𑁬. 𑀅𑀲𑀼𑀪𑀸𑀦𑀼𑀧𑀲𑁆𑀲𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁫. 𑀙𑀝𑁆𑀞𑁂 𑀅𑀲𑀼𑀪𑀸𑀦𑀼𑀧𑀲𑁆𑀲𑀻𑀢𑀺 𑀅𑀲𑀼𑀪𑀁 𑀅𑀦𑀼𑀧𑀲𑁆𑀲𑀦𑁆𑀢𑀸 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀯𑀲𑁂𑀦 𑀘𑁂𑀯 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀼 𑀕𑀳𑀺𑀢𑀦𑀺𑀫𑀺𑀢𑁆𑀢𑀲𑁆𑀲 𑀉𑀧𑀲𑀁𑀳𑀭𑀡𑀯𑀲𑁂𑀦 𑀘 𑀓𑀸𑀬𑀲𑁆𑀫𑀺𑀁 𑀅𑀲𑀼𑀪𑀁 𑀅𑀲𑀼𑀪𑀸𑀓𑀸𑀭𑀁 𑀅𑀦𑀼𑀧𑀲𑁆𑀲𑀓𑀸 𑀳𑀼𑀢𑁆𑀯𑀸 𑀯𑀺𑀳𑀭𑀣. 𑀆𑀦𑀸𑀧𑀸𑀦𑀲𑁆𑀲𑀢𑀻𑀢𑀺 𑀆𑀦𑀸𑀧𑀸𑀦𑁂 𑀲𑀢𑀺, 𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀸 𑀲𑀢𑀺, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀻𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀆𑀦𑀦𑁆𑀢𑀺 𑀅𑀲𑁆𑀲𑀸𑀲𑁄, 𑀦𑁄 𑀧𑀲𑁆𑀲𑀸𑀲𑁄. 𑀧𑀸𑀦𑀦𑁆𑀢𑀺 𑀧𑀲𑁆𑀲𑀸𑀲𑁄, 𑀦𑁄 𑀅𑀲𑁆𑀲𑀸𑀲𑁄’’𑀢𑀺𑀆𑀤𑀺 (𑀧𑀝𑀺. 𑀫. 𑁧.𑁧𑁬𑁦).

𑀯𑁄𑀢𑀺 𑀢𑀼𑀫𑁆𑀳𑀸𑀓𑀁. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀇𑀥 𑀕𑁄𑀘𑀭𑀚𑁆𑀛𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀧𑀭𑀺𑀫𑀼𑀔𑀦𑁆𑀢𑀺 𑀅𑀪𑀺𑀫𑀼𑀔𑀁. 𑀲𑀽𑀧𑀝𑁆𑀞𑀺𑀢𑀸𑀢𑀺 𑀲𑀼𑀝𑁆𑀞𑀼 𑀉𑀧𑀝𑁆𑀞𑀺𑀢𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀆𑀦𑀸𑀧𑀸𑀦𑀲𑁆𑀲𑀢𑀺 𑀘 𑀢𑀼𑀫𑁆𑀳𑀸𑀓𑀁 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀲𑀼𑀝𑁆𑀞𑀼 𑀉𑀧𑀝𑁆𑀞𑀺𑀢𑀸 𑀳𑁄𑀢𑀽𑀢𑀺. 𑀅𑀣 𑀯𑀸 𑀧𑀭𑀺𑀫𑀼𑀔𑀦𑁆𑀢𑀺 𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑁋 ‘‘𑀧𑀭𑀻𑀢𑀺 𑀧𑀭𑀺𑀕𑁆𑀕𑀳𑀝𑁆𑀞𑁄, 𑀫𑀼𑀔𑀦𑁆𑀢𑀺 𑀦𑀺𑀬𑁆𑀬𑀸𑀦𑀝𑁆𑀞𑁄, 𑀲𑀢𑀻𑀢𑀺 𑀉𑀧𑀝𑁆𑀞𑀸𑀦𑀝𑁆𑀞𑁄, 𑀢𑁂𑀦 𑀯𑀼𑀘𑁆𑀘𑀢𑀺 𑀧𑀭𑀺𑀫𑀼𑀔𑀁 𑀲𑀢𑀺’’𑀦𑁆𑀢𑀺 (𑀧𑀝𑀺. 𑀫. 𑁧.𑁧𑁬𑁪). 𑀇𑀫𑀺𑀦𑀸 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀲𑁄𑀴𑀲𑀧𑁆𑀧𑀪𑁂𑀤𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀏𑀯𑀁 𑀲𑀗𑁆𑀔𑁂𑀧𑁂𑀦𑁂𑀯 𑀭𑀸𑀕𑀘𑀭𑀺𑀢𑀯𑀺𑀢𑀓𑁆𑀓𑀘𑀭𑀺𑀢𑀸𑀦𑀁 𑀲𑀧𑁆𑀧𑀸𑀬𑀁 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀜𑁆𑀘 𑀉𑀧𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀣𑀸’’𑀢𑀺 𑀆𑀳. 𑀢𑀢𑁆𑀣 𑀅𑀦𑀺𑀘𑁆𑀘𑀁, 𑀅𑀦𑀺𑀘𑁆𑀘𑀮𑀓𑁆𑀔𑀡𑀁, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻𑀢𑀺 𑀇𑀤𑀁 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀳𑀼𑀢𑁆𑀯𑀸, 𑀅𑀪𑀸𑀯𑀢𑁄, 𑀉𑀤𑀬𑀩𑁆𑀩𑀬𑀬𑁄𑀕𑀢𑁄, 𑀢𑀸𑀯𑀓𑀸𑀮𑀺𑀓𑀢𑁄, 𑀦𑀺𑀘𑁆𑀘𑀧𑀝𑀺𑀓𑁆𑀔𑁂𑀧𑀢𑁄 𑀘 𑀔𑀦𑁆𑀥𑀧𑀜𑁆𑀘𑀓𑀁 𑀅𑀦𑀺𑀘𑁆𑀘𑀁 𑀦𑀸𑀫. 𑀢𑀲𑁆𑀲 𑀬𑁄 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑁄, 𑀢𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀦𑀸𑀫. 𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀸 𑀯𑀺𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀢𑀁 𑀅𑀦𑀺𑀘𑁆𑀘𑀦𑁆𑀢𑀺 𑀯𑀺𑀧𑀲𑁆𑀲𑀓𑁄 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻. 𑀏𑀢𑁆𑀣 𑀘 𑀏𑀓𑀸𑀤𑀲𑀯𑀺𑀥𑀸 𑀅𑀲𑀼𑀪𑀓𑀣𑀸 𑀧𑀞𑀫𑀚𑁆𑀛𑀸𑀦𑀁 𑀧𑀸𑀧𑁂𑀢𑁆𑀯𑀸, 𑀲𑁄𑀴𑀲𑀯𑀢𑁆𑀣𑀼𑀓𑀸 𑀘 𑀆𑀦𑀸𑀧𑀸𑀦𑀓𑀣𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀧𑀸𑀧𑁂𑀢𑁆𑀯𑀸, 𑀯𑀺𑀧𑀲𑁆𑀲𑀦𑀸𑀓𑀣𑀸 𑀘 𑀯𑀺𑀢𑁆𑀣𑀸𑀭𑀢𑁄 𑀯𑀢𑁆𑀢𑀩𑁆𑀩𑀸, 𑀲𑀸 𑀧𑀦 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁭𑁩𑁭-𑁭𑁪𑁦) 𑀓𑀣𑀺𑀢𑀸𑀢𑀺 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀅𑀲𑀼𑀪𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀁 𑀨𑀮𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀼𑀪𑀸𑀦𑀼𑀧𑀲𑁆𑀲𑀻𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀪𑀸𑀬 𑀥𑀸𑀢𑀼𑀬𑀸𑀢𑀺 𑀲𑀼𑀪𑀪𑀸𑀯𑁂, 𑀲𑀼𑀪𑀦𑀺𑀫𑀺𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀭𑀸𑀕𑀸𑀦𑀼𑀲𑀬𑁄𑀢𑀺 𑀲𑀼𑀪𑀸𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄. 𑀲𑁄 𑀓𑁂𑀲𑀸𑀤𑀻𑀲𑀼 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀼 𑀯𑀸 𑀅𑀲𑀼𑀪𑀸𑀦𑀼𑀧𑀲𑁆𑀲𑀻𑀦𑀁 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀥𑀺𑀕𑀢𑁂𑀦 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀳𑀻𑀬𑀢𑀺, 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀤𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀲𑀼𑀪𑀸 𑀪𑀸𑀯𑁂𑀢𑀩𑁆𑀩𑀸 𑀓𑀸𑀫𑀭𑀸𑀕𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺 (𑀅. 𑀦𑀺. 𑁯.𑁩; 𑀉𑀤𑀸. 𑁩𑁧). 𑀩𑀸𑀳𑀺𑀭𑀸𑀢𑀺 𑀩𑀳𑀺𑀤𑁆𑀥𑀸𑀯𑀢𑁆𑀣𑀼𑀓𑀢𑁆𑀢𑀸 𑀅𑀦𑀢𑁆𑀣𑀸𑀯𑀳𑀢𑁆𑀢𑀸 𑀘 𑀩𑀸𑀳𑀺𑀭𑀸 𑀩𑀳𑀺𑀪𑀽𑀢𑀸. 𑀯𑀺𑀢𑀓𑁆𑀓𑀸𑀲𑀬𑀸𑀢𑀺 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀺𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸. 𑀢𑁂 𑀳𑀺 𑀅𑀧𑁆𑀧𑀳𑀻𑀦𑀸 𑀆𑀲𑀬𑀸𑀦𑀼𑀕𑀢𑀸 𑀲𑀢𑀺 𑀧𑀘𑁆𑀘𑀬𑀲𑀫𑀯𑀸𑀬𑁂 𑀉𑀧𑁆𑀧𑀚𑁆𑀚𑀦𑀢𑁄 𑀯𑀺𑀢𑀓𑁆𑀓𑀸𑀲𑀬𑀸𑀢𑀺 𑀯𑀼𑀢𑁆𑀢𑀸. 𑀓𑀸𑀫𑀯𑀺𑀢𑀓𑁆𑀓𑁄 𑀘𑁂𑀢𑁆𑀣 𑀓𑀸𑀫𑀭𑀸𑀕𑀕𑁆𑀕𑀳𑀡𑁂𑀦 𑀕𑀳𑀺𑀢𑁄 𑀏𑀯𑀸𑀢𑀺 𑀢𑀤𑀯𑀲𑁂𑀲𑀸 𑀯𑀺𑀢𑀓𑁆𑀓𑀸 𑀏𑀯 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀖𑀸𑀢𑀧𑀓𑁆𑀔𑀺𑀓𑀸𑀢𑀺 𑀤𑀼𑀓𑁆𑀔𑀪𑀸𑀕𑀺𑀬𑀸, 𑀇𑀘𑁆𑀙𑀸𑀯𑀺𑀖𑀸𑀢𑀦𑀺𑀩𑁆𑀩𑀢𑁆𑀢𑀦𑀓𑀸 𑀯𑀸. 𑀢𑁂 𑀦 𑀳𑁄𑀦𑁆𑀢𑀻𑀢𑀺 𑀢𑁂 𑀧𑀳𑀻𑀬𑀦𑁆𑀢𑀺. 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄, 𑀜𑀸𑀢𑀺𑀯𑀺𑀢𑀓𑁆𑀓𑁄, 𑀚𑀦𑀧𑀤𑀯𑀺𑀢𑀓𑁆𑀓𑁄, 𑀅𑀫𑀭𑀸𑀯𑀺𑀢𑀓𑁆𑀓𑁄, 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀧𑀭𑀸𑀦𑀼𑀤𑁆𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄𑀢𑀺 𑀅𑀝𑁆𑀞, 𑀓𑀸𑀫𑀯𑀺𑀢𑀓𑁆𑀓𑁂𑀦 𑀲𑀤𑁆𑀥𑀺𑀁 𑀦𑀯𑀯𑀺𑀥𑀸 𑀫𑀳𑀸𑀯𑀺𑀢𑀓𑁆𑀓𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀦𑀸 𑀢𑀦𑁆𑀦𑀺𑀲𑁆𑀲𑀺𑀢𑀸𑀬 𑀘 𑀯𑀺𑀧𑀲𑁆𑀲𑀦𑀸𑀬 𑀧𑀼𑀩𑁆𑀩𑀪𑀸𑀕𑁂 𑀯𑀺𑀓𑁆𑀔𑀫𑁆𑀪𑀺𑀢𑀸. 𑀢𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀅𑀥𑀺𑀕𑀢𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀬𑀣𑀸𑀭𑀳𑀁 𑀅𑀦𑀯𑀲𑁂𑀲𑀢𑁄 𑀧𑀳𑀻𑀬𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀆𑀦𑀸𑀧𑀸𑀦𑀲𑁆𑀲𑀢𑀺 𑀪𑀸𑀯𑁂𑀢𑀩𑁆𑀩𑀸 𑀯𑀺𑀢𑀓𑁆𑀓𑀼𑀧𑀘𑁆𑀙𑁂𑀤𑀸𑀬𑀸’’𑀢𑀺 (𑀅. 𑀦𑀺. 𑁯.𑁩; 𑀉𑀤𑀸. 𑁩𑁧).

𑀬𑀸 𑀅𑀯𑀺𑀚𑁆𑀚𑀸, 𑀲𑀸 𑀧𑀳𑀻𑀬𑀢𑀻𑀢𑀺 𑀬𑀸 𑀲𑀘𑁆𑀘𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀺𑀦𑀻 𑀲𑀩𑁆𑀩𑀸𑀦𑀢𑁆𑀣𑀓𑀸𑀭𑀻 𑀲𑀓𑀮𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀫𑀽𑀮𑀪𑀽𑀢𑀸 𑀅𑀯𑀺𑀚𑁆𑀚𑀸, 𑀲𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻𑀦𑀁 𑀯𑀺𑀳𑀭𑀢𑀁 𑀲𑀫𑀼𑀘𑁆𑀙𑀺𑀚𑁆𑀚𑀢𑀺. 𑀇𑀤𑀁 𑀓𑀺𑀭 𑀪𑀕𑀯𑀢𑀸 𑀅𑀦𑀺𑀘𑁆𑀘𑀸𑀓𑀸𑀭𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀢𑁂𑀪𑀽𑀫𑀓𑁂𑀲𑀼 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀸𑀤𑀺𑀢𑁄 𑀲𑀫𑁆𑀫𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑀸𑀦𑀁 𑀬𑀤𑀸 𑀅𑀦𑀺𑀘𑁆𑀘𑀦𑁆𑀢𑀺 𑀧𑀯𑀢𑁆𑀢𑀫𑀸𑀦𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑁂𑀦 𑀖𑀝𑀻𑀬𑀢𑀺, 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀲𑀁 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻𑀦𑀁 𑀯𑀺𑀳𑀭𑀢𑀁 𑀅𑀯𑀺𑀚𑁆𑀚𑀸 𑀅𑀦𑀯𑀲𑁂𑀲𑀢𑁄 𑀧𑀳𑀻𑀬𑀢𑀺, 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻𑀦𑀁 𑀯𑀺𑀳𑀭𑀢𑀦𑁆𑀢𑀺 𑀇𑀤𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀲𑁆𑀲 𑀢𑁂𑀲𑀁 𑀧𑀸𑀓𑀝𑀪𑀸𑀯𑀢𑁄 𑀇𑀢𑀭𑀲𑁆𑀲 𑀮𑀓𑁆𑀔𑀡𑀤𑁆𑀯𑀬𑀲𑁆𑀲 𑀕𑀳𑀡𑁂 𑀉𑀧𑀸𑀬𑀪𑀸𑀯𑀢𑁄 𑀯𑀸 𑀯𑀼𑀢𑁆𑀢𑀁, 𑀦 𑀧𑀦 𑀏𑀓𑀲𑁆𑀲𑁂𑀯 𑀮𑀓𑁆𑀔𑀡𑀲𑁆𑀲 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁩.𑁧𑁫). 𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀅𑀦𑀺𑀘𑁆𑀘𑀲𑀜𑁆𑀜𑀺𑀦𑁄 𑀳𑀺, 𑀫𑁂𑀖𑀺𑀬, 𑀅𑀦𑀢𑁆𑀢𑀲𑀜𑁆𑀜𑀸 𑀲𑀡𑁆𑀞𑀸𑀢𑀺, 𑀅𑀦𑀢𑁆𑀢𑀲𑀜𑁆𑀜𑀻 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀁 𑀧𑀸𑀧𑀼𑀡𑀸𑀢𑀻’’𑀢𑀺.

𑀕𑀸𑀣𑀸𑀲𑀼 𑀆𑀦𑀸𑀧𑀸𑀦𑁂 𑀧𑀝𑀺𑀲𑁆𑀲𑀢𑁄𑀢𑀺 𑀆𑀦𑀸𑀧𑀸𑀦𑀦𑀺𑀫𑀺𑀢𑁆𑀢𑀲𑁆𑀫𑀺𑀁 𑀧𑀝𑀺 𑀧𑀝𑀺 𑀲𑀢𑁄, 𑀉𑀧𑀝𑁆𑀞𑀺𑀢𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀧𑀲𑁆𑀲𑀦𑁆𑀢𑀺 𑀆𑀲𑀯𑀓𑁆𑀔𑀬𑀜𑀸𑀡𑀘𑀓𑁆𑀔𑀼𑀦𑀸 𑀲𑀗𑁆𑀔𑀸𑀭𑀽𑀧𑀲𑀫𑀁 𑀦𑀺𑀩𑁆𑀩𑀸𑀦𑀁 𑀧𑀲𑁆𑀲𑀦𑁆𑀢𑁄. 𑀆𑀢𑀸𑀧𑀻 𑀲𑀩𑁆𑀩𑀤𑀸𑀢𑀺 𑀅𑀦𑁆𑀢𑀭𑀸𑀯𑁄𑀲𑀸𑀦𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀅𑀲𑀼𑀪𑀸𑀦𑀼𑀧𑀲𑁆𑀲𑀦𑀸𑀤𑀻𑀲𑀼 𑀲𑀢𑀢𑀁 𑀆𑀢𑀸𑀧𑀻 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄, 𑀢𑀢𑁄 𑀏𑀯 𑀬𑀢𑁄 𑀯𑀸𑀬𑀫𑀫𑀸𑀦𑁄, 𑀦𑀺𑀬𑀢𑁄 𑀯𑀸 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁂𑀦 𑀢𑀢𑁆𑀣 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁂 𑀦𑀺𑀩𑁆𑀩𑀸𑀦𑁂 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀘𑁆𑀘𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀙𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.