𑁧𑁩. 𑀓𑀺𑀲𑀸𑀕𑁄𑀢𑀫𑀻𑀯𑀢𑁆𑀣𑀼

𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀺𑀲𑀸𑀕𑁄𑀢𑀫𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀕𑁂𑀳𑁂 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁 𑀅𑀗𑁆𑀕𑀸𑀭𑀸 𑀏𑀯 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁂𑀝𑁆𑀞𑀺 𑀢𑀁 𑀤𑀺𑀲𑁆𑀯𑀸 𑀉𑀧𑁆𑀧𑀦𑁆𑀦𑀲𑁄𑀓𑁄 𑀆𑀳𑀸𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀺. 𑀢𑀲𑁆𑀲𑁂𑀓𑁄 𑀲𑀳𑀸𑀬𑀓𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸, ‘‘𑀲𑀫𑁆𑀫, 𑀓𑀲𑁆𑀫𑀸 𑀲𑁄𑀘𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸, ‘‘𑀲𑀫𑁆𑀫, 𑀫𑀸 𑀲𑁄𑀘𑀺, 𑀅𑀳𑀁 𑀏𑀓𑀁 𑀉𑀧𑀸𑀬𑀁 𑀚𑀸𑀦𑀸𑀫𑀺, 𑀢𑀁 𑀓𑀭𑁄𑀳𑀻’’𑀢𑀺. ‘‘𑀓𑀺𑀁 𑀓𑀭𑁄𑀫𑀺, 𑀲𑀫𑁆𑀫𑀸’’𑀢𑀺? 𑀅𑀢𑁆𑀢𑀦𑁄 𑀆𑀧𑀡𑁂 𑀓𑀺𑀮𑀜𑁆𑀚𑀁 𑀧𑀲𑀸𑀭𑁂𑀢𑁆𑀯𑀸 𑀢𑀢𑁆𑀣 𑀢𑁂 𑀅𑀗𑁆𑀕𑀸𑀭𑁂 𑀭𑀸𑀲𑀺𑀁 𑀓𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑁄 𑀯𑀺𑀬 𑀦𑀺𑀲𑀻𑀤, 𑀆𑀕𑀢𑀸𑀕𑀢𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀬𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀲𑁂𑀲𑀚𑀦𑀸 𑀯𑀢𑁆𑀣𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀯𑀺𑀓𑁆𑀓𑀺𑀡𑀦𑁆𑀢𑀺, 𑀢𑁆𑀯𑀁 𑀧𑀦 𑀅𑀗𑁆𑀕𑀸𑀭𑁂 𑀯𑀺𑀓𑁆𑀓𑀺𑀡𑀦𑁆𑀢𑁄 𑀦𑀺𑀲𑀺𑀦𑁆𑀦𑁄’’𑀢𑀺. 𑀢𑁂 𑀯𑀤𑁂𑀬𑁆𑀬𑀸𑀲𑀺 𑁋 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀅𑀯𑀺𑀓𑁆𑀓𑀺𑀡𑀦𑁆𑀢𑁄 𑀓𑀺𑀁 𑀓𑀭𑁄𑀫𑀻’’𑀢𑀺? 𑀬𑁄 𑀧𑀦 𑀢𑀁 𑀏𑀯𑀁 𑀯𑀤𑀢𑀺 ‘‘𑀲𑁂𑀲𑀚𑀦𑀸 𑀯𑀢𑁆𑀣𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀯𑀺𑀓𑁆𑀓𑀺𑀡𑀦𑁆𑀢𑀺, 𑀢𑁆𑀯𑀁 𑀧𑀦 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀯𑀺𑀓𑁆𑀓𑀺𑀡𑀦𑁆𑀢𑁄 𑀦𑀺𑀲𑀺𑀦𑁆𑀦𑁄’’𑀢𑀺. 𑀢𑀁 𑀯𑀤𑁂𑀬𑁆𑀬𑀸𑀲𑀺 ‘‘𑀓𑀳𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡’’𑀦𑁆𑀢𑀺. ‘‘𑀇𑀤’’𑀦𑁆𑀢𑀺 𑀘 𑀯𑀼𑀢𑁆𑀢𑁂 ‘‘𑀆𑀳𑀭, 𑀢𑀸𑀯 𑀦’’𑀦𑁆𑀢𑀺 𑀳𑀢𑁆𑀣𑁂𑀳𑀺 𑀧𑀝𑀺𑀘𑁆𑀙𑁂𑀬𑁆𑀬𑀸𑀲𑀺. 𑀏𑀯𑀁 𑀤𑀺𑀦𑁆𑀦𑀁 𑀢𑀯 𑀳𑀢𑁆𑀣𑁂 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀪𑀯𑀺𑀲𑁆𑀲𑀢𑀺. 𑀲𑀸 𑀧𑀦 𑀲𑀘𑁂 𑀓𑀼𑀫𑀸𑀭𑀺𑀓𑀸 𑀳𑁄𑀢𑀺, 𑀢𑀯 𑀕𑁂𑀳𑁂 𑀧𑀼𑀢𑁆𑀢𑀲𑁆𑀲 𑀦𑀁 𑀆𑀳𑀭𑀺𑀢𑁆𑀯𑀸 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁 𑀢𑀲𑁆𑀲𑀸 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀢𑀸𑀬 𑀤𑀺𑀦𑁆𑀦𑀁 𑀯𑀮𑀜𑁆𑀚𑁂𑀬𑁆𑀬𑀸𑀲𑀺. 𑀲𑀘𑁂 𑀓𑀼𑀫𑀸𑀭𑀓𑁄 𑀳𑁄𑀢𑀺, 𑀢𑀯 𑀕𑁂𑀳𑁂 𑀯𑀬𑀧𑁆𑀧𑀢𑁆𑀢𑀁 𑀥𑀻𑀢𑀭𑀁 𑀢𑀲𑁆𑀲 𑀤𑀢𑁆𑀯𑀸 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀢𑁂𑀦 𑀤𑀺𑀦𑁆𑀦𑀁 𑀯𑀮𑀜𑁆𑀚𑁂𑀬𑁆𑀬𑀸𑀲𑀻𑀢𑀺. 𑀲𑁄 ‘‘𑀪𑀤𑁆𑀤𑀓𑁄 𑀉𑀧𑀸𑀬𑁄’’𑀢𑀺 𑀅𑀢𑁆𑀢𑀦𑁄 𑀆𑀧𑀡𑁂 𑀅𑀗𑁆𑀕𑀸𑀭𑁂 𑀭𑀸𑀲𑀺𑀁 𑀓𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑁄 𑀯𑀺𑀬 𑀦𑀺𑀲𑀻𑀤𑀺. 𑀬𑁂 𑀧𑀦 𑀦𑀁 𑀏𑀯𑀫𑀸𑀳𑀁𑀲𑀼 𑁋 ‘‘𑀲𑁂𑀲𑀚𑀦𑀸 𑀯𑀢𑁆𑀣𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀯𑀺𑀓𑁆𑀓𑀺𑀡𑀦𑁆𑀢𑀺, 𑀓𑀺𑀁 𑀧𑀦 𑀢𑁆𑀯𑀁 𑀅𑀗𑁆𑀕𑀸𑀭𑁂 𑀯𑀺𑀓𑁆𑀓𑀺𑀡𑀦𑁆𑀢𑁄 𑀦𑀺𑀲𑀺𑀦𑁆𑀦𑁄’’𑀢𑀺? 𑀢𑁂𑀲𑀁 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀅𑀯𑀺𑀓𑁆𑀓𑀺𑀡𑀦𑁆𑀢𑁄 𑀓𑀺𑀁 𑀓𑀭𑁄𑀫𑀻’’𑀢𑀺 𑀧𑀝𑀺𑀯𑀘𑀦𑀁 𑀅𑀤𑀸𑀲𑀺. 𑀅𑀣𑁂𑀓𑀸 𑀕𑁄𑀢𑀫𑀻 𑀦𑀸𑀫 𑀓𑀼𑀫𑀸𑀭𑀺𑀓𑀸 𑀓𑀺𑀲𑀲𑀭𑀻𑀭𑀢𑀸𑀬 𑀓𑀺𑀲𑀸𑀕𑁄𑀢𑀫𑀻𑀢𑀺 𑀧𑀜𑁆𑀜𑀸𑀬𑀫𑀸𑀦𑀸 𑀧𑀭𑀺𑀚𑀺𑀡𑁆𑀡𑀓𑀼𑀮𑀲𑁆𑀲 𑀥𑀻𑀢𑀸 𑀅𑀢𑁆𑀢𑀦𑁄 𑀏𑀓𑁂𑀦 𑀓𑀺𑀘𑁆𑀘𑁂𑀦 𑀆𑀧𑀡𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀲𑁂𑀝𑁆𑀞𑀺𑀁 𑀤𑀺𑀲𑁆𑀯𑀸 𑀏𑀯𑀫𑀸𑀳 𑁋 ‘‘𑀓𑀺𑀁, 𑀢𑀸𑀢, 𑀲𑁂𑀲𑀚𑀦𑀸 𑀯𑀢𑁆𑀣𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀯𑀺𑀓𑁆𑀓𑀺𑀡𑀦𑁆𑀢𑀺, 𑀢𑁆𑀯𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀯𑀺𑀓𑁆𑀓𑀺𑀡𑀦𑁆𑀢𑁄 𑀦𑀺𑀲𑀺𑀦𑁆𑀦𑁄’’𑀢𑀺? ‘‘𑀓𑀳𑀁, 𑀅𑀫𑁆𑀫, 𑀳𑀺𑀭𑀜𑁆𑀜𑀲𑀼𑀯𑀡𑁆𑀡’’𑀦𑁆𑀢𑀺? ‘‘𑀦𑀦𑀼 ‘𑀢𑁆𑀯𑀁 𑀢𑀤𑁂𑀯 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄𑀲𑀻’𑀢𑀺, 𑀆𑀳𑀭, 𑀢𑀸𑀯 𑀦𑀁, 𑀅𑀫𑁆𑀫𑀸’’𑀢𑀺. 𑀲𑀸 𑀳𑀢𑁆𑀣𑀧𑀽𑀭𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑁂𑀲𑀼 𑀞𑀧𑁂𑀲𑀺, 𑀢𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀫𑁂𑀯 𑀅𑀳𑁄𑀲𑀺.

𑀅𑀣 𑀦𑀁 𑀲𑁂𑀝𑁆𑀞𑀺 ‘‘𑀓𑀢𑀭𑀁 𑀢𑁂, 𑀅𑀫𑁆𑀫, 𑀕𑁂𑀳’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀲𑀼𑀓𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀲𑀸 𑀅𑀲𑁆𑀲𑀸𑀫𑀺𑀓𑀪𑀸𑀯𑀁 𑀜𑀢𑁆𑀯𑀸 𑀥𑀦𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑁆𑀲 𑀆𑀦𑁂𑀢𑁆𑀯𑀸 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁 𑀧𑀝𑀺𑀘𑁆𑀙𑀸𑀧𑁂𑀲𑀺. 𑀲𑀩𑁆𑀩𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀫𑁂𑀯 𑀅𑀳𑁄𑀲𑀺. 𑀢𑀲𑁆𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀕𑀩𑁆𑀪𑁄 𑀧𑀢𑀺𑀝𑁆𑀞𑀳𑀺. 𑀲𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀲𑁄 𑀧𑀤𑀲𑀸 𑀕𑀫𑀦𑀓𑀸𑀮𑁂 𑀓𑀸𑀮𑀫𑀓𑀸𑀲𑀺. 𑀲𑀸 𑀅𑀤𑀺𑀝𑁆𑀞𑀧𑀼𑀩𑁆𑀩𑀫𑀭𑀡𑀢𑀸𑀬 𑀢𑀁 𑀛𑀸𑀧𑁂𑀢𑀼𑀁 𑀦𑀻𑀳𑀭𑀦𑁆𑀢𑁂 𑀯𑀸𑀭𑁂𑀢𑁆𑀯𑀸 ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀪𑁂𑀲𑀚𑁆𑀚𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀫𑀢𑀓𑀴𑁂𑀯𑀭𑀁 𑀅𑀗𑁆𑀓𑁂𑀦𑀸𑀤𑀸𑀬 ‘‘𑀅𑀧𑀺 𑀦𑀼 𑀫𑁂 𑀧𑀼𑀢𑁆𑀢𑀲𑁆𑀲 𑀪𑁂𑀲𑀚𑁆𑀚𑀁 𑀚𑀸𑀦𑀸𑀣𑀸’’𑀢𑀺 𑀧𑀼𑀘𑁆𑀙𑀦𑁆𑀢𑀻 𑀖𑀭𑀧𑀝𑀺𑀧𑀸𑀝𑀺𑀬𑀸 𑀯𑀺𑀘𑀭𑀢𑀺. 𑀅𑀣 𑀦𑀁 𑀫𑀦𑀼𑀲𑁆𑀲𑀸, ‘‘𑀅𑀫𑁆𑀫, 𑀢𑁆𑀯𑀁 𑀉𑀫𑁆𑀫𑀢𑁆𑀢𑀺𑀓𑀸 𑀚𑀸𑀢𑀸, 𑀫𑀢𑀓𑀧𑀼𑀢𑁆𑀢𑀲𑁆𑀲 𑀪𑁂𑀲𑀚𑁆𑀚𑀁 𑀧𑀼𑀘𑁆𑀙𑀦𑁆𑀢𑀻 𑀯𑀺𑀘𑀭𑀲𑀻’’𑀢𑀺 𑀯𑀤𑀦𑁆𑀢𑀺. 𑀲𑀸 ‘‘𑀅𑀯𑀲𑁆𑀲𑀁 𑀫𑀫 𑀧𑀼𑀢𑁆𑀢𑀲𑁆𑀲 𑀪𑁂𑀲𑀚𑁆𑀚𑀁 𑀚𑀸𑀦𑀦𑀓𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀫𑀜𑁆𑀜𑀫𑀸𑀦𑀸 𑀯𑀺𑀘𑀭𑀢𑀺. 𑀅𑀣 𑀦𑀁 𑀏𑀓𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀤𑀺𑀲𑁆𑀯𑀸, ‘‘𑀅𑀬𑀁 𑀫𑀫 𑀥𑀻𑀢𑀸 𑀧𑀞𑀫𑀁 𑀧𑀼𑀢𑁆𑀢𑀓𑀁 𑀯𑀺𑀚𑀸𑀢𑀸 𑀪𑀯𑀺𑀲𑁆𑀲𑀢𑀺 𑀅𑀤𑀺𑀝𑁆𑀞𑀧𑀼𑀩𑁆𑀩𑀫𑀭𑀡𑀸, 𑀫𑀬𑀸 𑀇𑀫𑀺𑀲𑁆𑀲𑀸 𑀅𑀯𑀲𑁆𑀲𑀬𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋 ‘‘𑀅𑀫𑁆𑀫, 𑀅𑀳𑀁 𑀪𑁂𑀲𑀚𑁆𑀚𑀁 𑀦 𑀚𑀸𑀦𑀸𑀫𑀺, 𑀪𑁂𑀲𑀚𑁆𑀚𑀚𑀸𑀦𑀦𑀓𑀁 𑀧𑀦 𑀚𑀸𑀦𑀸𑀫𑀻’’𑀢𑀺. ‘‘𑀓𑁄 𑀚𑀸𑀦𑀸𑀢𑀺, 𑀢𑀸𑀢𑀸’’𑀢𑀺? ‘‘𑀲𑀢𑁆𑀣𑀸, 𑀅𑀫𑁆𑀫, 𑀚𑀸𑀦𑀸𑀢𑀺, 𑀕𑀘𑁆𑀙, 𑀢𑀁 𑀧𑀼𑀘𑁆𑀙𑀸𑀳𑀻’’𑀢𑀺. 𑀲𑀸 ‘‘𑀕𑀫𑀺𑀲𑁆𑀲𑀸𑀫𑀺, 𑀢𑀸𑀢, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀢𑀸𑀢𑀸’’𑀢𑀺 𑀯𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀧𑀼𑀘𑁆𑀙𑀺 𑁋 ‘‘𑀢𑀼𑀫𑁆𑀳𑁂 𑀓𑀺𑀭 𑀫𑁂 𑀧𑀼𑀢𑁆𑀢𑀲𑁆𑀲 𑀪𑁂𑀲𑀚𑁆𑀚𑀁 𑀚𑀸𑀦𑀸𑀣, 𑀪𑀦𑁆𑀢𑁂’’𑀢𑀺? ‘‘𑀆𑀫, 𑀚𑀸𑀦𑀸𑀫𑀻’’𑀢𑀺. ‘‘𑀓𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀅𑀘𑁆𑀙𑀭𑀕𑁆𑀕𑀳𑀡𑀫𑀢𑁆𑀢𑁂 𑀲𑀺𑀤𑁆𑀥𑀢𑁆𑀣𑀓𑁂 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺. ‘‘𑀮𑀪𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’. ‘‘𑀓𑀲𑁆𑀲 𑀧𑀦 𑀕𑁂𑀳𑁂 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀬𑀲𑁆𑀲 𑀕𑁂𑀳𑁂 𑀧𑀼𑀢𑁆𑀢𑁄 𑀯𑀸 𑀥𑀻𑀢𑀸 𑀯𑀸 𑀦 𑀓𑁄𑀘𑀺 𑀫𑀢𑀧𑀼𑀩𑁆𑀩𑁄’’𑀢𑀺. 𑀲𑀸 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀫𑀢𑀧𑀼𑀢𑁆𑀢𑀓𑀁 𑀅𑀗𑁆𑀓𑁂𑀦𑀸𑀤𑀸𑀬 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀧𑀞𑀫𑀕𑁂𑀳𑀲𑁆𑀲 𑀤𑁆𑀯𑀸𑀭𑁂 𑀞𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀲𑀺𑀤𑁆𑀥𑀢𑁆𑀣𑀓𑁄, 𑀧𑀼𑀢𑁆𑀢𑀲𑁆𑀲 𑀓𑀺𑀭 𑀫𑁂 𑀪𑁂𑀲𑀚𑁆𑀚𑀁 𑀏𑀢’’𑀦𑁆𑀢𑀺 𑀯𑀢𑁆𑀯𑀸 ‘‘𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁂 𑀢𑁂𑀦 𑀳𑀺 𑀤𑁂𑀣𑀸𑀢𑀺. 𑀢𑁂𑀳𑀺 𑀆𑀳𑀭𑀺𑀢𑁆𑀯𑀸 𑀲𑀺𑀤𑁆𑀥𑀢𑁆𑀣𑀓𑁂𑀲𑀼 𑀤𑀺𑀬𑁆𑀬𑀫𑀸𑀦𑁂𑀲𑀼 ‘‘𑀇𑀫𑀲𑁆𑀫𑀺𑀁 𑀕𑁂𑀳𑁂 𑀧𑀼𑀢𑁆𑀢𑁄 𑀯𑀸 𑀥𑀻𑀢𑀸 𑀯𑀸 𑀫𑀢𑀧𑀼𑀩𑁆𑀩𑁄 𑀓𑁄𑀘𑀺 𑀦𑀢𑁆𑀣𑀺, 𑀅𑀫𑁆𑀫𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀓𑀺𑀁 𑀯𑀤𑁂𑀲𑀺, 𑀅𑀫𑁆𑀫? 𑀚𑀻𑀯𑀫𑀸𑀦𑀸 𑀳𑀺 𑀓𑀢𑀺𑀧𑀬𑀸, 𑀫𑀢𑀓𑀸 𑀏𑀯 𑀩𑀳𑀼𑀓𑀸’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀕𑀡𑁆𑀳𑀣 𑀯𑁄 𑀲𑀺𑀤𑁆𑀥𑀢𑁆𑀣𑀓𑁂, 𑀦𑁂𑀢𑀁 𑀫𑀫 𑀧𑀼𑀢𑁆𑀢𑀲𑁆𑀲 𑀪𑁂𑀲𑀚𑁆𑀚’’𑀦𑁆𑀢𑀺 𑀧𑀝𑀺𑀅𑀤𑀸𑀲𑀺.

𑀲𑀸 𑀇𑀫𑀺𑀦𑀸 𑀦𑀻𑀬𑀸𑀫𑁂𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀦𑀁 𑀧𑀼𑀘𑁆𑀙𑀦𑁆𑀢𑀻 𑀯𑀺𑀘𑀭𑀺. 𑀲𑀸 𑀏𑀓𑀕𑁂𑀳𑁂𑀧𑀺 𑀲𑀺𑀤𑁆𑀥𑀢𑁆𑀣𑀓𑁂 𑀅𑀕𑀳𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀪𑀸𑀭𑀺𑀬𑀁 𑀓𑀫𑁆𑀫𑀁, 𑀅𑀳𑀁 ‘𑀫𑀫𑁂𑀯 𑀧𑀼𑀢𑁆𑀢𑁄 𑀫𑀢𑁄’𑀢𑀺 𑀲𑀜𑁆𑀜𑀫𑀓𑀸𑀲𑀺𑀁, 𑀲𑀓𑀮𑀕𑀸𑀫𑁂𑀧𑀺 𑀧𑀦 𑀚𑀻𑀯𑀦𑁆𑀢𑁂𑀳𑀺 𑀫𑀢𑀓𑀸𑀯 𑀩𑀳𑀼𑀢𑀭𑀸’’𑀢𑀺. 𑀢𑀲𑁆𑀲𑀸 𑀏𑀯𑀁 𑀘𑀺𑀦𑁆𑀢𑀬𑀫𑀸𑀦𑀸𑀬 𑀧𑀼𑀢𑁆𑀢𑀲𑀺𑀦𑁂𑀳𑀁 𑀫𑀼𑀤𑀼𑀓𑀳𑀤𑀬𑀁 𑀣𑀤𑁆𑀥𑀪𑀸𑀯𑀁 𑀅𑀕𑀫𑀸𑀲𑀺. 𑀲𑀸 𑀧𑀼𑀢𑁆𑀢𑀁 𑀅𑀭𑀜𑁆𑀜𑁂 𑀙𑀟𑁆𑀟𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀮𑀤𑁆𑀥𑀸 𑀢𑁂 𑀏𑀓𑀘𑁆𑀙𑀭𑀫𑀢𑁆𑀢𑀸 𑀲𑀺𑀤𑁆𑀥𑀢𑁆𑀣𑀓𑀸’’𑀢𑀺 𑀆𑀳. ‘‘𑀦 𑀮𑀤𑁆𑀥𑀸, 𑀪𑀦𑁆𑀢𑁂, 𑀲𑀓𑀮𑀕𑀸𑀫𑁂 𑀚𑀻𑀯𑀦𑁆𑀢𑁂𑀳𑀺 𑀫𑀢𑀓𑀸𑀯 𑀩𑀳𑀼𑀢𑀭𑀸’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀢𑁆𑀯𑀁 ‘𑀫𑀫𑁂𑀯 𑀧𑀼𑀢𑁆𑀢𑁄 𑀫𑀢𑁄’𑀢𑀺 𑀲𑀮𑁆𑀮𑀓𑁆𑀔𑁂𑀲𑀺, 𑀥𑀼𑀯𑀥𑀫𑁆𑀫𑁄 𑀏𑀲 𑀲𑀢𑁆𑀢𑀸𑀦𑀁. 𑀫𑀘𑁆𑀘𑀼𑀭𑀸𑀚𑀸 𑀳𑀺 𑀲𑀩𑁆𑀩𑀲𑀢𑁆𑀢𑁂 𑀅𑀧𑀭𑀺𑀧𑀼𑀡𑁆𑀡𑀚𑁆𑀛𑀸𑀲𑀬𑁂 𑀏𑀯 𑀫𑀳𑁄𑀖𑁄 𑀯𑀺𑀬 𑀧𑀭𑀺𑀓𑀟𑁆𑀠𑀫𑀸𑀦𑁄𑀬𑁂𑀯 𑀅𑀧𑀸𑀬𑀲𑀫𑀼𑀤𑁆𑀤𑁂 𑀧𑀓𑁆𑀔𑀺𑀧𑀢𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀢𑀁 𑀧𑀼𑀢𑁆𑀢𑀧𑀲𑀼𑀲𑀫𑁆𑀫𑀢𑁆𑀢𑀁, 𑀩𑁆𑀬𑀸𑀲𑀢𑁆𑀢𑀫𑀦𑀲𑀁 𑀦𑀭𑀁;

𑀲𑀼𑀢𑁆𑀢𑀁 𑀕𑀸𑀫𑀁 𑀫𑀳𑁄𑀖𑁄𑀯, 𑀫𑀘𑁆𑀘𑀼 𑀆𑀤𑀸𑀬 𑀕𑀘𑁆𑀙𑀢𑀻’’𑀢𑀺. (𑀥. 𑀧. 𑁨𑁮𑁭);

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀓𑀺𑀲𑀸𑀕𑁄𑀢𑀫𑀻 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀅𑀜𑁆𑀜𑁂𑀧𑀺 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀸 𑀧𑀦 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺, 𑀲𑀢𑁆𑀣𑀸 𑀢𑀁 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀲𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑀸 𑀓𑀺𑀲𑀸𑀕𑁄𑀢𑀫𑀻 𑀣𑁂𑀭𑀻𑀢𑀺 𑀧𑀜𑁆𑀜𑀸𑀬𑀺. 𑀲𑀸 𑀏𑀓𑀤𑀺𑀯𑀲𑀁 𑀉𑀧𑁄𑀲𑀣𑀸𑀕𑀸𑀭𑁂 𑀯𑀸𑀭𑀁 𑀧𑀢𑁆𑀯𑀸 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀤𑀻𑀧𑀚𑀸𑀮𑀸 𑀉𑀧𑁆𑀧𑀚𑁆𑀚𑀦𑁆𑀢𑀺𑀬𑁄 𑀘 𑀪𑀺𑀚𑁆𑀚𑀦𑁆𑀢𑀺𑀬𑁄 𑀘 𑀤𑀺𑀲𑁆𑀯𑀸 ‘‘𑀏𑀯𑀫𑁂𑀯 𑀇𑀫𑁂 𑀲𑀢𑁆𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑁂𑀯 𑀦𑀺𑀭𑀼𑀚𑁆𑀛𑀦𑁆𑀢𑀺 𑀘, 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀸 𑀏𑀯 𑀦 𑀧𑀜𑁆𑀜𑀸𑀬𑀦𑁆𑀢𑀻’’𑀢𑀺 𑀆𑀭𑀫𑁆𑀫𑀡𑀁 𑀅𑀕𑁆𑀕𑀳𑁂𑀲𑀺. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀢𑀲𑁆𑀲𑀸 𑀲𑀫𑁆𑀫𑀼𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀣𑁂𑀦𑁆𑀢𑁄 𑀯𑀺𑀬 ‘‘𑀏𑀯𑀫𑁂𑀯, 𑀕𑁄𑀢𑀫𑀺, 𑀇𑀫𑁂 𑀲𑀢𑁆𑀢𑀸 𑀤𑀻𑀧𑀚𑀸𑀮𑀸 𑀯𑀺𑀬 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑁂𑀯 𑀦𑀺𑀭𑀼𑀚𑁆𑀛𑀦𑁆𑀢𑀺 𑀘, 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀸 𑀏𑀯 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀏𑀯𑀁 𑀦𑀺𑀩𑁆𑀩𑀸𑀦𑀁 𑀅𑀧𑀲𑁆𑀲𑀦𑁆𑀢𑀸𑀦𑀁 𑀯𑀲𑁆𑀲𑀲𑀢𑀁 𑀚𑀻𑀯𑀦𑀢𑁄 𑀦𑀺𑀩𑁆𑀩𑀸𑀦𑀁 𑀧𑀲𑁆𑀲𑀦𑁆𑀢𑀲𑁆𑀲 𑀔𑀡𑀫𑀢𑁆𑀢𑀫𑁆𑀧𑀺 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁪. ‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀅𑀧𑀲𑁆𑀲𑀁 𑀅𑀫𑀢𑀁 𑀧𑀤𑀁;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀧𑀲𑁆𑀲𑀢𑁄 𑀅𑀫𑀢𑀁 𑀧𑀤’’𑀦𑁆𑀢𑀺.

𑀢𑀢𑁆𑀣 𑀅𑀫𑀢𑀁 𑀧𑀤𑀦𑁆𑀢𑀺 𑀫𑀭𑀡𑀯𑀺𑀭𑀳𑀺𑀢𑀓𑁄𑀝𑁆𑀞𑀸𑀲𑀁, 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀤𑁂𑀲𑀦𑀸𑀯𑀲𑀸𑀦𑁂 𑀓𑀺𑀲𑀸𑀕𑁄𑀢𑀫𑀻 𑀬𑀣𑀸𑀦𑀺𑀲𑀺𑀦𑁆𑀦𑀸𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀻𑀢𑀺.

𑀓𑀺𑀲𑀸𑀕𑁄𑀢𑀫𑀻𑀯𑀢𑁆𑀣𑀼 𑀢𑁂𑀭𑀲𑀫𑀁.