𑁨𑁧. 𑀧𑀩𑁆𑀪𑀸𑀭𑀯𑀸𑀲𑀻𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼

𑀅𑀲𑀁𑀲𑀝𑁆𑀞𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀩𑁆𑀪𑀸𑀭𑀯𑀸𑀲𑀻𑀢𑀺𑀲𑁆𑀲𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀲𑀧𑁆𑀧𑀸𑀬𑀁 𑀲𑁂𑀦𑀸𑀲𑀦𑀁 𑀑𑀮𑁄𑀓𑁂𑀦𑁆𑀢𑁄 𑀏𑀓𑀁 𑀮𑁂𑀡𑀧𑀩𑁆𑀪𑀸𑀭𑀁 𑀧𑀸𑀧𑀼𑀡𑀺, 𑀲𑀫𑁆𑀧𑀢𑁆𑀢𑀓𑁆𑀔𑀡𑁂𑀬𑁂𑀯𑀲𑁆𑀲 𑀘𑀺𑀢𑁆𑀢𑀁 𑀏𑀓𑀕𑁆𑀕𑀢𑀁 𑀮𑀪𑀺. 𑀲𑁄 ‘‘𑀅𑀳𑀁 𑀇𑀥 𑀯𑀲𑀦𑁆𑀢𑁄 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀦𑀺𑀧𑁆𑀨𑀸𑀤𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀮𑁂𑀡𑁂𑀧𑀺 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 ‘‘𑀲𑀻𑀮𑀯𑀸 𑀪𑀺𑀓𑁆𑀔𑀼 𑀆𑀕𑀢𑁄, 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀯𑀲𑀺𑀢𑀼𑀁 𑀤𑀼𑀓𑁆𑀔𑀁. 𑀅𑀬𑀁 𑀧𑀦 𑀇𑀥 𑀏𑀓𑀭𑀢𑁆𑀢𑀺𑀫𑁂𑀯 𑀯𑀲𑀺𑀢𑁆𑀯𑀸 𑀧𑀓𑁆𑀓𑀫𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀢𑁆𑀢𑁂 𑀆𑀤𑀸𑀬 𑀦𑀺𑀓𑁆𑀔𑀫𑀺. 𑀣𑁂𑀭𑁄 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀕𑁄𑀘𑀭𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀣 𑀦𑀁 𑀏𑀓𑀸 𑀉𑀧𑀸𑀲𑀺𑀓𑀸 𑀤𑀺𑀲𑁆𑀯𑀸𑀯 𑀧𑀼𑀢𑁆𑀢𑀲𑀺𑀦𑁂𑀳𑀁 𑀧𑀝𑀺𑀮𑀪𑀺𑀢𑁆𑀯𑀸 𑀕𑁂𑀳𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀦𑀺𑀲𑁆𑀲𑀸𑀬 𑀢𑁂𑀫𑀸𑀲𑀁 𑀯𑀲𑀦𑀢𑁆𑀣𑀸𑀬 𑀬𑀸𑀘𑀺. 𑀲𑁄𑀧𑀺 ‘‘𑀲𑀓𑁆𑀓𑀸 𑀫𑀬𑀸 𑀇𑀫𑀁 𑀦𑀺𑀲𑁆𑀲𑀸𑀬 𑀪𑀯𑀦𑀺𑀲𑁆𑀲𑀭𑀡𑀁 𑀓𑀸𑀢𑀼’’𑀦𑁆𑀢𑀺 𑀅𑀥𑀺𑀯𑀸𑀲𑁂𑀢𑁆𑀯𑀸 𑀢𑀫𑁂𑀯 𑀮𑁂𑀡𑀁 𑀅𑀕𑀫𑀸𑀲𑀺. 𑀤𑁂𑀯𑀢𑀸 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀤𑁆𑀥𑀸 𑀓𑁂𑀦𑀘𑀺 𑀦𑀺𑀫𑀦𑁆𑀢𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀲𑁆𑀯𑁂 𑀯𑀸 𑀧𑀭𑀲𑀼𑀯𑁂 𑀯𑀸 𑀕𑀫𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺.

𑀏𑀯𑀁 𑀅𑀟𑁆𑀠𑀫𑀸𑀲𑀫𑀢𑁆𑀢𑁂 𑀅𑀢𑀺𑀓𑁆𑀓𑀦𑁆𑀢𑁂 ‘‘𑀅𑀬𑀁 𑀇𑀥𑁂𑀯 𑀫𑀜𑁆𑀜𑁂 𑀅𑀦𑁆𑀢𑁄𑀯𑀲𑁆𑀲𑀁 𑀯𑀲𑀺𑀲𑁆𑀲𑀢𑀺, 𑀲𑀻𑀮𑀯𑀢𑀸 𑀧𑀦 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀧𑀼𑀢𑁆𑀢𑀓𑁂𑀳𑀺 𑀲𑀤𑁆𑀥𑀺𑀁 𑀯𑀲𑀺𑀢𑀼𑀁 𑀤𑀼𑀓𑁆𑀓𑀭𑀁, 𑀇𑀫𑀜𑁆𑀘 ‘𑀦𑀺𑀓𑁆𑀔𑀫𑀸’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸, 𑀅𑀢𑁆𑀣𑀺 𑀦𑀼 𑀔𑁄 𑀇𑀫𑀲𑁆𑀲 𑀲𑀻𑀮𑁂 𑀔𑀮𑀺𑀢’’𑀦𑁆𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑀻 𑀉𑀧𑀲𑀫𑁆𑀧𑀤𑀫𑀸𑀴𑀓𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀲𑀻𑀮𑁂 𑀔𑀮𑀺𑀢𑀁 𑀅𑀤𑀺𑀲𑁆𑀯𑀸 ‘‘𑀧𑀭𑀺𑀲𑀼𑀤𑁆𑀥𑀫𑀲𑁆𑀲 𑀲𑀻𑀮𑀁, 𑀓𑀺𑀜𑁆𑀘𑀺𑀤𑁂𑀯𑀲𑁆𑀲 𑀓𑀢𑁆𑀯𑀸 𑀅𑀬𑀲𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀉𑀧𑀝𑁆𑀞𑀸𑀓𑀓𑀼𑀮𑁂 𑀉𑀧𑀸𑀲𑀺𑀓𑀸𑀬 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀲𑀺. 𑀢𑀲𑁆𑀲 𑀅𑀓𑁆𑀔𑀻𑀦𑀺 𑀦𑀺𑀓𑁆𑀔𑀫𑀺𑀁𑀲𑀼, 𑀫𑀼𑀔𑀢𑁄 𑀔𑁂𑀴𑁄 𑀧𑀕𑁆𑀖𑀭𑀺. 𑀉𑀧𑀸𑀲𑀺𑀓𑀸 𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀯𑀺𑀭𑀯𑀺. 𑀅𑀣 𑀦𑀁 𑀤𑁂𑀯𑀢𑀸 𑀅𑀤𑀺𑀲𑁆𑀲𑀫𑀸𑀦𑀭𑀽𑀧𑀸 𑀏𑀯𑀫𑀸𑀳 𑁋 ‘‘𑀫𑀬𑀸 𑀏𑀲 𑀕𑀳𑀺𑀢𑁄, 𑀩𑀮𑀺𑀓𑀫𑁆𑀫𑁂𑀦𑀧𑀺 𑀫𑁂 𑀅𑀢𑁆𑀣𑁄 𑀦𑀢𑁆𑀣𑀺, 𑀢𑀼𑀫𑁆𑀳𑀸𑀓𑀁 𑀧𑀦 𑀓𑀼𑀮𑀽𑀧𑀓𑀁 𑀣𑁂𑀭𑀁 𑀮𑀝𑁆𑀞𑀺𑀫𑀥𑀼𑀓𑀁 𑀬𑀸𑀘𑀺𑀢𑁆𑀯𑀸 𑀢𑁂𑀦 𑀢𑁂𑀮𑀁 𑀧𑀘𑀺𑀢𑁆𑀯𑀸 𑀇𑀫𑀲𑁆𑀲 𑀦𑀢𑁆𑀣𑀼𑀓𑀫𑁆𑀫𑀁 𑀤𑁂𑀣, 𑀏𑀯𑀸𑀳𑀁 𑀇𑀫𑀁 𑀫𑀼𑀜𑁆𑀘𑀺𑀲𑁆𑀲𑀸𑀫𑀻’’𑀢𑀺. 𑀦𑀲𑁆𑀲𑀢𑀼 𑀯𑀸 𑀏𑀲 𑀫𑀭𑀢𑀼 𑀯𑀸, 𑀦 𑀲𑀓𑁆𑀔𑀺𑀲𑁆𑀲𑀸𑀫𑀳𑀁 𑀅𑀬𑁆𑀬𑀁 𑀮𑀝𑁆𑀞𑀺𑀫𑀥𑀼𑀓𑀁 𑀬𑀸𑀘𑀺𑀢𑀼𑀦𑁆𑀢𑀺. 𑀲𑀘𑁂 𑀮𑀝𑁆𑀞𑀺𑀫𑀥𑀼𑀓𑀁 𑀬𑀸𑀘𑀺𑀢𑀼𑀁 𑀦 𑀲𑀓𑁆𑀓𑁄𑀣, 𑀦𑀸𑀲𑀺𑀓𑀸𑀬𑀲𑁆𑀲 𑀳𑀺𑀗𑁆𑀕𑀼𑀘𑀼𑀡𑁆𑀡𑀁 𑀧𑀓𑁆𑀔𑀺𑀧𑀺𑀢𑀼𑀁 𑀯𑀤𑁂𑀣𑀸𑀢𑀺. 𑀇𑀤𑀫𑁆𑀧𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀫𑀸𑀢𑀺. 𑀢𑁂𑀦 𑀳𑀺𑀲𑁆𑀲 𑀧𑀸𑀤𑀥𑁄𑀯𑀦𑀉𑀤𑀓𑀁 𑀆𑀤𑀸𑀬 𑀲𑀻𑀲𑁂 𑀆𑀲𑀺𑀜𑁆𑀘𑀣𑀸𑀢𑀺. 𑀉𑀧𑀸𑀲𑀺𑀓𑀸 ‘‘𑀲𑀓𑁆𑀓𑀸 𑀇𑀤𑀁 𑀓𑀸𑀢𑀼’’𑀦𑁆𑀢𑀺 𑀯𑁂𑀮𑀸𑀬 𑀆𑀕𑀢𑀁 𑀣𑁂𑀭𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀁 𑀤𑀢𑁆𑀯𑀸 𑀅𑀦𑁆𑀢𑀭𑀪𑀢𑁆𑀢𑁂 𑀦𑀺𑀲𑀺𑀦𑁆𑀦𑀲𑁆𑀲 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀉𑀤𑀓𑀁 𑀕𑀳𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀤𑀁 𑀉𑀤𑀓𑀁 𑀤𑀸𑀭𑀓𑀲𑁆𑀲 𑀲𑀻𑀲𑁂 𑀆𑀲𑀺𑀜𑁆𑀘𑀸𑀫𑀸’’𑀢𑀺 𑀆𑀧𑀼𑀘𑁆𑀙𑀺𑀢𑁆𑀯𑀸 ‘‘𑀢𑁂𑀦 𑀳𑀺 𑀆𑀲𑀺𑀜𑁆𑀘𑀣𑀸’’𑀢𑀺 𑀯𑀼𑀢𑁆𑀢𑁂 𑀢𑀣𑀸 𑀅𑀓𑀸𑀲𑀺. 𑀲𑀸 𑀤𑁂𑀯𑀢𑀸 𑀢𑀸𑀯𑀤𑁂𑀯 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀮𑁂𑀡𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺.

𑀣𑁂𑀭𑁄𑀧𑀺 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀉𑀝𑁆𑀞𑀸𑀬𑀸𑀲𑀦𑀸 𑀅𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑀢𑀸𑀬 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀲𑀚𑁆𑀛𑀸𑀬𑀦𑁆𑀢𑁄𑀯 𑀧𑀓𑁆𑀓𑀸𑀫𑀺. 𑀅𑀣 𑀦𑀁 𑀮𑁂𑀡𑀤𑁆𑀯𑀸𑀭𑀁 𑀧𑀢𑁆𑀢𑀓𑀸𑀮𑁂 𑀲𑀸 𑀤𑁂𑀯𑀢𑀸 ‘‘𑀫𑀳𑀸𑀯𑁂𑀚𑁆𑀚 𑀫𑀸 𑀇𑀥 𑀧𑀯𑀺𑀲𑀸’’𑀢𑀺 𑀆𑀳. 𑀲𑁄 𑀢𑀢𑁆𑀣𑁂𑀯 𑀞𑀢𑁆𑀯𑀸 ‘‘𑀓𑀸𑀲𑀺 𑀢𑁆𑀯’’𑀦𑁆𑀢𑀺 𑀆𑀳. 𑀅𑀳𑀁 𑀇𑀥 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸𑀢𑀺. 𑀣𑁂𑀭𑁄 ‘‘𑀅𑀢𑁆𑀣𑀺 𑀦𑀼 𑀔𑁄 𑀫𑀬𑀸 𑀯𑁂𑀚𑁆𑀚𑀓𑀫𑁆𑀫𑀲𑁆𑀲 𑀓𑀢𑀝𑁆𑀞𑀸𑀦’’𑀦𑁆𑀢𑀺 𑀉𑀧𑀲𑀫𑁆𑀧𑀤𑀫𑀸𑀴𑀓𑀢𑁄 𑀧𑀝𑁆𑀞𑀸𑀬 𑀑𑀮𑁄𑀓𑁂𑀦𑁆𑀢𑁄 𑀅𑀢𑁆𑀢𑀦𑁄 𑀲𑀻𑀮𑁂 𑀢𑀺𑀮𑀓𑀁 𑀯𑀸 𑀓𑀸𑀴𑀓𑀁 𑀯𑀸 𑀅𑀤𑀺𑀲𑁆𑀯𑀸 ‘‘𑀅𑀳𑀁 𑀫𑀬𑀸 𑀯𑁂𑀚𑁆𑀚𑀓𑀫𑁆𑀫𑀲𑁆𑀲 𑀓𑀢𑀝𑁆𑀞𑀸𑀦𑀁 𑀦 𑀧𑀲𑁆𑀲𑀸𑀫𑀺, 𑀓𑀲𑁆𑀫𑀸 𑀏𑀯𑀁 𑀯𑀤𑁂𑀲𑀻’’𑀢𑀺 𑀆𑀳. 𑀦 𑀧𑀲𑁆𑀲𑀲𑀻𑀢𑀺. 𑀆𑀫, 𑀦 𑀧𑀲𑁆𑀲𑀸𑀫𑀻𑀢𑀺? 𑀆𑀘𑀺𑀓𑁆𑀔𑀸𑀫𑀺 𑀢𑁂𑀢𑀺. 𑀆𑀫, 𑀆𑀘𑀺𑀓𑁆𑀔𑀸𑀳𑀻𑀢𑀺. 𑀢𑀺𑀝𑁆𑀞𑀢𑀼 𑀢𑀸𑀯 𑀤𑀽𑀭𑁂 𑀓𑀢𑀁, 𑀅𑀚𑁆𑀚𑁂𑀯 𑀢𑀬𑀸 𑀅𑀫𑀦𑀼𑀲𑁆𑀲𑀕𑀳𑀺𑀢𑀲𑁆𑀲 𑀉𑀧𑀝𑁆𑀞𑀸𑀓𑀧𑀼𑀢𑁆𑀢𑀲𑁆𑀲 𑀧𑀸𑀤𑀥𑁄𑀯𑀦𑀉𑀤𑀓𑀁 𑀲𑀻𑀲𑁂 𑀆𑀲𑀺𑀢𑁆𑀢𑀁, 𑀦𑀸𑀲𑀺𑀢𑁆𑀢𑀦𑁆𑀢𑀺? 𑀆𑀫, 𑀆𑀲𑀺𑀢𑁆𑀢𑀦𑁆𑀢𑀺. 𑀓𑀺𑀁 𑀏𑀢𑀁 𑀦 𑀧𑀲𑁆𑀲𑀲𑀻𑀢𑀺? 𑀏𑀢𑀁 𑀲𑀦𑁆𑀥𑀸𑀬 𑀢𑁆𑀯𑀁 𑀯𑀤𑁂𑀲𑀻𑀢𑀺? 𑀆𑀫, 𑀏𑀢𑀁 𑀲𑀦𑁆𑀥𑀸𑀬 𑀯𑀤𑀸𑀫𑀻𑀢𑀺. 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀯𑀢 𑀫𑁂 𑀲𑀫𑁆𑀫𑀸 𑀧𑀡𑀺𑀳𑀺𑀢𑁄 𑀅𑀢𑁆𑀢𑀸, 𑀲𑀸𑀲𑀦𑀲𑁆𑀲 𑀅𑀦𑀼𑀭𑀽𑀧𑀁 𑀯𑀢 𑀫𑁂 𑀘𑀭𑀺𑀢𑀁, 𑀤𑁂𑀯𑀢𑀸𑀧𑀺 𑀫𑀫 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀢𑀺𑀮𑀓𑀁 𑀯𑀸 𑀓𑀸𑀴𑀓𑀁 𑀯𑀸 𑀅𑀤𑀺𑀲𑁆𑀯𑀸 𑀤𑀸𑀭𑀓𑀲𑁆𑀲 𑀲𑀻𑀲𑁂 𑀆𑀲𑀺𑀢𑁆𑀢𑀧𑀸𑀤𑀥𑁄𑀯𑀦𑀫𑀢𑁆𑀢𑀁 𑀅𑀤𑁆𑀤𑀲𑀸’’𑀢𑀺 𑀢𑀲𑁆𑀲 𑀲𑀻𑀮𑀁 𑀆𑀭𑀩𑁆𑀪 𑀩𑀮𑀯𑀧𑀻𑀢𑀺 𑀉𑀧𑁆𑀧𑀚𑁆𑀚𑀺. 𑀲𑁄 𑀢𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀧𑀸𑀤𑀼𑀤𑁆𑀥𑀸𑀭𑀫𑁆𑀧𑀺 𑀅𑀓𑀢𑁆𑀯𑀸 𑀢𑀢𑁆𑀣𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 ‘‘𑀫𑀸𑀤𑀺𑀲𑀁 𑀧𑀭𑀺𑀲𑀼𑀤𑁆𑀥𑀁 𑀲𑀫𑀡𑀁 𑀤𑀽𑀲𑁂𑀢𑁆𑀯𑀸 𑀫𑀸 𑀇𑀥 𑀯𑀦𑀲𑀡𑁆𑀟𑁂 𑀯𑀲𑀺, 𑀢𑁆𑀯𑀫𑁂𑀯 𑀦𑀺𑀓𑁆𑀔𑀫𑀸𑀳𑀻’’𑀢𑀺 𑀤𑁂𑀯𑀢𑀁 𑀑𑀯𑀤𑀦𑁆𑀢𑁄 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀯𑀺𑀲𑀼𑀤𑁆𑀥𑁄 𑀯𑀢 𑀫𑁂 𑀯𑀸𑀲𑁄, 𑀦𑀺𑀫𑁆𑀫𑀮𑀁 𑀫𑀁 𑀢𑀧𑀲𑁆𑀲𑀺𑀦𑀁;

𑀫𑀸 𑀢𑁆𑀯𑀁 𑀯𑀺𑀲𑀼𑀤𑁆𑀥𑀁 𑀤𑀽𑀲𑁂𑀲𑀺, 𑀦𑀺𑀓𑁆𑀔𑀫 𑀧𑀯𑀦𑀸 𑀢𑀼𑀯’’𑀦𑁆𑀢𑀺.

𑀲𑁄 𑀢𑀢𑁆𑀣𑁂𑀯 𑀢𑁂𑀫𑀸𑀲𑀁 𑀯𑀲𑀺𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 ‘‘𑀓𑀺𑀁, 𑀆𑀯𑀼𑀲𑁄, 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀢𑁂 𑀫𑀢𑁆𑀣𑀓𑀁 𑀧𑀸𑀧𑀺𑀢’’𑀦𑁆𑀢𑀺 𑀧𑀼𑀝𑁆𑀞𑁄 𑀢𑀲𑁆𑀫𑀺𑀁 𑀮𑁂𑀡𑁂 𑀯𑀲𑁆𑀲𑀽𑀧𑀕𑀫𑀦𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀢𑁆𑀯𑀸, ‘‘𑀆𑀯𑀼𑀲𑁄, 𑀢𑁆𑀯𑀁 𑀤𑁂𑀯𑀢𑀸𑀬 𑀏𑀯𑀁 𑀯𑀼𑀘𑁆𑀘𑀫𑀸𑀦𑁄 𑀦 𑀓𑀼𑀚𑁆𑀛𑀻’’𑀢𑀺 𑀯𑀼𑀢𑁆𑀢𑁂 ‘‘𑀦 𑀓𑀼𑀚𑁆𑀛𑀺’’𑀦𑁆𑀢𑀺 𑀆𑀳. 𑀪𑀺𑀓𑁆𑀔𑀽 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀼𑀁, ‘‘𑀪𑀦𑁆𑀢𑁂, 𑀅𑀬𑀁 𑀪𑀺𑀓𑁆𑀔𑀼 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀺, 𑀤𑁂𑀯𑀢𑀸𑀬 𑀇𑀤𑀁 𑀦𑀸𑀫 𑀯𑀼𑀘𑁆𑀘𑀫𑀸𑀦𑁄𑀧𑀺 𑀦 𑀓𑀼𑀚𑁆𑀛𑀺𑀦𑁆𑀢𑀺 𑀯𑀤𑀢𑀻’’𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀦𑁂𑀯, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑁄 𑀓𑀼𑀚𑁆𑀛𑀢𑀺, 𑀏𑀢𑀲𑁆𑀲 𑀕𑀺𑀳𑀻𑀳𑀺 𑀯𑀸 𑀧𑀩𑁆𑀩𑀚𑀺𑀢𑁂𑀳𑀺 𑀯𑀸 𑀲𑀁𑀲𑀕𑁆𑀕𑁄 𑀦𑀸𑀫 𑀦𑀢𑁆𑀣𑀺, 𑀅𑀲𑀁𑀲𑀝𑁆𑀞𑁄 𑀏𑀲 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁦𑁪. ‘‘𑀅𑀲𑀁𑀲𑀝𑁆𑀞𑀁 𑀕𑀳𑀝𑁆𑀞𑁂𑀳𑀺, 𑀅𑀦𑀸𑀕𑀸𑀭𑁂𑀳𑀺 𑀘𑀽𑀪𑀬𑀁;

𑀅𑀦𑁄𑀓𑀲𑀸𑀭𑀺𑀫𑀧𑁆𑀧𑀺𑀘𑁆𑀙𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀅𑀲𑀁𑀲𑀝𑁆𑀞𑀦𑁆𑀢𑀺 𑀤𑀲𑁆𑀲𑀦𑀲𑀯𑀦𑀲𑀫𑀼𑀮𑁆𑀮𑀧𑀦𑀧𑀭𑀺𑀪𑁄𑀕𑀓𑀸𑀬𑀲𑀁𑀲𑀕𑁆𑀕𑀸𑀦𑀁 𑀅𑀪𑀸𑀯𑁂𑀦 𑀅𑀲𑀁𑀲𑀝𑁆𑀞𑀁. 𑀉𑀪𑀬𑀦𑁆𑀢𑀺 𑀕𑀺𑀳𑀻𑀳𑀺 𑀘 𑀅𑀦𑀸𑀕𑀸𑀭𑁂𑀳𑀺 𑀘𑀸𑀢𑀺 𑀉𑀪𑀬𑁂𑀳𑀺𑀧𑀺 𑀅𑀲𑀁𑀲𑀝𑁆𑀞𑀁. 𑀅𑀦𑁄𑀓𑀲𑀸𑀭𑀺𑀦𑁆𑀢𑀺 𑀅𑀦𑀸𑀮𑀬𑀘𑀸𑀭𑀺𑀁 𑀢𑀁 𑀏𑀯𑀭𑀽𑀧𑀁 𑀅𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀧𑀩𑁆𑀪𑀸𑀭𑀯𑀸𑀲𑀻𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼 𑀏𑀓𑀯𑀻𑀲𑀢𑀺𑀫𑀁.