𑁯. 𑀏𑀓𑀯𑀺𑀳𑀸𑀭𑀺𑀢𑁆𑀣𑁂𑀭𑀯𑀢𑁆𑀣𑀼

𑀏𑀓𑀸𑀲𑀦𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀯𑀺𑀳𑀸𑀭𑀺𑀢𑁆𑀣𑁂𑀭𑀁 𑀦𑀸𑀫 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀣𑁂𑀭𑁄 𑀏𑀓𑀓𑁄𑀯 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑀓𑁄𑀯 𑀦𑀺𑀲𑀻𑀤𑀢𑀺, 𑀏𑀓𑀓𑁄𑀯 𑀘𑀗𑁆𑀓𑀫𑀢𑀺, 𑀏𑀓𑀓𑁄𑀯 𑀢𑀺𑀝𑁆𑀞𑀢𑀻𑀢𑀺 𑀘𑀢𑀼𑀧𑀭𑀺𑀲𑀦𑁆𑀢𑀭𑁂 𑀧𑀸𑀓𑀝𑁄 𑀅𑀳𑁄𑀲𑀺. 𑀅𑀣 𑀦𑀁 𑀪𑀺𑀓𑁆𑀔𑀽, ‘‘𑀪𑀦𑁆𑀢𑁂, 𑀏𑀯𑀭𑀽𑀧𑁄 𑀦𑀸𑀫𑀸𑀬𑀁 𑀣𑁂𑀭𑁄’’𑀢𑀺 𑀢𑀣𑀸𑀕𑀢𑀲𑁆𑀲𑀸𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀢𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 ‘‘𑀪𑀺𑀓𑁆𑀔𑀼𑀦𑀸 𑀦𑀸𑀫 𑀧𑀯𑀺𑀯𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀺𑀯𑁂𑀓𑁂 𑀆𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁦𑁫. ‘‘𑀏𑀓𑀸𑀲𑀦𑀁 𑀏𑀓𑀲𑁂𑀬𑁆𑀬𑀁, 𑀏𑀓𑁄 𑀘𑀭𑀫𑀢𑀦𑁆𑀤𑀺𑀢𑁄;

𑀏𑀓𑁄 𑀤𑀫𑀬𑀫𑀢𑁆𑀢𑀸𑀦𑀁, 𑀯𑀦𑀦𑁆𑀢𑁂 𑀭𑀫𑀺𑀢𑁄 𑀲𑀺𑀬𑀸’’𑀢𑀺.

𑀢𑀢𑁆𑀣 𑀏𑀓𑀸𑀲𑀦𑀁 𑀏𑀓𑀲𑁂𑀬𑁆𑀬𑀦𑁆𑀢𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀫𑀚𑁆𑀛𑁂𑀧𑀺 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀚𑀳𑀺𑀢𑁆𑀯𑀸 𑀢𑁂𑀦𑁂𑀯 𑀫𑀦𑀲𑀺𑀓𑀸𑀭𑁂𑀦 𑀦𑀺𑀲𑀺𑀦𑁆𑀦𑀲𑁆𑀲 𑀆𑀲𑀦𑀁 𑀏𑀓𑀸𑀲𑀦𑀁 𑀦𑀸𑀫. 𑀮𑁄𑀳𑀧𑀸𑀲𑀸𑀤𑀲𑀤𑀺𑀲𑁂𑀧𑀺 𑀘 𑀧𑀸𑀲𑀸𑀤𑁂 𑀪𑀺𑀓𑁆𑀔𑀼𑀲𑀳𑀲𑁆𑀲𑀫𑀚𑁆𑀛𑁂𑀧𑀺 𑀧𑀜𑁆𑀜𑀢𑁆𑀢𑁂 𑀯𑀺𑀘𑀺𑀢𑁆𑀭𑀧𑀘𑁆𑀘𑀢𑁆𑀣𑀭𑀡𑀽𑀧𑀥𑀸𑀦𑁂 𑀫𑀳𑀸𑀭𑀳𑁂 𑀲𑀬𑀦𑁂 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁂𑀦 𑀦𑀺𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀬𑁆𑀬𑀸 𑀏𑀓𑀲𑁂𑀬𑁆𑀬𑀸 𑀦𑀸𑀫. 𑀏𑀯𑀭𑀽𑀧𑀁 𑀏𑀓𑀸𑀲𑀦𑀜𑁆𑀘 𑀏𑀓𑀲𑁂𑀬𑁆𑀬𑀜𑁆𑀘 𑀪𑀚𑁂𑀣𑀸𑀢𑀺 𑀅𑀢𑁆𑀣𑁄. 𑀅𑀢𑀦𑁆𑀤𑀺𑀢𑁄𑀢𑀺 𑀚𑀗𑁆𑀖𑀩𑀮𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀓𑀧𑁆𑀧𑀦𑁂𑀦 𑀅𑀓𑀼𑀲𑀻𑀢𑁄 𑀳𑀼𑀢𑁆𑀯𑀸 𑀲𑀩𑁆𑀩𑀻𑀭𑀺𑀬𑀸𑀧𑀣𑁂𑀲𑀼 𑀏𑀓𑀓𑁄𑀯 𑀘𑀭𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀏𑀓𑁄 𑀤𑀫𑀬𑀦𑁆𑀢𑀺 𑀭𑀢𑁆𑀢𑀺𑀝𑁆𑀞𑀸𑀦𑀸𑀤𑀻𑀲𑀼 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀫𑀕𑁆𑀕𑀨𑀮𑀸𑀥𑀺𑀕𑀫𑀯𑀲𑁂𑀦 𑀏𑀓𑁄𑀯 𑀳𑀼𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀫𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀦𑀦𑁆𑀢𑁂 𑀭𑀫𑀺𑀢𑁄 𑀲𑀺𑀬𑀸𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀤𑀫𑁂𑀦𑁆𑀢𑁄 𑀇𑀢𑁆𑀣𑀺𑀧𑀼𑀭𑀺𑀲𑀲𑀤𑁆𑀤𑀸𑀤𑀻𑀳𑀺 𑀧𑀯𑀺𑀯𑀺𑀢𑁆𑀢𑁂 𑀯𑀦𑀦𑁆𑀢𑁂𑀬𑁂𑀯 𑀅𑀪𑀺𑀭𑀫𑀺𑀢𑁄 𑀪𑀯𑁂𑀬𑁆𑀬. 𑀦 𑀳𑀺 𑀲𑀓𑁆𑀓𑀸 𑀆𑀓𑀺𑀡𑁆𑀡𑀯𑀺𑀳𑀸𑀭𑀺𑀦𑀸 𑀏𑀯𑀁 𑀅𑀢𑁆𑀢𑀸𑀦𑀁 𑀤𑀫𑁂𑀢𑀼𑀦𑁆𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀫𑀳𑀸𑀚𑀦𑁄 𑀏𑀓𑀯𑀺𑀳𑀸𑀭𑀺𑀓𑀫𑁂𑀯 𑀧𑀢𑁆𑀣𑁂𑀲𑀻𑀢𑀺.

𑀏𑀓𑀯𑀺𑀳𑀸𑀭𑀺𑀢𑁆𑀣𑁂𑀭𑀯𑀢𑁆𑀣𑀼 𑀦𑀯𑀫𑀁.

𑀧𑀓𑀺𑀡𑁆𑀡𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀯𑀻𑀲𑀢𑀺𑀫𑁄 𑀯𑀕𑁆𑀕𑁄.