𑁮. 𑀫𑀸𑀭𑀯𑀢𑁆𑀣𑀼

𑀅𑀢𑁆𑀣𑀫𑁆𑀳𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀅𑀭𑀜𑁆𑀜𑀓𑀼𑀝𑀺𑀓𑀸𑀬𑀁 𑀯𑀺𑀳𑀭𑀦𑁆𑀢𑁄 𑀫𑀸𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀲𑁆𑀫𑀺𑀁 𑀓𑀺𑀭 𑀓𑀸𑀮𑁂 𑀭𑀸𑀚𑀸𑀦𑁄 𑀫𑀦𑀼𑀲𑁆𑀲𑁂 𑀧𑀻𑀴𑁂𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀺. 𑀅𑀣 𑀪𑀕𑀯𑀸 𑀅𑀥𑀫𑁆𑀫𑀺𑀓𑀭𑀸𑀚𑀽𑀦𑀁 𑀭𑀚𑁆𑀚𑁂 𑀤𑀡𑁆𑀟𑀓𑀭𑀡𑀧𑀻𑀴𑀺𑀢𑁂 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀓𑀸𑀭𑀼𑀜𑁆𑀜𑁂𑀦 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀓𑁆𑀓𑀸 𑀦𑀼 𑀔𑁄 𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀅𑀳𑀦𑀁 𑀅𑀖𑀸𑀢𑀬𑀁, 𑀅𑀚𑀺𑀦𑀁 𑀅𑀚𑀸𑀧𑀬𑀁, 𑀅𑀲𑁄𑀘𑀁 𑀅𑀲𑁄𑀘𑀸𑀧𑀬𑀁 𑀥𑀫𑁆𑀫𑁂𑀦𑀸’’𑀢𑀺, 𑀫𑀸𑀭𑁄 𑀧𑀸𑀧𑀺𑀫𑀸 𑀢𑀁 𑀪𑀕𑀯𑀢𑁄 𑀧𑀭𑀺𑀯𑀺𑀢𑀓𑁆𑀓𑀁 𑀜𑀢𑁆𑀯𑀸 ‘‘𑀲𑀫𑀡𑁄 𑀕𑁄𑀢𑀫𑁄 ‘𑀲𑀓𑁆𑀓𑀸 𑀦𑀼 𑀔𑁄 𑀭𑀚𑁆𑀚𑀁 𑀓𑀸𑀭𑁂𑀢𑀼’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺, 𑀇𑀤𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀭𑀚𑁆𑀚𑀜𑁆𑀘 𑀦𑀸𑀫𑁂𑀢𑀁 𑀧𑀫𑀸𑀤𑀝𑁆𑀞𑀸𑀦𑀁, 𑀢𑀁 𑀓𑀸𑀭𑁂𑀦𑁆𑀢𑁂 𑀲𑀓𑁆𑀓𑀸 𑀑𑀓𑀸𑀲𑀁 𑀮𑀪𑀺𑀢𑀼𑀁, 𑀕𑀘𑁆𑀙𑀸𑀫𑀺 𑀉𑀲𑁆𑀲𑀸𑀳𑀫𑀲𑁆𑀲 𑀚𑀦𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀓𑀸𑀭𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀭𑀚𑁆𑀚𑀁, 𑀓𑀸𑀭𑁂𑀢𑀼 𑀲𑀼𑀕𑀢𑁄 𑀭𑀚𑁆𑀚𑀁 𑀅𑀳𑀦𑀁 𑀅𑀖𑀸𑀢𑀬𑀁, 𑀅𑀚𑀺𑀦𑀁 𑀅𑀚𑀸𑀧𑀬𑀁, 𑀅𑀲𑁄𑀘𑀁 𑀅𑀲𑁄𑀘𑀸𑀧𑀬𑀁 𑀥𑀫𑁆𑀫𑁂𑀦𑀸’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀺𑀁 𑀧𑀦 𑀫𑁂 𑀢𑁆𑀯𑀁, 𑀧𑀸𑀧𑀺𑀫, 𑀧𑀲𑁆𑀲𑀲𑀺, 𑀬𑀁 𑀫𑀁 𑀢𑁆𑀯𑀁 𑀏𑀯𑀁 𑀯𑀤𑁂𑀲𑀻’’𑀢𑀺 𑀯𑀢𑁆𑀯𑀸 ‘‘𑀪𑀕𑀯𑀢𑀸 𑀔𑁄, 𑀪𑀦𑁆𑀢𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀲𑀼𑀪𑀸𑀯𑀺𑀢𑀸. 𑀆𑀓𑀗𑁆𑀔𑀫𑀸𑀦𑁄 𑀳𑀺 𑀪𑀕𑀯𑀸 𑀳𑀺𑀫𑀯𑀦𑁆𑀢𑀁 𑀧𑀩𑁆𑀩𑀢𑀭𑀸𑀚𑀁 ‘𑀲𑀼𑀯𑀡𑁆𑀡’𑀦𑁆𑀢𑀺 𑀅𑀥𑀺𑀫𑀼𑀘𑁆𑀘𑁂𑀬𑁆𑀬, 𑀢𑀜𑁆𑀘 𑀲𑀼𑀯𑀡𑁆𑀡𑀫𑁂𑀯 𑀅𑀲𑁆𑀲, 𑀅𑀳𑀫𑁆𑀧𑀺 𑀔𑁄 𑀥𑀦𑁂𑀦 𑀥𑀦𑀓𑀭𑀡𑀻𑀬𑀁 𑀓𑀭𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀣𑀸’’𑀢𑀺 𑀢𑁂𑀦 𑀯𑀼𑀢𑁆𑀢𑁂 𑁋

‘‘𑀧𑀩𑁆𑀩𑀢𑀲𑁆𑀲 𑀲𑀼𑀯𑀡𑁆𑀡𑀲𑁆𑀲, 𑀚𑀸𑀢𑀭𑀽𑀧𑀲𑁆𑀲 𑀓𑁂𑀯𑀮𑁄;

𑀤𑁆𑀯𑀺𑀢𑁆𑀢𑀸𑀯 𑀦𑀸𑀮𑀫𑁂𑀓𑀲𑁆𑀲, 𑀇𑀢𑀺 𑀯𑀺𑀤𑁆𑀯𑀸 𑀲𑀫𑀜𑁆𑀘𑀭𑁂.

‘‘𑀬𑁄 𑀤𑀼𑀓𑁆𑀔𑀫𑀤𑀓𑁆𑀔𑀺 𑀬𑀢𑁄𑀦𑀺𑀤𑀸𑀦𑀁,

𑀓𑀸𑀫𑁂𑀲𑀼 𑀲𑁄 𑀚𑀦𑁆𑀢𑀼 𑀓𑀣𑀁 𑀦𑀫𑁂𑀬𑁆𑀬;

𑀉𑀧𑀥𑀺𑀁 𑀯𑀺𑀤𑀺𑀢𑁆𑀯𑀸 𑀲𑀗𑁆𑀕𑁄𑀢𑀺 𑀮𑁄𑀓𑁂,

𑀢𑀲𑁆𑀲𑁂𑀯 𑀚𑀦𑁆𑀢𑀼 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂’’𑀢𑀺. (𑀲𑀁. 𑀦𑀺. 𑁧.𑁧𑁫𑁬) 𑁋

𑀇𑀫𑀸𑀳𑀺 𑀕𑀸𑀣𑀸𑀳𑀺 𑀲𑀁𑀯𑁂𑀚𑁂𑀢𑁆𑀯𑀸 ‘‘𑀅𑀜𑁆𑀜𑁄 𑀏𑀯 𑀔𑁄, 𑀧𑀸𑀧𑀺𑀫, 𑀢𑀯 𑀑𑀯𑀸𑀤𑁄, 𑀅𑀜𑁆𑀜𑁄 𑀫𑀫, 𑀢𑀬𑀸 𑀲𑀤𑁆𑀥𑀺𑀁 𑀥𑀫𑁆𑀫𑀲𑀁𑀲𑀦𑁆𑀤𑀦𑀸 𑀦𑀸𑀫 𑀦𑀢𑁆𑀣𑀺, 𑀅𑀳𑀜𑁆𑀳𑀺 𑀏𑀯𑀁 𑀑𑀯𑀤𑀸𑀫𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁩𑁧. ‘‘𑀅𑀢𑁆𑀣𑀫𑁆𑀳𑀺 𑀚𑀸𑀢𑀫𑁆𑀳𑀺 𑀲𑀼𑀔𑀸 𑀲𑀳𑀸𑀬𑀸,

𑀢𑀼𑀝𑁆𑀞𑀻 𑀲𑀼𑀔𑀸 𑀬𑀸 𑀇𑀢𑀭𑀻𑀢𑀭𑁂𑀦;

𑀧𑀼𑀜𑁆𑀜𑀁 𑀲𑀼𑀔𑀁 𑀚𑀻𑀯𑀺𑀢𑀲𑀗𑁆𑀔𑀬𑀫𑁆𑀳𑀺,

𑀲𑀩𑁆𑀩𑀲𑁆𑀲 𑀤𑀼𑀓𑁆𑀔𑀲𑁆𑀲 𑀲𑀼𑀔𑀁 𑀧𑀳𑀸𑀦𑀁.

𑁩𑁩𑁨. ‘‘𑀲𑀼𑀔𑀸 𑀫𑀢𑁆𑀢𑁂𑀬𑁆𑀬𑀢𑀸 𑀮𑁄𑀓𑁂,

𑀅𑀣𑁄 𑀧𑁂𑀢𑁆𑀢𑁂𑀬𑁆𑀬𑀢𑀸 𑀲𑀼𑀔𑀸;

𑀲𑀼𑀔𑀸 𑀲𑀸𑀫𑀜𑁆𑀜𑀢𑀸 𑀮𑁄𑀓𑁂,

𑀅𑀣𑁄 𑀩𑁆𑀭𑀳𑁆𑀫𑀜𑁆𑀜𑀢𑀸 𑀲𑀼𑀔𑀸.

𑁩𑁩𑁩. ‘‘𑀲𑀼𑀔𑀁 𑀬𑀸𑀯 𑀚𑀭𑀸𑀲𑀻𑀮𑀁, 𑀲𑀼𑀔𑀸 𑀲𑀤𑁆𑀥𑀸 𑀧𑀢𑀺𑀝𑁆𑀞𑀺𑀢𑀸;

𑀲𑀼𑀔𑁄 𑀧𑀜𑁆𑀜𑀸𑀬 𑀧𑀝𑀺𑀮𑀸𑀪𑁄, 𑀧𑀸𑀧𑀸𑀦𑀁 𑀅𑀓𑀭𑀡𑀁 𑀲𑀼𑀔’’𑀦𑁆𑀢𑀺.

𑀢𑀢𑁆𑀣 𑀅𑀢𑁆𑀣𑀫𑁆𑀳𑀻𑀢𑀺 𑀧𑀩𑁆𑀩𑀚𑀺𑀢𑀲𑁆𑀲𑀸𑀧𑀺 𑀳𑀺 𑀘𑀻𑀯𑀭𑀓𑀭𑀡𑀸𑀤𑀺𑀓𑁂 𑀯𑀸 𑀅𑀥𑀺𑀓𑀭𑀡𑀯𑀽𑀧𑀲𑀫𑀸𑀤𑀺𑀓𑁂 𑀯𑀸 𑀕𑀺𑀳𑀺𑀦𑁄𑀧𑀺 𑀓𑀲𑀺𑀓𑀫𑁆𑀫𑀸𑀤𑀺𑀓𑁂 𑀯𑀸 𑀩𑀮𑀯𑀧𑀓𑁆𑀔𑀲𑀦𑁆𑀦𑀺𑀲𑁆𑀲𑀺𑀢𑁂𑀳𑀺 𑀅𑀪𑀺𑀪𑀯𑀦𑀸𑀤𑀺𑀓𑁂 𑀯𑀸 𑀓𑀺𑀘𑁆𑀘𑁂 𑀉𑀧𑁆𑀧𑀦𑁆𑀦𑁂 𑀬𑁂 𑀢𑀁 𑀓𑀺𑀘𑁆𑀘𑀁 𑀦𑀺𑀧𑁆𑀨𑀸𑀤𑁂𑀢𑀼𑀁 𑀯𑀸 𑀯𑀽𑀧𑀲𑀫𑁂𑀢𑀼𑀁 𑀯𑀸 𑀲𑀓𑁆𑀓𑁄𑀦𑁆𑀢𑀺, 𑀏𑀯𑀭𑀽𑀧𑀸 𑀲𑀼𑀔𑀸 𑀲𑀳𑀸𑀬𑀸𑀢𑀺 𑀅𑀢𑁆𑀣𑁄. 𑀢𑀼𑀝𑁆𑀞𑀻 𑀲𑀼𑀔𑀸𑀢𑀺 𑀬𑀲𑁆𑀫𑀸 𑀧𑀦 𑀕𑀺𑀳𑀺𑀦𑁄𑀧𑀺 𑀲𑀓𑁂𑀦 𑀅𑀲𑀦𑁆𑀢𑀼𑀝𑁆𑀞𑀸 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀻𑀦𑀺 𑀆𑀭𑀪𑀦𑁆𑀢𑀺, 𑀧𑀩𑁆𑀩𑀚𑀺𑀢𑀸𑀧𑀺 𑀦𑀸𑀦𑀧𑁆𑀧𑀓𑀸𑀭𑀁 𑀅𑀦𑁂𑀲𑀦𑀁. 𑀇𑀢𑀺 𑀢𑁂 𑀲𑀼𑀔𑀁 𑀦 𑀯𑀺𑀦𑁆𑀤𑀦𑁆𑀢𑀺𑀬𑁂𑀯. 𑀢𑀲𑁆𑀫𑀸 𑀬𑀸 𑀇𑀢𑀭𑀻𑀢𑀭𑁂𑀦 𑀧𑀭𑀺𑀢𑁆𑀢𑁂𑀦 𑀯𑀸 𑀯𑀺𑀧𑀼𑀮𑁂𑀦 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀲𑀦𑁆𑀢𑀼𑀝𑁆𑀞𑀺, 𑀅𑀬𑀫𑁂𑀯 𑀲𑀼𑀔𑀸𑀢𑀺 𑀅𑀢𑁆𑀣𑁄. 𑀧𑀼𑀜𑁆𑀜𑀦𑁆𑀢𑀺 𑀫𑀭𑀡𑀓𑀸𑀮𑁂 𑀧𑀦 𑀬𑀣𑀸𑀚𑁆𑀛𑀸𑀲𑀬𑁂𑀦 𑀧𑀢𑁆𑀣𑀭𑀺𑀢𑁆𑀯𑀸 𑀓𑀢𑀧𑀼𑀜𑁆𑀜𑀓𑀫𑁆𑀫𑀫𑁂𑀯 𑀲𑀼𑀔𑀁. 𑀲𑀩𑁆𑀩𑀲𑁆𑀲𑀸𑀢𑀺 𑀲𑀓𑀮𑀲𑁆𑀲𑀧𑀺 𑀧𑀦 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀫𑁂𑀯 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀼𑀔𑀁 𑀦𑀸𑀫.

𑀫𑀢𑁆𑀢𑁂𑀬𑁆𑀬𑀢𑀸𑀢𑀺 𑀫𑀸𑀢𑀭𑀺 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺. 𑀧𑁂𑀢𑁆𑀢𑁂𑀬𑁆𑀬𑀢𑀸𑀢𑀺 𑀧𑀺𑀢𑀭𑀺 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺. 𑀉𑀪𑀬𑁂𑀦𑀧𑀺 𑀫𑀸𑀢𑀸𑀧𑀺𑀢𑀽𑀦𑀁 𑀉𑀧𑀝𑁆𑀞𑀸𑀦𑀫𑁂𑀯 𑀓𑀣𑀺𑀢𑀁. 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀧𑀼𑀢𑁆𑀢𑀸𑀦𑀁 𑀅𑀦𑀼𑀧𑀝𑁆𑀞𑀳𑀦𑀪𑀸𑀯𑀁 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀪𑀽𑀫𑀺𑀬𑀁 𑀯𑀸 𑀦𑀺𑀤𑀳𑀦𑁆𑀢𑀺, 𑀧𑀭𑁂𑀲𑀁 𑀯𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, ‘‘𑀫𑀸𑀢𑀸𑀧𑀺𑀢𑀭𑁄 𑀦 𑀉𑀧𑀝𑁆𑀞𑀳𑀦𑁆𑀢𑀻’’𑀢𑀺 𑀦𑁂𑀲𑀁 𑀦𑀺𑀦𑁆𑀤𑀸𑀧𑀺 𑀯𑀟𑁆𑀠𑀢𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀕𑀽𑀣𑀦𑀺𑀭𑀬𑁂𑀧𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀬𑁂 𑀧𑀦 𑀫𑀸𑀢𑀸𑀧𑀺𑀢𑀭𑁄 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀦𑁆𑀢𑀺, 𑀢𑁂 𑀢𑁂𑀲𑀁 𑀲𑀦𑁆𑀢𑀓𑀁 𑀥𑀦𑀫𑁆𑀧𑀺 𑀧𑀸𑀧𑀼𑀡𑀦𑁆𑀢𑀺, 𑀧𑀲𑀁𑀲𑀫𑁆𑀧𑀺 𑀮𑀪𑀦𑁆𑀢𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀉𑀪𑀬𑀫𑁆𑀧𑁂𑀢𑀁 𑀲𑀼𑀔𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀸𑀫𑀜𑁆𑀜𑀢𑀸𑀢𑀺 𑀧𑀩𑁆𑀩𑀚𑀺𑀢𑁂𑀲𑀼 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺. 𑀩𑁆𑀭𑀳𑁆𑀫𑀜𑁆𑀜𑀢𑀸𑀢𑀺 𑀩𑀸𑀳𑀺𑀢𑀧𑀸𑀧𑁂𑀲𑀼 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑁂𑀲𑀼 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺𑀬𑁂𑀯. 𑀉𑀪𑀬𑁂𑀦𑀧𑀺 𑀢𑁂𑀲𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀝𑀺𑀚𑀕𑁆𑀕𑀦𑀪𑀸𑀯𑁄 𑀓𑀣𑀺𑀢𑁄, 𑀇𑀤𑀫𑁆𑀧𑀺 𑀮𑁄𑀓𑁂 𑀲𑀼𑀔𑀁 𑀦𑀸𑀫 𑀓𑀣𑀺𑀓𑀁.

𑀲𑀻𑀮𑀦𑁆𑀢𑀺 𑀫𑀡𑀺𑀓𑀼𑀡𑁆𑀟𑀮𑀭𑀢𑁆𑀢𑀯𑀢𑁆𑀣𑀸𑀤𑀬𑁄 𑀳𑀺 𑀅𑀮𑀗𑁆𑀓𑀸𑀭𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀬𑁂 𑀞𑀺𑀢𑀸𑀦𑀁𑀬𑁂𑀯 𑀲𑁄𑀪𑀦𑁆𑀢𑀺. 𑀦 𑀤𑀳𑀭𑀸𑀦𑀁 𑀅𑀮𑀗𑁆𑀓𑀸𑀭𑁄 𑀫𑀳𑀮𑁆𑀮𑀓𑀓𑀸𑀮𑁂, 𑀫𑀳𑀮𑁆𑀮𑀓𑀸𑀦𑀁 𑀯𑀸 𑀅𑀮𑀗𑁆𑀓𑀸𑀭𑁄 𑀤𑀳𑀭𑀓𑀸𑀮𑁂 𑀲𑁄𑀪𑀢𑀺, ‘‘𑀉𑀫𑁆𑀫𑀢𑁆𑀢𑀓𑁄 𑀏𑀲 𑀫𑀜𑁆𑀜𑁂’’𑀢𑀺 𑀕𑀭𑀳𑀼𑀧𑁆𑀧𑀸𑀤𑀦𑁂𑀦 𑀧𑀦 𑀤𑁄𑀲𑀫𑁂𑀯 𑀚𑀦𑁂𑀢𑀺. 𑀧𑀜𑁆𑀘𑀲𑀻𑀮𑀤𑀲𑀲𑀻𑀮𑀸𑀤𑀺𑀪𑁂𑀤𑀁 𑀧𑀦 𑀲𑀻𑀮𑀁 𑀤𑀳𑀭𑀲𑁆𑀲𑀸𑀧𑀺 𑀫𑀳𑀮𑁆𑀮𑀓𑀲𑁆𑀲𑀸𑀧𑀺 𑀲𑀩𑁆𑀩𑀯𑀬𑁂𑀲𑀼 𑀲𑁄𑀪𑀢𑀺𑀬𑁂𑀯, ‘‘𑀅𑀳𑁄 𑀯𑀢𑀸𑀬𑀁 𑀲𑀻𑀮𑀯𑀸’’𑀢𑀺 𑀧𑀲𑀁𑀲𑀼𑀧𑁆𑀧𑀸𑀤𑀦𑁂𑀦 𑀲𑁄𑀫𑀦𑀲𑁆𑀲𑀫𑁂𑀯 𑀆𑀯𑀳𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 𑀲𑀼𑀔𑀁 𑀬𑀸𑀯 𑀚𑀭𑀸 𑀲𑀻𑀮𑀦𑁆𑀢𑀺. 𑀲𑀤𑁆𑀥𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀢𑁄 𑀤𑀼𑀯𑀺𑀥𑀸𑀧𑀺 𑀲𑀤𑁆𑀥𑀸 𑀦𑀺𑀘𑁆𑀘𑀮𑀸 𑀳𑀼𑀢𑁆𑀯𑀸 𑀧𑀢𑀺𑀝𑁆𑀞𑀺𑀢𑀸. 𑀲𑀼𑀔𑁄 𑀧𑀜𑁆𑀜𑀸𑀬 𑀧𑀝𑀺𑀮𑀸𑀪𑁄𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀬 𑀧𑀝𑀺𑀮𑀸𑀪𑁄 𑀲𑀼𑀔𑁄. 𑀧𑀸𑀧𑀸𑀦𑀁 𑀅𑀓𑀭𑀡𑀦𑁆𑀢𑀺 𑀲𑁂𑀢𑀼𑀖𑀸𑀢𑀯𑀲𑁂𑀦 𑀧𑀦 𑀧𑀸𑀧𑀸𑀦𑀁 𑀅𑀓𑀭𑀡𑀁 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀼𑀔𑀦𑁆𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽𑀦𑀁 𑀤𑁂𑀯𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀫𑀸𑀭𑀯𑀢𑁆𑀣𑀼 𑀅𑀝𑁆𑀞𑀫𑀁.

𑀦𑀸𑀕𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑁂𑀯𑀻𑀲𑀢𑀺𑀫𑁄 𑀯𑀕𑁆𑀕𑁄.