𑁧. 𑀯𑀺𑀢𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁦. 𑀘𑀢𑀼𑀢𑁆𑀣𑀯𑀕𑁆𑀕𑀲𑁆𑀲 𑀧𑀞𑀫𑁂 𑀅𑀓𑀼𑀲𑀮𑀯𑀺𑀢𑀓𑁆𑀓𑀸𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸 𑀯𑀺𑀢𑀓𑁆𑀓𑀸, 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀢𑀺 𑀅𑀢𑁆𑀣𑁄. 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀏𑀢𑁆𑀣 𑀅𑀦𑀯𑀜𑁆𑀜𑀢𑁆𑀢𑀻𑀢𑀺 𑀅𑀦𑀯𑀜𑁆𑀜𑀸 𑀧𑀭𑁂𑀳𑀺 𑀅𑀢𑁆𑀢𑀦𑁄 𑀅𑀳𑀻𑀴𑀺𑀢𑀢𑀸 𑀅𑀧𑀭𑀺𑀪𑀽𑀢𑀢𑀸, ‘‘𑀅𑀳𑁄 𑀯𑀢 𑀫𑀁 𑀧𑀭𑁂 𑀦 𑀅𑀯𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀇𑀘𑁆𑀙𑀸𑀘𑀸𑀭𑁄, 𑀢𑀸𑀬 𑀅𑀦𑀯𑀜𑁆𑀜𑀢𑁆𑀢𑀺𑀬𑀸 𑀧𑀝𑀺𑀲𑀁𑀬𑀼𑀢𑁆𑀢𑁄 𑀲𑀁𑀲𑀝𑁆𑀞𑁄, 𑀢𑀁 𑀯𑀸 𑀆𑀭𑀩𑁆𑀪 𑀧𑀯𑀢𑁆𑀢𑁄 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄. 𑀢𑀲𑁆𑀫𑀸 ‘‘𑀓𑀣𑀁 𑀦𑀼 𑀔𑁄 𑀫𑀁 𑀧𑀭𑁂 𑀕𑀳𑀝𑁆𑀞𑀸 𑀘𑁂𑀯 𑀧𑀩𑁆𑀩𑀚𑀺𑀢𑀸 𑀘 𑀦 𑀑𑀭𑀓𑀢𑁄 𑀤𑀳𑁂𑀬𑁆𑀬𑀼’’𑀦𑁆𑀢𑀺 𑀲𑀫𑁆𑀪𑀸𑀯𑀦𑀓𑀫𑁆𑀬𑀢𑀸𑀬 𑀇𑀘𑁆𑀙𑀸𑀘𑀸𑀭𑁂, 𑀞𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀺𑀢𑀓𑁆𑀓𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀘𑀻𑀯𑀭𑀸𑀤𑀺𑀮𑀸𑀪𑁂𑀦 𑀘𑁂𑀯 𑀲𑀓𑁆𑀓𑀸𑀭𑁂𑀦 𑀘 𑀓𑀺𑀢𑁆𑀢𑀺𑀲𑀤𑁆𑀤𑁂𑀦 𑀘 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁄. 𑀧𑀭𑀸𑀦𑀼𑀤𑁆𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀧𑀭𑁂𑀲𑀼 𑀅𑀦𑀼𑀤𑁆𑀤𑀬𑀢𑀸𑀧𑀢𑀺𑀭𑀽𑀧𑀓𑁂𑀦 𑀕𑁂𑀳𑀲𑀺𑀢𑀧𑁂𑀫𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀭𑀸𑀚𑀽𑀳𑀺 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀕𑀳𑀧𑀢𑀺𑀓𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺 𑀲𑀳𑀦𑀦𑁆𑀤𑀻 𑀲𑀳𑀲𑁄𑀓𑀻, 𑀲𑀼𑀔𑀺𑀢𑁂𑀲𑀼 𑀲𑀼𑀔𑀺𑀢𑁄, 𑀤𑀼𑀓𑁆𑀔𑀺𑀢𑁂𑀲𑀼 𑀤𑀼𑀓𑁆𑀔𑀺𑀢𑁄, 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀅𑀢𑁆𑀢𑀦𑀸𑀯 𑀬𑁄𑀕𑀁 𑀆𑀧𑀚𑁆𑀚𑀢𑀻’’𑀢𑀺 (𑀲𑀁. 𑀦𑀺. 𑁩.𑁩; 𑁪.𑁨𑁪𑁧; 𑀯𑀺𑀪. 𑁮𑁮𑁮).

𑀕𑀸𑀣𑀸𑀲𑀼 𑀅𑀦𑀯𑀜𑁆𑀜𑀢𑁆𑀢𑀺𑀬𑀸 𑀧𑀝𑀺𑀲𑀁𑀬𑀼𑀢𑁆𑀢𑁄 𑀧𑀼𑀕𑁆𑀕𑀮𑁄 𑀅𑀦𑀯𑀜𑁆𑀜𑀢𑁆𑀢𑀺𑀲𑀁𑀬𑀼𑀢𑁆𑀢𑁄. 𑀮𑀸𑀪𑀲𑀓𑁆𑀓𑀸𑀭𑁂 𑀕𑀸𑀭𑀯𑁄 𑀏𑀢𑀲𑁆𑀲, 𑀦 𑀥𑀫𑁆𑀫𑁂𑀢𑀺 𑀮𑀸𑀪𑀲𑀓𑁆𑀓𑀸𑀭𑀕𑀸𑀭𑀯𑁄. 𑀲𑀼𑀔𑀤𑀼𑀓𑁆𑀔𑁂𑀲𑀼 𑀅𑀫𑀸 𑀲𑀳 𑀪𑀯𑀸𑀢𑀺 𑀅𑀫𑀘𑁆𑀘𑀸, 𑀲𑀳𑀸𑀬𑀲𑀤𑀺𑀲𑀸 𑀉𑀧𑀝𑁆𑀞𑀸𑀓𑀸. 𑀢𑁂𑀳𑀺 𑀕𑁂𑀳𑀲𑀺𑀢𑀧𑁂𑀫𑀯𑀲𑁂𑀦 𑀲𑀳 𑀦𑀦𑁆𑀤𑀦𑀲𑀻𑀮𑁄 𑀲𑀳𑀦𑀦𑁆𑀤𑀻 𑀅𑀫𑀘𑁆𑀘𑁂𑀳𑀺, 𑀇𑀫𑀺𑀦𑀸 𑀧𑀭𑀸𑀦𑀼𑀤𑁆𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀁 𑀯𑀺𑀢𑀓𑁆𑀓𑀁 𑀤𑀲𑁆𑀲𑁂𑀢𑀺. 𑀆𑀭𑀸 𑀲𑀁𑀬𑁄𑀚𑀦𑀓𑁆𑀔𑀬𑀸𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀯𑀺𑀢𑀓𑁆𑀓𑁂𑀳𑀺 𑀅𑀪𑀺𑀪𑀽𑀢𑁄 𑀧𑀼𑀕𑁆𑀕𑀮𑁄 𑀲𑀁𑀬𑁄𑀚𑀦𑀓𑁆𑀔𑀬𑀢𑁄 𑀅𑀭𑀳𑀢𑁆𑀢𑀢𑁄 𑀤𑀽𑀭𑁂, 𑀢𑀲𑁆𑀲 𑀢𑀁 𑀤𑀼𑀮𑁆𑀮𑀪𑀦𑁆𑀢𑀺 𑀅𑀢𑁆𑀣𑁄.

𑀧𑀼𑀢𑁆𑀢𑀧𑀲𑀼𑀦𑁆𑀢𑀺 𑀧𑀼𑀢𑁆𑀢𑁂 𑀘 𑀧𑀲𑀯𑁄 𑀘. 𑀧𑀼𑀢𑁆𑀢𑀲𑀤𑁆𑀤𑁂𑀦 𑀘𑁂𑀢𑁆𑀣 𑀤𑀸𑀭𑀸𑀤𑀬𑁄; 𑀧𑀲𑀼𑀲𑀤𑁆𑀤𑁂𑀦 𑀅𑀲𑁆𑀲𑀫𑀳𑀺𑀁𑀲𑀔𑁂𑀢𑁆𑀢𑀯𑀢𑁆𑀣𑀸𑀤𑀬𑁄 𑀘 𑀲𑀗𑁆𑀕𑀳𑀺𑀢𑀸. 𑀯𑀺𑀯𑀸𑀳𑁂𑀢𑀺 𑀯𑀺𑀯𑀸𑀳𑀓𑀸𑀭𑀸𑀧𑀦𑁂. 𑀇𑀫𑀺𑀦𑀸 𑀆𑀯𑀸𑀳𑁄𑀧𑀺 𑀲𑀗𑁆𑀕𑀳𑀺𑀢𑁄. 𑀲𑀁𑀳𑀭𑀸𑀦𑀻𑀢𑀺 𑀧𑀭𑀺𑀕𑁆𑀕𑀳𑀸𑀦𑀺, 𑀧𑀭𑀺𑀓𑁆𑀔𑀸𑀭𑀲𑀗𑁆𑀕𑀳𑀸𑀦𑀻𑀢𑀺 𑀅𑀢𑁆𑀣𑁄. ‘‘𑀲𑀦𑁆𑀣𑀯𑀸𑀦𑀻’’𑀢𑀺 𑀘 𑀧𑀞𑀦𑁆𑀢𑀺, 𑀫𑀺𑀢𑁆𑀢𑀲𑀦𑁆𑀣𑀯𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀢𑁆𑀣 𑀳𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀩𑁆𑀩𑁄 𑀲𑁄 𑀢𑀸𑀤𑀺𑀲𑁄 𑀪𑀺𑀓𑁆𑀔𑀽𑀢𑀺 𑀲𑁄 𑀬𑀣𑀸𑀯𑀼𑀢𑁆𑀢𑀁 𑀲𑀩𑁆𑀩𑀁 𑀧𑀧𑀜𑁆𑀘𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀬𑀣𑀸 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸, 𑀢𑀣𑀸 𑀧𑀲𑁆𑀲𑀺𑀢𑀩𑁆𑀩𑀢𑁄 𑀢𑀸𑀤𑀺𑀲𑁄 𑀲𑀁𑀲𑀸𑀭𑁂 𑀪𑀬𑀁 𑀇𑀓𑁆𑀔𑀢𑀻𑀢𑀺 𑀪𑀺𑀓𑁆𑀔𑀼 𑀉𑀢𑁆𑀢𑀫𑀁 𑀲𑀫𑁆𑀩𑁄𑀥𑀺𑀁 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀅𑀭𑀳𑀢𑀺.

𑀧𑀞𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.