𑁧𑁮. 𑀉𑀧𑁆𑀧𑀮𑀯𑀡𑁆𑀡𑀸𑀣𑁂𑀭𑀻𑀯𑀢𑁆𑀣𑀼

𑀯𑀸𑀭𑀺 𑀧𑁄𑀓𑁆𑀔𑀭𑀧𑀢𑁆𑀢𑁂𑀯𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀧𑁆𑀧𑀮𑀯𑀡𑁆𑀡𑀣𑁂𑀭𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 ‘‘𑀫𑀥𑀼𑀯𑀸 𑀫𑀜𑁆𑀜𑀢𑀺 𑀩𑀸𑀮𑁄’’𑀢𑀺 𑀕𑀸𑀣𑀸𑀯𑀡𑁆𑀡𑀦𑀸𑀬 (𑀥. 𑀧. 𑁬𑁯) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 (𑀥. 𑀧. 𑀅𑀝𑁆𑀞. 𑁧.𑁬𑁯) 𑁋

𑀅𑀧𑀭𑁂𑀦 𑀲𑀫𑀬𑁂𑀦 𑀫𑀳𑀸𑀚𑀦𑁄 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀺 ‘‘𑀔𑀻𑀡𑀸𑀲𑀯𑀸𑀧𑀺 𑀫𑀜𑁆𑀜𑁂 𑀓𑀸𑀫𑀲𑀼𑀔𑀁 𑀲𑀸𑀤𑀺𑀬𑀦𑁆𑀢𑀺, 𑀓𑀸𑀫𑀁 𑀲𑁂𑀯𑀦𑁆𑀢𑀺, 𑀓𑀺𑀁 𑀦 𑀲𑁂𑀯𑀺𑀲𑁆𑀲𑀦𑁆𑀢𑀺. 𑀦 𑀳𑁂𑀢𑁂 𑀓𑁄𑀴𑀸𑀧𑀭𑀼𑀓𑁆𑀔𑀸, 𑀦 𑀘 𑀯𑀫𑁆𑀫𑀺𑀓𑀸, 𑀅𑀮𑁆𑀮𑀫𑀁𑀲𑀲𑀭𑀻𑀭𑀸𑀯, 𑀢𑀲𑁆𑀫𑀸 𑀏𑀢𑁂𑀧𑀺 𑀓𑀸𑀫𑀲𑀼𑀔𑀁 𑀲𑀸𑀤𑀺𑀬𑀦𑁆𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀔𑀻𑀡𑀸𑀲𑀯𑀸 𑀓𑀸𑀫𑀲𑀼𑀔𑀁 𑀲𑀸𑀤𑀺𑀬𑀦𑁆𑀢𑀺, 𑀦 𑀓𑀸𑀫𑀁 𑀲𑁂𑀯𑀦𑁆𑀢𑀺. 𑀬𑀣𑀸 𑀳𑀺 𑀧𑀤𑀼𑀫𑀧𑀢𑁆𑀢𑁂 𑀧𑀢𑀺𑀢𑀁 𑀉𑀤𑀓𑀩𑀺𑀦𑁆𑀤𑀼 𑀦 𑀮𑀺𑀫𑁆𑀧𑀢𑀺 𑀦 𑀲𑀡𑁆𑀞𑀸𑀢𑀺, 𑀯𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀦 𑀧𑀢𑀢𑁂𑀯. 𑀬𑀣𑀸 𑀘 𑀆𑀭𑀕𑁆𑀕𑁂 𑀲𑀸𑀲𑀧𑁄 𑀦 𑀉𑀧𑀮𑀺𑀫𑁆𑀧𑀢𑀺 𑀦 𑀲𑀡𑁆𑀞𑀸𑀢𑀺, 𑀯𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀢𑀢𑁂𑀯, 𑀏𑀯𑀁 𑀔𑀻𑀡𑀸𑀲𑀯𑀲𑁆𑀲 𑀘𑀺𑀢𑁆𑀢𑁂 𑀤𑀼𑀯𑀺𑀥𑁄𑀧𑀺 𑀓𑀸𑀫𑁄 𑀦 𑀮𑀺𑀫𑁆𑀧𑀢𑀺 𑀦 𑀲𑀡𑁆𑀞𑀸𑀢𑀻’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁪𑁦𑁧. ‘‘𑀯𑀸𑀭𑀺 𑀧𑁄𑀓𑁆𑀔𑀭𑀧𑀢𑁆𑀢𑁂𑀯, 𑀆𑀭𑀕𑁆𑀕𑁂𑀭𑀺𑀯 𑀲𑀸𑀲𑀧𑁄;

𑀬𑁄 𑀦 𑀮𑀺𑀫𑁆𑀧𑀢𑀺 𑀓𑀸𑀫𑁂𑀲𑀼, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺.

𑀢𑀢𑁆𑀣 𑀬𑁄 𑀦 𑀮𑀺𑀫𑁆𑀧𑀢𑀻𑀢𑀺 𑀏𑀯𑀫𑁂𑀯𑀁 𑀬𑁄 𑀅𑀩𑁆𑀪𑀦𑁆𑀢𑀭𑁂 𑀤𑀼𑀯𑀺𑀥𑁂𑀧𑀺 𑀓𑀸𑀫𑁂 𑀦 𑀉𑀧𑀮𑀺𑀫𑁆𑀧𑀢𑀺, 𑀢𑀲𑁆𑀫𑀺𑀁 𑀓𑀸𑀫𑁂 𑀦 𑀲𑀡𑁆𑀞𑀸𑀢𑀺, 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀉𑀧𑁆𑀧𑀮𑀯𑀡𑁆𑀡𑀸𑀣𑁂𑀭𑀻𑀯𑀢𑁆𑀣𑀼 𑀅𑀝𑁆𑀞𑀸𑀭𑀲𑀫𑀁.