𑁧𑁧. 𑀅𑀧𑀼𑀢𑁆𑀢𑀓𑀲𑁂𑀝𑁆𑀞𑀺𑀯𑀢𑁆𑀣𑀼

𑀳𑀦𑀦𑁆𑀢𑀺 𑀪𑁄𑀕𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀧𑀼𑀢𑁆𑀢𑀓𑀲𑁂𑀝𑁆𑀞𑀺𑀁 𑀦𑀸𑀫 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀲𑁆𑀲 𑀓𑀺𑀭 𑀓𑀸𑀮𑀓𑀺𑀭𑀺𑀬𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 ‘‘𑀅𑀧𑀼𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀁 𑀓𑀲𑁆𑀲 𑀧𑀸𑀧𑀼𑀡𑀸𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀭𑀜𑁆𑀜𑁄’’𑀢𑀺 𑀲𑀼𑀢𑁆𑀯𑀸 𑀲𑀢𑁆𑀢𑀳𑀺 𑀤𑀺𑀯𑀲𑁂𑀳𑀺 𑀢𑀲𑁆𑀲 𑀕𑁂𑀳𑀢𑁄 𑀥𑀦𑀁 𑀭𑀸𑀚𑀓𑀼𑀮𑀁 𑀅𑀪𑀺𑀳𑀭𑀸𑀧𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀳𑀦𑁆𑀤 𑀓𑀼𑀢𑁄 𑀦𑀼 𑀢𑁆𑀯𑀁, 𑀫𑀳𑀸𑀭𑀸𑀚, 𑀆𑀕𑀘𑁆𑀙𑀲𑀺 𑀤𑀺𑀯𑀸𑀤𑀺𑀯𑀲𑁆𑀲𑀸’’𑀢𑀺 𑀯𑀼𑀢𑁆𑀢𑁂 ‘‘𑀇𑀥, 𑀪𑀦𑁆𑀢𑁂, 𑀲𑀸𑀯𑀢𑁆𑀣𑀺𑀬𑀁 𑀲𑁂𑀝𑁆𑀞𑀺, 𑀕𑀳𑀧𑀢𑀺, 𑀓𑀸𑀮𑀓𑀢𑁄, 𑀢𑀫𑀳𑀁 𑀅𑀧𑀼𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀁 𑀭𑀸𑀚𑀦𑁆𑀢𑁂𑀧𑀼𑀭𑀁 𑀅𑀪𑀺𑀳𑀭𑀺𑀢𑁆𑀯𑀸 𑀆𑀕𑀘𑁆𑀙𑀸𑀫𑀻’’𑀢𑀺 𑀆𑀳. 𑀲𑀩𑁆𑀩𑀁 𑀲𑀼𑀢𑁆𑀢𑁂 (𑀲𑀁. 𑀦𑀺. 𑁧.𑁧𑁩𑁦) 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀲𑁄 𑀓𑀺𑀭 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑁂 𑀉𑀧𑀦𑀻𑀢𑁂 ‘‘𑀏𑀯𑀭𑀽𑀧𑀁 𑀦𑀸𑀫 𑀫𑀦𑀼𑀲𑁆𑀲𑀸 𑀪𑀼𑀜𑁆𑀚𑀦𑁆𑀢𑀺, 𑀓𑀺𑀁 𑀢𑀼𑀫𑁆𑀳𑁂 𑀫𑀬𑀸 𑀲𑀤𑁆𑀥𑀺𑀁 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀓𑁂𑀴𑀺𑀁 𑀓𑀭𑁄𑀣𑀸’’𑀢𑀺 𑀪𑁄𑀚𑀦𑁂 𑀉𑀧𑀝𑁆𑀞𑀺𑀢𑁂 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑀳𑀭𑀺𑀢𑁆𑀯𑀸 𑀧𑀮𑀸𑀧𑁂𑀢𑁆𑀯𑀸 ‘‘𑀇𑀤𑀁 𑀫𑀦𑀼𑀲𑁆𑀲𑀸𑀦𑀁 𑀪𑁄𑀚𑀦’’𑀦𑁆𑀢𑀺 𑀓𑀡𑀸𑀚𑀓𑀁 𑀪𑀼𑀜𑁆𑀚𑀢𑀺 𑀩𑀺𑀴𑀗𑁆𑀕𑀤𑀼𑀢𑀺𑀬𑀁. 𑀯𑀢𑁆𑀣𑀬𑀸𑀦𑀙𑀢𑁆𑀢𑁂𑀲𑀼𑀧𑀺 𑀫𑀦𑀸𑀧𑁂𑀲𑀼 𑀉𑀧𑀝𑁆𑀞𑀸𑀧𑀺𑀢𑁂𑀲𑀼 𑀢𑁂 𑀫𑀦𑀼𑀲𑁆𑀲𑁂 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑀳𑀭𑀦𑁆𑀢𑁄 𑀧𑀮𑀸𑀧𑁂𑀢𑁆𑀯𑀸 𑀲𑀸𑀡𑀸𑀦𑀺 𑀥𑀸𑀭𑁂𑀢𑀺, 𑀚𑀚𑁆𑀚𑀭𑀭𑀣𑀓𑁂𑀦 𑀬𑀸𑀢𑀺 𑀧𑀡𑁆𑀡𑀙𑀢𑁆𑀢𑀓𑁂𑀦 𑀥𑀸𑀭𑀺𑀬𑀫𑀸𑀦𑁂𑀦𑀸𑀢𑀺 𑀏𑀯𑀁 𑀭𑀜𑁆𑀜𑀸 𑀆𑀭𑁄𑀘𑀺𑀢𑁂 𑀲𑀢𑁆𑀣𑀸 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀓𑀣𑁂𑀲𑀺.

𑀪𑀽𑀢𑀧𑀼𑀩𑁆𑀩𑀁 𑀲𑁄, 𑀫𑀳𑀸𑀭𑀸𑀚, 𑀲𑁂𑀝𑁆𑀞𑀺, 𑀕𑀳𑀧𑀢𑀺, 𑀢𑀕𑀭𑀲𑀺𑀔𑀺𑀁 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀧𑀺𑀡𑁆𑀟𑀧𑀸𑀢𑁂𑀦 𑀧𑀝𑀺𑀧𑀸𑀤𑁂𑀲𑀺. ‘‘𑀤𑁂𑀣 𑀲𑀫𑀡𑀲𑁆𑀲 𑀧𑀺𑀡𑁆𑀟’’𑀦𑁆𑀢𑀺 𑀯𑀢𑁆𑀯𑀸 𑀲𑁄 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀢𑀲𑁆𑀫𑀺𑀁 𑀓𑀺𑀭 𑀅𑀲𑁆𑀲𑀤𑁆𑀥𑁂 𑀩𑀸𑀮𑁂 𑀏𑀯𑀁 𑀯𑀢𑁆𑀯𑀸 𑀧𑀓𑁆𑀓𑀦𑁆𑀢𑁂 𑀢𑀲𑁆𑀲 𑀪𑀭𑀺𑀬𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸 ‘‘𑀘𑀺𑀭𑀲𑁆𑀲𑀁 𑀯𑀢 𑀫𑁂 𑀇𑀫𑀲𑁆𑀲 𑀫𑀼𑀔𑀢𑁄 ‘𑀤𑁂𑀳𑀻’𑀢𑀺 𑀯𑀘𑀦𑀁 𑀲𑀼𑀢𑀁, 𑀅𑀚𑁆𑀚 𑀫𑀫 𑀫𑀦𑁄𑀭𑀣𑀁 𑀧𑀽𑀭𑁂𑀦𑁆𑀢𑀻 𑀧𑀺𑀡𑁆𑀟𑀧𑀸𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀡𑀻𑀢𑀪𑁄𑀚𑀦𑀲𑁆𑀲 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄𑀧𑀺 𑀦𑀺𑀯𑀢𑁆𑀢𑀫𑀸𑀦𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁, 𑀲𑀫𑀡, 𑀓𑀺𑀜𑁆𑀘𑀺 𑀢𑁂 𑀮𑀤𑁆𑀥’’𑀦𑁆𑀢𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀡𑀻𑀢𑀧𑀺𑀡𑁆𑀟𑀧𑀸𑀢𑀁 𑀤𑀺𑀲𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀯𑀭𑀫𑁂𑀢𑀁 𑀧𑀺𑀡𑁆𑀟𑀧𑀸𑀢𑀁 𑀤𑀸𑀲𑀸 𑀯𑀸 𑀓𑀫𑁆𑀫𑀓𑀭𑀸 𑀯𑀸 𑀪𑀼𑀜𑁆𑀚𑁂𑀬𑁆𑀬𑀼𑀁. 𑀢𑁂 𑀳𑀺 𑀇𑀫𑀁 𑀪𑀼𑀜𑁆𑀚𑀺𑀢𑁆𑀯𑀸 𑀫𑀬𑁆𑀳𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀅𑀬𑀁 𑀧𑀦 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀺𑀲𑁆𑀲𑀢𑀺, 𑀦𑀝𑁆𑀞𑁄 𑀫𑁂 𑀲𑁄 𑀧𑀺𑀡𑁆𑀟𑀧𑀸𑀢𑁄’’𑀢𑀺. 𑀲𑁄 𑀪𑀸𑀢𑀼 𑀘 𑀧𑀦 𑀏𑀓𑀧𑀼𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀲𑁆𑀲 𑀓𑀸𑀭𑀡𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺. 𑀲𑁄 𑀓𑀺𑀭𑀲𑁆𑀲 𑀅𑀗𑁆𑀕𑀼𑀮𑀺𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 ‘‘𑀇𑀤𑀁 𑀫𑀬𑁆𑀳𑀁 𑀧𑀺𑀢𑀼𑀲𑀦𑁆𑀢𑀓𑀁 𑀬𑀸𑀦𑀓𑀁, 𑀅𑀬𑀁 𑀢𑀲𑁆𑀲 𑀕𑁄𑀡𑁄’’𑀢𑀺𑀆𑀤𑀻𑀦𑀺 𑀆𑀳. 𑀅𑀣 𑀦𑀁 𑀲𑁄 𑀲𑁂𑀝𑁆𑀞𑀺 ‘‘𑀇𑀤𑀸𑀦𑀺 𑀢𑀸𑀯𑁂𑀲 𑀏𑀯𑀁 𑀯𑀤𑁂𑀢𑀺, 𑀇𑀫𑀲𑁆𑀲 𑀧𑀦 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀓𑀸𑀮𑁂 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀪𑁄𑀕𑁂 𑀓𑁄 𑀭𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀢𑀁 𑀅𑀭𑀜𑁆𑀜𑀁 𑀦𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀕𑀘𑁆𑀙𑀫𑀽𑀮𑁂 𑀕𑀻𑀯𑀸𑀬 𑀕𑀳𑁂𑀢𑁆𑀯𑀸 𑀫𑀽𑀮𑀓𑀦𑁆𑀤𑀁 𑀯𑀺𑀬 𑀕𑀻𑀯𑀁 𑀨𑀸𑀮𑁂𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀢𑀢𑁆𑀣𑁂𑀯 𑀙𑀟𑁆𑀟𑁂𑀲𑀺. 𑀇𑀤𑀫𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀬𑀁 𑀔𑁄 𑀲𑁄, 𑀫𑀳𑀸𑀭𑀸𑀚, 𑀲𑁂𑀝𑁆𑀞𑀺, 𑀕𑀳𑀧𑀢𑀺, 𑀢𑀕𑀭𑀲𑀺𑀔𑀺𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀧𑀺𑀡𑁆𑀟𑀧𑀸𑀢𑁂𑀦 𑀧𑀝𑀺𑀧𑀸𑀤𑁂𑀲𑀺, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺, 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀇𑀫𑀺𑀲𑁆𑀲𑀸𑀬𑁂𑀯 𑀲𑀸𑀯𑀢𑁆𑀣𑀺𑀬𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑁂𑀝𑁆𑀞𑀺𑀢𑁆𑀢𑀁 𑀓𑀸𑀭𑁂𑀲𑀺. 𑀬𑀁 𑀔𑁄 𑀲𑁄, 𑀫𑀳𑀸𑀭𑀸𑀚, 𑀲𑁂𑀝𑁆𑀞𑀺, 𑀕𑀳𑀧𑀢𑀺, 𑀤𑀢𑁆𑀯𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀺 ‘𑀯𑀭𑀫𑁂𑀢𑀁 𑀧𑀺𑀡𑁆𑀟𑀧𑀸𑀢𑀁 𑀤𑀸𑀲𑀸 𑀯𑀸 𑀓𑀫𑁆𑀫𑀓𑀭𑀸 𑀯𑀸 𑀪𑀼𑀜𑁆𑀚𑁂𑀬𑁆𑀬𑀼’𑀦𑁆𑀢𑀺, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀦𑀸𑀲𑁆𑀲𑀼𑀴𑀸𑀭𑀸𑀬 𑀪𑀢𑁆𑀢𑀪𑁄𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀦𑀸𑀲𑁆𑀲𑀼𑀴𑀸𑀭𑀸𑀬 𑀯𑀢𑁆𑀣𑀪𑁄𑀕𑀸𑀬, 𑀦𑀸𑀲𑁆𑀲𑀼𑀴𑀸𑀭𑀸𑀬 𑀬𑀸𑀦𑀪𑁄𑀕𑀸𑀬, 𑀦𑀸𑀲𑁆𑀲𑀼𑀴𑀸𑀭𑀸𑀦𑀁 𑀧𑀜𑁆𑀘𑀦𑁆𑀦𑀁 𑀓𑀸𑀫𑀕𑀼𑀡𑀸𑀦𑀁 𑀪𑁄𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺. 𑀬𑀁 𑀔𑁄 𑀲𑁄, 𑀫𑀳𑀸𑀭𑀸𑀚, 𑀲𑁂𑀝𑁆𑀞𑀺, 𑀕𑀳𑀧𑀢𑀺, 𑀪𑀸𑀢𑀼 𑀘 𑀧𑀦 𑀏𑀓𑀧𑀼𑀢𑁆𑀢𑀁 𑀲𑀸𑀧𑀢𑁂𑀬𑁆𑀬𑀲𑁆𑀲 𑀓𑀸𑀭𑀡𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀩𑀳𑀽𑀦𑀺 𑀯𑀲𑁆𑀲𑀲𑀢𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀣, 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀇𑀤𑀁 𑀲𑀢𑁆𑀢𑀫𑀁 𑀅𑀧𑀼𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀁 𑀭𑀸𑀚𑀓𑁄𑀲𑀁 𑀧𑀯𑁂𑀲𑁂𑀢𑀺. 𑀢𑀲𑁆𑀲 𑀔𑁄 𑀧𑀦, 𑀫𑀳𑀸𑀭𑀸𑀚, 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀼𑀭𑀸𑀡𑀜𑁆𑀘 𑀧𑀼𑀜𑁆𑀜𑀁 𑀧𑀭𑀺𑀓𑁆𑀔𑀻𑀡𑀁, 𑀦𑀯𑀜𑁆𑀘 𑀧𑀼𑀜𑁆𑀜𑀁 𑀅𑀦𑀼𑀧𑀘𑀺𑀢𑀁. 𑀅𑀚𑁆𑀚 𑀧𑀦, 𑀫𑀳𑀸𑀭𑀸𑀚, 𑀲𑁂𑀝𑁆𑀞𑀺, 𑀕𑀳𑀧𑀢𑀺, 𑀫𑀳𑀸𑀭𑁄𑀭𑀼𑀯𑁂 𑀦𑀺𑀭𑀬𑁂 𑀧𑀘𑁆𑀘𑀢𑀻’’𑀢𑀺 (𑀲𑀁. 𑀦𑀺. 𑁧.𑁧𑁩𑁧).

𑀭𑀸𑀚𑀸 𑀲𑀢𑁆𑀣𑀼 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀳𑁄, 𑀪𑀦𑁆𑀢𑁂, 𑀪𑀸𑀭𑀺𑀬𑀁 𑀓𑀫𑁆𑀫𑀁, 𑀏𑀢𑁆𑀢𑀓𑁂 𑀦𑀸𑀫 𑀪𑁄𑀕𑁂 𑀯𑀺𑀚𑁆𑀚𑀫𑀸𑀦𑁂 𑀦𑁂𑀯 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺, 𑀦 𑀢𑀼𑀫𑁆𑀳𑀸𑀤𑀺𑀲𑁂 𑀩𑀼𑀤𑁆𑀥𑁂 𑀥𑀼𑀭𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑁂 𑀧𑀼𑀜𑁆𑀜𑀓𑀫𑁆𑀫𑀁 𑀅𑀓𑀸𑀲𑀻’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚, 𑀤𑀼𑀫𑁆𑀫𑁂𑀥𑀧𑀼𑀕𑁆𑀕𑀮𑀸 𑀦𑀸𑀫 𑀪𑁄𑀕𑁂 𑀮𑀪𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀦 𑀕𑀯𑁂𑀲𑀦𑁆𑀢𑀺, 𑀪𑁄𑀕𑁂 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀢𑀡𑁆𑀳𑀸 𑀧𑀦𑁂𑀢𑁂 𑀤𑀻𑀖𑀭𑀢𑁆𑀢𑀁 𑀳𑀦𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁫𑁫. ‘‘𑀳𑀦𑀦𑁆𑀢𑀺 𑀪𑁄𑀕𑀸 𑀤𑀼𑀫𑁆𑀫𑁂𑀥𑀁, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄;

𑀪𑁄𑀕𑀢𑀡𑁆𑀳𑀸𑀬 𑀤𑀼𑀫𑁆𑀫𑁂𑀥𑁄, 𑀳𑀦𑁆𑀢𑀺 𑀅𑀜𑁆𑀜𑁂𑀯 𑀅𑀢𑁆𑀢𑀦’’𑀦𑁆𑀢𑀺.

𑀢𑀢𑁆𑀣 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄𑀢𑀺 𑀬𑁂 𑀧𑀦 𑀦𑀺𑀩𑁆𑀩𑀸𑀦𑀧𑀸𑀭𑀕𑀯𑁂𑀲𑀺𑀦𑁄 𑀧𑀼𑀕𑁆𑀕𑀮𑀸, 𑀦 𑀢𑁂 𑀪𑁄𑀕𑀸 𑀳𑀦𑀦𑁆𑀢𑀺. 𑀅𑀜𑁆𑀜𑁂𑀯 𑀅𑀢𑁆𑀢𑀦𑀦𑁆𑀢𑀺 𑀪𑁄𑀕𑁂 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀸𑀬 𑀢𑀡𑁆𑀳𑀸𑀬 𑀤𑀼𑀧𑁆𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀧𑀭𑁂 𑀯𑀺𑀬 𑀅𑀢𑁆𑀢𑀸𑀦𑀫𑁂𑀯 𑀳𑀦𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀅𑀧𑀼𑀢𑁆𑀢𑀓𑀲𑁂𑀝𑁆𑀞𑀺𑀯𑀢𑁆𑀣𑀼 𑀏𑀓𑀸𑀤𑀲𑀫𑀁.