𑁧𑁭. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼

𑀅𑀓𑁆𑀓𑁄𑀥𑀦𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀤𑀸 𑀓𑀺𑀭 𑀣𑁂𑀭𑁄 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀦𑀸𑀮𑀓𑀕𑀸𑀫𑁂 𑀫𑀸𑀢𑀼 𑀖𑀭𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀲𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀭𑀺𑀯𑀺𑀲𑀫𑀸𑀦𑀸 𑀅𑀓𑁆𑀓𑁄𑀲𑀺 𑁋 ‘‘𑀅𑀫𑁆𑀪𑁄, 𑀉𑀘𑁆𑀙𑀺𑀝𑁆𑀞𑀔𑀸𑀤𑀓 𑀉𑀘𑁆𑀙𑀺𑀝𑁆𑀞𑀓𑀜𑁆𑀚𑀺𑀬𑀁 𑀅𑀮𑀪𑀺𑀢𑁆𑀯𑀸 𑀧𑀭𑀖𑀭𑁂𑀲𑀼 𑀉𑀴𑀼𑀗𑁆𑀓𑀧𑀺𑀝𑁆𑀞𑁂𑀦 𑀖𑀝𑁆𑀝𑀺𑀢𑀓𑀜𑁆𑀚𑀺𑀬𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄𑀲𑀺, 𑀦𑀸𑀲𑀺𑀢𑀫𑁆𑀳𑀸 𑀢𑀬𑀸, 𑀪𑀼𑀜𑁆𑀚𑀸𑀳𑀺 𑀤𑀸𑀦𑀻’’𑀢𑀺. 𑀪𑀺𑀓𑁆𑀔𑀽𑀦𑀫𑁆𑀧𑀺 𑀪𑀢𑁆𑀢𑀁 𑀤𑀤𑀫𑀸𑀦𑀸 ‘‘𑀢𑀼𑀫𑁆𑀳𑁂𑀳𑀺 𑀫𑀫 𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀘𑀽𑀴𑀼𑀧𑀝𑁆𑀞𑀸𑀓𑁄 𑀓𑀢𑁄, 𑀇𑀤𑀸𑀦𑀺 𑀪𑀼𑀜𑁆𑀚𑀣𑀸’’𑀢𑀺 𑀯𑀤𑁂𑀢𑀺. 𑀣𑁂𑀭𑁄 𑀪𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀫𑁂𑀯 𑀅𑀕𑀫𑀸𑀲𑀺. 𑀅𑀣𑀸𑀬𑀲𑁆𑀫𑀸 𑀭𑀸𑀳𑀼𑀮𑁄 𑀲𑀢𑁆𑀣𑀸𑀭𑀁 𑀧𑀺𑀡𑁆𑀟𑀧𑀸𑀢𑁂𑀦 𑀆𑀧𑀼𑀘𑁆𑀙𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 𑁋 ‘‘𑀭𑀸𑀳𑀼𑀮, 𑀓𑀳𑀁 𑀕𑀫𑀺𑀢𑁆𑀣𑀸’’𑀢𑀺? ‘‘𑀅𑀬𑁆𑀬𑀺𑀓𑀸𑀬 𑀕𑀸𑀫𑀁, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀦 𑀢𑁂 𑀅𑀬𑁆𑀬𑀺𑀓𑀸𑀬 𑀉𑀧𑀚𑁆𑀛𑀸𑀬𑁄 𑀯𑀼𑀢𑁆𑀢𑁄’’𑀢𑀺? ‘‘𑀅𑀬𑁆𑀬𑀺𑀓𑀸𑀬 𑀫𑁂, 𑀪𑀦𑁆𑀢𑁂, 𑀉𑀧𑀚𑁆𑀛𑀸𑀬𑁄 𑀅𑀓𑁆𑀓𑀼𑀝𑁆𑀞𑁄’’𑀢𑀺. ‘‘𑀓𑀺𑀦𑁆𑀢𑀺 𑀯𑀢𑁆𑀯𑀸’’𑀢𑀺? ‘‘𑀇𑀤𑀁 𑀦𑀸𑀫, 𑀪𑀦𑁆𑀢𑁂’’𑀢𑀺. ‘‘𑀉𑀧𑀚𑁆𑀛𑀸𑀬𑁂𑀦 𑀧𑀦 𑀢𑁂 𑀓𑀺𑀁 𑀯𑀼𑀢𑁆𑀢’’𑀦𑁆𑀢𑀺? ‘‘𑀦 𑀓𑀺𑀜𑁆𑀘𑀺, 𑀪𑀦𑁆𑀢𑁂’’𑀢𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁, ‘‘𑀆𑀯𑀼𑀲𑁄, 𑀅𑀘𑁆𑀙𑀭𑀺𑀬𑀸 𑀯𑀢 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀕𑀼𑀡𑀸, 𑀏𑀯𑀁𑀦𑀸𑀫𑀲𑁆𑀲 𑀫𑀸𑀢𑀭𑀺 𑀅𑀓𑁆𑀓𑁄𑀲𑀦𑁆𑀢𑀺𑀬𑀸 𑀓𑁄𑀥𑀫𑀢𑁆𑀢𑀫𑁆𑀧𑀺 𑀦𑀸𑀳𑁄𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀔𑀻𑀡𑀸𑀲𑀯𑀸 𑀦𑀸𑀫 𑀅𑀓𑁆𑀓𑁄𑀥𑀦𑀸𑀯 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁦𑁦. ‘‘𑀅𑀓𑁆𑀓𑁄𑀥𑀦𑀁 𑀯𑀢𑀯𑀦𑁆𑀢𑀁, 𑀲𑀻𑀮𑀯𑀦𑁆𑀢𑀁 𑀅𑀦𑀼𑀲𑁆𑀲𑀤𑀁;

𑀤𑀦𑁆𑀢𑀁 𑀅𑀦𑁆𑀢𑀺𑀫𑀲𑀸𑀭𑀻𑀭𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀯𑀢𑀯𑀦𑁆𑀢𑀦𑁆𑀢𑀺 𑀥𑀼𑀢𑀯𑀢𑁂𑀦, 𑀲𑀫𑀦𑁆𑀦𑀸𑀕𑀢𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀦 𑀲𑀻𑀮𑀯𑀦𑁆𑀢𑀁, 𑀢𑀡𑁆𑀳𑀸𑀉𑀲𑁆𑀲𑀤𑀸𑀪𑀸𑀯𑁂𑀦 𑀅𑀦𑀼𑀲𑁆𑀲𑀤𑀁 , 𑀙𑀴𑀺𑀦𑁆𑀤𑁆𑀭𑀺𑀬𑀤𑀫𑀦𑁂𑀦 𑀤𑀦𑁆𑀢𑀁, 𑀓𑁄𑀝𑀺𑀬𑀁 𑀞𑀺𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀅𑀦𑁆𑀢𑀺𑀫𑀲𑀭𑀻𑀭𑀁 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼 𑀲𑀢𑁆𑀢𑀭𑀲𑀫𑀁.