𑁩𑁭. 𑀯𑀗𑁆𑀕𑀻𑀲𑀢𑁆𑀣𑁂𑀭𑀯𑀢𑁆𑀣𑀼

𑀘𑀼𑀢𑀺𑀁 𑀬𑁄 𑀯𑁂𑀤𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀯𑀗𑁆𑀕𑀻𑀲𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀭𑀸𑀚𑀕𑀳𑁂 𑀓𑀺𑀭𑁂𑀓𑁄 𑀩𑁆𑀭𑀸𑀳𑁆𑀫𑀡𑁄 𑀯𑀗𑁆𑀕𑀻𑀲𑁄 𑀦𑀸𑀫 𑀫𑀢𑀫𑀦𑀼𑀲𑁆𑀲𑀸𑀦𑀁 𑀲𑀻𑀲𑀁 𑀆𑀓𑁄𑀝𑁂𑀢𑁆𑀯𑀸 ‘‘𑀇𑀤𑀁 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀲𑀻𑀲𑀁, 𑀇𑀤𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁, 𑀇𑀤𑀁 𑀧𑁂𑀢𑁆𑀢𑀺𑀯𑀺𑀲𑀬𑁂, 𑀇𑀤𑀁 𑀫𑀦𑀼𑀲𑁆𑀲𑀮𑁄𑀓𑁂, 𑀇𑀤𑀁 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀲𑀻𑀲’’𑀦𑁆𑀢𑀺 𑀚𑀸𑀦𑀸𑀢𑀺. 𑀩𑁆𑀭𑀸𑀳𑁆𑀫𑀡𑀸 ‘‘𑀲𑀓𑁆𑀓𑀸 𑀇𑀫𑀁 𑀦𑀺𑀲𑁆𑀲𑀸𑀬 𑀮𑁄𑀓𑀁 𑀔𑀸𑀤𑀺𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀤𑁆𑀯𑁂 𑀭𑀢𑁆𑀢𑀯𑀢𑁆𑀣𑀸𑀦𑀺 𑀧𑀭𑀺𑀤𑀳𑀸𑀧𑁂𑀢𑁆𑀯𑀸 𑀆𑀤𑀸𑀬 𑀚𑀦𑀧𑀤𑀁 𑀘𑀭𑀦𑁆𑀢𑀸 𑀫𑀦𑀼𑀲𑁆𑀲𑁂 𑀯𑀤𑀦𑁆𑀢𑀺 ‘‘𑀏𑀲𑁄 𑀯𑀗𑁆𑀕𑀻𑀲𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀫𑀢𑀫𑀦𑀼𑀲𑁆𑀲𑀸𑀦𑀁 𑀲𑀻𑀲𑀁 𑀆𑀓𑁄𑀝𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀚𑀸𑀦𑀸𑀢𑀺, 𑀅𑀢𑁆𑀢𑀦𑁄 𑀜𑀸𑀢𑀓𑀸𑀦𑀁 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀧𑀼𑀘𑁆𑀙𑀣𑀸’’𑀢𑀺. 𑀫𑀦𑀼𑀲𑁆𑀲𑀸 𑀬𑀣𑀸𑀩𑀮𑀁 𑀤𑀲𑀧𑀺 𑀓𑀳𑀸𑀧𑀡𑁂 𑀯𑀻𑀲𑀢𑀺𑀧𑀺 𑀲𑀢𑀫𑁆𑀧𑀺 𑀤𑀢𑁆𑀯𑀸 𑀜𑀸𑀢𑀓𑀸𑀦𑀁 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀧𑀼𑀘𑁆𑀙𑀦𑁆𑀢𑀺. 𑀢𑁂 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀚𑁂𑀢𑀯𑀦𑀲𑁆𑀲 𑀅𑀯𑀺𑀤𑀽𑀭𑁂 𑀦𑀺𑀯𑀸𑀲𑀁 𑀕𑀡𑁆𑀳𑀺𑀁𑀲𑀼. 𑀢𑁂 𑀪𑀼𑀢𑁆𑀢𑀧𑀸𑀢𑀭𑀸𑀲𑀸 𑀫𑀳𑀸𑀚𑀦𑀁 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀁 𑀥𑀫𑁆𑀫𑀲𑁆𑀲𑀯𑀦𑀸𑀬 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀳𑀁 𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀯𑀺𑀳𑀸𑀭𑀁 𑀥𑀫𑁆𑀫𑀲𑁆𑀲𑀯𑀦𑀸𑀬𑀸’’𑀢𑀺 𑀯𑀼𑀢𑁆𑀢𑁂 ‘‘𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀣, 𑀅𑀫𑁆𑀳𑀸𑀓𑀁 𑀯𑀗𑁆𑀕𑀻𑀲𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑀺𑀲𑁄 𑀦𑀸𑀫 𑀦𑀢𑁆𑀣𑀺, 𑀫𑀢𑀫𑀦𑀼𑀲𑁆𑀲𑀸𑀦𑀁 𑀲𑀻𑀲𑀁 𑀆𑀓𑁄𑀝𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀚𑀸𑀦𑀸𑀢𑀺, 𑀜𑀸𑀢𑀓𑀸𑀦𑀁 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀧𑀼𑀘𑁆𑀙𑀣𑀸’’𑀢𑀺 𑀆𑀳𑀁𑀲𑀼. 𑀢𑁂 ‘‘𑀯𑀗𑁆𑀕𑀻𑀲𑁄 𑀓𑀺𑀁 𑀚𑀸𑀦𑀸𑀢𑀺, 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸𑀭𑀸 𑀲𑀤𑀺𑀲𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀇𑀢𑀭𑁂𑀳𑀺𑀧𑀺 ‘‘𑀯𑀗𑁆𑀕𑀻𑀲𑀲𑀤𑀺𑀲𑁄 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁂 𑀓𑀣𑀁 𑀯𑀟𑁆𑀠𑁂𑀢𑁆𑀯𑀸 ‘‘𑀏𑀣, 𑀤𑀸𑀦𑀺 𑀯𑁄 𑀯𑀗𑁆𑀕𑀻𑀲𑀲𑁆𑀲 𑀯𑀸 𑀅𑀫𑁆𑀳𑀸𑀓𑀁 𑀯𑀸 𑀲𑀢𑁆𑀣𑀼 𑀚𑀸𑀦𑀦𑀪𑀸𑀯𑀁 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀢𑁂 𑀆𑀤𑀸𑀬 𑀯𑀺𑀳𑀸𑀭𑀁 𑀅𑀕𑀫𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀆𑀕𑀫𑀦𑀪𑀸𑀯𑀁 𑀜𑀢𑁆𑀯𑀸 𑀦𑀺𑀭𑀬𑁂 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂𑀢𑀺 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀦𑀺𑀩𑁆𑀩𑀢𑁆𑀢𑀸𑀦𑀁 𑀘𑀢𑁆𑀢𑀸𑀭𑀺 𑀲𑀻𑀲𑀸𑀦𑀺, 𑀔𑀻𑀡𑀸𑀲𑀯𑀲𑀻𑀲𑀜𑁆𑀘𑀸𑀢𑀺 𑀧𑀜𑁆𑀘 𑀲𑀻𑀲𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀞𑀧𑁂𑀢𑁆𑀯𑀸 𑀆𑀕𑀢𑀓𑀸𑀮𑁂 𑀯𑀗𑁆𑀕𑀻𑀲𑀁 𑀧𑀼𑀘𑁆𑀙𑀺 𑁋 ‘‘𑀢𑁆𑀯𑀁 𑀓𑀺𑀭 𑀲𑀻𑀲𑀁 𑀆𑀓𑁄𑀝𑁂𑀢𑁆𑀯𑀸 𑀫𑀢𑀓𑀸𑀦𑀁 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀚𑀸𑀦𑀸𑀲𑀻’’𑀢𑀺? ‘‘𑀆𑀫, 𑀚𑀸𑀦𑀸𑀫𑀻’’𑀢𑀺. ‘‘𑀇𑀤𑀁 𑀓𑀲𑁆𑀲 𑀲𑀻𑀲’’𑀦𑁆𑀢𑀺? 𑀲𑁄 𑀢𑀁 𑀆𑀓𑁄𑀝𑁂𑀢𑁆𑀯𑀸 ‘‘𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀲𑁆𑀲𑀸’’𑀢𑀺 𑀆𑀳. 𑀅𑀣𑀲𑁆𑀲 𑀲𑀢𑁆𑀣𑀸 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀇𑀢𑀭𑀸𑀦𑀺𑀧𑀺 𑀢𑀻𑀡𑀺 𑀲𑀻𑀲𑀸𑀦𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀯𑀼𑀢𑁆𑀢𑀯𑀼𑀢𑁆𑀢𑀓𑁆𑀔𑀡𑁂 𑀢𑀣𑁂𑀯 𑀢𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀧𑀜𑁆𑀘𑀫𑀁 𑀲𑀻𑀲𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀇𑀤𑀁 𑀓𑀲𑁆𑀲 𑀲𑀻𑀲’’𑀦𑁆𑀢𑀺 𑀧𑀼𑀘𑁆𑀙𑀺, 𑀲𑁄 𑀢𑀫𑁆𑀧𑀺 𑀆𑀓𑁄𑀝𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀦 𑀚𑀸𑀦𑀸𑀢𑀺.

𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀺𑀁, 𑀯𑀗𑁆𑀕𑀻𑀲, 𑀦 𑀚𑀸𑀦𑀸𑀲𑀻’’𑀢𑀺 𑀯𑀢𑁆𑀯𑀸, ‘‘𑀆𑀫, 𑀦 𑀚𑀸𑀦𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀁 𑀚𑀸𑀦𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀯𑀗𑁆𑀕𑀻𑀲𑁄 𑀬𑀸𑀘𑀺 ‘‘𑀤𑁂𑀣 𑀫𑁂 𑀇𑀫𑀁 𑀫𑀦𑁆𑀢’’𑀦𑁆𑀢𑀺. 𑀦 𑀲𑀓𑁆𑀓𑀸 𑀅𑀧𑀩𑁆𑀩𑀚𑀺𑀢𑀲𑁆𑀲 𑀤𑀸𑀢𑀼𑀦𑁆𑀢𑀺. 𑀲𑁄 ‘‘𑀇𑀫𑀲𑁆𑀫𑀺𑀁 𑀫𑀦𑁆𑀢𑁂 𑀕𑀳𑀺𑀢𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀳𑀁 𑀚𑁂𑀝𑁆𑀞𑀓𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂 𑀩𑁆𑀭𑀸𑀳𑁆𑀫𑀡𑁂 ‘‘𑀢𑀼𑀫𑁆𑀳𑁂 𑀢𑀢𑁆𑀣𑁂𑀯 𑀓𑀢𑀺𑀧𑀸𑀳𑀁 𑀯𑀲𑀣, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀯𑀗𑁆𑀕𑀻𑀲𑀢𑁆𑀣𑁂𑀭𑁄 𑀦𑀸𑀫 𑀅𑀳𑁄𑀲𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀁 𑀤𑀢𑁆𑀯𑀸 ‘‘𑀫𑀦𑁆𑀢𑀲𑁆𑀲 𑀧𑀭𑀺𑀓𑀫𑁆𑀫𑀁 𑀲𑀚𑁆𑀛𑀸𑀬𑀸𑀳𑀻’’𑀢𑀺 𑀆𑀳. 𑀲𑁄 𑀢𑀁 𑀲𑀚𑁆𑀛𑀸𑀬𑀦𑁆𑀢𑁄 𑀅𑀦𑁆𑀢𑀭𑀦𑁆𑀢𑀭𑀸 𑀩𑁆𑀭𑀸𑀳𑁆𑀫𑀡𑁂𑀳𑀺 ‘‘𑀕𑀳𑀺𑀢𑁄 𑀢𑁂 𑀫𑀦𑁆𑀢𑁄’’𑀢𑀺 𑀧𑀼𑀘𑁆𑀙𑀺𑀬𑀫𑀸𑀦𑁄 ‘‘𑀆𑀕𑀫𑁂𑀣 𑀢𑀸𑀯, 𑀕𑀡𑁆𑀳𑀸𑀫𑀻’’𑀢𑀺 𑀯𑀢𑁆𑀯𑀸 𑀓𑀢𑀺𑀧𑀸𑀳𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀼𑀦 𑀩𑁆𑀭𑀸𑀳𑁆𑀫𑀡𑁂𑀳𑀺 𑀧𑀼𑀝𑁆𑀞𑁄 ‘‘𑀅𑀪𑀩𑁆𑀩𑁄 𑀤𑀸𑀦𑀸𑀳𑀁, 𑀆𑀯𑀼𑀲𑁄, 𑀕𑀦𑁆𑀢𑀼’’𑀦𑁆𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 ‘‘𑀅𑀬𑀁, 𑀪𑀦𑁆𑀢𑁂, 𑀅𑀪𑀽𑀢𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀻’’𑀢𑀺 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀫𑀸, 𑀪𑀺𑀓𑁆𑀔𑀯𑁂, 𑀏𑀯𑀁 𑀅𑀯𑀘𑀼𑀢𑁆𑀣, 𑀇𑀤𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑁄 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀓𑀼𑀲𑀮𑁄 𑀚𑀸𑀢𑁄’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁪𑁧𑁯. ‘‘𑀘𑀼𑀢𑀺𑀁 𑀬𑁄 𑀯𑁂𑀤𑀺 𑀲𑀢𑁆𑀢𑀸𑀦𑀁, 𑀉𑀧𑀧𑀢𑁆𑀢𑀺𑀜𑁆𑀘 𑀲𑀩𑁆𑀩𑀲𑁄;

𑀅𑀲𑀢𑁆𑀢𑀁 𑀲𑀼𑀕𑀢𑀁 𑀩𑀼𑀤𑁆𑀥𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁪𑁨𑁦. ‘‘𑀬𑀲𑁆𑀲 𑀕𑀢𑀺𑀁 𑀦 𑀚𑀸𑀦𑀦𑁆𑀢𑀺, 𑀤𑁂𑀯𑀸 𑀕𑀦𑁆𑀥𑀩𑁆𑀩𑀫𑀸𑀦𑀼𑀲𑀸;

𑀔𑀻𑀡𑀸𑀲𑀯𑀁 𑀅𑀭𑀳𑀦𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀬𑁄 𑀯𑁂𑀤𑀻𑀢𑀺 𑀬𑁄 𑀲𑀢𑁆𑀢𑀸𑀦𑀁 𑀲𑀩𑁆𑀩𑀸𑀓𑀸𑀭𑁂𑀦 𑀘𑀼𑀢𑀺𑀜𑁆𑀘 𑀧𑀝𑀺𑀲𑀦𑁆𑀥𑀺𑀜𑁆𑀘 𑀧𑀸𑀓𑀝𑀁 𑀓𑀢𑁆𑀯𑀸 𑀚𑀸𑀦𑀸𑀢𑀺, 𑀢𑀫𑀳𑀁 𑀅𑀮𑀕𑁆𑀕𑀢𑀸𑀬 𑀅𑀲𑀢𑁆𑀢𑀁, 𑀧𑀝𑀺𑀧𑀢𑁆𑀢𑀺𑀬𑀸 𑀲𑀼𑀝𑁆𑀞𑀼 𑀕𑀢𑀢𑁆𑀢𑀸 𑀲𑀼𑀕𑀢𑀁, 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀩𑀼𑀤𑁆𑀥𑀢𑀸𑀬 𑀩𑀼𑀤𑁆𑀥𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀲𑀸𑀢𑀺 𑀬𑀲𑁆𑀲𑁂𑀢𑁂 𑀤𑁂𑀯𑀸𑀤𑀬𑁄 𑀕𑀢𑀺𑀁 𑀦 𑀚𑀸𑀦𑀦𑁆𑀢𑀺, 𑀢𑀫𑀳𑀁 𑀆𑀲𑀯𑀸𑀦𑀁 𑀔𑀻𑀡𑀢𑀸𑀬 𑀔𑀻𑀡𑀸𑀲𑀯𑀁, 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 𑀅𑀭𑀳𑀦𑁆𑀢𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀯𑀗𑁆𑀕𑀻𑀲𑀢𑁆𑀣𑁂𑀭𑀯𑀢𑁆𑀣𑀼 𑀲𑀢𑁆𑀢𑀢𑀺𑀁𑀲𑀢𑀺𑀫𑀁.