𑁨𑁦. 𑀫𑀕𑁆𑀕𑀯𑀕𑁆𑀕𑁄

𑁧. 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀯𑀢𑁆𑀣𑀼

𑀫𑀕𑁆𑀕𑀸𑀦𑀝𑁆𑀞𑀗𑁆𑀕𑀺𑀓𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂 𑀓𑀺𑀭 𑀲𑀢𑁆𑀣𑀭𑀺 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀧𑀼𑀦 𑀲𑀸𑀯𑀢𑁆𑀣𑀺𑀁 𑀆𑀕𑀢𑁂 𑀉𑀧𑀝𑁆𑀞𑀸𑀦𑀲𑀸𑀮𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀅𑀲𑀼𑀓𑀕𑀸𑀫𑀢𑁄 𑀅𑀲𑀼𑀓𑀕𑀸𑀫𑀲𑁆𑀲 𑀫𑀕𑁆𑀕𑁄 𑀲𑀫𑁄, 𑀅𑀲𑀼𑀓𑀕𑀸𑀫𑀲𑁆𑀲 𑀫𑀕𑁆𑀕𑁄 𑀯𑀺𑀲𑀫𑁄, 𑀲𑀲𑀓𑁆𑀔𑀭𑁄, 𑀅𑀲𑀓𑁆𑀔𑀭𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑁆𑀢𑀦𑁄 𑀯𑀺𑀘𑀭𑀺𑀢𑀫𑀕𑁆𑀕𑀁 𑀆𑀭𑀩𑁆𑀪 𑀫𑀕𑁆𑀕𑀓𑀣𑀁 𑀓𑀣𑁂𑀲𑀼𑀁. 𑀲𑀢𑁆𑀣𑀸 𑀢𑁂𑀲𑀁 𑀅𑀭𑀳𑀢𑁆𑀢𑀲𑁆𑀲𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀢𑀁 𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀅𑀬𑀁 𑀩𑀸𑀳𑀺𑀭𑀓𑀫𑀕𑁆𑀕𑁄, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀅𑀭𑀺𑀬𑀫𑀕𑁆𑀕𑁂 𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀜𑁆𑀳𑀺 𑀓𑀭𑁄𑀦𑁆𑀢𑁄 𑀪𑀺𑀓𑁆𑀔𑀼 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁭𑁩. ‘‘𑀫𑀕𑁆𑀕𑀸𑀦𑀝𑁆𑀞𑀗𑁆𑀕𑀺𑀓𑁄 𑀲𑁂𑀝𑁆𑀞𑁄, 𑀲𑀘𑁆𑀘𑀸𑀦𑀁 𑀘𑀢𑀼𑀭𑁄 𑀧𑀤𑀸;

𑀯𑀺𑀭𑀸𑀕𑁄 𑀲𑁂𑀝𑁆𑀞𑁄 𑀥𑀫𑁆𑀫𑀸𑀦𑀁, 𑀤𑁆𑀯𑀺𑀧𑀤𑀸𑀦𑀜𑁆𑀘 𑀘𑀓𑁆𑀔𑀼𑀫𑀸.

𑁨𑁭𑁪. ‘‘𑀏𑀲𑁂𑀯 𑀫𑀕𑁆𑀕𑁄 𑀦𑀢𑁆𑀣𑀜𑁆𑀜𑁄, 𑀤𑀲𑁆𑀲𑀦𑀲𑁆𑀲 𑀯𑀺𑀲𑀼𑀤𑁆𑀥𑀺𑀬𑀸;

𑀏𑀢𑀜𑁆𑀳𑀺 𑀢𑀼𑀫𑁆𑀳𑁂 𑀧𑀝𑀺𑀧𑀚𑁆𑀚𑀣, 𑀫𑀸𑀭𑀲𑁆𑀲𑁂𑀢𑀁 𑀧𑀫𑁄𑀳𑀦𑀁.

𑁨𑁭𑁫. ‘‘𑀏𑀢𑀜𑁆𑀳𑀺 𑀢𑀼𑀫𑁆𑀳𑁂 𑀧𑀝𑀺𑀧𑀦𑁆𑀦𑀸, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀣;

𑀅𑀓𑁆𑀔𑀸𑀢𑁄 𑀯𑁄 𑀫𑀬𑀸 𑀫𑀕𑁆𑀕𑁄, 𑀅𑀜𑁆𑀜𑀸𑀬 𑀲𑀮𑁆𑀮𑀓𑀦𑁆𑀢𑀦𑀁.

𑁨𑁭𑁬. ‘‘𑀢𑀼𑀫𑁆𑀳𑁂𑀳𑀺 𑀓𑀺𑀘𑁆𑀘𑀫𑀸𑀢𑀧𑁆𑀧𑀁, 𑀅𑀓𑁆𑀔𑀸𑀢𑀸𑀭𑁄 𑀢𑀣𑀸𑀕𑀢𑀸;

𑀧𑀝𑀺𑀧𑀦𑁆𑀦𑀸 𑀧𑀫𑁄𑀓𑁆𑀔𑀦𑁆𑀢𑀺, 𑀛𑀸𑀬𑀺𑀦𑁄 𑀫𑀸𑀭𑀩𑀦𑁆𑀥𑀦𑀸’’𑀢𑀺.

𑀢𑀢𑁆𑀣 𑀫𑀕𑁆𑀕𑀸𑀦𑀝𑁆𑀞𑀗𑁆𑀕𑀺𑀓𑁄𑀢𑀺 𑀚𑀗𑁆𑀖𑀫𑀕𑁆𑀕𑀸𑀤𑀬𑁄 𑀯𑀸 𑀳𑁄𑀦𑁆𑀢𑀼 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀫𑀕𑁆𑀕𑀸 𑀯𑀸, 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀫𑀕𑁆𑀕𑀸𑀦𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀧𑀳𑀸𑀦𑀁 𑀓𑀭𑁄𑀦𑁆𑀢𑁄 𑀦𑀺𑀭𑁄𑀥𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼𑀧𑀺 𑀲𑀘𑁆𑀘𑁂𑀲𑀼 𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑀸𑀤𑀺𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄. 𑀲𑀘𑁆𑀘𑀸𑀦𑀁 𑀘𑀢𑀼𑀭𑁄 𑀧𑀤𑀸𑀢𑀺 ‘‘𑀲𑀘𑁆𑀘𑀁 𑀪𑀡𑁂 𑀦 𑀓𑀼𑀚𑁆𑀛𑁂𑀬𑁆𑀬𑀸’’𑀢𑀺 (𑀥. 𑀧. 𑁨𑁨𑁪) 𑀆𑀕𑀢𑀁 𑀯𑀘𑀻𑀲𑀘𑁆𑀘𑀁 𑀯𑀸 𑀳𑁄𑀢𑀼, ‘‘𑀲𑀘𑁆𑀘𑁄 𑀩𑁆𑀭𑀸𑀳𑁆𑀫𑀡𑁄 𑀲𑀘𑁆𑀘𑁄 𑀔𑀢𑁆𑀢𑀺𑀬𑁄’’𑀢𑀺𑀆𑀤𑀺𑀪𑁂𑀤𑀁 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀯𑀸 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 (𑀥. 𑀲. 𑁧𑁧𑁪𑁪; 𑀫. 𑀦𑀺. 𑁨.𑁧𑁮𑁭-𑁧𑁮𑁮) 𑀤𑀺𑀝𑁆𑀞𑀺𑀲𑀘𑁆𑀘𑀁 𑀯𑀸 ‘‘𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺𑀆𑀤𑀺𑀪𑁂𑀤𑀁 𑀧𑀭𑀫𑀢𑁆𑀣𑀲𑀘𑁆𑀘𑀁 𑀯𑀸 𑀳𑁄𑀢𑀼, 𑀲𑀩𑁆𑀩𑁂𑀲𑀫𑁆𑀧𑀺 𑀇𑀫𑁂𑀲𑀁 𑀲𑀘𑁆𑀘𑀸𑀦𑀁 𑀧𑀭𑀺𑀚𑀸𑀦𑀺𑀢𑀩𑁆𑀩𑀝𑁆𑀞𑁂𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀝𑁆𑀞𑁂𑀦 𑀧𑀳𑀸𑀢𑀩𑁆𑀩𑀝𑁆𑀞𑁂𑀦 𑀪𑀸𑀯𑁂𑀢𑀩𑁆𑀩𑀝𑁆𑀞𑁂𑀦 𑀏𑀓𑀧𑀝𑀺𑀯𑁂𑀥𑀝𑁆𑀞𑁂𑀦 𑀘 𑀢𑀣𑀧𑀝𑀺𑀯𑁂𑀥𑀝𑁆𑀞𑁂𑀦 𑀘 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺𑀆𑀤𑀬𑁄 𑀘𑀢𑀼𑀭𑁄 𑀧𑀤𑀸 𑀲𑁂𑀝𑁆𑀞𑀸 𑀦𑀸𑀫. 𑀯𑀺𑀭𑀸𑀕𑁄 𑀲𑁂𑀝𑁆𑀞𑁄 𑀥𑀫𑁆𑀫𑀸𑀦𑀦𑁆𑀢𑀺 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 (𑀇𑀢𑀺𑀯𑀼. 𑁯𑁦; 𑀅. 𑀦𑀺. 𑁪.𑁩𑁪) 𑀯𑀘𑀦𑀢𑁄 𑀲𑀩𑁆𑀩𑀥𑀫𑁆𑀫𑀸𑀦𑀁 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁄 𑀯𑀺𑀭𑀸𑀕𑁄 𑀲𑁂𑀝𑁆𑀞𑁄. 𑀤𑁆𑀯𑀺𑀧𑀤𑀸𑀦𑀜𑁆𑀘 𑀘𑀓𑁆𑀔𑀼𑀫𑀸𑀢𑀺 𑀲𑀩𑁆𑀩𑁂𑀲𑀁 𑀤𑁂𑀯𑀫𑀦𑀼𑀲𑁆𑀲𑀸𑀤𑀺𑀪𑁂𑀤𑀸𑀦𑀁 𑀤𑁆𑀯𑀺𑀧𑀤𑀸𑀦𑀁 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸 𑀢𑀣𑀸𑀕𑀢𑁄𑀯 𑀲𑁂𑀝𑁆𑀞𑁄. 𑀘-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀅𑀭𑀽𑀧𑀥𑀫𑁆𑀫𑁂 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀢𑀲𑁆𑀫𑀸 𑀅𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀢𑀣𑀸𑀕𑀢𑁄 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄.

𑀤𑀲𑁆𑀲𑀦𑀲𑁆𑀲 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀫𑀕𑁆𑀕𑀨𑀮𑀤𑀲𑁆𑀲𑀦𑀲𑁆𑀲 𑀯𑀺𑀲𑀼𑀤𑁆𑀥𑀢𑁆𑀣𑀁 𑀬𑁄 𑀫𑀬𑀸 ‘‘𑀲𑁂𑀝𑁆𑀞𑁄’’𑀢𑀺 𑀯𑀼𑀢𑁆𑀢𑁄, 𑀏𑀲𑁄𑀯 𑀫𑀕𑁆𑀕𑁄, 𑀦𑀢𑁆𑀣𑀜𑁆𑀜𑁄. 𑀏𑀢𑀜𑁆𑀳𑀺 𑀢𑀼𑀫𑁆𑀳𑁂𑀢𑀺 𑀢𑀲𑁆𑀫𑀸 𑀢𑀼𑀫𑁆𑀳𑁂 𑀏𑀢𑀫𑁂𑀯 𑀧𑀝𑀺𑀧𑀚𑁆𑀚𑀣. 𑀫𑀸𑀭𑀲𑁆𑀲𑁂𑀢𑀁 𑀧𑀫𑁄𑀳𑀦𑀦𑁆𑀢𑀺 𑀏𑀢𑀁 𑀫𑀸𑀭𑀫𑁄𑀳𑀦𑀁 𑀫𑀸𑀭𑀫𑀦𑁆𑀣𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀤𑀼𑀓𑁆𑀔𑀲𑁆𑀲𑀦𑁆𑀢𑀦𑁆𑀢𑀺 𑀲𑀓𑀮𑀲𑁆𑀲𑀧𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀁 𑀧𑀭𑀺𑀘𑁆𑀙𑁂𑀤𑀁 𑀓𑀭𑀺𑀲𑁆𑀲𑀣𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀸𑀬 𑀲𑀮𑁆𑀮𑀓𑀦𑁆𑀢𑀦𑀦𑁆𑀢𑀺 𑀭𑀸𑀕𑀲𑀮𑁆𑀮𑀸𑀤𑀻𑀦𑀁 𑀓𑀦𑁆𑀢𑀦𑀁 𑀦𑀺𑀫𑁆𑀫𑀣𑀦𑀁 𑀅𑀩𑁆𑀩𑀽𑀳𑀡𑀁 𑀏𑀢𑀁 𑀫𑀕𑁆𑀕𑀁, 𑀫𑀬𑀸 𑀯𑀺𑀦𑀸 𑀅𑀦𑀼𑀲𑁆𑀲𑀯𑀸𑀤𑀻𑀳𑀺 𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑁄 𑀜𑀢𑁆𑀯𑀸𑀯 𑀅𑀬𑀁 𑀫𑀕𑁆𑀕𑁄 𑀅𑀓𑁆𑀔𑀸𑀢𑁄, 𑀇𑀤𑀸𑀦𑀺 𑀢𑀼𑀫𑁆𑀳𑁂𑀳𑀺 𑀓𑀺𑀮𑁂𑀲𑀸𑀦𑀁 𑀆𑀢𑀸𑀧𑀦𑁂𑀦 ‘‘𑀆𑀢𑀧𑁆𑀧’’𑀦𑁆𑀢𑀺 𑀲𑀗𑁆𑀔𑀁 𑀕𑀢𑀁 𑀢𑀲𑁆𑀲 𑀅𑀥𑀺𑀕𑀫𑀢𑁆𑀣𑀸𑀬 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀁 𑀓𑀺𑀘𑁆𑀘𑀁 𑀓𑀭𑀡𑀻𑀬𑀁. 𑀓𑁂𑀯𑀮𑀜𑁆𑀳𑀺 𑀅𑀓𑁆𑀔𑀸𑀢𑀸𑀭𑁄𑀯 𑀢𑀣𑀸𑀕𑀢𑀸. 𑀢𑀲𑁆𑀫𑀸 𑀢𑁂𑀳𑀺 𑀅𑀓𑁆𑀔𑀸𑀢𑀯𑀲𑁂𑀦 𑀬𑁂 𑀧𑀝𑀺𑀧𑀦𑁆𑀦𑀸 𑀤𑁆𑀯𑀻𑀳𑀺 𑀛𑀸𑀦𑁂𑀳𑀺 𑀛𑀸𑀬𑀺𑀦𑁄, 𑀢𑁂 𑀢𑁂𑀪𑀽𑀫𑀓𑀯𑀝𑁆𑀝𑀲𑀗𑁆𑀔𑀸𑀢𑀸 𑀫𑀸𑀭𑀩𑀦𑁆𑀥𑀦𑀸 𑀧𑀫𑁄𑀓𑁆𑀔𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀯𑀢𑁆𑀣𑀼 𑀧𑀞𑀫𑀁.

𑁨. 𑀅𑀦𑀺𑀘𑁆𑀘𑀮𑀓𑁆𑀔𑀡𑀯𑀢𑁆𑀣𑀼

𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂 𑀓𑀺𑀭 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀅𑀭𑀜𑁆𑀜𑁂 𑀯𑀸𑀬𑀫𑀦𑁆𑀢𑀸𑀧𑀺 𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀯𑀸 ‘‘𑀯𑀺𑀲𑁂𑀲𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀫𑀺𑀁𑀲𑀼. 𑀲𑀢𑁆𑀣𑀸 ‘‘𑀓𑀺𑀁 𑀦𑀼 𑀔𑁄 𑀇𑀫𑁂𑀲𑀁 𑀲𑀧𑁆𑀧𑀸𑀬’’𑀦𑁆𑀢𑀺 𑀯𑀻𑀫𑀁𑀲𑀦𑁆𑀢𑁄 ‘‘𑀇𑀫𑁂 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑁂 𑀅𑀦𑀼𑀬𑀼𑀜𑁆𑀚𑀺𑀁𑀲𑀼, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀮𑀓𑁆𑀔𑀡𑁂𑀦𑁂𑀯 𑀢𑁂𑀲𑀁 𑀏𑀓𑀁 𑀕𑀸𑀣𑀁 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀓𑀸𑀫𑀪𑀯𑀸𑀤𑀻𑀲𑀼 𑀲𑀩𑁆𑀩𑁂𑀧𑀺 𑀲𑀗𑁆𑀔𑀸𑀭𑀸 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀸 𑀏𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁭𑁭. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺.

𑀢𑀢𑁆𑀣 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸𑀢𑀺 𑀓𑀸𑀫𑀪𑀯𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀸 𑀔𑀦𑁆𑀥𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀦𑀢𑁄 𑀅𑀦𑀺𑀘𑁆𑀘𑀸𑀢𑀺 𑀬𑀤𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀧𑀲𑁆𑀲𑀢𑀺, 𑀅𑀣 𑀇𑀫𑀲𑁆𑀫𑀺𑀁 𑀔𑀦𑁆𑀥𑀧𑀭𑀺𑀳𑀭𑀡𑀤𑀼𑀓𑁆𑀔𑁂 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑀸𑀤𑀺𑀯𑀲𑁂𑀦 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀯𑀺𑀲𑀼𑀤𑁆𑀥𑀢𑁆𑀣𑀸𑀬 𑀯𑁄𑀤𑀸𑀦𑀢𑁆𑀣𑀸𑀬 𑀏𑀲 𑀫𑀕𑁆𑀕𑁄𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀅𑀦𑀺𑀘𑁆𑀘𑀮𑀓𑁆𑀔𑀡𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀤𑀼𑀓𑁆𑀔𑀮𑀓𑁆𑀔𑀡𑀯𑀢𑁆𑀣𑀼

𑀤𑀼𑀢𑀺𑀬𑀕𑀸𑀣𑀸𑀬𑀧𑀺 𑀏𑀯𑀭𑀽𑀧𑀫𑁂𑀯 𑀯𑀢𑁆𑀣𑀼. 𑀢𑀤𑀸 𑀳𑀺 𑀪𑀕𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀤𑀼𑀓𑁆𑀔𑀮𑀓𑁆𑀔𑀡𑁂 𑀓𑀢𑀸𑀪𑀺𑀬𑁄𑀕𑀪𑀸𑀯𑀁 𑀜𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀲𑀩𑁆𑀩𑁂𑀧𑀺 𑀔𑀦𑁆𑀥𑀸 𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑀸 𑀏𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁭𑁮. ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺.

𑀢𑀢𑁆𑀣 𑀤𑀼𑀓𑁆𑀔𑀸𑀢𑀺 𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑀸. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀤𑀼𑀓𑁆𑀔𑀮𑀓𑁆𑀔𑀡𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀅𑀦𑀢𑁆𑀢𑀮𑀓𑁆𑀔𑀡𑀯𑀢𑁆𑀣𑀼

𑀢𑀢𑀺𑀬𑀕𑀸𑀣𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀯𑀮𑀜𑁆𑀳𑀺 𑀏𑀢𑁆𑀣 𑀪𑀕𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀼𑀩𑁆𑀩𑁂 𑀅𑀦𑀢𑁆𑀢𑀮𑀓𑁆𑀔𑀡𑁂 𑀅𑀦𑀼𑀬𑀼𑀢𑁆𑀢𑀪𑀸𑀯𑀁 𑀜𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀲𑀩𑁆𑀩𑁂𑀧𑀺 𑀔𑀦𑁆𑀥𑀸 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀅𑀦𑀢𑁆𑀢𑀸 𑀏𑀯𑀸’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁭𑁯. ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺.

𑀢𑀢𑁆𑀣 𑀲𑀩𑁆𑀩𑁂 𑀥𑀫𑁆𑀫𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸 𑀏𑀯 𑀅𑀥𑀺𑀧𑁆𑀧𑁂𑀢𑀸. 𑀅𑀦𑀢𑁆𑀢𑀸𑀢𑀺 ‘‘𑀫𑀸 𑀚𑀻𑀬𑀦𑁆𑀢𑀼 𑀫𑀸 𑀫𑀻𑀬𑀦𑁆𑀢𑀽’’𑀢𑀺 𑀯𑀲𑁂 𑀯𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀅𑀦𑀢𑁆𑀢𑀸 𑀅𑀢𑁆𑀢𑀲𑀼𑀜𑁆𑀜𑀸 𑀅𑀲𑁆𑀲𑀸𑀫𑀺𑀓𑀸 𑀅𑀦𑀺𑀲𑁆𑀲𑀭𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺.

𑀅𑀦𑀢𑁆𑀢𑀮𑀓𑁆𑀔𑀡𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀧𑀥𑀸𑀦𑀓𑀫𑁆𑀫𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼

𑀉𑀝𑁆𑀞𑀸𑀦𑀓𑀸𑀮𑀫𑁆𑀳𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀥𑀸𑀦𑀓𑀫𑁆𑀫𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀓𑀺𑀭 𑀧𑀜𑁆𑀘𑀲𑀢𑀸 𑀓𑀼𑀮𑀧𑀼𑀢𑁆𑀢𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀅𑀕𑀫𑀁𑀲𑀼. 𑀢𑁂𑀲𑀼 𑀏𑀓𑁄 𑀢𑀢𑁆𑀣𑁂𑀯 𑀑𑀳𑀻𑀬𑀺. 𑀅𑀯𑀲𑁂𑀲𑀸 𑀅𑀭𑀜𑁆𑀜𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 ‘‘𑀧𑀝𑀺𑀮𑀤𑁆𑀥𑀕𑀼𑀡𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑁆𑀲𑀸𑀫𑀸’’𑀢𑀺 𑀧𑀼𑀦 𑀲𑀸𑀯𑀢𑁆𑀣𑀺𑀁 𑀅𑀕𑀫𑀁𑀲𑀼. 𑀢𑁂 𑀲𑀸𑀯𑀢𑁆𑀣𑀺𑀢𑁄 𑀬𑁄𑀚𑀦𑀫𑀢𑁆𑀢𑁂 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂 𑀤𑀺𑀲𑁆𑀯𑀸 𑀏𑀓𑁄 𑀉𑀧𑀸𑀲𑀓𑁄 𑀬𑀸𑀕𑀼𑀪𑀢𑁆𑀢𑀸𑀤𑀻𑀳𑀺 𑀧𑀢𑀺𑀫𑀸𑀦𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀲𑀼𑀢𑁆𑀯𑀸 𑀧𑀼𑀦𑀤𑀺𑀯𑀲𑀢𑁆𑀣𑀸𑀬𑀧𑀺 𑀦𑀺𑀫𑀦𑁆𑀢𑁂𑀲𑀺. 𑀢𑁂 𑀢𑀤𑀳𑁂𑀯 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀢𑀺𑀯𑀺𑀬 𑀢𑀼𑀝𑁆𑀞𑀺𑀁 𑀧𑀯𑁂𑀤𑀬𑀫𑀸𑀦𑁄 𑀧𑀝𑀺𑀲𑀦𑁆𑀣𑀸𑀭𑀁 𑀅𑀓𑀸𑀲𑀺.

𑀅𑀣 𑀦𑁂𑀲𑀁 𑀢𑀢𑁆𑀣 𑀑𑀳𑀻𑀦𑁄 𑀲𑀳𑀸𑀬𑀓𑀪𑀺𑀓𑁆𑀔𑀼 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀢𑁆𑀣𑀼 𑀇𑀫𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑀲𑁆𑀲 𑀫𑀼𑀔𑀁 𑀦𑀧𑁆𑀧𑀳𑁄𑀢𑀺, 𑀫𑀬𑁆𑀳𑀁 𑀧𑀦 𑀫𑀕𑁆𑀕𑀨𑀮𑀸𑀪𑀸𑀯𑁂𑀦 𑀫𑀬𑀸 𑀲𑀤𑁆𑀥𑀺𑀁 𑀦 𑀓𑀣𑁂𑀢𑀺, 𑀅𑀚𑁆𑀚𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀬𑀸 𑀲𑀤𑁆𑀥𑀺𑀁 𑀓𑀣𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀢𑁂𑀧𑀺 𑀪𑀺𑀓𑁆𑀔𑀽, ‘‘𑀪𑀦𑁆𑀢𑁂, 𑀫𑀬𑀁 𑀆𑀕𑀫𑀦𑀫𑀕𑁆𑀕𑁂 𑀏𑀓𑁂𑀦 𑀉𑀧𑀸𑀲𑀓𑁂𑀦 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑀺𑀢𑀸, 𑀢𑀢𑁆𑀣 𑀧𑀸𑀢𑁄𑀯 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀲𑀢𑁆𑀣𑀸𑀭𑀁 𑀅𑀧𑀮𑁄𑀓𑁂𑀲𑀼𑀁. 𑀅𑀣 𑀦𑁂𑀲𑀁 𑀲𑀳𑀸𑀬𑀓𑁄 𑀪𑀺𑀓𑁆𑀔𑀼 𑀲𑀩𑁆𑀩𑀭𑀢𑁆𑀢𑀺𑀁 𑀘𑀗𑁆𑀓𑀫𑀦𑁆𑀢𑁄 𑀦𑀺𑀤𑁆𑀤𑀸𑀯𑀲𑁂𑀦 𑀘𑀗𑁆𑀓𑀫𑀓𑁄𑀝𑀺𑀬𑀁 𑀏𑀓𑀲𑁆𑀫𑀺𑀁 𑀧𑀸𑀲𑀸𑀡𑀨𑀮𑀓𑁂 𑀧𑀢𑀺, 𑀊𑀭𑀼𑀝𑁆𑀞𑀺 𑀪𑀺𑀚𑁆𑀚𑀺. 𑀲𑁄 𑀫𑀳𑀸𑀲𑀤𑁆𑀤𑁂𑀦 𑀯𑀺𑀭𑀯𑀺. 𑀢𑀲𑁆𑀲 𑀢𑁂 𑀲𑀳𑀸𑀬𑀓𑀸 𑀪𑀺𑀓𑁆𑀔𑀽 𑀲𑀤𑁆𑀤𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀉𑀧𑀥𑀸𑀯𑀺𑀁𑀲𑀼. 𑀢𑁂𑀲𑀁 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀢𑀲𑁆𑀲 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀸𑀦𑀁𑀬𑁂𑀯 𑀅𑀭𑀼𑀡𑁄 𑀉𑀝𑁆𑀞𑀳𑀺, 𑀢𑁂 𑀢𑀁 𑀕𑀸𑀫𑀁 𑀕𑀦𑁆𑀢𑀼𑀁 𑀑𑀓𑀸𑀲𑀁 𑀦 𑀮𑀪𑀺𑀁𑀲𑀼. 𑀅𑀣 𑀦𑁂 𑀲𑀢𑁆𑀣𑀸 𑀆𑀳 𑁋 ‘‘𑀓𑀺𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀸𑀘𑀸𑀭𑀕𑀸𑀫𑀁 𑀦 𑀕𑀫𑀺𑀢𑁆𑀣𑀸’’𑀢𑀺. 𑀢𑁂 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀏𑀲 𑀇𑀤𑀸𑀦𑁂𑀯 𑀢𑀼𑀫𑁆𑀳𑀸𑀓𑀁 𑀮𑀸𑀪𑀦𑁆𑀢𑀭𑀸𑀬𑀁 𑀓𑀭𑁄𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀓𑀸𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀬𑀸𑀘𑀺𑀢𑁄 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑁋

‘‘𑀬𑁄 𑀧𑀼𑀩𑁆𑀩𑁂 𑀓𑀭𑀡𑀻𑀬𑀸𑀦𑀺, 𑀧𑀘𑁆𑀙𑀸 𑀲𑁄 𑀓𑀸𑀢𑀼𑀫𑀺𑀘𑁆𑀙𑀢𑀺;

𑀯𑀭𑀼𑀡𑀓𑀝𑁆𑀞𑀪𑀜𑁆𑀚𑁄𑀯, 𑀲 𑀧𑀘𑁆𑀙𑀸 𑀫𑀦𑀼𑀢𑀧𑁆𑀧𑀢𑀻’’𑀢𑀺. (𑀚𑀸. 𑁧.𑁧.𑁭𑁧) 𑁋

𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀲𑀺. 𑀢𑀤𑀸 𑀓𑀺𑀭 𑀢𑁂 𑀪𑀺𑀓𑁆𑀔𑀽 𑀧𑀜𑁆𑀘𑀲𑀢𑀸 𑀫𑀸𑀡𑀯𑀓𑀸 𑀅𑀳𑁂𑀲𑀼𑀁, 𑀓𑀼𑀲𑀻𑀢𑀫𑀸𑀡𑀯𑀓𑁄 𑀅𑀬𑀁 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀆𑀘𑀭𑀺𑀬𑁄 𑀧𑀦 𑀢𑀣𑀸𑀕𑀢𑁄𑀯 𑀅𑀳𑁄𑀲𑀻𑀢𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀬𑁄 𑀳𑀺 𑀉𑀝𑁆𑀞𑀸𑀦𑀓𑀸𑀮𑁂 𑀉𑀝𑁆𑀞𑀸𑀦𑀁 𑀦 𑀓𑀭𑁄𑀢𑀺, 𑀲𑀁𑀲𑀦𑁆𑀦𑀲𑀗𑁆𑀓𑀧𑁆𑀧𑁄 𑀳𑁄𑀢𑀺, 𑀓𑀼𑀲𑀻𑀢𑁄 𑀲𑁄 𑀛𑀸𑀦𑀸𑀤𑀺𑀪𑁂𑀤𑀁 𑀯𑀺𑀲𑁂𑀲𑀁 𑀦𑀸𑀥𑀺𑀕𑀘𑁆𑀙𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁮𑁦. ‘‘𑀉𑀝𑁆𑀞𑀸𑀦𑀓𑀸𑀮𑀫𑁆𑀳𑀺 𑀅𑀦𑀼𑀝𑁆𑀞𑀳𑀸𑀦𑁄,

𑀬𑀼𑀯𑀸 𑀩𑀮𑀻 𑀆𑀮𑀲𑀺𑀬𑀁 𑀉𑀧𑁂𑀢𑁄;

𑀲𑀁𑀲𑀦𑁆𑀦𑀲𑀗𑁆𑀓𑀧𑁆𑀧𑀫𑀦𑁄 𑀓𑀼𑀲𑀻𑀢𑁄,

𑀧𑀜𑁆𑀜𑀸𑀬 𑀫𑀕𑁆𑀕𑀁 𑀅𑀮𑀲𑁄 𑀦 𑀯𑀺𑀦𑁆𑀤𑀢𑀻’’𑀢𑀺.

𑀢𑀢𑁆𑀣 𑀅𑀦𑀼𑀝𑁆𑀞𑀳𑀸𑀦𑁄𑀢𑀺 𑀅𑀦𑀼𑀝𑁆𑀞𑀳𑀦𑁆𑀢𑁄 𑀅𑀯𑀸𑀬𑀫𑀦𑁆𑀢𑁄. 𑀬𑀼𑀯𑀸 𑀩𑀮𑀻𑀢𑀺 𑀧𑀞𑀫𑀬𑁄𑀩𑁆𑀩𑀦𑁂 𑀞𑀺𑀢𑁄 𑀩𑀮𑀲𑀫𑁆𑀧𑀦𑁆𑀦𑁄𑀧𑀺 𑀳𑀼𑀢𑁆𑀯𑀸 𑀅𑀮𑀲𑀪𑀸𑀯𑁂𑀦 𑀉𑀧𑁂𑀢𑁄 𑀳𑁄𑀢𑀺, 𑀪𑀼𑀢𑁆𑀯𑀸 𑀲𑀬𑀢𑀺. 𑀲𑀁𑀲𑀦𑁆𑀦𑀲𑀗𑁆𑀓𑀧𑁆𑀧𑀫𑀦𑁄𑀢𑀺 𑀢𑀻𑀳𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁂𑀳𑀺 𑀲𑀼𑀝𑁆𑀞𑀼 𑀅𑀯𑀲𑀦𑁆𑀦𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀘𑀺𑀢𑁆𑀢𑁄. 𑀓𑀼𑀲𑀻𑀢𑁄𑀢𑀺 𑀦𑀺𑀩𑁆𑀩𑀻𑀭𑀺𑀬𑁄. 𑀅𑀮𑀲𑁄𑀢𑀺 𑀫𑀳𑀸𑀅𑀮𑀲𑁄 𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁 𑀅𑀭𑀺𑀬𑀫𑀕𑁆𑀕𑀁 𑀅𑀧𑀲𑁆𑀲𑀦𑁆𑀢𑁄 𑀦 𑀯𑀺𑀦𑁆𑀤𑀢𑀺, 𑀦 𑀧𑀝𑀺𑀮𑀪𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀧𑀥𑀸𑀦𑀓𑀫𑁆𑀫𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀲𑀽𑀓𑀭𑀧𑁂𑀢𑀯𑀢𑁆𑀣𑀼

𑀯𑀸𑀘𑀸𑀦𑀼𑀭𑀓𑁆𑀔𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀽𑀓𑀭𑀧𑁂𑀢𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀤𑀺𑀯𑀲𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀮𑀓𑁆𑀔𑀡𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀕𑀺𑀚𑁆𑀛𑀓𑀽𑀝𑀸 𑀑𑀭𑁄𑀳𑀦𑁆𑀢𑁄 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. ‘‘𑀓𑁄 𑀦𑀼 𑀔𑁄, 𑀆𑀯𑀼𑀲𑁄, 𑀳𑁂𑀢𑀼 𑀲𑀺𑀢𑀲𑁆𑀲 𑀧𑀸𑀢𑀼𑀓𑀫𑁆𑀫𑀸𑀬𑀸’’𑀢𑀺 𑀮𑀓𑁆𑀔𑀡𑀢𑁆𑀣𑁂𑀭𑁂𑀦 𑀧𑀼𑀝𑁆𑀞𑁄 ‘‘𑀅𑀓𑀸𑀮𑁄, 𑀆𑀯𑀼𑀲𑁄, 𑀇𑀫𑀲𑁆𑀲 𑀧𑀜𑁆𑀳𑀲𑁆𑀲, 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀫𑀁 𑀧𑀼𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀮𑀓𑁆𑀔𑀡𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁𑀬𑁂𑀯 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀯𑁂𑀴𑀼𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣 𑀦𑀁 𑀮𑀓𑁆𑀔𑀡𑀢𑁆𑀣𑁂𑀭𑁄 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀲𑁄 𑀆𑀳 𑁋 ‘‘𑀆𑀯𑀼𑀲𑁄, 𑀅𑀳𑀁 𑀏𑀓𑀁 𑀧𑁂𑀢𑀁 𑀅𑀤𑁆𑀤𑀲𑀁, 𑀢𑀲𑁆𑀲 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀲𑀭𑀻𑀭𑀁, 𑀢𑀁 𑀫𑀦𑀼𑀲𑁆𑀲𑀲𑀭𑀻𑀭𑀲𑀤𑀺𑀲𑀁. 𑀲𑀻𑀲𑀁 𑀧𑀦 𑀲𑀽𑀓𑀭𑀲𑁆𑀲 𑀯𑀺𑀬, 𑀢𑀲𑁆𑀲 𑀫𑀼𑀔𑁂 𑀦𑀗𑁆𑀕𑀼𑀝𑁆𑀞𑀁 𑀚𑀸𑀢𑀁, 𑀢𑀢𑁄 𑀧𑀼𑀴𑀯𑀸 𑀧𑀕𑁆𑀖𑀭𑀦𑁆𑀢𑀺. 𑀲𑁆𑀯𑀸𑀳𑀁 ‘𑀦 𑀫𑁂 𑀏𑀯𑀭𑀽𑀧𑁄 𑀲𑀢𑁆𑀢𑁄 𑀤𑀺𑀝𑁆𑀞𑀧𑀼𑀩𑁆𑀩𑁄’𑀢𑀺 𑀢𑀁 𑀤𑀺𑀲𑁆𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺’’𑀦𑁆𑀢𑀺. 𑀲𑀢𑁆𑀣𑀸 ‘‘𑀘𑀓𑁆𑀔𑀼𑀪𑀽𑀢𑀸 𑀯𑀢, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀻’’𑀢𑀺 𑀯𑀢𑁆𑀯𑀸 ‘‘𑀅𑀳𑀫𑁆𑀧𑁂𑀢𑀁 𑀲𑀢𑁆𑀢𑀁 𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀅𑀤𑁆𑀤𑀲𑀁. ‘𑀬𑁂 𑀧𑀦 𑀫𑁂 𑀦 𑀲𑀤𑁆𑀤𑀳𑁂𑀬𑁆𑀬𑀼𑀁, 𑀢𑁂𑀲𑀁 𑀅𑀳𑀺𑀢𑀸𑀬 𑀅𑀲𑁆𑀲𑀸’𑀢𑀺 𑀧𑀭𑁂𑀲𑀁 𑀅𑀦𑀼𑀓𑀫𑁆𑀧𑀸𑀬 𑀦 𑀓𑀣𑁂𑀲𑀺𑀁. 𑀇𑀤𑀸𑀦𑀺 𑀫𑁄𑀕𑁆𑀕𑀮𑁆𑀮𑀸𑀦𑀁 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀓𑀣𑁂𑀫𑀺. 𑀲𑀘𑁆𑀘𑀁, 𑀪𑀺𑀓𑁆𑀔𑀯𑁂, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀆𑀳𑀸’’𑀢𑀺 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫’’𑀦𑁆𑀢𑀺. 𑀲𑀢𑁆𑀣𑀸 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀡𑀸𑀣𑀸’’𑀢𑀺 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀓𑀣𑁂𑀲𑀺.

𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀓𑀺𑀭 𑀏𑀓𑀲𑁆𑀫𑀺𑀁 𑀕𑀸𑀫𑀓𑀸𑀯𑀸𑀲𑁂 𑀤𑁆𑀯𑁂 𑀣𑁂𑀭𑀸 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀁𑀲𑀼. 𑀢𑁂𑀲𑀼 𑀏𑀓𑁄 𑀲𑀝𑁆𑀞𑀺𑀯𑀲𑁆𑀲𑁄, 𑀏𑀓𑁄 𑀏𑀓𑀽𑀦𑀲𑀝𑁆𑀞𑀺𑀯𑀲𑁆𑀲𑁄. 𑀏𑀓𑀽𑀦𑀲𑀝𑁆𑀞𑀺𑀯𑀲𑁆𑀲𑁄 𑀇𑀢𑀭𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀯𑀺𑀘𑀭𑀺, 𑀲𑀸𑀫𑀡𑁂𑀭𑁄 𑀯𑀺𑀬 𑀲𑀩𑁆𑀩𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀅𑀓𑀸𑀲𑀺. 𑀢𑁂𑀲𑀁 𑀏𑀓𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀯𑀼𑀢𑁆𑀣𑀪𑀸𑀢𑀽𑀦𑀁 𑀯𑀺𑀬 𑀲𑀫𑀕𑁆𑀕𑀯𑀸𑀲𑀁 𑀯𑀲𑀦𑁆𑀢𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀏𑀓𑁄 𑀥𑀫𑁆𑀫𑀓𑀣𑀺𑀓𑁄 𑀆𑀕𑀫𑀺. 𑀢𑀤𑀸 𑀘 𑀥𑀫𑁆𑀫𑀲𑁆𑀲𑀯𑀦𑀤𑀺𑀯𑀲𑁄 𑀳𑁄𑀢𑀺. 𑀣𑁂𑀭𑀸 𑀦𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 ‘‘𑀥𑀫𑁆𑀫𑀓𑀣𑀁 𑀦𑁄 𑀓𑀣𑁂𑀳𑀺 𑀲𑀧𑁆𑀧𑀼𑀭𑀺𑀲𑀸’’𑀢𑀺 𑀆𑀳𑀁𑀲𑀼. 𑀲𑁄 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀣𑁂𑀭𑀸 ‘‘𑀥𑀫𑁆𑀫𑀓𑀣𑀺𑀓𑁄 𑀦𑁄 𑀮𑀤𑁆𑀥𑁄’’𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑀸 𑀧𑀼𑀦𑀤𑀺𑀯𑀲𑁂 𑀢𑀁 𑀆𑀤𑀸𑀬 𑀥𑀼𑀭𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀓𑀢𑀪𑀢𑁆𑀢𑀓𑀺𑀘𑁆𑀘𑀸, ‘‘𑀆𑀯𑀼𑀲𑁄, 𑀳𑀺𑀬𑁆𑀬𑁄 𑀓𑀣𑀺𑀢𑀝𑁆𑀞𑀸𑀦𑀢𑁄𑀯 𑀣𑁄𑀓𑀁 𑀥𑀫𑁆𑀫𑀁 𑀓𑀣𑁂𑀳𑀻’’𑀢𑀺 𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀁 𑀓𑀣𑀸𑀧𑁂𑀲𑀼𑀁. 𑀫𑀦𑀼𑀲𑁆𑀲𑀸 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀼𑀦𑀤𑀺𑀯𑀲𑀢𑁆𑀣𑀸𑀬𑀧𑀺 𑀦𑀺𑀫𑀦𑁆𑀢𑀬𑀺𑀁𑀲𑀼. 𑀏𑀯𑀁 𑀲𑀫𑀦𑁆𑀢𑀸 𑀪𑀺𑀓𑁆𑀔𑀸𑀘𑀸𑀭𑀕𑀸𑀫𑁂𑀲𑀼 𑀤𑁆𑀯𑁂 𑀤𑁆𑀯𑁂 𑀤𑀺𑀯𑀲𑁂 𑀢𑀁 𑀆𑀤𑀸𑀬 𑀧𑀺𑀡𑁆𑀟𑀸𑀬 𑀘𑀭𑀺𑀁𑀲𑀼.

𑀥𑀫𑁆𑀫𑀓𑀣𑀺𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀤𑁆𑀯𑁂𑀧𑀺 𑀅𑀢𑀺𑀫𑀼𑀤𑀼𑀓𑀸, 𑀫𑀬𑀸 𑀉𑀪𑁄𑀧𑁂𑀢𑁂 𑀧𑀮𑀸𑀧𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀲𑀸𑀬𑀁 𑀣𑁂𑀭𑀽𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀉𑀝𑁆𑀞𑀸𑀬 𑀕𑀢𑀓𑀸𑀮𑁂 𑀦𑀺𑀯𑀢𑁆𑀢𑀺𑀢𑁆𑀯𑀸 𑀫𑀳𑀸𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸 ‘‘𑀓𑀣𑁂𑀳𑀺, 𑀆𑀯𑀼𑀲𑁄’’𑀢𑀺 𑀯𑀼𑀢𑁆𑀢𑁂 𑀣𑁄𑀓𑀁 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀓𑀣𑀸 𑀦𑀸𑀫𑁂𑀲𑀸 𑀫𑀳𑀸𑀲𑀸𑀯𑀚𑁆𑀚𑀸’’𑀢𑀺 𑀯𑀢𑁆𑀯𑀸 𑀅𑀓𑀣𑁂𑀢𑁆𑀯𑀸𑀯 𑀧𑀓𑁆𑀓𑀸𑀫𑀺. 𑀅𑀦𑀼𑀣𑁂𑀭𑀲𑁆𑀲𑀸𑀧𑀺 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀣𑁂𑀯 𑀅𑀓𑀸𑀲𑀺. 𑀲𑁄 𑀤𑀼𑀢𑀺𑀬𑀤𑀺𑀯𑀲𑁂 𑀢𑀣𑁂𑀯 𑀓𑀢𑁆𑀯𑀸 𑀢𑀢𑀺𑀬𑀤𑀺𑀯𑀲𑁂 𑀢𑁂𑀲𑀁 𑀅𑀢𑀺𑀯𑀺𑀬 𑀓𑁄𑀢𑀼𑀳𑀮𑁂 𑀉𑀧𑁆𑀧𑀦𑁆𑀦𑁂 𑀫𑀳𑀸𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀺, 𑀢𑀼𑀫𑁆𑀳𑀸𑀓𑀁 𑀧𑀦 𑀲𑀦𑁆𑀢𑀺𑀓𑁂 𑀯𑀢𑁆𑀢𑀼𑀁 𑀦 𑀯𑀺𑀲𑀳𑀸𑀫𑀻’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 ‘‘𑀳𑁄𑀢𑀼, 𑀆𑀯𑀼𑀲𑁄, 𑀓𑀣𑁂𑀳𑀻’’𑀢𑀺 𑀦𑀺𑀧𑁆𑀧𑀻𑀴𑀺𑀢𑁄 𑀆𑀳 𑁋 ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀅𑀦𑀼𑀣𑁂𑀭𑁄 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀲𑀁𑀪𑁄𑀕𑁄’’𑀢𑀺. 𑀲𑀧𑁆𑀧𑀼𑀭𑀺𑀲, 𑀓𑀺𑀁 𑀦𑀸𑀫𑁂𑀢𑀁 𑀓𑀣𑁂𑀲𑀺, 𑀫𑀬𑀁 𑀏𑀓𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀯𑀼𑀢𑁆𑀣𑀧𑀼𑀢𑁆𑀢𑀸 𑀯𑀺𑀬, 𑀅𑀫𑁆𑀳𑁂𑀲𑀼 𑀏𑀓𑁂𑀦 𑀬𑀁 𑀮𑀤𑁆𑀥𑀁, 𑀇𑀢𑀭𑁂𑀦𑀸𑀧𑀺 𑀮𑀤𑁆𑀥𑀫𑁂𑀯 𑀳𑁄𑀢𑀺. 𑀫𑀬𑀸 𑀏𑀢𑀲𑁆𑀲 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀕𑀼𑀡𑁄 𑀦𑀸𑀫 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄𑀢𑀺? 𑀏𑀯𑀁, 𑀪𑀦𑁆𑀢𑁂𑀢𑀺. 𑀆𑀫𑀸𑀯𑀼𑀲𑁄𑀢𑀺. 𑀪𑀦𑁆𑀢𑁂 𑀫𑀁 𑀅𑀦𑀼𑀣𑁂𑀭𑁄 𑀏𑀯𑀫𑀸𑀳 𑁋 ‘‘𑀲𑀧𑁆𑀧𑀼𑀭𑀺𑀲, 𑀢𑁆𑀯𑀁 𑀓𑀼𑀮𑀧𑀼𑀢𑁆𑀢𑁄, 𑀅𑀬𑀁 𑀫𑀳𑀸𑀣𑁂𑀭𑁄 𑀮𑀚𑁆𑀚𑀻 𑀧𑁂𑀲𑀮𑁄𑀢𑀺 𑀏𑀢𑁂𑀦 𑀲𑀤𑁆𑀥𑀺𑀁 𑀲𑀁𑀪𑁄𑀕𑀁 𑀓𑀭𑁄𑀦𑁆𑀢𑁄 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀏𑀯𑀫𑁂𑀲 𑀫𑀁 𑀆𑀕𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀯𑀤𑀢𑀻𑀢𑀺.

𑀫𑀳𑀸𑀣𑁂𑀭𑁄 𑀢𑀁 𑀲𑀼𑀢𑁆𑀯𑀸𑀯 𑀓𑀼𑀤𑁆𑀥𑀫𑀸𑀦𑀲𑁄 𑀤𑀡𑁆𑀟𑀸𑀪𑀺𑀳𑀢𑀁 𑀓𑀼𑀮𑀸𑀮𑀪𑀸𑀚𑀦𑀁 𑀯𑀺𑀬 𑀪𑀺𑀚𑁆𑀚𑀺. 𑀇𑀢𑀭𑁄𑀧𑀺 𑀉𑀝𑁆𑀞𑀸𑀬 𑀅𑀦𑀼𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀣𑁂𑀯 𑀅𑀯𑁄𑀘, 𑀲𑁄𑀧𑀺 𑀢𑀣𑁂𑀯 𑀪𑀺𑀚𑁆𑀚𑀺. 𑀢𑁂𑀲𑀼 𑀓𑀺𑀜𑁆𑀘𑀸𑀧𑀺 𑀏𑀢𑁆𑀢𑀓𑀁 𑀓𑀸𑀮𑀁 𑀏𑀓𑁄𑀧𑀺 𑀯𑀺𑀲𑀼𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀧𑀼𑀩𑁆𑀩𑁄 𑀦𑀸𑀫 𑀦𑀢𑁆𑀣𑀺, 𑀧𑀼𑀦𑀤𑀺𑀯𑀲𑁂 𑀧𑀦 𑀯𑀺𑀲𑀼𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀅𑀦𑀼𑀣𑁂𑀭𑁄 𑀧𑀼𑀭𑁂𑀢𑀭𑀁 𑀆𑀕𑀦𑁆𑀢𑁆𑀯𑀸 𑀉𑀧𑀝𑁆𑀞𑀸𑀦𑀲𑀸𑀮𑀸𑀬 𑀅𑀝𑁆𑀞𑀸𑀲𑀺, 𑀫𑀳𑀸𑀣𑁂𑀭𑁄 𑀧𑀘𑁆𑀙𑀸 𑀅𑀕𑀫𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀅𑀦𑀼𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀇𑀫𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀉𑀤𑀸𑀳𑀼 𑀦𑁄’’𑀢𑀺. 𑀲𑁄 ‘‘𑀦 𑀇𑀤𑀸𑀦𑀺 𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸𑀧𑀺 ‘‘𑀳𑁄𑀢𑀼, 𑀦 𑀫𑀬𑀸 𑀏𑀯𑀁 𑀓𑀢𑀧𑀼𑀩𑁆𑀩𑀁, 𑀫𑀬𑀸 𑀅𑀢𑁆𑀢𑀦𑁄 𑀯𑀢𑁆𑀢𑀁 𑀳𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀘𑀺𑀢𑁆𑀢𑀁 𑀫𑀼𑀤𑀼𑀓𑀁 𑀓𑀢𑁆𑀯𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀧𑀢𑁆𑀢𑀘𑀻𑀯𑀭𑀁 𑀤𑁂𑀣𑀸’’𑀢𑀺 𑀆𑀳. 𑀇𑀢𑀭𑁄 ‘‘𑀕𑀘𑁆𑀙, 𑀤𑀼𑀩𑁆𑀩𑀺𑀦𑀻𑀢, 𑀦 𑀢𑁆𑀯𑀁 𑀫𑀫 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑀭𑀽𑀧𑁄’’𑀢𑀺 𑀅𑀘𑁆𑀙𑀭𑀁 𑀧𑀳𑀭𑀺𑀢𑁆𑀯𑀸 𑀢𑁂𑀦𑀧𑀺 ‘‘𑀆𑀫, 𑀪𑀦𑁆𑀢𑁂, 𑀅𑀳𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀘𑀻𑀯𑀭𑀁 𑀦 𑀧𑀝𑀺𑀕𑁆𑀕𑀡𑁆𑀳𑀸𑀫𑀻𑀢𑀺 𑀘𑀺𑀦𑁆𑀢𑁂𑀲𑀺’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀆𑀯𑀼𑀲𑁄 𑀦𑀯𑀓, 𑀓𑀺𑀁 𑀢𑁆𑀯𑀁 𑀘𑀺𑀦𑁆𑀢𑁂𑀲𑀺, 𑀫𑀫 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀓𑁄𑀘𑀺 𑀲𑀗𑁆𑀕𑁄 𑀅𑀢𑁆𑀣𑀻’’𑀢𑀺 𑀆𑀳. 𑀇𑀢𑀭𑁄𑀧𑀺 ‘‘𑀢𑀼𑀫𑁆𑀳𑁂 𑀧𑀦, 𑀪𑀦𑁆𑀢𑁂, 𑀓𑀺𑀁 𑀏𑀯𑀁 𑀫𑀜𑁆𑀜𑀣 ‘𑀫𑀫 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀓𑁄𑀘𑀺 𑀲𑀗𑁆𑀕𑁄 𑀅𑀢𑁆𑀣𑀻’𑀢𑀺, 𑀏𑀲𑁄 𑀢𑁂 𑀯𑀺𑀳𑀸𑀭𑁄’’𑀢𑀺 𑀯𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀦𑀺𑀓𑁆𑀔𑀫𑀺. 𑀇𑀢𑀭𑁄𑀧𑀺 𑀦𑀺𑀓𑁆𑀔𑀫𑀺. 𑀢𑁂 𑀉𑀪𑁄𑀧𑀺 𑀏𑀓𑀫𑀕𑁆𑀕𑁂𑀦𑀸𑀧𑀺 𑀅𑀕𑀦𑁆𑀢𑁆𑀯𑀸 𑀏𑀓𑁄 𑀧𑀘𑁆𑀙𑀺𑀫𑀤𑁆𑀯𑀸𑀭𑁂𑀦 𑀫𑀕𑁆𑀕𑀁 𑀕𑀡𑁆𑀳𑀺, 𑀏𑀓𑁄 𑀧𑀼𑀭𑀢𑁆𑀣𑀺𑀫𑀤𑁆𑀯𑀸𑀭𑁂𑀦. 𑀥𑀫𑁆𑀫𑀓𑀣𑀺𑀓𑁄, ‘‘𑀪𑀦𑁆𑀢𑁂, 𑀫𑀸 𑀏𑀯𑀁 𑀓𑀭𑁄𑀣, 𑀫𑀸 𑀏𑀯𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 ‘‘𑀢𑀺𑀝𑁆𑀞𑀸𑀯𑀼𑀲𑁄’’𑀢𑀺 𑀯𑀼𑀢𑁆𑀢𑁂 𑀦𑀺𑀯𑀢𑁆𑀢𑀺. 𑀲𑁄 𑀧𑀼𑀦𑀤𑀺𑀯𑀲𑁂 𑀥𑀼𑀭𑀕𑀸𑀫𑀁 𑀧𑀯𑀺𑀝𑁆𑀞𑁄 𑀫𑀦𑀼𑀲𑁆𑀲𑁂𑀳𑀺, ‘‘𑀪𑀦𑁆𑀢𑁂, 𑀪𑀤𑁆𑀤𑀦𑁆𑀢𑀸 𑀓𑀼𑀳𑀺’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀆𑀯𑀼𑀲𑁄, 𑀫𑀸 𑀧𑀼𑀘𑁆𑀙𑀣, 𑀢𑀼𑀫𑁆𑀳𑀸𑀓𑀁 𑀓𑀼𑀮𑀼𑀧𑀓𑀸 𑀳𑀺𑀬𑁆𑀬𑁄 𑀓𑀮𑀳𑀁 𑀓𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼, 𑀅𑀳𑀁 𑀬𑀸𑀘𑀦𑁆𑀢𑁄𑀧𑀺 𑀦𑀺𑀯𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺’’𑀦𑁆𑀢𑀺 𑀆𑀳. 𑀢𑁂𑀲𑀼 𑀩𑀸𑀮𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀧𑀡𑁆𑀟𑀺𑀢𑀸 𑀧𑀦 ‘‘𑀅𑀫𑁆𑀳𑁂𑀳𑀺 𑀏𑀢𑁆𑀢𑀓𑀁 𑀓𑀸𑀮𑀁 𑀪𑀤𑁆𑀤𑀦𑁆𑀢𑀸𑀦𑀁 𑀓𑀺𑀜𑁆𑀘𑀺 𑀔𑀮𑀺𑀢𑀁 𑀦𑀸𑀫 𑀦 𑀤𑀺𑀝𑁆𑀞𑀧𑀼𑀩𑁆𑀩𑀁, 𑀢𑁂𑀲𑀁 𑀪𑀬𑀁 𑀇𑀫𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 𑀅𑀳𑁂𑀲𑀼𑀁.

𑀢𑁂𑀧𑀺 𑀣𑁂𑀭𑀸 𑀕𑀢𑀝𑁆𑀞𑀸𑀦𑁂 𑀘𑀺𑀢𑁆𑀢𑀲𑀼𑀔𑀁 𑀦𑀸𑀫 𑀦 𑀮𑀪𑀺𑀁𑀲𑀼. 𑀫𑀳𑀸𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀦𑀯𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀢𑀁, 𑀫𑀼𑀳𑀼𑀢𑁆𑀢𑀁 𑀤𑀺𑀝𑁆𑀞𑀁 𑀦𑀸𑀫 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀼𑀁 𑀆𑀳 𑁋 ‘𑀫𑀳𑀸𑀣𑁂𑀭𑁂𑀦 𑀲𑀤𑁆𑀥𑀺𑀁 𑀲𑀁𑀪𑁄𑀕𑀁 𑀫𑀸 𑀅𑀓𑀸𑀲𑀻’’’𑀢𑀺. 𑀇𑀢𑀭𑁄𑀧𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀫𑀳𑀸𑀣𑁂𑀭𑀲𑁆𑀲 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀢𑀁, 𑀫𑀼𑀳𑀼𑀢𑁆𑀢𑀁 𑀤𑀺𑀝𑁆𑀞𑀁 𑀦𑀸𑀫 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀼𑀁 𑀆𑀳 𑁋 ‘𑀇𑀫𑀺𑀦𑀸 𑀲𑀤𑁆𑀥𑀺𑀁 𑀲𑀁𑀪𑁄𑀕𑀁 𑀫𑀸 𑀅𑀓𑀸𑀲𑀻’’’𑀢𑀺. 𑀢𑁂𑀲𑀁 𑀦𑁂𑀯 𑀲𑀚𑁆𑀛𑀸𑀬𑁄 𑀦 𑀫𑀦𑀲𑀺𑀓𑀸𑀭𑁄 𑀅𑀳𑁄𑀲𑀺. 𑀢𑁂 𑀯𑀲𑁆𑀲𑀲𑀢𑀘𑁆𑀘𑀬𑁂𑀦 𑀧𑀘𑁆𑀙𑀺𑀫𑀤𑀺𑀲𑀸𑀬 𑀏𑀓𑀁 𑀯𑀺𑀳𑀸𑀭𑀁 𑀅𑀕𑀫𑀁𑀲𑀼. 𑀢𑁂𑀲𑀁 𑀏𑀓𑀫𑁂𑀯 𑀲𑁂𑀦𑀸𑀲𑀦𑀁 𑀧𑀸𑀧𑀼𑀡𑀺. 𑀫𑀳𑀸𑀣𑁂𑀭𑁂 𑀧𑀯𑀺𑀲𑀺𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀲𑀺𑀦𑁆𑀦𑁂 𑀇𑀢𑀭𑁄𑀧𑀺 𑀧𑀸𑀯𑀺𑀲𑀺. 𑀫𑀳𑀸𑀣𑁂𑀭𑁄 𑀢𑀁 𑀤𑀺𑀲𑁆𑀯𑀸𑀯 𑀲𑀜𑁆𑀚𑀸𑀦𑀺𑀢𑁆𑀯𑀸 𑀅𑀲𑁆𑀲𑀽𑀦𑀺 𑀲𑀦𑁆𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀇𑀢𑀭𑁄𑀧𑀺 𑀫𑀳𑀸𑀣𑁂𑀭𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺 ‘‘𑀓𑀣𑁂𑀫𑀺 𑀦𑀼 𑀔𑁄 𑀫𑀸 𑀓𑀣𑁂𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀦 𑀢𑀁 𑀲𑀤𑁆𑀥𑁂𑀬𑁆𑀬𑀭𑀽𑀧’’𑀦𑁆𑀢𑀺 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀏𑀢𑁆𑀢𑀓𑀁 𑀓𑀸𑀮𑀁 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀺𑀁, 𑀅𑀧𑀺 𑀦𑀼 𑀔𑁄 𑀫𑁂 𑀓𑀸𑀬𑀤𑁆𑀯𑀸𑀭𑀸𑀤𑀻𑀲𑀼 𑀢𑀼𑀫𑁆𑀳𑁂𑀳𑀺 𑀓𑀺𑀜𑁆𑀘𑀺 𑀅𑀲𑀸𑀭𑀼𑀧𑁆𑀧𑀁 𑀤𑀺𑀝𑁆𑀞𑀧𑀼𑀩𑁆𑀩’’𑀦𑁆𑀢𑀺. ‘‘𑀦 𑀤𑀺𑀝𑁆𑀞𑀧𑀼𑀩𑁆𑀩𑀁, 𑀆𑀯𑀼𑀲𑁄’’𑀢𑀺. 𑀅𑀣 𑀓𑀲𑁆𑀫𑀸 𑀥𑀫𑁆𑀫𑀓𑀣𑀺𑀓𑀁 𑀅𑀯𑀘𑀼𑀢𑁆𑀣 ‘‘𑀫𑀸 𑀏𑀢𑁂𑀦 𑀲𑀤𑁆𑀥𑀺𑀁 𑀲𑀁𑀪𑁄𑀕𑀫𑀓𑀸𑀲𑀻’’𑀢𑀺? ‘‘𑀦𑀸𑀳𑀁, 𑀆𑀯𑀼𑀲𑁄, 𑀏𑀯𑀁 𑀓𑀣𑁂𑀫𑀺, 𑀢𑀬𑀸 𑀓𑀺𑀭 𑀫𑀫 𑀅𑀦𑁆𑀢𑀭𑁂 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺. ‘‘𑀅𑀳𑀫𑁆𑀧𑀺, 𑀪𑀦𑁆𑀢𑁂, 𑀦 𑀯𑀤𑀸𑀫𑀻’’𑀢𑀺. 𑀢𑁂 𑀢𑀲𑁆𑀫𑀺𑀁 𑀔𑀡𑁂 ‘‘𑀢𑁂𑀦 𑀅𑀫𑁆𑀳𑁂 𑀪𑀺𑀦𑁆𑀤𑀺𑀢𑀼𑀓𑀸𑀫𑁂𑀦 𑀏𑀯𑀁 𑀯𑀼𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀅𑀘𑁆𑀘𑀬𑀁 𑀤𑁂𑀲𑀬𑀺𑀁𑀲𑀼. 𑀢𑁂 𑀯𑀲𑁆𑀲𑀲𑀢𑀁 𑀘𑀺𑀢𑁆𑀢𑀲𑁆𑀲𑀸𑀤𑀁 𑀅𑀮𑀪𑀦𑁆𑀢𑀸 𑀢𑀁 𑀤𑀺𑀯𑀲𑀁 𑀲𑀫𑀕𑁆𑀕𑀸 𑀳𑀼𑀢𑁆𑀯𑀸 ‘‘𑀆𑀬𑀸𑀫, 𑀦𑀁 𑀢𑀢𑁄 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀺𑀲𑁆𑀲𑀸𑀫𑀸’’𑀢𑀺 𑀧𑀓𑁆𑀓𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀢𑀁 𑀯𑀺𑀳𑀸𑀭𑀁 𑀅𑀕𑀫𑀁𑀲𑀼.

𑀥𑀫𑁆𑀫𑀓𑀣𑀺𑀓𑁄𑀧𑀺 𑀣𑁂𑀭𑁂 𑀤𑀺𑀲𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀉𑀧𑀕𑀘𑁆𑀙𑀺. 𑀣𑁂𑀭𑀸 ‘‘𑀦 𑀢𑁆𑀯𑀁 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀺𑀢𑀼𑀁 𑀬𑀼𑀢𑁆𑀢𑀭𑀽𑀧𑁄’’𑀢𑀺 𑀅𑀘𑁆𑀙𑀭𑀁 𑀧𑀳𑀭𑀺𑀁𑀲𑀼. 𑀲𑁄 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀸𑀯𑀤𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀺. 𑀅𑀣 𑀦𑀁 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀓𑀢𑁄 𑀲𑀫𑀡𑀥𑀫𑁆𑀫𑁄 𑀲𑀦𑁆𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀢𑀢𑁄 𑀘𑀯𑀺𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀧𑀘𑁆𑀘𑀺𑀢𑁆𑀯𑀸 𑀇𑀤𑀸𑀦𑀺 𑀕𑀺𑀚𑁆𑀛𑀓𑀽𑀝𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀢𑁆𑀢𑀪𑀸𑀯𑁂𑀦 𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀻𑀢𑀺.

𑀲𑀢𑁆𑀣𑀸 𑀇𑀤𑀁 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀆𑀳𑀭𑀺𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀓𑀸𑀬𑀸𑀤𑀻𑀳𑀺 𑀉𑀧𑀲𑀦𑁆𑀢𑀭𑀽𑀧𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁮𑁧. ‘‘𑀯𑀸𑀘𑀸𑀦𑀼𑀭𑀓𑁆𑀔𑀻 𑀫𑀦𑀲𑀸 𑀲𑀼𑀲𑀁𑀯𑀼𑀢𑁄,

𑀓𑀸𑀬𑁂𑀦 𑀘 𑀦𑀸𑀓𑀼𑀲𑀮𑀁 𑀓𑀬𑀺𑀭𑀸;

𑀏𑀢𑁂 𑀢𑀬𑁄 𑀓𑀫𑁆𑀫𑀧𑀣𑁂 𑀯𑀺𑀲𑁄𑀥𑀬𑁂,

𑀆𑀭𑀸𑀥𑀬𑁂 𑀫𑀕𑁆𑀕𑀫𑀺𑀲𑀺𑀧𑁆𑀧𑀯𑁂𑀤𑀺𑀢’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀘𑀢𑀼𑀦𑁆𑀦𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀁 𑀯𑀚𑁆𑀚𑀦𑁂𑀦 𑀯𑀸𑀘𑀸𑀦𑀼𑀭𑀓𑁆𑀔𑀻 𑀅𑀪𑀺𑀚𑁆𑀛𑀸𑀤𑀻𑀦𑀁 𑀅𑀦𑀼𑀧𑁆𑀧𑀸𑀤𑀦𑁂𑀦 𑀫𑀦𑀲𑀸 𑀘 𑀲𑀼𑀝𑁆𑀞𑀼 𑀲𑀁𑀯𑀼𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀧𑀚𑀳𑀦𑁆𑀢𑁄 𑀓𑀸𑀬𑁂𑀦 𑀘 𑀅𑀓𑀼𑀲𑀮𑀁 𑀦 𑀓𑀬𑀺𑀭𑀸. 𑀏𑀯𑀁 𑀏𑀢𑁂 𑀢𑀬𑁄 𑀓𑀫𑁆𑀫𑀧𑀣𑁂 𑀯𑀺𑀲𑁄𑀥𑀬𑁂. 𑀏𑀯𑀁 𑀯𑀺𑀲𑁄𑀥𑁂𑀦𑁆𑀢𑁄 𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀏𑀲𑀓𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀇𑀲𑀻𑀳𑀺 𑀧𑀯𑁂𑀤𑀺𑀢𑀁 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀁 𑀆𑀭𑀸𑀥𑁂𑀬𑁆𑀬𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀽𑀓𑀭𑀧𑁂𑀢𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀧𑁄𑀝𑁆𑀞𑀺𑀮𑀢𑁆𑀣𑁂𑀭𑀯𑀢𑁆𑀣𑀼

𑀬𑁄𑀕𑀸 𑀯𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑁄𑀝𑁆𑀞𑀺𑀮𑀁 𑀦𑀸𑀫 𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀲𑀢𑁆𑀢𑀦𑁆𑀦𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀢𑁂𑀧𑀺𑀝𑀓𑁄 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀥𑀫𑁆𑀫𑀁 𑀯𑀸𑀘𑁂𑀲𑀺. 𑀲𑀢𑁆𑀣𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 ‘𑀅𑀢𑁆𑀢𑀦𑁄 𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀘𑀺𑀢𑁆𑀢𑀫𑁆𑀧𑀺 𑀦𑀢𑁆𑀣𑀺 𑀲𑀁𑀯𑁂𑀚𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀣𑁂𑀭𑀁 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀦𑀁 𑀆𑀕𑀢𑀓𑀸𑀮𑁂 ‘‘𑀏𑀳𑀺, 𑀢𑀼𑀘𑁆𑀙𑀧𑁄𑀝𑁆𑀞𑀺𑀮, 𑀯𑀦𑁆𑀤, 𑀢𑀼𑀘𑁆𑀙𑀧𑁄𑀝𑁆𑀞𑀺𑀮, 𑀦𑀺𑀲𑀻𑀤, 𑀢𑀼𑀘𑁆𑀙𑀧𑁄𑀝𑁆𑀞𑀺𑀮, 𑀬𑀸𑀳𑀺, 𑀢𑀼𑀘𑁆𑀙𑀧𑁄𑀝𑁆𑀞𑀺𑀮𑀸’’𑀢𑀺 𑀯𑀤𑀢𑀺. 𑀉𑀝𑁆𑀞𑀸𑀬 𑀕𑀢𑀓𑀸𑀮𑁂𑀧𑀺 ‘‘𑀢𑀼𑀘𑁆𑀙𑀧𑁄𑀝𑁆𑀞𑀺𑀮𑁄 𑀕𑀢𑁄’’𑀢𑀺 𑀯𑀤𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀲𑀸𑀝𑁆𑀞𑀓𑀣𑀸𑀦𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀥𑀸𑀭𑁂𑀫𑀺, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀅𑀝𑁆𑀞𑀸𑀭𑀲 𑀫𑀳𑀸𑀕𑀡𑁂 𑀥𑀫𑁆𑀫𑀁 𑀯𑀸𑀘𑁂𑀫𑀺, 𑀅𑀣 𑀧𑀦 𑀫𑀁 𑀲𑀢𑁆𑀣𑀸 𑀅𑀪𑀺𑀓𑁆𑀔𑀡𑀁, ‘𑀢𑀼𑀘𑁆𑀙𑀧𑁄𑀝𑁆𑀞𑀺𑀮𑀸’𑀢𑀺 𑀯𑀤𑁂𑀢𑀺, 𑀅𑀤𑁆𑀥𑀸 𑀫𑀁 𑀲𑀢𑁆𑀣𑀸 𑀛𑀸𑀦𑀸𑀤𑀻𑀦𑀁 𑀅𑀪𑀸𑀯𑁂𑀦 𑀏𑀯𑀁 𑀯𑀤𑁂𑀢𑀻’’𑀢𑀺. 𑀲𑁄 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑁄 ‘‘𑀤𑀸𑀦𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀧𑀘𑁆𑀘𑀽𑀲𑀓𑀸𑀮𑁂 𑀲𑀩𑁆𑀩𑀧𑀘𑁆𑀙𑀸 𑀥𑀫𑁆𑀫𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺. 𑀧𑀭𑀺𑀯𑁂𑀡𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀚𑁆𑀛𑀸𑀬𑀦𑁆𑀢𑀸 𑀦𑀁 ‘‘𑀆𑀘𑀭𑀺𑀬𑁄’’𑀢𑀺 𑀦 𑀲𑀮𑁆𑀮𑀓𑁆𑀔𑁂𑀲𑀼𑀁. 𑀲𑁄 𑀯𑀻𑀲𑀬𑁄𑀚𑀦𑀲𑀢𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀅𑀭𑀜𑁆𑀜𑀸𑀯𑀸𑀲𑁂 𑀢𑀺𑀁𑀲 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺, 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀗𑁆𑀖𑀢𑁆𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀯𑀲𑁆𑀲𑀬𑁄 𑀫𑁂 𑀳𑁄𑀣𑀸’’𑀢𑀺 𑀆𑀳. 𑀆𑀯𑀼𑀲𑁄, 𑀢𑁆𑀯𑀁 𑀥𑀫𑁆𑀫𑀓𑀣𑀺𑀓𑁄, 𑀅𑀫𑁆𑀳𑁂𑀳𑀺 𑀦𑀸𑀫 𑀢𑀁 𑀦𑀺𑀲𑁆𑀲𑀸𑀬 𑀓𑀺𑀜𑁆𑀘𑀺 𑀚𑀸𑀦𑀺𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀓𑀲𑁆𑀫𑀸 𑀏𑀯𑀁 𑀯𑀤𑁂𑀲𑀻𑀢𑀺? 𑀫𑀸, 𑀪𑀦𑁆𑀢𑁂, 𑀏𑀯𑀁 𑀓𑀭𑁄𑀣, 𑀅𑀯𑀲𑁆𑀲𑀬𑁄 𑀫𑁂 𑀳𑁄𑀣𑀸𑀢𑀺. 𑀢𑁂 𑀧𑀦 𑀲𑀩𑁆𑀩𑁂 𑀔𑀻𑀡𑀸𑀲𑀯𑀸𑀯. 𑀅𑀣 𑀦𑀁 𑀫𑀳𑀸𑀣𑁂𑀭𑁄 ‘‘𑀇𑀫𑀲𑁆𑀲 𑀉𑀕𑁆𑀕𑀳𑀁 𑀦𑀺𑀲𑁆𑀲𑀸𑀬 𑀫𑀸𑀦𑁄 𑀅𑀢𑁆𑀣𑀺𑀬𑁂𑀯𑀸’’𑀢𑀺 𑀅𑀦𑀼𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀧𑀳𑀺𑀡𑀺. 𑀲𑁄𑀧𑀺 𑀦𑀁 𑀢𑀣𑁂𑀯𑀸𑀳. 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀲𑀩𑁆𑀩𑁂𑀧𑀺 𑀢𑀁 𑀧𑁂𑀲𑁂𑀦𑁆𑀢𑀸 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀽𑀘𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀲𑀩𑁆𑀩𑀦𑀯𑀓𑀲𑁆𑀲 𑀲𑀢𑁆𑀢𑀯𑀲𑁆𑀲𑀺𑀓𑀲𑀸𑀫𑀡𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀧𑀳𑀺𑀡𑀺𑀁𑀲𑀼. 𑀏𑀯𑀫𑀲𑁆𑀲 𑀫𑀸𑀦𑀁 𑀦𑀻𑀳𑀭𑀺𑀁𑀲𑀼.

𑀲𑁄 𑀦𑀺𑀳𑀢𑀫𑀸𑀦𑁄 𑀲𑀸𑀫𑀡𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 ‘‘𑀅𑀯𑀲𑁆𑀲𑀬𑁄 𑀫𑁂 𑀳𑁄𑀳𑀺 𑀲𑀧𑁆𑀧𑀼𑀭𑀺𑀲𑀸’’𑀢𑀺 𑀆𑀳. 𑀅𑀳𑁄, 𑀆𑀘𑀭𑀺𑀬, 𑀓𑀺𑀁 𑀦𑀸𑀫𑁂𑀢𑀁 𑀓𑀣𑁂𑀣, 𑀢𑀼𑀫𑁆𑀳𑁂 𑀫𑀳𑀮𑁆𑀮𑀓𑀸 𑀩𑀳𑀼𑀲𑁆𑀲𑀼𑀢𑀸, 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀫𑀬𑀸 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀚𑀸𑀦𑀺𑀢𑀩𑁆𑀩𑀁 𑀪𑀯𑁂𑀬𑁆𑀬𑀸𑀢𑀺. 𑀫𑀸 𑀏𑀯𑀁 𑀓𑀭𑀺, 𑀲𑀧𑁆𑀧𑀼𑀭𑀺𑀲, 𑀳𑁄𑀳𑀺𑀬𑁂𑀯 𑀫𑁂 𑀅𑀯𑀲𑁆𑀲𑀬𑁄𑀢𑀺. 𑀪𑀦𑁆𑀢𑁂, 𑀲𑀘𑁂𑀧𑀺 𑀑𑀯𑀸𑀤𑀓𑁆𑀔𑀫𑀸 𑀪𑀯𑀺𑀲𑁆𑀲𑀣, 𑀪𑀯𑀺𑀲𑁆𑀲𑀸𑀫𑀺 𑀯𑁄 𑀅𑀯𑀲𑁆𑀲𑀬𑁄𑀢𑀺. 𑀳𑁄𑀫𑀺, 𑀲𑀧𑁆𑀧𑀼𑀭𑀺𑀲, 𑀅𑀳𑀁 ‘‘𑀅𑀕𑁆𑀕𑀺𑀁 𑀧𑀯𑀺𑀲𑀸’’𑀢𑀺 𑀯𑀼𑀢𑁆𑀢𑁂 𑀅𑀕𑁆𑀕𑀺𑀁 𑀧𑀯𑀺𑀲𑀸𑀫𑀺𑀬𑁂𑀯𑀸𑀢𑀺. 𑀅𑀣 𑀦𑀁 𑀲𑁄 𑀅𑀯𑀺𑀤𑀽𑀭𑁂 𑀏𑀓𑀁 𑀲𑀭𑀁 𑀤𑀲𑁆𑀲𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀬𑀣𑀸𑀦𑀺𑀯𑀢𑁆𑀣𑀧𑀸𑀭𑀼𑀢𑁄𑀯 𑀇𑀫𑀁 𑀲𑀭𑀁 𑀧𑀯𑀺𑀲𑀣𑀸’’𑀢𑀺 𑀆𑀳. 𑀲𑁄 𑀳𑀺𑀲𑁆𑀲 𑀫𑀳𑀕𑁆𑀖𑀸𑀦𑀁 𑀤𑀼𑀧𑀝𑁆𑀝𑀘𑀻𑀯𑀭𑀸𑀦𑀁 𑀦𑀺𑀯𑀢𑁆𑀣𑀧𑀸𑀭𑀼𑀢𑀪𑀸𑀯𑀁 𑀜𑀢𑁆𑀯𑀸𑀧𑀺 ‘‘𑀑𑀯𑀸𑀤𑀓𑁆𑀔𑀫𑁄 𑀦𑀼 𑀔𑁄’’𑀢𑀺 𑀯𑀻𑀫𑀁𑀲𑀦𑁆𑀢𑁄 𑀏𑀯𑀫𑀸𑀳. 𑀣𑁂𑀭𑁄𑀧𑀺 𑀏𑀓𑀯𑀘𑀦𑁂𑀦𑁂𑀯 𑀉𑀤𑀓𑀁 𑀑𑀢𑀭𑀺. 𑀅𑀣 𑀦𑀁 𑀘𑀻𑀯𑀭𑀓𑀡𑁆𑀡𑀸𑀦𑀁 𑀢𑁂𑀫𑀺𑀢𑀓𑀸𑀮𑁂 ‘‘𑀏𑀣, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀏𑀓𑀯𑀘𑀦𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀞𑀺𑀢𑀁 𑀆𑀳 𑁋 ‘‘𑀪𑀦𑁆𑀢𑁂, 𑀏𑀓𑀲𑁆𑀫𑀺𑀁 𑀯𑀫𑁆𑀫𑀺𑀓𑁂 𑀙 𑀙𑀺𑀤𑁆𑀤𑀸𑀦𑀺, 𑀢𑀢𑁆𑀣 𑀏𑀓𑁂𑀦 𑀙𑀺𑀤𑁆𑀤𑁂𑀦 𑀕𑁄𑀥𑀸 𑀅𑀦𑁆𑀢𑁄 𑀧𑀯𑀺𑀝𑁆𑀞𑀸, 𑀢𑀁 𑀕𑀡𑁆𑀳𑀺𑀢𑀼𑀓𑀸𑀫𑁄 𑀇𑀢𑀭𑀸𑀦𑀺 𑀧𑀜𑁆𑀘 𑀙𑀺𑀤𑁆𑀤𑀸𑀦𑀺 𑀣𑀓𑁂𑀢𑁆𑀯𑀸 𑀙𑀝𑁆𑀞𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀯𑀺𑀝𑁆𑀞𑀙𑀺𑀤𑁆𑀤𑁂𑀦𑁂𑀯 𑀕𑀡𑁆𑀳𑀸𑀢𑀺, 𑀏𑀯𑀁 𑀢𑀼𑀫𑁆𑀳𑁂𑀧𑀺 𑀙𑀤𑁆𑀯𑀸𑀭𑀺𑀓𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑁂𑀲𑀸𑀦𑀺 𑀧𑀜𑁆𑀘𑀤𑁆𑀯𑀸𑀭𑀸𑀦𑀺 𑀧𑀺𑀥𑀸𑀬 𑀫𑀦𑁄𑀤𑁆𑀯𑀸𑀭𑁂 𑀓𑀫𑁆𑀫𑀁 𑀧𑀝𑁆𑀞𑀧𑁂𑀣𑀸’’𑀢𑀺. 𑀩𑀳𑀼𑀲𑁆𑀲𑀼𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑁆𑀢𑀓𑁂𑀦𑁂𑀯 𑀧𑀤𑀻𑀧𑀼𑀚𑁆𑀚𑀮𑀦𑀁 𑀯𑀺𑀬 𑀅𑀳𑁄𑀲𑀺. 𑀲𑁄 ‘‘𑀏𑀢𑁆𑀢𑀓𑀫𑁂𑀯 𑀳𑁄𑀢𑀼 𑀲𑀧𑁆𑀧𑀼𑀭𑀺𑀲𑀸’’𑀢𑀺 𑀓𑀭𑀚𑀓𑀸𑀬𑁂 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀆𑀭𑀪𑀺.

𑀲𑀢𑁆𑀣𑀸 𑀯𑀻𑀲𑀬𑁄𑀚𑀦𑀲𑀢𑀫𑀢𑁆𑀣𑀓𑁂 𑀦𑀺𑀲𑀺𑀦𑁆𑀦𑁄𑀯 𑀢𑀁 𑀪𑀺𑀓𑁆𑀔𑀼𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀬𑀣𑁂𑀯𑀸𑀬𑀁 𑀪𑀺𑀓𑁆𑀔𑀼 𑀪𑀽𑀭𑀺𑀧𑀜𑁆𑀜𑁄, 𑀏𑀯𑀫𑁂𑀯𑀁 𑀅𑀦𑁂𑀦 𑀅𑀢𑁆𑀢𑀸𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄 𑀯𑀺𑀬 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁮𑁨. ‘‘𑀬𑁄𑀕𑀸 𑀯𑁂 𑀚𑀸𑀬𑀢𑀻 𑀪𑀽𑀭𑀺, 𑀅𑀬𑁄𑀕𑀸 𑀪𑀽𑀭𑀺𑀲𑀗𑁆𑀔𑀬𑁄;

𑀏𑀢𑀁 𑀤𑁆𑀯𑁂𑀥𑀸𑀧𑀣𑀁 𑀜𑀢𑁆𑀯𑀸, 𑀪𑀯𑀸𑀬 𑀯𑀺𑀪𑀯𑀸𑀬 𑀘;

𑀢𑀣𑀸𑀢𑁆𑀢𑀸𑀦𑀁 𑀦𑀺𑀯𑁂𑀲𑁂𑀬𑁆𑀬, 𑀬𑀣𑀸 𑀪𑀽𑀭𑀺 𑀧𑀯𑀟𑁆𑀠𑀢𑀻’’𑀢𑀺.

𑀢𑀢𑁆𑀣 𑀬𑁄𑀕𑀸𑀢𑀺 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸. 𑀪𑀽𑀭𑀻𑀢𑀺 𑀧𑀣𑀯𑀻𑀲𑀫𑀸𑀬 𑀯𑀺𑀢𑁆𑀣𑀢𑀸𑀬 𑀧𑀜𑁆𑀜𑀸𑀬𑁂𑀢𑀁 𑀦𑀸𑀫𑀁. 𑀲𑀗𑁆𑀔𑀬𑁄𑀢𑀺 𑀯𑀺𑀦𑀸𑀲𑁄. 𑀏𑀢𑀁 𑀤𑁆𑀯𑁂𑀥𑀸𑀧𑀣𑀦𑁆𑀢𑀺 𑀏𑀢𑀁 𑀬𑁄𑀕𑀜𑁆𑀘 𑀅𑀬𑁄𑀕𑀜𑁆𑀘. 𑀪𑀯𑀸𑀬 𑀯𑀺𑀪𑀯𑀸𑀬 𑀘𑀸𑀢𑀺 𑀯𑀼𑀤𑁆𑀥𑀺𑀬𑀸 𑀘 𑀅𑀯𑀼𑀤𑁆𑀥𑀺𑀬𑀸 𑀘. 𑀢𑀣𑀸𑀢𑀺 𑀬𑀣𑀸 𑀅𑀬𑀁 𑀪𑀽𑀭𑀺𑀲𑀗𑁆𑀔𑀸𑀢𑀸 𑀧𑀜𑁆𑀜𑀸 𑀧𑀯𑀟𑁆𑀠𑀢𑀺, 𑀏𑀯𑀁 𑀅𑀢𑁆𑀢𑀸𑀦𑀁 𑀦𑀺𑀯𑁂𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀧𑁄𑀝𑁆𑀞𑀺𑀮𑀢𑁆𑀣𑁂𑀭𑁄 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀻𑀢𑀺.

𑀧𑁄𑀝𑁆𑀞𑀺𑀮𑀢𑁆𑀣𑁂𑀭𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀧𑀜𑁆𑀘𑀫𑀳𑀮𑁆𑀮𑀓𑀢𑁆𑀣𑁂𑀭𑀯𑀢𑁆𑀣𑀼

𑀯𑀦𑀁 𑀙𑀺𑀦𑁆𑀤𑀣𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀫𑁆𑀩𑀳𑀼𑀮𑁂 𑀫𑀳𑀮𑁆𑀮𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂 𑀓𑀺𑀭 𑀕𑀺𑀳𑀺𑀓𑀸𑀮𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀝𑀼𑀫𑁆𑀩𑀺𑀓𑀸 𑀫𑀳𑀤𑁆𑀥𑀦𑀸 𑀅𑀜𑁆𑀜𑀫𑀜𑁆𑀜𑀲𑀳𑀸𑀬𑀓𑀸 𑀏𑀓𑀢𑁄 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 ‘‘𑀫𑀬𑀁 𑀫𑀳𑀮𑁆𑀮𑀓𑀸, 𑀓𑀺𑀁 𑀦𑁄 𑀖𑀭𑀸𑀯𑀸𑀲𑁂𑀦𑀸’’𑀢𑀺 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼, 𑀫𑀳𑀮𑁆𑀮𑀓𑀪𑀸𑀯𑁂𑀦 𑀧𑀦 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀯𑀺𑀳𑀸𑀭𑀧𑀭𑀺𑀬𑀦𑁆𑀢𑁂 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀏𑀓𑀢𑁄𑀯 𑀯𑀲𑀺𑀁𑀲𑀼. 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀸𑀧𑀺 𑀬𑁂𑀪𑀼𑀬𑁆𑀬𑁂𑀦 𑀧𑀼𑀢𑁆𑀢𑀤𑀸𑀭𑀲𑁆𑀲𑁂𑀯 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀺𑀁𑀲𑀼. 𑀢𑁂𑀲𑀼 𑀏𑀓𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀫𑀥𑀼𑀭𑀧𑀸𑀘𑀺𑀓𑀸 𑀦𑀸𑀫, 𑀲𑀸 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀉𑀧𑀓𑀸𑀭𑀺𑀓𑀸 𑀅𑀳𑁄𑀲𑀺. 𑀓𑀲𑁆𑀫𑀸 𑀲𑀩𑁆𑀩𑁂𑀧𑀺 𑀅𑀢𑁆𑀢𑀦𑀸 𑀮𑀤𑁆𑀥𑀸𑀳𑀸𑀭𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲𑀸 𑀏𑀯 𑀕𑁂𑀳𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺? 𑀲𑀸𑀧𑀺 𑀦𑁂𑀲𑀁 𑀬𑀣𑀸𑀲𑀦𑁆𑀦𑀺𑀳𑀺𑀢𑀁 𑀲𑀽𑀧𑀩𑁆𑀬𑀜𑁆𑀚𑀦𑀁 𑀤𑁂𑀢𑀺. 𑀲𑀸 𑀅𑀜𑁆𑀜𑀢𑀭𑀸𑀩𑀸𑀥𑁂𑀦 𑀨𑀼𑀝𑁆𑀞𑀸 𑀓𑀸𑀮𑀫𑀓𑀸𑀲𑀺. 𑀅𑀣 𑀢𑁂 𑀫𑀳𑀮𑁆𑀮𑀓𑀢𑁆𑀣𑁂𑀭𑀸 𑀲𑀳𑀸𑀬𑀓𑀲𑁆𑀲 𑀣𑁂𑀭𑀲𑁆𑀲 𑀧𑀡𑁆𑀡𑀲𑀸𑀮𑀸𑀬 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀕𑀻𑀯𑀸𑀲𑀼 𑀕𑀳𑁂𑀢𑁆𑀯𑀸 ‘‘𑀫𑀥𑀼𑀭𑀧𑀸𑀘𑀺𑀓𑀸 𑀉𑀧𑀸𑀲𑀺𑀓𑀸 𑀓𑀸𑀮𑀓𑀢𑀸’’𑀢𑀺 𑀯𑀺𑀮𑀧𑀦𑁆𑀢𑀸 𑀭𑁄𑀤𑀺𑀁𑀲𑀼. 𑀪𑀺𑀓𑁆𑀔𑀽𑀳𑀺 𑀘 𑀲𑀫𑀦𑁆𑀢𑀢𑁄 𑀉𑀧𑀥𑀸𑀯𑀺𑀢𑁆𑀯𑀸 ‘‘𑀓𑀺𑀁 𑀇𑀤𑀁, 𑀆𑀯𑀼𑀲𑁄’’𑀢𑀺 𑀧𑀼𑀝𑁆𑀞𑀸, ‘‘𑀪𑀦𑁆𑀢𑁂, 𑀲𑀳𑀸𑀬𑀓𑀲𑁆𑀲 𑀦𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀓𑀸𑀮𑀓𑀢𑀸, 𑀲𑀸 𑀅𑀫𑁆𑀳𑀸𑀓𑀁 𑀅𑀢𑀺𑀯𑀺𑀬 𑀉𑀧𑀓𑀸𑀭𑀺𑀓𑀸. 𑀇𑀤𑀸𑀦𑀺 𑀓𑀼𑀢𑁄 𑀢𑀣𑀸𑀭𑀽𑀧𑀺𑀁 𑀮𑀪𑀺𑀲𑁆𑀲𑀸𑀫𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀭𑁄𑀤𑀸𑀫𑀸’’𑀢𑀺 𑀆𑀳𑀁𑀲𑀼.

𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀢𑁂 𑀓𑀸𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀫𑀼𑀤𑁆𑀤𑀢𑀻𑀭𑁂 𑀘𑀭𑀫𑀸𑀦𑀸 𑀲𑀫𑀼𑀤𑁆𑀤𑀊𑀫𑀺𑀬𑀸 𑀲𑀫𑀼𑀤𑁆𑀤𑀁 𑀧𑀯𑁂𑀲𑁂𑀢𑁆𑀯𑀸 𑀫𑀸𑀭𑀺𑀢𑀸𑀬 𑀓𑀸𑀓𑀺𑀬𑀸 𑀭𑁄𑀤𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸 𑀢𑀁 𑀦𑀻𑀳𑀭𑀺𑀲𑁆𑀲𑀸𑀫𑀸𑀢𑀺 𑀫𑀼𑀔𑀢𑀼𑀡𑁆𑀟𑀓𑁂𑀳𑀺 𑀫𑀳𑀸𑀲𑀫𑀼𑀤𑁆𑀤𑀁 𑀉𑀲𑁆𑀲𑀺𑀜𑁆𑀘𑀦𑁆𑀢𑀸 𑀓𑀺𑀮𑀫𑀺𑀁𑀲𑀽’’𑀢𑀺 𑀅𑀢𑀻𑀢𑀁 𑀆𑀳𑀭𑀺𑀢𑁆𑀯𑀸 𑁋

‘‘𑀅𑀧𑀺 𑀦𑀼 𑀳𑀦𑀼𑀓𑀸 𑀲𑀦𑁆𑀢𑀸, 𑀫𑀼𑀔𑀜𑁆𑀘 𑀧𑀭𑀺𑀲𑀼𑀲𑁆𑀲𑀢𑀺;

𑀑𑀭𑀫𑀸𑀫 𑀦 𑀧𑀸𑀭𑁂𑀫, 𑀧𑀽𑀭𑀢𑁂𑀯 𑀫𑀳𑁄𑀤𑀥𑀻’’𑀢𑀺. (𑀚𑀸. 𑁧.𑁧.𑁧𑁪𑁬);

𑀇𑀫𑀁 𑀓𑀸𑀓𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀭𑀸𑀕𑀤𑁄𑀲𑀫𑁄𑀳𑀯𑀦𑀁 𑀦𑀺𑀲𑁆𑀲𑀸𑀬 𑀢𑀼𑀫𑁆𑀳𑁂𑀳𑀺 𑀇𑀤𑀁 𑀤𑀼𑀓𑁆𑀔𑀁 𑀧𑀢𑁆𑀢𑀁, 𑀢𑀁 𑀯𑀦𑀁 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀁 𑀦𑀺𑀤𑁆𑀤𑀼𑀓𑁆𑀔𑀸 𑀪𑀯𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁮𑁩. ‘‘𑀯𑀦𑀁 𑀙𑀺𑀦𑁆𑀤𑀣 𑀫𑀸 𑀭𑀼𑀓𑁆𑀔𑀁, 𑀯𑀦𑀢𑁄 𑀚𑀸𑀬𑀢𑁂 𑀪𑀬𑀁;

𑀙𑁂𑀢𑁆𑀯𑀸 𑀯𑀦𑀜𑁆𑀘 𑀯𑀦𑀣𑀜𑁆𑀘, 𑀦𑀺𑀩𑁆𑀩𑀦𑀸 𑀳𑁄𑀣 𑀪𑀺𑀓𑁆𑀔𑀯𑁄.

𑁨𑁮𑁪. ‘‘𑀬𑀸𑀯 𑀳𑀺 𑀯𑀦𑀣𑁄 𑀦 𑀙𑀺𑀚𑁆𑀚𑀢𑀺,

𑀅𑀡𑀼𑀫𑀢𑁆𑀢𑁄𑀧𑀺 𑀦𑀭𑀲𑁆𑀲 𑀦𑀸𑀭𑀺𑀲𑀼;

𑀧𑀝𑀺𑀩𑀤𑁆𑀥𑀫𑀦𑁄𑀯 𑀢𑀸𑀯 𑀲𑁄,

𑀯𑀘𑁆𑀙𑁄 𑀔𑀻𑀭𑀧𑀓𑁄𑀯 𑀫𑀸𑀢𑀭𑀻’’𑀢𑀺.

𑀢𑀢𑁆𑀣 𑀫𑀸 𑀭𑀼𑀓𑁆𑀔𑀦𑁆𑀢𑀺 𑀲𑀢𑁆𑀣𑀸𑀭𑀸 𑀳𑀺 ‘‘𑀯𑀦𑀁 𑀙𑀺𑀦𑁆𑀤𑀣𑀸’’𑀢𑀺 𑀯𑀼𑀢𑁆𑀢𑁂 𑀢𑁂𑀲𑀁 𑀅𑀘𑀺𑀭𑀧𑀩𑁆𑀩𑀚𑀺𑀢𑀸𑀦𑀁 ‘‘𑀲𑀢𑁆𑀣𑀸 𑀅𑀫𑁆𑀳𑁂 𑀯𑀸𑀲𑀺𑀆𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑀦𑀁 𑀙𑀺𑀦𑁆𑀤𑀸𑀧𑁂𑀢𑀻’’𑀢𑀺 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑀼𑀓𑀸𑀫𑀢𑀸 𑀉𑀧𑁆𑀧𑀚𑁆𑀚𑀺. 𑀅𑀣 𑀦𑁂 ‘‘𑀫𑀬𑀸 𑀭𑀸𑀕𑀸𑀤𑀺𑀓𑀺𑀮𑁂𑀲𑀯𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁, 𑀦 𑀭𑀼𑀓𑁆𑀔𑁂’’𑀢𑀺 𑀧𑀝𑀺𑀲𑁂𑀥𑁂𑀦𑁆𑀢𑁄 ‘‘𑀫𑀸 𑀭𑀼𑀓𑁆𑀔’’𑀦𑁆𑀢𑀺 𑀆𑀳. 𑀯𑀦𑀢𑁄𑀢𑀺 𑀬𑀣𑀸 𑀧𑀸𑀓𑀢𑀺𑀓𑀯𑀦𑀢𑁄 𑀲𑀻𑀳𑀸𑀤𑀺𑀪𑀬𑀁 𑀚𑀸𑀬𑀢𑀺, 𑀏𑀯𑀁 𑀚𑀸𑀢𑀺𑀆𑀤𑀺𑀪𑀬𑀫𑁆𑀧𑀺 𑀓𑀺𑀮𑁂𑀲𑀯𑀦𑀢𑁄 𑀚𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀯𑀦𑀜𑁆𑀘 𑀯𑀦𑀣𑀜𑁆𑀘𑀸𑀢𑀺 𑀏𑀢𑁆𑀣 𑀫𑀳𑀦𑁆𑀢𑀸 𑀭𑀼𑀓𑁆𑀔𑀸 𑀯𑀦𑀁 𑀦𑀸𑀫, 𑀔𑀼𑀤𑁆𑀤𑀓𑀸 𑀢𑀲𑁆𑀫𑀺𑀁 𑀯𑀦𑁂 𑀞𑀺𑀢𑀢𑁆𑀢𑀸 𑀯𑀦𑀣𑀸 𑀦𑀸𑀫. 𑀧𑀼𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀭𑀼𑀓𑁆𑀔𑀸 𑀯𑀸 𑀯𑀦𑀁 𑀦𑀸𑀫, 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀓𑀸 𑀯𑀦𑀣𑀸 𑀦𑀸𑀫. 𑀏𑀯𑀫𑁂𑀯 𑀫𑀳𑀦𑁆𑀢𑀫𑀳𑀦𑁆𑀢𑀸 𑀪𑀯𑀸𑀓𑀟𑁆𑀠𑀦𑀓𑀸 𑀓𑀺𑀮𑁂𑀲𑀸 𑀯𑀦𑀁 𑀦𑀸𑀫, 𑀧𑀯𑀢𑁆𑀢𑀺𑀬𑀁 𑀯𑀺𑀧𑀸𑀓𑀤𑀸𑀬𑀓𑀸 𑀯𑀦𑀣𑀸 𑀦𑀸𑀫. 𑀧𑀼𑀩𑁆𑀩𑀧𑁆𑀧𑀢𑁆𑀢𑀺𑀓𑀸 𑀯𑀦𑀁 𑀦𑀸𑀫, 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀓𑀸 𑀯𑀦𑀣𑀸 𑀦𑀸𑀫. 𑀢𑀁 𑀉𑀪𑀬𑀁 𑀘𑀢𑀼𑀢𑁆𑀣𑀫𑀕𑁆𑀕𑀜𑀸𑀡𑁂𑀦 𑀙𑀺𑀦𑁆𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 𑁋 ‘‘𑀙𑁂𑀢𑁆𑀯𑀸 𑀯𑀦𑀜𑁆𑀘 𑀯𑀦𑀣𑀜𑁆𑀘, 𑀦𑀺𑀩𑁆𑀩𑀦𑀸 𑀳𑁄𑀣 𑀪𑀺𑀓𑁆𑀔𑀯𑁄’’𑀢𑀺. 𑀦𑀺𑀩𑁆𑀩𑀦𑀸 𑀳𑁄𑀣𑀸𑀢𑀺 𑀦𑀺𑀓𑁆𑀓𑀺𑀮𑁂𑀲𑀸 𑀳𑁄𑀣. 𑀬𑀸𑀯 𑀳𑀺 𑀯𑀦𑀣𑁄𑀢𑀺 𑀬𑀸𑀯 𑀏𑀲 𑀅𑀡𑀼𑀫𑀢𑁆𑀢𑁄𑀧𑀺 𑀓𑀺𑀮𑁂𑀲𑀯𑀦𑀣𑁄 𑀦𑀭𑀲𑁆𑀲 𑀦𑀸𑀭𑀻𑀲𑀼 𑀦 𑀙𑀺𑀚𑁆𑀚𑀢𑀺, 𑀢𑀸𑀯 𑀲𑁄 𑀔𑀻𑀭𑀧𑀓𑁄 𑀯𑀘𑁆𑀙𑁄 𑀫𑀸𑀢𑀭𑀺 𑀯𑀺𑀬 𑀧𑀝𑀺𑀩𑀤𑁆𑀥𑀫𑀦𑁄 𑀮𑀕𑁆𑀕𑀘𑀺𑀢𑁆𑀢𑁄𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀧𑀜𑁆𑀘𑀧𑀺 𑀢𑁂 𑀫𑀳𑀮𑁆𑀮𑀓𑀢𑁆𑀣𑁂𑀭𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀧𑀜𑁆𑀘𑀫𑀳𑀮𑁆𑀮𑀓𑀢𑁆𑀣𑁂𑀭𑀯𑀢𑁆𑀣𑀼 𑀅𑀝𑁆𑀞𑀫𑀁.

𑁯. 𑀲𑀼𑀯𑀡𑁆𑀡𑀓𑀸𑀭𑀢𑁆𑀣𑁂𑀭𑀯𑀢𑁆𑀣𑀼

𑀉𑀘𑁆𑀙𑀺𑀦𑁆𑀤𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑁄 𑀓𑀺𑀭 𑀲𑀼𑀯𑀡𑁆𑀡𑀓𑀸𑀭𑀧𑀼𑀢𑁆𑀢𑁄 𑀅𑀪𑀺𑀭𑀽𑀧𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺. 𑀣𑁂𑀭𑁄 ‘‘𑀢𑀭𑀼𑀡𑀸𑀦𑀁 𑀭𑀸𑀕𑁄 𑀉𑀲𑁆𑀲𑀦𑁆𑀦𑁄 𑀳𑁄𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀭𑀸𑀕𑀧𑀝𑀺𑀖𑀸𑀢𑀸𑀬 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀢𑀲𑁆𑀲 𑀧𑀦 𑀢𑀁 𑀅𑀲𑀧𑁆𑀧𑀸𑀬𑀁. 𑀢𑀲𑁆𑀫𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀢𑁂𑀫𑀸𑀲𑀁 𑀯𑀸𑀬𑀫𑀦𑁆𑀢𑁄 𑀘𑀺𑀢𑁆𑀢𑁂𑀓𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 𑀧𑀼𑀦 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀣𑁂𑀭𑁂𑀦 ‘‘𑀉𑀧𑀝𑁆𑀞𑀺𑀢𑀁 𑀢𑁂, 𑀆𑀯𑀼𑀲𑁄, 𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀅𑀣𑀲𑁆𑀲 𑀣𑁂𑀭𑁄 ‘‘𑀓𑀫𑁆𑀫𑀝𑁆𑀞𑀸𑀦𑀁 𑀦 𑀲𑀫𑁆𑀧𑀚𑁆𑀚𑀢𑀻𑀢𑀺 𑀯𑁄𑀲𑀸𑀦𑀁 𑀆𑀧𑀚𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀧𑀼𑀦 𑀢𑀤𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀲𑀸𑀥𑀼𑀓𑀁 𑀓𑀣𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀤𑀼𑀢𑀺𑀬𑀯𑀸𑀭𑁂𑀧𑀺 𑀓𑀺𑀜𑁆𑀘𑀺 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀆𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀆𑀭𑁄𑀘𑁂𑀲𑀺. 𑀅𑀣𑀲𑁆𑀲 𑀣𑁂𑀭𑁄𑀧𑀺 𑀲𑀓𑀸𑀭𑀡𑀁 𑀲𑀉𑀧𑀫𑀁 𑀓𑀢𑁆𑀯𑀸 𑀢𑀤𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺. 𑀲𑁄 𑀧𑀼𑀦𑀧𑀺 𑀆𑀕𑀦𑁆𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀅𑀲𑀫𑁆𑀧𑀚𑁆𑀚𑀦𑀪𑀸𑀯𑀁 𑀓𑀣𑁂𑀲𑀺. 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀸𑀭𑀓𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑁂 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀯𑀺𑀚𑁆𑀚𑀫𑀸𑀦𑀸𑀢𑀺 𑀅𑀯𑀺𑀚𑁆𑀚𑀫𑀸𑀦𑁂 𑀅𑀯𑀺𑀚𑁆𑀚𑀫𑀸𑀦𑀸𑀢𑀺 𑀧𑀚𑀸𑀦𑀸𑀢𑀺. 𑀅𑀬𑀁 𑀪𑀺𑀓𑁆𑀔𑀼 𑀓𑀸𑀭𑀓𑁄, 𑀦𑁄 𑀅𑀓𑀸𑀭𑀓𑁄, 𑀧𑀝𑀺𑀧𑀦𑁆𑀦𑁄, 𑀦𑁄 𑀅𑀧𑁆𑀧𑀝𑀺𑀧𑀦𑁆𑀦𑁄, 𑀅𑀳𑀁 𑀧𑀦𑁂𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀦 𑀚𑀸𑀦𑀸𑀫𑀺, 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑁄 𑀏𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀆𑀤𑀸𑀬 𑀲𑀸𑀬𑀦𑁆𑀳𑀲𑀫𑀬𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀬𑀁, 𑀪𑀦𑁆𑀢𑁂, 𑀫𑀫 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄, 𑀇𑀫𑀲𑁆𑀲 𑀫𑀬𑀸 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀇𑀤𑀁 𑀦𑀸𑀫 𑀓𑀫𑁆𑀫𑀝𑁆𑀞𑀸𑀦𑀁 𑀤𑀺𑀦𑁆𑀦’’𑀦𑁆𑀢𑀺 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺.

𑀅𑀣 𑀦𑀁 𑀲𑀢𑁆𑀣𑀸 ‘‘𑀆𑀲𑀬𑀸𑀦𑀼𑀲𑀬𑀜𑀸𑀡𑀁 𑀦𑀸𑀫𑁂𑀢𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀉𑀦𑁆𑀦𑀸𑀤𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑀸𑀦𑀁 𑀩𑀼𑀤𑁆𑀥𑀸𑀦𑀁𑀬𑁂𑀯 𑀯𑀺𑀲𑀬𑁄’’𑀢𑀺 𑀯𑀢𑁆𑀯𑀸 ‘‘𑀓𑀢𑀭𑀓𑀼𑀮𑀸 𑀦𑀼 𑀔𑁄 𑀏𑀲 𑀧𑀩𑁆𑀩𑀚𑀺𑀢𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀲𑀼𑀯𑀡𑁆𑀡𑀓𑀸𑀭𑀓𑀼𑀮𑀸’’𑀢𑀺 𑀜𑀢𑁆𑀯𑀸 𑀅𑀢𑀻𑀢𑁂 𑀅𑀢𑁆𑀢𑀪𑀸𑀯𑁂 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀲𑀼𑀯𑀡𑁆𑀡𑀓𑀸𑀭𑀓𑀼𑀮𑁂𑀬𑁂𑀯 𑀧𑀝𑀺𑀧𑀸𑀝𑀺𑀬𑀸 𑀦𑀺𑀩𑁆𑀩𑀢𑁆𑀢𑀸𑀦𑀺 𑀧𑀜𑁆𑀘 𑀅𑀢𑁆𑀢𑀪𑀸𑀯𑀲𑀢𑀸𑀦𑀺 𑀤𑀺𑀲𑁆𑀯𑀸 ‘‘𑀇𑀫𑀺𑀦𑀸 𑀤𑀳𑀭𑁂𑀦 𑀤𑀻𑀖𑀭𑀢𑁆𑀢𑀁 𑀲𑀼𑀯𑀡𑁆𑀡𑀓𑀸𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀦 𑀓𑀡𑀺𑀓𑀸𑀭𑀧𑀼𑀧𑁆𑀨𑀧𑀤𑀼𑀫𑀧𑀼𑀧𑁆𑀨𑀸𑀤𑀻𑀦𑀺 𑀓𑀭𑀺𑀲𑁆𑀲𑀸𑀫𑀻𑀢𑀺 𑀭𑀢𑁆𑀢𑀲𑀼𑀯𑀡𑁆𑀡𑀫𑁂𑀯 𑀲𑀫𑁆𑀧𑀭𑀺𑀯𑀢𑁆𑀢𑀺𑀢𑀁, 𑀢𑀲𑁆𑀫𑀸 𑀇𑀫𑀲𑁆𑀲 𑀅𑀲𑀼𑀪𑀧𑀝𑀺𑀓𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀦 𑀯𑀝𑁆𑀝𑀢𑀺, 𑀫𑀦𑀸𑀧𑀫𑁂𑀯𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀲𑀧𑁆𑀧𑀸𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀲𑀸𑀭𑀺𑀧𑀼𑀢𑁆𑀢, 𑀢𑀬𑀸 𑀓𑀫𑁆𑀫𑀝𑁆𑀞𑀸𑀦𑀁 𑀤𑀢𑁆𑀯𑀸 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀓𑀺𑀮𑀫𑀺𑀢𑀁 𑀪𑀺𑀓𑁆𑀔𑀼𑀁 𑀅𑀚𑁆𑀚 𑀧𑀘𑁆𑀙𑀸𑀪𑀢𑁆𑀢𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑀁 𑀧𑀲𑁆𑀲𑀺𑀲𑁆𑀲𑀲𑀺, 𑀕𑀘𑁆𑀙 𑀢𑁆𑀯’’𑀦𑁆𑀢𑀺 𑀣𑁂𑀭𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀇𑀤𑁆𑀥𑀺𑀬𑀸 𑀘𑀓𑁆𑀓𑀫𑀢𑁆𑀢𑀁 𑀲𑀼𑀯𑀡𑁆𑀡𑀧𑀤𑀼𑀫𑀁 𑀫𑀸𑀧𑁂𑀢𑁆𑀯𑀸 𑀧𑀢𑁆𑀢𑁂𑀳𑀺 𑀘𑁂𑀯 𑀦𑀸𑀮𑁂𑀳𑀺 𑀘 𑀉𑀤𑀓𑀩𑀺𑀦𑁆𑀤𑀽𑀦𑀺 𑀫𑀼𑀜𑁆𑀘𑀦𑁆𑀢𑀁 𑀯𑀺𑀬 𑀓𑀢𑁆𑀯𑀸 ‘‘𑀪𑀺𑀓𑁆𑀔𑀼 𑀇𑀫𑀁 𑀧𑀤𑀼𑀫𑀁 𑀆𑀤𑀸𑀬 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀯𑀸𑀮𑀼𑀓𑀭𑀸𑀲𑀺𑀫𑁆𑀳𑀺 𑀞𑀧𑁂𑀢𑁆𑀯𑀸 𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 ‘𑀮𑁄𑀳𑀺𑀢𑀓𑀁 𑀮𑁄𑀳𑀺𑀢𑀓’𑀦𑁆𑀢𑀺 𑀧𑀭𑀺𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺 𑀅𑀤𑀸𑀲𑀺. 𑀢𑀲𑁆𑀲 𑀲𑀢𑁆𑀣𑀼𑀳𑀢𑁆𑀣𑀢𑁄 𑀧𑀤𑀼𑀫𑀁 𑀕𑀡𑁆𑀳𑀦𑁆𑀢𑀲𑁆𑀲𑁂𑀯 𑀘𑀺𑀢𑁆𑀢𑀁 𑀧𑀲𑀻𑀤𑀺. 𑀲𑁄 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑀁 𑀕𑀦𑁆𑀢𑁆𑀯𑀸 𑀯𑀸𑀮𑀼𑀓𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑀢𑁆𑀣 𑀧𑀤𑀼𑀫𑀦𑀸𑀮𑀁 𑀧𑀯𑁂𑀲𑁂𑀢𑁆𑀯𑀸 𑀲𑀫𑁆𑀫𑀼𑀔𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄 ‘‘𑀮𑁄𑀳𑀺𑀢𑀓𑀁 𑀮𑁄𑀳𑀺𑀢𑀓’’𑀦𑁆𑀢𑀺 𑀧𑀭𑀺𑀓𑀫𑁆𑀫𑀁 𑀆𑀭𑀪𑀺. 𑀅𑀣𑀲𑁆𑀲 𑀢𑀗𑁆𑀔𑀡𑀜𑁆𑀜𑁂𑀯 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀺𑀁𑀲𑀼, 𑀉𑀧𑀘𑀸𑀭𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀺. 𑀢𑀤𑀦𑀦𑁆𑀢𑀭𑀁 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀲𑀻𑀪𑀸𑀯𑀁 𑀧𑀸𑀧𑁂𑀢𑁆𑀯𑀸 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀺𑀧𑀺 𑀧𑀢𑁆𑀯𑀸 𑀯𑀲𑀻𑀪𑀽𑀢𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀛𑀸𑀦𑀓𑀻𑀴𑀁 𑀓𑀻𑀴𑀦𑁆𑀢𑁄 𑀦𑀺𑀲𑀻𑀤𑀺.

𑀲𑀢𑁆𑀣𑀸 𑀢𑀲𑁆𑀲 𑀛𑀸𑀦𑀸𑀦𑀁 𑀉𑀧𑁆𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀲𑀓𑁆𑀔𑀺𑀲𑁆𑀲𑀢𑀺 𑀦𑀼 𑀔𑁄 𑀏𑀲 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀉𑀢𑁆𑀢𑀭𑀺 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀦 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀢𑀁 𑀧𑀤𑀼𑀫𑀁 𑀫𑀺𑀮𑀸𑀬𑀢𑀽’’𑀢𑀺 𑀅𑀥𑀺𑀝𑁆𑀞𑀳𑀺. 𑀢𑀁 𑀳𑀢𑁆𑀣𑁂𑀳𑀺 𑀫𑀤𑁆𑀤𑀺𑀢𑀧𑀤𑀼𑀫𑀁 𑀫𑀺𑀮𑀸𑀬𑀦𑁆𑀢𑀁 𑀯𑀺𑀬 𑀓𑀸𑀴𑀯𑀡𑁆𑀡𑀁 𑀅𑀳𑁄𑀲𑀺. 𑀲𑁄 𑀛𑀸𑀦𑀸 𑀯𑀼𑀝𑁆𑀞𑀸𑀬 𑀢𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀇𑀫𑀁 𑀧𑀤𑀼𑀫𑀁 𑀚𑀭𑀸𑀬 𑀧𑀳𑀝𑀁 𑀧𑀜𑁆𑀜𑀸𑀬𑀢𑀺, 𑀅𑀦𑀼𑀧𑀸𑀤𑀺𑀡𑁆𑀡𑀓𑁂𑀧𑀺 𑀏𑀯𑀁 𑀚𑀭𑀸𑀬 𑀅𑀪𑀺𑀪𑀼𑀬𑁆𑀬𑀫𑀸𑀦𑁂 𑀉𑀧𑀸𑀤𑀺𑀡𑁆𑀡𑀓𑁂 𑀓𑀣𑀸𑀯 𑀦𑀢𑁆𑀣𑀺. 𑀇𑀤𑀫𑁆𑀧𑀺 𑀳𑀺 𑀚𑀭𑀸 𑀅𑀪𑀺𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀧𑀲𑁆𑀲𑀺. 𑀢𑀲𑁆𑀫𑀺𑀁 𑀧𑀦 𑀤𑀺𑀝𑁆𑀞𑁂 𑀤𑀼𑀓𑁆𑀔𑀮𑀓𑁆𑀔𑀡𑀜𑁆𑀘 𑀅𑀦𑀢𑁆𑀢𑀮𑀓𑁆𑀔𑀡𑀜𑁆𑀘 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀢𑀲𑁆𑀲 𑀢𑀬𑁄 𑀪𑀯𑀸 𑀆𑀤𑀺𑀢𑁆𑀢𑀸 𑀯𑀺𑀬 𑀓𑀡𑁆𑀟𑁂 𑀩𑀤𑁆𑀥𑀓𑀼𑀡𑀧𑀸 𑀯𑀺𑀬 𑀘 𑀔𑀸𑀬𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀓𑀼𑀫𑀸𑀭𑀓𑀸 𑀏𑀓𑀁 𑀲𑀭𑀁 𑀑𑀢𑀭𑀺𑀢𑁆𑀯𑀸 𑀓𑀼𑀫𑀼𑀤𑀸𑀦𑀺 𑀪𑀜𑁆𑀚𑀺𑀢𑁆𑀯𑀸 𑀣𑀮𑁂 𑀭𑀸𑀲𑀺𑀁 𑀓𑀭𑁄𑀦𑁆𑀢𑀺. 𑀲𑁄 𑀚𑀮𑁂 𑀘 𑀣𑀮𑁂 𑀘 𑀓𑀼𑀫𑀼𑀤𑀸𑀦𑀺 𑀑𑀮𑁄𑀓𑁂𑀲𑀺. 𑀅𑀣𑀲𑁆𑀲 𑀚𑀮𑁂 𑀓𑀼𑀫𑀼𑀤𑀸𑀦𑀺 𑀅𑀪𑀺𑀭𑀽𑀧𑀸𑀦𑀺 𑀉𑀤𑀓𑀧𑀕𑁆𑀖𑀭𑀦𑁆𑀢𑀸𑀦𑀺 𑀯𑀺𑀬 𑀉𑀧𑀝𑁆𑀞𑀳𑀺𑀁𑀲𑀼, 𑀇𑀢𑀭𑀸𑀦𑀺 𑀅𑀕𑁆𑀕𑀕𑁆𑀕𑁂𑀲𑀼 𑀧𑀭𑀺𑀫𑀺𑀮𑀸𑀢𑀸𑀦𑀺. 𑀲𑁄 ‘‘𑀅𑀦𑀼𑀧𑀸𑀤𑀺𑀡𑁆𑀡𑀓𑀁 𑀚𑀭𑀸 𑀏𑀯𑀁 𑀧𑀳𑀭𑀢𑀺, 𑀉𑀧𑀸𑀤𑀺𑀡𑁆𑀡𑀓𑀁 𑀓𑀺𑀁 𑀧𑀦 𑀦 𑀧𑀳𑀭𑀺𑀲𑁆𑀲𑀢𑀻’’𑀢𑀺 𑀲𑀼𑀝𑁆𑀞𑀼𑀢𑀭𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀻𑀦𑀺 𑀅𑀤𑁆𑀤𑀲. 𑀲𑀢𑁆𑀣𑀸 ‘‘𑀧𑀸𑀓𑀝𑀻𑀪𑀽𑀢𑀁 𑀇𑀤𑀸𑀦𑀺 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀜𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑀓𑁄𑀯 𑀑𑀪𑀸𑀲𑀁 𑀫𑀼𑀜𑁆𑀘𑀺, 𑀲𑁄 𑀢𑀲𑁆𑀲 𑀫𑀼𑀔𑀁 𑀧𑀳𑀭𑀺. 𑀅𑀣𑀲𑁆𑀲 ‘‘𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑀲𑁆𑀲 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 𑀲𑀫𑁆𑀫𑀼𑀔𑁂 𑀞𑀺𑀢𑁄 𑀯𑀺𑀬 𑀅𑀳𑁄𑀲𑀺. 𑀲𑁄 𑀉𑀝𑁆𑀞𑀸𑀬 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀲𑀧𑁆𑀧𑀸𑀬𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁮𑁫. ‘‘𑀉𑀘𑁆𑀙𑀺𑀦𑁆𑀤 𑀲𑀺𑀦𑁂𑀳𑀫𑀢𑁆𑀢𑀦𑁄, 𑀓𑀼𑀫𑀼𑀤𑀁 𑀲𑀸𑀭𑀤𑀺𑀓𑀁𑀯 𑀧𑀸𑀡𑀺𑀦𑀸;

𑀲𑀦𑁆𑀢𑀺𑀫𑀕𑁆𑀕𑀫𑁂𑀯 𑀩𑁆𑀭𑀽𑀳𑀬, 𑀦𑀺𑀩𑁆𑀩𑀸𑀦𑀁 𑀲𑀼𑀕𑀢𑁂𑀦 𑀤𑁂𑀲𑀺𑀢’’𑀦𑁆𑀢𑀺.

𑀢𑀢𑁆𑀣 𑀉𑀘𑁆𑀙𑀺𑀦𑁆𑀤𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀉𑀘𑁆𑀙𑀺𑀦𑁆𑀤. 𑀲𑀸𑀭𑀤𑀺𑀓𑀦𑁆𑀢𑀺 𑀲𑀭𑀤𑀓𑀸𑀮𑁂 𑀦𑀺𑀩𑁆𑀩𑀢𑁆𑀢𑀁. 𑀲𑀦𑁆𑀢𑀺𑀫𑀕𑁆𑀕𑀦𑁆𑀢𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁. 𑀩𑁆𑀭𑀽𑀳𑀬𑀸𑀢𑀺 𑀯𑀟𑁆𑀠𑀬. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀲𑀼𑀕𑀢𑁂𑀦 𑀤𑁂𑀲𑀺𑀢𑀁, 𑀢𑀲𑁆𑀫𑀸 𑀢𑀲𑁆𑀲 𑀫𑀕𑁆𑀕𑀁 𑀪𑀸𑀯𑁂𑀳𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺.

𑀲𑀼𑀯𑀡𑁆𑀡𑀓𑀸𑀭𑀢𑁆𑀣𑁂𑀭𑀯𑀢𑁆𑀣𑀼 𑀦𑀯𑀫𑀁.

𑁧𑁦. 𑀫𑀳𑀸𑀥𑀦𑀯𑀸𑀡𑀺𑀚𑀯𑀢𑁆𑀣𑀼

𑀇𑀥 𑀯𑀲𑁆𑀲𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀥𑀦𑀯𑀸𑀡𑀺𑀚𑀁 𑀦𑀸𑀫 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀩𑀸𑀭𑀸𑀡𑀲𑀺𑀢𑁄 𑀓𑀼𑀲𑀼𑀫𑁆𑀪𑀭𑀢𑁆𑀢𑀸𑀦𑀁 𑀯𑀢𑁆𑀣𑀸𑀦𑀁 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀯𑀡𑀺𑀚𑁆𑀚𑀸𑀬 𑀲𑀸𑀯𑀢𑁆𑀣𑀺𑀁 𑀆𑀕𑀢𑁄 𑀦𑀤𑀻𑀢𑀻𑀭𑀁 𑀧𑀢𑁆𑀯𑀸 ‘‘𑀲𑁆𑀯𑁂 𑀦𑀤𑀺𑀁 𑀉𑀢𑁆𑀢𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀢𑁆𑀣𑁂𑀯 𑀲𑀓𑀝𑀸𑀦𑀺 𑀫𑁄𑀘𑁂𑀢𑁆𑀯𑀸 𑀯𑀲𑀺. 𑀭𑀢𑁆𑀢𑀺𑀁 𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸 𑀯𑀲𑁆𑀲𑀺. 𑀦𑀤𑀻 𑀲𑀢𑁆𑀢𑀸𑀳𑀁 𑀉𑀤𑀓𑀲𑁆𑀲 𑀧𑀽𑀭𑀸 𑀅𑀝𑁆𑀞𑀸𑀲𑀺. 𑀦𑀸𑀕𑀭𑀸𑀧𑀺 𑀲𑀢𑁆𑀢𑀸𑀳𑀁 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀁𑀲𑀼. 𑀓𑀼𑀲𑀼𑀫𑁆𑀪𑀭𑀢𑁆𑀢𑁂𑀳𑀺 𑀯𑀢𑁆𑀣𑁂𑀳𑀺 𑀓𑀺𑀘𑁆𑀘𑀁 𑀦 𑀦𑀺𑀝𑁆𑀞𑀺𑀢𑀁. 𑀯𑀸𑀡𑀺𑀚𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀤𑀽𑀭𑀁 𑀆𑀕𑀢𑁄. 𑀲𑀘𑁂 𑀧𑀼𑀦 𑀕𑀫𑀺𑀲𑁆𑀲𑀸𑀫𑀺, 𑀧𑀧𑀜𑁆𑀘𑁄 𑀪𑀯𑀺𑀲𑁆𑀲𑀢𑀺. 𑀇𑀥𑁂𑀯 𑀯𑀲𑁆𑀲𑀜𑁆𑀘 𑀳𑁂𑀫𑀦𑁆𑀢𑀜𑁆𑀘 𑀕𑀺𑀫𑁆𑀳𑀜𑁆𑀘 𑀫𑀫 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀲𑀺𑀢𑁆𑀯𑀸 𑀇𑀫𑀸𑀦𑀺 𑀯𑀺𑀓𑁆𑀓𑀺𑀡𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀣𑀸 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀢𑀲𑁆𑀲 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀲𑀺𑀢𑀁 𑀧𑀸𑀢𑀼𑀓𑀭𑀺𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀲𑀺𑀢𑀓𑀸𑀭𑀡𑀁 𑀧𑀼𑀝𑁆𑀞𑁄 𑀆𑀳 𑁋 ‘‘𑀤𑀺𑀝𑁆𑀞𑁄 𑀢𑁂, 𑀆𑀦𑀦𑁆𑀤, 𑀫𑀳𑀸𑀥𑀦𑀯𑀸𑀡𑀺𑀚𑁄’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. 𑀲𑁄 𑀅𑀢𑁆𑀢𑀦𑁄 𑀚𑀻𑀯𑀺𑀢𑀦𑁆𑀢𑀭𑀸𑀬𑀁 𑀅𑀚𑀸𑀦𑀺𑀢𑁆𑀯𑀸 𑀇𑀫𑀁 𑀲𑀁𑀯𑀘𑁆𑀙𑀭𑀁 𑀇𑀥𑁂𑀯 𑀯𑀲𑀺𑀢𑁆𑀯𑀸 𑀪𑀡𑁆𑀟𑀁 𑀯𑀺𑀓𑁆𑀓𑀺𑀡𑀺𑀢𑀼𑀁 𑀘𑀺𑀢𑁆𑀢𑀫𑀓𑀸𑀲𑀻𑀢𑀺. ‘‘𑀓𑀺𑀁 𑀧𑀦 𑀢𑀲𑁆𑀲, 𑀪𑀦𑁆𑀢𑁂, 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺? 𑀲𑀢𑁆𑀣𑀸 ‘‘𑀆𑀫𑀸𑀦𑀦𑁆𑀤, 𑀲𑀢𑁆𑀢𑀸𑀳𑀫𑁂𑀯 𑀚𑀻𑀯𑀺𑀢𑁆𑀯𑀸 𑀲𑁄 𑀫𑀘𑁆𑀘𑀼𑀫𑀼𑀔𑁂 𑀧𑀢𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀅𑀚𑁆𑀚𑁂𑀯 𑀓𑀺𑀘𑁆𑀘𑀫𑀸𑀢𑀧𑁆𑀧𑀁, 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂;

𑀦 𑀳𑀺 𑀦𑁄 𑀲𑀗𑁆𑀕𑀭𑀁 𑀢𑁂𑀦, 𑀫𑀳𑀸𑀲𑁂𑀦𑁂𑀦 𑀫𑀘𑁆𑀘𑀼𑀦𑀸.

‘‘𑀏𑀯𑀁 𑀯𑀺𑀳𑀸𑀭𑀺𑀁 𑀆𑀢𑀸𑀧𑀺𑀁, 𑀅𑀳𑁄𑀭𑀢𑁆𑀢𑀫𑀢𑀦𑁆𑀤𑀺𑀢𑀁;

𑀢𑀁 𑀯𑁂 𑀪𑀤𑁆𑀤𑁂𑀓𑀭𑀢𑁆𑀢𑁄𑀢𑀺, 𑀲𑀦𑁆𑀢𑁄 𑀆𑀘𑀺𑀓𑁆𑀔𑀢𑁂 𑀫𑀼𑀦𑀻’’𑀢𑀺. (𑀫. 𑀦𑀺. 𑁩.𑁨𑁭𑁨);

𑀕𑀘𑁆𑀙𑀸𑀫𑀺𑀲𑁆𑀲, 𑀪𑀦𑁆𑀢𑁂, 𑀆𑀭𑁄𑀘𑁂𑀲𑁆𑀲𑀸𑀫𑀻𑀢𑀺. 𑀯𑀺𑀲𑁆𑀲𑀢𑁆𑀣𑁄 𑀕𑀘𑁆𑀙𑀸𑀦𑀦𑁆𑀤𑀸𑀢𑀺. 𑀣𑁂𑀭𑁄 𑀲𑀓𑀝𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀸𑀬 𑀘𑀭𑀺. 𑀯𑀸𑀡𑀺𑀚𑁄 𑀣𑁂𑀭𑀁 𑀆𑀳𑀸𑀭𑁂𑀦 𑀧𑀢𑀺𑀫𑀸𑀦𑁂𑀲𑀺. 𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀓𑀺𑀢𑁆𑀢𑀓𑀁 𑀓𑀸𑀮𑀁 𑀇𑀥 𑀯𑀲𑀺𑀲𑁆𑀲𑀲𑀻’’𑀢𑀺? ‘‘𑀪𑀦𑁆𑀢𑁂, 𑀅𑀳𑀁 𑀤𑀽𑀭𑀢𑁄 𑀆𑀕𑀢𑁄’’. 𑀲𑀘𑁂 𑀧𑀼𑀦 𑀕𑀫𑀺𑀲𑁆𑀲𑀸𑀫𑀺, 𑀧𑀧𑀜𑁆𑀘𑁄 𑀪𑀯𑀺𑀲𑁆𑀲𑀢𑀺, 𑀇𑀫𑀁 𑀲𑀁𑀯𑀘𑁆𑀙𑀭𑀁 𑀇𑀥 𑀯𑀲𑀺𑀢𑁆𑀯𑀸 𑀪𑀡𑁆𑀟𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻𑀢𑀺. 𑀉𑀧𑀸𑀲𑀓, 𑀤𑀼𑀚𑁆𑀚𑀸𑀦𑁄 𑀚𑀻𑀯𑀺𑀢𑀦𑁆𑀢𑀭𑀸𑀬𑁄, 𑀅𑀧𑁆𑀧𑀫𑀸𑀤𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀆𑀫, 𑀉𑀧𑀸𑀲𑀓, 𑀲𑀢𑁆𑀢𑀸𑀳𑀫𑁂𑀯 𑀢𑁂 𑀚𑀻𑀯𑀺𑀢𑀁 𑀧𑀯𑀢𑁆𑀢𑀺𑀲𑁆𑀲𑀢𑀻𑀢𑀺’’. 𑀲𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 𑀳𑀼𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀧𑀢𑁆𑀢𑀁 𑀕𑀡𑁆𑀳𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄, ‘‘𑀉𑀧𑀸𑀲𑀓, 𑀧𑀡𑁆𑀟𑀺𑀢𑁂𑀦 𑀦𑀸𑀫 ‘𑀇𑀥𑁂𑀯 𑀯𑀲𑁆𑀲𑀸𑀤𑀻𑀦𑀺 𑀯𑀲𑀺𑀲𑁆𑀲𑀸𑀫𑀺, 𑀇𑀤𑀜𑁆𑀘𑀺𑀤𑀜𑁆𑀘 𑀓𑀫𑁆𑀫𑀁 𑀧𑀬𑁄𑀚𑁂𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀢𑁆𑀢𑀦𑁄 𑀧𑀦 𑀚𑀻𑀯𑀺𑀢𑀦𑁆𑀢𑀭𑀸𑀬𑀫𑁂𑀯 𑀘𑀺𑀦𑁆𑀢𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁮𑁬. ‘‘𑀇𑀥 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫𑀺, 𑀇𑀥 𑀳𑁂𑀫𑀦𑁆𑀢𑀕𑀺𑀫𑁆𑀳𑀺𑀲𑀼;

𑀇𑀢𑀺 𑀩𑀸𑀮𑁄 𑀯𑀺𑀘𑀺𑀦𑁆𑀢𑁂𑀢𑀺, 𑀅𑀦𑁆𑀢𑀭𑀸𑀬𑀁 𑀦 𑀩𑀼𑀚𑁆𑀛𑀢𑀻’’𑀢𑀺.

𑀢𑀢𑁆𑀣 𑀇𑀥 𑀯𑀲𑁆𑀲𑀦𑁆𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑁄𑀦𑁆𑀢𑁄 𑀘𑀢𑀼𑀫𑀸𑀲𑀁 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫𑀺. 𑀳𑁂𑀫𑀦𑁆𑀢𑀕𑀺𑀫𑁆𑀳𑀺𑀲𑀽𑀢𑀺 𑀳𑁂𑀫𑀦𑁆𑀢𑀕𑀺𑀫𑁆𑀳𑁂𑀲𑀼𑀧𑀺 ‘‘𑀘𑀢𑁆𑀢𑀸𑀭𑁄 𑀫𑀸𑀲𑁂 𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑁄𑀦𑁆𑀢𑁄 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀁 𑀅𑀢𑁆𑀣𑀁 𑀅𑀚𑀸𑀦𑀦𑁆𑀢𑁄 𑀩𑀸𑀮𑁄 𑀯𑀺𑀘𑀺𑀦𑁆𑀢𑁂𑀢𑀺. 𑀅𑀦𑁆𑀢𑀭𑀸𑀬𑀦𑁆𑀢𑀺 ‘‘𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀓𑀸𑀮𑁂 𑀯𑀸 𑀤𑁂𑀲𑁂 𑀯𑀸 𑀯𑀬𑁂 𑀯𑀸 𑀫𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀚𑀻𑀯𑀺𑀢𑀦𑁆𑀢𑀭𑀸𑀬𑀁 𑀦 𑀩𑀼𑀚𑁆𑀛𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀯𑀸𑀡𑀺𑀚𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀺. 𑀯𑀸𑀡𑀺𑀚𑁄𑀧𑀺 𑀲𑀢𑁆𑀣𑀸𑀭𑀁 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 ‘‘𑀲𑀻𑀲𑀭𑁄𑀕𑁄 𑀯𑀺𑀬 𑀫𑁂 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀬𑀦𑁂 𑀦𑀺𑀧𑀚𑁆𑀚𑀺, 𑀢𑀣𑀸𑀦𑀺𑀧𑀦𑁆𑀦𑁄𑀯 𑀓𑀸𑀮𑀁 𑀓𑀢𑁆𑀯𑀸 𑀢𑀼𑀲𑀺𑀢𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺.

𑀫𑀳𑀸𑀥𑀦𑀯𑀸𑀡𑀺𑀚𑀯𑀢𑁆𑀣𑀼 𑀤𑀲𑀫𑀁.

𑁧𑁧. 𑀓𑀺𑀲𑀸𑀕𑁄𑀢𑀫𑀻𑀯𑀢𑁆𑀣𑀼

𑀢𑀁 𑀧𑀼𑀢𑁆𑀢𑀧𑀲𑀼𑀲𑀫𑁆𑀫𑀢𑁆𑀢𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀺𑀲𑀸𑀕𑁄𑀢𑀫𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀲𑀳𑀲𑁆𑀲𑀯𑀕𑁆𑀕𑁂 𑁋

‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀅𑀧𑀲𑁆𑀲𑀁 𑀅𑀫𑀢𑀁 𑀧𑀤𑀁;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀧𑀲𑁆𑀲𑀢𑁄 𑀅𑀫𑀢𑀁 𑀧𑀤’’𑀦𑁆𑀢𑀺. (𑀥. 𑀧. 𑁧𑁧𑁪) 𑁋

𑀕𑀸𑀣𑀸𑀯𑀡𑁆𑀡𑀦𑀸𑀬 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑀺𑀢𑀁. 𑀢𑀤𑀸 𑀳𑀺 𑀲𑀢𑁆𑀣𑀸 ‘‘𑀓𑀺𑀲𑀸𑀕𑁄𑀢𑀫𑀺 𑀮𑀤𑁆𑀥𑀸 𑀢𑁂 𑀏𑀓𑀘𑁆𑀙𑀭𑀫𑀢𑁆𑀢𑀸 𑀲𑀺𑀤𑁆𑀥𑀢𑁆𑀣𑀓𑀸’’𑀢𑀺 𑀆𑀳. ‘‘𑀦 𑀮𑀤𑁆𑀥𑀸, 𑀪𑀦𑁆𑀢𑁂, 𑀲𑀓𑀮𑀕𑀸𑀫𑁂 𑀚𑀻𑀯𑀦𑁆𑀢𑁂𑀳𑀺 𑀓𑀺𑀭 𑀫𑀢𑀓𑀸 𑀏𑀯 𑀩𑀳𑀼𑀢𑀭𑀸’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀢𑁆𑀯𑀁 ‘𑀫𑀫𑁂𑀯 𑀧𑀼𑀢𑁆𑀢𑁄 𑀫𑀢𑁄’𑀢𑀺 𑀲𑀮𑁆𑀮𑀓𑁆𑀔𑁂𑀲𑀺, 𑀥𑀼𑀯𑀥𑀫𑁆𑀫𑁄 𑀏𑀲 𑀲𑀩𑁆𑀩𑀲𑀢𑁆𑀢𑀸𑀦𑀁. 𑀫𑀘𑁆𑀘𑀼𑀭𑀸𑀚𑀸 𑀳𑀺 𑀲𑀩𑁆𑀩𑀲𑀢𑁆𑀢𑁂 𑀅𑀧𑀭𑀺𑀧𑀼𑀡𑁆𑀡𑀚𑁆𑀛𑀸𑀲𑀬𑁂 𑀏𑀯 𑀫𑀳𑁄𑀖𑁄 𑀯𑀺𑀬 𑀧𑀭𑀺𑀓𑀟𑁆𑀠𑀫𑀸𑀦𑁄 𑀅𑀧𑀸𑀬𑀲𑀫𑀼𑀤𑁆𑀤𑁂 𑀧𑀓𑁆𑀔𑀺𑀧𑀢𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁨𑁮𑁭. ‘‘𑀢𑀁 𑀧𑀼𑀢𑁆𑀢𑀧𑀲𑀼𑀲𑀫𑁆𑀫𑀢𑁆𑀢𑀁, 𑀩𑁆𑀬𑀸𑀲𑀢𑁆𑀢𑀫𑀦𑀲𑀁 𑀦𑀭𑀁;

𑀲𑀼𑀢𑁆𑀢𑀁 𑀕𑀸𑀫𑀁 𑀫𑀳𑁄𑀖𑁄𑀯, 𑀫𑀘𑁆𑀘𑀼 𑀆𑀤𑀸𑀬 𑀕𑀘𑁆𑀙𑀢𑀻’’𑀢𑀺.

𑀢𑀢𑁆𑀣 𑀢𑀁 𑀧𑀼𑀢𑁆𑀢𑀧𑀲𑀼𑀲𑀫𑁆𑀫𑀢𑁆𑀢𑀦𑁆𑀢𑀺 𑀢𑀁 𑀭𑀽𑀧𑀩𑀮𑀸𑀤𑀺𑀲𑀫𑁆𑀧𑀦𑁆𑀦𑁂 𑀧𑀼𑀢𑁆𑀢𑁂 𑀘 𑀧𑀲𑀽 𑀘 𑀮𑀪𑀺𑀢𑁆𑀯𑀸 ‘‘𑀫𑀫 𑀧𑀼𑀢𑁆𑀢𑀸 𑀅𑀪𑀺𑀭𑀽𑀧𑀸 𑀩𑀮𑀲𑀫𑁆𑀧𑀦𑁆𑀦𑀸 𑀧𑀡𑁆𑀟𑀺𑀢𑀸 𑀲𑀩𑁆𑀩𑀓𑀺𑀘𑁆𑀘𑀲𑀫𑀢𑁆𑀣𑀸, 𑀫𑀫 𑀕𑁄𑀡𑀸 𑀅𑀪𑀺𑀭𑀽𑀧𑀸 𑀅𑀭𑁄𑀕𑀸 𑀫𑀳𑀸𑀪𑀸𑀭𑀯𑀳𑀸, 𑀫𑀫 𑀕𑀸𑀯𑀻 𑀩𑀳𑀼𑀔𑀻𑀭𑀸’’𑀢𑀺 𑀏𑀯𑀁 𑀧𑀼𑀢𑁆𑀢𑁂𑀳𑀺 𑀘 𑀧𑀲𑀽𑀳𑀺 𑀘 𑀲𑀫𑁆𑀫𑀢𑁆𑀢𑀁 𑀦𑀭𑀁. 𑀩𑁆𑀬𑀸𑀲𑀢𑁆𑀢𑀫𑀦𑀲𑀦𑁆𑀢𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀲𑀼 𑀯𑀸 𑀧𑀢𑁆𑀢𑀘𑀻𑀯𑀭𑀸𑀤𑀻𑀲𑀼 𑀯𑀸 𑀓𑀺𑀜𑁆𑀘𑀺𑀤𑁂𑀯 𑀮𑀪𑀺𑀢𑁆𑀯𑀸 𑀢𑀢𑁄 𑀉𑀢𑁆𑀢𑀭𑀺𑀢𑀭𑀁 𑀧𑀢𑁆𑀣𑀦𑀢𑀸𑀬 𑀆𑀲𑀢𑁆𑀢𑀫𑀸𑀦𑀲𑀁 𑀯𑀸, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼 𑀯𑀸 𑀧𑀭𑀺𑀓𑁆𑀔𑀸𑀭𑁂𑀲𑀼 𑀬𑀁 𑀬𑀁 𑀮𑀤𑁆𑀥𑀁 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀮𑀕𑁆𑀕𑀦𑀢𑀸𑀬 𑀩𑁆𑀬𑀸𑀲𑀢𑁆𑀢𑀫𑀸𑀦𑀲𑀁 𑀯𑀸. 𑀲𑀼𑀢𑁆𑀢𑀁 𑀕𑀸𑀫𑀦𑁆𑀢𑀺 𑀦𑀺𑀤𑁆𑀤𑀁 𑀉𑀧𑀕𑀢𑀁 𑀲𑀢𑁆𑀢𑀦𑀺𑀓𑀸𑀬𑀁. 𑀫𑀳𑁄𑀖𑁄𑀯𑀸𑀢𑀺 𑀬𑀣𑀸 𑀏𑀯𑀭𑀽𑀧𑀁 𑀕𑀸𑀫𑀁 𑀕𑀫𑁆𑀪𑀻𑀭𑀯𑀺𑀢𑁆𑀣𑀢𑁄 𑀫𑀳𑀦𑁆𑀢𑁄 𑀫𑀳𑀸𑀦𑀤𑀻𑀦𑀁 𑀑𑀖𑁄 𑀅𑀦𑁆𑀢𑀫𑀲𑁄 𑀲𑀼𑀦𑀔𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸 𑀲𑀩𑁆𑀩𑀁 𑀆𑀤𑀸𑀬 𑀕𑀘𑁆𑀙𑀢𑀺, 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀦𑀭𑀁 𑀫𑀘𑁆𑀘𑀼 𑀆𑀤𑀸𑀬 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀓𑀺𑀲𑀸𑀕𑁄𑀢𑀫𑀻 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀓𑀺𑀲𑀸𑀕𑁄𑀢𑀫𑀻𑀯𑀢𑁆𑀣𑀼 𑀏𑀓𑀸𑀤𑀲𑀫𑀁.

𑁧𑁨. 𑀧𑀝𑀸𑀘𑀸𑀭𑀸𑀯𑀢𑁆𑀣𑀼

𑀦 𑀲𑀦𑁆𑀢𑀺 𑀧𑀼𑀢𑁆𑀢𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀝𑀸𑀘𑀸𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀲𑀳𑀲𑁆𑀲𑀯𑀕𑁆𑀕𑁂 𑁋

‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀅𑀧𑀲𑁆𑀲𑀁 𑀉𑀤𑀬𑀩𑁆𑀩𑀬𑀁;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀧𑀲𑁆𑀲𑀢𑁄 𑀉𑀤𑀬𑀩𑁆𑀩𑀬’’𑀦𑁆𑀢𑀺. (𑀥. 𑀧. 𑁧𑁧𑁩) 𑁋

𑀕𑀸𑀣𑀸𑀯𑀡𑁆𑀡𑀦𑀸𑀬 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑀺𑀢𑀁. 𑀢𑀤𑀸 𑀧𑀦 𑀲𑀢𑁆𑀣𑀸 𑀧𑀝𑀸𑀘𑀸𑀭𑀁 𑀢𑀦𑀼𑀪𑀽𑀢𑀲𑁄𑀓𑀁 𑀜𑀢𑁆𑀯𑀸 ‘‘𑀧𑀝𑀸𑀘𑀸𑀭𑁂 𑀧𑀼𑀢𑁆𑀢𑀸𑀤𑀬𑁄 𑀦𑀸𑀫 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀲𑁆𑀲 𑀢𑀸𑀡𑀁 𑀯𑀸 𑀮𑁂𑀡𑀁 𑀯𑀸 𑀲𑀭𑀡𑀁 𑀯𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀚𑁆𑀚𑀫𑀸𑀦𑀸𑀧𑀺 𑀢𑁂 𑀦 𑀲𑀦𑁆𑀢𑀺𑀬𑁂𑀯. 𑀧𑀡𑁆𑀟𑀺𑀢𑁂𑀦 𑀧𑀦 𑀲𑀻𑀮𑀁 𑀯𑀺𑀲𑁄𑀥𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑀫𑁂𑀯 𑀲𑁄𑀥𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁨𑁮𑁮. ‘‘𑀦 𑀲𑀦𑁆𑀢𑀺 𑀧𑀼𑀢𑁆𑀢𑀸 𑀢𑀸𑀡𑀸𑀬, 𑀦 𑀧𑀺𑀢𑀸 𑀦𑀸𑀧𑀺 𑀩𑀦𑁆𑀥𑀯𑀸;

𑀅𑀦𑁆𑀢𑀓𑁂𑀦𑀸𑀥𑀺𑀧𑀦𑁆𑀦𑀲𑁆𑀲, 𑀦𑀢𑁆𑀣𑀺 𑀜𑀸𑀢𑀻𑀲𑀼 𑀢𑀸𑀡𑀢𑀸.

𑁨𑁮𑁯. ‘‘𑀏𑀢𑀫𑀢𑁆𑀣𑀯𑀲𑀁 𑀜𑀢𑁆𑀯𑀸, 𑀧𑀡𑁆𑀟𑀺𑀢𑁄 𑀲𑀻𑀮𑀲𑀁𑀯𑀼𑀢𑁄;

𑀦𑀺𑀩𑁆𑀩𑀸𑀦𑀕𑀫𑀦𑀁 𑀫𑀕𑁆𑀕𑀁, 𑀔𑀺𑀧𑁆𑀧𑀫𑁂𑀯 𑀯𑀺𑀲𑁄𑀥𑀬𑁂’’𑀢𑀺.

𑀢𑀢𑁆𑀣 𑀢𑀸𑀡𑀸𑀬𑀸𑀢𑀺 𑀢𑀸𑀡𑀪𑀸𑀯𑀸𑀬 𑀧𑀢𑀺𑀝𑁆𑀞𑀸𑀦𑀢𑁆𑀣𑀸𑀬. 𑀩𑀦𑁆𑀥𑀯𑀸𑀢𑀺 𑀧𑀼𑀢𑁆𑀢𑁂 𑀘 𑀫𑀸𑀢𑀸𑀧𑀺𑀢𑀭𑁄 𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀜𑀸𑀢𑀺𑀲𑀼𑀳𑀚𑁆𑀚𑀸. 𑀅𑀦𑁆𑀢𑀓𑁂𑀦𑀸𑀥𑀺𑀧𑀦𑁆𑀦𑀲𑁆𑀲𑀸𑀢𑀺 𑀫𑀭𑀡𑁂𑀦 𑀅𑀪𑀺𑀪𑀽𑀢𑀲𑁆𑀲. 𑀧𑀯𑀢𑁆𑀢𑀺𑀬𑀜𑁆𑀳𑀺 𑀧𑀼𑀢𑁆𑀢𑀸𑀤𑀬𑁄 𑀅𑀦𑁆𑀦𑀧𑀸𑀦𑀸𑀤𑀺𑀤𑀸𑀦𑁂𑀦 𑀘𑁂𑀯 𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑀦𑀺𑀢𑁆𑀣𑀭𑀡𑁂𑀦 𑀘 𑀢𑀸𑀡𑀸 𑀳𑀼𑀢𑁆𑀯𑀸𑀧𑀺 𑀫𑀭𑀡𑀓𑀸𑀮𑁂 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀫𑀭𑀡𑀁 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀢𑀸𑀡𑀢𑁆𑀣𑀸𑀬 𑀮𑁂𑀡𑀢𑁆𑀣𑀸𑀬 𑀦 𑀲𑀦𑁆𑀢𑀺 𑀦𑀸𑀫. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑁋 ‘‘𑀦𑀢𑁆𑀣𑀺 𑀜𑀸𑀢𑀻𑀲𑀼 𑀢𑀸𑀡𑀢𑀸’’𑀢𑀺. 𑀏𑀢𑀫𑀢𑁆𑀣𑀯𑀲𑀦𑁆𑀢𑀺 𑀏𑀯𑀁 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀢𑀸𑀡𑀁 𑀪𑀯𑀺𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑀲𑀗𑁆𑀔𑀸𑀢𑀁 𑀓𑀸𑀭𑀡𑀁 𑀚𑀸𑀦𑀺𑀢𑁆𑀯𑀸 𑀧𑀡𑁆𑀟𑀺𑀢𑁄 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀦 𑀲𑀁𑀯𑀼𑀢𑁄 𑀭𑀓𑁆𑀔𑀺𑀢𑀕𑁄𑀧𑀺𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀸𑀦𑀕𑀫𑀦𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀲𑀻𑀖𑀁 𑀲𑀻𑀖𑀁 𑀯𑀺𑀲𑁄𑀥𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀧𑀝𑀸𑀘𑀸𑀭𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀅𑀜𑁆𑀜𑁂 𑀘 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀧𑀝𑀸𑀘𑀸𑀭𑀸𑀯𑀢𑁆𑀣𑀼 𑀤𑁆𑀯𑀸𑀤𑀲𑀫𑀁.

𑀫𑀕𑁆𑀕𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀻𑀲𑀢𑀺𑀫𑁄 𑀯𑀕𑁆𑀕𑁄.