𑁩𑁩. 𑀚𑀝𑀺𑀮𑀢𑁆𑀣𑁂𑀭𑀯𑀢𑁆𑀣𑀼

𑀬𑁄𑀥 𑀢𑀡𑁆𑀳𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀚𑀝𑀺𑀮𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀻 𑀓𑀣𑀸 𑁋 𑀅𑀢𑀻𑀢𑁂 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀤𑁆𑀯𑁂 𑀪𑀸𑀢𑀭𑁄 𑀓𑀼𑀝𑀼𑀫𑁆𑀩𑀺𑀓𑀸 𑀫𑀳𑀦𑁆𑀢𑀁 𑀉𑀘𑁆𑀙𑀼𑀔𑁂𑀢𑁆𑀢𑀁 𑀓𑀸𑀭𑁂𑀲𑀼𑀁. 𑀅𑀣𑁂𑀓𑀤𑀺𑀯𑀲𑀁 𑀓𑀦𑀺𑀝𑁆𑀞𑀪𑀸𑀢𑀸 𑀉𑀘𑁆𑀙𑀼𑀔𑁂𑀢𑁆𑀢𑀁 𑀕𑀦𑁆𑀢𑁆𑀯𑀸 ‘‘𑀏𑀓𑀁 𑀚𑁂𑀝𑁆𑀞𑀪𑀸𑀢𑀺𑀓𑀲𑁆𑀲 𑀤𑀲𑁆𑀲𑀸𑀫𑀺, 𑀏𑀓𑀁 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑁆𑀯𑁂 𑀉𑀘𑁆𑀙𑀼𑀬𑀝𑁆𑀞𑀺𑀬𑁄 𑀭𑀲𑀲𑁆𑀲 𑀅𑀦𑀺𑀓𑁆𑀔𑀫𑀦𑀢𑁆𑀣𑀸𑀬 𑀙𑀺𑀦𑁆𑀦𑀝𑁆𑀞𑀸𑀦𑁂 𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀺. 𑀢𑀤𑀸 𑀓𑀺𑀭 𑀉𑀘𑁆𑀙𑀽𑀦𑀁 𑀬𑀦𑁆𑀢𑁂𑀦 𑀧𑀻𑀴𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀅𑀕𑁆𑀕𑁂 𑀯𑀸 𑀫𑀽𑀮𑁂 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀉𑀓𑁆𑀔𑀺𑀢𑁆𑀢𑀓𑀸𑀮𑁂 𑀥𑀫𑁆𑀫𑀓𑀭𑀡𑀢𑁄 𑀉𑀤𑀓𑀁 𑀯𑀺𑀬 𑀲𑀬𑀫𑁂𑀯 𑀭𑀲𑁄 𑀦𑀺𑀓𑁆𑀔𑀫𑀢𑀺. 𑀢𑀲𑁆𑀲 𑀧𑀦 𑀔𑁂𑀢𑁆𑀢𑀢𑁄 𑀉𑀘𑁆𑀙𑀼𑀬𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀆𑀕𑀫𑀦𑀓𑀸𑀮𑁂 𑀕𑀦𑁆𑀥𑀫𑀸𑀤𑀦𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 ‘‘𑀓𑀲𑁆𑀲 𑀦𑀼 𑀔𑁄 𑀅𑀚𑁆𑀚 𑀅𑀦𑀼𑀕𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀢𑀁 𑀅𑀢𑁆𑀢𑀦𑁄 𑀜𑀸𑀡𑀚𑀸𑀮𑁂 𑀧𑀯𑀺𑀝𑁆𑀞𑀁 𑀤𑀺𑀲𑁆𑀯𑀸 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀲𑀫𑀢𑁆𑀣𑀪𑀸𑀯𑀜𑁆𑀘 𑀜𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀇𑀤𑁆𑀥𑀺𑀬𑀸 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀲𑁄 𑀢𑀁 𑀤𑀺𑀲𑁆𑀯𑀸𑀯 𑀧𑀲𑀦𑁆𑀦𑀘𑀺𑀢𑁆𑀢𑁄 𑀉𑀢𑁆𑀢𑀭𑀲𑀸𑀝𑀓𑀁 𑀉𑀘𑁆𑀘𑀢𑀭𑁂 𑀪𑀽𑀫𑀺𑀧𑀤𑁂𑀲𑁂 𑀅𑀢𑁆𑀣𑀭𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀥 𑀦𑀺𑀲𑀻𑀤𑀣𑀸’’𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 ‘‘𑀧𑀢𑁆𑀢𑀁 𑀉𑀧𑀦𑀸𑀫𑁂𑀣𑀸’’𑀢𑀺 𑀉𑀘𑁆𑀙𑀼𑀬𑀝𑁆𑀞𑀺𑀬𑀸 𑀩𑀦𑁆𑀥𑀦𑀝𑁆𑀞𑀸𑀦𑀁 𑀫𑁄𑀘𑁂𑀢𑁆𑀯𑀸 𑀧𑀢𑁆𑀢𑀲𑁆𑀲 𑀉𑀧𑀭𑀺 𑀅𑀓𑀸𑀲𑀺, 𑀭𑀲𑁄 𑀑𑀢𑀭𑀺𑀢𑁆𑀯𑀸 𑀧𑀢𑁆𑀢𑀁 𑀧𑀽𑀭𑁂𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀦 𑀢𑀲𑁆𑀫𑀺𑀁 𑀭𑀲𑁂 𑀧𑀻𑀢𑁂 ‘‘𑀲𑀸𑀥𑀼𑀓𑀁 𑀯𑀢 𑀫𑁂 𑀅𑀬𑁆𑀬𑁂𑀦 𑀭𑀲𑁄 𑀧𑀻𑀢𑁄. 𑀲𑀘𑁂 𑀫𑁂 𑀚𑁂𑀝𑁆𑀞𑀪𑀸𑀢𑀺𑀓𑁄 𑀫𑀽𑀮𑀁 𑀆𑀳𑀭𑀸𑀧𑁂𑀲𑁆𑀲𑀢𑀺, 𑀫𑀽𑀮𑀁 𑀤𑀲𑁆𑀲𑀸𑀫𑀺. 𑀲𑀘𑁂 𑀧𑀢𑁆𑀢𑀺𑀁 𑀆𑀳𑀭𑀸𑀧𑁂𑀲𑁆𑀲𑀢𑀺, 𑀧𑀢𑁆𑀢𑀺𑀁 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀧𑀢𑁆𑀢𑀁 𑀫𑁂 𑀉𑀧𑀦𑀸𑀫𑁂𑀣𑀸’’𑀢𑀺 𑀤𑀼𑀢𑀺𑀬𑀫𑁆𑀧𑀺 𑀉𑀘𑁆𑀙𑀼𑀬𑀝𑁆𑀞𑀺𑀁 𑀫𑁄𑀘𑁂𑀢𑁆𑀯𑀸 𑀭𑀲𑀁 𑀅𑀤𑀸𑀲𑀺. ‘‘𑀪𑀸𑀢𑀸 𑀫𑁂 𑀉𑀘𑁆𑀙𑀼𑀔𑁂𑀢𑁆𑀢𑀢𑁄 𑀅𑀜𑁆𑀜𑀁 𑀉𑀘𑁆𑀙𑀼𑀁 𑀆𑀳𑀭𑀺𑀢𑁆𑀯𑀸 𑀔𑀸𑀤𑀺𑀲𑁆𑀲𑀢𑀻’’𑀢𑀺 𑀏𑀢𑁆𑀢𑀓𑀫𑁆𑀧𑀺 𑀓𑀺𑀭𑀲𑁆𑀲 𑀯𑀜𑁆𑀘𑀦𑀘𑀺𑀢𑁆𑀢𑀁 𑀦𑀸𑀳𑁄𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀧𑀦 𑀧𑀞𑀫𑀁 𑀉𑀘𑁆𑀙𑀼𑀭𑀲𑀲𑁆𑀲 𑀧𑀻𑀢𑀢𑁆𑀢𑀸 𑀢𑀁 𑀉𑀘𑁆𑀙𑀼𑀭𑀲𑀁 𑀅𑀜𑁆𑀜𑁂𑀳𑀺𑀧𑀺 𑀲𑀤𑁆𑀥𑀺𑀁 𑀲𑀁𑀯𑀺𑀪𑀚𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀕𑀳𑁂𑀢𑁆𑀯𑀸𑀯 𑀦𑀺𑀲𑀻𑀤𑀺. 𑀲𑁄 𑀢𑀲𑁆𑀲 𑀆𑀓𑀸𑀭𑀁 𑀜𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀬𑁄 𑀅𑀬𑀁 𑀫𑀬𑀸 𑀤𑀺𑀦𑁆𑀦𑁄 𑀅𑀕𑁆𑀕𑀭𑀲𑁄, 𑀇𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀢𑀼𑀫𑁆𑀳𑁂𑀳𑀺 𑀧𑀢𑁆𑀢𑀥𑀫𑁆𑀫𑀫𑁂𑀯 𑀧𑀸𑀧𑀼𑀡𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄𑀧𑀺𑀲𑁆𑀲 ‘‘𑀏𑀯𑀁 𑀳𑁄𑀢𑀽’’𑀢𑀺 𑀯𑀢𑁆𑀯𑀸 ‘‘𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳’’𑀦𑁆𑀢𑀺 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀬𑀣𑀸 𑀲𑁄 𑀧𑀲𑁆𑀲𑀢𑀺, 𑀏𑀯𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀆𑀓𑀸𑀲𑁂𑀦 𑀕𑀦𑁆𑀥𑀫𑀸𑀤𑀦𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀢𑀸𑀦𑀁 𑀢𑀁 𑀭𑀲𑀁 𑀅𑀤𑀸𑀲𑀺.

𑀲𑁄 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀪𑀸𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀳𑀁 𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀉𑀘𑁆𑀙𑀼𑀔𑁂𑀢𑁆𑀢𑀁 𑀑𑀮𑁄𑀓𑁂𑀢𑀼𑀁 𑀕𑀢𑁄𑀫𑁆𑀳𑀻’’𑀢𑀺. ‘‘𑀓𑀺𑀁 𑀢𑀸𑀤𑀺𑀲𑁂𑀦 𑀉𑀘𑁆𑀙𑀼𑀔𑁂𑀢𑁆𑀢𑀁 𑀕𑀢𑁂𑀦, 𑀦𑀦𑀼 𑀦𑀸𑀫 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀉𑀘𑁆𑀙𑀼𑀬𑀝𑁆𑀞𑀺𑀬𑁄 𑀆𑀤𑀸𑀬 𑀆𑀕𑀦𑁆𑀢𑀩𑁆𑀩𑀁 𑀪𑀯𑁂𑀬𑁆𑀬𑀸’’𑀢𑀺 𑀪𑀸𑀢𑀭𑀸 𑀯𑀼𑀢𑁆𑀢𑁄 𑁋 ‘‘𑀆𑀫, 𑀪𑀸𑀢𑀺𑀓, 𑀤𑁆𑀯𑁂 𑀫𑁂 𑀉𑀘𑁆𑀙𑀼𑀬𑀝𑁆𑀞𑀺𑀬𑁄 𑀕𑀳𑀺𑀢𑀸, 𑀏𑀓𑀁 𑀧𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀫𑀫 𑀉𑀘𑁆𑀙𑀼𑀬𑀝𑁆𑀞𑀺𑀢𑁄 𑀭𑀲𑀁 𑀤𑀢𑁆𑀯𑀸 ‘𑀫𑀽𑀮𑀁 𑀯𑀸 𑀧𑀢𑁆𑀢𑀺𑀁 𑀯𑀸 𑀤𑀲𑁆𑀲𑀸𑀫𑀻’𑀢𑀺 𑀢𑀼𑀫𑁆𑀳𑀸𑀓𑀫𑁆𑀧𑀺 𑀫𑁂 𑀉𑀘𑁆𑀙𑀼𑀬𑀝𑁆𑀞𑀺𑀢𑁄 𑀭𑀲𑁄 𑀤𑀺𑀦𑁆𑀦𑁄, 𑀓𑀺𑀁 𑀦𑀼 𑀔𑁄 𑀢𑀲𑁆𑀲 𑀫𑀽𑀮𑀁 𑀕𑀡𑁆𑀳𑀺𑀲𑁆𑀲𑀣, 𑀉𑀤𑀸𑀳𑀼 𑀧𑀢𑁆𑀢𑀺’’𑀦𑁆𑀢𑀺 𑀆𑀳. ‘‘𑀓𑀺𑀁 𑀧𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀦 𑀓𑀢’’𑀦𑁆𑀢𑀺? ‘‘𑀫𑀫 𑀉𑀘𑁆𑀙𑀼𑀬𑀝𑁆𑀞𑀺𑀢𑁄 𑀭𑀲𑀁 𑀧𑀺𑀯𑀺𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀉𑀘𑁆𑀙𑀼𑀬𑀝𑁆𑀞𑀺𑀢𑁄 𑀭𑀲𑀁 𑀆𑀤𑀸𑀬 𑀆𑀓𑀸𑀲𑁂𑀦 𑀕𑀦𑁆𑀥𑀫𑀸𑀤𑀦𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘𑀲𑀢𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀅𑀤𑀸𑀲𑀻’’𑀢𑀺. 𑀲𑁄 𑀢𑀲𑁆𑀫𑀺𑀁 𑀓𑀣𑁂𑀦𑁆𑀢𑁂𑀬𑁂𑀯 𑀦𑀺𑀭𑀦𑁆𑀢𑀭𑀁 𑀧𑀻𑀢𑀺𑀬𑀸 𑀨𑀼𑀝𑁆𑀞𑀲𑀭𑀻𑀭𑁄 𑀳𑀼𑀢𑁆𑀯𑀸 ‘‘𑀢𑁂𑀦 𑀫𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀦 𑀤𑀺𑀝𑁆𑀞𑀥𑀫𑁆𑀫𑀲𑁆𑀲𑁂𑀯 𑀅𑀥𑀺𑀕𑀫𑁄 𑀪𑀯𑁂𑀬𑁆𑀬𑀸’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀏𑀯𑀁 𑀓𑀦𑀺𑀝𑁆𑀞𑁂𑀦 𑀢𑀺𑀲𑁆𑀲𑁄 𑀲𑀫𑁆𑀧𑀢𑁆𑀢𑀺𑀬𑁄 𑀧𑀢𑁆𑀣𑀺𑀢𑀸, 𑀚𑁂𑀝𑁆𑀞𑁂𑀦 𑀧𑀦 𑀏𑀓𑀧𑀤𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀣𑀺𑀢𑀦𑁆𑀢𑀺 𑀇𑀤𑀁 𑀢𑁂𑀲𑀁 𑀧𑀼𑀩𑁆𑀩𑀓𑀫𑁆𑀫𑀁.

𑀢𑁂 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀔𑁂𑀧𑀬𑀺𑀁𑀲𑀼. 𑀢𑁂𑀲𑀁 𑀤𑁂𑀯𑀮𑁄𑀓𑁂 𑀞𑀺𑀢𑀓𑀸𑀮𑁂𑀬𑁂𑀯 𑀯𑀺𑀧𑀲𑁆𑀲𑀻 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺. 𑀢𑁂𑀧𑀺 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀩𑀦𑁆𑀥𑀼𑀫𑀢𑀺𑀬𑀸 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀚𑁂𑀝𑁆𑀞𑁄 𑀚𑁂𑀝𑁆𑀞𑁄𑀯, 𑀓𑀦𑀺𑀝𑁆𑀞𑁄 𑀓𑀦𑀺𑀝𑁆𑀞𑁄𑀯 𑀳𑀼𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀁𑀲𑀼. 𑀢𑁂𑀲𑀼 𑀚𑁂𑀝𑁆𑀞𑀲𑁆𑀲 𑀲𑁂𑀦𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼, 𑀓𑀦𑀺𑀝𑁆𑀞𑀲𑁆𑀲 𑀅𑀧𑀭𑀸𑀚𑀺𑀢𑁄𑀢𑀺. 𑀢𑁂𑀲𑀼 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀸𑀧𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑁂𑀲𑀼 ‘‘𑀩𑀼𑀤𑁆𑀥𑀭𑀢𑀦𑀁 𑀮𑁄𑀓𑁂 𑀉𑀧𑁆𑀧𑀦𑁆𑀦𑀁, 𑀥𑀫𑁆𑀫𑀭𑀢𑀦𑀁, 𑀲𑀗𑁆𑀖𑀭𑀢𑀦𑀁, 𑀤𑀸𑀦𑀸𑀦𑀺 𑀤𑁂𑀣, 𑀧𑀼𑀜𑁆𑀜𑀸𑀦𑀺 𑀓𑀭𑁄𑀣, 𑀅𑀚𑁆𑀚 𑀅𑀝𑁆𑀞𑀫𑀻, 𑀅𑀚𑁆𑀚 𑀘𑀸𑀢𑀼𑀤𑁆𑀤𑀲𑀻, 𑀅𑀚𑁆𑀚 𑀧𑀦𑁆𑀦𑀭𑀲𑀻, 𑀉𑀧𑁄𑀲𑀣𑀁 𑀓𑀭𑁄𑀣, 𑀥𑀫𑁆𑀫𑀁 𑀲𑀼𑀡𑀸𑀣𑀸’’𑀢𑀺 𑀥𑀫𑁆𑀫𑀖𑁄𑀲𑀓𑀲𑁆𑀲 𑀩𑀦𑁆𑀥𑀼𑀫𑀢𑀻𑀦𑀕𑀭𑁂 𑀖𑁄𑀲𑀦𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑀁 𑀧𑀼𑀭𑁂𑀪𑀢𑁆𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀥𑀫𑁆𑀫𑀲𑁆𑀲𑀯𑀦𑀸𑀬 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀲𑁂𑀦𑀓𑀼𑀝𑀼𑀫𑁆𑀩𑀺𑀓𑁄 ‘‘𑀓𑀳𑀁 𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀥𑀫𑁆𑀫𑀲𑁆𑀲𑀯𑀦𑀸𑀬𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀫𑁆𑀧𑀺 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀕𑀦𑁆𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀲𑀻𑀤𑀺.

𑀲𑀢𑁆𑀣𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺. 𑀲𑁄 𑀲𑀢𑁆𑀣𑀼 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀉𑀲𑁆𑀲𑀸𑀳𑀚𑀸𑀢𑁄 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀅𑀢𑁆𑀣𑀺 𑀧𑀦 𑀢𑁂 𑀅𑀧𑀮𑁄𑀓𑁂𑀢𑀩𑁆𑀩𑀸 𑀜𑀸𑀢𑀓𑀸’’𑀢𑀺 𑀧𑀼𑀘𑁆𑀙𑀺. 𑀅𑀢𑁆𑀣𑀺, 𑀪𑀦𑁆𑀢𑁂𑀢𑀺. 𑀢𑁂𑀦 𑀳𑀺 𑀅𑀧𑀮𑁄𑀓𑁂𑀢𑁆𑀯𑀸 𑀏𑀳𑀻𑀢𑀺. 𑀲𑁄 𑀓𑀦𑀺𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀬𑀁 𑀇𑀫𑀲𑁆𑀫𑀺𑀁 𑀓𑀼𑀮𑁂 𑀲𑀸𑀧𑀢𑁂𑀬𑁆𑀬𑀁, 𑀢𑀁 𑀲𑀩𑁆𑀩𑀁 𑀢𑀯 𑀳𑁄𑀢𑀽’’𑀢𑀺 𑀆𑀳. 𑀢𑀼𑀫𑁆𑀳𑁂 𑀧𑀦, 𑀲𑀸𑀫𑀻𑀢𑀺. 𑀅𑀳𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺. 𑀲𑀸𑀫𑀺 𑀓𑀺𑀁 𑀯𑀤𑁂𑀣, 𑀅𑀳𑀁 𑀫𑀸𑀢𑀭𑀺 𑀫𑀢𑀸𑀬 𑀫𑀸𑀢𑀭𑀁 𑀯𑀺𑀬, 𑀧𑀺𑀢𑀭𑀺 𑀫𑀢𑁂 𑀧𑀺𑀢𑀭𑀁 𑀯𑀺𑀬 𑀢𑀼𑀫𑁆𑀳𑁂 𑀅𑀮𑀢𑁆𑀣𑀁, 𑀇𑀤𑀁 𑀓𑀼𑀮𑀁 𑀫𑀳𑀸𑀪𑁄𑀕𑀁, 𑀕𑁂𑀳𑁂 𑀞𑀺𑀢𑁂𑀦𑁂𑀯 𑀲𑀓𑁆𑀓𑀸 𑀧𑀼𑀜𑁆𑀜𑀸𑀦𑀺 𑀓𑀸𑀢𑀼𑀁, 𑀫𑀸 𑀏𑀯𑀁 𑀓𑀭𑀺𑀢𑁆𑀣𑀸𑀢𑀺. 𑀫𑀬𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑁄 𑀲𑀼𑀢𑁄, 𑀦 𑀲𑀓𑁆𑀓𑀸 𑀢𑀁 𑀅𑀕𑀸𑀭𑀫𑀚𑁆𑀛𑁂 𑀞𑀺𑀢𑁂𑀦 𑀧𑀽𑀭𑁂𑀢𑀼𑀁, 𑀧𑀩𑁆𑀩𑀚𑀺𑀲𑁆𑀲𑀸𑀫𑁂𑀯𑀸𑀳𑀁, 𑀢𑁆𑀯𑀁 𑀦𑀺𑀯𑀢𑁆𑀢𑀸𑀳𑀻𑀢𑀺. 𑀏𑀯𑀁 𑀲𑁄 𑀓𑀦𑀺𑀝𑁆𑀞𑀁 𑀦𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀓𑀦𑀺𑀝𑁆𑀞𑁄𑀧𑀺 ‘‘𑀪𑀸𑀢𑀼 𑀧𑀩𑁆𑀩𑀚𑀺𑀢𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀪𑀸𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀅𑀢𑁆𑀢𑀦𑁄 𑀪𑀯𑀦𑀺𑀲𑁆𑀲𑀭𑀡𑀁 𑀓𑀢𑀁, 𑀅𑀳𑀁 𑀧𑀦 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀩𑀤𑁆𑀥𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀫𑀬𑁆𑀳𑀁 𑀕𑁂𑀳𑁂 𑀞𑀺𑀢𑀲𑁆𑀲𑁂𑀯 𑀅𑀦𑀼𑀘𑁆𑀙𑀯𑀺𑀓𑀁 𑀫𑀳𑀦𑁆𑀢𑀁 𑀧𑀼𑀜𑁆𑀜𑀓𑀫𑁆𑀫𑀁 𑀆𑀘𑀺𑀓𑁆𑀔𑀣𑀸’’𑀢𑀺. 𑀅𑀣 𑀦𑀁 𑀣𑁂𑀭𑁄 ‘‘𑀲𑀸𑀥𑀼 𑀲𑀸𑀥𑀼, 𑀧𑀡𑁆𑀟𑀺𑀢, 𑀲𑀢𑁆𑀣𑀼 𑀕𑀦𑁆𑀥𑀓𑀼𑀝𑀺𑀁 𑀓𑀭𑁄𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀦𑀸𑀦𑀸𑀤𑀸𑀭𑀽𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀣𑀫𑁆𑀪𑀸𑀤𑀻𑀦𑀁 𑀅𑀢𑁆𑀣𑀸𑀬 𑀢𑀘𑁆𑀙𑀸𑀧𑁂𑀢𑁆𑀯𑀸 𑀏𑀓𑀁 𑀲𑀼𑀯𑀡𑁆𑀡𑀔𑀘𑀺𑀢𑀁, 𑀏𑀓𑀁 𑀭𑀚𑀢𑀔𑀘𑀺𑀢𑀁, 𑀏𑀓𑀁 𑀫𑀡𑀺𑀔𑀘𑀺𑀢𑀦𑁆𑀢𑀺 𑀲𑀩𑁆𑀩𑀸𑀦𑀺 𑀲𑀢𑁆𑀢𑀭𑀢𑀦𑀔𑀘𑀺𑀢𑀸𑀦𑀺 𑀓𑀸𑀭𑁂𑀢𑁆𑀯𑀸 𑀢𑁂𑀳𑀺 𑀕𑀦𑁆𑀥𑀓𑀼𑀝𑀺𑀁 𑀓𑀸𑀭𑁂𑀢𑁆𑀯𑀸 𑀲𑀢𑁆𑀢𑀭𑀢𑀦𑀔𑀘𑀺𑀢𑀸𑀳𑁂𑀯 𑀙𑀤𑀦𑀺𑀝𑁆𑀞𑀓𑀸𑀳𑀺 𑀙𑀸𑀤𑀸𑀧𑁂𑀲𑀺. 𑀕𑀦𑁆𑀥𑀓𑀼𑀝𑀺𑀬𑀸 𑀓𑀭𑀡𑀓𑀸𑀮𑁂𑀬𑁂𑀯 𑀧𑀦 𑀢𑀁 𑀅𑀢𑁆𑀢𑀦𑀸 𑀲𑀫𑀸𑀦𑀦𑀸𑀫𑀓𑁄 𑀅𑀧𑀭𑀸𑀚𑀺𑀢𑁄𑀬𑁂𑀯 𑀦𑀸𑀫 𑀪𑀸𑀕𑀺𑀦𑁂𑀬𑁆𑀬𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀳𑀫𑁆𑀧𑀺 𑀓𑀭𑀺𑀲𑁆𑀲𑀸𑀫𑀺, 𑀫𑀬𑁆𑀳𑀫𑁆𑀧𑀺 𑀧𑀢𑁆𑀢𑀺𑀁 𑀤𑁂𑀣 𑀫𑀸𑀢𑀼𑀮𑀸’’𑀢𑀺 𑀆𑀳. 𑀦 𑀤𑁂𑀫𑀺, 𑀢𑀸𑀢, 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀲𑁄 𑀩𑀳𑀼𑀫𑁆𑀧𑀺 𑀬𑀸𑀘𑀺𑀢𑁆𑀯𑀸 𑀧𑀢𑁆𑀢𑀺𑀁 𑀅𑀮𑀪𑀫𑀸𑀦𑁄 ‘‘𑀕𑀦𑁆𑀥𑀓𑀼𑀝𑀺𑀬𑀸 𑀧𑀼𑀭𑀢𑁄 𑀓𑀼𑀜𑁆𑀚𑀭𑀲𑀸𑀮𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀢𑁆𑀢𑀭𑀢𑀦𑀫𑀬𑀁 𑀓𑀼𑀜𑁆𑀚𑀭𑀲𑀸𑀮𑀁 𑀓𑀸𑀭𑁂𑀲𑀺. 𑀲𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀫𑁂𑀡𑁆𑀟𑀓𑀲𑁂𑀝𑁆𑀞𑀺 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺.

𑀕𑀦𑁆𑀥𑀓𑀼𑀝𑀺𑀬𑀁 𑀧𑀦 𑀲𑀢𑁆𑀢𑀭𑀢𑀦𑀫𑀬𑀸𑀦𑀺 𑀢𑀻𑀡𑀺 𑀫𑀳𑀸𑀯𑀸𑀢𑀧𑀸𑀦𑀸𑀦𑀺 𑀅𑀳𑁂𑀲𑀼𑀁. 𑀢𑁂𑀲𑀁 𑀅𑀪𑀺𑀫𑀼𑀔𑁂 𑀳𑁂𑀝𑁆𑀞𑀸 𑀲𑀼𑀥𑀸𑀧𑀭𑀺𑀓𑀫𑁆𑀫𑀓𑀢𑀸 𑀢𑀺𑀲𑁆𑀲𑁄 𑀧𑁄𑀓𑁆𑀔𑀭𑀡𑀺𑀬𑁄 𑀓𑀸𑀭𑁂𑀢𑁆𑀯𑀸 𑀘𑀢𑀼𑀚𑁆𑀚𑀸𑀢𑀺𑀓𑀕𑀦𑁆𑀥𑁄𑀤𑀓𑀲𑁆𑀲 𑀧𑀽𑀭𑁂𑀢𑁆𑀯𑀸 𑀅𑀧𑀭𑀸𑀚𑀺𑀢𑁄, 𑀕𑀳𑀧𑀢𑀺, 𑀧𑀜𑁆𑀘𑀯𑀡𑁆𑀡𑀸𑀦𑀺 𑀓𑀼𑀲𑀼𑀫𑀸𑀦𑀺 𑀭𑁄𑀧𑀸𑀧𑁂𑀲𑀺 𑀢𑀣𑀸𑀕𑀢𑀲𑁆𑀲 𑀅𑀦𑁆𑀢𑁄 𑀦𑀺𑀲𑀺𑀦𑁆𑀦𑀓𑀸𑀮𑁂 𑀯𑀸𑀢𑀯𑁂𑀕𑁂𑀦 𑀲𑀫𑀼𑀝𑁆𑀞𑀺𑀢𑀸𑀳𑀺 𑀭𑁂𑀡𑀼𑀯𑀝𑁆𑀝𑀻𑀳𑀺 𑀲𑀭𑀻𑀭𑀲𑁆𑀲 𑀑𑀓𑀺𑀭𑀡𑀢𑁆𑀣𑀁. 𑀕𑀦𑁆𑀥𑀓𑀼𑀝𑀺𑀣𑀽𑀧𑀺𑀓𑀸𑀬 𑀓𑀧𑀮𑁆𑀮𑀁 𑀭𑀢𑁆𑀢𑀲𑀼𑀯𑀡𑁆𑀡𑀫𑀬𑀁 𑀅𑀳𑁄𑀲𑀺, 𑀧𑀯𑀸𑀴𑀫𑀬𑀸 𑀲𑀺𑀔𑀭𑀸, 𑀳𑁂𑀝𑁆𑀞𑀸 𑀫𑀡𑀺𑀫𑀬𑀸 𑀙𑀤𑀦𑀺𑀝𑁆𑀞𑀓𑀸. 𑀇𑀢𑀺 𑀲𑀸 𑀦𑀘𑁆𑀘𑀦𑁆𑀢𑁄 𑀯𑀺𑀬 𑀫𑁄𑀭𑁄 𑀲𑁄𑀪𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀲𑀢𑁆𑀢𑀲𑀼 𑀧𑀦 𑀭𑀢𑀦𑁂𑀲𑀼 𑀓𑁄𑀝𑁆𑀝𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑁄𑀝𑁆𑀝𑁂𑀢𑁆𑀯𑀸 𑀇𑀢𑀭𑀁 𑀲𑀓𑀮𑀫𑁂𑀯 𑀕𑀳𑁂𑀢𑁆𑀯𑀸 𑀚𑀡𑁆𑀡𑀼𑀫𑀢𑁆𑀢𑁂𑀦 𑀑𑀥𑀺𑀦𑀸 𑀕𑀦𑁆𑀥𑀓𑀼𑀝𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀯𑁂𑀡𑀁 𑀧𑀽𑀭𑁂𑀲𑀺.

𑀏𑀯𑀁 𑀕𑀦𑁆𑀥𑀓𑀼𑀝𑀺𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀧𑀭𑀸𑀚𑀺𑀢𑁄, 𑀕𑀳𑀧𑀢𑀺, 𑀪𑀸𑀢𑀺𑀓𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀸 𑀕𑀦𑁆𑀥𑀓𑀼𑀝𑀺, 𑀧𑀭𑀺𑀪𑁄𑀕𑀫𑀲𑁆𑀲𑀸 𑀧𑀘𑁆𑀘𑀸𑀲𑀻𑀲𑀸𑀫𑀺, 𑀧𑀭𑀺𑀪𑁄𑀕𑁂𑀦 𑀓𑀺𑀭 𑀫𑀳𑀦𑁆𑀢𑀁 𑀧𑀼𑀜𑁆𑀜𑀁 𑀳𑁄𑀢𑀻’’𑀢𑀺. 𑀲𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀺𑀦𑀸 𑀓𑀺𑀭 𑀯𑁄 𑀓𑀼𑀝𑀼𑀫𑁆𑀩𑀺𑀓𑁂𑀦 𑀕𑀦𑁆𑀥𑀓𑀼𑀝𑀺 𑀓𑀸𑀭𑀺𑀢𑀸, 𑀇𑀤𑀸𑀦𑀺 𑀧𑀦 𑀧𑀭𑀺𑀪𑁄𑀕𑀁 𑀧𑀘𑁆𑀘𑀸𑀲𑀻𑀲𑀢𑀻’’𑀢𑀺 𑀆𑀳. 𑀲𑀢𑁆𑀣𑀸 𑀉𑀝𑁆𑀞𑀸𑀬𑀸𑀲𑀦𑀸 𑀕𑀦𑁆𑀥𑀓𑀼𑀝𑀺𑀅𑀪𑀺𑀫𑀼𑀔𑀁 𑀕𑀦𑁆𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀓𑁆𑀔𑀺𑀢𑁆𑀢𑀭𑀢𑀦𑀭𑀸𑀲𑀺𑀁 𑀑𑀮𑁄𑀓𑁂𑀦𑁆𑀢𑁄 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀓𑀼𑀝𑀼𑀫𑁆𑀩𑀺𑀓𑁄 ‘‘𑀧𑀯𑀺𑀲𑀣, 𑀪𑀦𑁆𑀢𑁂’’𑀢𑀺 𑀆𑀳. 𑀲𑀢𑁆𑀣𑀸 𑀢𑀢𑁆𑀣𑁂𑀯 𑀞𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 𑀢𑀲𑁆𑀲 𑀪𑀸𑀢𑀺𑀓𑀢𑁆𑀣𑁂𑀭𑀁 𑀑𑀮𑁄𑀓𑁂𑀲𑀺. 𑀲𑁄 𑀑𑀮𑁄𑀓𑀺𑀢𑀸𑀓𑀸𑀭𑁂𑀦𑁂𑀯 𑀜𑀢𑁆𑀯𑀸 𑀓𑀦𑀺𑀝𑁆𑀞𑀪𑀸𑀢𑀭𑀁 𑀆𑀳 𑁋 ‘‘𑀏𑀳𑀺, 𑀢𑀸𑀢, ‘𑀫𑀫𑁂𑀯 𑀭𑀓𑁆𑀔𑀸 𑀪𑀯𑀺𑀲𑁆𑀲𑀢𑀺, 𑀢𑀼𑀫𑁆𑀳𑁂 𑀬𑀣𑀸𑀲𑀼𑀔𑀁 𑀯𑀲𑀣𑀸’𑀢𑀺 𑀲𑀢𑁆𑀣𑀸𑀭𑀁 𑀯𑀤𑁂𑀳𑀻’’𑀢𑀺. 𑀲𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀬𑀣𑀸 𑀫𑀦𑀼𑀲𑁆𑀲𑀸 𑀭𑀼𑀓𑁆𑀔𑀫𑀽𑀮𑁂 𑀧𑀯𑀺𑀲𑀺𑀢𑁆𑀯𑀸 𑀅𑀦𑀧𑁂𑀓𑁆𑀔𑀸 𑀧𑀓𑁆𑀓𑀫𑀦𑁆𑀢𑀺, 𑀬𑀣𑀸 𑀯𑀸 𑀦𑀤𑀺𑀁 𑀢𑀭𑀺𑀢𑁆𑀯𑀸 𑀉𑀴𑀼𑀫𑁆𑀧𑀁 𑀅𑀦𑀧𑁂𑀓𑁆𑀔𑀸 𑀧𑀭𑀺𑀘𑁆𑀘𑀚𑀦𑁆𑀢𑀺, 𑀏𑀯𑀁 𑀅𑀦𑀧𑁂𑀓𑁆𑀔𑀸 𑀳𑀼𑀢𑁆𑀯𑀸 𑀢𑀼𑀫𑁆𑀳𑁂 𑀯𑀲𑀣𑀸’’𑀢𑀺 𑀆𑀳. 𑀓𑀺𑀫𑀢𑁆𑀣𑀁 𑀧𑀦 𑀲𑀢𑁆𑀣𑀸 𑀅𑀝𑁆𑀞𑀸𑀲𑀺? 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑀁 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀧𑀘𑁆𑀙𑀸𑀪𑀢𑁆𑀢𑀫𑁆𑀧𑀺 𑀩𑀳𑀽 𑀆𑀕𑀘𑁆𑀙𑀦𑁆𑀢𑀺, 𑀢𑁂𑀲𑀼 𑀭𑀢𑀦𑀸𑀦𑀺 𑀆𑀤𑀸𑀬 𑀧𑀓𑁆𑀓𑀫𑀦𑁆𑀢𑁂𑀲𑀼 𑀦 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀯𑀸𑀭𑁂𑀢𑀼𑀁, 𑀧𑀭𑀺𑀯𑁂𑀡𑀫𑁆𑀳𑀺 𑀏𑀢𑁆𑀢𑀓𑁂 𑀭𑀢𑀦𑁂 𑀯𑁄𑀓𑀺𑀡𑁆𑀡𑁂 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑁂 𑀳𑀭𑀦𑁆𑀢𑁂𑀧𑀺 𑀦 𑀯𑀸𑀭𑁂𑀢𑀻𑀢𑀺 𑀓𑀼𑀝𑀼𑀫𑁆𑀩𑀺𑀓𑁄 𑀫𑀬𑀺 𑀆𑀖𑀸𑀢𑀁 𑀓𑀢𑁆𑀯𑀸 𑀅𑀧𑀸𑀬𑀽𑀧𑀕𑁄 𑀪𑀯𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀅𑀝𑁆𑀞𑀸𑀲𑀺. 𑀢𑁂𑀦 𑀧𑀦, ‘‘𑀪𑀦𑁆𑀢𑁂, 𑀫𑀫𑁂𑀯 𑀭𑀓𑁆𑀔𑀸 𑀪𑀯𑀺𑀲𑁆𑀲𑀢𑀺, 𑀢𑀼𑀫𑁆𑀳𑁂 𑀯𑀲𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀸𑀯𑀺𑀲𑀺.

𑀓𑀼𑀝𑀼𑀫𑁆𑀩𑀺𑀓𑁄 𑀲𑀫𑀦𑁆𑀢𑀸 𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑁂 𑀆𑀳 𑁋 ‘‘𑀢𑀸𑀢𑀸, 𑀉𑀘𑁆𑀙𑀗𑁆𑀕𑁂𑀦 𑀯𑀸 𑀧𑀘𑁆𑀙𑀺𑀧𑀲𑀺𑀩𑁆𑀩𑀓𑁂𑀳𑀺 𑀯𑀸 𑀆𑀤𑀸𑀬 𑀕𑀘𑁆𑀙𑀦𑁆𑀢𑁂 𑀯𑀸𑀭𑁂𑀬𑁆𑀬𑀸𑀣, 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂 𑀧𑀦 𑀫𑀸 𑀯𑀸𑀭𑀬𑀺𑀢𑁆𑀣𑀸’’𑀢𑀺. 𑀅𑀦𑁆𑀢𑁄𑀦𑀕𑀭𑁂𑀧𑀺 𑀆𑀭𑁄𑀘𑀸𑀧𑁂𑀲𑀺 ‘‘𑀫𑀬𑀸 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀲𑀢𑁆𑀢 𑀭𑀢𑀦𑀸𑀦𑀺 𑀑𑀓𑀺𑀡𑁆𑀡𑀸𑀦𑀺, 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑀸 𑀉𑀪𑁄 𑀳𑀢𑁆𑀣𑁂 𑀧𑀽𑀭𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀼, 𑀲𑀼𑀔𑀺𑀢𑀸𑀧𑀺 𑀏𑀓𑁂𑀦 𑀕𑀡𑁆𑀳𑀦𑁆𑀢𑀽’’𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 ‘‘𑀲𑀤𑁆𑀥𑀸 𑀢𑀸𑀯 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸 𑀕𑀫𑀺𑀲𑁆𑀲𑀦𑁆𑀢𑀺𑀬𑁂𑀯, 𑀅𑀲𑁆𑀲𑀤𑁆𑀥𑀸𑀧𑀺 𑀧𑀦 𑀥𑀦𑀮𑁄𑀪𑁂𑀦 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀲𑁆𑀫𑀸 𑀚𑀦𑀲𑀗𑁆𑀕𑀳𑀢𑁆𑀣𑀸𑀬 𑀏𑀯𑀁 𑀆𑀭𑁄𑀘𑀸𑀧𑁂𑀲𑀺. 𑀫𑀳𑀸𑀚𑀦𑁄 𑀢𑁂𑀦 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀭𑀢𑀦𑀸𑀦𑀺 𑀕𑀡𑁆𑀳𑀺. 𑀲𑀓𑀺𑀁 𑀑𑀓𑀺𑀡𑁆𑀡𑀭𑀢𑀦𑁂𑀲𑀼 𑀔𑀻𑀡𑁂𑀲𑀼 𑀬𑀸𑀯𑀢𑀢𑀺𑀬𑀁 𑀚𑀡𑁆𑀡𑀼𑀫𑀢𑁆𑀢𑁂𑀦 𑀑𑀥𑀺𑀦𑀸 𑀑𑀓𑀺𑀭𑀸𑀧𑁂𑀲𑀺𑀬𑁂𑀯. 𑀲𑀢𑁆𑀣𑀼 𑀧𑀦 𑀧𑀸𑀤𑀫𑀽𑀮𑁂 𑀢𑀺𑀧𑀼𑀲𑀫𑀢𑁆𑀢𑀁 𑀅𑀦𑀕𑁆𑀖𑀁 𑀫𑀡𑀺𑀭𑀢𑀦𑀁 𑀞𑀧𑁂𑀲𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀲𑀢𑁆𑀣𑀼 𑀲𑀭𑀻𑀭𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀸𑀬 𑀧𑀪𑀸𑀬 𑀲𑀤𑁆𑀥𑀺𑀁 𑀫𑀡𑀺𑀧𑀪𑀁 𑀑𑀮𑁄𑀓𑁂𑀦𑁆𑀢𑀸𑀦𑀁 𑀢𑀺𑀢𑁆𑀢𑀺 𑀦𑀸𑀫 𑀦 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀫𑀸 𑀏𑀯𑀫𑀓𑀸𑀲𑀺. 𑀫𑀳𑀸𑀚𑀦𑁄𑀧𑀺 𑀅𑀢𑀺𑀢𑁆𑀢𑁄𑀯 𑀑𑀮𑁄𑀓𑁂𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀩𑁆𑀭𑀸𑀳𑁆𑀫𑀡𑁄 ‘‘𑀲𑀢𑁆𑀣𑀼 𑀓𑀺𑀭 𑀧𑀸𑀤𑀫𑀽𑀮𑁂 𑀫𑀳𑀕𑁆𑀖𑀁 𑀫𑀡𑀺𑀭𑀢𑀦𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀳𑀭𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑀼𑀁 𑀆𑀕𑀢𑀲𑁆𑀲 𑀫𑀳𑀸𑀚𑀦𑀲𑁆𑀲 𑀅𑀦𑁆𑀢𑀭𑁂𑀦 𑀧𑀸𑀯𑀺𑀲𑀺. 𑀓𑀼𑀝𑀼𑀫𑁆𑀩𑀺𑀓𑁄 𑀢𑀲𑁆𑀲 𑀧𑀯𑀺𑀲𑀦𑀸𑀓𑀸𑀭𑁂𑀦𑁂𑀯 ‘‘𑀫𑀡𑀺𑀁 𑀕𑀡𑁆𑀳𑀺𑀢𑀼𑀓𑀸𑀫𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀅𑀳𑁄 𑀯𑀢 𑀦 𑀕𑀡𑁆𑀳𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑁄𑀧𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤𑀦𑁆𑀢𑁄 𑀯𑀺𑀬 𑀧𑀸𑀤𑀫𑀽𑀮𑁂 𑀳𑀢𑁆𑀣𑀁 𑀉𑀧𑀦𑀸𑀫𑁂𑀢𑁆𑀯𑀸 𑀫𑀡𑀺𑀁 𑀕𑀳𑁂𑀢𑁆𑀯𑀸 𑀑𑀯𑀝𑁆𑀝𑀺𑀓𑀸𑀬 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀓𑀼𑀝𑀼𑀫𑁆𑀩𑀺𑀓𑁄 𑀢𑀲𑁆𑀫𑀺𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀥𑀫𑁆𑀫𑀓𑀣𑀸𑀯𑀲𑀸𑀦𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀫𑀬𑀸 𑀢𑀺𑀓𑁆𑀔𑀢𑁆𑀢𑀼𑀁 𑀕𑀦𑁆𑀥𑀓𑀼𑀝𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀚𑀡𑁆𑀡𑀼𑀫𑀢𑁆𑀢𑁂𑀦 𑀑𑀥𑀺𑀦𑀸 𑀲𑀢𑁆𑀢 𑀭𑀢𑀦𑀸𑀦𑀺 𑀑𑀓𑀺𑀡𑁆𑀡𑀸𑀦𑀺, 𑀢𑀸𑀦𑀺 𑀫𑁂 𑀕𑀡𑁆𑀳𑀦𑁆𑀢𑁂𑀲𑀼 𑀆𑀖𑀸𑀢𑁄 𑀦𑀸𑀫 𑀦𑀸𑀳𑁄𑀲𑀺, 𑀘𑀺𑀢𑁆𑀢𑀁 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀲𑀻𑀤𑀺𑀬𑁂𑀯. 𑀅𑀚𑁆𑀚 𑀧𑀦 ‘𑀅𑀳𑁄 𑀯𑀢𑀸𑀬𑀁 𑀩𑁆𑀭𑀸𑀳𑁆𑀫𑀡𑁄 𑀫𑀡𑀺𑀁 𑀦 𑀕𑀡𑁆𑀳𑁂𑀬𑁆𑀬𑀸’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀫𑀺𑀁 𑀫𑀡𑀺𑀁 𑀆𑀤𑀸𑀬 𑀕𑀢𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀼𑀁 𑀦𑀸𑀲𑀓𑁆𑀔𑀺’’𑀦𑁆𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀦𑀦𑀼, 𑀉𑀧𑀸𑀲𑀓, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀧𑀭𑁂𑀳𑀺 𑀅𑀦𑀸𑀳𑀭𑀡𑀻𑀬𑀁 𑀓𑀸𑀢𑀼𑀁 𑀲𑀓𑁆𑀓𑁄𑀲𑀻’’𑀢𑀺 𑀦𑀬𑀁 𑀅𑀤𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 𑀫𑀫 𑀲𑀦𑁆𑀢𑀓𑀁 𑀤𑀲𑀺𑀓𑀲𑀼𑀢𑁆𑀢𑀫𑀢𑁆𑀢𑀫𑁆𑀧𑀺 𑀫𑀁 𑀅𑀪𑀺𑀪𑀯𑀺𑀢𑁆𑀯𑀸 𑀅𑀦𑁂𑀓𑀲𑀢𑀸𑀧𑀺 𑀭𑀸𑀚𑀸𑀦𑁄 𑀯𑀸 𑀘𑁄𑀭𑀸 𑀯𑀸 𑀕𑀡𑁆𑀳𑀺𑀢𑀼𑀁 𑀲𑀫𑀢𑁆𑀣𑀸 𑀦𑀸𑀫 𑀫𑀸 𑀳𑁄𑀦𑁆𑀢𑀼, 𑀅𑀕𑁆𑀕𑀺𑀦𑀸𑀧𑀺 𑀫𑀫 𑀲𑀦𑁆𑀢𑀓𑀁 𑀫𑀸 𑀟𑀬𑁆𑀳𑀢𑀼, 𑀉𑀤𑀓𑁂𑀦𑀧𑀺 𑀫𑀸 𑀯𑀼𑀬𑁆𑀳𑀢𑀽’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸𑀧𑀺𑀲𑁆𑀲 ‘‘𑀏𑀯𑀁 𑀳𑁄𑀢𑀽’’𑀢𑀺 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀲𑁄 𑀕𑀦𑁆𑀥𑀓𑀼𑀝𑀺𑀫𑀳𑀁 𑀓𑀭𑁄𑀦𑁆𑀢𑁄 𑀅𑀝𑁆𑀞𑀲𑀝𑁆𑀞𑀺𑀬𑀸 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀁 𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀦𑀯 𑀫𑀸𑀲𑁂 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀤𑀸𑀦𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑁂𑀲𑀁 𑀢𑀺𑀘𑀻𑀯𑀭𑀁 𑀅𑀤𑀸𑀲𑀺. 𑀲𑀗𑁆𑀖𑀦𑀯𑀓𑀲𑁆𑀲 𑀘𑀻𑀯𑀭𑀲𑀸𑀝𑀓𑀸 𑀲𑀳𑀲𑁆𑀲𑀕𑁆𑀖𑀦𑀓𑀸 𑀅𑀳𑁂𑀲𑀼𑀁.

𑀲𑁄 𑀏𑀯𑀁 𑀬𑀸𑀯𑀢𑀸𑀬𑀼𑀓𑀁 𑀧𑀼𑀜𑁆𑀜𑀸𑀦𑀺 𑀓𑀭𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑁂 𑀏𑀓𑀲𑁆𑀫𑀺𑀁 𑀲𑁂𑀝𑁆𑀞𑀺𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀅𑀟𑁆𑀠𑀫𑀸𑀲𑀸𑀥𑀺𑀓𑁂 𑀦𑀯 𑀫𑀸𑀲𑁂 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀯𑀲𑀺. 𑀚𑀸𑀢𑀤𑀺𑀯𑀲𑁂 𑀧𑀦𑀲𑁆𑀲 𑀲𑀓𑀮𑀦𑀕𑀭𑁂 𑀲𑀩𑁆𑀩𑀸𑀯𑀼𑀥𑀸𑀦𑀺 𑀧𑀚𑁆𑀚𑀮𑀺𑀁𑀲𑀼, 𑀲𑀩𑁆𑀩𑁂𑀲𑀁 𑀓𑀸𑀬𑀭𑀽𑀴𑁆𑀳𑀸𑀦𑀺 𑀆𑀪𑀭𑀡𑀸𑀦𑀺𑀧𑀺 𑀧𑀚𑁆𑀚𑀮𑀺𑀢𑀸𑀦𑀺 𑀯𑀺𑀬 𑀑𑀪𑀸𑀲𑀁 𑀫𑀼𑀜𑁆𑀘𑀺𑀁𑀲𑀼, 𑀦𑀕𑀭𑀁 𑀏𑀓𑀧𑀚𑁆𑀚𑁄𑀢𑀁 𑀅𑀳𑁄𑀲𑀺. 𑀲𑁂𑀝𑁆𑀞𑀺𑀧𑀺 𑀧𑀸𑀢𑁄𑀯 𑀭𑀸𑀚𑀽𑀧𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀭𑀸𑀚𑀸 𑀧𑀼𑀘𑁆𑀙𑀺 𑁋 ‘‘𑀅𑀚𑁆𑀚 𑀲𑀩𑁆𑀩𑀸𑀯𑀼𑀥𑀸𑀦𑀺 𑀧𑀚𑁆𑀚𑀮𑀺𑀁𑀲𑀼, 𑀦𑀕𑀭𑀁 𑀏𑀓𑀧𑀚𑁆𑀚𑁄𑀢𑀁 𑀚𑀸𑀢𑀁, 𑀚𑀸𑀦𑀸𑀲𑀺 𑀦𑀼 𑀔𑁄 𑀏𑀢𑁆𑀣 𑀓𑀸𑀭𑀡’’𑀦𑁆𑀢𑀺? ‘‘𑀚𑀸𑀦𑀸𑀫𑀺, 𑀤𑁂𑀯𑀸’’𑀢𑀺. ‘‘𑀓𑀺𑀁, 𑀲𑁂𑀝𑁆𑀞𑀻’’𑀢𑀺? ‘‘𑀫𑀫 𑀕𑁂𑀳𑁂 𑀢𑀼𑀫𑁆𑀳𑀸𑀓𑀁 𑀤𑀸𑀲𑁄 𑀚𑀸𑀢𑁄, 𑀢𑀲𑁆𑀲 𑀧𑀼𑀜𑁆𑀜𑀢𑁂𑀚𑁂𑀦𑁂𑀯𑀁 𑀅𑀳𑁄𑀲𑀻’’𑀢𑀺. ‘‘𑀓𑀺𑀁 𑀦𑀼 𑀔𑁄 𑀘𑁄𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺? ‘‘𑀦𑀢𑁆𑀣𑁂𑀢𑀁, 𑀤𑁂𑀯, 𑀧𑀼𑀜𑁆𑀜𑀯𑀸 𑀲𑀢𑁆𑀢𑁄 𑀓𑀢𑀸𑀪𑀺𑀦𑀻𑀳𑀸𑀭𑁄’’𑀢𑀺. ‘‘𑀢𑁂𑀦 𑀳𑀺 𑀦𑀁 𑀲𑀫𑁆𑀫𑀸 𑀧𑁄𑀲𑁂𑀢𑀼𑀁 𑀯𑀝𑁆𑀝𑀢𑀺, 𑀇𑀤𑀫𑀲𑁆𑀲 𑀔𑀻𑀭𑀫𑀽𑀮𑀁 𑀳𑁄𑀢𑀽’’𑀢𑀺 𑀤𑁂𑀯𑀲𑀺𑀓𑀁 𑀲𑀳𑀲𑁆𑀲𑀁 𑀧𑀝𑁆𑀞𑀧𑁂𑀲𑀺. 𑀅𑀣𑀲𑁆𑀲 𑀦𑀸𑀫𑀕𑀳𑀡𑀤𑀺𑀯𑀲𑁂 𑀲𑀓𑀮𑀦𑀕𑀭𑀲𑁆𑀲 𑀏𑀓𑀧𑀚𑁆𑀚𑁄𑀢𑀪𑀽𑀢𑀢𑁆𑀢𑀸 𑀚𑁄𑀢𑀺𑀓𑁄𑀢𑁆𑀯𑁂𑀯 𑀦𑀸𑀫𑀁 𑀓𑀭𑀺𑀁𑀲𑀼.

𑀅𑀣𑀲𑁆𑀲 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀕𑁂𑀳𑀓𑀭𑀡𑀢𑁆𑀣𑀸𑀬 𑀪𑀽𑀫𑀺𑀢𑀮𑁂 𑀲𑁄𑀥𑀺𑀬𑀫𑀸𑀦𑁂 𑀲𑀓𑁆𑀓𑀲𑁆𑀲 𑀪𑀯𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 ‘‘𑀓𑀺𑀁 𑀦𑀼 𑀔𑁄 𑀇𑀤’’𑀦𑁆𑀢𑀺 𑀉𑀧𑀥𑀸𑀭𑀬𑀫𑀸𑀦𑁄 ‘‘𑀚𑁄𑀢𑀺𑀓𑀲𑁆𑀲 𑀕𑁂𑀳𑀝𑁆𑀞𑀸𑀦𑀁 𑀕𑀡𑁆𑀳𑀦𑁆𑀢𑀻’’𑀢𑀺 𑀜𑀢𑁆𑀯𑀸 ‘‘𑀦𑀸𑀬𑀁 𑀏𑀢𑁂𑀳𑀺 𑀓𑀢𑀕𑁂𑀳𑁂 𑀯𑀲𑀺𑀲𑁆𑀲𑀢𑀺, 𑀫𑀬𑀸𑀧𑁂𑀢𑁆𑀣 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀟𑁆𑀠𑀓𑀻𑀯𑁂𑀲𑁂𑀦 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀣𑀸’’𑀢𑀺 𑀆𑀳. ‘‘𑀚𑁄𑀢𑀺𑀓𑀲𑁆𑀲 𑀕𑁂𑀳𑀝𑁆𑀞𑀸𑀦𑀁 𑀕𑀡𑁆𑀳𑀸𑀫𑀸’’𑀢𑀺. ‘‘𑀅𑀧𑁂𑀣, 𑀦𑀸𑀬𑀁 𑀢𑀼𑀫𑁆𑀳𑁂𑀳𑀺 𑀓𑀢𑀕𑁂𑀳𑁂 𑀯𑀲𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀲𑁄𑀴𑀲𑀓𑀭𑀻𑀲𑀫𑀢𑁆𑀢𑀁 𑀪𑀽𑀫𑀺𑀧𑀤𑁂𑀲𑀁 𑀑𑀮𑁄𑀓𑁂𑀲𑀺, 𑀲𑁄 𑀢𑀸𑀯𑀤𑁂𑀯 𑀓𑀲𑀺𑀡𑀫𑀡𑁆𑀟𑀮𑀁 𑀯𑀺𑀬 𑀲𑀫𑁄 𑀅𑀳𑁄𑀲𑀺. 𑀧𑀼𑀦 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀢𑁆𑀢𑀭𑀢𑀦𑀫𑀬𑁄 𑀲𑀢𑁆𑀢𑀪𑀽𑀫𑀺𑀓𑀧𑀸𑀲𑀸𑀤𑁄 𑀉𑀝𑁆𑀞𑀳𑀢𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀑𑀮𑁄𑀓𑁂𑀲𑀺, 𑀢𑀸𑀯𑀤𑁂𑀯 𑀢𑀣𑀸𑀭𑀽𑀧𑁄 𑀧𑀸𑀲𑀸𑀤𑁄 𑀉𑀝𑁆𑀞𑀳𑀺. 𑀧𑀼𑀦 ‘‘𑀇𑀫𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀢𑁆𑀢𑀭𑀢𑀦𑀫𑀬𑀸 𑀲𑀢𑁆𑀢 𑀧𑀸𑀓𑀸𑀭𑀸 𑀉𑀝𑁆𑀞𑀳𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀑𑀮𑁄𑀓𑁂𑀲𑀺, 𑀢𑀣𑀸𑀭𑀽𑀧𑀸 𑀧𑀸𑀓𑀸𑀭𑀸 𑀉𑀝𑁆𑀞𑀳𑀺𑀁𑀲𑀼. 𑀅𑀣 ‘‘𑀦𑁂𑀲𑀁 𑀧𑀭𑀺𑀬𑀦𑁆𑀢𑁂 𑀓𑀧𑁆𑀧𑀭𑀼𑀓𑁆𑀔𑀸 𑀉𑀝𑁆𑀞𑀳𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀑𑀮𑁄𑀓𑁂𑀲𑀺, 𑀢𑀣𑀸𑀭𑀽𑀧𑀸 𑀓𑀧𑁆𑀧𑀭𑀼𑀓𑁆𑀔𑀸 𑀉𑀝𑁆𑀞𑀳𑀺𑀁𑀲𑀼. ‘‘𑀧𑀸𑀲𑀸𑀤𑀲𑁆𑀲 𑀘𑀢𑀽𑀲𑀼 𑀓𑀡𑁆𑀡𑁂𑀲𑀼 𑀘𑀢𑀲𑁆𑀲𑁄 𑀦𑀺𑀥𑀺𑀓𑀼𑀫𑁆𑀪𑀺𑀬𑁄 𑀉𑀝𑁆𑀞𑀳𑀦𑁆𑀢𑀽’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀑𑀮𑁄𑀓𑁂𑀲𑀺, 𑀲𑀩𑁆𑀩𑀁 𑀢𑀣𑁂𑀯 𑀅𑀳𑁄𑀲𑀺. 𑀦𑀺𑀥𑀺𑀓𑀼𑀫𑁆𑀪𑀻𑀲𑀼 𑀧𑀦 𑀏𑀓𑀸 𑀬𑁄𑀚𑀦𑀺𑀓𑀸 𑀅𑀳𑁄𑀲𑀺, 𑀏𑀓𑀸 𑀢𑀺𑀕𑀸𑀯𑀼𑀢𑀺𑀓𑀸, 𑀏𑀓𑀸 𑀅𑀟𑁆𑀠𑀬𑁄𑀚𑀦𑀺𑀓𑀸, 𑀏𑀓𑀸 𑀕𑀸𑀯𑀼𑀢𑀧𑁆𑀧𑀫𑀸𑀡𑀸. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀺𑀥𑀺𑀓𑀼𑀫𑁆𑀪𑀻𑀦𑀁 𑀧𑀦 𑀏𑀓𑀫𑀼𑀔𑀧𑁆𑀧𑀫𑀸𑀡𑀁 𑀅𑀳𑁄𑀲𑀺, 𑀳𑁂𑀝𑁆𑀞𑀸 𑀧𑀣𑀯𑀻𑀧𑀭𑀺𑀬𑀦𑁆𑀢𑀸𑀯 𑀅𑀳𑁂𑀲𑀼𑀁. 𑀚𑁄𑀢𑀺𑀓𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀺𑀥𑀺𑀓𑀼𑀫𑁆𑀪𑀻𑀦𑀁 𑀫𑀼𑀔𑀧𑀭𑀺𑀫𑀸𑀡𑀁 𑀦 𑀓𑀣𑀺𑀢𑀁, 𑀲𑀩𑁆𑀩𑀸 𑀫𑀼𑀔𑀙𑀺𑀦𑁆𑀦𑀢𑀸𑀮𑀨𑀮𑀁 𑀯𑀺𑀬 𑀧𑀭𑀺𑀧𑀼𑀡𑁆𑀡𑀸𑀯 𑀉𑀝𑁆𑀞𑀳𑀺𑀁𑀲𑀼. 𑀧𑀸𑀲𑀸𑀤𑀲𑁆𑀲 𑀘𑀢𑀽𑀲𑀼 𑀓𑀡𑁆𑀡𑁂𑀲𑀼 𑀢𑀭𑀼𑀡𑀢𑀸𑀮𑀓𑁆𑀔𑀦𑁆𑀥𑀧𑁆𑀧𑀫𑀸𑀡𑀸 𑀘𑀢𑀲𑁆𑀲𑁄 𑀲𑀼𑀯𑀡𑁆𑀡𑀫𑀬𑀸 𑀉𑀘𑁆𑀙𑀼𑀬𑀝𑁆𑀞𑀺𑀬𑁄 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀸𑀲𑀁 𑀫𑀡𑀺𑀫𑀬𑀸𑀦𑀺 𑀧𑀢𑁆𑀢𑀸𑀦𑀺, 𑀲𑁄𑀯𑀡𑁆𑀡𑀫𑀬𑀸𑀦𑀺 𑀔𑀦𑁆𑀥𑀸𑀦𑀺 𑀅𑀳𑁂𑀲𑀼𑀁. 𑀧𑀼𑀩𑁆𑀩𑀓𑀫𑁆𑀫𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀓𑀺𑀭𑁂𑀢𑀸𑀦𑀺, 𑀦𑀺𑀩𑁆𑀩𑀢𑁆𑀢𑀺𑀁𑀲𑀼.

𑀲𑀢𑁆𑀢𑀲𑀼 𑀤𑁆𑀯𑀸𑀭𑀓𑁄𑀝𑁆𑀞𑀓𑁂𑀲𑀼 𑀲𑀢𑁆𑀢 𑀬𑀓𑁆𑀔𑀸 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼. 𑀧𑀞𑀫𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀬𑀫𑀓𑁄𑀴𑀻 𑀦𑀸𑀫 𑀬𑀓𑁆𑀔𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀦 𑀬𑀓𑁆𑀔𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀆𑀭𑀓𑁆𑀔𑀁 𑀕𑀡𑁆𑀳𑀺, 𑀤𑀼𑀢𑀺𑀬𑁂 𑀉𑀧𑁆𑀧𑀮𑁄 𑀦𑀸𑀫 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑀬𑀓𑁆𑀔𑀸𑀦𑀁 𑀤𑁆𑀯𑀻𑀳𑀺 𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁, 𑀢𑀢𑀺𑀬𑁂 𑀯𑀚𑀺𑀭𑁄 𑀦𑀸𑀫 𑀢𑀻𑀳𑀺 𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁, 𑀘𑀢𑀼𑀢𑁆𑀣𑁂 𑀯𑀚𑀺𑀭𑀩𑀸𑀳𑀼 𑀦𑀸𑀫 𑀘𑀢𑀽𑀳𑀺 𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁, 𑀧𑀜𑁆𑀘𑀫𑁂 𑀓𑀲𑀓𑀦𑁆𑀤𑁄 𑀦𑀸𑀫 𑀧𑀜𑁆𑀘𑀳𑀺 𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁, 𑀙𑀝𑁆𑀞𑁂 𑀓𑀝𑀢𑁆𑀣𑁄 𑀦𑀸𑀫 𑀙𑀳𑀺 𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁, 𑀲𑀢𑁆𑀢𑀫𑁂 𑀤𑀺𑀲𑀸𑀫𑀼𑀔𑁄 𑀦𑀸𑀫 𑀲𑀢𑁆𑀢𑀳𑀺 𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀆𑀭𑀓𑁆𑀔𑀁 𑀕𑀡𑁆𑀳𑀺. 𑀏𑀯𑀁 𑀧𑀸𑀲𑀸𑀤𑀲𑁆𑀲 𑀅𑀦𑁆𑀢𑁄 𑀘 𑀩𑀳𑀺 𑀘 𑀕𑀸𑀴𑁆𑀳𑀭𑀓𑁆𑀔𑀸 𑀅𑀳𑁄𑀲𑀺. ‘‘𑀚𑁄𑀢𑀺𑀓𑀲𑁆𑀲 𑀓𑀺𑀭 𑀲𑀢𑁆𑀢𑀭𑀢𑀦𑀫𑀬𑁄 𑀲𑀢𑁆𑀢𑀪𑀽𑀫𑀺𑀓𑀧𑀸𑀲𑀸𑀤𑁄 𑀉𑀝𑁆𑀞𑀺𑀢𑁄, 𑀲𑀢𑁆𑀢 𑀧𑀸𑀓𑀸𑀭𑀸 𑀲𑀢𑁆𑀢𑀤𑁆𑀯𑀸𑀭𑀓𑁄𑀝𑁆𑀞𑀓𑀸 𑀘𑀢𑀲𑁆𑀲𑁄 𑀦𑀺𑀥𑀺𑀓𑀼𑀫𑁆𑀪𑀺𑀬𑁄 𑀉𑀝𑁆𑀞𑀺𑀢𑀸’’𑀢𑀺 𑀲𑀼𑀢𑁆𑀯𑀸 𑀩𑀺𑀫𑁆𑀩𑀺𑀲𑀸𑀭𑁄 𑀭𑀸𑀚𑀸 𑀲𑁂𑀝𑁆𑀞𑀺𑀘𑁆𑀙𑀢𑁆𑀢𑀁 𑀧𑀳𑀺𑀡𑀺. 𑀲𑁄 𑀚𑁄𑀢𑀺𑀓𑀲𑁂𑀝𑁆𑀞𑀺 𑀦𑀸𑀫 𑀅𑀳𑁄𑀲𑀺.

𑀢𑁂𑀦 𑀧𑀦 𑀲𑀤𑁆𑀥𑀺𑀁 𑀓𑀢𑀧𑀼𑀜𑁆𑀜𑀓𑀫𑁆𑀫𑀸 𑀇𑀢𑁆𑀣𑀻 𑀉𑀢𑁆𑀢𑀭𑀓𑀼𑀭𑀽𑀲𑀼 𑀦𑀺𑀩𑁆𑀩𑀢𑁆𑀢𑀺. 𑀅𑀣 𑀦𑀁 𑀤𑁂𑀯𑀢𑀸 𑀢𑀢𑁄 𑀆𑀦𑁂𑀢𑁆𑀯𑀸 𑀲𑀺𑀭𑀺𑀕𑀩𑁆𑀪𑁂 𑀦𑀺𑀲𑀻𑀤𑀸𑀧𑁂𑀲𑀼𑀁. 𑀲𑀸 𑀆𑀕𑀘𑁆𑀙𑀫𑀸𑀦𑀸 𑀏𑀓𑀁 𑀢𑀡𑁆𑀟𑀼𑀮𑀦𑀸𑀴𑀺𑀁 𑀢𑀬𑁄 𑀘 𑀚𑁄𑀢𑀺𑀧𑀸𑀲𑀸𑀡𑁂 𑀕𑀡𑁆𑀳𑀺. 𑀢𑁂𑀲𑀁 𑀬𑀸𑀯𑀚𑀻𑀯𑀁 𑀢𑀸𑀬𑁂𑀯 𑀢𑀡𑁆𑀟𑀼𑀮𑀦𑀸𑀴𑀺𑀬𑀸 𑀪𑀢𑁆𑀢𑀁 𑀅𑀳𑁄𑀲𑀺. 𑀲𑀘𑁂 𑀓𑀺𑀭 𑀢𑁂 𑀲𑀓𑀝𑀲𑀢𑀫𑁆𑀧𑀺 𑀢𑀡𑁆𑀟𑀼𑀮𑀸𑀦𑀁 𑀧𑀽𑀭𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀲𑀸 𑀢𑀡𑁆𑀟𑀼𑀮𑀦𑀸𑀴𑀺 𑀦𑀸𑀴𑀺𑀬𑁂𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀪𑀢𑁆𑀢𑀧𑀘𑀦𑀓𑀸𑀮𑁂 𑀢𑀡𑁆𑀟𑀼𑀮𑁂 𑀉𑀓𑁆𑀔𑀮𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑁂𑀲𑀁 𑀧𑀸𑀲𑀸𑀡𑀸𑀦𑀁 𑀉𑀧𑀭𑀺 𑀞𑀧𑁂𑀢𑀺, 𑀧𑀸𑀲𑀸𑀡𑀸 𑀢𑀸𑀯𑀤𑁂𑀯 𑀧𑀚𑁆𑀚𑀮𑀺𑀢𑁆𑀯𑀸 𑀪𑀢𑁆𑀢𑁂 𑀧𑀓𑁆𑀓𑀫𑀢𑁆𑀢𑁂 𑀦𑀺𑀩𑁆𑀩𑀸𑀬𑀦𑁆𑀢𑀺. 𑀢𑁂𑀦𑁂𑀯 𑀲𑀜𑁆𑀜𑀸𑀡𑁂𑀦 𑀪𑀢𑁆𑀢𑀲𑁆𑀲 𑀧𑀓𑁆𑀓𑀪𑀸𑀯𑀁 𑀚𑀸𑀦𑀦𑁆𑀢𑀺. 𑀲𑀽𑀧𑁂𑀬𑁆𑀬𑀸𑀤𑀺𑀧𑀘𑀦𑀓𑀸𑀮𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀢𑁂𑀲𑀁 𑀚𑁄𑀢𑀺𑀧𑀸𑀲𑀸𑀡𑁂𑀳𑀺 𑀆𑀳𑀸𑀭𑁄 𑀧𑀘𑁆𑀘𑀢𑀺. 𑀫𑀡𑀺𑀆𑀮𑁄𑀓𑁂𑀦 𑀘 𑀯𑀲𑀦𑁆𑀢𑀺, 𑀅𑀕𑁆𑀕𑀺𑀲𑁆𑀲 𑀯𑀸 𑀤𑀻𑀧𑀲𑁆𑀲 𑀯𑀸 𑀑𑀪𑀸𑀲𑀁 𑀦𑁂𑀯 𑀚𑀸𑀦𑀺𑀁𑀲𑀼. ‘‘𑀚𑁄𑀢𑀺𑀓𑀲𑁆𑀲 𑀓𑀺𑀭 𑀏𑀯𑀭𑀽𑀧𑀸 𑀲𑀫𑁆𑀧𑀢𑁆𑀢𑀻’’𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑁄 𑀅𑀳𑁄𑀲𑀺. 𑀫𑀳𑀸𑀚𑀦𑁄 𑀬𑀸𑀦𑀸𑀤𑀻𑀦𑀺 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀘𑁆𑀙𑀢𑀺. 𑀚𑁄𑀢𑀺𑀓𑀲𑁂𑀝𑁆𑀞𑀺 𑀆𑀕𑀢𑀸𑀕𑀢𑀸𑀦𑀁 𑀉𑀢𑁆𑀢𑀭𑀓𑀼𑀭𑀼𑀢𑀡𑁆𑀟𑀼𑀮𑀸𑀦𑀁 𑀪𑀢𑁆𑀢𑀁 𑀧𑀘𑀸𑀧𑁂𑀢𑁆𑀯𑀸 𑀤𑀸𑀧𑁂𑀲𑀺. ‘‘𑀓𑀧𑁆𑀧𑀭𑀼𑀓𑁆𑀔𑁂𑀳𑀺 𑀯𑀢𑁆𑀣𑀸𑀦𑀺 𑀕𑀡𑁆𑀳𑀦𑁆𑀢𑀼, 𑀆𑀪𑀭𑀡𑀸𑀦𑀺 𑀕𑀡𑁆𑀳𑀦𑁆𑀢𑀽’’𑀢𑀺 𑀆𑀡𑀸𑀧𑁂𑀲𑀺. ‘‘𑀕𑀸𑀯𑀼𑀢𑀺𑀓𑀦𑀺𑀥𑀺𑀓𑀼𑀫𑁆𑀪𑀺𑀬𑀸 𑀫𑀼𑀔𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑀬𑀸𑀧𑀦𑀫𑀢𑁆𑀢𑀁 𑀥𑀦𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀆𑀡𑀸𑀧𑁂𑀲𑀺. 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀓𑁂𑀲𑀼 𑀥𑀦𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁂𑀲𑀼 𑀦𑀺𑀥𑀺𑀓𑀼𑀫𑁆𑀪𑀺𑀬𑀸 𑀅𑀗𑁆𑀕𑀼𑀮𑀺𑀫𑀢𑁆𑀢𑀫𑁆𑀧𑀺 𑀊𑀦𑀁 𑀦𑀸𑀳𑁄𑀲𑀺. 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀯𑀸𑀮𑀼𑀓𑀁 𑀓𑀢𑁆𑀯𑀸 𑀑𑀓𑀺𑀡𑁆𑀡𑀭𑀢𑀦𑀸𑀦𑀁 𑀓𑀺𑀭𑀲𑁆𑀲 𑀏𑀲𑁄 𑀦𑀺𑀲𑁆𑀲𑀦𑁆𑀤𑁄.

𑀏𑀯𑀁 𑀫𑀳𑀸𑀚𑀦𑁂 𑀯𑀢𑁆𑀣𑀸𑀪𑀭𑀡𑀸𑀦𑀺 𑀘𑁂𑀯 𑀥𑀦𑀜𑁆𑀘 𑀬𑀤𑀺𑀘𑁆𑀙𑀓𑀁 𑀆𑀤𑀸𑀬 𑀕𑀘𑁆𑀙𑀦𑁆𑀢𑁂 𑀩𑀺𑀫𑁆𑀩𑀺𑀲𑀸𑀭𑁄 𑀢𑀲𑁆𑀲 𑀧𑀸𑀲𑀸𑀤𑀁 𑀤𑀝𑁆𑀞𑀼𑀓𑀸𑀫𑁄𑀧𑀺 𑀫𑀳𑀸𑀚𑀦𑁂 𑀆𑀕𑀘𑁆𑀙𑀦𑁆𑀢𑁂 𑀑𑀓𑀸𑀲𑀁 𑀦𑀸𑀮𑀢𑁆𑀣. 𑀅𑀧𑀭𑀪𑀸𑀕𑁂 𑀬𑀤𑀺𑀘𑁆𑀙𑀓𑀁 𑀆𑀤𑀸𑀬 𑀕𑀢𑀢𑁆𑀢𑀸 𑀫𑀦𑀼𑀲𑁆𑀲𑁂𑀲𑀼 𑀫𑀦𑁆𑀤𑀻𑀪𑀽𑀢𑁂𑀲𑀼 𑀭𑀸𑀚𑀸 𑀚𑁄𑀢𑀺𑀓𑀲𑁆𑀲 𑀧𑀺𑀢𑀭𑀁 𑀆𑀳 𑁋 ‘‘𑀢𑀯 𑀧𑀼𑀢𑁆𑀢𑀲𑁆𑀲 𑀧𑀸𑀲𑀸𑀤𑀁 𑀤𑀝𑁆𑀞𑀼𑀓𑀸𑀫𑀫𑁆𑀳𑀸’’𑀢𑀺. 𑀲𑁄 ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀯𑀢𑁆𑀯𑀸 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀓𑀣𑁂𑀲𑀺 𑁋 ‘‘𑀢𑀸𑀢, 𑀭𑀸𑀚𑀸 𑀢𑁂 𑀧𑀸𑀲𑀸𑀤𑀁 𑀤𑀝𑁆𑀞𑀼𑀓𑀸𑀫𑁄’’𑀢𑀺. ‘‘𑀲𑀸𑀥𑀼, 𑀢𑀸𑀢, 𑀆𑀕𑀘𑁆𑀙𑀢𑀽’’𑀢𑀺. 𑀭𑀸𑀚𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀢𑀢𑁆𑀣 𑀅𑀕𑀫𑀸𑀲𑀺. 𑀧𑀞𑀫𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀓𑀘𑀯𑀭𑀙𑀟𑁆𑀟𑀺𑀓𑀸 𑀤𑀸𑀲𑀻 𑀭𑀜𑁆𑀜𑁄 𑀳𑀢𑁆𑀣𑀁 𑀅𑀤𑀸𑀲𑀺, 𑀭𑀸𑀚𑀸 ‘‘𑀲𑁂𑀝𑁆𑀞𑀺𑀚𑀸𑀬𑀸’’𑀢𑀺 𑀲𑀜𑁆𑀜𑀸𑀬 𑀮𑀚𑁆𑀚𑀫𑀸𑀦𑁄 𑀢𑀲𑁆𑀲𑀸 𑀩𑀸𑀳𑀸𑀬 𑀳𑀢𑁆𑀣𑀁 𑀦 𑀞𑀧𑁂𑀲𑀺. 𑀏𑀯𑀁 𑀲𑁂𑀲𑀤𑁆𑀯𑀸𑀭𑀓𑁄𑀝𑁆𑀞𑀓𑁂𑀲𑀼𑀧𑀺 𑀤𑀸𑀲𑀺𑀬𑁄 ‘‘𑀲𑁂𑀝𑁆𑀞𑀺𑀪𑀭𑀺𑀬𑀸𑀬𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀢𑀸𑀲𑀁 𑀩𑀸𑀳𑀸𑀬 𑀳𑀢𑁆𑀣𑀁 𑀦 𑀞𑀧𑁂𑀲𑀺. 𑀚𑁄𑀢𑀺𑀓𑁄 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀘𑁆𑀙𑀢𑁄 𑀳𑀼𑀢𑁆𑀯𑀸 ‘‘𑀧𑀼𑀭𑀢𑁄 𑀬𑀸𑀣, 𑀤𑁂𑀯𑀸’’𑀢𑀺 𑀆𑀳. 𑀭𑀜𑁆𑀜𑁄 𑀫𑀡𑀺𑀧𑀣𑀯𑀻 𑀲𑀢𑀧𑁄𑀭𑀺𑀲𑀧𑀧𑀸𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀺. 𑀲𑁄 ‘‘𑀇𑀫𑀺𑀦𑀸 𑀫𑀫 𑀕𑀳𑀡𑀢𑁆𑀣𑀸𑀬 𑀑𑀧𑀸𑀢𑁄 𑀔𑀡𑀺𑀢𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀧𑀸𑀤𑀁 𑀦𑀺𑀓𑁆𑀔𑀺𑀧𑀺𑀢𑀼𑀁 𑀦 𑀯𑀺𑀲𑀳𑀺. 𑀚𑁄𑀢𑀺𑀓𑁄 ‘‘𑀦𑀸𑀬𑀁, 𑀤𑁂𑀯, 𑀑𑀧𑀸𑀢𑁄, 𑀫𑀫 𑀧𑀘𑁆𑀙𑀢𑁄 𑀆𑀕𑀘𑁆𑀙𑀣𑀸’’𑀢𑀺 𑀧𑀼𑀭𑀢𑁄 𑀅𑀳𑁄𑀲𑀺. 𑀭𑀸𑀚𑀸 𑀢𑁂𑀦 𑀅𑀓𑁆𑀓𑀦𑁆𑀢𑀓𑀸𑀮𑁂 𑀪𑀽𑀫𑀺𑀁 𑀅𑀓𑁆𑀓𑀫𑀺𑀢𑁆𑀯𑀸 𑀳𑁂𑀝𑁆𑀞𑀺𑀫𑀢𑀮𑀢𑁄 𑀧𑀝𑁆𑀞𑀸𑀬 𑀧𑀸𑀲𑀸𑀤𑀁 𑀑𑀮𑁄𑀓𑁂𑀦𑁆𑀢𑁄 𑀯𑀺𑀘𑀭𑀺. 𑀢𑀤𑀸 𑀅𑀚𑀸𑀢𑀲𑀢𑁆𑀢𑀼𑀓𑀼𑀫𑀸𑀭𑁄𑀧𑀺 𑀧𑀺𑀢𑀼 𑀅𑀗𑁆𑀕𑀼𑀮𑀺𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀅𑀦𑁆𑀥𑀩𑀸𑀮𑁄 𑀫𑀫 𑀧𑀺𑀢𑀸, 𑀕𑀳𑀧𑀢𑀺𑀓𑁂 𑀦𑀸𑀫 𑀲𑀢𑁆𑀢𑀭𑀢𑀦𑀫𑀬𑁂 𑀧𑀸𑀲𑀸𑀤𑁂 𑀯𑀲𑀦𑁆𑀢𑁂 𑀏𑀲 𑀭𑀸𑀚𑀸 𑀳𑀼𑀢𑁆𑀯𑀸 𑀤𑀸𑀭𑀼𑀫𑀬𑁂 𑀕𑁂𑀳𑁂 𑀯𑀲𑀢𑀺, 𑀅𑀳𑀁 𑀤𑀸𑀦𑀺 𑀭𑀸𑀚𑀸 𑀳𑀼𑀢𑁆𑀯𑀸 𑀇𑀫𑀲𑁆𑀲 𑀇𑀫𑀲𑁆𑀫𑀺𑀁 𑀧𑀸𑀲𑀸𑀤𑁂 𑀯𑀲𑀺𑀢𑀼𑀁 𑀦 𑀤𑀲𑁆𑀲𑀸𑀫𑀻’’𑀢𑀺.

𑀭𑀜𑁆𑀜𑁄𑀧𑀺 𑀉𑀧𑀭𑀺𑀫𑀢𑀮𑀸𑀦𑀺 𑀅𑀪𑀺𑀭𑀼𑀳𑀦𑁆𑀢𑀲𑁆𑀲𑁂𑀯 𑀧𑀸𑀢𑀭𑀸𑀲𑀯𑁂𑀮𑀸 𑀚𑀸𑀢𑀸. 𑀲𑁄 𑀲𑁂𑀝𑁆𑀞𑀺𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀫𑀳𑀸𑀲𑁂𑀝𑁆𑀞𑀺, 𑀇𑀥𑁂𑀯 𑀧𑀸𑀢𑀭𑀸𑀲𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺. 𑀚𑀸𑀦𑀸𑀫𑀺, 𑀤𑁂𑀯, 𑀲𑀚𑁆𑀚𑀺𑀢𑁄 𑀤𑁂𑀯𑀲𑁆𑀲𑀸𑀳𑀸𑀭𑁄𑀢𑀺. 𑀲𑁄 𑀲𑁄𑀴𑀲𑀳𑀺 𑀕𑀦𑁆𑀥𑁄𑀤𑀓𑀖𑀝𑁂𑀳𑀺 𑀦𑁆𑀳𑀢𑁆𑀯𑀸 𑀭𑀢𑀦𑀫𑀬𑁂 𑀲𑁂𑀝𑁆𑀞𑀺𑀲𑁆𑀲 𑀦𑀺𑀲𑀻𑀤𑀦𑀫𑀡𑁆𑀟𑀧𑁂 𑀧𑀜𑁆𑀜𑀢𑁆𑀢𑁂 𑀢𑀲𑁆𑀲𑁂𑀯 𑀦𑀺𑀲𑀻𑀤𑀦𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀳𑀢𑁆𑀣𑀥𑁄𑀯𑀦𑀽𑀤𑀓𑀁 𑀤𑀢𑁆𑀯𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸𑀬 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀓𑀺𑀮𑀺𑀦𑁆𑀦𑀧𑀸𑀬𑀸𑀲𑀁 𑀯𑀟𑁆𑀠𑁂𑀢𑁆𑀯𑀸 𑀧𑀼𑀭𑀢𑁄 𑀞𑀧𑀬𑀺𑀁𑀲𑀼. 𑀭𑀸𑀚𑀸 ‘‘𑀪𑁄𑀚𑀦’’𑀦𑁆𑀢𑀺 𑀲𑀜𑁆𑀜𑀸𑀬 𑀪𑀼𑀜𑁆𑀚𑀺𑀢𑀼𑀁 𑀆𑀭𑀪𑀺. 𑀲𑁂𑀝𑁆𑀞𑀺 ‘‘𑀦𑀬𑀺𑀤𑀁, 𑀤𑁂𑀯, 𑀪𑁄𑀚𑀦𑀁, 𑀓𑀺𑀮𑀺𑀦𑁆𑀦𑀧𑀸𑀬𑀸𑀲𑁄 𑀏𑀲𑁄’’𑀢𑀺 𑀅𑀜𑁆𑀜𑀺𑀲𑁆𑀲𑀸 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀪𑁄𑀚𑀦𑀁 𑀯𑀟𑁆𑀠𑁂𑀢𑁆𑀯𑀸 𑀧𑀼𑀭𑀺𑀫𑀧𑀸𑀢𑀺𑀬𑀁 𑀞𑀧𑀬𑀺𑀁𑀲𑀼. 𑀢𑀢𑁄 𑀉𑀝𑁆𑀞𑀺𑀢𑀉𑀢𑀼𑀦𑀸 𑀓𑀺𑀭 𑀢𑀁 𑀪𑀼𑀜𑁆𑀚𑀺𑀢𑀼𑀁 𑀲𑀼𑀔𑀁 𑀳𑁄𑀢𑀺. 𑀭𑀸𑀚𑀸 𑀫𑀥𑀼𑀭𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑁄 𑀧𑀫𑀸𑀡𑀁 𑀦 𑀅𑀜𑁆𑀜𑀸𑀲𑀺. 𑀅𑀣 𑀦𑀁 𑀲𑁂𑀝𑁆𑀞𑀺 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ‘‘𑀅𑀮𑀁, 𑀤𑁂𑀯, 𑀏𑀢𑁆𑀢𑀓𑀫𑁂𑀯 𑀳𑁄𑀢𑀼, 𑀇𑀢𑁄 𑀉𑀢𑁆𑀢𑀭𑀺𑀁 𑀚𑀺𑀭𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀆𑀳. 𑀅𑀣 𑀦𑀁 𑀭𑀸𑀚𑀸 𑀆𑀳 𑁋 ‘‘𑀓𑀺𑀁, 𑀕𑀳𑀧𑀢𑀺, 𑀕𑀭𑀼𑀓𑀁 𑀓𑀢𑁆𑀯𑀸 𑀓𑀣𑁂𑀲𑀺 𑀅𑀢𑁆𑀢𑀦𑁄 𑀪𑀢𑁆𑀢’’𑀦𑁆𑀢𑀺? 𑀤𑁂𑀯, 𑀦𑀢𑁆𑀣𑁂𑀢𑀁, 𑀢𑀼𑀫𑁆𑀳𑀸𑀓𑀁 𑀲𑀩𑁆𑀩𑀲𑁆𑀲𑀸𑀧𑀺 𑀳𑀺 𑀩𑀮𑀓𑀸𑀬𑀲𑁆𑀲 𑀇𑀤𑀫𑁂𑀯 𑀪𑀢𑁆𑀢𑀁 𑀇𑀤𑀁 𑀲𑀼𑀧𑁂𑀬𑁆𑀬𑀁. 𑀅𑀧𑀺 𑀘 𑀔𑁄 𑀅𑀳𑀁 𑀅𑀬𑀲𑀲𑁆𑀲 𑀪𑀸𑀬𑀸𑀫𑀻𑀢𑀺. 𑀓𑀺𑀁 𑀓𑀸𑀭𑀡𑀸𑀢𑀺? 𑀲𑀘𑁂 𑀤𑁂𑀯𑀲𑁆𑀲 𑀓𑀸𑀬𑀸𑀮𑀲𑀺𑀬𑀫𑀢𑁆𑀢𑀁 𑀪𑀯𑁂𑀬𑁆𑀬, ‘‘𑀳𑀺𑀬𑁆𑀬𑁄 𑀭𑀜𑁆𑀜𑀸 𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑁂 𑀪𑀢𑁆𑀢𑀁 𑀪𑀼𑀢𑁆𑀢𑀁, 𑀲𑁂𑀝𑁆𑀞𑀺𑀦𑀸 𑀓𑀺𑀜𑁆𑀘𑀺 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀘𑀦𑀲𑁆𑀲 𑀪𑀸𑀬𑀸𑀫𑀺, 𑀤𑁂𑀯𑀸𑀢𑀺. 𑀢𑁂𑀦 𑀳𑀺 𑀪𑀢𑁆𑀢𑀁 𑀳𑀭, 𑀉𑀤𑀓𑀁 𑀆𑀳𑀭𑀸𑀢𑀺. 𑀭𑀜𑁆𑀜𑁄 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀲𑀩𑁆𑀩𑁄 𑀭𑀸𑀚𑀧𑀭𑀺𑀯𑀸𑀭𑁄 𑀢𑀤𑁂𑀯 𑀪𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀺.

𑀭𑀸𑀚𑀸 𑀲𑀼𑀔𑀓𑀣𑀸𑀬 𑀦𑀺𑀲𑀺𑀦𑁆𑀦𑁄 𑀲𑁂𑀝𑁆𑀞𑀺𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀓𑀺𑀁 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀲𑁂𑀝𑁆𑀞𑀺𑀪𑀭𑀺𑀬𑀸 𑀦𑀢𑁆𑀣𑀻’’𑀢𑀺 𑀆𑀳? ‘‘𑀆𑀫 𑀅𑀢𑁆𑀣𑀺, 𑀤𑁂𑀯𑀸’’𑀢𑀺. ‘‘𑀓𑀳𑀁 𑀲𑀸’’𑀢𑀺? ‘‘𑀲𑀺𑀭𑀺𑀕𑀩𑁆𑀪𑁂 𑀦𑀺𑀲𑀺𑀦𑁆𑀦𑀸, 𑀤𑁂𑀯𑀲𑁆𑀲 𑀆𑀕𑀢𑀪𑀸𑀯𑀁 𑀦 𑀚𑀸𑀦𑀸𑀢𑀻’’𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀧𑀸𑀢𑁄𑀯 𑀭𑀸𑀚𑀸 𑀲𑀧𑀭𑀺𑀯𑀸𑀭𑁄 𑀆𑀕𑀢𑁄, 𑀲𑀸 𑀧𑀦𑀲𑁆𑀲 𑀆𑀕𑀢𑀪𑀸𑀯𑀁 𑀦 𑀚𑀸𑀦𑀸𑀢𑁂𑀯. 𑀢𑀢𑁄 𑀲𑁂𑀝𑁆𑀞𑀺 ‘‘𑀭𑀸𑀚𑀸 𑀫𑁂 𑀪𑀭𑀺𑀬𑀁 𑀤𑀝𑁆𑀞𑀼𑀓𑀸𑀫𑁄’’𑀢𑀺 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀭𑀸𑀚𑀸 𑀆𑀕𑀢𑁄, 𑀓𑀺𑀁 𑀢𑀯 𑀭𑀸𑀚𑀸𑀦𑀁 𑀤𑀝𑁆𑀞𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀆𑀳. 𑀲𑀸 𑀦𑀺𑀧𑀦𑁆𑀦𑀓𑀸𑀯 ‘‘𑀓𑁄 𑀏𑀲, 𑀲𑀸𑀫𑀺, 𑀭𑀸𑀚𑀸 𑀦𑀸𑀫𑀸’’𑀢𑀺 𑀯𑀢𑁆𑀯𑀸 ‘‘𑀭𑀸𑀚𑀸 𑀦𑀸𑀫 𑀅𑀫𑁆𑀳𑀸𑀓𑀁 𑀇𑀲𑁆𑀲𑀭𑁄’’𑀢𑀺 𑀯𑀼𑀢𑁆𑀢𑁂 𑀅𑀦𑀢𑁆𑀢𑀫𑀦𑀢𑀁 𑀧𑀯𑁂𑀤𑁂𑀦𑁆𑀢𑀻 ‘‘𑀤𑀼𑀓𑁆𑀓𑀝𑀸𑀦𑀺 𑀯𑀢 𑀦𑁄 𑀧𑀼𑀜𑁆𑀜𑀓𑀫𑁆𑀫𑀸𑀦𑀺, 𑀬𑁂𑀲𑀁 𑀦𑁄 𑀇𑀲𑁆𑀲𑀭𑁄𑀧𑀺 𑀅𑀢𑁆𑀣𑀺. 𑀅𑀲𑁆𑀲𑀤𑁆𑀥𑀸𑀬 𑀦𑀸𑀫 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀫𑀬𑀁 𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀫𑁆𑀳𑀸. 𑀅𑀤𑁆𑀥𑀸 𑀅𑀫𑁆𑀳𑁂𑀳𑀺 𑀅𑀲𑀤𑁆𑀤𑀳𑀺𑀢𑁆𑀯𑀸 𑀤𑀸𑀦𑀁 𑀤𑀺𑀦𑁆𑀦𑀁 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲𑁂𑀢𑀁 𑀨𑀮’’𑀦𑁆𑀢𑀺 𑀯𑀢𑁆𑀯𑀸 ‘‘𑀓𑀺𑀁 𑀤𑀸𑀦𑀺 𑀓𑀭𑁄𑀫𑀺, 𑀲𑀸𑀫𑀻’’𑀢𑀺 𑀆𑀳. 𑀢𑀸𑀮𑀯𑀡𑁆𑀝𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀩𑀻𑀚𑀸𑀳𑀻𑀢𑀺. 𑀢𑀲𑁆𑀲𑀸 𑀢𑀸𑀮𑀯𑀡𑁆𑀝𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀩𑀻𑀚𑁂𑀦𑁆𑀢𑀺𑀬𑀸 𑀭𑀜𑁆𑀜𑁄 𑀯𑁂𑀞𑀦𑀲𑁆𑀲 𑀕𑀦𑁆𑀥𑀯𑀸𑀢𑁄 𑀅𑀓𑁆𑀔𑀻𑀦𑀺 𑀧𑀳𑀭𑀺, 𑀅𑀣𑀲𑁆𑀲𑀸 𑀅𑀓𑁆𑀔𑀻𑀳𑀺 𑀅𑀲𑁆𑀲𑀼𑀥𑀸𑀭𑀸 𑀧𑀯𑀢𑁆𑀢𑀺𑀁𑀲𑀼. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀸 𑀲𑁂𑀝𑁆𑀞𑀺𑀁 𑀆𑀳 𑁋 ‘‘𑀫𑀳𑀸𑀲𑁂𑀝𑁆𑀞𑀺, 𑀫𑀸𑀢𑀼𑀕𑀸𑀫𑁄 𑀦𑀸𑀫 𑀅𑀧𑁆𑀧𑀩𑀼𑀤𑁆𑀥𑀺𑀓𑁄, ‘𑀭𑀸𑀚𑀸 𑀫𑁂 𑀲𑀸𑀫𑀺𑀓𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀕𑀡𑁆𑀳𑁂𑀬𑁆𑀬𑀸’𑀢𑀺 𑀪𑀬𑁂𑀦 𑀭𑁄𑀤𑀢𑀺 𑀫𑀜𑁆𑀜𑁂, 𑀅𑀲𑁆𑀲𑀸𑀲𑁂𑀳𑀺 𑀦𑀁 ‘𑀦 𑀫𑁂 𑀢𑀯 𑀲𑀫𑁆𑀧𑀢𑁆𑀢𑀺𑀬𑀸 𑀅𑀢𑁆𑀣𑁄’’’𑀢𑀺. 𑀦 𑀏𑀲𑀸, 𑀤𑁂𑀯, 𑀭𑁄𑀤𑀢𑀻𑀢𑀺. 𑀅𑀣 𑀓𑀺𑀁 𑀏𑀢𑀦𑁆𑀢𑀺? 𑀢𑀼𑀫𑁆𑀳𑀸𑀓𑀁 𑀯𑁂𑀞𑀦𑀕𑀦𑁆𑀥𑁂𑀦𑀲𑁆𑀲𑀸 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑀺𑀁𑀲𑀼. 𑀅𑀬𑀜𑁆𑀳𑀺 𑀤𑀻𑀧𑁄𑀪𑀸𑀲𑀁 𑀯𑀸 𑀅𑀕𑁆𑀕𑀺𑀑𑀪𑀸𑀲𑀁 𑀯𑀸 𑀅𑀤𑀺𑀲𑁆𑀯𑀸 𑀫𑀡𑀺𑀆𑀮𑁄𑀓𑁂𑀦𑁂𑀯 𑀪𑀼𑀜𑁆𑀚𑀢𑀺 𑀘 𑀦𑀺𑀲𑀻𑀤𑀢𑀺 𑀘 𑀦𑀺𑀧𑀚𑁆𑀚𑀢𑀺 𑀘, 𑀤𑁂𑀯𑁄 𑀧𑀦 𑀤𑀻𑀧𑀸𑀮𑁄𑀓𑁂𑀦 𑀦𑀺𑀲𑀺𑀦𑁆𑀦𑁄 𑀪𑀯𑀺𑀲𑁆𑀲𑀢𑀻𑀢𑀺? 𑀆𑀫, 𑀲𑁂𑀝𑁆𑀞𑀻𑀢𑀺. 𑀢𑁂𑀦 𑀳𑀺, 𑀤𑁂𑀯, 𑀅𑀚𑁆𑀚 𑀧𑀝𑁆𑀞𑀸𑀬 𑀫𑀡𑀺𑀆𑀮𑁄𑀓𑁂𑀦 𑀦𑀺𑀲𑀻𑀤𑀣𑀸𑀢𑀺 𑀫𑀳𑀦𑁆𑀢𑀁 𑀢𑀺𑀧𑀼𑀲𑀫𑀢𑁆𑀢𑀁 𑀅𑀦𑀕𑁆𑀖𑀁 𑀫𑀡𑀺𑀭𑀢𑀦𑀁 𑀅𑀤𑀸𑀲𑀺. 𑀭𑀸𑀚𑀸 𑀕𑁂𑀳𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀫𑀳𑀢𑀻 𑀯𑀢 𑀚𑁄𑀢𑀺𑀓𑀲𑁆𑀲 𑀲𑀫𑁆𑀧𑀢𑁆𑀢𑀻’’𑀢𑀺 𑀯𑀢𑁆𑀯𑀸 𑀅𑀕𑀫𑀸𑀲𑀺. 𑀅𑀬𑀁 𑀢𑀸𑀯 𑀚𑁄𑀢𑀺𑀓𑀲𑁆𑀲 𑀉𑀧𑁆𑀧𑀢𑁆𑀢𑀺.

𑀇𑀤𑀸𑀦𑀺 𑀚𑀝𑀺𑀮𑀲𑁆𑀲 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸 𑁋 𑀩𑀸𑀭𑀸𑀡𑀲𑀺𑀬𑀜𑁆𑀳𑀺 𑀏𑀓𑀸 𑀲𑁂𑀝𑁆𑀞𑀺𑀥𑀻𑀢𑀸 𑀅𑀪𑀺𑀭𑀽𑀧𑀸 𑀅𑀳𑁄𑀲𑀺, 𑀢𑀁 𑀧𑀦𑁆𑀦𑀭𑀲𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀓𑀸𑀮𑁂 𑀭𑀓𑁆𑀔𑀡𑀢𑁆𑀣𑀸𑀬 𑀏𑀓𑀁 𑀤𑀸𑀲𑀺𑀁 𑀤𑀢𑁆𑀯𑀸 𑀲𑀢𑁆𑀢𑀪𑀽𑀫𑀺𑀓𑀲𑁆𑀲 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺𑀫𑀢𑀮𑁂 𑀲𑀺𑀭𑀺𑀕𑀩𑁆𑀪𑁂 𑀯𑀸𑀲𑀬𑀺𑀁𑀲𑀼. 𑀢𑀁 𑀏𑀓𑀤𑀺𑀯𑀲𑀁 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀩𑀳𑀺 𑀑𑀮𑁄𑀓𑀬𑀫𑀸𑀦𑀁 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀏𑀓𑁄 𑀯𑀺𑀚𑁆𑀚𑀸𑀥𑀭𑁄 𑀤𑀺𑀲𑁆𑀯𑀸 𑀉𑀧𑁆𑀧𑀦𑁆𑀦𑀲𑀺𑀦𑁂𑀳𑁄 𑀯𑀸𑀢𑀧𑀸𑀦𑁂𑀦 𑀧𑀯𑀺𑀲𑀺𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀲𑀦𑁆𑀣𑀯𑀫𑀓𑀸𑀲𑀺. 𑀲𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀁𑀯𑀸𑀲𑀫𑀦𑁆𑀯𑀸𑀬 𑀦 𑀘𑀺𑀭𑀲𑁆𑀲𑁂𑀯 𑀕𑀩𑁆𑀪𑀁 𑀧𑀝𑀺𑀮𑀪𑀺. 𑀅𑀣 𑀦𑀁 𑀲𑀸 𑀤𑀸𑀲𑀻 𑀤𑀺𑀲𑁆𑀯𑀸, ‘‘𑀅𑀫𑁆𑀫, 𑀓𑀺𑀁 𑀇𑀤’’𑀦𑁆𑀢𑀺 𑀯𑀢𑁆𑀯𑀸 ‘‘𑀳𑁄𑀢𑀼 𑀫𑀸 𑀓𑀲𑁆𑀲𑀘𑀺 𑀆𑀘𑀺𑀓𑁆𑀔𑀻’’𑀢𑀺 𑀢𑀸𑀬 𑀯𑀼𑀢𑁆𑀢𑀸 𑀪𑀬𑁂𑀦 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀲𑀸𑀧𑀺 𑀤𑀲𑀫𑀸𑀲𑀘𑁆𑀘𑀬𑁂𑀦 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 𑀦𑀯𑀪𑀸𑀚𑀦𑀁 𑀆𑀳𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀢𑀁 𑀤𑀸𑀭𑀓𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀢𑀁 𑀪𑀸𑀚𑀦𑀁 𑀧𑀺𑀤𑀳𑀺𑀢𑁆𑀯𑀸 𑀉𑀧𑀭𑀺 𑀧𑀼𑀧𑁆𑀨𑀤𑀸𑀫𑀸𑀦𑀺 𑀞𑀧𑁂𑀢𑁆𑀯𑀸 ‘‘𑀇𑀫𑀁 𑀲𑀻𑀲𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀗𑁆𑀕𑀸𑀬 𑀯𑀺𑀲𑁆𑀲𑀚𑁆𑀚𑁂𑀳𑀺, ‘𑀓𑀺𑀁 𑀇𑀤’𑀦𑁆𑀢𑀺 𑀘 𑀧𑀼𑀝𑁆𑀞𑀸 ‘𑀅𑀬𑁆𑀬𑀸𑀬 𑀫𑁂 𑀩𑀮𑀺𑀓𑀫𑁆𑀫’𑀦𑁆𑀢𑀺 𑀯𑀤𑁂𑀬𑁆𑀬𑀸𑀲𑀻’’𑀢𑀺 𑀤𑀸𑀲𑀺𑀁 𑀆𑀡𑀸𑀧𑁂𑀲𑀺. 𑀲𑀸 𑀢𑀣𑀸 𑀅𑀓𑀸𑀲𑀺.

𑀳𑁂𑀝𑁆𑀞𑀸𑀕𑀗𑁆𑀕𑀸𑀬𑀫𑁆𑀧𑀺 𑀤𑁆𑀯𑁂 𑀇𑀢𑁆𑀣𑀺𑀬𑁄 𑀦𑁆𑀳𑀸𑀬𑀫𑀸𑀦𑀸 𑀢𑀁 𑀪𑀸𑀚𑀦𑀁 𑀉𑀤𑀓𑁂𑀦𑀸𑀳𑀭𑀺𑀬𑀫𑀸𑀦𑀁 𑀤𑀺𑀲𑁆𑀯𑀸 𑀏𑀓𑀸 ‘‘𑀫𑀬𑁆𑀳𑁂𑀢𑀁 𑀪𑀸𑀚𑀦’’𑀦𑁆𑀢𑀺 𑀆𑀳. 𑀏𑀓𑀸 ‘‘𑀬𑀁 𑀏𑀢𑀲𑁆𑀲 𑀅𑀦𑁆𑀢𑁄, 𑀢𑀁 𑀫𑀬𑁆𑀳’’𑀦𑁆𑀢𑀺 𑀯𑀢𑁆𑀯𑀸 𑀪𑀸𑀚𑀦𑁂 𑀲𑀫𑁆𑀧𑀢𑁆𑀢𑁂 𑀢𑀁 𑀆𑀤𑀸𑀬 𑀣𑀮𑁂 𑀞𑀧𑁂𑀢𑁆𑀯𑀸 𑀯𑀺𑀯𑀭𑀺𑀢𑁆𑀯𑀸 𑀤𑀸𑀭𑀓𑀁 𑀤𑀺𑀲𑁆𑀯𑀸 𑀏𑀓𑀸 ‘‘𑀫𑀫 𑀪𑀸𑀚𑀦𑀦𑁆𑀢𑀺 𑀯𑀼𑀢𑁆𑀢𑀢𑀸𑀬 𑀤𑀸𑀭𑀓𑁄 𑀫𑀫𑁂𑀯 𑀳𑁄𑀢𑀻’’𑀢𑀺 𑀆𑀳. 𑀏𑀓𑀸 ‘‘𑀬𑀁 𑀪𑀸𑀚𑀦𑀲𑁆𑀲 𑀅𑀦𑁆𑀢𑁄, 𑀢𑀁 𑀫𑀫𑁂𑀯 𑀳𑁄𑀢𑀽𑀢𑀺 𑀯𑀼𑀢𑁆𑀢𑀢𑀸𑀬 𑀫𑀫 𑀤𑀸𑀭𑀓𑁄’’𑀢𑀺 𑀆𑀳. 𑀢𑀸 𑀯𑀺𑀯𑀤𑀫𑀸𑀦𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀅𑀫𑀘𑁆𑀘𑁂𑀲𑀼 𑀯𑀺𑀦𑀺𑀘𑁆𑀙𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀲𑀼 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀭𑀸𑀚𑀸 𑀢𑀸𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀢𑁆𑀯𑀁 𑀤𑀸𑀭𑀓𑀁 𑀕𑀡𑁆𑀳, 𑀢𑁆𑀯𑀁 𑀪𑀸𑀚𑀦𑀁 𑀕𑀡𑁆𑀳𑀸’’𑀢𑀺 𑀆𑀳. 𑀬𑀸𑀬 𑀧𑀦 𑀤𑀸𑀭𑀓𑁄 𑀮𑀤𑁆𑀥𑁄, 𑀲𑀸 𑀫𑀳𑀸𑀓𑀘𑁆𑀘𑀸𑀦𑀢𑁆𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀬𑀺𑀓𑀸 𑀅𑀳𑁄𑀲𑀺. 𑀢𑀲𑁆𑀫𑀸 𑀲𑀸 𑀤𑀸𑀭𑀓𑀁 ‘‘𑀇𑀫𑀁 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀻’’𑀢𑀺 𑀧𑁄𑀲𑁂𑀲𑀺. 𑀢𑀲𑁆𑀲 𑀚𑀸𑀢𑀤𑀺𑀯𑀲𑁂 𑀕𑀩𑁆𑀪𑀫𑀮𑀲𑁆𑀲 𑀥𑁄𑀯𑀺𑀢𑁆𑀯𑀸 𑀅𑀦𑀧𑀦𑀻𑀢𑀢𑀸𑀬 𑀓𑁂𑀲𑀸 𑀚𑀝𑀺𑀢𑀸 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼, 𑀢𑁂𑀦𑀲𑁆𑀲 𑀚𑀝𑀺𑀮𑁄𑀢𑁆𑀯𑁂𑀯 𑀦𑀸𑀫𑀁 𑀓𑀭𑀺𑀁𑀲𑀼. 𑀢𑀲𑁆𑀲 𑀧𑀤𑀲𑀸 𑀯𑀺𑀘𑀭𑀡𑀓𑀸𑀮𑁂 𑀣𑁂𑀭𑁄 𑀢𑀁 𑀕𑁂𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀉𑀧𑀸𑀲𑀺𑀓𑀸 𑀣𑁂𑀭𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀆𑀳𑀸𑀭𑀫𑀤𑀸𑀲𑀺. 𑀣𑁂𑀭𑁄 𑀤𑀸𑀭𑀓𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀉𑀧𑀸𑀲𑀺𑀓𑁂 𑀤𑀸𑀭𑀓𑁄 𑀮𑀤𑁆𑀥𑁄’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀪𑀦𑁆𑀢𑁂, 𑀇𑀫𑀸𑀳𑀁 𑀤𑀸𑀭𑀓𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀻𑀢𑀺 𑀧𑁄𑀲𑁂𑀲𑀺𑀁, 𑀧𑀩𑁆𑀩𑀸𑀚𑁂𑀣 𑀦’’𑀦𑁆𑀢𑀺 𑀅𑀤𑀸𑀲𑀺. 𑀣𑁂𑀭𑁄 ‘‘𑀲𑀸𑀥𑀽’’𑀢𑀺 𑀆𑀤𑀸𑀬 𑀢𑀁 𑀕𑀘𑁆𑀙𑀦𑁆𑀢𑁄 ‘‘𑀅𑀢𑁆𑀣𑀺 𑀦𑀼 𑀔𑁄 𑀇𑀫𑀲𑁆𑀲 𑀕𑀺𑀳𑀺𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑀼𑀁 𑀧𑀼𑀜𑁆𑀜𑀓𑀫𑁆𑀫’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀫𑀳𑀸𑀧𑀼𑀜𑁆𑀜𑁄 𑀲𑀢𑁆𑀢𑁄 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀢𑀺, 𑀤𑀳𑀭𑁄 𑀏𑀲 𑀢𑀸𑀯, 𑀜𑀸𑀡𑀫𑁆𑀧𑀺𑀲𑁆𑀲 𑀧𑀭𑀺𑀧𑀸𑀓𑀁 𑀦 𑀕𑀘𑁆𑀙𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀆𑀤𑀸𑀬 𑀢𑀓𑁆𑀓𑀲𑀺𑀮𑀸𑀬𑀁 𑀏𑀓𑀲𑁆𑀲 𑀉𑀧𑀝𑁆𑀞𑀸𑀓𑀲𑁆𑀲 𑀕𑁂𑀳𑀁 𑀅𑀕𑀫𑀸𑀲𑀺.

𑀲𑁄 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑁄 𑀢𑀁 𑀤𑀸𑀭𑀓𑀁 𑀤𑀺𑀲𑁆𑀯𑀸 ‘‘𑀤𑀸𑀭𑀓𑁄 𑀯𑁄, 𑀪𑀦𑁆𑀢𑁂, 𑀮𑀤𑁆𑀥𑁄’’𑀢𑀺 𑀧𑀼𑀘𑁆𑀙𑀺. 𑀆𑀫, 𑀉𑀧𑀸𑀲𑀓, 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀤𑀳𑀭𑁄 𑀢𑀸𑀯, 𑀢𑀯𑁂𑀯 𑀲𑀦𑁆𑀢𑀺𑀓𑁂 𑀳𑁄𑀢𑀽𑀢𑀺. 𑀲𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀢𑀁 𑀧𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺. 𑀢𑀲𑁆𑀲 𑀧𑀦 𑀕𑁂𑀳𑁂 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀪𑀡𑁆𑀟𑀓𑀁 𑀉𑀲𑁆𑀲𑀦𑁆𑀦𑀁 𑀳𑁄𑀢𑀺. 𑀲𑁄 𑀕𑀸𑀫𑀦𑁆𑀢𑀭𑀁 𑀕𑀘𑁆𑀙𑀦𑁆𑀢𑁄 𑀲𑀩𑁆𑀩𑀫𑁆𑀧𑀺 𑀢𑀁 𑀪𑀡𑁆𑀟𑀁 𑀆𑀧𑀡𑀁 𑀳𑀭𑀺𑀢𑁆𑀯𑀸 𑀤𑀸𑀭𑀓𑀁 𑀆𑀧𑀡𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀢𑀲𑁆𑀲 𑀢𑀲𑁆𑀲 𑀪𑀡𑁆𑀟𑀓𑀲𑁆𑀲 𑀫𑀽𑀮𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀇𑀤𑀜𑁆𑀘 𑀇𑀤𑀜𑁆𑀘 𑀏𑀢𑁆𑀢𑀓𑀁 𑀦𑀸𑀫 𑀥𑀦𑀁 𑀕𑀳𑁂𑀢𑁆𑀯𑀸 𑀤𑀤𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀁𑀤𑀺𑀯𑀲𑀁 𑀦𑀕𑀭𑀧𑀭𑀺𑀕𑁆𑀕𑀸𑀳𑀺𑀓𑀸 𑀤𑁂𑀯𑀢𑀸 𑀅𑀦𑁆𑀢𑀫𑀲𑁄 𑀫𑀭𑀺𑀘𑀚𑀻𑀭𑀓𑀫𑀢𑁆𑀢𑁂𑀦𑀸𑀧𑀺 𑀅𑀢𑁆𑀣𑀺𑀓𑁂 𑀢𑀲𑁆𑀲𑁂𑀯 𑀆𑀧𑀡𑀸𑀪𑀺𑀫𑀼𑀔𑁂 𑀓𑀭𑀺𑀁𑀲𑀼. 𑀲𑁄 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀉𑀲𑁆𑀲𑀦𑁆𑀦𑀁 𑀪𑀡𑁆𑀟𑀓𑀁 𑀏𑀓𑀤𑀺𑀯𑀲𑁂𑀦𑁂𑀯 𑀯𑀺𑀓𑁆𑀓𑀺𑀡𑀺. 𑀓𑀼𑀝𑀼𑀫𑁆𑀩𑀺𑀓𑁄 𑀆𑀕𑀦𑁆𑀢𑁆𑀯𑀸 𑀆𑀧𑀡𑁂 𑀓𑀺𑀜𑁆𑀘𑀺 𑀅𑀤𑀺𑀲𑁆𑀯𑀸 ‘‘𑀲𑀩𑁆𑀩𑀁 𑀢𑁂, 𑀢𑀸𑀢, 𑀪𑀡𑁆𑀟𑀓𑀁 𑀦𑀸𑀲𑀺𑀢’’𑀦𑁆𑀢𑀺 𑀆𑀳. 𑀦 𑀦𑀸𑀲𑁂𑀫𑀺, 𑀲𑀩𑁆𑀩𑀁 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀓𑁆𑀓𑀺𑀡𑀺𑀁, 𑀇𑀤𑀁 𑀅𑀲𑀼𑀓𑀲𑁆𑀲 𑀫𑀽𑀮𑀁, 𑀇𑀤𑀁 𑀅𑀲𑀼𑀓𑀲𑁆𑀲𑀸𑀢𑀺. 𑀓𑀼𑀝𑀼𑀫𑁆𑀩𑀺𑀓𑁄 𑀧𑀲𑀻𑀤𑀺𑀢𑁆𑀯𑀸 ‘‘𑀅𑀦𑀕𑁆𑀖𑁄 𑀧𑀼𑀭𑀺𑀲𑁄, 𑀬𑀢𑁆𑀣 𑀓𑀢𑁆𑀣𑀘𑀺 𑀚𑀻𑀯𑀺𑀢𑀼𑀁 𑀲𑀫𑀢𑁆𑀣𑁄’’𑀢𑀺 𑀅𑀢𑁆𑀢𑀦𑁄 𑀕𑁂𑀳𑁂 𑀯𑀬𑀧𑁆𑀧𑀢𑁆𑀢𑀁 𑀥𑀻𑀢𑀭𑀁 𑀢𑀲𑁆𑀲 𑀤𑀢𑁆𑀯𑀸 ‘‘𑀕𑁂𑀳𑀫𑀲𑁆𑀲 𑀓𑀭𑁄𑀣𑀸’’𑀢𑀺 𑀧𑀼𑀭𑀺𑀲𑁂 𑀆𑀡𑀸𑀧𑁂𑀢𑁆𑀯𑀸 𑀦𑀺𑀝𑁆𑀞𑀺𑀢𑁂 𑀕𑁂𑀳𑁂 ‘‘𑀕𑀘𑁆𑀙𑀣, 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀕𑁂𑀳𑁂 𑀯𑀲𑀣𑀸’’𑀢𑀺 𑀆𑀳.

𑀅𑀣𑀲𑁆𑀲 𑀕𑁂𑀳𑀧𑀯𑀺𑀲𑀦𑀓𑀸𑀮𑁂 𑀏𑀓𑁂𑀦 𑀧𑀸𑀤𑁂𑀦 𑀉𑀫𑁆𑀫𑀸𑀭𑁂 𑀅𑀓𑁆𑀓𑀦𑁆𑀢𑀫𑀢𑁆𑀢𑁂 𑀕𑁂𑀳𑀲𑁆𑀲 𑀧𑀘𑁆𑀙𑀺𑀫𑀪𑀸𑀕𑁂 𑀪𑀽𑀫𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑁄 𑀲𑀼𑀯𑀡𑁆𑀡𑀧𑀩𑁆𑀩𑀢𑁄 𑀉𑀝𑁆𑀞𑀳𑀺. 𑀭𑀸𑀚𑀸 ‘‘𑀚𑀝𑀺𑀮𑀓𑀼𑀫𑀸𑀭𑀲𑁆𑀲 𑀓𑀺𑀭 𑀕𑁂𑀳𑁂 𑀪𑀽𑀫𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀩𑁆𑀩𑀢𑁄 𑀉𑀝𑁆𑀞𑀺𑀢𑁄’’𑀢𑀺 𑀲𑀼𑀢𑁆𑀯𑀸𑀯 𑀢𑀲𑁆𑀲 𑀲𑁂𑀝𑁆𑀞𑀺𑀘𑁆𑀙𑀢𑁆𑀢𑀁 𑀧𑁂𑀲𑁂𑀲𑀺. 𑀲𑁄 𑀚𑀝𑀺𑀮𑀲𑁂𑀝𑁆𑀞𑀺 𑀦𑀸𑀫 𑀅𑀳𑁄𑀲𑀺. 𑀢𑀲𑁆𑀲 𑀢𑀬𑁄 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀲𑁄 𑀢𑁂𑀲𑀁 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀲𑀘𑁂 𑀅𑀫𑁆𑀳𑁂𑀳𑀺 𑀲𑀫𑀸𑀦𑀪𑁄𑀕𑀁 𑀲𑁂𑀝𑁆𑀞𑀺𑀓𑀼𑀮𑀁 𑀪𑀯𑀺𑀲𑁆𑀲𑀢𑀺, 𑀧𑀩𑁆𑀩𑀚𑀺𑀢𑀼𑀁 𑀤𑀲𑁆𑀲𑀦𑁆𑀢𑀺. 𑀦𑁄 𑀘𑁂, 𑀦 𑀤𑀲𑁆𑀲𑀦𑁆𑀢𑀺. 𑀅𑀢𑁆𑀣𑀺 𑀦𑀼 𑀔𑁄 𑀚𑀫𑁆𑀩𑀼𑀤𑀻𑀧𑁂 𑀅𑀫𑁆𑀳𑁂𑀳𑀺 𑀲𑀫𑀸𑀦𑀪𑁄𑀕𑀁 𑀓𑀼𑀮’’𑀦𑁆𑀢𑀺 𑀯𑀻𑀫𑀁𑀲𑀦𑀢𑁆𑀣𑀸𑀬 𑀲𑀼𑀯𑀡𑁆𑀡𑀫𑀬𑀁 𑀇𑀝𑁆𑀞𑀓𑀁 𑀲𑀼𑀯𑀡𑁆𑀡𑀫𑀬𑀁 𑀧𑀢𑁄𑀤𑀮𑀝𑁆𑀞𑀺𑀁 𑀲𑀼𑀯𑀡𑁆𑀡𑀫𑀬𑀁 𑀧𑀸𑀤𑀼𑀓𑀜𑁆𑀘 𑀓𑀸𑀭𑀸𑀧𑁂𑀢𑁆𑀯𑀸 𑀧𑀼𑀭𑀺𑀲𑀸𑀦𑀁 𑀳𑀢𑁆𑀣𑁂 𑀤𑀢𑁆𑀯𑀸 ‘‘𑀕𑀘𑁆𑀙𑀣, 𑀇𑀫𑀸𑀦𑀺 𑀆𑀤𑀸𑀬 𑀓𑀺𑀜𑁆𑀘𑀺𑀤𑁂𑀯 𑀑𑀮𑁄𑀓𑀬𑀫𑀸𑀦𑀸 𑀯𑀺𑀬 𑀚𑀫𑁆𑀩𑀼𑀤𑀻𑀧𑀢𑀮𑁂 𑀯𑀺𑀘𑀭𑀺𑀢𑁆𑀯𑀸 𑀅𑀫𑁆𑀳𑁂𑀳𑀺 𑀲𑀫𑀸𑀦𑀪𑁄𑀕𑀲𑁆𑀲 𑀲𑁂𑀝𑁆𑀞𑀺𑀓𑀼𑀮𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀯𑀸 𑀦𑀢𑁆𑀣𑀺𑀪𑀸𑀯𑀁 𑀯𑀸 𑀜𑀢𑁆𑀯𑀸 𑀆𑀕𑀘𑁆𑀙𑀣𑀸’’𑀢𑀺 𑀧𑀳𑀺𑀡𑀺.

𑀢𑁂 𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀪𑀤𑁆𑀤𑀺𑀬𑀦𑀕𑀭𑀁 𑀧𑀸𑀧𑀼𑀡𑀺𑀁𑀲𑀼. 𑀅𑀣 𑀦𑁂 𑀫𑁂𑀡𑁆𑀟𑀓𑀲𑁂𑀝𑁆𑀞𑀺 𑀤𑀺𑀲𑁆𑀯𑀸, ‘‘𑀢𑀸𑀢𑀸, 𑀓𑀺𑀁 𑀓𑀭𑁄𑀦𑁆𑀢𑀸 𑀯𑀺𑀘𑀭𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀓𑀁 𑀑𑀮𑁄𑀓𑁂𑀦𑁆𑀢𑀸 𑀯𑀺𑀘𑀭𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀇𑀫𑁂𑀲𑀁 𑀇𑀫𑀸𑀦𑀺 𑀕𑀳𑁂𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀑𑀮𑁄𑀓𑁂𑀢𑀼𑀁 𑀯𑀺𑀘𑀭𑀡𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀭𑀝𑁆𑀞𑀁 𑀧𑀭𑀺𑀕𑁆𑀕𑀡𑁆𑀳𑀫𑀸𑀦𑀸 𑀯𑀺𑀘𑀭𑀦𑁆𑀢𑀻’’𑀢𑀺 𑀜𑀢𑁆𑀯𑀸, ‘‘𑀢𑀸𑀢𑀸, 𑀅𑀫𑁆𑀳𑀸𑀓𑀁 𑀧𑀘𑁆𑀙𑀺𑀫𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀑𑀮𑁄𑀓𑁂𑀣𑀸’’𑀢𑀺 𑀆𑀳. 𑀢𑁂 𑀢𑀢𑁆𑀣 𑀅𑀝𑁆𑀞𑀓𑀭𑀻𑀲𑀫𑀢𑁆𑀢𑁂 𑀞𑀸𑀦𑁂 𑀳𑀢𑁆𑀣𑀺𑀅𑀲𑁆𑀲𑀉𑀲𑀪𑀧𑁆𑀧𑀫𑀸𑀡𑁂 𑀧𑀺𑀝𑁆𑀞𑀺𑀬𑀸 𑀧𑀺𑀝𑁆𑀞𑀺𑀁 𑀆𑀳𑀘𑁆𑀘 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀺𑀢𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀲𑀼𑀯𑀡𑁆𑀡𑀫𑁂𑀡𑁆𑀟𑀓𑁂 𑀤𑀺𑀲𑁆𑀯𑀸 𑀢𑁂𑀲𑀁 𑀅𑀦𑁆𑀢𑀭𑀦𑁆𑀢𑀭𑀸 𑀯𑀺𑀘𑀭𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀅𑀣 𑀦𑁂 𑀲𑁂𑀝𑁆𑀞𑀺, ‘‘𑀢𑀸𑀢𑀸, 𑀬𑀁 𑀑𑀮𑁄𑀓𑁂𑀦𑁆𑀢𑀸 𑀯𑀺𑀘𑀭𑀣, 𑀤𑀺𑀝𑁆𑀞𑁄 𑀯𑁄 𑀲𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀧𑀲𑁆𑀲𑀸𑀫, 𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀕𑀘𑁆𑀙𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀢𑁂 𑀢𑀢𑁄𑀯 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀲𑁂𑀝𑁆𑀞𑀺𑀦𑀸 ‘‘𑀓𑀺𑀁, 𑀢𑀸𑀢𑀸, 𑀤𑀺𑀝𑁆𑀞𑀁 𑀯𑁄 𑀅𑀫𑁆𑀳𑀸𑀓𑀁 𑀲𑀫𑀸𑀦𑀪𑁄𑀕𑀁 𑀲𑁂𑀝𑁆𑀞𑀺𑀓𑀼𑀮’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀲𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀓𑀺𑀁 𑀅𑀢𑁆𑀣𑀺, 𑀪𑀤𑁆𑀤𑀺𑀬𑀦𑀕𑀭𑁂 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀦𑁄 𑀏𑀯𑀭𑀽𑀧𑁄 𑀦𑀸𑀫 𑀯𑀺𑀪𑀯𑁄’’𑀢𑀺 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺 𑀅𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 ‘‘𑀏𑀓𑀁 𑀢𑀸𑀯 𑀲𑁂𑀝𑁆𑀞𑀺𑀓𑀼𑀮𑀁 𑀮𑀤𑁆𑀥𑀁, 𑀅𑀧𑀭𑀫𑁆𑀧𑀺 𑀦𑀼 𑀔𑁄 𑀅𑀢𑁆𑀣𑀻’’𑀢𑀺 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀓𑀫𑁆𑀩𑀮𑀁 𑀤𑀢𑁆𑀯𑀸 ‘‘𑀕𑀘𑁆𑀙𑀣, 𑀢𑀸𑀢𑀸, 𑀅𑀜𑁆𑀜𑀫𑁆𑀧𑀺. 𑀲𑁂𑀝𑁆𑀞𑀺𑀓𑀼𑀮𑀁 𑀯𑀺𑀘𑀺𑀦𑀣𑀸’’𑀢𑀺 𑀧𑀳𑀺𑀡𑀺.

𑀢𑁂 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀚𑁄𑀢𑀺𑀓𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑀢𑁄 𑀅𑀯𑀺𑀤𑀽𑀭𑁂 𑀤𑀸𑀭𑀼𑀭𑀸𑀲𑀺𑀁 𑀓𑀢𑁆𑀯𑀸 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀅𑀝𑁆𑀞𑀁𑀲𑀼. ‘‘𑀓𑀺𑀁 𑀇𑀤’’𑀦𑁆𑀢𑀺 𑀧𑀼𑀝𑁆𑀞𑀓𑀸𑀮𑁂 𑀘 ‘‘𑀏𑀓𑀁 𑀦𑁄 𑀫𑀳𑀕𑁆𑀖𑀓𑀫𑁆𑀩𑀮𑀁 𑀯𑀺𑀓𑁆𑀓𑀺𑀡𑀦𑁆𑀢𑀸𑀦𑀁 𑀓𑀬𑀺𑀓𑁄 𑀦𑀢𑁆𑀣𑀺, 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸𑀧𑀺 𑀘𑁄𑀭𑀸𑀦𑀁 𑀪𑀸𑀬𑀸𑀫, 𑀢𑁂𑀦 𑀢𑀁 𑀛𑀸𑀧𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀯𑀤𑀺𑀁𑀲𑀼. 𑀅𑀣 𑀦𑁂 𑀚𑁄𑀢𑀺𑀓𑀲𑁂𑀝𑁆𑀞𑀺 𑀤𑀺𑀲𑁆𑀯𑀸 ‘‘𑀇𑀫𑁂 𑀓𑀺𑀁 𑀓𑀭𑁄𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀺𑀁 𑀅𑀕𑁆𑀖𑀦𑀓𑁄 𑀓𑀫𑁆𑀩𑀮𑁄’’𑀢𑀺 𑀧𑀼𑀘𑁆𑀙𑀺. ‘‘𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑁄’’𑀢𑀺 𑀯𑀼𑀢𑁆𑀢𑁂 𑀲𑀢𑀲𑀳𑀲𑁆𑀲𑀁 𑀤𑀸𑀧𑁂𑀢𑁆𑀯𑀸 ‘‘𑀤𑁆𑀯𑀸𑀭𑀓𑁄𑀝𑁆𑀞𑀓𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀓𑀘𑀯𑀭𑀙𑀟𑁆𑀟𑀺𑀓𑀸𑀬 𑀤𑀸𑀲𑀺𑀬𑀸 𑀤𑁂𑀣𑀸’’𑀢𑀺 𑀢𑁂𑀲𑀁𑀬𑁂𑀯 𑀳𑀢𑁆𑀣𑁂 𑀧𑀳𑀺𑀡𑀺. 𑀲𑀸 𑀓𑀫𑁆𑀩𑀮𑀁 𑀕𑀳𑁂𑀢𑁆𑀯𑀸 𑀭𑁄𑀤𑀫𑀸𑀦𑀸 𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀫𑀁, 𑀲𑀸𑀫𑀺, 𑀅𑀧𑀭𑀸𑀥𑁂 𑀲𑀢𑀺 𑀧𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀓𑀲𑁆𑀫𑀸 𑀫𑁂 𑀏𑀯𑀭𑀽𑀧𑀁 𑀣𑀽𑀮𑀓𑀫𑁆𑀩𑀮𑀁 𑀧𑀳𑀺𑀡𑀺𑀢𑁆𑀣, 𑀓𑀣𑀸𑀳𑀁 𑀇𑀫𑀁 𑀦𑀺𑀯𑀸𑀲𑁂𑀲𑁆𑀲𑀸𑀫𑀺 𑀯𑀸 𑀧𑀸𑀭𑀼𑀧𑀺𑀲𑁆𑀲𑀸𑀫𑀺 𑀯𑀸’’𑀢𑀺. 𑀦𑀸𑀳𑀁 𑀢𑀯 𑀏𑀢𑀤𑀢𑁆𑀣𑀸𑀬 𑀧𑀳𑀺𑀡𑀺𑀁, 𑀏𑀢𑀁 𑀧𑀦 𑀧𑀮𑀺𑀯𑁂𑀞𑁂𑀢𑁆𑀯𑀸 𑀢𑀯 𑀲𑀬𑀦𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀦𑀓𑀸𑀮𑁂 𑀕𑀦𑁆𑀥𑁄𑀤𑀓𑁂𑀦 𑀥𑁄𑀢𑀸𑀦𑀁 𑀧𑀸𑀤𑀸𑀦𑀁 𑀧𑀼𑀜𑁆𑀙𑀦𑀢𑁆𑀣𑀸𑀬 𑀢𑁂 𑀧𑀳𑀺𑀡𑀺𑀁, 𑀓𑀺𑀁 𑀏𑀢𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀲𑀻𑀢𑀺. 𑀲𑀸 ‘‘𑀏𑀢𑀁 𑀧𑀦 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀢𑁂 𑀘 𑀧𑀼𑀭𑀺𑀲𑀸 𑀢𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀢𑀸𑀢𑀸, 𑀤𑀺𑀝𑁆𑀞𑀁 𑀯𑁄 𑀲𑁂𑀝𑁆𑀞𑀺𑀓𑀼𑀮’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀲𑀸𑀫𑀺, 𑀓𑀺𑀁 𑀢𑀼𑀫𑁆𑀳𑀸𑀓𑀁 𑀅𑀢𑁆𑀣𑀺, 𑀭𑀸𑀚𑀕𑀳𑀦𑀕𑀭𑁂 𑀚𑁄𑀢𑀺𑀓𑀲𑁂𑀝𑁆𑀞𑀺𑀲𑁆𑀲 𑀏𑀯𑀭𑀽𑀧𑀸 𑀦𑀸𑀫 𑀲𑀫𑁆𑀧𑀢𑁆𑀢𑀻’’𑀢𑀺 𑀲𑀩𑁆𑀩𑀁 𑀕𑁂𑀳𑀲𑀫𑁆𑀧𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀁𑀲𑀼. 𑀲𑁂𑀝𑁆𑀞𑀺 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑁄 ‘‘𑀇𑀤𑀸𑀦𑀺 𑀧𑀩𑁆𑀩𑀚𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀧𑀩𑁆𑀩𑀚𑀺𑀢𑀼𑀓𑀸𑀫𑁄𑀫𑁆𑀳𑀺, 𑀤𑁂𑀯𑀸’’𑀢𑀺 𑀆𑀳. 𑀲𑀸𑀥𑀼, 𑀫𑀳𑀸𑀲𑁂𑀝𑁆𑀞𑀺, 𑀧𑀩𑁆𑀩𑀚𑀸𑀳𑀻𑀢𑀺. 𑀲𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀤𑀡𑁆𑀟𑀁 𑀯𑀚𑀺𑀭𑀓𑀼𑀤𑁆𑀤𑀸𑀮𑀁 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸, ‘‘𑀢𑀸𑀢, 𑀧𑀘𑁆𑀙𑀺𑀫𑀕𑁂𑀳𑁂 𑀲𑀼𑀯𑀡𑁆𑀡𑀧𑀩𑁆𑀩𑀢𑀢𑁄 𑀲𑀼𑀯𑀡𑁆𑀡𑀧𑀺𑀡𑁆𑀟𑀁 𑀉𑀤𑁆𑀥𑀭𑀸𑀳𑀻’’𑀢𑀺 𑀆𑀳. 𑀲𑁄 𑀓𑀼𑀤𑁆𑀤𑀸𑀮𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀲𑀼𑀯𑀡𑁆𑀡𑀧𑀩𑁆𑀩𑀢𑀁 𑀧𑀳𑀭𑀺, 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀧𑀳𑀝𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀢𑀲𑁆𑀲 𑀳𑀢𑁆𑀣𑀢𑁄 𑀓𑀼𑀤𑁆𑀤𑀸𑀮𑀁 𑀕𑀳𑁂𑀢𑁆𑀯𑀸 𑀫𑀚𑁆𑀛𑀺𑀫𑀧𑀼𑀢𑁆𑀢𑀲𑁆𑀲 𑀳𑀢𑁆𑀣𑁂 𑀤𑀢𑁆𑀯𑀸 𑀧𑀳𑀺𑀡𑀺, 𑀢𑀲𑁆𑀲𑀧𑀺 𑀲𑀼𑀯𑀡𑁆𑀡𑀧𑀩𑁆𑀩𑀢𑀁 𑀧𑀳𑀭𑀦𑁆𑀢𑀲𑁆𑀲 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀧𑀳𑀝𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀅𑀣 𑀦𑀁 𑀓𑀦𑀺𑀝𑁆𑀞𑀧𑀼𑀢𑁆𑀢𑀲𑁆𑀲 𑀳𑀢𑁆𑀣𑁂 𑀤𑀢𑁆𑀯𑀸 𑀧𑀳𑀺𑀡𑀺, 𑀢𑀲𑁆𑀲 𑀢𑀁 𑀕𑀳𑁂𑀢𑁆𑀯𑀸 𑀧𑀳𑀭𑀦𑁆𑀢𑀲𑁆𑀲 𑀓𑁄𑀝𑁆𑀝𑁂𑀢𑁆𑀯𑀸 𑀭𑀸𑀲𑀺𑀓𑀢𑀸𑀬 𑀫𑀢𑁆𑀢𑀺𑀓𑀸𑀬 𑀧𑀳𑀝𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀅𑀣 𑀦𑀁 𑀲𑁂𑀝𑁆𑀞𑀺 ‘‘𑀏𑀳𑀺, 𑀢𑀸𑀢, 𑀅𑀮𑀁 𑀏𑀢𑁆𑀢𑀓𑁂𑀦𑀸’’𑀢𑀺 𑀯𑀢𑁆𑀯𑀸 𑀇𑀢𑀭𑁂 𑀤𑁆𑀯𑁂 𑀚𑁂𑀝𑁆𑀞𑀪𑀸𑀢𑀺𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀅𑀬𑀁 𑀲𑀼𑀯𑀡𑁆𑀡𑀧𑀩𑁆𑀩𑀢𑁄 𑀦 𑀢𑀼𑀫𑁆𑀳𑀸𑀓𑀁 𑀦𑀺𑀩𑁆𑀩𑀢𑁆𑀢𑁄, 𑀫𑀬𑁆𑀳𑀜𑁆𑀘 𑀓𑀦𑀺𑀝𑁆𑀞𑀲𑁆𑀲 𑀘 𑀦𑀺𑀩𑁆𑀩𑀢𑁆𑀢𑁄, 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀆𑀳. 𑀓𑀲𑁆𑀫𑀸 𑀧𑀦 𑀲𑁄 𑀢𑁂𑀲𑀫𑁂𑀯 𑀦𑀺𑀩𑁆𑀩𑀢𑁆𑀢𑀢𑀺, 𑀓𑀲𑁆𑀫𑀸 𑀘 𑀚𑀝𑀺𑀮𑁄 𑀚𑀸𑀢𑀓𑀸𑀮𑁂 𑀉𑀤𑀓𑁂 𑀧𑀸𑀢𑀺𑀢𑁄𑀢𑀺? 𑀅𑀢𑁆𑀢𑀦𑁄 𑀓𑀢𑀓𑀫𑁆𑀫𑁂𑀦𑁂𑀯.

𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀳𑀺 𑀘𑁂𑀢𑀺𑀬𑁂 𑀓𑀭𑀺𑀬𑀫𑀸𑀦𑁂 𑀏𑀓𑁄 𑀔𑀻𑀡𑀸𑀲𑀯𑁄 𑀘𑁂𑀢𑀺𑀬𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀑𑀮𑁄𑀓𑁂𑀢𑁆𑀯𑀸, ‘‘𑀢𑀸𑀢𑀸, 𑀓𑀲𑁆𑀫𑀸 𑀘𑁂𑀢𑀺𑀬𑀲𑁆𑀲 𑀉𑀢𑁆𑀢𑀭𑁂𑀦 𑀫𑀼𑀔𑀁 𑀦 𑀉𑀝𑁆𑀞𑀳𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀲𑀼𑀯𑀡𑁆𑀡𑀁 𑀦𑀧𑁆𑀧𑀳𑁄𑀢𑀻’’𑀢𑀺 𑀆𑀳𑀁𑀲𑀼. 𑀅𑀳𑀁 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀸𑀤𑀧𑁂𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀆𑀤𑀭𑁂𑀦 𑀓𑀫𑁆𑀫𑀁 𑀓𑀭𑁄𑀣𑀸𑀢𑀺. 𑀲𑁄 𑀏𑀯𑀁 𑀯𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸, ‘‘𑀅𑀫𑁆𑀫𑀸, 𑀢𑀸𑀢𑀸, 𑀢𑀼𑀫𑁆𑀳𑀸𑀓𑀁 𑀘𑁂𑀢𑀺𑀬𑀲𑁆𑀲 𑀏𑀓𑀲𑁆𑀫𑀺𑀁 𑀫𑀼𑀔𑁂 𑀲𑀼𑀯𑀡𑁆𑀡𑀁 𑀦𑀧𑁆𑀧𑀳𑁄𑀢𑀺, 𑀲𑀼𑀯𑀡𑁆𑀡𑀁 𑀚𑀸𑀦𑀸𑀣𑀸’’𑀢𑀺 𑀫𑀳𑀸𑀚𑀦𑀁 𑀲𑀫𑀸𑀤𑀧𑁂𑀦𑁆𑀢𑁄 𑀲𑀼𑀯𑀡𑁆𑀡𑀓𑀸𑀭𑀓𑀼𑀮𑀁 𑀅𑀕𑀫𑀸𑀲𑀺. 𑀲𑀼𑀯𑀡𑁆𑀡𑀓𑀸𑀭𑁄𑀧𑀺 𑀢𑀗𑁆𑀔𑀡𑁂𑀬𑁂𑀯 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀓𑀮𑀳𑀁 𑀓𑀭𑁄𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀦𑀁 𑀣𑁂𑀭𑁄 ‘‘𑀘𑁂𑀢𑀺𑀬𑁂 𑀢𑀼𑀫𑁆𑀳𑁂𑀳𑀺 𑀕𑀳𑀺𑀢𑀫𑀼𑀔𑀲𑁆𑀲 𑀲𑀼𑀯𑀡𑁆𑀡𑀁 𑀦𑀧𑁆𑀧𑀳𑁄𑀢𑀺, 𑀢𑀁 𑀚𑀸𑀦𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. 𑀲𑁄 𑀪𑀭𑀺𑀬𑀸𑀬 𑀓𑁄𑀧𑁂𑀦 ‘‘𑀢𑀯 𑀲𑀢𑁆𑀣𑀸𑀭𑀁 𑀉𑀤𑀓𑁂 𑀔𑀺𑀧𑀺𑀢𑁆𑀯𑀸 𑀕𑀘𑁆𑀙𑀸’’𑀢𑀺 𑀆𑀳. 𑀅𑀣 𑀦𑀁 𑀲𑀸 ‘‘𑀅𑀢𑀺𑀲𑀸𑀳𑀲𑀺𑀓𑀓𑀫𑁆𑀫𑀁 𑀢𑁂 𑀓𑀢𑀁, 𑀫𑀫 𑀓𑀼𑀤𑁆𑀥𑁂𑀦 𑀢𑁂 𑀅𑀳𑀫𑁂𑀯 𑀅𑀓𑁆𑀓𑁄𑀲𑀺𑀢𑀩𑁆𑀩𑀸 𑀯𑀸 𑀧𑀳𑀭𑀺𑀢𑀩𑁆𑀩𑀸 𑀯𑀸, 𑀓𑀲𑁆𑀫𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀩𑀼𑀤𑁆𑀥𑁂𑀲𑀼 𑀯𑁂𑀭𑀫𑀓𑀸𑀲𑀻’’𑀢𑀺 𑀆𑀳. 𑀲𑀼𑀯𑀡𑁆𑀡𑀓𑀸𑀭𑁄 𑀢𑀸𑀯𑀤𑁂𑀯 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀔𑀫𑀣 𑀫𑁂, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀣𑁂𑀭𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺. 𑀢𑀸𑀢, 𑀅𑀳𑀁 𑀢𑀬𑀸 𑀦 𑀓𑀺𑀜𑁆𑀘𑀺 𑀯𑀼𑀢𑁆𑀢𑁄, 𑀲𑀢𑁆𑀣𑀸𑀭𑀁 𑀔𑀫𑀸𑀧𑁂𑀳𑀻𑀢𑀺. 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀔𑀫𑀸𑀧𑁂𑀫𑀺, 𑀪𑀦𑁆𑀢𑁂𑀢𑀺. 𑀲𑀼𑀯𑀡𑁆𑀡𑀧𑀼𑀧𑁆𑀨𑀸𑀦𑀁 𑀢𑀬𑁄 𑀓𑀼𑀫𑁆𑀪𑁂 𑀓𑀢𑁆𑀯𑀸 𑀅𑀦𑁆𑀢𑁄𑀥𑀸𑀢𑀼𑀦𑀺𑀥𑀸𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀮𑁆𑀮𑀯𑀢𑁆𑀣𑁄 𑀅𑀮𑁆𑀮𑀓𑁂𑀲𑁄 𑀳𑀼𑀢𑁆𑀯𑀸 𑀔𑀫𑀸𑀧𑁂𑀳𑀺, 𑀢𑀸𑀢𑀸𑀢𑀺.

𑀲𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀲𑀼𑀯𑀡𑁆𑀡𑀧𑀼𑀧𑁆𑀨𑀸𑀦𑀺 𑀓𑀭𑁄𑀦𑁆𑀢𑁄 𑀢𑀻𑀲𑀼 𑀧𑀼𑀢𑁆𑀢𑁂𑀲𑀼 𑀚𑁂𑀝𑁆𑀞𑀧𑀼𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀏𑀳𑀺, 𑀢𑀸𑀢, 𑀅𑀳𑀁 𑀲𑀢𑁆𑀣𑀸𑀭𑀁 𑀯𑁂𑀭𑀯𑀘𑀦𑁂𑀦 𑀅𑀯𑀘𑀁, 𑀢𑀲𑁆𑀫𑀸 𑀇𑀫𑀸𑀦𑀺 𑀧𑀼𑀧𑁆𑀨𑀸𑀦𑀺 𑀓𑀢𑁆𑀯𑀸 𑀥𑀸𑀢𑀼𑀦𑀺𑀥𑀸𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀔𑀫𑀸𑀧𑁂𑀲𑁆𑀲𑀸𑀫𑀺, 𑀢𑁆𑀯𑀫𑁆𑀧𑀺 𑀔𑁄 𑀫𑁂 𑀲𑀳𑀸𑀬𑁄 𑀳𑁄𑀳𑀻’’𑀢𑀺 𑀆𑀳. 𑀲𑁄 ‘‘𑀦 𑀢𑁆𑀯𑀁 𑀫𑀬𑀸 𑀯𑁂𑀭𑀯𑀘𑀦𑀁 𑀯𑀤𑀸𑀧𑀺𑀢𑁄, 𑀢𑁆𑀯𑀁𑀬𑁂𑀯 𑀓𑀭𑁄𑀳𑀻’’𑀢𑀺 𑀓𑀸𑀢𑀼𑀁 𑀦 𑀇𑀘𑁆𑀙𑀺. 𑀫𑀚𑁆𑀛𑀺𑀫𑀧𑀼𑀢𑁆𑀢𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀢𑀣𑁂𑀯𑀸𑀳, 𑀲𑁄𑀧𑀺 𑀢𑀣𑁂𑀯 𑀯𑀢𑁆𑀯𑀸 𑀓𑀸𑀢𑀼𑀁 𑀦 𑀇𑀘𑁆𑀙𑀺. 𑀓𑀦𑀺𑀝𑁆𑀞𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀢𑀣𑁂𑀯𑀸𑀳, 𑀲𑁄 ‘‘𑀧𑀺𑀢𑀼 𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑀁 𑀦𑀸𑀫 𑀧𑀼𑀢𑁆𑀢𑀲𑁆𑀲 𑀪𑀸𑀭𑁄’’𑀢𑀺 𑀯𑀢𑁆𑀯𑀸 𑀧𑀺𑀢𑀼𑀲𑀳𑀸𑀬𑁄 𑀳𑀼𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀅𑀓𑀸𑀲𑀺. 𑀲𑀼𑀯𑀡𑁆𑀡𑀓𑀸𑀭𑁄 𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑀸𑀦𑀁 𑀧𑀼𑀧𑁆𑀨𑀸𑀦𑀁 𑀢𑀬𑁄 𑀓𑀼𑀫𑁆𑀪𑁂 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀥𑀸𑀢𑀼𑀦𑀺𑀥𑀸𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀮𑁆𑀮𑀯𑀢𑁆𑀣𑁄 𑀅𑀮𑁆𑀮𑀓𑁂𑀲𑁄 𑀲𑀢𑁆𑀣𑀸𑀭𑀁 𑀔𑀫𑀸𑀧𑁂𑀲𑀺. 𑀇𑀢𑀺 𑀲𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀚𑀸𑀢𑀓𑀸𑀮𑁂 𑀉𑀤𑀓𑁂 𑀧𑀸𑀢𑀦𑀁 𑀮𑀪𑀺. 𑀅𑀬𑀁 𑀧𑀦𑀲𑁆𑀲 𑀓𑁄𑀝𑀺𑀬𑀁 𑀞𑀺𑀢𑁄 𑀅𑀢𑁆𑀢𑀪𑀸𑀯𑁄. 𑀇𑀥𑀸𑀧𑀺 𑀢𑀲𑁆𑀲𑁂𑀯 𑀦𑀺𑀲𑁆𑀲𑀦𑁆𑀤𑁂𑀦 𑀉𑀤𑀓𑁂 𑀧𑀸𑀢𑀺𑀢𑁄. 𑀬𑁂 𑀧𑀦𑀲𑁆𑀲 𑀤𑁆𑀯𑁂 𑀚𑁂𑀝𑁆𑀞𑀪𑀸𑀢𑀺𑀓𑀸 𑀧𑀼𑀢𑁆𑀢𑀸 𑀲𑀼𑀯𑀡𑁆𑀡𑀧𑀼𑀧𑁆𑀨𑀸𑀦𑀁 𑀓𑀭𑀡𑀓𑀸𑀮𑁂 𑀲𑀳𑀸𑀬𑀸 𑀪𑀯𑀺𑀢𑀼𑀁 𑀦 𑀇𑀘𑁆𑀙𑀺𑀁𑀲𑀼, 𑀢𑁂𑀲𑀁 𑀢𑁂𑀦 𑀓𑀸𑀭𑀡𑁂𑀦 𑀲𑀼𑀯𑀡𑁆𑀡𑀧𑀩𑁆𑀩𑀢𑁄 𑀦 𑀦𑀺𑀩𑁆𑀩𑀢𑁆𑀢𑀺, 𑀚𑀝𑀺𑀮𑀲𑁆𑀲 𑀘𑁂𑀯 𑀓𑀦𑀺𑀝𑁆𑀞𑀧𑀼𑀢𑁆𑀢𑀲𑁆𑀲 𑀘 𑀏𑀓𑀢𑁄 𑀓𑀢𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀺. 𑀇𑀢𑀺 𑀲𑁄 𑀧𑀼𑀢𑁆𑀢𑁂 𑀅𑀦𑀼𑀲𑀸𑀲𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀢𑀺𑀧𑀸𑀳𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑀢𑁆𑀣𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀢𑀲𑁆𑀲 𑀧𑀼𑀢𑁆𑀢𑀸𑀦𑀁 𑀕𑁂𑀳𑀤𑁆𑀯𑀸𑀭𑀁 𑀅𑀕𑀫𑀸𑀲𑀺, 𑀢𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀟𑁆𑀠𑀫𑀸𑀲𑀁 𑀪𑀺𑀓𑁆𑀔𑀸𑀤𑀸𑀦𑀁 𑀅𑀤𑀁𑀲𑀼.

𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀅𑀚𑁆𑀚𑀸𑀧𑀺 𑀢𑁂, 𑀆𑀯𑀼𑀲𑁄 𑀚𑀝𑀺𑀮, 𑀅𑀲𑀻𑀢𑀺𑀳𑀢𑁆𑀣𑁂 𑀲𑀼𑀯𑀡𑁆𑀡𑀧𑀩𑁆𑀩𑀢𑁂 𑀘 𑀧𑀼𑀢𑁆𑀢𑁂𑀲𑀼 𑀘 𑀢𑀡𑁆𑀳𑀸 𑀅𑀢𑁆𑀣𑀻’’𑀢𑀺. ‘‘𑀦 𑀫𑁂, 𑀆𑀯𑀼𑀲𑁄, 𑀏𑀢𑁂𑀲𑀼 𑀢𑀡𑁆𑀳𑀸 𑀯𑀸 𑀫𑀸𑀦𑁄 𑀯𑀸 𑀅𑀢𑁆𑀣𑀻’’𑀢𑀺. 𑀢𑁂 ‘‘𑀅𑀬𑀁 𑀚𑀝𑀺𑀮𑀢𑁆𑀣𑁂𑀭𑁄 𑀅𑀪𑀽𑀢𑀁 𑀯𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀻’’𑀢𑀺 𑀯𑀤𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑀲𑁆𑀲 𑀢𑁂𑀲𑀼 𑀢𑀡𑁆𑀳𑀸 𑀯𑀸 𑀫𑀸𑀦𑁄 𑀯𑀸 𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁧𑁬. ‘‘𑀬𑁄𑀥 𑀢𑀡𑁆𑀳𑀁 𑀧𑀳𑀦𑁆𑀢𑁆𑀯𑀸𑀦, 𑀅𑀦𑀸𑀕𑀸𑀭𑁄 𑀧𑀭𑀺𑀩𑁆𑀩𑀚𑁂;

𑀢𑀡𑁆𑀳𑀸𑀪𑀯𑀧𑀭𑀺𑀓𑁆𑀔𑀻𑀡𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀇𑀥 𑀮𑁄𑀓𑁂 𑀙𑀤𑁆𑀯𑀸𑀭𑀺𑀓𑀁 𑀢𑀡𑁆𑀳𑀁 𑀯𑀸 𑀫𑀸𑀦𑀁 𑀯𑀸 𑀚𑀳𑀺𑀢𑁆𑀯𑀸 𑀖𑀭𑀸𑀯𑀸𑀲𑁂𑀦 𑀅𑀦𑀢𑁆𑀣𑀺𑀓𑁄 𑀅𑀦𑀸𑀕𑀸𑀭𑁄 𑀳𑀼𑀢𑁆𑀯𑀸 𑀧𑀭𑀺𑀩𑁆𑀩𑀚𑀢𑀺, 𑀢𑀡𑁆𑀳𑀸𑀬 𑀘𑁂𑀯 𑀪𑀯𑀲𑁆𑀲 𑀘 𑀧𑀭𑀺𑀓𑁆𑀔𑀻𑀡𑀢𑁆𑀢𑀸 𑀢𑀡𑁆𑀳𑀸𑀪𑀯𑀧𑀭𑀺𑀓𑁆𑀔𑀻𑀡𑀁 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀚𑀝𑀺𑀮𑀢𑁆𑀣𑁂𑀭𑀯𑀢𑁆𑀣𑀼 𑀢𑁂𑀢𑁆𑀢𑀺𑀁𑀲𑀢𑀺𑀫𑀁.