𑁨𑁫. 𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑀯𑀢𑁆𑀣𑀼

𑀅𑀓𑀓𑁆𑀓𑀲𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭𑀸𑀬𑀲𑁆𑀫𑀸 ‘‘𑀏𑀳𑀺, 𑀯𑀲𑀮𑀺, 𑀬𑀸𑀳𑀺, 𑀯𑀲𑀮𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀕𑀺𑀳𑀻𑀧𑀺 𑀧𑀩𑁆𑀩𑀚𑀺𑀢𑁂𑀧𑀺 𑀯𑀲𑀮𑀺𑀯𑀸𑀤𑁂𑀦𑁂𑀯 𑀲𑀫𑀼𑀤𑀸𑀘𑀭𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁 𑁋 ‘‘𑀆𑀬𑀲𑁆𑀫𑀸, 𑀪𑀦𑁆𑀢𑁂, 𑀧𑀺𑀮𑀺𑀦𑁆𑀤𑀯𑀘𑁆𑀙𑁄 𑀪𑀺𑀓𑁆𑀔𑀽 𑀯𑀲𑀮𑀺𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀢𑀻’’𑀢𑀺. 𑀲𑀢𑁆𑀣𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀧𑀺𑀮𑀺𑀦𑁆𑀤𑀯𑀘𑁆𑀙 𑀪𑀺𑀓𑁆𑀔𑀽 𑀯𑀲𑀮𑀺𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀲𑀸𑀬𑀲𑁆𑀫𑀢𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀫𑀦𑀲𑀺𑀓𑀭𑀺𑀢𑁆𑀯𑀸 ‘‘𑀫𑀸 𑀔𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀯𑀘𑁆𑀙𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀚𑁆𑀛𑀸𑀬𑀺𑀢𑁆𑀣, 𑀦, 𑀪𑀺𑀓𑁆𑀔𑀯𑁂, 𑀯𑀘𑁆𑀙𑁄 𑀤𑁄𑀲𑀦𑁆𑀢𑀭𑁄 𑀪𑀺𑀓𑁆𑀔𑀽 𑀯𑀲𑀮𑀺𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀢𑀺, 𑀯𑀘𑁆𑀙𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀅𑀩𑁆𑀩𑁄𑀓𑀺𑀡𑁆𑀡𑀸𑀦𑀺 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑀸𑀦𑀺, 𑀲𑁄 𑀢𑀲𑁆𑀲 𑀤𑀻𑀖𑀭𑀢𑁆𑀢𑀁 𑀯𑀲𑀮𑀺𑀯𑀸𑀤𑁄 𑀲𑀫𑀼𑀤𑀸𑀘𑀺𑀡𑁆𑀡𑁄, 𑀔𑀻𑀡𑀸𑀲𑀯𑀲𑁆𑀲 𑀦𑀸𑀫 𑀓𑀓𑁆𑀓𑀲𑀁 𑀨𑀭𑀼𑀲𑀁 𑀧𑀭𑁂𑀲𑀁 𑀫𑀫𑁆𑀫𑀖𑀝𑁆𑀝𑀦𑀯𑀘𑀦𑀫𑁂𑀯 𑀦𑀢𑁆𑀣𑀺. 𑀆𑀘𑀺𑀡𑁆𑀡𑀯𑀲𑁂𑀦 𑀳𑀺 𑀫𑀫 𑀧𑀼𑀢𑁆𑀢𑁄 𑀏𑀯𑀁 𑀓𑀣𑁂𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁦𑁮. ‘‘𑀅𑀓𑀓𑁆𑀓𑀲𑀁 𑀯𑀺𑀜𑁆𑀜𑀸𑀧𑀦𑀺𑀁, 𑀕𑀺𑀭𑀁 𑀲𑀘𑁆𑀘𑀫𑀼𑀤𑀻𑀭𑀬𑁂;

𑀬𑀸𑀬 𑀦𑀸𑀪𑀺𑀲𑀚𑁂 𑀓𑀜𑁆𑀘𑀺, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀅𑀓𑀓𑁆𑀓𑀲𑀦𑁆𑀢𑀺 𑀅𑀨𑀭𑀼𑀲𑀁. 𑀯𑀺𑀜𑁆𑀜𑀸𑀧𑀦𑀺𑀦𑁆𑀢𑀺 𑀅𑀢𑁆𑀣𑀯𑀺𑀜𑁆𑀜𑀸𑀧𑀦𑀺𑀁. 𑀲𑀘𑁆𑀘𑀦𑁆𑀢𑀺 𑀪𑀽𑀢𑀢𑁆𑀣𑀁. 𑀦𑀸𑀪𑀺𑀲𑀚𑁂𑀢𑀺 𑀬𑀸𑀬 𑀕𑀺𑀭𑀸𑀬 𑀅𑀜𑁆𑀜𑀁 𑀓𑀼𑀚𑁆𑀛𑀸𑀧𑀦𑀯𑀲𑁂𑀦 𑀦 𑀮𑀕𑁆𑀕𑀸𑀧𑁂𑀬𑁆𑀬, 𑀔𑀻𑀡𑀸𑀲𑀯𑁄 𑀦𑀸𑀫 𑀏𑀯𑀭𑀽𑀧𑀫𑁂𑀯 𑀕𑀺𑀭𑀁 𑀪𑀸𑀲𑁂𑀬𑁆𑀬, 𑀢𑀲𑁆𑀫𑀸 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑀯𑀢𑁆𑀣𑀼 𑀧𑀜𑁆𑀘𑀯𑀻𑀲𑀢𑀺𑀫𑀁.