𑁩𑁨. 𑀲𑀼𑀦𑁆𑀤𑀭𑀲𑀫𑀼𑀤𑁆𑀤𑀢𑁆𑀣𑁂𑀭𑀯𑀢𑁆𑀣𑀼

𑀬𑁄𑀥 𑀓𑀸𑀫𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀼𑀦𑁆𑀤𑀭𑀲𑀫𑀼𑀤𑁆𑀤𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑁄 𑀓𑀼𑀮𑀧𑀼𑀢𑁆𑀢𑁄 𑀲𑀼𑀦𑁆𑀤𑀭𑀲𑀫𑀼𑀤𑁆𑀤𑀓𑀼𑀫𑀸𑀭𑁄 𑀦𑀸𑀫 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀯𑀺𑀪𑀯𑁂 𑀫𑀳𑀸𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄. 𑀲𑁄 𑀏𑀓𑀤𑀺𑀯𑀲𑀁 𑀧𑀘𑁆𑀙𑀸𑀪𑀢𑁆𑀢𑀁 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀁 𑀫𑀳𑀸𑀚𑀦𑀁 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀚𑁂𑀢𑀯𑀦𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀳𑀁 𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀳𑀫𑁆𑀧𑀺 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑀲𑁆𑀲 𑀆𑀲𑀬𑀁 𑀯𑀺𑀤𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺. 𑀲𑁄 ‘‘𑀦 𑀲𑀓𑁆𑀓𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑁂𑀦 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼’’𑀦𑁆𑀢𑀺 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸𑀬 𑀚𑀸𑀢𑀼𑀲𑁆𑀲𑀸𑀳𑁄 𑀧𑀭𑀺𑀲𑀸𑀬 𑀧𑀓𑁆𑀓𑀦𑁆𑀢𑀸𑀬 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 ‘‘𑀫𑀸𑀢𑀸𑀧𑀺𑀢𑀽𑀳𑀺 𑀅𑀦𑀦𑀼𑀜𑁆𑀜𑀸𑀢𑀁 𑀢𑀣𑀸𑀕𑀢𑀸 𑀦 𑀧𑀩𑁆𑀩𑀸𑀚𑁂𑀦𑁆𑀢𑀻’’𑀢𑀺 𑀲𑀼𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀭𑀝𑁆𑀞𑀧𑀸𑀮𑀓𑀼𑀮𑀧𑀼𑀢𑁆𑀢𑀸𑀤𑀬𑁄 𑀯𑀺𑀬 𑀫𑀳𑀦𑁆𑀢𑁂𑀦 𑀯𑀸𑀬𑀸𑀫𑁂𑀦 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 ‘‘𑀓𑀺𑀁 𑀫𑁂 𑀇𑀥 𑀯𑀸𑀲𑁂𑀦𑀸’’𑀢𑀺 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀯𑀻𑀢𑀺𑀦𑀸𑀫𑁂𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀲𑀸𑀯𑀢𑁆𑀣𑀺𑀬𑀁 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀏𑀓𑀲𑁆𑀫𑀺𑀁 𑀙𑀡𑀤𑀺𑀯𑀲𑁂 𑀫𑀳𑀦𑁆𑀢𑁂𑀦 𑀲𑀺𑀭𑀺𑀲𑁄𑀪𑀕𑁆𑀕𑁂𑀦 𑀢𑀲𑁆𑀲 𑀲𑀳𑀸𑀬𑀓𑀓𑀼𑀫𑀸𑀭𑀓𑁂 𑀓𑀻𑀴𑀫𑀸𑀦𑁂 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀲𑁆𑀲 𑀇𑀤𑀁 𑀤𑀼𑀮𑁆𑀮𑀪𑀁 𑀚𑀸𑀢’’𑀦𑁆𑀢𑀺 𑀧𑀭𑀺𑀤𑁂𑀯𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀏𑀓𑀸 𑀕𑀡𑀺𑀓𑀸 𑀢𑀁 𑀓𑀼𑀮𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀫𑀸𑀢𑀭𑀁 𑀭𑁄𑀤𑀫𑀸𑀦𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀫, 𑀓𑀺𑀁 𑀓𑀸𑀭𑀡𑀸 𑀭𑁄𑀤𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀧𑀼𑀢𑁆𑀢𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀭𑁄𑀤𑀸𑀫𑀻’’𑀢𑀺. ‘‘𑀓𑀳𑀁 𑀧𑀦 𑀲𑁄, 𑀅𑀫𑁆𑀫𑀸’’𑀢𑀺? ‘‘𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁄’’𑀢𑀺. ‘‘𑀓𑀺𑀁 𑀉𑀧𑁆𑀧𑀩𑁆𑀩𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺? ‘‘𑀯𑀝𑁆𑀝𑀢𑀺, 𑀦 𑀧𑀦 𑀇𑀘𑁆𑀙𑀢𑀺, 𑀇𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀸𑀚𑀕𑀳𑀁 𑀕𑀢𑁄’’𑀢𑀺. ‘‘𑀲𑀘𑀸𑀳𑀁 𑀢𑀁 𑀉𑀧𑁆𑀧𑀩𑁆𑀩𑀸𑀚𑁂𑀬𑁆𑀬𑀁, 𑀓𑀺𑀁 𑀫𑁂 𑀓𑀭𑁂𑀬𑁆𑀬𑀸𑀣𑀸’’𑀢𑀺? ‘‘𑀇𑀫𑀲𑁆𑀲 𑀢𑁂 𑀓𑀼𑀮𑀲𑁆𑀲 𑀓𑀼𑀝𑀼𑀫𑁆𑀩𑀲𑀸𑀫𑀺𑀦𑀺𑀁 𑀓𑀭𑁂𑀬𑁆𑀬𑀸𑀫𑀸’’𑀢𑀺. 𑀢𑁂𑀦 𑀳𑀺 𑀫𑁂 𑀧𑀭𑀺𑀩𑁆𑀩𑀬𑀁 𑀤𑁂𑀣𑀸𑀢𑀺 𑀧𑀭𑀺𑀩𑁆𑀩𑀬𑀁 𑀕𑀳𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀺𑀡𑁆𑀟𑀸𑀬 𑀘𑀭𑀡𑀯𑀻𑀣𑀺𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀢𑁆𑀣𑁂𑀓𑀁 𑀦𑀺𑀯𑀸𑀲𑀕𑁂𑀳𑀁 𑀕𑀳𑁂𑀢𑁆𑀯𑀸 𑀧𑀸𑀢𑁄𑀯 𑀧𑀡𑀻𑀢𑀁 𑀆𑀳𑀸𑀭𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀣𑁂𑀭𑀲𑁆𑀲 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀓𑀸𑀮𑁂 𑀪𑀺𑀓𑁆𑀔𑀁 𑀤𑀢𑁆𑀯𑀸 𑀓𑀢𑀺𑀧𑀸𑀳𑀘𑁆𑀘𑀬𑁂𑀦, ‘‘𑀪𑀦𑁆𑀢𑁂, 𑀇𑀥𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑁄𑀣𑀸’’𑀢𑀺 𑀧𑀢𑁆𑀢𑀁 𑀕𑀡𑁆𑀳𑀺. 𑀲𑁄 𑀧𑀢𑁆𑀢𑀫𑀤𑀸𑀲𑀺.

𑀅𑀣 𑀦𑀁 𑀧𑀡𑀻𑀢𑁂𑀦 𑀆𑀳𑀸𑀭𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀥𑁂𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁 𑀨𑀸𑀲𑀼𑀓’’𑀦𑁆𑀢𑀺 𑀯𑀢𑁆𑀯𑀸 𑀓𑀢𑀺𑀧𑀸𑀳𑀁 𑀆𑀮𑀺𑀦𑁆𑀤𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀤𑀸𑀭𑀓𑁂 𑀧𑀽𑀯𑁂𑀳𑀺 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 ‘‘𑀏𑀣 𑀢𑀼𑀫𑁆𑀳𑁂 𑀣𑁂𑀭𑀲𑁆𑀲 𑀆𑀕𑀢𑀓𑀸𑀮𑁂 𑀫𑀬𑀺 𑀯𑀸𑀭𑁂𑀦𑁆𑀢𑀺𑀬𑀸𑀧𑀺 𑀇𑀥𑀸𑀕𑀦𑁆𑀢𑁆𑀯𑀸 𑀭𑀚𑀁 𑀉𑀝𑁆𑀞𑀸𑀧𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀢𑁂 𑀧𑀼𑀦𑀤𑀺𑀯𑀲𑁂 𑀣𑁂𑀭𑀲𑁆𑀲 𑀪𑁄𑀚𑀦𑀯𑁂𑀮𑀸𑀬 𑀢𑀸𑀬 𑀯𑀸𑀭𑀺𑀬𑀫𑀸𑀦𑀸𑀧𑀺 𑀭𑀚𑀁 𑀉𑀝𑁆𑀞𑀸𑀧𑁂𑀲𑀼𑀁. 𑀲𑀸 𑀧𑀼𑀦𑀤𑀺𑀯𑀲𑁂, ‘‘𑀪𑀦𑁆𑀢𑁂, 𑀤𑀸𑀭𑀓𑀸 𑀯𑀸𑀭𑀺𑀬𑀫𑀸𑀦𑀸𑀧𑀺 𑀫𑀫 𑀯𑀘𑀦𑀁 𑀅𑀲𑀼𑀡𑀺𑀢𑁆𑀯𑀸 𑀇𑀥 𑀭𑀚𑀁 𑀉𑀝𑁆𑀞𑀸𑀧𑁂𑀦𑁆𑀢𑀺, 𑀅𑀦𑁆𑀢𑁄𑀕𑁂𑀳𑁂 𑀦𑀺𑀲𑀻𑀤𑀣𑀸’’𑀢𑀺 𑀅𑀦𑁆𑀢𑁄 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀓𑀢𑀺𑀧𑀸𑀳𑀁 𑀪𑁄𑀚𑁂𑀲𑀺. 𑀧𑀼𑀦 𑀤𑀸𑀭𑀓𑁂 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀫𑀬𑀸 𑀯𑀸𑀭𑀺𑀬𑀫𑀸𑀦𑀸𑀧𑀺 𑀣𑁂𑀭𑀲𑁆𑀲 𑀪𑁄𑀚𑀦𑀓𑀸𑀮𑁂 𑀫𑀳𑀸𑀲𑀤𑁆𑀤𑀁 𑀓𑀭𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀢𑁂 𑀢𑀣𑀸 𑀓𑀭𑀺𑀁𑀲𑀼. 𑀲𑀸 𑀧𑀼𑀦𑀤𑀺𑀯𑀲𑁂, ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀢𑀺𑀯𑀺𑀬 𑀫𑀳𑀸𑀲𑀤𑁆𑀤𑁄 𑀳𑁄𑀢𑀺, 𑀤𑀸𑀭𑀓𑀸 𑀫𑀬𑀸 𑀯𑀸𑀭𑀺𑀬𑀫𑀸𑀦𑀸𑀧𑀺 𑀯𑀘𑀦𑀁 𑀦 𑀕𑀡𑁆𑀳𑀦𑁆𑀢𑀺, 𑀉𑀧𑀭𑀺𑀧𑀸𑀲𑀸𑀤𑁂𑀬𑁂𑀯 𑀦𑀺𑀲𑀻𑀤𑀣𑀸’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 𑀅𑀥𑀺𑀯𑀸𑀲𑀺𑀢𑁂 𑀣𑁂𑀭𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀦𑁆𑀢𑀻 𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀫𑀸𑀦𑀸𑀯 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺. 𑀣𑁂𑀭𑁄 𑀉𑀓𑁆𑀓𑀝𑁆𑀞𑀲𑀧𑀤𑀸𑀦𑀘𑀸𑀭𑀺𑀓𑁄 𑀲𑀫𑀸𑀦𑁄𑀧𑀺 𑀭𑀲𑀢𑀡𑁆𑀳𑀸𑀬 𑀩𑀤𑁆𑀥𑁄 𑀢𑀲𑁆𑀲𑀸 𑀯𑀘𑀦𑁂𑀦 𑀲𑀢𑁆𑀢𑀪𑀽𑀫𑀺𑀓𑀁 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺.

𑀲𑀸 𑀣𑁂𑀭𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 ‘‘𑀘𑀢𑁆𑀢𑀸𑀮𑀻𑀲𑀸𑀬 𑀔𑀮𑀼, 𑀲𑀫𑁆𑀫, 𑀧𑀼𑀡𑁆𑀡𑀫𑀼𑀔 𑀞𑀸𑀦𑁂𑀳𑀺 𑀇𑀢𑁆𑀣𑀻 𑀧𑀼𑀭𑀺𑀲𑀁 𑀅𑀘𑁆𑀘𑀸𑀯𑀤𑀢𑀺 𑀯𑀺𑀚𑀫𑁆𑀪𑀢𑀺 𑀯𑀺𑀦𑀫𑀢𑀺 𑀕𑀺𑀮𑀲𑀢𑀺 𑀯𑀺𑀮𑀚𑁆𑀚𑀢𑀺 𑀦𑀔𑁂𑀦 𑀦𑀔𑀁 𑀖𑀝𑁆𑀝𑁂𑀢𑀺, 𑀧𑀸𑀤𑁂𑀦 𑀧𑀸𑀤𑀁 𑀅𑀓𑁆𑀓𑀫𑀢𑀺, 𑀓𑀝𑁆𑀞𑁂𑀦 𑀧𑀣𑀯𑀺𑀁 𑀯𑀺𑀮𑀺𑀔𑀢𑀺, 𑀤𑀸𑀭𑀓𑀁 𑀉𑀮𑁆𑀮𑀗𑁆𑀖𑁂𑀢𑀺 𑀑𑀮𑀗𑁆𑀖𑁂𑀢𑀺, 𑀓𑀻𑀴𑀢𑀺 𑀓𑀻𑀴𑀸𑀧𑁂𑀢𑀺, 𑀘𑀼𑀫𑁆𑀩𑀢𑀺 𑀘𑀼𑀫𑁆𑀩𑀸𑀧𑁂𑀢𑀺, 𑀪𑀼𑀜𑁆𑀚𑀢𑀺 𑀪𑀼𑀜𑁆𑀚𑀸𑀧𑁂𑀢𑀺, 𑀤𑀤𑀸𑀢𑀺 𑀆𑀬𑀸𑀘𑀢𑀺, 𑀓𑀢𑀫𑀦𑀼𑀓𑀭𑁄𑀢𑀺, 𑀉𑀘𑁆𑀘𑀁 𑀪𑀸𑀲𑀢𑀺, 𑀦𑀻𑀘𑀁 𑀪𑀸𑀲𑀢𑀺, 𑀅𑀯𑀺𑀘𑁆𑀘𑀁 𑀪𑀸𑀲𑀢𑀺, 𑀯𑀺𑀯𑀺𑀘𑁆𑀘𑀁 𑀪𑀸𑀲𑀢𑀺, 𑀦𑀘𑁆𑀘𑁂𑀦 𑀕𑀻𑀢𑁂𑀦 𑀯𑀸𑀤𑀺𑀢𑁂𑀦 𑀭𑁄𑀤𑀺𑀢𑁂𑀦 𑀯𑀺𑀮𑀲𑀺𑀢𑁂𑀦 𑀯𑀺𑀪𑀽𑀲𑀺𑀢𑁂𑀦 𑀚𑀕𑁆𑀖𑀢𑀺, 𑀧𑁂𑀓𑁆𑀔𑀢𑀺, 𑀓𑀝𑀺𑀁 𑀘𑀸𑀮𑁂𑀢𑀺, 𑀕𑀼𑀬𑁆𑀳𑀪𑀡𑁆𑀟𑀓𑀁 𑀘𑀸𑀮𑁂𑀢𑀺, 𑀊𑀭𑀼𑀁 𑀯𑀺𑀯𑀭𑀢𑀺, 𑀊𑀭𑀼𑀁 𑀧𑀺𑀤𑀳𑀢𑀺, 𑀣𑀦𑀁 𑀤𑀲𑁆𑀲𑁂𑀢𑀺, 𑀓𑀘𑁆𑀙𑀁 𑀤𑀲𑁆𑀲𑁂𑀢𑀺, 𑀦𑀸𑀪𑀺𑀁 𑀤𑀲𑁆𑀲𑁂𑀢𑀺, 𑀅𑀓𑁆𑀔𑀺𑀁 𑀦𑀺𑀔𑀡𑀢𑀺, 𑀪𑀫𑀼𑀓𑀁 𑀉𑀓𑁆𑀔𑀺𑀧𑀢𑀺, 𑀑𑀝𑁆𑀞𑀁 𑀧𑀮𑀺𑀔𑀢𑀺, 𑀚𑀺𑀯𑁆𑀳𑀁 𑀦𑀺𑀮𑁆𑀮𑀸𑀮𑁂𑀢𑀺, 𑀤𑀼𑀲𑁆𑀲𑀁 𑀫𑀼𑀜𑁆𑀘𑀢𑀺, 𑀤𑀼𑀲𑁆𑀲𑀁 𑀩𑀦𑁆𑀥𑀢𑀺, 𑀲𑀺𑀭𑀲𑀁 𑀫𑀼𑀜𑁆𑀘𑀢𑀺, 𑀲𑀺𑀭𑀲𑀁 𑀩𑀦𑁆𑀥𑀢𑀻’’𑀢𑀺 (𑀚𑀸. 𑁨.𑁨𑁧.𑁩𑁦𑁦) 𑀏𑀯𑀁 𑀆𑀕𑀢𑀁 𑀇𑀢𑁆𑀣𑀺𑀓𑀼𑀢𑁆𑀢𑀁 𑀇𑀢𑁆𑀣𑀺𑀮𑀻𑀮𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲 𑀧𑀼𑀭𑀢𑁄 𑀞𑀺𑀢𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀮𑀢𑁆𑀢𑀓𑀓𑀢𑀸 𑀧𑀸𑀤𑀸, 𑀧𑀸𑀤𑀼𑀓𑀸𑀭𑀼𑀬𑁆𑀳 𑀯𑁂𑀲𑀺𑀬𑀸;

𑀢𑀼𑀯𑀫𑁆𑀧𑀺 𑀤𑀳𑀭𑁄 𑀫𑀫, 𑀅𑀳𑀫𑁆𑀧𑀺 𑀤𑀳𑀭𑀸 𑀢𑀯;

𑀉𑀪𑁄𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀚𑀺𑀡𑁆𑀡𑀸 𑀤𑀡𑁆𑀟𑀧𑀭𑀸𑀬𑀡𑀸’’𑀢𑀺. (𑀣𑁂𑀭𑀕𑀸. 𑁪𑁫𑁯, 𑁪𑁬𑁨);

𑀣𑁂𑀭𑀲𑁆𑀲 ‘‘𑀅𑀳𑁄 𑀯𑀢 𑀫𑁂 𑀪𑀸𑀭𑀺𑀬𑀁 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀓𑀢𑀓𑀫𑁆𑀫’’𑀦𑁆𑀢𑀺 𑀫𑀳𑀸𑀲𑀁𑀯𑁂𑀕𑁄 𑀉𑀤𑀧𑀸𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀢𑁆𑀣𑀸 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀫𑀢𑁆𑀣𑀓𑁂 𑀚𑁂𑀢𑀯𑀦𑁂 𑀦𑀺𑀲𑀺𑀦𑁆𑀦𑁄𑀯 𑀢𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀅𑀣 𑀦𑀁 𑀆𑀦𑀦𑁆𑀤𑀢𑁆𑀣𑁂𑀭𑁄 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀓𑁄 𑀦𑀼 𑀔𑁄 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀲𑀺𑀢𑀲𑁆𑀲 𑀧𑀸𑀢𑀼𑀓𑀫𑁆𑀫𑀸𑀬𑀸’’𑀢𑀺. 𑀆𑀦𑀦𑁆𑀤, 𑀭𑀸𑀚𑀕𑀳𑀦𑀕𑀭𑁂 𑀲𑀢𑁆𑀢𑀪𑀽𑀫𑀺𑀓𑀧𑀸𑀲𑀸𑀤𑀢𑀮𑁂 𑀲𑀼𑀦𑁆𑀤𑀭𑀲𑀫𑀼𑀤𑁆𑀤𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄 𑀕𑀡𑀺𑀓𑀸𑀬 𑀘 𑀲𑀗𑁆𑀕𑀸𑀫𑁄 𑀯𑀢𑁆𑀢𑀢𑀻𑀢𑀺. 𑀓𑀲𑁆𑀲 𑀦𑀼 𑀔𑁄, 𑀪𑀦𑁆𑀢𑁂, 𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀓𑀲𑁆𑀲 𑀧𑀭𑀸𑀚𑀬𑁄𑀢𑀺? 𑀲𑀢𑁆𑀣𑀸, ‘‘𑀆𑀦𑀦𑁆𑀤, 𑀲𑀼𑀦𑁆𑀤𑀭𑀲𑀫𑀼𑀤𑁆𑀤𑀲𑁆𑀲 𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀕𑀡𑀺𑀓𑀸𑀬 𑀧𑀭𑀸𑀚𑀬𑁄’’𑀢𑀺 𑀣𑁂𑀭𑀲𑁆𑀲 𑀚𑀬𑀁 𑀧𑀓𑀸𑀲𑁂𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑀓𑁄𑀯 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 ‘‘𑀪𑀺𑀓𑁆𑀔𑀼 𑀉𑀪𑁄𑀧𑀺 𑀓𑀸𑀫𑁂 𑀦𑀺𑀭𑀧𑁂𑀓𑁆𑀔𑁄 𑀧𑀚𑀳𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁧𑁫. ‘‘𑀬𑁄𑀥 𑀓𑀸𑀫𑁂 𑀧𑀳𑀦𑁆𑀢𑁆𑀯𑀸𑀦, 𑀅𑀦𑀸𑀕𑀸𑀭𑁄 𑀧𑀭𑀺𑀩𑁆𑀩𑀚𑁂;

𑀓𑀸𑀫𑀪𑀯𑀧𑀭𑀺𑀓𑁆𑀔𑀻𑀡𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀧𑀼𑀕𑁆𑀕𑀮𑁄 𑀇𑀥 𑀮𑁄𑀓𑁂 𑀉𑀪𑁄𑀧𑀺 𑀓𑀸𑀫𑁂 𑀳𑀺𑀢𑁆𑀯𑀸 𑀅𑀦𑀸𑀕𑀸𑀭𑁄 𑀳𑀼𑀢𑁆𑀯𑀸 𑀧𑀭𑀺𑀩𑁆𑀩𑀚𑀢𑀺, 𑀢𑀁 𑀧𑀭𑀺𑀓𑁆𑀔𑀻𑀡𑀓𑀸𑀫𑀜𑁆𑀘𑁂𑀯 𑀧𑀭𑀺𑀓𑁆𑀔𑀻𑀡𑀪𑀯𑀜𑁆𑀘 𑀅𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀣𑁂𑀭𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀇𑀤𑁆𑀥𑀺𑀩𑀮𑁂𑀦 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀓𑀡𑁆𑀡𑀺𑀓𑀸𑀫𑀡𑁆𑀟𑀮𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀲𑀢𑁆𑀣𑀼 𑀲𑀭𑀻𑀭𑀁 𑀣𑁄𑀫𑁂𑀦𑁆𑀢𑁄𑀬𑁂𑀯 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺. 𑀥𑀫𑁆𑀫𑀲𑀪𑀸𑀬𑀫𑁆𑀧𑀺 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁, ‘‘𑀆𑀯𑀼𑀲𑁄, 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀁 𑀭𑀲𑀁 𑀦𑀺𑀲𑁆𑀲𑀸𑀬 𑀫𑀦𑀁 𑀦𑀝𑁆𑀞𑁄 𑀲𑀼𑀦𑁆𑀤𑀭𑀲𑀫𑀼𑀤𑁆𑀤𑀢𑁆𑀣𑁂𑀭𑁄, 𑀲𑀢𑁆𑀣𑀸 𑀧𑀦𑀲𑁆𑀲 𑀅𑀯𑀲𑁆𑀲𑀬𑁄 𑀚𑀸𑀢𑁄’’𑀢𑀺. 𑀲𑀢𑁆𑀣𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀸𑀳𑀁 𑀏𑀢𑀲𑁆𑀲 𑀭𑀲𑀢𑀡𑁆𑀳𑀸𑀬 𑀩𑀤𑁆𑀥𑀫𑀦𑀲𑁆𑀲 𑀅𑀯𑀲𑁆𑀲𑀬𑁄 𑀚𑀸𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀢𑀲𑁆𑀲𑀢𑁆𑀣𑀲𑁆𑀲 𑀧𑀓𑀸𑀲𑀦𑀢𑁆𑀣𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑁋

‘‘𑀦 𑀓𑀺𑀭𑀢𑁆𑀣𑀺 𑀭𑀲𑁂𑀳𑀺 𑀧𑀸𑀧𑀺𑀬𑁄,

𑀆𑀯𑀸𑀲𑁂𑀳𑀺 𑀯𑀸 𑀲𑀦𑁆𑀣𑀯𑁂𑀳𑀺 𑀯𑀸;

𑀯𑀸𑀢𑀫𑀺𑀕𑀁 𑀕𑀳𑀦𑀦𑀺𑀲𑁆𑀲𑀺𑀢𑀁,

𑀯𑀲𑀫𑀸𑀦𑁂𑀲𑀺 𑀭𑀲𑁂𑀳𑀺 𑀲𑀜𑁆𑀚𑀬𑁄’’𑀢𑀺. (𑀚𑀸. 𑁧.𑁧.𑁧𑁪) 𑁋

𑀏𑀓𑀓𑀦𑀺𑀧𑀸𑀢𑁂 𑀇𑀫𑀁 𑀯𑀸𑀢𑀫𑀺𑀕𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 ‘‘𑀢𑀤𑀸 𑀲𑀼𑀦𑁆𑀤𑀭𑀲𑀫𑀼𑀤𑁆𑀤𑁄 𑀯𑀸𑀢𑀫𑀺𑀕𑁄 𑀅𑀳𑁄𑀲𑀺, 𑀇𑀫𑀁 𑀧𑀦 𑀕𑀸𑀣𑀁 𑀯𑀢𑁆𑀯𑀸 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀸 𑀭𑀜𑁆𑀜𑁄 𑀫𑀳𑀸𑀫𑀘𑁆𑀘𑁄 𑀅𑀳𑀫𑁂𑀯𑀸’’𑀢𑀺 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀻𑀢𑀺.

𑀲𑀼𑀦𑁆𑀤𑀭𑀲𑀫𑀼𑀤𑁆𑀤𑀢𑁆𑀣𑁂𑀭𑀯𑀢𑁆𑀣𑀼 𑀩𑀢𑁆𑀢𑀺𑀁𑀲𑀢𑀺𑀫𑀁.