𑁩𑁪. 𑀚𑁄𑀢𑀺𑀓𑀢𑁆𑀣𑁂𑀭𑀯𑀢𑁆𑀣𑀼

𑀬𑁄𑀥 𑀢𑀡𑁆𑀳𑀦𑁆𑀢𑀺 𑀧𑀼𑀦 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀚𑁄𑀢𑀺𑀓𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀅𑀚𑀸𑀢𑀲𑀢𑁆𑀢𑀼𑀓𑀼𑀫𑀸𑀭𑁄 𑀳𑀺 𑀤𑁂𑀯𑀤𑀢𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀧𑀺𑀢𑀭𑀁 𑀖𑀸𑀢𑁂𑀢𑁆𑀯𑀸 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑁄 ‘‘𑀚𑁄𑀢𑀺𑀓𑀲𑁂𑀝𑁆𑀞𑀺𑀲𑁆𑀲 𑀫𑀳𑀸𑀧𑀸𑀲𑀸𑀤𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀬𑀼𑀤𑁆𑀥𑀲𑀚𑁆𑀚𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀡𑀺𑀧𑀸𑀓𑀸𑀭𑁂 𑀲𑀧𑀭𑀺𑀯𑀸𑀭𑀲𑁆𑀲 𑀅𑀢𑁆𑀢𑀦𑁄 𑀙𑀸𑀬𑀁 𑀤𑀺𑀲𑁆𑀯𑀸 ‘‘𑀕𑀳𑀧𑀢𑀺𑀓𑁄 𑀬𑀼𑀤𑁆𑀥𑀲𑀚𑁆𑀚𑁄 𑀳𑀼𑀢𑁆𑀯𑀸 𑀩𑀮𑀁 𑀆𑀤𑀸𑀬 𑀦𑀺𑀓𑁆𑀔𑀦𑁆𑀢𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀉𑀧𑀕𑀦𑁆𑀢𑀼𑀁 𑀦 𑀯𑀺𑀲𑀳𑀺. 𑀲𑁂𑀝𑁆𑀞𑀺𑀧𑀺 𑀢𑀁 𑀤𑀺𑀯𑀲𑀁 𑀉𑀧𑁄𑀲𑀣𑀺𑀓𑁄 𑀳𑀼𑀢𑁆𑀯𑀸 𑀧𑀸𑀢𑁄𑀯 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀧𑀞𑀫𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀆𑀭𑀓𑁆𑀔𑀁 𑀕𑀳𑁂𑀢𑁆𑀯𑀸 𑀞𑀺𑀢𑁄 𑀧𑀦 𑀬𑀫𑀓𑁄𑀴𑀺 𑀦𑀸𑀫 𑀬𑀓𑁆𑀔𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀳𑀁 𑀕𑀘𑁆𑀙𑀲𑀻’’𑀢𑀺 𑀲𑀧𑀭𑀺𑀯𑀸𑀭𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀤𑀺𑀲𑀸𑀯𑀺𑀤𑀺𑀲𑀸𑀲𑀼 𑀅𑀦𑀼𑀩𑀦𑁆𑀥𑀺. 𑀭𑀸𑀚𑀸 𑀯𑀺𑀳𑀸𑀭𑀫𑁂𑀯 𑀅𑀕𑀫𑀸𑀲𑀺.

𑀅𑀣 𑀦𑀁 𑀲𑁂𑀝𑁆𑀞𑀺 𑀤𑀺𑀲𑁆𑀯𑀸𑀯 ‘‘𑀓𑀺𑀁, 𑀤𑁂𑀯𑀸’’𑀢𑀺 𑀯𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀅𑀝𑁆𑀞𑀸𑀲𑀺. 𑀕𑀳𑀧𑀢𑀺, 𑀓𑀺𑀁 𑀢𑁆𑀯𑀁 𑀢𑀯 𑀧𑀼𑀭𑀺𑀲𑁂 ‘‘𑀫𑀬𑀸 𑀲𑀤𑁆𑀥𑀺𑀁 𑀬𑀼𑀚𑁆𑀛𑀣𑀸’’𑀢𑀺 𑀆𑀡𑀸𑀧𑁂𑀢𑁆𑀯𑀸 𑀇𑀥𑀸𑀕𑀫𑁆𑀫 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀯𑀺𑀬 𑀦𑀺𑀲𑀺𑀦𑁆𑀦𑁄𑀢𑀺. 𑀓𑀺𑀁 𑀧𑀦 𑀤𑁂𑀯𑁄 𑀫𑀫 𑀕𑁂𑀳𑀁 𑀕𑀡𑁆𑀳𑀺𑀢𑀼𑀁 𑀕𑀢𑁄𑀢𑀺? 𑀆𑀫, 𑀕𑀢𑁄𑀫𑁆𑀳𑀻𑀢𑀺. 𑀫𑀫 𑀅𑀦𑀺𑀘𑁆𑀙𑀸𑀬 𑀫𑀫 𑀕𑁂𑀳𑀁 𑀕𑀡𑁆𑀳𑀺𑀢𑀼𑀁 𑀭𑀸𑀚𑀲𑀳𑀲𑁆𑀲𑀫𑁆𑀧𑀺 𑀦 𑀲𑀓𑁆𑀓𑁄𑀢𑀺, 𑀤𑁂𑀯𑀸𑀢𑀺. 𑀲𑁄 ‘‘𑀓𑀺𑀁 𑀧𑀦 𑀢𑁆𑀯𑀁 𑀭𑀸𑀚𑀸 𑀪𑀯𑀺𑀲𑁆𑀲𑀲𑀻’’𑀢𑀺 𑀓𑀼𑀚𑁆𑀛𑀺. 𑀦𑀸𑀳𑀁 𑀭𑀸𑀚𑀸, 𑀫𑀫 𑀲𑀦𑁆𑀢𑀓𑀁 𑀧𑀦 𑀤𑀲𑀺𑀓𑀲𑀼𑀢𑁆𑀢𑀫𑁆𑀧𑀺 𑀫𑀫 𑀅𑀦𑀺𑀘𑁆𑀙𑀸𑀬 𑀭𑀸𑀚𑀽𑀳𑀺 𑀯𑀸 𑀘𑁄𑀭𑁂𑀳𑀺 𑀯𑀸 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺. 𑀓𑀺𑀁 𑀧𑀦𑀸𑀳𑀁 𑀢𑀯 𑀭𑀼𑀘𑀺𑀬𑀸 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺? 𑀢𑁂𑀦 𑀳𑀺, 𑀤𑁂𑀯, 𑀇𑀫𑀸 𑀫𑁂 𑀤𑀲𑀲𑀼 𑀅𑀗𑁆𑀕𑀼𑀮𑀻𑀲𑀼 𑀯𑀻𑀲𑀢𑀺 𑀫𑀼𑀤𑁆𑀤𑀺𑀓𑀸, 𑀇𑀫𑀸𑀳𑀁 𑀢𑀼𑀫𑁆𑀳𑀸𑀓𑀁 𑀦 𑀤𑁂𑀫𑀺. 𑀲𑀘𑁂 𑀲𑀓𑁆𑀓𑁄𑀣, 𑀕𑀡𑁆𑀳𑀣𑀸𑀢𑀺. 𑀲𑁄 𑀧𑀦 𑀭𑀸𑀚𑀸 𑀪𑀽𑀫𑀺𑀬𑀁 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀉𑀮𑁆𑀮𑀗𑁆𑀖𑀦𑁆𑀢𑁄 𑀅𑀝𑁆𑀞𑀸𑀭𑀲𑀳𑀢𑁆𑀣𑀁 𑀞𑀸𑀦𑀁 𑀅𑀪𑀺𑀭𑀼𑀳𑀢𑀺, 𑀞𑀢𑁆𑀯𑀸 𑀉𑀮𑁆𑀮𑀗𑁆𑀖𑀦𑁆𑀢𑁄 𑀅𑀲𑀻𑀢𑀺𑀳𑀢𑁆𑀣𑀁 𑀞𑀸𑀦𑀁 𑀅𑀪𑀺𑀭𑀼𑀳𑀢𑀺. 𑀏𑀯𑀁𑀫𑀳𑀸𑀩𑀮𑁄 𑀲𑀫𑀸𑀦𑁄𑀧𑀺 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀏𑀓𑀁 𑀫𑀼𑀤𑁆𑀤𑀺𑀓𑀫𑁆𑀧𑀺 𑀓𑀟𑁆𑀠𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀦𑀁 𑀲𑁂𑀝𑁆𑀞𑀺 ‘‘𑀲𑀸𑀝𑀓𑀁 𑀧𑀢𑁆𑀣𑀭, 𑀤𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀗𑁆𑀕𑀼𑀮𑀺𑀬𑁄 𑀉𑀚𑀼𑀓𑀸 𑀅𑀓𑀸𑀲𑀺, 𑀯𑀻𑀲𑀢𑀺𑀧𑀺 𑀫𑀼𑀤𑁆𑀤𑀺𑀓𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀅𑀣 𑀦𑀁 𑀲𑁂𑀝𑁆𑀞𑀺 ‘‘𑀏𑀯𑀁, 𑀤𑁂𑀯, 𑀫𑀫 𑀲𑀦𑁆𑀢𑀓𑀁 𑀫𑀫 𑀅𑀦𑀺𑀘𑁆𑀙𑀸𑀬 𑀦 𑀲𑀓𑁆𑀓𑀸 𑀕𑀡𑁆𑀳𑀺𑀢𑀼’’𑀦𑁆𑀢𑀺 𑀯𑀢𑁆𑀯𑀸 𑀭𑀜𑁆𑀜𑁄 𑀓𑀺𑀭𑀺𑀬𑀸𑀬 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑁄 ‘‘𑀧𑀩𑁆𑀩𑀚𑀺𑀢𑀼𑀁 𑀫𑁂 𑀅𑀦𑀼𑀚𑀸𑀦, 𑀤𑁂𑀯𑀸’’𑀢𑀺 𑀆𑀳. 𑀲𑁄 ‘‘𑀇𑀫𑀲𑁆𑀫𑀺𑀁 𑀧𑀩𑁆𑀩𑀚𑀺𑀢𑁂 𑀲𑀼𑀔𑀁 𑀧𑀸𑀲𑀸𑀤𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀯𑀘𑀦𑁂𑀦𑁂𑀯 ‘‘𑀢𑁆𑀯𑀁 𑀧𑀩𑁆𑀩𑀚𑀸𑀳𑀻’’𑀢𑀺 𑀆𑀳. 𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀚𑁄𑀢𑀺𑀓𑀢𑁆𑀣𑁂𑀭𑁄 𑀦𑀸𑀫 𑀅𑀳𑁄𑀲𑀺. 𑀢𑀲𑁆𑀲 𑀅𑀭𑀳𑀢𑁆𑀢𑀁 𑀧𑀢𑁆𑀢𑀓𑁆𑀔𑀡𑁂𑀬𑁂𑀯 𑀲𑀩𑁆𑀩𑀸𑀧𑀺 𑀲𑀸 𑀲𑀫𑁆𑀧𑀢𑁆𑀢𑀺 𑀅𑀦𑁆𑀢𑀭𑀥𑀸𑀬𑀺, 𑀢𑀫𑁆𑀧𑀺𑀲𑁆𑀲 𑀲𑀢𑀼𑀮𑀓𑀸𑀬𑀺𑀁 𑀦𑀸𑀫 𑀪𑀭𑀺𑀬𑀁 𑀤𑁂𑀯𑀢𑀸 𑀉𑀢𑁆𑀢𑀭𑀓𑀼𑀭𑀼𑀫𑁂𑀯 𑀦𑀬𑀺𑀁𑀲𑀼.

𑀅𑀣𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀢𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀆𑀯𑀼𑀲𑁄 𑀚𑁄𑀢𑀺𑀓, 𑀢𑀲𑁆𑀫𑀺𑀁 𑀧𑀦 𑀢𑁂 𑀧𑀸𑀲𑀸𑀤𑁂 𑀯𑀸 𑀇𑀢𑁆𑀣𑀺𑀬𑀸 𑀯𑀸 𑀢𑀡𑁆𑀳𑀸 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦𑀢𑁆𑀣𑀸𑀯𑀼𑀲𑁄’’𑀢𑀺 𑀯𑀼𑀢𑁆𑀢𑁂 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀅𑀪𑀽𑀢𑀁 𑀯𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀻’’𑀢𑀺. 𑀲𑀢𑁆𑀣𑀸 ‘‘𑀦𑀢𑁆𑀣𑁂𑀯, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑀲𑁆𑀲 𑀢𑀲𑁆𑀫𑀺𑀁 𑀢𑀡𑁆𑀳𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁧𑁬. ‘‘𑀬𑁄𑀥 𑀢𑀡𑁆𑀳𑀁 𑀧𑀳𑀦𑁆𑀢𑁆𑀯𑀸𑀦, 𑀅𑀦𑀸𑀕𑀸𑀭𑁄 𑀧𑀭𑀺𑀩𑁆𑀩𑀚𑁂;

𑀢𑀡𑁆𑀳𑀸𑀪𑀯𑀧𑀭𑀺𑀓𑁆𑀔𑀻𑀡𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬𑀢𑁆𑀣𑁄 𑀳𑁂𑀝𑁆𑀞𑀸 𑀚𑀝𑀺𑀮𑀢𑁆𑀣𑁂𑀭𑀯𑀢𑁆𑀣𑀼𑀫𑁆𑀳𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀚𑁄𑀢𑀺𑀓𑀢𑁆𑀣𑁂𑀭𑀯𑀢𑁆𑀣𑀼 𑀘𑀢𑀼𑀢𑀺𑀁𑀲𑀢𑀺𑀫𑀁.