𑁨𑁬. 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄

𑁧. 𑀧𑀲𑀸𑀤𑀩𑀳𑀼𑀮𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑀙𑀺𑀦𑁆𑀤 𑀲𑁄𑀢𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀲𑀸𑀤𑀩𑀳𑀼𑀮𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀅𑀢𑁆𑀢𑀦𑁄 𑀕𑁂𑀳𑁂 𑀲𑁄𑀴𑀲𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦𑀺𑀘𑁆𑀘𑀪𑀢𑁆𑀢𑀁 𑀧𑀝𑁆𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀆𑀕𑀢𑀯𑁂𑀮𑀸𑀬 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 ‘‘𑀆𑀕𑀘𑁆𑀙𑀦𑁆𑀢𑀼 𑀪𑁄𑀦𑁆𑀢𑁄 𑀅𑀭𑀳𑀦𑁆𑀢𑁄, 𑀦𑀺𑀲𑀻𑀤𑀦𑁆𑀢𑀼 𑀪𑁄𑀦𑁆𑀢𑁄 𑀅𑀭𑀳𑀦𑁆𑀢𑁄’’𑀢𑀺 𑀬𑀁𑀓𑀺𑀜𑁆𑀘𑀺 𑀯𑀤𑀦𑁆𑀢𑁄 𑀅𑀭𑀳𑀦𑁆𑀢𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀫𑁂𑀯 𑀯𑀤𑀢𑀺. 𑀢𑁂𑀲𑀼 𑀧𑀼𑀣𑀼𑀚𑁆𑀚𑀦𑀸 ‘‘𑀅𑀬𑀁 𑀅𑀫𑁆𑀳𑁂𑀲𑀼 𑀅𑀭𑀳𑀦𑁆𑀢𑀲𑀜𑁆𑀜𑀻’’𑀢𑀺 𑀘𑀺𑀦𑁆𑀢𑀬𑀺𑀁𑀲𑀼, 𑀔𑀻𑀡𑀸𑀲𑀯𑀸 ‘‘𑀅𑀬𑀁 𑀦𑁄 𑀔𑀻𑀡𑀸𑀲𑀯𑀪𑀸𑀯𑀁 𑀚𑀸𑀦𑀸𑀢𑀻’’𑀢𑀺. 𑀏𑀯𑀁 𑀢𑁂 𑀲𑀩𑁆𑀩𑁂𑀧𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀢𑀲𑁆𑀲 𑀕𑁂𑀳𑀁 𑀦𑀸𑀕𑀫𑀺𑀁𑀲𑀼. 𑀲𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 ‘‘𑀓𑀺𑀦𑁆𑀦𑀼 𑀔𑁄, 𑀅𑀬𑁆𑀬𑀸, 𑀦𑀸𑀕𑀘𑁆𑀙𑀦𑁆𑀢𑀻’’𑀢𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀓𑀺𑀁 𑀏𑀢𑀁, 𑀪𑀺𑀓𑁆𑀔𑀯𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀳𑀺 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀆𑀭𑁄𑀘𑀺𑀢𑁂 ‘‘𑀲𑀸𑀤𑀺𑀬𑀣 𑀧𑀦 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀭𑀳𑀦𑁆𑀢𑀯𑀸𑀤’’𑀦𑁆𑀢𑀺 𑀆𑀳. ‘‘𑀦 𑀲𑀸𑀤𑀺𑀬𑀸𑀫 𑀫𑀬𑀁, 𑀪𑀦𑁆𑀢𑁂’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀫𑀦𑀼𑀲𑁆𑀲𑀸𑀦𑀁 𑀏𑀢𑀁 𑀧𑀲𑀸𑀤𑀪𑀜𑁆𑀜𑀁, 𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀲𑀸𑀤𑀪𑀜𑁆𑀜𑁂, 𑀅𑀧𑀺 𑀘 𑀔𑁄 𑀧𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀭𑀳𑀦𑁆𑀢𑁂𑀲𑀼 𑀅𑀥𑀺𑀫𑀢𑁆𑀢𑀁 𑀧𑁂𑀫𑀁, 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀺𑀧𑀺 𑀢𑀡𑁆𑀳𑀸𑀲𑁄𑀢𑀁 𑀙𑁂𑀢𑁆𑀯𑀸 𑀅𑀭𑀳𑀢𑁆𑀢𑀫𑁂𑀯 𑀧𑀢𑁆𑀢𑀼𑀁 𑀬𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁮𑁩. ‘‘𑀙𑀺𑀦𑁆𑀤 𑀲𑁄𑀢𑀁 𑀧𑀭𑀓𑁆𑀓𑀫𑁆𑀫, 𑀓𑀸𑀫𑁂 𑀧𑀦𑀼𑀤 𑀩𑁆𑀭𑀸𑀳𑁆𑀫𑀡;

𑀲𑀗𑁆𑀔𑀸𑀭𑀸𑀦𑀁 𑀔𑀬𑀁 𑀜𑀢𑁆𑀯𑀸, 𑀅𑀓𑀢𑀜𑁆𑀜𑀽𑀲𑀺 𑀩𑁆𑀭𑀸𑀳𑁆𑀫𑀡𑀸’’𑀢𑀺.

𑀢𑀢𑁆𑀣 𑀧𑀭𑀓𑁆𑀓𑀫𑁆𑀫𑀸𑀢𑀺 𑀢𑀡𑁆𑀳𑀸𑀲𑁄𑀢𑀁 𑀦𑀸𑀫 𑀦 𑀅𑀧𑁆𑀧𑀫𑀢𑁆𑀢𑀓𑁂𑀦 𑀯𑀸𑀬𑀸𑀫𑁂𑀦 𑀙𑀺𑀦𑁆𑀤𑀺𑀢𑀼𑀁 𑀲𑀓𑁆𑀓𑀸, 𑀢𑀲𑁆𑀫𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀦 𑀫𑀳𑀦𑁆𑀢𑁂𑀦 𑀧𑀭𑀓𑁆𑀓𑀫𑁂𑀦 𑀧𑀭𑀓𑁆𑀓𑀫𑀺𑀢𑁆𑀯𑀸 𑀢𑀁 𑀲𑁄𑀢𑀁 𑀙𑀺𑀦𑁆𑀤. 𑀉𑀪𑁄𑀧𑀺 𑀓𑀸𑀫𑁂 𑀧𑀦𑀼𑀤 𑀦𑀻𑀳𑀭. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀔𑀻𑀡𑀸𑀲𑀯𑀸𑀦𑀁 𑀆𑀮𑀧𑀦𑀫𑁂𑀢𑀁. 𑀲𑀗𑁆𑀔𑀸𑀭𑀸𑀦𑀦𑁆𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀔𑀬𑀁 𑀚𑀸𑀦𑀺𑀢𑁆𑀯𑀸. 𑀅𑀓𑀢𑀜𑁆𑀜𑀽𑀢𑀺 𑀏𑀯𑀁 𑀲𑀦𑁆𑀢𑁂 𑀢𑁆𑀯𑀁 𑀲𑀼𑀯𑀡𑁆𑀡𑀸𑀤𑀻𑀲𑀼 𑀓𑁂𑀦𑀘𑀺 𑀅𑀓𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀚𑀸𑀦𑀦𑀢𑁄 𑀅𑀓𑀢𑀜𑁆𑀜𑀽 𑀦𑀸𑀫 𑀳𑁄𑀲𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀧𑀲𑀸𑀤𑀩𑀳𑀼𑀮𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀧𑀞𑀫𑀁.

𑁨. 𑀲𑀫𑁆𑀩𑀳𑀼𑀮𑀪𑀺𑀓𑁆𑀔𑀼𑀯𑀢𑁆𑀣𑀼

𑀬𑀤𑀸 𑀤𑁆𑀯𑀬𑁂𑀲𑀽𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀤𑀺𑀯𑀲𑀜𑁆𑀳𑀺 𑀢𑀺𑀁𑀲𑀫𑀢𑁆𑀢𑀸 𑀤𑀺𑀲𑀸𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀢𑁂𑀲𑀁 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀞𑀺𑀢𑀓𑁄𑀯 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀤𑁆𑀯𑁂 𑀥𑀫𑁆𑀫𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀓𑀢𑀫𑁂 𑀦𑀼 𑀔𑁄 𑀤𑁆𑀯𑁂 𑀥𑀫𑁆𑀫𑀸’’𑀢𑀺? 𑀅𑀣 𑀦𑀁 𑀲𑀢𑁆𑀣𑀸 ‘‘𑀤𑁆𑀯𑁂 𑀥𑀫𑁆𑀫𑀸𑀢𑀺 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀫𑀣𑀯𑀺𑀧𑀲𑁆𑀲𑀦𑀸 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁮𑁪. ‘‘𑀬𑀤𑀸 𑀤𑁆𑀯𑀬𑁂𑀲𑀼 𑀥𑀫𑁆𑀫𑁂𑀲𑀼, 𑀧𑀸𑀭𑀕𑀽 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀅𑀣𑀲𑁆𑀲 𑀲𑀩𑁆𑀩𑁂 𑀲𑀁𑀬𑁄𑀕𑀸, 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀚𑀸𑀦𑀢𑁄’’𑀢𑀺.

𑀢𑀢𑁆𑀣 𑀬𑀤𑀸𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀤𑁆𑀯𑀺𑀥𑀸 𑀞𑀺𑀢𑁂𑀲𑀼 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂𑀲𑀼 𑀅𑀪𑀺𑀜𑁆𑀜𑀸𑀧𑀸𑀭𑀕𑀸𑀤𑀺𑀯𑀲𑁂𑀦 𑀅𑀬𑀁 𑀔𑀻𑀡𑀸𑀲𑀯𑁄 𑀧𑀸𑀭𑀕𑀽 𑀳𑁄𑀢𑀺, 𑀅𑀣𑀲𑁆𑀲 𑀯𑀝𑁆𑀝𑀲𑁆𑀫𑀺𑀁 𑀲𑀁𑀬𑁄𑀚𑀦𑀲𑀫𑀢𑁆𑀣𑀸 𑀲𑀩𑁆𑀩𑁂 𑀓𑀸𑀫𑀬𑁄𑀕𑀸𑀤𑀬𑁄 𑀲𑀁𑀬𑁄𑀕𑀸 𑀏𑀯𑀁 𑀚𑀸𑀦𑀦𑁆𑀢𑀲𑁆𑀲 𑀅𑀢𑁆𑀣𑀁 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀲𑀩𑁆𑀩𑁂𑀧𑀺 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀲𑀫𑁆𑀩𑀳𑀼𑀮𑀪𑀺𑀓𑁆𑀔𑀼𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀫𑀸𑀭𑀯𑀢𑁆𑀣𑀼

𑀬𑀲𑁆𑀲 𑀧𑀸𑀭𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀸𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭𑁂𑀓𑀲𑁆𑀫𑀺𑀁 𑀤𑀺𑀯𑀲𑁂 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀯𑀺𑀬 𑀳𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀧𑀸𑀭𑀁 𑀧𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀓𑀺𑀦𑁆𑀦𑀼 𑀔𑁄 𑀏𑀢𑀁 𑀧𑀸𑀭𑀁 𑀦𑀸𑀫𑀸’’𑀢𑀺. 𑀲𑀢𑁆𑀣𑀸 ‘‘𑀫𑀸𑀭𑁄 𑀅𑀬’’𑀦𑁆𑀢𑀺 𑀯𑀺𑀤𑀺𑀢𑁆𑀯𑀸, ‘‘𑀧𑀸𑀧𑀺𑀫, 𑀓𑀺𑀁 𑀢𑀯 𑀧𑀸𑀭𑁂𑀦, 𑀢𑀜𑁆𑀳𑀺 𑀯𑀻𑀢𑀭𑀸𑀕𑁂𑀳𑀺 𑀧𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁮𑁫. ‘‘𑀬𑀲𑁆𑀲 𑀧𑀸𑀭𑀁 𑀅𑀧𑀸𑀭𑀁 𑀯𑀸, 𑀧𑀸𑀭𑀸𑀧𑀸𑀭𑀁 𑀦 𑀯𑀺𑀚𑁆𑀚𑀢𑀺;

𑀯𑀻𑀢𑀤𑁆𑀤𑀭𑀁 𑀯𑀺𑀲𑀁𑀬𑀼𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀧𑀸𑀭𑀦𑁆𑀢𑀺 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀙 𑀆𑀬𑀢𑀦𑀸𑀦𑀺. 𑀅𑀧𑀸𑀭𑀦𑁆𑀢𑀺 𑀩𑀸𑀳𑀺𑀭𑀸𑀦𑀺 𑀙 𑀆𑀬𑀢𑀦𑀸𑀦𑀺. 𑀧𑀸𑀭𑀸𑀧𑀸𑀭𑀦𑁆𑀢𑀺 𑀢𑀤𑀼𑀪𑀬𑀁. 𑀦 𑀯𑀺𑀚𑁆𑀚𑀢𑀻𑀢𑀺 𑀬𑀲𑁆𑀲 𑀲𑀩𑁆𑀩𑀫𑁆𑀧𑁂𑀢𑀁 ‘‘𑀅𑀳’’𑀦𑁆𑀢𑀺 𑀯𑀸 ‘‘𑀫𑀫’’𑀦𑁆𑀢𑀺 𑀯𑀸 𑀕𑀳𑀡𑀸𑀪𑀸𑀯𑁂𑀦 𑀦𑀢𑁆𑀣𑀺, 𑀢𑀁 𑀓𑀺𑀮𑁂𑀲𑀤𑀭𑀣𑀸𑀦𑀁 𑀯𑀺𑀕𑀫𑁂𑀦 𑀯𑀻𑀢𑀤𑁆𑀤𑀭𑀁 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀯𑀺𑀲𑀁𑀬𑀼𑀢𑁆𑀢𑀁 𑀅𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀫𑀸𑀭𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑀛𑀸𑀬𑀺𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀢𑁆𑀣𑀸 𑀅𑀢𑁆𑀢𑀦𑁄 𑀲𑀸𑀯𑀓𑁂, ‘𑀩𑁆𑀭𑀸𑀳𑁆𑀫𑀡𑀸’𑀢𑀺 𑀯𑀤𑀢𑀺, 𑀅𑀳𑀜𑁆𑀘𑀫𑁆𑀳𑀺 𑀚𑀸𑀢𑀺𑀕𑁄𑀢𑁆𑀢𑁂𑀦 𑀩𑁆𑀭𑀸𑀳𑁆𑀫𑀡𑁄, 𑀫𑀫𑁆𑀧𑀺 𑀦𑀼 𑀔𑁄 𑀏𑀯𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀲𑀢𑁆𑀣𑀸 ‘‘𑀦𑀸𑀳𑀁 𑀚𑀸𑀢𑀺𑀕𑁄𑀢𑁆𑀢𑀫𑀢𑁆𑀢𑁂𑀦 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀺, 𑀉𑀢𑁆𑀢𑀫𑀢𑁆𑀣𑀁 𑀅𑀭𑀳𑀢𑁆𑀢𑀁 𑀅𑀦𑀼𑀧𑁆𑀧𑀢𑁆𑀢𑀫𑁂𑀯 𑀧𑀦𑁂𑀯𑀁 𑀯𑀤𑀸𑀫𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁮𑁬. ‘‘𑀛𑀸𑀬𑀺𑀁 𑀯𑀺𑀭𑀚𑀫𑀸𑀲𑀻𑀦𑀁, 𑀓𑀢𑀓𑀺𑀘𑁆𑀘𑀫𑀦𑀸𑀲𑀯𑀁;

𑀉𑀢𑁆𑀢𑀫𑀢𑁆𑀣𑀫𑀦𑀼𑀧𑁆𑀧𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀛𑀸𑀬𑀺𑀦𑁆𑀢𑀺 𑀤𑀼𑀯𑀺𑀥𑁂𑀦 𑀛𑀸𑀦𑁂𑀦 𑀛𑀸𑀬𑀦𑁆𑀢𑀁 𑀓𑀸𑀫𑀭𑀚𑁂𑀦 𑀯𑀺𑀭𑀚𑀁 𑀯𑀦𑁂 𑀏𑀓𑀓𑀫𑀸𑀲𑀻𑀦𑀁 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀲𑁄𑀴𑀲𑀦𑁆𑀦𑀁 𑀓𑀺𑀘𑁆𑀘𑀸𑀦𑀁 𑀓𑀢𑀢𑁆𑀢𑀸 𑀓𑀢𑀓𑀺𑀘𑁆𑀘𑀁 𑀆𑀲𑀯𑀸𑀦𑀁 𑀅𑀪𑀸𑀯𑁂𑀦 𑀅𑀦𑀸𑀲𑀯𑀁 𑀉𑀢𑁆𑀢𑀫𑀢𑁆𑀣𑀁 𑀅𑀭𑀳𑀢𑁆𑀢𑀁 𑀅𑀦𑀼𑀧𑁆𑀧𑀢𑁆𑀢𑀁 𑀅𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀆𑀦𑀦𑁆𑀤𑀢𑁆𑀣𑁂𑀭𑀯𑀢𑁆𑀣𑀼

𑀤𑀺𑀯𑀸 𑀢𑀧𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 𑀯𑀺𑀳𑀭𑀦𑁆𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀧𑀲𑁂𑀦𑀤𑀺 𑀓𑁄𑀲𑀮𑁄 𑀓𑀺𑀭 𑀫𑀳𑀸𑀧𑀯𑀸𑀭𑀡𑀸𑀬 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑁄 𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀆𑀤𑀸𑀬 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁄 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀦𑀸𑀫𑀫𑁂𑀯 𑀧𑀦𑀲𑁆𑀲𑁂𑀢𑀁, 𑀲𑀭𑀻𑀭𑀁 𑀲𑀼𑀯𑀡𑁆𑀡𑀯𑀡𑁆𑀡𑀁. 𑀢𑀲𑁆𑀫𑀺𑀁 𑀧𑀦 𑀔𑀡𑁂 𑀘𑀦𑁆𑀤𑁄 𑀉𑀕𑁆𑀕𑀘𑁆𑀙𑀢𑀺, 𑀲𑀽𑀭𑀺𑀬𑁄 𑀅𑀢𑁆𑀣𑀫𑁂𑀢𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀅𑀢𑁆𑀣𑀫𑁂𑀦𑁆𑀢𑀲𑁆𑀲 𑀘 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀘𑁆𑀙𑀦𑁆𑀢𑀲𑁆𑀲 𑀘 𑀘𑀦𑁆𑀤𑀲𑁆𑀲 𑀑𑀪𑀸𑀲𑀁 𑀑𑀮𑁄𑀓𑁂𑀦𑁆𑀢𑁄 𑀭𑀜𑁆𑀜𑁄 𑀲𑀭𑀻𑀭𑁄𑀪𑀸𑀲𑀁 𑀣𑁂𑀭𑀲𑁆𑀲 𑀲𑀭𑀻𑀭𑁄𑀪𑀸𑀲𑀁 𑀢𑀣𑀸𑀕𑀢𑀲𑁆𑀲 𑀘 𑀲𑀭𑀻𑀭𑁄𑀪𑀸𑀲𑀁 𑀑𑀮𑁄𑀓𑁂𑀲𑀺. 𑀢𑀢𑁆𑀣 𑀲𑀩𑁆𑀩𑁄𑀪𑀸𑀲𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀸𑀯 𑀯𑀺𑀭𑁄𑀘𑀢𑀺. 𑀣𑁂𑀭𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀚𑁆𑀚 𑀫𑀫 𑀇𑀫𑁂 𑀑𑀪𑀸𑀲𑁂 𑀑𑀮𑁄𑀓𑁂𑀦𑁆𑀢𑀲𑁆𑀲 𑀢𑀼𑀫𑁆𑀳𑀸𑀓𑀫𑁂𑀯 𑀑𑀪𑀸𑀲𑁄 𑀭𑀼𑀘𑁆𑀘𑀢𑀺. 𑀢𑀼𑀫𑁆𑀳𑀸𑀓𑀜𑁆𑀳𑀺 𑀲𑀭𑀻𑀭𑀁 𑀲𑀩𑁆𑀩𑁄𑀪𑀸𑀲𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀺𑀭𑁄𑀘𑀢𑀻’’𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸, ‘‘𑀆𑀦𑀦𑁆𑀤, 𑀲𑀽𑀭𑀺𑀬𑁄 𑀦𑀸𑀫 𑀤𑀺𑀯𑀸 𑀯𑀺𑀭𑁄𑀘𑀢𑀺, 𑀘𑀦𑁆𑀤𑁄 𑀭𑀢𑁆𑀢𑀺𑀁, 𑀭𑀸𑀚𑀸 𑀅𑀮𑀗𑁆𑀓𑀢𑀓𑀸𑀮𑁂𑀬𑁂𑀯, 𑀔𑀻𑀡𑀸𑀲𑀯𑁂 𑀕𑀡𑀲𑀗𑁆𑀕𑀡𑀺𑀓𑀁 𑀧𑀳𑀸𑀬 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁𑀬𑁂𑀯 𑀯𑀺𑀭𑁄𑀘𑀢𑀺, 𑀩𑀼𑀤𑁆𑀥𑀸 𑀧𑀦 𑀭𑀢𑁆𑀢𑀺𑀫𑁆𑀧𑀺 𑀤𑀺𑀯𑀸𑀧𑀺 𑀧𑀜𑁆𑀘𑀯𑀺𑀥𑁂𑀦 𑀢𑁂𑀚𑁂𑀦 𑀯𑀺𑀭𑁄𑀘𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁮𑁭. ‘‘𑀤𑀺𑀯𑀸 𑀢𑀧𑀢𑀺 𑀆𑀤𑀺𑀘𑁆𑀘𑁄, 𑀭𑀢𑁆𑀢𑀺𑀫𑀸𑀪𑀸𑀢𑀺 𑀘𑀦𑁆𑀤𑀺𑀫𑀸;

𑀲𑀦𑁆𑀦𑀤𑁆𑀥𑁄 𑀔𑀢𑁆𑀢𑀺𑀬𑁄 𑀢𑀧𑀢𑀺, 𑀛𑀸𑀬𑀻 𑀢𑀧𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀅𑀣 𑀲𑀩𑁆𑀩𑀫𑀳𑁄𑀭𑀢𑁆𑀢𑀺𑀁, 𑀩𑀼𑀤𑁆𑀥𑁄 𑀢𑀧𑀢𑀺 𑀢𑁂𑀚𑀲𑀸’’𑀢𑀺.

𑀢𑀢𑁆𑀣 𑀤𑀺𑀯𑀸 𑀢𑀧𑀢𑀻𑀢𑀺 𑀤𑀺𑀯𑀸 𑀯𑀺𑀭𑁄𑀘𑀢𑀺, 𑀭𑀢𑁆𑀢𑀺𑀁 𑀧𑀦𑀲𑁆𑀲 𑀕𑀢𑀫𑀕𑁆𑀕𑁄𑀧𑀺 𑀦 𑀧𑀜𑁆𑀜𑀸𑀬𑀢𑀺. 𑀘𑀦𑁆𑀤𑀺𑀫𑀸𑀢𑀺 𑀘𑀦𑁆𑀤𑁄𑀧𑀺 𑀅𑀩𑁆𑀪𑀸𑀤𑀻𑀳𑀺 𑀯𑀺𑀫𑀼𑀢𑁆𑀢𑁄 𑀭𑀢𑁆𑀢𑀺𑀫𑁂𑀯 𑀯𑀺𑀭𑁄𑀘𑀢𑀺, 𑀦𑁄 𑀤𑀺𑀯𑀸. 𑀲𑀦𑁆𑀦𑀤𑁆𑀥𑁄𑀢𑀺 𑀲𑀼𑀯𑀡𑁆𑀡𑀫𑀡𑀺𑀯𑀺𑀘𑀺𑀢𑁆𑀢𑁂𑀳𑀺 𑀲𑀩𑁆𑀩𑀸𑀪𑀭𑀡𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀧𑀭𑀺𑀓𑁆𑀔𑀺𑀢𑁆𑀢𑁄𑀯 𑀭𑀸𑀚𑀸 𑀯𑀺𑀭𑁄𑀘𑀢𑀺, 𑀦 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀞𑀺𑀢𑁄. 𑀛𑀸𑀬𑀻𑀢𑀺 𑀔𑀻𑀡𑀸𑀲𑀯𑁄 𑀧𑀦 𑀕𑀡𑀁 𑀯𑀺𑀦𑁄𑀤𑁂𑀢𑁆𑀯𑀸 𑀛𑀸𑀬𑀦𑁆𑀢𑁄𑀯 𑀯𑀺𑀭𑁄𑀘𑀢𑀺. 𑀢𑁂𑀚𑀲𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀲𑀻𑀮𑀢𑁂𑀚𑁂𑀦 𑀤𑀼𑀲𑁆𑀲𑀻𑀮𑁆𑀬𑀢𑁂𑀚𑀁, 𑀕𑀼𑀡𑀢𑁂𑀚𑁂𑀦 𑀦𑀺𑀕𑁆𑀕𑀼𑀡𑀢𑁂𑀚𑀁, 𑀧𑀜𑁆𑀜𑀸𑀢𑁂𑀚𑁂𑀦 𑀤𑀼𑀧𑁆𑀧𑀜𑁆𑀜𑀢𑁂𑀚𑀁, 𑀧𑀼𑀜𑁆𑀜𑀢𑁂𑀚𑁂𑀦 𑀅𑀧𑀼𑀜𑁆𑀜𑀢𑁂𑀚𑀁, 𑀥𑀫𑁆𑀫𑀢𑁂𑀚𑁂𑀦 𑀅𑀥𑀫𑁆𑀫𑀢𑁂𑀚𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀇𑀫𑀺𑀦𑀸 𑀧𑀜𑁆𑀘𑀯𑀺𑀥𑁂𑀦 𑀢𑁂𑀚𑀲𑀸 𑀦𑀺𑀘𑁆𑀘𑀓𑀸𑀮𑀫𑁂𑀯 𑀯𑀺𑀭𑁄𑀘𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀆𑀦𑀦𑁆𑀤𑀢𑁆𑀣𑁂𑀭𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑀺𑀢𑀯𑀢𑁆𑀣𑀼

𑀩𑀸𑀳𑀺𑀢𑀧𑀸𑀧𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑀺𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀩𑀸𑀳𑀺𑀭𑀓𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 ‘‘𑀲𑀫𑀡𑁄 𑀕𑁄𑀢𑀫𑁄 𑀅𑀢𑁆𑀢𑀦𑁄 𑀲𑀸𑀯𑀓𑁂 ‘𑀧𑀩𑁆𑀩𑀚𑀺𑀢𑀸’𑀢𑀺 𑀯𑀤𑀢𑀺, 𑀅𑀳𑀜𑁆𑀘𑀫𑁆𑀳𑀺 𑀧𑀩𑁆𑀩𑀚𑀺𑀢𑁄, 𑀫𑀫𑁆𑀧𑀺 𑀔𑁄 𑀏𑀯𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀲𑀢𑁆𑀣𑀸 ‘‘𑀦𑀸𑀳𑀁 𑀏𑀢𑁆𑀢𑀓𑁂𑀦 ‘𑀧𑀩𑁆𑀩𑀚𑀺𑀢𑁄’𑀢𑀺 𑀯𑀤𑀸𑀫𑀺, 𑀓𑀺𑀮𑁂𑀲𑀫𑀮𑀸𑀦𑀁 𑀧𑀦 𑀧𑀩𑁆𑀩𑀸𑀚𑀺𑀢𑀢𑁆𑀢𑀸 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁮𑁮. ‘‘𑀩𑀸𑀳𑀺𑀢𑀧𑀸𑀧𑁄𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀲𑀫𑀘𑀭𑀺𑀬𑀸 𑀲𑀫𑀡𑁄𑀢𑀺 𑀯𑀼𑀘𑁆𑀘𑀢𑀺;

𑀧𑀩𑁆𑀩𑀸𑀚𑀬𑀫𑀢𑁆𑀢𑀦𑁄 𑀫𑀮𑀁, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀲𑀫𑀘𑀭𑀺𑀬𑀸𑀢𑀺 𑀲𑀩𑁆𑀩𑀸𑀓𑀼𑀲𑀮𑀸𑀦𑀺 𑀲𑀫𑁂𑀢𑁆𑀯𑀸 𑀘𑀭𑀡𑁂𑀦. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀩𑀸𑀳𑀺𑀢𑀧𑀸𑀧𑀢𑀸𑀬 𑀩𑁆𑀭𑀸𑀳𑁆𑀫𑀡𑁄, 𑀅𑀓𑀼𑀲𑀮𑀸𑀦𑀺 𑀲𑀫𑁂𑀢𑁆𑀯𑀸 𑀘𑀭𑀡𑁂𑀦 𑀲𑀫𑀡𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀬𑁄 𑀅𑀢𑁆𑀢𑀦𑁄 𑀭𑀸𑀕𑀸𑀤𑀺𑀫𑀮𑀁 𑀧𑀩𑁆𑀩𑀸𑀚𑀬𑀦𑁆𑀢𑁄 𑀯𑀺𑀦𑁄𑀤𑁂𑀦𑁆𑀢𑁄 𑀘𑀭𑀢𑀺, 𑀲𑁄𑀧𑀺 𑀢𑁂𑀦 𑀧𑀩𑁆𑀩𑀸𑀚𑀦𑁂𑀦 𑀧𑀩𑁆𑀩𑀚𑀺𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑀺𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑀺𑀢𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼

𑀦 𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀁 𑀓𑀺𑀭 𑀞𑀸𑀦𑁂 𑀲𑀫𑁆𑀩𑀳𑀼𑀮𑀸 𑀫𑀦𑀼𑀲𑁆𑀲𑀸 ‘‘𑀅𑀳𑁄 𑀅𑀫𑁆𑀳𑀸𑀓𑀁, 𑀅𑀬𑁆𑀬𑁄, 𑀔𑀦𑁆𑀢𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀅𑀜𑁆𑀜𑁂𑀲𑀼 𑀅𑀓𑁆𑀓𑁄𑀲𑀦𑁆𑀢𑁂𑀲𑀼 𑀯𑀸 𑀧𑀳𑀭𑀦𑁆𑀢𑁂𑀲𑀼 𑀯𑀸 𑀓𑁄𑀧𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀻’’𑀢𑀺 𑀣𑁂𑀭𑀲𑁆𑀲 𑀕𑀼𑀡𑁂 𑀓𑀣𑀬𑀺𑀁𑀲𑀼. 𑀅𑀣𑁂𑀓𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀓𑁄 𑀏𑀲 𑀦 𑀓𑀼𑀚𑁆𑀛𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀫𑁆𑀳𑀸𑀓𑀁 𑀣𑁂𑀭𑁄’’𑀢𑀺. ‘‘𑀦𑀁 𑀓𑀼𑀚𑁆𑀛𑀸𑀧𑁂𑀦𑁆𑀢𑁄 𑀦 𑀪𑀯𑀺𑀲𑁆𑀲𑀢𑀻’’𑀢𑀺? ‘‘𑀦𑀢𑁆𑀣𑁂𑀢𑀁, 𑀩𑁆𑀭𑀸𑀳𑁆𑀫𑀡𑀸’’𑀢𑀺. ‘‘𑀢𑁂𑀦 𑀳𑀺 𑀅𑀳𑀁 𑀦𑀁 𑀓𑀼𑀚𑁆𑀛𑀸𑀧𑁂𑀲𑁆𑀲𑀸𑀫𑀻’’𑀢𑀺? ‘‘𑀲𑀘𑁂 𑀲𑀓𑁆𑀓𑁄𑀲𑀺, 𑀓𑀼𑀚𑁆𑀛𑀸𑀧𑁂𑀳𑀻’’𑀢𑀺. 𑀲𑁄 ‘‘𑀳𑁄𑀢𑀼, 𑀚𑀸𑀦𑀺𑀲𑁆𑀲𑀸𑀫𑀺𑀲𑁆𑀲 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀣𑁂𑀭𑀁 𑀪𑀺𑀓𑁆𑀔𑀸𑀬 𑀧𑀯𑀺𑀝𑁆𑀞𑀁 𑀤𑀺𑀲𑁆𑀯𑀸 𑀧𑀘𑁆𑀙𑀸𑀪𑀸𑀕𑁂𑀦 𑀕𑀦𑁆𑀢𑁆𑀯𑀸 𑀧𑀺𑀝𑁆𑀞𑀺𑀫𑀚𑁆𑀛𑁂 𑀫𑀳𑀦𑁆𑀢𑀁 𑀧𑀸𑀡𑀺𑀧𑁆𑀧𑀳𑀸𑀭𑀫𑀤𑀸𑀲𑀺. 𑀣𑁂𑀭𑁄 ‘‘𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺 𑀅𑀦𑁄𑀮𑁄𑀓𑁂𑀢𑁆𑀯𑀸𑀯 𑀕𑀢𑁄. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀓𑀮𑀲𑀭𑀻𑀭𑁂 𑀟𑀸𑀳𑁄 𑀉𑀧𑁆𑀧𑀚𑁆𑀚𑀺. 𑀲𑁄 ‘‘𑀅𑀳𑁄 𑀕𑀼𑀡𑀲𑀫𑁆𑀧𑀦𑁆𑀦𑁄, 𑀅𑀬𑁆𑀬𑁄’’𑀢𑀺 𑀣𑁂𑀭𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀔𑀫𑀣 𑀫𑁂, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 ‘‘𑀓𑀺𑀁 𑀏𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑁂 ‘‘𑀅𑀳𑀁 𑀯𑀻𑀫𑀁𑀲𑀦𑀢𑁆𑀣𑀸𑀬 𑀢𑀼𑀫𑁆𑀳𑁂 𑀧𑀳𑀭𑀺’’𑀦𑁆𑀢𑀺 𑀆𑀳. ‘‘𑀳𑁄𑀢𑀼 𑀔𑀫𑀸𑀫𑀺 𑀢𑁂’’𑀢𑀺. ‘‘𑀲𑀘𑁂 𑀫𑁂, 𑀪𑀦𑁆𑀢𑁂, 𑀔𑀫𑀣, 𑀫𑀫 𑀕𑁂𑀳𑁂𑀬𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀣𑁂𑀭𑀲𑁆𑀲 𑀧𑀢𑁆𑀢𑀁 𑀕𑀡𑁆𑀳𑀺, 𑀣𑁂𑀭𑁄𑀧𑀺 𑀧𑀢𑁆𑀢𑀁 𑀅𑀤𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀣𑁂𑀭𑀁 𑀕𑁂𑀳𑀁 𑀦𑁂𑀢𑁆𑀯𑀸 𑀧𑀭𑀺𑀯𑀺𑀲𑀺.

𑀫𑀦𑀼𑀲𑁆𑀲𑀸 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀇𑀫𑀺𑀦𑀸 𑀅𑀫𑁆𑀳𑀸𑀓𑀁 𑀦𑀺𑀭𑀧𑀭𑀸𑀥𑁄 𑀅𑀬𑁆𑀬𑁄 𑀧𑀳𑀝𑁄, 𑀤𑀡𑁆𑀟𑁂𑀦𑀧𑀺𑀲𑁆𑀲 𑀫𑁄𑀓𑁆𑀔𑁄 𑀦𑀢𑁆𑀣𑀺, 𑀏𑀢𑁆𑀣𑁂𑀯 𑀦𑀁 𑀫𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀺𑀳𑀢𑁆𑀣𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑀤𑁆𑀯𑀸𑀭𑁂 𑀅𑀝𑁆𑀞𑀁𑀲𑀼. 𑀣𑁂𑀭𑁄 𑀉𑀝𑁆𑀞𑀸𑀬 𑀕𑀘𑁆𑀙𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀢𑁆𑀣𑁂 𑀧𑀢𑁆𑀢𑀁 𑀅𑀤𑀸𑀲𑀺. 𑀫𑀦𑀼𑀲𑁆𑀲𑀸 𑀢𑀁 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀦𑀺𑀯𑀢𑁆𑀢𑁂𑀣𑀸’’𑀢𑀺 𑀆𑀳𑀁𑀲𑀼. 𑀓𑀺𑀁 𑀏𑀢𑀁 𑀉𑀧𑀸𑀲𑀓𑀸𑀢𑀺? 𑀩𑁆𑀭𑀸𑀳𑁆𑀫𑀡𑁂𑀦 𑀢𑀼𑀫𑁆𑀳𑁂 𑀧𑀳𑀝𑀸, 𑀫𑀬𑀫𑀲𑁆𑀲 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀸𑀢𑀺. 𑀓𑀺𑀁 𑀧𑀦 𑀢𑀼𑀫𑁆𑀳𑁂 𑀇𑀫𑀺𑀦𑀸 𑀧𑀳𑀝𑀸, 𑀉𑀤𑀸𑀳𑀼 𑀅𑀳𑀦𑁆𑀢𑀺? 𑀢𑀼𑀫𑁆𑀳𑁂, 𑀪𑀦𑁆𑀢𑁂𑀢𑀺. ‘‘𑀫𑀁 𑀏𑀲 𑀧𑀳𑀭𑀺𑀢𑁆𑀯𑀸 𑀔𑀫𑀸𑀧𑁂𑀲𑀺, 𑀕𑀘𑁆𑀙𑀣 𑀢𑀼𑀫𑁆𑀳𑁂’’𑀢𑀺 𑀫𑀦𑀼𑀲𑁆𑀲𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀦𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀣𑁂𑀭𑁄 𑀯𑀺𑀳𑀸𑀭𑀫𑁂𑀯 𑀕𑀢𑁄. 𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀺𑀁𑀲𑀼 ‘‘𑀓𑀺𑀁 𑀦𑀸𑀫𑁂𑀢𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀬𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀧𑀳𑀝𑁄, 𑀢𑀲𑁆𑀲𑁂𑀯 𑀕𑁂𑀳𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄. 𑀣𑁂𑀭𑀲𑁆𑀲 𑀧𑀳𑀝𑀓𑀸𑀮𑀢𑁄 𑀧𑀝𑁆𑀞𑀸𑀬 𑀇𑀤𑀸𑀦𑀺 𑀲𑁄 𑀓𑀲𑁆𑀲 𑀮𑀚𑁆𑀚𑀺𑀲𑁆𑀲𑀢𑀺, 𑀅𑀯𑀲𑁂𑀲𑁂 𑀧𑁄𑀣𑁂𑀦𑁆𑀢𑁄 𑀯𑀺𑀘𑀭𑀺𑀲𑁆𑀲𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑀁 𑀧𑀳𑀭𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀕𑀺𑀳𑀺𑀩𑁆𑀭𑀸𑀳𑁆𑀫𑀡𑁂𑀦 𑀧𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁄 𑀧𑀳𑀝𑁄 𑀪𑀯𑀺𑀲𑁆𑀲𑀢𑀺, 𑀓𑁄𑀥𑁄 𑀦𑀸𑀫𑁂𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀢𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁮𑁯. ‘‘𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀳𑀭𑁂𑀬𑁆𑀬, 𑀦𑀸𑀲𑁆𑀲 𑀫𑀼𑀜𑁆𑀘𑁂𑀣 𑀩𑁆𑀭𑀸𑀳𑁆𑀫𑀡𑁄;

𑀥𑀻 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀦𑁆𑀢𑀸𑀭𑀁, 𑀢𑀢𑁄 𑀥𑀻 𑀬𑀲𑁆𑀲 𑀫𑀼𑀜𑁆𑀘𑀢𑀺.

𑁩𑁯𑁦. ‘‘𑀦 𑀩𑁆𑀭𑀸𑀳𑁆𑀫𑀡𑀲𑁆𑀲𑁂𑀢𑀤𑀓𑀺𑀜𑁆𑀘𑀺 𑀲𑁂𑀬𑁆𑀬𑁄, 𑀬𑀤𑀸 𑀦𑀺𑀲𑁂𑀥𑁄 𑀫𑀦𑀲𑁄 𑀧𑀺𑀬𑁂𑀳𑀺;

𑀬𑀢𑁄 𑀬𑀢𑁄 𑀳𑀺𑀁𑀲𑀫𑀦𑁄 𑀦𑀺𑀯𑀢𑁆𑀢𑀢𑀺, 𑀢𑀢𑁄 𑀢𑀢𑁄 𑀲𑀫𑁆𑀫𑀢𑀺𑀫𑁂𑀯 𑀤𑀼𑀓𑁆𑀔’’𑀦𑁆𑀢𑀺.

𑀢𑀢𑁆𑀣 𑀧𑀳𑀭𑁂𑀬𑁆𑀬𑀸𑀢𑀺 ‘‘𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑁄𑀳𑀫𑀲𑁆𑀫𑀻’’𑀢𑀺 𑀚𑀸𑀦𑀦𑁆𑀢𑁄 𑀔𑀻𑀡𑀸𑀲𑀯𑀲𑁆𑀲 𑀯𑀸 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀚𑀸𑀢𑀺𑀩𑁆𑀭𑀸𑀳𑁆𑀫𑀡𑀲𑁆𑀲 𑀦 𑀧𑀳𑀭𑁂𑀬𑁆𑀬. 𑀦𑀸𑀲𑁆𑀲 𑀫𑀼𑀜𑁆𑀘𑁂𑀣𑀸𑀢𑀺 𑀲𑁄𑀧𑀺 𑀧𑀳𑀝𑁄 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑁄 𑀅𑀲𑁆𑀲 𑀧𑀳𑀭𑀺𑀢𑁆𑀯𑀸 𑀞𑀺𑀢𑀲𑁆𑀲 𑀯𑁂𑀭𑀁 𑀦 𑀫𑀼𑀜𑁆𑀘𑁂𑀣, 𑀢𑀲𑁆𑀫𑀺𑀁 𑀓𑁄𑀧𑀁 𑀦 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀥𑀻 𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀢𑀺 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀦𑁆𑀢𑀸𑀭𑀁 𑀕𑀭𑀳𑀸𑀫𑀺. 𑀢𑀢𑁄 𑀥𑀻𑀢𑀺 𑀬𑁄 𑀧𑀦 𑀢𑀁 𑀧𑀳𑀭𑀦𑁆𑀢𑀁 𑀧𑀝𑀺𑀧𑀳𑀭𑀦𑁆𑀢𑁄 𑀢𑀲𑁆𑀲 𑀉𑀧𑀭𑀺 𑀯𑁂𑀭𑀁 𑀫𑀼𑀜𑁆𑀘𑀢𑀺, 𑀢𑀁 𑀢𑀢𑁄𑀧𑀺 𑀕𑀭𑀳𑀸𑀫𑀺𑀬𑁂𑀯.

𑀏𑀢𑀤𑀓𑀺𑀜𑁆𑀘𑀺 𑀲𑁂𑀬𑁆𑀬𑁄𑀢𑀺 𑀬𑀁 𑀔𑀻𑀡𑀸𑀲𑀯𑀲𑁆𑀲 𑀅𑀓𑁆𑀓𑁄𑀲𑀦𑁆𑀢𑀁 𑀯𑀸 𑀅𑀧𑀘𑁆𑀘𑀓𑁆𑀓𑁄𑀲𑀦𑀁, 𑀧𑀳𑀭𑀦𑁆𑀢𑀁 𑀯𑀸 𑀅𑀧𑁆𑀧𑀝𑀺𑀧𑀳𑀭𑀡𑀁, 𑀏𑀢𑀁 𑀢𑀲𑁆𑀲 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑀲𑁆𑀲 𑀦 𑀓𑀺𑀜𑁆𑀘𑀺 𑀲𑁂𑀬𑁆𑀬𑁄, 𑀅𑀧𑁆𑀧𑀫𑀢𑁆𑀢𑀓𑀁 𑀲𑁂𑀬𑁆𑀬𑁄 𑀦 𑀳𑁄𑀢𑀺, 𑀅𑀥𑀺𑀫𑀢𑁆𑀢𑀫𑁂𑀯 𑀲𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀬𑀤𑀸 𑀦𑀺𑀲𑁂𑀥𑁄 𑀫𑀦𑀲𑁄 𑀧𑀺𑀬𑁂𑀳𑀻𑀢𑀺 𑀓𑁄𑀥𑀦𑀲𑁆𑀲 𑀳𑀺 𑀓𑁄𑀥𑀼𑀧𑁆𑀧𑀸𑀤𑁄𑀯 𑀫𑀦𑀲𑁄 𑀧𑀺𑀬𑁄 𑀦𑀸𑀫. 𑀓𑁄𑀥𑁄 𑀳𑀺 𑀧𑀦𑁂𑀲 𑀫𑀸𑀢𑀸𑀧𑀺𑀢𑀽𑀲𑀼𑀧𑀺 𑀩𑀼𑀤𑁆𑀥𑀸𑀤𑀻𑀲𑀼𑀧𑀺 𑀅𑀧𑀭𑀚𑁆𑀛𑀢𑀺. 𑀢𑀲𑁆𑀫𑀸 𑀬𑁄 𑀅𑀲𑁆𑀲 𑀢𑁂𑀳𑀺 𑀫𑀦𑀲𑁄 𑀦𑀺𑀲𑁂𑀥𑁄 𑀓𑁄𑀥𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦𑀺𑀕𑁆𑀕𑀳𑁄, 𑀏𑀢𑀁 𑀦 𑀓𑀺𑀜𑁆𑀘𑀺 𑀲𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀳𑀺𑀁𑀲𑀫𑀦𑁄𑀢𑀺 𑀓𑁄𑀥𑀫𑀦𑁄. 𑀲𑁄 𑀢𑀲𑁆𑀲 𑀬𑀢𑁄 𑀬𑀢𑁄 𑀯𑀢𑁆𑀣𑀼𑀢𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀦𑁆𑀢𑁄 𑀦𑀺𑀯𑀢𑁆𑀢𑀢𑀺. 𑀢𑀢𑁄 𑀢𑀢𑁄𑀢𑀺 𑀢𑀢𑁄 𑀢𑀢𑁄 𑀯𑀢𑁆𑀣𑀼𑀢𑁄 𑀲𑀓𑀮𑀫𑁆𑀧𑀺 𑀯𑀝𑁆𑀝𑀤𑀼𑀓𑁆𑀔𑀁 𑀦𑀺𑀯𑀢𑁆𑀢𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀯𑀢𑁆𑀣𑀼

𑀬𑀲𑁆𑀲 𑀓𑀸𑀬𑁂𑀦 𑀯𑀸𑀘𑀸𑀬𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀧𑀚𑀸𑀧𑀢𑀺𑀁 𑀕𑁄𑀢𑀫𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀪𑀕𑀯𑀢𑀸 𑀳𑀺 𑀅𑀦𑀼𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀲𑁆𑀫𑀺𑀁 𑀧𑀜𑁆𑀜𑀢𑁆𑀢𑁂 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀫𑀡𑁆𑀟𑀦𑀓𑀚𑀸𑀢𑀺𑀬𑁄 𑀧𑀼𑀭𑀺𑀲𑁄 𑀲𑀼𑀭𑀪𑀺𑀧𑀼𑀧𑁆𑀨𑀤𑀸𑀫𑀁 𑀯𑀺𑀬 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀧𑀭𑀺𑀯𑀸𑀭𑀸 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀉𑀧𑀲𑀫𑁆𑀧𑀤𑀁 𑀮𑀪𑀺, 𑀅𑀜𑁆𑀜𑁄 𑀢𑀲𑁆𑀲𑀸 𑀉𑀧𑀚𑁆𑀛𑀸𑀬𑁄 𑀯𑀸 𑀆𑀘𑀭𑀺𑀬𑁄 𑀯𑀸 𑀦𑀢𑁆𑀣𑀺. 𑀏𑀯𑀁 𑀮𑀤𑁆𑀥𑀽𑀧𑀲𑀫𑁆𑀧𑀤𑀁 𑀣𑁂𑀭𑀺𑀁 𑀆𑀭𑀩𑁆𑀪 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀲𑀳𑀢𑁆𑀣𑁂𑀦𑁂𑀯 𑀓𑀸𑀲𑀸𑀬𑀸𑀦𑀺 𑀕𑀡𑁆𑀳𑀻’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀺𑀬𑁄 𑀢𑀸𑀬 𑀲𑀤𑁆𑀥𑀺𑀁 𑀦𑁂𑀯 𑀉𑀧𑁄𑀲𑀣𑀁 𑀦 𑀧𑀯𑀸𑀭𑀡𑀁 𑀓𑀭𑁄𑀦𑁆𑀢𑀺, 𑀢𑀸 𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀲𑁆𑀲𑀧𑀺 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀢𑀸𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀫𑀬𑀸 𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸 𑀅𑀝𑁆𑀞 𑀕𑀭𑀼𑀥𑀫𑁆𑀫𑀸 𑀤𑀺𑀦𑁆𑀦𑀸, 𑀅𑀳𑀫𑁂𑀯𑀲𑁆𑀲𑀸𑀘𑀭𑀺𑀬𑁄, 𑀅𑀳𑀫𑁂𑀯 𑀉𑀧𑀚𑁆𑀛𑀸𑀬𑁄. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀺𑀭𑀳𑀺𑀢𑁂𑀲𑀼 𑀔𑀻𑀡𑀸𑀲𑀯𑁂𑀲𑀼 𑀓𑀼𑀓𑁆𑀓𑀼𑀘𑁆𑀘𑀁 𑀦𑀸𑀫 𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁯𑁧. ‘‘𑀬𑀲𑁆𑀲 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀦𑀢𑁆𑀣𑀺 𑀤𑀼𑀓𑁆𑀓𑀝𑀁;

𑀲𑀁𑀯𑀼𑀢𑀁 𑀢𑀻𑀳𑀺 𑀞𑀸𑀦𑁂𑀳𑀺, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀤𑀼𑀓𑁆𑀓𑀝𑀦𑁆𑀢𑀺 𑀲𑀸𑀯𑀚𑁆𑀚𑀁 𑀤𑀼𑀓𑁆𑀔𑀼𑀤𑁆𑀭𑀬𑀁 𑀅𑀧𑀸𑀬𑀲𑀁𑀯𑀢𑁆𑀢𑀦𑀺𑀓𑀁 𑀓𑀫𑁆𑀫𑀁. 𑀢𑀻𑀳𑀺 𑀞𑀸𑀦𑁂𑀳𑀻𑀢𑀺 𑀏𑀢𑁂𑀳𑀺 𑀓𑀸𑀬𑀸𑀤𑀻𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀧𑀯𑁂𑀲𑀦𑀺𑀯𑀸𑀭𑀡𑀢𑁆𑀣𑀸𑀬 𑀤𑁆𑀯𑀸𑀭𑀁 𑀧𑀺𑀳𑀺𑀢𑀁, 𑀢𑀁 𑀅𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀯𑀢𑁆𑀣𑀼 𑀅𑀝𑁆𑀞𑀫𑀁.

𑁯. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼

𑀬𑀫𑁆𑀳𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭𑀸𑀬𑀲𑁆𑀫𑀸 𑀅𑀲𑁆𑀲𑀚𑀺𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 ‘‘𑀬𑀲𑁆𑀲𑀁 𑀤𑀺𑀲𑀸𑀬𑀁 𑀣𑁂𑀭𑁄 𑀯𑀲𑀢𑀻’’𑀢𑀺 𑀲𑀼𑀡𑀸𑀢𑀺, 𑀢𑀢𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀢𑀢𑁄𑀯 𑀲𑀻𑀲𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀢𑀺. 𑀪𑀺𑀓𑁆𑀔𑀽 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀅𑀚𑁆𑀚𑀸𑀧𑀺 𑀤𑀺𑀲𑀸 𑀦𑀫𑀲𑁆𑀲𑀫𑀸𑀦𑁄 𑀯𑀺𑀘𑀭𑀢𑀻’’𑀢𑀺 𑀢𑀫𑀢𑁆𑀣𑀁 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀣𑁂𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀤𑀺𑀲𑀸 𑀦𑀫𑀲𑁆𑀲𑀦𑁆𑀢𑁄 𑀯𑀺𑀘𑀭𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀫 𑀤𑀺𑀲𑀸 𑀦𑀫𑀲𑁆𑀲𑀦𑀪𑀸𑀯𑀁 𑀯𑀸 𑀅𑀦𑀫𑀲𑁆𑀲𑀦𑀪𑀸𑀯𑀁 𑀯𑀸 𑀢𑀼𑀫𑁆𑀳𑁂𑀯 𑀚𑀸𑀦𑀸𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄 𑀤𑀺𑀲𑀸 𑀦𑀫𑀲𑁆𑀲𑀢𑀺, 𑀅𑀲𑁆𑀲𑀚𑀺𑀢𑁆𑀣𑁂𑀭𑀲𑁆𑀲 𑀧𑀦 𑀲𑀦𑁆𑀢𑀺𑀓𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀢𑀸𑀬 𑀅𑀢𑁆𑀢𑀦𑁄 𑀆𑀘𑀭𑀺𑀬𑀁 𑀦𑀫𑀲𑁆𑀲𑀢𑀺. 𑀬𑀜𑁆𑀳𑀺 𑀆𑀘𑀭𑀺𑀬𑀁 𑀦𑀺𑀲𑁆𑀲𑀸𑀬 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺, 𑀢𑁂𑀦 𑀲𑁄 𑀩𑁆𑀭𑀸𑀳𑁆𑀫𑀡𑁂𑀦 𑀅𑀕𑁆𑀕𑀺 𑀯𑀺𑀬 𑀲𑀓𑁆𑀓𑀘𑁆𑀘𑀁 𑀦𑀫𑀲𑁆𑀲𑀺𑀢𑀩𑁆𑀩𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁯𑁨. ‘‘𑀬𑀫𑁆𑀳𑀸 𑀥𑀫𑁆𑀫𑀁 𑀯𑀺𑀚𑀸𑀦𑁂𑀬𑁆𑀬, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑀁;

𑀲𑀓𑁆𑀓𑀘𑁆𑀘𑀁 𑀢𑀁 𑀦𑀫𑀲𑁆𑀲𑁂𑀬𑁆𑀬, 𑀅𑀕𑁆𑀕𑀺𑀳𑀼𑀢𑁆𑀢𑀁𑀯 𑀩𑁆𑀭𑀸𑀳𑁆𑀫𑀡𑁄’’𑀢𑀺.

𑀢𑀢𑁆𑀣 𑀅𑀕𑁆𑀕𑀺𑀳𑀼𑀢𑁆𑀢𑀁𑀯𑀸𑀢𑀺 𑀬𑀣𑀸 𑀩𑁆𑀭𑀸𑀳𑁆𑀫𑀡𑁄 𑀅𑀕𑁆𑀕𑀺𑀳𑀼𑀢𑁆𑀢𑀁 𑀲𑀫𑁆𑀫𑀸 𑀧𑀭𑀺𑀘𑀭𑀡𑁂𑀦 𑀘𑁂𑀯 𑀅𑀜𑁆𑀚𑀮𑀺𑀓𑀫𑁆𑀫𑀸𑀤𑀻𑀳𑀺 𑀘 𑀲𑀓𑁆𑀓𑀘𑁆𑀘𑀁 𑀦𑀫𑀲𑁆𑀲𑀢𑀺, 𑀏𑀯𑀁 𑀬𑀫𑁆𑀳𑀸 𑀆𑀘𑀭𑀺𑀬𑀸 𑀢𑀣𑀸𑀕𑀢𑀧𑀯𑁂𑀤𑀺𑀢𑀁 𑀥𑀫𑁆𑀫𑀁 𑀯𑀺𑀚𑀸𑀦𑁂𑀬𑁆𑀬, 𑀢𑀁 𑀲𑀓𑁆𑀓𑀘𑁆𑀘𑀁 𑀦𑀫𑀲𑁆𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼 𑀦𑀯𑀫𑀁.

𑁧𑁦. 𑀚𑀝𑀺𑀮𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑀦 𑀚𑀝𑀸𑀳𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀚𑀝𑀺𑀮𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 ‘‘𑀅𑀳𑀁 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀼𑀚𑀸𑀢𑁄 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄. 𑀲𑀘𑁂 𑀲𑀫𑀡𑁄 𑀕𑁄𑀢𑀫𑁄 𑀅𑀢𑁆𑀢𑀦𑁄 𑀲𑀸𑀯𑀓𑁂 𑀩𑁆𑀭𑀸𑀳𑁆𑀫𑀡𑀸𑀢𑀺 𑀯𑀤𑀢𑀺, 𑀫𑀫𑁆𑀧𑀺 𑀦𑀼 𑀔𑁄 𑀢𑀣𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀦𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀚𑀝𑀸𑀫𑀢𑁆𑀢𑁂𑀦, 𑀦 𑀚𑀸𑀢𑀺𑀕𑁄𑀢𑁆𑀢𑀫𑀢𑁆𑀢𑁂𑀦 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀺, 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀫𑁂𑀯 𑀧𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑁄𑀢𑀺 𑀯𑀤𑀸𑀫𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁯𑁩. ‘‘𑀦 𑀚𑀝𑀸𑀳𑀺 𑀦 𑀕𑁄𑀢𑁆𑀢𑁂𑀦, 𑀦 𑀚𑀘𑁆𑀘𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀬𑀫𑁆𑀳𑀺 𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘, 𑀲𑁄 𑀲𑀼𑀘𑀻 𑀲𑁄 𑀘 𑀩𑁆𑀭𑀸𑀳𑁆𑀫𑀡𑁄’’𑀢𑀺.

𑀢𑀢𑁆𑀣 𑀲𑀘𑁆𑀘𑀦𑁆𑀢𑀺 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑁄𑀴𑀲𑀳𑀸𑀓𑀸𑀭𑁂𑀳𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑀁 𑀲𑀘𑁆𑀘𑀜𑀸𑀡𑀜𑁆𑀘𑁂𑀯 𑀦𑀯𑀯𑀺𑀥𑁄 𑀘 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀅𑀢𑁆𑀣𑀺, 𑀲𑁄 𑀲𑀼𑀘𑀺, 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀘𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀚𑀝𑀺𑀮𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀤𑀲𑀫𑀁.

𑁧𑁧. 𑀓𑀼𑀳𑀓𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑀓𑀺𑀁 𑀢𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀯𑀕𑁆𑀕𑀼𑀮𑀺𑀯𑀢𑀁 𑀓𑀼𑀳𑀓𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀯𑁂𑀲𑀸𑀮𑀺𑀦𑀕𑀭𑀤𑁆𑀯𑀸𑀭𑁂 𑀏𑀓𑀁 𑀓𑀓𑀼𑀥𑀭𑀼𑀓𑁆𑀔𑀁 𑀆𑀭𑀼𑀬𑁆𑀳 𑀤𑁆𑀯𑀻𑀳𑀺 𑀧𑀸𑀤𑁂𑀳𑀺 𑀭𑀼𑀓𑁆𑀔𑀲𑀸𑀔𑀁 𑀕𑀡𑁆𑀳𑀺𑀢𑁆𑀯𑀸 𑀅𑀥𑁄𑀲𑀺𑀭𑁄 𑀑𑀮𑀫𑁆𑀩𑀦𑁆𑀢𑁄 ‘‘𑀓𑀧𑀺𑀮𑀸𑀦𑀁 𑀫𑁂 𑀲𑀢𑀁 𑀤𑁂𑀣, 𑀓𑀳𑀸𑀧𑀡𑁂 𑀤𑁂𑀣, 𑀧𑀭𑀺𑀘𑀸𑀭𑀺𑀓𑀁 𑀤𑁂𑀣, 𑀦𑁄 𑀘𑁂 𑀤𑀲𑁆𑀲𑀣, 𑀇𑀢𑁄 𑀧𑀢𑀺𑀢𑁆𑀯𑀸 𑀫𑀭𑀦𑁆𑀢𑁄 𑀦𑀕𑀭𑀁 𑀅𑀦𑀕𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺. 𑀢𑀣𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑀲𑁆𑀲 𑀦𑀕𑀭𑀁 𑀧𑀯𑀺𑀲𑀦𑀓𑀸𑀮𑁂 𑀪𑀺𑀓𑁆𑀔𑀽 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀲𑁆𑀯𑀸 𑀦𑀺𑀓𑁆𑀔𑀫𑀦𑀓𑀸𑀮𑁂𑀧𑀺 𑀦𑀁 𑀢𑀣𑁂𑀯 𑀑𑀮𑀫𑁆𑀩𑀦𑁆𑀢𑀁 𑀧𑀲𑁆𑀲𑀺𑀁𑀲𑀼. 𑀦𑀸𑀕𑀭𑀸𑀧𑀺 ‘‘𑀅𑀬𑀁 𑀧𑀸𑀢𑁄𑀯 𑀧𑀝𑁆𑀞𑀸𑀬 𑀏𑀯𑀁 𑀑𑀮𑀫𑁆𑀩𑀦𑁆𑀢𑁄 𑀧𑀢𑀺𑀢𑁆𑀯𑀸 𑀫𑀭𑀦𑁆𑀢𑁄 𑀦𑀕𑀭𑀁 𑀅𑀦𑀕𑀭𑀁 𑀓𑀭𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀕𑀭𑀯𑀺𑀦𑀸𑀲𑀪𑀻𑀢𑀸 ‘‘𑀬𑀁 𑀲𑁄 𑀬𑀸𑀘𑀢𑀺, 𑀲𑀩𑁆𑀩𑀁 𑀤𑁂𑀫𑀸’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀅𑀤𑀁𑀲𑀼. 𑀲𑁄 𑀑𑀢𑀭𑀺𑀢𑁆𑀯𑀸 𑀲𑀩𑁆𑀩𑀁 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀪𑀺𑀓𑁆𑀔𑀽 𑀯𑀺𑀳𑀸𑀭𑀽𑀧𑀘𑀸𑀭𑁂 𑀢𑀁 𑀕𑀸𑀯𑀺𑀁 𑀯𑀺𑀬 𑀯𑀺𑀭𑀯𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 ‘‘𑀮𑀤𑁆𑀥𑀁 𑀢𑁂, 𑀩𑁆𑀭𑀸𑀳𑁆𑀫𑀡, 𑀬𑀣𑀸𑀧𑀢𑁆𑀣𑀺𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀮𑀤𑁆𑀥𑀁 𑀫𑁂’’𑀢𑀺 𑀲𑀼𑀢𑁆𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀲𑁄 𑀓𑀼𑀳𑀓𑀘𑁄𑀭𑁄, 𑀧𑀼𑀩𑁆𑀩𑁂𑀧𑀺 𑀓𑀼𑀳𑀓𑀘𑁄𑀭𑁄𑀬𑁂𑀯 𑀅𑀳𑁄𑀲𑀺. 𑀇𑀤𑀸𑀦𑀺 𑀧𑀦𑁂𑀲 𑀩𑀸𑀮𑀚𑀦𑀁 𑀯𑀜𑁆𑀘𑁂𑀢𑀺, 𑀢𑀤𑀸 𑀧𑀦 𑀧𑀡𑁆𑀟𑀺𑀢𑁂 𑀯𑀜𑁆𑀘𑁂𑀢𑀼𑀁 𑀦𑀸𑀲𑀓𑁆𑀔𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀫𑀸𑀳𑀭𑀺.

𑀅𑀢𑀻𑀢𑁂 𑀏𑀓𑀁 𑀓𑀸𑀲𑀺𑀓𑀕𑀸𑀫𑀁 𑀦𑀺𑀲𑁆𑀲𑀸𑀬 𑀏𑀓𑁄 𑀓𑀼𑀳𑀓𑀢𑀸𑀧𑀲𑁄 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀁 𑀏𑀓𑀁 𑀓𑀼𑀮𑀁 𑀧𑀝𑀺𑀚𑀕𑁆𑀕𑀺. 𑀤𑀺𑀯𑀸 𑀉𑀧𑁆𑀧𑀦𑁆𑀦𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀢𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀸𑀦𑀁 𑀯𑀺𑀬 𑀢𑀲𑁆𑀲𑀧𑀺 𑀏𑀓𑀁 𑀓𑁄𑀝𑁆𑀞𑀸𑀲𑀁 𑀤𑁂𑀢𑀺, 𑀲𑀸𑀬𑀁 𑀉𑀧𑁆𑀧𑀦𑁆𑀦𑀓𑁄𑀝𑁆𑀞𑀸𑀲𑀁 𑀞𑀧𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀤𑁂𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀸𑀬𑀁 𑀕𑁄𑀥𑀫𑀁𑀲𑀁 𑀮𑀪𑀺𑀢𑁆𑀯𑀸 𑀲𑀸𑀥𑀼𑀓𑀁 𑀧𑀘𑀺𑀢𑁆𑀯𑀸 𑀢𑀢𑁄 𑀓𑁄𑀝𑁆𑀞𑀸𑀲𑀁 𑀞𑀧𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀢𑀲𑁆𑀲 𑀅𑀤𑀁𑀲𑀼. 𑀢𑀸𑀧𑀲𑁄 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸𑀯 𑀭𑀲𑀢𑀡𑁆𑀳𑀸𑀬 𑀩𑀤𑁆𑀥𑁄 ‘‘𑀓𑀺𑀁 𑀫𑀁𑀲𑀁 𑀦𑀸𑀫𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀕𑁄𑀥𑀫𑀁𑀲’’𑀦𑁆𑀢𑀺 𑀲𑀼𑀢𑁆𑀯𑀸 𑀪𑀺𑀓𑁆𑀔𑀸𑀬 𑀘𑀭𑀺𑀢𑁆𑀯𑀸 𑀲𑀧𑁆𑀧𑀺𑀤𑀥𑀺𑀓𑀝𑀼𑀓𑀪𑀡𑁆𑀟𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀧𑁂𑀲𑀺. 𑀧𑀡𑁆𑀡𑀲𑀸𑀮𑀸𑀬 𑀧𑀦 𑀅𑀯𑀺𑀤𑀽𑀭𑁂 𑀏𑀓𑀲𑁆𑀫𑀺𑀁 𑀯𑀫𑁆𑀫𑀺𑀓𑁂 𑀕𑁄𑀥𑀭𑀸𑀚𑀸 𑀯𑀺𑀳𑀭𑀢𑀺. 𑀲𑁄 𑀓𑀸𑀮𑁂𑀦 𑀓𑀸𑀮𑀁 𑀢𑀸𑀧𑀲𑀁 𑀯𑀦𑁆𑀤𑀺𑀢𑀼𑀁 𑀆𑀕𑀘𑁆𑀙𑀢𑀺. 𑀢𑀁𑀤𑀺𑀯𑀲𑀁 𑀧𑀦𑁂𑀲 ‘‘𑀢𑀁 𑀯𑀥𑀺𑀲𑁆𑀲𑀸𑀫𑀻’’𑀢𑀺 𑀤𑀡𑁆𑀟𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀢𑀲𑁆𑀲 𑀯𑀫𑁆𑀫𑀺𑀓𑀲𑁆𑀲 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀦𑀺𑀤𑁆𑀤𑀸𑀬𑀦𑁆𑀢𑁄 𑀯𑀺𑀬 𑀦𑀺𑀲𑀻𑀤𑀺. 𑀕𑁄𑀥𑀭𑀸𑀚𑀸 𑀯𑀫𑁆𑀫𑀺𑀓𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑁄𑀯 𑀆𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀦 𑀫𑁂 𑀅𑀚𑁆𑀚 𑀆𑀘𑀭𑀺𑀬𑀲𑁆𑀲 𑀆𑀓𑀸𑀭𑁄 𑀭𑀼𑀘𑁆𑀘𑀢𑀻’’𑀢𑀺 𑀢𑀢𑁄𑀯 𑀦𑀺𑀯𑀢𑁆𑀢𑀺. 𑀢𑀸𑀧𑀲𑁄 𑀢𑀲𑁆𑀲 𑀦𑀺𑀯𑀢𑁆𑀢𑀦𑀪𑀸𑀯𑀁 𑀜𑀢𑁆𑀯𑀸 𑀢𑀲𑁆𑀲 𑀫𑀸𑀭𑀡𑀢𑁆𑀣𑀸𑀬 𑀤𑀡𑁆𑀟𑀁 𑀔𑀺𑀧𑀺, 𑀤𑀡𑁆𑀟𑁄 𑀯𑀺𑀭𑀚𑁆𑀛𑀺𑀢𑁆𑀯𑀸 𑀕𑀢𑁄. 𑀕𑁄𑀥𑀭𑀸𑀚𑀸𑀧𑀺 𑀥𑀫𑁆𑀫𑀺𑀓𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁄 𑀲𑀻𑀲𑀁 𑀦𑀻𑀳𑀭𑀺𑀢𑁆𑀯𑀸 𑀆𑀕𑀢𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀢𑀸𑀧𑀲𑀁 𑀆𑀳 𑁋

‘‘𑀲𑀫𑀡𑀁 𑀢𑀁 𑀫𑀜𑁆𑀜𑀫𑀸𑀦𑁄, 𑀉𑀧𑀕𑀘𑁆𑀙𑀺𑀫𑀲𑀜𑁆𑀜𑀢𑀁;

𑀲𑁄 𑀫𑀁 𑀤𑀡𑁆𑀟𑁂𑀦 𑀧𑀸𑀳𑀸𑀲𑀺, 𑀬𑀣𑀸 𑀅𑀲𑀫𑀡𑁄 𑀢𑀣𑀸.

‘‘𑀓𑀺𑀁 𑀢𑁂 𑀚𑀝𑀸𑀳𑀺 𑀤𑀼𑀫𑁆𑀫𑁂𑀥, 𑀓𑀺𑀁 𑀢𑁂 𑀅𑀚𑀺𑀦𑀲𑀸𑀝𑀺𑀬𑀸;

𑀅𑀩𑁆𑀪𑀦𑁆𑀢𑀭𑀁 𑀢𑁂 𑀕𑀳𑀦𑀁, 𑀩𑀸𑀳𑀺𑀭𑀁 𑀧𑀭𑀺𑀫𑀚𑁆𑀚𑀲𑀻’’𑀢𑀺. (𑀚𑀸. 𑁧.𑁪.𑁯𑁭-𑁯𑁮);

𑀅𑀣 𑀦𑀁 𑀢𑀸𑀧𑀲𑁄 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀧𑀮𑁄𑀪𑁂𑀢𑀼𑀁 𑀏𑀯𑀫𑀸𑀳 𑁋

‘‘𑀏𑀳𑀺 𑀕𑁄𑀥 𑀦𑀺𑀯𑀢𑁆𑀢𑀲𑁆𑀲𑀼, 𑀪𑀼𑀜𑁆𑀚 𑀲𑀸𑀮𑀻𑀦𑀫𑁄𑀤𑀦𑀁;

𑀢𑁂𑀮𑀁 𑀮𑁄𑀡𑀜𑁆𑀘 𑀫𑁂 𑀅𑀢𑁆𑀣𑀺, 𑀧𑀳𑀽𑀢𑀁 𑀫𑀬𑁆𑀳 𑀧𑀺𑀧𑁆𑀨𑀮𑀻’’𑀢𑀺. (𑀚𑀸. 𑁧.𑁪.𑁯𑁯);

𑀢𑀁 𑀲𑀼𑀢𑁆𑀯𑀸 𑀕𑁄𑀥𑀭𑀸𑀚𑀸 ‘‘𑀬𑀣𑀸 𑀬𑀣𑀸 𑀢𑁆𑀯𑀁 𑀓𑀣𑁂𑀲𑀺, 𑀢𑀣𑀸 𑀢𑀣𑀸 𑀫𑁂 𑀧𑀮𑀸𑀬𑀺𑀢𑀼𑀓𑀸𑀫𑀢𑀸𑀯 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀏𑀲 𑀪𑀺𑀬𑁆𑀬𑁄 𑀧𑀯𑁂𑀓𑁆𑀔𑀸𑀫𑀺, 𑀯𑀫𑁆𑀫𑀺𑀓𑀁 𑀲𑀢𑀧𑁄𑀭𑀺𑀲𑀁;

𑀢𑁂𑀮𑀁 𑀮𑁄𑀡𑀜𑁆𑀘 𑀓𑀺𑀢𑁆𑀢𑁂𑀲𑀺, 𑀅𑀳𑀺𑀢𑀁 𑀫𑀬𑁆𑀳 𑀧𑀺𑀧𑁆𑀨𑀮𑀻’’𑀢𑀺. (𑀚𑀸. 𑁧.𑁪.𑁧𑁦𑁦);

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 ‘‘𑀅𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀢𑀬𑀺 𑀲𑀫𑀡𑀲𑀜𑁆𑀜𑀁 𑀅𑀓𑀸𑀲𑀺𑀁, 𑀇𑀤𑀸𑀦𑀺 𑀧𑀦 𑀢𑁂 𑀫𑀁 𑀧𑀳𑀭𑀺𑀢𑀼𑀓𑀸𑀫𑀢𑀸𑀬 𑀤𑀡𑁆𑀟𑁄 𑀔𑀺𑀢𑁆𑀢𑁄, 𑀢𑀲𑁆𑀲 𑀔𑀺𑀢𑁆𑀢𑀓𑀸𑀮𑁂𑀬𑁂𑀯 𑀅𑀲𑀫𑀡𑁄 𑀚𑀸𑀢𑁄. 𑀓𑀺𑀁 𑀢𑀸𑀤𑀺𑀲𑀲𑁆𑀲 𑀤𑀼𑀧𑁆𑀧𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀚𑀝𑀸𑀳𑀺, 𑀓𑀺𑀁 𑀲𑀔𑀼𑀭𑁂𑀦 𑀅𑀚𑀺𑀦𑀘𑀫𑁆𑀫𑁂𑀦. 𑀅𑀩𑁆𑀪𑀦𑁆𑀢𑀭𑀜𑁆𑀳𑀺 𑀢𑁂 𑀕𑀳𑀦𑀁, 𑀓𑁂𑀯𑀮𑀁 𑀩𑀸𑀳𑀺𑀭𑀫𑁂𑀯 𑀧𑀭𑀺𑀫𑀚𑁆𑀚𑀲𑀻’’𑀢𑀺 𑀆𑀳. 𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 ‘‘𑀢𑀤𑀸 𑀏𑀲 𑀓𑀼𑀳𑀓𑁄 𑀢𑀸𑀧𑀲𑁄 𑀅𑀳𑁄𑀲𑀺, 𑀕𑁄𑀥𑀭𑀸𑀚𑀸 𑀧𑀦 𑀅𑀳𑀫𑁂𑀯𑀸’’𑀢𑀺 𑀯𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀢𑀤𑀸 𑀕𑁄𑀥𑀧𑀡𑁆𑀟𑀺𑀢𑁂𑀦 𑀢𑀲𑁆𑀲 𑀦𑀺𑀕𑁆𑀕𑀳𑀺𑀢𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁯𑁪. ‘‘𑀓𑀺𑀁 𑀢𑁂 𑀚𑀝𑀸𑀳𑀺 𑀤𑀼𑀫𑁆𑀫𑁂𑀥, 𑀓𑀺𑀁 𑀢𑁂 𑀅𑀚𑀺𑀦𑀲𑀸𑀝𑀺𑀬𑀸;

𑀅𑀩𑁆𑀪𑀦𑁆𑀢𑀭𑀁 𑀢𑁂 𑀕𑀳𑀦𑀁, 𑀩𑀸𑀳𑀺𑀭𑀁 𑀧𑀭𑀺𑀫𑀚𑁆𑀚𑀲𑀻’’𑀢𑀺. (𑀚𑀸. 𑁧.𑁪.𑁯𑁮);

𑀢𑀢𑁆𑀣 𑀓𑀺𑀁 𑀢𑁂 𑀚𑀝𑀸𑀳𑀻𑀢𑀺 𑀅𑀫𑁆𑀪𑁄 𑀤𑀼𑀧𑁆𑀧𑀜𑁆𑀜 𑀢𑀯 𑀩𑀤𑁆𑀥𑀸𑀳𑀺𑀧𑀺 𑀇𑀫𑀸𑀳𑀺 𑀚𑀝𑀸𑀳𑀺 𑀲𑀔𑀼𑀭𑀸𑀬 𑀦𑀺𑀯𑀢𑁆𑀣𑀸𑀬𑀧𑀺 𑀇𑀫𑀸𑀬 𑀅𑀚𑀺𑀦𑀘𑀫𑁆𑀫𑀲𑀸𑀝𑀺𑀓𑀸𑀬 𑀘 𑀓𑀺𑀫𑀢𑁆𑀣𑁄𑀢𑀺. 𑀅𑀩𑁆𑀪𑀦𑁆𑀢𑀭𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀜𑁆𑀳𑀺 𑀢𑁂 𑀭𑀸𑀕𑀸𑀤𑀺𑀓𑀺𑀮𑁂𑀲𑀕𑀳𑀦𑀁, 𑀓𑁂𑀯𑀮𑀁 𑀳𑀢𑁆𑀣𑀺𑀮𑀡𑁆𑀟𑀁 𑀅𑀲𑁆𑀲𑀮𑀡𑁆𑀟𑀁 𑀯𑀺𑀬 𑀫𑀝𑁆𑀞𑀁 𑀩𑀸𑀳𑀺𑀭𑀁 𑀧𑀭𑀺𑀫𑀚𑁆𑀚𑀲𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀓𑀼𑀳𑀓𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀏𑀓𑀸𑀤𑀲𑀫𑀁.

𑁧𑁨. 𑀓𑀺𑀲𑀸𑀕𑁄𑀢𑀫𑀻𑀯𑀢𑁆𑀣𑀼

𑀧𑀁𑀲𑀼𑀓𑀽𑀮𑀥𑀭𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀯𑀺𑀳𑀭𑀦𑁆𑀢𑁄 𑀓𑀺𑀲𑀸𑀕𑁄𑀢𑀫𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀤𑀸 𑀓𑀺𑀭 𑀲𑀓𑁆𑀓𑁄 𑀧𑀞𑀫𑀬𑀸𑀫𑀸𑀯𑀲𑀸𑀦𑁂 𑀤𑁂𑀯𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀲𑀸𑀭𑀡𑀻𑀬𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑁄 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀓𑀺𑀲𑀸𑀕𑁄𑀢𑀫𑀻 ‘‘𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀲𑀓𑁆𑀓𑀁 𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀺. 𑀲𑁄 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀦𑁆𑀢𑀺𑀁 𑀤𑀺𑀲𑁆𑀯𑀸 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑀸 𑀦𑀸𑀫𑁂𑀲𑀸, 𑀪𑀦𑁆𑀢𑁂, 𑀆𑀕𑀘𑁆𑀙𑀫𑀸𑀦𑀸𑀯 𑀢𑀼𑀫𑁆𑀳𑁂 𑀤𑀺𑀲𑁆𑀯𑀸 𑀦𑀺𑀯𑀢𑁆𑀢𑀢𑀻’’𑀢𑀺? 𑀲𑀢𑁆𑀣𑀸 ‘‘𑀓𑀺𑀲𑀸𑀕𑁄𑀢𑀫𑀻 𑀦𑀸𑀫𑁂𑀲𑀸, 𑀫𑀳𑀸𑀭𑀸𑀚, 𑀫𑀫 𑀥𑀻𑀢𑀸 𑀧𑀁𑀲𑀼𑀓𑀽𑀮𑀺𑀓𑀢𑁆𑀣𑁂𑀭𑀻𑀦𑀁 𑀅𑀕𑁆𑀕𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁯𑁫. ‘‘𑀧𑀁𑀲𑀼𑀓𑀽𑀮𑀥𑀭𑀁 𑀚𑀦𑁆𑀢𑀼𑀁, 𑀓𑀺𑀲𑀁 𑀥𑀫𑀦𑀺𑀲𑀦𑁆𑀣𑀢𑀁;

𑀏𑀓𑀁 𑀯𑀦𑀲𑁆𑀫𑀺𑀁 𑀛𑀸𑀬𑀦𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀓𑀺𑀲𑀦𑁆𑀢𑀺 𑀧𑀁𑀲𑀼𑀓𑀽𑀮𑀺𑀓𑀸 𑀳𑀺 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀁 𑀧𑀝𑀺𑀧𑀤𑀁 𑀧𑀽𑀭𑁂𑀦𑁆𑀢𑀸 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀸 𑀘𑁂𑀯 𑀳𑁄𑀦𑁆𑀢𑀺 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑀸 𑀘, 𑀢𑀲𑁆𑀫𑀸 𑀏𑀯𑀫𑀸𑀳. 𑀏𑀓𑀁 𑀯𑀦𑀲𑁆𑀫𑀺𑀦𑁆𑀢𑀺 𑀯𑀺𑀯𑀺𑀢𑁆𑀢𑀝𑁆𑀞𑀸𑀦𑁂 𑀏𑀓𑀓𑀁 𑀯𑀦𑀲𑁆𑀫𑀺𑀁 𑀛𑀸𑀬𑀦𑁆𑀢𑀁 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀓𑀺𑀲𑀸𑀕𑁄𑀢𑀫𑀻𑀯𑀢𑁆𑀣𑀼 𑀤𑁆𑀯𑀸𑀤𑀲𑀫𑀁.

𑁧𑁩. 𑀏𑀓𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑀦 𑀘𑀸𑀳𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 ‘‘𑀲𑀫𑀡𑁄 𑀕𑁄𑀢𑀫𑁄 𑀅𑀢𑁆𑀢𑀦𑁄 𑀲𑀸𑀯𑀓𑁂 𑀩𑁆𑀭𑀸𑀳𑁆𑀫𑀡𑀸𑀢𑀺 𑀯𑀤𑀢𑀺 𑀅𑀳𑀜𑁆𑀘𑀫𑁆𑀳𑀺 𑀩𑁆𑀭𑀸𑀳𑁆𑀫𑀡𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄, 𑀫𑀫𑁆𑀧𑀺 𑀦𑀼 𑀔𑁄 𑀏𑀯𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀦𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀩𑁆𑀭𑀸𑀳𑁆𑀫𑀡𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀫𑀢𑁆𑀢𑁂𑀦𑁂𑀯𑀁 𑀯𑀤𑀸𑀫𑀺, 𑀬𑁄 𑀧𑀦 𑀅𑀓𑀺𑀜𑁆𑀘𑀦𑁄 𑀅𑀕𑀳𑀡𑁄, 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁯𑁬. ‘‘𑀦 𑀘𑀸𑀳𑀁 𑀩𑁆𑀭𑀸𑀳𑁆𑀫𑀡𑀁 𑀩𑁆𑀭𑀽𑀫𑀺, 𑀬𑁄𑀦𑀺𑀚𑀁 𑀫𑀢𑁆𑀢𑀺𑀲𑀫𑁆𑀪𑀯𑀁;

𑀪𑁄𑀯𑀸𑀤𑀺 𑀦𑀸𑀫 𑀲𑁄 𑀳𑁄𑀢𑀺, 𑀲𑀘𑁂 𑀳𑁄𑀢𑀺 𑀲𑀓𑀺𑀜𑁆𑀘𑀦𑁄;

𑀅𑀓𑀺𑀜𑁆𑀘𑀦𑀁 𑀅𑀦𑀸𑀤𑀸𑀦𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀬𑁄𑀦𑀺𑀚𑀦𑁆𑀢𑀺 𑀬𑁄𑀦𑀺𑀬𑀁 𑀚𑀸𑀢𑀁. 𑀫𑀢𑁆𑀢𑀺𑀲𑀫𑁆𑀪𑀯𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀺𑀬𑀸 𑀫𑀸𑀢𑀼 𑀲𑀦𑁆𑀢𑀓𑁂 𑀉𑀤𑀭𑀲𑁆𑀫𑀺𑀁 𑀲𑀫𑁆𑀪𑀽𑀢𑀁. 𑀪𑁄𑀯𑀸𑀤𑀻𑀢𑀺 𑀲𑁄 𑀧𑀦 𑀆𑀫𑀦𑁆𑀢𑀦𑀸𑀤𑀻𑀲𑀼 ‘‘𑀪𑁄, 𑀪𑁄’’𑀢𑀺 𑀯𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀪𑁄𑀯𑀸𑀤𑀺 𑀦𑀸𑀫 𑀳𑁄𑀢𑀺, 𑀲𑀘𑁂 𑀭𑀸𑀕𑀸𑀤𑀻𑀳𑀺 𑀓𑀺𑀜𑁆𑀘𑀦𑁂𑀳𑀺 𑀲𑀓𑀺𑀜𑁆𑀘𑀦𑁄. 𑀅𑀳𑀁 𑀧𑀦 𑀭𑀸𑀕𑀸𑀤𑀻𑀳𑀺 𑀅𑀓𑀺𑀜𑁆𑀘𑀦𑀁 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀅𑀦𑀸𑀤𑀸𑀦𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀏𑀓𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀢𑁂𑀭𑀲𑀫𑀁.

𑁧𑁪. 𑀉𑀕𑁆𑀕𑀲𑁂𑀦𑀲𑁂𑀝𑁆𑀞𑀺𑀧𑀼𑀢𑁆𑀢𑀯𑀢𑁆𑀣𑀼

𑀲𑀩𑁆𑀩𑀲𑀁𑀬𑁄𑀚𑀦𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀕𑁆𑀕𑀲𑁂𑀦𑀁 𑀦𑀸𑀫 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 ‘‘𑀫𑀼𑀜𑁆𑀘 𑀧𑀼𑀭𑁂 𑀫𑀼𑀜𑁆𑀘 𑀧𑀘𑁆𑀙𑀢𑁄’’𑀢𑀺 (𑀥. 𑀧. 𑁩𑁪𑁮) 𑀕𑀸𑀣𑀸𑀯𑀡𑁆𑀡𑀦𑀸𑀬 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑀢𑀤𑀸 𑀳𑀺 𑀲𑀢𑁆𑀣𑀸, ‘‘𑀪𑀦𑁆𑀢𑁂, 𑀉𑀕𑁆𑀕𑀲𑁂𑀦𑁄 ‘𑀦 𑀪𑀸𑀬𑀸𑀫𑀻’𑀢𑀺 𑀯𑀤𑀢𑀺, 𑀅𑀪𑀽𑀢𑁂𑀦 𑀫𑀜𑁆𑀜𑁂 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀻’’𑀢𑀺 𑀪𑀺𑀓𑁆𑀔𑀽𑀳𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑀲𑀤𑀺𑀲𑀸 𑀙𑀺𑀦𑁆𑀦𑀲𑀁𑀬𑁄𑀚𑀦𑀸 𑀦 𑀪𑀸𑀬𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁯𑁭. ‘‘𑀲𑀩𑁆𑀩𑀲𑀁𑀬𑁄𑀚𑀦𑀁 𑀙𑁂𑀢𑁆𑀯𑀸, 𑀬𑁄 𑀯𑁂 𑀦 𑀧𑀭𑀺𑀢𑀲𑁆𑀲𑀢𑀺;

𑀲𑀗𑁆𑀕𑀸𑀢𑀺𑀕𑀁 𑀯𑀺𑀲𑀁𑀬𑀼𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀲𑀩𑁆𑀩𑀲𑀁𑀬𑁄𑀚𑀦𑀦𑁆𑀢𑀺 𑀤𑀲𑀯𑀺𑀥𑀲𑀁𑀬𑁄𑀚𑀦𑀁. 𑀦 𑀧𑀭𑀺𑀢𑀲𑁆𑀲𑀢𑀻𑀢𑀺 𑀢𑀡𑁆𑀳𑀸𑀬 𑀦 𑀪𑀸𑀬𑀢𑀺. 𑀢𑀫𑀳𑀦𑁆𑀢𑀺 𑀢𑀁 𑀅𑀳𑀁 𑀭𑀸𑀕𑀸𑀤𑀻𑀦𑀁 𑀲𑀗𑁆𑀕𑀸𑀦𑀁 𑀅𑀢𑀻𑀢𑀢𑁆𑀢𑀸 𑀲𑀗𑁆𑀕𑀸𑀢𑀺𑀕𑀁, 𑀘𑀢𑀼𑀦𑁆𑀦𑀫𑁆𑀧𑀺 𑀬𑁄𑀕𑀸𑀦𑀁 𑀅𑀪𑀸𑀯𑁂𑀦 𑀯𑀺𑀲𑀁𑀬𑀼𑀢𑁆𑀢𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀉𑀕𑁆𑀕𑀲𑁂𑀦𑀲𑁂𑀝𑁆𑀞𑀺𑀧𑀼𑀢𑁆𑀢𑀯𑀢𑁆𑀣𑀼 𑀘𑀼𑀤𑁆𑀤𑀲𑀫𑀁.

𑁧𑁫. 𑀤𑁆𑀯𑁂𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑀙𑁂𑀢𑁆𑀯𑀸 𑀦𑀤𑁆𑀥𑀺𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑁆𑀯𑁂 𑀩𑁆𑀭𑀸𑀳𑁆𑀫𑀡𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂𑀲𑀼 𑀓𑀺𑀭𑁂𑀓𑀲𑁆𑀲 𑀘𑀽𑀴𑀭𑁄𑀳𑀺𑀢𑁄 𑀦𑀸𑀫 𑀕𑁄𑀡𑁄 𑀅𑀳𑁄𑀲𑀺, 𑀏𑀓𑀲𑁆𑀲 𑀫𑀳𑀸𑀭𑁄𑀳𑀺𑀢𑁄 𑀦𑀸𑀫. 𑀢𑁂 𑀏𑀓𑀤𑀺𑀯𑀲𑀁 ‘‘𑀢𑀯 𑀕𑁄𑀡𑁄 𑀩𑀮𑀯𑀸, 𑀫𑀫 𑀕𑁄𑀡𑁄 𑀩𑀮𑀯𑀸’’𑀢𑀺 𑀯𑀺𑀯𑀤𑀺𑀢𑁆𑀯𑀸 ‘‘𑀓𑀺𑀁 𑀦𑁄 𑀯𑀺𑀯𑀸𑀤𑁂𑀦, 𑀧𑀸𑀚𑁂𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀅𑀘𑀺𑀭𑀯𑀢𑀻𑀢𑀻𑀭𑁂 𑀲𑀓𑀝𑀁 𑀯𑀸𑀮𑀼𑀓𑀸𑀬 𑀧𑀽𑀭𑁂𑀢𑁆𑀯𑀸 𑀕𑁄𑀡𑁂 𑀬𑁄𑀚𑀬𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀪𑀺𑀓𑁆𑀔𑀽𑀧𑀺 𑀦𑁆𑀳𑀸𑀬𑀺𑀢𑀼𑀁 𑀢𑀢𑁆𑀣 𑀕𑀢𑀸 𑀳𑁄𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑀸 𑀕𑁄𑀡𑁂 𑀧𑀸𑀚𑁂𑀲𑀼𑀁. 𑀲𑀓𑀝𑀁 𑀦𑀺𑀘𑁆𑀘𑀮𑀁 𑀅𑀝𑁆𑀞𑀸𑀲𑀺, 𑀦𑀤𑁆𑀥𑀺𑀯𑀭𑀢𑁆𑀢𑀸 𑀧𑀦 𑀙𑀺𑀚𑁆𑀚𑀺𑀁𑀲𑀼. 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀲𑀢𑁆𑀣𑀼 𑀆𑀭𑁄𑀘𑀬𑀺𑀁𑀲𑀼. 𑀲𑀢𑁆𑀣𑀸, ‘‘𑀪𑀺𑀓𑁆𑀔𑀯𑁂, 𑀩𑀸𑀳𑀺𑀭𑀸 𑀏𑀢𑀸 𑀦𑀤𑁆𑀥𑀺𑀯𑀭𑀢𑁆𑀢𑀸, 𑀬𑁄 𑀓𑁄𑀘𑀺 𑀏𑀢𑀸 𑀙𑀺𑀦𑁆𑀤𑀢𑁂𑀯, 𑀪𑀺𑀓𑁆𑀔𑀼𑀦𑀸 𑀧𑀦 𑀅𑀚𑁆𑀛𑀢𑁆𑀢𑀺𑀓𑀁 𑀓𑁄𑀥𑀦𑀤𑁆𑀥𑀺𑀜𑁆𑀘𑁂𑀯 𑀢𑀡𑁆𑀳𑀸𑀯𑀭𑀢𑁆𑀢𑀜𑁆𑀘 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁯𑁮. ‘‘𑀙𑁂𑀢𑁆𑀯𑀸 𑀦𑀤𑁆𑀥𑀺𑀁 𑀯𑀭𑀢𑁆𑀢𑀜𑁆𑀘, 𑀲𑀦𑁆𑀤𑀸𑀦𑀁 𑀲𑀳𑀦𑀼𑀓𑁆𑀓𑀫𑀁;

𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑀁 𑀩𑀼𑀤𑁆𑀥𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀦𑀤𑁆𑀥𑀺𑀦𑁆𑀢𑀺 𑀦𑀬𑁆𑀳𑀦𑀪𑀸𑀯𑁂𑀦 𑀧𑀯𑀢𑁆𑀢𑀁 𑀓𑁄𑀥𑀁. 𑀯𑀭𑀢𑁆𑀢𑀦𑁆𑀢𑀺 𑀩𑀦𑁆𑀥𑀦𑀪𑀸𑀯𑁂𑀦 𑀧𑀯𑀢𑁆𑀢𑀁 𑀢𑀡𑁆𑀳𑀁. 𑀲𑀦𑁆𑀤𑀸𑀦𑀁 𑀲𑀳𑀦𑀼𑀓𑁆𑀓𑀫𑀦𑁆𑀢𑀺 𑀅𑀦𑀼𑀲𑀬𑀸𑀦𑀼𑀓𑁆𑀓𑀫𑀲𑀳𑀺𑀢𑀁 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀲𑀦𑁆𑀤𑀸𑀦𑀁, 𑀇𑀤𑀁 𑀲𑀩𑁆𑀩𑀫𑁆𑀧𑀺 𑀙𑀺𑀦𑁆𑀤𑀺𑀢𑁆𑀯𑀸 𑀞𑀺𑀢𑀁 𑀅𑀯𑀺𑀚𑁆𑀚𑀸𑀧𑀮𑀺𑀖𑀲𑁆𑀲 𑀉𑀓𑁆𑀔𑀺𑀢𑁆𑀢𑀢𑁆𑀢𑀸 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑀁, 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑀁 𑀢𑀁 𑀅𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀤𑁆𑀯𑁂𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀧𑀦𑁆𑀦𑀭𑀲𑀫𑀁.

𑁧𑁬. 𑀅𑀓𑁆𑀓𑁄𑀲𑀓𑀪𑀸𑀭𑀤𑁆𑀯𑀸𑀚𑀯𑀢𑁆𑀣𑀼

𑀅𑀓𑁆𑀓𑁄𑀲𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀓𑁆𑀓𑁄𑀲𑀓𑀪𑀸𑀭𑀤𑁆𑀯𑀸𑀚𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀲𑁆𑀲 𑀳𑀺 𑀪𑀸𑀢𑀼 𑀪𑀸𑀭𑀤𑁆𑀯𑀸𑀚𑀲𑁆𑀲 𑀥𑀦𑀜𑁆𑀚𑀸𑀦𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀲𑁄𑀢𑀸𑀧𑀦𑁆𑀦𑀸 𑀅𑀳𑁄𑀲𑀺. 𑀲𑀸 𑀔𑀻𑀧𑀺𑀢𑁆𑀯𑀸𑀧𑀺 𑀓𑀸𑀲𑀺𑀢𑁆𑀯𑀸𑀧𑀺 𑀧𑀓𑁆𑀔𑀮𑀺𑀢𑁆𑀯𑀸𑀧𑀺 ‘‘𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀲𑀸 𑀏𑀓𑀤𑀺𑀯𑀲𑀁 𑀩𑁆𑀭𑀸𑀳𑁆𑀫𑀡𑀧𑀭𑀺𑀯𑁂𑀲𑀦𑀸𑀬 𑀧𑀯𑀢𑁆𑀢𑀫𑀸𑀦𑀸𑀬 𑀧𑀓𑁆𑀔𑀮𑀺𑀢𑁆𑀯𑀸 𑀢𑀣𑁂𑀯 𑀫𑀳𑀸𑀲𑀤𑁆𑀤𑁂𑀦 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀏𑀯𑀫𑁂𑀯𑀸𑀬𑀁 𑀯𑀲𑀮𑀻 𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀧𑀓𑁆𑀔𑀮𑀺𑀢𑁆𑀯𑀸 𑀢𑀲𑁆𑀲 𑀫𑀼𑀡𑁆𑀟𑀓𑀲𑁆𑀲 𑀲𑀫𑀡𑀓𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀻’’𑀢𑀺 𑀯𑀢𑁆𑀯𑀸 ‘‘𑀇𑀤𑀸𑀦𑀺 𑀢𑁂, 𑀯𑀲𑀮𑀺, 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀲𑀢𑁆𑀣𑀼𑀦𑁄 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀲𑀸 ‘‘𑀕𑀘𑁆𑀙, 𑀩𑁆𑀭𑀸𑀳𑁆𑀫𑀡, 𑀦𑀸𑀳𑀁 𑀢𑀁 𑀧𑀲𑁆𑀲𑀸𑀫𑀺, 𑀬𑁄 𑀢𑀲𑁆𑀲 𑀪𑀕𑀯𑀢𑁄 𑀯𑀸𑀤𑀁 𑀆𑀭𑁄𑀧𑁂𑀬𑁆𑀬, 𑀅𑀧𑀺 𑀘 𑀕𑀦𑁆𑀢𑁆𑀯𑀸 𑀢𑀁 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀲𑁆𑀲𑀽’’𑀢𑀺 𑀆𑀳. 𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀯𑀦𑁆𑀤𑀺𑀢𑁆𑀯𑀸𑀯 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀓𑀺𑀁𑀲𑀼 𑀙𑁂𑀢𑁆𑀯𑀸 𑀲𑀼𑀔𑀁 𑀲𑁂𑀢𑀺, 𑀓𑀺𑀁𑀲𑀼 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀺;

𑀓𑀺𑀲𑁆𑀲𑀲𑁆𑀲𑀼 𑀏𑀓𑀥𑀫𑁆𑀫𑀲𑁆𑀲, 𑀯𑀥𑀁 𑀭𑁄𑀘𑁂𑀲𑀺 𑀕𑁄𑀢𑀫𑀸’’𑀢𑀺. (𑀲𑀁. 𑀦𑀺. 𑁧.𑁧𑁮𑁭);

𑀅𑀣𑀲𑁆𑀲 𑀧𑀜𑁆𑀳𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀲𑀢𑁆𑀣𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀓𑁄𑀥𑀁 𑀙𑁂𑀢𑁆𑀯𑀸 𑀲𑀼𑀔𑀁 𑀲𑁂𑀢𑀺, 𑀓𑁄𑀥𑀁 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀺;

𑀓𑁄𑀥𑀲𑁆𑀲 𑀯𑀺𑀲𑀫𑀽𑀮𑀲𑁆𑀲, 𑀫𑀥𑀼𑀭𑀕𑁆𑀕𑀲𑁆𑀲 𑀩𑁆𑀭𑀸𑀳𑁆𑀫𑀡;

𑀯𑀥𑀁 𑀅𑀭𑀺𑀬𑀸 𑀧𑀲𑀁𑀲𑀦𑁆𑀢𑀺, 𑀢𑀜𑁆𑀳𑀺 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀻’’𑀢𑀺. (𑀲𑀁. 𑀦𑀺. 𑁧.𑁧𑁮𑁭);

𑀲𑁄 𑀲𑀢𑁆𑀣𑀭𑀺 𑀧𑀲𑀻𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣𑀲𑁆𑀲 𑀓𑀦𑀺𑀝𑁆𑀞𑁄 𑀅𑀓𑁆𑀓𑁄𑀲𑀓𑀪𑀸𑀭𑀤𑁆𑀯𑀸𑀚𑁄 ‘‘𑀪𑀸𑀢𑀸 𑀓𑀺𑀭 𑀫𑁂 𑀧𑀩𑁆𑀩𑀚𑀺𑀢𑁄’’𑀢𑀺 𑀲𑀼𑀢𑁆𑀯𑀸 𑀓𑀼𑀤𑁆𑀥𑁄 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀲𑀩𑁆𑀪𑀸𑀳𑀺 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀅𑀓𑁆𑀓𑁄𑀲𑀺. 𑀲𑁄𑀧𑀺 𑀲𑀢𑁆𑀣𑀸𑀭𑀸 𑀅𑀢𑀺𑀣𑀻𑀦𑀁 𑀔𑀸𑀤𑀦𑀻𑀬𑀸𑀤𑀺𑀤𑀸𑀦𑀑𑀧𑀫𑁆𑀫𑁂𑀦 𑀲𑀜𑁆𑀜𑀢𑁆𑀢𑁄 𑀲𑀢𑁆𑀣𑀭𑀺 𑀧𑀲𑀦𑁆𑀦𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀧𑀭𑁂𑀧𑀺𑀲𑁆𑀲 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑀺𑀮𑀺𑀗𑁆𑀕𑀓𑀪𑀸𑀭𑀤𑁆𑀯𑀸𑀚𑁄𑀢𑀺 𑀤𑁆𑀯𑁂 𑀓𑀦𑀺𑀝𑁆𑀞𑀪𑀸𑀢𑀭𑁄 𑀲𑀢𑁆𑀣𑀸𑀭𑀁 𑀅𑀓𑁆𑀓𑁄𑀲𑀦𑁆𑀢𑀸𑀯 𑀲𑀢𑁆𑀣𑀸𑀭𑀸 𑀯𑀺𑀦𑀻𑀢𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼.

𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁, ‘‘𑀆𑀯𑀼𑀲𑁄, 𑀅𑀘𑁆𑀙𑀭𑀺𑀬𑀸 𑀯𑀢 𑀩𑀼𑀤𑁆𑀥𑀕𑀼𑀡𑀸, 𑀘𑀢𑀽𑀲𑀼 𑀦𑀸𑀫 𑀪𑀸𑀢𑀺𑀓𑁂𑀲𑀼 𑀅𑀓𑁆𑀓𑁄𑀲𑀦𑁆𑀢𑁂𑀲𑀼 𑀲𑀢𑁆𑀣𑀸 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀢𑁂𑀲𑀁𑀬𑁂𑀯 𑀧𑀢𑀺𑀝𑁆𑀞𑀸 𑀚𑀸𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀅𑀳𑀁 𑀫𑀫 𑀔𑀦𑁆𑀢𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀤𑀼𑀝𑁆𑀞𑁂𑀲𑀼 𑀅𑀤𑀼𑀲𑁆𑀲𑀦𑁆𑀢𑁄 𑀫𑀳𑀸𑀚𑀦𑀲𑁆𑀲 𑀧𑀢𑀺𑀝𑁆𑀞𑀸 𑀳𑁄𑀫𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋