𑁧𑁦. 𑀤𑁂𑀯𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁯. 𑀤𑀲𑀫𑁂 𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀲𑀤𑁆𑀥𑀫𑁆𑀫𑁂𑀳𑀺 𑀅𑀪𑀺𑀪𑀽𑀢𑁄𑀢𑀺 𑀓𑀸 𑀉𑀧𑁆𑀧𑀢𑁆𑀢𑀺? 𑀤𑁂𑀯𑀤𑀢𑁆𑀢𑁂 𑀳𑀺 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀁 𑀧𑀯𑀺𑀝𑁆𑀞𑁂 𑀤𑁂𑀯𑀤𑀢𑁆𑀢𑀧𑀓𑁆𑀔𑀺𑀬𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀘 ‘‘𑀲𑀫𑀡𑁂𑀦 𑀕𑁄𑀢𑀫𑁂𑀦 𑀅𑀪𑀺𑀲𑀧𑀺𑀢𑁄 𑀤𑁂𑀯𑀤𑀢𑁆𑀢𑁄 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄’’𑀢𑀺 𑀅𑀩𑁆𑀪𑀸𑀘𑀺𑀓𑁆𑀔𑀺𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀲𑀸𑀲𑀦𑁂 𑀅𑀦𑀪𑀺𑀧𑁆𑀧𑀲𑀦𑁆𑀦𑀸 𑀫𑀦𑀼𑀲𑁆𑀲𑀸 ‘‘𑀲𑀺𑀬𑀸 𑀦𑀼 𑀔𑁄 𑀏𑀢𑀤𑁂𑀯𑀁, 𑀬𑀣𑀸 𑀇𑀫𑁂 𑀪𑀡𑀦𑁆𑀢𑀻’’𑀢𑀺 𑀆𑀲𑀗𑁆𑀓𑀁 𑀉𑀧𑁆𑀧𑀸𑀤𑁂𑀲𑀼𑀁. 𑀢𑀁 𑀧𑀯𑀢𑁆𑀢𑀺𑀁 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀅𑀣 𑀪𑀕𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀸 𑀓𑀲𑁆𑀲𑀘𑀺 𑀅𑀪𑀺𑀲𑀧𑀁 𑀤𑁂𑀦𑁆𑀢𑀺, 𑀢𑀲𑁆𑀫𑀸 𑀦 𑀤𑁂𑀯𑀤𑀢𑁆𑀢𑁄 𑀫𑀬𑀸 𑀅𑀪𑀺𑀲𑀧𑀺𑀢𑁄, 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦𑁂𑀯 𑀦𑀺𑀭𑀬𑀁 𑀧𑀯𑀺𑀝𑁆𑀞𑁄’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀫𑀺𑀘𑁆𑀙𑀸𑀕𑀸𑀳𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀇𑀫𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀇𑀤𑀁 𑀲𑀼𑀢𑁆𑀢𑀁 𑀅𑀪𑀸𑀲𑀺.

𑀢𑀢𑁆𑀣 𑀅𑀲𑀤𑁆𑀥𑀫𑁆𑀫𑁂𑀳𑀻𑀢𑀺 𑀅𑀲𑀢𑀁 𑀥𑀫𑁆𑀫𑁂𑀳𑀺, 𑀅𑀲𑀦𑁆𑀢𑁂𑀳𑀺 𑀯𑀸 𑀥𑀫𑁆𑀫𑁂𑀳𑀺. 𑀅𑀢𑁂𑀓𑀺𑀘𑁆𑀙𑁄𑀢𑀺 𑀩𑀼𑀤𑁆𑀥𑁂𑀳𑀺𑀧𑀺 𑀅𑀦𑀺𑀯𑀢𑁆𑀢𑀦𑀻𑀬𑀢𑁆𑀢𑀸 𑀅𑀯𑀻𑀘𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀢𑀺𑀓𑀺𑀘𑁆𑀙𑀸𑀪𑀸𑀯𑀢𑁄 𑀅𑀢𑁂𑀓𑀺𑀘𑁆𑀙𑁄, 𑀅𑀢𑀺𑀓𑀺𑀘𑁆𑀙𑀦𑀻𑀬𑁄𑀢𑀺 𑀅𑀢𑁆𑀣𑁄. 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀯𑀢𑁆𑀢𑀸 𑀧𑀸𑀧𑀸 𑀇𑀘𑁆𑀙𑀸 𑀏𑀢𑀲𑁆𑀲𑀸𑀢𑀺 𑀧𑀸𑀧𑀺𑀘𑁆𑀙𑁄, 𑀢𑀲𑁆𑀲 𑀪𑀸𑀯𑁄 𑀧𑀸𑀧𑀺𑀘𑁆𑀙𑀢𑀸, 𑀢𑀸𑀬. ‘‘𑀅𑀳𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀺, 𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀇𑀘𑁆𑀙𑀸 𑀉𑀧𑁆𑀧𑀦𑁆𑀦𑀸. 𑀓𑁄𑀓𑀸𑀮𑀺𑀓𑀸𑀤𑀬𑁄 𑀧𑀸𑀧𑀸 𑀮𑀸𑀫𑀓𑀸 𑀫𑀺𑀢𑁆𑀢𑀸 𑀏𑀢𑀲𑁆𑀲𑀸𑀢𑀺 𑀧𑀸𑀧𑀫𑀺𑀢𑁆𑀢𑁄, 𑀢𑀲𑁆𑀲 𑀪𑀸𑀯𑁄 𑀧𑀸𑀧𑀫𑀺𑀢𑁆𑀢𑀢𑀸, 𑀢𑀸𑀬. 𑀉𑀢𑁆𑀢𑀭𑀺𑀓𑀭𑀡𑀻𑀬𑁂𑀢𑀺 𑀛𑀸𑀦𑀸𑀪𑀺𑀜𑁆𑀜𑀸𑀳𑀺 𑀉𑀢𑁆𑀢𑀭𑀺𑀓𑀭𑀡𑀻𑀬𑁂 𑀅𑀥𑀺𑀕𑀦𑁆𑀢𑀩𑁆𑀩𑁂 𑀫𑀕𑁆𑀕𑀨𑀮𑁂 𑀅𑀦𑀥𑀺𑀕𑀢𑁂 𑀲𑀢𑀺 𑀏𑀯, 𑀢𑀁 𑀅𑀦𑀥𑀺𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀑𑀭𑀫𑀢𑁆𑀢𑀓𑁂𑀦𑀸𑀢𑀺 𑀅𑀧𑁆𑀧𑀫𑀢𑁆𑀢𑀓𑁂𑀦 𑀛𑀸𑀦𑀸𑀪𑀺𑀜𑁆𑀜𑀸𑀫𑀢𑁆𑀢𑁂𑀦. 𑀯𑀺𑀲𑁂𑀲𑀸𑀥𑀺𑀕𑀫𑁂𑀦𑀸𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀥𑀺𑀕𑀫𑁂𑀦. 𑀅𑀦𑁆𑀢𑀭𑀸𑀢𑀺 𑀯𑁂𑀫𑀚𑁆𑀛𑁂. 𑀯𑁄𑀲𑀸𑀦𑀁 𑀆𑀧𑀸𑀤𑀻𑀢𑀺 𑀅𑀓𑀢𑀓𑀺𑀘𑁆𑀘𑁄𑀯 𑀲𑀫𑀸𑀦𑁄 ‘‘𑀓𑀢𑀓𑀺𑀘𑁆𑀘𑁄𑀫𑁆𑀳𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀲𑀫𑀡𑀥𑀫𑁆𑀫𑀢𑁄 𑀯𑀺𑀕𑀫𑀁 𑀆𑀧𑀚𑁆𑀚𑀺. 𑀇𑀢𑀺 𑀪𑀕𑀯𑀸 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀯𑀺𑀲𑁂𑀲𑀢𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑁂 𑀆𑀤𑀻𑀦𑀯𑀁 𑀧𑀓𑀸𑀲𑁂𑀲𑀺 𑀪𑀸𑀭𑀺𑀬𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀛𑀸𑀦𑀸𑀪𑀺𑀜𑁆𑀜𑀸𑀧𑀭𑀺𑀬𑁄𑀲𑀸𑀦𑀸 𑀲𑀫𑁆𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸𑀧𑀺 𑀅𑀦𑁂𑀓𑀸𑀦𑀢𑁆𑀣𑀸𑀯𑀳𑀁 𑀦𑀸𑀦𑀸𑀯𑀺𑀥𑀁 𑀤𑀼𑀓𑁆𑀔𑀳𑁂𑀢𑀼𑀁 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀁 𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑀕𑁆𑀕𑀁 𑀆𑀮𑀲𑀺𑀬𑀸𑀦𑀼𑀬𑁄𑀕𑀜𑁆𑀘 𑀅𑀯𑀺𑀚𑀳𑀦𑁆𑀢𑁄 𑀅𑀯𑀻𑀘𑀺𑀫𑁆𑀳𑀺 𑀓𑀧𑁆𑀧𑀝𑁆𑀞𑀺𑀬𑀁 𑀅𑀢𑁂𑀓𑀺𑀘𑁆𑀙𑀁 𑀓𑀺𑀩𑁆𑀩𑀺𑀲𑀁 𑀧𑀲𑀯𑀺𑀲𑁆𑀲𑀢𑀻𑀢𑀺.

𑀕𑀸𑀣𑀸𑀲𑀼 𑀫𑀸𑀢𑀺 𑀧𑀝𑀺𑀲𑁂𑀥𑁂 𑀦𑀺𑀧𑀸𑀢𑁄. 𑀚𑀸𑀢𑀽𑀢𑀺 𑀏𑀓𑀁𑀲𑁂𑀦. 𑀓𑁄𑀘𑀻𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀘𑀦𑀁. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀲𑀢𑁆𑀢𑀮𑁄𑀓𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂 𑀓𑁄𑀘𑀺 𑀧𑀼𑀕𑁆𑀕𑀮𑁄 𑀏𑀓𑀁𑀲𑁂𑀦 𑀧𑀸𑀧𑀺𑀘𑁆𑀙𑁄 𑀫𑀸 𑀳𑁄𑀢𑀽’’𑀢𑀺. 𑀢𑀤𑀫𑀺𑀦𑀸𑀧𑀺 𑀚𑀸𑀦𑀸𑀣, 𑀧𑀸𑀧𑀺𑀘𑁆𑀙𑀸𑀦𑀁 𑀬𑀣𑀸 𑀕𑀢𑀻𑀢𑀺 𑀧𑀸𑀧𑀺𑀘𑁆𑀙𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀬𑀣𑀸 𑀕𑀢𑀺 𑀬𑀸𑀤𑀺𑀲𑀻 𑀦𑀺𑀧𑁆𑀨𑀢𑁆𑀢𑀺, 𑀬𑀸𑀤𑀺𑀲𑁄 𑀅𑀪𑀺𑀲𑀫𑁆𑀧𑀭𑀸𑀬𑁄, 𑀢𑀁 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀚𑀸𑀦𑀸𑀣𑀸𑀢𑀺 𑀤𑁂𑀯𑀤𑀢𑁆𑀢𑀁 𑀦𑀺𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀧𑀡𑁆𑀟𑀺𑀢𑁄𑀢𑀺 𑀲𑀫𑀜𑁆𑀜𑀸𑀢𑁄𑀢𑀺 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑁂𑀦 𑀧𑀡𑁆𑀟𑀺𑀢𑁄𑀢𑀺 𑀜𑀸𑀢𑁄. 𑀪𑀸𑀯𑀺𑀢𑀢𑁆𑀢𑁄𑀢𑀺 𑀲𑀫𑁆𑀫𑀢𑁄𑀢𑀺 𑀛𑀸𑀦𑀸𑀪𑀺𑀜𑁆𑀜𑀸𑀳𑀺 𑀪𑀸𑀯𑀺𑀢𑀘𑀺𑀢𑁆𑀢𑁄𑀢𑀺 𑀲𑀫𑁆𑀪𑀸𑀯𑀺𑀢𑁄. 𑀢𑀣𑀸 𑀳𑀺 𑀲𑁄 𑀧𑀼𑀩𑁆𑀩𑁂 ‘‘𑀫𑀳𑀺𑀤𑁆𑀥𑀺𑀓𑁄 𑀕𑁄𑀥𑀺𑀧𑀼𑀢𑁆𑀢𑁄, 𑀫𑀳𑀸𑀦𑀼𑀪𑀸𑀯𑁄 𑀕𑁄𑀥𑀺𑀧𑀼𑀢𑁆𑀢𑁄’’𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸𑀧𑀺 𑀧𑀲𑀁𑀲𑀺𑀢𑁄 𑀅𑀳𑁄𑀲𑀺. 𑀚𑀮𑀁𑀯 𑀬𑀲𑀲𑀸 𑀅𑀝𑁆𑀞𑀸, 𑀤𑁂𑀯𑀤𑀢𑁆𑀢𑁄𑀢𑀺 𑀯𑀺𑀲𑁆𑀲𑀼𑀢𑁄𑀢𑀺 𑀅𑀢𑁆𑀢𑀦𑁄 𑀓𑀺𑀢𑁆𑀢𑀺𑀬𑀸 𑀧𑀭𑀺𑀯𑀸𑀭𑁂𑀦 𑀚𑀮𑀦𑁆𑀢𑁄 𑀯𑀺𑀬 𑀑𑀪𑀸𑀲𑁂𑀦𑁆𑀢𑁄 𑀯𑀺𑀬 𑀞𑀺𑀢𑁄 𑀤𑁂𑀯𑀤𑀢𑁆𑀢𑁄𑀢𑀺 𑀏𑀯𑀁 𑀯𑀺𑀲𑁆𑀲𑀼𑀢𑁄 𑀧𑀸𑀓𑀝𑁄 𑀅𑀳𑁄𑀲𑀺. ‘‘𑀫𑁂 𑀲𑀼𑀢𑁆𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀫𑀬𑀸 𑀲𑀼𑀢𑀁 𑀲𑀼𑀢𑀫𑀢𑁆𑀢𑀁, 𑀓𑀢𑀺𑀧𑀸𑀳𑁂𑀦𑁂𑀯 𑀅𑀢𑀣𑀸𑀪𑀽𑀢𑀢𑁆𑀢𑀸 𑀢𑀲𑁆𑀲 𑀢𑀁 𑀧𑀡𑁆𑀟𑀺𑀘𑁆𑀘𑀸𑀤𑀺 𑀲𑀯𑀦𑀫𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀣𑁄.

𑀲𑁄 𑀲𑀫𑀸𑀦𑀫𑀦𑀼𑀘𑀺𑀡𑁆𑀡𑁄, 𑀆𑀲𑀚𑁆𑀚 𑀦𑀁 𑀢𑀣𑀸𑀕𑀢𑀦𑁆𑀢𑀺 𑀲𑁄 𑀏𑀯𑀁𑀪𑀽𑀢𑁄 𑀤𑁂𑀯𑀤𑀢𑁆𑀢𑁄 ‘‘𑀩𑀼𑀤𑁆𑀥𑁄𑀧𑀺 𑀲𑀓𑁆𑀬𑀧𑀼𑀢𑁆𑀢𑁄, 𑀅𑀳𑀫𑁆𑀧𑀺 𑀲𑀓𑁆𑀬𑀧𑀼𑀢𑁆𑀢𑁄, 𑀩𑀼𑀤𑁆𑀥𑁄𑀧𑀺 𑀲𑀫𑀡𑁄, 𑀅𑀳𑀫𑁆𑀧𑀺 𑀲𑀫𑀡𑁄, 𑀩𑀼𑀤𑁆𑀥𑁄𑀧𑀺 𑀇𑀤𑁆𑀥𑀺𑀫𑀸, 𑀅𑀳𑀫𑁆𑀧𑀺 𑀇𑀤𑁆𑀥𑀺𑀫𑀸, 𑀩𑀼𑀤𑁆𑀥𑁄𑀧𑀺 𑀤𑀺𑀩𑁆𑀩𑀘𑀓𑁆𑀔𑀼𑀓𑁄, 𑀅𑀳𑀫𑁆𑀧𑀺 𑀤𑀺𑀩𑁆𑀩𑀘𑀓𑁆𑀔𑀼𑀓𑁄, 𑀩𑀼𑀤𑁆𑀥𑁄𑀧𑀺 𑀤𑀺𑀩𑁆𑀩𑀲𑁄𑀢𑀓𑁄, 𑀅𑀳𑀫𑁆𑀧𑀺 𑀤𑀺𑀩𑁆𑀩𑀲𑁄𑀢𑀓𑁄, 𑀩𑀼𑀤𑁆𑀥𑁄𑀧𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀮𑀸𑀪𑀻, 𑀅𑀳𑀫𑁆𑀧𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀮𑀸𑀪𑀻, 𑀩𑀼𑀤𑁆𑀥𑁄𑀧𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀥𑀫𑁆𑀫𑁂 𑀚𑀸𑀦𑀸𑀢𑀺, 𑀅𑀳𑀫𑁆𑀧𑀺 𑀢𑁂 𑀚𑀸𑀦𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀅𑀚𑀸𑀦𑀺𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀢𑁆𑀢𑀦𑀸 𑀲𑀫𑀲𑀫𑀝𑁆𑀞𑀧𑀦𑁂𑀦 𑀲𑀫𑀸𑀦𑀁 𑀆𑀧𑀚𑁆𑀚𑀦𑁆𑀢𑁄 ‘‘𑀇𑀤𑀸𑀦𑀸𑀳𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀺, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀪𑀺𑀫𑀸𑀭𑀧𑀬𑁄𑀚𑀦𑀸 𑀢𑀣𑀸𑀕𑀢𑀁 𑀆𑀲𑀚𑁆𑀚 𑀆𑀲𑀸𑀤𑁂𑀢𑁆𑀯𑀸 𑀯𑀺𑀳𑁂𑀞𑁂𑀢𑁆𑀯𑀸. ‘‘𑀧𑀫𑀸𑀤𑀫𑀦𑀼𑀚𑀻𑀦𑁄’’𑀢𑀺𑀧𑀺 𑀧𑀞𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 ‘‘𑀯𑀼𑀢𑁆𑀢𑀦𑀬𑁂𑀦 𑀧𑀫𑀸𑀤𑀁 𑀆𑀧𑀚𑁆𑀚𑀦𑁆𑀢𑁄 𑀧𑀫𑀸𑀤𑀁 𑀦𑀺𑀲𑁆𑀲𑀸𑀬 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀬𑀼𑀕𑀕𑁆𑀕𑀸𑀳𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀲𑀳𑁂𑀯 𑀛𑀸𑀦𑀸𑀪𑀺𑀜𑁆𑀜𑀸𑀳𑀺 𑀅𑀦𑀼𑀚𑀻𑀦𑁄 𑀧𑀭𑀺𑀳𑀻𑀦𑁄’’𑀢𑀺. 𑀅𑀯𑀻𑀘𑀺𑀦𑀺𑀭𑀬𑀁 𑀧𑀢𑁆𑀢𑁄, 𑀘𑀢𑀼𑀤𑁆𑀯𑀸𑀭𑀁 𑀪𑀬𑀸𑀦𑀓𑀦𑁆𑀢𑀺 𑀚𑀸𑀮𑀸𑀦𑀁 𑀢𑀢𑁆𑀣 𑀉𑀧𑁆𑀧𑀦𑁆𑀦𑀲𑀢𑁆𑀢𑀸𑀦𑀁 𑀯𑀸 𑀦𑀺𑀭𑀦𑁆𑀢𑀭𑀢𑀸𑀬 ‘‘𑀅𑀯𑀻𑀘𑀻’’𑀢𑀺 𑀮𑀤𑁆𑀥𑀦𑀸𑀫𑀁 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀘𑀢𑀼𑀫𑀳𑀸𑀤𑁆𑀯𑀸𑀭𑀬𑁄𑀕𑁂𑀦 𑀘𑀢𑀼𑀤𑁆𑀯𑀸𑀭𑀁 𑀅𑀢𑀺𑀪𑀬𑀸𑀦𑀓𑀁 𑀫𑀳𑀸𑀦𑀺𑀭𑀬𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀧𑀢𑁆𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋

‘‘𑀘𑀢𑀼𑀓𑁆𑀓𑀡𑁆𑀡𑁄 𑀘𑀢𑀼𑀤𑁆𑀯𑀸𑀭𑁄, 𑀯𑀺𑀪𑀢𑁆𑀢𑁄 𑀪𑀸𑀕𑀲𑁄 𑀫𑀺𑀢𑁄;

𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑁄, 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑁄.

‘‘𑀢𑀲𑁆𑀲 𑀅𑀬𑁄𑀫𑀬𑀸 𑀪𑀽𑀫𑀺, 𑀚𑀮𑀺𑀢𑀸 𑀢𑁂𑀚𑀲𑀸 𑀬𑀼𑀢𑀸;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 𑀲𑀩𑁆𑀩𑀤𑀸’’𑀢𑀺. (𑀫. 𑀦𑀺. 𑁩.𑁨𑁫𑁦; 𑀅. 𑀦𑀺. 𑁩.𑁩𑁬; 𑀧𑁂. 𑀯. 𑁬𑁯𑁩-𑁬𑁯𑁪; 𑀚𑀸. 𑁨.𑁧𑁯.𑁮𑁬-𑁮𑁭);

𑀅𑀤𑀼𑀝𑁆𑀞𑀲𑁆𑀲𑀸𑀢𑀺 𑀅𑀤𑀼𑀝𑁆𑀞𑀘𑀺𑀢𑁆𑀢𑀲𑁆𑀲. 𑀤𑀼𑀩𑁆𑀪𑁂𑀢𑀺 𑀤𑀽𑀲𑁂𑀬𑁆𑀬. 𑀢𑀫𑁂𑀯 𑀧𑀸𑀧𑀁 𑀨𑀼𑀲𑀢𑀻𑀢𑀺 𑀢𑀫𑁂𑀯 𑀅𑀤𑀼𑀝𑁆𑀞𑀤𑀼𑀩𑁆𑀪𑀺𑀁 𑀧𑀸𑀧𑀧𑀼𑀕𑁆𑀕𑀮𑀁 𑀧𑀸𑀧𑀁 𑀦𑀺𑀳𑀻𑀦𑀁 𑀧𑀸𑀧𑀨𑀮𑀁 𑀨𑀼𑀲𑀢𑀺 𑀧𑀸𑀧𑀼𑀡𑀸𑀢𑀺 𑀅𑀪𑀺𑀪𑀯𑀢𑀺. 𑀪𑁂𑀲𑁆𑀫𑀸𑀢𑀺 𑀯𑀺𑀧𑀼𑀮𑀪𑀸𑀯𑁂𑀦 𑀕𑀫𑁆𑀪𑀻𑀭𑀪𑀸𑀯𑁂𑀦 𑀘 𑀪𑀺𑀁𑀲𑀸𑀧𑁂𑀦𑁆𑀢𑁄 𑀯𑀺𑀬, 𑀯𑀺𑀧𑀼𑀮𑀕𑀫𑁆𑀪𑀻𑀭𑁄𑀢𑀺 𑀅𑀢𑁆𑀣𑁄. 𑀯𑀸𑀤𑁂𑀦𑀸𑀢𑀺 𑀤𑁄𑀲𑁂𑀦. 𑀯𑀺𑀳𑀺𑀁𑀲𑀢𑀻𑀢𑀺 𑀩𑀸𑀥𑀢𑀺 𑀆𑀲𑀸𑀤𑁂𑀢𑀺. 𑀯𑀸𑀤𑁄 𑀢𑀫𑁆𑀳𑀺 𑀦 𑀭𑀽𑀳𑀢𑀻𑀢𑀺 𑀢𑀲𑁆𑀫𑀺𑀁 𑀢𑀣𑀸𑀕𑀢𑁂 𑀧𑀭𑁂𑀦 𑀆𑀭𑁄𑀧𑀺𑀬𑀫𑀸𑀦𑁄 𑀤𑁄𑀲𑁄 𑀦 𑀭𑀼𑀳𑀢𑀺, 𑀦 𑀢𑀺𑀝𑁆𑀞𑀢𑀺, 𑀯𑀺𑀲𑀓𑀼𑀫𑁆𑀪𑁄 𑀯𑀺𑀬 𑀲𑀫𑀼𑀤𑁆𑀤𑀲𑁆𑀲, 𑀦 𑀢𑀲𑁆𑀲 𑀯𑀺𑀓𑀸𑀭𑀁 𑀚𑀦𑁂𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀙𑀳𑀺 𑀕𑀸𑀣𑀸𑀳𑀺 𑀧𑀸𑀧𑀺𑀘𑁆𑀙𑀢𑀸𑀤𑀺𑀲𑀫𑀦𑁆𑀦𑀸𑀕𑀢𑀲𑁆𑀲 𑀦𑀺𑀭𑀬𑀽𑀧𑀕𑀪𑀸𑀯𑀤𑀲𑁆𑀲𑀦𑁂𑀦 𑀤𑀼𑀓𑁆𑀔𑀢𑁄 𑀅𑀧𑀭𑀺𑀫𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀧𑁆𑀧𑀝𑀺𑀧𑀓𑁆𑀔𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀲𑁆𑀲 𑀤𑀼𑀓𑁆𑀔𑀓𑁆𑀔𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀸𑀤𑀺𑀲𑀁 𑀫𑀺𑀢𑁆𑀢’’𑀦𑁆𑀢𑀺 𑀑𑀲𑀸𑀦𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀲 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀲𑁆𑀲 𑀫𑀕𑁆𑀕𑀸𑀦𑀼𑀕𑁄 𑀧𑀝𑀺𑀧𑀢𑁆𑀢𑀺𑀫𑀕𑁆𑀕𑀁 𑀅𑀦𑀼𑀕𑀢𑁄 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑁄 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀫𑁂𑀦 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀔𑀬𑀁 𑀧𑀭𑀺𑀬𑁄𑀲𑀸𑀦𑀁 𑀧𑀸𑀧𑀼𑀡𑁂𑀬𑁆𑀬. 𑀢𑀸𑀤𑀺𑀲𑀁 𑀩𑀼𑀤𑁆𑀥𑀁 𑀯𑀸 𑀩𑀼𑀤𑁆𑀥𑀲𑀸𑀯𑀓𑀁 𑀯𑀸 𑀧𑀡𑁆𑀟𑀺𑀢𑁄 𑀲𑀧𑁆𑀧𑀜𑁆𑀜𑁄, 𑀅𑀢𑁆𑀢𑀦𑁄 𑀫𑀺𑀢𑁆𑀢𑀁 𑀓𑀼𑀩𑁆𑀩𑁂𑀣 𑀢𑁂𑀦 𑀫𑁂𑀢𑁆𑀢𑀺𑀓𑀁 𑀓𑀭𑁂𑀬𑁆𑀬, 𑀢𑀜𑁆𑀘 𑀲𑁂𑀯𑁂𑀬𑁆𑀬 𑀢𑀫𑁂𑀯 𑀧𑀬𑀺𑀭𑀼𑀧𑀸𑀲𑁂𑀬𑁆𑀬𑀸𑀢𑀺.

𑀇𑀢𑀺 𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀙𑀝𑁆𑀞𑀲𑀢𑁆𑀢𑀫𑀲𑀼𑀢𑁆𑀢𑁂𑀲𑀼 𑀯𑀺𑀯𑀝𑁆𑀝𑀁 𑀓𑀣𑀺𑀢𑀁, 𑀇𑀢𑀭𑁂𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑀤𑀲𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.