𑁩𑁯. 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑀯𑀢𑁆𑀣𑀼

𑀉𑀲𑀪𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 ‘‘𑀦 𑀯𑁂 𑀓𑀤𑀭𑀺𑀬𑀸 𑀤𑁂𑀯𑀮𑁄𑀓𑀁 𑀯𑀚𑀦𑁆𑀢𑀻’’𑀢𑀺 (𑀥. 𑀧. 𑁧𑁭𑁭) 𑀕𑀸𑀣𑀸𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑀫𑁂𑀯. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋

𑀪𑀺𑀓𑁆𑀔𑀽 𑀅𑀗𑁆𑀕𑀼𑀮𑀺𑀫𑀸𑀮𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀅𑀗𑁆𑀕𑀼𑀮𑀺𑀫𑀸𑀮, 𑀤𑀼𑀝𑁆𑀞𑀳𑀢𑁆𑀣𑀺𑀁 𑀙𑀢𑁆𑀢𑀁 𑀥𑀸𑀭𑁂𑀢𑁆𑀯𑀸 𑀞𑀺𑀢𑀁 𑀤𑀺𑀲𑁆𑀯𑀸 𑀪𑀸𑀬𑀻’’𑀢𑀺? ‘‘𑀦 𑀪𑀸𑀬𑀺𑀁, 𑀆𑀯𑀼𑀲𑁄’’𑀢𑀺. 𑀢𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀅𑀗𑁆𑀕𑀼𑀮𑀺𑀫𑀸𑀮𑁄, 𑀪𑀦𑁆𑀢𑁂, 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀻’’𑀢𑀺. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑁄 𑀅𑀗𑁆𑀕𑀼𑀮𑀺𑀫𑀸𑀮𑁄 𑀪𑀸𑀬𑀢𑀺. 𑀔𑀻𑀡𑀸𑀲𑀯𑀉𑀲𑀪𑀸𑀦𑀜𑁆𑀳𑀺 𑀅𑀦𑁆𑀢𑀭𑁂 𑀚𑁂𑀝𑁆𑀞𑀓𑀉𑀲𑀪𑀸 𑀫𑀫 𑀧𑀼𑀢𑁆𑀢𑀲𑀤𑀺𑀲𑀸 𑀪𑀺𑀓𑁆𑀔𑀽 𑀦 𑀪𑀸𑀬𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁨𑁨. ‘‘𑀉𑀲𑀪𑀁 𑀧𑀯𑀭𑀁 𑀯𑀻𑀭𑀁, 𑀫𑀳𑁂𑀲𑀺𑀁 𑀯𑀺𑀚𑀺𑀢𑀸𑀯𑀺𑀦𑀁;

𑀅𑀦𑁂𑀚𑀁 𑀦𑁆𑀳𑀸𑀢𑀓𑀁 𑀩𑀼𑀤𑁆𑀥𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀘𑁆𑀙𑀫𑁆𑀪𑀺𑀢𑀝𑁆𑀞𑁂𑀦 𑀉𑀲𑀪𑀲𑀤𑀺𑀲𑀢𑀸𑀬 𑀉𑀲𑀪𑀁 𑀉𑀢𑁆𑀢𑀫𑀝𑁆𑀞𑁂𑀦 𑀧𑀯𑀭𑀁 𑀯𑀻𑀭𑀺𑀬𑀲𑀫𑁆𑀧𑀢𑁆𑀢𑀺𑀬𑀸 𑀯𑀻𑀭𑀁 𑀫𑀳𑀦𑁆𑀢𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀏𑀲𑀺𑀢𑀢𑁆𑀢𑀸 𑀫𑀳𑁂𑀲𑀺𑀁 𑀢𑀺𑀡𑁆𑀡𑀁 𑀫𑀸𑀭𑀸𑀦𑀁 𑀯𑀺𑀚𑀺𑀢𑀢𑁆𑀢𑀸 𑀯𑀺𑀚𑀺𑀢𑀸𑀯𑀺𑀦𑀁 𑀦𑁆𑀳𑀸𑀢𑀓𑀺𑀮𑁂𑀲𑀢𑀸𑀬 𑀦𑁆𑀳𑀸𑀢𑀓𑀁 𑀘𑀢𑀼𑀲𑀘𑁆𑀘𑀩𑀼𑀤𑁆𑀥𑀢𑀸𑀬 𑀩𑀼𑀤𑁆𑀥𑀁 𑀢𑀁 𑀏𑀯𑀭𑀽𑀧𑀁 𑀅𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑀯𑀢𑁆𑀣𑀼 𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀁.