𑁧𑁯. 𑀥𑀫𑁆𑀫𑀝𑁆𑀞𑀯𑀕𑁆𑀕𑁄

𑁧. 𑀯𑀺𑀦𑀺𑀘𑁆𑀙𑀬𑀫𑀳𑀸𑀫𑀢𑁆𑀢𑀯𑀢𑁆𑀣𑀼

𑀦 𑀢𑁂𑀦 𑀳𑁄𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀯𑀺𑀦𑀺𑀘𑁆𑀙𑀬𑀫𑀳𑀸𑀫𑀢𑁆𑀢𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀤𑀺𑀯𑀲𑀜𑁆𑀳𑀺 𑀪𑀺𑀓𑁆𑀔𑀽 𑀲𑀸𑀯𑀢𑁆𑀣𑀺𑀬𑀁 𑀉𑀢𑁆𑀢𑀭𑀤𑁆𑀯𑀸𑀭𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀦𑀕𑀭𑀫𑀚𑁆𑀛𑁂𑀦 𑀯𑀺𑀳𑀸𑀭𑀁 𑀆𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀫𑁂𑀖𑁄 𑀉𑀝𑁆𑀞𑀸𑀬 𑀧𑀸𑀯𑀲𑁆𑀲𑀺. 𑀢𑁂 𑀲𑀫𑁆𑀫𑀼𑀔𑀸𑀕𑀢𑀁 𑀯𑀺𑀦𑀺𑀘𑁆𑀙𑀬𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀫𑀳𑀸𑀫𑀢𑁆𑀢𑁂 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀲𑀸𑀫𑀺𑀓𑁂 𑀅𑀲𑀸𑀫𑀺𑀓𑁂 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀅𑀳𑁄 𑀇𑀫𑁂 𑀅𑀥𑀫𑁆𑀫𑀺𑀓𑀸, 𑀫𑀬𑀁 𑀧𑀦 ‘𑀇𑀫𑁂 𑀥𑀫𑁆𑀫𑁂𑀦 𑀯𑀺𑀦𑀺𑀘𑁆𑀙𑀬𑀁 𑀓𑀭𑁄𑀦𑁆𑀢𑀻’𑀢𑀺 𑀲𑀜𑁆𑀜𑀺𑀦𑁄 𑀅𑀳𑀼𑀫𑁆𑀳𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀲𑁆𑀲𑁂 𑀯𑀺𑀕𑀢𑁂 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀸𑀤𑀺𑀯𑀲𑀺𑀓𑀸 𑀳𑀼𑀢𑁆𑀯𑀸 𑀲𑀸𑀳𑀲𑁂𑀦 𑀅𑀢𑁆𑀣𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑀸 𑀥𑀫𑁆𑀫𑀝𑁆𑀞𑀸 𑀦𑀸𑀫 𑀳𑁄𑀦𑁆𑀢𑀺, 𑀅𑀧𑀭𑀸𑀥𑀁 𑀧𑀦 𑀅𑀦𑀼𑀯𑀺𑀚𑁆𑀚𑀺𑀢𑁆𑀯𑀸 𑀅𑀧𑀭𑀸𑀥𑀸𑀦𑀼𑀭𑀽𑀧𑀁 𑀅𑀲𑀸𑀳𑀲𑁂𑀦 𑀯𑀺𑀦𑀺𑀘𑁆𑀙𑀬𑀁 𑀓𑀭𑁄𑀦𑁆𑀢𑀸 𑀏𑀯 𑀥𑀫𑁆𑀫𑀝𑁆𑀞𑀸 𑀦𑀸𑀫 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁫𑁬. ‘‘𑀦 𑀢𑁂𑀦 𑀳𑁄𑀢𑀺 𑀥𑀫𑁆𑀫𑀝𑁆𑀞𑁄, 𑀬𑁂𑀦𑀢𑁆𑀣𑀁 𑀲𑀸𑀳𑀲𑀸 𑀦𑀬𑁂;

𑀬𑁄 𑀘 𑀅𑀢𑁆𑀣𑀁 𑀅𑀦𑀢𑁆𑀣𑀜𑁆𑀘, 𑀉𑀪𑁄 𑀦𑀺𑀘𑁆𑀙𑁂𑀬𑁆𑀬 𑀧𑀡𑁆𑀟𑀺𑀢𑁄.

𑁨𑁫𑁭. ‘‘𑀅𑀲𑀸𑀳𑀲𑁂𑀦 𑀥𑀫𑁆𑀫𑁂𑀦, 𑀲𑀫𑁂𑀦 𑀦𑀬𑀢𑀻 𑀧𑀭𑁂;

𑀥𑀫𑁆𑀫𑀲𑁆𑀲 𑀕𑀼𑀢𑁆𑀢𑁄 𑀫𑁂𑀥𑀸𑀯𑀻, 𑀥𑀫𑁆𑀫𑀝𑁆𑀞𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀢𑁂𑀦𑀸𑀢𑀺 𑀏𑀢𑁆𑀢𑀓𑁂𑀦𑁂𑀯 𑀓𑀸𑀭𑀡𑁂𑀦. 𑀥𑀫𑁆𑀫𑀝𑁆𑀞𑁄𑀢𑀺 𑀭𑀸𑀚𑀸 𑀳𑀺 𑀅𑀢𑁆𑀢𑀦𑁄 𑀓𑀸𑀢𑀩𑁆𑀩𑁂 𑀯𑀺𑀦𑀺𑀘𑁆𑀙𑀬𑀥𑀫𑁆𑀫𑁂 𑀞𑀺𑀢𑁄𑀧𑀺 𑀥𑀫𑁆𑀫𑀝𑁆𑀞𑁄 𑀦𑀸𑀫 𑀦 𑀳𑁄𑀢𑀺. 𑀬𑁂𑀦𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦. 𑀅𑀢𑁆𑀣𑀦𑁆𑀢𑀺 𑀑𑀢𑀺𑀡𑁆𑀡𑀁 𑀯𑀺𑀦𑀺𑀘𑁆𑀙𑀺𑀢𑀩𑁆𑀩𑀁 𑀅𑀢𑁆𑀣𑀁. 𑀲𑀸𑀳𑀲𑀸 𑀦𑀬𑁂𑀢𑀺 𑀙𑀦𑁆𑀤𑀸𑀤𑀻𑀲𑀼 𑀧𑀢𑀺𑀝𑁆𑀞𑀺𑀢𑁄 𑀲𑀸𑀳𑀲𑁂𑀦 𑀫𑀼𑀲𑀸𑀯𑀸𑀤𑁂𑀦 𑀯𑀺𑀦𑀺𑀘𑁆𑀙𑁂𑀬𑁆𑀬. 𑀬𑁄 𑀳𑀺 𑀙𑀦𑁆𑀤𑁂 𑀧𑀢𑀺𑀝𑁆𑀞𑀸𑀬 𑀜𑀸𑀢𑀻𑀢𑀺 𑀯𑀸 𑀫𑀺𑀢𑁆𑀢𑁄𑀢𑀺 𑀯𑀸 𑀫𑀼𑀲𑀸 𑀯𑀢𑁆𑀯𑀸 𑀅𑀲𑀸𑀫𑀺𑀓𑀫𑁂𑀯 𑀲𑀸𑀫𑀺𑀓𑀁 𑀓𑀭𑁄𑀢𑀺, 𑀤𑁄𑀲𑁂 𑀧𑀢𑀺𑀝𑁆𑀞𑀸𑀬 𑀅𑀢𑁆𑀢𑀦𑁄 𑀯𑁂𑀭𑀻𑀦𑀁 𑀫𑀼𑀲𑀸 𑀯𑀢𑁆𑀯𑀸 𑀲𑀸𑀫𑀺𑀓𑀫𑁂𑀯 𑀅𑀲𑀸𑀫𑀺𑀓𑀁 𑀓𑀭𑁄𑀢𑀺, 𑀫𑁄𑀳𑁂 𑀧𑀢𑀺𑀝𑁆𑀞𑀸𑀬 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀓𑀸𑀮𑁂 𑀅𑀜𑁆𑀜𑀯𑀺𑀳𑀺𑀢𑁄 𑀯𑀺𑀬 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀫𑀼𑀲𑀸 𑀯𑀢𑁆𑀯𑀸 ‘‘𑀇𑀫𑀺𑀦𑀸 𑀚𑀺𑀢𑀁, 𑀅𑀬𑀁 𑀧𑀭𑀸𑀚𑀺𑀢𑁄’’𑀢𑀺 𑀧𑀭𑀁 𑀦𑀻𑀳𑀭𑀢𑀺, 𑀪𑀬𑁂 𑀧𑀢𑀺𑀝𑁆𑀞𑀸𑀬 𑀓𑀲𑁆𑀲𑀘𑀺𑀤𑁂𑀯 𑀇𑀲𑁆𑀲𑀭𑀚𑀸𑀢𑀺𑀓𑀲𑁆𑀲 𑀧𑀭𑀸𑀚𑀬𑀁 𑀧𑀸𑀧𑀼𑀡𑀦𑁆𑀢𑀲𑁆𑀲𑀸𑀧𑀺 𑀚𑀬𑀁 𑀆𑀭𑁄𑀧𑁂𑀢𑀺, 𑀅𑀬𑀁 𑀲𑀸𑀳𑀲𑁂𑀦 𑀅𑀢𑁆𑀣𑀁 𑀦𑁂𑀢𑀺 𑀦𑀸𑀫. 𑀏𑀲𑁄 𑀥𑀫𑁆𑀫𑀝𑁆𑀞𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀁 𑀅𑀦𑀢𑁆𑀣𑀜𑁆𑀘𑀸𑀢𑀺 𑀪𑀽𑀢𑀜𑁆𑀘 𑀅𑀪𑀽𑀢𑀜𑁆𑀘 𑀓𑀸𑀭𑀡𑀁. 𑀉𑀪𑁄 𑀦𑀺𑀘𑁆𑀙𑁂𑀬𑁆𑀬𑀸𑀢𑀺 𑀬𑁄 𑀧𑀦 𑀧𑀡𑁆𑀟𑀺𑀢𑁄 𑀉𑀪𑁄 𑀅𑀢𑁆𑀣𑀸𑀦𑀢𑁆𑀣𑁂 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀯𑀤𑀢𑀺. 𑀅𑀲𑀸𑀳𑀲𑁂𑀦𑀸𑀢𑀺 𑀅𑀫𑀼𑀲𑀸𑀯𑀸𑀤𑁂𑀦. 𑀥𑀫𑁆𑀫𑁂𑀦𑀸𑀢𑀺 𑀯𑀺𑀦𑀺𑀘𑁆𑀙𑀬𑀥𑀫𑁆𑀫𑁂𑀦, 𑀦 𑀙𑀦𑁆𑀤𑀸𑀤𑀺𑀯𑀲𑁂𑀦. 𑀲𑀫𑁂𑀦𑀸𑀢𑀺 𑀅𑀧𑀭𑀸𑀥𑀸𑀦𑀼𑀭𑀽𑀧𑁂𑀦𑁂𑀯 𑀧𑀭𑁂 𑀦𑀬𑀢𑀺, 𑀚𑀬𑀁 𑀯𑀸 𑀧𑀭𑀸𑀚𑀬𑀁 𑀯𑀸 𑀧𑀸𑀧𑁂𑀢𑀺. 𑀥𑀫𑁆𑀫𑀲𑁆𑀲 𑀕𑀼𑀢𑁆𑀢𑁄𑀢𑀺 𑀲𑁄 𑀥𑀫𑁆𑀫𑀕𑀼𑀢𑁆𑀢𑁄 𑀥𑀫𑁆𑀫𑀭𑀓𑁆𑀔𑀺𑀢𑁄 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀫𑁂𑀥𑀸𑀯𑀻 𑀯𑀺𑀦𑀺𑀘𑁆𑀙𑀬𑀥𑀫𑁆𑀫𑁂 𑀞𑀺𑀢𑀢𑁆𑀢𑀸 𑀥𑀫𑁆𑀫𑀝𑁆𑀞𑁄𑀢𑀺 𑀧𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀯𑀺𑀦𑀺𑀘𑁆𑀙𑀬𑀫𑀳𑀸𑀫𑀢𑁆𑀢𑀯𑀢𑁆𑀣𑀼 𑀧𑀞𑀫𑀁.

𑁨. 𑀙𑀩𑁆𑀩𑀕𑁆𑀕𑀺𑀬𑀯𑀢𑁆𑀣𑀼

𑀦 𑀢𑁂𑀦 𑀧𑀡𑁆𑀟𑀺𑀢𑁄 𑀳𑁄𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀙𑀩𑁆𑀩𑀕𑁆𑀕𑀺𑀬𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂 𑀓𑀺𑀭 𑀯𑀺𑀳𑀸𑀭𑁂𑀧𑀺 𑀕𑀸𑀫𑁂𑀧𑀺 𑀪𑀢𑁆𑀢𑀕𑁆𑀕𑀁 𑀆𑀓𑀼𑀮𑀁 𑀓𑀭𑁄𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑁂 𑀪𑀺𑀓𑁆𑀔𑀽 𑀕𑀸𑀫𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀆𑀕𑀢𑁂 𑀤𑀳𑀭𑁂 𑀲𑀸𑀫𑀡𑁂𑀭𑁂 𑀘 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀻𑀤𑀺𑀲𑀁, 𑀆𑀯𑀼𑀲𑁄, 𑀪𑀢𑁆𑀢𑀕𑁆𑀕’’𑀦𑁆𑀢𑀺? 𑀪𑀦𑁆𑀢𑁂, 𑀫𑀸 𑀧𑀼𑀘𑁆𑀙𑀣, 𑀙𑀩𑁆𑀩𑀕𑁆𑀕𑀺𑀬𑀸 ‘‘𑀫𑀬𑀫𑁂𑀯 𑀯𑀺𑀬𑀢𑁆𑀢𑀸, 𑀫𑀬𑀫𑁂𑀯 𑀧𑀡𑁆𑀟𑀺𑀢𑀸, 𑀇𑀫𑁂 𑀧𑀳𑀭𑀺𑀢𑁆𑀯𑀸 𑀲𑀻𑀲𑁂 𑀓𑀘𑀯𑀭𑀁 𑀆𑀓𑀺𑀭𑀺𑀢𑁆𑀯𑀸 𑀦𑀻𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀅𑀫𑁆𑀳𑁂 𑀧𑀺𑀝𑁆𑀞𑀺𑀬𑀁 𑀕𑀳𑁂𑀢𑁆𑀯𑀸 𑀓𑀘𑀯𑀭𑀁 𑀑𑀓𑀺𑀭𑀦𑁆𑀢𑀸 𑀪𑀢𑁆𑀢𑀕𑁆𑀕𑀁 𑀆𑀓𑀼𑀮𑀁 𑀅𑀓𑀁𑀲𑀽𑀢𑀺. 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀩𑀳𑀼𑀁 𑀪𑀸𑀲𑀺𑀢𑁆𑀯𑀸 𑀧𑀭𑁂 𑀯𑀺𑀳𑁂𑀞𑀬𑀫𑀸𑀦𑀁 ‘𑀧𑀡𑁆𑀟𑀺𑀢𑁄’𑀢𑀺 𑀯𑀤𑀸𑀫𑀺, 𑀔𑁂𑀫𑀺𑀦𑀁 𑀧𑀦 𑀅𑀯𑁂𑀭𑀻𑀦𑀁 𑀅𑀪𑀬𑀫𑁂𑀯 𑀧𑀡𑁆𑀟𑀺𑀢𑁄𑀢𑀺 𑀯𑀤𑀸𑀫𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁫𑁮. ‘‘𑀦 𑀢𑁂𑀦 𑀧𑀡𑁆𑀟𑀺𑀢𑁄 𑀳𑁄𑀢𑀺, 𑀬𑀸𑀯𑀢𑀸 𑀩𑀳𑀼 𑀪𑀸𑀲𑀢𑀺;

𑀔𑁂𑀫𑀻 𑀅𑀯𑁂𑀭𑀻 𑀅𑀪𑀬𑁄, 𑀧𑀡𑁆𑀟𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀬𑀸𑀯𑀢𑀸𑀢𑀺 𑀬𑀢𑁆𑀢𑀓𑁂𑀦 𑀓𑀸𑀭𑀡𑁂𑀦 𑀲𑀗𑁆𑀖𑀫𑀚𑁆𑀛𑀸𑀤𑀻𑀲𑀼 𑀩𑀳𑀼𑀁 𑀓𑀣𑁂𑀢𑀺, 𑀢𑁂𑀦 𑀧𑀡𑁆𑀟𑀺𑀢𑁄 𑀦𑀸𑀫 𑀦 𑀳𑁄𑀢𑀺. 𑀬𑁄 𑀧𑀦 𑀲𑀬𑀁 𑀔𑁂𑀫𑀻 𑀧𑀜𑁆𑀘𑀦𑁆𑀦𑀁 𑀯𑁂𑀭𑀸𑀦𑀁 𑀅𑀪𑀸𑀯𑁂𑀦 𑀅𑀯𑁂𑀭𑀻 𑀦𑀺𑀩𑁆𑀪𑀬𑁄, 𑀬𑀁 𑀯𑀸 𑀆𑀕𑀫𑁆𑀫 𑀫𑀳𑀸𑀚𑀦𑀲𑁆𑀲 𑀪𑀬𑀁 𑀦 𑀳𑁄𑀢𑀺, 𑀲𑁄 𑀧𑀡𑁆𑀟𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀙𑀩𑁆𑀩𑀕𑁆𑀕𑀺𑀬𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀏𑀓𑀼𑀤𑀸𑀦𑀔𑀻𑀡𑀸𑀲𑀯𑀢𑁆𑀣𑁂𑀭𑀯𑀢𑁆𑀣𑀼

𑀦 𑀢𑀸𑀯𑀢𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀼𑀤𑀸𑀦𑀢𑁆𑀣𑁂𑀭𑀁 𑀦𑀸𑀫 𑀔𑀻𑀡𑀸𑀲𑀯𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀏𑀓𑀓𑁄𑀯 𑀏𑀓𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀺𑀳𑀭𑀢𑀺, 𑀏𑀓𑀫𑁂𑀯𑀲𑁆𑀲 𑀉𑀤𑀸𑀦𑀁 𑀧𑀕𑀼𑀡𑀁 𑁋

‘‘𑀅𑀥𑀺𑀘𑁂𑀢𑀲𑁄 𑀅𑀧𑁆𑀧𑀫𑀚𑁆𑀚𑀢𑁄,

𑀫𑀼𑀦𑀺𑀦𑁄 𑀫𑁄𑀦𑀧𑀣𑁂𑀲𑀼 𑀲𑀺𑀓𑁆𑀔𑀢𑁄;

𑀲𑁄𑀓𑀸 𑀦 𑀪𑀯𑀦𑁆𑀢𑀺 𑀢𑀸𑀤𑀺𑀦𑁄,

𑀉𑀧𑀲𑀦𑁆𑀢𑀲𑁆𑀲 𑀲𑀤𑀸 𑀲𑀢𑀻𑀫𑀢𑁄’’𑀢𑀺. (𑀧𑀸𑀘𑀺. 𑁧𑁫𑁩; 𑀉𑀤𑀸. 𑁩𑁭);

𑀲𑁄 𑀓𑀺𑀭 𑀉𑀧𑁄𑀲𑀣𑀤𑀺𑀯𑀲𑁂𑀲𑀼 𑀲𑀬𑀫𑁂𑀯 𑀥𑀫𑁆𑀫𑀲𑁆𑀲𑀯𑀦𑀁 𑀖𑁄𑀲𑁂𑀢𑁆𑀯𑀸 𑀇𑀫𑀁 𑀕𑀸𑀣𑀁 𑀯𑀤𑀢𑀺. 𑀧𑀣𑀯𑀺𑀉𑀦𑁆𑀤𑁆𑀭𑀺𑀬𑀦𑀲𑀤𑁆𑀤𑁄 𑀯𑀺𑀬 𑀤𑁂𑀯𑀢𑀸𑀦𑀁 𑀲𑀸𑀥𑀼𑀓𑀸𑀭𑀲𑀤𑁆𑀤𑁄 𑀳𑁄𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀉𑀧𑁄𑀲𑀣𑀤𑀺𑀯𑀲𑁂 𑀧𑀜𑁆𑀘𑀧𑀜𑁆𑀘𑀲𑀢𑀧𑀭𑀺𑀯𑀸𑀭𑀸 𑀤𑁆𑀯𑁂 𑀢𑀺𑀧𑀺𑀝𑀓𑀥𑀭𑀸 𑀪𑀺𑀓𑁆𑀔𑀽 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀅𑀕𑀫𑀁𑀲𑀼. 𑀲𑁄 𑀢𑁂 𑀤𑀺𑀲𑁆𑀯𑀸𑀯 𑀢𑀼𑀝𑁆𑀞𑀫𑀸𑀦𑀲𑁄 ‘‘𑀲𑀸𑀥𑀼 𑀯𑁄 𑀓𑀢𑀁 𑀇𑀥 𑀆𑀕𑀘𑁆𑀙𑀦𑁆𑀢𑁂𑀳𑀺, 𑀅𑀚𑁆𑀚 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀆𑀳. 𑀅𑀢𑁆𑀣𑀺 𑀧𑀦, 𑀆𑀯𑀼𑀲𑁄, 𑀇𑀥 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸𑀢𑀺. 𑀅𑀢𑁆𑀣𑀺, 𑀪𑀦𑁆𑀢𑁂, 𑀅𑀬𑀁 𑀯𑀦𑀲𑀡𑁆𑀟𑁄 𑀥𑀫𑁆𑀫𑀲𑁆𑀲𑀯𑀦𑀤𑀺𑀯𑀲𑁂 𑀤𑁂𑀯𑀢𑀸𑀦𑀁 𑀲𑀸𑀥𑀼𑀓𑀸𑀭𑀲𑀤𑁆𑀤𑁂𑀦 𑀏𑀓𑀦𑀺𑀦𑁆𑀦𑀸𑀤𑁄 𑀳𑁄𑀢𑀻𑀢𑀺. 𑀢𑁂𑀲𑀼 𑀏𑀓𑁄 𑀢𑀺𑀧𑀺𑀝𑀓𑀥𑀭𑁄 𑀥𑀫𑁆𑀫𑀁 𑀑𑀲𑀸𑀭𑁂𑀲𑀺, 𑀏𑀓𑁄 𑀓𑀣𑁂𑀲𑀺. 𑀏𑀓𑀤𑁂𑀯𑀢𑀸𑀧𑀺 𑀲𑀸𑀥𑀼𑀓𑀸𑀭𑀁 𑀦𑀸𑀤𑀸𑀲𑀺. 𑀢𑁂 𑀆𑀳𑀁𑀲𑀼 𑁋 ‘‘𑀢𑁆𑀯𑀁, 𑀆𑀯𑀼𑀲𑁄, 𑀥𑀫𑁆𑀫𑀲𑁆𑀲𑀯𑀦𑀤𑀺𑀯𑀲𑁂 𑀇𑀫𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀤𑁂𑀯𑀢𑀸 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀲𑀸𑀥𑀼𑀓𑀸𑀭𑀁 𑀤𑁂𑀦𑁆𑀢𑀻𑀢𑀺 𑀯𑀤𑁂𑀲𑀺, 𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺. 𑀪𑀦𑁆𑀢𑁂, 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀲𑀸𑀥𑀼𑀓𑀸𑀭𑀲𑀤𑁆𑀤𑁂𑀦 𑀏𑀓𑀦𑀺𑀦𑁆𑀦𑀸𑀤𑁄 𑀏𑀯 𑀳𑁄𑀢𑀺, 𑀦 𑀅𑀚𑁆𑀚 𑀧𑀦 𑀚𑀸𑀦𑀸𑀫𑀺 ‘‘𑀓𑀺𑀫𑁂𑀢’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀆𑀯𑀼𑀲𑁄, 𑀢𑁆𑀯𑀁 𑀢𑀸𑀯 𑀥𑀫𑁆𑀫𑀁 𑀓𑀣𑁂𑀳𑀻’’𑀢𑀺. 𑀲𑁄 𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀢𑀫𑁂𑀯 𑀕𑀸𑀣𑀁 𑀯𑀤𑁂𑀲𑀺. 𑀤𑁂𑀯𑀢𑀸 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀲𑀸𑀥𑀼𑀓𑀸𑀭𑀫𑀤𑀁𑀲𑀼. 𑀅𑀣 𑀦𑁂𑀲𑀁 𑀧𑀭𑀺𑀯𑀸𑀭𑀸 𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀺𑀁𑀲𑀼 ‘‘𑀇𑀫𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀤𑁂𑀯𑀢𑀸 𑀫𑀼𑀔𑁄𑀮𑁄𑀓𑀦𑁂𑀦 𑀲𑀸𑀥𑀼𑀓𑀸𑀭𑀁 𑀤𑀤𑀦𑁆𑀢𑀺, 𑀢𑀺𑀧𑀺𑀝𑀓𑀥𑀭𑀪𑀺𑀓𑁆𑀔𑀽𑀲𑀼 𑀏𑀢𑁆𑀢𑀓𑀁 𑀪𑀡𑀦𑁆𑀢𑁂𑀲𑀼𑀧𑀺 𑀓𑀺𑀜𑁆𑀘𑀺 𑀧𑀲𑀁𑀲𑀦𑀫𑀢𑁆𑀢𑀫𑁆𑀧𑀺 𑀅𑀯𑀢𑁆𑀯𑀸 𑀏𑀓𑁂𑀦 𑀫𑀳𑀮𑁆𑀮𑀓𑀢𑁆𑀣𑁂𑀭𑁂𑀦 𑀏𑀓𑀕𑀸𑀣𑀸𑀬 𑀓𑀣𑀺𑀢𑀸𑀬 𑀫𑀳𑀸𑀲𑀤𑁆𑀤𑁂𑀦 𑀲𑀸𑀥𑀼𑀓𑀸𑀭𑀁 𑀤𑀤𑀦𑁆𑀢𑀻’’𑀢𑀺. 𑀢𑁂𑀧𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀲𑀢𑁆𑀣𑀸 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀬𑁄 𑀩𑀳𑀼𑀫𑁆𑀧𑀺 𑀉𑀕𑁆𑀕𑀡𑁆𑀳𑀢𑀺 𑀯𑀸 𑀪𑀸𑀲𑀢𑀺 𑀯𑀸, 𑀢𑀁 𑀥𑀫𑁆𑀫𑀥𑀭𑁄𑀢𑀺 𑀯𑀤𑀸𑀫𑀺. 𑀬𑁄 𑀧𑀦 𑀏𑀓𑀫𑁆𑀧𑀺 𑀕𑀸𑀣𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺, 𑀅𑀬𑀁 𑀥𑀫𑁆𑀫𑀥𑀭𑁄 𑀦𑀸𑀫𑀸’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁫𑁯. ‘‘𑀦 𑀢𑀸𑀯𑀢𑀸 𑀥𑀫𑁆𑀫𑀥𑀭𑁄, 𑀬𑀸𑀯𑀢𑀸 𑀩𑀳𑀼 𑀪𑀸𑀲𑀢𑀺;

𑀬𑁄 𑀘 𑀅𑀧𑁆𑀧𑀫𑁆𑀧𑀺 𑀲𑀼𑀢𑁆𑀯𑀸𑀦, 𑀥𑀫𑁆𑀫𑀁 𑀓𑀸𑀬𑁂𑀦 𑀧𑀲𑁆𑀲𑀢𑀺;

𑀲 𑀯𑁂 𑀥𑀫𑁆𑀫𑀥𑀭𑁄 𑀳𑁄𑀢𑀺, 𑀬𑁄 𑀥𑀫𑁆𑀫𑀁 𑀦𑀧𑁆𑀧𑀫𑀚𑁆𑀚𑀢𑀻’’𑀢𑀺.

𑀢𑀢𑁆𑀣 𑀬𑀸𑀯𑀢𑀸𑀢𑀺 𑀬𑀢𑁆𑀢𑀓𑁂𑀦 𑀉𑀕𑁆𑀕𑀳𑀡𑀥𑀸𑀭𑀡𑀯𑀸𑀘𑀦𑀸𑀤𑀺𑀦𑀸 𑀓𑀸𑀭𑀡𑁂𑀦 𑀩𑀳𑀼𑀁 𑀪𑀸𑀲𑀢𑀺, 𑀢𑀸𑀯𑀢𑁆𑀢𑀓𑁂𑀦 𑀥𑀫𑁆𑀫𑀥𑀭𑁄 𑀦 𑀳𑁄𑀢𑀺, 𑀯𑀁𑀲𑀸𑀦𑀼𑀭𑀓𑁆𑀔𑀓𑁄 𑀧𑀦 𑀧𑀯𑁂𑀡𑀺𑀧𑀸𑀮𑀓𑁄 𑀦𑀸𑀫 𑀳𑁄𑀢𑀺. 𑀬𑁄 𑀘 𑀅𑀧𑁆𑀧𑀫𑁆𑀧𑀻𑀢𑀺 𑀬𑁄 𑀧𑀦 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀲𑀼𑀢𑁆𑀯𑀸 𑀥𑀫𑁆𑀫𑀫𑀦𑁆𑀯𑀸𑀬 𑀅𑀢𑁆𑀣𑀫𑀦𑁆𑀯𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑀼𑀢𑁆𑀯𑀸 𑀦𑀸𑀫𑀓𑀸𑀬𑁂𑀦 𑀤𑀼𑀓𑁆𑀔𑀸𑀤𑀻𑀦𑀺 𑀧𑀭𑀺𑀚𑀸𑀦𑀦𑁆𑀢𑁄 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲 𑀯𑁂 𑀥𑀫𑁆𑀫𑀥𑀭𑁄 𑀳𑁄𑀢𑀺. 𑀬𑁄 𑀥𑀫𑁆𑀫𑀁 𑀦𑀧𑁆𑀧𑀫𑀚𑁆𑀚𑀢𑀻𑀢𑀺 𑀬𑁄𑀧𑀺 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑀼𑀢𑁆𑀯𑀸 𑀅𑀚𑁆𑀚 𑀅𑀚𑁆𑀚𑁂𑀯𑀸𑀢𑀺 𑀧𑀝𑀺𑀯𑁂𑀥𑀁 𑀆𑀓𑀗𑁆𑀔𑀦𑁆𑀢𑁄 𑀥𑀫𑁆𑀫𑀁 𑀦𑀧𑁆𑀧𑀫𑀚𑁆𑀚𑀢𑀺, 𑀅𑀬𑀫𑁆𑀧𑀺 𑀥𑀫𑁆𑀫𑀥𑀭𑁄𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀏𑀓𑀼𑀤𑀸𑀦𑀔𑀻𑀡𑀸𑀲𑀯𑀢𑁆𑀣𑁂𑀭𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀯𑀢𑁆𑀣𑀼

𑀦 𑀢𑁂𑀦 𑀣𑁂𑀭𑁄 𑀲𑁄 𑀳𑁄𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀤𑀺𑀯𑀲𑀜𑁆𑀳𑀺 𑀢𑀲𑁆𑀫𑀺𑀁 𑀣𑁂𑀭𑁂 𑀲𑀢𑁆𑀣𑀼 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀓𑁆𑀓𑀦𑁆𑀢𑀫𑀢𑁆𑀢𑁂 𑀢𑀺𑀁𑀲𑀫𑀢𑁆𑀢𑀸 𑀆𑀭𑀜𑁆𑀜𑀺𑀓𑀸 𑀪𑀺𑀓𑁆𑀔𑀽 𑀢𑀁 𑀧𑀲𑁆𑀲𑀦𑁆𑀢𑀸 𑀏𑀯 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺 𑁋 ‘‘𑀇𑀢𑁄 𑀕𑀢𑀁 𑀏𑀓𑀁 𑀣𑁂𑀭𑀁 𑀧𑀲𑁆𑀲𑀣𑀸’’𑀢𑀺? ‘‘𑀦 𑀧𑀲𑁆𑀲𑀸𑀫, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀦𑀼 𑀤𑀺𑀝𑁆𑀞𑁄 𑀯𑁄’’𑀢𑀺? ‘‘𑀏𑀓𑀁, 𑀪𑀦𑁆𑀢𑁂, 𑀲𑀸𑀫𑀡𑁂𑀭𑀁 𑀧𑀲𑁆𑀲𑀺𑀫𑁆𑀳𑀸’’𑀢𑀺. ‘‘𑀦 𑀲𑁄, 𑀪𑀺𑀓𑁆𑀔𑀯𑁂, 𑀲𑀸𑀫𑀡𑁂𑀭𑁄, 𑀣𑁂𑀭𑁄 𑀏𑀯 𑀲𑁄’’𑀢𑀺? ‘‘𑀅𑀢𑀺𑀯𑀺𑀬 𑀔𑀼𑀤𑁆𑀤𑀓𑁄, 𑀪𑀦𑁆𑀢𑁂’’𑀢𑀺. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀫𑀳𑀮𑁆𑀮𑀓𑀪𑀸𑀯𑁂𑀦 𑀣𑁂𑀭𑀸𑀲𑀦𑁂 𑀦𑀺𑀲𑀺𑀦𑁆𑀦𑀫𑀢𑁆𑀢𑀓𑁂𑀦 𑀣𑁂𑀭𑁄𑀢𑀺 𑀯𑀤𑀸𑀫𑀺. 𑀬𑁄 𑀧𑀦 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀅𑀳𑀺𑀁𑀲𑀓𑀪𑀸𑀯𑁂 𑀞𑀺𑀢𑁄, 𑀅𑀬𑀁 𑀣𑁂𑀭𑁄 𑀦𑀸𑀫𑀸’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁬𑁦. ‘‘𑀦 𑀢𑁂𑀦 𑀣𑁂𑀭𑁄 𑀲𑁄 𑀳𑁄𑀢𑀺, 𑀬𑁂𑀦𑀲𑁆𑀲 𑀧𑀮𑀺𑀢𑀁 𑀲𑀺𑀭𑁄;

𑀧𑀭𑀺𑀧𑀓𑁆𑀓𑁄 𑀯𑀬𑁄 𑀢𑀲𑁆𑀲, 𑀫𑁄𑀖𑀚𑀺𑀡𑁆𑀡𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁬𑁧. ‘‘𑀬𑀫𑁆𑀳𑀺 𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘, 𑀅𑀳𑀺𑀁𑀲𑀸 𑀲𑀁𑀬𑀫𑁄 𑀤𑀫𑁄;

𑀲 𑀯𑁂 𑀯𑀦𑁆𑀢𑀫𑀮𑁄 𑀥𑀻𑀭𑁄, 𑀣𑁂𑀭𑁄 𑀇𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀧𑀭𑀺𑀧𑀓𑁆𑀓𑁄𑀢𑀺 𑀧𑀭𑀺𑀡𑀢𑁄, 𑀯𑀼𑀟𑁆𑀠𑀪𑀸𑀯𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀫𑁄𑀖𑀚𑀺𑀡𑁆𑀡𑁄𑀢𑀺 𑀅𑀦𑁆𑀢𑁄 𑀣𑁂𑀭𑀓𑀭𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀸𑀯𑁂𑀦 𑀢𑀼𑀘𑁆𑀙𑀚𑀺𑀡𑁆𑀡𑁄 𑀦𑀸𑀫. 𑀬𑀫𑁆𑀳𑀺 𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘𑀸𑀢𑀺 𑀬𑀫𑁆𑀳𑀺 𑀧𑀦 𑀧𑀼𑀕𑁆𑀕𑀮𑁂 𑀲𑁄𑀴𑀲𑀳𑀸𑀓𑀸𑀭𑁂𑀳𑀺 𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀘𑀢𑀼𑀩𑁆𑀩𑀺𑀥𑀁 𑀲𑀘𑁆𑀘𑀁, 𑀜𑀸𑀡𑁂𑀦 𑀲𑀘𑁆𑀙𑀺𑀓𑀢𑀢𑁆𑀢𑀸 𑀦𑀯𑀯𑀺𑀥𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀘 𑀅𑀢𑁆𑀣𑀺. 𑀅𑀳𑀺𑀁𑀲𑀸𑀢𑀺 𑀅𑀳𑀺𑀁𑀲𑀦𑀪𑀸𑀯𑁄. 𑀤𑁂𑀲𑀦𑀸𑀫𑀢𑁆𑀢𑀫𑁂𑀢𑀁, 𑀬𑀫𑁆𑀳𑀺 𑀧𑀦 𑀘𑀢𑀼𑀩𑁆𑀩𑀺𑀥𑀸𑀧𑀺 𑀅𑀧𑁆𑀧𑀫𑀜𑁆𑀜𑀸𑀪𑀸𑀯𑀦𑀸 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀲𑀁𑀬𑀫𑁄 𑀤𑀫𑁄𑀢𑀺 𑀲𑀻𑀮𑀜𑁆𑀘𑁂𑀯 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀘. 𑀯𑀦𑁆𑀢𑀫𑀮𑁄𑀢𑀺 𑀫𑀕𑁆𑀕𑀜𑀸𑀡𑁂𑀦 𑀦𑀻𑀳𑀝𑀫𑀮𑁄. 𑀥𑀻𑀭𑁄𑀢𑀺 𑀥𑀺𑀢𑀺𑀲𑀫𑁆𑀧𑀦𑁆𑀦𑁄. 𑀣𑁂𑀭𑁄𑀢𑀺 𑀲𑁄 𑀇𑀫𑁂𑀳𑀺 𑀣𑀺𑀭𑀪𑀸𑀯𑀓𑀸𑀭𑀓𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀣𑁂𑀭𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀲𑀫𑁆𑀩𑀳𑀼𑀮𑀪𑀺𑀓𑁆𑀔𑀼𑀯𑀢𑁆𑀣𑀼

𑀦 𑀯𑀸𑀓𑁆𑀓𑀭𑀡𑀫𑀢𑁆𑀢𑁂𑀦𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀤𑀳𑀭𑁂 𑀘𑁂𑀯 𑀲𑀸𑀫𑀡𑁂𑀭𑁂 𑀘 𑀅𑀢𑁆𑀢𑀦𑁄 𑀥𑀫𑁆𑀫𑀸𑀘𑀭𑀺𑀬𑀸𑀦𑀫𑁂𑀯 𑀘𑀻𑀯𑀭𑀭𑀚𑀦𑀸𑀤𑀻𑀦𑀺 𑀯𑁂𑀬𑁆𑀬𑀸𑀯𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀏𑀓𑀘𑁆𑀘𑁂 𑀣𑁂𑀭𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀫𑀬𑀫𑁆𑀧𑀺 𑀩𑁆𑀬𑀜𑁆𑀚𑀦𑀲𑀫𑀬𑁂 𑀓𑀼𑀲𑀮𑀸, 𑀅𑀫𑁆𑀳𑀸𑀓𑀫𑁂𑀯 𑀓𑀺𑀜𑁆𑀘𑀺 𑀦𑀢𑁆𑀣𑀺. 𑀬𑀁𑀦𑀽𑀦 𑀫𑀬𑀁 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬𑀸𑀫, ‘𑀪𑀦𑁆𑀢𑁂, 𑀫𑀬𑀁 𑀩𑁆𑀬𑀜𑁆𑀚𑀦𑀲𑀫𑀬𑁂 𑀓𑀼𑀲𑀮𑀸, 𑀅𑀜𑁆𑀜𑁂𑀲𑀁 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸𑀧𑀺 𑀇𑀫𑁂𑀲𑀁 𑀲𑀦𑁆𑀢𑀺𑀓𑁂 𑀅𑀲𑁄𑀥𑁂𑀢𑁆𑀯𑀸 𑀫𑀸 𑀲𑀚𑁆𑀛𑀸𑀬𑀺𑀢𑁆𑀣𑀸𑀢𑀺 𑀤𑀳𑀭𑀲𑀸𑀫𑀡𑁂𑀭𑁂 𑀆𑀡𑀸𑀧𑁂𑀣𑀸’𑀢𑀺. 𑀏𑀯𑀜𑁆𑀳𑀺 𑀅𑀫𑁆𑀳𑀸𑀓𑀁 𑀮𑀸𑀪𑀲𑀓𑁆𑀓𑀸𑀭𑁄 𑀯𑀟𑁆𑀠𑀺𑀲𑁆𑀲𑀢𑀻’’𑀢𑀺. 𑀢𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀣𑀸 𑀯𑀤𑀺𑀁𑀲𑀼.

𑀲𑀢𑁆𑀣𑀸 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀯𑁂𑀡𑀺𑀯𑀲𑁂𑀦𑁂𑀯 𑀏𑀯𑀁 𑀯𑀢𑁆𑀢𑀼𑀁 𑀮𑀪𑀢𑀺, 𑀇𑀫𑁂 𑀧𑀦 𑀮𑀸𑀪𑀲𑀓𑁆𑀓𑀸𑀭𑁂 𑀦𑀺𑀲𑁆𑀲𑀺𑀢𑀸𑀢𑀺 𑀜𑀢𑁆𑀯𑀸 𑀅𑀳𑀁 𑀢𑀼𑀫𑁆𑀳𑁂 𑀯𑀸𑀓𑁆𑀓𑀭𑀡𑀫𑀢𑁆𑀢𑁂𑀦 𑀲𑀸𑀥𑀼𑀭𑀽𑀧𑀸𑀢𑀺 𑀦 𑀯𑀤𑀸𑀫𑀺. 𑀬𑀲𑁆𑀲 𑀧𑀦𑁂𑀢𑁂 𑀇𑀲𑁆𑀲𑀸𑀤𑀬𑁄 𑀥𑀫𑁆𑀫𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀏𑀲𑁄 𑀏𑀯 𑀲𑀸𑀥𑀼𑀭𑀽𑀧𑁄’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁬𑁨. ‘‘𑀦 𑀯𑀸𑀓𑁆𑀓𑀭𑀡𑀫𑀢𑁆𑀢𑁂𑀦, 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸;

𑀲𑀸𑀥𑀼𑀭𑀽𑀧𑁄 𑀦𑀭𑁄 𑀳𑁄𑀢𑀺, 𑀇𑀲𑁆𑀲𑀼𑀓𑀻 𑀫𑀘𑁆𑀙𑀭𑀻 𑀲𑀞𑁄.

𑁨𑁬𑁩. ‘‘𑀬𑀲𑁆𑀲 𑀘𑁂𑀢𑀁 𑀲𑀫𑀼𑀘𑁆𑀙𑀺𑀦𑁆𑀦𑀁, 𑀫𑀽𑀮𑀖𑀘𑁆𑀘𑀁 𑀲𑀫𑀽𑀳𑀢𑀁;

𑀲𑀯𑀦𑁆𑀢𑀤𑁄𑀲𑁄 𑀫𑁂𑀥𑀸𑀯𑀻, 𑀲𑀸𑀥𑀼𑀭𑀽𑀧𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀦 𑀯𑀸𑀓𑁆𑀓𑀭𑀡𑀫𑀢𑁆𑀢𑁂𑀦𑀸𑀢𑀺 𑀯𑀘𑀻𑀓𑀭𑀡𑀫𑀢𑁆𑀢𑁂𑀦 𑀲𑀤𑁆𑀤𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀯𑀘𑀦𑀫𑀢𑁆𑀢𑁂𑀦. 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸𑀢𑀺 𑀲𑀭𑀻𑀭𑀯𑀡𑁆𑀡𑀲𑁆𑀲 𑀫𑀦𑀸𑀧𑀪𑀸𑀯𑁂𑀦 𑀯𑀸. 𑀦𑀭𑁄𑀢𑀺 𑀏𑀢𑁆𑀢𑀓𑁂𑀦𑁂𑀯 𑀓𑀸𑀭𑀡𑁂𑀦 𑀧𑀭𑀮𑀸𑀪𑀸𑀤𑀻𑀲𑀼 𑀇𑀲𑁆𑀲𑀸𑀫𑀦𑀓𑁄 𑀧𑀜𑁆𑀘𑀯𑀺𑀥𑁂𑀦 𑀫𑀘𑁆𑀙𑁂𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑁂𑀭𑀸𑀝𑀺𑀓𑀪𑀸𑀯𑁂𑀦 𑀲𑀞𑁄 𑀦𑀭𑁄 𑀲𑀸𑀥𑀼𑀭𑀽𑀧𑁄 𑀦 𑀳𑁄𑀢𑀺. 𑀬𑀲𑁆𑀲 𑀘𑁂𑀢𑀦𑁆𑀢𑀺 𑀬𑀲𑁆𑀲 𑀘 𑀧𑀼𑀕𑁆𑀕𑀮𑀲𑁆𑀲𑁂𑀢𑀁 𑀇𑀲𑁆𑀲𑀸𑀤𑀺𑀤𑁄𑀲𑀚𑀸𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀲𑀫𑀽𑀮𑀓𑀁 𑀙𑀺𑀦𑁆𑀦𑀁, 𑀫𑀽𑀮𑀖𑀸𑀢𑀁 𑀓𑀢𑁆𑀯𑀸 𑀲𑀫𑀽𑀳𑀢𑀁, 𑀲𑁄 𑀯𑀦𑁆𑀢𑀤𑁄𑀲𑁄 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀲𑀸𑀥𑀼𑀭𑀽𑀧𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀫𑁆𑀩𑀳𑀼𑀮𑀪𑀺𑀓𑁆𑀔𑀼𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀳𑀢𑁆𑀣𑀓𑀯𑀢𑁆𑀣𑀼

𑀦 𑀫𑀼𑀡𑁆𑀟𑀓𑁂𑀦 𑀲𑀫𑀡𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀳𑀢𑁆𑀣𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀯𑀸𑀤𑀓𑁆𑀔𑀺𑀢𑁆𑀢𑁄 ‘‘𑀢𑀼𑀫𑁆𑀳𑁂 𑀅𑀲𑀼𑀓𑀯𑁂𑀮𑀸𑀬 𑀅𑀲𑀼𑀓𑀝𑁆𑀞𑀸𑀦𑀁 𑀦𑀸𑀫 𑀆𑀕𑀘𑁆𑀙𑁂𑀬𑁆𑀬𑀸𑀣, 𑀯𑀸𑀤𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀧𑀼𑀭𑁂𑀢𑀭𑀫𑁂𑀯 𑀢𑀢𑁆𑀣 𑀕𑀦𑁆𑀢𑁆𑀯𑀸 ‘‘𑀧𑀲𑁆𑀲𑀣, 𑀢𑀺𑀢𑁆𑀣𑀺𑀬𑀸 𑀫𑀫 𑀪𑀬𑁂𑀦 𑀦𑀸𑀕𑀢𑀸, 𑀏𑀲𑁄𑀯 𑀧𑀦 𑀦𑁂𑀲𑀁 𑀧𑀭𑀸𑀚𑀬𑁄’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀯𑀸𑀤𑀓𑁆𑀔𑀺𑀢𑁆𑀢𑁄 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀦𑁆𑀢𑁄 𑀯𑀺𑀘𑀭𑀢𑀺. 𑀲𑀢𑁆𑀣𑀸 ‘‘𑀳𑀢𑁆𑀣𑀓𑁄 𑀓𑀺𑀭 𑀏𑀯𑀁 𑀓𑀭𑁄𑀢𑀻’’𑀢𑀺 𑀲𑀼𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀳𑀢𑁆𑀣𑀓, 𑀏𑀯𑀁 𑀓𑀭𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀓𑀲𑁆𑀫𑀸 𑀏𑀯𑀁 𑀓𑀭𑁄𑀲𑀺? 𑀏𑀯𑀭𑀽𑀧𑀜𑁆𑀳𑀺 𑀫𑀼𑀲𑀸𑀯𑀸𑀤𑀁 𑀓𑀭𑁄𑀦𑁆𑀢𑁄 𑀲𑀻𑀲𑀫𑀼𑀡𑁆𑀟𑀦𑀸𑀤𑀺𑀫𑀢𑁆𑀢𑁂𑀦𑁂𑀯 𑀲𑀫𑀡𑁄 𑀦𑀸𑀫 𑀦 𑀳𑁄𑀢𑀺. 𑀬𑁄 𑀧𑀦 𑀅𑀡𑀽𑀦𑀺 𑀯𑀸 𑀣𑀽𑀮𑀸𑀦𑀺 𑀯𑀸 𑀧𑀸𑀧𑀸𑀦𑀺 𑀲𑀫𑁂𑀢𑁆𑀯𑀸 𑀞𑀺𑀢𑁄, 𑀅𑀬𑀫𑁂𑀯 𑀲𑀫𑀡𑁄’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁬𑁪. ‘‘𑀦 𑀫𑀼𑀡𑁆𑀟𑀓𑁂𑀦 𑀲𑀫𑀡𑁄, 𑀅𑀩𑁆𑀩𑀢𑁄 𑀅𑀮𑀺𑀓𑀁 𑀪𑀡𑀁;

𑀇𑀘𑁆𑀙𑀸𑀮𑁄𑀪𑀲𑀫𑀸𑀧𑀦𑁆𑀦𑁄, 𑀲𑀫𑀡𑁄 𑀓𑀺𑀁 𑀪𑀯𑀺𑀲𑁆𑀲𑀢𑀺.

𑁨𑁬𑁫. ‘‘𑀬𑁄 𑀘 𑀲𑀫𑁂𑀢𑀺 𑀧𑀸𑀧𑀸𑀦𑀺, 𑀅𑀡𑀼𑀁 𑀣𑀽𑀮𑀸𑀦𑀺 𑀲𑀩𑁆𑀩𑀲𑁄;

𑀲𑀫𑀺𑀢𑀢𑁆𑀢𑀸 𑀳𑀺 𑀧𑀸𑀧𑀸𑀦𑀁, 𑀲𑀫𑀡𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀫𑀼𑀡𑁆𑀟𑀓𑁂𑀦𑀸𑀢𑀺 𑀲𑀻𑀲𑀫𑀼𑀡𑁆𑀟𑀦𑀫𑀢𑁆𑀢𑁂𑀦. 𑀅𑀩𑁆𑀩𑀢𑁄𑀢𑀺 𑀲𑀻𑀮𑀯𑀢𑁂𑀦 𑀘 𑀥𑀼𑀢𑀗𑁆𑀕𑀯𑀢𑁂𑀦 𑀘 𑀯𑀺𑀭𑀳𑀺𑀢𑁄. 𑀅𑀮𑀺𑀓𑀁 𑀪𑀡𑀦𑁆𑀢𑀺 𑀫𑀼𑀲𑀸𑀯𑀸𑀤𑀁 𑀪𑀡𑀦𑁆𑀢𑁄 𑀅𑀲𑀫𑁆𑀧𑀢𑁆𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀇𑀘𑁆𑀙𑀸𑀬 𑀧𑀢𑁆𑀢𑁂𑀲𑀼 𑀘 𑀮𑁄𑀪𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀫𑀡𑁄 𑀦𑀸𑀫 𑀓𑀺𑀁 𑀪𑀯𑀺𑀲𑁆𑀲𑀢𑀺? 𑀲𑀫𑁂𑀢𑀻𑀢𑀺 𑀬𑁄 𑀘 𑀧𑀭𑀺𑀢𑁆𑀢𑀸𑀦𑀺 𑀯𑀸 𑀫𑀳𑀦𑁆𑀢𑀸𑀦𑀺 𑀯𑀸 𑀧𑀸𑀧𑀸𑀦𑀺 𑀯𑀽𑀧𑀲𑀫𑁂𑀢𑀺, 𑀲𑁄 𑀢𑁂𑀲𑀁 𑀲𑀫𑀺𑀢𑀢𑁆𑀢𑀸 𑀲𑀫𑀡𑁄𑀢𑀺 𑀧𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀳𑀢𑁆𑀣𑀓𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑀦 𑀢𑁂𑀦 𑀪𑀺𑀓𑁆𑀔𑀼 𑀲𑁄 𑀳𑁄𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀩𑀸𑀳𑀺𑀭𑀲𑀫𑀬𑁂 𑀧𑀩𑁆𑀩𑀚𑀺𑀢𑁆𑀯𑀸 𑀪𑀺𑀓𑁆𑀔𑀁 𑀘𑀭𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀅𑀢𑁆𑀢𑀦𑁄 𑀲𑀸𑀯𑀓𑁂 𑀪𑀺𑀓𑁆𑀔𑀸𑀬 𑀘𑀭𑀡𑁂𑀦 ‘𑀪𑀺𑀓𑁆𑀔𑀽’𑀢𑀺 𑀯𑀤𑀢𑀺, 𑀫𑀫𑁆𑀧𑀺 ‘𑀪𑀺𑀓𑁆𑀔𑀽’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑁄 𑀕𑁄𑀢𑀫, 𑀅𑀳𑀫𑁆𑀧𑀺 𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀚𑀻𑀯𑀸𑀫𑀺, 𑀫𑀫𑁆𑀧𑀺 ‘𑀪𑀺𑀓𑁆𑀔𑀽’𑀢𑀺 𑀯𑀤𑁂𑀳𑀻’’𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀦𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀪𑀺𑀓𑁆𑀔𑀦𑀫𑀢𑁆𑀢𑁂𑀦 𑀪𑀺𑀓𑁆𑀔𑀽𑀢𑀺 𑀯𑀤𑀸𑀫𑀺. 𑀦 𑀳𑀺 𑀯𑀺𑀲𑁆𑀲𑀁 𑀥𑀫𑁆𑀫𑀁 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑁄 𑀪𑀺𑀓𑁆𑀔𑀼 𑀦𑀸𑀫 𑀳𑁄𑀢𑀺. 𑀬𑁄 𑀧𑀦 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀲𑀗𑁆𑀔𑀸𑀬 𑀘𑀭𑀢𑀺, 𑀲𑁄 𑀪𑀺𑀓𑁆𑀔𑀼 𑀦𑀸𑀫𑀸’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁬𑁬. ‘‘𑀦 𑀢𑁂𑀦 𑀪𑀺𑀓𑁆𑀔𑀼 𑀲𑁄 𑀳𑁄𑀢𑀺, 𑀬𑀸𑀯𑀢𑀸 𑀪𑀺𑀓𑁆𑀔𑀢𑁂 𑀧𑀭𑁂;

𑀯𑀺𑀲𑁆𑀲𑀁 𑀥𑀫𑁆𑀫𑀁 𑀲𑀫𑀸𑀤𑀸𑀬, 𑀪𑀺𑀓𑁆𑀔𑀼 𑀳𑁄𑀢𑀺 𑀦 𑀢𑀸𑀯𑀢𑀸.

𑁨𑁬𑁭. ‘‘𑀬𑁄𑀥 𑀧𑀼𑀜𑁆𑀜𑀜𑁆𑀘 𑀧𑀸𑀧𑀜𑁆𑀘, 𑀩𑀸𑀳𑁂𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸;

𑀲𑀗𑁆𑀔𑀸𑀬 𑀮𑁄𑀓𑁂 𑀘𑀭𑀢𑀺, 𑀲 𑀯𑁂 𑀪𑀺𑀓𑁆𑀔𑀽𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀬𑀸𑀯𑀢𑀸𑀢𑀺 𑀬𑀢𑁆𑀢𑀓𑁂𑀦 𑀧𑀭𑁂 𑀪𑀺𑀓𑁆𑀔𑀢𑁂, 𑀢𑁂𑀦 𑀪𑀺𑀓𑁆𑀔𑀦𑀫𑀢𑁆𑀢𑁂𑀦 𑀪𑀺𑀓𑁆𑀔𑀼 𑀦𑀸𑀫 𑀦 𑀳𑁄𑀢𑀺. 𑀯𑀺𑀲𑁆𑀲𑀦𑁆𑀢𑀺 𑀯𑀺𑀲𑀫𑀁 𑀥𑀫𑁆𑀫𑀁, 𑀯𑀺𑀲𑁆𑀲𑀕𑀦𑁆𑀥𑀁 𑀯𑀸 𑀓𑀸𑀬𑀓𑀫𑁆𑀫𑀸𑀤𑀺𑀓𑀁 𑀥𑀫𑁆𑀫𑀁 𑀲𑀫𑀸𑀤𑀸𑀬 𑀘𑀭𑀦𑁆𑀢𑁄 𑀪𑀺𑀓𑁆𑀔𑀼 𑀦𑀸𑀫 𑀦 𑀳𑁄𑀢𑀺. 𑀬𑁄𑀥𑀸𑀢𑀺 𑀬𑁄 𑀇𑀥 𑀲𑀸𑀲𑀦𑁂 𑀉𑀪𑀬𑀫𑁆𑀧𑁂𑀢𑀁 𑀧𑀼𑀜𑁆𑀜𑀜𑁆𑀘 𑀧𑀸𑀧𑀜𑁆𑀘 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀩𑀸𑀳𑁂𑀢𑁆𑀯𑀸 𑀧𑀦𑀼𑀤𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸 𑀳𑁄𑀢𑀺. 𑀲𑀗𑁆𑀔𑀸𑀬𑀸𑀢𑀺 𑀜𑀸𑀡𑁂𑀦. 𑀮𑁄𑀓𑁂𑀢𑀺 𑀔𑀦𑁆𑀥𑀸𑀤𑀺𑀮𑁄𑀓𑁂 ‘‘𑀇𑀫𑁂 𑀅𑀚𑁆𑀛𑀢𑁆𑀢𑀺𑀓𑀸 𑀔𑀦𑁆𑀥𑀸, 𑀇𑀫𑁂 𑀩𑀸𑀳𑀺𑀭𑀸’’𑀢𑀺 𑀏𑀯𑀁 𑀲𑀩𑁆𑀩𑁂𑀧𑀺 𑀥𑀫𑁆𑀫𑁂 𑀚𑀸𑀦𑀺𑀢𑁆𑀯𑀸 𑀘𑀭𑀢𑀺, 𑀲𑁄 𑀢𑁂𑀦 𑀜𑀸𑀡𑁂𑀦 𑀓𑀺𑀮𑁂𑀲𑀸𑀦𑀁 𑀪𑀺𑀦𑁆𑀦𑀢𑁆𑀢𑀸 ‘‘𑀪𑀺𑀓𑁆𑀔𑀽’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀢𑀺𑀢𑁆𑀣𑀺𑀬𑀯𑀢𑁆𑀣𑀼

𑀦 𑀫𑁄𑀦𑁂𑀦𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀢𑀺𑀢𑁆𑀣𑀺𑀬𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂 𑀓𑀺𑀭 𑀪𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀫𑀦𑀼𑀲𑁆𑀲𑀸𑀦𑀁 ‘‘𑀔𑁂𑀫𑀁 𑀳𑁄𑀢𑀼, 𑀲𑀼𑀔𑀁 𑀳𑁄𑀢𑀼, 𑀆𑀬𑀼 𑀯𑀟𑁆𑀠𑀢𑀼, 𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀓𑀮𑀮𑀁 𑀅𑀢𑁆𑀣𑀺, 𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀓𑀡𑁆𑀝𑀓𑁄 𑀅𑀢𑁆𑀣𑀺, 𑀏𑀯𑀭𑀽𑀧𑀁 𑀞𑀸𑀦𑀁 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀗𑁆𑀕𑀮𑀁 𑀯𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺. 𑀪𑀺𑀓𑁆𑀔𑀽 𑀧𑀦 𑀧𑀞𑀫𑀩𑁄𑀥𑀺𑀬𑀁 𑀅𑀦𑀼𑀫𑁄𑀤𑀦𑀸𑀤𑀻𑀦𑀁 𑀅𑀦𑀦𑀼𑀜𑁆𑀜𑀸𑀢𑀓𑀸𑀮𑁂 𑀪𑀢𑁆𑀢𑀕𑁆𑀕𑁂 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀫𑁄𑀤𑀦𑀁 𑀅𑀓𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺. 𑀫𑀦𑀼𑀲𑁆𑀲𑀸 ‘‘𑀢𑀺𑀢𑁆𑀣𑀺𑀬𑀸𑀦𑀁 𑀲𑀦𑁆𑀢𑀺𑀓𑀸 𑀫𑀗𑁆𑀕𑀮𑀁 𑀲𑀼𑀡𑀸𑀫, 𑀪𑀤𑁆𑀤𑀦𑁆𑀢𑀸 𑀧𑀦 𑀢𑀼𑀡𑁆𑀳𑀻𑀪𑀽𑀢𑀸 𑀧𑀓𑁆𑀓𑀫𑀦𑁆𑀢𑀻’’𑀢𑀺 𑀉𑀚𑁆𑀛𑀸𑀬𑀺𑀁𑀲𑀼. 𑀪𑀺𑀓𑁆𑀔𑀽 𑀢𑀫𑀢𑁆𑀣𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸, ‘‘𑀪𑀺𑀓𑁆𑀔𑀯𑁂, 𑀇𑀢𑁄 𑀧𑀝𑁆𑀞𑀸𑀬 𑀪𑀢𑁆𑀢𑀕𑁆𑀕𑀸𑀤𑀻𑀲𑀼 𑀬𑀣𑀸𑀲𑀼𑀔𑀁 𑀅𑀦𑀼𑀫𑁄𑀤𑀦𑀁 𑀓𑀭𑁄𑀣, 𑀉𑀧𑀦𑀺𑀲𑀺𑀦𑁆𑀦𑀓𑀣𑀁 𑀓𑀭𑁄𑀣, 𑀥𑀫𑁆𑀫𑀁 𑀓𑀣𑁂𑀣𑀸’’𑀢𑀺 𑀅𑀦𑀼𑀚𑀸𑀦𑀺. 𑀢𑁂 𑀢𑀣𑀸 𑀓𑀭𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀅𑀦𑀼𑀫𑁄𑀤𑀦𑀸𑀤𑀻𑀦𑀺 𑀲𑀼𑀡𑀦𑁆𑀢𑀸 𑀉𑀲𑁆𑀲𑀸𑀳𑀧𑁆𑀧𑀢𑁆𑀢𑀸 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀢𑀺𑀢𑁆𑀣𑀺𑀬𑀸 𑀧𑀦 ‘‘𑀫𑀬𑀁 𑀫𑀼𑀦𑀺𑀦𑁄 𑀫𑁄𑀦𑀁 𑀓𑀭𑁄𑀫, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸 𑀪𑀢𑁆𑀢𑀕𑁆𑀕𑀸𑀤𑀻𑀲𑀼 𑀫𑀳𑀸𑀓𑀣𑀁 𑀓𑀣𑁂𑀦𑁆𑀢𑀸 𑀯𑀺𑀘𑀭𑀦𑁆𑀢𑀻’’𑀢𑀺 𑀉𑀚𑁆𑀛𑀸𑀬𑀺𑀁𑀲𑀼.

𑀲𑀢𑁆𑀣𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀢𑀼𑀡𑁆𑀳𑀻𑀪𑀸𑀯𑀫𑀢𑁆𑀢𑁂𑀦 ‘𑀫𑀼𑀦𑀻’𑀢𑀺 𑀯𑀤𑀸𑀫𑀺. 𑀏𑀓𑀘𑁆𑀘𑁂 𑀳𑀺 𑀅𑀚𑀸𑀦𑀦𑁆𑀢𑀸 𑀦 𑀓𑀣𑁂𑀦𑁆𑀢𑀺, 𑀏𑀓𑀘𑁆𑀘𑁂 𑀅𑀯𑀺𑀲𑀸𑀭𑀤𑀢𑀸𑀬, 𑀏𑀓𑀘𑁆𑀘𑁂 ‘𑀫𑀸 𑀦𑁄 𑀇𑀫𑀁 𑀅𑀢𑀺𑀲𑀬𑀢𑁆𑀣𑀁 𑀅𑀜𑁆𑀜𑁂 𑀚𑀸𑀦𑀺𑀁𑀲𑀽’𑀢𑀺 𑀫𑀘𑁆𑀙𑁂𑀭𑁂𑀦. 𑀢𑀲𑁆𑀫𑀸 𑀫𑁄𑀦𑀫𑀢𑁆𑀢𑁂𑀦 𑀫𑀼𑀦𑀺 𑀦 𑀳𑁄𑀢𑀺, 𑀧𑀸𑀧𑀯𑀽𑀧𑀲𑀫𑁂𑀦 𑀧𑀦 𑀫𑀼𑀦𑀺 𑀦𑀸𑀫 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁬𑁮. ‘‘𑀦 𑀫𑁄𑀦𑁂𑀦 𑀫𑀼𑀦𑀻 𑀳𑁄𑀢𑀺, 𑀫𑀽𑀴𑁆𑀳𑀭𑀽𑀧𑁄 𑀅𑀯𑀺𑀤𑁆𑀤𑀲𑀼;

𑀬𑁄 𑀘 𑀢𑀼𑀮𑀁𑀯 𑀧𑀕𑁆𑀕𑀬𑁆𑀳, 𑀯𑀭𑀫𑀸𑀤𑀸𑀬 𑀧𑀡𑁆𑀟𑀺𑀢𑁄.

𑁨𑁬𑁯. ‘‘𑀧𑀸𑀧𑀸𑀦𑀺 𑀧𑀭𑀺𑀯𑀚𑁆𑀚𑁂𑀢𑀺, 𑀲 𑀫𑀼𑀦𑀻 𑀢𑁂𑀦 𑀲𑁄 𑀫𑀼𑀦𑀺;

𑀬𑁄 𑀫𑀼𑀦𑀸𑀢𑀺 𑀉𑀪𑁄 𑀮𑁄𑀓𑁂, 𑀫𑀼𑀦𑀺 𑀢𑁂𑀦 𑀧𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀦 𑀫𑁄𑀦𑁂𑀦𑀸𑀢𑀺 𑀓𑀸𑀫𑀜𑁆𑀳𑀺 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀸𑀲𑀗𑁆𑀔𑀸𑀢𑁂𑀦 𑀫𑀕𑁆𑀕𑀜𑀸𑀡𑀫𑁄𑀦𑁂𑀦 𑀫𑀼𑀦𑀺 𑀦𑀸𑀫 𑀳𑁄𑀢𑀺, 𑀇𑀥 𑀧𑀦 𑀢𑀼𑀡𑁆𑀳𑀻𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀫𑁄𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀫𑀽𑀴𑁆𑀳𑀭𑀽𑀧𑁄𑀢𑀺 𑀢𑀼𑀘𑁆𑀙𑀭𑀽𑀧𑁄. 𑀅𑀯𑀺𑀤𑁆𑀤𑀲𑀽𑀢𑀺 𑀅𑀯𑀺𑀜𑁆𑀜𑀽. 𑀏𑀯𑀭𑀽𑀧𑁄 𑀳𑀺 𑀢𑀼𑀡𑁆𑀳𑀻𑀪𑀽𑀢𑁄𑀧𑀺 𑀫𑀼𑀦𑀺 𑀦𑀸𑀫 𑀦 𑀳𑁄𑀢𑀺. 𑀅𑀣 𑀯𑀸 𑀫𑁄𑀦𑁂𑀦 𑀫𑀼𑀦𑀺 𑀦𑀸𑀫 𑀦 𑀳𑁄𑀢𑀺, 𑀢𑀼𑀘𑁆𑀙𑀲𑀪𑀸𑀯𑁄 𑀧𑀦 𑀅𑀯𑀺𑀜𑁆𑀜𑀽 𑀘 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀬𑁄 𑀘 𑀢𑀼𑀮𑀁𑀯 𑀧𑀕𑀬𑁆𑀳𑀸𑀢𑀺 𑀬𑀣𑀸 𑀳𑀺 𑀢𑀼𑀮𑀁 𑀕𑀳𑁂𑀢𑁆𑀯𑀸 𑀞𑀺𑀢𑁄 𑀅𑀢𑀺𑀭𑁂𑀓𑀁 𑀘𑁂 𑀳𑁄𑀢𑀺, 𑀳𑀭𑀢𑀺. 𑀊𑀦𑀁 𑀘𑁂 𑀳𑁄𑀢𑀺, 𑀧𑀓𑁆𑀔𑀺𑀧𑀢𑀺. 𑀏𑀯𑀫𑁂𑀯 𑀬𑁄 𑀅𑀢𑀺𑀭𑁂𑀓𑀁 𑀳𑀭𑀦𑁆𑀢𑁄 𑀯𑀺𑀬 𑀧𑀸𑀧𑀁 𑀳𑀭𑀢𑀺 𑀧𑀭𑀺𑀯𑀚𑁆𑀚𑁂𑀢𑀺, 𑀊𑀦𑀓𑁂 𑀧𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀓𑀼𑀲𑀮𑀁 𑀧𑀭𑀺𑀧𑀽𑀭𑁂𑀢𑀺. 𑀏𑀯𑀜𑁆𑀘 𑀧𑀦 𑀓𑀭𑁄𑀦𑁆𑀢𑁄 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀗𑁆𑀔𑀸𑀢𑀁 𑀯𑀭𑀁 𑀉𑀢𑁆𑀢𑀫𑀫𑁂𑀯 𑀆𑀤𑀸𑀬 𑀧𑀸𑀧𑀸𑀦𑀺 𑀅𑀓𑀼𑀲𑀮𑀓𑀫𑁆𑀫𑀸𑀦𑀺 𑀧𑀭𑀺𑀯𑀚𑁆𑀚𑁂𑀢𑀺. 𑀲 𑀫𑀼𑀦𑀻𑀢𑀺 𑀲𑁄 𑀫𑀼𑀦𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀲𑁄 𑀫𑀼𑀦𑀻𑀢𑀺 𑀓𑀲𑁆𑀫𑀸 𑀧𑀦 𑀲𑁄 𑀫𑀼𑀦𑀻𑀢𑀺 𑀘𑁂? 𑀬𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀓𑀸𑀭𑀡𑀁, 𑀢𑁂𑀦 𑀲𑁄 𑀫𑀼𑀦𑀻𑀢𑀺 𑀅𑀢𑁆𑀣𑁄. 𑀲𑁄 𑀫𑀼𑀦𑀸𑀢𑀺 𑀉𑀪𑁄 𑀮𑁄𑀓𑁂𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀇𑀫𑀲𑁆𑀫𑀺𑀁 𑀔𑀦𑁆𑀥𑀸𑀤𑀺𑀮𑁄𑀓𑁂 𑀢𑀼𑀮𑀁 𑀆𑀭𑁄𑀧𑁂𑀢𑁆𑀯𑀸 𑀫𑀺𑀦𑀦𑁆𑀢𑁄 𑀯𑀺𑀬 ‘‘𑀇𑀫𑁂 𑀅𑀚𑁆𑀛𑀢𑁆𑀢𑀺𑀓𑀸 𑀔𑀦𑁆𑀥𑀸, 𑀇𑀫𑁂 𑀩𑀸𑀳𑀺𑀭𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀇𑀫𑁂 𑀉𑀪𑁄 𑀅𑀢𑁆𑀣𑁂 𑀫𑀼𑀦𑀸𑀢𑀺. 𑀫𑀼𑀦𑀺 𑀢𑁂𑀦 𑀧𑀯𑀼𑀘𑁆𑀘𑀢𑀻𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀫𑀼𑀦𑀻𑀢𑀺 𑀯𑀼𑀘𑁆𑀘𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀢𑀺𑀢𑁆𑀣𑀺𑀬𑀯𑀢𑁆𑀣𑀼 𑀅𑀝𑁆𑀞𑀫𑀁.

𑁯. 𑀩𑀸𑀮𑀺𑀲𑀺𑀓𑀯𑀢𑁆𑀣𑀼

𑀦 𑀢𑁂𑀦 𑀅𑀭𑀺𑀬𑁄 𑀳𑁄𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀅𑀭𑀺𑀬𑀁 𑀦𑀸𑀫 𑀩𑀸𑀮𑀺𑀲𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀤𑀺𑀯𑀲𑀜𑁆𑀳𑀺 𑀲𑀢𑁆𑀣𑀸 𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀲𑀸𑀯𑀢𑁆𑀣𑀺𑀬𑀸 𑀉𑀢𑁆𑀢𑀭𑀤𑁆𑀯𑀸𑀭𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀢𑀢𑁄 𑀆𑀕𑀘𑁆𑀙𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑁄 𑀩𑀸𑀮𑀺𑀲𑀺𑀓𑁄 𑀩𑀮𑀺𑀲𑁂𑀦 𑀫𑀘𑁆𑀙𑁂 𑀕𑀡𑁆𑀳𑀦𑁆𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀤𑀺𑀲𑁆𑀯𑀸 𑀩𑀮𑀺𑀲𑀬𑀝𑁆𑀞𑀺𑀁 𑀙𑀟𑁆𑀟𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀦𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑁄 ‘‘𑀢𑁆𑀯𑀁 𑀓𑀺𑀁 𑀦𑀸𑀫𑁄𑀲𑀻’’𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀸𑀤𑀻𑀦𑀁 𑀦𑀸𑀫𑀸𑀦𑀺 𑀧𑀼𑀘𑁆𑀙𑀺. 𑀢𑁂𑀧𑀺 ‘‘𑀅𑀳𑀁 𑀲𑀸𑀭𑀺𑀧𑀼𑀢𑁆𑀢𑁄 𑀅𑀳𑀁 𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀸𑀫𑀸𑀦𑀺 𑀓𑀣𑀬𑀺𑀁𑀲𑀼. 𑀩𑀸𑀮𑀺𑀲𑀺𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀢𑁆𑀣𑀸 𑀲𑀩𑁆𑀩𑁂𑀲𑀁 𑀦𑀸𑀫𑀸𑀦𑀺 𑀧𑀼𑀘𑁆𑀙𑀢𑀺, 𑀫𑀫𑀫𑁆𑀧𑀺 𑀦𑀸𑀫𑀁 𑀧𑀼𑀘𑁆𑀙𑀺𑀲𑁆𑀲𑀢𑀺 𑀫𑀜𑁆𑀜𑁂’’𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀇𑀘𑁆𑀙𑀁 𑀜𑀢𑁆𑀯𑀸, ‘‘𑀉𑀧𑀸𑀲𑀓, 𑀢𑁆𑀯𑀁 𑀓𑁄 𑀦𑀸𑀫𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀅𑀭𑀺𑀬𑁄 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀉𑀧𑀸𑀲𑀓, 𑀢𑀸𑀤𑀺𑀲𑀸 𑀧𑀸𑀡𑀸𑀢𑀺𑀧𑀸𑀢𑀺𑀦𑁄 𑀅𑀭𑀺𑀬𑀸 𑀦𑀸𑀫 𑀳𑁄𑀦𑁆𑀢𑀺, 𑀅𑀭𑀺𑀬𑀸 𑀧𑀦 𑀫𑀳𑀸𑀚𑀦𑀲𑁆𑀲 𑀅𑀳𑀺𑀁𑀲𑀦𑀪𑀸𑀯𑁂 𑀞𑀺𑀢𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁭𑁦. ‘‘𑀦 𑀢𑁂𑀦 𑀅𑀭𑀺𑀬𑁄 𑀳𑁄𑀢𑀺, 𑀬𑁂𑀦 𑀧𑀸𑀡𑀸𑀦𑀺 𑀳𑀺𑀁𑀲𑀢𑀺;

𑀅𑀳𑀺𑀁𑀲𑀸 𑀲𑀩𑁆𑀩𑀧𑀸𑀡𑀸𑀦𑀁, 𑀅𑀭𑀺𑀬𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀅𑀳𑀺𑀁𑀲𑀸𑀢𑀺 𑀅𑀳𑀺𑀁𑀲𑀦𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁂𑀦 𑀳𑀺 𑀧𑀸𑀡𑀸𑀦𑀺 𑀳𑀺𑀁𑀲𑀢𑀺, 𑀦 𑀢𑁂𑀦 𑀓𑀸𑀭𑀡𑁂𑀦 𑀅𑀭𑀺𑀬𑁄 𑀳𑁄𑀢𑀺. 𑀬𑁄 𑀧𑀦 𑀲𑀩𑁆𑀩𑀧𑀸𑀡𑀸𑀦𑀁 𑀧𑀸𑀡𑀺𑀆𑀤𑀻𑀳𑀺 𑀅𑀳𑀺𑀁𑀲𑀦𑁂𑀦 𑀫𑁂𑀢𑁆𑀢𑀸𑀤𑀺𑀪𑀸𑀯𑀦𑀸𑀬 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀳𑀺𑀁𑀲𑀢𑁄 𑀆𑀭𑀸𑀯 𑀞𑀺𑀢𑁄, 𑀅𑀬𑀁 𑀅𑀭𑀺𑀬𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀸𑀮𑀺𑀲𑀺𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀩𑀸𑀮𑀺𑀲𑀺𑀓𑀯𑀢𑁆𑀣𑀼 𑀦𑀯𑀫𑀁.

𑁧𑁦. 𑀲𑀫𑁆𑀩𑀳𑀼𑀮𑀲𑀻𑀮𑀸𑀤𑀺𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑀼𑀯𑀢𑁆𑀣𑀼

𑀦 𑀲𑀻𑀮𑀩𑁆𑀩𑀢𑀫𑀢𑁆𑀢𑁂𑀦𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀫𑁆𑀩𑀳𑀼𑀮𑁂 𑀲𑀻𑀮𑀸𑀤𑀺𑀲𑀫𑁆𑀧𑀦𑁆𑀦𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂𑀲𑀼 𑀓𑀺𑀭 𑀏𑀓𑀘𑁆𑀘𑀸𑀦𑀁 𑀏𑀯𑀁 𑀅𑀳𑁄𑀲𑀺 𑁋 ‘‘𑀫𑀬𑀁 𑀲𑀫𑁆𑀧𑀦𑁆𑀦𑀲𑀻𑀮𑀸, 𑀫𑀬𑀁 𑀥𑀼𑀢𑀗𑁆𑀕𑀥𑀭𑀸, 𑀫𑀬𑀁 𑀩𑀳𑀼𑀲𑁆𑀲𑀼𑀢𑀸, 𑀫𑀬𑀁 𑀧𑀦𑁆𑀢𑀲𑁂𑀦𑀸𑀲𑀦𑀯𑀸𑀲𑀺𑀦𑁄, 𑀫𑀬𑀁 𑀛𑀸𑀦𑀮𑀸𑀪𑀺𑀦𑁄, 𑀦 𑀅𑀫𑁆𑀳𑀸𑀓𑀁 𑀅𑀭𑀳𑀢𑁆𑀢𑀁 𑀤𑀼𑀮𑁆𑀮𑀪𑀁, 𑀇𑀘𑁆𑀙𑀺𑀢𑀤𑀺𑀯𑀲𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀸’’𑀢𑀺. 𑀬𑁂𑀧𑀺 𑀢𑀢𑁆𑀣 𑀅𑀦𑀸𑀕𑀸𑀫𑀺𑀦𑁄, 𑀢𑁂𑀲𑀫𑁆𑀧𑀺 𑀏𑀢𑀤𑀳𑁄𑀲𑀺 𑁋 ‘‘𑀦 𑀅𑀫𑁆𑀳𑀸𑀓𑀁 𑀇𑀤𑀸𑀦𑀺 𑀅𑀭𑀳𑀢𑁆𑀢𑀁 𑀤𑀼𑀮𑁆𑀮𑀪’’𑀦𑁆𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀏𑀓𑀤𑀺𑀯𑀲𑀁 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 ‘‘𑀅𑀧𑀺 𑀦𑀼 𑀔𑁄 𑀯𑁄, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀢𑁆𑀢’’𑀦𑁆𑀢𑀺 𑀲𑀢𑁆𑀣𑀸𑀭𑀸 𑀧𑀼𑀝𑁆𑀞𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀪𑀦𑁆𑀢𑁂, 𑀫𑀬𑀁 𑀏𑀯𑀭𑀽𑀧𑀸 𑀏𑀯𑀭𑀽𑀧𑀸 𑀘, 𑀢𑀲𑁆𑀫𑀸 ‘𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀲𑀫𑀢𑁆𑀣𑀫𑁆𑀳𑀸’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀺𑀳𑀭𑀸𑀫𑀸’’𑀢𑀺.

𑀲𑀢𑁆𑀣𑀸 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀧𑀭𑀺𑀲𑀼𑀤𑁆𑀥𑀲𑀻𑀮𑀸𑀤𑀺𑀫𑀢𑁆𑀢𑀓𑁂𑀦 𑀯𑀸 𑀅𑀦𑀸𑀕𑀸𑀫𑀺𑀲𑀼𑀔𑀧𑁆𑀧𑀢𑁆𑀢𑀫𑀢𑁆𑀢𑀓𑁂𑀦 𑀯𑀸 ‘𑀅𑀧𑁆𑀧𑀓𑀁 𑀦𑁄 𑀪𑀯𑀤𑀼𑀓𑁆𑀔’𑀦𑁆𑀢𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀆𑀲𑀯𑀓𑁆𑀔𑀬𑀁 𑀧𑀦 𑀅𑀧𑁆𑀧𑀢𑁆𑀯𑀸 ‘𑀲𑀼𑀔𑀺𑀢𑁄𑀫𑁆𑀳𑀻’𑀢𑀺 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁭𑁧. ‘‘𑀦 𑀲𑀻𑀮𑀩𑁆𑀩𑀢𑀫𑀢𑁆𑀢𑁂𑀦, 𑀩𑀸𑀳𑀼𑀲𑀘𑁆𑀘𑁂𑀦 𑀯𑀸 𑀧𑀦;

𑀅𑀣 𑀯𑀸 𑀲𑀫𑀸𑀥𑀺𑀮𑀸𑀪𑁂𑀦, 𑀯𑀺𑀯𑀺𑀢𑁆𑀢𑀲𑀬𑀦𑁂𑀦 𑀯𑀸.

𑁨𑁭𑁨. ‘‘𑀨𑀼𑀲𑀸𑀫𑀺 𑀦𑁂𑀓𑁆𑀔𑀫𑁆𑀫𑀲𑀼𑀔𑀁, 𑀅𑀧𑀼𑀣𑀼𑀚𑁆𑀚𑀦𑀲𑁂𑀯𑀺𑀢𑀁;

𑀪𑀺𑀓𑁆𑀔𑀼 𑀯𑀺𑀲𑁆𑀲𑀸𑀲𑀫𑀸𑀧𑀸𑀤𑀺, 𑀅𑀧𑁆𑀧𑀢𑁆𑀢𑁄 𑀆𑀲𑀯𑀓𑁆𑀔𑀬’’𑀦𑁆𑀢𑀺.

𑀢𑀢𑁆𑀣 𑀲𑀻𑀮𑀩𑁆𑀩𑀢𑀫𑀢𑁆𑀢𑁂𑀦𑀸𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀫𑀢𑁆𑀢𑁂𑀦 𑀯𑀸 𑀢𑁂𑀭𑀲𑀥𑀼𑀢𑀗𑁆𑀕𑀫𑀢𑁆𑀢𑁂𑀦 𑀯𑀸. 𑀩𑀸𑀳𑀼𑀲𑀘𑁆𑀘𑁂𑀦 𑀯𑀸𑀢𑀺 𑀢𑀺𑀡𑁆𑀡𑀁 𑀧𑀺𑀝𑀓𑀸𑀦𑀁 𑀉𑀕𑁆𑀕𑀳𑀺𑀢𑀫𑀢𑁆𑀢𑁂𑀦 𑀯𑀸. 𑀲𑀫𑀸𑀥𑀺𑀮𑀸𑀪𑁂𑀦𑀸𑀢𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑁂𑀦. 𑀦𑁂𑀓𑁆𑀔𑀫𑁆𑀫𑀲𑀼𑀔𑀦𑁆𑀢𑀺 𑀅𑀦𑀸𑀕𑀸𑀫𑀺𑀲𑀼𑀔𑀁. 𑀢𑀁 𑀅𑀦𑀸𑀕𑀸𑀫𑀺𑀲𑀼𑀔𑀁 𑀨𑀼𑀲𑀸𑀫𑀻𑀢𑀺 𑀏𑀢𑁆𑀢𑀓𑀫𑀢𑁆𑀢𑁂𑀦 𑀯𑀸. 𑀅𑀧𑀼𑀣𑀼𑀚𑁆𑀚𑀦𑀲𑁂𑀯𑀺𑀢𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑁂𑀳𑀺 𑀅𑀲𑁂𑀯𑀺𑀢𑀁 𑀅𑀭𑀺𑀬𑀲𑁂𑀯𑀺𑀢𑀫𑁂𑀯. 𑀪𑀺𑀓𑁆𑀔𑀽𑀢𑀺 𑀢𑁂𑀲𑀁 𑀅𑀜𑁆𑀜𑀢𑀭𑀁 𑀆𑀮𑀧𑀦𑁆𑀢𑁄 𑀆𑀳. 𑀯𑀺𑀲𑁆𑀲𑀸𑀲𑀫𑀸𑀧𑀸𑀤𑀻𑀢𑀺 𑀯𑀺𑀲𑁆𑀲𑀸𑀲𑀁 𑀦 𑀆𑀧𑀚𑁆𑀚𑁂𑀬𑁆𑀬. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀪𑀺𑀓𑁆𑀔𑀼 𑀇𑀫𑀺𑀦𑀸 𑀲𑀫𑁆𑀧𑀦𑁆𑀦𑀲𑀻𑀮𑀸𑀤𑀺𑀪𑀸𑀯𑀫𑀢𑁆𑀢𑀓𑁂𑀦𑁂𑀯 ‘‘𑀫𑀬𑁆𑀳𑀁 𑀪𑀯𑁄 𑀅𑀧𑁆𑀧𑀓𑁄 𑀧𑀭𑀺𑀢𑁆𑀢𑀓𑁄’’𑀢𑀺 𑀆𑀲𑀯𑀓𑁆𑀔𑀬𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀪𑀺𑀓𑁆𑀔𑀼 𑀦𑀸𑀫 𑀯𑀺𑀲𑁆𑀲𑀸𑀲𑀁 𑀦𑀸𑀧𑀚𑁆𑀚𑁂𑀬𑁆𑀬. 𑀬𑀣𑀸 𑀳𑀺 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀕𑀽𑀣𑁄 𑀤𑀼𑀕𑁆𑀕𑀦𑁆𑀥𑁄 𑀳𑁄𑀢𑀺, 𑀏𑀯𑀁 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀪𑀯𑁄 𑀤𑀼𑀓𑁆𑀔𑁄𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀁𑀲𑀼, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀲𑀫𑁆𑀩𑀳𑀼𑀮𑀲𑀻𑀮𑀸𑀤𑀺𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑀼𑀯𑀢𑁆𑀣𑀼 𑀤𑀲𑀫𑀁.

𑀥𑀫𑁆𑀫𑀝𑁆𑀞𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀽𑀦𑀯𑀻𑀲𑀢𑀺𑀫𑁄 𑀯𑀕𑁆𑀕𑁄.