𑁧𑁨. 𑀧𑀝𑀸𑀘𑀸𑀭𑀸𑀣𑁂𑀭𑀻𑀯𑀢𑁆𑀣𑀼

𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀝𑀸𑀘𑀸𑀭𑀁 𑀣𑁂𑀭𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀯𑀺𑀪𑀯𑀲𑁆𑀲 𑀲𑁂𑀝𑁆𑀞𑀺𑀦𑁄 𑀥𑀻𑀢𑀸 𑀅𑀳𑁄𑀲𑀺 𑀅𑀪𑀺𑀭𑀽𑀧𑀸. 𑀢𑀁 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀓𑀸𑀮𑁂 𑀲𑀢𑁆𑀢𑀪𑀽𑀫𑀺𑀓𑀲𑁆𑀲 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺𑀫𑀢𑀮𑁂 𑀭𑀓𑁆𑀔𑀦𑁆𑀢𑀸 𑀯𑀲𑀸𑀧𑁂𑀲𑀼𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀸 𑀏𑀓𑁂𑀦 𑀅𑀢𑁆𑀢𑀦𑁄 𑀘𑀽𑀴𑀽𑀧𑀝𑁆𑀞𑀸𑀓𑁂𑀦 𑀲𑀤𑁆𑀥𑀺𑀁 𑀯𑀺𑀧𑁆𑀧𑀝𑀺𑀧𑀚𑁆𑀚𑀺. 𑀅𑀣𑀲𑁆𑀲𑀸 𑀫𑀸𑀢𑀸𑀧𑀺𑀢𑀭𑁄 𑀲𑀫𑀚𑀸𑀢𑀺𑀓𑀓𑀼𑀮𑁂 𑀏𑀓𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀯𑀺𑀯𑀸𑀳𑀤𑀺𑀯𑀲𑀁 𑀞𑀧𑁂𑀲𑀼𑀁. 𑀢𑀲𑁆𑀫𑀺𑀁 𑀉𑀧𑀓𑀝𑁆𑀞𑁂 𑀲𑀸 𑀢𑀁 𑀘𑀽𑀴𑀽𑀧𑀝𑁆𑀞𑀸𑀓𑀁 𑀆𑀳 𑁋 ‘‘𑀫𑀁 𑀓𑀺𑀭 𑀅𑀲𑀼𑀓𑀓𑀼𑀮𑀲𑁆𑀲 𑀦𑀸𑀫 𑀤𑀲𑁆𑀲𑀦𑁆𑀢𑀺, 𑀫𑀬𑀺 𑀧𑀢𑀺𑀓𑀼𑀮𑀁 𑀕𑀢𑁂 𑀫𑀫 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄𑀧𑀺 𑀢𑀢𑁆𑀣 𑀧𑀯𑁂𑀲𑀦𑀁 𑀦 𑀮𑀪𑀺𑀲𑁆𑀲𑀲𑀺, 𑀲𑀘𑁂 𑀢𑁂 𑀫𑀬𑀺 𑀲𑀺𑀦𑁂𑀳𑁄 𑀅𑀢𑁆𑀣𑀺, 𑀇𑀤𑀸𑀦𑁂𑀯 𑀫𑀁 𑀕𑀳𑁂𑀢𑁆𑀯𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀮𑀸𑀬𑀲𑁆𑀲𑀽’’𑀢𑀺. ‘‘𑀲𑁄 𑀲𑀸𑀥𑀼, 𑀪𑀤𑁆𑀤𑁂’’𑀢𑀺. ‘‘𑀢𑁂𑀦 𑀳𑀺 𑀅𑀳𑀁 𑀲𑁆𑀯𑁂 𑀧𑀸𑀢𑁄𑀯 𑀦𑀕𑀭𑀤𑁆𑀯𑀸𑀭𑀲𑁆𑀲 𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀞𑀲𑁆𑀲𑀸𑀫𑀺, 𑀢𑁆𑀯𑀁 𑀏𑀓𑁂𑀦 𑀉𑀧𑀸𑀬𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀢𑁆𑀣 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀲𑀗𑁆𑀓𑁂𑀢𑀝𑁆𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀲𑀸𑀧𑀺 𑀧𑀸𑀢𑁄𑀯 𑀓𑀺𑀮𑀺𑀝𑁆𑀞𑀁 𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑁂𑀲𑁂 𑀯𑀺𑀓𑁆𑀓𑀺𑀭𑀺𑀢𑁆𑀯𑀸 𑀓𑀼𑀡𑁆𑀟𑀓𑁂𑀦 𑀲𑀭𑀻𑀭𑀁 𑀫𑀓𑁆𑀔𑀺𑀢𑁆𑀯𑀸 𑀓𑀼𑀝𑀁 𑀆𑀤𑀸𑀬 𑀤𑀸𑀲𑀻𑀳𑀺 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀻 𑀯𑀺𑀬 𑀖𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀞𑀸𑀦𑀁 𑀅𑀕𑀫𑀸𑀲𑀺. 𑀲𑁄 𑀢𑀁 𑀆𑀤𑀸𑀬 𑀤𑀽𑀭𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀕𑀸𑀫𑁂 𑀦𑀺𑀯𑀸𑀲𑀁 𑀓𑀧𑁆𑀧𑁂𑀢𑁆𑀯𑀸 𑀅𑀭𑀜𑁆𑀜𑁂 𑀔𑁂𑀢𑁆𑀢𑀁 𑀓𑀲𑀺𑀢𑁆𑀯𑀸 𑀤𑀸𑀭𑀼𑀧𑀡𑁆𑀡𑀸𑀤𑀻𑀦𑀺 𑀆𑀳𑀭𑀢𑀺. 𑀇𑀢𑀭𑀸 𑀓𑀼𑀝𑁂𑀦 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀲𑀳𑀢𑁆𑀣𑀸 𑀓𑁄𑀝𑁆𑀝𑀦𑀧𑀘𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀻 𑀅𑀢𑁆𑀢𑀦𑁄 𑀧𑀸𑀧𑀲𑁆𑀲 𑀨𑀮𑀁 𑀅𑀦𑀼𑀪𑁄𑀢𑀺. 𑀅𑀣𑀲𑁆𑀲𑀸 𑀓𑀼𑀘𑁆𑀙𑀺𑀬𑀁 𑀕𑀩𑁆𑀪𑁄 𑀧𑀢𑀺𑀝𑁆𑀞𑀸𑀲𑀺. 𑀲𑀸 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸 ‘‘𑀇𑀥 𑀫𑁂 𑀓𑁄𑀘𑀺 𑀉𑀧𑀓𑀸𑀭𑀓𑁄 𑀦𑀢𑁆𑀣𑀺, 𑀫𑀸𑀢𑀸𑀧𑀺𑀢𑀭𑁄 𑀦𑀸𑀫 𑀧𑀼𑀢𑁆𑀢𑁂𑀲𑀼 𑀫𑀼𑀤𑀼𑀳𑀤𑀬𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀫𑀁 𑀦𑁂𑀳𑀺, 𑀢𑀢𑁆𑀣 𑀫𑁂 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀸𑀫𑀺𑀓𑀁 𑀬𑀸𑀘𑀺. 𑀲𑁄 ‘‘𑀓𑀺𑀁, 𑀪𑀤𑁆𑀤𑁂, 𑀓𑀣𑁂𑀲𑀺, 𑀫𑀁 𑀤𑀺𑀲𑁆𑀯𑀸 𑀢𑀯 𑀫𑀸𑀢𑀸𑀧𑀺𑀢𑀭𑁄 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀭𑁂𑀬𑁆𑀬𑀼𑀁, 𑀦 𑀲𑀓𑁆𑀓𑀸 𑀫𑀬𑀸 𑀢𑀢𑁆𑀣 𑀕𑀦𑁆𑀢𑀼’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀲𑀸 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀢𑁆𑀯𑀸𑀧𑀺 𑀕𑀫𑀦𑀁 𑀅𑀮𑀪𑀫𑀸𑀦𑀸 𑀢𑀲𑁆𑀲 𑀅𑀭𑀜𑁆𑀜𑀁 𑀕𑀢𑀓𑀸𑀮𑁂 𑀧𑀝𑀺𑀯𑀺𑀲𑁆𑀲𑀓𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑀘𑁂 𑀲𑁄 𑀆𑀕𑀦𑁆𑀢𑁆𑀯𑀸 𑀫𑀁 𑀅𑀧𑀲𑁆𑀲𑀦𑁆𑀢𑁄 ‘𑀓𑀳𑀁 𑀕𑀢𑀸’𑀢𑀺 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀫𑀫 𑀅𑀢𑁆𑀢𑀦𑁄 𑀓𑀼𑀮𑀖𑀭𑀁 𑀕𑀢𑀪𑀸𑀯𑀁 𑀆𑀘𑀺𑀓𑁆𑀔𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀕𑁂𑀳𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄𑀧𑀺 𑀆𑀕𑀦𑁆𑀢𑁆𑀯𑀸 𑀢𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀯𑀺𑀲𑁆𑀲𑀓𑁂 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀦𑀺𑀯𑀢𑁆𑀢𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀁 𑀬𑀸𑀘𑀺𑀬𑀫𑀸𑀦𑁄𑀧𑀺 𑀦𑀺𑀯𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣𑀲𑁆𑀲𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀓𑀫𑁆𑀫𑀚𑀯𑀸𑀢𑀸 𑀘𑀮𑀺𑀁𑀲𑀼. 𑀲𑀸 𑀏𑀓𑀁 𑀕𑀘𑁆𑀙𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸, ‘‘𑀲𑀸𑀫𑀺, 𑀓𑀫𑁆𑀫𑀚𑀯𑀸𑀢𑀸 𑀫𑁂 𑀘𑀮𑀺𑀢𑀸’’𑀢𑀺 𑀯𑀢𑁆𑀯𑀸 𑀪𑀽𑀫𑀺𑀬𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀲𑀫𑁆𑀧𑀭𑀺𑀯𑀢𑁆𑀢𑀫𑀸𑀦𑀸 𑀓𑀺𑀘𑁆𑀙𑁂𑀦 𑀤𑀸𑀭𑀓𑀁 𑀯𑀺𑀚𑀸𑀬𑀺𑀢𑁆𑀯𑀸 ‘‘𑀬𑀲𑁆𑀲𑀢𑁆𑀣𑀸𑀬𑀸𑀳𑀁 𑀓𑀼𑀮𑀖𑀭𑀁 𑀕𑀘𑁆𑀙𑁂𑀬𑁆𑀬𑀁, 𑀲𑁄 𑀅𑀢𑁆𑀣𑁄 𑀦𑀺𑀧𑁆𑀨𑀦𑁆𑀦𑁄’’𑀢𑀺 𑀧𑀼𑀦𑀤𑁂𑀯 𑀢𑁂𑀦 𑀲𑀤𑁆𑀥𑀺𑀁 𑀕𑁂𑀳𑀁 𑀆𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺.

𑀢𑀲𑁆𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀼𑀦 𑀕𑀩𑁆𑀪𑁄 𑀧𑀢𑀺𑀝𑁆𑀞𑀳𑀺. 𑀲𑀸 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸 𑀳𑀼𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀸𑀫𑀺𑀓𑀁 𑀬𑀸𑀘𑀺𑀢𑁆𑀯𑀸 𑀕𑀫𑀦𑀁 𑀅𑀮𑀪𑀫𑀸𑀦𑀸 𑀧𑀼𑀢𑁆𑀢𑀁 𑀅𑀗𑁆𑀓𑁂𑀦𑀸𑀤𑀸𑀬 𑀢𑀣𑁂𑀯 𑀧𑀓𑁆𑀓𑀫𑀺𑀢𑁆𑀯𑀸 𑀢𑁂𑀦 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 ‘‘𑀢𑀺𑀝𑁆𑀞𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀦𑀺𑀯𑀢𑁆𑀢𑀺𑀢𑀼𑀁 𑀦 𑀇𑀘𑁆𑀙𑀺. 𑀅𑀣 𑀦𑁂𑀲𑀁 𑀕𑀘𑁆𑀙𑀦𑁆𑀢𑀸𑀦𑀁 𑀫𑀳𑀸 𑀅𑀓𑀸𑀮𑀫𑁂𑀖𑁄 𑀉𑀤𑀧𑀸𑀤𑀺 𑀲𑀫𑀦𑁆𑀢𑀸 𑀯𑀺𑀚𑁆𑀚𑀼𑀮𑀢𑀸𑀳𑀺 𑀆𑀤𑀺𑀢𑁆𑀢𑀁 𑀯𑀺𑀬 𑀫𑁂𑀖𑀢𑁆𑀣𑀦𑀺𑀢𑁂𑀳𑀺, 𑀪𑀺𑀚𑁆𑀚𑀫𑀸𑀦𑀁 𑀯𑀺𑀬 𑀉𑀤𑀓𑀥𑀸𑀭𑀸𑀦𑀺𑀧𑀸𑀢𑀦𑀺𑀭𑀦𑁆𑀢𑀭𑀁 𑀦𑀪𑀁 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀢𑀲𑁆𑀲𑀸 𑀓𑀫𑁆𑀫𑀚𑀯𑀸𑀢𑀸 𑀘𑀮𑀺𑀁𑀲𑀼. 𑀲𑀸 𑀲𑀸𑀫𑀺𑀓𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀲𑀸𑀫𑀺, 𑀓𑀫𑁆𑀫𑀚𑀯𑀸𑀢𑀸 𑀫𑁂 𑀘𑀮𑀺𑀢𑀸, 𑀦 𑀲𑀓𑁆𑀓𑁄𑀫𑀺 𑀲𑀦𑁆𑀥𑀸𑀭𑁂𑀢𑀼𑀁, 𑀅𑀦𑁄𑀯𑀲𑁆𑀲𑀓𑀝𑁆𑀞𑀸𑀦𑀁 𑀫𑁂 𑀚𑀸𑀦𑀸𑀳𑀻’’𑀢𑀺 𑀆𑀳. 𑀲𑁄 𑀳𑀢𑁆𑀣𑀕𑀢𑀸𑀬 𑀯𑀸𑀲𑀺𑀬𑀸 𑀇𑀢𑁄 𑀘𑀺𑀢𑁄 𑀘 𑀉𑀧𑀥𑀸𑀭𑁂𑀦𑁆𑀢𑁄 𑀏𑀓𑀲𑁆𑀫𑀺𑀁 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀚𑀸𑀢𑀁 𑀕𑀼𑀫𑁆𑀩𑀁 𑀤𑀺𑀲𑁆𑀯𑀸 𑀙𑀺𑀦𑁆𑀤𑀺𑀢𑀼𑀁 𑀆𑀭𑀪𑀺. 𑀅𑀣 𑀦𑀁 𑀯𑀫𑁆𑀫𑀺𑀓𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀖𑁄𑀭𑀯𑀺𑀲𑁄 𑀆𑀲𑀻𑀯𑀺𑀲𑁄 𑀟𑀁𑀲𑀺. 𑀢𑀗𑁆𑀔𑀡𑀜𑁆𑀜𑁂𑀯𑀲𑁆𑀲 𑀲𑀭𑀻𑀭𑀁 𑀅𑀦𑁆𑀢𑁄𑀲𑀫𑀼𑀝𑁆𑀞𑀺𑀢𑀸𑀳𑀺 𑀅𑀕𑁆𑀕𑀺𑀚𑀸𑀮𑀸𑀳𑀺 𑀟𑀬𑁆𑀳𑀫𑀸𑀦𑀁 𑀯𑀺𑀬 𑀦𑀻𑀮𑀯𑀡𑁆𑀡𑀁 𑀳𑀼𑀢𑁆𑀯𑀸 𑀢𑀢𑁆𑀣𑁂𑀯 𑀧𑀢𑀺. 𑀇𑀢𑀭𑀸𑀧𑀺 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀫𑀸𑀦𑀸 𑀢𑀲𑁆𑀲 𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑀻𑀧𑀺 𑀢𑀁 𑀅𑀤𑀺𑀲𑁆𑀯𑀸𑀯 𑀅𑀧𑀭𑀫𑁆𑀧𑀺 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀤𑁆𑀯𑁂 𑀤𑀸𑀭𑀓𑀸 𑀯𑀸𑀢𑀯𑀼𑀝𑁆𑀞𑀺𑀯𑁂𑀕𑀁 𑀅𑀲𑀳𑀫𑀸𑀦𑀸 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀦𑁆𑀢𑀺. 𑀲𑀸 𑀉𑀪𑁄𑀧𑀺 𑀢𑁂 𑀉𑀭𑀦𑁆𑀢𑀭𑁂 𑀓𑀢𑁆𑀯𑀸 𑀤𑁆𑀯𑀻𑀳𑀺 𑀚𑀡𑁆𑀡𑀼𑀓𑁂𑀳𑀺 𑀘𑁂𑀯 𑀳𑀢𑁆𑀣𑁂𑀳𑀺 𑀘 𑀪𑀽𑀫𑀺𑀬𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀢𑀣𑀸 𑀞𑀺𑀢𑀸𑀯 𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀲𑀓𑀮𑀲𑀭𑀻𑀭𑀁 𑀦𑀺𑀮𑁆𑀮𑁄𑀳𑀺𑀢𑀁 𑀯𑀺𑀬 𑀧𑀡𑁆𑀟𑀼𑀧𑀮𑀸𑀲𑀯𑀡𑁆𑀡𑀁 𑀅𑀳𑁄𑀲𑀺. 𑀲𑀸 𑀉𑀝𑁆𑀞𑀺𑀢𑁂 𑀅𑀭𑀼𑀡𑁂 𑀫𑀁𑀲𑀧𑁂𑀲𑀺𑀯𑀡𑁆𑀡𑀁 𑀏𑀓𑀁 𑀧𑀼𑀢𑁆𑀢𑀁 𑀅𑀗𑁆𑀓𑁂𑀦𑀸𑀤𑀸𑀬 𑀇𑀢𑀭𑀁 𑀅𑀗𑁆𑀕𑀼𑀮𑀺𑀬𑀸 𑀕𑀳𑁂𑀢𑁆𑀯𑀸 ‘‘𑀏𑀳𑀺, 𑀢𑀸𑀢, 𑀧𑀺𑀢𑀸 𑀢𑁂 𑀇𑀢𑁄 𑀕𑀢𑁄’’𑀢𑀺 𑀯𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀕𑀢𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀻 𑀢𑀁 𑀯𑀫𑁆𑀫𑀺𑀓𑀫𑀢𑁆𑀣𑀓𑁂 𑀓𑀸𑀮𑀁 𑀓𑀢𑁆𑀯𑀸 𑀧𑀢𑀺𑀢𑀁 𑀦𑀻𑀮𑀯𑀡𑁆𑀡𑀁 𑀣𑀤𑁆𑀥𑀲𑀭𑀻𑀭𑀁 𑀤𑀺𑀲𑁆𑀯𑀸 ‘‘𑀫𑀁 𑀦𑀺𑀲𑁆𑀲𑀸𑀬 𑀫𑀫 𑀲𑀸𑀫𑀺𑀓𑁄 𑀧𑀦𑁆𑀣𑁂 𑀫𑀢𑁄’’𑀢𑀺 𑀭𑁄𑀤𑀦𑁆𑀢𑀻 𑀧𑀭𑀺𑀤𑁂𑀯𑀦𑁆𑀢𑀻 𑀧𑀸𑀬𑀸𑀲𑀺.

𑀲𑀸 𑀲𑀓𑀮𑀭𑀢𑁆𑀢𑀺𑀁 𑀤𑁂𑀯𑁂𑀦 𑀯𑀼𑀝𑁆𑀞𑀢𑁆𑀢𑀸 𑀅𑀘𑀺𑀭𑀯𑀢𑀺𑀁 𑀦𑀤𑀺𑀁 𑀚𑀡𑁆𑀡𑀼𑀧𑁆𑀧𑀫𑀸𑀡𑁂𑀦 𑀓𑀝𑀺𑀧𑁆𑀧𑀫𑀸𑀡𑁂𑀦 𑀣𑀦𑀧𑁆𑀧𑀫𑀸𑀡𑁂𑀦 𑀉𑀤𑀓𑁂𑀦 𑀧𑀭𑀺𑀧𑀼𑀡𑁆𑀡𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀫𑀦𑁆𑀤𑀩𑀼𑀤𑁆𑀥𑀺𑀢𑀸𑀬 𑀤𑁆𑀯𑀻𑀳𑀺 𑀤𑀸𑀭𑀓𑁂𑀳𑀺 𑀲𑀤𑁆𑀥𑀺𑀁 𑀉𑀤𑀓𑀁 𑀑𑀢𑀭𑀺𑀢𑀼𑀁 𑀅𑀯𑀺𑀲𑀳𑀦𑁆𑀢𑀻 𑀚𑁂𑀝𑁆𑀞𑀧𑀼𑀢𑁆𑀢𑀁 𑀑𑀭𑀺𑀫𑀢𑀻𑀭𑁂 𑀞𑀧𑁂𑀢𑁆𑀯𑀸 𑀇𑀢𑀭𑀁 𑀆𑀤𑀸𑀬 𑀧𑀭𑀢𑀻𑀭𑀁 𑀕𑀦𑁆𑀢𑁆𑀯𑀸 𑀲𑀸𑀔𑀸𑀪𑀗𑁆𑀕𑀁 𑀅𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 ‘‘𑀇𑀢𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀩𑀸𑀮𑀧𑀼𑀢𑁆𑀢𑀓𑀁 𑀧𑀳𑀸𑀬 𑀢𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀧𑀼𑀦𑀧𑁆𑀧𑀼𑀦𑀁 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑀬𑀫𑀸𑀦𑀸 𑀧𑀸𑀬𑀸𑀲𑀺. 𑀅𑀣𑀲𑁆𑀲𑀸 𑀦𑀤𑀻𑀫𑀚𑁆𑀛𑀁 𑀕𑀢𑀓𑀸𑀮𑁂 𑀏𑀓𑁄 𑀲𑁂𑀦𑁄 𑀢𑀁 𑀓𑀼𑀫𑀸𑀭𑀁 𑀤𑀺𑀲𑁆𑀯𑀸 ‘‘𑀫𑀁𑀲𑀧𑁂𑀲𑀻’’𑀢𑀺 𑀲𑀜𑁆𑀜𑀸𑀬 𑀆𑀓𑀸𑀲𑀢𑁄 𑀪𑀲𑁆𑀲𑀺. 𑀲𑀸 𑀢𑀁 𑀧𑀼𑀢𑁆𑀢𑀲𑁆𑀲𑀢𑁆𑀣𑀸𑀬 𑀪𑀲𑁆𑀲𑀦𑁆𑀢𑀁 𑀤𑀺𑀲𑁆𑀯𑀸 𑀉𑀪𑁄 𑀳𑀢𑁆𑀣𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀲𑀽𑀲𑀽’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀫𑀳𑀸𑀲𑀤𑁆𑀤𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀲𑁂𑀦𑁄 𑀤𑀽𑀭𑀪𑀸𑀯𑁂𑀦 𑀢𑀁 𑀅𑀲𑀼𑀢𑁆𑀯𑀸𑀯 𑀓𑀼𑀫𑀸𑀭𑀓𑀁 𑀕𑀳𑁂𑀢𑁆𑀯𑀸 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀕𑀢𑁄. 𑀑𑀭𑀺𑀫𑀢𑀻𑀭𑁂 𑀞𑀺𑀢𑀧𑀼𑀢𑁆𑀢𑁄 𑀫𑀸𑀢𑀭𑀁 𑀦𑀤𑀻𑀫𑀚𑁆𑀛𑁂 𑀉𑀪𑁄 𑀳𑀢𑁆𑀣𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀸𑀲𑀤𑁆𑀤𑀁 𑀦𑀺𑀘𑁆𑀙𑀸𑀭𑀬𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀫𑀁 𑀧𑀓𑁆𑀓𑁄𑀲𑀢𑀻’’𑀢𑀺 𑀲𑀜𑁆𑀜𑀸𑀬 𑀯𑁂𑀕𑁂𑀦 𑀉𑀤𑀓𑁂 𑀧𑀢𑀺. 𑀇𑀢𑀺𑀲𑁆𑀲𑀸 𑀩𑀸𑀮𑀧𑀼𑀢𑁆𑀢𑀁 𑀲𑁂𑀦𑁄 𑀳𑀭𑀺, 𑀚𑁂𑀝𑁆𑀞𑀧𑀼𑀢𑁆𑀢𑁄 𑀉𑀤𑀓𑁂𑀦 𑀯𑀽𑀴𑁆𑀳𑁄.

𑀲𑀸 ‘‘𑀏𑀓𑁄 𑀫𑁂 𑀧𑀼𑀢𑁆𑀢𑁄 𑀲𑁂𑀦𑁂𑀦 𑀕𑀳𑀺𑀢𑁄, 𑀏𑀓𑁄 𑀉𑀤𑀓𑁂𑀦 𑀯𑀽𑀴𑁆𑀳𑁄, 𑀧𑀦𑁆𑀣𑁂 𑀫𑁂 𑀧𑀢𑀺 𑀫𑀢𑁄’’𑀢𑀺 𑀭𑁄𑀤𑀦𑁆𑀢𑀻 𑀧𑀭𑀺𑀤𑁂𑀯𑀦𑁆𑀢𑀻 𑀕𑀘𑁆𑀙𑀫𑀸𑀦𑀸 𑀲𑀸𑀯𑀢𑁆𑀣𑀺𑀢𑁄 𑀆𑀕𑀘𑁆𑀙𑀦𑁆𑀢𑀁 𑀏𑀓𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀢𑁆𑀣 𑀯𑀸𑀲𑀺𑀓𑁄𑀲𑀺, 𑀢𑀸𑀢𑀸’’𑀢𑀺? ‘‘𑀲𑀸𑀯𑀢𑁆𑀣𑀺𑀯𑀸𑀲𑀺𑀓𑁄𑀫𑁆𑀳𑀺, 𑀅𑀫𑁆𑀫𑀸’’𑀢𑀺. ‘‘𑀲𑀸𑀯𑀢𑁆𑀣𑀺𑀦𑀕𑀭𑁂 𑀅𑀲𑀼𑀓𑀯𑀻𑀣𑀺𑀬𑀁 𑀏𑀯𑀭𑀽𑀧𑀁 𑀅𑀲𑀼𑀓𑀓𑀼𑀮𑀁 𑀦𑀸𑀫 𑀅𑀢𑁆𑀣𑀺, 𑀚𑀸𑀦𑀸𑀲𑀺, 𑀢𑀸𑀢𑀸’’𑀢𑀺? ‘‘𑀚𑀸𑀦𑀸𑀫𑀺, 𑀅𑀫𑁆𑀫, 𑀢𑀁 𑀧𑀦 𑀫𑀸 𑀧𑀼𑀘𑁆𑀙𑀺, 𑀲𑀘𑁂 𑀅𑀜𑁆𑀜𑀁 𑀚𑀸𑀦𑀸𑀲𑀺 𑀧𑀼𑀘𑁆𑀙𑀸’’𑀢𑀺. ‘‘𑀅𑀜𑁆𑀜𑁂𑀦 𑀫𑁂 𑀓𑀫𑁆𑀫𑀁 𑀦𑀢𑁆𑀣𑀺, 𑀢𑀤𑁂𑀯 𑀧𑀼𑀘𑁆𑀙𑀸𑀫𑀺, 𑀢𑀸𑀢𑀸’’𑀢𑀺. ‘‘𑀅𑀫𑁆𑀫, 𑀢𑁆𑀯𑀁 𑀅𑀢𑁆𑀢𑀦𑁄 𑀅𑀦𑀸𑀘𑀺𑀓𑁆𑀔𑀺𑀢𑀼𑀁 𑀦 𑀤𑁂𑀲𑀺, 𑀅𑀚𑁆𑀚 𑀢𑁂 𑀲𑀩𑁆𑀩𑀭𑀢𑁆𑀢𑀺𑀁 𑀤𑁂𑀯𑁄 𑀯𑀲𑁆𑀲𑀦𑁆𑀢𑁄 𑀤𑀺𑀝𑁆𑀞𑁄’’𑀢𑀺. ‘‘𑀤𑀺𑀝𑁆𑀞𑁄 𑀫𑁂, 𑀢𑀸𑀢, 𑀫𑀬𑁆𑀳𑀫𑁂𑀯𑁂𑀲𑁄 𑀲𑀩𑁆𑀩𑀭𑀢𑁆𑀢𑀺𑀁 𑀯𑀼𑀝𑁆𑀞𑁄, 𑀦 𑀅𑀜𑁆𑀜𑀲𑁆𑀲. 𑀫𑀬𑁆𑀳𑀁 𑀧𑀦 𑀯𑀼𑀝𑁆𑀞𑀓𑀸𑀭𑀡𑀁 𑀧𑀘𑁆𑀙𑀸 𑀢𑁂 𑀓𑀣𑁂𑀲𑁆𑀲𑀸𑀫𑀺, 𑀏𑀢𑀲𑁆𑀫𑀺𑀁 𑀢𑀸𑀯 𑀫𑁂 𑀲𑁂𑀝𑁆𑀞𑀺𑀕𑁂𑀳𑁂 𑀧𑀯𑀢𑁆𑀢𑀺𑀁 𑀓𑀣𑁂𑀳𑀻’’𑀢𑀺. ‘‘𑀅𑀫𑁆𑀫, 𑀅𑀚𑁆𑀚 𑀭𑀢𑁆𑀢𑀺𑀁 𑀲𑁂𑀝𑁆𑀞𑀺𑀜𑁆𑀘 𑀲𑁂𑀝𑁆𑀞𑀺𑀪𑀭𑀺𑀬𑀜𑁆𑀘 𑀲𑁂𑀝𑁆𑀞𑀺𑀧𑀼𑀢𑁆𑀢𑀜𑁆𑀘𑀸𑀢𑀺 𑀢𑀬𑁄𑀧𑀺 𑀚𑀦𑁂 𑀅𑀯𑀢𑁆𑀣𑀭𑀫𑀸𑀦𑀁 𑀕𑁂𑀳𑀁 𑀧𑀢𑀺, 𑀢𑁂 𑀏𑀓𑀘𑀺𑀢𑀓𑀲𑁆𑀫𑀺𑀁 𑀛𑀸𑀬𑀦𑁆𑀢𑀺. 𑀏𑀲 𑀥𑀽𑀫𑁄 𑀧𑀜𑁆𑀜𑀸𑀬𑀢𑀺, 𑀅𑀫𑁆𑀫𑀸’’𑀢𑀺. 𑀲𑀸 𑀢𑀲𑁆𑀫𑀺𑀁 𑀔𑀡𑁂 𑀦𑀺𑀯𑀢𑁆𑀣𑀯𑀢𑁆𑀣𑀁 𑀧𑀢𑀫𑀸𑀦𑀁 𑀦 𑀲𑀜𑁆𑀚𑀸𑀦𑀺, 𑀉𑀫𑁆𑀫𑀢𑁆𑀢𑀺𑀓𑀪𑀸𑀯𑀁 𑀧𑀢𑁆𑀯𑀸 𑀬𑀣𑀸𑀚𑀸𑀢𑀸𑀯 𑀭𑁄𑀤𑀦𑁆𑀢𑀻 𑀧𑀭𑀺𑀤𑁂𑀯𑀦𑁆𑀢𑀻 𑁋

‘‘𑀉𑀪𑁄 𑀧𑀼𑀢𑁆𑀢𑀸 𑀓𑀸𑀮𑀓𑀢𑀸, 𑀧𑀦𑁆𑀣𑁂 𑀫𑀬𑁆𑀳𑀁 𑀧𑀢𑀻 𑀫𑀢𑁄;

𑀫𑀸𑀢𑀸 𑀧𑀺𑀢𑀸 𑀘 𑀪𑀸𑀢𑀸 𑀘, 𑀏𑀓𑀘𑀺𑀢𑀫𑁆𑀳𑀺 𑀟𑀬𑁆𑀳𑀭𑁂’’𑀢𑀺. (𑀅𑀧. 𑀣𑁂𑀭𑀻 𑁨.𑁨.𑁪𑁯𑁮) 𑁋

𑀯𑀺𑀮𑀧𑀦𑁆𑀢𑀻 𑀧𑀭𑀺𑀩𑁆𑀪𑀫𑀺. 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀉𑀫𑁆𑀫𑀢𑁆𑀢𑀺𑀓𑀸 𑀉𑀫𑁆𑀫𑀢𑁆𑀢𑀺𑀓𑀸’’𑀢𑀺 𑀓𑀘𑀯𑀭𑀁 𑀕𑀳𑁂𑀢𑁆𑀯𑀸 𑀧𑀁𑀲𑀼𑀁 𑀕𑀳𑁂𑀢𑁆𑀯𑀸 𑀫𑀢𑁆𑀣𑀓𑁂 𑀑𑀓𑀺𑀭𑀦𑁆𑀢𑀸 𑀮𑁂𑀟𑁆𑀟𑀽𑀳𑀺 𑀧𑀳𑀭𑀦𑁆𑀢𑀺. 𑀲𑀢𑁆𑀣𑀸 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀅𑀝𑁆𑀞𑀧𑀭𑀺𑀲𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀢𑀁 𑀆𑀕𑀘𑁆𑀙𑀫𑀸𑀦𑀁 𑀅𑀤𑁆𑀤𑀲 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀽𑀭𑀺𑀢𑀧𑀸𑀭𑀫𑀺𑀁 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑀁.

𑀲𑀸 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀧𑀤𑀼𑀫𑀼𑀢𑁆𑀢𑀭𑀲𑀢𑁆𑀣𑀸𑀭𑀸 𑀏𑀓𑀁 𑀯𑀺𑀦𑀬𑀥𑀭𑀢𑁆𑀣𑁂𑀭𑀺𑀁 𑀩𑀸𑀳𑀸𑀬 𑀕𑀳𑁂𑀢𑁆𑀯𑀸 𑀦𑀦𑁆𑀤𑀦𑀯𑀦𑁂 𑀞𑀧𑁂𑀦𑁆𑀢𑀁 𑀯𑀺𑀬 𑀏𑀢𑀤𑀕𑁆𑀕𑀝𑁆𑀞𑀸𑀦𑁂 𑀞𑀧𑀺𑀬𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀳𑀫𑁆𑀧𑀺 𑀢𑀼𑀫𑁆𑀳𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀯𑀺𑀦𑀬𑀥𑀭𑀢𑁆𑀣𑁂𑀭𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑀁 𑀮𑀪𑁂𑀬𑁆𑀬’’𑀦𑁆𑀢𑀺 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀢𑁆𑀣𑀦𑀁 𑀞𑀧𑁂𑀲𑀺. 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑁄 𑀅𑀦𑀸𑀕𑀢𑀁𑀲𑀜𑀸𑀡𑀁 𑀧𑀢𑁆𑀣𑀭𑀺𑀢𑁆𑀯𑀸 𑀧𑀢𑁆𑀣𑀦𑀸𑀬 𑀲𑀫𑀺𑀚𑁆𑀛𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀦𑀸𑀕𑀢𑁂 𑀕𑁄𑀢𑀫𑀩𑀼𑀤𑁆𑀥𑀲𑁆𑀲 𑀦𑀸𑀫 𑀲𑀸𑀲𑀦𑁂 𑀅𑀬𑀁 𑀧𑀝𑀸𑀘𑀸𑀭𑀸 𑀦𑀸𑀫𑁂𑀦 𑀯𑀺𑀦𑀬𑀥𑀭𑀢𑁆𑀣𑁂𑀭𑀻𑀦𑀁 𑀅𑀕𑁆𑀕𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀸𑀲𑀺. 𑀢𑀁 𑀏𑀯𑀁 𑀧𑀢𑁆𑀣𑀺𑀢𑀧𑀢𑁆𑀣𑀦𑀁 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑀁 𑀲𑀢𑁆𑀣𑀸 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀇𑀫𑀺𑀲𑁆𑀲𑀸 𑀞𑀧𑁂𑀢𑁆𑀯𑀸 𑀫𑀁 𑀅𑀜𑁆𑀜𑁄 𑀅𑀯𑀲𑁆𑀲𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀬𑀣𑀸 𑀯𑀺𑀳𑀸𑀭𑀸𑀪𑀺𑀫𑀼𑀔𑀁 𑀆𑀕𑀘𑁆𑀙𑀢𑀺, 𑀏𑀯𑀁 𑀅𑀓𑀸𑀲𑀺. 𑀧𑀭𑀺𑀲𑀸 𑀢𑀁 𑀤𑀺𑀲𑁆𑀯𑀸𑀯 ‘‘𑀇𑀫𑀺𑀲𑁆𑀲𑀸 𑀉𑀫𑁆𑀫𑀢𑁆𑀢𑀺𑀓𑀸𑀬 𑀇𑀢𑁄 𑀆𑀕𑀦𑁆𑀢𑀼𑀁 𑀫𑀸 𑀤𑀤𑀺𑀢𑁆𑀣𑀸’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀅𑀧𑁂𑀣, 𑀫𑀸 𑀦𑀁 𑀯𑀸𑀭𑀬𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀅𑀯𑀺𑀤𑀽𑀭𑀝𑁆𑀞𑀸𑀦𑀁 𑀆𑀕𑀢𑀓𑀸𑀮𑁂 ‘‘𑀲𑀢𑀺𑀁 𑀧𑀝𑀺𑀮𑀪 𑀪𑀕𑀺𑀦𑀻’’𑀢𑀺 𑀆𑀳. 𑀲𑀸 𑀢𑀁 𑀔𑀡𑀁𑀬𑁂𑀯 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀲𑀢𑀺𑀁 𑀧𑀝𑀺𑀮𑀪𑀺. 𑀢𑀲𑁆𑀫𑀺𑀁𑀓𑀸𑀮𑁂 𑀦𑀺𑀯𑀢𑁆𑀣𑀯𑀢𑁆𑀣𑀲𑁆𑀲 𑀧𑀢𑀺𑀢𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺. 𑀅𑀣𑀲𑁆𑀲𑀸 𑀏𑀓𑁄 𑀧𑀼𑀭𑀺𑀲𑁄 𑀉𑀢𑁆𑀢𑀭𑀲𑀸𑀝𑀓𑀁 𑀔𑀺𑀧𑀺. 𑀲𑀸 𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀼𑀯𑀡𑁆𑀡𑀯𑀡𑁆𑀡𑁂𑀲𑀼 𑀧𑀸𑀤𑁂𑀲𑀼 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀯𑀲𑁆𑀲𑀬𑁄 𑀫𑁂 𑀳𑁄𑀣, 𑀧𑀢𑀺𑀝𑁆𑀞𑀸 𑀫𑁂 𑀳𑁄𑀣. 𑀏𑀓𑀜𑁆𑀳𑀺 𑀫𑁂 𑀧𑀼𑀢𑁆𑀢𑀁 𑀲𑁂𑀦𑁄 𑀕𑀡𑁆𑀳𑀺, 𑀏𑀓𑁄 𑀉𑀤𑀓𑁂𑀦 𑀯𑀽𑀴𑁆𑀳𑁄, 𑀧𑀦𑁆𑀣𑁂 𑀫𑁂 𑀧𑀢𑀺 𑀫𑀢𑁄, 𑀫𑀸𑀢𑀸𑀧𑀺𑀢𑀭𑁄 𑀘𑁂𑀯 𑀫𑁂 𑀪𑀸𑀢𑀸 𑀘 𑀕𑁂𑀳𑁂𑀦 𑀅𑀯𑀢𑁆𑀣𑀝𑀸 𑀏𑀓𑀘𑀺𑀢𑀓𑀲𑁆𑀫𑀺𑀁 𑀛𑀸𑀬𑀦𑁆𑀢𑀻’’𑀢𑀺.

𑀲𑀢𑁆𑀣𑀸 𑀢𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀧𑀝𑀸𑀘𑀸𑀭𑁂, 𑀫𑀸 𑀘𑀺𑀦𑁆𑀢𑀬𑀺, 𑀢𑀯 𑀢𑀸𑀡𑀁 𑀲𑀭𑀡𑀁 𑀅𑀯𑀲𑁆𑀲𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑀲𑁆𑀲𑁂𑀯 𑀲𑀦𑁆𑀢𑀺𑀓𑀁 𑀆𑀕𑀢𑀸𑀲𑀺. 𑀬𑀣𑀸 𑀳𑀺 𑀢𑀯 𑀇𑀤𑀸𑀦𑀺 𑀏𑀓𑁄 𑀧𑀼𑀢𑁆𑀢𑀓𑁄 𑀲𑁂𑀦𑁂𑀦 𑀕𑀳𑀺𑀢𑁄, 𑀏𑀓𑁄 𑀉𑀤𑀓𑁂𑀦 𑀯𑀽𑀴𑁆𑀳𑁄, 𑀧𑀦𑁆𑀣𑁂 𑀧𑀢𑀺 𑀫𑀢𑁄, 𑀫𑀸𑀢𑀸𑀧𑀺𑀢𑀭𑁄 𑀘𑁂𑀯 𑀪𑀸𑀢𑀸 𑀘 𑀕𑁂𑀳𑁂𑀦 𑀅𑀯𑀢𑁆𑀣𑀝𑀸; 𑀏𑀯𑀫𑁂𑀯 𑀇𑀫𑀲𑁆𑀫𑀺𑀁 𑀲𑀁𑀲𑀸𑀭𑁂 𑀧𑀼𑀢𑁆𑀢𑀸𑀤𑀻𑀦𑀁 𑀫𑀢𑀓𑀸𑀮𑁂 𑀢𑀯 𑀭𑁄𑀤𑀦𑁆𑀢𑀺𑀬𑀸 𑀧𑀕𑁆𑀖𑀭𑀺𑀢𑀅𑀲𑁆𑀲𑀼 𑀘𑀢𑀼𑀦𑁆𑀦𑀁 𑀫𑀳𑀸𑀲𑀫𑀼𑀤𑁆𑀤𑀸𑀦𑀁 𑀉𑀤𑀓𑀢𑁄 𑀩𑀳𑀼𑀢𑀭’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀘𑀢𑀽𑀲𑀼 𑀲𑀫𑀼𑀤𑁆𑀤𑁂𑀲𑀼 𑀚𑀮𑀁 𑀧𑀭𑀺𑀢𑁆𑀢𑀓𑀁,

𑀢𑀢𑁄 𑀩𑀳𑀼𑀁 𑀅𑀲𑁆𑀲𑀼𑀚𑀮𑀁 𑀅𑀦𑀧𑁆𑀧𑀓𑀁;

𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑀲𑁆𑀲 𑀦𑀭𑀲𑁆𑀲 𑀲𑁄𑀘𑀦𑀸,

𑀓𑀺𑀁 𑀓𑀸𑀭𑀡𑀸 𑀅𑀫𑁆𑀫 𑀢𑀼𑀯𑀁 𑀧𑀫𑀚𑁆𑀚𑀲𑀻’’𑀢𑀺.

𑀏𑀯𑀁 𑀲𑀢𑁆𑀣𑀭𑀺 𑀅𑀦𑀫𑀢𑀕𑁆𑀕𑀧𑀭𑀺𑀬𑀸𑀬𑀁 𑀓𑀣𑁂𑀦𑁆𑀢𑁂 𑀢𑀲𑁆𑀲 𑀲𑀭𑀻𑀭𑁂 𑀲𑁄𑀓𑁄 𑀢𑀦𑀼𑀢𑁆𑀢𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀢𑀦𑀼𑀪𑀽𑀢𑀲𑁄𑀓𑀁 𑀜𑀢𑁆𑀯𑀸 𑀧𑀼𑀦 𑀲𑀢𑁆𑀣𑀸 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀧𑀝𑀸𑀘𑀸𑀭𑁂 𑀧𑀼𑀢𑁆𑀢𑀸𑀤𑀬𑁄 𑀦𑀸𑀫 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀲𑁆𑀲 𑀢𑀸𑀡𑀁 𑀯𑀸 𑀮𑁂𑀡𑀁 𑀯𑀸 𑀲𑀭𑀡𑀁 𑀯𑀸 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀚𑁆𑀚𑀫𑀸𑀦𑀸𑀧𑀺 𑀢𑁂 𑀦 𑀲𑀦𑁆𑀢𑀺𑀬𑁂𑀯, 𑀧𑀡𑁆𑀟𑀺𑀢𑁂𑀦 𑀧𑀦 𑀲𑀻𑀮𑀁 𑀯𑀺𑀲𑁄𑀥𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑀁 𑀔𑀺𑀧𑁆𑀧𑀫𑁂𑀯 𑀲𑁄𑀥𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀦 𑀲𑀦𑁆𑀢𑀺 𑀧𑀼𑀢𑁆𑀢𑀸 𑀢𑀸𑀡𑀸𑀬, 𑀦 𑀧𑀺𑀢𑀸 𑀦𑀸𑀧𑀺 𑀩𑀦𑁆𑀥𑀯𑀸;

𑀅𑀦𑁆𑀢𑀓𑁂𑀦𑀸𑀥𑀺𑀧𑀦𑁆𑀦𑀲𑁆𑀲, 𑀦𑀢𑁆𑀣𑀺 𑀜𑀸𑀢𑀻𑀲𑀼 𑀢𑀸𑀡𑀢𑀸. (𑀥. 𑀧. 𑁨𑁮𑁮; 𑀅𑀧. 𑀣𑁂𑀭𑀻 𑁨.𑁨.𑁫𑁦𑁧);

‘‘𑀏𑀢𑀫𑀢𑁆𑀣𑀯𑀲𑁆𑀲𑀁 𑀜𑀢𑁆𑀯𑀸, 𑀧𑀡𑁆𑀟𑀺𑀢𑁄 𑀲𑀻𑀮𑀲𑀁𑀯𑀼𑀢𑁄;

𑀦𑀺𑀩𑁆𑀩𑀸𑀦𑀕𑀫𑀦𑀁 𑀫𑀕𑁆𑀕𑀁, 𑀔𑀺𑀧𑁆𑀧𑀫𑁂𑀯 𑀯𑀺𑀲𑁄𑀥𑀬𑁂’’𑀢𑀺. (𑀥. 𑀧. 𑁨𑁮𑁯);

𑀤𑁂𑀲𑀦𑀸𑀯𑀲𑀸𑀦𑁂 𑀧𑀝𑀸𑀘𑀸𑀭𑀸 𑀫𑀳𑀸𑀧𑀣𑀯𑀺𑀬𑀁 𑀧𑀁𑀲𑀼𑀧𑀭𑀺𑀫𑀸𑀡𑁂 𑀓𑀺𑀮𑁂𑀲𑁂 𑀛𑀸𑀧𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀅𑀜𑁆𑀜𑁂𑀧𑀺 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺. 𑀲𑀸 𑀧𑀦 𑀲𑁄𑀢𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀲𑀢𑁆𑀣𑀸 𑀢𑀁 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑀁 𑀧𑀳𑀺𑀡𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀲𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑀸 𑀧𑀝𑀺𑀢𑀸𑀘𑀸𑀭𑀢𑁆𑀢𑀸 𑀧𑀝𑀸𑀘𑀸𑀭𑀸𑀢𑁆𑀯𑁂𑀯 𑀧𑀜𑁆𑀜𑀸𑀬𑀺. 𑀲𑀸 𑀏𑀓𑀤𑀺𑀯𑀲𑀁 𑀓𑀼𑀝𑁂𑀦 𑀉𑀤𑀓𑀁 𑀆𑀤𑀸𑀬 𑀧𑀸𑀤𑁂 𑀥𑁄𑀯𑀦𑁆𑀢𑀻 𑀉𑀤𑀓𑀁 𑀆𑀲𑀺𑀜𑁆𑀘𑀺, 𑀢𑀁 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀧𑀘𑁆𑀙𑀺𑀚𑁆𑀚𑀺. 𑀤𑀼𑀢𑀺𑀬𑀯𑀸𑀭𑁂 𑀆𑀲𑀺𑀢𑁆𑀢𑀁 𑀢𑀢𑁄 𑀤𑀽𑀭𑀢𑀭𑀁 𑀅𑀕𑀫𑀸𑀲𑀺. 𑀢𑀢𑀺𑀬𑀯𑀸𑀭𑁂 𑀆𑀲𑀺𑀢𑁆𑀢𑀁 𑀢𑀢𑁄𑀧𑀺 𑀤𑀽𑀭𑀢𑀭𑀦𑁆𑀢𑀺. 𑀲𑀸 𑀢𑀤𑁂𑀯 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀢𑀬𑁄 𑀯𑀬𑁂 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀫𑀬𑀸 𑀧𑀞𑀫𑀁 𑀆𑀲𑀺𑀢𑁆𑀢𑀁 𑀉𑀤𑀓𑀁 𑀯𑀺𑀬 𑀇𑀫𑁂 𑀲𑀢𑁆𑀢𑀸 𑀧𑀞𑀫𑀯𑀬𑁂𑀧𑀺 𑀫𑀭𑀦𑁆𑀢𑀺, 𑀢𑀢𑁄 𑀤𑀽𑀭𑀢𑀭𑀁 𑀕𑀢𑀁 𑀤𑀼𑀢𑀺𑀬𑀯𑀸𑀭𑁂 𑀆𑀲𑀺𑀢𑁆𑀢𑀁 𑀉𑀤𑀓𑀁 𑀯𑀺𑀬 𑀫𑀚𑁆𑀛𑀺𑀫𑀯𑀬𑁂𑀧𑀺 𑀫𑀭𑀦𑁆𑀢𑀺, 𑀢𑀢𑁄𑀧𑀺 𑀤𑀽𑀭𑀢𑀭𑀁 𑀕𑀢𑀁 𑀢𑀢𑀺𑀬𑀯𑀸𑀭𑁂 𑀆𑀲𑀺𑀢𑁆𑀢𑀁 𑀉𑀤𑀓𑀁 𑀯𑀺𑀬 𑀧𑀘𑁆𑀙𑀺𑀫𑀯𑀬𑁂𑀧𑀺 𑀫𑀭𑀦𑁆𑀢𑀺𑀬𑁂𑀯𑀸’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀢𑀲𑁆𑀲𑀸 𑀲𑀫𑁆𑀫𑀼𑀔𑁂 𑀞𑀢𑁆𑀯𑀸 𑀓𑀣𑁂𑀦𑁆𑀢𑁄 𑀯𑀺𑀬 ‘‘𑀏𑀯𑀫𑁂𑀢𑀁 𑀧𑀝𑀸𑀘𑀸𑀭𑁂, 𑀧𑀜𑁆𑀘𑀦𑁆𑀦𑀫𑁆𑀧𑀺 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁 𑀅𑀧𑀲𑁆𑀲𑀦𑁆𑀢𑀲𑁆𑀲 𑀯𑀲𑁆𑀲𑀲𑀢𑀁 𑀚𑀻𑀯𑀦𑀢𑁄 𑀢𑁂𑀲𑀁 𑀉𑀤𑀬𑀩𑁆𑀩𑀬𑀁 𑀧𑀲𑁆𑀲𑀦𑁆𑀢𑀲𑁆𑀲 𑀏𑀓𑀸𑀳𑀫𑁆𑀧𑀺 𑀏𑀓𑀓𑁆𑀔𑀡𑀫𑁆𑀧𑀺 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀕𑀸𑀣𑀫𑀸𑀳 𑁋

𑁧𑁧𑁩. ‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀅𑀧𑀲𑁆𑀲𑀁 𑀉𑀤𑀬𑀩𑁆𑀩𑀬𑀁;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀧𑀲𑁆𑀲𑀢𑁄 𑀉𑀤𑀬𑀩𑁆𑀩𑀬’’𑀦𑁆𑀢𑀺.

𑀢𑀢𑁆𑀣 𑀅𑀧𑀲𑁆𑀲𑀁 𑀉𑀤𑀬𑀩𑁆𑀩𑀬𑀦𑁆𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀧𑀜𑁆𑀘𑀯𑀻𑀲𑀢𑀺𑀬𑀸 𑀮𑀓𑁆𑀔𑀡𑁂𑀳𑀺 𑀉𑀤𑀬𑀜𑁆𑀘 𑀯𑀬𑀜𑁆𑀘 𑀅𑀧𑀲𑁆𑀲𑀦𑁆𑀢𑁄. 𑀧𑀲𑁆𑀲𑀢𑁄 𑀉𑀤𑀬𑀩𑁆𑀩𑀬𑀦𑁆𑀢𑀺 𑀢𑁂𑀲𑀁 𑀉𑀤𑀬𑀜𑁆𑀘 𑀯𑀬𑀜𑁆𑀘 𑀧𑀲𑁆𑀲𑀦𑁆𑀢𑀲𑁆𑀲. 𑀇𑀢𑀭𑀲𑁆𑀲 𑀚𑀻𑀯𑀦𑀢𑁄 𑀏𑀓𑀸𑀳𑀫𑁆𑀧𑀺 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀧𑀝𑀸𑀘𑀸𑀭𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀧𑀝𑀸𑀘𑀸𑀭𑀸𑀣𑁂𑀭𑀻𑀯𑀢𑁆𑀣𑀼 𑀤𑁆𑀯𑀸𑀤𑀲𑀫𑀁.