𑁩𑁬. 𑀦𑀝𑀧𑀼𑀢𑁆𑀢𑀓𑀢𑁆𑀣𑁂𑀭𑀯𑀢𑁆𑀣𑀼

𑀳𑀺𑀢𑁆𑀯𑀸 𑀭𑀢𑀺𑀜𑁆𑀘𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀦𑀝𑀧𑀼𑀢𑁆𑀢𑀓𑀁𑀬𑁂𑀯 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀇𑀥 𑀧𑀦 𑀲𑀢𑁆𑀣𑀸, ‘‘𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑁄 𑀭𑀢𑀺𑀜𑁆𑀘 𑀅𑀭𑀢𑀺𑀜𑁆𑀘 𑀧𑀳𑀸𑀬 𑀞𑀺𑀢𑁄’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁧𑁮. ‘‘𑀳𑀺𑀢𑁆𑀯𑀸 𑀭𑀢𑀺𑀜𑁆𑀘 𑀅𑀭𑀢𑀺𑀜𑁆𑀘, 𑀲𑀻𑀢𑀺𑀪𑀽𑀢𑀁 𑀦𑀺𑀭𑀽𑀧𑀥𑀺𑀁;

𑀲𑀩𑁆𑀩𑀮𑁄𑀓𑀸𑀪𑀺𑀪𑀼𑀁 𑀯𑀻𑀭𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀭𑀢𑀺𑀦𑁆𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀭𑀢𑀺𑀁. 𑀅𑀭𑀢𑀺𑀦𑁆𑀢𑀺 𑀅𑀭𑀜𑁆𑀜𑀯𑀸𑀲𑁂 𑀉𑀓𑁆𑀓𑀡𑁆𑀞𑀺𑀢𑀢𑁆𑀢𑀁. 𑀲𑀻𑀢𑀺𑀪𑀽𑀢𑀦𑁆𑀢𑀺 𑀦𑀺𑀩𑁆𑀩𑀼𑀢𑀁. 𑀦𑀺𑀭𑀽𑀧𑀥𑀺𑀦𑁆𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁. 𑀯𑀻𑀭𑀦𑁆𑀢𑀺 𑀢𑀁 𑀏𑀯𑀭𑀽𑀧𑀁 𑀲𑀩𑁆𑀩𑀁 𑀔𑀦𑁆𑀥𑀮𑁄𑀓𑀁 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑀁 𑀯𑀻𑀭𑀺𑀬𑀯𑀦𑁆𑀢𑀁 𑀅𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀦𑀝𑀧𑀼𑀢𑁆𑀢𑀓𑀢𑁆𑀣𑁂𑀭𑀯𑀢𑁆𑀣𑀼 𑀙𑀢𑁆𑀢𑀺𑀁𑀲𑀢𑀺𑀫𑀁.