𑁨𑁧. 𑀧𑀓𑀺𑀡𑁆𑀡𑀓𑀯𑀕𑁆𑀕𑁄

𑁧. 𑀅𑀢𑁆𑀢𑀦𑁄𑀧𑀼𑀩𑁆𑀩𑀓𑀫𑁆𑀫𑀯𑀢𑁆𑀣𑀼

𑀫𑀢𑁆𑀢𑀸𑀲𑀼𑀔𑀧𑀭𑀺𑀘𑁆𑀘𑀸𑀕𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀯𑁂𑀲𑀸𑀮𑀻 𑀇𑀤𑁆𑀥𑀸 𑀅𑀳𑁄𑀲𑀺 𑀨𑀻𑀢𑀸 𑀩𑀳𑀼𑀚𑀦𑀸 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸. 𑀢𑀢𑁆𑀣 𑀳𑀺 𑀯𑀸𑀭𑁂𑀦 𑀯𑀸𑀭𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀸𑀦𑀁 𑀔𑀢𑁆𑀢𑀺𑀬𑀸𑀦𑀁𑀬𑁂𑀯 𑀲𑀢𑁆𑀢𑀲𑀢𑀸𑀥𑀺𑀓𑀸𑀦𑀺 𑀲𑀢𑁆𑀢𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀘 𑀔𑀢𑁆𑀢𑀺𑀬𑀸 𑀅𑀳𑁂𑀲𑀼𑀁. 𑀢𑁂𑀲𑀁 𑀯𑀲𑀦𑀢𑁆𑀣𑀸𑀬 𑀢𑀢𑁆𑀢𑀓𑀸𑀬𑁂𑀯 𑀧𑀸𑀲𑀸𑀤𑀸 𑀢𑀢𑁆𑀢𑀓𑀸𑀦𑁂𑀯 𑀓𑀽𑀝𑀸𑀕𑀸𑀭𑀸𑀦𑀺 𑀉𑀬𑁆𑀬𑀸𑀦𑁂 𑀯𑀺𑀳𑀸𑀭𑀢𑁆𑀣𑀸𑀬 𑀢𑀢𑁆𑀢𑀓𑀸𑀬𑁂𑀯 𑀆𑀭𑀸𑀫𑀸 𑀘 𑀧𑁄𑀓𑁆𑀔𑀭𑀡𑀺𑀬𑁄 𑀘 𑀅𑀳𑁂𑀲𑀼𑀁. 𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀤𑀼𑀩𑁆𑀪𑀺𑀓𑁆𑀔𑀸 𑀅𑀳𑁄𑀲𑀺 𑀤𑀼𑀲𑁆𑀲𑀲𑁆𑀲𑀸. 𑀢𑀢𑁆𑀣 𑀙𑀸𑀢𑀓𑀪𑀬𑁂𑀦 𑀧𑀞𑀫𑀁 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑀸 𑀓𑀸𑀮𑀫𑀓𑀁𑀲𑀼. 𑀢𑁂𑀲𑀁 𑀢𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀙𑀟𑁆𑀟𑀺𑀢𑀸𑀦𑀁 𑀓𑀼𑀡𑀧𑀸𑀦𑀁 𑀕𑀦𑁆𑀥𑁂𑀦 𑀅𑀫𑀦𑀼𑀲𑁆𑀲𑀸 𑀦𑀕𑀭𑀁 𑀧𑀯𑀺𑀲𑀺𑀁𑀲𑀼. 𑀅𑀫𑀦𑀼𑀲𑁆𑀲𑀽𑀧𑀤𑁆𑀤𑀯𑁂𑀦 𑀩𑀳𑀼𑀢𑀭𑀸 𑀓𑀸𑀮𑀫𑀓𑀁𑀲𑀼. 𑀢𑁂𑀲𑀁 𑀓𑀼𑀡𑀧𑀕𑀦𑁆𑀥𑀧𑀝𑀺𑀓𑁆𑀓𑀽𑀮𑀢𑀸𑀬 𑀲𑀢𑁆𑀢𑀸𑀦𑀁 𑀅𑀳𑀺𑀯𑀸𑀢𑀭𑁄𑀕𑁄 𑀉𑀧𑁆𑀧𑀚𑁆𑀚𑀺. 𑀏𑀯𑀁 𑀤𑀼𑀩𑁆𑀪𑀺𑀓𑁆𑀔𑀪𑀬𑀁 𑀅𑀫𑀦𑀼𑀲𑁆𑀲𑀪𑀬𑀁 𑀭𑁄𑀕𑀪𑀬𑀦𑁆𑀢𑀺 𑀢𑀻𑀡𑀺 𑀪𑀬𑀸𑀦𑀺 𑀉𑀧𑁆𑀧𑀚𑁆𑀚𑀺𑀁𑀲𑀼.

𑀦𑀕𑀭𑀯𑀸𑀲𑀺𑀦𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀭𑀸𑀚𑀸𑀦𑀁 𑀆𑀳𑀁𑀲𑀼 𑁋 ‘‘𑀫𑀳𑀸𑀭𑀸𑀚, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀢𑀻𑀡𑀺 𑀪𑀬𑀸𑀦𑀺 𑀉𑀧𑁆𑀧𑀦𑁆𑀦𑀸𑀦𑀺, 𑀇𑀢𑁄 𑀧𑀼𑀩𑁆𑀩𑁂 𑀬𑀸𑀯 𑀲𑀢𑁆𑀢𑀫𑀸 𑀭𑀸𑀚𑀧𑀭𑀺𑀯𑀝𑁆𑀝𑀸 𑀏𑀯𑀭𑀽𑀧𑀁 𑀪𑀬𑀁 𑀦𑀸𑀫 𑀦 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀁. 𑀅𑀥𑀫𑁆𑀫𑀺𑀓𑀭𑀸𑀚𑀽𑀦𑀜𑁆𑀳𑀺 𑀓𑀸𑀮𑁂 𑀏𑀯𑀭𑀽𑀧𑀁 𑀪𑀬𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀭𑀸𑀚𑀸 𑀲𑀦𑁆𑀣𑀸𑀕𑀸𑀭𑁂 𑀲𑀩𑁆𑀩𑁂𑀲𑀁 𑀲𑀦𑁆𑀦𑀺𑀧𑀸𑀢𑀁 𑀓𑀸𑀭𑁂𑀢𑁆𑀯𑀸 ‘‘𑀲𑀘𑁂 𑀫𑁂 𑀅𑀥𑀫𑁆𑀫𑀺𑀓𑀪𑀸𑀯𑁄 𑀅𑀢𑁆𑀣𑀺, 𑀢𑀁 𑀯𑀺𑀘𑀺𑀦𑀣𑀸’’𑀢𑀺 𑀆𑀳. 𑀯𑁂𑀲𑀸𑀮𑀺𑀯𑀸𑀲𑀺𑀦𑁄 𑀲𑀩𑁆𑀩𑀁 𑀧𑀯𑁂𑀡𑀺 𑀯𑀺𑀘𑀺𑀦𑀦𑁆𑀢𑀸 𑀭𑀜𑁆𑀜𑁄 𑀓𑀜𑁆𑀘𑀺 𑀤𑁄𑀲𑀁 𑀅𑀤𑀺𑀲𑁆𑀯𑀸, ‘‘𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀢𑁂 𑀤𑁄𑀲𑁄’’𑀢𑀺 𑀯𑀢𑁆𑀯𑀸 ‘‘𑀓𑀣𑀁 𑀦𑀼 𑀔𑁄 𑀇𑀤𑀁 𑀅𑀫𑁆𑀳𑀸𑀓𑀁 𑀪𑀬𑀁 𑀯𑀽𑀧𑀲𑀫𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀫𑀦𑁆𑀢𑀬𑀺𑀁𑀲𑀼. 𑀢𑀢𑁆𑀣 𑀏𑀓𑀘𑁆𑀘𑁂𑀳𑀺 ‘‘𑀩𑀮𑀺𑀓𑀫𑁆𑀫𑁂𑀦 𑀆𑀬𑀸𑀘𑀦𑀸𑀬 𑀫𑀗𑁆𑀕𑀮𑀓𑀺𑀭𑀺𑀬𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑀫𑁆𑀧𑀺 𑀢𑀁 𑀯𑀺𑀥𑀺𑀁 𑀓𑀢𑁆𑀯𑀸 𑀧𑀝𑀺𑀩𑀸𑀳𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀅𑀣𑀜𑁆𑀜𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀙 𑀲𑀢𑁆𑀣𑀸𑀭𑁄 𑀫𑀳𑀸𑀦𑀼𑀪𑀸𑀯𑀸, 𑀢𑁂𑀲𑀼 𑀇𑀥𑀸𑀕𑀢𑀫𑀢𑁆𑀢𑁂𑀲𑀼 𑀪𑀬𑀁 𑀯𑀽𑀧𑀲𑀫𑁂𑀬𑁆𑀬𑀸’’𑀢𑀺. 𑀅𑀧𑀭𑁂 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄. 𑀲𑁄 𑀳𑀺 𑀪𑀕𑀯𑀸 𑀲𑀩𑁆𑀩𑀲𑀢𑁆𑀢𑀳𑀺𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄. 𑀢𑀲𑁆𑀫𑀺𑀁 𑀇𑀥 𑀆𑀕𑀢𑁂 𑀇𑀫𑀸𑀦𑀺 𑀪𑀬𑀸𑀦𑀺 𑀯𑀽𑀧𑀲𑀫𑁂𑀬𑁆𑀬𑀼’’𑀦𑁆𑀢𑀺 𑀆𑀳𑀁𑀲𑀼. 𑀢𑁂𑀲𑀁 𑀯𑀘𑀦𑀁 𑀲𑀩𑁆𑀩𑁂𑀧𑀺 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 ‘‘𑀓𑀳𑀁 𑀦𑀼 𑀔𑁄 𑀲𑁄 𑀪𑀕𑀯𑀸 𑀏𑀢𑀭𑀳𑀺 𑀯𑀺𑀳𑀭𑀢𑀻’’𑀢𑀺 𑀆𑀳𑀁𑀲𑀼. 𑀢𑀤𑀸 𑀧𑀦 𑀲𑀢𑁆𑀣𑀸 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀭𑀜𑁆𑀜𑁄 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀩𑀺𑀫𑁆𑀩𑀺𑀲𑀸𑀭𑀲𑀫𑀸𑀕𑀫𑁂 𑀩𑀺𑀫𑁆𑀩𑀺𑀲𑀸𑀭𑁂𑀦 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑁄 𑀫𑀳𑀸𑀮𑀺 𑀦𑀸𑀫 𑀮𑀺𑀘𑁆𑀙𑀯𑀻 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺.

𑀯𑁂𑀲𑀸𑀮𑀺𑀯𑀸𑀲𑀺𑀦𑁄 𑀫𑀳𑀦𑁆𑀢𑀁 𑀧𑀡𑁆𑀡𑀸𑀓𑀸𑀭𑀁 𑀲𑀚𑁆𑀚𑁂𑀢𑁆𑀯𑀸 𑀭𑀸𑀚𑀸𑀦𑀁 𑀩𑀺𑀫𑁆𑀩𑀺𑀲𑀸𑀭𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 ‘‘𑀲𑀢𑁆𑀣𑀸𑀭𑀁 𑀇𑀥𑀸𑀦𑁂𑀣𑀸’’𑀢𑀺 𑀫𑀳𑀸𑀮𑀺𑀜𑁆𑀘𑁂𑀯 𑀮𑀺𑀘𑁆𑀙𑀯𑀺𑀁 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀜𑁆𑀘 𑀧𑀳𑀺𑀡𑀺𑀁𑀲𑀼. 𑀢𑁂 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀦𑀺𑀯𑁂𑀤𑁂𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀲𑀢𑁆𑀣𑀸𑀭𑀁 𑀅𑀫𑁆𑀳𑀸𑀓𑀁 𑀦𑀕𑀭𑀁 𑀧𑁂𑀲𑁂𑀣𑀸’’𑀢𑀺 𑀬𑀸𑀘𑀺𑀁𑀲𑀼. 𑀭𑀸𑀚𑀸 ‘‘𑀢𑀼𑀫𑁆𑀳𑁂𑀯 𑀚𑀸𑀦𑀸𑀣𑀸’’𑀢𑀺 𑀦 𑀲𑀫𑁆𑀧𑀝𑀺𑀘𑁆𑀙𑀺. 𑀢𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀬𑀸𑀘𑀺𑀁𑀲𑀼 𑁋 ‘‘𑀪𑀦𑁆𑀢𑁂, 𑀯𑁂𑀲𑀸𑀮𑀺𑀬𑀁 𑀢𑀻𑀡𑀺 𑀪𑀬𑀸𑀦𑀺 𑀉𑀧𑁆𑀧𑀦𑁆𑀦𑀸𑀦𑀺, 𑀢𑀸𑀦𑀺 𑀢𑀼𑀫𑁆𑀳𑁂𑀲𑀼 𑀆𑀕𑀢𑁂𑀲𑀼 𑀯𑀽𑀧𑀲𑀫𑀺𑀲𑁆𑀲𑀦𑁆𑀢𑀺, 𑀏𑀣, 𑀪𑀦𑁆𑀢𑁂, 𑀕𑀘𑁆𑀙𑀸𑀫𑀸’’𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀯𑁂𑀲𑀸𑀮𑀺𑀬𑀁 𑀭𑀢𑀦𑀲𑀼𑀢𑁆𑀢𑁂 (𑀔𑀼. 𑀧𑀸. 𑁬.𑁧 𑀆𑀤𑀬𑁄; 𑀲𑀼. 𑀦𑀺. 𑁨𑁨𑁪 𑀆𑀤𑀬𑁄) 𑀯𑀼𑀢𑁆𑀢𑁂 𑀲𑀸 𑀭𑀓𑁆𑀔𑀸 𑀘𑀓𑁆𑀓𑀯𑀸𑀴𑀸𑀦𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀁 𑀨𑀭𑀺𑀲𑁆𑀲𑀢𑀺, 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀺, 𑀢𑀸𑀦𑀺 𑀘 𑀪𑀬𑀸𑀦𑀺 𑀯𑀽𑀧𑀲𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀜𑀢𑁆𑀯𑀸 𑀢𑁂𑀲𑀁 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺.

𑀭𑀸𑀚𑀸 𑀩𑀺𑀫𑁆𑀩𑀺𑀲𑀸𑀭𑁄 ‘‘𑀲𑀢𑁆𑀣𑀸𑀭𑀸 𑀓𑀺𑀭 𑀯𑁂𑀲𑀸𑀮𑀺𑀕𑀫𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢’’𑀦𑁆𑀢𑀺 𑀲𑀼𑀢𑁆𑀯𑀸 𑀦𑀕𑀭𑁂 𑀖𑁄𑀲𑀦𑀁 𑀓𑀸𑀭𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀯𑁂𑀲𑀸𑀮𑀺𑀕𑀫𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀆𑀕𑀫𑁂𑀣, 𑀢𑀸𑀯 𑀫𑀕𑁆𑀕𑀁 𑀧𑀝𑀺𑀬𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀭𑀸𑀚𑀕𑀳𑀲𑁆𑀲 𑀘 𑀕𑀗𑁆𑀕𑀸𑀬 𑀘 𑀅𑀦𑁆𑀢𑀭𑁂 𑀧𑀜𑁆𑀘𑀬𑁄𑀚𑀦𑀪𑀽𑀫𑀺𑀁 𑀲𑀫𑀁 𑀓𑀸𑀭𑁂𑀢𑁆𑀯𑀸 𑀬𑁄𑀚𑀦𑁂 𑀬𑁄𑀚𑀦𑁂 𑀯𑀺𑀳𑀸𑀭𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀢𑁆𑀣𑀼 𑀕𑀫𑀦𑀓𑀸𑀮𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀭𑀸𑀚𑀸 𑀬𑁄𑀚𑀦𑀦𑁆𑀢𑀭𑁂 𑀚𑀡𑁆𑀡𑀼𑀫𑀢𑁆𑀢𑁂𑀦 𑀑𑀥𑀺𑀦𑀸 𑀧𑀜𑁆𑀘𑀯𑀡𑁆𑀡𑀸𑀦𑀺 𑀧𑀼𑀧𑁆𑀨𑀸𑀦𑀺 𑀑𑀓𑀺𑀭𑀸𑀧𑁂𑀢𑁆𑀯𑀸 𑀥𑀚𑀧𑀝𑀸𑀓𑀓𑀤𑀮𑀻𑀆𑀤𑀻𑀦𑀺 𑀉𑀲𑁆𑀲𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀙𑀢𑁆𑀢𑀸𑀢𑀺𑀙𑀢𑁆𑀢𑀁 𑀓𑀢𑁆𑀯𑀸 𑀤𑁆𑀯𑁂 𑀲𑁂𑀢𑀘𑁆𑀙𑀢𑁆𑀢𑀸𑀦𑀺 𑀏𑀓𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀫𑁂𑀓𑀁 𑀲𑁂𑀢𑀘𑁆𑀙𑀢𑁆𑀢𑀁 𑀉𑀧𑀭𑀺 𑀥𑀸𑀭𑁂𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀧𑀼𑀧𑁆𑀨𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑀁 𑀓𑀭𑁄𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑁂𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀸𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀸𑀤𑀻𑀦𑀺 𑀤𑀢𑁆𑀯𑀸 𑀧𑀜𑁆𑀘𑀳𑀺 𑀤𑀺𑀯𑀲𑁂𑀳𑀺 𑀕𑀗𑁆𑀕𑀸𑀢𑀻𑀭𑀁 𑀧𑀸𑀧𑁂𑀢𑁆𑀯𑀸 𑀢𑀢𑁆𑀣 𑀦𑀸𑀯𑀁 𑀅𑀮𑀗𑁆𑀓𑀭𑁄𑀦𑁆𑀢𑁄 𑀯𑁂𑀲𑀸𑀮𑀺𑀓𑀸𑀦𑀁 𑀲𑀸𑀲𑀦𑀁 𑀧𑁂𑀲𑁂𑀲𑀺 𑁋 ‘‘𑀫𑀕𑁆𑀕𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀲𑀢𑁆𑀣𑀼 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑁄𑀦𑁆𑀢𑀽’’𑀢𑀺. 𑀢𑁂 ‘‘𑀤𑀺𑀕𑀼𑀡𑀁 𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑁂𑀲𑀸𑀮𑀺𑀬𑀸 𑀘 𑀕𑀗𑁆𑀕𑀸𑀬 𑀘 𑀅𑀦𑁆𑀢𑀭𑁂 𑀢𑀺𑀬𑁄𑀚𑀦𑀪𑀽𑀫𑀺𑀁 𑀲𑀫𑀁 𑀓𑀸𑀭𑁂𑀢𑁆𑀯𑀸 𑀪𑀕𑀯𑀢𑁄 𑀘𑀢𑀽𑀳𑀺 𑀲𑁂𑀢𑀘𑁆𑀙𑀢𑁆𑀢𑁂𑀳𑀺 𑀏𑀓𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀲𑁂𑀢𑀘𑁆𑀙𑀢𑁆𑀢𑁂𑀳𑀺 𑀙𑀢𑁆𑀢𑀸𑀢𑀺𑀙𑀢𑁆𑀢𑀸𑀦𑀺 𑀲𑀚𑁆𑀚𑁂𑀢𑁆𑀯𑀸 𑀧𑀽𑀚𑀁 𑀓𑀼𑀭𑀼𑀫𑀸𑀦𑀸 𑀆𑀕𑀦𑁆𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀅𑀝𑁆𑀞𑀁𑀲𑀼. 𑀩𑀺𑀫𑁆𑀩𑀺𑀲𑀸𑀭𑁄 𑀤𑁆𑀯𑁂 𑀦𑀸𑀯𑀸 𑀲𑀗𑁆𑀖𑀸𑀝𑁂𑀢𑁆𑀯𑀸 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀧𑀼𑀧𑁆𑀨𑀤𑀸𑀫𑀸𑀤𑀻𑀳𑀺 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀲𑀩𑁆𑀩𑀭𑀢𑀦𑀫𑀬𑀁 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀸𑀧𑁂𑀲𑀺. 𑀪𑀕𑀯𑀸 𑀢𑀲𑁆𑀫𑀺𑀁 𑀦𑀺𑀲𑀻𑀤𑀺. 𑀪𑀺𑀓𑁆𑀔𑀽𑀧𑀺 𑀦𑀸𑀯𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀭𑀸𑀚𑀸 𑀅𑀦𑀼𑀕𑀘𑁆𑀙𑀦𑁆𑀢𑁄 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 ‘‘𑀬𑀸𑀯, 𑀪𑀦𑁆𑀢𑁂, 𑀪𑀕𑀯𑀸 𑀆𑀕𑀘𑁆𑀙𑀢𑀺, 𑀢𑀸𑀯𑀸𑀳𑀁 𑀇𑀥𑁂𑀯 𑀕𑀗𑁆𑀕𑀸𑀢𑀻𑀭𑁂 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀦𑀸𑀯𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀲𑀢𑁆𑀣𑀸 𑀬𑁄𑀚𑀦𑀫𑀢𑁆𑀢𑀁 𑀅𑀤𑁆𑀥𑀸𑀦𑀁 𑀕𑀗𑁆𑀕𑀸𑀬 𑀕𑀦𑁆𑀢𑁆𑀯𑀸 𑀯𑁂𑀲𑀸𑀮𑀺𑀓𑀸𑀦𑀁 𑀲𑀻𑀫𑀁 𑀧𑀸𑀧𑀼𑀡𑀺.

𑀮𑀺𑀘𑁆𑀙𑀯𑀻𑀭𑀸𑀚𑀸𑀦𑁄 𑀲𑀢𑁆𑀣𑀸𑀭𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 𑀦𑀸𑀯𑀁 𑀢𑀻𑀭𑀁 𑀉𑀧𑀦𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀦𑀸𑀯𑀸𑀢𑁄 𑀑𑀢𑀸𑀭𑀬𑀺𑀁𑀲𑀼. 𑀲𑀢𑁆𑀣𑀸𑀭𑀸 𑀑𑀢𑀭𑀺𑀢𑁆𑀯𑀸 𑀢𑀻𑀭𑁂 𑀅𑀓𑁆𑀓𑀦𑁆𑀢𑀫𑀢𑁆𑀢𑁂𑀬𑁂𑀯 𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸 𑀧𑁄𑀓𑁆𑀔𑀭𑀯𑀲𑁆𑀲𑀁 𑀯𑀲𑁆𑀲𑀺. 𑀲𑀩𑁆𑀩𑀢𑁆𑀣 𑀚𑀡𑁆𑀡𑀼𑀧𑁆𑀧𑀫𑀸𑀡𑀊𑀭𑀼𑀧𑁆𑀧𑀫𑀸𑀡𑀓𑀝𑀺𑀧𑁆𑀧𑀫𑀸𑀡𑀸𑀤𑀻𑀦𑀺 𑀉𑀤𑀓𑀸𑀦𑀺 𑀲𑀦𑁆𑀤𑀦𑁆𑀢𑀸𑀦𑀺 𑀲𑀩𑁆𑀩𑀓𑀼𑀡𑀧𑀸𑀦𑀺 𑀕𑀗𑁆𑀕𑀁 𑀧𑀯𑁂𑀲𑀬𑀺𑀁𑀲𑀼, 𑀧𑀭𑀺𑀲𑀼𑀤𑁆𑀥𑁄 𑀪𑀽𑀫𑀺𑀪𑀸𑀕𑁄 𑀅𑀳𑁄𑀲𑀺. 𑀮𑀺𑀘𑁆𑀙𑀯𑀻𑀭𑀸𑀚𑀸𑀦𑁄 𑀲𑀢𑁆𑀣𑀸𑀭𑀁 𑀬𑁄𑀚𑀦𑁂 𑀬𑁄𑀚𑀦𑁂 𑀯𑀲𑀸𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀤𑀺𑀕𑀼𑀡𑀁 𑀧𑀽𑀚𑀁 𑀓𑀭𑁄𑀦𑁆𑀢𑀸 𑀢𑀻𑀳𑀺 𑀤𑀺𑀯𑀲𑁂𑀳𑀺 𑀯𑁂𑀲𑀸𑀮𑀺𑀁 𑀦𑀬𑀺𑀁𑀲𑀼. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑁂𑀯𑀕𑀡𑀧𑀭𑀺𑀯𑀼𑀢𑁄 𑀆𑀕𑀫𑀸𑀲𑀺, 𑀫𑀳𑁂𑀲𑀓𑁆𑀔𑀸𑀦𑀁 𑀤𑁂𑀯𑀸𑀦𑀁 𑀲𑀦𑁆𑀦𑀺𑀧𑀸𑀢𑁂𑀦 𑀅𑀫𑀦𑀼𑀲𑁆𑀲𑀸 𑀬𑁂𑀪𑀼𑀬𑁆𑀬𑁂𑀦 𑀧𑀮𑀸𑀬𑀺𑀁𑀲𑀼. 𑀲𑀢𑁆𑀣𑀸 𑀲𑀸𑀬𑀁 𑀦𑀕𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀫𑀁, 𑀆𑀦𑀦𑁆𑀤, 𑀭𑀢𑀦𑀲𑀼𑀢𑁆𑀢𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀮𑀺𑀘𑁆𑀙𑀯𑀻𑀓𑀼𑀫𑀸𑀭𑁂𑀳𑀺 𑀲𑀤𑁆𑀥𑀺𑀁 𑀯𑀺𑀘𑀭𑀦𑁆𑀢𑁄 𑀯𑁂𑀲𑀸𑀮𑀺𑀬𑀸 𑀢𑀺𑀡𑁆𑀡𑀁 𑀧𑀸𑀓𑀸𑀭𑀸𑀦𑀁 𑀅𑀦𑁆𑀢𑀭𑁂 𑀧𑀭𑀺𑀢𑁆𑀢𑀁 𑀓𑀭𑁄𑀳𑀻’’𑀢𑀺.

𑀣𑁂𑀭𑁄 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀁 𑀭𑀢𑀦𑀲𑀼𑀢𑁆𑀢𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀢𑁆𑀣𑀼 𑀲𑁂𑀮𑀫𑀬𑀧𑀢𑁆𑀢𑁂𑀦 𑀉𑀤𑀓𑀁 𑀆𑀤𑀸𑀬 𑀦𑀕𑀭𑀤𑁆𑀯𑀸𑀭𑁂 𑀞𑀺𑀢𑁄 𑀧𑀡𑀺𑀥𑀸𑀦𑀢𑁄 𑀧𑀝𑁆𑀞𑀸𑀬 𑀢𑀣𑀸𑀕𑀢𑀲𑁆𑀲 𑀤𑀲 𑀧𑀸𑀭𑀫𑀺𑀬𑁄 𑀤𑀲 𑀉𑀧𑀧𑀸𑀭𑀫𑀺𑀬𑁄 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀮𑁄𑀓𑀢𑁆𑀣𑀘𑀭𑀺𑀬𑀸 𑀜𑀸𑀢𑀢𑁆𑀣𑀘𑀭𑀺𑀬𑀸 𑀩𑀼𑀤𑁆𑀥𑀢𑁆𑀣𑀘𑀭𑀺𑀬𑀸𑀢𑀺 𑀢𑀺𑀲𑁆𑀲𑁄 𑀘𑀭𑀺𑀬𑀸𑀬𑁄 𑀧𑀘𑁆𑀙𑀺𑀫𑀪𑀯𑁂 𑀕𑀩𑁆𑀪𑀯𑁄𑀓𑁆𑀓𑀦𑁆𑀢𑀺𑀁 𑀚𑀸𑀢𑀺𑀁 𑀅𑀪𑀺𑀦𑀺𑀓𑁆𑀔𑀫𑀦𑀁 𑀧𑀥𑀸𑀦𑀘𑀭𑀺𑀬𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀫𑀸𑀭𑀯𑀺𑀚𑀬𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀝𑀺𑀯𑁂𑀥𑀁 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀁 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀢𑀺 𑀲𑀩𑁆𑀩𑁂𑀧𑀺𑀫𑁂 𑀩𑀼𑀤𑁆𑀥𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀢𑀺𑀬𑀸𑀫𑀭𑀢𑁆𑀢𑀺𑀁 𑀢𑀻𑀲𑀼 𑀧𑀸𑀓𑀸𑀭𑀦𑁆𑀢𑀭𑁂𑀲𑀼 𑀧𑀭𑀺𑀢𑁆𑀢𑀁 𑀓𑀭𑁄𑀦𑁆𑀢𑁄 𑀯𑀺𑀘𑀭𑀺. 𑀢𑁂𑀦 ‘‘𑀬𑀁𑀓𑀺𑀜𑁆𑀘𑀻’’𑀢𑀺 𑀯𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀉𑀤𑁆𑀥𑀁 𑀔𑀺𑀢𑁆𑀢𑀉𑀤𑀓𑀁 𑀅𑀫𑀦𑀼𑀲𑁆𑀲𑀸𑀦𑀁 𑀉𑀧𑀭𑀺 𑀧𑀢𑀺. ‘‘𑀬𑀸𑀦𑀻𑀥 𑀪𑀽𑀢𑀸𑀦𑀻’’𑀢𑀺 𑀕𑀸𑀣𑀸𑀓𑀣𑀦𑀢𑁄 𑀧𑀝𑁆𑀞𑀸𑀬 𑀭𑀚𑀢𑀯𑀝𑀁𑀲𑀓𑀸 𑀯𑀺𑀬 𑀉𑀤𑀓𑀩𑀺𑀦𑁆𑀤𑀽𑀦𑀺 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀕𑀺𑀮𑀸𑀦𑀫𑀦𑀼𑀲𑁆𑀲𑀸𑀦𑀁 𑀉𑀧𑀭𑀺 𑀧𑀢𑀺𑀁𑀲𑀼. 𑀢𑀸𑀯𑀤𑁂𑀯 𑀯𑀽𑀧𑀲𑀦𑁆𑀢𑀭𑁄𑀕𑀸 𑀫𑀦𑀼𑀲𑁆𑀲𑀸 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀣𑁂𑀭𑀁 𑀧𑀭𑀺𑀯𑀸𑀭𑁂𑀲𑀼𑀁. ‘‘𑀬𑀁𑀓𑀺𑀜𑁆𑀘𑀻’’𑀢𑀺 𑀯𑀼𑀢𑁆𑀢𑀧𑀤𑀢𑁄 𑀧𑀝𑁆𑀞𑀸𑀬 𑀧𑀦 𑀉𑀤𑀓𑀨𑀼𑀲𑀺𑀢𑁂𑀳𑀺 𑀨𑀼𑀝𑁆𑀞𑀨𑀼𑀝𑁆𑀞𑀸 𑀲𑀩𑁆𑀩𑁂 𑀅𑀧𑀮𑀸𑀬𑀦𑁆𑀢𑀸 𑀲𑀗𑁆𑀓𑀸𑀭𑀓𑀽𑀝𑀪𑀺𑀢𑁆𑀢𑀺𑀧𑀤𑁂𑀲𑀸𑀤𑀺𑀦𑀺𑀲𑁆𑀲𑀺𑀢𑀸 𑀅𑀫𑀦𑀼𑀲𑁆𑀲𑀸 𑀢𑁂𑀦 𑀢𑁂𑀦 𑀤𑁆𑀯𑀸𑀭𑁂𑀦 𑀧𑀮𑀸𑀬𑀺𑀁𑀲𑀼. 𑀤𑁆𑀯𑀸𑀭𑀸𑀦𑀺 𑀅𑀦𑁄𑀓𑀸𑀲𑀸𑀦𑀺 𑀅𑀳𑁂𑀲𑀼𑀁. 𑀢𑁂 𑀑𑀓𑀸𑀲𑀁 𑀅𑀮𑀪𑀦𑁆𑀢𑀸 𑀧𑀸𑀓𑀸𑀭𑀁 𑀪𑀺𑀦𑁆𑀤𑀺𑀢𑁆𑀯𑀸𑀧𑀺 𑀧𑀮𑀸𑀬𑀺𑀁𑀲𑀼.

𑀫𑀳𑀸𑀚𑀦𑁄 𑀦𑀕𑀭𑀫𑀚𑁆𑀛𑁂 𑀲𑀦𑁆𑀣𑀸𑀕𑀸𑀭𑀁 𑀲𑀩𑁆𑀩𑀕𑀦𑁆𑀥𑁂𑀳𑀺 𑀉𑀧𑀮𑀺𑀫𑁆𑀧𑁂𑀢𑁆𑀯𑀸 𑀉𑀧𑀭𑀺 𑀲𑀼𑀯𑀡𑁆𑀡𑀢𑀸𑀭𑀓𑀸𑀤𑀺𑀯𑀺𑀘𑀺𑀢𑁆𑀢𑀁 𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀆𑀦𑁂𑀲𑀺. 𑀲𑀢𑁆𑀣𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀮𑀺𑀘𑁆𑀙𑀯𑀻𑀕𑀡𑁄𑀧𑀺 𑀲𑀢𑁆𑀣𑀸𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑁂𑀯𑀕𑀡𑀧𑀭𑀺𑀯𑀼𑀢𑁄 𑀧𑀢𑀺𑀭𑀽𑀧𑁂 𑀑𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀣𑁂𑀭𑁄𑀧𑀺 𑀲𑀓𑀮𑀦𑀕𑀭𑀁 𑀅𑀦𑀼𑀯𑀺𑀘𑀭𑀺𑀢𑁆𑀯𑀸 𑀯𑀽𑀧𑀲𑀦𑁆𑀢𑀭𑁄𑀕𑁂𑀦 𑀫𑀳𑀸𑀚𑀦𑁂𑀦 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀢𑀤𑁂𑀯 𑀭𑀢𑀦𑀲𑀼𑀢𑁆𑀢𑀁 𑀅𑀪𑀸𑀲𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀏𑀯𑀁 𑀧𑀼𑀦𑀤𑀺𑀯𑀲𑁂𑀧𑀻𑀢𑀺 𑀲𑀢𑁆𑀢𑀸𑀳𑀁 𑀢𑀤𑁂𑀯 𑀭𑀢𑀦𑀲𑀼𑀢𑁆𑀢𑀁 𑀤𑁂𑀲𑁂𑀢𑁆𑀯𑀸 𑀲𑀩𑁆𑀩𑀪𑀬𑀸𑀦𑀁 𑀯𑀽𑀧𑀲𑀦𑁆𑀢𑀪𑀸𑀯𑀁 𑀜𑀢𑁆𑀯𑀸 𑀮𑀺𑀘𑁆𑀙𑀯𑀻𑀕𑀡𑀁 𑀆𑀫𑀦𑁆𑀢𑁂𑀢𑁆𑀯𑀸 𑀯𑁂𑀲𑀸𑀮𑀺𑀢𑁄 𑀦𑀺𑀓𑁆𑀔𑀫𑀺. 𑀮𑀺𑀘𑁆𑀙𑀯𑀻𑀭𑀸𑀚𑀸𑀦𑁄 𑀤𑀺𑀕𑀼𑀡𑀁 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀸 𑀧𑀼𑀦 𑀢𑀻𑀳𑀺 𑀤𑀺𑀯𑀲𑁂𑀳𑀺 𑀲𑀢𑁆𑀣𑀸𑀭𑀁 𑀕𑀗𑁆𑀕𑀸𑀢𑀻𑀭𑀁 𑀦𑀬𑀺𑀁𑀲𑀼.

𑀕𑀗𑁆𑀕𑀸𑀬 𑀦𑀺𑀩𑁆𑀩𑀢𑁆𑀢𑀦𑀸𑀕𑀭𑀸𑀚𑀸𑀦𑁄 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀫𑀦𑀼𑀲𑁆𑀲𑀸 𑀢𑀣𑀸𑀕𑀢𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀫𑀬𑀁 𑀓𑀺𑀁 𑀦 𑀓𑀭𑁄𑀫𑀸’’𑀢𑀺. 𑀢𑁂 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀬𑀸 𑀦𑀸𑀯𑀸𑀬𑁄 𑀫𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀬𑁂 𑀧𑀮𑁆𑀮𑀗𑁆𑀓𑁂 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀜𑁆𑀘𑀯𑀡𑁆𑀡𑀧𑀤𑀼𑀫𑀲𑀜𑁆𑀙𑀦𑁆𑀦𑀁 𑀉𑀤𑀓𑀁 𑀓𑀭𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀫𑁆𑀧𑀺 𑀅𑀦𑀼𑀕𑁆𑀕𑀳𑀁 𑀓𑀭𑁄𑀣𑀸’’𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀸𑀯𑀁 𑀅𑀪𑀺𑀭𑀼𑀳𑀡𑀢𑁆𑀣𑀸𑀬 𑀲𑀢𑁆𑀣𑀸𑀭𑀁 𑀬𑀸𑀘𑀺𑀁𑀲𑀼. ‘‘𑀫𑀦𑀼𑀲𑁆𑀲𑀸 𑀘 𑀦𑀸𑀕𑀸 𑀘 𑀢𑀣𑀸𑀕𑀢𑀲𑁆𑀲 𑀧𑀽𑀚𑀁 𑀓𑀭𑁄𑀦𑁆𑀢𑀺, 𑀫𑀬𑀁 𑀧𑀦 𑀓𑀺𑀁 𑀦 𑀓𑀭𑁄𑀫𑀸’’𑀢𑀺 𑀪𑀽𑀫𑀝𑁆𑀞𑀓𑀤𑁂𑀯𑁂𑀧𑀺 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀸 𑀲𑀩𑁆𑀩𑁂 𑀤𑁂𑀯𑀸 𑀲𑀓𑁆𑀓𑀸𑀭𑀁 𑀓𑀭𑀺𑀁𑀲𑀼. 𑀢𑀢𑁆𑀣 𑀦𑀸𑀕𑀸 𑀬𑁄𑀚𑀦𑀺𑀓𑀸𑀦𑀺 𑀙𑀢𑁆𑀢𑀸𑀢𑀺𑀙𑀢𑁆𑀢𑀸𑀦𑀺 𑀉𑀓𑁆𑀔𑀺𑀧𑀺𑀁𑀲𑀼. 𑀏𑀯𑀁 𑀳𑁂𑀝𑁆𑀞𑀸 𑀦𑀸𑀕𑀸 𑀪𑀽𑀫𑀺𑀢𑀮𑁂 𑀭𑀼𑀓𑁆𑀔𑀕𑀘𑁆𑀙𑀧𑀩𑁆𑀩𑀢𑀸𑀤𑀻𑀲𑀼 𑀪𑀽𑀫𑀝𑁆𑀞𑀓𑀸 𑀤𑁂𑀯𑀢𑀸, 𑀅𑀦𑁆𑀢𑀮𑀺𑀓𑁆𑀔𑁂 𑀆𑀓𑀸𑀲𑀝𑁆𑀞𑀤𑁂𑀯𑀸𑀢𑀺 𑀦𑀸𑀕𑀪𑀯𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑁂𑀦 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀙𑀢𑁆𑀢𑀸𑀢𑀺𑀙𑀢𑁆𑀢𑀸𑀦𑀺 𑀉𑀲𑁆𑀲𑀸𑀧𑀺𑀢𑀸𑀦𑀺 𑀅𑀳𑁂𑀲𑀼𑀁. 𑀙𑀢𑁆𑀢𑀦𑁆𑀢𑀭𑁂𑀲𑀼 𑀥𑀚𑀸, 𑀥𑀚𑀦𑁆𑀢𑀭𑁂𑀲𑀼 𑀧𑀝𑀸𑀓𑀸, 𑀢𑁂𑀲𑀁 𑀅𑀦𑁆𑀢𑀭𑀦𑁆𑀢𑀭𑀸 𑀧𑀼𑀧𑁆𑀨𑀤𑀸𑀫𑀯𑀸𑀲𑀘𑀼𑀡𑁆𑀡𑀥𑀼𑀫𑀸𑀤𑀻𑀳𑀺 𑀲𑀓𑁆𑀓𑀸𑀭𑁄 𑀅𑀳𑁄𑀲𑀺. 𑀲𑀩𑁆𑀩𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀤𑁂𑀯𑀧𑀼𑀢𑁆𑀢𑀸 𑀙𑀡𑀯𑁂𑀲𑀁 𑀕𑀳𑁂𑀢𑁆𑀯𑀸 𑀉𑀕𑁆𑀖𑁄𑀲𑀬𑀫𑀸𑀦𑀸 𑀆𑀓𑀸𑀲𑁂 𑀯𑀺𑀘𑀭𑀺𑀁𑀲𑀼. 𑀢𑀬𑁄 𑀏𑀯 𑀓𑀺𑀭 𑀲𑀫𑀸𑀕𑀫𑀸 𑀫𑀳𑀦𑁆𑀢𑀸 𑀅𑀳𑁂𑀲𑀼𑀁 𑁋 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀲𑀫𑀸𑀕𑀫𑁄 𑀤𑁂𑀯𑁄𑀭𑁄𑀳𑀡𑀲𑀫𑀸𑀕𑀫𑁄 𑀅𑀬𑀁 𑀕𑀗𑁆𑀕𑁄𑀭𑁄𑀳𑀡𑀲𑀫𑀸𑀕𑀫𑁄𑀢𑀺.

𑀧𑀭𑀢𑀻𑀭𑁂 𑀩𑀺𑀫𑁆𑀩𑀺𑀲𑀸𑀭𑁄𑀧𑀺 𑀮𑀺𑀘𑁆𑀙𑀯𑀻𑀳𑀺 𑀓𑀢𑀲𑀓𑁆𑀓𑀸𑀭𑀢𑁄 𑀤𑀺𑀕𑀼𑀡𑀁 𑀲𑀓𑁆𑀓𑀸𑀭𑀁 𑀲𑀚𑁆𑀚𑁂𑀢𑁆𑀯𑀸 𑀪𑀕𑀯𑀢𑁄 𑀆𑀕𑀫𑀦𑀁 𑀉𑀤𑀺𑀓𑁆𑀔𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀕𑀗𑁆𑀕𑀸𑀬 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀭𑀸𑀚𑀽𑀦𑀁 𑀫𑀳𑀦𑁆𑀢𑀁 𑀧𑀭𑀺𑀘𑁆𑀘𑀸𑀕𑀁 𑀑𑀮𑁄𑀓𑁂𑀢𑁆𑀯𑀸 𑀦𑀸𑀕𑀸𑀤𑀻𑀦𑀜𑁆𑀘 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀏𑀓𑁂𑀓𑀸𑀬 𑀦𑀸𑀯𑀸𑀬 𑀧𑀜𑁆𑀘𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀧𑀭𑀺𑀯𑀸𑀭𑀁 𑀏𑀓𑁂𑀓𑀁 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀁 𑀫𑀸𑀧𑁂𑀲𑀺. 𑀲𑁄 𑀏𑀓𑁂𑀓𑀲𑁆𑀲 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀘𑁂𑀯 𑀓𑀧𑁆𑀧𑀭𑀼𑀓𑁆𑀔𑀲𑁆𑀲 𑀘 𑀧𑀼𑀧𑁆𑀨𑀤𑀸𑀫𑀲𑁆𑀲 𑀘 𑀳𑁂𑀝𑁆𑀞𑀸 𑀦𑀸𑀕𑀕𑀡𑀧𑀭𑀺𑀯𑀼𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀪𑀽𑀫𑀝𑁆𑀞𑀓𑀤𑁂𑀯𑀢𑀸𑀤𑀻𑀲𑀼𑀧𑀺 𑀏𑀓𑁂𑀓𑀲𑁆𑀫𑀺𑀁 𑀑𑀓𑀸𑀲𑁂 𑀲𑀧𑀭𑀺𑀯𑀸𑀭𑀁 𑀏𑀓𑁂𑀓𑀁 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀁 𑀫𑀸𑀧𑁂𑀲𑀺. 𑀏𑀯𑀁 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑁂 𑀏𑀓𑀸𑀮𑀗𑁆𑀓𑀸𑀭𑁂 𑀏𑀓𑀼𑀲𑁆𑀲𑀯𑁂 𑀏𑀓𑀙𑀡𑁂𑀬𑁂𑀯 𑀘 𑀚𑀸𑀢𑁂 𑀲𑀢𑁆𑀣𑀸 𑀦𑀸𑀕𑀸𑀦𑀫𑀦𑀼𑀕𑁆𑀕𑀳𑀁 𑀓𑀭𑁄𑀦𑁆𑀢𑁄 𑀏𑀓𑀁 𑀭𑀢𑀦𑀦𑀸𑀯𑀁 𑀅𑀪𑀺𑀭𑀼𑀳𑀺. 𑀪𑀺𑀓𑁆𑀔𑀽𑀲𑀼𑀧𑀺 𑀏𑀓𑁂𑀓𑁄 𑀏𑀓𑁂𑀓𑀫𑁂𑀯 𑀅𑀪𑀺𑀭𑀼𑀳𑀺. 𑀦𑀸𑀕𑀭𑀸𑀚𑀸𑀦𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀸𑀕𑀪𑀯𑀦𑀁 𑀧𑀯𑁂𑀲𑁂𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀤𑀺𑀩𑁆𑀩𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺𑀁𑀲𑀼. 𑀲𑀢𑁆𑀣𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀳𑀺 𑀧𑀽𑀚𑀺𑀬𑀫𑀸𑀦𑁄 𑀧𑀜𑁆𑀘𑀳𑀺 𑀦𑀸𑀯𑀸𑀲𑀢𑁂𑀳𑀺 𑀕𑀗𑁆𑀕𑀸𑀦𑀤𑀺𑀁 𑀅𑀢𑀺𑀓𑁆𑀓𑀫𑀺.

𑀭𑀸𑀚𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀦𑀸𑀯𑀸𑀢𑁄 𑀑𑀢𑀸𑀭𑁂𑀢𑁆𑀯𑀸 𑀆𑀕𑀫𑀦𑀓𑀸𑀮𑁂 𑀮𑀺𑀘𑁆𑀙𑀯𑀻𑀢𑀺 𑀓𑀢𑀲𑀓𑁆𑀓𑀸𑀭𑀢𑁄 𑀤𑀺𑀕𑀼𑀡𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀜𑁆𑀘𑀳𑀺 𑀤𑀺𑀯𑀲𑁂𑀳𑀺 𑀭𑀸𑀚𑀕𑀳𑀁 𑀅𑀪𑀺𑀦𑁂𑀲𑀺. 𑀤𑀼𑀢𑀺𑀬𑀤𑀺𑀯𑀲𑁂 𑀪𑀺𑀓𑁆𑀔𑀽 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀲𑀸𑀬𑀦𑁆𑀳𑀲𑀫𑀬𑁂 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀅𑀳𑁄 𑀩𑀼𑀤𑁆𑀥𑀸𑀦𑀁 𑀫𑀳𑀸𑀦𑀼𑀪𑀸𑀯𑁄, 𑀅𑀳𑁄 𑀲𑀢𑁆𑀣𑀭𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀲𑀸𑀤𑁄, 𑀕𑀗𑁆𑀕𑀸𑀬 𑀦𑀸𑀫 𑀑𑀭𑀢𑁄 𑀘 𑀧𑀸𑀭𑀢𑁄 𑀘 𑀅𑀝𑁆𑀞𑀬𑁄𑀚𑀦𑁂 𑀫𑀕𑁆𑀕𑁂 𑀩𑀼𑀤𑁆𑀥𑀕𑀢𑁂𑀦 𑀧𑀲𑀸𑀤𑁂𑀦 𑀭𑀸𑀚𑀽𑀳𑀺 𑀲𑀫𑀢𑀮𑀁 𑀪𑀽𑀫𑀺𑀁 𑀓𑀢𑁆𑀯𑀸 𑀯𑀸𑀮𑀼𑀓𑀸 𑀑𑀓𑀺𑀡𑁆𑀡𑀸, 𑀚𑀡𑁆𑀡𑀼𑀫𑀢𑁆𑀢𑁂𑀦 𑀑𑀥𑀺𑀦𑀸 𑀦𑀸𑀦𑀸𑀯𑀡𑁆𑀡𑀸𑀦𑀺 𑀧𑀼𑀧𑁆𑀨𑀸𑀦𑀺 𑀲𑀦𑁆𑀣𑀢𑀸𑀦𑀺, 𑀕𑀗𑁆𑀕𑀸𑀬 𑀉𑀤𑀓𑀁 𑀦𑀸𑀕𑀸𑀦𑀼𑀪𑀸𑀯𑁂𑀦 𑀧𑀜𑁆𑀘𑀯𑀡𑁆𑀡𑁂𑀳𑀺 𑀧𑀤𑀼𑀫𑁂𑀳𑀺 𑀲𑀜𑁆𑀙𑀦𑁆𑀦𑀁, 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀦𑀸 𑀙𑀢𑁆𑀢𑀸𑀢𑀺𑀙𑀢𑁆𑀢𑀸𑀦𑀺 𑀉𑀲𑁆𑀲𑀸𑀧𑀺𑀢𑀸𑀦𑀺, 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀏𑀓𑀸𑀮𑀗𑁆𑀓𑀸𑀭𑀁 𑀏𑀓𑀼𑀲𑁆𑀲𑀯𑀁 𑀯𑀺𑀬 𑀚𑀸𑀢’’𑀦𑁆𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀏𑀲 𑀧𑀽𑀚𑀸𑀲𑀓𑁆𑀓𑀸𑀭𑁄 𑀫𑀬𑁆𑀳𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁄, 𑀦 𑀦𑀸𑀕𑀤𑁂𑀯𑀩𑁆𑀭𑀳𑁆𑀫𑀸𑀦𑀼𑀪𑀸𑀯𑁂𑀦. 𑀅𑀢𑀻𑀢𑁂 𑀧𑀦 𑀅𑀧𑁆𑀧𑀫𑀢𑁆𑀢𑀓𑀧𑀭𑀺𑀘𑁆𑀘𑀸𑀕𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺.

𑀅𑀢𑀻𑀢𑁂 𑀢𑀓𑁆𑀓𑀲𑀺𑀮𑀸𑀬𑀁 𑀲𑀗𑁆𑀔𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺. 𑀢𑀲𑁆𑀲 𑀧𑀼𑀢𑁆𑀢𑁄 𑀲𑀼𑀲𑀻𑀫𑁄 𑀦𑀸𑀫 𑀫𑀸𑀡𑀯𑁄 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀏𑀓𑀤𑀺𑀯𑀲𑀁 𑀧𑀺𑀢𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀇𑀘𑁆𑀙𑀸𑀫𑀳𑀁, 𑀢𑀸𑀢, 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀫𑀦𑁆𑀢𑁂 𑀅𑀚𑁆𑀛𑀸𑀬𑀺𑀢𑀼’’𑀦𑁆𑀢𑀺. 𑀅𑀣 𑀦𑀁 𑀧𑀺𑀢𑀸 𑀆𑀳 𑁋 ‘‘𑀢𑁂𑀦 𑀳𑀺, 𑀢𑀸𑀢, 𑀅𑀲𑀼𑀓𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀫𑀫 𑀲𑀳𑀸𑀬𑀓𑁄, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀥𑀻𑀬𑀲𑁆𑀲𑀽’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀺𑀢𑀭𑀸 𑀧𑀳𑀺𑀢𑀪𑀸𑀯𑀫𑀸𑀘𑀺𑀓𑁆𑀔𑀺. 𑀅𑀣 𑀦𑀁 𑀲𑁄 ‘‘𑀲𑀳𑀸𑀬𑀓𑀲𑁆𑀲 𑀫𑁂 𑀧𑀼𑀢𑁆𑀢𑁄’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀝𑀺𑀧𑀲𑁆𑀲𑀤𑁆𑀥𑀤𑀭𑀣𑀁 𑀪𑀤𑁆𑀤𑀓𑁂𑀦 𑀤𑀺𑀯𑀲𑁂𑀦 𑀫𑀦𑁆𑀢𑁂 𑀯𑀸𑀘𑁂𑀢𑀼𑀫𑀸𑀭𑀪𑀺. 𑀲𑁄 𑀮𑀳𑀼𑀜𑁆𑀘 𑀕𑀡𑁆𑀳𑀦𑁆𑀢𑁄 𑀩𑀳𑀼𑀜𑁆𑀘 𑀕𑀡𑁆𑀳𑀦𑁆𑀢𑁄 𑀅𑀢𑁆𑀢𑀦𑁄 𑀉𑀕𑁆𑀕𑀳𑀺𑀢𑀼𑀕𑁆𑀕𑀳𑀺𑀢𑀁 𑀲𑀼𑀯𑀡𑁆𑀡𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀲𑀻𑀳𑀢𑁂𑀮𑀫𑀺𑀯 𑀅𑀯𑀺𑀦𑀲𑁆𑀲𑀫𑀸𑀦𑀁 𑀥𑀸𑀭𑁂𑀦𑁆𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀆𑀘𑀭𑀺𑀬𑀲𑁆𑀲 𑀲𑀫𑁆𑀫𑀼𑀔𑀢𑁄 𑀉𑀕𑁆𑀕𑀡𑁆𑀳𑀺𑀢𑀩𑁆𑀩𑀁 𑀲𑀩𑁆𑀩𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑁄 𑀅𑀢𑁆𑀢𑀦𑁄 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑀲𑁆𑀲 𑀆𑀤𑀺𑀫𑀚𑁆𑀛𑀫𑁂𑀯 𑀧𑀲𑁆𑀲𑀢𑀺, 𑀦𑁄 𑀧𑀭𑀺𑀬𑁄𑀲𑀸𑀦𑀁.

𑀲𑁄 𑀆𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀳𑀁 𑀇𑀫𑀲𑁆𑀲 𑀲𑀺𑀧𑁆𑀧𑀲𑁆𑀲 𑀆𑀤𑀺𑀫𑀚𑁆𑀛𑀫𑁂𑀯 𑀧𑀲𑁆𑀲𑀸𑀫𑀺, 𑀦𑁄 𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 𑀯𑀢𑁆𑀯𑀸 𑀆𑀘𑀭𑀺𑀬𑁂𑀦 ‘‘𑀅𑀳𑀫𑁆𑀧𑀺, 𑀢𑀸𑀢, 𑀦 𑀧𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀅𑀣 𑀓𑁄, 𑀆𑀘𑀭𑀺𑀬, 𑀧𑀭𑀺𑀬𑁄𑀲𑀸𑀦𑀁 𑀚𑀸𑀦𑀸𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑁂, 𑀢𑀸𑀢, 𑀇𑀲𑀬𑁄 𑀇𑀲𑀺𑀧𑀢𑀦𑁂 𑀯𑀺𑀳𑀭𑀦𑁆𑀢𑀺, 𑀢𑁂 𑀚𑀸𑀦𑁂𑀬𑁆𑀬𑀼𑀁, 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀲𑁆𑀲𑀽’’𑀢𑀺 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀢𑀼𑀫𑁆𑀳𑁂 𑀓𑀺𑀭 𑀧𑀭𑀺𑀬𑁄𑀲𑀸𑀦𑀁 𑀚𑀸𑀦𑀸𑀣𑀸’’𑀢𑀺? ‘‘𑀆𑀫, 𑀚𑀸𑀦𑀸𑀫𑀸’’𑀢𑀺. ‘‘𑀢𑁂𑀦 𑀳𑀺 𑀫𑁂 𑀆𑀘𑀺𑀓𑁆𑀔𑀣𑀸’’𑀢𑀺? ‘‘𑀦 𑀫𑀬𑀁 𑀅𑀧𑀩𑁆𑀩𑀚𑀺𑀢𑀲𑁆𑀲 𑀆𑀘𑀺𑀓𑁆𑀔𑀸𑀫. 𑀲𑀘𑁂 𑀢𑁂 𑀧𑀭𑀺𑀬𑁄𑀲𑀸𑀦𑁂𑀦𑀢𑁆𑀣𑁄, 𑀧𑀩𑁆𑀩𑀚𑀲𑁆𑀲𑀽’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀅𑀣𑀲𑁆𑀲 𑀢𑁂 ‘‘𑀇𑀤𑀁 𑀢𑀸𑀯 𑀲𑀺𑀓𑁆𑀔𑀲𑁆𑀲𑀽’’𑀢𑀺 𑀯𑀢𑁆𑀯𑀸 ‘‘𑀏𑀯𑀁 𑀢𑁂 𑀦𑀺𑀯𑀸𑀲𑁂𑀢𑀩𑁆𑀩𑀁, 𑀏𑀯𑀁 𑀧𑀸𑀭𑀼𑀧𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀪𑀺𑀲𑀫𑀸𑀘𑀸𑀭𑀺𑀓𑀁 𑀆𑀘𑀺𑀓𑁆𑀔𑀺𑀁𑀲𑀼. 𑀲𑁄 𑀢𑀢𑁆𑀣 𑀲𑀺𑀓𑁆𑀔𑀦𑁆𑀢𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑁆𑀢𑀸 𑀦𑀘𑀺𑀭𑀲𑁆𑀲𑁂𑀯 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀲𑀓𑀮𑀩𑀸𑀭𑀸𑀡𑀲𑀺𑀦𑀕𑀭𑁂 𑀕𑀕𑀦𑀢𑀮𑁂 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀧𑀸𑀓𑀝𑁄 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀅𑀳𑁄𑀲𑀺, 𑀲𑁄 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀦 𑀘𑀺𑀭𑀲𑁆𑀲𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀅𑀣𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀫𑀳𑀸𑀚𑀦𑁄 𑀘 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀥𑀸𑀢𑀼𑀬𑁄 𑀘 𑀕𑀳𑁂𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀣𑀽𑀧𑀁 𑀓𑀸𑀭𑁂𑀲𑀼𑀁.

𑀲𑀗𑁆𑀔𑁄𑀧𑀺 𑀩𑁆𑀭𑀸𑀳𑁆𑀫𑀡𑁄 ‘‘𑀧𑀼𑀢𑁆𑀢𑁄 𑀫𑁂 𑀘𑀺𑀭𑀁 𑀕𑀢𑁄, 𑀧𑀯𑀢𑁆𑀢𑀺𑀫𑀲𑁆𑀲 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀤𑀝𑁆𑀞𑀼𑀓𑀸𑀫𑁄 𑀢𑀓𑁆𑀓𑀲𑀺𑀮𑀸𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑀸𑀭𑀸𑀡𑀲𑀺𑀁 𑀧𑀢𑁆𑀯𑀸 𑀫𑀳𑀸𑀚𑀦𑀓𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀁 𑀤𑀺𑀲𑁆𑀯𑀸 ‘‘𑀅𑀤𑁆𑀥𑀸 𑀇𑀫𑁂𑀲𑀼 𑀏𑀓𑁄𑀧𑀺 𑀫𑁂 𑀧𑀼𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀁 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀲𑀼𑀲𑀻𑀫𑁄 𑀦𑀸𑀫 𑀫𑀸𑀡𑀯𑁄 𑀇𑀥𑀸𑀕𑀫𑀺, 𑀅𑀧𑀺 𑀦𑀼 𑀔𑁄 𑀢𑀲𑁆𑀲 𑀧𑀯𑀢𑁆𑀢𑀺𑀁 𑀚𑀸𑀦𑀸𑀣𑀸’’𑀢𑀺? ‘‘𑀆𑀫, 𑀩𑁆𑀭𑀸𑀳𑁆𑀫𑀡, 𑀚𑀸𑀦𑀸𑀫, 𑀅𑀲𑀼𑀓𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑁂 𑀢𑀬𑁄 𑀯𑁂𑀤𑁂 𑀲𑀚𑁆𑀛𑀸𑀬𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀧𑀘𑁆𑀘𑁂𑀓𑀲𑀫𑁆𑀩𑁄𑀥𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀬𑀫𑀲𑁆𑀲 𑀣𑀽𑀧𑁄 𑀧𑀢𑀺𑀝𑁆𑀞𑀸𑀧𑀺𑀢𑁄’’𑀢𑀺. 𑀲𑁄 𑀪𑀽𑀫𑀺𑀁 𑀳𑀢𑁆𑀣𑁂𑀦 𑀧𑀳𑀭𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀓𑀦𑁆𑀤𑀺𑀢𑁆𑀯𑀸 𑀢𑀁 𑀘𑁂𑀢𑀺𑀬𑀗𑁆𑀕𑀡𑀁 𑀕𑀦𑁆𑀢𑁆𑀯𑀸 𑀢𑀺𑀡𑀸𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀉𑀢𑁆𑀢𑀭𑀲𑀸𑀝𑀓𑁂𑀦 𑀯𑀸𑀮𑀼𑀓𑀁 𑀆𑀳𑀭𑀺𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑁂 𑀆𑀓𑀺𑀭𑀺𑀢𑁆𑀯𑀸 𑀓𑀫𑀡𑁆𑀟𑀮𑀼𑀢𑁄 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀺𑀢𑁆𑀯𑀸 𑀯𑀦𑀧𑀼𑀧𑁆𑀨𑁂𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀲𑀸𑀝𑀓𑁂𑀦 𑀧𑀝𑀸𑀓𑀁 𑀆𑀭𑁄𑀧𑁂𑀢𑁆𑀯𑀸 𑀣𑀽𑀧𑀲𑁆𑀲 𑀉𑀧𑀭𑀺 𑀅𑀢𑁆𑀢𑀦𑁄 𑀙𑀢𑁆𑀢𑀓𑀁 𑀩𑀦𑁆𑀥𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑀢𑁆𑀣𑀸 𑀇𑀤𑀁 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 ‘‘𑀢𑀤𑀸, 𑀪𑀺𑀓𑁆𑀔𑀯𑁂, 𑀅𑀳𑀁 𑀲𑀗𑁆𑀔𑁄 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺𑀁. 𑀫𑀬𑀸 𑀲𑀼𑀲𑀻𑀫𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀘𑁂𑀢𑀺𑀬𑀗𑁆𑀕𑀡𑁂 𑀢𑀺𑀡𑀸𑀦𑀺 𑀉𑀤𑁆𑀥𑀝𑀸𑀦𑀺, 𑀢𑀲𑁆𑀲 𑀫𑁂 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀅𑀝𑁆𑀞𑀬𑁄𑀚𑀦𑀫𑀕𑁆𑀕𑀁 𑀯𑀺𑀳𑀢𑀔𑀸𑀡𑀼𑀓𑀓𑀡𑁆𑀝𑀓𑀁 𑀓𑀢𑁆𑀯𑀸 𑀲𑀼𑀤𑁆𑀥𑀁 𑀲𑀫𑀢𑀮𑀁 𑀓𑀭𑀺𑀁𑀲𑀼. 𑀫𑀬𑀸 𑀢𑀢𑁆𑀣 𑀯𑀸𑀮𑀼𑀓𑀸 𑀑𑀓𑀺𑀡𑁆𑀡𑀸, 𑀢𑀲𑁆𑀲 𑀫𑁂 𑀦𑀺𑀲𑁆𑀲𑀦𑁆𑀤𑁂𑀦 𑀅𑀝𑁆𑀞𑀬𑁄𑀚𑀦𑀫𑀕𑁆𑀕𑁂 𑀯𑀸𑀮𑀼𑀓𑀁 𑀑𑀓𑀺𑀭𑀺𑀁𑀲𑀼. 𑀫𑀬𑀸 𑀢𑀢𑁆𑀣 𑀯𑀦𑀓𑀼𑀲𑀼𑀫𑁂𑀳𑀺 𑀧𑀽𑀚𑀸 𑀓𑀢𑀸, 𑀢𑀲𑁆𑀲 𑀫𑁂 𑀦𑀺𑀲𑁆𑀲𑀦𑁆𑀤𑁂𑀦 𑀅𑀝𑁆𑀞𑀬𑁄𑀚𑀦𑀫𑀕𑁆𑀕𑁂 𑀦𑀸𑀦𑀸𑀯𑀡𑁆𑀡𑀸𑀦𑀺 𑀧𑀼𑀧𑁆𑀨𑀸𑀦𑀺 𑀑𑀓𑀺𑀡𑁆𑀡𑀸𑀦𑀺, 𑀏𑀓𑀬𑁄𑀚𑀦𑀝𑁆𑀞𑀸𑀦𑁂 𑀕𑀗𑁆𑀕𑀸𑀬 𑀉𑀤𑀓𑀁 𑀧𑀜𑁆𑀘𑀯𑀡𑁆𑀡𑁂𑀳𑀺 𑀧𑀤𑀼𑀫𑁂𑀳𑀺 𑀲𑀜𑁆𑀙𑀦𑁆𑀦𑀁. 𑀫𑀬𑀸 𑀢𑀢𑁆𑀣 𑀓𑀫𑀡𑁆𑀟𑀮𑀼𑀉𑀤𑀓𑁂𑀦 𑀪𑀽𑀫𑀺 𑀧𑀭𑀺𑀧𑁆𑀨𑁄𑀲𑀺𑀢𑀸, 𑀢𑀲𑁆𑀲 𑀫𑁂 𑀦𑀺𑀲𑁆𑀲𑀦𑁆𑀤𑁂𑀦 𑀯𑁂𑀲𑀸𑀮𑀺𑀬𑀁 𑀧𑁄𑀓𑁆𑀔𑀭𑀯𑀲𑁆𑀲𑀁 𑀯𑀲𑁆𑀲𑀺. 𑀫𑀬𑀸 𑀢𑀢𑁆𑀣 𑀧𑀝𑀸𑀓𑀸, 𑀆𑀭𑁄𑀧𑀺𑀢𑀸, 𑀙𑀢𑁆𑀢𑀓𑀜𑁆𑀘 𑀩𑀤𑁆𑀥𑀁, 𑀢𑀲𑁆𑀲 𑀫𑁂 𑀦𑀺𑀲𑁆𑀲𑀦𑁆𑀤𑁂𑀦 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀦𑀸 𑀥𑀚𑀧𑀝𑀸𑀓𑀙𑀢𑁆𑀢𑀸𑀢𑀺𑀙𑀢𑁆𑀢𑀸𑀤𑀻𑀳𑀺 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀏𑀓𑀼𑀲𑁆𑀲𑀯𑀁 𑀯𑀺𑀬 𑀚𑀸𑀢𑀁. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀏𑀲 𑀧𑀽𑀚𑀸𑀲𑀓𑁆𑀓𑀸𑀭𑁄 𑀫𑀬𑁆𑀳𑀁 𑀦𑁂𑀯 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁄, 𑀦 𑀦𑀸𑀕𑀤𑁂𑀯𑀩𑁆𑀭𑀳𑁆𑀫𑀸𑀦𑀼𑀪𑀸𑀯𑁂𑀦, 𑀅𑀢𑀻𑀢𑁂 𑀧𑀦 𑀅𑀧𑁆𑀧𑀫𑀢𑁆𑀢𑀓𑀧𑀭𑀺𑀘𑁆𑀘𑀸𑀕𑀸𑀦𑀼𑀪𑀸𑀯𑁂𑀦𑀸’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁯𑁦. ‘‘𑀫𑀢𑁆𑀢𑀸𑀲𑀼𑀔𑀧𑀭𑀺𑀘𑁆𑀘𑀸𑀕𑀸, 𑀧𑀲𑁆𑀲𑁂 𑀘𑁂 𑀯𑀺𑀧𑀼𑀮𑀁 𑀲𑀼𑀔𑀁;

𑀘𑀚𑁂 𑀫𑀢𑁆𑀢𑀸𑀲𑀼𑀔𑀁 𑀥𑀻𑀭𑁄, 𑀲𑀫𑁆𑀧𑀲𑁆𑀲𑀁 𑀯𑀺𑀧𑀼𑀮𑀁 𑀲𑀼𑀔’’𑀦𑁆𑀢𑀺.

𑀢𑀢𑁆𑀣 𑀫𑀢𑁆𑀢𑀸𑀲𑀼𑀔𑀧𑀭𑀺𑀘𑁆𑀘𑀸𑀕𑀸𑀢𑀺 𑀫𑀢𑁆𑀢𑀸𑀲𑀼𑀔𑀦𑁆𑀢𑀺 𑀧𑀫𑀸𑀡𑀬𑀼𑀢𑁆𑀢𑀓𑀁 𑀧𑀭𑀺𑀢𑁆𑀢𑀲𑀼𑀔𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀧𑀭𑀺𑀘𑁆𑀘𑀸𑀕𑁂𑀦. 𑀯𑀺𑀧𑀼𑀮𑀁 𑀲𑀼𑀔𑀦𑁆𑀢𑀺 𑀉𑀴𑀸𑀭𑀁 𑀲𑀼𑀔𑀁 𑀦𑀺𑀩𑁆𑀩𑀸𑀦𑀲𑀼𑀔𑀁 𑀯𑀼𑀘𑁆𑀘𑀢𑀺, 𑀢𑀁 𑀘𑁂 𑀧𑀲𑁆𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀏𑀓𑀜𑁆𑀳𑀺 𑀪𑁄𑀚𑀦𑀧𑀸𑀢𑀺𑀁 𑀲𑀚𑁆𑀚𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲 𑀫𑀢𑁆𑀢𑀸𑀲𑀼𑀔𑀁 𑀦𑀸𑀫 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀧𑀦 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀉𑀧𑁄𑀲𑀣𑀁 𑀯𑀸 𑀓𑀭𑁄𑀦𑁆𑀢𑀲𑁆𑀲 𑀤𑀸𑀦𑀁 𑀯𑀸 𑀤𑀤𑀦𑁆𑀢𑀲𑁆𑀲 𑀯𑀺𑀧𑀼𑀮𑀁 𑀉𑀴𑀸𑀭𑀁 𑀦𑀺𑀩𑁆𑀩𑀸𑀦𑀲𑀼𑀔𑀁 𑀦𑀸𑀫 𑀦𑀺𑀩𑁆𑀩𑀢𑁆𑀢𑀢𑀺. 𑀢𑀲𑁆𑀫𑀸 𑀲𑀘𑁂 𑀏𑀯𑀁 𑀢𑀲𑁆𑀲 𑀫𑀢𑁆𑀢𑀸𑀲𑀼𑀔𑀲𑁆𑀲 𑀧𑀭𑀺𑀘𑁆𑀘𑀸𑀕𑀸 𑀯𑀺𑀧𑀼𑀮𑀁 𑀲𑀼𑀔𑀁 𑀧𑀲𑁆𑀲𑀢𑀺, 𑀅𑀣𑁂𑀢𑀁 𑀯𑀺𑀧𑀼𑀮𑀁 𑀲𑀼𑀔𑀁 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑁄 𑀧𑀡𑁆𑀟𑀺𑀢𑁄 𑀢𑀁 𑀫𑀢𑁆𑀢𑀸𑀲𑀼𑀔𑀁 𑀘𑀚𑁂𑀬𑁆𑀬𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀅𑀢𑁆𑀢𑀦𑁄𑀧𑀼𑀩𑁆𑀩𑀓𑀫𑁆𑀫𑀯𑀢𑁆𑀣𑀼 𑀧𑀞𑀫𑀁.

𑁨. 𑀓𑀼𑀓𑁆𑀓𑀼𑀝𑀅𑀡𑁆𑀟𑀔𑀸𑀤𑀺𑀓𑀸𑀯𑀢𑁆𑀣𑀼

𑀧𑀭𑀤𑀼𑀓𑁆𑀔𑀽𑀧𑀥𑀸𑀦𑁂𑀦𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀼𑀓𑁆𑀓𑀼𑀝𑀅𑀡𑁆𑀟𑀔𑀸𑀤𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀸 𑀓𑀺𑀭 𑀅𑀯𑀺𑀤𑀽𑀭𑁂 𑀧𑀡𑁆𑀟𑀼𑀭𑀁 𑀦𑀸𑀫 𑀏𑀓𑁄 𑀕𑀸𑀫𑁄, 𑀢𑀢𑁆𑀣𑁂𑀓𑁄 𑀓𑁂𑀯𑀝𑁆𑀝𑁄 𑀯𑀲𑀢𑀺. 𑀲𑁄 𑀲𑀸𑀯𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑁄 𑀅𑀘𑀺𑀭𑀯𑀢𑀺𑀬𑀁 𑀓𑀘𑁆𑀙𑀧𑀅𑀡𑁆𑀟𑀸𑀦𑀺 𑀤𑀺𑀲𑁆𑀯𑀸 𑀢𑀸𑀦𑀺 𑀆𑀤𑀸𑀬 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀕𑁂𑀳𑁂 𑀧𑀘𑀸𑀧𑁂𑀢𑁆𑀯𑀸 𑀔𑀸𑀤𑀦𑁆𑀢𑁄 𑀢𑀲𑁆𑀫𑀺𑀁 𑀕𑁂𑀳𑁂 𑀓𑀼𑀫𑀸𑀭𑀺𑀓𑀸𑀬𑀧𑀺 𑀏𑀓𑀁 𑀅𑀡𑁆𑀟𑀁 𑀅𑀤𑀸𑀲𑀺. 𑀲𑀸 𑀢𑀁 𑀔𑀸𑀤𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀅𑀜𑁆𑀜𑀁 𑀔𑀸𑀤𑀦𑀻𑀬𑀁 𑀦𑀸𑀫 𑀦 𑀇𑀘𑁆𑀙𑀺. 𑀅𑀣𑀲𑁆𑀲𑀸 𑀫𑀸𑀢𑀸 𑀓𑀼𑀓𑁆𑀓𑀼𑀝𑀺𑀬𑀸 𑀯𑀺𑀚𑀸𑀢𑀝𑁆𑀞𑀸𑀦𑀢𑁄 𑀏𑀓𑀁 𑀅𑀡𑁆𑀟𑀁 𑀕𑀳𑁂𑀢𑁆𑀯𑀸 𑀅𑀤𑀸𑀲𑀺. 𑀲𑀸 𑀢𑀁 𑀔𑀸𑀤𑀺𑀢𑁆𑀯𑀸 𑀭𑀲𑀢𑀡𑁆𑀳𑀸𑀬 𑀩𑀤𑁆𑀥𑀸 𑀢𑀢𑁄 𑀧𑀝𑁆𑀞𑀸𑀬 𑀲𑀬𑀫𑁂𑀯 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀸𑀦𑀺 𑀕𑀳𑁂𑀢𑁆𑀯𑀸 𑀔𑀸𑀤𑀢𑀺. 𑀓𑀼𑀓𑁆𑀓𑀼𑀝𑀻 𑀯𑀺𑀚𑀸𑀢𑀯𑀺𑀚𑀸𑀢𑀓𑀸𑀮𑁂 𑀢𑀁 𑀅𑀢𑁆𑀢𑀦𑁄 𑀅𑀡𑁆𑀟𑀸𑀦𑀺 𑀕𑀳𑁂𑀢𑁆𑀯𑀸 𑀔𑀸𑀤𑀦𑁆𑀢𑀺𑀁 𑀤𑀺𑀲𑁆𑀯𑀸 𑀢𑀸𑀬 𑀉𑀧𑀤𑁆𑀤𑀼𑀢𑀸 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀇𑀢𑁄 𑀤𑀸𑀦𑀺 𑀘𑀼𑀢𑀸 𑀬𑀓𑁆𑀔𑀺𑀦𑀻 𑀳𑀼𑀢𑁆𑀯𑀸 𑀢𑀯 𑀚𑀸𑀢𑀤𑀸𑀭𑀓𑁂 𑀔𑀸𑀤𑀺𑀢𑀼𑀁 𑀲𑀫𑀢𑁆𑀣𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀕𑁂𑀳𑁂 𑀫𑀚𑁆𑀚𑀸𑀭𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀇𑀢𑀭𑀸𑀧𑀺 𑀓𑀸𑀮𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀓𑀼𑀓𑁆𑀓𑀼𑀝𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀓𑀼𑀓𑁆𑀓𑀼𑀝𑀻 𑀅𑀡𑁆𑀟𑀸𑀦𑀺 𑀯𑀺𑀚𑀸𑀬𑀺, 𑀫𑀚𑁆𑀚𑀸𑀭𑀻 𑀆𑀕𑀦𑁆𑀢𑁆𑀯𑀸 𑀢𑀸𑀦𑀺 𑀔𑀸𑀤𑀺𑀢𑁆𑀯𑀸 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀔𑀸𑀤𑀺𑀬𑁂𑀯. 𑀓𑀼𑀓𑁆𑀓𑀼𑀝𑀻 ‘‘𑀢𑀬𑁄 𑀯𑀸𑀭𑁂 𑀫𑀫 𑀅𑀡𑁆𑀟𑀸𑀦𑀺 𑀔𑀸𑀤𑀺𑀢𑁆𑀯𑀸 𑀇𑀤𑀸𑀦𑀺 𑀫𑀫𑁆𑀧𑀺 𑀔𑀸𑀤𑀺𑀢𑀼𑀓𑀸𑀫𑀸𑀲𑀺, 𑀇𑀢𑁄 𑀘𑀼𑀢𑀸 𑀲𑀧𑀼𑀢𑁆𑀢𑀓𑀁 𑀢𑀁 𑀔𑀸𑀤𑀺𑀢𑀼𑀁 𑀮𑀪𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀤𑀻𑀧𑀺𑀦𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀇𑀢𑀭𑀸𑀧𑀺 𑀓𑀸𑀮𑀁 𑀓𑀢𑁆𑀯𑀸 𑀫𑀺𑀕𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀯𑀺𑀚𑀸𑀢𑀓𑀸𑀮𑁂 𑀤𑀻𑀧𑀺𑀦𑀻 𑀆𑀕𑀦𑁆𑀢𑁆𑀯𑀸 𑀢𑀁 𑀲𑀤𑁆𑀥𑀺𑀁 𑀧𑀼𑀢𑁆𑀢𑁂𑀳𑀺 𑀔𑀸𑀤𑀺. 𑀏𑀯𑀁 𑀔𑀸𑀤𑀦𑁆𑀢𑀸 𑀧𑀜𑁆𑀘𑀲𑀼 𑀅𑀢𑁆𑀢𑀪𑀸𑀯𑀲𑀢𑁂𑀲𑀼 𑀅𑀜𑁆𑀜𑀫𑀜𑁆𑀜𑀲𑁆𑀲 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀯𑀲𑀸𑀦𑁂 𑀏𑀓𑀸 𑀬𑀓𑁆𑀔𑀺𑀦𑀻 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀏𑀓𑀸 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀇𑀢𑁄 𑀧𑀭𑀁 ‘‘𑀦 𑀳𑀺 𑀯𑁂𑀭𑁂𑀦 𑀯𑁂𑀭𑀸𑀦𑀻’’𑀢𑀺 (𑀥. 𑀧. 𑁫) 𑀕𑀸𑀣𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀥 𑀧𑀦 𑀲𑀢𑁆𑀣𑀸 ‘‘𑀯𑁂𑀭𑀜𑁆𑀳𑀺 𑀅𑀯𑁂𑀭𑁂𑀦 𑀉𑀧𑀲𑀫𑁆𑀫𑀢𑀺, 𑀦𑁄 𑀯𑁂𑀭𑁂𑀦𑀸’’𑀢𑀺 𑀯𑀢𑁆𑀯𑀸 𑀉𑀪𑀺𑀦𑁆𑀦𑀫𑁆𑀧𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁯𑁧. ‘‘𑀧𑀭𑀤𑀼𑀓𑁆𑀔𑀽𑀧𑀥𑀸𑀦𑁂𑀦, 𑀅𑀢𑁆𑀢𑀦𑁄 𑀲𑀼𑀔𑀫𑀺𑀘𑁆𑀙𑀢𑀺;

𑀯𑁂𑀭𑀲𑀁𑀲𑀕𑁆𑀕𑀲𑀁𑀲𑀝𑁆𑀞𑁄, 𑀯𑁂𑀭𑀸 𑀲𑁄 𑀦 𑀧𑀭𑀺𑀫𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀧𑀭𑀤𑀼𑀓𑁆𑀔𑀽𑀧𑀥𑀸𑀦𑁂𑀦𑀸𑀢𑀺 𑀧𑀭𑀲𑁆𑀫𑀺𑀁 𑀤𑀼𑀓𑁆𑀔𑀽𑀧𑀥𑀸𑀦𑁂𑀦, 𑀧𑀭𑀲𑁆𑀲 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀯𑁂𑀭𑀲𑀁𑀲𑀕𑁆𑀕𑀲𑀁𑀲𑀝𑁆𑀞𑁄𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀅𑀓𑁆𑀓𑁄𑀲𑀦𑀧𑀘𑁆𑀘𑀓𑁆𑀓𑁄𑀲𑀦𑀧𑀳𑀭𑀡𑀧𑀝𑀺𑀳𑀭𑀡𑀸𑀤𑀻𑀦𑀁 𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀓𑀢𑁂𑀦 𑀯𑁂𑀭𑀲𑀁𑀲𑀕𑁆𑀕𑁂𑀦 𑀲𑀁𑀲𑀝𑁆𑀞𑁄. 𑀯𑁂𑀭𑀸 𑀲𑁄 𑀦 𑀧𑀭𑀺𑀫𑀼𑀘𑁆𑀘𑀢𑀻𑀢𑀺 𑀦𑀺𑀘𑁆𑀘𑀓𑀸𑀮𑀁 𑀯𑁂𑀭𑀯𑀲𑁂𑀦 𑀤𑀼𑀓𑁆𑀔𑀫𑁂𑀯 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀬𑀓𑁆𑀔𑀺𑀦𑀻 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀧𑀜𑁆𑀘 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀯𑁂𑀭𑀢𑁄 𑀫𑀼𑀘𑁆𑀘𑀺, 𑀇𑀢𑀭𑀸𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀓𑀼𑀓𑁆𑀓𑀼𑀝𑀅𑀡𑁆𑀟𑀔𑀸𑀤𑀺𑀓𑀸𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀪𑀤𑁆𑀤𑀺𑀬𑀪𑀺𑀓𑁆𑀔𑀼𑀯𑀢𑁆𑀣𑀼

𑀬𑀜𑁆𑀳𑀺 𑀓𑀺𑀘𑁆𑀘𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀪𑀤𑁆𑀤𑀺𑀬𑀁 𑀦𑀺𑀲𑁆𑀲𑀸𑀬 𑀚𑀸𑀢𑀺𑀬𑀸𑀯𑀦𑁂 𑀯𑀺𑀳𑀭𑀦𑁆𑀢𑁄 𑀪𑀤𑁆𑀤𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂 𑀓𑀺𑀭 𑀧𑀸𑀤𑀼𑀓𑀫𑀡𑁆𑀟𑀦𑁂 𑀉𑀬𑁆𑀬𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀬𑀣𑀸𑀳 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀤𑁆𑀤𑀺𑀬𑀸 𑀪𑀺𑀓𑁆𑀔𑀽 𑀅𑀦𑁂𑀓𑀯𑀺𑀳𑀺𑀢𑀁 𑀧𑀸𑀤𑀼𑀓𑀫𑀡𑁆𑀟𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀢𑀺𑀡𑀧𑀸𑀤𑀼𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀫𑀼𑀜𑁆𑀚𑀧𑀸𑀤𑀼𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀧𑀩𑁆𑀩𑀚𑀧𑀸𑀤𑀼𑀓𑀁 𑀳𑀺𑀦𑁆𑀢𑀸𑀮𑀧𑀸𑀤𑀼𑀓𑀁 𑀓𑀫𑀮𑀧𑀸𑀤𑀼𑀓𑀁 𑀓𑀫𑁆𑀩𑀮𑀧𑀸𑀤𑀼𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀭𑀺𑀜𑁆𑀘𑀦𑁆𑀢𑀺 𑀉𑀤𑁆𑀤𑁂𑀲𑀁 𑀧𑀭𑀺𑀧𑀼𑀘𑁆𑀙𑀁 𑀅𑀥𑀺𑀲𑀻𑀮𑀁 𑀅𑀥𑀺𑀘𑀺𑀢𑁆𑀢𑀁 𑀅𑀥𑀺𑀧𑀜𑁆𑀜’’𑀦𑁆𑀢𑀺 (𑀫𑀳𑀸𑀯. 𑁨𑁫𑁧). 𑀪𑀺𑀓𑁆𑀔𑀽 𑀢𑁂𑀲𑀁 𑀢𑀣𑀸𑀓𑀭𑀡𑀪𑀸𑀯𑀁 𑀚𑀸𑀦𑀺𑀢𑁆𑀯𑀸 𑀉𑀚𑁆𑀛𑀸𑀬𑀺𑀢𑁆𑀯𑀸 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀢𑁂 𑀪𑀺𑀓𑁆𑀔𑀽 𑀕𑀭𑀳𑀺𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂 𑀅𑀜𑁆𑀜𑁂𑀦 𑀓𑀺𑀘𑁆𑀘𑁂𑀦 𑀆𑀕𑀢𑀸 𑀅𑀜𑁆𑀜𑀲𑁆𑀫𑀺𑀁𑀬𑁂𑀯 𑀓𑀺𑀘𑁆𑀘𑁂 𑀉𑀬𑁆𑀬𑀼𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁯𑁨. ‘‘𑀬𑀜𑁆𑀳𑀺 𑀓𑀺𑀘𑁆𑀘𑀁 𑀅𑀧𑀯𑀺𑀤𑁆𑀥𑀁, 𑀅𑀓𑀺𑀘𑁆𑀘𑀁 𑀧𑀦 𑀓𑀭𑀻𑀬𑀢𑀺;

𑀉𑀦𑁆𑀦𑀴𑀸𑀦𑀁 𑀧𑀫𑀢𑁆𑀢𑀸𑀦𑀁, 𑀢𑁂𑀲𑀁 𑀯𑀟𑁆𑀠𑀦𑁆𑀢𑀺 𑀆𑀲𑀯𑀸.

𑁨𑁯𑁩. ‘‘𑀬𑁂𑀲𑀜𑁆𑀘 𑀲𑀼𑀲𑀫𑀸𑀭𑀤𑁆𑀥𑀸, 𑀦𑀺𑀘𑁆𑀘𑀁 𑀓𑀸𑀬𑀕𑀢𑀸 𑀲𑀢𑀺;

𑀅𑀓𑀺𑀘𑁆𑀘𑀁 𑀢𑁂 𑀦 𑀲𑁂𑀯𑀦𑁆𑀢𑀺, 𑀓𑀺𑀘𑁆𑀘𑁂 𑀲𑀸𑀢𑀘𑁆𑀘𑀓𑀸𑀭𑀺𑀦𑁄;

𑀲𑀢𑀸𑀦𑀁 𑀲𑀫𑁆𑀧𑀚𑀸𑀦𑀸𑀦𑀁, 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀆𑀲𑀯𑀸’’𑀢𑀺.

𑀢𑀢𑁆𑀣 𑀬𑀜𑁆𑀳𑀺 𑀓𑀺𑀘𑁆𑀘𑀦𑁆𑀢𑀺 𑀪𑀺𑀓𑁆𑀔𑀼𑀦𑁄 𑀳𑀺 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀧𑀭𑀺𑀫𑀸𑀡𑀲𑀻𑀮𑀓𑁆𑀔𑀦𑁆𑀥𑀕𑁄𑀧𑀦𑀁 𑀅𑀭𑀜𑁆𑀜𑀸𑀯𑀸𑀲𑁄 𑀥𑀼𑀢𑀗𑁆𑀕𑀧𑀭𑀺𑀳𑀭𑀡𑀁 𑀪𑀸𑀯𑀦𑀸𑀭𑀸𑀫𑀢𑀸𑀢𑀺 𑀏𑀯𑀫𑀸𑀤𑀻𑀦𑀺 𑀓𑀺𑀘𑁆𑀘𑀁 𑀦𑀸𑀫. 𑀇𑀫𑁂𑀳𑀺 𑀧𑀦 𑀬𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁, 𑀢𑀁 𑀅𑀧𑀯𑀺𑀤𑁆𑀥𑀁 𑀙𑀟𑁆𑀟𑀺𑀢𑀁. 𑀅𑀓𑀺𑀘𑁆𑀘𑀦𑁆𑀢𑀺 𑀪𑀺𑀓𑁆𑀔𑀼𑀦𑁄 𑀙𑀢𑁆𑀢𑀫𑀡𑁆𑀟𑀦𑀁 𑀉𑀧𑀸𑀳𑀦𑀫𑀡𑁆𑀟𑀦𑀁 𑀧𑀸𑀤𑀼𑀓𑀧𑀢𑁆𑀢𑀣𑀸𑀮𑀓𑀥𑀫𑁆𑀫𑀓𑀭𑀡𑀓𑀸𑀬𑀩𑀦𑁆𑀥𑀦𑀅𑀁𑀲𑀩𑀤𑁆𑀥𑀓𑀫𑀡𑁆𑀟𑀦𑀁 𑀅𑀓𑀺𑀘𑁆𑀘𑀁 𑀦𑀸𑀫. 𑀬𑁂𑀳𑀺 𑀢𑀁 𑀓𑀬𑀺𑀭𑀢𑀺, 𑀢𑁂𑀲𑀁 𑀫𑀸𑀦𑀦𑀴𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀘𑀭𑀡𑁂𑀦 𑀉𑀦𑁆𑀦𑀴𑀸𑀦𑀁 𑀲𑀢𑀺𑀯𑁄𑀲𑁆𑀲𑀕𑁆𑀕𑁂𑀦 𑀧𑀫𑀢𑁆𑀢𑀸𑀦𑀁 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀯𑀟𑁆𑀠𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀲𑀫𑀸𑀭𑀤𑁆𑀥𑀸𑀢𑀺 𑀲𑀼𑀧𑀕𑁆𑀕𑀳𑀺𑀢𑀸. 𑀓𑀸𑀬𑀕𑀢𑀸 𑀲𑀢𑀻𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀦𑀸. 𑀅𑀓𑀺𑀘𑁆𑀘𑀦𑁆𑀢𑀺 𑀢𑁂 𑀏𑀢𑀁 𑀙𑀢𑁆𑀢𑀫𑀡𑁆𑀟𑀦𑀸𑀤𑀺𑀓𑀁 𑀅𑀓𑀺𑀘𑁆𑀘𑀁 𑀦 𑀲𑁂𑀯𑀦𑁆𑀢𑀺 𑀦 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀘𑁆𑀘𑁂𑀢𑀺 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀢𑁆𑀢𑀩𑁆𑀩𑁂 𑀅𑀧𑀭𑀺𑀫𑀸𑀡𑀲𑀻𑀮𑀓𑁆𑀔𑀦𑁆𑀥𑀕𑁄𑀧𑀦𑀸𑀤𑀺𑀓𑁂 𑀓𑀭𑀡𑀻𑀬𑁂. 𑀲𑀸𑀢𑀘𑁆𑀘𑀓𑀸𑀭𑀺𑀦𑁄𑀢𑀺 𑀲𑀢𑀢𑀓𑀸𑀭𑀺𑀦𑁄 𑀅𑀝𑁆𑀞𑀺𑀢𑀓𑀸𑀭𑀺𑀦𑁄. 𑀢𑁂𑀲𑀁 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁂𑀦 𑀲𑀢𑀸𑀦𑀁 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀘𑀢𑀽𑀳𑀺 𑀲𑀫𑁆𑀧𑀚𑀜𑁆𑀜𑁂𑀳𑀺 𑀲𑀫𑁆𑀧𑀚𑀸𑀦𑀸𑀦𑀁 𑀘𑀢𑁆𑀢𑀸𑀭𑁄𑀧𑀺 𑀆𑀲𑀯𑀸 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺, 𑀧𑀭𑀺𑀓𑁆𑀔𑀬𑀁 𑀅𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀪𑀤𑁆𑀤𑀺𑀬𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀯𑀢𑁆𑀣𑀼

𑀫𑀸𑀢𑀭𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀤𑀺𑀯𑀲𑀜𑁆𑀳𑀺 𑀲𑀫𑁆𑀩𑀳𑀼𑀮𑀸 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀲𑀢𑁆𑀣𑀸𑀭𑀁 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀅𑀢𑀺𑀓𑁆𑀓𑀫𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀑𑀮𑁄𑀓𑁂𑀢𑁆𑀯𑀸 ‘‘𑀧𑀲𑁆𑀲𑀣, 𑀪𑀺𑀓𑁆𑀔𑀯𑁂, 𑀅𑀬𑀁 𑀪𑀺𑀓𑁆𑀔𑀼 𑀫𑀸𑀢𑀸𑀧𑀺𑀢𑀭𑁄 𑀳𑀦𑁆𑀢𑁆𑀯𑀸 𑀦𑀺𑀤𑁆𑀤𑀼𑀓𑁆𑀔𑁄 𑀳𑀼𑀢𑁆𑀯𑀸 𑀬𑀸𑀢𑀻’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 ‘‘𑀓𑀺𑀁 𑀦𑀼 𑀔𑁄 𑀲𑀢𑁆𑀣𑀸 𑀯𑀤𑀢𑀻’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀫𑀼𑀔𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 𑀲𑀁𑀲𑀬𑀧𑀓𑁆𑀔𑀦𑁆𑀤𑁂𑀳𑀺, ‘‘𑀪𑀦𑁆𑀢𑁂, 𑀓𑀺𑀁 𑀦𑀸𑀫𑁂𑀢𑀁 𑀯𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 𑀢𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁯𑁪. ‘‘𑀫𑀸𑀢𑀭𑀁 𑀧𑀺𑀢𑀭𑀁 𑀳𑀦𑁆𑀢𑁆𑀯𑀸, 𑀭𑀸𑀚𑀸𑀦𑁄 𑀤𑁆𑀯𑁂 𑀘 𑀔𑀢𑁆𑀢𑀺𑀬𑁂;

𑀭𑀝𑁆𑀞𑀁 𑀲𑀸𑀦𑀼𑀘𑀭𑀁 𑀳𑀦𑁆𑀢𑁆𑀯𑀸, 𑀅𑀦𑀻𑀖𑁄 𑀬𑀸𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺.

𑀢𑀢𑁆𑀣 𑀲𑀸𑀦𑀼𑀘𑀭𑀦𑁆𑀢𑀺 𑀆𑀬𑀲𑀸𑀥𑀓𑁂𑀦 𑀆𑀬𑀼𑀢𑁆𑀢𑀓𑁂𑀦 𑀲𑀳𑀺𑀢𑀁. 𑀏𑀢𑁆𑀣 𑀳𑀺 ‘‘𑀢𑀡𑁆𑀳𑀸 𑀚𑀦𑁂𑀢𑀺 𑀧𑀼𑀭𑀺𑀲’’𑀦𑁆𑀢𑀺 (𑀲𑀁. 𑀦𑀺. 𑁧.𑁫𑁫-𑁫𑁭) 𑀯𑀘𑀦𑀢𑁄 𑀢𑀻𑀲𑀼 𑀪𑀯𑁂𑀲𑀼 𑀲𑀢𑁆𑀢𑀸𑀦𑀁 𑀚𑀦𑀦𑀢𑁄 𑀢𑀡𑁆𑀳𑀸 𑀫𑀸𑀢𑀸 𑀦𑀸𑀫. ‘‘𑀅𑀳𑀁 𑀅𑀲𑀼𑀓𑀲𑁆𑀲 𑀦𑀸𑀫 𑀭𑀜𑁆𑀜𑁄 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀲𑁆𑀲 𑀯𑀸 𑀧𑀼𑀢𑁆𑀢𑁄’’𑀢𑀺 𑀧𑀺𑀢𑀭𑀁 𑀦𑀺𑀲𑁆𑀲𑀸𑀬 𑀅𑀲𑁆𑀫𑀺𑀫𑀸𑀦𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄 𑀅𑀲𑁆𑀫𑀺𑀫𑀸𑀦𑁄 𑀧𑀺𑀢𑀸 𑀦𑀸𑀫. 𑀮𑁄𑀓𑁄 𑀯𑀺𑀬 𑀭𑀸𑀚𑀸𑀦𑀁 𑀬𑀲𑁆𑀫𑀸 𑀲𑀩𑁆𑀩𑀤𑀺𑀝𑁆𑀞𑀺𑀕𑀢𑀸𑀦𑀺 𑀤𑁆𑀯𑁂 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄 𑀪𑀚𑀦𑁆𑀢𑀺, 𑀢𑀲𑁆𑀫𑀸 𑀤𑁆𑀯𑁂 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄 𑀤𑁆𑀯𑁂 𑀔𑀢𑁆𑀢𑀺𑀬𑀭𑀸𑀚𑀸𑀦𑁄 𑀦𑀸𑀫. 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀯𑀺𑀢𑁆𑀣𑀢𑀝𑁆𑀞𑁂𑀦 𑀭𑀝𑁆𑀞𑀤𑀺𑀲𑀢𑁆𑀢𑀸 𑀭𑀝𑁆𑀞𑀁 𑀦𑀸𑀫. 𑀆𑀬𑀲𑀸𑀥𑀓𑁄 𑀆𑀬𑀼𑀢𑁆𑀢𑀓𑀧𑀼𑀭𑀺𑀲𑁄 𑀯𑀺𑀬 𑀢𑀦𑁆𑀦𑀺𑀲𑁆𑀲𑀺𑀢𑁄 𑀦𑀦𑁆𑀤𑀺𑀭𑀸𑀕𑁄 𑀅𑀦𑀼𑀘𑀭𑁄 𑀦𑀸𑀫. 𑀅𑀦𑀻𑀖𑁄𑀢𑀺 𑀦𑀺𑀤𑁆𑀤𑀼𑀓𑁆𑀔𑁄. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀔𑀻𑀡𑀸𑀲𑀯𑁄. 𑀏𑀢𑁂𑀲𑀁 𑀢𑀡𑁆𑀳𑀸𑀤𑀻𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀸𑀲𑀺𑀦𑀸 𑀳𑀢𑀢𑁆𑀢𑀸 𑀔𑀻𑀡𑀸𑀲𑀯𑁄 𑀦𑀺𑀤𑁆𑀤𑀼𑀓𑁆𑀔𑁄 𑀳𑀼𑀢𑁆𑀯𑀸 𑀬𑀸𑀢𑀻𑀢𑀺 𑀅𑀬𑀫𑁂𑀢𑁆𑀣𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼.

𑀤𑀼𑀢𑀺𑀬𑀕𑀸𑀣𑀸𑀬𑀧𑀺 𑀯𑀢𑁆𑀣𑀼 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀢𑀤𑀸 𑀳𑀺 𑀲𑀢𑁆𑀣𑀸 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀫𑁂𑀯 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁯𑁫. ‘‘𑀫𑀸𑀢𑀭𑀁 𑀧𑀺𑀢𑀭𑀁 𑀳𑀦𑁆𑀢𑁆𑀯𑀸, 𑀭𑀸𑀚𑀸𑀦𑁄 𑀤𑁆𑀯𑁂 𑀘 𑀲𑁄𑀢𑁆𑀣𑀺𑀬𑁂;

𑀯𑁂𑀬𑀕𑁆𑀖𑀧𑀜𑁆𑀘𑀫𑀁 𑀳𑀦𑁆𑀢𑁆𑀯𑀸, 𑀅𑀦𑀻𑀖𑁄 𑀬𑀸𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺.

𑀢𑀢𑁆𑀣 𑀤𑁆𑀯𑁂 𑀘 𑀲𑁄𑀢𑁆𑀣𑀺𑀬𑁂𑀢𑀺 𑀤𑁆𑀯𑁂 𑀘 𑀩𑁆𑀭𑀸𑀳𑁆𑀫𑀡𑁂. 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀥𑀫𑁆𑀫𑀺𑀲𑁆𑀲𑀭𑀢𑀸𑀬 𑀘 𑀤𑁂𑀲𑀦𑀸𑀯𑀺𑀥𑀺𑀓𑀼𑀲𑀮𑀢𑀸𑀬 𑀘 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄 𑀤𑁆𑀯𑁂 𑀩𑁆𑀭𑀸𑀳𑁆𑀫𑀡𑀭𑀸𑀚𑀸𑀦𑁄 𑀘 𑀓𑀢𑁆𑀯𑀸 𑀓𑀣𑁂𑀲𑀺. 𑀯𑁂𑀬𑀕𑁆𑀖𑀧𑀜𑁆𑀘𑀫𑀦𑁆𑀢𑀺 𑀏𑀢𑁆𑀣 𑀩𑁆𑀬𑀕𑁆𑀖𑀸𑀦𑀼𑀘𑀭𑀺𑀢𑁄 𑀲𑀧𑁆𑀧𑀝𑀺𑀪𑀬𑁄 𑀤𑀼𑀧𑁆𑀧𑀝𑀺𑀧𑀦𑁆𑀦𑁄 𑀫𑀕𑁆𑀕𑁄 𑀯𑁂𑀬𑀕𑁆𑀖𑁄 𑀦𑀸𑀫, 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀫𑁆𑀧𑀺 𑀢𑁂𑀦 𑀲𑀤𑀺𑀲𑀢𑀸𑀬 𑀯𑁂𑀬𑀕𑁆𑀖𑀁 𑀦𑀸𑀫, 𑀢𑀁 𑀧𑀜𑁆𑀘𑀫𑀁 𑀅𑀲𑁆𑀲𑀸𑀢𑀺 𑀦𑀻𑀯𑀭𑀡𑀧𑀜𑁆𑀘𑀓𑀁 𑀯𑁂𑀬𑀕𑁆𑀖𑀧𑀜𑁆𑀘𑀫𑀁 𑀦𑀸𑀫. 𑀇𑀤𑀜𑁆𑀘 𑀯𑁂𑀬𑀕𑁆𑀖𑀧𑀜𑁆𑀘𑀫𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀸𑀲𑀺𑀦𑀸 𑀦𑀺𑀲𑁆𑀲𑁂𑀲𑀁 𑀳𑀦𑁆𑀢𑁆𑀯𑀸 𑀅𑀦𑀻𑀖𑁄𑀯 𑀬𑀸𑀢𑀺 𑀩𑁆𑀭𑀸𑀳𑁆𑀫𑀡𑁄𑀢𑀺 𑀅𑀬𑀫𑁂𑀢𑁆𑀣𑀢𑁆𑀣𑁄. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺.

𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀤𑀸𑀭𑀼𑀲𑀸𑀓𑀝𑀺𑀓𑀧𑀼𑀢𑁆𑀢𑀯𑀢𑁆𑀣𑀼

𑀲𑀼𑀧𑁆𑀧𑀩𑀼𑀤𑁆𑀥𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑀸𑀭𑀼𑀲𑀸𑀓𑀝𑀺𑀓𑀲𑁆𑀲 𑀧𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀭𑀸𑀚𑀕𑀳𑀲𑁆𑀫𑀺𑀜𑁆𑀳𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀧𑀼𑀢𑁆𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀧𑀼𑀢𑁆𑀢𑁄𑀢𑀺 𑀤𑁆𑀯𑁂 𑀤𑀸𑀭𑀓𑀸 𑀅𑀪𑀺𑀓𑁆𑀔𑀡𑀁 𑀕𑀼𑀴𑀓𑀻𑀴𑀁 𑀓𑀻𑀴𑀦𑁆𑀢𑀺. 𑀢𑁂𑀲𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀧𑀼𑀢𑁆𑀢𑁄 𑀕𑀼𑀴𑀁 𑀔𑀺𑀧𑀫𑀸𑀦𑁄 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀦𑀫𑁄 𑀩𑀼𑀤𑁆𑀥𑀲𑁆𑀲𑀸’’𑀢𑀺 𑀯𑀢𑁆𑀯𑀸 𑀯𑀢𑁆𑀯𑀸 𑀕𑀼𑀴𑀁 𑀔𑀺𑀧𑀢𑀺. 𑀇𑀢𑀭𑁄 𑀢𑀺𑀢𑁆𑀣𑀺𑀬𑀕𑀼𑀡𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀦𑀫𑁄 𑀅𑀭𑀳𑀦𑁆𑀢𑀸𑀦’’𑀦𑁆𑀢𑀺 𑀯𑀢𑁆𑀯𑀸 𑀯𑀢𑁆𑀯𑀸 𑀔𑀺𑀧𑀢𑀺. 𑀢𑁂𑀲𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀢𑁆𑀢𑁄 𑀚𑀺𑀦𑀸𑀢𑀺, 𑀇𑀢𑀭𑁄 𑀧𑀦 𑀧𑀭𑀸𑀚𑀬𑀢𑀺. 𑀲𑁄 𑀢𑀲𑁆𑀲 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀏𑀯𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀏𑀯𑀁 𑀯𑀢𑁆𑀯𑀸 𑀕𑀼𑀴𑀁 𑀔𑀺𑀧𑀦𑁆𑀢𑁄 𑀫𑀫𑀁 𑀚𑀺𑀦𑀸𑀢𑀺, 𑀅𑀳𑀫𑁆𑀧𑀺 𑀏𑀯𑀭𑀽𑀧𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀁 𑀧𑀭𑀺𑀘𑀬𑀫𑀓𑀸𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀲 𑀧𑀺𑀢𑀸 𑀲𑀓𑀝𑀁 𑀬𑁄𑀚𑁂𑀢𑁆𑀯𑀸 𑀤𑀸𑀭𑀽𑀦𑀁 𑀅𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑁄 𑀢𑀫𑁆𑀧𑀺 𑀤𑀸𑀭𑀓𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀅𑀝𑀯𑀺𑀬𑀁 𑀤𑀸𑀭𑀽𑀦𑀁 𑀲𑀓𑀝𑀁 𑀧𑀽𑀭𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀩𑀳𑀺𑀦𑀕𑀭𑁂 𑀲𑀼𑀲𑀸𑀦𑀲𑀸𑀫𑀦𑁆𑀢𑁂 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑁂 𑀕𑁄𑀡𑁂 𑀫𑁄𑀘𑁂𑀢𑁆𑀯𑀸 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀫𑀓𑀸𑀲𑀺. 𑀅𑀣𑀲𑁆𑀲 𑀢𑁂 𑀕𑁄𑀡𑀸 𑀲𑀸𑀬𑀦𑁆𑀳𑀲𑀫𑀬𑁂 𑀦𑀕𑀭𑀁 𑀧𑀯𑀺𑀲𑀦𑁆𑀢𑁂𑀦 𑀕𑁄𑀕𑀡𑁂𑀦 𑀲𑀤𑁆𑀥𑀺𑀁 𑀦𑀕𑀭𑀫𑁂𑀯 𑀧𑀯𑀺𑀲𑀺𑀁𑀲𑀼. 𑀲𑀸𑀓𑀝𑀺𑀓𑁄𑀧𑀺 𑀕𑁄𑀡𑁂 𑀅𑀦𑀼𑀩𑀦𑁆𑀥𑀦𑁆𑀢𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀸𑀬𑀁 𑀕𑁄𑀡𑁂 𑀤𑀺𑀲𑁆𑀯𑀸 𑀆𑀤𑀸𑀬 𑀦𑀺𑀓𑁆𑀔𑀫𑀦𑁆𑀢𑁄 𑀤𑁆𑀯𑀸𑀭𑀁 𑀦 𑀲𑀫𑁆𑀧𑀸𑀧𑀼𑀡𑀺. 𑀢𑀲𑁆𑀫𑀺𑀜𑁆𑀳𑀺 𑀅𑀲𑀫𑁆𑀧𑀢𑁆𑀢𑁂𑀬𑁂𑀯 𑀤𑁆𑀯𑀸𑀭𑀁 𑀧𑀺𑀳𑀺𑀢𑀁.

𑀅𑀣𑀲𑁆𑀲 𑀧𑀼𑀢𑁆𑀢𑁄 𑀏𑀓𑀓𑁄𑀯 𑀭𑀢𑁆𑀢𑀺𑀪𑀸𑀕𑁂 𑀲𑀓𑀝𑀲𑁆𑀲 𑀳𑁂𑀝𑁆𑀞𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀭𑀸𑀚𑀕𑀳𑀁 𑀧𑀦 𑀧𑀓𑀢𑀺𑀬𑀸𑀧𑀺 𑀅𑀫𑀦𑀼𑀲𑁆𑀲𑀩𑀳𑀼𑀮𑀁. 𑀅𑀬𑀜𑁆𑀘 𑀲𑀼𑀲𑀸𑀦𑀲𑀦𑁆𑀢𑀺𑀓𑁂 𑀦𑀺𑀧𑀦𑁆𑀦𑁄. 𑀢𑀢𑁆𑀣 𑀦𑀁 𑀤𑁆𑀯𑁂 𑀅𑀫𑀦𑀼𑀲𑁆𑀲𑀸 𑀧𑀲𑁆𑀲𑀺𑀁𑀲𑀼. 𑀏𑀓𑁄 𑀲𑀸𑀲𑀦𑀲𑁆𑀲 𑀧𑀝𑀺𑀓𑀡𑁆𑀟𑀓𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄, 𑀏𑀓𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄. 𑀢𑁂𑀲𑀼 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀆𑀳 𑁋 ‘‘𑀅𑀬𑀁 𑀦𑁄 𑀪𑀓𑁆𑀔𑁄, 𑀇𑀫𑀁 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺. 𑀇𑀢𑀭𑁄 ‘‘𑀅𑀮𑀁 𑀫𑀸 𑀢𑁂 𑀭𑀼𑀘𑁆𑀘𑀻’’𑀢𑀺 𑀦𑀺𑀯𑀸𑀭𑁂𑀢𑀺. 𑀲𑁄 𑀢𑁂𑀦 𑀦𑀺𑀯𑀸𑀭𑀺𑀬𑀫𑀸𑀦𑁄𑀧𑀺 𑀢𑀲𑁆𑀲 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀤𑀸𑀭𑀓𑀁 𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺. 𑀲𑁄 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀧𑀭𑀺𑀘𑀺𑀢𑀢𑁆𑀢𑀸 𑀢𑀲𑁆𑀫𑀺𑀁 𑀔𑀡𑁂 ‘‘𑀦𑀫𑁄 𑀩𑀼𑀤𑁆𑀥𑀲𑁆𑀲𑀸’’𑀢𑀺 𑀆𑀳. 𑀅𑀫𑀦𑀼𑀲𑁆𑀲𑁄 𑀫𑀳𑀸𑀪𑀬𑀪𑀻𑀢𑁄 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀇𑀢𑀭𑁄 ‘‘𑀅𑀫𑁆𑀳𑁂𑀳𑀺 𑀅𑀓𑀺𑀘𑁆𑀘𑀁 𑀓𑀢𑀁, 𑀤𑀡𑁆𑀟𑀓𑀫𑁆𑀫𑀁 𑀢𑀲𑁆𑀲 𑀓𑀭𑁄𑀫𑀸’’𑀢𑀺 𑀯𑀢𑁆𑀯𑀸 𑀢𑀁 𑀭𑀓𑁆𑀔𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀜𑁆𑀜𑁄 𑀪𑁄𑀚𑀦𑀧𑀸𑀢𑀺𑀁 𑀧𑀽𑀭𑁂𑀢𑁆𑀯𑀸 𑀪𑁄𑀚𑀦𑀁 𑀆𑀳𑀭𑀺. 𑀅𑀣 𑀦𑀁 𑀉𑀪𑁄𑀧𑀺 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 ‘‘𑀇𑀫𑀸𑀦𑀺 𑀅𑀓𑁆𑀔𑀭𑀸𑀦𑀺 𑀭𑀸𑀚𑀸𑀯 𑀧𑀲𑁆𑀲𑀢𑀼, 𑀫𑀸 𑀅𑀜𑁆𑀜𑁄’’𑀢𑀺 𑀢𑀁 𑀧𑀯𑀢𑁆𑀢𑀺𑀁 𑀧𑀓𑀸𑀲𑁂𑀦𑁆𑀢𑀸 𑀬𑀓𑁆𑀔𑀸𑀦𑀼𑀪𑀸𑀯𑁂𑀦 𑀪𑁄𑀚𑀦𑀧𑀸𑀢𑀺𑀬𑀁 𑀅𑀓𑁆𑀔𑀭𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑀺𑀁 𑀤𑀸𑀭𑀼𑀲𑀓𑀝𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀆𑀭𑀓𑁆𑀔𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀧𑀼𑀦𑀤𑀺𑀯𑀲𑁂 ‘‘𑀭𑀸𑀚𑀓𑀼𑀮𑀢𑁄 𑀘𑁄𑀭𑁂𑀳𑀺 𑀪𑁄𑀚𑀦𑀪𑀡𑁆𑀟𑀁 𑀅𑀯𑀳𑀝’’𑀦𑁆𑀢𑀺 𑀓𑁄𑀮𑀸𑀳𑀮𑀁 𑀓𑀭𑁄𑀦𑁆𑀢𑀸 𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀸 𑀢𑀢𑁆𑀣 𑀅𑀧𑀲𑁆𑀲𑀦𑁆𑀢𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑀸 𑀤𑀸𑀭𑀼𑀲𑀓𑀝𑁂 𑀲𑀼𑀯𑀡𑁆𑀡𑀧𑀸𑀢𑀺𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀘𑁄𑀭𑁄’’𑀢𑀺 𑀢𑀁 𑀤𑀸𑀭𑀓𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 𑀅𑀓𑁆𑀔𑀭𑀸𑀦𑀺 𑀤𑀺𑀲𑁆𑀯𑀸 ‘‘𑀓𑀺𑀁 𑀏𑀢𑀁, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦𑀸𑀳𑀁, 𑀤𑁂𑀯, 𑀚𑀸𑀦𑀸𑀫𑀺, 𑀫𑀸𑀢𑀸𑀧𑀺𑀢𑀭𑁄 𑀫𑁂 𑀆𑀕𑀦𑁆𑀢𑁆𑀯𑀸 𑀭𑀢𑁆𑀢𑀺𑀁 𑀪𑁄𑀚𑁂𑀢𑁆𑀯𑀸 𑀭𑀓𑁆𑀔𑀫𑀸𑀦𑀸 𑀅𑀝𑁆𑀞𑀁𑀲𑀼, 𑀅𑀳𑀫𑁆𑀧𑀺 𑀫𑀸𑀢𑀸𑀧𑀺𑀢𑀭𑁄 𑀫𑀁 𑀭𑀓𑁆𑀔𑀦𑁆𑀢𑀻𑀢𑀺 𑀦𑀺𑀩𑁆𑀪𑀬𑁄𑀯 𑀦𑀺𑀤𑁆𑀤𑀁 𑀉𑀧𑀕𑀢𑁄. 𑀏𑀢𑁆𑀢𑀓𑀁 𑀅𑀳𑀁 𑀚𑀸𑀦𑀸𑀫𑀻’’𑀢𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄𑀧𑀺 𑀢𑀁 𑀞𑀸𑀦𑀁 𑀆𑀕𑀫𑀁𑀲𑀼. 𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀢𑁂 𑀢𑀬𑁄𑀧𑀺 𑀚𑀦𑁂 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀏𑀯 𑀭𑀓𑁆𑀔𑀸 𑀳𑁄𑀢𑀺, 𑀉𑀤𑀸𑀳𑀼 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀆𑀤𑀬𑁄𑀧𑀻’’𑀢𑀺 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀲𑀢𑁆𑀣𑀸, ‘‘𑀫𑀳𑀸𑀭𑀸𑀚, 𑀦 𑀓𑁂𑀯𑀮𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑁂𑀯 𑀭𑀓𑁆𑀔𑀸, 𑀬𑁂𑀲𑀁 𑀧𑀦 𑀙𑀩𑁆𑀩𑀺𑀥𑁂𑀦 𑀘𑀺𑀢𑁆𑀢𑀁 𑀲𑀼𑀪𑀸𑀯𑀺𑀢𑀁, 𑀢𑁂𑀲𑀁 𑀅𑀜𑁆𑀜𑁂𑀦 𑀭𑀓𑁆𑀔𑀸𑀯𑀭𑀡𑁂𑀦 𑀯𑀸 𑀫𑀦𑁆𑀢𑁄𑀲𑀥𑁂𑀳𑀺 𑀯𑀸 𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀙 𑀞𑀸𑀦𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑁨𑁯𑁬. ‘‘𑀲𑀼𑀧𑁆𑀧𑀩𑀼𑀤𑁆𑀥𑀁 𑀧𑀩𑀼𑀚𑁆𑀛𑀦𑁆𑀢𑀺, 𑀲𑀤𑀸 𑀕𑁄𑀢𑀫𑀲𑀸𑀯𑀓𑀸;

𑀬𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀦𑀺𑀘𑁆𑀘𑀁 𑀩𑀼𑀤𑁆𑀥𑀕𑀢𑀸 𑀲𑀢𑀺.

𑁨𑁯𑁭. ‘‘𑀲𑀼𑀧𑁆𑀧𑀩𑀼𑀤𑁆𑀥𑀁 𑀧𑀩𑀼𑀚𑁆𑀛𑀦𑁆𑀢𑀺, 𑀲𑀤𑀸 𑀕𑁄𑀢𑀫𑀲𑀸𑀯𑀓𑀸;

𑀬𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀦𑀺𑀘𑁆𑀘𑀁 𑀥𑀫𑁆𑀫𑀕𑀢𑀸 𑀲𑀢𑀺.

𑁨𑁯𑁮. ‘‘𑀲𑀼𑀧𑁆𑀧𑀩𑀼𑀤𑁆𑀥𑀁 𑀧𑀩𑀼𑀚𑁆𑀛𑀦𑁆𑀢𑀺, 𑀲𑀤𑀸 𑀕𑁄𑀢𑀫𑀲𑀸𑀯𑀓𑀸;

𑀬𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀦𑀺𑀘𑁆𑀘𑀁 𑀲𑀗𑁆𑀖𑀕𑀢𑀸 𑀲𑀢𑀺.

𑁨𑁯𑁯. ‘‘𑀲𑀼𑀧𑁆𑀧𑀩𑀼𑀤𑁆𑀥𑀁 𑀧𑀩𑀼𑀚𑁆𑀛𑀦𑁆𑀢𑀺, 𑀲𑀤𑀸 𑀕𑁄𑀢𑀫𑀲𑀸𑀯𑀓𑀸;

𑀬𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀦𑀺𑀘𑁆𑀘𑀁 𑀓𑀸𑀬𑀕𑀢𑀸 𑀲𑀢𑀺.

𑁩𑁦𑁦. ‘‘𑀲𑀼𑀧𑁆𑀧𑀩𑀼𑀤𑁆𑀥𑀁 𑀧𑀩𑀼𑀚𑁆𑀛𑀦𑁆𑀢𑀺, 𑀲𑀤𑀸 𑀕𑁄𑀢𑀫𑀲𑀸𑀯𑀓𑀸;

𑀬𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀅𑀳𑀺𑀁𑀲𑀸𑀬 𑀭𑀢𑁄 𑀫𑀦𑁄.

𑁩𑁦𑁧. ‘‘𑀲𑀼𑀧𑁆𑀧𑀩𑀼𑀤𑁆𑀥𑀁 𑀧𑀩𑀼𑀚𑁆𑀛𑀦𑁆𑀢𑀺, 𑀲𑀤𑀸 𑀕𑁄𑀢𑀫𑀲𑀸𑀯𑀓𑀸;

𑀬𑁂𑀲𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀪𑀸𑀯𑀦𑀸𑀬 𑀭𑀢𑁄 𑀫𑀦𑁄’’𑀢𑀺.

𑀢𑀢𑁆𑀣 𑀲𑀼𑀧𑁆𑀧𑀩𑀼𑀤𑁆𑀥𑀁 𑀧𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑀼𑀤𑁆𑀥𑀕𑀢𑀁 𑀲𑀢𑀺𑀁 𑀕𑀳𑁂𑀢𑁆𑀯𑀸 𑀲𑀼𑀧𑀦𑁆𑀢𑀸, 𑀕𑀳𑁂𑀢𑁆𑀯𑀸𑀬𑁂𑀯 𑀘 𑀧𑀩𑀼𑀚𑁆𑀛𑀦𑁆𑀢𑀸 𑀲𑀼𑀧𑁆𑀧𑀩𑀼𑀤𑁆𑀥𑀁 𑀧𑀩𑀼𑀚𑁆𑀛𑀦𑁆𑀢𑀺 𑀦𑀸𑀫. 𑀲𑀤𑀸 𑀕𑁄𑀢𑀫𑀲𑀸𑀯𑀓𑀸𑀢𑀺 𑀕𑁄𑀢𑀫𑀕𑁄𑀢𑁆𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀯𑀦𑀦𑁆𑀢𑁂 𑀚𑀸𑀢𑀢𑁆𑀢𑀸 𑀢𑀲𑁆𑀲𑁂𑀯 𑀅𑀦𑀼𑀲𑀸𑀲𑀦𑀺𑀬𑀸 𑀲𑀯𑀦𑀢𑀸𑀬 𑀕𑁄𑀢𑀫𑀲𑀸𑀯𑀓𑀸. 𑀩𑀼𑀤𑁆𑀥𑀕𑀢𑀸 𑀲𑀢𑀻𑀢𑀺 𑀬𑁂𑀲𑀁 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀧𑁆𑀧𑀪𑁂𑀤𑁂 𑀩𑀼𑀤𑁆𑀥𑀕𑀼𑀡𑁂 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀢𑀺 𑀦𑀺𑀘𑁆𑀘𑀓𑀸𑀮𑀁 𑀅𑀢𑁆𑀣𑀺, 𑀢𑁂 𑀲𑀤𑀸𑀧𑀺 𑀲𑀼𑀧𑁆𑀧𑀩𑀼𑀤𑁆𑀥𑀁 𑀧𑀩𑀼𑀚𑁆𑀛𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑀸 𑀧𑀦 𑀏𑀓𑀤𑀺𑀯𑀲𑀁 𑀢𑀻𑀲𑀼 𑀓𑀸𑀮𑁂𑀲𑀼 𑀤𑁆𑀯𑀻𑀲𑀼 𑀓𑀸𑀮𑁂𑀲𑀼 𑀏𑀓𑀲𑁆𑀫𑀺𑀫𑁆𑀧𑀺 𑀓𑀸𑀮𑁂 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁 𑀫𑀦𑀲𑀺 𑀓𑀭𑁄𑀦𑁆𑀢𑀸 𑀲𑀼𑀧𑁆𑀧𑀩𑀼𑀤𑁆𑀥𑀁 𑀧𑀩𑀼𑀚𑁆𑀛𑀦𑁆𑀢𑀺𑀬𑁂𑀯 𑀦𑀸𑀫. 𑀥𑀫𑁆𑀫𑀕𑀢𑀸 𑀲𑀢𑀻𑀢𑀺 ‘‘𑀲𑁆𑀯𑀸𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄’’𑀢𑀺𑀆𑀤𑀺𑀧𑁆𑀧𑀪𑁂𑀤𑁂 𑀥𑀫𑁆𑀫𑀕𑀼𑀡𑁂 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀢𑀺. 𑀲𑀗𑁆𑀖𑀕𑀢𑀸 𑀲𑀢𑀻𑀢𑀺 ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄’’𑀢𑀺𑀆𑀤𑀺𑀧𑁆𑀧𑀪𑁂𑀤𑁂 𑀲𑀗𑁆𑀖𑀕𑀼𑀡𑁂 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀢𑀺. 𑀓𑀸𑀬𑀕𑀢𑀸 𑀲𑀢𑀻𑀢𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀯𑀲𑁂𑀦 𑀯𑀸 𑀦𑀯𑀲𑀺𑀯𑀣𑀺𑀓𑀸𑀯𑀲𑁂𑀦 𑀯𑀸 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀯𑀲𑁂𑀦 𑀯𑀸 𑀅𑀚𑁆𑀛𑀢𑁆𑀢𑀦𑀻𑀮𑀓𑀲𑀺𑀡𑀸𑀤𑀺𑀭𑀽𑀧𑀚𑁆𑀛𑀸𑀦𑀯𑀲𑁂𑀦 𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀢𑀺. 𑀅𑀳𑀺𑀁𑀲𑀸𑀬 𑀭𑀢𑁄𑀢𑀺 ‘‘𑀲𑁄 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺 (𑀯𑀺𑀪. 𑁬𑁪𑁨) 𑀏𑀯𑀁 𑀯𑀼𑀢𑁆𑀢𑀸𑀬 𑀓𑀭𑀼𑀡𑀸𑀪𑀸𑀯𑀦𑀸𑀬 𑀭𑀢𑁄. 𑀪𑀸𑀯𑀦𑀸𑀬𑀸𑀢𑀺 𑀫𑁂𑀢𑁆𑀢𑀸𑀪𑀸𑀯𑀦𑀸𑀬. 𑀓𑀺𑀜𑁆𑀘𑀸𑀧𑀺 𑀳𑁂𑀝𑁆𑀞𑀸 𑀓𑀭𑀼𑀡𑀸𑀪𑀸𑀯𑀦𑀸𑀬 𑀯𑀼𑀢𑁆𑀢𑀢𑁆𑀢𑀸 𑀇𑀥 𑀲𑀩𑁆𑀩𑀸𑀧𑀺 𑀅𑀯𑀲𑁂𑀲𑀸 𑀪𑀸𑀯𑀦𑀸 𑀦𑀸𑀫, 𑀇𑀥 𑀧𑀦 𑀫𑁂𑀢𑁆𑀢𑀸𑀪𑀸𑀯𑀦𑀸𑀯 𑀅𑀥𑀺𑀧𑁆𑀧𑁂𑀢𑀸. 𑀲𑁂𑀲𑀁 𑀧𑀞𑀫𑀕𑀸𑀣𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀤𑁂𑀲𑀦𑀸𑀯𑀲𑀸𑀦𑁂 𑀤𑀸𑀭𑀓𑁄 𑀲𑀤𑁆𑀥𑀺𑀁 𑀫𑀸𑀢𑀸𑀧𑀺𑀢𑀽𑀳𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀧𑀘𑁆𑀙𑀸 𑀧𑀦 𑀧𑀩𑁆𑀩𑀚𑀺𑀢𑁆𑀯𑀸 𑀲𑀩𑁆𑀩𑁂𑀧𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀤𑀸𑀭𑀼𑀲𑀸𑀓𑀝𑀺𑀓𑀧𑀼𑀢𑁆𑀢𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀯𑀚𑁆𑀚𑀺𑀧𑀼𑀢𑁆𑀢𑀓𑀪𑀺𑀓𑁆𑀔𑀼𑀯𑀢𑁆𑀣𑀼

𑀤𑀼𑀧𑁆𑀧𑀩𑁆𑀩𑀚𑁆𑀚𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀲𑀸𑀮𑀺𑀁 𑀦𑀺𑀲𑁆𑀲𑀸𑀬 𑀫𑀳𑀸𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀯𑀚𑁆𑀚𑀺𑀧𑀼𑀢𑁆𑀢𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 𑀅𑀜𑁆𑀜𑀢𑀭𑁄 𑀯𑀚𑁆𑀚𑀺𑀧𑀼𑀢𑁆𑀢𑀓𑁄 𑀪𑀺𑀓𑁆𑀔𑀼 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂, 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀬𑀁 𑀲𑀩𑁆𑀩𑀭𑀢𑁆𑀢𑀺𑀙𑀡𑁄 𑀳𑁄𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀯𑁂𑀲𑀸𑀮𑀺𑀬𑀸 𑀢𑀽𑀭𑀺𑀬𑀢𑀸𑀴𑀺𑀢𑀯𑀸𑀤𑀺𑀢𑀦𑀺𑀕𑁆𑀖𑁄𑀲𑀲𑀤𑁆𑀤𑀁 𑀲𑀼𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑁄 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀏𑀓𑀓𑀸 𑀫𑀬𑀁 𑀅𑀭𑀜𑁆𑀜𑁂 𑀯𑀺𑀳𑀭𑀸𑀫,

𑀅𑀧𑀯𑀺𑀤𑁆𑀥𑀁𑀯 𑀯𑀦𑀲𑁆𑀫𑀺𑀁 𑀤𑀸𑀭𑀼𑀓𑀁;

𑀏𑀢𑀸𑀤𑀺𑀲𑀺𑀓𑀸𑀬 𑀭𑀢𑁆𑀢𑀺𑀬𑀸,

𑀓𑁄𑀲𑀼 𑀦𑀸𑀫𑀫𑁆𑀳𑁂𑀳𑀺 𑀧𑀸𑀧𑀺𑀬𑁄’’𑀢𑀺. (𑀲𑀁. 𑀦𑀺. 𑁧.𑁨𑁨𑁯);

𑀲𑁄 𑀓𑀺𑀭 𑀯𑀚𑁆𑀚𑀺𑀭𑀝𑁆𑀞𑁂 𑀭𑀸𑀚𑀧𑀼𑀢𑁆𑀢𑁄 𑀯𑀸𑀭𑁂𑀦 𑀲𑀫𑁆𑀧𑀢𑁆𑀢𑀁 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄 𑀯𑁂𑀲𑀸𑀮𑀺𑀬𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂𑀳𑀺 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸 𑀲𑀓𑀮𑀦𑀕𑀭𑁂 𑀥𑀚𑀧𑀝𑀸𑀓𑀸𑀤𑀻𑀳𑀺 𑀧𑀝𑀺𑀫𑀡𑁆𑀟𑀺𑀢𑁂 𑀓𑁄𑀫𑀼𑀤𑀺𑀬𑀸 𑀧𑀼𑀡𑁆𑀡𑀫𑀸𑀬 𑀲𑀩𑁆𑀩𑀭𑀢𑁆𑀢𑀺𑀁 𑀙𑀡𑀯𑀸𑀭𑁂 𑀯𑀢𑁆𑀢𑀫𑀸𑀦𑁂 𑀪𑁂𑀭𑀺𑀬𑀸𑀤𑀻𑀦𑀁 𑀢𑀽𑀭𑀺𑀬𑀸𑀦𑀁 𑀢𑀸𑀴𑀺𑀢𑀸𑀦𑀁 𑀦𑀺𑀕𑁆𑀖𑁄𑀲𑀁 𑀯𑀻𑀡𑀸𑀤𑀻𑀦𑀜𑁆𑀘 𑀯𑀸𑀤𑀺𑀢𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀬𑀸𑀦𑀺 𑀯𑁂𑀲𑀸𑀮𑀺𑀬𑀁 𑀲𑀢𑁆𑀢 𑀭𑀸𑀚𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀭𑀸𑀚𑀲𑀢𑀸𑀦𑀺 𑀲𑀢𑁆𑀢 𑀭𑀸𑀚𑀸𑀦𑁄, 𑀢𑀢𑁆𑀢𑀓𑀸 𑀏𑀯 𑀘 𑀦𑁂𑀲𑀁 𑀉𑀧𑀭𑀸𑀚𑀲𑁂𑀦𑀸𑀧𑀢𑀺𑀆𑀤𑀬𑁄, 𑀢𑁂𑀲𑀼 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂𑀲𑀼 𑀦𑀓𑁆𑀔𑀢𑁆𑀢𑀓𑀻𑀴𑀦𑀢𑁆𑀣𑀸𑀬 𑀯𑀻𑀣𑀺𑀁 𑀑𑀢𑀺𑀡𑁆𑀡𑁂𑀲𑀼 𑀲𑀝𑁆𑀞𑀺𑀳𑀢𑁆𑀣𑁂 𑀫𑀳𑀸𑀘𑀗𑁆𑀓𑀫𑁂 𑀘𑀗𑁆𑀓𑀫𑀫𑀸𑀦𑁄 𑀕𑀕𑀦𑀫𑀚𑁆𑀛𑁂 𑀞𑀺𑀢𑀁 𑀧𑀼𑀡𑁆𑀡𑀘𑀦𑁆𑀤𑀁 𑀤𑀺𑀲𑁆𑀯𑀸 𑀘𑀗𑁆𑀓𑀫𑀓𑁄𑀝𑀺𑀬𑀁 𑀨𑀮𑀓𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄 𑀯𑁂𑀞𑀦𑀸𑀮𑀗𑁆𑀓𑀸𑀭𑀯𑀺𑀭𑀳𑀺𑀢𑀢𑁆𑀢𑀸 𑀯𑀦𑁂 𑀙𑀟𑁆𑀟𑀺𑀢𑀤𑀸𑀭𑀼𑀓𑀁 𑀯𑀺𑀬 𑀅𑀢𑁆𑀢𑀪𑀸𑀯𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀅𑀜𑁆𑀜𑁄 𑀅𑀫𑁆𑀳𑁂𑀳𑀺 𑀮𑀸𑀫𑀓𑀢𑀭𑁄’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀧𑀓𑀢𑀺𑀬𑀸 𑀆𑀭𑀜𑁆𑀜𑀓𑀸𑀤𑀺𑀕𑀼𑀡𑀬𑀼𑀢𑁆𑀢𑁄𑀧𑀺 𑀢𑀲𑁆𑀫𑀺𑀁 𑀔𑀡𑁂 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀏𑀯𑀫𑀸𑀳. 𑀲𑁄 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸𑀬 𑀤𑁂𑀯𑀢𑀸𑀬 ‘‘𑀇𑀫𑀁 𑀪𑀺𑀓𑁆𑀔𑀼𑀁 𑀲𑀁𑀯𑁂𑀚𑁂𑀲𑁆𑀲𑀸𑀫𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑁋

‘‘𑀏𑀓𑀓𑁄𑀯 𑀢𑁆𑀯𑀁 𑀅𑀭𑀜𑁆𑀜𑁂 𑀯𑀺𑀳𑀭𑀲𑀺, 𑀅𑀧𑀯𑀺𑀤𑁆𑀥𑀁𑀯 𑀯𑀦𑀲𑁆𑀫𑀺𑀁 𑀤𑀸𑀭𑀼𑀓𑀁;

𑀢𑀲𑁆𑀲 𑀢𑁂 𑀩𑀳𑀼𑀓𑀸 𑀧𑀺𑀳𑀬𑀦𑁆𑀢𑀺, 𑀦𑁂𑀭𑀬𑀺𑀓𑀸 𑀯𑀺𑀬 𑀲𑀕𑁆𑀕𑀕𑀸𑀫𑀺𑀦’’𑀦𑁆𑀢𑀺. (𑀲𑀁. 𑀦𑀺. 𑁧.𑁨𑁨𑁯) 𑁋

𑀯𑀼𑀢𑁆𑀢𑀁 𑀇𑀫𑀁 𑀕𑀸𑀣𑀁 𑀲𑀼𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀖𑀭𑀸𑀯𑀸𑀲𑀲𑁆𑀲 𑀤𑀼𑀓𑁆𑀔𑀢𑀁 𑀧𑀓𑀸𑀲𑁂𑀢𑀼𑀓𑀸𑀫𑁄 𑀧𑀜𑁆𑀘 𑀤𑀼𑀓𑁆𑀔𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁦𑁨. ‘‘𑀤𑀼𑀧𑁆𑀧𑀩𑁆𑀩𑀚𑁆𑀚𑀁 𑀤𑀼𑀭𑀪𑀺𑀭𑀫𑀁, 𑀤𑀼𑀭𑀸𑀯𑀸𑀲𑀸 𑀖𑀭𑀸 𑀤𑀼𑀔𑀸;

𑀤𑀼𑀓𑁆𑀔𑁄𑀲𑀫𑀸𑀦𑀲𑀁𑀯𑀸𑀲𑁄, 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑀤𑁆𑀥𑀕𑀽;

𑀢𑀲𑁆𑀫𑀸 𑀦 𑀘𑀤𑁆𑀥𑀕𑀽 𑀲𑀺𑀬𑀸, 𑀦 𑀘 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑁄 𑀲𑀺𑀬𑀸’’𑀢𑀺.

𑀢𑀢𑁆𑀣 𑀤𑀼𑀧𑁆𑀧𑀩𑁆𑀩𑀚𑁆𑀚𑀦𑁆𑀢𑀺 𑀅𑀧𑁆𑀧𑀁 𑀯𑀸 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀜𑁆𑀘𑁂𑀯 𑀜𑀸𑀢𑀺𑀧𑀭𑀺𑀯𑀝𑁆𑀝𑀜𑁆𑀘 𑀧𑀳𑀸𑀬 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀦𑀸𑀫 𑀤𑀼𑀓𑁆𑀔𑀁. 𑀤𑀼𑀭𑀪𑀺𑀭𑀫𑀦𑁆𑀢𑀺 𑀏𑀯𑀁 𑀧𑀩𑁆𑀩𑀚𑀺𑀢𑁂𑀦𑀸𑀧𑀺 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀚𑀻𑀯𑀺𑀢𑀯𑀼𑀢𑁆𑀢𑀺𑀁 𑀖𑀝𑁂𑀦𑁆𑀢𑁂𑀦 𑀅𑀧𑀭𑀺𑀫𑀸𑀡𑀲𑀻𑀮𑀓𑁆𑀔𑀦𑁆𑀥𑀕𑁄𑀧𑀦𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀯𑀲𑁂𑀦 𑀅𑀪𑀺𑀭𑀫𑀺𑀢𑀼𑀁 𑀤𑀼𑀓𑁆𑀔𑀁. 𑀤𑀼𑀭𑀸𑀯𑀸𑀲𑀸𑀢𑀺 𑀬𑀲𑁆𑀫𑀸 𑀧𑀦 𑀖𑀭𑀁 𑀆𑀯𑀲𑀦𑁆𑀢𑁂𑀦 𑀭𑀸𑀚𑀽𑀦𑀁 𑀭𑀸𑀚𑀓𑀺𑀘𑁆𑀘𑀁, 𑀇𑀲𑁆𑀲𑀭𑀸𑀦𑀁 𑀇𑀲𑁆𑀲𑀭𑀓𑀺𑀘𑁆𑀘𑀁 𑀯𑀳𑀺𑀢𑀩𑁆𑀩𑀁, 𑀧𑀭𑀺𑀚𑀦𑀸 𑀘𑁂𑀯 𑀥𑀫𑁆𑀫𑀺𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘 𑀲𑀗𑁆𑀕𑀳𑀺𑀢𑀩𑁆𑀩𑀸. 𑀏𑀯𑀁 𑀲𑀦𑁆𑀢𑁂𑀧𑀺 𑀖𑀭𑀸𑀯𑀸𑀲𑁄 𑀙𑀺𑀤𑁆𑀤𑀖𑀝𑁄 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬 𑀘 𑀤𑀼𑀧𑁆𑀧𑀽𑀭𑁄. 𑀢𑀲𑁆𑀫𑀸 𑀖𑀭𑀸𑀯𑀸𑀲𑀸 𑀦𑀸𑀫𑁂𑀢𑁂 𑀤𑀼𑀭𑀸𑀯𑀸𑀲𑀸 𑀤𑀼𑀓𑁆𑀔𑀸 𑀆𑀯𑀲𑀺𑀢𑀼𑀁, 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀤𑀼𑀓𑁆𑀔𑀸𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑁄 𑀲𑀫𑀸𑀦𑀲𑀁𑀯𑀸𑀲𑁄𑀢𑀺 𑀕𑀺𑀳𑀺𑀦𑁄 𑀯𑀸 𑀳𑀺 𑀬𑁂 𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀪𑁄𑀕𑁂𑀳𑀺 𑀧𑀩𑁆𑀩𑀚𑀺𑀢𑀸 𑀯𑀸 𑀲𑀻𑀮𑀸𑀘𑀸𑀭𑀩𑀸𑀳𑀼𑀲𑀘𑁆𑀘𑀸𑀤𑀻𑀳𑀺 𑀲𑀫𑀸𑀦𑀸𑀧𑀺 𑀳𑀼𑀢𑁆𑀯𑀸 ‘‘𑀓𑁄𑀲𑀺 𑀢𑁆𑀯𑀁, 𑀓𑁄𑀲𑁆𑀫𑀺 𑀅𑀳’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀅𑀥𑀺𑀓𑀭𑀡𑀧𑀲𑀼𑀢𑀸 𑀳𑁄𑀦𑁆𑀢𑀺, 𑀢𑁂 𑀅𑀲𑀫𑀸𑀦𑀸 𑀦𑀸𑀫, 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑁄 𑀤𑀼𑀓𑁆𑀔𑁄𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑀤𑁆𑀥𑀕𑀽𑀢𑀺 𑀬𑁂 𑀯𑀝𑁆𑀝𑀲𑀗𑁆𑀔𑀸𑀢𑀁 𑀅𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑀢𑁆𑀢𑀸 𑀅𑀤𑁆𑀥𑀕𑀽, 𑀢𑁂 𑀤𑀼𑀓𑁆𑀔𑁂 𑀅𑀦𑀼𑀧𑀢𑀺𑀢𑀸𑀯. 𑀢𑀲𑁆𑀫𑀸 𑀦 𑀘𑀤𑁆𑀥𑀕𑀽𑀢𑀺 𑀬𑀲𑁆𑀫𑀸 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑀪𑀸𑀯𑁄𑀧𑀺 𑀤𑀼𑀓𑁆𑀔𑁄 𑀅𑀤𑁆𑀥𑀕𑀽𑀪𑀸𑀯𑁄𑀧𑀺, 𑀢𑀲𑁆𑀫𑀸 𑀯𑀝𑁆𑀝𑀲𑀗𑁆𑀔𑀸𑀢𑀁 𑀅𑀤𑁆𑀥𑀸𑀦𑀁 𑀕𑀫𑀦𑀢𑀸𑀬 𑀅𑀤𑁆𑀥𑀕𑀽 𑀦 𑀪𑀯𑁂𑀬𑁆𑀬, 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀤𑀼𑀓𑁆𑀔𑁂𑀦 𑀅𑀦𑀼𑀧𑀢𑀺𑀢𑁄𑀧𑀺 𑀦 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀤𑀲𑁆𑀲𑀺𑀢𑁂 𑀤𑀼𑀓𑁆𑀔𑁂 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀧𑀜𑁆𑀘 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀧𑀤𑀸𑀮𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀻𑀢𑀺.

𑀯𑀚𑁆𑀚𑀺𑀧𑀼𑀢𑁆𑀢𑀓𑀪𑀺𑀓𑁆𑀔𑀼𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀘𑀺𑀢𑁆𑀢𑀕𑀳𑀧𑀢𑀺𑀯𑀢𑁆𑀣𑀼

𑀲𑀤𑁆𑀥𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀺𑀢𑁆𑀢𑀕𑀳𑀧𑀢𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀩𑀸𑀮𑀯𑀕𑁆𑀕𑁂 ‘‘𑀅𑀲𑀦𑁆𑀢𑀁 𑀪𑀸𑀯𑀦𑀫𑀺𑀘𑁆𑀙𑁂𑀬𑁆𑀬𑀸’’𑀢𑀺 𑀕𑀸𑀣𑀸𑀯𑀡𑁆𑀡𑀦𑀸𑀬 𑀯𑀺𑀢𑁆𑀣𑀸𑀭𑀺𑀢𑀁. 𑀕𑀸𑀣𑀸𑀧𑀺 𑀢𑀢𑁆𑀣𑁂𑀯 𑀯𑀼𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀢𑀢𑁆𑀣 (𑀥. 𑀧. 𑀅𑀝𑁆𑀞. 𑁧.𑁭𑁪) 𑁋

‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀏𑀢𑀲𑁆𑀲 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀲𑁆𑀲𑁂𑀯𑀸𑀬𑀁 𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺. ‘‘𑀆𑀦𑀦𑁆𑀤, 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑁂𑀯. 𑀅𑀬𑀜𑁆𑀳𑀺 𑀉𑀧𑀸𑀲𑀓𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀲𑀫𑁆𑀧𑀦𑁆𑀦𑀲𑀻𑀮𑁄, 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀬𑀁 𑀬𑀁 𑀧𑀤𑁂𑀲𑀁 𑀪𑀚𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑁄 𑀦𑀺𑀩𑁆𑀩𑀢𑁆𑀢𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁦𑁩. ‘‘𑀲𑀤𑁆𑀥𑁄 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄, 𑀬𑀲𑁄𑀪𑁄𑀕𑀲𑀫𑀧𑁆𑀧𑀺𑀢𑁄;

𑀬𑀁 𑀬𑀁 𑀧𑀤𑁂𑀲𑀁 𑀪𑀚𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀽𑀚𑀺𑀢𑁄’’𑀢𑀺. (𑀥. 𑀧. 𑀅𑀝𑁆𑀞. 𑁧.𑁭𑁪);

𑀢𑀢𑁆𑀣 𑀲𑀤𑁆𑀥𑁄𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀲𑀻𑀮𑁂𑀦𑀸𑀢𑀺 𑀆𑀕𑀸𑀭𑀺𑀬𑀲𑀻𑀮𑀁, 𑀅𑀦𑀸𑀕𑀸𑀭𑀺𑀬𑀲𑀻𑀮𑀦𑁆𑀢𑀺 𑀤𑀼𑀯𑀺𑀥𑀁 𑀲𑀻𑀮𑀁. 𑀢𑁂𑀲𑀼 𑀇𑀥 𑀆𑀕𑀸𑀭𑀺𑀬𑀲𑀻𑀮𑀁 𑀅𑀥𑀺𑀧𑁆𑀧𑁂𑀢𑀁, 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀬𑀲𑁄𑀪𑁄𑀕𑀲𑀫𑀧𑁆𑀧𑀺𑀢𑁄𑀢𑀺 𑀬𑀸𑀤𑀺𑀲𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀻𑀦𑀁 𑀧𑀜𑁆𑀘𑀉𑀧𑀸𑀲𑀓𑀲𑀢𑀧𑀭𑀺𑀯𑀸𑀭𑀲𑀗𑁆𑀔𑀸𑀢𑁄 𑀆𑀕𑀸𑀭𑀺𑀬𑀬𑀲𑁄, 𑀢𑀸𑀤𑀺𑀲𑁂𑀦𑁂𑀯 𑀬𑀲𑁂𑀦 𑀥𑀦𑀥𑀜𑁆𑀜𑀸𑀤𑀺𑀓𑁄 𑀘𑁂𑀯 𑀲𑀢𑁆𑀢𑀯𑀺𑀥𑀅𑀭𑀺𑀬𑀥𑀦𑀲𑀗𑁆𑀔𑀸𑀢𑁄 𑀘𑀸𑀢𑀺 𑀤𑀼𑀯𑀺𑀥𑁄 𑀪𑁄𑀕𑁄, 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀬𑀁 𑀬𑀁 𑀧𑀤𑁂𑀲𑀦𑁆𑀢𑀺 𑀧𑀼𑀭𑀢𑁆𑀣𑀺𑀫𑀸𑀤𑀻𑀲𑀼 𑀤𑀺𑀲𑀸𑀲𑀼 𑀏𑀯𑀭𑀽𑀧𑁄 𑀓𑀼𑀮𑀧𑀼𑀢𑁆𑀢𑁄 𑀬𑀁 𑀬𑀁 𑀧𑀤𑁂𑀲𑀁 𑀪𑀚𑀢𑀺, 𑀢𑀢𑁆𑀣 𑀢𑀢𑁆𑀣 𑀏𑀯𑀭𑀽𑀧𑁂𑀦 𑀮𑀸𑀪𑀲𑀓𑁆𑀓𑀸𑀭𑁂𑀦 𑀧𑀽𑀚𑀺𑀢𑁄𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀘𑀺𑀢𑁆𑀢𑀕𑀳𑀧𑀢𑀺𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀘𑀽𑀴𑀲𑀼𑀪𑀤𑁆𑀤𑀸𑀯𑀢𑁆𑀣𑀼

𑀤𑀽𑀭𑁂 𑀲𑀦𑁆𑀢𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀥𑀻𑀢𑀭𑀁 𑀘𑀽𑀴𑀲𑀼𑀪𑀤𑁆𑀤𑀁 𑀦𑀸𑀫 𑀆𑀭𑀩𑁆𑀪 𑀓𑀣𑁂𑀲𑀺.

𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀓𑀺𑀭 𑀤𑀳𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀉𑀕𑁆𑀕𑀦𑀕𑀭𑀯𑀸𑀲𑀻 𑀉𑀕𑁆𑀕𑁄 𑀦𑀸𑀫 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀲𑀳𑀸𑀬𑀓𑁄 𑀅𑀳𑁄𑀲𑀺. 𑀢𑁂 𑀏𑀓𑀸𑀘𑀭𑀺𑀬𑀓𑀼𑀮𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀓𑀢𑀺𑀓𑀁 𑀓𑀭𑀺𑀁𑀲𑀼 ‘‘𑀅𑀫𑁆𑀳𑀸𑀓𑀁 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀧𑀼𑀢𑁆𑀢𑀥𑀻𑀢𑀸𑀲𑀼 𑀚𑀸𑀢𑀸𑀲𑀼 𑀬𑁄 𑀧𑀼𑀢𑁆𑀢𑀲𑁆𑀲 𑀥𑀻𑀢𑀭𑀁 𑀯𑀸𑀭𑁂𑀢𑀺, 𑀢𑁂𑀦 𑀢𑀲𑁆𑀲 𑀥𑀻𑀢𑀸 𑀤𑀸𑀢𑀩𑁆𑀩𑀸’’𑀢𑀺. 𑀢𑁂 𑀉𑀪𑁄𑀧𑀺 𑀯𑀬𑀧𑁆𑀧𑀢𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀕𑀭𑁂 𑀲𑁂𑀝𑁆𑀞𑀺𑀝𑁆𑀞𑀸𑀦𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀅𑀣𑁂𑀓𑀲𑁆𑀫𑀺𑀁 𑀲𑀫𑀬𑁂 𑀉𑀕𑁆𑀕𑀲𑁂𑀝𑁆𑀞𑀺 𑀯𑀡𑀺𑀚𑁆𑀚𑀁 𑀧𑀬𑁄𑀚𑁂𑀦𑁆𑀢𑁄 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀘𑀽𑀴𑀲𑀼𑀪𑀤𑁆𑀤𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀅𑀫𑁆𑀫, 𑀧𑀺𑀢𑀸 𑀢𑁂 𑀉𑀕𑁆𑀕𑀲𑁂𑀝𑁆𑀞𑀺 𑀦𑀸𑀫 𑀆𑀕𑀢𑁄, 𑀢𑀲𑁆𑀲 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀲𑀩𑁆𑀩𑀁 𑀢𑀯 𑀪𑀸𑀭𑁄’’𑀢𑀺 𑀆𑀡𑀸𑀧𑁂𑀲𑀺. 𑀲𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑀲𑁆𑀲 𑀆𑀕𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀲𑀳𑀢𑁆𑀣𑁂𑀦𑁂𑀯 𑀲𑀽𑀧𑀩𑁆𑀬𑀜𑁆𑀚𑀦𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀢𑀺, 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀻𑀦𑀺 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀪𑁄𑀚𑀦𑀓𑀸𑀮𑁂 𑀢𑀲𑁆𑀲 𑀦𑁆𑀳𑀸𑀦𑁄𑀤𑀓𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀦𑁆𑀳𑀸𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀸𑀥𑀼𑀓𑀁 𑀓𑀭𑁄𑀢𑀺.

𑀉𑀕𑁆𑀕𑀲𑁂𑀝𑁆𑀞𑀺 𑀢𑀲𑁆𑀲𑀸 𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀏𑀓𑀤𑀺𑀯𑀲𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀲𑀤𑁆𑀥𑀺𑀁 𑀲𑀼𑀔𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑁄 ‘‘𑀫𑀬𑀁 𑀤𑀳𑀭𑀓𑀸𑀮𑁂 𑀏𑀯𑀁 𑀦𑀸𑀫 𑀓𑀢𑀺𑀓𑀁 𑀓𑀭𑀺𑀫𑁆𑀳𑀸’’𑀢𑀺 𑀲𑀸𑀭𑁂𑀢𑁆𑀯𑀸 𑀘𑀽𑀴𑀲𑀼𑀪𑀤𑁆𑀤𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲𑀢𑁆𑀣𑀸𑀬 𑀯𑀸𑀭𑁂𑀲𑀺. 𑀲𑁄 𑀧𑀦 𑀧𑀓𑀢𑀺𑀬𑀸𑀯 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄. 𑀢𑀲𑁆𑀫𑀸 𑀤𑀲𑀩𑀮𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀲𑀢𑁆𑀣𑀸𑀭𑀸 𑀉𑀕𑁆𑀕𑀲𑁂𑀝𑁆𑀞𑀺𑀲𑁆𑀲𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀅𑀦𑀼𑀜𑁆𑀜𑀸𑀢𑁄 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀤𑀺𑀯𑀲𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀥𑀻𑀢𑀭𑀁 𑀯𑀺𑀲𑀸𑀔𑀁 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀦𑁆𑀢𑁄 𑀥𑀦𑀜𑁆𑀘𑀬𑀲𑁂𑀝𑁆𑀞𑀺 𑀯𑀺𑀬 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀲𑀼𑀪𑀤𑁆𑀤𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀅𑀫𑁆𑀫, 𑀲𑀲𑀼𑀭𑀓𑀼𑀮𑁂 𑀯𑀲𑀦𑁆𑀢𑀺𑀬𑀸 𑀦𑀸𑀫 𑀅𑀦𑁆𑀢𑁄𑀅𑀕𑁆𑀕𑀺 𑀩𑀳𑀺 𑀦 𑀦𑀻𑀳𑀭𑀺𑀢𑀩𑁆𑀩𑁄’’𑀢𑀺 (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁫𑁯; 𑀥. 𑀧. 𑀅𑀝𑁆𑀞. 𑁧.𑁫𑁨 𑀯𑀺𑀲𑀸𑀔𑀸𑀯𑀢𑁆𑀣𑀼) 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑀸 𑀯𑀺𑀲𑀸𑀔𑀸𑀬 𑀤𑀺𑀦𑁆𑀦𑀦𑀬𑁂𑀦𑁂𑀯 𑀤𑀲 𑀑𑀯𑀸𑀤𑁂 𑀤𑀢𑁆𑀯𑀸 ‘‘𑀲𑀘𑁂 𑀫𑁂 𑀕𑀢𑀝𑁆𑀞𑀸𑀦𑁂 𑀥𑀻𑀢𑀼 𑀤𑁄𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀼𑀫𑁆𑀳𑁂𑀳𑀺 𑀲𑁄𑀥𑁂𑀢𑀩𑁆𑀩𑁄’’𑀢𑀺 𑀅𑀝𑁆𑀞 𑀓𑀼𑀝𑀼𑀫𑁆𑀩𑀺𑀓𑁂 𑀧𑀸𑀝𑀺𑀪𑁄𑀕𑁂 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀉𑀬𑁆𑀬𑁄𑀚𑀦𑀤𑀺𑀯𑀲𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀼𑀭𑀺𑀫𑀪𑀯𑁂 𑀥𑀻𑀢𑀭𑀸 𑀓𑀢𑀸𑀦𑀁 𑀲𑀼𑀘𑀭𑀺𑀢𑀸𑀦𑀁 𑀨𑀮𑀯𑀺𑀪𑀽𑀢𑀺𑀁 𑀮𑁄𑀓𑀲𑁆𑀲 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑁂𑀦 𑀥𑀻𑀢𑀭𑀁 𑀉𑀬𑁆𑀬𑁄𑀚𑁂𑀲𑀺. 𑀢𑀲𑁆𑀲𑀸 𑀅𑀦𑀼𑀧𑀼𑀩𑁆𑀩𑁂𑀦 𑀉𑀕𑁆𑀕𑀦𑀕𑀭𑀁 𑀧𑀢𑁆𑀢𑀓𑀸𑀮𑁂 𑀲𑀲𑀼𑀭𑀓𑀼𑀮𑁂𑀦 𑀲𑀤𑁆𑀥𑀺𑀁 𑀫𑀳𑀸𑀚𑀦𑁄 𑀧𑀘𑁆𑀘𑀼𑀕𑁆𑀕𑀫𑀦𑀫𑀓𑀸𑀲𑀺.

𑀲𑀸𑀧𑀺 𑀅𑀢𑁆𑀢𑀦𑁄 𑀲𑀺𑀭𑀺𑀯𑀺𑀪𑀯𑀁 𑀧𑀸𑀓𑀝𑀁 𑀓𑀸𑀢𑀼𑀁 𑀯𑀺𑀲𑀸𑀔𑀸 𑀯𑀺𑀬 𑀲𑀓𑀮𑀦𑀕𑀭𑀲𑁆𑀲 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑀻 𑀭𑀣𑁂 𑀞𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀦𑀸𑀕𑀭𑁂𑀳𑀺 𑀧𑁂𑀲𑀺𑀢𑁂 𑀧𑀡𑁆𑀡𑀸𑀓𑀸𑀭𑁂 𑀕𑀳𑁂𑀢𑁆𑀯𑀸 𑀅𑀦𑀼𑀭𑀽𑀧𑀯𑀲𑁂𑀦 𑀢𑁂𑀲𑀁 𑀢𑁂𑀲𑀁 𑀧𑁂𑀲𑁂𑀦𑁆𑀢𑀻 𑀲𑀓𑀮𑀦𑀕𑀭𑀁 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀏𑀓𑀸𑀩𑀤𑁆𑀥𑀫𑀓𑀸𑀲𑀺. 𑀫𑀗𑁆𑀕𑀮𑀤𑀺𑀯𑀲𑀸𑀤𑀻𑀲𑀼 𑀧𑀦𑀲𑁆𑀲𑀸 𑀲𑀲𑀼𑀭𑁄 𑀅𑀘𑁂𑀮𑀓𑀸𑀦𑀁 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑁄 ‘‘𑀆𑀕𑀦𑁆𑀢𑁆𑀯𑀸 𑀅𑀫𑁆𑀳𑀸𑀓𑀁 𑀲𑀫𑀡𑁂 𑀯𑀦𑁆𑀤𑀢𑀽’’𑀢𑀺 𑀧𑁂𑀲𑁂𑀲𑀺. 𑀲𑀸 𑀮𑀚𑁆𑀚𑀸𑀬 𑀦𑀕𑁆𑀕𑁂 𑀧𑀲𑁆𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀕𑀦𑁆𑀢𑀼𑀁 𑀦 𑀇𑀘𑁆𑀙𑀢𑀺. 𑀲𑁄 𑀧𑀼𑀦𑀧𑁆𑀧𑀼𑀦𑀁 𑀧𑁂𑀲𑁂𑀢𑁆𑀯𑀸𑀧𑀺 𑀢𑀸𑀬 𑀧𑀝𑀺𑀓𑁆𑀔𑀺𑀢𑁆𑀢𑁄 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀦𑀻𑀳𑀭𑀣 𑀦’’𑀦𑁆𑀢𑀺 𑀆𑀳. 𑀲𑀸 ‘‘𑀦 𑀲𑀓𑁆𑀓𑀸 𑀫𑀫 𑀅𑀓𑀸𑀭𑀡𑁂𑀦 𑀤𑁄𑀲𑀁 𑀆𑀭𑁄𑀧𑁂𑀢𑀼’’𑀦𑁆𑀢𑀺 𑀓𑀼𑀝𑀼𑀫𑁆𑀩𑀺𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑁂 𑀢𑀲𑁆𑀲𑀸 𑀦𑀺𑀤𑁆𑀤𑁄𑀲𑀪𑀸𑀯𑀁 𑀜𑀢𑁆𑀯𑀸 𑀲𑁂𑀝𑁆𑀞𑀺𑀁 𑀲𑀜𑁆𑀜𑀸𑀧𑁂𑀲𑀼𑀁. 𑀲𑁄 ‘‘𑀅𑀬𑀁 𑀫𑀫 𑀲𑀫𑀡𑁂 𑀅𑀳𑀺𑀭𑀺𑀓𑀸𑀢𑀺 𑀦 𑀯𑀦𑁆𑀤𑀻’’𑀢𑀺 𑀪𑀭𑀺𑀬𑀸𑀬 𑀆𑀭𑁄𑀘𑁂𑀲𑀺. 𑀲𑀸 ‘‘𑀓𑀻𑀤𑀺𑀲𑀸 𑀦𑀼 𑀔𑁄 𑀇𑀫𑀺𑀲𑁆𑀲𑀸 𑀲𑀫𑀡𑀸, 𑀅𑀢𑀺𑀯𑀺𑀬 𑀢𑁂𑀲𑀁 𑀧𑀲𑀁𑀲𑀢𑀻’’𑀢𑀺 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 𑁋

‘‘𑀓𑀻𑀤𑀺𑀲𑀸 𑀲𑀫𑀡𑀸 𑀢𑀼𑀬𑁆𑀳𑀁, 𑀩𑀸𑀴𑁆𑀳𑀁 𑀔𑁄 𑀦𑁂 𑀧𑀲𑀁𑀲𑀲𑀺;

𑀓𑀺𑀁𑀲𑀻𑀮𑀸 𑀓𑀺𑀁𑀲𑀫𑀸𑀘𑀸𑀭𑀸, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑀸’’𑀢𑀺. (𑀅. 𑀦𑀺. 𑀅𑀝𑁆𑀞. 𑁨.𑁪.𑁨𑁪);

𑀅𑀣𑀲𑁆𑀲𑀸 𑀲𑀼𑀪𑀤𑁆𑀤𑀸 𑀩𑀼𑀤𑁆𑀥𑀸𑀦𑀜𑁆𑀘𑁂𑀯 𑀩𑀼𑀤𑁆𑀥𑀲𑀸𑀯𑀓𑀸𑀦𑀜𑁆𑀘 𑀕𑀼𑀡𑁂 𑀧𑀓𑀸𑀲𑁂𑀦𑁆𑀢𑀻 𑁋

‘‘𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀸 𑀲𑀦𑁆𑀢𑀫𑀸𑀦𑀲𑀸, 𑀲𑀦𑁆𑀢𑀁 𑀢𑁂𑀲𑀁 𑀕𑀢𑀁 𑀞𑀺𑀢𑀁;

𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽 𑀫𑀺𑀢𑀪𑀸𑀡𑀻, 𑀢𑀸𑀤𑀺𑀲𑀸 𑀲𑀫𑀡𑀸 𑀫𑀫. (𑀅. 𑀦𑀺. 𑀅𑀝𑁆𑀞. 𑁨.𑁪.𑁨𑁪);

‘‘𑀓𑀸𑀬𑀓𑀫𑁆𑀫𑀁 𑀲𑀼𑀘𑀺 𑀦𑁂𑀲𑀁, 𑀯𑀸𑀘𑀸𑀓𑀫𑁆𑀫𑀁 𑀅𑀦𑀸𑀯𑀺𑀮𑀁;

𑀫𑀦𑁄𑀓𑀫𑁆𑀫𑀁 𑀲𑀼𑀯𑀺𑀲𑀼𑀤𑁆𑀥𑀁, 𑀢𑀸𑀤𑀺𑀲𑀸 𑀲𑀫𑀡𑀸 𑀫𑀫.

‘‘𑀯𑀺𑀫𑀮𑀸 𑀲𑀗𑁆𑀔𑀫𑀼𑀢𑁆𑀢𑀸𑀪𑀸, 𑀲𑀼𑀤𑁆𑀥𑀸 𑀅𑀦𑁆𑀢𑀭𑀩𑀸𑀳𑀺𑀭𑀸;

𑀧𑀼𑀡𑁆𑀡𑀸 𑀲𑀼𑀤𑁆𑀥𑁂𑀳𑀺 𑀥𑀫𑁆𑀫𑁂𑀳𑀺, 𑀢𑀸𑀤𑀺𑀲𑀸 𑀲𑀫𑀡𑀸 𑀫𑀫.

‘‘𑀮𑀸𑀪𑁂𑀦 𑀉𑀦𑁆𑀦𑀢𑁄 𑀮𑁄𑀓𑁄, 𑀅𑀮𑀸𑀪𑁂𑀦 𑀘 𑀑𑀦𑀢𑁄;

𑀮𑀸𑀪𑀸𑀮𑀸𑀪𑁂𑀦 𑀏𑀓𑀝𑁆𑀞𑀸, 𑀢𑀸𑀤𑀺𑀲𑀸 𑀲𑀫𑀡𑀸 𑀫𑀫.

‘‘𑀬𑀲𑁂𑀦 𑀉𑀦𑁆𑀦𑀢𑁄 𑀮𑁄𑀓𑁄, 𑀅𑀬𑀲𑁂𑀦 𑀘 𑀑𑀦𑀢𑁄;

𑀬𑀲𑀸𑀬𑀲𑁂𑀦 𑀏𑀓𑀝𑁆𑀞𑀸, 𑀢𑀸𑀤𑀺𑀲𑀸 𑀲𑀫𑀡𑀸 𑀫𑀫.

‘‘𑀧𑀲𑀁𑀲𑀸𑀬𑀼𑀦𑁆𑀦𑀢𑁄 𑀮𑁄𑀓𑁄, 𑀦𑀺𑀦𑁆𑀤𑀸𑀬𑀸𑀧𑀺 𑀘 𑀑𑀦𑀢𑁄;

𑀲𑀫𑀸 𑀦𑀺𑀦𑁆𑀤𑀸𑀧𑀲𑀁𑀲𑀸𑀲𑀼, 𑀢𑀸𑀤𑀺𑀲𑀸 𑀲𑀫𑀡𑀸 𑀫𑀫.

‘‘𑀲𑀼𑀔𑁂𑀦 𑀉𑀦𑁆𑀦𑀢𑁄 𑀮𑁄𑀓𑁄, 𑀤𑀼𑀓𑁆𑀔𑁂𑀦𑀸𑀧𑀺 𑀘 𑀑𑀦𑀢𑁄;

𑀅𑀓𑀫𑁆𑀧𑀸 𑀲𑀼𑀔𑀤𑀼𑀓𑁆𑀔𑁂𑀲𑀼, 𑀢𑀸𑀤𑀺𑀲𑀸 𑀲𑀫𑀡𑀸 𑀫𑀫𑀸’’𑀢𑀺. 𑁋

𑀏𑀯𑀫𑀸𑀤𑀻𑀳𑀺 𑀯𑀘𑀦𑁂𑀳𑀺 𑀲𑀲𑁆𑀲𑀼𑀁 𑀢𑁄𑀲𑁂𑀲𑀺.

𑀅𑀣 𑀦𑀁 ‘‘𑀲𑀓𑁆𑀓𑀸 𑀢𑀯 𑀲𑀫𑀡𑁂 𑀅𑀫𑁆𑀳𑀸𑀓𑀫𑁆𑀧𑀺 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀯𑀢𑁆𑀯𑀸 ‘‘𑀲𑀓𑁆𑀓𑀸’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀬𑀣𑀸 𑀫𑀬𑀁 𑀢𑁂 𑀧𑀲𑁆𑀲𑀸𑀫, 𑀢𑀣𑀸 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀲𑀸 ‘‘𑀲𑀸𑀥𑀽’’𑀢𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀉𑀧𑀭𑀺𑀧𑀸𑀲𑀸𑀤𑀢𑀮𑁂 𑀞𑀢𑁆𑀯𑀸 𑀚𑁂𑀢𑀯𑀦𑀸𑀪𑀺𑀫𑀼𑀔𑀻 𑀲𑀓𑁆𑀓𑀘𑁆𑀘𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸 𑀕𑀦𑁆𑀥𑀯𑀸𑀲𑀧𑀼𑀧𑁆𑀨𑀥𑀼𑀫𑁂𑀳𑀺 𑀧𑀽𑀚𑀁 𑀓𑀢𑁆𑀯𑀸, ‘‘𑀪𑀦𑁆𑀢𑁂, 𑀲𑁆𑀯𑀸𑀢𑀦𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀫𑀺, 𑀇𑀫𑀺𑀦𑀸 𑀫𑁂 𑀲𑀜𑁆𑀜𑀸𑀡𑁂𑀦 𑀲𑀢𑁆𑀣𑀸 𑀦𑀺𑀫𑀦𑁆𑀢𑀺𑀢𑀪𑀸𑀯𑀁 𑀚𑀸𑀦𑀸𑀢𑀽’’𑀢𑀺 𑀲𑀼𑀫𑀦𑀧𑀼𑀧𑁆𑀨𑀸𑀦𑀁 𑀅𑀝𑁆𑀞 𑀫𑀼𑀝𑁆𑀞𑀺𑀬𑁄 𑀆𑀓𑀸𑀲𑁂 𑀔𑀺𑀧𑀺. 𑀧𑀼𑀧𑁆𑀨𑀸𑀦𑀺 𑀕𑀦𑁆𑀢𑁆𑀯𑀸 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀲𑀢𑁆𑀣𑀼𑀦𑁄 𑀉𑀧𑀭𑀺 𑀫𑀸𑀮𑀸𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀧𑀺 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑁆𑀯𑀸𑀢𑀦𑀸𑀬 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀲𑀺. 𑀲𑀢𑁆𑀣𑀸 ‘‘𑀅𑀥𑀺𑀯𑀼𑀢𑁆𑀣𑀁 𑀫𑀬𑀸, 𑀕𑀳𑀧𑀢𑀺, 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀬𑀸 𑀧𑀼𑀭𑁂𑀢𑀭𑀁 𑀆𑀕𑀢𑁄 𑀦𑀢𑁆𑀣𑀺, 𑀓𑀲𑁆𑀲 𑀦𑀼 𑀔𑁄 𑀯𑁄 𑀅𑀥𑀺𑀯𑀼𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀘𑀽𑀴𑀲𑀼𑀪𑀤𑁆𑀤𑀸𑀬, 𑀕𑀳𑀧𑀢𑀺, 𑀦𑀺𑀫𑀦𑁆𑀢𑀺𑀢𑁄’’𑀢𑀺 𑀯𑀢𑁆𑀯𑀸 ‘‘𑀦𑀦𑀼, 𑀪𑀦𑁆𑀢𑁂, 𑀘𑀽𑀴𑀲𑀼𑀪𑀤𑁆𑀤𑀸 𑀤𑀽𑀭𑁂 𑀯𑀲𑀢𑀺 𑀇𑀢𑁄 𑀯𑀻𑀲𑀢𑀺𑀬𑁄𑀚𑀦𑀲𑀢𑀫𑀢𑁆𑀣𑀓𑁂’’𑀢𑀺 𑀯𑀼𑀢𑁆𑀢𑁂, ‘‘𑀆𑀫 𑀕𑀳𑀧𑀢𑀺, 𑀤𑀽𑀭𑁂 𑀯𑀲𑀦𑁆𑀢𑀸𑀧𑀺 𑀳𑀺 𑀲𑀧𑁆𑀧𑀼𑀭𑀺𑀲𑀸 𑀅𑀪𑀺𑀫𑀼𑀔𑁂 𑀞𑀺𑀢𑀸 𑀯𑀺𑀬 𑀧𑀓𑀸𑀲𑁂𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁦𑁪. ‘‘𑀤𑀽𑀭𑁂 𑀲𑀦𑁆𑀢𑁄 𑀧𑀓𑀸𑀲𑁂𑀦𑁆𑀢𑀺, 𑀳𑀺𑀫𑀯𑀦𑁆𑀢𑁄𑀯 𑀧𑀩𑁆𑀩𑀢𑁄;

𑀅𑀲𑀦𑁆𑀢𑁂𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺, 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸 𑀬𑀣𑀸 𑀲𑀭𑀸’’𑀢𑀺.

𑀢𑀢𑁆𑀣 𑀲𑀦𑁆𑀢𑁄𑀢𑀺 𑀭𑀸𑀕𑀸𑀤𑀻𑀦𑀁 𑀲𑀦𑁆𑀢𑀢𑀸𑀬 𑀩𑀼𑀤𑁆𑀥𑀸𑀤𑀬𑁄 𑀲𑀦𑁆𑀢𑀸 𑀦𑀸𑀫. 𑀇𑀥 𑀧𑀦 𑀧𑀼𑀩𑁆𑀩𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑀸 𑀉𑀲𑁆𑀲𑀦𑁆𑀦𑀓𑀼𑀲𑀮𑀫𑀽𑀮𑀸 𑀪𑀸𑀯𑀺𑀢𑀪𑀸𑀯𑀦𑀸 𑀲𑀢𑁆𑀢𑀸 𑀲𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀧𑀓𑀸𑀲𑁂𑀦𑁆𑀢𑀻𑀢𑀺 𑀤𑀽𑀭𑁂 𑀞𑀺𑀢𑀸𑀧𑀺 𑀩𑀼𑀤𑁆𑀥𑀸𑀦𑀁 𑀜𑀸𑀡𑀧𑀣𑀁 𑀆𑀕𑀘𑁆𑀙𑀦𑁆𑀢𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀳𑀺𑀫𑀯𑀦𑁆𑀢𑁄 𑀯𑀸𑀢𑀺 𑀬𑀣𑀸 𑀳𑀺 𑀢𑀺𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀢𑁄 𑀧𑀜𑁆𑀘𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁄 𑀘𑀢𑀼𑀭𑀸𑀲𑀻𑀢𑀺𑀬𑀸 𑀓𑀽𑀝𑀲𑀳𑀲𑁆𑀲𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑁄 𑀤𑀽𑀭𑁂 𑀞𑀺𑀢𑀸𑀦𑀫𑁆𑀧𑀺 𑀅𑀪𑀺𑀫𑀼𑀔𑁂 𑀞𑀺𑀢𑁄 𑀯𑀺𑀬 𑀧𑀓𑀸𑀲𑁂𑀢𑀺, 𑀏𑀯𑀁 𑀧𑀓𑀸𑀲𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀲𑀦𑁆𑀢𑁂𑀢𑁆𑀣𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀕𑀭𑀼𑀓𑀸 𑀯𑀺𑀢𑀺𑀡𑁆𑀡𑀧𑀭𑀮𑁄𑀓𑀸 𑀆𑀫𑀺𑀲𑀘𑀓𑁆𑀔𑀼𑀓𑀸 𑀚𑀻𑀯𑀺𑀓𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑀸 𑀩𑀸𑀮𑀧𑀼𑀕𑁆𑀕𑀮𑀸 𑀅𑀲𑀦𑁆𑀢𑁄 𑀦𑀸𑀫, 𑀢𑁂 𑀏𑀢𑁆𑀣 𑀩𑀼𑀤𑁆𑀥𑀸𑀦𑀁 𑀤𑀓𑁆𑀔𑀺𑀡𑀲𑁆𑀲 𑀚𑀸𑀡𑀼𑀫𑀡𑁆𑀟𑀮𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑀸𑀧𑀺 𑀦 𑀤𑀺𑀲𑁆𑀲𑀦𑁆𑀢𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺. 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸𑀢𑀺 𑀭𑀢𑁆𑀢𑀺𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀅𑀦𑁆𑀥𑀓𑀸𑀭𑁂 𑀔𑀺𑀢𑁆𑀢𑀲𑀭𑀸 𑀯𑀺𑀬 𑀢𑀣𑀸𑀭𑀽𑀧𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀽𑀢𑀲𑁆𑀲 𑀧𑀼𑀩𑁆𑀩𑀳𑁂𑀢𑀼𑀦𑁄 𑀅𑀪𑀸𑀯𑁂𑀦 𑀦 𑀧𑀜𑁆𑀜𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘‘𑀲𑀢𑁆𑀣𑀸𑀭𑀸 𑀲𑀼𑀪𑀤𑁆𑀤𑀸𑀬 𑀦𑀺𑀫𑀦𑁆𑀢𑀦𑀁 𑀅𑀥𑀺𑀯𑀸𑀲𑀺𑀢’’𑀦𑁆𑀢𑀺 𑀜𑀢𑁆𑀯𑀸 𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑀁 𑀆𑀡𑀸𑀧𑁂𑀲𑀺 𑁋 ‘‘𑀧𑀜𑁆𑀘 𑀓𑀽𑀝𑀸𑀕𑀸𑀭𑀲𑀢𑀸𑀦𑀺 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀲𑁆𑀯𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀉𑀕𑁆𑀕𑀦𑀕𑀭𑀁 𑀦𑁂𑀳𑀻’’𑀢𑀺. 𑀲𑁄 𑀧𑀼𑀦𑀤𑀺𑀯𑀲𑁂 𑀧𑀜𑁆𑀘𑀲𑀢𑀸𑀦𑀺 𑀓𑀽𑀝𑀸𑀕𑀸𑀭𑀸𑀦𑀺 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀚𑁂𑀢𑀯𑀦𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀉𑀘𑁆𑀘𑀺𑀦𑀺𑀢𑁆𑀯𑀸 𑀯𑀺𑀲𑀼𑀤𑁆𑀥𑀔𑀻𑀡𑀸𑀲𑀯𑀸𑀦𑀁𑀬𑁂𑀯 𑀧𑀜𑁆𑀘𑀲𑀢𑀸𑀦𑀺 𑀆𑀤𑀸𑀬 𑀲𑀧𑀭𑀺𑀯𑀸𑀭𑁄 𑀓𑀽𑀝𑀸𑀕𑀸𑀭𑁂𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀉𑀕𑁆𑀕𑀦𑀕𑀭𑀁 𑀅𑀕𑀫𑀸𑀲𑀺. 𑀉𑀕𑁆𑀕𑀲𑁂𑀝𑁆𑀞𑀺𑀧𑀺 𑀲𑀧𑀭𑀺𑀯𑀸𑀭𑁄 𑀲𑀼𑀪𑀤𑁆𑀤𑀸𑀬 𑀤𑀺𑀦𑁆𑀦𑀦𑀬𑁂𑀦𑁂𑀯 𑀢𑀣𑀸𑀕𑀢𑀲𑁆𑀲 𑀆𑀕𑀢𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀲𑀢𑁆𑀣𑀸𑀭𑀁 𑀫𑀳𑀦𑁆𑀢𑁂𑀦 𑀲𑀺𑀭𑀺𑀯𑀺𑀪𑀯𑁂𑀦 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀫𑀸𑀮𑀸𑀤𑀻𑀳𑀺 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑁄 𑀲𑀧𑀭𑀺𑀯𑀸𑀭𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀲𑀢𑁆𑀣𑀸𑀧𑀺𑀲𑁆𑀲 𑀲𑀧𑁆𑀧𑀸𑀬𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀲𑀢𑁆𑀣𑀸 ‘‘𑀘𑀽𑀴𑀲𑀼𑀪𑀤𑁆𑀤𑀸𑀬 𑀅𑀦𑀼𑀕𑁆𑀕𑀳𑀡𑀢𑁆𑀣𑀁 𑀢𑁆𑀯𑀁 𑀇𑀥𑁂𑀯 𑀳𑁄𑀳𑀻’’𑀢𑀺 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀁 𑀦𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀫𑁂𑀯 𑀅𑀕𑀫𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀦𑀕𑀭𑀁 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀁 𑀅𑀳𑁄𑀲𑀻𑀢𑀺.

𑀘𑀽𑀴𑀲𑀼𑀪𑀤𑁆𑀤𑀸𑀯𑀢𑁆𑀣𑀼 𑀅𑀝𑁆𑀞𑀫𑀁.

𑁯. 𑀏𑀓𑀯𑀺𑀳𑀸𑀭𑀺𑀢𑁆𑀣𑁂𑀭𑀯𑀢𑁆𑀣𑀼

𑀏𑀓𑀸𑀲𑀦𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀯𑀺𑀳𑀸𑀭𑀺𑀢𑁆𑀣𑁂𑀭𑀁 𑀦𑀸𑀫 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀣𑁂𑀭𑁄 𑀏𑀓𑀓𑁄𑀯 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑀓𑁄𑀯 𑀦𑀺𑀲𑀻𑀤𑀢𑀺, 𑀏𑀓𑀓𑁄𑀯 𑀘𑀗𑁆𑀓𑀫𑀢𑀺, 𑀏𑀓𑀓𑁄𑀯 𑀢𑀺𑀝𑁆𑀞𑀢𑀻𑀢𑀺 𑀘𑀢𑀼𑀧𑀭𑀺𑀲𑀦𑁆𑀢𑀭𑁂 𑀧𑀸𑀓𑀝𑁄 𑀅𑀳𑁄𑀲𑀺. 𑀅𑀣 𑀦𑀁 𑀪𑀺𑀓𑁆𑀔𑀽, ‘‘𑀪𑀦𑁆𑀢𑁂, 𑀏𑀯𑀭𑀽𑀧𑁄 𑀦𑀸𑀫𑀸𑀬𑀁 𑀣𑁂𑀭𑁄’’𑀢𑀺 𑀢𑀣𑀸𑀕𑀢𑀲𑁆𑀲𑀸𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀢𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 ‘‘𑀪𑀺𑀓𑁆𑀔𑀼𑀦𑀸 𑀦𑀸𑀫 𑀧𑀯𑀺𑀯𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀺𑀯𑁂𑀓𑁂 𑀆𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁩𑁦𑁫. ‘‘𑀏𑀓𑀸𑀲𑀦𑀁 𑀏𑀓𑀲𑁂𑀬𑁆𑀬𑀁, 𑀏𑀓𑁄 𑀘𑀭𑀫𑀢𑀦𑁆𑀤𑀺𑀢𑁄;

𑀏𑀓𑁄 𑀤𑀫𑀬𑀫𑀢𑁆𑀢𑀸𑀦𑀁, 𑀯𑀦𑀦𑁆𑀢𑁂 𑀭𑀫𑀺𑀢𑁄 𑀲𑀺𑀬𑀸’’𑀢𑀺.

𑀢𑀢𑁆𑀣 𑀏𑀓𑀸𑀲𑀦𑀁 𑀏𑀓𑀲𑁂𑀬𑁆𑀬𑀦𑁆𑀢𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀫𑀚𑁆𑀛𑁂𑀧𑀺 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀚𑀳𑀺𑀢𑁆𑀯𑀸 𑀢𑁂𑀦𑁂𑀯 𑀫𑀦𑀲𑀺𑀓𑀸𑀭𑁂𑀦 𑀦𑀺𑀲𑀺𑀦𑁆𑀦𑀲𑁆𑀲 𑀆𑀲𑀦𑀁 𑀏𑀓𑀸𑀲𑀦𑀁 𑀦𑀸𑀫. 𑀮𑁄𑀳𑀧𑀸𑀲𑀸𑀤𑀲𑀤𑀺𑀲𑁂𑀧𑀺 𑀘 𑀧𑀸𑀲𑀸𑀤𑁂 𑀪𑀺𑀓𑁆𑀔𑀼𑀲𑀳𑀲𑁆𑀲𑀫𑀚𑁆𑀛𑁂𑀧𑀺 𑀧𑀜𑁆𑀜𑀢𑁆𑀢𑁂 𑀯𑀺𑀘𑀺𑀢𑁆𑀭𑀧𑀘𑁆𑀘𑀢𑁆𑀣𑀭𑀡𑀽𑀧𑀥𑀸𑀦𑁂 𑀫𑀳𑀸𑀭𑀳𑁂 𑀲𑀬𑀦𑁂 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁂𑀦 𑀦𑀺𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀬𑁆𑀬𑀸 𑀏𑀓𑀲𑁂𑀬𑁆𑀬𑀸 𑀦𑀸𑀫. 𑀏𑀯𑀭𑀽𑀧𑀁 𑀏𑀓𑀸𑀲𑀦𑀜𑁆𑀘 𑀏𑀓𑀲𑁂𑀬𑁆𑀬𑀜𑁆𑀘 𑀪𑀚𑁂𑀣𑀸𑀢𑀺 𑀅𑀢𑁆𑀣𑁄. 𑀅𑀢𑀦𑁆𑀤𑀺𑀢𑁄𑀢𑀺 𑀚𑀗𑁆𑀖𑀩𑀮𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀓𑀧𑁆𑀧𑀦𑁂𑀦 𑀅𑀓𑀼𑀲𑀻𑀢𑁄 𑀳𑀼𑀢𑁆𑀯𑀸 𑀲𑀩𑁆𑀩𑀻𑀭𑀺𑀬𑀸𑀧𑀣𑁂𑀲𑀼 𑀏𑀓𑀓𑁄𑀯 𑀘𑀭𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀏𑀓𑁄 𑀤𑀫𑀬𑀦𑁆𑀢𑀺 𑀭𑀢𑁆𑀢𑀺𑀝𑁆𑀞𑀸𑀦𑀸𑀤𑀻𑀲𑀼 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀫𑀕𑁆𑀕𑀨𑀮𑀸𑀥𑀺𑀕𑀫𑀯𑀲𑁂𑀦 𑀏𑀓𑁄𑀯 𑀳𑀼𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀫𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀦𑀦𑁆𑀢𑁂 𑀭𑀫𑀺𑀢𑁄 𑀲𑀺𑀬𑀸𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀤𑀫𑁂𑀦𑁆𑀢𑁄 𑀇𑀢𑁆𑀣𑀺𑀧𑀼𑀭𑀺𑀲𑀲𑀤𑁆𑀤𑀸𑀤𑀻𑀳𑀺 𑀧𑀯𑀺𑀯𑀺𑀢𑁆𑀢𑁂 𑀯𑀦𑀦𑁆𑀢𑁂𑀬𑁂𑀯 𑀅𑀪𑀺𑀭𑀫𑀺𑀢𑁄 𑀪𑀯𑁂𑀬𑁆𑀬. 𑀦 𑀳𑀺 𑀲𑀓𑁆𑀓𑀸 𑀆𑀓𑀺𑀡𑁆𑀡𑀯𑀺𑀳𑀸𑀭𑀺𑀦𑀸 𑀏𑀯𑀁 𑀅𑀢𑁆𑀢𑀸𑀦𑀁 𑀤𑀫𑁂𑀢𑀼𑀦𑁆𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀫𑀳𑀸𑀚𑀦𑁄 𑀏𑀓𑀯𑀺𑀳𑀸𑀭𑀺𑀓𑀫𑁂𑀯 𑀧𑀢𑁆𑀣𑁂𑀲𑀻𑀢𑀺.

𑀏𑀓𑀯𑀺𑀳𑀸𑀭𑀺𑀢𑁆𑀣𑁂𑀭𑀯𑀢𑁆𑀣𑀼 𑀦𑀯𑀫𑀁.

𑀧𑀓𑀺𑀡𑁆𑀡𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀯𑀻𑀲𑀢𑀺𑀫𑁄 𑀯𑀕𑁆𑀕𑁄.