𑁧𑁦. 𑀦𑀗𑁆𑀕𑀮𑀓𑀼𑀮𑀢𑁆𑀣𑁂𑀭𑀯𑀢𑁆𑀣𑀼

𑀅𑀢𑁆𑀢𑀦𑀸 𑀘𑁄𑀤𑀬𑀢𑁆𑀢𑀸𑀦𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀦𑀗𑁆𑀕𑀮𑀓𑀼𑀮𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑁄 𑀓𑀺𑀭 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁄 𑀧𑀭𑁂𑀲𑀁 𑀪𑀢𑀺𑀁 𑀓𑀢𑁆𑀯𑀸 𑀚𑀻𑀯𑀢𑀺, 𑀢𑀁 𑀏𑀓𑁄 𑀪𑀺𑀓𑁆𑀔𑀼 𑀧𑀺𑀮𑁄𑀢𑀺𑀓𑀔𑀡𑁆𑀟𑀦𑀺𑀯𑀢𑁆𑀣𑀁 𑀦𑀗𑁆𑀕𑀮𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀏𑀯𑀫𑀸𑀳 𑁋 ‘‘𑀓𑀺𑀁 𑀧𑀦 𑀢𑁂 𑀏𑀯𑀁 𑀚𑀻𑀯𑀦𑀢𑁄 𑀧𑀩𑁆𑀩𑀚𑀺𑀢𑀼𑀁 𑀦 𑀯𑀭’’𑀦𑁆𑀢𑀺. 𑀓𑁄 𑀫𑀁, 𑀪𑀦𑁆𑀢𑁂, 𑀏𑀯𑀁 𑀚𑀻𑀯𑀦𑁆𑀢𑀁 𑀧𑀩𑁆𑀩𑀸𑀚𑁂𑀲𑁆𑀲𑀢𑀻𑀢𑀺? 𑀲𑀘𑁂 𑀧𑀩𑁆𑀩𑀚𑀺𑀲𑁆𑀲𑀲𑀺, 𑀅𑀳𑀁 𑀢𑀁 𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀻𑀢𑀺. 𑀲𑀸𑀥𑀼 𑀪𑀦𑁆𑀢𑁂, 𑀲𑀘𑁂 𑀫𑀁 𑀧𑀩𑁆𑀩𑀸𑀚𑁂𑀲𑁆𑀲𑀣, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺. 𑀅𑀣 𑀦𑀁 𑀲𑁄 𑀣𑁂𑀭𑁄 𑀚𑁂𑀢𑀯𑀦𑀁 𑀦𑁂𑀢𑁆𑀯𑀸 𑀲𑀳𑀢𑁆𑀣𑁂𑀦, 𑀦𑁆𑀳𑀸𑀧𑁂𑀢𑁆𑀯𑀸 𑀫𑀸𑀴𑀓𑁂 𑀞𑀧𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀦𑀺𑀯𑀢𑁆𑀣𑀧𑀺𑀮𑁄𑀢𑀺𑀓𑀔𑀡𑁆𑀟𑁂𑀦 𑀲𑀤𑁆𑀥𑀺𑀁 𑀦𑀗𑁆𑀕𑀮𑀁 𑀫𑀸𑀴𑀓𑀲𑀻𑀫𑀸𑀬𑀫𑁂𑀯 𑀭𑀼𑀓𑁆𑀔𑀲𑀸𑀔𑀸𑀬𑀁 𑀞𑀧𑀸𑀧𑁂𑀲𑀺. 𑀲𑁄 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂𑀧𑀺 𑀦𑀗𑁆𑀕𑀮𑀓𑀼𑀮𑀢𑁆𑀣𑁂𑀭𑁄𑀢𑁆𑀯𑁂𑀯 𑀧𑀜𑁆𑀜𑀸𑀬𑀺. 𑀲𑁄 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀦𑁆𑀦𑀮𑀸𑀪𑀲𑀓𑁆𑀓𑀸𑀭𑀁 𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀉𑀓𑁆𑀓𑀡𑁆𑀞𑀺𑀢𑀁 𑀯𑀺𑀦𑁄𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀦 𑀤𑀸𑀦𑀺 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀓𑀸𑀲𑀸𑀬𑀸𑀦𑀺 𑀧𑀭𑀺𑀤𑀳𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀭𑀼𑀓𑁆𑀔𑀫𑀽𑀮𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀑𑀯𑀤𑀺 𑁋 ‘‘𑀅𑀳𑀺𑀭𑀺𑀓, 𑀦𑀺𑀮𑁆𑀮𑀚𑁆𑀚, 𑀇𑀤𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀺𑀩𑁆𑀪𑀫𑀺𑀢𑁆𑀯𑀸 𑀪𑀢𑀺𑀁 𑀓𑀢𑁆𑀯𑀸 𑀚𑀻𑀯𑀺𑀢𑀼𑀓𑀸𑀫𑁄 𑀚𑀸𑀢𑁄’’𑀢𑀺. 𑀢𑀲𑁆𑀲𑁂𑀯𑀁 𑀅𑀢𑁆𑀢𑀸𑀦𑀁 𑀑𑀯𑀤𑀦𑁆𑀢𑀲𑁆𑀲𑁂𑀯 𑀘𑀺𑀢𑁆𑀢𑀁 𑀢𑀦𑀼𑀓𑀪𑀸𑀯𑀁 𑀕𑀢𑀁. 𑀲𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀦 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀢𑀣𑁂𑀯 𑀅𑀢𑁆𑀢𑀸𑀦𑀁 𑀑𑀯𑀤𑀺, 𑀧𑀼𑀦𑀲𑁆𑀲 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑀺. 𑀲𑁄 𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀉𑀓𑁆𑀓𑀡𑁆𑀞𑀺𑀢𑀉𑀓𑁆𑀓𑀡𑁆𑀞𑀺𑀢𑀓𑀸𑀮𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀅𑀢𑁆𑀢𑀸𑀦𑀁 𑀑𑀯𑀤𑀺. 𑀅𑀣 𑀦𑀁 𑀪𑀺𑀓𑁆𑀔𑀽 𑀢𑀢𑁆𑀣 𑀅𑀪𑀺𑀡𑁆𑀳𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸, ‘‘𑀆𑀯𑀼𑀲𑁄, 𑀦𑀗𑁆𑀕𑀮𑀢𑁆𑀣𑁂𑀭 𑀓𑀲𑁆𑀫𑀸 𑀏𑀢𑁆𑀣 𑀕𑀘𑁆𑀙𑀲𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 ‘‘𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀺, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀓𑀢𑀺𑀧𑀸𑀳𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀪𑀺𑀓𑁆𑀔𑀽 𑀢𑁂𑀦 𑀲𑀤𑁆𑀥𑀺𑀁 𑀓𑁂𑀴𑀺𑀁 𑀓𑀭𑁄𑀦𑁆𑀢𑀸 𑀆𑀳𑀁𑀲𑀼 𑁋 ‘‘𑀆𑀯𑀼𑀲𑁄 𑀦𑀗𑁆𑀕𑀮𑀢𑁆𑀣𑁂𑀭, 𑀢𑀯 𑀯𑀺𑀘𑀭𑀡𑀫𑀕𑁆𑀕𑁄 𑀅𑀯𑀴𑀜𑁆𑀚𑁄 𑀯𑀺𑀬 𑀚𑀸𑀢𑁄, 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀦 𑀕𑀘𑁆𑀙𑀲𑀺 𑀫𑀜𑁆𑀜𑁂’’𑀢𑀺. 𑀆𑀫, 𑀪𑀦𑁆𑀢𑁂, 𑀫𑀬𑀁 𑀲𑀁𑀲𑀕𑁆𑀕𑁂 𑀲𑀢𑀺 𑀅𑀕𑀫𑀺𑀫𑁆𑀳𑀸, 𑀇𑀤𑀸𑀦𑀺 𑀧𑀦 𑀲𑁄 𑀲𑀁𑀲𑀕𑁆𑀕𑁄 𑀙𑀺𑀦𑁆𑀦𑁄, 𑀢𑁂𑀦 𑀦 𑀕𑀘𑁆𑀙𑀸𑀫𑀸𑀢𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 ‘‘𑀏𑀲 𑀅𑀪𑀽𑀢𑀁 𑀯𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀻’’𑀢𑀺 𑀲𑀢𑁆𑀣𑀼 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀆𑀫, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀘𑁄𑀤𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀲𑁆𑀲 𑀫𑀢𑁆𑀣𑀓𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁭𑁯. ‘‘𑀅𑀢𑁆𑀢𑀦𑀸 𑀘𑁄𑀤𑀬𑀢𑁆𑀢𑀸𑀦𑀁, 𑀧𑀝𑀺𑀫𑀁𑀲𑁂𑀣 𑀅𑀢𑁆𑀢𑀦𑀸;

𑀲𑁄 𑀅𑀢𑁆𑀢𑀕𑀼𑀢𑁆𑀢𑁄 𑀲𑀢𑀺𑀫𑀸, 𑀲𑀼𑀔𑀁 𑀪𑀺𑀓𑁆𑀔𑀼 𑀯𑀺𑀳𑀸𑀳𑀺𑀲𑀺.

𑁩𑁮𑁦. ‘‘𑀅𑀢𑁆𑀢𑀸 𑀳𑀺 𑀅𑀢𑁆𑀢𑀦𑁄 𑀦𑀸𑀣𑁄, 𑀓𑁄 𑀳𑀺 𑀦𑀸𑀣𑁄 𑀧𑀭𑁄 𑀲𑀺𑀬𑀸;

𑀅𑀢𑁆𑀢𑀸 𑀳𑀺 𑀅𑀢𑁆𑀢𑀦𑁄 𑀕𑀢𑀺;

𑀢𑀲𑁆𑀫𑀸 𑀲𑀁𑀬𑀫𑀫𑀢𑁆𑀢𑀸𑀦𑀁, 𑀅𑀲𑁆𑀲𑀁 𑀪𑀤𑁆𑀭𑀁𑀯 𑀯𑀸𑀡𑀺𑀚𑁄’’𑀢𑀺.

𑀢𑀢𑁆𑀣 𑀘𑁄𑀤𑀬𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀘𑁄𑀤𑀬 𑀲𑀸𑀭𑀬. 𑀧𑀝𑀺𑀫𑀁𑀲𑁂𑀣𑀸𑀢𑀺 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀧𑀭𑀺𑀯𑀻𑀫𑀁𑀲𑀣. 𑀲𑁄𑀢𑀺 𑀲𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀏𑀯𑀁 𑀲𑀦𑁆𑀢𑁂 𑀅𑀢𑁆𑀢𑀦𑀸𑀯 𑀕𑀼𑀢𑁆𑀢𑀢𑀸𑀬 𑀅𑀢𑁆𑀢𑀕𑀼𑀢𑁆𑀢𑁄, 𑀉𑀧𑀝𑁆𑀞𑀺𑀢𑀲𑀢𑀺𑀢𑀸𑀬 𑀲𑀢𑀺𑀫𑀸 𑀳𑀼𑀢𑁆𑀯𑀸 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀲𑀼𑀔𑀁 𑀯𑀺𑀳𑀭𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄.

𑀦𑀸𑀣𑁄𑀢𑀺 𑀅𑀯𑀲𑁆𑀲𑀬𑁄 𑀧𑀢𑀺𑀝𑁆𑀞𑀸. 𑀓𑁄 𑀳𑀺 𑀦𑀸𑀣𑁄 𑀧𑀭𑁄𑀢𑀺 𑀬𑀲𑁆𑀫𑀸 𑀧𑀭𑀲𑁆𑀲 𑀅𑀢𑁆𑀢𑀪𑀸𑀯𑁂 𑀧𑀢𑀺𑀝𑁆𑀞𑀸𑀬 𑀓𑀼𑀲𑀮𑀁 𑀯𑀸 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁂𑀦 𑀫𑀕𑁆𑀕𑀁 𑀯𑀸 𑀪𑀸𑀯𑁂𑀢𑁆𑀯𑀸 𑀲𑀘𑁆𑀙𑀺𑀓𑀢𑀨𑀮𑁂𑀦 𑀪𑀯𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀓𑁄 𑀳𑀺 𑀦𑀸𑀫 𑀧𑀭𑁄 𑀦𑀸𑀣𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀢𑁆𑀢𑀸𑀯 𑀅𑀢𑁆𑀢𑀦𑁄 𑀕𑀢𑀺 𑀧𑀢𑀺𑀝𑁆𑀞𑀸 𑀲𑀭𑀡𑀁, 𑀢𑀲𑁆𑀫𑀸 𑀬𑀣𑀸 𑀪𑀤𑁆𑀭𑀁 𑀅𑀲𑁆𑀲𑀸𑀚𑀸𑀦𑀻𑀬𑀁 𑀦𑀺𑀲𑁆𑀲𑀸𑀬 𑀮𑀸𑀪𑀁 𑀧𑀢𑁆𑀣𑀬𑀦𑁆𑀢𑁄 𑀯𑀸𑀡𑀺𑀚𑁄 𑀢𑀲𑁆𑀲 𑀯𑀺𑀲𑀫𑀝𑁆𑀞𑀸𑀦𑀘𑀸𑀭𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀦𑀳𑀸𑀧𑁂𑀦𑁆𑀢𑁄 𑀪𑁄𑀚𑁂𑀦𑁆𑀢𑁄 𑀲𑀁𑀬𑀫𑁂𑀢𑀺 𑀧𑀝𑀺𑀚𑀕𑁆𑀕𑀢𑀺, 𑀏𑀯𑀁 𑀢𑁆𑀯𑀫𑁆𑀧𑀺 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀅𑀓𑀼𑀲𑀮𑀲𑁆𑀲 𑀉𑀧𑁆𑀧𑀸𑀤𑀁 𑀦𑀺𑀯𑀸𑀭𑁂𑀦𑁆𑀢𑁄 𑀲𑀢𑀺𑀲𑀫𑁆𑀫𑁄𑀲𑁂𑀦 𑀉𑀧𑁆𑀧𑀦𑁆𑀦𑀁 𑀅𑀓𑀼𑀲𑀮𑀁 𑀧𑀚𑀳𑀦𑁆𑀢𑁄 𑀅𑀢𑁆𑀢𑀸𑀦𑀁 𑀲𑀁𑀬𑀫 𑀕𑁄𑀧𑀬, 𑀏𑀯𑀁 𑀲𑀦𑁆𑀢𑁂 𑀧𑀞𑀫𑀚𑁆𑀛𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀺𑀲𑁂𑀲𑀁 𑀅𑀥𑀺𑀕𑀫𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀦𑀗𑁆𑀕𑀮𑀓𑀼𑀮𑀢𑁆𑀣𑁂𑀭𑀯𑀢𑁆𑀣𑀼 𑀤𑀲𑀫𑀁.