𑁭. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁬. 𑀲𑀢𑁆𑀢𑀫𑁂 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀏𑀢𑁆𑀣 𑀥𑀫𑁆𑀫𑁄 𑀦𑀸𑀫 𑀦𑀯𑀯𑀺𑀥𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄, 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑁄 𑀲𑀻𑀮𑀯𑀺𑀲𑀼𑀤𑁆𑀥𑀺𑀆𑀤𑀺 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀥𑀫𑁆𑀫𑁄, 𑀢𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀦𑁆𑀦𑀲𑁆𑀲 𑀅𑀥𑀺𑀕𑀦𑁆𑀢𑀼𑀁 𑀧𑀝𑀺𑀧𑀚𑁆𑀚𑀫𑀸𑀦𑀲𑁆𑀲. 𑀅𑀬𑀫𑀦𑀼𑀥𑀫𑁆𑀫𑁄 𑀳𑁄𑀢𑀻𑀢𑀺 𑀅𑀬𑀁 𑀅𑀦𑀼𑀘𑁆𑀙𑀯𑀺𑀓𑀲𑀪𑀸𑀯𑁄 𑀧𑀢𑀺𑀭𑀽𑀧𑀲𑀪𑀸𑀯𑁄 𑀳𑁄𑀢𑀺. 𑀯𑁂𑀬𑁆𑀬𑀸𑀓𑀭𑀡𑀸𑀬𑀸𑀢𑀺 𑀓𑀣𑀦𑀸𑀬. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀦𑁆𑀦𑁄𑀬𑀦𑁆𑀢𑀺 𑀬𑀦𑁆𑀢𑀺 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁂𑀦 𑀅𑀦𑀼𑀥𑀫𑁆𑀫𑁂𑀦 𑀢𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀦𑁆𑀦𑁄𑀢𑀺 𑀩𑁆𑀬𑀸𑀓𑀭𑀫𑀸𑀦𑁄 𑀲𑀫𑁆𑀫𑀤𑁂𑀯 𑀩𑁆𑀬𑀸𑀓𑀭𑁄𑀦𑁆𑀢𑁄 𑀦𑀸𑀫 𑀲𑀺𑀬𑀸, 𑀦 𑀢𑀢𑁄𑀦𑀺𑀤𑀸𑀦𑀁 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑀩𑁆𑀩𑁄 𑀲𑀺𑀬𑀸𑀢𑀺. 𑀬𑀦𑁆𑀢𑀺 𑀯𑀸 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁, 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 ‘‘𑀬𑀤𑀺𑀤𑀁 𑀥𑀫𑁆𑀫𑀲𑁆𑀲𑁂𑀯 𑀪𑀸𑀲𑀦𑀁, 𑀥𑀫𑁆𑀫𑀯𑀺𑀢𑀓𑁆𑀓𑀲𑁆𑀲𑁂𑀯 𑀘 𑀯𑀺𑀢𑀓𑁆𑀓𑀦𑀁 𑀢𑀤𑀼𑀪𑀬𑀸𑀪𑀸𑀯𑁂 𑀜𑀸𑀡𑀼𑀧𑁂𑀓𑁆𑀔𑀸𑀬, 𑀅𑀬𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀣𑀸𑀭𑀽𑀧𑁄 𑀅𑀬𑀦𑁆𑀢𑀺 𑀓𑀣𑀦𑀸𑀬𑀸𑀦𑀼𑀭𑀽𑀧𑀳𑁂𑀢𑀼 𑀅𑀦𑀼𑀘𑁆𑀙𑀯𑀺𑀓𑀓𑀸𑀭𑀡𑀁. 𑀪𑀸𑀲𑀫𑀸𑀦𑁄 𑀥𑀫𑁆𑀫𑀁𑀬𑁂𑀯 𑀪𑀸𑀲𑁂𑀬𑁆𑀬𑀸𑀢𑀺 𑀓𑀣𑁂𑀦𑁆𑀢𑁄 𑀘𑁂 𑀤𑀲𑀓𑀣𑀸𑀯𑀢𑁆𑀣𑀼𑀥𑀫𑁆𑀫𑀁𑀬𑁂𑀯 𑀓𑀣𑁂𑀬𑁆𑀬, 𑀦 𑀢𑀧𑁆𑀧𑀝𑀺𑀧𑀓𑁆𑀔𑀫𑀳𑀺𑀘𑁆𑀙𑀢𑀸𑀤𑀺𑀅𑀥𑀫𑁆𑀫𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀸𑀬𑀁 𑀓𑀣𑀸 𑀅𑀪𑀺𑀲𑀮𑁆𑀮𑁂𑀔𑀺𑀓𑀸 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀧𑁆𑀧𑀺𑀘𑁆𑀙𑀓𑀣𑀸, 𑀲𑀦𑁆𑀢𑀼𑀝𑁆𑀞𑀺𑀓𑀣𑀸, 𑀧𑀯𑀺𑀯𑁂𑀓𑀓𑀣𑀸, 𑀅𑀲𑀁𑀲𑀕𑁆𑀕𑀓𑀣𑀸, 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸, 𑀲𑀻𑀮𑀓𑀣𑀸, 𑀲𑀫𑀸𑀥𑀺𑀓𑀣𑀸, 𑀧𑀜𑁆𑀜𑀸𑀓𑀣𑀸, 𑀯𑀺𑀫𑀼𑀢𑁆𑀢𑀺𑀓𑀣𑀸, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸, 𑀏𑀯𑀭𑀽𑀧𑀸𑀬 𑀓𑀣𑀸𑀬 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻’’𑀢𑀺 (𑀅. 𑀦𑀺. 𑁯.𑁩; 𑀉𑀤𑀸. 𑁩𑁧).

𑀅𑀪𑀺𑀲𑀮𑁆𑀮𑁂𑀔𑀺𑀓𑀸𑀬 𑀓𑀣𑀸𑀬 𑀮𑀸𑀪𑀻 𑀏𑀯 𑀳𑀺 𑀢𑀁 𑀪𑀸𑀲𑁂𑀬𑁆𑀬. 𑀏𑀢𑁂𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀫𑁆𑀧𑀤𑀸 𑀤𑀲𑁆𑀲𑀺𑀢𑀸.

𑀥𑀫𑁆𑀫𑀯𑀺𑀢𑀓𑁆𑀓𑀦𑁆𑀢𑀺 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑀸𑀤𑀺𑀁 𑀥𑀫𑁆𑀫𑀢𑁄 𑀅𑀦𑀧𑁂𑀢𑀁 𑀯𑀺𑀢𑀓𑁆𑀓𑀬𑀢𑁄 ‘‘𑀲𑀻𑀮𑀸𑀤𑀺𑀧𑀝𑀺𑀧𑀤𑀁 𑀧𑀭𑀺𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀉𑀧𑀭𑀽𑀧𑀭𑀺 𑀉𑀲𑁆𑀲𑀸𑀳𑁄 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺. 𑀲𑁄 𑀧𑀦 𑀯𑀺𑀢𑀓𑁆𑀓𑁄 𑀲𑀻𑀮𑀸𑀤𑀻𑀦𑀁 𑀅𑀦𑀼𑀧𑀓𑀸𑀭𑀥𑀫𑁆𑀫𑁂 𑀯𑀚𑁆𑀚𑁂𑀢𑁆𑀯𑀸 𑀉𑀧𑀓𑀸𑀭𑀥𑀫𑁆𑀫𑁂 𑀅𑀦𑀼𑀩𑁆𑀭𑀽𑀳𑀦𑀯𑀲𑁂𑀦 𑀳𑀸𑀦𑀪𑀸𑀕𑀺𑀬𑀪𑀸𑀯𑀁 𑀅𑀧𑀦𑁂𑀢𑁆𑀯𑀸 𑀞𑀺𑀢𑀺𑀪𑀸𑀕𑀺𑀬𑀪𑀸𑀯𑁂𑀧𑀺 𑀅𑀝𑁆𑀞𑀢𑁆𑀯𑀸 𑀯𑀺𑀲𑁂𑀲𑀪𑀸𑀕𑀺𑀬𑀢𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀢𑀜𑁆𑀘 𑀧𑀸𑀧𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀅𑀦𑁂𑀓𑀧𑁆𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀦𑁄 𑀅𑀥𑀫𑁆𑀫𑀯𑀺𑀢𑀓𑁆𑀓𑀦𑁆𑀢𑀺 𑀓𑀸𑀫𑀯𑀺𑀢𑀓𑁆𑀓𑀁 𑀦𑁄 𑀯𑀺𑀢𑀓𑁆𑀓𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀤𑀼𑀪𑀬𑀁 𑀯𑀸 𑀧𑀦𑀸𑀢𑀺 𑀬𑀤𑁂𑀢𑀁 𑀧𑀭𑁂𑀲𑀁 𑀅𑀦𑀼𑀕𑁆𑀕𑀳𑀡𑀢𑁆𑀣𑀁 𑀥𑀫𑁆𑀫𑀪𑀸𑀲𑀦𑀁 𑀅𑀢𑁆𑀢𑀦𑁄 𑀅𑀦𑀼𑀕𑁆𑀕𑀳𑀡𑀢𑁆𑀣𑀁 𑀥𑀫𑁆𑀫𑀯𑀺𑀢𑀓𑁆𑀓𑀦𑀜𑁆𑀘 𑀯𑀼𑀢𑁆𑀢𑀁. 𑀅𑀣 𑀯𑀸 𑀧𑀦 𑀢𑀁 𑀉𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀅𑀧𑁆𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀓𑀢𑁆𑀯𑀸. 𑀉𑀧𑁂𑀓𑁆𑀔𑀓𑁄𑀢𑀺 𑀢𑀣𑀸𑀧𑀝𑀺𑀧𑀢𑁆𑀢𑀺𑀬𑀁 𑀉𑀤𑀸𑀲𑀻𑀦𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀫𑁂𑀯 𑀅𑀦𑀼𑀩𑁆𑀭𑀽𑀳𑀦𑁆𑀢𑁄 𑀯𑀺𑀳𑀭𑁂𑀬𑁆𑀬, 𑀲𑀫𑀣𑀧𑀝𑀺𑀧𑀢𑁆𑀢𑀺𑀬𑀁 𑀉𑀧𑁂𑀓𑁆𑀔𑀓𑁄 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬𑀫𑁂𑀯 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀺𑀳𑀭𑁂𑀬𑁆𑀬. 𑀯𑀺𑀧𑀲𑁆𑀲𑀦𑀫𑁆𑀧𑀺 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀢𑀢𑁆𑀣𑀧𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀯𑀲𑁂𑀦 𑀉𑀧𑁂𑀓𑁆𑀔𑀓𑁄 𑀬𑀸𑀯 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀫𑀕𑁆𑀕𑁂𑀦 𑀖𑀝𑀻𑀬𑀢𑀺, 𑀢𑀸𑀯 𑀬𑀣𑀸 𑀢𑀁 𑀢𑀺𑀓𑁆𑀔𑀁 𑀲𑀽𑀭𑀁 𑀧𑀲𑀦𑁆𑀦𑀁 𑀳𑀼𑀢𑁆𑀯𑀸 𑀯𑀳𑀢𑀺, 𑀢𑀣𑀸 𑀯𑀺𑀳𑀭𑁂𑀬𑁆𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺.

𑀕𑀸𑀣𑀸𑀲𑀼 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁄 𑀆𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀆𑀭𑀸𑀫𑁄 𑀏𑀢𑀲𑁆𑀲𑀸𑀢𑀺 𑀥𑀫𑁆𑀫𑀸𑀭𑀸𑀫𑁄. 𑀢𑀲𑁆𑀫𑀺𑀁𑀬𑁂𑀯 𑀥𑀫𑁆𑀫𑁂 𑀭𑀢𑁄𑀢𑀺 𑀥𑀫𑁆𑀫𑀭𑀢𑁄. 𑀢𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀯𑀺𑀘𑀺𑀦𑁆𑀢𑀦𑀢𑁄 𑀥𑀫𑁆𑀫𑀁 𑀅𑀦𑀼𑀯𑀺𑀘𑀺𑀦𑁆𑀢𑀬𑀁 𑀢𑀁 𑀥𑀫𑁆𑀫𑀁 𑀆𑀯𑀚𑁆𑀚𑁂𑀦𑁆𑀢𑁄, 𑀫𑀦𑀲𑀺 𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀦𑀼𑀲𑁆𑀲𑀭𑀦𑁆𑀢𑀺 𑀢𑀫𑁂𑀯 𑀥𑀫𑁆𑀫𑀁 𑀉𑀧𑀭𑀽𑀧𑀭𑀺𑀪𑀸𑀯𑀦𑀸𑀯𑀲𑁂𑀦 𑀅𑀦𑀼𑀲𑁆𑀲𑀭𑀦𑁆𑀢𑁄. 𑀅𑀣 𑀯𑀸 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂 𑀞𑀢𑁆𑀯𑀸 𑀧𑀭𑁂𑀲𑀁 𑀤𑁂𑀲𑀦𑀸𑀯𑀲𑁂𑀦 𑀲𑀻𑀮𑀸𑀤𑀺𑀥𑀫𑁆𑀫𑁄 𑀆𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀆𑀭𑀸𑀫𑁄 𑀏𑀢𑀲𑁆𑀲𑀸𑀢𑀺 𑀥𑀫𑁆𑀫𑀸𑀭𑀸𑀫𑁄. 𑀢𑀣𑁂𑀯 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀭𑀢𑁄 𑀅𑀪𑀺𑀭𑀢𑁄𑀢𑀺 𑀥𑀫𑁆𑀫𑀭𑀢𑁄. 𑀢𑁂𑀲𑀁𑀬𑁂𑀯 𑀲𑀻𑀮𑀸𑀤𑀺𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀯𑁂𑀲𑀦𑁆𑀢𑁄 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀑𑀓𑀸𑀲𑀁 𑀅𑀤𑀢𑁆𑀯𑀸 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀺𑀥𑀫𑁆𑀫𑀁𑀬𑁂𑀯 𑀅𑀦𑀼𑀯𑀺𑀘𑀺𑀦𑁆𑀢𑀦𑀢𑁄 𑀥𑀫𑁆𑀫𑀁 𑀅𑀦𑀼𑀯𑀺𑀘𑀺𑀦𑁆𑀢𑀬𑀁. 𑀢𑀤𑀼𑀪𑀬𑀁 𑀯𑀸 𑀧𑀦 𑀑𑀴𑀸𑀭𑀺𑀓𑀢𑁄 𑀤𑀳𑀦𑁆𑀢𑁄 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀫𑁂𑀯 𑀉𑀧𑀭𑀽𑀧𑀭𑀺 𑀪𑀸𑀯𑀦𑀸𑀯𑀲𑁂𑀦 𑀅𑀦𑀼𑀲𑁆𑀲𑀭𑀦𑁆𑀢𑁄 𑀅𑀦𑀼𑀩𑁆𑀭𑀽𑀳𑀦𑀯𑀲𑁂𑀦 𑀧𑀯𑀢𑁆𑀢𑁂𑀦𑁆𑀢𑁄. 𑀲𑀤𑁆𑀥𑀫𑁆𑀫𑀸𑀢𑀺 𑀲𑀢𑁆𑀢𑀢𑀺𑀁𑀲𑀧𑁆𑀧𑀪𑁂𑀤𑀸 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀦𑀯𑀯𑀺𑀥𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀘 𑀦 𑀧𑀭𑀺𑀳𑀸𑀬𑀢𑀺, 𑀦 𑀘𑀺𑀭𑀲𑁆𑀲𑁂𑀯 𑀢𑀁 𑀅𑀥𑀺𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀢𑀲𑁆𑀲 𑀅𑀦𑀼𑀲𑁆𑀲𑀭𑀡𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀭𑀁 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀭𑀁 𑀯𑀸𑀢𑀺 𑀪𑀺𑀓𑁆𑀔𑀸𑀘𑀸𑀭𑀯𑀲𑁂𑀦 𑀘𑀗𑁆𑀓𑀫𑀦𑀯𑀲𑁂𑀦 𑀘 𑀘𑀭𑀦𑁆𑀢𑁄 𑀯𑀸. 𑀬𑀤𑀺 𑀯𑀸 𑀢𑀺𑀝𑁆𑀞𑀦𑁆𑀢𑀺 𑀢𑀺𑀝𑁆𑀞𑀦𑁆𑀢𑁄 𑀯𑀸 𑀦𑀺𑀲𑀺𑀦𑁆𑀦𑁄 𑀯𑀸, 𑀉𑀤 𑀯𑀸 𑀲𑀬𑀦𑁆𑀢𑀺 𑀲𑀬𑀦𑁆𑀢𑁄 𑀯𑀸. 𑀏𑀯𑀁 𑀘𑀢𑀽𑀲𑀼𑀧𑀺 𑀇𑀭𑀺𑀬𑀸𑀧𑀣𑁂𑀲𑀼. 𑀅𑀚𑁆𑀛𑀢𑁆𑀢𑀁 𑀲𑀫𑀬𑀁 𑀘𑀺𑀢𑁆𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑁂 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀕𑁄𑀘𑀭𑀚𑁆𑀛𑀢𑁆𑀢𑁂 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀦𑀁 𑀯𑀽𑀧𑀲𑀫𑀦𑀯𑀲𑁂𑀦 𑀧𑀚𑀳𑀦𑀯𑀲𑁂𑀦 𑀲𑀫𑀬𑀁 𑀲𑀫𑁂𑀦𑁆𑀢𑁄. 𑀲𑀦𑁆𑀢𑀺𑀫𑁂𑀯𑀸𑀥𑀺𑀕𑀘𑁆𑀙𑀢𑀻𑀢𑀺 𑀅𑀘𑁆𑀘𑀦𑁆𑀢𑀲𑀦𑁆𑀢𑀺𑀁 𑀦𑀺𑀩𑁆𑀩𑀸𑀦𑀫𑁂𑀯 𑀧𑀸𑀧𑀼𑀡𑀸𑀢𑀻𑀢𑀺.

𑀲𑀢𑁆𑀢𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.