𑁨. 𑀲𑀓𑁆𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧. 𑀤𑀼𑀢𑀺𑀬𑁂 𑀲𑀓𑁆𑀓𑀸𑀭𑁂𑀦𑀸𑀢𑀺 𑀲𑀓𑁆𑀓𑀸𑀭𑁂𑀦 𑀳𑁂𑀢𑀼𑀪𑀽𑀢𑁂𑀦, 𑀅𑀣 𑀯𑀸 𑀲𑀓𑁆𑀓𑀸𑀭𑁂𑀦𑀸𑀢𑀺 𑀲𑀓𑁆𑀓𑀸𑀭𑀳𑁂𑀢𑀼𑀦𑀸, 𑀲𑀓𑁆𑀓𑀸𑀭𑀳𑁂𑀢𑀼𑀓𑁂𑀦 𑀯𑀸. 𑀲𑀓𑁆𑀓𑀸𑀭𑀜𑁆𑀳𑀺 𑀦𑀺𑀲𑁆𑀲𑀸𑀬 𑀇𑀥𑁂𑀓𑀘𑁆𑀘𑁂 𑀧𑀼𑀕𑁆𑀕𑀮𑀸 𑀧𑀸𑀧𑀺𑀘𑁆𑀙𑀸 𑀇𑀘𑁆𑀙𑀸𑀧𑀓𑀢𑀸 𑀇𑀘𑁆𑀙𑀸𑀘𑀸𑀭𑁂 𑀞𑀢𑁆𑀯𑀸 ‘‘𑀲𑀓𑁆𑀓𑀸𑀭𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀸’’𑀢𑀺 𑀅𑀦𑁂𑀓𑀯𑀺𑀳𑀺𑀢𑀁 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀆𑀧𑀚𑁆𑀚𑀺𑀢𑁆𑀯𑀸 𑀇𑀢𑁄 𑀘𑀼𑀢𑀸 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀅𑀧𑀭𑁂 𑀬𑀣𑀸𑀲𑀓𑁆𑀓𑀸𑀭𑀁 𑀮𑀪𑀺𑀢𑁆𑀯𑀸 𑀢𑀦𑁆𑀦𑀺𑀫𑀺𑀢𑁆𑀢𑀁 𑀫𑀸𑀦𑀫𑀤𑀫𑀘𑁆𑀙𑀭𑀺𑀬𑀸𑀤𑀺𑀯𑀲𑁂𑀦 𑀧𑀫𑀸𑀤𑀁 𑀆𑀧𑀚𑁆𑀚𑀺𑀢𑁆𑀯𑀸 𑀇𑀢𑁄 𑀘𑀼𑀢𑀸 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑀓𑁆𑀓𑀸𑀭𑁂𑀦 𑀅𑀪𑀺𑀪𑀽𑀢𑀸 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀸’’𑀢𑀺. 𑀢𑀢𑁆𑀣 𑀅𑀪𑀺𑀪𑀽𑀢𑀸𑀢𑀺 𑀅𑀚𑁆𑀛𑁄𑀢𑁆𑀣𑀝𑀸. 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀸𑀢𑀺 𑀔𑁂𑀧𑀺𑀢𑀘𑀺𑀢𑁆𑀢𑀸, 𑀇𑀘𑁆𑀙𑀸𑀘𑀸𑀭𑁂𑀦 𑀫𑀸𑀦𑀫𑀤𑀸𑀤𑀺𑀦𑀸 𑀘 𑀔𑀬𑀁 𑀧𑀸𑀧𑀺𑀢𑀓𑀼𑀲𑀮𑀘𑀺𑀢𑁆𑀢𑀸. 𑀅𑀣 𑀯𑀸 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀸𑀢𑀺 𑀧𑀭𑀺𑀢𑁄 𑀆𑀤𑀺𑀦𑁆𑀦𑀘𑀺𑀢𑁆𑀢𑀸, 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀓𑀼𑀲𑀮𑀓𑁄𑀝𑁆𑀞𑀸𑀲𑁂𑀦 𑀬𑀣𑀸 𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀯𑀸𑀭𑁄 𑀦 𑀳𑁄𑀢𑀺, 𑀏𑀯𑀁 𑀲𑀫𑀦𑁆𑀢𑀢𑁄 𑀕𑀳𑀺𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑀸𑀢𑀺 𑀅𑀢𑁆𑀣𑁄. 𑀅𑀲𑀓𑁆𑀓𑀸𑀭𑁂𑀦𑀸𑀢𑀺 𑀳𑀻𑀴𑁂𑀢𑁆𑀯𑀸 𑀧𑀭𑀺𑀪𑀯𑀺𑀢𑁆𑀯𑀸 𑀧𑀭𑁂𑀳𑀺 𑀅𑀢𑁆𑀢𑀦𑀺 𑀧𑀯𑀢𑁆𑀢𑀺𑀢𑁂𑀦 𑀅𑀲𑀓𑁆𑀓𑀸𑀭𑁂𑀦 𑀳𑁂𑀢𑀼𑀦𑀸, 𑀅𑀲𑀓𑁆𑀓𑀸𑀭𑀳𑁂𑀢𑀼𑀓𑁂𑀦 𑀯𑀸 𑀫𑀸𑀦𑀸𑀤𑀺𑀦𑀸. 𑀲𑀓𑁆𑀓𑀸𑀭𑁂𑀦 𑀘 𑀅𑀲𑀓𑁆𑀓𑀸𑀭𑁂𑀦 𑀘𑀸𑀢𑀺 𑀓𑁂𑀳𑀺𑀘𑀺 𑀧𑀯𑀢𑁆𑀢𑀺𑀢𑁂𑀦 𑀲𑀓𑁆𑀓𑀸𑀭𑁂𑀦 𑀓𑁂𑀳𑀺𑀘𑀺 𑀧𑀯𑀢𑁆𑀢𑀺𑀢𑁂𑀦 𑀅𑀲𑀓𑁆𑀓𑀸𑀭𑁂𑀦 𑀘. 𑀬𑁂 𑀳𑀺 𑀓𑁂𑀳𑀺𑀘𑀺 𑀧𑀞𑀫𑀁 𑀲𑀓𑁆𑀓𑀢𑀸 𑀳𑀼𑀢𑁆𑀯𑀸 𑀢𑁂𑀳𑀺𑀬𑁂𑀯 𑀅𑀲𑀸𑀭𑀪𑀸𑀯𑀁 𑀜𑀢𑁆𑀯𑀸 𑀧𑀘𑁆𑀙𑀸 𑀅𑀲𑀓𑁆𑀓𑀢𑀸 𑀳𑁄𑀦𑁆𑀢𑀺, 𑀢𑀸𑀤𑀺𑀲𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀓𑁆𑀓𑀸𑀭𑁂𑀦 𑀘 𑀅𑀲𑀓𑁆𑀓𑀸𑀭𑁂𑀦 𑀘𑀸’’𑀢𑀺.

𑀏𑀢𑁆𑀣 𑀲𑀓𑁆𑀓𑀸𑀭𑁂𑀦 𑀅𑀪𑀺𑀪𑀽𑀢𑀸 𑀤𑁂𑀯𑀤𑀢𑁆𑀢𑀸𑀤𑀬𑁄 𑀦𑀺𑀤𑀲𑁆𑀲𑁂𑀢𑀩𑁆𑀩𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀨𑀮𑀁 𑀯𑁂 𑀓𑀤𑀮𑀺𑀁 𑀳𑀦𑁆𑀢𑀺, 𑀨𑀮𑀁 𑀯𑁂𑀴𑀼𑀁 𑀨𑀮𑀁 𑀦𑀴𑀁;

𑀲𑀓𑁆𑀓𑀸𑀭𑁄 𑀓𑀸𑀧𑀼𑀭𑀺𑀲𑀁 𑀳𑀦𑁆𑀢𑀺, 𑀕𑀩𑁆𑀪𑁄 𑀅𑀲𑁆𑀲𑀢𑀭𑀺𑀁 𑀬𑀣𑀸’’𑀢𑀺. (𑀲𑀁. 𑀦𑀺. 𑁧.𑁧𑁮𑁩; 𑀅. 𑀦𑀺. 𑁪.𑁬𑁮; 𑀘𑀽𑀴𑀯. 𑁩𑁩𑁫);

𑀲𑀸𑀥𑀽𑀦𑀁 𑀉𑀧𑀭𑀺 𑀓𑀢𑁂𑀦 𑀅𑀲𑀓𑁆𑀓𑀸𑀭𑁂𑀦 𑀅𑀪𑀺𑀪𑀽𑀢𑀸 𑀤𑀡𑁆𑀟𑀓𑀻𑀭𑀸𑀚𑀓𑀸𑀮𑀺𑀗𑁆𑀕𑀭𑀸𑀚𑀫𑀚𑁆𑀛𑀭𑀸𑀚𑀸𑀤𑀬𑁄 𑀦𑀺𑀤𑀲𑁆𑀲𑁂𑀢𑀩𑁆𑀩𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀓𑀺𑀲𑀜𑁆𑀳𑀺 𑀯𑀘𑁆𑀙𑀁 𑀅𑀯𑀓𑀺𑀭𑀺𑀬 𑀤𑀡𑁆𑀟𑀓𑀻,

𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀲𑀚𑀦𑁄 𑀲𑀭𑀝𑁆𑀞𑁄;

𑀓𑀼𑀓𑁆𑀓𑀼𑀴𑀦𑀸𑀫𑁂 𑀦𑀺𑀭𑀬𑀫𑁆𑀳𑀺 𑀧𑀘𑁆𑀘𑀢𑀺,

𑀢𑀲𑁆𑀲 𑀨𑀼𑀮𑀺𑀗𑁆𑀕𑀸𑀦𑀺 𑀧𑀢𑀦𑁆𑀢𑀺 𑀓𑀸𑀬𑁂.

‘‘𑀬𑁄 𑀲𑀜𑁆𑀜𑀢𑁂 𑀧𑀩𑁆𑀩𑀚𑀺𑀢𑁂 𑀅𑀯𑀜𑁆𑀘𑀬𑀺,

𑀥𑀫𑁆𑀫𑀁 𑀪𑀡𑀦𑁆𑀢𑁂 𑀲𑀫𑀡𑁂 𑀅𑀤𑀽𑀲𑀓𑁂;

𑀢𑀁 𑀦𑀸𑀴𑀺𑀓𑁂𑀭𑀁 𑀲𑀼𑀦𑀔𑀸 𑀧𑀭𑀢𑁆𑀣,

𑀲𑀗𑁆𑀕𑀫𑁆𑀫 𑀔𑀸𑀤𑀦𑁆𑀢𑀺 𑀯𑀺𑀨𑀦𑁆𑀤𑀫𑀸𑀦𑀁’’. (𑀚𑀸. 𑁨.𑁧𑁭.𑁭𑁦-𑁭𑁧);

‘‘𑀉𑀧𑀳𑀘𑁆𑀘 𑀫𑀦𑀁 𑀫𑀚𑁆𑀛𑁄, 𑀫𑀸𑀢𑀗𑁆𑀕𑀲𑁆𑀫𑀺𑀁 𑀬𑀲𑀲𑁆𑀲𑀺𑀦𑁂;

𑀲𑀧𑀸𑀭𑀺𑀲𑀚𑁆𑀚𑁄 𑀉𑀘𑁆𑀙𑀺𑀦𑁆𑀦𑁄, 𑀫𑀚𑁆𑀛𑀸𑀭𑀜𑁆𑀜𑀁 𑀢𑀤𑀸 𑀅𑀳𑀽’’𑀢𑀺. (𑀚𑀸. 𑁨.𑁧𑁯.𑁯𑁬);

𑀲𑀓𑁆𑀓𑀸𑀭𑁂𑀦 𑀘 𑀅𑀲𑀓𑁆𑀓𑀸𑀭𑁂𑀦 𑀘 𑀅𑀪𑀺𑀪𑀽𑀢𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀦𑀸𑀝𑀧𑀼𑀢𑁆𑀢𑀸𑀤𑀬𑁄 𑀦𑀺𑀤𑀲𑁆𑀲𑁂𑀢𑀩𑁆𑀩𑀸.

𑀕𑀸𑀣𑀸𑀲𑀼 𑀉𑀪𑀬𑀦𑁆𑀢𑀺 𑀉𑀪𑀬𑁂𑀦 𑀲𑀓𑁆𑀓𑀸𑀭𑁂𑀦 𑀘 𑀅𑀲𑀓𑁆𑀓𑀸𑀭𑁂𑀦 𑀘. 𑀲𑀫𑀸𑀥𑀺 𑀦 𑀯𑀺𑀓𑀫𑁆𑀧𑀢𑀻𑀢𑀺 𑀦 𑀘𑀮𑀢𑀺, 𑀏𑀓𑀕𑁆𑀕𑀪𑀸𑀯𑁂𑀦 𑀢𑀺𑀝𑁆𑀞𑀢𑀺. 𑀓𑀲𑁆𑀲 𑀧𑀦 𑀦 𑀘𑀮𑀢𑀻𑀢𑀺 𑀆𑀳 ‘‘𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀺𑀦𑁄’’𑀢𑀺. 𑀬𑁄 𑀧𑀫𑀸𑀤𑀓𑀭𑀥𑀫𑁆𑀫𑀸𑀦𑀁 𑀭𑀸𑀕𑀸𑀤𑀻𑀦𑀁 𑀲𑀼𑀝𑁆𑀞𑀼 𑀧𑀳𑀻𑀦𑀢𑁆𑀢𑀸 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻 𑀅𑀭𑀳𑀸, 𑀢𑀲𑁆𑀲. 𑀲𑁄 𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀦 𑀯𑀺𑀓𑀫𑁆𑀧𑀢𑀺. 𑀲𑀼𑀔𑀼𑀫𑀤𑀺𑀝𑁆𑀞𑀺𑀯𑀺𑀧𑀲𑁆𑀲𑀓𑀦𑁆𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀅𑀢𑁆𑀣𑀁 𑀲𑀼𑀔𑀼𑀫𑀸𑀬 𑀤𑀺𑀝𑁆𑀞𑀺𑀬𑀸 𑀧𑀜𑁆𑀜𑀸𑀬 𑀅𑀪𑀺𑀡𑁆𑀳𑀁 𑀧𑀯𑀢𑁆𑀢𑀯𑀺𑀧𑀲𑁆𑀲𑀦𑀢𑁆𑀢𑀸 𑀲𑀼𑀔𑀼𑀫𑀤𑀺𑀝𑁆𑀞𑀺𑀯𑀺𑀧𑀲𑁆𑀲𑀓𑀁. 𑀉𑀧𑀸𑀤𑀸𑀦𑀓𑁆𑀔𑀬𑀸𑀭𑀸𑀫𑀦𑁆𑀢𑀺 𑀘𑀢𑀼𑀦𑁆𑀦𑀁 𑀉𑀧𑀸𑀤𑀸𑀦𑀸𑀦𑀁 𑀔𑀬𑀁 𑀧𑀭𑀺𑀬𑁄𑀲𑀸𑀦𑀪𑀽𑀢𑀁 𑀅𑀭𑀳𑀢𑁆𑀢𑀨𑀮𑀁 𑀆𑀭𑀫𑀺𑀢𑀩𑁆𑀩𑀁 𑀏𑀢𑀲𑁆𑀲𑀸𑀢𑀺 𑀉𑀧𑀸𑀤𑀸𑀦𑀓𑁆𑀔𑀬𑀸𑀭𑀸𑀫𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀤𑀼𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.