𑁨𑁦. 𑀔𑁂𑀫𑀸𑀪𑀺𑀓𑁆𑀔𑀼𑀦𑀻𑀯𑀢𑁆𑀣𑀼

𑀕𑀫𑁆𑀪𑀻𑀭𑀧𑀜𑁆𑀜𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀕𑀺𑀚𑁆𑀛𑀓𑀽𑀝𑁂 𑀯𑀺𑀳𑀭𑀦𑁆𑀢𑁄 𑀔𑁂𑀫𑀁 𑀦𑀸𑀫 𑀪𑀺𑀓𑁆𑀔𑀼𑀦𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀤𑀺𑀯𑀲𑀜𑁆𑀳𑀺 𑀧𑀞𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀲𑀸𑀭𑀡𑀻𑀬𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑁄 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀔𑁂𑀫𑀸 𑀪𑀺𑀓𑁆𑀔𑀼𑀦𑀻 ‘‘𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀲𑀓𑁆𑀓𑀁 𑀤𑀺𑀲𑁆𑀯𑀸 𑀆𑀓𑀸𑀲𑁂 𑀞𑀺𑀢𑀸𑀯 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀲𑀓𑁆𑀓𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑁄 𑀏𑀲𑀸, 𑀪𑀦𑁆𑀢𑁂, 𑀆𑀕𑀘𑁆𑀙𑀫𑀸𑀦𑀸 𑀆𑀓𑀸𑀲𑁂 𑀞𑀺𑀢𑀸𑀯 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀺. 𑀲𑀢𑁆𑀣𑀸 ‘‘𑀏𑀲𑀸, 𑀫𑀳𑀸𑀭𑀸𑀚, 𑀫𑀫 𑀥𑀻𑀢𑀸 𑀔𑁂𑀫𑀸 𑀦𑀸𑀫 𑀫𑀳𑀸𑀧𑀜𑁆𑀜𑀸 𑀫𑀕𑁆𑀕𑀸𑀫𑀕𑁆𑀕𑀓𑁄𑀯𑀺𑀤𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁦𑁩. ‘‘𑀕𑀫𑁆𑀪𑀻𑀭𑀧𑀜𑁆𑀜𑀁 𑀫𑁂𑀥𑀸𑀯𑀺𑀁, 𑀫𑀕𑁆𑀕𑀸𑀫𑀕𑁆𑀕𑀲𑁆𑀲 𑀓𑁄𑀯𑀺𑀤𑀁;

𑀉𑀢𑁆𑀢𑀫𑀢𑁆𑀣𑀫𑀦𑀼𑀧𑁆𑀧𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀕𑀩𑁆𑀪𑀻𑀭𑀧𑀜𑁆𑀜𑀦𑁆𑀢𑀺 𑀕𑀫𑁆𑀪𑀻𑀭𑁂𑀲𑀼 𑀔𑀦𑁆𑀥𑀸𑀤𑀻𑀲𑀼 𑀧𑀯𑀢𑁆𑀢𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀁 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀁 𑀫𑁂𑀥𑀸𑀯𑀺𑀁 ‘‘𑀅𑀬𑀁 𑀤𑀼𑀕𑁆𑀕𑀢𑀺𑀬𑀸 𑀫𑀕𑁆𑀕𑁄, 𑀅𑀬𑀁 𑀲𑀼𑀕𑀢𑀺𑀬𑀸 𑀫𑀕𑁆𑀕𑁄, 𑀅𑀬𑀁 𑀦𑀺𑀩𑁆𑀩𑀸𑀦𑀲𑁆𑀲 𑀫𑀕𑁆𑀕𑁄, 𑀅𑀬𑀁 𑀅𑀫𑀕𑁆𑀕𑁄’’𑀢𑀺 𑀏𑀯𑀁 𑀫𑀕𑁆𑀕𑁂 𑀘 𑀅𑀫𑀕𑁆𑀕𑁂 𑀘 𑀙𑁂𑀓𑀢𑀸𑀬 𑀫𑀕𑁆𑀕𑀸𑀫𑀕𑁆𑀕𑀲𑁆𑀲 𑀓𑁄𑀯𑀺𑀤𑀁 𑀅𑀭𑀳𑀢𑁆𑀢𑀲𑀗𑁆𑀔𑀸𑀢𑀁 𑀉𑀢𑁆𑀢𑀫𑀢𑁆𑀣𑀁 𑀅𑀦𑀼𑀧𑁆𑀧𑀢𑁆𑀢𑀁 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀔𑁂𑀫𑀸𑀪𑀺𑀓𑁆𑀔𑀼𑀦𑀺𑀯𑀢𑁆𑀣𑀼 𑀯𑀻𑀲𑀢𑀺𑀫𑀁.