𑁩. 𑀤𑁂𑀯𑀲𑀤𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁨. 𑀢𑀢𑀺𑀬𑁂 𑀤𑁂𑀯𑁂𑀲𑀽𑀢𑀺 𑀞𑀧𑁂𑀢𑁆𑀯𑀸 𑀅𑀭𑀽𑀧𑀸𑀯𑀘𑀭𑀤𑁂𑀯𑁂 𑀘𑁂𑀯 𑀅𑀲𑀜𑁆𑀜𑀤𑁂𑀯𑁂 𑀘 𑀢𑀤𑀜𑁆𑀜𑁂𑀲𑀼 𑀉𑀧𑀧𑀢𑁆𑀢𑀺𑀤𑁂𑀯𑁂𑀲𑀼. 𑀤𑁂𑀯𑀲𑀤𑁆𑀤𑀸𑀢𑀺 𑀤𑁂𑀯𑀸𑀦𑀁 𑀧𑀻𑀢𑀺𑀲𑀫𑀼𑀤𑀸𑀳𑀸𑀭𑀲𑀤𑁆𑀤𑀸. 𑀦𑀺𑀘𑁆𑀙𑀭𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀁 𑀆𑀮𑀸𑀧𑀲𑀮𑁆𑀮𑀸𑀧𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀲𑀫𑀬𑀸 𑀲𑀫𑀬𑀁 𑀉𑀧𑀸𑀤𑀸𑀬𑀸𑀢𑀺 𑀲𑀫𑀬𑀢𑁄 𑀲𑀫𑀬𑀁 𑀧𑀝𑀺𑀘𑁆𑀘. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀺𑀁 𑀓𑀸𑀮𑁂 𑀞𑀺𑀢𑀸 𑀢𑁂 𑀤𑁂𑀯𑀸 𑀢𑀁 𑀓𑀸𑀮𑀁 𑀆𑀕𑀫𑁆𑀫 𑀦𑀁 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, 𑀢𑀢𑁄 𑀢𑀁 𑀲𑀫𑀬𑀁 𑀲𑀫𑁆𑀧𑀢𑁆𑀢𑀁 𑀆𑀕𑀫𑁆𑀫𑀸𑀢𑀺. ‘‘𑀲𑀫𑀬𑀁 𑀲𑀫𑀬𑀁 𑀉𑀧𑀸𑀤𑀸𑀬𑀸’’𑀢𑀺 𑀘 𑀓𑁂𑀘𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀢𑀁 𑀢𑀁 𑀲𑀫𑀬𑀁 𑀧𑀝𑀺𑀘𑁆𑀘𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀺𑀁 𑀲𑀫𑀬𑁂𑀢𑀺 𑀬𑀤𑀸 ‘‘𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩𑁪; 𑀧𑀸𑀘𑀺. 𑁪𑁧𑁭), ‘‘𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁯𑁧; 𑀲𑀁. 𑀦𑀺. 𑁨.𑁧𑁫𑁪) 𑀘 𑀓𑀸𑀫𑁂𑀲𑀼 𑀖𑀭𑀸𑀯𑀸𑀲𑁂 𑀘 𑀆𑀤𑀻𑀦𑀯𑀸, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀸 𑀘 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂. 𑀢𑀤𑀸 𑀳𑀺𑀲𑁆𑀲 𑀏𑀓𑀦𑁆𑀢𑁂𑀦 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺. 𑀅𑀭𑀺𑀬𑀲𑀸𑀯𑀓𑁄𑀢𑀺 𑀅𑀭𑀺𑀬𑀲𑁆𑀲 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑁄, 𑀲𑀸𑀯𑀓𑀪𑀸𑀯𑀁 𑀉𑀧𑀕𑀦𑁆𑀢𑀼𑀓𑀸𑀫𑁄, 𑀅𑀭𑀺𑀬𑀲𑀸𑀯𑀓𑁄 𑀯𑀸 𑀅𑀯𑀲𑁆𑀲𑀁𑀪𑀸𑀯𑀻. 𑀅𑀦𑁆𑀢𑀺𑀫𑀪𑀯𑀺𑀓𑀁 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀁 𑀲𑀦𑁆𑀥𑀸𑀬 𑀅𑀬𑀫𑀸𑀭𑀫𑁆𑀪𑁄. 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸𑀢𑀺 𑀓𑁂𑀲𑁂 𑀘 𑀫𑀲𑁆𑀲𑀼𑀜𑁆𑀘 𑀑𑀳𑀸𑀭𑁂𑀢𑁆𑀯𑀸 𑀅𑀧𑀦𑁂𑀢𑁆𑀯𑀸. 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸𑀢𑀺 𑀓𑀲𑀸𑀬𑁂𑀦 𑀭𑀢𑁆𑀢𑀢𑀸𑀬 𑀓𑀸𑀲𑀸𑀬𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀸𑀦𑀺 𑀯𑀢𑁆𑀣𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀘𑁂𑀯 𑀧𑀸𑀭𑀼𑀧𑀺𑀢𑁆𑀯𑀸 𑀘. 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬 𑀘𑁂𑀢𑁂𑀢𑀻𑀢𑀺 𑀅𑀕𑀸𑀭𑀲𑁆𑀫𑀸 𑀖𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑁂𑀬𑁆𑀬𑀦𑁆𑀢𑀺 𑀧𑀩𑁆𑀩𑀚𑁆𑀚𑀸𑀬 𑀘𑁂𑀢𑁂𑀢𑀺 𑀧𑀓𑀧𑁆𑀧𑁂𑀢𑀺, 𑀧𑀩𑁆𑀩𑀚𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀬𑀲𑁆𑀫𑀸 𑀅𑀕𑀸𑀭𑀲𑁆𑀲 𑀳𑀺𑀢𑀁 𑀓𑀲𑀺𑀯𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀁 𑀅𑀕𑀸𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀜𑁆𑀘 𑀧𑀩𑁆𑀩𑀚𑁆𑀚𑀸𑀬 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀩𑁆𑀩𑀚𑁆𑀚𑀸 𑀅𑀦𑀕𑀸𑀭𑀺𑀬𑀦𑁆𑀢𑀺 𑀜𑀸𑀢𑀩𑁆𑀩𑀸.

𑀫𑀸𑀭𑁂𑀦𑀸𑀢𑀺 𑀓𑀺𑀮𑁂𑀲𑀫𑀸𑀭𑁂𑀦. 𑀲𑀗𑁆𑀕𑀸𑀫𑀸𑀬 𑀘𑁂𑀢𑁂𑀢𑀻𑀢𑀺 𑀬𑀼𑀚𑁆𑀛𑀦𑀢𑁆𑀣𑀸𑀬 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀺, 𑀫𑀸𑀭𑀁 𑀅𑀪𑀺𑀯𑀺𑀚𑁂𑀢𑀼𑀁 𑀲𑀦𑁆𑀦𑀬𑁆𑀳𑀢𑀺. 𑀬𑀲𑁆𑀫𑀸 𑀧𑀦 𑀏𑀯𑀭𑀽𑀧𑀲𑁆𑀲 𑀧𑀝𑀺𑀧𑀚𑁆𑀚𑀦𑀓𑀧𑀼𑀕𑁆𑀕𑀮𑀲𑁆𑀲 𑀤𑁂𑀯𑀧𑀼𑀢𑁆𑀢𑀫𑀸𑀭𑁄𑀧𑀺 𑀅𑀦𑁆𑀢𑀭𑀸𑀬𑀸𑀬 𑀉𑀧𑀓𑁆𑀓𑀫𑀢𑀺, 𑀢𑀲𑁆𑀫𑀸 𑀢𑀲𑁆𑀲𑀧𑀺 𑀯𑀲𑁂𑀦 𑀫𑀸𑀭𑁂𑀦𑀸𑀢𑀺 𑀏𑀢𑁆𑀣 𑀤𑁂𑀯𑀧𑀼𑀢𑁆𑀢𑀫𑀸𑀭𑁂𑀦𑀸𑀢𑀺𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀲𑀸𑀧𑀺 𑀅𑀬𑀁 𑀇𑀘𑁆𑀙𑀸𑀯𑀺𑀖𑀸𑀢𑀁 𑀓𑀭𑀺𑀲𑁆𑀲𑀢𑁂𑀯𑀸𑀢𑀺. 𑀬𑀲𑁆𑀫𑀸 𑀧𑀦 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀔𑀼𑀭𑀕𑁆𑀕𑀢𑁄 𑀯𑀸 𑀧𑀝𑁆𑀞𑀸𑀬 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀦𑁆𑀢𑁄 𑀧𑀭𑀺𑀲𑁄𑀥𑁂𑀦𑁆𑀢𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀬𑀣𑀸𑀭𑀳𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀸𑀦𑀁 𑀯𑀲𑁂𑀦 𑀓𑀺𑀮𑁂𑀲𑀫𑀸𑀭𑀁 𑀧𑀭𑀺𑀧𑀸𑀢𑁂𑀢𑀺 𑀦𑀸𑀫, 𑀦 𑀬𑀼𑀚𑁆𑀛𑀢𑀺 𑀦𑀸𑀫 𑀲𑀫𑁆𑀧𑀳𑀸𑀭𑀲𑁆𑀲 𑀅𑀪𑀸𑀯𑀢𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑀸𑀭𑁂𑀦 𑀲𑀤𑁆𑀥𑀺𑀁 𑀲𑀗𑁆𑀕𑀸𑀫𑀸𑀬 𑀘𑁂𑀢𑁂𑀢𑀻’’𑀢𑀺.

𑀲𑀢𑁆𑀢𑀦𑁆𑀦𑀦𑁆𑀢𑀺 𑀓𑁄𑀝𑁆𑀞𑀸𑀲𑀢𑁄 𑀲𑀢𑁆𑀢𑀦𑁆𑀦𑀁, 𑀧𑀪𑁂𑀤𑀢𑁄 𑀧𑀦 𑀢𑁂 𑀲𑀢𑁆𑀢𑀢𑀺𑀁𑀲 𑀳𑁄𑀦𑁆𑀢𑀺. 𑀓𑀣𑀁? 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺. 𑀏𑀯𑀁 𑀧𑀪𑁂𑀤𑀢𑁄 𑀲𑀢𑁆𑀢𑀢𑀺𑀁𑀲𑀯𑀺𑀥𑀸𑀧𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀓𑁄𑀝𑁆𑀞𑀸𑀲𑀢𑁄 𑀲𑀢𑁆𑀢𑁂𑀯 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀢𑁆𑀢𑀦𑁆𑀦’’𑀦𑁆𑀢𑀺. 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀦𑁆𑀢𑀺 𑀩𑀼𑀚𑁆𑀛𑀦𑀝𑁆𑀞𑁂𑀦 𑀩𑁄𑀥𑀻𑀢𑀺 𑀮𑀤𑁆𑀥𑀦𑀸𑀫𑀲𑁆𑀲 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀫𑀕𑁆𑀕𑀜𑀸𑀡𑀲𑁆𑀲𑁂𑀯 𑀯𑀸 𑀧𑀓𑁆𑀔𑁂 𑀪𑀯𑀸𑀦𑀁 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁, 𑀩𑁄𑀥𑀺𑀓𑁄𑀝𑁆𑀞𑀸𑀲𑀺𑀬𑀸𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀩𑁄𑀥𑀺𑀧𑀓𑁆𑀔𑀺𑀓𑀸𑀦’’𑀦𑁆𑀢𑀺𑀧𑀺 𑀧𑀸𑀞𑁄, 𑀩𑁄𑀥𑀺𑀧𑀓𑁆𑀔𑀯𑀦𑁆𑀢𑀸𑀦𑀁, 𑀩𑁄𑀥𑀺𑀧𑀓𑁆𑀔𑁂 𑀯𑀸 𑀦𑀺𑀬𑀼𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄𑀢𑀺 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄. 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀳𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀧𑀭𑀺𑀬𑀸𑀬𑁂𑀦 𑀩𑁄𑀥𑀺𑀧𑀓𑁆𑀔𑀺𑀬𑀸 𑀦𑀸𑀫, 𑀫𑀕𑁆𑀕𑀓𑁆𑀔𑀡𑁂𑀬𑁂𑀯 𑀧𑀦 𑀢𑁂 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀩𑁄𑀥𑀺𑀧𑀓𑁆𑀔𑀺𑀬𑀸 𑀦𑀸𑀫 𑀳𑁄𑀦𑁆𑀢𑀺.

𑀆𑀲𑀯𑀸𑀦𑀁 𑀔𑀬𑀸𑀢𑀺 𑀓𑀸𑀫𑀸𑀲𑀯𑀸𑀤𑀻𑀦𑀁 𑀲𑀩𑁆𑀩𑁂𑀲𑀁 𑀆𑀲𑀯𑀸𑀦𑀁 𑀔𑀬𑀸. 𑀆𑀲𑀯𑁂𑀲𑀼 𑀳𑀺 𑀔𑀻𑀡𑁂𑀲𑀼 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀔𑀻𑀡𑀸𑀬𑁂𑀯 𑀳𑁄𑀦𑁆𑀢𑀺. 𑀢𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀅𑀦𑀸𑀲𑀯𑀦𑁆𑀢𑀺 𑀆𑀲𑀯𑀯𑀺𑀭𑀳𑀺𑀢𑀁. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀏𑀢𑁆𑀣 𑀘𑁂𑀢𑁄𑀯𑀘𑀦𑁂𑀦 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺, 𑀧𑀜𑁆𑀜𑀸𑀯𑀘𑀦𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀧𑀜𑁆𑀜𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀲𑀫𑀸𑀥𑀺 𑀭𑀸𑀕𑀢𑁄 𑀯𑀺𑀫𑀼𑀢𑁆𑀢𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀧𑀜𑁆𑀜𑀸 𑀅𑀯𑀺𑀚𑁆𑀚𑀸𑀬 𑀯𑀺𑀫𑀼𑀢𑁆𑀢𑀢𑁆𑀢𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀬𑁄 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀫𑀸𑀥𑀺, 𑀢𑀤𑀲𑁆𑀲 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁. 𑀬𑀸 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸, 𑀢𑀤𑀲𑁆𑀲 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻’’𑀢𑀺 (𑀲𑀁. 𑀦𑀺. 𑁫.𑁫𑁧𑁬).

𑀅𑀧𑀺𑀘𑁂𑀢𑁆𑀣 𑀲𑀫𑀣𑀨𑀮𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀯𑀺𑀧𑀲𑁆𑀲𑀦𑀸𑀨𑀮𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀅𑀢𑁆𑀢𑀦𑀸𑀬𑁂𑀯 𑀅𑀪𑀺𑀯𑀺𑀲𑀺𑀝𑁆𑀞𑀸𑀬 𑀧𑀜𑁆𑀜𑀸𑀬 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀅𑀧𑀭𑀧𑁆𑀧𑀘𑁆𑀘𑀬𑁂𑀦 𑀜𑀢𑁆𑀯𑀸. 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀧𑀸𑀧𑀼𑀡𑀺𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀳𑀭𑀢𑀺. 𑀢𑀫𑁂𑀯 𑀲𑀗𑁆𑀕𑀸𑀫𑀲𑀻𑀲𑀁 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀢𑀻𑀢𑀺 𑀫𑀸𑀭𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀯𑀺𑀚𑀺𑀢𑀯𑀺𑀚𑀬𑀢𑁆𑀢𑀸 𑀢𑁂𑀦 𑀓𑀢𑀲𑀗𑁆𑀕𑀸𑀫𑀲𑀗𑁆𑀔𑀸𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀲𑀻𑀲𑀪𑀽𑀢𑀁 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀁, 𑀅𑀪𑀺𑀪𑀯𑀦𑁆𑀢𑁄 𑀆𑀯𑀲𑀢𑀺, 𑀲𑀫𑀸𑀧𑀚𑁆𑀚𑀢𑀺 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀇𑀫𑁂 𑀘 𑀤𑁂𑀯𑀲𑀤𑁆𑀤𑀸 𑀤𑀺𑀝𑁆𑀞𑀲𑀘𑁆𑀘𑁂𑀲𑀼 𑀤𑁂𑀯𑁂𑀲𑀼 𑀧𑀯𑀢𑁆𑀢𑀦𑁆𑀢𑀺, 𑀯𑀺𑀲𑁂𑀲𑀢𑁄 𑀲𑀼𑀤𑁆𑀥𑀸𑀯𑀸𑀲𑀤𑁂𑀯𑁂𑀲𑀽𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀕𑀸𑀣𑀸𑀲𑀼 𑀫𑀳𑀦𑁆𑀢𑀦𑁆𑀢𑀺 𑀲𑀻𑀮𑀸𑀤𑀺𑀕𑀼𑀡𑀫𑀳𑀢𑁆𑀢𑁂𑀦 𑀫𑀳𑀦𑁆𑀢𑀁. 𑀯𑀻𑀢𑀲𑀸𑀭𑀤𑀦𑁆𑀢𑀺 𑀲𑀸𑀭𑀚𑁆𑀚𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁂𑀦 𑀯𑀺𑀕𑀢𑀲𑀸𑀭𑀚𑁆𑀚𑀁 𑀅𑀧𑀕𑀢𑀫𑀗𑁆𑀓𑀼𑀪𑀸𑀯𑀁. 𑀧𑀼𑀭𑀺𑀲𑀸𑀚𑀜𑁆𑀜𑀸𑀢𑀺 𑀅𑀲𑁆𑀲𑀸𑀤𑀻𑀲𑀼 𑀅𑀲𑁆𑀲𑀸𑀚𑀸𑀦𑀻𑀬𑀸𑀤𑀬𑁄 𑀯𑀺𑀬 𑀧𑀼𑀭𑀺𑀲𑁂𑀲𑀼 𑀆𑀚𑀸𑀦𑀻𑀬𑀪𑀽𑀢𑀸 𑀉𑀢𑁆𑀢𑀫𑀧𑀼𑀭𑀺𑀲𑀸. 𑀤𑀼𑀚𑁆𑀚𑀬𑀫𑀚𑁆𑀛𑀪𑀽𑀢𑀺 𑀧𑀘𑀼𑀭𑀚𑀦𑁂𑀳𑀺 𑀚𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀓𑀺𑀮𑁂𑀲𑀯𑀸𑀳𑀺𑀦𑀺𑀁 𑀅𑀪𑀺𑀪𑀯𑀺 𑀅𑀚𑁆𑀛𑁄𑀢𑁆𑀣𑀭𑀺. ‘‘𑀅𑀚𑁆𑀚𑀬𑀻’’𑀢𑀺𑀧𑀺 𑀧𑀞𑀦𑁆𑀢𑀺, 𑀅𑀚𑀺𑀦𑀻𑀢𑀺 𑀅𑀢𑁆𑀣𑁄. 𑀚𑁂𑀢𑁆𑀯𑀸𑀦 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀯𑀺𑀫𑁄𑀓𑁆𑀔𑁂𑀦 𑀅𑀦𑀸𑀯𑀭𑀦𑁆𑀢𑀺 𑀮𑁄𑀓𑀢𑁆𑀢𑀬𑀸𑀪𑀺𑀩𑁆𑀬𑀸𑀧𑀦𑀢𑁄 𑀤𑀺𑀬𑀟𑁆𑀠𑀲𑀳𑀲𑁆𑀲𑀸𑀤𑀺𑀯𑀺𑀪𑀸𑀕𑀢𑁄 𑀘 𑀯𑀺𑀧𑀼𑀮𑀢𑁆𑀢𑀸 𑀅𑀜𑁆𑀜𑁂𑀳𑀺 𑀆𑀯𑀭𑀺𑀢𑀼𑀁 𑀧𑀝𑀺𑀲𑁂𑀥𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀘 𑀅𑀦𑀸𑀯𑀭𑀁, 𑀫𑀘𑁆𑀘𑀼𑀦𑁄 𑀫𑀸𑀭𑀲𑁆𑀲 𑀲𑁂𑀦𑀁 𑀯𑀺𑀫𑁄𑀓𑁆𑀔𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀚𑁂𑀢𑁆𑀯𑀸 𑀬𑁄 𑀢𑁆𑀯𑀁 𑀤𑀼𑀚𑁆𑀚𑀬𑀁 𑀅𑀚𑀬𑀺, 𑀢𑀲𑁆𑀲 𑀦𑀫𑁄, 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀇𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀳𑀺-𑀇𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀏𑀢𑀁 𑀧𑀢𑁆𑀢𑀫𑀸𑀦𑀲𑀁 𑀅𑀥𑀺𑀕𑀢𑀸𑀭𑀳𑀢𑁆𑀢𑀁 𑀔𑀻𑀡𑀸𑀲𑀯𑀁 𑀤𑁂𑀯𑀢𑀸𑀦𑀫𑀲𑁆𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀇𑀢𑀻𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦. 𑀓𑀺𑀁 𑀧𑀦 𑀏𑀢𑀁 𑀓𑀸𑀭𑀡𑀁? 𑀦𑀫𑀼𑀘𑀺𑀲𑁂𑀦𑀸𑀯𑀺𑀚𑀬𑁂𑀦 𑀧𑀢𑁆𑀢𑀫𑀸𑀦𑀲𑀢𑁆𑀢𑀁. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀢𑀁 𑀤𑁂𑀯𑀢𑀸 𑀦𑀫𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀁 𑀓𑀸𑀭𑀡𑀁 𑀨𑀮𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀜𑁆𑀳𑀺 𑀢𑀲𑁆𑀲 𑀦 𑀧𑀲𑁆𑀲𑀦𑁆𑀢𑀺, 𑀬𑁂𑀦 𑀫𑀘𑁆𑀘𑀼𑀯𑀲𑀁 𑀯𑀚𑁂’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀫𑀸 𑀢𑀲𑁆𑀲 𑀧𑀼𑀭𑀺𑀲𑀸𑀚𑀜𑁆𑀜𑀲𑁆𑀲 𑀧𑀡𑀺𑀥𑀸𑀬 𑀕𑀯𑁂𑀲𑀦𑁆𑀢𑀸𑀧𑀺 𑀤𑁂𑀯𑀸 𑀅𑀡𑀼𑀫𑀢𑁆𑀢𑀫𑁆𑀧𑀺 𑀢𑀁 𑀓𑀸𑀭𑀡𑀁 𑀦 𑀧𑀲𑁆𑀲𑀦𑁆𑀢𑀺, 𑀬𑁂𑀦 𑀲𑁄 𑀫𑀘𑁆𑀘𑀼𑀦𑁄 𑀫𑀭𑀡𑀲𑁆𑀲 𑀯𑀲𑀁 𑀯𑀚𑁂 𑀉𑀧𑀕𑀘𑁆𑀙𑁂𑀬𑁆𑀬. 𑀢𑀲𑁆𑀫𑀸 𑀢𑀁 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀦𑀫𑀲𑁆𑀲𑀦𑁆𑀢𑀻𑀢𑀺.

𑀢𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.