𑁧𑁦. 𑀲𑀓𑁆𑀓𑀧𑀜𑁆𑀳𑀯𑀢𑁆𑀣𑀼

𑀲𑀩𑁆𑀩𑀤𑀸𑀦𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑁂 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀧𑀜𑁆𑀳𑁂 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀓𑀢𑀭𑀁 𑀤𑀸𑀦𑀁 𑀦𑀼 𑀔𑁄 𑀤𑀸𑀦𑁂𑀲𑀼, 𑀓𑀢𑀭𑁄 𑀭𑀲𑁄 𑀭𑀲𑁂𑀲𑀼, 𑀓𑀢𑀭𑀸 𑀭𑀢𑀺 𑀭𑀢𑀻𑀲𑀼 𑀚𑁂𑀝𑁆𑀞𑀓𑀸, 𑀢𑀡𑁆𑀳𑀓𑁆𑀔𑀬𑁄𑀯 𑀓𑀲𑁆𑀫𑀸 𑀚𑁂𑀝𑁆𑀞𑀓𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺? 𑀢𑁂 𑀧𑀜𑁆𑀳𑁂 𑀏𑀓𑀸 𑀤𑁂𑀯𑀢𑀸𑀧𑀺 𑀯𑀺𑀦𑀺𑀘𑁆𑀙𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀏𑀓𑁄 𑀧𑀦 𑀤𑁂𑀯𑁄 𑀏𑀓𑀁 𑀤𑁂𑀯𑀁, 𑀲𑁄𑀧𑀺 𑀅𑀧𑀭𑀦𑁆𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀧𑀼𑀘𑁆𑀙𑀦𑁆𑀢𑀸 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀤𑁆𑀯𑀸𑀤𑀲 𑀲𑀁𑀯𑀘𑁆𑀙𑀭𑀸𑀦𑀺 𑀯𑀺𑀘𑀭𑀺𑀁𑀲𑀼. 𑀏𑀢𑁆𑀢𑀓𑁂𑀦𑀸𑀧𑀺 𑀓𑀸𑀮𑁂𑀦 𑀧𑀜𑁆𑀳𑀸𑀦𑀁 𑀅𑀢𑁆𑀣𑀁 𑀅𑀤𑀺𑀲𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀢𑀸𑀢𑀸, 𑀫𑀳𑀸𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀘𑀢𑁆𑀢𑀸𑀭𑁄 𑀧𑀜𑁆𑀳𑁂 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀢𑀫𑁆𑀳𑀸’’𑀢𑀺. ‘‘𑀓𑀺𑀁 𑀧𑀜𑁆𑀳𑀁 𑀦𑀸𑀫𑁂𑀢𑀁, 𑀢𑀸𑀢𑀸’’𑀢𑀺. ‘‘𑀤𑀸𑀦𑀭𑀲𑀭𑀢𑀻𑀲𑀼 𑀓𑀢𑀫𑀸 𑀤𑀸𑀦𑀭𑀲𑀭𑀢𑀻 𑀦𑀼 𑀔𑁄 𑀲𑁂𑀝𑁆𑀞𑀸, 𑀢𑀡𑁆𑀳𑀓𑁆𑀔𑀬𑁄𑀯 𑀓𑀲𑁆𑀫𑀸 𑀲𑁂𑀝𑁆𑀞𑁄’’𑀢𑀺 𑀇𑀫𑁂 𑀧𑀜𑁆𑀳𑁂 𑀯𑀺𑀦𑀺𑀘𑁆𑀙𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀆𑀕𑀢𑀫𑁆𑀳𑀸𑀢𑀺. 𑀢𑀸𑀢𑀸, 𑀫𑀬𑀫𑁆𑀧𑀺 𑀇𑀫𑁂𑀲𑀁 𑀅𑀢𑁆𑀣𑁂 𑀦 𑀚𑀸𑀦𑀸𑀫, 𑀅𑀫𑁆𑀳𑀸𑀓𑀁 𑀧𑀦 𑀭𑀸𑀚𑀸 𑀚𑀦𑀲𑀳𑀲𑁆𑀲𑁂𑀦 𑀘𑀺𑀦𑁆𑀢𑀺𑀢𑁂 𑀅𑀢𑁆𑀣𑁂 𑀘𑀺𑀦𑁆𑀢𑁂𑀢𑁆𑀯𑀸 𑀢𑀗𑁆𑀔𑀡𑁂𑀦𑁂𑀯 𑀚𑀸𑀦𑀸𑀢𑀺, 𑀲𑁄 𑀅𑀫𑁆𑀳𑁂𑀳𑀺 𑀧𑀜𑁆𑀜𑀸𑀬 𑀘 𑀧𑀼𑀜𑁆𑀜𑁂𑀦 𑀘 𑀯𑀺𑀲𑀺𑀝𑁆𑀞𑁄, 𑀏𑀣, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀸𑀢𑀺 𑀢𑀫𑁂𑀯 𑀤𑁂𑀯𑀕𑀡𑀁 𑀆𑀤𑀸𑀬 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑁂𑀦𑀸𑀧𑀺 ‘‘𑀓𑀺𑀁, 𑀢𑀸𑀢𑀸, 𑀫𑀳𑀦𑁆𑀢𑁄 𑀤𑁂𑀯𑀲𑀦𑁆𑀦𑀺𑀧𑀸𑀢𑁄’’𑀢𑀺 𑀯𑀼𑀢𑁆𑀢𑁂 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀢𑀸𑀢𑀸, 𑀇𑀫𑁂𑀲𑀁 𑀧𑀜𑁆𑀳𑀸𑀦𑀁 𑀅𑀢𑁆𑀣𑀁 𑀅𑀜𑁆𑀜𑁄𑀧𑀺 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀩𑀼𑀤𑁆𑀥𑀯𑀺𑀲𑀬𑀸 𑀳𑁂𑀢𑁂. 𑀲𑀢𑁆𑀣𑀸 𑀧𑀦𑁂𑀢𑀭𑀳𑀺 𑀓𑀳𑀁 𑀯𑀺𑀳𑀭𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀚𑁂𑀢𑀯𑀦𑁂’’𑀢𑀺 𑀲𑀼𑀢𑁆𑀯𑀸 ‘‘𑀏𑀣, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀤𑁂𑀯𑀕𑀡𑁂𑀦 𑀲𑀤𑁆𑀥𑀺𑀁 𑀭𑀢𑁆𑀢𑀺𑀪𑀸𑀕𑁂 𑀲𑀓𑀮𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 ‘‘𑀓𑀺𑀁, 𑀫𑀳𑀸𑀭𑀸𑀚, 𑀫𑀳𑀢𑀸 𑀤𑁂𑀯𑀲𑀗𑁆𑀖𑁂𑀦 𑀆𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂, ‘‘𑀪𑀦𑁆𑀢𑁂, 𑀤𑁂𑀯𑀕𑀡𑁂𑀦 𑀇𑀫𑁂 𑀦𑀸𑀫 𑀧𑀜𑁆𑀳𑀸 𑀲𑀫𑀼𑀝𑁆𑀞𑀸𑀧𑀺𑀢𑀸, 𑀅𑀜𑁆𑀜𑁄 𑀇𑀫𑁂𑀲𑀁 𑀅𑀢𑁆𑀣𑀁 𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀇𑀫𑁂𑀲𑀁 𑀦𑁄 𑀅𑀢𑁆𑀣𑀁 𑀧𑀓𑀸𑀲𑁂𑀣𑀸’’𑀢𑀺 𑀆𑀳.

𑀲𑀢𑁆𑀣𑀸 ‘‘𑀲𑀸𑀥𑀼 𑀫𑀳𑀸𑀭𑀸𑀚, 𑀫𑀬𑀸 𑀳𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀓𑀗𑁆𑀔𑀘𑁆𑀙𑁂𑀤𑀦𑀢𑁆𑀣𑀫𑁂𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀤𑁆𑀥𑀁, 𑀢𑀬𑀸 𑀧𑀼𑀘𑁆𑀙𑀺𑀢𑀧𑀜𑁆𑀳𑁂𑀲𑀼 𑀳𑀺 𑀲𑀩𑁆𑀩𑀤𑀸𑀦𑀸𑀦𑀁 𑀥𑀫𑁆𑀫𑀤𑀸𑀦𑀁 𑀲𑁂𑀝𑁆𑀞𑀁, 𑀲𑀩𑁆𑀩𑀭𑀲𑀸𑀦𑀁 𑀥𑀫𑁆𑀫𑀭𑀲𑁄 𑀲𑁂𑀝𑁆𑀞𑁄, 𑀲𑀩𑁆𑀩𑀭𑀢𑀻𑀦𑀁 𑀥𑀫𑁆𑀫𑀭𑀢𑀺 𑀲𑁂𑀝𑁆𑀞𑀸, 𑀢𑀡𑁆𑀳𑀓𑁆𑀔𑀬𑁄 𑀧𑀦 𑀅𑀭𑀳𑀢𑁆𑀢𑀁 𑀲𑀫𑁆𑀧𑀸𑀧𑀓𑀢𑁆𑀢𑀸 𑀲𑁂𑀝𑁆𑀞𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁫𑁪. ‘‘𑀲𑀩𑁆𑀩𑀤𑀸𑀦𑀁 𑀥𑀫𑁆𑀫𑀤𑀸𑀦𑀁 𑀚𑀺𑀦𑀸𑀢𑀺,

𑀲𑀩𑁆𑀩𑀭𑀲𑀁 𑀥𑀫𑁆𑀫𑀭𑀲𑁄 𑀚𑀺𑀦𑀸𑀢𑀺;

𑀲𑀩𑁆𑀩𑀭𑀢𑀺𑀁 𑀥𑀫𑁆𑀫𑀭𑀢𑀺 𑀚𑀺𑀦𑀸𑀢𑀺,

𑀢𑀡𑁆𑀳𑀓𑁆𑀔𑀬𑁄 𑀲𑀩𑁆𑀩𑀤𑀼𑀓𑁆𑀔𑀁 𑀚𑀺𑀦𑀸𑀢𑀻’’𑀢𑀺.

𑀢𑀢𑁆𑀣 𑀲𑀩𑁆𑀩𑀤𑀸𑀦𑀁 𑀥𑀫𑁆𑀫𑀤𑀸𑀦𑀦𑁆𑀢𑀺 𑀲𑀘𑁂𑀧𑀺 𑀳𑀺 𑀘𑀓𑁆𑀓𑀯𑀸𑀴𑀕𑀩𑁆𑀪𑁂 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀦𑀺𑀭𑀦𑁆𑀢𑀭𑀁 𑀓𑀢𑁆𑀯𑀸 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑀸𑀦𑀁 𑀓𑀤𑀮𑀺𑀕𑀩𑁆𑀪𑀲𑀤𑀺𑀲𑀸𑀦𑀺 𑀘𑀻𑀯𑀭𑀸𑀦𑀺 𑀤𑀤𑁂𑀬𑁆𑀬, 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀘𑀢𑀼𑀧𑁆𑀧𑀤𑀺𑀓𑀸𑀬 𑀕𑀸𑀣𑀸𑀬 𑀓𑀢𑀸𑀦𑀼𑀫𑁄𑀤𑀦𑀸𑀯 𑀲𑁂𑀝𑁆𑀞𑀸. 𑀢𑀜𑁆𑀳𑀺 𑀤𑀸𑀦𑀁 𑀢𑀲𑁆𑀲𑀸 𑀕𑀸𑀣𑀸𑀬 𑀲𑁄𑀴𑀲𑀺𑀁 𑀓𑀮𑀁 𑀦𑀸𑀕𑁆𑀖𑀢𑀺. 𑀏𑀯𑀁 𑀥𑀫𑁆𑀫𑀲𑁆𑀲 𑀤𑁂𑀲𑀦𑀸𑀧𑀺 𑀯𑀸𑀘𑀦𑀫𑁆𑀧𑀺 𑀲𑀯𑀦𑀫𑁆𑀧𑀺 𑀫𑀳𑀦𑁆𑀢𑀁. 𑀬𑁂𑀦 𑀘 𑀧𑀼𑀕𑁆𑀕𑀮𑁂𑀦 𑀩𑀳𑀽𑀦𑀁 𑀢𑀁 𑀥𑀫𑁆𑀫𑀲𑁆𑀲𑀯𑀦𑀁 𑀓𑀸𑀭𑀺𑀢𑀁, 𑀢𑀲𑁆𑀲𑁂𑀯 𑀆𑀦𑀺𑀲𑀁𑀲𑁄 𑀫𑀳𑀸. 𑀢𑀣𑀸𑀭𑀽𑀧𑀸𑀬 𑀏𑀯 𑀧𑀭𑀺𑀲𑀸𑀬 𑀧𑀡𑀻𑀢𑀧𑀺𑀡𑁆𑀟𑀧𑀸𑀢𑀲𑁆𑀲 𑀧𑀢𑁆𑀢𑁂 𑀧𑀽𑀭𑁂𑀢𑁆𑀯𑀸 𑀤𑀺𑀦𑁆𑀦𑀤𑀸𑀦𑀢𑁄𑀧𑀺 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀁 𑀧𑀢𑁆𑀢𑁂 𑀧𑀽𑀭𑁂𑀢𑁆𑀯𑀸 𑀤𑀺𑀦𑁆𑀦𑀪𑁂𑀲𑀚𑁆𑀚𑀤𑀸𑀦𑀢𑁄𑀧𑀺 𑀫𑀳𑀸𑀯𑀺𑀳𑀸𑀭𑀲𑀤𑀺𑀲𑀸𑀦𑀁 𑀯𑀺𑀳𑀸𑀭𑀸𑀦𑀜𑁆𑀘 𑀮𑁄𑀳𑀧𑀸𑀲𑀸𑀤𑀲𑀤𑀺𑀲𑀸𑀦𑀜𑁆𑀘 𑀧𑀸𑀲𑀸𑀤𑀸𑀦𑀁 𑀅𑀦𑁂𑀓𑀸𑀦𑀺 𑀲𑀢𑀲𑀳𑀲𑁆𑀲𑀸𑀦𑀺 𑀓𑀸𑀭𑁂𑀢𑁆𑀯𑀸 𑀤𑀺𑀦𑁆𑀦𑀲𑁂𑀦𑀸𑀲𑀦𑀤𑀸𑀦𑀢𑁄𑀧𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀻𑀳𑀺 𑀯𑀺𑀳𑀸𑀭𑁂 𑀆𑀭𑀩𑁆𑀪 𑀓𑀢𑀧𑀭𑀺𑀘𑁆𑀘𑀸𑀕𑀢𑁄𑀧𑀺 𑀅𑀦𑁆𑀢𑀫𑀲𑁄 𑀘𑀢𑀼𑀧𑁆𑀧𑀤𑀺𑀓𑀸𑀬 𑀕𑀸𑀣𑀸𑀬 𑀅𑀦𑀼𑀫𑁄𑀤𑀦𑀸𑀯𑀲𑁂𑀦𑀸𑀧𑀺 𑀧𑀯𑀢𑁆𑀢𑀺𑀢𑀁 𑀥𑀫𑁆𑀫𑀤𑀸𑀦𑀫𑁂𑀯 𑀯𑀭𑀁 𑀲𑁂𑀝𑁆𑀞𑀁. 𑀓𑀺𑀁 𑀓𑀸𑀭𑀡𑀸? 𑀏𑀯𑀭𑀽𑀧𑀸𑀦𑀺 𑀳𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸𑀯 𑀓𑀭𑁄𑀦𑁆𑀢𑀺, 𑀦𑁄 𑀅𑀲𑀼𑀢𑁆𑀯𑀸. 𑀲𑀘𑁂 𑀳𑀺 𑀇𑀫𑁂 𑀲𑀢𑁆𑀢𑀸 𑀥𑀫𑁆𑀫𑀁 𑀦 𑀲𑀼𑀡𑁂𑀬𑁆𑀬𑀼𑀁, 𑀉𑀴𑀼𑀗𑁆𑀓𑀫𑀢𑁆𑀢𑀁 𑀬𑀸𑀕𑀼𑀫𑁆𑀧𑀺 𑀓𑀝𑀘𑁆𑀙𑀼𑀫𑀢𑁆𑀢𑀁 𑀪𑀢𑁆𑀢𑀫𑁆𑀧𑀺 𑀦 𑀤𑀤𑁂𑀬𑁆𑀬𑀼𑀁. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀲𑀩𑁆𑀩𑀤𑀸𑀦𑁂𑀳𑀺 𑀥𑀫𑁆𑀫𑀤𑀸𑀦𑀫𑁂𑀯 𑀲𑁂𑀝𑁆𑀞𑀁. 𑀅𑀧𑀺𑀘 𑀞𑀧𑁂𑀢𑁆𑀯𑀸 𑀩𑀼𑀤𑁆𑀥𑁂 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀘 𑀲𑀓𑀮𑀓𑀧𑁆𑀧𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀉𑀤𑀓𑀩𑀺𑀦𑁆𑀤𑀽𑀦𑀺 𑀕𑀡𑁂𑀢𑀼𑀁 𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸 𑀲𑀸𑀭𑀺𑀧𑀼𑀢𑁆𑀢𑀸𑀤𑀬𑁄𑀧𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀅𑀥𑀺𑀕𑀦𑁆𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀅𑀲𑁆𑀲𑀚𑀺𑀢𑁆𑀣𑁂𑀭𑀸𑀤𑀻𑀳𑀺 𑀓𑀣𑀺𑀢𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀭𑀺𑀁𑀲𑀼, 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸𑀬 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁 𑀲𑀘𑁆𑀙𑀺𑀓𑀭𑀺𑀁𑀲𑀼. 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦, 𑀫𑀳𑀸𑀭𑀸𑀚, 𑀥𑀫𑁆𑀫𑀤𑀸𑀦𑀫𑁂𑀯 𑀲𑁂𑀝𑁆𑀞𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀩𑁆𑀩𑀤𑀸𑀦𑀁 𑀥𑀫𑁆𑀫𑀤𑀸𑀦𑀁 𑀚𑀺𑀦𑀸𑀢𑀻’’𑀢𑀺.

𑀲𑀩𑁆𑀩𑁂 𑀧𑀦 𑀕𑀦𑁆𑀥𑀭𑀲𑀸𑀤𑀬𑁄𑀧𑀺 𑀭𑀲𑀸 𑀉𑀓𑁆𑀓𑀁𑀲𑀢𑁄 𑀤𑁂𑀯𑀢𑀸𑀦𑀁 𑀲𑀼𑀥𑀸𑀪𑁄𑀚𑀦𑀭𑀲𑁄𑀧𑀺 𑀲𑀁𑀲𑀸𑀭𑀯𑀝𑁆𑀝𑁂 𑀧𑀸𑀢𑁂𑀢𑁆𑀯𑀸 𑀤𑀼𑀓𑁆𑀔𑀸𑀦𑀼𑀪𑀯𑀦𑀲𑁆𑀲𑁂𑀯 𑀧𑀘𑁆𑀘𑀬𑁄. 𑀬𑁄 𑀧𑀦𑁂𑀲 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀲𑀗𑁆𑀔𑀸𑀢𑁄 𑀘 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀗𑁆𑀔𑀸𑀢𑁄 𑀘 𑀥𑀫𑁆𑀫𑀭𑀲𑁄, 𑀅𑀬𑀫𑁂𑀯 𑀲𑀩𑁆𑀩𑀭𑀲𑀸𑀦𑀁 𑀲𑁂𑀝𑁆𑀞𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀩𑁆𑀩𑀭𑀲𑀁 𑀥𑀫𑁆𑀫𑀭𑀲𑁄 𑀚𑀺𑀦𑀸𑀢𑀻’’𑀢𑀺. 𑀬𑀸𑀧𑁂𑀲𑀸 𑀧𑀼𑀢𑁆𑀢𑀭𑀢𑀺𑀥𑀻𑀢𑀼𑀭𑀢𑀺𑀥𑀦𑀭𑀢𑀺𑀇𑀢𑁆𑀣𑀺𑀭𑀢𑀺𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀸𑀤𑀺𑀭𑀢𑀺𑀧𑀪𑁂𑀤𑀸 𑀘 𑀅𑀦𑁂𑀓𑀧𑁆𑀧𑀪𑁂𑀤𑀸 𑀭𑀢𑀻, 𑀲𑀸𑀧𑀺 𑀲𑀁𑀲𑀸𑀭𑀯𑀝𑁆𑀝𑁂 𑀧𑀸𑀢𑁂𑀢𑁆𑀯𑀸 𑀤𑀼𑀓𑁆𑀔𑀸𑀦𑀼𑀪𑀯𑀦𑀲𑁆𑀲𑁂𑀯 𑀧𑀘𑁆𑀘𑀬𑁄. 𑀬𑀸 𑀧𑀦𑁂𑀲𑀸 𑀥𑀫𑁆𑀫𑀁 𑀓𑀣𑁂𑀦𑁆𑀢𑀲𑁆𑀲 𑀯𑀸 𑀲𑀼𑀡𑀦𑁆𑀢𑀲𑁆𑀲 𑀯𑀸 𑀯𑀸𑀘𑁂𑀦𑁆𑀢𑀲𑁆𑀲 𑀯𑀸 𑀅𑀦𑁆𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀸 𑀧𑀻𑀢𑀺 𑀉𑀤𑀕𑁆𑀕𑀪𑀸𑀯𑀁 𑀚𑀦𑁂𑀢𑀺, 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑁂𑀢𑀺, 𑀮𑁄𑀫𑀳𑀁𑀲𑀁 𑀚𑀦𑁂𑀢𑀺, 𑀲𑀸𑀬𑀁 𑀲𑀁𑀲𑀸𑀭𑀯𑀝𑁆𑀝𑀲𑁆𑀲 𑀅𑀦𑁆𑀢𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀧𑀭𑀺𑀬𑁄𑀲𑀸𑀦𑀸 𑀳𑁄𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀭𑀢𑀻𑀦𑀁 𑀏𑀯𑀭𑀽𑀧𑀸 𑀥𑀫𑁆𑀫𑀭𑀢𑀺𑀬𑁂𑀯 𑀲𑁂𑀝𑁆𑀞𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀩𑁆𑀩𑀭𑀢𑀺𑀁 𑀥𑀫𑁆𑀫𑀭𑀢𑀺 𑀚𑀺𑀦𑀸𑀢𑀻’’𑀢𑀺 𑀢𑀡𑁆𑀳𑀓𑁆𑀔𑀬𑁄 𑀧𑀦 𑀢𑀡𑁆𑀳𑀸𑀬 𑀔𑀬𑀦𑁆𑀢𑁂 𑀉𑀧𑁆𑀧𑀦𑁆𑀦𑀁 𑀅𑀭𑀳𑀢𑁆𑀢𑀁 𑀲𑀓𑀮𑀲𑁆𑀲𑀧𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀪𑀺𑀪𑀯𑀦𑀢𑁄 𑀲𑀩𑁆𑀩𑀲𑁂𑀝𑁆𑀞𑀫𑁂𑀯. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀡𑁆𑀳𑀓𑁆𑀔𑀬𑁄 𑀲𑀩𑁆𑀩𑀤𑀼𑀓𑁆𑀔𑀁 𑀚𑀺𑀦𑀸𑀢𑀻’’𑀢𑀺.

𑀏𑀯𑀁 𑀲𑀢𑁆𑀣𑀭𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀁 𑀓𑀣𑁂𑀦𑁆𑀢𑁂𑀬𑁂𑀯 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀲𑀓𑁆𑀓𑁄𑀧𑀺 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀪𑀦𑁆𑀢𑁂, 𑀏𑀯𑀁𑀚𑁂𑀝𑁆𑀞𑀓𑁂 𑀦𑀸𑀫 𑀥𑀫𑁆𑀫𑀤𑀸𑀦𑁂 𑀓𑀺𑀫𑀢𑁆𑀣𑀁 𑀅𑀫𑁆𑀳𑀸𑀓𑀁 𑀧𑀢𑁆𑀢𑀺𑀁 𑀦 𑀤𑀸𑀧𑁂𑀣, 𑀇𑀢𑁄 𑀧𑀝𑁆𑀞𑀸𑀬 𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀓𑀣𑁂𑀢𑁆𑀯𑀸 𑀧𑀢𑁆𑀢𑀺𑀁 𑀤𑀸𑀧𑁂𑀣, 𑀪𑀦𑁆𑀢𑁂’’𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀅𑀚𑁆𑀚𑀸𑀤𑀺𑀁 𑀓𑀢𑁆𑀯𑀸 𑀫𑀳𑀸𑀥𑀫𑁆𑀫𑀲𑁆𑀲𑀯𑀦𑀁 𑀯𑀸 𑀧𑀸𑀓𑀢𑀺𑀓𑀥𑀫𑁆𑀫𑀲𑁆𑀲𑀯𑀦𑀁 𑀯𑀸 𑀉𑀧𑀦𑀺𑀲𑀺𑀦𑁆𑀦𑀓𑀣𑀁 𑀯𑀸 𑀅𑀦𑁆𑀢𑀫𑀲𑁄 𑀅𑀦𑀼𑀫𑁄𑀤𑀦𑀫𑁆𑀧𑀺 𑀓𑀣𑁂𑀢𑁆𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀢𑁆𑀢𑀺𑀁 𑀤𑀤𑁂𑀬𑁆𑀬𑀸𑀣𑀸’’𑀢𑀺 𑀆𑀳.

𑀲𑀓𑁆𑀓𑀧𑀜𑁆𑀳𑀯𑀢𑁆𑀣𑀼 𑀤𑀲𑀫𑀁.