𑁧𑁨. 𑀅𑀗𑁆𑀓𑀼𑀭𑀯𑀢𑁆𑀣𑀼

𑀢𑀺𑀡𑀤𑁄𑀲𑀸𑀦𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀯𑀺𑀳𑀭𑀦𑁆𑀢𑁄 𑀅𑀗𑁆𑀓𑀼𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 ‘‘𑀬𑁂 𑀛𑀸𑀦𑀧𑁆𑀧𑀲𑀼𑀢𑀸 𑀥𑀻𑀭𑀸’’𑀢𑀺 (𑀥. 𑀧. 𑁧𑁮𑁧) 𑀕𑀸𑀣𑀸𑀬 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀢𑀢𑁆𑀣 𑀇𑀦𑁆𑀤𑀓𑀁 𑀆𑀭𑀩𑁆𑀪. 𑀲𑁄 𑀓𑀺𑀭 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀅𑀦𑁆𑀢𑁄𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀲𑁆𑀲 𑀅𑀢𑁆𑀢𑀦𑁄 𑀆𑀪𑀢𑀁 𑀓𑀝𑀘𑁆𑀙𑀼𑀫𑀢𑁆𑀢𑀓𑀁 𑀪𑀺𑀓𑁆𑀔𑀁 𑀤𑀸𑀧𑁂𑀲𑀺. 𑀢𑀤𑀲𑁆𑀲 𑀧𑀼𑀜𑁆𑀜𑀁 𑀅𑀗𑁆𑀓𑀼𑀭𑁂𑀦 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀉𑀤𑁆𑀥𑀦𑀧𑀦𑁆𑀢𑀺𑀁 𑀓𑀢𑁆𑀯𑀸 𑀤𑀺𑀦𑁆𑀦𑀤𑀸𑀦𑀢𑁄 𑀫𑀳𑀧𑁆𑀨𑀮𑀢𑀭𑀁 𑀚𑀸𑀢𑀁. 𑀢𑀲𑁆𑀫𑀸 𑀏𑀯𑀫𑀸𑀳. 𑀏𑀯𑀁 𑀯𑀼𑀢𑁆𑀢𑁂 𑀲𑀢𑁆𑀣𑀸, ‘‘𑀅𑀗𑁆𑀓𑀼𑀭, 𑀤𑀸𑀦𑀁 𑀦𑀸𑀫 𑀯𑀺𑀘𑁂𑀬𑁆𑀬 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀁 𑀢𑀁 𑀲𑀼𑀔𑁂𑀢𑁆𑀢𑁂 𑀲𑀼𑀯𑀼𑀢𑁆𑀢𑀩𑀻𑀚𑀁 𑀯𑀺𑀬 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀢𑁆𑀯𑀁 𑀧𑀦 𑀢𑀣𑀸 𑀦𑀸𑀓𑀸𑀲𑀺, 𑀢𑁂𑀦 𑀢𑁂 𑀤𑀸𑀦𑀁 𑀦 𑀫𑀳𑀧𑁆𑀨𑀮𑀁 𑀚𑀸𑀢’’𑀦𑁆𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑁋

‘‘𑀯𑀺𑀘𑁂𑀬𑁆𑀬 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁;

𑀯𑀺𑀘𑁂𑀬𑁆𑀬 𑀤𑀸𑀦𑀁 𑀲𑀼𑀕𑀢𑀧𑁆𑀧𑀲𑀢𑁆𑀣𑀁,

𑀬𑁂 𑀤𑀓𑁆𑀔𑀺𑀡𑁂𑀬𑁆𑀬𑀸 𑀇𑀥 𑀚𑀻𑀯𑀮𑁄𑀓𑁂;

𑀏𑀢𑁂𑀲𑀼 𑀤𑀺𑀦𑁆𑀦𑀸𑀦𑀺 𑀫𑀳𑀧𑁆𑀨𑀮𑀸𑀦𑀺,

𑀩𑀻𑀚𑀸𑀦𑀺 𑀯𑀼𑀢𑁆𑀢𑀸𑀦𑀺 𑀬𑀣𑀸𑀲𑀼𑀔𑁂𑀢𑁆𑀢𑁂’’𑀢𑀺. (𑀧𑁂. 𑀯. 𑁩𑁨𑁯) 𑁋

𑀯𑀢𑁆𑀯𑀸 𑀉𑀢𑁆𑀢𑀭𑀺𑀫𑁆𑀧𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁫𑁬. ‘‘𑀢𑀺𑀡𑀤𑁄𑀲𑀸𑀦𑀺 𑀔𑁂𑀢𑁆𑀢𑀸𑀦𑀺, 𑀭𑀸𑀕𑀤𑁄𑀲𑀸 𑀅𑀬𑀁 𑀧𑀚𑀸;

𑀢𑀲𑁆𑀫𑀸 𑀳𑀺 𑀯𑀻𑀢𑀭𑀸𑀕𑁂𑀲𑀼, 𑀤𑀺𑀦𑁆𑀦𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁.

𑁩𑁫𑁭. ‘‘𑀢𑀺𑀡𑀤𑁄𑀲𑀸𑀦𑀺 𑀔𑁂𑀢𑁆𑀢𑀸𑀦𑀺, 𑀤𑁄𑀲𑀤𑁄𑀲𑀸 𑀅𑀬𑀁 𑀧𑀚𑀸;

𑀢𑀲𑁆𑀫𑀸 𑀳𑀺 𑀯𑀻𑀢𑀤𑁄𑀲𑁂𑀲𑀼, 𑀤𑀺𑀦𑁆𑀦𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁.

𑁩𑁫𑁮. ‘‘𑀢𑀺𑀡𑀤𑁄𑀲𑀸𑀦𑀺 𑀔𑁂𑀢𑁆𑀢𑀸𑀦𑀺, 𑀫𑁄𑀳𑀤𑁄𑀲𑀸 𑀅𑀬𑀁 𑀧𑀚𑀸;

𑀢𑀲𑁆𑀫𑀸 𑀳𑀺 𑀯𑀻𑀢𑀫𑁄𑀳𑁂𑀲𑀼, 𑀤𑀺𑀦𑁆𑀦𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁.

𑁩𑁫𑁯. ‘‘𑀢𑀺𑀡𑀤𑁄𑀲𑀸𑀦𑀺 𑀔𑁂𑀢𑁆𑀢𑀸𑀦𑀺, 𑀇𑀘𑁆𑀙𑀸𑀤𑁄𑀲𑀸 𑀅𑀬𑀁 𑀧𑀚𑀸;

𑀢𑀲𑁆𑀫𑀸 𑀳𑀺 𑀯𑀺𑀕𑀢𑀺𑀘𑁆𑀙𑁂𑀲𑀼, 𑀤𑀺𑀦𑁆𑀦𑀁 𑀳𑁄𑀢𑀺 𑀫𑀳𑀧𑁆𑀨𑀮’’𑀦𑁆𑀢𑀺.

𑀢𑀢𑁆𑀣 𑀢𑀺𑀡𑀤𑁄𑀲𑀸𑀦𑀻𑀢𑀺 𑀲𑀸𑀫𑀸𑀓𑀸𑀤𑀻𑀦𑀺 𑀢𑀺𑀡𑀸𑀦𑀺 𑀉𑀝𑁆𑀞𑀳𑀦𑁆𑀢𑀸𑀦𑀺 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀸𑀦𑀺 𑀔𑁂𑀢𑁆𑀢𑀸𑀦𑀺 𑀤𑀽𑀲𑁂𑀦𑁆𑀢𑀺, 𑀢𑁂𑀦 𑀢𑀸𑀦𑀺 𑀦 𑀩𑀳𑀼𑀨𑀮𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀁 𑀲𑀢𑁆𑀢𑀸𑀦𑀫𑁆𑀧𑀺 𑀅𑀦𑁆𑀢𑁄 𑀭𑀸𑀕𑁄 𑀉𑀧𑁆𑀧𑀚𑁆𑀚𑀦𑁆𑀢𑁄 𑀲𑀢𑁆𑀢𑁂 𑀤𑀽𑀲𑁂𑀢𑀺, 𑀢𑁂𑀦 𑀢𑁂𑀲𑀼 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀦 𑀳𑁄𑀢𑀺. 𑀔𑀻𑀡𑀸𑀲𑀯𑁂𑀲𑀼 𑀤𑀺𑀦𑁆𑀦𑀁 𑀧𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀢𑀺𑀡𑀤𑁄𑀲𑀸𑀦𑀺 𑀔𑁂𑀢𑁆𑀢𑀸𑀦𑀺, 𑀭𑀸𑀕𑀤𑁄𑀲𑀸 𑀅𑀬𑀁 𑀧𑀚𑀸;

𑀢𑀲𑁆𑀫𑀸 𑀳𑀺 𑀯𑀻𑀢𑀭𑀸𑀕𑁂𑀲𑀼, 𑀤𑀺𑀦𑁆𑀦𑀁 𑀳𑁄𑀢𑀺 𑀫𑀳𑀧𑁆𑀨𑀮’’𑀦𑁆𑀢𑀺. 𑁋

𑀲𑁂𑀲𑀕𑀸𑀣𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀅𑀗𑁆𑀓𑀼𑀭𑁄 𑀘 𑀇𑀦𑁆𑀤𑀓𑁄 𑀘 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀅𑀗𑁆𑀓𑀼𑀭𑀯𑀢𑁆𑀣𑀼 𑀤𑁆𑀯𑀸𑀤𑀲𑀫𑀁.

𑀢𑀡𑁆𑀳𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀯𑀻𑀲𑀢𑀺𑀫𑁄 𑀯𑀕𑁆𑀕𑁄.