𑁧𑁨. 𑀲𑀼𑀪𑀤𑁆𑀤𑀧𑀭𑀺𑀩𑁆𑀩𑀸𑀚𑀓𑀯𑀢𑁆𑀣𑀼

𑀆𑀓𑀸𑀲𑁂𑀢𑀺 𑀇𑀤𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀓𑀼𑀲𑀺𑀦𑀸𑀭𑀸𑀬𑀁 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑀓𑁂 𑀦𑀺𑀧𑀦𑁆𑀦𑁄 𑀲𑀼𑀪𑀤𑁆𑀤𑀁 𑀧𑀭𑀺𑀩𑁆𑀩𑀸𑀚𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀅𑀢𑀻𑀢𑁂 𑀓𑀦𑀺𑀝𑁆𑀞𑀪𑀸𑀢𑀭𑀺 𑀏𑀓𑀲𑁆𑀫𑀺𑀁 𑀲𑀲𑁆𑀲𑁂 𑀦𑀯𑀓𑁆𑀔𑀢𑁆𑀢𑀼𑀁 𑀅𑀕𑁆𑀕𑀤𑀸𑀦𑀁 𑀤𑁂𑀦𑁆𑀢𑁂 𑀤𑀸𑀦𑀁 𑀤𑀸𑀢𑀼𑀁 𑀅𑀦𑀺𑀘𑁆𑀙𑀦𑁆𑀢𑁄 𑀑𑀲𑀓𑁆𑀓𑀺𑀢𑁆𑀯𑀸 𑀅𑀯𑀲𑀸𑀦𑁂 𑀅𑀤𑀸𑀲𑀺. 𑀢𑀲𑁆𑀫𑀸 𑀧𑀞𑀫𑀩𑁄𑀥𑀺𑀬𑀫𑁆𑀧𑀺 𑀫𑀚𑁆𑀛𑀺𑀫𑀩𑁄𑀥𑀺𑀬𑀫𑁆𑀧𑀺 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀁 𑀦𑀸𑀮𑀢𑁆𑀣. 𑀧𑀘𑁆𑀙𑀺𑀫𑀩𑁄𑀥𑀺𑀬𑀁 𑀧𑀦 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 ‘‘𑀅𑀳𑀁 𑀢𑀻𑀲𑀼 𑀧𑀜𑁆𑀳𑁂𑀲𑀼 𑀅𑀢𑁆𑀢𑀦𑁄 𑀓𑀗𑁆𑀔𑀁 𑀫𑀳𑀮𑁆𑀮𑀓𑁂 𑀧𑀭𑀺𑀩𑁆𑀩𑀸𑀚𑀓𑁂 𑀧𑀼𑀘𑁆𑀙𑀺𑀢𑁆𑀯𑀸 𑀲𑀫𑀡𑀁 𑀕𑁄𑀢𑀫𑀁 ‘𑀤𑀳𑀭𑁄’𑀢𑀺 𑀲𑀜𑁆𑀜𑀸𑀬 𑀦 𑀧𑀼𑀘𑁆𑀙𑀺𑀁, 𑀢𑀲𑁆𑀲 𑀘 𑀤𑀸𑀦𑀺 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄, 𑀧𑀘𑁆𑀙𑀸 𑀫𑁂 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀧𑀼𑀘𑁆𑀙𑀺𑀢𑀓𑀸𑀭𑀡𑀸 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀦𑀺𑀯𑀸𑀭𑀺𑀬𑀫𑀸𑀦𑁄𑀧𑀺 𑀲𑀢𑁆𑀣𑀸𑀭𑀸 𑀑𑀓𑀸𑀲𑀁 𑀓𑀢𑁆𑀯𑀸, ‘‘𑀆𑀦𑀦𑁆𑀤, 𑀫𑀸 𑀲𑀼𑀪𑀤𑁆𑀤𑀁 𑀦𑀺𑀯𑀸𑀭𑀬𑀺, 𑀧𑀼𑀘𑁆𑀙𑀢𑀼 𑀫𑀁 𑀧𑀜𑁆𑀳’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀦𑁆𑀢𑁄𑀲𑀸𑀡𑀺𑀁 𑀧𑀯𑀺𑀲𑀺𑀢𑁆𑀯𑀸 𑀳𑁂𑀝𑁆𑀞𑀸𑀫𑀜𑁆𑀘𑀓𑁂 𑀦𑀺𑀲𑀺𑀦𑁆𑀦𑁄, ‘‘𑀪𑁄 𑀲𑀫𑀡, 𑀓𑀺𑀁 𑀦𑀼 𑀔𑁄 𑀆𑀓𑀸𑀲𑁂 𑀧𑀤𑀁 𑀦𑀸𑀫 𑀅𑀢𑁆𑀣𑀺, 𑀇𑀢𑁄 𑀩𑀳𑀺𑀤𑁆𑀥𑀸 𑀲𑀫𑀡𑁄 𑀦𑀸𑀫 𑀅𑀢𑁆𑀣𑀺, 𑀲𑀗𑁆𑀔𑀸𑀭𑀸 𑀲𑀲𑁆𑀲𑀢𑀸 𑀦𑀸𑀫 𑀅𑀢𑁆𑀣𑀻’’𑀢𑀺 𑀇𑀫𑁂 𑀧𑀜𑁆𑀳𑁂 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀢𑁂𑀲𑀁 𑀅𑀪𑀸𑀯𑀁 𑀆𑀘𑀺𑀓𑁆𑀔𑀦𑁆𑀢𑁄 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀲𑀺 𑁋

𑁨𑁫𑁪. ‘‘𑀆𑀓𑀸𑀲𑁂𑀯 𑀧𑀤𑀁 𑀦𑀢𑁆𑀣𑀺, 𑀲𑀫𑀡𑁄 𑀦𑀢𑁆𑀣𑀺 𑀩𑀸𑀳𑀺𑀭𑁂;

𑀧𑀧𑀜𑁆𑀘𑀸𑀪𑀺𑀭𑀢𑀸 𑀧𑀚𑀸, 𑀦𑀺𑀧𑁆𑀧𑀧𑀜𑁆𑀘𑀸 𑀢𑀣𑀸𑀕𑀢𑀸.

𑁨𑁫𑁫. ‘‘𑀆𑀓𑀸𑀲𑁂𑀯 𑀧𑀤𑀁 𑀦𑀢𑁆𑀣𑀺, 𑀲𑀫𑀡𑁄 𑀦𑀢𑁆𑀣𑀺 𑀩𑀸𑀳𑀺𑀭𑁂;

𑀲𑀗𑁆𑀔𑀸𑀭𑀸 𑀲𑀲𑁆𑀲𑀢𑀸 𑀦𑀢𑁆𑀣𑀺, 𑀦𑀢𑁆𑀣𑀺 𑀩𑀼𑀤𑁆𑀥𑀸𑀦𑀫𑀺𑀜𑁆𑀚𑀺𑀢’’𑀦𑁆𑀢𑀺.

𑀢𑀢𑁆𑀣 𑀧𑀤𑀦𑁆𑀢𑀺 𑀇𑀫𑀲𑁆𑀫𑀺𑀁 𑀆𑀓𑀸𑀲𑁂 𑀯𑀡𑁆𑀡𑀲𑀡𑁆𑀞𑀸𑀦𑀯𑀲𑁂𑀦 𑀏𑀯𑀭𑀽𑀧𑀦𑁆𑀢𑀺 𑀧𑀜𑁆𑀜𑀸𑀧𑁂𑀢𑀩𑁆𑀩𑀁 𑀓𑀲𑁆𑀲𑀘𑀺 𑀧𑀤𑀁 𑀦𑀸𑀫 𑀦𑀢𑁆𑀣𑀺. 𑀩𑀸𑀳𑀺𑀭𑁂𑀢𑀺 𑀫𑀫 𑀲𑀸𑀲𑀦𑀢𑁄 𑀩𑀳𑀺𑀤𑁆𑀥𑀸 𑀫𑀕𑁆𑀕𑀨𑀮𑀝𑁆𑀞𑁄 𑀲𑀫𑀡𑁄 𑀦𑀸𑀫 𑀦𑀢𑁆𑀣𑀺. 𑀧𑀚𑀸𑀢𑀺 𑀅𑀬𑀁 𑀲𑀢𑁆𑀢𑀮𑁄𑀓𑀲𑀗𑁆𑀔𑀸𑀢𑀸 𑀧𑀚𑀸 𑀢𑀡𑁆𑀳𑀸𑀤𑀻𑀲𑀼 𑀧𑀧𑀜𑁆𑀘𑁂𑀲𑀼𑀬𑁂𑀯𑀸𑀪𑀺𑀭𑀢𑀸. 𑀦𑀺𑀧𑁆𑀧𑀧𑀜𑁆𑀘𑀸𑀢𑀺 𑀩𑁄𑀥𑀺𑀫𑀽𑀮𑁂𑀬𑁂𑀯 𑀲𑀩𑁆𑀩𑀧𑀧𑀜𑁆𑀘𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀦𑀺𑀧𑁆𑀧𑀧𑀜𑁆𑀘𑀸 𑀢𑀣𑀸𑀕𑀢𑀸. 𑀲𑀗𑁆𑀔𑀸𑀭𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀢𑁂𑀲𑀼 𑀳𑀺 𑀏𑀓𑁄𑀧𑀺 𑀲𑀲𑁆𑀲𑀢𑁄 𑀦𑀸𑀫 𑀦𑀢𑁆𑀣𑀺. 𑀇𑀜𑁆𑀚𑀺𑀢𑀦𑁆𑀢𑀺 𑀩𑀼𑀤𑁆𑀥𑀸𑀦𑀁 𑀧𑀦 𑀢𑀡𑁆𑀳𑀸𑀫𑀸𑀦𑀸𑀤𑀻𑀲𑀼 𑀇𑀜𑁆𑀚𑀺𑀢𑁂𑀲𑀼 𑀬𑁂𑀦 𑀲𑀗𑁆𑀔𑀸𑀭𑀸 𑀲𑀲𑁆𑀲𑀢𑀸𑀢𑀺 𑀕𑀡𑁆𑀳𑁂𑀬𑁆𑀬, 𑀢𑀁 𑀏𑀓𑀁 𑀇𑀜𑁆𑀚𑀺𑀢𑀫𑁆𑀧𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀲𑀼𑀪𑀤𑁆𑀤𑁄 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀲𑀼𑀪𑀤𑁆𑀤𑀧𑀭𑀺𑀩𑁆𑀩𑀸𑀚𑀓𑀯𑀢𑁆𑀣𑀼 𑀤𑁆𑀯𑀸𑀤𑀲𑀫𑀁.

𑀫𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀸𑀭𑀲𑀫𑁄 𑀯𑀕𑁆𑀕𑁄.