𑁧𑁨. 𑀲𑀼𑀫𑀦𑀲𑀸𑀫𑀡𑁂𑀭𑀯𑀢𑁆𑀣𑀼

𑀬𑁄 𑀳𑀯𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀧𑀼𑀩𑁆𑀩𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀲𑀼𑀫𑀦𑀲𑀸𑀫𑀡𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀻 𑀓𑀣𑀸 𑁋

𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑀲𑁆𑀫𑀺𑀜𑁆𑀳𑀺 𑀏𑀓𑁄 𑀓𑀼𑀮𑀧𑀼𑀢𑁆𑀢𑁄 𑀲𑀢𑁆𑀣𑀸𑀭𑀸 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀏𑀓𑀁 𑀪𑀺𑀓𑁆𑀔𑀼𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑀬𑀫𑀸𑀦𑁄 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀳𑀫𑁆𑀧𑀺 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀅𑀕𑁆𑀕𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀞𑀧𑁂𑀲𑀺. 𑀲𑀢𑁆𑀣𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀧𑀢𑁆𑀣𑀦𑀸𑀬 𑀲𑀫𑀺𑀚𑁆𑀛𑀦𑀪𑀸𑀯𑀁 𑀯𑀺𑀤𑀺𑀢𑁆𑀯𑀸 ‘‘𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀕𑁄𑀢𑀫𑀩𑀼𑀤𑁆𑀥𑀲𑀸𑀲𑀦𑁂 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀅𑀕𑁆𑀕𑁄 𑀅𑀦𑀼𑀭𑀼𑀤𑁆𑀥𑁄 𑀦𑀸𑀫 𑀪𑀯𑀺𑀲𑁆𑀲𑀲𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀲𑁄 𑀢𑀁 𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 𑀲𑁆𑀯𑁂 𑀧𑀢𑁆𑀢𑀩𑁆𑀩𑀁 𑀯𑀺𑀬 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀫𑀜𑁆𑀜𑀫𑀸𑀦𑁄 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀢𑁆𑀣𑀭𑀺 𑀪𑀺𑀓𑁆𑀔𑀽 𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀲𑀢𑁆𑀢𑀬𑁄𑀚𑀦𑀺𑀓𑀁 𑀓𑀜𑁆𑀘𑀦𑀣𑀽𑀧𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁂𑀓𑀸𑀦𑀺 𑀤𑀻𑀧𑀭𑀼𑀓𑁆𑀔𑀲𑀳𑀲𑁆𑀲𑀸𑀦𑀺 𑀓𑀸𑀭𑁂𑀢𑁆𑀯𑀸 𑀤𑀻𑀧𑀧𑀽𑀚𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀩𑀸𑀭𑀸𑀡𑀲𑀺𑀬𑀁 𑀤𑀮𑀺𑀤𑁆𑀤𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀲𑀼𑀫𑀦𑀲𑁂𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀢𑀲𑁆𑀲 𑀢𑀺𑀡𑀳𑀸𑀭𑀓𑁄 𑀳𑀼𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀅𑀦𑁆𑀦𑀪𑀸𑀭𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑀼𑀫𑀦𑀲𑁂𑀝𑁆𑀞𑀻𑀧𑀺 𑀢𑀲𑁆𑀫𑀺𑀁 𑀦𑀕𑀭𑁂 𑀦𑀺𑀘𑁆𑀘𑀓𑀸𑀮𑀁 𑀫𑀳𑀸𑀤𑀸𑀦𑀁 𑀤𑁂𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀉𑀧𑀭𑀺𑀝𑁆𑀞𑁄 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀕𑀦𑁆𑀥𑀫𑀸𑀤𑀦𑁂 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 ‘‘𑀓𑀲𑁆𑀲 𑀦𑀼 𑀔𑁄 𑀅𑀚𑁆𑀚 𑀅𑀦𑀼𑀕𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀚𑁆𑀚 𑀫𑀬𑀸 𑀅𑀦𑁆𑀦𑀪𑀸𑀭𑀲𑁆𑀲 𑀅𑀦𑀼𑀕𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀇𑀤𑀸𑀦𑀺 𑀘 𑀲𑁄 𑀅𑀝𑀯𑀺𑀢𑁄 𑀢𑀺𑀡𑀁 𑀆𑀤𑀸𑀬 𑀕𑁂𑀳𑀁 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀇𑀤𑁆𑀥𑀺𑀬𑀸 𑀕𑀦𑁆𑀢𑁆𑀯𑀸 𑀅𑀦𑁆𑀦𑀪𑀸𑀭𑀲𑁆𑀲 𑀲𑀫𑁆𑀫𑀼𑀔𑁂 𑀧𑀘𑁆𑀘𑀼𑀝𑁆𑀞𑀸𑀲𑀺. 𑀅𑀦𑁆𑀦𑀪𑀸𑀭𑁄 𑀢𑀁 𑀢𑀼𑀘𑁆𑀙𑀧𑀢𑁆𑀢𑀳𑀢𑁆𑀣𑀁 𑀤𑀺𑀲𑁆𑀯𑀸 ‘‘𑀅𑀧𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀁 𑀮𑀪𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀮𑀪𑀺𑀲𑁆𑀲𑀸𑀫 𑀫𑀳𑀸𑀧𑀼𑀜𑁆𑀜𑀸’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀣𑁄𑀓𑀁 𑀆𑀕𑀫𑁂𑀣𑀸’’𑀢𑀺 𑀢𑀺𑀡𑀓𑀸𑀚𑀁 𑀙𑀟𑁆𑀟𑁂𑀢𑁆𑀯𑀸 𑀯𑁂𑀕𑁂𑀦 𑀕𑁂𑀳𑀁 𑀕𑀦𑁆𑀢𑁆𑀯𑀸, ‘‘𑀪𑀤𑁆𑀤𑁂, 𑀫𑀬𑁆𑀳𑀁 𑀞𑀧𑀺𑀢𑀪𑀸𑀕𑀪𑀢𑁆𑀢𑀁 𑀅𑀢𑁆𑀣𑀺, 𑀦𑀢𑁆𑀣𑀻’’𑀢𑀺 𑀪𑀭𑀺𑀬𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀢𑁆𑀣𑀺, 𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀯𑁂𑀕𑁂𑀦 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀢𑁆𑀢𑀁 𑀆𑀤𑀸𑀬 ‘‘𑀫𑀬𑁆𑀳𑀁 𑀤𑀸𑀢𑀼𑀓𑀸𑀫𑀢𑀸𑀬 𑀲𑀢𑀺 𑀤𑁂𑀬𑁆𑀬𑀥𑀫𑁆𑀫𑁄 𑀦 𑀳𑁄𑀢𑀺, 𑀤𑁂𑀬𑁆𑀬𑀥𑀫𑁆𑀫𑁂 𑀲𑀢𑀺 𑀧𑀝𑀺𑀕𑁆𑀕𑀸𑀳𑀓𑀁 𑀦 𑀮𑀪𑀸𑀫𑀺. 𑀅𑀚𑁆𑀚 𑀧𑀦 𑀫𑁂 𑀧𑀝𑀺𑀕𑁆𑀕𑀸𑀳𑀓𑁄 𑀘 𑀤𑀺𑀝𑁆𑀞𑁄, 𑀤𑁂𑀬𑁆𑀬𑀥𑀫𑁆𑀫𑁄 𑀘 𑀅𑀢𑁆𑀣𑀺, 𑀮𑀸𑀪𑀸 𑀯𑀢 𑀫𑁂’’𑀢𑀺 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀧𑀢𑁆𑀢𑁂 𑀧𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀧𑀘𑁆𑀘𑀸𑀳𑀭𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑁂 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑁋

‘‘𑀇𑀫𑀺𑀦𑀸 𑀧𑀦 𑀤𑀸𑀦𑁂𑀦, 𑀫𑀸 𑀫𑁂 𑀤𑀸𑀮𑀺𑀤𑁆𑀤𑀺𑀬𑀁 𑀅𑀳𑀼;

𑀦𑀢𑁆𑀣𑀻𑀢𑀺 𑀯𑀘𑀦𑀁 𑀦𑀸𑀫, 𑀫𑀸 𑀅𑀳𑁄𑀲𑀺 𑀪𑀯𑀸𑀪𑀯𑁂. 𑁋

𑀪𑀦𑁆𑀢𑁂 𑀏𑀯𑀭𑀽𑀧𑀸 𑀤𑀼𑀚𑁆𑀚𑀻𑀯𑀺𑀢𑀸 𑀫𑀼𑀘𑁆𑀘𑁂𑀬𑁆𑀬𑀁, 𑀦𑀢𑁆𑀣𑀻𑀢𑀺 𑀧𑀤𑀫𑁂𑀯 𑀦 𑀲𑀼𑀡𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀞𑀧𑁂𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 ‘‘𑀏𑀯𑀁 𑀳𑁄𑀢𑀼 𑀫𑀳𑀸𑀧𑀼𑀜𑁆𑀜𑀸’’𑀢𑀺 𑀯𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑀼𑀫𑀦𑀲𑁂𑀝𑁆𑀞𑀺𑀦𑁄𑀧𑀺 𑀙𑀢𑁆𑀢𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 ‘‘𑀅𑀳𑁄 𑀤𑀸𑀦𑀁 𑀧𑀭𑀫𑀤𑀸𑀦𑀁, 𑀉𑀧𑀭𑀺𑀝𑁆𑀞𑁂 𑀲𑀼𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀅𑀣 𑀦𑀁 𑀲𑁂𑀝𑁆𑀞𑀺 ‘‘𑀓𑀺𑀁 𑀫𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀤𑀸𑀦𑀁 𑀤𑀤𑀫𑀸𑀦𑀁 𑀦 𑀧𑀲𑁆𑀲𑀲𑀻’’𑀢𑀺 𑀆𑀳. 𑀦𑀸𑀳𑀁 𑀢𑀯 𑀤𑀸𑀦𑀁 𑀆𑀭𑀩𑁆𑀪 𑀲𑀸𑀥𑀼𑀓𑀸𑀭𑀁 𑀤𑁂𑀫𑀺, 𑀅𑀦𑁆𑀦𑀪𑀸𑀭𑁂𑀦 𑀧𑀦 𑀉𑀧𑀭𑀺𑀝𑁆𑀞𑀲𑁆𑀲 𑀤𑀺𑀦𑁆𑀦𑀧𑀺𑀡𑁆𑀟𑀧𑀸𑀢𑁂 𑀧𑀲𑀻𑀤𑀺𑀢𑁆𑀯𑀸 𑀫𑀬𑀸 𑀏𑀲 𑀲𑀸𑀥𑀼𑀓𑀸𑀭𑁄 𑀧𑀯𑀢𑁆𑀢𑀺𑀢𑁄𑀢𑀺. 𑀲𑁄 ‘‘𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄, 𑀅𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀤𑀸𑀦𑀁 𑀤𑀤𑀦𑁆𑀢𑁄 𑀤𑁂𑀯𑀢𑀁 𑀲𑀸𑀥𑀼𑀓𑀸𑀭𑀁 𑀤𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁, 𑀅𑀦𑁆𑀦𑀪𑀸𑀭𑁄 𑀫𑀁 𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑁄 𑀏𑀓𑀧𑀺𑀡𑁆𑀟𑀧𑀸𑀢𑁂𑀦𑁂𑀯 𑀲𑀸𑀥𑀼𑀓𑀸𑀭𑀁 𑀤𑀸𑀧𑁂𑀲𑀺, 𑀢𑀲𑁆𑀲 𑀤𑀸𑀦𑁂 𑀅𑀦𑀼𑀘𑁆𑀙𑀯𑀺𑀓𑀁 𑀓𑀢𑁆𑀯𑀸 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀫𑀫 𑀲𑀦𑁆𑀢𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀅𑀚𑁆𑀚 𑀢𑀬𑀸 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀤𑀺𑀦𑁆𑀦’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀲𑀸𑀫𑀺, 𑀉𑀧𑀭𑀺𑀝𑁆𑀞𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀫𑁂 𑀅𑀚𑁆𑀚 𑀪𑀸𑀕𑀪𑀢𑁆𑀢𑀁 𑀤𑀺𑀦𑁆𑀦’’𑀦𑁆𑀢𑀺. ‘‘𑀳𑀦𑁆𑀤, 𑀪𑁄, 𑀓𑀳𑀸𑀧𑀡𑀁 𑀕𑀳𑁂𑀢𑁆𑀯𑀸 𑀏𑀢𑀁 𑀫𑀬𑁆𑀳𑀁 𑀧𑀺𑀡𑁆𑀟𑀧𑀸𑀢𑀁 𑀤𑁂𑀳𑀻’’𑀢𑀺? ‘‘𑀦 𑀤𑁂𑀫𑀺, 𑀲𑀸𑀫𑀻’’𑀢𑀺. 𑀲𑁄 𑀬𑀸𑀯 𑀲𑀳𑀲𑁆𑀲𑀁 𑀯𑀟𑁆𑀠𑁂𑀲𑀺, 𑀇𑀢𑀭𑁄 𑀲𑀳𑀲𑁆𑀲𑁂𑀦𑀸𑀧𑀺 𑀦𑀸𑀤𑀸𑀲𑀺. 𑀅𑀣 𑀦𑀁 ‘‘𑀳𑁄𑀢𑀼, 𑀪𑁄, 𑀬𑀤𑀺 𑀧𑀺𑀡𑁆𑀟𑀧𑀸𑀢𑀁 𑀦 𑀤𑁂𑀲𑀺, 𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸 𑀧𑀢𑁆𑀢𑀺𑀁 𑀫𑁂 𑀤𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀅𑀬𑁆𑀬𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑁂𑀕𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸, ‘‘𑀪𑀦𑁆𑀢𑁂 𑀲𑀼𑀫𑀦𑀲𑁂𑀝𑁆𑀞𑀺, 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀧𑀺𑀡𑁆𑀟𑀧𑀸𑀢𑁂 𑀧𑀢𑁆𑀢𑀺𑀁 𑀬𑀸𑀘𑀢𑀺, 𑀓𑀺𑀁 𑀓𑀭𑁄𑀫𑀻’’𑀢𑀺 𑀧𑀼𑀘𑁆𑀙𑀺.

𑀅𑀣𑀲𑁆𑀲 𑀲𑁄 𑀉𑀧𑀫𑀁 𑀆𑀳𑀭𑀺 ‘‘𑀲𑁂𑀬𑁆𑀬𑀣𑀸𑀧𑀺, 𑀧𑀡𑁆𑀟𑀺𑀢, 𑀓𑀼𑀮𑀲𑀢𑀺𑀓𑁂 𑀕𑀸𑀫𑁂 𑀏𑀓𑀲𑁆𑀫𑀺𑀁 𑀖𑀭𑁂 𑀤𑀻𑀧𑀁 𑀚𑀸𑀮𑁂𑀬𑁆𑀬, 𑀲𑁂𑀲𑀸 𑀅𑀢𑁆𑀢𑀦𑁄 𑀢𑁂𑀮𑁂𑀦 𑀯𑀝𑁆𑀝𑀺𑀁 𑀢𑁂𑀫𑁂𑀢𑁆𑀯𑀸 𑀚𑀸𑀮𑀸𑀧𑁂𑀢𑁆𑀯𑀸 𑀕𑀡𑁆𑀳𑁂𑀬𑁆𑀬𑀼𑀁, 𑀧𑀼𑀭𑀺𑀫𑀧𑀤𑀻𑀧𑀲𑁆𑀲 𑀧𑀪𑀸 𑀅𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑀸 𑀦𑀢𑁆𑀣𑀻’’𑀢𑀺. 𑀅𑀢𑀺𑀭𑁂𑀓𑀢𑀭𑀸, 𑀪𑀦𑁆𑀢𑁂, 𑀧𑀪𑀸 𑀳𑁄𑀢𑀻𑀢𑀺. 𑀏𑀯𑀫𑁂𑀯𑀁 𑀧𑀡𑁆𑀟𑀺𑀢 𑀉𑀴𑀼𑀗𑁆𑀓𑀬𑀸𑀕𑀼 𑀯𑀸 𑀳𑁄𑀢𑀼, 𑀓𑀝𑀘𑁆𑀙𑀼𑀪𑀺𑀓𑁆𑀔𑀸 𑀯𑀸, 𑀅𑀢𑁆𑀢𑀦𑁄 𑀧𑀺𑀡𑁆𑀟𑀧𑀸𑀢𑁂 𑀧𑀭𑁂𑀲𑀁 𑀧𑀢𑁆𑀢𑀺𑀁 𑀤𑁂𑀦𑁆𑀢𑀲𑁆𑀲 𑀬𑀢𑁆𑀢𑀓𑀸𑀦𑀁 𑀤𑁂𑀢𑀺, 𑀢𑀢𑁆𑀢𑀓𑀁 𑀯𑀟𑁆𑀠𑀢𑀺. 𑀢𑁆𑀯𑀜𑁆𑀳𑀺 𑀏𑀓𑀫𑁂𑀯 𑀧𑀺𑀡𑁆𑀟𑀧𑀸𑀢𑀁 𑀅𑀤𑀸𑀲𑀺, 𑀲𑁂𑀝𑁆𑀞𑀺𑀲𑁆𑀲 𑀧𑀦 𑀧𑀢𑁆𑀢𑀺𑀬𑀸 𑀤𑀺𑀦𑁆𑀦𑀸𑀬 𑀤𑁆𑀯𑁂 𑀧𑀺𑀡𑁆𑀟𑀧𑀸𑀢𑀸 𑀳𑁄𑀦𑁆𑀢𑀺 𑀏𑀓𑁄 𑀢𑀯, 𑀏𑀓𑁄 𑀢𑀲𑁆𑀲𑀸𑀢𑀺.

𑀲𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀕𑀡𑁆𑀳, 𑀲𑀸𑀫𑀺, 𑀧𑀢𑁆𑀢𑀺’’𑀦𑁆𑀢𑀺 𑀆𑀳. 𑀢𑁂𑀦 𑀳𑀺 𑀇𑀫𑁂 𑀓𑀳𑀸𑀧𑀡𑁂 𑀕𑀡𑁆𑀳𑀸𑀢𑀺. 𑀦𑀸𑀳𑀁 𑀧𑀺𑀡𑁆𑀟𑀧𑀸𑀢𑀁 𑀯𑀺𑀓𑁆𑀓𑀺𑀡𑀸𑀫𑀺, 𑀲𑀤𑁆𑀥𑀸𑀬 𑀢𑁂 𑀧𑀢𑁆𑀢𑀺𑀁 𑀤𑀫𑁆𑀫𑀻𑀢𑀺. ‘‘𑀢𑁆𑀯𑀁 𑀲𑀤𑁆𑀥𑀸𑀬 𑀤𑁂𑀲𑀺, 𑀅𑀳𑀫𑁆𑀧𑀺 𑀢𑀯 𑀕𑀼𑀡𑁂 𑀧𑀽𑀚𑁂𑀫𑀺, 𑀕𑀡𑁆𑀳, 𑀢𑀸𑀢, 𑀇𑀢𑁄 𑀧𑀝𑁆𑀞𑀸𑀬 𑀘 𑀧𑀦 𑀫𑀸 𑀲𑀳𑀢𑁆𑀣𑀸 𑀓𑀫𑁆𑀫𑀫𑀓𑀸𑀲𑀺, 𑀯𑀻𑀣𑀺𑀬𑀁 𑀖𑀭𑀁 𑀫𑀸𑀧𑁂𑀢𑁆𑀯𑀸 𑀯𑀲. 𑀬𑁂𑀦 𑀘 𑀢𑁂 𑀅𑀢𑁆𑀣𑁄 𑀳𑁄𑀢𑀺, 𑀲𑀩𑁆𑀩𑀁 𑀫𑀫 𑀲𑀦𑁆𑀢𑀺𑀓𑀸 𑀕𑀡𑁆𑀳𑀸𑀳𑀻’’𑀢𑀺 𑀆𑀳. 𑀦𑀺𑀭𑁄𑀥𑀸 𑀯𑀼𑀝𑁆𑀞𑀺𑀢𑀲𑁆𑀲 𑀧𑀦 𑀤𑀺𑀦𑁆𑀦𑀧𑀺𑀡𑁆𑀟𑀧𑀸𑀢𑁄 𑀢𑀤𑀳𑁂𑀯 𑀯𑀺𑀧𑀸𑀓𑀁 𑀤𑁂𑀢𑀺. 𑀢𑀲𑁆𑀫𑀸 𑀭𑀸𑀚𑀸𑀧𑀺 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀅𑀦𑁆𑀦𑀪𑀸𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀫𑀳𑀦𑁆𑀢𑀁 𑀪𑁄𑀕𑀁 𑀤𑀢𑁆𑀯𑀸 𑀢𑀲𑁆𑀲 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀤𑀸𑀧𑁂𑀲𑀺.

𑀲𑁄 𑀲𑀼𑀫𑀦𑀲𑁂𑀝𑁆𑀞𑀺𑀲𑁆𑀲 𑀲𑀳𑀸𑀬𑀓𑁄 𑀳𑀼𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑁂 𑀅𑀫𑀺𑀢𑁄𑀤𑀦𑀲𑁆𑀲 𑀲𑀓𑁆𑀓𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀅𑀦𑀼𑀭𑀼𑀤𑁆𑀥𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀫𑀳𑀸𑀦𑀸𑀫𑀲𑀓𑁆𑀓𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀸, 𑀲𑀢𑁆𑀣𑀼 𑀘𑀽𑀴𑀧𑀺𑀢𑀼 𑀧𑀼𑀢𑁆𑀢𑁄 𑀧𑀭𑀫𑀲𑀼𑀔𑀼𑀫𑀸𑀮𑁄 𑀫𑀳𑀸𑀧𑀼𑀜𑁆𑀜𑁄 𑀅𑀳𑁄𑀲𑀺. 𑀏𑀓𑀤𑀺𑀯𑀲𑀁 𑀓𑀺𑀭 𑀙𑀲𑀼 𑀔𑀢𑁆𑀢𑀺𑀬𑁂𑀲𑀼 𑀧𑀽𑀯𑁂 𑀮𑀓𑁆𑀔𑀁 𑀓𑀢𑁆𑀯𑀸 𑀕𑀼𑀴𑁂𑀳𑀺 𑀓𑀻𑀴𑀦𑁆𑀢𑁂𑀲𑀼 𑀅𑀦𑀼𑀭𑀼𑀤𑁆𑀥𑁄 𑀧𑀭𑀸𑀚𑀺𑀢𑁄 𑀧𑀽𑀯𑀸𑀦𑀁 𑀅𑀢𑁆𑀣𑀸𑀬 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀧𑀳𑀺𑀡𑀺. 𑀲𑀸 𑀫𑀳𑀦𑁆𑀢𑀁 𑀲𑀼𑀯𑀡𑁆𑀡𑀣𑀸𑀮𑀁 𑀧𑀽𑀭𑁂𑀢𑁆𑀯𑀸 𑀧𑀽𑀯𑁂 𑀧𑁂𑀲𑁂𑀲𑀺. 𑀧𑀽𑀯𑁂 𑀔𑀸𑀤𑀺𑀢𑁆𑀯𑀸 𑀧𑀼𑀦 𑀓𑀻𑀴𑀦𑁆𑀢𑁄 𑀧𑀭𑀸𑀚𑀺𑀢𑁄 𑀢𑀣𑁂𑀯 𑀧𑀳𑀺𑀡𑀺. 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀽𑀯𑁂𑀲𑀼 𑀆𑀳𑀝𑁂𑀲𑀼 𑀘𑀢𑀼𑀢𑁆𑀣𑁂 𑀯𑀸𑀭𑁂 𑀫𑀸𑀢𑀸 ‘‘𑀇𑀤𑀸𑀦𑀺 𑀧𑀽𑀯𑀸 𑀦𑀢𑁆𑀣𑀻’’𑀢𑀺 𑀧𑀳𑀺𑀡𑀺. 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀦𑀢𑁆𑀣𑀻’’𑀢𑀺 𑀧𑀤𑀲𑁆𑀲 𑀅𑀲𑀼𑀢𑀧𑀼𑀩𑁆𑀩𑀢𑀸𑀬 ‘‘𑀦𑀢𑁆𑀣𑀺𑀧𑀽𑀯𑀸 𑀦𑀸𑀫 𑀇𑀤𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀜𑁆𑀜𑀁 𑀓𑀢𑁆𑀯𑀸 ‘‘𑀕𑀘𑁆𑀙 𑀦𑀢𑁆𑀣𑀺𑀧𑀽𑀯𑁂 𑀆𑀳𑀭𑀸’’𑀢𑀺 𑀧𑁂𑀲𑁂𑀲𑀺. 𑀅𑀣𑀲𑁆𑀲 𑀫𑀸𑀢𑀸 ‘‘𑀦𑀢𑁆𑀣𑀺𑀧𑀽𑀯𑁂 𑀓𑀺𑀭, 𑀅𑀬𑁆𑀬𑁂, 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀫𑀫 𑀧𑀼𑀢𑁆𑀢𑁂𑀦 𑀦𑀢𑁆𑀣𑀻𑀢𑀺 𑀧𑀤𑀁 𑀦 𑀲𑀼𑀢𑀧𑀼𑀩𑁆𑀩𑀁, 𑀓𑀣𑀁 𑀦𑀼 𑀔𑁄 𑀦𑀢𑁆𑀣𑀺𑀪𑀸𑀯𑀁 𑀚𑀸𑀦𑀸𑀧𑁂𑀬𑁆𑀬’’𑀦𑁆𑀢𑀺 𑀲𑀼𑀯𑀡𑁆𑀡𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀅𑀧𑀭𑀸𑀬 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 ‘‘𑀳𑀦𑁆𑀤, 𑀢𑀸𑀢, 𑀇𑀫𑀁 𑀫𑀫 𑀧𑀼𑀢𑁆𑀢𑀲𑁆𑀲 𑀤𑁂𑀳𑀻’’𑀢𑀺 𑀧𑀳𑀺𑀡𑀺. 𑀢𑀲𑁆𑀫𑀺𑀁 𑀔𑀡𑁂 𑀦𑀕𑀭𑀧𑀭𑀺𑀕𑁆𑀕𑀸𑀳𑀺𑀓𑀸 𑀤𑁂𑀯𑀢𑀸 ‘‘𑀅𑀫𑁆𑀳𑀸𑀓𑀁 𑀲𑀸𑀫𑀺𑀦𑀸 𑀅𑀦𑁆𑀦𑀪𑀸𑀭𑀓𑀸𑀮𑁂 𑀉𑀧𑀭𑀺𑀝𑁆𑀞𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀪𑀸𑀕𑀪𑀢𑁆𑀢𑀁 𑀤𑀢𑁆𑀯𑀸 ‘𑀦𑀢𑁆𑀣𑀻𑀢𑀺 𑀧𑀤𑀫𑁂𑀯 𑀦 𑀲𑀼𑀡𑁂𑀬𑁆𑀬’𑀦𑁆𑀢𑀺 𑀧𑀢𑁆𑀣𑀦𑀸 𑀦𑀸𑀫 𑀞𑀧𑀺𑀢𑀸. 𑀲𑀘𑁂 𑀫𑀬𑀁 𑀢𑀫𑀢𑁆𑀣𑀁 𑀜𑀢𑁆𑀯𑀸 𑀅𑀚𑁆𑀛𑀼𑀧𑁂𑀓𑁆𑀔𑁂𑀬𑁆𑀬𑀸𑀫, 𑀫𑀼𑀤𑁆𑀥𑀸𑀧𑀺 𑀦𑁄 𑀲𑀢𑁆𑀢𑀥𑀸 𑀨𑀮𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀺𑀩𑁆𑀩𑀧𑀽𑀯𑁂𑀳𑀺 𑀧𑀸𑀢𑀺𑀁 𑀧𑀽𑀭𑀬𑀺𑀁𑀲𑀼. 𑀲𑁄 𑀧𑀼𑀭𑀺𑀲𑁄 𑀧𑀸𑀢𑀺𑀁 𑀆𑀳𑀭𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀞𑀧𑁂𑀢𑁆𑀯𑀸 𑀯𑀺𑀯𑀭𑀺. 𑀢𑁂𑀲𑀁 𑀕𑀦𑁆𑀥𑁄 𑀲𑀓𑀮𑀦𑀕𑀭𑀁 𑀨𑀭𑀺. 𑀧𑀽𑀯𑁄 𑀧𑀦 𑀫𑀼𑀔𑁂 𑀞𑀧𑀺𑀢𑀫𑀢𑁆𑀢𑁄𑀯 𑀲𑀢𑁆𑀢𑀭𑀲𑀳𑀭𑀡𑀺𑀲𑀳𑀲𑁆𑀲𑀸𑀦𑀺 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀅𑀦𑀼𑀭𑀼𑀤𑁆𑀥𑁄𑀧𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀦 𑀫𑀁 𑀫𑀜𑁆𑀜𑁂 𑀇𑀢𑁄 𑀧𑀼𑀩𑁆𑀩𑁂 𑀫𑀸𑀢𑀸 𑀧𑀺𑀬𑀸𑀬𑀢𑀺. 𑀦 𑀳𑀺 𑀫𑁂 𑀅𑀜𑁆𑀜𑀤𑀸 𑀢𑀸𑀬 𑀦𑀢𑁆𑀣𑀺𑀧𑀽𑀯𑀸 𑀦𑀸𑀫 𑀧𑀓𑁆𑀓𑀧𑀼𑀩𑁆𑀩𑀸’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀫𑀸𑀢𑀭𑀁 𑀏𑀯𑀫𑀸𑀳 𑁋 ‘‘𑀅𑀫𑁆𑀫, 𑀦𑀸𑀳𑀁 𑀢𑀯 𑀧𑀺𑀬𑁄’’𑀢𑀺. 𑀢𑀸𑀢, 𑀓𑀺𑀁 𑀯𑀤𑁂𑀲𑀺, 𑀫𑀫 𑀅𑀓𑁆𑀔𑀻𑀳𑀺𑀧𑀺 𑀳𑀤𑀬𑀫𑀁𑀲𑀢𑁄𑀧𑀺 𑀢𑁆𑀯𑀁 𑀧𑀺𑀬𑀢𑀭𑁄𑀢𑀺. 𑀲𑀘𑀸𑀳𑀁, 𑀅𑀫𑁆𑀫, 𑀢𑀯 𑀧𑀺𑀬𑁄, 𑀓𑀲𑁆𑀫𑀸 𑀫𑀫 𑀧𑀼𑀩𑁆𑀩𑁂 𑀏𑀯𑀭𑀽𑀧𑁂 𑀦𑀢𑁆𑀣𑀺𑀧𑀽𑀯𑁂 𑀦𑀸𑀫 𑀦 𑀅𑀤𑀸𑀲𑀻𑀢𑀺. 𑀲𑀸 𑀢𑀁 𑀧𑀼𑀭𑀺𑀲𑀁 𑀧𑀼𑀘𑁆𑀙𑀺 𑁋 ‘‘𑀢𑀸𑀢, 𑀓𑀺𑀜𑁆𑀘𑀺 𑀧𑀸𑀢𑀺𑀬𑀁 𑀅𑀳𑁄𑀲𑀻’’𑀢𑀺. 𑀆𑀫, 𑀅𑀬𑁆𑀬𑁂, 𑀧𑀽𑀯𑀸𑀦𑀁 𑀧𑀸𑀢𑀺 𑀧𑀭𑀺𑀧𑀼𑀡𑁆𑀡𑀸 𑀅𑀳𑁄𑀲𑀺, 𑀦 𑀫𑁂 𑀏𑀯𑀭𑀽𑀧𑀸 𑀤𑀺𑀝𑁆𑀞𑀧𑀼𑀩𑁆𑀩𑀸𑀢𑀺. 𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀼𑀢𑁆𑀢𑁄 𑀫𑁂 𑀓𑀢𑀧𑀼𑀜𑁆𑀜𑁄, 𑀤𑁂𑀯𑀢𑀸𑀳𑀺𑀲𑁆𑀲 𑀤𑀺𑀩𑁆𑀩𑀧𑀽𑀯𑀸 𑀧𑀳𑀺𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑁄𑀧𑀺 𑀫𑀸𑀢𑀭𑀁 𑀆𑀳 𑁋 ‘‘𑀅𑀫𑁆𑀫, 𑀦 𑀫𑀬𑀸 𑀏𑀯𑀭𑀽𑀧𑀸 𑀧𑀽𑀯𑀸 𑀔𑀸𑀤𑀺𑀢𑀧𑀼𑀩𑁆𑀩𑀸, 𑀇𑀢𑁄 𑀧𑀝𑁆𑀞𑀸𑀬 𑀫𑁂 𑀦𑀢𑁆𑀣𑀺𑀧𑀽𑀯𑀫𑁂𑀯 𑀧𑀘𑁂𑀬𑁆𑀬𑀸𑀲𑀻’’𑀢𑀺. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀢𑁂𑀦 ‘‘𑀧𑀽𑀯𑁂 𑀔𑀸𑀤𑀺𑀢𑀼𑀓𑀸𑀫𑁄𑀫𑁆𑀳𑀻’’𑀢𑀺 𑀯𑀼𑀢𑁆𑀢𑀓𑀸𑀮𑁂 𑀲𑀼𑀯𑀡𑁆𑀡𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀅𑀜𑁆𑀜𑀸𑀬 𑀧𑀸𑀢𑀺𑀬𑀸 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀧𑀳𑀺𑀡𑀢𑀺, 𑀤𑁂𑀯𑀢𑀸 𑀧𑀸𑀢𑀺𑀁 𑀧𑀽𑀭𑁂𑀦𑁆𑀢𑀺. 𑀏𑀯𑀁 𑀲𑁄 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁄 𑀦𑀢𑁆𑀣𑀻𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀅𑀚𑀸𑀦𑀺𑀢𑁆𑀯𑀸 𑀤𑀺𑀩𑁆𑀩𑀧𑀽𑀯𑁂𑀬𑁂𑀯 𑀧𑀭𑀺𑀪𑀼𑀜𑁆𑀚𑀺.

𑀲𑀢𑁆𑀣𑀼 𑀧𑀦 𑀧𑀭𑀺𑀯𑀸𑀭𑀢𑁆𑀣𑀁 𑀓𑀼𑀮𑀧𑀝𑀺𑀧𑀸𑀝𑀺𑀬𑀸 𑀲𑀸𑀓𑀺𑀬𑀓𑀼𑀫𑀸𑀭𑁂𑀲𑀼 𑀧𑀩𑁆𑀩𑀚𑀦𑁆𑀢𑁂𑀲𑀼 𑀫𑀳𑀸𑀦𑀸𑀫𑁂𑀦 𑀲𑀓𑁆𑀓𑁂𑀦, ‘‘𑀢𑀸𑀢, 𑀅𑀫𑁆𑀳𑀸𑀓𑀁 𑀓𑀼𑀮𑀸 𑀓𑁄𑀘𑀺 𑀧𑀩𑁆𑀩𑀚𑀺𑀢𑁄 𑀦𑀢𑁆𑀣𑀺, 𑀢𑀬𑀸 𑀯𑀸 𑀧𑀩𑁆𑀩𑀚𑀺𑀢𑀩𑁆𑀩𑀁, 𑀫𑀬𑀸 𑀯𑀸’’𑀢𑀺 𑀯𑀼𑀢𑁆𑀢𑁂 𑀲𑁄 𑀆𑀳 𑁋 ‘‘𑀅𑀳𑀁 𑀅𑀢𑀺𑀲𑀼𑀔𑀼𑀫𑀸𑀮𑁄 𑀧𑀩𑁆𑀩𑀚𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺. 𑀢𑁂𑀦 𑀳𑀺 𑀓𑀫𑁆𑀫𑀦𑁆𑀢𑀁 𑀉𑀕𑁆𑀕𑀡𑁆𑀳, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺. 𑀓𑁄 𑀏𑀲 𑀓𑀫𑁆𑀫𑀦𑁆𑀢𑁄 𑀦𑀸𑀫𑀸𑀢𑀺? 𑀲𑁄 𑀳𑀺 𑀪𑀢𑁆𑀢𑀲𑁆𑀲 𑀉𑀝𑁆𑀞𑀸𑀦𑀝𑁆𑀞𑀸𑀦𑀫𑁆𑀧𑀺 𑀦 𑀚𑀸𑀦𑀸𑀢𑀺, 𑀓𑀫𑁆𑀫𑀦𑁆𑀢𑀁 𑀓𑀺𑀫𑁂𑀯 𑀚𑀸𑀦𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀏𑀓𑀤𑀺𑀯𑀲𑀜𑁆𑀳𑀺 𑀅𑀦𑀼𑀭𑀼𑀤𑁆𑀥𑁄 𑀪𑀤𑁆𑀤𑀺𑀬𑁄 𑀓𑀺𑀫𑀺𑀮𑁄𑀢𑀺 𑀢𑀬𑁄 𑀚𑀦𑀸 ‘‘𑀪𑀢𑁆𑀢𑀁 𑀦𑀸𑀫 𑀓𑀳𑀁 𑀉𑀝𑁆𑀞𑀸𑀢𑀻’’𑀢𑀺 𑀫𑀦𑁆𑀢𑀬𑀺𑀁𑀲𑀼. 𑀢𑁂𑀲𑀼 𑀓𑀺𑀫𑀺𑀮𑁄 ‘‘𑀓𑁄𑀝𑁆𑀞𑁂𑀲𑀼 𑀉𑀝𑁆𑀞𑀸𑀢𑀻’’𑀢𑀺 𑀆𑀳. 𑀲𑁄 𑀓𑀺𑀭𑁂𑀓𑀤𑀺𑀯𑀲𑀁 𑀯𑀻𑀳𑀻 𑀓𑁄𑀝𑁆𑀞𑀫𑁆𑀳𑀺 𑀧𑀓𑁆𑀔𑀺𑀧𑀦𑁆𑀢𑁂 𑀅𑀤𑁆𑀤𑀲, 𑀢𑀲𑁆𑀫𑀸 ‘‘𑀓𑁄𑀝𑁆𑀞𑁂 𑀪𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀲𑀜𑁆𑀜𑀸𑀬 𑀏𑀯𑀫𑀸𑀳. 𑀅𑀣 𑀦𑀁 𑀪𑀤𑁆𑀤𑀺𑀬𑁄 ‘‘𑀢𑁆𑀯𑀁 𑀦 𑀚𑀸𑀦𑀸𑀲𑀻’’𑀢𑀺 𑀯𑀢𑁆𑀯𑀸 ‘‘𑀪𑀢𑁆𑀢𑀁 𑀦𑀸𑀫 𑀉𑀓𑁆𑀔𑀮𑀺𑀬𑀁 𑀉𑀝𑁆𑀞𑀸𑀢𑀻’’𑀢𑀺 𑀆𑀳. 𑀲𑁄 𑀓𑀺𑀭𑁂𑀓𑀤𑀺𑀯𑀲𑀁 𑀉𑀓𑁆𑀔𑀮𑀺𑀢𑁄 𑀪𑀢𑁆𑀢𑀁 𑀯𑀟𑁆𑀠𑁂𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀏𑀢𑁆𑀣𑁂𑀯𑁂𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀲𑀜𑁆𑀜𑀫𑀓𑀸𑀲𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀅𑀦𑀼𑀭𑀼𑀤𑁆𑀥𑁄 𑀢𑁂 𑀉𑀪𑁄𑀧𑀺 ‘‘𑀢𑀼𑀫𑁆𑀳𑁂 𑀦 𑀚𑀸𑀦𑀸𑀣𑀸’’𑀢𑀺 𑀯𑀢𑁆𑀯𑀸 ‘‘𑀪𑀢𑁆𑀢𑀁 𑀦𑀸𑀫 𑀭𑀢𑀦𑀼𑀩𑁆𑀩𑁂𑀥𑀫𑀓𑀼𑀴𑀸𑀬 𑀫𑀳𑀸𑀲𑀼𑀯𑀡𑁆𑀡𑀧𑀸𑀢𑀺𑀬𑀁 𑀉𑀝𑁆𑀞𑀸𑀢𑀻’’𑀢𑀺 𑀆𑀳. 𑀢𑁂𑀦 𑀓𑀺𑀭 𑀦𑁂𑀯 𑀯𑀻𑀳𑀺𑀁 𑀓𑁄𑀝𑁆𑀝𑁂𑀦𑁆𑀢𑀸, 𑀦 𑀪𑀢𑁆𑀢𑀁 𑀧𑀘𑀦𑁆𑀢𑀸 𑀤𑀺𑀝𑁆𑀞𑀧𑀼𑀩𑁆𑀩𑀸, 𑀲𑀼𑀯𑀡𑁆𑀡𑀧𑀸𑀢𑀺𑀬𑀁 𑀯𑀟𑁆𑀠𑁂𑀢𑁆𑀯𑀸 𑀧𑀼𑀭𑀢𑁄 𑀞𑀧𑀺𑀢𑀪𑀢𑁆𑀢𑀫𑁂𑀯 𑀧𑀲𑁆𑀲𑀢𑀺, 𑀢𑀲𑁆𑀫𑀸 ‘‘𑀧𑀸𑀢𑀺𑀬𑀁𑀬𑁂𑀯𑁂𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀲𑀜𑁆𑀜𑀫𑀓𑀸𑀲𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀏𑀯𑀁 𑀪𑀢𑁆𑀢𑀼𑀝𑁆𑀞𑀸𑀦𑀝𑁆𑀞𑀸𑀦𑀫𑁆𑀧𑀺 𑀅𑀚𑀸𑀦𑀦𑁆𑀢𑁄 𑀫𑀳𑀸𑀧𑀼𑀜𑁆𑀜𑁄 𑀓𑀼𑀮𑀧𑀼𑀢𑁆𑀢𑁄 𑀓𑀫𑁆𑀫𑀦𑁆𑀢𑁂 𑀓𑀺𑀁 𑀚𑀸𑀦𑀺𑀲𑁆𑀲𑀢𑀺.

𑀲𑁄 ‘‘𑀏𑀳𑀺 𑀔𑁄 𑀢𑁂, 𑀅𑀦𑀼𑀭𑀼𑀤𑁆𑀥, 𑀖𑀭𑀸𑀯𑀸𑀲𑀢𑁆𑀣𑀁 𑀅𑀦𑀼𑀲𑀸𑀲𑀺𑀲𑁆𑀲𑀸𑀫𑀺, 𑀧𑀞𑀫𑀁 𑀔𑁂𑀢𑁆𑀢𑀁 𑀓𑀲𑀸𑀧𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀪𑀸𑀢𑀭𑀸 𑀯𑀼𑀢𑁆𑀢𑀸𑀦𑀁 𑀓𑀫𑁆𑀫𑀦𑁆𑀢𑀸𑀦𑀁 𑀅𑀧𑀭𑀺𑀬𑀦𑁆𑀢𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀦 𑀫𑁂 𑀖𑀭𑀸𑀯𑀸𑀲𑁂𑀦 𑀅𑀢𑁆𑀣𑁄’’𑀢𑀺 𑀫𑀸𑀢𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀪𑀤𑁆𑀤𑀺𑀬𑀧𑀫𑀼𑀔𑁂𑀳𑀺 𑀧𑀜𑁆𑀘𑀳𑀺 𑀲𑀸𑀓𑀺𑀬𑀓𑀼𑀫𑀸𑀭𑁂𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀺𑀬𑀫𑁆𑀩𑀯𑀦𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀧𑀦 𑀲𑀫𑁆𑀫𑀸𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀺𑀓𑀢𑁆𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀏𑀓𑀸𑀲𑀦𑁂 𑀦𑀺𑀲𑀺𑀦𑁆𑀦𑁄𑀯 𑀳𑀢𑁆𑀣𑀢𑀮𑁂 𑀞𑀧𑀺𑀢𑀆𑀫𑀮𑀓𑀸𑀦𑀺 𑀯𑀺𑀬 𑀲𑀳𑀲𑁆𑀲𑀮𑁄𑀓𑀥𑀸𑀢𑀼𑀬𑁄 𑀑𑀮𑁄𑀓𑀦𑀲𑀫𑀢𑁆𑀣𑁄 𑀳𑀼𑀢𑁆𑀯𑀸 𑁋

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀢𑁂𑀯𑀺𑀚𑁆𑀚𑁄 𑀇𑀤𑁆𑀥𑀺𑀧𑀢𑁆𑀢𑁄𑀫𑁆𑀳𑀺, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺. (𑀣𑁂𑀭𑀕𑀸. 𑁩𑁩𑁨, 𑁫𑁬𑁨) 𑁋

𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀫𑁂 𑀓𑀢𑁆𑀯𑀸 𑀅𑀬𑀁 𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸’’𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀧𑀤𑀼𑀫𑀼𑀢𑁆𑀢𑀭𑀧𑀸𑀤𑀫𑀽𑀮𑁂 𑀧𑀢𑁆𑀣𑀦𑀁 𑀞𑀧𑁂𑀲𑀺’’𑀦𑁆𑀢𑀺 𑀜𑀢𑁆𑀯𑀸 𑀧𑀼𑀦 ‘‘𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑁄 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀲𑀼𑀫𑀦𑀲𑁂𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑁄 𑀅𑀦𑁆𑀦𑀪𑀸𑀭𑁄 𑀦𑀸𑀫 𑀅𑀳𑁄𑀲𑀺’’𑀦𑁆𑀢𑀺𑀧𑀺 𑀜𑀢𑁆𑀯𑀸 𑁋

‘‘𑀅𑀦𑁆𑀦𑀪𑀸𑀭𑁄 𑀧𑀼𑀭𑁂 𑀆𑀲𑀺𑀁, 𑀤𑀮𑀺𑀤𑁆𑀤𑁄 𑀢𑀺𑀡𑀳𑀸𑀭𑀓𑁄;

𑀧𑀺𑀡𑁆𑀟𑀧𑀸𑀢𑁄 𑀫𑀬𑀸 𑀤𑀺𑀦𑁆𑀦𑁄, 𑀉𑀧𑀭𑀺𑀝𑁆𑀞𑀲𑁆𑀲 𑀢𑀸𑀤𑀺𑀦𑁄’’𑀢𑀺. 𑁋

𑀆𑀳. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑁄 𑀲𑁄 𑀢𑀤𑀸 𑀫𑀬𑀸 𑀉𑀧𑀭𑀺𑀝𑁆𑀞𑀲𑁆𑀲 𑀤𑀺𑀦𑁆𑀦𑀧𑀺𑀡𑁆𑀟𑀧𑀸𑀢𑀢𑁄 𑀓𑀳𑀸𑀧𑀡𑁂 𑀤𑀢𑁆𑀯𑀸 𑀧𑀢𑁆𑀢𑀺𑀁 𑀅𑀕𑁆𑀕𑀳𑁂𑀲𑀺, 𑀫𑀫 𑀲𑀳𑀸𑀬𑀓𑁄 𑀲𑀼𑀫𑀦𑀲𑁂𑀝𑁆𑀞𑀺 𑀓𑀳𑀁 𑀦𑀼 𑀔𑁄 𑀲𑁄 𑀏𑀢𑀭𑀳𑀺 𑀦𑀺𑀩𑁆𑀩𑀢𑁆𑀢𑁄’’𑀢𑀺. 𑀅𑀣 𑀦𑀁 ‘‘𑀯𑀺𑀜𑁆𑀛𑀸𑀝𑀯𑀺𑀬𑀁 𑀧𑀩𑁆𑀩𑀢𑀧𑀸𑀤𑁂 𑀫𑀼𑀡𑁆𑀟𑀦𑀺𑀕𑀫𑁄 𑀦𑀸𑀫 𑀅𑀢𑁆𑀣𑀺, 𑀢𑀢𑁆𑀣 𑀫𑀳𑀸𑀫𑀼𑀡𑁆𑀟𑀲𑁆𑀲 𑀦𑀸𑀫 𑀉𑀧𑀸𑀲𑀓𑀲𑁆𑀲 𑀫𑀳𑀸𑀲𑀼𑀫𑀦𑁄 𑀘𑀽𑀴𑀲𑀼𑀫𑀦𑁄𑀢𑀺 𑀤𑁆𑀯𑁂 𑀧𑀼𑀢𑁆𑀢𑀸, 𑀢𑁂𑀲𑀼 𑀲𑁄 𑀘𑀽𑀴𑀲𑀼𑀫𑀦𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀅𑀤𑁆𑀤𑀲. 𑀤𑀺𑀲𑁆𑀯𑀸 𑀘 𑀧𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀢𑀢𑁆𑀣 𑀫𑀬𑀺 𑀕𑀢𑁂 𑀉𑀧𑀓𑀸𑀭𑁄, 𑀦𑀢𑁆𑀣𑀻’’𑀢𑀺. 𑀲𑁄 𑀉𑀧𑀥𑀸𑀭𑁂𑀦𑁆𑀢𑁄 𑀇𑀤𑀁 𑀅𑀤𑁆𑀤𑀲 ‘‘𑀲𑁄 𑀢𑀢𑁆𑀣 𑀫𑀬𑀺 𑀕𑀢𑁂 𑀲𑀢𑁆𑀢𑀯𑀲𑁆𑀲𑀺𑀓𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀔𑀼𑀭𑀕𑁆𑀕𑁂𑀬𑁂𑀯 𑀘 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺. 𑀤𑀺𑀲𑁆𑀯𑀸 𑀘 𑀧𑀦 𑀉𑀧𑀓𑀝𑁆𑀞𑁂 𑀅𑀦𑁆𑀢𑁄𑀯𑀲𑁆𑀲𑁂 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀕𑀸𑀫𑀤𑁆𑀯𑀸𑀭𑁂 𑀑𑀢𑀭𑀺. 𑀫𑀳𑀸𑀫𑀼𑀡𑁆𑀟𑁄 𑀧𑀦 𑀉𑀧𑀸𑀲𑀓𑁄 𑀣𑁂𑀭𑀲𑁆𑀲 𑀧𑀼𑀩𑁆𑀩𑁂𑀧𑀺 𑀯𑀺𑀲𑁆𑀲𑀸𑀲𑀺𑀓𑁄 𑀏𑀯. 𑀲𑁄 𑀣𑁂𑀭𑀁 𑀧𑀺𑀡𑁆𑀟𑀧𑀸𑀢𑀓𑀸𑀮𑁂 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑀁 𑀤𑀺𑀲𑁆𑀯𑀸 𑀧𑀼𑀢𑁆𑀢𑀁 𑀫𑀳𑀸𑀲𑀼𑀫𑀦𑀁 𑀆𑀳 𑁋 ‘‘𑀢𑀸𑀢, 𑀅𑀬𑁆𑀬𑁄, 𑀫𑁂 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀆𑀕𑀢𑁄, 𑀬𑀸𑀯𑀲𑁆𑀲 𑀅𑀜𑁆𑀜𑁄 𑀓𑁄𑀘𑀺 𑀧𑀢𑁆𑀢𑀁 𑀦 𑀕𑀡𑁆𑀳𑀸𑀢𑀺, 𑀢𑀸𑀯𑀲𑁆𑀲 𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀕𑀡𑁆𑀳, 𑀅𑀳𑀁 𑀆𑀲𑀦𑀁 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀉𑀧𑀸𑀲𑀓𑁄 𑀣𑁂𑀭𑀁 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀲𑀓𑁆𑀓𑀘𑁆𑀘𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀢𑁂𑀫𑀸𑀲𑀁 𑀯𑀲𑀦𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀕𑀡𑁆𑀳𑀺, 𑀣𑁂𑀭𑁄𑀧𑀺 𑀅𑀥𑀺𑀯𑀸𑀲𑁂𑀲𑀺.

𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀧𑀝𑀺𑀚𑀕𑁆𑀕𑀦𑁆𑀢𑁄 𑀯𑀺𑀬 𑀢𑁂𑀫𑀸𑀲𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀢𑀺𑀘𑀻𑀯𑀭𑀜𑁆𑀘𑁂𑀯 𑀕𑀼𑀴𑀢𑁂𑀮𑀢𑀡𑁆𑀟𑀼𑀮𑀸𑀤𑀻𑀦𑀺 𑀘 𑀆𑀳𑀭𑀺𑀢𑁆𑀯𑀸 𑀣𑁂𑀭𑀲𑁆𑀲 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 ‘‘𑀕𑀡𑁆𑀳𑀣, 𑀪𑀦𑁆𑀢𑁂’’𑀢𑀺 𑀆𑀳. ‘‘𑀅𑀮𑀁, 𑀉𑀧𑀸𑀲𑀓, 𑀦 𑀫𑁂 𑀇𑀫𑀺𑀦𑀸 𑀅𑀢𑁆𑀣𑁄’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀯𑀲𑁆𑀲𑀸𑀯𑀸𑀲𑀺𑀓𑀮𑀸𑀪𑁄 𑀦𑀸𑀫𑁂𑀲, 𑀕𑀡𑁆𑀳𑀣 𑀦’’𑀦𑁆𑀢𑀺? ‘‘𑀦 𑀕𑀡𑁆𑀳𑀸𑀫𑀺, 𑀉𑀧𑀸𑀲𑀓𑀸’’𑀢𑀺. ‘‘𑀓𑀺𑀫𑀢𑁆𑀣𑀁 𑀦 𑀕𑀡𑁆𑀳𑀣, 𑀪𑀦𑁆𑀢𑁂’’𑀢𑀺? ‘‘𑀫𑀬𑁆𑀳𑀁 𑀲𑀦𑁆𑀢𑀺𑀓𑁂 𑀓𑀧𑁆𑀧𑀺𑀬𑀓𑀸𑀭𑀓𑁄 𑀲𑀸𑀫𑀡𑁂𑀭𑁄𑀧𑀺 𑀦𑀢𑁆𑀣𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀫𑀫 𑀧𑀼𑀢𑁆𑀢𑁄 𑀫𑀳𑀸𑀲𑀼𑀫𑀦𑁄 𑀲𑀸𑀫𑀡𑁂𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀦 𑀫𑁂, 𑀉𑀧𑀸𑀲𑀓, 𑀫𑀳𑀸𑀲𑀼𑀫𑀦𑁂𑀦𑀢𑁆𑀣𑁄’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀘𑀽𑀴𑀲𑀼𑀫𑀦𑀁 𑀧𑀩𑁆𑀩𑀸𑀚𑁂𑀣𑀸’’𑀢𑀺. 𑀣𑁂𑀭𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀘𑀽𑀴𑀲𑀼𑀫𑀦𑀁 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀣𑁂𑀭𑁄 𑀢𑁂𑀦 𑀲𑀤𑁆𑀥𑀺𑀁 𑀅𑀟𑁆𑀠𑀫𑀸𑀲𑀫𑀢𑁆𑀢𑀁 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 ‘‘𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀜𑀸𑀢𑀓𑁂 𑀆𑀧𑀼𑀘𑁆𑀙𑀺𑀢𑁆𑀯𑀸 𑀆𑀓𑀸𑀲𑁂𑀦𑁂𑀯 𑀕𑀦𑁆𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀅𑀭𑀜𑁆𑀜𑀓𑀼𑀝𑀺𑀓𑀸𑀬 𑀑𑀢𑀭𑀺.

𑀣𑁂𑀭𑁄 𑀧𑀦 𑀧𑀓𑀢𑀺𑀬𑀸𑀧𑀺 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀢𑀲𑁆𑀲 𑀢𑀢𑁆𑀣 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀘𑀗𑁆𑀓𑀫𑀦𑁆𑀢𑀲𑁆𑀲 𑀉𑀤𑀭𑀯𑀸𑀢𑁄 𑀲𑀫𑀼𑀝𑁆𑀞𑀳𑀺. 𑀅𑀣 𑀦𑀁 𑀓𑀺𑀮𑀦𑁆𑀢𑀭𑀽𑀧𑀁 𑀤𑀺𑀲𑁆𑀯𑀸 𑀲𑀸𑀫𑀡𑁂𑀭𑁄 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀓𑀺𑀁 𑀯𑁄 𑀭𑀼𑀚𑁆𑀚𑀢𑀻’’𑀢𑀺? ‘‘𑀉𑀤𑀭𑀯𑀸𑀢𑁄 𑀫𑁂 𑀲𑀫𑀼𑀝𑁆𑀞𑀺𑀢𑁄’’𑀢𑀺. ‘‘𑀅𑀜𑁆𑀜𑀤𑀸𑀧𑀺 𑀲𑀫𑀼𑀝𑁆𑀞𑀺𑀢𑀧𑀼𑀩𑁆𑀩𑁄, 𑀪𑀦𑁆𑀢𑁂’’𑀢𑀺? ‘‘𑀆𑀫𑀸𑀯𑀼𑀲𑁄’’𑀢𑀺. ‘‘𑀓𑁂𑀦 𑀨𑀸𑀲𑀼𑀓𑀁 𑀳𑁄𑀢𑀺, 𑀪𑀦𑁆𑀢𑁂’’𑀢𑀺? ‘‘𑀅𑀦𑁄𑀢𑀢𑁆𑀢𑀢𑁄 𑀧𑀸𑀦𑀻𑀬𑁂 𑀮𑀤𑁆𑀥𑁂 𑀨𑀸𑀲𑀼𑀓𑀁 𑀳𑁄𑀢𑀺, 𑀆𑀯𑀼𑀲𑁄’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀆𑀳𑀭𑀸𑀫𑀻’’𑀢𑀺. ‘‘𑀲𑀓𑁆𑀔𑀺𑀲𑁆𑀲𑀲𑀺 𑀲𑀸𑀫𑀡𑁂𑀭𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. 𑀢𑁂𑀦 𑀳𑀺 𑀅𑀦𑁄𑀢𑀢𑁆𑀢𑁂 𑀧𑀦𑁆𑀦𑀕𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀫𑀁 𑀚𑀸𑀦𑀸𑀢𑀺, 𑀢𑀲𑁆𑀲 𑀆𑀘𑀺𑀓𑁆𑀔𑀺𑀢𑁆𑀯𑀸 𑀪𑁂𑀲𑀚𑁆𑀚𑀢𑁆𑀣𑀸𑀬 𑀏𑀓𑀁 𑀧𑀸𑀦𑀻𑀬𑀯𑀸𑀭𑀓𑀁 𑀆𑀳𑀭𑀸𑀢𑀺. 𑀲𑁄 𑀲𑀸𑀥𑀽𑀢𑀺 𑀉𑀧𑀚𑁆𑀛𑀸𑀬𑀁 𑀯𑀦𑁆𑀤𑀺𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀜𑁆𑀘𑀬𑁄𑀚𑀦𑀲𑀢𑀁 𑀞𑀸𑀦𑀁 𑀅𑀕𑀫𑀸𑀲𑀺. 𑀢𑀁 𑀤𑀺𑀯𑀲𑀁 𑀧𑀦 𑀦𑀸𑀕𑀭𑀸𑀚𑀸 𑀦𑀸𑀕𑀦𑀸𑀝𑀓𑀧𑀭𑀺𑀯𑀼𑀢𑁄 𑀉𑀤𑀓𑀓𑀻𑀴𑀁 𑀓𑀻𑀴𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀲𑁄 𑀲𑀸𑀫𑀡𑁂𑀭𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸𑀯 𑀓𑀼𑀚𑁆𑀛𑀺, ‘‘𑀅𑀬𑀁 𑀫𑀼𑀡𑁆𑀟𑀓𑀲𑀫𑀡𑁄 𑀅𑀢𑁆𑀢𑀦𑁄 𑀧𑀸𑀤𑀧𑀁𑀲𑀼𑀁 𑀫𑀫 𑀫𑀢𑁆𑀣𑀓𑁂 𑀑𑀓𑀺𑀭𑀦𑁆𑀢𑁄 𑀯𑀺𑀘𑀭𑀢𑀺, 𑀅𑀦𑁄𑀢𑀢𑁆𑀢𑁂 𑀧𑀸𑀦𑀻𑀬𑀢𑁆𑀣𑀸𑀬 𑀆𑀕𑀢𑁄 𑀪𑀯𑀺𑀲𑁆𑀲𑀢𑀺, 𑀦 𑀤𑀸𑀦𑀺𑀲𑁆𑀲 𑀧𑀸𑀦𑀻𑀬𑀁 𑀤𑀲𑁆𑀲𑀸𑀫𑀻’’𑀢𑀺 𑀧𑀡𑁆𑀡𑀸𑀲𑀬𑁄𑀚𑀦𑀺𑀓𑀁 𑀅𑀦𑁄𑀢𑀢𑁆𑀢𑀤𑀳𑀁 𑀫𑀳𑀸𑀧𑀸𑀢𑀺𑀬𑀸 𑀉𑀓𑁆𑀔𑀮𑀺𑀁 𑀧𑀺𑀤𑀳𑀦𑁆𑀢𑁄 𑀯𑀺𑀬 𑀨𑀡𑁂𑀦 𑀧𑀺𑀤𑀳𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀲𑀸𑀫𑀡𑁂𑀭𑁄 𑀦𑀸𑀕𑀭𑀸𑀚𑀲𑁆𑀲 𑀆𑀓𑀸𑀭𑀁 𑀑𑀮𑁄𑀓𑁂𑀢𑁆𑀯𑀸𑀯 ‘‘𑀓𑀼𑀤𑁆𑀥𑁄 𑀅𑀬’’𑀦𑁆𑀢𑀺 𑀜𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑀼𑀡𑁄𑀳𑀺 𑀫𑁂 𑀦𑀸𑀕𑀭𑀸𑀚, 𑀉𑀕𑁆𑀕𑀢𑁂𑀚 𑀫𑀳𑀩𑁆𑀩𑀮;

𑀤𑁂𑀳𑀺 𑀫𑁂 𑀧𑀸𑀦𑀻𑀬𑀖𑀝𑀁, 𑀪𑁂𑀲𑀚𑁆𑀚𑀢𑁆𑀣𑀫𑁆𑀳𑀺 𑀆𑀕𑀢𑁄’’𑀢𑀺.

𑀢𑀁 𑀲𑀼𑀢𑁆𑀯𑀸 𑀦𑀸𑀕𑀭𑀸𑀚𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀧𑀼𑀭𑀢𑁆𑀣𑀺𑀫𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂, 𑀕𑀗𑁆𑀕𑀸 𑀦𑀸𑀫 𑀫𑀳𑀸𑀦𑀤𑀻;

𑀫𑀳𑀸𑀲𑀫𑀼𑀤𑁆𑀤𑀫𑀧𑁆𑀧𑁂𑀢𑀺, 𑀢𑀢𑁄 𑀢𑁆𑀯𑀁 𑀧𑀸𑀦𑀻𑀬𑀁 𑀳𑀭𑀸’’𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀸𑀫𑀡𑁂𑀭𑁄 ‘‘𑀅𑀬𑀁 𑀦𑀸𑀕𑀭𑀸𑀚𑀸 𑀅𑀢𑁆𑀢𑀦𑁄 𑀇𑀘𑁆𑀙𑀸𑀬 𑀦 𑀤𑀲𑁆𑀲𑀢𑀺, 𑀅𑀳𑀁 𑀩𑀮𑀓𑁆𑀓𑀸𑀭𑀁 𑀓𑀢𑁆𑀯𑀸 𑀆𑀦𑀼𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀇𑀫𑀁 𑀅𑀪𑀺𑀪𑀯𑀺𑀢𑁆𑀯𑀸𑀯 𑀧𑀸𑀦𑀻𑀬𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀉𑀧𑀚𑁆𑀛𑀸𑀬𑁄 𑀫𑀁 𑀅𑀦𑁄𑀢𑀢𑁆𑀢𑀢𑁄𑀯 𑀧𑀸𑀦𑀻𑀬𑀁 𑀆𑀳𑀭𑀸𑀧𑁂𑀢𑀺, 𑀢𑁂𑀦𑀸𑀳𑀁 𑀇𑀤𑀫𑁂𑀯 𑀳𑀭𑀺𑀲𑁆𑀲𑀸𑀫𑀺, 𑀅𑀧𑁂𑀳𑀺, 𑀫𑀸 𑀫𑀁 𑀯𑀸𑀭𑁂𑀳𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀇𑀢𑁄𑀯 𑀧𑀸𑀦𑀻𑀬𑀁 𑀳𑀸𑀲𑁆𑀲𑀁, 𑀇𑀫𑀺𑀦𑀸𑀯𑀫𑁆𑀳𑀺 𑀅𑀢𑁆𑀣𑀺𑀓𑁄;

𑀬𑀤𑀺 𑀢𑁂 𑀣𑀸𑀫𑀩𑀮𑀁 𑀅𑀢𑁆𑀣𑀺, 𑀦𑀸𑀕𑀭𑀸𑀚 𑀦𑀺𑀯𑀸𑀭𑀬𑀸’’𑀢𑀺.

𑀅𑀣 𑀦𑀁 𑀦𑀸𑀕𑀭𑀸𑀚𑀸 𑀆𑀳 𑁋

‘‘𑀲𑀸𑀫𑀡𑁂𑀭 𑀲𑀘𑁂 𑀅𑀢𑁆𑀣𑀺, 𑀢𑀯 𑀯𑀺𑀓𑁆𑀓𑀫 𑀧𑁄𑀭𑀺𑀲𑀁;

𑀅𑀪𑀺𑀦𑀦𑁆𑀤𑀸𑀫𑀺 𑀢𑁂 𑀯𑀸𑀘𑀁, 𑀳𑀭𑀲𑁆𑀲𑀼 𑀧𑀸𑀦𑀻𑀬𑀁 𑀫𑀫𑀸’’𑀢𑀺.

𑀅𑀣 𑀦𑀁 𑀲𑀸𑀫𑀡𑁂𑀭𑁄 ‘‘𑀏𑀯𑀁, 𑀫𑀳𑀸𑀭𑀸𑀚, 𑀳𑀭𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀬𑀤𑀺 𑀲𑀓𑁆𑀓𑁄𑀦𑁆𑀢𑁄 𑀳𑀭𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑁋 ‘‘𑀢𑁂𑀦 𑀳𑀺 𑀲𑀼𑀝𑁆𑀞𑀼 𑀚𑀸𑀦𑀲𑁆𑀲𑀽’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 ‘‘𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀆𑀦𑀼𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀫𑀬𑀸 𑀧𑀸𑀦𑀻𑀬𑀁 𑀳𑀭𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀓𑀸𑀲𑀝𑁆𑀞𑀤𑁂𑀯𑀢𑀸𑀦𑀁 𑀢𑀸𑀯 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑀸 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀅𑀝𑁆𑀞𑀁𑀲𑀼. ‘‘𑀏𑀢𑀲𑁆𑀫𑀺𑀁 𑀅𑀦𑁄𑀢𑀢𑁆𑀢𑀤𑀳𑀧𑀺𑀝𑁆𑀞𑁂 𑀧𑀦𑁆𑀦𑀕𑀦𑀸𑀕𑀭𑀸𑀚𑁂𑀦 𑀲𑀤𑁆𑀥𑀺𑀁 𑀫𑀫 𑀲𑀗𑁆𑀕𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀚𑀬𑀧𑀭𑀸𑀚𑀬𑀁 𑀑𑀮𑁄𑀓𑁂𑀣𑀸’’𑀢𑀺 𑀆𑀳. 𑀲𑁄 𑀏𑀢𑁂𑀦𑁂𑀯 𑀦𑀻𑀳𑀸𑀭𑁂𑀦 𑀘𑀢𑁆𑀢𑀸𑀭𑁄 𑀮𑁄𑀓𑀧𑀸𑀮𑁂 𑀲𑀓𑁆𑀓𑀲𑀼𑀬𑀸𑀫𑀲𑀦𑁆𑀢𑀼𑀲𑀺𑀢𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀘 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑀢𑁄 𑀧𑀭𑀁 𑀧𑀝𑀺𑀧𑀸𑀝𑀺𑀬𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀩𑁆𑀭𑀳𑁆𑀫𑁂𑀳𑀺 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑁂𑀳𑀺 ‘‘𑀓𑀺𑀁, 𑀪𑀦𑁆𑀢𑁂’’𑀢𑀺 𑀧𑀼𑀝𑁆𑀞𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀏𑀯𑀁 𑀲𑁄 𑀅𑀲𑀜𑁆𑀜𑁂 𑀘 𑀅𑀭𑀽𑀧𑀺𑀩𑁆𑀭𑀳𑁆𑀫𑀸𑀦𑁄 𑀘 𑀞𑀧𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀫𑀼𑀳𑀼𑀢𑁆𑀢𑁂𑀦𑁂𑀯 𑀆𑀳𑀺𑀡𑁆𑀟𑀺𑀢𑁆𑀯𑀸 𑀆𑀭𑁄𑀘𑁂𑀲𑀺. 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀩𑁆𑀩𑀸𑀧𑀺 𑀤𑁂𑀯𑀢𑀸 𑀅𑀦𑁄𑀢𑀢𑁆𑀢𑀤𑀳𑀧𑀺𑀝𑁆𑀞𑁂 𑀦𑀸𑀴𑀺𑀬𑀁 𑀧𑀓𑁆𑀔𑀺𑀢𑁆𑀢𑀸𑀦𑀺 𑀧𑀺𑀝𑁆𑀞𑀘𑀼𑀡𑁆𑀡𑀸𑀦𑀺 𑀯𑀺𑀬 𑀆𑀓𑀸𑀲𑀁 𑀦𑀺𑀭𑀦𑁆𑀢𑀭𑀁 𑀧𑀽𑀭𑁂𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀲𑀦𑁆𑀦𑀺𑀧𑀢𑀺𑀢𑁂 𑀤𑁂𑀯𑀲𑀗𑁆𑀖𑁂 𑀲𑀸𑀫𑀡𑁂𑀭𑁄 𑀆𑀓𑀸𑀲𑁂 𑀞𑀢𑁆𑀯𑀸 𑀦𑀸𑀕𑀭𑀸𑀚𑀁 𑀆𑀳 𑁋

‘‘𑀲𑀼𑀡𑁄𑀳𑀺 𑀫𑁂 𑀦𑀸𑀕𑀭𑀸𑀚, 𑀉𑀕𑁆𑀕𑀢𑁂𑀚 𑀫𑀳𑀩𑁆𑀩𑀮;

𑀤𑁂𑀳𑀺 𑀫𑁂 𑀧𑀸𑀦𑀻𑀬𑀖𑀝𑀁, 𑀪𑁂𑀲𑀚𑁆𑀚𑀢𑁆𑀣𑀫𑁆𑀳𑀺 𑀆𑀕𑀢𑁄’’𑀢𑀺.

𑀅𑀣 𑀦𑀁 𑀦𑀸𑀕𑁄 𑀆𑀳 𑁋

‘‘𑀲𑀸𑀫𑀡𑁂𑀭 𑀲𑀘𑁂 𑀅𑀢𑁆𑀣𑀺, 𑀢𑀯 𑀯𑀺𑀓𑁆𑀓𑀫 𑀧𑁄𑀭𑀺𑀲𑀁;

𑀅𑀪𑀺𑀦𑀦𑁆𑀤𑀸𑀫𑀺 𑀢𑁂 𑀯𑀸𑀘𑀁, 𑀳𑀭𑀲𑁆𑀲𑀼 𑀧𑀸𑀦𑀻𑀬𑀁 𑀫𑀫𑀸’’𑀢𑀺.

𑀲𑁄 𑀢𑀺𑀓𑁆𑀔𑀢𑁆𑀢𑀼𑀁 𑀦𑀸𑀕𑀭𑀸𑀚𑀲𑁆𑀲 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑀓𑁄𑀯 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀆𑀓𑀸𑀲𑀢𑁄 𑀑𑀭𑀼𑀬𑁆𑀳 𑀦𑀸𑀕𑀭𑀸𑀚𑀲𑁆𑀲 𑀨𑀡𑁂 𑀅𑀓𑁆𑀓𑀫𑀺𑀢𑁆𑀯𑀸 𑀅𑀥𑁄𑀫𑀼𑀔𑀁 𑀦𑀺𑀧𑁆𑀧𑀻𑀴𑁂𑀲𑀺, 𑀢𑀸𑀯𑀤𑁂𑀯 𑀩𑀮𑀯𑀢𑀸 𑀧𑀼𑀭𑀺𑀲𑁂𑀦 𑀅𑀓𑁆𑀓𑀦𑁆𑀢𑀅𑀮𑁆𑀮𑀘𑀫𑁆𑀫𑀁 𑀯𑀺𑀬 𑀦𑀸𑀕𑀭𑀸𑀚𑀲𑁆𑀲 𑀨𑀡𑁂 𑀅𑀓𑁆𑀓𑀦𑁆𑀢𑀫𑀢𑁆𑀢𑁂 𑀑𑀕𑀮𑀺𑀢𑁆𑀯𑀸 𑀤𑀩𑁆𑀩𑀺𑀫𑀢𑁆𑀢𑀸 𑀨𑀡𑀧𑀼𑀝𑀓𑀸 𑀅𑀳𑁂𑀲𑀼𑀁. 𑀦𑀸𑀕𑀭𑀸𑀚𑀲𑁆𑀲 𑀨𑀡𑁂𑀳𑀺 𑀫𑀼𑀢𑁆𑀢𑀫𑀼𑀢𑁆𑀢𑀝𑁆𑀞𑀸𑀦𑀢𑁄 𑀢𑀸𑀮𑀓𑁆𑀔𑀦𑁆𑀥𑀧𑀫𑀸𑀡𑀸 𑀉𑀤𑀓𑀯𑀝𑁆𑀝𑀺𑀬𑁄 𑀉𑀕𑁆𑀕𑀜𑁆𑀙𑀺𑀁𑀲𑀼. 𑀲𑀸𑀫𑀡𑁂𑀭𑁄 𑀆𑀓𑀸𑀲𑁂𑀬𑁂𑀯 𑀧𑀸𑀦𑀻𑀬𑀯𑀸𑀭𑀓𑀁 𑀧𑀽𑀭𑁂𑀲𑀺. 𑀤𑁂𑀯𑀲𑀗𑁆𑀖𑁄 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀅𑀣 𑀦𑀸𑀕𑀭𑀸𑀚𑀸 𑀮𑀚𑁆𑀚𑀺𑀢𑁆𑀯𑀸 𑀲𑀸𑀫𑀡𑁂𑀭𑀲𑁆𑀲 𑀓𑀼𑀚𑁆𑀛𑀺, 𑀚𑀬𑀓𑀼𑀲𑀼𑀫𑀯𑀡𑁆𑀡𑀸𑀦𑀺𑀲𑁆𑀲 𑀅𑀓𑁆𑀔𑀻𑀦𑀺 𑀅𑀳𑁂𑀲𑀼𑀁. 𑀲𑁄 ‘‘𑀅𑀬𑀁 𑀫𑀁 𑀤𑁂𑀯𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀧𑀸𑀦𑀻𑀬𑀁 𑀕𑀳𑁂𑀢𑁆𑀯𑀸 𑀮𑀚𑁆𑀚𑀸𑀧𑁂𑀲𑀺, 𑀏𑀢𑀁 𑀕𑀳𑁂𑀢𑁆𑀯𑀸 𑀫𑀼𑀔𑁂 𑀳𑀢𑁆𑀣𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀳𑀤𑀬𑀫𑀁𑀲𑀁 𑀯𑀸𑀲𑁆𑀲 𑀫𑀤𑁆𑀤𑀸𑀫𑀺, 𑀧𑀸𑀤𑁂 𑀯𑀸 𑀦𑀁 𑀕𑀳𑁂𑀢𑁆𑀯𑀸 𑀧𑀸𑀭𑀕𑀗𑁆𑀕𑀸𑀬𑀁 𑀔𑀺𑀧𑀸𑀫𑀻’’𑀢𑀺 𑀯𑁂𑀕𑁂𑀦 𑀅𑀦𑀼𑀩𑀦𑁆𑀥𑀺. 𑀅𑀦𑀼𑀩𑀦𑁆𑀥𑀦𑁆𑀢𑁄𑀧𑀺 𑀦𑀁 𑀧𑀸𑀧𑀼𑀡𑀺𑀢𑀼𑀁 𑀦𑀸𑀲𑀓𑁆𑀔𑀺𑀬𑁂𑀯. 𑀲𑀸𑀫𑀡𑁂𑀭𑁄 𑀕𑀦𑁆𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀳𑀢𑁆𑀣𑁂 𑀧𑀸𑀦𑀻𑀬𑀁 𑀞𑀧𑁂𑀢𑁆𑀯𑀸 ‘‘𑀧𑀺𑀯𑀣, 𑀪𑀦𑁆𑀢𑁂’’𑀢𑀺 𑀆𑀳. 𑀦𑀸𑀕𑀭𑀸𑀚𑀸𑀧𑀺 𑀧𑀘𑁆𑀙𑀢𑁄 𑀆𑀕𑀦𑁆𑀢𑁆𑀯𑀸, ‘‘𑀪𑀦𑁆𑀢𑁂 𑀅𑀦𑀼𑀭𑀼𑀤𑁆𑀥, 𑀲𑀸𑀫𑀡𑁂𑀭𑁄 𑀫𑀬𑀸 𑀅𑀤𑀺𑀦𑁆𑀦𑀫𑁂𑀯 𑀧𑀸𑀦𑀻𑀬𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄, 𑀫𑀸 𑀧𑀺𑀯𑀺𑀢𑁆𑀣𑀸’’𑀢𑀺 𑀆𑀳. 𑀏𑀯𑀁 𑀓𑀺𑀭 𑀲𑀸𑀫𑀡𑁂𑀭𑀸𑀢𑀺. ‘‘𑀧𑀺𑀯𑀣, 𑀪𑀦𑁆𑀢𑁂, 𑀇𑀫𑀺𑀦𑀸 𑀫𑁂 𑀤𑀺𑀦𑁆𑀦𑀁 𑀧𑀸𑀦𑀻𑀬𑀁 𑀆𑀳𑀝’’𑀦𑁆𑀢𑀺 𑀆𑀳. 𑀣𑁂𑀭𑁄 ‘‘𑀔𑀻𑀡𑀸𑀲𑀯𑀲𑀸𑀫𑀡𑁂𑀭𑀲𑁆𑀲 𑀫𑀼𑀲𑀸𑀓𑀣𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀜𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺. 𑀢𑀗𑁆𑀔𑀡𑀜𑁆𑀜𑁂𑀯𑀲𑁆𑀲 𑀆𑀩𑀸𑀥𑁄 𑀧𑀝𑀺𑀧𑀲𑁆𑀲𑀫𑁆𑀪𑀺. 𑀧𑀼𑀦 𑀦𑀸𑀕𑁄 𑀣𑁂𑀭𑀁 𑀆𑀳 𑁋 ‘‘𑀪𑀦𑁆𑀢𑁂, 𑀲𑀸𑀫𑀡𑁂𑀭𑁂𑀦𑀫𑁆𑀳𑀺 𑀲𑀩𑁆𑀩𑀁 𑀤𑁂𑀯𑀕𑀡𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀮𑀚𑁆𑀚𑀸𑀧𑀺𑀢𑁄, 𑀅𑀳𑀫𑀲𑁆𑀲 𑀳𑀤𑀬𑀁 𑀯𑀸 𑀨𑀸𑀮𑁂𑀲𑁆𑀲𑀸𑀫𑀺, 𑀧𑀸𑀤𑁂 𑀯𑀸 𑀦𑀁 𑀕𑀳𑁂𑀢𑁆𑀯𑀸 𑀧𑀸𑀭𑀕𑀗𑁆𑀕𑀸𑀬 𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺. 𑀫𑀳𑀸𑀭𑀸𑀚, 𑀲𑀸𑀫𑀡𑁂𑀭𑁄 𑀫𑀳𑀸𑀦𑀼𑀪𑀸𑀯𑁄, 𑀢𑀼𑀫𑁆𑀳𑁂 𑀲𑀸𑀫𑀡𑁂𑀭𑁂𑀦 𑀲𑀤𑁆𑀥𑀺𑀁 𑀲𑀗𑁆𑀕𑀸𑀫𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀣, 𑀔𑀫𑀸𑀧𑁂𑀢𑁆𑀯𑀸 𑀦𑀁 𑀕𑀘𑁆𑀙𑀣𑀸𑀢𑀺. 𑀲𑁄 𑀲𑀬𑀫𑁆𑀧𑀺 𑀲𑀸𑀫𑀡𑁂𑀭𑀲𑁆𑀲 𑀆𑀦𑀼𑀪𑀸𑀯𑀁 𑀚𑀸𑀦𑀸𑀢𑀺𑀬𑁂𑀯, 𑀮𑀚𑁆𑀚𑀸𑀬 𑀧𑀦 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀆𑀕𑀢𑁄. 𑀅𑀣 𑀦𑀁 𑀣𑁂𑀭𑀲𑁆𑀲 𑀯𑀘𑀦𑁂𑀦 𑀔𑀫𑀸𑀧𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀫𑀺𑀢𑁆𑀢𑀲𑀦𑁆𑀣𑀯𑀁 𑀓𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀅𑀦𑁄𑀢𑀢𑁆𑀢𑀉𑀤𑀓𑁂𑀦 𑀅𑀢𑁆𑀣𑁂 𑀲𑀢𑀺 𑀢𑀼𑀫𑁆𑀳𑀸𑀓𑀁 𑀆𑀕𑀫𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀫𑀬𑁆𑀳𑀁 𑀧𑀳𑀺𑀡𑁂𑀬𑁆𑀬𑀸𑀣, 𑀅𑀳𑀫𑁂𑀯 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀣𑁂𑀭𑁄𑀧𑀺 𑀲𑀸𑀫𑀡𑁂𑀭𑀁 𑀆𑀤𑀸𑀬 𑀧𑀸𑀬𑀸𑀲𑀺. 𑀲𑀢𑁆𑀣𑀸 𑀣𑁂𑀭𑀲𑁆𑀲 𑀆𑀕𑀫𑀦𑀪𑀸𑀯𑀁 𑀜𑀢𑁆𑀯𑀸 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 𑀣𑁂𑀭𑀲𑁆𑀲 𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀪𑀺𑀓𑁆𑀔𑀽𑀧𑀺 𑀣𑁂𑀭𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀲𑀼𑀁. 𑀅𑀣𑁂𑀓𑀘𑁆𑀘𑁂 𑀲𑀸𑀫𑀡𑁂𑀭𑀁 𑀲𑀻𑀲𑁂𑀧𑀺 𑀓𑀡𑁆𑀡𑁂𑀲𑀼𑀧𑀺 𑀩𑀸𑀳𑀸𑀬𑀫𑁆𑀧𑀺 𑀕𑀳𑁂𑀢𑁆𑀯𑀸 𑀲𑀜𑁆𑀘𑀸𑀮𑁂𑀢𑁆𑀯𑀸 ‘‘𑀓𑀺𑀁, 𑀲𑀸𑀫𑀡𑁂𑀭 𑀘𑀽𑀴𑀓𑀦𑀺𑀝𑁆𑀞, 𑀦 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀆𑀳𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀪𑀸𑀭𑀺𑀬𑀁 𑀯𑀢𑀺𑀫𑁂𑀲𑀁 𑀪𑀺𑀓𑁆𑀔𑀽𑀦𑀁 𑀓𑀫𑁆𑀫𑀁 𑀆𑀲𑀻𑀯𑀺𑀲𑀁 𑀕𑀻𑀯𑀸𑀬 𑀕𑀡𑁆𑀳𑀦𑁆𑀢𑀸 𑀯𑀺𑀬 𑀲𑀸𑀫𑀡𑁂𑀭𑀁 𑀕𑀡𑁆𑀳𑀦𑁆𑀢𑀺, 𑀦𑀸𑀲𑁆𑀲 𑀆𑀦𑀼𑀪𑀸𑀯𑀁 𑀚𑀸𑀦𑀦𑁆𑀢𑀺, 𑀅𑀚𑁆𑀚 𑀫𑀬𑀸 𑀲𑀼𑀫𑀦𑀲𑀸𑀫𑀡𑁂𑀭𑀲𑁆𑀲 𑀕𑀼𑀡𑀁 𑀧𑀸𑀓𑀝𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀣𑁂𑀭𑁄𑀧𑀺 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀦𑀦𑁆𑀤, 𑀅𑀦𑁄𑀢𑀢𑁆𑀢𑀉𑀤𑀓𑁂𑀦𑀫𑁆𑀳𑀺 𑀧𑀸𑀤𑁂 𑀥𑁄𑀯𑀺𑀢𑀼𑀓𑀸𑀫𑁄, 𑀲𑀸𑀫𑀡𑁂𑀭𑀸𑀦𑀁 𑀖𑀝𑀁 𑀤𑀢𑁆𑀯𑀸 𑀧𑀸𑀦𑀻𑀬𑀁 𑀆𑀳𑀭𑀸𑀧𑁂𑀳𑀻’’𑀢𑀺. 𑀣𑁂𑀭𑁄 𑀯𑀺𑀳𑀸𑀭𑁂 𑀧𑀜𑁆𑀘𑀫𑀢𑁆𑀢𑀸𑀦𑀺 𑀲𑀸𑀫𑀡𑁂𑀭𑀲𑀢𑀸𑀦𑀺 𑀲𑀦𑁆𑀦𑀺𑀧𑀸𑀢𑁂𑀲𑀺. 𑀢𑁂𑀲𑀼 𑀲𑀼𑀫𑀦𑀲𑀸𑀫𑀡𑁂𑀭𑁄 𑀲𑀩𑁆𑀩𑀦𑀯𑀓𑁄 𑀅𑀳𑁄𑀲𑀺. 𑀣𑁂𑀭𑁄 𑀲𑀩𑁆𑀩𑀫𑀳𑀮𑁆𑀮𑀓𑀁 𑀲𑀸𑀫𑀡𑁂𑀭𑀁 𑀆𑀳 𑁋 ‘‘𑀲𑀸𑀫𑀡𑁂𑀭, 𑀲𑀢𑁆𑀣𑀸 𑀅𑀦𑁄𑀓𑀢𑁆𑀢𑀤𑀳𑀉𑀤𑀓𑁂𑀦 𑀧𑀸𑀤𑁂 𑀥𑁄𑀯𑀺𑀢𑀼𑀓𑀸𑀫𑁄, 𑀖𑀝𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀧𑀸𑀦𑀻𑀬𑀁 𑀆𑀳𑀭𑀸’’𑀢𑀺. 𑀲𑁄 ‘‘𑀦 𑀲𑀓𑁆𑀓𑁄𑀫𑀺, 𑀪𑀦𑁆𑀢𑁂’’𑀢𑀺 𑀦 𑀇𑀘𑁆𑀙𑀺. 𑀣𑁂𑀭𑁄 𑀲𑁂𑀲𑁂𑀧𑀺 𑀧𑀝𑀺𑀧𑀸𑀝𑀺𑀬𑀸 𑀧𑀼𑀘𑁆𑀙𑀺, 𑀢𑁂𑀧𑀺 𑀢𑀣𑁂𑀯 𑀯𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺𑀁𑀲𑀼. ‘‘𑀓𑀺𑀁 𑀧𑀦𑁂𑀢𑁆𑀣 𑀔𑀻𑀡𑀸𑀲𑀯𑀲𑀸𑀫𑀡𑁂𑀭𑀸 𑀦𑀢𑁆𑀣𑀻’’𑀢𑀺? 𑀅𑀢𑁆𑀣𑀺, 𑀢𑁂 𑀧𑀦 ‘‘𑀦𑀸𑀬𑀁 𑀅𑀫𑁆𑀳𑀸𑀓𑀁 𑀩𑀤𑁆𑀥𑁄 𑀫𑀸𑀮𑀸𑀧𑀼𑀝𑁄, 𑀲𑀼𑀫𑀦𑀲𑀸𑀫𑀡𑁂𑀭𑀲𑁆𑀲𑁂𑀯 𑀩𑀤𑁆𑀥𑁄’’𑀢𑀺 𑀦 𑀇𑀘𑁆𑀙𑀺𑀁𑀲𑀼, 𑀧𑀼𑀣𑀼𑀚𑁆𑀚𑀦𑀸 𑀧𑀦 𑀅𑀢𑁆𑀢𑀦𑁄 𑀅𑀲𑀫𑀢𑁆𑀣𑀢𑀸𑀬𑁂𑀯 𑀦 𑀇𑀘𑁆𑀙𑀺𑀁𑀲𑀼. 𑀧𑀭𑀺𑀬𑁄𑀲𑀸𑀦𑁂 𑀧𑀦 𑀲𑀼𑀫𑀦𑀲𑁆𑀲 𑀯𑀸𑀭𑁂 𑀲𑀫𑁆𑀧𑀢𑁆𑀢𑁂, ‘‘𑀲𑀸𑀫𑀡𑁂𑀭, 𑀲𑀢𑁆𑀣𑀸 𑀅𑀦𑁄𑀢𑀢𑁆𑀢𑀤𑀳𑀉𑀤𑀓𑁂𑀦 𑀧𑀸𑀤𑁂 𑀥𑁄𑀯𑀺𑀢𑀼𑀓𑀸𑀫𑁄, 𑀓𑀼𑀝𑀁 𑀆𑀤𑀸𑀬 𑀓𑀺𑀭 𑀉𑀤𑀓𑀁 𑀆𑀳𑀭𑀸’’𑀢𑀺 𑀆𑀳. 𑀲𑁄 ‘‘𑀲𑀢𑁆𑀣𑀭𑀺 𑀆𑀳𑀭𑀸𑀧𑁂𑀦𑁆𑀢𑁂 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀦𑁄𑀢𑀢𑁆𑀢𑀢𑁄 𑀓𑀺𑀭 𑀫𑀁 𑀉𑀤𑀓𑀁 𑀆𑀳𑀸𑀭𑀸𑀧𑁂𑀣𑀸’’𑀢𑀺 𑀆𑀳. ‘‘𑀆𑀫, 𑀲𑀼𑀫𑀦𑀸’’𑀢𑀺. 𑀲𑁄 𑀯𑀺𑀲𑀸𑀔𑀸𑀬 𑀓𑀸𑀭𑀺𑀢𑁂𑀲𑀼 𑀖𑀦𑀲𑀼𑀯𑀡𑁆𑀡𑀓𑁄𑀝𑁆𑀝𑀺𑀫𑁂𑀲𑀼 𑀲𑁂𑀦𑀸𑀲𑀦𑀓𑀼𑀝𑁂𑀲𑀼 𑀏𑀓𑀁 𑀲𑀝𑁆𑀞𑀺𑀓𑀼𑀝𑀉𑀤𑀓𑀕𑀡𑁆𑀳𑀦𑀓𑀁 𑀫𑀳𑀸𑀖𑀝𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 ‘‘𑀇𑀫𑀺𑀦𑀸 𑀫𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀁𑀲𑀓𑀽𑀝𑁂 𑀞𑀧𑀺𑀢𑁂𑀦 𑀅𑀢𑁆𑀣𑁄 𑀦𑀢𑁆𑀣𑀻’’𑀢𑀺 𑀑𑀮𑀫𑁆𑀩𑀓𑀁 𑀓𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀳𑀺𑀫𑀯𑀦𑁆𑀢𑀸𑀪𑀺𑀫𑀼𑀔𑁄 𑀧𑀓𑁆𑀔𑀦𑁆𑀤𑀺.

𑀦𑀸𑀕𑀭𑀸𑀚𑀸 𑀲𑀸𑀫𑀡𑁂𑀭𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀓𑀼𑀝𑀁 𑀅𑀁𑀲𑀓𑀽𑀝𑁂𑀦 𑀆𑀤𑀸𑀬, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀫𑀸𑀤𑀺𑀲𑁂 𑀤𑀸𑀲𑁂 𑀯𑀺𑀚𑁆𑀚𑀫𑀸𑀦𑁂 𑀓𑀲𑁆𑀫𑀸 𑀲𑀬𑀁 𑀆𑀕𑀢𑀸, 𑀉𑀤𑀓𑁂𑀦𑀢𑁆𑀣𑁂 𑀲𑀢𑀺 𑀓𑀲𑁆𑀫𑀸 𑀲𑀸𑀲𑀦𑀫𑀢𑁆𑀢𑀫𑁆𑀧𑀺 𑀦 𑀧𑀳𑀺𑀡𑀣𑀸’’𑀢𑀺 𑀓𑀼𑀝𑁂𑀦 𑀉𑀤𑀓𑀁 𑀆𑀤𑀸𑀬 𑀲𑀬𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀧𑀼𑀭𑀢𑁄 𑀳𑁄𑀣, 𑀪𑀦𑁆𑀢𑁂, 𑀅𑀳𑀫𑁂𑀯 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀢𑀺𑀝𑁆𑀞𑀣 𑀢𑀼𑀫𑁆𑀳𑁂, 𑀫𑀳𑀸𑀭𑀸𑀚, 𑀅𑀳𑀫𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀆𑀡𑀢𑁆𑀢𑁄’’𑀢𑀺 𑀦𑀸𑀕𑀭𑀸𑀚𑀸𑀦𑀁 𑀦𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀓𑀼𑀝𑀁 𑀫𑀼𑀔𑀯𑀝𑁆𑀝𑀺𑀬𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂𑀦𑀸𑀕𑀜𑁆𑀙𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀕𑀘𑁆𑀙𑀦𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀲𑁆𑀲𑀣, 𑀪𑀺𑀓𑁆𑀔𑀯𑁂, 𑀲𑀸𑀫𑀡𑁂𑀭𑀲𑁆𑀲 𑀮𑀻𑀮𑀁, 𑀆𑀓𑀸𑀲𑁂 𑀳𑀁𑀲𑀭𑀸𑀚𑀸 𑀯𑀺𑀬 𑀲𑁄𑀪𑀢𑀻’’𑀢𑀺 𑀆𑀳. 𑀲𑁄𑀧𑀺 𑀧𑀸𑀦𑀻𑀬𑀖𑀝𑀁 𑀞𑀧𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 𑁋 ‘‘𑀓𑀢𑀺𑀯𑀲𑁆𑀲𑁄𑀲𑀺 𑀢𑁆𑀯𑀁, 𑀲𑀼𑀫𑀦𑀸’’𑀢𑀺? ‘‘𑀲𑀢𑁆𑀢𑀯𑀲𑁆𑀲𑁄𑀫𑁆𑀳𑀺, 𑀪𑀦𑁆𑀢𑁂𑀢𑀺. ‘‘𑀢𑁂𑀦 𑀳𑀺, 𑀲𑀼𑀫𑀦, 𑀅𑀚𑁆𑀚 𑀧𑀝𑁆𑀞𑀸𑀬 𑀪𑀺𑀓𑁆𑀔𑀼 𑀳𑁄𑀳𑀻’’𑀢𑀺 𑀯𑀢𑁆𑀯𑀸 𑀤𑀸𑀬𑀚𑁆𑀚𑀉𑀧𑀲𑀫𑁆𑀧𑀤𑀁 𑀅𑀤𑀸𑀲𑀺. 𑀤𑁆𑀯𑁂𑀬𑁂𑀯 𑀓𑀺𑀭 𑀲𑀸𑀫𑀡𑁂𑀭𑀸 𑀲𑀢𑁆𑀢𑀯𑀲𑁆𑀲𑀺𑀓𑀸 𑀉𑀧𑀲𑀫𑁆𑀧𑀤𑀁 𑀮𑀪𑀺𑀁𑀲𑀼 𑁋 𑀅𑀬𑀜𑁆𑀘 𑀲𑀼𑀫𑀦𑁄 𑀲𑁄𑀧𑀸𑀓𑁄 𑀘𑀸𑀢𑀺.

𑀏𑀯𑀁 𑀢𑀲𑁆𑀫𑀺𑀁 𑀉𑀧𑀲𑀫𑁆𑀧𑀦𑁆𑀦𑁂 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁, ‘‘𑀅𑀘𑁆𑀙𑀭𑀺𑀬𑀁 𑀆𑀯𑀼𑀲𑁄, 𑀏𑀯𑀭𑀽𑀧𑁄 𑀳𑀺 𑀦𑀸𑀫 𑀤𑀳𑀭𑀲𑀸𑀫𑀡𑁂𑀭𑀲𑁆𑀲 𑀆𑀦𑀼𑀪𑀸𑀯𑁄 𑀳𑁄𑀢𑀺, 𑀦 𑀦𑁄 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑁄 𑀆𑀦𑀼𑀪𑀸𑀯𑁄 𑀤𑀺𑀝𑁆𑀞𑀧𑀼𑀩𑁆𑀩𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀲𑀦𑁂 𑀤𑀳𑀭𑁄𑀧𑀺 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑁄 𑀏𑀯𑀭𑀽𑀧𑀁 𑀲𑀫𑁆𑀧𑀢𑁆𑀢𑀺𑀁 𑀮𑀪𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁮𑁨. ‘‘𑀬𑁄 𑀳𑀯𑁂 𑀤𑀳𑀭𑁄 𑀪𑀺𑀓𑁆𑀔𑀼, 𑀬𑀼𑀜𑁆𑀚𑀢𑀺 𑀩𑀼𑀤𑁆𑀥𑀲𑀸𑀲𑀦𑁂;

𑀲𑁄𑀫𑀁 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸’’𑀢𑀺.

𑀢𑀢𑁆𑀣 𑀬𑀼𑀜𑁆𑀚𑀢𑀻𑀢𑀺 𑀖𑀝𑀢𑀺 𑀯𑀸𑀬𑀫𑀢𑀺. 𑀧𑀪𑀸𑀲𑁂𑀢𑀻𑀢𑀺 𑀲𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀅𑀩𑁆𑀪𑀸𑀤𑀻𑀳𑀺 𑀫𑀼𑀢𑁆𑀢𑁄 𑀘𑀦𑁆𑀤𑀺𑀫𑀸 𑀯𑀺𑀬 𑀮𑁄𑀓𑀁 𑀔𑀦𑁆𑀥𑀸𑀤𑀺𑀪𑁂𑀤𑀁 𑀮𑁄𑀓𑀁 𑀑𑀪𑀸𑀲𑁂𑀢𑀺, 𑀏𑀓𑀸𑀮𑁄𑀓𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀼𑀫𑀦𑀲𑀸𑀫𑀡𑁂𑀭𑀯𑀢𑁆𑀣𑀼 𑀤𑁆𑀯𑀸𑀤𑀲𑀫𑀁.

𑀪𑀺𑀓𑁆𑀔𑀼𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀯𑀻𑀲𑀢𑀺𑀫𑁄 𑀯𑀕𑁆𑀕𑁄.