𑁨𑁨. 𑀦𑀺𑀭𑀬𑀯𑀕𑁆𑀕𑁄

𑁧. 𑀲𑀼𑀦𑁆𑀤𑀭𑀻𑀧𑀭𑀺𑀩𑁆𑀩𑀸𑀚𑀺𑀓𑀸𑀯𑀢𑁆𑀣𑀼

𑀅𑀪𑀽𑀢𑀯𑀸𑀤𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀼𑀦𑁆𑀤𑀭𑀺𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀓𑁆𑀓𑀢𑁄 𑀳𑁄𑀢𑀺 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄’’𑀢𑀺 𑀯𑀢𑁆𑀣𑀼 𑀯𑀺𑀢𑁆𑀣𑀸𑀭𑀢𑁄 𑀉𑀤𑀸𑀦𑁂 (𑀉𑀤𑀸. 𑁩𑁮) 𑀆𑀕𑀢𑀫𑁂𑀯. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀪𑀕𑀯𑀢𑁄 𑀓𑀺𑀭 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀧𑀜𑁆𑀘𑀦𑁆𑀦𑀁 𑀫𑀳𑀸𑀦𑀤𑀻𑀦𑀁 𑀫𑀳𑁄𑀖𑀲𑀤𑀺𑀲𑁂 𑀮𑀸𑀪𑀲𑀓𑁆𑀓𑀸𑀭𑁂 𑀉𑀧𑁆𑀧𑀦𑁆𑀦𑁂 𑀳𑀢𑀮𑀸𑀪𑀲𑀓𑁆𑀓𑀸𑀭𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀲𑀽𑀭𑀺𑀬𑀼𑀕𑁆𑀕𑀫𑀦𑀓𑀸𑀮𑁂 𑀔𑀚𑁆𑀚𑁄𑀧𑀦𑀓𑀸 𑀯𑀺𑀬 𑀦𑀺𑀧𑁆𑀧𑀪𑀸 𑀳𑀼𑀢𑁆𑀯𑀸 𑀏𑀓𑀢𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀫𑀬𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀢𑀮𑀸𑀪𑀲𑀓𑁆𑀓𑀸𑀭𑀸, 𑀦 𑀦𑁄 𑀓𑁄𑀘𑀺 𑀅𑀢𑁆𑀣𑀺𑀪𑀸𑀯𑀫𑁆𑀧𑀺 𑀚𑀸𑀦𑀸𑀢𑀺, 𑀓𑁂𑀦 𑀦𑀼 𑀔𑁄 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀯𑀡𑁆𑀡𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀮𑀸𑀪𑀲𑀓𑁆𑀓𑀸𑀭𑀫𑀲𑁆𑀲 𑀅𑀦𑁆𑀢𑀭𑀥𑀸𑀧𑁂𑀬𑁆𑀬𑀸𑀫𑀸’’𑀢𑀺. 𑀅𑀣 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀦𑁆𑀤𑀭𑀺𑀬𑀸 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀲𑀓𑁆𑀓𑀼𑀡𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀏𑀓𑀤𑀺𑀯𑀲𑀁 𑀲𑀼𑀦𑁆𑀤𑀭𑀺𑀁 𑀢𑀺𑀢𑁆𑀣𑀺𑀬𑀸𑀭𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀁 𑀦𑀸𑀮𑀧𑀺𑀁𑀲𑀼. 𑀲𑀸 𑀧𑀼𑀦𑀧𑁆𑀧𑀼𑀦𑀁 𑀲𑀮𑁆𑀮𑀧𑀦𑁆𑀢𑀻𑀧𑀺 𑀧𑀝𑀺𑀯𑀘𑀦𑀁 𑀅𑀮𑀪𑀺𑀢𑁆𑀯𑀸 ‘‘𑀅𑀧𑀺 𑀧𑀦𑀬𑁆𑀬𑀸, 𑀓𑁂𑀦𑀘𑀺 𑀯𑀺𑀳𑁂𑀞𑀺𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀓𑀺𑀁, 𑀪𑀕𑀺𑀦𑀺, 𑀲𑀫𑀡𑀁 𑀕𑁄𑀢𑀫𑀁 𑀅𑀫𑁆𑀳𑁂 𑀯𑀺𑀳𑁂𑀞𑁂𑀢𑁆𑀯𑀸 𑀳𑀢𑀮𑀸𑀪𑀲𑀓𑁆𑀓𑀸𑀭𑁂 𑀓𑀢𑁆𑀯𑀸 𑀯𑀺𑀘𑀭𑀦𑁆𑀢𑀁 𑀦 𑀧𑀲𑁆𑀲𑀲𑀻’’𑀢𑀺? ‘‘𑀫𑀬𑀸 𑀏𑀢𑁆𑀣 𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀢𑁆𑀯𑀁 𑀔𑁄𑀲𑀺, 𑀪𑀕𑀺𑀦𑀺, 𑀅𑀪𑀺𑀭𑀽𑀧𑀸 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀬𑀲𑀁 𑀆𑀭𑁄𑀧𑁂𑀢𑁆𑀯𑀸 𑀫𑀳𑀸𑀚𑀦𑀁 𑀢𑀯 𑀓𑀣𑀁 𑀕𑀸𑀳𑀸𑀧𑁂𑀢𑁆𑀯𑀸 𑀳𑀢𑀮𑀸𑀪𑀲𑀓𑁆𑀓𑀸𑀭𑀁 𑀓𑀭𑁄𑀳𑀻’’𑀢𑀺. 𑀲𑀸 𑀢𑀁 𑀲𑀼𑀢𑁆𑀯𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀓𑁆𑀓𑀦𑁆𑀢𑀸 𑀢𑀢𑁄 𑀧𑀝𑁆𑀞𑀸𑀬 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀓𑀧𑁆𑀧𑀽𑀭𑀓𑀝𑀼𑀓𑀨𑀮𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀲𑀸𑀬𑀁 𑀫𑀳𑀸𑀚𑀦𑀲𑁆𑀲 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀦𑀓𑀸𑀮𑁂 𑀚𑁂𑀢𑀯𑀦𑀸𑀪𑀺𑀫𑀼𑀔𑀻 𑀕𑀘𑁆𑀙𑀢𑀺, ‘‘𑀓𑀳𑀁 𑀕𑀘𑁆𑀙𑀲𑀻’’𑀢𑀺 𑀘 𑀧𑀼𑀝𑁆𑀞𑀸 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀺, 𑀅𑀳𑀜𑁆𑀳𑀺 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀢𑀺𑀢𑁆𑀣𑀺𑀬𑀸𑀭𑀸𑀫𑁂 𑀯𑀲𑀺𑀢𑁆𑀯𑀸 𑀧𑀸𑀢𑁄𑀯 𑀚𑁂𑀢𑀯𑀦𑀫𑀕𑁆𑀕𑀁 𑀑𑀢𑀭𑀺𑀢𑁆𑀯𑀸 𑀦𑀕𑀭𑀸𑀪𑀺𑀫𑀼𑀔𑀻 𑀆𑀕𑀘𑁆𑀙𑀦𑁆𑀢𑀻 ‘‘𑀓𑀺𑀁, 𑀲𑀼𑀦𑁆𑀤𑀭𑀺, 𑀓𑀳𑀁 𑀕𑀢𑀸𑀲𑀻’’𑀢𑀺 𑀧𑀼𑀝𑁆𑀞𑀸 ‘‘𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀺𑀢𑁆𑀯𑀸 𑀢𑀁 𑀓𑀺𑀮𑁂𑀲𑀭𑀢𑀺𑀬𑀸 𑀭𑀫𑀸𑀧𑁂𑀢𑁆𑀯𑀸 𑀆𑀕𑀢𑀸𑀫𑁆𑀳𑀻’’𑀢𑀺 𑀯𑀤𑀢𑀺.

𑀅𑀣 𑀢𑁂 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀥𑀼𑀢𑁆𑀢𑀸𑀦𑀁 𑀓𑀳𑀸𑀧𑀡𑁂 𑀤𑀢𑁆𑀯𑀸 ‘‘𑀕𑀘𑁆𑀙𑀣 𑀲𑀼𑀦𑁆𑀤𑀭𑀺𑀁 𑀫𑀸𑀭𑁂𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀕𑀦𑁆𑀥𑀓𑀼𑀝𑀺𑀬𑀸 𑀲𑀫𑀻𑀧𑁂 𑀫𑀸𑀮𑀸𑀓𑀘𑀯𑀭𑀦𑁆𑀢𑀭𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀣𑀸’’𑀢𑀺 𑀯𑀤𑀺𑀁𑀲𑀼. 𑀢𑁂 𑀢𑀣𑀸 𑀅𑀓𑀁𑀲𑀼. 𑀢𑀢𑁄 𑀢𑀺𑀢𑁆𑀣𑀺𑀬𑀸 ‘‘𑀲𑀼𑀦𑁆𑀤𑀭𑀺𑀁 𑀦 𑀧𑀲𑁆𑀲𑀸𑀫𑀸’’𑀢𑀺 𑀓𑁄𑀮𑀸𑀳𑀮𑀁 𑀓𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 ‘‘𑀓𑀳𑀁 𑀯𑁄 𑀆𑀲𑀗𑁆𑀓𑀸’’𑀢𑀺 𑀯𑀼𑀢𑁆𑀢𑀸 ‘‘𑀇𑀫𑁂𑀲𑀼 𑀤𑀺𑀯𑀲𑁂𑀲𑀼 𑀚𑁂𑀢𑀯𑀦𑁂 𑀯𑀲𑀢𑀺, 𑀢𑀢𑁆𑀣𑀲𑁆𑀲𑀸 𑀧𑀯𑀢𑁆𑀢𑀺𑀁 𑀦 𑀚𑀸𑀦𑀸𑀫𑀸’’𑀢𑀺 𑀯𑀢𑁆𑀯𑀸 ‘‘𑀢𑁂𑀦 𑀳𑀺 𑀕𑀘𑁆𑀙𑀣, 𑀦𑀁 𑀯𑀺𑀘𑀺𑀦𑀣𑀸’’𑀢𑀺 𑀭𑀜𑁆𑀜𑀸 𑀅𑀦𑀼𑀜𑁆𑀜𑀸𑀢𑀸 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑁂 𑀕𑀳𑁂𑀢𑁆𑀯𑀸 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀯𑀺𑀘𑀺𑀦𑀦𑁆𑀢𑀸 𑀫𑀸𑀮𑀸𑀓𑀘𑀯𑀭𑀦𑁆𑀢𑀭𑁂 𑀢𑀁 𑀤𑀺𑀲𑁆𑀯𑀸 𑀫𑀜𑁆𑀘𑀓𑀁 𑀆𑀭𑁄𑀧𑁂𑀢𑁆𑀯𑀸 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸 ‘𑀲𑀢𑁆𑀣𑀸𑀭𑀸 𑀓𑀢𑀁 𑀧𑀸𑀧𑀓𑀫𑁆𑀫𑀁 𑀧𑀝𑀺𑀘𑁆𑀙𑀸𑀤𑁂𑀲𑁆𑀲𑀸𑀫𑀸’𑀢𑀺 𑀲𑀼𑀦𑁆𑀤𑀭𑀺𑀁 𑀫𑀸𑀭𑁂𑀢𑁆𑀯𑀸 𑀫𑀸𑀮𑀸𑀓𑀘𑀯𑀭𑀦𑁆𑀢𑀭𑁂 𑀦𑀺𑀓𑁆𑀔𑀺𑀧𑀺𑀁𑀲𑀽’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑀬𑀺𑀁𑀲𑀼. 𑀭𑀸𑀚𑀸 ‘‘𑀢𑁂𑀦 𑀳𑀺 𑀕𑀘𑁆𑀙𑀣, 𑀦𑀕𑀭𑀁 𑀆𑀳𑀺𑀡𑁆𑀟𑀣𑀸’’𑀢𑀺 𑀆𑀳. 𑀢𑁂 𑀦𑀕𑀭𑀯𑀻𑀣𑀻𑀲𑀼 ‘‘𑀧𑀲𑁆𑀲𑀣 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀧𑀼𑀦 𑀭𑀜𑁆𑀜𑁄 𑀦𑀺𑀯𑁂𑀲𑀦𑀤𑁆𑀯𑀸𑀭𑀁 𑀆𑀕𑀫𑀺𑀁𑀲𑀼. 𑀭𑀸𑀚𑀸 𑀲𑀼𑀦𑁆𑀤𑀭𑀺𑀬𑀸 𑀲𑀭𑀻𑀭𑀁 𑀆𑀫𑀓𑀲𑀼𑀲𑀸𑀦𑁂 𑀅𑀝𑁆𑀝𑀓𑀁 𑀆𑀭𑁄𑀧𑁂𑀢𑁆𑀯𑀸 𑀭𑀓𑁆𑀔𑀸𑀧𑁂𑀲𑀺. 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀞𑀧𑁂𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁂 𑀲𑁂𑀲𑀸 𑀬𑁂𑀪𑀼𑀬𑁆𑀬𑁂𑀦 ‘‘𑀧𑀲𑁆𑀲𑀣 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑁂𑀧𑀺 𑀩𑀳𑀺𑀦𑀕𑀭𑁂𑀧𑀺 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀪𑀺𑀓𑁆𑀔𑀽 𑀢𑀁 𑀧𑀯𑀢𑁆𑀢𑀺𑀁 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀢𑁂𑀦 𑀳𑀺 𑀢𑀼𑀫𑁆𑀳𑁂𑀧𑀺 𑀢𑁂 𑀫𑀦𑀼𑀲𑁆𑀲𑁂 𑀏𑀯𑀁 𑀧𑀝𑀺𑀘𑁄𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁦𑁬. ‘‘𑀅𑀪𑀽𑀢𑀯𑀸𑀤𑀻 𑀦𑀺𑀭𑀬𑀁 𑀉𑀧𑁂𑀢𑀺,

𑀬𑁄 𑀯𑀸𑀧𑀺 𑀓𑀢𑁆𑀯𑀸 𑀦 𑀓𑀭𑁄𑀫𑀺𑀘𑀸𑀳;

𑀉𑀪𑁄𑀧𑀺 𑀢𑁂 𑀧𑁂𑀘𑁆𑀘 𑀲𑀫𑀸 𑀪𑀯𑀦𑁆𑀢𑀺,

𑀦𑀺𑀳𑀻𑀦𑀓𑀫𑁆𑀫𑀸 𑀫𑀦𑀼𑀚𑀸 𑀧𑀭𑀢𑁆𑀣𑀸’’𑀢𑀺.

𑀢𑀢𑁆𑀣 𑀅𑀪𑀽𑀢𑀯𑀸𑀤𑀻𑀢𑀺 𑀧𑀭𑀲𑁆𑀲 𑀤𑁄𑀲𑀁 𑀅𑀤𑀺𑀲𑁆𑀯𑀸𑀯 𑀫𑀼𑀲𑀸𑀯𑀸𑀤𑀁 𑀓𑀢𑁆𑀯𑀸 𑀢𑀼𑀘𑁆𑀙𑁂𑀦 𑀧𑀭𑀁 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑁄. 𑀓𑀢𑁆𑀯𑀸𑀢𑀺 𑀬𑁄 𑀯𑀸 𑀧𑀦 𑀧𑀸𑀧𑀓𑀫𑁆𑀫𑀁 𑀓𑀢𑁆𑀯𑀸 ‘‘𑀦𑀸𑀳𑀁 𑀏𑀢𑀁 𑀓𑀭𑁄𑀫𑀻’’𑀢𑀺 𑀆𑀳. 𑀧𑁂𑀘𑁆𑀘 𑀲𑀫𑀸 𑀪𑀯𑀦𑁆𑀢𑀻𑀢𑀺 𑀢𑁂 𑀉𑀪𑁄𑀧𑀺 𑀚𑀦𑀸 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸 𑀦𑀺𑀭𑀬𑀁 𑀉𑀧𑀕𑀫𑀦𑁂𑀦 𑀕𑀢𑀺𑀬𑀸 𑀲𑀫𑀸 𑀪𑀯𑀦𑁆𑀢𑀺. 𑀕𑀢𑀺𑀬𑁂𑀯 𑀦𑁂𑀲𑀁 𑀧𑀭𑀺𑀘𑁆𑀙𑀺𑀦𑁆𑀦𑀸, 𑀆𑀬𑀼 𑀧𑀦 𑀦𑁂𑀲𑀁 𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀩𑀳𑀼𑀓𑀜𑁆𑀳𑀺 𑀧𑀸𑀧𑀓𑀫𑁆𑀫𑀁 𑀓𑀢𑁆𑀯𑀸 𑀘𑀺𑀭𑀁 𑀦𑀺𑀭𑀬𑁂 𑀧𑀘𑁆𑀘𑀦𑁆𑀢𑀺, 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀓𑀫𑁂𑀯 𑀓𑀸𑀮𑀁. 𑀬𑀲𑁆𑀫𑀸 𑀧𑀦 𑀦𑁂𑀲𑀁 𑀉𑀪𑀺𑀦𑁆𑀦𑀫𑁆𑀧𑀺 𑀮𑀸𑀫𑀓𑀫𑁂𑀯 𑀓𑀫𑁆𑀫𑀁, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀦𑀺𑀳𑀻𑀦𑀓𑀫𑁆𑀫𑀸 𑀫𑀦𑀼𑀚𑀸 𑀧𑀭𑀢𑁆𑀣𑀸’’𑀢𑀺. 𑀧𑀭𑀢𑁆𑀣𑀸𑀢𑀺 𑀇𑀫𑀲𑁆𑀲 𑀧𑀦 𑀧𑀤𑀲𑁆𑀲 𑀧𑀼𑀭𑀢𑁄 𑀧𑁂𑀘𑁆𑀘𑀧𑀤𑁂𑀦 𑀲𑀫𑁆𑀩𑀦𑁆𑀥𑁄. 𑀧𑁂𑀘𑁆𑀘 𑀧𑀭𑀢𑁆𑀣 𑀇𑀢𑁄 𑀕𑀦𑁆𑀢𑁆𑀯𑀸 𑀢𑁂 𑀦𑀺𑀳𑀻𑀦𑀓𑀫𑁆𑀫𑀸 𑀧𑀭𑀮𑁄𑀓𑁂 𑀲𑀫𑀸 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀭𑀸𑀚𑀸 ‘‘𑀲𑀼𑀦𑁆𑀤𑀭𑀺𑀬𑀸 𑀅𑀜𑁆𑀜𑁂𑀳𑀺 𑀫𑀸𑀭𑀺𑀢𑀪𑀸𑀯𑀁 𑀚𑀸𑀦𑀸𑀣𑀸’’𑀢𑀺 𑀧𑀼𑀭𑀺𑀲𑁂 𑀉𑀬𑁆𑀬𑁄𑀚𑁂𑀲𑀺. 𑀅𑀣 𑀢𑁂 𑀥𑀼𑀢𑁆𑀢𑀸 𑀢𑁂𑀳𑀺 𑀓𑀳𑀸𑀧𑀡𑁂𑀳𑀺 𑀲𑀼𑀭𑀁 𑀧𑀺𑀯𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑀁 𑀓𑀭𑀺𑀁𑀲𑀼. 𑀏𑀓𑁄 𑀏𑀓𑀁 𑀆𑀳 𑁋 ‘‘𑀢𑁆𑀯𑀁 𑀲𑀼𑀦𑁆𑀤𑀭𑀺𑀁 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀸𑀭𑁂𑀢𑁆𑀯𑀸 𑀫𑀸𑀮𑀸𑀓𑀘𑀯𑀭𑀦𑁆𑀢𑀭𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑁄 𑀮𑀤𑁆𑀥𑀓𑀳𑀸𑀧𑀡𑁂𑀳𑀺 𑀲𑀼𑀭𑀁 𑀧𑀺𑀯𑀲𑀺, 𑀳𑁄𑀢𑀼 𑀳𑁄𑀢𑀽’’𑀢𑀺. 𑀭𑀸𑀚𑀧𑀼𑀭𑀺𑀲𑀸 𑀢𑁂 𑀥𑀼𑀢𑁆𑀢𑁂 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀅𑀣 𑀦𑁂 𑀭𑀸𑀚𑀸 ‘‘𑀢𑀼𑀫𑁆𑀳𑁂𑀳𑀺 𑀲𑀸 𑀫𑀸𑀭𑀺𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀓𑁂𑀳𑀺 𑀫𑀸𑀭𑀸𑀧𑀺𑀢𑀸’’𑀢𑀺? ‘‘𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀳𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀢𑀺𑀢𑁆𑀣𑀺𑀬𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺. 𑀢𑁂 𑀢𑀣𑁂𑀯 𑀯𑀤𑀺𑀁𑀲𑀼. 𑀢𑁂𑀦 𑀳𑀺 𑀕𑀘𑁆𑀙𑀣 𑀢𑀼𑀫𑁆𑀳𑁂 𑀏𑀯𑀁 𑀯𑀤𑀦𑁆𑀢𑀸 𑀦𑀕𑀭𑀁 𑀆𑀳𑀺𑀡𑁆𑀟𑀣 𑁋 ‘‘𑀅𑀬𑀁 𑀲𑀼𑀦𑁆𑀤𑀭𑀻 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀯𑀡𑁆𑀡𑀁 𑀆𑀭𑁄𑀧𑁂𑀢𑀼𑀓𑀸𑀫𑁂𑀳𑀺 𑀅𑀫𑁆𑀳𑁂𑀳𑀺 𑀫𑀸𑀭𑀸𑀧𑀺𑀢𑀸, 𑀦𑁂𑀯 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲, 𑀦 𑀲𑀸𑀯𑀓𑀸𑀦𑀁 𑀤𑁄𑀲𑁄 𑀅𑀢𑁆𑀣𑀺, 𑀅𑀫𑁆𑀳𑀸𑀓𑀫𑁂𑀯 𑀤𑁄𑀲𑁄’’𑀢𑀺. 𑀢𑁂 𑀢𑀣𑀸 𑀓𑀭𑀺𑀁𑀲𑀼. 𑀩𑀸𑀮𑀫𑀳𑀸𑀚𑀦𑁄 𑀢𑀤𑀸 𑀲𑀤𑁆𑀤𑀳𑀺, 𑀢𑀺𑀢𑁆𑀣𑀺𑀬𑀸𑀧𑀺 𑀥𑀼𑀢𑁆𑀢𑀸𑀧𑀺 𑀧𑀼𑀭𑀺𑀲𑀯𑀥𑀤𑀡𑁆𑀟𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀩𑀼𑀤𑁆𑀥𑀸𑀦𑀁 𑀲𑀓𑁆𑀓𑀸𑀭𑁄 𑀫𑀳𑀸 𑀅𑀳𑁄𑀲𑀻𑀢𑀺.

𑀲𑀼𑀦𑁆𑀤𑀭𑀻𑀧𑀭𑀺𑀩𑁆𑀩𑀸𑀚𑀺𑀓𑀸𑀯𑀢𑁆𑀣𑀼 𑀧𑀞𑀫𑀁.

𑁨. 𑀤𑀼𑀘𑁆𑀘𑀭𑀺𑀢𑀨𑀮𑀧𑀻𑀴𑀺𑀢𑀯𑀢𑁆𑀣𑀼

𑀓𑀸𑀲𑀸𑀯𑀓𑀡𑁆𑀞𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑀼𑀘𑁆𑀘𑀭𑀺𑀢𑀨𑀮𑀸𑀦𑀼𑀪𑀸𑀯𑁂𑀦 𑀧𑀻𑀴𑀺𑀢𑁂 𑀲𑀢𑁆𑀢𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀆𑀬𑀲𑁆𑀫𑀸 𑀳𑀺 𑀫𑁄𑀕𑁆𑀕𑀮𑁆𑀮𑀸𑀦𑁄 𑀮𑀓𑁆𑀔𑀡𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀕𑀺𑀚𑁆𑀛𑀓𑀽𑀝𑀸 𑀑𑀭𑁄𑀳𑀦𑁆𑀢𑁄 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀧𑁂𑀢𑀸𑀤𑀻𑀦𑀁 𑀅𑀢𑁆𑀢𑀪𑀸𑀯𑁂 𑀤𑀺𑀲𑁆𑀯𑀸 𑀲𑀺𑀢𑀁 𑀓𑀭𑁄𑀦𑁆𑀢𑁄 𑀮𑀓𑁆𑀔𑀡𑀢𑁆𑀣𑁂𑀭𑁂𑀦 𑀲𑀺𑀢𑀓𑀸𑀭𑀡𑀁 𑀧𑀼𑀝𑁆𑀞𑁄 ‘‘𑀅𑀓𑀸𑀮𑁄, 𑀆𑀯𑀼𑀲𑁄, 𑀇𑀫𑀲𑁆𑀲 𑀧𑀜𑁆𑀳𑀲𑁆𑀲, 𑀢𑀣𑀸𑀕𑀢𑀲𑁆𑀲 𑀲𑀦𑁆𑀢𑀺𑀓𑁂 𑀫𑀁 𑀧𑀼𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀲𑀦𑁆𑀢𑀺𑀓𑁂 𑀣𑁂𑀭𑁂𑀦 𑀧𑀼𑀝𑁆𑀞𑁄 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀧𑁂𑀢𑀸𑀤𑀻𑀦𑀁 𑀤𑀺𑀝𑁆𑀞𑀪𑀸𑀯𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀇𑀥𑀸𑀳𑀁, 𑀆𑀯𑀼𑀲𑁄, 𑀕𑀺𑀚𑁆𑀛𑀓𑀽𑀝𑀸 𑀧𑀩𑁆𑀩𑀢𑀸 𑀑𑀭𑁄𑀳𑀦𑁆𑀢𑁄 𑀅𑀤𑁆𑀤𑀲𑀁 𑀪𑀺𑀓𑁆𑀔𑀼𑀁 𑀯𑁂𑀳𑀸𑀲𑀁 𑀕𑀘𑁆𑀙𑀦𑁆𑀢𑀁, 𑀢𑀲𑁆𑀲 𑀲𑀗𑁆𑀖𑀸𑀝𑀺𑀧𑀺 𑀆𑀤𑀺𑀢𑁆𑀢𑀸 𑀲𑀫𑁆𑀧𑀚𑁆𑀚𑀮𑀺𑀢𑀸 𑀲𑀚𑁄𑀢𑀺𑀪𑀽𑀢𑀸…𑀧𑁂… 𑀓𑀸𑀬𑁄𑀧𑀺 𑀆𑀤𑀺𑀢𑁆𑀢𑁄’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁨𑁩𑁦; 𑀲𑀁. 𑀦𑀺. 𑁨.𑁨𑁧𑁮) 𑀦𑀬𑁂𑀦 𑀲𑀤𑁆𑀥𑀺𑀁 𑀧𑀢𑁆𑀢𑀘𑀻𑀯𑀭𑀓𑀸𑀬𑀩𑀦𑁆𑀥𑀦𑀸𑀤𑀻𑀳𑀺 𑀟𑀬𑁆𑀳𑀫𑀸𑀦𑁂 𑀧𑀜𑁆𑀘 𑀲𑀳𑀥𑀫𑁆𑀫𑀺𑀓𑁂 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀢𑁂𑀲𑀁 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀅𑀦𑀼𑀭𑀽𑀧𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀧𑀸𑀧𑀪𑀸𑀯𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑀲𑁆𑀫𑀺𑀁 𑀔𑀡𑁂 𑀢𑀢𑁆𑀣 𑀦𑀺𑀲𑀺𑀦𑁆𑀦𑀸𑀦𑀁 𑀩𑀳𑀽𑀦𑀁 𑀧𑀸𑀧𑀪𑀺𑀓𑁆𑀔𑀽𑀦𑀁 𑀤𑀼𑀘𑁆𑀘𑀭𑀺𑀢𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁦𑁭. ‘‘𑀓𑀸𑀲𑀸𑀯𑀓𑀡𑁆𑀞𑀸 𑀩𑀳𑀯𑁄, 𑀧𑀸𑀧𑀥𑀫𑁆𑀫𑀸 𑀅𑀲𑀜𑁆𑀜𑀢𑀸;

𑀧𑀸𑀧𑀸 𑀧𑀸𑀧𑁂𑀳𑀺 𑀓𑀫𑁆𑀫𑁂𑀳𑀺, 𑀦𑀺𑀭𑀬𑀁 𑀢𑁂 𑀉𑀧𑀧𑀚𑁆𑀚𑀭𑁂’’𑀢𑀺.

𑀢𑀢𑁆𑀣 𑀓𑀸𑀲𑀸𑀯𑀓𑀡𑁆𑀞𑀸𑀢𑀺 𑀓𑀸𑀲𑀸𑀯𑁂𑀦 𑀧𑀮𑀺𑀯𑁂𑀞𑀺𑀢𑀓𑀡𑁆𑀞𑀸. 𑀧𑀸𑀧𑀥𑀫𑁆𑀫𑀸𑀢𑀺 𑀮𑀸𑀫𑀓𑀥𑀫𑁆𑀫𑀸. 𑀅𑀲𑀜𑁆𑀜𑀢𑀸𑀢𑀺 𑀓𑀸𑀬𑀸𑀤𑀺𑀲𑀁𑀬𑀫𑀭𑀳𑀺𑀢𑀸, 𑀢𑀣𑀸𑀭𑀽𑀧𑀸 𑀧𑀸𑀧𑀧𑀼𑀕𑁆𑀕𑀮𑀸 𑀅𑀢𑁆𑀢𑀦𑀸 𑀓𑀢𑁂𑀳𑀺 𑀅𑀓𑀼𑀲𑀮𑀓𑀫𑁆𑀫𑁂𑀳𑀺 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀺, 𑀢𑁂 𑀢𑀢𑁆𑀣 𑀧𑀘𑁆𑀘𑀺𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀧𑁂𑀢𑁂𑀲𑀼𑀧𑀺 𑀏𑀯𑀁 𑀧𑀘𑁆𑀘𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀤𑀼𑀘𑁆𑀘𑀭𑀺𑀢𑀨𑀮𑀧𑀻𑀴𑀺𑀢𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀪𑀺𑀓𑁆𑀔𑀼𑀯𑀢𑁆𑀣𑀼

𑀲𑁂𑀬𑁆𑀬𑁄 𑀅𑀬𑁄𑀕𑀼𑀴𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬 𑀫𑀳𑀸𑀯𑀦𑁂 𑀯𑀺𑀳𑀭𑀦𑁆𑀢𑁄 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀸𑀭𑀸𑀚𑀺𑀓𑁂 (𑀧𑀸𑀭𑀸. 𑁧𑁯𑁩 𑀆𑀤𑀬𑁄) 𑀆𑀕𑀢𑀫𑁂𑀯.

𑀢𑀤𑀸 𑀳𑀺 𑀲𑀢𑁆𑀣𑀸 𑀢𑁂 𑀪𑀺𑀓𑁆𑀔𑀽 ‘‘𑀓𑀺𑀁 𑀧𑀦 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀉𑀤𑀭𑀲𑁆𑀲𑀢𑁆𑀣𑀸𑀬 𑀕𑀺𑀳𑀻𑀦𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀕𑀭𑀳𑀺𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁦𑁮. ‘‘𑀲𑁂𑀬𑁆𑀬𑁄 𑀅𑀬𑁄𑀕𑀼𑀴𑁄 𑀪𑀼𑀢𑁆𑀢𑁄, 𑀢𑀢𑁆𑀢𑁄 𑀅𑀕𑁆𑀕𑀺𑀲𑀺𑀔𑀽𑀧𑀫𑁄;

𑀬𑀜𑁆𑀘𑁂 𑀪𑀼𑀜𑁆𑀚𑁂𑀬𑁆𑀬 𑀤𑀼𑀲𑁆𑀲𑀻𑀮𑁄, 𑀭𑀝𑁆𑀞𑀧𑀺𑀡𑁆𑀟𑀫𑀲𑀜𑁆𑀜𑀢𑁄’’𑀢𑀺.

𑀢𑀢𑁆𑀣 𑀬𑀜𑁆𑀘𑁂 𑀪𑀼𑀜𑁆𑀚𑁂𑀬𑁆𑀬𑀸𑀢𑀺 𑀬𑀁 𑀤𑀼𑀲𑁆𑀲𑀻𑀮𑁄 𑀦𑀺𑀲𑁆𑀲𑀻𑀮𑀧𑀼𑀕𑁆𑀕𑀮𑁄 𑀓𑀸𑀬𑀸𑀤𑀻𑀳𑀺 𑀅𑀲𑀜𑁆𑀜𑀢𑁄 𑀭𑀝𑁆𑀞𑀯𑀸𑀲𑀻𑀳𑀺 𑀲𑀤𑁆𑀥𑀸𑀬 𑀤𑀺𑀦𑁆𑀦𑀁 𑀭𑀝𑁆𑀞𑀧𑀺𑀡𑁆𑀟𑀁 ‘‘𑀲𑀫𑀡𑁄𑀫𑁆𑀳𑀻’’𑀢𑀺 𑀧𑀝𑀺𑀚𑀸𑀦𑀦𑁆𑀢𑁄 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑁂𑀬𑁆𑀬, 𑀢𑀢𑁆𑀢𑁄 𑀆𑀤𑀺𑀢𑁆𑀢𑁄 𑀅𑀕𑁆𑀕𑀺𑀯𑀡𑁆𑀡𑁄 𑀅𑀬𑁄𑀕𑀼𑀴𑁄𑀯 𑀪𑀼𑀢𑁆𑀢𑁄 𑀲𑁂𑀬𑁆𑀬𑁄 𑀲𑀼𑀦𑁆𑀤𑀭𑀢𑀭𑁄. 𑀓𑀺𑀁 𑀓𑀸𑀭𑀡𑀸? 𑀢𑀧𑁆𑀧𑀘𑁆𑀘𑀬𑀸 𑀳𑀺 𑀏𑀓𑁄𑀯 𑀅𑀢𑁆𑀢𑀪𑀸𑀯𑁄 𑀛𑀸𑀬𑁂𑀬𑁆𑀬, 𑀤𑀼𑀲𑁆𑀲𑀻𑀮𑁄 𑀧𑀦 𑀲𑀤𑁆𑀥𑀸𑀤𑁂𑀬𑁆𑀬𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑁂𑀓𑀸𑀦𑀺𑀧𑀺 𑀚𑀸𑀢𑀺𑀲𑀢𑀸𑀦𑀺 𑀦𑀺𑀭𑀬𑁂 𑀧𑀘𑁆𑀘𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀪𑀺𑀓𑁆𑀔𑀼𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀔𑁂𑀫𑀓𑀲𑁂𑀝𑁆𑀞𑀺𑀧𑀼𑀢𑁆𑀢𑀯𑀢𑁆𑀣𑀼

𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑀁 𑀔𑁂𑀫𑀓𑀁 𑀦𑀸𑀫 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀅𑀪𑀺𑀭𑀽𑀧𑁄 𑀅𑀳𑁄𑀲𑀺, 𑀬𑁂𑀪𑀼𑀬𑁆𑀬𑁂𑀦 𑀇𑀢𑁆𑀣𑀺𑀬𑁄 𑀢𑀁 𑀤𑀺𑀲𑁆𑀯𑀸 𑀭𑀸𑀕𑀸𑀪𑀺𑀪𑀽𑀢𑀸 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀲𑁄𑀧𑀺 𑀧𑀭𑀤𑀸𑀭𑀓𑀫𑁆𑀫𑀸𑀪𑀺𑀭𑀢𑁄𑀯 𑀅𑀳𑁄𑀲𑀺. 𑀅𑀣 𑀦𑀁 𑀭𑀢𑁆𑀢𑀺𑀁 𑀭𑀸𑀚𑀧𑀼𑀭𑀺𑀲𑀸 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 𑀫𑀳𑀸𑀲𑁂𑀝𑁆𑀞𑀺𑀲𑁆𑀲 𑀮𑀚𑁆𑀚𑀸𑀫𑀻𑀢𑀺 𑀢𑀁 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀲𑁄 𑀧𑀦 𑀦𑁂𑀯 𑀯𑀺𑀭𑀫𑀺. 𑀅𑀣 𑀦𑀁 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀭𑀸𑀚𑀧𑀼𑀭𑀺𑀲𑀸 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺𑀬𑁂𑀯. 𑀫𑀳𑀸𑀲𑁂𑀝𑁆𑀞𑀺, 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀢𑀁 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀣𑀸’’𑀢𑀺 𑀆𑀳. 𑀲𑀢𑁆𑀣𑀸 𑀢𑀲𑁆𑀲 𑀲𑀁𑀯𑁂𑀕𑀓𑀣𑀁 𑀯𑀢𑁆𑀯𑀸 𑀧𑀭𑀤𑀸𑀭𑀲𑁂𑀯𑀦𑀸𑀬 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁦𑁯. ‘‘𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺 𑀦𑀭𑁄 𑀧𑀫𑀢𑁆𑀢𑁄,

𑀆𑀧𑀚𑁆𑀚𑀢𑀺 𑀧𑀭𑀤𑀸𑀭𑀽𑀧𑀲𑁂𑀯𑀻;

𑀅𑀧𑀼𑀜𑁆𑀜𑀮𑀸𑀪𑀁 𑀦 𑀦𑀺𑀓𑀸𑀫𑀲𑁂𑀬𑁆𑀬𑀁,

𑀦𑀺𑀦𑁆𑀤𑀁 𑀢𑀢𑀻𑀬𑀁 𑀦𑀺𑀭𑀬𑀁 𑀘𑀢𑀼𑀢𑁆𑀣𑀁.

𑁩𑁧𑁦. ‘‘𑀅𑀧𑀼𑀜𑁆𑀜𑀮𑀸𑀪𑁄 𑀘 𑀕𑀢𑀻 𑀘 𑀧𑀸𑀧𑀺𑀓𑀸,

𑀪𑀻𑀢𑀲𑁆𑀲 𑀪𑀻𑀢𑀸𑀬 𑀭𑀢𑀻 𑀘 𑀣𑁄𑀓𑀺𑀓𑀸;

𑀭𑀸𑀚𑀸 𑀘 𑀤𑀡𑁆𑀟𑀁 𑀕𑀭𑀼𑀓𑀁 𑀧𑀡𑁂𑀢𑀺,

𑀢𑀲𑁆𑀫𑀸 𑀦𑀭𑁄 𑀧𑀭𑀤𑀸𑀭𑀁 𑀦 𑀲𑁂𑀯𑁂’’𑀢𑀺.

𑀢𑀢𑁆𑀣 𑀞𑀸𑀦𑀸𑀦𑀻𑀢𑀺 𑀤𑀼𑀓𑁆𑀔𑀓𑀸𑀭𑀡𑀸𑀦𑀺. 𑀧𑀫𑀢𑁆𑀢𑁄𑀢𑀺 𑀲𑀢𑀺𑀯𑁄𑀲𑁆𑀲𑀕𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀆𑀧𑀚𑁆𑀚𑀢𑀻𑀢𑀺 𑀧𑀸𑀧𑀼𑀡𑀸𑀢𑀺. 𑀧𑀭𑀤𑀸𑀭𑀽𑀧𑀲𑁂𑀯𑀻𑀢𑀺 𑀧𑀭𑀤𑀸𑀭𑀁 𑀉𑀧𑀲𑁂𑀯𑀦𑁆𑀢𑁄 𑀉𑀧𑁆𑀧𑀣𑀘𑀸𑀭𑀻. 𑀅𑀧𑀼𑀜𑁆𑀜𑀮𑀸𑀪𑀦𑁆𑀢𑀺 𑀅𑀓𑀼𑀲𑀮𑀮𑀸𑀪𑀁. 𑀦 𑀦𑀺𑀓𑀸𑀫𑀲𑁂𑀬𑁆𑀬𑀦𑁆𑀢𑀺 𑀬𑀣𑀸 𑀇𑀘𑁆𑀙𑀢𑀺, 𑀏𑀯𑀁 𑀲𑁂𑀬𑁆𑀬𑀁 𑀅𑀮𑀪𑀺𑀢𑁆𑀯𑀸 𑀅𑀦𑀺𑀘𑁆𑀙𑀺𑀢𑀁 𑀧𑀭𑀺𑀢𑁆𑀢𑀓𑀫𑁂𑀯 𑀓𑀸𑀮𑀁 𑀲𑁂𑀬𑁆𑀬𑀁 𑀮𑀪𑀢𑀺. 𑀅𑀧𑀼𑀜𑁆𑀜𑀮𑀸𑀪𑁄 𑀘𑀸𑀢𑀺 𑀏𑀯𑀁 𑀢𑀲𑁆𑀲 𑀅𑀬𑀜𑁆𑀘 𑀅𑀧𑀼𑀜𑁆𑀜𑀮𑀸𑀪𑁄, 𑀢𑁂𑀦 𑀘 𑀅𑀧𑀼𑀜𑁆𑀜𑁂𑀦 𑀦𑀺𑀭𑀬𑀲𑀗𑁆𑀔𑀸𑀢𑀸 𑀧𑀸𑀧𑀺𑀓𑀸 𑀕𑀢𑀺 𑀳𑁄𑀢𑀺. 𑀭𑀢𑀻 𑀘 𑀣𑁄𑀓𑀺𑀓𑀸𑀢𑀺 𑀬𑀸 𑀢𑀲𑁆𑀲 𑀪𑀻𑀢𑀲𑁆𑀲 𑀪𑀻𑀢𑀸𑀬 𑀇𑀢𑁆𑀣𑀺𑀬𑀸 𑀲𑀤𑁆𑀥𑀺𑀁 𑀭𑀢𑀺, 𑀲𑀸𑀧𑀺 𑀣𑁄𑀓𑀺𑀓𑀸 𑀧𑀭𑀺𑀢𑁆𑀢𑀸 𑀳𑁄𑀢𑀺. 𑀕𑀭𑀼𑀓𑀦𑁆𑀢𑀺 𑀭𑀸𑀚𑀸 𑀘 𑀳𑀢𑁆𑀣𑀘𑁆𑀙𑁂𑀤𑀸𑀤𑀺𑀯𑀲𑁂𑀦 𑀕𑀭𑀼𑀓𑀁 𑀤𑀡𑁆𑀟𑀁 𑀧𑀡𑁂𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀭𑀤𑀸𑀭𑀁 𑀲𑁂𑀯𑀦𑁆𑀢𑁄 𑀏𑀢𑀸𑀦𑀺 𑀅𑀧𑀼𑀜𑁆𑀜𑀸𑀤𑀻𑀦𑀺 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 𑀧𑀭𑀤𑀸𑀭𑀁 𑀦 𑀲𑁂𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀔𑁂𑀫𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀢𑀢𑁄 𑀧𑀝𑁆𑀞𑀸𑀬 𑀫𑀳𑀸𑀚𑀦𑁄 𑀲𑀼𑀔𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀓𑀺𑀁 𑀧𑀦𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀦𑁆𑀢𑀺? 𑀲𑁄 𑀓𑀺𑀭 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀉𑀢𑁆𑀢𑀫𑀫𑀮𑁆𑀮𑁄 𑀳𑀼𑀢𑁆𑀯𑀸 𑀤𑁆𑀯𑁂 𑀲𑀼𑀯𑀡𑁆𑀡𑀧𑀝𑀸𑀓𑀸 𑀤𑀲𑀩𑀮𑀲𑁆𑀲 𑀓𑀜𑁆𑀘𑀦𑀣𑀽𑀧𑁂 𑀆𑀭𑁄𑀧𑁂𑀢𑁆𑀯𑀸 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺 ‘‘𑀞𑀧𑁂𑀢𑁆𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀺𑀢𑁆𑀣𑀺𑀬𑁄 𑀅𑀯𑀲𑁂𑀲𑀸 𑀫𑀁 𑀤𑀺𑀲𑁆𑀯𑀸 𑀭𑀚𑁆𑀚𑀦𑁆𑀢𑀽’’𑀢𑀺. 𑀇𑀤𑀫𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀦𑁆𑀢𑀺. 𑀢𑁂𑀦 𑀢𑀁 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀤𑀺𑀲𑁆𑀯𑀸 𑀧𑀭𑁂𑀲𑀁 𑀇𑀢𑁆𑀣𑀺𑀬𑁄 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀽𑀢𑀺.

𑀔𑁂𑀫𑀓𑀲𑁂𑀝𑁆𑀞𑀺𑀧𑀼𑀢𑁆𑀢𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀤𑀼𑀩𑁆𑀩𑀘𑀪𑀺𑀓𑁆𑀔𑀼𑀯𑀢𑁆𑀣𑀼

𑀓𑀼𑀲𑁄 𑀬𑀣𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀤𑀼𑀩𑁆𑀩𑀘𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑁄 𑀓𑀺𑀭 𑀪𑀺𑀓𑁆𑀔𑀼 𑀅𑀲𑀜𑁆𑀘𑀺𑀘𑁆𑀘 𑀏𑀓𑀁 𑀢𑀺𑀡𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑀼𑀓𑁆𑀓𑀼𑀘𑁆𑀘𑁂 𑀉𑀧𑁆𑀧𑀦𑁆𑀦𑁂 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀆𑀯𑀼𑀲𑁄, 𑀬𑁄 𑀢𑀺𑀡𑀁 𑀙𑀺𑀦𑁆𑀤𑀢𑀺, 𑀢𑀲𑁆𑀲 𑀓𑀺𑀁 𑀳𑁄𑀢𑀻’’𑀢𑀺 𑀢𑀁 𑀅𑀢𑁆𑀢𑀦𑀸 𑀓𑀢𑀪𑀸𑀯𑀁 𑀆𑀭𑁄𑀘𑁂𑀢𑁆𑀯𑀸 𑀧𑀼𑀘𑁆𑀙𑀺. 𑀅𑀣 𑀦𑀁 𑀇𑀢𑀭𑁄 ‘‘𑀢𑁆𑀯𑀁 𑀢𑀺𑀡𑀲𑁆𑀲 𑀙𑀺𑀦𑁆𑀦𑀓𑀸𑀭𑀡𑀸 𑀓𑀺𑀜𑁆𑀘𑀺 𑀳𑁄𑀢𑀻𑀢𑀺 𑀲𑀜𑁆𑀜𑀁 𑀓𑀭𑁄𑀲𑀺, 𑀦 𑀏𑀢𑁆𑀣 𑀓𑀺𑀜𑁆𑀘𑀺 𑀳𑁄𑀢𑀺, 𑀤𑁂𑀲𑁂𑀢𑁆𑀯𑀸 𑀧𑀦 𑀫𑀼𑀘𑁆𑀘𑀢𑀻’’𑀢𑀺 𑀯𑀢𑁆𑀯𑀸 𑀲𑀬𑀫𑁆𑀧𑀺 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀢𑀺𑀡𑀁 𑀮𑀼𑀜𑁆𑀘𑀺𑀢𑁆𑀯𑀸 𑀅𑀕𑁆𑀕𑀳𑁂𑀲𑀺. 𑀪𑀺𑀓𑁆𑀔𑀽 𑀢𑀁 𑀧𑀯𑀢𑁆𑀢𑀺𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀢𑀁 𑀪𑀺𑀓𑁆𑀔𑀼𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁧𑁧. ‘‘𑀓𑀼𑀲𑁄 𑀬𑀣𑀸 𑀤𑀼𑀕𑁆𑀕𑀳𑀺𑀢𑁄, 𑀳𑀢𑁆𑀣𑀫𑁂𑀯𑀸𑀦𑀼𑀓𑀦𑁆𑀢𑀢𑀺;

𑀲𑀸𑀫𑀜𑁆𑀜𑀁 𑀤𑀼𑀧𑁆𑀧𑀭𑀸𑀫𑀝𑁆𑀞𑀁, 𑀦𑀺𑀭𑀬𑀸𑀬𑀼𑀧𑀓𑀟𑁆𑀠𑀢𑀺.

𑁩𑁧𑁨. ‘‘𑀬𑀁 𑀓𑀺𑀜𑁆𑀘𑀺 𑀲𑀺𑀣𑀺𑀮𑀁 𑀓𑀫𑁆𑀫𑀁, 𑀲𑀁𑀓𑀺𑀮𑀺𑀝𑁆𑀞𑀜𑁆𑀘 𑀬𑀁 𑀯𑀢𑀁;

𑀲𑀗𑁆𑀓𑀲𑁆𑀲𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦 𑀢𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁.

𑁩𑁧𑁩. ‘‘𑀓𑀬𑀺𑀭𑀸 𑀘𑁂 𑀓𑀬𑀺𑀭𑀸𑀣𑁂𑀦𑀁, 𑀤𑀴𑁆𑀳𑀫𑁂𑀦𑀁 𑀧𑀭𑀓𑁆𑀓𑀫𑁂;

𑀲𑀺𑀣𑀺𑀮𑁄 𑀳𑀺 𑀧𑀭𑀺𑀩𑁆𑀩𑀸𑀚𑁄, 𑀪𑀺𑀬𑁆𑀬𑁄 𑀆𑀓𑀺𑀭𑀢𑁂 𑀭𑀚’’𑀦𑁆𑀢𑀺.

𑀢𑀢𑁆𑀣 𑀓𑀼𑀲𑁄𑀢𑀺 𑀬𑀁 𑀓𑀺𑀜𑁆𑀘𑀺 𑀢𑀺𑀔𑀺𑀡𑀥𑀸𑀭𑀁 𑀢𑀺𑀡𑀁 𑀅𑀦𑁆𑀢𑀫𑀲𑁄 𑀢𑀸𑀮𑀧𑀡𑁆𑀡𑀫𑁆𑀧𑀺, 𑀬𑀣𑀸 𑀲𑁄 𑀓𑀼𑀲𑁄 𑀬𑁂𑀦 𑀤𑀼𑀕𑁆𑀕𑀳𑀺𑀢𑁄, 𑀢𑀲𑁆𑀲 𑀳𑀢𑁆𑀣𑀁 𑀅𑀦𑀼𑀓𑀦𑁆𑀢𑀢𑀺 𑀨𑀸𑀮𑁂𑀢𑀺, 𑀏𑀯𑀫𑁂𑀯 𑀲𑀫𑀡𑀥𑀫𑁆𑀫𑀲𑀗𑁆𑀔𑀸𑀢𑀁 𑀲𑀸𑀫𑀜𑁆𑀜𑀫𑁆𑀧𑀺 𑀔𑀡𑁆𑀟𑀲𑀻𑀮𑀸𑀤𑀺𑀢𑀸𑀬 𑀤𑀼𑀧𑁆𑀧𑀭𑀸𑀫𑀝𑁆𑀞𑀁 𑀦𑀺𑀭𑀬𑀸𑀬𑀼𑀧𑀓𑀟𑁆𑀠𑀢𑀺, 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀺𑀣𑀺𑀮𑀦𑁆𑀢𑀺 𑀑𑀮𑀻𑀬𑀺𑀢𑁆𑀯𑀸 𑀓𑀭𑀡𑁂𑀦 𑀲𑀺𑀣𑀺𑀮𑀕𑀸𑀳𑀁 𑀓𑀢𑁆𑀯𑀸 𑀓𑀢𑀁 𑀬𑀁𑀓𑀺𑀜𑁆𑀘𑀺 𑀓𑀫𑁆𑀫𑀁. 𑀲𑀁𑀓𑀺𑀮𑀺𑀝𑁆𑀞𑀦𑁆𑀢𑀺 𑀯𑁂𑀲𑀺𑀬𑀸𑀤𑀺𑀓𑁂𑀲𑀼 𑀅𑀕𑁄𑀘𑀭𑁂𑀲𑀼 𑀘𑀭𑀡𑁂𑀦 𑀲𑀁𑀓𑀺𑀮𑀺𑀝𑁆𑀞𑀁. 𑀲𑀗𑁆𑀓𑀲𑁆𑀲𑀭𑀦𑁆𑀢𑀺 𑀲𑀗𑁆𑀓𑀸𑀳𑀺 𑀲𑀭𑀺𑀢𑀩𑁆𑀩𑀁, 𑀉𑀧𑁄𑀲𑀣𑀓𑀺𑀘𑁆𑀘𑀸𑀤𑀻𑀲𑀼 𑀅𑀜𑁆𑀜𑀢𑀭𑀓𑀺𑀘𑁆𑀘𑁂𑀦 𑀲𑀦𑁆𑀦𑀺𑀧𑀢𑀺𑀢𑀫𑁆𑀧𑀺 𑀲𑀗𑁆𑀖𑀁 𑀤𑀺𑀲𑁆𑀯𑀸 ‘‘𑀅𑀤𑁆𑀥𑀸 𑀇𑀫𑁂 𑀫𑀫 𑀘𑀭𑀺𑀬𑀁 𑀜𑀢𑁆𑀯𑀸 𑀫𑀁 𑀉𑀓𑁆𑀔𑀺𑀧𑀺𑀢𑀼𑀓𑀸𑀫𑀸𑀯 𑀲𑀦𑁆𑀦𑀺𑀧𑀢𑀺𑀢𑀸’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀆𑀲𑀗𑁆𑀓𑀸𑀳𑀺 𑀲𑀭𑀺𑀢𑀁 𑀉𑀲𑁆𑀲𑀗𑁆𑀓𑀺𑀢𑀁 𑀧𑀭𑀺𑀲𑀗𑁆𑀓𑀺𑀢𑀁. 𑀦 𑀢𑀁 𑀳𑁄𑀢𑀻𑀢𑀺 𑀢𑀁 𑀏𑀯𑀭𑀽𑀧𑀁 𑀲𑀫𑀡𑀥𑀫𑁆𑀫𑀲𑀗𑁆𑀔𑀸𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑀳𑀧𑁆𑀨𑀮𑀁 𑀦 𑀳𑁄𑀢𑀺, 𑀢𑀲𑁆𑀲 𑀫𑀳𑀧𑁆𑀨𑀮𑀸𑀪𑀸𑀯𑁂𑀦𑁂𑀯 𑀪𑀺𑀓𑁆𑀔𑀤𑀸𑀬𑀓𑀸𑀦𑀫𑁆𑀧𑀺𑀲𑁆𑀲 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀬𑀺𑀭𑀸 𑀘𑁂𑀢𑀺 𑀢𑀲𑁆𑀫𑀸 𑀬𑀁 𑀓𑀫𑁆𑀫𑀁 𑀓𑀭𑁂𑀬𑁆𑀬, 𑀢𑀁 𑀓𑀭𑁂𑀬𑁆𑀬𑀸𑀣𑁂𑀯. 𑀤𑀴𑁆𑀳𑀫𑁂𑀦𑀁 𑀧𑀭𑀓𑁆𑀓𑀫𑁂𑀢𑀺 𑀣𑀺𑀭𑀓𑀢𑀫𑁂𑀯 𑀓𑀢𑁆𑀯𑀸 𑀅𑀯𑀢𑁆𑀢𑀲𑀫𑀸𑀤𑀸𑀦𑁄 𑀳𑀼𑀢𑁆𑀯𑀸 𑀏𑀦𑀁 𑀓𑀬𑀺𑀭𑀸. 𑀧𑀭𑀺𑀩𑁆𑀩𑀸𑀚𑁄𑀢𑀺 𑀲𑀺𑀣𑀺𑀮𑀪𑀸𑀯𑁂𑀦 𑀓𑀢𑁄 𑀔𑀡𑁆𑀟𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑁄 𑀲𑀫𑀡𑀥𑀫𑁆𑀫𑁄. 𑀪𑀺𑀬𑁆𑀬𑁄 𑀆𑀓𑀺𑀭𑀢𑁂 𑀭𑀚𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑁂 𑀯𑀺𑀚𑁆𑀚𑀫𑀸𑀦𑀁 𑀭𑀸𑀕𑀭𑀚𑀸𑀤𑀺𑀁 𑀏𑀯𑀭𑀽𑀧𑁄 𑀲𑀫𑀡𑀥𑀫𑁆𑀫𑁄 𑀅𑀧𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀣 𑀔𑁄 𑀢𑀲𑁆𑀲 𑀉𑀧𑀭𑀺 𑀅𑀧𑀭𑀫𑁆𑀧𑀺 𑀭𑀸𑀕𑀭𑀚𑀸𑀤𑀺𑀁 𑀆𑀓𑀺𑀭𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼, 𑀲𑁄𑀧𑀺 𑀪𑀺𑀓𑁆𑀔𑀼 𑀲𑀁𑀯𑀭𑁂 𑀞𑀢𑁆𑀯𑀸 𑀧𑀘𑁆𑀙𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺.

𑀤𑀼𑀩𑁆𑀩𑀘𑀪𑀺𑀓𑁆𑀔𑀼𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀇𑀲𑁆𑀲𑀸𑀧𑀓𑀢𑀺𑀢𑁆𑀣𑀺𑀯𑀢𑁆𑀣𑀼

𑀅𑀓𑀢𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀇𑀲𑁆𑀲𑀸𑀧𑀓𑀢𑀁 𑀇𑀢𑁆𑀣𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀲𑁆𑀲𑀸 𑀓𑀺𑀭 𑀲𑀸𑀫𑀺𑀓𑁄 𑀏𑀓𑀸𑀬 𑀕𑁂𑀳𑀤𑀸𑀲𑀺𑀬𑀸 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀅𑀓𑀸𑀲𑀺. 𑀲𑀸 𑀇𑀲𑁆𑀲𑀸𑀧𑀓𑀢𑀸 𑀢𑀁 𑀤𑀸𑀲𑀺𑀁 𑀳𑀢𑁆𑀣𑀧𑀸𑀤𑁂𑀲𑀼 𑀩𑀦𑁆𑀥𑀺𑀢𑁆𑀯𑀸 𑀢𑀲𑁆𑀲𑀸 𑀓𑀡𑁆𑀡𑀦𑀸𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀕𑀼𑀴𑁆𑀳𑀕𑀩𑁆𑀪𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀅𑀢𑁆𑀢𑀦𑀸 𑀓𑀢𑀪𑀸𑀯𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 ‘‘𑀏𑀳𑀺, 𑀅𑀬𑁆𑀬, 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀲𑀸𑀫𑀺𑀓𑀁 𑀆𑀤𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀻 𑀦𑀺𑀲𑀻𑀤𑀺. 𑀅𑀣𑀲𑁆𑀲𑀸 𑀆𑀕𑀦𑁆𑀢𑀼𑀓𑀜𑀸𑀢𑀓𑀸 𑀕𑁂𑀳𑀁 𑀆𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 𑀤𑀸𑀲𑀺𑀁 𑀫𑁄𑀘𑀬𑀺𑀁𑀲𑀼. 𑀲𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀞𑀺𑀢𑀸 𑀢𑀫𑀢𑁆𑀣𑀁 𑀤𑀲𑀩𑀮𑀲𑁆𑀲 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀤𑀼𑀘𑁆𑀘𑀭𑀺𑀢𑀁 𑀦𑀸𑀫 ‘𑀇𑀤𑀁 𑀫𑁂 𑀅𑀜𑁆𑀜𑁂 𑀦 𑀚𑀸𑀦𑀦𑁆𑀢𑀻’𑀢𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀦 𑀓𑀸𑀢𑀩𑁆𑀩𑀁, 𑀅𑀜𑁆𑀜𑀲𑁆𑀫𑀺𑀁 𑀅𑀚𑀸𑀦𑀦𑁆𑀢𑁂𑀧𑀺 𑀲𑀼𑀘𑀭𑀺𑀢𑀫𑁂𑀯 𑀓𑀸𑀢𑀩𑁆𑀩𑀁. 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀓𑀢𑀫𑁆𑀧𑀺 𑀳𑀺 𑀤𑀼𑀘𑁆𑀘𑀭𑀺𑀢𑀁 𑀦𑀸𑀫 𑀧𑀘𑁆𑀙𑀸𑀦𑀼𑀢𑀸𑀧𑀁 𑀓𑀭𑁄𑀢𑀺, 𑀲𑀼𑀘𑀭𑀺𑀢𑀁 𑀧𑀸𑀫𑁄𑀚𑁆𑀚𑀫𑁂𑀯 𑀚𑀦𑁂𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁧𑁪. ‘‘𑀅𑀓𑀢𑀁 𑀤𑀼𑀓𑁆𑀓𑀝𑀁 𑀲𑁂𑀬𑁆𑀬𑁄, 𑀧𑀘𑁆𑀙𑀸 𑀢𑀧𑁆𑀧𑀢𑀺 𑀤𑀼𑀓𑁆𑀓𑀝𑀁;

𑀓𑀢𑀜𑁆𑀘 𑀲𑀼𑀓𑀢𑀁 𑀲𑁂𑀬𑁆𑀬𑁄, 𑀬𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀻’’𑀢𑀺.

𑀢𑀢𑁆𑀣 𑀤𑀼𑀓𑁆𑀓𑀝𑀦𑁆𑀢𑀺 𑀲𑀸𑀯𑀚𑁆𑀚𑀁 𑀅𑀧𑀸𑀬𑀲𑀁𑀯𑀢𑁆𑀢𑀦𑀺𑀓𑀁 𑀓𑀫𑁆𑀫𑀁 𑀅𑀓𑀢𑀫𑁂𑀯 𑀲𑁂𑀬𑁆𑀬𑁄 𑀯𑀭𑀁 𑀉𑀢𑁆𑀢𑀫𑀁. 𑀧𑀘𑁆𑀙𑀸 𑀢𑀧𑁆𑀧𑀢𑀻𑀢𑀺 𑀢𑀜𑁆𑀳𑀺 𑀅𑀦𑀼𑀲𑁆𑀲𑀭𑀺𑀢𑀸𑀦𑀼𑀲𑁆𑀲𑀭𑀺𑀢𑀓𑀸𑀮𑁂 𑀢𑀧𑁆𑀧𑀢𑀺𑀬𑁂𑀯. 𑀲𑀼𑀓𑀢𑀦𑁆𑀢𑀺 𑀅𑀦𑀯𑀚𑁆𑀚𑀁 𑀧𑀦 𑀲𑀼𑀔𑀤𑀸𑀬𑀓𑀁 𑀲𑀼𑀕𑀢𑀺𑀲𑀁𑀯𑀢𑁆𑀢𑀦𑀺𑀓𑀫𑁂𑀯 𑀓𑀫𑁆𑀫𑀁 𑀓𑀢𑀁 𑀲𑁂𑀬𑁆𑀬𑁄. 𑀬𑀁 𑀓𑀢𑁆𑀯𑀸𑀢𑀺 𑀬𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀅𑀦𑀼𑀲𑁆𑀲𑀭𑀡𑀓𑀸𑀮𑁂 𑀦 𑀢𑀧𑁆𑀧𑀢𑀺 𑀦𑀸𑀦𑀼𑀢𑀧𑁆𑀧𑀢𑀺, 𑀲𑁄𑀫𑀦𑀲𑁆𑀲𑀚𑀸𑀢𑁄𑀯 𑀳𑁄𑀢𑀺, 𑀢𑀁 𑀓𑀫𑁆𑀫𑀁 𑀯𑀭𑀦𑁆𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀉𑀧𑀸𑀲𑀓𑁄 𑀘 𑀲𑀸 𑀘 𑀇𑀢𑁆𑀣𑀻 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑀜𑁆𑀘 𑀧𑀦 𑀤𑀸𑀲𑀺𑀁 𑀢𑀢𑁆𑀣𑁂𑀯 𑀪𑀼𑀚𑀺𑀲𑁆𑀲𑀁 𑀓𑀢𑁆𑀯𑀸 𑀥𑀫𑁆𑀫𑀘𑀸𑀭𑀺𑀦𑀺𑀁 𑀓𑀭𑀺𑀁𑀲𑀽𑀢𑀺.

𑀇𑀲𑁆𑀲𑀸𑀧𑀓𑀢𑀺𑀢𑁆𑀣𑀺𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀲𑀫𑁆𑀩𑀳𑀼𑀮𑀪𑀺𑀓𑁆𑀔𑀼𑀯𑀢𑁆𑀣𑀼

𑀦𑀕𑀭𑀁 𑀬𑀣𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀫𑁆𑀩𑀳𑀼𑀮𑁂 𑀆𑀕𑀦𑁆𑀢𑀼𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂 𑀓𑀺𑀭 𑀏𑀓𑀲𑁆𑀫𑀺𑀁 𑀧𑀘𑁆𑀘𑀦𑁆𑀢𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀞𑀫𑀫𑀸𑀲𑁂 𑀲𑀼𑀔𑀁 𑀯𑀺𑀳𑀭𑀺𑀁𑀲𑀼. 𑀫𑀚𑁆𑀛𑀺𑀫𑀫𑀸𑀲𑁂 𑀘𑁄𑀭𑀸 𑀆𑀕𑀦𑁆𑀢𑁆𑀯𑀸 𑀢𑁂𑀲𑀁 𑀕𑁄𑀘𑀭𑀕𑀸𑀫𑀁 𑀧𑀳𑀭𑀺𑀢𑁆𑀯𑀸 𑀓𑀭𑀫𑀭𑁂 𑀕𑀳𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀫𑀦𑀼𑀲𑁆𑀲𑀸 𑀘𑁄𑀭𑀸𑀦𑀁 𑀧𑀝𑀺𑀩𑀸𑀳𑀦𑀢𑁆𑀣𑀸𑀬 𑀢𑀁 𑀧𑀘𑁆𑀘𑀦𑁆𑀢𑀦𑀕𑀭𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀸 𑀢𑁂 𑀪𑀺𑀓𑁆𑀔𑀽 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀸𑀢𑀼𑀁 𑀑𑀓𑀸𑀲𑀁 𑀦 𑀮𑀪𑀺𑀁𑀲𑀼. 𑀢𑁂 𑀅𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑀸 𑀲𑀢𑁆𑀣𑀼 𑀤𑀲𑁆𑀲𑀦𑀸𑀬 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 ‘‘𑀓𑀺𑀁, 𑀪𑀺𑀓𑁆𑀔𑀯𑁂, 𑀲𑀼𑀔𑀁 𑀯𑀲𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀬𑀁 𑀧𑀞𑀫𑀫𑀸𑀲𑀫𑁂𑀯 𑀲𑀼𑀔𑀁 𑀯𑀲𑀺𑀫𑁆𑀳𑀸, 𑀫𑀚𑁆𑀛𑀺𑀫𑀫𑀸𑀲𑁂 𑀘𑁄𑀭𑀸 𑀕𑀸𑀫𑀁 𑀧𑀳𑀭𑀺𑀁𑀲𑀼, 𑀢𑀢𑁄 𑀧𑀝𑁆𑀞𑀸𑀬 𑀫𑀦𑀼𑀲𑁆𑀲𑀸 𑀦𑀕𑀭𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀸 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀸𑀢𑀼𑀁 𑀑𑀓𑀸𑀲𑀁 𑀦 𑀮𑀪𑀺𑀁𑀲𑀼. 𑀢𑀲𑁆𑀫𑀸 𑀅𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑀺𑀫𑁆𑀳𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀮𑀁, 𑀪𑀺𑀓𑁆𑀔𑀯𑁂, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀨𑀸𑀲𑀼𑀯𑀺𑀳𑀸𑀭𑁄 𑀦𑀸𑀫 𑀦𑀺𑀘𑁆𑀘𑀓𑀸𑀮𑀁 𑀤𑀼𑀮𑁆𑀮𑀪𑁄, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀬𑀣𑀸 𑀢𑁂 𑀫𑀦𑀼𑀲𑁆𑀲𑀸 𑀦𑀕𑀭𑀁 𑀕𑁄𑀧𑀬𑀺𑀁𑀲𑀼, 𑀏𑀯𑀁 𑀅𑀢𑁆𑀢𑀪𑀸𑀯𑀫𑁂𑀯 𑀕𑁄𑀧𑀬𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁧𑁫. ‘‘𑀦𑀕𑀭𑀁 𑀬𑀣𑀸 𑀧𑀘𑁆𑀘𑀦𑁆𑀢𑀁, 𑀕𑀼𑀢𑁆𑀢𑀁 𑀲𑀦𑁆𑀢𑀭𑀩𑀸𑀳𑀺𑀭𑀁;

𑀏𑀯𑀁 𑀕𑁄𑀧𑁂𑀣 𑀅𑀢𑁆𑀢𑀸𑀦𑀁, 𑀔𑀡𑁄 𑀯𑁄 𑀫𑀸 𑀉𑀧𑀘𑁆𑀘𑀕𑀸;

𑀔𑀡𑀸𑀢𑀻𑀢𑀸 𑀳𑀺 𑀲𑁄𑀘𑀦𑁆𑀢𑀺, 𑀦𑀺𑀭𑀬𑀫𑁆𑀳𑀺 𑀲𑀫𑀧𑁆𑀧𑀺𑀢𑀸’’𑀢𑀺.

𑀢𑀢𑁆𑀣 𑀲𑀦𑁆𑀢𑀭𑀩𑀸𑀳𑀺𑀭𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀬𑀣𑀸 𑀢𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀢𑀁 𑀧𑀘𑁆𑀘𑀦𑁆𑀢𑀦𑀕𑀭𑀁 𑀤𑁆𑀯𑀸𑀭𑀧𑀸𑀓𑀸𑀭𑀸𑀤𑀻𑀦𑀺 𑀣𑀺𑀭𑀸𑀦𑀺 𑀓𑀭𑁄𑀦𑁆𑀢𑁂𑀳𑀺 𑀲𑀅𑀦𑁆𑀢𑀭𑀁, 𑀅𑀝𑁆𑀝𑀸𑀮𑀓𑀧𑀭𑀺𑀔𑀸𑀤𑀻𑀦𑀺 𑀣𑀺𑀭𑀸𑀦𑀺 𑀓𑀭𑁄𑀦𑁆𑀢𑁂𑀳𑀺 𑀲𑀩𑀸𑀳𑀺𑀭𑀦𑁆𑀢𑀺 𑀲𑀦𑁆𑀢𑀭𑀩𑀸𑀳𑀺𑀭𑀁 𑀲𑀼𑀕𑀼𑀢𑁆𑀢𑀁 𑀓𑀢𑀁, 𑀏𑀯𑀁 𑀢𑀼𑀫𑁆𑀳𑁂𑀧𑀺 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀙 𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀺𑀢𑁆𑀯𑀸 𑀤𑁆𑀯𑀸𑀭𑀭𑀓𑁆𑀔𑀺𑀓𑀁 𑀲𑀢𑀺𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀬𑀣𑀸 𑀕𑀬𑁆𑀳𑀫𑀸𑀦𑀸𑀦𑀺 𑀩𑀸𑀳𑀺𑀭𑀸𑀦𑀺 𑀙 𑀆𑀬𑀢𑀦𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀉𑀧𑀖𑀸𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀢𑀣𑀸 𑀅𑀕𑁆𑀕𑀳𑀡𑁂𑀦 𑀢𑀸𑀦𑀺𑀧𑀺 𑀣𑀺𑀭𑀸𑀦𑀺 𑀓𑀢𑁆𑀯𑀸 𑀢𑁂𑀲𑀁 𑀅𑀧𑁆𑀧𑀯𑁂𑀲𑀸𑀬 𑀤𑁆𑀯𑀸𑀭𑀭𑀓𑁆𑀔𑀺𑀓𑀁 𑀲𑀢𑀺𑀁 𑀅𑀧𑁆𑀧𑀳𑀸𑀬 𑀯𑀺𑀘𑀭𑀦𑁆𑀢𑀸 𑀅𑀢𑁆𑀢𑀸𑀦𑀁 𑀕𑁄𑀧𑁂𑀣𑀸𑀢𑀺 𑀅𑀢𑁆𑀣𑁄. 𑀔𑀡𑁄 𑀯𑁄 𑀫𑀸 𑀉𑀧𑀘𑁆𑀘𑀕𑀸𑀢𑀺 𑀬𑁄 𑀳𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀦 𑀕𑁄𑀧𑁂𑀢𑀺, 𑀢𑀁 𑀧𑀼𑀕𑁆𑀕𑀮𑀁 𑀅𑀬𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑀔𑀡𑁄 𑀫𑀚𑁆𑀛𑀺𑀫𑀤𑁂𑀲𑁂 𑀉𑀧𑁆𑀧𑀢𑁆𑀢𑀺𑀔𑀡𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀝𑀺𑀮𑀤𑁆𑀥𑀔𑀡𑁄 𑀙𑀦𑁆𑀦𑀁 𑀆𑀬𑀢𑀦𑀸𑀦𑀁 𑀅𑀯𑁂𑀓𑀮𑁆𑀮𑀔𑀡𑁄𑀢𑀺 𑀲𑀩𑁆𑀩𑁄𑀧𑀺 𑀅𑀬𑀁 𑀔𑀡𑁄 𑀅𑀢𑀺𑀓𑁆𑀓𑀫𑀢𑀺, 𑀲𑁄 𑀔𑀡𑁄 𑀢𑀼𑀫𑁆𑀳𑁂 𑀫𑀸 𑀅𑀢𑀺𑀓𑁆𑀓𑀫𑀢𑀼. 𑀔𑀡𑀸𑀢𑀻𑀢𑀸𑀢𑀺 𑀬𑁂 𑀳𑀺 𑀢𑀁 𑀔𑀡𑀁 𑀅𑀢𑀻𑀢𑀸, 𑀢𑁂 𑀘 𑀧𑀼𑀕𑁆𑀕𑀮𑁂 𑀲𑁄 𑀘 𑀔𑀡𑁄 𑀅𑀢𑀻𑀢𑁄, 𑀢𑁂 𑀦𑀺𑀭𑀬𑀫𑁆𑀳𑀺 𑀲𑀫𑀧𑁆𑀧𑀺𑀢𑀸 𑀳𑀼𑀢𑁆𑀯𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑁄𑀘𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀪𑀺𑀓𑁆𑀔𑀽 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀲𑀫𑁆𑀩𑀳𑀼𑀮𑀪𑀺𑀓𑁆𑀔𑀼𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀦𑀺𑀕𑀡𑁆𑀞𑀯𑀢𑁆𑀣𑀼

𑀅𑀮𑀚𑁆𑀚𑀺𑀢𑀸𑀬𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀦𑀺𑀕𑀡𑁆𑀞𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀤𑀺𑀯𑀲𑁂 𑀪𑀺𑀓𑁆𑀔𑀽 𑀦𑀺𑀕𑀡𑁆𑀞𑁂 𑀤𑀺𑀲𑁆𑀯𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁, ‘‘𑀆𑀯𑀼𑀲𑁄, 𑀲𑀩𑁆𑀩𑀲𑁄 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂𑀳𑀺 𑀅𑀘𑁂𑀮𑀓𑁂𑀳𑀺 𑀇𑀫𑁂 𑀦𑀺𑀕𑀡𑁆𑀞𑀸 𑀯𑀭𑀢𑀭𑀸, 𑀬𑁂 𑀏𑀓𑀁 𑀧𑀼𑀭𑀺𑀫𑀧𑀲𑁆𑀲𑀫𑁆𑀧𑀺 𑀢𑀸𑀯 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀺, 𑀲𑀳𑀺𑀭𑀺𑀓𑀸 𑀫𑀜𑁆𑀜𑁂 𑀏𑀢𑁂’’𑀢𑀺. 𑀢𑀁 𑀲𑀼𑀢𑁆𑀯𑀸 𑀦𑀺𑀕𑀡𑁆𑀞𑀸 ‘‘𑀦 𑀫𑀬𑀁 𑀏𑀢𑁂𑀦 𑀓𑀸𑀭𑀡𑁂𑀦 𑀧𑀝𑀺𑀘𑁆𑀙𑀸𑀤𑁂𑀫, 𑀧𑀁𑀲𑀼𑀭𑀚𑀸𑀤𑀬𑁄 𑀧𑀦 𑀧𑀼𑀕𑁆𑀕𑀮𑀸 𑀏𑀯, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀝𑀺𑀩𑀤𑁆𑀥𑀸 𑀏𑀯, 𑀢𑁂 𑀦𑁄 𑀪𑀺𑀓𑁆𑀔𑀸𑀪𑀸𑀚𑀦𑁂𑀲𑀼 𑀫𑀸 𑀧𑀢𑀺𑀁𑀲𑀽𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀧𑀝𑀺𑀘𑁆𑀙𑀸𑀤𑁂𑀫𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀯𑀸𑀤𑀧𑀝𑀺𑀯𑀸𑀤𑀯𑀲𑁂𑀦 𑀩𑀳𑀼𑀁 𑀓𑀣𑀁 𑀓𑀣𑁂𑀲𑀼𑀁. 𑀪𑀺𑀓𑁆𑀔𑀽 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁂 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸, ‘‘𑀪𑀺𑀓𑁆𑀔𑀯𑁂, 𑀅𑀮𑀚𑁆𑀚𑀺𑀢𑀩𑁆𑀩𑁂𑀦 𑀮𑀚𑁆𑀚𑀺𑀢𑁆𑀯𑀸 𑀮𑀚𑁆𑀚𑀺𑀢𑀩𑁆𑀩𑁂𑀦 𑀅𑀮𑀚𑁆𑀚𑀫𑀸𑀦𑀸 𑀦𑀸𑀫 𑀤𑀼𑀕𑁆𑀕𑀢𑀺𑀧𑀭𑀸𑀬𑀡𑀸𑀯 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁧𑁬. ‘‘𑀅𑀮𑀚𑁆𑀚𑀺𑀢𑀸𑀬𑁂 𑀮𑀚𑁆𑀚𑀦𑁆𑀢𑀺, 𑀮𑀚𑁆𑀚𑀺𑀢𑀸𑀬𑁂 𑀦 𑀮𑀚𑁆𑀚𑀭𑁂;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑀸𑀤𑀸𑀦𑀸, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.

𑁩𑁧𑁭. ‘‘𑀅𑀪𑀬𑁂 𑀪𑀬𑀤𑀲𑁆𑀲𑀺𑀦𑁄, 𑀪𑀬𑁂 𑀘𑀸𑀪𑀬𑀤𑀲𑁆𑀲𑀺𑀦𑁄;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑀸𑀤𑀸𑀦𑀸, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺’’𑀦𑁆𑀢𑀺.

𑀢𑀢𑁆𑀣 𑀅𑀮𑀚𑁆𑀚𑀺𑀢𑀸𑀬𑁂𑀢𑀺 𑀅𑀮𑀚𑁆𑀚𑀺𑀢𑀩𑁆𑀩𑁂𑀦. 𑀪𑀺𑀓𑁆𑀔𑀸𑀪𑀸𑀚𑀦𑀜𑁆𑀳𑀺 𑀅𑀮𑀚𑁆𑀚𑀺𑀢𑀩𑁆𑀩𑀁 𑀦𑀸𑀫, 𑀢𑁂 𑀧𑀦 𑀢𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸 𑀢𑁂𑀦 𑀮𑀚𑁆𑀚𑀦𑁆𑀢𑀺 𑀦𑀸𑀫. 𑀮𑀚𑁆𑀚𑀺𑀢𑀸𑀬𑁂𑀢𑀺 𑀅𑀧𑀝𑀺𑀘𑁆𑀙𑀦𑁆𑀦𑁂𑀦 𑀳𑀺𑀭𑀺𑀓𑁄𑀧𑀻𑀦𑀗𑁆𑀕𑁂𑀦 𑀮𑀚𑁆𑀚𑀺𑀢𑀩𑁆𑀩𑁂𑀦. 𑀢𑁂 𑀧𑀦 𑀢𑀁 𑀅𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸 𑀮𑀚𑁆𑀚𑀺𑀢𑀸𑀬𑁂 𑀦 𑀮𑀚𑁆𑀚𑀦𑁆𑀢𑀺 𑀦𑀸𑀫. 𑀢𑁂𑀦 𑀢𑁂𑀲𑀁 𑀅𑀮𑀚𑁆𑀚𑀺𑀢𑀩𑁆𑀩𑁂𑀦 𑀮𑀚𑁆𑀚𑀺𑀢𑀁 𑀮𑀚𑁆𑀚𑀺𑀢𑀩𑁆𑀩𑁂𑀦 𑀅𑀮𑀚𑁆𑀚𑀺𑀢𑀁 𑀢𑀼𑀘𑁆𑀙𑀕𑀳𑀡𑀪𑀸𑀯𑁂𑀦 𑀘 𑀅𑀜𑁆𑀜𑀣𑀸𑀕𑀳𑀡𑀪𑀸𑀯𑁂𑀦 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀳𑁄𑀢𑀺. 𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀸 𑀧𑀦 𑀢𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑀸𑀤𑀸𑀦𑀸 𑀲𑀢𑁆𑀢𑀸 𑀦𑀺𑀭𑀬𑀸𑀤𑀺𑀪𑁂𑀤𑀁 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀪𑀬𑁂𑀢𑀺 𑀪𑀺𑀓𑁆𑀔𑀸𑀪𑀸𑀚𑀦𑀁 𑀦𑀺𑀲𑁆𑀲𑀸𑀬 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀓𑀺𑀮𑁂𑀲𑀤𑀼𑀘𑁆𑀘𑀭𑀺𑀢𑀪𑀬𑀸𑀦𑀁 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀪𑀺𑀓𑁆𑀔𑀸𑀪𑀸𑀚𑀦𑀁 𑀅𑀪𑀬𑀁 𑀦𑀸𑀫, 𑀪𑀬𑁂𑀦 𑀢𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀸 𑀧𑀦 𑀅𑀪𑀬𑁂 𑀪𑀬𑀤𑀲𑁆𑀲𑀺𑀦𑁄 𑀦𑀸𑀫. 𑀳𑀺𑀭𑀺𑀓𑁄𑀧𑀻𑀦𑀗𑁆𑀕𑀁 𑀧𑀦 𑀦𑀺𑀲𑁆𑀲𑀸𑀬 𑀭𑀸𑀕𑀸𑀤𑀻𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀢𑀁 𑀪𑀬𑀁 𑀦𑀸𑀫, 𑀢𑀲𑁆𑀲 𑀅𑀧𑀝𑀺𑀘𑁆𑀙𑀸𑀤𑀦𑁂𑀦 𑀪𑀬𑁂 𑀘𑀸𑀪𑀬𑀤𑀲𑁆𑀲𑀺𑀦𑁄. 𑀢𑀲𑁆𑀲 𑀢𑀁 𑀅𑀬𑀣𑀸𑀕𑀳𑀡𑀲𑁆𑀲 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑀸𑀤𑀸𑀦𑀸 𑀲𑀢𑁆𑀢𑀸 𑀤𑀼𑀕𑁆𑀕𑀳𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀦𑀺𑀕𑀡𑁆𑀞𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑀸 𑀧𑀩𑁆𑀩𑀚𑀺𑀁𑀲𑀼, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀦𑀺𑀕𑀡𑁆𑀞𑀯𑀢𑁆𑀣𑀼 𑀅𑀝𑁆𑀞𑀫𑀁.

𑁯. 𑀢𑀺𑀢𑁆𑀣𑀺𑀬𑀲𑀸𑀯𑀓𑀯𑀢𑁆𑀣𑀼

𑀅𑀯𑀚𑁆𑀚𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀢𑀺𑀢𑁆𑀣𑀺𑀬𑀲𑀸𑀯𑀓𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀸𑀯𑀓𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑁂 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸𑀦𑀁 𑀉𑀧𑀸𑀲𑀓𑀸𑀦𑀁 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀧𑀭𑀺𑀯𑀸𑀭𑁂 𑀓𑀻𑀴𑀫𑀸𑀦𑁂 𑀤𑀺𑀲𑁆𑀯𑀸 𑀕𑁂𑀳𑀁 𑀆𑀕𑀢𑀓𑀸𑀮𑁂 ‘‘𑀦 𑀯𑁄 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀯𑀦𑁆𑀤𑀺𑀢𑀩𑁆𑀩𑀸, 𑀦𑀸𑀧𑀺 𑀢𑁂𑀲𑀁 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑀩𑁆𑀩’’𑀦𑁆𑀢𑀺 𑀲𑀧𑀣𑀁 𑀓𑀸𑀭𑀬𑀺𑀁𑀲𑀼. 𑀢𑁂 𑀏𑀓𑀤𑀺𑀯𑀲𑀁 𑀚𑁂𑀢𑀯𑀦𑀯𑀺𑀳𑀸𑀭𑀲𑁆𑀲 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑀸𑀫𑀦𑁆𑀢𑁂 𑀓𑀻𑀴𑀦𑁆𑀢𑀸 𑀧𑀺𑀧𑀸𑀲𑀺𑀢𑀸 𑀅𑀳𑁂𑀲𑀼𑀁. 𑀅𑀣𑁂𑀓𑀁 𑀉𑀧𑀸𑀲𑀓𑀤𑀸𑀭𑀓𑀁 ‘‘𑀢𑁆𑀯𑀁 𑀏𑀢𑁆𑀣 𑀕𑀦𑁆𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀅𑀫𑁆𑀳𑀸𑀓𑀫𑁆𑀧𑀺 𑀆𑀳𑀭𑀸𑀳𑀻’’𑀢𑀺 𑀧𑀳𑀺𑀡𑀺𑀁𑀲𑀼. 𑀲𑁄 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀢𑁆𑀯𑀫𑁂𑀯 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀇𑀢𑀭𑁂𑀧𑀺 𑀧𑀸𑀦𑀻𑀬𑀧𑀺𑀯𑀦𑀢𑁆𑀣𑀸𑀬 𑀇𑀥𑁂𑀯 𑀧𑁂𑀲𑁂𑀳𑀻’’𑀢𑀺 𑀆𑀳. 𑀲𑁄 𑀢𑀣𑀸 𑀅𑀓𑀸𑀲𑀺. 𑀢𑁂 𑀆𑀕𑀦𑁆𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀁𑀲𑀼. 𑀲𑀢𑁆𑀣𑀸 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑁂𑀲𑀁 𑀲𑀧𑁆𑀧𑀸𑀬𑀁 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑀢𑁂 𑀅𑀘𑀮𑀲𑀤𑁆𑀥𑁂 𑀓𑀢𑁆𑀯𑀸 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑁂 𑀲𑀓𑀸𑀦𑀺 𑀕𑁂𑀳𑀸𑀦𑀺 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀫𑀸𑀢𑀸𑀧𑀺𑀢𑀽𑀦𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀦𑁂𑀲𑀁 𑀫𑀸𑀢𑀸𑀧𑀺𑀢𑀭𑁄 ‘‘𑀧𑀼𑀢𑁆𑀢𑀓𑀸 𑀦𑁄 𑀯𑀺𑀧𑀦𑁆𑀦𑀤𑀺𑀝𑁆𑀞𑀺𑀓𑀸 𑀚𑀸𑀢𑀸’’𑀢𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 𑀧𑀭𑀺𑀤𑁂𑀯𑀺𑀁𑀲𑀼. 𑀅𑀣 𑀢𑁂𑀲𑀁 𑀙𑁂𑀓𑀸 𑀲𑀫𑁆𑀩𑀳𑀼𑀮𑀸 𑀧𑀝𑀺𑀯𑀺𑀲𑁆𑀲𑀓𑀸 𑀫𑀦𑀼𑀲𑁆𑀲𑀸 𑀆𑀕𑀦𑁆𑀢𑁆𑀯𑀸 𑀤𑁄𑀫𑀦𑀲𑁆𑀲𑀯𑀽𑀧𑀲𑀫𑀦𑀢𑁆𑀣𑀸𑀬 𑀥𑀫𑁆𑀫𑀁 𑀓𑀣𑀬𑀺𑀁𑀲𑀼. 𑀢𑁂 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀇𑀫𑁂 𑀤𑀸𑀭𑀓𑁂 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲𑁂𑀯 𑀦𑀺𑀬𑁆𑀬𑀸𑀤𑁂𑀲𑁆𑀲𑀸𑀫𑀸’’𑀢𑀺 𑀫𑀳𑀦𑁆𑀢𑁂𑀦 𑀜𑀸𑀢𑀺𑀕𑀡𑁂𑀦 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀦𑀬𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀅𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁩𑁧𑁮. ‘‘𑀅𑀯𑀚𑁆𑀚𑁂 𑀯𑀚𑁆𑀚𑀫𑀢𑀺𑀦𑁄, 𑀯𑀚𑁆𑀚𑁂 𑀘𑀸𑀯𑀚𑁆𑀚𑀤𑀲𑁆𑀲𑀺𑀦𑁄;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑀸𑀤𑀸𑀦𑀸, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.

𑁩𑁧𑁯. ‘‘𑀯𑀚𑁆𑀚𑀜𑁆𑀘 𑀯𑀚𑁆𑀚𑀢𑁄 𑀜𑀢𑁆𑀯𑀸, 𑀅𑀯𑀚𑁆𑀚𑀜𑁆𑀘 𑀅𑀯𑀚𑁆𑀚𑀢𑁄;

𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑀸𑀤𑀸𑀦𑀸, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀲𑀼𑀕𑁆𑀕𑀢𑀺’’𑀦𑁆𑀢𑀺.

𑀢𑀢𑁆𑀣 𑀅𑀯𑀚𑁆𑀚𑁂𑀢𑀺 𑀤𑀲𑀯𑀢𑁆𑀣𑀼𑀓𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸, 𑀢𑀲𑁆𑀲𑀸 𑀉𑀧𑀦𑀺𑀲𑁆𑀲𑀬𑀪𑀽𑀢𑁂 𑀥𑀫𑁆𑀫𑁂 𑀘. 𑀯𑀚𑁆𑀚𑀫𑀢𑀺𑀦𑁄𑀢𑀺 𑀯𑀚𑁆𑀚𑀁 𑀇𑀤𑀦𑁆𑀢𑀺 𑀉𑀧𑁆𑀧𑀦𑁆𑀦𑀫𑀢𑀺𑀦𑁄. 𑀤𑀲𑀯𑀢𑁆𑀣𑀼𑀓𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀧𑀦 𑀢𑀲𑁆𑀲𑀸 𑀉𑀧𑀦𑀺𑀲𑁆𑀲𑀬𑀪𑀽𑀢𑁂 𑀥𑀫𑁆𑀫𑁂 𑀘 𑀅𑀯𑀚𑁆𑀚𑀤𑀲𑁆𑀲𑀺𑀦𑁄, 𑀏𑀢𑀺𑀲𑁆𑀲𑀸 𑀅𑀯𑀚𑁆𑀚𑀁 𑀯𑀚𑁆𑀚𑀢𑁄 𑀯𑀚𑁆𑀚𑀜𑁆𑀘 𑀅𑀯𑀚𑁆𑀚𑀢𑁄 𑀜𑀢𑁆𑀯𑀸 𑀕𑀳𑀡𑀲𑀗𑁆𑀔𑀸𑀢𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑀸𑀤𑀸𑀦𑀸 𑀲𑀢𑁆𑀢𑀸 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀕𑀸𑀣𑀸𑀬 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀲𑀩𑁆𑀩𑁂𑀧𑀺 𑀢𑁂 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀅𑀧𑀭𑀸𑀧𑀭𑀁 𑀥𑀫𑁆𑀫𑀁 𑀲𑀼𑀡𑀦𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀢𑀺𑀢𑁆𑀣𑀺𑀬𑀲𑀸𑀯𑀓𑀯𑀢𑁆𑀣𑀼 𑀦𑀯𑀫𑀁.

𑀦𑀺𑀭𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀸𑀯𑀻𑀲𑀢𑀺𑀫𑁄 𑀯𑀕𑁆𑀕𑁄.