𑁨𑁫. 𑀪𑀺𑀓𑁆𑀔𑀼𑀯𑀕𑁆𑀕𑁄

𑁧. 𑀧𑀜𑁆𑀘𑀪𑀺𑀓𑁆𑀔𑀼𑀯𑀢𑁆𑀣𑀼

𑀘𑀓𑁆𑀔𑀼𑀦𑀸 𑀲𑀁𑀯𑀭𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀘 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂𑀲𑀼 𑀓𑀺𑀭 𑀏𑀓𑁂𑀓𑁄 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀧𑀜𑁆𑀘𑀲𑀼 𑀤𑁆𑀯𑀸𑀭𑁂𑀲𑀼 𑀏𑀓𑁂𑀓𑀫𑁂𑀯 𑀭𑀓𑁆𑀔𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀅𑀳𑀁 𑀤𑀼𑀭𑀓𑁆𑀔𑀁 𑀭𑀓𑁆𑀔𑀸𑀫𑀺, 𑀅𑀳𑀁 𑀤𑀼𑀭𑀓𑁆𑀔𑀁 𑀭𑀓𑁆𑀔𑀸𑀫𑀻’’𑀢𑀺 𑀯𑀺𑀯𑀤𑀺𑀢𑁆𑀯𑀸 ‘‘𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺𑀢𑁆𑀯𑀸 𑀇𑀫𑀫𑀢𑁆𑀣𑀁 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀬𑀁 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀦𑀺 𑀭𑀓𑁆𑀔𑀦𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀓𑁆𑀔𑀦𑀤𑁆𑀯𑀸𑀭𑀫𑁂𑀯 𑀤𑀼𑀭𑀓𑁆𑀔𑀦𑁆𑀢𑀺 𑀫𑀜𑁆𑀜𑀸𑀫, 𑀓𑁄 𑀦𑀼 𑀔𑁄 𑀅𑀫𑁆𑀳𑁂𑀲𑀼 𑀤𑀼𑀭𑀓𑁆𑀔𑀁 𑀭𑀓𑁆𑀔𑀢𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸 𑀏𑀓𑀁 𑀪𑀺𑀓𑁆𑀔𑀼𑀫𑁆𑀧𑀺 𑀅𑀦𑁄𑀲𑀸𑀤𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀲𑀩𑁆𑀩𑀸𑀦𑀺 𑀧𑁂𑀢𑀸𑀦𑀺 𑀤𑀼𑀭𑀓𑁆𑀔𑀸𑀦𑁂𑀯, 𑀅𑀧𑀺 𑀘 𑀔𑁄 𑀧𑀦 𑀢𑀼𑀫𑁆𑀳𑁂 𑀦 𑀇𑀤𑀸𑀦𑁂𑀯 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀅𑀲𑀁𑀯𑀼𑀢𑀸, 𑀧𑀼𑀩𑁆𑀩𑁂𑀧𑀺 𑀅𑀲𑀁𑀯𑀼𑀢𑀸, 𑀅𑀲𑀁𑀯𑀼𑀢𑀢𑁆𑀢𑀸𑀬𑁂𑀯 𑀘 𑀧𑀡𑁆𑀟𑀺𑀢𑀸𑀦𑀁 𑀑𑀯𑀸𑀤𑁂 𑀅𑀯𑀢𑁆𑀢𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 ‘‘𑀓𑀤𑀸, 𑀪𑀦𑁆𑀢𑁂’’𑀢𑀺 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑁂 𑀢𑀓𑁆𑀓𑀲𑀺𑀮𑀚𑀸𑀢𑀓𑀲𑁆𑀲 𑀯𑀢𑁆𑀣𑀼𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀭𑀓𑁆𑀔𑀲𑀻𑀦𑀁 𑀯𑀲𑁂𑀦 𑀭𑀸𑀚𑀓𑀼𑀮𑁂 𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁂 𑀧𑀢𑁆𑀢𑀸𑀪𑀺𑀲𑁂𑀓𑁂𑀦 𑀫𑀳𑀸𑀲𑀢𑁆𑀢𑁂𑀦 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀭𑀸𑀚𑀸𑀲𑀦𑁂 𑀦𑀺𑀲𑀺𑀦𑁆𑀦𑁂𑀦 𑀅𑀢𑁆𑀢𑀦𑁄 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀯𑀻𑀭𑀺𑀬𑀁 𑀦𑀸𑀫𑁂𑀢𑀁 𑀲𑀢𑁆𑀢𑁂𑀳𑀺 𑀓𑀢𑁆𑀢𑀩𑁆𑀩𑀫𑁂𑀯𑀸’’𑀢𑀺 𑀉𑀤𑀸𑀦𑀯𑀲𑁂𑀦 𑀉𑀤𑀸𑀦𑀺𑀢𑀁 𑁋

‘‘𑀓𑀼𑀲𑀮𑀽𑀧𑀤𑁂𑀲𑁂 𑀥𑀺𑀢𑀺𑀬𑀸 𑀤𑀴𑁆𑀳𑀸𑀬 𑀘,

𑀅𑀦𑀺𑀯𑀢𑁆𑀢𑀺𑀢𑀢𑁆𑀢𑀸𑀪𑀬𑀪𑀻𑀭𑀼𑀢𑀸𑀬 𑀘;

𑀦 𑀭𑀓𑁆𑀔𑀲𑀻𑀦𑀁 𑀯𑀲𑀫𑀸𑀕𑀫𑀺𑀫𑁆𑀳𑀲𑁂,

𑀲 𑀲𑁄𑀢𑁆𑀣𑀺𑀪𑀸𑀯𑁄 𑀫𑀳𑀢𑀸 𑀪𑀬𑁂𑀦 𑀫𑁂’’𑀢𑀺. (𑀚𑀸. 𑁧.𑁧.𑁧𑁩𑁨) 𑁋

𑀇𑀫𑀁 𑀕𑀸𑀣𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀢𑀤𑀸𑀧𑀺 𑀢𑀼𑀫𑁆𑀳𑁂𑀯 𑀧𑀜𑁆𑀘 𑀚𑀦𑀸 𑀢𑀓𑁆𑀓𑀲𑀺𑀮𑀸𑀬𑀁 𑀭𑀚𑁆𑀚𑀕𑀳𑀡𑀢𑁆𑀣𑀸𑀬 𑀦𑀺𑀓𑁆𑀔𑀦𑁆𑀢𑀁 𑀫𑀳𑀸𑀲𑀢𑁆𑀢𑀁 𑀆𑀯𑀼𑀥𑀳𑀢𑁆𑀣𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀭𑀓𑁆𑀔𑀲𑀻𑀳𑀺 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀺𑀯𑀲𑁂𑀦 𑀉𑀧𑀦𑀻𑀢𑁂𑀲𑀼 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀲𑀼 𑀅𑀲𑀁𑀯𑀼𑀢𑀸 𑀧𑀡𑁆𑀟𑀺𑀢𑀲𑁆𑀲 𑀑𑀯𑀸𑀤𑁂 𑀅𑀯𑀢𑁆𑀢𑀺𑀢𑁆𑀯𑀸 𑀑𑀮𑀻𑀬𑀦𑁆𑀢𑀸 𑀭𑀓𑁆𑀔𑀲𑀻𑀳𑀺 𑀔𑀸𑀤𑀺𑀢𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺𑀢𑁆𑀣. 𑀢𑁂𑀲𑀼 𑀧𑀦 𑀆𑀭𑀫𑁆𑀫𑀡𑁂𑀲𑀼 𑀲𑀼𑀲𑀁𑀯𑀼𑀢𑁄 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀦𑁆𑀢𑀺𑀁 𑀤𑁂𑀯𑀯𑀡𑁆𑀡𑀺𑀁 𑀬𑀓𑁆𑀔𑀺𑀦𑀺𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀭𑀚𑁆𑀚𑀁 𑀧𑀢𑁆𑀢𑁄 𑀭𑀸𑀚𑀸 𑀅𑀳𑀫𑁂𑀯𑀸’’𑀢𑀺 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀲𑀩𑁆𑀩𑀸𑀦𑀺 𑀤𑁆𑀯𑀸𑀭𑀸𑀦𑀺 𑀲𑀁𑀯𑀭𑀺𑀢𑀩𑁆𑀩𑀸𑀦𑀺. 𑀏𑀢𑀸𑀦𑀺 𑀳𑀺 𑀲𑀁𑀯𑀭𑀦𑁆𑀢𑁄 𑀏𑀯 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁬𑁦. ‘‘𑀘𑀓𑁆𑀔𑀼𑀦𑀸 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀲𑁄𑀢𑁂𑀦 𑀲𑀁𑀯𑀭𑁄;

𑀖𑀸𑀦𑁂𑀦 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀚𑀺𑀯𑁆𑀳𑀸𑀬 𑀲𑀁𑀯𑀭𑁄.

𑁩𑁬𑁧. ‘‘𑀓𑀸𑀬𑁂𑀦 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀯𑀸𑀘𑀸𑀬 𑀲𑀁𑀯𑀭𑁄;

𑀫𑀦𑀲𑀸 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀲𑀩𑁆𑀩𑀢𑁆𑀣 𑀲𑀁𑀯𑀭𑁄;

𑀲𑀩𑁆𑀩𑀢𑁆𑀣 𑀲𑀁𑀯𑀼𑀢𑁄 𑀪𑀺𑀓𑁆𑀔𑀼, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀘𑀓𑁆𑀔𑀼𑀦𑀸𑀢𑀺 𑀬𑀤𑀸 𑀳𑀺 𑀪𑀺𑀓𑁆𑀔𑀼𑀦𑁄 𑀘𑀓𑁆𑀔𑀼𑀤𑁆𑀯𑀸𑀭𑁂 𑀭𑀽𑀧𑀸𑀭𑀫𑁆𑀫𑀡𑀁 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, 𑀢𑀤𑀸 𑀇𑀝𑁆𑀞𑀸𑀭𑀫𑁆𑀫𑀡𑁂 𑀅𑀭𑀚𑁆𑀚𑀦𑁆𑀢𑀲𑁆𑀲 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂 𑀅𑀤𑀼𑀲𑁆𑀲𑀦𑁆𑀢𑀲𑁆𑀲 𑀅𑀲𑀫𑀧𑁂𑀓𑁆𑀔𑀦𑁂𑀦 𑀫𑁄𑀳𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀲𑀁𑀯𑀭𑁄 𑀣𑀓𑀦𑀁 𑀧𑀺𑀤𑀳𑀦𑀁 𑀕𑀼𑀢𑁆𑀢𑀺 𑀓𑀢𑀸 𑀦𑀸𑀫 𑀳𑁄𑀢𑀺. 𑀢𑀲𑁆𑀲 𑀲𑁄 𑀏𑀯𑀭𑀽𑀧𑁄 𑀘𑀓𑁆𑀔𑀼𑀦𑀸 𑀲𑀁𑀯𑀭𑁄 𑀲𑀸𑀥𑀼. 𑀏𑀲 𑀦𑀬𑁄 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺. 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼𑀬𑁂𑀯 𑀧𑀦 𑀲𑀁𑀯𑀭𑁄 𑀯𑀸 𑀅𑀲𑀁𑀯𑀭𑁄 𑀯𑀸 𑀦𑀼𑀧𑁆𑀧𑀚𑁆𑀚𑀢𑀺, 𑀧𑀭𑀢𑁄 𑀧𑀦 𑀚𑀯𑀦𑀯𑀻𑀣𑀺𑀬𑀁 𑀏𑀲 𑀮𑀩𑁆𑀪𑀢𑀺. 𑀢𑀤𑀸 𑀳𑀺 𑀅𑀲𑀁𑀯𑀭𑁄 𑀉𑀧𑁆𑀧𑀚𑁆𑀚𑀦𑁆𑀢𑁄 𑀅𑀲𑁆𑀲𑀤𑁆𑀥𑀸 𑀅𑀓𑁆𑀔𑀦𑁆𑀢𑀺 𑀓𑁄𑀲𑀚𑁆𑀚𑀁 𑀫𑀼𑀝𑁆𑀞𑀲𑀘𑁆𑀘𑀁 𑀅𑀜𑁆𑀜𑀸𑀡𑀦𑁆𑀢𑀺 𑀅𑀓𑀼𑀲𑀮𑀯𑀻𑀣𑀺𑀬𑀁 𑀅𑀬𑀁 𑀧𑀜𑁆𑀘𑀯𑀺𑀥𑁄 𑀮𑀩𑁆𑀪𑀢𑀺. 𑀲𑀁𑀯𑀭𑁄 𑀉𑀧𑁆𑀧𑀚𑁆𑀚𑀦𑁆𑀢𑁄 𑀲𑀤𑁆𑀥𑀸 𑀔𑀦𑁆𑀢𑀺 𑀯𑀻𑀭𑀺𑀬𑀁 𑀲𑀢𑀺 𑀜𑀸𑀡𑀦𑁆𑀢𑀺 𑀓𑀼𑀲𑀮𑀯𑀻𑀣𑀺𑀬𑀁 𑀅𑀬𑀁 𑀧𑀜𑁆𑀘𑀯𑀺𑀥𑁄 𑀮𑀩𑁆𑀪𑀢𑀺.

𑀓𑀸𑀬𑁂𑀦 𑀲𑀁𑀯𑀭𑁄𑀢𑀺 𑀏𑀢𑁆𑀣 𑀧𑀦 𑀧𑀲𑀸𑀤𑀓𑀸𑀬𑁄𑀧𑀺 𑀘𑁄𑀧𑀦𑀓𑀸𑀬𑁄𑀧𑀺 𑀮𑀩𑁆𑀪𑀢𑀺. 𑀉𑀪𑀬𑀫𑁆𑀧𑀺 𑀧𑀦𑁂𑀢𑀁 𑀓𑀸𑀬𑀤𑁆𑀯𑀸𑀭𑀫𑁂𑀯. 𑀢𑀢𑁆𑀣 𑀧𑀲𑀸𑀤𑀤𑁆𑀯𑀸𑀭𑁂 𑀲𑀁𑀯𑀭𑀸𑀲𑀁𑀯𑀭𑁄 𑀓𑀣𑀺𑀢𑁄𑀯. 𑀘𑁄𑀧𑀦𑀤𑁆𑀯𑀸𑀭𑁂𑀧𑀺 𑀢𑀁𑀯𑀢𑁆𑀣𑀼𑀓𑀸 𑀧𑀸𑀡𑀸𑀢𑀺𑀧𑀸𑀢𑀅𑀤𑀺𑀦𑁆𑀦𑀸𑀤𑀸𑀦𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸. 𑀢𑁂𑀳𑀺 𑀧𑀦 𑀲𑀤𑁆𑀥𑀺𑀁 𑀅𑀓𑀼𑀲𑀮𑀯𑀻𑀣𑀺𑀬𑀁 𑀉𑀧𑁆𑀧𑀚𑁆𑀚𑀦𑁆𑀢𑁂𑀳𑀺 𑀢𑀁 𑀤𑁆𑀯𑀸𑀭𑀁 𑀅𑀲𑀁𑀯𑀼𑀢𑀁 𑀳𑁄𑀢𑀺, 𑀓𑀼𑀲𑀮𑀯𑀻𑀣𑀺𑀬𑀁 𑀉𑀧𑁆𑀧𑀚𑁆𑀚𑀦𑁆𑀢𑁂𑀳𑀺 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀆𑀤𑀻𑀳𑀺 𑀲𑀁𑀯𑀼𑀢𑀁. 𑀲𑀸𑀥𑀼 𑀯𑀸𑀘𑀸𑀬𑀸𑀢𑀺 𑀏𑀢𑁆𑀣𑀸𑀧𑀺 𑀘𑁄𑀧𑀦𑀯𑀸𑀘𑀸𑀧𑀺 𑀯𑀸𑀘𑀸. 𑀢𑀸𑀬 𑀲𑀤𑁆𑀥𑀺𑀁 𑀉𑀧𑁆𑀧𑀚𑁆𑀚𑀦𑁆𑀢𑁂𑀳𑀺 𑀫𑀼𑀲𑀸𑀯𑀸𑀤𑀸𑀤𑀻𑀳𑀺 𑀢𑀁 𑀤𑁆𑀯𑀸𑀭𑀁 𑀅𑀲𑀁𑀯𑀼𑀢𑀁 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸𑀯𑁂𑀭𑀫𑀡𑀺𑀆𑀤𑀻𑀳𑀺 𑀲𑀁𑀯𑀼𑀢𑀁. 𑀫𑀦𑀲𑀸 𑀲𑀁𑀯𑀭𑁄𑀢𑀺 𑀏𑀢𑁆𑀣𑀸𑀧𑀺 𑀚𑀯𑀦𑀫𑀦𑀢𑁄 𑀅𑀜𑁆𑀜𑁂𑀦 𑀫𑀦𑁂𑀦 𑀲𑀤𑁆𑀥𑀺𑀁 𑀅𑀪𑀺𑀚𑁆𑀛𑀸𑀤𑀬𑁄 𑀦𑀢𑁆𑀣𑀺. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀚𑀯𑀦𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑁂𑀳𑀺 𑀅𑀪𑀺𑀚𑁆𑀛𑀸𑀤𑀻𑀳𑀺 𑀢𑀁 𑀤𑁆𑀯𑀸𑀭𑀁 𑀅𑀲𑀁𑀯𑀼𑀢𑀁 𑀳𑁄𑀢𑀺, 𑀅𑀦𑀪𑀺𑀚𑁆𑀛𑀸𑀤𑀻𑀳𑀺 𑀲𑀁𑀯𑀼𑀢𑀁 𑀳𑁄𑀢𑀺. 𑀲𑀸𑀥𑀼 𑀲𑀩𑁆𑀩𑀢𑁆𑀣𑀸𑀢𑀺 𑀢𑁂𑀲𑀼 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀲𑀩𑁆𑀩𑁂𑀲𑀼𑀧𑀺 𑀲𑀁𑀯𑀭𑁄 𑀲𑀸𑀥𑀼. 𑀏𑀢𑁆𑀢𑀸𑀯𑀢𑀸 𑀳𑀺 𑀅𑀝𑁆𑀞 𑀲𑀁𑀯𑀭𑀤𑁆𑀯𑀸𑀭𑀸𑀦𑀺 𑀅𑀝𑁆𑀞 𑀘 𑀅𑀲𑀁𑀯𑀭𑀤𑁆𑀯𑀸𑀭𑀸𑀦𑀺 𑀓𑀣𑀺𑀢𑀸𑀦𑀺. 𑀢𑁂𑀲𑀼 𑀅𑀝𑁆𑀞𑀲𑀼 𑀅𑀲𑀁𑀯𑀭𑀤𑁆𑀯𑀸𑀭𑁂𑀲𑀼 𑀞𑀺𑀢𑁄 𑀪𑀺𑀓𑁆𑀔𑀼 𑀲𑀓𑀮𑀯𑀝𑁆𑀝𑀫𑀽𑀮𑀓𑀤𑀼𑀓𑁆𑀔𑀢𑁄 𑀦 𑀫𑀼𑀘𑁆𑀘𑀢𑀺, 𑀲𑀁𑀯𑀭𑀤𑁆𑀯𑀸𑀭𑁂𑀲𑀼 𑀧𑀦 𑀞𑀺𑀢𑁄 𑀲𑀩𑁆𑀩𑀲𑁆𑀫𑀸𑀧𑀺 𑀯𑀝𑁆𑀝𑀫𑀽𑀮𑀓𑀤𑀼𑀓𑁆𑀔𑀸 𑀫𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀩𑁆𑀩𑀢𑁆𑀣 𑀲𑀁𑀯𑀼𑀢𑁄 𑀪𑀺𑀓𑁆𑀔𑀼, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀧𑀜𑁆𑀘 𑀪𑀺𑀓𑁆𑀔𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀧𑀜𑁆𑀘𑀪𑀺𑀓𑁆𑀔𑀼𑀯𑀢𑁆𑀣𑀼 𑀧𑀞𑀫𑀁.

𑁨. 𑀳𑀁𑀲𑀖𑀸𑀢𑀓𑀪𑀺𑀓𑁆𑀔𑀼𑀯𑀢𑁆𑀣𑀼

𑀳𑀢𑁆𑀣𑀲𑀁𑀬𑀢𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀳𑀁𑀲𑀖𑀸𑀢𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀓𑀺𑀭 𑀤𑁆𑀯𑁂 𑀲𑀳𑀸𑀬𑀓𑀸 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑀸 𑀬𑁂𑀪𑀼𑀬𑁆𑀬𑁂𑀦 𑀏𑀓𑀢𑁄 𑀯𑀺𑀘𑀭𑀦𑁆𑀢𑀺. 𑀢𑁂 𑀏𑀓𑀤𑀺𑀯𑀲𑀁 𑀅𑀘𑀺𑀭𑀯𑀢𑀺𑀁 𑀕𑀦𑁆𑀢𑁆𑀯𑀸 𑀦𑁆𑀳𑀢𑁆𑀯𑀸 𑀆𑀢𑀧𑁂 𑀢𑀧𑁆𑀧𑀫𑀸𑀦𑀸 𑀲𑀸𑀭𑀡𑀻𑀬𑀓𑀣𑀁 𑀓𑀣𑁂𑀦𑁆𑀢𑀸 𑀅𑀝𑁆𑀞𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀤𑁆𑀯𑁂 𑀳𑀁𑀲𑀸 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀺. 𑀅𑀣𑁂𑀓𑁄 𑀤𑀳𑀭𑀪𑀺𑀓𑁆𑀔𑀼 𑀲𑀓𑁆𑀔𑀭𑀁 𑀕𑀳𑁂𑀢𑁆𑀯𑀸 ‘‘𑀏𑀓𑀲𑁆𑀲 𑀳𑀁𑀲𑀧𑁄𑀢𑀓𑀲𑁆𑀲 𑀅𑀓𑁆𑀔𑀺𑀁 𑀧𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳, 𑀇𑀢𑀭𑁄 ‘‘𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀺𑀝𑁆𑀞𑀢𑀼 𑀇𑀫𑀲𑁆𑀫𑀺𑀁 𑀧𑀲𑁆𑀲𑁂 𑀅𑀓𑁆𑀔𑀺, 𑀧𑀭𑀧𑀲𑁆𑀲𑁂 𑀅𑀓𑁆𑀔𑀺𑀁 𑀧𑀳𑀭𑀺𑀲𑁆𑀲𑀸𑀫𑀻𑀢𑀺. 𑀇𑀤𑀫𑁆𑀧𑀺 𑀦 𑀲𑀓𑁆𑀔𑀺𑀲𑁆𑀲𑀲𑀺𑀬𑁂𑀯𑀸𑀢𑀺. ‘‘𑀢𑁂𑀦 𑀳𑀺 𑀉𑀧𑀥𑀸𑀭𑁂𑀳𑀻’’𑀢𑀺 𑀤𑀼𑀢𑀺𑀬𑀁 𑀲𑀓𑁆𑀔𑀭𑀁 𑀕𑀳𑁂𑀢𑁆𑀯𑀸 𑀳𑀁𑀲𑀲𑁆𑀲 𑀧𑀘𑁆𑀙𑀸𑀪𑀸𑀕𑁂 𑀔𑀺𑀧𑀺, 𑀳𑀁𑀲𑁄 𑀲𑀓𑁆𑀔𑀭𑀲𑀤𑁆𑀤𑀁 𑀲𑀼𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀲𑀺. 𑀅𑀣 𑀦𑀁 𑀇𑀢𑀭𑀁 𑀯𑀝𑁆𑀝𑀲𑀓𑁆𑀔𑀭𑀁 𑀕𑀳𑁂𑀢𑁆𑀯𑀸 𑀧𑀭𑀧𑀲𑁆𑀲𑁂 𑀅𑀓𑁆𑀔𑀺𑀫𑁆𑀳𑀺 𑀧𑀳𑀭𑀺𑀢𑁆𑀯𑀸 𑀑𑀭𑀺𑀫𑀓𑁆𑀔𑀺𑀦𑀸 𑀦𑀺𑀓𑁆𑀔𑀸𑀫𑁂𑀲𑀺. 𑀳𑀁𑀲𑁄 𑀯𑀺𑀭𑀯𑀦𑁆𑀢𑁄 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀢𑁂𑀲𑀁 𑀧𑀸𑀤𑀫𑀽𑀮𑁂𑀬𑁂𑀯 𑀧𑀢𑀺. 𑀢𑀢𑁆𑀣 𑀢𑀢𑁆𑀣 𑀞𑀺𑀢𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸, ‘‘𑀆𑀯𑀼𑀲𑁄, 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑀦𑀼𑀘𑁆𑀙𑀯𑀺𑀓𑀁 𑀯𑁄 𑀓𑀢𑀁 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀦𑁆𑀢𑁂𑀳𑀻’’𑀢𑀺 𑀯𑀢𑁆𑀯𑀸 𑀢𑁂 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀤𑀲𑁆𑀲𑁂𑀲𑀼𑀁.

𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑀬𑀸 𑀪𑀺𑀓𑁆𑀔𑀼 𑀧𑀸𑀡𑀸𑀢𑀺𑀧𑀸𑀢𑁄 𑀓𑀢𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀼 𑀓𑀲𑁆𑀫𑀸 𑀏𑀯𑀭𑀽𑀧𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀏𑀯𑀫𑀓𑀸𑀲𑀺, 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀅𑀕𑀸𑀭𑀫𑀚𑁆𑀛𑁂 𑀯𑀲𑀫𑀸𑀦𑀸 𑀅𑀧𑁆𑀧𑀫𑀢𑁆𑀢𑀓𑁂𑀲𑀼𑀧𑀺 𑀞𑀸𑀦𑁂𑀲𑀼 𑀓𑀼𑀓𑁆𑀓𑀼𑀘𑁆𑀘𑀁 𑀓𑀭𑀺𑀁𑀲𑀼, 𑀢𑁆𑀯𑀁 𑀧𑀦 𑀏𑀯𑀭𑀽𑀧𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀼𑀓𑁆𑀓𑀼𑀘𑁆𑀘𑀫𑀢𑁆𑀢𑀫𑁆𑀧𑀺 𑀦 𑀅𑀓𑀸𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀓𑀼𑀭𑀼𑀭𑀝𑁆𑀞𑁂 𑀇𑀦𑁆𑀤𑀧𑀢𑁆𑀢𑀦𑀕𑀭𑁂 𑀥𑀦𑀜𑁆𑀘𑀬𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀢𑀓𑁆𑀓𑀲𑀺𑀮𑀸𑀬𑀁 𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀧𑀺𑀢𑀭𑀸 𑀉𑀧𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑀺𑀢𑁄 𑀅𑀧𑀭𑀪𑀸𑀕𑁂 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀧𑀢𑁆𑀯𑀸 𑀤𑀲 𑀭𑀸𑀚𑀥𑀫𑁆𑀫𑁂 𑀅𑀓𑁄𑀧𑁂𑀦𑁆𑀢𑁄 𑀓𑀼𑀭𑀼𑀥𑀫𑁆𑀫𑁂 𑀯𑀢𑁆𑀢𑀺𑀢𑁆𑀣. 𑀓𑀼𑀭𑀼𑀥𑀫𑁆𑀫𑁄 𑀦𑀸𑀫 𑀧𑀜𑁆𑀘𑀲𑀻𑀮𑀸𑀦𑀺, 𑀢𑀸𑀦𑀺 𑀩𑁄𑀥𑀺𑀲𑀢𑁆𑀢𑁄 𑀧𑀭𑀺𑀲𑀼𑀤𑁆𑀥𑀸𑀦𑀺 𑀓𑀢𑁆𑀯𑀸 𑀭𑀓𑁆𑀔𑀺. 𑀬𑀣𑀸 𑀘 𑀩𑁄𑀥𑀺𑀲𑀢𑁆𑀢𑁄, 𑀏𑀯𑀫𑀲𑁆𑀲 𑀫𑀸𑀢𑀸 𑀅𑀕𑁆𑀕𑀫𑀳𑁂𑀲𑀻 𑀓𑀦𑀺𑀝𑁆𑀞𑀪𑀸𑀢𑀸 𑀉𑀧𑀭𑀸𑀚𑀸 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀭𑀚𑁆𑀚𑀼𑀕𑀸𑀳𑀓𑁄 𑀅𑀫𑀘𑁆𑀘𑁄 𑀲𑀸𑀭𑀣𑀺 𑀲𑁂𑀝𑁆𑀞𑀺 𑀤𑁄𑀡𑀫𑀸𑀧𑀓𑁄 𑀫𑀳𑀸𑀫𑀢𑁆𑀢𑁄 𑀤𑁄𑀯𑀸𑀭𑀺𑀓𑁄 𑀦𑀕𑀭𑀲𑁄𑀪𑀺𑀦𑀻 𑀯𑀡𑁆𑀡𑀤𑀸𑀲𑀻𑀢𑀺 𑀏𑀯𑀫𑁂𑀢𑁂𑀲𑀼 𑀏𑀓𑀸𑀤𑀲𑀲𑀼 𑀚𑀦𑁂𑀲𑀼 𑀓𑀼𑀭𑀼𑀥𑀫𑁆𑀫𑀁 𑀭𑀓𑁆𑀔𑀦𑁆𑀢𑁂𑀲𑀼 𑀓𑀮𑀺𑀗𑁆𑀕𑀭𑀝𑁆𑀞𑁂 𑀤𑀦𑁆𑀢𑀧𑀼𑀭𑀦𑀕𑀭𑁂 𑀓𑀮𑀺𑀗𑁆𑀕𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀢𑀲𑁆𑀫𑀺𑀁 𑀭𑀝𑁆𑀞𑁂 𑀤𑁂𑀯𑁄 𑀦 𑀯𑀲𑁆𑀲𑀺. 𑀫𑀳𑀸𑀲𑀢𑁆𑀢𑀲𑁆𑀲 𑀧𑀦 𑀅𑀜𑁆𑀚𑀦𑀲𑀦𑁆𑀦𑀺𑀪𑁄 𑀦𑀸𑀫 𑀫𑀗𑁆𑀕𑀮𑀳𑀢𑁆𑀣𑀻 𑀫𑀳𑀸𑀧𑀼𑀜𑁆𑀜𑁄 𑀳𑁄𑀢𑀺. 𑀭𑀝𑁆𑀞𑀯𑀸𑀲𑀺𑀦𑁄 ‘‘𑀢𑀲𑁆𑀫𑀺𑀁 𑀆𑀦𑀻𑀢𑁂 𑀤𑁂𑀯𑁄 𑀯𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀜𑀸𑀬 𑀭𑀜𑁆𑀜𑁄 𑀆𑀭𑁄𑀘𑀬𑀺𑀁𑀲𑀼. 𑀭𑀸𑀚𑀸 𑀢𑀲𑁆𑀲 𑀳𑀢𑁆𑀣𑀺𑀲𑁆𑀲 𑀆𑀦𑀬𑀦𑀢𑁆𑀣𑀸𑀬 𑀩𑁆𑀭𑀸𑀳𑁆𑀫𑀡𑁂 𑀧𑀳𑀺𑀡𑀺. 𑀢𑁂 𑀕𑀦𑁆𑀢𑁆𑀯𑀸 𑀫𑀳𑀸𑀲𑀢𑁆𑀢𑀁 𑀳𑀢𑁆𑀣𑀺𑀁 𑀬𑀸𑀘𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀬𑀸𑀘𑀦𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 𑀆𑀳 𑁋

‘‘𑀢𑀯 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘, 𑀯𑀺𑀤𑀺𑀢𑁆𑀯𑀸𑀦 𑀚𑀦𑀸𑀥𑀺𑀧;

𑀯𑀡𑁆𑀡𑀁 𑀅𑀜𑁆𑀚𑀦𑀯𑀡𑁆𑀡𑁂𑀦, 𑀓𑀮𑀺𑀗𑁆𑀕𑀲𑁆𑀫𑀺𑀁 𑀦𑀺𑀫𑀺𑀫𑁆𑀳𑀲𑁂’’𑀢𑀺. (𑀚𑀸. 𑁧.𑁩.𑁭𑁬) 𑁋

𑀇𑀫𑀁 𑀢𑀺𑀓𑀦𑀺𑀧𑀸𑀢𑁂 𑀚𑀸𑀢𑀓𑀁 𑀓𑀣𑁂𑀲𑀺. 𑀳𑀢𑁆𑀣𑀺𑀫𑁆𑀳𑀺 𑀧𑀦 𑀆𑀦𑀻𑀢𑁂𑀧𑀺 𑀤𑁂𑀯𑁂 𑀅𑀯𑀲𑁆𑀲𑀦𑁆𑀢𑁂 ‘‘𑀲𑁄 𑀭𑀸𑀚𑀸 𑀓𑀼𑀭𑀼𑀥𑀫𑁆𑀫𑀁 𑀭𑀓𑁆𑀔𑀢𑀺, 𑀢𑁂𑀦𑀲𑁆𑀲 𑀭𑀝𑁆𑀞𑁂 𑀤𑁂𑀯𑁄 𑀯𑀲𑁆𑀲𑀢𑀻’’𑀢𑀺 𑀲𑀜𑁆𑀜𑀸𑀬 ‘‘𑀬𑀁 𑀲𑁄 𑀓𑀼𑀭𑀼𑀥𑀫𑁆𑀫𑀁 𑀭𑀓𑁆𑀔𑀢𑀺, 𑀢𑀁 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀺𑀢𑁆𑀯𑀸 𑀆𑀦𑁂𑀣𑀸’’𑀢𑀺 𑀧𑀼𑀦 𑀓𑀸𑀮𑀺𑀗𑁆𑀕𑁄 𑀩𑁆𑀭𑀸𑀳𑁆𑀫𑀡𑁂 𑀘 𑀅𑀫𑀘𑁆𑀘𑁂 𑀘 𑀧𑁂𑀲𑁂𑀲𑀺. 𑀢𑁂𑀲𑀼 𑀕𑀦𑁆𑀢𑁆𑀯𑀸 𑀬𑀸𑀘𑀦𑁆𑀢𑁂𑀲𑀼 𑀭𑀸𑀚𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀻𑀮𑁂𑀲𑀼 𑀓𑀺𑀜𑁆𑀘𑀺 𑀓𑀼𑀓𑁆𑀓𑀼𑀘𑁆𑀘𑀫𑀢𑁆𑀢𑀁 𑀓𑀢𑁆𑀯𑀸 ‘‘𑀅𑀧𑀭𑀺𑀲𑀼𑀤𑁆𑀥𑀁 𑀦𑁄 𑀲𑀻𑀮’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀧𑀺 ‘‘𑀦 𑀏𑀢𑁆𑀢𑀸𑀯𑀢𑀸 𑀲𑀻𑀮𑀪𑁂𑀤𑁄 𑀳𑁄𑀢𑀻’’𑀢𑀺 𑀢𑁂𑀳𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀻𑀮𑀸𑀦𑀺 𑀓𑀣𑀬𑀺𑀁𑀲𑀼. 𑀓𑀸𑀮𑀺𑀗𑁆𑀕𑁄 𑀲𑀼𑀯𑀡𑁆𑀡𑀧𑀝𑁆𑀝𑁂 𑀮𑀺𑀔𑀸𑀧𑁂𑀢𑁆𑀯𑀸 𑀆𑀪𑀢𑀁 𑀓𑀼𑀭𑀼𑀥𑀫𑁆𑀫𑀁 𑀤𑀺𑀲𑁆𑀯𑀸𑀯 𑀲𑀫𑀸𑀤𑀸𑀬 𑀲𑀸𑀥𑀼𑀓𑀁 𑀧𑀽𑀭𑁂𑀲𑀺. 𑀢𑀲𑁆𑀲 𑀭𑀝𑁆𑀞𑁂 𑀤𑁂𑀯𑁄 𑀧𑀸𑀯𑀲𑁆𑀲𑀺, 𑀭𑀝𑁆𑀞𑀁 𑀔𑁂𑀫𑀁 𑀲𑀼𑀪𑀺𑀓𑁆𑀔𑀁 𑀅𑀳𑁄𑀲𑀺. 𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑁋

‘‘𑀕𑀡𑀺𑀓𑀸 𑀉𑀧𑁆𑀧𑀮𑀯𑀡𑁆𑀡𑀸, 𑀧𑀼𑀡𑁆𑀡𑁄 𑀤𑁄𑀯𑀸𑀭𑀺𑀓𑁄 𑀢𑀤𑀸;

𑀭𑀚𑁆𑀚𑀼𑀕𑀸𑀳𑁄 𑀘 𑀓𑀘𑁆𑀘𑀸𑀦𑁄, 𑀤𑁄𑀡𑀫𑀸𑀧𑀓𑁄 𑀘 𑀓𑁄𑀮𑀺𑀢𑁄.

‘‘𑀲𑀸𑀭𑀺𑀧𑀼𑀢𑁆𑀢𑁄 𑀢𑀤𑀸 𑀲𑁂𑀝𑁆𑀞𑀻, 𑀅𑀦𑀼𑀭𑀼𑀤𑁆𑀥𑁄 𑀘 𑀲𑀸𑀭𑀣𑀻;

𑀩𑁆𑀭𑀸𑀳𑁆𑀫𑀡𑁄 𑀓𑀲𑁆𑀲𑀧𑁄 𑀣𑁂𑀭𑁄, 𑀉𑀧𑀭𑀸𑀚𑀸𑀦𑀦𑁆𑀤𑀧𑀡𑁆𑀟𑀺𑀢𑁄.

‘‘𑀫𑀳𑁂𑀲𑀻 𑀭𑀸𑀳𑀼𑀮𑀫𑀸𑀢𑀸, 𑀫𑀸𑀬𑀸𑀤𑁂𑀯𑀻 𑀚𑀦𑁂𑀢𑁆𑀢𑀺𑀓𑀸;

𑀓𑀼𑀭𑀼𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑁄, 𑀏𑀯𑀁 𑀥𑀸𑀭𑁂𑀣 𑀚𑀸𑀢𑀓’’𑀦𑁆𑀢𑀺. 𑁋

𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 ‘‘𑀪𑀺𑀓𑁆𑀔𑀼 𑀏𑀯𑀁 𑀧𑀼𑀩𑁆𑀩𑁂𑀧𑀺 𑀧𑀡𑁆𑀟𑀺𑀢𑀸 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀓𑀼𑀓𑁆𑀓𑀼𑀘𑁆𑀘𑁂 𑀉𑀧𑁆𑀧𑀦𑁆𑀦𑁂 𑀅𑀢𑁆𑀢𑀦𑁄 𑀲𑀻𑀮𑀪𑁂𑀤𑁂 𑀆𑀲𑀗𑁆𑀓𑀁 𑀓𑀭𑀺𑀁𑀲𑀼, 𑀢𑁆𑀯𑀁 𑀧𑀦 𑀫𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀦𑁆𑀢𑁄 𑀅𑀢𑀺𑀪𑀸𑀭𑀺𑀬𑀁 𑀓𑀫𑁆𑀫𑀫𑀓𑀸𑀲𑀺, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀳𑀢𑁆𑀣𑁂𑀳𑀺 𑀧𑀸𑀤𑁂𑀳𑀺 𑀯𑀸𑀘𑀸𑀬 𑀘 𑀲𑀁𑀬𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁬𑁨. ‘‘𑀳𑀢𑁆𑀣𑀲𑀁𑀬𑀢𑁄 𑀧𑀸𑀤𑀲𑀁𑀬𑀢𑁄,

𑀯𑀸𑀘𑀸𑀲𑀁𑀬𑀢𑁄 𑀲𑀁𑀬𑀢𑀼𑀢𑁆𑀢𑀫𑁄;

𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄,

𑀏𑀓𑁄 𑀲𑀦𑁆𑀢𑀼𑀲𑀺𑀢𑁄 𑀢𑀫𑀸𑀳𑀼 𑀪𑀺𑀓𑁆𑀔𑀼’’𑀦𑁆𑀢𑀺.

𑀢𑀢𑁆𑀣 𑀳𑀢𑁆𑀣𑀲𑀁𑀬𑀢𑁄𑀢𑀺 𑀳𑀢𑁆𑀣𑀓𑀻𑀴𑀸𑀧𑀦𑀸𑀤𑀻𑀦𑀁 𑀯𑀸 𑀳𑀢𑁆𑀣𑁂𑀦 𑀧𑀭𑁂𑀲𑀁 𑀧𑀳𑀭𑀡𑀸𑀤𑀻𑀦𑀁 𑀯𑀸 𑀅𑀪𑀸𑀯𑁂𑀦 𑀳𑀢𑁆𑀣𑀲𑀁𑀬𑀢𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀯𑀸𑀘𑀸𑀬 𑀧𑀦 𑀫𑀼𑀲𑀸𑀯𑀸𑀤𑀸𑀤𑀻𑀦𑀁 𑀅𑀓𑀭𑀡𑀢𑁄 𑀯𑀸𑀘𑀸𑀬 𑀲𑀁𑀬𑀢𑁄. 𑀲𑀁𑀬𑀢𑀼𑀢𑁆𑀢𑀫𑁄𑀢𑀺 𑀲𑀁𑀬𑀢𑀢𑁆𑀢𑀪𑀸𑀯𑁄, 𑀓𑀸𑀬𑀘𑀮𑀦𑀲𑀻𑀲𑀼𑀓𑁆𑀔𑀺𑀧𑀦𑀪𑀫𑀼𑀓𑀯𑀺𑀓𑀸𑀭𑀸𑀤𑀻𑀦𑀁 𑀅𑀓𑀸𑀭𑀓𑁄𑀢𑀺 𑀅𑀢𑁆𑀣𑁄. 𑀅𑀚𑁆𑀛𑀢𑁆𑀢𑀭𑀢𑁄𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑀸𑀬 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀬 𑀭𑀢𑁄. 𑀲𑀫𑀸𑀳𑀺𑀢𑁄𑀢𑀺 𑀲𑀼𑀝𑁆𑀞𑀼 𑀞𑀧𑀺𑀢𑁄. 𑀏𑀓𑁄 𑀲𑀦𑁆𑀢𑀼𑀲𑀺𑀢𑁄𑀢𑀺 𑀏𑀓𑀯𑀺𑀳𑀸𑀭𑀻 𑀳𑀼𑀢𑁆𑀯𑀸 𑀲𑀼𑀝𑁆𑀞𑀼 𑀢𑀼𑀲𑀺𑀢𑁄 𑀯𑀺𑀧𑀲𑁆𑀲𑀦𑀸𑀘𑀸𑀭𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀅𑀥𑀺𑀕𑀫𑁂𑀦 𑀢𑀼𑀝𑁆𑀞𑀫𑀸𑀦𑀲𑁄. 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀜𑁆𑀳𑀺 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂𑀧𑀺 𑀲𑁂𑀔𑀸 𑀅𑀢𑁆𑀢𑀦𑁄 𑀅𑀥𑀺𑀕𑀫𑁂𑀦 𑀲𑀦𑁆𑀢𑀼𑀲𑁆𑀲𑀦𑁆𑀢𑀻𑀢𑀺 𑀲𑀦𑁆𑀢𑀼𑀲𑀺𑀢𑀸, 𑀅𑀭𑀳𑀸 𑀧𑀦 𑀏𑀓𑀦𑁆𑀢𑀲𑀦𑁆𑀢𑀼𑀲𑀺𑀢𑁄𑀯. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀳𑀁𑀲𑀖𑀸𑀢𑀓𑀪𑀺𑀓𑁆𑀔𑀼𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀓𑁄𑀓𑀸𑀮𑀺𑀓𑀯𑀢𑁆𑀣𑀼

𑀬𑁄 𑀫𑀼𑀔𑀲𑀁𑀬𑀢𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀓𑀸𑀮𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 ‘‘𑀅𑀣 𑀔𑁄 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻’’𑀢𑀺 𑀲𑀼𑀢𑁆𑀢𑁂 (𑀲𑀁. 𑀦𑀺. 𑁧.𑁧𑁮𑁧; 𑀲𑀼. 𑀦𑀺. 𑀓𑁄𑀓𑀸𑀮𑀺𑀓𑀲𑀼𑀢𑁆𑀢; 𑀅. 𑀦𑀺. 𑁧𑁦.𑁮𑁯) 𑀆𑀕𑀢𑀫𑁂𑀯. 𑀅𑀢𑁆𑀣𑁄𑀧𑀺𑀲𑁆𑀲 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀓𑁄𑀓𑀸𑀮𑀺𑀓𑁂 𑀧𑀦 𑀧𑀤𑀼𑀫𑀦𑀺𑀭𑀬𑁂 𑀉𑀧𑁆𑀧𑀦𑁆𑀦𑁂 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀅𑀳𑁄 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀫𑀼𑀔𑀁 𑀦𑀺𑀲𑁆𑀲𑀸𑀬 𑀯𑀺𑀦𑀸𑀲𑀁 𑀧𑀢𑁆𑀢𑁄, 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀅𑀓𑁆𑀓𑁄𑀲𑀦𑁆𑀢𑀲𑁆𑀲𑁂𑀯 𑀳𑀺𑀲𑁆𑀲 𑀧𑀣𑀯𑀻 𑀯𑀺𑀯𑀭𑀁 𑀅𑀤𑀸𑀲𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀫𑀼𑀔𑀫𑁂𑀯 𑀦𑀺𑀲𑁆𑀲𑀸𑀬 𑀦𑀝𑁆𑀞𑁄’’𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀲𑁄𑀢𑀼𑀓𑀸𑀫𑁂𑀳𑀺 𑀪𑀺𑀓𑁆𑀔𑀽𑀳𑀺 𑀬𑀸𑀘𑀺𑀢𑁄 𑀢𑀲𑁆𑀲 𑀧𑀓𑀸𑀲𑀦𑀢𑁆𑀣𑀁 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀏𑀓𑀲𑁆𑀫𑀺𑀁 𑀲𑀭𑁂 𑀓𑀘𑁆𑀙𑀧𑁄 𑀯𑀲𑀢𑀺. 𑀤𑁆𑀯𑁂 𑀳𑀁𑀲𑀧𑁄𑀢𑀓𑀸 𑀕𑁄𑀘𑀭𑀸𑀬 𑀘𑀭𑀦𑁆𑀢𑀸 𑀢𑁂𑀦 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀓𑀢𑁆𑀯𑀸 𑀤𑀴𑁆𑀳𑀯𑀺𑀲𑁆𑀲𑀸𑀲𑀺𑀓𑀸 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀓𑀘𑁆𑀙𑀧𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀲𑀫𑁆𑀫, 𑀅𑀫𑁆𑀳𑀸𑀓𑀁 𑀳𑀺𑀫𑀯𑀦𑁆𑀢𑁂 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑀢𑀮𑁂 𑀓𑀜𑁆𑀘𑀦𑀕𑀼𑀳𑀸𑀬 𑀯𑀲𑀦𑀝𑁆𑀞𑀸𑀦𑀁, 𑀭𑀫𑀡𑀺𑀬𑁄 𑀧𑀤𑁂𑀲𑁄, 𑀕𑀘𑁆𑀙𑀺𑀲𑁆𑀲𑀲𑀺 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺’’𑀦𑁆𑀢𑀺. ‘‘𑀲𑀫𑁆𑀫, 𑀅𑀳𑀁 𑀓𑀣𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺? ‘‘𑀫𑀬𑀁 𑀢𑀁 𑀦𑁂𑀲𑁆𑀲𑀸𑀫, 𑀲𑀘𑁂 𑀫𑀼𑀔𑀁 𑀭𑀓𑁆𑀔𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺. ‘‘𑀭𑀓𑁆𑀔𑀺𑀲𑁆𑀲𑀸𑀫𑀺, 𑀲𑀫𑁆𑀫𑀸 𑀕𑀳𑁂𑀢𑁆𑀯𑀸 𑀫𑀁 𑀕𑀘𑁆𑀙𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀏𑀓𑀁 𑀤𑀡𑁆𑀟𑀓𑀁 𑀓𑀘𑁆𑀙𑀧𑁂𑀦 𑀟𑀁𑀲𑀸𑀧𑁂𑀢𑁆𑀯𑀸 𑀲𑀬𑀁 𑀢𑀲𑁆𑀲 𑀉𑀪𑁄 𑀓𑁄𑀝𑀺𑀬𑁄 𑀟𑀁𑀲𑀺𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺𑀁𑀲𑀼. 𑀢𑀁 𑀢𑀣𑀸 𑀳𑀁𑀲𑁂𑀳𑀺 𑀦𑀻𑀬𑀫𑀸𑀦𑀁 𑀕𑀸𑀫𑀤𑀸𑀭𑀓𑀸 𑀤𑀺𑀲𑁆𑀯𑀸 ‘‘𑀤𑁆𑀯𑁂 𑀳𑀁𑀲𑀸 𑀓𑀘𑁆𑀙𑀧𑀁 𑀤𑀡𑁆𑀟𑁂𑀦 𑀳𑀭𑀦𑁆𑀢𑀻’’𑀢𑀺 𑀆𑀳𑀁𑀲𑀼. 𑀓𑀘𑁆𑀙𑀧𑁄 ‘‘𑀬𑀤𑀺 𑀫𑀁 𑀲𑀳𑀸𑀬𑀓𑀸 𑀦𑁂𑀦𑁆𑀢𑀺, 𑀢𑀼𑀫𑁆𑀳𑀸𑀓𑀁 𑀏𑀢𑁆𑀣 𑀓𑀺𑀁 𑀳𑁄𑀢𑀺 𑀤𑀼𑀝𑁆𑀞𑀘𑁂𑀝𑀓𑀸’’𑀢𑀺 𑀯𑀢𑁆𑀢𑀼𑀓𑀸𑀫𑁄 𑀳𑀁𑀲𑀸𑀦𑀁 𑀲𑀻𑀖𑀯𑁂𑀕𑀢𑀸𑀬 𑀩𑀸𑀭𑀸𑀡𑀲𑀺𑀦𑀕𑀭𑁂 𑀭𑀸𑀚𑀦𑀺𑀯𑁂𑀲𑀦𑀲𑁆𑀲 𑀉𑀧𑀭𑀺𑀪𑀸𑀕𑀁 𑀲𑀫𑁆𑀧𑀢𑁆𑀢𑀓𑀸𑀮𑁂 𑀤𑀝𑁆𑀞𑀝𑁆𑀞𑀸𑀦𑀢𑁄 𑀤𑀡𑁆𑀟𑀓𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀆𑀓𑀸𑀲𑀗𑁆𑀕𑀡𑁂 𑀧𑀢𑀺𑀢𑁆𑀯𑀸 𑀤𑁆𑀯𑁂𑀥𑀸 𑀪𑀺𑀚𑁆𑀚𑀺. 𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑁋

‘‘𑀅𑀯𑀥𑀻 𑀯𑀢 𑀅𑀢𑁆𑀢𑀸𑀦𑀁, 𑀓𑀘𑁆𑀙𑀧𑁄 𑀩𑁆𑀬𑀸𑀳𑀭𑀁 𑀕𑀺𑀭𑀁;

𑀲𑀼𑀕𑁆𑀕𑀳𑀻𑀢𑀲𑁆𑀫𑀺𑀁 𑀓𑀝𑁆𑀞𑀲𑁆𑀫𑀺𑀁, 𑀯𑀸𑀘𑀸𑀬 𑀲𑀓𑀺𑀬𑀸𑀯𑀥𑀻.

‘‘𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦𑀭𑀯𑀻𑀭𑀺𑀬𑀲𑁂𑀝𑁆𑀞,

𑀯𑀸𑀘𑀁 𑀧𑀫𑀼𑀜𑁆𑀘𑁂 𑀓𑀼𑀲𑀮𑀁 𑀦𑀸𑀢𑀺𑀯𑁂𑀮𑀁;

𑀧𑀲𑁆𑀲𑀲𑀺 𑀩𑀳𑀼𑀪𑀸𑀡𑁂𑀦, 𑀓𑀘𑁆𑀙𑀧𑀁 𑀩𑁆𑀬𑀲𑀦𑀁 𑀕𑀢’’𑀦𑁆𑀢𑀺. (𑀚𑀸. 𑁧.𑁨.𑁧𑁨𑁯-𑁧𑁩𑁦);

𑀇𑀫𑀁 𑀤𑀼𑀓𑀦𑀺𑀧𑀸𑀢𑁂 𑀩𑀳𑀼𑀪𑀸𑀡𑀺𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀫𑀼𑀔𑀲𑀁𑀬𑀢𑁂𑀦 𑀲𑀫𑀘𑀸𑀭𑀺𑀦𑀸 𑀅𑀦𑀼𑀤𑁆𑀥𑀢𑁂𑀦 𑀦𑀺𑀩𑁆𑀩𑀼𑀢𑀘𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁬𑁩. ‘‘𑀬𑁄 𑀫𑀼𑀔𑀲𑀁𑀬𑀢𑁄 𑀪𑀺𑀓𑁆𑀔𑀼, 𑀫𑀦𑁆𑀢𑀪𑀸𑀡𑀻 𑀅𑀦𑀼𑀤𑁆𑀥𑀢𑁄;

𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀤𑀻𑀧𑁂𑀢𑀺, 𑀫𑀥𑀼𑀭𑀁 𑀢𑀲𑁆𑀲 𑀪𑀸𑀲𑀺𑀢’’𑀦𑁆𑀢𑀺.

𑀢𑀢𑁆𑀣 𑀫𑀼𑀔𑀲𑀁𑀬𑀢𑁄𑀢𑀺 𑀤𑀸𑀲𑀘𑀡𑁆𑀟𑀸𑀮𑀸𑀤𑀬𑁄𑀧𑀺 ‘‘𑀢𑁆𑀯𑀁 𑀤𑀼𑀚𑁆𑀚𑀸𑀢𑁄, 𑀢𑁆𑀯𑀁 𑀤𑀼𑀲𑁆𑀲𑀻𑀮𑁄’’𑀢𑀺𑀆𑀤𑀻𑀦𑀁 𑀅𑀯𑀘𑀦𑀢𑀸𑀬 𑀫𑀼𑀔𑁂𑀦 𑀲𑀁𑀬𑀢𑁄. 𑀫𑀦𑁆𑀢𑀪𑀸𑀡𑀻𑀢𑀺 𑀫𑀦𑁆𑀢𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀸𑀬 𑀪𑀡𑀦𑀲𑀻𑀮𑁄. 𑀅𑀦𑀼𑀤𑁆𑀥𑀢𑁄𑀢𑀺 𑀦𑀺𑀩𑁆𑀩𑀼𑀢𑀘𑀺𑀢𑁆𑀢𑁄. 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀤𑀻𑀧𑁂𑀢𑀻𑀢𑀺 𑀪𑀸𑀲𑀺𑀢𑀢𑁆𑀣𑀜𑁆𑀘𑁂𑀯 𑀤𑁂𑀲𑀦𑀸𑀥𑀫𑁆𑀫𑀜𑁆𑀘 𑀓𑀣𑁂𑀢𑀺. 𑀫𑀥𑀼𑀭𑀦𑁆𑀢𑀺 𑀏𑀯𑀭𑀽𑀧𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀸𑀲𑀺𑀢𑀁 𑀫𑀥𑀼𑀭𑀁 𑀦𑀸𑀫. 𑀬𑁄 𑀧𑀦 𑀅𑀢𑁆𑀣𑀫𑁂𑀯 𑀲𑀫𑁆𑀧𑀸𑀤𑁂𑀢𑀺, 𑀦 𑀧𑀸𑀴𑀺𑀁, 𑀧𑀸𑀴𑀺𑀁𑀬𑁂𑀯 𑀲𑀫𑁆𑀧𑀸𑀤𑁂𑀢𑀺, 𑀦 𑀅𑀢𑁆𑀣𑀁, 𑀉𑀪𑀬𑀁 𑀯𑀸 𑀧𑀦 𑀦 𑀲𑀫𑁆𑀧𑀸𑀤𑁂𑀢𑀺, 𑀢𑀲𑁆𑀲 𑀪𑀸𑀲𑀺𑀢𑀁 𑀫𑀥𑀼𑀭𑀁 𑀦𑀸𑀫 𑀦 𑀳𑁄𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀓𑁄𑀓𑀸𑀮𑀺𑀓𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀥𑀫𑁆𑀫𑀸𑀭𑀸𑀫𑀢𑁆𑀣𑁂𑀭𑀯𑀢𑁆𑀣𑀼

𑀥𑀫𑁆𑀫𑀸𑀭𑀸𑀫𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀥𑀫𑁆𑀫𑀸𑀭𑀸𑀫𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀢𑁆𑀣𑀸𑀭𑀸 𑀓𑀺𑀭 ‘‘𑀇𑀢𑁄 𑀫𑁂 𑀘𑀢𑀼𑀫𑀸𑀲𑀘𑁆𑀘𑀬𑁂𑀦 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀭𑁄𑀘𑀺𑀢𑁂 𑀅𑀦𑁂𑀓𑀲𑀳𑀲𑁆𑀲𑀸 𑀪𑀺𑀓𑁆𑀔𑀽 𑀲𑀢𑁆𑀣𑀸𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀘𑀭𑀺𑀁𑀲𑀼. 𑀢𑀢𑁆𑀣 𑀧𑀼𑀣𑀼𑀚𑁆𑀚𑀦𑀸 𑀪𑀺𑀓𑁆𑀔𑀽 𑀅𑀲𑁆𑀲𑀽𑀦𑀺 𑀲𑀦𑁆𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀔𑀻𑀡𑀸𑀲𑀯𑀸𑀦𑀁 𑀥𑀫𑁆𑀫𑀲𑀁𑀯𑁂𑀕𑁄 𑀉𑀧𑁆𑀧𑀚𑁆𑀚𑀺. 𑀲𑀩𑁆𑀩𑁂𑀧𑀺 ‘‘𑀓𑀺𑀁 𑀦𑀼 𑀔𑁄 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀕𑁆𑀕𑀩𑀦𑁆𑀥𑀦𑁂𑀦 𑀯𑀺𑀘𑀭𑀦𑁆𑀢𑀺. 𑀏𑀓𑁄 𑀧𑀦 𑀥𑀫𑁆𑀫𑀸𑀭𑀸𑀫𑁄 𑀦𑀸𑀫 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀦 𑀉𑀧𑀲𑀗𑁆𑀓𑀫𑀢𑀺. 𑀪𑀺𑀓𑁆𑀔𑀽𑀳𑀺 ‘‘𑀓𑀺𑀁, 𑀆𑀯𑀼𑀲𑁄’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀧𑀝𑀺𑀯𑀘𑀦𑀫𑁆𑀧𑀺 𑀅𑀤𑀢𑁆𑀯𑀸 ‘‘𑀲𑀢𑁆𑀣𑀸 𑀓𑀺𑀭 𑀘𑀢𑀼𑀫𑀸𑀲𑀘𑁆𑀘𑀬𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺, 𑀅𑀳𑀜𑁆𑀘𑀫𑁆𑀳𑀺 𑀅𑀯𑀻𑀢𑀭𑀸𑀕𑁄, 𑀲𑀢𑁆𑀣𑀭𑀺 𑀥𑀭𑀫𑀸𑀦𑁂𑀬𑁂𑀯 𑀯𑀸𑀬𑀫𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀓𑁄𑀯 𑀯𑀺𑀳𑀭𑀦𑁆𑀢𑁄 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀆𑀯𑀚𑁆𑀚𑁂𑀢𑀺 𑀘𑀺𑀦𑁆𑀢𑁂𑀢𑀺 𑀅𑀦𑀼𑀲𑁆𑀲𑀭𑀢𑀺. 𑀪𑀺𑀓𑁆𑀔𑀽 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀼𑀁 𑁋 ‘‘𑀪𑀦𑁆𑀢𑁂, 𑀥𑀫𑁆𑀫𑀸𑀭𑀸𑀫𑀲𑁆𑀲 𑀢𑀼𑀫𑁆𑀳𑁂𑀲𑀼 𑀲𑀺𑀦𑁂𑀳𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, ‘𑀲𑀢𑁆𑀣𑀸 𑀓𑀺𑀭 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺, 𑀓𑀺𑀁 𑀦𑀼 𑀔𑁄 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑀦𑁆𑀢𑀦𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀢𑀻’’𑀢𑀺. 𑀲𑀢𑁆𑀣𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀏𑀯𑀁 𑀓𑀭𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? 𑀢𑀼𑀫𑁆𑀳𑁂 𑀓𑀺𑀭 𑀘𑀢𑀼𑀫𑀸𑀲𑀘𑁆𑀘𑀬𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀣, 𑀅𑀳𑀜𑁆𑀘𑀫𑁆𑀳𑀺 𑀅𑀯𑀻𑀢𑀭𑀸𑀕𑁄, 𑀢𑀼𑀫𑁆𑀳𑁂𑀲𑀼 𑀥𑀭𑀦𑁆𑀢𑁂𑀲𑀼𑀬𑁂𑀯 𑀯𑀸𑀬𑀫𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻𑀢𑀺 𑀢𑀼𑀫𑁆𑀳𑁂𑀳𑀺 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀆𑀯𑀚𑁆𑀚𑀸𑀫𑀺 𑀘𑀺𑀦𑁆𑀢𑁂𑀫𑀺 𑀅𑀦𑀼𑀲𑁆𑀲𑀭𑀸𑀫𑀻𑀢𑀺.

𑀲𑀢𑁆𑀣𑀸 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀢𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀅𑀜𑁆𑀜𑁂𑀦𑀸𑀧𑀺 𑀫𑀬𑀺 𑀲𑀺𑀦𑁂𑀳𑀯𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀥𑀫𑁆𑀫𑀸𑀭𑀸𑀫𑀲𑀤𑀺𑀲𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. 𑀦 𑀳𑀺 𑀫𑀬𑁆𑀳𑀁 𑀫𑀸𑀮𑀸𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑀁 𑀓𑀭𑁄𑀦𑁆𑀢𑀸 𑀫𑀫 𑀧𑀽𑀚𑀁 𑀓𑀭𑁄𑀦𑁆𑀢𑀺 𑀦𑀸𑀫, 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀦𑁆𑀢𑀸𑀬𑁂𑀯 𑀧𑀦 𑀫𑀁 𑀧𑀽𑀚𑁂𑀦𑁆𑀢𑀺 𑀦𑀸𑀫𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁬𑁪. ‘‘𑀥𑀫𑁆𑀫𑀸𑀭𑀸𑀫𑁄 𑀥𑀫𑁆𑀫𑀭𑀢𑁄, 𑀥𑀫𑁆𑀫𑀁 𑀅𑀦𑀼𑀯𑀺𑀘𑀺𑀦𑁆𑀢𑀬𑀁;

𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀁 𑀪𑀺𑀓𑁆𑀔𑀼, 𑀲𑀤𑁆𑀥𑀫𑁆𑀫𑀸 𑀦 𑀧𑀭𑀺𑀳𑀸𑀬𑀢𑀻’’𑀢𑀺.

𑀢𑀢𑁆𑀣 𑀦𑀺𑀯𑀸𑀲𑀦𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁄 𑀆𑀭𑀸𑀫𑁄 𑀅𑀲𑁆𑀲𑀸𑀢𑀺 𑀥𑀫𑁆𑀫𑀸𑀭𑀸𑀫𑁄. 𑀢𑀲𑁆𑀫𑀺𑀁𑀬𑁂𑀯 𑀥𑀫𑁆𑀫𑁂 𑀭𑀢𑁄𑀢𑀺 𑀥𑀫𑁆𑀫𑀭𑀢𑁄. 𑀢𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀯𑀺𑀘𑀺𑀦𑁆𑀢𑀦𑀢𑀸𑀬 𑀥𑀫𑁆𑀫𑀁 𑀅𑀦𑀼𑀯𑀺𑀘𑀺𑀦𑁆𑀢𑀬𑀁, 𑀢𑀁 𑀥𑀫𑁆𑀫𑀁 𑀆𑀯𑀚𑁆𑀚𑁂𑀦𑁆𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀦𑀼𑀲𑁆𑀲𑀭𑀦𑁆𑀢𑀺 𑀢𑀫𑁂𑀯 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀦𑁆𑀢𑁄. 𑀲𑀤𑁆𑀥𑀫𑁆𑀫𑀸𑀢𑀺 𑀏𑀯𑀭𑀽𑀧𑁄 𑀪𑀺𑀓𑁆𑀔𑀼 𑀲𑀢𑁆𑀢𑀢𑀺𑀁𑀲𑀪𑁂𑀤𑀸 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀦𑀯𑀯𑀺𑀥𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀘 𑀦 𑀧𑀭𑀺𑀳𑀸𑀬𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀥𑀫𑁆𑀫𑀸𑀭𑀸𑀫𑀢𑁆𑀣𑁂𑀭𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀯𑀺𑀧𑀓𑁆𑀔𑀲𑁂𑀯𑀓𑀪𑀺𑀓𑁆𑀔𑀼𑀯𑀢𑁆𑀣𑀼

𑀲𑀮𑀸𑀪𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀯𑀺𑀧𑀓𑁆𑀔𑀲𑁂𑀯𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀲𑁆𑀲 𑀓𑀺𑀭𑁂𑀓𑁄 𑀤𑁂𑀯𑀤𑀢𑁆𑀢𑀧𑀓𑁆𑀔𑀺𑀓𑁄 𑀪𑀺𑀓𑁆𑀔𑀼 𑀲𑀳𑀸𑀬𑁄 𑀅𑀳𑁄𑀲𑀺. 𑀲𑁄 𑀢𑀁 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀼𑀳𑀺𑀁 𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀲𑀼𑀓𑀝𑁆𑀞𑀸𑀦𑀁 𑀦𑀸𑀫 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼’’𑀦𑁆𑀢𑀺. ‘‘𑀮𑀤𑁆𑀥𑁄 𑀢𑁂 𑀧𑀺𑀡𑁆𑀟𑀧𑀸𑀢𑁄’’𑀢𑀺? ‘‘𑀆𑀫, 𑀮𑀤𑁆𑀥𑁄’’𑀢𑀺. ‘‘𑀇𑀥 𑀅𑀫𑁆𑀳𑀸𑀓𑀁 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄, 𑀓𑀢𑀺𑀧𑀸𑀳𑀁 𑀇𑀥𑁂𑀯 𑀳𑁄𑀳𑀻’’𑀢𑀺. 𑀲𑁄 𑀢𑀲𑁆𑀲 𑀯𑀘𑀦𑁂𑀦 𑀓𑀢𑀺𑀧𑀸𑀳𑀁 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺. 𑀅𑀣 𑀦𑀁 𑀪𑀺𑀓𑁆𑀔𑀽 ‘‘𑀅𑀬𑀁, 𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀮𑀸𑀪𑀲𑀓𑁆𑀓𑀸𑀭𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀤𑁂𑀯𑀤𑀢𑁆𑀢𑀲𑁆𑀲 𑀧𑀓𑁆𑀔𑀺𑀓𑁄 𑀏𑀲𑁄’’𑀢𑀺 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀏𑀯𑀫𑀓𑀸𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀪𑀦𑁆𑀢𑁂, 𑀅𑀳𑀁 𑀢𑀢𑁆𑀣 𑀏𑀓𑀁 𑀤𑀳𑀭𑀁 𑀦𑀺𑀲𑁆𑀲𑀸𑀬 𑀓𑀢𑀺𑀧𑀸𑀳𑀁 𑀯𑀲𑀺𑀁, 𑀦 𑀘 𑀧𑀦 𑀤𑁂𑀯𑀤𑀢𑁆𑀢𑀲𑁆𑀲 𑀮𑀤𑁆𑀥𑀺𑀁 𑀭𑁄𑀘𑁂𑀫𑀻’’𑀢𑀺. 𑀅𑀣 𑀦𑀁 𑀪𑀕𑀯𑀸 ‘‘𑀓𑀺𑀜𑁆𑀘𑀸𑀧𑀺 𑀢𑁆𑀯𑀁 𑀮𑀤𑁆𑀥𑀺𑀁 𑀦 𑀭𑁄𑀘𑁂𑀲𑀺, 𑀤𑀺𑀝𑁆𑀞𑀤𑀺𑀝𑁆𑀞𑀓𑀸𑀦𑀁𑀬𑁂𑀯 𑀧𑀦 𑀮𑀤𑁆𑀥𑀺𑀁 𑀭𑁄𑀘𑁂𑀦𑁆𑀢𑁄 𑀯𑀺𑀬 𑀯𑀺𑀘𑀭𑀲𑀺. 𑀦 𑀢𑁆𑀯𑀁 𑀇𑀤𑀸𑀦𑁂𑀯 𑀏𑀯𑀁 𑀓𑀭𑁄𑀲𑀺, 𑀧𑀼𑀩𑁆𑀩𑁂𑀧𑀺 𑀏𑀯𑀭𑀽𑀧𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 ‘‘𑀇𑀤𑀸𑀦𑀺 𑀢𑀸𑀯, 𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺 𑀲𑀸𑀫𑀁 𑀤𑀺𑀝𑁆𑀞𑁄, 𑀧𑀼𑀩𑁆𑀩𑁂 𑀧𑀦𑁂𑀲 𑀓𑁂𑀲𑀁 𑀮𑀤𑁆𑀥𑀺𑀁 𑀭𑁄𑀘𑁂𑀦𑁆𑀢𑁄 𑀯𑀺𑀬 𑀯𑀺𑀘𑀭𑀺, 𑀆𑀘𑀺𑀓𑁆𑀔𑀣 𑀦𑁄’’𑀢𑀺 𑀪𑀺𑀓𑁆𑀔𑀽𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑁋

‘‘𑀧𑀼𑀭𑀸𑀡𑀘𑁄𑀭𑀸𑀦 𑀯𑀘𑁄 𑀦𑀺𑀲𑀫𑁆𑀫,

𑀫𑀳𑀺𑀴𑀸𑀫𑀼𑀔𑁄 𑀧𑁄𑀣𑀬𑀫𑀦𑁆𑀯𑀘𑀸𑀭𑀻;

𑀲𑀼𑀲𑀜𑁆𑀜𑀢𑀸𑀦𑀜𑁆𑀳𑀺 𑀯𑀘𑁄 𑀦𑀺𑀲𑀫𑁆𑀫,

𑀕𑀚𑀼𑀢𑁆𑀢𑀫𑁄 𑀲𑀩𑁆𑀩𑀕𑀼𑀡𑁂𑀲𑀼 𑀅𑀝𑁆𑀞𑀸’’𑀢𑀺. (𑀚𑀸. 𑁧.𑁧.𑁨𑁬) 𑁋

𑀇𑀫𑀁 𑀫𑀳𑀺𑀴𑀸𑀫𑀼𑀔𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀲𑀓𑀮𑀸𑀪𑁂𑀦𑁂𑀯 𑀲𑀦𑁆𑀢𑀼𑀝𑁆𑀞𑁂𑀦 𑀪𑀯𑀺𑀢𑀩𑁆𑀩𑀁, 𑀧𑀭𑀮𑀸𑀪𑀁 𑀧𑀢𑁆𑀣𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑀭𑀮𑀸𑀪𑀁 𑀧𑀢𑁆𑀣𑁂𑀦𑁆𑀢𑀲𑁆𑀲 𑀳𑀺 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑁂𑀲𑀼 𑀏𑀓𑀥𑀫𑁆𑀫𑁄𑀧𑀺 𑀦𑀼𑀧𑁆𑀧𑀚𑁆𑀚𑀢𑀺, 𑀲𑀓𑀮𑀸𑀪𑀲𑀦𑁆𑀢𑀼𑀝𑁆𑀞𑀲𑁆𑀲𑁂𑀯 𑀧𑀦 𑀛𑀸𑀦𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁬𑁫. ‘‘𑀲𑀮𑀸𑀪𑀁 𑀦𑀸𑀢𑀺𑀫𑀜𑁆𑀜𑁂𑀬𑁆𑀬, 𑀦𑀸𑀜𑁆𑀜𑁂𑀲𑀁 𑀧𑀺𑀳𑀬𑀁 𑀘𑀭𑁂;

𑀅𑀜𑁆𑀜𑁂𑀲𑀁 𑀧𑀺𑀳𑀬𑀁 𑀪𑀺𑀓𑁆𑀔𑀼, 𑀲𑀫𑀸𑀥𑀺𑀁 𑀦𑀸𑀥𑀺𑀕𑀘𑁆𑀙𑀢𑀺.

𑁩𑁬𑁬. ‘‘𑀅𑀧𑁆𑀧𑀮𑀸𑀪𑁄𑀧𑀺 𑀘𑁂 𑀪𑀺𑀓𑁆𑀔𑀼, 𑀲𑀮𑀸𑀪𑀁 𑀦𑀸𑀢𑀺𑀫𑀜𑁆𑀜𑀢𑀺;

𑀢𑀁 𑀯𑁂 𑀤𑁂𑀯𑀸 𑀧𑀲𑀁𑀲𑀦𑁆𑀢𑀺, 𑀲𑀼𑀤𑁆𑀥𑀸𑀚𑀻𑀯𑀺𑀁 𑀅𑀢𑀦𑁆𑀤𑀺𑀢’’𑀦𑁆𑀢𑀺.

𑀢𑀢𑁆𑀣 𑀲𑀮𑀸𑀪𑀦𑁆𑀢𑀺 𑀅𑀢𑁆𑀢𑀦𑁄 𑀉𑀧𑁆𑀧𑀚𑁆𑀚𑀦𑀓𑀮𑀸𑀪𑀁. 𑀲𑀧𑀤𑀸𑀦𑀘𑀸𑀭𑀜𑁆𑀳𑀺 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀅𑀦𑁂𑀲𑀦𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀲𑀮𑀸𑀪𑀁 𑀅𑀢𑀺𑀫𑀜𑁆𑀜𑀢𑀺 𑀳𑀻𑀴𑁂𑀢𑀺 𑀚𑀺𑀕𑀼𑀘𑁆𑀙𑀢𑀺 𑀦𑀸𑀫. 𑀢𑀲𑁆𑀫𑀸 𑀏𑀯𑀁 𑀅𑀓𑀭𑀡𑁂𑀦 𑀲𑀮𑀸𑀪𑀁 𑀦𑀸𑀢𑀺𑀫𑀜𑁆𑀜𑁂𑀬𑁆𑀬. 𑀅𑀜𑁆𑀜𑁂𑀲𑀁 𑀧𑀺𑀳𑀬𑀦𑁆𑀢𑀺 𑀅𑀜𑁆𑀜𑁂𑀲𑀁 𑀮𑀸𑀪𑀁 𑀧𑀢𑁆𑀣𑁂𑀦𑁆𑀢𑁄 𑀦 𑀘𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀫𑀸𑀥𑀺𑀁 𑀦𑀸𑀥𑀺𑀕𑀘𑁆𑀙𑀢𑀻𑀢𑀺 𑀅𑀜𑁆𑀜𑁂𑀲𑀜𑁆𑀳𑀺 𑀮𑀸𑀪𑀁 𑀧𑀺𑀳𑀬𑀦𑁆𑀢𑁄 𑀢𑁂𑀲𑀁 𑀘𑀻𑀯𑀭𑀸𑀤𑀺𑀓𑀭𑀡𑁂 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑁄 𑀪𑀺𑀓𑁆𑀔𑀼 𑀅𑀧𑁆𑀧𑀦𑀸𑀲𑀫𑀸𑀥𑀺𑀁 𑀯𑀸 𑀉𑀧𑀘𑀸𑀭𑀲𑀫𑀸𑀥𑀺𑀁 𑀯𑀸 𑀦𑀸𑀥𑀺𑀕𑀘𑁆𑀙𑀢𑀺. 𑀲𑀮𑀸𑀪𑀁 𑀦𑀸𑀢𑀺𑀫𑀜𑁆𑀜𑀢𑀻𑀢𑀺 𑀅𑀧𑁆𑀧𑀮𑀸𑀪𑁄𑀧𑀺 𑀲𑀫𑀸𑀦𑁄 𑀉𑀘𑁆𑀘𑀦𑀻𑀘𑀓𑀼𑀮𑁂 𑀧𑀝𑀺𑀧𑀸𑀝𑀺𑀬𑀸 𑀲𑀧𑀤𑀸𑀦𑀁 𑀘𑀭𑀦𑁆𑀢𑁄 𑀪𑀺𑀓𑁆𑀔𑀼 𑀲𑀮𑀸𑀪𑀁 𑀦𑀸𑀢𑀺𑀫𑀜𑁆𑀜𑀢𑀺 𑀦𑀸𑀫. 𑀢𑀁 𑀯𑁂𑀢𑀺 𑀢𑀁 𑀏𑀯𑀭𑀽𑀧𑀁 𑀪𑀺𑀓𑁆𑀔𑀼𑀁 𑀲𑀸𑀭𑀚𑀻𑀯𑀺𑀢𑀢𑀸𑀬 𑀲𑀼𑀤𑁆𑀥𑀸𑀚𑀻𑀯𑀺𑀁 𑀚𑀗𑁆𑀖𑀩𑀮𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀓𑀧𑁆𑀧𑀦𑁂𑀦 𑀅𑀓𑀼𑀲𑀻𑀢𑀢𑀸𑀬 𑀅𑀢𑀦𑁆𑀤𑀺𑀢𑀁 𑀤𑁂𑀯𑀸 𑀧𑀲𑀁𑀲𑀦𑁆𑀢𑀺 𑀣𑁄𑀫𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀯𑀺𑀧𑀓𑁆𑀔𑀲𑁂𑀯𑀓𑀪𑀺𑀓𑁆𑀔𑀼𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀧𑀜𑁆𑀘𑀕𑁆𑀕𑀤𑀸𑀬𑀓𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑀲𑀩𑁆𑀩𑀲𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀘𑀕𑁆𑀕𑀤𑀸𑀬𑀓𑀁 𑀦𑀸𑀫 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀲𑀲𑁆𑀲𑁂 𑀔𑁂𑀢𑁆𑀢𑁂 𑀞𑀺𑀢𑀓𑀸𑀮𑁂𑀬𑁂𑀯 𑀔𑁂𑀢𑁆𑀢𑀕𑁆𑀕𑀁 𑀦𑀸𑀫 𑀤𑁂𑀢𑀺, 𑀔𑀮𑀓𑀸𑀮𑁂 𑀔𑀮𑀕𑁆𑀕𑀁 𑀦𑀸𑀫 𑀤𑁂𑀢𑀺, 𑀔𑀮𑀪𑀡𑁆𑀟𑀓𑀸𑀮𑁂 𑀔𑀮𑀪𑀡𑁆𑀟𑀕𑁆𑀕𑀁 𑀦𑀸𑀫 𑀤𑁂𑀢𑀺, 𑀉𑀓𑁆𑀔𑀮𑀺𑀓𑀓𑀸𑀮𑁂 𑀓𑀼𑀫𑁆𑀪𑀕𑁆𑀕𑀁 𑀦𑀸𑀫 𑀤𑁂𑀢𑀺, 𑀧𑀸𑀢𑀺𑀬𑀁 𑀯𑀟𑁆𑀠𑀺𑀢𑀓𑀸𑀮𑁂 𑀧𑀸𑀢𑀕𑁆𑀕𑀁 𑀦𑀸𑀫 𑀤𑁂𑀢𑀻𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀅𑀕𑁆𑀕𑀤𑀸𑀦𑀸𑀦𑀺 𑀤𑁂𑀢𑀺, 𑀲𑀫𑁆𑀧𑀢𑁆𑀢𑀲𑁆𑀲 𑀅𑀤𑀢𑁆𑀯𑀸 𑀦𑀸𑀫 𑀦 𑀪𑀼𑀜𑁆𑀚𑀢𑀺. 𑀢𑁂𑀦𑀲𑁆𑀲 𑀧𑀜𑁆𑀘𑀕𑁆𑀕𑀤𑀸𑀬𑀓𑁄𑀢𑁆𑀯𑁂𑀯 𑀦𑀸𑀫𑀁 𑀅𑀳𑁄𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀘 𑀩𑁆𑀭𑀸𑀳𑁆𑀫𑀡𑀺𑀬𑀸 𑀘𑀲𑁆𑀲 𑀢𑀺𑀡𑁆𑀡𑀁 𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑁄𑀚𑀦𑀯𑁂𑀮𑀸𑀬𑀁 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀲𑁄𑀧𑀺 𑀤𑁆𑀯𑀸𑀭𑀧𑀫𑀼𑀔𑁂 𑀅𑀦𑁆𑀢𑁄𑀕𑁂𑀳𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀲𑀢𑁆𑀣𑀸𑀭𑀁 𑀤𑁆𑀯𑀸𑀭𑁂 𑀞𑀺𑀢𑀁 𑀦 𑀧𑀲𑁆𑀲𑀢𑀺. 𑀩𑁆𑀭𑀸𑀳𑁆𑀫𑀡𑀻 𑀧𑀦 𑀢𑀁 𑀧𑀭𑀺𑀯𑀺𑀲𑀫𑀸𑀦𑀸 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀅𑀕𑁆𑀕𑀁 𑀤𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀇𑀤𑀸𑀦𑀺 𑀘 𑀲𑀫𑀡𑁄 𑀕𑁄𑀢𑀫𑁄 𑀆𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑁂 𑀞𑀺𑀢𑁄. 𑀲𑀘𑁂 𑀩𑁆𑀭𑀸𑀳𑁆𑀫𑀡𑁄 𑀏𑀢𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀪𑀢𑁆𑀢𑀁 𑀳𑀭𑀺𑀢𑁆𑀯𑀸 𑀤𑀲𑁆𑀲𑀢𑀺, 𑀧𑀼𑀦𑀧𑀸𑀳𑀁 𑀧𑀘𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺. 𑀲𑀸 ‘‘𑀏𑀯𑀁 𑀅𑀬𑀁 𑀲𑀫𑀡𑀁 𑀕𑁄𑀢𑀫𑀁 𑀦 𑀧𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀲𑀢𑁆𑀣𑀼 𑀧𑀺𑀝𑁆𑀞𑀺𑀁 𑀤𑀢𑁆𑀯𑀸 𑀢𑀲𑁆𑀲 𑀧𑀘𑁆𑀙𑀢𑁄 𑀢𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀻 𑀑𑀦𑀫𑀺𑀢𑁆𑀯𑀸 𑀧𑀼𑀡𑁆𑀡𑀘𑀦𑁆𑀤𑀁 𑀧𑀸𑀡𑀺𑀦𑀸 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀻 𑀯𑀺𑀬 𑀅𑀝𑁆𑀞𑀸𑀲𑀺. 𑀢𑀣𑀸 𑀞𑀺𑀢𑀸 𑀏𑀯 𑀘 𑀧𑀦 ‘‘𑀕𑀢𑁄 𑀦𑀼 𑀔𑁄 𑀦𑁄’’𑀢𑀺 𑀲𑀢𑁆𑀣𑀸𑀭𑀁 𑀅𑀟𑁆𑀠𑀓𑁆𑀔𑀺𑀓𑁂𑀦 𑀑𑀮𑁄𑀓𑁂𑀲𑀺. 𑀲𑀢𑁆𑀣𑀸 𑀢𑀢𑁆𑀣𑁂𑀯 𑀅𑀝𑁆𑀞𑀸𑀲𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀦 𑀲𑀯𑀦𑀪𑀬𑁂𑀦 ‘‘𑀅𑀢𑀺𑀘𑁆𑀙𑀣𑀸’’𑀢𑀺 𑀦 𑀯𑀤𑁂𑀢𑀺, 𑀑𑀲𑀓𑁆𑀓𑀺𑀢𑁆𑀯𑀸 𑀧𑀦 𑀲𑀡𑀺𑀓𑀫𑁂𑀯 ‘‘𑀅𑀢𑀺𑀘𑁆𑀙𑀣𑀸’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀦 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀲𑀻𑀲𑀁 𑀘𑀸𑀮𑁂𑀲𑀺. 𑀮𑁄𑀓𑀕𑀭𑀼𑀦𑀸 𑀩𑀼𑀤𑁆𑀥𑁂𑀦 ‘‘𑀦 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀲𑀻𑀲𑁂 𑀘𑀸𑀮𑀺𑀢𑁂 𑀲𑀸 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀫𑀳𑀸𑀳𑀲𑀺𑀢𑀁 𑀳𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀢𑁆𑀣𑀸 𑀕𑁂𑀳𑀸𑀪𑀺𑀫𑀼𑀔𑀁 𑀑𑀪𑀸𑀲𑀁 𑀫𑀼𑀜𑁆𑀘𑀺. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀧𑀺𑀝𑁆𑀞𑀺𑀁 𑀤𑀢𑁆𑀯𑀸 𑀦𑀺𑀲𑀺𑀦𑁆𑀦𑁄𑀬𑁂𑀯 𑀩𑁆𑀭𑀸𑀳𑁆𑀫𑀡𑀺𑀬𑀸 𑀳𑀲𑀺𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 𑀙𑀩𑁆𑀩𑀡𑁆𑀡𑀸𑀦𑀜𑁆𑀘 𑀭𑀲𑁆𑀫𑀻𑀦𑀁 𑀑𑀪𑀸𑀲𑀁 𑀑𑀮𑁄𑀓𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀤𑁆𑀤𑀲. 𑀩𑀼𑀤𑁆𑀥𑀸 𑀳𑀺 𑀦𑀸𑀫 𑀕𑀸𑀫𑁂 𑀯𑀸 𑀅𑀭𑀜𑁆𑀜𑁂 𑀯𑀸 𑀳𑁂𑀢𑀼𑀲𑀫𑁆𑀧𑀦𑁆𑀦𑀸𑀦𑀁 𑀅𑀢𑁆𑀢𑀸𑀦𑀁 𑀅𑀤𑀲𑁆𑀲𑁂𑀢𑁆𑀯𑀸 𑀦 𑀧𑀓𑁆𑀓𑀫𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸, ‘‘𑀪𑁄𑀢𑀺 𑀦𑀸𑀲𑀺𑀢𑁄𑀫𑁆𑀳𑀺 𑀢𑀬𑀸, 𑀭𑀸𑀚𑀧𑀼𑀢𑁆𑀢𑀁 𑀆𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑁂 𑀞𑀺𑀢𑀁 𑀫𑀬𑁆𑀳𑀁 𑀅𑀦𑀸𑀘𑀺𑀓𑁆𑀔𑀦𑁆𑀢𑀺𑀬𑀸 𑀪𑀸𑀭𑀺𑀬𑀁 𑀢𑁂 𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀯𑀢𑁆𑀯𑀸 𑀅𑀟𑁆𑀠𑀪𑀼𑀢𑁆𑀢𑀁 𑀪𑁄𑀚𑀦𑀧𑀸𑀢𑀺𑀁 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀪𑁄 𑀕𑁄𑀢𑀫, 𑀅𑀳𑀁 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀅𑀕𑁆𑀕𑀁 𑀤𑀢𑁆𑀯𑀸𑀯 𑀪𑀼𑀜𑁆𑀚𑀸𑀫𑀺, 𑀇𑀢𑁄 𑀘 𑀫𑁂 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀏𑀓𑁄𑀯 𑀪𑀢𑁆𑀢𑀓𑁄𑀝𑁆𑀞𑀸𑀲𑁄 𑀪𑀼𑀢𑁆𑀢𑁄, 𑀏𑀓𑁄 𑀓𑁄𑀝𑁆𑀞𑀸𑀲𑁄 𑀅𑀯𑀲𑀺𑀝𑁆𑀞𑁄, 𑀧𑀝𑀺𑀕𑁆𑀕𑀡𑁆𑀳𑀺𑀲𑁆𑀲𑀲𑀺 𑀫𑁂 𑀇𑀤𑀁 𑀪𑀢𑁆𑀢’’𑀦𑁆𑀢𑀺. 𑀲𑀢𑁆𑀣𑀸 ‘‘𑀦 𑀫𑁂 𑀢𑀯 𑀉𑀘𑁆𑀙𑀺𑀝𑁆𑀞𑀪𑀢𑁆𑀢𑁂𑀦 𑀅𑀢𑁆𑀣𑁄’’𑀢𑀺 𑀅𑀯𑀢𑁆𑀯𑀸, ‘‘𑀩𑁆𑀭𑀸𑀳𑁆𑀫𑀡, 𑀅𑀕𑁆𑀕𑀫𑁆𑀧𑀺 𑀫𑀬𑁆𑀳𑀫𑁂𑀯 𑀅𑀦𑀼𑀘𑁆𑀙𑀯𑀺𑀓𑀁, 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀅𑀟𑁆𑀠𑀪𑀼𑀢𑁆𑀢𑀪𑀢𑁆𑀢𑀫𑁆𑀧𑀺, 𑀘𑀭𑀺𑀫𑀓𑀪𑀢𑁆𑀢𑀧𑀺𑀡𑁆𑀟𑁄𑀧𑀺 𑀫𑀬𑁆𑀳𑀫𑁂𑀯 𑀅𑀦𑀼𑀘𑁆𑀙𑀯𑀺𑀓𑁄. 𑀫𑀬𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀧𑀭𑀤𑀢𑁆𑀢𑀽𑀧𑀚𑀻𑀯𑀺𑀧𑁂𑀢𑀲𑀤𑀺𑀲𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀬𑀤𑀕𑁆𑀕𑀢𑁄 𑀫𑀚𑁆𑀛𑀢𑁄 𑀲𑁂𑀲𑀢𑁄 𑀯𑀸,

𑀧𑀺𑀡𑁆𑀟𑀁 𑀮𑀪𑁂𑀣 𑀧𑀭𑀤𑀢𑁆𑀢𑀽𑀧𑀚𑀻𑀯𑀻;

𑀦𑀸𑀮𑀁 𑀣𑀼𑀢𑀼𑀁 𑀦𑁄𑀧𑀺 𑀦𑀺𑀧𑀘𑁆𑀘𑀯𑀸𑀤𑀻,

𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀻’’𑀢𑀺. (𑀲𑀼. 𑀦𑀺. 𑁨𑁧𑁯);

𑀩𑁆𑀭𑀸𑀳𑁆𑀫𑀡𑁄 𑀢𑀁 𑀲𑀼𑀢𑁆𑀯𑀸𑀯 𑀧𑀲𑀦𑁆𑀦𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀅𑀳𑁄 𑀅𑀘𑁆𑀙𑀭𑀺𑀬𑀁, 𑀤𑀻𑀧𑀲𑀸𑀫𑀺𑀓𑁄 𑀦𑀸𑀫 𑀭𑀸𑀚𑀧𑀼𑀢𑁆𑀢𑁄 ‘𑀦 𑀫𑁂 𑀢𑀯 𑀉𑀘𑁆𑀙𑀺𑀝𑁆𑀞𑀪𑀢𑁆𑀢𑁂𑀦 𑀅𑀢𑁆𑀣𑁄’𑀢𑀺 𑀅𑀯𑀢𑁆𑀯𑀸 𑀏𑀯𑀁 𑀯𑀓𑁆𑀔𑀢𑀻’’𑀢𑀺 𑀤𑁆𑀯𑀸𑀭𑁂 𑀞𑀺𑀢𑀓𑁄𑀯 𑀲𑀢𑁆𑀣𑀸𑀭𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺 𑁋 ‘‘𑀪𑁄 𑀕𑁄𑀢𑀫, 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀲𑀸𑀯𑀓𑁂 𑀪𑀺𑀓𑁆𑀔𑀽𑀢𑀺 𑀯𑀤𑀣, 𑀓𑀺𑀢𑁆𑀢𑀸𑀯𑀢𑀸 𑀪𑀺𑀓𑁆𑀔𑀼 𑀦𑀸𑀫 𑀳𑁄𑀢𑀻’’𑀢𑀺. 𑀲𑀢𑁆𑀣𑀸 ‘‘𑀓𑀣𑀁𑀭𑀽𑀧𑀸 𑀦𑀼 𑀔𑁄 𑀇𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀸 𑀲𑀧𑁆𑀧𑀸𑀬𑀸’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀇𑀫𑁂 𑀤𑁆𑀯𑁂𑀧𑀺 𑀚𑀦𑀸 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 ‘𑀦𑀸𑀫𑀭𑀽𑀧’𑀦𑁆𑀢𑀺 𑀯𑀤𑀦𑁆𑀢𑀸𑀦𑀁 𑀓𑀣𑀁 𑀲𑀼𑀡𑀺𑀁𑀲𑀼, 𑀦𑀸𑀫𑀭𑀽𑀧𑀁 𑀅𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀯 𑀦𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺, ‘‘𑀩𑁆𑀭𑀸𑀳𑁆𑀫𑀡, 𑀦𑀸𑀫𑁂 𑀘 𑀭𑀽𑀧𑁂 𑀘 𑀅𑀭𑀚𑁆𑀚𑀦𑁆𑀢𑁄 𑀅𑀲𑀚𑁆𑀚𑀦𑁆𑀢𑁄 𑀅𑀲𑁄𑀘𑀦𑁆𑀢𑁄 𑀪𑀺𑀓𑁆𑀔𑀼 𑀦𑀸𑀫 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁬𑁭. ‘‘𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁, 𑀬𑀲𑁆𑀲 𑀦𑀢𑁆𑀣𑀺 𑀫𑀫𑀸𑀬𑀺𑀢𑀁;

𑀅𑀲𑀢𑀸 𑀘 𑀦 𑀲𑁄𑀘𑀢𑀺, 𑀲 𑀯𑁂 𑀪𑀺𑀓𑁆𑀔𑀽𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀯𑁂𑀤𑀦𑀸𑀤𑀻𑀦𑀁 𑀘𑀢𑀼𑀦𑁆𑀦𑀁, 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀘𑀸𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑁂 𑀦𑀸𑀫𑀭𑀽𑀧𑁂. 𑀫𑀫𑀸𑀬𑀺𑀢𑀦𑁆𑀢𑀺 𑀬𑀲𑁆𑀲 𑀅𑀳𑀦𑁆𑀢𑀺 𑀯𑀸 𑀫𑀫𑀦𑁆𑀢𑀺 𑀯𑀸 𑀕𑀸𑀳𑁄 𑀦𑀢𑁆𑀣𑀺. 𑀅𑀲𑀢𑀸 𑀘 𑀦 𑀲𑁄𑀘𑀢𑀻𑀢𑀺 𑀢𑀲𑁆𑀫𑀺𑀜𑁆𑀘 𑀦𑀸𑀫𑀭𑀽𑀧𑁂 𑀔𑀬𑀯𑀬𑀁 𑀧𑀢𑁆𑀢𑁂 ‘‘𑀫𑀫 𑀭𑀽𑀧𑀁 𑀔𑀻𑀡𑀁…𑀧𑁂… 𑀫𑀫 𑀯𑀺𑀜𑁆𑀜𑀸𑀡𑀁 𑀔𑀻𑀡’’𑀦𑁆𑀢𑀺 𑀦 𑀲𑁄𑀘𑀢𑀺 𑀦 𑀯𑀺𑀳𑀜𑁆𑀜𑀢𑀺, ‘‘𑀔𑀬𑀯𑀬𑀥𑀫𑁆𑀫𑀁 𑀫𑁂 𑀔𑀻𑀡’’𑀦𑁆𑀢𑀺 𑀧𑀲𑁆𑀲𑀢𑀺. 𑀲 𑀯𑁂𑀢𑀺 𑀲𑁄 𑀏𑀯𑀭𑀽𑀧𑁄 𑀯𑀺𑀚𑁆𑀚𑀫𑀸𑀦𑁂𑀧𑀺 𑀦𑀸𑀫𑀭𑀽𑀧𑁂 𑀫𑀫𑀸𑀬𑀺𑀢𑀭𑀳𑀺𑀢𑁄𑀧𑀺 𑀅𑀲𑀢𑀸𑀧𑀺 𑀢𑁂𑀦 𑀅𑀲𑁄𑀘𑀦𑁆𑀢𑁄 𑀪𑀺𑀓𑁆𑀔𑀽𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀉𑀪𑁄𑀧𑀺 𑀚𑀬𑀫𑁆𑀧𑀢𑀺𑀓𑀸 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀧𑀜𑁆𑀘𑀕𑁆𑀕𑀤𑀸𑀬𑀓𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀲𑀫𑁆𑀩𑀳𑀼𑀮𑀪𑀺𑀓𑁆𑀔𑀼𑀯𑀢𑁆𑀣𑀼

𑀫𑁂𑀢𑁆𑀢𑀸𑀯𑀺𑀳𑀸𑀭𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀆𑀬𑀲𑁆𑀫𑀦𑁆𑀢𑁂 𑀫𑀳𑀸𑀓𑀘𑁆𑀘𑀸𑀦𑁂 𑀅𑀯𑀦𑁆𑀢𑀺𑀚𑀦𑀧𑀤𑁂 𑀓𑀼𑀭𑀭𑀖𑀭𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀧𑀩𑁆𑀩𑀢𑁂 𑀯𑀺𑀳𑀭𑀦𑁆𑀢𑁂 𑀲𑁄𑀡𑁄 𑀦𑀸𑀫 𑀓𑁄𑀝𑀺𑀓𑀡𑁆𑀡𑁄 𑀉𑀧𑀸𑀲𑀓𑁄 𑀣𑁂𑀭𑀲𑁆𑀲 𑀥𑀫𑁆𑀫𑀓𑀣𑀸𑀬 𑀧𑀲𑀻𑀤𑀺𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀣𑁂𑀭𑁂𑀦 ‘‘𑀤𑀼𑀓𑁆𑀓𑀭𑀁 𑀔𑁄, 𑀲𑁄𑀡, 𑀬𑀸𑀯𑀚𑀻𑀯𑀁 𑀏𑀓𑀪𑀢𑁆𑀢𑀁 𑀏𑀓𑀲𑁂𑀬𑁆𑀬𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀢𑁆𑀯𑀸 𑀤𑁆𑀯𑁂 𑀯𑀸𑀭𑁂 𑀧𑀝𑀺𑀓𑁆𑀔𑀺𑀢𑁆𑀢𑁄𑀧𑀺 𑀧𑀩𑁆𑀩𑀚𑁆𑀚𑀸𑀬 𑀅𑀢𑀺𑀯𑀺𑀬 𑀉𑀲𑁆𑀲𑀸𑀳𑀚𑀸𑀢𑁄 𑀢𑀢𑀺𑀬𑀯𑀸𑀭𑁂 𑀣𑁂𑀭𑀁 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀧𑁆𑀧𑀪𑀺𑀓𑁆𑀔𑀼𑀓𑀢𑁆𑀢𑀸 𑀤𑀓𑁆𑀔𑀺𑀡𑀸𑀧𑀣𑁂 𑀢𑀺𑀡𑁆𑀡𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀲𑀢𑁆𑀣𑀸𑀭𑀁 𑀲𑀫𑁆𑀫𑀼𑀔𑀸 𑀤𑀝𑁆𑀞𑀼𑀓𑀸𑀫𑁄 𑀳𑀼𑀢𑁆𑀯𑀸 𑀉𑀧𑀚𑁆𑀛𑀸𑀬𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 𑀤𑀺𑀦𑁆𑀦𑀁 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀲𑀢𑁆𑀣𑀸𑀭𑀸 𑀏𑀓𑀕𑀦𑁆𑀥𑀓𑀼𑀝𑀺𑀬𑀁𑀬𑁂𑀯 𑀅𑀦𑀼𑀜𑁆𑀜𑀸𑀢𑀲𑁂𑀦𑀸𑀲𑀦𑁄 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀅𑀚𑁆𑀛𑁄𑀓𑀸𑀲𑁂 𑀯𑀻𑀣𑀺𑀦𑀸𑀫𑁂𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀲𑁂𑀦𑀸𑀲𑀦𑁂 𑀢𑀁 𑀭𑀢𑁆𑀢𑀺𑀪𑀸𑀕𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀲𑀢𑁆𑀣𑀸𑀭𑀸 𑀅𑀚𑁆𑀛𑀺𑀝𑁆𑀞𑁄 𑀲𑁄𑀴𑀲 𑀅𑀝𑁆𑀞𑀓𑀯𑀕𑁆𑀕𑀺𑀓𑀸𑀦𑀺 (𑀲𑀼. 𑀦𑀺. 𑁭𑁭𑁨 𑀆𑀤𑀬𑁄) 𑀲𑀩𑁆𑀩𑀸𑀦𑁂𑀯 𑀲𑀭𑀪𑀜𑁆𑀜𑁂𑀦 𑀅𑀪𑀡𑀺. 𑀅𑀣𑀲𑁆𑀲 𑀪𑀕𑀯𑀸 𑀲𑀭𑀪𑀜𑁆𑀜𑀧𑀭𑀺𑀬𑁄𑀲𑀸𑀦𑁂 𑀅𑀩𑁆𑀪𑀸𑀦𑀼𑀫𑁄𑀤𑁂𑀦𑁆𑀢𑁄 𑁋 ‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀽’’𑀢𑀺 𑀲𑀸𑀥𑀼𑀓𑀸𑀭𑀁 𑀅𑀤𑀸𑀲𑀺. 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀲𑀸𑀥𑀼𑀓𑀸𑀭𑀁 𑀲𑀼𑀢𑁆𑀯𑀸 𑀪𑀽𑀫𑀝𑁆𑀞𑀓𑀤𑁂𑀯𑀸 𑀦𑀸𑀕𑀸 𑀲𑀼𑀧𑀡𑁆𑀡𑀸𑀢𑀺 𑀏𑀯𑀁 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀏𑀓𑀲𑀸𑀥𑀼𑀓𑀸𑀭𑀫𑁂𑀯 𑀅𑀳𑁄𑀲𑀺.

𑀢𑀲𑁆𑀫𑀺𑀁 𑀔𑀡𑁂 𑀚𑁂𑀢𑀯𑀦𑀢𑁄 𑀯𑀻𑀲𑀬𑁄𑀚𑀦𑀲𑀢𑀫𑀢𑁆𑀣𑀓𑁂 𑀓𑀼𑀭𑀭𑀖𑀭𑀦𑀕𑀭𑁂 𑀣𑁂𑀭𑀲𑁆𑀲 𑀫𑀸𑀢𑀼 𑀫𑀳𑀸𑀉𑀧𑀸𑀲𑀺𑀓𑀸𑀬 𑀕𑁂𑀳𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸𑀧𑀺 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀅𑀣 𑀦𑀁 𑀉𑀧𑀸𑀲𑀺𑀓𑀸 𑀆𑀳 𑁋 ‘‘𑀓𑁄 𑀏𑀲 𑀲𑀸𑀥𑀼𑀓𑀸𑀭𑀁 𑀤𑁂𑀢𑀻’’𑀢𑀺? 𑀅𑀳𑀁, 𑀪𑀕𑀺𑀦𑀻𑀢𑀺. 𑀓𑁄𑀲𑀺 𑀢𑁆𑀯𑀦𑁆𑀢𑀺? 𑀢𑀯 𑀕𑁂𑀳𑁂 𑀅𑀥𑀺𑀯𑀢𑁆𑀣𑀸, 𑀤𑁂𑀯𑀢𑀸𑀢𑀺. 𑀢𑁆𑀯𑀁 𑀇𑀢𑁄 𑀧𑀼𑀩𑁆𑀩𑁂 𑀫𑀬𑁆𑀳𑀁 𑀲𑀸𑀥𑀼𑀓𑀸𑀭𑀁 𑀅𑀤𑀢𑁆𑀯𑀸 𑀅𑀚𑁆𑀚 𑀓𑀲𑁆𑀫𑀸 𑀤𑁂𑀲𑀻𑀢𑀺? 𑀦𑀸𑀳𑀁 𑀢𑀼𑀬𑁆𑀳𑀁 𑀲𑀸𑀥𑀼𑀓𑀸𑀭𑀁 𑀤𑀫𑁆𑀫𑀻𑀢𑀺. 𑀅𑀣 𑀓𑀲𑁆𑀲 𑀢𑁂 𑀲𑀸𑀥𑀼𑀓𑀸𑀭𑁄 𑀤𑀺𑀦𑁆𑀦𑁄𑀢𑀺? 𑀢𑀯 𑀧𑀼𑀢𑁆𑀢𑀲𑁆𑀲 𑀓𑁄𑀝𑀺𑀓𑀡𑁆𑀡𑀲𑁆𑀲 𑀲𑁄𑀡𑀢𑁆𑀣𑁂𑀭𑀲𑁆𑀲𑀸𑀢𑀺. 𑀓𑀺𑀁 𑀫𑁂 𑀧𑀼𑀢𑁆𑀢𑁂𑀦 𑀓𑀢𑀦𑁆𑀢𑀺? 𑀧𑀼𑀢𑁆𑀢𑁄 𑀢𑁂 𑀅𑀚𑁆𑀚 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀲𑀢𑁆𑀣𑀸 𑀢𑀯 𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀢𑁂𑀦𑀲𑁆𑀲 𑀫𑀬𑀸𑀧𑀺 𑀲𑀸𑀥𑀼𑀓𑀸𑀭𑁄 𑀤𑀺𑀦𑁆𑀦𑁄. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀳𑀺 𑀲𑀸𑀥𑀼𑀓𑀸𑀭𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀪𑀽𑀫𑀝𑁆𑀞𑀓𑀤𑁂𑀯𑁂 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀏𑀓𑀲𑀸𑀥𑀼𑀓𑀸𑀭𑀫𑁂𑀯 𑀚𑀸𑀢𑀦𑁆𑀢𑀺. 𑀓𑀺𑀁 𑀧𑀦, 𑀲𑀸𑀫𑀺, 𑀫𑀫 𑀧𑀼𑀢𑁆𑀢𑁂𑀦 𑀲𑀢𑁆𑀣𑀼 𑀥𑀫𑁆𑀫𑁄 𑀓𑀣𑀺𑀢𑁄, 𑀲𑀢𑁆𑀣𑀸𑀭𑀸 𑀫𑀫 𑀧𑀼𑀢𑁆𑀢𑀲𑁆𑀲 𑀓𑀣𑀺𑀢𑁄𑀢𑀺? 𑀢𑀯 𑀧𑀼𑀢𑁆𑀢𑁂𑀦 𑀲𑀢𑁆𑀣𑀼 𑀓𑀣𑀺𑀢𑁄𑀢𑀺. 𑀏𑀯𑀁 𑀤𑁂𑀯𑀢𑀸𑀬 𑀓𑀣𑁂𑀦𑁆𑀢𑀺𑀬𑀸𑀯 𑀉𑀧𑀸𑀲𑀺𑀓𑀸𑀬 𑀧𑀜𑁆𑀘𑀯𑀡𑁆𑀡𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀓𑀮𑀲𑀭𑀻𑀭𑀁 𑀨𑀭𑀺.

𑀅𑀣𑀲𑁆𑀲𑀸 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀫𑁂 𑀧𑀼𑀢𑁆𑀢𑁄 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀺𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀁 𑀓𑀣𑁂𑀢𑀼𑀁 𑀲𑀓𑁆𑀔𑀺, 𑀫𑀬𑁆𑀳𑀫𑁆𑀧𑀺 𑀓𑀣𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺𑀬𑁂𑀯. 𑀧𑀼𑀢𑁆𑀢𑀲𑁆𑀲 𑀆𑀕𑀢𑀓𑀸𑀮𑁂 𑀥𑀫𑁆𑀫𑀲𑁆𑀲𑀯𑀦𑀁 𑀓𑀸𑀭𑁂𑀢𑁆𑀯𑀸 𑀥𑀫𑁆𑀫𑀓𑀣𑀁 𑀲𑀼𑀡𑀺𑀲𑁆𑀲𑀸𑀫𑀻’’𑀢𑀺. 𑀲𑁄𑀡𑀢𑁆𑀣𑁂𑀭𑁄𑀧𑀺 𑀔𑁄 𑀲𑀢𑁆𑀣𑀸𑀭𑀸 𑀲𑀸𑀥𑀼𑀓𑀸𑀭𑁂 𑀤𑀺𑀦𑁆𑀦𑁂 ‘‘𑀅𑀬𑀁 𑀫𑁂 𑀉𑀧𑀚𑁆𑀛𑀸𑀬𑁂𑀦 𑀤𑀺𑀦𑁆𑀦𑀲𑀸𑀲𑀦𑀁 𑀆𑀭𑁄𑀘𑁂𑀢𑀼𑀁 𑀓𑀸𑀮𑁄’’𑀢𑀺 𑀪𑀕𑀯𑀦𑁆𑀢𑀁 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀤𑀁 𑀆𑀤𑀺𑀁 𑀓𑀢𑁆𑀯𑀸 (𑀫𑀳𑀸𑀯. 𑁨𑁫𑁯) 𑀧𑀜𑁆𑀘 𑀯𑀭𑁂 𑀬𑀸𑀘𑀺𑀢𑁆𑀯𑀸 𑀓𑀢𑀺𑀧𑀸𑀳𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂𑀬𑁂𑀯 𑀯𑀲𑀺𑀢𑁆𑀯𑀸 ‘‘𑀉𑀧𑀚𑁆𑀛𑀸𑀬𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀸𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀚𑁂𑀢𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀉𑀧𑀚𑁆𑀛𑀸𑀬𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺.

𑀣𑁂𑀭𑁄 𑀧𑀼𑀦𑀤𑀺𑀯𑀲𑁂 𑀢𑀁 𑀆𑀤𑀸𑀬 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀫𑀸𑀢𑀼 𑀉𑀧𑀸𑀲𑀺𑀓𑀸𑀬 𑀕𑁂𑀳𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀲𑀸𑀧𑀺 𑀧𑀼𑀢𑁆𑀢𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑀸 𑀯𑀦𑁆𑀤𑀺𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀢𑀸𑀢, 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀺𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀓𑀣𑁂𑀲𑀻’’𑀢𑀺. ‘‘𑀉𑀧𑀸𑀲𑀺𑀓𑁂, 𑀢𑀼𑀬𑁆𑀳𑀁 𑀓𑁂𑀦 𑀇𑀤𑀁 𑀓𑀣𑀺𑀢’’𑀦𑁆𑀢𑀺? ‘‘𑀢𑀸𑀢, 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀫𑀬𑀸 ‘𑀓𑁄 𑀏𑀲𑁄’𑀢𑀺 𑀯𑀼𑀢𑁆𑀢𑁂 ‘𑀅𑀳’𑀦𑁆𑀢𑀺 𑀯𑀢𑁆𑀯𑀸 𑀏𑀯𑀜𑁆𑀘 𑀏𑀯𑀜𑁆𑀘 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀬𑁆𑀳𑀁 𑀏𑀢𑀤𑀳𑁄𑀲𑀺 𑁋 ‘𑀲𑀘𑁂 𑀫𑁂 𑀧𑀼𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺, 𑀫𑀬𑁆𑀳𑀫𑁆𑀧𑀺 𑀓𑀣𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’𑀢𑀺. 𑀅𑀣 𑀦𑀁 𑀆𑀳 𑁋 ‘𑀢𑀸𑀢, 𑀬𑀢𑁄 𑀢𑀬𑀸 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀥𑀫𑁆𑀫𑁄 𑀓𑀣𑀺𑀢𑁄, 𑀫𑀬𑁆𑀳𑀫𑁆𑀧𑀺 𑀓𑀣𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺 𑀏𑀯. 𑀅𑀲𑀼𑀓𑀤𑀺𑀯𑀲𑁂 𑀦𑀸𑀫 𑀥𑀫𑁆𑀫𑀲𑁆𑀲𑀯𑀦𑀁 𑀓𑀸𑀭𑁂𑀢𑁆𑀯𑀸 𑀢𑀯 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀺, 𑀢𑀸𑀢𑀸’’’𑀢𑀺. 𑀲𑁄 𑀅𑀥𑀺𑀯𑀸𑀲𑁂𑀲𑀺. 𑀉𑀧𑀸𑀲𑀺𑀓𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀧𑀽𑀚𑀁 𑀓𑀢𑁆𑀯𑀸 ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀥𑀫𑁆𑀫𑀓𑀣𑀁 𑀲𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀫𑁂𑀯 𑀤𑀸𑀲𑀺𑀁 𑀕𑁂𑀳𑀭𑀓𑁆𑀔𑀺𑀓𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀁 𑀧𑀭𑀺𑀚𑀦𑀁 𑀆𑀤𑀸𑀬 𑀅𑀦𑁆𑀢𑁄𑀦𑀕𑀭𑁂 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀓𑀸𑀭𑀺𑀢𑁂 𑀫𑀡𑁆𑀟𑀧𑁂 𑀅𑀮𑀗𑁆𑀓𑀢𑀥𑀫𑁆𑀫𑀸𑀲𑀦𑀁 𑀅𑀪𑀺𑀭𑀼𑀬𑁆𑀳 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑁄𑀢𑀼𑀁 𑀅𑀕𑀫𑀸𑀲𑀺.

𑀢𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀦𑀯𑀲𑀢𑀸 𑀘𑁄𑀭𑀸 𑀢𑀲𑁆𑀲𑀸 𑀉𑀧𑀸𑀲𑀺𑀓𑀸𑀬 𑀕𑁂𑀳𑁂 𑀑𑀢𑀸𑀭𑀁 𑀑𑀮𑁄𑀓𑁂𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀢𑀲𑁆𑀲𑀸 𑀧𑀦 𑀕𑁂𑀳𑀁 𑀲𑀢𑁆𑀢𑀳𑀺 𑀧𑀸𑀓𑀸𑀭𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀁 𑀲𑀢𑁆𑀢𑀤𑁆𑀯𑀸𑀭𑀓𑁄𑀝𑁆𑀞𑀓𑀬𑀼𑀢𑁆𑀢𑀁, 𑀢𑀢𑁆𑀣 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀘𑀡𑁆𑀟𑀲𑀼𑀦𑀔𑁂 𑀩𑀦𑁆𑀥𑀺𑀢𑁆𑀯𑀸 𑀞𑀧𑀬𑀺𑀁𑀲𑀼. 𑀅𑀦𑁆𑀢𑁄𑀕𑁂𑀳𑁂 𑀙𑀤𑀦𑀲𑁆𑀲 𑀉𑀤𑀓𑀧𑀸𑀢𑀝𑁆𑀞𑀸𑀦𑁂 𑀧𑀦 𑀧𑀭𑀺𑀔𑀁 𑀔𑀡𑀺𑀢𑁆𑀯𑀸 𑀢𑀺𑀧𑀼𑀦𑀸 𑀧𑀽𑀭𑀬𑀺𑀁𑀲𑀼. 𑀢𑀁 𑀤𑀺𑀯𑀸 𑀆𑀢𑀧𑁂𑀦 𑀯𑀺𑀮𑀻𑀦𑀁 𑀧𑀓𑁆𑀓𑀼𑀣𑀺𑀢𑀁 𑀯𑀺𑀬 𑀢𑀺𑀝𑁆𑀞𑀢𑀺, 𑀭𑀢𑁆𑀢𑀺𑀁 𑀓𑀞𑀺𑀦𑀁 𑀓𑀓𑁆𑀔𑀴𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑀲𑁆𑀲𑀸𑀦𑀦𑁆𑀢𑀭𑀸 𑀫𑀳𑀦𑁆𑀢𑀸𑀦𑀺 𑀅𑀬𑀲𑀗𑁆𑀖𑀸𑀝𑀓𑀸𑀦𑀺 𑀦𑀺𑀭𑀦𑁆𑀢𑀭𑀁 𑀪𑀽𑀫𑀺𑀬𑀁 𑀑𑀤𑀳𑀺𑀁𑀲𑀼. 𑀇𑀢𑀺 𑀇𑀫𑀜𑁆𑀘𑀸𑀭𑀓𑁆𑀔𑀁 𑀉𑀧𑀸𑀲𑀺𑀓𑀸𑀬 𑀘 𑀅𑀦𑁆𑀢𑁄𑀕𑁂𑀳𑁂 𑀞𑀺𑀢𑀪𑀸𑀯𑀁 𑀧𑀝𑀺𑀘𑁆𑀘 𑀢𑁂 𑀘𑁄𑀭𑀸 𑀑𑀓𑀸𑀲𑀁 𑀅𑀮𑀪𑀦𑁆𑀢𑀸 𑀢𑀁 𑀤𑀺𑀯𑀲𑀁 𑀢𑀲𑁆𑀲𑀸 𑀕𑀢𑀪𑀸𑀯𑀁 𑀜𑀢𑁆𑀯𑀸 𑀉𑀫𑀗𑁆𑀕𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑀺𑀧𑀼𑀧𑀭𑀺𑀔𑀸𑀬 𑀘 𑀅𑀬𑀲𑀗𑁆𑀖𑀸𑀝𑀓𑀸𑀦𑀜𑁆𑀘 𑀳𑁂𑀝𑁆𑀞𑀸𑀪𑀸𑀕𑁂𑀦𑁂𑀯 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀘𑁄𑀭𑀚𑁂𑀝𑁆𑀞𑀓𑀁 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀧𑀳𑀺𑀡𑀺𑀁𑀲𑀼 ‘‘𑀲𑀘𑁂 𑀲𑀸 𑀅𑀫𑁆𑀳𑀸𑀓𑀁 𑀇𑀥 𑀧𑀯𑀺𑀝𑁆𑀞𑀪𑀸𑀯𑀁 𑀲𑀼𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑁂𑀳𑀸𑀪𑀺𑀫𑀼𑀔𑀻 𑀆𑀕𑀘𑁆𑀙𑀢𑀺, 𑀅𑀲𑀺𑀦𑀸 𑀦𑀁 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀣𑀸’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀲𑀦𑁆𑀢𑀺𑀓𑁂 𑀅𑀝𑁆𑀞𑀸𑀲𑀺.

𑀘𑁄𑀭𑀸𑀧𑀺 𑀅𑀦𑁆𑀢𑁄𑀕𑁂𑀳𑁂 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀓𑀳𑀸𑀧𑀡𑀕𑀩𑁆𑀪𑀤𑁆𑀯𑀸𑀭𑀁 𑀯𑀺𑀯𑀭𑀺𑀁𑀲𑀼. 𑀲𑀸 𑀤𑀸𑀲𑀻 𑀘𑁄𑀭𑁂 𑀤𑀺𑀲𑁆𑀯𑀸 𑀉𑀧𑀸𑀲𑀺𑀓𑀸𑀬 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀅𑀬𑁆𑀬𑁂, 𑀩𑀳𑀽 𑀘𑁄𑀭𑀸 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀓𑀳𑀸𑀧𑀡𑀕𑀩𑁆𑀪𑀤𑁆𑀯𑀸𑀭𑀁 𑀯𑀺𑀯𑀭𑀺𑀁𑀲𑀽’’𑀢𑀺 𑀆𑀭𑁄𑀘𑁂𑀲𑀺. ‘‘𑀘𑁄𑀭𑀸 𑀅𑀢𑁆𑀢𑀦𑀸 𑀤𑀺𑀝𑁆𑀞𑀓𑀳𑀸𑀧𑀡𑁂 𑀳𑀭𑀦𑁆𑀢𑀼, 𑀅𑀳𑀁 𑀫𑀫 𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀡𑀸𑀫𑀺, 𑀫𑀸 𑀫𑁂 𑀥𑀫𑁆𑀫𑀲𑁆𑀲 𑀅𑀦𑁆𑀢𑀭𑀸𑀬𑀁 𑀓𑀭𑀺, 𑀕𑁂𑀳𑀁 𑀕𑀘𑁆𑀙𑀸’’𑀢𑀺 𑀢𑀁 𑀧𑀳𑀺𑀡𑀺. 𑀘𑁄𑀭𑀸𑀧𑀺 𑀓𑀳𑀸𑀧𑀡𑀕𑀩𑁆𑀪𑀁 𑀢𑀼𑀘𑁆𑀙𑀁 𑀓𑀢𑁆𑀯𑀸 𑀭𑀚𑀢𑀕𑀩𑁆𑀪𑀁 𑀯𑀺𑀯𑀭𑀺𑀁𑀲𑀼. 𑀲𑀸 𑀧𑀼𑀦𑀧𑀺 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀉𑀧𑀸𑀲𑀺𑀓𑀸𑀧𑀺 ‘‘𑀘𑁄𑀭𑀸 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀁 𑀳𑀭𑀦𑁆𑀢𑀼, 𑀫𑀸 𑀫𑁂 𑀅𑀦𑁆𑀢𑀭𑀸𑀬𑀁 𑀓𑀭𑀻’’𑀢𑀺 𑀧𑀼𑀦 𑀢𑀁 𑀧𑀳𑀺𑀡𑀺. 𑀘𑁄𑀭𑀸 𑀭𑀚𑀢𑀕𑀩𑁆𑀪𑀫𑁆𑀧𑀺 𑀢𑀼𑀘𑁆𑀙𑀁 𑀓𑀢𑁆𑀯𑀸 𑀲𑀼𑀯𑀡𑁆𑀡𑀕𑀩𑁆𑀪𑀁 𑀯𑀺𑀯𑀭𑀺𑀁𑀲𑀼. 𑀲𑀸 𑀧𑀼𑀦𑀧𑀺 𑀕𑀦𑁆𑀢𑁆𑀯𑀸 𑀉𑀧𑀸𑀲𑀺𑀓𑀸𑀬 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀉𑀧𑀸𑀲𑀺𑀓𑀸 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀪𑁄𑀢𑀺 𑀚𑁂 𑀢𑁆𑀯𑀁 𑀅𑀦𑁂𑀓𑀯𑀸𑀭𑀁 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑀸, ‘𑀘𑁄𑀭𑀸 𑀬𑀣𑀸𑀭𑀼𑀘𑀺𑀢𑀁 𑀳𑀭𑀦𑁆𑀢𑀼, 𑀅𑀳𑀁 𑀫𑀫 𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀡𑀸𑀫𑀺, 𑀫𑀸 𑀫𑁂 𑀅𑀦𑁆𑀢𑀭𑀸𑀬𑀁 𑀓𑀭𑀻’𑀢𑀺 𑀫𑀬𑀸 𑀯𑀼𑀢𑁆𑀢𑀸𑀧𑀺 𑀫𑀫 𑀓𑀣𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀆𑀕𑀘𑁆𑀙𑀲𑀺𑀬𑁂𑀯. 𑀲𑀘𑁂 𑀇𑀤𑀸𑀦𑀺 𑀢𑁆𑀯𑀁 𑀆𑀕𑀘𑁆𑀙𑀺𑀲𑁆𑀲𑀲𑀺, 𑀚𑀸𑀦𑀺𑀲𑁆𑀲𑀸𑀫𑀺 𑀢𑁂 𑀓𑀢𑁆𑀢𑀩𑁆𑀩𑀁, 𑀕𑁂𑀳𑀫𑁂𑀯 𑀕𑀘𑁆𑀙𑀸’’𑀢𑀺 𑀧𑀳𑀺𑀡𑀺.

𑀘𑁄𑀭𑀚𑁂𑀝𑁆𑀞𑀓𑁄 𑀢𑀲𑁆𑀲𑀸 𑀓𑀣𑀁 𑀲𑀼𑀢𑁆𑀯𑀸 ‘‘𑀏𑀯𑀭𑀽𑀧𑀸𑀬 𑀇𑀢𑁆𑀣𑀺𑀬𑀸 𑀲𑀦𑁆𑀢𑀓𑀁 𑀳𑀭𑀦𑁆𑀢𑀸𑀦𑀁 𑀅𑀲𑀦𑀺 𑀧𑀢𑀺𑀢𑁆𑀯𑀸 𑀫𑀢𑁆𑀣𑀓𑀁 𑀪𑀺𑀦𑁆𑀤𑁂𑀬𑁆𑀬𑀸’’𑀢𑀺 𑀘𑁄𑀭𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀲𑀻𑀖𑀁 𑀉𑀧𑀸𑀲𑀺𑀓𑀸𑀬 𑀲𑀦𑁆𑀢𑀓𑀁 𑀧𑀝𑀺𑀧𑀸𑀓𑀢𑀺𑀓𑀁 𑀓𑀭𑁄𑀣𑀸’’𑀢𑀺 𑀆𑀳. 𑀢𑁂 𑀓𑀳𑀸𑀧𑀡𑁂𑀳𑀺 𑀓𑀳𑀸𑀧𑀡𑀕𑀩𑁆𑀪𑀁, 𑀭𑀚𑀢𑀲𑀼𑀯𑀡𑁆𑀡𑁂𑀳𑀺 𑀭𑀚𑀢𑀲𑀼𑀯𑀡𑁆𑀡𑀕𑀩𑁆𑀪𑁂 𑀧𑀼𑀦 𑀧𑀽𑀭𑀬𑀺𑀁𑀲𑀼. 𑀥𑀫𑁆𑀫𑀢𑀸 𑀓𑀺𑀭𑁂𑀲𑀸, 𑀬𑀁 𑀥𑀫𑁆𑀫𑁄 𑀥𑀫𑁆𑀫𑀘𑀸𑀭𑀺𑀦𑀁 𑀭𑀓𑁆𑀔𑀢𑀺. 𑀢𑁂𑀦𑁂𑀯𑀸𑀳 𑁋

‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁,

𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀸𑀢𑀺;

𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂,

𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻’’𑀢𑀺. (𑀣𑁂𑀭𑀕𑀸. 𑁩𑁦𑁩; 𑀚𑀸. 𑁧.𑁧𑁦.𑁧𑁦𑁨);

𑀘𑁄𑀭𑀸𑀧𑀺 𑀕𑀦𑁆𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑀝𑁆𑀞𑀸𑀦𑁂 𑀅𑀝𑁆𑀞𑀁𑀲𑀼. 𑀣𑁂𑀭𑁄𑀧𑀺 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀆𑀲𑀦𑀸 𑀑𑀢𑀭𑀺. 𑀢𑀲𑁆𑀫𑀺𑀁 𑀔𑀡𑁂 𑀘𑁄𑀭𑀚𑁂𑀝𑁆𑀞𑀓𑁄 𑀉𑀧𑀸𑀲𑀺𑀓𑀸𑀬 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀔𑀫𑀸𑀳𑀺 𑀫𑁂, 𑀅𑀬𑁆𑀬𑁂’’𑀢𑀺 𑀆𑀳. ‘‘𑀓𑀺𑀁 𑀇𑀤𑀁, 𑀢𑀸𑀢𑀸’’𑀢𑀺? ‘‘𑀅𑀳𑀜𑁆𑀳𑀺 𑀢𑀼𑀫𑁆𑀳𑁂𑀲𑀼 𑀆𑀖𑀸𑀢𑀁 𑀓𑀢𑁆𑀯𑀸 𑀢𑀼𑀫𑁆𑀳𑁂 𑀫𑀸𑀭𑁂𑀢𑀼𑀓𑀸𑀫𑁄 𑀅𑀝𑁆𑀞𑀸𑀲𑀺’’𑀦𑁆𑀢𑀺. ‘‘𑀢𑁂𑀦 𑀳𑀺 𑀢𑁂, 𑀢𑀸𑀢, 𑀔𑀫𑀸𑀫𑀻’’𑀢𑀺. 𑀲𑁂𑀲𑀘𑁄𑀭𑀸𑀧𑀺 𑀢𑀣𑁂𑀯 𑀯𑀢𑁆𑀯𑀸, ‘‘𑀢𑀸𑀢𑀸, 𑀔𑀫𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀆𑀳𑀁𑀲𑀼 𑁋 ‘‘𑀅𑀬𑁆𑀬𑁂, 𑀲𑀘𑁂 𑀦𑁄 𑀔𑀫𑀣, 𑀧𑀼𑀢𑁆𑀢𑀲𑁆𑀲 𑀯𑁄 𑀲𑀦𑁆𑀢𑀺𑀓𑁂 𑀅𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀁 𑀤𑀸𑀧𑁂𑀣𑀸’’𑀢𑀺. 𑀲𑀸 𑀧𑀼𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀢𑀸𑀢, 𑀇𑀫𑁂 𑀘𑁄𑀭𑀸 𑀫𑀫 𑀕𑀼𑀡𑁂𑀲𑀼 𑀢𑀼𑀫𑁆𑀳𑀸𑀓𑀜𑁆𑀘 𑀥𑀫𑁆𑀫𑀓𑀣𑀸𑀬 𑀧𑀲𑀦𑁆𑀦𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀦𑁆𑀢𑀺, 𑀧𑀩𑁆𑀩𑀸𑀚𑁂𑀣 𑀦𑁂’’𑀢𑀺. 𑀣𑁂𑀭𑁄 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀦𑀺𑀯𑀢𑁆𑀣𑀯𑀢𑁆𑀣𑀸𑀦𑀁 𑀤𑀲𑀸𑀦𑀺 𑀙𑀺𑀦𑁆𑀤𑀸𑀧𑁂𑀢𑁆𑀯𑀸 𑀢𑀫𑁆𑀩𑀫𑀢𑁆𑀢𑀺𑀓𑀸𑀬 𑀭𑀚𑀸𑀧𑁂𑀢𑁆𑀯𑀸 𑀢𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀘 𑀦𑁂𑀲𑀁 𑀏𑀓𑁂𑀓𑀲𑁆𑀲 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀫𑁆𑀫𑀝𑁆𑀞𑀸𑀦𑀫𑀤𑀸𑀲𑀺. 𑀢𑁂 𑀦𑀯𑀲𑀢𑀸 𑀪𑀺𑀓𑁆𑀔𑀽 𑀯𑀺𑀲𑀼𑀁 𑀯𑀺𑀲𑀼𑀁 𑀦𑀯𑀲𑀢𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀕𑀳𑁂𑀢𑁆𑀯𑀸 𑀏𑀓𑀁 𑀧𑀩𑁆𑀩𑀢𑀁 𑀅𑀪𑀺𑀭𑀼𑀬𑁆𑀳 𑀢𑀲𑁆𑀲 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀁𑀲𑀼.

𑀲𑀢𑁆𑀣𑀸 𑀯𑀻𑀲𑀬𑁄𑀚𑀦𑀲𑀢𑀫𑀢𑁆𑀣𑀓𑁂 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄𑀯 𑀢𑁂 𑀪𑀺𑀓𑁆𑀔𑀽 𑀑𑀮𑁄𑀓𑁂𑀢𑁆𑀯𑀸 𑀢𑁂𑀲𑀁 𑀘𑀭𑀺𑀬𑀯𑀲𑁂𑀦 𑀥𑀫𑁆𑀫𑀤𑁂𑀲𑀦𑀁 𑀯𑀯𑀢𑁆𑀣𑀸𑀧𑁂𑀢𑁆𑀯𑀸 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀲𑀫𑁆𑀫𑀼𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀣𑁂𑀦𑁆𑀢𑁄 𑀯𑀺𑀬 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁬𑁮. ‘‘𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀬𑁄 𑀪𑀺𑀓𑁆𑀔𑀼, 𑀧𑀲𑀦𑁆𑀦𑁄 𑀩𑀼𑀤𑁆𑀥𑀲𑀸𑀲𑀦𑁂;

𑀅𑀥𑀺𑀕𑀘𑁆𑀙𑁂 𑀧𑀤𑀁 𑀲𑀦𑁆𑀢𑀁, 𑀲𑀗𑁆𑀔𑀸𑀭𑀽𑀧𑀲𑀫𑀁 𑀲𑀼𑀔𑀁.

𑁩𑁬𑁯. ‘‘𑀲𑀺𑀜𑁆𑀘 𑀪𑀺𑀓𑁆𑀔𑀼 𑀇𑀫𑀁 𑀦𑀸𑀯𑀁, 𑀲𑀺𑀢𑁆𑀢𑀸 𑀢𑁂 𑀮𑀳𑀼𑀫𑁂𑀲𑁆𑀲𑀢𑀺;

𑀙𑁂𑀢𑁆𑀯𑀸 𑀭𑀸𑀕𑀜𑁆𑀘 𑀤𑁄𑀲𑀜𑁆𑀘, 𑀢𑀢𑁄 𑀦𑀺𑀩𑁆𑀩𑀸𑀦𑀫𑁂𑀳𑀺𑀲𑀺.

𑁩𑁭𑁦. ‘‘𑀧𑀜𑁆𑀘 𑀙𑀺𑀦𑁆𑀤𑁂 𑀧𑀜𑁆𑀘 𑀚𑀳𑁂, 𑀧𑀜𑁆𑀘 𑀘𑀼𑀢𑁆𑀢𑀭𑀺 𑀪𑀸𑀯𑀬𑁂;

𑀧𑀜𑁆𑀘𑀲𑀗𑁆𑀕𑀸𑀢𑀺𑀕𑁄 𑀪𑀺𑀓𑁆𑀔𑀼, 𑀑𑀖𑀢𑀺𑀡𑁆𑀡𑁄𑀢𑀺 𑀯𑀼𑀘𑁆𑀘𑀢𑀺.

𑁩𑁭𑁧. ‘‘𑀛𑀸𑀬 𑀪𑀺𑀓𑁆𑀔𑀼 𑀫𑀸 𑀧𑀫𑀸𑀤𑁄,

𑀫𑀸 𑀢𑁂 𑀓𑀸𑀫𑀕𑀼𑀡𑁂 𑀭𑀫𑁂𑀲𑁆𑀲𑀼 𑀘𑀺𑀢𑁆𑀢𑀁;

𑀫𑀸 𑀮𑁄𑀳𑀕𑀼𑀴𑀁 𑀕𑀺𑀮𑀻 𑀧𑀫𑀢𑁆𑀢𑁄,

𑀫𑀸 𑀓𑀦𑁆𑀤𑀻 𑀤𑀼𑀓𑁆𑀔𑀫𑀺𑀤𑀦𑁆𑀢𑀺 𑀤𑀬𑁆𑀳𑀫𑀸𑀦𑁄.

𑁩𑁭𑁨. ‘‘𑀦𑀢𑁆𑀣𑀺 𑀛𑀸𑀦𑀁 𑀅𑀧𑀜𑁆𑀜𑀲𑁆𑀲, 𑀧𑀜𑁆𑀜𑀸 𑀦𑀢𑁆𑀣𑀺 𑀅𑀛𑀸𑀬𑀢𑁄;

𑀬𑀫𑁆𑀳𑀺 𑀛𑀸𑀦𑀜𑁆𑀘 𑀧𑀜𑁆𑀜𑀸 𑀘, 𑀲 𑀯𑁂 𑀦𑀺𑀩𑁆𑀩𑀸𑀦𑀲𑀦𑁆𑀢𑀺𑀓𑁂.

𑁩𑁭𑁩. ‘‘𑀲𑀼𑀜𑁆𑀜𑀸𑀕𑀸𑀭𑀁 𑀧𑀯𑀺𑀝𑁆𑀞𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀫𑀸𑀦𑀼𑀲𑀻 𑀭𑀢𑀻 𑀳𑁄𑀢𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄.

𑁩𑁭𑁪. ‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢𑀁.

𑁩𑁭𑁫. ‘‘𑀢𑀢𑁆𑀭𑀸𑀬𑀫𑀸𑀤𑀺 𑀪𑀯𑀢𑀺, 𑀇𑀥 𑀧𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀇𑀦𑁆𑀤𑁆𑀭𑀺𑀬𑀕𑀼𑀢𑁆𑀢𑀺 𑀲𑀦𑁆𑀢𑀼𑀝𑁆𑀞𑀺, 𑀧𑀸𑀢𑀺𑀫𑁄𑀓𑁆𑀔𑁂 𑀘 𑀲𑀁𑀯𑀭𑁄.

𑁩𑁭𑁬. ‘‘𑀫𑀺𑀢𑁆𑀢𑁂 𑀪𑀚𑀲𑁆𑀲𑀼 𑀓𑀮𑁆𑀬𑀸𑀡𑁂, 𑀲𑀼𑀤𑁆𑀥𑀸𑀚𑀻𑀯𑁂 𑀅𑀢𑀦𑁆𑀤𑀺𑀢𑁂;

𑀧𑀝𑀺𑀲𑀦𑁆𑀣𑀸𑀭𑀯𑀼𑀢𑁆𑀬𑀲𑁆𑀲, 𑀆𑀘𑀸𑀭𑀓𑀼𑀲𑀮𑁄 𑀲𑀺𑀬𑀸;

𑀢𑀢𑁄 𑀧𑀸𑀫𑁄𑀚𑁆𑀚𑀩𑀳𑀼𑀮𑁄, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀻’’𑀢𑀺.

𑀢𑀢𑁆𑀣 𑀫𑁂𑀢𑁆𑀢𑀸𑀯𑀺𑀳𑀸𑀭𑀻𑀢𑀺 𑀫𑁂𑀢𑁆𑀢𑀸𑀓𑀫𑁆𑀫𑀝𑁆𑀞𑀸𑀦𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀫𑁂𑀢𑁆𑀢𑀸𑀯𑀲𑁂𑀦 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑁂 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀞𑀺𑀢𑁄𑀧𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀻𑀬𑁂𑀯 𑀦𑀸𑀫. 𑀧𑀲𑀦𑁆𑀦𑁄𑀢𑀺 𑀬𑁄 𑀧𑀦 𑀩𑀼𑀤𑁆𑀥𑀲𑀸𑀲𑀦𑁂 𑀧𑀲𑀦𑁆𑀦𑁄 𑀳𑁄𑀢𑀺, 𑀧𑀲𑀸𑀤𑀁 𑀭𑁄𑀘𑁂𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀧𑀤𑀁 𑀲𑀦𑁆𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀢𑀁 𑀦𑀸𑀫𑀁. 𑀏𑀯𑀭𑀽𑀧𑁄 𑀳𑀺 𑀪𑀺𑀓𑁆𑀔𑀼 𑀲𑀦𑁆𑀢𑀁 𑀓𑁄𑀝𑁆𑀞𑀸𑀲𑀁 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀉𑀧𑀲𑀦𑁆𑀢𑀢𑀸𑀬 𑀲𑀗𑁆𑀔𑀸𑀭𑀽𑀧𑀲𑀫𑀁, 𑀧𑀭𑀫𑀲𑀼𑀔𑀢𑀸𑀬 𑀲𑀼𑀔𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀘𑁆𑀙𑀢𑀺, 𑀯𑀺𑀦𑁆𑀤𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀲𑀺𑀜𑁆𑀘 𑀪𑀺𑀓𑁆𑀔𑀼 𑀇𑀫𑀁 𑀦𑀸𑀯𑀦𑁆𑀢𑀺 𑀪𑀺𑀓𑁆𑀔𑀼 𑀇𑀫𑀁 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀦𑀸𑀯𑀁 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁄𑀤𑀓𑀁 𑀙𑀟𑁆𑀟𑁂𑀦𑁆𑀢𑁄 𑀲𑀺𑀜𑁆𑀘. 𑀲𑀺𑀢𑁆𑀢𑀸 𑀢𑁂 𑀮𑀳𑀼𑀫𑁂𑀲𑁆𑀲𑀢𑀻𑀢𑀺 𑀬𑀣𑀸 𑀳𑀺 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀲𑁆𑀲𑁂𑀯 𑀪𑀭𑀺𑀢𑀸 𑀦𑀸𑀯𑀸 𑀙𑀺𑀤𑁆𑀤𑀸𑀦𑀺 𑀧𑀺𑀤𑀳𑀺𑀢𑁆𑀯𑀸 𑀉𑀤𑀓𑀲𑁆𑀲 𑀲𑀺𑀢𑁆𑀢𑀢𑀸𑀬 𑀲𑀺𑀢𑁆𑀢𑀸 𑀲𑀮𑁆𑀮𑀳𑀼𑀓𑀸 𑀳𑀼𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀦𑁄𑀲𑀻𑀤𑀺𑀢𑁆𑀯𑀸 𑀲𑀻𑀖𑀁 𑀲𑀼𑀧𑀝𑁆𑀝𑀦𑀁 𑀕𑀘𑁆𑀙𑀢𑀺, 𑀏𑀯𑀁 𑀢𑀯𑀸𑀧𑀺 𑀅𑀬𑀁 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁄𑀤𑀓𑀪𑀭𑀺𑀢𑀸 𑀅𑀢𑁆𑀢𑀪𑀸𑀯𑀦𑀸𑀯𑀸 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀺𑀙𑀺𑀤𑁆𑀤𑀸𑀦𑀺 𑀲𑀁𑀯𑀭𑁂𑀦 𑀧𑀺𑀤𑀳𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀲𑁆𑀲 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁄𑀤𑀓𑀲𑁆𑀲 𑀲𑀺𑀢𑁆𑀢𑀢𑀸𑀬 𑀲𑀺𑀢𑁆𑀢𑀸 𑀲𑀮𑁆𑀮𑀳𑀼𑀓𑀸 𑀲𑀁𑀲𑀸𑀭𑀯𑀝𑁆𑀝𑁂 𑀅𑀦𑁄𑀲𑀻𑀤𑀺𑀢𑁆𑀯𑀸 𑀲𑀻𑀖𑀁 𑀦𑀺𑀩𑁆𑀩𑀸𑀦𑀁 𑀕𑀫𑀺𑀲𑁆𑀲𑀢𑀺. 𑀙𑁂𑀢𑁆𑀯𑀸𑀢𑀺 𑀭𑀸𑀕𑀤𑁄𑀲𑀩𑀦𑁆𑀥𑀦𑀸𑀦𑀺 𑀙𑀺𑀦𑁆𑀤. 𑀏𑀢𑀸𑀦𑀺 𑀳𑀺 𑀙𑀺𑀦𑁆𑀤𑀺𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀢𑀢𑁄 𑀅𑀧𑀭𑀪𑀸𑀕𑁂 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀫𑁂𑀯 𑀏𑀳𑀺𑀲𑀺, 𑀕𑀫𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄.

𑀧𑀜𑁆𑀘 𑀙𑀺𑀦𑁆𑀤𑁂𑀢𑀺 𑀳𑁂𑀝𑁆𑀞𑀸𑀅𑀧𑀸𑀬𑀲𑀫𑁆𑀧𑀸𑀧𑀓𑀸𑀦𑀺 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀧𑀸𑀤𑁂 𑀩𑀤𑁆𑀥𑀭𑀚𑁆𑀚𑀼𑀁 𑀧𑀼𑀭𑀺𑀲𑁄 𑀲𑀢𑁆𑀣𑁂𑀦 𑀯𑀺𑀬 𑀳𑁂𑀝𑁆𑀞𑀸𑀫𑀕𑁆𑀕𑀢𑁆𑀢𑀬𑁂𑀦 𑀙𑀺𑀦𑁆𑀤𑁂𑀬𑁆𑀬. 𑀧𑀜𑁆𑀘 𑀚𑀳𑁂𑀢𑀺 𑀉𑀧𑀭𑀺𑀤𑁂𑀯𑀮𑁄𑀓𑀲𑀫𑁆𑀧𑀸𑀧𑀓𑀸𑀦𑀺 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀧𑀼𑀭𑀺𑀲𑁄 𑀕𑀻𑀯𑀸𑀬 𑀩𑀤𑁆𑀥𑀭𑀚𑁆𑀚𑀼𑀓𑀁 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀚𑀳𑁂𑀬𑁆𑀬 𑀧𑀚𑀳𑁂𑀬𑁆𑀬, 𑀙𑀺𑀦𑁆𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀘 𑀘𑀼𑀢𑁆𑀢𑀭𑀺 𑀪𑀸𑀯𑀬𑁂𑀢𑀺 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀢𑁆𑀣𑀸𑀬 𑀲𑀤𑁆𑀥𑀸𑀤𑀻𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀉𑀢𑁆𑀢𑀭𑀺 𑀪𑀸𑀯𑁂𑀬𑁆𑀬. 𑀧𑀜𑁆𑀘𑀲𑀗𑁆𑀕𑀸𑀢𑀺𑀕𑁄𑀢𑀺 𑀏𑀯𑀁 𑀲𑀦𑁆𑀢𑁂 𑀧𑀜𑁆𑀘𑀦𑁆𑀦𑀁 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀲𑀗𑁆𑀕𑀸𑀦𑀁 𑀅𑀢𑀺𑀓𑁆𑀓𑀫𑀦𑁂𑀦 𑀧𑀜𑁆𑀘𑀲𑀗𑁆𑀕𑀸𑀢𑀺𑀕𑁄 𑀪𑀺𑀓𑁆𑀔𑀼 𑀑𑀖𑀢𑀺𑀡𑁆𑀡𑁄𑀢𑀺 𑀯𑀼𑀘𑁆𑀘𑀢𑀺, 𑀘𑀢𑁆𑀢𑀸𑀭𑁄 𑀑𑀖𑁂 𑀢𑀺𑀡𑁆𑀡𑁄𑀬𑁂𑀯𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀛𑀸𑀬 𑀪𑀺𑀓𑁆𑀔𑀽𑀢𑀺 𑀪𑀺𑀓𑁆𑀔𑀼 𑀢𑁆𑀯𑀁 𑀤𑁆𑀯𑀺𑀦𑁆𑀦𑀁 𑀛𑀸𑀦𑀸𑀦𑀁 𑀯𑀲𑁂𑀦 𑀛𑀸𑀬 𑀘𑁂𑀯, 𑀓𑀸𑀬𑀓𑀫𑁆𑀫𑀸𑀤𑀻𑀲𑀼 𑀘 𑀅𑀧𑁆𑀧𑀫𑀢𑁆𑀢𑀯𑀺𑀳𑀸𑀭𑀺𑀢𑀸𑀬 𑀫𑀸 𑀧𑀫𑀚𑁆𑀚𑀺. 𑀭𑀫𑁂𑀲𑁆𑀲𑀽𑀢𑀺 𑀧𑀜𑁆𑀘𑀯𑀺𑀥𑁂 𑀘 𑀓𑀸𑀫𑀕𑀼𑀡𑁂 𑀢𑁂 𑀘𑀺𑀢𑁆𑀢𑀁 𑀫𑀸 𑀭𑀫𑁂𑀲𑁆𑀲𑀼. 𑀫𑀸 𑀮𑁄𑀳𑀕𑀼𑀴𑀦𑁆𑀢𑀺 𑀲𑀢𑀺𑀯𑁄𑀲𑁆𑀲𑀕𑁆𑀕𑀮𑀓𑁆𑀔𑀡𑁂𑀦 𑀳𑀺 𑀧𑀫𑀸𑀤𑁂𑀦 𑀧𑀫𑀢𑁆𑀢𑀸 𑀦𑀺𑀭𑀬𑁂 𑀢𑀢𑁆𑀢𑀁 𑀮𑁄𑀳𑀕𑀼𑀴𑀁 𑀕𑀺𑀮𑀦𑁆𑀢𑀺, 𑀢𑁂𑀦 𑀢𑀁 𑀯𑀤𑀸𑀫𑀺 ‘‘𑀫𑀸 𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀮𑁄𑀳𑀕𑀼𑀴𑀁 𑀕𑀺𑀮𑀺, 𑀫𑀸 𑀦𑀺𑀭𑀬𑁂 𑀟𑀬𑁆𑀳𑀫𑀸𑀦𑁄 ‘𑀤𑀼𑀓𑁆𑀔𑀫𑀺𑀤’𑀦𑁆𑀢𑀺 𑀓𑀦𑁆𑀤𑀻’’𑀢𑀺 𑀅𑀢𑁆𑀣𑁄.

𑀦𑀢𑁆𑀣𑀺 𑀛𑀸𑀦𑀦𑁆𑀢𑀺 𑀛𑀸𑀦𑀼𑀧𑁆𑀧𑀸𑀤𑀺𑀓𑀸𑀬 𑀯𑀸𑀬𑀸𑀫𑀧𑀜𑁆𑀜𑀸𑀬 𑀅𑀧𑀜𑁆𑀜𑀲𑁆𑀲 𑀛𑀸𑀦𑀁 𑀦𑀸𑀫 𑀦𑀢𑁆𑀣𑀺. 𑀧𑀜𑁆𑀜𑀸 𑀦𑀢𑁆𑀣𑀻𑀢𑀺 𑀅𑀛𑀸𑀬𑀦𑁆𑀢𑀲𑁆𑀲 ‘‘𑀲𑀫𑀸𑀳𑀺𑀢𑁄 𑀪𑀺𑀓𑁆𑀔𑀼 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑀸 𑀧𑀜𑁆𑀜𑀸 𑀦𑀢𑁆𑀣𑀺. 𑀬𑀫𑁆𑀳𑀺 𑀛𑀸𑀦𑀜𑁆𑀘 𑀧𑀜𑁆𑀜𑀸 𑀘𑀸𑀢𑀺 𑀬𑀫𑁆𑀳𑀺 𑀧𑀼𑀕𑁆𑀕𑀮𑁂 𑀇𑀤𑀁 𑀉𑀪𑀬𑀫𑁆𑀧𑀺 𑀅𑀢𑁆𑀣𑀺, 𑀲𑁄 𑀦𑀺𑀩𑁆𑀩𑀸𑀦𑀲𑁆𑀲 𑀲𑀦𑁆𑀢𑀺𑀓𑁂 𑀞𑀺𑀢𑁄𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀲𑀼𑀜𑁆𑀜𑀸𑀕𑀸𑀭𑀁 𑀧𑀯𑀺𑀝𑁆𑀞𑀲𑁆𑀲𑀸𑀢𑀺 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀯𑀺𑀯𑀺𑀢𑁆𑀢𑁄𑀓𑀸𑀲𑁂 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀚𑀳𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁂𑀦 𑀦𑀺𑀲𑀺𑀦𑁆𑀦𑀲𑁆𑀲. 𑀲𑀦𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀦𑀺𑀩𑁆𑀩𑀼𑀢𑀘𑀺𑀢𑁆𑀢𑀲𑁆𑀲. 𑀲𑀫𑁆𑀫𑀸𑀢𑀺 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦 𑀥𑀫𑁆𑀫𑀁 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸 𑀅𑀫𑀸𑀦𑀼𑀲𑀻 𑀭𑀢𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀸 𑀤𑀺𑀩𑁆𑀩𑀸𑀧𑀺 𑀭𑀢𑀺 𑀳𑁄𑀢𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀻𑀢𑀺 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀬𑁂𑀦 𑀬𑁂𑀦𑀸𑀓𑀸𑀭𑁂𑀦, 𑀧𑀼𑀭𑁂𑀪𑀢𑁆𑀢𑀸𑀤𑀻𑀲𑀼 𑀯𑀸 𑀓𑀸𑀮𑁂𑀲𑀼 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀅𑀢𑁆𑀢𑀦𑀸 𑀅𑀪𑀺𑀭𑀼𑀘𑀺𑀢𑁂 𑀓𑀸𑀮𑁂, 𑀅𑀪𑀺𑀭𑀼𑀘𑀺𑀢𑁂 𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀲𑀫𑁆𑀫𑀲𑀢𑀺. 𑀉𑀤𑀬𑀩𑁆𑀩𑀬𑀦𑁆𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀧𑀜𑁆𑀘𑀯𑀻𑀲𑀢𑀺𑀬𑀸 𑀮𑀓𑁆𑀔𑀡𑁂𑀳𑀺 𑀉𑀤𑀬𑀁, 𑀧𑀜𑁆𑀘𑀯𑀻𑀲𑀢𑀺𑀬𑀸 𑀏𑀯 𑀘 𑀮𑀓𑁆𑀔𑀡𑁂𑀳𑀺 𑀯𑀬𑀁. 𑀧𑀻𑀢𑀺𑀧𑀸𑀫𑁄𑀚𑁆𑀚𑀦𑁆𑀢𑀺 𑀏𑀯𑀁 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁 𑀲𑀫𑁆𑀫𑀲𑀦𑁆𑀢𑁄 𑀥𑀫𑁆𑀫𑀧𑀻𑀢𑀺𑀁 𑀥𑀫𑁆𑀫𑀧𑀸𑀫𑁄𑀚𑁆𑀚𑀜𑁆𑀘 𑀮𑀪𑀢𑀺. 𑀅𑀫𑀢𑀦𑁆𑀢𑀺 𑀢𑀁 𑀲𑀧𑁆𑀧𑀘𑁆𑀘𑀬𑁂 𑀦𑀸𑀫𑀭𑀽𑀧𑁂 𑀧𑀸𑀓𑀝𑁂 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑁂 𑀉𑀧𑁆𑀧𑀦𑁆𑀦𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀅𑀫𑀢𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑀢𑁆𑀢𑀸 𑀯𑀺𑀚𑀸𑀦𑀢𑀁 𑀧𑀡𑁆𑀟𑀺𑀢𑀸𑀦𑀁 𑀅𑀫𑀢𑀫𑁂𑀯𑀸𑀢𑀺 𑀅𑀢𑁆𑀣𑁄.

𑀢𑀢𑁆𑀭𑀸𑀬𑀫𑀸𑀤𑀺 𑀪𑀯𑀢𑀻𑀢𑀺 𑀢𑀢𑁆𑀭 𑀅𑀬𑀁 𑀆𑀤𑀺, 𑀇𑀤𑀁 𑀧𑀼𑀩𑁆𑀩𑀝𑁆𑀞𑀸𑀦𑀁 𑀳𑁄𑀢𑀺. 𑀇𑀥 𑀧𑀜𑁆𑀜𑀲𑁆𑀲𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀡𑁆𑀟𑀺𑀢𑀪𑀺𑀓𑁆𑀔𑀼𑀦𑁄. 𑀇𑀤𑀸𑀦𑀺 ‘‘𑀢𑀁 𑀆𑀤𑀻’’𑀢𑀺 𑀯𑀼𑀢𑁆𑀢𑀁 𑀧𑀼𑀩𑁆𑀩𑀝𑁆𑀞𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀇𑀦𑁆𑀤𑁆𑀭𑀺𑀬𑀕𑀼𑀢𑁆𑀢𑀻𑀢𑀺𑀆𑀤𑀺𑀫𑀸𑀳. 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀜𑁆𑀳𑀺 𑀧𑀼𑀩𑁆𑀩𑀝𑁆𑀞𑀸𑀦𑀁 𑀦𑀸𑀫. 𑀢𑀢𑁆𑀣 𑀇𑀦𑁆𑀤𑁆𑀭𑀺𑀬𑀕𑀼𑀢𑁆𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄. 𑀲𑀦𑁆𑀢𑀼𑀝𑁆𑀞𑀻𑀢𑀺 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑁄. 𑀢𑁂𑀦 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺 𑀘𑁂𑀯 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀜𑁆𑀘 𑀲𑀻𑀮𑀁 𑀓𑀣𑀺𑀢𑀁. 𑀧𑀸𑀢𑀺𑀫𑁄𑀓𑁆𑀔𑁂𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀗𑁆𑀔𑀸𑀢𑁂 𑀚𑁂𑀝𑁆𑀞𑀓𑀲𑀻𑀮𑁂 𑀧𑀭𑀺𑀧𑀽𑀭𑀓𑀸𑀭𑀺𑀢𑀸 𑀓𑀣𑀺𑀢𑀸.

𑀫𑀺𑀢𑁆𑀢𑁂 𑀪𑀚𑀲𑁆𑀲𑀼 𑀓𑀮𑁆𑀬𑀸𑀡𑁂𑀢𑀺 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀦𑁆𑀢𑁂 𑀅𑀧𑀢𑀺𑀭𑀽𑀧𑀲𑀳𑀸𑀬𑁂 𑀯𑀚𑁆𑀚𑁂𑀢𑁆𑀯𑀸 𑀲𑀸𑀥𑀼𑀚𑀻𑀯𑀺𑀢𑀸𑀬 𑀲𑀼𑀤𑁆𑀥𑀸𑀚𑀻𑀯𑁂 𑀚𑀗𑁆𑀖𑀩𑀮𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀓𑀓𑀧𑁆𑀧𑀦𑀸𑀬 𑀅𑀓𑀼𑀲𑀻𑀢𑁂 𑀅𑀢𑀦𑁆𑀤𑀺𑀢𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀪𑀚𑀲𑁆𑀲𑀼, 𑀲𑁂𑀯𑀲𑁆𑀲𑀽𑀢𑀺 𑀅𑀢𑁆𑀣𑁄. 𑀧𑀝𑀺𑀲𑀦𑁆𑀣𑀸𑀭𑀯𑀼𑀢𑁆𑀬𑀲𑁆𑀲𑀸𑀢𑀺 𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑁂𑀦 𑀘 𑀥𑀫𑁆𑀫𑀧𑀝𑀺𑀲𑀦𑁆𑀣𑀸𑀭𑁂𑀦 𑀘 𑀲𑀫𑁆𑀧𑀦𑁆𑀦𑀯𑀼𑀢𑁆𑀢𑀺𑀢𑀸𑀬 𑀧𑀝𑀺𑀲𑀦𑁆𑀣𑀸𑀭𑀯𑀼𑀢𑁆𑀢𑀺 𑀅𑀲𑁆𑀲, 𑀧𑀝𑀺𑀲𑀦𑁆𑀣𑀸𑀭𑀲𑁆𑀲 𑀓𑀸𑀭𑀓𑀸 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀆𑀘𑀸𑀭𑀓𑀼𑀲𑀮𑁄𑀢𑀺 𑀲𑀻𑀮𑀫𑁆𑀧𑀺 𑀆𑀘𑀸𑀭𑁄, 𑀯𑀢𑁆𑀢𑀧𑀝𑀺𑀯𑀢𑁆𑀢𑀫𑁆𑀧𑀺 𑀆𑀘𑀸𑀭𑁄. 𑀢𑀢𑁆𑀣 𑀓𑀼𑀲𑀮𑁄 𑀲𑀺𑀬𑀸, 𑀙𑁂𑀓𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁄 𑀧𑀸𑀫𑁄𑀚𑁆𑀚𑀩𑀳𑀼𑀮𑁄𑀢𑀺 𑀢𑀢𑁄 𑀧𑀝𑀺𑀲𑀦𑁆𑀣𑀸𑀭𑀯𑀼𑀢𑁆𑀢𑀺𑀢𑁄 𑀘 𑀆𑀘𑀸𑀭𑀓𑁄𑀲𑀮𑁆𑀮𑀢𑁄 𑀘 𑀉𑀧𑁆𑀧𑀦𑁆𑀦𑁂𑀦 𑀥𑀫𑁆𑀫𑀧𑀸𑀫𑁄𑀚𑁆𑀚𑁂𑀦 𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀳𑀼𑀢𑁆𑀯𑀸 𑀢𑀁 𑀲𑀓𑀮𑀲𑁆𑀲𑀸𑀧𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀁 𑀓𑀭𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀸𑀲𑀼 𑀇𑀫𑀸𑀲𑀼 𑀕𑀸𑀣𑀸𑀲𑀼 𑀏𑀓𑀫𑁂𑀓𑀺𑀲𑁆𑀲𑀸𑀬 𑀕𑀸𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 𑀏𑀓𑀫𑁂𑀓𑀁 𑀪𑀺𑀓𑁆𑀔𑀼𑀲𑀢𑀁 𑀦𑀺𑀲𑀺𑀦𑁆𑀦𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑁂 𑀪𑀺𑀓𑁆𑀔𑀽 𑀆𑀓𑀸𑀲𑁂𑀦𑁂𑀯 𑀯𑀻𑀲𑀬𑁄𑀚𑀦𑀲𑀢𑀺𑀓𑀁 𑀓𑀦𑁆𑀢𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀯𑀡𑁆𑀡𑁂𑀦𑁆𑀢𑀸 𑀣𑁄𑀫𑁂𑀦𑁆𑀢𑀸 𑀧𑀸𑀤𑁂 𑀯𑀦𑁆𑀤𑀺𑀁𑀲𑀽𑀢𑀺.

𑀲𑀫𑁆𑀩𑀳𑀼𑀮𑀪𑀺𑀓𑁆𑀔𑀼𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀯𑀢𑁆𑀣𑀼

𑀯𑀲𑁆𑀲𑀺𑀓𑀸 𑀯𑀺𑀬 𑀧𑀼𑀧𑁆𑀨𑀸𑀦𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂 𑀓𑀺𑀭 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀸 𑀧𑀸𑀢𑁄𑀯 𑀧𑀼𑀧𑁆𑀨𑀺𑀢𑀸𑀦𑀺 𑀯𑀲𑁆𑀲𑀺𑀓𑀧𑀼𑀧𑁆𑀨𑀸𑀦𑀺 𑀲𑀸𑀬𑀁 𑀯𑀡𑁆𑀝𑀢𑁄 𑀫𑀼𑀘𑁆𑀘𑀦𑁆𑀢𑀸𑀦𑀺 𑀤𑀺𑀲𑁆𑀯𑀸 ‘‘𑀧𑀼𑀧𑁆𑀨𑀸𑀦𑀁 𑀯𑀡𑁆𑀝𑁂𑀳𑀺 𑀫𑀼𑀘𑁆𑀘𑀦𑀢𑁄 𑀫𑀬𑀁 𑀧𑀞𑀫𑀢𑀭𑀁 𑀭𑀸𑀕𑀸𑀤𑀻𑀳𑀺 𑀫𑀼𑀘𑁆𑀘𑀺𑀲𑁆𑀲𑀸𑀫𑀸’’𑀢𑀺 𑀯𑀸𑀬𑀫𑀺𑀁𑀲𑀼. 𑀲𑀢𑁆𑀣𑀸 𑀢𑁂 𑀪𑀺𑀓𑁆𑀔𑀽 𑀑𑀮𑁄𑀓𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀯𑀡𑁆𑀝𑀢𑁄 𑀫𑀼𑀘𑁆𑀘𑀦𑀧𑀼𑀧𑁆𑀨𑁂𑀦 𑀯𑀺𑀬 𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀢𑀼𑀁 𑀯𑀸𑀬𑀫𑀺𑀢𑀩𑁆𑀩𑀫𑁂𑀯𑀸’’𑀢𑀺 𑀯𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀆𑀮𑁄𑀓𑀁 𑀨𑀭𑀺𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁭𑁭. ‘‘𑀯𑀲𑁆𑀲𑀺𑀓𑀸 𑀯𑀺𑀬 𑀧𑀼𑀧𑁆𑀨𑀸𑀦𑀺, 𑀫𑀤𑁆𑀤𑀯𑀸𑀦𑀺 𑀧𑀫𑀼𑀜𑁆𑀘𑀢𑀺;

𑀏𑀯𑀁 𑀭𑀸𑀕𑀜𑁆𑀘 𑀤𑁄𑀲𑀜𑁆𑀘, 𑀯𑀺𑀧𑁆𑀧𑀫𑀼𑀜𑁆𑀘𑁂𑀣 𑀪𑀺𑀓𑁆𑀔𑀯𑁄’’𑀢𑀺.

𑀢𑀢𑁆𑀣 𑀯𑀲𑁆𑀲𑀺𑀓𑀸𑀢𑀺 𑀲𑀼𑀫𑀦𑀸. 𑀫𑀤𑁆𑀤𑀯𑀸𑀦𑀻𑀢𑀺 𑀫𑀺𑀮𑀸𑀢𑀸𑀦𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀯𑀲𑁆𑀲𑀺𑀓𑀸 𑀳𑀺𑀬𑁆𑀬𑁄 𑀧𑀼𑀧𑁆𑀨𑀺𑀢𑀧𑀼𑀧𑁆𑀨𑀸𑀦𑀺 𑀧𑀼𑀦𑀤𑀺𑀯𑀲𑁂 𑀧𑀼𑀭𑀸𑀡𑀪𑀽𑀢𑀸𑀦𑀺 𑀫𑀼𑀜𑁆𑀘𑀢𑀺, 𑀯𑀡𑁆𑀝𑀢𑁄 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀏𑀯𑀁 𑀢𑀼𑀫𑁆𑀳𑁂𑀧𑀺 𑀭𑀸𑀕𑀸𑀤𑀬𑁄 𑀤𑁄𑀲𑁂 𑀯𑀺𑀧𑁆𑀧𑀫𑀼𑀜𑁆𑀘𑁂𑀣𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀲𑀩𑁆𑀩𑁂𑀧𑀺 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀯𑀢𑁆𑀣𑀼 𑀅𑀝𑁆𑀞𑀫𑀁.

𑁯. 𑀲𑀦𑁆𑀢𑀓𑀸𑀬𑀢𑁆𑀣𑁂𑀭𑀯𑀢𑁆𑀣𑀼

𑀲𑀦𑁆𑀢𑀓𑀸𑀬𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀦𑁆𑀢𑀓𑀸𑀬𑀢𑁆𑀣𑁂𑀭𑀁 𑀦𑀸𑀫 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀲𑁆𑀲 𑀓𑀺𑀭 𑀳𑀢𑁆𑀣𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀁 𑀦𑀸𑀫 𑀦𑀸𑀳𑁄𑀲𑀺, 𑀓𑀸𑀬𑀯𑀺𑀚𑀫𑁆𑀪𑀦𑀭𑀳𑀺𑀢𑁄 𑀲𑀦𑁆𑀢𑀅𑀢𑁆𑀢𑀪𑀸𑀯𑁄𑀯 𑀅𑀳𑁄𑀲𑀺. 𑀲𑁄 𑀓𑀺𑀭 𑀲𑀻𑀳𑀬𑁄𑀦𑀺𑀢𑁄 𑀆𑀕𑀢𑁄 𑀣𑁂𑀭𑁄. 𑀲𑀻𑀳𑀸 𑀓𑀺𑀭 𑀏𑀓𑀤𑀺𑀯𑀲𑀁 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀭𑀚𑀢𑀲𑀼𑀯𑀡𑁆𑀡𑀫𑀡𑀺𑀧𑀯𑀸𑀴𑀕𑀼𑀳𑀸𑀦𑀁 𑀅𑀜𑁆𑀜𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀫𑀦𑁄𑀲𑀺𑀮𑀸𑀢𑀮𑁂 𑀳𑀭𑀺𑀢𑀸𑀮𑀘𑀼𑀡𑁆𑀡𑁂𑀲𑀼 𑀲𑀢𑁆𑀢𑀸𑀳𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀉𑀝𑁆𑀞𑀸𑀬 𑀦𑀺𑀧𑀦𑁆𑀦𑀝𑁆𑀞𑀸𑀦𑀁 𑀑𑀮𑁄𑀓𑁂𑀢𑁆𑀯𑀸 𑀲𑀘𑁂 𑀦𑀗𑁆𑀕𑀼𑀝𑁆𑀞𑀲𑁆𑀲 𑀯𑀸 𑀓𑀡𑁆𑀡𑀸𑀦𑀁 𑀯𑀸 𑀳𑀢𑁆𑀣𑀧𑀸𑀤𑀸𑀦𑀁 𑀯𑀸 𑀘𑀮𑀺𑀢𑀢𑁆𑀢𑀸 𑀫𑀦𑁄𑀲𑀺𑀮𑀸𑀳𑀭𑀺𑀢𑀸𑀮𑀘𑀼𑀡𑁆𑀡𑀸𑀦𑀁 𑀯𑀺𑀧𑁆𑀧𑀓𑀺𑀡𑁆𑀡𑀢𑀁 𑀧𑀲𑁆𑀲𑀦𑁆𑀢𑀺, ‘‘𑀦 𑀢𑁂 𑀇𑀤𑀁 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑀲𑁆𑀲 𑀯𑀸 𑀧𑀢𑀺𑀭𑀽𑀧’’𑀦𑁆𑀢𑀺 𑀧𑀼𑀦 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑀸 𑀦𑀺𑀧𑀚𑁆𑀚𑀦𑁆𑀢𑀺, 𑀘𑀼𑀡𑁆𑀡𑀸𑀦𑀁 𑀧𑀦 𑀯𑀺𑀧𑁆𑀧𑀓𑀺𑀡𑁆𑀡𑀪𑀸𑀯𑁂 𑀅𑀲𑀢𑀺 ‘‘𑀇𑀤𑀁 𑀢𑁂 𑀚𑀸𑀢𑀺𑀕𑁄𑀢𑁆𑀢𑀸𑀦𑀁 𑀅𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺 𑀆𑀲𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀚𑀫𑁆𑀪𑀺𑀢𑁆𑀯𑀸 𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀕𑁄𑀘𑀭𑀸𑀬 𑀧𑀓𑁆𑀓𑀫𑀦𑁆𑀢𑀺. 𑀏𑀯𑀭𑀽𑀧𑀸𑀬 𑀲𑀻𑀳𑀬𑁄𑀦𑀺𑀬𑀸 𑀆𑀕𑀢𑁄 𑀅𑀬𑀁 𑀪𑀺𑀓𑁆𑀔𑀼. 𑀢𑀲𑁆𑀲 𑀓𑀸𑀬𑀲𑀫𑀸𑀘𑀸𑀭𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁 𑁋 ‘‘𑀦 𑀦𑁄, 𑀪𑀦𑁆𑀢𑁂, 𑀲𑀦𑁆𑀢𑀓𑀸𑀬𑀢𑁆𑀣𑁂𑀭𑀲𑀤𑀺𑀲𑁄 𑀪𑀺𑀓𑁆𑀔𑀼 𑀤𑀺𑀝𑁆𑀞𑀧𑀼𑀩𑁆𑀩𑁄. 𑀇𑀫𑀲𑁆𑀲 𑀳𑀺 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀳𑀢𑁆𑀣𑀘𑀮𑀦𑀁 𑀯𑀸 𑀧𑀸𑀤𑀘𑀮𑀦𑀁 𑀯𑀸 𑀓𑀸𑀬𑀯𑀺𑀚𑀫𑁆𑀪𑀺𑀢𑀸 𑀯𑀸 𑀦𑀢𑁆𑀣𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸, ‘‘𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀲𑀦𑁆𑀢𑀓𑀸𑀬𑀢𑁆𑀣𑁂𑀭𑁂𑀦 𑀯𑀺𑀬 𑀓𑀸𑀬𑀸𑀤𑀻𑀳𑀺 𑀉𑀧𑀲𑀦𑁆𑀢𑁂𑀦𑁂𑀯 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋