𑁪𑁦. 𑀤𑁂𑀯𑀳𑀺𑀢𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑀧𑀼𑀩𑁆𑀩𑁂𑀦𑀺𑀯𑀸𑀲𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁂𑀯𑀳𑀺𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀜𑁆𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀪𑀕𑀯𑀸 𑀯𑀸𑀢𑀭𑁄𑀕𑁂𑀦 𑀆𑀩𑀸𑀥𑀺𑀓𑁄 𑀳𑀼𑀢𑁆𑀯𑀸 𑀉𑀧𑀯𑀸𑀡𑀢𑁆𑀣𑁂𑀭𑀁 𑀉𑀡𑁆𑀳𑁄𑀤𑀓𑀢𑁆𑀣𑀸𑀬 𑀤𑁂𑀯𑀳𑀺𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑀁 𑀧𑀳𑀺𑀡𑀺. 𑀲𑁄 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀆𑀩𑀸𑀥𑀺𑀓𑀪𑀸𑀯𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀉𑀡𑁆𑀳𑁄𑀤𑀓𑀁 𑀬𑀸𑀘𑀺, 𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀢𑀼𑀝𑁆𑀞𑀫𑀸𑀦𑀲𑁄 𑀳𑀼𑀢𑁆𑀯𑀸 ‘‘𑀮𑀸𑀪𑀸 𑀯𑀢 𑀫𑁂, 𑀬𑀁 𑀫𑀫 𑀲𑀦𑁆𑀢𑀺𑀓𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀉𑀡𑁆𑀳𑁄𑀤𑀓𑀲𑁆𑀲𑀢𑁆𑀣𑀸𑀬 𑀲𑀸𑀯𑀓𑀁 𑀧𑀳𑀺𑀡𑀻’’𑀢𑀺 𑀉𑀡𑁆𑀳𑁄𑀤𑀓𑀲𑁆𑀲 𑀓𑀸𑀚𑀁 𑀧𑀼𑀭𑀺𑀲𑁂𑀦 𑀕𑀸𑀳𑀸𑀧𑁂𑀢𑁆𑀯𑀸 𑀨𑀸𑀡𑀺𑀢𑀲𑁆𑀲 𑀘 𑀧𑀼𑀝𑀁 𑀉𑀧𑀯𑀸𑀡𑀢𑁆𑀣𑁂𑀭𑀲𑁆𑀲 𑀧𑀸𑀤𑀸𑀲𑀺. 𑀣𑁂𑀭𑁄 𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀡𑁆𑀳𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀉𑀡𑁆𑀳𑁄𑀤𑀓𑁂𑀦 𑀨𑀸𑀡𑀺𑀢𑀁 𑀆𑀮𑁄𑀴𑁂𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀸𑀲𑀺, 𑀢𑀲𑁆𑀲 𑀢𑀗𑁆𑀔𑀡𑁂𑀬𑁂𑀯 𑀲𑁄 𑀆𑀩𑀸𑀥𑁄 𑀧𑀝𑀺𑀧𑀲𑁆𑀲𑀫𑁆𑀪𑀺. 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀲𑁆𑀲 𑀦𑀼 𑀔𑁄 𑀤𑁂𑀬𑁆𑀬𑀥𑀫𑁆𑀫𑁄 𑀤𑀺𑀦𑁆𑀦𑁄 𑀫𑀳𑀧𑁆𑀨𑀮𑁄 𑀳𑁄𑀢𑀺, 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀧𑀼𑀘𑁆𑀙𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀓𑀢𑁆𑀣 𑀤𑀚𑁆𑀚𑀸 𑀤𑁂𑀬𑁆𑀬𑀥𑀫𑁆𑀫𑀁, 𑀓𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁;

𑀓𑀣𑀜𑁆𑀳𑀺 𑀬𑀚𑀫𑀸𑀦𑀲𑁆𑀲, 𑀓𑀣𑀁 𑀇𑀚𑁆𑀛𑀢𑀺 𑀤𑀓𑁆𑀔𑀺𑀡𑀸’’𑀢𑀺. (𑀲𑀁. 𑀦𑀺. 𑁧.𑁧𑁯𑁯);

𑀅𑀣𑀲𑁆𑀲 𑀲𑀢𑁆𑀣𑀸 ‘‘𑀏𑀯𑀭𑀽𑀧𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀧𑀓𑀸𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁨𑁩. ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀬𑁄 𑀯𑁂𑀤𑀺, 𑀲𑀕𑁆𑀕𑀸𑀧𑀸𑀬𑀜𑁆𑀘 𑀧𑀲𑁆𑀲𑀢𑀺;

𑀅𑀣𑁄 𑀚𑀸𑀢𑀺𑀓𑁆𑀔𑀬𑀁 𑀧𑀢𑁆𑀢𑁄, 𑀅𑀪𑀺𑀜𑁆𑀜𑀸𑀯𑁄𑀲𑀺𑀢𑁄 𑀫𑀼𑀦𑀺; (𑀲𑀁. 𑀦𑀺. 𑁧.𑁧𑁯𑁯);

𑀲𑀩𑁆𑀩𑀯𑁄𑀲𑀺𑀢𑀯𑁄𑀲𑀸𑀦𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀚𑀸𑀦𑀸𑀢𑀺, 𑀙𑀩𑁆𑀩𑀻𑀲𑀢𑀺𑀤𑁂𑀯𑀮𑁄𑀓𑀪𑁂𑀤𑀁 𑀲𑀕𑁆𑀕𑀜𑁆𑀘 𑀘𑀢𑀼𑀩𑁆𑀩𑀺𑀥𑀁 𑀅𑀧𑀸𑀬𑀜𑁆𑀘 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀺, 𑀅𑀣𑁄 𑀚𑀸𑀢𑀺𑀓𑁆𑀔𑀬𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀥𑀫𑁆𑀫𑀁 𑀅𑀪𑀺𑀚𑀸𑀦𑀺𑀢𑁆𑀯𑀸 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀺𑀢𑁆𑀯𑀸 𑀧𑀳𑀸𑀢𑀩𑁆𑀩𑀁 𑀧𑀳𑀸𑀬 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑁆𑀯𑀸 𑀯𑁄𑀲𑀺𑀓𑁄 𑀦𑀺𑀝𑁆𑀞𑀸𑀦𑀁 𑀧𑀢𑁆𑀢𑁄, 𑀯𑀼𑀲𑀺𑀢𑀯𑁄𑀲𑀸𑀦𑀁 𑀯𑀸 𑀧𑀢𑁆𑀢𑁄, 𑀆𑀲𑀯𑀓𑁆𑀔𑀬𑀧𑀜𑁆𑀜𑀸𑀬 𑀫𑁄𑀦𑀪𑀸𑀯𑀁 𑀧𑀢𑁆𑀢𑀢𑁆𑀢𑀸 𑀫𑀼𑀦𑀺, 𑀢𑀫𑀳𑀁 𑀲𑀩𑁆𑀩𑁂𑀲𑀁 𑀓𑀺𑀮𑁂𑀲𑀸𑀦𑀁 𑀯𑁄𑀲𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀼𑀢𑁆𑀣𑀪𑀸𑀯𑁂𑀦 𑀲𑀩𑁆𑀩𑀯𑁄𑀲𑀺𑀢𑀯𑁄𑀲𑀸𑀦𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀧𑀲𑀦𑁆𑀦𑀫𑀸𑀦𑀲𑁄 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀉𑀧𑀸𑀲𑀓𑀢𑁆𑀢𑀁 𑀧𑀯𑁂𑀤𑁂𑀲𑀻𑀢𑀺.

𑀤𑁂𑀯𑀳𑀺𑀢𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀘𑀢𑁆𑀢𑀸𑀮𑀻𑀲𑀁.

𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀙𑀩𑁆𑀩𑀻𑀲𑀢𑀺𑀫𑁄 𑀯𑀕𑁆𑀕𑁄.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 𑀲𑀩𑁆𑀩𑀧𑀞𑀫𑁂 𑀬𑀫𑀓𑀯𑀕𑁆𑀕𑁂 𑀘𑀼𑀤𑁆𑀤𑀲 𑀯𑀢𑁆𑀣𑀽𑀦𑀺, 𑀅𑀧𑁆𑀧𑀫𑀸𑀤𑀯𑀕𑁆𑀕𑁂 𑀦𑀯, 𑀘𑀺𑀢𑁆𑀢𑀯𑀕𑁆𑀕𑁂 𑀦𑀯, 𑀧𑀼𑀧𑁆𑀨𑀯𑀕𑁆𑀕𑁂 𑀤𑁆𑀯𑀸𑀤𑀲, 𑀩𑀸𑀮𑀯𑀕𑁆𑀕𑁂 𑀧𑀦𑁆𑀦𑀭𑀲, 𑀧𑀡𑁆𑀟𑀺𑀢𑀯𑀕𑁆𑀕𑁂 𑀏𑀓𑀸𑀤𑀲, 𑀅𑀭𑀳𑀦𑁆𑀢𑀯𑀕𑁆𑀕𑁂 𑀤𑀲, 𑀲𑀳𑀲𑁆𑀲𑀯𑀕𑁆𑀕𑁂 𑀘𑀼𑀤𑁆𑀤𑀲, 𑀧𑀸𑀧𑀯𑀕𑁆𑀕𑁂 𑀤𑁆𑀯𑀸𑀤𑀲, 𑀤𑀡𑁆𑀟𑀯𑀕𑁆𑀕𑁂 𑀏𑀓𑀸𑀤𑀲, 𑀚𑀭𑀸𑀯𑀕𑁆𑀕𑁂 𑀦𑀯, 𑀅𑀢𑁆𑀢𑀯𑀕𑁆𑀕𑁂 𑀤𑀲, 𑀮𑁄𑀓𑀯𑀕𑁆𑀕𑁂 𑀏𑀓𑀸𑀤𑀲, 𑀩𑀼𑀤𑁆𑀥𑀯𑀕𑁆𑀕𑁂 𑀦𑀯, 𑀲𑀼𑀔𑀯𑀕𑁆𑀕𑁂 𑀅𑀝𑁆𑀞, 𑀧𑀺𑀬𑀯𑀕𑁆𑀕𑁂 𑀦𑀯, 𑀓𑁄𑀥𑀯𑀕𑁆𑀕𑁂 𑀅𑀝𑁆𑀞, 𑀫𑀮𑀯𑀕𑁆𑀕𑁂 𑀤𑁆𑀯𑀸𑀤𑀲, 𑀥𑀫𑁆𑀫𑀝𑁆𑀞𑀯𑀕𑁆𑀕𑁂 𑀤𑀲, 𑀫𑀕𑁆𑀕𑀯𑀕𑁆𑀕𑁂 𑀤𑁆𑀯𑀸𑀤𑀲, 𑀧𑀓𑀺𑀡𑁆𑀡𑀓𑀯𑀕𑁆𑀕𑁂 𑀦𑀯, 𑀦𑀺𑀭𑀬𑀯𑀕𑁆𑀕𑁂 𑀦𑀯, 𑀦𑀸𑀕𑀯𑀕𑁆𑀕𑁂 𑀅𑀝𑁆𑀞, 𑀢𑀡𑁆𑀳𑀸𑀯𑀕𑁆𑀕𑁂 𑀤𑁆𑀯𑀸𑀤𑀲, 𑀪𑀺𑀓𑁆𑀔𑀼𑀯𑀕𑁆𑀕𑁂 𑀤𑁆𑀯𑀸𑀤𑀲, 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁂 𑀘𑀢𑁆𑀢𑀸𑀮𑀻𑀲𑀸𑀢𑀺 𑀧𑀜𑁆𑀘𑀸𑀥𑀺𑀓𑀸𑀦𑀺 𑀢𑀻𑀡𑀺 𑀯𑀢𑁆𑀣𑀼𑀲𑀢𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀦𑀸𑀢𑀺𑀲𑀗𑁆𑀔𑁂𑀧𑀦𑀸𑀢𑀺𑀯𑀺𑀢𑁆𑀣𑀸𑀭𑀯𑀲𑁂𑀦 𑀉𑀧𑀭𑀘𑀺𑀢𑀸 𑀤𑁆𑀯𑀸𑀲𑀢𑁆𑀢𑀢𑀺𑀪𑀸𑀡𑀯𑀸𑀭𑀧𑀫𑀸𑀡𑀸 𑀥𑀫𑁆𑀫𑀧𑀤𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸𑀢𑀺.

𑀧𑀢𑁆𑀢𑀁 𑀥𑀫𑁆𑀫𑀧𑀤𑀁 𑀬𑁂𑀦, 𑀥𑀫𑁆𑀫𑀭𑀸𑀚𑁂𑀦𑀦𑀼𑀢𑁆𑀢𑀭𑀁;

𑀕𑀸𑀣𑀸 𑀥𑀫𑁆𑀫𑀧𑀤𑁂 𑀢𑁂𑀦, 𑀪𑀸𑀲𑀺𑀢𑀸 𑀬𑀸 𑀫𑀳𑁂𑀲𑀺𑀦𑀸.

𑀲𑀢𑁂𑀯𑀻𑀲𑀸 𑀘𑀢𑀼𑀲𑁆𑀲𑀢𑀸, 𑀘𑀢𑀼𑀲𑀘𑁆𑀘𑀯𑀺𑀪𑀸𑀯𑀺𑀦𑀸;

𑀲𑀢𑀢𑁆𑀢𑀬𑀜𑁆𑀳𑀺 𑀯𑀢𑁆𑀣𑀽𑀦𑀁, 𑀧𑀜𑁆𑀘𑀸𑀥𑀺𑀓𑀸 𑀲𑀫𑀼𑀝𑁆𑀞𑀺𑀢𑀸.

𑀯𑀺𑀳𑀸𑀭𑁂 𑀅𑀥𑀺𑀭𑀸𑀚𑁂𑀦, 𑀓𑀸𑀭𑀺𑀢𑀫𑁆𑀳𑀺 𑀓𑀢𑀜𑁆𑀜𑀼𑀦𑀸;

𑀧𑀸𑀲𑀸𑀤𑁂 𑀲𑀺𑀭𑀺𑀓𑀽𑀝𑀲𑁆𑀲, 𑀭𑀜𑁆𑀜𑁄 𑀯𑀺𑀳𑀭𑀢𑀸 𑀫𑀬𑀸.

𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁, 𑀅𑀢𑁆𑀣𑀸𑀬 𑀘 𑀳𑀺𑀢𑀸𑀬 𑀘;

𑀮𑁄𑀓𑀲𑁆𑀲 𑀮𑁄𑀓𑀦𑀸𑀣𑀲𑁆𑀲, 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀓𑀫𑁆𑀬𑀢𑀸.

𑀢𑀸𑀲𑀁 𑀅𑀝𑁆𑀞𑀓𑀣𑀁 𑀏𑀢𑀁, 𑀓𑀭𑁄𑀦𑁆𑀢𑁂𑀦 𑀲𑀼𑀦𑀺𑀫𑁆𑀫𑀮𑀁;

𑀤𑁆𑀯𑀸𑀲𑀢𑁆𑀢𑀢𑀺𑀧𑀫𑀸𑀡𑀸𑀬, 𑀪𑀸𑀡𑀯𑀸𑀭𑁂𑀳𑀺 𑀧𑀸𑀴𑀺𑀬𑀸.

𑀬𑀁 𑀧𑀢𑁆𑀢𑀁 𑀓𑀼𑀲𑀮𑀁 𑀢𑁂𑀦, 𑀓𑀼𑀲𑀮𑀸 𑀲𑀩𑁆𑀩𑀧𑀸𑀡𑀺𑀦𑀁;

𑀲𑀩𑁆𑀩𑁂 𑀇𑀚𑁆𑀛𑀦𑁆𑀢𑀼 𑀲𑀗𑁆𑀓𑀧𑁆𑀧𑀸, 𑀮𑀪𑀦𑁆𑀢𑀼 𑀫𑀥𑀼𑀭𑀁 𑀨𑀮𑀦𑁆𑀢𑀺.

𑀧𑀭𑀫𑀯𑀺𑀲𑀼𑀤𑁆𑀥𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀻𑀭𑀺𑀬𑀧𑀝𑀺𑀫𑀡𑁆𑀟𑀺𑀢𑁂𑀦 𑀲𑀻𑀮𑀸𑀘𑀸𑀭𑀚𑁆𑀚𑀯𑀫𑀤𑁆𑀤𑀯𑀸𑀤𑀺𑀕𑀼𑀡𑀲𑀫𑀼𑀤𑀬𑀲𑀫𑀼𑀤𑀺𑀢𑁂𑀦 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀡𑀲𑀫𑀢𑁆𑀣𑁂𑀦 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀲𑀫𑀦𑁆𑀦𑀸𑀕𑀢𑁂𑀦 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑁂 𑀲𑀸𑀝𑁆𑀞𑀓𑀣𑁂 𑀲𑀢𑁆𑀣𑀼𑀲𑀸𑀲𑀦𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀧𑁆𑀧𑀪𑀸𑀯𑁂𑀦 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑀲𑀼𑀔𑀯𑀺𑀦𑀺𑀕𑁆𑀕𑀢𑀫𑀥𑀼𑀭𑁄𑀤𑀸𑀭𑀯𑀘𑀦𑀮𑀸𑀯𑀡𑁆𑀡𑀬𑀼𑀢𑁆𑀢𑁂𑀦 𑀬𑀼𑀢𑁆𑀢𑀫𑀼𑀢𑁆𑀢𑀯𑀸𑀤𑀺𑀦𑀸 𑀯𑀸𑀤𑀻𑀯𑀭𑁂𑀦 𑀫𑀳𑀸𑀓𑀯𑀺𑀦𑀸 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸𑀧𑀭𑀺𑀯𑀸𑀭𑁂 𑀙𑀴𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀧𑁆𑀧𑀪𑁂𑀤𑀕𑀼𑀡𑀧𑀝𑀺𑀫𑀡𑁆𑀟𑀺𑀢𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀩𑀼𑀤𑁆𑀥𑀻𑀦𑀁 𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸𑀦𑀁 𑀣𑁂𑀭𑀸𑀦𑀁 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀁𑀲𑀸𑀮𑀗𑁆𑀓𑀸𑀭𑀪𑀽𑀢𑁂𑀦 𑀯𑀺𑀧𑀼𑀮𑀯𑀺𑀲𑀼𑀤𑁆𑀥𑀩𑀼𑀤𑁆𑀥𑀺𑀦𑀸 𑀩𑀼𑀤𑁆𑀥𑀖𑁄𑀲𑁄𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀣𑁂𑀭𑁂𑀦 𑀓𑀢𑀸𑀬𑀁 𑀥𑀫𑁆𑀫𑀧𑀤𑀝𑁆𑀞𑀓𑀣𑀸 𑁋

𑀢𑀸𑀯 𑀢𑀺𑀝𑁆𑀞𑀢𑀼 𑀮𑁄𑀓𑀲𑁆𑀫𑀺𑀁, 𑀮𑁄𑀓𑀦𑀺𑀢𑁆𑀣𑀭𑀡𑁂𑀲𑀺𑀦𑀁;

𑀤𑀲𑁆𑀲𑁂𑀦𑁆𑀢𑀻 𑀓𑀼𑀮𑀧𑀼𑀢𑁆𑀢𑀸𑀦𑀁, 𑀦𑀬𑀁 𑀲𑀤𑁆𑀥𑀸𑀤𑀺𑀩𑀼𑀤𑁆𑀥𑀺𑀬𑀸.

𑀬𑀸𑀯 𑀩𑀼𑀤𑁆𑀥𑁄𑀢𑀺 𑀦𑀸𑀫𑀫𑁆𑀧𑀺, 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀮𑁄𑀓𑀫𑁆𑀳𑀺 𑀮𑁄𑀓𑀚𑁂𑀝𑁆𑀞𑀲𑁆𑀲, 𑀧𑀯𑀢𑁆𑀢𑀢𑀺 𑀫𑀳𑁂𑀲𑀺𑀦𑁄𑀢𑀺.

𑀇𑀢𑀺 𑀢𑁂𑀯𑀻𑀲𑀸𑀥𑀺𑀓𑀘𑀢𑀼𑀲𑀢𑀕𑀸𑀣𑀸𑀧𑀜𑁆𑀘𑀸𑀥𑀺𑀓𑀢𑀺𑀲𑀢𑀯𑀢𑁆𑀣𑀼𑀧𑀝𑀺𑀫𑀡𑁆𑀟𑀺𑀢𑀸

𑀙𑀩𑁆𑀩𑀻𑀲𑀢𑀺𑀯𑀕𑁆𑀕𑀲𑀫𑀦𑁆𑀦𑀸𑀕𑀢𑀸 𑀥𑀫𑁆𑀫𑀧𑀤𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀥𑀫𑁆𑀫𑀧𑀤-𑀅𑀝𑁆𑀞𑀓𑀣𑀸 𑀲𑀩𑁆𑀩𑀸𑀓𑀸𑀭𑁂𑀦 𑀦𑀺𑀝𑁆𑀞𑀺𑀢𑀸.