𑁧𑁮. 𑀫𑀮𑀯𑀕𑁆𑀕𑁄

𑁧. 𑀕𑁄𑀖𑀸𑀢𑀓𑀧𑀼𑀢𑁆𑀢𑀯𑀢𑁆𑀣𑀼

𑀧𑀡𑁆𑀟𑀼𑀧𑀮𑀸𑀲𑁄𑀯 𑀤𑀸𑀦𑀺𑀲𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀕𑁄𑀖𑀸𑀢𑀓𑀧𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑁄 𑀕𑁄𑀖𑀸𑀢𑀓𑁄 𑀕𑀸𑀯𑁄 𑀯𑀥𑀺𑀢𑁆𑀯𑀸 𑀯𑀭𑀫𑀁𑀲𑀸𑀦𑀺 𑀕𑀳𑁂𑀢𑁆𑀯𑀸 𑀧𑀘𑀸𑀧𑁂𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑁂𑀳𑀺 𑀲𑀤𑁆𑀥𑀺𑀁 𑀦𑀺𑀲𑀻𑀤𑀺𑀢𑁆𑀯𑀸 𑀫𑀁𑀲𑀜𑁆𑀘 𑀔𑀸𑀤𑀢𑀺, 𑀫𑀽𑀮𑁂𑀦 𑀘 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀲𑁄 𑀏𑀯𑀁 𑀧𑀜𑁆𑀘𑀧𑀡𑁆𑀡𑀸𑀲 𑀯𑀲𑁆𑀲𑀸𑀦𑀺 𑀕𑁄𑀖𑀸𑀢𑀓𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀥𑀼𑀭𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑀲𑁆𑀲 𑀲𑀢𑁆𑀣𑀼 𑀏𑀓𑀤𑀺𑀯𑀲𑀫𑁆𑀧𑀺 𑀓𑀝𑀘𑁆𑀙𑀼𑀫𑀢𑁆𑀢𑀫𑁆𑀧𑀺 𑀬𑀸𑀕𑀼𑀁 𑀯𑀸 𑀪𑀢𑁆𑀢𑀁 𑀯𑀸 𑀦 𑀅𑀤𑀸𑀲𑀺. 𑀲𑁄 𑀘 𑀯𑀺𑀦𑀸 𑀫𑀁𑀲𑁂𑀦 𑀪𑀢𑁆𑀢𑀁 𑀦 𑀪𑀼𑀜𑁆𑀚𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀤𑀺𑀯𑀲𑀪𑀸𑀕𑁂 𑀫𑀁𑀲𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀘𑀺𑀢𑀼𑀁 𑀏𑀓𑀁 𑀫𑀁𑀲𑀔𑀡𑁆𑀟𑀁 𑀪𑀭𑀺𑀬𑀸𑀬 𑀤𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀲𑀳𑀸𑀬𑀓𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀭𑀺𑀬𑀁 𑀆𑀳 𑁋 ‘‘𑀣𑁄𑀓𑀁 𑀫𑁂 𑀯𑀺𑀓𑁆𑀓𑀺𑀡𑀺𑀬𑀫𑀁𑀲𑀁 𑀤𑁂𑀳𑀺, 𑀕𑁂𑀳𑀁 𑀫𑁂 𑀧𑀸𑀳𑀼𑀦𑀓𑁄 𑀆𑀕𑀢𑁄’’𑀢𑀺. 𑀦𑀢𑁆𑀣𑀺 𑀯𑀺𑀓𑁆𑀓𑀺𑀡𑀺𑀬𑀫𑀁𑀲𑀁, 𑀲𑀳𑀸𑀬𑀓𑁄 𑀢𑁂 𑀫𑀁𑀲𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀇𑀤𑀸𑀦𑀺 𑀦𑁆𑀳𑀸𑀬𑀺𑀢𑀼𑀁 𑀕𑀢𑁄𑀢𑀺. 𑀫𑀸 𑀏𑀯𑀁 𑀓𑀭𑀺, 𑀲𑀘𑁂 𑀫𑀁𑀲𑀔𑀡𑁆𑀟𑀁 𑀅𑀢𑁆𑀣𑀺, 𑀤𑁂𑀳𑀻𑀢𑀺. 𑀲𑀳𑀸𑀬𑀓𑀲𑁆𑀲 𑀢𑁂 𑀦𑀺𑀓𑁆𑀔𑀺𑀢𑁆𑀢𑀫𑀁𑀲𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀦𑀢𑁆𑀣𑀻𑀢𑀺. 𑀲𑁄 ‘‘𑀲𑀳𑀸𑀬𑀓𑀲𑁆𑀲 𑀫𑁂 𑀅𑀢𑁆𑀣𑀸𑀬 𑀞𑀧𑀺𑀢𑀫𑀁𑀲𑀢𑁄 𑀅𑀜𑁆𑀜𑀁 𑀫𑀁𑀲𑀁 𑀦𑀢𑁆𑀣𑀺, 𑀲𑁄 𑀘 𑀯𑀺𑀦𑀸 𑀫𑀁𑀲𑁂𑀦 𑀦 𑀪𑀼𑀜𑁆𑀚𑀢𑀺, 𑀦𑀸𑀬𑀁 𑀤𑀲𑁆𑀲𑀢𑀻’’𑀢𑀺 𑀲𑀸𑀫𑀁𑀬𑁂𑀯 𑀢𑀁 𑀫𑀁𑀲𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀕𑁄𑀖𑀸𑀢𑀓𑁄𑀧𑀺 𑀦𑁆𑀳𑀢𑁆𑀯𑀸 𑀆𑀕𑀢𑁄 𑀢𑀸𑀬 𑀅𑀢𑁆𑀢𑀦𑁄 𑀧𑀓𑁆𑀓𑀧𑀡𑁆𑀡𑁂𑀦 𑀲𑀤𑁆𑀥𑀺𑀁 𑀯𑀟𑁆𑀠𑁂𑀢𑁆𑀯𑀸 𑀪𑀢𑁆𑀢𑁂 𑀉𑀧𑀦𑀻𑀢𑁂 𑀆𑀳 ‘‘𑀓𑀳𑀁 𑀫𑀁𑀲’’𑀦𑁆𑀢𑀺? ‘‘𑀦𑀢𑁆𑀣𑀺, 𑀲𑀸𑀫𑀻’’𑀢𑀺. 𑀦𑀦𑀼 𑀅𑀳𑀁 𑀧𑀘𑁆𑀘𑀦𑀢𑁆𑀣𑀸𑀬 𑀫𑀁𑀲𑀁 𑀤𑀢𑁆𑀯𑀸 𑀕𑀢𑁄𑀢𑀺. 𑀢𑀯 𑀲𑀳𑀸𑀬𑀓𑁄 𑀆𑀕𑀦𑁆𑀢𑁆𑀯𑀸 ‘‘𑀧𑀸𑀳𑀼𑀦𑀓𑁄 𑀫𑁂 𑀆𑀕𑀢𑁄, 𑀯𑀺𑀓𑁆𑀓𑀺𑀡𑀺𑀬𑀫𑀁𑀲𑀁 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀫𑀬𑀸 ‘‘𑀲𑀳𑀸𑀬𑀓𑀲𑁆𑀲 𑀢𑁂 𑀞𑀧𑀺𑀢𑀫𑀁𑀲𑀢𑁄 𑀅𑀜𑁆𑀜𑀁 𑀫𑀁𑀲𑀁 𑀦𑀢𑁆𑀣𑀺, 𑀲𑁄 𑀘 𑀯𑀺𑀦𑀸 𑀫𑀁𑀲𑁂𑀦 𑀦 𑀪𑀼𑀜𑁆𑀚𑀢𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀩𑀮𑀓𑁆𑀓𑀸𑀭𑁂𑀦 𑀢𑀁 𑀫𑀁𑀲𑀁 𑀲𑀸𑀫𑀁𑀬𑁂𑀯 𑀕𑀳𑁂𑀢𑁆𑀯𑀸 𑀕𑀢𑁄𑀢𑀺. 𑀅𑀳𑀁 𑀯𑀺𑀦𑀸 𑀫𑀁𑀲𑁂𑀦 𑀪𑀢𑁆𑀢𑀁 𑀦 𑀪𑀼𑀜𑁆𑀚𑀸𑀫𑀺, 𑀳𑀭𑀸𑀳𑀺 𑀦𑀦𑁆𑀢𑀺. 𑀓𑀺𑀁 𑀲𑀓𑁆𑀓𑀸 𑀓𑀸𑀢𑀼𑀁, 𑀪𑀼𑀜𑁆𑀚, 𑀲𑀸𑀫𑀻𑀢𑀺. 𑀲𑁄 ‘‘𑀦𑀸𑀳𑀁 𑀪𑀼𑀜𑁆𑀚𑀸𑀫𑀻’’𑀢𑀺 𑀢𑀁 𑀪𑀢𑁆𑀢𑀁 𑀳𑀭𑀸𑀧𑁂𑀢𑁆𑀯𑀸 𑀲𑀢𑁆𑀣𑀁 𑀆𑀤𑀸𑀬 𑀧𑀘𑁆𑀙𑀸𑀕𑁂𑀳𑁂 𑀞𑀺𑀢𑁄 𑀕𑁄𑀡𑁄 𑀅𑀢𑁆𑀣𑀺, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀫𑀼𑀔𑁂 𑀳𑀢𑁆𑀣𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀚𑀺𑀯𑁆𑀳𑀁 𑀦𑀻𑀳𑀭𑀺𑀢𑁆𑀯𑀸 𑀲𑀢𑁆𑀣𑁂𑀦 𑀫𑀽𑀮𑁂 𑀙𑀺𑀦𑁆𑀤𑀺𑀢𑁆𑀯𑀸 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀅𑀗𑁆𑀕𑀸𑀭𑁂𑀲𑀼 𑀧𑀘𑀸𑀧𑁂𑀢𑁆𑀯𑀸 𑀪𑀢𑁆𑀢𑀫𑀢𑁆𑀣𑀓𑁂 𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀏𑀓𑀁 𑀪𑀢𑁆𑀢𑀧𑀺𑀡𑁆𑀟𑀁 𑀪𑀼𑀜𑁆𑀚𑀺𑀢𑁆𑀯𑀸 𑀏𑀓𑀁 𑀫𑀁𑀲𑀔𑀡𑁆𑀟𑀁 𑀫𑀼𑀔𑁂 𑀞𑀧𑁂𑀲𑀺. 𑀢𑀗𑁆𑀔𑀡𑀜𑁆𑀜𑁂𑀯𑀲𑁆𑀲 𑀚𑀺𑀯𑁆𑀳𑀸 𑀙𑀺𑀚𑁆𑀚𑀺𑀢𑁆𑀯𑀸 𑀪𑀢𑁆𑀢𑀧𑀸𑀢𑀺𑀬𑀁 𑀧𑀢𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀯𑀺𑀧𑀸𑀓𑀁 𑀮𑀪𑀺. 𑀲𑁄𑀧𑀺 𑀔𑁄 𑀕𑁄𑀡𑁄 𑀯𑀺𑀬 𑀮𑁄𑀳𑀺𑀢𑀥𑀸𑀭𑀸𑀬 𑀫𑀼𑀔𑀢𑁄 𑀧𑀕𑁆𑀖𑀭𑀦𑁆𑀢𑀺𑀬𑀸 𑀅𑀦𑁆𑀢𑁄𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀚𑀡𑁆𑀡𑀼𑀓𑁂𑀳𑀺 𑀯𑀺𑀘𑀭𑀦𑁆𑀢𑁄 𑀯𑀺𑀭𑀯𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀕𑁄𑀖𑀸𑀢𑀓𑀲𑁆𑀲 𑀧𑀼𑀢𑁆𑀢𑁄 𑀧𑀺𑀢𑀭𑀁 𑀑𑀮𑁄𑀓𑁂𑀦𑁆𑀢𑁄 𑀲𑀫𑀻𑀧𑁂 𑀞𑀺𑀢𑁄 𑀳𑁄𑀢𑀺. 𑀅𑀣 𑀦𑀁 𑀫𑀸𑀢𑀸 𑀆𑀳 𑁋 ‘‘𑀧𑀲𑁆𑀲, 𑀧𑀼𑀢𑁆𑀢, 𑀇𑀫𑀁 𑀕𑁄𑀖𑀸𑀢𑀓𑀁 𑀕𑁄𑀡𑀁 𑀯𑀺𑀬 𑀕𑁂𑀳𑀫𑀚𑁆𑀛𑁂 𑀚𑀡𑁆𑀡𑀼𑀓𑁂𑀳𑀺 𑀯𑀺𑀘𑀭𑀺𑀢𑁆𑀯𑀸 𑀯𑀺𑀭𑀯𑀦𑁆𑀢𑀁, 𑀇𑀤𑀁 𑀤𑀼𑀓𑁆𑀔𑀁 𑀢𑀯 𑀫𑀢𑁆𑀣𑀓𑁂 𑀧𑀢𑀺𑀲𑁆𑀲𑀢𑀺, 𑀫𑀫𑀫𑁆𑀧𑀺 𑀅𑀦𑁄𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑁄𑀢𑁆𑀣𑀺𑀁 𑀓𑀭𑁄𑀦𑁆𑀢𑁄 𑀧𑀮𑀸𑀬𑀲𑁆𑀲𑀽’’𑀢𑀺. 𑀲𑁄 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀫𑀸𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀺, 𑀧𑀮𑀸𑀬𑀺𑀢𑁆𑀯𑀸 𑀘 𑀧𑀦 𑀢𑀓𑁆𑀓𑀲𑀺𑀮𑀁 𑀅𑀕𑀫𑀸𑀲𑀺. 𑀕𑁄𑀖𑀸𑀢𑀓𑁄𑀧𑀺 𑀕𑁄𑀡𑁄 𑀯𑀺𑀬 𑀕𑁂𑀳𑀫𑀚𑁆𑀛𑁂 𑀯𑀺𑀭𑀯𑀦𑁆𑀢𑁄 𑀯𑀺𑀘𑀭𑀺𑀢𑁆𑀯𑀸 𑀓𑀸𑀮𑀓𑀢𑁄 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀕𑁄𑀡𑁄𑀧𑀺 𑀓𑀸𑀮𑀫𑀓𑀸𑀲𑀺. 𑀕𑁄𑀖𑀸𑀢𑀓𑀧𑀼𑀢𑁆𑀢𑁄𑀧𑀺 𑀢𑀓𑁆𑀓𑀲𑀺𑀮𑀁 𑀕𑀦𑁆𑀢𑁆𑀯𑀸 𑀲𑀼𑀯𑀡𑁆𑀡𑀓𑀸𑀭𑀓𑀫𑁆𑀫𑀁 𑀉𑀕𑁆𑀕𑀡𑁆𑀳𑀺. 𑀅𑀣𑀲𑁆𑀲𑀸𑀘𑀭𑀺𑀬𑁄 𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 ‘‘𑀏𑀯𑀭𑀽𑀧𑀁 𑀦𑀸𑀫 𑀅𑀮𑀗𑁆𑀓𑀸𑀭𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄𑀧𑀺 𑀢𑀣𑀸𑀭𑀽𑀧𑀁 𑀅𑀮𑀗𑁆𑀓𑀸𑀭𑀁 𑀅𑀓𑀸𑀲𑀺. 𑀅𑀣𑀲𑁆𑀲𑀸𑀘𑀭𑀺𑀬𑁄 𑀆𑀕𑀦𑁆𑀢𑁆𑀯𑀸 𑀅𑀮𑀗𑁆𑀓𑀸𑀭𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀕𑀦𑁆𑀢𑁆𑀯𑀸 𑀚𑀻𑀯𑀺𑀢𑀼𑀁 𑀲𑀫𑀢𑁆𑀣𑁄’’𑀢𑀺 𑀯𑀬𑀧𑁆𑀧𑀢𑁆𑀢𑀁 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀅𑀤𑀸𑀲𑀺. 𑀲𑁄 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀟𑁆𑀠𑀺.

𑀅𑀣𑀲𑁆𑀲 𑀧𑀼𑀢𑁆𑀢𑀸 𑀯𑀬𑀧𑁆𑀧𑀢𑁆𑀢𑀸 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀸𑀯𑀢𑁆𑀣𑀺𑀬𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀯𑀲𑀦𑁆𑀢𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀅𑀳𑁂𑀲𑀼𑀁. 𑀧𑀺𑀢𑀸𑀧𑀺 𑀦𑁂𑀲𑀁 𑀢𑀓𑁆𑀓𑀲𑀺𑀮𑀸𑀬𑀁 𑀓𑀺𑀜𑁆𑀘𑀺 𑀓𑀼𑀲𑀮𑀁 𑀅𑀓𑀢𑁆𑀯𑀸𑀯 𑀚𑀭𑀁 𑀧𑀸𑀧𑀼𑀡𑀺. 𑀅𑀣𑀲𑁆𑀲 𑀧𑀼𑀢𑁆𑀢𑀸 ‘‘𑀧𑀺𑀢𑀸 𑀦𑁄 𑀫𑀳𑀮𑁆𑀮𑀓𑁄’’𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀧𑀺𑀢𑀼 𑀅𑀢𑁆𑀣𑀸𑀬 𑀤𑀸𑀦𑀁 𑀤𑀲𑁆𑀲𑀸𑀫𑀸’’𑀢𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑀬𑀺𑀁𑀲𑀼. 𑀢𑁂 𑀧𑀼𑀦𑀤𑀺𑀯𑀲𑁂 𑀅𑀦𑁆𑀢𑁄𑀕𑁂𑀳𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀲𑀢𑁆𑀣𑀸𑀭𑀁 𑀆𑀳𑀁𑀲𑀼 𑁋 ‘‘𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺 𑀇𑀤𑀁 𑀧𑀺𑀢𑀼 𑀚𑀻𑀯𑀪𑀢𑁆𑀢𑀁 𑀤𑀺𑀦𑁆𑀦𑀁, 𑀧𑀺𑀢𑀼 𑀦𑁄 𑀅𑀦𑀼𑀫𑁄𑀤𑀦𑀁 𑀓𑀭𑁄𑀣𑀸’’𑀢𑀺. 𑀲𑀢𑁆𑀣𑀸 𑀢𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀉𑀧𑀸𑀲𑀓, 𑀢𑁆𑀯𑀁 𑀫𑀳𑀮𑁆𑀮𑀓𑁄 𑀧𑀭𑀺𑀧𑀓𑁆𑀓𑀲𑀭𑀻𑀭𑁄 𑀧𑀡𑁆𑀟𑀼𑀧𑀮𑀸𑀲𑀲𑀤𑀺𑀲𑁄, 𑀢𑀯 𑀧𑀭𑀮𑁄𑀓𑀕𑀫𑀦𑀸𑀬 𑀓𑀼𑀲𑀮𑀧𑀸𑀣𑁂𑀬𑁆𑀬𑀁 𑀦𑀢𑁆𑀣𑀺, 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀓𑀭𑁄𑀳𑀺, 𑀧𑀡𑁆𑀟𑀺𑀢𑁄 𑀪𑀯, 𑀫𑀸 𑀩𑀸𑀮𑁄’’𑀢𑀺 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁩𑁫. ‘‘𑀧𑀡𑁆𑀟𑀼𑀧𑀮𑀸𑀲𑁄𑀯 𑀤𑀸𑀦𑀺𑀲𑀺,

𑀬𑀫𑀧𑀼𑀭𑀺𑀲𑀸𑀧𑀺 𑀘 𑀢𑁂 𑀉𑀧𑀝𑁆𑀞𑀺𑀢𑀸;

𑀉𑀬𑁆𑀬𑁄𑀕𑀫𑀼𑀔𑁂 𑀘 𑀢𑀺𑀝𑁆𑀞𑀲𑀺,

𑀧𑀸𑀣𑁂𑀬𑁆𑀬𑀫𑁆𑀧𑀺 𑀘 𑀢𑁂 𑀦 𑀯𑀺𑀚𑁆𑀚𑀢𑀺.

𑁨𑁩𑁬. ‘‘𑀲𑁄 𑀓𑀭𑁄𑀳𑀺 𑀤𑀻𑀧𑀫𑀢𑁆𑀢𑀦𑁄,

𑀔𑀺𑀧𑁆𑀧𑀁 𑀯𑀸𑀬𑀫 𑀧𑀡𑁆𑀟𑀺𑀢𑁄 𑀪𑀯;

𑀦𑀺𑀤𑁆𑀥𑀦𑁆𑀢𑀫𑀮𑁄 𑀅𑀦𑀗𑁆𑀕𑀡𑁄,

𑀤𑀺𑀩𑁆𑀩𑀁 𑀅𑀭𑀺𑀬𑀪𑀽𑀫𑀺𑀁 𑀉𑀧𑁂𑀳𑀺𑀲𑀻’’𑀢𑀺.

𑀢𑀢𑁆𑀣 𑀧𑀡𑁆𑀟𑀼𑀧𑀮𑀸𑀲𑁄𑀯 𑀤𑀸𑀦𑀺𑀲𑀻𑀢𑀺, 𑀉𑀧𑀸𑀲𑀓, 𑀢𑁆𑀯𑀁 𑀇𑀤𑀸𑀦𑀺 𑀙𑀺𑀚𑁆𑀚𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀢𑀺𑀢𑀧𑀡𑁆𑀟𑀼𑀧𑀮𑀸𑀲𑁄 𑀯𑀺𑀬 𑀅𑀳𑁄𑀲𑀺. 𑀬𑀫𑀧𑀼𑀭𑀺𑀲𑀸𑀢𑀺 𑀬𑀫𑀤𑀽𑀢𑀸 𑀯𑀼𑀘𑁆𑀘𑀦𑁆𑀢𑀺, 𑀇𑀤𑀁 𑀧𑀦 𑀫𑀭𑀡𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀫𑀭𑀡𑀁 𑀢𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀉𑀬𑁆𑀬𑁄𑀕𑀫𑀼𑀔𑁂𑀢𑀺 𑀧𑀭𑀺𑀳𑀸𑀦𑀺𑀫𑀼𑀔𑁂, 𑀅𑀯𑀼𑀟𑁆𑀠𑀺𑀫𑀼𑀔𑁂 𑀘 𑀞𑀺𑀢𑁄𑀲𑀻𑀢𑀺 𑀅𑀢𑁆𑀣𑁄. 𑀧𑀸𑀣𑁂𑀬𑁆𑀬𑀦𑁆𑀢𑀺 𑀕𑀫𑀺𑀓𑀲𑁆𑀲 𑀢𑀡𑁆𑀟𑀼𑀮𑀸𑀤𑀺𑀧𑀸𑀣𑁂𑀬𑁆𑀬𑀁 𑀯𑀺𑀬 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀲𑁆𑀲 𑀢𑀯 𑀓𑀼𑀲𑀮𑀧𑀸𑀣𑁂𑀬𑁆𑀬𑀫𑁆𑀧𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀲𑁄 𑀓𑀭𑁄𑀳𑀻𑀢𑀺 𑀲𑁄 𑀢𑁆𑀯𑀁 𑀲𑀫𑀼𑀤𑁆𑀤𑁂 𑀦𑀸𑀯𑀸𑀬 𑀪𑀺𑀦𑁆𑀦𑀸𑀬 𑀤𑀻𑀧𑀲𑀗𑁆𑀔𑀸𑀢𑀁 𑀧𑀢𑀺𑀝𑁆𑀞𑀁 𑀯𑀺𑀬 𑀅𑀢𑁆𑀢𑀦𑁄 𑀓𑀼𑀲𑀮𑀧𑀢𑀺𑀝𑁆𑀞𑀁 𑀓𑀭𑁄𑀳𑀺. 𑀓𑀭𑁄𑀦𑁆𑀢𑁄 𑀘 𑀔𑀺𑀧𑁆𑀧𑀁 𑀯𑀸𑀬𑀫, 𑀲𑀻𑀖𑀁 𑀲𑀻𑀖𑀁 𑀯𑀻𑀭𑀺𑀬𑀁 𑀆𑀭𑀪, 𑀅𑀢𑁆𑀢𑀦𑁄 𑀓𑀼𑀲𑀮𑀓𑀫𑁆𑀫𑀧𑀢𑀺𑀝𑁆𑀞𑀓𑀭𑀡𑁂𑀦 𑀧𑀡𑁆𑀟𑀺𑀢𑁄 𑀪𑀯. 𑀬𑁄 𑀳𑀺 𑀫𑀭𑀡𑀫𑀼𑀔𑀁 𑀅𑀧𑁆𑀧𑀢𑁆𑀯𑀸 𑀓𑀸𑀢𑀼𑀁 𑀲𑀫𑀢𑁆𑀣𑀓𑀸𑀮𑁂𑀯 𑀓𑀼𑀲𑀮𑀁 𑀓𑀭𑁄𑀢𑀺, 𑀏𑀲 𑀧𑀡𑁆𑀟𑀺𑀢𑁄 𑀦𑀸𑀫, 𑀢𑀸𑀤𑀺𑀲𑁄 𑀪𑀯, 𑀫𑀸 𑀅𑀦𑁆𑀥𑀩𑀸𑀮𑁄𑀢𑀺 𑀅𑀢𑁆𑀣𑁄. 𑀤𑀺𑀩𑁆𑀩𑀁 𑀅𑀭𑀺𑀬𑀪𑀽𑀫𑀺𑀦𑁆𑀢𑀺 𑀏𑀯𑀁 𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑁄 𑀭𑀸𑀕𑀸𑀤𑀻𑀦𑀁 𑀫𑀮𑀸𑀦𑀁 𑀦𑀻𑀳𑀝𑀢𑀸𑀬 𑀦𑀺𑀤𑁆𑀥𑀦𑁆𑀢𑀫𑀮𑁄 𑀅𑀗𑁆𑀕𑀡𑀸𑀪𑀸𑀯𑁂𑀦 𑀅𑀦𑀗𑁆𑀕𑀡𑁄 𑀦𑀺𑀓𑁆𑀓𑀺𑀮𑁂𑀲𑁄 𑀳𑀼𑀢𑁆𑀯𑀸 𑀧𑀜𑁆𑀘𑀯𑀺𑀥𑀁 𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀺𑀁 𑀧𑀸𑀧𑀼𑀡𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀉𑀧𑀸𑀲𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀢𑁂 𑀧𑀼𑀦𑀤𑀺𑀯𑀲𑀢𑁆𑀣𑀸𑀬𑀧𑀺 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀸𑀦𑀁 𑀤𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀁 𑀲𑀢𑁆𑀣𑀸𑀭𑀁 𑀅𑀦𑀼𑀫𑁄𑀤𑀦𑀓𑀸𑀮𑁂 𑀆𑀳𑀁𑀲𑀼 𑁋 ‘‘𑀪𑀦𑁆𑀢𑁂, 𑀇𑀤𑀫𑁆𑀧𑀺 𑀅𑀫𑁆𑀳𑀸𑀓𑀁 𑀧𑀺𑀢𑀼 𑀚𑀻𑀯𑀪𑀢𑁆𑀢𑀫𑁂𑀯, 𑀇𑀫𑀲𑁆𑀲𑁂𑀯 𑀅𑀦𑀼𑀫𑁄𑀤𑀦𑀁 𑀓𑀭𑁄𑀣𑀸’’𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀇𑀫𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁩𑁭. ‘‘𑀉𑀧𑀦𑀻𑀢𑀯𑀬𑁄 𑀘 𑀤𑀸𑀦𑀺𑀲𑀺,

𑀲𑀫𑁆𑀧𑀬𑀸𑀢𑁄𑀲𑀺 𑀬𑀫𑀲𑁆𑀲 𑀲𑀦𑁆𑀢𑀺𑀓𑀁;

𑀯𑀸𑀲𑁄 𑀢𑁂 𑀦𑀢𑁆𑀣𑀺 𑀅𑀦𑁆𑀢𑀭𑀸,

𑀧𑀸𑀣𑁂𑀬𑁆𑀬𑀫𑁆𑀧𑀺 𑀘 𑀢𑁂 𑀦 𑀯𑀺𑀚𑁆𑀚𑀢𑀺.

𑁨𑁩𑁮. ‘‘𑀲𑁄 𑀓𑀭𑁄𑀳𑀺 𑀤𑀻𑀧𑀫𑀢𑁆𑀢𑀦𑁄,

𑀔𑀺𑀧𑁆𑀧𑀁 𑀯𑀸𑀬𑀫 𑀧𑀡𑁆𑀟𑀺𑀢𑁄 𑀪𑀯;

𑀦𑀺𑀤𑁆𑀥𑀦𑁆𑀢𑀫𑀮𑁄 𑀅𑀦𑀗𑁆𑀕𑀡𑁄,

𑀦 𑀧𑀼𑀦 𑀚𑀸𑀢𑀺𑀚𑀭𑀁 𑀉𑀧𑁂𑀳𑀺𑀲𑀻’’𑀢𑀺.

𑀢𑀢𑁆𑀣 𑀉𑀧𑀦𑀻𑀢𑀯𑀬𑁄𑀢𑀺 𑀉𑀧𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀦𑀻𑀢𑀯𑀬𑁄𑀢𑀺 𑀯𑀺𑀕𑀢𑀯𑀬𑁄 𑀅𑀢𑀺𑀓𑁆𑀓𑀦𑁆𑀢𑀯𑀬𑁄, 𑀢𑁆𑀯𑀜𑁆𑀘𑀲𑀺 𑀤𑀸𑀦𑀺 𑀢𑀬𑁄 𑀯𑀬𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀭𑀡𑀫𑀼𑀔𑁂 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀬𑀸𑀢𑁄𑀲𑀺 𑀬𑀫𑀲𑁆𑀲 𑀲𑀦𑁆𑀢𑀺𑀓𑀦𑁆𑀢𑀺 𑀫𑀭𑀡𑀫𑀼𑀔𑀁 𑀕𑀦𑁆𑀢𑀼𑀁 𑀲𑀚𑁆𑀚𑁄 𑀳𑀼𑀢𑁆𑀯𑀸 𑀞𑀺𑀢𑁄𑀲𑀻𑀢𑀺 𑀅𑀢𑁆𑀣𑁄. 𑀯𑀸𑀲𑁄 𑀢𑁂 𑀦𑀢𑁆𑀣𑀺 𑀅𑀦𑁆𑀢𑀭𑀸𑀢𑀺 𑀬𑀣𑀸 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑀸 𑀢𑀸𑀦𑀺 𑀢𑀸𑀦𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀲𑀦𑁆𑀢𑀺, 𑀦 𑀏𑀯𑀁 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀸. 𑀦 𑀳𑀺 𑀲𑀓𑁆𑀓𑀸 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑁂𑀦 ‘‘𑀅𑀥𑀺𑀯𑀸𑀲𑁂𑀣 𑀓𑀢𑀺𑀧𑀸𑀳𑀁, 𑀤𑀸𑀦𑀁 𑀢𑀸𑀯 𑀤𑁂𑀫𑀺, 𑀥𑀫𑁆𑀫𑀁 𑀢𑀸𑀯 𑀲𑀼𑀡𑀸𑀫𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀢𑀼𑀁. 𑀇𑀢𑁄 𑀧𑀦 𑀘𑀯𑀺𑀢𑁆𑀯𑀸 𑀧𑀭𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄𑀯 𑀳𑁄𑀢𑀺. 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀧𑀸𑀣𑁂𑀬𑁆𑀬𑀦𑁆𑀢𑀺 𑀇𑀤𑀁 𑀓𑀺𑀜𑁆𑀘𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯, 𑀉𑀧𑀸𑀲𑀓𑀲𑁆𑀲 𑀧𑀦 𑀧𑀼𑀦𑀧𑁆𑀧𑀼𑀦𑀁 𑀤𑀴𑁆𑀳𑀻𑀓𑀭𑀡𑀢𑁆𑀣𑀁 𑀇𑀥𑀸𑀧𑀺 𑀲𑀢𑁆𑀣𑀸𑀭𑀸 𑀓𑀣𑀺𑀢𑀁. 𑀚𑀸𑀢𑀺𑀚𑀭𑀦𑁆𑀢𑀺 𑀏𑀢𑁆𑀣 𑀩𑁆𑀬𑀸𑀥𑀺𑀫𑀭𑀡𑀸𑀦𑀺𑀧𑀺 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀳𑁂𑀝𑁆𑀞𑀺𑀫𑀕𑀸𑀣𑀸𑀳𑀺 𑀘 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀓𑀣𑀺𑀢𑁄, 𑀇𑀥 𑀅𑀭𑀳𑀢𑁆𑀢𑀫𑀕𑁆𑀕𑁄 𑀓𑀣𑀺𑀢𑁄. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀣𑀸 𑀦𑀸𑀫 𑀭𑀜𑁆𑀜𑀸 𑀅𑀢𑁆𑀢𑀦𑁄 𑀫𑀼𑀔𑀧𑀫𑀸𑀡𑁂𑀦 𑀓𑀩𑀴𑀁 𑀯𑀟𑁆𑀠𑁂𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀉𑀧𑀦𑀻𑀢𑁂 𑀲𑁄 𑀓𑀼𑀫𑀸𑀭𑁄 𑀅𑀢𑁆𑀢𑀦𑁄 𑀫𑀼𑀔𑀧𑀫𑀸𑀡𑁂𑀦𑁂𑀯 𑀕𑀡𑁆𑀳𑀸𑀢𑀺, 𑀏𑀯𑀫𑁂𑀯 𑀲𑀢𑁆𑀣𑀸𑀭𑀸 𑀉𑀧𑀭𑀺𑀫𑀕𑁆𑀕𑀯𑀲𑁂𑀦 𑀥𑀫𑁆𑀫𑁂 𑀤𑁂𑀲𑀺𑀢𑁂𑀧𑀺 𑀉𑀧𑀸𑀲𑀓𑁄 𑀅𑀢𑁆𑀢𑀦𑁄 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀳𑁂𑀝𑁆𑀞𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀇𑀫𑀺𑀲𑁆𑀲𑀸 𑀅𑀦𑀼𑀫𑁄𑀤𑀦𑀸𑀬 𑀅𑀯𑀲𑀸𑀦𑁂 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑁄. 𑀲𑁂𑀲𑀧𑀭𑀺𑀲𑀸𑀬𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀕𑁄𑀖𑀸𑀢𑀓𑀧𑀼𑀢𑁆𑀢𑀯𑀢𑁆𑀣𑀼 𑀧𑀞𑀫𑀁.

𑁨. 𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑀅𑀦𑀼𑀧𑀼𑀩𑁆𑀩𑁂𑀦𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀏𑀓𑀤𑀺𑀯𑀲𑀁 𑀧𑀸𑀢𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀧𑀸𑀭𑀼𑀧𑀦𑀝𑁆𑀞𑀸𑀦𑁂 𑀪𑀺𑀓𑁆𑀔𑀽 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑁂 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀢𑀁 𑀧𑀦 𑀞𑀸𑀦𑀁 𑀯𑀺𑀭𑀽𑀴𑁆𑀳𑀢𑀺𑀡𑀁 𑀳𑁄𑀢𑀺. 𑀅𑀣𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑀲𑁆𑀲 𑀘𑀻𑀯𑀭𑀓𑀡𑁆𑀡𑁄 𑀢𑀺𑀡𑁂𑀲𑀼 𑀧𑀯𑀝𑁆𑀝𑁂𑀦𑁆𑀢𑁄 𑀉𑀲𑁆𑀲𑀸𑀯𑀩𑀺𑀦𑁆𑀤𑀽𑀳𑀺 𑀢𑁂𑀫𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀇𑀫𑀁 𑀞𑀸𑀦𑀁 𑀅𑀧𑁆𑀧𑀳𑀭𑀺𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀼𑀦𑀤𑀺𑀯𑀲𑁂 𑀓𑀼𑀤𑁆𑀤𑀸𑀮𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀢𑀁 𑀞𑀸𑀦𑀁 𑀢𑀘𑁆𑀙𑁂𑀢𑁆𑀯𑀸 𑀔𑀮𑀫𑀡𑁆𑀟𑀮𑀲𑀤𑀺𑀲𑀁 𑀅𑀓𑀸𑀲𑀺. 𑀧𑀼𑀦𑀤𑀺𑀯𑀲𑁂𑀧𑀺 𑀢𑀁 𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀲𑀼 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑁂𑀲𑀼 𑀏𑀓𑀲𑁆𑀲 𑀘𑀻𑀯𑀭𑀓𑀡𑁆𑀡𑀁 𑀪𑀽𑀫𑀺𑀬𑀁 𑀧𑀢𑀺𑀢𑁆𑀯𑀸 𑀧𑀁𑀲𑀼𑀫𑁆𑀳𑀺 𑀧𑀯𑀝𑁆𑀝𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀇𑀥 𑀯𑀸𑀮𑀼𑀓𑀁 𑀑𑀓𑀺𑀭𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀸𑀮𑀼𑀓𑀁 𑀆𑀳𑀭𑀺𑀢𑁆𑀯𑀸 𑀑𑀓𑀺𑀭𑀺.

𑀅𑀣𑁂𑀓𑀤𑀺𑀯𑀲𑀁 𑀧𑀼𑀭𑁂𑀪𑀢𑁆𑀢𑀁 𑀘𑀡𑁆𑀟𑁄 𑀆𑀢𑀧𑁄 𑀅𑀳𑁄𑀲𑀺, 𑀢𑀤𑀸𑀧𑀺 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑀸𑀦𑀁 𑀕𑀢𑁆𑀢𑀢𑁄 𑀲𑁂𑀤𑁂 𑀫𑀼𑀘𑁆𑀘𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀇𑀥 𑀫𑀬𑀸 𑀫𑀡𑁆𑀟𑀧𑀁 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀡𑁆𑀟𑀧𑀁 𑀓𑀸𑀭𑁂𑀲𑀺. 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀯𑀲𑁆𑀲𑀁 𑀯𑀲𑁆𑀲𑀺, 𑀯𑀤𑁆𑀤𑀮𑀺𑀓𑀁 𑀅𑀳𑁄𑀲𑀺. 𑀢𑀤𑀸𑀧𑀺 𑀩𑁆𑀭𑀸𑀳𑁆𑀫𑀡𑁄 𑀪𑀺𑀓𑁆𑀔𑀽 𑀑𑀮𑁄𑀓𑁂𑀦𑁆𑀢𑁄𑀯 𑀞𑀺𑀢𑁄 𑀢𑀺𑀦𑁆𑀢𑀘𑀻𑀯𑀭𑀓𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀏𑀢𑁆𑀣 𑀫𑀬𑀸 𑀲𑀸𑀮𑀁 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀲𑀸𑀮𑀫𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀪𑀺𑀓𑁆𑀔𑀽 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀲𑀢𑁆𑀣𑀼 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀳𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀧𑀸𑀭𑀼𑀧𑀦𑀓𑀸𑀮𑁂 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀑𑀮𑁄𑀓𑁂𑀦𑁆𑀢𑁄 𑀞𑀺𑀢𑁄 𑀇𑀤𑀜𑁆𑀘𑀺𑀤𑀜𑁆𑀘 𑀤𑀺𑀲𑁆𑀯𑀸 𑀇𑀤𑀜𑁆𑀘𑀺𑀤𑀜𑁆𑀘 𑀓𑀸𑀭𑁂𑀲𑀺’’𑀦𑁆𑀢𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, ‘‘𑀩𑁆𑀭𑀸𑀳𑁆𑀫𑀡, 𑀧𑀡𑁆𑀟𑀺𑀢𑀸 𑀦𑀸𑀫 𑀔𑀡𑁂 𑀔𑀡𑁂 𑀣𑁄𑀓𑀁 𑀓𑀼𑀲𑀮𑀁 𑀓𑀭𑁄𑀦𑁆𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀅𑀢𑁆𑀢𑀦𑁄 𑀅𑀓𑀼𑀲𑀮𑀫𑀮𑀁 𑀦𑀻𑀳𑀭𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁩𑁯. ‘‘𑀅𑀦𑀼𑀧𑀼𑀩𑁆𑀩𑁂𑀦 𑀫𑁂𑀥𑀸𑀯𑀻, 𑀣𑁄𑀓𑀁 𑀣𑁄𑀓𑀁 𑀔𑀡𑁂 𑀔𑀡𑁂;

𑀓𑀫𑁆𑀫𑀸𑀭𑁄 𑀭𑀚𑀢𑀲𑁆𑀲𑁂𑀯, 𑀦𑀺𑀤𑁆𑀥𑀫𑁂 𑀫𑀮𑀫𑀢𑁆𑀢𑀦𑁄’’𑀢𑀺.

𑀢𑀢𑁆𑀣 𑀅𑀦𑀼𑀧𑀼𑀩𑁆𑀩𑁂𑀦𑀸𑀢𑀺 𑀅𑀦𑀼𑀧𑀝𑀺𑀧𑀸𑀝𑀺𑀬𑀸. 𑀫𑁂𑀥𑀸𑀯𑀻𑀢𑀺 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀔𑀡𑁂 𑀔𑀡𑁂𑀢𑀺 𑀑𑀓𑀸𑀲𑁂 𑀑𑀓𑀸𑀲𑁂 𑀓𑀼𑀲𑀮𑀁 𑀓𑀭𑁄𑀦𑁆𑀢𑁄. 𑀓𑀫𑁆𑀫𑀸𑀭𑁄 𑀭𑀚𑀢𑀲𑁆𑀲𑁂𑀯𑀸𑀢𑀺 𑀬𑀣𑀸 𑀲𑀼𑀯𑀡𑁆𑀡𑀓𑀸𑀭𑁄 𑀏𑀓𑀯𑀸𑀭𑀫𑁂𑀯 𑀲𑀼𑀯𑀡𑁆𑀡𑀁 𑀢𑀸𑀧𑁂𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀫𑀮𑀁 𑀦𑀻𑀳𑀭𑀺𑀢𑁆𑀯𑀸 𑀧𑀺𑀮𑀦𑁆𑀥𑀦𑀯𑀺𑀓𑀢𑀺𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀢𑀸𑀧𑁂𑀦𑁆𑀢𑁄 𑀓𑁄𑀝𑁆𑀝𑁂𑀦𑁆𑀢𑁄 𑀧𑀦 𑀫𑀮𑀁 𑀦𑀻𑀳𑀭𑀢𑀺, 𑀢𑀢𑁄 𑀅𑀦𑁂𑀓𑀯𑀺𑀥𑀁 𑀧𑀺𑀮𑀦𑁆𑀥𑀦𑀯𑀺𑀓𑀢𑀺𑀁 𑀓𑀭𑁄𑀢𑀺, 𑀏𑀯𑀫𑁂𑀯 𑀧𑀼𑀦𑀧𑁆𑀧𑀼𑀦𑀁 𑀓𑀼𑀲𑀮𑀁 𑀓𑀭𑁄𑀦𑁆𑀢𑁄 𑀧𑀡𑁆𑀟𑀺𑀢𑁄 𑀅𑀢𑁆𑀢𑀦𑁄 𑀭𑀸𑀕𑀸𑀤𑀺𑀫𑀮𑀁 𑀦𑀺𑀤𑁆𑀥𑀫𑁂𑀬𑁆𑀬, 𑀏𑀯𑀁 𑀦𑀺𑀤𑁆𑀥𑀦𑁆𑀢𑀫𑀮𑁄 𑀦𑀺𑀓𑁆𑀓𑀺𑀮𑁂𑀲𑁄𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑁆𑀭𑀸𑀳𑁆𑀫𑀡𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀢𑀺, 𑀫𑀳𑀸𑀚𑀦𑀲𑁆𑀲𑀸𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼

𑀅𑀬𑀲𑀸𑀯 𑀫𑀮𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀢𑀺𑀲𑁆𑀲𑀢𑁆𑀣𑁂𑀭𑀁 𑀦𑀸𑀫 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑁄 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀢𑀺𑀲𑁆𑀲𑀢𑁆𑀣𑁂𑀭𑁄𑀢𑀺 𑀧𑀜𑁆𑀜𑀸𑀬𑀺. 𑀲𑁄 𑀅𑀧𑀭𑀪𑀸𑀕𑁂 𑀚𑀦𑀧𑀤𑀯𑀺𑀳𑀸𑀭𑁂 𑀯𑀲𑁆𑀲𑀽𑀧𑀕𑀢𑁄 𑀅𑀝𑁆𑀞𑀳𑀢𑁆𑀣𑀓𑀁 𑀣𑀽𑀮𑀲𑀸𑀝𑀓𑀁 𑀮𑀪𑀺𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸 𑀢𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀪𑀕𑀺𑀦𑀺𑀬𑀸 𑀳𑀢𑁆𑀣𑁂 𑀞𑀧𑁂𑀲𑀺. 𑀲𑀸 ‘‘𑀦 𑀫𑁂 𑀏𑀲𑁄 𑀲𑀸𑀝𑀓𑁄 𑀪𑀸𑀢𑀼 𑀅𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀢𑀁 𑀢𑀺𑀔𑀺𑀡𑀸𑀬 𑀯𑀸𑀲𑀺𑀬𑀸 𑀙𑀺𑀦𑁆𑀤𑀺𑀢𑁆𑀯𑀸 𑀳𑀻𑀭𑀳𑀻𑀭𑀁 𑀓𑀢𑁆𑀯𑀸 𑀉𑀤𑀼𑀓𑁆𑀔𑀮𑁂 𑀓𑁄𑀝𑁆𑀝𑁂𑀢𑁆𑀯𑀸 𑀧𑀯𑀺𑀲𑁂𑀢𑁆𑀯𑀸 𑀧𑁄𑀣𑁂𑀢𑁆𑀯𑀸 𑀯𑀝𑁆𑀝𑁂𑀢𑁆𑀯𑀸 𑀲𑀼𑀔𑀼𑀫𑀲𑀼𑀢𑁆𑀢𑀁 𑀓𑀦𑁆𑀢𑀺𑀢𑁆𑀯𑀸 𑀲𑀸𑀝𑀓𑀁 𑀯𑀸𑀬𑀸𑀧𑁂𑀲𑀺. 𑀣𑁂𑀭𑁄𑀧𑀺 𑀲𑀼𑀢𑁆𑀢𑀜𑁆𑀘𑁂𑀯 𑀲𑀽𑀘𑀺𑀬𑁄 𑀘 𑀲𑀁𑀯𑀺𑀤𑀳𑀺𑀢𑁆𑀯𑀸 𑀘𑀻𑀯𑀭𑀓𑀸𑀭𑀓𑁂 𑀤𑀳𑀭𑀲𑀸𑀫𑀡𑁂𑀭𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀪𑀕𑀺𑀦𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀢𑀁 𑀫𑁂 𑀲𑀸𑀝𑀓𑀁 𑀤𑁂𑀣, 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀲𑀸 𑀦𑀯𑀳𑀢𑁆𑀣𑀁 𑀲𑀸𑀝𑀓𑀁 𑀦𑀻𑀳𑀭𑀺𑀢𑁆𑀯𑀸 𑀓𑀦𑀺𑀝𑁆𑀞𑀪𑀸𑀢𑀺𑀓𑀲𑁆𑀲 𑀳𑀢𑁆𑀣𑁂 𑀞𑀧𑁂𑀲𑀺. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀑𑀮𑁄𑀓𑁂𑀢𑁆𑀯𑀸 ‘‘𑀫𑀫 𑀲𑀸𑀝𑀓𑁄 𑀣𑀽𑀮𑁄 𑀅𑀝𑁆𑀞𑀳𑀢𑁆𑀣𑁄, 𑀅𑀬𑀁 𑀲𑀼𑀔𑀼𑀫𑁄 𑀦𑀯𑀳𑀢𑁆𑀣𑁄. 𑀦𑀸𑀬𑀁 𑀫𑀫 𑀲𑀸𑀝𑀓𑁄, 𑀢𑀼𑀫𑁆𑀳𑀸𑀓𑀁 𑀏𑀲, 𑀦 𑀫𑁂 𑀇𑀫𑀺𑀦𑀸 𑀅𑀢𑁆𑀣𑁄, 𑀢𑀫𑁂𑀯 𑀫𑁂 𑀤𑁂𑀣𑀸’’𑀢𑀺 𑀆𑀳. ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀫𑁂𑀯 𑀏𑀲𑁄, 𑀕𑀡𑁆𑀳𑀣 𑀦’’𑀦𑁆𑀢𑀺? 𑀲𑁄 𑀦𑁂𑀯 𑀇𑀘𑁆𑀙𑀺. 𑀅𑀣𑀲𑁆𑀲 𑀅𑀢𑁆𑀢𑀦𑀸 𑀓𑀢𑀓𑀺𑀘𑁆𑀘𑀁 𑀲𑀩𑁆𑀩𑀁 𑀆𑀭𑁄𑀘𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀫𑁂𑀯𑁂𑀲, 𑀕𑀡𑁆𑀳𑀣 𑀦’’𑀦𑁆𑀢𑀺 𑀅𑀤𑀸𑀲𑀺. 𑀲𑁄 𑀢𑀁 𑀆𑀤𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀘𑀻𑀯𑀭𑀓𑀫𑁆𑀫𑀁 𑀧𑀝𑁆𑀞𑀧𑁂𑀲𑀺.

𑀅𑀣𑀲𑁆𑀲 𑀪𑀕𑀺𑀦𑀻 𑀘𑀻𑀯𑀭𑀓𑀸𑀭𑀸𑀦𑀁 𑀅𑀢𑁆𑀣𑀸𑀬 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀲𑀺. 𑀘𑀻𑀯𑀭𑀲𑁆𑀲 𑀦𑀺𑀝𑁆𑀞𑀺𑀢𑀤𑀺𑀯𑀲𑁂 𑀧𑀦 𑀅𑀢𑀺𑀭𑁂𑀓𑀲𑀓𑁆𑀓𑀸𑀭𑀁 𑀓𑀸𑀭𑁂𑀲𑀺. 𑀲𑁄 𑀘𑀻𑀯𑀭𑀁 𑀑𑀮𑁄𑀓𑁂𑀢𑁆𑀯𑀸 𑀢𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑀲𑀺𑀦𑁂𑀳𑁄 ‘‘𑀲𑁆𑀯𑁂 𑀤𑀸𑀦𑀺 𑀦𑀁 𑀧𑀸𑀭𑀼𑀧𑀺𑀲𑁆𑀲𑀸𑀫𑀻’’𑀢𑀺 𑀲𑀁𑀳𑀭𑀺𑀢𑁆𑀯𑀸 𑀘𑀻𑀯𑀭𑀯𑀁𑀲𑁂 𑀞𑀧𑁂𑀢𑁆𑀯𑀸 𑀢𑀁 𑀭𑀢𑁆𑀢𑀺𑀁 𑀪𑀼𑀢𑁆𑀢𑀸𑀳𑀸𑀭𑀁 𑀚𑀺𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀘𑀻𑀯𑀭𑁂 𑀊𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀪𑀕𑀺𑀦𑀻𑀧𑀺𑀲𑁆𑀲 𑀓𑀸𑀮𑀓𑀺𑀭𑀺𑀬𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂𑀲𑀼 𑀧𑀯𑀢𑁆𑀢𑀫𑀸𑀦𑀸 𑀭𑁄𑀤𑀺. 𑀪𑀺𑀓𑁆𑀔𑀽 𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 𑀅𑀪𑀸𑀯𑁂𑀦 𑀲𑀗𑁆𑀖𑀲𑁆𑀲𑁂𑀯 𑀢𑀁 𑀧𑀸𑀧𑀼𑀡𑀸𑀢𑀺. ‘‘𑀪𑀸𑀚𑁂𑀲𑁆𑀲𑀸𑀫 𑀦’’𑀦𑁆𑀢𑀺 𑀢𑀁 𑀘𑀻𑀯𑀭𑀁 𑀦𑀻𑀳𑀭𑀸𑀧𑁂𑀲𑀼𑀁. 𑀲𑀸 𑀊𑀓𑀸 ‘‘𑀇𑀫𑁂 𑀫𑀫 𑀲𑀦𑁆𑀢𑀓𑀁 𑀯𑀺𑀮𑀼𑀫𑁆𑀧𑀦𑁆𑀢𑀻’’𑀢𑀺 𑀯𑀺𑀭𑀯𑀦𑁆𑀢𑀻 𑀇𑀢𑁄 𑀘𑀺𑀢𑁄 𑀘 𑀲𑀦𑁆𑀥𑀸𑀯𑀺. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸, ‘‘𑀆𑀦𑀦𑁆𑀤, 𑀢𑀺𑀲𑁆𑀲𑀲𑁆𑀲 𑀘𑀻𑀯𑀭𑀁 𑀅𑀪𑀸𑀚𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀤𑁂𑀳𑀻’’𑀢𑀺 𑀆𑀳. 𑀣𑁂𑀭𑁄 𑀢𑀣𑀸 𑀓𑀸𑀭𑁂𑀲𑀺. 𑀲𑀸𑀧𑀺 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀼𑀲𑀺𑀢𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀲𑀢𑁆𑀣𑀸 ‘‘𑀅𑀝𑁆𑀞𑀫𑁂 𑀤𑀺𑀯𑀲𑁂 𑀢𑀺𑀲𑁆𑀲𑀲𑁆𑀲 𑀘𑀻𑀯𑀭𑀁 𑀪𑀸𑀚𑁂𑀢𑁆𑀯𑀸 𑀕𑀡𑁆𑀳𑀣𑀸’’𑀢𑀺 𑀆𑀡𑀸𑀧𑁂𑀲𑀺. 𑀪𑀺𑀓𑁆𑀔𑀽 𑀢𑀣𑀸 𑀓𑀭𑀺𑀁𑀲𑀼.

𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀓𑀲𑁆𑀫𑀸 𑀦𑀼 𑀔𑁄 𑀲𑀢𑁆𑀣𑀸 𑀢𑀺𑀲𑁆𑀲𑀲𑁆𑀲 𑀘𑀻𑀯𑀭𑀁 𑀲𑀢𑁆𑀢 𑀤𑀺𑀯𑀲𑁂 𑀞𑀧𑀸𑀧𑁂𑀢𑁆𑀯𑀸 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀕𑀡𑁆𑀳𑀺𑀢𑀼𑀁 𑀅𑀦𑀼𑀚𑀸𑀦𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀅𑀢𑁆𑀢𑀦𑁄 𑀘𑀻𑀯𑀭𑁂 𑀊𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀢𑀼𑀫𑁆𑀳𑁂𑀳𑀺 𑀢𑀲𑁆𑀫𑀺𑀁 𑀪𑀸𑀚𑀺𑀬𑀫𑀸𑀦𑁂 ‘𑀇𑀫𑁂 𑀫𑀫 𑀲𑀦𑁆𑀢𑀓𑀁 𑀯𑀺𑀮𑀼𑀫𑁆𑀧𑀦𑁆𑀢𑀻’𑀢𑀺 𑀯𑀺𑀭𑀯𑀦𑁆𑀢𑀻 𑀇𑀢𑁄 𑀘𑀺𑀢𑁄 𑀘 𑀥𑀸𑀯𑀺. 𑀲𑀸 𑀢𑀼𑀫𑁆𑀳𑁂𑀳𑀺 𑀘𑀻𑀯𑀭𑁂 𑀕𑀬𑁆𑀳𑀫𑀸𑀦𑁂 𑀢𑀼𑀫𑁆𑀳𑁂𑀲𑀼 𑀫𑀦𑀁 𑀧𑀤𑀼𑀲𑁆𑀲𑀺𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀢𑁂𑀦 𑀘𑀸𑀳𑀁 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀸𑀧𑁂𑀲𑀺𑀁. 𑀇𑀤𑀸𑀦𑀺 𑀧𑀦 𑀲𑀸 𑀢𑀼𑀲𑀺𑀢𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀸, 𑀢𑁂𑀦 𑀯𑁄 𑀫𑀬𑀸 𑀘𑀻𑀯𑀭𑀕𑀳𑀡𑀁 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀢𑁂𑀳𑀺 ‘‘𑀪𑀸𑀭𑀺𑀬𑀸 𑀯𑀢 𑀅𑀬𑀁, 𑀪𑀦𑁆𑀢𑁂, 𑀢𑀡𑁆𑀳𑀸 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀆𑀫, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸 𑀦𑀸𑀫 𑀪𑀸𑀭𑀺𑀬𑀸. 𑀬𑀣𑀸 𑀅𑀬𑀢𑁄 𑀫𑀮𑀁 𑀉𑀝𑁆𑀞𑀳𑀺𑀢𑁆𑀯𑀸 𑀅𑀬𑀫𑁂𑀯 𑀔𑀸𑀤𑀢𑀺 𑀯𑀺𑀦𑀸𑀲𑁂𑀢𑀺 𑀅𑀧𑀭𑀺𑀪𑁄𑀕𑀁 𑀓𑀭𑁄𑀢𑀺, 𑀏𑀯𑀫𑁂𑀯𑀸𑀬𑀁 𑀢𑀡𑁆𑀳𑀸 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑁂 𑀲𑀢𑁆𑀢𑁂 𑀦𑀺𑀭𑀬𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀸𑀧𑁂𑀢𑀺, 𑀯𑀺𑀦𑀸𑀲𑀁 𑀧𑀸𑀧𑁂𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁪𑁦. ‘‘𑀅𑀬𑀲𑀸𑀯 𑀫𑀮𑀁 𑀲𑀫𑀼𑀝𑁆𑀞𑀺𑀢𑀁,

𑀢𑀢𑀼𑀝𑁆𑀞𑀸𑀬 𑀢𑀫𑁂𑀯 𑀔𑀸𑀤𑀢𑀺;

𑀏𑀯𑀁 𑀅𑀢𑀺𑀥𑁄𑀦𑀘𑀸𑀭𑀺𑀦𑀁,

𑀲𑀸𑀦𑀺 𑀓𑀫𑁆𑀫𑀸𑀦𑀺 𑀦𑀬𑀦𑁆𑀢𑀺 𑀤𑀼𑀕𑁆𑀕𑀢𑀺’’𑀦𑁆𑀢𑀺.

𑀢𑀢𑁆𑀣 𑀅𑀬𑀲𑀸𑀯𑀸𑀢𑀺 𑀅𑀬𑀢𑁄 𑀲𑀫𑀼𑀝𑁆𑀞𑀺𑀢𑀁. 𑀢𑀢𑀼𑀝𑁆𑀞𑀸𑀬𑀸𑀢𑀺 𑀢𑀢𑁄 𑀉𑀝𑁆𑀞𑀸𑀬. 𑀅𑀢𑀺𑀥𑁄𑀦𑀘𑀸𑀭𑀺𑀦𑀦𑁆𑀢𑀺 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 ‘‘𑀇𑀤𑀫𑀢𑁆𑀣𑀁 𑀏𑀢𑁂’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀧𑀜𑁆𑀜𑀸, 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀘𑀭𑀦𑁆𑀢𑁄 𑀅𑀢𑀺𑀥𑁄𑀦𑀘𑀸𑀭𑀻 𑀦𑀸𑀫. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀅𑀬𑀢𑁄 𑀫𑀮𑀁 𑀲𑀫𑀼𑀝𑁆𑀞𑀸𑀬 𑀢𑀢𑁄 𑀲𑀫𑀼𑀝𑁆𑀞𑀺𑀢𑀁 𑀢𑀫𑁂𑀯 𑀔𑀸𑀤𑀢𑀺, 𑀏𑀯𑀫𑁂𑀯𑀁 𑀘𑀢𑀼𑀧𑀘𑁆𑀘𑀬𑁂 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀁 𑀅𑀢𑀺𑀥𑁄𑀦𑀘𑀸𑀭𑀺𑀦𑀁 𑀲𑀸𑀦𑀺 𑀓𑀫𑁆𑀫𑀸𑀦𑀺 𑀅𑀢𑁆𑀢𑀦𑀺 𑀞𑀺𑀢𑀢𑁆𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀸𑀦𑁂𑀯 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀤𑀼𑀕𑁆𑀕𑀢𑀺𑀁 𑀦𑀬𑀦𑁆𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀮𑀸𑀮𑀼𑀤𑀸𑀬𑀺𑀢𑁆𑀣𑁂𑀭𑀯𑀢𑁆𑀣𑀼

𑀅𑀲𑀚𑁆𑀛𑀸𑀬𑀫𑀮𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀮𑀸𑀮𑀼𑀤𑀸𑀬𑀺𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀧𑀜𑁆𑀘𑀓𑁄𑀝𑀺𑀫𑀢𑁆𑀢𑀸 𑀅𑀭𑀺𑀬𑀲𑀸𑀯𑀓𑀸 𑀯𑀲𑀦𑁆𑀢𑀺, 𑀤𑁆𑀯𑁂 𑀓𑁄𑀝𑀺𑀫𑀢𑁆𑀢𑀸 𑀧𑀼𑀣𑀼𑀚𑁆𑀚𑀦𑀸 𑀯𑀲𑀦𑁆𑀢𑀺. 𑀢𑁂𑀲𑀼 𑀅𑀭𑀺𑀬𑀲𑀸𑀯𑀓𑀸 𑀧𑀼𑀭𑁂𑀪𑀢𑁆𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀲𑀧𑁆𑀧𑀺𑀢𑁂𑀮𑀫𑀥𑀼𑀨𑀸𑀡𑀺𑀢𑀯𑀢𑁆𑀣𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑀺. 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀕𑀫𑀦𑀓𑀸𑀮𑁂 𑀘 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀦𑀁 𑀕𑀼𑀡𑀓𑀣𑀁 𑀓𑀣𑁂𑀦𑁆𑀢𑀺. 𑀉𑀤𑀸𑀬𑀺𑀢𑁆𑀣𑁂𑀭𑁄 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀏𑀢𑁂𑀲𑀁 𑀢𑀸𑀯 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀼𑀫𑁆𑀳𑁂 𑀏𑀯𑀁 𑀓𑀣𑁂𑀣, 𑀫𑀫 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀓𑀺𑀁 𑀦𑀼 𑀔𑁄 𑀦 𑀓𑀣𑁂𑀲𑁆𑀲𑀣𑀸’’𑀢𑀺 𑀯𑀤𑀢𑀺. 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀏𑀓𑁄 𑀥𑀫𑁆𑀫𑀓𑀣𑀺𑀓𑁄 𑀪𑀯𑀺𑀲𑁆𑀲𑀢𑀺, 𑀇𑀫𑀲𑁆𑀲𑀧𑀺 𑀅𑀫𑁆𑀳𑁂𑀳𑀺 𑀥𑀫𑁆𑀫𑀓𑀣𑀁 𑀲𑁄𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑁂 𑀏𑀓𑀤𑀺𑀯𑀲𑀁 𑀣𑁂𑀭𑀁 𑀬𑀸𑀘𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀥𑀫𑁆𑀫𑀲𑁆𑀲𑀯𑀦𑀤𑀺𑀯𑀲𑁄’’𑀢𑀺 𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀅𑀫𑁆𑀳𑀸𑀓𑀁 𑀤𑀺𑀯𑀸 𑀥𑀫𑁆𑀫𑀓𑀣𑀁 𑀓𑀣𑁂𑀬𑁆𑀬𑀸𑀣𑀸’’𑀢𑀺 𑀆𑀳𑀁𑀲𑀼. 𑀲𑁄𑀧𑀺 𑀢𑁂𑀲𑀁 𑀅𑀥𑀺𑀯𑀸𑀲𑁂𑀲𑀺.

𑀢𑁂𑀳𑀺 𑀥𑀫𑁆𑀫𑀲𑁆𑀲𑀯𑀦𑀯𑁂𑀮𑀸𑀬 𑀆𑀕𑀦𑁆𑀢𑁆𑀯𑀸, ‘‘𑀪𑀦𑁆𑀢𑁂, 𑀦𑁄 𑀥𑀫𑁆𑀫𑀁 𑀓𑀣𑁂𑀣𑀸’’𑀢𑀺 𑀯𑀼𑀢𑁆𑀢𑁂 𑀮𑀸𑀮𑀼𑀤𑀸𑀬𑀺𑀢𑁆𑀣𑁂𑀭𑁄 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀘𑀺𑀢𑁆𑀢𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀘𑀸𑀮𑁂𑀦𑁆𑀢𑁄 𑀏𑀓𑀫𑁆𑀧𑀺 𑀥𑀫𑁆𑀫𑀧𑀤𑀁 𑀅𑀤𑀺𑀲𑁆𑀯𑀸 ‘‘𑀅𑀳𑀁 𑀲𑀭𑀪𑀜𑁆𑀜𑀁 𑀪𑀡𑀺𑀲𑁆𑀲𑀸𑀫𑀺, 𑀅𑀜𑁆𑀜𑁄 𑀥𑀫𑁆𑀫𑀓𑀣𑀁 𑀓𑀣𑁂𑀢𑀽’’𑀢𑀺 𑀯𑀢𑁆𑀯𑀸 𑀑𑀢𑀭𑀺. 𑀢𑁂 𑀅𑀜𑁆𑀜𑁂𑀦 𑀥𑀫𑁆𑀫𑀓𑀣𑀁 𑀓𑀣𑀸𑀧𑁂𑀢𑁆𑀯𑀸 𑀲𑀭𑀪𑀸𑀡𑀢𑁆𑀣𑀸𑀬 𑀧𑀼𑀦 𑀢𑀁 𑀆𑀲𑀦𑀁 𑀆𑀭𑁄𑀧𑀬𑀺𑀁𑀲𑀼. 𑀲𑁄 𑀧𑀼𑀦𑀧𑀺 𑀓𑀺𑀜𑁆𑀘𑀺 𑀅𑀤𑀺𑀲𑁆𑀯𑀸 ‘‘𑀅𑀳𑀁 𑀭𑀢𑁆𑀢𑀺𑀁 𑀓𑀣𑁂𑀲𑁆𑀲𑀸𑀫𑀺, 𑀅𑀜𑁆𑀜𑁄 𑀲𑀭𑀪𑀜𑁆𑀜𑀁 𑀪𑀡𑀢𑀽’’𑀢𑀺 𑀯𑀢𑁆𑀯𑀸 𑀆𑀲𑀦𑀸 𑀑𑀢𑀭𑀺. 𑀢𑁂 𑀅𑀜𑁆𑀜𑁂𑀦 𑀲𑀭𑀪𑀜𑁆𑀜𑀁 𑀪𑀡𑀸𑀧𑁂𑀢𑁆𑀯𑀸 𑀧𑀼𑀦 𑀭𑀢𑁆𑀢𑀺𑀁 𑀣𑁂𑀭𑀁 𑀆𑀦𑀬𑀺𑀁𑀲𑀼. 𑀲𑁄 𑀭𑀢𑁆𑀢𑀺𑀫𑁆𑀧𑀺 𑀓𑀺𑀜𑁆𑀘𑀺 𑀅𑀤𑀺𑀲𑁆𑀯𑀸 ‘‘𑀅𑀳𑀁 𑀧𑀘𑁆𑀘𑀽𑀲𑀓𑀸𑀮𑁂 𑀓𑀣𑁂𑀲𑁆𑀲𑀸𑀫𑀺, 𑀭𑀢𑁆𑀢𑀺𑀁 𑀅𑀜𑁆𑀜𑁄 𑀓𑀣𑁂𑀢𑀽’’𑀢𑀺 𑀯𑀢𑁆𑀯𑀸 𑀑𑀢𑀭𑀺. 𑀢𑁂 𑀅𑀜𑁆𑀜𑁂𑀦 𑀭𑀢𑁆𑀢𑀺𑀁 𑀓𑀣𑀸𑀧𑁂𑀢𑁆𑀯𑀸 𑀧𑀼𑀦 𑀧𑀘𑁆𑀘𑀽𑀲𑁂 𑀢𑀁 𑀆𑀦𑀬𑀺𑀁𑀲𑀼. 𑀲𑁄 𑀧𑀼𑀦𑀧𑀺 𑀓𑀺𑀜𑁆𑀘𑀺 𑀦𑀸𑀤𑁆𑀤𑀲. 𑀫𑀳𑀸𑀚𑀦𑁄 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀦𑀺 𑀕𑀳𑁂𑀢𑁆𑀯𑀸, ‘‘𑀅𑀦𑁆𑀥𑀩𑀸𑀮, 𑀢𑁆𑀯𑀁 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀦𑀁 𑀯𑀡𑁆𑀡𑁂 𑀓𑀣𑀺𑀬𑀫𑀸𑀦𑁂 𑀏𑀯𑀜𑁆𑀘𑁂𑀯𑀜𑁆𑀘 𑀯𑀤𑁂𑀲𑀺, 𑀇𑀤𑀸𑀦𑀺 𑀓𑀲𑁆𑀫𑀸 𑀦 𑀓𑀣𑁂𑀲𑀻’’𑀢𑀺 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑀧𑀮𑀸𑀬𑀦𑁆𑀢𑀁 𑀅𑀦𑀼𑀩𑀦𑁆𑀥𑀺. 𑀲𑁄 𑀧𑀮𑀸𑀬𑀦𑁆𑀢𑁄 𑀏𑀓𑀺𑀲𑁆𑀲𑀸 𑀯𑀘𑁆𑀘𑀓𑀼𑀝𑀺𑀬𑀸 𑀧𑀢𑀺.

𑀫𑀳𑀸𑀚𑀦𑁄 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀺 𑁋 ‘‘𑀅𑀚𑁆𑀚 𑀮𑀸𑀮𑀼𑀤𑀸𑀬𑀻 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀦𑀁 𑀕𑀼𑀡𑀓𑀣𑀸𑀬 𑀧𑀯𑀢𑁆𑀢𑀫𑀸𑀦𑀸𑀬 𑀉𑀲𑁆𑀲𑀽𑀬𑀦𑁆𑀢𑁄 𑀅𑀢𑁆𑀢𑀦𑁄 𑀥𑀫𑁆𑀫𑀓𑀣𑀺𑀓𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀫𑀦𑀼𑀲𑁆𑀲𑁂𑀳𑀺 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 ‘𑀥𑀫𑁆𑀫𑀁 𑀲𑀼𑀡𑁄𑀫𑀸’𑀢𑀺 𑀯𑀼𑀢𑁆𑀢𑁂 𑀘𑀢𑀼𑀓𑁆𑀔𑀢𑁆𑀢𑀼𑀁 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀣𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀺𑀜𑁆𑀘𑀺 𑀅𑀧𑀲𑁆𑀲𑀦𑁆𑀢𑁄 ‘𑀢𑁆𑀯𑀁 𑀅𑀫𑁆𑀳𑀸𑀓𑀁 𑀅𑀬𑁆𑀬𑁂𑀳𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀸𑀲𑀻’𑀢𑀺 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀲𑀦𑁆𑀢𑀚𑁆𑀚𑁂𑀢𑁆𑀯𑀸 𑀧𑀮𑀸𑀧𑀺𑀬𑀫𑀸𑀦𑁄 𑀯𑀘𑁆𑀘𑀓𑀼𑀝𑀺𑀬𑀸 𑀧𑀢𑀺𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀏𑀲𑁄 𑀕𑀽𑀣𑀓𑀽𑀧𑁂 𑀦𑀺𑀫𑀼𑀕𑁆𑀕𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑁋

‘‘𑀘𑀢𑀼𑀧𑁆𑀧𑀤𑁄 𑀅𑀳𑀁 𑀲𑀫𑁆𑀫, 𑀢𑁆𑀯𑀫𑁆𑀧𑀺 𑀲𑀫𑁆𑀫 𑀘𑀢𑀼𑀧𑁆𑀧𑀤𑁄;

𑀏𑀳𑀺 𑀲𑀫𑁆𑀫 𑀦𑀺𑀯𑀢𑁆𑀢𑀲𑁆𑀲𑀼, 𑀓𑀺𑀁 𑀦𑀼 𑀪𑀻𑀢𑁄 𑀧𑀮𑀸𑀬𑀲𑀺.

‘‘𑀅𑀲𑀼𑀘𑀺𑀧𑀽𑀢𑀺𑀮𑁄𑀫𑁄𑀲𑀺, 𑀤𑀼𑀕𑁆𑀕𑀦𑁆𑀥𑁄 𑀯𑀸𑀲𑀺 𑀲𑀽𑀓𑀭;

𑀲𑀘𑁂 𑀬𑀼𑀚𑁆𑀛𑀺𑀢𑀼𑀓𑀸𑀫𑁄𑀲𑀺, 𑀚𑀬𑀁 𑀲𑀫𑁆𑀫 𑀤𑀤𑀸𑀫𑀺 𑀢𑁂’’𑀢𑀺. (𑀚𑀸. 𑁧.𑁨.𑁫-𑁬) 𑁋

𑀇𑀫𑀁 𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀲𑀺. 𑀢𑀤𑀸 𑀲𑀻𑀳𑁄 𑀲𑀸𑀭𑀺𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀲𑀽𑀓𑀭𑁄 𑀮𑀸𑀮𑀼𑀤𑀸𑀬𑀻𑀢𑀺. 𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀮𑀸𑀮𑀼𑀤𑀸𑀬𑀺𑀦𑀸 𑀅𑀧𑁆𑀧𑀫𑀢𑁆𑀢𑀓𑁄𑀯 𑀥𑀫𑁆𑀫𑁄 𑀉𑀕𑁆𑀕𑀳𑀺𑀢𑁄, 𑀲𑀚𑁆𑀛𑀸𑀬𑀁 𑀧𑀦 𑀦𑁂𑀯 𑀅𑀓𑀸𑀲𑀺, 𑀓𑀺𑀜𑁆𑀘𑀺 𑀧𑀭𑀺𑀬𑀢𑁆𑀢𑀺𑀁 𑀉𑀕𑁆𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀅𑀲𑀚𑁆𑀛𑀸𑀬𑀓𑀭𑀡𑀁 𑀫𑀮𑀫𑁂𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁪𑁧. ‘‘𑀅𑀲𑀚𑁆𑀛𑀸𑀬𑀫𑀮𑀸 𑀫𑀦𑁆𑀢𑀸, 𑀅𑀦𑀼𑀝𑁆𑀞𑀸𑀦𑀫𑀮𑀸 𑀖𑀭𑀸;

𑀫𑀮𑀁 𑀯𑀡𑁆𑀡𑀲𑁆𑀲 𑀓𑁄𑀲𑀚𑁆𑀚𑀁, 𑀧𑀫𑀸𑀤𑁄 𑀭𑀓𑁆𑀔𑀢𑁄 𑀫𑀮’’𑀦𑁆𑀢𑀺.

𑀢𑀢𑁆𑀣 𑀅𑀲𑀚𑁆𑀛𑀸𑀬𑀫𑀮𑀸𑀢𑀺 𑀬𑀸𑀓𑀸𑀘𑀺 𑀧𑀭𑀺𑀬𑀢𑁆𑀢𑀺 𑀯𑀸 𑀲𑀺𑀧𑁆𑀧𑀁 𑀯𑀸 𑀬𑀲𑁆𑀫𑀸 𑀅𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀅𑀦𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀯𑀺𑀦𑀲𑁆𑀲𑀢𑀺 𑀯𑀸 𑀦𑀺𑀭𑀦𑁆𑀢𑀭𑀁 𑀯𑀸 𑀦 𑀉𑀧𑀝𑁆𑀞𑀸𑀢𑀺, 𑀢𑀲𑁆𑀫𑀸 ‘‘𑀅𑀲𑀚𑁆𑀛𑀸𑀬𑀫𑀮𑀸 𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑀲𑁆𑀲 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀚𑀺𑀡𑁆𑀡𑀧𑀝𑀺𑀲𑀗𑁆𑀔𑀭𑀡𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑀲𑁆𑀲 𑀖𑀭𑀁 𑀦𑀸𑀫 𑀯𑀺𑀦𑀲𑁆𑀲𑀢𑀺, 𑀢𑀲𑁆𑀫𑀸 ‘‘𑀅𑀦𑀼𑀝𑁆𑀞𑀸𑀦𑀫𑀮𑀸 𑀖𑀭𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀕𑀺𑀳𑀺𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀓𑁄𑀲𑀚𑁆𑀚𑀯𑀲𑁂𑀦 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀯𑀸 𑀧𑀭𑀺𑀓𑁆𑀔𑀸𑀭𑀧𑀝𑀺𑀚𑀕𑁆𑀕𑀦𑀁 𑀯𑀸 𑀅𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑁄 𑀤𑀼𑀩𑁆𑀩𑀡𑁆𑀡𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀫𑀮𑀁 𑀯𑀡𑁆𑀡𑀲𑁆𑀲 𑀓𑁄𑀲𑀚𑁆𑀚’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀕𑀸𑀯𑁄 𑀭𑀓𑁆𑀔𑀦𑁆𑀢𑀲𑁆𑀲 𑀧𑀫𑀸𑀤𑀯𑀲𑁂𑀦 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀯𑀸 𑀓𑀻𑀴𑀦𑁆𑀢𑀲𑁆𑀲 𑀯𑀸 𑀢𑀸 𑀕𑀸𑀯𑁄 𑀅𑀢𑀺𑀢𑁆𑀣𑀧𑀓𑁆𑀔𑀦𑁆𑀤𑀦𑀸𑀤𑀺𑀦𑀸 𑀯𑀸 𑀯𑀸𑀴𑀫𑀺𑀕𑀘𑁄𑀭𑀸𑀤𑀺𑀉𑀧𑀤𑁆𑀤𑀯𑁂𑀦 𑀯𑀸 𑀧𑀭𑁂𑀲𑀁 𑀲𑀸𑀮𑀺𑀔𑁂𑀢𑁆𑀢𑀸𑀤𑀻𑀦𑀺 𑀑𑀢𑀭𑀺𑀢𑁆𑀯𑀸 𑀔𑀸𑀤𑀦𑀯𑀲𑁂𑀦 𑀯𑀺𑀦𑀸𑀲𑀁 𑀆𑀧𑀚𑁆𑀚𑀦𑁆𑀢𑀺, 𑀲𑀬𑀫𑁆𑀧𑀺 𑀤𑀡𑁆𑀟𑀁 𑀯𑀸 𑀧𑀭𑀺𑀪𑀸𑀲𑀁 𑀯𑀸 𑀧𑀸𑀧𑀼𑀡𑀸𑀢𑀺, 𑀧𑀩𑁆𑀩𑀚𑀺𑀢𑀁 𑀯𑀸 𑀧𑀦 𑀙 𑀤𑁆𑀯𑀸𑀭𑀸𑀦𑀺 𑀅𑀭𑀓𑁆𑀔𑀦𑁆𑀢𑀁 𑀧𑀫𑀸𑀤𑀯𑀲𑁂𑀦 𑀓𑀺𑀮𑁂𑀲𑀸 𑀑𑀢𑀭𑀺𑀢𑁆𑀯𑀸 𑀲𑀸𑀲𑀦𑀸 𑀘𑀸𑀯𑁂𑀦𑁆𑀢𑀺, 𑀢𑀲𑁆𑀫𑀸 ‘‘𑀧𑀫𑀸𑀤𑁄 𑀭𑀓𑁆𑀔𑀢𑁄 𑀫𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑁄 𑀳𑀺𑀲𑁆𑀲 𑀯𑀺𑀦𑀸𑀲𑀸𑀯𑀳𑀦𑁂𑀦 𑀫𑀮𑀝𑁆𑀞𑀸𑀦𑀺𑀬𑀢𑁆𑀢𑀸 𑀫𑀮𑀦𑁆𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀮𑀸𑀮𑀼𑀤𑀸𑀬𑀺𑀢𑁆𑀣𑁂𑀭𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀅𑀜𑁆𑀜𑀢𑀭𑀓𑀼𑀮𑀧𑀼𑀢𑁆𑀢𑀯𑀢𑁆𑀣𑀼

𑀫𑀮𑀺𑀢𑁆𑀣𑀺𑀬𑀸 𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀓𑀼𑀮𑀧𑀼𑀢𑁆𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀲𑁆𑀲 𑀓𑀺𑀭 𑀲𑀫𑀸𑀦𑀚𑀸𑀢𑀺𑀓𑀁 𑀓𑀼𑀮𑀓𑀼𑀫𑀸𑀭𑀺𑀓𑀁 𑀆𑀦𑁂𑀲𑀼𑀁. 𑀲𑀸 𑀆𑀦𑀻𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀅𑀢𑀺𑀘𑀸𑀭𑀺𑀦𑀻 𑀅𑀳𑁄𑀲𑀺. 𑀲𑁄 𑀓𑀼𑀮𑀧𑀼𑀢𑁆𑀢𑁄 𑀢𑀲𑁆𑀲𑀸 𑀅𑀢𑀺𑀘𑀸𑀭𑁂𑀦 𑀮𑀚𑁆𑀚𑀺𑀢𑁄 𑀓𑀲𑁆𑀲𑀘𑀺 𑀲𑀫𑁆𑀫𑀼𑀔𑀻𑀪𑀸𑀯𑀁 𑀉𑀧𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀸𑀤𑀻𑀦𑀺 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 ‘‘𑀓𑀺𑀁, 𑀉𑀧𑀸𑀲𑀓, 𑀦 𑀤𑀺𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑁂 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀲𑀢𑁆𑀣𑀸, ‘‘𑀉𑀧𑀸𑀲𑀓, 𑀧𑀼𑀩𑁆𑀩𑁂𑀧𑀺 𑀫𑀬𑀸 ‘𑀇𑀢𑁆𑀣𑀺𑀬𑁄 𑀦𑀸𑀫 𑀦𑀤𑀻𑀆𑀤𑀺𑀲𑀤𑀺𑀲𑀸, 𑀢𑀸𑀲𑀼 𑀧𑀡𑁆𑀟𑀺𑀢𑁂𑀦 𑀓𑁄𑀥𑁄 𑀦 𑀓𑀸𑀢𑀩𑁆𑀩𑁄’𑀢𑀺 𑀯𑀼𑀢𑁆𑀢𑀁, 𑀢𑁆𑀯𑀁 𑀧𑀦 𑀪𑀯𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀦 𑀲𑀮𑁆𑀮𑀓𑁆𑀔𑁂𑀲𑀻’’𑀢𑀺 𑀯𑀢𑁆𑀯𑀸 𑀢𑁂𑀦 𑀬𑀸𑀘𑀺𑀢𑁄 𑁋

‘‘𑀬𑀣𑀸 𑀦𑀤𑀻 𑀘 𑀧𑀦𑁆𑀣𑁄 𑀘, 𑀧𑀸𑀦𑀸𑀕𑀸𑀭𑀁 𑀲𑀪𑀸 𑀧𑀧𑀸;

𑀏𑀯𑀁 𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫, 𑀯𑁂𑀮𑀸 𑀢𑀸𑀲𑀁 𑀦 𑀯𑀺𑀚𑁆𑀚𑀢𑀻’’𑀢𑀺. (𑀚𑀸. 𑁧.𑁧.𑁬𑁫; 𑁧.𑁧𑁨.𑁯) 𑁋

𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸, ‘‘𑀉𑀧𑀸𑀲𑀓, 𑀇𑀢𑁆𑀣𑀺𑀬𑀸 𑀳𑀺 𑀅𑀢𑀺𑀘𑀸𑀭𑀺𑀦𑀺𑀪𑀸𑀯𑁄 𑀫𑀮𑀁, 𑀤𑀸𑀦𑀁 𑀤𑁂𑀦𑁆𑀢𑀲𑁆𑀲 𑀫𑀘𑁆𑀙𑁂𑀭𑀁 𑀫𑀮𑀁, 𑀇𑀥𑀮𑁄𑀓𑀧𑀭𑀮𑁄𑀓𑁂𑀲𑀼 𑀲𑀢𑁆𑀢𑀸𑀦𑀁 𑀅𑀓𑀼𑀲𑀮𑀓𑀫𑁆𑀫𑀁 𑀯𑀺𑀦𑀸𑀲𑀦𑀢𑁆𑀣𑁂𑀦 𑀫𑀮𑀁, 𑀅𑀯𑀺𑀚𑁆𑀚𑀸 𑀧𑀦 𑀲𑀩𑁆𑀩𑀫𑀮𑀸𑀦𑀁 𑀉𑀢𑁆𑀢𑀫𑀫𑀮’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁪𑁨. ‘‘𑀫𑀮𑀺𑀢𑁆𑀣𑀺𑀬𑀸 𑀤𑀼𑀘𑁆𑀘𑀭𑀺𑀢𑀁, 𑀫𑀘𑁆𑀙𑁂𑀭𑀁 𑀤𑀤𑀢𑁄 𑀫𑀮𑀁;

𑀫𑀮𑀸 𑀯𑁂 𑀧𑀸𑀧𑀓𑀸 𑀥𑀫𑁆𑀫𑀸, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘.

𑁨𑁪𑁩. ‘‘𑀢𑀢𑁄 𑀫𑀮𑀸 𑀫𑀮𑀢𑀭𑀁, 𑀅𑀯𑀺𑀚𑁆𑀚𑀸 𑀧𑀭𑀫𑀁 𑀫𑀮𑀁;

𑀏𑀢𑀁 𑀫𑀮𑀁 𑀧𑀳𑀦𑁆𑀢𑁆𑀯𑀸𑀦, 𑀦𑀺𑀫𑁆𑀫𑀮𑀸 𑀳𑁄𑀣 𑀪𑀺𑀓𑁆𑀔𑀯𑁄’’𑀢𑀺.

𑀢𑀢𑁆𑀣 𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀅𑀢𑀺𑀘𑀸𑀭𑁄. 𑀅𑀢𑀺𑀘𑀸𑀭𑀺𑀦𑀺𑀜𑁆𑀳𑀺 𑀇𑀢𑁆𑀣𑀺𑀁 𑀲𑀸𑀫𑀺𑀓𑁄𑀧𑀺 𑀕𑁂𑀳𑀸 𑀦𑀻𑀳𑀭𑀢𑀺, 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑀁 𑀕𑀢𑀫𑁆𑀧𑀺 ‘‘𑀢𑁆𑀯𑀁 𑀓𑀼𑀮𑀲𑁆𑀲 𑀅𑀕𑀸𑀭𑀯𑀪𑀽𑀢𑀸, 𑀅𑀓𑁆𑀔𑀻𑀳𑀺𑀧𑀺 𑀦 𑀤𑀝𑁆𑀞𑀩𑁆𑀩𑀸’’𑀢𑀺 𑀢𑀁 𑀦𑀻𑀳𑀭𑀦𑁆𑀢𑀺. 𑀲𑀸 𑀅𑀦𑀸𑀣𑀸 𑀯𑀺𑀘𑀭𑀦𑁆𑀢𑀻 𑀫𑀳𑀸𑀤𑀼𑀓𑁆𑀔𑀁 𑀧𑀸𑀧𑀼𑀡𑀸𑀢𑀺. 𑀢𑁂𑀦𑀲𑁆𑀲𑀸 𑀤𑀼𑀘𑁆𑀘𑀭𑀺𑀢𑀁 ‘‘𑀫𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀤𑀢𑁄𑀢𑀺 𑀤𑀸𑀬𑀓𑀲𑁆𑀲. 𑀬𑀲𑁆𑀲 𑀳𑀺 𑀔𑁂𑀢𑁆𑀢𑀓𑀲𑀦𑀓𑀸𑀮𑁂 ‘‘𑀇𑀫𑀲𑁆𑀫𑀺𑀁 𑀔𑁂𑀢𑁆𑀢𑁂 𑀲𑀫𑁆𑀧𑀦𑁆𑀦𑁂 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀧𑁆𑀨𑀦𑁆𑀦𑁂 𑀲𑀲𑁆𑀲𑁂𑀧𑀺 𑀫𑀘𑁆𑀙𑁂𑀭𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀸𑀕𑀘𑀺𑀢𑁆𑀢𑀁 𑀦𑀺𑀯𑀸𑀭𑁂𑀢𑀺, 𑀲𑁄 𑀫𑀘𑁆𑀙𑁂𑀭𑀯𑀲𑁂𑀦 𑀘𑀸𑀕𑀘𑀺𑀢𑁆𑀢𑁂 𑀅𑀯𑀺𑀭𑀽𑀳𑀦𑁆𑀢𑁂 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀢𑀺𑀲𑁆𑀲𑁄 𑀲𑀫𑁆𑀧𑀢𑁆𑀢𑀺𑀬𑁄 𑀦 𑀮𑀪𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀫𑀘𑁆𑀙𑁂𑀭𑀁 𑀤𑀤𑀢𑁄 𑀫𑀮’’𑀦𑁆𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀸𑀧𑀓𑀸 𑀥𑀫𑁆𑀫𑀸𑀢𑀺 𑀅𑀓𑀼𑀲𑀮𑀥𑀫𑁆𑀫𑀸 𑀧𑀦 𑀇𑀥𑀮𑁄𑀓𑁂 𑀘 𑀧𑀭𑀮𑁄𑀓𑁂 𑀘 𑀫𑀮𑀫𑁂𑀯.

𑀢𑀢𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑀮𑀢𑁄. 𑀫𑀮𑀢𑀭𑀦𑁆𑀢𑀺 𑀅𑀢𑀺𑀭𑁂𑀓𑀫𑀮𑀁 𑀯𑁄 𑀓𑀣𑁂𑀫𑀻𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀢𑀺 𑀅𑀝𑁆𑀞𑀯𑀢𑁆𑀣𑀼𑀓𑀁 𑀅𑀜𑁆𑀜𑀸𑀡𑀫𑁂𑀯 𑀧𑀭𑀫𑀁 𑀫𑀮𑀁. 𑀧𑀳𑀦𑁆𑀢𑁆𑀯𑀸𑀦𑀸𑀢𑀺 𑀏𑀢𑀁 𑀫𑀮𑀁 𑀚𑀳𑀺𑀢𑁆𑀯𑀸, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂 𑀦𑀺𑀫𑁆𑀫𑀮𑀸 𑀳𑁄𑀣𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀅𑀜𑁆𑀜𑀢𑀭𑀓𑀼𑀮𑀧𑀼𑀢𑁆𑀢𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀘𑀽𑀴𑀲𑀸𑀭𑀺𑀯𑀢𑁆𑀣𑀼

𑀲𑀼𑀚𑀻𑀯𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀘𑀽𑀴𑀲𑀸𑀭𑀺𑀁 𑀦𑀸𑀫 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀏𑀓𑀤𑀺𑀯𑀲𑁂 𑀯𑁂𑀚𑁆𑀚𑀓𑀫𑁆𑀫𑀁 𑀓𑀢𑁆𑀯𑀸 𑀧𑀡𑀻𑀢𑀪𑁄𑀚𑀦𑀁 𑀮𑀪𑀺𑀢𑁆𑀯𑀸 𑀆𑀤𑀸𑀬 𑀦𑀺𑀓𑁆𑀔𑀫𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀣𑁂𑀭𑀁 𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂, 𑀇𑀤𑀁 𑀫𑀬𑀸 𑀯𑁂𑀚𑁆𑀚𑀓𑀫𑁆𑀫𑀁 𑀓𑀢𑁆𑀯𑀸 𑀮𑀤𑁆𑀥𑀁, 𑀢𑀼𑀫𑁆𑀳𑁂 𑀅𑀜𑁆𑀜𑀢𑁆𑀣 𑀏𑀯𑀭𑀽𑀧𑀁 𑀪𑁄𑀚𑀦𑀁 𑀦 𑀮𑀪𑀺𑀲𑁆𑀲𑀣, 𑀇𑀫𑀁 𑀪𑀼𑀜𑁆𑀚𑀣, 𑀅𑀳𑀁 𑀢𑁂 𑀯𑁂𑀚𑁆𑀚𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀘𑁆𑀘𑀓𑀸𑀮𑀁 𑀏𑀯𑀭𑀽𑀧𑀁 𑀆𑀳𑀸𑀭𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀣𑁂𑀭𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁄𑀯 𑀧𑀓𑁆𑀓𑀸𑀫𑀺. 𑀪𑀺𑀓𑁆𑀔𑀽 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸, ‘‘𑀪𑀺𑀓𑁆𑀔𑀯𑁂, 𑀅𑀳𑀺𑀭𑀺𑀓𑁄 𑀦𑀸𑀫 𑀧𑀕𑀩𑁆𑀪𑁄 𑀓𑀸𑀓𑀲𑀤𑀺𑀲𑁄 𑀳𑀼𑀢𑁆𑀯𑀸 𑀏𑀓𑀯𑀻𑀲𑀢𑀺𑀯𑀺𑀥𑀸𑀬 𑀅𑀦𑁂𑀲𑀦𑀸𑀬 𑀞𑀢𑁆𑀯𑀸 𑀲𑀼𑀔𑀁 𑀚𑀻𑀯𑀢𑀺, 𑀳𑀺𑀭𑀺𑀑𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑁄 𑀧𑀦 𑀤𑀼𑀓𑁆𑀔𑀁 𑀚𑀻𑀯𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁪𑁪. ‘‘𑀲𑀼𑀚𑀻𑀯𑀁 𑀅𑀳𑀺𑀭𑀺𑀓𑁂𑀦, 𑀓𑀸𑀓𑀲𑀽𑀭𑁂𑀦 𑀥𑀁𑀲𑀺𑀦𑀸;

𑀧𑀓𑁆𑀔𑀦𑁆𑀤𑀺𑀦𑀸 𑀧𑀕𑀩𑁆𑀪𑁂𑀦, 𑀲𑀁𑀓𑀺𑀮𑀺𑀝𑁆𑀞𑁂𑀦 𑀚𑀻𑀯𑀺𑀢𑀁.

𑁨𑁪𑁫. ‘‘𑀳𑀺𑀭𑀻𑀫𑀢𑀸 𑀘 𑀤𑀼𑀚𑁆𑀚𑀻𑀯𑀁, 𑀦𑀺𑀘𑁆𑀘𑀁 𑀲𑀼𑀘𑀺𑀕𑀯𑁂𑀲𑀺𑀦𑀸;

𑀅𑀮𑀻𑀦𑁂𑀦𑀸𑀧𑁆𑀧𑀕𑀩𑁆𑀪𑁂𑀦, 𑀲𑀼𑀤𑁆𑀥𑀸𑀚𑀻𑀯𑁂𑀦 𑀧𑀲𑁆𑀲𑀢𑀸’’𑀢𑀺.

𑀢𑀢𑁆𑀣 𑀅𑀳𑀺𑀭𑀺𑀓𑁂𑀦𑀸𑀢𑀺 𑀙𑀺𑀦𑁆𑀦𑀳𑀺𑀭𑁄𑀢𑁆𑀢𑀧𑁆𑀧𑀓𑁂𑀦. 𑀏𑀯𑀭𑀽𑀧𑁂𑀦 𑀳𑀺 𑀅𑀫𑀸𑀢𑀭𑀫𑁂𑀯 ‘‘𑀫𑀸𑀢𑀸 𑀫𑁂’’𑀢𑀺 𑀅𑀧𑀺𑀢𑀸𑀤𑀬𑁄 𑀏𑀯 𑀘 ‘‘𑀧𑀺𑀢𑀸 𑀫𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀢𑁆𑀯𑀸 𑀏𑀓𑀯𑀻𑀲𑀢𑀺𑀯𑀺𑀥𑀸𑀬 𑀅𑀦𑁂𑀲𑀦𑀸𑀬 𑀧𑀢𑀺𑀝𑁆𑀞𑀸𑀬 𑀲𑀼𑀔𑁂𑀦 𑀚𑀻𑀯𑀢𑀼𑀁 𑀲𑀓𑁆𑀓𑀸. 𑀓𑀸𑀓𑀲𑀽𑀭𑁂𑀦𑀸𑀢𑀺 𑀲𑀽𑀭𑀓𑀸𑀓𑀲𑀤𑀺𑀲𑁂𑀦. 𑀬𑀣𑀸 𑀳𑀺 𑀲𑀽𑀭𑀓𑀸𑀓𑁄 𑀓𑀼𑀮𑀖𑀭𑁂𑀲𑀼 𑀬𑀸𑀕𑀼𑀆𑀤𑀻𑀦𑀺 𑀕𑀡𑁆𑀳𑀺𑀢𑀼𑀓𑀸𑀫𑁄 𑀪𑀺𑀢𑁆𑀢𑀺𑀆𑀤𑀻𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀑𑀮𑁄𑀓𑀦𑀪𑀸𑀯𑀁 𑀜𑀢𑁆𑀯𑀸 𑀅𑀦𑁄𑀮𑁄𑀓𑁂𑀦𑁆𑀢𑁄 𑀯𑀺𑀬 𑀅𑀜𑁆𑀜𑀯𑀺𑀳𑀺𑀢𑀓𑁄 𑀯𑀺𑀬 𑀦𑀺𑀤𑁆𑀤𑀸𑀬𑀦𑁆𑀢𑁄 𑀯𑀺𑀬 𑀘 𑀳𑀼𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀧𑀫𑀸𑀤𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀦𑀼𑀧𑀢𑀺𑀢𑁆𑀯𑀸 ‘‘𑀲𑀽𑀲𑀽’’𑀢𑀺 𑀯𑀤𑀦𑁆𑀢𑁂𑀲𑀼𑀬𑁂𑀯 𑀪𑀸𑀚𑀦𑀢𑁄 𑀫𑀼𑀔𑀧𑀽𑀭𑀁 𑀕𑀳𑁂𑀢𑁆𑀯𑀸 𑀧𑀮𑀸𑀬𑀢𑀺, 𑀏𑀯𑀫𑁂𑀯𑀁 𑀅𑀳𑀺𑀭𑀺𑀓𑀧𑀼𑀕𑁆𑀕𑀮𑁄𑀧𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀬𑀸𑀕𑀼𑀪𑀢𑁆𑀢𑀝𑁆𑀞𑀸𑀦𑀸𑀤𑀻𑀦𑀺 𑀯𑀯𑀢𑁆𑀣𑀧𑁂𑀢𑀺. 𑀢𑀢𑁆𑀣 𑀪𑀺𑀓𑁆𑀔𑀽 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀬𑀸𑀧𑀦𑀫𑀢𑁆𑀢𑀁 𑀆𑀤𑀸𑀬 𑀆𑀲𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀸 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀦𑁆𑀢𑀺 𑀲𑀚𑁆𑀛𑀸𑀬𑀦𑁆𑀢𑀺 𑀆𑀲𑀦𑀲𑀸𑀮𑀁 𑀲𑀫𑁆𑀫𑀚𑁆𑀚𑀦𑁆𑀢𑀺. 𑀅𑀬𑀁 𑀧𑀦 𑀅𑀓𑀢𑁆𑀯𑀸 𑀕𑀸𑀫𑀸𑀪𑀺𑀫𑀼𑀔𑁄𑀯 𑀳𑁄𑀢𑀺.

𑀲𑁄 𑀳𑀺 𑀪𑀺𑀓𑁆𑀔𑀽𑀳𑀺 ‘‘𑀧𑀲𑁆𑀲𑀣𑀺𑀫’’𑀦𑁆𑀢𑀺 𑀑𑀮𑁄𑀓𑀺𑀬𑀫𑀸𑀦𑁄𑀧𑀺 𑀅𑀦𑁄𑀮𑁄𑀓𑁂𑀦𑁆𑀢𑁄 𑀯𑀺𑀬 𑀅𑀜𑁆𑀜𑀯𑀺𑀳𑀺𑀢𑁄 𑀯𑀺𑀬 𑀦𑀺𑀤𑁆𑀤𑀸𑀬𑀦𑁆𑀢𑁄 𑀯𑀺𑀬 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀦𑁆𑀢𑁄 𑀯𑀺𑀬 𑀘𑀻𑀯𑀭𑀁 𑀲𑀁𑀯𑀺𑀤𑀳𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 ‘‘𑀅𑀲𑀼𑀓𑀁 𑀦𑀸𑀫 𑀫𑁂 𑀓𑀫𑁆𑀫𑀁 𑀅𑀢𑁆𑀣𑀻’’𑀢𑀺 𑀯𑀤𑀦𑁆𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀧𑀸𑀢𑁄𑀯 𑀯𑀯𑀢𑁆𑀣𑀧𑀺𑀢𑀕𑁂𑀳𑁂𑀲𑀼 𑀅𑀜𑁆𑀜𑀢𑀭𑀁 𑀕𑁂𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀖𑀭𑀫𑀸𑀦𑀼𑀲𑀓𑁂𑀲𑀼 𑀣𑁄𑀓𑀁 𑀓𑀯𑀸𑀝𑀁 𑀧𑀺𑀥𑀸𑀬 𑀤𑁆𑀯𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀦𑁆𑀤𑀦𑁆𑀢𑁂𑀲𑀼𑀧𑀺 𑀏𑀓𑁂𑀦 𑀳𑀢𑁆𑀣𑁂𑀦 𑀓𑀯𑀸𑀝𑀁 𑀧𑀡𑀸𑀫𑁂𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀲𑀢𑀺. 𑀅𑀣 𑀦𑀁 𑀤𑀺𑀲𑁆𑀯𑀸 𑀅𑀓𑀸𑀫𑀓𑀸𑀧𑀺 𑀆𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀆𑀤𑀻𑀲𑀼 𑀬𑀁 𑀅𑀢𑁆𑀣𑀺, 𑀢𑀁 𑀤𑁂𑀦𑁆𑀢𑀺. 𑀲𑁄 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀯𑀲𑁂𑀲𑀁 𑀧𑀢𑁆𑀢𑁂𑀦𑀸𑀤𑀸𑀬 𑀧𑀓𑁆𑀓𑀫𑀢𑀺. 𑀅𑀬𑀁 𑀓𑀸𑀓𑀲𑀽𑀭𑁄 𑀦𑀸𑀫. 𑀏𑀯𑀭𑀽𑀧𑁂𑀦 𑀅𑀳𑀺𑀭𑀺𑀓𑁂𑀦 𑀲𑀼𑀚𑀻𑀯𑀦𑁆𑀢𑀺 𑀅𑀢𑁆𑀣𑁄.

𑀥𑀁𑀲𑀺𑀦𑀸𑀢𑀺 ‘‘𑀅𑀲𑀼𑀓𑀢𑁆𑀣𑁂𑀭𑁄 𑀦𑀸𑀫 𑀅𑀧𑁆𑀧𑀺𑀘𑁆𑀙𑁄’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁂𑀲𑀼 𑁋 ‘‘𑀓𑀺𑀁 𑀧𑀦 𑀫𑀬𑀁 𑀦 𑀅𑀧𑁆𑀧𑀺𑀘𑁆𑀙𑀸’’𑀢𑀺𑀆𑀤𑀺𑀯𑀘𑀦𑁂𑀦 𑀧𑀭𑁂𑀲𑀁 𑀕𑀼𑀡𑀥𑀁𑀲𑀦𑀢𑀸𑀬 𑀥𑀁𑀲𑀺𑀦𑀸. 𑀢𑀣𑀸𑀭𑀽𑀧𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀬𑀫𑁆𑀧𑀺 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑁂 𑀬𑀼𑀢𑁆𑀢𑁄’’𑀢𑀺 𑀫𑀜𑁆𑀜𑀫𑀸𑀦𑀸 𑀫𑀦𑀼𑀲𑁆𑀲𑀸 𑀤𑀸𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. 𑀲𑁄 𑀧𑀦 𑀢𑀢𑁄 𑀧𑀝𑁆𑀞𑀸𑀬 𑀯𑀺𑀜𑁆𑀜𑀽𑀧𑀼𑀭𑀺𑀲𑀸𑀦𑀁 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀫𑁆𑀳𑀸𑀧𑀺 𑀮𑀸𑀪𑀸 𑀧𑀭𑀺𑀳𑀸𑀬𑀢𑀺. 𑀏𑀯𑀁 𑀥𑀁𑀲𑀺𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁄𑀧𑀺 𑀧𑀭𑀲𑁆𑀲𑀧𑀺 𑀮𑀸𑀪𑀁 𑀦𑀸𑀲𑁂𑀢𑀺𑀬𑁂𑀯.

𑀧𑀓𑁆𑀔𑀦𑁆𑀤𑀺𑀦𑀸𑀢𑀺 𑀧𑀓𑁆𑀔𑀦𑁆𑀤𑀘𑀸𑀭𑀺𑀦𑀸. 𑀧𑀭𑁂𑀲𑀁 𑀓𑀺𑀘𑁆𑀘𑀸𑀦𑀺𑀧𑀺 𑀅𑀢𑁆𑀢𑀦𑁄 𑀓𑀺𑀘𑁆𑀘𑀸𑀦𑀺 𑀯𑀺𑀬 𑀤𑀲𑁆𑀲𑁂𑀦𑁆𑀢𑁄 𑀧𑀸𑀢𑁄𑀯 𑀪𑀺𑀓𑁆𑀔𑀽𑀲𑀼 𑀘𑁂𑀢𑀺𑀬𑀗𑁆𑀕𑀡𑀸𑀤𑀻𑀲𑀼 𑀯𑀢𑁆𑀢𑀁 𑀓𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁂𑀦 𑀣𑁄𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀉𑀝𑁆𑀞𑀸𑀬 𑀕𑀸𑀫𑀁 𑀧𑀯𑀺𑀲𑀦𑁆𑀢𑁂𑀲𑀼 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀧𑀡𑁆𑀟𑀼𑀓𑀸𑀲𑀸𑀯𑀧𑀸𑀭𑀼𑀧𑀦𑀅𑀓𑁆𑀔𑀺𑀅𑀜𑁆𑀚𑀦𑀲𑀻𑀲𑀫𑀓𑁆𑀔𑀦𑀸𑀤𑀻𑀳𑀺 𑀅𑀢𑁆𑀢𑀪𑀸𑀯𑀁 𑀫𑀡𑁆𑀟𑁂𑀢𑁆𑀯𑀸 𑀲𑀫𑁆𑀫𑀚𑁆𑀚𑀦𑁆𑀢𑁄 𑀯𑀺𑀬 𑀤𑁆𑀯𑁂 𑀢𑀬𑁄 𑀲𑀫𑁆𑀫𑀚𑁆𑀚𑀦𑀺𑀧𑀳𑀸𑀭𑁂 𑀤𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑀸𑀪𑀺𑀫𑀼𑀔𑁄 𑀳𑁄𑀢𑀺. 𑀫𑀦𑀼𑀲𑁆𑀲𑀸 𑀧𑀸𑀢𑁄𑀯 ‘‘𑀘𑁂𑀢𑀺𑀬𑀁 𑀯𑀦𑁆𑀤𑀺𑀲𑁆𑀲𑀸𑀫, 𑀫𑀸𑀮𑀸𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀢𑀸 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀯𑀺𑀳𑀸𑀭𑁄 𑀇𑀫𑀁 𑀤𑀳𑀭𑀁 𑀦𑀺𑀲𑁆𑀲𑀸𑀬 𑀧𑀝𑀺𑀚𑀕𑁆𑀕𑀦𑀁 𑀮𑀪𑀢𑀺, 𑀇𑀫𑀁 𑀫𑀸 𑀧𑀫𑀚𑁆𑀚𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀤𑀸𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. 𑀏𑀯𑀭𑀽𑀧𑁂𑀦 𑀧𑀓𑁆𑀔𑀦𑁆𑀤𑀺𑀦𑀸𑀧𑀺 𑀲𑀼𑀚𑀻𑀯𑀁. 𑀧𑀕𑀩𑁆𑀪𑁂𑀦𑀸𑀢𑀺 𑀓𑀸𑀬𑀧𑀸𑀕𑀩𑁆𑀪𑀺𑀬𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁂𑀦. 𑀲𑀁𑀓𑀺𑀮𑀺𑀝𑁆𑀞𑁂𑀦 𑀚𑀻𑀯𑀺𑀢𑀦𑁆𑀢𑀺 𑀏𑀯𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑁆𑀯𑀸 𑀚𑀻𑀯𑀦𑁆𑀢𑁂𑀦 𑀳𑀺 𑀧𑀼𑀕𑁆𑀕𑀮𑁂𑀦 𑀲𑀁𑀓𑀺𑀮𑀺𑀝𑁆𑀞𑁂𑀦 𑀳𑀼𑀢𑁆𑀯𑀸 𑀚𑀻𑀯𑀺𑀢𑀁 𑀦𑀸𑀫 𑀳𑁄𑀢𑀺, 𑀢𑀁 𑀤𑀼𑀚𑁆𑀚𑀻𑀯𑀺𑀢𑀁 𑀧𑀸𑀧𑀫𑁂𑀯𑀸𑀢𑀺 𑀅𑀢𑁆𑀣𑁄.

𑀳𑀺𑀭𑀻𑀫𑀢𑀸 𑀘𑀸𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑁂𑀦 𑀧𑀼𑀕𑁆𑀕𑀮𑁂𑀦 𑀤𑀼𑀚𑁆𑀚𑀻𑀯𑀁. 𑀲𑁄 𑀳𑀺 𑀅𑀫𑀸𑀢𑀸𑀤𑀬𑁄𑀯 ‘‘𑀫𑀸𑀢𑀸 𑀫𑁂’’𑀢𑀺𑀆𑀤𑀻𑀦𑀺 𑀅𑀯𑀢𑁆𑀯𑀸 𑀅𑀥𑀫𑁆𑀫𑀺𑀓𑁂 𑀧𑀘𑁆𑀘𑀬𑁂 𑀕𑀽𑀣𑀁 𑀯𑀺𑀬 𑀚𑀺𑀕𑀼𑀘𑁆𑀙𑀦𑁆𑀢𑁄 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀭𑀺𑀬𑁂𑀲𑀦𑁆𑀢𑁄 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀮𑀽𑀔𑀁 𑀚𑀻𑀯𑀺𑀓𑀁 𑀚𑀻𑀯𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀘𑀺𑀕𑀯𑁂𑀲𑀺𑀦𑀸𑀢𑀺 𑀲𑀼𑀘𑀻𑀦𑀺 𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀕𑀯𑁂𑀲𑀦𑁆𑀢𑁂𑀦. 𑀅𑀮𑀻𑀦𑁂𑀦𑀸𑀢𑀺 𑀚𑀻𑀯𑀺𑀢𑀯𑀼𑀢𑁆𑀢𑀺𑀫𑀦𑀮𑁆𑀮𑀻𑀦𑁂𑀦. 𑀲𑀼𑀤𑁆𑀥𑀸𑀚𑀻𑀯𑁂𑀦 𑀧𑀲𑁆𑀲𑀢𑀸𑀢𑀺 𑀏𑀯𑀭𑀽𑀧𑁄 𑀳𑀺 𑀧𑀼𑀕𑁆𑀕𑀮𑁄 𑀲𑀼𑀤𑁆𑀥𑀸𑀚𑀻𑀯𑁄 𑀦𑀸𑀫 𑀳𑁄𑀢𑀺. 𑀢𑁂𑀦 𑀏𑀯𑀁 𑀲𑀼𑀤𑁆𑀥𑀸𑀚𑀻𑀯𑁂𑀦 𑀢𑀫𑁂𑀯 𑀲𑀼𑀤𑁆𑀥𑀸𑀚𑀻𑀯𑀁 𑀲𑀸𑀭𑀢𑁄 𑀧𑀲𑁆𑀲𑀢𑀸 𑀮𑀽𑀔𑀚𑀻𑀯𑀺𑀢𑀯𑀲𑁂𑀦 𑀤𑀼𑀚𑁆𑀚𑀻𑀯𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀘𑀽𑀴𑀲𑀸𑀭𑀺𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀧𑀜𑁆𑀘𑀉𑀧𑀸𑀲𑀓𑀯𑀢𑁆𑀣𑀼

𑀬𑁄 𑀧𑀸𑀡𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀘 𑀉𑀧𑀸𑀲𑀓𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂𑀲𑀼 𑀳𑀺 𑀏𑀓𑁄 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀲𑀺𑀓𑁆𑀔𑀸𑀧𑀤𑀫𑁂𑀯 𑀭𑀓𑁆𑀔𑀢𑀺, 𑀇𑀢𑀭𑁂 𑀇𑀢𑀭𑀸𑀦𑀺. 𑀢𑁂 𑀏𑀓𑀤𑀺𑀯𑀲𑀁 ‘‘𑀅𑀳𑀁 𑀤𑀼𑀓𑁆𑀓𑀭𑀁 𑀓𑀭𑁄𑀫𑀺, 𑀤𑀼𑀓𑁆𑀓𑀭𑀁 𑀭𑀓𑁆𑀔𑀸𑀫𑀻’’𑀢𑀺 𑀯𑀺𑀯𑀸𑀤𑀸𑀧𑀦𑁆𑀦𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀏𑀓𑀲𑀻𑀮𑀫𑁆𑀧𑀺 𑀓𑀦𑀺𑀝𑁆𑀞𑀓𑀁 𑀅𑀓𑀢𑁆𑀯𑀸 ‘‘𑀲𑀩𑁆𑀩𑀸𑀦𑁂𑀯 𑀤𑀼𑀭𑀓𑁆𑀔𑀸𑀦𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁪𑁬. ‘‘𑀬𑁄 𑀧𑀸𑀡𑀫𑀢𑀺𑀧𑀸𑀢𑁂𑀢𑀺, 𑀫𑀼𑀲𑀸𑀯𑀸𑀤𑀜𑁆𑀘 𑀪𑀸𑀲𑀢𑀺;

𑀮𑁄𑀓𑁂 𑀅𑀤𑀺𑀦𑁆𑀦𑀫𑀸𑀤𑀺𑀬𑀢𑀺, 𑀧𑀭𑀤𑀸𑀭𑀜𑁆𑀘 𑀕𑀘𑁆𑀙𑀢𑀺.

𑁨𑁪𑁭. ‘‘𑀲𑀼𑀭𑀸𑀫𑁂𑀭𑀬𑀧𑀸𑀦𑀜𑁆𑀘, 𑀬𑁄 𑀦𑀭𑁄 𑀅𑀦𑀼𑀬𑀼𑀜𑁆𑀚𑀢𑀺;

𑀇𑀥𑁂𑀯 𑀫𑁂𑀲𑁄 𑀮𑁄𑀓𑀲𑁆𑀫𑀺𑀁, 𑀫𑀽𑀮𑀁 𑀔𑀡𑀢𑀺 𑀅𑀢𑁆𑀢𑀦𑁄.

𑁨𑁪𑁮. ‘‘𑀏𑀯𑀁 𑀪𑁄 𑀧𑀼𑀭𑀺𑀲 𑀚𑀸𑀦𑀸𑀳𑀺, 𑀧𑀸𑀧𑀥𑀫𑁆𑀫𑀸 𑀅𑀲𑀜𑁆𑀜𑀢𑀸;

𑀫𑀸 𑀢𑀁 𑀮𑁄𑀪𑁄 𑀅𑀥𑀫𑁆𑀫𑁄 𑀘, 𑀘𑀺𑀭𑀁 𑀤𑀼𑀓𑁆𑀔𑀸𑀬 𑀭𑀦𑁆𑀥𑀬𑀼’’𑀦𑁆𑀢𑀺.

𑀢𑀢𑁆𑀣 𑀬𑁄 𑀧𑀸𑀡𑀫𑀢𑀺𑀧𑀸𑀢𑁂𑀢𑀻𑀢𑀺 𑀬𑁄 𑀲𑀸𑀳𑀢𑁆𑀣𑀺𑀓𑀸𑀤𑀻𑀲𑀼 𑀙𑀲𑀼 𑀧𑀬𑁄𑀕𑁂𑀲𑀼 𑀏𑀓𑀧𑀬𑁄𑀕𑁂𑀦𑀸𑀧𑀺 𑀧𑀭𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑀘𑁆𑀙𑀺𑀦𑁆𑀤𑀢𑀺. 𑀫𑀼𑀲𑀸𑀯𑀸𑀤𑀦𑁆𑀢𑀺 𑀧𑀭𑁂𑀲𑀁 𑀅𑀢𑁆𑀣𑀪𑀜𑁆𑀚𑀦𑀓𑀁 𑀫𑀼𑀲𑀸𑀯𑀸𑀤𑀜𑁆𑀘 𑀪𑀸𑀲𑀢𑀺. 𑀮𑁄𑀓𑁂 𑀅𑀤𑀺𑀦𑁆𑀦𑀫𑀸𑀤𑀺𑀬𑀢𑀻𑀢𑀺 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂 𑀣𑁂𑀬𑁆𑀬𑀸𑀯𑀳𑀸𑀭𑀸𑀤𑀻𑀲𑀼 𑀏𑀓𑁂𑀦𑀧𑀺 𑀅𑀯𑀳𑀸𑀭𑁂𑀦 𑀧𑀭𑀧𑀭𑀺𑀕𑁆𑀕𑀳𑀺𑀢𑀁 𑀆𑀤𑀺𑀬𑀢𑀺. 𑀧𑀭𑀤𑀸𑀭𑀜𑁆𑀘 𑀕𑀘𑁆𑀙𑀢𑀻𑀢𑀺 𑀧𑀭𑀲𑁆𑀲 𑀭𑀓𑁆𑀔𑀺𑀢𑀕𑁄𑀧𑀺𑀢𑁂𑀲𑀼 𑀪𑀡𑁆𑀟𑁂𑀲𑀼 𑀅𑀧𑀭𑀚𑁆𑀛𑀦𑁆𑀢𑁄 𑀉𑀧𑁆𑀧𑀣𑀘𑀸𑀭𑀁 𑀘𑀭𑀢𑀺. 𑀲𑀼𑀭𑀸𑀫𑁂𑀭𑀬𑀧𑀸𑀦𑀦𑁆𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀼𑀭𑀸𑀬 𑀘𑁂𑀯 𑀫𑁂𑀭𑀬𑀲𑁆𑀲 𑀘 𑀧𑀸𑀦𑀁. 𑀅𑀦𑀼𑀬𑀼𑀜𑁆𑀚𑀢𑀻𑀢𑀺 𑀲𑁂𑀯𑀢𑀺 𑀩𑀳𑀼𑀮𑀻𑀓𑀭𑁄𑀢𑀺. 𑀫𑀽𑀮𑀁 𑀔𑀡𑀢𑀻𑀢𑀺 𑀢𑀺𑀝𑁆𑀞𑀢𑀼 𑀧𑀭𑀮𑁄𑀓𑁄, 𑀲𑁄 𑀧𑀦 𑀧𑀼𑀕𑁆𑀕𑀮𑁄 𑀇𑀥 𑀮𑁄𑀓𑀲𑁆𑀫𑀺𑀁𑀬𑁂𑀯 𑀬𑁂𑀦 𑀔𑁂𑀢𑁆𑀢𑀯𑀢𑁆𑀣𑀼𑀆𑀤𑀺𑀦𑀸 𑀫𑀽𑀮𑁂𑀦 𑀧𑀢𑀺𑀝𑁆𑀞𑀧𑁂𑀬𑁆𑀬, 𑀢𑀫𑁆𑀧𑀺 𑀅𑀝𑁆𑀞𑀧𑁂𑀢𑁆𑀯𑀸 𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀸 𑀲𑀼𑀭𑀁 𑀧𑀺𑀯𑀦𑁆𑀢𑁄 𑀅𑀢𑁆𑀢𑀦𑁄 𑀫𑀽𑀮𑀁 𑀔𑀡𑀢𑀺, 𑀅𑀦𑀸𑀣𑁄 𑀓𑀧𑀡𑁄 𑀳𑀼𑀢𑁆𑀯𑀸 𑀯𑀺𑀘𑀭𑀢𑀺. 𑀏𑀯𑀁, 𑀪𑁄𑀢𑀺 𑀧𑀜𑁆𑀘𑀤𑀼𑀲𑁆𑀲𑀻𑀮𑁆𑀬𑀓𑀫𑁆𑀫𑀓𑀸𑀭𑀓𑀁 𑀧𑀼𑀕𑁆𑀕𑀮𑀁 𑀆𑀮𑀧𑀢𑀺. 𑀧𑀸𑀧𑀥𑀫𑁆𑀫𑀸𑀢𑀺 𑀮𑀸𑀫𑀓𑀥𑀫𑁆𑀫𑀸. 𑀅𑀲𑀜𑁆𑀜𑀢𑀸𑀢𑀺 𑀓𑀸𑀬𑀲𑀜𑁆𑀜𑀢𑀸𑀤𑀺𑀭𑀳𑀺𑀢𑀸. 𑀅𑀘𑁂𑀢𑀲𑀸𑀢𑀺𑀧𑀺 𑀧𑀸𑀞𑁄, 𑀅𑀘𑀺𑀢𑁆𑀢𑀓𑀸𑀢𑀺 𑀅𑀢𑁆𑀣𑁄. 𑀮𑁄𑀪𑁄 𑀅𑀥𑀫𑁆𑀫𑁄 𑀘𑀸𑀢𑀺 𑀮𑁄𑀪𑁄 𑀘𑁂𑀯 𑀤𑁄𑀲𑁄 𑀘. 𑀉𑀪𑀬𑀫𑁆𑀧𑀺 𑀳𑁂𑀢𑀁 𑀅𑀓𑀼𑀲𑀮𑀫𑁂𑀯. 𑀘𑀺𑀭𑀁 𑀤𑀼𑀓𑁆𑀔𑀸𑀬 𑀭𑀦𑁆𑀥𑀬𑀼𑀦𑁆𑀢𑀺 𑀘𑀺𑀭𑀓𑀸𑀮𑀁 𑀦𑀺𑀭𑀬𑀤𑀼𑀓𑁆𑀔𑀸𑀤𑀻𑀦𑀁 𑀅𑀢𑁆𑀣𑀸𑀬 𑀢𑀁 𑀏𑀢𑁂 𑀥𑀫𑁆𑀫𑀸 𑀫𑀸 𑀭𑀦𑁆𑀥𑁂𑀦𑁆𑀢𑀼 𑀫𑀸 𑀫𑀢𑁆𑀣𑁂𑀦𑁆𑀢𑀽𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀧𑀜𑁆𑀘 𑀉𑀧𑀸𑀲𑀓𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀧𑀜𑁆𑀘𑀉𑀧𑀸𑀲𑀓𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀢𑀺𑀲𑁆𑀲𑀤𑀳𑀭𑀯𑀢𑁆𑀣𑀼

𑀤𑀤𑀸𑀢𑀺 𑀯𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀢𑀺𑀲𑁆𑀲𑀤𑀳𑀭𑀁 𑀦𑀸𑀫 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀦𑁄 𑀯𑀺𑀲𑀸𑀔𑀸𑀬 𑀉𑀧𑀸𑀲𑀺𑀓𑀸𑀬𑀸𑀢𑀺 𑀧𑀜𑁆𑀘𑀦𑁆𑀦𑀁 𑀅𑀭𑀺𑀬𑀲𑀸𑀯𑀓𑀓𑁄𑀝𑀻𑀦𑀁 𑀤𑀸𑀦𑀁 𑀦𑀺𑀦𑁆𑀤𑀦𑁆𑀢𑁄 𑀯𑀺𑀘𑀭𑀺, 𑀅𑀲𑀤𑀺𑀲𑀤𑀸𑀦𑀫𑁆𑀧𑀺 𑀦𑀺𑀦𑁆𑀤𑀺𑀬𑁂𑀯. 𑀢𑁂𑀲𑀁 𑀢𑁂𑀲𑀁 𑀤𑀸𑀦𑀕𑁆𑀕𑁂 𑀲𑀻𑀢𑀮𑀁 𑀮𑀪𑀺𑀢𑁆𑀯𑀸 ‘‘𑀲𑀻𑀢𑀮’’𑀦𑁆𑀢𑀺 𑀦𑀺𑀦𑁆𑀤𑀺, 𑀉𑀡𑁆𑀳𑀁 𑀮𑀪𑀺𑀢𑁆𑀯𑀸 ‘‘𑀉𑀡𑁆𑀳’’𑀦𑁆𑀢𑀺 𑀦𑀺𑀦𑁆𑀤𑀺. 𑀅𑀧𑁆𑀧𑀁 𑀤𑁂𑀦𑁆𑀢𑁂𑀧𑀺 ‘‘𑀓𑀺𑀁 𑀇𑀫𑁂 𑀅𑀧𑁆𑀧𑀫𑀢𑁆𑀢𑀓𑀁 𑀤𑁂𑀦𑁆𑀢𑀻’’𑀢𑀺 𑀦𑀺𑀦𑁆𑀤𑀺, 𑀩𑀳𑀼𑀁 𑀤𑁂𑀦𑁆𑀢𑁂𑀧𑀺 ‘‘𑀇𑀫𑁂𑀲𑀁 𑀕𑁂𑀳𑁂 𑀞𑀧𑀦𑀝𑁆𑀞𑀸𑀦𑀁 𑀫𑀜𑁆𑀜𑁂 𑀦𑀢𑁆𑀣𑀺, 𑀦𑀦𑀼 𑀦𑀸𑀫 𑀪𑀺𑀓𑁆𑀔𑀽𑀦𑀁 𑀬𑀸𑀧𑀦𑀫𑀢𑁆𑀢𑀁 𑀤𑀸𑀢𑀩𑁆𑀩𑀁, 𑀏𑀢𑁆𑀢𑀓𑀁 𑀬𑀸𑀕𑀼𑀪𑀢𑁆𑀢𑀁 𑀦𑀺𑀭𑀢𑁆𑀣𑀓𑀫𑁂𑀯 𑀯𑀺𑀲𑁆𑀲𑀚𑁆𑀚𑀢𑀻’’𑀢𑀺 𑀦𑀺𑀦𑁆𑀤𑀺. 𑀅𑀢𑁆𑀢𑀦𑁄 𑀧𑀦 𑀜𑀸𑀢𑀓𑁂 𑀆𑀭𑀩𑁆𑀪 ‘‘𑀅𑀳𑁄 𑀅𑀫𑁆𑀳𑀸𑀓𑀁 𑀜𑀸𑀢𑀓𑀸𑀦𑀁 𑀕𑁂𑀳𑀁 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀕𑀢𑀸𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀑𑀧𑀸𑀦𑀪𑀽𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀧𑀲𑀁𑀲𑀁 𑀧𑀯𑀢𑁆𑀢𑁂𑀲𑀺. 𑀲𑁄 𑀧𑀦𑁂𑀓𑀲𑁆𑀲 𑀤𑁄𑀯𑀸𑀭𑀺𑀓𑀲𑁆𑀲 𑀧𑀼𑀢𑁆𑀢𑁄 𑀚𑀦𑀧𑀤𑀁 𑀯𑀺𑀘𑀭𑀦𑁆𑀢𑁂𑀳𑀺 𑀯𑀟𑁆𑀠𑀓𑀻𑀳𑀺 𑀲𑀤𑁆𑀥𑀺𑀁 𑀯𑀺𑀘𑀭𑀦𑁆𑀢𑁄 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀧𑀩𑁆𑀩𑀚𑀺𑀢𑁄. 𑀅𑀣 𑀦𑀁 𑀪𑀺𑀓𑁆𑀔𑀽 𑀏𑀯𑀁 𑀫𑀦𑀼𑀲𑁆𑀲𑀸𑀦𑀁 𑀤𑀸𑀦𑀸𑀤𑀻𑀦𑀺 𑀦𑀺𑀦𑁆𑀤𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀆𑀯𑀼𑀲𑁄, 𑀢𑀯 𑀜𑀸𑀢𑀓𑀸 𑀓𑀳𑀁 𑀯𑀲𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀲𑀼𑀓𑀕𑀸𑀫𑁂 𑀦𑀸𑀫𑀸’’𑀢𑀺 𑀲𑀼𑀢𑁆𑀯𑀸𑀯 𑀓𑀢𑀺𑀧𑀬𑁂 𑀤𑀳𑀭𑁂 𑀧𑁂𑀲𑁂𑀲𑀼𑀁. 𑀢𑁂 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀕𑀸𑀫𑀯𑀸𑀲𑀺𑀓𑁂𑀳𑀺 𑀆𑀲𑀦𑀲𑀸𑀮𑀸𑀬 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀓𑀢𑀲𑀓𑁆𑀓𑀸𑀭𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀇𑀫𑀫𑁆𑀳𑀸 𑀕𑀸𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀢𑀺𑀲𑁆𑀲𑁄 𑀦𑀸𑀫 𑀤𑀳𑀭𑁄 𑀅𑀢𑁆𑀣𑀺. 𑀢𑀲𑁆𑀲 𑀓𑀢𑀫𑁂 𑀜𑀸𑀢𑀓𑀸’’𑀢𑀺? 𑀫𑀦𑀼𑀲𑁆𑀲𑀸 ‘‘𑀇𑀥 𑀓𑀼𑀮𑀕𑁂𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀤𑀸𑀭𑀓𑁄 𑀦𑀢𑁆𑀣𑀺, 𑀓𑀺𑀁 𑀦𑀼 𑀔𑁄 𑀇𑀫𑁂 𑀯𑀤𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀏𑀓𑁄 𑀤𑁄𑀯𑀸𑀭𑀺𑀓𑀧𑀼𑀢𑁆𑀢𑁄 𑀯𑀟𑁆𑀠𑀓𑀻𑀳𑀺 𑀲𑀤𑁆𑀥𑀺𑀁 𑀯𑀺𑀘𑀭𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄𑀢𑀺 𑀲𑀼𑀡𑁄𑀫, 𑀢𑀁 𑀲𑀦𑁆𑀥𑀸𑀬 𑀯𑀤𑁂𑀣 𑀫𑀜𑁆𑀜𑁂’’𑀢𑀺 𑀆𑀳𑀁𑀲𑀼. 𑀤𑀳𑀭𑀪𑀺𑀓𑁆𑀔𑀽 𑀢𑀺𑀲𑁆𑀲𑀲𑁆𑀲 𑀢𑀢𑁆𑀣 𑀇𑀲𑁆𑀲𑀭𑀜𑀸𑀢𑀓𑀸𑀦𑀁 𑀅𑀪𑀸𑀯𑀁 𑀜𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 ‘‘𑀅𑀓𑀸𑀭𑀡𑀫𑁂𑀯, 𑀪𑀦𑁆𑀢𑁂, 𑀢𑀺𑀲𑁆𑀲𑁄 𑀯𑀺𑀮𑀧𑀦𑁆𑀢𑁄 𑀯𑀺𑀘𑀭𑀢𑀻’’𑀢𑀺 𑀢𑀁 𑀧𑀯𑀢𑁆𑀢𑀺𑀁 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀼𑀁. 𑀪𑀺𑀓𑁆𑀔𑀽𑀧𑀺 𑀢𑀁 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀼𑀁.

𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀯𑀺𑀓𑀢𑁆𑀣𑁂𑀦𑁆𑀢𑁄 𑀯𑀺𑀘𑀭𑀢𑀺, 𑀧𑀼𑀩𑁆𑀩𑁂𑀧𑀺 𑀯𑀺𑀓𑀢𑁆𑀣𑀓𑁄𑀯 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑁋

‘‘𑀩𑀳𑀼𑀫𑁆𑀧𑀺 𑀲𑁄 𑀯𑀺𑀓𑀢𑁆𑀣𑁂𑀬𑁆𑀬, 𑀅𑀜𑁆𑀜𑀁 𑀚𑀦𑀧𑀤𑀁 𑀕𑀢𑁄;

𑀅𑀦𑁆𑀯𑀸𑀕𑀦𑁆𑀢𑁆𑀯𑀸𑀦 𑀤𑀽𑀲𑁂𑀬𑁆𑀬, 𑀪𑀼𑀜𑁆𑀚 𑀪𑁄𑀕𑁂 𑀓𑀝𑀸𑀳𑀓𑀸’’𑀢𑀺. (𑀚𑀸. 𑁧.𑁧.𑁧𑁨𑁫) 𑁋

𑀇𑀫𑀁 𑀓𑀝𑀸𑀳𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀬𑁄 𑀳𑀺 𑀧𑀼𑀕𑁆𑀕𑀮𑁄 𑀧𑀭𑁂𑀳𑀺 𑀅𑀧𑁆𑀧𑀓𑁂 𑀯𑀸 𑀩𑀳𑀼𑀓𑁂 𑀯𑀸 𑀮𑀽𑀔𑁂 𑀯𑀸 𑀧𑀡𑀻𑀢𑁂 𑀯𑀸 𑀤𑀺𑀦𑁆𑀦𑁂 𑀅𑀜𑁆𑀜𑁂𑀲𑀁 𑀯𑀸 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀅𑀤𑀺𑀦𑁆𑀦𑁂 𑀫𑀗𑁆𑀓𑀼 𑀳𑁄𑀢𑀺, 𑀢𑀲𑁆𑀲 𑀛𑀸𑀦𑀁 𑀯𑀸 𑀯𑀺𑀧𑀲𑁆𑀲𑀦𑀁 𑀯𑀸 𑀫𑀕𑁆𑀕𑀨𑀮𑀸𑀤𑀻𑀦𑀺 𑀯𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁪𑁯. ‘‘𑀤𑀤𑀸𑀢𑀺 𑀯𑁂 𑀬𑀣𑀸𑀲𑀤𑁆𑀥𑀁, 𑀬𑀣𑀸𑀧𑀲𑀸𑀤𑀦𑀁 𑀚𑀦𑁄;

𑀢𑀢𑁆𑀣 𑀬𑁄 𑀘 𑀫𑀗𑁆𑀓𑀼 𑀳𑁄𑀢𑀺, 𑀧𑀭𑁂𑀲𑀁 𑀧𑀸𑀦𑀪𑁄𑀚𑀦𑁂;

𑀦 𑀲𑁄 𑀤𑀺𑀯𑀸 𑀯𑀸 𑀭𑀢𑁆𑀢𑀺𑀁 𑀯𑀸, 𑀲𑀫𑀸𑀥𑀺𑀫𑀥𑀺𑀕𑀘𑁆𑀙𑀢𑀺.

𑁨𑁫𑁦. ‘‘𑀬𑀲𑁆𑀲 𑀘𑁂𑀢𑀁 𑀲𑀫𑀼𑀘𑁆𑀙𑀺𑀦𑁆𑀦𑀁, 𑀫𑀽𑀮𑀖𑀘𑁆𑀘𑀁 𑀲𑀫𑀽𑀳𑀢𑀁;

𑀲 𑀯𑁂 𑀤𑀺𑀯𑀸 𑀯𑀸 𑀭𑀢𑁆𑀢𑀺𑀁 𑀯𑀸, 𑀲𑀫𑀸𑀥𑀺𑀫𑀥𑀺𑀕𑀘𑁆𑀙𑀢𑀻’’𑀢𑀺.

𑀢𑀢𑁆𑀣 𑀤𑀤𑀸𑀢𑀺 𑀯𑁂 𑀬𑀣𑀸𑀲𑀤𑁆𑀥𑀦𑁆𑀢𑀺 𑀮𑀽𑀔𑀧𑀡𑀻𑀢𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀤𑁂𑀦𑁆𑀢𑁄 𑀚𑀦𑁄 𑀬𑀣𑀸𑀲𑀤𑁆𑀥𑀁 𑀅𑀢𑁆𑀢𑀦𑁄 𑀲𑀤𑁆𑀥𑀸𑀦𑀼𑀭𑀽𑀧𑀫𑁂𑀯 𑀤𑁂𑀢𑀺. 𑀬𑀣𑀸𑀧𑀲𑀸𑀤𑀦𑀦𑁆𑀢𑀺 𑀣𑁂𑀭𑀦𑀯𑀸𑀤𑀻𑀲𑀼 𑀘𑀲𑁆𑀲 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀧𑀲𑀸𑀤𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀤𑁂𑀦𑁆𑀢𑁄 𑀬𑀣𑀸𑀧𑀲𑀸𑀤𑀦𑀁 𑀅𑀢𑁆𑀢𑀦𑁄 𑀧𑀲𑀸𑀤𑀸𑀦𑀼𑀭𑀽𑀧𑀫𑁂𑀯 𑀤𑁂𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀭𑀲𑁆𑀲 𑀤𑀸𑀦𑁂 ‘‘𑀫𑀬𑀸 𑀅𑀧𑁆𑀧𑀁 𑀯𑀸 𑀮𑀤𑁆𑀥𑀁, 𑀮𑀽𑀔𑀁 𑀯𑀸 𑀮𑀤𑁆𑀥’’𑀦𑁆𑀢𑀺 𑀫𑀗𑁆𑀓𑀼𑀪𑀸𑀯𑀁 𑀆𑀧𑀚𑁆𑀚𑀢𑀺. 𑀲𑀫𑀸𑀥𑀺𑀦𑁆𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀤𑀺𑀯𑀸 𑀯𑀸 𑀭𑀢𑁆𑀢𑀺𑀁 𑀯𑀸 𑀉𑀧𑀘𑀸𑀭𑀧𑁆𑀧𑀦𑀸𑀯𑀲𑁂𑀦 𑀯𑀸 𑀫𑀕𑁆𑀕𑀨𑀮𑀯𑀲𑁂𑀦 𑀯𑀸 𑀲𑀫𑀸𑀥𑀺𑀁 𑀦𑀸𑀥𑀺𑀕𑀘𑁆𑀙𑀢𑀺. 𑀬𑀲𑁆𑀲 𑀘𑁂𑀢𑀦𑁆𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀢𑀁 𑀏𑀓𑁂𑀲𑀼 𑀞𑀸𑀦𑁂𑀲𑀼 𑀫𑀗𑁆𑀓𑀼𑀪𑀸𑀯𑀲𑀗𑁆𑀔𑀸𑀢𑀁 𑀅𑀓𑀼𑀲𑀮𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀫𑀽𑀮𑀖𑀘𑁆𑀘𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀲𑀫𑀽𑀳𑀢𑀁, 𑀲𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀫𑀸𑀥𑀺𑀁 𑀅𑀥𑀺𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀢𑀺𑀲𑁆𑀲𑀤𑀳𑀭𑀯𑀢𑁆𑀣𑀼 𑀅𑀝𑁆𑀞𑀫𑀁.

𑁯. 𑀧𑀜𑁆𑀘𑀉𑀧𑀸𑀲𑀓𑀯𑀢𑁆𑀣𑀼

𑀦𑀢𑁆𑀣𑀺 𑀭𑀸𑀕𑀲𑀫𑁄 𑀅𑀕𑁆𑀕𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀘 𑀉𑀧𑀸𑀲𑀓𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂 𑀓𑀺𑀭 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀩𑀼𑀤𑁆𑀥𑀸𑀦𑀜𑁆𑀘 ‘‘𑀅𑀬𑀁 𑀔𑀢𑁆𑀢𑀺𑀬𑁄, 𑀅𑀬𑀁 𑀩𑁆𑀭𑀸𑀳𑁆𑀫𑀡𑁄, 𑀅𑀬𑀁 𑀅𑀟𑁆𑀠𑁄, 𑀅𑀬𑀁 𑀤𑀼𑀕𑁆𑀕𑀢𑁄, 𑀇𑀫𑀲𑁆𑀲 𑀉𑀴𑀸𑀭𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀇𑀫𑀲𑁆𑀲 𑀦𑁄’’𑀢𑀺 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺. 𑀬𑀁𑀓𑀺𑀜𑁆𑀘𑀺 𑀆𑀭𑀩𑁆𑀪 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀥𑀫𑁆𑀫𑀕𑀸𑀭𑀯𑀁 𑀧𑀼𑀭𑀓𑁆𑀔𑀢𑁆𑀯𑀸 𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬 𑀤𑁂𑀲𑁂𑀢𑀺. 𑀏𑀯𑀁 𑀤𑁂𑀲𑁂𑀦𑁆𑀢𑀲𑁆𑀲 𑀧𑀦 𑀢𑀣𑀸𑀕𑀢𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑀸𑀦𑀁 𑀢𑁂𑀲𑀁 𑀏𑀓𑁄 𑀦𑀺𑀲𑀺𑀦𑁆𑀦𑀓𑁄𑀯 𑀦𑀺𑀤𑁆𑀤𑀸𑀬𑀺, 𑀏𑀓𑁄 𑀅𑀗𑁆𑀕𑀼𑀮𑀺𑀬𑀸 𑀪𑀽𑀫𑀺𑀁 𑀮𑀺𑀔𑀦𑁆𑀢𑁄 𑀦𑀺𑀲𑀻𑀤𑀺, 𑀏𑀓𑁄 𑀏𑀓𑀁 𑀭𑀼𑀓𑁆𑀔𑀁 𑀘𑀸𑀮𑁂𑀦𑁆𑀢𑁄 𑀦𑀺𑀲𑀻𑀤𑀺, 𑀏𑀓𑁄 𑀆𑀓𑀸𑀲𑀁 𑀉𑀮𑁆𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀺, 𑀏𑀓𑁄 𑀧𑀦 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀅𑀲𑁆𑀲𑁄𑀲𑀺.

𑀆𑀦𑀦𑁆𑀤𑀢𑁆𑀣𑁂𑀭𑁄 𑀲𑀢𑁆𑀣𑀸𑀭𑀁 𑀩𑀻𑀚𑀬𑀫𑀸𑀦𑁄 𑀢𑁂𑀲𑀁 𑀆𑀓𑀸𑀭𑀁 𑀑𑀮𑁄𑀓𑁂𑀦𑁆𑀢𑁄 𑀲𑀢𑁆𑀣𑀸𑀭𑀁 𑀆𑀳 𑁋 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀇𑀫𑁂𑀲𑀁 𑀫𑀳𑀸𑀫𑁂𑀖𑀕𑀚𑁆𑀚𑀺𑀢𑀁 𑀕𑀚𑁆𑀚𑀦𑁆𑀢𑀸 𑀯𑀺𑀬 𑀥𑀫𑁆𑀫𑀁 𑀤𑁂𑀲𑁂𑀣, 𑀏𑀢𑁂 𑀧𑀦 𑀢𑀼𑀫𑁆𑀳𑁂𑀲𑀼𑀧𑀺 𑀥𑀫𑁆𑀫𑀁 𑀓𑀣𑁂𑀦𑁆𑀢𑁂𑀲𑀼 𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑁄𑀦𑁆𑀢𑀸 𑀦𑀺𑀲𑀺𑀦𑁆𑀦𑀸’’𑀢𑀺. ‘‘𑀆𑀦𑀦𑁆𑀤, 𑀢𑁆𑀯𑀁 𑀏𑀢𑁂 𑀦 𑀚𑀸𑀦𑀸𑀲𑀻’’𑀢𑀺? ‘‘𑀆𑀫, 𑀦 𑀚𑀸𑀦𑀸𑀫𑀺, 𑀪𑀦𑁆𑀢𑁂’’𑀢𑀺. 𑀏𑀢𑁂𑀲𑀼 𑀳𑀺 𑀬𑁄 𑀏𑀲 𑀦𑀺𑀤𑁆𑀤𑀸𑀬𑀦𑁆𑀢𑁄 𑀦𑀺𑀲𑀺𑀦𑁆𑀦𑁄, 𑀏𑀲 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀲𑀧𑁆𑀧𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀪𑁄𑀕𑁂𑀲𑀼 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀦𑀺𑀤𑁆𑀤𑀸𑀬𑀺, 𑀇𑀤𑀸𑀦𑀺𑀧𑀺𑀲𑁆𑀲 𑀦𑀺𑀤𑁆𑀤𑀸𑀬 𑀢𑀺𑀢𑁆𑀢𑀺 𑀦𑀢𑁆𑀣𑀺, 𑀦𑀸𑀲𑁆𑀲 𑀓𑀡𑁆𑀡𑀁 𑀫𑀫 𑀲𑀤𑁆𑀤𑁄 𑀧𑀯𑀺𑀲𑀢𑀻𑀢𑀺. 𑀓𑀺𑀁 𑀧𑀦, 𑀪𑀦𑁆𑀢𑁂, 𑀧𑀝𑀺𑀧𑀸𑀝𑀺𑀬𑀸 𑀓𑀣𑁂𑀣, 𑀉𑀤𑀸𑀳𑀼 𑀅𑀦𑁆𑀢𑀭𑀦𑁆𑀢𑀭𑀸𑀢𑀺. 𑀆𑀦𑀦𑁆𑀤, 𑀏𑀢𑀲𑁆𑀲 𑀳𑀺 𑀓𑀸𑀮𑁂𑀦 𑀫𑀦𑀼𑀲𑁆𑀲𑀢𑁆𑀢𑀁, 𑀓𑀸𑀮𑁂𑀦 𑀤𑁂𑀯𑀢𑁆𑀢𑀁, 𑀓𑀸𑀮𑁂𑀦 𑀦𑀸𑀕𑀢𑁆𑀢𑀦𑁆𑀢𑀺 𑀏𑀯𑀁 𑀅𑀦𑁆𑀢𑀭𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀲𑁆𑀲 𑀉𑀧𑀧𑀢𑁆𑀢𑀺𑀬𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦𑀸𑀧𑀺 𑀦 𑀲𑀓𑁆𑀓𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁. 𑀧𑀝𑀺𑀧𑀸𑀝𑀺𑀬𑀸 𑀧𑀦𑁂𑀲 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀦𑀸𑀕𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀺 𑀦𑀺𑀤𑁆𑀤𑀸𑀬 𑀅𑀢𑀺𑀢𑁆𑀢𑁄𑀬𑁂𑀯. 𑀅𑀗𑁆𑀕𑀼𑀮𑀺𑀬𑀸 𑀪𑀽𑀫𑀺𑀁 𑀮𑀺𑀔𑀦𑁆𑀢𑁄 𑀦𑀺𑀲𑀺𑀦𑁆𑀦𑀧𑀼𑀭𑀺𑀲𑁄𑀧𑀺 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀕𑀡𑁆𑀟𑀼𑀧𑁆𑀧𑀸𑀤𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀪𑀽𑀫𑀺𑀁 𑀔𑀡𑀺, 𑀇𑀤𑀸𑀦𑀺𑀧𑀺 𑀪𑀽𑀫𑀺𑀁 𑀔𑀡𑀦𑁆𑀢𑁄𑀯 𑀫𑀫 𑀲𑀤𑁆𑀤𑀁 𑀦 𑀲𑀼𑀡𑀸𑀢𑀺. 𑀏𑀲 𑀭𑀼𑀓𑁆𑀔𑀁 𑀘𑀸𑀮𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑀧𑀼𑀭𑀺𑀲𑁄𑀧𑀺 𑀧𑀝𑀺𑀧𑀸𑀝𑀺𑀬𑀸 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀫𑀓𑁆𑀓𑀝𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺, 𑀇𑀤𑀸𑀦𑀺𑀧𑀺 𑀧𑀼𑀩𑁆𑀩𑀸𑀘𑀺𑀡𑁆𑀡𑀯𑀲𑁂𑀦 𑀭𑀼𑀓𑁆𑀔𑀁 𑀘𑀸𑀮𑁂𑀢𑀺𑀬𑁂𑀯, 𑀦𑀸𑀲𑁆𑀲 𑀓𑀡𑁆𑀡𑀁 𑀫𑀫 𑀲𑀤𑁆𑀤𑁄 𑀧𑀯𑀺𑀲𑀢𑀺. 𑀏𑀲 𑀆𑀓𑀸𑀲𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀧𑀼𑀭𑀺𑀲𑁄𑀧𑀺 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀦𑀓𑁆𑀔𑀢𑁆𑀢𑀧𑀸𑀞𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀇𑀤𑀸𑀦𑀺 𑀧𑀼𑀩𑁆𑀩𑀸𑀘𑀺𑀡𑁆𑀡𑀯𑀲𑁂𑀦 𑀅𑀚𑁆𑀚𑀸𑀧𑀺 𑀆𑀓𑀸𑀲𑀫𑁂𑀯 𑀉𑀮𑁆𑀮𑁄𑀓𑁂𑀢𑀺, 𑀦𑀸𑀲𑁆𑀲 𑀓𑀡𑁆𑀡𑀁 𑀫𑀫 𑀲𑀤𑁆𑀤𑁄 𑀧𑀯𑀺𑀲𑀢𑀺. 𑀏𑀲 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀦𑀺𑀲𑀺𑀦𑁆𑀦𑀧𑀼𑀭𑀺𑀲𑁄 𑀧𑀦 𑀧𑀝𑀺𑀧𑀸𑀝𑀺𑀬𑀸 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀫𑀦𑁆𑀢𑀚𑁆𑀛𑀸𑀬𑀓𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀇𑀤𑀸𑀦𑀺𑀧𑀺 𑀫𑀦𑁆𑀢𑀁 𑀲𑀁𑀲𑀦𑁆𑀤𑀦𑁆𑀢𑁄 𑀯𑀺𑀬 𑀲𑀓𑁆𑀓𑀘𑁆𑀘𑀁 𑀲𑀼𑀡𑀸𑀢𑀻𑀢𑀺.

‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀥𑀫𑁆𑀫𑀤𑁂𑀲𑀦𑀸 𑀙𑀯𑀺𑀆𑀤𑀻𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺, 𑀓𑀲𑁆𑀫𑀸 𑀇𑀫𑁂 𑀢𑀼𑀫𑁆𑀳𑁂𑀲𑀼𑀧𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂𑀲𑀼 𑀲𑀓𑁆𑀓𑀘𑁆𑀘𑀁 𑀦 𑀲𑀼𑀡𑀦𑁆𑀢𑀻’’𑀢𑀺? ‘‘𑀆𑀦𑀦𑁆𑀤, 𑀫𑀫 𑀥𑀫𑁆𑀫𑁄 𑀲𑀼𑀲𑁆𑀲𑀯𑀦𑀻𑀬𑁄𑀢𑀺 𑀲𑀜𑁆𑀜𑀁 𑀓𑀭𑁄𑀲𑀺 𑀫𑀜𑁆𑀜𑁂’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀤𑀼𑀲𑁆𑀲𑀯𑀦𑀻𑀬𑁄’’𑀢𑀺? ‘‘𑀆𑀫, 𑀆𑀦𑀦𑁆𑀤𑀸’’𑀢𑀺. ‘‘𑀓𑀲𑁆𑀫𑀸, 𑀪𑀦𑁆𑀢𑁂’’𑀢𑀺? ‘‘𑀆𑀦𑀦𑁆𑀤, 𑀩𑀼𑀤𑁆𑀥𑁄𑀢𑀺 𑀯𑀸 𑀥𑀫𑁆𑀫𑁄𑀢𑀺 𑀯𑀸 𑀲𑀗𑁆𑀖𑁄𑀢𑀺 𑀯𑀸 𑀧𑀤𑀁 𑀇𑀫𑁂𑀳𑀺 𑀲𑀢𑁆𑀢𑁂𑀳𑀺 𑀅𑀦𑁂𑀓𑁂𑀲𑀼𑀧𑀺 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀲𑀼 𑀅𑀲𑀼𑀢𑀧𑀼𑀩𑁆𑀩𑀁. 𑀬𑀲𑁆𑀫𑀸 𑀇𑀫𑀁 𑀥𑀫𑁆𑀫𑀁 𑀲𑁄𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀸 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀇𑀫𑁂 𑀲𑀢𑁆𑀢𑀸 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁𑀬𑁂𑀯 𑀲𑀼𑀡𑀦𑁆𑀢𑀸 𑀆𑀕𑀢𑀸, 𑀢𑀲𑁆𑀫𑀸 𑀲𑀼𑀭𑀸𑀧𑀸𑀦𑀓𑁂𑀴𑀺𑀫𑀡𑁆𑀟𑀮𑀸𑀤𑀻𑀲𑀼 𑀕𑀸𑀬𑀦𑁆𑀢𑀸 𑀦𑀘𑁆𑀘𑀦𑁆𑀢𑀸 𑀯𑀺𑀘𑀭𑀦𑁆𑀢𑀺, 𑀥𑀫𑁆𑀫𑀁 𑀲𑁄𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺. ‘‘𑀓𑀺𑀁 𑀦𑀺𑀲𑁆𑀲𑀸𑀬 𑀧𑀦𑁂𑀢𑁂 𑀦 𑀲𑀓𑁆𑀓𑁄𑀦𑁆𑀢𑀺, 𑀪𑀦𑁆𑀢𑁂’’𑀢𑀺?

𑀅𑀣𑀲𑁆𑀲 𑀲𑀢𑁆𑀣𑀸, ‘‘𑀆𑀦𑀦𑁆𑀤, 𑀭𑀸𑀕𑀁 𑀦𑀺𑀲𑁆𑀲𑀸𑀬 𑀤𑁄𑀲𑀁 𑀦𑀺𑀲𑁆𑀲𑀸𑀬 𑀫𑁄𑀳𑀁 𑀦𑀺𑀲𑁆𑀲𑀸𑀬 𑀢𑀡𑁆𑀳𑀁 𑀦𑀺𑀲𑁆𑀲𑀸𑀬 𑀦 𑀲𑀓𑁆𑀓𑁄𑀦𑁆𑀢𑀺. 𑀭𑀸𑀕𑀕𑁆𑀕𑀺𑀲𑀤𑀺𑀲𑁄 𑀅𑀕𑁆𑀕𑀺 𑀦𑀸𑀫 𑀦𑀢𑁆𑀣𑀺, 𑀲𑁄 𑀙𑀸𑀭𑀺𑀓𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸 𑀲𑀢𑁆𑀢𑁂 𑀤𑀳𑀢𑀺. 𑀓𑀺𑀜𑁆𑀘𑀸𑀧𑀺 𑀲𑀢𑁆𑀢𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄 𑀓𑀧𑁆𑀧𑀯𑀺𑀦𑀸𑀲𑀓𑁄 𑀅𑀕𑁆𑀕𑀺𑀧𑀺 𑀓𑀺𑀜𑁆𑀘𑀺 𑀅𑀦𑀯𑀲𑁂𑀲𑁂𑀢𑁆𑀯𑀸𑀯 𑀮𑁄𑀓𑀁 𑀤𑀳𑀢𑀺, 𑀲𑁄 𑀧𑀦 𑀅𑀕𑁆𑀕𑀺 𑀓𑀤𑀸𑀘𑀺𑀬𑁂𑀯 𑀤𑀳𑀢𑀺. 𑀭𑀸𑀕𑀕𑁆𑀕𑀺𑀦𑁄 𑀅𑀤𑀳𑀦𑀓𑀸𑀮𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀭𑀸𑀕𑀲𑀫𑁄 𑀯𑀸 𑀅𑀕𑁆𑀕𑀺 𑀤𑁄𑀲𑀲𑀫𑁄 𑀯𑀸 𑀕𑀳𑁄 𑀫𑁄𑀳𑀲𑀫𑀁 𑀯𑀸 𑀚𑀸𑀮𑀁 𑀢𑀡𑁆𑀳𑀸𑀲𑀫𑀸 𑀯𑀸 𑀦𑀤𑀻 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁫𑁧. ‘‘𑀦𑀢𑁆𑀣𑀺 𑀭𑀸𑀕𑀲𑀫𑁄 𑀅𑀕𑁆𑀕𑀺, 𑀦𑀢𑁆𑀣𑀺 𑀤𑁄𑀲𑀲𑀫𑁄 𑀕𑀳𑁄;

𑀦𑀢𑁆𑀣𑀺 𑀫𑁄𑀳𑀲𑀫𑀁 𑀚𑀸𑀮𑀁, 𑀦𑀢𑁆𑀣𑀺 𑀢𑀡𑁆𑀳𑀸𑀲𑀫𑀸 𑀦𑀤𑀻’’𑀢𑀺.

𑀢𑀢𑁆𑀣 𑀭𑀸𑀕𑀲𑀫𑁄𑀢𑀺 𑀥𑀽𑀫𑀸𑀤𑀻𑀲𑀼 𑀓𑀺𑀜𑁆𑀘𑀺 𑀅𑀤𑀲𑁆𑀲𑁂𑀢𑁆𑀯𑀸 𑀅𑀦𑁆𑀢𑁄𑀬𑁂𑀯 𑀉𑀝𑁆𑀞𑀸𑀬 𑀛𑀸𑀧𑀦𑀯𑀲𑁂𑀦 𑀭𑀸𑀕𑁂𑀦 𑀲𑀫𑁄 𑀅𑀕𑁆𑀕𑀺 𑀦𑀸𑀫 𑀦𑀢𑁆𑀣𑀺. 𑀤𑁄𑀲𑀲𑀫𑁄𑀢𑀺 𑀬𑀓𑁆𑀔𑀕𑀳𑀅𑀚𑀕𑀭𑀕𑀳𑀓𑀼𑀫𑁆𑀪𑀺𑀮𑀕𑀳𑀸𑀤𑀬𑁄 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀕𑀡𑁆𑀳𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀤𑁄𑀲𑀕𑀳𑁄 𑀧𑀦 𑀲𑀩𑁆𑀩𑀢𑁆𑀣 𑀏𑀓𑀦𑁆𑀢𑀫𑁂𑀯 𑀕𑀡𑁆𑀳𑀸𑀢𑀻𑀢𑀺 𑀤𑁄𑀲𑁂𑀦 𑀲𑀫𑁄 𑀕𑀳𑁄 𑀦𑀸𑀫 𑀦𑀢𑁆𑀣𑀺. 𑀫𑁄𑀳𑀲𑀫𑀦𑁆𑀢𑀺 𑀑𑀦𑀦𑁆𑀥𑀦𑀧𑀭𑀺𑀬𑁄𑀦𑀦𑁆𑀥𑀦𑀝𑁆𑀞𑁂𑀦 𑀧𑀦 𑀫𑁄𑀳𑀲𑀫𑀁 𑀚𑀸𑀮𑀁 𑀦𑀸𑀫 𑀦𑀢𑁆𑀣𑀺. 𑀢𑀡𑁆𑀳𑀸𑀲𑀫𑀸𑀢𑀺 𑀕𑀗𑁆𑀕𑀸𑀤𑀻𑀦𑀁 𑀦𑀤𑀻𑀦𑀁 𑀧𑀼𑀡𑁆𑀡𑀓𑀸𑀮𑁄𑀧𑀺 𑀊𑀦𑀓𑀸𑀮𑁄𑀧𑀺 𑀲𑀼𑀓𑁆𑀔𑀓𑀸𑀮𑁄𑀧𑀺 𑀧𑀜𑁆𑀜𑀸𑀬𑀢𑀺, 𑀢𑀡𑁆𑀳𑀸𑀬 𑀧𑀦 𑀧𑀼𑀡𑁆𑀡𑀓𑀸𑀮𑁄 𑀯𑀸 𑀲𑀼𑀓𑁆𑀔𑀓𑀸𑀮𑁄 𑀯𑀸 𑀦𑀢𑁆𑀣𑀺, 𑀦𑀺𑀘𑁆𑀘𑀁 𑀊𑀦𑀸𑀯 𑀧𑀜𑁆𑀜𑀸𑀬𑀢𑀻𑀢𑀺 𑀤𑀼𑀧𑁆𑀧𑀽𑀭𑀡𑀝𑁆𑀞𑁂𑀦 𑀢𑀡𑁆𑀳𑀸𑀬 𑀲𑀫𑀸 𑀦𑀤𑀻 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀉𑀧𑀸𑀲𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀧𑀜𑁆𑀘𑀉𑀧𑀸𑀲𑀓𑀯𑀢𑁆𑀣𑀼 𑀦𑀯𑀫𑀁.

𑁧𑁦. 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀯𑀢𑁆𑀣𑀼

𑀲𑀼𑀤𑀲𑁆𑀲𑀁 𑀯𑀚𑁆𑀚𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀪𑀤𑁆𑀤𑀺𑀬𑀦𑀕𑀭𑀁 𑀦𑀺𑀲𑁆𑀲𑀸𑀬 𑀚𑀸𑀢𑀺𑀬𑀸𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀢𑁆𑀣𑀸 𑀓𑀺𑀭 𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀼 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀦𑁄 𑀘, 𑀪𑀭𑀺𑀬𑀸𑀬 𑀘𑀲𑁆𑀲 𑀘𑀦𑁆𑀤𑀧𑀤𑀼𑀫𑀸𑀬, 𑀧𑀼𑀢𑁆𑀢𑀲𑁆𑀲 𑀘 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄, 𑀲𑀼𑀡𑀺𑀲𑀸𑀬 𑀘 𑀲𑀼𑀫𑀦𑀤𑁂𑀯𑀺𑀬𑀸, 𑀦𑀢𑁆𑀢𑀸𑀬 𑀘𑀲𑁆𑀲 𑀯𑀺𑀲𑀸𑀔𑀸𑀬, 𑀤𑀸𑀲𑀲𑁆𑀲 𑀘 𑀧𑀼𑀡𑁆𑀡𑀲𑁆𑀲𑀸𑀢𑀺 𑀇𑀫𑁂𑀲𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀪𑀤𑁆𑀤𑀺𑀬𑀦𑀕𑀭𑀁 𑀕𑀦𑁆𑀢𑁆𑀯𑀸 𑀚𑀸𑀢𑀺𑀬𑀸𑀯𑀦𑁂 𑀯𑀺𑀳𑀸𑀲𑀺. 𑀫𑁂𑀡𑁆𑀟𑀓𑀲𑁂𑀝𑁆𑀞𑀺 𑀲𑀢𑁆𑀣𑀼 𑀆𑀕𑀫𑀦𑀁 𑀅𑀲𑁆𑀲𑁄𑀲𑀺. 𑀓𑀲𑁆𑀫𑀸 𑀧𑀦𑁂𑀲 𑀫𑁂𑀡𑁆𑀟𑀓𑀲𑁂𑀝𑁆𑀞𑀺 𑀦𑀸𑀫 𑀚𑀸𑀢𑁄𑀢𑀺? 𑀢𑀲𑁆𑀲 𑀓𑀺𑀭 𑀧𑀘𑁆𑀙𑀺𑀫𑀕𑁂𑀳𑁂 𑀅𑀝𑁆𑀞𑀓𑀭𑀻𑀲𑀫𑀢𑁆𑀢𑁂 𑀞𑀸𑀦𑁂 𑀳𑀢𑁆𑀣𑀺𑀅𑀲𑁆𑀲𑀉𑀲𑀪𑀧𑀫𑀸𑀡𑀸 𑀲𑀼𑀯𑀡𑁆𑀡𑀫𑁂𑀡𑁆𑀟𑀓𑀸 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀺𑀝𑁆𑀞𑀺𑀬𑀸 𑀧𑀺𑀝𑁆𑀞𑀺𑀁 𑀧𑀳𑀭𑀫𑀸𑀦𑀸 𑀉𑀝𑁆𑀞𑀳𑀺𑀁𑀲𑀼. 𑀢𑁂𑀲𑀁 𑀫𑀼𑀔𑁂𑀲𑀼 𑀧𑀜𑁆𑀘𑀯𑀡𑁆𑀡𑀸𑀦𑀁 𑀲𑀼𑀢𑁆𑀢𑀸𑀦𑀁 𑀕𑁂𑀡𑁆𑀟𑀼𑀓𑀸 𑀧𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺. 𑀲𑀧𑁆𑀧𑀺𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀳𑀺 𑀯𑀸 𑀯𑀢𑁆𑀣𑀘𑁆𑀙𑀸𑀤𑀦𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀳𑀺 𑀯𑀸 𑀅𑀢𑁆𑀣𑁂 𑀲𑀢𑀺 𑀢𑁂𑀲𑀁 𑀫𑀼𑀔𑀢𑁄 𑀕𑁂𑀡𑁆𑀟𑀼𑀓𑁂 𑀅𑀧𑀦𑁂𑀦𑁆𑀢𑀺, 𑀏𑀓𑀲𑁆𑀲𑀸𑀧𑀺 𑀫𑁂𑀡𑁆𑀟𑀓𑀲𑁆𑀲 𑀫𑀼𑀔𑀢𑁄 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁 𑀧𑀳𑁄𑀦𑀓𑀁 𑀲𑀧𑁆𑀧𑀺𑀢𑁂𑀮𑀫𑀥𑀼𑀨𑀸𑀡𑀺𑀢𑀯𑀢𑁆𑀣𑀘𑁆𑀙𑀸𑀤𑀦𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀦𑀺𑀓𑁆𑀔𑀫𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀫𑁂𑀡𑁆𑀟𑀓𑀲𑁂𑀝𑁆𑀞𑀻𑀢𑀺 𑀧𑀜𑁆𑀜𑀸𑀬𑀺.

𑀓𑀺𑀁 𑀧𑀦𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀦𑁆𑀢𑀺? 𑀯𑀺𑀧𑀲𑁆𑀲𑀻𑀩𑀼𑀤𑁆𑀥𑀓𑀸𑀮𑁂 𑀓𑀺𑀭 𑀏𑀲 𑀅𑀯𑀭𑁄𑀚𑀲𑁆𑀲 𑀦𑀸𑀫 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄 𑀫𑀸𑀢𑀼𑀮𑁂𑀦 𑀲𑀫𑀸𑀦𑀦𑀸𑀫𑁄 𑀅𑀯𑀭𑁄𑀚𑁄 𑀦𑀸𑀫 𑀅𑀳𑁄𑀲𑀺. 𑀅𑀣𑀲𑁆𑀲 𑀫𑀸𑀢𑀼𑀮𑁄 𑀲𑀢𑁆𑀣𑀼 𑀕𑀦𑁆𑀥𑀓𑀼𑀝𑀺𑀁 𑀓𑀸𑀢𑀼𑀁 𑀆𑀭𑀪𑀺. 𑀲𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀫𑀸𑀢𑀼𑀮, 𑀉𑀪𑁄𑀧𑀺 𑀲𑀳𑁂𑀯 𑀓𑀭𑁄𑀫𑀸’’𑀢𑀺 𑀯𑀢𑁆𑀯𑀸 ‘‘𑀅𑀳𑀁 𑀅𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀅𑀲𑀸𑀥𑀸𑀭𑀡𑀁 𑀓𑀢𑁆𑀯𑀸 𑀏𑀓𑀓𑁄𑀯 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑁂𑀦 𑀧𑀦 𑀧𑀝𑀺𑀓𑁆𑀔𑀺𑀢𑁆𑀢𑀓𑀸𑀮𑁂 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀕𑀦𑁆𑀥𑀓𑀼𑀝𑀺𑀬𑀸 𑀓𑀢𑀸𑀬 𑀇𑀫𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀓𑀼𑀜𑁆𑀚𑀭𑀲𑀸𑀮𑀁 𑀦𑀸𑀫 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀭𑀜𑁆𑀜𑀢𑁄 𑀤𑀩𑁆𑀩𑀲𑀫𑁆𑀪𑀸𑀭𑁂 𑀆𑀳𑀭𑀸𑀧𑁂𑀢𑁆𑀯𑀸 𑀏𑀓𑀁 𑀣𑀫𑁆𑀪𑀁 𑀲𑀼𑀯𑀡𑁆𑀡𑀔𑀘𑀺𑀢𑀁, 𑀏𑀓𑀁 𑀭𑀚𑀢𑀔𑀘𑀺𑀢𑀁, 𑀏𑀓𑀁 𑀫𑀡𑀺𑀔𑀘𑀺𑀢𑀁, 𑀏𑀓𑀁 𑀲𑀢𑁆𑀢𑀭𑀢𑀦𑀔𑀘𑀺𑀢𑀦𑁆𑀢𑀺 𑀏𑀯𑀁 𑀢𑀼𑀮𑀸𑀲𑀗𑁆𑀖𑀸𑀢𑀤𑁆𑀯𑀸𑀭𑀓𑀯𑀸𑀝𑀯𑀸𑀢𑀧𑀸𑀦𑀕𑁄𑀧𑀸𑀦𑀲𑀻𑀙𑀤𑀦𑀺𑀝𑁆𑀞𑀓𑀸 𑀲𑀩𑁆𑀩𑀸𑀧𑀺 𑀲𑀼𑀯𑀡𑁆𑀡𑀸𑀤𑀺𑀔𑀘𑀺𑀢𑀸𑀯 𑀓𑀸𑀭𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀬𑀸 𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀢𑀣𑀸𑀕𑀢𑀲𑁆𑀲 𑀲𑀢𑁆𑀢𑀭𑀢𑀦𑀫𑀬𑀁 𑀓𑀼𑀜𑁆𑀚𑀭𑀲𑀸𑀮𑀁 𑀓𑀸𑀭𑁂𑀲𑀺. 𑀢𑀲𑁆𑀲𑀸 𑀉𑀧𑀭𑀺 𑀖𑀦𑀭𑀢𑁆𑀢𑀲𑀼𑀯𑀡𑁆𑀡𑀫𑀬𑀸 𑀓𑀫𑁆𑀩𑀮𑀸 𑀧𑀯𑀸𑀴𑀫𑀬𑀸 𑀲𑀺𑀔𑀭𑀣𑀽𑀧𑀺𑀓𑀸𑀬𑁄 𑀅𑀳𑁂𑀲𑀼𑀁. 𑀓𑀼𑀜𑁆𑀚𑀭𑀲𑀸𑀮𑀸𑀬 𑀫𑀚𑁆𑀛𑁂 𑀞𑀸𑀦𑁂 𑀭𑀢𑀦𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀥𑀫𑁆𑀫𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑀲𑁆𑀲 𑀖𑀦𑀭𑀢𑁆𑀢𑀲𑀼𑀯𑀡𑁆𑀡𑀫𑀬𑀸 𑀧𑀸𑀤𑀸 𑀅𑀳𑁂𑀲𑀼𑀁, 𑀢𑀣𑀸 𑀘𑀢𑀲𑁆𑀲𑁄 𑀅𑀝𑀦𑀺𑀬𑁄. 𑀘𑀢𑁆𑀢𑀸𑀭𑁄 𑀧𑀦 𑀲𑀼𑀯𑀡𑁆𑀡𑀫𑁂𑀡𑁆𑀟𑀓𑁂 𑀓𑀸𑀭𑀸𑀧𑁂𑀢𑁆𑀯𑀸 𑀆𑀲𑀦𑀲𑁆𑀲 𑀘𑀢𑀼𑀦𑁆𑀦𑀁 𑀧𑀸𑀤𑀸𑀦𑀁 𑀳𑁂𑀝𑁆𑀞𑀸 𑀞𑀧𑁂𑀲𑀺, 𑀤𑁆𑀯𑁂 𑀫𑁂𑀡𑁆𑀟𑀓𑁂 𑀓𑀸𑀭𑀸𑀧𑁂𑀢𑁆𑀯𑀸 𑀧𑀸𑀤𑀧𑀻𑀞𑀓𑀸𑀬 𑀳𑁂𑀝𑁆𑀞𑀸 𑀞𑀧𑁂𑀲𑀺, 𑀙 𑀲𑀼𑀯𑀡𑁆𑀡𑀫𑁂𑀡𑁆𑀟𑀓𑁂 𑀓𑀸𑀭𑀸𑀧𑁂𑀢𑁆𑀯𑀸 𑀫𑀡𑁆𑀟𑀧𑀁 𑀧𑀭𑀺𑀓𑁆𑀔𑀺𑀧𑁂𑀦𑁆𑀢𑁄 𑀞𑀧𑁂𑀲𑀺. 𑀥𑀫𑁆𑀫𑀸𑀲𑀦𑀁 𑀧𑀞𑀫𑀁 𑀲𑀼𑀢𑁆𑀢𑀫𑀬𑁂𑀳𑀺 𑀭𑀚𑁆𑀚𑀼𑀓𑁂𑀳𑀺 𑀯𑀸𑀬𑀸𑀧𑁂𑀢𑁆𑀯𑀸 𑀫𑀚𑁆𑀛𑁂 𑀲𑀼𑀯𑀡𑁆𑀡𑀲𑀼𑀢𑁆𑀢𑀫𑀬𑁂𑀳𑀺 𑀉𑀧𑀭𑀺 𑀫𑀼𑀢𑁆𑀢𑀫𑀬𑁂𑀳𑀺 𑀲𑀼𑀢𑁆𑀢𑁂𑀳𑀺 𑀯𑀸𑀬𑀸𑀧𑁂𑀲𑀺. 𑀢𑀲𑁆𑀲 𑀘𑀦𑁆𑀤𑀦𑀫𑀬𑁄 𑀅𑀧𑀲𑁆𑀲𑀬𑁄 𑀅𑀳𑁄𑀲𑀺. 𑀏𑀯𑀁 𑀓𑀼𑀜𑁆𑀚𑀭𑀲𑀸𑀮𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀸𑀮𑀸𑀫𑀳𑀁 𑀓𑀭𑁄𑀦𑁆𑀢𑁄 𑀅𑀝𑁆𑀞𑀲𑀝𑁆𑀞𑀻𑀳𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀤𑀸𑀦𑀁 𑀤𑀢𑁆𑀯𑀸 𑀑𑀲𑀸𑀦𑀤𑀺𑀯𑀲𑁂 𑀢𑀺𑀘𑀻𑀯𑀭𑀁 𑀅𑀤𑀸𑀲𑀺. 𑀢𑀢𑁆𑀣 𑀲𑀗𑁆𑀖𑀦𑀯𑀓𑀲𑁆𑀲 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀧𑀸𑀧𑀼𑀡𑀺.

𑀏𑀯𑀁 𑀯𑀺𑀧𑀲𑁆𑀲𑀻𑀩𑀼𑀤𑁆𑀥𑀓𑀸𑀮𑁂 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀪𑀤𑁆𑀤𑀓𑀧𑁆𑀧𑁂 𑀩𑀸𑀭𑀸𑀡𑀲𑀺𑀬𑀁 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀲𑁂𑀝𑁆𑀞𑀺 𑀦𑀸𑀫 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀭𑀸𑀚𑀽𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀧𑀼𑀭𑁄𑀳𑀺𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁, 𑀆𑀘𑀭𑀺𑀬, 𑀦𑀓𑁆𑀔𑀢𑁆𑀢𑀫𑀼𑀳𑀼𑀢𑁆𑀢𑀁, 𑀉𑀧𑀥𑀸𑀭𑁂𑀣𑀸’’𑀢𑀺 𑀆𑀳. 𑀆𑀫, 𑀉𑀧𑀥𑀸𑀭𑁂𑀫𑀺, 𑀓𑀺𑀁 𑀅𑀜𑁆𑀜𑀁 𑀅𑀫𑁆𑀳𑀸𑀓𑀁 𑀓𑀫𑁆𑀫𑀦𑁆𑀢𑀺. 𑀢𑁂𑀦 𑀳𑀺 𑀓𑀻𑀤𑀺𑀲𑀁 𑀚𑀦𑀧𑀤𑀘𑀸𑀭𑀺𑀢𑁆𑀢𑀦𑁆𑀢𑀺? 𑀏𑀓𑀁 𑀪𑀬𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀓𑀺𑀁 𑀪𑀬𑀁 𑀦𑀸𑀫𑀸𑀢𑀺? 𑀙𑀸𑀢𑀓𑀪𑀬𑀁 𑀲𑁂𑀝𑁆𑀞𑀻𑀢𑀺. 𑀓𑀤𑀸 𑀪𑀯𑀺𑀲𑁆𑀲𑀢𑀻𑀢𑀺? 𑀇𑀢𑁄 𑀢𑀺𑀡𑁆𑀡𑀁 𑀲𑀁𑀯𑀘𑁆𑀙𑀭𑀸𑀦𑀁 𑀅𑀘𑁆𑀘𑀬𑁂𑀦𑀸𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺 𑀩𑀳𑀼𑀁 𑀓𑀲𑀺𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸 𑀕𑁂𑀳𑁂 𑀯𑀺𑀚𑁆𑀚𑀫𑀸𑀦𑀥𑀦𑁂𑀦𑀸𑀧𑀺 𑀥𑀜𑁆𑀜𑀫𑁂𑀯 𑀕𑀳𑁂𑀢𑁆𑀯𑀸 𑀅𑀟𑁆𑀠𑀢𑁂𑀭𑀲𑀸𑀦𑀺 𑀓𑁄𑀝𑁆𑀞𑀲𑀢𑀸𑀦𑀺 𑀓𑀸𑀭𑁂𑀢𑁆𑀯𑀸 𑀲𑀩𑁆𑀩𑀓𑁄𑀝𑁆𑀞𑀓𑁂 𑀯𑀻𑀳𑀻𑀳𑀺 𑀧𑀭𑀺𑀧𑀽𑀭𑁂𑀲𑀺. 𑀓𑁄𑀝𑁆𑀞𑁂𑀲𑀼 𑀅𑀧𑁆𑀧𑀳𑁄𑀦𑁆𑀢𑁂𑀲𑀼 𑀘𑀸𑀝𑀺𑀆𑀤𑀻𑀦𑀺 𑀧𑀽𑀭𑁂𑀢𑁆𑀯𑀸 𑀅𑀯𑀲𑁂𑀲𑀁 𑀪𑀽𑀫𑀺𑀬𑀁 𑀆𑀯𑀸𑀝𑁂 𑀓𑀢𑁆𑀯𑀸 𑀦𑀺𑀔𑀡𑀺. 𑀦𑀺𑀥𑀸𑀦𑀸𑀯𑀲𑁂𑀲𑀁 𑀫𑀢𑁆𑀢𑀺𑀓𑀸𑀬 𑀲𑀤𑁆𑀥𑀺𑀁 𑀫𑀤𑁆𑀤𑀺𑀢𑁆𑀯𑀸 𑀪𑀺𑀢𑁆𑀢𑀺𑀬𑁄 𑀮𑀺𑀫𑁆𑀧𑀸𑀧𑁂𑀲𑀺.

𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀙𑀸𑀢𑀓𑀪𑀬𑁂 𑀲𑀫𑁆𑀧𑀢𑁆𑀢𑁂 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀁 𑀥𑀜𑁆𑀜𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀓𑁄𑀝𑁆𑀞𑁂𑀲𑀼 𑀘 𑀘𑀸𑀝𑀺𑀆𑀤𑀻𑀲𑀼 𑀘 𑀦𑀺𑀓𑁆𑀔𑀺𑀢𑁆𑀢𑀥𑀜𑁆𑀜𑁂 𑀧𑀭𑀺𑀓𑁆𑀔𑀻𑀡𑁂 𑀧𑀭𑀺𑀚𑀦𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀕𑀘𑁆𑀙𑀣, 𑀢𑀸𑀢𑀸, 𑀧𑀩𑁆𑀩𑀢𑀧𑀸𑀤𑀁 𑀧𑀯𑀺𑀲𑀺𑀢𑁆𑀯𑀸 𑀚𑀻𑀯𑀦𑁆𑀢𑀸 𑀲𑀼𑀪𑀺𑀓𑁆𑀔𑀓𑀸𑀮𑁂 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑀼𑀓𑀸𑀫𑀸 𑀆𑀕𑀘𑁆𑀙𑀣, 𑀅𑀦𑀸𑀕𑀦𑁆𑀢𑀼𑀓𑀸𑀫𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀚𑀻𑀯𑀣𑀸’’𑀢𑀺. 𑀢𑁂 𑀭𑁄𑀤𑀫𑀸𑀦𑀸 𑀅𑀲𑁆𑀲𑀼𑀫𑀼𑀔𑀸 𑀳𑀼𑀢𑁆𑀯𑀸 𑀲𑁂𑀝𑁆𑀞𑀺𑀁 𑀯𑀦𑁆𑀤𑀺𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀦𑀺𑀲𑀻𑀤𑀺𑀢𑁆𑀯𑀸 𑀢𑀣𑀸 𑀅𑀓𑀁𑀲𑀼. 𑀢𑀲𑁆𑀲 𑀧𑀦 𑀲𑀦𑁆𑀢𑀺𑀓𑁂 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀏𑀓𑁄𑀯 𑀧𑀼𑀡𑁆𑀡𑁄 𑀦𑀸𑀫 𑀤𑀸𑀲𑁄 𑀑𑀳𑀻𑀬𑀺, 𑀢𑁂𑀦 𑀲𑀤𑁆𑀥𑀺𑀁 𑀲𑁂𑀝𑁆𑀞𑀺𑀚𑀸𑀬𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀲𑁂𑀝𑁆𑀞𑀺𑀲𑀼𑀡𑀺𑀲𑀸𑀢𑀺 𑀧𑀜𑁆𑀘𑁂𑀯 𑀚𑀦𑀸 𑀅𑀳𑁂𑀲𑀼𑀁. 𑀢𑁂 𑀪𑀽𑀫𑀺𑀬𑀁 𑀆𑀯𑀸𑀝𑁂𑀲𑀼 𑀦𑀺𑀳𑀺𑀢𑀥𑀜𑁆𑀜𑁂𑀧𑀺 𑀧𑀭𑀺𑀓𑁆𑀔𑀻𑀡𑁂 𑀪𑀺𑀢𑁆𑀢𑀺𑀫𑀢𑁆𑀢𑀺𑀓𑀁 𑀧𑀸𑀢𑁂𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀢𑀢𑁄 𑀮𑀤𑁆𑀥𑀥𑀜𑁆𑀜𑁂𑀦 𑀬𑀸𑀧𑀬𑀺𑀁𑀲𑀼. 𑀅𑀣𑀲𑁆𑀲 𑀚𑀸𑀬𑀸 𑀙𑀸𑀢𑀓𑁂 𑀅𑀯𑀢𑁆𑀣𑀭𑀦𑁆𑀢𑁂 𑀫𑀢𑁆𑀢𑀺𑀓𑀸𑀬 𑀔𑀻𑀬𑀫𑀸𑀦𑀸𑀬 𑀪𑀺𑀢𑁆𑀢𑀺𑀧𑀸𑀤𑁂𑀲𑀼 𑀅𑀯𑀲𑀺𑀝𑁆𑀞𑀫𑀢𑁆𑀢𑀺𑀓𑀁 𑀧𑀸𑀢𑁂𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀅𑀟𑁆𑀠𑀸𑀴𑁆𑀳𑀓𑀫𑀢𑁆𑀢𑀁 𑀯𑀻𑀳𑀺𑀁 𑀮𑀪𑀺𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀏𑀓𑀁 𑀢𑀡𑁆𑀟𑀼𑀮𑀦𑀸𑀴𑀺𑀁 𑀕𑀳𑁂𑀢𑁆𑀯𑀸 ‘‘𑀙𑀸𑀢𑀓𑀓𑀸𑀮𑁂 𑀘𑁄𑀭𑀸 𑀩𑀳𑀽 𑀳𑁄𑀦𑁆𑀢𑀻’’𑀢𑀺 𑀘𑁄𑀭𑀪𑀬𑁂𑀦 𑀏𑀓𑀲𑁆𑀫𑀺𑀁 𑀓𑀼𑀝𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀺𑀤𑀳𑀺𑀢𑁆𑀯𑀸 𑀪𑀽𑀫𑀺𑀬𑀁 𑀦𑀺𑀔𑀡𑀺𑀢𑁆𑀯𑀸 𑀞𑀧𑁂𑀲𑀺. 𑀅𑀣 𑀦𑀁 𑀲𑁂𑀝𑁆𑀞𑀺 𑀭𑀸𑀚𑀽𑀧𑀝𑁆𑀞𑀸𑀦𑀢𑁄 𑀆𑀕𑀦𑁆𑀢𑁆𑀯𑀸 𑀆𑀳 𑁋 ‘‘𑀪𑀤𑁆𑀤𑁂, 𑀙𑀸𑀢𑁄𑀫𑁆𑀳𑀺, 𑀅𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺. 𑀲𑀸 𑀯𑀺𑀚𑁆𑀚𑀫𑀸𑀦𑀁 ‘‘𑀦𑀢𑁆𑀣𑀻’’𑀢𑀺 𑀅𑀯𑀢𑁆𑀯𑀸 ‘‘𑀏𑀓𑀸 𑀢𑀡𑁆𑀟𑀼𑀮𑀦𑀸𑀴𑀺 𑀅𑀢𑁆𑀣𑀻’’𑀢𑀺 𑀆𑀳. ‘‘𑀓𑀳𑀁 𑀲𑀸’’𑀢𑀺? ‘‘𑀘𑁄𑀭𑀪𑀬𑁂𑀦 𑀫𑁂 𑀦𑀺𑀔𑀡𑀺𑀢𑁆𑀯𑀸 𑀞𑀧𑀺𑀢𑀸’’𑀢𑀺. ‘‘𑀢𑁂𑀦 𑀳𑀺 𑀦𑀁 𑀉𑀤𑁆𑀥𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀧𑀘𑀸𑀳𑀻’’𑀢𑀺. ‘‘𑀲𑀘𑁂 𑀬𑀸𑀕𑀼𑀁 𑀧𑀘𑀺𑀲𑁆𑀲𑀸𑀫𑀺, 𑀤𑁆𑀯𑁂 𑀯𑀸𑀭𑁂 𑀮𑀪𑀺𑀲𑁆𑀲𑀢𑀺. 𑀲𑀘𑁂 𑀪𑀢𑁆𑀢𑀁 𑀧𑀘𑀺𑀲𑁆𑀲𑀸𑀫𑀺, 𑀏𑀓𑀯𑀸𑀭𑀫𑁂𑀯 𑀮𑀪𑀺𑀲𑁆𑀲𑀢𑀺, 𑀓𑀺𑀁 𑀧𑀘𑀸𑀫𑀺, 𑀲𑀸𑀫𑀻’’𑀢𑀺 𑀆𑀳. ‘‘𑀅𑀫𑁆𑀳𑀸𑀓𑀁 𑀅𑀜𑁆𑀜𑁄 𑀧𑀘𑁆𑀘𑀬𑁄 𑀦𑀢𑁆𑀣𑀺, 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀫𑀭𑀺𑀲𑁆𑀲𑀸𑀫, 𑀪𑀢𑁆𑀢𑀫𑁂𑀯 𑀧𑀘𑀸𑀳𑀻’’𑀢𑀺. 𑀲𑀸 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀲𑁂𑀝𑁆𑀞𑀺𑀦𑁄 𑀓𑁄𑀝𑁆𑀞𑀸𑀲𑀁 𑀯𑀟𑁆𑀠𑁂𑀢𑁆𑀯𑀸 𑀧𑀼𑀭𑀢𑁄 𑀞𑀧𑁂𑀲𑀺.

𑀢𑀲𑁆𑀫𑀺𑀁 𑀔𑀡𑁂 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀢𑀺. 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀓𑀺𑀭 𑀲𑀫𑀸𑀧𑀢𑁆𑀢𑀺𑀩𑀮𑁂𑀦 𑀚𑀺𑀖𑀘𑁆𑀙𑀸 𑀦 𑀩𑀸𑀥𑀢𑀺. 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀸𑀦𑀁 𑀧𑀦 𑀩𑀮𑀯𑀢𑀻 𑀳𑀼𑀢𑁆𑀯𑀸 𑀉𑀤𑀭𑀧𑀝𑀮𑀁 𑀟𑀬𑁆𑀳𑀦𑁆𑀢𑀻 𑀯𑀺𑀬 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀢𑁂 𑀮𑀪𑀦𑀝𑁆𑀞𑀸𑀦𑀁 𑀑𑀮𑁄𑀓𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀢𑀁 𑀤𑀺𑀯𑀲𑀜𑁆𑀘 𑀢𑁂𑀲𑀁 𑀤𑀸𑀦𑀁 𑀤𑀢𑁆𑀯𑀸 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑀫𑁆𑀧𑀢𑁆𑀢𑀺𑀁 𑀮𑀪𑀦𑁆𑀢𑀺. 𑀢𑀲𑁆𑀫𑀸 𑀲𑁄𑀧𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀦𑁆𑀢𑁄 ‘‘𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀙𑀸𑀢𑀓𑀪𑀬𑀁 𑀉𑀧𑁆𑀧𑀦𑁆𑀦𑀁, 𑀲𑁂𑀝𑁆𑀞𑀺𑀕𑁂𑀳𑁂 𑀘 𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀦𑀸𑀴𑀺𑀓𑁄𑀤𑀦𑁄𑀯 𑀧𑀓𑁆𑀓𑁄, 𑀲𑀤𑁆𑀥𑀸 𑀦𑀼 𑀔𑁄 𑀏𑀢𑁂, 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀯𑀸 𑀫𑀫 𑀲𑀗𑁆𑀕𑀳𑀁 𑀓𑀸𑀢𑀼’’𑀦𑁆𑀢𑀺 𑀢𑁂𑀲𑀁 𑀲𑀤𑁆𑀥𑀪𑀸𑀯𑀜𑁆𑀘 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀲𑀫𑀢𑁆𑀣𑀪𑀸𑀯𑀜𑁆𑀘 𑀤𑀺𑀲𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀫𑀳𑀸𑀲𑁂𑀝𑁆𑀞𑀺𑀲𑁆𑀲 𑀧𑀼𑀭𑀢𑁄 𑀤𑁆𑀯𑀸𑀭𑁂 𑀞𑀺𑀢𑀫𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀲𑁄 𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 ‘‘𑀧𑀼𑀩𑁆𑀩𑁂𑀧𑀺 𑀫𑀬𑀸 𑀤𑀸𑀦𑀲𑁆𑀲 𑀅𑀤𑀺𑀦𑁆𑀦𑀢𑁆𑀢𑀸 𑀏𑀯𑀭𑀽𑀧𑀁 𑀙𑀸𑀢𑀓𑀁 𑀤𑀺𑀝𑁆𑀞𑀁, 𑀇𑀤𑀁 𑀔𑁄 𑀧𑀦 𑀪𑀢𑁆𑀢𑀁 𑀫𑀁 𑀏𑀓𑀤𑀺𑀯𑀲𑀫𑁂𑀯 𑀭𑀓𑁆𑀔𑁂𑀬𑁆𑀬. 𑀅𑀬𑁆𑀬𑀲𑁆𑀲 𑀧𑀦 𑀤𑀺𑀦𑁆𑀦𑀁 𑀅𑀦𑁂𑀓𑀸𑀲𑀼 𑀓𑀧𑁆𑀧𑀓𑁄𑀝𑀻𑀲𑀼 𑀫𑀫 𑀳𑀺𑀢𑀲𑀼𑀔𑀸𑀯𑀳𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀪𑀢𑁆𑀢𑀧𑀸𑀢𑀺𑀁 𑀅𑀧𑀦𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 𑀆𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀤𑀧𑀻𑀞𑁂 𑀞𑀧𑁂𑀢𑁆𑀯𑀸 𑀪𑀢𑁆𑀢𑀧𑀸𑀢𑀺𑀫𑀸𑀤𑀸𑀬 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀢𑁆𑀢𑁂 𑀑𑀓𑀺𑀭𑀺. 𑀉𑀧𑀟𑁆𑀠𑀸𑀯𑀲𑁂𑀲𑁂 𑀪𑀢𑁆𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀧𑀺𑀤𑀳𑀺. 𑀅𑀣 𑀦𑀁, ‘‘𑀪𑀦𑁆𑀢𑁂, 𑀏𑀓𑀸𑀬 𑀢𑀡𑁆𑀟𑀼𑀮𑀦𑀸𑀴𑀺𑀬𑀸 𑀧𑀜𑁆𑀘𑀦𑁆𑀦𑀁 𑀚𑀦𑀸𑀦𑀁 𑀧𑀓𑁆𑀓𑀑𑀤𑀦𑀲𑁆𑀲 𑀅𑀬𑀁 𑀏𑀓𑁄 𑀓𑁄𑀝𑁆𑀞𑀸𑀲𑁄, 𑀇𑀫𑀁 𑀤𑁆𑀯𑀺𑀥𑀸 𑀓𑀸𑀢𑀼𑀁 𑀦 𑀲𑀓𑁆𑀓𑀸. 𑀫𑀸 𑀫𑀬𑁆𑀳𑀁 𑀇𑀥𑀮𑁄𑀓𑁂 𑀲𑀗𑁆𑀕𑀳𑀁 𑀓𑀭𑁄𑀣, 𑀅𑀳𑀁 𑀦𑀺𑀭𑀯𑀲𑁂𑀲𑀁 𑀤𑀸𑀢𑀼𑀓𑀸𑀫𑁄𑀫𑁆𑀳𑀻’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑀁 𑀪𑀢𑁆𑀢𑀫𑀤𑀸𑀲𑀺. 𑀤𑀢𑁆𑀯𑀸 𑀘 𑀧𑀦 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺, ‘‘𑀫𑀸, 𑀪𑀦𑁆𑀢𑁂, 𑀧𑀼𑀦 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀏𑀯𑀭𑀽𑀧𑀁 𑀙𑀸𑀢𑀓𑀪𑀬𑀁 𑀅𑀤𑁆𑀤𑀲𑀁, 𑀇𑀢𑁄 𑀧𑀝𑁆𑀞𑀸𑀬 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁 𑀩𑀻𑀚𑀪𑀢𑁆𑀢𑀁 𑀤𑀸𑀢𑀼𑀁 𑀲𑀫𑀢𑁆𑀣𑁄 𑀪𑀯𑁂𑀬𑁆𑀬𑀁, 𑀲𑀳𑀢𑁆𑀣𑁂𑀦 𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀺𑀓𑀁 𑀦 𑀓𑀧𑁆𑀧𑁂𑀬𑁆𑀬𑀁, 𑀅𑀟𑁆𑀠𑀢𑁂𑀭𑀲 𑀓𑁄𑀝𑁆𑀞𑀲𑀢𑀸𑀦𑀺 𑀲𑁄𑀥𑀸𑀧𑁂𑀢𑁆𑀯𑀸 𑀲𑀻𑀲𑀁 𑀦𑁆𑀳𑀸𑀬𑀺𑀢𑁆𑀯𑀸 𑀢𑁂𑀲𑀁 𑀤𑁆𑀯𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀤𑁆𑀥𑀁 𑀑𑀮𑁄𑀓𑀺𑀢𑀓𑁆𑀔𑀡𑁂𑀬𑁂𑀯 𑀫𑁂 𑀭𑀢𑁆𑀢𑀲𑀸𑀮𑀺𑀥𑀸𑀭𑀸 𑀧𑀢𑀺𑀢𑁆𑀯𑀸 𑀲𑀩𑁆𑀩𑀓𑁄𑀝𑁆𑀞𑁂 𑀧𑀽𑀭𑁂𑀬𑁆𑀬𑀼𑀁. 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀘 𑀅𑀬𑀫𑁂𑀯 𑀪𑀭𑀺𑀬𑀸, 𑀅𑀬𑀫𑁂𑀯 𑀧𑀼𑀢𑁆𑀢𑁄, 𑀅𑀬𑀫𑁂𑀯 𑀲𑀼𑀡𑀺𑀲𑀸, 𑀅𑀬𑀫𑁂𑀯 𑀤𑀸𑀲𑁄 𑀳𑁄𑀢𑀽’’𑀢𑀺.

𑀪𑀭𑀺𑀬𑀸𑀧𑀺𑀲𑁆𑀲 ‘‘𑀫𑀫 𑀲𑀸𑀫𑀺𑀓𑁂 𑀚𑀺𑀖𑀘𑁆𑀙𑀸𑀬 𑀧𑀻𑀴𑀺𑀬𑀫𑀸𑀦𑁂 𑀦 𑀲𑀓𑁆𑀓𑀸 𑀫𑀬𑀸 𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀢𑁆𑀯𑀸 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺, ‘‘𑀪𑀦𑁆𑀢𑁂, 𑀇𑀤𑀸𑀦𑀺 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀏𑀯𑀭𑀽𑀧𑀁 𑀙𑀸𑀢𑀓𑀪𑀬𑀁 𑀦 𑀧𑀲𑁆𑀲𑁂𑀬𑁆𑀬𑀁, 𑀪𑀢𑁆𑀢𑀣𑀸𑀮𑀺𑀓𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁 𑀪𑀢𑁆𑀢𑀁 𑀤𑁂𑀦𑁆𑀢𑀺𑀬𑀸𑀧𑀺 𑀘 𑀫𑁂 𑀬𑀸𑀯 𑀦 𑀉𑀝𑁆𑀞𑀳𑀺𑀲𑁆𑀲𑀸𑀫𑀺, 𑀢𑀸𑀯 𑀕𑀳𑀺𑀢𑀕𑀳𑀺𑀢𑀝𑁆𑀞𑀸𑀦𑀁 𑀧𑀽𑀭𑀺𑀢𑀫𑁂𑀯 𑀳𑁄𑀢𑀼. 𑀅𑀬𑀫𑁂𑀯 𑀲𑀸𑀫𑀺𑀓𑁄, 𑀅𑀬𑀫𑁂𑀯 𑀧𑀼𑀢𑁆𑀢𑁄, 𑀅𑀬𑀫𑁂𑀯 𑀲𑀼𑀡𑀺𑀲𑀸, 𑀅𑀬𑀫𑁂𑀯 𑀤𑀸𑀲𑁄 𑀳𑁄𑀢𑀽’’𑀢𑀺. 𑀧𑀼𑀢𑁆𑀢𑁄𑀧𑀺𑀲𑁆𑀲 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀢𑁆𑀯𑀸 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺, ‘‘𑀪𑀦𑁆𑀢𑁂, 𑀇𑀢𑁄 𑀧𑀝𑁆𑀞𑀸𑀬 𑀏𑀯𑀭𑀽𑀧𑀁 𑀙𑀸𑀢𑀓𑀪𑀬𑀁 𑀦 𑀧𑀲𑁆𑀲𑁂𑀬𑁆𑀬𑀁, 𑀏𑀓𑀜𑁆𑀘 𑀫𑁂 𑀲𑀳𑀲𑁆𑀲𑀣𑀯𑀺𑀓𑀁 𑀕𑀳𑁂𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁 𑀓𑀳𑀸𑀧𑀡𑀁 𑀤𑁂𑀦𑁆𑀢𑀲𑁆𑀲𑀸𑀧𑀺 𑀅𑀬𑀁 𑀲𑀳𑀲𑁆𑀲𑀣𑀯𑀺𑀓𑀸 𑀧𑀭𑀺𑀧𑀼𑀡𑁆𑀡𑀸𑀯 𑀳𑁄𑀢𑀼, 𑀇𑀫𑁂𑀬𑁂𑀯 𑀫𑀸𑀢𑀸𑀧𑀺𑀢𑀭𑁄 𑀳𑁄𑀦𑁆𑀢𑀼, 𑀅𑀬𑀁 𑀪𑀭𑀺𑀬𑀸, 𑀅𑀬𑀁 𑀤𑀸𑀲𑁄 𑀳𑁄𑀢𑀽’’𑀢𑀺.

𑀲𑀼𑀡𑀺𑀲𑀸𑀧𑀺𑀲𑁆𑀲 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀢𑁆𑀯𑀸 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺, ‘‘𑀇𑀢𑁄 𑀧𑀝𑁆𑀞𑀸𑀬 𑀏𑀯𑀭𑀽𑀧𑀁 𑀙𑀸𑀢𑀓𑀪𑀬𑀁 𑀦 𑀧𑀲𑁆𑀲𑁂𑀬𑁆𑀬𑀁, 𑀏𑀓𑀜𑁆𑀘 𑀫𑁂 𑀥𑀜𑁆𑀜𑀧𑀺𑀝𑀓𑀁 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁 𑀩𑀻𑀚𑀪𑀢𑁆𑀢𑀁 𑀤𑁂𑀦𑁆𑀢𑀺𑀬𑀸𑀧𑀺 𑀔𑀻𑀡𑀪𑀸𑀯𑁄 𑀫𑀸 𑀧𑀜𑁆𑀜𑀸𑀬𑀺𑀢𑁆𑀣, 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀇𑀫𑁂𑀬𑁂𑀯 𑀲𑀲𑀼𑀭𑀸 𑀳𑁄𑀦𑁆𑀢𑀼, 𑀅𑀬𑀫𑁂𑀯 𑀲𑀸𑀫𑀺𑀓𑁄, 𑀅𑀬𑀫𑁂𑀯 𑀤𑀸𑀲𑁄 𑀳𑁄𑀢𑀽’’𑀢𑀺. 𑀤𑀸𑀲𑁄𑀧𑀺 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀢𑁆𑀯𑀸 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺, ‘‘𑀇𑀢𑁄 𑀧𑀝𑁆𑀞𑀸𑀬 𑀏𑀯𑀭𑀽𑀧𑀁 𑀙𑀸𑀢𑀓𑀪𑀬𑀁 𑀦 𑀧𑀲𑁆𑀲𑁂𑀬𑁆𑀬𑀁, 𑀲𑀩𑁆𑀩𑁂 𑀇𑀫𑁂 𑀲𑀸𑀫𑀺𑀓𑀸 𑀳𑁄𑀦𑁆𑀢𑀼, 𑀓𑀲𑀦𑁆𑀢𑀲𑁆𑀲 𑀘 𑀫𑁂 𑀇𑀢𑁄 𑀢𑀺𑀲𑁆𑀲𑁄, 𑀏𑀢𑁆𑀢𑁄 𑀢𑀺𑀲𑁆𑀲𑁄, 𑀫𑀚𑁆𑀛𑁂 𑀏𑀓𑀸𑀢𑀺 𑀤𑀸𑀭𑀼𑀅𑀫𑁆𑀩𑀡𑀫𑀢𑁆𑀢𑀸 𑀲𑀢𑁆𑀢 𑀲𑀢𑁆𑀢 𑀲𑀻𑀢𑀸𑀬𑁄 𑀕𑀘𑁆𑀙𑀦𑁆𑀢𑀽’’𑀢𑀺. 𑀲𑁄 𑀢𑀁 𑀤𑀺𑀯𑀲𑀁 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀧𑀢𑁆𑀣𑁂𑀢𑁆𑀯𑀸 𑀮𑀤𑁆𑀥𑀼𑀁 𑀲𑀫𑀢𑁆𑀣𑁄𑀧𑀺 𑀲𑀸𑀫𑀺𑀓𑁂𑀲𑀼 𑀲𑀺𑀦𑁂𑀳𑁂𑀦 ‘‘𑀇𑀫𑁂𑀬𑁂𑀯 𑀫𑁂 𑀲𑀸𑀫𑀺𑀓𑀸 𑀳𑁄𑀦𑁆𑀢𑀽’’𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀲𑀩𑁆𑀩𑁂𑀲𑀫𑁆𑀧𑀺 𑀯𑀘𑀦𑀸𑀯𑀲𑀸𑀦𑁂 ‘‘𑀏𑀯𑀁 𑀳𑁄𑀢𑀽’’𑀢𑀺 𑀯𑀢𑁆𑀯𑀸 𑁋

‘‘𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳𑀁, 𑀔𑀺𑀧𑁆𑀧𑀫𑁂𑀯 𑀲𑀫𑀺𑀚𑁆𑀛𑀢𑀼;

𑀲𑀩𑁆𑀩𑁂 𑀧𑀽𑀭𑁂𑀦𑁆𑀢𑀼 𑀲𑀗𑁆𑀓𑀧𑁆𑀧𑀸, 𑀘𑀦𑁆𑀤𑁄 𑀧𑀦𑁆𑀦𑀭𑀲𑁄 𑀬𑀣𑀸.

‘‘𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳𑀁, 𑀔𑀺𑀧𑁆𑀧𑀫𑁂𑀯 𑀲𑀫𑀺𑀚𑁆𑀛𑀢𑀼;

𑀲𑀩𑁆𑀩𑁂 𑀧𑀽𑀭𑁂𑀦𑁆𑀢𑀼 𑀲𑀗𑁆𑀓𑀧𑁆𑀧𑀸, 𑀫𑀡𑀺 𑀚𑁄𑀢𑀺𑀭𑀲𑁄 𑀬𑀣𑀸’’𑀢𑀺. 𑁋

𑀧𑀘𑁆𑀘𑁂𑀓𑀩𑀼𑀤𑁆𑀥𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 ‘‘𑀫𑀬𑀸 𑀇𑀫𑁂𑀲𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀬𑀸𑀯 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑀸 𑀇𑀫𑁂 𑀫𑀁 𑀧𑀲𑁆𑀲𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑁂𑀧𑀺 𑀑𑀮𑁄𑀓𑁂𑀢𑁆𑀯𑀸𑀯 𑀅𑀝𑁆𑀞𑀁𑀲𑀼. 𑀲𑁄 𑀕𑀦𑁆𑀢𑁆𑀯𑀸 𑀢𑀁 𑀪𑀢𑁆𑀢𑀁 𑀧𑀜𑁆𑀘𑀳𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀪𑀚𑀺. 𑀢𑀁 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀲𑀩𑁆𑀩𑁂𑀲𑀫𑁆𑀧𑀺 𑀧𑀳𑁄𑀢𑀺. 𑀢𑁂 𑀑𑀮𑁄𑀓𑁂𑀦𑁆𑀢𑀸𑀬𑁂𑀯 𑀅𑀝𑁆𑀞𑀁𑀲𑀼.

𑀅𑀢𑀺𑀓𑁆𑀓𑀦𑁆𑀢𑁂 𑀧𑀦 𑀫𑀚𑁆𑀛𑀦𑁆𑀳𑀺𑀓𑁂 𑀲𑁂𑀝𑁆𑀞𑀺𑀪𑀭𑀺𑀬𑀸 𑀉𑀓𑁆𑀔𑀮𑀺𑀁 𑀥𑁄𑀯𑀺𑀢𑁆𑀯𑀸 𑀧𑀺𑀤𑀳𑀺𑀢𑁆𑀯𑀸 𑀞𑀧𑁂𑀲𑀺. 𑀲𑁂𑀝𑁆𑀞𑀺𑀧𑀺 𑀚𑀺𑀖𑀘𑁆𑀙𑀸𑀬 𑀧𑀻𑀴𑀺𑀢𑁄 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀲𑁄 𑀲𑀸𑀬𑀦𑁆𑀳𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀪𑀭𑀺𑀬𑀁 𑀆𑀳 𑁋 ‘‘𑀪𑀤𑁆𑀤𑁂, 𑀅𑀢𑀺𑀯𑀺𑀬 𑀙𑀸𑀢𑁄𑀫𑁆𑀳𑀺, 𑀅𑀢𑁆𑀣𑀺 𑀦𑀼 𑀔𑁄 𑀉𑀓𑁆𑀔𑀮𑀺𑀬𑀸 𑀢𑀮𑁂 𑀛𑀸𑀫𑀓𑀲𑀺𑀢𑁆𑀣𑀸𑀦𑀻’’𑀢𑀺. 𑀲𑀸 𑀥𑁄𑀯𑀺𑀢𑁆𑀯𑀸 𑀉𑀓𑁆𑀔𑀮𑀺𑀬𑀸 𑀞𑀧𑀺𑀢𑀪𑀸𑀯𑀁 𑀚𑀸𑀦𑀦𑁆𑀢𑀻𑀧𑀺 ‘‘𑀦𑀢𑁆𑀣𑀻’’𑀢𑀺 𑀅𑀯𑀢𑁆𑀯𑀸 ‘‘𑀉𑀓𑁆𑀔𑀮𑀺𑀁 𑀯𑀺𑀯𑀭𑀺𑀢𑁆𑀯𑀸 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀉𑀝𑁆𑀞𑀸𑀬 𑀉𑀓𑁆𑀔𑀮𑀺𑀫𑀽𑀮𑀁 𑀕𑀦𑁆𑀢𑁆𑀯𑀸 𑀉𑀓𑁆𑀔𑀮𑀺𑀁 𑀯𑀺𑀯𑀭𑀺, 𑀢𑀸𑀯𑀤𑁂𑀯 𑀲𑀼𑀫𑀦𑀫𑀓𑀼𑀮𑀲𑀤𑀺𑀲𑀯𑀡𑁆𑀡𑀲𑁆𑀲 𑀪𑀢𑁆𑀢𑀲𑁆𑀲 𑀧𑀽𑀭𑀸 𑀉𑀓𑁆𑀔𑀮𑀺 𑀧𑀺𑀥𑀸𑀦𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀸 𑀢𑀁 𑀤𑀺𑀲𑁆𑀯𑀸𑀯 𑀧𑀻𑀢𑀺𑀬𑀸 𑀨𑀼𑀝𑁆𑀞𑀲𑀭𑀻𑀭𑀸 𑀲𑁂𑀝𑁆𑀞𑀺𑀁 𑀆𑀳 𑁋 ‘‘𑀉𑀝𑁆𑀞𑁂𑀳𑀺, 𑀲𑀸𑀫𑀺, 𑀅𑀳𑀁 𑀉𑀓𑁆𑀔𑀮𑀺𑀁 𑀥𑁄𑀯𑀺𑀢𑁆𑀯𑀸 𑀧𑀺𑀤𑀳𑀺𑀁, 𑀲𑀸 𑀧𑀦 𑀲𑀼𑀫𑀦𑀫𑀓𑀼𑀮𑀲𑀤𑀺𑀲𑀯𑀡𑁆𑀡𑀲𑁆𑀲 𑀪𑀢𑁆𑀢𑀲𑁆𑀲 𑀧𑀽𑀭𑀸, 𑀧𑀼𑀜𑁆𑀜𑀸𑀦𑀺 𑀦𑀸𑀫 𑀓𑀢𑁆𑀢𑀩𑁆𑀩𑀭𑀽𑀧𑀸𑀦𑀺, 𑀤𑀸𑀦𑀁 𑀦𑀸𑀫 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁. 𑀉𑀝𑁆𑀞𑁂𑀳𑀺, 𑀲𑀸𑀫𑀺, 𑀪𑀼𑀜𑁆𑀚𑀲𑁆𑀲𑀽’’𑀢𑀺. 𑀲𑀸 𑀤𑁆𑀯𑀺𑀦𑁆𑀦𑀁 𑀧𑀺𑀢𑀸𑀧𑀼𑀢𑁆𑀢𑀸𑀦𑀁 𑀪𑀢𑁆𑀢𑀁 𑀅𑀤𑀸𑀲𑀺. 𑀢𑁂𑀲𑀼 𑀲𑀼𑀢𑁆𑀯𑀸 𑀉𑀝𑁆𑀞𑀺𑀢𑁂𑀲𑀼 𑀲𑀼𑀡𑀺𑀲𑀸𑀬 𑀲𑀤𑁆𑀥𑀺𑀁 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀧𑀼𑀡𑁆𑀡𑀲𑁆𑀲 𑀪𑀢𑁆𑀢𑀁 𑀅𑀤𑀸𑀲𑀺. 𑀕𑀳𑀺𑀢𑀕𑀳𑀺𑀢𑀝𑁆𑀞𑀸𑀦𑀁 𑀦 𑀔𑀻𑀬𑀢𑀺, 𑀓𑀝𑀘𑁆𑀙𑀼𑀦𑀸 𑀲𑀓𑀺𑀁 𑀕𑀳𑀺𑀢𑀝𑁆𑀞𑀸𑀦𑀫𑁂𑀯 𑀧𑀜𑁆𑀜𑀸𑀬𑀢𑀺. 𑀢𑀁𑀤𑀺𑀯𑀲𑀫𑁂𑀯 𑀓𑁄𑀝𑁆𑀞𑀸𑀤𑀬𑁄 𑀧𑀼𑀩𑁆𑀩𑁂 𑀧𑀽𑀭𑀺𑀢𑀦𑀺𑀬𑀸𑀫𑁂𑀦𑁂𑀯 𑀧𑀼𑀦 𑀧𑀽𑀭𑀬𑀺𑀁𑀲𑀼. ‘‘𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑁂 𑀪𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀩𑀻𑀚𑀪𑀢𑁆𑀢𑁂𑀳𑀺 𑀅𑀢𑁆𑀣𑀺𑀓𑀸 𑀆𑀕𑀦𑁆𑀢𑁆𑀯𑀸 𑀕𑀡𑁆𑀳𑀦𑁆𑀢𑀽’’𑀢𑀺 𑀦𑀕𑀭𑁂 𑀖𑁄𑀲𑀦𑀁 𑀓𑀸𑀭𑁂𑀲𑀺. 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀕𑁂𑀳𑀢𑁄 𑀩𑀻𑀚𑀪𑀢𑁆𑀢𑀁 𑀕𑀡𑁆𑀳𑀺𑀁𑀲𑀼. 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀪𑀺𑀁𑀲𑀼𑀬𑁂𑀯.

𑀲𑁄 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀪𑀤𑁆𑀤𑀺𑀬𑀦𑀕𑀭𑁂 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀪𑀭𑀺𑀬𑀸𑀧𑀺𑀲𑁆𑀲 𑀫𑀳𑀸𑀪𑁄𑀕𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀢𑀲𑁆𑀲𑁂𑀯 𑀕𑁂𑀳𑀁 𑀅𑀕𑀫𑀸𑀲𑀺. 𑀢𑀲𑁆𑀲 𑀢𑀁 𑀧𑀼𑀩𑁆𑀩𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀧𑀘𑁆𑀙𑀸𑀕𑁂𑀳𑁂 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀫𑁂𑀡𑁆𑀟𑀓𑀸 𑀉𑀝𑁆𑀞𑀳𑀺𑀁𑀲𑀼. 𑀧𑀼𑀢𑁆𑀢𑁄𑀧𑀺 𑀦𑁂𑀲𑀁 𑀧𑀼𑀢𑁆𑀢𑁄𑀯, 𑀲𑀼𑀡𑀺𑀲𑀸 𑀲𑀼𑀡𑀺𑀲𑀸𑀯, 𑀤𑀸𑀲𑁄 𑀤𑀸𑀲𑁄𑀯 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀲𑁂𑀝𑁆𑀞𑀺 𑀅𑀢𑁆𑀢𑀦𑁄 𑀧𑀼𑀜𑁆𑀜𑀁 𑀯𑀻𑀫𑀁𑀲𑀺𑀢𑀼𑀓𑀸𑀫𑁄 𑀅𑀟𑁆𑀠𑀢𑁂𑀭𑀲𑀸𑀦𑀺 𑀓𑁄𑀝𑁆𑀞𑀲𑀢𑀸𑀦𑀺 𑀲𑁄𑀥𑀸𑀧𑁂𑀢𑁆𑀯𑀸 𑀲𑀻𑀲𑀁 𑀦𑁆𑀳𑀸𑀢𑁄 𑀤𑁆𑀯𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀤𑁆𑀥𑀁 𑀑𑀮𑁄𑀓𑁂𑀲𑀺. 𑀲𑀩𑁆𑀩𑀸𑀦𑀺𑀧𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀭𑀢𑁆𑀢𑀲𑀸𑀮𑀻𑀦𑀁 𑀧𑀽𑀭𑀬𑀺𑀁𑀲𑀼. 𑀲𑁄 𑀲𑁂𑀲𑀸𑀦𑀫𑁆𑀧𑀺 𑀧𑀼𑀜𑁆𑀜𑀸𑀦𑀺 𑀯𑀻𑀫𑀁𑀲𑀺𑀢𑀼𑀓𑀸𑀫𑁄 𑀪𑀭𑀺𑀬𑀜𑁆𑀘 𑀧𑀼𑀢𑁆𑀢𑀸𑀤𑀬𑁄 𑀘 ‘‘𑀢𑀼𑀫𑁆𑀳𑀸𑀓𑀫𑁆𑀧𑀺 𑀧𑀼𑀜𑁆𑀜𑀸𑀦𑀺 𑀯𑀻𑀫𑀁𑀲𑀺𑀲𑁆𑀲𑀣𑀸’’𑀢𑀺 𑀆𑀳.

𑀅𑀣𑀲𑁆𑀲 𑀪𑀭𑀺𑀬𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀢𑀡𑁆𑀟𑀼𑀮𑁂 𑀫𑀺𑀦𑀸𑀧𑁂𑀢𑁆𑀯𑀸 𑀢𑁂𑀳𑀺 𑀪𑀢𑁆𑀢𑀁 𑀧𑀘𑀸𑀧𑁂𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀯𑀡𑁆𑀡𑀓𑀝𑀘𑁆𑀙𑀼𑀁 𑀆𑀤𑀸𑀬 ‘‘𑀪𑀢𑁆𑀢𑁂𑀦 𑀅𑀢𑁆𑀣𑀺𑀓𑀸 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀖𑁄𑀲𑀸𑀧𑁂𑀢𑁆𑀯𑀸 𑀆𑀕𑀢𑀸𑀕𑀢𑀸𑀦𑀁 𑀉𑀧𑀦𑀻𑀢𑀪𑀸𑀚𑀦𑀸𑀦𑀺 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀲𑀓𑀮𑀤𑀺𑀯𑀲𑀫𑁆𑀧𑀺 𑀤𑁂𑀦𑁆𑀢𑀺𑀬𑀸 𑀓𑀝𑀘𑁆𑀙𑀼𑀦𑀸 𑀕𑀳𑀺𑀢𑀝𑁆𑀞𑀸𑀦𑀫𑁂𑀯 𑀧𑀜𑁆𑀜𑀸𑀬𑀢𑀺. 𑀢𑀲𑁆𑀲𑀸 𑀧𑀦 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀫𑁆𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀸𑀫𑀳𑀢𑁆𑀣𑁂𑀦 𑀉𑀓𑁆𑀔𑀮𑀺𑀁 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀓𑀝𑀘𑁆𑀙𑀼𑀁 𑀕𑀳𑁂𑀢𑁆𑀯𑀸 𑀏𑀯𑀫𑁂𑀯 𑀧𑀢𑁆𑀢𑁂 𑀧𑀽𑀭𑁂𑀢𑁆𑀯𑀸 𑀪𑀢𑁆𑀢𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀯𑀸𑀫𑀳𑀢𑁆𑀣𑀢𑀮𑀁 𑀧𑀽𑀭𑁂𑀢𑁆𑀯𑀸 𑀧𑀤𑀼𑀫𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀺, 𑀤𑀓𑁆𑀔𑀺𑀡𑀳𑀢𑁆𑀣𑀢𑀮𑀁 𑀧𑀽𑀭𑁂𑀢𑁆𑀯𑀸 𑀘𑀦𑁆𑀤𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀺. 𑀬𑀲𑁆𑀫𑀸 𑀧𑀦 𑀯𑀸𑀫𑀳𑀢𑁆𑀣𑀢𑁄 𑀥𑀫𑁆𑀫𑀓𑀭𑀡𑀁 𑀆𑀤𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀤𑀓𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀤𑀤𑀫𑀸𑀦𑀸 𑀅𑀧𑀭𑀸𑀧𑀭𑀁 𑀯𑀺𑀘𑀭𑀺, 𑀢𑁂𑀦𑀲𑁆𑀲𑀸 𑀤𑀓𑁆𑀔𑀺𑀡𑀧𑀸𑀤𑀢𑀮𑀁 𑀧𑀽𑀭𑁂𑀢𑁆𑀯𑀸 𑀘𑀦𑁆𑀤𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀺, 𑀯𑀸𑀫𑀧𑀸𑀤𑀢𑀮𑀁 𑀧𑀽𑀭𑁂𑀢𑁆𑀯𑀸 𑀧𑀤𑀼𑀫𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀘𑀦𑁆𑀤𑀧𑀤𑀼𑀫𑀸𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼.

𑀧𑀼𑀢𑁆𑀢𑁄𑀧𑀺𑀲𑁆𑀲 𑀲𑀻𑀲𑀁 𑀦𑁆𑀳𑀸𑀢𑁄 𑀲𑀳𑀲𑁆𑀲𑀣𑀯𑀺𑀓𑀁 𑀆𑀤𑀸𑀬 ‘‘𑀓𑀳𑀸𑀧𑀡𑁂𑀳𑀺 𑀅𑀢𑁆𑀣𑀺𑀓𑀸 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀯𑀢𑁆𑀯𑀸 𑀆𑀕𑀢𑀸𑀕𑀢𑀸𑀦𑀁 𑀕𑀳𑀺𑀢𑀪𑀸𑀚𑀦𑀸𑀦𑀺 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀣𑀯𑀺𑀓𑀸𑀬 𑀓𑀳𑀸𑀧𑀡𑀲𑀳𑀲𑁆𑀲𑀁 𑀅𑀳𑁄𑀲𑀺𑀬𑁂𑀯. 𑀲𑀼𑀡𑀺𑀲𑀸𑀧𑀺𑀲𑁆𑀲 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀯𑀻𑀳𑀺𑀧𑀺𑀝𑀓𑀁 𑀆𑀤𑀸𑀬 𑀆𑀓𑀸𑀲𑀗𑁆𑀕𑀡𑁂 𑀦𑀺𑀲𑀺𑀦𑁆𑀦𑀸 ‘‘𑀩𑀻𑀚𑀪𑀢𑁆𑀢𑁂𑀳𑀺 𑀅𑀢𑁆𑀣𑀺𑀓𑀸 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀯𑀢𑁆𑀯𑀸 𑀆𑀕𑀢𑀸𑀕𑀢𑀸𑀦𑀁 𑀕𑀳𑀺𑀢𑀪𑀸𑀚𑀦𑀸𑀦𑀺 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀧𑀺𑀝𑀓𑀁 𑀬𑀣𑀸𑀧𑀽𑀭𑀺𑀢𑀫𑁂𑀯 𑀅𑀳𑁄𑀲𑀺. 𑀤𑀸𑀲𑁄𑀧𑀺𑀲𑁆𑀲 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀬𑀼𑀕𑁂𑀲𑀼 𑀲𑀼𑀯𑀡𑁆𑀡𑀬𑁄𑀢𑁆𑀢𑁂𑀳𑀺 𑀕𑁄𑀡𑁂 𑀬𑁄𑀚𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀢𑁄𑀤𑀬𑀝𑁆𑀞𑀺𑀁 𑀆𑀤𑀸𑀬 𑀤𑁆𑀯𑀺𑀦𑁆𑀦𑀁 𑀕𑁄𑀡𑀸𑀦𑀁 𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀺𑀓𑀸𑀦𑀺 𑀤𑀢𑁆𑀯𑀸 𑀯𑀺𑀲𑀸𑀡𑁂𑀲𑀼 𑀲𑀼𑀯𑀡𑁆𑀡𑀓𑁄𑀲𑀓𑁂 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀔𑁂𑀢𑁆𑀢𑀁 𑀕𑀦𑁆𑀢𑁆𑀯𑀸 𑀧𑀸𑀚𑁂𑀲𑀺. 𑀇𑀢𑁄 𑀢𑀺𑀲𑁆𑀲𑁄, 𑀏𑀢𑁆𑀢𑁄 𑀢𑀺𑀲𑁆𑀲𑁄, 𑀫𑀚𑁆𑀛𑁂 𑀏𑀓𑀸𑀢𑀺 𑀲𑀢𑁆𑀢 𑀲𑀻𑀢𑀸 𑀪𑀺𑀚𑁆𑀚𑀺𑀢𑁆𑀯𑀸 𑀅𑀕𑀫𑀁𑀲𑀼. 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀪𑀢𑁆𑀢𑀩𑀻𑀚𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀲𑀼 𑀬𑀣𑀸𑀭𑀼𑀘𑀺𑀢𑀁 𑀲𑁂𑀝𑁆𑀞𑀺𑀕𑁂𑀳𑀢𑁄𑀬𑁂𑀯 𑀕𑀡𑁆𑀳𑀺𑀁𑀲𑀼. 𑀇𑀫𑁂 𑀧𑀜𑁆𑀘 𑀫𑀳𑀸𑀧𑀼𑀜𑁆𑀜𑀸.

𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀲𑁂𑀝𑁆𑀞𑀺 ‘‘𑀲𑀢𑁆𑀣𑀸 𑀓𑀺𑀭 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀲𑀢𑁆𑀣𑀼 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀢𑀺𑀢𑁆𑀣𑀺𑀬𑁂 𑀤𑀺𑀲𑁆𑀯𑀸 𑀢𑁂𑀳𑀺 ‘‘𑀓𑀲𑁆𑀫𑀸 𑀢𑀁, 𑀕𑀳𑀧𑀢𑀺, 𑀓𑀺𑀭𑀺𑀬𑀯𑀸𑀤𑁄 𑀲𑀫𑀸𑀦𑁄 𑀅𑀓𑀺𑀭𑀺𑀬𑀯𑀸𑀤𑀲𑁆𑀲 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀲𑀻’’𑀢𑀺 𑀦𑀺𑀯𑀸𑀭𑀺𑀬𑀫𑀸𑀦𑁄𑀧𑀺 𑀢𑁂𑀲𑀁 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺. 𑀲𑁄 𑀤𑁂𑀲𑀦𑀸𑀯𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀢𑀺𑀢𑁆𑀣𑀺𑀬𑁂𑀳𑀺 𑀅𑀯𑀡𑁆𑀡𑀁 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀸𑀭𑀺𑀢𑀪𑀸𑀯𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀲𑀢𑁆𑀣𑀸, ‘‘𑀕𑀳𑀧𑀢𑀺, 𑀇𑀫𑁂 𑀲𑀢𑁆𑀢𑀸 𑀦𑀸𑀫 𑀫𑀳𑀦𑁆𑀢𑀫𑁆𑀧𑀺 𑀅𑀢𑁆𑀢𑀦𑁄 𑀤𑁄𑀲𑀁 𑀦 𑀧𑀲𑁆𑀲𑀦𑁆𑀢𑀺, 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀧𑀭𑁂𑀲𑀁 𑀤𑁄𑀲𑀁 𑀯𑀺𑀚𑁆𑀚𑀫𑀸𑀦𑀁 𑀓𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀪𑀼𑀲𑀁 𑀯𑀺𑀬 𑀑𑀧𑀼𑀦𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁫𑁨. ‘‘𑀲𑀼𑀤𑀲𑁆𑀲𑀁 𑀯𑀚𑁆𑀚𑀫𑀜𑁆𑀜𑁂𑀲𑀁, 𑀅𑀢𑁆𑀢𑀦𑁄 𑀧𑀦 𑀤𑀼𑀤𑁆𑀤𑀲𑀁;