𑁪. 𑀧𑀜𑁆𑀘𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩. 𑀘𑀢𑀼𑀢𑁆𑀣𑁂 𑀬𑀤𑀸𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀤𑁂𑀯𑁄𑀢𑀺 𑀉𑀧𑀧𑀢𑁆𑀢𑀺𑀤𑁂𑀯𑁄. 𑀢𑀬𑁄 𑀳𑀺 𑀤𑁂𑀯𑀸 𑁋 𑀲𑀫𑁆𑀫𑀼𑀢𑀺𑀤𑁂𑀯𑀸, 𑀉𑀧𑀧𑀢𑁆𑀢𑀺𑀤𑁂𑀯𑀸, 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀢𑀺. 𑀢𑁂𑀲𑀼 𑀲𑀫𑁆𑀫𑀼𑀢𑀺𑀤𑁂𑀯𑀸 𑀦𑀸𑀫 𑀭𑀸𑀚𑀸𑀦𑁄 𑀔𑀢𑁆𑀢𑀺𑀬𑀸. 𑀉𑀧𑀧𑀢𑁆𑀢𑀺𑀤𑁂𑀯𑀸 𑀦𑀸𑀫 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑁄 𑀧𑀝𑁆𑀞𑀸𑀬 𑀢𑀤𑀼𑀧𑀭𑀺𑀤𑁂𑀯𑀸. 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀦𑀸𑀫 𑀔𑀻𑀡𑀸𑀲𑀯𑀸. 𑀇𑀥 𑀧𑀦 𑀓𑀸𑀫𑀸𑀯𑀘𑀭𑀤𑁂𑀯𑁄 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑁂𑀯𑁄𑀢𑀺 𑀉𑀧𑀧𑀢𑁆𑀢𑀺𑀤𑁂𑀯𑁄’’𑀢𑀺. 𑀤𑁂𑀯𑀓𑀸𑀬𑀸𑀢𑀺 𑀤𑁂𑀯𑀲𑀫𑀽𑀳𑀢𑁄, 𑀤𑁂𑀯𑀝𑁆𑀞𑀸𑀦𑀢𑁄 𑀯𑀸, 𑀤𑁂𑀯𑀮𑁄𑀓𑀢𑁄𑀢𑀺 𑀅𑀢𑁆𑀣𑁄. 𑀲𑀫𑀽𑀳𑀦𑀺𑀯𑀸𑀲𑀯𑀸𑀘𑀓𑁄 𑀳𑀺 𑀅𑀬𑀁 𑀓𑀸𑀬𑀲𑀤𑁆𑀤𑁄. 𑀘𑀯𑀦𑀥𑀫𑁆𑀫𑁄𑀢𑀺 𑀫𑀭𑀡𑀥𑀫𑁆𑀫𑁄, 𑀆𑀬𑀼𑀓𑁆𑀔𑀬𑁂𑀦 𑀯𑀸 𑀧𑀼𑀜𑁆𑀜𑀓𑁆𑀔𑀬𑁂𑀦 𑀯𑀸 𑀉𑀧𑀝𑁆𑀞𑀺𑀢𑀫𑀭𑀡𑁄𑀢𑀺 𑀅𑀢𑁆𑀣𑁄.

𑀧𑀜𑁆𑀘𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀅𑀲𑁆𑀲 𑀉𑀧𑀝𑁆𑀞𑀺𑀢𑀫𑀭𑀡𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀧𑀜𑁆𑀘 𑀫𑀭𑀡𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀧𑀓𑀸𑀲𑀸𑀦𑀺 𑀯𑀸 𑀳𑁄𑀦𑁆𑀢𑀺. 𑀫𑀸𑀮𑀸 𑀫𑀺𑀮𑀸𑀬𑀦𑁆𑀢𑀻𑀢𑀺 𑀢𑁂𑀦 𑀧𑀺𑀴𑀦𑁆𑀥𑀺𑀢𑀫𑀸𑀮𑀸 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂 𑀆𑀢𑀧𑁂 𑀔𑀺𑀢𑁆𑀢𑀸 𑀯𑀺𑀬 𑀫𑀺𑀮𑀸𑀢𑀸 𑀯𑀺𑀳𑀢𑀲𑁄𑀪𑀸 𑀳𑁄𑀦𑁆𑀢𑀺.

𑀯𑀢𑁆𑀣𑀸𑀦𑀺 𑀓𑀺𑀮𑀺𑀲𑁆𑀲𑀦𑁆𑀢𑀻𑀢𑀺 𑀲𑀭𑀤𑀲𑀫𑀬𑁂 𑀯𑀺𑀕𑀢𑀯𑀮𑀸𑀳𑀓𑁂 𑀆𑀓𑀸𑀲𑁂 𑀅𑀩𑁆𑀪𑀼𑀲𑁆𑀲𑀓𑁆𑀓𑀫𑀸𑀦𑀩𑀸𑀮𑀲𑀽𑀭𑀺𑀬𑀲𑀤𑀺𑀲𑀧𑁆𑀧𑀪𑀸𑀦𑀺 𑀦𑀸𑀦𑀸𑀯𑀺𑀭𑀸𑀕𑀯𑀡𑁆𑀡𑀸𑀦𑀺 𑀢𑁂𑀦 𑀦𑀺𑀯𑀢𑁆𑀣𑀧𑀸𑀭𑀼𑀢𑀯𑀢𑁆𑀣𑀸𑀦𑀺 𑀢𑀁 𑀔𑀡𑀁𑀬𑁂𑀯 𑀓𑀤𑁆𑀤𑀫𑁂 𑀔𑀺𑀧𑀺𑀢𑁆𑀯𑀸 𑀫𑀤𑁆𑀤𑀺𑀢𑀸𑀦𑀺 𑀯𑀺𑀬 𑀯𑀺𑀳𑀢𑀧𑁆𑀧𑀪𑀸𑀦𑀺 𑀫𑀮𑀺𑀦𑀸𑀦𑀺 𑀳𑁄𑀦𑁆𑀢𑀺.

𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀻𑀢𑀺 𑀲𑀼𑀧𑀭𑀺𑀲𑀼𑀤𑁆𑀥𑀚𑀸𑀢𑀺𑀫𑀡𑀺 𑀯𑀺𑀬 𑀲𑀼𑀲𑀺𑀓𑁆𑀔𑀺𑀢𑀲𑀺𑀧𑁆𑀧𑀸𑀘𑀭𑀺𑀬𑀭𑀘𑀺𑀢𑀲𑀼𑀯𑀡𑁆𑀡𑀧𑀝𑀺𑀫𑀸 𑀯𑀺𑀬 𑀘 𑀧𑀼𑀩𑁆𑀩𑁂 𑀲𑁂𑀤𑀫𑀮𑀚𑀮𑁆𑀮𑀺𑀓𑀸𑀭𑀳𑀺𑀢𑀲𑀭𑀻𑀭𑀲𑁆𑀲 𑀢𑀲𑁆𑀫𑀺𑀁 𑀔𑀡𑁂 𑀉𑀪𑁄𑀳𑀺 𑀓𑀘𑁆𑀙𑁂𑀳𑀺 𑀲𑁂𑀤𑀥𑀸𑀭𑀸 𑀲𑀦𑁆𑀤𑀦𑁆𑀢𑀺 𑀧𑀕𑁆𑀖𑀭𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀓𑀘𑁆𑀙𑁂𑀳𑀺𑀬𑁂𑀯, 𑀲𑀓𑀮𑀲𑀭𑀻𑀭𑀢𑁄𑀧𑀺 𑀧𑀦𑀲𑁆𑀲 𑀲𑁂𑀤𑀚𑀮𑀓𑀡𑁆𑀡𑀺𑀓𑀸 𑀫𑀼𑀘𑁆𑀘𑀢𑀺𑀬𑁂𑀯, 𑀬𑁂𑀦 𑀆𑀫𑀼𑀢𑁆𑀢𑀫𑀼𑀢𑁆𑀢𑀸𑀚𑀸𑀮𑀕𑀯𑀘𑁆𑀙𑀺𑀢𑁄 𑀯𑀺𑀬 𑀢𑀲𑁆𑀲 𑀓𑀸𑀬𑁄 𑀳𑁄𑀢𑀺.

𑀓𑀸𑀬𑁂 𑀤𑀼𑀩𑁆𑀩𑀡𑁆𑀡𑀺𑀬𑀁 𑀑𑀓𑁆𑀓𑀫𑀢𑀻𑀢𑀺 𑀧𑀼𑀩𑁆𑀩𑁂 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀬𑀣𑀸𑀦𑀼𑀪𑀸𑀯𑀁 𑀏𑀓𑀬𑁄𑀚𑀦𑀁 𑀤𑁆𑀯𑀺𑀬𑁄𑀚𑀦𑀁 𑀬𑀸𑀯 𑀤𑁆𑀯𑀸𑀤𑀲𑀬𑁄𑀚𑀦𑀫𑀢𑁆𑀢𑀫𑁆𑀧𑀺 𑀧𑀤𑁂𑀲𑀁 𑀆𑀪𑀸𑀬 𑀨𑀭𑀺𑀢𑁆𑀯𑀸 𑀯𑀺𑀚𑁆𑀚𑁄𑀢𑀫𑀸𑀦𑁄 𑀓𑀸𑀬𑁄 𑀳𑁄𑀢𑀺 𑀔𑀡𑁆𑀟𑀺𑀘𑁆𑀘𑀧𑀸𑀮𑀺𑀘𑁆𑀘𑀸𑀤𑀺𑀯𑀺𑀭𑀳𑀺𑀢𑁄, 𑀦 𑀲𑀻𑀢𑀁 𑀦 𑀉𑀡𑁆𑀳𑀁 𑀉𑀧𑀖𑀸𑀢𑀓𑀁, 𑀤𑁂𑀯𑀥𑀻𑀢𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀯𑀺𑀬 𑀳𑁄𑀢𑀺, 𑀤𑁂𑀯𑀧𑀼𑀢𑁆𑀢𑁄 𑀯𑀻𑀲𑀢𑀺𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀯𑀺𑀬, 𑀢𑀁 𑀔𑀡𑀁𑀬𑁂𑀯 𑀦𑀺𑀧𑁆𑀧𑀪𑁂 𑀦𑀺𑀢𑁆𑀢𑁂𑀚𑁂 𑀓𑀸𑀬𑁂 𑀯𑀺𑀭𑀽𑀧𑀪𑀸𑀯𑁄 𑀅𑀦𑀼𑀧𑀯𑀺𑀲𑀢𑀺 𑀲𑀡𑁆𑀞𑀸𑀢𑀺.

𑀲𑀓𑁂 𑀤𑁂𑀯𑁄 𑀤𑁂𑀯𑀸𑀲𑀦𑁂 𑀦𑀸𑀪𑀺𑀭𑀫𑀢𑀻𑀢𑀺 𑀅𑀢𑁆𑀢𑀦𑁄 𑀅𑀘𑁆𑀙𑀭𑀸𑀕𑀡𑁂𑀳𑀺 𑀲𑀤𑁆𑀥𑀺𑀁 𑀓𑀻𑀴𑀦𑀧𑀭𑀺𑀘𑀭𑀡𑀓𑀤𑀺𑀩𑁆𑀩𑀸𑀲𑀦𑁂 𑀦 𑀭𑀫𑀢𑀺, 𑀦 𑀘𑀺𑀢𑁆𑀢𑀲𑁆𑀲𑀸𑀤𑀁 𑀮𑀪𑀢𑀺. 𑀢𑀲𑁆𑀲 𑀓𑀺𑀭 𑀫𑀦𑀼𑀲𑁆𑀲𑀕𑀡𑀦𑀸𑀬 𑀲𑀢𑁆𑀢𑀳𑀺 𑀤𑀺𑀯𑀲𑁂𑀳𑀺 𑀫𑀭𑀡𑀁 𑀪𑀯𑀺𑀲𑁆𑀲𑀢𑀻𑀢𑀺 𑀇𑀫𑀸𑀦𑀺 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺. 𑀲𑁄 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺𑀬𑀸 ‘‘𑀏𑀯𑀭𑀽𑀧𑀸𑀬 𑀦𑀸𑀫 𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀩𑀮𑀯𑀲𑁄𑀓𑀸𑀪𑀺𑀪𑀽𑀢𑁄 𑀳𑁄𑀢𑀺. 𑀢𑁂𑀦𑀲𑁆𑀲 𑀓𑀸𑀬𑁂 𑀫𑀳𑀸𑀧𑀭𑀺𑀴𑀸𑀳𑁄 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀲𑀩𑁆𑀩𑀢𑁄 𑀕𑀢𑁆𑀢𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺. 𑀘𑀺𑀭𑀢𑀭𑀁 𑀓𑀸𑀮𑀁 𑀅𑀧𑀭𑀺𑀘𑀺𑀢𑀤𑀼𑀓𑁆𑀔𑁄 𑀢𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀏𑀓𑀘𑁆𑀘𑁄 ‘‘𑀤𑀬𑁆𑀳𑀸𑀫𑀺 𑀤𑀬𑁆𑀳𑀸𑀫𑀻’’𑀢𑀺 𑀓𑀦𑁆𑀤𑀦𑁆𑀢𑁄 𑀧𑀭𑀺𑀤𑁂𑀯𑀦𑁆𑀢𑁄 𑀓𑀢𑁆𑀣𑀘𑀺 𑀅𑀲𑁆𑀲𑀸𑀤𑀁 𑀅𑀮𑀪𑀦𑁆𑀢𑁄 𑀯𑀺𑀚𑀧𑁆𑀧𑀦𑁆𑀢𑁄 𑀯𑀺𑀮𑀧𑀦𑁆𑀢𑁄 𑀢𑀳𑀺𑀁 𑀢𑀳𑀺𑀁 𑀆𑀳𑀺𑀡𑁆𑀟𑀢𑀺. 𑀏𑀓𑀘𑁆𑀘𑁄 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀓𑀸𑀬𑀯𑀸𑀘𑀸𑀳𑀺 𑀯𑀺𑀓𑀸𑀭𑀁 𑀅𑀓𑀭𑁄𑀦𑁆𑀢𑁄𑀧𑀺 𑀧𑀺𑀬𑀯𑀺𑀧𑁆𑀧𑀬𑁄𑀕𑀤𑀼𑀓𑁆𑀔𑀁 𑀅𑀲𑀳𑀦𑁆𑀢𑁄 𑀯𑀺𑀳𑀜𑁆𑀜𑀫𑀸𑀦𑁄 𑀯𑀺𑀘𑀭𑀢𑀺.

𑀇𑀫𑀸𑀦𑀺 𑀧𑀦 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀬𑀣𑀸 𑀮𑁄𑀓𑁂 𑀫𑀳𑀸𑀧𑀼𑀜𑁆𑀜𑀸𑀦𑀁 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀦𑀁𑀬𑁂𑀯 𑀉𑀓𑁆𑀓𑀸𑀧𑀸𑀢𑀪𑀽𑀫𑀺𑀘𑀸𑀮𑀘𑀦𑁆𑀤𑀕𑁆𑀕𑀸𑀳𑀸𑀤𑀻𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀲𑀩𑁆𑀩𑁂𑀲𑀁; 𑀏𑀯𑀫𑁂𑀯 𑀫𑀳𑁂𑀲𑀓𑁆𑀔𑀤𑁂𑀯𑀸𑀦𑀁𑀬𑁂𑀯 𑀧𑀜𑁆𑀜𑀸𑀬𑀢𑀺. 𑀉𑀧𑁆𑀧𑀦𑁆𑀦𑀸𑀦𑀺 𑀘 𑀢𑀸𑀦𑀺 ‘‘𑀇𑀫𑀸𑀦𑀺 𑀫𑀭𑀡𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀦𑀸𑀫𑀸’’𑀢𑀺 𑀓𑁂𑀘𑀺 𑀤𑁂𑀯𑀸 𑀚𑀸𑀦𑀦𑁆𑀢𑀺, 𑀦 𑀲𑀩𑁆𑀩𑁂. 𑀢𑀢𑁆𑀣 𑀬𑁄 𑀫𑀦𑁆𑀤𑁂𑀦 𑀓𑀼𑀲𑀮𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑁄, 𑀲𑁄 ‘‘𑀇𑀤𑀸𑀦𑀺 𑀓𑁄 𑀚𑀸𑀦𑀸𑀢𑀺, ‘𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀻’’’𑀢𑀺 𑀪𑀸𑀬𑀢𑀺. 𑀬𑁄 𑀧𑀦 𑀫𑀳𑀸𑀧𑀼𑀜𑁆𑀜𑁄, 𑀲𑁄 ‘‘𑀩𑀳𑀼𑀁 𑀫𑀬𑀸 𑀤𑀸𑀦𑀁 𑀤𑀺𑀦𑁆𑀦𑀁, 𑀲𑀻𑀮𑀁 𑀭𑀓𑁆𑀔𑀺𑀢𑀁, 𑀧𑀼𑀜𑁆𑀜𑀁 𑀉𑀧𑀘𑀺𑀢𑀁, 𑀇𑀢𑁄 𑀘𑀼𑀢𑀲𑁆𑀲 𑀫𑁂 𑀲𑀼𑀕𑀢𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸’’𑀢𑀺 𑀦 𑀪𑀸𑀬𑀢𑀺 𑀦 𑀯𑀺𑀓𑀫𑁆𑀧𑀢𑀺. 𑀏𑀯𑀁 𑀉𑀧𑀝𑁆𑀞𑀺𑀢𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀧𑀦 𑀢𑀁 𑀕𑀳𑁂𑀢𑁆𑀯𑀸 𑀤𑁂𑀯𑀢𑀸 𑀦𑀦𑁆𑀤𑀦𑀯𑀦𑀁 𑀧𑀯𑁂𑀲𑁂𑀦𑁆𑀢𑀺 𑀲𑀩𑁆𑀩𑀤𑁂𑀯𑀮𑁄𑀓𑁂𑀲𑀼 𑀦𑀦𑁆𑀤𑀦𑀯𑀦𑀁 𑀅𑀢𑁆𑀣𑀺𑀬𑁂𑀯.

𑀢𑀻𑀳𑀺 𑀯𑀸𑀘𑀸𑀳𑀺 𑀅𑀦𑀼𑀫𑁄𑀤𑁂𑀦𑁆𑀢𑀻𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁂𑀳𑀺 𑀢𑀻𑀳𑀺 𑀯𑀘𑀦𑁂𑀳𑀺 𑀅𑀦𑀼𑀫𑁄𑀤𑁂𑀦𑁆𑀢𑀺, 𑀫𑁄𑀤𑀁 𑀧𑀫𑁄𑀤𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀅𑀲𑁆𑀲𑀸𑀲𑁂𑀦𑁆𑀢𑀺, 𑀅𑀪𑀺𑀯𑀤𑀦𑀯𑀲𑁂𑀦 𑀯𑀸 𑀢𑀁𑀔𑀡𑀸𑀦𑀼𑀭𑀽𑀧𑀁 𑀧𑀫𑁄𑀤𑀁 𑀓𑀭𑁄𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀅𑀦𑀼𑀫𑁄𑀤𑁂𑀦𑁆𑀢𑀻’’𑀢𑀺 𑀧𑀤𑀲𑁆𑀲 ‘‘𑀑𑀯𑀤𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀇𑀢𑁄𑀢𑀺 𑀤𑁂𑀯𑀮𑁄𑀓𑀢𑁄. 𑀪𑁄𑀢𑀺 𑀆𑀮𑀧𑀦𑀁. 𑀲𑀼𑀕𑀢𑀺𑀦𑁆𑀢𑀺 𑀲𑀼𑀦𑁆𑀤𑀭𑀕𑀢𑀺𑀁, 𑀫𑀦𑀼𑀲𑁆𑀲𑀮𑁄𑀓𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀕𑀘𑁆𑀙𑀸𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀉𑀧𑁂𑀳𑀺.

𑀏𑀯𑀁 𑀯𑀼𑀢𑁆𑀢𑁂𑀢𑀺 𑀏𑀯𑀁 𑀢𑀤𑀸 𑀢𑁂𑀳𑀺 𑀤𑁂𑀯𑁂𑀳𑀺 𑀢𑀲𑁆𑀲 ‘‘𑀇𑀢𑁄 𑀪𑁄 𑀲𑀼𑀕𑀢𑀺𑀁 𑀕𑀘𑁆𑀙𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀯𑀘𑀦𑁂 𑀪𑀕𑀯𑀢𑀸 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀦𑀸𑀫𑀕𑁄𑀢𑁆𑀢𑁂𑀦 𑀅𑀧𑀸𑀓𑀝𑁄 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀦𑀺𑀲𑀺𑀦𑁆𑀦𑁄 𑀅𑀦𑀼𑀲𑀦𑁆𑀥𑀺𑀓𑀼𑀲𑀮𑁄 𑀏𑀓𑁄 𑀪𑀺𑀓𑁆𑀔𑀼 ‘‘𑀏𑀢𑁂 𑀲𑀼𑀕𑀢𑀺𑀆𑀤𑀬𑁄 𑀪𑀕𑀯𑀢𑀸 𑀅𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑀸 𑀅𑀯𑀺𑀪𑀽𑀢𑀸, 𑀳𑀦𑁆𑀤 𑀢𑁂 𑀯𑀺𑀪𑀽𑀢𑀢𑀭𑁂 𑀓𑀸𑀭𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀏𑀢𑀁 ‘‘𑀓𑀺𑀁𑀦𑀼 𑀔𑁄, 𑀪𑀦𑁆𑀢𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀲𑀤𑁆𑀥𑀸𑀤𑀺𑀕𑀼𑀡𑀯𑀺𑀲𑁂𑀲𑀧𑀝𑀺𑀮𑀸𑀪𑀓𑀸𑀭𑀡𑀢𑁄 𑀤𑁂𑀯𑀽𑀧𑀧𑀢𑁆𑀢𑀺𑀳𑁂𑀢𑀼𑀢𑁄 𑀘 𑀫𑀦𑀼𑀲𑁆𑀲𑀢𑁆𑀢𑀁 𑀤𑁂𑀯𑀸𑀦𑀁 𑀅𑀪𑀺𑀲𑀫𑁆𑀫𑀢𑀦𑁆𑀢𑀺 𑀆𑀳 ‘‘𑀫𑀦𑀼𑀲𑁆𑀲𑀢𑁆𑀢𑀁 𑀔𑁄 𑀪𑀺𑀓𑁆𑀔𑀼 𑀤𑁂𑀯𑀸𑀦𑀁 𑀲𑀼𑀕𑀢𑀺𑀕𑀫𑀦𑀲𑀗𑁆𑀔𑀸𑀢’’𑀦𑁆𑀢𑀺.

𑀲𑀼𑀕𑀢𑀺𑀕𑀫𑀦𑀲𑀗𑁆𑀔𑀸𑀢𑀦𑁆𑀢𑀺 ‘‘𑀲𑀼𑀕𑀢𑀺𑀕𑀫𑀦’’𑀦𑁆𑀢𑀺 𑀲𑀫𑁆𑀫𑀸 𑀓𑀣𑀺𑀢𑀁, 𑀯𑀡𑁆𑀡𑀺𑀢𑀁 𑀣𑁄𑀫𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀁 𑀫𑀦𑀼𑀲𑁆𑀲𑀪𑀽𑀢𑁄𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁, 𑀢𑁂𑀦 𑀧𑀝𑀺𑀮𑀪𑀢𑀻𑀢𑀺 𑀏𑀢𑁆𑀣 𑀧𑀝𑀺𑀮𑀪𑀦𑀓𑀺𑀭𑀺𑀬𑀸 𑀆𑀫𑀲𑀻𑀬𑀢𑀺, 𑀬𑁄 𑀲𑀤𑁆𑀥𑀸𑀧𑀝𑀺𑀮𑀸𑀪𑁄𑀢𑀺 𑀅𑀢𑁆𑀣𑁄. 𑀫𑀦𑀼𑀲𑁆𑀲𑀪𑀽𑀢𑁄𑀢𑀺 𑀫𑀦𑀼𑀲𑁆𑀲𑁂𑀲𑀼 𑀉𑀧𑁆𑀧𑀦𑁆𑀦𑁄, 𑀫𑀦𑀼𑀲𑁆𑀲𑀪𑀸𑀯𑀁 𑀯𑀸 𑀧𑀢𑁆𑀢𑁄. 𑀬𑀲𑁆𑀫𑀸 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑀸𑀦𑀁 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀸 𑀬𑁂𑀪𑀼𑀬𑁆𑀬𑁂𑀦 𑀤𑀼𑀮𑁆𑀮𑀪𑀸 𑀲𑀯𑀦𑀸𑀬, 𑀦 𑀢𑀣𑀸 𑀫𑀦𑀼𑀲𑁆𑀲𑀸𑀦𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑀦𑀼𑀲𑁆𑀲𑀪𑀽𑀢𑁄’’𑀢𑀺. 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂𑀢𑀺 𑀢𑀣𑀸𑀕𑀢𑁂𑀦 𑀪𑀕𑀯𑀢𑀸 𑀤𑁂𑀲𑀺𑀢𑁂 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑁂 𑀲𑀸𑀲𑀦𑁂. 𑀢𑀜𑁆𑀳𑀺 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑁄 𑀘, 𑀆𑀲𑀬𑀸𑀦𑀼𑀭𑀽𑀧𑀁 𑀯𑀺𑀦𑁂𑀬𑁆𑀬𑀸𑀦𑀁 𑀯𑀺𑀦𑀬𑀦𑀢𑁄 𑀯𑀺𑀦𑀬𑁄 𑀘𑀸𑀢𑀺 𑀥𑀫𑁆𑀫𑀯𑀺𑀦𑀬𑁄, 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀯𑀸 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑀁 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀁 𑀯𑀺𑀦𑁂𑀢𑀻𑀢𑀺 𑀥𑀫𑁆𑀫𑀯𑀺𑀦𑀬𑁄. 𑀥𑀫𑁆𑀫𑁂𑀦𑁂𑀯 𑀯𑀸 𑀯𑀺𑀦𑀬𑁄, 𑀦 𑀤𑀡𑁆𑀟𑀲𑀢𑁆𑀣𑁂𑀳𑀻𑀢𑀺 𑀥𑀫𑁆𑀫𑀯𑀺𑀦𑀬𑁄, 𑀥𑀫𑁆𑀫𑀬𑀼𑀢𑁆𑀢𑁄 𑀯𑀸 𑀯𑀺𑀦𑀬𑁄𑀢𑀺 𑀥𑀫𑁆𑀫𑀯𑀺𑀦𑀬𑁄, 𑀥𑀫𑁆𑀫𑀸𑀬 𑀯𑀸 𑀲𑀳 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀬 𑀯𑀺𑀦𑀬𑁄𑀢𑀺 𑀥𑀫𑁆𑀫𑀯𑀺𑀦𑀬𑁄, 𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀥𑀫𑁆𑀫𑀢𑁄 𑀯𑀸 𑀧𑀯𑀢𑁆𑀢𑁄 𑀯𑀺𑀦𑀬𑁄𑀢𑀺 𑀥𑀫𑁆𑀫𑀯𑀺𑀦𑀬𑁄. 𑀥𑀫𑁆𑀫𑁄 𑀯𑀸 𑀪𑀕𑀯𑀸 𑀥𑀫𑁆𑀫𑀪𑀽𑀢𑁄 𑀥𑀫𑁆𑀫𑀓𑀸𑀬𑁄 𑀥𑀫𑁆𑀫𑀲𑁆𑀲𑀸𑀫𑀻, 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀯𑀺𑀦𑀬𑁄, 𑀦 𑀢𑀓𑁆𑀓𑀺𑀬𑀸𑀦𑀦𑁆𑀢𑀺 𑀥𑀫𑁆𑀫𑀯𑀺𑀦𑀬𑁄, 𑀥𑀫𑁆𑀫𑁂 𑀯𑀸 𑀫𑀕𑁆𑀕𑀨𑀮𑁂 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀯𑀺𑀲𑀬𑀪𑀽𑀢𑁂 𑀯𑀸 𑀧𑀯𑀢𑁆𑀢𑁄 𑀯𑀺𑀦𑀬𑁄𑀢𑀺 𑀥𑀫𑁆𑀫𑀯𑀺𑀦𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂.

𑀲𑀤𑁆𑀥𑀁 𑀧𑀝𑀺𑀮𑀪𑀢𑀻𑀢𑀺 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀲𑀤𑁆𑀥𑀁 𑀉𑀧𑁆𑀧𑀸𑀤𑁂𑀢𑀺. 𑀲𑀤𑁆𑀥𑁄 𑀳𑀺 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂 𑀆𑀭𑀸𑀥𑁂𑀲𑁆𑀲𑀢𑀺. 𑀲𑀼𑀮𑀤𑁆𑀥𑀮𑀸𑀪𑀲𑀗𑁆𑀔𑀸𑀢𑀦𑁆𑀢𑀺 𑀏𑀢𑁆𑀣 𑀬𑀣𑀸 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀔𑁂𑀢𑁆𑀢𑀯𑀢𑁆𑀣𑀸𑀤𑀺𑀮𑀸𑀪𑁄 𑀲𑀢𑁆𑀢𑀸𑀦𑀁 𑀉𑀧𑀪𑁄𑀕𑀲𑀼𑀔𑀁 𑀆𑀯𑀳𑀢𑀺, 𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀤𑀼𑀓𑁆𑀔𑀁 𑀧𑀝𑀺𑀩𑀸𑀳𑀢𑀺, 𑀥𑀦𑀤𑀸𑀮𑀺𑀤𑁆𑀤𑀺𑀬𑀁 𑀯𑀽𑀧𑀲𑀫𑁂𑀢𑀺, 𑀫𑀼𑀢𑁆𑀢𑀸𑀤𑀺𑀭𑀢𑀦𑀧𑀝𑀺𑀮𑀸𑀪𑀳𑁂𑀢𑀼 𑀳𑁄𑀢𑀺, 𑀮𑁄𑀓𑀲𑀦𑁆𑀢𑀢𑀺𑀜𑁆𑀘 𑀆𑀯𑀳𑀢𑀺; 𑀏𑀯𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀲𑀤𑁆𑀥𑀸𑀧𑀺 𑀬𑀣𑀸𑀲𑀫𑁆𑀪𑀯𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀁 𑀯𑀺𑀧𑀸𑀓𑀲𑀼𑀔𑀫𑀸𑀯𑀳𑀢𑀺, 𑀲𑀤𑁆𑀥𑀸𑀥𑀼𑀭𑁂𑀦 𑀧𑀝𑀺𑀧𑀦𑁆𑀦𑀸𑀦𑀁 𑀚𑀸𑀢𑀺𑀚𑀭𑀸𑀤𑀺𑀤𑀼𑀓𑁆𑀔𑀁 𑀧𑀝𑀺𑀩𑀸𑀳𑀢𑀺, 𑀕𑀼𑀡𑀤𑀸𑀮𑀺𑀤𑁆𑀤𑀺𑀬𑀁 𑀯𑀽𑀧𑀲𑀫𑁂𑀢𑀺, 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀺𑀭𑀢𑀦𑀧𑀝𑀺𑀮𑀸𑀪𑀳𑁂𑀢𑀼 𑀳𑁄𑀢𑀺, 𑀮𑁄𑀓𑀲𑀦𑁆𑀢𑀢𑀺𑀜𑁆𑀘 𑀆𑀯𑀳𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀤𑁆𑀥𑁄 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄, 𑀬𑀲𑁄 𑀪𑁄𑀕𑀲𑀫𑀧𑁆𑀧𑀺𑀢𑁄;

𑀬𑀁 𑀬𑀁 𑀧𑀤𑁂𑀲𑀁 𑀪𑀚𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀽𑀚𑀺𑀢𑁄’’𑀢𑀺. (𑀥. 𑀧. 𑁩𑁦𑁩);

𑀏𑀯𑀁 𑀲𑀤𑁆𑀥𑀸𑀧𑀝𑀺𑀮𑀸𑀪𑀲𑁆𑀲 𑀲𑀼𑀮𑀤𑁆𑀥𑀮𑀸𑀪𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀫𑀸 𑀧𑀦𑀸𑀬𑀁 𑀲𑀤𑁆𑀥𑀸𑀧𑀝𑀺𑀮𑀸𑀪𑁄 𑀅𑀦𑀼𑀕𑀸𑀫𑀺𑀓𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀳𑁂𑀢𑀼, 𑀮𑁄𑀓𑀺𑀬𑀲𑁆𑀲 𑀘 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀥𑀦𑀮𑀸𑀪𑀲𑁆𑀲 𑀓𑀸𑀭𑀡𑀁. 𑀲𑀤𑁆𑀥𑁄𑀬𑁂𑀯 𑀳𑀺 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀉𑀴𑀸𑀭𑀼𑀴𑀸𑀭𑀯𑀺𑀢𑁆𑀢𑀽𑀧𑀓𑀭𑀡𑀸𑀦𑀺 𑀅𑀥𑀺𑀕𑀘𑁆𑀙𑀢𑀺, 𑀢𑁂𑀳𑀺 𑀘 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀅𑀢𑁆𑀣𑀫𑁂𑀯 𑀲𑀫𑁆𑀧𑀸𑀤𑁂𑀢𑀺. 𑀅𑀲𑁆𑀲𑀤𑁆𑀥𑀲𑁆𑀲 𑀧𑀦 𑀢𑀸𑀦𑀺 𑀅𑀦𑀢𑁆𑀣𑀸𑀯𑀳𑀸𑀦𑀺 𑀳𑁄𑀦𑁆𑀢𑀺, 𑀇𑀥 𑀘𑁂𑀯 𑀲𑀫𑁆𑀧𑀭𑀸𑀬𑁂 𑀘𑀸𑀢𑀺, 𑀏𑀯𑀫𑁆𑀧𑀺 𑀲𑀤𑁆𑀥𑀸𑀬 𑀲𑀼𑀮𑀤𑁆𑀥𑀮𑀸𑀪𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑁋

‘‘𑀲𑀤𑁆𑀥𑀸 𑀩𑀦𑁆𑀥𑀢𑀺 𑀧𑀸𑀣𑁂𑀬𑁆𑀬𑀁’’. (𑀲𑀁. 𑀦𑀺. 𑁧.𑁭𑁯).

‘‘𑀲𑀤𑁆𑀥𑀸 𑀤𑀼𑀢𑀺𑀬𑀸 𑀧𑀼𑀭𑀺𑀲𑀲𑁆𑀲 𑀳𑁄𑀢𑀻’’𑀢𑀺 𑀘. (𑀲𑀁. 𑀦𑀺. 𑁧.𑁩𑁬, 𑁫𑁯).

‘‘𑀲𑀤𑁆𑀥𑀻𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞’’𑀦𑁆𑀢𑀺 𑀘. (𑀲𑀁. 𑀦𑀺. 𑁧.𑁭𑁩; 𑀲𑀼. 𑀦𑀺. 𑁧𑁮𑁪).

‘‘𑀲𑀤𑁆𑀥𑀸𑀳𑀢𑁆𑀣𑁄 𑀫𑀳𑀸𑀦𑀸𑀕𑁄’’𑀢𑀺 𑀘. (𑀅. 𑀦𑀺. 𑁬.𑁪𑁩; 𑀣𑁂𑀭𑀕𑀸. 𑁬𑁯𑁪).

‘‘𑀲𑀤𑁆𑀥𑀸 𑀩𑀻𑀚𑀁 𑀢𑀧𑁄 𑀯𑀼𑀝𑁆𑀞𑀻’’𑀢𑀺 𑀘. (𑀲𑀁. 𑀦𑀺. 𑁧.𑁧𑁯𑁭; 𑀲𑀼. 𑀦𑀺. 𑁭𑁭).

‘‘𑀲𑀤𑁆𑀥𑁂𑀲𑀺𑀓𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄’’𑀢𑀺 (𑀅. 𑀦𑀺. 𑁭.𑁬𑁭) 𑀘.

‘‘𑀲𑀤𑁆𑀥𑀸𑀬 𑀢𑀭𑀢𑀺 𑀑𑀖’’𑀦𑁆𑀢𑀺 𑀘. (𑀲𑀁. 𑀦𑀺. 𑁧.𑁨𑁪𑁬) 𑁋

𑀅𑀦𑁂𑀓𑁂𑀲𑀼 𑀞𑀸𑀦𑁂𑀲𑀼 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺 𑀲𑀤𑁆𑀥𑀸 𑀲𑀁𑀯𑀡𑁆𑀡𑀺𑀢𑀸.

𑀇𑀤𑀸𑀦𑀺 𑀬𑀸𑀬 𑀲𑀤𑁆𑀥𑀸𑀬 𑀲𑀸𑀲𑀦𑁂 𑀓𑀼𑀲𑀮𑀥𑀫𑁆𑀫𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄 𑀦𑀸𑀫 𑀳𑁄𑀢𑀺 𑀦𑀺𑀬𑀸𑀫𑁄𑀓𑁆𑀓𑀦𑁆𑀢𑀺𑀬𑀸, 𑀢𑀁 𑀲𑀤𑁆𑀥𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀸 𑀔𑁄 𑀧𑀦𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀲𑁆𑀲𑀸𑀢𑀺 𑀇𑀫𑀲𑁆𑀲 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀦𑀺𑀯𑀺𑀝𑁆𑀞𑀸𑀢𑀺 𑀅𑀪𑀺𑀦𑀺𑀯𑀺𑀝𑁆𑀞𑀸 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸. 𑀫𑀽𑀮𑀚𑀸𑀢𑀸𑀢𑀺 𑀚𑀸𑀢𑀫𑀽𑀮𑀸. 𑀓𑀺𑀁 𑀧𑀦 𑀲𑀤𑁆𑀥𑀸𑀬 𑀫𑀽𑀮𑀁 𑀦𑀸𑀫? 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀲𑁆𑀫𑀺𑀁 𑀑𑀓𑀧𑁆𑀧𑀦𑀳𑁂𑀢𑀼𑀪𑀽𑀢𑁄 𑀉𑀧𑀸𑀬𑀫𑀦𑀲𑀺𑀓𑀸𑀭𑁄. 𑀅𑀧𑀺𑀘 𑀲𑀧𑁆𑀧𑀼𑀭𑀺𑀲𑀲𑁂𑀯𑀦𑀸 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀻𑀢𑀺 𑀘𑀢𑁆𑀢𑀸𑀭𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺 𑀫𑀽𑀮𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀧𑀢𑀺𑀝𑁆𑀞𑀺𑀢𑀸𑀢𑀺 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦 𑀓𑁂𑀦𑀘𑀺 𑀅𑀓𑀫𑁆𑀧𑀦𑀻𑀬𑀪𑀸𑀯𑁂𑀦 𑀅𑀯𑀝𑁆𑀞𑀺𑀢𑀸. 𑀢𑁂𑀦𑁂𑀯𑀸𑀳 ‘‘𑀤𑀴𑁆𑀳𑀸 𑀅𑀲𑀁𑀳𑀸𑀭𑀺𑀬𑀸’’𑀢𑀺. 𑀤𑀴𑁆𑀳𑀸𑀢𑀺 𑀣𑀺𑀭𑀸. 𑀅𑀲𑀁𑀳𑀸𑀭𑀺𑀬𑀸𑀢𑀺 𑀓𑁂𑀦𑀘𑀺 𑀲𑀁𑀳𑀭𑀺𑀢𑀼𑀁 𑀯𑀸 𑀳𑀸𑀧𑁂𑀢𑀼𑀁 𑀯𑀸 𑀅𑀧𑀦𑁂𑀢𑀼𑀁 𑀯𑀸 𑀅𑀲𑀓𑁆𑀓𑀼𑀡𑁂𑀬𑁆𑀬𑀸. 𑀇𑀢𑀺 𑀢𑁂 𑀤𑁂𑀯𑀸 𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀫𑀥𑀺𑀕𑀫𑀁 𑀆𑀲𑀻𑀲𑀦𑁆𑀢𑀸 𑀏𑀯𑀁 𑀯𑀤𑀦𑁆𑀢𑀺. 𑀅𑀢𑁆𑀢𑀦𑁄 𑀤𑁂𑀯𑀮𑁄𑀓𑁂 𑀓𑀸𑀫𑀲𑀼𑀔𑀽𑀧𑀪𑁄𑀕𑀸𑀭𑀳𑀫𑁂𑀯 𑀳𑀺 𑀅𑀭𑀺𑀬𑀧𑀼𑀕𑁆𑀕𑀮𑀁 𑀢𑁂 𑀇𑀘𑁆𑀙𑀦𑁆𑀢𑀺. 𑀢𑁂𑀦𑀸𑀳 ‘‘𑀏𑀳𑀺, 𑀤𑁂𑀯, 𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺.

𑀕𑀸𑀣𑀸𑀲𑀼 𑀧𑀼𑀜𑁆𑀜𑀓𑁆𑀔𑀬𑀫𑀭𑀡𑀫𑁆𑀧𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑁂𑀦𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀘𑀯𑀢𑀺 𑀆𑀬𑀼𑀲𑀗𑁆𑀔𑀬𑀸’’𑀢𑀺. 𑀅𑀦𑀼𑀫𑁄𑀤𑀢𑀦𑁆𑀢𑀺 𑀅𑀦𑀼𑀫𑁄𑀤𑀦𑁆𑀢𑀸𑀦𑀁. 𑀫𑀦𑀼𑀲𑁆𑀲𑀸𑀦𑀁 𑀲𑀳𑀩𑁆𑀬𑀢𑀦𑁆𑀢𑀺 𑀫𑀦𑀼𑀲𑁆𑀲𑁂𑀳𑀺 𑀲𑀳𑀪𑀸𑀯𑀁. 𑀲𑀳 𑀩𑁆𑀬𑁂𑀢𑀻𑀢𑀺 𑀲𑀳𑀩𑁆𑀬𑁄, 𑀲𑀳𑀧𑀯𑀢𑁆𑀢𑀦𑀓𑁄, 𑀢𑀲𑁆𑀲 𑀪𑀸𑀯𑁄 𑀲𑀳𑀩𑁆𑀬𑀢𑀸. 𑀦𑀺𑀯𑀺𑀝𑁆𑀞𑀲𑁆𑀲𑀸𑀢𑀺 𑀦𑀺𑀯𑀺𑀝𑁆𑀞𑀸 𑀪𑀯𑁂𑀬𑁆𑀬. 𑀬𑀸𑀯𑀚𑀻𑀯𑀦𑁆𑀢𑀺 𑀬𑀸𑀯 𑀚𑀻𑀯𑀺𑀢𑀧𑁆𑀧𑀯𑀢𑁆𑀢𑀺𑀬𑀸, 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸𑀢𑀺 𑀅𑀢𑁆𑀣𑁄.

𑀅𑀧𑁆𑀧𑀫𑀸𑀡𑀦𑁆𑀢𑀺 𑀲𑀓𑁆𑀓𑀘𑁆𑀘𑀁 𑀩𑀳𑀼𑀁 𑀉𑀴𑀸𑀭𑀁 𑀩𑀳𑀼𑀓𑁆𑀔𑀢𑁆𑀢𑀼𑀜𑁆𑀘 𑀓𑀭𑀡𑀯𑀲𑁂𑀦 𑀧𑀫𑀸𑀡𑀭𑀳𑀺𑀢𑀁. 𑀦𑀺𑀭𑀽𑀧𑀥𑀺𑀦𑁆𑀢𑀺 𑀓𑀺𑀮𑁂𑀲𑀽𑀧𑀥𑀺𑀭𑀳𑀺𑀢𑀁, 𑀲𑀼𑀯𑀺𑀲𑀼𑀤𑁆𑀥𑀁 𑀦𑀺𑀫𑁆𑀫𑀮𑀦𑁆𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀢𑁂 𑀤𑁂𑀯𑀸 𑀫𑀳𑀕𑁆𑀕𑀢𑀓𑀼𑀲𑀮𑀁 𑀦 𑀇𑀘𑁆𑀙𑀦𑁆𑀢𑀺 𑀓𑀸𑀫𑀮𑁄𑀓𑀲𑀫𑀢𑀺𑀓𑁆𑀓𑀫𑀦𑀢𑁄, 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀫𑁂𑀯 𑀇𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 ‘‘𑀇𑀢𑁄 𑀤𑁂𑀯𑀮𑁄𑀓𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑁂𑀲𑀼 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀁 𑀲𑀩𑁆𑀩𑀁 𑀤𑀼𑀘𑁆𑀘𑀭𑀺𑀢𑀁 𑀧𑀳𑀸𑀬 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀁 𑀲𑀩𑁆𑀩𑀁 𑀲𑀼𑀘𑀭𑀺𑀢𑀁 𑀉𑀴𑀸𑀭𑀁 𑀯𑀺𑀧𑀼𑀮𑀁 𑀉𑀧𑀘𑀺𑀦𑀺𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑁂𑀦 𑀆𑀕𑀢𑀲𑀤𑁆𑀥𑁄 𑀪𑀯𑀸𑀳𑀻’’𑀢𑀺. 𑀬𑀲𑁆𑀫𑀸 𑀧𑀦 𑀮𑁄𑀓𑀼𑀢𑁆𑀢𑀭𑁂𑀲𑀼 𑀧𑀞𑀫𑀫𑀕𑁆𑀕𑀁 𑀤𑀼𑀢𑀺𑀬𑀫𑀕𑁆𑀕𑀫𑁆𑀧𑀺 𑀯𑀸 𑀇𑀘𑁆𑀙𑀦𑁆𑀢𑀺 𑀅𑀢𑁆𑀢𑀦𑁄 𑀤𑁂𑀯𑀮𑁄𑀓𑀽𑀧𑀧𑀢𑁆𑀢𑀺𑀬𑀸 𑀅𑀦𑀢𑀺𑀯𑀢𑁆𑀢𑀦𑀢𑁄, 𑀢𑀲𑁆𑀫𑀸 𑀢𑁂𑀲𑀫𑁆𑀧𑀺 𑀯𑀲𑁂𑀦 ‘‘𑀅𑀧𑁆𑀧𑀫𑀸𑀡𑀁 𑀦𑀺𑀭𑀽𑀧𑀥𑀺’’𑀦𑁆𑀢𑀺𑀧𑀤𑀸𑀦𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀧𑀫𑀸𑀡𑀓𑀭𑀸𑀦𑀁 𑀤𑀺𑀝𑁆𑀞𑁂𑀓𑀝𑁆𑀞𑀑𑀴𑀸𑀭𑀺𑀓𑀓𑀸𑀫𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀦𑀁 𑀉𑀧𑀘𑁆𑀙𑁂𑀤𑁂𑀦 𑀅𑀧𑁆𑀧𑀫𑀸𑀡𑀁, 𑀲𑀢𑁆𑀢𑀫𑀪𑀯𑀢𑁄 𑀯𑀸 𑀉𑀧𑁆𑀧𑀚𑁆𑀚𑀦𑀸𑀭𑀳𑀲𑁆𑀲 𑀔𑀦𑁆𑀥𑀽𑀧𑀥𑀺𑀲𑁆𑀲 𑀢𑀁𑀦𑀺𑀩𑁆𑀩𑀢𑁆𑀢𑀓𑀅𑀪𑀺𑀲𑀗𑁆𑀔𑀸𑀭𑀽𑀧𑀥𑀺𑀲𑁆𑀲 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑀓𑀺𑀮𑁂𑀲𑀽𑀧𑀥𑀺𑀲𑁆𑀲 𑀘 𑀧𑀳𑀸𑀦𑁂𑀦 𑀢𑁂𑀲𑀁 𑀅𑀦𑀺𑀩𑁆𑀩𑀢𑁆𑀢𑀦𑀢𑁄 𑀦𑀺𑀭𑀼𑀧𑀥𑀺𑀲𑀗𑁆𑀔𑀸𑀢𑀦𑀺𑀩𑁆𑀩𑀸𑀦𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀘 𑀦𑀺𑀭𑀼𑀧𑀥𑀻𑀢𑀺.

𑀏𑀯𑀁 𑀅𑀘𑁆𑀘𑀦𑁆𑀢𑀫𑁂𑀯 𑀅𑀧𑀸𑀬𑀤𑁆𑀯𑀸𑀭𑀧𑀺𑀥𑀸𑀬𑀓𑀁 𑀓𑀫𑁆𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁄 𑀑𑀧𑀥𑀺𑀓’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀑𑀧𑀥𑀺𑀓𑀦𑁆𑀢𑀺 𑀉𑀧𑀥𑀺𑀯𑁂𑀧𑀓𑁆𑀓𑀁 𑀅𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸 𑀘𑁂𑀯 𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀘 𑀦𑀺𑀩𑁆𑀩𑀢𑁆𑀢𑀓𑀦𑁆𑀢𑀺 𑀅𑀢𑁆𑀣𑁄. 𑀉𑀧𑀥𑀻𑀢𑀺 𑀳𑀺 𑀅𑀢𑁆𑀢𑀪𑀸𑀯𑁄 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀲𑀦𑁆𑀢𑁂𑀓𑀘𑁆𑀘𑀸𑀦𑀺 𑀧𑀸𑀧𑀓𑀸𑀦𑀺 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀺 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀧𑀝𑀺𑀩𑀸𑀳𑀺𑀢𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀻’’𑀢𑀺 (𑀯𑀺𑀪. 𑁮𑁧𑁦). 𑀓𑀸𑀫𑀕𑀼𑀡𑀸𑀧𑀺. 𑀬𑀣𑀸𑀳 ‘‘𑀉𑀧𑀥𑀻𑀳𑀺 𑀦𑀭𑀲𑁆𑀲 𑀲𑁄𑀘𑀦𑀸’’𑀢𑀺 (𑀲𑀁. 𑀦𑀺. 𑁧.𑁧𑁨; 𑀲𑀼. 𑀦𑀺. 𑁩𑁪). 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀉𑀧𑀥𑀻𑀬𑀢𑀺 𑀏𑀢𑁆𑀣 𑀲𑀼𑀔𑀤𑀼𑀓𑁆𑀔𑀦𑁆𑀢𑀺 𑀉𑀧𑀥𑀺, 𑀅𑀢𑁆𑀢𑀪𑀸𑀯𑁄 𑀓𑀸𑀫𑀕𑀼𑀡𑀸 𑀘. 𑀉𑀧𑀥𑀺𑀓𑀭𑀡𑀁 𑀲𑀻𑀮𑀁 𑀏𑀢𑀲𑁆𑀲, 𑀉𑀧𑀥𑀺𑀁 𑀯𑀸 𑀅𑀭𑀳𑀢𑀻𑀢𑀺 𑀑𑀧𑀥𑀺𑀓𑀁, 𑀧𑀼𑀜𑁆𑀜𑀁, 𑀢𑀁 𑀩𑀳𑀼𑀁 𑀉𑀴𑀸𑀭𑀁 𑀓𑀢𑁆𑀯𑀸. 𑀓𑀣𑀁? 𑀤𑀸𑀦𑁂𑀦. 𑀤𑀸𑀦𑀜𑁆𑀳𑀺 𑀇𑀢𑀭𑁂𑀳𑀺 𑀲𑀼𑀓𑀭𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀤𑀸𑀦𑁂𑀦𑀸𑀢𑀺 𑀯𑀸 𑀧𑀤𑁂𑀦 𑀅𑀪𑀬𑀤𑀸𑀦𑀫𑁆𑀧𑀺 𑀯𑀼𑀢𑁆𑀢𑀁, 𑀦 𑀆𑀫𑀺𑀲𑀤𑀸𑀦𑀫𑁂𑀯𑀸𑀢𑀺 𑀲𑀻𑀮𑀲𑁆𑀲𑀸𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀬𑀲𑁆𑀫𑀸 𑀧𑀦 𑀢𑁂 𑀤𑁂𑀯𑀸 𑀅𑀲𑀼𑀭𑀓𑀸𑀬𑀳𑀸𑀦𑀺𑀁 𑀏𑀓𑀦𑁆𑀢𑁂𑀦𑁂𑀯 𑀤𑁂𑀯𑀓𑀸𑀬𑀧𑀸𑀭𑀺𑀧𑀽𑀭𑀺𑀜𑁆𑀘 𑀇𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀉𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑀸 ‘‘𑀅𑀜𑁆𑀜𑁂𑀧𑀺 𑀫𑀘𑁆𑀘𑁂 𑀲𑀤𑁆𑀥𑀫𑁆𑀫𑁂, 𑀩𑁆𑀭𑀳𑁆𑀫𑀘𑀭𑀺𑀬𑁂 𑀦𑀺𑀯𑁂𑀲𑀬𑀸’’𑀢𑀺 𑀥𑀫𑁆𑀫𑀤𑀸𑀦𑁂 𑀦𑀺𑀬𑁄𑀚𑁂𑀦𑁆𑀢𑀺. 𑀬𑀤𑀸 𑀯𑀺𑀤𑀽𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀤𑁂𑀯𑀸 𑀤𑁂𑀯𑀁 𑀘𑀯𑀦𑁆𑀢𑀁 𑀯𑀺𑀤𑀽 𑀯𑀺𑀚𑀸𑀦𑁂𑀬𑁆𑀬𑀼𑀁, 𑀢𑀤𑀸 𑀇𑀫𑀸𑀬 𑀬𑀣𑀸𑀯𑀼𑀢𑁆𑀢𑀸𑀬 𑀅𑀦𑀼𑀓𑀫𑁆𑀧𑀸𑀬 𑀤𑀼𑀓𑁆𑀔𑀸𑀧𑀦𑀬𑀦𑀓𑀫𑁆𑀬𑀢𑀸𑀬 ‘‘𑀤𑁂𑀯, 𑀇𑀫𑁂 𑀤𑁂𑀯𑀓𑀸𑀬𑁂 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀏𑀳𑀺 𑀆𑀕𑀘𑁆𑀙𑀸𑀳𑀻’’𑀢𑀺 𑀘 𑀅𑀦𑀼𑀫𑁄𑀤𑁂𑀦𑁆𑀢𑀻𑀢𑀺.

𑀘𑀢𑀼𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.