𑁪. 𑀘𑀢𑀼𑀓𑁆𑀓𑀦𑀺𑀧𑀸𑀢𑁄

𑁧. 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀬𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦. 𑀘𑀢𑀼𑀓𑁆𑀓𑀦𑀺𑀧𑀸𑀢𑀲𑁆𑀲 𑀧𑀞𑀫𑁂 𑀅𑀳𑀦𑁆𑀢𑀺 𑀅𑀢𑁆𑀢𑀦𑀺𑀤𑁆𑀤𑁂𑀲𑁄. 𑀬𑁄 𑀳𑀺 𑀧𑀭𑁄 𑀦 𑀳𑁄𑀢𑀺, 𑀲𑁄 𑀦𑀺𑀬𑀓𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑁄 𑀅𑀢𑁆𑀢𑀸 ‘‘𑀅𑀳’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀲𑁆𑀫𑀻𑀢𑀺 𑀧𑀝𑀺𑀚𑀸𑀦𑀦𑀸. 𑀬𑁄 𑀧𑀭𑀫𑀢𑁆𑀣𑀩𑁆𑀭𑀸𑀳𑁆𑀫𑀡𑀪𑀸𑀯𑁄 ‘‘𑀅𑀳’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁄, 𑀢𑀲𑁆𑀲 𑀅𑀢𑁆𑀢𑀦𑀺 𑀅𑀢𑁆𑀣𑀺𑀪𑀸𑀯𑀁 𑀧𑀝𑀺𑀚𑀸𑀦𑀦𑁆𑀢𑁄 𑀳𑀺 𑀲𑀢𑁆𑀣𑀸 ‘‘𑀅𑀲𑁆𑀫𑀻’’𑀢𑀺 𑀅𑀯𑁄𑀘. ‘‘𑀅𑀳𑀫𑀲𑁆𑀫𑀻’’𑀢𑀺 𑀘 𑀬𑀣𑀸 ‘‘𑀅𑀳𑀫𑀲𑁆𑀫𑀺 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸, 𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀘 𑀅𑀧𑁆𑀧𑀳𑀻𑀦𑀤𑀺𑀝𑁆𑀞𑀺𑀫𑀸𑀦𑀸𑀦𑀼𑀲𑀬𑀸 𑀧𑀼𑀣𑀼𑀚𑁆𑀚𑀦𑀸 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀫𑀸𑀦𑀫𑀜𑁆𑀜𑀦𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀅𑀪𑀺𑀯𑀤𑀦𑁆𑀢𑀺, 𑀦 𑀏𑀯𑀁 𑀯𑀼𑀢𑁆𑀢𑀁. 𑀲𑀩𑁆𑀩𑀲𑁄 𑀧𑀦 𑀧𑀳𑀻𑀦𑀤𑀺𑀝𑁆𑀞𑀺𑀫𑀸𑀦𑀸𑀦𑀼𑀲𑀬𑁄 𑀪𑀕𑀯𑀸 𑀲𑀫𑀜𑁆𑀜𑀁 𑀅𑀦𑀢𑀺𑀥𑀸𑀯𑀦𑁆𑀢𑁄 𑀮𑁄𑀓𑀲𑀫𑀜𑁆𑀜𑀸𑀦𑀼𑀭𑁄𑀥𑁂𑀦 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 𑀥𑀫𑁆𑀫𑀁 𑀧𑀢𑀺𑀝𑁆𑀞𑀧𑁂𑀦𑁆𑀢𑁄 𑀓𑁂𑀯𑀮𑀁 𑀢𑀸𑀤𑀺𑀲𑀲𑁆𑀲 𑀕𑀼𑀡𑀲𑁆𑀲 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀢𑀁 𑀧𑀝𑀺𑀚𑀸𑀦𑀦𑁆𑀢𑁄 ‘‘𑀅𑀳𑀫𑀲𑁆𑀫𑀻’’𑀢𑀺 𑀆𑀳. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀳𑁆𑀫𑀲𑁆𑀲 𑀘 𑀅𑀡𑀦𑀢𑁄 𑀩𑁆𑀭𑀸𑀳𑁆𑀫𑀡𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀅𑀳𑀁 𑀧𑀭𑀫𑀢𑁆𑀣𑀢𑁄 𑀩𑁆𑀭𑀸𑀳𑁆𑀫𑀡𑁄𑀲𑁆𑀫𑀻𑀢𑀺. 𑀪𑀕𑀯𑀸 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀼𑀡𑁆𑀡𑀲𑁆𑀲 𑀤𑀸𑀦𑀲𑀁𑀬𑀫𑀸𑀤𑀺𑀯𑀢𑀲𑀫𑀸𑀤𑀸𑀦𑀲𑁆𑀲 𑀦𑀺𑀭𑀯𑀲𑁂𑀲𑀸𑀬 𑀢𑀧𑀘𑀭𑀺𑀬𑀸𑀬 𑀧𑀸𑀭𑀁 𑀕𑀢𑁄 𑀲𑀫𑁆𑀫𑀤𑁂𑀯 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀲𑀓𑀮𑀯𑁂𑀤𑀦𑁆𑀢𑀕𑀽 𑀲𑀼𑀯𑀺𑀲𑀼𑀤𑁆𑀥𑀯𑀺𑀚𑁆𑀚𑀸𑀘𑀭𑀡𑁄 𑀲𑀩𑁆𑀩𑀣𑀸 𑀦𑀺𑀦𑁆𑀳𑀸𑀢𑀧𑀸𑀧𑀫𑀮𑁄 𑀅𑀦𑀼𑀢𑁆𑀢𑀭𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀢𑁆𑀢𑀸 𑀧𑀯𑀢𑁆𑀢𑀸, 𑀲𑀼𑀧𑀭𑀺𑀲𑀼𑀤𑁆𑀥𑀲𑁆𑀲 𑀘 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀯𑁂𑀤𑁂𑀢𑀸, 𑀢𑀲𑁆𑀫𑀸 𑀲𑀩𑁆𑀩𑀲𑁄 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀳𑁆𑀫𑀲𑁆𑀲 𑀘 𑀅𑀡𑀦𑀢𑁄 𑀓𑀣𑀦𑀢𑁄 𑀧𑀭𑀫𑀢𑁆𑀣𑁂𑀦 𑀩𑁆𑀭𑀸𑀳𑁆𑀫𑀡𑁄𑀢𑀺 𑀯𑀼𑀘𑁆𑀘𑀢𑀺.

𑀇𑀢𑀺 𑀪𑀕𑀯𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀢𑁆𑀢𑀦𑁄 𑀅𑀦𑀼𑀢𑁆𑀢𑀭𑀁 𑀩𑁆𑀭𑀸𑀳𑁆𑀫𑀡𑀪𑀸𑀯𑀁 𑀧𑀯𑁂𑀤𑁂𑀢𑁆𑀯𑀸 𑀬𑀸𑀦𑀺 𑀢𑀸𑀦𑀺 𑀩𑁆𑀭𑀸𑀳𑁆𑀫𑀡𑀤𑀸𑀦𑀸𑀤𑀻𑀦𑀺 𑀙 𑀓𑀫𑁆𑀫𑀸𑀦𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀜𑁆𑀜𑀸𑀧𑁂𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀲𑀼𑀧𑀭𑀺𑀲𑀼𑀤𑁆𑀥𑀸𑀦𑀁 𑀉𑀓𑁆𑀓𑀁𑀲𑀢𑁄 𑀅𑀢𑁆𑀢𑀦𑀺 𑀲𑀁𑀯𑀺𑀚𑁆𑀚𑀫𑀸𑀦𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀸𑀘𑀬𑁄𑀕𑁄’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀬𑀸𑀘𑀬𑁄𑀕𑁄𑀢𑀺 𑀬𑀸𑀘𑁂𑀳𑀺 𑀬𑀼𑀢𑁆𑀢𑁄. 𑀬𑀸𑀘𑀦𑁆𑀢𑀻𑀢𑀺 𑀬𑀸𑀘𑀸, 𑀬𑀸𑀘𑀓𑀸, 𑀢𑁂 𑀧𑀦𑁂𑀢𑁆𑀣 𑀯𑁂𑀦𑁂𑀬𑁆𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀳𑀺 ‘‘𑀤𑁂𑀲𑁂𑀢𑀼, 𑀪𑀦𑁆𑀢𑁂 𑀪𑀕𑀯𑀸, 𑀥𑀫𑁆𑀫𑀁; 𑀤𑁂𑀲𑁂𑀢𑀼, 𑀲𑀼𑀕𑀢𑁄, 𑀥𑀫𑁆𑀫’’𑀦𑁆𑀢𑀺 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀬𑀸𑀘𑀦𑁆𑀢𑀺. 𑀪𑀕𑀯𑀸 𑀘 𑀢𑁂𑀲𑀁 𑀇𑀘𑁆𑀙𑀸𑀯𑀺𑀖𑀸𑀢𑀁 𑀅𑀓𑀭𑁄𑀦𑁆𑀢𑁄 𑀬𑀣𑀸𑀭𑀼𑀘𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀥𑀫𑁆𑀫𑀤𑀸𑀦𑀁 𑀤𑁂𑀢𑀻𑀢𑀺 𑀬𑀸𑀘𑀬𑁄𑀕𑁄, 𑀲𑀤𑀸 𑀲𑀩𑁆𑀩𑀓𑀸𑀮𑀁 𑀢𑁂𑀳𑀺 𑀅𑀯𑀺𑀭𑀳𑀺𑀢𑁄. 𑀅𑀣 𑀯𑀸 𑀬𑀸𑀘𑀬𑁄𑀕𑁄𑀢𑀺 𑀬𑀸𑀘𑀦𑀬𑁄𑀕𑁆𑀕𑁄, 𑀅𑀥𑀺𑀧𑁆𑀧𑀸𑀬𑀧𑀽𑀭𑀡𑀢𑁄 𑀬𑀸𑀘𑀺𑀢𑀼𑀁 𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄 ‘‘𑀬𑀸𑀚𑀬𑁄𑀕𑁄’’𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣 𑀬𑀸𑀚𑁄 𑀯𑀼𑀘𑁆𑀘𑀢𑀺 𑀫𑀳𑀸𑀤𑀸𑀦𑀁, 𑀬𑀺𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀇𑀥 𑀧𑀦 𑀥𑀫𑁆𑀫𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁, 𑀬𑀸𑀚𑁂 𑀦𑀺𑀬𑀼𑀢𑁆𑀢𑁄𑀢𑀺 𑀬𑀸𑀚𑀬𑁄𑀕𑀸. 𑀲𑀤𑀸𑀢𑀺 𑀲𑀩𑁆𑀩𑀤𑀸, 𑀅𑀦𑀯𑀭𑀢𑀧𑁆𑀧𑀯𑀢𑁆𑀢𑀲𑀤𑁆𑀥𑀫𑁆𑀫𑀫𑀳𑀸𑀤𑀸𑀦𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑀸𑀚𑁂𑀦 𑀬𑁄𑀚𑁂𑀢𑀻𑀢𑀺𑀧𑀺 𑀬𑀸𑀚𑀬𑁄𑀕𑁄. 𑀢𑀺𑀯𑀺𑀥𑀤𑀸𑀦𑀲𑀗𑁆𑀔𑀸𑀢𑁂𑀦 𑀬𑀸𑀚𑁂𑀦 𑀲𑀢𑁆𑀢𑁂 𑀬𑀣𑀸𑀭𑀳𑀁 𑀬𑁄𑀚𑁂𑀢𑀺, 𑀢𑀢𑁆𑀣 𑀤𑀸𑀦𑁂 𑀦𑀺𑀬𑁄𑀚𑁂𑀢𑀻𑀢𑀺 𑀅𑀢𑁆𑀣𑁄. ‘‘𑀬𑀸𑀚𑀬𑁄𑀕𑁄 𑀲𑀢𑀢’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. 𑀧𑀬𑀢𑀧𑀸𑀡𑀻𑀢𑀺 𑀧𑀭𑀺𑀲𑀼𑀤𑁆𑀥𑀳𑀢𑁆𑀣𑁄. 𑀬𑁄 𑀳𑀺 𑀤𑀸𑀦𑀸𑀥𑀺𑀫𑀼𑀢𑁆𑀢𑁄 𑀆𑀫𑀺𑀲𑀤𑀸𑀦𑀁 𑀤𑁂𑀦𑁆𑀢𑁄 𑀲𑀓𑁆𑀓𑀘𑁆𑀘𑀁 𑀲𑀳𑀢𑁆𑀣𑁂𑀦 𑀤𑁂𑀬𑁆𑀬𑀥𑀫𑁆𑀫𑀁 𑀤𑀸𑀢𑀼𑀁 𑀲𑀤𑀸 𑀥𑁄𑀢𑀳𑀢𑁆𑀣𑁄𑀬𑁂𑀯 𑀳𑁄𑀢𑀺, 𑀲𑁄 ‘‘𑀧𑀬𑀢𑀧𑀸𑀡𑀻’’𑀢𑀺 𑀯𑀼𑀘𑁆𑀘𑀢𑀺. 𑀪𑀕𑀯𑀸𑀧𑀺 𑀥𑀫𑁆𑀫𑀤𑀸𑀦𑀸𑀥𑀺𑀫𑀼𑀢𑁆𑀢𑁄 𑀲𑀓𑁆𑀓𑀘𑁆𑀘𑀁 𑀲𑀩𑁆𑀩𑀓𑀸𑀮𑀁 𑀥𑀫𑁆𑀫𑀤𑀸𑀦𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀬𑀢𑀧𑀸𑀡𑀻’’𑀢𑀺. ‘‘𑀲𑀤𑀸’’𑀢𑀺 𑀘 𑀧𑀤𑀁 𑀇𑀫𑀺𑀦𑀸𑀧𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑀩𑁆𑀩𑀁 ‘‘𑀲𑀤𑀸 𑀧𑀬𑀢𑀧𑀸𑀡𑀻’’𑀢𑀺. 𑀅𑀯𑀺𑀪𑀸𑀕𑁂𑀦 𑀳𑀺 𑀲𑀢𑁆𑀣𑀸 𑀯𑁂𑀦𑁂𑀬𑁆𑀬𑀮𑁄𑀓𑀲𑁆𑀲 𑀲𑀤𑁆𑀥𑀫𑁆𑀫𑀤𑀸𑀦𑀁 𑀲𑀤𑀸 𑀲𑀩𑁆𑀩𑀓𑀸𑀮𑀁 𑀧𑀯𑀢𑁆𑀢𑁂𑀦𑁆𑀢𑁄 𑀢𑀢𑁆𑀣 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑀢𑀺.

𑀅𑀧𑀭𑁄 𑀦𑀬𑁄 𑁋 𑀬𑁄𑀕𑁄 𑀯𑀼𑀘𑁆𑀘𑀢𑀺 𑀪𑀸𑀯𑀦𑀸. 𑀬𑀣𑀸𑀳 ‘‘𑀬𑁄𑀕𑀸 𑀯𑁂 𑀚𑀸𑀬𑀢𑁂 𑀪𑀽𑀭𑀻’’𑀢𑀺 (𑀥. 𑀧. 𑁨𑁮𑁨). 𑀢𑀲𑁆𑀫𑀸 𑀬𑀸𑀚𑀬𑁄𑀕𑁄𑀢𑀺 𑀬𑀸𑀚𑀪𑀸𑀯𑀦𑀁, 𑀧𑀭𑀺𑀘𑁆𑀘𑀸𑀕𑀪𑀸𑀯𑀦𑀁 𑀅𑀦𑀼𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀪𑀕𑀯𑀸 𑀳𑀺 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀧𑀼𑀩𑁆𑀩𑁂 𑀩𑁄𑀥𑀺𑀲𑀢𑁆𑀢𑀪𑀽𑀢𑁄𑀧𑀺 𑀓𑀭𑀼𑀡𑀸𑀲𑀫𑀼𑀲𑁆𑀲𑀸𑀳𑀺𑀢𑁄 𑀅𑀦𑀯𑀲𑁂𑀲𑀢𑁄 𑀤𑀸𑀦𑀁 𑀧𑀭𑀺𑀩𑁆𑀭𑀽𑀳𑁂𑀦𑁆𑀢𑁄 𑀢𑀢𑁆𑀣 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀅𑀪𑀺𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺, 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸𑀧𑀺 𑀢𑀺𑀯𑀺𑀥𑀁 𑀤𑀸𑀦𑀁 𑀧𑀭𑀺𑀩𑁆𑀭𑀽𑀳𑁂𑀲𑀺 𑀯𑀺𑀲𑁂𑀲𑀢𑁄 𑀥𑀫𑁆𑀫𑀤𑀸𑀦𑀁, 𑀧𑀭𑁂𑀧𑀺 𑀢𑀢𑁆𑀣 𑀦𑀺𑀬𑁄𑀚𑁂𑀲𑀺. 𑀢𑀣𑀸 𑀳𑀺 𑀲𑁄 𑀯𑁂𑀦𑁂𑀬𑁆𑀬𑀬𑀸𑀘𑀓𑀸𑀦𑀁 𑀓𑀲𑁆𑀲𑀘𑀺 𑀲𑀭𑀡𑀸𑀦𑀺 𑀅𑀤𑀸𑀲𑀺, 𑀓𑀲𑁆𑀲𑀘𑀺 𑀧𑀜𑁆𑀘 𑀲𑀻𑀮𑀸𑀦𑀺, 𑀓𑀲𑁆𑀲𑀘𑀺 𑀤𑀲 𑀲𑀻𑀮𑀸𑀦𑀺, 𑀓𑀲𑁆𑀲𑀘𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁, 𑀓𑀲𑁆𑀲𑀘𑀺 𑀥𑀼𑀢𑀥𑀫𑁆𑀫𑁂, 𑀓𑀲𑁆𑀲𑀘𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺, 𑀓𑀲𑁆𑀲𑀘𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄, 𑀓𑀲𑁆𑀲𑀘𑀺 𑀧𑀜𑁆𑀘𑀸𑀪𑀺𑀜𑁆𑀜𑀸𑀬𑁄, 𑀘𑀢𑁆𑀢𑀸𑀭𑁄 𑀫𑀕𑁆𑀕𑁂, 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀏𑀯𑀫𑀸𑀤𑀺𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑁂𑀤𑀁 𑀕𑀼𑀡𑀥𑀦𑀁 𑀥𑀫𑁆𑀫𑀤𑀸𑀦𑀯𑀲𑁂𑀦 𑀬𑀣𑀸𑀥𑀺𑀧𑁆𑀧𑀸𑀬𑀁 𑀤𑁂𑀦𑁆𑀢𑁄 𑀧𑀭𑁂 𑀘 ‘‘𑀤𑁂𑀣𑀸’’𑀢𑀺 𑀦𑀺𑀬𑁄𑀚𑁂𑀦𑁆𑀢𑁄 𑀧𑀭𑀺𑀘𑁆𑀘𑀸𑀕𑀪𑀸𑀯𑀦𑀁 𑀧𑀭𑀺𑀩𑁆𑀭𑀽𑀳𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀭𑀺𑀘𑁆𑀘𑀸𑀕𑀪𑀸𑀯𑀦𑀁 𑀅𑀦𑀼𑀬𑀼𑀢𑁆𑀢𑁄’’𑀢𑀺.

𑀧𑀬𑀢𑀧𑀸𑀡𑀻𑀢𑀺 𑀯𑀸 𑀆𑀬𑀢𑀧𑀸𑀡𑀻, 𑀳𑀢𑁆𑀣𑀕𑀢𑀁 𑀓𑀺𑀜𑁆𑀘𑀺 𑀤𑀸𑀢𑀼𑀁 ‘‘𑀏𑀳𑀺 𑀕𑀡𑁆𑀳𑀸’’𑀢𑀺 𑀧𑀲𑀸𑀭𑀺𑀢𑀳𑀢𑁆𑀣𑁄 𑀯𑀺𑀬 𑀆𑀘𑀭𑀺𑀬𑀫𑀼𑀝𑁆𑀞𑀺𑀁 𑀅𑀓𑀢𑁆𑀯𑀸 𑀲𑀤𑁆𑀥𑀫𑁆𑀫𑀤𑀸𑀦𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀧𑀬𑀢𑀧𑀸𑀡𑀻𑀢𑀺 𑀯𑀸 𑀉𑀲𑁆𑀲𑀸𑀳𑀺𑀢𑀳𑀢𑁆𑀣𑁄, 𑀆𑀫𑀺𑀲𑀤𑀸𑀦𑀁 𑀤𑀸𑀢𑀼𑀁 𑀉𑀲𑁆𑀲𑀸𑀳𑀺𑀢𑀳𑀢𑁆𑀣𑁄 𑀯𑀺𑀬 𑀥𑀫𑁆𑀫𑀤𑀸𑀦𑁂 𑀓𑀢𑀼𑀲𑁆𑀲𑀸𑀳𑁄𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀺𑀫𑀤𑁂𑀳𑀥𑀭𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀲𑁂𑀦 𑀩𑁆𑀭𑀸𑀳𑁆𑀫𑀡𑀓𑀭𑀡𑀸𑀦𑀁 𑀥𑀫𑁆𑀫𑀸𑀦𑀁 𑀧𑀸𑀭𑀺𑀧𑀽𑀭𑀺𑀬𑀸 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑀥𑀸𑀭𑀻. 𑀅𑀯𑀼𑀲𑀺𑀢𑀯𑀢𑁄 𑀳𑀺 𑀯𑀲𑀮𑀓𑀭𑀡𑀸𑀦𑀁 𑀥𑀫𑁆𑀫𑀸𑀦𑀁 𑀅𑀧𑁆𑀧𑀳𑀸𑀦𑁂𑀦 𑀯𑀲𑀮𑀸𑀤𑀺𑀲𑀫𑀜𑁆𑀜𑀸 𑀕𑀢𑀺 𑀆𑀬𑀢𑀺𑀁 𑀕𑀩𑁆𑀪𑀲𑁂𑀬𑁆𑀬𑀸 𑀲𑀺𑀬𑀸. 𑀢𑁂𑀦 𑀪𑀕𑀯𑀸 𑀅𑀢𑁆𑀢𑀦𑁄 𑀅𑀘𑁆𑀘𑀦𑁆𑀢𑀯𑀼𑀲𑀺𑀢𑀩𑁆𑀭𑀸𑀳𑁆𑀫𑀡𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀦𑀼𑀢𑁆𑀢𑀭𑁄 𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑁄𑀢𑀺 𑀤𑀼𑀢𑁆𑀢𑀺𑀓𑀺𑀘𑁆𑀙𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀭𑁄𑀕𑀲𑁆𑀲 𑀢𑀺𑀓𑀺𑀘𑁆𑀙𑀦𑀢𑁄 𑀉𑀢𑁆𑀢𑀫𑁄 𑀪𑀺𑀲𑀓𑁆𑀓𑁄, 𑀅𑀜𑁆𑀜𑁂𑀳𑀺 𑀅𑀦𑀼𑀤𑁆𑀥𑀭𑀡𑀻𑀬𑀸𑀦𑀁 𑀭𑀸𑀕𑀸𑀤𑀺𑀲𑀮𑁆𑀮𑀸𑀦𑀁 𑀓𑀦𑁆𑀢𑀦𑀢𑁄 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀲𑀫𑀼𑀤𑁆𑀥𑀭𑀡𑀢𑁄 𑀉𑀢𑁆𑀢𑀫𑁄 𑀲𑀮𑁆𑀮𑀓𑀦𑁆𑀢𑀦𑀯𑁂𑀚𑁆𑀚𑁄. 𑀇𑀫𑀺𑀦𑀸 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀩𑁆𑀭𑀸𑀳𑁆𑀫𑀡𑀓𑀭𑀡𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀢𑀦𑀺 𑀧𑀢𑀺𑀝𑁆𑀞𑀺𑀢𑀸𑀦𑀁 𑀧𑀭𑀲𑀦𑁆𑀢𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑀦𑁂𑀦 𑀧𑀭𑁂𑀲𑀫𑁆𑀧𑀺 𑀩𑁆𑀭𑀸𑀳𑁆𑀫𑀡𑀓𑀭𑀡𑀫𑀸𑀳.

𑀢𑀲𑁆𑀲 𑀫𑁂 𑀢𑀼𑀫𑁆𑀳𑁂 𑀧𑀼𑀢𑁆𑀢𑀸𑀢𑀺 𑀢𑀲𑁆𑀲 𑀏𑀯𑀭𑀽𑀧𑀲𑁆𑀲 𑀫𑀫 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀧𑀼𑀢𑁆𑀢𑀸 𑀅𑀢𑁆𑀭𑀚𑀸 𑀳𑁄𑀣. 𑀑𑀭𑀲𑀸𑀢𑀺 𑀉𑀭𑀲𑀺 𑀲𑀫𑁆𑀩𑀦𑁆𑀥𑀸. 𑀬𑀣𑀸 𑀳𑀺 𑀲𑀢𑁆𑀢𑀸𑀦𑀁 𑀑𑀭𑀲𑀧𑀼𑀢𑁆𑀢𑀸 𑀅𑀢𑁆𑀭𑀚𑀸 𑀯𑀺𑀲𑁂𑀲𑁂𑀦 𑀧𑀺𑀢𑀼𑀲𑀦𑁆𑀢𑀓𑀲𑁆𑀲 𑀤𑀸𑀬𑀚𑁆𑀚𑀲𑁆𑀲 𑀪𑀸𑀕𑀺𑀦𑁄 𑀳𑁄𑀦𑁆𑀢𑀺, 𑀏𑀯𑀫𑁂𑀢𑁂𑀧𑀺 𑀅𑀭𑀺𑀬𑀧𑀼𑀕𑁆𑀕𑀮𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀥𑀫𑁆𑀫𑀲𑁆𑀲𑀯𑀦𑀦𑁆𑀢𑁂 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀸. 𑀢𑀲𑁆𑀲 𑀲𑀦𑁆𑀢𑀓𑀲𑁆𑀲 𑀯𑀺𑀫𑀼𑀢𑁆𑀢𑀺𑀲𑀼𑀔𑀲𑁆𑀲 𑀅𑀭𑀺𑀬𑀥𑀫𑁆𑀫𑀭𑀢𑀦𑀲𑁆𑀲 𑀘 𑀏𑀓𑀁𑀲𑀪𑀸𑀕𑀺𑀬𑀢𑀸𑀬 𑀑𑀭𑀲𑀸. 𑀅𑀣 𑀯𑀸 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀦𑀼𑀪𑀸𑀯𑁂𑀦 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀫𑀸𑀦𑀸 𑀑𑀓𑁆𑀓𑀦𑁆𑀢𑀸 𑀘 𑀅𑀭𑀺𑀬𑀲𑀸𑀯𑀓𑀸 𑀲𑀢𑁆𑀣𑀼 𑀉𑀭𑁂 𑀯𑀸𑀬𑀸𑀫𑀚𑀦𑀺𑀢𑀸𑀪𑀺𑀚𑀸𑀢𑀺𑀢𑀸𑀬 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 ‘‘𑀑𑀭𑀲𑀧𑀼𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺. 𑀢𑀣𑀸 𑀳𑀺 𑀢𑁂 𑀪𑀕𑀯𑀢𑀸 𑀆𑀲𑀬𑀸𑀦𑀼𑀲𑀬𑀘𑀭𑀺𑀬𑀸𑀥𑀺𑀫𑀼𑀢𑁆𑀢𑀺𑀆𑀤𑀺𑀯𑁄𑀮𑁄𑀓𑀦𑁂𑀦 𑀯𑀚𑁆𑀚𑀸𑀦𑀼𑀘𑀺𑀦𑁆𑀢𑀦𑁂𑀦 𑀘 𑀳𑀤𑀬𑁂 𑀓𑀢𑁆𑀯𑀸 𑀯𑀚𑁆𑀚𑀢𑁄 𑀦𑀺𑀯𑀸𑀭𑁂𑀢𑁆𑀯𑀸 𑀅𑀦𑀯𑀚𑁆𑀚𑁂 𑀧𑀢𑀺𑀝𑁆𑀞𑀧𑁂𑀦𑁆𑀢𑁂𑀦 𑀲𑀻𑀮𑀸𑀤𑀺𑀥𑀫𑁆𑀫𑀲𑀭𑀻𑀭𑀧𑁄𑀲𑀦𑁂𑀦 𑀲𑀁𑀯𑀟𑁆𑀠𑀺𑀢𑀸. 𑀫𑀼𑀔𑀢𑁄 𑀚𑀸𑀢𑀸𑀢𑀺 𑀫𑀼𑀔𑀢𑁄 𑀚𑀸𑀢𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀢𑁆𑀢𑀸 𑀫𑀼𑀔𑀢𑁄 𑀚𑀸𑀢𑀸. 𑀅𑀣 𑀯𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁄 𑀲𑀩𑁆𑀩𑀲𑁆𑀲 𑀓𑀼𑀲𑀮𑀥𑀫𑁆𑀫𑀲𑁆𑀲 𑀫𑀼𑀔𑀢𑁄 𑀧𑀸𑀢𑀺𑀫𑁄𑀓𑁆𑀔𑀢𑁄 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀢𑁄 𑀯𑀺𑀫𑁄𑀓𑁆𑀔𑀫𑀼𑀔𑀢𑁄 𑀯𑀸 𑀅𑀭𑀺𑀬𑀫𑀕𑁆𑀕𑀚𑀸𑀢𑀺𑀬𑀸 𑀚𑀸𑀢𑀸𑀢𑀺𑀧𑀺 𑀫𑀼𑀔𑀢𑁄 𑀚𑀸𑀢𑀸. 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑁂 𑀲𑀸𑀲𑀦𑀥𑀫𑁆𑀫𑁂 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑁂 𑀯𑀸 𑀚𑀸𑀢𑀸𑀢𑀺 𑀥𑀫𑁆𑀫𑀚𑀸. 𑀢𑁂𑀦𑁂𑀯 𑀥𑀫𑁆𑀫𑁂𑀦 𑀦𑀺𑀫𑁆𑀫𑀺𑀢𑀸 𑀫𑀸𑀧𑀺𑀢𑀸𑀢𑀺 𑀥𑀫𑁆𑀫𑀦𑀺𑀫𑁆𑀫𑀺𑀢𑀸. 𑀲𑀢𑀺𑀥𑀫𑁆𑀫𑀯𑀺𑀘𑀬𑀸𑀤𑀺 𑀥𑀫𑁆𑀫𑀤𑀸𑀬𑀸𑀤𑀸, 𑀦 𑀮𑀸𑀪𑀲𑀓𑁆𑀓𑀸𑀭𑀸𑀤𑀺 𑀆𑀫𑀺𑀲𑀤𑀸𑀬𑀸𑀤𑀸, 𑀥𑀫𑁆𑀫𑀤𑀸𑀬𑀸𑀤𑀸 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸 𑀳𑁄𑀣𑀸𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑀥𑀫𑁆𑀫𑁄 𑀤𑀼𑀯𑀺𑀥𑁄 𑁋 𑀦𑀺𑀧𑁆𑀧𑀭𑀺𑀬𑀸𑀬𑀥𑀫𑁆𑀫𑁄, 𑀧𑀭𑀺𑀬𑀸𑀬𑀥𑀫𑁆𑀫𑁄𑀢𑀺. 𑀆𑀫𑀺𑀲𑀫𑁆𑀧𑀺 𑀤𑀼𑀯𑀺𑀥𑀁 𑁋 𑀦𑀺𑀧𑁆𑀧𑀭𑀺𑀬𑀸𑀬𑀸𑀫𑀺𑀲𑀁, 𑀧𑀭𑀺𑀬𑀸𑀬𑀸𑀫𑀺𑀲𑀦𑁆𑀢𑀺. 𑀓𑀣𑀁? 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑁆𑀧𑀪𑁂𑀤𑁄 𑀳𑀺 𑀦𑀯𑀯𑀺𑀥𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀦𑀺𑀧𑁆𑀧𑀭𑀺𑀬𑀸𑀬𑀥𑀫𑁆𑀫𑁄, 𑀦𑀺𑀩𑁆𑀩𑀢𑁆𑀢𑀺𑀢𑀥𑀫𑁆𑀫𑁄𑀬𑁂𑀯, 𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀓𑀸𑀭𑀡𑁂𑀦 𑀯𑀸 𑀮𑁂𑀲𑁂𑀦 𑀯𑀸 𑀥𑀫𑁆𑀫𑁄. 𑀬𑀁 𑀧𑀦𑀺𑀤𑀁 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀺𑀢𑀁 𑀓𑀼𑀲𑀮𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀥𑁂𑀓𑀘𑁆𑀘𑁄 𑀯𑀺𑀯𑀝𑁆𑀝𑀁 𑀧𑀢𑁆𑀣𑁂𑀦𑁆𑀢𑁄 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀲𑀫𑀸𑀤𑀺𑀬𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺, 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀯𑀢𑁆𑀣𑀼𑀧𑀽𑀚𑀁 𑀓𑀭𑁄𑀢𑀺, 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀤𑁂𑀲𑁂𑀢𑀺, 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀏𑀯𑀁 𑀓𑀭𑁄𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀧𑀝𑀺𑀮𑀪𑀢𑀺, 𑀅𑀬𑀁 𑀧𑀭𑀺𑀬𑀸𑀬𑀥𑀫𑁆𑀫𑁄. 𑀢𑀣𑀸 𑀘𑀻𑀯𑀭𑀸𑀤𑀬𑁄 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀦𑀺𑀧𑁆𑀧𑀭𑀺𑀬𑀸𑀬𑀸𑀫𑀺𑀲𑀫𑁂𑀯, 𑀦 𑀅𑀜𑁆𑀜𑁂𑀦 𑀧𑀭𑀺𑀬𑀸𑀬𑁂𑀦 𑀯𑀸 𑀓𑀸𑀭𑀡𑁂𑀦 𑀯𑀸 𑀮𑁂𑀲𑁂𑀦 𑀯𑀸 𑀆𑀫𑀺𑀲𑀁. 𑀬𑀁 𑀧𑀦𑀺𑀤𑀁 𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀥𑁂𑀓𑀘𑁆𑀘𑁄 𑀯𑀝𑁆𑀝𑀁 𑀧𑀢𑁆𑀣𑁂𑀦𑁆𑀢𑁄 𑀲𑀫𑁆𑀧𑀢𑁆𑀢𑀺𑀪𑀯𑀁 𑀇𑀘𑁆𑀙𑀫𑀸𑀦𑁄 𑀤𑀸𑀦𑀁 𑀤𑁂𑀢𑀺…𑀧𑁂… 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀏𑀯𑀁 𑀓𑀭𑁄𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄 𑀧𑀝𑀺𑀮𑀪𑀢𑀺, 𑀇𑀤𑀁 𑀧𑀭𑀺𑀬𑀸𑀬𑀸𑀫𑀺𑀲𑀁 𑀦𑀸𑀫.

𑀢𑀢𑁆𑀣 𑀦𑀺𑀧𑁆𑀧𑀭𑀺𑀬𑀸𑀬𑀥𑀫𑁆𑀫𑁄𑀧𑀺 𑀪𑀕𑀯𑀢𑁄𑀬𑁂𑀯 𑀲𑀦𑁆𑀢𑀓𑁄. 𑀪𑀕𑀯𑀢𑀸 𑀳𑀺 𑀓𑀣𑀺𑀢𑀢𑁆𑀢𑀸 𑀪𑀺𑀓𑁆𑀔𑀽 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀅𑀥𑀺𑀕𑀘𑁆𑀙𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑁄, 𑀳𑀺, 𑀩𑁆𑀭𑀸𑀳𑁆𑀫𑀡, 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸…𑀧𑁂… 𑀫𑀕𑁆𑀕𑀸𑀦𑀼𑀕𑀸 𑀘 𑀧𑀦𑁂𑀢𑀭𑀳𑀺 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸’’𑀢𑀺 (𑀫. 𑀦𑀺. 𑁩.𑁭𑁯; 𑀘𑀽𑀮𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫).

‘‘𑀲𑁄, 𑀳𑀸𑀯𑀼𑀲𑁄, 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺, 𑀧𑀲𑁆𑀲𑀁 𑀧𑀲𑁆𑀲𑀢𑀺, 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄, 𑀯𑀢𑁆𑀢𑀸 𑀧𑀯𑀢𑁆𑀢𑀸, 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸, 𑀅𑀫𑀢𑀲𑁆𑀲 𑀤𑀸𑀢𑀸, 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄’’𑀢𑀺 (𑀫. 𑀦𑀺. 𑁧.𑁨𑁦𑁩; 𑁩.𑁨𑁮𑁧) 𑀘.

𑀧𑀭𑀺𑀬𑀸𑀬𑀥𑀫𑁆𑀫𑁄𑀧𑀺 𑀪𑀕𑀯𑀢𑁄𑀬𑁂𑀯 𑀲𑀦𑁆𑀢𑀓𑁄. 𑀪𑀕𑀯𑀢𑀸 𑀳𑀺 𑀓𑀣𑀺𑀢𑀢𑁆𑀢𑀸 𑀏𑀯 𑀚𑀸𑀦𑀦𑁆𑀢𑀺 ‘‘𑀯𑀺𑀯𑀝𑁆𑀝𑀁 𑀧𑀢𑁆𑀣𑁂𑀢𑁆𑀯𑀸 𑀤𑀸𑀦𑀁 𑀤𑁂𑀦𑁆𑀢𑁄…𑀧𑁂… 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀧𑀝𑀺𑀮𑀪𑀢𑀻’’𑀢𑀺. 𑀦𑀺𑀧𑁆𑀧𑀭𑀺𑀬𑀸𑀬𑀸𑀫𑀺𑀲𑀫𑁆𑀧𑀺 𑀪𑀕𑀯𑀢𑁄𑀬𑁂𑀯 𑀲𑀦𑁆𑀢𑀓𑀁. 𑀪𑀕𑀯𑀢𑀸 𑀳𑀺 𑀅𑀦𑀼𑀜𑁆𑀜𑀸𑀢𑀢𑁆𑀢𑀸𑀬𑁂𑀯 𑀪𑀺𑀓𑁆𑀔𑀽𑀳𑀺 𑀚𑀻𑀯𑀓𑀯𑀢𑁆𑀣𑀼𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀡𑀻𑀢𑀘𑀻𑀯𑀭𑀁 𑀮𑀤𑁆𑀥𑀁. 𑀬𑀣𑀸𑀳 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀳𑀧𑀢𑀺𑀘𑀻𑀯𑀭𑀁. 𑀬𑁄 𑀇𑀘𑁆𑀙𑀢𑀺, 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀼. 𑀬𑁄 𑀇𑀘𑁆𑀙𑀢𑀺, 𑀕𑀳𑀧𑀢𑀺𑀘𑀻𑀯𑀭𑀁 𑀲𑀸𑀤𑀺𑀬𑀢𑀼. 𑀇𑀢𑀭𑀻𑀢𑀭𑁂𑀦𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀼𑀝𑁆𑀞𑀺𑀁𑀬𑁂𑀯 𑀯𑀡𑁆𑀡𑁂𑀫𑀻’’𑀢𑀺 (𑀫𑀳𑀸𑀯. 𑁩𑁩𑁭).

𑀏𑀯𑀁 𑀇𑀢𑀭𑁂𑀧𑀺 𑀧𑀘𑁆𑀘𑀬𑀸 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀏𑀯 𑀪𑀺𑀓𑁆𑀔𑀽𑀳𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀮𑀤𑁆𑀥𑀸. 𑀧𑀭𑀺𑀬𑀸𑀬𑀸𑀫𑀺𑀲𑀫𑁆𑀧𑀺 𑀪𑀕𑀯𑀢𑁄𑀬𑁂𑀯 𑀲𑀦𑁆𑀢𑀓𑀁. 𑀪𑀕𑀯𑀢𑀸 𑀳𑀺 𑀓𑀣𑀺𑀢𑀢𑁆𑀢𑀸 𑀏𑀯 𑀚𑀸𑀦𑀦𑁆𑀢𑀺 ‘‘𑀲𑀫𑁆𑀧𑀢𑁆𑀢𑀺𑀪𑀯𑀁 𑀧𑀢𑁆𑀣𑁂𑀦𑁆𑀢𑁄 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁…𑀧𑁂… 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀬𑀸𑀬𑀸𑀫𑀺𑀲𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀜𑁆𑀘 𑀧𑀝𑀺𑀮𑀪𑀢𑀻’’𑀢𑀺. 𑀬𑀤𑁂𑀯 𑀬𑀲𑁆𑀫𑀸 𑀦𑀺𑀧𑁆𑀧𑀭𑀺𑀬𑀸𑀬𑀥𑀫𑁆𑀫𑁄𑀧𑀺 𑀧𑀭𑀺𑀬𑀸𑀬𑀥𑀫𑁆𑀫𑁄𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑀸𑀫𑀺𑀲𑀫𑁆𑀧𑀺 𑀧𑀭𑀺𑀬𑀸𑀬𑀸𑀫𑀺𑀲𑀫𑁆𑀧𑀺 𑀪𑀕𑀯𑀢𑁄𑀬𑁂𑀯 𑀲𑀦𑁆𑀢𑀓𑀁, 𑀢𑀲𑁆𑀫𑀸 𑀢𑀢𑁆𑀣 𑀅𑀢𑁆𑀢𑀦𑁄 𑀲𑀸𑀫𑀺𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀢𑀢𑁆𑀣 𑀘 𑀬𑀁 𑀲𑁂𑀝𑁆𑀞𑀢𑀭𑀁 𑀅𑀘𑁆𑀘𑀦𑁆𑀢𑀳𑀺𑀢𑀲𑀼𑀔𑀸𑀯𑀳𑀁 𑀢𑀢𑁆𑀣𑁂𑀯 𑀦𑁂 𑀦𑀺𑀬𑁄𑀚𑁂𑀦𑁆𑀢𑁄 𑀏𑀯𑀫𑀸𑀳 ‘‘𑀢𑀲𑁆𑀲 𑀫𑁂 𑀢𑀼𑀫𑁆𑀳𑁂 𑀧𑀼𑀢𑁆𑀢𑀸 𑀑𑀭𑀲𑀸…𑀧𑁂… 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺.

𑀇𑀢𑀺 𑀪𑀕𑀯𑀸 𑀧𑀭𑀺𑀧𑀼𑀡𑁆𑀡𑀯𑀢𑀲𑀫𑀸𑀤𑀸𑀦𑀁 𑀢𑀧𑀘𑀭𑀺𑀬𑀁 𑀲𑀫𑁆𑀫𑀤𑁂𑀯 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀼𑀯𑀺𑀲𑀼𑀤𑁆𑀥𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀁 𑀅𑀦𑀯𑀲𑁂𑀲𑀯𑁂𑀤𑀦𑁆𑀢𑀧𑀸𑀭𑀕𑀼𑀁 𑀩𑀸𑀳𑀺𑀢𑀲𑀩𑁆𑀩𑀧𑀸𑀧𑀁 𑀲𑀢𑀢𑀁 𑀬𑀸𑀘𑀬𑁄𑀕𑀁 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀦𑀼𑀢𑁆𑀢𑀭𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀧𑁆𑀧𑀢𑁆𑀢𑀁 𑀅𑀢𑁆𑀢𑀦𑁄 𑀧𑀭𑀫𑀢𑁆𑀣𑀩𑁆𑀭𑀸𑀳𑁆𑀫𑀡𑀪𑀸𑀯𑀁 𑀅𑀭𑀺𑀬𑀲𑀸𑀯𑀓𑀸𑀦𑀜𑁆𑀘 𑀅𑀢𑁆𑀢𑀦𑁄 𑀑𑀭𑀲𑀧𑀼𑀢𑁆𑀢𑀸𑀤𑀺𑀪𑀸𑀯𑀁 𑀧𑀯𑁂𑀤𑁂𑀲𑀺. 𑀪𑀕𑀯𑀸 𑀳𑀺 ‘‘𑀲𑀻𑀳𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 (𑀅. 𑀦𑀺. 𑁫.𑁯𑁯) 𑀏𑀢𑁆𑀣 𑀲𑀻𑀳𑀲𑀤𑀺𑀲𑀁, ‘‘𑀧𑀼𑀭𑀺𑀲𑁄 𑀫𑀕𑁆𑀕𑀓𑀼𑀲𑀮𑁄𑀢𑀺 𑀔𑁄, 𑀢𑀺𑀲𑁆𑀲, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁩.𑁮𑁪) 𑀏𑀢𑁆𑀣 𑀫𑀕𑁆𑀕𑀤𑁂𑀲𑀓𑀧𑀼𑀭𑀺𑀲𑀲𑀤𑀺𑀲𑀁, ‘‘𑀭𑀸𑀚𑀸𑀳𑀫𑀲𑁆𑀫𑀺 𑀲𑁂𑀮𑀸’’𑀢𑀺 (𑀫. 𑀦𑀺. 𑁨.𑁩𑁯𑁯; 𑀲𑀼. 𑀦𑀺. 𑁫𑁫𑁯) 𑀏𑀢𑁆𑀣 𑀭𑀸𑀚𑀲𑀤𑀺𑀲𑀁, ‘‘𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑁄𑀢𑀺 𑀔𑁄, 𑀲𑀼𑀦𑀓𑁆𑀔𑀢𑁆𑀢, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀫. 𑀦𑀺. 𑁩.𑁬𑁫) 𑀏𑀢𑁆𑀣 𑀯𑁂𑀚𑁆𑀚𑀲𑀤𑀺𑀲𑀁, ‘‘𑀩𑁆𑀭𑀸𑀳𑁆𑀫𑀡𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀅. 𑀦𑀺. 𑁮.𑁮𑁫) 𑀏𑀢𑁆𑀣 𑀩𑁆𑀭𑀸𑀳𑁆𑀫𑀡𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀓𑀣𑁂𑀲𑀺. 𑀇𑀥𑀸𑀧𑀺 𑀩𑁆𑀭𑀸𑀳𑁆𑀫𑀡 𑀲𑀤𑀺𑀲𑀁 𑀓𑀢𑁆𑀯𑀸 𑀓𑀣𑁂𑀲𑀺.

𑀇𑀤𑀸𑀦𑀺 𑀬𑁂𑀳𑀺 𑀤𑀸𑀦𑀸𑀤𑀻𑀳𑀺 𑀬𑀼𑀢𑁆𑀢𑀲𑁆𑀲 𑀇𑀢𑁄 𑀩𑀸𑀳𑀺𑀭𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀩𑁆𑀭𑀸𑀳𑁆𑀫𑀡𑀓𑀺𑀘𑁆𑀘𑀁 𑀧𑀭𑀺𑀧𑀼𑀡𑁆𑀡𑀁 𑀫𑀜𑁆𑀜𑀦𑁆𑀢𑀺, 𑀢𑁂𑀳𑀺 𑀅𑀢𑁆𑀢𑀦𑁄 𑀤𑀸𑀦𑀸𑀤𑀻𑀦𑀁 𑀅𑀕𑁆𑀕𑀲𑁂𑀝𑁆𑀞𑀪𑀸𑀯𑀁 𑀧𑀓𑀸𑀲𑁂𑀢𑀼𑀁 ‘‘𑀤𑁆𑀯𑁂𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀤𑀸𑀦𑀸𑀦𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀸𑀕𑀸𑀢𑀺 𑀫𑀳𑀸𑀬𑀜𑁆𑀜𑀸, 𑀫𑀳𑀸𑀤𑀸𑀦𑀸𑀦𑀻𑀢𑀺 𑀅𑀢𑁆𑀣𑁄, 𑀬𑀸𑀦𑀺 ‘‘𑀬𑀺𑀝𑁆𑀞𑀸𑀦𑀻’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀯𑁂𑀮𑀸𑀫𑀤𑀸𑀦𑀯𑁂𑀲𑁆𑀲𑀦𑁆𑀢𑀭𑀤𑀸𑀦𑀫𑀳𑀸𑀯𑀺𑀚𑀺𑀢𑀬𑀜𑁆𑀜𑀲𑀤𑀺𑀲𑀸 𑀆𑀫𑀺𑀲𑀬𑀸𑀕𑀸 𑀯𑁂𑀤𑀺𑀢𑀩𑁆𑀩𑀸, 𑀫𑀳𑀸𑀲𑀫𑀬𑀲𑀼𑀢𑁆𑀢𑀫𑀗𑁆𑀕𑀮𑀲𑀼𑀢𑁆𑀢𑀘𑀽𑀴𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀲𑀫𑀘𑀺𑀢𑁆𑀢𑀲𑀼𑀢𑁆𑀢𑀤𑁂𑀲𑀦𑀸𑀤𑀬𑁄 𑀥𑀫𑁆𑀫𑀬𑀸𑀕𑀸. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀕𑀸𑀣𑀸𑀬𑀁 𑀅𑀬𑀚𑀻𑀢𑀺 𑀅𑀤𑀸𑀲𑀺. 𑀅𑀫𑀘𑁆𑀙𑀭𑀻𑀢𑀺 𑀲𑀩𑁆𑀩𑀫𑀘𑁆𑀙𑀭𑀺𑀬𑀸𑀦𑀁 𑀩𑁄𑀥𑀺𑀫𑀽𑀮𑁂𑀬𑁂𑀯 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀫𑀘𑁆𑀙𑁂𑀭𑀭𑀳𑀺𑀢𑁄. 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀻𑀢𑀺 𑀫𑀳𑀸𑀓𑀭𑀼𑀡𑀸𑀬 𑀲𑀩𑁆𑀩𑀲𑀢𑁆𑀢𑁂 𑀧𑀺𑀬𑀧𑀼𑀢𑁆𑀢𑀁 𑀯𑀺𑀬 𑀅𑀦𑀼𑀕𑁆𑀕𑀡𑁆𑀳𑀦𑀲𑀻𑀮𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀯𑀥𑀓𑁂 𑀤𑁂𑀯𑀤𑀢𑁆𑀢𑁂 𑀘, 𑀘𑁄𑀭𑁂 𑀅𑀗𑁆𑀕𑀼𑀮𑀺𑀫𑀸𑀮𑀓𑁂;

𑀥𑀦𑀧𑀸𑀮𑁂 𑀭𑀸𑀳𑀼𑀮𑁂 𑀘𑁂𑀯, 𑀲𑀫𑀘𑀺𑀢𑁆𑀢𑁄 𑀫𑀳𑀸𑀫𑀼𑀦𑀻’’𑀢𑀺. (𑀫𑀺. 𑀧. 𑁬.𑁬.𑁫) 𑁋

𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀼𑀮𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧. 𑀤𑀼𑀢𑀺𑀬𑁂 𑀅𑀧𑁆𑀧𑀸𑀦𑀻𑀢𑀺 𑀧𑀭𑀺𑀢𑁆𑀢𑀸𑀦𑀺. 𑀲𑀼𑀮𑀪𑀸𑀦𑀻𑀢𑀺 𑀲𑀼𑀔𑁂𑀦 𑀮𑀤𑁆𑀥𑀩𑁆𑀩𑀸𑀦𑀺, 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀸 𑀲𑀓𑁆𑀓𑀸 𑀳𑁄𑀢𑀺 𑀮𑀤𑁆𑀥𑀼𑀁. 𑀅𑀦𑀯𑀚𑁆𑀚𑀸𑀦𑀻𑀢𑀺 𑀯𑀚𑁆𑀚𑀭𑀳𑀺𑀢𑀸𑀦𑀺 𑀦𑀺𑀤𑁆𑀤𑁄𑀲𑀸𑀦𑀺 𑀆𑀕𑀫𑀦𑀲𑀼𑀤𑁆𑀥𑀺𑀢𑁄 𑀓𑀸𑀬𑀫𑀡𑁆𑀟𑀦𑀸𑀤𑀺𑀓𑀺𑀮𑁂𑀲𑀯𑀢𑁆𑀣𑀼𑀪𑀸𑀯𑀸𑀪𑀸𑀯𑀢𑁄 𑀘. 𑀢𑀢𑁆𑀣 𑀲𑀼𑀮𑀪𑀢𑀸𑀬 𑀧𑀭𑀺𑀬𑁂𑀲𑀦𑀤𑀼𑀓𑁆𑀔𑀲𑁆𑀲 𑀅𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀅𑀧𑁆𑀧𑀢𑀸𑀬 𑀧𑀭𑀺𑀳𑀭𑀡𑀤𑀼𑀓𑁆𑀔𑀲𑁆𑀲𑀧𑀺 𑀅𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀅𑀦𑀯𑀚𑁆𑀚𑀢𑀸𑀬 𑀅𑀕𑀭𑀳𑀺𑀢𑀩𑁆𑀩𑀢𑀸𑀬 𑀪𑀺𑀓𑁆𑀔𑀼𑀲𑀸𑀭𑀼𑀧𑁆𑀧𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀅𑀧𑁆𑀧𑀢𑀸𑀬 𑀯𑀸 𑀧𑀭𑀺𑀢𑁆𑀢𑀸𑀲𑀲𑁆𑀲 𑀅𑀯𑀢𑁆𑀣𑀼𑀢𑀸, 𑀲𑀼𑀮𑀪𑀢𑀸𑀬 𑀕𑁂𑀥𑀸𑀬 𑀅𑀯𑀢𑁆𑀣𑀼𑀢𑀸, 𑀅𑀦𑀯𑀚𑁆𑀚𑀢𑀸𑀬 𑀆𑀤𑀻𑀦𑀯𑀯𑀲𑁂𑀦 𑀦𑀺𑀲𑁆𑀲𑀭𑀡𑀧𑀜𑁆𑀜𑀸𑀬 𑀯𑀢𑁆𑀣𑀼𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀅𑀧𑁆𑀧𑀢𑀸𑀬 𑀯𑀸 𑀮𑀸𑀪𑁂𑀦 𑀦 𑀲𑁄𑀫𑀦𑀲𑁆𑀲𑀁 𑀚𑀦𑀬𑀦𑁆𑀢𑀺, 𑀲𑀼𑀮𑀪𑀢𑀸𑀬 𑀅𑀮𑀸𑀪𑁂𑀦 𑀦 𑀤𑁄𑀫𑀦𑀲𑁆𑀲𑀁 𑀚𑀦𑀬𑀦𑁆𑀢𑀺, 𑀅𑀦𑀯𑀚𑁆𑀚𑀢𑀸𑀬 𑀯𑀺𑀧𑁆𑀧𑀝𑀺𑀲𑀸𑀭𑀦𑀺𑀫𑀺𑀢𑁆𑀢𑀁 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀁 𑀦 𑀚𑀦𑀬𑀦𑁆𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀯𑀢𑁆𑀣𑀼𑀪𑀸𑀯𑀢𑁄.

𑀧𑀁𑀲𑀼𑀓𑀽𑀮𑀦𑁆𑀢𑀺 𑀭𑀣𑀺𑀓𑀸𑀲𑀼𑀲𑀸𑀦𑀲𑀗𑁆𑀓𑀸𑀭𑀓𑀽𑀝𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀁𑀲𑀽𑀦𑀁 𑀉𑀧𑀭𑀺 𑀞𑀺𑀢𑀢𑁆𑀢𑀸 𑀅𑀩𑁆𑀪𑀼𑀕𑁆𑀕𑀢𑀝𑁆𑀞𑁂𑀦 𑀧𑀁𑀲𑀼𑀓𑀽𑀮𑀁 𑀯𑀺𑀬𑀸𑀢𑀺 𑀧𑀁𑀲𑀼𑀓𑀽𑀮𑀁, 𑀧𑀁𑀲𑀼 𑀯𑀺𑀬 𑀓𑀼𑀘𑁆𑀙𑀺𑀢𑀪𑀸𑀯𑀁 𑀉𑀮𑀢𑀺 𑀕𑀘𑁆𑀙𑀢𑀻𑀢𑀺 𑀧𑀁𑀲𑀼𑀓𑀽𑀮𑀦𑁆𑀢𑀺 𑀏𑀯𑀁 𑀮𑀤𑁆𑀥𑀦𑀸𑀫𑀁 𑀭𑀣𑀺𑀓𑀸𑀤𑀻𑀲𑀼 𑀧𑀢𑀺𑀢𑀦𑀦𑁆𑀢𑀓𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀓𑀢𑀘𑀻𑀯𑀭𑀁. 𑀧𑀺𑀡𑁆𑀟𑀺𑀬𑀸𑀮𑁄𑀧𑁄𑀢𑀺 𑀚𑀗𑁆𑀖𑀧𑀺𑀡𑁆𑀟𑀺𑀬𑀸 𑀩𑀮𑁂𑀦 𑀘𑀭𑀺𑀢𑁆𑀯𑀸 𑀖𑀭𑁂 𑀖𑀭𑁂 𑀆𑀮𑁄𑀧𑀫𑀢𑁆𑀢𑀁 𑀓𑀢𑁆𑀯𑀸 𑀮𑀤𑁆𑀥𑀪𑁄𑀚𑀦𑀁. 𑀭𑀼𑀓𑁆𑀔𑀫𑀽𑀮𑀦𑁆𑀢𑀺 𑀯𑀺𑀯𑁂𑀓𑀸𑀦𑀼𑀭𑀽𑀧𑀁 𑀬𑀁𑀓𑀺𑀜𑁆𑀘𑀺 𑀭𑀼𑀓𑁆𑀔𑀲𑀫𑀻𑀧𑀁. 𑀧𑀽𑀢𑀺𑀫𑀼𑀢𑁆𑀢𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀕𑁄𑀫𑀼𑀢𑁆𑀢𑀁. 𑀬𑀣𑀸 𑀳𑀺 𑀲𑀼𑀯𑀡𑁆𑀡𑀯𑀡𑁆𑀡𑁄𑀧𑀺 𑀓𑀸𑀬𑁄 𑀧𑀽𑀢𑀺𑀓𑀸𑀬𑁄𑀯 𑀏𑀯𑀁 𑀅𑀪𑀺𑀦𑀯𑀫𑁆𑀧𑀺 𑀫𑀼𑀢𑁆𑀢𑀁 𑀧𑀽𑀢𑀺𑀫𑀼𑀢𑁆𑀢𑀫𑁂𑀯. 𑀢𑀢𑁆𑀣 𑀓𑁂𑀘𑀺 𑀕𑁄𑀫𑀼𑀢𑁆𑀢𑀪𑀸𑀯𑀺𑀢𑀁 𑀳𑀭𑀺𑀢𑀓𑀻𑀔𑀡𑁆𑀟𑀁 ‘‘𑀧𑀽𑀢𑀺𑀫𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀧𑀽𑀢𑀺𑀪𑀸𑀯𑁂𑀦 𑀆𑀧𑀡𑀸𑀤𑀺𑀢𑁄 𑀯𑀺𑀲𑁆𑀲𑀝𑁆𑀞𑀁 𑀙𑀟𑁆𑀟𑀺𑀢𑀁 𑀅𑀧𑀭𑀺𑀕𑁆𑀕𑀳𑀺𑀢𑀁 𑀬𑀁𑀓𑀺𑀜𑁆𑀘𑀺 𑀪𑁂𑀲𑀚𑁆𑀚𑀁 𑀧𑀽𑀢𑀺𑀫𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀅𑀧𑀭𑁂.

𑀬𑀢𑁄 𑀔𑁄𑀢𑀺 𑀧𑀘𑁆𑀘𑀢𑁆𑀢𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁, 𑀬𑀁 𑀔𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦 ‘‘𑀢𑀼𑀝𑁆𑀞𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀓𑀺𑀭𑀺𑀬𑀁 𑀧𑀭𑀸𑀫𑀲𑀢𑀺. 𑀢𑀼𑀝𑁆𑀞𑁄𑀢𑀺 𑀲𑀦𑁆𑀢𑀼𑀝𑁆𑀞𑁄. 𑀇𑀤𑀫𑀲𑁆𑀲𑀸𑀳𑀦𑁆𑀢𑀺 𑀬𑁆𑀯𑀸𑀬𑀁 𑀘𑀢𑀼𑀩𑁆𑀩𑀺𑀥𑁂𑀦 𑀬𑀣𑀸𑀯𑀼𑀢𑁆𑀢𑁂𑀦 𑀧𑀘𑁆𑀘𑀬𑁂𑀦 𑀅𑀧𑁆𑀧𑁂𑀦 𑀲𑀼𑀮𑀪𑁂𑀦 𑀲𑀦𑁆𑀢𑁄𑀲𑁄, 𑀇𑀤𑀁 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀻𑀮𑀲𑀁𑀯𑀭𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀏𑀓𑀁 𑀲𑀸𑀫𑀜𑁆𑀜𑀗𑁆𑀕𑀁 𑀲𑀫𑀡𑀪𑀸𑀯𑀓𑀸𑀭𑀡𑀦𑁆𑀢𑀺 𑀅𑀳𑀁 𑀯𑀤𑀸𑀫𑀺. 𑀲𑀦𑁆𑀢𑀼𑀝𑁆𑀞𑀲𑁆𑀲 𑀳𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀲𑀼𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀲𑀫𑀣𑀯𑀺𑀧𑀲𑁆𑀲𑀦𑀸 𑀘 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀅𑀣 𑀯𑀸 𑀲𑀸𑀫𑀜𑁆𑀜𑀁 𑀦𑀸𑀫 𑀅𑀭𑀺𑀬𑀫𑀕𑁆𑀕𑁄. 𑀢𑀲𑁆𑀲 𑀲𑀗𑁆𑀔𑁂𑀧𑀢𑁄 𑀤𑁆𑀯𑁂 𑀅𑀗𑁆𑀕𑀸𑀦𑀺 𑁋 𑀩𑀸𑀳𑀺𑀭𑀁, 𑀅𑀚𑁆𑀛𑀢𑁆𑀢𑀺𑀓𑀦𑁆𑀢𑀺. 𑀢𑀢𑁆𑀣 𑀩𑀸𑀳𑀺𑀭𑀁 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀜𑁆𑀘, 𑀅𑀚𑁆𑀛𑀢𑁆𑀢𑀺𑀓𑀁 𑀧𑀦 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺 𑀘. 𑀢𑁂𑀲𑀼 𑀬𑀲𑁆𑀫𑀸 𑀬𑀣𑀸𑀭𑀳𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀪𑀽𑀢𑀸 𑀢𑀲𑁆𑀲𑀸 𑀫𑀽𑀮𑀪𑀽𑀢𑀸 𑀘𑁂𑀢𑁂 𑀥𑀫𑁆𑀫𑀸, 𑀬𑀤𑀺𑀤𑀁 𑀅𑀧𑁆𑀧𑀺𑀘𑁆𑀙𑀢𑀸 𑀲𑀦𑁆𑀢𑀼𑀝𑁆𑀞𑀺𑀢𑀸 𑀧𑀯𑀺𑀯𑀺𑀢𑁆𑀢𑀢𑀸 𑀅𑀲𑀁𑀲𑀝𑁆𑀞𑀢𑀸 𑀆𑀭𑀤𑁆𑀥𑀯𑀻𑀭𑀺𑀬𑀢𑀸𑀢𑀺 𑀏𑀯𑀫𑀸𑀤𑀬𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀇𑀤𑀫𑀲𑁆𑀲𑀸𑀳𑀁 𑀅𑀜𑁆𑀜𑀢𑀭𑀁 𑀲𑀸𑀫𑀜𑁆𑀜𑀗𑁆𑀕𑀦𑁆𑀢𑀺 𑀯𑀤𑀸𑀫𑀻’’𑀢𑀺.

𑀕𑀸𑀣𑀸𑀲𑀼 𑀲𑁂𑀦𑀸𑀲𑀦𑀫𑀸𑀭𑀩𑁆𑀪𑀸𑀢𑀺 𑀯𑀺𑀳𑀸𑀭𑀸𑀤𑀺𑀁 𑀫𑀜𑁆𑀘𑀧𑀻𑀞𑀸𑀤𑀺𑀜𑁆𑀘 𑀲𑁂𑀦𑀸𑀲𑀦𑀁 𑀦𑀺𑀲𑁆𑀲𑀸𑀬. 𑀘𑀻𑀯𑀭𑀁 𑀧𑀸𑀦𑀪𑁄𑀚𑀦𑀦𑁆𑀢𑀺 𑀦𑀺𑀯𑀸𑀲𑀦𑀸𑀤𑀺𑀘𑀻𑀯𑀭𑀁, 𑀅𑀫𑁆𑀩𑀧𑀸𑀦𑀓𑀸𑀤𑀺𑀧𑀸𑀦𑀁, 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀺𑀪𑀼𑀜𑁆𑀚𑀺𑀢𑀩𑁆𑀩𑀯𑀢𑁆𑀣𑀼𑀜𑁆𑀘 𑀆𑀭𑀩𑁆𑀪𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀖𑀸𑀢𑁄 𑀯𑀺𑀳𑀢𑀪𑀸𑀯𑁄 𑀘𑁂𑀢𑁄𑀤𑀼𑀓𑁆𑀔𑀁 𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀆𑀯𑀸𑀲𑁂 𑀧𑀘𑁆𑀘𑀬𑀸 𑀲𑀼𑀮𑀪𑀸’’𑀢𑀺 𑀮𑀪𑀺𑀢𑀩𑁆𑀩𑀝𑁆𑀞𑀸𑀦𑀕𑀫𑀦𑁂𑀦 𑀯𑀸 ‘‘𑀫𑀬𑁆𑀳𑀁 𑀧𑀸𑀧𑀼𑀡𑀸𑀢𑀺 𑀦 𑀢𑀼𑀬𑁆𑀳’’𑀦𑁆𑀢𑀺 𑀯𑀺𑀯𑀸𑀤𑀸𑀧𑀚𑁆𑀚𑀦𑁂𑀦 𑀯𑀸 𑀦𑀯𑀓𑀫𑁆𑀫𑀓𑀭𑀡𑀸𑀤𑀺𑀯𑀲𑁂𑀦 𑀯𑀸 𑀲𑁂𑀦𑀸𑀲𑀦𑀸𑀤𑀻𑀦𑀺 𑀧𑀭𑀺𑀬𑁂𑀲𑀦𑁆𑀢𑀸𑀦𑀁 𑀅𑀲𑀦𑁆𑀢𑀼𑀝𑁆𑀞𑀸𑀦𑀁 𑀇𑀘𑁆𑀙𑀺𑀢𑀮𑀸𑀪𑀸𑀤𑀺𑀦𑀸 𑀬𑁄 𑀯𑀺𑀖𑀸𑀢𑁄 𑀘𑀺𑀢𑁆𑀢𑀲𑁆𑀲 𑀳𑁄𑀢𑀺, 𑀲𑁄 𑀢𑀢𑁆𑀣 𑀲𑀦𑁆𑀢𑀼𑀝𑁆𑀞𑀲𑁆𑀲 𑀦 𑀳𑁄𑀢𑀻𑀢𑀺. 𑀤𑀺𑀲𑀸 𑀦𑀧𑁆𑀧𑀝𑀺𑀳𑀜𑁆𑀜𑀢𑀻𑀢𑀺 𑀲𑀦𑁆𑀢𑀼𑀝𑁆𑀞𑀺𑀬𑀸 𑀘𑀸𑀢𑀼𑀤𑁆𑀤𑀺𑀲𑀸𑀪𑀸𑀯𑁂𑀦 𑀤𑀺𑀲𑀸 𑀦𑀧𑁆𑀧𑀝𑀺𑀳𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀘𑀸𑀢𑀼𑀤𑁆𑀤𑀺𑀲𑁄 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀺,

𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀇𑀢𑀭𑀻𑀢𑀭𑁂𑀦𑀸’’𑀢𑀺. (𑀲𑀼. 𑀦𑀺. 𑁪𑁨; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁮);

𑀬𑀲𑁆𑀲 𑀳𑀺 ‘‘𑀅𑀲𑀼𑀓𑀝𑁆𑀞𑀸𑀦𑀁 𑀦𑀸𑀫 𑀕𑀢𑁄 𑀘𑀻𑀯𑀭𑀸𑀤𑀻𑀦𑀺 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀤𑀺𑀲𑀸 𑀧𑀝𑀺𑀳𑀜𑁆𑀜𑀢𑀺 𑀦𑀸𑀫. 𑀬𑀲𑁆𑀲 𑀧𑀦 𑀏𑀯𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀤𑀺𑀲𑀸 𑀦 𑀧𑀝𑀺𑀳𑀜𑁆𑀜𑀢𑀺 𑀦𑀸𑀫. 𑀥𑀫𑁆𑀫𑀸𑀢𑀺 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀸. 𑀲𑀸𑀫𑀜𑁆𑀜𑀲𑁆𑀲𑀸𑀦𑀼𑀮𑁄𑀫𑀺𑀓𑀸𑀢𑀺 𑀲𑀫𑀡𑀥𑀫𑁆𑀫𑀲𑁆𑀲 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬 𑀅𑀭𑀺𑀬𑀫𑀕𑁆𑀕𑀲𑁆𑀲𑁂𑀯 𑀯𑀸 𑀅𑀦𑀼𑀘𑁆𑀙𑀯𑀺𑀓𑀸 𑀅𑀧𑁆𑀧𑀺𑀘𑁆𑀙𑀢𑀸𑀤𑀬𑁄. 𑀅𑀥𑀺𑀕𑁆𑀕𑀳𑀺𑀢𑀸𑀢𑀺 𑀲𑀩𑁆𑀩𑁂 𑀢𑁂 𑀢𑀼𑀝𑁆𑀞𑀘𑀺𑀢𑁆𑀢𑀲𑁆𑀲 𑀲𑀦𑁆𑀢𑀼𑀝𑁆𑀞𑀘𑀺𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀥𑀺𑀕𑁆𑀕𑀳𑀺𑀢𑀸 𑀧𑀝𑀺𑀧𑀓𑁆𑀔𑀥𑀫𑁆𑀫𑁂 𑀅𑀪𑀺𑀪𑀯𑀺𑀢𑁆𑀯𑀸 𑀕𑀳𑀺𑀢𑀸 𑀳𑁄𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀕𑀢𑀸, 𑀦 𑀩𑀸𑀳𑀺𑀭𑀕𑀢𑀸𑀢𑀺.

𑀤𑀼𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀆𑀲𑀯𑀓𑁆𑀔𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁨. 𑀢𑀢𑀺𑀬𑁂 𑀚𑀸𑀦𑀢𑁄𑀢𑀺 𑀚𑀸𑀦𑀦𑁆𑀢𑀲𑁆𑀲. 𑀧𑀲𑁆𑀲𑀢𑁄𑀢𑀺 𑀧𑀲𑁆𑀲𑀦𑁆𑀢𑀲𑁆𑀲. 𑀬𑀤𑀺𑀧𑀺 𑀇𑀫𑀸𑀦𑀺 𑀤𑁆𑀯𑁂𑀧𑀺 𑀧𑀤𑀸𑀦𑀺 𑀏𑀓𑀢𑁆𑀣𑀸𑀦𑀺, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁, 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀚𑀸𑀦𑀢𑁄’’𑀢𑀺 𑀜𑀸𑀡𑀮𑀓𑁆𑀔𑀡𑀁 𑀉𑀧𑀸𑀤𑀸𑀬 𑀧𑀼𑀕𑁆𑀕𑀮𑀁 𑀦𑀺𑀤𑁆𑀤𑀺𑀲𑀢𑀺. 𑀚𑀸𑀦𑀦𑀮𑀓𑁆𑀔𑀡𑀜𑁆𑀳𑀺 𑀜𑀸𑀡𑀁. ‘‘𑀧𑀲𑁆𑀲𑀢𑁄’’𑀢𑀺 𑀜𑀸𑀡𑀧𑁆𑀧𑀪𑀸𑀯𑀁 𑀉𑀧𑀸𑀤𑀸𑀬. 𑀤𑀲𑁆𑀲𑀦𑀧𑁆𑀧𑀪𑀸𑀯𑀜𑁆𑀳𑀺 𑀉𑀧𑀸𑀤𑀸𑀬 𑀜𑀸𑀡𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄 𑀘𑀓𑁆𑀔𑀼𑀫𑀸 𑀯𑀺𑀬 𑀧𑀼𑀕𑁆𑀕𑀮𑁄 𑀘𑀓𑁆𑀔𑀼𑀦𑀸 𑀭𑀽𑀧𑀸𑀦𑀺, 𑀜𑀸𑀡𑁂𑀦 𑀯𑀺𑀯𑀝𑁂 𑀥𑀫𑁆𑀫𑁂 𑀧𑀲𑁆𑀲𑀢𑀺. 𑀅𑀣 𑀯𑀸 𑀚𑀸𑀦𑀢𑁄𑀢𑀺 𑀅𑀦𑀼𑀩𑁄𑀥𑀜𑀸𑀡𑁂𑀦 𑀚𑀸𑀦𑀢𑁄. 𑀧𑀲𑁆𑀲𑀢𑁄𑀢𑀺 𑀧𑀝𑀺𑀯𑁂𑀥𑀜𑀸𑀡𑁂𑀦 𑀧𑀲𑁆𑀲𑀢𑁄. 𑀧𑀝𑀺𑀮𑁄𑀫𑀢𑁄 𑀯𑀸 𑀤𑀲𑁆𑀲𑀦𑀫𑀕𑁆𑀕𑁂𑀦 𑀧𑀲𑁆𑀲𑀢𑁄, 𑀪𑀸𑀯𑀦𑀸𑀫𑀕𑁆𑀕𑁂𑀦 𑀚𑀸𑀦𑀢𑁄. 𑀓𑁂𑀘𑀺 𑀧𑀦 ‘‘𑀜𑀸𑀢𑀢𑀻𑀭𑀡𑀧𑀳𑀸𑀦𑀧𑀭𑀺𑀜𑁆𑀜𑀸𑀳𑀺 𑀚𑀸𑀦𑀢𑁄, 𑀲𑀺𑀔𑀸𑀧𑁆𑀧𑀢𑁆𑀢𑀯𑀺𑀧𑀲𑁆𑀲𑀦𑀸𑀬 𑀧𑀲𑁆𑀲𑀢𑁄’’𑀢𑀺 𑀯𑀤𑀦𑁆𑀢𑀺. 𑀅𑀣 𑀯𑀸 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦 𑀚𑀸𑀦𑀢𑁄, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁂𑀦 𑀧𑀲𑁆𑀲𑀢𑁄. 𑀢𑀤𑀼𑀪𑀬𑁂 𑀘 𑀲𑀢𑀺 𑀧𑀳𑀸𑀦𑀪𑀸𑀯𑀦𑀸𑀪𑀺𑀲𑀫𑀬𑀸 𑀲𑀺𑀤𑁆𑀥𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑀬𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀬𑀤𑀸 𑀘𑁂𑀢𑁆𑀣 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀤𑀸 ‘‘𑀚𑀸𑀦𑀢𑁄 𑀧𑀲𑁆𑀲𑀢𑁄’’𑀢𑀺 𑀧𑀤𑀸𑀦𑀁 𑀳𑁂𑀢𑀼𑀅𑀢𑁆𑀣𑀤𑀻𑀧𑀦𑀢𑀸 𑀤𑀝𑁆𑀞𑀩𑁆𑀩𑀸. 𑀬𑀤𑀸 𑀧𑀦 𑀫𑀕𑁆𑀕𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀤𑀸 𑀫𑀕𑁆𑀕𑀓𑀺𑀘𑁆𑀘𑀢𑁆𑀣𑀤𑀻𑀧𑀦𑀢𑀸.

𑀆𑀲𑀯𑀸𑀦𑀁 𑀔𑀬𑀦𑁆𑀢𑀺 ‘‘𑀚𑀸𑀦𑀢𑁄, 𑀅𑀳𑀁 𑀪𑀺𑀓𑁆𑀔𑀯𑁂, 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑀁 𑀯𑀤𑀸𑀫𑀻’’𑀢𑀺 (𑀫. 𑀦𑀺. 𑁧.𑁧𑁫; 𑀲𑀁. 𑀦𑀺. 𑁩.𑁧𑁦𑁧; 𑁫.𑁧𑁦𑁯𑁫) 𑀏𑀯𑀫𑀸𑀕𑀢𑁂 𑀲𑀩𑁆𑀩𑀸𑀲𑀯𑀲𑀁𑀯𑀭𑀧𑀭𑀺𑀬𑀸𑀬𑁂 ‘‘𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁩𑁮) 𑀘 𑀲𑀼𑀢𑁆𑀢𑀧𑀤𑁂𑀲𑀼 𑀆𑀲𑀯𑀸𑀦𑀁 𑀧𑀳𑀸𑀦𑀁 𑀅𑀘𑁆𑀘𑀦𑁆𑀢𑀓𑁆𑀔𑀬𑁄 𑀅𑀲𑀫𑀼𑀧𑁆𑀧𑀸𑀤𑁄 𑀔𑀻𑀡𑀸𑀓𑀸𑀭𑁄 𑀦𑀢𑁆𑀣𑀺𑀪𑀸𑀯𑁄 ‘‘𑀆𑀲𑀯𑀓𑁆𑀔𑀬𑁄’’𑀢𑀺 𑀯𑀼𑀢𑁆𑀢𑁄. ‘‘𑀆𑀲𑀯𑀸𑀦𑀁 𑀔𑀬𑀸 𑀲𑀫𑀡𑁄 𑀳𑁄𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁩𑁮) 𑀨𑀮𑀁.

‘‘𑀧𑀭𑀯𑀚𑁆𑀚𑀸𑀦𑀼𑀧𑀲𑁆𑀲𑀺𑀲𑁆𑀲, 𑀦𑀺𑀘𑁆𑀘𑀁 𑀉𑀚𑁆𑀛𑀸𑀦𑀲𑀜𑁆𑀜𑀺𑀦𑁄;

𑀆𑀲𑀯𑀸 𑀢𑀲𑁆𑀲 𑀯𑀟𑁆𑀠𑀦𑁆𑀢𑀺, 𑀆𑀭𑀸 𑀲𑁄 𑀆𑀲𑀯𑀓𑁆𑀔𑀬𑀸’’𑀢𑀺. (𑀥. 𑀧. 𑁨𑁫𑁩); 𑁋

𑀆𑀤𑀻𑀲𑀼 𑀦𑀺𑀩𑁆𑀩𑀸𑀦𑀁.

‘‘𑀲𑁂𑀔𑀲𑁆𑀲 𑀲𑀺𑀓𑁆𑀔𑀫𑀸𑀦𑀲𑁆𑀲, 𑀉𑀚𑀼𑀫𑀕𑁆𑀕𑀸𑀦𑀼𑀲𑀸𑀭𑀺𑀦𑁄;

𑀔𑀬𑀲𑁆𑀫𑀺𑀁 𑀧𑀞𑀫𑀁 𑀜𑀸𑀡𑀁, 𑀢𑀢𑁄 𑀅𑀜𑁆𑀜𑀸 𑀅𑀦𑀦𑁆𑀢𑀭𑀸;

𑀢𑀢𑁄 𑀅𑀜𑁆𑀜𑀸𑀯𑀺𑀫𑀼𑀢𑁆𑀢𑀲𑁆𑀲, 𑀜𑀸𑀡𑀁 𑀯𑁂 𑀳𑁄𑀢𑀺 𑀢𑀸𑀤𑀺𑀦𑁄’’𑀢𑀺. (𑀅. 𑀦𑀺. 𑁩.𑁮𑁬; 𑀇𑀢𑀺𑀯𑀼. 𑁬𑁨) 𑁋

𑀏𑀯𑀫𑀸𑀕𑀢𑁂 𑀇𑀦𑁆𑀤𑁆𑀭𑀺𑀬𑀲𑀼𑀢𑁆𑀢𑁂 𑀇𑀥 𑀘 𑀫𑀕𑁆𑀕𑁄 ‘‘𑀆𑀲𑀯𑀓𑁆𑀔𑀬𑁄’’𑀢𑀺 𑀯𑀼𑀢𑁆𑀢𑁄. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀚𑀸𑀦𑀦𑁆𑀢𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲 𑀅𑀳𑀁 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀁 𑀯𑀤𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑁄 𑀅𑀚𑀸𑀦𑀢𑁄 𑀦𑁄 𑀅𑀧𑀲𑁆𑀲𑀢𑁄𑀢𑀺 𑀬𑁄 𑀧𑀦 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀢𑀲𑁆𑀲 𑀦𑁄 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀬𑁂 𑀅𑀚𑀸𑀦𑀢𑁄 𑀅𑀧𑀲𑁆𑀲𑀢𑁄𑀧𑀺 𑀲𑀁𑀲𑀸𑀭𑀲𑀼𑀤𑁆𑀥𑀺𑀁 𑀯𑀤𑀦𑁆𑀢𑀺, 𑀢𑁂 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀼𑀭𑀺𑀫𑁂𑀦 𑀯𑀸 𑀧𑀤𑀤𑁆𑀯𑀬𑁂𑀦 𑀉𑀧𑀸𑀬𑁄 𑀯𑀼𑀢𑁆𑀢𑁄, 𑀇𑀫𑀺𑀦𑀸 𑀅𑀦𑀼𑀧𑀸𑀬𑀧𑀝𑀺𑀲𑁂𑀥𑁄. 𑀲𑀗𑁆𑀔𑁂𑀧𑁂𑀦 𑀘𑁂𑀢𑁆𑀣 𑀜𑀸𑀡𑀁 𑀆𑀲𑀯𑀓𑁆𑀔𑀬𑀓𑀭𑀁, 𑀲𑁂𑀲𑀁 𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑁄𑀢𑀺 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀬𑀁 𑀚𑀸𑀦𑀢𑁄 𑀬𑀁 𑀧𑀲𑁆𑀲𑀢𑁄 𑀆𑀲𑀯𑀓𑁆𑀔𑀬𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄’’𑀢𑀺 𑀧𑀼𑀘𑁆𑀙𑀁 𑀆𑀭𑀪𑀺. 𑀢𑀢𑁆𑀣 𑀚𑀸𑀦𑀦𑀸 𑀩𑀳𑀼𑀯𑀺𑀥𑀸. 𑀤𑀩𑁆𑀩𑀚𑀸𑀢𑀺𑀓𑁄 𑀏𑀯 𑀳𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀙𑀢𑁆𑀢𑀁 𑀓𑀸𑀢𑀼𑀁 𑀚𑀸𑀦𑀸𑀢𑀺, 𑀓𑁄𑀘𑀺 𑀘𑀻𑀯𑀭𑀸𑀤𑀻𑀦𑀁 𑀅𑀜𑁆𑀜𑀢𑀭𑀁, 𑀢𑀲𑁆𑀲 𑀈𑀤𑀺𑀲𑀸𑀦𑀺 𑀓𑀫𑁆𑀫𑀸𑀦𑀺 𑀯𑀢𑁆𑀢𑀲𑀻𑀲𑁂 𑀞𑀢𑁆𑀯𑀸 𑀓𑀭𑁄𑀦𑁆𑀢𑀲𑁆𑀲 𑀲𑀸 𑀚𑀸𑀦𑀦𑀸 ‘‘𑀫𑀕𑁆𑀕𑀨𑀮𑀸𑀦𑀁 𑀧𑀤𑀝𑁆𑀞𑀸𑀦𑀁 𑀦 𑀳𑁄𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀬𑁄 𑀧𑀦 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑁂𑀚𑁆𑀚𑀓𑀫𑁆𑀫𑀸𑀤𑀻𑀦𑀺 𑀓𑀸𑀢𑀼𑀁 𑀚𑀸𑀦𑀸𑀢𑀺, 𑀢𑀲𑁆𑀲𑁂𑀯𑀁 𑀚𑀸𑀦𑀢𑁄 𑀆𑀲𑀯𑀸 𑀯𑀟𑁆𑀠𑀦𑁆𑀢𑀺𑀬𑁂𑀯. 𑀢𑀲𑁆𑀫𑀸 𑀬𑀁 𑀚𑀸𑀦𑀢𑁄 𑀬𑀁 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺, 𑀢𑀤𑁂𑀯 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁, 𑀢𑀁 𑀳𑁂𑀝𑁆𑀞𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀼𑀢𑁆𑀢𑁂 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑁂𑀯.

𑀢𑀢𑁆𑀣 𑀧𑀦 ‘‘𑀬𑁄𑀦𑀺𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀻’’𑀢𑀺 (𑀇𑀢𑀺𑀯𑀼. 𑁧𑁬) 𑀆𑀕𑀢𑀢𑁆𑀢𑀸 ‘‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀣𑀯𑀺𑀪𑀸𑀯𑀦𑀸 𑀓𑀢𑀸. 𑀇𑀥 ‘‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀻’’𑀢𑀺 (𑀫. 𑀦𑀺. 𑁧.𑁧𑁫; 𑀲𑀁. 𑀦𑀺. 𑁩.𑁧𑁦𑁧; 𑁫.𑁧𑁦𑁯𑁫) 𑀆𑀕𑀢𑀢𑁆𑀢𑀸 ‘‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑀯𑀲𑁂𑀦 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀫𑀕𑁆𑀕𑀜𑀸𑀡𑁂𑀦 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀆𑀲𑀯𑁂𑀲𑀼 𑀘 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑀸𑀲𑀯𑁄 𑀔𑀻𑀬𑀢𑀺, 𑀢𑀢𑀺𑀬𑀫𑀕𑁆𑀕𑁂𑀦 𑀓𑀸𑀫𑀸𑀲𑀯𑁄, 𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀪𑀯𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄 𑀘 𑀔𑀻𑀬𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀕𑀸𑀣𑀸𑀲𑀼 𑀯𑀺𑀫𑀼𑀢𑁆𑀢𑀺𑀜𑀸𑀡𑀦𑁆𑀢𑀺 𑀯𑀺𑀫𑀼𑀢𑁆𑀢𑀺𑀬𑀁 𑀦𑀺𑀩𑁆𑀩𑀸𑀦𑁂 𑀨𑀮𑁂 𑀘 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀉𑀢𑁆𑀢𑀫𑀦𑁆𑀢𑀺 𑀉𑀢𑁆𑀢𑀫𑀥𑀫𑁆𑀫𑀸𑀭𑀫𑁆𑀫𑀡𑀢𑁆𑀢𑀸 𑀉𑀢𑁆𑀢𑀫𑀁. 𑀔𑀬𑁂 𑀜𑀸𑀡𑀦𑁆𑀢𑀺 𑀆𑀲𑀯𑀸𑀦𑀁 𑀲𑀁𑀬𑁄𑀚𑀦𑀸𑀦𑀜𑁆𑀘 𑀔𑀬𑁂 𑀔𑀬𑀓𑀭𑁂 𑀅𑀭𑀺𑀬𑀫𑀕𑁆𑀕𑁂 𑀜𑀸𑀡𑀁. ‘‘𑀔𑀻𑀡𑀸 𑀲𑀁𑀬𑁄𑀚𑀦𑀸 𑀇𑀢𑀺 𑀜𑀸𑀡’’𑀦𑁆𑀢𑀺 𑀇𑀥𑀸𑀧𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑁂𑀦 𑀧𑀳𑀻𑀦𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀁 𑀤𑀲𑁆𑀲𑁂𑀢𑀺. 𑀏𑀯𑀫𑁂𑀢𑁆𑀣 𑀘𑀢𑁆𑀢𑀸𑀭𑀺𑀧𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺 𑀯𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀸 𑀳𑀺 𑀇𑀥 𑀦𑀢𑁆𑀣𑀺 𑀅𑀭𑀳𑀢𑁆𑀢𑀨𑀮𑀸𑀥𑀺𑀕𑀫𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀬𑀣𑀸 𑀘𑁂𑀢𑁆𑀣 𑀚𑀸𑀦𑀢𑁄 𑀧𑀲𑁆𑀲𑀢𑁄𑀢𑀺 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀺𑀘𑁆𑀘𑀁 𑀅𑀥𑀺𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀏𑀯𑀁 𑀲𑀫𑁆𑀫𑀧𑁆𑀧𑀥𑀸𑀦𑀓𑀺𑀘𑁆𑀘𑀫𑁆𑀧𑀺 𑀅𑀥𑀺𑀓𑀫𑁂𑀯 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀢𑁆𑀯𑁂𑀯𑀺𑀤𑀁 𑀓𑀼𑀲𑀻𑀢𑁂𑀦𑀸’’𑀢𑀺 𑀑𑀲𑀸𑀦𑀕𑀸𑀣𑀫𑀸𑀳.

𑀢𑀢𑁆𑀣 𑀦 𑀢𑁆𑀯𑁂𑀯𑀺𑀤𑀦𑁆𑀢𑀺 𑀦 𑀢𑀼 𑀏𑀯 𑀇𑀤𑀁. 𑀢𑀼𑀲𑀤𑁆𑀤𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀩𑀸𑀮𑁂𑀦𑀫𑀯𑀺𑀚𑀸𑀦𑀢𑀸𑀢𑀺 𑀫𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀇𑀤𑀁 𑀲𑁂𑀓𑁆𑀔𑀫𑀕𑁆𑀕𑁂𑀦 𑀅𑀲𑁂𑀓𑁆𑀔𑀫𑀕𑁆𑀕𑁂𑀦 𑀘 𑀧𑀢𑁆𑀢𑀩𑁆𑀩𑀁 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀸𑀤𑀺𑀲𑀩𑁆𑀩𑀕𑀦𑁆𑀣𑀸𑀦𑀁 𑀧𑀫𑁄𑀘𑀦𑀁 𑀧𑀫𑁄𑀘𑀦𑀲𑁆𑀲 𑀦𑀺𑀫𑀺𑀢𑁆𑀢𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀦𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀬𑀣𑀸𑀪𑀽𑀢𑀁 𑀅𑀯𑀺𑀚𑀸𑀦𑀢𑀸 𑀢𑀢𑁄 𑀏𑀯 𑀩𑀸𑀮𑁂𑀦 𑀅𑀯𑀺𑀤𑁆𑀤𑀲𑀼𑀦𑀸 𑀬𑀣𑀸 𑀅𑀥𑀺𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 𑀓𑀼𑀲𑀻𑀢𑁂𑀦 𑀦𑀺𑀩𑁆𑀩𑀻𑀭𑀺𑀬𑁂𑀦𑀸𑀧𑀺, 𑀢𑀲𑁆𑀫𑀸 𑀢𑀤𑀥𑀺𑀕𑀫𑀸𑀬 𑀆𑀭𑀤𑁆𑀥𑀯𑀻𑀭𑀺𑀬𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑁄 𑀓𑀼𑀲𑀻𑀢𑀲𑁆𑀲’’ (𑀤𑀻. 𑀦𑀺. 𑁩.𑁩𑁫𑁮).

‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣, 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂;

𑀥𑀼𑀦𑀸𑀣 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀦𑀴𑀸𑀕𑀸𑀭𑀁𑀯 𑀓𑀼𑀜𑁆𑀚𑀭𑁄’’𑀢𑀺. (𑀲𑀁. 𑀦𑀺. 𑁧.𑁧𑁮𑁫; 𑀦𑁂𑀢𑁆𑀢𑀺. 𑁨𑁯; 𑀫𑀺. 𑀧. 𑁫.𑁧.𑁪);

𑀢𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩. 𑀘𑀢𑀼𑀢𑁆𑀣𑁂 𑀬𑁂 𑀳𑀺 𑀓𑁂𑀘𑀻𑀢𑀺 𑀬𑁂 𑀓𑁂𑀘𑀺. 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀦𑁆𑀢𑀻𑀢𑀺 ‘‘𑀇𑀤𑀁 𑀤𑀼𑀓𑁆𑀔𑀁, 𑀏𑀢𑁆𑀢𑀓𑀁 𑀤𑀼𑀓𑁆𑀔𑀁, 𑀦 𑀇𑀢𑁄 𑀪𑀺𑀬𑁆𑀬𑁄’’𑀢𑀺 𑀅𑀯𑀺𑀧𑀭𑀻𑀢𑀁 𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑀢𑁄 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀲𑀳𑀺𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀤𑀼𑀓𑁆𑀔𑀲𑀘𑁆𑀘𑀁 𑀦 𑀚𑀸𑀦𑀦𑁆𑀢𑀺 𑀦 𑀧𑀝𑀺𑀯𑀺𑀚𑁆𑀛𑀦𑁆𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦 𑀫𑁂 𑀢𑁂, 𑀪𑀺𑀓𑁆𑀔𑀯𑁂𑀢𑀺𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀦𑀼𑀬𑀼𑀢𑁆𑀢𑀸 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑀲𑀫𑀡𑀸 𑀘𑁂𑀯 𑀚𑀸𑀢𑀺𑀫𑀢𑁆𑀢𑀩𑁆𑀭𑀸𑀳𑁆𑀫𑀡𑀸 𑀘 𑀦 𑀫𑀬𑀸 𑀢𑁂 𑀲𑀫𑀺𑀢𑀧𑀸𑀧𑀲𑀫𑀡𑁂𑀲𑀼 𑀲𑀫𑀡𑁄𑀢𑀺, 𑀩𑀸𑀳𑀺𑀢𑀧𑀸𑀧𑀩𑁆𑀭𑀸𑀳𑁆𑀫𑀡𑁂𑀲𑀼 𑀩𑁆𑀭𑀸𑀳𑁆𑀫𑀡𑁄𑀢𑀺 𑀘 𑀲𑀫𑁆𑀫𑀢𑀸 𑀅𑀦𑀼𑀜𑁆𑀜𑀸𑀢𑀸. 𑀓𑀲𑁆𑀫𑀸? 𑀲𑀫𑀡𑀓𑀭𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀓𑀭𑀡𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀪𑀸𑀯𑀢𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀦 𑀘 𑀧𑀦 𑀢𑁂 𑀆𑀬𑀲𑁆𑀫𑀦𑁆𑀢𑁄’’𑀢𑀺𑀆𑀤𑀺. 𑀢𑀢𑁆𑀣 𑀲𑀸𑀫𑀜𑁆𑀜𑀢𑁆𑀣𑀦𑁆𑀢𑀺 𑀲𑀸𑀫𑀜𑁆𑀜𑀲𑀗𑁆𑀔𑀸𑀢𑀁 𑀅𑀢𑁆𑀣𑀁, 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀻𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀧𑀭𑁂 𑀧𑀦 ‘‘𑀲𑀸𑀫𑀜𑁆𑀜𑀢𑁆𑀣𑀦𑁆𑀢𑀺 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸, 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑀦𑁆𑀢𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀨𑀮𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀕𑀸𑀣𑀸𑀲𑀼 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺.

𑀘𑀢𑀼𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀻𑀮𑀲𑀫𑁆𑀧𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁪. 𑀧𑀜𑁆𑀘𑀫𑁂 𑀲𑀻𑀮𑀲𑀫𑁆𑀧𑀦𑁆𑀦𑀸𑀢𑀺 𑀏𑀢𑁆𑀣 𑀲𑀻𑀮𑀁 𑀦𑀸𑀫 𑀔𑀻𑀡𑀸𑀲𑀯𑀸𑀦𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀻𑀮𑀁, 𑀢𑁂𑀦 𑀲𑀫𑁆𑀧𑀦𑁆𑀦𑀸 𑀲𑀫𑀦𑁆𑀦𑀸𑀕𑀢𑀸𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑀸. 𑀲𑀫𑀸𑀥𑀺𑀧𑀜𑁆𑀜𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀫𑀼𑀢𑁆𑀢𑀺 𑀧𑀦 𑀨𑀮𑀯𑀺𑀫𑀼𑀢𑁆𑀢𑀺𑀬𑁂𑀯, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀏𑀯𑀫𑁂𑀢𑁆𑀣 𑀲𑀻𑀮𑀸𑀤𑀬𑁄 𑀢𑀬𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸, 𑀯𑀺𑀫𑀼𑀢𑁆𑀢𑀺 𑀮𑁄𑀓𑀼𑀢𑁆𑀢𑀭𑀸𑀯, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀮𑁄𑀓𑀺𑀬𑀫𑁂𑀯. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀬𑀣𑀸𑀭𑀳𑀁 𑀧𑀭𑁂 𑀑𑀯𑀤𑀦𑁆𑀢𑀺 𑀅𑀦𑀼𑀲𑀸𑀲𑀦𑁆𑀢𑀻𑀢𑀺 𑀑𑀯𑀸𑀤𑀓𑀸. 𑀯𑀺𑀜𑁆𑀜𑀸𑀧𑀓𑀸𑀢𑀺 𑀓𑀫𑁆𑀫𑀸𑀦𑀺 𑀓𑀫𑁆𑀫𑀨𑀮𑀸𑀦𑀺 𑀘, 𑀯𑀺𑀜𑁆𑀜𑀸𑀧𑀓𑀸, 𑀢𑀢𑁆𑀣 𑀘 ‘‘𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸, 𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸. 𑀇𑀫𑁂 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸, 𑀇𑀫𑁂 𑀥𑀫𑁆𑀫𑀸 𑀅𑀦𑀯𑀚𑁆𑀚𑀸’’𑀢𑀺𑀆𑀤𑀺𑀦𑀸 𑀓𑀼𑀲𑀮𑀸𑀤𑀺𑀯𑀺𑀪𑀸𑀕𑀢𑁄 𑀔𑀦𑁆𑀥𑀸𑀤𑀺𑀯𑀺𑀪𑀸𑀕𑀢𑁄 𑀲𑀮𑀓𑁆𑀔𑀡𑀢𑁄 𑀲𑀸𑀫𑀜𑁆𑀜𑀮𑀓𑁆𑀔𑀡𑀢𑁄𑀢𑀺 𑀯𑀺𑀯𑀺𑀥𑁂𑀳𑀺 𑀦𑀬𑁂𑀳𑀺 𑀥𑀫𑁆𑀫𑀸𑀦𑀁 𑀜𑀸𑀧𑀓𑀸 𑀅𑀯𑀩𑁄𑀥𑀓𑀸. 𑀲𑀦𑁆𑀤𑀲𑁆𑀲𑀓𑀸𑀢𑀺 𑀢𑁂𑀬𑁂𑀯 𑀥𑀫𑁆𑀫𑁂 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀯𑀺𑀬 𑀧𑀭𑀲𑁆𑀲 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑁂𑀢𑀸𑀭𑁄. 𑀲𑀫𑀸𑀤𑀧𑀓𑀸𑀢𑀺 𑀬𑀁 𑀲𑀻𑀮𑀸𑀤𑀺 𑀬𑁂𑀳𑀺 𑀅𑀲𑀫𑀸𑀤𑀺𑀦𑁆𑀦𑀁, 𑀢𑀲𑁆𑀲 𑀲𑀫𑀸𑀤𑀸𑀧𑁂𑀢𑀸𑀭𑁄, 𑀢𑀢𑁆𑀣 𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑀸𑀭𑁄. 𑀲𑀫𑀼𑀢𑁆𑀢𑁂𑀚𑀓𑀸𑀢𑀺 𑀏𑀯𑀁 𑀓𑀼𑀲𑀮𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀺𑀢𑀸𑀦𑀁 𑀉𑀧𑀭𑀺 𑀅𑀥𑀺𑀘𑀺𑀢𑁆𑀢𑀸𑀦𑀼𑀬𑁄𑀕𑁂 𑀦𑀺𑀬𑁄𑀚𑀦𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀲𑀫𑁆𑀫𑀸 𑀉𑀢𑁆𑀢𑁂𑀚𑀓𑀸, 𑀬𑀣𑀸 𑀯𑀺𑀲𑁂𑀲𑀸𑀥𑀺𑀕𑀫𑁄 𑀳𑁄𑀢𑀺, 𑀏𑀯𑀁 𑀦𑀺𑀲𑀸𑀫𑀦𑀯𑀲𑁂𑀦 𑀢𑁂𑀚𑀓𑀸. 𑀲𑀫𑁆𑀧𑀳𑀁𑀲𑀓𑀸𑀢𑀺 𑀢𑁂𑀲𑀁 𑀬𑀣𑀸𑀮𑀤𑁆𑀥𑁂𑀳𑀺 𑀉𑀧𑀭𑀺𑀮𑀤𑁆𑀥𑀩𑁆𑀩𑁂𑀳𑀺 𑀘 𑀕𑀼𑀡𑀯𑀺𑀲𑁂𑀲𑁂𑀳𑀺 𑀘𑀺𑀢𑁆𑀢𑀲𑁆𑀲 𑀲𑀫𑁆𑀫𑀸 𑀧𑀳𑀁𑀲𑀓𑀸, 𑀮𑀤𑁆𑀥𑀲𑁆𑀲𑀸𑀤𑀯𑀲𑁂𑀦 𑀲𑀼𑀝𑁆𑀞𑀼 𑀢𑁄𑀲𑀓𑀸. 𑀅𑀮𑀁𑀲𑀫𑀓𑁆𑀔𑀸𑀢𑀸𑀭𑁄𑀢𑀺 𑀅𑀮𑀁 𑀧𑀭𑀺𑀬𑀢𑁆𑀢𑀁 𑀬𑀣𑀸𑀯𑀼𑀢𑁆𑀢𑀁 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀲𑀫𑁆𑀫𑀤𑁂𑀯 𑀅𑀦𑀼𑀕𑁆𑀕𑀳𑀸𑀥𑀺𑀧𑁆𑀧𑀸𑀬𑁂𑀦 𑀅𑀓𑁆𑀔𑀸𑀢𑀸𑀭𑁄.

𑀅𑀣 𑀯𑀸 𑀲𑀦𑁆𑀤𑀲𑁆𑀲𑀓𑀸𑀢𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀸 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀬𑁄 𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑀢𑁄 𑀲𑀫𑁆𑀫𑀤𑁂𑀯 𑀤𑀲𑁆𑀲𑁂𑀢𑀸𑀭𑁄. 𑀲𑀫𑀸𑀤𑀧𑀓𑀸𑀢𑀺 𑀘𑀺𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑀦𑀯𑀲𑁂𑀦 𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀕𑀸𑀳𑀸𑀧𑀓𑀸. 𑀲𑀫𑀼𑀢𑁆𑀢𑁂𑀚𑀓𑀸𑀢𑀺 𑀢𑀤𑀢𑁆𑀣𑀕𑁆𑀕𑀳𑀡𑁂 𑀉𑀲𑁆𑀲𑀸𑀳𑀚𑀦𑀦𑁂𑀦 𑀲𑀫𑁆𑀫𑀤𑁂𑀯 𑀯𑁄𑀤𑀧𑀓𑀸 𑀚𑁄𑀢𑀓𑀸 𑀯𑀸. 𑀲𑀫𑁆𑀧𑀳𑀁𑀲𑀓𑀸𑀢𑀺 𑀢𑀤𑀢𑁆𑀣𑀧𑀝𑀺𑀧𑀢𑁆𑀢𑀺𑀬𑀁 𑀆𑀦𑀺𑀲𑀁𑀲𑀤𑀲𑁆𑀲𑀦𑁂𑀦 𑀲𑀫𑁆𑀫𑀤𑁂𑀯 𑀧𑀳𑀁𑀲𑀓𑀸 𑀢𑁄𑀲𑀓𑀸. 𑀅𑀮𑀁𑀲𑀫𑀓𑁆𑀔𑀸𑀢𑀸𑀭𑁄𑀢𑀺 𑀲𑀫𑀢𑁆𑀣𑀸 𑀳𑀼𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀲𑀫𑀓𑁆𑀔𑀸𑀢𑀸𑀭𑁄. 𑀲𑀤𑁆𑀥𑀫𑁆𑀫𑀲𑁆𑀲𑀸𑀢𑀺 𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑀲𑁆𑀲, 𑀢𑀺𑀯𑀺𑀥𑀲𑁆𑀲𑀸𑀧𑀺 𑀯𑀸 𑀲𑀤𑁆𑀥𑀫𑁆𑀫𑀲𑁆𑀲 𑀤𑁂𑀲𑁂𑀢𑀸𑀭𑁄.

𑀤𑀲𑁆𑀲𑀦𑀫𑁆𑀧𑀳𑀦𑁆𑀢𑀺 𑀤𑀲𑁆𑀲𑀦𑀫𑁆𑀧𑀺 𑀅𑀳𑀁. 𑀢𑀁 𑀧𑀦𑁂𑀢𑀁 𑀘𑀓𑁆𑀔𑀼𑀤𑀲𑁆𑀲𑀦𑀁 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀧𑀲𑀦𑁆𑀦𑁂𑀳𑀺 𑀘𑀓𑁆𑀔𑀽𑀳𑀺 𑀅𑀭𑀺𑀬𑀸𑀦𑀁 𑀑𑀮𑁄𑀓𑀦𑀁 𑀘𑀓𑁆𑀔𑀼𑀤𑀲𑁆𑀲𑀦𑀁 𑀦𑀸𑀫. 𑀅𑀭𑀺𑀬𑀪𑀸𑀯𑀓𑀭𑀸𑀦𑀁 𑀧𑀦 𑀥𑀫𑁆𑀫𑀸𑀦𑀁 𑀅𑀭𑀺𑀬𑀪𑀸𑀯𑀲𑁆𑀲 𑀘 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑁂𑀳𑀺 𑀅𑀥𑀺𑀕𑀫𑁄 𑀜𑀸𑀡𑀤𑀲𑁆𑀲𑀦𑀁 𑀦𑀸𑀫. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀘𑀓𑁆𑀔𑀼𑀤𑀲𑁆𑀲𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀅𑀭𑀺𑀬𑀸𑀦𑀜𑁆𑀳𑀺 𑀧𑀲𑀦𑁆𑀦𑁂𑀳𑀺 𑀘𑀓𑁆𑀔𑀽𑀳𑀺 𑀑𑀮𑁄𑀓𑀦𑀫𑁆𑀧𑀺 𑀲𑀢𑁆𑀢𑀸𑀦𑀁 𑀩𑀳𑀽𑀧𑀓𑀸𑀭𑀫𑁂𑀯. 𑀲𑀯𑀦𑀦𑁆𑀢𑀺 ‘‘𑀅𑀲𑀼𑀓𑁄 𑀦𑀸𑀫 𑀔𑀻𑀡𑀸𑀲𑀯𑁄 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀭𑀝𑁆𑀞𑁂 𑀯𑀸 𑀚𑀦𑀧𑀤𑁂 𑀯𑀸 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀯𑀺𑀳𑀸𑀭𑁂 𑀯𑀸 𑀮𑁂𑀡𑁂 𑀯𑀸 𑀯𑀲𑀢𑀻’’𑀢𑀺 𑀓𑀣𑁂𑀦𑁆𑀢𑀸𑀦𑀁 𑀲𑁄𑀢𑁂𑀦 𑀲𑀯𑀦𑀁, 𑀏𑀢𑀫𑁆𑀧𑀺 𑀩𑀳𑀽𑀧𑀓𑀸𑀭𑀫𑁂𑀯. 𑀉𑀧𑀲𑀗𑁆𑀓𑀫𑀦𑀦𑁆𑀢𑀺 ‘‘𑀤𑀸𑀦𑀁 𑀯𑀸 𑀤𑀲𑁆𑀲𑀸𑀫𑀺, 𑀧𑀜𑁆𑀳𑀁 𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀥𑀫𑁆𑀫𑀁 𑀯𑀸 𑀲𑁄𑀲𑁆𑀲𑀸𑀫𑀺, 𑀲𑀓𑁆𑀓𑀸𑀭𑀁 𑀯𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀭𑀽𑀧𑁂𑀦 𑀘𑀺𑀢𑁆𑀢𑁂𑀦 𑀅𑀭𑀺𑀬𑀸𑀦𑀁 𑀉𑀧𑀲𑀗𑁆𑀓𑀫𑀦𑀁. 𑀧𑀬𑀺𑀭𑀼𑀧𑀸𑀲𑀦𑀦𑁆𑀢𑀺 𑀧𑀜𑁆𑀳𑀧𑀬𑀺𑀭𑀼𑀧𑀸𑀲𑀦𑀁, 𑀅𑀭𑀺𑀬𑀸𑀦𑀁 𑀕𑀼𑀡𑁂 𑀲𑀼𑀢𑁆𑀯𑀸 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀸𑀦𑀁 𑀯𑀸 𑀤𑀢𑁆𑀯𑀸 𑀯𑀢𑁆𑀢𑀁 𑀯𑀸 𑀓𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀓𑀼𑀲𑀮’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀜𑁆𑀳𑀧𑀼𑀘𑁆𑀙𑀦𑀦𑁆𑀢𑀺 𑀅𑀢𑁆𑀣𑁄. 𑀯𑁂𑀬𑁆𑀬𑀸𑀯𑀘𑁆𑀘𑀸𑀤𑀺𑀓𑀭𑀡𑀁 𑀧𑀬𑀺𑀭𑀼𑀧𑀸𑀲𑀦𑀁𑀬𑁂𑀯. 𑀅𑀦𑀼𑀲𑁆𑀲𑀭𑀡𑀦𑁆𑀢𑀺 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂𑀲𑀼 𑀦𑀺𑀲𑀺𑀦𑁆𑀦𑀲𑁆𑀲 ‘‘𑀇𑀤𑀸𑀦𑀺 𑀅𑀭𑀺𑀬𑀸 𑀕𑀼𑀫𑁆𑀩𑀮𑁂𑀡𑀫𑀡𑁆𑀟𑀧𑀸𑀤𑀻𑀲𑀼 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀲𑀼𑀔𑁂𑀳𑀺 𑀯𑀻𑀢𑀺𑀦𑀸𑀫𑁂𑀦𑁆𑀢𑀻’’𑀢𑀺 𑀢𑁂𑀲𑀁 𑀤𑀺𑀩𑁆𑀩𑀯𑀺𑀳𑀸𑀭𑀸𑀤𑀺𑀕𑀼𑀡𑀯𑀺𑀲𑁂𑀲𑀸𑀭𑀫𑁆𑀫𑀡𑀁 𑀅𑀦𑀼𑀲𑁆𑀲𑀭𑀡𑀁. 𑀬𑁄 𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀸 𑀑𑀯𑀸𑀤𑁄 𑀮𑀤𑁆𑀥𑁄 𑀳𑁄𑀢𑀺, 𑀢𑀁 𑀆𑀯𑀚𑁆𑀚𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀻𑀮𑀁 𑀓𑀣𑀺𑀢𑀁, 𑀇𑀫𑀲𑁆𑀫𑀺𑀁 𑀲𑀫𑀸𑀥𑀺, 𑀇𑀫𑀲𑁆𑀫𑀺𑀁 𑀯𑀺𑀧𑀲𑁆𑀲𑀦𑀸, 𑀇𑀫𑀲𑁆𑀫𑀺𑀁 𑀫𑀕𑁆𑀕𑁄, 𑀇𑀫𑀲𑁆𑀫𑀺𑀁 𑀨𑀮’’𑀦𑁆𑀢𑀺 𑀏𑀯𑀁 𑀅𑀦𑀼𑀲𑁆𑀲𑀭𑀡𑀁.

𑀅𑀦𑀼𑀧𑀩𑁆𑀩𑀚𑁆𑀚𑀦𑁆𑀢𑀺 𑀅𑀭𑀺𑀬𑁂𑀲𑀼 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀖𑀭𑀸 𑀦𑀺𑀓𑁆𑀔𑀫𑁆𑀫 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁. 𑀅𑀭𑀺𑀬𑁂𑀲𑀼 𑀳𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀢𑁂𑀲𑀁𑀬𑁂𑀯 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑁂𑀲𑀁𑀬𑁂𑀯 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀧𑀘𑁆𑀘𑀸𑀲𑀻𑀲𑀫𑀸𑀦𑀲𑁆𑀲 𑀘𑀭𑀢𑁄𑀧𑀺 𑀧𑀩𑁆𑀩𑀚𑁆𑀚𑀸 𑀅𑀦𑀼𑀧𑀩𑁆𑀩𑀚𑁆𑀚𑀸 𑀦𑀸𑀫, 𑀅𑀜𑁆𑀜𑁂𑀲𑀁 𑀲𑀦𑁆𑀢𑀺𑀓𑁂 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀧𑀘𑁆𑀘𑀸𑀲𑀻𑀲𑀫𑀸𑀦𑀲𑁆𑀲 𑀘𑀭𑀢𑁄𑀧𑀺 𑀧𑀩𑁆𑀩𑀚𑁆𑀚𑀸 𑀅𑀦𑀼𑀧𑀩𑁆𑀩𑀚𑁆𑀚𑀸 𑀦𑀸𑀫, 𑀅𑀭𑀺𑀬𑁂𑀲𑀼 𑀧𑀲𑀸𑀤𑁂𑀦 𑀅𑀜𑁆𑀜𑀢𑁆𑀣 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀺𑀬𑀸𑀦𑀁 𑀲𑀦𑁆𑀢𑀺𑀓𑁂 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀧𑀘𑁆𑀘𑀸𑀲𑀻𑀲𑀫𑀸𑀦𑀲𑁆𑀲 𑀘𑀭𑀢𑁄𑀧𑀺 𑀧𑀩𑁆𑀩𑀚𑁆𑀚𑀸 𑀅𑀦𑀼𑀧𑀩𑁆𑀩𑀚𑁆𑀚𑀸𑀯. 𑀅𑀜𑁆𑀜𑁂𑀲𑀼 𑀧𑀦 𑀧𑀲𑀸𑀤𑁂𑀦 𑀅𑀜𑁆𑀜𑁂𑀲𑀁𑀬𑁂𑀯 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀜𑁆𑀜𑁂𑀲𑀁𑀬𑁂𑀯 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀧𑀘𑁆𑀘𑀸𑀲𑀻𑀲𑀫𑀸𑀦𑀲𑁆𑀲 𑀘𑀭𑀢𑁄 𑀧𑀩𑁆𑀩𑀚𑁆𑀚𑀸 𑀅𑀦𑀼𑀧𑀩𑁆𑀩𑀚𑁆𑀚𑀸 𑀦𑀸𑀫 𑀦 𑀳𑁄𑀢𑀺. 𑀯𑀼𑀢𑁆𑀢𑀦𑀬𑁂𑀦 𑀧𑀩𑁆𑀩𑀚𑀺𑀢𑁂𑀲𑀼 𑀧𑀦 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀢𑀸𑀯 𑀅𑀦𑀼𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸 𑀲𑀢𑀲𑀳𑀲𑁆𑀲𑀫𑀢𑁆𑀢𑀸 𑀅𑀳𑁂𑀲𑀼𑀁, 𑀢𑀣𑀸 𑀣𑁂𑀭𑀲𑁆𑀲𑁂𑀯 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀘𑀦𑁆𑀤𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲, 𑀢𑀲𑁆𑀲𑀸𑀧𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀲𑀽𑀭𑀺𑀬𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲, 𑀢𑀲𑁆𑀲𑀸𑀧𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀅𑀲𑁆𑀲𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲, 𑀢𑀲𑁆𑀲𑀸𑀧𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀬𑁄𑀦𑀓𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲. 𑀢𑀲𑁆𑀲 𑀧𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀅𑀲𑁄𑀓𑀭𑀜𑁆𑀜𑁄 𑀓𑀦𑀺𑀝𑁆𑀞𑀪𑀸𑀢𑀸 𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫 𑀅𑀳𑁄𑀲𑀺. 𑀢𑀲𑁆𑀲 𑀅𑀦𑀼𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸 𑀅𑀟𑁆𑀠𑀢𑁂𑀬𑁆𑀬𑀓𑁄𑀝𑀺𑀲𑀗𑁆𑀔𑀸 𑀅𑀳𑁂𑀲𑀼𑀁. 𑀤𑀻𑀧𑀧𑁆𑀧𑀲𑀸𑀤𑀓𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲 𑀧𑀦 𑀅𑀦𑀼𑀧𑀩𑁆𑀩𑀚𑀺𑀢𑀸𑀦𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀬𑀸𑀯𑀚𑁆𑀚𑀤𑀺𑀯𑀲𑀸 𑀮𑀗𑁆𑀓𑀸𑀤𑀻𑀧𑁂 𑀲𑀢𑁆𑀣𑀭𑀺 𑀧𑀲𑀸𑀤𑁂𑀦 𑀧𑀩𑁆𑀩𑀚𑀦𑁆𑀢𑀸 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲𑁂𑀯 𑀅𑀦𑀼𑀧𑀩𑁆𑀩𑀚𑁆𑀚𑀦𑁆𑀢𑀺 𑀦𑀸𑀫.

𑀇𑀤𑀸𑀦𑀺 𑀬𑁂𑀦 𑀓𑀸𑀭𑀡𑁂𑀦 𑀢𑁂𑀲𑀁 𑀅𑀭𑀺𑀬𑀸𑀦𑀁 𑀤𑀲𑁆𑀲𑀦𑀸𑀤𑀺 𑀩𑀳𑀽𑀧𑀓𑀸𑀭𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸𑀭𑀽𑀧𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀣𑀸𑀭𑀽𑀧𑁂𑀢𑀺 𑀢𑀸𑀤𑀺𑀲𑁂 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁂 𑀅𑀭𑀺𑀬𑁂. 𑀬𑀲𑁆𑀫𑀸 𑀤𑀲𑁆𑀲𑀦𑀲𑀯𑀦𑀸𑀦𑀼𑀲𑁆𑀲𑀭𑀡𑀸𑀦𑀺 𑀉𑀧𑀲𑀗𑁆𑀓𑀫𑀦𑀧𑀬𑀺𑀭𑀼𑀧𑀸𑀲𑀦𑀝𑁆𑀞𑀸𑀦𑀸𑀦𑀺, 𑀢𑀲𑁆𑀫𑀸 𑀢𑀸𑀦𑀺 𑀅𑀦𑀸𑀫𑀲𑀺𑀢𑁆𑀯𑀸 𑀉𑀧𑀲𑀗𑁆𑀓𑀫𑀦𑀧𑀬𑀺𑀭𑀼𑀧𑀸𑀲𑀦𑀸𑀦𑀺𑀬𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄’’𑀢𑀺 𑀯𑀼𑀢𑁆𑀢𑀁. 𑀤𑀲𑁆𑀲𑀦𑀲𑀯𑀦𑀸𑀦𑀼𑀲𑁆𑀲𑀭𑀡𑀢𑁄 𑀳𑀺 𑀅𑀭𑀺𑀬𑁂𑀲𑀼 𑀉𑀧𑁆𑀧𑀦𑁆𑀦𑀲𑀤𑁆𑀥𑁄 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀮𑀤𑁆𑀥𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑁄 𑀅𑀧𑀭𑀺𑀧𑀽𑀭𑁂 𑀲𑀻𑀮𑀸𑀤𑀺𑀕𑀼𑀡𑁂 𑀧𑀭𑀺𑀧𑀽𑀭𑁂𑀲𑁆𑀲𑀢𑀻𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀤𑁆𑀥𑀸𑀚𑀸𑀢𑁄 𑀉𑀧𑀲𑀗𑁆𑀓𑀫𑀢𑀺, 𑀉𑀧𑀲𑀗𑁆𑀓𑀫𑀦𑁆𑀢𑁄 𑀧𑀬𑀺𑀭𑀼𑀧𑀸𑀲𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁨.𑁧𑁮𑁩).

𑀢𑀢𑁆𑀣 𑀲𑁂𑀯𑀢𑁄𑀢𑀺 𑀯𑀢𑁆𑀢𑀧𑀝𑀺𑀯𑀢𑁆𑀢𑀓𑀭𑀡𑀯𑀲𑁂𑀦 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀢𑁄. 𑀪𑀚𑀢𑁄𑀢𑀺 𑀲𑀫𑁆𑀧𑀺𑀬𑀸𑀬𑀦𑀪𑀢𑁆𑀢𑀺𑀯𑀲𑁂𑀦 𑀪𑀚𑀢𑁄. 𑀧𑀬𑀺𑀭𑀼𑀧𑀸𑀲𑀢𑁄𑀢𑀺 𑀧𑀜𑁆𑀳𑀧𑀼𑀘𑁆𑀙𑀦𑁂𑀦 𑀧𑀝𑀺𑀧𑀢𑁆𑀢𑀺𑀅𑀦𑀼𑀓𑀭𑀡𑁂𑀦 𑀘 𑀧𑀬𑀺𑀭𑀼𑀧𑀸𑀲𑀢𑁄𑀢𑀺 𑀢𑀺𑀡𑁆𑀡𑀁 𑀧𑀤𑀸𑀦𑀁 𑀅𑀢𑁆𑀣𑀯𑀺𑀪𑀸𑀕𑁄 𑀤𑀻𑀧𑁂𑀢𑀩𑁆𑀩𑁄. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀸𑀭𑀺𑀧𑀽𑀭𑀺 𑀏𑀓𑀽𑀦𑀯𑀻𑀲𑀢𑀺𑀫𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀭𑀽𑀧𑀸 𑀘 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀢𑀺𑀆𑀤𑀻𑀲𑀼 𑀬𑁂 𑀬𑀣𑀸𑀯𑀼𑀢𑁆𑀢𑀕𑀼𑀡𑀲𑀫𑀦𑁆𑀦𑀸𑀕𑀫𑁂𑀦 𑀏𑀯𑀭𑀽𑀧𑀸 𑀏𑀤𑀺𑀲𑀸 𑀪𑀺𑀦𑁆𑀦𑀲𑀩𑁆𑀩𑀓𑀺𑀮𑁂𑀲𑀸 𑀪𑀺𑀓𑁆𑀔𑀽, 𑀢𑁂 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀳𑀺𑀢𑁂𑀲𑀼 𑀲𑀢𑁆𑀢𑀸𑀦𑀁 𑀦𑀺𑀬𑁄𑀚𑀦𑀯𑀲𑁂𑀦 𑀅𑀦𑀼𑀲𑀸𑀲𑀦𑀢𑁄 𑀲𑀢𑁆𑀣𑀸𑀭𑁄𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀚𑀸𑀢𑀺𑀓𑀦𑁆𑀢𑀸𑀭𑀸𑀤𑀺𑀦𑀺𑀢𑁆𑀣𑀭𑀡𑀢𑁄 𑀲𑀢𑁆𑀣𑀯𑀸𑀳𑀸𑀢𑀺𑀧𑀺, 𑀭𑀸𑀕𑀸𑀤𑀺𑀭𑀡𑀸𑀦𑀁 𑀚𑀳𑀦𑀢𑁄 𑀚𑀳𑀸𑀧𑀦𑀢𑁄 𑀘 𑀭𑀡𑀜𑁆𑀚𑀳𑀸𑀢𑀺𑀧𑀺, 𑀅𑀯𑀺𑀚𑁆𑀚𑀸𑀢𑀫𑀲𑁆𑀲 𑀯𑀺𑀦𑁄𑀤𑀦𑀢𑁄 𑀯𑀺𑀦𑁄𑀤𑀸𑀧𑀦𑀢𑁄 𑀘 𑀢𑀫𑁄𑀦𑀼𑀤𑀸𑀢𑀺𑀧𑀺, 𑀲𑀧𑀭𑀲𑀦𑁆𑀢𑀸𑀦𑁂𑀲𑀼 𑀧𑀜𑁆𑀜𑀸𑀆𑀮𑁄𑀓𑀧𑀜𑁆𑀜𑀸𑀑𑀪𑀸𑀲𑀧𑀜𑁆𑀜𑀸𑀧𑀚𑁆𑀚𑁄𑀢𑀸𑀦𑀁 𑀓𑀭𑀡𑁂𑀦 𑀦𑀺𑀩𑁆𑀩𑀢𑁆𑀢𑀦𑁂𑀦 𑀆𑀮𑁄𑀓𑀸𑀤𑀺𑀓𑀭𑀸𑀢𑀺𑀧𑀺, 𑀢𑀣𑀸 𑀜𑀸𑀡𑀼𑀓𑁆𑀓𑀸𑀜𑀸𑀡𑀧𑁆𑀧𑀪𑀸𑀥𑀫𑁆𑀫𑀼𑀓𑁆𑀓𑀸𑀥𑀫𑁆𑀫𑀧𑁆𑀧𑀪𑀸𑀦𑀁 𑀥𑀸𑀭𑀡𑁂𑀦 𑀓𑀭𑀡𑁂𑀦 𑀘 𑀉𑀓𑁆𑀓𑀸𑀥𑀸𑀭𑀸𑀢𑀺𑀧𑀺, 𑀧𑀪𑀗𑁆𑀓𑀭𑀸𑀢𑀺𑀧𑀺, 𑀆𑀭𑀓𑀢𑁆𑀢𑀸 𑀓𑀺𑀮𑁂𑀲𑁂𑀳𑀺, 𑀅𑀦𑀬𑁂 𑀦 𑀇𑀭𑀺𑀬𑀦𑀢𑁄, 𑀅𑀬𑁂 𑀘 𑀇𑀭𑀺𑀬𑀦𑀢𑁄 𑀧𑀭𑁂𑀲𑀁 𑀢𑀣𑀸𑀪𑀸𑀯𑀳𑁂𑀢𑀼𑀪𑀸𑀯𑀢𑁄, 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀅𑀭𑀡𑀻𑀬𑀢𑁄 𑀅𑀭𑀺𑀬𑀸𑀢𑀺𑀧𑀺, 𑀧𑀜𑁆𑀜𑀸𑀘𑀓𑁆𑀔𑀼𑀥𑀫𑁆𑀫𑀘𑀓𑁆𑀔𑀽𑀦𑀁 𑀲𑀸𑀢𑀺𑀲𑀬𑀧𑀝𑀺𑀮𑀸𑀪𑁂𑀦 𑀘𑀓𑁆𑀔𑀼𑀫𑀦𑁆𑀢𑁄𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺.

𑀕𑀸𑀣𑀸𑀲𑀼 𑀧𑀸𑀫𑁄𑀚𑁆𑀚𑀓𑀭𑀡𑀁 𑀞𑀸𑀦𑀦𑁆𑀢𑀺 𑀦𑀺𑀭𑀸𑀫𑀺𑀲𑀲𑁆𑀲 𑀧𑀫𑁄𑀤𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀁 𑀞𑀸𑀦𑀁 𑀓𑀸𑀭𑀡𑀁. 𑀏𑀢𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀦𑀺𑀤𑀲𑁆𑀲𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀯𑀺𑀚𑀸𑀦𑀢𑀦𑁆𑀢𑀺 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑁂 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑀸𑀦𑀁. 𑀪𑀸𑀯𑀺𑀢𑀢𑁆𑀢𑀸𑀦𑀦𑁆𑀢𑀺 𑀪𑀸𑀯𑀺𑀢𑀲𑀪𑀸𑀯𑀸𑀦𑀁, 𑀓𑀸𑀬𑀪𑀸𑀯𑀦𑀸𑀤𑀻𑀳𑀺 𑀪𑀸𑀯𑀺𑀢𑀲𑀦𑁆𑀢𑀸𑀦𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀚𑀻𑀯𑀺𑀦𑀦𑁆𑀢𑀺 𑀫𑀺𑀘𑁆𑀙𑀸𑀚𑀻𑀯𑀁 𑀧𑀳𑀸𑀬 𑀥𑀫𑁆𑀫𑁂𑀦 𑀜𑀸𑀬𑁂𑀦 𑀚𑀻𑀯𑀺𑀓𑀓𑀧𑁆𑀧𑀦𑀢𑁄, 𑀥𑀫𑁆𑀫𑁂𑀦 𑀯𑀸 𑀜𑀸𑀬𑁂𑀦 𑀅𑀢𑁆𑀢𑀪𑀸𑀯𑀲𑁆𑀲 𑀧𑀯𑀢𑁆𑀢𑀦𑀢𑁄, 𑀲𑀫𑀸𑀧𑀢𑁆𑀢𑀺𑀩𑀳𑀼𑀮𑀢𑀸𑀬 𑀯𑀸 𑀅𑀕𑁆𑀕𑀨𑀮𑀥𑀫𑁆𑀫𑁂𑀦 𑀚𑀻𑀯𑀦𑀢𑁄 𑀥𑀫𑁆𑀫𑀚𑀻𑀯𑀺𑀦𑀁. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀤𑀺𑀤𑀁 𑀪𑀸𑀯𑀺𑀢𑀢𑁆𑀢𑀸𑀦𑀁 𑀧𑀭𑀺𑀦𑀺𑀝𑁆𑀞𑀺𑀢𑀲𑀫𑀸𑀥𑀺𑀧𑀜𑁆𑀜𑀸𑀪𑀸𑀯𑀦𑀸𑀦𑀁 𑀢𑀢𑁄 𑀏𑀯 𑀥𑀫𑁆𑀫𑀚𑀻𑀯𑀺𑀦𑀁 𑀅𑀭𑀺𑀬𑀸𑀦𑀁 𑀤𑀲𑁆𑀲𑀦𑀁. 𑀏𑀢𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑀦𑀺𑀫𑀺𑀢𑁆𑀢𑀸𑀦𑀁 𑀲𑀻𑀮𑀸𑀤𑀻𑀦𑀁 𑀧𑀸𑀭𑀺𑀧𑀽𑀭𑀺𑀳𑁂𑀢𑀼𑀪𑀸𑀯𑀢𑁄 𑀯𑀺𑀚𑀸𑀦𑀢𑀁 𑀲𑀧𑁆𑀧𑀜𑁆𑀜𑀚𑀸𑀢𑀺𑀓𑀸𑀦𑀁 𑀏𑀓𑀦𑁆𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑀓𑀸𑀭𑀡𑀦𑁆𑀢𑀺.

𑀇𑀤𑀸𑀦𑀺 𑀢𑀁 𑀢𑀲𑁆𑀲 𑀓𑀸𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂 𑀚𑁄𑀢𑀬𑀦𑁆𑀢𑀻’’𑀢𑀺 𑀑𑀲𑀸𑀦𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀢𑁂𑀢𑀺 𑀢𑁂 𑀪𑀸𑀯𑀺𑀢𑀢𑁆𑀢𑀸 𑀥𑀫𑁆𑀫𑀚𑀻𑀯𑀺𑀦𑁄 𑀅𑀭𑀺𑀬𑀸. 𑀚𑁄𑀢𑀬𑀦𑁆𑀢𑀻𑀢𑀺 𑀧𑀓𑀸𑀲𑀬𑀦𑁆𑀢𑀺. 𑀪𑀸𑀲𑀬𑀦𑁆𑀢𑀻𑀢𑀺 𑀲𑀤𑁆𑀥𑀫𑁆𑀫𑁄𑀪𑀸𑀲𑁂𑀦 𑀮𑁄𑀓𑀁 𑀧𑀪𑀸𑀲𑀬𑀦𑁆𑀢𑀺, 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑁂𑀲𑀦𑁆𑀢𑀺 𑀬𑁂𑀲𑀁 𑀅𑀭𑀺𑀬𑀸𑀦𑀁. 𑀲𑀸𑀲𑀦𑀦𑁆𑀢𑀺 𑀑𑀯𑀸𑀤𑀁. 𑀲𑀫𑁆𑀫𑀤𑀜𑁆𑀜𑀸𑀬𑀸𑀢𑀺 𑀧𑀼𑀩𑁆𑀩𑀪𑀸𑀕𑀜𑀸𑀡𑁂𑀳𑀺 𑀲𑀫𑁆𑀫𑀤𑁂𑀯 𑀚𑀸𑀦𑀺𑀢𑁆𑀯𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀜𑁆𑀘𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀢𑀡𑁆𑀳𑀼𑀧𑁆𑀧𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁫. 𑀙𑀝𑁆𑀞𑁂 𑀢𑀡𑁆𑀳𑀼𑀧𑁆𑀧𑀸𑀤𑀸𑀢𑀺 𑀏𑀢𑁆𑀣 𑀉𑀧𑁆𑀧𑀚𑁆𑀚𑀢𑀺 𑀏𑀢𑁂𑀲𑀽𑀢𑀺 𑀉𑀧𑁆𑀧𑀸𑀤𑀸. 𑀓𑀸 𑀉𑀧𑁆𑀧𑀚𑁆𑀚𑀢𑀺? 𑀢𑀡𑁆𑀳𑀸. 𑀢𑀡𑁆𑀳𑀸𑀬 𑀉𑀧𑁆𑀧𑀸𑀤𑀸 𑀢𑀡𑁆𑀳𑀼𑀧𑁆𑀧𑀸𑀤𑀸, 𑀢𑀡𑁆𑀳𑀸𑀯𑀢𑁆𑀣𑀽𑀦𑀺 𑀢𑀡𑁆𑀳𑀸𑀓𑀸𑀭𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀬𑀢𑁆𑀣𑀸𑀢𑀺 𑀬𑁂𑀲𑀼 𑀦𑀺𑀫𑀺𑀢𑁆𑀢𑀪𑀽𑀢𑁂𑀲𑀼. 𑀉𑀧𑁆𑀧𑀚𑁆𑀚𑀫𑀸𑀦𑀸𑀢𑀺 𑀉𑀧𑁆𑀧𑀚𑁆𑀚𑀦𑀲𑀻𑀮𑀸. 𑀘𑀻𑀯𑀭𑀳𑁂𑀢𑀽𑀢𑀺 ‘‘𑀓𑀢𑁆𑀣 𑀫𑀦𑀸𑀧𑀁 𑀘𑀻𑀯𑀭𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀻𑀯𑀭𑀓𑀸𑀭𑀡𑀸 𑀉𑀧𑁆𑀧𑀚𑁆𑀚𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺𑀪𑀯𑀸𑀪𑀯𑀳𑁂𑀢𑀽𑀢𑀺 𑀏𑀢𑁆𑀣 𑀧𑀦 𑀇𑀢𑀻𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀬𑀣𑀸 𑀘𑀻𑀯𑀭𑀸𑀤𑀺𑀳𑁂𑀢𑀼, 𑀏𑀯𑀁 𑀪𑀯𑀸𑀪𑀯𑀳𑁂𑀢𑀼𑀧𑀻𑀢𑀺 𑀅𑀢𑁆𑀣𑁄. 𑀪𑀯𑀸𑀪𑀯𑀸𑀢𑀺 𑀘𑁂𑀢𑁆𑀣 𑀧𑀡𑀻𑀢𑀧𑁆𑀧𑀡𑀻𑀢𑀸𑀦𑀺 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀺 𑀪𑀯𑀢𑀺 𑀆𑀭𑁄𑀕𑁆𑀬𑀁 𑀏𑀢𑁂𑀦𑀸𑀢𑀺 𑀓𑀢𑁆𑀯𑀸. ‘‘𑀲𑀫𑁆𑀧𑀢𑁆𑀢𑀺𑀪𑀯𑁂𑀲𑀼 𑀧𑀡𑀻𑀢𑀧𑁆𑀧𑀡𑀻𑀢𑀢𑀭𑁄 𑀪𑀯𑀸𑀪𑀯𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀪𑀯𑁄𑀢𑀺 𑀯𑀸 𑀲𑀫𑁆𑀧𑀢𑁆𑀢𑀺, 𑀅𑀪𑀯𑁄𑀢𑀺 𑀯𑀺𑀧𑀢𑁆𑀢𑀺. 𑀪𑀯𑁄𑀢𑀺 𑀯𑀼𑀟𑁆𑀠𑀺, 𑀅𑀪𑀯𑁄𑀢𑀺 𑀳𑀸𑀦𑀺. 𑀢𑀁 𑀦𑀺𑀫𑀺𑀢𑁆𑀢𑀜𑁆𑀘 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀪𑀯𑀸𑀪𑀯𑀳𑁂𑀢𑀼 𑀯𑀸’’𑀢𑀺.

𑀕𑀸𑀣𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸 𑀏𑀯. 𑀅𑀧𑀺𑀘 𑀢𑀡𑁆𑀳𑀸𑀤𑀼𑀢𑀺𑀬𑁄𑀢𑀺 𑀢𑀡𑁆𑀳𑀸𑀲𑀳𑀸𑀬𑁄. 𑀅𑀬𑀜𑁆𑀳𑀺 𑀲𑀢𑁆𑀢𑁄 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀲𑀁𑀲𑀭𑀦𑁆𑀢𑁄 𑀦 𑀏𑀓𑀓𑁄𑀯 𑀲𑀁𑀲𑀭𑀢𑀺, 𑀢𑀡𑁆𑀳𑀁 𑀧𑀦 𑀤𑀼𑀢𑀺𑀬𑀺𑀓𑀁 𑀲𑀳𑀸𑀬𑀺𑀓𑀁 𑀮𑀪𑀺𑀢𑁆𑀯𑀸𑀯 𑀲𑀁𑀲𑀭𑀢𑀺. 𑀢𑀣𑀸 𑀳𑀺 𑀢𑀁 𑀧𑀧𑀸𑀢𑀧𑀸𑀢𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀫𑀥𑀼𑀕𑀡𑁆𑀳𑀦𑀓𑀮𑀼𑀤𑁆𑀤𑀓𑀁 𑀯𑀺𑀬 𑀅𑀦𑁂𑀓𑀸𑀤𑀻𑀦𑀯𑀸𑀓𑀼𑀮𑁂𑀲𑀼𑀧𑀺 𑀪𑀯𑁂𑀲𑀼 𑀆𑀦𑀺𑀲𑀁𑀲𑀫𑁂𑀯 𑀤𑀲𑁆𑀲𑁂𑀦𑁆𑀢𑀻 𑀅𑀦𑀢𑁆𑀣𑀚𑀸𑀮𑁂 𑀲𑀸 𑀧𑀭𑀺𑀩𑁆𑀪𑀫𑀸𑀧𑁂𑀢𑀺. 𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸𑀢𑀺 𑀏𑀢𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀔𑀦𑁆𑀥𑁂𑀲𑀼 𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀲𑀜𑁆𑀜𑀺𑀢𑀁 𑀆𑀤𑀻𑀦𑀯𑀁 𑀚𑀸𑀦𑀺𑀢𑁆𑀯𑀸. 𑀢𑀡𑁆𑀳𑀁 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀦𑁆𑀢𑀺 ‘‘𑀢𑀡𑁆𑀳𑀸 𑀘𑀸𑀬𑀁 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄 𑀧𑀪𑀯𑁄 𑀓𑀸𑀭𑀡’’𑀦𑁆𑀢𑀺 𑀚𑀸𑀦𑀺𑀢𑁆𑀯𑀸. 𑀏𑀢𑁆𑀢𑀸𑀯𑀢𑀸 𑀘 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀼𑀧𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸. 𑀇𑀤𑀸𑀦𑀺 𑀢𑀁 𑀔𑀻𑀡𑀸𑀲𑀯𑀁 𑀣𑁄𑀫𑁂𑀦𑁆𑀢𑁄 ‘‘𑀯𑀻𑀢𑀢𑀡𑁆𑀳𑁄’’𑀢𑀺𑀆𑀤𑀺𑀫𑀸𑀳. 𑀬𑀁 𑀧𑀦𑁂𑀢𑁆𑀣 𑀅𑀯𑀼𑀢𑁆𑀢𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀙𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀩𑁆𑀭𑀳𑁆𑀫𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁬. 𑀲𑀢𑁆𑀢𑀫𑁂 𑀲𑀩𑁆𑀭𑀳𑁆𑀫𑀓𑀸𑀦𑀻𑀢𑀺 𑀲𑀲𑁂𑀝𑁆𑀞𑀓𑀸𑀦𑀺. 𑀬𑁂𑀲𑀦𑁆𑀢𑀺 𑀬𑁂𑀲𑀁 𑀓𑀼𑀮𑀸𑀦𑀁. 𑀧𑀼𑀢𑁆𑀢𑀸𑀦𑀦𑁆𑀢𑀺 𑀧𑀼𑀢𑁆𑀢𑁂𑀳𑀺 𑀧𑀽𑀚𑀺𑀢𑀲𑀤𑁆𑀤𑀬𑁄𑀕𑁂𑀦 𑀳𑀺 𑀇𑀤𑀁 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀅𑀚𑁆𑀛𑀸𑀕𑀸𑀭𑁂𑀢𑀺 𑀲𑀓𑁂 𑀖𑀭𑁂. 𑀧𑀽𑀚𑀺𑀢𑀸 𑀳𑁄𑀦𑁆𑀢𑀻𑀢𑀺 𑀬𑀁 𑀖𑀭𑁂 𑀅𑀢𑁆𑀣𑀺, 𑀢𑁂𑀦 𑀧𑀝𑀺𑀚𑀕𑁆𑀕𑀺𑀢𑀸 𑀫𑀦𑀸𑀧𑁂𑀦 𑀘𑁂𑀯 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀘 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀦𑁆𑀢𑀺. 𑀇𑀢𑀺 𑀫𑀸𑀢𑀸𑀧𑀺𑀢𑀼𑀧𑀽𑀚𑀓𑀸𑀦𑀺 𑀓𑀼𑀮𑀸𑀦𑀺 ‘‘𑀲𑀩𑁆𑀭𑀳𑁆𑀫𑀓𑀸𑀦𑀻’’𑀢𑀺 𑀧𑀲𑀁𑀲𑀺𑀢𑁆𑀯𑀸 𑀉𑀧𑀭𑀺𑀧𑀺 𑀦𑁂𑀲𑀁 𑀧𑀲𑀁𑀲𑀦𑀻𑀬𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀧𑀼𑀩𑁆𑀩𑀤𑁂𑀯𑀢𑀸𑀦𑀻’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀩𑁆𑀭𑀳𑁆𑀫𑀸𑀢𑀺𑀆𑀤𑀻𑀦𑀺 𑀢𑁂𑀲𑀁 𑀩𑁆𑀭𑀳𑁆𑀫𑀸𑀤𑀺𑀪𑀸𑀯𑀲𑀸𑀥𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀭𑀸𑀬𑀫𑀢𑁆𑀣𑀯𑀺𑀪𑀸𑀯𑀦𑀸 𑁋 𑀩𑁆𑀭𑀳𑁆𑀫𑀸𑀢𑀺 𑀲𑁂𑀝𑁆𑀞𑀸𑀥𑀺𑀯𑀘𑀦𑀁. 𑀬𑀣𑀸 𑀳𑀺 𑀩𑁆𑀭𑀳𑁆𑀫𑀼𑀦𑁄 𑀘𑀢𑀲𑁆𑀲𑁄 𑀪𑀸𑀯𑀦𑀸 𑀅𑀯𑀺𑀚𑀳𑀺𑀢𑀸 𑀳𑁄𑀦𑁆𑀢𑀺 𑀫𑁂𑀢𑁆𑀢𑀸, 𑀓𑀭𑀼𑀡𑀸, 𑀫𑀼𑀤𑀺𑀢𑀸, 𑀉𑀧𑁂𑀓𑁆𑀔𑀸𑀢𑀺, 𑀏𑀯𑀁 𑀫𑀸𑀢𑀸𑀧𑀺𑀢𑀽𑀦𑀁 𑀧𑀼𑀢𑁆𑀢𑁂𑀲𑀼 𑀘𑀢𑀲𑁆𑀲𑁄 𑀪𑀸𑀯𑀦𑀸 𑀅𑀯𑀺𑀚𑀳𑀺𑀢𑀸 𑀳𑁄𑀦𑁆𑀢𑀺. 𑀢𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀯𑁂𑀤𑀺𑀢𑀩𑁆𑀩𑀸 𑁋 𑀓𑀼𑀘𑁆𑀙𑀺𑀕𑀢𑀲𑁆𑀫𑀺𑀜𑁆𑀳𑀺 𑀤𑀸𑀭𑀓𑁂 ‘‘𑀓𑀤𑀸 𑀦 𑀔𑁄 𑀧𑀼𑀢𑁆𑀢𑀓𑀁 𑀅𑀭𑁄𑀕𑀁 𑀧𑀭𑀺𑀧𑀼𑀡𑁆𑀡𑀗𑁆𑀕𑀧𑀘𑁆𑀘𑀗𑁆𑀕𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦𑁂𑀲 𑀫𑀦𑁆𑀤𑁄 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄 𑀊𑀓𑀸𑀳𑀺 𑀯𑀸 𑀫𑀗𑁆𑀓𑀼𑀮𑁂𑀳𑀺 𑀯𑀸 𑀤𑀝𑁆𑀞𑁄 𑀤𑀼𑀓𑁆𑀔𑀲𑁂𑀬𑁆𑀬𑀸𑀬 𑀯𑀸 𑀧𑀻𑀴𑀺𑀢𑁄 𑀧𑀭𑁄𑀤𑀢𑀺 𑀯𑀺𑀭𑀯𑀢𑀺, 𑀢𑀤𑀸𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀓𑀸𑀭𑀼𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑀺. 𑀆𑀥𑀸𑀯𑀺𑀢𑁆𑀯𑀸 𑀯𑀺𑀥𑀸𑀯𑀺𑀢𑁆𑀯𑀸 𑀓𑀻𑀴𑀦𑀓𑀸𑀮𑁂 𑀧𑀦 𑀮𑁄𑀪𑀦𑀻𑀬𑀯𑀬𑀲𑁆𑀫𑀺𑀁 𑀯𑀸 𑀞𑀺𑀢𑀓𑀸𑀮𑁂 𑀤𑀸𑀭𑀓𑀁 𑀑𑀮𑁄𑀓𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀘𑀺𑀢𑁆𑀢𑀁 𑀲𑀧𑁆𑀧𑀺𑀫𑀡𑁆𑀟𑁂 𑀧𑀓𑁆𑀔𑀺𑀢𑁆𑀢𑀲𑀢𑀯𑀺𑀳𑀢𑀓𑀧𑁆𑀧𑀸𑀲𑀧𑀺𑀘𑀼𑀧𑀝𑀮𑀁 𑀯𑀺𑀬 𑀫𑀼𑀤𑀼𑀓𑀁 𑀆𑀫𑁄𑀤𑀺𑀢𑀁 𑀧𑀫𑁄𑀤𑀺𑀢𑀁, 𑀢𑀤𑀸 𑀦𑁂𑀲𑀁 𑀫𑀼𑀤𑀺𑀢𑀸 𑀮𑀩𑁆𑀪𑀢𑀺. 𑀬𑀤𑀸 𑀧𑀦 𑀢𑁂𑀲𑀁 𑀧𑀼𑀢𑁆𑀢𑁄 𑀤𑀸𑀭𑀪𑀭𑀡𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀧𑀸𑀝𑀺𑀬𑁂𑀓𑁆𑀓𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀢𑀤𑀸 𑀫𑀸𑀢𑀸𑀧𑀺𑀢𑀽𑀦𑀁 ‘‘𑀲𑀓𑁆𑀓𑁄𑀢𑀺 𑀤𑀸𑀦𑀺 𑀦𑁄 𑀧𑀼𑀢𑁆𑀢𑀓𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀚𑀻𑀯𑀺𑀢𑀼’’𑀦𑁆𑀢𑀺 𑀫𑀚𑁆𑀛𑀢𑁆𑀢𑀪𑀸𑀯𑁄 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀉𑀧𑁂𑀓𑁆𑀔𑀸 𑀮𑀩𑁆𑀪𑀢𑀺. 𑀏𑀯𑀁 𑀫𑀸𑀢𑀸𑀧𑀺𑀢𑀽𑀦𑀁 𑀧𑀼𑀢𑁆𑀢𑁂𑀲𑀼 𑀬𑀣𑀸𑀓𑀸𑀮𑀁 𑀘𑀢𑀼𑀩𑁆𑀩𑀺𑀥𑀲𑁆𑀲𑀧𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑁆𑀲 𑀮𑀩𑁆𑀪𑀦𑀢𑁄 𑀩𑁆𑀭𑀳𑁆𑀫𑀲𑀤𑀺𑀲𑀯𑀼𑀢𑁆𑀢𑀺𑀢𑀸𑀬 𑀯𑀼𑀢𑁆𑀢𑀁 ‘‘𑀩𑁆𑀭𑀳𑁆𑀫𑀸𑀢𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺.

𑀧𑀼𑀩𑁆𑀩𑀤𑁂𑀯𑀢𑀸𑀢𑀺 𑀏𑀢𑁆𑀣 𑀤𑁂𑀯𑀸 𑀦𑀸𑀫 𑀢𑀺𑀯𑀺𑀥𑀸 𑁋 𑀲𑀫𑁆𑀫𑀼𑀢𑀺𑀤𑁂𑀯𑀸, 𑀉𑀧𑀧𑀢𑁆𑀢𑀺𑀤𑁂𑀯𑀸, 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀢𑀺. 𑀢𑁂𑀲𑀼 𑀲𑀫𑁆𑀫𑀼𑀢𑀺𑀤𑁂𑀯𑀸 𑀦𑀸𑀫 𑀭𑀸𑀚𑀸𑀦𑁄 𑀔𑀢𑁆𑀢𑀺𑀬𑀸. 𑀢𑁂 𑀳𑀺 ‘‘𑀤𑁂𑀯𑁄, 𑀤𑁂𑀯𑀻’’𑀢𑀺 𑀮𑁄𑀓𑁂 𑀯𑁄𑀳𑀭𑀻𑀬𑀦𑁆𑀢𑀺, 𑀤𑁂𑀯𑀸 𑀯𑀺𑀬 𑀮𑁄𑀓𑀲𑁆𑀲 𑀦𑀺𑀕𑁆𑀕𑀳𑀸𑀦𑀼𑀕𑁆𑀕𑀳𑀲𑀫𑀢𑁆𑀣𑀸 𑀘 𑀳𑁄𑀦𑁆𑀢𑀺. 𑀉𑀧𑀧𑀢𑁆𑀢𑀺𑀤𑁂𑀯𑀸 𑀦𑀸𑀫 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀪𑀯𑀕𑁆𑀕𑀸 𑀉𑀧𑁆𑀧𑀦𑁆𑀦𑀸 𑀲𑀢𑁆𑀢𑀸. 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀦𑀸𑀫 𑀔𑀻𑀡𑀸𑀲𑀯𑀸 𑀲𑀩𑁆𑀩𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀺𑀢𑁄. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀤𑀺𑀩𑁆𑀩𑀦𑁆𑀢𑀺, 𑀓𑀻𑀴𑀦𑁆𑀢𑀺, 𑀮𑀴𑀦𑁆𑀢𑀺, 𑀚𑁄𑀢𑀦𑁆𑀢𑀺 𑀧𑀝𑀺𑀧𑀓𑁆𑀔𑀁 𑀚𑀬𑀦𑁆𑀢𑀺 𑀯𑀸𑀢𑀺 𑀤𑁂𑀯𑀸. 𑀢𑁂𑀲𑀼 𑀲𑀩𑁆𑀩𑀲𑁂𑀝𑁆𑀞𑀸 𑀯𑀺𑀲𑀼𑀤𑁆𑀥𑀺𑀤𑁂𑀯𑀸. 𑀬𑀣𑀸 𑀢𑁂 𑀩𑀸𑀮𑀚𑀦𑁂𑀳𑀺 𑀓𑀢𑀁 𑀅𑀧𑀭𑀸𑀥𑀁 𑀅𑀕𑀡𑁂𑀢𑁆𑀯𑀸 𑀏𑀓𑀦𑁆𑀢𑁂𑀦𑁂𑀯 𑀢𑁂𑀲𑀁 𑀅𑀦𑀢𑁆𑀣𑀳𑀸𑀦𑀺𑀁 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀜𑁆𑀘 𑀆𑀓𑀗𑁆𑀔𑀦𑁆𑀢𑀸𑀯 𑀬𑀣𑀸𑀯𑀼𑀢𑁆𑀢𑀩𑁆𑀭𑀳𑁆𑀫𑀯𑀺𑀳𑀸𑀭𑀬𑁄𑀕𑁂𑀦 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀬 𑀘 𑀢𑁂𑀲𑀁 𑀓𑀸𑀭𑀸𑀦𑀁 𑀫𑀳𑀧𑁆𑀨𑀮𑀢𑀁 𑀫𑀳𑀸𑀦𑀺𑀲𑀁𑀲𑀢𑀜𑁆𑀘 𑀆𑀯𑀳𑀦𑁆𑀢𑀺; 𑀏𑀯𑀫𑁂𑀯 𑀫𑀸𑀢𑀸𑀧𑀺𑀢𑀭𑁄𑀧𑀺 𑀧𑀼𑀢𑁆𑀢𑀸𑀦𑀁 𑀅𑀧𑀭𑀸𑀥𑀁 𑀅𑀕𑀡𑁂𑀢𑁆𑀯𑀸 𑀏𑀓𑀦𑁆𑀢𑁂𑀦𑁂𑀯 𑀢𑁂𑀲𑀁 𑀅𑀦𑀢𑁆𑀣𑀳𑀸𑀦𑀺𑀁 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀜𑁆𑀘 𑀆𑀓𑀗𑁆𑀔𑀦𑁆𑀢𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑀢𑀼𑀩𑁆𑀩𑀺𑀥𑀲𑁆𑀲𑀧𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑁆𑀲 𑀮𑀩𑁆𑀪𑀦𑀢𑁄 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀸 𑀧𑀭𑀫𑀤𑀓𑁆𑀔𑀺𑀡𑁂𑀬𑁆𑀬𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑀺 𑀓𑀢𑀸𑀦𑀁 𑀓𑀸𑀭𑀸𑀦𑀁 𑀫𑀳𑀧𑁆𑀨𑀮𑀢𑀁 𑀫𑀳𑀸𑀦𑀺𑀲𑀁𑀲𑀢𑀜𑁆𑀘 𑀆𑀯𑀳𑀦𑁆𑀢𑀺. 𑀲𑀩𑁆𑀩𑀤𑁂𑀯𑁂𑀳𑀺 𑀘 𑀧𑀞𑀫𑀁 𑀢𑁂𑀲𑀁 𑀉𑀧𑀓𑀸𑀭𑀯𑀦𑁆𑀢𑀢𑀸𑀬 𑀢𑁂 𑀆𑀤𑀺𑀢𑁄𑀬𑁂𑀯 𑀤𑁂𑀯𑀸. 𑀢𑁂𑀲𑀜𑁆𑀳𑀺 𑀯𑀲𑁂𑀦 𑀢𑁂 𑀧𑀞𑀫𑀁 𑀅𑀜𑁆𑀜𑁂 𑀤𑁂𑀯𑁂 ‘‘𑀤𑁂𑀯𑀸’’𑀢𑀺 𑀚𑀸𑀦𑀦𑁆𑀢𑀺 𑀆𑀭𑀸𑀥𑁂𑀦𑁆𑀢𑀺 𑀧𑀬𑀺𑀭𑀼𑀧𑀸𑀲𑀦𑁆𑀢𑀺, 𑀆𑀭𑀸𑀥𑀦𑀯𑀺𑀥𑀺𑀁 𑀜𑀢𑁆𑀯𑀸 𑀢𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑀸 𑀢𑀲𑁆𑀲𑀸 𑀧𑀝𑀺𑀧𑀢𑁆𑀢𑀺𑀬𑀸 𑀨𑀮𑀁 𑀅𑀥𑀺𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀧𑀘𑁆𑀙𑀸𑀤𑁂𑀯𑀸 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑀤𑁂𑀯𑀢𑀸𑀢𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺.

𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺 𑀧𑀞𑀫𑀆𑀘𑀭𑀺𑀬𑀸. 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀧𑀼𑀢𑁆𑀢𑁂 𑀲𑀺𑀓𑁆𑀔𑀸𑀧𑁂𑀦𑁆𑀢𑀸 𑀅𑀢𑀺𑀢𑀭𑀼𑀡𑀓𑀸𑀮𑀢𑁄 𑀧𑀝𑁆𑀞𑀸𑀬 ‘‘𑀏𑀯𑀁 𑀦𑀺𑀲𑀻𑀤, 𑀏𑀯𑀁 𑀕𑀘𑁆𑀙, 𑀏𑀯𑀁 𑀢𑀺𑀝𑁆𑀞, 𑀏𑀯𑀁 𑀲𑀬, 𑀏𑀯𑀁 𑀔𑀸𑀤, 𑀏𑀯𑀁 𑀪𑀼𑀜𑁆𑀚, 𑀅𑀬𑀁 𑀢𑁂 ‘𑀢𑀸𑀢𑀸’𑀢𑀺 𑀯𑀢𑁆𑀢𑀩𑁆𑀩𑁄, 𑀅𑀬𑀁 ‘𑀪𑀸𑀢𑀺𑀓𑀸’𑀢𑀺, 𑀅𑀬𑀁 ‘𑀪𑀕𑀺𑀦𑀻’𑀢𑀺, 𑀇𑀤𑀁 𑀦𑀸𑀫 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀇𑀤𑀁 𑀦 𑀯𑀝𑁆𑀝𑀢𑀺, 𑀅𑀲𑀼𑀓𑀁 𑀦𑀸𑀫 𑀉𑀧𑀲𑀗𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀺, 𑀅𑀲𑀼𑀓𑀁 𑀦𑀸𑀫 𑀦 𑀯𑀝𑁆𑀝𑀢𑀻’’𑀢𑀺 𑀕𑀸𑀳𑁂𑀦𑁆𑀢𑀺 𑀲𑀺𑀓𑁆𑀔𑀸𑀧𑁂𑀦𑁆𑀢𑀺. 𑀅𑀧𑀭𑀪𑀸𑀕𑁂 𑀅𑀜𑁆𑀜𑁂 𑀆𑀘𑀭𑀺𑀬𑀸𑀧𑀺 𑀲𑀺𑀧𑁆𑀧𑀁 𑀫𑀼𑀤𑁆𑀤𑀁 𑀕𑀡𑀦𑀦𑁆𑀢𑀺 𑀏𑀯𑀫𑀸𑀤𑀺𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, 𑀅𑀜𑁆𑀜𑁂 𑀲𑀭𑀡𑀸𑀦𑀺 𑀤𑁂𑀦𑁆𑀢𑀺, 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑀺, 𑀧𑀩𑁆𑀩𑀸𑀚𑁂𑀦𑁆𑀢𑀺, 𑀥𑀫𑁆𑀫𑀁 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑀺, 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀻𑀦𑀺 𑀧𑀸𑀧𑁂𑀦𑁆𑀢𑀺. 𑀇𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀧𑀘𑁆𑀙𑀸𑀆𑀘𑀭𑀺𑀬𑀸 𑀦𑀸𑀫. 𑀫𑀸𑀢𑀸𑀧𑀺𑀢𑀭𑁄 𑀧𑀦 𑀲𑀩𑁆𑀩𑀧𑀞𑀫𑀁. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺.

𑀆𑀳𑀼𑀦𑁂𑀬𑁆𑀬𑀸𑀢𑀺 𑀆𑀦𑁂𑀢𑁆𑀯𑀸 𑀳𑀼𑀦𑀺𑀢𑀩𑁆𑀩𑀦𑁆𑀢𑀺 𑀆𑀳𑀼𑀦𑀁, 𑀤𑀽𑀭𑀢𑁄𑀧𑀺 𑀆𑀦𑁂𑀢𑁆𑀯𑀸 𑀨𑀮𑀯𑀺𑀲𑁂𑀲𑀁 𑀆𑀓𑀗𑁆𑀔𑀦𑁆𑀢𑁂𑀦 𑀕𑀼𑀡𑀯𑀦𑁆𑀢𑁂𑀲𑀼 𑀤𑀸𑀢𑀩𑁆𑀩𑀸𑀦𑀁 𑀅𑀦𑁆𑀦𑀧𑀸𑀦𑀯𑀢𑁆𑀣𑀘𑁆𑀙𑀸𑀤𑀦𑀸𑀤𑀻𑀦𑀁 𑀏𑀢𑀁 𑀦𑀸𑀫𑀁, 𑀉𑀧𑀓𑀸𑀭𑀔𑁂𑀢𑁆𑀢𑀢𑀸𑀬 𑀢𑀁 𑀆𑀳𑀼𑀦𑀁 𑀅𑀭𑀳𑀦𑁆𑀢𑀻𑀢𑀺 𑀆𑀳𑀼𑀦𑁂𑀬𑁆𑀬𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀳𑀼𑀦𑁂𑀬𑁆𑀬𑀸𑀢𑀺, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺.

𑀇𑀤𑀸𑀦𑀺 𑀢𑁂𑀲𑀁 𑀩𑁆𑀭𑀳𑁆𑀫𑀸𑀤𑀺𑀪𑀸𑀯𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀩𑀳𑀼𑀓𑀸𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀽𑀢𑀺 𑀢𑀁 𑀫𑀸𑀢𑀸𑀧𑀺𑀢𑀽𑀦𑀁 𑀩𑁆𑀭𑀳𑁆𑀫𑀸𑀤𑀺𑀅𑀥𑀺𑀯𑀘𑀦𑀁 𑀓𑁂𑀦 𑀓𑀸𑀭𑀡𑁂𑀦𑀸𑀢𑀺 𑀘𑁂𑀢𑀺 𑀅𑀢𑁆𑀣𑁄. 𑀩𑀳𑀼𑀓𑀸𑀭𑀸𑀢𑀺 𑀩𑀳𑀽𑀧𑀓𑀸𑀭𑀸. 𑀆𑀧𑀸𑀤𑀓𑀸𑀢𑀺 𑀚𑀻𑀯𑀺𑀢𑀲𑁆𑀲 𑀆𑀧𑀸𑀤𑀓𑀸, 𑀧𑀸𑀮𑀓𑀸. 𑀧𑀼𑀢𑁆𑀢𑀸𑀦𑀜𑁆𑀳𑀺 𑀫𑀸𑀢𑀸𑀧𑀺𑀢𑀽𑀳𑀺 𑀚𑀻𑀯𑀺𑀢𑀁 𑀆𑀧𑀸𑀤𑀺𑀢𑀁 𑀧𑀸𑀮𑀺𑀢𑀁 𑀖𑀝𑀺𑀢𑀁 𑀅𑀦𑀼𑀧𑁆𑀧𑀩𑀦𑁆𑀥𑁂𑀦 𑀧𑀯𑀢𑁆𑀢𑀺𑀢𑀁 𑀲𑀫𑁆𑀧𑀸𑀤𑀺𑀢𑀁. 𑀧𑁄𑀲𑀓𑀸𑀢𑀺 𑀳𑀢𑁆𑀣𑀧𑀸𑀤𑁂 𑀯𑀟𑁆𑀠𑁂𑀢𑁆𑀯𑀸 𑀳𑀤𑀬𑀮𑁄𑀳𑀺𑀢𑀁 𑀧𑀸𑀬𑁂𑀢𑁆𑀯𑀸 𑀧𑁄𑀲𑁂𑀢𑀸𑀭𑁄. 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀸𑀭𑁄𑀢𑀺 𑀧𑀼𑀢𑁆𑀢𑀸𑀦𑀁 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀤𑀲𑁆𑀲𑀦𑀁 𑀦𑀸𑀫 𑀫𑀸𑀢𑀸𑀧𑀺𑀢𑀭𑁄 𑀦𑀺𑀲𑁆𑀲𑀸𑀬 𑀚𑀸𑀢𑀦𑁆𑀢𑀺 𑀢𑁂 𑀦𑁂𑀲𑀁 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀸𑀭𑁄 𑀦𑀸𑀫. 𑀇𑀢𑀺 𑀢𑁂𑀲𑀁 𑀩𑀳𑀼𑀓𑀸𑀭𑀢𑁆𑀢𑀁 𑀩𑁆𑀭𑀳𑁆𑀫𑀸𑀤𑀺𑀪𑀸𑀯𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑀺𑀢𑀁, 𑀬𑁂𑀦 𑀧𑀼𑀢𑁆𑀢𑁄 𑀫𑀸𑀢𑀸𑀧𑀺𑀢𑀽𑀦𑀁 𑀮𑁄𑀓𑀺𑀬𑁂𑀦 𑀉𑀧𑀓𑀸𑀭𑁂𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀧𑀭𑀺𑀬𑀦𑁆𑀢𑀁 𑀧𑀝𑀺𑀓𑀸𑀭𑀁 𑀓𑀸𑀢𑀼𑀁 𑀦 𑀲𑀫𑀢𑁆𑀣𑁄𑀬𑁂𑀯. 𑀲𑀘𑁂 𑀳𑀺 𑀧𑀼𑀢𑁆𑀢𑁄 ‘‘𑀫𑀸𑀢𑀸𑀧𑀺𑀢𑀽𑀦𑀁 𑀉𑀧𑀓𑀸𑀭𑀲𑁆𑀲 𑀧𑀘𑁆𑀘𑀼𑀧𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀯𑀸𑀬𑀫𑀦𑁆𑀢𑁄 𑀤𑀓𑁆𑀔𑀺𑀡𑁂 𑀅𑀁𑀲𑀓𑀽𑀝𑁂 𑀫𑀸𑀢𑀭𑀁, 𑀇𑀢𑀭𑀲𑁆𑀫𑀺𑀁 𑀧𑀺𑀢𑀭𑀁 𑀞𑀧𑁂𑀢𑁆𑀯𑀸 𑀯𑀲𑁆𑀲𑀲𑀢𑀸𑀬𑀼𑀓𑁄 𑀲𑀓𑀮𑀁 𑀯𑀲𑁆𑀲𑀲𑀢𑀫𑁆𑀧𑀺 𑀧𑀭𑀺𑀳𑀭𑁂𑀬𑁆𑀬 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀦𑁆𑀳𑀸𑀧𑀦𑀲𑀫𑁆𑀩𑀸𑀳𑀦𑀸𑀤𑀻𑀳𑀺 𑀘 𑀬𑀣𑀸𑀭𑀼𑀘𑀺 𑀉𑀧𑀝𑁆𑀞𑀳𑀦𑁆𑀢𑁄 𑀢𑁂𑀲𑀁 𑀫𑀼𑀢𑁆𑀢𑀓𑀭𑀻𑀲𑀫𑁆𑀧𑀺 𑀅𑀚𑀺𑀕𑀼𑀘𑁆𑀙𑀦𑁆𑀢𑁄, 𑀦 𑀏𑀢𑁆𑀢𑀸𑀯𑀢𑀸 𑀧𑀼𑀢𑁆𑀢𑁂𑀦 𑀫𑀸𑀢𑀸𑀧𑀺𑀢𑀽𑀦𑀁 𑀧𑀝𑀺𑀓𑀸𑀭𑁄 𑀓𑀢𑁄 𑀳𑁄𑀢𑀺 𑀅𑀜𑁆𑀜𑀢𑁆𑀭 𑀲𑀤𑁆𑀥𑀸𑀤𑀺𑀕𑀼𑀡𑀯𑀺𑀲𑁂𑀲𑁂 𑀧𑀢𑀺𑀝𑁆𑀞𑀸𑀧𑀦𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀤𑁆𑀯𑀺𑀦𑁆𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀦 𑀲𑀼𑀧𑁆𑀧𑀝𑀺𑀓𑀸𑀭𑀁 𑀯𑀤𑀸𑀫𑀺. 𑀓𑀢𑀫𑁂𑀲𑀁 𑀤𑁆𑀯𑀺𑀦𑁆𑀦𑀁? 𑀫𑀸𑀢𑀼 𑀘 𑀧𑀺𑀢𑀼 𑀘. 𑀏𑀓𑁂𑀦, 𑀪𑀺𑀓𑁆𑀔𑀯𑁂, 𑀅𑀁𑀲𑁂𑀦 𑀫𑀸𑀢𑀭𑀁 𑀧𑀭𑀺𑀳𑀭𑁂𑀬𑁆𑀬, 𑀏𑀓𑁂𑀦 𑀅𑀁𑀲𑁂𑀦 𑀧𑀺𑀢𑀭𑀁 𑀧𑀭𑀺𑀳𑀭𑁂𑀬𑁆𑀬 𑀯𑀲𑁆𑀲𑀲𑀢𑀸𑀬𑀼𑀓𑁄 𑀯𑀲𑁆𑀲𑀲𑀢𑀚𑀻𑀯𑀻, 𑀲𑁄 𑀘 𑀦𑁂𑀲𑀁 𑀉𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀦𑁆𑀳𑀸𑀧𑀦𑀲𑀫𑁆𑀩𑀸𑀳𑀦𑁂𑀦, 𑀢𑁂 𑀘 𑀢𑀢𑁆𑀣𑁂𑀯 𑀫𑀼𑀢𑁆𑀢𑀓𑀭𑀻𑀲𑀁 𑀘𑀚𑁂𑀬𑁆𑀬𑀼𑀁, 𑀦 𑀢𑁆𑀯𑁂𑀯, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀽𑀦𑀁 𑀓𑀢𑀁 𑀯𑀸 𑀳𑁄𑀢𑀺 𑀧𑀝𑀺𑀓𑀢𑀁 𑀯𑀸. 𑀇𑀫𑀺𑀲𑁆𑀲𑀸 𑀘, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀣𑀯𑀺𑀬𑀸 𑀧𑀳𑀽𑀢𑀭𑀢𑁆𑀢𑀭𑀢𑀦𑀸𑀬 𑀫𑀸𑀢𑀸𑀧𑀺𑀢𑀭𑁄 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑁂 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀬𑁆𑀬, 𑀦 𑀢𑁆𑀯𑁂𑀯, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀽𑀦𑀁 𑀓𑀢𑀁 𑀯𑀸 𑀳𑁄𑀢𑀺 𑀧𑀝𑀺𑀓𑀢𑀁 𑀯𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀩𑀳𑀼𑀓𑀸𑀭𑀸, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀸𑀦𑀁 𑀆𑀧𑀸𑀤𑀓𑀸 𑀧𑁄𑀲𑀓𑀸 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀤𑀲𑁆𑀲𑁂𑀢𑀸𑀭𑁄.

‘‘𑀬𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀭𑁄 𑀅𑀲𑁆𑀲𑀤𑁆𑀥𑁂 𑀲𑀤𑁆𑀥𑀸𑀲𑀫𑁆𑀧𑀤𑀸𑀬 𑀲𑀫𑀸𑀤𑀧𑁂𑀢𑀺 𑀦𑀺𑀯𑁂𑀲𑁂𑀢𑀺 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀤𑀼𑀲𑁆𑀲𑀻𑀮𑁂 𑀲𑀻𑀮𑀲𑀫𑁆𑀧𑀤𑀸𑀬, 𑀫𑀘𑁆𑀙𑀭𑀺𑀦𑁄 𑀘𑀸𑀕𑀲𑀫𑁆𑀧𑀤𑀸𑀬, 𑀤𑀼𑀧𑁆𑀧𑀜𑁆𑀜𑁂 𑀧𑀜𑁆𑀜𑀸𑀲𑀫𑁆𑀧𑀤𑀸𑀬 𑀲𑀫𑀸𑀤𑀧𑁂𑀢𑀺 𑀦𑀺𑀯𑁂𑀲𑁂𑀢𑀺 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀸𑀧𑀺𑀢𑀽𑀦𑀁 𑀓𑀢𑀜𑁆𑀘 𑀳𑁄𑀢𑀺 𑀧𑀝𑀺𑀓𑀢𑀜𑁆𑀘𑀸’’𑀢𑀺 (𑀅. 𑀦𑀺. 𑁨.𑁩𑁪).

𑀢𑀣𑀸 𑁋

‘‘𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀁, 𑀧𑀼𑀢𑁆𑀢𑀤𑀸𑀭𑀲𑁆𑀲 𑀲𑀗𑁆𑀕𑀳𑁄’’𑀢𑀺; (𑀔𑀼. 𑀧𑀸. 𑁫.𑁬);

‘‘𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀁, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀘 𑁋

𑀏𑀯𑀫𑀸𑀤𑀻𑀦𑀺 𑀫𑀸𑀢𑀸𑀧𑀺𑀢𑀽𑀦𑀁 𑀧𑀼𑀢𑁆𑀢𑀲𑁆𑀲 𑀩𑀳𑀽𑀧𑀓𑀸𑀭𑀪𑀸𑀯𑀲𑀸𑀥𑀓𑀸𑀦𑀺 𑀲𑀼𑀢𑁆𑀢𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺.

𑀕𑀸𑀣𑀸𑀲𑀼 𑀯𑀼𑀘𑁆𑀘𑀭𑁂𑀢𑀺 𑀯𑀼𑀘𑁆𑀘𑀦𑁆𑀢𑀺 𑀓𑀣𑀻𑀬𑀦𑁆𑀢𑀺. 𑀧𑀚𑀸𑀬 𑀅𑀦𑀼𑀓𑀫𑁆𑀧𑀓𑀸𑀢𑀺 𑀧𑀭𑁂𑀲𑀁 𑀧𑀸𑀡𑀁 𑀙𑀺𑀦𑁆𑀤𑀺𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀬𑀁𑀓𑀺𑀜𑁆𑀘𑀺 𑀘𑀚𑀺𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀧𑀚𑀁 𑀧𑀝𑀺𑀚𑀕𑁆𑀕𑀦𑁆𑀢𑀺 𑀕𑁄𑀧𑀬𑀦𑁆𑀢𑀺, 𑀢𑀲𑁆𑀫𑀸 𑀧𑀚𑀸𑀬 𑀅𑀢𑁆𑀢𑀦𑁄 𑀧𑀼𑀢𑁆𑀢𑀸𑀦𑀁 𑀅𑀦𑀼𑀓𑀫𑁆𑀧𑀓𑀸 𑀅𑀦𑀼𑀕𑁆𑀕𑀸𑀳𑀓𑀸.

𑀦𑀫𑀲𑁆𑀲𑁂𑀬𑁆𑀬𑀸𑀢𑀺 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀇𑀤𑀁 𑀫𑀬𑁆𑀳𑀁 𑀉𑀢𑁆𑀢𑀫𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢’’𑀦𑁆𑀢𑀺 𑀦𑀫𑀓𑁆𑀓𑀸𑀭𑀁 𑀓𑀭𑁂𑀬𑁆𑀬. 𑀲𑀓𑁆𑀓𑀭𑁂𑀬𑁆𑀬𑀸𑀢𑀺 𑀲𑀓𑁆𑀓𑀸𑀭𑁂𑀦 𑀧𑀝𑀺𑀫𑀸𑀦𑁂𑀬𑁆𑀬. 𑀇𑀤𑀸𑀦𑀺 𑀢𑀁 𑀲𑀓𑁆𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑁆𑀦𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑁆𑀦𑁂𑀦𑀸𑀢𑀺 𑀬𑀸𑀕𑀼𑀪𑀢𑁆𑀢𑀔𑀸𑀤𑀦𑀻𑀬𑁂𑀦. 𑀧𑀸𑀦𑁂𑀦𑀸𑀢𑀺 𑀅𑀝𑁆𑀞𑀯𑀺𑀥𑀧𑀸𑀦𑁂𑀦. 𑀯𑀢𑁆𑀣𑁂𑀦𑀸𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑁂𑀦. 𑀲𑀬𑀦𑁂𑀦𑀸𑀢𑀺 𑀫𑀜𑁆𑀘𑀧𑀻𑀞𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑀸𑀤𑀺𑀦𑀸 𑀲𑀬𑀦𑁂𑀦. 𑀉𑀘𑁆𑀙𑀸𑀤𑀦𑁂𑀦𑀸𑀢𑀺 𑀤𑀼𑀕𑁆𑀕𑀦𑁆𑀥𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀲𑀼𑀕𑀦𑁆𑀥𑀓𑀭𑀡𑀼𑀘𑁆𑀙𑀸𑀤𑀦𑁂𑀦. 𑀦𑁆𑀳𑀸𑀦𑁂𑀦𑀸𑀢𑀺 𑀲𑀻𑀢𑀓𑀸𑀮𑁂 𑀉𑀡𑁆𑀳𑁄𑀤𑀓𑁂𑀦, 𑀉𑀡𑁆𑀳𑀓𑀸𑀮𑁂 𑀲𑀻𑀢𑁄𑀤𑀓𑁂𑀦 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸 𑀦𑁆𑀳𑀸𑀧𑀦𑁂𑀦. 𑀧𑀸𑀤𑀸𑀦𑀁 𑀥𑁄𑀯𑀦𑁂𑀦 𑀘𑀸𑀢𑀺 𑀉𑀡𑁆𑀳𑁄𑀤𑀓𑀲𑀻𑀢𑁄𑀤𑀓𑁂𑀳𑀺 𑀧𑀸𑀤𑀥𑁄𑀯𑀦𑁂𑀦 𑀘𑁂𑀯 𑀢𑁂𑀮𑀫𑀓𑁆𑀔𑀦𑁂𑀦 𑀘.

𑀢𑀸𑀬 𑀦𑀁 𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺 𑀏𑀢𑁆𑀣 𑀦𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑀭𑀡𑁂𑀦. 𑀅𑀣 𑀯𑀸 𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺 𑀪𑀭𑀡𑀓𑀺𑀘𑁆𑀘𑀓𑀭𑀡𑀓𑀼𑀮𑀯𑀁𑀲𑀧𑀢𑀺𑀝𑁆𑀞𑀸𑀧𑀦𑀸𑀤𑀺𑀦𑀸 𑀧𑀜𑁆𑀘𑀯𑀺𑀥𑀉𑀧𑀝𑁆𑀞𑀸𑀦𑁂𑀦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀜𑁆𑀘𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀞𑀸𑀦𑁂𑀳𑀺 𑀧𑀼𑀢𑁆𑀢𑁂𑀦 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀫𑀸𑀢𑀸𑀧𑀺𑀢𑀭𑁄 𑀧𑀘𑁆𑀘𑀼𑀧𑀝𑁆𑀞𑀸𑀢𑀩𑁆𑀩𑀸 ‘𑀪𑀢𑁄 𑀦𑁂 𑀪𑀭𑀺𑀲𑁆𑀲𑀸𑀫𑀺, 𑀓𑀺𑀘𑁆𑀘𑀁 𑀦𑁂𑀲𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀼𑀮𑀯𑀁𑀲𑀁 𑀞𑀧𑁂𑀲𑁆𑀲𑀸𑀫𑀺, 𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀸𑀫𑀺. 𑀅𑀣 𑀯𑀸 𑀧𑀦 𑀦𑁂𑀲𑀁 𑀧𑁂𑀢𑀸𑀦𑀁 𑀓𑀸𑀮𑀓𑀢𑀸𑀦𑀁 𑀤𑀓𑁆𑀔𑀺𑀡𑀫𑀦𑀼𑀧𑁆𑀧𑀤𑀲𑁆𑀲𑀸𑀫𑀻’𑀢𑀺. 𑀇𑀫𑁂𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀧𑀼𑀢𑁆𑀢𑁂𑀦 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀫𑀸𑀢𑀸𑀧𑀺𑀢𑀭𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀧𑀜𑁆𑀘𑀳𑀺 𑀞𑀸𑀦𑁂𑀳𑀺 𑀧𑀼𑀢𑁆𑀢𑀁 𑀅𑀦𑀼𑀓𑀫𑁆𑀧𑀦𑁆𑀢𑀺 𑁋 𑀧𑀸𑀧𑀸 𑀦𑀺𑀯𑀸𑀭𑁂𑀦𑁆𑀢𑀺, 𑀓𑀮𑁆𑀬𑀸𑀡𑁂 𑀦𑀺𑀯𑁂𑀲𑁂𑀦𑁆𑀢𑀺, 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, 𑀧𑀢𑀺𑀭𑀽𑀧𑁂𑀦 𑀤𑀸𑀭𑁂𑀦 𑀲𑀁𑀬𑁄𑀚𑁂𑀦𑁆𑀢𑀺, 𑀲𑀫𑀬𑁂 𑀤𑀸𑀬𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁩.𑁨𑁬𑁭).

𑀅𑀧𑀺𑀘 𑀬𑁄 𑀫𑀸𑀢𑀸𑀧𑀺𑀢𑀭𑁄 𑀢𑀻𑀲𑀼 𑀯𑀢𑁆𑀣𑀽𑀲𑀼 𑀅𑀪𑀺𑀧𑁆𑀧𑀲𑀦𑁆𑀦𑁂 𑀓𑀢𑁆𑀯𑀸 𑀲𑀻𑀮𑁂𑀲𑀼 𑀯𑀸 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀯𑀸 𑀦𑀺𑀬𑁄𑀚𑁂𑀢𑁆𑀯𑀸 𑀉𑀧𑀝𑁆𑀞𑀳𑀢𑀺, 𑀅𑀬𑀁 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀓𑀸𑀦𑀁 𑀅𑀕𑁆𑀕𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀸 𑀧𑀦𑀸𑀬𑀁 𑀧𑀸𑀭𑀺𑀘𑀭𑀺𑀬𑀸 𑀧𑀼𑀢𑁆𑀢𑀲𑁆𑀲 𑀉𑀪𑀬𑀮𑁄𑀓𑀳𑀺𑀢𑀲𑀼𑀔𑀸𑀯𑀳𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀥𑁂𑀯 𑀦𑀁 𑀧𑀲𑀁𑀲𑀦𑁆𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻’’𑀢𑀺 𑀆𑀳. 𑀢𑀢𑁆𑀣 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂. 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀓𑀜𑁆𑀳𑀺 𑀧𑀼𑀕𑁆𑀕𑀮𑀁 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸 𑀢𑀢𑁆𑀣 𑀧𑀸𑀭𑀺𑀘𑀭𑀺𑀬𑀸𑀬 𑀧𑀲𑀁𑀲𑀦𑁆𑀢𑀺 𑀯𑀡𑁆𑀡𑁂𑀦𑁆𑀢𑀺 𑀣𑁄𑀫𑁂𑀦𑁆𑀢𑀺, 𑀢𑀲𑁆𑀲 𑀘 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀦𑁆𑀢𑀸 𑀲𑀬𑀫𑁆𑀧𑀺 𑀅𑀢𑁆𑀢𑀦𑁄 𑀫𑀸𑀢𑀸𑀧𑀺𑀢𑀽𑀲𑀼 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀫𑀳𑀦𑁆𑀢𑀁 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺. 𑀧𑁂𑀘𑁆𑀘𑀸𑀢𑀺 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸 𑀲𑀕𑁆𑀕𑁂 𑀞𑀺𑀢𑁄 𑀫𑀸𑀢𑀸𑀧𑀺𑀢𑀼𑀧𑀝𑁆𑀞𑀸𑀓𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀻𑀳𑀺 𑀫𑁄𑀤𑀢𑀺 𑀧𑀫𑁄𑀤𑀢𑀺 𑀅𑀪𑀺𑀦𑀦𑁆𑀤𑀢𑀻𑀢𑀺.

𑀲𑀢𑁆𑀢𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀩𑀳𑀼𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁭. 𑀅𑀝𑁆𑀞𑀫𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀢𑀺 𑀩𑁆𑀭𑀸𑀳𑁆𑀫𑀡𑀸 𑀘𑁂𑀯 𑀕𑀳𑀧𑀢𑀺𑀓𑀸 𑀘. 𑀞𑀧𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂 𑀬𑁂 𑀓𑁂𑀘𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑀸 𑀇𑀥 𑀕𑀳𑀧𑀢𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑁂𑀢𑀺 𑀅𑀦𑀺𑀬𑀫𑀢𑁄 𑀦𑀺𑀤𑁆𑀤𑀺𑀝𑁆𑀞𑀧𑀭𑀸𑀫𑀲𑀦𑀁. 𑀯𑁄𑀢𑀺 𑀉𑀧𑀬𑁄𑀕𑀩𑀳𑀼𑀯𑀘𑀦𑀁. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑀸𑀓𑀁 𑀩𑀳𑀽𑀧𑀓𑀸𑀭𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸, 𑀬𑁂 𑀩𑁆𑀭𑀸𑀳𑁆𑀫𑀡𑀸 𑀘𑁂𑀯 𑀲𑁂𑀲𑀅𑀕𑀸𑀭𑀺𑀓𑀸 𑀘 ‘‘𑀢𑀼𑀫𑁆𑀳𑁂 𑀏𑀯 𑀅𑀫𑁆𑀳𑀸𑀓𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁, 𑀬𑀢𑁆𑀣 𑀫𑀬𑀁 𑀉𑀤𑁆𑀥𑀕𑁆𑀕𑀺𑀓𑀁 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀸𑀧𑁂𑀫 𑀲𑁄𑀯𑀕𑁆𑀕𑀺𑀓𑀁 𑀲𑀼𑀔𑀯𑀺𑀧𑀸𑀓𑀁 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓’’𑀦𑁆𑀢𑀺 𑀘𑀻𑀯𑀭𑀸𑀤𑀻𑀳𑀺 𑀧𑀘𑁆𑀘𑀬𑁂𑀳𑀺 𑀧𑀢𑀺𑀉𑀧𑀝𑁆𑀞𑀺𑀢𑀸𑀢𑀺.

𑀏𑀯𑀁 ‘‘𑀆𑀫𑀺𑀲𑀤𑀸𑀦𑁂𑀦 𑀆𑀫𑀺𑀲𑀲𑀁𑀯𑀺𑀪𑀸𑀕𑁂𑀦 𑀆𑀫𑀺𑀲𑀸𑀦𑀼𑀕𑁆𑀕𑀳𑁂𑀦 𑀕𑀳𑀝𑁆𑀞𑀸 𑀪𑀺𑀓𑁆𑀔𑀽𑀦𑀁 𑀉𑀧𑀓𑀸𑀭𑀯𑀦𑁆𑀢𑁄’’𑀢𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀥𑀫𑁆𑀫𑀤𑀸𑀦𑁂𑀦 𑀥𑀫𑁆𑀫𑀲𑀁𑀯𑀺𑀪𑀸𑀕𑁂𑀦 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀪𑀺𑀓𑁆𑀔𑀽𑀦𑀫𑁆𑀧𑀺 𑀢𑁂𑀲𑀁 𑀉𑀧𑀓𑀸𑀭𑀯𑀦𑁆𑀢𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀼𑀫𑁆𑀳𑁂𑀧𑀺, 𑀪𑀺𑀓𑁆𑀔𑀯𑁂,’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀇𑀫𑀺𑀦𑀸 𑀓𑀺𑀁 𑀓𑀣𑀺𑀢𑀁? 𑀧𑀺𑀡𑁆𑀟𑀸𑀧𑀘𑀸𑀬𑀦𑀁 𑀦𑀸𑀫 𑀓𑀣𑀺𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀸 𑀇𑀫𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀦𑁂𑀯 𑀢𑀼𑀫𑁆𑀳𑀸𑀓𑀁 𑀜𑀸𑀢𑀓𑀸, 𑀦 𑀫𑀺𑀢𑁆𑀢𑀸, 𑀦 𑀇𑀡𑀁 𑀯𑀸 𑀥𑀸𑀭𑁂𑀦𑁆𑀢𑀺, 𑀅𑀣 𑀔𑁄 ‘‘𑀇𑀫𑁂 𑀲𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸, 𑀏𑀢𑁆𑀣 𑀦𑁄 𑀓𑀸𑀭𑀸 𑀫𑀳𑀧𑁆𑀨𑀮𑀸 𑀪𑀯𑀺𑀲𑁆𑀲𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀸’’𑀢𑀺 𑀨𑀮𑀯𑀺𑀲𑁂𑀲𑀁 𑀆𑀓𑀗𑁆𑀔𑀦𑁆𑀢𑀸 𑀢𑀼𑀫𑁆𑀳𑁂 𑀘𑀻𑀯𑀭𑀸𑀤𑀻𑀳𑀺 𑀉𑀧𑀝𑁆𑀞𑀳𑀦𑁆𑀢𑀺. 𑀢𑀲𑁆𑀫𑀸 𑀢𑀁 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑀁 𑀧𑀭𑀺𑀧𑀽𑀭𑁂𑀦𑁆𑀢𑀸 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣, 𑀥𑀫𑁆𑀫𑀤𑁂𑀲𑀦𑀸𑀧𑀺 𑀯𑁄 𑀓𑀸𑀭𑀓𑀸𑀦𑀁𑀬𑁂𑀯 𑀲𑁄𑀪𑀢𑀺, 𑀆𑀤𑁂𑀬𑁆𑀬𑀸 𑀘 𑀳𑁄𑀢𑀺, 𑀦 𑀇𑀢𑀭𑁂𑀲𑀦𑁆𑀢𑀺 𑀏𑀯𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀅𑀧𑁆𑀧𑀫𑀸𑀤𑁄 𑀓𑀭𑀡𑀻𑀬𑁄𑀢𑀺.

𑀏𑀯𑀫𑀺𑀤𑀁, 𑀪𑀺𑀓𑁆𑀔𑀯𑁂𑀢𑀺𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀏𑀯𑀁 𑀇𑀫𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑁂𑀳𑀺 𑀆𑀫𑀺𑀲𑀤𑀸𑀦𑀥𑀫𑁆𑀫𑀤𑀸𑀦𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀲𑀦𑁆𑀦𑀺𑀲𑁆𑀲𑀸𑀬 𑀓𑀸𑀫𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀲𑁆𑀲𑀧𑀺 𑀑𑀖𑀲𑁆𑀲 𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀲𑀓𑀮𑀲𑁆𑀲𑀧𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀲𑀫𑁆𑀫𑀤𑁂𑀯 𑀧𑀭𑀺𑀬𑁄𑀲𑀸𑀦𑀓𑀭𑀡𑀸𑀬 𑀉𑀧𑁄𑀲𑀣𑀲𑀻𑀮𑀦𑀺𑀬𑀫𑀸𑀤𑀺𑀯𑀲𑁂𑀦 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀤𑀺𑀯𑀲𑁂𑀦 𑀯𑀸 𑀇𑀤𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀯𑀼𑀲𑁆𑀲𑀢𑀺 𑀘𑀭𑀻𑀬𑀢𑀻𑀢𑀺.

𑀕𑀸𑀣𑀸𑀲𑀼 𑀲𑀸𑀕𑀸𑀭𑀸𑀢𑀺 𑀕𑀳𑀝𑁆𑀞𑀸. 𑀅𑀦𑀕𑀸𑀭𑀸𑀢𑀺 𑀧𑀭𑀺𑀘𑁆𑀘𑀢𑁆𑀢𑀅𑀕𑀸𑀭𑀸 𑀧𑀩𑁆𑀩𑀚𑀺𑀢𑀸. 𑀉𑀪𑁄 𑀅𑀜𑁆𑀜𑁄𑀜𑁆𑀜𑀦𑀺𑀲𑁆𑀲𑀺𑀢𑀸𑀢𑀺 𑀢𑁂 𑀉𑀪𑁄𑀧𑀺 𑀅𑀜𑁆𑀜𑀫𑀜𑁆𑀜𑀲𑀦𑁆𑀦𑀺𑀲𑁆𑀲𑀺𑀢𑀸. 𑀲𑀸𑀕𑀸𑀭𑀸 𑀳𑀺 𑀅𑀦𑀕𑀸𑀭𑀸𑀦𑀁 𑀥𑀫𑁆𑀫𑀤𑀸𑀦𑀲𑀦𑁆𑀦𑀺𑀲𑁆𑀲𑀺𑀢𑀸, 𑀅𑀦𑀕𑀸𑀭𑀸 𑀘 𑀲𑀸𑀕𑀸𑀭𑀸𑀦𑀁 𑀧𑀘𑁆𑀘𑀬𑀤𑀸𑀦𑀲𑀦𑁆𑀦𑀺𑀲𑁆𑀲𑀺𑀢𑀸. 𑀆𑀭𑀸𑀥𑀬𑀦𑁆𑀢𑀻𑀢𑀺 𑀲𑀸𑀥𑁂𑀦𑁆𑀢𑀺 𑀲𑀫𑁆𑀧𑀸𑀤𑁂𑀦𑁆𑀢𑀺. 𑀲𑀤𑁆𑀥𑀫𑁆𑀫𑀦𑁆𑀢𑀺 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑀁 𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑀜𑁆𑀘. 𑀢𑀢𑁆𑀣 𑀬𑀁 𑀉𑀢𑁆𑀢𑀫𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀢𑁆𑀢𑀭’’𑀦𑁆𑀢𑀺 𑀅𑀭𑀳𑀢𑁆𑀢𑀁 𑀦𑀺𑀩𑁆𑀩𑀸𑀦𑀜𑁆𑀘. 𑀲𑀸𑀕𑀸𑀭𑁂𑀲𑀽𑀢𑀺 𑀲𑀸𑀕𑀸𑀭𑁂𑀳𑀺, 𑀦𑀺𑀲𑁆𑀲𑀓𑁆𑀓𑁂 𑀇𑀤𑀁 𑀪𑀼𑀫𑁆𑀫𑀯𑀘𑀦𑀁, 𑀲𑀸𑀕𑀸𑀭𑀸𑀦𑀁 𑀯𑀸 𑀲𑀦𑁆𑀢𑀺𑀓𑁂. 𑀧𑀘𑁆𑀘𑀬𑀦𑁆𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀁 𑀤𑀼𑀯𑀺𑀥𑀁 𑀧𑀘𑁆𑀘𑀬𑀁 𑀧𑀺𑀡𑁆𑀟𑀧𑀸𑀢𑀁 𑀪𑁂𑀲𑀚𑁆𑀚𑀜𑁆𑀘. 𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀦𑁆𑀢𑀺 𑀉𑀢𑀼𑀧𑀭𑀺𑀲𑁆𑀲𑀬𑀸𑀤𑀺𑀧𑀭𑀺𑀲𑁆𑀲𑀬𑀳𑀭𑀡𑀁 𑀯𑀺𑀳𑀸𑀭𑀸𑀤𑀺𑀆𑀯𑀲𑀣𑀁. 𑀲𑀼𑀕𑀢𑀦𑁆𑀢𑀺 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀁 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞𑀯𑀺𑀥𑀁 𑀅𑀭𑀺𑀬𑀧𑀼𑀕𑁆𑀕𑀮𑀁. 𑀲𑀸𑀯𑀓𑁄 𑀳𑀺 𑀇𑀥 𑀲𑀼𑀕𑀢𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀖𑀭𑀫𑁂𑀲𑀺𑀦𑁄𑀢𑀺 𑀖𑀭𑀁 𑀏𑀲𑀺𑀦𑁄, 𑀕𑁂𑀳𑁂 𑀞𑀢𑁆𑀯𑀸 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑀸 𑀪𑁄𑀕𑀽𑀧𑀓𑀭𑀡𑀸𑀦𑀺 𑀘𑁂𑀯 𑀕𑀳𑀝𑁆𑀞𑀲𑀻𑀮𑀸𑀤𑀻𑀦𑀺 𑀘 𑀏𑀲𑀦𑀲𑀻𑀮𑀸𑀢𑀺 𑀅𑀢𑁆𑀣𑁄. 𑀲𑀤𑁆𑀤𑀳𑀸𑀦𑁄 𑀅𑀭𑀳𑀢𑀦𑁆𑀢𑀺 𑀅𑀭𑀳𑀦𑁆𑀢𑀸𑀦𑀁 𑀅𑀭𑀺𑀬𑀸𑀦𑀁 𑀯𑀘𑀦𑀁, 𑀢𑁂𑀲𑀁 𑀯𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀲𑀤𑁆𑀤𑀳𑀦𑁆𑀢𑀸. ‘‘𑀅𑀤𑁆𑀥𑀸 𑀇𑀫𑁂 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸, 𑀬𑀣𑀸 𑀇𑀫𑁂 𑀓𑀣𑁂𑀦𑁆𑀢𑀺, 𑀢𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀲𑀸 𑀧𑀝𑀺𑀧𑀢𑁆𑀢𑀺 𑀲𑀕𑁆𑀕𑀫𑁄𑀓𑁆𑀔𑀲𑀫𑁆𑀧𑀢𑁆𑀢𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 𑀅𑀪𑀺𑀲𑀤𑁆𑀤𑀳𑀦𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀲𑀤𑁆𑀤𑀳𑀦𑁆𑀢𑀸’’𑀢𑀺𑀧𑀺 𑀧𑀸𑀞𑁄. 𑀅𑀭𑀺𑀬𑀧𑀜𑁆𑀜𑀸𑀬𑀸𑀢𑀺 𑀲𑀼𑀯𑀺𑀲𑀼𑀤𑁆𑀥𑀧𑀜𑁆𑀜𑀸𑀬. 𑀛𑀸𑀬𑀺𑀦𑁄𑀢𑀺 𑀆𑀭𑀫𑁆𑀫𑀡𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀯𑀲𑁂𑀦 𑀤𑀼𑀯𑀺𑀥𑁂𑀦𑀧𑀺 𑀛𑀸𑀦𑁂𑀦 𑀛𑀸𑀬𑀺𑀦𑁄.

𑀇𑀥 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦𑀸𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂, 𑀇𑀫𑀲𑁆𑀫𑀺𑀁 𑀯𑀸 𑀲𑀸𑀲𑀦𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀲𑁆𑀲 𑀫𑀕𑁆𑀕𑀪𑀽𑀢𑀁 𑀲𑀻𑀮𑀸𑀤𑀺𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀸𑀯𑀤𑁂𑀯 𑀲𑀼𑀕𑀢𑀺𑀕𑀸𑀫𑀺𑀦𑁄. 𑀦𑀦𑁆𑀤𑀺𑀦𑁄𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀬𑁄𑀕𑁂𑀦 𑀦𑀦𑁆𑀤𑀦𑀲𑀻𑀮𑀸. 𑀓𑁂𑀘𑀺 𑀧𑀦 ‘‘𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦 𑀫𑀕𑁆𑀕𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀸𑀧𑀼𑀡𑀺𑀢𑁆𑀯𑀸’’𑀢𑀺 𑀯𑀤𑀦𑁆𑀢𑀺. 𑀤𑁂𑀯𑀮𑁄𑀓𑀲𑁆𑀫𑀺𑀦𑁆𑀢𑀺 𑀙𑀩𑁆𑀩𑀺𑀥𑁂𑀧𑀺 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂. 𑀫𑁄𑀤𑀦𑁆𑀢𑀺 𑀓𑀸𑀫𑀓𑀸𑀫𑀺𑀦𑁄𑀢𑀺 𑀬𑀣𑀺𑀘𑁆𑀙𑀺𑀢𑀯𑀢𑁆𑀣𑀼𑀦𑀺𑀧𑁆𑀨𑀢𑁆𑀢𑀺𑀢𑁄 𑀓𑀸𑀫𑀓𑀸𑀫𑀺𑀦𑁄 𑀓𑀸𑀫𑀯𑀦𑁆𑀢𑁄 𑀳𑀼𑀢𑁆𑀯𑀸 𑀧𑀫𑁄𑀤𑀦𑁆𑀢𑀻𑀢𑀺.

𑀅𑀝𑁆𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀓𑀼𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁮. 𑀦𑀯𑀫𑁂 𑀓𑀼𑀳𑀸𑀢𑀺 𑀲𑀸𑀫𑀦𑁆𑀢𑀚𑀧𑁆𑀧𑀦𑀸𑀤𑀺𑀦𑀸 𑀓𑀼𑀳𑀦𑀯𑀢𑁆𑀣𑀼𑀦𑀸 𑀓𑀼𑀳𑀓𑀸, 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀺𑀘𑁆𑀙𑀸𑀬 𑀓𑁄𑀳𑀜𑁆𑀜𑀁 𑀓𑀢𑁆𑀯𑀸 𑀧𑀭𑁂𑀲𑀁 𑀯𑀺𑀫𑁆𑀳𑀸𑀧𑀓𑀸𑀢𑀺 𑀅𑀢𑁆𑀣𑁄. 𑀣𑀤𑁆𑀥𑀸𑀢𑀺 𑀓𑁄𑀥𑁂𑀦 𑀘 𑀫𑀸𑀦𑁂𑀦 𑀘 𑀣𑀤𑁆𑀥𑀫𑀸𑀦𑀲𑀸. ‘‘𑀓𑁄𑀥𑀦𑁄 𑀳𑁄𑀢𑀺 𑀉𑀧𑀸𑀬𑀸𑀲𑀩𑀳𑀼𑀮𑁄, 𑀅𑀧𑁆𑀧𑀫𑁆𑀧𑀺 𑀯𑀼𑀢𑁆𑀢𑁄 𑀲𑀫𑀸𑀦𑁄 𑀅𑀪𑀺𑀲𑀚𑁆𑀚𑀢𑀺 𑀓𑀼𑀧𑁆𑀧𑀢𑀺 𑀩𑁆𑀬𑀸𑀧𑀚𑁆𑀚𑀢𑀺 𑀧𑀢𑀺𑀢𑁆𑀣𑀻𑀬𑀢𑀻’’𑀢𑀺 (𑀅. 𑀦𑀺. 𑁩.𑁨𑁫; 𑀧𑀼. 𑀧. 𑁧𑁦𑁧) 𑀏𑀯𑀁 𑀯𑀼𑀢𑁆𑀢𑁂𑀦 𑀓𑁄𑀥𑁂𑀦 𑀘, ‘‘𑀤𑀼𑀩𑁆𑀩𑀘𑁄 𑀳𑁄𑀢𑀺 𑀤𑁄𑀯𑀘𑀲𑁆𑀲𑀓𑀭𑀡𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀓𑁆𑀔𑀫𑁄 𑀅𑀧𑁆𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻 𑀅𑀦𑀼𑀲𑀸𑀲𑀦𑀺’’𑀦𑁆𑀢𑀺 (𑀫. 𑀦𑀺. 𑁧.𑁧𑁮𑁧) 𑀏𑀯𑀁 𑀯𑀼𑀢𑁆𑀢𑁂𑀦 𑀤𑁄𑀯𑀘𑀲𑁆𑀲𑁂𑀦 𑀘, ‘‘𑀚𑀸𑀢𑀺𑀫𑀤𑁄, 𑀕𑁄𑀢𑁆𑀢𑀫𑀤𑁄, 𑀲𑀺𑀧𑁆𑀧𑀫𑀤𑁄, 𑀆𑀭𑁄𑀕𑁆𑀬𑀫𑀤𑁄, 𑀬𑁄𑀩𑁆𑀩𑀦𑀫𑀤𑁄, 𑀚𑀻𑀯𑀺𑀢𑀫𑀤𑁄’’𑀢𑀺 (𑀯𑀺𑀪. 𑁮𑁩𑁨) 𑀏𑀯𑀁 𑀯𑀼𑀢𑁆𑀢𑁂𑀦 𑀚𑀸𑀢𑀺𑀫𑀤𑀸𑀤𑀺𑀪𑁂𑀤𑁂𑀦 𑀫𑀤𑁂𑀦 𑀘 𑀕𑀭𑀼𑀓𑀸𑀢𑀩𑁆𑀩𑁂𑀲𑀼 𑀕𑀭𑀽𑀲𑀼 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀅𑀓𑀢𑁆𑀯𑀸 𑀅𑀬𑁄𑀲𑀮𑀸𑀓𑀁 𑀕𑀺𑀮𑀺𑀢𑁆𑀯𑀸 𑀞𑀺𑀢𑀸 𑀯𑀺𑀬 𑀅𑀦𑁄𑀦𑀢𑀸 𑀳𑀼𑀢𑁆𑀯𑀸 𑀯𑀺𑀘𑀭𑀡𑀓𑀸. 𑀮𑀧𑀸𑀢𑀺 𑀉𑀧𑀮𑀸𑀧𑀓𑀸 𑀫𑀺𑀘𑁆𑀙𑀸𑀚𑀻𑀯𑀯𑀲𑁂𑀦 𑀓𑀼𑀮𑀲𑀗𑁆𑀕𑀸𑀳𑀓𑀸 𑀧𑀘𑁆𑀘𑀬𑀢𑁆𑀣𑀁 𑀧𑀬𑀼𑀢𑁆𑀢𑀯𑀸𑀘𑀸𑀯𑀲𑁂𑀦 𑀦𑀺𑀧𑁆𑀧𑁂𑀲𑀺𑀓𑀢𑀸𑀯𑀲𑁂𑀦 𑀘 𑀮𑀧𑀓𑀸𑀢𑀺 𑀯𑀸 𑀅𑀢𑁆𑀣𑁄.

𑀲𑀺𑀗𑁆𑀕𑀻𑀢𑀺 ‘‘𑀢𑀢𑁆𑀣 𑀓𑀢𑀫𑀁 𑀲𑀺𑀗𑁆𑀕𑀁? 𑀬𑀁 𑀲𑀺𑀗𑁆𑀕𑀁 𑀲𑀺𑀗𑁆𑀕𑀸𑀭𑀢𑀸 𑀘𑀸𑀢𑀼𑀭𑀢𑀸 𑀘𑀸𑀢𑀼𑀭𑀺𑀬𑀁 𑀧𑀭𑀺𑀓𑁆𑀔𑀢𑁆𑀢𑀢𑀸 𑀧𑀸𑀭𑀺𑀓𑁆𑀔𑀢𑁆𑀢𑀺𑀬’’𑀦𑁆𑀢𑀺 (𑀯𑀺𑀪. 𑁮𑁫𑁨) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀲𑀺𑀗𑁆𑀕𑀲𑀤𑀺𑀲𑁂𑀳𑀺 𑀧𑀸𑀓𑀝𑀓𑀺𑀮𑁂𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀉𑀦𑁆𑀦𑀴𑀸𑀢𑀺 𑀉𑀕𑁆𑀕𑀢𑀦𑀴𑀸, 𑀦𑀴𑀲𑀤𑀺𑀲𑀁 𑀢𑀼𑀘𑁆𑀙𑀫𑀸𑀦𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀘𑀭𑀡𑀓𑀸. 𑀅𑀲𑀫𑀸𑀳𑀺𑀢𑀸𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀫𑀢𑁆𑀢𑀲𑁆𑀲𑀸𑀧𑀺 𑀅𑀮𑀸𑀪𑀺𑀦𑁄. 𑀦 𑀫𑁂 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑀸𑀫𑀓𑀸𑀢𑀺 𑀢𑁂 𑀫𑀬𑁆𑀳𑀁 𑀪𑀺𑀓𑁆𑀔𑀽 𑀫𑀫 𑀲𑀦𑁆𑀢𑀓𑀸 𑀦 𑀳𑁄𑀦𑁆𑀢𑀺. 𑀫𑁂𑀢𑀺 𑀇𑀤𑀁 𑀧𑀤𑀁 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑀢𑁆𑀢𑀸 𑀪𑀕𑀯𑀢𑀸 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀢𑁂 𑀓𑀼𑀳𑀦𑀸𑀤𑀺𑀬𑁄𑀕𑀢𑁄 𑀦 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸, 𑀢𑀲𑁆𑀫𑀸 ‘‘𑀦 𑀫𑀸𑀫𑀓𑀸’’𑀢𑀺 𑀯𑀼𑀢𑁆𑀢𑀸. 𑀅𑀧𑀕𑀢𑀸𑀢𑀺 𑀬𑀤𑀺𑀧𑀺 𑀢𑁂 𑀫𑀫 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀸, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀦 𑀅𑀧𑁆𑀧𑀝𑀺𑀧𑀚𑁆𑀚𑀦𑀢𑁄 𑀅𑀧𑀕𑀢𑀸 𑀏𑀯 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸, 𑀇𑀢𑁄 𑀢𑁂 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑁂 𑀞𑀺𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀦𑀪𑀜𑁆𑀘 𑀤𑀽𑀭𑁂 𑀧𑀣𑀯𑀻 𑀘 𑀤𑀽𑀭𑁂,

𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀢𑀤𑀸𑀳𑀼 𑀤𑀽𑀭𑁂;

𑀢𑀢𑁄 𑀳𑀯𑁂 𑀤𑀽𑀭𑀢𑀭𑀁 𑀯𑀤𑀦𑁆𑀢𑀺,

𑀲𑀢𑀜𑁆𑀘 𑀥𑀫𑁆𑀫𑀁 𑀅𑀲𑀢𑀜𑁆𑀘 𑀭𑀸𑀚𑀸’’𑀢𑀺. (𑀅. 𑀦𑀺. 𑁪.𑁪𑁭; 𑀚𑀸. 𑁨.𑁨𑁧.𑁪𑁧𑁪);

𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀯𑀟𑁆𑀠𑀦𑀯𑀲𑁂𑀦 𑀯𑀼𑀤𑁆𑀥𑀺𑀁, 𑀢𑀢𑁆𑀣 𑀦𑀺𑀘𑁆𑀘𑀮𑀪𑀸𑀯𑁂𑀦 𑀯𑀺𑀭𑀽𑀴𑁆𑀳𑀺𑀁, 𑀲𑀩𑁆𑀩𑀢𑁆𑀣 𑀧𑀢𑁆𑀣𑀝𑀪𑀸𑀯𑁂𑀦 𑀲𑀻𑀮𑀸𑀤𑀺𑀥𑀫𑁆𑀫𑀓𑁆𑀔𑀦𑁆𑀥𑀧𑀸𑀭𑀺𑀧𑀽𑀭𑀺𑀬𑀸 𑀯𑁂𑀧𑀼𑀮𑁆𑀮𑀁. 𑀦 𑀘 𑀢𑁂 𑀓𑀼𑀳𑀸𑀤𑀺𑀲𑀪𑀸𑀯𑀸 𑀪𑀺𑀓𑁆𑀔𑀽 𑀆𑀧𑀚𑁆𑀚𑀦𑁆𑀢𑀺, 𑀦 𑀘 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑀸𑀫𑀓𑀸𑀢𑀺 𑀇𑀥𑀸𑀧𑀺 𑀫𑁂𑀢𑀺 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑀢𑁆𑀢𑀸 𑀯𑀤𑀢𑀺, 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀢𑁆𑀢𑀸 𑀧𑀦 ‘‘𑀫𑀸𑀫𑀓𑀸’’𑀢𑀺 𑀆𑀳. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀯𑀺𑀭𑀽𑀳𑀦𑁆𑀢𑀺 𑀦𑀸𑀫, 𑀅𑀭𑀳𑀢𑁆𑀢𑀨𑀮𑁂 𑀧𑀦 𑀲𑀫𑁆𑀧𑀢𑁆𑀢𑁂 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀦𑁆𑀦𑀸 𑀦𑀸𑀫. 𑀕𑀸𑀣𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀏𑀯.

𑀦𑀯𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀦𑀤𑀻𑀲𑁄𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯. 𑀤𑀲𑀫𑁂 𑀲𑁂𑀬𑁆𑀬𑀣𑀸𑀧𑀻𑀢𑀺 𑀑𑀧𑀫𑁆𑀫𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀬𑀣𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀦𑀤𑀺𑀬𑀸 𑀲𑁄𑀢𑁂𑀦 𑀑𑀯𑀼𑀬𑁆𑀳𑁂𑀬𑁆𑀬𑀸𑀢𑀺 𑀲𑀻𑀖𑀲𑁄𑀢𑀸𑀬 𑀳𑀸𑀭𑀳𑀸𑀭𑀺𑀦𑀺𑀬𑀸 𑀦𑀤𑀺𑀬𑀸 𑀉𑀤𑀓𑀯𑁂𑀕𑁂𑀦 𑀳𑁂𑀝𑁆𑀞𑀢𑁄 𑀯𑀼𑀬𑁆𑀳𑁂𑀬𑁆𑀬 𑀅𑀥𑁄 𑀳𑀭𑀺𑀬𑁂𑀣. 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑁂𑀦𑀸𑀢𑀺 𑀧𑀺𑀬𑀲𑀪𑀸𑀯𑁂𑀦 𑀲𑀸𑀢𑀲𑀪𑀸𑀯𑁂𑀦 𑀘 𑀓𑀸𑀭𑀡𑀪𑀽𑀢𑁂𑀦, 𑀢𑀲𑁆𑀲𑀁 𑀦𑀤𑀺𑀬𑀁 𑀢𑀲𑁆𑀲𑀸 𑀯𑀸 𑀧𑀭𑀢𑀻𑀭𑁂 𑀫𑀡𑀺𑀲𑀼𑀯𑀡𑁆𑀡𑀸𑀤𑀺 𑀅𑀜𑁆𑀜𑀁 𑀯𑀸 𑀧𑀺𑀬𑀯𑀢𑁆𑀣𑀼 𑀯𑀺𑀢𑁆𑀢𑀽𑀧𑀓𑀭𑀡𑀁 𑀅𑀢𑁆𑀣𑀺, 𑀢𑀁 𑀕𑀳𑁂𑀲𑁆𑀲𑀸𑀫𑀻𑀢𑀺 𑀦𑀤𑀺𑀬𑀁 𑀧𑀢𑀺𑀢𑁆𑀯𑀸 𑀲𑁄𑀢𑁂𑀦 𑀅𑀯𑀓𑀟𑁆𑀠𑁂𑀬𑁆𑀬. 𑀓𑀺𑀜𑁆𑀘𑀸𑀧𑀻𑀢𑀺 𑀅𑀦𑀼𑀚𑀸𑀦𑀦𑀅𑀲𑀫𑁆𑀪𑀸𑀯𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀓𑀺𑀁 𑀅𑀦𑀼𑀚𑀸𑀦𑀸𑀢𑀺, 𑀓𑀺𑀁 𑀦 𑀲𑀫𑁆𑀪𑀸𑀯𑁂𑀢𑀺? 𑀢𑁂𑀦 𑀧𑀼𑀭𑀺𑀲𑁂𑀦 𑀅𑀥𑀺𑀧𑁆𑀧𑁂𑀢𑀲𑁆𑀲 𑀧𑀺𑀬𑀯𑀢𑁆𑀣𑀼𑀲𑁆𑀲 𑀢𑀢𑁆𑀣 𑀅𑀢𑁆𑀣𑀺𑀪𑀸𑀯𑀁 𑀅𑀦𑀼𑀚𑀸𑀦𑀸𑀢𑀺, 𑀢𑀣𑀸𑀕𑀫𑀦𑀁 𑀧𑀦 𑀆𑀤𑀻𑀦𑀯𑀯𑀦𑁆𑀢𑀢𑀸𑀬 𑀦 𑀲𑀫𑁆𑀪𑀸𑀯𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀫𑁆𑀪𑁄, 𑀧𑀼𑀭𑀺𑀲, 𑀬𑀤𑀺𑀧𑀺 𑀢𑀬𑀸 𑀅𑀥𑀺𑀧𑁆𑀧𑁂𑀢𑀁 𑀧𑀺𑀬𑀯𑀢𑁆𑀣𑀼 𑀢𑀢𑁆𑀣 𑀉𑀧𑀮𑀩𑁆𑀪𑀢𑀺, 𑀏𑀯𑀁 𑀕𑀫𑀦𑁂 𑀧𑀦 𑀅𑀬𑀫𑀸𑀤𑀻𑀦𑀯𑁄, 𑀬𑀁 𑀢𑁆𑀯𑀁 𑀳𑁂𑀝𑁆𑀞𑀸 𑀭𑀳𑀤𑀁 𑀧𑀢𑁆𑀯𑀸 𑀫𑀭𑀡𑀁 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁 𑀧𑀸𑀧𑀼𑀡𑁂𑀬𑁆𑀬𑀸𑀲𑀻𑀢𑀺.

𑀅𑀢𑁆𑀣𑀺 𑀘𑁂𑀢𑁆𑀣 𑀳𑁂𑀝𑁆𑀞𑀸 𑀭𑀳𑀤𑁄𑀢𑀺 𑀏𑀢𑀺𑀲𑁆𑀲𑀸 𑀦𑀤𑀺𑀬𑀸 𑀳𑁂𑀝𑁆𑀞𑀸 𑀅𑀦𑀼𑀲𑁄𑀢𑀪𑀸𑀕𑁂 𑀅𑀢𑀺𑀯𑀺𑀬 𑀕𑀫𑁆𑀪𑀻𑀭𑀯𑀺𑀢𑁆𑀣𑀢𑁄 𑀏𑀓𑁄 𑀫𑀳𑀸𑀲𑀭𑁄 𑀅𑀢𑁆𑀣𑀺. 𑀲𑁄 𑀘 𑀲𑀫𑀦𑁆𑀢𑀢𑁄 𑀯𑀸𑀢𑀸𑀪𑀺𑀖𑀸𑀢𑀲𑀫𑀼𑀝𑁆𑀞𑀺𑀢𑀸𑀳𑀺 𑀫𑀡𑀺𑀫𑀬𑀧𑀩𑁆𑀩𑀢𑀓𑀽𑀝𑀲𑀦𑁆𑀦𑀺𑀪𑀸𑀳𑀺 𑀫𑀳𑀢𑀻𑀳𑀺 𑀊𑀫𑀻𑀳𑀺 𑀯𑀻𑀘𑀻𑀳𑀺 𑀲𑀊𑀫𑀺, 𑀯𑀺𑀲𑀫𑁂𑀲𑀼 𑀪𑀽𑀫𑀺𑀧𑁆𑀧𑀤𑁂𑀲𑁂𑀲𑀼 𑀲𑀯𑁂𑀕𑀁 𑀅𑀦𑀼𑀧𑀓𑁆𑀔𑀦𑁆𑀤𑀦𑁆𑀢𑁂𑀦 𑀇𑀫𑀺𑀲𑁆𑀲𑀸 𑀢𑀸𑀯 𑀦𑀤𑀺𑀬𑀸 𑀫𑀳𑁄𑀖𑁂𑀦 𑀢𑀳𑀺𑀁 𑀢𑀳𑀺𑀁 𑀆𑀯𑀝𑁆𑀝𑀫𑀸𑀦𑀯𑀺𑀧𑀼𑀮𑀚𑀮𑀢𑀸𑀬 𑀩𑀮𑀯𑀸𑀫𑀼𑀔𑀲𑀤𑀺𑀲𑁂𑀳𑀺 𑀲𑀳 𑀆𑀯𑀝𑁆𑀝𑁂𑀳𑀻𑀢𑀺 𑀲𑀸𑀯𑀝𑁆𑀝𑁄. 𑀢𑀁 𑀭𑀳𑀤𑀁 𑀑𑀢𑀺𑀡𑁆𑀡𑀲𑀢𑁆𑀢𑁂𑀬𑁂𑀯 𑀅𑀢𑁆𑀢𑀦𑁄 𑀦𑀺𑀩𑀤𑁆𑀥𑀸𑀫𑀺𑀲𑀕𑁄𑀘𑀭𑁂 𑀓𑀢𑁆𑀯𑀸 𑀅𑀚𑁆𑀛𑀸𑀯𑀲𑀦𑁆𑀢𑁂𑀦 𑀅𑀢𑀺𑀯𑀺𑀬 𑀪𑀬𑀸𑀦𑀓𑀤𑀲𑁆𑀲𑀦𑁂𑀦 𑀖𑁄𑀭𑀘𑁂𑀢𑀲𑀸 𑀤𑀓𑀭𑀓𑁆𑀔𑀲𑁂𑀦 𑀲𑀕𑀳𑁄 𑀲𑀭𑀓𑁆𑀔𑀲𑁄, 𑀘𑀡𑁆𑀟𑀫𑀘𑁆𑀙𑀫𑀓𑀭𑀸𑀤𑀺𑀦𑀸 𑀯𑀸 𑀲𑀕𑀳𑁄, 𑀬𑀣𑀸𑀯𑀼𑀢𑁆𑀢𑀭𑀓𑁆𑀔𑀲𑁂𑀦 𑀲𑀭𑀓𑁆𑀔𑀲𑁄.

𑀬𑀦𑁆𑀢𑀺 𑀏𑀯𑀁 𑀲𑀧𑁆𑀧𑀝𑀺𑀪𑀬𑀁 𑀬𑀁 𑀭𑀳𑀤𑀁. 𑀅𑀫𑁆𑀪𑁄 𑀧𑀼𑀭𑀺𑀲𑀸𑀢𑀺 𑀆𑀮𑀧𑀦𑀁. 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑀲𑀻𑀢𑀺 𑀢𑀸𑀳𑀺 𑀯𑀸 𑀊𑀫𑀻𑀳𑀺 𑀅𑀚𑁆𑀛𑁄𑀢𑁆𑀣𑀝𑁄, 𑀢𑁂𑀲𑀼 𑀯𑀸 𑀆𑀯𑀝𑁆𑀝𑁂𑀲𑀼 𑀦𑀺𑀧𑀢𑀺𑀢𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑁂𑀲𑀁 𑀯𑀸 𑀘𑀡𑁆𑀟𑀫𑀘𑁆𑀙𑀫𑀓𑀭𑀸𑀤𑀻𑀦𑀁 𑀫𑀼𑀔𑁂 𑀦𑀺𑀧𑀢𑀺𑀢𑁄. 𑀢𑀲𑁆𑀲 𑀯𑀸 𑀤𑀓𑀭𑀓𑁆𑀔𑀲𑀲𑁆𑀲 𑀳𑀢𑁆𑀣𑀁 𑀕𑀢𑁄 𑀫𑀭𑀡𑀁 𑀯𑀸 𑀕𑀫𑀺𑀲𑁆𑀲𑀲𑀺, 𑀅𑀣 𑀯𑀸 𑀧𑀦 𑀆𑀬𑀼𑀲𑁂𑀲𑁂 𑀲𑀢𑀺 𑀢𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀅𑀧𑀕𑀘𑁆𑀙𑀦𑁆𑀢𑁄 𑀢𑁂𑀳𑀺 𑀊𑀫𑀺𑀆𑀤𑀻𑀳𑀺 𑀚𑀦𑀺𑀢𑀖𑀝𑁆𑀝𑀺𑀢𑀯𑀲𑁂𑀦 𑀫𑀭𑀡𑀫𑀢𑁆𑀢𑀁 𑀫𑀭𑀡𑀧𑁆𑀧𑀫𑀸𑀡𑀁 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀺. 𑀧𑀝𑀺𑀲𑁄𑀢𑀁 𑀯𑀸𑀬𑀫𑁂𑀬𑁆𑀬𑀸𑀢𑀺 𑀲𑁄 𑀧𑀼𑀩𑁆𑀩𑁂 𑀅𑀦𑀼𑀲𑁄𑀢𑀁 𑀯𑀼𑀬𑁆𑀳𑀫𑀸𑀦𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀦𑀢𑁆𑀣𑁄 𑀓𑀺𑀭 𑀫𑁂 𑀉𑀧𑀝𑁆𑀞𑀺𑀢𑁄, 𑀫𑀘𑁆𑀘𑀼𑀫𑀼𑀔𑁂 𑀓𑀺𑀭𑀸𑀳𑀁 𑀧𑀭𑀺𑀯𑀢𑁆𑀢𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀩𑀮𑀯𑀪𑀬𑁄 𑀲𑀫𑁆𑀪𑀫𑀦𑁆𑀢𑁄 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀉𑀲𑁆𑀲𑀸𑀳𑀁 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀯𑀸𑀬𑀫𑁂𑀬𑁆𑀬 𑀢𑀭𑁂𑀬𑁆𑀬, 𑀦 𑀘𑀺𑀭𑁂𑀦𑁂𑀯 𑀢𑀻𑀭𑀁 𑀲𑀫𑁆𑀧𑀸𑀧𑀼𑀡𑁂𑀬𑁆𑀬.

𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀸𑀬𑀸𑀢𑀺 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀸𑀦𑀼𑀓𑀽𑀮𑀲𑁆𑀲 𑀅𑀢𑁆𑀣𑀲𑁆𑀲 𑀲𑀫𑁆𑀩𑁄𑀥𑀦𑀸𑀬 𑀉𑀧𑀫𑀸 𑀓𑀢𑀸. 𑀅𑀬𑀜𑁆𑀘𑁂𑀢𑁆𑀣 𑀅𑀢𑁆𑀣𑁄𑀢𑀺 𑀅𑀬𑀫𑁂𑀯 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁄 𑀇𑀥 𑀫𑀬𑀸 𑀅𑀥𑀺𑀧𑁆𑀧𑁂𑀢𑁄 𑀉𑀧𑀫𑁂𑀬𑁆𑀬𑀢𑁆𑀣𑁄, 𑀬𑀲𑁆𑀲 𑀯𑀺𑀜𑁆𑀜𑀸𑀧𑀦𑀸𑀬 𑀉𑀧𑀫𑀸 𑀆𑀳𑀝𑀸.

𑀢𑀡𑁆𑀳𑀸𑀬𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀏𑀢𑁆𑀣 𑀘𑀢𑀽𑀳𑀺 𑀆𑀓𑀸𑀭𑁂𑀳𑀺 𑀢𑀡𑁆𑀳𑀸𑀬 𑀲𑁄𑀢𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸 𑀅𑀦𑀼𑀓𑁆𑀓𑀫𑀧𑀭𑀺𑀯𑀼𑀟𑁆𑀠𑀺𑀢𑁄 𑀅𑀦𑀼𑀧𑁆𑀧𑀩𑀦𑁆𑀥𑀢𑁄 𑀑𑀲𑀻𑀤𑀸𑀧𑀦𑀢𑁄 𑀤𑀼𑀭𑀼𑀢𑁆𑀢𑀭𑀡𑀢𑁄 𑀘. 𑀬𑀣𑀸 𑀳𑀺 𑀉𑀧𑀭𑀺 𑀫𑀳𑀸𑀫𑁂𑀖𑁂 𑀅𑀪𑀺𑀧𑁆𑀧𑀯𑀼𑀝𑁆𑀞𑁂 𑀉𑀤𑀓𑀁 𑀧𑀩𑁆𑀩𑀢𑀓𑀦𑁆𑀤𑀭𑀧𑀤𑀭𑀲𑀸𑀔𑀸𑀬𑁄 𑀧𑀽𑀭𑁂𑀢𑁆𑀯𑀸 𑀢𑀢𑁄 𑀪𑀲𑁆𑀲𑀺𑀢𑁆𑀯𑀸 𑀓𑀼𑀲𑀼𑀩𑁆𑀪𑁂 𑀧𑀽𑀭𑁂𑀢𑁆𑀯𑀸 𑀢𑀢𑁄 𑀪𑀲𑁆𑀲𑀺𑀢𑁆𑀯𑀸 𑀓𑀼𑀦𑁆𑀦𑀤𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀢𑁄 𑀫𑀳𑀸𑀦𑀤𑀺𑀬𑁄 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀏𑀓𑁄𑀖𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 ‘‘𑀦𑀤𑀻𑀲𑁄𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀯 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀤𑀺𑀯𑀲𑁂𑀦 𑀅𑀦𑁂𑀓𑀪𑁂𑀤𑁂𑀲𑀼 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀮𑁄𑀪𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀯𑀼𑀟𑁆𑀠𑀺𑀁 𑀕𑀘𑁆𑀙𑀦𑁆𑀢𑁄 ‘‘𑀢𑀡𑁆𑀳𑀸𑀲𑁄𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸 𑀘 𑀦𑀤𑀻𑀲𑁄𑀢𑁄 𑀆𑀕𑀫𑀦𑀢𑁄 𑀬𑀸𑀯 𑀲𑀫𑀼𑀤𑁆𑀤𑀧𑁆𑀧𑀢𑁆𑀢𑀺, 𑀢𑀸𑀯 𑀲𑀢𑀺 𑀯𑀺𑀘𑁆𑀙𑁂𑀤𑀧𑀘𑁆𑀘𑀬𑀸𑀪𑀸𑀯𑁂 𑀅𑀯𑀺𑀘𑁆𑀙𑀺𑀚𑁆𑀚𑀫𑀸𑀦𑁄 𑀅𑀦𑀼𑀧𑁆𑀧𑀩𑀦𑁆𑀥𑁂𑀦 𑀧𑀯𑀢𑁆𑀢𑀢𑀺, 𑀏𑀯𑀁 𑀢𑀡𑁆𑀳𑀸𑀲𑁄𑀢𑁄𑀧𑀺 𑀆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀅𑀲𑀢𑀺 𑀯𑀺𑀘𑁆𑀙𑁂𑀤𑀧𑀘𑁆𑀘𑀬𑁂 𑀅𑀯𑀺𑀘𑁆𑀙𑀺𑀚𑁆𑀚𑀫𑀸𑀦𑁄 𑀅𑀧𑀸𑀬𑀲𑀫𑀼𑀤𑁆𑀤𑀸𑀪𑀺𑀫𑀼𑀔𑁄 𑀅𑀦𑀼𑀧𑁆𑀧𑀩𑀦𑁆𑀥𑁂𑀦 𑀧𑀯𑀢𑁆𑀢𑀢𑀺. 𑀬𑀣𑀸 𑀧𑀦 𑀦𑀤𑀻𑀲𑁄𑀢𑁄 𑀢𑀤𑀦𑁆𑀢𑁄𑀕𑀥𑁂 𑀲𑀢𑁆𑀢𑁂 𑀑𑀲𑀻𑀤𑀸𑀧𑁂𑀢𑀺, 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀤𑁂𑀢𑀺, 𑀫𑀭𑀡𑀁 𑀯𑀸 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁 𑀧𑀸𑀧𑁂𑀢𑀺, 𑀏𑀯𑀁 𑀢𑀡𑁆𑀳𑀸𑀲𑁄𑀢𑁄𑀧𑀺 𑀅𑀢𑁆𑀢𑀦𑁄 𑀲𑁄𑀢𑀦𑁆𑀢𑁄𑀕𑀢𑁂 𑀲𑀢𑁆𑀢𑁂 𑀑𑀲𑀻𑀤𑀸𑀧𑁂𑀢𑀺, 𑀧𑀜𑁆𑀜𑀸𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀤𑁂𑀢𑀺, 𑀓𑀼𑀲𑀮𑀫𑀽𑀮𑀘𑁆𑀙𑁂𑀤𑀦𑁂𑀦 𑀲𑀁𑀓𑀺𑀮𑁂𑀲𑀥𑀫𑁆𑀫𑀲𑀫𑀸𑀧𑀚𑁆𑀚𑀦𑁂𑀦 𑀘 𑀫𑀭𑀡𑀁 𑀯𑀸 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁 𑀧𑀸𑀧𑁂𑀢𑀺.

𑀬𑀣𑀸 𑀘 𑀦𑀤𑀺𑀬𑀸 𑀲𑁄𑀢𑁄 𑀫𑀳𑁄𑀖𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑁄 𑀉𑀴𑀼𑀫𑁆𑀧𑀁 𑀯𑀸 𑀦𑀸𑀯𑀁 𑀯𑀸 𑀩𑀦𑁆𑀥𑀺𑀢𑀼𑀁 𑀦𑁂𑀢𑀼𑀜𑁆𑀘 𑀙𑁂𑀓𑀁 𑀧𑀼𑀭𑀺𑀲𑀁 𑀦𑀺𑀲𑁆𑀲𑀸𑀬 𑀧𑀭𑀢𑀻𑀭𑀁 𑀕𑀦𑁆𑀢𑀼𑀁 𑀅𑀚𑁆𑀛𑀸𑀲𑀬𑀁 𑀓𑀢𑁆𑀯𑀸 𑀢𑀚𑁆𑀚𑀁 𑀯𑀸𑀬𑀸𑀫𑀁 𑀓𑀭𑁄𑀦𑁆𑀢𑁂𑀦 𑀢𑀭𑀺𑀢𑀩𑁆𑀩𑁄, 𑀦 𑀬𑁂𑀦 𑀯𑀸 𑀢𑁂𑀦 𑀯𑀸𑀢𑀺 𑀤𑀼𑀭𑀼𑀢𑁆𑀢𑀭𑁄, 𑀏𑀯𑀁 𑀢𑀡𑁆𑀳𑀸𑀲𑁄𑀢𑁄𑀧𑀺 𑀓𑀸𑀫𑁄𑀖𑀪𑀯𑁄𑀖𑀪𑀽𑀢𑁄 𑀲𑀻𑀮𑀲𑀁𑀯𑀭𑀁 𑀧𑀽𑀭𑁂𑀢𑀼𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀓𑀫𑁆𑀫𑀁 𑀓𑀸𑀢𑀼𑀁 ‘‘𑀦𑀺𑀧𑀓𑁂𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀅𑀚𑁆𑀛𑀸𑀲𑀬𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀦𑀺𑀲𑁆𑀲𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀸𑀯𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀫𑁆𑀫𑀸𑀯𑀸𑀬𑀸𑀫𑀁 𑀓𑀭𑁄𑀦𑁆𑀢𑁂𑀦 𑀢𑀭𑀺𑀢𑀩𑁆𑀩𑁄, 𑀦 𑀬𑁂𑀦 𑀯𑀸 𑀢𑁂𑀦 𑀯𑀸𑀢𑀺 𑀤𑀼𑀭𑀼𑀢𑁆𑀢𑀭𑁄. 𑀏𑀯𑀁 𑀅𑀦𑀼𑀓𑁆𑀓𑀫𑀧𑀭𑀺𑀯𑀼𑀟𑁆𑀠𑀺𑀢𑁄 𑀅𑀦𑀼𑀧𑁆𑀧𑀩𑀦𑁆𑀥𑀢𑁄 𑀑𑀲𑀻𑀤𑀸𑀧𑀦𑀢𑁄 𑀤𑀼𑀭𑀼𑀢𑁆𑀢𑀭𑀡𑀢𑁄𑀢𑀺 𑀘𑀢𑀽𑀳𑀺 𑀆𑀓𑀸𑀭𑁂𑀳𑀺 𑀢𑀡𑁆𑀳𑀸𑀬 𑀦𑀤𑀻𑀲𑁄𑀢𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀦𑁆𑀢𑀺 𑀧𑀺𑀬𑀚𑀸𑀢𑀺𑀓𑀁 𑀧𑀺𑀬𑀲𑀪𑀸𑀯𑀁 𑀧𑀺𑀬𑀭𑀽𑀧𑀁, 𑀫𑀥𑀼𑀭𑀚𑀸𑀢𑀺𑀓𑀁 𑀫𑀥𑀼𑀭𑀲𑀪𑀸𑀯𑀁 𑀲𑀸𑀢𑀭𑀽𑀧𑀁, 𑀇𑀝𑁆𑀞𑀲𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀙𑀦𑁆𑀦𑁂𑀢𑀦𑁆𑀢𑀺 𑀙𑀦𑁆𑀦𑀁 𑀏𑀢𑀁. 𑀅𑀚𑁆𑀛𑀢𑁆𑀢𑀺𑀓𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀏𑀯𑀁 𑀫𑀬𑀁 𑀅𑀢𑁆𑀢𑀸𑀢𑀺 𑀕𑀳𑀡𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀇𑀫𑀺𑀦𑀸 𑀯𑀺𑀬 𑀅𑀥𑀺𑀧𑁆𑀧𑀸𑀬𑁂𑀦 𑀅𑀢𑁆𑀢𑀸𑀦𑀁 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸𑀦𑀻𑀢𑀺 𑀅𑀚𑁆𑀛𑀢𑁆𑀢𑀺𑀓𑀸𑀦𑀺. 𑀢𑀢𑁆𑀣 𑀕𑁄𑀘𑀭𑀚𑁆𑀛𑀢𑁆𑀢𑀁, 𑀦𑀺𑀬𑀓𑀚𑁆𑀛𑀢𑁆𑀢𑀁, 𑀯𑀺𑀲𑀬𑀚𑁆𑀛𑀢𑁆𑀢𑀁, 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀅𑀚𑁆𑀛𑀢𑁆𑀢𑀁. 𑀢𑁂𑀲𑀼 ‘‘𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀥. 𑀧. 𑁩𑁬𑁨) 𑀯𑀼𑀢𑁆𑀢𑀁 𑀇𑀤𑀁 𑀕𑁄𑀘𑀭𑀚𑁆𑀛𑀢𑁆𑀢𑀁 𑀦𑀸𑀫. ‘‘𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦’’𑀦𑁆𑀢𑀺 (𑀤𑀻. 𑀦𑀺. 𑁧.𑁨𑁨𑁮; 𑀥. 𑀲. 𑁧𑁬𑁧) 𑀆𑀕𑀢𑀁 𑀇𑀤𑀁 𑀦𑀺𑀬𑀓𑀚𑁆𑀛𑀢𑁆𑀢𑀁 𑀦𑀸𑀫. ‘‘𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 (𑀫. 𑀦𑀺. 𑁩.𑁧𑁮𑁭) 𑀏𑀯𑀫𑀸𑀕𑀢𑀁 𑀇𑀤𑀁 𑀯𑀺𑀲𑀬𑀚𑁆𑀛𑀢𑁆𑀢𑀁 𑀦𑀸𑀫. ‘‘𑀅𑀚𑁆𑀛𑀢𑁆𑀢𑀺𑀓𑀸 𑀥𑀫𑁆𑀫𑀸, 𑀩𑀸𑀳𑀺𑀭𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁨𑁦) 𑀏𑀢𑁆𑀣 𑀯𑀼𑀢𑁆𑀢𑀁 𑀅𑀚𑁆𑀛𑀢𑁆𑀢𑀁 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑀁 𑀦𑀸𑀫. 𑀇𑀥𑀸𑀧𑀺 𑀏𑀢𑀤𑁂𑀯 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀅𑀚𑁆𑀛𑀢𑁆𑀢𑀸𑀦𑀺𑀬𑁂𑀯 𑀅𑀚𑁆𑀛𑀢𑁆𑀢𑀺𑀓𑀸𑀦𑀺. 𑀅𑀣 𑀯𑀸 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀅𑀢𑁆𑀣𑁂𑀦 ‘‘𑀅𑀚𑁆𑀛𑀢𑁆𑀢𑀸 𑀥𑀫𑁆𑀫𑀸, 𑀩𑀳𑀺𑀤𑁆𑀥𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀢𑁂𑀲𑀼 𑀅𑀚𑁆𑀛𑀢𑁆𑀢𑁂𑀲𑀼 𑀪𑀯𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀸𑀦𑀺, 𑀘𑀓𑁆𑀔𑀸𑀤𑀻𑀦𑀺. 𑀢𑁂𑀲𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁.

𑀆𑀬𑀢𑀦𑀸𑀦𑀦𑁆𑀢𑀺 𑀏𑀢𑁆𑀣 𑀆𑀬𑀢𑀦𑀢𑁄, 𑀆𑀬𑀸𑀦𑀁 𑀢𑀦𑀦𑀢𑁄, 𑀆𑀬𑀢𑀲𑁆𑀲 𑀘 𑀦𑀬𑀦𑀢𑁄 𑀆𑀬𑀢𑀦𑀸𑀦𑀻𑀢𑀺. 𑀘𑀓𑁆𑀔𑀸𑀤𑀻𑀲𑀼 𑀳𑀺 𑀢𑀁𑀢𑀁𑀤𑁆𑀯𑀸𑀭𑀯𑀢𑁆𑀣𑀼𑀓𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑀓𑁂𑀦 𑀲𑀓𑁂𑀦 𑀅𑀦𑀼𑀪𑀯𑀦𑀸𑀤𑀺𑀦𑀸 𑀓𑀺𑀘𑁆𑀘𑁂𑀦 𑀆𑀬𑀢𑀦𑁆𑀢𑀺 𑀉𑀝𑁆𑀞𑀳𑀦𑁆𑀢𑀺 𑀖𑀝𑀦𑁆𑀢𑀺 𑀯𑀸𑀬𑀫𑀦𑁆𑀢𑀺, 𑀢𑁂 𑀘 𑀆𑀬𑀪𑀽𑀢𑁂 𑀥𑀫𑁆𑀫𑁂 𑀏𑀢𑀸𑀦𑀺 𑀢𑀦𑁄𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦𑁆𑀢𑀺, 𑀬𑀜𑁆𑀘 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀧𑀯𑀢𑁆𑀢𑀁 𑀅𑀢𑀺𑀯𑀺𑀬 𑀆𑀬𑀢𑀁 𑀯𑀝𑁆𑀝𑀤𑀼𑀓𑁆𑀔𑀁, 𑀢𑀁 𑀦𑀬𑀦𑁆𑀢𑀺 𑀧𑀯𑀢𑁆𑀢𑁂𑀦𑁆𑀢𑀺. 𑀇𑀢𑀺 𑀲𑀩𑁆𑀩𑀣𑀸𑀧𑀺𑀫𑁂 𑀥𑀫𑁆𑀫𑀸 𑀆𑀬𑀢𑀦𑀢𑁄, 𑀆𑀬𑀸𑀦𑀁 𑀢𑀦𑀦𑀢𑁄, 𑀆𑀬𑀢𑀲𑁆𑀲 𑀘 𑀦𑀬𑀦𑀢𑁄 𑀆𑀬𑀢𑀦𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀧𑀺𑀘 𑀦𑀺𑀯𑀸𑀲𑀝𑁆𑀞𑀸𑀦𑀝𑁆𑀞𑁂𑀦, 𑀆𑀓𑀭𑀝𑁆𑀞𑁂𑀦, 𑀲𑀫𑁄𑀲𑀭𑀡𑀝𑁆𑀞𑀸𑀦𑀝𑁆𑀞𑁂𑀦, 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦, 𑀓𑀸𑀭𑀡𑀝𑁆𑀞𑁂𑀦 𑀘 𑀆𑀬𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀮𑁄𑀓𑁂 ‘‘𑀇𑀲𑁆𑀲𑀭𑀸𑀬𑀢𑀦𑀁 𑀤𑁂𑀯𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀦𑀺𑀯𑀸𑀲𑀝𑁆𑀞𑀸𑀦𑀁 𑀆𑀬𑀢𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀲𑀼𑀯𑀡𑁆𑀡𑀸𑀬𑀢𑀦𑀁 𑀭𑀚𑀢𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀆𑀓𑀭𑁄. 𑀲𑀸𑀲𑀦𑁂 𑀧𑀦 ‘‘𑀫𑀦𑁄𑀭𑀫𑁂 𑀆𑀬𑀢𑀦𑁂, 𑀲𑁂𑀯𑀦𑁆𑀢𑀺 𑀦𑀁 𑀯𑀺𑀳𑀗𑁆𑀕𑀫𑀸’’𑀢𑀺𑀆𑀤𑀻𑀲𑀼 𑀲𑀫𑁄𑀲𑀭𑀡𑀝𑁆𑀞𑀸𑀦𑀁. ‘‘𑀤𑀓𑁆𑀔𑀺𑀡𑀸𑀧𑀣𑁄 𑀕𑀼𑀦𑁆𑀦𑀁 𑀆𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀲𑀜𑁆𑀚𑀸𑀢𑀺𑀤𑁂𑀲𑁄. ‘‘𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁫𑁮; 𑀅. 𑀦𑀺. 𑁩.𑁧𑁦𑁨) 𑀓𑀸𑀭𑀡𑀁 𑀆𑀬𑀢𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀘𑀓𑁆𑀔𑀸𑀤𑀻𑀲𑀼 𑀘 𑀢𑁂 𑀢𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀦𑀺𑀯𑀲𑀦𑁆𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀘𑀓𑁆𑀔𑀸𑀤𑀬𑁄 𑀢𑁂𑀲𑀁 𑀦𑀺𑀯𑀸𑀲𑀝𑁆𑀞𑀸𑀦𑀁. 𑀢𑀢𑁆𑀣 𑀘 𑀢𑁂 𑀆𑀓𑀺𑀡𑁆𑀡𑀸 𑀢𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸𑀢𑀺 𑀢𑁂 𑀦𑁂𑀲𑀁 𑀆𑀓𑀭𑁄, 𑀲𑀫𑁄𑀲𑀭𑀡𑀝𑁆𑀞𑀸𑀦𑀜𑁆𑀘 𑀢𑀢𑁆𑀣 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑁂𑀦 𑀲𑀫𑁄𑀲𑀭𑀡𑀢𑁄, 𑀲𑀜𑁆𑀚𑀸𑀢𑀺𑀤𑁂𑀲𑁄 𑀘 𑀢𑀦𑁆𑀦𑀺𑀲𑁆𑀲𑀬𑀪𑀸𑀯𑁂𑀦 𑀢𑁂𑀲𑀁 𑀢𑀢𑁆𑀣𑁂𑀯 𑀉𑀧𑁆𑀧𑀢𑁆𑀢𑀺𑀢𑁄, 𑀓𑀸𑀭𑀡𑀜𑁆𑀘 𑀢𑀤𑀪𑀸𑀯𑁂 𑀢𑁂𑀲𑀁 𑀅𑀪𑀸𑀯𑀢𑁄𑀢𑀺. 𑀇𑀢𑀺 𑀦𑀺𑀯𑀸𑀲𑀝𑁆𑀞𑀸𑀦𑀝𑁆𑀞𑁂𑀦, 𑀆𑀓𑀭𑀝𑁆𑀞𑁂𑀦, 𑀲𑀫𑁄𑀲𑀭𑀡𑀝𑁆𑀞𑀸𑀦𑀝𑁆𑀞𑁂𑀦, 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦, 𑀓𑀸𑀭𑀡𑀝𑁆𑀞𑁂𑀦𑀸𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀘𑀓𑁆𑀔𑀸𑀤𑀻𑀦𑀺 𑀆𑀬𑀢𑀦𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀙𑀦𑁆𑀦𑁂𑀢𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀆𑀬𑀢𑀦𑀸𑀦’’𑀦𑁆𑀢𑀺.

𑀬𑀤𑀺𑀧𑀺 𑀭𑀽𑀧𑀸𑀤𑀬𑁄𑀧𑀺 𑀥𑀫𑁆𑀫𑀸 ‘‘𑀭𑀽𑀧𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀢𑀡𑁆𑀳𑀸𑀯𑀢𑁆𑀣𑀼𑀪𑀸𑀯𑀢𑁄 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀘𑀓𑁆𑀔𑀸𑀤𑀺𑀓𑁂 𑀧𑀦 𑀫𑀼𑀜𑁆𑀘𑀺𑀢𑁆𑀯𑀸 𑀅𑀢𑁆𑀢𑀪𑀸𑀯𑀧𑀜𑁆𑀜𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 ‘‘𑀫𑀫 𑀘𑀓𑁆𑀔𑀼 𑀫𑀫 𑀲𑁄𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀥𑀺𑀓𑀲𑀺𑀦𑁂𑀳𑀯𑀢𑁆𑀣𑀼𑀪𑀸𑀯𑁂𑀦 𑀘𑀓𑁆𑀔𑀸𑀤𑀬𑁄 𑀲𑀸𑀢𑀺𑀲𑀬𑀁 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀦𑁆𑀢𑀺 𑀦𑀺𑀤𑁆𑀤𑁂𑀲𑀁 𑀅𑀭𑀳𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀦𑁆𑀦𑁂𑀢𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀆𑀬𑀢𑀦𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀑𑀭𑀫𑁆𑀪𑀸𑀕𑀺𑀬𑀸𑀦𑀦𑁆𑀢𑀺 𑀏𑀢𑁆𑀣 𑀑𑀭𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸 𑀑𑀭𑀫𑁆𑀪𑀸𑀕𑀸, 𑀧𑀘𑁆𑀘𑀬𑀪𑀸𑀯𑁂𑀦 𑀢𑁂𑀲𑀁 𑀳𑀺𑀢𑀸𑀢𑀺 𑀑𑀭𑀫𑁆𑀪𑀸𑀕𑀺𑀬𑀸. 𑀬𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀢𑀁 𑀧𑀼𑀕𑁆𑀕𑀮𑀁 𑀯𑀝𑁆𑀝𑀲𑁆𑀫𑀺𑀁 𑀲𑀁𑀬𑁄𑀚𑁂𑀦𑁆𑀢𑀺 𑀩𑀦𑁆𑀥𑀦𑁆𑀢𑀻𑀢𑀺 𑀲𑀁𑀬𑁄𑀚𑀦𑀸𑀦𑀺. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑁂 𑀳𑀺 𑀓𑀸𑀫𑀪𑀯𑀽𑀧𑀕𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀸 𑀳𑀼𑀢𑁆𑀯𑀸 𑀭𑀽𑀧𑀸𑀭𑀽𑀧𑀥𑀸𑀢𑀼𑀢𑁄 𑀳𑁂𑀝𑁆𑀞𑀸𑀪𑀸𑀯𑁂𑀦 𑀦𑀺𑀳𑀻𑀦𑀪𑀸𑀯𑁂𑀦 𑀑𑀭𑀫𑁆𑀪𑀸𑀕𑀪𑀽𑀢𑁂𑀦 𑀓𑀸𑀫𑀪𑀯𑁂𑀦 𑀲𑀢𑁆𑀢𑁂 𑀲𑀁𑀬𑁄𑀚𑁂𑀦𑁆𑀢𑀺. 𑀏𑀢𑁂𑀦𑁂𑀯 𑀢𑁂𑀲𑀁 𑀳𑁂𑀝𑁆𑀞𑀸𑀭𑀳𑀤𑀲𑀤𑀺𑀲𑀢𑀸 𑀤𑀻𑀧𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀊𑀫𑀺𑀪𑀬𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀓𑁄𑀥𑀼𑀧𑀸𑀬𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁, 𑀊𑀫𑀺 𑀏𑀯 𑀪𑀬𑀦𑁆𑀢𑀺 𑀊𑀫𑀺𑀪𑀬𑀁. 𑀓𑀼𑀚𑁆𑀛𑀦𑀝𑁆𑀞𑁂𑀦 𑀓𑁄𑀥𑁄, 𑀲𑁆𑀯𑁂𑀯 𑀘𑀺𑀢𑁆𑀢𑀲𑁆𑀲 𑀲𑀭𑀻𑀭𑀲𑁆𑀲 𑀘 𑀅𑀪𑀺𑀧𑁆𑀧𑀫𑀤𑁆𑀤𑀦𑀧𑀯𑁂𑀥𑀦𑀼𑀧𑁆𑀧𑀸𑀤𑀦𑁂𑀦 𑀤𑀴𑁆𑀳𑀁 𑀆𑀬𑀸𑀲𑀦𑀝𑁆𑀞𑁂𑀦 𑀉𑀧𑀸𑀬𑀸𑀲𑁄.

𑀏𑀢𑁆𑀣 𑀘 𑀅𑀦𑁂𑀓𑀯𑀸𑀭𑀁 𑀧𑀯𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑀸 𑀲𑀫𑀯𑁂𑀢𑀁 𑀲𑀢𑁆𑀢𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀅𑀤𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀸𑀧𑀸𑀤𑀦𑁂𑀦 𑀓𑁄𑀥𑀼𑀧𑀸𑀬𑀸𑀲𑀲𑁆𑀲 𑀊𑀫𑀺𑀲𑀤𑀺𑀲𑀢𑀸 𑀤𑀝𑁆𑀞𑀩𑁆𑀩𑀸. 𑀢𑀣𑀸 𑀓𑀸𑀫𑀕𑀼𑀡𑀸𑀦𑀁 𑀓𑀺𑀮𑁂𑀲𑀸𑀪𑀺𑀪𑀽𑀢𑁂 𑀲𑀢𑁆𑀢𑁂 𑀇𑀢𑁄 𑀘 𑀏𑀢𑁆𑀢𑁄, 𑀏𑀢𑁆𑀢𑁄 𑀘 𑀇𑀢𑁄𑀢𑀺 𑀏𑀯𑀁 𑀫𑀦𑀸𑀧𑀺𑀬𑀭𑀽𑀧𑀸𑀤𑀺𑀯𑀺𑀲𑀬𑀲𑀗𑁆𑀔𑀸𑀢𑁂 𑀅𑀢𑁆𑀢𑀦𑀺 𑀲𑀁𑀲𑀸𑀭𑁂𑀢𑁆𑀯𑀸 𑀬𑀣𑀸 𑀢𑀢𑁄 𑀩𑀳𑀺𑀪𑀽𑀢𑁂 𑀦𑁂𑀓𑁆𑀔𑀫𑁆𑀫𑁂 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀚𑁆𑀚𑀢𑀺 𑀏𑀯𑀁 𑀆𑀯𑀝𑁆𑀝𑁂𑀢𑁆𑀯𑀸 𑀩𑁆𑀬𑀲𑀦𑀸𑀧𑀸𑀤𑀦𑁂𑀦 𑀆𑀯𑀝𑁆𑀝𑀲𑀤𑀺𑀲𑀢𑀸 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀧𑀦 𑀕𑀳𑀭𑀓𑁆𑀔𑀲𑁄𑀧𑀺 𑀆𑀭𑀓𑁆𑀔𑀭𑀳𑀺𑀢𑀁 𑀅𑀢𑁆𑀢𑀦𑁄 𑀕𑁄𑀘𑀭𑀪𑀽𑀫𑀺𑀕𑀢𑀁 𑀧𑀼𑀭𑀺𑀲𑀁 𑀅𑀪𑀺𑀪𑀼𑀬𑁆𑀬 𑀕𑀳𑁂𑀢𑁆𑀯𑀸 𑀅𑀕𑁄𑀘𑀭𑁂 𑀞𑀺𑀢𑀫𑁆𑀧𑀺 𑀭𑀓𑁆𑀔𑀲𑀫𑀸𑀬𑀸𑀬 𑀕𑁄𑀘𑀭𑀁 𑀦𑁂𑀢𑁆𑀯𑀸 𑀪𑁂𑀭𑀯𑀭𑀽𑀧𑀤𑀲𑁆𑀲𑀦𑀸𑀤𑀺𑀦𑀸 𑀅𑀯𑀲𑀁 𑀅𑀢𑁆𑀢𑀦𑁄 𑀉𑀧𑀓𑀸𑀭𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀁 𑀓𑀢𑁆𑀯𑀸 𑀅𑀦𑁆𑀯𑀸𑀯𑀺𑀲𑀺𑀢𑁆𑀯𑀸 𑀯𑀡𑁆𑀡𑀩𑀮𑀪𑁄𑀕𑀬𑀲𑀲𑀼𑀔𑁂𑀳𑀺𑀧𑀺 𑀯𑀺𑀬𑁄𑀚𑁂𑀦𑁆𑀢𑁄 𑀫𑀳𑀦𑁆𑀢𑀁 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀢𑀺, 𑀏𑀯𑀁 𑀫𑀸𑀢𑀼𑀕𑀸𑀫𑁄𑀧𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀭𑀳𑀺𑀢𑀁 𑀅𑀯𑀻𑀭𑀧𑀼𑀭𑀺𑀲𑀁 𑀇𑀢𑁆𑀣𑀺𑀓𑀼𑀢𑁆𑀢𑀪𑀽𑀢𑁂𑀳𑀺 𑀅𑀢𑁆𑀢𑀦𑁄 𑀳𑀸𑀯𑀪𑀸𑀯𑀯𑀺𑀮𑀸𑀲𑁂𑀳𑀺 𑀅𑀪𑀺𑀪𑀼𑀬𑁆𑀬 𑀕𑀳𑁂𑀢𑁆𑀯𑀸 𑀯𑀻𑀭𑀚𑀸𑀢𑀺𑀬𑀫𑁆𑀧𑀺 𑀅𑀢𑁆𑀢𑀦𑁄 𑀭𑀽𑀧𑀸𑀤𑀻𑀳𑀺 𑀧𑀮𑁄𑀪𑀦𑀯𑀲𑁂𑀦 𑀇𑀢𑁆𑀣𑀺𑀫𑀸𑀬𑀸𑀬 𑀅𑀦𑁆𑀯𑀸𑀯𑀺𑀲𑀺𑀢𑁆𑀯𑀸 𑀅𑀯𑀲𑀁 𑀅𑀢𑁆𑀢𑀦𑁄 𑀉𑀧𑀓𑀸𑀭𑀥𑀫𑁆𑀫𑁂 𑀲𑀻𑀮𑀸𑀤𑀬𑁄 𑀲𑀫𑁆𑀧𑀸𑀤𑁂𑀢𑀼𑀁 𑀅𑀲𑀫𑀢𑁆𑀣𑀁 𑀓𑀭𑁄𑀦𑁆𑀢𑁄 𑀕𑀼𑀡𑀯𑀡𑁆𑀡𑀸𑀤𑀻𑀳𑀺 𑀯𑀺𑀬𑁄𑀚𑁂𑀢𑁆𑀯𑀸 𑀫𑀳𑀦𑁆𑀢𑀁 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀢𑀺, 𑀏𑀯𑀁 𑀫𑀸𑀢𑀼𑀕𑀸𑀫𑀲𑁆𑀲 𑀕𑀳𑀭𑀓𑁆𑀔𑀲𑀲𑀤𑀺𑀲𑀢𑀸 𑀤𑀝𑁆𑀞𑀩𑁆𑀩𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀯𑀝𑁆𑀝𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑁂𑀢𑀁 𑀓𑀸𑀫𑀕𑀼𑀡𑀸𑀦𑀁 𑀅𑀥𑀺𑀯𑀘𑀦𑀁, 𑀕𑀳𑀭𑀓𑁆𑀔𑀲𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺.

𑀧𑀝𑀺𑀲𑁄𑀢𑁄𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀦𑁂𑀓𑁆𑀔𑀫𑁆𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀏𑀢𑁆𑀣 𑀧𑀩𑁆𑀩𑀚𑁆𑀚𑀸 𑀲𑀳 𑀉𑀧𑀘𑀸𑀭𑁂𑀦 𑀧𑀞𑀫𑀚𑁆𑀛𑀸𑀦𑀁 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀘 𑀦𑀺𑀩𑁆𑀩𑀸𑀦𑀜𑁆𑀘 𑀦𑁂𑀓𑁆𑀔𑀫𑁆𑀫𑀁 𑀦𑀸𑀫. 𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀦𑁂𑀓𑁆𑀔𑀫𑁆𑀫𑀁 𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀩𑁆𑀩𑀚𑁆𑀚𑀸 𑀧𑀞𑀫𑀁 𑀛𑀸𑀦𑀁, 𑀦𑀺𑀩𑁆𑀩𑀸𑀦𑀜𑁆𑀘 𑀯𑀺𑀧𑀲𑁆𑀲𑀦𑀸;

𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀧𑀯𑀼𑀘𑁆𑀘𑀭𑁂’’𑀢𑀺.

𑀇𑀫𑁂𑀲𑀁 𑀧𑀦 𑀧𑀩𑁆𑀩𑀚𑁆𑀚𑀸𑀤𑀻𑀦𑀁 𑀢𑀡𑁆𑀳𑀸𑀲𑁄𑀢𑀲𑁆𑀲 𑀧𑀝𑀺𑀮𑁄𑀫𑀢𑁄 𑀧𑀝𑀺𑀲𑁄𑀢𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀺𑀲𑁂𑀲𑁂𑀦 𑀳𑀺 𑀥𑀫𑁆𑀫𑀯𑀺𑀦𑀬𑁄 𑀦𑁂𑀓𑁆𑀔𑀫𑁆𑀫𑀁, 𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀁 𑀧𑀩𑁆𑀩𑀚𑁆𑀚𑀸 𑀘, 𑀥𑀫𑁆𑀫𑀯𑀺𑀦𑀬𑁄 𑀘 𑀢𑀡𑁆𑀳𑀸𑀲𑁄𑀢𑀲𑁆𑀲 𑀧𑀝𑀺𑀲𑁄𑀢𑀁 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀝𑀺𑀲𑁄𑀢𑀕𑀸𑀫𑀺𑀁 𑀦𑀺𑀧𑀼𑀡𑀁, 𑀕𑀫𑁆𑀪𑀻𑀭𑀁 𑀤𑀼𑀤𑁆𑀤𑀲𑀁 𑀅𑀡𑀼𑀁;

𑀭𑀸𑀕𑀭𑀢𑁆𑀢𑀸 𑀦 𑀤𑀓𑁆𑀔𑀦𑁆𑀢𑀺, 𑀢𑀫𑁄𑀔𑀦𑁆𑀥𑁂𑀦 𑀆𑀯𑀼𑀢𑀸’’𑀢𑀺. (𑀤𑀻. 𑀦𑀺. 𑁨.𑁬𑁫; 𑀫. 𑀦𑀺. 𑁧.𑁨𑁮𑁧; 𑀲𑀁. 𑀦𑀺. 𑁧.𑁧𑁭𑁨);

𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲𑀸𑀢𑀺 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀲𑁆𑀲. 𑀢𑀲𑁆𑀲 𑀓𑀸𑀫𑁄𑀖𑀸𑀤𑀺𑀪𑁂𑀤𑀢𑀡𑁆𑀳𑀸𑀲𑁄𑀢𑀲𑀦𑁆𑀢𑀭𑀡𑀲𑁆𑀲 𑀳𑀢𑁆𑀣𑁂𑀳𑀺 𑀧𑀸𑀤𑁂𑀳𑀺 𑀘𑀢𑀼𑀭𑀗𑁆𑀕𑀦𑀤𑀻𑀲𑁄𑀢𑀲𑀦𑁆𑀢𑀭𑀡𑀯𑀸𑀬𑀸𑀫𑀲𑁆𑀲 𑀲𑀤𑀺𑀲𑀢𑀸 𑀧𑀸𑀓𑀝𑀸𑀬𑁂𑀯. 𑀢𑀣𑀸 𑀦𑀤𑀻𑀲𑁄𑀢𑀲𑁆𑀲 𑀢𑀻𑀭𑁂 𑀞𑀺𑀢𑀲𑁆𑀲 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀓𑀸𑀫𑀸𑀤𑀺𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀑𑀖𑀁 𑀢𑀭𑀺𑀢𑁆𑀯𑀸 𑀢𑀲𑁆𑀲 𑀧𑀭𑀢𑀻𑀭𑀪𑀽𑀢𑁂 𑀦𑀺𑀩𑁆𑀩𑀸𑀦𑀣𑀮𑁂 𑀞𑀺𑀢𑀲𑁆𑀲 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀢𑁄 𑀪𑀕𑀯𑀢𑁄 𑀲𑀤𑀺𑀲𑀪𑀸𑀯𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺.

𑀢𑀢𑁆𑀭𑀺𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀦𑀤𑀻𑀲𑁄𑀢𑁄 𑀯𑀺𑀬 𑀅𑀦𑀼𑀧𑁆𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁄 𑀢𑀡𑁆𑀳𑀸𑀲𑁄𑀢𑁄, 𑀢𑁂𑀦 𑀯𑀼𑀬𑁆𑀳𑀫𑀸𑀦𑁄 𑀧𑀼𑀭𑀺𑀲𑁄 𑀯𑀺𑀬 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀧𑀭𑀺𑀩𑁆𑀪𑀫𑀦𑀢𑁄 𑀢𑀡𑁆𑀳𑀸𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑁄 𑀲𑀢𑁆𑀢𑁄, 𑀢𑀲𑁆𑀲 𑀢𑀢𑁆𑀣 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑀯𑀢𑁆𑀣𑀼𑀲𑁆𑀫𑀺𑀁 𑀅𑀪𑀺𑀦𑀺𑀯𑁂𑀲𑁄 𑀯𑀺𑀬 𑀇𑀫𑀲𑁆𑀲 𑀘𑀓𑁆𑀔𑀸𑀤𑀻𑀲𑀼 𑀅𑀪𑀺𑀦𑀺𑀯𑁂𑀲𑁄, 𑀲𑀊𑀫𑀺𑀲𑀸𑀯𑀝𑁆𑀝𑀲𑀕𑀳𑀭𑀓𑁆𑀔𑀲𑁄 𑀳𑁂𑀝𑁆𑀞𑀸𑀭𑀳𑀤𑁄 𑀯𑀺𑀬 𑀓𑁄𑀥𑀼𑀧𑀸𑀬𑀸𑀲𑀧𑀜𑁆𑀘𑀓𑀸𑀫𑀕𑀼𑀡𑀫𑀸𑀢𑀼𑀕𑀸𑀫𑀲𑀫𑀸𑀓𑀼𑀮𑁄 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀲𑀫𑀽𑀳𑁄, 𑀢𑀫𑀢𑁆𑀣𑀁 𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸 𑀢𑀲𑁆𑀲 𑀦𑀤𑀻𑀲𑁄𑀢𑀲𑁆𑀲 𑀧𑀭𑀢𑀻𑀭𑁂 𑀞𑀺𑀢𑁄 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀯𑀺𑀬 𑀲𑀓𑀮𑀁 𑀲𑀁𑀲𑀸𑀭𑀸𑀤𑀻𑀦𑀯𑀁 𑀲𑀩𑁆𑀩𑀜𑁆𑀘 𑀜𑁂𑀬𑁆𑀬𑀥𑀫𑁆𑀫𑀁 𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸 𑀢𑀡𑁆𑀳𑀸𑀲𑁄𑀢𑀲𑁆𑀲 𑀧𑀭𑀢𑀻𑀭𑀪𑀽𑀢𑁂 𑀦𑀺𑀩𑁆𑀩𑀸𑀦𑀣𑀮𑁂 𑀞𑀺𑀢𑁄 𑀲𑀫𑀦𑁆𑀢𑀘𑀓𑁆𑀔𑀼 𑀪𑀕𑀯𑀸, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀲𑁆𑀫𑀺𑀁 𑀦𑀤𑀺𑀬𑀸 𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑁂 𑀧𑀼𑀭𑀺𑀲𑁂 𑀅𑀦𑀼𑀓𑀫𑁆𑀧𑀸𑀬 𑀭𑀳𑀤𑀲𑁆𑀲 𑀭𑀳𑀤𑀸𑀤𑀻𑀦𑀯𑀲𑁆𑀲 𑀘 𑀆𑀘𑀺𑀓𑁆𑀔𑀦𑀁 𑀯𑀺𑀬 𑀢𑀡𑁆𑀳𑀸𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑀲𑁆𑀲 𑀲𑀢𑁆𑀢𑀲𑁆𑀲 𑀫𑀳𑀸𑀓𑀭𑀼𑀡𑀸𑀬 𑀪𑀕𑀯𑀢𑁄 𑀢𑀡𑁆𑀳𑀸𑀤𑀻𑀦𑀁 𑀢𑀤𑀸𑀤𑀻𑀦𑀯𑀲𑁆𑀲 𑀘 𑀯𑀺𑀪𑀸𑀯𑀦𑀸, 𑀢𑀲𑁆𑀲 𑀯𑀘𑀦𑀁 𑀅𑀲𑀤𑁆𑀤𑀳𑀺𑀢𑁆𑀯𑀸 𑀅𑀦𑀼𑀲𑁄𑀢𑀕𑀸𑀫𑀺𑀦𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀲𑁆𑀫𑀺𑀁 𑀭𑀳𑀤𑁂 𑀫𑀭𑀡𑀧𑁆𑀧𑀢𑁆𑀢𑀺𑀫𑀭𑀡𑀫𑀢𑁆𑀢𑀤𑀼𑀓𑁆𑀔𑀧𑁆𑀧𑀢𑁆𑀢𑀺𑀬𑁄 𑀯𑀺𑀬 𑀪𑀕𑀯𑀢𑁄 𑀯𑀘𑀦𑀁 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀲𑁆𑀲 𑀅𑀧𑀸𑀬𑀼𑀧𑁆𑀧𑀢𑁆𑀢𑀺, 𑀲𑀼𑀕𑀢𑀺𑀬𑀁 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺 𑀘, 𑀢𑀲𑁆𑀲 𑀧𑀦 𑀯𑀘𑀦𑀁 𑀲𑀤𑁆𑀤𑀳𑀺𑀢𑁆𑀯𑀸 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀯𑀸𑀬𑀸𑀫𑀓𑀭𑀡𑀁 𑀯𑀺𑀬 𑀢𑁂𑀦 𑀘 𑀯𑀸𑀬𑀸𑀫𑁂𑀦 𑀧𑀭𑀢𑀻𑀭𑀁 𑀧𑀢𑁆𑀯𑀸 𑀲𑀼𑀔𑁂𑀦 𑀬𑀣𑀺𑀘𑁆𑀙𑀺𑀢𑀝𑁆𑀞𑀸𑀦𑀕𑀫𑀦𑀁 𑀯𑀺𑀬 𑀪𑀕𑀯𑀢𑁄 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀡𑁆𑀳𑀸𑀤𑀻𑀲𑀼 𑀆𑀤𑀻𑀦𑀯𑀁 𑀧𑀲𑁆𑀲𑀺𑀢𑁆𑀯𑀸 𑀢𑀡𑁆𑀳𑀸𑀲𑁄𑀢𑀲𑁆𑀲 𑀧𑀝𑀺𑀲𑁄𑀢𑀧𑀩𑁆𑀩𑀚𑁆𑀚𑀸𑀤𑀺𑀦𑁂𑀓𑁆𑀔𑀫𑁆𑀫𑀯𑀲𑁂𑀦 𑀯𑀻𑀭𑀺𑀬𑀸𑀭𑀫𑁆𑀪𑁄, 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀘 𑀢𑁂𑀦𑁂𑀯 𑀯𑀻𑀭𑀺𑀬𑀸𑀭𑀫𑁆𑀪𑁂𑀦 𑀢𑀡𑁆𑀳𑀸𑀲𑁄𑀢𑀸𑀢𑀺𑀓𑁆𑀓𑀫𑀦𑀁 𑀦𑀺𑀩𑁆𑀩𑀸𑀦𑀢𑀻𑀭𑀁 𑀧𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀬𑀣𑀸𑀭𑀼𑀘𑀺 𑀲𑀼𑀔𑀯𑀺𑀳𑀸𑀭𑁄𑀢𑀺.

𑀕𑀸𑀣𑀸𑀲𑀼 𑀲𑀳𑀸𑀧𑀺 𑀤𑀼𑀓𑁆𑀔𑁂𑀦 𑀚𑀳𑁂𑀬𑁆𑀬 𑀓𑀸𑀫𑁂𑀢𑀺 𑀛𑀸𑀦𑀫𑀕𑁆𑀕𑀸𑀥𑀺𑀕𑀫𑀢𑁆𑀣𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀼𑀬𑁄𑀕𑀁 𑀓𑀭𑁄𑀦𑁆𑀢𑁄 𑀪𑀺𑀓𑁆𑀔𑀼 𑀬𑀤𑀺𑀧𑀺 𑀢𑁂𑀲𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀲𑀫𑁆𑀧𑀚𑁆𑀚𑀢𑀺, 𑀦 𑀲𑀼𑀔𑁂𑀦 𑀯𑀻𑀣𑀺𑀁 𑀑𑀢𑀭𑀢𑀺 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀬 𑀓𑀺𑀮𑁂𑀲𑀸𑀦𑀁 𑀩𑀮𑀯𑀪𑀸𑀯𑀢𑁄, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀸 𑀅𑀢𑀺𑀓𑁆𑀔𑀪𑀸𑀯𑀢𑁄. 𑀢𑀣𑀸 𑀲𑀢𑀺 𑀲𑀳𑀸𑀧𑀺 𑀤𑀼𑀓𑁆𑀔𑁂𑀦 𑀚𑀳𑁂𑀬𑁆𑀬 𑀓𑀸𑀫𑁂, 𑀧𑀞𑀫𑀚𑁆𑀛𑀸𑀦𑁂𑀦 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀢𑀢𑀺𑀬𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑁄 𑀓𑀺𑀮𑁂𑀲𑀓𑀸𑀫𑁂 𑀧𑀚𑀳𑁂𑀬𑁆𑀬. 𑀏𑀢𑁂𑀦 𑀤𑀼𑀓𑁆𑀔𑀧𑀝𑀺𑀧𑀤𑁂 𑀛𑀸𑀦𑀫𑀕𑁆𑀕𑁂 𑀤𑀲𑁆𑀲𑁂𑀢𑀺.

𑀬𑁄𑀕𑀓𑁆𑀔𑁂𑀫𑀁 𑀆𑀬𑀢𑀺𑀁 𑀧𑀢𑁆𑀣𑀬𑀸𑀦𑁄𑀢𑀺 𑀅𑀦𑀸𑀕𑀸𑀫𑀺𑀢𑀁 𑀅𑀭𑀳𑀢𑁆𑀢𑀁 𑀇𑀘𑁆𑀙𑀦𑁆𑀢𑁄 𑀆𑀓𑀗𑁆𑀔𑀫𑀸𑀦𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺𑀧𑀺 𑀏𑀢𑀭𑀳𑀺 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀛𑀸𑀦𑀧𑀼𑀭𑀺𑀫𑀫𑀕𑁆𑀕𑁂 𑀅𑀥𑀺𑀕𑀘𑁆𑀙𑀸𑀫𑀺, 𑀇𑀫𑁂 𑀧𑀦 𑀦𑀺𑀲𑁆𑀲𑀸𑀬 𑀉𑀧𑀭𑀺 𑀅𑀭𑀳𑀢𑁆𑀢𑀁 𑀅𑀥𑀺𑀕𑀦𑁆𑀢𑁆𑀯𑀸 𑀓𑀢𑀓𑀺𑀘𑁆𑀘𑁄 𑀧𑀳𑀻𑀦𑀲𑀩𑁆𑀩𑀤𑀼𑀓𑁆𑀔𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀲𑀳𑀸𑀧𑀺 𑀤𑀼𑀓𑁆𑀔𑁂𑀦 𑀛𑀸𑀦𑀸𑀤𑀻𑀳𑀺 𑀓𑀸𑀫𑁂 𑀧𑀚𑀳𑁂𑀬𑁆𑀬𑀸𑀢𑀺. 𑀅𑀣 𑀯𑀸 𑀬𑁄 𑀓𑀸𑀫𑀯𑀺𑀢𑀓𑁆𑀓𑀩𑀳𑀼𑀮𑁄 𑀧𑀼𑀕𑁆𑀕𑀮𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀯𑀲𑁂𑀦 𑀧𑀩𑁆𑀩𑀚𑁆𑀚𑀁 𑀲𑀻𑀮𑀯𑀺𑀲𑁄𑀥𑀦𑀁 𑀛𑀸𑀦𑀸𑀤𑀻𑀦𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺𑀁 𑀯𑀸 𑀧𑀝𑀺𑀧𑀚𑁆𑀚𑀦𑁆𑀢𑁄 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀅𑀲𑁆𑀲𑀼𑀫𑀼𑀔𑁄 𑀭𑁄𑀤𑀫𑀸𑀦𑁄 𑀢𑀁 𑀯𑀺𑀢𑀓𑁆𑀓𑀁 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀳𑀸𑀧𑀺 𑀤𑀼𑀓𑁆𑀔𑁂𑀦 𑀚𑀳𑁂𑀬𑁆𑀬 𑀓𑀸𑀫𑁂’’𑀢𑀺. 𑀲𑁄 𑀳𑀺 𑀓𑀺𑀘𑁆𑀙𑁂𑀦𑀧𑀺 𑀓𑀸𑀫𑁂 𑀧𑀚𑀳𑀦𑁆𑀢𑁄 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑁂𑀬𑁆𑀬. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑁄𑀕𑀓𑁆𑀔𑁂𑀫𑀁 𑀆𑀬𑀢𑀺𑀁 𑀧𑀢𑁆𑀣𑀬𑀸𑀦𑁄’’𑀢𑀺.

𑀲𑀫𑁆𑀫𑀧𑁆𑀧𑀚𑀸𑀦𑁄𑀢𑀺 𑀯𑀺𑀧𑀲𑁆𑀲𑀦𑀸𑀲𑀳𑀺𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀲𑀫𑁆𑀫𑀤𑁂𑀯 𑀧𑀚𑀸𑀦𑀦𑁆𑀢𑁄. 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄𑀢𑀺 𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀅𑀦𑀦𑁆𑀢𑀭𑀁 𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄. 𑀯𑀺𑀫𑀼𑀢𑁆𑀢𑀺𑀬𑀸 𑀨𑀲𑁆𑀲𑀬𑁂 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀫𑀕𑁆𑀕𑀨𑀮𑀸𑀥𑀺𑀕𑀫𑀦𑀓𑀸𑀮𑁂 𑀯𑀺𑀫𑀼𑀢𑁆𑀢𑀺𑀁 𑀦𑀺𑀩𑁆𑀩𑀸𑀦𑀁 𑀨𑀲𑁆𑀲𑀬𑁂 𑀨𑀼𑀲𑁂𑀬𑁆𑀬 𑀧𑀸𑀧𑀼𑀡𑁂𑀬𑁆𑀬 𑀅𑀥𑀺𑀕𑀘𑁆𑀙𑁂𑀬𑁆𑀬 𑀲𑀘𑁆𑀙𑀺𑀓𑀭𑁂𑀬𑁆𑀬. 𑀉𑀧𑀬𑁄𑀕𑀢𑁆𑀣𑁂 𑀳𑀺 ‘‘𑀯𑀺𑀫𑀼𑀢𑁆𑀢𑀺𑀬𑀸’’𑀢𑀺 𑀇𑀤𑀁 𑀲𑀸𑀫𑀺𑀯𑀘𑀦𑀁. 𑀯𑀺𑀫𑀼𑀢𑁆𑀢𑀺𑀬𑀸 𑀯𑀸 𑀆𑀭𑀫𑁆𑀫𑀡𑀪𑀽𑀢𑀸𑀬 𑀢𑀢𑁆𑀣 𑀢𑀢𑁆𑀣 𑀢𑀁𑀢𑀁𑀨𑀮𑀲𑀫𑀸𑀧𑀢𑁆𑀢𑀺𑀓𑀸𑀮𑁂 𑀅𑀢𑁆𑀢𑀦𑁄 𑀨𑀮𑀘𑀺𑀢𑁆𑀢𑀁 𑀨𑀲𑁆𑀲𑀬𑁂 𑀨𑀼𑀲𑁂𑀬𑁆𑀬 𑀧𑀸𑀧𑀼𑀡𑁂𑀬𑁆𑀬, 𑀦𑀺𑀩𑁆𑀩𑀸𑀦𑁄𑀕𑀥𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲 𑀯𑁂𑀤𑀕𑀽𑀢𑀺 𑀲𑁄 𑀯𑁂𑀤𑀲𑀗𑁆𑀔𑀸𑀢𑁂𑀦 𑀫𑀕𑁆𑀕𑀜𑀸𑀡𑁂𑀦 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀕𑀢𑀢𑁆𑀢𑀸 𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀯𑁂𑀤𑀕𑀽. 𑀮𑁄𑀓𑀦𑁆𑀢𑀕𑀽𑀢𑀺 𑀔𑀦𑁆𑀥𑀮𑁄𑀓𑀲𑁆𑀲 𑀧𑀭𑀺𑀬𑀦𑁆𑀢𑀁 𑀕𑀢𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀤𑀲𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀘𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁦. 𑀏𑀓𑀸𑀤𑀲𑀫𑁂 𑀘𑀭𑀢𑁄𑀢𑀺 𑀕𑀘𑁆𑀙𑀦𑁆𑀢𑀲𑁆𑀲, 𑀘𑀗𑁆𑀓𑀫𑀦𑁆𑀢𑀲𑁆𑀲 𑀯𑀸. 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀯𑀸𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼 𑀅𑀯𑀻𑀢𑀭𑀸𑀕𑀢𑀸𑀬 𑀢𑀸𑀤𑀺𑀲𑁂 𑀧𑀘𑁆𑀘𑀬𑁂 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀸 𑀯𑀺𑀢𑀓𑁆𑀓𑁄 𑀉𑀧𑁆𑀧𑀚𑁆𑀚𑀢𑀺 𑀘𑁂, 𑀬𑀤𑀺 𑀉𑀧𑁆𑀧𑀚𑁆𑀚𑀢𑀺. 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀸𑀢𑀺 𑀆𑀖𑀸𑀢𑀦𑀺𑀫𑀺𑀢𑁆𑀢𑀩𑁆𑀬𑀸𑀧𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀸 𑀯𑀺𑀢𑀓𑁆𑀓𑁄, 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑀭𑀯𑀺𑀳𑁂𑀞𑀦𑀯𑀲𑁂𑀦 𑀯𑀺𑀳𑀺𑀁𑀲𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀸 𑀯𑀺𑀢𑀓𑁆𑀓𑁄 𑀉𑀧𑁆𑀧𑀚𑁆𑀚𑀢𑀺 𑀘𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀥𑀺𑀯𑀸𑀲𑁂𑀢𑀻𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀁 𑀬𑀣𑀸𑀧𑀘𑁆𑀘𑀬𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀁 ‘‘𑀇𑀢𑀺𑀧𑀸𑀬𑀁 𑀯𑀺𑀢𑀓𑁆𑀓𑁄 𑀧𑀸𑀧𑀓𑁄, 𑀇𑀢𑀺𑀧𑀺 𑀅𑀓𑀼𑀲𑀮𑁄, 𑀇𑀢𑀺𑀧𑀺 𑀲𑀸𑀯𑀚𑁆𑀚𑁄, 𑀲𑁄 𑀘 𑀔𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀲𑀁𑀯𑀢𑁆𑀢𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀅𑀪𑀸𑀯𑀢𑁄 𑀅𑀥𑀺𑀯𑀸𑀲𑁂𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀆𑀭𑁄𑀧𑁂𑀢𑁆𑀯𑀸 𑀯𑀸𑀲𑁂𑀢𑀺 𑀘𑁂. 𑀅𑀥𑀺𑀯𑀸𑀲𑁂𑀦𑁆𑀢𑁄𑀬𑁂𑀯 𑀘 𑀦𑀧𑁆𑀧𑀚𑀳𑀢𑀺 𑀢𑀤𑀗𑁆𑀕𑀸𑀤𑀺𑀧𑁆𑀧𑀳𑀸𑀦𑀯𑀲𑁂𑀦 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀢𑀢𑁄 𑀏𑀯 𑀦 𑀯𑀺𑀦𑁄𑀤𑁂𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀢𑁄 𑀦 𑀦𑀼𑀤𑀢𑀺 𑀦 𑀦𑀻𑀳𑀭𑀢𑀺, 𑀢𑀣𑀸 𑀅𑀯𑀺𑀦𑁄𑀤𑀦𑀢𑁄 𑀦 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀦 𑀯𑀺𑀕𑀢𑀦𑁆𑀢𑀁 𑀓𑀭𑁄𑀢𑀺. 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀬𑀣𑀸 𑀢𑁂𑀲𑀁 𑀅𑀦𑁆𑀢𑁄𑀧𑀺 𑀦𑀸𑀯𑀲𑀺𑀲𑁆𑀲𑀢𑀺 𑀅𑀦𑁆𑀢𑀫𑀲𑁄 𑀪𑀗𑁆𑀕𑀫𑀢𑁆𑀢𑀫𑁆𑀧𑀺 𑀏𑀯𑀁 𑀓𑀭𑁄𑀢𑀺, 𑀅𑀬𑀁 𑀧𑀦 𑀢𑀣𑀸 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸𑀪𑀽𑀢𑁄𑀯 𑀦 𑀅𑀦𑀪𑀸𑀯𑀁 𑀕𑀫𑁂𑀢𑀺 𑀅𑀦𑀼 𑀅𑀦𑀼 𑀅𑀪𑀸𑀯𑀁 𑀦 𑀕𑀫𑁂𑀢𑀺. 𑀦 𑀧𑀚𑀳𑀢𑀺 𑀘𑁂, 𑀦 𑀯𑀺𑀦𑁄𑀤𑁂𑀢𑀺 𑀘𑁂𑀢𑀺𑀆𑀤𑀺𑀦𑀸 𑀘𑁂-𑀲𑀤𑁆𑀤𑀁 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀘𑀭𑀦𑁆𑀢𑀺 𑀘𑀭𑀦𑁆𑀢𑁄. 𑀏𑀯𑀁𑀪𑀽𑀢𑁄𑀢𑀺 𑀏𑀯𑀁 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀧𑀸𑀧𑀯𑀺𑀢𑀓𑁆𑀓𑁂𑀳𑀺 𑀲𑀫𑀗𑁆𑀕𑀻𑀪𑀽𑀢𑁄. 𑀅𑀦𑀸𑀢𑀸𑀧𑀻 𑀅𑀦𑁄𑀢𑁆𑀢𑀸𑀧𑀻𑀢𑀺 𑀓𑀺𑀮𑁂𑀲𑀸𑀦𑀁 𑀆𑀢𑀸𑀧𑀦𑀲𑁆𑀲 𑀯𑀻𑀭𑀺𑀬𑀲𑁆𑀲 𑀅𑀪𑀸𑀯𑁂𑀦 𑀅𑀦𑀸𑀢𑀸𑀧𑀻, 𑀧𑀸𑀧𑀼𑀢𑁆𑀭𑀸𑀲𑀆𑀢𑀸𑀧𑀦𑀧𑀭𑀺𑀢𑀸𑀧𑀦𑀮𑀓𑁆𑀔𑀡𑀲𑁆𑀲 𑀑𑀢𑁆𑀢𑀧𑁆𑀧𑀲𑁆𑀲 𑀅𑀪𑀸𑀯𑁂𑀦 𑀅𑀦𑁄𑀢𑁆𑀢𑀸𑀧𑀻. 𑀲𑀢𑀢𑀁 𑀲𑀫𑀺𑀢𑀦𑁆𑀢𑀺 𑀲𑀩𑁆𑀩𑀓𑀸𑀮𑀁 𑀦𑀺𑀭𑀦𑁆𑀢𑀭𑀁. 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄𑀢𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀧𑀭𑀺𑀳𑀸𑀬𑀺𑀢𑁆𑀯𑀸 𑀅𑀓𑀼𑀲𑀮𑀧𑀓𑁆𑀔𑁂 𑀓𑀼𑀘𑁆𑀙𑀺𑀢𑀁 𑀲𑀻𑀤𑀦𑀢𑁄 𑀓𑁄𑀲𑀚𑁆𑀚𑀲𑀫𑀦𑁆𑀦𑀸𑀕𑀫𑁂𑀦 𑀘 𑀓𑀼𑀲𑀻𑀢𑁄, 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀸𑀪𑀸𑀯𑁂𑀦 𑀳𑀻𑀦𑀯𑀻𑀭𑀺𑀬𑁄 𑀯𑀻𑀭𑀺𑀬𑀯𑀺𑀭𑀳𑀺𑀢𑁄𑀢𑀺 𑀯𑀼𑀘𑁆𑀘𑀢𑀺 𑀓𑀣𑀻𑀬𑀢𑀺. 𑀞𑀺𑀢𑀲𑁆𑀲𑀸𑀢𑀺 𑀕𑀫𑀦𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀺𑀝𑁆𑀞𑀢𑁄. 𑀲𑀬𑀦𑀇𑀭𑀺𑀬𑀸𑀧𑀣𑀲𑁆𑀲 𑀯𑀺𑀲𑁂𑀲𑀢𑁄 𑀓𑁄𑀲𑀚𑁆𑀚𑀧𑀓𑁆𑀔𑀺𑀓𑀢𑁆𑀢𑀸 𑀬𑀣𑀸 𑀢𑀁𑀲𑀫𑀗𑁆𑀕𑀺𑀦𑁄 𑀯𑀺𑀢𑀓𑁆𑀓𑀸 𑀲𑀫𑁆𑀪𑀯𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀚𑀸𑀕𑀭𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁.

𑀲𑀼𑀓𑁆𑀓𑀧𑀓𑁆𑀔𑁂 𑀢𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀸𑀥𑀺𑀯𑀸𑀲𑁂𑀢𑀻𑀢𑀺 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑀸𑀧𑀺 𑀯𑀺𑀳𑀭𑀢𑁄 𑀅𑀦𑀸𑀤𑀺𑀫𑀢𑀺 𑀲𑀁𑀲𑀸𑀭𑁂 𑀘𑀺𑀭𑀓𑀸𑀮𑀪𑀸𑀯𑀺𑀢𑁂𑀦 𑀢𑀣𑀸𑀭𑀽𑀧𑀧𑁆𑀧𑀘𑁆𑀘𑀬𑀲𑀫𑀸𑀬𑁄𑀕𑁂𑀦 𑀲𑀢𑀺𑀲𑀫𑁆𑀫𑁄𑀲𑁂𑀦 𑀯𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀺 𑀉𑀧𑁆𑀧𑀚𑁆𑀚𑀢𑀺 𑀘𑁂, 𑀢𑀁 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀆𑀭𑁄𑀧𑁂𑀢𑁆𑀯𑀸 𑀦 𑀯𑀸𑀲𑁂𑀢𑀺 𑀘𑁂, 𑀅𑀩𑁆𑀪𑀦𑁆𑀢𑀭𑁂 𑀦 𑀯𑀸𑀲𑁂𑀢𑀺 𑀘𑁂𑀢𑀺 𑀅𑀢𑁆𑀣𑁄. 𑀅𑀦𑀥𑀺𑀯𑀸𑀲𑁂𑀦𑁆𑀢𑁄 𑀓𑀺𑀁 𑀓𑀭𑁄𑀢𑀻𑀢𑀺? 𑀧𑀚𑀳𑀢𑀺 𑀙𑀟𑁆𑀟𑁂𑀢𑀺. 𑀓𑀺𑀁 𑀓𑀘𑀯𑀭𑀁 𑀯𑀺𑀬 𑀧𑀺𑀝𑀓𑁂𑀦? 𑀦 𑀳𑀺, 𑀅𑀧𑀺𑀘 𑀔𑁄 𑀢𑀁 𑀯𑀺𑀦𑁄𑀤𑁂𑀢𑀺 𑀦𑀼𑀤𑀢𑀺 𑀦𑀻𑀳𑀭𑀢𑀺. 𑀓𑀺𑀁 𑀩𑀮𑀻𑀩𑀤𑁆𑀤𑀁 𑀯𑀺𑀬 𑀧𑀢𑁄𑀤𑁂𑀦? 𑀦 𑀳𑀺, 𑀅𑀣 𑀔𑁄 𑀦𑀁 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀯𑀺𑀕𑀢𑀦𑁆𑀢𑀁 𑀓𑀭𑁄𑀢𑀺. 𑀬𑀣𑀸 𑀢𑁂𑀲𑀁 𑀅𑀦𑁆𑀢𑁄𑀧𑀺 𑀦𑀸𑀯𑀲𑀺𑀲𑁆𑀲𑀢𑀺 𑀅𑀦𑁆𑀢𑀫𑀲𑁄 𑀪𑀗𑁆𑀕𑀫𑀢𑁆𑀢𑀫𑁆𑀧𑀺, 𑀢𑀣𑀸 𑀢𑁂 𑀓𑀭𑁄𑀢𑀺. 𑀓𑀣𑀁 𑀧𑀦 𑀢𑁂 𑀢𑀣𑀸 𑀓𑀭𑁄𑀢𑀺? 𑀅𑀦𑀪𑀸𑀯𑀁 𑀕𑀫𑁂𑀢𑀺 𑀅𑀦𑀼 𑀅𑀦𑀼 𑀅𑀪𑀸𑀯𑀁 𑀕𑀫𑁂𑀢𑀺, 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀬𑀣𑀸 𑀲𑀼𑀯𑀺𑀓𑁆𑀔𑀫𑁆𑀪𑀺𑀢𑀸 𑀳𑁄𑀦𑁆𑀢𑀺 𑀢𑀣𑀸 𑀦𑁂 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀁𑀪𑀽𑀢𑁄𑀢𑀺𑀆𑀤𑀻𑀲𑀼 𑀏𑀯𑀁 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀅𑀦𑀥𑀺𑀯𑀸𑀲𑀦𑁂𑀦 𑀲𑀼𑀯𑀺𑀲𑀼𑀤𑁆𑀥𑀸𑀲𑀬𑁄 𑀲𑀫𑀸𑀦𑁄 𑀢𑀸𑀬 𑀘 𑀆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀢𑀦𑁆𑀦𑀺𑀫𑀺𑀢𑁆𑀢𑀸𑀬 𑀘 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 𑀚𑀸𑀕𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀆𑀢𑀸𑀧𑀦𑀮𑀓𑁆𑀔𑀡𑁂𑀦 𑀯𑀻𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀆𑀢𑀸𑀧𑀻, 𑀲𑀩𑁆𑀩𑀲𑁄 𑀧𑀸𑀧𑀼𑀢𑁆𑀭𑀸𑀲𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸. 𑀑𑀢𑁆𑀢𑀸𑀧𑀻 𑀲𑀢𑀢𑀁 𑀭𑀢𑁆𑀢𑀺𑀦𑁆𑀤𑀺𑀯𑀁, 𑀲𑀫𑀺𑀢𑀁 𑀦𑀺𑀭𑀦𑁆𑀢𑀭𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀦𑀼𑀬𑁄𑀕𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀲𑀺𑀤𑁆𑀥𑀺𑀬𑀸, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄 𑀦𑀺𑀩𑁆𑀩𑀸𑀦𑀁 𑀧𑀝𑀺𑀧𑁂𑀲𑀺𑀢𑀘𑀺𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺 𑀓𑀣𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀕𑀸𑀣𑀸𑀲𑀼 𑀕𑁂𑀳𑀦𑀺𑀲𑁆𑀲𑀺𑀢𑀦𑁆𑀢𑀺 𑀏𑀢𑁆𑀣 𑀕𑁂𑀳𑀯𑀸𑀲𑀻𑀳𑀺 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀕𑁂𑀳𑀯𑀸𑀲𑀻𑀦𑀁 𑀲𑀪𑀸𑀯𑀢𑁆𑀢𑀸 𑀕𑁂𑀳𑀥𑀫𑁆𑀫𑀢𑁆𑀢𑀸 𑀯𑀸 𑀕𑁂𑀳𑀁 𑀯𑀼𑀘𑁆𑀘𑀢𑀺 𑀯𑀢𑁆𑀣𑀼𑀓𑀸𑀫𑁄. 𑀅𑀣 𑀯𑀸 𑀕𑁂𑀳𑀧𑀝𑀺𑀩𑀤𑁆𑀥𑀪𑀸𑀯𑀢𑁄 𑀓𑀺𑀮𑁂𑀲𑀓𑀸𑀫𑀸𑀦𑀁 𑀦𑀺𑀯𑀸𑀲𑀝𑁆𑀞𑀸𑀦𑀪𑀸𑀯𑀢𑁄 𑀢𑀁𑀯𑀢𑁆𑀣𑀼𑀓𑀢𑁆𑀢𑀸 𑀯𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀺 𑀕𑁂𑀳𑀦𑀺𑀲𑁆𑀲𑀺𑀢𑀁 𑀦𑀸𑀫. 𑀓𑀼𑀫𑁆𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄𑀢𑀺 𑀬𑀲𑁆𑀫𑀸 𑀅𑀭𑀺𑀬𑀫𑀕𑁆𑀕𑀲𑁆𑀲 𑀉𑀧𑁆𑀧𑀣𑀪𑀸𑀯𑀢𑁄 𑀅𑀪𑀺𑀚𑁆𑀛𑀸𑀤𑀬𑁄 𑀢𑀤𑁂𑀓𑀝𑁆𑀞𑀥𑀫𑁆𑀫𑀸 𑀘 𑀓𑀼𑀫𑁆𑀫𑀕𑁆𑀕𑁄, 𑀢𑀲𑁆𑀫𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀩𑀳𑀼𑀮𑁄 𑀧𑀼𑀕𑁆𑀕𑀮𑁄 𑀓𑀼𑀫𑁆𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀦𑀸𑀫. 𑀫𑁄𑀳𑀦𑁂𑀬𑁆𑀬𑁂𑀲𑀼 𑀫𑀼𑀘𑁆𑀙𑀺𑀢𑁄𑀢𑀺 𑀫𑁄𑀳𑀲𑀁𑀯𑀢𑁆𑀢𑀦𑀺𑀬𑁂𑀲𑀼 𑀭𑀽𑀧𑀸𑀤𑀻𑀲𑀼 𑀫𑀼𑀘𑁆𑀙𑀺𑀢𑁄 𑀲𑀫𑁆𑀫𑀢𑁆𑀢𑁄 𑀅𑀚𑁆𑀛𑁄𑀧𑀦𑁆𑀦𑁄. 𑀲𑀫𑁆𑀩𑁄𑀥𑀺𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀜𑀸𑀡𑀁. 𑀨𑀼𑀝𑁆𑀞𑀼𑀦𑁆𑀢𑀺 𑀨𑀼𑀲𑀺𑀢𑀼𑀁 𑀧𑀢𑁆𑀢𑀼𑀁, 𑀲𑁄 𑀢𑀸𑀤𑀺𑀲𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀕𑁄𑀘𑀭𑁄 𑀅𑀪𑀩𑁆𑀩𑁄, 𑀦 𑀓𑀤𑀸𑀘𑀺 𑀢𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄.

𑀯𑀺𑀢𑀓𑁆𑀓𑀁 𑀲𑀫𑀬𑀺𑀢𑁆𑀯𑀸𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀁 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀁 𑀧𑀝𑀺𑀲𑀗𑁆𑀔𑀸𑀦𑀪𑀸𑀯𑀦𑀸𑀩𑀮𑁂𑀳𑀺 𑀯𑀽𑀧𑀲𑀫𑁂𑀢𑁆𑀯𑀸. 𑀯𑀺𑀢𑀓𑁆𑀓𑀽𑀧𑀲𑀫𑁂 𑀭𑀢𑁄𑀢𑀺 𑀦𑀯𑀦𑁆𑀦𑀫𑁆𑀧𑀺 𑀫𑀳𑀸𑀯𑀺𑀢𑀓𑁆𑀓𑀸𑀦𑀁 𑀅𑀘𑁆𑀘𑀦𑁆𑀢𑀯𑀽𑀧𑀲𑀫𑀪𑀽𑀢𑁂 𑀅𑀭𑀳𑀢𑁆𑀢𑁂 𑀦𑀺𑀩𑁆𑀩𑀸𑀦𑁂 𑀏𑀯 𑀯𑀸 𑀅𑀚𑁆𑀛𑀸𑀲𑀬𑁂𑀦 𑀭𑀢𑁄 𑀅𑀪𑀺𑀭𑀢𑁄. 𑀪𑀩𑁆𑀩𑁄 𑀲𑁄 𑀢𑀸𑀤𑀺𑀲𑁄𑀢𑀺 𑀲𑁄 𑀬𑀣𑀸𑀯𑀼𑀢𑁆𑀢𑁄 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀫𑀸𑀦𑁄 𑀧𑀼𑀕𑁆𑀕𑀮𑁄 𑀧𑀼𑀩𑁆𑀩𑀪𑀸𑀕𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀩𑀮𑁂𑀦 𑀲𑀩𑁆𑀩𑀯𑀺𑀢𑀓𑁆𑀓𑁂 𑀬𑀣𑀸𑀭𑀳𑀁 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀯𑀽𑀧𑀲𑀫𑁂𑀢𑁆𑀯𑀸 𑀞𑀺𑀢𑁄, 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀜𑁆𑀘 𑀅𑀦𑀼𑀢𑁆𑀢𑀭𑀁 𑀲𑀫𑁆𑀩𑁄𑀥𑀺𑀁 𑀨𑀼𑀝𑁆𑀞𑀼𑀁 𑀅𑀥𑀺𑀕𑀦𑁆𑀢𑀼𑀁 𑀪𑀩𑁆𑀩𑁄 𑀲𑀫𑀢𑁆𑀣𑁄𑀢𑀺.

𑀏𑀓𑀸𑀤𑀲𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀲𑀫𑁆𑀧𑀦𑁆𑀦𑀲𑀻𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧. 𑀤𑁆𑀯𑀸𑀤𑀲𑀫𑁂 𑀲𑀫𑁆𑀧𑀦𑁆𑀦𑀲𑀻𑀮𑀸𑀢𑀺 𑀏𑀢𑁆𑀣 𑀢𑀺𑀯𑀺𑀥𑀁 𑀲𑀫𑁆𑀧𑀦𑁆𑀦𑀁 𑀧𑀭𑀺𑀧𑀼𑀡𑁆𑀡𑀲𑀫𑀗𑁆𑀕𑀻𑀫𑀥𑀼𑀭𑀯𑀲𑁂𑀦. 𑀢𑁂𑀲𑀼 𑁋

‘‘𑀲𑀫𑁆𑀧𑀦𑁆𑀦𑀁 𑀲𑀸𑀮𑀺𑀓𑁂𑀤𑀸𑀭𑀁, 𑀲𑀼𑀯𑀸 𑀪𑀼𑀜𑁆𑀚𑀦𑁆𑀢𑀺 𑀓𑁄𑀲𑀺𑀬;

𑀧𑀝𑀺𑀯𑁂𑀤𑁂𑀫𑀺 𑀢𑁂 𑀩𑁆𑀭𑀳𑁆𑀫𑁂, 𑀦 𑀦𑁂 𑀯𑀸𑀭𑁂𑀢𑀼𑀫𑀼𑀲𑁆𑀲𑀳𑁂’’𑀢𑀺. (𑀚𑀸. 𑁧.𑁧𑁪.𑁧) 𑁋

𑀏𑀢𑁆𑀣 𑀧𑀭𑀺𑀧𑀼𑀡𑁆𑀡𑀢𑁆𑀣𑁄 𑀲𑀫𑁆𑀧𑀦𑁆𑀦𑀲𑀤𑁆𑀤𑁄. ‘‘𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄’’𑀢𑀺 (𑀯𑀺𑀪. 𑁫𑁧𑁧) 𑀏𑀢𑁆𑀣 𑀲𑀫𑀗𑁆𑀕𑀺𑀪𑀸𑀯𑀢𑁆𑀣𑁄 𑀲𑀫𑁆𑀧𑀦𑁆𑀦𑀲𑀤𑁆𑀤𑁄. ‘‘𑀇𑀫𑀺𑀲𑁆𑀲𑀸, 𑀪𑀦𑁆𑀢𑁂, 𑀫𑀳𑀸𑀧𑀣𑀯𑀺𑀬𑀸 𑀳𑁂𑀝𑁆𑀞𑀺𑀫𑀢𑀮𑀁 𑀲𑀫𑁆𑀧𑀦𑁆𑀦𑀁 𑁋 𑀲𑁂𑀬𑁆𑀬𑀣𑀸𑀧𑀺 𑀔𑀼𑀤𑁆𑀤𑀫𑀥𑀼𑀁 𑀅𑀦𑀻𑀮𑀓𑀁, 𑀏𑀯𑀫𑀲𑁆𑀲𑀸𑀤’’𑀦𑁆𑀢𑀺 (𑀧𑀸𑀭𑀸. 𑁧𑁭) 𑀏𑀢𑁆𑀣 𑀫𑀥𑀼𑀭𑀢𑁆𑀣𑁄 𑀲𑀫𑁆𑀧𑀦𑁆𑀦𑀲𑀤𑁆𑀤𑁄. 𑀇𑀥 𑀧𑀦 𑀧𑀭𑀺𑀧𑀼𑀡𑁆𑀡𑀢𑁆𑀣𑁂𑀧𑀺 𑀲𑀫𑀗𑁆𑀕𑀺𑀪𑀸𑀯𑁂𑀧𑀺 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀲𑀫𑁆𑀧𑀦𑁆𑀦𑀲𑀻𑀮𑀸𑀢𑀺 𑀧𑀭𑀺𑀧𑀼𑀡𑁆𑀡𑀲𑀻𑀮𑀸 𑀳𑀼𑀢𑁆𑀯𑀸𑀢𑀺𑀧𑀺, 𑀲𑀻𑀮𑀲𑀫𑀗𑁆𑀕𑀺𑀦𑁄 𑀳𑀼𑀢𑁆𑀯𑀸𑀢𑀺𑀧𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 ‘‘𑀧𑀭𑀺𑀧𑀼𑀡𑁆𑀡𑀲𑀻𑀮𑀸’’𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀔𑁂𑀢𑁆𑀢𑀤𑁄𑀲𑀯𑀺𑀕𑀫𑁂𑀦 𑀔𑁂𑀢𑁆𑀢𑀧𑀸𑀭𑀺𑀧𑀽𑀭𑀺 𑀯𑀺𑀬 𑀧𑀭𑀺𑀧𑀼𑀡𑁆𑀡𑀁 𑀦𑀸𑀫 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀔𑁂𑀢𑁆𑀢𑀤𑁄𑀲𑀯𑀺𑀕𑀫𑁂𑀦 𑀔𑁂𑀢𑁆𑀢𑀧𑀸𑀭𑀺𑀧𑀽𑀭𑀺 𑀯𑀺𑀬 𑀲𑀻𑀮𑀤𑁄𑀲𑀯𑀺𑀕𑀫𑁂𑀦 𑀲𑀻𑀮𑀧𑀸𑀭𑀺𑀧𑀽𑀭𑀺 𑀯𑀼𑀢𑁆𑀢𑀸’’𑀢𑀺. ‘‘𑀲𑀻𑀮𑀲𑀫𑀗𑁆𑀕𑀺𑀦𑁄’’𑀢𑀺 𑀇𑀫𑀺𑀦𑀸 𑀧𑀦 𑀅𑀢𑁆𑀣𑁂𑀦 𑀲𑀻𑀮𑁂𑀦 𑀲𑀫𑀗𑁆𑀕𑀻𑀪𑀽𑀢𑀸 𑀲𑀫𑁄𑀥𑀸𑀦𑀕𑀢𑀸 𑀲𑀫𑀦𑁆𑀦𑀸𑀕𑀢𑀸 𑀳𑀼𑀢𑁆𑀯𑀸 𑀯𑀺𑀳𑀭𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑀫𑁆𑀧𑀦𑁆𑀦𑀲𑀻𑀮𑀢𑀸 𑀳𑁄𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀆𑀤𑀻𑀦𑀯𑀤𑀲𑁆𑀲𑀦𑁂𑀦, 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀆𑀦𑀺𑀲𑀁𑀲𑀤𑀲𑁆𑀲𑀦𑁂𑀦 𑀘. 𑀢𑀤𑀼𑀪𑀬𑀫𑁆𑀧𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁦-𑁨𑁧) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 ‘‘𑀲𑀫𑁆𑀧𑀦𑁆𑀦𑀲𑀻𑀮𑀸’’𑀢𑀺 𑀏𑀢𑁆𑀢𑀸𑀯𑀢𑀸 𑀓𑀺𑀭 𑀪𑀕𑀯𑀸 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑀸’’𑀢𑀺 𑀇𑀫𑀺𑀦𑀸 𑀚𑁂𑀝𑁆𑀞𑀓𑀲𑀻𑀮𑀁 𑀤𑀲𑁆𑀲𑁂𑀢𑀻𑀢𑀺𑀆𑀤𑀺𑀦𑀸 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀓𑀺𑀫𑀲𑁆𑀲 𑀉𑀢𑁆𑀢𑀭𑀺 𑀓𑀭𑀡𑀻𑀬𑀦𑁆𑀢𑀺 𑀏𑀯𑀁 𑀲𑀫𑁆𑀧𑀦𑁆𑀦𑀲𑀻𑀮𑀸𑀦𑀁 𑀯𑀺𑀳𑀭𑀢𑀁 𑀢𑀼𑀫𑁆𑀳𑀸𑀓𑀁 𑀓𑀺𑀦𑁆𑀢𑀺 𑀲𑀺𑀬𑀸 𑀉𑀢𑁆𑀢𑀭𑀺 𑀓𑀸𑀢𑀩𑁆𑀩𑀁, 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀘𑁂𑀢𑀺 𑀅𑀢𑁆𑀣𑁄.

𑀏𑀯𑀁 ‘‘𑀲𑀫𑁆𑀧𑀦𑁆𑀦𑀲𑀻𑀮𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣𑀸’’𑀢𑀺𑀆𑀤𑀺𑀦𑀸 𑀲𑀫𑁆𑀧𑀸𑀤𑀦𑀽𑀧𑀸𑀬𑁂𑀦 𑀲𑀤𑁆𑀥𑀺𑀁 𑀲𑀻𑀮𑀲𑀫𑁆𑀧𑀤𑀸𑀬 𑀪𑀺𑀓𑁆𑀔𑀽 𑀦𑀺𑀬𑁄𑀚𑁂𑀦𑁆𑀢𑁄 𑀅𑀦𑁂𑀓𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀤𑁂𑀲𑀦𑀁 𑀆𑀭𑀪𑀺𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀫𑀸 𑀏𑀓𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑀸𑀧𑀺 𑀪𑀕𑀯𑀢𑁄 𑀤𑁂𑀲𑀦𑀸 𑀅𑀦𑁂𑀓𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀯 𑀳𑁄𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸, 𑀢𑀲𑁆𑀫𑀸 𑀢𑀁 𑀏𑀓𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀭𑀢𑁄 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀅𑀪𑀺𑀚𑁆𑀛𑀸𑀬𑀢𑀺 𑀏𑀢𑀸𑀬𑀸𑀢𑀺 𑀅𑀪𑀺𑀚𑁆𑀛𑀸, 𑀧𑀭𑀪𑀡𑁆𑀟𑀸𑀪𑀺𑀚𑁆𑀛𑀸𑀬𑀦𑀮𑀓𑁆𑀔𑀡𑀲𑁆𑀲 𑀮𑁄𑀪𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀩𑁆𑀬𑀸𑀧𑀚𑁆𑀚𑀢𑀺 𑀧𑀽𑀢𑀺𑀪𑀯𑀢𑀺 𑀘𑀺𑀢𑁆𑀢𑀁 𑀏𑀢𑁂𑀦𑀸𑀢𑀺 𑀩𑁆𑀬𑀸𑀧𑀸𑀤𑁄, ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀲𑁆𑀲 𑀏𑀓𑀽𑀦𑀯𑀻𑀲𑀢𑀺𑀆𑀖𑀸𑀢𑀯𑀢𑁆𑀣𑀼𑀯𑀺𑀲𑀬𑀲𑁆𑀲 𑀤𑁄𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀉𑀪𑀺𑀦𑁆𑀦𑀫𑁆𑀧𑀺 ‘‘𑀢𑀢𑁆𑀣 𑀓𑀢𑀫𑁄 𑀓𑀸𑀫𑀘𑁆𑀙𑀦𑁆𑀤𑁄? 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀧𑀺𑀧𑀸𑀲𑀸 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦’’𑀦𑁆𑀢𑀺 (𑀥. 𑀲. 𑁧𑁧𑁫𑁯), 𑀢𑀣𑀸 ‘‘𑀮𑁄𑀪𑁄 𑀮𑀼𑀩𑁆𑀪𑀦𑀸 𑀮𑀼𑀩𑁆𑀪𑀺𑀢𑀢𑁆𑀢𑀁 𑀲𑀸𑀭𑀸𑀕𑁄 𑀲𑀸𑀭𑀚𑁆𑀚𑀦𑀸 𑀲𑀸𑀭𑀚𑁆𑀚𑀺𑀢𑀢𑁆𑀢𑀁 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁩𑁯𑁧), ‘‘𑀤𑁄𑀲𑁄 𑀤𑀼𑀲𑁆𑀲𑀦𑀸 𑀤𑀼𑀲𑁆𑀲𑀺𑀢𑀢𑁆𑀢𑀁 𑀩𑁆𑀬𑀸𑀧𑀢𑁆𑀢𑀺 𑀩𑁆𑀬𑀸𑀧𑀚𑁆𑀚𑀦𑀸 𑀩𑁆𑀬𑀸𑀧𑀚𑁆𑀚𑀺𑀢𑀢𑁆𑀢𑀁 𑀯𑀺𑀭𑁄𑀥𑁄 𑀧𑀝𑀺𑀯𑀺𑀭𑁄𑀥𑁄 𑀘𑀡𑁆𑀟𑀺𑀓𑁆𑀓𑀁 𑀅𑀲𑀼𑀭𑁄𑀧𑁄 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁪𑁧𑁮, 𑁧𑁨𑁩𑁭) 𑀘 𑀯𑀺𑀢𑁆𑀣𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀕𑀢𑁄 𑀳𑁄𑀢𑀻𑀢𑀺 𑀅𑀬𑀜𑁆𑀘 𑀅𑀪𑀺𑀚𑁆𑀛𑀸, 𑀅𑀬𑀜𑁆𑀘 𑀩𑁆𑀬𑀸𑀧𑀸𑀤𑁄 𑀯𑀺𑀕𑀢𑁄 𑀳𑁄𑀢𑀺 𑀅𑀧𑀕𑀢𑁄, 𑀧𑀳𑀻𑀦𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀲𑁆𑀲 𑀘 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀲𑁆𑀲 𑀘 𑀧𑀳𑀸𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑀣𑀺𑀦𑀫𑀺𑀤𑁆𑀥𑀦𑁆𑀢𑀺 𑀣𑀺𑀦𑀜𑁆𑀘𑁂𑀯 𑀫𑀺𑀤𑁆𑀥𑀜𑁆𑀘. 𑀢𑁂𑀲𑀼 𑀘𑀺𑀢𑁆𑀢𑀲𑁆𑀲 𑀅𑀓𑀫𑁆𑀫𑀜𑁆𑀜𑀢𑀸 𑀣𑀺𑀦𑀁, 𑀆𑀮𑀲𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀯𑁂𑀤𑀦𑀸𑀤𑀻𑀦𑀁 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀅𑀓𑀫𑁆𑀫𑀜𑁆𑀜𑀢𑀸 𑀫𑀺𑀤𑁆𑀥𑀁, 𑀧𑀘𑀮𑀸𑀬𑀺𑀓𑀪𑀸𑀯𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀉𑀪𑀺𑀦𑁆𑀦𑀫𑁆𑀧𑀺 ‘‘𑀢𑀢𑁆𑀣 𑀓𑀢𑀫𑀁 𑀣𑀺𑀦𑀁? 𑀬𑀸 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀜𑁆𑀜𑀢𑀸 𑀑𑀮𑀻𑀬𑀦𑀸 𑀲𑀮𑁆𑀮𑀻𑀬𑀦𑀸. 𑀢𑀢𑁆𑀣 𑀓𑀢𑀫𑀁 𑀫𑀺𑀤𑁆𑀥𑀁? 𑀬𑀸 𑀓𑀸𑀬𑀲𑁆𑀲 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀜𑁆𑀜𑀢𑀸 𑀑𑀦𑀸𑀳𑁄 𑀧𑀭𑀺𑀬𑁄𑀦𑀸𑀳𑁄’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁧𑁬𑁨-𑁧𑁧𑁬𑁩) 𑀦𑀬𑁂𑀦 𑀯𑀺𑀢𑁆𑀣𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀉𑀤𑁆𑀥𑀘𑁆𑀘𑀜𑁆𑀘𑁂𑀯 𑀓𑀼𑀓𑁆𑀓𑀼𑀘𑁆𑀘𑀜𑁆𑀘. 𑀢𑀢𑁆𑀣 𑀉𑀤𑁆𑀥𑀘𑁆𑀘𑀁 𑀦𑀸𑀫 𑀘𑀺𑀢𑁆𑀢𑀲𑁆𑀲 𑀉𑀤𑁆𑀥𑀢𑀸𑀓𑀸𑀭𑁄, 𑀓𑀼𑀓𑁆𑀓𑀼𑀘𑁆𑀘𑀁 𑀦𑀸𑀫 𑀅𑀓𑀢𑀓𑀮𑁆𑀬𑀸𑀡𑀲𑁆𑀲 𑀓𑀢𑀧𑀸𑀧𑀲𑁆𑀲 𑀢𑀧𑁆𑀧𑀘𑁆𑀘𑀬𑀸 𑀯𑀺𑀧𑁆𑀧𑀝𑀺𑀲𑀸𑀭𑁄. 𑀉𑀪𑀺𑀦𑁆𑀦𑀫𑁆𑀧𑀺 ‘‘𑀢𑀢𑁆𑀣 𑀓𑀢𑀫𑀁 𑀉𑀤𑁆𑀥𑀘𑁆𑀘𑀁? 𑀬𑀁 𑀘𑀺𑀢𑁆𑀢𑀲𑁆𑀲 𑀉𑀤𑁆𑀥𑀘𑁆𑀘𑀁 𑀅𑀯𑀽𑀧𑀲𑀫𑁄 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑁄 𑀪𑀦𑁆𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁧𑁬𑁫) 𑀯𑀺𑀢𑁆𑀣𑀸𑀭𑁄. ‘‘𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡𑀁, 𑀅𑀓𑀢𑀁 𑀓𑀼𑀲𑀮𑀁, 𑀅𑀓𑀢𑀁 𑀪𑀻𑀭𑀼𑀢𑁆𑀢𑀸𑀦𑀁; 𑀓𑀢𑀁 𑀧𑀸𑀧𑀁, 𑀓𑀢𑀁 𑀮𑀼𑀤𑁆𑀤𑀁, 𑀓𑀢𑀁 𑀓𑀺𑀩𑁆𑀩𑀺𑀲’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁨𑁪𑁮; 𑀦𑁂𑀢𑁆𑀢𑀺. 𑁧𑁨𑁦) 𑀧𑀯𑀢𑁆𑀢𑀺𑀆𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀩𑀼𑀤𑁆𑀥𑀸𑀤𑀻𑀲𑀼 𑀲𑀁𑀲𑀬𑁄. 𑀢𑀲𑁆𑀲𑀸 ‘‘𑀲𑀢𑁆𑀣𑀭𑀺 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺, 𑀦𑀸𑀥𑀺𑀫𑀼𑀘𑁆𑀘𑀢𑀺 𑀦 𑀲𑀫𑁆𑀧𑀲𑀻𑀤𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁯𑁧𑁫), ‘‘𑀢𑀢𑁆𑀣 𑀓𑀢𑀫𑀸 𑀯𑀺𑀘𑀺𑀓𑀺𑀘𑁆𑀙𑀸? 𑀬𑀸 𑀓𑀗𑁆𑀔𑀸 𑀓𑀗𑁆𑀔𑀸𑀬𑀦𑀸 𑀓𑀗𑁆𑀔𑀸𑀬𑀺𑀢𑀢𑁆𑀢𑀁 𑀯𑀺𑀫𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀤𑁆𑀯𑁂𑀴𑁆𑀳𑀓𑀁 𑀤𑁆𑀯𑁂𑀥𑀸𑀧𑀣𑁄 𑀲𑀁𑀲𑀬𑁄 𑀅𑀦𑁂𑀓𑀁𑀲𑀕𑁆𑀕𑀸𑀳𑁄 𑀆𑀲𑀧𑁆𑀧𑀦𑀸 𑀧𑀭𑀺𑀲𑀧𑁆𑀧𑀦𑀸 𑀅𑀧𑀭𑀺𑀬𑁄𑀕𑀸𑀳𑀦𑀸 𑀙𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀫𑀦𑁄𑀯𑀺𑀮𑁂𑀔𑁄’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁦𑁦𑁮) 𑀘 𑀦𑀬𑁂𑀦 𑀯𑀺𑀢𑁆𑀣𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀸𑀤𑀻𑀦𑀁 𑀯𑀺𑀕𑀫𑀯𑀲𑁂𑀦 𑀘 𑀧𑀳𑀸𑀦𑀯𑀲𑁂𑀦 𑀘 𑀢𑁂𑀲𑀁 𑀯𑀺𑀓𑁆𑀔𑀫𑁆𑀪𑀦𑀫𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀲𑁄 𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬 𑀯𑀺𑀕𑀢𑀸𑀪𑀺𑀚𑁆𑀛𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺, 𑀅𑀪𑀺𑀚𑁆𑀛𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀩𑁆𑀬𑀸𑀧𑀸𑀤𑀧𑀤𑁄𑀲𑀁 𑀧𑀳𑀸𑀬 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀯𑀺𑀳𑀭𑀢𑀺, 𑀩𑁆𑀬𑀸𑀧𑀸𑀤𑀧𑀤𑁄𑀲𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀣𑀺𑀦𑀫𑀺𑀤𑁆𑀥𑀁 𑀧𑀳𑀸𑀬 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄 𑀯𑀺𑀳𑀭𑀢𑀺 𑀆𑀮𑁄𑀓𑀲𑀜𑁆𑀜𑀻 𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀣𑀺𑀦𑀫𑀺𑀤𑁆𑀥𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀸𑀬 𑀅𑀦𑀼𑀤𑁆𑀥𑀢𑁄 𑀯𑀺𑀳𑀭𑀢𑀺 𑀅𑀚𑁆𑀛𑀢𑁆𑀢𑀁 𑀉𑀧𑀲𑀦𑁆𑀢𑀘𑀺𑀢𑁆𑀢𑁄 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀬 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀳𑀭𑀢𑀺 𑀅𑀓𑀣𑀁𑀓𑀣𑀻 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀯𑀺𑀘𑀺𑀓𑀺𑀘𑁆𑀙𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀻’’𑀢𑀺 (𑀯𑀺𑀪. 𑁫𑁦𑁮).

𑀢𑀢𑁆𑀣 𑀬𑀣𑀸 𑀦𑀻𑀯𑀭𑀡𑀸𑀦𑀁 𑀧𑀳𑀸𑀦𑀁 𑀳𑁄𑀢𑀺, 𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀜𑁆𑀘 𑀦𑁂𑀲𑀁 𑀧𑀳𑀸𑀦𑀁 𑀳𑁄𑀢𑀺? 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀢𑀸𑀯 𑀅𑀲𑀼𑀪𑀦𑀺𑀫𑀺𑀢𑁆𑀢𑁂 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀧𑀳𑀸𑀦𑀁 𑀳𑁄𑀢𑀺, 𑀲𑀼𑀪𑀦𑀺𑀫𑀺𑀢𑁆𑀢𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦𑀲𑁆𑀲 𑀉𑀧𑁆𑀧𑀢𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀼𑀪𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀏𑀯𑀁 𑀲𑀼𑀪𑀦𑀺𑀫𑀺𑀢𑁆𑀢𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀲𑀼𑀪𑀦𑀺𑀫𑀺𑀢𑁆𑀢𑁂 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀧𑀳𑀸𑀦𑀁 𑀳𑁄𑀢𑀺. 𑀢𑀢𑁆𑀣 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀦𑀸𑀫 𑀅𑀲𑀼𑀪𑀫𑁆𑀧𑀺 𑀅𑀲𑀼𑀪𑀸𑀭𑀫𑁆𑀫𑀡𑀫𑁆𑀧𑀺, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫 𑀉𑀧𑀸𑀬𑀫𑀦𑀲𑀺𑀓𑀸𑀭𑁄, 𑀧𑀣𑀫𑀦𑀲𑀺𑀓𑀸𑀭𑁄, 𑀅𑀦𑀺𑀘𑁆𑀘𑁂 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸, 𑀤𑀼𑀓𑁆𑀔𑁂 𑀤𑀼𑀓𑁆𑀔𑀦𑁆𑀢𑀺 𑀯𑀸, 𑀅𑀦𑀢𑁆𑀢𑀦𑀺 𑀅𑀦𑀢𑁆𑀢𑀸𑀢𑀺 𑀯𑀸, 𑀅𑀲𑀼𑀪𑁂 𑀅𑀲𑀼𑀪𑀦𑁆𑀢𑀺 𑀯𑀸 𑀫𑀦𑀲𑀺𑀓𑀸𑀭𑁄. 𑀢𑀁 𑀢𑀢𑁆𑀣 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋