𑁨𑁩. 𑀲𑀸𑀫𑀡𑁂𑀭𑀸𑀦𑀁 𑀯𑀢𑁆𑀣𑀼

𑀅𑀯𑀺𑀭𑀼𑀤𑁆𑀥𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀢𑁆𑀢𑀸𑀭𑁄 𑀲𑀸𑀫𑀡𑁂𑀭𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀸 𑀓𑀺𑀭 𑀩𑁆𑀭𑀸𑀳𑁆𑀫𑀡𑀻 𑀘𑀢𑀼𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀉𑀤𑁆𑀤𑁂𑀲𑀪𑀢𑁆𑀢𑀁 𑀲𑀚𑁆𑀚𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀆𑀳 𑁋 ‘‘𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀘𑀢𑁆𑀢𑀸𑀭𑁄 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑁂 𑀉𑀤𑁆𑀤𑀺𑀲𑀸𑀧𑁂𑀢𑁆𑀯𑀸 𑀆𑀦𑁂𑀳𑀻’’𑀢𑀺. 𑀲𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄 𑀫𑁂 𑀩𑁆𑀭𑀸𑀳𑁆𑀫𑀡𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑁂𑀣𑀸’’𑀢𑀺 𑀆𑀳. 𑀢𑀲𑁆𑀲 𑀲𑀁𑀓𑀺𑀘𑁆𑀘𑁄 𑀧𑀡𑁆𑀟𑀺𑀢𑁄 𑀲𑁄𑀧𑀸𑀓𑁄 𑀭𑁂𑀯𑀢𑁄𑀢𑀺 𑀲𑀢𑁆𑀢𑀯𑀲𑁆𑀲𑀺𑀓𑀸 𑀘𑀢𑁆𑀢𑀸𑀭𑁄 𑀔𑀻𑀡𑀸𑀲𑀯𑀲𑀸𑀫𑀡𑁂𑀭𑀸 𑀧𑀸𑀧𑀼𑀡𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑀻 𑀫𑀳𑀸𑀭𑀳𑀸𑀦𑀺 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀞𑀺𑀢𑀸 𑀲𑀸𑀫𑀡𑁂𑀭𑁂 𑀤𑀺𑀲𑁆𑀯𑀸𑀯 𑀓𑀼𑀧𑀺𑀢𑀸 𑀉𑀤𑁆𑀥𑀦𑁂 𑀧𑀓𑁆𑀔𑀺𑀢𑁆𑀢𑀮𑁄𑀡𑀁 𑀯𑀺𑀬 𑀢𑀝𑀢𑀝𑀸𑀬𑀫𑀸𑀦𑀸 ‘‘𑀢𑁆𑀯𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀦𑀢𑁆𑀢𑀼𑀫𑀢𑁆𑀢𑁂𑀧𑀺 𑀅𑀧𑁆𑀧𑀳𑁄𑀦𑁆𑀢𑁂 𑀘𑀢𑁆𑀢𑀸𑀭𑁄 𑀓𑀼𑀫𑀸𑀭𑀓𑁂 𑀕𑀳𑁂𑀢𑁆𑀯𑀸 𑀆𑀕𑀢𑁄𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀢𑁂𑀲𑀼 𑀆𑀲𑀦𑁂𑀲𑀼 𑀦𑀺𑀲𑀻𑀤𑀺𑀢𑀼𑀁 𑀅𑀤𑀢𑁆𑀯𑀸 𑀦𑀻𑀘𑀧𑀻𑀞𑀓𑀸𑀦𑀺 𑀅𑀢𑁆𑀣𑀭𑀺𑀢𑁆𑀯𑀸 ‘‘𑀏𑀢𑁂𑀲𑀼 𑀦𑀺𑀲𑀻𑀤𑀣𑀸’’𑀢𑀺 𑀯𑀢𑁆𑀯𑀸 ‘‘𑀕𑀘𑁆𑀙, 𑀩𑁆𑀭𑀸𑀳𑁆𑀫𑀡, 𑀫𑀳𑀮𑁆𑀮𑀓𑁂 𑀑𑀮𑁄𑀓𑁂𑀢𑁆𑀯𑀸 𑀆𑀦𑁂𑀳𑀻’’𑀢𑀺 𑀆𑀳. 𑀩𑁆𑀭𑀸𑀳𑁆𑀫𑀡𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀏𑀣, 𑀅𑀫𑁆𑀳𑀸𑀓𑀁 𑀕𑁂𑀳𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀦𑁂𑀲𑀺. 𑀣𑁂𑀭𑁄 𑀆𑀕𑀦𑁆𑀢𑁆𑀯𑀸 𑀲𑀸𑀫𑀡𑁂𑀭𑁂 𑀤𑀺𑀲𑁆𑀯𑀸 ‘‘𑀇𑀫𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀪𑀢𑁆𑀢𑀁 𑀮𑀤𑁆𑀥’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦 𑀮𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑁂 𑀘𑀢𑀼𑀦𑁆𑀦𑀫𑁂𑀯 𑀪𑀢𑁆𑀢𑀲𑁆𑀲 𑀧𑀝𑀺𑀬𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀆𑀳𑀭 𑀫𑁂 𑀧𑀢𑁆𑀢’’𑀦𑁆𑀢𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀩𑁆𑀭𑀸𑀳𑁆𑀫𑀡𑀻𑀧𑀺 ‘‘𑀓𑀺𑀁 𑀇𑀫𑀺𑀦𑀸 𑀯𑀼𑀢𑁆𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀢𑁂𑀲𑀁 𑀦𑀺𑀲𑀺𑀦𑁆𑀦𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀆𑀳𑀭 𑀫𑁂 𑀧𑀢𑁆𑀢’’𑀦𑁆𑀢𑀺 𑀅𑀢𑁆𑀢𑀦𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑀢𑁄, 𑀦 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀲𑀻𑀖𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑀁 𑀑𑀮𑁄𑀓𑁂𑀢𑁆𑀯𑀸 𑀆𑀦𑁂𑀳𑀻𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀕𑀦𑁆𑀢𑁆𑀯𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀁 𑀤𑀺𑀲𑁆𑀯𑀸 𑀢𑀣𑁂𑀯 𑀯𑀢𑁆𑀯𑀸 𑀆𑀦𑁂𑀲𑀺. 𑀲𑁄𑀧𑀺 𑀲𑀸𑀫𑀡𑁂𑀭𑁂 𑀤𑀺𑀲𑁆𑀯𑀸 𑀢𑀣𑁂𑀯 𑀯𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑀻 𑀆𑀳 𑁋 ‘‘𑀏𑀢𑁂 𑀦 𑀪𑀼𑀜𑁆𑀚𑀺𑀢𑀼𑀓𑀸𑀫𑀸, 𑀩𑁆𑀭𑀸𑀳𑁆𑀫𑀡𑀯𑀸𑀤𑀓𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑀁 𑀆𑀦𑁂𑀳𑀻’’𑀢𑀺.

𑀲𑀸𑀫𑀡𑁂𑀭𑀸𑀧𑀺 𑀧𑀸𑀢𑁄𑀯 𑀧𑀝𑁆𑀞𑀸𑀬 𑀓𑀺𑀜𑁆𑀘𑀺 𑀅𑀮𑀪𑀫𑀸𑀦𑀸 𑀚𑀺𑀖𑀘𑁆𑀙𑀸𑀬 𑀧𑀻𑀴𑀺𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀦𑁂𑀲𑀁 𑀕𑀼𑀡𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀆𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 𑀆𑀯𑀚𑁆𑀚𑁂𑀦𑁆𑀢𑁄 𑀢𑁂𑀲𑀁 𑀧𑀸𑀢𑁄𑀯 𑀧𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑀸𑀦𑀁 𑀓𑀺𑀮𑀦𑁆𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀫𑀬𑀸 𑀢𑀢𑁆𑀣 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀚𑀭𑀸𑀚𑀺𑀡𑁆𑀡𑁄 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀢𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀯𑀸𑀤𑀓𑁂 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀕𑁆𑀕𑀸𑀲𑀦𑁂 𑀦𑀺𑀲𑀻𑀤𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀤𑀺𑀲𑁆𑀯𑀸 ‘‘𑀇𑀤𑀸𑀦𑀺 𑀫𑁂 𑀩𑁆𑀭𑀸𑀳𑁆𑀫𑀡𑀻 𑀅𑀢𑁆𑀢𑀫𑀦𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀳𑀺 𑀕𑁂𑀳𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀢𑀁 𑀆𑀤𑀸𑀬 𑀕𑁂𑀳𑀁 𑀅𑀕𑀫𑀸𑀲𑀺. 𑀩𑁆𑀭𑀸𑀳𑁆𑀫𑀡𑀻 𑀢𑀁 𑀤𑀺𑀲𑁆𑀯𑀸𑀯 𑀢𑀼𑀝𑁆𑀞𑀘𑀺𑀢𑁆𑀢𑀸 𑀤𑁆𑀯𑀻𑀲𑀼 𑀆𑀲𑀦𑁂𑀲𑀼 𑀅𑀢𑁆𑀣𑀭𑀡𑀁 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀣𑀭𑀺𑀢𑁆𑀯𑀸, ‘‘𑀅𑀬𑁆𑀬, 𑀇𑀥 𑀦𑀺𑀲𑀻𑀤𑀸𑀳𑀻’’𑀢𑀺 𑀆𑀳. 𑀲𑀓𑁆𑀓𑁄 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀲𑀸𑀫𑀡𑁂𑀭𑁂 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀢𑁂𑀲𑀁 𑀆𑀲𑀦𑀧𑀭𑀺𑀬𑀦𑁆𑀢𑁂 𑀪𑀽𑀫𑀺𑀬𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀅𑀣 𑀦𑀁 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑀻 𑀩𑁆𑀭𑀸𑀳𑁆𑀫𑀡𑀁 𑀆𑀳 𑁋 ‘‘𑀅𑀳𑁄 𑀢𑁂 𑀆𑀦𑀻𑀢𑁄 𑀩𑁆𑀭𑀸𑀳𑁆𑀫𑀡𑁄, 𑀏𑀢𑀫𑁆𑀧𑀺 𑀉𑀫𑁆𑀫𑀢𑁆𑀢𑀓𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄𑀲𑀺, 𑀅𑀢𑁆𑀢𑀦𑁄 𑀦𑀢𑁆𑀢𑀼𑀫𑀢𑁆𑀢𑁂 𑀯𑀦𑁆𑀤𑀦𑁆𑀢𑁄 𑀯𑀺𑀘𑀭𑀢𑀺, 𑀓𑀺𑀁 𑀇𑀫𑀺𑀦𑀸, 𑀦𑀻𑀳𑀭𑀸𑀳𑀺 𑀦’’𑀦𑁆𑀢𑀺. 𑀲𑁄 𑀔𑀦𑁆𑀥𑁂𑀧𑀺 𑀳𑀢𑁆𑀣𑁂𑀧𑀺 𑀓𑀘𑁆𑀙𑀸𑀬𑀧𑀺 𑀕𑀳𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀺𑀬𑀫𑀸𑀦𑁄 𑀉𑀝𑁆𑀞𑀸𑀢𑀼𑀫𑁆𑀧𑀺 𑀦 𑀇𑀘𑁆𑀙𑀢𑀺. 𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑀻 ‘‘𑀏𑀳𑀺, 𑀩𑁆𑀭𑀸𑀳𑁆𑀫𑀡, 𑀢𑁆𑀯𑀁 𑀏𑀓𑀲𑁆𑀫𑀺𑀁 𑀳𑀢𑁆𑀣𑁂 𑀕𑀡𑁆𑀳, 𑀅𑀳𑀁 𑀏𑀓𑀲𑁆𑀫𑀺𑀁 𑀳𑀢𑁆𑀣𑁂 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀉𑀪𑁄𑀧𑀺 𑀤𑁆𑀯𑀻𑀲𑀼 𑀳𑀢𑁆𑀣𑁂𑀲𑀼 𑀕𑀳𑁂𑀢𑁆𑀯𑀸 𑀧𑀺𑀝𑁆𑀞𑀺𑀬𑀁 𑀧𑁄𑀣𑁂𑀦𑁆𑀢𑀸 𑀕𑁂𑀳𑀤𑁆𑀯𑀸𑀭𑀢𑁄 𑀩𑀳𑀺 𑀅𑀓𑀁𑀲𑀼. 𑀲𑀓𑁆𑀓𑁄𑀧𑀺 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀦𑀺𑀲𑀺𑀦𑁆𑀦𑁄 𑀳𑀢𑁆𑀣𑀁 𑀧𑀭𑀺𑀯𑀢𑁆𑀢𑁂𑀲𑀺. 𑀢𑁂 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀁 𑀦𑀺𑀲𑀺𑀦𑁆𑀦𑀫𑁂𑀯 𑀤𑀺𑀲𑁆𑀯𑀸 𑀪𑀻𑀢𑀭𑀯𑀁 𑀭𑀯𑀦𑁆𑀢𑀸 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑁄 𑀅𑀢𑁆𑀢𑀦𑁄 𑀲𑀓𑁆𑀓𑀪𑀸𑀯𑀁 𑀚𑀸𑀦𑀸𑀧𑁂𑀲𑀺. 𑀅𑀣 𑀦𑁂𑀲𑀁 𑀆𑀳𑀸𑀭𑀁 𑀅𑀤𑀁𑀲𑀼. 𑀧𑀜𑁆𑀘𑀧𑀺 𑀚𑀦𑀸 𑀆𑀳𑀸𑀭𑀁 𑀕𑀳𑁂𑀢𑁆𑀯𑀸 𑀏𑀓𑁄 𑀓𑀡𑁆𑀡𑀺𑀓𑀸𑀫𑀡𑁆𑀟𑀮𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸, 𑀏𑀓𑁄 𑀙𑀤𑀦𑀲𑁆𑀲 𑀧𑀼𑀭𑀺𑀫𑀪𑀸𑀕𑀁, 𑀏𑀓𑁄 𑀧𑀘𑁆𑀙𑀺𑀫𑀪𑀸𑀕𑀁, 𑀏𑀓𑁄 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸, 𑀲𑀓𑁆𑀓𑁄𑀧𑀺 𑀏𑀓𑁂𑀦 𑀞𑀸𑀦𑁂𑀦 𑀦𑀺𑀓𑁆𑀔𑀫𑀻𑀢𑀺 𑀏𑀯𑀁 𑀧𑀜𑁆𑀘𑀥𑀸 𑀅𑀕𑀫𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀘 𑀧𑀦 𑀢𑀁 𑀕𑁂𑀳𑀁 𑀧𑀜𑁆𑀘𑀙𑀺𑀤𑁆𑀤𑀕𑁂𑀳𑀁 𑀓𑀺𑀭 𑀦𑀸𑀫 𑀚𑀸𑀢𑀁.

𑀲𑀸𑀫𑀡𑁂𑀭𑁂𑀧𑀺 𑀯𑀺𑀳𑀸𑀭𑀁 𑀕𑀢𑀓𑀸𑀮𑁂 𑀪𑀺𑀓𑁆𑀔𑀽, ‘‘𑀆𑀯𑀼𑀲𑁄, 𑀓𑀻𑀤𑀺𑀲’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀫𑀸 𑀦𑁄 𑀧𑀼𑀘𑁆𑀙𑀺𑀢𑁆𑀣, 𑀅𑀫𑁆𑀳𑀸𑀓𑀁 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀩𑁆𑀭𑀸𑀳𑁆𑀫𑀡𑀻 𑀓𑁄𑀥𑀸𑀪𑀺𑀪𑀽𑀢𑀸 𑀧𑀜𑁆𑀜𑀢𑁆𑀢𑀸𑀲𑀦𑁂𑀲𑀼 𑀦𑁄 𑀦𑀺𑀲𑀻𑀤𑀺𑀢𑀼𑀫𑁆𑀧𑀺 𑀅𑀤𑀢𑁆𑀯𑀸 ‘‘𑀲𑀻𑀖𑀁 𑀲𑀻𑀖𑀁 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑀁 𑀆𑀦𑁂𑀳𑀻’’𑀢𑀺 𑀆𑀳. 𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁄 𑀆𑀕𑀦𑁆𑀢𑁆𑀯𑀸 𑀅𑀫𑁆𑀳𑁂 𑀤𑀺𑀲𑁆𑀯𑀸 ‘‘𑀇𑀫𑁂𑀲𑀁 𑀦𑀺𑀲𑀺𑀦𑁆𑀦𑀩𑁆𑀭𑀸𑀳𑁆𑀫𑀡𑀸𑀦𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀢𑁆𑀢𑀁 𑀆𑀳𑀭𑀸𑀧𑁂𑀢𑁆𑀯𑀸 𑀦𑀺𑀓𑁆𑀔𑀫𑀺. ‘‘𑀅𑀜𑁆𑀜𑀁 𑀫𑀳𑀮𑁆𑀮𑀓𑀁 𑀩𑁆𑀭𑀸𑀳𑁆𑀫𑀡𑀁 𑀆𑀦𑁂𑀲𑀻’’𑀢𑀺 𑀯𑀼𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀁 𑀆𑀦𑁂𑀲𑀺, 𑀲𑁄𑀧𑀺 𑀅𑀫𑁆𑀳𑁂 𑀤𑀺𑀲𑁆𑀯𑀸 𑀢𑀣𑁂𑀯 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀩𑁆𑀭𑀸𑀳𑁆𑀫𑀡𑀻 ‘‘𑀦 𑀏𑀢𑁂 𑀪𑀼𑀜𑁆𑀚𑀺𑀢𑀼𑀓𑀸𑀫𑀸, 𑀕𑀘𑁆𑀙 𑀩𑁆𑀭𑀸𑀳𑁆𑀫𑀡𑀯𑀸𑀤𑀓𑀢𑁄 𑀏𑀓𑀁 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑀁 𑀆𑀦𑁂𑀳𑀻’’𑀢𑀺 𑀩𑁆𑀭𑀸𑀳𑁆𑀫𑀡𑀁 𑀧𑀳𑀺𑀡𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀯𑁂𑀲𑁂𑀦 𑀆𑀕𑀢𑀁 𑀲𑀓𑁆𑀓𑀁 𑀆𑀦𑁂𑀲𑀺, 𑀢𑀲𑁆𑀲 𑀆𑀕𑀢𑀓𑀸𑀮𑁂 𑀅𑀫𑁆𑀳𑀸𑀓𑀁 𑀆𑀳𑀸𑀭𑀁 𑀅𑀤𑀁𑀲𑀽𑀢𑀺. 𑀏𑀯𑀁 𑀓𑀭𑁄𑀦𑁆𑀢𑀸𑀦𑀁 𑀧𑀦 𑀢𑁂𑀲𑀁 𑀢𑀼𑀫𑁆𑀳𑁂 𑀦 𑀓𑀼𑀚𑁆𑀛𑀺𑀢𑁆𑀣𑀸𑀢𑀺? 𑀦 𑀓𑀼𑀚𑁆𑀛𑀺𑀫𑁆𑀳𑀸𑀢𑀺. 𑀪𑀺𑀓𑁆𑀔𑀽 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁 𑁋 ‘‘𑀪𑀦𑁆𑀢𑁂, 𑀇𑀫𑁂 ‘𑀦 𑀓𑀼𑀚𑁆𑀛𑀺𑀫𑁆𑀳𑀸’𑀢𑀺 𑀅𑀪𑀽𑀢𑀁 𑀯𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀻’’𑀢𑀺. 𑀲𑀢𑁆𑀣𑀸, ‘‘𑀪𑀺𑀓𑁆𑀔𑀯𑁂, 𑀔𑀻𑀡𑀸𑀲𑀯𑀸 𑀦𑀸𑀫 𑀯𑀺𑀭𑀼𑀤𑁆𑀥𑁂𑀲𑀼𑀧𑀺 𑀦 𑀯𑀺𑀭𑀼𑀚𑁆𑀛𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁦𑁬. ‘‘𑀅𑀯𑀺𑀭𑀼𑀤𑁆𑀥𑀁 𑀯𑀺𑀭𑀼𑀤𑁆𑀥𑁂𑀲𑀼, 𑀅𑀢𑁆𑀢𑀤𑀡𑁆𑀟𑁂𑀲𑀼 𑀦𑀺𑀩𑁆𑀩𑀼𑀢𑀁;

𑀲𑀸𑀤𑀸𑀦𑁂𑀲𑀼 𑀅𑀦𑀸𑀤𑀸𑀦𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀅𑀯𑀺𑀭𑀼𑀤𑁆𑀥𑀦𑁆𑀢𑀺 𑀆𑀖𑀸𑀢𑀯𑀲𑁂𑀦 𑀯𑀺𑀭𑀼𑀤𑁆𑀥𑁂𑀲𑀼𑀧𑀺 𑀮𑁄𑀓𑀺𑀬𑀫𑀳𑀸𑀚𑀦𑁂𑀲𑀼 𑀆𑀖𑀸𑀢𑀸𑀪𑀸𑀯𑁂𑀦 𑀅𑀯𑀺𑀭𑀼𑀤𑁆𑀥𑀁. 𑀳𑀢𑁆𑀣𑀕𑀢𑁂 𑀤𑀡𑁆𑀟𑁂 𑀯𑀸 𑀲𑀢𑁆𑀣𑁂 𑀯𑀸 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀧𑀭𑁂𑀲𑀁 𑀧𑀳𑀸𑀭𑀤𑀸𑀦𑀢𑁄 𑀅𑀯𑀺𑀭𑀢𑀢𑁆𑀢𑀸 𑀅𑀢𑁆𑀢𑀤𑀡𑁆𑀟𑁂𑀲𑀼 𑀚𑀦𑁂𑀲𑀼 𑀦𑀺𑀩𑁆𑀩𑀼𑀢𑀁 𑀦𑀺𑀓𑁆𑀔𑀺𑀢𑁆𑀢𑀤𑀡𑁆𑀟𑀁, 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀅𑀳𑀁 𑀫𑀫𑀦𑁆𑀢𑀺 𑀕𑀳𑀺𑀢𑀢𑁆𑀢𑀸 𑀲𑀸𑀤𑀸𑀦𑁂𑀲𑀼 𑀢𑀲𑁆𑀲 𑀕𑀳𑀡𑀲𑁆𑀲 𑀅𑀪𑀸𑀯𑁂𑀦 𑀅𑀦𑀸𑀤𑀸𑀦𑀁 𑀢𑀁 𑀏𑀯𑀭𑀽𑀧𑀁 𑀅𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀸𑀫𑀡𑁂𑀭𑀸𑀦𑀁 𑀯𑀢𑁆𑀣𑀼 𑀢𑁂𑀯𑀻𑀲𑀢𑀺𑀫𑀁.