𑁩𑁮. 𑀥𑀫𑁆𑀫𑀤𑀺𑀦𑁆𑀦𑀢𑁆𑀣𑁂𑀭𑀻𑀯𑀢𑁆𑀣𑀼

𑀬𑀲𑁆𑀲𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀥𑀫𑁆𑀫𑀤𑀺𑀦𑁆𑀦𑀁 𑀦𑀸𑀫 𑀪𑀺𑀓𑁆𑀔𑀼𑀦𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀤𑀺𑀯𑀲𑀜𑁆𑀳𑀺 𑀢𑀲𑁆𑀲𑀸 𑀕𑀺𑀳𑀺𑀓𑀸𑀮𑁂 𑀲𑀸𑀫𑀺𑀓𑁄 𑀯𑀺𑀲𑀸𑀔𑁄 𑀉𑀧𑀸𑀲𑀓𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀸 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁 𑀥𑀫𑁆𑀫𑀤𑀺𑀦𑁆𑀦𑀁 𑀧𑀝𑀺𑀘𑁆𑀙𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀢𑀢𑁄 𑀧𑀼𑀩𑁆𑀩𑁂 𑀆𑀕𑀘𑁆𑀙𑀦𑁆𑀢𑁄 𑀥𑀫𑁆𑀫𑀤𑀺𑀦𑁆𑀦𑀁 𑀯𑀸𑀢𑀧𑀸𑀦𑁂𑀦 𑀑𑀮𑁄𑀓𑁂𑀦𑁆𑀢𑀺𑀁 𑀤𑀺𑀲𑁆𑀯𑀸 𑀲𑀺𑀢𑀁 𑀓𑀭𑁄𑀢𑀺. 𑀢𑀁 𑀤𑀺𑀯𑀲𑀁 𑀧𑀦 𑀯𑀸𑀢𑀧𑀸𑀦𑁂𑀦 𑀞𑀺𑀢𑀁 𑀅𑀦𑁄𑀮𑁄𑀓𑁂𑀦𑁆𑀢𑁄𑀯 𑀅𑀕𑀫𑀸𑀲𑀺. 𑀲𑀸 ‘‘𑀓𑀺𑀁 𑀦𑀼 𑀔𑁄 𑀇𑀤’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀳𑁄𑀢𑀼, 𑀪𑁄𑀚𑀦𑀓𑀸𑀮𑁂 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀪𑁄𑀚𑀦𑀯𑁂𑀮𑀸𑀬 𑀪𑀢𑁆𑀢𑀁 𑀉𑀧𑀦𑀸𑀫𑁂𑀲𑀺. 𑀲𑁄 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 ‘‘𑀏𑀳𑀺, 𑀏𑀓𑀢𑁄 𑀪𑀼𑀜𑁆𑀚𑀸𑀫𑀸’’𑀢𑀺 𑀯𑀤𑀢𑀺, 𑀢𑀁 𑀤𑀺𑀯𑀲𑀁 𑀧𑀦 𑀢𑀼𑀡𑁆𑀳𑀻𑀪𑀽𑀢𑁄𑀯 𑀪𑀼𑀜𑁆𑀚𑀺. 𑀲𑀸 ‘‘𑀓𑁂𑀦𑀘𑀺𑀤𑁂𑀯 𑀓𑀸𑀭𑀡𑁂𑀦 𑀓𑀼𑀧𑀺𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀣 𑀦𑀁 𑀯𑀺𑀲𑀸𑀔𑁄 𑀲𑀼𑀔𑀦𑀺𑀲𑀺𑀦𑁆𑀦𑀯𑁂𑀮𑀸𑀬 𑀢𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀥𑀫𑁆𑀫𑀤𑀺𑀦𑁆𑀦𑁂 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁 𑀧𑀝𑀺𑀘𑁆𑀙𑀸𑀳𑀻’’𑀢𑀺 𑀆𑀳. 𑀲𑀸 ‘‘𑀓𑀼𑀤𑁆𑀥𑀸 𑀦𑀸𑀫 𑀲𑀸𑀧𑀢𑁂𑀬𑁆𑀬𑀁 𑀦 𑀧𑀝𑀺𑀘𑁆𑀙𑀸𑀧𑁂𑀦𑁆𑀢𑀺, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀧𑀦, 𑀲𑀸𑀫𑀻’’𑀢𑀺 𑀆𑀳. 𑀅𑀳𑀁 𑀇𑀢𑁄 𑀧𑀝𑁆𑀞𑀸𑀬 𑀦 𑀓𑀺𑀜𑁆𑀘𑀺 𑀯𑀺𑀘𑀸𑀭𑁂𑀫𑀻𑀢𑀺. 𑀢𑀼𑀫𑁆𑀳𑁂𑀳𑀺 𑀙𑀟𑁆𑀟𑀺𑀢𑀁 𑀔𑁂𑀴𑀁 𑀓𑁄 𑀧𑀝𑀺𑀘𑁆𑀙𑀺𑀲𑁆𑀲𑀢𑀺, 𑀏𑀯𑀁 𑀲𑀦𑁆𑀢𑁂 𑀫𑀫 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀣𑀸𑀢𑀺. 𑀲𑁄 ‘‘𑀲𑀸𑀥𑀼, 𑀪𑀤𑁆𑀤𑁂’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀢𑀁 𑀪𑀺𑀓𑁆𑀔𑀼𑀦𑀻𑀉𑀧𑀲𑁆𑀲𑀬𑀁 𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀲𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑀸 𑀥𑀫𑁆𑀫𑀤𑀺𑀦𑁆𑀦𑀢𑁆𑀣𑁂𑀭𑀻 𑀦𑀸𑀫 𑀅𑀳𑁄𑀲𑀺.

𑀲𑀸 𑀧𑀯𑀺𑀯𑁂𑀓𑀓𑀸𑀫𑀢𑀸𑀬 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀯𑀺𑀳𑀭𑀦𑁆𑀢𑀻 𑀦 𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 ‘‘𑀇𑀤𑀸𑀦𑀺 𑀫𑀁 𑀦𑀺𑀲𑁆𑀲𑀸𑀬 𑀜𑀸𑀢𑀺𑀚𑀦𑀸 𑀧𑀼𑀜𑁆𑀜𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀼𑀦𑀤𑁂𑀯 𑀭𑀸𑀚𑀕𑀳𑀁 𑀧𑀘𑁆𑀘𑀸𑀕𑀜𑁆𑀙𑀺. 𑀉𑀧𑀸𑀲𑀓𑁄 𑀢𑀲𑁆𑀲𑀸 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀆𑀕𑀢𑀸’’𑀢𑀺 𑀪𑀺𑀓𑁆𑀔𑀼𑀦𑀻𑀉𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀣𑁂𑀭𑀺𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 ‘‘𑀉𑀓𑁆𑀓𑀡𑁆𑀞𑀺𑀢𑀸 𑀦𑀼 𑀔𑁄𑀲𑀺, 𑀅𑀬𑁆𑀬𑁂𑀢𑀺 𑀯𑀢𑁆𑀢𑀼𑀁 𑀅𑀧𑁆𑀧𑀢𑀺𑀭𑀽𑀧𑀁, 𑀧𑀜𑁆𑀳𑀫𑁂𑀓𑀁 𑀦𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀲𑀸 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀉𑀧𑀸𑀲𑀓𑁄 𑀢𑁂𑀦𑁂𑀯 𑀉𑀧𑀸𑀬𑁂𑀦 𑀲𑁂𑀲𑀫𑀕𑁆𑀕𑁂𑀲𑀼𑀧𑀺 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑁆𑀫 𑀧𑀜𑁆𑀳𑀲𑁆𑀲 𑀧𑀼𑀝𑁆𑀞𑀓𑀸𑀮𑁂 𑀢𑀸𑀬 ‘‘𑀅𑀘𑁆𑀘𑀬𑀸𑀲𑀺, 𑀆𑀯𑀼𑀲𑁄, 𑀯𑀺𑀲𑀸𑀔𑀸’’𑀢𑀺 𑀯𑀢𑁆𑀯𑀸 ‘‘𑀆𑀓𑀗𑁆𑀔𑀫𑀸𑀦𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀯𑀼𑀢𑁆𑀢𑁂 𑀣𑁂𑀭𑀺𑀁 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀓𑀣𑀸𑀲𑀮𑁆𑀮𑀸𑀧𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀲𑀼𑀓𑀣𑀺𑀢𑀁 𑀫𑀫 𑀥𑀻𑀢𑀸𑀬 𑀥𑀫𑁆𑀫𑀤𑀺𑀦𑁆𑀦𑀸𑀬, 𑀅𑀳𑀫𑁆𑀧𑁂𑀢𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀏𑀯𑀫𑁂𑀯 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁨𑁧. ‘‘𑀬𑀲𑁆𑀲 𑀧𑀼𑀭𑁂 𑀘 𑀧𑀘𑁆𑀙𑀸 𑀘, 𑀫𑀚𑁆𑀛𑁂 𑀘 𑀦𑀢𑁆𑀣𑀺 𑀓𑀺𑀜𑁆𑀘𑀦𑀁;

𑀅𑀓𑀺𑀜𑁆𑀘𑀦𑀁 𑀅𑀦𑀸𑀤𑀸𑀦𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀧𑀼𑀭𑁂𑀢𑀺 𑀅𑀢𑀻𑀢𑁂𑀲𑀼 𑀔𑀦𑁆𑀥𑁂𑀲𑀼. 𑀧𑀘𑁆𑀙𑀸𑀢𑀺 𑀅𑀦𑀸𑀕𑀢𑁂𑀲𑀼 𑀔𑀦𑁆𑀥𑁂𑀲𑀼. 𑀫𑀚𑁆𑀛𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀔𑀦𑁆𑀥𑁂𑀲𑀼. 𑀦𑀢𑁆𑀣𑀺 𑀓𑀺𑀜𑁆𑀘𑀦𑀦𑁆𑀢𑀺 𑀬𑀲𑁆𑀲𑁂𑀢𑁂𑀲𑀼 𑀞𑀸𑀦𑁂𑀲𑀼 𑀢𑀡𑁆𑀳𑀸𑀕𑀸𑀳𑀲𑀗𑁆𑀔𑀸𑀢𑀁 𑀓𑀺𑀜𑁆𑀘𑀦𑀁 𑀦𑀢𑁆𑀣𑀺, 𑀢𑀫𑀳𑀁 𑀭𑀸𑀕𑀓𑀺𑀜𑁆𑀘𑀦𑀸𑀤𑀻𑀳𑀺 𑀅𑀓𑀺𑀜𑁆𑀘𑀦𑀁 𑀓𑀲𑁆𑀲𑀘𑀺 𑀕𑀳𑀡𑀲𑁆𑀲 𑀅𑀪𑀸𑀯𑁂𑀦 𑀅𑀦𑀸𑀤𑀸𑀦𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀥𑀫𑁆𑀫𑀤𑀺𑀦𑁆𑀦𑀢𑁆𑀣𑁂𑀭𑀻𑀯𑀢𑁆𑀣𑀼 𑀅𑀝𑁆𑀞𑀢𑀺𑀁𑀲𑀢𑀺𑀫𑀁.