𑁨𑁪. 𑀢𑀡𑁆𑀳𑀸𑀯𑀕𑁆𑀕𑁄

𑁧. 𑀓𑀧𑀺𑀮𑀫𑀘𑁆𑀙𑀯𑀢𑁆𑀣𑀼

𑀫𑀦𑀼𑀚𑀲𑁆𑀲𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀧𑀺𑀮𑀫𑀘𑁆𑀙𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀅𑀢𑀻𑀢𑁂 𑀓𑀺𑀭 𑀓𑀲𑁆𑀲𑀧𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑁂 𑀤𑁆𑀯𑁂 𑀓𑀼𑀮𑀪𑀸𑀢𑀭𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀸𑀯𑀓𑀸𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀢𑁂𑀲𑀼 𑀚𑁂𑀝𑁆𑀞𑁄 𑀲𑀸𑀕𑀢𑁄 𑀦𑀸𑀫 𑀅𑀳𑁄𑀲𑀺, 𑀓𑀦𑀺𑀝𑁆𑀞𑁄 𑀓𑀧𑀺𑀮𑁄 𑀦𑀸𑀫. 𑀫𑀸𑀢𑀸 𑀧𑀦 𑀦𑁂𑀲𑀁 𑀲𑀸𑀥𑀺𑀦𑀻 𑀦𑀸𑀫, 𑀓𑀦𑀺𑀝𑁆𑀞𑀪𑀕𑀺𑀦𑀻 𑀢𑀸𑀧𑀦𑀸 𑀦𑀸𑀫. 𑀢𑀸𑀧𑀺 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀁𑀲𑀼. 𑀏𑀯𑀁 𑀢𑁂𑀲𑀼 𑀧𑀩𑁆𑀩𑀚𑀺𑀢𑁂𑀲𑀼 𑀉𑀪𑁄 𑀪𑀸𑀢𑀭𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑀸 𑀏𑀓𑀤𑀺𑀯𑀲𑀁, ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀓𑀢𑀺 𑀥𑀼𑀭𑀸𑀦𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀕𑀦𑁆𑀣𑀥𑀼𑀭𑀁 𑀯𑀺𑀧𑀲𑁆𑀲𑀦𑀸𑀥𑀼𑀭𑀜𑁆𑀘𑀸𑀢𑀺 𑀤𑁆𑀯𑁂 𑀥𑀼𑀭𑀸𑀦𑀻’’𑀢𑀺 𑀲𑀼𑀢𑁆𑀯𑀸 𑀚𑁂𑀝𑁆𑀞𑁄 ‘‘𑀯𑀺𑀧𑀲𑁆𑀲𑀦𑀸𑀥𑀼𑀭𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀧𑀜𑁆𑀘 𑀯𑀲𑁆𑀲𑀸𑀦𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀦𑁆𑀢𑀺𑀓𑁂 𑀯𑀲𑀺𑀢𑁆𑀯𑀸 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀯𑀸𑀬𑀫𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀓𑀦𑀺𑀝𑁆𑀞𑁄 ‘‘𑀅𑀳𑀁 𑀢𑀸𑀯 𑀢𑀭𑀼𑀡𑁄, 𑀯𑀼𑀟𑁆𑀠𑀓𑀸𑀮𑁂 𑀯𑀺𑀧𑀲𑁆𑀲𑀦𑀸𑀥𑀼𑀭𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀣𑀥𑀼𑀭𑀁 𑀧𑀝𑁆𑀞𑀧𑁂𑀢𑁆𑀯𑀸 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀡𑁆𑀳𑀺. 𑀢𑀲𑁆𑀲 𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀫𑀳𑀸𑀧𑀭𑀺𑀯𑀸𑀭𑁄, 𑀧𑀭𑀺𑀯𑀸𑀭𑀁 𑀦𑀺𑀲𑁆𑀲𑀸𑀬 𑀮𑀸𑀪𑁄 𑀉𑀤𑀧𑀸𑀤𑀺. 𑀲𑁄 𑀩𑀸𑀳𑀼𑀲𑀘𑁆𑀘𑀫𑀤𑁂𑀦 𑀫𑀢𑁆𑀢𑁄 𑀮𑀸𑀪𑀢𑀡𑁆𑀳𑀸𑀬 𑀅𑀪𑀺𑀪𑀽𑀢𑁄 𑀅𑀢𑀺𑀧𑀡𑁆𑀟𑀺𑀢𑀫𑀸𑀦𑀺𑀢𑀸𑀬 𑀧𑀭𑁂𑀳𑀺 𑀯𑀼𑀢𑁆𑀢𑀁 𑀓𑀧𑁆𑀧𑀺𑀬𑀫𑁆𑀧𑀺 ‘‘𑀅𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀤𑁂𑀢𑀺, 𑀅𑀓𑀧𑁆𑀧𑀺𑀬𑀫𑁆𑀧𑀺 ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀤𑁂𑀢𑀺, 𑀲𑀸𑀯𑀚𑁆𑀚𑀫𑁆𑀧𑀺 ‘‘𑀅𑀦𑀯𑀚𑁆𑀚’’𑀦𑁆𑀢𑀺, 𑀅𑀦𑀯𑀚𑁆𑀚𑀫𑁆𑀧𑀺 ‘‘𑀲𑀸𑀯𑀚𑁆𑀚’’𑀦𑁆𑀢𑀺. 𑀲𑁄 𑀧𑁂𑀲𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 ‘‘𑀫𑀸, 𑀆𑀯𑀼𑀲𑁄 𑀓𑀧𑀺𑀮, 𑀏𑀯𑀁 𑀅𑀯𑀘𑀸’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀑𑀯𑀤𑀺𑀬𑀫𑀸𑀦𑁄𑀧𑀺 ‘‘𑀢𑀼𑀫𑁆𑀳𑁂 𑀓𑀺𑀁 𑀚𑀸𑀦𑀸𑀣, 𑀭𑀺𑀢𑁆𑀢𑀫𑀼𑀝𑁆𑀞𑀺𑀲𑀤𑀺𑀲𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀔𑀼𑀁𑀲𑁂𑀦𑁆𑀢𑁄 𑀯𑀫𑁆𑀪𑁂𑀦𑁆𑀢𑁄 𑀘𑀭𑀢𑀺. 𑀅𑀣𑀲𑁆𑀲 𑀪𑀸𑀢𑀼 𑀲𑀸𑀕𑀢𑀢𑁆𑀣𑁂𑀭𑀲𑁆𑀲𑀸𑀧𑀺 𑀪𑀺𑀓𑁆𑀔𑀽 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑁄𑀧𑀺 𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀆𑀯𑀼𑀲𑁄 𑀓𑀧𑀺𑀮, 𑀢𑀼𑀫𑁆𑀳𑀸𑀤𑀺𑀲𑀸𑀦𑀜𑁆𑀳𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀲𑀸𑀲𑀦𑀲𑁆𑀲 𑀆𑀬𑀼 𑀦𑀸𑀫, 𑀢𑀲𑁆𑀫𑀸 𑀧𑀝𑀺𑀧𑀢𑁆𑀢𑀺𑀁 𑀧𑀳𑀸𑀬 𑀓𑀧𑁆𑀧𑀺𑀬𑀸𑀤𑀻𑀦𑀺 𑀧𑀝𑀺𑀩𑀸𑀳𑀦𑁆𑀢𑁄 𑀫𑀸 𑀏𑀯𑀁 𑀅𑀯𑀘𑀸’’𑀢𑀺 𑀑𑀯𑀤𑀺. 𑀲𑁄 𑀢𑀲𑁆𑀲𑀧𑀺 𑀯𑀘𑀦𑀁 𑀦𑀸𑀤𑀺𑀬𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀣𑁂𑀭𑁄 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀑𑀯𑀤𑀺𑀢𑁆𑀯𑀸 𑀑𑀯𑀸𑀤𑀁 𑀅𑀕𑀡𑁆𑀳𑀦𑁆𑀢𑀁 ‘‘𑀦𑀸𑀬𑀁 𑀫𑀫 𑀯𑀘𑀦𑀁 𑀓𑀭𑁄𑀢𑀻’’𑀢𑀺 𑀜𑀢𑁆𑀯𑀸 ‘‘𑀢𑁂𑀦, 𑀆𑀯𑀼𑀲𑁄, 𑀧𑀜𑁆𑀜𑀸𑀬𑀺𑀲𑁆𑀲𑀲𑀺 𑀲𑀓𑁂𑀦 𑀓𑀫𑁆𑀫𑁂𑀦𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀢𑁄 𑀧𑀝𑁆𑀞𑀸𑀬 𑀦𑀁 𑀅𑀜𑁆𑀜𑁂 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀙𑀟𑁆𑀟𑀬𑀺𑀁𑀲𑀼.

𑀲𑁄 𑀤𑀼𑀭𑀸𑀘𑀸𑀭𑁄 𑀳𑀼𑀢𑁆𑀯𑀸 𑀤𑀼𑀭𑀸𑀘𑀸𑀭𑀧𑀭𑀺𑀯𑀼𑀢𑁄 𑀯𑀺𑀳𑀭𑀦𑁆𑀢𑁄 𑀏𑀓𑀤𑀺𑀯𑀲𑀁 𑀉𑀧𑁄𑀲𑀣𑀕𑁆𑀕𑁂 ‘‘𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀩𑀻𑀚𑀦𑀺𑀁 𑀆𑀤𑀸𑀬 𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀯𑀢𑁆𑀢𑀢𑀺, 𑀆𑀯𑀼𑀲𑁄, 𑀏𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀓𑁄 𑀅𑀢𑁆𑀣𑁄 𑀇𑀫𑀲𑁆𑀲 𑀧𑀝𑀺𑀯𑀘𑀦𑁂𑀦 𑀤𑀺𑀦𑁆𑀦𑁂𑀦𑀸’’𑀢𑀺 𑀢𑀼𑀡𑁆𑀳𑀻𑀪𑀽𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸, ‘‘𑀆𑀯𑀼𑀲𑁄, 𑀥𑀫𑁆𑀫𑁄 𑀯𑀸 𑀯𑀺𑀦𑀬𑁄 𑀯𑀸 𑀦𑀢𑁆𑀣𑀺, 𑀧𑀸𑀢𑀺𑀫𑁄𑀓𑁆𑀔𑁂𑀦 𑀲𑀼𑀢𑁂𑀦 𑀯𑀸 𑀅𑀲𑀼𑀢𑁂𑀦 𑀯𑀸 𑀓𑁄 𑀅𑀢𑁆𑀣𑁄’’𑀢𑀺 𑀯𑀢𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀳𑀺. 𑀏𑀯𑀁 𑀲𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀁 𑀑𑀲𑀓𑁆𑀓𑀸𑀧𑁂𑀲𑀺. 𑀲𑀸𑀕𑀢𑀢𑁆𑀣𑁂𑀭𑁄𑀧𑀺 𑀢𑀤𑀳𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀓𑀧𑀺𑀮𑁄 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀅𑀯𑀻𑀘𑀺𑀫𑁆𑀳𑀺 𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺. 𑀲𑀸𑀧𑀺𑀲𑁆𑀲 𑀫𑀸𑀢𑀸 𑀘 𑀪𑀕𑀺𑀦𑀻 𑀘 𑀢𑀲𑁆𑀲𑁂𑀯 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑁂𑀲𑀮𑁂 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀺𑀢𑁆𑀯𑀸 𑀧𑀭𑀺𑀪𑀸𑀲𑀺𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀩𑁆𑀩𑀢𑁆𑀢𑀺𑀁𑀲𑀼.

𑀢𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀧𑀜𑁆𑀘𑀲𑀢𑀸 𑀧𑀼𑀭𑀺𑀲𑀸 𑀕𑀸𑀫𑀖𑀸𑀢𑀓𑀸𑀤𑀻𑀦𑀺 𑀓𑀢𑁆𑀯𑀸 𑀘𑁄𑀭𑀺𑀓𑀸𑀬 𑀚𑀻𑀯𑀦𑁆𑀢𑀸 𑀚𑀦𑀧𑀤𑀫𑀦𑀼𑀲𑁆𑀲𑁂𑀳𑀺 𑀅𑀦𑀼𑀩𑀤𑁆𑀥𑀸 𑀧𑀮𑀸𑀬𑀫𑀸𑀦𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀓𑀺𑀜𑁆𑀘𑀺 𑀧𑀝𑀺𑀲𑀭𑀡𑀁 𑀅𑀧𑀲𑁆𑀲𑀦𑁆𑀢𑀸 𑀅𑀜𑁆𑀜𑀢𑀭𑀁 𑀆𑀭𑀜𑁆𑀜𑀺𑀓𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀝𑀺𑀲𑀭𑀡𑀁 𑀦𑁄, 𑀪𑀦𑁆𑀢𑁂, 𑀳𑁄𑀣𑀸’’𑀢𑀺 𑀯𑀤𑀺𑀁𑀲𑀼. 𑀣𑁂𑀭𑁄 ‘‘𑀢𑀼𑀫𑁆𑀳𑀸𑀓𑀁 𑀲𑀻𑀮𑀲𑀤𑀺𑀲𑀁 𑀧𑀝𑀺𑀲𑀭𑀡𑀁 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑁂𑀧𑀺 𑀧𑀜𑁆𑀘𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀺𑀁𑀲𑀼. 𑀅𑀣 𑀦𑁂 𑀣𑁂𑀭𑁄 𑀑𑀯𑀤𑀺 𑁋 ‘‘𑀇𑀤𑀸𑀦𑀺 𑀢𑀼𑀫𑁆𑀳𑁂 𑀲𑀻𑀮𑀯𑀦𑁆𑀢𑀸, 𑀚𑀻𑀯𑀺𑀢𑀳𑁂𑀢𑀼𑀧𑀺 𑀯𑁄 𑀦𑁂𑀯 𑀲𑀻𑀮𑀁 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀁, 𑀦 𑀫𑀦𑁄𑀧𑀤𑁄𑀲𑁄 𑀓𑀸𑀢𑀩𑁆𑀩𑁄’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀅𑀣 𑀦𑁂 𑀚𑀦𑀧𑀤𑀫𑀦𑀼𑀲𑁆𑀲𑀸 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀬𑁂𑀲𑀫𑀸𑀦𑀸 𑀢𑁂 𑀘𑁄𑀭𑁂 𑀤𑀺𑀲𑁆𑀯𑀸 𑀲𑀩𑁆𑀩𑁂 𑀢𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀼𑀁. 𑀢𑁂 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼, 𑀘𑁄𑀭𑀚𑁂𑀝𑁆𑀞𑀓𑁄 𑀚𑁂𑀝𑁆𑀞𑀓𑀤𑁂𑀯𑀧𑀼𑀢𑁆𑀢𑁄 𑀅𑀳𑁄𑀲𑀺.

𑀢𑁂 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀮𑁄𑀓𑁂 𑀲𑀁𑀲𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀦𑀕𑀭𑀤𑁆𑀯𑀸𑀭𑁂 𑀧𑀜𑁆𑀘𑀲𑀢𑀓𑀼𑀮𑀺𑀓𑁂 𑀓𑁂𑀯𑀝𑁆𑀝𑀕𑀸𑀫𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀚𑁂𑀝𑁆𑀞𑀓𑀤𑁂𑀯𑀧𑀼𑀢𑁆𑀢𑁄 𑀓𑁂𑀯𑀝𑁆𑀝𑀚𑁂𑀝𑁆𑀞𑀓𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀇𑀢𑀭𑁂 𑀇𑀢𑀭𑁂𑀲𑀼. 𑀏𑀯𑀁 𑀢𑁂𑀲𑀁 𑀏𑀓𑀤𑀺𑀯𑀲𑁂𑀬𑁂𑀯 𑀧𑀝𑀺𑀲𑀦𑁆𑀥𑀺𑀕𑀳𑀡𑀜𑁆𑀘 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀜𑁆𑀘 𑀅𑀳𑁄𑀲𑀺. 𑀓𑁂𑀯𑀝𑁆𑀝𑀚𑁂𑀝𑁆𑀞𑀓𑁄 ‘‘𑀅𑀢𑁆𑀣𑀺 𑀦𑀼 𑀔𑁄 𑀇𑀫𑀲𑁆𑀫𑀺𑀁 𑀕𑀸𑀫𑁂 𑀅𑀜𑁆𑀜𑁂𑀧𑀺 𑀤𑀸𑀭𑀓𑀸 𑀅𑀚𑁆𑀚 𑀚𑀸𑀢𑀸’’𑀢𑀺 𑀧𑀭𑀺𑀬𑁂𑀲𑀸𑀧𑁂𑀢𑁆𑀯𑀸 𑀢𑁂𑀲𑀁 𑀚𑀸𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀏𑀢𑁂 𑀫𑀫 𑀧𑀼𑀢𑁆𑀢𑀲𑁆𑀲 𑀲𑀳𑀸𑀬𑀓𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀩𑁆𑀩𑁂𑀲𑀁 𑀧𑁄𑀲𑀸𑀯𑀦𑀺𑀓𑀁 𑀤𑀸𑀧𑁂𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀲𑀳𑀧𑀁𑀲𑀼𑀓𑀻𑀴𑀓𑀸 𑀲𑀳𑀸𑀬𑀓𑀸 𑀳𑀼𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀯𑀬𑀧𑁆𑀧𑀢𑁆𑀢𑀸 𑀅𑀳𑁂𑀲𑀼𑀁. 𑀢𑁂𑀲𑀁 𑀓𑁂𑀯𑀝𑁆𑀝𑀚𑁂𑀝𑁆𑀞𑀓𑀧𑀼𑀢𑁆𑀢𑁄𑀯 𑀬𑀲𑀢𑁄 𑀘 𑀢𑁂𑀚𑀢𑁄 𑀘 𑀅𑀕𑁆𑀕𑀧𑀼𑀭𑀺𑀲𑁄 𑀅𑀳𑁄𑀲𑀺.

𑀓𑀧𑀺𑀮𑁄𑀧𑀺 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀘𑀺𑀭𑀯𑀢𑀺𑀬𑀸 𑀲𑀼𑀯𑀡𑁆𑀡𑀯𑀡𑁆𑀡𑁄 𑀤𑀼𑀕𑁆𑀕𑀦𑁆𑀥𑀫𑀼𑀔𑁄 𑀫𑀘𑁆𑀙𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀢𑁂 𑀲𑀳𑀸𑀬𑀓𑀸 ‘‘𑀫𑀘𑁆𑀙𑁂 𑀩𑀦𑁆𑀥𑀺𑀲𑁆𑀲𑀸𑀫𑀸’’𑀢𑀺 𑀚𑀸𑀮𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀦𑀤𑀺𑀬𑀸 𑀔𑀺𑀧𑀺𑀁𑀲𑀼. 𑀅𑀣 𑀦𑁂𑀲𑀁 𑀅𑀦𑁆𑀢𑁄𑀚𑀸𑀮𑀁 𑀲𑁄 𑀫𑀘𑁆𑀙𑁄 𑀧𑀸𑀯𑀺𑀲𑀺. 𑀢𑀁 𑀤𑀺𑀲𑁆𑀯𑀸 𑀲𑀩𑁆𑀩𑁂 𑀓𑁂𑀯𑀝𑁆𑀝𑀕𑀸𑀫𑀯𑀸𑀲𑀺𑀦𑁄 𑀉𑀘𑁆𑀘𑀸𑀲𑀤𑁆𑀤𑀫𑀓𑀁𑀲𑀼 𑁋 ‘‘𑀧𑀼𑀢𑁆𑀢𑀸 𑀦𑁄 𑀧𑀞𑀫𑀁 𑀫𑀘𑁆𑀙𑁂 𑀩𑀦𑁆𑀥𑀦𑁆𑀢𑀸 𑀲𑀼𑀯𑀡𑁆𑀡𑀫𑀘𑁆𑀙𑀁 𑀩𑀦𑁆𑀥𑀺𑀁𑀲𑀼, 𑀇𑀤𑀸𑀦𑀺 𑀦𑁄 𑀭𑀸𑀚𑀸 𑀩𑀳𑀼𑀥𑀦𑀁 𑀤𑀲𑁆𑀲𑀢𑀻’’𑀢𑀺. 𑀢𑁂𑀧𑀺 𑀔𑁄 𑀲𑀳𑀸𑀬𑀓𑀸 𑀫𑀘𑁆𑀙𑀁 𑀦𑀸𑀯𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀸𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀭𑀜𑁆𑀜𑀸𑀧𑀺 𑀢𑀁 𑀤𑀺𑀲𑁆𑀯𑀸𑀯 ‘‘𑀓𑀺𑀁 𑀏𑀢’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀫𑀘𑁆𑀙𑁄, 𑀤𑁂𑀯𑀸’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀲𑀼𑀯𑀡𑁆𑀡𑀯𑀡𑁆𑀡𑀁 𑀫𑀘𑁆𑀙𑀁 𑀤𑀺𑀲𑁆𑀯𑀸 ‘‘𑀲𑀢𑁆𑀣𑀸 𑀏𑀢𑀲𑁆𑀲 𑀲𑀼𑀯𑀡𑁆𑀡𑀯𑀡𑁆𑀡𑀓𑀸𑀭𑀡𑀁 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀫𑀘𑁆𑀙𑀁 𑀕𑀸𑀳𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀫𑀘𑁆𑀙𑁂𑀦 𑀫𑀼𑀔𑁂 𑀯𑀺𑀯𑀝𑀫𑀢𑁆𑀢𑁂𑀬𑁂𑀯 𑀲𑀓𑀮𑀚𑁂𑀢𑀯𑀦𑀁 𑀅𑀢𑀺𑀯𑀺𑀬 𑀤𑀼𑀕𑁆𑀕𑀦𑁆𑀥𑀁 𑀅𑀳𑁄𑀲𑀺. 𑀭𑀸𑀚𑀸 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺 𑁋 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀫𑀘𑁆𑀙𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀚𑀸𑀢𑁄, 𑀓𑀲𑁆𑀫𑀸 𑀘𑀲𑁆𑀲 𑀫𑀼𑀔𑀢𑁄 𑀤𑀼𑀕𑁆𑀕𑀦𑁆𑀥𑁄 𑀯𑀸𑀬𑀢𑀻’’𑀢𑀺?

𑀅𑀬𑀁, 𑀫𑀳𑀸𑀭𑀸𑀚, 𑀓𑀲𑁆𑀲𑀧𑀪𑀕𑀯𑀢𑁄 𑀧𑀸𑀯𑀘𑀦𑁂 𑀓𑀧𑀺𑀮𑁄 𑀦𑀸𑀫 𑀪𑀺𑀓𑁆𑀔𑀼 𑀅𑀳𑁄𑀲𑀺 𑀩𑀳𑀼𑀲𑁆𑀲𑀼𑀢𑁄 𑀫𑀳𑀸𑀧𑀭𑀺𑀯𑀸𑀭𑁄 𑀮𑀸𑀪𑀢𑀡𑁆𑀳𑀸𑀬 𑀅𑀪𑀺𑀪𑀽𑀢𑁄 𑀅𑀢𑁆𑀢𑀦𑁄 𑀯𑀘𑀦𑀁 𑀅𑀕𑀡𑁆𑀳𑀦𑁆𑀢𑀸𑀦𑀁 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑁄, 𑀢𑀲𑁆𑀲 𑀘 𑀪𑀕𑀯𑀢𑁄 𑀲𑀸𑀲𑀦𑀁 𑀑𑀲𑀓𑁆𑀓𑀸𑀧𑁂𑀲𑀺, 𑀲𑁄 𑀢𑁂𑀦 𑀓𑀫𑁆𑀫𑁂𑀦 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀇𑀤𑀸𑀦𑀺 𑀫𑀘𑁆𑀙𑁄 𑀳𑀼𑀢𑁆𑀯𑀸 𑀚𑀸𑀢𑁄. 𑀬𑀁 𑀧𑀦 𑀲𑁄 𑀤𑀻𑀖𑀭𑀢𑁆𑀢𑀁 𑀩𑀼𑀤𑁆𑀥𑀯𑀘𑀦𑀁 𑀯𑀸𑀘𑁂𑀲𑀺, 𑀩𑀼𑀤𑁆𑀥𑀲𑁆𑀲 𑀘 𑀕𑀼𑀡𑀁 𑀓𑀣𑁂𑀲𑀺, 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀇𑀫𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀧𑀝𑀺𑀮𑀪𑀺. 𑀬𑀁 𑀪𑀺𑀓𑁆𑀔𑀽𑀦𑀁 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑁄 𑀅𑀳𑁄𑀲𑀺, 𑀢𑁂𑀦𑀲𑁆𑀲 𑀫𑀼𑀔𑀢𑁄 𑀤𑀼𑀕𑁆𑀕𑀦𑁆𑀥𑁄 𑀯𑀸𑀬𑀢𑀺. ‘‘𑀓𑀣𑀸𑀧𑁂𑀫𑀺 𑀦𑀁, 𑀫𑀳𑀸𑀭𑀸𑀚𑀸’’𑀢𑀺? ‘‘𑀓𑀣𑀸𑀧𑁂𑀣, 𑀪𑀦𑁆𑀢𑁂’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 𑀧𑀼𑀘𑁆𑀙𑀺 𑁋 ‘‘𑀢𑁆𑀯𑀁𑀲𑀺 𑀓𑀧𑀺𑀮𑁄’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀅𑀳𑀁 𑀓𑀧𑀺𑀮𑁄’’𑀢𑀺. ‘‘𑀓𑀼𑀢𑁄 𑀆𑀕𑀢𑁄𑀲𑀻’’𑀢𑀺? ‘‘𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀢𑁄, 𑀪𑀦𑁆𑀢𑁂’’𑀢𑀺. ‘‘𑀚𑁂𑀝𑁆𑀞𑀪𑀸𑀢𑀺𑀓𑁄 𑀢𑁂 𑀲𑀸𑀕𑀢𑁄 𑀓𑀼𑀳𑀺𑀁 𑀕𑀢𑁄’’𑀢𑀺? ‘‘𑀧𑀭𑀺𑀦𑀺𑀩𑁆𑀩𑀼𑀢𑁄, 𑀪𑀦𑁆𑀢𑁂’’𑀢𑀺. ‘‘𑀫𑀸𑀢𑀸 𑀧𑀦 𑀢𑁂 𑀲𑀸𑀥𑀺𑀦𑀻 𑀓𑀳’’𑀦𑁆𑀢𑀺? ‘‘𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸, 𑀪𑀦𑁆𑀢𑁂’’𑀢𑀺. ‘‘𑀓𑀦𑀺𑀝𑁆𑀞𑀪𑀕𑀺𑀦𑀻 𑀘 𑀢𑁂 𑀢𑀸𑀧𑀦𑀸 𑀓𑀳’’𑀦𑁆𑀢𑀺? ‘‘𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸, 𑀪𑀦𑁆𑀢𑁂’’𑀢𑀺. ‘‘𑀇𑀤𑀸𑀦𑀺 𑀢𑁆𑀯𑀁 𑀓𑀳𑀁 𑀕𑀫𑀺𑀲𑁆𑀲𑀲𑀻’’𑀢𑀺? ‘‘𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀫𑁂𑀯, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀸𑀪𑀺𑀪𑀽𑀢𑁄 𑀦𑀸𑀯𑀁 𑀲𑀻𑀲𑁂𑀦 𑀧𑀳𑀭𑀺𑀢𑁆𑀯𑀸 𑀢𑀸𑀯𑀤𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺. 𑀫𑀳𑀸𑀚𑀦𑁄 𑀲𑀁𑀯𑀺𑀕𑁆𑀕𑁄 𑀅𑀳𑁄𑀲𑀺 𑀮𑁄𑀫𑀳𑀝𑁆𑀞𑀚𑀸𑀢𑁄.

𑀅𑀣 𑀪𑀕𑀯𑀸 𑀢𑀲𑁆𑀫𑀺𑀁 𑀔𑀡𑁂 𑀲𑀦𑁆𑀦𑀺𑀧𑀢𑀺𑀢𑀸𑀬 𑀧𑀭𑀺𑀲𑀸𑀬 𑀘𑀺𑀢𑁆𑀢𑀸𑀘𑀸𑀭𑀁 𑀑𑀮𑁄𑀓𑁂𑀢𑁆𑀯𑀸 𑀢𑀗𑁆𑀔𑀡𑀸𑀦𑀼𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 ‘‘𑀥𑀫𑁆𑀫𑀘𑀭𑀺𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀏𑀢𑀤𑀸𑀳𑀼 𑀯𑀲𑀼𑀢𑁆𑀢𑀫’’𑀦𑁆𑀢𑀺 𑀲𑀼𑀢𑁆𑀢𑀦𑀺𑀧𑀸𑀢𑁂 (𑀲𑀼. 𑀦𑀺. 𑁨𑁭𑁬) 𑀓𑀧𑀺𑀮𑀲𑀼𑀢𑁆𑀢𑀁 𑀓𑀣𑁂𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁩𑁪. ‘‘𑀫𑀦𑀼𑀚𑀲𑁆𑀲 𑀧𑀫𑀢𑁆𑀢𑀘𑀸𑀭𑀺𑀦𑁄, 𑀢𑀡𑁆𑀳𑀸 𑀯𑀟𑁆𑀠𑀢𑀺 𑀫𑀸𑀮𑀼𑀯𑀸 𑀯𑀺𑀬;

𑀲𑁄 𑀧𑁆𑀮𑀯𑀢𑀻 𑀳𑀼𑀭𑀸 𑀳𑀼𑀭𑀁, 𑀨𑀮𑀫𑀺𑀘𑁆𑀙𑀁𑀯 𑀯𑀦𑀲𑁆𑀫𑀺 𑀯𑀸𑀦𑀭𑁄.

𑁩𑁩𑁫. ‘‘𑀬𑀁 𑀏𑀲𑀸 𑀲𑀳𑀢𑁂 𑀚𑀫𑁆𑀫𑀻, 𑀢𑀡𑁆𑀳𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀸;

𑀲𑁄𑀓𑀸 𑀢𑀲𑁆𑀲 𑀧𑀯𑀟𑁆𑀠𑀦𑁆𑀢𑀺, 𑀅𑀪𑀺𑀯𑀝𑁆𑀞𑀁𑀯 𑀩𑀻𑀭𑀡𑀁.

𑁩𑁩𑁬. ‘‘𑀬𑁄 𑀘𑁂𑀢𑀁 𑀲𑀳𑀢𑁂 𑀚𑀫𑁆𑀫𑀺𑀁, 𑀢𑀡𑁆𑀳𑀁 𑀮𑁄𑀓𑁂 𑀤𑀼𑀭𑀘𑁆𑀘𑀬𑀁;

𑀲𑁄𑀓𑀸 𑀢𑀫𑁆𑀳𑀸 𑀧𑀧𑀢𑀦𑁆𑀢𑀺, 𑀉𑀤𑀩𑀺𑀦𑁆𑀤𑀼𑀯 𑀧𑁄𑀓𑁆𑀔𑀭𑀸.

𑁩𑁩𑁭. ‘‘𑀢𑀁 𑀯𑁄 𑀯𑀤𑀸𑀫𑀺 𑀪𑀤𑁆𑀤𑀁 𑀯𑁄, 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸;

𑀢𑀡𑁆𑀳𑀸𑀬 𑀫𑀽𑀮𑀁 𑀔𑀡𑀣, 𑀉𑀲𑀻𑀭𑀢𑁆𑀣𑁄𑀯 𑀩𑀻𑀭𑀡𑀁;

𑀫𑀸 𑀯𑁄 𑀦𑀴𑀁𑀯 𑀲𑁄𑀢𑁄𑀯, 𑀫𑀸𑀭𑁄 𑀪𑀜𑁆𑀚𑀺 𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺.

𑀢𑀢𑁆𑀣 𑀧𑀫𑀢𑁆𑀢𑀘𑀸𑀭𑀺𑀦𑁄𑀢𑀺 𑀲𑀢𑀺𑀯𑁄𑀲𑁆𑀲𑀕𑁆𑀕𑀮𑀓𑁆𑀔𑀡𑁂𑀦 𑀧𑀫𑀸𑀤𑁂𑀦 𑀧𑀫𑀢𑁆𑀢𑀘𑀸𑀭𑀺𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦𑁂𑀯 𑀛𑀸𑀦𑀁 𑀦 𑀯𑀺𑀧𑀲𑁆𑀲𑀦𑀸 𑀦 𑀫𑀕𑁆𑀕𑀨𑀮𑀸𑀦𑀺 𑀯𑀟𑁆𑀠𑀦𑁆𑀢𑀺. 𑀬𑀣𑀸 𑀧𑀦 𑀭𑀼𑀓𑁆𑀔𑀁 𑀲𑀁𑀲𑀺𑀩𑁆𑀩𑀦𑁆𑀢𑀻 𑀧𑀭𑀺𑀬𑁄𑀦𑀦𑁆𑀥𑀦𑁆𑀢𑀻 𑀢𑀲𑁆𑀲 𑀯𑀺𑀦𑀸𑀲𑀸𑀬 𑀫𑀸𑀮𑀼𑀯𑀸𑀮𑀢𑀸 𑀯𑀟𑁆𑀠𑀢𑀺, 𑀏𑀯𑀫𑀲𑁆𑀲 𑀙 𑀤𑁆𑀯𑀸𑀭𑀸𑀦𑀺 𑀦𑀺𑀲𑁆𑀲𑀸𑀬 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀢𑀡𑁆𑀳𑀸 𑀯𑀟𑁆𑀠𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀧𑁆𑀮𑀯𑀢𑀻 𑀳𑀼𑀭𑀸 𑀳𑀼𑀭𑀦𑁆𑀢𑀺 𑀲𑁄 𑀢𑀡𑁆𑀳𑀸𑀯𑀲𑀺𑀓𑁄 𑀧𑀼𑀕𑁆𑀕𑀮𑁄 𑀪𑀯𑁂 𑀪𑀯𑁂 𑀉𑀧𑁆𑀮𑀯𑀢𑀺 𑀥𑀸𑀯𑀢𑀺. 𑀬𑀣𑀸 𑀓𑀺𑀁 𑀯𑀺𑀬𑀸𑀢𑀺? 𑀨𑀮𑀫𑀺𑀘𑁆𑀙𑀁𑀯 𑀯𑀦𑀲𑁆𑀫𑀺 𑀯𑀸𑀦𑀭𑁄, 𑀬𑀣𑀸 𑀭𑀼𑀓𑁆𑀔𑀨𑀮𑀁 𑀇𑀘𑁆𑀙𑀦𑁆𑀢𑁄 𑀯𑀸𑀦𑀭𑁄 𑀯𑀦𑀲𑁆𑀫𑀺𑀁 𑀥𑀸𑀯𑀢𑀺, 𑀢𑀲𑁆𑀲 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀲𑀸𑀔𑀁 𑀕𑀡𑁆𑀳𑀸𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀕𑀡𑁆𑀳𑀸𑀢𑀺, 𑀢𑀫𑁆𑀧𑀺 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀕𑀡𑁆𑀳𑀸𑀢𑀺, ‘‘𑀲𑀸𑀔𑀁 𑀅𑀮𑀪𑀺𑀢𑁆𑀯𑀸 𑀲𑀦𑁆𑀦𑀺𑀲𑀺𑀦𑁆𑀦𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀦𑀸𑀧𑀚𑁆𑀚𑀢𑀺, 𑀏𑀯𑀫𑁂𑀯 𑀢𑀡𑁆𑀳𑀸𑀯𑀲𑀺𑀓𑁄 𑀧𑀼𑀕𑁆𑀕𑀮𑁄 𑀳𑀼𑀭𑀸 𑀳𑀼𑀭𑀁 𑀥𑀸𑀯𑀦𑁆𑀢𑁄 ‘‘𑀆𑀭𑀫𑁆𑀫𑀡𑀁 𑀅𑀮𑀪𑀺𑀢𑁆𑀯𑀸 𑀢𑀡𑁆𑀳𑀸𑀬 𑀅𑀧𑀯𑀢𑁆𑀢𑀁 𑀧𑀢𑁆𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀦𑀸𑀧𑀚𑁆𑀚𑀢𑀺.

𑀬𑀦𑁆𑀢𑀺 𑀬𑀁 𑀧𑀼𑀕𑁆𑀕𑀮𑀁 𑀏𑀲𑀸 𑀮𑀸𑀫𑀓𑀪𑀸𑀯𑁂𑀦 𑀚𑀫𑁆𑀫𑀻 𑀯𑀺𑀲𑀸𑀳𑀸𑀭𑀢𑀸𑀬 𑀯𑀺𑀲𑀧𑀼𑀧𑁆𑀨𑀢𑀸𑀬 𑀯𑀺𑀲𑀨𑀮𑀢𑀸𑀬 𑀯𑀺𑀲𑀧𑀭𑀺𑀪𑁄𑀕𑀢𑀸𑀬 𑀭𑀽𑀧𑀸𑀤𑀻𑀲𑀼 𑀯𑀺𑀲𑀢𑁆𑀢𑀢𑀸𑀬 𑀆𑀲𑀢𑁆𑀢𑀢𑀸𑀬 𑀯𑀺𑀲𑀢𑁆𑀢𑀺𑀓𑀸𑀢𑀺 𑀲𑀗𑁆𑀔𑁆𑀬𑀁 𑀕𑀢𑀸 𑀙𑀤𑁆𑀯𑀸𑀭𑀺𑀓𑀢𑀡𑁆𑀳𑀸 𑀅𑀪𑀺𑀪𑀯𑀢𑀺. 𑀬𑀣𑀸 𑀦𑀸𑀫 𑀯𑀲𑁆𑀲𑀸𑀦𑁂 𑀧𑀼𑀦𑀧𑁆𑀧𑀼𑀦𑀁 𑀯𑀲𑁆𑀲𑀦𑁆𑀢𑁂𑀦 𑀤𑁂𑀯𑁂𑀦 𑀅𑀪𑀺𑀯𑀝𑁆𑀞𑀁 𑀩𑀻𑀭𑀡𑀢𑀺𑀡𑀁 𑀯𑀟𑁆𑀠𑀢𑀺, 𑀏𑀯𑀁 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀦𑁆𑀢𑁄 𑀯𑀝𑁆𑀝𑀫𑀽𑀮𑀓𑀸 𑀲𑁄𑀓𑀸 𑀅𑀪𑀺𑀯𑀟𑁆𑀠𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑀼𑀭𑀘𑁆𑀘𑀬𑀦𑁆𑀢𑀺 𑀬𑁄 𑀧𑀦 𑀧𑀼𑀕𑁆𑀕𑀮𑁄 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀧𑀚𑀳𑀺𑀢𑀼𑀁 𑀤𑀼𑀓𑁆𑀓𑀭𑀢𑀸𑀬 𑀤𑀼𑀭𑀘𑁆𑀘𑀬𑀁 𑀢𑀡𑁆𑀳𑀁 𑀲𑀳𑀢𑀺 𑀅𑀪𑀺𑀪𑀯𑀢𑀺, 𑀢𑀫𑁆𑀳𑀸 𑀧𑀼𑀕𑁆𑀕𑀮𑀸 𑀯𑀝𑁆𑀝𑀫𑀽𑀮𑀓𑀸 𑀲𑁄𑀓𑀸 𑀧𑀧𑀢𑀦𑁆𑀢𑀺. 𑀬𑀣𑀸 𑀦𑀸𑀫 𑀧𑁄𑀓𑁆𑀔𑀭𑁂 𑀧𑀤𑀼𑀫𑀧𑀢𑁆𑀢𑁂 𑀧𑀢𑀺𑀢𑀁 𑀉𑀤𑀓𑀩𑀺𑀦𑁆𑀤𑀼 𑀦 𑀧𑀢𑀺𑀝𑁆𑀞𑀸𑀢𑀺, 𑀏𑀯𑀁 𑀦 𑀧𑀢𑀺𑀝𑁆𑀞𑀳𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀢𑀁 𑀯𑁄 𑀯𑀤𑀸𑀫𑀻𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀅𑀳𑀁 𑀢𑀼𑀫𑁆𑀳𑁂 𑀯𑀤𑀸𑀫𑀺. 𑀪𑀤𑁆𑀤𑀁 𑀯𑁄𑀢𑀺 𑀪𑀤𑁆𑀤𑀁 𑀢𑀼𑀫𑁆𑀳𑀸𑀓𑀁 𑀳𑁄𑀢𑀼, 𑀫𑀸 𑀅𑀳𑀁 𑀓𑀧𑀺𑀮𑁄 𑀯𑀺𑀬 𑀯𑀺𑀦𑀸𑀲𑀁 𑀧𑀸𑀧𑀼𑀡𑀣𑀸𑀢𑀺 𑀅𑀢𑁆𑀣𑁄. 𑀫𑀽𑀮𑀦𑁆𑀢𑀺 𑀇𑀫𑀺𑀲𑁆𑀲𑀸 𑀙𑀤𑁆𑀯𑀸𑀭𑀺𑀓𑀢𑀡𑁆𑀳𑀸𑀬 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀫𑀽𑀮𑀁 𑀔𑀡𑀣. 𑀓𑀺𑀁 𑀯𑀺𑀬𑀸𑀢𑀺? 𑀉𑀲𑀻𑀭𑀢𑁆𑀣𑁄𑀯 𑀩𑀻𑀭𑀡𑀁, 𑀬𑀣𑀸 𑀉𑀲𑀻𑀭𑁂𑀦 𑀅𑀢𑁆𑀣𑀺𑀓𑁄 𑀧𑀼𑀭𑀺𑀲𑁄 𑀫𑀳𑀦𑁆𑀢𑁂𑀦 𑀓𑀼𑀤𑀸𑀮𑁂𑀦 𑀩𑀻𑀭𑀡𑀁 𑀔𑀡𑀢𑀺, 𑀏𑀯𑀫𑀲𑁆𑀲𑀸 𑀫𑀽𑀮𑀁 𑀔𑀡𑀣𑀸𑀢𑀺 𑀅𑀢𑁆𑀣𑁄. 𑀫𑀸 𑀯𑁄 𑀦𑀴𑀁𑀯 𑀲𑁄𑀢𑁄𑀯, 𑀫𑀸𑀭𑁄 𑀪𑀜𑁆𑀚𑀺 𑀧𑀼𑀦𑀧𑁆𑀧𑀼𑀦𑀦𑁆𑀢𑀺 𑀫𑀸 𑀢𑀼𑀫𑁆𑀳𑁂 𑀦𑀤𑀻𑀲𑁄𑀢𑁂 𑀚𑀸𑀢𑀁 𑀦𑀴𑀁 𑀫𑀳𑀸𑀯𑁂𑀕𑁂𑀦 𑀆𑀕𑀢𑁄 𑀦𑀤𑀻𑀲𑁄𑀢𑁄 𑀯𑀺𑀬 𑀓𑀺𑀮𑁂𑀲𑀫𑀸𑀭𑁄 𑀫𑀭𑀡𑀫𑀸𑀭𑁄 𑀤𑁂𑀯𑀧𑀼𑀢𑁆𑀢𑀫𑀸𑀭𑁄 𑀘 𑀧𑀼𑀦𑀧𑁆𑀧𑀼𑀦𑀁 𑀪𑀜𑁆𑀚𑀢𑀽𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀧𑀜𑁆𑀘𑀲𑀢𑀸𑀧𑀺 𑀓𑁂𑀯𑀝𑁆𑀝𑀧𑀼𑀢𑁆𑀢𑀸 𑀲𑀁𑀯𑁂𑀕𑀁 𑀆𑀧𑀚𑁆𑀚𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀁 𑀧𑀢𑁆𑀣𑀬𑀫𑀸𑀦𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀢𑁆𑀯𑀸 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀆𑀦𑁂𑀜𑁆𑀚𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑀧𑀭𑀺𑀪𑁄𑀕𑁂𑀦 𑀏𑀓𑀧𑀭𑀺𑀪𑁄𑀕𑀸 𑀅𑀳𑁂𑀲𑀼𑀦𑁆𑀢𑀺.

𑀓𑀧𑀺𑀮𑀫𑀘𑁆𑀙𑀯𑀢𑁆𑀣𑀼 𑀧𑀞𑀫𑀁.

𑁨. 𑀲𑀽𑀓𑀭𑀧𑁄𑀢𑀺𑀓𑀸𑀯𑀢𑁆𑀣𑀼

𑀬𑀣𑀸𑀧𑀺 𑀫𑀽𑀮𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀕𑀽𑀣𑀲𑀽𑀓𑀭𑀧𑁄𑀢𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀲𑀢𑁆𑀣𑀸 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀏𑀓𑀁 𑀲𑀽𑀓𑀭𑀧𑁄𑀢𑀺𑀓𑀁 𑀤𑀺𑀲𑁆𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀢𑀲𑁆𑀲 𑀲𑀺𑀢𑀁 𑀓𑀭𑁄𑀦𑁆𑀢𑀲𑁆𑀲 𑀫𑀼𑀔𑀯𑀺𑀯𑀭𑀦𑀺𑀕𑁆𑀕𑀢𑀁 𑀤𑀦𑁆𑀢𑁄𑀪𑀸𑀲𑀫𑀡𑁆𑀟𑀮𑀁 𑀤𑀺𑀲𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑁄 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀲𑀺𑀢𑀲𑁆𑀲 𑀧𑀸𑀢𑀼𑀓𑀫𑁆𑀫𑀸𑀬𑀸’’𑀢𑀺 𑀲𑀺𑀢𑀓𑀸𑀭𑀡𑀁 𑀧𑀼𑀘𑁆𑀙𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 𑁋 ‘‘𑀧𑀲𑁆𑀲𑀲𑁂𑀢𑀁, 𑀆𑀦𑀦𑁆𑀤, 𑀲𑀽𑀓𑀭𑀧𑁄𑀢𑀺𑀓’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. 𑀏𑀲𑀸 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀏𑀓𑀸𑀬 𑀆𑀲𑀦𑀲𑀸𑀮𑀸𑀬 𑀲𑀸𑀫𑀦𑁆𑀢𑀸 𑀓𑀼𑀓𑁆𑀓𑀼𑀝𑀻 𑀅𑀳𑁄𑀲𑀺. 𑀲𑀸 𑀏𑀓𑀲𑁆𑀲 𑀬𑁄𑀕𑀸𑀯𑀘𑀭𑀲𑁆𑀲 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀥𑀫𑁆𑀫𑀖𑁄𑀲𑀁 𑀲𑀼𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀩𑁆𑀩𑀭𑀻 𑀦𑀸𑀫 𑀭𑀸𑀚𑀥𑀻𑀢𑀸 𑀅𑀳𑁄𑀲𑀺. 𑀲𑀸 𑀅𑀧𑀭𑀪𑀸𑀕𑁂 𑀲𑀭𑀻𑀭𑀯𑀮𑀜𑁆𑀚𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑀸 𑀧𑀼𑀴𑀯𑀓𑀭𑀸𑀲𑀺𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀧𑀼𑀴𑀯𑀓𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀞𑀫𑀁 𑀛𑀸𑀦𑀁 𑀧𑀝𑀺𑀮𑀪𑀺. 𑀲𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁄 𑀘𑀯𑀺𑀢𑁆𑀯𑀸 𑀧𑀼𑀦 𑀕𑀢𑀺𑀯𑀲𑁂𑀦 𑀆𑀮𑀼𑀮𑀫𑀸𑀦𑀸 𑀇𑀤𑀸𑀦𑀺 𑀲𑀽𑀓𑀭𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺, 𑀇𑀤𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸 𑀫𑀬𑀸 𑀲𑀺𑀢𑀁 𑀧𑀸𑀢𑀼𑀓𑀢𑀦𑁆𑀢𑀺. 𑀢𑀁 𑀲𑀼𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀧𑁆𑀧𑀫𑀼𑀔𑀸 𑀪𑀺𑀓𑁆𑀔𑀽 𑀫𑀳𑀦𑁆𑀢𑀁 𑀲𑀁𑀯𑁂𑀕𑀁 𑀧𑀝𑀺𑀮𑀪𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀲𑀁𑀯𑁂𑀕𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀪𑀯𑀢𑀡𑁆𑀳𑀸𑀬 𑀆𑀤𑀻𑀦𑀯𑀁 𑀧𑀓𑀸𑀲𑁂𑀦𑁆𑀢𑁄 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀺𑀢𑀓𑁄𑀯 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁩𑁮. ‘‘𑀬𑀣𑀸𑀧𑀺 𑀫𑀽𑀮𑁂 𑀅𑀦𑀼𑀧𑀤𑁆𑀤𑀯𑁂 𑀤𑀴𑁆𑀳𑁂,

𑀙𑀺𑀦𑁆𑀦𑁄𑀧𑀺 𑀭𑀼𑀓𑁆𑀔𑁄 𑀧𑀼𑀦𑀭𑁂𑀯 𑀭𑀽𑀳𑀢𑀺;

𑀏𑀯𑀫𑁆𑀧𑀺 𑀢𑀡𑁆𑀳𑀸𑀦𑀼𑀲𑀬𑁂 𑀅𑀦𑀽𑀳𑀢𑁂,

𑀦𑀺𑀩𑁆𑀩𑀢𑁆𑀢𑀢𑀻 𑀤𑀼𑀓𑁆𑀔𑀫𑀺𑀤𑀁 𑀧𑀼𑀦𑀧𑁆𑀧𑀼𑀦𑀁.

𑁩𑁩𑁯. ‘‘𑀬𑀲𑁆𑀲 𑀙𑀢𑁆𑀢𑀺𑀁𑀲𑀢𑀺 𑀲𑁄𑀢𑀸, 𑀫𑀦𑀸𑀧𑀲𑀯𑀦𑀸 𑀪𑀼𑀲𑀸;

𑀫𑀳𑀸𑀯𑀳𑀦𑁆𑀢𑀺 𑀤𑀼𑀤𑁆𑀤𑀺𑀝𑁆𑀞𑀺𑀁, 𑀲𑀗𑁆𑀓𑀧𑁆𑀧𑀸 𑀭𑀸𑀕𑀦𑀺𑀲𑁆𑀲𑀺𑀢𑀸.

𑁩𑁪𑁦. ‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸, 𑀮𑀢𑀸 𑀉𑀧𑁆𑀧𑀚𑁆𑀚 𑀢𑀺𑀝𑁆𑀞𑀢𑀺;

𑀢𑀜𑁆𑀘 𑀤𑀺𑀲𑁆𑀯𑀸 𑀮𑀢𑀁 𑀚𑀸𑀢𑀁, 𑀫𑀽𑀮𑀁 𑀧𑀜𑁆𑀜𑀸𑀬 𑀙𑀺𑀦𑁆𑀤𑀣.

𑁩𑁪𑁧. ‘‘𑀲𑀭𑀺𑀢𑀸𑀦𑀺 𑀲𑀺𑀦𑁂𑀳𑀺𑀢𑀸𑀦𑀺 𑀘,

𑀲𑁄𑀫𑀦𑀲𑁆𑀲𑀸𑀦𑀺 𑀳𑁄𑀦𑁆𑀢𑀺 𑀚𑀦𑁆𑀢𑀼𑀦𑁄;

𑀢𑁂 𑀲𑀸𑀢𑀲𑀺𑀢𑀸 𑀲𑀼𑀔𑁂𑀲𑀺𑀦𑁄,

𑀢𑁂 𑀯𑁂 𑀚𑀸𑀢𑀺𑀚𑀭𑀽𑀧𑀕𑀸 𑀦𑀭𑀸.

𑁩𑁪𑁨. ‘‘𑀢𑀲𑀺𑀡𑀸𑀬 𑀧𑀼𑀭𑀓𑁆𑀔𑀢𑀸 𑀧𑀚𑀸,

𑀧𑀭𑀺𑀲𑀧𑁆𑀧𑀦𑁆𑀢𑀺 𑀲𑀲𑁄𑀯 𑀩𑀦𑁆𑀥𑀺𑀢𑁄;

𑀲𑀁𑀬𑁄𑀚𑀦𑀲𑀗𑁆𑀕𑀲𑀢𑁆𑀢𑀓𑀸,

𑀤𑀼𑀓𑁆𑀔𑀫𑀼𑀧𑁂𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀘𑀺𑀭𑀸𑀬.

𑁩𑁪𑁩. ‘‘𑀢𑀲𑀺𑀡𑀸𑀬 𑀧𑀼𑀭𑀓𑁆𑀔𑀢𑀸 𑀧𑀚𑀸,

𑀧𑀭𑀺𑀲𑀧𑁆𑀧𑀦𑁆𑀢𑀺 𑀲𑀲𑁄𑀯 𑀩𑀦𑁆𑀥𑀺𑀢𑁄;

𑀢𑀲𑁆𑀫𑀸 𑀢𑀲𑀺𑀡𑀁 𑀯𑀺𑀦𑁄𑀤𑀬𑁂,

𑀆𑀓𑀗𑁆𑀔𑀦𑁆𑀢 𑀯𑀺𑀭𑀸𑀕𑀫𑀢𑁆𑀢𑀦𑁄’’𑀢𑀺.

𑀢𑀢𑁆𑀣 𑀫𑀽𑀮𑁂𑀢𑀺 𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀢𑀼𑀥𑀸 𑀳𑁂𑀝𑁆𑀞𑀸 𑀘 𑀉𑀚𑀼𑀓𑀫𑁂𑀯 𑀕𑀢𑁂 𑀧𑀜𑁆𑀘𑀯𑀺𑀥𑀫𑀽𑀮𑁂 𑀙𑁂𑀤𑀦𑀨𑀸𑀮𑀦𑀧𑀸𑀘𑀦𑀯𑀺𑀚𑁆𑀛𑀦𑀸𑀤𑀻𑀦𑀁 𑀓𑁂𑀦𑀘𑀺 𑀉𑀧𑀤𑁆𑀤𑀯𑁂𑀦 𑀅𑀦𑀼𑀧𑀤𑁆𑀤𑀯𑁂 𑀣𑀺𑀭𑀧𑀢𑁆𑀢𑀢𑀸𑀬 𑀤𑀴𑁆𑀳𑁂 𑀲𑁄 𑀭𑀼𑀓𑁆𑀔𑁄 𑀉𑀧𑀭𑀺𑀘𑁆𑀙𑀺𑀦𑁆𑀦𑁄𑀧𑀺 𑀲𑀸𑀔𑀸𑀦𑀁 𑀯𑀲𑁂𑀦 𑀧𑀼𑀦𑀤𑁂𑀯 𑀭𑀽𑀳𑀢𑀺, 𑀏𑀯𑀫𑁂𑀯 𑀙𑀤𑁆𑀯𑀸𑀭𑀺𑀓𑀸𑀬 𑀢𑀡𑁆𑀳𑀸𑀬 𑀅𑀦𑀼𑀲𑀬𑁂 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀅𑀦𑀼𑀳𑀢𑁂 𑀅𑀲𑀫𑀼𑀘𑁆𑀙𑀺𑀦𑁆𑀦𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂 𑀚𑀸𑀢𑀺𑀆𑀤𑀺𑀪𑁂𑀤𑀁 𑀇𑀤𑀁 𑀤𑀼𑀓𑁆𑀔𑀁 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑁆𑀩𑀢𑁆𑀢𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀬𑀲𑁆𑀲𑀸𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 ‘‘𑀇𑀢𑀺 𑀅𑀚𑁆𑀛𑀢𑁆𑀢𑀺𑀓𑀲𑁆𑀲𑀽𑀧𑀸𑀤𑀸𑀬 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀩𑀸𑀳𑀺𑀭𑀲𑁆𑀲𑀽𑀧𑀸𑀤𑀸𑀬 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻’’𑀢𑀺 𑀇𑀫𑁂𑀲𑀁 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀁 𑀯𑀲𑁂𑀦 𑀙𑀢𑁆𑀢𑀺𑀁𑀲𑀢𑀺𑀬𑀸 𑀲𑁄𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀫𑀦𑀸𑀧𑁂𑀲𑀼 𑀭𑀽𑀧𑀸𑀤𑀻𑀲𑀼 𑀆𑀲𑀯𑀢𑀺 𑀧𑀯𑀢𑁆𑀢𑀢𑀻𑀢𑀺 𑀫𑀦𑀸𑀧𑀲𑀯𑀦𑀸 𑀢𑀡𑁆𑀳𑀸 𑀪𑀼𑀲𑀸 𑀩𑀮𑀯𑀢𑀻 𑀳𑁄𑀢𑀺, 𑀢𑀁 𑀧𑀼𑀕𑁆𑀕𑀮𑀁 𑀯𑀺𑀧𑀦𑁆𑀦𑀜𑀸𑀡𑀢𑀸𑀬 𑀤𑀼𑀤𑁆𑀤𑀺𑀝𑁆𑀞𑀺𑀁 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀫𑀳𑀦𑁆𑀢𑀪𑀸𑀯𑁂𑀦 𑀫𑀳𑀸 𑀳𑀼𑀢𑁆𑀯𑀸 𑀛𑀸𑀦𑀁 𑀯𑀸 𑀯𑀺𑀧𑀲𑁆𑀲𑀦𑀁 𑀯𑀸 𑀅𑀦𑀺𑀲𑁆𑀲𑀸𑀬 𑀭𑀸𑀕𑀦𑀺𑀲𑁆𑀲𑀺𑀢𑀸 𑀲𑀗𑁆𑀓𑀧𑁆𑀧𑀸 𑀯𑀳𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸𑀢𑀺 𑀇𑀫𑁂 𑀢𑀡𑁆𑀳𑀸𑀲𑁄𑀢𑀸 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀦𑀁 𑀯𑀲𑁂𑀦 𑀲𑀩𑁆𑀩𑁂𑀲𑀼 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑀯𑀦𑀢𑁄, 𑀲𑀩𑁆𑀩𑀸𑀧𑀺 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸𑀢𑀺 𑀲𑀩𑁆𑀩𑀪𑀯𑁂𑀲𑀼 𑀯𑀸 𑀲𑀯𑀦𑀢𑁄 𑀲𑀩𑁆𑀩𑀥𑀺 𑀲𑀯𑀦𑁆𑀢𑀺 𑀦𑀸𑀫. 𑀮𑀢𑀸𑀢𑀺 𑀧𑀮𑀺𑀯𑁂𑀞𑀦𑀝𑁆𑀞𑁂𑀦 𑀲𑀁𑀲𑀺𑀩𑁆𑀩𑀦𑀝𑁆𑀞𑁂𑀦 𑀘 𑀮𑀢𑀸 𑀯𑀺𑀬𑀸𑀢𑀺 𑀮𑀢𑀸. 𑀉𑀧𑁆𑀧𑀚𑁆𑀚 𑀢𑀺𑀝𑁆𑀞𑀢𑀻𑀢𑀺 𑀙𑀳𑀺 𑀤𑁆𑀯𑀸𑀭𑁂𑀳𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀢𑀺𑀝𑁆𑀞𑀢𑀺. 𑀢𑀜𑁆𑀘 𑀤𑀺𑀲𑁆𑀯𑀸𑀢𑀺 𑀢𑀁 𑀧𑀦 𑀢𑀡𑁆𑀳𑀸𑀮𑀢𑀁 ‘‘𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀚𑀸𑀢𑀝𑁆𑀞𑀸𑀦𑀯𑀲𑁂𑀦 𑀤𑀺𑀲𑁆𑀯𑀸. 𑀧𑀜𑁆𑀜𑀸𑀬𑀸𑀢𑀺 𑀲𑀢𑁆𑀣𑁂𑀦 𑀯𑀦𑁂 𑀚𑀸𑀢𑀁 𑀮𑀢𑀁 𑀯𑀺𑀬 𑀫𑀕𑁆𑀕𑀧𑀜𑁆𑀜𑀸𑀬 𑀫𑀽𑀮𑁂 𑀙𑀺𑀦𑁆𑀤𑀣𑀸𑀢𑀺 𑀅𑀢𑁆𑀣𑁄.

𑀲𑀭𑀺𑀢𑀸𑀦𑀻𑀢𑀺 𑀅𑀦𑀼𑀲𑀝𑀸𑀦𑀺 𑀧𑀬𑀸𑀢𑀸𑀦𑀺. 𑀲𑀺𑀦𑁂𑀳𑀺𑀢𑀸𑀦𑀻𑀢𑀺 𑀘𑀻𑀯𑀭𑀸𑀤𑀻𑀲𑀼 𑀧𑀯𑀢𑁆𑀢𑀲𑀺𑀦𑁂𑀳𑀯𑀲𑁂𑀦 𑀲𑀺𑀦𑁂𑀳𑀺𑀢𑀸𑀦𑀺 𑀘, 𑀢𑀡𑁆𑀳𑀸𑀲𑀺𑀦𑁂𑀳𑀫𑀓𑁆𑀔𑀺𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀲𑁄𑀫𑀦𑀲𑁆𑀲𑀸𑀦𑀻𑀢𑀺 𑀢𑀡𑁆𑀳𑀸𑀯𑀲𑀺𑀓𑀲𑁆𑀲 𑀚𑀦𑁆𑀢𑀼𑀦𑁄 𑀏𑀯𑀭𑀽𑀧𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺 𑀪𑀯𑀦𑁆𑀢𑀺. 𑀢𑁂 𑀲𑀸𑀢𑀲𑀺𑀢𑀸𑀢𑀺 𑀢𑁂 𑀢𑀡𑁆𑀳𑀸𑀯𑀲𑀺𑀓𑀸 𑀧𑀼𑀕𑁆𑀕𑀮𑀸 𑀲𑀸𑀢𑀦𑀺𑀲𑁆𑀲𑀺𑀢𑀸 𑀲𑀼𑀔𑀦𑀺𑀲𑁆𑀲𑀺𑀢𑀸 𑀘 𑀳𑀼𑀢𑁆𑀯𑀸 𑀲𑀼𑀔𑁂𑀲𑀺𑀦𑁄 𑀲𑀼𑀔𑀧𑀭𑀺𑀬𑁂𑀲𑀺𑀦𑁄 𑀪𑀯𑀦𑁆𑀢𑀺. 𑀢𑁂 𑀯𑁂𑀢𑀺 𑀬𑁂 𑀏𑀯𑀭𑀽𑀧𑀸 𑀦𑀭𑀸, 𑀢𑁂 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀦𑀺 𑀉𑀧𑀕𑀘𑁆𑀙𑀦𑁆𑀢𑀺𑀬𑁂𑀯𑀸𑀢𑀺 𑀚𑀸𑀢𑀺𑀚𑀭𑀽𑀧𑀕𑀸 𑀦𑀸𑀫 𑀳𑁄𑀦𑁆𑀢𑀺. 𑀧𑀚𑀸𑀢𑀺 𑀇𑀫𑁂 𑀲𑀢𑁆𑀢𑀸 𑀢𑀸𑀲𑀓𑀭𑀡𑁂𑀦 𑀢𑀲𑀺𑀡𑀸𑀢𑀺 𑀲𑀗𑁆𑀔𑁆𑀬𑀁 𑀕𑀢𑀸𑀬 𑀢𑀡𑁆𑀳𑀸𑀬 𑀧𑀼𑀭𑀓𑁆𑀔𑀢𑀸 𑀧𑀭𑀺𑀯𑀸𑀭𑀺𑀢𑀸 𑀳𑀼𑀢𑁆𑀯𑀸.

𑀩𑀦𑁆𑀥𑀺𑀢𑁄𑀢𑀺 𑀮𑀼𑀤𑁆𑀤𑁂𑀦 𑀅𑀭𑀜𑁆𑀜𑁂 𑀩𑀤𑁆𑀥𑁄 𑀲𑀲𑁄 𑀯𑀺𑀬 𑀧𑀭𑀺𑀲𑀧𑁆𑀧𑀦𑁆𑀢𑀺 𑀪𑀸𑀬𑀦𑁆𑀢𑀺. 𑀲𑀁𑀬𑁄𑀚𑀦𑀲𑀗𑁆𑀕𑀲𑀢𑁆𑀢𑀓𑀸𑀢𑀺 𑀤𑀲𑀯𑀺𑀥𑁂𑀦 𑀲𑀁𑀬𑁄𑀚𑀦𑀲𑀗𑁆𑀕𑁂𑀦 𑀘𑁂𑀯 𑀲𑀢𑁆𑀢𑀯𑀺𑀥𑁂𑀦 𑀭𑀸𑀕𑀲𑀗𑁆𑀕𑀸𑀤𑀺𑀦𑀸 𑀘 𑀲𑀢𑁆𑀢𑀸 𑀩𑀤𑁆𑀥𑀸 𑀢𑀲𑁆𑀫𑀺𑀁 𑀯𑀸 𑀮𑀕𑁆𑀕𑀸 𑀳𑀼𑀢𑁆𑀯𑀸. 𑀘𑀺𑀭𑀸𑀬𑀸𑀢𑀺 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀚𑀸𑀢𑀺𑀆𑀤𑀺𑀓𑀁 𑀤𑀼𑀓𑁆𑀔𑀁 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀢𑀲𑀺𑀡𑀸𑀬 𑀧𑀼𑀭𑀓𑁆𑀔𑀢𑀸 𑀧𑀮𑀺𑀯𑁂𑀞𑀺𑀢𑀸 𑀲𑀢𑁆𑀢𑀸, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀯𑀺𑀭𑀸𑀕𑀁 𑀭𑀸𑀕𑀸𑀤𑀺𑀯𑀺𑀕𑀫𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀣𑁂𑀦𑁆𑀢𑁄 𑀆𑀓𑀗𑁆𑀓𑀫𑀸𑀦𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑁂𑀢𑀁 𑀢𑀲𑀺𑀡𑀁 𑀯𑀺𑀦𑁄𑀤𑀬𑁂 𑀧𑀦𑀼𑀤𑀺𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀙𑀟𑁆𑀟𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼.

𑀲𑀸𑀧𑀺 𑀔𑁄 𑀲𑀽𑀓𑀭𑀧𑁄𑀢𑀺𑀓𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀲𑀼𑀯𑀡𑁆𑀡𑀪𑀽𑀫𑀺𑀬𑀁 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀢𑁄 𑀘𑀼𑀢𑀸 𑀩𑀸𑀭𑀸𑀡𑀲𑀺𑀬𑀁, 𑀢𑀢𑁄 𑀘𑀼𑀢𑀸 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑁂 𑀅𑀲𑁆𑀲𑀯𑀸𑀡𑀺𑀚𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀢𑁄 𑀘𑀼𑀢𑀸 𑀓𑀸𑀯𑀻𑀭𑀧𑀝𑁆𑀝𑀦𑁂 𑀦𑀸𑀯𑀺𑀓𑀲𑁆𑀲 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀢𑁄 𑀘𑀼𑀢𑀸 𑀅𑀦𑀼𑀭𑀸𑀥𑀧𑀼𑀭𑁂 𑀇𑀲𑁆𑀲𑀭𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀢𑁄 𑀘𑀼𑀢𑀸 𑀢𑀲𑁆𑀲𑁂𑀯 𑀤𑀓𑁆𑀔𑀺𑀡𑀤𑀺𑀲𑀸𑀬 𑀪𑁄𑀓𑁆𑀓𑀦𑁆𑀢𑀕𑀸𑀫𑁂 𑀲𑀼𑀫𑀦𑀲𑁆𑀲 𑀦𑀸𑀫 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀥𑀻𑀢𑀸 𑀦𑀸𑀫𑁂𑀦 𑀲𑀼𑀫𑀦𑀸 𑀏𑀯 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀅𑀣𑀲𑁆𑀲𑀸 𑀧𑀺𑀢𑀸 𑀢𑀲𑁆𑀫𑀺𑀁 𑀕𑀸𑀫𑁂 𑀙𑀟𑁆𑀟𑀺𑀢𑁂 𑀤𑀻𑀖𑀯𑀸𑀧𑀺𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀫𑀳𑀸𑀫𑀼𑀦𑀺𑀕𑀸𑀫𑁂 𑀦𑀸𑀫 𑀯𑀲𑀺. 𑀢𑀢𑁆𑀣 𑀦𑀁 𑀤𑀼𑀝𑁆𑀞𑀕𑀸𑀫𑀡𑀺𑀭𑀜𑁆𑀜𑁄 𑀅𑀫𑀘𑁆𑀘𑁄 𑀮𑀓𑀼𑀡𑁆𑀟𑀓𑀅𑀢𑀺𑀫𑁆𑀩𑀭𑁄 𑀦𑀸𑀫 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀕𑀢𑁄 𑀤𑀺𑀲𑁆𑀯𑀸 𑀫𑀳𑀦𑁆𑀢𑀁 𑀫𑀗𑁆𑀕𑀮𑀁 𑀓𑀢𑁆𑀯𑀸 𑀆𑀤𑀸𑀬 𑀫𑀳𑀸𑀧𑀼𑀡𑁆𑀡𑀕𑀸𑀫𑀁 𑀕𑀢𑁄. 𑀅𑀣 𑀦𑀁 𑀓𑁄𑀝𑀺𑀧𑀩𑁆𑀩𑀢𑀫𑀳𑀸𑀯𑀺𑀳𑀸𑀭𑀯𑀸𑀲𑀻 𑀫𑀳𑀸𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀦𑀸𑀫 𑀢𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀢𑀲𑁆𑀲𑀸 𑀕𑁂𑀳𑀤𑁆𑀯𑀸𑀭𑁂 𑀞𑀺𑀢𑁄 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀓𑀣𑁂𑀲𑀺, ‘‘𑀆𑀯𑀼𑀲𑁄, 𑀲𑀽𑀓𑀭𑀧𑁄𑀢𑀺𑀓𑀸 𑀦𑀸𑀫 𑀮𑀓𑀼𑀡𑁆𑀟𑀓𑀅𑀢𑀺𑀫𑁆𑀩𑀭𑀫𑀳𑀸𑀫𑀢𑁆𑀢𑀲𑁆𑀲 𑀪𑀭𑀺𑀬𑀪𑀸𑀯𑀁 𑀧𑀢𑁆𑀢𑀸, 𑀅𑀳𑁄 𑀅𑀘𑁆𑀙𑀭𑀺𑀬’’𑀦𑁆𑀢𑀺. 𑀲𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀅𑀢𑀻𑀢𑀪𑀯𑁂 𑀉𑀕𑁆𑀖𑀸𑀝𑁂𑀢𑁆𑀯𑀸 𑀚𑀸𑀢𑀺𑀲𑁆𑀲𑀭𑀜𑀸𑀡𑀁 𑀧𑀝𑀺𑀮𑀪𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑀸 𑀲𑀸𑀫𑀺𑀓𑀁 𑀬𑀸𑀘𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀇𑀲𑁆𑀲𑀭𑀺𑀬𑁂𑀦 𑀧𑀜𑁆𑀘𑀩𑀮𑀓𑀢𑁆𑀣𑁂𑀭𑀻𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑁂 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀓𑀣𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀧𑀘𑁆𑀙𑀸 𑀤𑀫𑀺𑀴𑀫𑀤𑁆𑀤𑀦𑁂 𑀓𑀢𑁂 𑀜𑀸𑀢𑀻𑀦𑀁 𑀯𑀲𑀦𑀝𑁆𑀞𑀸𑀦𑀁 𑀪𑁄𑀓𑁆𑀓𑀦𑁆𑀢𑀕𑀸𑀫𑀫𑁂𑀯 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀯𑀲𑀦𑁆𑀢𑀻 𑀓𑀮𑁆𑀮𑀫𑀳𑀸𑀯𑀺𑀳𑀸𑀭𑁂 𑀆𑀲𑀻𑀯𑀺𑀲𑁄𑀧𑀫𑀲𑀼𑀢𑁆𑀢𑀦𑁆𑀢𑀁 𑀲𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀲𑀸 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀳𑀺 𑀧𑀼𑀘𑁆𑀙𑀺𑀢𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀲𑀩𑁆𑀩𑀁 𑀇𑀫𑀁 𑀧𑀯𑀢𑁆𑀢𑀺𑀁 𑀦𑀺𑀭𑀦𑁆𑀢𑀭𑀁 𑀓𑀣𑁂𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀫𑀡𑁆𑀟𑀮𑀸𑀭𑀸𑀫𑀯𑀸𑀲𑀺𑀦𑀸 𑀥𑀫𑁆𑀫𑀧𑀤𑀪𑀸𑀡𑀓𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 ‘‘𑀅𑀳𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀓𑀼𑀓𑁆𑀓𑀼𑀝𑀻 𑀳𑀼𑀢𑁆𑀯𑀸 𑀢𑀢𑁆𑀣 𑀲𑁂𑀦𑀲𑁆𑀲 𑀲𑀦𑁆𑀢𑀺𑀓𑀸 𑀲𑀻𑀲𑀘𑁆𑀙𑁂𑀤𑀁 𑀧𑀢𑁆𑀯𑀸 𑀭𑀸𑀚𑀕𑀳𑁂 𑀦𑀺𑀩𑁆𑀩𑀢𑁆𑀢𑀸, 𑀧𑀭𑀺𑀩𑁆𑀩𑀸𑀚𑀺𑀓𑀸𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀸 𑀦𑀘𑀺𑀭𑀲𑁆𑀲𑁂𑀯 𑀘𑀯𑀺𑀢𑁆𑀯𑀸 𑀲𑀽𑀓𑀭𑀬𑁄𑀦𑀺𑀁 𑀕𑀦𑁆𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀲𑀼𑀯𑀡𑁆𑀡𑀪𑀽𑀫𑀺𑀁, 𑀢𑀢𑁄 𑀘𑀼𑀢𑀸 𑀩𑀸𑀭𑀸𑀡𑀲𑀺𑀁, 𑀢𑀢𑁄 𑀘𑀼𑀢𑀸 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑀁, 𑀢𑀢𑁄 𑀘𑀼𑀢𑀸 𑀓𑀸𑀯𑀻𑀭𑀧𑀝𑁆𑀝𑀦𑀁, 𑀢𑀢𑁄 𑀘𑀼𑀢𑀸 𑀅𑀦𑀼𑀭𑀸𑀥𑀧𑀼𑀭𑀁, 𑀢𑀢𑁄 𑀘𑀼𑀢𑀸 𑀪𑁄𑀓𑁆𑀓𑀦𑁆𑀢𑀕𑀸𑀫’’𑀦𑁆𑀢𑀺 𑀏𑀯𑀁 𑀲𑀫𑀯𑀺𑀲𑀫𑁂 𑀢𑁂𑀭𑀲 𑀅𑀢𑁆𑀢𑀪𑀸𑀯𑁂 𑀧𑀢𑁆𑀯𑀸 ‘‘𑀇𑀤𑀸𑀦𑀺 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸, 𑀲𑀩𑁆𑀩𑁂𑀧𑀺 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀲𑀁𑀯𑁂𑀚𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺.

𑀲𑀽𑀓𑀭𑀧𑁄𑀢𑀺𑀓𑀸𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀯𑀺𑀩𑁆𑀪𑀦𑁆𑀢𑀪𑀺𑀓𑁆𑀔𑀼𑀯𑀢𑁆𑀣𑀼

𑀬𑁄 𑀦𑀺𑀩𑁆𑀩𑀦𑀣𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀯𑀺𑀩𑁆𑀪𑀦𑁆𑀢𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑁄 𑀓𑀺𑀭 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀳𑀼𑀢𑁆𑀯𑀸 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀉𑀧𑁆𑀧𑀸𑀤𑁂𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀫𑀸𑀢𑀼𑀮𑀲𑁆𑀲 𑀲𑀼𑀯𑀡𑁆𑀡𑀓𑀸𑀭𑀲𑁆𑀲 𑀕𑁂𑀳𑁂 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀯𑀺𑀩𑁆𑀪𑀫𑀺. 𑀅𑀣 𑀦𑀁 𑀫𑀦𑀼𑀲𑁆𑀲𑀸 𑀅𑀮𑀲𑀪𑀸𑀯𑁂𑀦 𑀓𑀫𑁆𑀫𑀁 𑀓𑀸𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑀁 𑀕𑁂𑀳𑀸 𑀦𑀻𑀳𑀭𑀺𑀁𑀲𑀼. 𑀲𑁄 𑀧𑀸𑀧𑀫𑀺𑀢𑁆𑀢𑀲𑀁𑀲𑀕𑁆𑀕𑁂𑀦 𑀘𑁄𑀭𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀯𑀺𑀘𑀭𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀘𑀢𑀼𑀓𑁆𑀓𑁂 𑀘𑀢𑀼𑀓𑁆𑀓𑁂 𑀓𑀲𑀸𑀳𑀺 𑀢𑀸𑀴𑁂𑀦𑁆𑀢𑀸 𑀆𑀖𑀸𑀢𑀦𑀁 𑀦𑀬𑀺𑀁𑀲𑀼. 𑀣𑁂𑀭𑁄 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁 𑀧𑀯𑀺𑀲𑀦𑁆𑀢𑁄 𑀢𑀁 𑀤𑀓𑁆𑀔𑀺𑀡𑁂𑀦 𑀤𑁆𑀯𑀸𑀭𑁂𑀦 𑀦𑀻𑀳𑀭𑀺𑀬𑀫𑀸𑀦𑀁 𑀤𑀺𑀲𑁆𑀯𑀸 𑀩𑀦𑁆𑀥𑀦𑀁 𑀲𑀺𑀣𑀺𑀮𑀁 𑀓𑀸𑀭𑁂𑀢𑁆𑀯𑀸 ‘‘𑀧𑀼𑀩𑁆𑀩𑁂 𑀢𑀬𑀸 𑀧𑀭𑀺𑀘𑀺𑀢𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀦 𑀆𑀯𑀚𑁆𑀚𑁂𑀳𑀻’’𑀢𑀺 𑀆𑀳. 𑀲𑁄 𑀢𑁂𑀦 𑀑𑀯𑀸𑀤𑁂𑀦 𑀲𑀢𑀼𑀧𑁆𑀧𑀸𑀤𑀁 𑀮𑀪𑀺𑀢𑁆𑀯𑀸 𑀧𑀼𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀅𑀣 𑀦𑀁 ‘‘𑀆𑀖𑀸𑀢𑀦𑀁 𑀦𑁂𑀢𑁆𑀯𑀸 𑀖𑀸𑀢𑁂𑀲𑁆𑀲𑀸𑀫𑀸’’𑀢𑀺 𑀲𑀽𑀮𑁂 𑀉𑀢𑁆𑀢𑀸𑀲𑁂𑀲𑀼𑀁. 𑀲𑁄 𑀦 𑀪𑀸𑀬𑀢𑀺 𑀦 𑀲𑀦𑁆𑀢𑀲𑀢𑀺. 𑀅𑀣𑀲𑁆𑀲 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀞𑀺𑀢𑀸 𑀫𑀦𑀼𑀲𑁆𑀲𑀸 𑀅𑀲𑀺𑀲𑀢𑁆𑀢𑀺𑀢𑁄𑀫𑀭𑀸𑀤𑀻𑀦𑀺 𑀆𑀯𑀼𑀥𑀸𑀦𑀺 𑀉𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀢𑀁 𑀅𑀲𑀦𑁆𑀢𑀲𑀦𑁆𑀢𑀫𑁂𑀯 𑀤𑀺𑀲𑁆𑀯𑀸 ‘‘𑀧𑀲𑁆𑀲𑀣, 𑀪𑁄, 𑀇𑀫𑀁 𑀧𑀼𑀭𑀺𑀲𑀁, 𑀅𑀦𑁂𑀓𑀲𑀢𑀸𑀦𑀜𑁆𑀳𑀺 𑀆𑀯𑀼𑀥𑀳𑀢𑁆𑀣𑀸𑀦𑀁 𑀧𑀼𑀭𑀺𑀲𑀸𑀦𑀁 𑀫𑀚𑁆𑀛𑁂 𑀦𑁂𑀯 𑀙𑀫𑁆𑀪𑀢𑀺 𑀦 𑀯𑁂𑀥𑀢𑀺, 𑀅𑀳𑁄 𑀅𑀘𑁆𑀙𑀭𑀺𑀬’’𑀦𑁆𑀢𑀺 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀚𑀸𑀢𑀸 𑀫𑀳𑀸𑀦𑀸𑀤𑀁 𑀦𑀤𑀺𑀢𑁆𑀯𑀸 𑀭𑀜𑁆𑀜𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀢𑀁 𑀓𑀸𑀭𑀡𑀁 𑀲𑀼𑀢𑁆𑀯𑀸 ‘‘𑀯𑀺𑀲𑁆𑀲𑀚𑁆𑀚𑁂𑀣 𑀦’’𑀦𑁆𑀢𑀺 𑀆𑀳. 𑀲𑀢𑁆𑀣𑀼 𑀲𑀦𑁆𑀢𑀺𑀓𑀫𑁆𑀧𑀺 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑀬𑀺𑀁𑀲𑀼. 𑀲𑀢𑁆𑀣𑀸 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁪𑁪. ‘‘𑀬𑁄 𑀦𑀺𑀩𑁆𑀩𑀦𑀣𑁄 𑀯𑀦𑀸𑀥𑀺𑀫𑀼𑀢𑁆𑀢𑁄,

𑀯𑀦𑀫𑀼𑀢𑁆𑀢𑁄 𑀯𑀦𑀫𑁂𑀯 𑀥𑀸𑀯𑀢𑀺;

𑀢𑀁 𑀧𑀼𑀕𑁆𑀕𑀮𑀫𑁂𑀣 𑀧𑀲𑁆𑀲𑀣,

𑀫𑀼𑀢𑁆𑀢𑁄 𑀩𑀦𑁆𑀥𑀦𑀫𑁂𑀯 𑀥𑀸𑀯𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀧𑀼𑀕𑁆𑀕𑀮𑁄 𑀕𑀺𑀳𑀺𑀪𑀸𑀯𑁂 𑀆𑀮𑀬𑀲𑀗𑁆𑀔𑀸𑀢𑀁 𑀯𑀦𑀣𑀁 𑀙𑀟𑁆𑀟𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀢𑀸𑀬 𑀦𑀺𑀩𑁆𑀩𑀦𑀣𑁄 𑀤𑀺𑀩𑁆𑀩𑀯𑀺𑀳𑀸𑀭𑀲𑀗𑁆𑀔𑀸𑀢𑁂 𑀢𑀧𑁄𑀯𑀦𑁂 𑀅𑀥𑀺𑀫𑀼𑀢𑁆𑀢𑁄 𑀖𑀭𑀸𑀯𑀸𑀲𑀩𑀦𑁆𑀥𑀦𑀲𑀗𑁆𑀔𑀸𑀢𑀸 𑀢𑀡𑁆𑀳𑀸𑀯𑀦𑀸 𑀫𑀼𑀢𑁆𑀢𑁄 𑀳𑀼𑀢𑁆𑀯𑀸 𑀧𑀼𑀦 𑀖𑀭𑀸𑀯𑀸𑀲𑀩𑀦𑁆𑀥𑀦𑀲𑀗𑁆𑀔𑀸𑀢𑀁 𑀢𑀡𑁆𑀳𑀸𑀯𑀦𑀫𑁂𑀯 𑀥𑀸𑀯𑀢𑀺, 𑀏𑀣 𑀢𑀁 𑀧𑀼𑀕𑁆𑀕𑀮𑀁 𑀧𑀲𑁆𑀲𑀣, 𑀏𑀲𑁄 𑀖𑀭𑀸𑀯𑀸𑀲𑀩𑀦𑁆𑀥𑀦𑀢𑁄 𑀫𑀼𑀢𑁆𑀢𑁄 𑀖𑀭𑀸𑀯𑀸𑀲𑀩𑀦𑁆𑀥𑀦𑀫𑁂𑀯 𑀥𑀸𑀯𑀢𑀻𑀢𑀺.

𑀇𑀫𑀁 𑀧𑀦 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑁄 𑀭𑀸𑀚𑀧𑀼𑀭𑀺𑀲𑀸𑀦𑀁 𑀅𑀦𑁆𑀢𑀭𑁂 𑀲𑀽𑀮𑀕𑁆𑀕𑁂 𑀦𑀺𑀲𑀺𑀦𑁆𑀦𑁄𑀯 𑀉𑀤𑀬𑀩𑁆𑀩𑀬𑀁 𑀧𑀝𑁆𑀞𑀧𑁂𑀢𑁆𑀯𑀸 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑁄 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀆𑀓𑀸𑀲𑁂𑀦𑁂𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀲𑀭𑀸𑀚𑀺𑀓𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺.

𑀯𑀺𑀩𑁆𑀪𑀦𑁆𑀢𑀪𑀺𑀓𑁆𑀔𑀼𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀩𑀦𑁆𑀥𑀦𑀸𑀕𑀸𑀭𑀯𑀢𑁆𑀣𑀼

𑀦 𑀢𑀁 𑀤𑀴𑁆𑀳𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀩𑀦𑁆𑀥𑀦𑀸𑀕𑀸𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀁 𑀓𑀺𑀭 𑀓𑀸𑀮𑁂 𑀩𑀳𑀽 𑀲𑀦𑁆𑀥𑀺𑀘𑁆𑀙𑁂𑀤𑀓𑀧𑀦𑁆𑀣𑀖𑀸𑀢𑀓𑀫𑀦𑀼𑀲𑁆𑀲𑀖𑀸𑀢𑀓𑁂 𑀘𑁄𑀭𑁂 𑀆𑀦𑁂𑀢𑁆𑀯𑀸 𑀓𑁄𑀲𑀮𑀭𑀜𑁆𑀜𑁄 𑀤𑀲𑁆𑀲𑀬𑀺𑀁𑀲𑀼. 𑀢𑁂 𑀭𑀸𑀚𑀸 𑀅𑀦𑁆𑀤𑀼𑀩𑀦𑁆𑀥𑀦𑀭𑀚𑁆𑀚𑀼𑀩𑀦𑁆𑀥𑀦𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑁂𑀳𑀺 𑀩𑀦𑁆𑀥𑀸𑀧𑁂𑀲𑀺. 𑀢𑀺𑀁𑀲𑀫𑀢𑁆𑀢𑀸𑀧𑀺 𑀔𑁄 𑀚𑀸𑀦𑀧𑀤𑀸 𑀪𑀺𑀓𑁆𑀔𑀽 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀓𑀸𑀫𑀸 𑀆𑀕𑀦𑁆𑀢𑁆𑀯𑀸 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀸 𑀩𑀦𑁆𑀥𑀦𑀸𑀕𑀸𑀭𑀁 𑀕𑀦𑁆𑀢𑁆𑀯𑀸 𑀢𑁂 𑀘𑁄𑀭𑁂 𑀤𑀺𑀲𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀲𑀸𑀬𑀦𑁆𑀳𑀲𑀫𑀬𑁂 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀚𑁆𑀚 𑀅𑀫𑁆𑀳𑁂𑀳𑀺 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂𑀳𑀺 𑀩𑀦𑁆𑀥𑀦𑀸𑀕𑀸𑀭𑁂 𑀩𑀳𑀽 𑀘𑁄𑀭𑀸 𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀻𑀳𑀺 𑀩𑀤𑁆𑀥𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀸 𑀤𑀺𑀝𑁆𑀞𑀸, 𑀢𑁂 𑀢𑀸𑀦𑀺 𑀩𑀦𑁆𑀥𑀦𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀢𑁆𑀣𑀺 𑀦𑀼 𑀔𑁄, 𑀪𑀦𑁆𑀢𑁂, 𑀢𑁂𑀳𑀺 𑀩𑀦𑁆𑀥𑀦𑁂𑀳𑀺 𑀣𑀺𑀭𑀢𑀭𑀁 𑀅𑀜𑁆𑀜𑀁 𑀩𑀦𑁆𑀥𑀦𑀁 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸, ‘‘𑀪𑀺𑀓𑁆𑀔𑀯𑁂, 𑀓𑀺𑀁 𑀩𑀦𑁆𑀥𑀦𑀸𑀦𑀺 𑀦𑀸𑀫𑁂𑀢𑀸𑀦𑀺, 𑀬𑀁 𑀧𑀦𑁂𑀢𑀁 𑀥𑀦𑀥𑀜𑁆𑀜𑀧𑀼𑀢𑁆𑀢𑀤𑀸𑀭𑀸𑀤𑀻𑀲𑀼 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀓𑀺𑀮𑁂𑀲𑀩𑀦𑁆𑀥𑀦𑀁, 𑀏𑀢𑀁 𑀏𑀢𑁂𑀳𑀺 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀲𑀢𑀲𑀳𑀲𑁆𑀲𑀕𑀼𑀡𑁂𑀦 𑀣𑀺𑀭𑀢𑀭𑀁, 𑀏𑀯𑀁 𑀫𑀳𑀦𑁆𑀢𑀫𑁆𑀧𑀺 𑀧𑀦𑁂𑀢𑀁 𑀤𑀼𑀘𑁆𑀙𑀺𑀦𑁆𑀤𑀦𑀺𑀬𑀁 𑀩𑀦𑁆𑀥𑀦𑀁 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸 𑀙𑀺𑀦𑁆𑀤𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀽’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺 𑁋

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀏𑀓𑀲𑁆𑀫𑀺𑀁 𑀤𑀼𑀕𑁆𑀕𑀢𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀯𑀬𑀧𑁆𑀧𑀢𑁆𑀢𑀲𑁆𑀲 𑀧𑀺𑀢𑀸 𑀓𑀸𑀮𑀫𑀓𑀸𑀲𑀺. 𑀲𑁄 𑀪𑀢𑀺𑀁 𑀓𑀢𑁆𑀯𑀸 𑀫𑀸𑀢𑀭𑀁 𑀧𑁄𑀲𑁂𑀲𑀺. 𑀅𑀣𑀲𑁆𑀲 𑀫𑀸𑀢𑀸 𑀅𑀦𑀺𑀘𑁆𑀙𑀫𑀸𑀦𑀲𑁆𑀲𑁂𑀯 𑀏𑀓𑀁 𑀓𑀼𑀮𑀥𑀻𑀢𑀭𑀁 𑀕𑁂𑀳𑁂 𑀓𑀢𑁆𑀯𑀸 𑀅𑀧𑀭𑀪𑀸𑀕𑁂 𑀓𑀸𑀮𑀫𑀓𑀸𑀲𑀺. 𑀪𑀭𑀺𑀬𑀸𑀬𑀧𑀺𑀲𑁆𑀲 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀳𑀺. 𑀲𑁄 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑁄𑀯, ‘‘𑀪𑀤𑁆𑀤𑁂, 𑀢𑁆𑀯𑀁 𑀪𑀢𑀺𑀁 𑀓𑀢𑁆𑀯𑀸 𑀚𑀻𑀯, 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀲𑀸𑀫𑀺, 𑀦𑀦𑀼 𑀕𑀩𑁆𑀪𑁄 𑀫𑁂 𑀧𑀢𑀺𑀝𑁆𑀞𑀺𑀢𑁄, 𑀫𑀬𑀺 𑀯𑀺𑀚𑀸𑀢𑀸𑀬 𑀤𑀸𑀭𑀓𑀁 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀲𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀲𑁆𑀲𑀸 𑀯𑀺𑀚𑀸𑀢𑀓𑀸𑀮𑁂, ‘‘𑀪𑀤𑁆𑀤𑁂, 𑀢𑁆𑀯𑀁 𑀲𑁄𑀢𑁆𑀣𑀺𑀦𑀸 𑀯𑀺𑀚𑀸𑀢𑀸, 𑀇𑀤𑀸𑀦𑀺 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀧𑀼𑀘𑁆𑀙𑀺. 𑀅𑀣 𑀦𑀁 𑀲𑀸 ‘‘𑀧𑀼𑀢𑁆𑀢𑀲𑁆𑀲 𑀢𑀸𑀯 𑀣𑀦𑀧𑀸𑀦𑀢𑁄 𑀅𑀧𑀕𑀫𑀦𑀓𑀸𑀮𑀁 𑀆𑀕𑀫𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑀼𑀦 𑀕𑀩𑁆𑀪𑀁 𑀕𑀡𑁆𑀳𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸, 𑀇𑀫𑀺𑀲𑁆𑀲𑀸 𑀅𑀦𑀸𑀘𑀺𑀓𑁆𑀔𑀺𑀢𑁆𑀯𑀸𑀯 𑀧𑀮𑀸𑀬𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀲𑁆𑀲𑀸 𑀅𑀦𑀸𑀘𑀺𑀓𑁆𑀔𑀺𑀢𑁆𑀯𑀸𑀯 𑀭𑀢𑁆𑀢𑀺𑀪𑀸𑀕𑁂 𑀉𑀝𑁆𑀞𑀸𑀬 𑀧𑀮𑀸𑀬𑀺. 𑀅𑀣 𑀦𑀁 𑀦𑀕𑀭𑀕𑀼𑀢𑁆𑀢𑀺𑀓𑀸 𑀅𑀕𑁆𑀕𑀳𑁂𑀲𑀼𑀁. 𑀲𑁄 ‘‘𑀅𑀳𑀁, 𑀲𑀸𑀫𑀺, 𑀫𑀸𑀢𑀼𑀧𑁄𑀲𑀓𑁄 𑀦𑀸𑀫, 𑀯𑀺𑀲𑁆𑀲𑀚𑁆𑀚𑁂𑀣 𑀫’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀺𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀬𑁄 𑀮𑀪𑀺𑀢𑁆𑀯𑀸 𑀛𑀸𑀦𑀓𑀻𑀴𑀸𑀬 𑀓𑀻𑀴𑀦𑁆𑀢𑁄 𑀯𑀺𑀳𑀸𑀲𑀺. 𑀲𑁄 𑀢𑀢𑁆𑀣 𑀯𑀲𑀦𑁆𑀢𑁄𑀬𑁂𑀯 ‘‘𑀏𑀯𑀭𑀽𑀧𑀫𑁆𑀧𑀺 𑀦𑀸𑀫 𑀫𑁂 𑀤𑀼𑀘𑁆𑀙𑀺𑀦𑁆𑀤𑀦𑀺𑀬𑀁 𑀧𑀼𑀢𑁆𑀢𑀤𑀸𑀭𑀩𑀦𑁆𑀥𑀦𑀁 𑀓𑀺𑀮𑁂𑀲𑀩𑀦𑁆𑀥𑀦𑀁 𑀙𑀺𑀦𑁆𑀦’’𑀦𑁆𑀢𑀺 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀲𑀢𑁆𑀣𑀸 𑀇𑀫𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀢𑁂𑀦 𑀉𑀤𑀸𑀦𑀺𑀢𑀁 𑀉𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁪𑁫. ‘‘𑀦 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸,

𑀬𑀤𑀸𑀬𑀲𑀁 𑀤𑀸𑀭𑀼𑀚𑀧𑀩𑁆𑀩𑀚𑀜𑁆𑀘;

𑀲𑀸𑀭𑀢𑁆𑀢𑀭𑀢𑁆𑀢𑀸 𑀫𑀡𑀺𑀓𑀼𑀡𑁆𑀟𑀮𑁂𑀲𑀼,

𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸.

𑁩𑁪𑁬. ‘‘𑀏𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸,

𑀑𑀳𑀸𑀭𑀺𑀦𑀁 𑀲𑀺𑀣𑀺𑀮𑀁 𑀤𑀼𑀧𑁆𑀧𑀫𑀼𑀜𑁆𑀘𑀁;

𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀧𑀭𑀺𑀩𑁆𑀩𑀚𑀦𑁆𑀢𑀺,

𑀅𑀦𑀧𑁂𑀓𑁆𑀔𑀺𑀦𑁄 𑀓𑀸𑀫𑀲𑀼𑀔𑀁 𑀧𑀳𑀸𑀬𑀸’’𑀢𑀺.

𑀢𑀢𑁆𑀣 𑀥𑀻𑀭𑀸𑀢𑀺 𑀩𑀼𑀤𑁆𑀥𑀸𑀤𑀬𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑀸 𑀬𑀁 𑀲𑀗𑁆𑀔𑀮𑀺𑀓𑀲𑀗𑁆𑀔𑀸𑀢𑀁 𑀅𑀬𑀲𑀸 𑀦𑀺𑀩𑁆𑀩𑀢𑁆𑀢𑀁 𑀆𑀬𑀲𑀁, 𑀅𑀦𑁆𑀤𑀼𑀩𑀦𑁆𑀥𑀦𑀲𑀗𑁆𑀔𑀸𑀢𑀁 𑀤𑀸𑀭𑀼𑀚𑀁, 𑀬𑀜𑁆𑀘 𑀧𑀩𑁆𑀩𑀚𑀢𑀺𑀡𑁂𑀳𑀺 𑀯𑀸 𑀅𑀜𑁆𑀜𑁂𑀳𑀺 𑀯𑀸 𑀯𑀸𑀓𑀸𑀤𑀻𑀳𑀺 𑀭𑀚𑁆𑀚𑀼𑀁 𑀓𑀢𑁆𑀯𑀸 𑀓𑀢𑀁 𑀭𑀚𑁆𑀚𑀼𑀩𑀦𑁆𑀥𑀦𑀁, 𑀢𑀁 𑀅𑀲𑀺𑀆𑀤𑀻𑀳𑀺 𑀙𑀺𑀦𑁆𑀤𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑁂𑀦 𑀣𑀺𑀭𑀦𑁆𑀢𑀺 𑀦 𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀭𑀢𑁆𑀢𑀭𑀢𑁆𑀢𑀸𑀢𑀺 𑀲𑀸𑀭𑀢𑁆𑀢𑀸 𑀳𑀼𑀢𑁆𑀯𑀸 𑀭𑀢𑁆𑀢𑀸, 𑀩𑀳𑀮𑀢𑀭𑀭𑀸𑀕𑀭𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀫𑀡𑀺𑀓𑀼𑀡𑁆𑀟𑀮𑁂𑀲𑀽𑀢𑀺 𑀫𑀡𑀻𑀲𑀼 𑀘𑁂𑀯 𑀓𑀼𑀡𑁆𑀟𑀮𑁂𑀲𑀼 𑀘, 𑀫𑀡𑀺𑀯𑀺𑀘𑀺𑀢𑁆𑀢𑁂𑀲𑀼 𑀯𑀸 𑀓𑀼𑀡𑁆𑀟𑀮𑁂𑀲𑀼. 𑀏𑀢𑀁 𑀤𑀴𑁆𑀳𑀦𑁆𑀢𑀺 𑀬𑁂 𑀫𑀡𑀺𑀓𑀼𑀡𑁆𑀟𑀮𑁂𑀲𑀼 𑀲𑀸𑀭𑀢𑁆𑀢𑀭𑀢𑁆𑀢𑀸, 𑀢𑁂𑀲𑀁 𑀲𑁄 𑀭𑀸𑀕𑁄 𑀘 𑀬𑀸 𑀧𑀼𑀢𑁆𑀢𑀤𑀸𑀭𑁂𑀲𑀼 𑀅𑀧𑁂𑀓𑁆𑀔𑀸 𑀢𑀡𑁆𑀳𑀸, 𑀏𑀢𑀁 𑀓𑀺𑀮𑁂𑀲𑀫𑀬𑀁 𑀩𑀦𑁆𑀥𑀦𑀜𑁆𑀘 𑀧𑀡𑁆𑀟𑀺𑀢𑀧𑀼𑀭𑀺𑀲𑀸 𑀤𑀴𑁆𑀳𑀦𑁆𑀢𑀺 𑀯𑀤𑀦𑁆𑀢𑀺. 𑀑𑀳𑀸𑀭𑀺𑀦𑀦𑁆𑀢𑀺 𑀆𑀓𑀟𑁆𑀠𑀺𑀢𑁆𑀯𑀸 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀧𑀸𑀢𑀦𑀢𑁄 𑀅𑀯𑀳𑀭𑀢𑀺 𑀳𑁂𑀝𑁆𑀞𑀸 𑀳𑀭𑀢𑀻𑀢𑀺 𑀑𑀳𑀸𑀭𑀺𑀦𑀁. 𑀲𑀺𑀣𑀺𑀮𑀦𑁆𑀢𑀺 𑀩𑀦𑁆𑀥𑀦𑀝𑁆𑀞𑀸𑀦𑁂 𑀙𑀯𑀺𑀘𑀫𑁆𑀫𑀫𑀁𑀲𑀸𑀦𑀺 𑀦 𑀙𑀺𑀦𑁆𑀤𑀢𑀺, 𑀮𑁄𑀳𑀺𑀢𑀁 𑀦 𑀦𑀻𑀳𑀭𑀢𑀺, 𑀩𑀦𑁆𑀥𑀦𑀪𑀸𑀯𑀫𑁆𑀧𑀺 𑀅𑀚𑀸𑀦𑀸𑀧𑁂𑀢𑁆𑀯𑀸 𑀣𑀮𑀧𑀣𑀚𑀮𑀧𑀣𑀸𑀤𑀻𑀲𑀼 𑀓𑀫𑁆𑀫𑀸𑀦𑀺 𑀓𑀸𑀢𑀼𑀁 𑀤𑁂𑀢𑀻𑀢𑀺 𑀲𑀺𑀣𑀺𑀮𑀁. 𑀤𑀼𑀧𑁆𑀧𑀫𑀼𑀜𑁆𑀘𑀦𑁆𑀢𑀺 𑀮𑁄𑀪𑀯𑀲𑁂𑀦 𑀳𑀺 𑀏𑀓𑀯𑀸𑀭𑀫𑁆𑀧𑀺 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀩𑀦𑁆𑀥𑀦𑀁 𑀤𑀝𑁆𑀞𑀝𑁆𑀞𑀸𑀦𑀢𑁄 𑀓𑀘𑁆𑀙𑀧𑁄 𑀯𑀺𑀬 𑀤𑀼𑀫𑁆𑀫𑁄𑀘𑀺𑀬𑀁 𑀳𑁄𑀢𑀻𑀢𑀺 𑀤𑀼𑀧𑁆𑀧𑀫𑀼𑀜𑁆𑀘𑀁. 𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦𑀸𑀢𑀺 𑀏𑀢𑀁 𑀤𑀴𑁆𑀳𑀫𑁆𑀧𑀺 𑀓𑀺𑀮𑁂𑀲𑀩𑀦𑁆𑀥𑀦𑀁 𑀜𑀸𑀡𑀔𑀕𑁆𑀕𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑀧𑁂𑀓𑁆𑀔𑀺𑀦𑁄 𑀳𑀼𑀢𑁆𑀯𑀸 𑀓𑀸𑀫𑀲𑀼𑀔𑀁 𑀧𑀳𑀸𑀬 𑀧𑀭𑀺𑀩𑁆𑀩𑀚𑀦𑁆𑀢𑀺, 𑀧𑀓𑁆𑀓𑀫𑀦𑁆𑀢𑀺 𑀧𑀩𑁆𑀩𑀚𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀩𑀦𑁆𑀥𑀦𑀸𑀕𑀸𑀭𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀔𑁂𑀫𑀸𑀣𑁂𑀭𑀻𑀯𑀢𑁆𑀣𑀼

𑀬𑁂 𑀭𑀸𑀕𑀭𑀢𑁆𑀢𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀔𑁂𑀫𑀁 𑀦𑀸𑀫 𑀭𑀜𑁆𑀜𑁄 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀧𑀸𑀤𑀫𑀽𑀮𑁂 𑀧𑀢𑁆𑀣𑀺𑀢𑀧𑀢𑁆𑀣𑀦𑀸 𑀅𑀢𑀺𑀯𑀺𑀬 𑀅𑀪𑀺𑀭𑀽𑀧𑀸 𑀧𑀸𑀲𑀸𑀤𑀺𑀓𑀸 𑀅𑀳𑁄𑀲𑀺. ‘‘𑀲𑀢𑁆𑀣𑀸 𑀓𑀺𑀭 𑀭𑀽𑀧𑀲𑁆𑀲 𑀤𑁄𑀲𑀁 𑀓𑀣𑁂𑀢𑀻’’𑀢𑀺 𑀲𑀼𑀢𑁆𑀯𑀸 𑀧𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀦 𑀇𑀘𑁆𑀙𑀺. 𑀭𑀸𑀚𑀸 𑀢𑀲𑁆𑀲𑀸 𑀭𑀽𑀧𑀫𑀤𑀫𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀯𑁂𑀴𑀼𑀯𑀦𑀯𑀡𑁆𑀡𑀦𑀸𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀕𑀻𑀢𑀸𑀦𑀺 𑀓𑀸𑀭𑁂𑀢𑁆𑀯𑀸 𑀦𑀝𑀸𑀤𑀻𑀦𑀁 𑀤𑀸𑀧𑁂𑀲𑀺. 𑀢𑁂𑀲𑀁 𑀢𑀸𑀦𑀺 𑀕𑀸𑀬𑀦𑁆𑀢𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀲𑁆𑀲𑀸 𑀯𑁂𑀴𑀼𑀯𑀦𑀁 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀯𑀺𑀬 𑀅𑀲𑀼𑀢𑀧𑀼𑀩𑁆𑀩𑀁 𑀯𑀺𑀬 𑀘 𑀅𑀳𑁄𑀲𑀺. 𑀲𑀸 ‘‘𑀓𑀢𑀭𑀁 𑀉𑀬𑁆𑀬𑀸𑀦𑀁 𑀲𑀦𑁆𑀥𑀸𑀬 𑀕𑀸𑀬𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀤𑁂𑀯𑀻, 𑀢𑀼𑀫𑁆𑀳𑀸𑀓𑀁 𑀯𑁂𑀴𑀼𑀯𑀦𑀼𑀬𑁆𑀬𑀸𑀦𑀫𑁂𑀯𑀸’’𑀢𑀺 𑀯𑀼𑀢𑁆𑀢𑁂 𑀉𑀬𑁆𑀬𑀸𑀦𑀁 𑀕𑀦𑁆𑀢𑀼𑀓𑀸𑀫𑀸 𑀅𑀳𑁄𑀲𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀆𑀕𑀫𑀦𑀁 𑀜𑀢𑁆𑀯𑀸 𑀧𑀭𑀺𑀲𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄𑀯 𑀢𑀸𑀮𑀯𑀡𑁆𑀝𑀁 𑀆𑀤𑀸𑀬 𑀅𑀢𑁆𑀢𑀦𑁄 𑀧𑀲𑁆𑀲𑁂 𑀞𑀢𑁆𑀯𑀸 𑀩𑀻𑀚𑀫𑀸𑀦𑀁 𑀅𑀪𑀺𑀭𑀽𑀧𑀁 𑀇𑀢𑁆𑀣𑀺𑀁 𑀦𑀺𑀫𑁆𑀫𑀺𑀦𑀺. 𑀔𑁂𑀫𑀸, 𑀤𑁂𑀯𑀻𑀧𑀺 𑀧𑀯𑀺𑀲𑀫𑀸𑀦𑀸𑀯 𑀢𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀭𑀽𑀧𑀲𑁆𑀲 𑀤𑁄𑀲𑀁 𑀓𑀣𑁂𑀢𑀻𑀢𑀺 𑀯𑀤𑀦𑁆𑀢𑀺, 𑀅𑀬𑀜𑁆𑀘𑀲𑁆𑀲 𑀲𑀦𑁆𑀢𑀺𑀓𑁂 𑀇𑀢𑁆𑀣𑀻 𑀩𑀻𑀚𑀬𑀫𑀸𑀦𑀸 𑀞𑀺𑀢𑀸, 𑀦𑀸𑀳𑀁 𑀇𑀫𑀺𑀲𑁆𑀲𑀸 𑀓𑀮𑀪𑀸𑀕𑀫𑁆𑀧𑀺 𑀉𑀧𑁂𑀫𑀺, 𑀦 𑀫𑀬𑀸 𑀈𑀤𑀺𑀲𑀁 𑀇𑀢𑁆𑀣𑀺𑀭𑀽𑀧𑀁 𑀤𑀺𑀝𑁆𑀞𑀧𑀼𑀩𑁆𑀩𑀁, 𑀲𑀢𑁆𑀣𑀸𑀭𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺 𑀫𑀜𑁆𑀜𑁂’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀓𑀣𑀸𑀲𑀤𑁆𑀤𑀫𑁆𑀧𑀺 𑀅𑀦𑀺𑀲𑀸𑀫𑁂𑀢𑁆𑀯𑀸 𑀢𑀫𑁂𑀯 𑀇𑀢𑁆𑀣𑀺𑀁 𑀑𑀮𑁄𑀓𑀬𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀢𑀲𑁆𑀫𑀺𑀁 𑀭𑀽𑀧𑁂 𑀉𑀧𑁆𑀧𑀦𑁆𑀦𑀩𑀳𑀼𑀫𑀸𑀦𑀢𑀁 𑀜𑀢𑁆𑀯𑀸 𑀢𑀁 𑀭𑀽𑀧𑀁 𑀧𑀞𑀫𑀯𑀬𑀸𑀤𑀺𑀯𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀭𑀺𑀬𑁄𑀲𑀸𑀦𑁂 𑀅𑀝𑁆𑀞𑀺𑀫𑀢𑁆𑀢𑀸𑀯𑀲𑀸𑀦𑀁 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀔𑁂𑀫𑀸 𑀢𑀁 𑀤𑀺𑀲𑁆𑀯𑀸 ‘‘𑀏𑀯𑀭𑀽𑀧𑀫𑁆𑀧𑀺 𑀦𑀸𑀫𑁂𑀢𑀁 𑀭𑀽𑀧𑀁 𑀫𑀼𑀳𑀼𑀢𑁆𑀢𑁂𑀦𑁂𑀯 𑀔𑀬𑀯𑀬𑀁 𑀲𑀫𑁆𑀧𑀢𑁆𑀢𑀁, 𑀦𑀢𑁆𑀣𑀺 𑀯𑀢 𑀇𑀫𑀲𑁆𑀫𑀺𑀁 𑀭𑀽𑀧𑁂 𑀲𑀸𑀭𑁄’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀘𑀺𑀢𑁆𑀢𑀸𑀘𑀸𑀭𑀁 𑀑𑀮𑁄𑀓𑁂𑀢𑁆𑀯𑀸, ‘‘𑀔𑁂𑀫𑁂, 𑀢𑁆𑀯𑀁 ‘𑀇𑀫𑀲𑁆𑀫𑀺𑀁 𑀭𑀽𑀧𑁂 𑀲𑀸𑀭𑁄 𑀅𑀢𑁆𑀣𑀻’𑀢𑀺 𑀘𑀺𑀦𑁆𑀢𑁂𑀲𑀺, 𑀧𑀲𑁆𑀲 𑀤𑀸𑀦𑀺𑀲𑁆𑀲 𑀅𑀲𑀸𑀭𑀪𑀸𑀯’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀆𑀢𑀼𑀭𑀁 𑀅𑀲𑀼𑀘𑀺𑀁 𑀧𑀽𑀢𑀺𑀁, 𑀧𑀲𑁆𑀲 𑀔𑁂𑀫𑁂 𑀲𑀫𑀼𑀲𑁆𑀲𑀬𑀁;

𑀉𑀕𑁆𑀖𑀭𑀦𑁆𑀢𑀁 𑀧𑀕𑁆𑀖𑀭𑀦𑁆𑀢𑀁, 𑀩𑀸𑀮𑀸𑀦𑀁 𑀅𑀪𑀺𑀧𑀢𑁆𑀣𑀺𑀢’’𑀦𑁆𑀢𑀺. (𑀅𑀧. 𑀣𑁂𑀭𑀻 𑁨.𑁨.𑁩𑁫𑁪);

𑀲𑀸 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀅𑀣 𑀦𑀁 𑀲𑀢𑁆𑀣𑀸, ‘‘𑀔𑁂𑀫𑁂, 𑀇𑀫𑁂 𑀲𑀢𑁆𑀢𑀸 𑀭𑀸𑀕𑀭𑀢𑁆𑀢𑀸 𑀤𑁄𑀲𑀧𑀤𑀼𑀝𑁆𑀞𑀸 𑀫𑁄𑀳𑀫𑀽𑀴𑁆𑀳𑀸 𑀅𑀢𑁆𑀢𑀦𑁄 𑀢𑀡𑁆𑀳𑀸𑀲𑁄𑀢𑀁 𑀲𑀫𑀢𑀺𑀓𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀢𑁆𑀣𑁂𑀯 𑀮𑀕𑁆𑀕𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁪𑁭. ‘‘𑀬𑁂 𑀭𑀸𑀕𑀭𑀢𑁆𑀢𑀸𑀦𑀼𑀧𑀢𑀦𑁆𑀢𑀺 𑀲𑁄𑀢𑀁,

𑀲𑀬𑀁 𑀓𑀢𑀁 𑀫𑀓𑁆𑀓𑀝𑀓𑁄𑀯 𑀚𑀸𑀮𑀁;

𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀯𑀚𑀦𑁆𑀢𑀺 𑀥𑀻𑀭𑀸,

𑀅𑀦𑀧𑁂𑀓𑁆𑀔𑀺𑀦𑁄 𑀲𑀩𑁆𑀩𑀤𑀼𑀓𑁆𑀔𑀁 𑀧𑀳𑀸𑀬𑀸’’𑀢𑀺.

𑀢𑀢𑁆𑀣 𑀫𑀓𑁆𑀓𑀝𑀓𑁄𑀯 𑀚𑀸𑀮𑀦𑁆𑀢𑀺 𑀬𑀣𑀸 𑀦𑀸𑀫 𑀫𑀓𑁆𑀓𑀝𑀓𑁄 𑀲𑀼𑀢𑁆𑀢𑀚𑀸𑀮𑀁 𑀓𑀢𑁆𑀯𑀸 𑀫𑀚𑁆𑀛𑁂 𑀞𑀸𑀦𑁂 𑀦𑀸𑀪𑀺𑀫𑀡𑁆𑀟𑀮𑁂 𑀦𑀺𑀧𑀦𑁆𑀦𑁄 𑀧𑀭𑀺𑀬𑀦𑁆𑀢𑁂 𑀧𑀢𑀺𑀢𑀁 𑀧𑀝𑀗𑁆𑀕𑀁 𑀯𑀸 𑀫𑀓𑁆𑀔𑀺𑀓𑀁 𑀯𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀢𑀲𑁆𑀲 𑀭𑀲𑀁 𑀧𑀺𑀯𑀺𑀢𑁆𑀯𑀸 𑀧𑀼𑀦 𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀦𑀺𑀧𑀚𑁆𑀚𑀢𑀺, 𑀏𑀯𑀫𑁂𑀯 𑀬𑁂 𑀲𑀢𑁆𑀢𑀸 𑀭𑀸𑀕𑀭𑀢𑁆𑀢𑀸 𑀤𑁄𑀲𑀧𑀤𑀼𑀝𑁆𑀞𑀸 𑀫𑁄𑀳𑀫𑀽𑀴𑁆𑀳𑀸 𑀲𑀬𑀁𑀓𑀢𑀁 𑀢𑀡𑁆𑀳𑀸𑀲𑁄𑀢𑀁 𑀅𑀦𑀼𑀧𑀢𑀦𑁆𑀢𑀺, 𑀢𑁂 𑀢𑀁 𑀲𑀫𑀢𑀺𑀓𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀏𑀯𑀁 𑀤𑀼𑀭𑀢𑀺𑀓𑁆𑀓𑀫𑀁. 𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀯𑀚𑀦𑁆𑀢𑀺 𑀥𑀻𑀭𑀸𑀢𑀺 𑀧𑀡𑁆𑀟𑀺𑀢𑀸 𑀏𑀢𑀁 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸 𑀅𑀦𑀧𑁂𑀓𑁆𑀔𑀺𑀦𑁄 𑀦𑀺𑀭𑀸𑀮𑀬𑀸 𑀳𑀼𑀢𑁆𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀤𑀼𑀓𑁆𑀔𑀁 𑀧𑀳𑀸𑀬 𑀯𑀚𑀦𑁆𑀢𑀺, 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀔𑁂𑀫𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺, 𑀫𑀳𑀸𑀚𑀦𑀲𑁆𑀲𑀸𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀺. 𑀲𑀢𑁆𑀣𑀸 𑀭𑀸𑀚𑀸𑀦𑀁 𑀆𑀳 𑁋 ‘‘𑀫𑀳𑀸𑀭𑀸𑀚, 𑀔𑁂𑀫𑀸𑀬 𑀧𑀩𑁆𑀩𑀚𑀺𑀢𑀼𑀁 𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀼𑀁 𑀯𑀸 𑀯𑀝𑁆𑀝𑀢𑀻’’𑀢𑀺. 𑀪𑀦𑁆𑀢𑁂, 𑀧𑀩𑁆𑀩𑀸𑀚𑁂𑀣 𑀦𑀁, 𑀅𑀮𑀁 𑀧𑀭𑀺𑀦𑀺𑀩𑁆𑀩𑀸𑀦𑁂𑀦𑀸𑀢𑀺. 𑀲𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀕𑁆𑀕𑀲𑀸𑀯𑀺𑀓𑀸 𑀅𑀳𑁄𑀲𑀻𑀢𑀺.

𑀔𑁂𑀫𑀸𑀣𑁂𑀭𑀻𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀉𑀕𑁆𑀕𑀲𑁂𑀦𑀯𑀢𑁆𑀣𑀼

𑀫𑀼𑀜𑁆𑀘 𑀧𑀼𑀭𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀕𑁆𑀕𑀲𑁂𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀧𑀜𑁆𑀘𑀲𑀢𑀸 𑀓𑀺𑀭 𑀦𑀝𑀸 𑀲𑀁𑀯𑀘𑁆𑀙𑀭𑁂 𑀯𑀸 𑀙𑀫𑀸𑀲𑁂 𑀯𑀸 𑀧𑀢𑁆𑀢𑁂 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀲𑀢𑁆𑀢𑀸𑀳𑀁 𑀲𑀫𑀚𑁆𑀚𑀁 𑀓𑀢𑁆𑀯𑀸 𑀩𑀳𑀼𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀮𑀪𑀦𑁆𑀢𑀺, 𑀅𑀦𑁆𑀢𑀭𑀦𑁆𑀢𑀭𑁂 𑀉𑀓𑁆𑀔𑁂𑀧𑀤𑀸𑀬𑀸𑀦𑀁 𑀧𑀭𑀺𑀬𑀦𑁆𑀢𑁄 𑀦𑀢𑁆𑀣𑀺. 𑀫𑀳𑀸𑀚𑀦𑁄 𑀫𑀜𑁆𑀘𑀸𑀢𑀺𑀫𑀜𑁆𑀘𑀸𑀤𑀻𑀲𑀼 𑀞𑀢𑁆𑀯𑀸 𑀲𑀫𑀚𑁆𑀚𑀁 𑀑𑀮𑁄𑀓𑁂𑀲𑀺. 𑀅𑀣𑁂𑀓𑀸 𑀮𑀗𑁆𑀖𑀺𑀓𑀥𑀻𑀢𑀸 𑀯𑀁𑀲𑀁 𑀅𑀪𑀺𑀭𑀼𑀬𑁆𑀳 𑀢𑀲𑁆𑀲 𑀉𑀧𑀭𑀺 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀢𑀲𑁆𑀲 𑀧𑀭𑀺𑀬𑀦𑁆𑀢𑁂 𑀆𑀓𑀸𑀲𑁂 𑀘𑀗𑁆𑀓𑀫𑀫𑀸𑀦𑀸 𑀦𑀘𑁆𑀘𑀢𑀺 𑀘𑁂𑀯 𑀕𑀸𑀬𑀢𑀺 𑀘. 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀕𑁆𑀕𑀲𑁂𑀦𑁄 𑀦𑀸𑀫 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀲𑀳𑀸𑀬𑀓𑁂𑀦 𑀲𑀤𑁆𑀥𑀺𑀁 𑀫𑀜𑁆𑀘𑀸𑀢𑀺𑀫𑀜𑁆𑀘𑁂 𑀞𑀺𑀢𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀢𑀲𑁆𑀲𑀸 𑀳𑀢𑁆𑀣𑀧𑀸𑀤𑀯𑀺𑀓𑁆𑀔𑁂𑀧𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀲𑀺𑀦𑁂𑀳𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 ‘‘𑀢𑀁 𑀮𑀪𑀦𑁆𑀢𑁄 𑀚𑀻𑀯𑀺𑀲𑁆𑀲𑀸𑀫𑀺, 𑀅𑀮𑀪𑀦𑁆𑀢𑀲𑁆𑀲 𑀫𑁂 𑀇𑀥𑁂𑀯 𑀫𑀭𑀡’’𑀦𑁆𑀢𑀺 𑀆𑀳𑀸𑀭𑀽𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀺. 𑀫𑀸𑀢𑀸𑀧𑀺𑀢𑀽𑀳𑀺, ‘‘𑀢𑀸𑀢, 𑀓𑀺𑀁 𑀢𑁂 𑀭𑀼𑀚𑁆𑀚𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁄𑀧𑀺 ‘‘𑀢𑀁 𑀫𑁂 𑀦𑀝𑀥𑀻𑀢𑀭𑀁 𑀮𑀪𑀦𑁆𑀢𑀲𑁆𑀲 𑀚𑀻𑀯𑀺𑀢𑀁 𑀅𑀢𑁆𑀣𑀺, 𑀅𑀮𑀪𑀦𑁆𑀢𑀲𑁆𑀲 𑀫𑁂 𑀇𑀥𑁂𑀯 𑀫𑀭𑀡’’𑀦𑁆𑀢𑀺 𑀯𑀢𑁆𑀯𑀸, ‘‘𑀢𑀸𑀢, 𑀫𑀸 𑀏𑀯𑀁 𑀓𑀭𑀺, 𑀅𑀜𑁆𑀜𑀁 𑀢𑁂 𑀅𑀫𑁆𑀳𑀸𑀓𑀁 𑀓𑀼𑀮𑀲𑁆𑀲 𑀘 𑀪𑁄𑀕𑀸𑀦𑀜𑁆𑀘 𑀅𑀦𑀼𑀭𑀽𑀧𑀁 𑀓𑀼𑀫𑀸𑀭𑀺𑀓𑀁 𑀆𑀦𑁂𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀢𑀣𑁂𑀯 𑀯𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀅𑀣𑀲𑁆𑀲 𑀧𑀺𑀢𑀸 𑀩𑀳𑀼𑀁 𑀬𑀸𑀘𑀺𑀢𑁆𑀯𑀸𑀧𑀺 𑀢𑀁 𑀲𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀲𑁆𑀲 𑀲𑀳𑀸𑀬𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀓𑀳𑀸𑀧𑀡𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀇𑀫𑁂 𑀓𑀳𑀸𑀧𑀡𑁂 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀤𑁂𑀢𑀽’’𑀢𑀺 𑀧𑀳𑀺𑀡𑀺. 𑀲𑁄 ‘‘𑀦𑀸𑀳𑀁 𑀓𑀳𑀸𑀧𑀡𑁂 𑀕𑀳𑁂𑀢𑁆𑀯𑀸 𑀤𑁂𑀫𑀺, 𑀲𑀘𑁂 𑀧𑀦 𑀲𑁄 𑀇𑀫𑀁 𑀅𑀮𑀪𑀺𑀢𑁆𑀯𑀸 𑀚𑀻𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑁂𑀦 𑀳𑀺 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀯𑀺𑀘𑀭𑀢𑀼, 𑀤𑀲𑁆𑀲𑀸𑀫𑀺𑀲𑁆𑀲 𑀥𑀻𑀢𑀭’’𑀦𑁆𑀢𑀺 𑀆𑀳. 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑁄 ‘‘𑀅𑀳𑀁 𑀢𑁂𑀳𑀺 𑀲𑀤𑁆𑀥𑀺𑀁 𑀯𑀺𑀘𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀬𑀸𑀘𑀦𑁆𑀢𑀸𑀦𑀫𑁆𑀧𑀺 𑀢𑁂𑀲𑀁 𑀓𑀣𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀸𑀝𑀓𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑁄 𑀢𑀲𑁆𑀲 𑀥𑀻𑀢𑀭𑀁 𑀤𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀲𑀺𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀘𑀭𑀺.

𑀲𑀸𑀧𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀁𑀯𑀸𑀲𑀫𑀦𑁆𑀯𑀸𑀬 𑀦𑀘𑀺𑀭𑀲𑁆𑀲𑁂𑀯 𑀧𑀼𑀢𑁆𑀢𑀁 𑀮𑀪𑀺𑀢𑁆𑀯𑀸 𑀓𑀻𑀴𑀸𑀧𑀬𑀫𑀸𑀦𑀸 ‘‘𑀲𑀓𑀝𑀕𑁄𑀧𑀓𑀲𑁆𑀲 𑀧𑀼𑀢𑁆𑀢, 𑀪𑀡𑁆𑀟𑀳𑀸𑀭𑀓𑀲𑁆𑀲 𑀧𑀼𑀢𑁆𑀢, 𑀓𑀺𑀜𑁆𑀘𑀺 𑀅𑀚𑀸𑀦𑀓𑀲𑁆𑀲 𑀧𑀼𑀢𑁆𑀢𑀸’’𑀢𑀺 𑀯𑀤𑀢𑀺. 𑀲𑁄𑀧𑀺 𑀦𑁂𑀲𑀁 𑀲𑀓𑀝𑀧𑀭𑀺𑀯𑀢𑁆𑀢𑀓𑀁 𑀓𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑁂 𑀕𑁄𑀡𑀸𑀦𑀁 𑀢𑀺𑀡𑀁 𑀆𑀳𑀭𑀢𑀺, 𑀲𑀺𑀧𑁆𑀧𑀤𑀲𑁆𑀲𑀦𑀝𑁆𑀞𑀸𑀦𑁂 𑀮𑀤𑁆𑀥𑀪𑀡𑁆𑀟𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀳𑀭𑀢𑀺. 𑀢𑀤𑁂𑀯 𑀓𑀺𑀭 𑀲𑀦𑁆𑀥𑀸𑀬 𑀲𑀸 𑀇𑀢𑁆𑀣𑀻 𑀧𑀼𑀢𑁆𑀢𑀁 𑀓𑀻𑀴𑀸𑀧𑀬𑀫𑀸𑀦𑀸 𑀢𑀣𑀸 𑀯𑀤𑀢𑀺. 𑀲𑁄 𑀅𑀢𑁆𑀢𑀸𑀦𑀁 𑀆𑀭𑀩𑁆𑀪 𑀢𑀲𑁆𑀲𑀸 𑀕𑀸𑀬𑀦𑀪𑀸𑀯𑀁 𑀜𑀢𑁆𑀯𑀸 𑀢𑀁 𑀧𑀼𑀘𑁆𑀙𑀺 𑁋 ‘‘𑀫𑀁 𑀲𑀦𑁆𑀥𑀸𑀬 𑀓𑀣𑁂𑀲𑀻’’𑀢𑀺? ‘‘𑀆𑀫, 𑀢𑀁 𑀲𑀦𑁆𑀥𑀸𑀬𑀸’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀅𑀳𑀁 𑀧𑀮𑀸𑀬𑀺𑀲𑁆𑀲𑀸𑀫𑀻’’𑀢𑀺. 𑀲𑀸 ‘‘𑀓𑀺𑀁 𑀧𑀦 𑀫𑀬𑁆𑀳𑀁 𑀢𑀬𑀸 𑀧𑀮𑀸𑀬𑀺𑀢𑁂𑀦 𑀯𑀸 𑀆𑀕𑀢𑁂𑀦 𑀯𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀢𑀤𑁂𑀯 𑀕𑀻𑀢𑀁 𑀕𑀸𑀬𑀢𑀺. 𑀲𑀸 𑀓𑀺𑀭 𑀅𑀢𑁆𑀢𑀦𑁄 𑀭𑀽𑀧𑀲𑀫𑁆𑀧𑀢𑁆𑀢𑀺𑀜𑁆𑀘𑁂𑀯 𑀥𑀦𑀮𑀸𑀪𑀜𑁆𑀘 𑀦𑀺𑀲𑁆𑀲𑀸𑀬 𑀢𑀁 𑀓𑀺𑀲𑁆𑀫𑀺𑀜𑁆𑀘𑀺 𑀦 𑀫𑀜𑁆𑀜𑀢𑀺. 𑀲𑁄 ‘‘𑀓𑀺𑀁 𑀦𑀼 𑀔𑁄 𑀦𑀺𑀲𑁆𑀲𑀸𑀬 𑀇𑀫𑀺𑀲𑁆𑀲𑀸 𑀅𑀬𑀁 𑀫𑀸𑀦𑁄’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 ‘‘𑀲𑀺𑀧𑁆𑀧𑀁 𑀦𑀺𑀲𑁆𑀲𑀸𑀬𑀸’’𑀢𑀺 𑀜𑀢𑁆𑀯𑀸 ‘‘𑀳𑁄𑀢𑀼, 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀲𑀲𑀼𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀲𑁆𑀲 𑀚𑀸𑀦𑀦𑀓𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀲𑀺𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀕𑀳𑀁 𑀆𑀕𑀦𑁆𑀢𑁆𑀯𑀸 ‘‘𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀉𑀕𑁆𑀕𑀲𑁂𑀦𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀦𑀕𑀭𑀯𑀸𑀲𑀻𑀦𑀁 𑀲𑀺𑀧𑁆𑀧𑀁 𑀤𑀲𑁆𑀲𑁂𑀲𑁆𑀲𑀢𑀻’’𑀢𑀺 𑀆𑀭𑁄𑀘𑀸𑀧𑁂𑀲𑀺.

𑀦𑀕𑀭𑀯𑀸𑀲𑀺𑀦𑁄 𑀫𑀜𑁆𑀘𑀸𑀢𑀺𑀫𑀜𑁆𑀘𑀸𑀤𑀬𑁄 𑀩𑀦𑁆𑀥𑀸𑀧𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀲𑁄𑀧𑀺 𑀲𑀝𑁆𑀞𑀺𑀳𑀢𑁆𑀣𑀁 𑀯𑀁𑀲𑀁 𑀅𑀪𑀺𑀭𑀼𑀬𑁆𑀳 𑀢𑀲𑁆𑀲 𑀫𑀢𑁆𑀣𑀓𑁂 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀯𑀲𑀁 𑀲𑀢𑁆𑀣𑀸 𑀧𑀘𑁆𑀘𑀽𑀲𑀓𑀸𑀮𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑀁 𑀅𑀢𑁆𑀢𑀦𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀲𑁆𑀯𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀲𑀺𑀧𑁆𑀧𑀁 𑀤𑀲𑁆𑀲𑁂𑀲𑁆𑀲𑀸𑀫𑀻𑀢𑀺 𑀯𑀁𑀲𑀫𑀢𑁆𑀣𑀓𑁂 𑀞𑀲𑁆𑀲𑀢𑀺, 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺𑀲𑁆𑀲𑀢𑀺. 𑀢𑀢𑁆𑀭 𑀅𑀳𑀁 𑀘𑀢𑀼𑀧𑁆𑀧𑀤𑀺𑀓𑀁 𑀕𑀸𑀣𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀺, 𑀉𑀕𑁆𑀕𑀲𑁂𑀦𑁄𑀧𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺 𑀅𑀜𑁆𑀜𑀸𑀲𑀺. 𑀲𑀢𑁆𑀣𑀸 𑀧𑀼𑀦𑀤𑀺𑀯𑀲𑁂 𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀉𑀕𑁆𑀕𑀲𑁂𑀦𑁄𑀧𑀺 𑀲𑀢𑁆𑀣𑀭𑀺 𑀅𑀦𑁆𑀢𑁄𑀦𑀕𑀭𑀁 𑀅𑀧𑀯𑀺𑀝𑁆𑀞𑁂𑀬𑁂𑀯 𑀉𑀦𑁆𑀦𑀸𑀤𑀦𑀢𑁆𑀣𑀸𑀬 𑀫𑀳𑀸𑀚𑀦𑀲𑁆𑀲 𑀅𑀗𑁆𑀕𑀼𑀮𑀺𑀲𑀜𑁆𑀜𑀁 𑀤𑀢𑁆𑀯𑀸 𑀯𑀁𑀲𑀫𑀢𑁆𑀣𑀓𑁂 𑀧𑀢𑀺𑀝𑁆𑀞𑀸𑀬 𑀆𑀓𑀸𑀲𑁂𑀬𑁂𑀯 𑀲𑀢𑁆𑀢 𑀯𑀸𑀭𑁂 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀑𑀭𑀼𑀬𑁆𑀳 𑀯𑀁𑀲𑀫𑀢𑁆𑀣𑀓𑁂 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀢𑁆𑀣𑀸 𑀦𑀕𑀭𑀁 𑀧𑀯𑀺𑀲𑀦𑁆𑀢𑁄 𑀬𑀣𑀸 𑀢𑀁 𑀧𑀭𑀺𑀲𑀸 𑀦 𑀑𑀮𑁄𑀓𑁂𑀢𑀺, 𑀏𑀯𑀁 𑀓𑀢𑁆𑀯𑀸 𑀅𑀢𑁆𑀢𑀸𑀦𑀫𑁂𑀯 𑀑𑀮𑁄𑀓𑀸𑀧𑁂𑀲𑀺. 𑀉𑀕𑁆𑀕𑀲𑁂𑀦𑁄 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀦 𑀫𑀁 𑀧𑀭𑀺𑀲𑀸 𑀑𑀮𑁄𑀓𑁂𑀢𑀻’’𑀢𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 ‘‘𑀇𑀤𑀁 𑀫𑀬𑀸 𑀲𑀁𑀯𑀘𑁆𑀙𑀭𑁂 𑀓𑀢𑁆𑀢𑀩𑁆𑀩𑀁 𑀲𑀺𑀧𑁆𑀧𑀁, 𑀲𑀢𑁆𑀣𑀭𑀺 𑀦𑀕𑀭𑀁 𑀧𑀯𑀺𑀲𑀦𑁆𑀢𑁂 𑀧𑀭𑀺𑀲𑀸 𑀫𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀲𑀢𑁆𑀣𑀸𑀭𑀫𑁂𑀯 𑀑𑀮𑁄𑀓𑁂𑀢𑀺, 𑀫𑁄𑀖𑀁 𑀯𑀢 𑀫𑁂 𑀲𑀺𑀧𑁆𑀧𑀤𑀲𑁆𑀲𑀦𑀁 𑀚𑀸𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺.

𑀲𑀢𑁆𑀣𑀸 𑀢𑀲𑁆𑀲 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀕𑀘𑁆𑀙, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀯𑀤𑁂𑀳𑀺 ‘𑀲𑀺𑀧𑁆𑀧𑀁 𑀓𑀺𑀭 𑀤𑀲𑁆𑀲𑁂𑀢𑀽’’’𑀢𑀺 𑀆𑀳. 𑀣𑁂𑀭𑁄 𑀕𑀦𑁆𑀢𑁆𑀯𑀸 𑀯𑀁𑀲𑀲𑁆𑀲 𑀳𑁂𑀝𑁆𑀞𑀸 𑀞𑀺𑀢𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀇𑀗𑁆𑀖 𑀧𑀲𑁆𑀲 𑀦𑀝𑀧𑀼𑀢𑁆𑀢, 𑀉𑀕𑁆𑀕𑀲𑁂𑀦 𑀫𑀳𑀩𑁆𑀩𑀮;

𑀓𑀭𑁄𑀳𑀺 𑀭𑀗𑁆𑀕𑀁 𑀧𑀭𑀺𑀲𑀸𑀬, 𑀳𑀸𑀲𑀬𑀲𑁆𑀲𑀼 𑀫𑀳𑀸𑀚𑀦’’𑀦𑁆𑀢𑀺.

𑀲𑁄 𑀣𑁂𑀭𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑁄 𑀳𑀼𑀢𑁆𑀯𑀸 ‘‘𑀲𑀢𑁆𑀣𑀸 𑀫𑀜𑁆𑀜𑁂 𑀫𑀫 𑀲𑀺𑀧𑁆𑀧𑀁 𑀧𑀲𑁆𑀲𑀺𑀢𑀼𑀓𑀸𑀫𑁄’’𑀢𑀺 𑀯𑀁𑀲𑀫𑀢𑁆𑀣𑀓𑁂 𑀞𑀺𑀢𑀓𑁄𑀯 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀇𑀗𑁆𑀖 𑀧𑀲𑁆𑀲 𑀫𑀳𑀸𑀧𑀜𑁆𑀜, 𑀫𑁄𑀕𑁆𑀕𑀮𑁆𑀮𑀸𑀦 𑀫𑀳𑀺𑀤𑁆𑀥𑀺𑀓;

𑀓𑀭𑁄𑀫𑀺 𑀭𑀗𑁆𑀕𑀁 𑀧𑀭𑀺𑀲𑀸𑀬, 𑀳𑀸𑀲𑀬𑀸𑀫𑀺 𑀫𑀳𑀸𑀚𑀦’’𑀦𑁆𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀯𑀁𑀲𑀫𑀢𑁆𑀣𑀓𑀢𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂𑀯 𑀘𑀼𑀤𑁆𑀤𑀲𑀓𑁆𑀔𑀢𑁆𑀢𑀼𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀑𑀭𑀼𑀬𑁆𑀳 𑀯𑀁𑀲𑀫𑀢𑁆𑀣𑀓𑁂𑀯 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸, ‘‘𑀉𑀕𑁆𑀕𑀲𑁂𑀦, 𑀧𑀡𑁆𑀟𑀺𑀢𑁂𑀦 𑀦𑀸𑀫 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀔𑀦𑁆𑀥𑁂𑀲𑀼 𑀆𑀮𑀬𑀁 𑀧𑀳𑀸𑀬 𑀚𑀸𑀢𑀺𑀆𑀤𑀻𑀳𑀺 𑀫𑀼𑀘𑁆𑀘𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁪𑁮. ‘‘𑀫𑀼𑀜𑁆𑀘 𑀧𑀼𑀭𑁂 𑀫𑀼𑀜𑁆𑀘 𑀧𑀘𑁆𑀙𑀢𑁄,

𑀫𑀚𑁆𑀛𑁂 𑀫𑀼𑀜𑁆𑀘 𑀪𑀯𑀲𑁆𑀲 𑀧𑀸𑀭𑀕𑀽;

𑀲𑀩𑁆𑀩𑀢𑁆𑀣 𑀯𑀺𑀫𑀼𑀢𑁆𑀢𑀫𑀸𑀦𑀲𑁄,

𑀦 𑀧𑀼𑀦𑀁 𑀚𑀸𑀢𑀺𑀚𑀭𑀁 𑀉𑀧𑁂𑀳𑀺𑀲𑀻’’𑀢𑀺.

𑀢𑀢𑁆𑀣 𑀫𑀼𑀜𑁆𑀘 𑀧𑀼𑀭𑁂𑀢𑀺 𑀅𑀢𑀻𑀢𑁂𑀲𑀼 𑀔𑀦𑁆𑀥𑁂𑀲𑀼 𑀆𑀮𑀬𑀁 𑀦𑀺𑀓𑀦𑁆𑀢𑀺𑀁 𑀅𑀚𑁆𑀛𑁄𑀲𑀸𑀦𑀁 𑀧𑀢𑁆𑀣𑀦𑀁 𑀧𑀭𑀺𑀬𑀼𑀝𑁆𑀞𑀸𑀦𑀁 𑀕𑀸𑀳𑀁 𑀧𑀭𑀸𑀫𑀸𑀲𑀁 𑀢𑀡𑁆𑀳𑀁 𑀫𑀼𑀜𑁆𑀘. 𑀧𑀘𑁆𑀙𑀢𑁄𑀢𑀺 𑀅𑀦𑀸𑀕𑀢𑁂𑀲𑀼𑀧𑀺 𑀔𑀦𑁆𑀥𑁂𑀲𑀼 𑀆𑀮𑀬𑀸𑀤𑀻𑀦𑀺 𑀫𑀼𑀜𑁆𑀘. 𑀫𑀚𑁆𑀛𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼𑀧𑀺 𑀢𑀸𑀦𑀺 𑀫𑀼𑀜𑁆𑀘. 𑀪𑀯𑀲𑁆𑀲 𑀧𑀸𑀭𑀕𑀽𑀢𑀺 𑀏𑀯𑀁 𑀲𑀦𑁆𑀢𑁂 𑀢𑀺𑀯𑀺𑀥𑀲𑁆𑀲𑀸𑀧𑀺 𑀪𑀯𑀲𑁆𑀲 𑀅𑀪𑀺𑀜𑁆𑀜𑀸𑀧𑀭𑀺𑀜𑁆𑀜𑀸𑀧𑀳𑀸𑀦𑀪𑀸𑀯𑀦𑀸𑀲𑀘𑁆𑀙𑀺𑀓𑀺𑀭𑀺𑀬𑀯𑀲𑁂𑀦 𑀧𑀸𑀭𑀕𑀽 𑀧𑀸𑀭𑀗𑁆𑀕𑀢𑁄 𑀳𑀼𑀢𑁆𑀯𑀸 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀤𑀺𑀪𑁂𑀤𑁂 𑀲𑀩𑁆𑀩𑀲𑀗𑁆𑀔𑀢𑁂 𑀯𑀺𑀫𑀼𑀢𑁆𑀢𑀫𑀸𑀦𑀲𑁄 𑀯𑀺𑀳𑀭𑀦𑁆𑀢𑁄 𑀧𑀼𑀦 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀦 𑀉𑀧𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑁄𑀧𑀺 𑀯𑀁𑀲𑀫𑀢𑁆𑀣𑀓𑁂 𑀞𑀺𑀢𑀓𑁄𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀯𑀁𑀲𑀢𑁄 𑀑𑀭𑀼𑀬𑁆𑀳 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀅𑀣 𑀦𑀁 𑀲𑀢𑁆𑀣𑀸 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀏𑀳𑀺 𑀪𑀺𑀓𑁆𑀔𑀽’’𑀢𑀺 𑀆𑀳. 𑀲𑁄 𑀢𑀸𑀯𑀤𑁂𑀯 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀥𑀭𑁄 𑀲𑀝𑁆𑀞𑀺𑀯𑀲𑁆𑀲𑀺𑀓𑀢𑁆𑀣𑁂𑀭𑁄 𑀯𑀺𑀬 𑀅𑀳𑁄𑀲𑀺. 𑀅𑀣 𑀦𑀁 𑀪𑀺𑀓𑁆𑀔𑀽, ‘‘𑀆𑀯𑀼𑀲𑁄 𑀉𑀕𑁆𑀕𑀲𑁂𑀦, 𑀲𑀝𑁆𑀞𑀺𑀳𑀢𑁆𑀣𑀲𑁆𑀲 𑀢𑁂 𑀯𑀁𑀲𑀲𑁆𑀲 𑀫𑀢𑁆𑀣𑀓𑀢𑁄 𑀑𑀢𑀭𑀦𑁆𑀢𑀲𑁆𑀲 𑀪𑀬𑀁 𑀦𑀸𑀫 𑀦𑀸𑀳𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀪𑀬’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁, ‘‘𑀪𑀦𑁆𑀢𑁂, 𑀉𑀕𑁆𑀕𑀲𑁂𑀦𑁄 ‘𑀦 𑀪𑀸𑀬𑀸𑀫𑀻’𑀢𑀺 𑀯𑀤𑀢𑀺, 𑀅𑀪𑀽𑀢𑀁 𑀯𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀻’’𑀢𑀺. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑁂𑀦 𑀉𑀕𑁆𑀕𑀲𑁂𑀦𑁂𑀦 𑀲𑀤𑀺𑀲𑀸 𑀙𑀺𑀦𑁆𑀦𑀲𑀁𑀬𑁄𑀚𑀦𑀸 𑀪𑀺𑀓𑁆𑀔𑀽 𑀪𑀸𑀬𑀦𑁆𑀢𑀺, 𑀦 𑀢𑀲𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁂 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑀩𑁆𑀩𑀲𑀁𑀬𑁄𑀚𑀦𑀁 𑀙𑁂𑀢𑁆𑀯𑀸, 𑀬𑁄 𑀯𑁂 𑀦 𑀧𑀭𑀺𑀢𑀲𑁆𑀲𑀢𑀺;

𑀲𑀗𑁆𑀕𑀸𑀢𑀺𑀕𑀁 𑀯𑀺𑀲𑀁𑀬𑀼𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺. (𑀥. 𑀧. 𑁩𑁯𑁭; 𑀲𑀼. 𑀦𑀺. 𑁬𑁨𑁬);

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀧𑀼𑀦𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀏𑀯𑀁 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀝𑀥𑀻𑀢𑀭𑀁 𑀦𑀺𑀲𑁆𑀲𑀸𑀬 𑀦𑀝𑁂𑀳𑀺 𑀲𑀤𑁆𑀥𑀺𑀁 𑀯𑀺𑀘𑀭𑀡𑀓𑀸𑀭𑀡𑀁, 𑀓𑀺𑀁 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑀓𑀸𑀭𑀡’’𑀦𑁆𑀢𑀺? 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀉𑀪𑀬𑀫𑁆𑀧𑁂𑀢𑀁 𑀇𑀫𑀺𑀦𑀸 𑀏𑀯 𑀓𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀓𑀺𑀭 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀲𑀼𑀯𑀡𑁆𑀡𑀘𑁂𑀢𑀺𑀬𑁂 𑀓𑀭𑀺𑀬𑀫𑀸𑀦𑁂 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄 𑀓𑀼𑀮𑀧𑀼𑀢𑁆𑀢𑀸 𑀩𑀳𑀼𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀬𑀸𑀦𑀓𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 ‘‘𑀳𑀢𑁆𑀣𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀘𑁂𑀢𑀺𑀬𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀁 𑀣𑁂𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀁 𑀧𑀲𑁆𑀲𑀺𑀁𑀲𑀼. 𑀅𑀣𑁂𑀓𑀸 𑀓𑀼𑀮𑀥𑀻𑀢𑀸 𑀣𑁂𑀭𑀁 𑀑𑀮𑁄𑀓𑁂𑀢𑁆𑀯𑀸 𑀲𑀸𑀫𑀺𑀓𑀁 𑀆𑀳 𑁋 ‘‘𑀲𑀸𑀫𑀺, 𑀅𑀬𑁆𑀬𑁄, 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀬𑀸𑀦𑀓𑁂 𑀘 𑀦𑁄 𑀩𑀳𑀼𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁, 𑀧𑀢𑁆𑀢𑀫𑀲𑁆𑀲 𑀆𑀳𑀭, 𑀪𑀺𑀓𑁆𑀔𑀁 𑀤𑀲𑁆𑀲𑀸𑀫𑀸’’𑀢𑀺. 𑀲𑁄 𑀢𑀁 𑀧𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀲𑁆𑀲 𑀧𑀽𑀭𑁂𑀢𑁆𑀯𑀸 𑀣𑁂𑀭𑀲𑁆𑀲 𑀳𑀢𑁆𑀣𑁂 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀉𑀪𑁄𑀧𑀺 𑀧𑀢𑁆𑀣𑀦𑀁 𑀓𑀭𑀺𑀁𑀲𑀼, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀥𑀫𑁆𑀫𑀲𑁆𑀲𑁂𑀯 𑀪𑀸𑀕𑀺𑀦𑁄 𑀪𑀯𑁂𑀬𑁆𑀬𑀸𑀫𑀸’’𑀢𑀺. 𑀲𑁄𑀧𑀺 𑀣𑁂𑀭𑁄 𑀔𑀻𑀡𑀸𑀲𑀯𑁄𑀯, 𑀢𑀲𑁆𑀫𑀸 𑀑𑀮𑁄𑀓𑁂𑀦𑁆𑀢𑁄 𑀢𑁂𑀲𑀁 𑀧𑀢𑁆𑀣𑀦𑀸𑀬 𑀲𑀫𑀺𑀚𑁆𑀛𑀦𑀪𑀸𑀯𑀁 𑀜𑀢𑁆𑀯𑀸 𑀲𑀺𑀢𑀁 𑀅𑀓𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀲𑀸 𑀇𑀢𑁆𑀣𑀻 𑀲𑀸𑀫𑀺𑀓𑀁 𑀆𑀳 𑁋 ‘‘𑀅𑀫𑁆𑀳𑀸𑀓𑀁, 𑀅𑀬𑁆𑀬𑁄, 𑀲𑀺𑀢𑀁 𑀓𑀭𑁄𑀢𑀺, 𑀏𑀓𑁄 𑀦𑀝𑀓𑀸𑀭𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑀸𑀫𑀺𑀓𑁄𑀧𑀺𑀲𑁆𑀲𑀸 ‘‘𑀏𑀯𑀁 𑀪𑀯𑀺𑀲𑁆𑀲𑀢𑀺, 𑀪𑀤𑁆𑀤𑁂’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀇𑀤𑀁 𑀢𑁂𑀲𑀁 𑀧𑀼𑀩𑁆𑀩𑀓𑀫𑁆𑀫𑀁. 𑀢𑁂 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀲𑀸 𑀇𑀢𑁆𑀣𑀻 𑀦𑀝𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺, 𑀧𑀼𑀭𑀺𑀲𑁄 𑀲𑁂𑀝𑁆𑀞𑀺𑀕𑁂𑀳𑁂. 𑀲𑁄 ‘‘𑀏𑀯𑀁, 𑀪𑀤𑁆𑀤𑁂, 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲𑀸 𑀧𑀝𑀺𑀯𑀘𑀦𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀦𑀝𑁂𑀳𑀺 𑀲𑀤𑁆𑀥𑀺𑀁 𑀯𑀺𑀘𑀭𑀺. 𑀔𑀻𑀡𑀸𑀲𑀯𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑀧𑀺𑀡𑁆𑀟𑀧𑀸𑀢𑀁 𑀦𑀺𑀲𑁆𑀲𑀸𑀬 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑀸𑀧𑀺 𑀦𑀝𑀥𑀻𑀢𑀸 ‘‘𑀬𑀸 𑀫𑁂 𑀲𑀸𑀫𑀺𑀓𑀲𑁆𑀲 𑀕𑀢𑀺, 𑀫𑀬𑁆𑀳𑀫𑁆𑀧𑀺 𑀲𑀸 𑀏𑀯 𑀕𑀢𑀻’’𑀢𑀺 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀻𑀢𑀺.

𑀉𑀕𑁆𑀕𑀲𑁂𑀦𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀘𑀽𑀴𑀥𑀦𑀼𑀕𑁆𑀕𑀳𑀧𑀡𑁆𑀟𑀺𑀢𑀯𑀢𑁆𑀣𑀼

𑀯𑀺𑀢𑀓𑁆𑀓𑀫𑀣𑀺𑀢𑀲𑁆𑀲𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀽𑀴𑀥𑀦𑀼𑀕𑁆𑀕𑀳𑀧𑀡𑁆𑀟𑀺𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑁄 𑀓𑀺𑀭 𑀤𑀳𑀭𑀪𑀺𑀓𑁆𑀔𑀼 𑀲𑀮𑀸𑀓𑀕𑁆𑀕𑁂 𑀅𑀢𑁆𑀢𑀦𑁄 𑀧𑀢𑁆𑀢𑀲𑀮𑀸𑀓𑀁 𑀕𑀳𑁂𑀢𑁆𑀯𑀸 𑀲𑀮𑀸𑀓𑀬𑀸𑀕𑀼𑀁 𑀆𑀤𑀸𑀬 𑀆𑀲𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀧𑀺𑀯𑀺. 𑀢𑀢𑁆𑀣 𑀉𑀤𑀓𑀁 𑀅𑀮𑀪𑀺𑀢𑁆𑀯𑀸 𑀉𑀤𑀓𑀢𑁆𑀣𑀸𑀬 𑀏𑀓𑀁 𑀖𑀭𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀢𑀁 𑀏𑀓𑀸 𑀓𑀼𑀫𑀸𑀭𑀺𑀓𑀸 𑀤𑀺𑀲𑁆𑀯𑀸𑀯 𑀉𑀧𑁆𑀧𑀦𑁆𑀦𑀲𑀺𑀦𑁂𑀳𑀸, ‘‘𑀪𑀦𑁆𑀢𑁂, 𑀧𑀼𑀦 𑀧𑀸𑀦𑀻𑀬𑁂𑀦 𑀅𑀢𑁆𑀣𑁂 𑀲𑀢𑀺 𑀇𑀥𑁂𑀯 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀬𑀤𑀸 𑀧𑀸𑀦𑀻𑀬𑀁 𑀦 𑀮𑀪𑀢𑀺, 𑀢𑀤𑀸 𑀢𑀢𑁆𑀣𑁂𑀯 𑀕𑀘𑁆𑀙𑀢𑀺. 𑀲𑀸𑀧𑀺𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀸𑀦𑀻𑀬𑀁 𑀤𑁂𑀢𑀺. 𑀏𑀯𑀁 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀬𑀸𑀕𑀼𑀫𑁆𑀧𑀺 𑀤𑀢𑁆𑀯𑀸 𑀧𑀼𑀦𑁂𑀓𑀤𑀺𑀯𑀲𑀁 𑀢𑀢𑁆𑀣𑁂𑀯 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑀢𑁆𑀢𑀁 𑀅𑀤𑀸𑀲𑀺. 𑀲𑀦𑁆𑀢𑀺𑀓𑁂 𑀘𑀲𑁆𑀲 𑀦𑀺𑀲𑀻𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀦 𑀓𑀺𑀜𑁆𑀘𑀺 𑀦𑀢𑁆𑀣𑀺 𑀦𑀸𑀫, 𑀓𑁂𑀯𑀮𑀁 𑀫𑀬𑀁 𑀯𑀺𑀘𑀭𑀡𑀓𑀫𑀦𑀼𑀲𑁆𑀲𑀫𑁂𑀯 𑀦 𑀮𑀪𑀸𑀫𑀸’’𑀢𑀺 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀲𑁄 𑀓𑀣𑀺𑀧𑀸𑀳𑁂𑀦𑁂𑀯 𑀢𑀲𑁆𑀲𑀸 𑀓𑀣𑀁 𑀲𑀼𑀢𑁆𑀯𑀸 𑀉𑀓𑁆𑀓𑀡𑁆𑀞𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀓𑀲𑁆𑀫𑀸 𑀢𑁆𑀯𑀁, 𑀆𑀯𑀼𑀲𑁄, 𑀓𑀺𑀲𑁄 𑀉𑀧𑁆𑀧𑀡𑁆𑀟𑀼𑀧𑀡𑁆𑀟𑀼𑀓𑀚𑀸𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀉𑀓𑁆𑀓𑀡𑁆𑀞𑀺𑀢𑁄𑀫𑁆𑀳𑀺, 𑀆𑀯𑀼𑀲𑁄’’𑀢𑀺 𑀯𑀼𑀢𑁆𑀢𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀦𑁆𑀢𑀺𑀓𑀁 𑀦𑀬𑀺𑀁𑀲𑀼. 𑀢𑁂𑀧𑀺 𑀦𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀓𑀲𑁆𑀫𑀸 𑀢𑁆𑀯𑀁 𑀫𑀸𑀤𑀺𑀲𑀲𑁆𑀲 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 ‘𑀲𑁄𑀢𑀸𑀧𑀦𑁆𑀦𑁄’𑀢𑀺 𑀯𑀸 ‘𑀲𑀓𑀤𑀸𑀕𑀸𑀫𑀻’𑀢𑀺 𑀯𑀸 𑀅𑀢𑁆𑀢𑀸𑀦𑀁 𑀅𑀯𑀤𑀸𑀧𑁂𑀢𑁆𑀯𑀸 ‘𑀉𑀓𑁆𑀓𑀡𑁆𑀞𑀺𑀢𑁄’𑀢𑀺 𑀯𑀤𑀸𑀧𑁂𑀲𑀺, 𑀪𑀸𑀭𑀺𑀬𑀁 𑀢𑁂 𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀯𑀢𑁆𑀯𑀸 ‘‘𑀓𑀺𑀁 𑀓𑀸𑀭𑀡𑀸 𑀉𑀓𑁆𑀓𑀡𑁆𑀞𑀺𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀪𑀦𑁆𑀢𑁂, 𑀏𑀓𑀸 𑀫𑀁 𑀇𑀢𑁆𑀣𑀻 𑀏𑀯𑀫𑀸𑀳𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀼, 𑀅𑀦𑀘𑁆𑀙𑀭𑀺𑀬𑀁 𑀏𑀢𑀁 𑀢𑀲𑁆𑀲𑀸 𑀓𑀺𑀭𑀺𑀬𑀁. 𑀲𑀸 𑀳𑀺 𑀧𑀼𑀩𑁆𑀩𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀥𑀦𑀼𑀕𑁆𑀕𑀳𑀧𑀡𑁆𑀟𑀺𑀢𑀁 𑀧𑀳𑀸𑀬 𑀢𑀁𑀫𑀼𑀳𑀼𑀢𑁆𑀢𑀤𑀺𑀝𑁆𑀞𑀓𑁂 𑀏𑀓𑀲𑁆𑀫𑀺𑀁 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀢𑁆𑀣𑀲𑁆𑀲 𑀧𑀓𑀸𑀲𑀦𑀢𑁆𑀣𑀁 𑀪𑀺𑀓𑁆𑀔𑀽𑀳𑀺 𑀬𑀸𑀘𑀺𑀢𑁄 𑁋

𑀅𑀢𑀻𑀢𑁂 𑀘𑀽𑀴𑀥𑀦𑀼𑀕𑁆𑀕𑀳𑀧𑀡𑁆𑀟𑀺𑀢𑀓𑀸𑀮𑁂 𑀢𑀓𑁆𑀓𑀲𑀺𑀮𑀸𑀬𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑀲𑁆𑀲 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀳𑁂𑀢𑁆𑀯𑀸 𑀢𑁂𑀦 𑀢𑀼𑀝𑁆𑀞𑁂𑀦 𑀤𑀺𑀦𑁆𑀦𑀁 𑀥𑀻𑀢𑀭𑀁 𑀆𑀤𑀸𑀬 𑀩𑀸𑀭𑀸𑀡𑀲𑀺𑀁 𑀕𑀘𑁆𑀙𑀦𑁆𑀢𑀲𑁆𑀲 𑀏𑀓𑀲𑁆𑀫𑀺𑀁 𑀅𑀝𑀯𑀺𑀫𑀼𑀔𑁂 𑀏𑀓𑀽𑀦𑀧𑀜𑁆𑀜𑀸𑀲𑀸𑀬 𑀓𑀡𑁆𑀟𑁂𑀳𑀺 𑀏𑀓𑀽𑀦𑀧𑀜𑁆𑀜𑀸𑀲𑀘𑁄𑀭𑁂 𑀫𑀸𑀭𑁂𑀢𑁆𑀯𑀸 𑀓𑀡𑁆𑀟𑁂𑀲𑀼 𑀔𑀻𑀡𑁂𑀲𑀼 𑀘𑁄𑀭𑀚𑁂𑀝𑁆𑀞𑀓𑀁 𑀕𑀳𑁂𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸, ‘‘𑀪𑀤𑁆𑀤𑁂, 𑀅𑀲𑀺𑀁 𑀆𑀳𑀭𑀸’’𑀢𑀺 𑀯𑀼𑀢𑁆𑀢𑁂 𑀢𑀸𑀬 𑀢𑀗𑁆𑀔𑀡𑀁 𑀤𑀺𑀝𑁆𑀞𑀘𑁄𑀭𑁂 𑀲𑀺𑀦𑁂𑀳𑀁 𑀓𑀢𑁆𑀯𑀸 𑀘𑁄𑀭𑀲𑁆𑀲 𑀳𑀢𑁆𑀣𑁂 𑀅𑀲𑀺𑀣𑀭𑀼𑀁 𑀞𑀧𑁂𑀢𑁆𑀯𑀸 𑀘𑁄𑀭𑁂𑀦 𑀥𑀦𑀼𑀕𑁆𑀕𑀳𑀧𑀡𑁆𑀟𑀺𑀢𑀲𑁆𑀲 𑀫𑀸𑀭𑀺𑀢𑀪𑀸𑀯𑀁 𑀆𑀯𑀺𑀓𑀢𑁆𑀯𑀸 𑀘𑁄𑀭𑁂𑀦 𑀘 𑀢𑀁 𑀆𑀤𑀸𑀬 𑀕𑀘𑁆𑀙𑀦𑁆𑀢𑁂𑀦 ‘‘𑀫𑀫𑁆𑀧𑀺 𑀏𑀲𑀸 𑀅𑀜𑁆𑀜𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀲𑀸𑀫𑀺𑀓𑀁 𑀯𑀺𑀬 𑀫𑀸𑀭𑀸𑀧𑁂𑀲𑁆𑀲𑀢𑀺, 𑀓𑀺𑀁 𑀫𑁂 𑀇𑀫𑀸𑀬𑀸’’𑀢𑀺 𑀏𑀓𑀁 𑀦𑀤𑀺𑀁 𑀤𑀺𑀲𑁆𑀯𑀸 𑀑𑀭𑀺𑀫𑀢𑀻𑀭𑁂 𑀢𑀁 𑀞𑀧𑁂𑀢𑁆𑀯𑀸 𑀢𑀲𑁆𑀲𑀸 𑀪𑀡𑁆𑀟𑀓𑀁 𑀆𑀤𑀸𑀬 ‘‘𑀢𑁆𑀯𑀁 𑀇𑀥𑁂𑀯 𑀳𑁄𑀳𑀺, 𑀬𑀸𑀯𑀸𑀳𑀁 𑀪𑀡𑁆𑀟𑀺𑀓𑀁 𑀉𑀢𑁆𑀢𑀸𑀭𑁂𑀫𑀻’’𑀢𑀺 𑀢𑀢𑁆𑀣𑁂𑀯 𑀢𑀁 𑀧𑀳𑀸𑀬 𑀕𑀫𑀦𑀪𑀸𑀯𑀜𑁆𑀘 𑀆𑀯𑀺𑀓𑀢𑁆𑀯𑀸 𑁋

‘‘𑀲𑀩𑁆𑀩𑀁 𑀪𑀡𑁆𑀟𑀁 𑀲𑀫𑀸𑀤𑀸𑀬, 𑀧𑀸𑀭𑀁 𑀢𑀺𑀡𑁆𑀡𑁄𑀲𑀺 𑀩𑁆𑀭𑀸𑀳𑁆𑀫𑀡;

𑀧𑀘𑁆𑀘𑀸𑀕𑀘𑁆𑀙 𑀮𑀳𑀼𑀁 𑀔𑀺𑀧𑁆𑀧𑀁, 𑀫𑀫𑁆𑀧𑀺 𑀢𑀸𑀭𑁂𑀳𑀺 𑀤𑀸𑀦𑀺𑀢𑁄.

‘‘𑀅𑀲𑀦𑁆𑀣𑀼𑀢𑀁 𑀫𑀁 𑀘𑀺𑀭𑀲𑀦𑁆𑀣𑀼𑀢𑁂𑀦,

𑀦𑀺𑀫𑀻𑀦𑀺 𑀪𑁄𑀢𑀻 𑀅𑀤𑁆𑀥𑀼𑀯𑀁 𑀥𑀼𑀯𑁂𑀦;

𑀫𑀬𑀸𑀧𑀺 𑀪𑁄𑀢𑀻 𑀦𑀺𑀫𑀺𑀦𑁂𑀬𑁆𑀬 𑀅𑀜𑁆𑀜𑀁,

𑀇𑀢𑁄 𑀅𑀳𑀁 𑀤𑀽𑀭𑀢𑀭𑀁 𑀕𑀫𑀺𑀲𑁆𑀲𑀁.

‘‘𑀓𑀸𑀬𑀁 𑀏𑀴𑀕𑀮𑀸𑀕𑀼𑀫𑁆𑀩𑁂, 𑀓𑀭𑁄𑀢𑀺 𑀅𑀳𑀼𑀳𑀸𑀲𑀺𑀬𑀁;

𑀦𑀬𑀻𑀥 𑀦𑀘𑁆𑀘𑀁 𑀯𑀸 𑀕𑀻𑀢𑀁 𑀯𑀸, 𑀢𑀸𑀴𑀁 𑀯𑀸 𑀲𑀼𑀲𑀫𑀸𑀳𑀺𑀢𑀁;

𑀅𑀦𑀫𑁆𑀳𑀺𑀓𑀸𑀮𑁂 𑀲𑀼𑀲𑁄𑀡𑀺, 𑀓𑀺𑀁 𑀦𑀼 𑀚𑀕𑁆𑀖𑀲𑀺 𑀲𑁄𑀪𑀦𑁂.

‘‘𑀲𑀺𑀗𑁆𑀕𑀸𑀮 𑀩𑀸𑀮 𑀤𑀼𑀫𑁆𑀫𑁂𑀥, 𑀅𑀧𑁆𑀧𑀧𑀜𑁆𑀜𑁄𑀲𑀺 𑀚𑀫𑁆𑀩𑀼𑀓;

𑀚𑀻𑀦𑁄 𑀫𑀘𑁆𑀙𑀜𑁆𑀘 𑀧𑁂𑀲𑀺𑀜𑁆𑀘, 𑀓𑀧𑀡𑁄 𑀯𑀺𑀬 𑀛𑀸𑀬𑀲𑀺.

‘‘𑀲𑀼𑀤𑀲𑁆𑀲𑀁 𑀯𑀚𑁆𑀚𑀫𑀜𑁆𑀜𑁂𑀲𑀁, 𑀅𑀢𑁆𑀢𑀦𑁄 𑀧𑀦 𑀤𑀼𑀤𑁆𑀤𑀲𑀁;

𑀚𑀻𑀦𑀸 𑀧𑀢𑀺𑀜𑁆𑀘 𑀚𑀸𑀭𑀜𑁆𑀘, 𑀫𑀜𑁆𑀜𑁂 𑀢𑁆𑀯𑀜𑁆𑀜𑁂𑀯 𑀛𑀸𑀬𑀲𑀺.

‘‘𑀏𑀯𑀫𑁂𑀢𑀁 𑀫𑀺𑀕𑀭𑀸𑀚, 𑀬𑀣𑀸 𑀪𑀸𑀲𑀲𑀺 𑀚𑀫𑁆𑀩𑀼𑀓;

𑀲𑀸 𑀦𑀽𑀦𑀸𑀳𑀁 𑀇𑀢𑁄 𑀕𑀦𑁆𑀢𑁆𑀯𑀸, 𑀪𑀢𑁆𑀢𑀼 𑀳𑁂𑀲𑁆𑀲𑀁 𑀯𑀲𑀸𑀦𑀼𑀕𑀸.

‘‘𑀬𑁄 𑀳𑀭𑁂 𑀫𑀢𑁆𑀢𑀺𑀓𑀁 𑀣𑀸𑀮𑀁, 𑀓𑀁𑀲𑀣𑀸𑀮𑀫𑁆𑀧𑀺 𑀲𑁄 𑀳𑀭𑁂;

𑀓𑀢𑀜𑁆𑀘𑁂𑀯 𑀢𑀬𑀸 𑀧𑀸𑀧𑀁, 𑀧𑀼𑀦𑀧𑁂𑀯𑀁 𑀓𑀭𑀺𑀲𑁆𑀲𑀲𑀻’’𑀢𑀺. (𑀚𑀸. 𑁧.𑁫.𑁧𑁨𑁮-𑁧𑁩𑁪) 𑁋

𑀇𑀫𑀁 𑀧𑀜𑁆𑀘𑀓𑀦𑀺𑀧𑀸𑀢𑁂 𑀘𑀽𑀴𑀥𑀦𑀼𑀕𑁆𑀕𑀳𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 ‘‘𑀢𑀤𑀸 𑀘𑀽𑀴𑀥𑀦𑀼𑀕𑁆𑀕𑀳𑀧𑀡𑁆𑀟𑀺𑀢𑁄 𑀢𑁆𑀯𑀁 𑀅𑀳𑁄𑀲𑀺, 𑀲𑀸 𑀇𑀢𑁆𑀣𑀻 𑀏𑀢𑀭𑀳𑀺 𑀅𑀬𑀁 𑀓𑀼𑀫𑀸𑀭𑀺𑀓𑀸, 𑀲𑀺𑀗𑁆𑀕𑀸𑀮𑀭𑀽𑀧𑁂𑀦 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀦𑀺𑀕𑁆𑀕𑀳𑀓𑀸𑀭𑀓𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀅𑀳𑀫𑁂𑀯𑀸’’𑀢𑀺 𑀯𑀢𑁆𑀯𑀸 ‘‘𑀏𑀯𑀁 𑀲𑀸 𑀇𑀢𑁆𑀣𑀻 𑀢𑀁𑀫𑀼𑀳𑀼𑀢𑁆𑀢𑀤𑀺𑀝𑁆𑀞𑀓𑁂 𑀏𑀓𑀲𑁆𑀫𑀺𑀁 𑀲𑀺𑀦𑁂𑀳𑁂𑀦 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀧𑀡𑁆𑀟𑀺𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺, 𑀢𑀁 𑀇𑀢𑁆𑀣𑀺𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀁 𑀢𑀯 𑀢𑀡𑁆𑀳𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀳𑀭𑀸𑀳𑀺 𑀪𑀺𑀓𑁆𑀔𑀽’’𑀢𑀺 𑀢𑀁 𑀑𑀯𑀤𑀺𑀢𑁆𑀯𑀸 𑀉𑀢𑁆𑀢𑀭𑀺𑀫𑁆𑀧𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁪𑁯. ‘‘𑀯𑀺𑀢𑀓𑁆𑀓𑀫𑀣𑀺𑀢𑀲𑁆𑀲 𑀚𑀦𑁆𑀢𑀼𑀦𑁄,

𑀢𑀺𑀩𑁆𑀩𑀭𑀸𑀕𑀲𑁆𑀲 𑀲𑀼𑀪𑀸𑀦𑀼𑀧𑀲𑁆𑀲𑀺𑀦𑁄;

𑀪𑀺𑀬𑁆𑀬𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀺,

𑀏𑀲 𑀔𑁄 𑀤𑀴𑁆𑀳𑀁 𑀓𑀭𑁄𑀢𑀺 𑀩𑀦𑁆𑀥𑀦𑀁.

𑁩𑁫𑁦. ‘‘𑀯𑀺𑀢𑀓𑁆𑀓𑀽𑀧𑀲𑀫𑁂 𑀘 𑀬𑁄 𑀭𑀢𑁄,

𑀅𑀲𑀼𑀪𑀁 𑀪𑀸𑀯𑀬𑀢𑁂 𑀲𑀤𑀸 𑀲𑀢𑁄;

𑀏𑀲 𑀔𑁄 𑀩𑁆𑀬𑀦𑁆𑀢𑀺 𑀓𑀸𑀳𑀺𑀢𑀺,

𑀏𑀲 𑀙𑁂𑀘𑁆𑀙𑀢𑀺 𑀫𑀸𑀭𑀩𑀦𑁆𑀥𑀦’’𑀦𑁆𑀢𑀺.

𑀢𑀢𑁆𑀣 𑀯𑀺𑀢𑀓𑁆𑀓𑀫𑀣𑀺𑀢𑀲𑁆𑀲𑀸𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀳𑀺 𑀯𑀺𑀢𑀓𑁆𑀓𑁂𑀳𑀺 𑀦𑀺𑀫𑁆𑀫𑀣𑀺𑀢𑀲𑁆𑀲. 𑀢𑀺𑀩𑁆𑀩𑀭𑀸𑀕𑀲𑁆𑀲𑀸𑀢𑀺 𑀩𑀳𑀮𑀭𑀸𑀕𑀲𑁆𑀲. 𑀲𑀼𑀪𑀸𑀦𑀼𑀧𑀲𑁆𑀲𑀺𑀦𑁄𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑁂 𑀲𑀼𑀪𑀦𑀺𑀫𑀺𑀢𑁆𑀢𑀕𑀸𑀳𑀸𑀤𑀺𑀯𑀲𑁂𑀦 𑀯𑀺𑀲𑁆𑀲𑀝𑁆𑀞𑀫𑀸𑀦𑀲𑀢𑀸𑀬 𑀲𑀼𑀪𑀦𑁆𑀢𑀺 𑀅𑀦𑀼𑀧𑀲𑁆𑀲𑀦𑁆𑀢𑀲𑁆𑀲. 𑀢𑀡𑁆𑀳𑀸𑀢𑀺 𑀏𑀯𑀭𑀽𑀧𑀲𑁆𑀲 𑀛𑀸𑀦𑀸𑀤𑀻𑀲𑀼 𑀏𑀓𑀫𑁆𑀧𑀺 𑀦 𑀯𑀟𑁆𑀠𑀢𑀺, 𑀅𑀣 𑀔𑁄 𑀙𑀤𑁆𑀯𑀸𑀭𑀺𑀓𑀸 𑀢𑀡𑁆𑀳𑀸𑀬𑁂𑀯 𑀪𑀺𑀬𑁆𑀬𑁄 𑀯𑀟𑁆𑀠𑀢𑀺. 𑀏𑀲 𑀔𑁄𑀢𑀺 𑀏𑀲𑁄 𑀧𑀼𑀕𑁆𑀕𑀮𑁄 𑀢𑀡𑁆𑀳𑀸𑀩𑀦𑁆𑀥𑀦𑀁 𑀤𑀴𑁆𑀳𑀁 𑀲𑀼𑀣𑀺𑀭𑀁 𑀓𑀭𑁄𑀢𑀺. 𑀯𑀺𑀢𑀓𑁆𑀓𑀽𑀧𑀲𑀫𑁂𑀢𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀽𑀧𑀲𑀫𑀲𑀗𑁆𑀔𑀸𑀢𑁂 𑀤𑀲𑀲𑀼 𑀅𑀲𑀼𑀪𑁂𑀲𑀼 𑀧𑀞𑀫𑀚𑁆𑀛𑀸𑀦𑁂. 𑀲𑀤𑀸 𑀲𑀢𑁄𑀢𑀺 𑀬𑁄 𑀏𑀢𑁆𑀣 𑀅𑀪𑀺𑀭𑀢𑁄 𑀳𑀼𑀢𑁆𑀯𑀸 𑀦𑀺𑀘𑁆𑀘𑀁 𑀉𑀧𑀝𑁆𑀞𑀺𑀢𑀲𑀢𑀺𑀢𑀸𑀬 𑀲𑀢𑁄 𑀢𑀁 𑀅𑀲𑀼𑀪𑀛𑀸𑀦𑀁 𑀪𑀸𑀯𑁂𑀢𑀺. 𑀩𑁆𑀬𑀦𑁆𑀢𑀺 𑀓𑀸𑀳𑀺𑀢𑀻𑀢𑀺 𑀏𑀲 𑀪𑀺𑀓𑁆𑀔𑀼 𑀢𑀻𑀲𑀼 𑀪𑀯𑁂𑀲𑀼 𑀉𑀧𑁆𑀧𑀚𑁆𑀚𑀦𑀓𑀁 𑀢𑀡𑁆𑀳𑀁 𑀯𑀺𑀕𑀢𑀦𑁆𑀢𑀁 𑀓𑀭𑀺𑀲𑁆𑀲𑀢𑀺. 𑀫𑀸𑀭𑀩𑀦𑁆𑀥𑀦𑀦𑁆𑀢𑀺 𑀏𑀲𑁄 𑀢𑁂𑀪𑀽𑀫𑀓𑀯𑀝𑁆𑀝𑀲𑀗𑁆𑀔𑀸𑀢𑀁 𑀫𑀸𑀭𑀩𑀦𑁆𑀥𑀦𑀫𑁆𑀧𑀺 𑀙𑀺𑀦𑁆𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.