𑁨𑁩. 𑀦𑀸𑀕𑀯𑀕𑁆𑀕𑁄

𑁧. 𑀅𑀢𑁆𑀢𑀤𑀦𑁆𑀢𑀯𑀢𑁆𑀣𑀼

𑀅𑀳𑀁 𑀦𑀸𑀕𑁄 𑀯𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀸𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀅𑀧𑁆𑀧𑀫𑀸𑀤𑀯𑀕𑁆𑀕𑀲𑁆𑀲 𑀆𑀤𑀺𑀕𑀸𑀣𑀸𑀯𑀡𑁆𑀡𑀦𑀸𑀬 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀢𑀢𑁆𑀣 (𑀥. 𑀧. 𑀅𑀝𑁆𑀞. 𑁧.𑀲𑀸𑀫𑀸𑀯𑀢𑀺𑀯𑀢𑁆𑀣𑀼) 𑁋

𑀫𑀸𑀕𑀡𑁆𑀟𑀺𑀬𑀸 𑀢𑀸𑀲𑀁 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑀺𑀢𑁆𑀯𑀸 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲𑁂𑀯 𑀓𑀢𑁆𑀢𑀩𑁆𑀩𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀸𑀕𑀭𑀸𑀦𑀁 𑀮𑀜𑁆𑀚𑀁 𑀤𑀢𑁆𑀯𑀸 ‘‘𑀲𑀫𑀡𑀁 𑀕𑁄𑀢𑀫𑀁 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀘𑀭𑀦𑁆𑀢𑀁 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑁂𑀳𑀺 𑀲𑀤𑁆𑀥𑀺𑀁 𑀅𑀓𑁆𑀓𑁄𑀲𑁂𑀢𑁆𑀯𑀸 𑀧𑀭𑀺𑀪𑀸𑀲𑁂𑀢𑁆𑀯𑀸 𑀧𑀮𑀸𑀧𑁂𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀢𑀻𑀲𑀼 𑀭𑀢𑀦𑁂𑀲𑀼 𑀅𑀧𑁆𑀧𑀲𑀦𑁆𑀦𑀸 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀝𑁆𑀞𑀁 𑀲𑀢𑁆𑀣𑀸𑀭𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 ‘‘𑀘𑁄𑀭𑁄𑀲𑀺 𑀩𑀸𑀮𑁄𑀲𑀺 𑀫𑀽𑀴𑁆𑀳𑁄𑀲𑀺 𑀣𑁂𑀦𑁄𑀲𑀺 𑀑𑀝𑁆𑀞𑁄𑀲𑀺 𑀕𑁄𑀡𑁄𑀲𑀺 𑀕𑀤𑁆𑀭𑀪𑁄𑀲𑀺 𑀦𑁂𑀭𑀬𑀺𑀓𑁄𑀲𑀺 𑀢𑀺𑀭𑀘𑁆𑀙𑀸𑀦𑀕𑀢𑁄𑀲𑀺, 𑀦𑀢𑁆𑀣𑀺 𑀢𑀼𑀬𑁆𑀳𑀁 𑀲𑀼𑀕𑀢𑀺, 𑀤𑀼𑀕𑁆𑀕𑀢𑀺𑀬𑁂𑀯 𑀢𑀼𑀬𑁆𑀳𑀁 𑀧𑀸𑀝𑀺𑀓𑀗𑁆𑀔𑀸’’𑀢𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺. 𑀢𑀁 𑀲𑀼𑀢𑁆𑀯𑀸 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀢𑁆𑀣𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀪𑀦𑁆𑀢𑁂, 𑀇𑀫𑁂 𑀦𑀸𑀕𑀭𑀸 𑀅𑀫𑁆𑀳𑁂 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺, 𑀇𑀢𑁄 𑀅𑀜𑁆𑀜𑀢𑁆𑀣 𑀕𑀘𑁆𑀙𑀸𑀫𑀸’’𑀢𑀺. ‘‘𑀓𑀼𑀳𑀺𑀁, 𑀆𑀦𑀦𑁆𑀤𑀸’’𑀢𑀺? ‘‘𑀅𑀜𑁆𑀜𑀁 𑀦𑀕𑀭𑀁, 𑀪𑀦𑁆𑀢𑁂’’𑀢𑀺. ‘‘𑀢𑀢𑁆𑀣 𑀫𑀦𑀼𑀲𑁆𑀲𑁂𑀲𑀼 𑀅𑀓𑁆𑀓𑁄𑀲𑀦𑁆𑀢𑁂𑀲𑀼 𑀧𑀭𑀺𑀪𑀸𑀲𑀦𑁆𑀢𑁂𑀲𑀼 𑀧𑀼𑀦 𑀓𑀢𑁆𑀣 𑀕𑀫𑀺𑀲𑁆𑀲𑀸𑀫𑀸𑀦𑀦𑁆𑀤𑀸’’𑀢𑀺. ‘‘𑀢𑀢𑁄𑀧𑀺 𑀅𑀜𑁆𑀜𑀁 𑀦𑀕𑀭𑀁, 𑀪𑀦𑁆𑀢𑁂’’𑀢𑀺. ‘‘𑀢𑀢𑁆𑀣 𑀫𑀦𑀼𑀲𑁆𑀲𑁂𑀲𑀼 𑀅𑀓𑁆𑀓𑁄𑀲𑀦𑁆𑀢𑁂𑀲𑀼 𑀧𑀭𑀺𑀪𑀸𑀲𑀦𑁆𑀢𑁂𑀲𑀼 𑀓𑀼𑀳𑀺𑀁 𑀕𑀫𑀺𑀲𑁆𑀲𑀸𑀫𑀸𑀦𑀦𑁆𑀤𑀸’’𑀢𑀺. ‘‘𑀢𑀢𑁄𑀧𑀺 𑀅𑀜𑁆𑀜𑀁 𑀦𑀕𑀭𑀁, 𑀪𑀦𑁆𑀢𑁂’’𑀢𑀺. ‘‘𑀆𑀦𑀦𑁆𑀤, 𑀦 𑀏𑀯𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀬𑀢𑁆𑀣 𑀅𑀥𑀺𑀓𑀭𑀡𑀁 𑀉𑀧𑁆𑀧𑀦𑁆𑀦𑀁, 𑀢𑀢𑁆𑀣𑁂𑀯 𑀢𑀲𑁆𑀫𑀺𑀁 𑀯𑀽𑀧𑀲𑀦𑁆𑀢𑁂 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀓𑁂 𑀧𑀦 𑀢𑁂, 𑀆𑀦𑀦𑁆𑀤, 𑀅𑀓𑁆𑀓𑁄𑀲𑀦𑁆𑀢𑀻’’𑀢𑀺. ‘‘𑀪𑀦𑁆𑀢𑁂, 𑀤𑀸𑀲𑀓𑀫𑁆𑀫𑀓𑀭𑁂 𑀉𑀧𑀸𑀤𑀸𑀬 𑀲𑀩𑁆𑀩𑁂 𑀅𑀓𑁆𑀓𑁄𑀲𑀦𑁆𑀢𑀻’’𑀢𑀺. ‘‘𑀅𑀳𑀁, 𑀆𑀦𑀦𑁆𑀤, 𑀲𑀗𑁆𑀕𑀸𑀫𑀁 𑀑𑀢𑀺𑀡𑁆𑀡𑀳𑀢𑁆𑀣𑀺𑀲𑀤𑀺𑀲𑁄. 𑀲𑀗𑁆𑀕𑀸𑀫𑀁 𑀑𑀢𑀺𑀡𑁆𑀡𑀳𑀢𑁆𑀣𑀺𑀦𑁄 𑀳𑀺 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀕𑀢𑁂 𑀲𑀭𑁂 𑀲𑀳𑀺𑀢𑀼𑀁 𑀪𑀸𑀭𑁄, 𑀢𑀣𑁂𑀯 𑀩𑀳𑀽𑀳𑀺 𑀤𑀼𑀲𑁆𑀲𑀻𑀮𑁂𑀳𑀺 𑀓𑀣𑀺𑀢𑀓𑀣𑀸𑀦𑀁 𑀲𑀳𑀦𑀁 𑀦𑀸𑀫 𑀫𑀬𑁆𑀳𑀁 𑀪𑀸𑀭𑁄’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀸𑀦𑀁 𑀆𑀭𑀩𑁆𑀪 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁨𑁦. ‘‘𑀅𑀳𑀁 𑀦𑀸𑀕𑁄𑀯 𑀲𑀗𑁆𑀕𑀸𑀫𑁂, 𑀘𑀸𑀧𑀢𑁄 𑀧𑀢𑀺𑀢𑀁 𑀲𑀭𑀁;

𑀅𑀢𑀺𑀯𑀸𑀓𑁆𑀬𑀁 𑀢𑀺𑀢𑀺𑀓𑁆𑀔𑀺𑀲𑁆𑀲𑀁, 𑀤𑀼𑀲𑁆𑀲𑀻𑀮𑁄 𑀳𑀺 𑀩𑀳𑀼𑀚𑁆𑀚𑀦𑁄.

𑁩𑁨𑁧. ‘‘𑀤𑀦𑁆𑀢𑀁 𑀦𑀬𑀦𑁆𑀢𑀺 𑀲𑀫𑀺𑀢𑀺𑀁, 𑀤𑀦𑁆𑀢𑀁 𑀭𑀸𑀚𑀸𑀪𑀺𑀭𑀽𑀳𑀢𑀺;

𑀤𑀦𑁆𑀢𑁄 𑀲𑁂𑀝𑁆𑀞𑁄 𑀫𑀦𑀼𑀲𑁆𑀲𑁂𑀲𑀼, 𑀬𑁄𑀢𑀺𑀯𑀸𑀓𑁆𑀬𑀁 𑀢𑀺𑀢𑀺𑀓𑁆𑀔𑀢𑀺.

𑁩𑁨𑁨. ‘‘𑀯𑀭𑀫𑀲𑁆𑀲𑀢𑀭𑀸 𑀤𑀦𑁆𑀢𑀸, 𑀆𑀚𑀸𑀦𑀻𑀬𑀸 𑀘 𑀲𑀺𑀦𑁆𑀥𑀯𑀸;

𑀓𑀼𑀜𑁆𑀚𑀭𑀸 𑀘 𑀫𑀳𑀸𑀦𑀸𑀕𑀸, 𑀅𑀢𑁆𑀢𑀤𑀦𑁆𑀢𑁄 𑀢𑀢𑁄 𑀯𑀭’’𑀦𑁆𑀢𑀺.

𑀢𑀢𑁆𑀣 𑀦𑀸𑀕𑁄𑀯𑀸𑀢𑀺 𑀳𑀢𑁆𑀣𑀻 𑀯𑀺𑀬. 𑀘𑀸𑀧𑀢𑁄 𑀧𑀢𑀺𑀢𑀦𑁆𑀢𑀺 𑀥𑀦𑀼𑀢𑁄 𑀫𑀼𑀢𑁆𑀢𑀁. 𑀅𑀢𑀺𑀯𑀸𑀓𑁆𑀬𑀦𑁆𑀢𑀺 𑀅𑀝𑁆𑀞𑀅𑀦𑀭𑀺𑀬𑀯𑁄𑀳𑀸𑀭𑀯𑀲𑁂𑀦 𑀧𑀯𑀢𑁆𑀢𑀁 𑀯𑀻𑀢𑀺𑀓𑁆𑀓𑀫𑀯𑀘𑀦𑀁. 𑀢𑀺𑀢𑀺𑀓𑁆𑀔𑀺𑀲𑁆𑀲𑀦𑁆𑀢𑀺 𑀬𑀣𑀸 𑀲𑀗𑁆𑀕𑀸𑀫𑀸𑀯𑀘𑀭𑁄 𑀲𑀼𑀤𑀦𑁆𑀢𑁄 𑀫𑀳𑀸𑀦𑀸𑀕𑁄 𑀔𑀫𑁄 𑀲𑀢𑁆𑀢𑀺𑀧𑀳𑀸𑀭𑀸𑀤𑀻𑀦𑀺 𑀘𑀸𑀧𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀅𑀢𑁆𑀢𑀦𑀺 𑀧𑀢𑀺𑀢𑁂 𑀲𑀭𑁂 𑀅𑀯𑀺𑀳𑀜𑁆𑀜𑀫𑀸𑀦𑁄 𑀢𑀺𑀢𑀺𑀓𑁆𑀔𑀢𑀺, 𑀏𑀯𑀫𑁂𑀯 𑀏𑀯𑀭𑀽𑀧𑀁 𑀅𑀢𑀺𑀯𑀸𑀓𑁆𑀬𑀁 𑀢𑀺𑀢𑀺𑀓𑁆𑀔𑀺𑀲𑁆𑀲𑀁, 𑀲𑀳𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀤𑀼𑀲𑁆𑀲𑀻𑀮𑁄 𑀳𑀻𑀢𑀺 𑀅𑀬𑀜𑁆𑀳𑀺 𑀮𑁄𑀓𑀺𑀬𑀫𑀳𑀸𑀚𑀦𑁄 𑀩𑀳𑀼𑀤𑀼𑀲𑁆𑀲𑀻𑀮𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀖𑀝𑁆𑀝𑁂𑀦𑁆𑀢𑁄 𑀘𑀭𑀢𑀺, 𑀢𑀢𑁆𑀣 𑀅𑀥𑀺𑀯𑀸𑀲𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑀫𑁂𑀯 𑀫𑀫 𑀪𑀸𑀭𑁄. 𑀲𑀫𑀺𑀢𑀺𑀦𑁆𑀢𑀺 𑀉𑀬𑁆𑀬𑀸𑀦𑀓𑀻𑀴𑀫𑀡𑁆𑀟𑀮𑀸𑀤𑀻𑀲𑀼 𑀫𑀳𑀸𑀚𑀦𑀫𑀚𑁆𑀛𑀁 𑀕𑀘𑁆𑀙𑀦𑁆𑀢𑀸 𑀤𑀦𑁆𑀢𑀫𑁂𑀯 𑀕𑁄𑀡𑀚𑀸𑀢𑀺𑀁 𑀯𑀸 𑀅𑀲𑁆𑀲𑀚𑀸𑀢𑀺𑀁 𑀯𑀸 𑀬𑀸𑀦𑁂 𑀬𑁄𑀚𑁂𑀢𑁆𑀯𑀸 𑀦𑀬𑀦𑁆𑀢𑀺. 𑀭𑀸𑀚𑀸𑀢𑀺 𑀢𑀣𑀸𑀭𑀽𑀧𑁂𑀳𑁂𑀯 𑀯𑀸𑀳𑀦𑁂𑀳𑀺 𑀕𑀘𑁆𑀙𑀦𑁆𑀢𑁄 𑀭𑀸𑀚𑀸𑀧𑀺 𑀤𑀦𑁆𑀢𑀫𑁂𑀯 𑀅𑀪𑀺𑀭𑀽𑀳𑀢𑀺. 𑀫𑀦𑀼𑀲𑁆𑀲𑁂𑀲𑀽𑀢𑀺 𑀫𑀦𑀼𑀲𑁆𑀲𑁂𑀲𑀼𑀧𑀺 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀤𑀦𑁆𑀢𑁄 𑀦𑀺𑀩𑁆𑀩𑀺𑀲𑁂𑀯𑀦𑁄𑀯 𑀲𑁂𑀝𑁆𑀞𑁄. 𑀬𑁄𑀢𑀺𑀯𑀸𑀓𑁆𑀬𑀦𑁆𑀢𑀺 𑀬𑁄 𑀏𑀯𑀭𑀽𑀧𑀁 𑀅𑀢𑀺𑀓𑁆𑀓𑀫𑀯𑀘𑀦𑀁 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑀫𑁆𑀧𑀺 𑀢𑀺𑀢𑀺𑀓𑁆𑀔𑀢𑀺 𑀦 𑀧𑀝𑀺𑀧𑁆𑀨𑀭𑀢𑀺 𑀦 𑀯𑀺𑀳𑀜𑁆𑀜𑀢𑀺, 𑀏𑀯𑀭𑀽𑀧𑁄 𑀤𑀦𑁆𑀢𑁄 𑀲𑁂𑀝𑁆𑀞𑁄𑀢𑀺 𑀅𑀢𑁆𑀣𑁄.

𑀅𑀲𑁆𑀲𑀢𑀭𑀸𑀢𑀺 𑀯𑀴𑀯𑀸𑀬 𑀕𑀤𑁆𑀭𑀪𑁂𑀦 𑀚𑀸𑀢𑀸. 𑀆𑀚𑀸𑀦𑀻𑀬𑀸𑀢𑀺 𑀬𑀁 𑀅𑀲𑁆𑀲𑀤𑀫𑀲𑀸𑀭𑀣𑀺 𑀓𑀸𑀭𑀡𑀁 𑀓𑀸𑀭𑁂𑀢𑀺, 𑀢𑀲𑁆𑀲 𑀔𑀺𑀧𑁆𑀧𑀁 𑀚𑀸𑀦𑀦𑀲𑀫𑀢𑁆𑀣𑀸. 𑀲𑀺𑀦𑁆𑀥𑀯𑀸𑀢𑀺 𑀲𑀺𑀦𑁆𑀥𑀯𑀭𑀝𑁆𑀞𑁂 𑀚𑀸𑀢𑀸 𑀅𑀲𑁆𑀲𑀸. 𑀫𑀳𑀸𑀦𑀸𑀕𑀸𑀢𑀺 𑀓𑀼𑀜𑁆𑀚𑀭𑀲𑀗𑁆𑀔𑀸𑀢𑀸 𑀫𑀳𑀸𑀳𑀢𑁆𑀣𑀺𑀦𑁄. 𑀅𑀢𑁆𑀢𑀤𑀦𑁆𑀢𑁄𑀢𑀺 𑀏𑀢𑁂 𑀅𑀲𑁆𑀲𑀢𑀭𑀸 𑀘 𑀲𑀺𑀦𑁆𑀥𑀯𑀸 𑀘 𑀓𑀼𑀜𑁆𑀚𑀭𑀸 𑀘 𑀤𑀦𑁆𑀢𑀸𑀯 𑀯𑀭𑀁, 𑀦 𑀅𑀤𑀦𑁆𑀢𑀸. 𑀬𑁄 𑀧𑀦 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀅𑀢𑁆𑀢𑀦𑁄 𑀤𑀦𑁆𑀢𑀢𑀸𑀬 𑀅𑀢𑁆𑀢𑀤𑀦𑁆𑀢𑁄 𑀦𑀺𑀩𑁆𑀩𑀺𑀲𑁂𑀯𑀦𑁄, 𑀅𑀬𑀁 𑀢𑀢𑁄𑀧𑀺 𑀯𑀭𑀁, 𑀲𑀩𑁆𑀩𑁂𑀳𑀺𑀧𑀺 𑀏𑀢𑁂𑀳𑀺 𑀉𑀢𑁆𑀢𑀭𑀺𑀢𑀭𑁄𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀯𑀻𑀣𑀺𑀲𑀺𑀗𑁆𑀖𑀸𑀝𑀓𑀸𑀤𑀻𑀲𑀼 𑀞𑀢𑁆𑀯𑀸 𑀅𑀓𑁆𑀓𑁄𑀲𑀦𑁆𑀢𑁄 𑀧𑀭𑀺𑀪𑀸𑀲𑀦𑁆𑀢𑁄 𑀲𑀩𑁆𑀩𑁄𑀧𑀺 𑀲𑁄 𑀫𑀳𑀸𑀚𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀻𑀢𑀺.

𑀅𑀢𑁆𑀢𑀤𑀦𑁆𑀢𑀯𑀢𑁆𑀣𑀼 𑀧𑀞𑀫𑀁.

𑁨. 𑀳𑀢𑁆𑀣𑀸𑀘𑀭𑀺𑀬𑀧𑀼𑀩𑁆𑀩𑀓𑀪𑀺𑀓𑁆𑀔𑀼𑀯𑀢𑁆𑀣𑀼

𑀦 𑀳𑀺 𑀏𑀢𑁂𑀳𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀳𑀢𑁆𑀣𑀸𑀘𑀭𑀺𑀬𑀧𑀼𑀩𑁆𑀩𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀏𑀓𑀤𑀺𑀯𑀲𑀁 𑀅𑀘𑀺𑀭𑀯𑀢𑀻𑀦𑀤𑀻𑀢𑀻𑀭𑁂 𑀳𑀢𑁆𑀣𑀺𑀤𑀫𑀓𑀁 ‘‘𑀏𑀓𑀁 𑀳𑀢𑁆𑀣𑀺𑀁 𑀤𑀫𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀁 𑀓𑀸𑀭𑀡𑀁 𑀲𑀺𑀓𑁆𑀔𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀤𑀺𑀲𑁆𑀯𑀸 𑀲𑀫𑀻𑀧𑁂 𑀞𑀺𑀢𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 𑀆𑀳 𑁋 ‘‘𑀆𑀯𑀼𑀲𑁄, 𑀲𑀘𑁂 𑀅𑀬𑀁 𑀳𑀢𑁆𑀣𑀸𑀘𑀭𑀺𑀬𑁄 𑀇𑀫𑀁 𑀳𑀢𑁆𑀣𑀺𑀁 𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀯𑀺𑀚𑁆𑀛𑁂𑀬𑁆𑀬, 𑀔𑀺𑀧𑁆𑀧𑀫𑁂𑀯 𑀇𑀫𑀁 𑀓𑀸𑀭𑀡𑀁 𑀲𑀺𑀓𑁆𑀔𑀸𑀧𑁂𑀬𑁆𑀬𑀸’’𑀢𑀺. 𑀲𑁄 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀢𑀣𑀸 𑀓𑀢𑁆𑀯𑀸 𑀢𑀁 𑀳𑀢𑁆𑀣𑀺𑀁 𑀲𑀼𑀤𑀦𑁆𑀢𑀁 𑀤𑀫𑁂𑀲𑀺. 𑀢𑁂 𑀪𑀺𑀓𑁆𑀔𑀽 𑀢𑀁 𑀧𑀯𑀢𑁆𑀢𑀺𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀢𑀁 𑀪𑀺𑀓𑁆𑀔𑀼𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑀬𑀸 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘𑀁, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀯𑀺𑀕𑀭𑀳𑀺𑀢𑁆𑀯𑀸 ‘‘𑀓𑀺𑀁 𑀢𑁂, 𑀫𑁄𑀖𑀧𑀼𑀭𑀺𑀲, 𑀳𑀢𑁆𑀣𑀺𑀬𑀸𑀦𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀤𑀦𑁆𑀢𑁂𑀦. 𑀦 𑀳𑀺 𑀏𑀢𑁂𑀳𑀺 𑀬𑀸𑀦𑁂𑀳𑀺 𑀅𑀕𑀢𑀧𑀼𑀩𑁆𑀩𑀁 𑀞𑀸𑀦𑀁 𑀕𑀦𑁆𑀢𑀼𑀁 𑀲𑀫𑀢𑁆𑀣𑀸 𑀦𑀸𑀫 𑀅𑀢𑁆𑀣𑀺, 𑀅𑀢𑁆𑀢𑀦𑀸 𑀧𑀦 𑀲𑀼𑀤𑀦𑁆𑀢𑁂𑀦 𑀲𑀓𑁆𑀓𑀸 𑀅𑀕𑀢𑀧𑀼𑀩𑁆𑀩𑀁 𑀞𑀸𑀦𑀁 𑀕𑀦𑁆𑀢𑀼𑀁, 𑀢𑀲𑁆𑀫𑀸 𑀅𑀢𑁆𑀢𑀸𑀦𑀫𑁂𑀯 𑀤𑀫𑁂𑀳𑀺, 𑀓𑀺𑀁 𑀢𑁂 𑀏𑀢𑁂𑀲𑀁 𑀤𑀫𑀦𑁂𑀦𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁨𑁩. ‘‘𑀦 𑀳𑀺 𑀏𑀢𑁂𑀳𑀺 𑀬𑀸𑀦𑁂𑀳𑀺, 𑀕𑀘𑁆𑀙𑁂𑀬𑁆𑀬 𑀅𑀕𑀢𑀁 𑀤𑀺𑀲𑀁;

𑀬𑀣𑀸𑀢𑁆𑀢𑀦𑀸 𑀲𑀼𑀤𑀦𑁆𑀢𑁂𑀦, 𑀤𑀦𑁆𑀢𑁄 𑀤𑀦𑁆𑀢𑁂𑀦 𑀕𑀘𑁆𑀙𑀢𑀻’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀸𑀦𑀺 𑀢𑀸𑀦𑀺 𑀳𑀢𑁆𑀣𑀺𑀬𑀸𑀦𑀸𑀤𑀻𑀦𑀺 𑀬𑀸𑀦𑀸𑀦𑀺, 𑀦 𑀳𑀺 𑀏𑀢𑁂𑀳𑀺 𑀬𑀸𑀦𑁂𑀳𑀺 𑀓𑁄𑀘𑀺 𑀧𑀼𑀕𑁆𑀕𑀮𑁄 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀅𑀕𑀢𑀧𑀼𑀩𑁆𑀩𑀢𑁆𑀢𑀸 ‘‘𑀅𑀕𑀢’’𑀦𑁆𑀢𑀺 𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀤𑀺𑀲𑀁 𑀢𑀣𑀸 𑀕𑀘𑁆𑀙𑁂𑀬𑁆𑀬, 𑀬𑀣𑀸 𑀧𑀼𑀩𑁆𑀩𑀪𑀸𑀕𑁂 𑀇𑀦𑁆𑀤𑁆𑀭𑀺𑀬𑀤𑀫𑁂𑀦 𑀅𑀧𑀭𑀪𑀸𑀕𑁂 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀬 𑀲𑀼𑀤𑀦𑁆𑀢𑁂𑀦 𑀤𑀦𑁆𑀢𑁄 𑀦𑀺𑀩𑁆𑀩𑀺𑀲𑁂𑀯𑀦𑁄 𑀲𑀧𑁆𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀢𑀁 𑀅𑀕𑀢𑀧𑀼𑀩𑁆𑀩𑀁 𑀤𑀺𑀲𑀁 𑀕𑀘𑁆𑀙𑀢𑀺, 𑀤𑀦𑁆𑀢𑀪𑀽𑀫𑀺𑀁 𑀧𑀸𑀧𑀼𑀡𑀸𑀢𑀺. 𑀢𑀲𑁆𑀫𑀸 𑀅𑀢𑁆𑀢𑀤𑀫𑀦𑀫𑁂𑀯 𑀢𑀢𑁄 𑀯𑀭𑀦𑁆𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀳𑀢𑁆𑀣𑀸𑀘𑀭𑀺𑀬𑀧𑀼𑀩𑁆𑀩𑀓𑀪𑀺𑀓𑁆𑀔𑀼𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀧𑀭𑀺𑀚𑀺𑀡𑁆𑀡𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑀯𑀢𑁆𑀣𑀼

𑀥𑀦𑀧𑀸𑀮𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀲𑁆𑀲 𑀧𑀭𑀺𑀚𑀺𑀡𑁆𑀡𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑁄 𑀩𑁆𑀭𑀸𑀳𑁆𑀫𑀡𑁄 𑀅𑀝𑁆𑀞𑀲𑀢𑀲𑀳𑀲𑁆𑀲𑀯𑀺𑀪𑀯𑁄 𑀯𑀬𑀧𑁆𑀧𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀧𑀼𑀢𑁆𑀢𑀸𑀦𑀁 𑀆𑀯𑀸𑀳𑀁 𑀓𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀢𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺. 𑀅𑀣𑀲𑁆𑀲 𑀩𑁆𑀭𑀸𑀳𑁆𑀫𑀡𑀺𑀬𑀸 𑀓𑀸𑀮𑀓𑀢𑀸𑀬 𑀧𑀼𑀢𑁆𑀢𑀸 𑀲𑀫𑁆𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀲𑀘𑁂 𑀅𑀬𑀁 𑀅𑀜𑁆𑀜𑀁 𑀩𑁆𑀭𑀸𑀳𑁆𑀫𑀡𑀺𑀁 𑀆𑀦𑁂𑀲𑁆𑀲𑀢𑀺, 𑀢𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀦𑀺𑀩𑁆𑀩𑀢𑁆𑀢𑀸𑀦𑀁 𑀯𑀲𑁂𑀦 𑀓𑀼𑀮𑀲𑀦𑁆𑀢𑀓𑀁 𑀪𑀺𑀚𑁆𑀚𑀺𑀲𑁆𑀲𑀢𑀺, 𑀳𑀦𑁆𑀤 𑀦𑀁 𑀫𑀬𑀁 𑀲𑀗𑁆𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀢𑁂 𑀢𑀁 𑀧𑀡𑀻𑀢𑁂𑀳𑀺 𑀖𑀸𑀲𑀘𑁆𑀙𑀸𑀤𑀦𑀸𑀤𑀻𑀳𑀺 𑀉𑀧𑀝𑁆𑀞𑀳𑀦𑁆𑀢𑀸 𑀳𑀢𑁆𑀣𑀧𑀸𑀤𑀲𑀫𑁆𑀩𑀸𑀳𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀉𑀧𑀝𑁆𑀞𑀳𑀺𑀢𑁆𑀯𑀸 𑀏𑀓𑀤𑀺𑀯𑀲𑀫𑀲𑁆𑀲 𑀤𑀺𑀯𑀸 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑀲𑁆𑀲 𑀳𑀢𑁆𑀣𑀧𑀸𑀤𑁂 𑀲𑀫𑁆𑀩𑀸𑀳𑀦𑁆𑀢𑀸 𑀧𑀸𑀝𑀺𑀬𑁂𑀓𑁆𑀓𑀁 𑀖𑀭𑀸𑀯𑀸𑀲𑁂 𑀆𑀤𑀻𑀦𑀯𑀁 𑀯𑀢𑁆𑀯𑀸 ‘‘𑀫𑀬𑀁 𑀢𑀼𑀫𑁆𑀳𑁂 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫, 𑀲𑁂𑀲𑀥𑀦𑀫𑁆𑀧𑀺 𑀦𑁄 𑀤𑁂𑀣𑀸’’𑀢𑀺 𑀬𑀸𑀘𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑁄 𑀧𑀼𑀦 𑀏𑀓𑁂𑀓𑀲𑁆𑀲 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀢𑁆𑀣𑀧𑀸𑀭𑀼𑀧𑀦𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀁 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀦𑀺𑀬𑁆𑀬𑀸𑀤𑁂𑀲𑀺. 𑀢𑀁 𑀚𑁂𑀝𑁆𑀞𑀧𑀼𑀢𑁆𑀢𑁄 𑀓𑀢𑀺𑀧𑀸𑀳𑀁 𑀉𑀧𑀝𑁆𑀞𑀳𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀦𑁆𑀳𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀁 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀢𑁆𑀯𑀸 𑀲𑀼𑀡𑁆𑀳𑀸 𑀏𑀯𑀫𑀸𑀳 𑁋 ‘‘𑀓𑀺𑀁 𑀢𑀬𑀸 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀅𑀢𑀺𑀭𑁂𑀓𑀁 𑀤𑀺𑀦𑁆𑀦𑀁 𑀅𑀢𑁆𑀣𑀺, 𑀦𑀦𑀼 𑀲𑀩𑁆𑀩𑁂𑀲𑀁 𑀤𑁆𑀯𑁂 𑀤𑁆𑀯𑁂 𑀲𑀢𑀲𑀳𑀲𑁆𑀲𑀸𑀦𑀺 𑀤𑀺𑀦𑁆𑀦𑀸𑀦𑀺, 𑀓𑀺𑀁 𑀲𑁂𑀲𑀧𑀼𑀢𑁆𑀢𑀸𑀦𑀁 𑀖𑀭𑀲𑁆𑀲 𑀫𑀕𑁆𑀕𑀁 𑀦 𑀚𑀸𑀦𑀸𑀲𑀻’’𑀢𑀺. 𑀲𑁄𑀧𑀺 ‘‘𑀦𑀲𑁆𑀲 𑀯𑀲𑀮𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀖𑀭𑀁 𑀅𑀕𑀫𑀸𑀲𑀺. 𑀢𑀢𑁄𑀧𑀺 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀇𑀫𑀺𑀦𑀸𑀯 𑀉𑀧𑀸𑀬𑁂𑀦 𑀧𑀮𑀸𑀧𑀺𑀢𑁄 𑀅𑀜𑁆𑀜𑀲𑁆𑀲𑀸𑀢𑀺 𑀏𑀯𑀁 𑀏𑀓𑀖𑀭𑀫𑁆𑀧𑀺 𑀧𑀯𑁂𑀲𑀦𑀁 𑀅𑀮𑀪𑀫𑀸𑀦𑁄 𑀧𑀡𑁆𑀟𑀭𑀗𑁆𑀕𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁄 𑀓𑀸𑀮𑀸𑀦𑀫𑀘𑁆𑀘𑀬𑁂𑀦 𑀚𑀭𑀸𑀚𑀺𑀡𑁆𑀡𑁄 𑀤𑀼𑀩𑁆𑀪𑁄𑀚𑀦𑀤𑀼𑀓𑁆𑀔𑀲𑁂𑀬𑁆𑀬𑀸𑀳𑀺 𑀫𑀺𑀮𑀸𑀢𑀲𑀭𑀻𑀭𑁄 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁄 𑀆𑀕𑀫𑁆𑀫 𑀧𑀻𑀞𑀺𑀓𑀸𑀬 𑀦𑀺𑀧𑀦𑁆𑀦𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀢𑁆𑀯𑀸 𑀉𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑁄 𑀅𑀢𑁆𑀢𑀸𑀦𑀁 𑀑𑀮𑁄𑀓𑁂𑀢𑁆𑀯𑀸 𑀧𑀼𑀢𑁆𑀢𑁂𑀲𑀼 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀅𑀧𑀲𑁆𑀲𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀡𑁄 𑀓𑀺𑀭 𑀕𑁄𑀢𑀫𑁄 𑀅𑀩𑁆𑀪𑀸𑀓𑀼𑀝𑀺𑀓𑁄 𑀉𑀢𑁆𑀢𑀸𑀦𑀫𑀼𑀔𑁄 𑀲𑀼𑀔𑀲𑀫𑁆𑀪𑀸𑀲𑁄 𑀧𑀝𑀺𑀲𑀦𑁆𑀣𑀸𑀭𑀓𑀼𑀲𑀮𑁄, 𑀲𑀓𑁆𑀓𑀸 𑀲𑀫𑀡𑀁 𑀕𑁄𑀢𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀮𑀪𑀺𑀢𑀼’’𑀦𑁆𑀢𑀺. 𑀲𑁄 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀲𑀡𑁆𑀞𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀪𑀸𑀚𑀦𑀁 𑀕𑀳𑁂𑀢𑁆𑀯𑀸 𑀤𑀡𑁆𑀟𑀫𑀸𑀤𑀸𑀬 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 (𑀲𑀁. 𑀦𑀺. 𑁧.𑁨𑁦𑁦) 𑁋

𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄 𑀮𑀽𑀔𑁄 𑀮𑀽𑀔𑀧𑀸𑀯𑀼𑀭𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂𑀦 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀺𑀦𑁆𑀦𑀼 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀮𑀽𑀔𑁄 𑀮𑀽𑀔𑀧𑀸𑀯𑀼𑀭𑀡𑁄’’𑀢𑀺. 𑀇𑀥 𑀫𑁂, 𑀪𑁄 𑀕𑁄𑀢𑀫, 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑀸, 𑀢𑁂 𑀫𑀁 𑀤𑀸𑀭𑁂𑀳𑀺 𑀲𑀁𑀧𑀼𑀘𑁆𑀙 𑀖𑀭𑀸 𑀦𑀺𑀓𑁆𑀔𑀸𑀫𑁂𑀦𑁆𑀢𑀻𑀢𑀺. 𑀢𑁂𑀦 𑀳𑀺 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀇𑀫𑀸 𑀕𑀸𑀣𑀸𑀬𑁄 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀲𑀪𑀸𑀬𑀁 𑀫𑀳𑀸𑀚𑀦𑀓𑀸𑀬𑁂 𑀲𑀦𑁆𑀦𑀺𑀧𑀢𑀺𑀢𑁂 𑀧𑀼𑀢𑁆𑀢𑁂𑀲𑀼 𑀘 𑀲𑀦𑁆𑀦𑀺𑀲𑀺𑀦𑁆𑀦𑁂𑀲𑀼 𑀪𑀸𑀲𑀲𑁆𑀲𑀼 𑁋

‘‘𑀬𑁂𑀳𑀺 𑀚𑀸𑀢𑁂𑀳𑀺 𑀦𑀦𑁆𑀤𑀺𑀲𑁆𑀲𑀁, 𑀬𑁂𑀲𑀜𑁆𑀘 𑀪𑀯𑀫𑀺𑀘𑁆𑀙𑀺𑀲𑀁;

𑀢𑁂 𑀫𑀁 𑀤𑀸𑀭𑁂𑀳𑀺 𑀲𑀁𑀧𑀼𑀘𑁆𑀙, 𑀲𑀸𑀯 𑀯𑀸𑀭𑁂𑀦𑁆𑀢𑀺 𑀲𑀽𑀓𑀭𑀁.

‘‘𑀅𑀲𑀦𑁆𑀢𑀸 𑀓𑀺𑀭 𑀫𑀁 𑀚𑀫𑁆𑀫𑀸, 𑀢𑀸𑀢 𑀢𑀸𑀢𑀸𑀢𑀺 𑀪𑀸𑀲𑀭𑁂;

𑀭𑀓𑁆𑀔𑀲𑀸 𑀧𑀼𑀢𑁆𑀢𑀭𑀽𑀧𑁂𑀦, 𑀢𑁂 𑀚𑀳𑀦𑁆𑀢𑀺 𑀯𑀬𑁄𑀕𑀢𑀁.

‘‘𑀅𑀲𑁆𑀲𑁄𑀯 𑀚𑀺𑀡𑁆𑀡𑁄 𑀦𑀺𑀩𑁆𑀪𑁄𑀕𑁄, 𑀔𑀸𑀤𑀦𑀸 𑀅𑀧𑀦𑀻𑀬𑀢𑀺;

𑀩𑀸𑀮𑀓𑀸𑀦𑀁 𑀧𑀺𑀢𑀸 𑀣𑁂𑀭𑁄, 𑀧𑀭𑀸𑀕𑀸𑀭𑁂𑀲𑀼 𑀪𑀺𑀓𑁆𑀔𑀢𑀺.

‘‘𑀤𑀡𑁆𑀟𑁄𑀯 𑀓𑀺𑀭 𑀫𑁂 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀧𑀼𑀢𑁆𑀢𑀸 𑀅𑀦𑀲𑁆𑀲𑀯𑀸;

𑀘𑀡𑁆𑀟𑀫𑁆𑀧𑀺 𑀕𑁄𑀡𑀁 𑀯𑀸𑀭𑁂𑀢𑀺, 𑀅𑀣𑁄 𑀘𑀡𑁆𑀟𑀫𑁆𑀧𑀺 𑀓𑀼𑀓𑁆𑀓𑀼𑀭𑀁.

‘‘𑀅𑀦𑁆𑀥𑀓𑀸𑀭𑁂 𑀧𑀼𑀭𑁂 𑀳𑁄𑀢𑀺, 𑀕𑀫𑁆𑀪𑀻𑀭𑁂 𑀕𑀸𑀥𑀫𑁂𑀥𑀢𑀺;

𑀤𑀡𑁆𑀟𑀲𑁆𑀲 𑀆𑀦𑀼𑀪𑀸𑀯𑁂𑀦, 𑀔𑀮𑀺𑀢𑁆𑀯𑀸 𑀧𑀢𑀺𑀢𑀺𑀝𑁆𑀞𑀢𑀻’’𑀢𑀺. (𑀲𑀁. 𑀦𑀺. 𑁧.𑁨𑁦𑁦);

𑀲𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀢𑀸 𑀕𑀸𑀣𑀸𑀬𑁄 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀣𑀸𑀭𑀽𑀧𑁂 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀫𑀸𑀕𑀫𑀤𑀺𑀯𑀲𑁂 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁂𑀲𑀼 𑀧𑀼𑀢𑁆𑀢𑁂𑀲𑀼 𑀢𑀁 𑀲𑀪𑀁 𑀑𑀕𑀸𑀳𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀚𑁆𑀛𑁂 𑀫𑀳𑀸𑀭𑀳𑁂𑀲𑀼 𑀆𑀲𑀦𑁂𑀲𑀼 𑀦𑀺𑀲𑀺𑀦𑁆𑀦𑁂𑀲𑀼 ‘‘𑀅𑀬𑀁 𑀫𑁂 𑀓𑀸𑀮𑁄’’𑀢𑀺 𑀲𑀪𑀸𑀬 𑀫𑀚𑁆𑀛𑁂 𑀧𑀯𑀺𑀲𑀺𑀢𑁆𑀯𑀸 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀳𑀁, 𑀪𑁄, 𑀢𑀼𑀫𑁆𑀳𑀸𑀓𑀁 𑀕𑀸𑀣𑀸𑀬𑁄 𑀪𑀸𑀲𑀺𑀢𑀼𑀓𑀸𑀫𑁄, 𑀲𑀼𑀡𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 ‘‘𑀪𑀸𑀲𑀲𑁆𑀲𑀼, 𑀩𑁆𑀭𑀸𑀳𑁆𑀫𑀡, 𑀲𑀼𑀡𑁄𑀫𑀸’’𑀢𑀺 𑀯𑀼𑀢𑁆𑀢𑁂 𑀞𑀺𑀢𑀓𑁄𑀯 𑀅𑀪𑀸𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸𑀦𑀁 𑀯𑀢𑁆𑀢𑀁 𑀳𑁄𑀢𑀺 ‘‘𑀬𑁄 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀓𑀁 𑀔𑀸𑀤𑀦𑁆𑀢𑁄 𑀫𑀸𑀢𑀸𑀧𑀺𑀢𑀭𑁄 𑀦 𑀧𑁄𑀲𑁂𑀢𑀺, 𑀲𑁄 𑀫𑀸𑀭𑁂𑀢𑀩𑁆𑀩𑁄’’𑀢𑀺. 𑀢𑀲𑁆𑀫𑀸 𑀢𑁂 𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑀸 𑀧𑀺𑀢𑀼 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 ‘‘𑀚𑀻𑀯𑀺𑀢𑀁 𑀦𑁄, 𑀢𑀸𑀢, 𑀤𑁂𑀣𑀸’’𑀢𑀺 𑀬𑀸𑀘𑀺𑀁𑀲𑀼. 𑀲𑁄 𑀧𑀺𑀢𑀼 𑀳𑀤𑀬𑀫𑀼𑀤𑀼𑀢𑀸𑀬 ‘‘𑀫𑀸 𑀫𑁂, 𑀪𑁄, 𑀧𑀼𑀢𑁆𑀢𑀓𑁂 𑀯𑀺𑀦𑀸𑀲𑀬𑀺𑀢𑁆𑀣, 𑀧𑁄𑀲𑁂𑀲𑁆𑀲𑀦𑁆𑀢𑀺 𑀫’’𑀦𑁆𑀢𑀺 𑀆𑀳. 𑀅𑀣𑀲𑁆𑀲 𑀧𑀼𑀢𑁆𑀢𑁂 𑀫𑀦𑀼𑀲𑁆𑀲𑀸 𑀆𑀳𑀁𑀲𑀼 𑁋 ‘‘𑀲𑀘𑁂, 𑀪𑁄, 𑀅𑀚𑁆𑀚 𑀧𑀝𑁆𑀞𑀸𑀬 𑀧𑀺𑀢𑀭𑀁 𑀦 𑀲𑀫𑁆𑀫𑀸 𑀧𑀝𑀺𑀚𑀕𑁆𑀕𑀺𑀲𑁆𑀲𑀣, 𑀖𑀸𑀢𑁂𑀲𑁆𑀲𑀸𑀫 𑀯𑁄’’𑀢𑀺. 𑀢𑁂 𑀪𑀻𑀢𑀸 𑀧𑀺𑀢𑀭𑀁 𑀧𑀻𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀬𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑁂𑀳𑀁 𑀦𑁂𑀢𑁆𑀯𑀸 𑀲𑀭𑀻𑀭𑀁 𑀢𑁂𑀮𑁂𑀦 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀕𑀦𑁆𑀥𑀘𑀼𑀡𑁆𑀡𑀸𑀤𑀻𑀳𑀺 𑀦𑁆𑀳𑀸𑀧𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀺𑀬𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀅𑀚𑁆𑀚 𑀧𑀝𑁆𑀞𑀸𑀬 𑀅𑀫𑁆𑀳𑀸𑀓𑀁 𑀧𑀺𑀢𑀭𑀁 𑀲𑀫𑁆𑀫𑀸 𑀧𑀝𑀺𑀚𑀕𑁆𑀕𑀣, 𑀲𑀘𑁂 𑀢𑀼𑀫𑁆𑀳𑁂 𑀧𑀫𑀸𑀤𑀁 𑀆𑀧𑀚𑁆𑀚𑀺𑀲𑁆𑀲𑀣, 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫 𑀯𑁄’’𑀢𑀺 𑀯𑀢𑁆𑀯𑀸 𑀧𑀡𑀻𑀢𑀪𑁄𑀚𑀦𑀁 𑀪𑁄𑀚𑁂𑀲𑀼𑀁.

𑀩𑁆𑀭𑀸𑀳𑁆𑀫𑀡𑁄 𑀲𑀼𑀪𑁄𑀚𑀦𑀜𑁆𑀘 𑀲𑀼𑀔𑀲𑁂𑀬𑁆𑀬𑀜𑁆𑀘 𑀆𑀕𑀫𑁆𑀫 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀲𑀜𑁆𑀚𑀸𑀢𑀩𑀮𑁄 𑀧𑀻𑀡𑀺𑀦𑁆𑀤𑁆𑀭𑀺𑀬𑁄 𑀅𑀢𑁆𑀢𑀪𑀸𑀯𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀫𑁂 𑀲𑀫𑁆𑀧𑀢𑁆𑀢𑀺 𑀲𑀫𑀡𑀁 𑀕𑁄𑀢𑀫𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀸’’𑀢𑀺 𑀧𑀡𑁆𑀡𑀸𑀓𑀸𑀭𑀢𑁆𑀣𑀸𑀬 𑀏𑀓𑀁 𑀤𑀼𑀲𑁆𑀲𑀬𑀼𑀕𑀁 𑀆𑀤𑀸𑀬 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀢𑀁 𑀤𑀼𑀲𑁆𑀲𑀬𑀼𑀕𑀁 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 ‘‘𑀫𑀬𑀁, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀆𑀘𑀭𑀺𑀬𑀲𑁆𑀲 𑀆𑀘𑀭𑀺𑀬𑀥𑀦𑀁 𑀧𑀭𑀺𑀬𑁂𑀲𑀸𑀫, 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂 𑀪𑀯𑀁 𑀕𑁄𑀢𑀫𑁄 𑀆𑀘𑀭𑀺𑀬𑁄 𑀆𑀘𑀭𑀺𑀬𑀥𑀦’’𑀦𑁆𑀢𑀺 𑀆𑀳. 𑀪𑀕𑀯𑀸 𑀢𑀲𑁆𑀲 𑀅𑀦𑀼𑀓𑀫𑁆𑀧𑀸𑀬 𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀩𑁆𑀭𑀸𑀳𑁆𑀫𑀡𑁄 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀏𑀯𑀫𑀸𑀳 𑁋 ‘‘𑀪𑁄 𑀕𑁄𑀢𑀫, 𑀫𑀬𑁆𑀳𑀁 𑀧𑀼𑀢𑁆𑀢𑁂𑀳𑀺 𑀘𑀢𑁆𑀢𑀸𑀭𑀺 𑀥𑀼𑀯𑀪𑀢𑁆𑀢𑀸𑀦𑀺 𑀤𑀺𑀦𑁆𑀦𑀸𑀦𑀺, 𑀢𑀢𑁄 𑀅𑀳𑀁 𑀤𑁆𑀯𑁂 𑀢𑀼𑀫𑁆𑀳𑀸𑀓𑀁 𑀤𑀫𑁆𑀫𑀻’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀮𑁆𑀬𑀸𑀡𑀁, 𑀩𑁆𑀭𑀸𑀳𑁆𑀫𑀡, 𑀫𑀬𑀁 𑀧𑀦 𑀭𑀼𑀘𑁆𑀘𑀦𑀝𑁆𑀞𑀸𑀦𑀫𑁂𑀯 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀖𑀭𑀁 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑁂 𑀆𑀳 𑁋 ‘‘𑀢𑀸𑀢𑀸, 𑀲𑀫𑀡𑁄 𑀕𑁄𑀢𑀫𑁄 𑀫𑀬𑁆𑀳𑀁 𑀲𑀳𑀸𑀬𑁄, 𑀢𑀲𑁆𑀲 𑀫𑁂 𑀤𑁆𑀯𑁂 𑀥𑀼𑀯𑀪𑀢𑁆𑀢𑀸𑀦𑀺 𑀤𑀺𑀦𑁆𑀦𑀸𑀦𑀺, 𑀢𑀼𑀫𑁆𑀳𑁂 𑀢𑀲𑁆𑀫𑀺𑀁 𑀲𑀫𑁆𑀧𑀢𑁆𑀢𑁂 𑀫𑀸 𑀧𑀫𑀚𑁆𑀚𑀺𑀢𑁆𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼.

𑀲𑀢𑁆𑀣𑀸 𑀧𑀼𑀦𑀤𑀺𑀯𑀲𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀖𑀭𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀧𑀢𑁆𑀢𑀫𑀸𑀤𑀸𑀬 𑀖𑀭𑀁 𑀧𑀯𑁂𑀲𑁂𑀢𑁆𑀯𑀸 𑀫𑀳𑀸𑀭𑀳𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀡𑀻𑀢𑀪𑁄𑀚𑀦𑀫𑀤𑀸𑀲𑀺. 𑀲𑀢𑁆𑀣𑀸 𑀧𑀼𑀦𑀤𑀺𑀯𑀲𑁂 𑀇𑀢𑀭𑀲𑁆𑀲 𑀇𑀢𑀭𑀲𑁆𑀲𑀸𑀢𑀺 𑀧𑀝𑀺𑀧𑀸𑀝𑀺𑀬𑀸 𑀲𑀩𑁆𑀩𑁂𑀲𑀁 𑀖𑀭𑀸𑀦𑀺 𑀅𑀕𑀫𑀸𑀲𑀺. 𑀲𑀩𑁆𑀩𑁂 𑀢𑁂 𑀢𑀣𑁂𑀯 𑀲𑀓𑁆𑀓𑀸𑀭𑀁 𑀅𑀓𑀁𑀲𑀼. 𑀏𑀓𑀤𑀺𑀯𑀲𑀁 𑀚𑁂𑀝𑁆𑀞𑀧𑀼𑀢𑁆𑀢𑁄 𑀫𑀗𑁆𑀕𑀮𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀧𑀺𑀢𑀭𑀁 𑀆𑀳 𑁋 ‘‘𑀢𑀸𑀢, 𑀓𑀲𑁆𑀲 𑀫𑀗𑁆𑀕𑀮𑀁 𑀤𑁂𑀫𑀸’’𑀢𑀺? ‘‘𑀦𑀸𑀳𑀁 𑀅𑀜𑁆𑀜𑁂 𑀚𑀸𑀦𑀸𑀫𑀺, 𑀲𑀫𑀡𑁄 𑀕𑁄𑀢𑀫𑁄 𑀫𑀬𑁆𑀳𑀁 𑀲𑀳𑀸𑀬𑁄’’𑀢𑀺. ‘‘𑀢𑁂𑀦 𑀳𑀺 𑀢𑀁 𑀲𑁆𑀯𑀸𑀢𑀦𑀸𑀬 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀦𑀺𑀫𑀦𑁆𑀢𑁂𑀣𑀸’’𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀣𑀸 𑀅𑀓𑀸𑀲𑀺. 𑀲𑀢𑁆𑀣𑀸 𑀧𑀼𑀦𑀤𑀺𑀯𑀲𑁂 𑀲𑀧𑀭𑀺𑀯𑀸𑀭𑁄 𑀢𑀲𑁆𑀲 𑀕𑁂𑀳𑀁 𑀅𑀕𑀫𑀸𑀲𑀺. 𑀲𑁄 𑀳𑀭𑀺𑀢𑀼𑀧𑀮𑀺𑀢𑁆𑀢𑁂 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁂 𑀕𑁂𑀳𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀧𑁆𑀧𑁄𑀤𑀓𑀫𑀥𑀼𑀧𑀸𑀬𑀲𑁂𑀦 𑀘𑁂𑀯 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀘 𑀧𑀭𑀺𑀯𑀺𑀲𑀺. 𑀅𑀦𑁆𑀢𑀭𑀸𑀪𑀢𑁆𑀢𑀲𑁆𑀫𑀺𑀁𑀬𑁂𑀯 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀢𑁆𑀢𑀸𑀭𑁄 𑀧𑀼𑀢𑁆𑀢𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀪𑁄 𑀕𑁄𑀢𑀫, 𑀫𑀬𑀁 𑀅𑀫𑁆𑀳𑀸𑀓𑀁 𑀧𑀺𑀢𑀭𑀁 𑀧𑀝𑀺𑀚𑀕𑁆𑀕𑀸𑀫 𑀦 𑀧𑀫𑀚𑁆𑀚𑀸𑀫, 𑀧𑀲𑁆𑀲𑀣𑀺𑀫𑀲𑁆𑀲 𑀅𑀢𑁆𑀢𑀪𑀸𑀯’’𑀦𑁆𑀢𑀺.

𑀲𑀢𑁆𑀣𑀸 ‘‘𑀓𑀮𑁆𑀬𑀸𑀡𑀁 𑀯𑁄 𑀓𑀢𑀁, 𑀫𑀸𑀢𑀸𑀧𑀺𑀢𑀼𑀧𑁄𑀲𑀦𑀁 𑀦𑀸𑀫 𑀧𑁄𑀭𑀸𑀡𑀓𑀧𑀡𑁆𑀟𑀺𑀢𑀸𑀦𑀁 𑀆𑀘𑀺𑀡𑁆𑀡𑀫𑁂𑀯𑀸’’𑀢𑀺 𑀯𑀢𑁆𑀯𑀸 ‘‘𑀢𑀲𑁆𑀲 𑀦𑀸𑀕𑀲𑁆𑀲 𑀯𑀺𑀧𑁆𑀧𑀯𑀸𑀲𑁂𑀦, 𑀯𑀺𑀭𑀽𑀴𑁆𑀳𑀸 𑀲𑀮𑁆𑀮𑀓𑀻 𑀘 𑀓𑀼𑀝𑀚𑀸 𑀘𑀸’’𑀢𑀺 𑀇𑀫𑀁 𑀏𑀓𑀸𑀤𑀲𑀦𑀺𑀧𑀸𑀢𑁂 𑀫𑀸𑀢𑀼𑀧𑁄𑀲𑀓𑀦𑀸𑀕𑀭𑀸𑀚𑀚𑀸𑀢𑀓𑀁 (𑀘𑀭𑀺𑀬𑀸. 𑁨.𑁧 𑀆𑀤𑀬𑁄; 𑀚𑀸. 𑁧.𑁧𑁧.𑁧 𑀆𑀤𑀬𑁄) 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀢𑁆𑀯𑀸 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

𑁩𑁨𑁪. ‘‘𑀥𑀦𑀧𑀸𑀮𑁄 𑀦𑀸𑀫 𑀓𑀼𑀜𑁆𑀚𑀭𑁄,

𑀓𑀝𑀼𑀓𑀪𑁂𑀤𑀦𑁄 𑀤𑀼𑀦𑁆𑀦𑀺𑀯𑀸𑀭𑀬𑁄;

𑀩𑀤𑁆𑀥𑁄 𑀓𑀩𑀴𑀁 𑀦 𑀪𑀼𑀜𑁆𑀚𑀢𑀺,

𑀲𑀼𑀫𑀭𑀢𑀺 𑀦𑀸𑀕𑀯𑀦𑀲𑁆𑀲 𑀓𑀼𑀜𑁆𑀚𑀭𑁄’’𑀢𑀺.

𑀢𑀢𑁆𑀣 𑀥𑀦𑀧𑀸𑀮𑁄 𑀦𑀸𑀫𑀸𑀢𑀺 𑀢𑀤𑀸 𑀓𑀸𑀲𑀺𑀓𑀭𑀜𑁆𑀜𑀸 𑀳𑀢𑁆𑀣𑀸𑀘𑀭𑀺𑀬𑀁 𑀧𑁂𑀲𑁂𑀢𑁆𑀯𑀸 𑀭𑀫𑀡𑀻𑀬𑁂 𑀦𑀸𑀕𑀯𑀦𑁂 𑀕𑀸𑀳𑀸𑀧𑀺𑀢𑀲𑁆𑀲 𑀳𑀢𑁆𑀣𑀺𑀦𑁄 𑀏𑀢𑀁 𑀦𑀸𑀫𑀁. 𑀓𑀝𑀼𑀓𑀪𑁂𑀤𑀦𑁄𑀢𑀺 𑀢𑀺𑀔𑀺𑀡𑀫𑀤𑁄. 𑀳𑀢𑁆𑀣𑀻𑀦𑀜𑁆𑀳𑀺 𑀫𑀤𑀓𑀸𑀮𑁂 𑀓𑀡𑁆𑀡𑀘𑀽𑀴𑀺𑀓𑀸 𑀧𑀪𑀺𑀚𑁆𑀚𑀦𑁆𑀢𑀺, 𑀧𑀓𑀢𑀺𑀬𑀸𑀧𑀺 𑀳𑀢𑁆𑀣𑀺𑀦𑁄 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀗𑁆𑀓𑀼𑀲𑁂 𑀯𑀸 𑀓𑀼𑀦𑁆𑀢𑀢𑁄𑀫𑀭𑁂 𑀯𑀸 𑀦 𑀕𑀡𑁂𑀦𑁆𑀢𑀺, 𑀘𑀡𑁆𑀟𑀸 𑀪𑀯𑀦𑁆𑀢𑀺. 𑀲𑁄 𑀧𑀦 𑀅𑀢𑀺𑀘𑀡𑁆𑀟𑁄𑀬𑁂𑀯. 𑀢𑁂𑀦 𑀯𑀼𑀢𑁆𑀢𑀁 𑁋 𑀓𑀝𑀼𑀓𑀪𑁂𑀤𑀦𑁄 𑀤𑀼𑀦𑁆𑀦𑀺𑀯𑀸𑀭𑀬𑁄𑀢𑀺. 𑀩𑀤𑁆𑀥𑁄 𑀓𑀩𑀴𑀁 𑀦 𑀪𑀼𑀜𑁆𑀚𑀢𑀻𑀢𑀺 𑀲𑁄 𑀩𑀤𑁆𑀥𑁄 𑀳𑀢𑁆𑀣𑀺𑀲𑀸𑀮𑀁 𑀧𑀦 𑀦𑁂𑀢𑁆𑀯𑀸 𑀯𑀺𑀘𑀺𑀢𑁆𑀭𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀓𑀢𑀕𑀦𑁆𑀥𑀧𑀭𑀺𑀪𑀡𑁆𑀟𑀸𑀬 𑀉𑀧𑀭𑀺 𑀩𑀤𑁆𑀥𑀯𑀺𑀘𑀺𑀢𑁆𑀭𑀯𑀺𑀢𑀸𑀦𑀸𑀬 𑀪𑀽𑀫𑀺𑀬𑀸 𑀞𑀧𑀺𑀢𑁄 𑀭𑀜𑁆𑀜𑀸 𑀭𑀸𑀚𑀸𑀭𑀳𑁂𑀦 𑀦𑀸𑀦𑀕𑁆𑀕𑀭𑀲𑁂𑀦 𑀪𑁄𑀚𑀦𑁂𑀦 𑀉𑀧𑀝𑁆𑀞𑀸𑀧𑀺𑀢𑁄𑀧𑀺 𑀓𑀺𑀜𑁆𑀘𑀺 𑀪𑀼𑀜𑁆𑀚𑀺𑀢𑀼𑀁 𑀦 𑀇𑀘𑁆𑀙𑀺, 𑀢𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀩𑀤𑁆𑀥𑁄 𑀓𑀩𑀴𑀁 𑀦 𑀪𑀼𑀜𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀼𑀫𑀭𑀢𑀺 𑀦𑀸𑀕𑀯𑀦𑀲𑁆𑀲𑀸𑀢𑀺 𑀲𑁄 𑀭𑀫𑀡𑀻𑀬𑀁 𑀫𑁂 𑀯𑀲𑀦𑀝𑁆𑀞𑀸𑀦𑀦𑁆𑀢𑀺 𑀦𑀸𑀕𑀯𑀦𑀁 𑀲𑀭𑀢𑀺. ‘‘𑀫𑀸𑀢𑀸 𑀧𑀦 𑀫𑁂 𑀅𑀭𑀜𑁆𑀜𑁂 𑀧𑀼𑀢𑁆𑀢𑀯𑀺𑀬𑁄𑀕𑁂𑀦 𑀤𑀼𑀓𑁆𑀔𑀧𑁆𑀧𑀢𑁆𑀢𑀸 𑀅𑀳𑁄𑀲𑀺, 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀥𑀫𑁆𑀫𑁄 𑀦 𑀫𑁂 𑀧𑀽𑀭𑀢𑀺, 𑀓𑀺𑀁 𑀫𑁂 𑀇𑀫𑀺𑀦𑀸 𑀪𑁄𑀚𑀦𑁂𑀦𑀸’’𑀢𑀺 𑀥𑀫𑁆𑀫𑀺𑀓𑀁 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀥𑀫𑁆𑀫𑀫𑁂𑀯 𑀲𑀭𑀺. 𑀢𑀁 𑀧𑀦 𑀬𑀲𑁆𑀫𑀸 𑀢𑀲𑁆𑀫𑀺𑀁 𑀦𑀸𑀕𑀯𑀦𑁂𑀬𑁂𑀯 𑀞𑀺𑀢𑁄 𑀲𑀓𑁆𑀓𑀸 𑀧𑀽𑀭𑁂𑀢𑀼𑀁, 𑀢𑁂𑀦 𑀯𑀼𑀢𑁆𑀢𑀁 𑁋 𑀲𑀼𑀫𑀭𑀢𑀺 𑀦𑀸𑀕𑀯𑀦𑀲𑁆𑀲 𑀓𑀼𑀜𑁆𑀚𑀭𑁄𑀢𑀺. 𑀲𑀢𑁆𑀣𑀭𑀺 𑀇𑀫𑀁 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀬𑀁 𑀆𑀦𑁂𑀢𑁆𑀯𑀸 𑀓𑀣𑁂𑀦𑁆𑀢𑁂 𑀓𑀣𑁂𑀦𑁆𑀢𑁂𑀬𑁂𑀯 𑀲𑀩𑁆𑀩𑁂𑀧𑀺 𑀢𑁂 𑀅𑀲𑁆𑀲𑀼𑀥𑀸𑀭𑀸 𑀧𑀯𑀢𑁆𑀢𑁂𑀢𑁆𑀯𑀸 𑀫𑀼𑀤𑀼𑀳𑀤𑀬𑀸 𑀑𑀳𑀺𑀢𑀲𑁄𑀢𑀸 𑀪𑀯𑀺𑀁𑀲𑀼. 𑀅𑀣 𑀦𑁂𑀲𑀁 𑀪𑀕𑀯𑀸 𑀲𑀧𑁆𑀧𑀸𑀬𑀁 𑀯𑀺𑀤𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀲𑀤𑁆𑀥𑀺𑀁 𑀧𑀼𑀢𑁆𑀢𑁂𑀳𑀺 𑀘𑁂𑀯 𑀲𑀼𑀡𑀺𑀲𑀸𑀳𑀺 𑀘 𑀩𑁆𑀭𑀸𑀳𑁆𑀫𑀡𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀻𑀢𑀺.

𑀧𑀭𑀺𑀚𑀺𑀡𑁆𑀡𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀧𑀲𑁂𑀦𑀤𑀺𑀓𑁄𑀲𑀮𑀯𑀢𑁆𑀣𑀼

𑀫𑀺𑀤𑁆𑀥𑀻 𑀬𑀤𑀸 𑀳𑁄𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀓𑁄𑀲𑀮𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀭𑀸𑀚𑀸 𑀢𑀡𑁆𑀟𑀼𑀮𑀤𑁄𑀡𑀲𑁆𑀲 𑀑𑀤𑀦𑀁 𑀢𑀤𑀼𑀧𑀺𑀬𑁂𑀦 𑀲𑀽𑀧𑀩𑁆𑀬𑀜𑁆𑀚𑀦𑁂𑀦 𑀪𑀼𑀜𑁆𑀚𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀪𑀢𑁆𑀢𑀲𑀫𑁆𑀫𑀤𑀁 𑀅𑀯𑀺𑀦𑁄𑀤𑁂𑀢𑁆𑀯𑀸𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀓𑀺𑀮𑀦𑁆𑀢𑀭𑀽𑀧𑁄 𑀇𑀢𑁄 𑀘𑀺𑀢𑁄 𑀘 𑀲𑀫𑁆𑀧𑀭𑀺𑀯𑀢𑁆𑀢𑀢𑀺, 𑀦𑀺𑀤𑁆𑀤𑀸𑀬 𑀅𑀪𑀺𑀪𑀼𑀬𑁆𑀬𑀫𑀸𑀦𑁄𑀧𑀺 𑀉𑀚𑀼𑀓𑀁 𑀦𑀺𑀧𑀚𑁆𑀚𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 𑁋 ‘‘𑀓𑀺𑀁, 𑀫𑀳𑀸𑀭𑀸𑀚, 𑀅𑀯𑀺𑀲𑁆𑀲𑀫𑀺𑀢𑁆𑀯𑀸𑀯 𑀆𑀕𑀢𑁄𑀲𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀪𑀼𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑁂 𑀫𑀳𑀸𑀤𑀼𑀓𑁆𑀔𑀁 𑀳𑁄𑀢𑀻’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸, ‘‘𑀫𑀳𑀸𑀭𑀸𑀚, 𑀅𑀢𑀺𑀩𑀳𑀼𑀪𑁄𑀚𑀦𑀁 𑀏𑀯𑀁 𑀤𑀼𑀓𑁆𑀔𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁨𑁫. ‘‘𑀫𑀺𑀤𑁆𑀥𑀻 𑀬𑀤𑀸 𑀳𑁄𑀢𑀺 𑀫𑀳𑀕𑁆𑀖𑀲𑁄 𑀘,

𑀦𑀺𑀤𑁆𑀤𑀸𑀬𑀺𑀢𑀸 𑀲𑀫𑁆𑀧𑀭𑀺𑀯𑀢𑁆𑀢𑀲𑀸𑀬𑀻;

𑀫𑀳𑀸𑀯𑀭𑀸𑀳𑁄𑀯 𑀦𑀺𑀯𑀸𑀧𑀧𑀼𑀝𑁆𑀞𑁄,

𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀺 𑀫𑀦𑁆𑀤𑁄’’𑀢𑀺.

𑀢𑀢𑁆𑀣 𑀫𑀺𑀤𑁆𑀥𑀻𑀢𑀺 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁄. 𑀫𑀳𑀕𑁆𑀖𑀲𑁄 𑀘𑀸𑀢𑀺 𑀫𑀳𑀸𑀪𑁄𑀚𑀦𑁄 𑀆𑀳𑀭𑀳𑀢𑁆𑀣𑀓𑀅𑀮𑀁𑀲𑀸𑀝𑀓𑀢𑀢𑁆𑀭𑀯𑀝𑁆𑀝𑀓𑀓𑀸𑀓𑀫𑀸𑀲𑀓𑀪𑀼𑀢𑁆𑀢𑀯𑀫𑀺𑀢𑀓𑀸𑀦𑀁 𑀅𑀜𑁆𑀜𑀢𑀭𑁄 𑀯𑀺𑀬. 𑀦𑀺𑀯𑀸𑀧𑀧𑀼𑀝𑁆𑀞𑁄𑀢𑀺 𑀓𑀼𑀡𑁆𑀟𑀓𑀸𑀤𑀺𑀦𑀸 𑀲𑀽𑀓𑀭𑀪𑀢𑁆𑀢𑁂𑀦 𑀧𑀼𑀝𑁆𑀞𑁄. 𑀖𑀭𑀲𑀽𑀓𑀭𑁄 𑀳𑀺 𑀤𑀳𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑁄𑀲𑀺𑀬𑀫𑀸𑀦𑁄 𑀣𑀽𑀮𑀲𑀭𑀻𑀭𑀓𑀸𑀮𑁂 𑀕𑁂𑀳𑀸 𑀩𑀳𑀺 𑀦𑀺𑀓𑁆𑀔𑀫𑀺𑀢𑀼𑀁 𑀅𑀮𑀪𑀦𑁆𑀢𑁄 𑀳𑁂𑀝𑁆𑀞𑀸𑀫𑀜𑁆𑀘𑀸𑀤𑀻𑀲𑀼 𑀲𑀫𑁆𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀅𑀲𑁆𑀲𑀲𑀦𑁆𑀢𑁄 𑀧𑀲𑁆𑀲𑀲𑀦𑁆𑀢𑁄 𑀲𑀬𑀢𑁂𑀯. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀤𑀸 𑀧𑀼𑀭𑀺𑀲𑁄 𑀫𑀺𑀤𑁆𑀥𑀻 𑀘 𑀳𑁄𑀢𑀺 𑀫𑀳𑀕𑁆𑀖𑀲𑁄 𑀘, 𑀦𑀺𑀯𑀸𑀧𑀧𑀼𑀝𑁆𑀞𑁄 𑀫𑀳𑀸𑀯𑀭𑀸𑀳𑁄 𑀯𑀺𑀬 𑀘 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀬𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀦𑀺𑀤𑁆𑀤𑀸𑀬𑀦𑀲𑀻𑀮𑁄 𑀲𑀫𑁆𑀧𑀭𑀺𑀯𑀢𑁆𑀢𑀲𑀸𑀬𑀻, 𑀢𑀤𑀸 𑀲𑁄 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’’𑀢𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀫𑀦𑀲𑀺𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑁂𑀲𑀁 𑀅𑀫𑀦𑀲𑀺𑀓𑀸𑀭𑀸 𑀫𑀦𑁆𑀤𑀧𑀜𑁆𑀜𑁄 𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀺, 𑀕𑀩𑁆𑀪𑀯𑀸𑀲𑀢𑁄 𑀦 𑀧𑀭𑀺𑀫𑀼𑀘𑁆𑀘𑀢𑀻𑀢𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀲𑀢𑁆𑀣𑀸 𑀭𑀜𑁆𑀜𑁄 𑀉𑀧𑀓𑀸𑀭𑀯𑀲𑁂𑀦 𑁋

‘‘𑀫𑀦𑀼𑀚𑀲𑁆𑀲 𑀲𑀤𑀸 𑀲𑀢𑀻𑀫𑀢𑁄, 𑀫𑀢𑁆𑀢𑀁 𑀚𑀸𑀦𑀢𑁄 𑀮𑀤𑁆𑀥𑀪𑁄𑀚𑀦𑁂;

𑀢𑀦𑀼𑀓𑀲𑁆𑀲 𑀪𑀯𑀦𑁆𑀢𑀺 𑀯𑁂𑀤𑀦𑀸, 𑀲𑀡𑀺𑀓𑀁 𑀚𑀻𑀭𑀢𑀺 𑀆𑀬𑀼 𑀧𑀸𑀮𑀬’’𑀦𑁆𑀢𑀺. (𑀲𑀁. 𑀦𑀺. 𑁧.𑁧𑁨𑁪);

𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸 𑀉𑀢𑁆𑀢𑀭𑀫𑀸𑀡𑀯𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 ‘‘𑀇𑀫𑀁 𑀕𑀸𑀣𑀁 𑀭𑀜𑁆𑀜𑁄 𑀪𑁄𑀚𑀦𑀯𑁂𑀮𑀸𑀬 𑀧𑀯𑁂𑀤𑁂𑀬𑁆𑀬𑀸𑀲𑀺, 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀪𑁄𑀚𑀦𑀁 𑀧𑀭𑀺𑀳𑀸𑀧𑁂𑀬𑁆𑀬𑀸𑀲𑀻’’𑀢𑀺 𑀉𑀧𑀸𑀬𑀁 𑀆𑀘𑀺𑀓𑁆𑀔𑀺, 𑀲𑁄 𑀢𑀣𑀸 𑀅𑀓𑀸𑀲𑀺. 𑀭𑀸𑀚𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀦𑀸𑀴𑀺𑀓𑁄𑀤𑀦𑀧𑀭𑀫𑀢𑀸𑀬 𑀲𑀡𑁆𑀞𑀺𑀢𑁄 𑀲𑀼𑀲𑀮𑁆𑀮𑀳𑀼𑀓𑀲𑀭𑀻𑀭𑁄 𑀲𑀼𑀔𑀧𑁆𑀧𑀢𑁆𑀢𑁄 𑀲𑀢𑁆𑀣𑀭𑀺 𑀉𑀧𑁆𑀧𑀦𑁆𑀦𑀯𑀺𑀲𑁆𑀲𑀸𑀲𑁄 𑀲𑀢𑁆𑀢𑀸𑀳𑀁 𑀅𑀲𑀤𑀺𑀲𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀤𑀸𑀦𑀸𑀦𑀼𑀫𑁄𑀤𑀦𑀸𑀬 𑀫𑀳𑀸𑀚𑀦𑁄 𑀫𑀳𑀦𑁆𑀢𑀁 𑀯𑀺𑀲𑁂𑀲𑀁 𑀧𑀸𑀧𑀼𑀡𑀻𑀢𑀺.

𑀧𑀲𑁂𑀦𑀤𑀺𑀓𑁄𑀲𑀮𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀲𑀸𑀦𑀼𑀲𑀸𑀫𑀡𑁂𑀭𑀯𑀢𑁆𑀣𑀼

𑀇𑀤𑀁 𑀧𑀼𑀭𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀦𑀼𑀁 𑀦𑀸𑀫 𑀲𑀸𑀫𑀡𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀏𑀓𑀺𑀲𑁆𑀲𑀸 𑀉𑀧𑀸𑀲𑀺𑀓𑀸𑀬 𑀏𑀓𑀧𑀼𑀢𑁆𑀢𑀓𑁄 𑀅𑀳𑁄𑀲𑀺. 𑀅𑀣 𑀦𑀁 𑀲𑀸 𑀤𑀳𑀭𑀓𑀸𑀮𑁂𑀬𑁂𑀯 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀻𑀮𑀯𑀸 𑀅𑀳𑁄𑀲𑀺 𑀯𑀢𑁆𑀢𑀲𑀫𑁆𑀧𑀦𑁆𑀦𑁄, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀆𑀕𑀦𑁆𑀢𑀼𑀓𑀸𑀦𑀁 𑀯𑀢𑁆𑀢𑀁 𑀓𑀢𑀫𑁂𑀯 𑀳𑁄𑀢𑀺. 𑀫𑀸𑀲𑀲𑁆𑀲 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀉𑀤𑀓𑀫𑀸𑀴𑀓𑁂 𑀉𑀤𑀓𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑀕𑁆𑀕𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀫𑀥𑀼𑀭𑀲𑁆𑀲𑀭𑁂𑀦 𑀥𑀫𑁆𑀫𑀲𑁆𑀲𑀯𑀦𑀁 𑀖𑁄𑀲𑁂𑀢𑀺. 𑀪𑀺𑀓𑁆𑀔𑀽 𑀢𑀲𑁆𑀲 𑀣𑀸𑀫𑀁 𑀜𑀢𑁆𑀯𑀸 ‘‘𑀲𑀭𑀪𑀜𑁆𑀜𑀁 𑀪𑀡 𑀲𑀸𑀫𑀡𑁂𑀭𑀸’’𑀢𑀺 𑀅𑀚𑁆𑀛𑁂𑀲𑀦𑁆𑀢𑀺. 𑀲𑁄 ‘‘𑀫𑀬𑁆𑀳𑀁 𑀳𑀤𑀬𑀯𑀸𑀢𑁄 𑀭𑀼𑀚𑀢𑀺, 𑀓𑀸𑀬𑁄 𑀯𑀸 𑀩𑀸𑀥𑀢𑀻’’𑀢𑀺 𑀓𑀺𑀜𑁆𑀘𑀺 𑀧𑀘𑁆𑀘𑀸𑀳𑀸𑀭𑀁 𑀅𑀓𑀢𑁆𑀯𑀸 𑀥𑀫𑁆𑀫𑀸𑀲𑀦𑀁 𑀅𑀪𑀺𑀭𑀽𑀳𑀺𑀢𑁆𑀯𑀸 𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬 𑀲𑀭𑀪𑀜𑁆𑀜𑀁 𑀯𑀢𑁆𑀯𑀸 𑀑𑀢𑀭𑀦𑁆𑀢𑁄 ‘‘𑀫𑀬𑁆𑀳𑀁 𑀫𑀸𑀢𑀸𑀧𑀺𑀢𑀽𑀦𑀁 𑀇𑀫𑀲𑁆𑀫𑀺𑀁 𑀲𑀭𑀪𑀜𑁆𑀜𑁂 𑀧𑀢𑁆𑀢𑀺𑀁 𑀤𑀫𑁆𑀫𑀻’’𑀢𑀺 𑀯𑀤𑀢𑀺. 𑀢𑀲𑁆𑀲 𑀫𑀦𑀼𑀲𑁆𑀲𑀸 𑀫𑀸𑀢𑀸𑀧𑀺𑀢𑀭𑁄 𑀧𑀢𑁆𑀢𑀺𑀬𑀸 𑀤𑀺𑀦𑁆𑀦𑀪𑀸𑀯𑀁 𑀦 𑀚𑀸𑀦𑀦𑁆𑀢𑀺. 𑀅𑀦𑀦𑁆𑀢𑀭𑀢𑁆𑀢𑀪𑀸𑀯𑁂 𑀧𑀦𑀲𑁆𑀲 𑀫𑀸𑀢𑀸 𑀬𑀓𑁆𑀔𑀺𑀦𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸, 𑀲𑀸 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 ‘‘𑀲𑀸𑀫𑀡𑁂𑀭𑁂𑀦 𑀤𑀺𑀦𑁆𑀦𑀧𑀢𑁆𑀢𑀺𑀁 𑀅𑀦𑀼𑀫𑁄𑀤𑀸𑀫𑀺, 𑀢𑀸𑀢𑀸’’𑀢𑀺 𑀯𑀤𑀢𑀺. ‘‘𑀲𑀻𑀮𑀲𑀫𑁆𑀧𑀦𑁆𑀦𑁄 𑀘 𑀦𑀸𑀫 𑀪𑀺𑀓𑁆𑀔𑀼 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀧𑀺𑀬𑁄 𑀳𑁄𑀢𑀻’’𑀢𑀺 𑀢𑀲𑁆𑀫𑀺𑀁 𑀲𑀸𑀫𑀡𑁂𑀭𑁂 𑀤𑁂𑀯𑀢𑀸 𑀲𑀮𑀚𑁆𑀚𑀸 𑀲𑀕𑀸𑀭𑀯𑀸 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀯𑀺𑀬 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀬 𑀘 𑀦𑀁 𑀫𑀜𑁆𑀜𑀦𑁆𑀢𑀺. 𑀲𑀸𑀫𑀡𑁂𑀭𑁂 𑀕𑀸𑀭𑀯𑁂𑀦 𑀢𑀜𑁆𑀘 𑀬𑀓𑁆𑀔𑀺𑀦𑀺𑀁 𑀕𑀭𑀼𑀓𑀁 𑀓𑀢𑁆𑀯𑀸 𑀧𑀲𑁆𑀲𑀦𑁆𑀢𑀺. 𑀢𑀸 𑀥𑀫𑁆𑀫𑀲𑁆𑀲𑀯𑀦𑀬𑀓𑁆𑀔𑀲𑀫𑀸𑀕𑀫𑀸𑀤𑀻𑀲𑀼 ‘‘𑀲𑀸𑀦𑀼𑀫𑀸𑀢𑀸 𑀲𑀸𑀦𑀼𑀫𑀸𑀢𑀸’’𑀢𑀺 𑀬𑀓𑁆𑀔𑀺𑀦𑀺𑀬𑀸 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟𑀁 𑀤𑁂𑀦𑁆𑀢𑀺. 𑀫𑀳𑁂𑀲𑀓𑁆𑀔𑀸𑀧𑀺 𑀬𑀓𑁆𑀔𑀸 𑀢𑀁 𑀤𑀺𑀲𑁆𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑀦𑁆𑀢𑀺, 𑀆𑀲𑀦𑀸 𑀯𑀼𑀝𑁆𑀞𑀳𑀦𑁆𑀢𑀺.

𑀅𑀣 𑀔𑁄 𑀲𑀸𑀫𑀡𑁂𑀭𑁄 𑀯𑀼𑀟𑁆𑀠𑀺𑀫𑀦𑁆𑀯𑀸𑀬 𑀧𑀭𑀺𑀧𑀓𑁆𑀓𑀺𑀦𑁆𑀤𑁆𑀭𑀺𑀬𑁄 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀭𑀼𑀴𑁆𑀳𑀓𑁂𑀲𑀦𑀔𑁄 𑀓𑀺𑀮𑀺𑀝𑁆𑀞𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑁄 𑀓𑀲𑁆𑀲𑀘𑀺 𑀅𑀦𑀸𑀭𑁄𑀘𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀏𑀓𑀓𑁄𑀯 𑀫𑀸𑀢𑀼𑀖𑀭𑀁 𑀅𑀕𑀫𑀸𑀲𑀺. 𑀉𑀧𑀸𑀲𑀺𑀓𑀸 𑀧𑀼𑀢𑁆𑀢𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀓𑀺𑀁, 𑀢𑀸𑀢, 𑀢𑁆𑀯𑀁 𑀧𑀼𑀩𑁆𑀩𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀯𑀸 𑀤𑀳𑀭𑀲𑀸𑀫𑀡𑁂𑀭𑁂𑀳𑀺 𑀯𑀸 𑀲𑀤𑁆𑀥𑀺𑀁 𑀇𑀥𑀸𑀕𑀘𑁆𑀙𑀲𑀺, 𑀓𑀲𑁆𑀫𑀸 𑀏𑀓𑀓𑁄𑀯 𑀅𑀚𑁆𑀚 𑀆𑀕𑀢𑁄𑀲𑀻’’𑀢𑀺? 𑀲𑁄 𑀉𑀓𑁆𑀓𑀡𑁆𑀞𑀺𑀢𑀪𑀸𑀯𑀁 𑀆𑀭𑁄𑀘𑁂𑀲𑀺. 𑀲𑀸 𑀉𑀧𑀸𑀲𑀺𑀓𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀖𑀭𑀸𑀯𑀸𑀲𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀢𑁆𑀢𑀁 𑀑𑀯𑀤𑀫𑀸𑀦𑀸𑀧𑀺 𑀲𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 ‘‘𑀅𑀧𑁆𑀧𑁂𑀯 𑀦𑀸𑀫 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀧𑀺 𑀲𑀮𑁆𑀮𑀓𑁆𑀔𑁂𑀬𑁆𑀬𑀸’’𑀢𑀺 𑀅𑀦𑀼𑀬𑁆𑀬𑁄𑀚𑁂𑀢𑁆𑀯𑀸 ‘‘𑀢𑀺𑀝𑁆𑀞, 𑀢𑀸𑀢, 𑀬𑀸𑀯 𑀢𑁂 𑀬𑀸𑀕𑀼𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀫𑀺, 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀲𑁆𑀲 𑀢𑁂 𑀫𑀦𑀸𑀧𑀸𑀦𑀺 𑀯𑀢𑁆𑀣𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀦𑀺𑀲𑀻𑀤𑀺 𑀲𑀸𑀫𑀡𑁂𑀭𑁄. 𑀉𑀧𑀸𑀲𑀺𑀓𑀸 𑀫𑀼𑀳𑀼𑀢𑁆𑀢𑁂𑀦𑁂𑀯 𑀬𑀸𑀕𑀼𑀔𑀚𑁆𑀚𑀓𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀤𑀸𑀲𑀺. 𑀅𑀣 ‘‘𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑀸 𑀢𑀡𑁆𑀟𑀼𑀮𑁂 𑀥𑁄𑀯𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀸 𑀬𑀓𑁆𑀔𑀺𑀦𑀻 ‘‘𑀓𑀳𑀁 𑀦𑀼 𑀔𑁄 𑀲𑀸𑀫𑀡𑁂𑀭𑁄, 𑀓𑀘𑁆𑀘𑀺 𑀪𑀺𑀓𑁆𑀔𑀸𑀳𑀸𑀭𑀁 𑀮𑀪𑀢𑀺, 𑀦𑁄’’𑀢𑀺 𑀆𑀯𑀚𑁆𑀚𑀫𑀸𑀦𑀸 𑀢𑀲𑁆𑀲 𑀯𑀺𑀩𑁆𑀪𑀫𑀺𑀢𑀼𑀓𑀸𑀫𑀢𑀸𑀬 𑀦𑀺𑀲𑀺𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀲𑀸𑀫𑀡𑁂𑀭𑁄 𑀫𑁂 𑀫𑀳𑁂𑀲𑀓𑁆𑀔𑀸𑀦𑀁 𑀤𑁂𑀯𑀢𑀸𑀦𑀁 𑀅𑀦𑁆𑀢𑀭𑁂 𑀮𑀚𑁆𑀚𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀕𑀘𑁆𑀙𑀸𑀫𑀺𑀲𑁆𑀲 𑀯𑀺𑀩𑁆𑀪𑀫𑀦𑁂 𑀅𑀦𑁆𑀢𑀭𑀸𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀔𑁂𑀴𑁂𑀦 𑀧𑀕𑁆𑀖𑀭𑀦𑁆𑀢𑁂𑀦 𑀪𑀽𑀫𑀺𑀬𑀁 𑀦𑀺𑀧𑀢𑀺. 𑀉𑀧𑀸𑀲𑀺𑀓𑀸 𑀧𑀼𑀢𑁆𑀢𑀲𑁆𑀲 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀊𑀭𑀽𑀲𑀼 𑀦𑀺𑀧𑀚𑁆𑀚𑀸𑀧𑁂𑀲𑀺. 𑀲𑀓𑀮𑀕𑀸𑀫𑀯𑀸𑀲𑀺𑀦𑁄 𑀆𑀕𑀦𑁆𑀢𑁆𑀯𑀸 𑀩𑀮𑀺𑀓𑀫𑁆𑀫𑀸𑀤𑀻𑀦𑀺 𑀓𑀭𑀺𑀁𑀲𑀼. 𑀉𑀧𑀸𑀲𑀺𑀓𑀸 𑀧𑀦 𑀧𑀭𑀺𑀤𑁂𑀯𑀫𑀸𑀦𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁.

‘‘𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑀺, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺 𑀬𑁂;

𑀦 𑀢𑁂𑀳𑀺 𑀬𑀓𑁆𑀔𑀸 𑀓𑀻𑀴𑀦𑁆𑀢𑀺, 𑀇𑀢𑀺 𑀫𑁂 𑀅𑀭𑀳𑀢𑀁 𑀲𑀼𑀢𑀁;

𑀲𑀸 𑀤𑀸𑀦𑀺 𑀅𑀚𑁆𑀚 𑀧𑀲𑁆𑀲𑀸𑀫𑀺, 𑀬𑀓𑁆𑀔𑀸 𑀓𑀻𑀴𑀦𑁆𑀢𑀺 𑀲𑀸𑀦𑀼𑀦𑀸’’𑀢𑀺. (𑀲𑀁. 𑀦𑀺. 𑁧.𑁨𑁩𑁯);

𑀉𑀧𑀸𑀲𑀺𑀓𑀸𑀬 𑀯𑀘𑀦𑀁 𑀲𑀼𑀢𑁆𑀯𑀸 𑁋

‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻;

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁.

‘‘𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑀺, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺 𑀬𑁂;

𑀦 𑀢𑁂𑀳𑀺 𑀬𑀓𑁆𑀔𑀸 𑀓𑀻𑀴𑀦𑁆𑀢𑀺, 𑀲𑀸𑀳𑀼 𑀢𑁂 𑀅𑀭𑀳𑀢𑀁 𑀲𑀼𑀢’’𑀦𑁆𑀢𑀺. (𑀲𑀁. 𑀦𑀺. 𑁧.𑁨𑁩𑁯) 𑁋

𑀯𑀢𑁆𑀯𑀸 𑀆𑀳 𑁋

‘‘𑀲𑀸𑀦𑀼𑀁 𑀧𑀩𑀼𑀤𑁆𑀥𑀁 𑀯𑀚𑁆𑀚𑀸𑀲𑀺, 𑀬𑀓𑁆𑀔𑀸𑀦𑀁 𑀯𑀘𑀦𑀁 𑀇𑀤𑀁;

𑀫𑀸𑀓𑀸𑀲𑀺 𑀧𑀸𑀧𑀓𑀁 𑀓𑀫𑁆𑀫𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄.

‘‘𑀲𑀘𑁂 𑀘 𑀧𑀸𑀧𑀓𑀁 𑀓𑀫𑁆𑀫𑀁, 𑀓𑀭𑀺𑀲𑁆𑀲𑀲𑀺 𑀓𑀭𑁄𑀲𑀺 𑀯𑀸;

𑀦 𑀢𑁂 𑀤𑀼𑀓𑁆𑀔𑀸 𑀧𑀫𑀼𑀢𑁆𑀬𑀢𑁆𑀣𑀺, 𑀉𑀧𑁆𑀧𑀘𑁆𑀘𑀸𑀧𑀺 𑀧𑀮𑀸𑀬𑀢𑁄’’𑀢𑀺. (𑀲𑀁. 𑀦𑀺. 𑁧.𑁨𑁩𑁯);

𑀏𑀯𑀁 𑀧𑀸𑀧𑀓𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀲𑀓𑀼𑀡𑀲𑁆𑀲 𑀯𑀺𑀬 𑀉𑀧𑁆𑀧𑀢𑀺𑀢𑁆𑀯𑀸 𑀧𑀮𑀸𑀬𑀢𑁄𑀧𑀺 𑀢𑁂 𑀫𑁄𑀓𑁆𑀔𑁄 𑀦𑀢𑁆𑀣𑀻𑀢𑀺 𑀯𑀢𑁆𑀯𑀸 𑀲𑀸 𑀬𑀓𑁆𑀔𑀺𑀦𑀻 𑀲𑀸𑀫𑀡𑁂𑀭𑀁 𑀫𑀼𑀜𑁆𑀘𑀺. 𑀲𑁄 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀫𑀸𑀢𑀭𑀁 𑀓𑁂𑀲𑁂 𑀯𑀺𑀓𑀺𑀭𑀺𑀬 𑀅𑀲𑁆𑀲𑀲𑀦𑁆𑀢𑀺𑀁 𑀧𑀲𑁆𑀲𑀲𑀦𑁆𑀢𑀺𑀁 𑀭𑁄𑀤𑀫𑀸𑀦𑀁 𑀲𑀓𑀮𑀕𑀸𑀫𑀯𑀸𑀲𑀺𑀦𑁄 𑀘 𑀲𑀦𑁆𑀦𑀺𑀧𑀢𑀺𑀢𑁂 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀬𑀓𑁆𑀔𑁂𑀦 𑀕𑀳𑀺𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 ‘‘𑀅𑀳𑀁 𑀧𑀼𑀩𑁆𑀩𑁂 𑀧𑀻𑀞𑁂 𑀦𑀺𑀲𑀺𑀦𑁆𑀦𑁄, 𑀫𑀸𑀢𑀸 𑀫𑁂 𑀅𑀯𑀺𑀤𑀽𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀡𑁆𑀟𑀼𑀮𑁂 𑀥𑁄𑀯𑀺, 𑀇𑀤𑀸𑀦𑀺 𑀧𑀦𑀫𑁆𑀳𑀺 𑀪𑀽𑀫𑀺𑀬𑀁 𑀦𑀺𑀧𑀦𑁆𑀦𑁄, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀦𑀺𑀧𑀦𑁆𑀦𑀓𑁄𑀯 𑀫𑀸𑀢𑀭𑀁 𑀆𑀳 𑁋

‘‘𑀫𑀢𑀁 𑀯𑀸 𑀅𑀫𑁆𑀫 𑀭𑁄𑀤𑀦𑁆𑀢𑀺, 𑀬𑁄 𑀯𑀸 𑀚𑀻𑀯𑀁 𑀦 𑀤𑀺𑀲𑁆𑀲𑀢𑀺;

𑀚𑀻𑀯𑀦𑁆𑀢𑀁 𑀅𑀫𑁆𑀫 𑀧𑀲𑁆𑀲𑀦𑁆𑀢𑀻, 𑀓𑀲𑁆𑀫𑀸 𑀫𑀁 𑀅𑀫𑁆𑀫 𑀭𑁄𑀤𑀲𑀻’’𑀢𑀺. (𑀣𑁂𑀭𑀕𑀸. 𑁪𑁪; 𑀲𑀁. 𑀦𑀺. 𑁧.𑁨𑁩𑁯);

𑀅𑀣𑀲𑁆𑀲 𑀫𑀸𑀢𑀸 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬 𑀧𑀩𑁆𑀩𑀚𑀺𑀢𑀲𑁆𑀲 𑀧𑀼𑀦 𑀯𑀺𑀩𑁆𑀪𑀫𑀦𑀢𑁆𑀣𑀁 𑀆𑀕𑀫𑀦𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀦𑁆𑀢𑀻 𑀆𑀳 𑁋

‘‘𑀫𑀢𑀁 𑀯𑀸 𑀧𑀼𑀢𑁆𑀢 𑀭𑁄𑀤𑀦𑁆𑀢𑀺, 𑀬𑁄 𑀯𑀸 𑀚𑀻𑀯𑀁 𑀦 𑀤𑀺𑀲𑁆𑀲𑀢𑀺;

𑀬𑁄 𑀘 𑀓𑀸𑀫𑁂 𑀘𑀚𑀺𑀢𑁆𑀯𑀸𑀦, 𑀧𑀼𑀦𑀭𑀸𑀕𑀘𑁆𑀙𑀢𑁂 𑀇𑀥;

𑀢𑀁 𑀯𑀸𑀧𑀺 𑀧𑀼𑀢𑁆𑀢 𑀭𑁄𑀤𑀦𑁆𑀢𑀺, 𑀧𑀼𑀦 𑀚𑀻𑀯𑀁 𑀫𑀢𑁄 𑀳𑀺 𑀲𑁄’’𑀢𑀺. (𑀲𑀁. 𑀦𑀺. 𑁧.𑁨𑁩𑁯);

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀖𑀭𑀸𑀯𑀸𑀲𑀁 𑀓𑀼𑀓𑁆𑀓𑀼𑀴𑀲𑀤𑀺𑀲𑀜𑁆𑀘𑁂𑀯 𑀦𑀭𑀓𑀲𑀤𑀺𑀲𑀜𑁆𑀘 𑀓𑀢𑁆𑀯𑀸 𑀖𑀭𑀸𑀯𑀸𑀲𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀦𑁆𑀢𑀻 𑀧𑀼𑀦 𑀆𑀳 𑁋

‘‘𑀓𑀼𑀓𑁆𑀓𑀼𑀴𑀸 𑀉𑀩𑁆𑀪𑀢𑁄 𑀢𑀸𑀢, 𑀓𑀼𑀓𑁆𑀓𑀼𑀴𑀁 𑀧𑀢𑀺𑀢𑀼𑀫𑀺𑀘𑁆𑀙𑀲𑀺;

𑀦𑀭𑀓𑀸 𑀉𑀩𑁆𑀪𑀢𑁄 𑀢𑀸𑀢, 𑀦𑀭𑀓𑀁 𑀧𑀢𑀺𑀢𑀼𑀫𑀺𑀘𑁆𑀙𑀲𑀻’’𑀢𑀺. (𑀲𑀁. 𑀦𑀺. 𑁧.𑁨𑁩𑁯);

𑀅𑀣 𑀦𑀁, ‘‘𑀧𑀼𑀢𑁆𑀢, 𑀪𑀤𑁆𑀤𑀁 𑀢𑀯 𑀳𑁄𑀢𑀼, 𑀫𑀬𑀸 𑀧𑀦 ‘𑀅𑀬𑀁 𑀦𑁄 𑀧𑀼𑀢𑁆𑀢𑀓𑁄 𑀟𑀬𑁆𑀳𑀫𑀸𑀦𑁄’𑀢𑀺 𑀕𑁂𑀳𑀸 𑀪𑀡𑁆𑀟𑀁 𑀯𑀺𑀬 𑀦𑀻𑀳𑀭𑀺𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀸𑀚𑀺𑀢𑁄, 𑀖𑀭𑀸𑀯𑀸𑀲𑁂 𑀧𑀼𑀦 𑀟𑀬𑁆𑀳𑀺𑀢𑀼𑀁 𑀇𑀘𑁆𑀙𑀲𑀺. 𑀅𑀪𑀺𑀥𑀸𑀯𑀣 𑀧𑀭𑀺𑀢𑁆𑀢𑀸𑀬𑀣 𑀦𑁄𑀢𑀺 𑀇𑀫𑀫𑀢𑁆𑀣𑀁 𑀓𑀲𑁆𑀲 𑀉𑀚𑁆𑀛𑀸𑀧𑀬𑀸𑀫 𑀓𑀁 𑀦𑀺𑀚𑁆𑀛𑀸𑀧𑀬𑀸𑀫𑀸’’𑀢𑀺 𑀤𑀻𑀧𑁂𑀢𑀼𑀁 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀪𑀺𑀥𑀸𑀯𑀣 𑀪𑀤𑁆𑀤𑀦𑁆𑀢𑁂, 𑀓𑀲𑁆𑀲 𑀉𑀚𑁆𑀛𑀸𑀧𑀬𑀸𑀫𑀲𑁂;

𑀆𑀤𑀺𑀢𑁆𑀢𑀸 𑀦𑀻𑀳𑀢𑀁 𑀪𑀡𑁆𑀟𑀁, 𑀧𑀼𑀦 𑀟𑀬𑁆𑀳𑀺𑀢𑀼𑀫𑀺𑀘𑁆𑀙𑀲𑀻’’𑀢𑀺. (𑀲𑀁. 𑀦𑀺. 𑁧.𑁨𑁩𑁯);

𑀲𑁄 𑀫𑀸𑀢𑀭𑀺 𑀓𑀣𑁂𑀦𑁆𑀢𑀺𑀬𑀸 𑀓𑀣𑁂𑀦𑁆𑀢𑀺𑀬𑀸 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀦𑀢𑁆𑀣𑀺 𑀫𑀬𑁆𑀳𑀁 𑀕𑀺𑀳𑀺𑀪𑀸𑀯𑁂𑀦 𑀅𑀢𑁆𑀣𑁄’’𑀢𑀺 𑀆𑀳. 𑀅𑀣𑀲𑁆𑀲 𑀫𑀸𑀢𑀸 ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀢𑀼𑀝𑁆𑀞𑀸 𑀧𑀡𑀻𑀢𑀪𑁄𑀚𑀦𑀁 𑀪𑁄𑀚𑁂𑀢𑁆𑀯𑀸 ‘‘𑀓𑀢𑀺𑀯𑀲𑁆𑀲𑁄𑀲𑀺, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑀪𑀸𑀯𑀁 𑀜𑀢𑁆𑀯𑀸 𑀢𑀺𑀘𑀻𑀯𑀭𑀁 𑀧𑀝𑀺𑀬𑀸𑀤𑁂𑀲𑀺. 𑀲𑁄 𑀧𑀭𑀺𑀧𑀼𑀡𑁆𑀡𑀧𑀢𑁆𑀢𑀘𑀻𑀯𑀭𑁄 𑀉𑀧𑀲𑀫𑁆𑀧𑀤𑀁 𑀮𑀪𑀺. 𑀅𑀣𑀲𑁆𑀲 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀢𑁆𑀣𑀸 𑀘𑀺𑀢𑁆𑀢𑀦𑀺𑀕𑁆𑀕𑀳𑁂 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 ‘‘𑀘𑀺𑀢𑁆𑀢𑀁 𑀦𑀸𑀫𑁂𑀢𑀁 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀤𑀻𑀖𑀭𑀢𑁆𑀢𑀁 𑀘𑀸𑀭𑀺𑀓𑀁 𑀘𑀭𑀦𑁆𑀢𑀁 𑀅𑀦𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀲𑁄𑀢𑁆𑀣𑀺𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀗𑁆𑀓𑀼𑀲𑁂𑀦 𑀫𑀢𑁆𑀢𑀳𑀢𑁆𑀣𑀺𑀦𑁄 𑀯𑀺𑀬 𑀘𑀺𑀢𑁆𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑁂 𑀬𑁄𑀕𑁄 𑀓𑀭𑀡𑀻𑀬𑁄’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁨𑁬. ‘‘𑀇𑀤𑀁 𑀧𑀼𑀭𑁂 𑀘𑀺𑀢𑁆𑀢𑀫𑀘𑀸𑀭𑀺 𑀘𑀸𑀭𑀺𑀓𑀁,

𑀬𑁂𑀦𑀺𑀘𑁆𑀙𑀓𑀁 𑀬𑀢𑁆𑀣𑀓𑀸𑀫𑀁 𑀬𑀣𑀸𑀲𑀼𑀔𑀁;

𑀢𑀤𑀚𑁆𑀚𑀳𑀁 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀺 𑀬𑁄𑀦𑀺𑀲𑁄,

𑀳𑀢𑁆𑀣𑀺𑀧𑁆𑀧𑀪𑀺𑀦𑁆𑀦𑀁 𑀯𑀺𑀬 𑀅𑀗𑁆𑀓𑀼𑀲𑀕𑁆𑀕𑀳𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀇𑀤𑀁 𑀘𑀺𑀢𑁆𑀢𑀁 𑀦𑀸𑀫 𑀇𑀢𑁄 𑀧𑀼𑀩𑁆𑀩𑁂 𑀭𑀽𑀧𑀸𑀤𑀻𑀲𑀼 𑀘 𑀆𑀭𑀫𑁆𑀫𑀡𑁂𑀲𑀼 𑀭𑀸𑀕𑀸𑀤𑀻𑀦𑀁 𑀬𑁂𑀦 𑀓𑀸𑀭𑀡𑁂𑀦 𑀇𑀘𑁆𑀙𑀢𑀺, 𑀬𑀢𑁆𑀣𑁂𑀯𑀲𑁆𑀲 𑀓𑀸𑀫𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑀲𑁂𑀦 𑀬𑀢𑁆𑀣 𑀓𑀸𑀫𑀁 𑀬𑀣𑀸𑀭𑀼𑀘𑀺 𑀘𑀭𑀦𑁆𑀢𑀲𑁆𑀲 𑀲𑀼𑀔𑀁 𑀳𑁄𑀢𑀺, 𑀢𑀣𑁂𑀯 𑀯𑀺𑀘𑀭𑀡𑀢𑁄 𑀬𑀣𑀸𑀲𑀼𑀔𑀁 𑀤𑀻𑀖𑀭𑀢𑁆𑀢𑀁 𑀘𑀸𑀭𑀺𑀓𑀁 𑀘𑀭𑀺, 𑀢𑀁 𑀅𑀚𑁆𑀚 𑀅𑀳𑀁 𑀧𑀪𑀺𑀦𑁆𑀦𑀁 𑀫𑀢𑁆𑀢𑀳𑀢𑁆𑀣𑀺𑀁 𑀳𑀢𑁆𑀣𑀸𑀘𑀭𑀺𑀬𑀲𑀗𑁆𑀔𑀸𑀢𑁄 𑀙𑁂𑀓𑁄 𑀅𑀗𑁆𑀓𑀼𑀲𑀕𑁆𑀕𑀳𑁄 𑀅𑀗𑁆𑀓𑀼𑀲𑁂𑀦 𑀯𑀺𑀬 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀺, 𑀦𑀸𑀲𑁆𑀲 𑀯𑀻𑀢𑀺𑀓𑁆𑀓𑀫𑀺𑀢𑀼𑀁 𑀤𑀲𑁆𑀲𑀸𑀫𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀲𑀸𑀦𑀼𑀦𑀸 𑀲𑀤𑁆𑀥𑀺𑀁 𑀥𑀫𑁆𑀫𑀲𑁆𑀲𑀯𑀦𑀸𑀬 𑀉𑀧𑀲𑀗𑁆𑀓𑀫𑀦𑁆𑀢𑀸𑀦𑀁 𑀩𑀳𑀽𑀦𑀁 𑀤𑁂𑀯𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀲𑁄𑀧𑀸𑀬𑀲𑁆𑀫𑀸 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀫𑀳𑀸𑀥𑀫𑁆𑀫𑀓𑀣𑀺𑀓𑁄 𑀳𑀼𑀢𑁆𑀯𑀸 𑀯𑀻𑀲𑀯𑀲𑁆𑀲𑀲𑀢𑀁 𑀞𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀲𑀗𑁆𑀔𑁄𑀪𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺.

𑀲𑀸𑀦𑀼𑀲𑀸𑀫𑀡𑁂𑀭𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀧𑀸𑀯𑁂𑀬𑁆𑀬𑀓𑀳𑀢𑁆𑀣𑀺𑀯𑀢𑁆𑀣𑀼

𑀅𑀧𑁆𑀧𑀫𑀸𑀤𑀭𑀢𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑁄𑀲𑀮𑀭𑀜𑁆𑀜𑁄 𑀧𑀸𑀯𑁂𑀬𑁆𑀬𑀓𑀁 𑀦𑀸𑀫 𑀳𑀢𑁆𑀣𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀳𑀢𑁆𑀣𑀻 𑀢𑀭𑀼𑀡𑀓𑀸𑀮𑁂 𑀫𑀳𑀸𑀩𑀮𑁄 𑀳𑀼𑀢𑁆𑀯𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀚𑀭𑀸𑀯𑀸𑀢𑀯𑁂𑀕𑀩𑁆𑀪𑀸𑀳𑀢𑁄 𑀳𑀼𑀢𑁆𑀯𑀸 𑀏𑀓𑀁 𑀫𑀳𑀦𑁆𑀢𑀁 𑀲𑀭𑀁 𑀑𑀭𑀼𑀬𑁆𑀳 𑀓𑀮𑀮𑁂 𑀮𑀕𑁆𑀕𑀺𑀢𑁆𑀯𑀸 𑀉𑀢𑁆𑀢𑀭𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀫𑀳𑀸𑀚𑀦𑁄 𑀢𑀁 𑀤𑀺𑀲𑁆𑀯𑀸 ‘‘𑀏𑀯𑀭𑀽𑀧𑁄𑀧𑀺 𑀦𑀸𑀫 𑀳𑀢𑁆𑀣𑀻 𑀇𑀫𑀁 𑀤𑀼𑀩𑁆𑀩𑀮𑀪𑀸𑀯𑀁 𑀧𑀢𑁆𑀢𑁄’’𑀢𑀺 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀳𑀢𑁆𑀣𑀸𑀘𑀭𑀺𑀬𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙, 𑀆𑀘𑀭𑀺𑀬, 𑀢𑀁 𑀳𑀢𑁆𑀣𑀺𑀁 𑀓𑀮𑀮𑀢𑁄 𑀉𑀤𑁆𑀥𑀭𑀸𑀳𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀲𑀗𑁆𑀕𑀸𑀫𑀲𑀻𑀲𑀁 𑀤𑀲𑁆𑀲𑁂𑀢𑁆𑀯𑀸 𑀲𑀗𑁆𑀕𑀸𑀫𑀪𑁂𑀭𑀺𑀁 𑀆𑀓𑁄𑀝𑀸𑀧𑁂𑀲𑀺. 𑀫𑀸𑀦𑀚𑀸𑀢𑀺𑀓𑁄 𑀳𑀢𑁆𑀣𑀻 𑀯𑁂𑀕𑁂𑀦𑀼𑀝𑁆𑀞𑀸𑀬 𑀣𑀮𑁂 𑀧𑀢𑀺𑀝𑁆𑀞𑀳𑀺. 𑀪𑀺𑀓𑁆𑀔𑀽 𑀢𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀺𑀦𑀸 𑀧𑀓𑀢𑀺𑀧𑀗𑁆𑀓𑀤𑀼𑀕𑁆𑀕𑀢𑁄 𑀅𑀢𑁆𑀢𑀸 𑀉𑀤𑁆𑀥𑀝𑁄, 𑀢𑀼𑀫𑁆𑀳𑁂 𑀧𑀦 𑀓𑀺𑀮𑁂𑀲𑀤𑀼𑀕𑁆𑀕𑁂 𑀧𑀓𑁆𑀔𑀦𑁆𑀤𑀸. 𑀢𑀲𑁆𑀫𑀸 𑀬𑁄𑀦𑀺𑀲𑁄 𑀧𑀤𑀳𑀺𑀢𑁆𑀯𑀸 𑀢𑀼𑀫𑁆𑀳𑁂𑀧𑀺 𑀢𑀢𑁄 𑀅𑀢𑁆𑀢𑀸𑀦𑀁 𑀉𑀤𑁆𑀥𑀭𑀣𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁨𑁭. ‘‘𑀅𑀧𑁆𑀧𑀫𑀸𑀤𑀭𑀢𑀸 𑀳𑁄𑀣, 𑀲𑀘𑀺𑀢𑁆𑀢𑀫𑀦𑀼𑀭𑀓𑁆𑀔𑀣;

𑀤𑀼𑀕𑁆𑀕𑀸 𑀉𑀤𑁆𑀥𑀭𑀣𑀢𑁆𑀢𑀸𑀦𑀁, 𑀧𑀗𑁆𑀓𑁂 𑀲𑀦𑁆𑀦𑁄𑀯 𑀓𑀼𑀜𑁆𑀚𑀭𑁄’’𑀢𑀺.

𑀢𑀢𑁆𑀣 𑀅𑀧𑁆𑀧𑀫𑀸𑀤𑀭𑀢𑀸𑀢𑀺 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁂 𑀅𑀪𑀺𑀭𑀢𑀸 𑀳𑁄𑀣. 𑀲𑀘𑀺𑀢𑁆𑀢𑀦𑁆𑀢𑀺 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀬𑀣𑀸 𑀯𑀻𑀢𑀺𑀓𑁆𑀓𑀫𑀁 𑀦 𑀓𑀭𑁄𑀢𑀺, 𑀏𑀯𑀁 𑀭𑀓𑁆𑀔𑀣. 𑀤𑀼𑀕𑁆𑀕𑀸𑀢𑀺 𑀬𑀣𑀸 𑀲𑁄 𑀧𑀗𑁆𑀓𑁂 𑀲𑀦𑁆𑀦𑁄 𑀓𑀼𑀜𑁆𑀚𑀭𑁄 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀯𑀸𑀬𑀸𑀫𑀁 𑀓𑀢𑁆𑀯𑀸 𑀧𑀗𑁆𑀓𑀤𑀼𑀕𑁆𑀕𑀢𑁄 𑀅𑀢𑁆𑀢𑀸𑀦𑀁 𑀉𑀤𑁆𑀥𑀭𑀺𑀢𑁆𑀯𑀸 𑀣𑀮𑁂 𑀧𑀢𑀺𑀝𑁆𑀞𑀺𑀢𑁄, 𑀏𑀯𑀁 𑀢𑀼𑀫𑁆𑀳𑁂𑀧𑀺 𑀓𑀺𑀮𑁂𑀲𑀤𑀼𑀕𑁆𑀕𑀢𑁄 𑀅𑀢𑁆𑀢𑀸𑀦𑀁 𑀉𑀤𑁆𑀥𑀭𑀣, 𑀦𑀺𑀩𑁆𑀩𑀸𑀦𑀣𑀮𑁂 𑀧𑀢𑀺𑀝𑁆𑀞𑀸𑀧𑁂𑀣𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀧𑀸𑀯𑁂𑀬𑁆𑀬𑀓𑀳𑀢𑁆𑀣𑀺𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀲𑀫𑁆𑀩𑀳𑀼𑀮𑀪𑀺𑀓𑁆𑀔𑀼𑀯𑀢𑁆𑀣𑀼

𑀲𑀘𑁂 𑀮𑀪𑁂𑀣𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀧𑀸𑀮𑀺𑀮𑁂𑀬𑁆𑀬𑀓𑀁 𑀦𑀺𑀲𑁆𑀲𑀸𑀬 𑀭𑀓𑁆𑀔𑀺𑀢𑀯𑀦𑀲𑀡𑁆𑀟𑁂 𑀯𑀺𑀳𑀭𑀦𑁆𑀢𑁄 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀬𑀫𑀓𑀯𑀕𑁆𑀕𑁂 ‘‘𑀧𑀭𑁂 𑀘 𑀦 𑀯𑀺𑀚𑀸𑀦𑀦𑁆𑀢𑀻’’𑀢𑀺 𑀕𑀸𑀣𑀸𑀯𑀡𑁆𑀡𑀦𑀸𑀬 𑀆𑀕𑀢𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 (𑀥. 𑀧. 𑀅𑀝𑁆𑀞. 𑁧.𑁫 𑀓𑁄𑀲𑀫𑁆𑀩𑀓𑀯𑀢𑁆𑀣𑀼) 𑁋

𑀢𑀣𑀸𑀕𑀢𑀲𑁆𑀲 𑀢𑀢𑁆𑀣 𑀳𑀢𑁆𑀣𑀺𑀦𑀸𑀕𑁂𑀦 𑀉𑀧𑀝𑁆𑀞𑀺𑀬𑀫𑀸𑀦𑀲𑁆𑀲 𑀯𑀲𑀦𑀪𑀸𑀯𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑁄 𑀅𑀳𑁄𑀲𑀺. 𑀲𑀸𑀯𑀢𑁆𑀣𑀺𑀦𑀕𑀭𑀢𑁄 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀯𑀺𑀲𑀸𑀔𑀸 𑀫𑀳𑀸𑀉𑀧𑀸𑀲𑀺𑀓𑀸’’𑀢𑀺 𑀏𑀯𑀫𑀸𑀤𑀻𑀦𑀺 𑀫𑀳𑀸𑀓𑀼𑀮𑀸𑀦𑀺 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀲𑀸𑀲𑀦𑀁 𑀧𑀳𑀺𑀡𑀺𑀁𑀲𑀼 ‘‘𑀲𑀢𑁆𑀣𑀸𑀭𑀁 𑀦𑁄, 𑀪𑀦𑁆𑀢𑁂, 𑀤𑀲𑁆𑀲𑁂𑀣𑀸’’𑀢𑀺. 𑀤𑀺𑀲𑀸𑀯𑀸𑀲𑀺𑀦𑁄𑀧𑀺 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀯𑀼𑀝𑁆𑀞𑀯𑀲𑁆𑀲𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀘𑀺𑀭𑀲𑁆𑀲𑀼𑀢𑀸 𑀦𑁄, 𑀆𑀯𑀼𑀲𑁄 𑀆𑀦𑀦𑁆𑀤, 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀥𑀫𑁆𑀫𑀻 𑀓𑀣𑀸, 𑀲𑀸𑀥𑀼 𑀫𑀬𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀮𑀪𑁂𑀬𑁆𑀬𑀸𑀫 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀥𑀫𑁆𑀫𑀺𑀁 𑀓𑀣𑀁 𑀲𑀯𑀦𑀸𑀬𑀸’’𑀢𑀺 𑀬𑀸𑀘𑀺𑀁𑀲𑀼. 𑀣𑁂𑀭𑁄 𑀢𑁂 𑀪𑀺𑀓𑁆𑀔𑀽 𑀆𑀤𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀢𑁂𑀫𑀸𑀲𑀁 𑀏𑀓𑀯𑀺𑀳𑀸𑀭𑀺𑀦𑁄 𑀢𑀣𑀸𑀕𑀢𑀲𑁆𑀲 𑀲𑀦𑁆𑀢𑀺𑀓𑀁 𑀏𑀢𑁆𑀢𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀉𑀧𑀲𑀗𑁆𑀓𑀫𑀦𑀁 𑀅𑀬𑀼𑀢𑁆𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀩𑀳𑀺 𑀞𑀧𑁂𑀢𑁆𑀯𑀸 𑀏𑀓𑀓𑁄𑀯 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺. 𑀧𑀸𑀮𑀺𑀮𑁂𑀬𑁆𑀬𑀓𑁄 𑀢𑀁 𑀤𑀺𑀲𑁆𑀯𑀸 𑀤𑀡𑁆𑀟𑀫𑀸𑀤𑀸𑀬 𑀧𑀓𑁆𑀔𑀦𑁆𑀤𑀺. 𑀢𑀁 𑀲𑀢𑁆𑀣𑀸 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀧𑁂𑀳𑀺, 𑀅𑀧𑁂𑀳𑀺, 𑀧𑀸𑀮𑀺𑀮𑁂𑀬𑁆𑀬𑀓, 𑀫𑀸 𑀯𑀸𑀭𑀬𑀺, 𑀩𑀼𑀤𑁆𑀥𑀼𑀧𑀝𑁆𑀞𑀸𑀓𑁄 𑀏𑀲𑁄’’𑀢𑀺 𑀆𑀳. 𑀲𑁄 𑀢𑀢𑁆𑀣𑁂𑀯 𑀤𑀡𑁆𑀟𑀁 𑀙𑀟𑁆𑀟𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁 𑀆𑀧𑀼𑀘𑁆𑀙𑀺. 𑀣𑁂𑀭𑁄 𑀦𑀸𑀤𑀸𑀲𑀺. 𑀦𑀸𑀕𑁄 ‘‘𑀲𑀘𑁂 𑀉𑀕𑁆𑀕𑀳𑀺𑀢𑀯𑀢𑁆𑀢𑁄 𑀪𑀯𑀺𑀲𑁆𑀲𑀢𑀺, 𑀲𑀢𑁆𑀣𑀼 𑀦𑀺𑀲𑀻𑀤𑀦𑀧𑀸𑀲𑀸𑀡𑀨𑀮𑀓𑁂 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀁 𑀦 𑀞𑀧𑁂𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀣𑁂𑀭𑁄 𑀧𑀢𑁆𑀢𑀘𑀻𑀯𑀭𑀁 𑀪𑀽𑀫𑀺𑀬𑀁 𑀞𑀧𑁂𑀲𑀺. 𑀯𑀢𑁆𑀢𑀲𑀫𑁆𑀧𑀦𑁆𑀦𑀸 𑀳𑀺 𑀕𑀭𑀽𑀦𑀁 𑀆𑀲𑀦𑁂 𑀯𑀸 𑀲𑀬𑀦𑁂 𑀯𑀸 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀁 𑀦 𑀞𑀧𑁂𑀦𑁆𑀢𑀺.

𑀣𑁂𑀭𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 ‘‘𑀏𑀓𑀓𑁄𑀯 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 ‘‘𑀓𑀳𑀁 𑀧𑀦 𑀢𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀘𑀺𑀢𑁆𑀢𑀁 𑀅𑀚𑀸𑀦𑀦𑁆𑀢𑁄 𑀩𑀳𑀺 𑀞𑀧𑁂𑀢𑁆𑀯𑀸 𑀆𑀕𑀢𑁄𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀧𑀓𑁆𑀓𑁄𑀲𑀸𑀳𑀺 𑀦𑁂’’𑀢𑀺 𑀆𑀳. 𑀣𑁂𑀭𑁄 𑀢𑀣𑀸 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺, ‘‘𑀪𑀦𑁆𑀢𑁂, 𑀪𑀕𑀯𑀸 𑀩𑀼𑀤𑁆𑀥𑀲𑀼𑀔𑀼𑀫𑀸𑀮𑁄 𑀘𑁂𑀯 𑀔𑀢𑁆𑀢𑀺𑀬𑀲𑀼𑀔𑀼𑀫𑀸𑀮𑁄 𑀘, 𑀢𑀼𑀫𑁆𑀳𑁂𑀳𑀺 𑀢𑁂𑀫𑀸𑀲𑀁 𑀏𑀓𑀓𑁂𑀳𑀺 𑀢𑀺𑀝𑁆𑀞𑀦𑁆𑀢𑁂𑀳𑀺 𑀦𑀺𑀲𑀻𑀤𑀦𑁆𑀢𑁂𑀳𑀺 𑀘 𑀤𑀼𑀓𑁆𑀓𑀭𑀁 𑀓𑀢𑀁, 𑀯𑀢𑁆𑀢𑀧𑀝𑀺𑀯𑀢𑁆𑀢𑀓𑀸𑀭𑀓𑁄𑀧𑀺 𑀫𑀼𑀔𑁄𑀤𑀓𑀸𑀤𑀺𑀤𑀸𑀬𑀓𑁄𑀧𑀺 𑀦𑀸𑀳𑁄𑀲𑀺 𑀫𑀜𑁆𑀜𑁂’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀧𑀸𑀮𑀺𑀮𑁂𑀬𑁆𑀬𑀓𑀳𑀢𑁆𑀣𑀺𑀦𑀸 𑀫𑀫 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀢𑀸𑀦𑀺. 𑀏𑀯𑀭𑀽𑀧𑀜𑁆𑀳𑀺 𑀲𑀳𑀸𑀬𑀁 𑀮𑀪𑀦𑁆𑀢𑁂𑀦 𑀏𑀓𑀓𑁄𑀯 𑀯𑀲𑀺𑀢𑀼𑀁 𑀬𑀼𑀢𑁆𑀢𑀁, 𑀅𑀮𑀪𑀦𑁆𑀢𑀲𑁆𑀲 𑀏𑀓𑀘𑀸𑀭𑀺𑀓𑀪𑀸𑀯𑁄𑀯 𑀲𑁂𑀬𑁆𑀬𑁄’’𑀢𑀺 𑀯𑀢𑁆𑀯𑀸 𑀦𑀸𑀕𑀯𑀕𑁆𑀕𑁂 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁨𑁮. ‘‘𑀲𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁,

𑀲𑀤𑁆𑀥𑀺𑀁𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁;

𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺,

𑀘𑀭𑁂𑀬𑁆𑀬 𑀢𑁂𑀦𑀢𑁆𑀢𑀫𑀦𑁄 𑀲𑀢𑀻𑀫𑀸.

𑁩𑁨𑁯. ‘‘𑀦𑁄 𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁,

𑀲𑀤𑁆𑀥𑀺𑀁𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁;

𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬,

𑀏𑀓𑁄 𑀘𑀭𑁂 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄.

𑁩𑁩𑁦. ‘‘𑀏𑀓𑀲𑁆𑀲 𑀘𑀭𑀺𑀢𑀁 𑀲𑁂𑀬𑁆𑀬𑁄,

𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸;

𑀏𑀓𑁄 𑀘𑀭𑁂 𑀦 𑀘 𑀧𑀸𑀧𑀸𑀦𑀺 𑀓𑀬𑀺𑀭𑀸,

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄’’𑀢𑀺.

𑀢𑀢𑁆𑀣 𑀦𑀺𑀧𑀓𑀦𑁆𑀢𑀺 𑀦𑁂𑀧𑀓𑁆𑀓𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀁. 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀦𑁆𑀢𑀺 𑀪𑀤𑁆𑀤𑀓𑀯𑀺𑀳𑀸𑀭𑀺𑀁 𑀧𑀡𑁆𑀟𑀺𑀢𑀁. 𑀧𑀭𑀺𑀲𑁆𑀲𑀬𑀸𑀦𑀻𑀢𑀺 𑀢𑀸𑀤𑀺𑀲𑀁 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀁 𑀲𑀳𑀸𑀬𑀁 𑀮𑀪𑀦𑁆𑀢𑁄 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄 𑀧𑀸𑀓𑀝𑀧𑀭𑀺𑀲𑁆𑀲𑀬𑁂 𑀘 𑀭𑀸𑀕𑀪𑀬𑀤𑁄𑀲𑀪𑀬𑀫𑁄𑀳𑀪𑀬𑀸𑀤𑀬𑁄 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑁂 𑀘𑀸𑀢𑀺 𑀲𑀩𑁆𑀩𑁂𑀯 𑀧𑀭𑀺𑀲𑁆𑀲𑀬𑁂 𑀅𑀪𑀺𑀪𑀯𑀺𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀅𑀢𑁆𑀢𑀫𑀦𑁄 𑀉𑀧𑀝𑁆𑀞𑀺𑀢𑀲𑀢𑀻 𑀳𑀼𑀢𑁆𑀯𑀸 𑀘𑀭𑁂𑀬𑁆𑀬, 𑀯𑀺𑀳𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀭𑀸𑀚𑀸𑀯 𑀭𑀝𑁆𑀞𑀦𑁆𑀢𑀺 𑀭𑀝𑁆𑀞𑀁 𑀳𑀺𑀢𑁆𑀯𑀸 𑀕𑀢𑁄 𑀫𑀳𑀸𑀚𑀦𑀓𑀭𑀸𑀚𑀸 𑀯𑀺𑀬. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀯𑀺𑀚𑀺𑀢𑀪𑀽𑀫𑀺𑀧𑀤𑁂𑀲𑁄 𑀭𑀸𑀚𑀸 ‘‘𑀇𑀤𑀁 𑀭𑀚𑁆𑀚𑀁 𑀦𑀸𑀫 𑀫𑀳𑀦𑁆𑀢𑀁 𑀧𑀫𑀸𑀤𑀝𑁆𑀞𑀸𑀦𑀁, 𑀓𑀺𑀁 𑀫𑁂 𑀭𑀚𑁆𑀚𑁂𑀦 𑀓𑀸𑀭𑀺𑀢𑁂𑀦𑀸’’𑀢𑀺 𑀯𑀺𑀚𑀺𑀢𑀁 𑀭𑀝𑁆𑀞𑀁 𑀧𑀳𑀸𑀬 𑀏𑀓𑀓𑁄𑀯 𑀫𑀳𑀸𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀏𑀓𑀓𑁄𑀯 𑀘𑀭𑀢𑀺, 𑀏𑀯𑀁 𑀏𑀓𑀓𑁄𑀯 𑀘𑀭𑁂𑀬𑁆𑀬𑀸𑀢𑀺. 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄𑀢𑀺 𑀬𑀣𑀸 𑀘 ‘‘𑀅𑀳𑀁 𑀔𑁄 𑀆𑀓𑀺𑀡𑁆𑀡𑁄 𑀯𑀺𑀳𑀭𑀸𑀫𑀺 𑀳𑀢𑁆𑀣𑀻𑀳𑀺 𑀳𑀢𑁆𑀣𑀺𑀦𑀻𑀳𑀺 𑀳𑀢𑁆𑀣𑀺𑀓𑀴𑀪𑁂𑀳𑀺 𑀳𑀢𑁆𑀣𑀺𑀘𑁆𑀙𑀸𑀧𑁂𑀳𑀺, 𑀙𑀺𑀦𑁆𑀦𑀕𑁆𑀕𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀔𑀸𑀤𑀸𑀫𑀺, 𑀑𑀪𑀕𑁆𑀕𑁄𑀪𑀕𑁆𑀕𑀜𑁆𑀘 𑀫𑁂 𑀲𑀸𑀔𑀸𑀪𑀗𑁆𑀕𑀁 𑀔𑀸𑀤𑀦𑁆𑀢𑀺, 𑀆𑀯𑀺𑀮𑀸𑀦𑀺 𑀘 𑀧𑀸𑀦𑀻𑀬𑀸𑀦𑀺 𑀧𑀺𑀯𑀸𑀫𑀺, 𑀑𑀕𑀸𑀳𑀸 𑀘 𑀫𑁂 𑀉𑀢𑁆𑀢𑀺𑀡𑁆𑀡𑀲𑁆𑀲 𑀳𑀢𑁆𑀣𑀺𑀦𑀺𑀬𑁄 𑀓𑀸𑀬𑀁 𑀉𑀧𑀦𑀺𑀖𑀁𑀲𑀦𑁆𑀢𑀺𑀬𑁄 𑀕𑀘𑁆𑀙𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 𑀏𑀓𑀓𑁄𑀯 𑀕𑀡𑀫𑁆𑀳𑀸 𑀯𑀽𑀧𑀓𑀝𑁆𑀞𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺 (𑀫𑀳𑀸𑀯. 𑁪𑁬𑁭; 𑀉𑀤𑀸. 𑁩𑁫) 𑀏𑀯𑀁 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑁆𑀯𑀸 𑀕𑀫𑀦𑀢𑁄 𑀫𑀸𑀢𑀗𑁆𑀕𑁄𑀢𑀺 𑀮𑀤𑁆𑀥𑀦𑀸𑀫𑁄 𑀇𑀫𑀲𑁆𑀫𑀺𑀁 𑀅𑀭𑀜𑁆𑀜𑁂 𑀅𑀬𑀁 𑀳𑀢𑁆𑀣𑀺𑀦𑀸𑀕𑁄 𑀬𑀽𑀣𑀁 𑀧𑀳𑀸𑀬 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀏𑀓𑀓𑁄𑀯 𑀲𑀼𑀔𑀁 𑀘𑀭𑀢𑀺, 𑀏𑀯𑀫𑁆𑀧𑀺 𑀏𑀓𑁄𑀯 𑀘𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀏𑀓𑀲𑁆𑀲𑀸𑀢𑀺 𑀧𑀩𑁆𑀩𑀚𑀺𑀢𑀲𑁆𑀲 𑀳𑀺 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀏𑀓𑀻𑀪𑀸𑀯𑀸𑀪𑀺𑀭𑀢𑀲𑁆𑀲 𑀏𑀓𑀓𑀲𑁆𑀲𑁂𑀯 𑀘𑀭𑀺𑀢𑀁 𑀲𑁂𑀬𑁆𑀬𑁄. 𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸𑀢𑀺 𑀘𑀽𑀴𑀲𑀻𑀮𑀁 𑀫𑀚𑁆𑀛𑀺𑀫𑀲𑀻𑀮𑀁 𑀫𑀳𑀸𑀲𑀻𑀮𑀁 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀢𑁂𑀭𑀲 𑀥𑀼𑀢𑀗𑁆𑀕𑀕𑀼𑀡𑀸𑀦𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀙 𑀅𑀪𑀺𑀜𑁆𑀜𑀸 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀬𑀜𑁆𑀳𑀺 𑀲𑀳𑀸𑀬𑀢𑀸 𑀦𑀸𑀫. 𑀲𑀸 𑀩𑀸𑀮𑁂 𑀦𑀺𑀲𑁆𑀲𑀸𑀬 𑀅𑀥𑀺𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸. 𑀏𑀓𑁄𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀏𑀓𑀓𑁄𑀯 𑀘𑀭𑁂𑀬𑁆𑀬, 𑀅𑀧𑁆𑀧𑀫𑀢𑁆𑀢𑀓𑀸𑀦𑀺𑀧𑀺 𑀦 𑀘 𑀧𑀸𑀧𑀸𑀦𑀺 𑀓𑀬𑀺𑀭𑀸. 𑀬𑀣𑀸 𑀲𑁄 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀦𑀺𑀭𑀸𑀮𑀬𑁄 𑀇𑀫𑀲𑁆𑀫𑀺𑀁 𑀅𑀭𑀜𑁆𑀜𑁂 𑀫𑀸𑀢𑀗𑁆𑀕𑀦𑀸𑀕𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑁂 𑀲𑀼𑀔𑀁 𑀘𑀭𑀢𑀺, 𑀏𑀯𑀁 𑀏𑀓𑀓𑁄𑀯 𑀳𑀼𑀢𑁆𑀯𑀸 𑀘𑀭𑁂𑀬𑁆𑀬, 𑀅𑀧𑁆𑀧𑀫𑀢𑁆𑀢𑀓𑀸𑀦𑀺𑀧𑀺 𑀦 𑀘 𑀧𑀸𑀧𑀸𑀦𑀺 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀺 𑀧𑀢𑀺𑀭𑀽𑀧𑀁 𑀲𑀳𑀸𑀬𑀁 𑀅𑀮𑀪𑀦𑁆𑀢𑁂𑀳𑀺 𑀏𑀓𑀘𑀸𑀭𑀻𑀳𑁂𑀯 𑀪𑀯𑀺𑀢𑀩𑁆𑀩𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀣𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀤𑁂𑀲𑁂𑀲𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀧𑀜𑁆𑀘𑀲𑀢𑀸𑀧𑀺 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀲𑀫𑁆𑀩𑀳𑀼𑀮𑀪𑀺𑀓𑁆𑀔𑀼𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀫𑀸𑀭𑀯𑀢𑁆𑀣𑀼

𑀅𑀢𑁆𑀣𑀫𑁆𑀳𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀅𑀭𑀜𑁆𑀜𑀓𑀼𑀝𑀺𑀓𑀸𑀬𑀁 𑀯𑀺𑀳𑀭𑀦𑁆𑀢𑁄 𑀫𑀸𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀲𑁆𑀫𑀺𑀁 𑀓𑀺𑀭 𑀓𑀸𑀮𑁂 𑀭𑀸𑀚𑀸𑀦𑁄 𑀫𑀦𑀼𑀲𑁆𑀲𑁂 𑀧𑀻𑀴𑁂𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀺. 𑀅𑀣 𑀪𑀕𑀯𑀸 𑀅𑀥𑀫𑁆𑀫𑀺𑀓𑀭𑀸𑀚𑀽𑀦𑀁 𑀭𑀚𑁆𑀚𑁂 𑀤𑀡𑁆𑀟𑀓𑀭𑀡𑀧𑀻𑀴𑀺𑀢𑁂 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀓𑀸𑀭𑀼𑀜𑁆𑀜𑁂𑀦 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀓𑁆𑀓𑀸 𑀦𑀼 𑀔𑁄 𑀭𑀚𑁆𑀚𑀁 𑀓𑀸𑀭𑁂𑀢𑀼𑀁 𑀅𑀳𑀦𑀁 𑀅𑀖𑀸𑀢𑀬𑀁, 𑀅𑀚𑀺𑀦𑀁 𑀅𑀚𑀸𑀧𑀬𑀁, 𑀅𑀲𑁄𑀘𑀁 𑀅𑀲𑁄𑀘𑀸𑀧𑀬𑀁 𑀥𑀫𑁆𑀫𑁂𑀦𑀸’’𑀢𑀺, 𑀫𑀸𑀭𑁄 𑀧𑀸𑀧𑀺𑀫𑀸 𑀢𑀁 𑀪𑀕𑀯𑀢𑁄 𑀧𑀭𑀺𑀯𑀺𑀢𑀓𑁆𑀓𑀁 𑀜𑀢𑁆𑀯𑀸 ‘‘𑀲𑀫𑀡𑁄 𑀕𑁄𑀢𑀫𑁄 ‘𑀲𑀓𑁆𑀓𑀸 𑀦𑀼 𑀔𑁄 𑀭𑀚𑁆𑀚𑀁 𑀓𑀸𑀭𑁂𑀢𑀼’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺, 𑀇𑀤𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀭𑀚𑁆𑀚𑀜𑁆𑀘 𑀦𑀸𑀫𑁂𑀢𑀁 𑀧𑀫𑀸𑀤𑀝𑁆𑀞𑀸𑀦𑀁, 𑀢𑀁 𑀓𑀸𑀭𑁂𑀦𑁆𑀢𑁂 𑀲𑀓𑁆𑀓𑀸 𑀑𑀓𑀸𑀲𑀁 𑀮𑀪𑀺𑀢𑀼𑀁, 𑀕𑀘𑁆𑀙𑀸𑀫𑀺 𑀉𑀲𑁆𑀲𑀸𑀳𑀫𑀲𑁆𑀲 𑀚𑀦𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀓𑀸𑀭𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀭𑀚𑁆𑀚𑀁, 𑀓𑀸𑀭𑁂𑀢𑀼 𑀲𑀼𑀕𑀢𑁄 𑀭𑀚𑁆𑀚𑀁 𑀅𑀳𑀦𑀁 𑀅𑀖𑀸𑀢𑀬𑀁, 𑀅𑀚𑀺𑀦𑀁 𑀅𑀚𑀸𑀧𑀬𑀁, 𑀅𑀲𑁄𑀘𑀁 𑀅𑀲𑁄𑀘𑀸𑀧𑀬𑀁 𑀥𑀫𑁆𑀫𑁂𑀦𑀸’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀓𑀺𑀁 𑀧𑀦 𑀫𑁂 𑀢𑁆𑀯𑀁, 𑀧𑀸𑀧𑀺𑀫, 𑀧𑀲𑁆𑀲𑀲𑀺, 𑀬𑀁 𑀫𑀁 𑀢𑁆𑀯𑀁 𑀏𑀯𑀁 𑀯𑀤𑁂𑀲𑀻’’𑀢𑀺 𑀯𑀢𑁆𑀯𑀸 ‘‘𑀪𑀕𑀯𑀢𑀸 𑀔𑁄, 𑀪𑀦𑁆𑀢𑁂, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀲𑀼𑀪𑀸𑀯𑀺𑀢𑀸. 𑀆𑀓𑀗𑁆𑀔𑀫𑀸𑀦𑁄 𑀳𑀺 𑀪𑀕𑀯𑀸 𑀳𑀺𑀫𑀯𑀦𑁆𑀢𑀁 𑀧𑀩𑁆𑀩𑀢𑀭𑀸𑀚𑀁 ‘𑀲𑀼𑀯𑀡𑁆𑀡’𑀦𑁆𑀢𑀺 𑀅𑀥𑀺𑀫𑀼𑀘𑁆𑀘𑁂𑀬𑁆𑀬, 𑀢𑀜𑁆𑀘 𑀲𑀼𑀯𑀡𑁆𑀡𑀫𑁂𑀯 𑀅𑀲𑁆𑀲, 𑀅𑀳𑀫𑁆𑀧𑀺 𑀔𑁄 𑀥𑀦𑁂𑀦 𑀥𑀦𑀓𑀭𑀡𑀻𑀬𑀁 𑀓𑀭𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀣𑀸’’𑀢𑀺 𑀢𑁂𑀦 𑀯𑀼𑀢𑁆𑀢𑁂 𑁋

‘‘𑀧𑀩𑁆𑀩𑀢𑀲𑁆𑀲 𑀲𑀼𑀯𑀡𑁆𑀡𑀲𑁆𑀲, 𑀚𑀸𑀢𑀭𑀽𑀧𑀲𑁆𑀲 𑀓𑁂𑀯𑀮𑁄;

𑀤𑁆𑀯𑀺𑀢𑁆𑀢𑀸𑀯 𑀦𑀸𑀮𑀫𑁂𑀓𑀲𑁆𑀲, 𑀇𑀢𑀺 𑀯𑀺𑀤𑁆𑀯𑀸 𑀲𑀫𑀜𑁆𑀘𑀭𑁂.

‘‘𑀬𑁄 𑀤𑀼𑀓𑁆𑀔𑀫𑀤𑀓𑁆𑀔𑀺 𑀬𑀢𑁄𑀦𑀺𑀤𑀸𑀦𑀁,

𑀓𑀸𑀫𑁂𑀲𑀼 𑀲𑁄 𑀚𑀦𑁆𑀢𑀼 𑀓𑀣𑀁 𑀦𑀫𑁂𑀬𑁆𑀬;

𑀉𑀧𑀥𑀺𑀁 𑀯𑀺𑀤𑀺𑀢𑁆𑀯𑀸 𑀲𑀗𑁆𑀕𑁄𑀢𑀺 𑀮𑁄𑀓𑁂,

𑀢𑀲𑁆𑀲𑁂𑀯 𑀚𑀦𑁆𑀢𑀼 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂’’𑀢𑀺. (𑀲𑀁. 𑀦𑀺. 𑁧.𑁧𑁫𑁬) 𑁋

𑀇𑀫𑀸𑀳𑀺 𑀕𑀸𑀣𑀸𑀳𑀺 𑀲𑀁𑀯𑁂𑀚𑁂𑀢𑁆𑀯𑀸 ‘‘𑀅𑀜𑁆𑀜𑁄 𑀏𑀯 𑀔𑁄, 𑀧𑀸𑀧𑀺𑀫, 𑀢𑀯 𑀑𑀯𑀸𑀤𑁄, 𑀅𑀜𑁆𑀜𑁄 𑀫𑀫, 𑀢𑀬𑀸 𑀲𑀤𑁆𑀥𑀺𑀁 𑀥𑀫𑁆𑀫𑀲𑀁𑀲𑀦𑁆𑀤𑀦𑀸 𑀦𑀸𑀫 𑀦𑀢𑁆𑀣𑀺, 𑀅𑀳𑀜𑁆𑀳𑀺 𑀏𑀯𑀁 𑀑𑀯𑀤𑀸𑀫𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁩𑁧. ‘‘𑀅𑀢𑁆𑀣𑀫𑁆𑀳𑀺 𑀚𑀸𑀢𑀫𑁆𑀳𑀺 𑀲𑀼𑀔𑀸 𑀲𑀳𑀸𑀬𑀸,

𑀢𑀼𑀝𑁆𑀞𑀻 𑀲𑀼𑀔𑀸 𑀬𑀸 𑀇𑀢𑀭𑀻𑀢𑀭𑁂𑀦;

𑀧𑀼𑀜𑁆𑀜𑀁 𑀲𑀼𑀔𑀁 𑀚𑀻𑀯𑀺𑀢𑀲𑀗𑁆𑀔𑀬𑀫𑁆𑀳𑀺,

𑀲𑀩𑁆𑀩𑀲𑁆𑀲 𑀤𑀼𑀓𑁆𑀔𑀲𑁆𑀲 𑀲𑀼𑀔𑀁 𑀧𑀳𑀸𑀦𑀁.

𑁩𑁩𑁨. ‘‘𑀲𑀼𑀔𑀸 𑀫𑀢𑁆𑀢𑁂𑀬𑁆𑀬𑀢𑀸 𑀮𑁄𑀓𑁂,

𑀅𑀣𑁄 𑀧𑁂𑀢𑁆𑀢𑁂𑀬𑁆𑀬𑀢𑀸 𑀲𑀼𑀔𑀸;

𑀲𑀼𑀔𑀸 𑀲𑀸𑀫𑀜𑁆𑀜𑀢𑀸 𑀮𑁄𑀓𑁂,

𑀅𑀣𑁄 𑀩𑁆𑀭𑀳𑁆𑀫𑀜𑁆𑀜𑀢𑀸 𑀲𑀼𑀔𑀸.

𑁩𑁩𑁩. ‘‘𑀲𑀼𑀔𑀁 𑀬𑀸𑀯 𑀚𑀭𑀸𑀲𑀻𑀮𑀁, 𑀲𑀼𑀔𑀸 𑀲𑀤𑁆𑀥𑀸 𑀧𑀢𑀺𑀝𑁆𑀞𑀺𑀢𑀸;

𑀲𑀼𑀔𑁄 𑀧𑀜𑁆𑀜𑀸𑀬 𑀧𑀝𑀺𑀮𑀸𑀪𑁄, 𑀧𑀸𑀧𑀸𑀦𑀁 𑀅𑀓𑀭𑀡𑀁 𑀲𑀼𑀔’’𑀦𑁆𑀢𑀺.

𑀢𑀢𑁆𑀣 𑀅𑀢𑁆𑀣𑀫𑁆𑀳𑀻𑀢𑀺 𑀧𑀩𑁆𑀩𑀚𑀺𑀢𑀲𑁆𑀲𑀸𑀧𑀺 𑀳𑀺 𑀘𑀻𑀯𑀭𑀓𑀭𑀡𑀸𑀤𑀺𑀓𑁂 𑀯𑀸 𑀅𑀥𑀺𑀓𑀭𑀡𑀯𑀽𑀧𑀲𑀫𑀸𑀤𑀺𑀓𑁂 𑀯𑀸 𑀕𑀺𑀳𑀺𑀦𑁄𑀧𑀺 𑀓𑀲𑀺𑀓𑀫𑁆𑀫𑀸𑀤𑀺𑀓𑁂 𑀯𑀸 𑀩𑀮𑀯𑀧𑀓𑁆𑀔𑀲𑀦𑁆𑀦𑀺𑀲𑁆𑀲𑀺𑀢𑁂𑀳𑀺 𑀅𑀪𑀺𑀪𑀯𑀦𑀸𑀤𑀺𑀓𑁂 𑀯𑀸 𑀓𑀺𑀘𑁆𑀘𑁂 𑀉𑀧𑁆𑀧𑀦𑁆𑀦𑁂 𑀬𑁂 𑀢𑀁 𑀓𑀺𑀘𑁆𑀘𑀁 𑀦𑀺𑀧𑁆𑀨𑀸𑀤𑁂𑀢𑀼𑀁 𑀯𑀸 𑀯𑀽𑀧𑀲𑀫𑁂𑀢𑀼𑀁 𑀯𑀸 𑀲𑀓𑁆𑀓𑁄𑀦𑁆𑀢𑀺, 𑀏𑀯𑀭𑀽𑀧𑀸 𑀲𑀼𑀔𑀸 𑀲𑀳𑀸𑀬𑀸𑀢𑀺 𑀅𑀢𑁆𑀣𑁄. 𑀢𑀼𑀝𑁆𑀞𑀻 𑀲𑀼𑀔𑀸𑀢𑀺 𑀬𑀲𑁆𑀫𑀸 𑀧𑀦 𑀕𑀺𑀳𑀺𑀦𑁄𑀧𑀺 𑀲𑀓𑁂𑀦 𑀅𑀲𑀦𑁆𑀢𑀼𑀝𑁆𑀞𑀸 𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀻𑀦𑀺 𑀆𑀭𑀪𑀦𑁆𑀢𑀺, 𑀧𑀩𑁆𑀩𑀚𑀺𑀢𑀸𑀧𑀺 𑀦𑀸𑀦𑀧𑁆𑀧𑀓𑀸𑀭𑀁 𑀅𑀦𑁂𑀲𑀦𑀁. 𑀇𑀢𑀺 𑀢𑁂 𑀲𑀼𑀔𑀁 𑀦 𑀯𑀺𑀦𑁆𑀤𑀦𑁆𑀢𑀺𑀬𑁂𑀯. 𑀢𑀲𑁆𑀫𑀸 𑀬𑀸 𑀇𑀢𑀭𑀻𑀢𑀭𑁂𑀦 𑀧𑀭𑀺𑀢𑁆𑀢𑁂𑀦 𑀯𑀸 𑀯𑀺𑀧𑀼𑀮𑁂𑀦 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀲𑀦𑁆𑀢𑀼𑀝𑁆𑀞𑀺, 𑀅𑀬𑀫𑁂𑀯 𑀲𑀼𑀔𑀸𑀢𑀺 𑀅𑀢𑁆𑀣𑁄. 𑀧𑀼𑀜𑁆𑀜𑀦𑁆𑀢𑀺 𑀫𑀭𑀡𑀓𑀸𑀮𑁂 𑀧𑀦 𑀬𑀣𑀸𑀚𑁆𑀛𑀸𑀲𑀬𑁂𑀦 𑀧𑀢𑁆𑀣𑀭𑀺𑀢𑁆𑀯𑀸 𑀓𑀢𑀧𑀼𑀜𑁆𑀜𑀓𑀫𑁆𑀫𑀫𑁂𑀯 𑀲𑀼𑀔𑀁. 𑀲𑀩𑁆𑀩𑀲𑁆𑀲𑀸𑀢𑀺 𑀲𑀓𑀮𑀲𑁆𑀲𑀧𑀺 𑀧𑀦 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀫𑁂𑀯 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀼𑀔𑀁 𑀦𑀸𑀫.

𑀫𑀢𑁆𑀢𑁂𑀬𑁆𑀬𑀢𑀸𑀢𑀺 𑀫𑀸𑀢𑀭𑀺 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺. 𑀧𑁂𑀢𑁆𑀢𑁂𑀬𑁆𑀬𑀢𑀸𑀢𑀺 𑀧𑀺𑀢𑀭𑀺 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺. 𑀉𑀪𑀬𑁂𑀦𑀧𑀺 𑀫𑀸𑀢𑀸𑀧𑀺𑀢𑀽𑀦𑀁 𑀉𑀧𑀝𑁆𑀞𑀸𑀦𑀫𑁂𑀯 𑀓𑀣𑀺𑀢𑀁. 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀧𑀼𑀢𑁆𑀢𑀸𑀦𑀁 𑀅𑀦𑀼𑀧𑀝𑁆𑀞𑀳𑀦𑀪𑀸𑀯𑀁 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀪𑀽𑀫𑀺𑀬𑀁 𑀯𑀸 𑀦𑀺𑀤𑀳𑀦𑁆𑀢𑀺, 𑀧𑀭𑁂𑀲𑀁 𑀯𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, ‘‘𑀫𑀸𑀢𑀸𑀧𑀺𑀢𑀭𑁄 𑀦 𑀉𑀧𑀝𑁆𑀞𑀳𑀦𑁆𑀢𑀻’’𑀢𑀺 𑀦𑁂𑀲𑀁 𑀦𑀺𑀦𑁆𑀤𑀸𑀧𑀺 𑀯𑀟𑁆𑀠𑀢𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀕𑀽𑀣𑀦𑀺𑀭𑀬𑁂𑀧𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀬𑁂 𑀧𑀦 𑀫𑀸𑀢𑀸𑀧𑀺𑀢𑀭𑁄 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀦𑁆𑀢𑀺, 𑀢𑁂 𑀢𑁂𑀲𑀁 𑀲𑀦𑁆𑀢𑀓𑀁 𑀥𑀦𑀫𑁆𑀧𑀺 𑀧𑀸𑀧𑀼𑀡𑀦𑁆𑀢𑀺, 𑀧𑀲𑀁𑀲𑀫𑁆𑀧𑀺 𑀮𑀪𑀦𑁆𑀢𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀉𑀪𑀬𑀫𑁆𑀧𑁂𑀢𑀁 𑀲𑀼𑀔𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀸𑀫𑀜𑁆𑀜𑀢𑀸𑀢𑀺 𑀧𑀩𑁆𑀩𑀚𑀺𑀢𑁂𑀲𑀼 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺. 𑀩𑁆𑀭𑀳𑁆𑀫𑀜𑁆𑀜𑀢𑀸𑀢𑀺 𑀩𑀸𑀳𑀺𑀢𑀧𑀸𑀧𑁂𑀲𑀼 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑁂𑀲𑀼 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺𑀬𑁂𑀯. 𑀉𑀪𑀬𑁂𑀦𑀧𑀺 𑀢𑁂𑀲𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀝𑀺𑀚𑀕𑁆𑀕𑀦𑀪𑀸𑀯𑁄 𑀓𑀣𑀺𑀢𑁄, 𑀇𑀤𑀫𑁆𑀧𑀺 𑀮𑁄𑀓𑁂 𑀲𑀼𑀔𑀁 𑀦𑀸𑀫 𑀓𑀣𑀺𑀓𑀁.