𑁨𑁪. 𑀫𑀳𑀸𑀧𑀦𑁆𑀣𑀓𑀢𑁆𑀣𑁂𑀭𑀯𑀢𑁆𑀣𑀼

𑀬𑀲𑁆𑀲 𑀭𑀸𑀕𑁄 𑀘𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀧𑀦𑁆𑀣𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀳𑀸𑀬𑀲𑁆𑀫𑀸 𑀘𑀽𑀴𑀧𑀦𑁆𑀣𑀓𑀁 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀏𑀓𑀁 𑀕𑀸𑀣𑀁 𑀧𑀕𑀼𑀡𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 ‘‘𑀢𑁆𑀯𑀁 𑀲𑀸𑀲𑀦𑁂 𑀅𑀪𑀩𑁆𑀩𑁄, 𑀕𑀺𑀳𑀺𑀪𑁄𑀕𑀸𑀧𑀺 𑀧𑀭𑀺𑀳𑀻𑀦𑁄, 𑀓𑀺𑀁 𑀢𑁂 𑀇𑀥 𑀯𑀸𑀲𑁂𑀦, 𑀇𑀢𑁄 𑀦𑀺𑀓𑁆𑀔𑀫𑀸’’𑀢𑀺 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀤𑁆𑀯𑀸𑀭𑀁 𑀣𑀓𑁂𑀲𑀺. 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁, ‘‘𑀆𑀯𑀼𑀲𑁄, 𑀫𑀳𑀸𑀧𑀦𑁆𑀣𑀓𑀢𑁆𑀣𑁂𑀭𑁂𑀦 𑀇𑀤𑀁 𑀦𑀸𑀫 𑀓𑀢𑀁, 𑀔𑀻𑀡𑀸𑀲𑀯𑀸𑀦𑀫𑁆𑀧𑀺 𑀫𑀜𑁆𑀜𑁂 𑀓𑁄𑀥𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀔𑀻𑀡𑀸𑀲𑀯𑀸𑀦𑀁 𑀭𑀸𑀕𑀸𑀤𑀬𑁄 𑀓𑀺𑀮𑁂𑀲𑀸 𑀅𑀢𑁆𑀣𑀺, 𑀫𑀫 𑀧𑀼𑀢𑁆𑀢𑁂𑀦 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑀢𑀸𑀬 𑀘𑁂𑀯 𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑀢𑀸𑀬 𑀘 𑀓𑀢’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁦𑁭. ‘‘𑀬𑀲𑁆𑀲 𑀭𑀸𑀕𑁄 𑀘 𑀤𑁄𑀲𑁄 𑀘, 𑀫𑀸𑀦𑁄 𑀫𑀓𑁆𑀔𑁄 𑀘 𑀧𑀸𑀢𑀺𑀢𑁄;

𑀲𑀸𑀲𑀧𑁄𑀭𑀺𑀯 𑀆𑀭𑀕𑁆𑀕𑀸, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀆𑀭𑀕𑁆𑀕𑀸𑀢𑀺 𑀬𑀲𑁆𑀲𑁂𑀢𑁂 𑀭𑀸𑀕𑀸𑀤𑀬𑁄 𑀓𑀺𑀮𑁂𑀲𑀸, 𑀅𑀬𑀜𑁆𑀘 𑀧𑀭𑀕𑀼𑀡𑀫𑀓𑁆𑀔𑀦𑀮𑀓𑁆𑀔𑀡𑁄 𑀫𑀓𑁆𑀔𑁄 𑀆𑀭𑀕𑁆𑀕𑀸 𑀲𑀸𑀲𑀧𑁄 𑀯𑀺𑀬 𑀧𑀸𑀢𑀺𑀢𑁄, 𑀬𑀣𑀸 𑀲𑀸𑀲𑀧𑁄 𑀆𑀭𑀕𑁆𑀕𑁂 𑀦 𑀲𑀦𑁆𑀢𑀺𑀝𑁆𑀞𑀢𑀺, 𑀏𑀯𑀁 𑀘𑀺𑀢𑁆𑀢𑁂 𑀦 𑀲𑀦𑁆𑀢𑀺𑀝𑁆𑀞𑀢𑀺, 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀫𑀳𑀸𑀧𑀦𑁆𑀣𑀓𑀢𑁆𑀣𑁂𑀭𑀯𑀢𑁆𑀣𑀼 𑀘𑀢𑀼𑀯𑀻𑀲𑀢𑀺𑀫𑀁.