𑁧𑁧. 𑀯𑀓𑁆𑀓𑀮𑀺𑀢𑁆𑀣𑁂𑀭𑀯𑀢𑁆𑀣𑀼

𑀧𑀸𑀫𑁄𑀚𑁆𑀚𑀩𑀳𑀼𑀮𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀯𑀓𑁆𑀓𑀮𑀺𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭𑀸𑀬𑀲𑁆𑀫𑀸 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀁 𑀢𑀣𑀸𑀕𑀢𑀁 𑀤𑀺𑀲𑁆𑀯𑀸 𑀲𑀢𑁆𑀣𑀼 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀅𑀢𑀺𑀢𑁆𑀢𑁄 ‘‘𑀏𑀯𑀸𑀳𑀁 𑀦𑀺𑀘𑁆𑀘𑀓𑀸𑀮𑀁 𑀢𑀣𑀸𑀕𑀢𑀁 𑀤𑀝𑁆𑀞𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀬𑀢𑁆𑀣 𑀞𑀺𑀢𑁂𑀦 𑀲𑀓𑁆𑀓𑀸 𑀤𑀲𑀩𑀮𑀁 𑀧𑀲𑁆𑀲𑀺𑀢𑀼𑀁, 𑀢𑀢𑁆𑀣 𑀞𑀺𑀢𑁄 𑀲𑀚𑁆𑀛𑀸𑀬𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀸𑀤𑀻𑀦𑀺 𑀧𑀳𑀸𑀬 𑀲𑀢𑁆𑀣𑀸𑀭𑀁 𑀑𑀮𑁄𑀓𑁂𑀦𑁆𑀢𑁄𑀯 𑀯𑀺𑀘𑀭𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀜𑀸𑀡𑀧𑀭𑀺𑀧𑀸𑀓𑀁 𑀆𑀕𑀫𑁂𑀦𑁆𑀢𑁄 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 ‘‘𑀇𑀤𑀸𑀦𑀺𑀲𑁆𑀲 𑀜𑀸𑀡𑀁 𑀧𑀭𑀺𑀧𑀸𑀓𑀁 𑀕𑀢’’𑀦𑁆𑀢𑀺 𑀜𑀢𑁆𑀯𑀸 ‘‘𑀓𑀺𑀁 𑀢𑁂, 𑀯𑀓𑁆𑀓𑀮𑀺, 𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦 𑀤𑀺𑀝𑁆𑀞𑁂𑀦, 𑀬𑁄 𑀔𑁄, 𑀯𑀓𑁆𑀓𑀮𑀺, 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀁 𑀧𑀲𑁆𑀲𑀢𑀺. 𑀬𑁄 𑀫𑀁 𑀧𑀲𑁆𑀲𑀢𑀺, 𑀲𑁄 𑀥𑀫𑁆𑀫𑀁 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁩.𑁮𑁭) 𑀯𑀢𑁆𑀯𑀸 𑀑𑀯𑀤𑀺. 𑀲𑁄 𑀏𑀯𑀁 𑀑𑀯𑀤𑀺𑀢𑁄𑀧𑀺 𑀲𑀢𑁆𑀣𑀼 𑀤𑀲𑁆𑀲𑀦𑀁 𑀧𑀳𑀸𑀬 𑀦𑁂𑀯 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀦𑀸𑀬𑀁 𑀪𑀺𑀓𑁆𑀔𑀼 𑀲𑀁𑀯𑁂𑀕𑀁 𑀅𑀮𑀪𑀺𑀢𑁆𑀯𑀸 𑀩𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 ‘‘𑀅𑀧𑁂𑀳𑀺, 𑀯𑀓𑁆𑀓𑀮𑀺, 𑀅𑀧𑁂𑀳𑀺, 𑀯𑀓𑁆𑀓𑀮𑀻’’𑀢𑀺 𑀧𑀡𑀸𑀫𑁂𑀲𑀺. 𑀲𑁄 ‘‘𑀦 𑀫𑀁 𑀲𑀢𑁆𑀣𑀸 𑀆𑀮𑀧𑀢𑀻’’𑀢𑀺 𑀢𑁂𑀫𑀸𑀲𑀁 𑀲𑀢𑁆𑀣𑀼 𑀲𑀫𑁆𑀫𑀼𑀔𑁂 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀓𑀺𑀁 𑀫𑀬𑁆𑀳𑀁 𑀚𑀻𑀯𑀺𑀢𑁂𑀦, 𑀧𑀩𑁆𑀩𑀢𑀸 𑀅𑀢𑁆𑀢𑀸𑀦𑀁 𑀧𑀸𑀢𑁂𑀲𑁆𑀲𑀸𑀫𑀻’’𑀢𑀺 𑀕𑀺𑀚𑁆𑀛𑀓𑀽𑀝𑀁 𑀅𑀪𑀺𑀭𑀼𑀳𑀺.

𑀲𑀢𑁆𑀣𑀸 𑀢𑀲𑁆𑀲 𑀓𑀺𑀮𑀫𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀬𑀁 𑀪𑀺𑀓𑁆𑀔𑀼 𑀫𑀫 𑀲𑀦𑁆𑀢𑀺𑀓𑀸 𑀅𑀲𑁆𑀲𑀸𑀲𑀁 𑀅𑀮𑀪𑀦𑁆𑀢𑁄 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑀁 𑀦𑀸𑀲𑁂𑀬𑁆𑀬𑀸’’𑀢𑀺 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀼𑀁 𑀑𑀪𑀸𑀲𑀁 𑀫𑀼𑀜𑁆𑀘𑀺. 𑀅𑀣𑀲𑁆𑀲 𑀲𑀢𑁆𑀣𑀼 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀸𑀯𑀫𑀳𑀦𑁆𑀢𑁄𑀧𑀺 𑀲𑁄𑀓𑁄 𑀧𑀳𑀻𑀬𑀺. 𑀲𑀢𑁆𑀣𑀸 𑀲𑀼𑀓𑁆𑀔𑀢𑀴𑀸𑀓𑀁 𑀑𑀖𑁂𑀦 𑀧𑀽𑀭𑁂𑀦𑁆𑀢𑁄 𑀯𑀺𑀬 𑀣𑁂𑀭𑀲𑁆𑀲 𑀩𑀮𑀯𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀸𑀤𑁂𑀢𑀼𑀁 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁮𑁧. ‘‘𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀪𑀺𑀓𑁆𑀔𑀼, 𑀧𑀲𑀦𑁆𑀦𑁄 𑀩𑀼𑀤𑁆𑀥𑀲𑀸𑀲𑀦𑁂;

𑀅𑀥𑀺𑀕𑀘𑁆𑀙𑁂 𑀧𑀤𑀁 𑀲𑀦𑁆𑀢𑀁, 𑀲𑀗𑁆𑀔𑀸𑀭𑀽𑀧𑀲𑀫𑀁 𑀲𑀼𑀔’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀧𑀓𑀢𑀺𑀬𑀸𑀧𑀺 𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀪𑀺𑀓𑁆𑀔𑀼 𑀩𑀼𑀤𑁆𑀥𑀲𑀸𑀲𑀦𑁂 𑀧𑀲𑀸𑀤𑀁 𑀭𑁄𑀘𑁂𑀢𑀺, 𑀲𑁄 𑀏𑀯𑀁 𑀧𑀲𑀦𑁆𑀦𑁄 𑀩𑀼𑀤𑁆𑀥𑀲𑀸𑀲𑀦𑁂 𑀲𑀦𑁆𑀢𑀁 𑀧𑀤𑀁 𑀲𑀗𑁆𑀔𑀸𑀭𑀽𑀧𑀲𑀫𑀁 𑀲𑀼𑀔𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀘𑁆𑀙𑁂𑀬𑁆𑀬𑀸𑀢𑀺. 𑀇𑀫𑀜𑁆𑀘 𑀧𑀦 𑀕𑀸𑀣𑀁 𑀯𑀢𑁆𑀯𑀸 𑀲𑀢𑁆𑀣𑀸 𑀯𑀓𑁆𑀓𑀮𑀺𑀢𑁆𑀣𑁂𑀭𑀲𑁆𑀲 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑁋

‘‘𑀏𑀳𑀺 𑀯𑀓𑁆𑀓𑀮𑀺 𑀫𑀸 𑀪𑀸𑀬𑀺, 𑀑𑀮𑁄𑀓𑁂𑀳𑀺 𑀢𑀣𑀸𑀕𑀢𑀁;

𑀅𑀳𑀁 𑀢𑀁 𑀉𑀤𑁆𑀥𑀭𑀺𑀲𑁆𑀲𑀸𑀫𑀺, 𑀧𑀗𑁆𑀓𑁂 𑀲𑀦𑁆𑀦𑀁𑀯 𑀓𑀼𑀜𑁆𑀚𑀭𑀁.

‘‘𑀏𑀳𑀺 𑀯𑀓𑁆𑀓𑀮𑀺 𑀫𑀸 𑀪𑀸𑀬𑀺, 𑀑𑀮𑁄𑀓𑁂𑀳𑀺 𑀢𑀣𑀸𑀕𑀢𑀁;

𑀅𑀳𑀁 𑀢𑀁 𑀫𑁄𑀘𑀬𑀺𑀲𑁆𑀲𑀸𑀫𑀺, 𑀭𑀸𑀳𑀼𑀕𑁆𑀕𑀳𑀁𑀯 𑀲𑀽𑀭𑀺𑀬𑀁.

‘‘𑀏𑀳𑀺 𑀯𑀓𑁆𑀓𑀮𑀺 𑀫𑀸 𑀪𑀸𑀬𑀺, 𑀑𑀮𑁄𑀓𑁂𑀳𑀺 𑀢𑀣𑀸𑀕𑀢𑀁;

𑀅𑀳𑀁 𑀢𑀁 𑀫𑁄𑀘𑀬𑀺𑀲𑁆𑀲𑀸𑀫𑀺, 𑀭𑀸𑀳𑀼𑀕𑁆𑀕𑀳𑀁𑀯 𑀘𑀦𑁆𑀤𑀺𑀫’’𑀦𑁆𑀢𑀺. 𑁋

𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺. 𑀲𑁄 ‘‘𑀤𑀲𑀩𑀮𑁄 𑀫𑁂 𑀤𑀺𑀝𑁆𑀞𑁄, 𑀏𑀳𑀻𑀢𑀺 𑀘 𑀅𑀯𑁆𑀳𑀸𑀦𑀫𑁆𑀧𑀺 𑀮𑀤𑁆𑀥’’𑀦𑁆𑀢𑀺 𑀩𑀮𑀯𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀓𑀼𑀢𑁄 𑀦𑀼 𑀔𑁄 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀕𑀫𑀦𑀫𑀕𑁆𑀕𑀁 𑀅𑀧𑀲𑁆𑀲𑀦𑁆𑀢𑁄 𑀤𑀲𑀩𑀮𑀲𑁆𑀲 𑀲𑀫𑁆𑀫𑀼𑀔𑁂 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀧𑀞𑀫𑀧𑀸𑀤𑁂 𑀧𑀩𑁆𑀩𑀢𑁂 𑀞𑀺𑀢𑁂𑀬𑁂𑀯 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑀕𑀸𑀣𑀸 𑀆𑀯𑀚𑁆𑀚𑁂𑀦𑁆𑀢𑁄 𑀆𑀓𑀸𑀲𑁂𑀬𑁂𑀯 𑀧𑀻𑀢𑀺𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑀣𑀸𑀕𑀢𑀁 𑀯𑀦𑁆𑀤𑀫𑀸𑀦𑁄𑀯 𑀑𑀢𑀭𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑀅𑀧𑀭𑀪𑀸𑀕𑁂 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀯𑀓𑁆𑀓𑀮𑀺𑀢𑁆𑀣𑁂𑀭𑀯𑀢𑁆𑀣𑀼 𑀏𑀓𑀸𑀤𑀲𑀫𑀁.