𑁩. 𑀢𑀺𑀓𑀦𑀺𑀧𑀸𑀢𑁄
𑁧. 𑀧𑀞𑀫𑀯𑀕𑁆𑀕𑁄
𑁧. 𑀫𑀽𑀮𑀲𑀼𑀢𑁆𑀢𑀯𑀡𑁆𑀡𑀦𑀸
𑁫𑁦. 𑀢𑀺𑀓𑀦𑀺𑀧𑀸𑀢𑀲𑁆𑀲 𑀧𑀞𑀫𑁂 𑀢𑀻𑀡𑀻𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀇𑀫𑀸𑀦𑀻𑀢𑀺 𑀅𑀪𑀺𑀫𑀼𑀔𑀻𑀓𑀭𑀡𑀁. 𑀅𑀓𑀼𑀲𑀮𑀫𑀽𑀮𑀸𑀦𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀥𑀫𑁆𑀫𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀅𑀓𑀼𑀲𑀮𑀸𑀦𑀺 𑀘 𑀢𑀸𑀦𑀺 𑀫𑀽𑀮𑀸𑀦𑀺 𑀘𑀸𑀢𑀺 𑀅𑀓𑀼𑀲𑀮𑀫𑀽𑀮𑀸𑀦𑀺. 𑀅𑀣 𑀯𑀸 𑀅𑀓𑀼𑀲𑀮𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀧𑀪𑀯𑀚𑀦𑀓𑀲𑀫𑀼𑀝𑁆𑀞𑀸𑀧𑀓𑀦𑀺𑀩𑁆𑀩𑀢𑁆𑀢𑀓𑀝𑁆𑀞𑁂𑀦 𑀫𑀽𑀮𑀸𑀦𑀺 𑀘𑀸𑀢𑀺 𑀅𑀓𑀼𑀲𑀮𑀫𑀽𑀮𑀸𑀦𑀺, 𑀅𑀓𑀼𑀲𑀮𑀥𑀫𑁆𑀫𑀸𑀦𑀁 𑀓𑀸𑀭𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀓𑀸𑀭𑀡𑀜𑁆𑀳𑀺 𑀬𑀣𑀸 𑀳𑀺𑀦𑁄𑀢𑀺 𑀏𑀢𑀲𑁆𑀫𑀸 𑀨𑀮𑀁 𑀧𑀯𑀢𑁆𑀢𑀢𑀻𑀢𑀺 𑀳𑁂𑀢𑀼, 𑀧𑀝𑀺𑀘𑁆𑀘 𑀏𑀢𑀲𑁆𑀫𑀸 𑀏𑀢𑀻𑀢𑀺 𑀧𑀘𑁆𑀘𑀬𑁄, 𑀧𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀧𑀪𑀯𑁄, 𑀅𑀢𑁆𑀢𑀦𑁄 𑀨𑀮𑀁 𑀚𑀦𑁂𑀢𑀻𑀢𑀺 𑀚𑀦𑀓𑀁, 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀲𑀫𑀼𑀝𑁆𑀞𑀸𑀧𑀓𑀁, 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀓𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀏𑀯𑀁 𑀧𑀢𑀺𑀝𑁆𑀞𑀝𑁆𑀞𑁂𑀦 𑀫𑀽𑀮𑀦𑁆𑀢𑀺, 𑀢𑀲𑁆𑀫𑀸 𑀅𑀓𑀼𑀲𑀮𑀫𑀽𑀮𑀸𑀦𑀻𑀢𑀺 𑀅𑀓𑀼𑀲𑀮𑀸𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀸𑀦𑀺, 𑀓𑀸𑀭𑀡𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.
𑀓𑁂𑀘𑀺 𑀧𑀦 ‘‘𑀲𑀸𑀮𑀺𑀆𑀤𑀻𑀦𑀁 𑀲𑀸𑀮𑀺𑀩𑀻𑀚𑀸𑀤𑀻𑀦𑀺 𑀯𑀺𑀬 𑀫𑀡𑀺𑀧𑁆𑀧𑀪𑀸𑀤𑀻𑀦𑀁 𑀫𑀡𑀺𑀯𑀡𑁆𑀡𑀸𑀤𑀬𑁄 𑀯𑀺𑀬 𑀘 𑀅𑀓𑀼𑀲𑀮𑀸𑀦𑀁 𑀅𑀓𑀼𑀲𑀮𑀪𑀸𑀯𑀲𑀸𑀥𑀓𑁄 𑀮𑁄𑀪𑀸𑀤𑀻𑀦𑀁 𑀫𑀽𑀮𑀝𑁆𑀞𑁄’’𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀅𑀓𑀼𑀲𑀮𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑁂𑀲𑀼 𑀢𑁂𑀲𑀁 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁄 𑀦 𑀲𑀺𑀬𑀸. 𑀦 𑀳𑀺 𑀢𑀸𑀦𑀺 𑀢𑁂𑀲𑀁 𑀅𑀓𑀼𑀲𑀮𑀪𑀸𑀯𑀁 𑀲𑀸𑀥𑁂𑀦𑁆𑀢𑀺, 𑀦 𑀘 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋
‘‘𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑀧𑀘𑁆𑀘𑀬𑀦𑀺𑀤𑁆𑀤𑁂𑀲.𑁧).
𑀅𑀳𑁂𑀢𑀼𑀓𑀲𑁆𑀲 𑀘 𑀫𑁄𑀳𑀲𑁆𑀲 𑀅𑀓𑀼𑀲𑀮𑀪𑀸𑀯𑁄 𑀦 𑀲𑀺𑀬𑀸 𑀅𑀓𑀼𑀲𑀮𑀪𑀸𑀯𑀲𑀸𑀥𑀓𑀲𑁆𑀲 𑀫𑀽𑀮𑀦𑁆𑀢𑀭𑀲𑁆𑀲 𑀅𑀪𑀸𑀯𑀢𑁄. 𑀅𑀣𑀸𑀧𑀺 𑀲𑀺𑀬𑀸 𑀮𑁄𑀪𑀸𑀤𑀻𑀦𑀁 𑀲𑀪𑀸𑀯𑀲𑀺𑀤𑁆𑀥𑁄 𑀅𑀓𑀼𑀲𑀮𑀸𑀤𑀺𑀪𑀸𑀯𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀦 𑀮𑁄𑀪𑀸𑀤𑀺𑀧𑀝𑀺𑀩𑀤𑁆𑀥𑁄𑀢𑀺. 𑀏𑀯𑀫𑁆𑀧𑀺 𑀬𑀣𑀸 𑀮𑁄𑀪𑀸𑀤𑀻𑀦𑀁, 𑀏𑀯𑀁 𑀅𑀮𑁄𑀪𑀸𑀤𑀻𑀦𑀫𑁆𑀧𑀺 𑀲𑀪𑀸𑀯𑀲𑀺𑀤𑁆𑀥𑁄 𑀓𑀼𑀲𑀮𑀸𑀤𑀺𑀪𑀸𑀯𑁄𑀢𑀺 𑀅𑀮𑁄𑀪𑀸𑀤𑀬𑁄 𑀓𑀼𑀲𑀮𑀸 𑀏𑀯 𑀲𑀺𑀬𑀼𑀁, 𑀦 𑀅𑀩𑁆𑀬𑀸𑀓𑀢𑀸, 𑀦 𑀘 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀬𑀣𑀸 𑀲𑀫𑁆𑀧𑀬𑀼𑀢𑁆𑀢𑁂𑀲𑀼, 𑀏𑀯𑀁 𑀫𑀽𑀮𑁂𑀲𑀼𑀧𑀺 𑀓𑀼𑀲𑀮𑀸𑀤𑀺𑀪𑀸𑀯𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀓𑁄 𑀯𑀺𑀬 𑀳𑀺 𑀓𑀼𑀲𑀮𑀪𑀸𑀯𑀲𑁆𑀲, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀓𑁄 𑀅𑀓𑀼𑀲𑀮𑀪𑀸𑀯𑀲𑁆𑀲 𑀓𑀸𑀭𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀯𑀁 𑀅𑀓𑀼𑀲𑀮𑀪𑀸𑀯𑀲𑀸𑀥𑀦𑀯𑀲𑁂𑀦 𑀮𑁄𑀪𑀸𑀤𑀻𑀦𑀁 𑀫𑀽𑀮𑀝𑁆𑀞𑀁 𑀅𑀕𑁆𑀕𑀳𑁂𑀢𑁆𑀯𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀯𑀲𑁂𑀦 𑀕𑀬𑁆𑀳𑀫𑀸𑀦𑁂 𑀦 𑀓𑁄𑀘𑀺 𑀤𑁄𑀲𑁄. 𑀮𑀤𑁆𑀥𑀳𑁂𑀢𑀼𑀧𑀘𑁆𑀘𑀬𑀸 𑀳𑀺 𑀥𑀫𑁆𑀫𑀸 𑀯𑀺𑀭𑀽𑀴𑁆𑀳𑀫𑀽𑀮𑀸 𑀯𑀺𑀬 𑀧𑀸𑀤𑀧𑀸 𑀣𑀺𑀭𑀸 𑀳𑁄𑀦𑁆𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸, 𑀳𑁂𑀢𑀼𑀭𑀳𑀺𑀢𑀸 𑀧𑀦 𑀢𑀺𑀮𑀩𑀻𑀚𑀓𑀸𑀤𑀺𑀲𑁂𑀯𑀸𑀮𑀸 𑀯𑀺𑀬 𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸𑀢𑀺 𑀳𑁂𑀢𑀼𑀆𑀤𑀺𑀅𑀢𑁆𑀣𑁂𑀦 𑀅𑀓𑀼𑀲𑀮𑀸𑀦𑀁 𑀉𑀧𑀓𑀸𑀭𑀓𑀢𑁆𑀢𑀸 𑀫𑀽𑀮𑀸𑀦𑀻𑀢𑀺 𑀅𑀓𑀼𑀲𑀮𑀫𑀽𑀮𑀸𑀦𑀺. 𑀬𑀲𑁆𑀫𑀸 𑀧𑀦 𑀫𑀽𑀮𑁂𑀦 𑀫𑀼𑀢𑁆𑀢𑁄 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀻𑀳𑀺 𑀫𑀽𑀮𑁂𑀳𑀺 𑀲𑀩𑁆𑀩𑁄 𑀅𑀓𑀼𑀲𑀮𑀭𑀸𑀲𑀺 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.
𑀢𑀸𑀦𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀮𑁄𑀪𑁄 𑀅𑀓𑀼𑀲𑀮𑀫𑀽𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀮𑁄𑀪𑀸𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀢𑀢𑁆𑀣 𑀧𑀦 𑀢𑀢𑀺𑀬𑀫𑀕𑁆𑀕𑀯𑀚𑁆𑀛𑀸 𑀮𑁄𑀪𑀸𑀤𑀬𑁄 𑀆𑀕𑀢𑀸, 𑀇𑀥 𑀧𑀦 𑀅𑀦𑀯𑀲𑁂𑀲𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄.
𑀕𑀸𑀣𑀸𑀬𑀁 𑀧𑀸𑀧𑀘𑁂𑀢𑀲𑀦𑁆𑀢𑀺 𑀅𑀓𑀼𑀲𑀮𑀥𑀫𑁆𑀫𑀲𑀫𑀸𑀬𑁄𑀕𑀢𑁄 𑀮𑀸𑀫𑀓𑀘𑀺𑀢𑁆𑀢𑀁. 𑀳𑀺𑀁𑀲𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀓𑁆𑀔𑀡𑁂 𑀆𑀬𑀢𑀺𑀁 𑀯𑀺𑀧𑀸𑀓𑀓𑁆𑀔𑀡𑁂 𑀘 𑀯𑀺𑀩𑀸𑀥𑁂𑀦𑁆𑀢𑀺. 𑀅𑀢𑁆𑀢𑀲𑀫𑁆𑀪𑀽𑀢𑀸𑀢𑀺 𑀅𑀢𑁆𑀢𑀦𑀺 𑀚𑀸𑀢𑀸. 𑀢𑀘𑀲𑀸𑀭𑀦𑁆𑀢𑀺 𑀕𑀡𑁆𑀞𑀺𑀢𑀁, 𑀯𑁂𑀴𑀼𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀨𑀮𑀦𑁆𑀢𑀺 𑀅𑀢𑁆𑀢𑀦𑁄 𑀨𑀮𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀔𑀤𑀺𑀭𑀲𑀻𑀲𑀧𑀸𑀤𑀬𑁄 𑀯𑀺𑀬 𑀅𑀦𑁆𑀢𑁄𑀲𑀸𑀭𑁄 𑀅𑀳𑀼𑀢𑁆𑀯𑀸 𑀩𑀳𑀺𑀲𑀸𑀭𑀢𑀸𑀬 𑀢𑀘𑀲𑀸𑀭𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀯𑁂𑀴𑀼𑀆𑀤𑀺𑀁 𑀬𑀣𑀸 𑀅𑀢𑁆𑀢𑀲𑀫𑁆𑀪𑀽𑀢𑀫𑁂𑀯 𑀨𑀮𑀁 𑀳𑀺𑀁𑀲𑀢𑀺 𑀯𑀺𑀦𑀸𑀲𑁂𑀢𑀺, 𑀏𑀯𑀫𑁂𑀯 𑀅𑀦𑁆𑀢𑁄 𑀲𑀻𑀮𑀸𑀤𑀺𑀲𑀸𑀭𑀭𑀳𑀺𑀢𑀁 𑀮𑀸𑀫𑀓𑀘𑀺𑀢𑁆𑀢𑀁 𑀧𑀼𑀕𑁆𑀕𑀮𑀁 𑀅𑀢𑁆𑀢𑀲𑀫𑁆𑀪𑀽𑀢𑀸𑀬𑁂𑀯 𑀮𑁄𑀪𑀸𑀤𑀬𑁄 𑀯𑀺𑀦𑀸𑀲𑁂𑀦𑁆𑀢𑀻𑀢𑀺.
𑀧𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁨. 𑀥𑀸𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸
𑁫𑁧. 𑀤𑀼𑀢𑀺𑀬𑁂 𑀥𑀸𑀢𑀼𑀬𑁄𑀢𑀺 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀲𑀪𑀸𑀯𑀲𑁆𑀲 𑀘 𑀥𑀸𑀭𑀡𑀝𑁆𑀞𑁂𑀦 𑀥𑀸𑀢𑀼𑀬𑁄. 𑀬𑀜𑁆𑀘𑁂𑀢𑁆𑀣 𑀨𑀮𑀦𑀺𑀩𑁆𑀩𑀢𑁆𑀢𑀓𑀁, 𑀢𑀁 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀲𑀪𑀸𑀯𑀲𑁆𑀲 𑀘, 𑀇𑀢𑀭𑀁 𑀲𑀪𑀸𑀯𑀲𑁆𑀲𑁂𑀯 𑀥𑀸𑀭𑀡𑀝𑁆𑀞𑁂𑀦 𑀥𑀸𑀢𑀼. 𑀭𑀽𑀧𑀥𑀸𑀢𑀽𑀢𑀺 𑀭𑀽𑀧𑀪𑀯𑁄. 𑀥𑀸𑀢𑀼𑀬𑀸 𑀆𑀕𑀢𑀝𑁆𑀞𑀸𑀦𑁂 𑀪𑀯𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁, 𑀪𑀯𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀥𑀸𑀢𑀼𑀬𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀦𑁆𑀢𑀺 𑀇𑀥 𑀪𑀯𑁂𑀦 𑀧𑀭𑀺𑀘𑁆𑀙𑁂𑀤𑁄 𑀓𑀣𑀺𑀢𑁄. 𑀢𑀲𑁆𑀫𑀸 𑁋
‘‘𑀓𑀢𑀫𑁂 𑀥𑀫𑁆𑀫𑀸 𑀭𑀽𑀧𑀸𑀯𑀘𑀭𑀸? 𑀳𑁂𑀝𑁆𑀞𑀢𑁄 𑀩𑁆𑀭𑀳𑁆𑀫𑀮𑁄𑀓𑀁 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸 𑀉𑀧𑀭𑀺𑀢𑁄 𑀅𑀓𑀦𑀺𑀝𑁆𑀞𑁂 𑀤𑁂𑀯𑁂 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸, 𑀇𑀫𑁂 𑀥𑀫𑁆𑀫𑀸 𑀭𑀽𑀧𑀸𑀯𑀘𑀭𑀸’’𑀢𑀺 (𑀥. 𑀲. 𑁧𑁨𑁮𑁯) 𑁋
𑀏𑀯𑀁 𑀯𑀼𑀢𑁆𑀢𑀸 𑀭𑀽𑀧𑀸𑀯𑀘𑀭𑀥𑀫𑁆𑀫𑀸 𑀭𑀽𑀧𑀥𑀸𑀢𑀼. 𑀅𑀭𑀽𑀧𑀥𑀸𑀢𑀽𑀢𑀺 𑀅𑀭𑀽𑀧𑀪𑀯𑁄. 𑀇𑀥𑀸𑀧𑀺 𑀪𑀯𑁂𑀦 𑀧𑀭𑀺𑀘𑁆𑀙𑁂𑀤𑁄 𑀓𑀣𑀺𑀢𑁄𑀢𑀺 𑁋
‘‘𑀓𑀢𑀫𑁂 𑀥𑀫𑁆𑀫𑀸 𑀅𑀭𑀽𑀧𑀸𑀯𑀘𑀭𑀸? 𑀳𑁂𑀝𑁆𑀞𑀢𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑁂 𑀤𑁂𑀯𑁂 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸, 𑀉𑀧𑀭𑀺𑀢𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀽𑀧𑀕𑁂 𑀤𑁂𑀯𑁂 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸, 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸, 𑀇𑀫𑁂 𑀥𑀫𑁆𑀫𑀸 𑀅𑀭𑀽𑀧𑀸𑀯𑀘𑀭𑀸’’𑀢𑀺 (𑀥. 𑀲. 𑁧𑁨𑁯𑁧) 𑁋
𑀏𑀯𑀁 𑀯𑀼𑀢𑁆𑀢𑀸 𑀅𑀭𑀽𑀧𑀸𑀯𑀘𑀭𑀥𑀫𑁆𑀫𑀸 𑀅𑀭𑀽𑀧𑀥𑀸𑀢𑀼. 𑀦𑀺𑀭𑁄𑀥𑀥𑀸𑀢𑀽𑀢𑀺 𑀦𑀺𑀩𑁆𑀩𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.
𑀅𑀧𑀭𑁄 𑀦𑀬𑁄 𑁋 𑀭𑀽𑀧𑀲𑀳𑀺𑀢𑀸, 𑀭𑀽𑀧𑀧𑀝𑀺𑀩𑀤𑁆𑀥𑀸, 𑀥𑀫𑁆𑀫𑀧𑁆𑀧𑀯𑀢𑁆𑀢𑀺 𑀭𑀽𑀧𑀥𑀸𑀢𑀼, 𑀧𑀜𑁆𑀘𑀯𑁄𑀓𑀸𑀭𑀪𑀯𑁄, 𑀏𑀓𑀯𑁄𑀓𑀸𑀭𑀪𑀯𑁄 𑀘, 𑀢𑁂𑀦 𑀲𑀓𑀮𑁄 𑀓𑀸𑀫𑀪𑀯𑁄 𑀭𑀽𑀧𑀪𑀯𑁄 𑀘 𑀲𑀗𑁆𑀕𑀳𑀺𑀢𑁄. 𑀭𑀽𑀧𑀭𑀳𑀺𑀢𑀸 𑀥𑀫𑁆𑀫𑀧𑁆𑀧𑀯𑀢𑁆𑀢𑀺 𑀅𑀭𑀽𑀧𑀥𑀸𑀢𑀼, 𑀘𑀢𑀼𑀯𑁄𑀓𑀸𑀭𑀪𑀯𑁄, 𑀢𑁂𑀦 𑀅𑀭𑀽𑀧𑀪𑀯𑁄 𑀲𑀗𑁆𑀕𑀳𑀺𑀢𑁄. 𑀇𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀢𑀬𑁄 𑀪𑀯𑀸 𑀲𑀩𑁆𑀩𑀸 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸. 𑀢𑀢𑀺𑀬𑀧𑀤𑁂𑀦 𑀧𑀦 𑀅𑀲𑀗𑁆𑀔𑀢𑀥𑀸𑀢𑀼𑀬𑁂𑀯 𑀲𑀗𑁆𑀕𑀳𑀺𑀢𑀸𑀢𑀺 𑀫𑀕𑁆𑀕𑀨𑀮𑀸𑀦𑀺 𑀇𑀥 𑀢𑀺𑀓𑀯𑀺𑀦𑀺𑀫𑀼𑀢𑁆𑀢𑀥𑀫𑁆𑀫𑀸 𑀦𑀸𑀫 𑀚𑀸𑀢𑀸. 𑀓𑁂𑀘𑀺 𑀧𑀦 ‘‘𑀭𑀽𑀧𑀥𑀸𑀢𑀽𑀢𑀺 𑀭𑀽𑀧𑀲𑀪𑀸𑀯𑀸 𑀥𑀫𑁆𑀫𑀸, 𑀅𑀭𑀽𑀧𑀥𑀸𑀢𑀽𑀢𑀺 𑀅𑀭𑀽𑀧𑀲𑀪𑀸𑀯𑀸 𑀥𑀫𑁆𑀫𑀸𑀢𑀺 𑀧𑀤𑀤𑁆𑀯𑀬𑁂𑀦 𑀅𑀦𑀯𑀲𑁂𑀲𑀢𑁄 𑀧𑀜𑁆𑀘𑀓𑁆𑀔𑀦𑁆𑀥𑀸 𑀕𑀳𑀺𑀢𑀸’’𑀢𑀺. ‘‘𑀭𑀽𑀧𑀢𑀡𑁆𑀳𑀸𑀬 𑀯𑀺𑀲𑀬𑀪𑀽𑀢𑀸 𑀥𑀫𑁆𑀫𑀸 𑀭𑀽𑀧𑀥𑀸𑀢𑀼, 𑀅𑀭𑀽𑀧𑀢𑀡𑁆𑀳𑀸𑀬 𑀯𑀺𑀲𑀬𑀪𑀽𑀢𑀸 𑀅𑀭𑀽𑀧𑀥𑀸𑀢𑀽’’𑀢𑀺 𑀘 𑀯𑀤𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀇𑀥 𑀦𑀸𑀥𑀺𑀧𑁆𑀧𑁂𑀢𑀁. 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.
𑀕𑀸𑀣𑀸𑀲𑀼 𑀭𑀽𑀧𑀥𑀸𑀢𑀼𑀁 𑀧𑀭𑀺𑀜𑁆𑀜𑀸𑀬𑀸𑀢𑀺 𑀭𑀽𑀧𑀧𑀝𑀺𑀩𑀤𑁆𑀥𑀥𑀫𑁆𑀫𑀧𑀯𑀢𑁆𑀢𑀺𑀁 𑀜𑀸𑀢𑀧𑀭𑀺𑀜𑁆𑀜𑀸𑀤𑀻𑀳𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀆𑀭𑀼𑀧𑁆𑀧𑁂𑀲𑀼 𑀅𑀲𑀡𑁆𑀞𑀺𑀢𑀸𑀢𑀺 𑀅𑀭𑀽𑀧𑀸𑀯𑀘𑀭𑀥𑀫𑁆𑀫𑁂𑀲𑀼 𑀪𑀯𑀭𑀸𑀕𑀯𑀲𑁂𑀦 𑀪𑀯𑀤𑀺𑀝𑁆𑀞𑀺𑀯𑀲𑁂𑀦 𑀘 𑀦 𑀧𑀢𑀺𑀝𑁆𑀞𑀺𑀢𑀸 𑀅𑀦𑀮𑁆𑀮𑀻𑀦𑀸. ‘‘𑀅𑀭𑀽𑀧𑁂𑀲𑀼 𑀅𑀲𑀡𑁆𑀞𑀺𑀢𑀸’’𑀢𑀺 𑀘 𑀧𑀞𑀦𑁆𑀢𑀺, 𑀲𑁄 𑀏𑀯 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀧𑀭𑀺𑀜𑁆𑀜𑀸 𑀯𑀼𑀢𑁆𑀢𑀸. 𑀦𑀺𑀭𑁄𑀥𑁂 𑀬𑁂 𑀯𑀺𑀫𑀼𑀘𑁆𑀘𑀦𑁆𑀢𑀻𑀢𑀺 𑀬𑁂 𑀦𑀺𑀩𑁆𑀩𑀸𑀦𑁂 𑀆𑀭𑀫𑁆𑀫𑀡𑀪𑀽𑀢𑁂 𑀅𑀕𑁆𑀕𑀫𑀕𑁆𑀕𑀨𑀮𑀯𑀲𑁂𑀦 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻𑀳𑀺 𑀅𑀦𑀯𑀲𑁂𑀲𑀓𑀺𑀮𑁂𑀲𑀢𑁄 𑀯𑀺𑀫𑀼𑀘𑁆𑀘𑀦𑁆𑀢𑀺. 𑀢𑁂 𑀚𑀦𑀸 𑀫𑀘𑁆𑀘𑀼𑀳𑀸𑀬𑀺𑀦𑁄𑀢𑀺 𑀢𑁂 𑀔𑀻𑀡𑀸𑀲𑀯𑀚𑀦𑀸 𑀫𑀭𑀡𑀁 𑀲𑀫𑀢𑀻𑀢𑀸.
𑀏𑀯𑀁 𑀥𑀸𑀢𑀼𑀢𑁆𑀢𑀬𑀲𑀫𑀢𑀺𑀓𑁆𑀓𑀫𑁂𑀦 𑀅𑀫𑀢𑀸𑀥𑀺𑀕𑀫𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀅𑀬𑀜𑁆𑀘 𑀧𑀝𑀺𑀧𑀤𑀸 𑀫𑀬𑀸 𑀕𑀢𑀫𑀕𑁆𑀕𑁄 𑀘 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀺𑀢𑁄’’𑀢𑀺 𑀢𑀢𑁆𑀣 𑀦𑁂𑀲𑀁 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀸𑀬𑁂𑀦𑀸𑀢𑀺 𑀦𑀸𑀫𑀓𑀸𑀬𑁂𑀦 𑀫𑀕𑁆𑀕𑀨𑀮𑁂𑀳𑀺. 𑀨𑀼𑀲𑀬𑀺𑀢𑁆𑀯𑀸𑀢𑀺 𑀧𑀢𑁆𑀯𑀸. 𑀦𑀺𑀭𑀽𑀧𑀥𑀺𑀦𑁆𑀢𑀺 𑀔𑀦𑁆𑀥𑀸𑀤𑀺𑀲𑀩𑁆𑀩𑀽𑀧𑀥𑀺𑀭𑀳𑀺𑀢𑀁. 𑀉𑀧𑀥𑀺𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀦𑁆𑀢𑀺 𑀢𑁂𑀲𑀁𑀬𑁂𑀯 𑀘 𑀉𑀧𑀥𑀻𑀦𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀓𑀸𑀭𑀡𑀁. 𑀦𑀺𑀩𑁆𑀩𑀸𑀦𑀲𑁆𑀲 𑀳𑀺 𑀫𑀕𑁆𑀕𑀜𑀸𑀡𑁂𑀦 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀩𑁆𑀩𑁂 𑀉𑀧𑀥𑀬𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀸 𑀳𑁄𑀦𑁆𑀢𑀻𑀢𑀺 𑀢𑀁 𑀢𑁂𑀲𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀓𑀸𑀭𑀡𑀁. 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑁂𑀦 𑀅𑀢𑁆𑀢𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀅𑀦𑀸𑀲𑀯𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑀫𑁂𑀯 𑀅𑀲𑁄𑀓𑀁 𑀯𑀺𑀭𑀚𑀁 𑀦𑀺𑀩𑁆𑀩𑀸𑀦𑀧𑀤𑀁 𑀤𑁂𑀲𑁂𑀢𑀺. 𑀢𑀲𑁆𑀫𑀸 𑀢𑀤𑀥𑀺𑀕𑀫𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀦𑁆𑀢𑀺.
𑀤𑀼𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁩. 𑀧𑀞𑀫𑀯𑁂𑀤𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸
𑁫𑁨. 𑀢𑀢𑀺𑀬𑁂 𑀯𑁂𑀤𑀦𑀸𑀢𑀺 𑀆𑀭𑀫𑁆𑀫𑀡𑀭𑀲𑀁 𑀯𑁂𑀤𑀺𑀬𑀦𑁆𑀢𑀺 𑀅𑀦𑀼𑀪𑀯𑀦𑁆𑀢𑀻𑀢𑀺 𑀯𑁂𑀤𑀦𑀸. 𑀢𑀸 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀔𑀸 𑀯𑁂𑀤𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀼𑀔-𑀲𑀤𑁆𑀤𑁄 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀤𑀼𑀓𑁆𑀔-𑀲𑀤𑁆𑀤𑁄 𑀧𑀦 ‘‘𑀚𑀸𑀢𑀺𑀧𑀺 𑀤𑀼𑀓𑁆𑀔𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁮𑁭; 𑀯𑀺𑀪. 𑁧𑁯𑁦) 𑀤𑀼𑀓𑁆𑀔𑀯𑀢𑁆𑀣𑀼𑀲𑁆𑀫𑀺𑀁 𑀆𑀕𑀢𑁄. ‘‘𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀮𑀺, 𑀭𑀽𑀧𑀁 𑀤𑀼𑀓𑁆𑀔𑀁 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑀁 𑀤𑀼𑀓𑁆𑀔𑀸𑀯𑀓𑁆𑀓𑀦𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁬𑁦) 𑀤𑀼𑀓𑁆𑀔𑀸𑀭𑀫𑁆𑀫𑀡𑁂. ‘‘𑀤𑀼𑀓𑁆𑀔𑁄 𑀧𑀸𑀧𑀲𑁆𑀲 𑀉𑀘𑁆𑀘𑀬𑁄’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁧𑁭) 𑀤𑀼𑀓𑁆𑀔𑀧𑀘𑁆𑀘𑀬𑁂. ‘‘𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀦 𑀲𑀼𑀓𑀭𑀸 𑀅𑀓𑁆𑀔𑀸𑀦𑁂𑀦 𑀧𑀸𑀧𑀼𑀡𑀺𑀢𑀼𑀁, 𑀬𑀸𑀯 𑀤𑀼𑀓𑁆𑀔𑀸 𑀦𑀺𑀭𑀬𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁫𑁦) 𑀤𑀼𑀓𑁆𑀔𑀧𑀘𑁆𑀘𑀬𑀝𑁆𑀞𑀸𑀦𑁂. ‘‘𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁩𑁨; 𑀥. 𑀲. 𑁧𑁬𑁫) 𑀤𑀼𑀓𑁆𑀔𑀯𑁂𑀤𑀦𑀸𑀬𑀁. 𑀇𑀥𑀸𑀧𑀺 𑀤𑀼𑀓𑁆𑀔𑀯𑁂𑀤𑀦𑀸𑀬𑀫𑁂𑀯.
𑀯𑀘𑀦𑀢𑁆𑀣𑀢𑁄 𑀧𑀦 𑀲𑀼𑀔𑀬𑀢𑀻𑀢𑀺 𑀲𑀼𑀔𑀸. 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔𑀸. 𑀦 𑀤𑀼𑀓𑁆𑀔𑀸 𑀦 𑀲𑀼𑀔𑀸𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀸, 𑀫𑀓𑀸𑀭𑁄 𑀧𑀤𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑁄. 𑀢𑀸𑀲𑀼 𑀇𑀝𑁆𑀞𑀸𑀦𑀼𑀪𑀯𑀦𑀮𑀓𑁆𑀔𑀡𑀸 𑀲𑀼𑀔𑀸, 𑀅𑀦𑀺𑀝𑁆𑀞𑀸𑀦𑀼𑀪𑀯𑀦𑀮𑀓𑁆𑀔𑀡𑀸 𑀤𑀼𑀓𑁆𑀔𑀸, 𑀉𑀪𑀬𑀯𑀺𑀧𑀭𑀻𑀢𑀸𑀦𑀼𑀪𑀯𑀦𑀮𑀓𑁆𑀔𑀡𑀸 𑀅𑀤𑀼𑀓𑁆𑀔𑀫𑀲𑀼𑀔𑀸. 𑀢𑀲𑁆𑀫𑀸 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀦𑀁 𑀉𑀧𑁆𑀧𑀢𑁆𑀢𑀺 𑀧𑀸𑀓𑀝𑀸, 𑀦 𑀅𑀤𑀼𑀓𑁆𑀔𑀫𑀲𑀼𑀔𑀸𑀬. 𑀬𑀤𑀸 𑀳𑀺 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀲𑀓𑀮𑀲𑀭𑀻𑀭𑀁 𑀪𑁂𑀦𑁆𑀢𑀁 𑀫𑀤𑁆𑀤𑀦𑁆𑀢𑀁 𑀨𑀭𑀫𑀸𑀦𑀁 𑀲𑀢𑀥𑁄𑀢𑀲𑀧𑁆𑀧𑀺𑀁 𑀔𑀸𑀤𑀸𑀧𑁂𑀦𑁆𑀢𑀁 𑀯𑀺𑀬, 𑀲𑀢𑀧𑀸𑀓𑀢𑁂𑀮𑀁 𑀫𑀓𑁆𑀔𑁂𑀦𑁆𑀢𑀁 𑀯𑀺𑀬, 𑀖𑀝𑀲𑀳𑀲𑁆𑀲𑁂𑀦 𑀧𑀭𑀺𑀴𑀸𑀳𑀁 𑀦𑀺𑀩𑁆𑀩𑀸𑀧𑀬𑀫𑀸𑀦𑀁 𑀯𑀺𑀬 𑀘 ‘‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’𑀦𑁆𑀢𑀺 𑀯𑀸𑀘𑀁 𑀦𑀺𑀘𑁆𑀙𑀸𑀭𑀬𑀫𑀸𑀦𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀲𑀓𑀮𑀲𑀭𑀻𑀭𑀁 𑀔𑁄𑀪𑁂𑀦𑁆𑀢𑀁 𑀫𑀤𑁆𑀤𑀦𑁆𑀢𑀁 𑀨𑀭𑀫𑀸𑀦𑀁 𑀢𑀢𑁆𑀢𑀨𑀸𑀮𑀁 𑀧𑀯𑁂𑀲𑁂𑀦𑁆𑀢𑀁 𑀯𑀺𑀬 𑀯𑀺𑀮𑀻𑀦𑀢𑀫𑁆𑀩𑀮𑁄𑀳𑀁 𑀆𑀲𑀺𑀜𑁆𑀘𑀦𑁆𑀢𑀁 𑀯𑀺𑀬 𑀘 ‘‘𑀅𑀳𑁄 𑀤𑀼𑀓𑁆𑀔𑀁, 𑀅𑀳𑁄 𑀤𑀼𑀓𑁆𑀔’’𑀦𑁆𑀢𑀺 𑀯𑀺𑀧𑁆𑀧𑀮𑀸𑀧𑁂𑀦𑁆𑀢𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀦𑀁 𑀉𑀧𑁆𑀧𑀢𑁆𑀢𑀺 𑀧𑀸𑀓𑀝𑀸.
𑀅𑀤𑀼𑀓𑁆𑀔𑀫𑀲𑀼𑀔𑀸 𑀧𑀦 𑀤𑀼𑀩𑁆𑀩𑀺𑀚𑀸𑀦𑀸 𑀤𑀼𑀤𑁆𑀤𑀻𑀧𑀦𑀸 𑀅𑀦𑁆𑀥𑀓𑀸𑀭𑀸 𑀅𑀯𑀺𑀪𑀽𑀢𑀸. 𑀲𑀸 𑀲𑀼𑀔𑀤𑀼𑀓𑁆𑀔𑀸𑀦𑀁 𑀅𑀧𑀕𑀫𑁂 𑀲𑀸𑀢𑀸𑀲𑀸𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀫𑀚𑁆𑀛𑀢𑁆𑀢𑀸𑀓𑀸𑀭𑀪𑀽𑀢𑀸 𑀦𑀬𑀢𑁄 𑀕𑀡𑁆𑀳𑀦𑁆𑀢𑀲𑁆𑀲𑁂𑀯 𑀧𑀸𑀓𑀝𑀸 𑀳𑁄𑀢𑀺. 𑀬𑀣𑀸 𑀓𑀺𑀁? 𑀬𑀣𑀸 𑀧𑀼𑀩𑁆𑀩𑀸𑀧𑀭𑀁 𑀲𑀧𑀁𑀲𑀼𑀓𑁂 𑀧𑀤𑁂𑀲𑁂 𑀉𑀧𑀘𑀭𑀺𑀢𑀫𑀕𑁆𑀕𑀯𑀲𑁂𑀦 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀫𑀺𑀕𑁂𑀦 𑀕𑀢𑀫𑀕𑁆𑀕𑁄, 𑀏𑀯𑀁 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑁂𑀲𑀼 𑀲𑀼𑀔𑀤𑀼𑀓𑁆𑀔𑀸𑀦𑀼𑀪𑀯𑀦𑁂𑀦𑀧𑀺 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀪𑀸𑀯𑁂𑀦 𑀯𑀺𑀜𑁆𑀜𑀸𑀬𑀢𑀺. 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀕𑁆𑀕𑀳𑀡𑀁 𑀧𑀺𑀝𑁆𑀞𑀺𑀧𑀸𑀲𑀸𑀡𑀕𑀫𑀦𑀁 𑀯𑀺𑀬 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀕𑁆𑀕𑀳𑀡𑀸𑀪𑀸𑀯𑀢𑁄. 𑀬𑀜𑁆𑀘 𑀢𑀢𑁆𑀭𑀸𑀦𑀼𑀪𑀯𑀦𑀁, 𑀲𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀢𑀺.
𑀏𑀯𑀫𑁂𑀢𑁆𑀣 𑀲𑀼𑀔𑀤𑀼𑀓𑁆𑀔𑀅𑀤𑀼𑀓𑁆𑀔𑀫𑀲𑀼𑀔𑀪𑀸𑀯𑁂𑀦 𑀢𑀺𑀥𑀸 𑀯𑀼𑀢𑁆𑀢𑀸𑀧𑀺 𑀓𑀢𑁆𑀣𑀘𑀺 𑀲𑀼𑀔𑀤𑀼𑀓𑁆𑀔𑀪𑀸𑀯𑁂𑀦 𑀤𑁆𑀯𑀺𑀥𑀸 𑀯𑀼𑀢𑁆𑀢𑀸. 𑀬𑀣𑀸𑀳 𑁋 ‘‘𑀤𑁆𑀯𑁂𑀧𑀺 𑀫𑀬𑀸, 𑀆𑀦𑀦𑁆𑀤, 𑀯𑁂𑀤𑀦𑀸 𑀯𑀼𑀢𑁆𑀢𑀸, 𑀧𑀭𑀺𑀬𑀸𑀬𑁂𑀦 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸’’𑀢𑀺 (𑀫. 𑀦𑀺. 𑁨.𑁮𑁯). 𑀓𑀢𑁆𑀣𑀘𑀺 𑀢𑀺𑀲𑁆𑀲𑁄𑀧𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀼𑀔𑀤𑀼𑀓𑁆𑀔𑀅𑀤𑀼𑀓𑁆𑀔𑀫𑀲𑀼𑀔𑀪𑀸𑀯𑁂𑀦 ‘‘𑀲𑀼𑀔𑀸 𑀯𑁂𑀤𑀦𑀸 𑀞𑀺𑀢𑀺𑀲𑀼𑀔𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀞𑀺𑀢𑀺𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀲𑀼𑀔𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀜𑀸𑀡𑀲𑀼𑀔𑀸 𑀅𑀜𑁆𑀜𑀸𑀡𑀤𑀼𑀓𑁆𑀔𑀸’’𑀢𑀺 (𑀫. 𑀦𑀺. 𑁧.𑁪𑁬𑁫). 𑀓𑀢𑁆𑀣𑀘𑀺 𑀲𑀩𑁆𑀩𑀸𑀧𑀺 𑀤𑀼𑀓𑁆𑀔𑀪𑀸𑀯𑁂𑀦. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔𑀲𑁆𑀫𑀺𑀦𑁆𑀢𑀺 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁪.𑁨𑁫𑁯).
𑀢𑀢𑁆𑀣 𑀲𑀺𑀬𑀸 𑁋 𑀬𑀤𑀺 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀬𑀣𑀸 𑀇𑀥 𑀯𑀼𑀢𑁆𑀢𑀸, 𑀅𑀜𑁆𑀜𑁂𑀲𑀼 𑀘 𑀏𑀤𑀺𑀲𑁂𑀲𑀼 𑀲𑀼𑀢𑁆𑀢𑁂𑀲𑀼 𑀅𑀪𑀺𑀥𑀫𑁆𑀫𑁂 𑀘 𑀏𑀯𑀁 𑀅𑀯𑀢𑁆𑀯𑀸 𑀓𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁 ‘‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔𑀲𑁆𑀫𑀺𑀦𑁆𑀢𑀺 𑀯𑀤𑀸𑀫𑀻’’𑀢𑀺, ‘‘𑀤𑁆𑀯𑁂𑀧𑀺 𑀫𑀬𑀸, 𑀆𑀦𑀦𑁆𑀤, 𑀯𑁂𑀤𑀦𑀸 𑀯𑀼𑀢𑁆𑀢𑀸’’𑀢𑀺 𑀘? 𑀲𑀦𑁆𑀥𑀸𑀬𑀪𑀸𑀲𑀺𑀢𑀫𑁂𑀢𑀁, 𑀢𑀲𑁆𑀫𑀸 𑀲𑀸 𑀧𑀭𑀺𑀬𑀸𑀬𑀤𑁂𑀲𑀦𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋
‘‘𑀲𑀗𑁆𑀔𑀸𑀭𑀸𑀦𑀺𑀘𑁆𑀘𑀢𑀁, 𑀆𑀦𑀦𑁆𑀤, 𑀫𑀬𑀸 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 𑀲𑀗𑁆𑀔𑀸𑀭𑀯𑀺𑀧𑀭𑀺𑀡𑀸𑀫𑀢𑀁, ‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔𑀲𑁆𑀫𑀺’’’𑀦𑁆𑀢𑀺 (𑀲𑀁. 𑀦𑀺. 𑁪.𑁨𑁫𑁯).
‘‘𑀤𑁆𑀯𑁂𑀧𑀺 𑀫𑀬𑀸, 𑀆𑀦𑀦𑁆𑀤, 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑁂𑀦𑀸’’𑀢𑀺 𑀘 (𑀲𑀁. 𑀦𑀺. 𑁪.𑁨𑁫𑁯).
𑀏𑀢𑁆𑀣 𑀳𑀺 𑀲𑀼𑀔𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀢𑀺 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀁 𑀯𑁂𑀤𑀦𑀸𑀦𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀤𑀼𑀓𑁆𑀔𑀪𑀸𑀯𑁄 𑀦𑀢𑁆𑀣𑀺, 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑁂𑀦 𑀧𑀦 𑀢𑀢𑁆𑀣 𑀦𑀺𑀘𑁆𑀙𑀦𑁆𑀤𑀤𑀲𑁆𑀲𑀦𑀢𑁆𑀣𑀁 𑀧𑀭𑀺𑀬𑀸𑀬𑁂𑀦 𑀤𑀼𑀓𑁆𑀔𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀲𑀸 𑀢𑀸𑀤𑀺𑀲𑀻 𑀧𑀭𑀺𑀬𑀸𑀬𑀤𑁂𑀲𑀦𑀸. 𑀅𑀬𑀁 𑀧𑀦 𑀯𑁂𑀤𑀦𑀢𑁆𑀢𑀬𑀤𑁂𑀲𑀦𑀸 𑀲𑀪𑀸𑀯𑀓𑀣𑀸𑀢𑀺 𑀓𑀢𑁆𑀯𑀸 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀸𑀢𑀺 𑀅𑀬𑀫𑁂𑀢𑁆𑀣 𑀆𑀘𑀭𑀺𑀬𑀸𑀦𑀁 𑀲𑀫𑀸𑀦𑀓𑀣𑀸.
𑀯𑀺𑀢𑀡𑁆𑀟𑀯𑀸𑀤𑀻 𑀧𑀦𑀸𑀳 ‘‘𑀤𑀼𑀓𑁆𑀔𑀢𑀸𑀤𑁆𑀯𑀬𑀯𑀘𑀦𑀢𑁄 𑀧𑀭𑀺𑀬𑀸𑀬𑀤𑁂𑀲𑀦𑀸𑀯 𑀯𑁂𑀤𑀦𑀢𑁆𑀢𑀬𑀤𑁂𑀲𑀦𑀸’’𑀢𑀺. 𑀲𑁄 ‘‘𑀫𑀸 𑀳𑁂𑀯’’𑀦𑁆𑀢𑀺𑀲𑁆𑀲 𑀯𑀘𑀦𑀻𑀬𑁄, 𑀬𑀲𑁆𑀫𑀸 𑀪𑀕𑀯𑀢𑀸 𑀲𑀩𑁆𑀩𑀸𑀲𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀪𑀸𑀯𑁄 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀯𑀼𑀢𑁆𑀢𑁄 ‘‘𑀲𑀗𑁆𑀔𑀸𑀭𑀸𑀦𑀺𑀘𑁆𑀘𑀢𑀁, 𑀆𑀦𑀦𑁆𑀤, 𑀫𑀬𑀸 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 𑀲𑀗𑁆𑀔𑀸𑀭𑀯𑀺𑀧𑀭𑀺𑀡𑀸𑀫𑀢𑀁 ‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔𑀲𑁆𑀫𑀺’’’𑀦𑁆𑀢𑀺. 𑀬𑀤𑀺 𑀧𑀦𑁂𑀢𑁆𑀣 𑀯𑁂𑀤𑀦𑀢𑁆𑀢𑀬𑀤𑁂𑀲𑀦𑀸 𑀧𑀭𑀺𑀬𑀸𑀬𑀤𑁂𑀲𑀦𑀸 𑀲𑀺𑀬𑀸, ‘‘𑀇𑀤𑀁 𑀫𑀬𑀸 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁 𑀢𑀺𑀲𑁆𑀲𑁄 𑀯𑁂𑀤𑀦𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀧𑀦𑁂𑀢𑀁 𑀯𑀼𑀢𑁆𑀢𑀁.
𑀅𑀧𑀺𑀘𑀸𑀬𑀫𑁂𑀯 𑀯𑀢𑁆𑀢𑀩𑁆𑀩𑁄 ‘‘𑀓𑁄, 𑀧𑀦𑀸𑀯𑀼𑀲𑁄, 𑀯𑁂𑀤𑀦𑀢𑁆𑀢𑀬𑀤𑁂𑀲𑀦𑀸𑀬 𑀅𑀥𑀺𑀧𑁆𑀧𑀸𑀬𑁄’’𑀢𑀺? 𑀲𑀘𑁂 𑀯𑀤𑁂𑀬𑁆𑀬 ‘‘𑀫𑀼𑀤𑀼𑀓𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀲𑀼𑀔𑀸, 𑀅𑀥𑀺𑀫𑀢𑁆𑀢𑀸 𑀤𑀼𑀓𑁆𑀔𑀸, 𑀫𑀚𑁆𑀛𑀺𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀢𑀺 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀸. 𑀢𑀸𑀲𑀼 𑀳𑀺 𑀦 𑀲𑀢𑁆𑀢𑀸𑀦𑀁 𑀲𑀼𑀔𑀸𑀤𑀺𑀯𑀟𑁆𑀠𑀻’’𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 𑁋 𑀓𑁄 𑀧𑀦𑀸𑀯𑀼𑀲𑁄 𑀤𑀼𑀓𑁆𑀔𑀯𑁂𑀤𑀦𑀸𑀬 𑀲𑀪𑀸𑀯𑁄, 𑀬𑁂𑀦 ‘‘𑀲𑀩𑁆𑀩𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸’’𑀢𑀺 𑀯𑀼𑀘𑁆𑀘𑁂𑀬𑁆𑀬𑀼𑀁? 𑀬𑀤𑀺 𑀬𑀸𑀬 𑀉𑀧𑁆𑀧𑀦𑁆𑀦𑀸𑀬 𑀲𑀢𑁆𑀢𑀸 𑀯𑀺𑀬𑁄𑀕𑀫𑁂𑀯 𑀇𑀘𑁆𑀙𑀦𑁆𑀢𑀺, 𑀲𑁄 𑀤𑀼𑀓𑁆𑀔𑀯𑁂𑀤𑀦𑀸𑀬 𑀲𑀪𑀸𑀯𑁄. 𑀬𑀸𑀬 𑀘 𑀧𑀦 𑀉𑀧𑁆𑀧𑀦𑁆𑀦𑀸𑀬 𑀲𑀢𑁆𑀢𑀸 𑀅𑀯𑀺𑀬𑁄𑀕𑀫𑁂𑀯 𑀇𑀘𑁆𑀙𑀦𑁆𑀢𑀺, 𑀬𑀸𑀬 𑀦 𑀉𑀪𑀬𑀁 𑀇𑀘𑁆𑀙𑀦𑁆𑀢𑀺, 𑀲𑀸 𑀓𑀣𑀁 𑀤𑀼𑀓𑁆𑀔𑀯𑁂𑀤𑀦𑀸 𑀲𑀺𑀬𑀸? 𑀅𑀣 𑀬𑀸 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀲𑁆𑀲 𑀉𑀧𑀖𑀸𑀢𑀓𑀸𑀭𑀻, 𑀲𑀸 𑀤𑀼𑀓𑁆𑀔𑀸. 𑀬𑀸 𑀅𑀦𑀼𑀕𑁆𑀕𑀳𑀓𑀸𑀭𑀻, 𑀲𑀸 𑀓𑀣𑀁 𑀤𑀼𑀓𑁆𑀔𑀸 𑀲𑀺𑀬𑀸. 𑀅𑀣 𑀧𑀦 𑀬𑀤𑀭𑀺𑀬𑀸 𑀤𑀼𑀓𑁆𑀔𑀢𑁄 𑀧𑀲𑁆𑀲𑀦𑁆𑀢𑀺, 𑀲𑁄 𑀤𑀼𑀓𑁆𑀔𑀯𑁂𑀤𑀦𑀸𑀬 𑀲𑀪𑀸𑀯𑁄, 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀯𑁂𑀤𑀦𑀁 𑀅𑀭𑀺𑀬𑀸 𑀤𑀼𑀓𑁆𑀔𑀢𑁄 𑀧𑀲𑁆𑀲𑀦𑁆𑀢𑀺, 𑀲𑀸 𑀘 𑀅𑀪𑀺𑀡𑁆𑀳𑀲𑀪𑀸𑀯𑀸𑀢𑀺 𑀓𑀣𑀁 𑀢𑀸𑀲𑀁 𑀯𑁂𑀤𑀦𑀸𑀦𑀁 𑀫𑀼𑀤𑀼𑀫𑀚𑁆𑀛𑀺𑀫𑀸𑀥𑀺𑀫𑀢𑁆𑀢𑀤𑀼𑀓𑁆𑀔𑀪𑀸𑀯𑁄 𑀲𑀺𑀬𑀸? 𑀬𑀤𑀺 𑀘 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀏𑀯 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀪𑀸𑀯𑁄 𑀲𑀺𑀬𑀸, ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀢𑀸𑀬𑁄 𑀤𑀼𑀓𑁆𑀔𑀤𑀼𑀓𑁆𑀔𑀢𑀸, 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸, 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸’’𑀢𑀺 (𑀤𑀻. 𑀦𑀺. 𑁩.𑁩𑁦𑁫) 𑀅𑀬𑀁 𑀤𑀼𑀓𑁆𑀔𑀢𑀸𑀦𑀁 𑀯𑀺𑀪𑀸𑀕𑀤𑁂𑀲𑀦𑀸 𑀦𑀺𑀧𑁆𑀧𑀬𑁄𑀚𑀦𑀸 𑀲𑀺𑀬𑀸. 𑀢𑀣𑀸 𑀘 𑀲𑀢𑀺 𑀲𑀼𑀢𑁆𑀢𑀫𑁂𑀯 𑀧𑀝𑀺𑀩𑀸𑀳𑀺𑀢𑀁 𑀲𑀺𑀬𑀸, 𑀧𑀼𑀭𑀺𑀫𑁂𑀲𑀼 𑀘 𑀢𑀻𑀲𑀼 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂𑀲𑀼 𑀫𑀼𑀤𑀼𑀓𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸𑀢𑀺 𑀆𑀧𑀚𑁆𑀚𑀢𑀺 𑀲𑀼𑀔𑀯𑁂𑀤𑀦𑀸𑀯𑀘𑀦𑀢𑁄. 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀅𑀭𑀽𑀧𑀚𑁆𑀛𑀸𑀦𑁂𑀲𑀼 𑀘 𑀫𑀚𑁆𑀛𑀺𑀫𑀸, 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸𑀯𑀘𑀦𑀢𑁄. 𑀏𑀯𑀁 𑀲𑀦𑁆𑀢𑁂 𑀧𑀼𑀭𑀺𑀫𑀸 𑀢𑀺𑀲𑁆𑀲𑁄 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀬𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑀸 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀳𑀺 𑀘 𑀲𑀦𑁆𑀢𑀢𑀭𑀸𑀢𑀺 𑀆𑀧𑀚𑁆𑀚𑀢𑀺. 𑀓𑀣𑀁 𑀯𑀸 𑀲𑀦𑁆𑀢𑀢𑀭𑀧𑁆𑀧𑀡𑀻𑀢𑀢𑀭𑀸𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀤𑀼𑀓𑁆𑀔𑀯𑁂𑀤𑀦𑀸𑀬 𑀅𑀥𑀺𑀓𑀪𑀸𑀯𑁄 𑀬𑀼𑀚𑁆𑀚𑀢𑀺? 𑀢𑀲𑁆𑀫𑀸 𑀯𑁂𑀤𑀦𑀢𑁆𑀢𑀬𑀤𑁂𑀲𑀦𑀸𑀬 𑀧𑀭𑀺𑀬𑀸𑀬𑀤𑁂𑀲𑀦𑀸𑀪𑀸𑀯𑁄 𑀦 𑀬𑀼𑀢𑁆𑀢𑁄𑀢𑀺.
𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀤𑀼𑀓𑁆𑀔𑁂 𑀲𑀼𑀔𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄’’𑀢𑀺 (𑀅. 𑀦𑀺. 𑁪.𑁪𑁯; 𑀧𑀝𑀺. 𑀫. 𑁧.𑁨𑁩𑁬), 𑀢𑀁 𑀓𑀣𑀦𑁆𑀢𑀺? 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀬 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀘 𑀬𑀣𑀸𑀪𑀽𑀢𑀸𑀦𑀯𑀩𑁄𑀥𑁂𑀦 𑀬𑀸 𑀏𑀓𑀦𑁆𑀢𑀢𑁄 𑀲𑀼𑀔𑀲𑀜𑁆𑀜𑀸, 𑀬𑀸 𑀘 𑀤𑀼𑀓𑁆𑀔𑀦𑀺𑀫𑀺𑀢𑁆𑀢𑁂 𑀲𑀼𑀔𑀦𑀺𑀫𑀺𑀢𑁆𑀢𑀲𑀜𑁆𑀜𑀸, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀫𑁆𑀧𑀺 ‘‘𑀲𑀼𑀔𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀤𑀼𑀓𑁆𑀔𑀢𑁄 𑀤𑀝𑁆𑀞𑀩𑁆𑀩𑀸’’𑀢𑀺 (𑀇𑀢𑀺𑀯𑀼. 𑁫𑁩) 𑀇𑀤𑀁 𑀧𑀦 𑀓𑀣𑀦𑁆𑀢𑀺? 𑀇𑀤𑀁 𑀧𑀦 𑀯𑀺𑀧𑀭𑀺𑀡𑀸𑀫𑀤𑀲𑁆𑀲𑀦𑁂 𑀲𑀦𑁆𑀦𑀺𑀬𑁄𑀚𑀦𑀢𑁆𑀣𑀁 𑀯𑀼𑀢𑁆𑀢𑀁 𑀢𑀲𑁆𑀲 𑀢𑀢𑁆𑀣 𑀯𑀺𑀭𑀸𑀕𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀸𑀬𑀪𑀸𑀯𑀢𑁄 𑀲𑀼𑀔𑀯𑁂𑀤𑀦𑀸𑀬 𑀩𑀳𑀼𑀤𑀼𑀓𑁆𑀔𑀸𑀦𑀼𑀕𑀢𑀪𑀸𑀯𑀢𑁄 𑀘. 𑀢𑀣𑀸 𑀳𑀺 𑀤𑀼𑀓𑁆𑀔𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀅𑀦𑁂𑀓𑁂𑀳𑀺 𑀤𑀼𑀓𑁆𑀔𑀥𑀫𑁆𑀫𑁂𑀳𑀺 𑀅𑀦𑀼𑀩𑀤𑁆𑀥𑀢𑁆𑀢𑀸 𑀘 𑀧𑀡𑁆𑀟𑀺𑀢𑀸 𑀲𑀼𑀔𑀫𑁆𑀧𑀺 𑀤𑀼𑀓𑁆𑀔𑀫𑀺𑀘𑁆𑀘𑁂𑀯 𑀧𑀝𑀺𑀧𑀦𑁆𑀦𑀸.
𑀏𑀯𑀫𑁆𑀧𑀺 𑀦𑀢𑁆𑀣𑁂𑀯 𑀲𑀼𑀔𑀸 𑀯𑁂𑀤𑀦𑀸, 𑀲𑀼𑀔𑀳𑁂𑀢𑀽𑀦𑀁 𑀦𑀺𑀬𑀫𑀸𑀪𑀸𑀯𑀢𑁄. 𑀬𑁂 𑀳𑀺 𑀲𑀼𑀔𑀯𑁂𑀤𑀦𑀸𑀬 𑀳𑁂𑀢𑀼𑀲𑀫𑁆𑀫𑀢𑀸 𑀖𑀸𑀲𑀘𑁆𑀙𑀸𑀤𑀦𑀸𑀤𑀬𑁄, 𑀢𑁂 𑀏𑀯 𑀅𑀥𑀺𑀫𑀢𑁆𑀢𑀁 𑀅𑀓𑀸𑀮𑁂 𑀘 𑀧𑀝𑀺𑀲𑁂𑀯𑀺𑀬𑀫𑀸𑀦𑀸 𑀤𑀼𑀓𑁆𑀔𑀯𑁂𑀤𑀦𑀸𑀬 𑀳𑁂𑀢𑀼𑀪𑀸𑀯𑀫𑀸𑀧𑀚𑁆𑀚𑀦𑁆𑀢𑀺. 𑀦 𑀘 𑀬𑁂𑀦𑁂𑀯 𑀳𑁂𑀢𑀼𑀦𑀸 𑀲𑀼𑀔𑀁, 𑀢𑁂𑀦𑁂𑀯 𑀤𑀼𑀓𑁆𑀔𑀦𑁆𑀢𑀺 𑀬𑀼𑀢𑁆𑀢𑀁 𑀯𑀢𑁆𑀢𑀼𑀁. 𑀢𑀲𑁆𑀫𑀸 𑀦 𑀢𑁂 𑀲𑀼𑀔𑀳𑁂𑀢𑀽, 𑀤𑀼𑀓𑁆𑀔𑀦𑁆𑀢𑀭𑀸𑀧𑀕𑀫𑁂 𑀧𑀦 𑀅𑀯𑀺𑀜𑁆𑀜𑀽𑀦𑀁 𑀲𑀼𑀔𑀲𑀜𑁆𑀜𑀸 𑀬𑀣𑀸 𑀘𑀺𑀭𑀢𑀭𑀁 𑀞𑀸𑀦𑀸𑀤𑀺𑀇𑀭𑀺𑀬𑀸𑀧𑀣𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀢𑀤𑀜𑁆𑀜𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑁂 𑀫𑀳𑀦𑁆𑀢𑀜𑁆𑀘 𑀪𑀸𑀭𑀁 𑀯𑀳𑀢𑁄 𑀪𑀸𑀭𑀦𑀺𑀓𑁆𑀔𑁂𑀧𑁂 𑀘𑁂𑀯 𑀯𑀽𑀧𑀲𑀫𑁂 𑀘, 𑀢𑀲𑁆𑀫𑀸 𑀦𑀢𑁆𑀣𑁂𑀯 𑀲𑀼𑀔𑀦𑁆𑀢𑀺? 𑀢𑀬𑀺𑀤𑀁 𑀲𑀫𑁆𑀫𑀤𑁂𑀯 𑀲𑀼𑀔𑀳𑁂𑀢𑀼𑀁 𑀅𑀧𑀭𑀺𑀜𑁆𑀜𑀸𑀬 𑀢𑀲𑁆𑀲 𑀦𑀺𑀬𑀫𑀸𑀪𑀸𑀯𑀧𑀭𑀺𑀓𑀧𑁆𑀧𑀦𑀁. 𑀆𑀭𑀫𑁆𑀫𑀡𑀫𑀢𑁆𑀢𑀫𑁂𑀯 𑀳𑀺 𑀓𑁂𑀯𑀮𑀁 𑀲𑀼𑀔𑀳𑁂𑀢𑀼𑀁 𑀫𑀦𑀲𑀺𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁, 𑀅𑀚𑁆𑀛𑀢𑁆𑀢𑀺𑀓𑀲𑀭𑀻𑀭𑀲𑁆𑀲 𑀅𑀯𑀢𑁆𑀣𑀸𑀯𑀺𑀲𑁂𑀲𑀁 𑀲𑀫𑀼𑀤𑀺𑀢𑀁 𑀧𑀦 𑀏𑀓𑀚𑁆𑀛𑀁 𑀢𑀤𑀼𑀪𑀬𑀁 𑀲𑀼𑀔𑀸𑀤𑀺𑀳𑁂𑀢𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀸𑀤𑀺𑀲𑀜𑁆𑀘 𑀢𑀤𑀼𑀪𑀬𑀁 𑀲𑀼𑀔𑀯𑁂𑀤𑀦𑀸𑀬 𑀳𑁂𑀢𑀼, 𑀢𑀸𑀤𑀺𑀲𑀁 𑀦 𑀓𑀤𑀸𑀘𑀺𑀧𑀺 𑀤𑀼𑀓𑁆𑀔𑀯𑁂𑀤𑀦𑀸𑀬 𑀳𑁂𑀢𑀼 𑀳𑁄𑀢𑀻𑀢𑀺 𑀯𑀯𑀢𑁆𑀣𑀺𑀢𑀸 𑀏𑀯 𑀲𑀼𑀔𑀸𑀤𑀺𑀳𑁂𑀢𑀼. 𑀬𑀣𑀸 𑀦𑀸𑀫 𑀢𑁂𑀚𑁄𑀥𑀸𑀢𑀼 𑀲𑀸𑀮𑀺𑀬𑀯𑀟𑀸𑀓𑀲𑀲𑁆𑀲𑀸𑀤𑀻𑀦𑀁 𑀬𑀸𑀤𑀺𑀲𑀫𑀯𑀢𑁆𑀣𑀦𑁆𑀢𑀭𑀁 𑀧𑀢𑁆𑀯𑀸 𑀲𑀸𑀢𑀫𑀥𑀼𑀭𑀪𑀸𑀯𑀳𑁂𑀢𑀼 𑀳𑁄𑀢𑀺, 𑀦 𑀢𑀸𑀤𑀺𑀲𑀫𑁂𑀯 𑀧𑀢𑁆𑀯𑀸 𑀓𑀤𑀸𑀘𑀺𑀧𑀺 𑀅𑀲𑀸𑀢𑀅𑀫𑀥𑀼𑀭𑀪𑀸𑀯𑀳𑁂𑀢𑀼 𑀳𑁄𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.
𑀤𑀼𑀓𑁆𑀔𑀸𑀧𑀕𑀫𑁂𑀯 𑀓𑀤𑀸𑀘𑀺 𑀲𑀼𑀔𑀯𑁂𑀤𑀦𑀦𑁆𑀢𑀭𑀁 𑀉𑀧𑀮𑀩𑁆𑀪𑀢𑀺. 𑀢𑀢𑁆𑀣 𑀲𑀼𑀔𑁂𑀬𑁂𑀯 𑀲𑀼𑀔𑀲𑀜𑁆𑀜𑀸, 𑀦 𑀤𑀼𑀓𑁆𑀔𑀸𑀧𑀕𑀫𑀫𑀢𑁆𑀢𑁂 𑀬𑀣𑀸 𑀅𑀤𑁆𑀥𑀸𑀦𑀕𑀫𑀦𑀧𑀭𑀺𑀲𑁆𑀲𑀫𑀓𑀺𑀮𑀦𑁆𑀢𑀲𑁆𑀲 𑀲𑀫𑁆𑀩𑀸𑀳𑀦𑁂 𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑁂 𑀘, 𑀅𑀜𑁆𑀜𑀣𑀸 𑀓𑀸𑀮𑀦𑁆𑀢𑀭𑁂𑀧𑀺 𑀧𑀭𑀺𑀲𑁆𑀲𑀫𑀸𑀧𑀕𑀫𑁂 𑀢𑀸𑀤𑀺𑀲𑀻 𑀲𑀼𑀔𑀲𑀜𑁆𑀜𑀸 𑀲𑀺𑀬𑀸. 𑀤𑀼𑀓𑁆𑀔𑀸𑀧𑀕𑀫𑀫𑀢𑁆𑀢𑁂 𑀧𑀦 𑀲𑀼𑀔𑀦𑁆𑀢𑀺 𑀧𑀭𑀺𑀓𑀧𑁆𑀧𑀦𑀸 𑀯𑁂𑀤𑀦𑀸𑀯𑀺𑀲𑁂𑀲𑀲𑁆𑀲 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑁆𑀢𑀸. 𑀏𑀓𑀦𑁆𑀢𑁂𑀦𑁂𑀯 𑀘𑁂𑀢𑀁 𑀏𑀯𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀬𑀢𑁄 𑀧𑀡𑀻𑀢𑀧𑁆𑀧𑀡𑀻𑀢𑀸𑀦𑀺𑀬𑁂𑀯 𑀆𑀭𑀫𑁆𑀫𑀡𑀸𑀦𑀺 𑀫𑀳𑀢𑀸 𑀆𑀬𑀸𑀲𑁂𑀦 𑀲𑀢𑁆𑀢𑀸 𑀅𑀪𑀺𑀧𑀢𑁆𑀣𑀬𑀦𑁆𑀢𑀺, 𑀦 𑀘 𑀦𑁂𑀲𑀁 𑀬𑁂𑀦 𑀓𑁂𑀦𑀘𑀺 𑀬𑀣𑀸𑀮𑀤𑁆𑀥𑀫𑀢𑁆𑀢𑁂𑀦 𑀧𑀘𑁆𑀘𑀬𑁂𑀦 𑀧𑀢𑀺𑀓𑀸𑀭𑀁 𑀓𑀸𑀢𑀼𑀁 𑀲𑀓𑁆𑀓𑀸 𑀢𑀡𑁆𑀳𑀼𑀧𑁆𑀧𑀸𑀤𑁂𑀦𑀸𑀢𑀺. 𑀯𑁂𑀤𑀦𑀸𑀧𑀘𑁆𑀘𑀬𑀸 𑀳𑀺 𑀢𑀡𑁆𑀳𑀸𑀉𑀧𑀸𑀤𑀺, 𑀢𑀣𑀸𑀪𑀸𑀯𑁂 𑀘 𑀲𑀼𑀕𑀦𑁆𑀥𑀫𑀥𑀼𑀭𑀲𑀼𑀔𑀲𑀫𑁆𑀨𑀲𑁆𑀲𑀸𑀤𑀺𑀯𑀢𑁆𑀣𑀽𑀦𑀁 𑀇𑀢𑀭𑀻𑀢𑀭𑀪𑀸𑀯𑁂𑀦 𑀲𑀼𑀔𑀯𑀺𑀲𑁂𑀲𑀲𑀜𑁆𑀜𑀸 𑀚𑀸𑀬𑀫𑀸𑀦𑀸 𑀓𑀢𑀫𑀲𑁆𑀲 𑀤𑀼𑀓𑁆𑀔𑀯𑀺𑀲𑁂𑀲𑀲𑁆𑀲 𑀅𑀧𑀕𑀫𑀦𑁂 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀤𑁆𑀯𑀸𑀭𑁂𑀲𑀼, 𑀲𑁄𑀢𑀤𑁆𑀯𑀸𑀭𑁂 𑀘 𑀤𑀺𑀩𑁆𑀩𑀲𑀗𑁆𑀕𑀻𑀢𑀲𑀤𑀺𑀲𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀲𑀤𑁆𑀤𑀸𑀯𑀥𑀸𑀭𑀡𑁂. 𑀢𑀲𑁆𑀫𑀸 𑀦 𑀤𑀼𑀓𑁆𑀔𑀯𑁂𑀤𑀦𑀸𑀬𑀫𑁂𑀯 𑀤𑀼𑀓𑁆𑀔𑀦𑁆𑀢𑀭𑀸𑀧𑀕𑀫𑁂 𑀲𑀼𑀔𑀲𑀜𑁆𑀜𑀸, 𑀦𑀸𑀧𑀺 𑀓𑁂𑀯𑀮𑁂 𑀤𑀼𑀓𑁆𑀔𑀸𑀧𑀕𑀫𑀫𑀢𑁆𑀢𑁂𑀢𑀺 𑀆𑀕𑀫𑀢𑁄 𑀬𑀼𑀢𑁆𑀢𑀺𑀢𑁄𑀧𑀺 𑀯𑀯𑀢𑁆𑀣𑀺𑀢𑀸 𑀢𑀺𑀲𑁆𑀲𑁄 𑀯𑁂𑀤𑀦𑀸𑀢𑀺 𑀪𑀕𑀯𑀢𑁄 𑀯𑁂𑀤𑀦𑀢𑁆𑀢𑀬𑀤𑁂𑀲𑀦𑀸 𑀦𑀻𑀢𑀢𑁆𑀣𑀸𑀬𑁂𑀯, 𑀦 𑀦𑁂𑀬𑁆𑀬𑀢𑁆𑀣𑀸𑀢𑀺 𑀲𑀜𑁆𑀜𑀸𑀧𑁂𑀢𑀩𑁆𑀩𑀁. 𑀏𑀯𑀜𑁆𑀘𑁂𑀢𑀁 𑀉𑀧𑁂𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁, 𑀦𑁄 𑀘𑁂, 𑀓𑀫𑁆𑀫𑀁 𑀓𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑀩𑁆𑀩𑁄 ‘‘𑀕𑀘𑁆𑀙 𑀬𑀣𑀸𑀲𑀼𑀔’’𑀦𑁆𑀢𑀺.
𑀏𑀯𑀫𑁂𑀢𑀸 𑀅𑀜𑁆𑀜𑀫𑀜𑁆𑀜𑀧𑀝𑀺𑀧𑀓𑁆𑀔𑀲𑀪𑀸𑀯𑀯𑀯𑀢𑁆𑀣𑀺𑀢𑀮𑀓𑁆𑀔𑀡𑀸 𑀏𑀯 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀪𑀕𑀯𑀢𑀸 𑀤𑁂𑀲𑀺𑀢𑀸. 𑀢𑀜𑁆𑀘 𑀔𑁄 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀺𑀓𑀸𑀦𑀁 𑀬𑁄𑀕𑀸𑀯𑀘𑀭𑀸𑀦𑀁 𑀯𑁂𑀤𑀦𑀸𑀫𑀼𑀔𑁂𑀦 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀁. 𑀤𑀼𑀯𑀺𑀥𑀜𑁆𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁, 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺. 𑀢𑀢𑁆𑀣 𑀪𑀕𑀯𑀸 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁄 𑀲𑀗𑁆𑀔𑁂𑀧𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀸 𑀯𑀺𑀢𑁆𑀣𑀸𑀭𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀸 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀸𑀤𑀺𑀯𑀲𑁂𑀦 𑀯𑀸 𑀓𑀣𑁂𑀢𑀺. 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀧𑀦 𑀓𑀣𑁂𑀦𑁆𑀢𑁄 𑀨𑀲𑁆𑀲𑀯𑀲𑁂𑀦 𑀯𑀸 𑀯𑁂𑀤𑀦𑀸𑀯𑀲𑁂𑀦 𑀯𑀸 𑀘𑀺𑀢𑁆𑀢𑀯𑀲𑁂𑀦 𑀯𑀸 𑀓𑀣𑁂𑀢𑀺. 𑀏𑀓𑀘𑁆𑀘𑀲𑁆𑀲 𑀳𑀺 𑀆𑀧𑀸𑀣𑀕𑀢𑁂 𑀆𑀭𑀫𑁆𑀫𑀡𑁂 𑀆𑀯𑀚𑁆𑀚𑀢𑁄 𑀢𑀢𑁆𑀣 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀨𑀲𑁆𑀲𑁄 𑀢𑀁 𑀆𑀭𑀫𑁆𑀫𑀡𑀁 𑀨𑀼𑀲𑀦𑁆𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀧𑀸𑀓𑀝𑁄 𑀳𑁄𑀢𑀺, 𑀏𑀓𑀘𑁆𑀘𑀲𑁆𑀲 𑀢𑀁 𑀆𑀭𑀫𑁆𑀫𑀡𑀁 𑀅𑀦𑀼𑀪𑀯𑀦𑁆𑀢𑀻 𑀉𑀧𑁆𑀧𑀚𑁆𑀚𑀫𑀸𑀦𑀸 𑀯𑁂𑀤𑀦𑀸 𑀧𑀸𑀓𑀝𑀸 𑀳𑁄𑀢𑀺, 𑀏𑀓𑀘𑁆𑀘𑀲𑁆𑀲 𑀢𑀁 𑀆𑀭𑀫𑁆𑀫𑀡𑀁 𑀯𑀺𑀚𑀸𑀦𑀦𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀯𑀺𑀜𑁆𑀜𑀸𑀡𑀁 𑀧𑀸𑀓𑀝𑀁 𑀳𑁄𑀢𑀺. 𑀇𑀢𑀺 𑀢𑁂𑀲𑀁 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀬𑀣𑀸𑀧𑀸𑀓𑀝𑀁 𑀨𑀲𑁆𑀲𑀸𑀤𑀺𑀫𑀼𑀔𑁂𑀦 𑀢𑀺𑀥𑀸 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀺.
𑀢𑀢𑁆𑀣 𑀬𑀲𑁆𑀲 𑀨𑀲𑁆𑀲𑁄 𑀧𑀸𑀓𑀝𑁄 𑀳𑁄𑀢𑀺, 𑀲𑁄𑀧𑀺 ‘‘𑀦 𑀓𑁂𑀯𑀮𑀁 𑀨𑀲𑁆𑀲𑁄𑀯 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀢𑀤𑁂𑀯 𑀆𑀭𑀫𑁆𑀫𑀡𑀁 𑀅𑀦𑀼𑀪𑀯𑀫𑀸𑀦𑀸 𑀯𑁂𑀤𑀦𑀸𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀲𑀜𑁆𑀚𑀸𑀦𑀫𑀸𑀦𑀸 𑀲𑀜𑁆𑀜𑀸𑀧𑀺, 𑀘𑁂𑀢𑀬𑀫𑀸𑀦𑀸 𑀘𑁂𑀢𑀦𑀸𑀧𑀺, 𑀯𑀺𑀚𑀸𑀦𑀫𑀸𑀦𑀁 𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑁂𑀬𑁂𑀯 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀬𑀲𑁆𑀲 𑀯𑁂𑀤𑀦𑀸 𑀧𑀸𑀓𑀝𑀸 𑀳𑁄𑀢𑀺, 𑀲𑁄𑀧𑀺 ‘‘𑀦 𑀓𑁂𑀯𑀮𑀁 𑀯𑁂𑀤𑀦𑀸𑀯 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀬 𑀲𑀤𑁆𑀥𑀺𑀁 𑀨𑀼𑀲𑀫𑀸𑀦𑁄 𑀨𑀲𑁆𑀲𑁄𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀲𑀜𑁆𑀚𑀸𑀦𑀫𑀸𑀦𑀸 𑀲𑀜𑁆𑀜𑀸𑀧𑀺, 𑀘𑁂𑀢𑀬𑀫𑀸𑀦𑀸 𑀘𑁂𑀢𑀦𑀸𑀧𑀺, 𑀯𑀺𑀚𑀸𑀦𑀫𑀸𑀦𑀁 𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑁂𑀬𑁂𑀯 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀬𑀲𑁆𑀲 𑀯𑀺𑀜𑁆𑀜𑀸𑀡𑀁 𑀧𑀸𑀓𑀝𑀁 𑀳𑁄𑀢𑀺, 𑀲𑁄𑀧𑀺 ‘‘𑀦 𑀓𑁂𑀯𑀮𑀁 𑀯𑀺𑀜𑁆𑀜𑀸𑀡𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀢𑀤𑁂𑀯𑀸𑀭𑀫𑁆𑀫𑀡𑀁 𑀨𑀼𑀲𑀫𑀸𑀦𑁄 𑀨𑀲𑁆𑀲𑁄𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀅𑀦𑀼𑀪𑀯𑀫𑀸𑀦𑀸 𑀯𑁂𑀤𑀦𑀸𑀧𑀺, 𑀲𑀜𑁆𑀚𑀸𑀦𑀫𑀸𑀦𑀸 𑀲𑀜𑁆𑀜𑀸𑀧𑀺, 𑀘𑁂𑀢𑀬𑀫𑀸𑀦𑀸 𑀘𑁂𑀢𑀦𑀸𑀧𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑁂𑀬𑁂𑀯 𑀧𑀭𑀺𑀕𑁆𑀕𑀡𑁆𑀳𑀸𑀢𑀺.
𑀲𑁄 ‘‘𑀇𑀫𑁂 𑀨𑀲𑁆𑀲𑀧𑀜𑁆𑀘𑀫𑀓𑀸 𑀥𑀫𑁆𑀫𑀸 𑀓𑀺𑀁𑀦𑀺𑀲𑁆𑀲𑀺𑀢𑀸’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀸’’𑀢𑀺 𑀧𑀚𑀸𑀦𑀸𑀢𑀺. 𑀯𑀢𑁆𑀣𑀼 𑀦𑀸𑀫 𑀓𑀭𑀚𑀓𑀸𑀬𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀇𑀤𑀜𑁆𑀘 𑀧𑀦 𑀫𑁂 𑀯𑀺𑀜𑁆𑀜𑀸𑀡𑀁 𑀏𑀢𑁆𑀣𑀲𑀺𑀢𑀁 𑀏𑀢𑁆𑀣𑀧𑀝𑀺𑀩𑀤𑁆𑀥’’𑀦𑁆𑀢𑀺 (𑀤𑀻. 𑀦𑀺. 𑁧.𑁨𑁩𑁫; 𑀫. 𑀦𑀺. 𑁨.𑁨𑁫𑁨). 𑀲𑁄 𑀅𑀢𑁆𑀣𑀢𑁄 𑀪𑀽𑀢𑀸 𑀘𑁂𑀯 𑀉𑀧𑀸𑀤𑀸𑀭𑀽𑀧𑀸𑀦𑀺 𑀘, 𑀏𑀯𑀫𑁂𑀢𑁆𑀣 𑀯𑀢𑁆𑀣𑀼 𑀭𑀽𑀧𑀁, 𑀨𑀲𑁆𑀲𑀧𑀜𑁆𑀘𑀫𑀓𑀸 𑀦𑀸𑀫𑀦𑁆𑀢𑀺 𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀯 𑀧𑀲𑁆𑀲𑀢𑀺. 𑀭𑀽𑀧𑀜𑁆𑀘𑁂𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄, 𑀦𑀸𑀫𑀁 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀫𑀢𑁆𑀢𑀁 𑀳𑁄𑀢𑀺. 𑀦𑀸𑀫𑀭𑀽𑀧𑀯𑀺𑀦𑀺𑀫𑀼𑀢𑁆𑀢𑀸 𑀳𑀺 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀧𑀜𑁆𑀘𑀓𑁆𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀁 𑀯𑀸 𑀦𑀸𑀫𑀭𑀽𑀧𑀁 𑀦𑀢𑁆𑀣𑀺. 𑀲𑁄 ‘‘𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀓𑀺𑀁𑀳𑁂𑀢𑀼𑀓𑀸’’𑀢𑀺 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 ‘‘𑀅𑀯𑀺𑀚𑁆𑀚𑀸𑀤𑀺𑀳𑁂𑀢𑀼𑀓𑀸’’𑀢𑀺, 𑀢𑀢𑁄 ‘‘𑀧𑀘𑁆𑀘𑀬𑁄 𑀘𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀜𑁆𑀘 𑀇𑀤𑀁, 𑀅𑀜𑁆𑀜𑁄 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀦𑀢𑁆𑀣𑀺, 𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑀫𑀢𑁆𑀢𑀫𑁂𑀯𑀸’’𑀢𑀺 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀯𑀲𑁂𑀦 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀸𑀝𑀺𑀬𑀸 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀲𑀫𑁆𑀫𑀲𑀦𑁆𑀢𑁄 𑀯𑀺𑀘𑀭𑀢𑀺. 𑀲𑁄 ‘‘𑀅𑀚𑁆𑀚 𑀅𑀚𑁆𑀚𑀸’’𑀢𑀺 𑀧𑀝𑀺𑀯𑁂𑀥𑀁 𑀆𑀓𑀗𑁆𑀔𑀫𑀸𑀦𑁄 𑀢𑀣𑀸𑀭𑀽𑀧𑁂 𑀲𑀫𑀬𑁂 𑀉𑀢𑀼𑀲𑀧𑁆𑀧𑀸𑀬𑀁, 𑀧𑀼𑀕𑁆𑀕𑀮𑀲𑀧𑁆𑀧𑀸𑀬𑀁, 𑀪𑁄𑀚𑀦𑀲𑀧𑁆𑀧𑀸𑀬𑀁, 𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀸𑀬𑀁 𑀯𑀸 𑀮𑀪𑀺𑀢𑁆𑀯𑀸 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄𑀯 𑀯𑀺𑀧𑀲𑁆𑀲𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀢𑀺. 𑀏𑀯𑀁 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀥 𑀧𑀦 𑀪𑀕𑀯𑀸 𑀯𑁂𑀤𑀦𑀸𑀯𑀲𑁂𑀦 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁄 𑀯𑁂𑀤𑀦𑀸𑀯𑀲𑁂𑀦 𑀓𑀣𑁂𑀲𑀺. 𑀢𑀢𑁆𑀣 𑁋
‘‘𑀮𑀓𑁆𑀔𑀡𑀜𑁆𑀘 𑀅𑀥𑀺𑀝𑁆𑀞𑀸𑀦𑀁, 𑀉𑀧𑁆𑀧𑀢𑁆𑀢𑀺 𑀅𑀦𑀼𑀲𑀬𑁄 𑀢𑀣𑀸;
𑀞𑀸𑀦𑀁 𑀧𑀯𑀢𑁆𑀢𑀺𑀓𑀸𑀮𑁄 𑀘, 𑀇𑀦𑁆𑀤𑁆𑀭𑀺𑀬𑀜𑁆𑀘 𑀤𑁆𑀯𑀺𑀥𑀸𑀤𑀺𑀢𑀸’’𑀢𑀺. 𑁋
𑀇𑀤𑀁 𑀧𑀓𑀺𑀡𑁆𑀡𑀓𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀢𑀢𑁆𑀣 𑀮𑀓𑁆𑀔𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀨𑀲𑁆𑀲𑁄. ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺 𑀳𑀺 𑀯𑀘𑀦𑀢𑁄 𑀨𑀲𑁆𑀲𑁄 𑀯𑁂𑀤𑀦𑀸𑀬 𑀅𑀥𑀺𑀝𑁆𑀞𑀸𑀦𑀁. 𑀢𑀣𑀸 𑀳𑀺 𑀲𑁄 𑀯𑁂𑀤𑀦𑀸𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀦𑀺𑀘𑁆𑀘𑀫𑁆𑀫𑀕𑀸𑀯𑀻𑀉𑀧𑀫𑀸𑀬 𑀉𑀧𑀫𑀺𑀢𑁄. 𑀢𑀢𑁆𑀣 𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀅𑀥𑀺𑀝𑁆𑀞𑀸𑀦𑀁, 𑀤𑀼𑀓𑁆𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬, 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀅𑀥𑀺𑀝𑁆𑀞𑀸𑀦𑀁, 𑀆𑀲𑀦𑁆𑀦𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀯𑁂𑀤𑀦𑀸 𑀓𑀲𑁆𑀲 𑀧𑀤𑀝𑁆𑀞𑀸𑀦𑀁? ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’’𑀢𑀺 𑀯𑀘𑀦𑀢𑁄 𑀢𑀡𑁆𑀳𑀸𑀬 𑀧𑀤𑀝𑁆𑀞𑀸𑀦𑀁 𑀅𑀪𑀺𑀧𑀢𑁆𑀣𑀦𑀻𑀬𑀪𑀸𑀯𑀢𑁄. 𑀲𑀼𑀔𑀸 𑀯𑁂𑀤𑀦𑀸 𑀢𑀸𑀯 𑀢𑀡𑁆𑀳𑀸𑀬 𑀧𑀤𑀝𑁆𑀞𑀸𑀦𑀁 𑀳𑁄𑀢𑀼, 𑀇𑀢𑀭𑀸 𑀧𑀦 𑀓𑀣𑀦𑁆𑀢𑀺? 𑀯𑀼𑀘𑁆𑀘𑀢𑁂 𑀲𑀼𑀔𑀲𑀫𑀗𑁆𑀕𑀻𑀧𑀺 𑀢𑀸𑀯 𑀢𑀁𑀲𑀤𑀺𑀲𑀁 𑀢𑀢𑁄 𑀯𑀸 𑀉𑀢𑁆𑀢𑀭𑀺𑀢𑀭𑀁 𑀲𑀼𑀔𑀁 𑀅𑀪𑀺𑀧𑀢𑁆𑀣𑁂𑀢𑀺, 𑀓𑀺𑀫𑀗𑁆𑀕 𑀧𑀦 𑀤𑀼𑀓𑁆𑀔𑀲𑀫𑀗𑁆𑀕𑀻𑀪𑀽𑀢𑁄. 𑀅𑀤𑀼𑀓𑁆𑀔𑀫𑀲𑀼𑀔𑀸 𑀘 𑀲𑀦𑁆𑀢𑀪𑀸𑀯𑁂𑀦 𑀲𑀼𑀔𑀫𑀺𑀘𑁆𑀘𑁂𑀯 𑀯𑀼𑀘𑁆𑀘𑀢𑀻𑀢𑀺 𑀢𑀺𑀲𑁆𑀲𑁄𑀧𑀺 𑀯𑁂𑀤𑀦𑀸 𑀢𑀡𑁆𑀳𑀸𑀬 𑀧𑀤𑀝𑁆𑀞𑀸𑀦𑀁.
𑀉𑀧𑁆𑀧𑀢𑁆𑀢𑀻𑀢𑀺 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁. 𑀇𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀸 𑀳𑀺 𑀲𑀢𑁆𑀢𑀲𑀗𑁆𑀔𑀸𑀭𑀸 𑀲𑀼𑀔𑀯𑁂𑀤𑀦𑀸𑀬 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁, 𑀢𑁂 𑀏𑀯 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀸 𑀤𑀼𑀓𑁆𑀔𑀯𑁂𑀤𑀦𑀸𑀬, 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀪𑀽𑀢𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬. 𑀯𑀺𑀧𑀸𑀓𑀢𑁄 𑀢𑀤𑀸𑀓𑀸𑀭𑀕𑁆𑀕𑀳𑀡𑀢𑁄 𑀘𑁂𑀢𑁆𑀣 𑀇𑀝𑁆𑀞𑀸𑀦𑀺𑀝𑁆𑀞𑀢𑀸 𑀯𑁂𑀤𑀺𑀢𑀩𑁆𑀩𑀸.
𑀅𑀦𑀼𑀲𑀬𑁄𑀢𑀺 𑀇𑀫𑀸𑀲𑀼 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀧𑀝𑀺𑀖𑀸𑀦𑀼𑀲𑀬𑁄, 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋
‘‘𑀲𑀼𑀔𑀸𑀬 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀯𑁂𑀤𑀦𑀸𑀬 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁪𑁬𑁫).
𑀤𑀺𑀝𑁆𑀞𑀺𑀫𑀸𑀦𑀸𑀦𑀼𑀲𑀬𑀸 𑀘𑁂𑀢𑁆𑀣 𑀭𑀸𑀕𑀧𑀓𑁆𑀔𑀺𑀬𑀸 𑀓𑀸𑀢𑀩𑁆𑀩𑀸. 𑀲𑀼𑀔𑀸𑀪𑀺𑀦𑀦𑁆𑀤𑀦𑁂𑀦 𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑀸 ‘‘𑀲𑀲𑁆𑀲𑀢’’𑀦𑁆𑀢𑀺𑀆𑀤𑀺𑀦𑀸 𑀲𑀓𑁆𑀓𑀸𑀬𑁂 𑀅𑀪𑀺𑀦𑀺𑀯𑀺𑀲𑀦𑁆𑀢𑀺, 𑀫𑀸𑀦𑀚𑀸𑀢𑀺𑀓𑀸 𑀘 𑀫𑀸𑀦𑀁 𑀚𑀧𑁆𑀧𑁂𑀦𑁆𑀢𑀺 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸. 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑀧𑀦 𑀅𑀯𑀺𑀚𑁆𑀚𑀸𑀧𑀓𑁆𑀔𑀺𑀓𑁄 𑀓𑀸𑀢𑀩𑁆𑀩𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑁂 (𑀯𑀺𑀪. 𑁨𑁮𑁮-𑁨𑁮𑁯) ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀯𑀺𑀘𑀺𑀓𑀺𑀘𑁆𑀙𑀸’’𑀢𑀺. 𑀅𑀦𑀼𑀲𑀬𑀸𑀦𑀜𑁆𑀘 𑀢𑀢𑁆𑀣 𑀢𑀢𑁆𑀣 𑀲𑀦𑁆𑀢𑀸𑀦𑁂 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀣𑀸𑀫𑀕𑀫𑀦𑀁. 𑀢𑀲𑁆𑀫𑀸 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦𑀢𑁆𑀢𑀸 𑀅𑀦𑀼𑀭𑀽𑀧𑀓𑀸𑀭𑀡𑀮𑀸𑀪𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑁄 𑀭𑀸𑀕𑁄, 𑀢𑀢𑁆𑀣 𑀲𑀬𑀺𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.
𑀞𑀸𑀦𑀦𑁆𑀢𑀺 𑀓𑀸𑀬𑁄 𑀘𑀺𑀢𑁆𑀢𑀜𑁆𑀘 𑀯𑁂𑀤𑀦𑀸𑀬 𑀞𑀸𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀸𑀬𑀺𑀓𑀁 𑀲𑀼𑀔𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀁 𑀲𑀸𑀢𑀁 𑀲𑀼𑀔𑀁 𑀯𑁂𑀤𑀬𑀺𑀢𑀁 (𑀥. 𑀲. 𑁪𑁪𑁯). 𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀲𑀺𑀓𑀁 𑀲𑀼𑀔𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀲𑀸𑀢𑀁 𑀲𑀼𑀔𑀁 𑀯𑁂𑀤𑀬𑀺𑀢’’𑀦𑁆𑀢𑀺 (𑀥. 𑀲. 𑁪𑁭𑁧) 𑀘.
𑀧𑀯𑀢𑁆𑀢𑀺𑀓𑀸𑀮𑁄𑀢𑀺 𑀧𑀯𑀢𑁆𑀢𑀺𑀓𑁆𑀔𑀡𑁄, 𑀧𑀯𑀢𑁆𑀢𑀦𑀸𑀓𑀮𑀦𑀜𑁆𑀘. 𑀧𑀯𑀢𑁆𑀢𑀺𑀓𑁆𑀔𑀡𑁂𑀦 𑀳𑀺 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀦𑀁 𑀲𑀼𑀔𑀤𑀼𑀓𑁆𑀔𑀪𑀸𑀯𑁄 𑀯𑀯𑀢𑁆𑀣𑀺𑀢𑁄. 𑀬𑀣𑀸𑀳 𑁋
‘‘𑀲𑀼𑀔𑀸 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀯𑁂𑀤𑀦𑀸 𑀞𑀺𑀢𑀺𑀲𑀼𑀔𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸, 𑀤𑀼𑀓𑁆𑀔𑀸 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀯𑁂𑀤𑀦𑀸 𑀞𑀺𑀢𑀺𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀲𑀼𑀔𑀸’’𑀢𑀺 (𑀫. 𑀦𑀺. 𑁧.𑁪𑁬𑁫).
𑀲𑀼𑀔𑀸𑀬 𑀯𑁂𑀤𑀦𑀸𑀬 𑀅𑀢𑁆𑀣𑀺𑀪𑀸𑀯𑁄 𑀲𑀼𑀔𑀁, 𑀦𑀢𑁆𑀣𑀺𑀪𑀸𑀯𑁄 𑀤𑀼𑀓𑁆𑀔𑀁. 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀅𑀢𑁆𑀣𑀺𑀪𑀸𑀯𑁄 𑀤𑀼𑀓𑁆𑀔𑀁, 𑀦𑀢𑁆𑀣𑀺𑀪𑀸𑀯𑁄 𑀲𑀼𑀔𑀦𑁆𑀢𑀺 𑀅𑀢𑁆𑀣𑁄. 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀧𑀯𑀢𑁆𑀢𑀦𑀸𑀓𑀮𑀦𑀁 𑀧𑀯𑀢𑁆𑀢𑀺𑀬𑀸 𑀆𑀓𑀮𑀦𑀁 𑀅𑀦𑀸𑀓𑀮𑀦𑀜𑁆𑀘 𑀚𑀸𑀦𑀦𑀁 𑀅𑀚𑀸𑀦𑀦𑀜𑁆𑀘 𑀲𑀼𑀔𑀤𑀼𑀓𑁆𑀔𑀪𑀸𑀯𑀯𑀯𑀢𑁆𑀣𑀸𑀦𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋
‘‘𑀅𑀤𑀼𑀓𑁆𑀔𑀫𑀲𑀼𑀔𑀸 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀯𑁂𑀤𑀦𑀸 𑀜𑀸𑀡𑀲𑀼𑀔𑀸 𑀅𑀜𑁆𑀜𑀸𑀡𑀤𑀼𑀓𑁆𑀔𑀸’’𑀢𑀺.
𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀏𑀢𑀸 𑀳𑀺 𑀲𑀼𑀔𑀸𑀤𑀬𑁄 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀲𑀼𑀔𑀺𑀦𑁆𑀤𑁆𑀭𑀺𑀬𑀁, 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁, 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀢𑁄 𑀧𑀜𑁆𑀘𑀥𑀸 𑀯𑀺𑀪𑀢𑁆𑀢𑀸. 𑀓𑀸𑀬𑀺𑀓𑀜𑁆𑀳𑀺 𑀲𑀸𑀢𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀲𑀸𑀢𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀦𑁆𑀢𑀺. 𑀫𑀸𑀦𑀲𑀁 𑀧𑀦 𑀲𑀸𑀢𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀲𑀸𑀢𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀦𑁆𑀢𑀺. 𑀤𑀼𑀯𑀺𑀥𑀫𑁆𑀧𑀺 𑀦𑁂𑀯 𑀲𑀸𑀢𑀁 𑀦𑀸𑀲𑀸𑀢𑀁 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀦𑁆𑀢𑀺. 𑀓𑀺𑀁 𑀧𑀦𑁂𑀢𑁆𑀣 𑀓𑀸𑀭𑀡𑀁 𑁋 𑀬𑀣𑀸 𑀓𑀸𑀬𑀺𑀓𑀘𑁂𑀢𑀲𑀺𑀓𑀸 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸 ‘‘𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁, 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑀸, 𑀦 𑀏𑀯𑀁 𑀅𑀤𑀼𑀓𑁆𑀔𑀫𑀲𑀼𑀔𑀸𑀢𑀺? 𑀪𑁂𑀤𑀸𑀪𑀸𑀯𑀢𑁄. 𑀬𑀣𑁂𑀯 𑀳𑀺 𑀅𑀦𑀼𑀕𑁆𑀕𑀳𑀲𑀪𑀸𑀯𑀸 𑀩𑀸𑀥𑀓𑀲𑀪𑀸𑀯𑀸 𑀘 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸 𑀅𑀜𑁆𑀜𑀣𑀸 𑀓𑀸𑀬𑀲𑁆𑀲 𑀅𑀦𑀼𑀕𑁆𑀕𑀳𑀁 𑀩𑀸𑀥𑀓𑀜𑁆𑀘 𑀓𑀭𑁄𑀦𑁆𑀢𑀺, 𑀘𑀺𑀢𑁆𑀢𑀲𑁆𑀲 𑀘 𑀅𑀜𑁆𑀜𑀣𑀸, 𑀦 𑀏𑀯𑀁 𑀅𑀤𑀼𑀓𑁆𑀔𑀫𑀲𑀼𑀔𑀸, 𑀢𑀲𑁆𑀫𑀸 𑀪𑁂𑀤𑀸𑀪𑀸𑀯𑀢𑁄 𑀯𑀺𑀪𑀚𑀺𑀢𑁆𑀯𑀸 𑀦 𑀯𑀼𑀢𑁆𑀢𑀸.
𑀤𑁆𑀯𑀺𑀥𑀸𑀤𑀺𑀢𑀸𑀢𑀺 𑀲𑀩𑁆𑀩𑀸𑀧𑀺 𑀳𑀺 𑀯𑁂𑀤𑀦𑀸 𑀯𑁂𑀤𑀬𑀺𑀢𑀝𑁆𑀞𑁂𑀦 𑀏𑀓𑀯𑀺𑀥𑀸𑀧𑀺 𑀦𑀺𑀲𑁆𑀲𑀬𑀪𑁂𑀤𑁂𑀦 𑀤𑀼𑀯𑀺𑀥𑀸 𑁋 𑀓𑀸𑀬𑀺𑀓𑀸 𑀘𑁂𑀢𑀲𑀺𑀓𑀸𑀢𑀺, 𑀲𑀼𑀔𑀸, 𑀤𑀼𑀓𑁆𑀔𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸𑀢𑀺 𑀢𑀺𑀯𑀺𑀥𑀸, 𑀘𑀢𑀼𑀬𑁄𑀦𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸, 𑀇𑀦𑁆𑀤𑁆𑀭𑀺𑀬𑀯𑀲𑁂𑀦, 𑀕𑀢𑀺𑀯𑀲𑁂𑀦 𑀘 𑀧𑀜𑁆𑀘𑀯𑀺𑀥𑀸, 𑀤𑁆𑀯𑀸𑀭𑀯𑀲𑁂𑀦 𑀘 𑀆𑀭𑀫𑁆𑀫𑀡𑀯𑀲𑁂𑀦 𑀘 𑀙𑀩𑁆𑀩𑀺𑀥𑀸, 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄𑀕𑁂𑀦 𑀲𑀢𑁆𑀢𑀯𑀺𑀥𑀸, 𑀅𑀝𑁆𑀞𑀮𑁄𑀓𑀥𑀫𑁆𑀫𑀧𑀘𑁆𑀘𑀬𑀢𑀸𑀬 𑀅𑀝𑁆𑀞𑀯𑀺𑀥𑀸, 𑀲𑀼𑀔𑀸𑀤𑀻𑀦𑀁 𑀧𑀘𑁆𑀘𑁂𑀓𑀁 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑁂𑀦 𑀦𑀯𑀯𑀺𑀥𑀸, 𑀢𑀸 𑀏𑀯 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑁂𑀤𑁂𑀦 𑀅𑀝𑁆𑀞𑀸𑀭𑀲𑀯𑀺𑀥𑀸, 𑀢𑀣𑀸 𑀭𑀽𑀧𑀸𑀤𑀻𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀲𑀼𑀔𑀸𑀤𑀺𑀯𑀲𑁂𑀦 𑀢𑀺𑀲𑁆𑀲𑁄 𑀢𑀺𑀲𑁆𑀲𑁄 𑀓𑀢𑁆𑀯𑀸. 𑀭𑀽𑀧𑀸𑀭𑀫𑁆𑀫𑀡𑀲𑁆𑀫𑀺𑀜𑁆𑀳𑀺 𑀲𑀼𑀔𑀸𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀤𑀼𑀓𑁆𑀔𑀸𑀧𑀺, 𑀅𑀤𑀼𑀓𑁆𑀔𑀫𑀲𑀼𑀔𑀸𑀧𑀺, 𑀏𑀯𑀁 𑀇𑀢𑀭𑁂𑀲𑀼𑀧𑀺. 𑀅𑀣 𑀯𑀸 𑀅𑀝𑁆𑀞𑀸𑀭𑀲𑀫𑀦𑁄𑀧𑀯𑀺𑀘𑀸𑀭𑀯𑀲𑁂𑀦 𑀅𑀝𑁆𑀞𑀸𑀭𑀲. 𑀯𑀼𑀢𑁆𑀢𑀜𑁆𑀳𑀺 𑁋
‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀁 𑀭𑀽𑀧𑀁 𑀉𑀧𑀯𑀺𑀘𑀭𑀢𑀺, 𑀤𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀁, 𑀉𑀧𑁂𑀓𑁆𑀔𑀸𑀝𑁆𑀞𑀸𑀦𑀺𑀬𑀁 𑀭𑀽𑀧𑀁 𑀉𑀧𑀯𑀺𑀘𑀭𑀢𑀺, 𑀲𑁄𑀢𑁂𑀦 𑀲𑀤𑁆𑀤𑀁…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀁 𑀥𑀫𑁆𑀫𑀁 𑀉𑀧𑀯𑀺𑀘𑀭𑀢𑀺, 𑀤𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀁, 𑀉𑀧𑁂𑀓𑁆𑀔𑀸𑀝𑁆𑀞𑀸𑀦𑀺𑀬𑀁 𑀥𑀫𑁆𑀫𑀁 𑀉𑀧𑀯𑀺𑀘𑀭𑀢𑀻’’𑀢𑀺 (𑀅. 𑀦𑀺. 𑁩.𑁬𑁨).
𑀏𑀯𑀁 𑀅𑀝𑁆𑀞𑀸𑀭𑀲𑀯𑀺𑀥𑀸 𑀳𑁄𑀦𑁆𑀢𑀺. 𑀢𑀣𑀸 𑀙 𑀕𑁂𑀳𑀲𑁆𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺, 𑀙 𑀕𑁂𑀳𑀲𑁆𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺, 𑀙 𑀕𑁂𑀳𑀲𑁆𑀲𑀺𑀢𑀸 𑀉𑀧𑁂𑀓𑁆𑀔𑀸, 𑀢𑀣𑀸 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀸 𑀲𑁄𑀫𑀦𑀲𑁆𑀲𑀸𑀤𑀬𑁄𑀢𑀺 𑀏𑀯𑀁 𑀙𑀢𑁆𑀢𑀺𑀁𑀲𑀯𑀺𑀥𑀸. 𑀅𑀢𑀻𑀢𑁂 𑀙𑀢𑁆𑀢𑀺𑀁𑀲, 𑀅𑀦𑀸𑀕𑀢𑁂 𑀙𑀢𑁆𑀢𑀺𑀁𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀢𑁆𑀢𑀺𑀁𑀲𑀸𑀢𑀺 𑀅𑀝𑁆𑀞𑀼𑀢𑁆𑀢𑀭𑀲𑀢𑀫𑁆𑀧𑀺 𑀪𑀯𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀤𑁆𑀯𑀺𑀥𑀸𑀤𑀺𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺.
𑀧𑀓𑀺𑀡𑁆𑀡𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.
𑀕𑀸𑀣𑀸𑀲𑀼 𑀲𑀫𑀸𑀳𑀺𑀢𑁄𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁂𑀦 𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑁄. 𑀢𑁂𑀦 𑀲𑀫𑀣𑀪𑀸𑀯𑀦𑀸𑀦𑀼𑀬𑁄𑀕𑀁 𑀤𑀲𑁆𑀲𑁂𑀢𑀺. 𑀲𑀫𑁆𑀧𑀚𑀸𑀦𑁄𑀢𑀺 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀸𑀤𑀺𑀦𑀸 𑀘𑀢𑀼𑀩𑁆𑀩𑀺𑀥𑁂𑀦 𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑁆𑀧𑀚𑀸𑀦𑁄. 𑀢𑁂𑀦 𑀯𑀺𑀧𑀲𑁆𑀲𑀦𑀸𑀦𑀼𑀬𑁄𑀕𑀁 𑀤𑀲𑁆𑀲𑁂𑀢𑀺. 𑀲𑀢𑁄𑀢𑀺 𑀲𑀢𑁄𑀓𑀸𑀭𑀻. 𑀢𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀬𑁂𑀦 𑀥𑀫𑁆𑀫𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀯𑁂𑀤𑀦𑀸 𑀘 𑀧𑀚𑀸𑀦𑀸𑀢𑀻𑀢𑀺 ‘‘𑀇𑀫𑀸 𑀯𑁂𑀤𑀦𑀸, 𑀏𑀢𑁆𑀢𑀓𑀸 𑀯𑁂𑀤𑀦𑀸’’𑀢𑀺 𑀲𑀪𑀸𑀯𑀢𑁄 𑀯𑀺𑀪𑀸𑀕𑀢𑁄 ‘‘𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’’𑀢𑀺 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀢𑁄 𑀘 𑀧𑀼𑀩𑁆𑀩𑀪𑀸𑀕𑁂 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑁂𑀦 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑁂𑀦 𑀧𑀚𑀸𑀦𑀸𑀢𑀺. 𑀯𑁂𑀤𑀦𑀸𑀦𑀜𑁆𑀘 𑀲𑀫𑁆𑀪𑀯𑀦𑁆𑀢𑀺 𑀲𑀫𑀼𑀤𑀬𑀲𑀘𑁆𑀘𑀁. 𑀬𑀢𑁆𑀣 𑀘𑁂𑀢𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀏𑀢𑁆𑀢𑀸𑀯𑀢𑀸 𑀯𑁂𑀤𑀦𑀸 𑀬𑀢𑁆𑀣 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀁 𑀦𑀺𑀭𑁄𑀥𑀲𑀘𑁆𑀘𑀁. 𑀔𑀬𑀕𑀸𑀫𑀺𑀦𑀦𑁆𑀢𑀺 𑀯𑁂𑀤𑀦𑀸𑀦𑀁 𑀔𑀬𑀕𑀸𑀫𑀺𑀦𑀁 𑀅𑀭𑀺𑀬𑀫𑀕𑁆𑀕𑀜𑁆𑀘 𑀧𑀚𑀸𑀦𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑁂𑀤𑀦𑀸𑀦𑀁 𑀔𑀬𑀸𑀢𑀺 𑀏𑀯𑀁 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀯𑁂𑀤𑀦𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀸. 𑀦𑀺𑀘𑁆𑀙𑀸𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀦𑀺𑀢𑁆𑀢𑀡𑁆𑀳𑁄, 𑀧𑀳𑀻𑀦𑀢𑀡𑁆𑀳𑁄, 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦, 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀘 𑀧𑀭𑀺𑀦𑀺𑀩𑁆𑀩𑀼𑀢𑁄 𑀳𑁄𑀢𑀺.
𑀢𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁪. 𑀤𑀼𑀢𑀺𑀬𑀯𑁂𑀤𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸
𑁫𑁩. 𑀘𑀢𑀼𑀢𑁆𑀣𑁂 𑀤𑀼𑀓𑁆𑀔𑀢𑁄 𑀤𑀝𑁆𑀞𑀩𑁆𑀩𑀸𑀢𑀺 𑀲𑀼𑀔𑀯𑁂𑀤𑀦𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀯𑀲𑁂𑀦 𑀤𑀼𑀓𑁆𑀔𑀸𑀢𑀺 𑀜𑀸𑀡𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀢𑀩𑁆𑀩𑀸. 𑀲𑀮𑁆𑀮𑀢𑁄 𑀤𑀝𑁆𑀞𑀩𑁆𑀩𑀸𑀢𑀺 𑀤𑀼𑀦𑁆𑀦𑀻𑀳𑀭𑀡𑀝𑁆𑀞𑁂𑀦 𑀅𑀦𑁆𑀢𑁄𑀢𑀼𑀤𑀦𑀝𑁆𑀞𑁂𑀦 𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑀤𑀼𑀓𑁆𑀔𑀪𑀸𑀯𑁂𑀦 𑀤𑀼𑀓𑁆𑀔𑀯𑁂𑀤𑀦𑀸 𑀲𑀮𑁆𑀮𑀦𑁆𑀢𑀺 𑀧𑀲𑁆𑀲𑀺𑀢𑀩𑁆𑀩𑀸. 𑀅𑀦𑀺𑀘𑁆𑀘𑀢𑁄𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀉𑀤𑀬𑀩𑁆𑀩𑀬𑀯𑀦𑁆𑀢𑀢𑁄 𑀢𑀸𑀯𑀓𑀸𑀮𑀺𑀓𑀢𑁄 𑀦𑀺𑀘𑁆𑀘𑀧𑀝𑀺𑀧𑀓𑁆𑀔𑀢𑁄 𑀘 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸𑀢𑀺 𑀧𑀲𑁆𑀲𑀺𑀢𑀩𑁆𑀩𑀸. 𑀓𑀸𑀫𑀜𑁆𑀘𑁂𑀢𑁆𑀣 𑀲𑀩𑁆𑀩𑀸𑀧𑀺 𑀯𑁂𑀤𑀦𑀸 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀺𑀢𑀩𑁆𑀩𑀸, 𑀅𑀦𑀺𑀘𑁆𑀘𑀤𑀲𑁆𑀲𑀦𑀢𑁄 𑀧𑀦 𑀲𑀸𑀢𑀺𑀲𑀬𑀁 𑀯𑀺𑀭𑀸𑀕𑀦𑀺𑀫𑀺𑀢𑁆𑀢𑀁 𑀤𑀼𑀓𑁆𑀔𑀤𑀲𑁆𑀲𑀦𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀣𑀸 ‘‘𑀲𑀼𑀔𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀤𑀼𑀓𑁆𑀔𑀢𑁄 𑀤𑀝𑁆𑀞𑀩𑁆𑀩𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀲𑀮𑁆𑀮𑀢𑁄 𑀤𑀝𑁆𑀞𑀩𑁆𑀩𑀸’’𑀢𑀺 𑀆𑀳. 𑀅𑀣 𑀯𑀸 𑀬𑀢𑁆𑀣 𑀧𑀼𑀣𑀼𑀚𑁆𑀚𑀦𑀸 𑀲𑀼𑀔𑀸𑀪𑀺𑀦𑀺𑀯𑁂𑀲𑀺𑀦𑁄, 𑀢𑀢𑁆𑀣 𑀦𑀺𑀩𑁆𑀩𑁂𑀤𑀚𑀦𑀦𑀢𑁆𑀣𑀁 𑀢𑀣𑀸 𑀯𑀼𑀢𑁆𑀢𑀁. 𑀢𑁂𑀦𑀲𑁆𑀲𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀬 ‘‘𑀲𑀼𑀔𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀤𑀼𑀓𑁆𑀔𑀢𑁄 𑀤𑀝𑁆𑀞𑀩𑁆𑀩𑀸’’𑀢𑀺 𑀯𑀢𑁆𑀯𑀸 ‘‘𑀲𑀼𑀔𑀸𑀧𑀺 𑀢𑀸𑀯 𑀏𑀤𑀺𑀲𑀻, 𑀤𑀼𑀓𑁆𑀔𑀸 𑀦𑀼 𑀔𑁄 𑀓𑀻𑀤𑀺𑀲𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀸𑀦𑀁 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀬 ‘‘𑀤𑀼𑀓𑁆𑀔𑀸 𑀯𑁂𑀤𑀦𑀸 𑀲𑀮𑁆𑀮𑀢𑁄 𑀤𑀝𑁆𑀞𑀩𑁆𑀩𑀸’’𑀢𑀺 𑀆𑀳, 𑀇𑀢𑀭𑀸 𑀧𑀦 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀏𑀯 𑀤𑀼𑀓𑁆𑀔𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀅𑀦𑀺𑀘𑁆𑀘𑀢𑁄 𑀤𑀝𑁆𑀞𑀩𑁆𑀩𑀸’’𑀢𑀺 𑀅𑀯𑁄𑀘.
𑀏𑀢𑁆𑀣 𑀘 ‘‘𑀲𑀼𑀔𑀸 𑀯𑁂𑀤𑀦𑀸 𑀤𑀼𑀓𑁆𑀔𑀢𑁄 𑀤𑀝𑁆𑀞𑀩𑁆𑀩𑀸’’𑀢𑀺 𑀏𑀢𑁂𑀦 𑀭𑀸𑀕𑀲𑁆𑀲 𑀲𑀫𑀼𑀕𑁆𑀖𑀸𑀢𑀦𑀽𑀧𑀸𑀬𑁄 𑀤𑀲𑁆𑀲𑀺𑀢𑁄. 𑀲𑀼𑀔𑀯𑁂𑀤𑀦𑀸𑀬 𑀳𑀺 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺. ‘‘𑀤𑀼𑀓𑁆𑀔𑀸 𑀯𑁂𑀤𑀦𑀸 𑀲𑀮𑁆𑀮𑀢𑁄 𑀤𑀝𑁆𑀞𑀩𑁆𑀩𑀸’’𑀢𑀺 𑀏𑀢𑁂𑀦 𑀤𑁄𑀲𑀲𑁆𑀲 𑀲𑀫𑀼𑀕𑁆𑀖𑀸𑀢𑀦𑀽𑀧𑀸𑀬𑁄 𑀤𑀲𑁆𑀲𑀺𑀢𑁄. 𑀤𑀼𑀓𑁆𑀔𑀯𑁂𑀤𑀦𑀸𑀬 𑀳𑀺 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺. ‘‘𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀅𑀦𑀺𑀘𑁆𑀘𑀢𑁄 𑀤𑀝𑁆𑀞𑀩𑁆𑀩𑀸’’𑀢𑀺 𑀏𑀢𑁂𑀦 𑀫𑁄𑀳𑀲𑁆𑀲 𑀲𑀫𑀼𑀕𑁆𑀖𑀸𑀢𑀦𑀽𑀧𑀸𑀬𑁄 𑀤𑀲𑁆𑀲𑀺𑀢𑁄. 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸𑀬 𑀳𑀺 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺.
𑀢𑀣𑀸 𑀧𑀞𑀫𑁂𑀦 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀲𑁆𑀲 𑀧𑀳𑀸𑀦𑀁 𑀤𑀲𑁆𑀲𑀺𑀢𑀁 𑀢𑀲𑁆𑀲 𑀲𑀼𑀔𑀲𑁆𑀲𑀸𑀤𑀳𑁂𑀢𑀼𑀓𑀢𑁆𑀢𑀸, 𑀤𑀼𑀢𑀺𑀬𑁂𑀦 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀲𑁆𑀲 𑀧𑀳𑀸𑀦𑀁. 𑀬𑀣𑀸𑀪𑀽𑀢𑀜𑁆𑀳𑀺 𑀤𑀼𑀓𑁆𑀔𑀁 𑀅𑀧𑀭𑀺𑀚𑀸𑀦𑀦𑁆𑀢𑀸 𑀢𑀲𑁆𑀲 𑀧𑀭𑀺𑀳𑀭𑀡𑀢𑁆𑀣𑀁 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺. 𑀢𑀢𑀺𑀬𑁂𑀦 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀲𑁆𑀲 𑀧𑀳𑀸𑀦𑀁 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑀲𑁆𑀲 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀸𑀪𑀸𑀯𑀢𑁄 𑀅𑀯𑀺𑀚𑁆𑀚𑀸𑀦𑀺𑀫𑀺𑀢𑁆𑀢𑀢𑁆𑀢𑀸 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀲𑁆𑀲, 𑀅𑀯𑀺𑀚𑁆𑀚𑀸𑀦𑀺𑀫𑀺𑀢𑁆𑀢𑀜𑁆𑀘 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀧𑀞𑀫𑁂𑀦 𑀯𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀧𑀭𑀺𑀜𑁆𑀜𑀸, 𑀤𑀼𑀢𑀺𑀬𑁂𑀦 𑀤𑀼𑀓𑁆𑀔𑀤𑀼𑀓𑁆𑀔𑀧𑀭𑀺𑀜𑁆𑀜𑀸, 𑀢𑀢𑀺𑀬𑁂𑀦 𑀲𑀗𑁆𑀔𑀸𑀭𑀤𑀼𑀓𑁆𑀔𑀧𑀭𑀺𑀜𑁆𑀜𑀸. 𑀧𑀞𑀫𑁂𑀦 𑀯𑀸 𑀇𑀝𑁆𑀞𑀸𑀭𑀫𑁆𑀫𑀡𑀧𑀭𑀺𑀜𑁆𑀜𑀸, 𑀤𑀼𑀢𑀺𑀬𑁂𑀦 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀧𑀭𑀺𑀜𑁆𑀜𑀸, 𑀢𑀢𑀺𑀬𑁂𑀦 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀧𑀭𑀺𑀜𑁆𑀜𑀸. 𑀯𑀺𑀭𑀢𑁆𑀢𑁂𑀲𑀼 𑀳𑀺 𑀢𑀤𑀸𑀭𑀫𑁆𑀫𑀡𑀥𑀫𑁆𑀫𑁂𑀲𑀼 𑀆𑀭𑀫𑁆𑀫𑀡𑀸𑀦𑀺𑀧𑀺 𑀯𑀺𑀭𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀻𑀢𑀺. 𑀧𑀞𑀫𑁂𑀦 𑀯𑀸 𑀭𑀸𑀕𑀧𑁆𑀧𑀳𑀸𑀦𑀧𑀭𑀺𑀓𑀺𑀢𑁆𑀢𑀦𑁂𑀦 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁄 𑀤𑀻𑀧𑀺𑀢𑁄 𑀳𑁄𑀢𑀺, 𑀤𑀼𑀢𑀺𑀬𑁂𑀦 𑀤𑁄𑀲𑀧𑁆𑀧𑀳𑀸𑀦𑀧𑀭𑀺𑀓𑀺𑀢𑁆𑀢𑀦𑁂𑀦 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁄, 𑀢𑀢𑀺𑀬𑁂𑀦 𑀫𑁄𑀳𑀧𑁆𑀧𑀳𑀸𑀦𑀧𑀭𑀺𑀓𑀺𑀢𑁆𑀢𑀦𑁂𑀦 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑁄 𑀤𑀻𑀧𑀺𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.
𑀬𑀢𑁄𑀢𑀺 𑀬𑀤𑀸, 𑀬𑀲𑁆𑀫𑀸 𑀯𑀸. 𑀅𑀭𑀺𑀬𑁄𑀢𑀺 𑀓𑀺𑀮𑁂𑀲𑁂𑀳𑀺 𑀆𑀭𑀓𑀸 𑀞𑀺𑀢𑁄 𑀧𑀭𑀺𑀲𑀼𑀤𑁆𑀥𑁄. 𑀲𑀫𑁆𑀫𑀤𑁆𑀤𑀲𑁄𑀢𑀺 𑀲𑀩𑁆𑀩𑀸𑀲𑀁 𑀯𑁂𑀤𑀦𑀸𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀯𑀸 𑀲𑀘𑁆𑀘𑀸𑀦𑀁 𑀅𑀯𑀺𑀧𑀭𑀻𑀢𑀤𑀲𑁆𑀲𑀸𑀯𑀻. 𑀅𑀘𑁆𑀙𑁂𑀘𑁆𑀙𑀺 𑀢𑀡𑁆𑀳𑀦𑁆𑀢𑀺 𑀯𑁂𑀤𑀦𑀸𑀫𑀽𑀮𑀓𑀁 𑀢𑀡𑁆𑀳𑀁 𑀅𑀕𑁆𑀕𑀫𑀕𑁆𑀕𑁂𑀦 𑀙𑀺𑀦𑁆𑀤𑀺, 𑀅𑀦𑀯𑀲𑁂𑀲𑀢𑁄 𑀲𑀫𑀼𑀘𑁆𑀙𑀺𑀦𑁆𑀤𑀺. 𑀯𑀺𑀯𑀢𑁆𑀢𑀬𑀺 𑀲𑀁𑀬𑁄𑀚𑀦𑀦𑁆𑀢𑀺 𑀤𑀲𑀯𑀺𑀥𑀁 𑀲𑀁𑀬𑁄𑀚𑀦𑀁 𑀧𑀭𑀺𑀯𑀢𑁆𑀢𑀬𑀺, 𑀦𑀺𑀫𑁆𑀫𑀽𑀮𑀫𑀓𑀸𑀲𑀺. 𑀲𑀫𑁆𑀫𑀸𑀢𑀺 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦. 𑀫𑀸𑀦𑀸𑀪𑀺𑀲𑀫𑀬𑀸𑀢𑀺 𑀫𑀸𑀦𑀲𑁆𑀲 𑀤𑀲𑁆𑀲𑀦𑀸𑀪𑀺𑀲𑀫𑀬𑀸, 𑀧𑀳𑀸𑀦𑀸𑀪𑀺𑀲𑀫𑀬𑀸 𑀯𑀸. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀳𑀺 𑀓𑀺𑀘𑁆𑀘𑀯𑀲𑁂𑀦 𑀫𑀸𑀦𑀁 𑀧𑀲𑁆𑀲𑀢𑀺, 𑀅𑀬𑀫𑀲𑁆𑀲 𑀤𑀲𑁆𑀲𑀦𑀸𑀪𑀺𑀲𑀫𑀬𑁄. 𑀢𑁂𑀦 𑀤𑀺𑀝𑁆𑀞𑁄 𑀧𑀦 𑀲𑁄 𑀢𑀸𑀯𑀤𑁂𑀯 𑀧𑀳𑀻𑀬𑀢𑀺 𑀤𑀺𑀝𑁆𑀞𑀯𑀺𑀲𑁂𑀦 𑀤𑀺𑀝𑁆𑀞𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀯𑀺𑀬, 𑀅𑀬𑀫𑀲𑁆𑀲 𑀧𑀳𑀸𑀦𑀸𑀪𑀺𑀲𑀫𑀬𑁄. 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸𑀢𑀺 𑀏𑀯𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀫𑀸𑀦𑀲𑁆𑀲 𑀤𑀺𑀝𑁆𑀞𑀢𑁆𑀢𑀸 𑀧𑀳𑀻𑀦𑀢𑁆𑀢𑀸 𑀘 𑀲𑀩𑁆𑀩𑀲𑁆𑀲𑁂𑀯 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀓𑁄𑀝𑀺𑀲𑀗𑁆𑀔𑀸𑀢𑀁 𑀅𑀦𑁆𑀢𑀁 𑀧𑀭𑀺𑀘𑁆𑀙𑁂𑀤𑀁 𑀧𑀭𑀺𑀯𑀝𑀼𑀫𑀁 𑀅𑀓𑀸𑀲𑀺, 𑀅𑀦𑁆𑀢𑀺𑀫𑀲𑀫𑀼𑀲𑁆𑀲𑀬𑀫𑀢𑁆𑀢𑀸𑀯𑀲𑁂𑀲𑀁 𑀤𑀼𑀓𑁆𑀔𑀫𑀓𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.
𑀕𑀸𑀣𑀸𑀲𑀼 𑀬𑁄𑀢𑀺 𑀬𑁄 𑀅𑀭𑀺𑀬𑀲𑀸𑀯𑀓𑁄. 𑀅𑀤𑁆𑀤𑀸𑀢𑀺 𑀅𑀤𑁆𑀤𑀲, 𑀲𑀼𑀔𑀯𑁂𑀤𑀦𑀁 𑀤𑀼𑀓𑁆𑀔𑀢𑁄 𑀧𑀲𑁆𑀲𑀻𑀢𑀺 𑀅𑀢𑁆𑀣𑁄. 𑀲𑀼𑀔𑀯𑁂𑀤𑀦𑀸 𑀳𑀺 𑀯𑀺𑀲𑀫𑀺𑀲𑁆𑀲𑀁 𑀯𑀺𑀬 𑀪𑁄𑀚𑀦𑀁 𑀧𑀭𑀺𑀪𑁄𑀕𑀓𑀸𑀮𑁂 𑀅𑀲𑁆𑀲𑀸𑀤𑀁 𑀤𑀤𑀫𑀸𑀦𑀸 𑀯𑀺𑀧𑀭𑀺𑀡𑀸𑀫𑀓𑀸𑀮𑁂 𑀤𑀼𑀓𑁆𑀔𑀸𑀬𑁂𑀯𑀸𑀢𑀺. 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀲𑀮𑁆𑀮𑀢𑁄𑀢𑀺 𑀬𑀣𑀸 𑀲𑀮𑁆𑀮𑀁 𑀲𑀭𑀻𑀭𑀁 𑀅𑀦𑀼𑀧𑀯𑀺𑀲𑀦𑁆𑀢𑀫𑁆𑀧𑀺 𑀧𑀯𑀺𑀝𑁆𑀞𑀫𑁆𑀧𑀺 𑀉𑀤𑁆𑀥𑀭𑀺𑀬𑀫𑀸𑀦𑀫𑁆𑀧𑀺 𑀧𑀻𑀴𑀫𑁂𑀯 𑀚𑀦𑁂𑀢𑀺, 𑀏𑀯𑀁 𑀤𑀼𑀓𑁆𑀔𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀫𑀸𑀦𑀸𑀧𑀺 𑀞𑀺𑀢𑀺𑀧𑁆𑀧𑀢𑁆𑀢𑀸𑀧𑀺 𑀪𑀺𑀚𑁆𑀚𑀫𑀸𑀦𑀸𑀧𑀺 𑀯𑀺𑀩𑀸𑀥𑀢𑀺𑀬𑁂𑀯𑀸𑀢𑀺 𑀢𑀁 𑀲𑀮𑁆𑀮𑀢𑁄 𑀯𑀺𑀧𑀲𑁆𑀲𑀻𑀢𑀺 𑀯𑀼𑀢𑁆𑀢𑀁. 𑀅𑀤𑁆𑀤𑀓𑁆𑀔𑀺 𑀦𑀁 𑀅𑀦𑀺𑀘𑁆𑀘𑀢𑁄𑀢𑀺 𑀲𑀼𑀔𑀤𑀼𑀓𑁆𑀔𑀢𑁄 𑀲𑀦𑁆𑀢𑀲𑀪𑀸𑀯𑀢𑀸𑀬 𑀲𑀦𑁆𑀢𑀢𑀭𑀚𑀸𑀢𑀺𑀓𑀫𑁆𑀧𑀺 𑀦𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀅𑀦𑀺𑀘𑁆𑀘𑀦𑁆𑀢𑀺𑀓𑀢𑀸𑀬 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀺.
𑀲 𑀯𑁂 𑀲𑀫𑁆𑀫𑀤𑁆𑀤𑀲𑁄𑀢𑀺 𑀲𑁄 𑀏𑀯𑀁 𑀢𑀺𑀲𑁆𑀲𑀦𑁆𑀦𑀁 𑀯𑁂𑀤𑀦𑀸𑀦𑀁 𑀲𑀫𑁆𑀫𑀤𑁂𑀯 𑀤𑀼𑀓𑁆𑀔𑀸𑀤𑀺𑀢𑁄 𑀤𑀲𑁆𑀲𑀸𑀯𑀻. 𑀬𑀢𑁄𑀢𑀺 𑀬𑀲𑁆𑀫𑀸. 𑀢𑀢𑁆𑀣𑀸𑀢𑀺 𑀯𑁂𑀤𑀦𑀸𑀬𑀁. 𑀯𑀺𑀫𑀼𑀘𑁆𑀘𑀢𑀻𑀢𑀺 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺𑀯𑀲𑁂𑀦 𑀯𑀺𑀫𑀼𑀘𑁆𑀘𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀲𑀼𑀔𑀸𑀤𑀻𑀦𑀺 𑀤𑀼𑀓𑁆𑀔𑀸𑀤𑀺𑀢𑁄 𑀅𑀤𑁆𑀤𑀲, 𑀢𑀲𑁆𑀫𑀸 𑀢𑀢𑁆𑀣 𑀯𑁂𑀤𑀦𑀸𑀬 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀯𑀺𑀫𑀼𑀘𑁆𑀘𑀢𑀺. 𑀬𑀁𑀲𑀤𑁆𑀤𑁂 𑀳𑀺 𑀯𑀼𑀢𑁆𑀢𑁂 𑀢𑀁𑀲𑀤𑁆𑀤𑁄 𑀆𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑁄. 𑀅𑀣 𑀯𑀸 𑀬𑀢𑁄𑀢𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀲𑀁𑀬𑀢𑁄 𑀬𑀢𑀢𑁆𑀢𑁄, 𑀬𑀢𑀢𑀺 𑀧𑀤𑀳𑀢𑀻𑀢𑀺 𑀯𑀸 𑀬𑀢𑁄, 𑀆𑀬𑀢𑀢𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀜𑁆𑀜𑀸𑀯𑁄𑀲𑀺𑀢𑁄𑀢𑀺 𑀯𑁂𑀤𑀦𑀸𑀫𑀼𑀔𑁂𑀦 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑁆𑀯𑀸 𑀙𑀝𑁆𑀞𑀸𑀪𑀺𑀜𑁆𑀜𑀸𑀬 𑀧𑀭𑀺𑀬𑁄𑀲𑀺𑀢𑁄 𑀓𑀢𑀓𑀺𑀘𑁆𑀘𑁄. 𑀲𑀦𑁆𑀢𑁄𑀢𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀯𑀽𑀧𑀲𑀫𑁂𑀦 𑀲𑀦𑁆𑀢𑁄. 𑀬𑁄𑀕𑀸𑀢𑀺𑀕𑁄𑀢𑀺 𑀓𑀸𑀫𑀬𑁄𑀕𑀸𑀤𑀺𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀬𑁄𑀕𑀁 𑀅𑀢𑀺𑀓𑁆𑀓𑀦𑁆𑀢𑁄. 𑀉𑀪𑀬𑀳𑀺𑀢𑀫𑀼𑀦𑀦𑀢𑁄 𑀫𑀼𑀦𑀻𑀢𑀺.
𑀘𑀢𑀼𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁫. 𑀧𑀞𑀫𑀏𑀲𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸
𑁫𑁪. 𑀧𑀜𑁆𑀘𑀫𑁂 𑀏𑀲𑀦𑀸𑀢𑀺 𑀕𑀯𑁂𑀲𑀦𑀸 𑀧𑀭𑀺𑀬𑁂𑀲𑀦𑀸 𑀫𑀕𑁆𑀕𑀦𑀸. 𑀢𑀸 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀫𑁂𑀲𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀫𑁂𑀲𑀦𑀸𑀢𑀺 𑀓𑀸𑀫𑀸𑀦𑀁 𑀏𑀲𑀦𑀸, 𑀓𑀸𑀫𑀲𑀗𑁆𑀔𑀸𑀢𑀸 𑀯𑀸 𑀏𑀲𑀦𑀸 𑀓𑀸𑀫𑁂𑀲𑀦𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋
‘‘𑀢𑀢𑁆𑀣 𑀓𑀢𑀫𑀸 𑀓𑀸𑀫𑁂𑀲𑀦𑀸? 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄, 𑀓𑀸𑀫𑀭𑀸𑀕𑁄, 𑀓𑀸𑀫𑀦𑀦𑁆𑀤𑀻, 𑀓𑀸𑀫𑀲𑁆𑀦𑁂𑀳𑁄, 𑀓𑀸𑀫𑀧𑀺𑀧𑀸𑀲𑀸, 𑀓𑀸𑀫𑀫𑀼𑀘𑁆𑀙𑀸, 𑀓𑀸𑀫𑀚𑁆𑀛𑁄𑀲𑀸𑀦𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀓𑀸𑀫𑁂𑀲𑀦𑀸’’𑀢𑀺 (𑀯𑀺𑀪. 𑁯𑁧𑁯).
𑀢𑀲𑁆𑀫𑀸 𑀓𑀸𑀫𑀭𑀸𑀕𑁄 𑀓𑀸𑀫𑁂𑀲𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀪𑀯𑁂𑀲𑀦𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋
‘‘𑀢𑀢𑁆𑀣 𑀓𑀢𑀫𑀸 𑀪𑀯𑁂𑀲𑀦𑀸? 𑀬𑁄 𑀪𑀯𑁂𑀲𑀼 𑀪𑀯𑀘𑁆𑀙𑀦𑁆𑀤𑁄…𑀧𑁂… 𑀪𑀯𑀚𑁆𑀛𑁄𑀲𑀸𑀦𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀯𑁂𑀲𑀦𑀸’’𑀢𑀺 (𑀯𑀺𑀪. 𑁯𑁧𑁯).
𑀢𑀲𑁆𑀫𑀸 𑀪𑀯𑁂𑀲𑀦𑀭𑀸𑀕𑁄 𑀭𑀽𑀧𑀸𑀭𑀽𑀧𑀪𑀯𑀧𑀢𑁆𑀣𑀦𑀸 𑀪𑀯𑁂𑀲𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀏𑀲𑀦𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸. 𑀬𑀣𑀸𑀳 𑁋
‘‘𑀢𑀢𑁆𑀣 𑀓𑀢𑀫𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸? 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀅𑀦𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀜𑁆𑀜𑁄𑀚𑀦𑀁 𑀕𑀸𑀳𑁄 𑀧𑀢𑀺𑀝𑁆𑀞𑀸𑀳𑁄 𑀅𑀪𑀺𑀦𑀺𑀯𑁂𑀲𑁄 𑀧𑀭𑀸𑀫𑀸𑀲𑁄 𑀓𑀼𑀫𑁆𑀫𑀕𑁆𑀕𑁄 𑀫𑀺𑀘𑁆𑀙𑀸𑀧𑀣𑁄 𑀫𑀺𑀘𑁆𑀙𑀢𑁆𑀢𑀁 𑀢𑀺𑀢𑁆𑀣𑀸𑀬𑀢𑀦𑀁 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸’’𑀢𑀺 (𑀯𑀺𑀪. 𑁯𑁧𑁯).
𑀢𑀲𑁆𑀫𑀸 𑀤𑀺𑀝𑁆𑀞𑀺𑀕𑀢𑀲𑀫𑁆𑀫𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀏𑀲𑀦𑀸 𑀤𑀺𑀝𑁆𑀞𑀺𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀭𑀸𑀕𑀤𑀺𑀝𑁆𑀞𑀺𑀬𑁄 𑀏𑀲𑀦𑀸𑀢𑀺 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀭𑀸𑀕𑀤𑀺𑀝𑁆𑀞𑀺𑀬𑁄𑀯 𑀏𑀲𑀦𑀸, 𑀢𑀤𑁂𑀓𑀝𑁆𑀞𑀁 𑀓𑀫𑁆𑀫𑀫𑁆𑀧𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋
‘‘𑀢𑀢𑁆𑀣 𑀓𑀢𑀫𑀸 𑀓𑀸𑀫𑁂𑀲𑀦𑀸? 𑀓𑀸𑀫𑀭𑀸𑀕𑁄 𑀢𑀤𑁂𑀓𑀝𑁆𑀞𑀁 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀓𑀸𑀫𑁂𑀲𑀦𑀸. 𑀢𑀢𑁆𑀣 𑀓𑀢𑀫𑀸 𑀪𑀯𑁂𑀲𑀦𑀸? 𑀪𑀯𑀭𑀸𑀕𑁄 𑀢𑀤𑁂𑀓𑀝𑁆𑀞𑀁 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀯𑁂𑀲𑀦𑀸. 𑀢𑀢𑁆𑀣 𑀓𑀢𑀫𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸? 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺 𑀢𑀤𑁂𑀓𑀝𑁆𑀞𑀁 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀫𑀦𑁄𑀓𑀫𑁆𑀫𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸’’𑀢𑀺 (𑀯𑀺𑀪. 𑁯𑁧𑁯) 𑁋
𑀏𑀯𑀫𑁂𑀢𑀸 𑀢𑀺𑀲𑁆𑀲𑁄 𑀏𑀲𑀦𑀸 𑀯𑁂𑀤𑀺𑀢𑀩𑁆𑀩𑀸.
𑀕𑀸𑀣𑀸𑀲𑀼 𑀲𑀫𑁆𑀪𑀯𑀦𑁆𑀢𑀺 𑀏𑀢𑁆𑀣 𑀏𑀲𑀦𑀸𑀦𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸 𑀅𑀯𑀺𑀚𑁆𑀚𑀸𑀤𑀬𑁄 𑀢𑀡𑁆𑀳𑀸 𑀘𑀸𑀢𑀺 𑀲𑀫𑁆𑀪𑀯𑁄, 𑀲𑀫𑀼𑀤𑀬𑁄𑀢𑀺 𑀅𑀢𑁆𑀣𑁄. 𑀬𑀢𑁆𑀣 𑀘𑁂𑀢𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑀧𑀞𑀫𑀫𑀕𑁆𑀕𑁂𑀦 𑀦𑀺𑀭𑀼𑀚𑁆𑀛𑀢𑀺, 𑀓𑀸𑀫𑁂𑀲𑀦𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦, 𑀪𑀯𑁂𑀲𑀦𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀦𑀺𑀭𑀼𑀚𑁆𑀛𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.
𑀧𑀜𑁆𑀘𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁬. 𑀤𑀼𑀢𑀺𑀬𑀏𑀲𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸
𑁫𑁫. 𑀙𑀝𑁆𑀞𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑀲𑀳𑀸𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀬 𑀲𑀤𑁆𑀥𑀺𑀁. 𑀯𑀺𑀪𑀢𑁆𑀢𑀺𑀮𑁄𑀧𑁂𑀦 𑀳𑀺 𑀅𑀬𑀁 𑀦𑀺𑀤𑁆𑀤𑁂𑀲𑁄, 𑀓𑀭𑀡𑀢𑁆𑀣𑁂 𑀯𑀸 𑀏𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀬 𑀲𑀤𑁆𑀥𑀺𑀁 𑀓𑀸𑀫𑁂𑀲𑀦𑀸, 𑀪𑀯𑁂𑀲𑀦𑀸𑀢𑀺 𑀢𑀺𑀲𑁆𑀲𑁄 𑀏𑀲𑀦𑀸’’𑀢𑀺. 𑀢𑀸𑀲𑀼 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀇𑀢𑀺𑀲𑀘𑁆𑀘𑀧𑀭𑀸𑀫𑀸𑀲𑁄, 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀲𑀫𑀼𑀲𑁆𑀲𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀇𑀢𑀺 𑀏𑀯𑀁 𑀲𑀘𑁆𑀘𑀦𑁆𑀢𑀺 𑀧𑀭𑀸𑀫𑀸𑀲𑁄 𑀇𑀢𑀺𑀲𑀘𑁆𑀘𑀧𑀭𑀸𑀫𑀸𑀲𑁄. 𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜𑀦𑁆𑀢𑀺 𑀤𑀺𑀝𑁆𑀞𑀺𑀬𑀸 𑀧𑀯𑀢𑁆𑀢𑀺𑀆𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀤𑀺𑀝𑁆𑀞𑀺𑀬𑁄 𑀏𑀯 𑀲𑀩𑁆𑀩𑀸𑀦𑀢𑁆𑀣𑀳𑁂𑀢𑀼𑀪𑀸𑀯𑀢𑁄 𑀤𑀺𑀝𑁆𑀞𑀺𑀝𑁆𑀞𑀸𑀦𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀯𑀚𑁆𑀚𑀁 𑀯𑀤𑀸𑀫𑀻’’𑀢𑀺 (𑀅. 𑀦𑀺. 𑁧.𑁩𑁧𑁦). 𑀢𑀸 𑀏𑀯 𑀘 𑀉𑀧𑀭𑀽𑀧𑀭𑀺 𑀯𑀟𑁆𑀠𑀫𑀸𑀦𑀸 𑀮𑁄𑀪𑀸𑀤𑀺𑀓𑀺𑀮𑁂𑀲𑀲𑀫𑀼𑀲𑁆𑀲𑀬𑁂𑀦 𑀘 𑀲𑀫𑀼𑀲𑁆𑀲𑀬𑀸, ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑀺𑀲𑀫𑀸𑀦𑀸 𑀲𑀩𑁆𑀩𑀸𑀦𑀢𑁆𑀣𑀳𑁂𑀢𑀼𑀪𑀽𑀢𑀸 𑀓𑀺𑀮𑁂𑀲𑀤𑀼𑀓𑁆𑀔𑀽𑀧𑀘𑀬𑀳𑁂𑀢𑀼𑀪𑀽𑀢𑀸 𑀘 𑀤𑀺𑀝𑁆𑀞𑀺𑀬𑁄 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀦 𑀧𑀯𑀢𑁆𑀢𑀺𑀆𑀓𑀸𑀭𑀢𑁄 𑀦𑀺𑀩𑁆𑀩𑀢𑁆𑀢𑀺𑀢𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.
𑀲𑀩𑁆𑀩𑀭𑀸𑀕𑀯𑀺𑀭𑀢𑁆𑀢𑀲𑁆𑀲𑀸𑀢𑀺 𑀲𑀩𑁆𑀩𑁂𑀳𑀺 𑀓𑀸𑀫𑀭𑀸𑀕𑀪𑀯𑀭𑀸𑀕𑁂𑀳𑀺 𑀯𑀺𑀭𑀢𑁆𑀢𑀲𑁆𑀲. 𑀢𑀢𑁄 𑀏𑀯 𑀢𑀡𑁆𑀳𑀓𑁆𑀔𑀬𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂 𑀯𑀺𑀫𑀼𑀢𑁆𑀢𑀢𑁆𑀢𑀸 𑀢𑀡𑁆𑀳𑀓𑁆𑀔𑀬𑀯𑀺𑀫𑀼𑀢𑁆𑀢𑀺𑀦𑁄 𑀅𑀭𑀳𑀢𑁄. 𑀏𑀲𑀦𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀸𑀢𑀺 𑀓𑀸𑀫𑁂𑀲𑀦𑀸, 𑀪𑀯𑁂𑀲𑀦𑀸 𑀘 𑀲𑀩𑁆𑀩𑀲𑁄 𑀦𑀺𑀲𑁆𑀲𑀝𑁆𑀞𑀸 𑀧𑀳𑀻𑀦𑀸. 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀲𑀫𑀽𑀳𑀢𑀸𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀲𑀗𑁆𑀔𑀸𑀢𑀸 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀘 𑀧𑀞𑀫𑀫𑀕𑁆𑀕𑁂𑀦𑁂𑀯 𑀲𑀫𑀼𑀕𑁆𑀖𑀸𑀢𑀺𑀢𑀸. 𑀏𑀲𑀦𑀸𑀦𑀁 𑀔𑀬𑀸𑀢𑀺 𑀏𑀯𑀫𑁂𑀢𑀸𑀲𑀁 𑀢𑀺𑀲𑁆𑀲𑀦𑁆𑀦𑀁 𑀏𑀲𑀦𑀸𑀦𑀁 𑀔𑀬𑀸 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀸 𑀪𑀺𑀦𑁆𑀦𑀓𑀺𑀮𑁂𑀲𑀢𑁆𑀢𑀸. 𑀪𑀺𑀓𑁆𑀔𑀽𑀢𑀺 𑀘 𑀲𑀩𑁆𑀩𑀲𑁄 𑀆𑀲𑀸𑀪𑀸 𑀯𑀸. 𑀦𑀺𑀭𑀸𑀲𑁄𑀢𑀺 𑀘 𑀤𑀺𑀝𑁆𑀞𑁂𑀓𑀝𑁆𑀞𑀲𑁆𑀲 𑀯𑀺𑀘𑀺𑀓𑀺𑀘𑁆𑀙𑀸𑀓𑀣𑀁𑀓𑀣𑀸𑀲𑀮𑁆𑀮𑀲𑁆𑀲 𑀧𑀳𑀻𑀦𑀢𑁆𑀢𑀸 𑀅𑀓𑀣𑀁𑀓𑀣𑀻𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺.
𑀙𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁭-𑁮. 𑀆𑀲𑀯𑀲𑀼𑀢𑁆𑀢𑀤𑁆𑀯𑀬𑀯𑀡𑁆𑀡𑀦𑀸
𑁫𑁬-𑁫𑁭. 𑀲𑀢𑁆𑀢𑀫𑁂 𑀓𑀸𑀫𑀸𑀲𑀯𑁄𑀢𑀺 𑀓𑀸𑀫𑁂𑀲𑀼 𑀆𑀲𑀯𑁄, 𑀓𑀸𑀫𑀲𑀗𑁆𑀔𑀸𑀢𑁄 𑀯𑀸 𑀆𑀲𑀯𑁄 𑀓𑀸𑀫𑀸𑀲𑀯𑁄, 𑀅𑀢𑁆𑀣𑀢𑁄 𑀧𑀦 𑀓𑀸𑀫𑀭𑀸𑀕𑁄 𑀭𑀽𑀧𑀸𑀤𑀺𑀅𑀪𑀺𑀭𑀢𑀺 𑀘 𑀓𑀸𑀫𑀸𑀲𑀯𑁄. 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑁄 𑀛𑀸𑀦𑀦𑀺𑀓𑀦𑁆𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄 𑀪𑀯𑀧𑀢𑁆𑀣𑀦𑀸 𑀘 𑀪𑀯𑀸𑀲𑀯𑁄. 𑀅𑀯𑀺𑀚𑁆𑀚𑀸𑀯 𑀅𑀯𑀺𑀚𑁆𑀚𑀸𑀲𑀯𑁄.
𑀆𑀲𑀯𑀸𑀦𑀜𑁆𑀘 𑀲𑀫𑁆𑀪𑀯𑀦𑁆𑀢𑀺 𑀏𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀅𑀯𑀺𑀚𑁆𑀚𑀸𑀤𑀬𑁄 𑀘 𑀓𑀺𑀮𑁂𑀲𑀸 𑀆𑀲𑀯𑀸𑀦𑀁 𑀲𑀫𑁆𑀪𑀯𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋
‘‘𑀅𑀬𑁄𑀦𑀺𑀲𑁄, 𑀪𑀺𑀓𑁆𑀔𑀯𑁂, 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀆𑀲𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀆𑀲𑀯𑀸 𑀧𑀯𑀟𑁆𑀠𑀦𑁆𑀢𑀻’’𑀢𑀺 (𑀫. 𑀦𑀺. 𑁧.𑁧𑁫).
‘‘𑀅𑀯𑀺𑀚𑁆𑀚𑀸, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑀗𑁆𑀕𑀫𑀸 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑁆𑀯𑀤𑁂𑀯 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧’’𑀦𑁆𑀢𑀺 (𑀇𑀢𑀺𑀯𑀼. 𑁪𑁦) 𑀘.
𑀫𑀕𑁆𑀕𑀜𑁆𑀘 𑀔𑀬𑀕𑀸𑀫𑀺𑀦𑀦𑁆𑀢𑀺 𑀆𑀲𑀯𑀸𑀦𑀁 𑀔𑀬𑀕𑀸𑀫𑀺𑀦𑀁 𑀅𑀭𑀺𑀬𑀫𑀕𑁆𑀕𑀜𑁆𑀘. 𑀢𑀢𑁆𑀣 𑀓𑀸𑀫𑀸𑀲𑀯𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀳𑀻𑀬𑀢𑀺, 𑀪𑀯𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄 𑀘 𑀅𑀭𑀳𑀢𑁆𑀢𑀫𑀕𑁆𑀕𑁂𑀦. 𑀓𑀸𑀫𑀼𑀧𑀸𑀤𑀸𑀦𑀁 𑀯𑀺𑀬 𑀓𑀸𑀫𑀸𑀲𑀯𑁄𑀧𑀺 𑀅𑀕𑁆𑀕𑀫𑀕𑁆𑀕𑀯𑀚𑁆𑀛𑁄𑀢𑀺 𑀘 𑀯𑀤𑀦𑁆𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀝𑁆𑀞𑀫𑁂 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺.
𑀲𑀢𑁆𑀢𑀫𑀅𑀝𑁆𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁯. 𑀢𑀡𑁆𑀳𑀸𑀲𑀼𑀢𑁆𑀢𑀯𑀡𑁆𑀡𑀦𑀸
𑁫𑁮. 𑀦𑀯𑀫𑁂 𑀢𑀡𑁆𑀳𑀸𑀬𑀦𑀝𑁆𑀞𑁂𑀦 𑀢𑀡𑁆𑀳𑀸, 𑀭𑀽𑀧𑀸𑀤𑀺𑀯𑀺𑀲𑀬𑀁 𑀢𑀲𑀢𑀻𑀢𑀺 𑀯𑀸 𑀢𑀡𑁆𑀳𑀸. 𑀇𑀤𑀸𑀦𑀺 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀫𑀢𑀡𑁆𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄 𑀓𑀸𑀫𑀢𑀡𑁆𑀳𑀸. 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑁄 𑀛𑀸𑀦𑀦𑀺𑀓𑀦𑁆𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄 𑀪𑀯𑀯𑀲𑁂𑀦 𑀧𑀢𑁆𑀣𑀦𑀸 𑀘 𑀪𑀯𑀢𑀡𑁆𑀳𑀸. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄 𑀯𑀺𑀪𑀯𑀢𑀡𑁆𑀳𑀸. 𑀅𑀧𑀺𑀘 𑀧𑀘𑁆𑀙𑀺𑀫𑀢𑀡𑁆𑀳𑀸𑀤𑁆𑀯𑀬𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀲𑀩𑁆𑀩𑀸𑀧𑀺 𑀢𑀡𑁆𑀳𑀸 𑀓𑀸𑀫𑀢𑀡𑁆𑀳𑀸 𑀏𑀯. 𑀬𑀣𑀸𑀳 𑁋
‘‘𑀢𑀢𑁆𑀣 𑀓𑀢𑀫𑀸 𑀪𑀯𑀢𑀡𑁆𑀳𑀸? 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄 𑀲𑀸𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀯𑀢𑀡𑁆𑀳𑀸. 𑀢𑀢𑁆𑀣 𑀓𑀢𑀫𑀸 𑀯𑀺𑀪𑀯𑀢𑀡𑁆𑀳𑀸? 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄 𑀲𑀸𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀯𑀺𑀪𑀯𑀢𑀡𑁆𑀳𑀸. 𑀅𑀯𑀲𑁂𑀲𑀸 𑀢𑀡𑁆𑀳𑀸 𑀓𑀸𑀫𑀢𑀡𑁆𑀳𑀸’’𑀢𑀺 (𑀯𑀺𑀪. 𑁯𑁧𑁬).
𑀇𑀫𑀸 𑀘 𑀢𑀺𑀲𑁆𑀲𑁄 𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸𑀢𑀺 𑀯𑀺𑀲𑀬𑀪𑁂𑀤𑀢𑁄 𑀧𑀘𑁆𑀘𑁂𑀓𑀁 𑀙𑀩𑁆𑀩𑀺𑀥𑀸𑀢𑀺 𑀓𑀢𑁆𑀯𑀸 𑀅𑀝𑁆𑀞𑀸𑀭𑀲 𑀳𑁄𑀦𑁆𑀢𑀺. 𑀢𑀸 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀲𑀼 𑀅𑀝𑁆𑀞𑀸𑀭𑀲, 𑀩𑀳𑀺𑀤𑁆𑀥𑀸𑀭𑀽𑀧𑀸𑀤𑀻𑀲𑀼 𑀅𑀝𑁆𑀞𑀸𑀭𑀲𑀸𑀢𑀺 𑀙𑀢𑁆𑀢𑀺𑀁𑀲, 𑀇𑀢𑀺 𑀅𑀢𑀻𑀢𑀸 𑀙𑀢𑁆𑀢𑀺𑀁𑀲, 𑀅𑀦𑀸𑀕𑀢𑀸 𑀙𑀢𑁆𑀢𑀺𑀁𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀙𑀢𑁆𑀢𑀺𑀁𑀲𑀸𑀢𑀺 𑀯𑀺𑀪𑀸𑀕𑀢𑁄 𑀅𑀝𑁆𑀞𑀲𑀢𑀁 𑀳𑁄𑀦𑁆𑀢𑀺. 𑀧𑀼𑀦 𑀲𑀗𑁆𑀕𑀳𑁂 𑀓𑀭𑀺𑀬𑀫𑀸𑀦𑁂 𑀓𑀸𑀮𑀪𑁂𑀤𑀁 𑀅𑀦𑀸𑀫𑀲𑀺𑀢𑁆𑀯𑀸 𑀕𑀬𑁆𑀳𑀫𑀸𑀦𑀸 𑀙𑀢𑁆𑀢𑀺𑀁𑀲𑁂𑀯 𑀳𑁄𑀦𑁆𑀢𑀺, 𑀭𑀽𑀧𑀸𑀤𑀻𑀦𑀁 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀺𑀪𑀸𑀕𑁂 𑀅𑀓𑀭𑀺𑀬𑀫𑀸𑀦𑁂 𑀅𑀝𑁆𑀞𑀸𑀭𑀲𑁂𑀯, 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀯𑀺𑀪𑀸𑀕𑀫𑀢𑁆𑀢𑁂 𑀕𑀬𑁆𑀳𑀫𑀸𑀦𑁂 𑀙𑀴𑁂𑀯, 𑀆𑀭𑀫𑁆𑀫𑀡𑀯𑀺𑀪𑀸𑀕𑀫𑁆𑀧𑀺 𑀅𑀓𑀢𑁆𑀯𑀸 𑀕𑀬𑁆𑀳𑀫𑀸𑀦𑀸 𑀢𑀺𑀲𑁆𑀲𑁄𑀬𑁂𑀯 𑀳𑁄𑀦𑁆𑀢𑀻𑀢𑀺.
𑀕𑀸𑀣𑀸𑀲𑀼 𑀢𑀡𑁆𑀳𑀸𑀬𑁄𑀕𑁂𑀦𑀸𑀢𑀺 𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 𑀬𑁄𑀕𑁂𑀦, 𑀓𑀸𑀫𑀬𑁄𑀕𑁂𑀦, 𑀪𑀯𑀬𑁄𑀕𑁂𑀦 𑀘. 𑀲𑀁𑀬𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑀸, 𑀪𑀯𑀸𑀤𑀻𑀲𑀼 𑀲𑀁𑀬𑁄𑀚𑀺𑀢𑀸 𑀯𑀸. 𑀢𑁂𑀦𑁂𑀯𑀸𑀳 ‘‘𑀭𑀢𑁆𑀢𑀘𑀺𑀢𑁆𑀢𑀸 𑀪𑀯𑀸𑀪𑀯𑁂’’𑀢𑀺. 𑀔𑀼𑀤𑁆𑀤𑀓𑁂 𑀘𑁂𑀯 𑀫𑀳𑀦𑁆𑀢𑁂 𑀘 𑀪𑀯𑁂 𑀮𑀕𑁆𑀕𑀘𑀺𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀪𑀯𑁄𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺, 𑀅𑀪𑀯𑁄𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺. 𑀢𑀲𑁆𑀫𑀸 𑀪𑀯𑀸𑀪𑀯𑁂 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀻𑀲𑀼 𑀲𑀢𑁆𑀢𑀯𑀺𑀲𑀢𑁆𑀢𑀘𑀺𑀢𑁆𑀢𑀸𑀢𑀺. 𑀏𑀢𑁂𑀦 𑀪𑀯𑀢𑀡𑁆𑀳𑀸, 𑀯𑀺𑀪𑀯𑀢𑀡𑁆𑀳𑀸 𑀘 𑀤𑀲𑁆𑀲𑀺𑀢𑀸. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 ‘‘𑀢𑀡𑁆𑀳𑀸𑀬𑁄𑀕𑁂𑀦𑀸’’𑀢𑀺 𑀇𑀫𑀺𑀦𑀸 𑀓𑀸𑀫𑀢𑀡𑁆𑀳𑀸𑀯 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀬𑁄𑀕𑀬𑀼𑀢𑁆𑀢𑀸 𑀫𑀸𑀭𑀲𑁆𑀲𑀸𑀢𑀺 𑀢𑁂 𑀏𑀯𑀁𑀪𑀽𑀢𑀸 𑀧𑀼𑀕𑁆𑀕𑀮𑀸 𑀫𑀸𑀭𑀲𑁆𑀲 𑀧𑀸𑀲𑀲𑀗𑁆𑀔𑀸𑀢𑁂𑀦 𑀬𑁄𑀕𑁂𑀦 𑀬𑀼𑀢𑁆𑀢𑀸 𑀩𑀤𑁆𑀥𑀸. 𑀭𑀸𑀕𑁄 𑀳𑀺 𑀫𑀸𑀭𑀬𑁄𑀕𑁄 𑀫𑀸𑀭𑀧𑀸𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋
‘‘𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀧𑀸𑀲𑁄, 𑀬𑁆𑀯𑀸𑀬𑀁 𑀘𑀭𑀢𑀺 𑀫𑀸𑀦𑀲𑁄;
𑀢𑁂𑀦 𑀢𑀁 𑀩𑀸𑀥𑀬𑀺𑀲𑁆𑀲𑀸𑀫𑀺, 𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻’’𑀢𑀺. (𑀲𑀁. 𑀦𑀺. 𑁧.𑁧𑁫𑁧; 𑀫𑀳𑀸𑀯. 𑁩𑁩);
𑀘𑀢𑀽𑀳𑀺 𑀬𑁄𑀕𑁂𑀳𑀺 𑀅𑀦𑀼𑀧𑀤𑁆𑀤𑀼𑀢𑀢𑁆𑀢𑀸 𑀬𑁄𑀕𑀓𑁆𑀔𑁂𑀫𑀁, 𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁆𑀢𑀜𑁆𑀘, 𑀢𑀲𑁆𑀲 𑀅𑀦𑀥𑀺𑀕𑀫𑁂𑀦 𑀅𑀬𑁄𑀕𑀓𑁆𑀔𑁂𑀫𑀺𑀦𑁄. 𑀉𑀧𑀭𑀽𑀧𑀭𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀚𑀦𑀦𑀢𑁄 𑀚𑀦𑀸, 𑀧𑀸𑀡𑀺𑀦𑁄. 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀸 𑀯𑀺𑀲𑀢𑁆𑀢𑀸𑀢𑀺 𑀲𑀢𑁆𑀢𑀸.
‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;
𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. 𑁋
𑀏𑀯𑀁 𑀯𑀼𑀢𑁆𑀢𑀁 𑀔𑀦𑁆𑀥𑀸𑀤𑀻𑀦𑀁 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀲𑀁𑀲𑀸𑀭𑀁 𑀕𑀘𑁆𑀙𑀦𑁆𑀢𑀺, 𑀢𑀢𑁄 𑀦 𑀫𑀼𑀘𑁆𑀘𑀦𑁆𑀢𑀺. 𑀓𑀲𑁆𑀫𑀸? 𑀢𑀡𑁆𑀳𑀸𑀬𑁄𑀕𑀬𑀼𑀢𑁆𑀢𑀢𑁆𑀢𑀸. 𑀚𑀸𑀢𑀺𑀫𑀭𑀡𑀕𑀸𑀫𑀺𑀦𑁄 𑀧𑀼𑀦𑀧𑁆𑀧𑀼𑀦𑀁 𑀚𑀦𑀦𑀫𑀭𑀡𑀲𑁆𑀲𑁂𑀯 𑀉𑀧𑀕𑀫𑀦𑀲𑀻𑀮𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀯𑀝𑁆𑀝𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀘 𑀢𑀡𑁆𑀳𑀁 𑀧𑀳𑀦𑁆𑀢𑁆𑀯𑀸𑀦𑀸’’𑀢𑀺 𑀕𑀸𑀣𑀫𑀸𑀳. 𑀲𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯.
𑀦𑀯𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁧𑁦. 𑀫𑀸𑀭𑀥𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸
𑁫𑁯. 𑀤𑀲𑀫𑀲𑁆𑀲 𑀓𑀸 𑀉𑀧𑁆𑀧𑀢𑁆𑀢𑀺? 𑀏𑀓𑀤𑀺𑀯𑀲𑀁 𑀓𑀺𑀭 𑀲𑀢𑁆𑀣𑀸 𑀲𑁂𑀓𑁆𑀔𑀩𑀳𑀼𑀮𑀸𑀬 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀦𑀺𑀲𑀺𑀦𑁆𑀦𑁄 𑀢𑁂𑀲𑀁 𑀅𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀢𑁆𑀯𑀸 𑀉𑀧𑀭𑀺 𑀯𑀺𑀲𑁂𑀲𑀸𑀥𑀺𑀕𑀫𑀸𑀬 𑀉𑀲𑁆𑀲𑀸𑀳𑀁 𑀚𑀦𑁂𑀢𑀼𑀁 𑀅𑀲𑁂𑀓𑁆𑀔𑀪𑀽𑀫𑀺𑀁 𑀣𑁄𑀫𑁂𑀦𑁆𑀢𑁄 𑀇𑀤𑀁 𑀲𑀼𑀢𑁆𑀢𑀁 𑀅𑀪𑀸𑀲𑀺. 𑀢𑀢𑁆𑀣 𑀅𑀢𑀺𑀓𑁆𑀓𑀫𑁆𑀫𑀸𑀢𑀺𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀅𑀢𑀺𑀓𑁆𑀓𑀫𑁆𑀫 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸. 𑀫𑀸𑀭𑀥𑁂𑀬𑁆𑀬𑀁 𑀫𑀸𑀭𑀲𑁆𑀲 𑀯𑀺𑀲𑀬𑀁 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀁. 𑀆𑀤𑀺𑀘𑁆𑀘𑁄𑀯 𑀬𑀣𑀸 𑀆𑀤𑀺𑀘𑁆𑀘𑁄 𑀅𑀩𑁆𑀪𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑁄 𑀅𑀢𑁆𑀢𑀦𑁄 𑀇𑀤𑁆𑀥𑀺𑀬𑀸 𑀆𑀦𑀼𑀪𑀸𑀯𑁂𑀦 𑀢𑁂𑀚𑀲𑀸𑀢𑀺 𑀢𑀻𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦𑀪𑀁 𑀅𑀩𑁆𑀪𑀼𑀲𑁆𑀲𑀓𑁆𑀓𑀫𑀸𑀦𑁄 𑀲𑀩𑁆𑀩𑀁 𑀆𑀓𑀸𑀲𑀕𑀢𑀁 𑀢𑀫𑀁 𑀅𑀢𑀺𑀓𑁆𑀓𑀫𑁆𑀫 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀯𑀺𑀥𑀫𑀺𑀢𑁆𑀯𑀸 𑀯𑀺𑀭𑁄𑀘𑀢𑀺, 𑀑𑀪𑀸𑀲𑀢𑀺, 𑀢𑀧𑀢𑀺; 𑀏𑀯𑀫𑁂𑀯 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀼𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑁄 𑀫𑀸𑀭𑀥𑁂𑀬𑁆𑀬𑀲𑀗𑁆𑀔𑀸𑀢𑀁 𑀢𑁂𑀪𑀽𑀫𑀓𑀥𑀫𑁆𑀫𑀧𑁆𑀧𑀯𑀢𑁆𑀢𑀁 𑀅𑀪𑀺𑀪𑀯𑀺𑀢𑁆𑀯𑀸 𑀯𑀺𑀭𑁄𑀘𑀢𑀻𑀢𑀺.
𑀅𑀲𑁂𑀓𑁆𑀔𑁂𑀦𑀸𑀢𑀺 𑀏𑀢𑁆𑀣 𑀲𑀺𑀓𑁆𑀔𑀸𑀲𑀼 𑀚𑀸𑀢𑀸𑀢𑀺 𑀲𑁂𑀓𑁆𑀔𑀸, 𑀲𑀢𑁆𑀢𑀦𑁆𑀦𑀁 𑀲𑁂𑀓𑁆𑀔𑀸𑀦𑀁 𑀏𑀢𑁂𑀢𑀺 𑀯𑀸 𑀲𑁂𑀓𑁆𑀔𑀸, 𑀅𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑀢𑁆𑀢𑀸 𑀲𑀬𑀫𑁂𑀯 𑀲𑀺𑀓𑁆𑀔𑀦𑁆𑀢𑀻𑀢𑀺 𑀯𑀸 𑀲𑁂𑀓𑁆𑀔𑀸 𑀫𑀕𑁆𑀕𑀥𑀫𑁆𑀫𑀸 𑀳𑁂𑀝𑁆𑀞𑀺𑀫𑀨𑀮𑀢𑁆𑀢𑀬𑀥𑀫𑁆𑀫𑀸 𑀘. 𑀅𑀕𑁆𑀕𑀨𑀮𑀥𑀫𑁆𑀫𑀸 𑀧𑀦 𑀉𑀧𑀭𑀺 𑀲𑀺𑀓𑁆𑀔𑀺𑀢𑀩𑁆𑀩𑀸𑀪𑀸𑀯𑁂𑀦 𑀦 𑀲𑁂𑀓𑁆𑀔𑀸𑀢𑀺 𑀅𑀲𑁂𑀓𑁆𑀔𑀸. 𑀬𑀢𑁆𑀣 𑀳𑀺 𑀲𑁂𑀓𑁆𑀔𑀪𑀸𑀯𑀸𑀲𑀗𑁆𑀓𑀸 𑀅𑀢𑁆𑀣𑀺, 𑀢𑀢𑁆𑀣𑀸𑀬𑀁 𑀧𑀝𑀺𑀲𑁂𑀥𑁄𑀢𑀺 𑀮𑁄𑀓𑀺𑀬𑀥𑀫𑁆𑀫𑁂𑀲𑀼 𑀦𑀺𑀩𑁆𑀩𑀸𑀦𑁂 𑀘 𑀅𑀲𑁂𑀓𑁆𑀔𑀪𑀸𑀯𑀸𑀦𑀸𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀸 𑀳𑀺 𑀲𑀺𑀓𑁆𑀔𑀸 𑀅𑀢𑁆𑀢𑀦𑁄 𑀧𑀝𑀺𑀧𑀓𑁆𑀔𑀓𑀺𑀮𑁂𑀲𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀸 𑀉𑀧𑀓𑁆𑀓𑀺𑀮𑁂𑀲𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑀫𑁆𑀧𑀺 𑀅𑀦𑀼𑀧𑀕𑀫𑀦𑀢𑁄 𑀲𑀸𑀢𑀺𑀲𑀬𑀁 𑀲𑀺𑀓𑁆𑀔𑀸𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀸, 𑀅𑀝𑁆𑀞𑀲𑀼𑀧𑀺 𑀫𑀕𑁆𑀕𑀨𑀮𑁂𑀲𑀼 𑀯𑀺𑀚𑁆𑀚𑀦𑁆𑀢𑀺; 𑀢𑀲𑁆𑀫𑀸 𑀘𑀢𑀼𑀫𑀕𑁆𑀕𑀳𑁂𑀝𑁆𑀞𑀺𑀫𑀨𑀮𑀢𑁆𑀢𑀬𑀥𑀫𑁆𑀫𑀸 𑀯𑀺𑀬 𑀅𑀭𑀳𑀢𑁆𑀢𑀨𑀮𑀥𑀫𑁆𑀫𑀸𑀧𑀺 ‘‘𑀢𑀸𑀲𑀼 𑀲𑀺𑀓𑁆𑀔𑀸𑀲𑀼 𑀚𑀸𑀢𑀸’’𑀢𑀺 𑀘, 𑀢𑀁𑀲𑀺𑀓𑁆𑀔𑀸𑀲𑀫𑀗𑁆𑀕𑀺𑀦𑁄 𑀅𑀭𑀳𑀢𑁄 𑀇𑀢𑀭𑁂𑀲𑀁 𑀯𑀺𑀬 𑀲𑁂𑀓𑁆𑀔𑀢𑁆𑀢𑁂 𑀲𑀢𑀺 ‘‘𑀲𑁂𑀓𑁆𑀔𑀲𑁆𑀲 𑀏𑀢𑁂’’𑀢𑀺 𑀘 ‘‘𑀲𑀺𑀓𑁆𑀔𑀸 𑀲𑀻𑀮𑀁 𑀏𑀢𑁂𑀲’’𑀦𑁆𑀢𑀺 𑀘 𑀲𑁂𑀓𑁆𑀔𑀸𑀢𑀺 𑀆𑀲𑀗𑁆𑀓𑀸 𑀲𑀺𑀬𑀼𑀦𑁆𑀢𑀺 𑀢𑀤𑀸𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 𑀅𑀲𑁂𑀓𑁆𑀔𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁂𑀓𑁆𑀔𑀪𑀸𑀯𑀧𑁆𑀧𑀝𑀺𑀲𑁂𑀥𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀭𑀳𑀢𑁆𑀢𑀨𑀮𑁂 𑀧𑀯𑀢𑁆𑀢𑀫𑀸𑀦𑀸 𑀳𑀺 𑀲𑀺𑀓𑁆𑀔𑀸 𑀧𑀭𑀺𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀢𑁆𑀢𑀸 𑀦 𑀲𑀺𑀓𑁆𑀔𑀸𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺, 𑀓𑁂𑀯𑀮𑀁 𑀲𑀺𑀓𑁆𑀔𑀸𑀨𑀮𑀪𑀸𑀯𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀢𑀸 𑀦 𑀲𑀺𑀓𑁆𑀔𑀸𑀯𑀘𑀦𑀁 𑀅𑀭𑀳𑀦𑁆𑀢𑀺, 𑀦𑀸𑀧𑀺 𑀢𑀁𑀲𑀫𑀗𑁆𑀕𑀺𑀦𑁄 𑀲𑁂𑀓𑁆𑀔𑀯𑀘𑀦𑀁, 𑀦 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀲𑀺𑀓𑁆𑀔𑀦𑀲𑀻𑀮𑀸. ‘‘𑀲𑀺𑀓𑁆𑀔𑀸𑀲𑀼 𑀚𑀸𑀢𑀸’’𑀢𑀺 𑀏𑀯𑀫𑀸𑀤𑀺𑀅𑀢𑁆𑀣𑁂𑀳𑀺 𑀅𑀕𑁆𑀕𑀨𑀮𑀥𑀫𑁆𑀫𑀸 𑀲𑁂𑀓𑁆𑀔𑀸 𑀦 𑀳𑁄𑀦𑁆𑀢𑀺. 𑀳𑁂𑀝𑁆𑀞𑀺𑀫𑀨𑀮𑁂𑀲𑀼 𑀧𑀦 𑀲𑀺𑀓𑁆𑀔𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀯𑀺𑀧𑀲𑁆𑀲𑀦𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀪𑀸𑀯𑀢𑁄 𑀲𑀺𑀓𑁆𑀔𑀸𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀻𑀢𑀺 𑀲𑀺𑀓𑁆𑀔𑀸𑀯𑀘𑀦𑀁 𑀅𑀭𑀳𑀦𑁆𑀢𑀺, 𑀢𑀁𑀲𑀫𑀗𑁆𑀕𑀺𑀦𑁄 𑀘 𑀲𑁂𑀓𑁆𑀔𑀯𑀘𑀦𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀘 𑀲𑀺𑀓𑁆𑀔𑀦𑀲𑀻𑀮𑀸. 𑀲𑁂𑀓𑁆𑀔𑀥𑀫𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀳𑀺 𑀅𑀢𑁆𑀣𑁂𑀳𑀺 𑀲𑁂𑀓𑁆𑀔𑀸 𑀳𑁄𑀦𑁆𑀢𑀺𑀬𑁂𑀯.
𑀅𑀣 𑀯𑀸 𑀲𑁂𑀓𑁆𑀔𑀸𑀢𑀺 𑀅𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑀸𑀦𑀁 𑀯𑀘𑀦𑀦𑁆𑀢𑀺, 𑀅𑀲𑁂𑀓𑁆𑀔𑀸𑀢𑀺 𑀧𑀤𑀁 𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑀸𑀦𑀁 𑀤𑀲𑁆𑀲𑀦𑀦𑁆𑀢𑀺 𑀦 𑀮𑁄𑀓𑀺𑀬𑀥𑀫𑁆𑀫𑀦𑀺𑀩𑁆𑀩𑀸𑀦𑀸𑀦𑀁 𑀅𑀲𑁂𑀓𑁆𑀔𑀪𑀸𑀯𑀸𑀧𑀢𑁆𑀢𑀺. 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀸 𑀲𑁂𑀓𑁆𑀔𑀸 𑀅𑀲𑁂𑀓𑁆𑀔𑀸 𑀘 𑀲𑁂𑀓𑁆𑀔𑀥𑀫𑁆𑀫𑁂𑀲𑀼 𑀏𑀯 𑀓𑁂𑀲𑀜𑁆𑀘𑀺 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀸𑀦𑀁 𑀅𑀲𑁂𑀓𑁆𑀔𑀢𑀸 𑀆𑀧𑀚𑁆𑀚𑀢𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀥𑀫𑁆𑀫𑀸 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀸. 𑀬𑀣𑀸𑀯𑀼𑀢𑁆𑀢𑁂𑀳𑀺 𑀘 𑀅𑀢𑁆𑀣𑁂𑀳𑀺 𑀲𑁂𑀓𑁆𑀔𑀸𑀢𑀺 𑀓𑀢𑁆𑀯𑀸 𑀅𑀲𑁂𑀓𑁆𑀔𑀸 𑀆𑀧𑀦𑁆𑀦𑀸𑀢𑀺 𑀘𑁂? 𑀢𑀁 𑀦, 𑀲𑀤𑀺𑀲𑁂𑀲𑀼 𑀢𑀩𑁆𑀩𑁄𑀳𑀸𑀭𑀢𑁄. 𑀅𑀭𑀳𑀢𑁆𑀢𑀫𑀕𑁆𑀕𑀢𑁄 𑀳𑀺 𑀦𑀺𑀦𑁆𑀦𑀸𑀦𑀸𑀓𑀭𑀡𑀁 𑀅𑀭𑀳𑀢𑁆𑀢𑀨𑀮𑀁 𑀞𑀧𑁂𑀢𑁆𑀯𑀸 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀓𑀭𑀡𑀁 𑀯𑀺𑀧𑀸𑀓𑀪𑀸𑀯𑀜𑁆𑀘, 𑀢𑀲𑁆𑀫𑀸 𑀢𑁂 𑀏𑀯 𑀲𑁂𑀓𑁆𑀔𑀸 𑀥𑀫𑁆𑀫𑀸 𑀅𑀭𑀳𑀢𑁆𑀢𑀨𑀮𑀪𑀸𑀯𑀁 𑀆𑀧𑀦𑁆𑀦𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀓𑀼𑀲𑀮𑀲𑀼𑀔𑀢𑁄 𑀘 𑀯𑀺𑀧𑀸𑀓𑀲𑀼𑀔𑀁 𑀲𑀦𑁆𑀢𑀢𑀭𑀢𑀸𑀬 𑀧𑀡𑀻𑀢𑀢𑀭𑀦𑁆𑀢𑀺 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀸𑀯 𑀢𑁂 𑀥𑀫𑁆𑀫𑀸 𑀳𑁄𑀦𑁆𑀢𑀻𑀢𑀺 ‘‘𑀅𑀲𑁂𑀓𑁆𑀔𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺.
𑀢𑁂 𑀧𑀦 𑀅𑀲𑁂𑀓𑁆𑀔𑀥𑀫𑁆𑀫𑁂 𑀔𑀦𑁆𑀥𑀯𑀲𑁂𑀦 𑀇𑀥 𑀢𑀺𑀥𑀸 𑀯𑀺𑀪𑀚𑀺𑀢𑁆𑀯𑀸 𑀢𑁂𑀳𑀺 𑀲𑀫𑀦𑁆𑀦𑀸𑀕𑀫𑁂𑀦 𑀔𑀻𑀡𑀸𑀲𑀯𑀲𑁆𑀲 𑀆𑀦𑀼𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 𑀪𑀕𑀯𑀸 ‘‘𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀻𑀮𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄. 𑀔𑀦𑁆𑀥𑀲𑀤𑁆𑀤𑁄 𑀧𑀦 𑀭𑀸𑀲𑀺𑀫𑁆𑀳𑀺 𑀧𑀜𑁆𑀜𑀢𑁆𑀢𑀺𑀬𑀁 𑀭𑀼𑀴𑁆𑀳𑀺𑀬𑀁 𑀕𑀼𑀡𑁂𑀢𑀺 𑀩𑀳𑀽𑀲𑀼 𑀅𑀢𑁆𑀣𑁂𑀲𑀼 𑀤𑀺𑀝𑁆𑀞𑀧𑁆𑀧𑀬𑁄𑀕𑁄. 𑀢𑀣𑀸 𑀳𑀺 ‘‘𑀅𑀲𑀗𑁆𑀔𑁂𑀬𑁆𑀬𑁄 𑀅𑀧𑁆𑀧𑀫𑁂𑀬𑁆𑀬𑁄 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁫𑁧; 𑁬.𑁩𑁭) 𑀭𑀸𑀲𑀺𑀫𑁆𑀳𑀺 𑀆𑀕𑀢𑁄. ‘‘𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁨𑁪𑁧) 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁 𑀫𑀦𑁄 𑀫𑀦𑀸𑀬𑀢𑀦𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑁬𑁩, 𑁬𑁫) 𑀭𑀼𑀴𑁆𑀳𑀺𑀬𑀁. ‘‘𑀦 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀢𑀬𑁄 𑀔𑀦𑁆𑀥𑀸 𑀲𑀗𑁆𑀕𑀳𑀺𑀢𑀸, 𑀢𑀻𑀳𑀺 𑀘 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀔𑀦𑁆𑀥𑁂𑀳𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀗𑁆𑀕𑀳𑀺𑀢𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁬𑁨) 𑀕𑀼𑀡𑁂. 𑀇𑀥𑀸𑀧𑀺 𑀕𑀼𑀡𑁂𑀬𑁂𑀯 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 𑀅𑀲𑁂𑀓𑁆𑀔𑁂𑀦 𑀲𑀻𑀮𑀲𑀗𑁆𑀔𑀸𑀢𑁂𑀦 𑀕𑀼𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀫𑀦𑁆𑀦𑀸𑀕𑀢𑁄𑀢𑀺 𑀲𑀫𑁆𑀧𑀬𑀼𑀢𑁆𑀢𑁄 𑀲𑀫𑀗𑁆𑀕𑀻𑀪𑀽𑀢𑁄. 𑀲𑀫𑀸𑀤𑀳𑀢𑀺 𑀏𑀢𑁂𑀦, 𑀲𑀬𑀁 𑀯𑀸 𑀲𑀫𑀸𑀤𑀳𑀢𑀺, 𑀲𑀫𑀸𑀥𑀸𑀦𑀫𑁂𑀯 𑀯𑀸𑀢𑀺 𑀲𑀫𑀸𑀥𑀺. 𑀧𑀓𑀸𑀭𑁂𑀳𑀺 𑀚𑀸𑀦𑀸𑀢𑀺 𑀬𑀣𑀸𑀲𑀪𑀸𑀯𑀁 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀧𑀜𑁆𑀜𑀸. 𑀲𑀻𑀮𑀫𑁂𑀯 𑀔𑀦𑁆𑀥𑁄 𑀲𑀻𑀮𑀓𑁆𑀔𑀦𑁆𑀥𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.
𑀢𑀢𑁆𑀣 𑀅𑀕𑁆𑀕𑀨𑀮𑀪𑀽𑀢𑀸 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄 𑀘 𑀲𑀪𑀸𑀯𑁂𑀦𑁂𑀯 𑀅𑀲𑁂𑀓𑁆𑀔𑁄 𑀲𑀻𑀮𑀓𑁆𑀔𑀦𑁆𑀥𑁄 𑀦𑀸𑀫, 𑀢𑀣𑀸 𑀲𑀫𑁆𑀫𑀸𑀲𑀫𑀸𑀥𑀺 𑀅𑀲𑁂𑀓𑁆𑀔𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄. 𑀢𑀤𑀼𑀧𑀓𑀸𑀭𑀓𑀢𑁄 𑀧𑀦 𑀲𑀫𑁆𑀫𑀸𑀯𑀸𑀬𑀸𑀫𑀲𑀫𑁆𑀫𑀸𑀲𑀢𑀺𑀬𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀢𑀣𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀅𑀲𑁂𑀓𑁆𑀔𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀢𑀤𑀼𑀧𑀓𑀸𑀭𑀓𑀢𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀝𑁆𑀞𑀧𑀺 𑀅𑀭𑀳𑀢𑁆𑀢𑀨𑀮𑀥𑀫𑁆𑀫𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.
𑀬𑀲𑁆𑀲 𑀏𑀢𑁂 𑀲𑀼𑀪𑀸𑀯𑀺𑀢𑀸𑀢𑀺 𑀬𑁂𑀦 𑀅𑀭𑀳𑀢𑀸 𑀏𑀢𑁂 𑀲𑀻𑀮𑀸𑀤𑀬𑁄 𑀅𑀲𑁂𑀓𑁆𑀔𑀥𑀫𑁆𑀫𑀓𑁆𑀔𑀦𑁆𑀥𑀸 𑀲𑀼𑀪𑀸𑀯𑀺𑀢𑀸 𑀲𑀼𑀝𑁆𑀞𑀼 𑀯𑀟𑁆𑀠𑀺𑀢𑀸, 𑀲𑁄 𑀆𑀤𑀺𑀘𑁆𑀘𑁄𑀯 𑀯𑀺𑀭𑁄𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀲𑁆𑀲 𑀘𑁂𑀢𑁂’’𑀢𑀺𑀧𑀺 𑀧𑀞𑀦𑁆𑀢𑀺. 𑀢𑁂𑀲𑀜𑁆𑀘 𑀲𑀤𑁆𑀤𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀏𑀯𑀫𑁂𑀢𑀲𑁆𑀫𑀺𑀁 𑀯𑀕𑁆𑀕𑁂 𑀧𑀞𑀫𑀲𑀼𑀢𑁆𑀢𑁂 𑀯𑀝𑁆𑀝𑀁, 𑀧𑀭𑀺𑀬𑁄𑀲𑀸𑀦𑀲𑀼𑀢𑁆𑀢𑁂 𑀯𑀺𑀯𑀝𑁆𑀝𑀁, 𑀇𑀢𑀭𑁂𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.
𑀤𑀲𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁨. 𑀤𑀼𑀢𑀺𑀬𑀯𑀕𑁆𑀕𑁄
𑁧. 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸
𑁬𑁦. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀻𑀢𑀺 𑀧𑀼𑀚𑁆𑀚𑀪𑀯𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀁 𑀧𑀼𑀦𑀦𑁆𑀢𑀻𑀢𑀺 𑀯𑀸 𑀧𑀼𑀜𑁆𑀜𑀸𑀦𑀺, 𑀧𑀼𑀜𑁆𑀜𑀸𑀦𑀺 𑀘 𑀢𑀸𑀦𑀺 𑀳𑁂𑀢𑀼𑀧𑀘𑁆𑀘𑀬𑁂𑀳𑀺 𑀓𑀢𑁆𑀢𑀩𑁆𑀩𑀢𑁄 𑀓𑀺𑀭𑀺𑀬𑀸 𑀘𑀸𑀢𑀺 𑀧𑀼𑀜𑁆𑀜𑀓𑀺𑀭𑀺𑀬𑀸. 𑀢𑀸 𑀏𑀯 𑀘 𑀢𑁂𑀲𑀁 𑀢𑁂𑀲𑀁 𑀆𑀦𑀺𑀲𑀁𑀲𑀸𑀦𑀁 𑀯𑀢𑁆𑀣𑀼𑀪𑀸𑀯𑀢𑁄 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺. 𑀤𑀸𑀦𑀫𑀬𑀦𑁆𑀢𑀺 𑀅𑀦𑀼𑀧𑀘𑁆𑀙𑀺𑀦𑁆𑀦𑀪𑀯𑀫𑀽𑀮𑀲𑁆𑀲 𑀅𑀦𑀼𑀕𑁆𑀕𑀳𑀯𑀲𑁂𑀦 𑀧𑀽𑀚𑀸𑀯𑀲𑁂𑀦 𑀯𑀸 𑀅𑀢𑁆𑀢𑀦𑁄 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀭𑁂𑀲𑀁 𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸 𑀤𑀻𑀬𑀢𑀺 𑀏𑀢𑀸𑀬𑀸𑀢𑀺 𑀤𑀸𑀦𑀁, 𑀤𑀸𑀦𑀫𑁂𑀯 𑀤𑀸𑀦𑀫𑀬𑀁. 𑀘𑀻𑀯𑀭𑀸𑀤𑀻𑀲𑀼 𑀳𑀺 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀦𑁆𑀦𑀸𑀤𑀻𑀲𑀼 𑀯𑀸 𑀤𑀲𑀲𑀼 𑀤𑀸𑀦𑀯𑀢𑁆𑀣𑀽𑀲𑀼 𑀭𑀽𑀧𑀸𑀤𑀻𑀲𑀼 𑀯𑀸 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀢𑀁 𑀢𑀁 𑀤𑁂𑀦𑁆𑀢𑀲𑁆𑀲 𑀢𑁂𑀲𑀁 𑀉𑀧𑁆𑀧𑀸𑀤𑀦𑀢𑁄 𑀧𑀝𑁆𑀞𑀸𑀬 𑀧𑀼𑀩𑁆𑀩𑀪𑀸𑀕𑁂 𑀧𑀭𑀺𑀘𑁆𑀘𑀸𑀕𑀓𑀸𑀮𑁂 𑀧𑀘𑁆𑀙𑀸 𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑁂𑀦 𑀅𑀦𑀼𑀲𑁆𑀲𑀭𑀡𑁂 𑀘𑀸𑀢𑀺 𑀢𑀻𑀲𑀼 𑀓𑀸𑀮𑁂𑀲𑀼 𑀯𑀼𑀢𑁆𑀢𑀦𑀬𑁂𑀦 𑀧𑀯𑀢𑁆𑀢𑀘𑁂𑀢𑀦𑀸 𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀦𑀸𑀫.
𑀲𑀻𑀮𑀫𑀬𑀦𑁆𑀢𑀺 𑀦𑀺𑀘𑁆𑀘𑀲𑀻𑀮𑀉𑀧𑁄𑀲𑀣𑀦𑀺𑀬𑀫𑀸𑀤𑀺𑀯𑀲𑁂𑀦 𑀧𑀜𑁆𑀘, 𑀅𑀝𑁆𑀞, 𑀤𑀲 𑀯𑀸 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀦𑁆𑀢𑀲𑁆𑀲 𑀲𑀻𑀮𑀧𑀽𑀭𑀡𑀢𑁆𑀣𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀲𑁆𑀲 𑀧𑀩𑁆𑀩𑀚𑀦𑁆𑀢𑀲𑁆𑀲 𑀫𑀦𑁄𑀭𑀣𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 ‘‘𑀧𑀩𑁆𑀩𑀚𑀺𑀢𑁄 𑀯𑀢𑀫𑁆𑀳𑀺 𑀲𑀸𑀥𑀼 𑀲𑀼𑀝𑁆𑀞𑀽’’𑀢𑀺 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀲𑀤𑁆𑀥𑀸𑀬 𑀧𑀸𑀢𑀺𑀫𑁄𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑀲𑁆𑀲 𑀧𑀜𑁆𑀜𑀸𑀬 𑀘𑀻𑀯𑀭𑀸𑀤𑀺𑀓𑁂 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀲𑀢𑀺𑀬𑀸 𑀆𑀧𑀸𑀣𑀕𑀢𑁂𑀲𑀼 𑀭𑀽𑀧𑀸𑀤𑀻𑀲𑀼 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀦𑀺 𑀲𑀁𑀯𑀭𑀦𑁆𑀢𑀲𑁆𑀲 𑀯𑀻𑀭𑀺𑀬𑁂𑀦 𑀆𑀚𑀻𑀯𑀁 𑀲𑁄𑀥𑁂𑀦𑁆𑀢𑀲𑁆𑀲 𑀘 𑀧𑀯𑀢𑁆𑀢𑀸 𑀘𑁂𑀢𑀦𑀸 𑀲𑀻𑀮𑀢𑀻𑀢𑀺 𑀲𑀻𑀮𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀦𑀸𑀫.
𑀢𑀣𑀸 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁪𑁮) 𑀯𑀼𑀢𑁆𑀢𑁂𑀦 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂𑀦 𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀲𑁄𑀢𑀁, 𑀖𑀸𑀦𑀁, 𑀚𑀺𑀯𑁆𑀳𑀁, 𑀓𑀸𑀬𑀁, 𑀫𑀦𑀁. 𑀭𑀽𑀧𑁂…𑀧𑁂… 𑀥𑀫𑁆𑀫𑁂, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁. 𑀭𑀽𑀧𑀲𑀜𑁆𑀜𑀁…𑀧𑁂… 𑀥𑀫𑁆𑀫𑀲𑀜𑁆𑀜𑀁. 𑀚𑀭𑀸𑀫𑀭𑀡𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀬𑀸 𑀘𑁂𑀢𑀦𑀸, 𑀬𑀸 𑀘 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀸 𑀛𑀸𑀦𑀘𑁂𑀢𑀦𑀸, 𑀬𑀸 𑀘 𑀅𑀦𑀯𑀚𑁆𑀚𑁂𑀲𑀼 𑀓𑀫𑁆𑀫𑀸𑀬𑀢𑀦𑀲𑀺𑀧𑁆𑀧𑀸𑀬𑀢𑀦𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀲𑀼 𑀧𑀭𑀺𑀘𑀬𑀫𑀦𑀲𑀺𑀓𑀸𑀭𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀘𑁂𑀢𑀦𑀸, 𑀲𑀩𑁆𑀩𑀸 𑀪𑀸𑀯𑁂𑀢𑀺 𑀏𑀢𑀸𑀬𑀸𑀢𑀺 𑀪𑀸𑀯𑀦𑀸𑀫𑀬𑀁 𑀯𑀼𑀢𑁆𑀢𑀦𑀬𑁂𑀦 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀘𑀸𑀢𑀺.
𑀏𑀓𑀫𑁂𑀓𑀜𑁆𑀘𑁂𑀢𑁆𑀣 𑀬𑀣𑀸𑀭𑀳𑀁 𑀧𑀼𑀩𑁆𑀩𑀪𑀸𑀕𑀢𑁄 𑀧𑀝𑁆𑀞𑀸𑀬 𑀓𑀸𑀬𑁂𑀦 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺, 𑀢𑀤𑀢𑁆𑀣𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑀲𑁆𑀲 𑀯𑀘𑀻𑀓𑀫𑁆𑀫𑀁, 𑀓𑀸𑀬𑀗𑁆𑀕𑀁 𑀯𑀸𑀘𑀗𑁆𑀕𑀜𑁆𑀘 𑀅𑀘𑁄𑀧𑁂𑀢𑁆𑀯𑀸 𑀫𑀦𑀲𑀸 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀫𑀦𑁄𑀓𑀫𑁆𑀫𑀁. 𑀅𑀦𑁆𑀦𑀸𑀤𑀻𑀦𑀺 𑀤𑁂𑀦𑁆𑀢𑀲𑁆𑀲 𑀘𑀸𑀧𑀺 ‘‘𑀅𑀦𑁆𑀦𑀤𑀸𑀦𑀸𑀤𑀻𑀦𑀺 𑀤𑁂𑀫𑀻’’𑀢𑀺 𑀯𑀸 𑀤𑀸𑀦𑀧𑀸𑀭𑀫𑀺𑀁 𑀆𑀯𑀚𑁆𑀚𑁂𑀢𑁆𑀯𑀸 𑀯𑀸 𑀤𑀸𑀦𑀓𑀸𑀮𑁂 𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀳𑁄𑀢𑀺. 𑀯𑀢𑁆𑀢𑀲𑀻𑀲𑁂 𑀞𑀢𑁆𑀯𑀸 𑀤𑀤𑀢𑁄 𑀲𑀻𑀮𑀫𑀬𑀁, 𑀔𑀬𑀢𑁄 𑀯𑀬𑀢𑁄 𑀓𑀫𑁆𑀫𑀢𑁄 𑀲𑀫𑁆𑀫𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀤𑀤𑀢𑁄 𑀪𑀸𑀯𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀳𑁄𑀢𑀺.
𑀅𑀧𑀭𑀸𑀦𑀺𑀧𑀺 𑀲𑀢𑁆𑀢 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑁋 𑀅𑀧𑀘𑀺𑀢𑀺𑀲𑀳𑀕𑀢𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀯𑁂𑀬𑁆𑀬𑀸𑀯𑀘𑁆𑀘𑀲𑀳𑀕𑀢𑀁 𑀧𑀢𑁆𑀢𑀺𑀅𑀦𑀼𑀧𑁆𑀧𑀤𑀸𑀦𑀁 𑀅𑀩𑁆𑀪𑀦𑀼𑀫𑁄𑀤𑀦𑀁 𑀤𑁂𑀲𑀦𑀸𑀫𑀬𑀁 𑀲𑀯𑀦𑀫𑀬𑀁 𑀤𑀺𑀝𑁆𑀞𑀺𑀚𑀼𑀕𑀢𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀢𑀺. 𑀲𑀭𑀡𑀕𑀫𑀦𑀫𑁆𑀧𑀺 𑀳𑀺 𑀤𑀺𑀝𑁆𑀞𑀺𑀚𑀼𑀕𑀢𑁂𑀦𑁂𑀯 𑀲𑀗𑁆𑀕𑀬𑁆𑀳𑀢𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺.
𑀢𑀢𑁆𑀣 𑀯𑀼𑀟𑁆𑀠𑀢𑀭𑀁 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀸𑀪𑀺𑀯𑀸𑀤𑀦𑀫𑀕𑁆𑀕𑀲𑀫𑁆𑀧𑀤𑀸𑀦𑀸𑀤𑀺𑀯𑀲𑁂𑀦 𑀅𑀧𑀘𑀸𑀬𑀦𑀲𑀳𑀕𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀟𑁆𑀠𑀢𑀭𑀸𑀦𑀁 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀓𑀭𑀡𑀯𑀲𑁂𑀦, 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑀸𑀫𑁂 𑀪𑀺𑀓𑁆𑀔𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀉𑀧𑀲𑀁𑀳𑀭𑀡𑀯𑀲𑁂𑀦 ‘‘𑀕𑀘𑁆𑀙 𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑀁 𑀆𑀳𑀭𑀸’’𑀢𑀺 𑀲𑀼𑀢𑁆𑀯𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀧𑀢𑁆𑀢𑀸𑀳𑀭𑀡𑀸𑀤𑀺𑀯𑀲𑁂𑀦 𑀘 𑀯𑁂𑀬𑁆𑀬𑀸𑀯𑀘𑁆𑀘𑀲𑀳𑀕𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀤𑀢𑁆𑀯𑀸 𑀧𑀼𑀧𑁆𑀨𑀕𑀦𑁆𑀥𑀸𑀤𑀻𑀳𑀺 𑀭𑀢𑀦𑀢𑁆𑀢𑀬𑀲𑁆𑀲 𑀧𑀽𑀚𑀁 𑀓𑀢𑁆𑀯𑀸 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀁 𑀧𑀼𑀜𑁆𑀜𑀁 𑀓𑀢𑁆𑀯𑀸 ‘‘𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀢𑁆𑀢𑀺 𑀳𑁄𑀢𑀽’’𑀢𑀺 𑀧𑀭𑀺𑀡𑀸𑀫𑀯𑀲𑁂𑀦 𑀧𑀢𑁆𑀢𑀺𑀅𑀦𑀼𑀧𑁆𑀧𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀧𑀭𑁂𑀳𑀺 𑀤𑀺𑀦𑁆𑀦𑀸𑀬 𑀧𑀢𑁆𑀢𑀺𑀬𑀸 𑀓𑁂𑀯𑀮𑀁 𑀯𑀸 𑀧𑀭𑁂𑀳𑀺 𑀓𑀢𑀁 𑀧𑀼𑀜𑁆𑀜𑀁 ‘‘𑀲𑀸𑀥𑀼, 𑀲𑀼𑀝𑁆𑀞𑀽’’𑀢𑀺 𑀅𑀦𑀼𑀫𑁄𑀤𑀦𑀯𑀲𑁂𑀦 𑀅𑀩𑁆𑀪𑀦𑀼𑀫𑁄𑀤𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀧𑀕𑀼𑀡𑀥𑀫𑁆𑀫𑀁 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁄 𑀳𑀺𑀢𑀚𑁆𑀛𑀸𑀲𑀬𑁂𑀦 𑀧𑀭𑁂𑀲𑀁 𑀤𑁂𑀲𑁂𑀢𑀺 𑁋 𑀇𑀤𑀁 𑀤𑁂𑀲𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀦𑀸𑀫. 𑀬𑀁 𑀧𑀦 𑀏𑀓𑁄 ‘‘𑀏𑀯𑀁 𑀫𑀁 𑀥𑀫𑁆𑀫𑀓𑀣𑀺𑀓𑁄𑀢𑀺 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀇𑀘𑁆𑀙𑀸𑀬 𑀞𑀢𑁆𑀯𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀁 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺. ‘‘𑀅𑀤𑁆𑀥𑀸 𑀅𑀬𑀁 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀸𑀦𑀁 𑀧𑀝𑀺𑀧𑀚𑁆𑀚𑀦𑀽𑀧𑀸𑀬𑁄’’𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀼𑀭𑁂𑀘𑀸𑀭𑀺𑀓𑀳𑀺𑀢𑀨𑀭𑀡𑁂𑀦 𑀫𑀼𑀤𑀼𑀘𑀺𑀢𑁆𑀢𑁂𑀦 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀇𑀤𑀁 𑀲𑀯𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀳𑁄𑀢𑀺. 𑀬𑀁 𑀧𑀦𑁂𑀓𑁄 ‘‘𑀇𑀢𑀺 𑀫𑀁 𑀲𑀤𑁆𑀥𑁄𑀢𑀺 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀼𑀡𑀸𑀢𑀺, 𑀢𑀁 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀤𑀺𑀝𑁆𑀞𑀺𑀬𑀸 𑀉𑀚𑀼𑀕𑀫𑀦𑀁 𑀤𑀺𑀝𑁆𑀞𑀺𑀚𑀼𑀕𑀢𑀁, ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀲𑁆𑀲 𑀲𑀫𑁆𑀫𑀸𑀤𑀲𑁆𑀲𑀦𑀲𑁆𑀲 𑀏𑀢𑀁 𑀅𑀥𑀺𑀯𑀘𑀦𑀁. 𑀇𑀤𑀜𑁆𑀳𑀺 𑀧𑀼𑀩𑁆𑀩𑀪𑀸𑀕𑁂 𑀯𑀸 𑀧𑀘𑁆𑀙𑀸𑀪𑀸𑀕𑁂 𑀯𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀫𑁆𑀧𑀺 𑀉𑀚𑀼𑀓𑀭𑀡𑀓𑀸𑀮𑁂 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀳𑁄𑀢𑀺. 𑀅𑀧𑀭𑁂 𑀧𑀦𑀸𑀳𑀼 ‘‘𑀯𑀺𑀚𑀸𑀦𑀦𑀧𑀚𑀸𑀦𑀦𑀯𑀲𑁂𑀦 𑀤𑀲𑁆𑀲𑀦𑀁 𑀤𑀺𑀝𑁆𑀞𑀺 𑀓𑀼𑀲𑀮𑀜𑁆𑀘 𑀯𑀺𑀜𑁆𑀜𑀸𑀡𑀁 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀸𑀤𑀺 𑀘 𑀲𑀫𑁆𑀫𑀸𑀤𑀲𑁆𑀲𑀦’’𑀦𑁆𑀢𑀺. 𑀢𑀢𑁆𑀣 𑀓𑀼𑀲𑀮𑁂𑀦 𑀯𑀺𑀜𑁆𑀜𑀸𑀡𑁂𑀦 𑀜𑀸𑀡𑀲𑁆𑀲 𑀅𑀦𑀼𑀧𑁆𑀧𑀸𑀤𑁂𑀧𑀺 𑀅𑀢𑁆𑀢𑀦𑀸 𑀓𑀢𑀧𑀼𑀜𑁆𑀜𑀸𑀦𑀼𑀲𑁆𑀲𑀭𑀡𑀯𑀡𑁆𑀡𑀸𑀭𑀳𑀯𑀡𑁆𑀡𑀦𑀸𑀤𑀻𑀦𑀁 𑀲𑀗𑁆𑀕𑀳𑁄, 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑁂𑀦 𑀓𑀫𑁆𑀫𑀧𑀣𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸. 𑀇𑀢𑀭𑀁 𑀧𑀦 𑀤𑀺𑀝𑁆𑀞𑀺𑀚𑀼𑀕𑀢𑀁 𑀲𑀩𑁆𑀩𑁂𑀲𑀁 𑀦𑀺𑀬𑀫𑀮𑀓𑁆𑀔𑀡𑀁. 𑀬𑀜𑁆𑀳𑀺 𑀓𑀺𑀜𑁆𑀘𑀺 𑀧𑀼𑀜𑁆𑀜𑀁 𑀓𑀭𑁄𑀦𑁆𑀢𑀲𑁆𑀲 𑀤𑀺𑀝𑁆𑀞𑀺𑀬𑀸 𑀉𑀚𑀼𑀪𑀸𑀯𑁂𑀦𑁂𑀯 𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺.
𑀇𑀫𑁂𑀲𑀁 𑀧𑀦 𑀲𑀢𑁆𑀢𑀦𑁆𑀦𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀁 𑀧𑀼𑀭𑀺𑀫𑁂𑀳𑀺 𑀢𑀻𑀳𑀺 𑀤𑀸𑀦𑀫𑀬𑀸𑀤𑀻𑀳𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀳𑀺 𑀲𑀗𑁆𑀕𑀳𑁄. 𑀢𑀢𑁆𑀣 𑀳𑀺 𑀅𑀧𑀘𑀸𑀬𑀦𑀯𑁂𑀬𑁆𑀬𑀸𑀯𑀘𑁆𑀘𑀸𑀦𑀺 𑀲𑀻𑀮𑀫𑀬𑁂, 𑀧𑀢𑁆𑀢𑀺𑀅𑀦𑀼𑀧𑁆𑀧𑀤𑀸𑀦𑀅𑀩𑁆𑀪𑀦𑀼𑀫𑁄𑀤𑀦𑀸𑀦𑀺 𑀤𑀸𑀦𑀫𑀬𑁂, 𑀥𑀫𑁆𑀫𑀤𑁂𑀲𑀦𑀸𑀲𑀯𑀦𑀸𑀦𑀺 𑀪𑀸𑀯𑀦𑀸𑀫𑀬𑁂, 𑀤𑀺𑀝𑁆𑀞𑀺𑀚𑀼𑀕𑀢𑀁 𑀢𑀻𑀲𑀼𑀧𑀺. 𑀢𑁂𑀦𑀸𑀳 𑀪𑀕𑀯𑀸 𑁋
‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀤𑀸𑀦𑀫𑀬𑀁…𑀧𑁂… 𑀪𑀸𑀯𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽’’𑀢𑀺 (𑀅. 𑀦𑀺. 𑁮.𑁩𑁬).
𑀏𑀢𑁆𑀣 𑀘 𑀅𑀝𑁆𑀞𑀦𑁆𑀦𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸𑀦𑀁 𑀯𑀲𑁂𑀦 𑀢𑀺𑀡𑁆𑀡𑀫𑁆𑀧𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀁 𑀧𑀯𑀢𑁆𑀢𑀺 𑀳𑁄𑀢𑀺. 𑀬𑀣𑀸 𑀳𑀺 𑀧𑀕𑀼𑀡𑀁 𑀥𑀫𑁆𑀫𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲 𑀏𑀓𑀘𑁆𑀘𑁂 𑀅𑀦𑀼𑀲𑀦𑁆𑀥𑀺𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑀲𑁆𑀲𑁂𑀯 𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀧𑀕𑀼𑀡𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦𑀸𑀧𑀺 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑀢𑀺. 𑀲𑀩𑁆𑀩𑀁 𑀢𑀁 𑀧𑀦 𑀫𑀳𑀕𑁆𑀕𑀢𑀓𑀼𑀲𑀮𑀘𑁂𑀢𑀦𑀸𑀦𑀁 𑀯𑀲𑁂𑀦 𑀪𑀸𑀯𑀦𑀸𑀫𑀬𑀫𑁂𑀯 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀳𑁄𑀢𑀺, 𑀦 𑀇𑀢𑀭𑀸𑀦𑀺. 𑀕𑀸𑀣𑀸𑀬 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯.
𑀧𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁨. 𑀘𑀓𑁆𑀔𑀼𑀲𑀼𑀢𑁆𑀢𑀯𑀡𑁆𑀡𑀦𑀸
𑁬𑁧. 𑀤𑀼𑀢𑀺𑀬𑁂 𑀘𑀓𑁆𑀔𑀽𑀦𑀻𑀢𑀺 𑀘𑀓𑁆𑀔𑀦𑁆𑀢𑀻𑀢𑀺 𑀘𑀓𑁆𑀔𑀽𑀦𑀺, 𑀲𑀫𑀯𑀺𑀲𑀫𑀁 𑀆𑀘𑀺𑀓𑁆𑀔𑀦𑁆𑀢𑀸𑀦𑀺 𑀯𑀺𑀬 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀘𑀓𑁆𑀔𑀦𑀝𑁆𑀞𑁂𑀦 𑀘𑀓𑁆𑀔𑀽𑀦𑀺. 𑀓𑀺𑀫𑀺𑀤𑀁 𑀘𑀓𑁆𑀔𑀦𑀁 𑀦𑀸𑀫? 𑀅𑀲𑁆𑀲𑀸𑀤𑀦𑀁, 𑀢𑀣𑀸 𑀳𑀺 𑀯𑀤𑀦𑁆𑀢𑀺 ‘‘𑀫𑀥𑀼𑀁 𑀘𑀓𑁆𑀔𑀢𑀺 𑀩𑁆𑀬𑀜𑁆𑀚𑀦𑀁 𑀘𑀓𑁆𑀔𑀢𑀻’’𑀢𑀺 𑀇𑀫𑀸𑀦𑀺 𑀘 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀦𑁆𑀢𑀸𑀦𑀺 𑀅𑀲𑁆𑀲𑀸𑀤𑁂𑀦𑁆𑀢𑀸𑀦𑀺 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀘𑀓𑁆𑀔𑀦𑀝𑁆𑀞𑁂𑀦 𑀘𑀓𑁆𑀔𑀽𑀦𑀺. 𑀢𑀸𑀦𑀺 𑀧𑀦 𑀲𑀗𑁆𑀔𑁂𑀧𑀢𑁄 𑀤𑁆𑀯𑁂 𑀘𑀓𑁆𑀔𑀽𑀦𑀺 𑁋 𑀜𑀸𑀡𑀘𑀓𑁆𑀔𑀼, 𑀫𑀁𑀲𑀘𑀓𑁆𑀔𑀼 𑀘𑀸𑀢𑀺. 𑀢𑁂𑀲𑀼 𑀫𑀁𑀲𑀘𑀓𑁆𑀔𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀜𑀸𑀡𑀘𑀓𑁆𑀔𑀼 𑀤𑀺𑀩𑁆𑀩𑀘𑀓𑁆𑀔𑀼, 𑀧𑀜𑁆𑀜𑀸𑀘𑀓𑁆𑀔𑀽𑀢𑀺 𑀇𑀥 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀯𑀼𑀢𑁆𑀢𑀁.
𑀢𑀢𑁆𑀣 𑀤𑀺𑀩𑁆𑀩𑀘𑀓𑁆𑀔𑀽𑀢𑀺 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀁. 𑀤𑁂𑀯𑀢𑀸𑀦𑀜𑁆𑀳𑀺 𑀲𑀼𑀘𑀭𑀺𑀢𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀁 𑀧𑀺𑀢𑁆𑀢𑀲𑁂𑀫𑁆𑀳𑀭𑀼𑀳𑀺𑀭𑀸𑀤𑀻𑀳𑀺 𑀅𑀧𑀮𑀺𑀩𑀼𑀤𑁆𑀥𑀁 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀢𑀸𑀬 𑀤𑀽𑀭𑁂𑀧𑀺 𑀆𑀭𑀫𑁆𑀫𑀡𑀕𑁆𑀕𑀳𑀡𑀲𑀫𑀢𑁆𑀣𑀁 𑀤𑀺𑀩𑁆𑀩𑀁 𑀧𑀲𑀸𑀤𑀘𑀓𑁆𑀔𑀼 𑀳𑁄𑀢𑀺. 𑀇𑀤𑀜𑁆𑀘𑀸𑀧𑀺 𑀯𑀻𑀭𑀺𑀬𑀪𑀸𑀯𑀦𑀸𑀩𑀮𑀦𑀺𑀩𑁆𑀩𑀢𑁆𑀢𑀁 𑀜𑀸𑀡𑀘𑀓𑁆𑀔𑀼 𑀢𑀸𑀤𑀺𑀲𑀫𑁂𑀯𑀸𑀢𑀺 𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸 𑀤𑀺𑀩𑁆𑀩𑀁, 𑀤𑀺𑀩𑁆𑀩𑀯𑀺𑀳𑀸𑀭𑀯𑀲𑁂𑀦 𑀧𑀝𑀺𑀮𑀤𑁆𑀥𑀢𑁆𑀢𑀸 𑀅𑀢𑁆𑀢𑀦𑁄 𑀘 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀆𑀮𑁄𑀓𑀧𑀭𑀺𑀕𑁆𑀕𑀳𑁂𑀦 𑀫𑀳𑀸𑀚𑀼𑀢𑀺𑀓𑀢𑁆𑀢𑀸. 𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀕𑀢𑀭𑀽𑀧𑀤𑀲𑁆𑀲𑀦𑁂𑀦 𑀫𑀳𑀸𑀕𑀢𑀺𑀓𑀢𑁆𑀢𑀸𑀧𑀺 𑀤𑀺𑀩𑁆𑀩𑀁. 𑀢𑀁 𑀲𑀩𑁆𑀩𑀁 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀤𑀲𑁆𑀲𑀦𑀝𑁆𑀞𑁂𑀦 𑀘𑀓𑁆𑀔𑀼𑀓𑀺𑀘𑁆𑀘𑀓𑀭𑀡𑁂𑀦 𑀘𑀓𑁆𑀔𑀼𑀫𑀺𑀯𑀸𑀢𑀺𑀧𑀺 𑀘𑀓𑁆𑀔𑀼, 𑀤𑀺𑀩𑁆𑀩𑀜𑁆𑀘 𑀢𑀁 𑀘𑀓𑁆𑀔𑀼 𑀘𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼.
𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸. 𑀓𑀺𑀁 𑀧𑀚𑀸𑀦𑀸𑀢𑀺? 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀦𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋
‘‘𑀧𑀚𑀸𑀦𑀸𑀢𑀻𑀢𑀺 𑀔𑁄, 𑀆𑀯𑀼𑀲𑁄, 𑀢𑀲𑁆𑀫𑀸 𑀧𑀜𑁆𑀜𑀸𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘 𑀧𑀚𑀸𑀦𑀸𑀢𑀺? 𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺 (𑀫. 𑀦𑀺. 𑁧.𑁪𑁪𑁯).
𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀧𑀜𑁆𑀜𑀸𑀧𑀦𑀯𑀲𑁂𑀦 𑀧𑀜𑁆𑀜𑀸. 𑀓𑀺𑀦𑁆𑀢𑀺 𑀧𑀜𑁆𑀜𑀸𑀧𑁂𑀢𑀺? 𑀅𑀦𑀺𑀘𑁆𑀘𑀦𑁆𑀢𑀺 𑀧𑀜𑁆𑀜𑀸𑀧𑁂𑀢𑀺, 𑀤𑀼𑀓𑁆𑀔𑀦𑁆𑀢𑀺 𑀧𑀜𑁆𑀜𑀸𑀧𑁂𑀢𑀺, 𑀅𑀦𑀢𑁆𑀢𑀸𑀢𑀺 𑀧𑀜𑁆𑀜𑀸𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀸 𑀧𑀦𑀸𑀬𑀁 𑀮𑀓𑁆𑀔𑀡𑀸𑀤𑀺𑀢𑁄 𑀬𑀣𑀸𑀲𑀪𑀸𑀯𑀧𑀝𑀺𑀯𑁂𑀥𑀮𑀓𑁆𑀔𑀡𑀸, 𑀅𑀓𑁆𑀔𑀮𑀺𑀢𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀯𑀸 𑀓𑀼𑀲𑀮𑀺𑀲𑁆𑀲𑀸𑀲𑀔𑀺𑀢𑁆𑀢𑀉𑀲𑀼𑀧𑀝𑀺𑀯𑁂𑀥𑁄 𑀯𑀺𑀬, 𑀯𑀺𑀲𑀬𑁄𑀪𑀸𑀲𑀦𑀭𑀲𑀸 𑀧𑀤𑀻𑀧𑁄 𑀯𑀺𑀬, 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀅𑀭𑀜𑁆𑀜𑀕𑀢𑀲𑀼𑀤𑁂𑀲𑀓𑁄 𑀯𑀺𑀬. 𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀆𑀲𑀯𑀓𑁆𑀔𑀬𑀜𑀸𑀡𑀲𑀗𑁆𑀔𑀸𑀢𑀸 𑀧𑀜𑁆𑀜𑀸 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀝𑁆𑀞𑁂𑀦 𑀧𑀜𑁆𑀜𑀸𑀘𑀓𑁆𑀔𑀽𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁫).
𑀏𑀢𑁂𑀲𑀼 𑀘 𑀫𑀁𑀲𑀘𑀓𑁆𑀔𑀼 𑀧𑀭𑀺𑀢𑁆𑀢𑀁, 𑀤𑀺𑀩𑁆𑀩𑀘𑀓𑁆𑀔𑀼 𑀫𑀳𑀕𑁆𑀕𑀢𑀁, 𑀇𑀢𑀭𑀁 𑀅𑀧𑁆𑀧𑀫𑀸𑀡𑀁. 𑀫𑀁𑀲𑀘𑀓𑁆𑀔𑀼 𑀭𑀽𑀧𑀁, 𑀇𑀢𑀭𑀸𑀦𑀺 𑀅𑀭𑀽𑀧𑀸𑀦𑀺. 𑀫𑀁𑀲𑀘𑀓𑁆𑀔𑀼 𑀤𑀺𑀩𑁆𑀩𑀘𑀓𑁆𑀔𑀼 𑀘 𑀮𑁄𑀓𑀺𑀬𑀸𑀦𑀺 𑀲𑀸𑀲𑀯𑀸𑀦𑀺 𑀭𑀽𑀧𑀯𑀺𑀲𑀬𑀸𑀦𑀺, 𑀇𑀢𑀭𑀁 𑀮𑁄𑀓𑀼𑀢𑁆𑀢𑀭𑀁 𑀅𑀦𑀸𑀲𑀯𑀁 𑀘𑀢𑀼𑀲𑀘𑁆𑀘𑀯𑀺𑀲𑀬𑀁. 𑀫𑀁𑀲𑀘𑀓𑁆𑀔𑀼 𑀅𑀩𑁆𑀬𑀸𑀓𑀢𑀁, 𑀤𑀺𑀩𑁆𑀩𑀘𑀓𑁆𑀔𑀼 𑀲𑀺𑀬𑀸 𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁, 𑀢𑀣𑀸 𑀧𑀜𑁆𑀜𑀸𑀘𑀓𑁆𑀔𑀼. 𑀫𑀁𑀲𑀘𑀓𑁆𑀔𑀼 𑀓𑀸𑀫𑀸𑀯𑀘𑀭𑀁, 𑀤𑀺𑀩𑁆𑀩𑀘𑀓𑁆𑀔𑀼 𑀭𑀽𑀧𑀸𑀯𑀘𑀭𑀁, 𑀇𑀢𑀭𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀏𑀯𑀫𑀸𑀤𑀺 𑀯𑀺𑀪𑀸𑀕𑀸 𑀯𑁂𑀤𑀺𑀢𑀩𑁆𑀩𑀸.
𑀕𑀸𑀣𑀸𑀲𑀼 𑀅𑀦𑀼𑀢𑁆𑀢𑀭𑀦𑁆𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀆𑀲𑀯𑀓𑁆𑀔𑀬𑀜𑀸𑀡𑀪𑀸𑀯𑀢𑁄 𑀅𑀦𑀼𑀢𑁆𑀢𑀭𑀁. 𑀅𑀓𑁆𑀔𑀸𑀲𑀺 𑀧𑀼𑀭𑀺𑀲𑀼𑀢𑁆𑀢𑀫𑁄𑀢𑀺 𑀧𑀼𑀭𑀺𑀲𑀸𑀦𑀁 𑀉𑀢𑁆𑀢𑀫𑁄 𑀅𑀕𑁆𑀕𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀤𑁂𑀲𑁂𑀲𑀺. 𑀉𑀧𑁆𑀧𑀸𑀤𑁄𑀢𑀺 𑀫𑀁𑀲𑀘𑀓𑁆𑀔𑀼𑀲𑁆𑀲 𑀧𑀯𑀢𑁆𑀢𑀺. 𑀫𑀕𑁆𑀕𑁄𑀢𑀺 𑀉𑀧𑀸𑀬𑁄, 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀓𑀸𑀭𑀡𑀁. 𑀧𑀓𑀢𑀺𑀘𑀓𑁆𑀔𑀼𑀫𑀢𑁄 𑀏𑀯 𑀳𑀺 𑀤𑀺𑀩𑁆𑀩𑀘𑀓𑁆𑀔𑀼 𑀉𑀧𑁆𑀧𑀚𑁆𑀚𑀢𑀺, 𑀬𑀲𑁆𑀫𑀸 𑀓𑀲𑀺𑀡𑀸𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀦𑀁, 𑀲𑁄 𑀘 𑀓𑀲𑀺𑀡𑀫𑀡𑁆𑀟𑀮𑁂 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑁂𑀦 𑀯𑀺𑀦𑀸 𑀦𑀢𑁆𑀣𑀻𑀢𑀺. 𑀬𑀢𑁄𑀢𑀺 𑀬𑀤𑀸. 𑀜𑀸𑀡𑀦𑁆𑀢𑀺 𑀆𑀲𑀯𑀓𑁆𑀔𑀬𑀜𑀸𑀡𑀁. 𑀢𑁂𑀦𑁂𑀯𑀸𑀳 ‘‘𑀧𑀜𑁆𑀜𑀸𑀘𑀓𑁆𑀔𑀼 𑀅𑀦𑀼𑀢𑁆𑀢𑀭’’𑀦𑁆𑀢𑀺. 𑀬𑀲𑁆𑀲 𑀘𑀓𑁆𑀔𑀼𑀲𑁆𑀲 𑀧𑀝𑀺𑀮𑀸𑀪𑀸𑀢𑀺 𑀬𑀲𑁆𑀲 𑀅𑀭𑀺𑀬𑀲𑁆𑀲 𑀧𑀜𑁆𑀜𑀸𑀘𑀓𑁆𑀔𑀼𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀪𑀸𑀯𑀦𑀸𑀬 𑀲𑀩𑁆𑀩𑀲𑁆𑀫𑀸 𑀯𑀝𑁆𑀝𑀤𑀼𑀓𑁆𑀔𑀢𑁄 𑀧𑀫𑀼𑀘𑁆𑀘𑀢𑀺 𑀧𑀭𑀺𑀫𑀼𑀘𑁆𑀘𑀢𑀻𑀢𑀺.
𑀤𑀼𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁩. 𑀇𑀦𑁆𑀤𑁆𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸
𑁬𑁨. 𑀢𑀢𑀺𑀬𑁂 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀅𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀬𑀸𑀦𑀺 𑀳𑀺 𑀲𑀳𑀚𑀸𑀢𑀥𑀫𑁆𑀫𑁂𑀲𑀼 𑀇𑀲𑁆𑀲𑀭𑀸 𑀯𑀺𑀬 𑀳𑀼𑀢𑁆𑀯𑀸 𑀢𑁂𑀳𑀺 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑀸𑀦𑀺, 𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫. 𑀅𑀧𑀺𑀘 𑀇𑀦𑁆𑀤𑁄 𑀪𑀕𑀯𑀸 𑀥𑀫𑁆𑀫𑀺𑀲𑁆𑀲𑀭𑁄 𑀧𑀭𑀫𑁂𑀦 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀢𑁂𑀦 𑀇𑀦𑁆𑀤𑁂𑀦 𑀲𑀩𑁆𑀩𑀧𑀞𑀫𑀁 𑀤𑀺𑀝𑁆𑀞𑀢𑁆𑀢𑀸 𑀅𑀥𑀺𑀕𑀢𑀢𑁆𑀢𑀸 𑀧𑀭𑁂𑀲𑀜𑁆𑀘 𑀤𑀺𑀝𑁆𑀞𑀢𑁆𑀢𑀸 𑀤𑁂𑀲𑀺𑀢𑀢𑁆𑀢𑀸 𑀯𑀺𑀳𑀺𑀢𑀢𑁆𑀢𑀸 𑀕𑁄𑀘𑀭𑀪𑀸𑀯𑀦𑀸𑀲𑁂𑀯𑀦𑀸𑀳𑀺 𑀤𑀺𑀝𑁆𑀞𑀢𑁆𑀢𑀸 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀇𑀦𑁆𑀤𑀁 𑀯𑀸 𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀽𑀢𑀁 𑀧𑀼𑀜𑁆𑀜𑀓𑀫𑁆𑀫𑀁, 𑀢𑀲𑁆𑀲 𑀮𑀺𑀗𑁆𑀕𑀸𑀦𑀻𑀢𑀺𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 ‘‘𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀅𑀦𑀜𑁆𑀜𑀸𑀢𑀁 𑀅𑀦𑀥𑀺𑀕𑀢𑀁 𑀅𑀫𑀢𑀧𑀤𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀫𑁂𑀯 𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀧𑀦𑁆𑀦𑀲𑁆𑀲 𑀇𑀫𑀺𑀦𑀸 𑀧𑀼𑀩𑁆𑀩𑀪𑀸𑀕𑁂𑀦 𑀉𑀧𑁆𑀧𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀁, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀧𑀜𑁆𑀜𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀆𑀚𑀸𑀦𑀦𑀇𑀦𑁆𑀤𑁆𑀭𑀺𑀬𑀁. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀆𑀚𑀸𑀦𑀸𑀢𑀺 𑀧𑀞𑀫𑀫𑀕𑁆𑀕𑀜𑀸𑀡𑁂𑀦 𑀤𑀺𑀝𑁆𑀞𑀫𑀭𑀺𑀬𑀸𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀚𑀸𑀦𑀸𑀢𑀻𑀢𑀺 𑀅𑀜𑁆𑀜𑀸. 𑀬𑀣𑁂𑀯 𑀳𑀺 𑀧𑀞𑀫𑀫𑀕𑁆𑀕𑀧𑀜𑁆𑀜𑀸 𑀤𑀼𑀓𑁆𑀔𑀸𑀤𑀻𑀲𑀼 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀢𑀣𑁂𑀯 𑀅𑀬𑀫𑁆𑀧𑀺 𑀧𑀯𑀢𑁆𑀢𑀢𑀻𑀢𑀺 𑀅𑀜𑁆𑀜𑀸 𑀘 𑀲𑀸 𑀬𑀣𑀸𑀯𑀼𑀢𑁆𑀢𑁂𑀦𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀁 𑀘𑀸𑀢𑀺 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀆𑀚𑀸𑀦𑀦𑀝𑁆𑀞𑁂𑀦𑁂𑀯 𑀅𑀜𑁆𑀜𑀲𑁆𑀲 𑀯𑀸 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀲𑁄𑀢𑀸𑀧𑀢𑁆𑀢𑀺𑀨𑀮𑀢𑁄 𑀧𑀝𑁆𑀞𑀸𑀬 𑀙𑀲𑀼 𑀞𑀸𑀦𑁂𑀲𑀼 𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀜𑁆𑀜𑀸𑀢𑀸𑀯𑀺𑀦𑁄 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀦𑀺𑀝𑁆𑀞𑀺𑀢𑀜𑀸𑀡𑀓𑀺𑀘𑁆𑀘𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 𑀇𑀦𑁆𑀤𑁆𑀭𑀺𑀬𑀝𑁆𑀞𑀲𑀫𑁆𑀪𑀯𑀢𑁄 𑀘 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁. 𑀏𑀢𑁆𑀣 𑀘 𑀧𑀞𑀫𑀧𑀘𑁆𑀙𑀺𑀫𑀸𑀦𑀺 𑀧𑀞𑀫𑀫𑀕𑁆𑀕𑀘𑀢𑀼𑀢𑁆𑀣𑀨𑀮𑀯𑀲𑁂𑀦 𑀏𑀓𑀝𑁆𑀞𑀸𑀦𑀺𑀓𑀸𑀦𑀺, 𑀇𑀢𑀭𑀁 𑀇𑀢𑀭𑀫𑀕𑁆𑀕𑀨𑀮𑀯𑀲𑁂𑀦 𑀙𑀝𑁆𑀞𑀸𑀦𑀺𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.
𑀕𑀸𑀣𑀸𑀲𑀼 𑀲𑀺𑀓𑁆𑀔𑀫𑀸𑀦𑀲𑁆𑀲𑀸𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀬𑁄 𑀲𑀺𑀓𑁆𑀔𑀫𑀸𑀦𑀲𑁆𑀲 𑀪𑀸𑀯𑁂𑀦𑁆𑀢𑀲𑁆𑀲. 𑀉𑀚𑀼𑀫𑀕𑁆𑀕𑀸𑀦𑀼𑀲𑀸𑀭𑀺𑀦𑁄𑀢𑀺 𑀉𑀚𑀼𑀫𑀕𑁆𑀕𑁄 𑀯𑀼𑀘𑁆𑀘𑀢𑀺 𑀅𑀭𑀺𑀬𑀫𑀕𑁆𑀕𑁄, 𑀅𑀦𑁆𑀢𑀤𑁆𑀯𑀬𑀯𑀺𑀯𑀚𑁆𑀚𑀺𑀢𑀢𑁆𑀢𑀸 𑀢𑀲𑁆𑀲 𑀅𑀦𑀼𑀲𑁆𑀲𑀭𑀡𑀢𑁄 𑀉𑀚𑀼𑀫𑀕𑁆𑀕𑀸𑀦𑀼𑀲𑀸𑀭𑀺𑀦𑁄, 𑀧𑀝𑀺𑀧𑀸𑀝𑀺𑀬𑀸 𑀫𑀕𑁆𑀕𑁂 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀔𑀬𑀲𑁆𑀫𑀺𑀦𑁆𑀢𑀺 𑀅𑀦𑀯𑀲𑁂𑀲𑀓𑀺𑀮𑁂𑀲𑀸𑀦𑀁 𑀔𑁂𑀧𑀦𑀢𑁄 𑀔𑀬𑀲𑀗𑁆𑀔𑀸𑀢𑁂 𑀅𑀕𑁆𑀕𑀫𑀕𑁆𑀕𑁂 𑀜𑀸𑀡𑀁 𑀧𑀞𑀫𑀁 𑀧𑀼𑀭𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁄 𑀅𑀜𑁆𑀜𑀸 𑀅𑀦𑀦𑁆𑀢𑀭𑀸𑀢𑀺 𑀢𑀢𑁄 𑀫𑀕𑁆𑀕𑀜𑀸𑀡𑀢𑁄 𑀅𑀦𑀦𑁆𑀢𑀭𑀸 𑀅𑀭𑀳𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀣 𑀯𑀸 𑀉𑀚𑀼𑀫𑀕𑁆𑀕𑀸𑀦𑀼𑀲𑀸𑀭𑀺𑀦𑁄𑀢𑀺 𑀮𑀻𑀦𑀼𑀤𑁆𑀥𑀘𑁆𑀘𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀸𑀤𑀺𑀓𑁂 𑀯𑀚𑁆𑀚𑁂𑀢𑁆𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀓𑀢𑁆𑀯𑀸 𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑀁 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀅𑀦𑀼𑀕𑀘𑁆𑀙𑀦𑁆𑀢𑀲𑁆𑀲 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 𑀕𑁄𑀢𑁆𑀭𑀪𑀼𑀜𑀸𑀡𑀸𑀦𑀦𑁆𑀢𑀭𑀁 𑀤𑀺𑀝𑁆𑀞𑁂𑀓𑀝𑁆𑀞𑀸𑀦𑀁 𑀓𑀺𑀮𑁂𑀲𑀸𑀦𑀁 𑀔𑁂𑀧𑀦𑀢𑁄 𑀔𑀬𑀲𑁆𑀫𑀺𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀧𑀞𑀫𑀁 𑀜𑀸𑀡𑀁 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁄 𑀅𑀜𑁆𑀜𑀸 𑀅𑀦𑀦𑁆𑀢𑀭𑀸𑀢𑀺 𑀢𑀢𑁄 𑀧𑀞𑀫𑀜𑀸𑀡𑀢𑁄 𑀅𑀦𑀦𑁆𑀢𑀭𑀸 𑀅𑀦𑀦𑁆𑀢𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀫𑀕𑁆𑀕𑀸 𑀅𑀜𑁆𑀜𑀸 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺.
𑀢𑀢𑁄 𑀅𑀜𑁆𑀜𑀸 𑀯𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀢𑀢𑁄 𑀅𑀜𑁆𑀜𑀸 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀢𑁄 𑀧𑀘𑁆𑀙𑀸 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀸𑀦𑀦𑁆𑀢𑀭𑀸 𑀅𑀭𑀳𑀢𑁆𑀢𑀨𑀮𑁂𑀦 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑁂𑀦 𑀯𑀺𑀫𑀼𑀢𑁆𑀢𑀲𑁆𑀲. 𑀜𑀸𑀡𑀁 𑀯𑁂 𑀳𑁄𑀢𑀺 𑀢𑀸𑀤𑀺𑀦𑁄𑀢𑀺 𑀅𑀭𑀳𑀢𑁆𑀢𑀨𑀮𑀼𑀧𑁆𑀧𑀢𑁆𑀢𑀺𑀢𑁄 𑀉𑀢𑁆𑀢𑀭𑀓𑀸𑀮𑁂 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀻𑀲𑀼 𑀢𑀸𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀓𑀣𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀅𑀓𑀼𑀧𑁆𑀧𑀸 𑀫𑁂 𑀯𑀺𑀫𑀼𑀢𑁆𑀢𑀻’’𑀢𑀺. 𑀢𑀲𑁆𑀲 𑀅𑀓𑀼𑀧𑁆𑀧𑀪𑀸𑀯𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺 ‘‘𑀪𑀯𑀲𑀁𑀬𑁄𑀚𑀦𑀓𑁆𑀔𑀬𑀸’’𑀢𑀺.
𑀇𑀤𑀸𑀦𑀺 𑀢𑀸𑀤𑀺𑀲𑀁 𑀔𑀻𑀡𑀸𑀲𑀯𑀁 𑀣𑁄𑀫𑁂𑀦𑁆𑀢𑁄 ‘‘𑀲 𑀯𑁂 𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀦𑁆𑀦𑁄’’𑀢𑀺 𑀢𑀢𑀺𑀬𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀦𑁆𑀦𑁄𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀮𑁄𑀓𑀼𑀢𑁆𑀢𑀭𑀺𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀲𑀼𑀤𑁆𑀥𑁂𑀳𑀺𑀧𑀺 𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑁂𑀳𑀺 𑀲𑀤𑁆𑀥𑀸𑀤𑀻𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀭𑀺𑀧𑀼𑀡𑁆𑀡𑁄, 𑀢𑀢𑁄 𑀏𑀯 𑀘𑀓𑁆𑀔𑀸𑀤𑀻𑀳𑀺 𑀲𑀼𑀝𑁆𑀞𑀼 𑀯𑀽𑀧𑀲𑀦𑁆𑀢𑁂𑀳𑀺 𑀦𑀺𑀩𑁆𑀩𑀺𑀲𑁂𑀯𑀦𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀢𑁂𑀦𑀸𑀳 ‘‘𑀲𑀦𑁆𑀢𑁄’’𑀢𑀺, 𑀲𑀩𑁆𑀩𑀓𑀺𑀮𑁂𑀲𑀧𑀭𑀺𑀴𑀸𑀳𑀯𑀽𑀧𑀲𑀫𑁂𑀦 𑀉𑀧𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀺𑀧𑀤𑁂 𑀭𑀢𑁄𑀢𑀺 𑀦𑀺𑀩𑁆𑀩𑀸𑀦𑁂 𑀅𑀪𑀺𑀭𑀢𑁄 𑀅𑀥𑀺𑀫𑀼𑀢𑁆𑀢𑁄. 𑀏𑀢𑁆𑀣 𑀘 ‘‘𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀦𑁆𑀦𑁄’’𑀢𑀺 𑀏𑀢𑁂𑀦 𑀪𑀸𑀯𑀺𑀢𑀫𑀕𑁆𑀕𑀢𑀸, 𑀧𑀭𑀺𑀜𑁆𑀜𑀸𑀢𑀓𑁆𑀔𑀦𑁆𑀥𑀢𑀸 𑀘𑀲𑁆𑀲 𑀤𑀲𑁆𑀲𑀺𑀢𑀸. ‘‘𑀲𑀦𑁆𑀢𑁄’’𑀢𑀺 𑀏𑀢𑁂𑀦 𑀧𑀳𑀻𑀦𑀓𑀺𑀮𑁂𑀲𑀢𑀸, ‘‘𑀲𑀦𑁆𑀢𑀺𑀧𑀤𑁂 𑀭𑀢𑁄’’𑀢𑀺 𑀏𑀢𑁂𑀦 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑀢𑀸𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.
𑀢𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑁪. 𑀅𑀤𑁆𑀥𑀸𑀲𑀼𑀢𑁆𑀢𑀯𑀡𑁆𑀡𑀦𑀸
𑁬𑁩. 𑀘𑀢𑀼𑀢𑁆𑀣𑁂 𑀅𑀤𑁆𑀥𑀸𑀢𑀺 𑀓𑀸𑀮𑀸. 𑀅𑀢𑀻𑀢𑁄 𑀅𑀤𑁆𑀥𑀸𑀢𑀺𑀆𑀤𑀻𑀲𑀼 𑀤𑁆𑀯𑁂 𑀧𑀭𑀺𑀬𑀸𑀬𑀸 𑁋 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁄, 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁄 𑀘. 𑀢𑀢𑁆𑀣 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀧𑀝𑀺𑀲𑀦𑁆𑀥𑀺𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑁄 𑀅𑀤𑁆𑀥𑀸 𑀦𑀸𑀫, 𑀘𑀼𑀢𑀺𑀢𑁄 𑀧𑀘𑁆𑀙𑀸 𑀅𑀦𑀸𑀕𑀢𑁄 𑀅𑀤𑁆𑀥𑀸 𑀦𑀸𑀫, 𑀲𑀳 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀳𑀺 𑀢𑀤𑀦𑀦𑁆𑀢𑀭𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸 𑀦𑀸𑀫. 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀉𑀧𑁆𑀧𑀸𑀤𑁄, 𑀞𑀺𑀢𑀺, 𑀪𑀗𑁆𑀕𑁄𑀢𑀺 𑀇𑀫𑁂 𑀢𑀬𑁄 𑀔𑀡𑁂 𑀧𑀢𑁆𑀯𑀸 𑀦𑀺𑀭𑀼𑀤𑁆𑀥𑀥𑀫𑁆𑀫𑀸 𑀅𑀢𑀻𑀢𑁄 𑀅𑀤𑁆𑀥𑀸 𑀦𑀸𑀫, 𑀢𑀬𑁄𑀧𑀺 𑀔𑀡𑁂 𑀅𑀲𑀫𑁆𑀧𑀢𑁆𑀢𑀸 𑀅𑀦𑀸𑀕𑀢𑁄 𑀅𑀤𑁆𑀥𑀸 𑀦𑀸𑀫, 𑀔𑀡𑀢𑁆𑀢𑀬𑀲𑀫𑀗𑁆𑀕𑀺𑀦𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸 𑀦𑀸𑀫.
𑀅𑀧𑀭𑁄 𑀦𑀬𑁄 𑁋 𑀅𑀬𑀜𑁆𑀳𑀺 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑁄 𑀅𑀤𑁆𑀥𑀸𑀲𑀦𑁆𑀢𑀢𑀺𑀲𑀫𑀬𑀔𑀡𑀯𑀲𑁂𑀦 𑀘𑀢𑀼𑀥𑀸 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀲𑀼 𑀅𑀤𑁆𑀥𑀸𑀯𑀺𑀪𑀸𑀕𑁄 𑀯𑀼𑀢𑁆𑀢𑁄. 𑀲𑀦𑁆𑀢𑀢𑀺𑀯𑀲𑁂𑀦 𑀲𑀪𑀸𑀕𑀸 𑀏𑀓𑀉𑀢𑀼𑀲𑀫𑀼𑀝𑁆𑀞𑀸𑀦𑀸, 𑀏𑀓𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑀸 𑀘 𑀧𑀼𑀩𑁆𑀩𑀸𑀧𑀭𑀺𑀬𑀯𑀲𑁂𑀦 𑀯𑀢𑁆𑀢𑀫𑀸𑀦𑀸𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸. 𑀢𑀢𑁄 𑀧𑀼𑀩𑁆𑀩𑁂 𑀯𑀺𑀲𑀪𑀸𑀕𑀉𑀢𑀼𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸 𑀅𑀢𑀻𑀢𑀸 𑀧𑀘𑁆𑀙𑀸 𑀅𑀦𑀸𑀕𑀢𑀸. 𑀘𑀺𑀢𑁆𑀢𑀚𑀸 𑀏𑀓𑀯𑀻𑀣𑀺𑀏𑀓𑀚𑀯𑀦𑀏𑀓𑀲𑀫𑀸𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀦𑀸𑀫, 𑀢𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑀸, 𑀧𑀘𑁆𑀙𑀸 𑀅𑀦𑀸𑀕𑀢𑀸. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀁 𑀧𑀸𑀝𑀺𑀬𑁂𑀓𑁆𑀓𑀁 𑀲𑀦𑁆𑀢𑀢𑀺𑀯𑀲𑁂𑀦 𑀅𑀢𑀻𑀢𑀸𑀤𑀺𑀪𑁂𑀤𑁄 𑀦𑀢𑁆𑀣𑀺, 𑀢𑁂𑀲𑀁𑀬𑁂𑀯 𑀧𑀦 𑀉𑀢𑀼𑀆𑀳𑀸𑀭𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀯𑀲𑁂𑀦 𑀢𑀲𑁆𑀲 𑀅𑀢𑀻𑀢𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀬𑀯𑀲𑁂𑀦 𑀏𑀓𑀫𑀼𑀳𑀼𑀢𑁆𑀢𑀧𑀼𑀩𑁆𑀩𑀡𑁆𑀳𑀲𑀸𑀬𑀦𑁆𑀳𑀭𑀢𑁆𑀢𑀺𑀤𑀺𑀯𑀸𑀤𑀻𑀲𑀼 𑀲𑀫𑀬𑁂𑀲𑀼 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀢𑀁𑀢𑀁𑀲𑀫𑀬𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀦𑀸𑀫, 𑀢𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑀸, 𑀧𑀘𑁆𑀙𑀸 𑀅𑀦𑀸𑀕𑀢𑀸. 𑀅𑀬𑀁 𑀢𑀸𑀯 𑀭𑀽𑀧𑀥𑀫𑁆𑀫𑁂𑀲𑀼 𑀦𑀬𑁄. 𑀅𑀭𑀽𑀧𑀥𑀫𑁆𑀫𑁂𑀲𑀼 𑀧𑀦 𑀔𑀡𑀯𑀲𑁂𑀦 𑀉𑀧𑁆𑀧𑀸𑀤𑀸𑀤𑀺𑀓𑁆𑀔𑀡𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸, 𑀢𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑀸, 𑀧𑀘𑁆𑀙𑀸 𑀅𑀦𑀸𑀕𑀢𑀸. 𑀅𑀧𑀺𑀘 𑀅𑀢𑀺𑀓𑁆𑀓𑀦𑁆𑀢𑀳𑁂𑀢𑀼𑀧𑀘𑁆𑀘𑀬𑀓𑀺𑀘𑁆𑀘𑀸 𑀅𑀢𑀻𑀢𑀸, 𑀦𑀺𑀝𑁆𑀞𑀺𑀢𑀳𑁂𑀢𑀼𑀓𑀺𑀘𑁆𑀘𑀸 𑀅𑀦𑀺𑀝𑁆𑀞𑀺𑀢𑀧𑀘𑁆𑀘𑀬𑀓𑀺𑀘𑁆𑀘𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸, 𑀉𑀪𑀬𑀓𑀺𑀘𑁆𑀘𑀁 𑀅𑀲𑀫𑁆𑀧𑀢𑁆𑀢𑀸 𑀅𑀦𑀸𑀕𑀢𑀸. 𑀅𑀢𑁆𑀢𑀦𑁄 𑀯𑀸 𑀓𑀺𑀘𑁆𑀘𑀓𑁆𑀔𑀡𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀸, 𑀢𑀢𑁄 𑀧𑀼𑀩𑁆𑀩𑁂 𑀅𑀢𑀻𑀢𑀸, 𑀧𑀘𑁆𑀙𑀸 𑀅𑀦𑀸𑀕𑀢𑀸. 𑀏𑀢𑁆𑀣 𑀘 𑀔𑀡𑀸𑀤𑀺𑀓𑀣𑀸𑀯 𑀦𑀺𑀧𑁆𑀧𑀭𑀺𑀬𑀸𑀬𑀸, 𑀲𑁂𑀲𑀸 𑀧𑀭𑀺𑀬𑀸𑀬𑀸. 𑀅𑀬𑀜𑁆𑀳𑀺 𑀅𑀢𑀻𑀢𑀸𑀤𑀺𑀪𑁂𑀤𑁄 𑀦𑀸𑀫 𑀥𑀫𑁆𑀫𑀸𑀦𑀁 𑀳𑁄𑀢𑀺, 𑀦 𑀓𑀸𑀮𑀲𑁆𑀲. 𑀅𑀢𑀻𑀢𑀸𑀤𑀺𑀪𑁂𑀤𑁂 𑀧𑀦 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀓𑀸𑀮𑁄 𑀇𑀥 𑀢𑁂𑀦𑁂𑀯 𑀯𑁄𑀳𑀸𑀭𑁂𑀦 𑀅𑀢𑀻𑀢𑁄𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.
𑀕𑀸𑀣𑀸𑀲𑀼 𑀅𑀓𑁆𑀔𑁂𑀬𑁆𑀬𑀲𑀜𑁆𑀜𑀺𑀦𑁄𑀢𑀺 𑀏𑀢𑁆𑀣 𑀅𑀓𑁆𑀔𑀸𑀬𑀢𑀺, 𑀓𑀣𑀻𑀬𑀢𑀺, 𑀧𑀜𑁆𑀜𑀸𑀧𑀻𑀬𑀢𑀻𑀢𑀺 𑀅𑀓𑁆𑀔𑁂𑀬𑁆𑀬𑀁, 𑀓𑀣𑀸𑀯𑀢𑁆𑀣𑀼, 𑀅𑀢𑁆𑀣𑀢𑁄 𑀭𑀽𑀧𑀸𑀤𑀬𑁄 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋
‘‘𑀅𑀢𑀻𑀢𑀁 𑀯𑀸 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀓𑀣𑀁 𑀓𑀣𑁂𑀬𑁆𑀬, 𑀅𑀦𑀸𑀕𑀢𑀁 𑀯𑀸…𑀧𑁂… 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀓𑀣𑀁 𑀓𑀣𑁂𑀬𑁆𑀬𑀸’’𑀢𑀺 (𑀤𑀻. 𑀦𑀺. 𑁩.𑁩𑁦𑁫).
𑀢𑀣𑀸 𑁋
‘‘𑀬𑀁, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀁 𑀯𑀺𑀧𑀭𑀺𑀡𑀢𑀁, ‘𑀅𑀳𑁄𑀲𑀻’𑀢𑀺 𑀢𑀲𑁆𑀲 𑀲𑀗𑁆𑀔𑀸, ‘𑀅𑀳𑁄𑀲𑀻’𑀢𑀺 𑀢𑀲𑁆𑀲 𑀲𑀫𑀜𑁆𑀜𑀸, ‘𑀅𑀳𑁄𑀲𑀻’𑀢𑀺 𑀢𑀲𑁆𑀲 𑀧𑀜𑁆𑀜𑀢𑁆𑀢𑀺; 𑀦 𑀢𑀲𑁆𑀲 𑀲𑀗𑁆𑀔𑀸 𑀅𑀢𑁆𑀣𑀻𑀢𑀺, 𑀦 𑀢𑀲𑁆𑀲 𑀲𑀗𑁆𑀔𑀸 𑀪𑀯𑀺𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁩.𑁬𑁨) 𑁋
𑀏𑀯𑀁 𑀯𑀼𑀢𑁆𑀢𑁂𑀦 𑀦𑀺𑀭𑀼𑀢𑁆𑀢𑀺𑀧𑀣𑀲𑀼𑀢𑁆𑀢𑁂𑀦𑀧𑀺 𑀏𑀢𑁆𑀣 𑀅𑀢𑁆𑀣𑁄 𑀤𑀻𑀧𑁂𑀢𑀩𑁆𑀩𑁄. 𑀏𑀯𑀁 𑀓𑀣𑀸𑀯𑀢𑁆𑀣𑀼𑀪𑀸𑀯𑁂𑀦 𑀅𑀓𑁆𑀔𑁂𑀬𑁆𑀬𑀲𑀗𑁆𑀔𑀸𑀢𑁂 𑀔𑀦𑁆𑀥𑀧𑀜𑁆𑀘𑀓𑁂 𑀅𑀳𑀦𑁆𑀢𑀺 𑀘 𑀫𑀫𑀦𑁆𑀢𑀺 𑀘 𑀤𑁂𑀯𑁄𑀢𑀺 𑀘 𑀫𑀦𑀼𑀲𑁆𑀲𑁄𑀢𑀺 𑀘 𑀇𑀢𑁆𑀣𑀻𑀢𑀺 𑀘 𑀧𑀼𑀭𑀺𑀲𑁄𑀢𑀺 𑀘 𑀆𑀤𑀺𑀦𑀸 𑀧𑀯𑀢𑁆𑀢𑀲𑀜𑁆𑀜𑀸𑀯𑀲𑁂𑀦 𑀅𑀓𑁆𑀔𑁂𑀬𑁆𑀬𑀲𑀜𑁆𑀜𑀺𑀦𑁄, 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀲𑀢𑁆𑀢𑀧𑀼𑀕𑁆𑀕𑀮𑀸𑀤𑀺𑀲𑀜𑁆𑀜𑀺𑀦𑁄𑀢𑀺 𑀅𑀢𑁆𑀣𑁄. 𑀅𑀓𑁆𑀔𑁂𑀬𑁆𑀬𑀲𑁆𑀫𑀺𑀁 𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑁆𑀕𑀸𑀳𑀯𑀲𑁂𑀦 𑀧𑀢𑀺𑀝𑁆𑀞𑀺𑀢𑀸, 𑀭𑀸𑀕𑀸𑀤𑀺𑀯𑀲𑁂𑀦 𑀯𑀸 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀧𑀢𑀺𑀝𑁆𑀞𑀺𑀢𑀸. 𑀭𑀢𑁆𑀢𑁄 𑀳𑀺 𑀭𑀸𑀕𑀯𑀲𑁂𑀦 𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺, 𑀤𑀼𑀝𑁆𑀞𑁄 𑀤𑁄𑀲𑀯𑀲𑁂𑀦, 𑀫𑀽𑀴𑁆𑀳𑁄 𑀫𑁄𑀳𑀯𑀲𑁂𑀦, 𑀧𑀭𑀸𑀫𑀝𑁆𑀞𑁄 𑀤𑀺𑀝𑁆𑀞𑀺𑀯𑀲𑁂𑀦, 𑀣𑀸𑀫𑀕𑀢𑁄 𑀅𑀦𑀼𑀲𑀬𑀯𑀲𑁂𑀦, 𑀯𑀺𑀦𑀺𑀩𑀤𑁆𑀥𑁄 𑀫𑀸𑀦𑀯𑀲𑁂𑀦, 𑀅𑀦𑀺𑀝𑁆𑀞𑀗𑁆𑀕𑀢𑁄 𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦, 𑀯𑀺𑀓𑁆𑀔𑁂𑀧𑀕𑀢𑁄 𑀉𑀤𑁆𑀥𑀘𑁆𑀘𑀯𑀲𑁂𑀦 𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀻𑀢𑀺.
𑀅𑀓𑁆𑀔𑁂𑀬𑁆𑀬𑀁 𑀅𑀧𑀭𑀺𑀜𑁆𑀜𑀸𑀬𑀸𑀢𑀺 𑀢𑀁 𑀅𑀓𑁆𑀔𑁂𑀬𑁆𑀬𑀁 𑀢𑁂𑀪𑀽𑀫𑀓𑀥𑀫𑁆𑀫𑁂 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀅𑀧𑀭𑀺𑀚𑀸𑀦𑀺𑀢𑁆𑀯𑀸 𑀢𑀲𑁆𑀲 𑀅𑀧𑀭𑀺𑀚𑀸𑀦𑀦𑀳𑁂𑀢𑀼. 𑀬𑁄𑀕𑀫𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄𑀢𑀺 𑀫𑀭𑀡𑀲𑁆𑀲 𑀬𑁄𑀕𑀁 𑀢𑁂𑀦 𑀲𑀁𑀬𑁄𑀕𑀁 𑀉𑀧𑀕𑀘𑁆𑀙𑀦𑁆𑀢𑀺, 𑀦 𑀯𑀺𑀲𑀁𑀬𑁄𑀕𑀦𑁆𑀢𑀺 𑀅𑀢𑁆𑀣𑁄.
𑀅𑀣 𑀯𑀸 𑀬𑁄𑀕𑀦𑁆𑀢𑀺 𑀉𑀧𑀸𑀬𑀁, 𑀢𑁂𑀦 𑀬𑁄𑀚𑀺𑀢𑀁 𑀧𑀲𑀸𑀭𑀺𑀢𑀁 𑀫𑀸𑀭𑀲𑁂𑀦𑀝𑁆𑀞𑀸𑀦𑀺𑀬𑀁 𑀅𑀦𑀢𑁆𑀣𑀚𑀸𑀮𑀁 𑀓𑀺𑀮𑁂𑀲𑀚𑀸𑀮𑀜𑁆𑀘 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋
‘‘𑀦 𑀳𑀺 𑀦𑁄 𑀲𑀗𑁆𑀕𑀭𑀁 𑀢𑁂𑀦, 𑀫𑀳𑀸𑀲𑁂𑀦𑁂𑀦 𑀫𑀘𑁆𑀘𑀼𑀦𑀸’’𑀢𑀺. (𑀫. 𑀦𑀺. 𑁩.𑁨𑁭𑁨; 𑀚𑀸. 𑁨.𑁨𑁨.𑁧𑁨𑁧; 𑀦𑁂𑀢𑁆𑀢𑀺. 𑁧𑁦𑁩);
𑀏𑀢𑁆𑀢𑀸𑀯𑀢𑀸 𑀯𑀝𑁆𑀝𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀓𑁆𑀔𑁂𑀬𑁆𑀬𑀜𑁆𑀘 𑀧𑀭𑀺𑀜𑁆𑀜𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑁂, 𑀢𑁂𑀦 𑀅𑀓𑁆𑀔𑁂𑀬𑁆𑀬𑀧𑀭𑀺𑀚𑀸𑀦𑀦𑁂𑀦 𑀮𑀤𑁆𑀥𑀩𑁆𑀩𑀁 𑀯𑀓𑁆𑀔𑀫𑀸𑀦𑀫𑁂𑀯 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀧𑀭𑀺𑀜𑁆𑀜𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀲𑀳𑀺𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀤𑀼𑀓𑁆𑀔𑀦𑁆𑀢𑀺 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀺𑀢𑁆𑀯𑀸, 𑀢𑀧𑁆𑀧𑀝𑀺𑀩𑀤𑁆𑀥𑀓𑀺𑀮𑁂𑀲𑀧𑁆𑀧𑀳𑀸𑀦𑁂𑀦 𑀯𑀸 𑀢𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀧𑀭𑀺𑀜𑁆𑀜𑀸𑀦𑀁 𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸. 𑀅𑀓𑁆𑀔𑀸𑀢𑀸𑀭𑀁 𑀦 𑀫𑀜𑁆𑀜𑀢𑀻𑀢𑀺 𑀲𑀩𑁆𑀩𑀲𑁄 𑀫𑀜𑁆𑀜𑀦𑀸𑀦𑀁 𑀧𑀳𑀻𑀦𑀢𑁆𑀢𑀸 𑀔𑀻𑀡𑀸𑀲𑀯𑁄 𑀅𑀓𑁆𑀔𑀸𑀢𑀸𑀭𑀁 𑀦 𑀫𑀜𑁆𑀜𑀢𑀺, 𑀓𑀸𑀭𑀓𑀸𑀤𑀺𑀲𑀪𑀸𑀯𑀁 𑀓𑀺𑀜𑁆𑀘𑀺 𑀅𑀢𑁆𑀢𑀸𑀦𑀁 𑀦 𑀧𑀘𑁆𑀘𑁂𑀢𑀻𑀢𑀺 𑀅𑀢𑁆𑀣𑁄. 𑀨𑀼𑀝𑁆𑀞𑁄 𑀯𑀺𑀫𑁄𑀓𑁆𑀔𑁄 𑀫𑀦𑀲𑀸, 𑀲𑀦𑁆𑀢𑀺𑀧𑀤𑀫𑀦𑀼𑀢𑁆𑀢𑀭𑀦𑁆𑀢𑀺 𑀬𑀲𑁆𑀫𑀸 𑀲𑀩𑁆𑀩𑀲𑀗𑁆𑀔𑀢𑀯𑀺𑀫𑀼𑀢𑁆𑀢𑀢𑁆𑀢𑀸 ‘‘𑀯𑀺𑀫𑁄𑀓𑁆𑀔𑁄’’𑀢𑀺 𑀲𑀩𑁆𑀩𑀓𑀺𑀮𑁂𑀲𑀲𑀦𑁆𑀢𑀸𑀧𑀯𑀽𑀧𑀲𑀫𑀦𑀝𑁆𑀞𑀸𑀦𑀢𑀸𑀬 ‘‘𑀲𑀦𑁆𑀢𑀺𑀧𑀤’’𑀦𑁆𑀢𑀺 𑀮𑀤𑁆𑀥𑀦𑀸𑀫𑁄 𑀦𑀺𑀩𑁆𑀩𑀸𑀦𑀥𑀫𑁆𑀫𑁄 𑀨𑀼𑀝𑁆𑀞𑁄 𑀨𑀼𑀲𑀺𑀢𑁄 𑀧𑀢𑁆𑀢𑁄, 𑀢𑀲𑁆𑀫𑀸 𑀅𑀓𑁆𑀔𑀸𑀢𑀸𑀭𑀁 𑀦 𑀫𑀜𑁆𑀜𑀢𑀻𑀢𑀺. 𑀅𑀣 𑀯𑀸 ‘‘𑀧𑀭𑀺𑀜𑁆𑀜𑀸𑀬𑀸’’𑀢𑀺 𑀧𑀤𑁂𑀦 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀁 𑀲𑀫𑀼𑀤𑀬𑀲𑀘𑁆𑀘𑀲𑁆𑀲 𑀧𑀳𑀸𑀦𑀸𑀪𑀺𑀲𑀫𑀬𑀜𑁆𑀘 𑀯𑀢𑁆𑀯𑀸 𑀇𑀤𑀸𑀦𑀺 ‘‘𑀨𑀼𑀝𑁆𑀞𑁄 𑀯𑀺𑀫𑁄𑀓𑁆𑀔𑁄 𑀫𑀦𑀲𑀸, 𑀲𑀦𑁆𑀢𑀺𑀧𑀤𑀫𑀦𑀼𑀢𑁆𑀢𑀭’’𑀦𑁆𑀢𑀺 𑀇𑀫𑀺𑀦𑀸 𑀫𑀕𑁆𑀕𑀦𑀺𑀭𑁄𑀥𑀸𑀦𑀁 𑀪𑀸𑀯𑀦𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀁 𑀯𑀤𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀘𑁆𑀘𑀢𑀻𑀢𑀺 𑀯𑀺𑀫𑁄𑀓𑁆𑀔𑁄, 𑀅𑀭𑀺𑀬𑀫𑀕𑁆𑀕𑁄. 𑀲𑁄 𑀧𑀦𑀲𑁆𑀲 𑀫𑀕𑁆𑀕𑀘𑀺𑀢𑁆𑀢𑁂𑀦 𑀨𑀼𑀝𑁆𑀞𑁄 𑀨𑀼𑀲𑀺𑀢𑁄 𑀪𑀸𑀯𑀺𑀢𑁄, 𑀢𑁂𑀦𑁂𑀯 𑀅𑀦𑀼𑀢𑁆𑀢𑀭𑀁 𑀲𑀦𑁆𑀢𑀺𑀧𑀤𑀁 𑀦𑀺𑀩𑁆𑀩𑀸𑀦𑀁 𑀨𑀼𑀝𑁆𑀞𑀁 𑀨𑀼𑀲𑀺𑀢𑀁 𑀲𑀘𑁆𑀙𑀺𑀓𑀢𑀦𑁆𑀢𑀺.
𑀅𑀓𑁆𑀔𑁂𑀬𑁆𑀬𑀲𑀫𑁆𑀧𑀦𑁆𑀦𑁄𑀢𑀺 𑀅𑀓𑁆𑀔𑁂𑀬𑁆𑀬𑀦𑀺𑀫𑀺𑀢𑁆𑀢𑀁 𑀯𑀺𑀯𑀺𑀥𑀸𑀳𑀺 𑀯𑀺𑀧𑀢𑁆𑀢𑀻𑀳𑀺 𑀉𑀧𑀤𑁆𑀤𑀼𑀢𑁂 𑀮𑁄𑀓𑁂 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑀸𑀬 𑀢𑀢𑁄 𑀲𑀼𑀧𑀭𑀺𑀫𑀼𑀢𑁆𑀢𑁄 𑀅𑀓𑁆𑀔𑁂𑀬𑁆𑀬𑀧𑀭𑀺𑀜𑁆𑀜𑀸𑀪𑀺𑀦𑀺𑀩𑁆𑀩𑀢𑁆𑀢𑀸𑀳𑀺 𑀲𑀫𑁆𑀧𑀢𑁆𑀢𑀻𑀳𑀺 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄. 𑀲𑀗𑁆𑀔𑀸𑀬 𑀲𑁂𑀯𑀻𑀢𑀺 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀸 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑁂 𑀲𑀗𑁆𑀔𑀸𑀬 𑀧𑀭𑀺𑀢𑀼𑀮𑁂𑀢𑁆𑀯𑀸𑀯 𑀲𑁂𑀯𑀦𑀲𑀻𑀮𑁄, 𑀲𑀗𑁆𑀔𑀸𑀢𑀥𑀫𑁆𑀫𑀢𑁆𑀢𑀸 𑀘 𑀆𑀧𑀸𑀣𑀕𑀢𑀁 𑀲𑀩𑁆𑀩𑀫𑁆𑀧𑀺 𑀯𑀺𑀲𑀬𑀁 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀲𑁂𑀦 𑀲𑀗𑁆𑀔𑀸𑀬 𑀲𑁂𑀯𑀦𑀲𑀻𑀮𑁄. 𑀥𑀫𑁆𑀫𑀝𑁆𑀞𑁄𑀢𑀺 𑀅𑀲𑁂𑀓𑁆𑀔𑀥𑀫𑁆𑀫𑁂𑀲𑀼 𑀦𑀺𑀩𑁆𑀩𑀸𑀦𑀥𑀫𑁆𑀫𑁂 𑀏𑀯 𑀯𑀸 𑀞𑀺𑀢𑁄. 𑀯𑁂𑀤𑀕𑀽𑀢𑀺 𑀯𑁂𑀤𑀺𑀢𑀩𑁆𑀩𑀲𑁆𑀲 𑀘𑀢𑀼𑀲𑀘𑁆𑀘𑀲𑁆𑀲 𑀧𑀸𑀭𑀗𑁆𑀕𑀢𑀢𑁆𑀢𑀸 𑀯𑁂𑀤𑀕𑀽. 𑀏𑀯𑀁𑀕𑀼𑀡𑁄 𑀅𑀭𑀳𑀸 𑀪𑀯𑀸𑀤𑀻𑀲𑀼 𑀓𑀢𑁆𑀣𑀘𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀸𑀯𑀢𑁄 𑀫𑀦𑀼𑀲𑁆𑀲𑀤𑁂𑀯𑀸𑀢𑀺 𑀲𑀗𑁆𑀔𑁆𑀬𑀁 𑀦 𑀉𑀧𑁂𑀢𑀺, 𑀅𑀧𑀜𑁆𑀜𑀢𑁆𑀢𑀺𑀓𑀪𑀸𑀯𑀫𑁂𑀯 𑀕𑀘𑁆𑀙𑀢𑀻𑀢𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.
𑀘𑀢𑀼𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.