𑁮. 𑀲𑀳𑀲𑁆𑀲𑀯𑀕𑁆𑀕𑁄

𑁧. 𑀢𑀫𑁆𑀩𑀤𑀸𑀞𑀺𑀓𑀘𑁄𑀭𑀖𑀸𑀢𑀓𑀯𑀢𑁆𑀣𑀼

𑀲𑀳𑀲𑁆𑀲𑀫𑀧𑀺 𑀘𑁂 𑀯𑀸𑀘𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀢𑀫𑁆𑀩𑀤𑀸𑀞𑀺𑀓𑀘𑁄𑀭𑀖𑀸𑀢𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀽𑀦𑀧𑀜𑁆𑀘𑀲𑀢𑀸 𑀓𑀺𑀭 𑀘𑁄𑀭𑀸 𑀕𑀸𑀫𑀖𑀸𑀢𑀓𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀼𑀁. 𑀅𑀣𑁂𑀓𑁄 𑀧𑀼𑀭𑀺𑀲𑁄 𑀦𑀺𑀩𑁆𑀩𑀺𑀤𑁆𑀥𑀧𑀺𑀗𑁆𑀕𑀮𑁄 𑀢𑀫𑁆𑀩𑀤𑀸𑀞𑀺𑀓𑁄 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀅𑀳𑀫𑁆𑀧𑀺 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀘𑁄𑀭𑀚𑁂𑀝𑁆𑀞𑀓𑀲𑁆𑀲 𑀤𑀲𑁆𑀲𑁂𑀢𑁆𑀯𑀸 ‘‘𑀅𑀬𑀫𑁆𑀧𑀺 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀯𑀲𑀺𑀢𑀼𑀁 𑀇𑀘𑁆𑀙𑀢𑀻’’𑀢𑀺 𑀆𑀳𑀁𑀲𑀼. 𑀅𑀣 𑀦𑀁 𑀘𑁄𑀭𑀚𑁂𑀝𑁆𑀞𑀓𑁄 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀫𑀸𑀢𑀼 𑀣𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀺𑀢𑀼 𑀯𑀸 𑀕𑀮𑀮𑁄𑀳𑀺𑀢𑀁 𑀦𑀻𑀳𑀭𑀺𑀢𑁆𑀯𑀸 𑀔𑀸𑀤𑀦𑀲𑀫𑀢𑁆𑀣𑁄 𑀅𑀢𑀺𑀓𑀓𑁆𑀔𑀴𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀦𑀢𑁆𑀣𑁂𑀢𑀲𑁆𑀲 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀯𑀲𑀦𑀓𑀺𑀘𑁆𑀘’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀲𑁄 𑀏𑀯𑀁 𑀧𑀝𑀺𑀓𑁆𑀔𑀺𑀢𑁆𑀢𑁄𑀧𑀺 𑀆𑀕𑀦𑁆𑀢𑁆𑀯𑀸 𑀏𑀓𑀁 𑀢𑀲𑁆𑀲𑁂𑀯 𑀅𑀦𑁆𑀢𑁂𑀯𑀸𑀲𑀺𑀓𑀁 𑀉𑀧𑀝𑁆𑀞𑀳𑀦𑁆𑀢𑁄 𑀆𑀭𑀸𑀥𑁂𑀲𑀺. 𑀲𑁄 𑀢𑀁 𑀆𑀤𑀸𑀬 𑀘𑁄𑀭𑀚𑁂𑀝𑁆𑀞𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀲𑀸𑀫𑀺, 𑀪𑀤𑁆𑀤𑀓𑁄 𑀏𑀲, 𑀅𑀫𑁆𑀳𑀸𑀓𑀁 𑀉𑀧𑀓𑀸𑀭𑀓𑁄, 𑀲𑀗𑁆𑀕𑀡𑁆𑀳𑀣 𑀦’’𑀦𑁆𑀢𑀺 𑀬𑀸𑀘𑀺𑀢𑁆𑀯𑀸 𑀘𑁄𑀭𑀚𑁂𑀝𑁆𑀞𑀓𑀁 𑀧𑀝𑀺𑀘𑁆𑀙𑀸𑀧𑁂𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀦𑀸𑀕𑀭𑀸 𑀭𑀸𑀚𑀧𑀼𑀭𑀺𑀲𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀢𑁂 𑀘𑁄𑀭𑁂 𑀕𑀳𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀫𑀳𑀸𑀫𑀘𑁆𑀘𑀸𑀦𑀁 𑀲𑀦𑁆𑀢𑀺𑀓𑀁 𑀦𑀬𑀺𑀁𑀲𑀼. 𑀅𑀫𑀘𑁆𑀘𑀸 𑀢𑁂𑀲𑀁 𑀨𑀭𑀲𑀼𑀦𑀸 𑀲𑀻𑀲𑀘𑁆𑀙𑁂𑀤𑀁 𑀆𑀡𑀸𑀧𑁂𑀲𑀼𑀁. 𑀢𑀢𑁄 ‘‘𑀓𑁄 𑀦𑀼 𑀔𑁄 𑀇𑀫𑁂 𑀫𑀸𑀭𑁂𑀲𑁆𑀲𑀢𑀻’’𑀢𑀺 𑀧𑀭𑀺𑀬𑁂𑀲𑀦𑁆𑀢𑀸 𑀢𑁂 𑀫𑀸𑀭𑁂𑀢𑀼𑀁 𑀇𑀘𑁆𑀙𑀦𑁆𑀢𑀁 𑀓𑀜𑁆𑀘𑀺 𑀅𑀤𑀺𑀲𑁆𑀯𑀸 𑀘𑁄𑀭𑀚𑁂𑀝𑁆𑀞𑀓𑀁 𑀆𑀳𑀁𑀲𑀼 𑁋 ‘‘𑀢𑁆𑀯𑀁 𑀇𑀫𑁂 𑀫𑀸𑀭𑁂𑀢𑁆𑀯𑀸 𑀚𑀻𑀯𑀺𑀢𑀜𑁆𑀘𑁂𑀯 𑀮𑀪𑀺𑀲𑁆𑀲𑀲𑀺 𑀲𑀫𑁆𑀫𑀸𑀦𑀜𑁆𑀘, 𑀫𑀸𑀭𑁂𑀳𑀺 𑀦𑁂’’𑀢𑀺. 𑀲𑁄𑀧𑀺 𑀅𑀢𑁆𑀢𑀸𑀦𑀁 𑀦𑀺𑀲𑁆𑀲𑀸𑀬 𑀯𑀲𑀺𑀢𑀢𑁆𑀢𑀸 𑀢𑁂 𑀫𑀸𑀭𑁂𑀢𑀼𑀁 𑀦 𑀇𑀘𑁆𑀙𑀺. 𑀏𑀢𑁂𑀦𑀽𑀧𑀸𑀬𑁂𑀦 𑀏𑀓𑀽𑀦𑀧𑀜𑁆𑀘𑀲𑀢𑁂 𑀧𑀼𑀘𑁆𑀙𑀺𑀁𑀲𑀼, 𑀲𑀩𑁆𑀩𑁂𑀧𑀺 𑀦 𑀇𑀘𑁆𑀙𑀺𑀁𑀲𑀼. 𑀲𑀩𑁆𑀩𑀧𑀘𑁆𑀙𑀸 𑀢𑀁 𑀦𑀺𑀩𑁆𑀩𑀺𑀤𑁆𑀥𑀧𑀺𑀗𑁆𑀕𑀮𑀁 𑀢𑀫𑁆𑀩𑀤𑀸𑀞𑀺𑀓𑀁 𑀧𑀼𑀘𑁆𑀙𑀺𑀁𑀲𑀼. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑁂 𑀲𑀩𑁆𑀩𑁂𑀧𑀺 𑀫𑀸𑀭𑁂𑀢𑁆𑀯𑀸 𑀚𑀻𑀯𑀺𑀢𑀜𑁆𑀘𑁂𑀯 𑀲𑀫𑁆𑀫𑀸𑀦𑀜𑁆𑀘 𑀮𑀪𑀺. 𑀏𑀢𑁂𑀦𑀽𑀧𑀸𑀬𑁂𑀦 𑀦𑀕𑀭𑀲𑁆𑀲 𑀤𑀓𑁆𑀔𑀺𑀡𑀢𑁄𑀧𑀺 𑀧𑀜𑁆𑀘 𑀘𑁄𑀭𑀲𑀢𑀸𑀦𑀺 𑀆𑀦𑁂𑀢𑁆𑀯𑀸 𑀅𑀫𑀘𑁆𑀘𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀳𑀺 𑀢𑁂𑀲𑀫𑁆𑀧𑀺 𑀲𑀻𑀲𑀘𑁆𑀙𑁂𑀤𑁂 𑀆𑀡𑀢𑁆𑀢𑁂 𑀘𑁄𑀭𑀚𑁂𑀝𑁆𑀞𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀸 𑀓𑀜𑁆𑀘𑀺 𑀫𑀸𑀭𑁂𑀢𑀼𑀁 𑀇𑀘𑁆𑀙𑀦𑁆𑀢𑀁 𑀅𑀤𑀺𑀲𑁆𑀯𑀸 ‘‘𑀧𑀼𑀭𑀺𑀫𑀤𑀺𑀯𑀲𑁂 𑀏𑀓𑁄 𑀧𑀼𑀭𑀺𑀲𑁄 𑀧𑀜𑁆𑀘𑀲𑀢𑁂 𑀘𑁄𑀭𑁂 𑀫𑀸𑀭𑁂𑀲𑀺, 𑀓𑀳𑀁 𑀦𑀼 𑀔𑁄 𑀲𑁄’’𑀢𑀺. ‘‘𑀅𑀲𑀼𑀓𑀝𑁆𑀞𑀸𑀦𑁂 𑀅𑀫𑁆𑀳𑁂𑀢𑀺 𑀤𑀺𑀝𑁆𑀞𑁄’’𑀢𑀺 𑀯𑀼𑀢𑁆𑀢𑁂 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀇𑀫𑁂 𑀫𑀸𑀭𑁂𑀳𑀺, 𑀲𑀫𑁆𑀫𑀸𑀦𑀁 𑀮𑀘𑁆𑀙𑀲𑀻’’𑀢𑀺 𑀆𑀡𑀸𑀧𑁂𑀲𑀼𑀁. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑁂 𑀲𑀩𑁆𑀩𑁂𑀧𑀺 𑀫𑀸𑀭𑁂𑀢𑁆𑀯𑀸 𑀲𑀫𑁆𑀫𑀸𑀦𑀁 𑀮𑀪𑀺. 𑀅𑀣 𑀦𑀁 ‘‘𑀪𑀤𑁆𑀤𑀓𑁄 𑀅𑀬𑀁 𑀧𑀼𑀭𑀺𑀲𑁄, 𑀦𑀺𑀩𑀤𑁆𑀥𑀁 𑀘𑁄𑀭𑀖𑀸𑀢𑀓𑀫𑁂𑀯 𑀏𑀢𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀫𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀢𑀁 𑀞𑀸𑀦𑀦𑁆𑀢𑀭𑀁 𑀤𑀢𑁆𑀯𑀸𑀯 𑀲𑀫𑁆𑀫𑀸𑀦𑀁 𑀓𑀭𑀺𑀁𑀲𑀼. 𑀲𑁄 𑀧𑀘𑁆𑀙𑀺𑀫𑀤𑀺𑀲𑀢𑁄𑀧𑀺 𑀉𑀢𑁆𑀢𑀭𑀤𑀺𑀲𑀢𑁄𑀧𑀺 𑀆𑀦𑀻𑀢𑁂 𑀧𑀜𑁆𑀘𑀲𑀢𑁂 𑀧𑀜𑁆𑀘𑀲𑀢𑁂 𑀘𑁄𑀭𑁂 𑀖𑀸𑀢𑁂𑀲𑀺𑀬𑁂𑀯. 𑀏𑀯𑀁 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀦𑀻𑀢𑀸𑀦𑀺 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀫𑀸𑀭𑁂𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀤𑁂𑀯𑀲𑀺𑀓𑀁 𑀏𑀓𑀁 𑀤𑁆𑀯𑁂𑀢𑀺 𑀆𑀦𑀻𑀢𑁂 𑀢𑁂 𑀫𑀦𑀼𑀲𑁆𑀲𑁂 𑀫𑀸𑀭𑁂𑀢𑁆𑀯𑀸 𑀧𑀜𑁆𑀘𑀧𑀡𑁆𑀡𑀸𑀲 𑀲𑀁𑀯𑀘𑁆𑀙𑀭𑀸𑀦𑀺 𑀘𑁄𑀭𑀖𑀸𑀢𑀓𑀓𑀫𑁆𑀫𑀁 𑀅𑀓𑀸𑀲𑀺.

𑀲𑁄 𑀫𑀳𑀮𑁆𑀮𑀓𑀓𑀸𑀮𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀻𑀲𑀁 𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀧𑀳𑀭𑀦𑁆𑀢𑁄 𑀫𑀦𑀼𑀲𑁆𑀲𑁂 𑀓𑀺𑀮𑀫𑁂𑀢𑀺. 𑀦𑀸𑀕𑀭𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀅𑀜𑁆𑀜𑁄𑀧𑀺 𑀘𑁄𑀭𑀖𑀸𑀢𑀓𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀅𑀬𑀁 𑀅𑀢𑀺𑀯𑀺𑀬 𑀫𑀦𑀼𑀲𑁆𑀲𑁂 𑀓𑀺𑀮𑀫𑁂𑀢𑀺, 𑀓𑀺𑀁 𑀇𑀫𑀺𑀦𑀸’’𑀢𑀺 𑀢𑀲𑁆𑀲 𑀢𑀁 𑀞𑀸𑀦𑀦𑁆𑀢𑀭𑀁 𑀳𑀭𑀺𑀁𑀲𑀼. 𑀲𑁄 𑀧𑀼𑀩𑁆𑀩𑁂 𑀘𑁄𑀭𑀖𑀸𑀢𑀓𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 ‘‘𑀅𑀳𑀢𑀲𑀸𑀝𑀓𑁂 𑀦𑀺𑀯𑀸𑀲𑁂𑀢𑀼𑀁, 𑀦𑀯𑀲𑀧𑁆𑀧𑀺𑀦𑀸 𑀲𑀗𑁆𑀔𑀢𑀁 𑀔𑀻𑀭𑀬𑀸𑀕𑀼𑀁 𑀧𑀺𑀯𑀺𑀢𑀼𑀁, 𑀲𑀼𑀫𑀦𑀧𑀼𑀧𑁆𑀨𑀸𑀦𑀺 𑀧𑀺𑀮𑀦𑁆𑀥𑀺𑀢𑀼𑀁, 𑀕𑀦𑁆𑀥𑁂 𑀯𑀺𑀮𑀺𑀫𑁆𑀧𑀺𑀢𑀼’’𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀦 𑀮𑀪𑀺. 𑀲𑁄 𑀞𑀸𑀦𑀸 𑀘𑀸𑀯𑀺𑀢𑀤𑀺𑀯𑀲𑁂 ‘‘𑀔𑀻𑀭𑀬𑀸𑀕𑀼𑀁 𑀫𑁂 𑀧𑀘𑀣𑀸’’𑀢𑀺 𑀯𑀢𑁆𑀯𑀸 𑀅𑀳𑀢𑀯𑀢𑁆𑀣𑀲𑀼𑀫𑀦𑀫𑀸𑀮𑀸𑀯𑀺𑀮𑁂𑀧𑀦𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀦𑀤𑀺𑀁 𑀕𑀦𑁆𑀢𑁆𑀯𑀸 𑀦𑁆𑀳𑀢𑁆𑀯𑀸 𑀅𑀳𑀢𑀯𑀢𑁆𑀣𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀫𑀸𑀮𑀸 𑀧𑀺𑀮𑀦𑁆𑀥𑀺𑀢𑁆𑀯𑀸 𑀕𑀦𑁆𑀥𑁂𑀳𑀺 𑀅𑀦𑀼𑀮𑀺𑀢𑁆𑀢𑀕𑀢𑁆𑀢𑁄 𑀕𑁂𑀳𑀁 𑀆𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀦𑀯𑀲𑀧𑁆𑀧𑀺𑀦𑀸 𑀲𑀗𑁆𑀔𑀢𑀁 𑀔𑀻𑀭𑀬𑀸𑀕𑀼𑀁 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 𑀳𑀢𑁆𑀣𑀥𑁄𑀯𑀦𑁄𑀤𑀓𑀁 𑀆𑀳𑀭𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 ‘‘𑀓𑀢𑁆𑀣 𑀦𑀼 𑀔𑁄 𑀅𑀚𑁆𑀚 𑀫𑀬𑀸 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀅𑀢𑁆𑀢𑀦𑁄 𑀪𑀺𑀓𑁆𑀔𑀸𑀘𑀸𑀭𑀁 𑀑𑀮𑁄𑀓𑁂𑀦𑁆𑀢𑁄 𑀢𑀲𑁆𑀲 𑀕𑁂𑀳𑁂 𑀔𑀻𑀭𑀬𑀸𑀕𑀼𑀁 𑀤𑀺𑀲𑁆𑀯𑀸 ‘‘𑀓𑀭𑀺𑀲𑁆𑀲𑀢𑀺 𑀦𑀼 𑀔𑁄 𑀫𑁂 𑀧𑀼𑀭𑀺𑀲𑁄 𑀲𑀗𑁆𑀕𑀳’’𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀫𑀁 𑀤𑀺𑀲𑁆𑀯𑀸 𑀫𑀫 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀢𑀺, 𑀓𑀭𑀺𑀢𑁆𑀯𑀸 𑀘 𑀧𑀦 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀮𑀪𑀺𑀲𑁆𑀲𑀢𑀺 𑀅𑀬𑀁 𑀓𑀼𑀮𑀧𑀼𑀢𑁆𑀢𑁄’’𑀢𑀺 𑀜𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀁 𑀆𑀤𑀸𑀬 𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑁂 𑀞𑀺𑀢𑀫𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺.

𑀲𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀸 𑀘𑀺𑀭𑀁 𑀘𑁄𑀭𑀖𑀸𑀢𑀓𑀓𑀫𑁆𑀫𑀁 𑀓𑀢𑀁, 𑀩𑀳𑀽 𑀫𑀦𑀼𑀲𑁆𑀲𑀸 𑀫𑀸𑀭𑀺𑀢𑀸, 𑀇𑀤𑀸𑀦𑀺 𑀫𑁂 𑀕𑁂𑀳𑁂 𑀔𑀻𑀭𑀬𑀸𑀕𑀼 𑀧𑀝𑀺𑀬𑀢𑁆𑀢𑀸, 𑀣𑁂𑀭𑁄 𑀆𑀕𑀦𑁆𑀢𑁆𑀯𑀸 𑀫𑀫 𑀕𑁂𑀳𑀤𑁆𑀯𑀸𑀭𑁂 𑀞𑀺𑀢𑁄, 𑀇𑀤𑀸𑀦𑀺 𑀫𑀬𑀸 𑀅𑀬𑁆𑀬𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀼𑀭𑀢𑁄 𑀞𑀧𑀺𑀢𑀬𑀸𑀕𑀼𑀁 𑀅𑀧𑀦𑁂𑀢𑁆𑀯𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑁄𑀕𑁂𑀳𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀢𑁆𑀢𑁂 𑀔𑀻𑀭𑀬𑀸𑀕𑀼𑀁 𑀆𑀓𑀺𑀭𑀺𑀢𑁆𑀯𑀸 𑀦𑀯𑀲𑀧𑁆𑀧𑀺𑀁 𑀆𑀲𑀺𑀜𑁆𑀘𑀺𑀢𑁆𑀯𑀸 𑀣𑁂𑀭𑀁 𑀩𑀻𑀚𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀘 𑀤𑀻𑀖𑀭𑀢𑁆𑀢𑀁 𑀅𑀮𑀤𑁆𑀥𑀧𑀼𑀩𑁆𑀩𑀢𑀸𑀬 𑀔𑀻𑀭𑀬𑀸𑀕𑀼𑀁 𑀧𑀸𑀢𑀼𑀁 𑀩𑀮𑀯𑀅𑀚𑁆𑀛𑀸𑀲𑀬𑁄 𑀅𑀳𑁄𑀲𑀺. 𑀣𑁂𑀭𑁄 𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀜𑀢𑁆𑀯𑀸 ‘‘𑀢𑁆𑀯𑀁, 𑀉𑀧𑀸𑀲𑀓, 𑀅𑀢𑁆𑀢𑀦𑁄 𑀬𑀸𑀕𑀼𑀁 𑀧𑀺𑀯𑀸’’𑀢𑀺 𑀆𑀳. 𑀲𑁄 𑀅𑀜𑁆𑀜𑀲𑁆𑀲 𑀳𑀢𑁆𑀣𑁂 𑀩𑀻𑀚𑀦𑀺𑀁 𑀤𑀢𑁆𑀯𑀸 𑀬𑀸𑀕𑀼𑀁 𑀧𑀺𑀯𑀺. 𑀣𑁂𑀭𑁄 𑀩𑀻𑀚𑀫𑀸𑀦𑀁 𑀧𑀼𑀭𑀺𑀲𑀁 ‘‘𑀕𑀘𑁆𑀙, 𑀉𑀧𑀸𑀲𑀓𑀫𑁂𑀯 𑀩𑀻𑀚𑀸𑀳𑀻’’𑀢𑀺 𑀆𑀳. 𑀲𑁄 𑀩𑀻𑀚𑀺𑀬𑀫𑀸𑀦𑁄 𑀓𑀼𑀘𑁆𑀙𑀺𑀧𑀽𑀭𑀁 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀣𑁂𑀭𑀁 𑀩𑀻𑀚𑀫𑀸𑀦𑁄 𑀞𑀢𑁆𑀯𑀸 𑀓𑀢𑀸𑀳𑀸𑀭𑀓𑀺𑀘𑁆𑀘𑀲𑁆𑀲 𑀣𑁂𑀭𑀲𑁆𑀲 𑀧𑀢𑁆𑀢𑀁 𑀅𑀕𑁆𑀕𑀳𑁂𑀲𑀺. 𑀣𑁂𑀭𑁄 𑀢𑀲𑁆𑀲 𑀅𑀦𑀼𑀫𑁄𑀤𑀦𑀁 𑀆𑀭𑀪𑀺. 𑀲𑁄 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀣𑁂𑀭𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀦𑀼𑀕𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀣𑁂𑀭𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸, ‘‘𑀉𑀧𑀸𑀲𑀓, 𑀓𑀲𑁆𑀫𑀸 𑀘𑀺𑀢𑁆𑀢𑀁 𑀤𑁂𑀲𑀦𑀸𑀦𑀼𑀕𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀪𑀦𑁆𑀢𑁂, 𑀫𑀬𑀸 𑀤𑀻𑀖𑀭𑀢𑁆𑀢𑀁 𑀓𑀓𑁆𑀔𑀴𑀓𑀫𑁆𑀫𑀁 𑀓𑀢𑀁, 𑀩𑀳𑀽 𑀫𑀦𑀼𑀲𑁆𑀲𑀸 𑀫𑀸𑀭𑀺𑀢𑀸, 𑀢𑀫𑀳𑀁 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀘𑀺𑀢𑁆𑀢𑀁 𑀅𑀬𑁆𑀬𑀲𑁆𑀲 𑀤𑁂𑀲𑀦𑀸𑀦𑀼𑀕𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺’’𑀦𑁆𑀢𑀺. 𑀣𑁂𑀭𑁄 ‘‘𑀯𑀜𑁆𑀘𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑀺𑀁 𑀧𑀦 𑀢𑁆𑀯𑀁 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀅𑀓𑀸𑀲𑀺, 𑀅𑀜𑁆𑀜𑁂𑀳𑀺 𑀓𑀸𑀭𑀺𑀢𑁄𑀲𑀻’’𑀢𑀺? ‘‘𑀭𑀸𑀚𑀸 𑀫𑀁 𑀓𑀸𑀭𑁂𑀲𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀦𑀼 𑀔𑁄 𑀢𑁂, 𑀉𑀧𑀸𑀲𑀓, 𑀏𑀯𑀁 𑀲𑀦𑁆𑀢𑁂 𑀅𑀓𑀼𑀲𑀮𑀁 𑀳𑁄𑀢𑀻’’𑀢𑀺? 𑀫𑀦𑁆𑀤𑀥𑀸𑀢𑀼𑀓𑁄 𑀉𑀧𑀸𑀲𑀓𑁄 𑀣𑁂𑀭𑁂𑀦𑁂𑀯𑀁 𑀯𑀼𑀢𑁆𑀢𑁂 ‘‘𑀦𑀢𑁆𑀣𑀺 𑀫𑀬𑁆𑀳𑀁 𑀅𑀓𑀼𑀲𑀮’’𑀦𑁆𑀢𑀺 𑀲𑀜𑁆𑀜𑀻 𑀳𑀼𑀢𑁆𑀯𑀸 𑀢𑁂𑀦 𑀳𑀺, ‘‘𑀪𑀦𑁆𑀢𑁂, 𑀥𑀫𑁆𑀫𑀁 𑀓𑀣𑁂𑀣𑀸’’𑀢𑀺. 𑀲𑁄 𑀣𑁂𑀭𑁂 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁂 𑀏𑀓𑀕𑁆𑀕𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀑𑀭𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀣𑁂𑀭𑁄𑀧𑀺 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀉𑀧𑀸𑀲𑀓𑀁 𑀣𑁂𑀭𑀁 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀫𑀸𑀦𑀁 𑀏𑀓𑀸 𑀬𑀓𑁆𑀔𑀺𑀦𑀻 𑀥𑁂𑀦𑀼𑀯𑁂𑀲𑁂𑀦 𑀆𑀕𑀦𑁆𑀢𑁆𑀯𑀸 𑀉𑀭𑁂 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀲𑀺. 𑀲𑁄 𑀓𑀸𑀮𑀁 𑀓𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀘𑁄𑀭𑀖𑀸𑀢𑀓𑁄 𑀧𑀜𑁆𑀘𑀧𑀡𑁆𑀡𑀸𑀲 𑀯𑀲𑁆𑀲𑀸𑀦𑀺 𑀓𑀓𑁆𑀔𑀴𑀓𑀫𑁆𑀫𑀁 𑀓𑀢𑁆𑀯𑀸 𑀅𑀚𑁆𑀚𑁂𑀯 𑀢𑀢𑁄 𑀫𑀼𑀢𑁆𑀢𑁄, 𑀅𑀚𑁆𑀚𑁂𑀯 𑀣𑁂𑀭𑀲𑁆𑀲 𑀪𑀺𑀓𑁆𑀔𑀁 𑀤𑀢𑁆𑀯𑀸 𑀅𑀚𑁆𑀚𑁂𑀯 𑀓𑀸𑀮𑀁 𑀓𑀢𑁄, 𑀓𑀳𑀁 𑀦𑀼 𑀔𑁄 𑀦𑀺𑀩𑁆𑀩𑀢𑁆𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀆𑀳. ‘‘𑀓𑀺𑀁, 𑀪𑀦𑁆𑀢𑁂, 𑀯𑀤𑁂𑀣, 𑀏𑀢𑁆𑀢𑀓𑀁 𑀓𑀸𑀮𑀁 𑀏𑀢𑁆𑀢𑀓𑁂 𑀫𑀦𑀼𑀲𑁆𑀲𑁂 𑀖𑀸𑀢𑁂𑀢𑁆𑀯𑀸 𑀢𑀼𑀲𑀺𑀢𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑁄’’𑀢𑀺. ‘‘𑀆𑀫, 𑀪𑀺𑀓𑁆𑀔𑀯𑁂, 𑀫𑀳𑀦𑁆𑀢𑁄 𑀢𑁂𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀮𑀤𑁆𑀥𑁄, 𑀲𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀦𑀼𑀮𑁄𑀫𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀇𑀢𑁄 𑀘𑀼𑀢𑁄 𑀢𑀼𑀲𑀺𑀢𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀲𑀼𑀪𑀸𑀲𑀺𑀢𑀁 𑀲𑀼𑀡𑀺𑀢𑁆𑀯𑀸𑀦, 𑀦𑀕𑀭𑁂 𑀘𑁄𑀭𑀖𑀸𑀢𑀓𑁄;

𑀅𑀦𑀼𑀮𑁄𑀫𑀔𑀦𑁆𑀢𑀺𑀁 𑀮𑀤𑁆𑀥𑀸𑀦, 𑀫𑁄𑀤𑀢𑀻 𑀢𑀺𑀤𑀺𑀯𑀁 𑀕𑀢𑁄’’𑀢𑀺.

‘‘𑀪𑀦𑁆𑀢𑁂, 𑀅𑀦𑀼𑀫𑁄𑀤𑀦𑀓𑀣𑀸 𑀦𑀸𑀫 𑀦 𑀩𑀮𑀯𑀸, 𑀢𑁂𑀦 𑀓𑀢𑀁 𑀅𑀓𑀼𑀲𑀮𑀓𑀫𑁆𑀫𑀁 𑀫𑀳𑀦𑁆𑀢𑀁, 𑀓𑀣𑀁 𑀏𑀢𑁆𑀢𑀓𑁂𑀦 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀲𑀻’’𑀢𑀺. 𑀲𑀢𑁆𑀣𑀸 ‘‘𑀓𑀺𑀁, 𑀪𑀺𑀓𑁆𑀔𑀯𑁂, ‘𑀫𑀬𑀸 𑀤𑁂𑀲𑀺𑀢𑀥𑀫𑁆𑀫𑀲𑁆𑀲 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸’𑀢𑀺 𑀫𑀸 𑀧𑀫𑀸𑀡𑀁 𑀕𑀡𑁆𑀳𑀣. 𑀏𑀓𑀯𑀸𑀘𑀸𑀧𑀺 𑀳𑀺 𑀅𑀢𑁆𑀣𑀦𑀺𑀲𑁆𑀲𑀺𑀢𑀸 𑀲𑁂𑀬𑁆𑀬𑀸𑀯𑀸’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁦. ‘‘𑀲𑀳𑀲𑁆𑀲𑀫𑀧𑀺 𑀘𑁂 𑀯𑀸𑀘𑀸, 𑀅𑀦𑀢𑁆𑀣𑀧𑀤𑀲𑀁𑀳𑀺𑀢𑀸;

𑀏𑀓𑀁 𑀅𑀢𑁆𑀣𑀧𑀤𑀁 𑀲𑁂𑀬𑁆𑀬𑁄, 𑀬𑀁 𑀲𑀼𑀢𑁆𑀯𑀸 𑀉𑀧𑀲𑀫𑁆𑀫𑀢𑀻’’𑀢𑀺.

𑀢𑀢𑁆𑀣 𑀲𑀳𑀲𑁆𑀲𑀫𑀧𑀻𑀢𑀺 𑀧𑀭𑀺𑀘𑁆𑀙𑁂𑀤𑀯𑀘𑀦𑀁, 𑀏𑀓𑀁 𑀲𑀳𑀲𑁆𑀲𑀁 𑀤𑁆𑀯𑁂 𑀲𑀳𑀲𑁆𑀲𑀸𑀦𑀻𑀢𑀺 𑀏𑀯𑀁 𑀲𑀳𑀲𑁆𑀲𑁂𑀦 𑀘𑁂𑀧𑀺 𑀧𑀭𑀺𑀘𑁆𑀙𑀺𑀦𑁆𑀦𑀯𑀸𑀘𑀸 𑀳𑁄𑀦𑁆𑀢𑀺, 𑀢𑀸 𑀘 𑀧𑀦 𑀅𑀦𑀢𑁆𑀣𑀧𑀤𑀲𑀁𑀳𑀺𑀢𑀸 𑀆𑀓𑀸𑀲𑀯𑀡𑁆𑀡𑀦𑀸𑀧𑀩𑁆𑀩𑀢𑀯𑀡𑁆𑀡𑀦𑀸𑀯𑀦𑀯𑀡𑁆𑀡𑀦𑀸𑀤𑀻𑀦𑀺 𑀧𑀓𑀸𑀲𑀓𑁂𑀳𑀺 𑀅𑀦𑀺𑀬𑁆𑀬𑀸𑀦𑀤𑀻𑀧𑀓𑁂𑀳𑀺 𑀅𑀦𑀢𑁆𑀣𑀓𑁂𑀳𑀺 𑀧𑀤𑁂𑀳𑀺 𑀲𑀁𑀳𑀺𑀢𑀸 𑀬𑀸𑀯 𑀩𑀳𑀼𑀓𑀸 𑀳𑁄𑀢𑀺, 𑀢𑀸𑀯 𑀧𑀸𑀧𑀺𑀓𑀸 𑀏𑀯𑀸𑀢𑀺 𑀅𑀢𑁆𑀣𑁄. 𑀏𑀓𑀁 𑀅𑀢𑁆𑀣𑀧𑀤𑀦𑁆𑀢𑀺 𑀬𑀁 𑀧𑀦 ‘‘𑀅𑀬𑀁 𑀓𑀸𑀬𑁄, 𑀅𑀬𑀁 𑀓𑀸𑀬𑀕𑀢𑀸𑀲𑀢𑀺, 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑁄, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺 𑀏𑀯𑀭𑀽𑀧𑀁 𑀏𑀓𑀁 𑀅𑀢𑁆𑀣𑀧𑀤𑀁 𑀲𑀼𑀢𑁆𑀯𑀸 𑀭𑀸𑀕𑀸𑀤𑀺𑀯𑀽𑀧𑀲𑀫𑁂𑀦 𑀉𑀧𑀲𑀫𑁆𑀫𑀢𑀺, 𑀢𑀁 𑀅𑀢𑁆𑀣𑀲𑀸𑀥𑀓𑀁 𑀦𑀺𑀩𑁆𑀩𑀸𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀲𑀢𑀺𑀧𑀝𑁆𑀞𑀸𑀦𑀧𑀭𑀺𑀤𑀻𑀧𑀓𑀁 𑀏𑀓𑀫𑁆𑀧𑀺 𑀧𑀤𑀁 𑀲𑁂𑀬𑁆𑀬𑁄𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀢𑀫𑁆𑀩𑀤𑀸𑀞𑀺𑀓𑀘𑁄𑀭𑀖𑀸𑀢𑀓𑀯𑀢𑁆𑀣𑀼 𑀧𑀞𑀫𑀁.

𑁨. 𑀩𑀸𑀳𑀺𑀬𑀤𑀸𑀭𑀼𑀘𑀻𑀭𑀺𑀬𑀢𑁆𑀣𑁂𑀭𑀯𑀢𑁆𑀣𑀼

𑀲𑀳𑀲𑁆𑀲𑀫𑀧𑀺 𑀘𑁂 𑀕𑀸𑀣𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀤𑀸𑀭𑀼𑀘𑀻𑀭𑀺𑀬𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀩𑀳𑀽 𑀫𑀦𑀼𑀲𑁆𑀲𑀸 𑀦𑀸𑀯𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑁄𑀫𑀳𑀸𑀲𑀫𑀼𑀤𑁆𑀤𑁂 𑀪𑀺𑀦𑁆𑀦𑀸𑀬 𑀦𑀸𑀯𑀸𑀬 𑀫𑀘𑁆𑀙𑀓𑀘𑁆𑀙𑀧𑀪𑀓𑁆𑀔𑀸 𑀅𑀳𑁂𑀲𑀼𑀁. 𑀏𑀓𑁄𑀯𑁂𑀢𑁆𑀣 𑀏𑀓𑀁 𑀨𑀮𑀓𑀁 𑀕𑀳𑁂𑀢𑁆𑀯𑀸 𑀯𑀸𑀬𑀫𑀦𑁆𑀢𑁄 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑀢𑀻𑀭𑀁 𑀑𑀓𑁆𑀓𑀫𑀺, 𑀢𑀲𑁆𑀲 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀦𑀢𑁆𑀣𑀺. 𑀲𑁄 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀧𑀲𑁆𑀲𑀦𑁆𑀢𑁄 𑀲𑀼𑀓𑁆𑀔𑀓𑀝𑁆𑀞𑀤𑀡𑁆𑀟𑀓𑁂 𑀯𑀸𑀓𑁂𑀳𑀺 𑀧𑀮𑀺𑀯𑁂𑀞𑁂𑀢𑁆𑀯𑀸 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀓𑀢𑁆𑀯𑀸 𑀤𑁂𑀯𑀓𑀼𑀮𑀢𑁄 𑀓𑀧𑀸𑀮𑀁 𑀕𑀳𑁂𑀢𑁆𑀯𑀸 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑀁 𑀅𑀕𑀫𑀸𑀲𑀺, 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀤𑀢𑁆𑀯𑀸 ‘‘𑀅𑀬𑀁 𑀏𑀓𑁄 𑀅𑀭𑀳𑀸’’𑀢𑀺 𑀲𑀫𑁆𑀪𑀸𑀯𑁂𑀲𑀼𑀁. 𑀲𑁄 𑀯𑀢𑁆𑀣𑁂𑀲𑀼 𑀉𑀧𑀦𑀻𑀢𑁂𑀲𑀼 ‘‘𑀲𑀘𑀸𑀳𑀁 𑀦𑀺𑀯𑀸𑀲𑁂𑀲𑁆𑀲𑀸𑀫𑀺 𑀯𑀸 𑀧𑀸𑀭𑀼𑀧𑀺𑀲𑁆𑀲𑀸𑀫𑀺 𑀯𑀸, 𑀮𑀸𑀪𑀲𑀓𑁆𑀓𑀸𑀭𑁄 𑀫𑁂 𑀧𑀭𑀺𑀳𑀸𑀬𑀺𑀲𑁆𑀲𑀢𑀻’’𑀢𑀺 𑀢𑀸𑀦𑀺 𑀯𑀢𑁆𑀣𑀸𑀦𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑀸𑀭𑀼𑀘𑀻𑀭𑀸𑀦𑁂𑀯 𑀧𑀭𑀺𑀤𑀳𑀺. 𑀅𑀣𑀲𑁆𑀲 𑀩𑀳𑀽𑀳𑀺 ‘‘𑀅𑀭𑀳𑀸 𑀅𑀭𑀳𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀬𑁂 𑀔𑁄 𑀓𑁂𑀘𑀺 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸, 𑀅𑀳𑀁 𑀢𑁂𑀲𑀁 𑀅𑀜𑁆𑀜𑀢𑀭𑁄’’𑀢𑀺. 𑀅𑀣𑀲𑁆𑀲 𑀧𑀼𑀭𑀸𑀡𑀲𑀸𑀮𑁄𑀳𑀺𑀢𑀸 𑀤𑁂𑀯𑀢𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺.

𑀧𑀼𑀭𑀸𑀡𑀲𑀸𑀮𑁄𑀳𑀺𑀢𑀸𑀢𑀺 𑀧𑀼𑀩𑁆𑀩𑁂 𑀏𑀓𑀢𑁄 𑀓𑀢𑀲𑀫𑀡𑀥𑀫𑁆𑀫𑀸. 𑀧𑀼𑀩𑁆𑀩𑁂 𑀓𑀺𑀭 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀑𑀲𑀓𑁆𑀓𑀫𑀸𑀦𑁂 𑀲𑀸𑀫𑀡𑁂𑀭𑀸𑀤𑀻𑀦𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 𑀲𑀢𑁆𑀢 𑀪𑀺𑀓𑁆𑀔𑀽 𑀲𑀁𑀯𑁂𑀕𑀧𑁆𑀧𑀢𑁆𑀢𑀸 ‘‘𑀬𑀸𑀯 𑀲𑀸𑀲𑀦𑀲𑁆𑀲 𑀅𑀦𑁆𑀢𑀭𑀥𑀸𑀦𑀁 𑀦 𑀳𑁄𑀢𑀺, 𑀢𑀸𑀯 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀼𑀯𑀡𑁆𑀡𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑀸 𑀏𑀓𑀁 𑀧𑀩𑁆𑀩𑀢𑀁 𑀤𑀺𑀲𑁆𑀯𑀸 ‘‘𑀚𑀻𑀯𑀺𑀢𑁂 𑀲𑀸𑀮𑀬𑀸 𑀦𑀺𑀯𑀢𑁆𑀢𑀦𑁆𑀢𑀼. 𑀦𑀺𑀭𑀸𑀮𑀬𑀸 𑀇𑀫𑀁 𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀦𑁆𑀢𑀽’’𑀢𑀺 𑀯𑀢𑁆𑀯𑀸 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑀁 𑀅𑀪𑀺𑀭𑀼𑀬𑁆𑀳 𑀦𑀺𑀲𑁆𑀲𑁂𑀡𑀺𑀁 𑀧𑀸𑀢𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀁𑀲𑀼. 𑀢𑁂𑀲𑀼 𑀲𑀗𑁆𑀖𑀢𑁆𑀣𑁂𑀭𑁄 𑀏𑀓𑀭𑀢𑁆𑀢𑀸𑀢𑀺𑀓𑁆𑀓𑀫𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁄 𑀅𑀦𑁄𑀢𑀢𑁆𑀢𑀤𑀳𑁂 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀉𑀢𑁆𑀢𑀭𑀓𑀼𑀭𑀼𑀢𑁄 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀆𑀳 𑁋 ‘‘𑀆𑀯𑀼𑀲𑁄, 𑀇𑀫𑀁 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀇𑀫𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺. 𑀓𑀺𑀁 𑀧𑀦, 𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺 𑀏𑀯𑀁 𑀓𑀢𑀺𑀓𑀸 𑀓𑀢𑀸 ‘‘𑀬𑁄 𑀧𑀞𑀫𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀢𑁂𑀦𑀸𑀪𑀢𑀁 𑀧𑀺𑀡𑁆𑀟𑀧𑀸𑀢𑀁 𑀅𑀯𑀲𑁂𑀲𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’𑀢𑀺. ‘‘𑀢𑁂𑀦 𑀳𑀺 𑀲𑀘𑁂 𑀫𑀬𑀫𑁆𑀧𑀺 𑀢𑀼𑀫𑁆𑀳𑁂 𑀯𑀺𑀬 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫, 𑀲𑀬𑀁 𑀆𑀳𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀦 𑀇𑀘𑁆𑀙𑀺𑀁𑀲𑀼. 𑀤𑀼𑀢𑀺𑀬𑀤𑀺𑀯𑀲𑁂 𑀤𑀼𑀢𑀺𑀬𑀢𑁆𑀣𑁂𑀭𑁄 𑀅𑀦𑀸𑀕𑀸𑀫𑀺𑀨𑀮𑀁 𑀧𑀸𑀧𑀼𑀡𑀺. 𑀲𑁄𑀧𑀺 𑀢𑀣𑁂𑀯 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺𑀢𑁆𑀯𑀸 𑀇𑀢𑀭𑁂 𑀦𑀺𑀫𑀦𑁆𑀢𑁂𑀲𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺 𑀏𑀯𑀁 𑀓𑀢𑀺𑀓𑀸 𑀓𑀢𑀸 ‘𑀫𑀳𑀸𑀣𑁂𑀭𑁂𑀦 𑀆𑀪𑀢𑀁 𑀧𑀺𑀡𑁆𑀟𑀧𑀸𑀢𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀣𑁂𑀭𑁂𑀦 𑀆𑀪𑀢𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀢𑀼𑀫𑁆𑀳𑁂 𑀯𑀺𑀬 𑀫𑀬𑀫𑁆𑀧𑀺 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀭𑀺𑀲𑀓𑀸𑀭𑁂𑀦 𑀪𑀼𑀜𑁆𑀚𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀦 𑀇𑀘𑁆𑀙𑀺𑀁𑀲𑀼. 𑀢𑁂𑀲𑀼 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀪𑀺𑀓𑁆𑀔𑀼 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀅𑀦𑀸𑀕𑀸𑀫𑀻 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀇𑀢𑀭𑁂 𑀧𑀜𑁆𑀘 𑀣𑁂𑀭𑀸 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀲𑀼𑀲𑁆𑀲𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀢𑀢𑁄 𑀘𑀯𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀓𑀼𑀮𑀖𑀭𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂𑀲𑀼 𑀏𑀓𑁄 𑀧𑀼𑀓𑁆𑀓𑀼𑀲𑀸𑀢𑀺 𑀭𑀸𑀚𑀸 (𑀫. 𑀦𑀺. 𑁩.𑁩𑁪𑁨) 𑀅𑀳𑁄𑀲𑀺, 𑀏𑀓𑁄 𑀓𑀼𑀫𑀸𑀭𑀓𑀲𑁆𑀲𑀧𑁄 (𑀫. 𑀦𑀺. 𑁧.𑁨𑁪𑁯), 𑀏𑀓𑁄 𑀤𑀸𑀭𑀼𑀘𑀻𑀭𑀺𑀬𑁄 (𑀉𑀤𑀸. 𑁧𑁦), 𑀏𑀓𑁄 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 (𑀧𑀸𑀭𑀸. 𑁩𑁮𑁦; 𑀉𑀤𑀸. 𑁭𑁯) 𑀏𑀓𑁄 𑀲𑀪𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄𑀢𑀺 (𑀲𑀼. 𑀦𑀺. 𑀲𑀪𑀺𑀬𑀲𑀼𑀢𑁆𑀢𑀁). 𑀢𑀢𑁆𑀣 𑀬𑁄 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀪𑀺𑀓𑁆𑀔𑀼 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ‘‘𑀧𑀼𑀭𑀸𑀡𑀲𑀸𑀮𑁄𑀳𑀺𑀢𑀸 𑀤𑁂𑀯𑀢𑀸’’𑀢𑀺.

𑀢𑀲𑁆𑀲 𑀳𑀺 𑀩𑁆𑀭𑀳𑁆𑀫𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀫𑀬𑀸 𑀲𑀤𑁆𑀥𑀺𑀁 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀅𑀓𑀸𑀲𑀺, 𑀇𑀤𑀸𑀦𑀺 𑀇𑀫𑀁 𑀮𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀯𑀺𑀦𑀲𑁆𑀲𑁂𑀬𑁆𑀬, 𑀲𑀁𑀯𑁂𑀚𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺. 𑀅𑀣 𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀦𑁂𑀯 𑀔𑁄 𑀢𑁆𑀯𑀁, 𑀩𑀸𑀳𑀺𑀬, 𑀅𑀭𑀳𑀸, 𑀦𑀧𑀺 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑁄, 𑀲𑀸𑀧𑀺 𑀢𑁂 𑀧𑀝𑀺𑀧𑀤𑀸 𑀦𑀢𑁆𑀣𑀺, 𑀬𑀸𑀬 𑀢𑁆𑀯𑀁 𑀅𑀭𑀳𑀸 𑀯𑀸 𑀅𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑁄’’𑀢𑀺. 𑀩𑀸𑀳𑀺𑀬𑁄 𑀆𑀓𑀸𑀲𑁂 𑀞𑀢𑁆𑀯𑀸 𑀓𑀣𑁂𑀦𑁆𑀢𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀑𑀮𑁄𑀓𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀢𑀁, 𑀅𑀳𑀁 ‘𑀅𑀭𑀳𑀦𑁆𑀢𑁄𑀫𑁆𑀳𑀻’𑀢𑀺 𑀘𑀺𑀦𑁆𑀢𑁂𑀲𑀺𑀁, 𑀅𑀬𑀜𑁆𑀘 𑀫𑀁 ‘𑀦 𑀢𑁆𑀯𑀁 𑀅𑀭𑀳𑀸, 𑀦𑀧𑀺 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑁄𑀲𑀻’𑀢𑀺 𑀯𑀤𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀮𑁄𑀓𑁂 𑀅𑀜𑁆𑀜𑁄 𑀅𑀭𑀳𑀸’’𑀢𑀺. 𑀅𑀣 𑀦𑀁 𑀧𑀼𑀘𑁆𑀙𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀏𑀢𑀭𑀳𑀺 𑀤𑁂𑀯𑀢𑁂 𑀮𑁄𑀓𑁂 𑀅𑀭𑀳𑀸 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑁄’’𑀢𑀺. 𑀅𑀣𑀲𑁆𑀲 𑀤𑁂𑀯𑀢𑀸 𑀆𑀘𑀺𑀓𑁆𑀔𑀺 𑁋 ‘‘𑀅𑀢𑁆𑀣𑀺, 𑀩𑀸𑀳𑀺𑀬, 𑀉𑀢𑁆𑀢𑀭𑁂𑀲𑀼 𑀚𑀦𑀧𑀤𑁂𑀲𑀼 𑀲𑀸𑀯𑀢𑁆𑀣𑀺 𑀦𑀸𑀫 𑀦𑀕𑀭𑀁, 𑀢𑀢𑁆𑀣 𑀲𑁄 𑀪𑀕𑀯𑀸 𑀏𑀢𑀭𑀳𑀺 𑀯𑀺𑀳𑀭𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀲𑁄 𑀳𑀺, 𑀩𑀸𑀳𑀺𑀬, 𑀪𑀕𑀯𑀸 𑀅𑀭𑀳𑀸 𑀘𑁂𑀯 𑀅𑀭𑀳𑀢𑁆𑀢𑀢𑁆𑀣𑀸𑀬 𑀘 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺.

𑀩𑀸𑀳𑀺𑀬𑁄 𑀭𑀢𑁆𑀢𑀺𑀪𑀸𑀕𑁂 𑀤𑁂𑀯𑀢𑀸𑀬 𑀓𑀣𑀁 𑀲𑀼𑀢𑁆𑀯𑀸 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 𑀢𑀁 𑀔𑀡𑀁𑀬𑁂𑀯 𑀲𑀼𑀧𑁆𑀧𑀸𑀭𑀓𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀭𑀢𑁆𑀢𑀺𑀯𑀸𑀲𑁂𑀦 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺, 𑀲𑀩𑁆𑀩𑀁 𑀯𑀻𑀲𑀬𑁄𑀚𑀦𑀲𑀢𑀺𑀓𑀁 𑀫𑀕𑁆𑀕𑀁 𑀏𑀓𑀭𑀢𑁆𑀢𑀺𑀯𑀸𑀲𑁂𑀦𑁂𑀯 𑀅𑀕𑀫𑀸𑀲𑀺. 𑀕𑀘𑁆𑀙𑀦𑁆𑀢𑁄 𑀘 𑀧𑀦 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀕𑀢𑁄. ‘‘𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦𑀸’’𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯. 𑀢𑀲𑁆𑀫𑀺𑀁 𑀧𑀦 𑀔𑀡𑁂 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀳𑁄𑀢𑀺. 𑀲𑁄 𑀪𑀼𑀢𑁆𑀢𑀧𑀸𑀢𑀭𑀸𑀲𑁂 𑀓𑀸𑀬𑀆𑀮𑀲𑀺𑀬𑀯𑀺𑀫𑁄𑀘𑀦𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 ‘‘𑀓𑀳𑀁 𑀏𑀢𑀭𑀳𑀺 𑀲𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. 𑀪𑀺𑀓𑁆𑀔𑀽 ‘‘𑀪𑀕𑀯𑀸 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄’’𑀢𑀺 𑀯𑀢𑁆𑀯𑀸 𑀢𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀢𑁆𑀯𑀁 𑀧𑀦 𑀓𑀼𑀢𑁄 𑀆𑀕𑀢𑁄𑀲𑀻’’𑀢𑀺? ‘‘𑀲𑀼𑀧𑁆𑀧𑀸𑀭𑀓𑀸 𑀆𑀕𑀢𑁄𑀫𑁆𑀳𑀻’’𑀢𑀺. ‘‘𑀓𑀤𑀸 𑀦𑀺𑀓𑁆𑀔𑀦𑁆𑀢𑁄𑀲𑀻’’𑀢𑀺? ‘‘𑀳𑀺𑀬𑁆𑀬𑁄 𑀲𑀸𑀬𑀁 𑀦𑀺𑀓𑁆𑀔𑀦𑁆𑀢𑁄𑀫𑁆𑀳𑀻’’𑀢𑀺. ‘‘𑀤𑀽𑀭𑀢𑁄𑀲𑀺 𑀆𑀕𑀢𑁄, 𑀦𑀺𑀲𑀻𑀤, 𑀢𑀯 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀣𑁄𑀓𑀁 𑀯𑀺𑀲𑁆𑀲𑀫𑀸𑀳𑀺, 𑀆𑀕𑀢𑀓𑀸𑀮𑁂 𑀲𑀢𑁆𑀣𑀸𑀭𑀁 𑀤𑀓𑁆𑀔𑀺𑀲𑁆𑀲𑀲𑀻’’𑀢𑀺. ‘‘𑀅𑀳𑀁, 𑀪𑀦𑁆𑀢𑁂, 𑀲𑀢𑁆𑀣𑀼 𑀯𑀸 𑀅𑀢𑁆𑀢𑀦𑁄 𑀯𑀸 𑀚𑀻𑀯𑀺𑀢𑀦𑁆𑀢𑀭𑀸𑀬𑀁 𑀦 𑀚𑀸𑀦𑀸𑀫𑀺, 𑀏𑀓𑀭𑀢𑁆𑀢𑁂𑀦𑁂𑀯𑀫𑁆𑀳𑀺 𑀓𑀢𑁆𑀣𑀘𑀺 𑀅𑀝𑁆𑀞𑀢𑁆𑀯𑀸 𑀅𑀦𑀺𑀲𑀻𑀤𑀺𑀢𑁆𑀯𑀸 𑀯𑀻𑀲𑀬𑁄𑀚𑀦𑀲𑀢𑀺𑀓𑀁 𑀫𑀕𑁆𑀕𑀁 𑀆𑀕𑀢𑁄, 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀢𑁆𑀯𑀸𑀯 𑀯𑀺𑀲𑁆𑀲𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀏𑀯𑀁 𑀯𑀢𑁆𑀯𑀸 𑀢𑀭𑀫𑀸𑀦𑀭𑀽𑀧𑁄 𑀲𑀸𑀯𑀢𑁆𑀣𑀺𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀦𑁄𑀧𑀫𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀘𑀺𑀭𑀲𑁆𑀲𑀁 𑀯𑀢 𑀫𑁂 𑀕𑁄𑀢𑀫𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀤𑀺𑀝𑁆𑀞𑁄’’𑀢𑀺 𑀤𑀺𑀝𑁆𑀞𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀑𑀦𑀢𑀲𑀭𑀻𑀭𑁄 𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀫𑁂𑀯 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀕𑁄𑀧𑁆𑀨𑀓𑁂𑀲𑀼 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀤𑁂𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫𑀁, 𑀬𑀁 𑀫𑀫𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀅𑀓𑀸𑀮𑁄 𑀔𑁄 𑀢𑀸𑀯, 𑀩𑀸𑀳𑀺𑀬, 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀫𑁆𑀳𑀸 𑀧𑀺𑀡𑁆𑀟𑀸𑀬𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀺.

𑀢𑀁 𑀲𑀼𑀢𑁆𑀯𑀸 𑀩𑀸𑀳𑀺𑀬𑁄, 𑀪𑀦𑁆𑀢𑁂, 𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑁂𑀦 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀦 𑀅𑀮𑀤𑁆𑀥𑀧𑀼𑀩𑁆𑀩𑁄, 𑀢𑀼𑀫𑁆𑀳𑀸𑀓𑀁 𑀯𑀸 𑀫𑀬𑁆𑀳𑀁 𑀯𑀸 𑀚𑀻𑀯𑀺𑀢𑀦𑁆𑀢𑀭𑀸𑀬𑀁 𑀦 𑀚𑀸𑀦𑀸𑀫𑀺, 𑀤𑁂𑀲𑁂𑀢𑀼 𑀫𑁂 𑀥𑀫𑁆𑀫𑀦𑁆𑀢𑀺. 𑀲𑀢𑁆𑀣𑀸 𑀤𑀼𑀢𑀺𑀬𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀬𑁂𑀯. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀇𑀫𑀲𑁆𑀲 𑀫𑀁 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀓𑀮𑀲𑀭𑀻𑀭𑀁 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀅𑀚𑁆𑀛𑁄𑀢𑁆𑀣𑀝𑀁 𑀳𑁄𑀢𑀺, 𑀩𑀮𑀯𑀧𑀻𑀢𑀺𑀯𑁂𑀕𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸𑀧𑀺 𑀦 𑀲𑀓𑁆𑀔𑀺𑀲𑁆𑀲𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁, 𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀢𑀸𑀯 𑀢𑀺𑀝𑁆𑀞𑀢𑀼, 𑀏𑀓𑀭𑀢𑁆𑀢𑁂𑀦𑁂𑀯 𑀯𑀻𑀲𑀬𑁄𑀚𑀦𑀲𑀢𑀺𑀓𑀁 𑀫𑀕𑁆𑀕𑀁 𑀆𑀕𑀢𑀢𑁆𑀢𑀸 𑀤𑀭𑀣𑁄𑀧𑀺𑀲𑁆𑀲 𑀩𑀮𑀯𑀸, 𑀲𑁄𑀧𑀺 𑀢𑀸𑀯 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀽’’𑀢𑀺. 𑀢𑀲𑁆𑀫𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑀺𑀬𑀁 𑀬𑀸𑀘𑀺𑀢𑁄 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀺𑀢𑁄𑀯 ‘‘𑀢𑀲𑁆𑀫𑀸𑀢𑀺𑀳 𑀢𑁂, 𑀩𑀸𑀳𑀺𑀬, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’’𑀢𑀺𑀆𑀤𑀺𑀦𑀸 (𑀉𑀤𑀸. 𑁧𑁦) 𑀦𑀬𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀲𑀢𑁆𑀣𑀼 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄𑀬𑁂𑀯 𑀲𑀩𑁆𑀩𑀸𑀲𑀯𑁂 𑀔𑁂𑀧𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀸𑀯𑀤𑁂𑀯 𑀘 𑀧𑀦 𑀪𑀕𑀯𑀦𑁆𑀢𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺, ‘‘𑀧𑀭𑀺𑀧𑀼𑀡𑁆𑀡𑀁 𑀢𑁂 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀧𑀼𑀝𑁆𑀞𑁄 ‘‘𑀦 𑀧𑀭𑀺𑀧𑀼𑀡𑁆𑀡’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀲𑀢𑁆𑀣𑀸 ‘‘𑀢𑁂𑀦 𑀳𑀺 𑀧𑀢𑁆𑀢𑀘𑀻𑀯𑀭𑀁 𑀧𑀭𑀺𑀬𑁂𑀲𑀸𑀳𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺.

‘‘𑀲𑁄 𑀓𑀺𑀭 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 ‘𑀪𑀺𑀓𑁆𑀔𑀼𑀦𑀸 𑀦𑀸𑀫 𑀅𑀢𑁆𑀢𑀦𑀸 𑀧𑀘𑁆𑀘𑀬𑁂 𑀮𑀪𑀺𑀢𑁆𑀯𑀸 𑀅𑀜𑁆𑀜𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀲𑀬𑀫𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀏𑀓𑀪𑀺𑀓𑁆𑀔𑀼𑀲𑁆𑀲𑀸𑀧𑀺 𑀧𑀢𑁆𑀢𑁂𑀦 𑀯𑀸 𑀘𑀻𑀯𑀭𑁂𑀦 𑀯𑀸 𑀲𑀗𑁆𑀕𑀳𑀁 𑀦 𑀅𑀓𑀸𑀲𑀺, 𑀢𑁂𑀦𑀲𑁆𑀲 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀁 𑀦 𑀉𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀧𑀩𑁆𑀩𑀚𑁆𑀚𑀁 𑀦 𑀅𑀤𑀸𑀲𑀺. 𑀢𑀫𑁆𑀧𑀺 𑀧𑀢𑁆𑀢𑀘𑀻𑀯𑀭𑀁 𑀧𑀭𑀺𑀬𑁂𑀲𑀫𑀸𑀦𑀫𑁂𑀯 𑀏𑀓𑀸 𑀬𑀓𑁆𑀔𑀺𑀦𑀻 𑀥𑁂𑀦𑀼𑀭𑀽𑀧𑁂𑀦 𑀆𑀕𑀦𑁆𑀢𑁆𑀯𑀸 𑀉𑀭𑀫𑁆𑀳𑀺 𑀧𑀳𑀭𑀺𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑀺. 𑀲𑀢𑁆𑀣𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀦𑁆𑀢𑁄 𑀩𑀸𑀳𑀺𑀬𑀲𑁆𑀲 𑀲𑀭𑀻𑀭𑀁 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀧𑀢𑀺𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀆𑀡𑀸𑀧𑁂𑀲𑀺, ‘‘𑀪𑀺𑀓𑁆𑀔𑀯𑁂, 𑀏𑀓𑀲𑁆𑀫𑀺𑀁 𑀕𑁂𑀳𑀤𑁆𑀯𑀸𑀭𑁂 𑀞𑀢𑁆𑀯𑀸 𑀫𑀜𑁆𑀘𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 𑀇𑀫𑀁 𑀲𑀭𑀻𑀭𑀁 𑀦𑀕𑀭𑀢𑁄 𑀦𑀻𑀳𑀭𑀺𑀢𑁆𑀯𑀸 𑀛𑀸𑀧𑁂𑀢𑁆𑀯𑀸 𑀣𑀽𑀧𑀁 𑀓𑀭𑁄𑀣𑀸’’𑀢𑀺. 𑀪𑀺𑀓𑁆𑀔𑀽 𑀢𑀣𑀸 𑀓𑀭𑀺𑀁𑀲𑀼, 𑀓𑀢𑁆𑀯𑀸 𑀘 𑀧𑀦 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑀸 𑀓𑀢𑀓𑀺𑀘𑁆𑀘𑀁 𑀆𑀭𑁄𑀘𑁂𑀢𑁆𑀯𑀸 𑀢𑀲𑁆𑀲 𑀅𑀪𑀺𑀲𑀫𑁆𑀧𑀭𑀸𑀬𑀁 𑀧𑀼𑀘𑁆𑀙𑀺𑀁𑀲𑀼. 𑀅𑀣 𑀦𑁂𑀲𑀁 𑀪𑀕𑀯𑀸 𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀁 𑀬𑀤𑀺𑀤𑀁 𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄’’𑀢𑀺 (𑀅. 𑀦𑀺. 𑁧.𑁨𑁧𑁬) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺. 𑀅𑀣 𑀦𑀁 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 ‘𑀩𑀸𑀳𑀺𑀬𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’𑀢𑀺 𑀯𑀤𑁂𑀣, 𑀓𑀤𑀸 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’’𑀢𑀺? ‘‘𑀫𑀫 𑀥𑀫𑁆𑀫𑀁 𑀲𑀼𑀢𑀓𑀸𑀮𑁂, 𑀪𑀺𑀓𑁆𑀔𑀯𑁂’’𑀢𑀺. ‘‘𑀓𑀤𑀸 𑀧𑀦𑀲𑁆𑀲, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀥𑀫𑁆𑀫𑁄 𑀓𑀣𑀺𑀢𑁄’’𑀢𑀺? ‘‘𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂𑀦 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀢𑁆𑀯𑀸’’𑀢𑀺. ‘‘𑀅𑀧𑁆𑀧𑀫𑀢𑁆𑀢𑀓𑁄 𑀳𑀺, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀢𑁆𑀯𑀸 𑀓𑀣𑀺𑀢𑀥𑀫𑁆𑀫𑁄 𑀓𑀣𑀁 𑀲𑁄 𑀢𑀸𑀯𑀢𑁆𑀢𑀓𑁂𑀦 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀲𑀻’’𑀢𑀺, 𑀅𑀣 𑀦𑁂 𑀲𑀢𑁆𑀣𑀸 ‘‘𑀓𑀺𑀁, 𑀪𑀺𑀓𑁆𑀔𑀯𑁂, 𑀫𑀫 𑀥𑀫𑁆𑀫𑀁 ‘𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸’𑀢𑀺 𑀫𑀸 𑀧𑀫𑀸𑀡𑀁 𑀕𑀡𑁆𑀳𑀣. 𑀅𑀦𑁂𑀓𑀸𑀦𑀺𑀧𑀺 𑀳𑀺 𑀕𑀸𑀣𑀸𑀲𑀳𑀲𑁆𑀲𑀸𑀦𑀺 𑀅𑀦𑀢𑁆𑀣𑀦𑀺𑀲𑁆𑀲𑀺𑀢𑀸𑀦𑀺 𑀦 𑀲𑁂𑀬𑁆𑀬𑁄, 𑀅𑀢𑁆𑀣𑀦𑀺𑀲𑁆𑀲𑀺𑀢𑀁 𑀧𑀦 𑀏𑀓𑀫𑁆𑀧𑀺 𑀕𑀸𑀣𑀸𑀧𑀤𑀁 𑀲𑁂𑀬𑁆𑀬𑁄’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁧. ‘‘𑀲𑀳𑀲𑁆𑀲𑀫𑀧𑀺 𑀘𑁂 𑀕𑀸𑀣𑀸, 𑀅𑀦𑀢𑁆𑀣𑀧𑀤𑀲𑀁𑀳𑀺𑀢𑀸;

𑀏𑀓𑀁 𑀕𑀸𑀣𑀸𑀧𑀤𑀁 𑀲𑁂𑀬𑁆𑀬𑁄, 𑀬𑀁 𑀲𑀼𑀢𑁆𑀯𑀸 𑀉𑀧𑀲𑀫𑁆𑀫𑀢𑀻’’𑀢𑀺.

𑀢𑀢𑁆𑀣 𑀏𑀓𑀁 𑀕𑀸𑀣𑀸𑀧𑀤𑀁 𑀲𑁂𑀬𑁆𑀬𑁄𑀢𑀺 ‘‘𑀅𑀧𑁆𑀧𑀫𑀸𑀤𑁄 𑀅𑀫𑀢𑀧𑀤𑀁…𑀧𑁂… 𑀬𑀣𑀸 𑀫𑀬𑀸’’𑀢𑀺 (𑀥. 𑀧. 𑁨𑁧) 𑀏𑀯𑀭𑀽𑀧𑀸 𑀏𑀓𑀸 𑀕𑀸𑀣𑀸𑀧𑀺 𑀲𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀩𑀸𑀳𑀺𑀬𑀤𑀸𑀭𑀼𑀘𑀻𑀭𑀺𑀬𑀢𑁆𑀣𑁂𑀭𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀓𑀼𑀡𑁆𑀟𑀮𑀓𑁂𑀲𑀺𑀢𑁆𑀣𑁂𑀭𑀻𑀯𑀢𑁆𑀣𑀼

𑀬𑁄 𑀘 𑀕𑀸𑀣𑀸𑀲𑀢𑀁 𑀪𑀸𑀲𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀼𑀡𑁆𑀟𑀮𑀓𑁂𑀲𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀭𑀸𑀚𑀕𑀳𑁂 𑀓𑀺𑀭 𑀏𑀓𑀸 𑀲𑁂𑀝𑁆𑀞𑀺𑀥𑀻𑀢𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀅𑀪𑀺𑀭𑀽𑀧𑀸 𑀅𑀳𑁄𑀲𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸. 𑀢𑀲𑁆𑀫𑀺𑀜𑁆𑀘 𑀯𑀬𑁂 𑀞𑀺𑀢𑀸 𑀦𑀸𑀭𑀺𑀬𑁄 𑀧𑀼𑀭𑀺𑀲𑀚𑁆𑀛𑀸𑀲𑀬𑀸 𑀳𑁄𑀦𑁆𑀢𑀺 𑀧𑀼𑀭𑀺𑀲𑀮𑁄𑀮𑀸. 𑀅𑀣 𑀦𑀁 𑀫𑀸𑀢𑀸𑀧𑀺𑀢𑀭𑁄 𑀲𑀢𑁆𑀢𑀪𑀽𑀫𑀺𑀓𑀲𑁆𑀲 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺𑀫𑀢𑀮𑁂 𑀲𑀺𑀭𑀺𑀕𑀩𑁆𑀪𑁂 𑀦𑀺𑀯𑀸𑀲𑀸𑀧𑁂𑀲𑀼𑀁. 𑀏𑀓𑀫𑁂𑀯𑀲𑁆𑀲𑀸 𑀤𑀸𑀲𑀺𑀁 𑀧𑀭𑀺𑀘𑀸𑀭𑀺𑀓𑀁 𑀅𑀤𑀁𑀲𑀼. 𑀅𑀣𑁂𑀓𑀁 𑀓𑀼𑀮𑀧𑀼𑀢𑁆𑀢𑀁 𑀘𑁄𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸𑀩𑀸𑀳𑀁 𑀩𑀦𑁆𑀥𑀺𑀢𑁆𑀯𑀸 𑀘𑀢𑀼𑀓𑁆𑀓𑁂 𑀘𑀢𑀼𑀓𑁆𑀓𑁂 𑀓𑀲𑀸𑀳𑀺 𑀧𑀳𑀭𑀺𑀢𑁆𑀯𑀸 𑀆𑀖𑀸𑀢𑀦𑀁 𑀦𑀬𑀺𑀁𑀲𑀼. 𑀲𑁂𑀝𑁆𑀞𑀺𑀥𑀻𑀢𑀸 𑀫𑀳𑀸𑀚𑀦𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀧𑀸𑀲𑀸𑀤𑀢𑀮𑁂 𑀞𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀻 𑀢𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀢𑀁 𑀧𑀢𑁆𑀣𑀬𑀫𑀸𑀦𑀸 𑀆𑀳𑀸𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀺. 𑀅𑀣 𑀦𑀁 𑀫𑀸𑀢𑀸 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀇𑀤𑀁, 𑀅𑀫𑁆𑀫𑀸’’𑀢𑀺? ‘‘𑀲𑀘𑁂 𑀏𑀢𑀁 ‘𑀘𑁄𑀭𑁄’𑀢𑀺 𑀕𑀳𑁂𑀢𑁆𑀯𑀸 𑀦𑀺𑀬𑁆𑀬𑀫𑀸𑀦𑀁 𑀧𑀼𑀭𑀺𑀲𑀁 𑀮𑀪𑀺𑀲𑁆𑀲𑀸𑀫𑀺, 𑀚𑀻𑀯𑀺𑀲𑁆𑀲𑀸𑀫𑀺. 𑀦𑁄 𑀘𑁂 𑀮𑀪𑀺𑀲𑁆𑀲𑀸𑀫𑀺, 𑀚𑀻𑀯𑀺𑀢𑀁 𑀫𑁂 𑀦𑀢𑁆𑀣𑀺, 𑀇𑀥𑁂𑀯 𑀫𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀫𑁆𑀫, 𑀫𑀸 𑀏𑀯𑀁 𑀓𑀭𑀺, 𑀅𑀫𑁆𑀳𑀸𑀓𑀁 𑀚𑀸𑀢𑀺𑀬𑀸 𑀘 𑀕𑁄𑀢𑁆𑀢𑁂𑀦 𑀘 𑀪𑁄𑀕𑁂𑀦 𑀘 𑀲𑀤𑀺𑀲𑀁 𑀅𑀜𑁆𑀜𑀁 𑀲𑀸𑀫𑀺𑀓𑀁 𑀮𑀪𑀺𑀲𑁆𑀲𑀲𑀻’’𑀢𑀺. ‘‘𑀫𑀬𑁆𑀳𑀁 𑀅𑀜𑁆𑀜𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀇𑀫𑀁 𑀅𑀮𑀪𑀫𑀸𑀦𑀸 𑀫𑀭𑀺𑀲𑁆𑀲𑀸𑀫𑀻’’𑀢𑀺. 𑀫𑀸𑀢𑀸 𑀥𑀻𑀢𑀭𑀁 𑀲𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀧𑀺𑀢𑀼𑀦𑁄 𑀆𑀭𑁄𑀘𑁂𑀲𑀺. 𑀲𑁄𑀧𑀺 𑀦𑀁 𑀲𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀓𑀺𑀁 𑀲𑀓𑁆𑀓𑀸 𑀓𑀸𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀘𑁄𑀭𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀭𑀸𑀚𑀧𑀼𑀭𑀺𑀲𑀲𑁆𑀲 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀧𑁂𑀲𑁂𑀲𑀺 𑁋 ‘‘𑀇𑀫𑀁 𑀕𑀳𑁂𑀢𑁆𑀯𑀸 𑀏𑀢𑀁 𑀧𑀼𑀭𑀺𑀲𑀁 𑀫𑀬𑁆𑀳𑀁 𑀤𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀓𑀳𑀸𑀧𑀡𑁂 𑀕𑀳𑁂𑀢𑁆𑀯𑀸 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀫𑀸𑀭𑁂𑀢𑁆𑀯𑀸 ‘‘𑀫𑀸𑀭𑀺𑀢𑁄, 𑀤𑁂𑀯, 𑀘𑁄𑀭𑁄’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀲𑁂𑀝𑁆𑀞𑀺𑀧𑀺 𑀢𑀲𑁆𑀲 𑀥𑀻𑀢𑀭𑀁 𑀅𑀤𑀸𑀲𑀺.

𑀲𑀸 𑀢𑀢𑁄 𑀧𑀝𑁆𑀞𑀸𑀬 ‘‘𑀲𑀸𑀫𑀺𑀓𑀁 𑀆𑀭𑀸𑀥𑁂𑀲𑁆𑀲𑀸𑀫𑀻’’𑀢𑀺 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑀸 𑀲𑀬𑀫𑁂𑀯 𑀢𑀲𑁆𑀲 𑀬𑀸𑀕𑀼𑀆𑀤𑀻𑀦𑀺 𑀲𑀁𑀯𑀺𑀤𑀳𑀢𑀺, 𑀘𑁄𑀭𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀤𑀸 𑀦𑀼 𑀔𑁄 𑀇𑀫𑀁 𑀫𑀸𑀭𑁂𑀢𑁆𑀯𑀸 𑀏𑀢𑀺𑀲𑁆𑀲𑀸 𑀆𑀪𑀭𑀡𑀸𑀦𑀺 𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀲𑀼𑀭𑀸𑀕𑁂𑀳𑁂 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀔𑀸𑀤𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺? 𑀲𑁄 ‘‘𑀅𑀢𑁆𑀣𑁂𑀓𑁄 𑀉𑀧𑀸𑀬𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳𑀸𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀺, 𑀅𑀣 𑀦𑀁 𑀲𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁 𑀢𑁂, 𑀲𑀸𑀫𑀺, 𑀭𑀼𑀚𑁆𑀚𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀦 𑀓𑀺𑀜𑁆𑀘𑀺 𑀫𑁂, 𑀪𑀤𑁆𑀤𑁂𑀢𑀺, 𑀓𑀘𑁆𑀘𑀺 𑀧𑀦 𑀫𑁂 𑀫𑀸𑀢𑀸𑀧𑀺𑀢𑀭𑁄 𑀢𑀼𑀬𑁆𑀳𑀁 𑀓𑀼𑀤𑁆𑀥𑀸’’𑀢𑀺? ‘‘𑀦 𑀓𑀼𑀚𑁆𑀛𑀦𑁆𑀢𑀺, 𑀪𑀤𑁆𑀤𑁂’’𑀢𑀺. 𑀅𑀣 ‘‘𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺? ‘‘𑀪𑀤𑁆𑀤𑁂, 𑀅𑀳𑀁 𑀢𑀁 𑀤𑀺𑀯𑀲𑀁 𑀩𑀦𑁆𑀥𑀺𑀢𑁆𑀯𑀸 𑀦𑀺𑀬𑁆𑀬𑀫𑀸𑀦𑁄 𑀘𑁄𑀭𑀧𑀧𑀸𑀢𑁂 𑀅𑀥𑀺𑀯𑀢𑁆𑀣𑀸𑀬 𑀤𑁂𑀯𑀢𑀸𑀬 𑀩𑀮𑀺𑀓𑀫𑁆𑀫𑀁 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀚𑀻𑀯𑀺𑀢𑀁 𑀮𑀪𑀺𑀁, 𑀢𑁆𑀯𑀫𑁆𑀧𑀺 𑀫𑀬𑀸 𑀢𑀲𑁆𑀲𑀸 𑀏𑀯 𑀆𑀦𑀼𑀪𑀸𑀯𑁂𑀦 𑀮𑀤𑁆𑀥𑀸, ‘𑀢𑀁 𑀫𑁂 𑀤𑁂𑀯𑀢𑀸𑀬 𑀩𑀮𑀺𑀓𑀫𑁆𑀫𑀁 𑀞𑀧𑀺𑀢’𑀦𑁆𑀢𑀺 𑀘𑀺𑀦𑁆𑀢𑁂𑀫𑀺, 𑀪𑀤𑁆𑀤𑁂’’𑀢𑀺. ‘‘𑀲𑀸𑀫𑀺, 𑀫𑀸 𑀘𑀺𑀦𑁆𑀢𑀬𑀺, 𑀓𑀭𑀺𑀲𑁆𑀲𑀸𑀫𑀺 𑀩𑀮𑀺𑀓𑀫𑁆𑀫𑀁, 𑀯𑀤𑁂𑀳𑀺, 𑀓𑁂𑀦𑀢𑁆𑀣𑁄’’𑀢𑀺? ‘‘𑀅𑀧𑁆𑀧𑁄𑀤𑀓𑀫𑀥𑀼𑀧𑀸𑀬𑀲𑁂𑀦 𑀘 𑀮𑀸𑀚𑀧𑀜𑁆𑀘𑀫𑀓𑀧𑀼𑀧𑁆𑀨𑁂𑀳𑀺 𑀘𑀸’’𑀢𑀺. ‘‘𑀲𑀸𑀥𑀼, 𑀲𑀸𑀫𑀺, 𑀅𑀳𑀁 𑀧𑀝𑀺𑀬𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀲𑀸 𑀲𑀩𑁆𑀩𑀁 𑀩𑀮𑀺𑀓𑀫𑁆𑀫𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 ‘‘𑀏𑀳𑀺, 𑀲𑀸𑀫𑀺, 𑀕𑀘𑁆𑀙𑀸𑀫𑀸’’𑀢𑀺 𑀆𑀳. ‘‘𑀢𑁂𑀦 𑀳𑀺, 𑀪𑀤𑁆𑀤𑁂, 𑀢𑀯 𑀜𑀸𑀢𑀓𑁂 𑀦𑀺𑀯𑀢𑁆𑀢𑁂𑀢𑁆𑀯𑀸 𑀫𑀳𑀕𑁆𑀖𑀸𑀦𑀺 𑀯𑀢𑁆𑀣𑀸𑀪𑀭𑀡𑀸𑀦𑀺 𑀕𑀳𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀅𑀮𑀗𑁆𑀓𑀭𑁄𑀳𑀺, 𑀳𑀲𑀦𑁆𑀢𑀸 𑀓𑀻𑀴𑀦𑁆𑀢𑀸 𑀲𑀼𑀔𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀲𑀸 𑀢𑀣𑀸 𑀅𑀓𑀸𑀲𑀺.

𑀅𑀣 𑀦𑀁 𑀲𑁄 𑀧𑀩𑁆𑀩𑀢𑀧𑀸𑀤𑀁 𑀕𑀢𑀓𑀸𑀮𑁂 𑀆𑀳 𑁋 ‘‘𑀪𑀤𑁆𑀤𑁂, 𑀇𑀢𑁄 𑀧𑀭𑀁 𑀉𑀪𑁄𑀯 𑀚𑀦𑀸 𑀕𑀫𑀺𑀲𑁆𑀲𑀸𑀫, 𑀲𑁂𑀲𑀚𑀦𑀁 𑀬𑀸𑀦𑀓𑁂𑀦 𑀲𑀤𑁆𑀥𑀺𑀁 𑀦𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀪𑀸𑀚𑀦𑀁 𑀲𑀬𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺. 𑀲𑀸 𑀢𑀣𑀸 𑀅𑀓𑀸𑀲𑀺. 𑀘𑁄𑀭𑁄 𑀢𑀁 𑀕𑀳𑁂𑀢𑁆𑀯𑀸 𑀘𑁄𑀭𑀧𑀧𑀸𑀢𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺. 𑀢𑀲𑁆𑀲 𑀳𑀺 𑀏𑀓𑁂𑀦 𑀧𑀲𑁆𑀲𑁂𑀦 𑀫𑀦𑀼𑀲𑁆𑀲𑀸 𑀅𑀪𑀺𑀭𑀼𑀳𑀦𑁆𑀢𑀺, 𑀏𑀓𑀁 𑀧𑀲𑁆𑀲𑀁 𑀙𑀺𑀦𑁆𑀦𑀧𑀧𑀸𑀢𑀁. 𑀧𑀩𑁆𑀩𑀢𑀫𑀢𑁆𑀣𑀓𑁂 𑀞𑀺𑀢𑀸 𑀢𑁂𑀦 𑀧𑀲𑁆𑀲𑁂𑀦 𑀘𑁄𑀭𑁂 𑀧𑀸𑀢𑁂𑀦𑁆𑀢𑀺. 𑀢𑁂 𑀔𑀡𑁆𑀟𑀸𑀔𑀡𑁆𑀟𑀁 𑀳𑀼𑀢𑁆𑀯𑀸 𑀪𑀽𑀫𑀺𑀬𑀁 𑀧𑀢𑀦𑁆𑀢𑀺. 𑀢𑀲𑁆𑀫𑀸 ‘‘𑀘𑁄𑀭𑀧𑀧𑀸𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀢𑀲𑁆𑀲 𑀧𑀩𑁆𑀩𑀢𑀲𑁆𑀲 𑀫𑀢𑁆𑀣𑀓𑁂 𑀞𑀢𑁆𑀯𑀸 ‘‘𑀩𑀮𑀺𑀓𑀫𑁆𑀫𑀁 𑀢𑁂, 𑀲𑀸𑀫𑀺, 𑀓𑀭𑁄𑀳𑀻’’𑀢𑀺 𑀆𑀳. 𑀲𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀧𑀼𑀦 𑀢𑀸𑀬 ‘‘𑀓𑀲𑁆𑀫𑀸, 𑀲𑀸𑀫𑀺, 𑀢𑀼𑀡𑁆𑀳𑀻𑀪𑀽𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 𑀢𑀁 𑀆𑀳 𑁋 ‘‘𑀦 𑀫𑀬𑁆𑀳𑀁 𑀩𑀮𑀺𑀓𑀫𑁆𑀫𑁂𑀦𑀢𑁆𑀣𑁄, 𑀯𑀜𑁆𑀘𑁂𑀢𑁆𑀯𑀸 𑀧𑀦 𑀢𑀁 𑀆𑀤𑀸𑀬 𑀆𑀕𑀢𑁄𑀫𑁆𑀳𑀻’’𑀢𑀺. ‘‘𑀓𑀺𑀁 𑀓𑀸𑀭𑀡𑀸, 𑀲𑀸𑀫𑀻’’𑀢𑀺? ‘‘𑀢𑀁 𑀫𑀸𑀭𑁂𑀢𑁆𑀯𑀸 𑀢𑀯 𑀆𑀪𑀭𑀡𑀸𑀦𑀺 𑀕𑀳𑁂𑀢𑁆𑀯𑀸 𑀧𑀮𑀸𑀬𑀦𑀢𑁆𑀣𑀸𑀬𑀸’’𑀢𑀺. 𑀲𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀸 𑀆𑀳 𑁋 ‘‘𑀲𑀸𑀫𑀺, 𑀅𑀳𑀜𑁆𑀘 𑀆𑀪𑀭𑀡𑀸𑀦𑀺 𑀘 𑀢𑀯 𑀲𑀦𑁆𑀢𑀓𑀸𑀦𑁂𑀯, 𑀓𑀲𑁆𑀫𑀸 𑀏𑀯𑀁 𑀯𑀤𑁂𑀲𑀻’’𑀢𑀺? 𑀲𑁄, ‘‘𑀫𑀸 𑀏𑀯𑀁 𑀓𑀭𑁄𑀳𑀻’’𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑀫𑀸𑀦𑁄𑀧𑀺 ‘‘𑀫𑀸𑀭𑁂𑀫𑀺 𑀏𑀯𑀸’’𑀢𑀺 𑀆𑀳. ‘‘𑀏𑀯𑀁 𑀲𑀦𑁆𑀢𑁂 𑀓𑀺𑀁 𑀢𑁂 𑀫𑀫 𑀫𑀭𑀡𑁂𑀦? 𑀇𑀫𑀸𑀦𑀺 𑀆𑀪𑀭𑀡𑀸𑀦𑀺 𑀕𑀳𑁂𑀢𑁆𑀯𑀸 𑀫𑀬𑁆𑀳𑀁 𑀚𑀻𑀯𑀺𑀢𑀁 𑀤𑁂𑀳𑀺, 𑀇𑀢𑁄 𑀧𑀝𑁆𑀞𑀸𑀬 𑀫𑀁 ‘𑀫𑀢𑀸’𑀢𑀺 𑀥𑀸𑀭𑁂𑀳𑀺, 𑀤𑀸𑀲𑀻 𑀯𑀸 𑀢𑁂 𑀳𑀼𑀢𑁆𑀯𑀸 𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀇𑀤𑀁 𑀲𑀼𑀯𑀡𑁆𑀡𑀓𑁂𑀬𑀽𑀭𑀁, 𑀫𑀼𑀢𑁆𑀢𑀸 𑀯𑁂𑀴𑀼𑀭𑀺𑀬𑀸 𑀩𑀳𑀽;

𑀲𑀩𑁆𑀩𑀁 𑀳𑀭𑀲𑁆𑀲𑀼 𑀪𑀤𑁆𑀤𑀦𑁆𑀢𑁂, 𑀫𑀁 𑀘 𑀤𑀸𑀲𑀻𑀢𑀺 𑀲𑀸𑀯𑀬𑀸’’𑀢𑀺. (𑀅𑀧. 𑀣𑁂𑀭𑀻 𑁨.𑁩.𑁨𑁭);

𑀢𑀁 𑀲𑀼𑀢𑁆𑀯𑀸 𑀘𑁄𑀭𑁄 ‘‘𑀏𑀯𑀁 𑀓𑀢𑁂 𑀢𑁆𑀯𑀁 𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀆𑀘𑀺𑀓𑁆𑀔𑀺𑀲𑁆𑀲𑀲𑀺, 𑀫𑀸𑀭𑁂𑀲𑁆𑀲𑀸𑀫𑀺𑀬𑁂𑀯, 𑀫𑀸 𑀢𑁆𑀯𑀁 𑀩𑀸𑀴𑁆𑀳𑀁 𑀧𑀭𑀺𑀤𑁂𑀯𑀲𑀻’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀫𑀸 𑀩𑀸𑀴𑁆𑀳𑀁 𑀧𑀭𑀺𑀤𑁂𑀯𑁂𑀲𑀺, 𑀔𑀺𑀧𑁆𑀧𑀁 𑀩𑀦𑁆𑀥𑀸𑀳𑀺 𑀪𑀡𑁆𑀟𑀺𑀓𑀁;

𑀦 𑀢𑀼𑀬𑁆𑀳𑀁 𑀚𑀻𑀯𑀺𑀢𑀁 𑀅𑀢𑁆𑀣𑀺, 𑀲𑀩𑁆𑀩𑀁 𑀕𑀡𑁆𑀳𑀸𑀫𑀺 𑀪𑀡𑁆𑀟𑀓’’𑀦𑁆𑀢𑀺. 𑁋

𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀇𑀤𑀁 𑀓𑀫𑁆𑀫𑀁 𑀪𑀸𑀭𑀺𑀬𑀁. 𑀧𑀜𑁆𑀜𑀸 𑀦𑀸𑀫 𑀦 𑀧𑀘𑀺𑀢𑁆𑀯𑀸 𑀔𑀸𑀤𑀦𑀢𑁆𑀣𑀸𑀬 𑀓𑀢𑀸, 𑀅𑀣 𑀔𑁄 𑀯𑀺𑀘𑀸𑀭𑀡𑀢𑁆𑀣𑀸𑀬 𑀓𑀢𑀸, 𑀚𑀸𑀦𑀺𑀲𑁆𑀲𑀸𑀫𑀺𑀲𑁆𑀲 𑀓𑀢𑁆𑀢𑀩𑁆𑀩’’𑀦𑁆𑀢𑀺, 𑀅𑀣 𑀦𑀁 𑀆𑀳 𑁋 ‘‘𑀲𑀸𑀫𑀺, 𑀬𑀤𑀸 𑀢𑁆𑀯𑀁 ‘𑀘𑁄𑀭𑁄’𑀢𑀺 𑀕𑀳𑁂𑀢𑁆𑀯𑀸 𑀦𑀻𑀬𑀲𑀺, 𑀢𑀤𑀸𑀳𑀁 𑀫𑀸𑀢𑀸𑀧𑀺𑀢𑀽𑀦𑀁 𑀆𑀘𑀺𑀓𑁆𑀔𑀺𑀁, 𑀢𑁂 𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀁 𑀆𑀳𑀭𑀸𑀧𑁂𑀢𑁆𑀯𑀸 𑀕𑁂𑀳𑁂 𑀓𑀭𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀅𑀳𑀁 𑀢𑀼𑀬𑁆𑀳𑀁 𑀉𑀧𑀓𑀸𑀭𑀺𑀓𑀸, 𑀅𑀚𑁆𑀚 𑀫𑁂 𑀲𑀼𑀤𑀺𑀝𑁆𑀞𑀁 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁 𑀯𑀦𑁆𑀤𑀺𑀢𑀼𑀁 𑀤𑁂𑀳𑀻’’𑀢𑀺. 𑀲𑁄 ‘‘𑀲𑀸𑀥𑀼, 𑀪𑀤𑁆𑀤𑁂, 𑀲𑀼𑀤𑀺𑀝𑁆𑀞𑀁 𑀓𑀢𑁆𑀯𑀸 𑀯𑀦𑁆𑀤𑀸𑀳𑀻’’𑀢𑀺 𑀯𑀢𑁆𑀯𑀸 𑀧𑀩𑁆𑀩𑀢𑀦𑁆𑀢𑁂 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀦𑁆𑀤𑀺𑀢𑁆𑀯𑀸, ‘‘𑀲𑀸𑀫𑀺, 𑀇𑀤𑀁 𑀢𑁂 𑀧𑀘𑁆𑀙𑀺𑀫𑀤𑀲𑁆𑀲𑀦𑀁, 𑀇𑀤𑀸𑀦𑀺 𑀢𑀼𑀬𑁆𑀳𑀁 𑀯𑀸 𑀫𑀫 𑀤𑀲𑁆𑀲𑀦𑀁, 𑀫𑀬𑁆𑀳𑀁 𑀯𑀸 𑀢𑀯 𑀤𑀲𑁆𑀲𑀦𑀁 𑀦𑀢𑁆𑀣𑀻’’𑀢𑀺 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀆𑀮𑀺𑀗𑁆𑀕𑀺𑀢𑁆𑀯𑀸 𑀧𑀫𑀢𑁆𑀢𑀁 𑀳𑀼𑀢𑁆𑀯𑀸 𑀧𑀩𑁆𑀩𑀢𑀦𑁆𑀢𑁂 𑀞𑀺𑀢𑀁 𑀧𑀺𑀝𑁆𑀞𑀺𑀧𑀲𑁆𑀲𑁂 𑀞𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀔𑀦𑁆𑀥𑁂 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀧𑀺𑀝𑁆𑀞𑀺𑀓𑀘𑁆𑀙𑀸𑀬 𑀕𑀳𑁂𑀢𑁆𑀯𑀸 𑀧𑀩𑁆𑀩𑀢𑀧𑀧𑀸𑀢𑁂 𑀔𑀺𑀧𑀺. 𑀲𑁄 𑀧𑀩𑁆𑀩𑀢𑀓𑀼𑀘𑁆𑀙𑀺𑀬𑀁 𑀧𑀝𑀺𑀳𑀢𑁄 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀳𑀼𑀢𑁆𑀯𑀸 𑀪𑀽𑀫𑀺𑀬𑀁 𑀧𑀢𑀺. 𑀘𑁄𑀭𑀧𑀧𑀸𑀢𑀫𑀢𑁆𑀣𑀓𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀦 𑀳𑀺 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼, 𑀧𑀼𑀭𑀺𑀲𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄;

𑀇𑀢𑁆𑀣𑀻𑀧𑀺 𑀧𑀡𑁆𑀟𑀺𑀢𑀸 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀓𑁆𑀔𑀡𑀸’’𑀢𑀺. (𑀅𑀧. 𑀣𑁂𑀭𑀻 𑁨.𑁩.𑁩𑁧);

𑀲𑀸𑀧𑀺 𑀘𑁄𑀭𑀁 𑀧𑀧𑀸𑀢𑁂 𑀔𑀺𑀧𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀕𑁂𑀳𑀁 𑀕𑀫𑀺𑀲𑁆𑀲𑀸𑀫𑀺, ‘𑀲𑀸𑀫𑀺𑀓𑁄 𑀢𑁂 𑀓𑀼𑀳𑀺’𑀦𑁆𑀢𑀺 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺, 𑀲𑀘𑀸𑀳𑀁 𑀏𑀯𑀁 𑀧𑀼𑀝𑁆𑀞𑀸 ‘𑀫𑀸𑀭𑀺𑀢𑁄 𑀫𑁂’𑀢𑀺 𑀯𑀓𑁆𑀔𑀸𑀫𑀺, ‘𑀤𑀼𑀩𑁆𑀩𑀺𑀦𑀻𑀢𑁂 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀢𑀁 𑀆𑀳𑀭𑀸𑀧𑁂𑀢𑁆𑀯𑀸 𑀇𑀤𑀸𑀦𑀺 𑀦𑀁 𑀫𑀸𑀭𑁂𑀲𑀻’𑀢𑀺 𑀫𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀚𑁆𑀛𑀺𑀲𑁆𑀲𑀦𑁆𑀢𑀺, ‘𑀆𑀪𑀭𑀡𑀢𑁆𑀣𑀸𑀬 𑀲𑁄 𑀫𑀁 𑀫𑀸𑀭𑁂𑀢𑀼𑀓𑀸𑀫𑁄 𑀅𑀳𑁄𑀲𑀻’𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀲𑀤𑁆𑀤𑀳𑀺𑀲𑁆𑀲𑀦𑁆𑀢𑀺, 𑀅𑀮𑀁 𑀫𑁂 𑀕𑁂𑀳𑁂𑀦𑀸’’𑀢𑀺 𑀢𑀢𑁆𑀣𑁂𑀯𑀸𑀪𑀭𑀡𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀯𑀺𑀘𑀭𑀦𑁆𑀢𑀻 𑀏𑀓𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀅𑀲𑁆𑀲𑀫𑀁 𑀧𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀫𑀬𑁆𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀤𑁂𑀣𑀸’’𑀢𑀺 𑀆𑀳. 𑀅𑀣 𑀦𑀁 𑀧𑀩𑁆𑀩𑀸𑀚𑁂𑀲𑀼𑀁. 𑀲𑀸 𑀧𑀩𑁆𑀩𑀚𑀺𑀢𑁆𑀯𑀸𑀯 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀸𑀬 𑀓𑀺𑀁 𑀉𑀢𑁆𑀢𑀫’’𑀦𑁆𑀢𑀺? ‘‘𑀪𑀤𑁆𑀤𑁂, 𑀤𑀲𑀲𑀼 𑀯𑀸 𑀓𑀲𑀺𑀡𑁂𑀲𑀼 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀁, 𑀯𑀸𑀤𑀲𑀳𑀲𑁆𑀲𑀁 𑀯𑀸 𑀉𑀕𑁆𑀕𑀡𑁆𑀳𑀺𑀢𑀩𑁆𑀩𑀁, 𑀅𑀬𑀁 𑀅𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀸𑀬 𑀉𑀢𑁆𑀢𑀫𑀢𑁆𑀣𑁄’’𑀢𑀺. ‘‘𑀛𑀸𑀦𑀁 𑀢𑀸𑀯 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀳𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀯𑀸𑀤𑀲𑀳𑀲𑁆𑀲𑀁 𑀧𑀦 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺, 𑀅𑀬𑁆𑀬𑀸’’𑀢𑀺. 𑀅𑀣 𑀦𑀁 𑀢𑁂 𑀯𑀸𑀤𑀲𑀳𑀲𑁆𑀲𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 ‘‘𑀉𑀕𑁆𑀕𑀳𑀺𑀢𑀁 𑀢𑁂 𑀲𑀺𑀧𑁆𑀧𑀁, 𑀇𑀤𑀸𑀦𑀺 𑀢𑁆𑀯𑀁 𑀚𑀫𑁆𑀩𑀼𑀤𑀻𑀧𑀢𑀮𑁂 𑀯𑀺𑀘𑀭𑀺𑀢𑁆𑀯𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀧𑀜𑁆𑀳𑀁 𑀓𑀣𑁂𑀢𑀼𑀁 𑀲𑀫𑀢𑁆𑀣𑀁 𑀑𑀮𑁄𑀓𑁂𑀳𑀻’’𑀢𑀺 𑀢𑀲𑁆𑀲 𑀳𑀢𑁆𑀣𑁂 𑀚𑀫𑁆𑀩𑀼𑀲𑀸𑀔𑀁 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀼𑀁 𑁋 ‘‘𑀕𑀘𑁆𑀙, 𑀪𑀤𑁆𑀤𑁂, 𑀲𑀘𑁂 𑀓𑁄𑀘𑀺 𑀕𑀺𑀳𑀺𑀪𑀽𑀢𑁄 𑀢𑀬𑀸 𑀲𑀤𑁆𑀥𑀺𑀁 𑀧𑀜𑁆𑀳𑀁 𑀓𑀣𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲𑁂𑀯 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀪𑀯𑀸𑀳𑀺, 𑀲𑀘𑁂 𑀧𑀩𑁆𑀩𑀚𑀺𑀢𑁄 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀸𑀳𑀻’’𑀢𑀺.

𑀲𑀸 𑀦𑀸𑀫𑁂𑀦 𑀚𑀫𑁆𑀩𑀼𑀧𑀭𑀺𑀩𑁆𑀩𑀸𑀚𑀺𑀓𑀸 𑀦𑀸𑀫 𑀳𑀼𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀺𑀝𑁆𑀞𑁂 𑀤𑀺𑀝𑁆𑀞𑁂 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀻 𑀯𑀺𑀘𑀭𑀢𑀺. 𑀢𑀸𑀬 𑀲𑀤𑁆𑀥𑀺𑀁 𑀓𑀣𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺. ‘‘𑀇𑀢𑁄 𑀚𑀫𑁆𑀩𑀼𑀧𑀭𑀺𑀩𑁆𑀩𑀸𑀚𑀺𑀓𑀸 𑀆𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸𑀯 𑀫𑀦𑀼𑀲𑁆𑀲𑀸 𑀧𑀮𑀸𑀬𑀦𑁆𑀢𑀺. 𑀲𑀸 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀪𑀺𑀓𑁆𑀔𑀸𑀬 𑀧𑀯𑀺𑀲𑀦𑁆𑀢𑀻 𑀕𑀸𑀫𑀤𑁆𑀯𑀸𑀭𑁂 𑀯𑀸𑀮𑀼𑀓𑀭𑀸𑀲𑀺𑀁 𑀓𑀢𑁆𑀯𑀸 𑀢𑀢𑁆𑀣 𑀚𑀫𑁆𑀩𑀼𑀲𑀸𑀔𑀁 𑀞𑀧𑁂𑀢𑁆𑀯𑀸 ‘‘𑀫𑀬𑀸 𑀲𑀤𑁆𑀥𑀺𑀁 𑀓𑀣𑁂𑀢𑀼𑀁 𑀲𑀫𑀢𑁆𑀣𑁄 𑀚𑀫𑁆𑀩𑀼𑀲𑀸𑀔𑀁 𑀫𑀤𑁆𑀤𑀢𑀽’’𑀢𑀺 𑀯𑀢𑁆𑀯𑀸 𑀕𑀸𑀫𑀁 𑀧𑀸𑀯𑀺𑀲𑀺. 𑀢𑀁 𑀞𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺. 𑀲𑀸𑀧𑀺 𑀫𑀺𑀮𑀸𑀢𑀸𑀬 𑀚𑀫𑁆𑀩𑀼𑀲𑀸𑀔𑀸𑀬 𑀅𑀜𑁆𑀜𑀁 𑀚𑀫𑁆𑀩𑀼𑀲𑀸𑀔𑀁 𑀕𑀡𑁆𑀳𑀸𑀢𑀺, 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀯𑀺𑀘𑀭𑀦𑁆𑀢𑀻 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀕𑀸𑀫𑀤𑁆𑀯𑀸𑀭𑁂 𑀯𑀸𑀮𑀼𑀓𑀭𑀸𑀲𑀺𑀁 𑀓𑀢𑁆𑀯𑀸 𑀚𑀫𑁆𑀩𑀼𑀲𑀸𑀔𑀁 𑀞𑀧𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀢𑁆𑀯𑀸 𑀪𑀺𑀓𑁆𑀔𑀸𑀬 𑀧𑀸𑀯𑀺𑀲𑀺. 𑀲𑀫𑁆𑀩𑀳𑀼𑀮𑀸 𑀕𑀸𑀫𑀤𑀸𑀭𑀓𑀸 𑀚𑀫𑁆𑀩𑀼𑀲𑀸𑀔𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀢𑀤𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀦𑀕𑀭𑀸 𑀦𑀺𑀓𑁆𑀔𑀦𑁆𑀢𑁄 𑀢𑁂 𑀤𑀸𑀭𑀓𑁂 𑀚𑀫𑁆𑀩𑀼𑀲𑀸𑀔𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀧𑀼𑀘𑁆𑀙𑀺. 𑀤𑀸𑀭𑀓𑀸 𑀣𑁂𑀭𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀁𑀲𑀼. ‘‘𑀢𑁂𑀦 𑀳𑀺 𑀤𑀸𑀭𑀓𑀸 𑀇𑀫𑀁 𑀲𑀸𑀔𑀁 𑀫𑀤𑁆𑀤𑀣𑀸’’𑀢𑀺. ‘‘𑀪𑀸𑀬𑀸𑀫, 𑀪𑀦𑁆𑀢𑁂’’𑀢𑀺. ‘‘𑀅𑀳𑀁 𑀧𑀜𑁆𑀳𑀁 𑀓𑀣𑁂𑀲𑁆𑀲𑀸𑀫𑀺, 𑀫𑀤𑁆𑀤𑀣 𑀢𑀼𑀫𑁆𑀳𑁂’’𑀢𑀺. 𑀢𑁂 𑀣𑁂𑀭𑀲𑁆𑀲 𑀯𑀘𑀦𑁂𑀦 𑀲𑀜𑁆𑀚𑀸𑀢𑀼𑀲𑁆𑀲𑀸𑀳𑀸 𑀢𑀣𑀸 𑀓𑀢𑁆𑀯𑀸 𑀫𑀤𑁆𑀤𑀦𑁆𑀢𑀸 𑀚𑀫𑁆𑀩𑀼𑀲𑀸𑀔𑀁 𑀉𑀓𑁆𑀔𑀺𑀧𑀺𑀁𑀲𑀼. 𑀧𑀭𑀺𑀩𑁆𑀩𑀸𑀚𑀺𑀓𑀸 𑀆𑀕𑀦𑁆𑀢𑁆𑀯𑀸 𑀢𑁂 𑀧𑀭𑀺𑀪𑀸𑀲𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀫𑀫 𑀧𑀜𑁆𑀳𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀓𑀲𑁆𑀫𑀸 𑀫𑁂 𑀲𑀸𑀔𑀁 𑀫𑀤𑁆𑀤𑀣𑀸’’𑀢𑀺 𑀆𑀳. ‘‘𑀅𑀬𑁆𑀬𑁂𑀦𑀫𑁆𑀳𑀸 𑀫𑀤𑁆𑀤𑀸𑀧𑀺𑀢𑀸’’𑀢𑀺 𑀆𑀳𑀁𑀲𑀼. ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀫𑁂 𑀲𑀸𑀔𑀸 𑀫𑀤𑁆𑀤𑀸𑀧𑀺𑀢𑀸’’𑀢𑀺? ‘‘𑀆𑀫, 𑀪𑀕𑀺𑀦𑀻’’𑀢𑀺. ‘‘𑀢𑁂𑀦 𑀳𑀺 𑀫𑀬𑀸 𑀲𑀤𑁆𑀥𑀺𑀁 𑀧𑀜𑁆𑀳𑀁 𑀓𑀣𑁂𑀣𑀸’’𑀢𑀺. ‘‘𑀲𑀸𑀥𑀼 𑀓𑀣𑁂𑀲𑁆𑀲𑀸𑀫𑀻’’𑀢𑀺.

𑀲𑀸 𑀯𑀟𑁆𑀠𑀫𑀸𑀦𑀓𑀘𑁆𑀙𑀸𑀬𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺, 𑀲𑀓𑀮𑀦𑀕𑀭𑀁 𑀲𑀗𑁆𑀔𑀼𑀪𑀺. ‘‘𑀤𑁆𑀯𑀺𑀦𑁆𑀦𑀁 𑀧𑀡𑁆𑀟𑀺𑀢𑀸𑀦𑀁 𑀓𑀣𑀁 𑀲𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀦𑀸𑀕𑀭𑀸 𑀢𑀸𑀬 𑀲𑀤𑁆𑀥𑀺𑀁𑀬𑁂𑀯 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀧𑀭𑀺𑀩𑁆𑀩𑀸𑀚𑀺𑀓𑀸 𑀣𑁂𑀭𑀁 𑀆𑀳 𑁋 ‘‘𑀪𑀦𑁆𑀢𑁂, 𑀧𑀼𑀘𑁆𑀙𑀸𑀫𑀺 𑀢𑁂 𑀧𑀜𑁆𑀳’’𑀦𑁆𑀢𑀺. ‘‘𑀧𑀼𑀘𑁆𑀙, 𑀪𑀕𑀺𑀦𑀻’’𑀢𑀺. 𑀲𑀸 𑀯𑀸𑀤𑀲𑀳𑀲𑁆𑀲𑀁 𑀧𑀼𑀘𑁆𑀙𑀺, 𑀧𑀼𑀘𑁆𑀙𑀺𑀢𑀁 𑀧𑀼𑀘𑁆𑀙𑀺𑀢𑀁 𑀣𑁂𑀭𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀏𑀢𑁆𑀢𑀓𑀸 𑀏𑀯 𑀢𑁂 𑀧𑀜𑁆𑀳𑀸, 𑀅𑀜𑁆𑀜𑁂𑀧𑀺 𑀅𑀢𑁆𑀣𑀻’’𑀢𑀺? ‘‘𑀏𑀢𑁆𑀢𑀓𑀸 𑀏𑀯, 𑀪𑀦𑁆𑀢𑁂’’𑀢𑀺. ‘‘𑀢𑀬𑀸 𑀩𑀳𑀽 𑀧𑀜𑁆𑀳𑀸 𑀧𑀼𑀝𑁆𑀞𑀸, 𑀫𑀬𑀫𑁆𑀧𑀺 𑀏𑀓𑀁 𑀧𑀼𑀘𑁆𑀙𑀸𑀫, 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀲𑀺 𑀦𑁄’’𑀢𑀺? ‘‘𑀚𑀸𑀦𑀫𑀸𑀦𑀸 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀸𑀫𑀺 𑀧𑀼𑀘𑁆𑀙𑀣, 𑀪𑀦𑁆𑀢𑁂’’𑀢𑀺. 𑀣𑁂𑀭𑁄 ‘‘𑀏𑀓𑀁 𑀦𑀸𑀫 𑀓𑀺’’𑀦𑁆𑀢𑀺 (𑀔𑀼. 𑀧𑀸. 𑁪.𑁧) 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀲𑀸 ‘‘𑀏𑀯𑀁 𑀦𑀸𑀫𑁂𑀲 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄’’𑀢𑀺 𑀅𑀚𑀸𑀦𑀦𑁆𑀢𑀻 ‘‘𑀓𑀺𑀁 𑀦𑀸𑀫𑁂𑀢𑀁, 𑀪𑀦𑁆𑀢𑁂’’𑀢𑀺 𑀧𑀼𑀘𑁆𑀙𑀺. ‘‘𑀩𑀼𑀤𑁆𑀥𑀧𑀜𑁆𑀳𑁄 𑀦𑀸𑀫, 𑀪𑀕𑀺𑀦𑀻’’𑀢𑀺. ‘‘𑀫𑀬𑁆𑀳𑀫𑁆𑀧𑀺 𑀢𑀁 𑀤𑁂𑀣, 𑀪𑀦𑁆𑀢𑁂’’𑀢𑀺. ‘‘𑀲𑀘𑁂 𑀫𑀸𑀤𑀺𑀲𑀸 𑀪𑀯𑀺𑀲𑁆𑀲𑀲𑀺, 𑀤𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀫𑀁 𑀧𑀩𑁆𑀩𑀸𑀚𑁂𑀣𑀸’’𑀢𑀺. 𑀣𑁂𑀭𑁄 𑀪𑀺𑀓𑁆𑀔𑀼𑀦𑀻𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀲𑀸 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑀸 𑀓𑀼𑀡𑁆𑀟𑀮𑀓𑁂𑀲𑀺𑀢𑁆𑀣𑁂𑀭𑀻 𑀦𑀸𑀫 𑀳𑀼𑀢𑁆𑀯𑀸 𑀓𑀢𑀺𑀧𑀸𑀳𑀘𑁆𑀘𑀬𑁂𑀦𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀓𑀼𑀡𑁆𑀟𑀮𑀓𑁂𑀲𑀺𑀢𑁆𑀣𑁂𑀭𑀺𑀬𑀸 𑀥𑀫𑁆𑀫𑀲𑁆𑀲𑀯𑀦𑀜𑁆𑀘 𑀩𑀳𑀼𑀁 𑀦𑀢𑁆𑀣𑀺, 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀜𑁆𑀘𑀲𑁆𑀲𑀸 𑀫𑀢𑁆𑀣𑀓𑀁 𑀧𑀢𑁆𑀢𑀁, 𑀏𑀓𑁂𑀦 𑀓𑀺𑀭 𑀘𑁄𑀭𑁂𑀦 𑀲𑀤𑁆𑀥𑀺𑀁 𑀫𑀳𑀸𑀲𑀗𑁆𑀕𑀸𑀫𑀁 𑀓𑀢𑁆𑀯𑀸 𑀚𑀺𑀦𑀺𑀢𑁆𑀯𑀸 𑀆𑀕𑀢𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀫𑀬𑀸 𑀤𑁂𑀲𑀺𑀢𑀥𑀫𑁆𑀫𑀁 ‘𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸’𑀢𑀺 𑀧𑀫𑀸𑀡𑀁 𑀫𑀸 𑀕𑀡𑁆𑀳𑀣, 𑀅𑀦𑀢𑁆𑀣𑀓𑀁 𑀧𑀤𑀲𑀢𑀫𑁆𑀧𑀺 𑀲𑁂𑀬𑁆𑀬𑁄 𑀦 𑀳𑁄𑀢𑀺, 𑀥𑀫𑁆𑀫𑀧𑀤𑀁 𑀧𑀦 𑀏𑀓𑀫𑁆𑀧𑀺 𑀲𑁂𑀬𑁆𑀬𑁄𑀯. 𑀅𑀯𑀲𑁂𑀲𑀘𑁄𑀭𑁂 𑀚𑀺𑀦𑀦𑁆𑀢𑀲𑁆𑀲 𑀘 𑀚𑀬𑁄 𑀦𑀸𑀫 𑀦 𑀳𑁄𑀢𑀺, 𑀅𑀚𑁆𑀛𑀢𑁆𑀢𑀺𑀓𑀓𑀺𑀮𑁂𑀲𑀘𑁄𑀭𑁂 𑀚𑀺𑀦𑀦𑁆𑀢𑀲𑁆𑀲𑁂𑀯 𑀧𑀦 𑀚𑀬𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁦𑁨. ‘‘𑀬𑁄 𑀘 𑀕𑀸𑀣𑀸𑀲𑀢𑀁 𑀪𑀸𑀲𑁂, 𑀅𑀦𑀢𑁆𑀣𑀧𑀤𑀲𑀁𑀳𑀺𑀢𑀸;

𑀏𑀓𑀁 𑀥𑀫𑁆𑀫𑀧𑀤𑀁 𑀲𑁂𑀬𑁆𑀬𑁄, 𑀬𑀁 𑀲𑀼𑀢𑁆𑀯𑀸 𑀉𑀧𑀲𑀫𑁆𑀫𑀢𑀺.

𑁧𑁦𑁩. ‘‘𑀬𑁄 𑀲𑀳𑀲𑁆𑀲𑀁 𑀲𑀳𑀲𑁆𑀲𑁂𑀦, 𑀲𑀗𑁆𑀕𑀸𑀫𑁂 𑀫𑀸𑀦𑀼𑀲𑁂 𑀚𑀺𑀦𑁂;

𑀏𑀓𑀜𑁆𑀘 𑀚𑁂𑀬𑁆𑀬𑀫𑀢𑁆𑀢𑀸𑀦𑀁, 𑀲 𑀯𑁂 𑀲𑀗𑁆𑀕𑀸𑀫𑀚𑀼𑀢𑁆𑀢𑀫𑁄’’𑀢𑀺.

𑀢𑀢𑁆𑀣 𑀕𑀸𑀣𑀸𑀲𑀢𑀦𑁆𑀢𑀺 𑀬𑁄 𑀘 𑀧𑀼𑀕𑁆𑀕𑀮𑁄 𑀲𑀢𑀧𑀭𑀺𑀘𑁆𑀙𑁂𑀤𑀸 𑀩𑀳𑀽𑀧𑀺 𑀕𑀸𑀣𑀸 𑀪𑀸𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀦𑀢𑁆𑀣𑀧𑀤𑀲𑀁𑀳𑀺𑀢𑀸𑀢𑀺 𑀆𑀓𑀸𑀲𑀯𑀡𑁆𑀡𑀦𑀸𑀤𑀺𑀯𑀲𑁂𑀦 𑀅𑀦𑀢𑁆𑀣𑀓𑁂𑀳𑀺 𑀧𑀤𑁂𑀳𑀺 𑀲𑀁𑀳𑀺𑀢𑀸. 𑀥𑀫𑁆𑀫𑀧𑀤𑀦𑁆𑀢𑀺 𑀅𑀢𑁆𑀣𑀲𑀸𑀥𑀓𑀁 𑀔𑀦𑁆𑀥𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁, ‘‘𑀘𑀢𑁆𑀢𑀸𑀭𑀺𑀫𑀸𑀦𑀺 𑀧𑀭𑀺𑀩𑁆𑀩𑀸𑀚𑀓𑀸 𑀥𑀫𑁆𑀫𑀧𑀤𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀅𑀦𑀪𑀺𑀚𑁆𑀛𑀸 𑀧𑀭𑀺𑀩𑁆𑀩𑀸𑀚𑀓𑀸 𑀥𑀫𑁆𑀫𑀧𑀤𑀁, 𑀅𑀩𑁆𑀬𑀸𑀧𑀸𑀤𑁄 𑀧𑀭𑀺𑀩𑁆𑀩𑀸𑀚𑀓𑀸 𑀥𑀫𑁆𑀫𑀧𑀤𑀁, 𑀲𑀫𑁆𑀫𑀸𑀲𑀢𑀺 𑀧𑀭𑀺𑀩𑁆𑀩𑀸𑀚𑀓𑀸 𑀥𑀫𑁆𑀫𑀧𑀤𑀁, 𑀲𑀫𑁆𑀫𑀸𑀲𑀫𑀸𑀥𑀺 𑀧𑀭𑀺𑀩𑁆𑀩𑀸𑀚𑀓𑀸 𑀥𑀫𑁆𑀫𑀧𑀤’’𑀦𑁆𑀢𑀺 (𑀅. 𑀦𑀺. 𑁪.𑁩𑁦) 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀥𑀫𑁆𑀫𑀧𑀤𑁂𑀲𑀼 𑀏𑀓𑀫𑁆𑀧𑀺 𑀥𑀫𑁆𑀫𑀧𑀤𑀁 𑀲𑁂𑀬𑁆𑀬𑁄. 𑀬𑁄 𑀲𑀳𑀲𑁆𑀲𑀁 𑀲𑀳𑀲𑁆𑀲𑁂𑀦𑀸𑀢𑀺 𑀬𑁄 𑀏𑀓𑁄 𑀲𑀗𑁆𑀕𑀸𑀫𑀬𑁄𑀥𑁄 𑀲𑀳𑀲𑁆𑀲𑁂𑀦 𑀕𑀼𑀡𑀺𑀢𑀁 𑀲𑀳𑀲𑁆𑀲𑀁 𑀫𑀸𑀦𑀼𑀲𑁂 𑀏𑀓𑀲𑁆𑀫𑀺𑀁 𑀲𑀗𑁆𑀕𑀸𑀫𑁂 𑀚𑀺𑀦𑁂𑀬𑁆𑀬, 𑀤𑀲𑀫𑀦𑀼𑀲𑁆𑀲𑀲𑀢𑀲𑀳𑀲𑁆𑀲𑀁 𑀚𑀺𑀦𑀺𑀢𑁆𑀯𑀸 𑀚𑀬𑀁 𑀆𑀳𑀭𑁂𑀬𑁆𑀬, 𑀅𑀬𑀫𑁆𑀧𑀺 𑀲𑀗𑁆𑀕𑀸𑀫𑀚𑀺𑀦𑀢𑀁 𑀉𑀢𑁆𑀢𑀫𑁄 𑀧𑀯𑀭𑁄 𑀦𑀸𑀫 𑀦 𑀳𑁄𑀢𑀺. 𑀏𑀓𑀜𑁆𑀘 𑀚𑁂𑀬𑁆𑀬𑀫𑀢𑁆𑀢𑀸𑀦𑀦𑁆𑀢𑀺 𑀬𑁄 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂𑀲𑀼 𑀅𑀚𑁆𑀛𑀢𑁆𑀢𑀺𑀓𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑁆𑀫𑀲𑀦𑁆𑀢𑁄 𑀅𑀢𑁆𑀢𑀦𑁄 𑀮𑁄𑀪𑀸𑀤𑀺𑀓𑀺𑀮𑁂𑀲𑀚𑀬𑁂𑀦 𑀅𑀢𑁆𑀢𑀸𑀦𑀁 𑀚𑀺𑀦𑁂𑀬𑁆𑀬. 𑀲 𑀯𑁂 𑀲𑀗𑁆𑀕𑀸𑀫𑀚𑀼𑀢𑁆𑀢𑀫𑁄𑀢𑀺 𑀲𑁄 𑀲𑀗𑁆𑀕𑀸𑀫𑀚𑀺𑀦𑀸𑀦𑀁 𑀉𑀢𑁆𑀢𑀫𑁄 𑀧𑀯𑀭𑁄 𑀲𑀗𑁆𑀕𑀸𑀫𑀲𑀻𑀲𑀬𑁄𑀥𑁄𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀓𑀼𑀡𑁆𑀟𑀮𑀓𑁂𑀲𑀺𑀢𑁆𑀣𑁂𑀭𑀻𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀅𑀦𑀢𑁆𑀣𑀧𑀼𑀘𑁆𑀙𑀓𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑀅𑀢𑁆𑀢𑀸 𑀳𑀯𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀦𑀢𑁆𑀣𑀧𑀼𑀘𑁆𑀙𑀓𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 ‘‘𑀓𑀺𑀁 𑀦𑀼 𑀔𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀢𑁆𑀣𑀫𑁂𑀯 𑀚𑀸𑀦𑀸𑀢𑀺, 𑀉𑀤𑀸𑀳𑀼 𑀅𑀦𑀢𑁆𑀣𑀫𑁆𑀧𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀅𑀢𑁆𑀣𑀫𑁂𑀯 𑀚𑀸𑀦𑀸𑀣 𑀫𑀜𑁆𑀜𑁂, 𑀦𑁄 𑀅𑀦𑀢𑁆𑀣’’𑀦𑁆𑀢𑀺? ‘‘𑀅𑀢𑁆𑀣𑀜𑁆𑀘𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀚𑀸𑀦𑀸𑀫𑀺 𑀅𑀦𑀢𑁆𑀣𑀜𑁆𑀘𑀸’’𑀢𑀺. ‘‘𑀢𑁂𑀦 𑀳𑀺 𑀫𑁂 𑀅𑀦𑀢𑁆𑀣𑀁 𑀓𑀣𑁂𑀣𑀸’’𑀢𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀉𑀲𑁆𑀲𑀽𑀭𑀲𑁂𑀬𑁆𑀬𑀁 𑀆𑀮𑀲𑁆𑀬𑀁, 𑀘𑀡𑁆𑀟𑀺𑀓𑁆𑀓𑀁 𑀤𑀻𑀖𑀲𑁄𑀡𑁆𑀟𑀺𑀬𑀁;

𑀏𑀓𑀲𑁆𑀲𑀤𑁆𑀥𑀸𑀦𑀕𑀫𑀦𑀁 𑀧𑀭𑀤𑀸𑀭𑀽𑀧𑀲𑁂𑀯𑀦𑀁;

𑀏𑀢𑀁 𑀩𑁆𑀭𑀸𑀳𑁆𑀫𑀡 𑀲𑁂𑀯𑀲𑁆𑀲𑀼, 𑀅𑀦𑀢𑁆𑀣𑀁 𑀢𑁂 𑀪𑀯𑀺𑀲𑁆𑀲𑀢𑀻’’𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀲𑀸𑀥𑀼𑀓𑀸𑀭𑀫𑀤𑀸𑀲𑀺 ‘‘𑀲𑀸𑀥𑀼 𑀲𑀸𑀥𑀼, 𑀕𑀡𑀸𑀘𑀭𑀺𑀬, 𑀕𑀡𑀚𑁂𑀝𑁆𑀞𑀓, 𑀢𑀼𑀫𑁆𑀳𑁂 𑀅𑀢𑁆𑀣𑀜𑁆𑀘 𑀚𑀸𑀦𑀸𑀣 𑀅𑀦𑀢𑁆𑀣𑀜𑁆𑀘𑀸’’𑀢𑀺. ‘‘𑀏𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀢𑁆𑀣𑀸𑀦𑀢𑁆𑀣𑀚𑀸𑀦𑀦𑀓𑁄 𑀦𑀸𑀫 𑀫𑀬𑀸 𑀲𑀤𑀺𑀲𑁄 𑀦𑀢𑁆𑀣𑀻’’𑀢𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀅𑀚𑁆𑀛𑀸𑀲𑀬𑀁 𑀉𑀧𑀥𑀸𑀭𑁂𑀢𑁆𑀯𑀸, ‘‘𑀩𑁆𑀭𑀸𑀳𑁆𑀫𑀡, 𑀓𑁂𑀦 𑀓𑀫𑁆𑀫𑁂𑀦 𑀚𑀻𑀯𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀚𑀽𑀢𑀓𑀫𑁆𑀫𑁂𑀦, 𑀪𑁄 𑀕𑁄𑀢𑀫𑀸’’𑀢𑀺. ‘‘𑀓𑀺𑀁 𑀧𑀦 𑀢𑁂 𑀚𑀬𑁄 𑀳𑁄𑀢𑀺 𑀧𑀭𑀸𑀚𑀬𑁄’’𑀢𑀺. ‘‘𑀚𑀬𑁄𑀧𑀺 𑀳𑁄𑀢𑀺 𑀧𑀭𑀸𑀚𑀬𑁄𑀧𑀻’’𑀢𑀺 𑀯𑀼𑀢𑁆𑀢𑁂, ‘‘𑀩𑁆𑀭𑀸𑀳𑁆𑀫𑀡, 𑀅𑀧𑁆𑀧𑀫𑀢𑁆𑀢𑀓𑁄 𑀏𑀲, 𑀧𑀭𑀁 𑀚𑀺𑀦𑀦𑁆𑀢𑀲𑁆𑀲 𑀚𑀬𑁄 𑀦𑀸𑀫 𑀦 𑀲𑁂𑀬𑁆𑀬𑁄. 𑀬𑁄 𑀧𑀦 𑀓𑀺𑀮𑁂𑀲𑀚𑀬𑁂𑀦 𑀅𑀢𑁆𑀢𑀸𑀦𑀁 𑀚𑀺𑀦𑀸𑀢𑀺, 𑀢𑀲𑁆𑀲 𑀚𑀬𑁄 𑀲𑁂𑀬𑁆𑀬𑁄. 𑀦 𑀳𑀺 𑀢𑀁 𑀚𑀬𑀁 𑀓𑁄𑀘𑀺 𑀅𑀧𑀚𑀬𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁧𑁦𑁪. ‘‘𑀅𑀢𑁆𑀢𑀸 𑀳𑀯𑁂 𑀚𑀺𑀢𑀁 𑀲𑁂𑀬𑁆𑀬𑁄, 𑀬𑀸 𑀘𑀸𑀬𑀁 𑀇𑀢𑀭𑀸 𑀧𑀚𑀸;

𑀅𑀢𑁆𑀢𑀤𑀦𑁆𑀢𑀲𑁆𑀲 𑀧𑁄𑀲𑀲𑁆𑀲, 𑀦𑀺𑀘𑁆𑀘𑀁 𑀲𑀜𑁆𑀜𑀢𑀘𑀸𑀭𑀺𑀦𑁄.

𑁧𑁦𑁫. ‘‘𑀦𑁂𑀯 𑀤𑁂𑀯𑁄 𑀦 𑀕𑀦𑁆𑀥𑀩𑁆𑀩𑁄, 𑀦 𑀫𑀸𑀭𑁄 𑀲𑀳 𑀩𑁆𑀭𑀳𑁆𑀫𑀼𑀦𑀸;

𑀚𑀺𑀢𑀁 𑀅𑀧𑀚𑀺𑀢𑀁 𑀓𑀬𑀺𑀭𑀸, 𑀢𑀣𑀸𑀭𑀽𑀧𑀲𑁆𑀲 𑀚𑀦𑁆𑀢𑀼𑀦𑁄’’𑀢𑀺.

𑀢𑀢𑁆𑀣 𑀳𑀯𑁂𑀢𑀺 𑀦𑀺𑀧𑀸𑀢𑁄. 𑀚𑀺𑀢𑀦𑁆𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄, 𑀅𑀢𑁆𑀢𑀦𑁄 𑀓𑀺𑀮𑁂𑀲𑀚𑀬𑁂𑀦 𑀅𑀢𑁆𑀢𑀸 𑀚𑀺𑀢𑁄 𑀲𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀬𑀸 𑀘𑀸𑀬𑀁 𑀇𑀢𑀭𑀸 𑀧𑀚𑀸𑀢𑀺 𑀬𑀸 𑀧𑀦𑀸𑀬𑀁 𑀅𑀯𑀲𑁂𑀲𑀸 𑀧𑀚𑀸 𑀚𑀽𑀢𑁂𑀦 𑀯𑀸 𑀥𑀦𑀳𑀭𑀡𑁂𑀦 𑀯𑀸 𑀲𑀗𑁆𑀕𑀸𑀫𑁂𑀦 𑀯𑀸 𑀩𑀮𑀸𑀪𑀺𑀪𑀯𑁂𑀦 𑀯𑀸 𑀚𑀺𑀢𑀸 𑀪𑀯𑁂𑀬𑁆𑀬, 𑀢𑀁 𑀚𑀺𑀦𑀦𑁆𑀢𑁂𑀦 𑀬𑀁 𑀚𑀺𑀢𑀁, 𑀦 𑀢𑀁 𑀲𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦 𑀢𑀤𑁂𑀯 𑀚𑀺𑀢𑀁 𑀲𑁂𑀬𑁆𑀬𑁄, 𑀇𑀤𑀁 𑀦 𑀲𑁂𑀬𑁆𑀬𑁄𑀢𑀺? 𑀬𑀲𑁆𑀫𑀸 𑀅𑀢𑁆𑀢𑀤𑀦𑁆𑀢𑀲𑁆𑀲…𑀧𑁂… 𑀢𑀣𑀸𑀭𑀽𑀧𑀲𑁆𑀲 𑀚𑀦𑁆𑀢𑀼𑀦𑁄𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀳𑀺 𑀬𑁆𑀯𑀸𑀬𑀁 𑀦𑀺𑀓𑁆𑀓𑀺𑀮𑁂𑀲𑀢𑀸𑀬 𑀅𑀢𑁆𑀢𑀤𑀦𑁆𑀢𑁄 𑀧𑁄𑀲𑁄, 𑀢𑀲𑁆𑀲 𑀅𑀢𑁆𑀢𑀤𑀦𑁆𑀢𑀲𑁆𑀲 𑀓𑀸𑀬𑀸𑀤𑀻𑀳𑀺 𑀦𑀺𑀘𑁆𑀘𑀁 𑀲𑀜𑁆𑀜𑀢𑀘𑀸𑀭𑀺𑀦𑁄 𑀏𑀯𑀭𑀽𑀧𑀲𑁆𑀲 𑀇𑀫𑁂𑀳𑀺 𑀓𑀸𑀬𑀲𑀜𑁆𑀜𑀫𑀸𑀤𑀻𑀳𑀺 𑀲𑀜𑁆𑀜𑀢𑀲𑁆𑀲 𑀚𑀦𑁆𑀢𑀼𑀦𑁄 𑀤𑁂𑀯𑁄 𑀯𑀸 𑀕𑀦𑁆𑀥𑀩𑁆𑀩𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀲𑀳 𑀉𑀝𑁆𑀞𑀳𑀺𑀢𑁆𑀯𑀸 ‘‘𑀅𑀳𑀫𑀲𑁆𑀲 𑀚𑀺𑀢𑀁 𑀅𑀧𑀚𑀺𑀢𑀁 𑀓𑀭𑀺𑀲𑁆𑀲𑀸𑀫𑀺, 𑀫𑀕𑁆𑀕𑀪𑀸𑀯𑀦𑀸𑀬 𑀧𑀳𑀻𑀦𑁂 𑀓𑀺𑀮𑁂𑀲𑁂 𑀧𑀼𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀖𑀝𑁂𑀦𑁆𑀢𑁄𑀧𑀺 𑀯𑀸𑀬𑀫𑀦𑁆𑀢𑁄𑀧𑀺 𑀬𑀣𑀸 𑀥𑀦𑀸𑀤𑀻𑀳𑀺 𑀧𑀭𑀸𑀚𑀺𑀢𑁄 𑀧𑀓𑁆𑀔𑀦𑁆𑀢𑀭𑁄 𑀳𑀼𑀢𑁆𑀯𑀸 𑀇𑀢𑀭𑁂𑀦 𑀚𑀺𑀢𑀁 𑀧𑀼𑀦 𑀚𑀺𑀦𑀦𑁆𑀢𑁄 𑀅𑀧𑀚𑀺𑀢𑀁 𑀓𑀭𑁂𑀬𑁆𑀬, ‘‘𑀏𑀯𑀁 𑀅𑀧𑀚𑀺𑀢𑀁 𑀓𑀸𑀢𑀼𑀁 𑀦𑁂𑀯 𑀲𑀓𑁆𑀓𑀼𑀡𑁂𑀬𑁆𑀬𑀸’’𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀅𑀦𑀢𑁆𑀣𑀧𑀼𑀘𑁆𑀙𑀓𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀫𑀸𑀢𑀼𑀮𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑀫𑀸𑀲𑁂 𑀫𑀸𑀲𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀫𑀸𑀢𑀼𑀮𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀣𑁂𑀭𑁄 𑀓𑀺𑀭 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀳 𑁋 ‘‘𑀓𑀺𑀁 𑀦𑀼 𑀔𑁄, 𑀩𑁆𑀭𑀸𑀳𑁆𑀫𑀡, 𑀓𑀺𑀜𑁆𑀘𑀺𑀤𑁂𑀯 𑀓𑀼𑀲𑀮𑀁 𑀓𑀭𑁄𑀲𑀻’’𑀢𑀺? ‘‘𑀓𑀭𑁄𑀫𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀓𑀭𑁄𑀲𑀻’’𑀢𑀺? ‘‘𑀫𑀸𑀲𑁂 𑀫𑀸𑀲𑁂 𑀲𑀳𑀲𑁆𑀲𑀧𑀭𑀺𑀘𑁆𑀘𑀸𑀕𑁂𑀦 𑀤𑀸𑀦𑀁 𑀤𑀫𑁆𑀫𑀻’’𑀢𑀺. ‘‘𑀓𑀲𑁆𑀲 𑀤𑁂𑀲𑀻’’𑀢𑀺? ‘‘𑀦𑀺𑀕𑀡𑁆𑀞𑀸𑀦𑀁, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀢𑁆𑀣𑀬𑀦𑁆𑀢𑁄’’𑀢𑀺? ‘‘𑀩𑁆𑀭𑀳𑁆𑀫𑀮𑁄𑀓𑀁, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀦 𑀩𑁆𑀭𑀳𑁆𑀫𑀮𑁄𑀓𑀲𑁆𑀲 𑀅𑀬𑀁 𑀫𑀕𑁆𑀕𑁄’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀓𑁄 𑀏𑀯𑀫𑀸𑀳𑀸’’𑀢𑀺? ‘‘𑀆𑀘𑀭𑀺𑀬𑁂𑀳𑀺 𑀫𑁂 𑀓𑀣𑀺𑀢𑀁, 𑀪𑀦𑁆𑀢𑁂’’𑀢𑀺. ‘‘𑀦𑁄 𑀢𑁆𑀯𑀁 𑀩𑁆𑀭𑀳𑁆𑀫𑀮𑁄𑀓𑀲𑁆𑀲 𑀫𑀕𑁆𑀕𑀁 𑀚𑀸𑀦𑀸𑀲𑀺, 𑀦𑀸𑀧𑀺 𑀢𑁂 𑀆𑀘𑀭𑀺𑀬𑀸, 𑀲𑀢𑁆𑀣𑀸𑀯 𑀏𑀓𑁄 𑀚𑀸𑀦𑀸𑀢𑀺, 𑀏𑀳𑀺, 𑀩𑁆𑀭𑀸𑀳𑁆𑀫𑀡, 𑀩𑁆𑀭𑀳𑁆𑀫𑀮𑁄𑀓𑀲𑁆𑀲 𑀢𑁂 𑀫𑀕𑁆𑀕𑀁 𑀓𑀣𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳𑀸’’𑀢𑀺, ‘‘𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 𑀲𑀸𑀥𑀼 𑀯𑀢𑀲𑁆𑀲 𑀩𑁆𑀭𑀳𑁆𑀫𑀮𑁄𑀓𑀲𑁆𑀲 𑀫𑀕𑁆𑀕𑀁 𑀓𑀣𑁂𑀣𑀸’’𑀢𑀺. 𑀲𑀢𑁆𑀣𑀸 ‘‘𑀏𑀯𑀁 𑀓𑀺𑀭, 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀪𑁄 𑀕𑁄𑀢𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀩𑁆𑀭𑀸𑀳𑁆𑀫𑀡, 𑀢𑀬𑀸 𑀏𑀯𑀁 𑀤𑀤𑀫𑀸𑀦𑁂𑀦 𑀯𑀲𑁆𑀲𑀲𑀢𑀁 𑀤𑀺𑀦𑁆𑀦𑀤𑀸𑀦𑀢𑁄𑀧𑀺 𑀫𑀼𑀳𑀼𑀢𑁆𑀢𑀫𑀢𑁆𑀢𑀁 𑀧𑀲𑀦𑁆𑀦𑀘𑀺𑀢𑁆𑀢𑁂𑀦 𑀫𑀫 𑀲𑀸𑀯𑀓𑀲𑁆𑀲 𑀑𑀮𑁄𑀓𑀦𑀁 𑀯𑀸 𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀫𑀢𑁆𑀢𑀤𑀸𑀦𑀁 𑀯𑀸 𑀫𑀳𑀧𑁆𑀨𑀮𑀢𑀭’’𑀦𑁆𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁬. ‘‘𑀫𑀸𑀲𑁂 𑀫𑀸𑀲𑁂 𑀲𑀳𑀲𑁆𑀲𑁂𑀦, 𑀬𑁄 𑀬𑀚𑁂𑀣 𑀲𑀢𑀁 𑀲𑀫𑀁;

𑀏𑀓𑀜𑁆𑀘 𑀪𑀸𑀯𑀺𑀢𑀢𑁆𑀢𑀸𑀦𑀁, 𑀫𑀼𑀳𑀼𑀢𑁆𑀢𑀫𑀧𑀺 𑀧𑀽𑀚𑀬𑁂;

𑀲𑀸𑀬𑁂𑀯 𑀧𑀽𑀚𑀦𑀸 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀯𑀲𑁆𑀲𑀲𑀢𑀁 𑀳𑀼𑀢’’𑀦𑁆𑀢𑀺.

𑀢𑀢𑁆𑀣 𑀲𑀳𑀲𑁆𑀲𑁂𑀦𑀸𑀳𑀺 𑀲𑀳𑀲𑁆𑀲𑀧𑀭𑀺𑀘𑁆𑀘𑀸𑀕𑁂𑀦. 𑀬𑁄 𑀬𑀚𑁂𑀣 𑀲𑀢𑀁 𑀲𑀫𑀦𑁆𑀢𑀺 𑀬𑁄 𑀯𑀲𑁆𑀲𑀲𑀢𑀁 𑀫𑀸𑀲𑁂 𑀫𑀸𑀲𑁂 𑀲𑀳𑀲𑁆𑀲𑀁 𑀧𑀭𑀺𑀘𑁆𑀘𑀚𑀦𑁆𑀢𑁄 𑀮𑁄𑀓𑀺𑀬𑀫𑀳𑀸𑀚𑀦𑀲𑁆𑀲 𑀤𑀸𑀦𑀁 𑀤𑀤𑁂𑀬𑁆𑀬, 𑀏𑀓𑀜𑁆𑀘 𑀪𑀸𑀯𑀺𑀢𑀢𑁆𑀢𑀸𑀦𑀦𑁆𑀢𑀺 𑀬𑁄 𑀧𑀦 𑀏𑀓𑀁 𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑁂𑀲𑁂𑀦 𑀯𑀟𑁆𑀠𑀺𑀢𑀅𑀢𑁆𑀢𑀸𑀦𑀁 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀲𑁄𑀢𑀸𑀧𑀦𑁆𑀦𑀁, 𑀉𑀧𑀭𑀺𑀫𑀓𑁄𑀝𑀺𑀬𑀸 𑀔𑀻𑀡𑀸𑀲𑀯𑀁 𑀖𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑀁 𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀤𑀸𑀦𑀯𑀲𑁂𑀦 𑀯𑀸 𑀬𑀸𑀧𑀦𑀫𑀢𑁆𑀢𑀆𑀳𑀸𑀭𑀤𑀸𑀦𑀯𑀲𑁂𑀦 𑀯𑀸 𑀣𑀽𑀮𑀲𑀸𑀝𑀓𑀤𑀸𑀦𑀫𑀢𑁆𑀢𑁂𑀦 𑀯𑀸 𑀧𑀽𑀚𑁂𑀬𑁆𑀬. 𑀬𑀁 𑀇𑀢𑀭𑁂𑀦 𑀯𑀲𑁆𑀲𑀲𑀢𑀁 𑀳𑀼𑀢𑀁. 𑀢𑀢𑁄 𑀲𑀸𑀬𑁂𑀯 𑀧𑀽𑀚𑀦𑀸 𑀲𑁂𑀬𑁆𑀬𑁄. 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄𑀢𑀺 𑀅𑀢𑁆𑀣𑁄𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑁄, 𑀅𑀜𑁆𑀜𑁂𑀧𑀺 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀫𑀸𑀢𑀼𑀮𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑀯𑀢𑁆𑀣𑀼

𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀦𑁆𑀢𑀽𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀫𑁆𑀧𑀺 𑀳𑀺 𑀣𑁂𑀭𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀓𑀺𑀁, 𑀩𑁆𑀭𑀸𑀳𑁆𑀫𑀡, 𑀓𑀼𑀲𑀮𑀁 𑀓𑀭𑁄𑀲𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀓𑀭𑁄𑀲𑀻’’𑀢𑀺? ‘‘𑀫𑀸𑀲𑁂 𑀫𑀸𑀲𑁂 𑀏𑀓𑀁 𑀏𑀓𑀁 𑀧𑀲𑀼𑀁 𑀖𑀸𑀢𑁂𑀢𑁆𑀯𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑀸𑀫𑀻’’𑀢𑀺. ‘‘𑀓𑀺𑀫𑀢𑁆𑀣𑀁 𑀏𑀯𑀁 𑀓𑀭𑁄𑀲𑀻’’𑀢𑀺? ‘‘𑀩𑁆𑀭𑀳𑁆𑀫𑀮𑁄𑀓𑀫𑀕𑁆𑀕𑁄 𑀓𑀺𑀭𑁂𑀲𑁄’’𑀢𑀺. ‘‘𑀓𑁂𑀦𑁂𑀯𑀁 𑀓𑀣𑀺𑀢’’𑀦𑁆𑀢𑀺? ‘‘𑀆𑀘𑀭𑀺𑀬𑁂𑀳𑀺 𑀫𑁂, 𑀪𑀦𑁆𑀢𑁂’’𑀢𑀺. ‘‘𑀦𑁂𑀯 𑀢𑁆𑀯𑀁 𑀩𑁆𑀭𑀳𑁆𑀫𑀮𑁄𑀓𑀲𑁆𑀲 𑀫𑀕𑁆𑀕𑀁 𑀚𑀸𑀦𑀸𑀲𑀺, 𑀦𑀸𑀧𑀺 𑀢𑁂 𑀆𑀘𑀭𑀺𑀬𑀸, 𑀏𑀳𑀺, 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀢𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀇𑀫𑀲𑁆𑀲, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀮𑁄𑀓𑀲𑁆𑀲 𑀫𑀕𑁆𑀕𑀁 𑀓𑀣𑁂𑀣𑀸’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀏𑀯𑀁 𑀓𑀺𑀭𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀯𑀁, 𑀪𑁄 𑀕𑁄𑀢𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀩𑁆𑀭𑀸𑀳𑁆𑀫𑀡, 𑀯𑀲𑁆𑀲𑀲𑀢𑀫𑁆𑀧𑀺 𑀏𑀯𑀁 𑀅𑀕𑁆𑀕𑀺𑀁 𑀧𑀭𑀺𑀘𑀭𑀦𑁆𑀢𑀲𑁆𑀲 𑀢𑀯 𑀅𑀕𑁆𑀕𑀺𑀧𑀸𑀭𑀺𑀘𑀭𑀺𑀬𑀸 𑀫𑀫 𑀲𑀸𑀯𑀓𑀲𑁆𑀲 𑀢𑀗𑁆𑀔𑀡𑀫𑀢𑁆𑀢𑀁 𑀧𑀽𑀚𑀫𑁆𑀧𑀺 𑀦 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁭. ‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀦𑁆𑀢𑀼, 𑀅𑀕𑁆𑀕𑀺𑀁 𑀧𑀭𑀺𑀘𑀭𑁂 𑀯𑀦𑁂;

𑀏𑀓𑀜𑁆𑀘 𑀪𑀸𑀯𑀺𑀢𑀢𑁆𑀢𑀸𑀦𑀁, 𑀫𑀼𑀳𑀼𑀢𑁆𑀢𑀫𑀧𑀺 𑀧𑀽𑀚𑀬𑁂;

𑀲𑀸𑀬𑁂𑀯 𑀧𑀽𑀚𑀦𑀸 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀯𑀲𑁆𑀲𑀲𑀢𑀁 𑀳𑀼𑀢’’𑀦𑁆𑀢𑀺.

𑀢𑀢𑁆𑀣 𑀚𑀦𑁆𑀢𑀽𑀢𑀺 𑀲𑀢𑁆𑀢𑀸𑀥𑀺𑀯𑀘𑀦𑀫𑁂𑀢𑀁. 𑀅𑀕𑁆𑀕𑀺𑀁 𑀧𑀭𑀺𑀘𑀭𑁂 𑀯𑀦𑁂𑀢𑀺 𑀦𑀺𑀧𑁆𑀧𑀧𑀜𑁆𑀘𑀪𑀸𑀯𑀧𑀢𑁆𑀣𑀦𑀸𑀬 𑀯𑀦𑀁 𑀧𑀯𑀺𑀲𑀺𑀢𑁆𑀯𑀸𑀧𑀺 𑀢𑀢𑁆𑀣 𑀅𑀕𑁆𑀕𑀺𑀁 𑀧𑀭𑀺𑀘𑀭𑁂𑀬𑁆𑀬. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺, 𑀅𑀜𑁆𑀜𑁂𑀧𑀺 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀳𑀸𑀬𑀓𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑀬𑀁 𑀓𑀺𑀜𑁆𑀘𑀺 𑀬𑀺𑀝𑁆𑀞𑀁 𑀯𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀳𑀸𑀬𑀓𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀫𑁆𑀧𑀺 𑀳𑀺 𑀣𑁂𑀭𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀓𑀺𑀁, 𑀩𑁆𑀭𑀸𑀳𑁆𑀫𑀡, 𑀓𑀺𑀜𑁆𑀘𑀺 𑀓𑀼𑀲𑀮𑀁 𑀓𑀭𑁄𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀓𑀭𑁄𑀲𑀻’’𑀢𑀺? ‘‘𑀬𑀺𑀝𑁆𑀞𑀬𑀸𑀕𑀁 𑀬𑀚𑀸𑀫𑀻’’𑀢𑀺. ‘‘𑀢𑀤𑀸 𑀓𑀺𑀭 𑀢𑀁 𑀬𑀸𑀕𑀁 𑀫𑀳𑀸𑀧𑀭𑀺𑀘𑁆𑀘𑀸𑀕𑁂𑀦 𑀬𑀚’’𑀦𑁆𑀢𑀺. 𑀇𑀢𑁄 𑀧𑀭𑀁 𑀣𑁂𑀭𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀇𑀫𑀲𑁆𑀲, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀮𑁄𑀓𑀲𑁆𑀲 𑀫𑀕𑁆𑀕𑀁 𑀓𑀣𑁂𑀣𑀸’’𑀢𑀺 𑀆𑀳. 𑀲𑀢𑁆𑀣𑀸, ‘‘𑀩𑁆𑀭𑀸𑀳𑁆𑀫𑀡, 𑀏𑀯𑀁 𑀓𑀺𑀭𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀯𑀁, 𑀪𑁄 𑀕𑁄𑀢𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀩𑁆𑀭𑀸𑀳𑁆𑀫𑀡, 𑀢𑀬𑀸 𑀲𑀁𑀯𑀘𑁆𑀙𑀭𑀁 𑀬𑀺𑀝𑁆𑀞𑀬𑀸𑀕𑀁 𑀬𑀚𑀦𑁆𑀢𑁂𑀦 𑀮𑁄𑀓𑀺𑀬𑀫𑀳𑀸𑀚𑀦𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀧𑀲𑀦𑁆𑀦𑀘𑀺𑀢𑁆𑀢𑁂𑀦 𑀫𑀫 𑀲𑀸𑀯𑀓𑀸𑀦𑀁 𑀯𑀦𑁆𑀤𑀦𑁆𑀢𑀸𑀦𑀁 𑀉𑀧𑁆𑀧𑀦𑁆𑀦𑀓𑀼𑀲𑀮𑀘𑁂𑀢𑀦𑀸𑀬 𑀘𑀢𑀼𑀪𑀸𑀕𑀫𑀢𑁆𑀢𑀫𑁆𑀧𑀺 𑀦 𑀅𑀕𑁆𑀖𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁮. ‘‘𑀬𑀁 𑀓𑀺𑀜𑁆𑀘𑀺 𑀬𑀺𑀝𑁆𑀞𑀁 𑀯 𑀳𑀼𑀢𑀁 𑀯 𑀮𑁄𑀓𑁂,

𑀲𑀁𑀯𑀘𑁆𑀙𑀭𑀁 𑀬𑀚𑁂𑀣 𑀧𑀼𑀜𑁆𑀜𑀧𑁂𑀓𑁆𑀔𑁄;

𑀲𑀩𑁆𑀩𑀫𑁆𑀧𑀺 𑀢𑀁 𑀦 𑀘𑀢𑀼𑀪𑀸𑀕𑀫𑁂𑀢𑀺,

𑀅𑀪𑀺𑀯𑀸𑀤𑀦𑀸 𑀉𑀚𑁆𑀚𑀼𑀕𑀢𑁂𑀲𑀼 𑀲𑁂𑀬𑁆𑀬𑁄’’𑀢𑀺.

𑀢𑀢𑁆𑀣 𑀬𑀁 𑀓𑀺𑀜𑁆𑀘𑀻𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀯𑀘𑀦𑀫𑁂𑀢𑀁. 𑀬𑀺𑀝𑁆𑀞𑀦𑁆𑀢𑀺 𑀬𑁂𑀪𑀼𑀬𑁆𑀬𑁂𑀦 𑀫𑀗𑁆𑀕𑀮𑀓𑀺𑀭𑀺𑀬𑀸𑀤𑀺𑀯𑀲𑁂𑀲𑀼 𑀤𑀺𑀦𑁆𑀦𑀤𑀸𑀦𑀁. 𑀳𑀼𑀢𑀦𑁆𑀢𑀺 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀓𑀢𑀁 𑀧𑀸𑀳𑀼𑀦𑀤𑀸𑀦𑀜𑁆𑀘𑁂𑀯, 𑀓𑀫𑁆𑀫𑀜𑁆𑀘 𑀨𑀮𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 𑀓𑀢𑀤𑀸𑀦𑀜𑁆𑀘. 𑀲𑀁𑀯𑀘𑁆𑀙𑀭𑀁 𑀬𑀚𑁂𑀣𑀸𑀢𑀺 𑀏𑀓𑀲𑀁𑀯𑀘𑁆𑀙𑀭𑀁 𑀦𑀺𑀭𑀦𑁆𑀢𑀭𑀫𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀤𑀸𑀦𑀁 𑀲𑀓𑀮𑀘𑀓𑁆𑀓𑀯𑀸𑀴𑁂𑀧𑀺 𑀮𑁄𑀓𑀺𑀬𑀫𑀳𑀸𑀚𑀦𑀲𑁆𑀲 𑀤𑀤𑁂𑀬𑁆𑀬. 𑀧𑀼𑀜𑁆𑀜𑀧𑁂𑀓𑁆𑀔𑁄𑀢𑀺 𑀧𑀼𑀜𑁆𑀜𑀁 𑀇𑀘𑁆𑀙𑀦𑁆𑀢𑁄. 𑀉𑀚𑁆𑀚𑀼𑀕𑀢𑁂𑀲𑀽𑀢𑀺 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀲𑁄𑀢𑀸𑀧𑀦𑁆𑀦𑁂𑀲𑀼 𑀉𑀧𑀭𑀺𑀫𑀓𑁄𑀝𑀺𑀬𑀸 𑀔𑀻𑀡𑀸𑀲𑀯𑁂𑀲𑀼. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀏𑀯𑀭𑀽𑀧𑁂𑀲𑀼 𑀧𑀲𑀦𑁆𑀦𑀘𑀺𑀢𑁆𑀢𑁂𑀦 𑀲𑀭𑀻𑀭𑀁 𑀑𑀦𑀫𑀺𑀢𑁆𑀯𑀸 𑀯𑀦𑁆𑀤𑀦𑁆𑀢𑀲𑁆𑀲 𑀓𑀼𑀲𑀮𑀘𑁂𑀢𑀦𑀸𑀬 𑀬𑀁 𑀨𑀮𑀁, 𑀢𑀢𑁄 𑀘𑀢𑀼𑀪𑀸𑀕𑀫𑁆𑀧𑀺 𑀲𑀩𑁆𑀩𑀁 𑀢𑀁 𑀤𑀸𑀦𑀁 𑀦 𑀅𑀕𑁆𑀖𑀢𑀺, 𑀢𑀲𑁆𑀫𑀸 𑀉𑀚𑀼𑀕𑀢𑁂𑀲𑀼 𑀅𑀪𑀺𑀯𑀸𑀤𑀦𑀫𑁂𑀯 𑀲𑁂𑀬𑁆𑀬𑁄’’𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑁄, 𑀅𑀜𑁆𑀜𑁂𑀧𑀺 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀳𑀸𑀬𑀓𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀆𑀬𑀼𑀯𑀟𑁆𑀠𑀦𑀓𑀼𑀫𑀸𑀭𑀯𑀢𑁆𑀣𑀼

𑀅𑀪𑀺𑀯𑀸𑀤𑀦𑀲𑀻𑀮𑀺𑀲𑁆𑀲𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀤𑀻𑀖𑀮𑀗𑁆𑀖𑀺𑀓𑀁 𑀦𑀺𑀲𑁆𑀲𑀸𑀬 𑀅𑀭𑀜𑁆𑀜𑀓𑀼𑀝𑀺𑀬𑀁 𑀯𑀺𑀳𑀭𑀦𑁆𑀢𑁄 𑀤𑀻𑀖𑀸𑀬𑀼𑀓𑀼𑀫𑀸𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀤𑀻𑀖𑀮𑀗𑁆𑀖𑀺𑀓𑀦𑀕𑀭𑀯𑀸𑀲𑀺𑀦𑁄 𑀓𑀺𑀭 𑀤𑁆𑀯𑁂 𑀩𑁆𑀭𑀸𑀳𑁆𑀫𑀡𑀸 𑀩𑀸𑀳𑀺𑀭𑀓𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀺 𑀢𑀧𑀘𑀭𑀡𑀁 𑀓𑀭𑀺𑀁𑀲𑀼. 𑀢𑁂𑀲𑀼 𑀏𑀓𑁄 ‘‘𑀧𑀯𑁂𑀡𑀺 𑀫𑁂 𑀦𑀲𑁆𑀲𑀺𑀲𑁆𑀲𑀢𑀺, 𑀯𑀺𑀩𑁆𑀪𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑀸 𑀓𑀢𑀁 𑀢𑀧𑀁 𑀧𑀭𑁂𑀲𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀕𑁄𑀲𑀢𑁂𑀦 𑀘𑁂𑀯 𑀓𑀳𑀸𑀧𑀡𑀲𑀢𑁂𑀦 𑀘 𑀲𑀤𑁆𑀥𑀺𑀁 𑀪𑀭𑀺𑀬𑀁 𑀮𑀪𑀺𑀢𑁆𑀯𑀸 𑀓𑀼𑀝𑀼𑀫𑁆𑀩𑀁 𑀲𑀡𑁆𑀞𑀧𑁂𑀲𑀺. 𑀅𑀣𑀲𑁆𑀲 𑀪𑀭𑀺𑀬𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀇𑀢𑀭𑁄 𑀧𑀦𑀲𑁆𑀲 𑀲𑀳𑀸𑀬𑀓𑁄 𑀧𑀯𑀸𑀲𑀁 𑀕𑀦𑁆𑀢𑁆𑀯𑀸 𑀧𑀼𑀦𑀤𑁂𑀯 𑀢𑀁 𑀦𑀕𑀭𑀁 𑀧𑀘𑁆𑀘𑀸𑀕𑀫𑀺. 𑀲𑁄 𑀢𑀲𑁆𑀲 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀆𑀤𑀸𑀬 𑀲𑀳𑀸𑀬𑀓𑀲𑁆𑀲 𑀤𑀲𑁆𑀲𑀦𑀢𑁆𑀣𑀸𑀬 𑀅𑀕𑀫𑀸𑀲𑀺. 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀁 𑀫𑀸𑀢𑀼 𑀳𑀢𑁆𑀣𑁂 𑀤𑀢𑁆𑀯𑀸 𑀲𑀬𑀁 𑀢𑀸𑀯 𑀯𑀦𑁆𑀤𑀺, 𑀫𑀸𑀢𑀸𑀧𑀺 𑀧𑀼𑀢𑁆𑀢𑀁 𑀧𑀺𑀢𑀼 𑀳𑀢𑁆𑀣𑁂 𑀤𑀢𑁆𑀯𑀸 𑀯𑀦𑁆𑀤𑀺. 𑀲𑁄 ‘‘𑀤𑀻𑀖𑀸𑀬𑀼𑀓𑀸 𑀳𑁄𑀣𑀸’’𑀢𑀺 𑀆𑀳, 𑀧𑀼𑀢𑁆𑀢𑁂 𑀧𑀦 𑀯𑀦𑁆𑀤𑀸𑀧𑀺𑀢𑁂 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣 𑀦𑀁 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺 𑀯𑀦𑁆𑀤𑀺𑀢𑁂 ‘𑀤𑀻𑀖𑀸𑀬𑀼𑀓𑀸 𑀳𑁄𑀣𑀸’𑀢𑀺 𑀯𑀢𑁆𑀯𑀸 𑀇𑀫𑀲𑁆𑀲 𑀯𑀦𑁆𑀤𑀦𑀓𑀸𑀮𑁂 𑀓𑀺𑀜𑁆𑀘𑀺 𑀦 𑀯𑀤𑁂𑀣𑀸’’𑀢𑀺 𑀆𑀳. ‘‘𑀇𑀫𑀲𑁆𑀲𑁂𑀓𑁄 𑀅𑀦𑁆𑀢𑀭𑀸𑀬𑁄 𑀅𑀢𑁆𑀣𑀺, 𑀩𑁆𑀭𑀸𑀳𑁆𑀫𑀡𑀸’’𑀢𑀺. ‘‘𑀓𑀺𑀢𑁆𑀢𑀓𑀁 𑀚𑀻𑀯𑀺𑀲𑁆𑀲𑀢𑀺, 𑀪𑀦𑁆𑀢𑁂’’𑀢𑀺? ‘‘𑀲𑀢𑁆𑀢𑀸𑀳𑀁, 𑀩𑁆𑀭𑀸𑀳𑁆𑀫𑀡𑀸’’𑀢𑀺. ‘‘𑀧𑀝𑀺𑀩𑀸𑀳𑀦𑀓𑀸𑀭𑀡𑀁 𑀅𑀢𑁆𑀣𑀺, 𑀪𑀦𑁆𑀢𑁂’’𑀢𑀺? ‘‘𑀦𑀸𑀳𑀁 𑀧𑀝𑀺𑀩𑀸𑀳𑀦𑀓𑀸𑀭𑀡𑀁 𑀚𑀸𑀦𑀸𑀫𑀻’’𑀢𑀺. ‘‘𑀓𑁄 𑀧𑀦 𑀚𑀸𑀦𑁂𑀬𑁆𑀬, 𑀪𑀦𑁆𑀢𑁂’’𑀢𑀺? ‘‘𑀲𑀫𑀡𑁄 𑀕𑁄𑀢𑀫𑁄 𑀚𑀸𑀦𑁂𑀬𑁆𑀬, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀸𑀳𑀻’’𑀢𑀺. ‘‘𑀢𑀢𑁆𑀣 𑀕𑀘𑁆𑀙𑀦𑁆𑀢𑁄 𑀢𑀧𑀧𑀭𑀺𑀳𑀸𑀦𑀺𑀢𑁄 𑀪𑀸𑀬𑀸𑀫𑀻’’𑀢𑀺. ‘‘𑀲𑀘𑁂 𑀢𑁂 𑀧𑀼𑀢𑁆𑀢𑀲𑀺𑀦𑁂𑀳𑁄 𑀅𑀢𑁆𑀣𑀺, 𑀢𑀧𑀧𑀭𑀺𑀳𑀸𑀦𑀺𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀸𑀳𑀻’’𑀢𑀺.

𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀬𑀁 𑀢𑀸𑀯 𑀯𑀦𑁆𑀤𑀺. 𑀲𑀢𑁆𑀣𑀸 ‘‘𑀤𑀻𑀖𑀸𑀬𑀼𑀓𑁄 𑀳𑁄𑀳𑀻’’𑀢𑀺 𑀆𑀳, 𑀧𑀚𑀸𑀧𑀢𑀺𑀬𑀸 𑀯𑀦𑁆𑀤𑀦𑀓𑀸𑀮𑁂𑀧𑀺 𑀢𑀲𑁆𑀲𑀸 𑀢𑀣𑁂𑀯 𑀯𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀯𑀦𑁆𑀤𑀸𑀧𑀦𑀓𑀸𑀮𑁂 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺, 𑀲𑀢𑁆𑀣𑀸𑀧𑀺 𑀢𑀣𑁂𑀯 𑀩𑁆𑀬𑀸𑀓𑀸𑀲𑀺. 𑀲𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀅𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸𑀯 𑀅𑀢𑁆𑀢𑀦𑁄 𑀫𑀦𑁆𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀁𑀲𑀦𑁆𑀤𑁂𑀲𑀺, 𑀧𑀝𑀺𑀩𑀸𑀳𑀦𑀽𑀧𑀸𑀬𑀁 𑀧𑀦 𑀦 𑀚𑀸𑀦𑀸𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺 𑁋 ‘‘𑀅𑀢𑁆𑀣𑀺 𑀧𑀦, 𑀪𑀦𑁆𑀢𑁂, 𑀧𑀝𑀺𑀩𑀸𑀳𑀦𑀽𑀧𑀸𑀬𑁄’’𑀢𑀺? ‘‘𑀪𑀯𑁂𑀬𑁆𑀬, 𑀩𑁆𑀭𑀸𑀳𑁆𑀫𑀡𑀸’’𑀢𑀺. ‘‘𑀓𑀺𑀁 𑀪𑀯𑁂𑀬𑁆𑀬𑀸’’𑀢𑀺? ‘‘𑀲𑀘𑁂 𑀢𑁆𑀯𑀁 𑀅𑀢𑁆𑀢𑀦𑁄 𑀕𑁂𑀳𑀤𑁆𑀯𑀸𑀭𑁂 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀢𑀲𑁆𑀲 𑀫𑀚𑁆𑀛𑁂 𑀧𑀻𑀞𑀺𑀓𑀁 𑀓𑀸𑀭𑁂𑀢𑁆𑀯𑀸 𑀢𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀅𑀝𑁆𑀞 𑀯𑀸 𑀲𑁄𑀴𑀲 𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑁂𑀲𑀼 𑀫𑀫 𑀲𑀸𑀯𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀦𑀺𑀭𑀦𑁆𑀢𑀭𑀁 𑀧𑀭𑀺𑀢𑁆𑀢𑀁 𑀓𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀲𑀺, 𑀏𑀯𑀫𑀲𑁆𑀲 𑀅𑀦𑁆𑀢𑀭𑀸𑀬𑁄 𑀦𑀲𑁆𑀲𑁂𑀬𑁆𑀬𑀸’’𑀢𑀺. ‘‘𑀪𑁄 𑀕𑁄𑀢𑀫, 𑀫𑀬𑀸 𑀫𑀡𑁆𑀟𑀧𑀸𑀤𑀻𑀦𑀺 𑀲𑀓𑁆𑀓𑀸 𑀓𑀸𑀢𑀼𑀁, 𑀢𑀼𑀫𑁆𑀳𑀸𑀓𑀁 𑀧𑀦 𑀲𑀸𑀯𑀓𑁂 𑀓𑀣𑀁 𑀮𑀘𑁆𑀙𑀸𑀫𑀻’’𑀢𑀺? ‘‘𑀢𑀬𑀸 𑀏𑀢𑁆𑀢𑀓𑁂 𑀓𑀢𑁂 𑀅𑀳𑀁 𑀫𑀫 𑀲𑀸𑀯𑀓𑁂 𑀧𑀳𑀺𑀡𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀪𑁄 𑀕𑁄𑀢𑀫𑀸’’𑀢𑀺 𑀲𑁄 𑀅𑀢𑁆𑀢𑀦𑁄 𑀕𑁂𑀳𑀤𑁆𑀯𑀸𑀭𑁂 𑀲𑀩𑁆𑀩𑀁 𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀪𑀺𑀓𑁆𑀔𑀽 𑀧𑀳𑀺𑀡𑀺, 𑀢𑁂 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀦𑀺𑀲𑀻𑀤𑀺𑀁𑀲𑀼, 𑀤𑀸𑀭𑀓𑀫𑁆𑀧𑀺 𑀧𑀻𑀞𑀺𑀓𑀸𑀬𑀁 𑀦𑀺𑀧𑀚𑁆𑀚𑀸𑀧𑁂𑀲𑀼𑀁, 𑀪𑀺𑀓𑁆𑀔𑀽 𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 𑀦𑀺𑀭𑀦𑁆𑀢𑀭𑀁 𑀧𑀭𑀺𑀢𑁆𑀢𑀁 𑀪𑀡𑀺𑀁𑀲𑀼, 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀸𑀬𑀁 𑀲𑀢𑁆𑀣𑀸 𑀆𑀕𑀘𑁆𑀙𑀺. 𑀢𑀲𑁆𑀫𑀺𑀁 𑀆𑀕𑀢𑁂 𑀲𑀩𑁆𑀩𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀏𑀓𑁄 𑀧𑀦 𑀅𑀯𑀭𑀼𑀤𑁆𑀥𑀓𑁄 𑀦𑀸𑀫 𑀬𑀓𑁆𑀔𑁄 𑀤𑁆𑀯𑀸𑀤𑀲 𑀲𑀁𑀯𑀘𑁆𑀙𑀭𑀸𑀦𑀺 𑀯𑁂𑀲𑁆𑀲𑀯𑀡𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀸 𑀯𑀭𑀁 𑀮𑀪𑀦𑁆𑀢𑁄 ‘‘𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀇𑀫𑀁 𑀤𑀸𑀭𑀓𑀁 𑀕𑀡𑁆𑀳𑁂𑀬𑁆𑀬𑀸𑀲𑀻’’𑀢𑀺 𑀮𑀪𑀺. 𑀢𑀲𑁆𑀫𑀸 𑀲𑁄𑀧𑀺 𑀆𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀲𑀢𑁆𑀣𑀭𑀺 𑀧𑀦 𑀢𑀢𑁆𑀣 𑀕𑀢𑁂 𑀫𑀳𑁂𑀲𑀓𑁆𑀔𑀸𑀲𑀼 𑀤𑁂𑀯𑀢𑀸𑀲𑀼 𑀲𑀦𑁆𑀦𑀺𑀧𑀢𑀺𑀢𑀸𑀲𑀼 𑀅𑀧𑁆𑀧𑁂𑀲𑀓𑁆𑀔𑀸 𑀤𑁂𑀯𑀢𑀸 𑀑𑀲𑀓𑁆𑀓𑀺𑀢𑁆𑀯𑀸 𑀑𑀲𑀓𑁆𑀓𑀺𑀢𑁆𑀯𑀸 𑀑𑀓𑀸𑀲𑀁 𑀅𑀮𑀪𑀫𑀸𑀦𑀸 𑀤𑁆𑀯𑀸𑀤𑀲 𑀬𑁄𑀚𑀦𑀸𑀦𑀺 𑀧𑀝𑀺𑀓𑁆𑀓𑀫𑀺𑀁𑀲𑀼. 𑀅𑀯𑀭𑀼𑀤𑁆𑀥𑀓𑁄𑀧𑀺 𑀢𑀣𑁂𑀯 𑀧𑀝𑀺𑀓𑁆𑀓𑀫𑀺, 𑀲𑀢𑁆𑀣𑀸𑀧𑀺 𑀲𑀩𑁆𑀩𑀭𑀢𑁆𑀢𑀺𑀁 𑀧𑀭𑀺𑀢𑁆𑀢𑀫𑀓𑀸𑀲𑀺. 𑀲𑀢𑁆𑀢𑀸𑀳𑁂 𑀯𑀻𑀢𑀺𑀯𑀢𑁆𑀢𑁂 𑀅𑀯𑀭𑀼𑀤𑁆𑀥𑀓𑁄 𑀤𑀸𑀭𑀓𑀁 𑀦 𑀮𑀪𑀺. 𑀅𑀝𑁆𑀞𑀫𑁂 𑀧𑀦 𑀤𑀺𑀯𑀲𑁂 𑀅𑀭𑀼𑀡𑁂 𑀉𑀕𑁆𑀕𑀢𑀫𑀢𑁆𑀢𑁂 𑀤𑀸𑀭𑀓𑀁 𑀆𑀦𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀸𑀧𑁂𑀲𑀼𑀁. 𑀲𑀢𑁆𑀣𑀸 ‘‘𑀤𑀻𑀖𑀸𑀬𑀼𑀓𑁄 𑀳𑁄𑀳𑀻’’𑀢𑀺 𑀆𑀳. ‘‘𑀓𑀻𑀯𑀘𑀺𑀭𑀁 𑀧𑀦, 𑀪𑁄 𑀕𑁄𑀢𑀫, 𑀤𑀸𑀭𑀓𑁄 𑀞𑀲𑁆𑀲𑀢𑀻’’𑀢𑀺? ‘‘𑀯𑀻𑀲𑀯𑀲𑁆𑀲𑀲𑀢𑀁, 𑀩𑁆𑀭𑀸𑀳𑁆𑀫𑀡𑀸’’𑀢𑀺. 𑀅𑀣𑀲𑁆𑀲 ‘‘𑀆𑀬𑀼𑀯𑀟𑁆𑀠𑀦𑀓𑀼𑀫𑀸𑀭𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀧𑀜𑁆𑀘𑀳𑀺 𑀉𑀧𑀸𑀲𑀓𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀯𑀺𑀘𑀭𑀺. 𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀧𑀲𑁆𑀲𑀣𑀸𑀯𑀼𑀲𑁄, 𑀆𑀬𑀼𑀯𑀟𑁆𑀠𑀦𑀓𑀼𑀫𑀸𑀭𑁂𑀦 𑀓𑀺𑀭 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀭𑀺𑀢𑀩𑁆𑀩𑀁 𑀅𑀪𑀯𑀺𑀲𑁆𑀲, 𑀲𑁄 𑀇𑀤𑀸𑀦𑀺 𑀯𑀻𑀲𑀯𑀲𑁆𑀲𑀲𑀢𑀝𑁆𑀞𑀸𑀬𑀻 𑀳𑀼𑀢𑁆𑀯𑀸 𑀧𑀜𑁆𑀘𑀳𑀺 𑀉𑀧𑀸𑀲𑀓𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀯𑀺𑀘𑀭𑀢𑀺, 𑀅𑀢𑁆𑀣𑀺 𑀫𑀜𑁆𑀜𑁂 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀆𑀬𑀼𑀯𑀟𑁆𑀠𑀦𑀓𑀸𑀭𑀡’’𑀦𑁆𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀦 𑀓𑁂𑀯𑀮𑀁 𑀆𑀬𑀼𑀯𑀟𑁆𑀠𑀦𑀫𑁂𑀯, 𑀇𑀫𑁂 𑀧𑀦 𑀲𑀢𑁆𑀢𑀸 𑀕𑀼𑀡𑀯𑀦𑁆𑀢𑁂 𑀯𑀦𑁆𑀤𑀦𑁆𑀢𑀸 𑀅𑀪𑀺𑀯𑀸𑀤𑁂𑀦𑁆𑀢𑀸 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀯𑀟𑁆𑀠𑀦𑁆𑀢𑀺, 𑀧𑀭𑀺𑀲𑁆𑀲𑀬𑀢𑁄 𑀫𑀼𑀘𑁆𑀘𑀦𑁆𑀢𑀺, 𑀬𑀸𑀯𑀢𑀸𑀬𑀼𑀓𑀫𑁂𑀯 𑀢𑀺𑀝𑁆𑀞𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁦𑁯. ‘‘𑀅𑀪𑀺𑀯𑀸𑀤𑀦𑀲𑀻𑀮𑀺𑀲𑁆𑀲, 𑀦𑀺𑀘𑁆𑀘𑀁 𑀯𑀼𑀟𑁆𑀠𑀸𑀧𑀘𑀸𑀬𑀺𑀦𑁄;

𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀯𑀟𑁆𑀠𑀦𑁆𑀢𑀺, 𑀆𑀬𑀼 𑀯𑀡𑁆𑀡𑁄 𑀲𑀼𑀔𑀁 𑀩𑀮’’𑀦𑁆𑀢𑀺.

𑀢𑀢𑁆𑀣 𑀅𑀪𑀺𑀯𑀸𑀤𑀦𑀲𑀻𑀮𑀺𑀲𑁆𑀲𑀸𑀢𑀺 𑀯𑀦𑁆𑀤𑀦𑀲𑀻𑀮𑀺𑀲𑁆𑀲, 𑀅𑀪𑀺𑀡𑁆𑀳𑀁 𑀯𑀦𑁆𑀤𑀦𑀓𑀺𑀘𑁆𑀘𑀧𑀲𑀼𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀯𑀼𑀟𑁆𑀠𑀸𑀧𑀘𑀸𑀬𑀺𑀦𑁄𑀢𑀺 𑀕𑀺𑀳𑀺𑀲𑁆𑀲 𑀯𑀸 𑀢𑀤𑀳𑀼𑀧𑀩𑁆𑀩𑀚𑀺𑀢𑁂 𑀤𑀳𑀭𑀲𑀸𑀫𑀡𑁂𑀭𑁂𑀧𑀺, 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀧𑀦 𑀧𑀩𑁆𑀩𑀚𑁆𑀚𑀸𑀬 𑀯𑀸 𑀉𑀧𑀲𑀫𑁆𑀧𑀤𑀸𑀬 𑀯𑀸 𑀯𑀼𑀟𑁆𑀠𑀢𑀭𑁂 𑀕𑀼𑀡𑀯𑀼𑀟𑁆𑀠𑁂 𑀅𑀧𑀘𑀸𑀬𑀫𑀸𑀦𑀲𑁆𑀲, 𑀅𑀪𑀺𑀯𑀸𑀤𑀦𑁂𑀦 𑀯𑀸 𑀦𑀺𑀘𑁆𑀘𑀁 𑀧𑀽𑀚𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀯𑀟𑁆𑀠𑀦𑁆𑀢𑀻𑀢𑀺 𑀆𑀬𑀼𑀫𑁆𑀳𑀺 𑀯𑀟𑁆𑀠𑀫𑀸𑀦𑁂 𑀬𑀢𑁆𑀢𑀓𑀁 𑀓𑀸𑀮𑀁 𑀢𑀁 𑀯𑀟𑁆𑀠𑀢𑀺, 𑀢𑀢𑁆𑀢𑀓𑀁 𑀇𑀢𑀭𑁂𑀧𑀺 𑀯𑀟𑁆𑀠𑀦𑁆𑀢𑀺𑀬𑁂𑀯. 𑀬𑁂𑀦 𑀳𑀺 𑀧𑀜𑁆𑀜𑀸𑀲𑀯𑀲𑁆𑀲𑀆𑀬𑀼𑀲𑀁𑀯𑀢𑁆𑀢𑀦𑀺𑀓𑀁 𑀓𑀼𑀲𑀮𑀁 𑀓𑀢𑀁, 𑀧𑀜𑁆𑀘𑀯𑀻𑀲𑀢𑀺𑀯𑀲𑁆𑀲𑀓𑀸𑀮𑁂 𑀘𑀲𑁆𑀲 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑁄 𑀅𑀪𑀺𑀯𑀸𑀤𑀦𑀲𑀻𑀮𑀢𑀸𑀬 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀲𑁄 𑀬𑀸𑀯𑀢𑀸𑀬𑀼𑀓𑀫𑁂𑀯 𑀢𑀺𑀝𑁆𑀞𑀢𑀺, 𑀯𑀡𑁆𑀡𑀸𑀤𑀬𑁄𑀧𑀺𑀲𑁆𑀲 𑀆𑀬𑀼𑀦𑀸𑀯 𑀲𑀤𑁆𑀥𑀺𑀁 𑀯𑀟𑁆𑀠𑀦𑁆𑀢𑀺. 𑀇𑀢𑁄 𑀉𑀢𑁆𑀢𑀭𑀺𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀦𑁆𑀢𑀭𑀸𑀬𑁂𑀦 𑀧𑀯𑀢𑁆𑀢𑀲𑁆𑀲𑀸𑀬𑀼𑀦𑁄 𑀯𑀟𑁆𑀠𑀦𑀁 𑀦𑀸𑀫 𑀦𑀢𑁆𑀣𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀆𑀬𑀼𑀯𑀟𑁆𑀠𑀦𑀓𑀼𑀫𑀸𑀭𑁄 𑀧𑀜𑁆𑀘𑀳𑀺 𑀉𑀧𑀸𑀲𑀓𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺, 𑀅𑀜𑁆𑀜𑁂𑀧𑀺 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀆𑀬𑀼𑀯𑀟𑁆𑀠𑀦𑀓𑀼𑀫𑀸𑀭𑀯𑀢𑁆𑀣𑀼 𑀅𑀝𑁆𑀞𑀫𑀁.

𑁯. 𑀲𑀁𑀓𑀺𑀘𑁆𑀘𑀲𑀸𑀫𑀡𑁂𑀭𑀯𑀢𑁆𑀣𑀼

𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀁𑀓𑀺𑀘𑁆𑀘𑀲𑀸𑀫𑀡𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀢𑀺𑀁𑀲𑀫𑀢𑁆𑀢𑀸 𑀓𑀼𑀮𑀧𑀼𑀢𑁆𑀢𑀸 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀸𑀲𑀦𑁂 𑀉𑀭𑀁 𑀤𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼. 𑀢𑁂 𑀉𑀧𑀲𑀫𑁆𑀧𑀤𑀸𑀬 𑀧𑀜𑁆𑀘𑀯𑀲𑁆𑀲𑀸 𑀳𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀕𑀦𑁆𑀣𑀥𑀼𑀭𑀁 𑀯𑀺𑀧𑀲𑁆𑀲𑀦𑀸𑀥𑀼𑀭𑀦𑁆𑀢𑀺 𑀤𑁆𑀯𑁂 𑀥𑀼𑀭𑀸𑀦𑀻𑀢𑀺 𑀲𑀼𑀢𑁆𑀯𑀸 ‘‘𑀫𑀬𑀁 𑀫𑀳𑀮𑁆𑀮𑀓𑀓𑀸𑀮𑁂 𑀧𑀩𑁆𑀩𑀚𑀺𑀢𑀸’’𑀢𑀺 𑀕𑀦𑁆𑀣𑀥𑀼𑀭𑁂 𑀉𑀲𑁆𑀲𑀸𑀳𑀁 𑀅𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀥𑀼𑀭𑀁 𑀧𑀽𑀭𑁂𑀢𑀼𑀓𑀸𑀫𑀸 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀏𑀓𑀁 𑀅𑀭𑀜𑁆𑀜𑀸𑀬𑀢𑀦𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀲𑀢𑁆𑀣𑀸𑀭𑀁 𑀆𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸 ‘‘𑀓𑀢𑀭𑀁 𑀞𑀸𑀦𑀁 𑀕𑀫𑀺𑀲𑁆𑀲𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀲𑀼𑀓𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀢𑀢𑁆𑀣 𑀢𑁂𑀲𑀁 𑀏𑀓𑀁 𑀯𑀺𑀖𑀸𑀲𑀸𑀤𑀁 𑀦𑀺𑀲𑁆𑀲𑀸𑀬 𑀪𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀜𑁆𑀘 𑀧𑀦 𑀲𑀁𑀓𑀺𑀘𑁆𑀘𑀲𑀸𑀫𑀡𑁂𑀭𑁂 𑀕𑀢𑁂 𑀯𑀽𑀧𑀲𑀫𑀺𑀲𑁆𑀲𑀢𑀺, 𑀅𑀣 𑀦𑁂𑀲𑀁 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀧𑀸𑀭𑀺𑀧𑀽𑀭𑀺𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀅𑀜𑁆𑀜𑀸𑀲𑀺.

𑀲𑀁𑀓𑀺𑀘𑁆𑀘𑀲𑀸𑀫𑀡𑁂𑀭𑁄 𑀦𑀸𑀫 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀸𑀫𑀡𑁂𑀭𑁄 𑀲𑀢𑁆𑀢𑀯𑀲𑁆𑀲𑀺𑀓𑁄 𑀚𑀸𑀢𑀺𑀬𑀸. 𑀢𑀲𑁆𑀲 𑀓𑀺𑀭 𑀫𑀸𑀢𑀸 𑀲𑀸𑀯𑀢𑁆𑀣𑀺𑀬𑀁 𑀅𑀟𑁆𑀠𑀓𑀼𑀮𑀲𑁆𑀲 𑀥𑀻𑀢𑀸. 𑀲𑀸 𑀢𑀲𑁆𑀫𑀺𑀁 𑀓𑀼𑀘𑁆𑀙𑀺𑀕𑀢𑁂 𑀏𑀓𑁂𑀦 𑀩𑁆𑀬𑀸𑀥𑀺𑀦𑀸 𑀢𑀗𑁆𑀔𑀡𑀜𑁆𑀜𑁂𑀯 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲𑀸 𑀛𑀸𑀧𑀺𑀬𑀫𑀸𑀦𑀸𑀬 𑀞𑀧𑁂𑀢𑁆𑀯𑀸 𑀕𑀩𑁆𑀪𑀫𑀁𑀲𑀁 𑀲𑁂𑀲𑀁 𑀛𑀸𑀬𑀺. 𑀅𑀣𑀲𑁆𑀲𑀸 𑀕𑀩𑁆𑀪𑀫𑀁𑀲𑀁 𑀘𑀺𑀢𑀓𑀢𑁄 𑀑𑀢𑀸𑀭𑁂𑀢𑁆𑀯𑀸 𑀤𑁆𑀯𑀻𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀲𑀽𑀮𑁂𑀳𑀺 𑀯𑀺𑀚𑁆𑀛𑀺𑀁𑀲𑀼. 𑀲𑀽𑀮𑀓𑁄𑀝𑀺 𑀤𑀸𑀭𑀓𑀲𑁆𑀲 𑀅𑀓𑁆𑀔𑀺𑀓𑁄𑀝𑀺𑀁 𑀧𑀳𑀭𑀺. 𑀏𑀯𑀁 𑀕𑀩𑁆𑀪𑀫𑀁𑀲𑀁 𑀯𑀺𑀚𑁆𑀛𑀺𑀢𑁆𑀯𑀸 𑀅𑀗𑁆𑀕𑀸𑀭𑀭𑀸𑀲𑀺𑀫𑁆𑀳𑀺 𑀔𑀺𑀧𑀺𑀢𑁆𑀯𑀸 𑀅𑀗𑁆𑀕𑀸𑀭𑁂𑀳𑁂𑀯 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀕𑀩𑁆𑀪𑀫𑀁𑀲𑀁 𑀛𑀸𑀬𑀺, 𑀅𑀗𑁆𑀕𑀸𑀭𑀫𑀢𑁆𑀣𑀓𑁂 𑀧𑀦 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑁄 𑀤𑀸𑀭𑀓𑁄 𑀧𑀤𑀼𑀫𑀕𑀩𑁆𑀪𑁂 𑀦𑀺𑀧𑀦𑁆𑀦𑁄 𑀯𑀺𑀬 𑀅𑀳𑁄𑀲𑀺. 𑀧𑀘𑁆𑀙𑀺𑀫𑀪𑀯𑀺𑀓𑀲𑁆𑀲 𑀲𑀢𑁆𑀢𑀲𑁆𑀲 𑀳𑀺 𑀲𑀺𑀦𑁂𑀭𑀼𑀦𑀸 𑀑𑀢𑁆𑀣𑀭𑀺𑀬𑀫𑀸𑀦𑀲𑁆𑀲𑀧𑀺 𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑁄 𑀦𑀸𑀫 𑀦𑀢𑁆𑀣𑀺. 𑀧𑀼𑀦𑀤𑀺𑀯𑀲𑁂 ‘‘𑀘𑀺𑀢𑀓𑀁 𑀦𑀺𑀩𑁆𑀩𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀆𑀕𑀢𑀸 𑀢𑀣𑀸𑀦𑀺𑀧𑀦𑁆𑀦𑀁 𑀤𑀸𑀭𑀓𑀁 𑀤𑀺𑀲𑁆𑀯𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸 ‘‘𑀓𑀣𑀜𑁆𑀳𑀺 𑀦𑀸𑀫 𑀏𑀢𑁆𑀢𑀓𑁂𑀲𑀼 𑀤𑀸𑀭𑀽𑀲𑀼 𑀔𑀻𑀬𑀫𑀸𑀦𑁂𑀲𑀼 𑀲𑀓𑀮𑀲𑀭𑀻𑀭𑁂 𑀛𑀸𑀧𑀺𑀬𑀫𑀸𑀦𑁂 𑀤𑀸𑀭𑀓𑁄 𑀦 𑀛𑀸𑀬𑀺, 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀸𑀭𑀓𑀁 𑀆𑀤𑀸𑀬 𑀅𑀦𑁆𑀢𑁄𑀕𑀸𑀫𑀁 𑀕𑀦𑁆𑀢𑁆𑀯𑀸 𑀦𑁂𑀫𑀺𑀢𑁆𑀢𑀓𑁂 𑀧𑀼𑀘𑁆𑀙𑀺𑀁𑀲𑀼. 𑀦𑁂𑀫𑀺𑀢𑁆𑀢𑀓𑀸 ‘‘𑀲𑀘𑁂 𑀅𑀬𑀁 𑀤𑀸𑀭𑀓𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑁆𑀲𑀺𑀲𑁆𑀲𑀢𑀺, 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀜𑀸𑀢𑀓𑀸 𑀤𑀼𑀕𑁆𑀕𑀢𑀸 𑀪𑀯𑀺𑀲𑁆𑀲𑀦𑁆𑀢𑀺? 𑀲𑀘𑁂 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀧𑀜𑁆𑀘𑀳𑀺 𑀲𑀫𑀡𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀯𑀺𑀘𑀭𑀺𑀲𑁆𑀲𑀢𑀻’’𑀢𑀺 𑀆𑀳𑀁𑀲𑀼. 𑀢𑀲𑁆𑀲 𑀲𑀗𑁆𑀓𑀼𑀦𑀸 𑀅𑀓𑁆𑀔𑀺𑀓𑁄𑀝𑀺𑀬𑀸 𑀪𑀺𑀦𑁆𑀦𑀢𑁆𑀢𑀸 𑀲𑀁𑀓𑀺𑀘𑁆𑀘𑀦𑁆𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀁𑀓𑀺𑀘𑁆𑀘𑁄𑀢𑀺 𑀧𑀜𑁆𑀜𑀸𑀬𑀺. 𑀅𑀣 𑀦𑀁 𑀜𑀸𑀢𑀓𑀸 ‘‘𑀳𑁄𑀢𑀼, 𑀯𑀟𑁆𑀠𑀺𑀢𑀓𑀸𑀮𑁂 𑀅𑀫𑁆𑀳𑀸𑀓𑀁 𑀅𑀬𑁆𑀬𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀸’’𑀢𑀺 𑀧𑁄𑀲𑀺𑀁𑀲𑀼. 𑀲𑁄 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 ‘‘𑀢𑀯 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀯𑀲𑀦𑀓𑀸𑀮𑁂 𑀫𑀸𑀢𑀸 𑀢𑁂 𑀓𑀸𑀮𑀫𑀓𑀸𑀲𑀺, 𑀢𑀲𑁆𑀲𑀸 𑀲𑀭𑀻𑀭𑁂 𑀛𑀸𑀧𑀺𑀬𑀫𑀸𑀦𑁂𑀧𑀺 𑀢𑁆𑀯𑀁 𑀦 𑀛𑀸𑀬𑀻’’𑀢𑀺 𑀓𑀼𑀫𑀸𑀭𑀓𑀸𑀦𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀅𑀳𑀁 𑀓𑀺𑀭 𑀏𑀯𑀭𑀽𑀧𑀸 𑀪𑀬𑀸 𑀫𑀼𑀢𑁆𑀢𑁄, 𑀓𑀺𑀁 𑀫𑁂 𑀖𑀭𑀸𑀯𑀸𑀲𑁂𑀦, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀜𑀸𑀢𑀓𑀸𑀦𑀁 𑀆𑀭𑁄𑀘𑁂𑀲𑀺. 𑀢𑁂 ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀁 𑀧𑀩𑁆𑀩𑀸𑀚𑁂𑀣𑀸’’𑀢𑀺 𑀅𑀤𑀁𑀲𑀼. 𑀣𑁂𑀭𑁄 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀤𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀔𑀼𑀭𑀕𑁆𑀕𑁂𑀬𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀬𑀁 𑀲𑀁𑀓𑀺𑀘𑁆𑀘𑀲𑀸𑀫𑀡𑁂𑀭𑁄 𑀦𑀸𑀫.

𑀲𑀢𑁆𑀣𑀸 ‘‘𑀏𑀢𑀲𑁆𑀫𑀺𑀁 𑀕𑀢𑁂 𑀢𑀁 𑀪𑀬𑀁 𑀯𑀽𑀧𑀲𑀫𑀺𑀲𑁆𑀲𑀢𑀺, 𑀅𑀣 𑀦𑁂𑀲𑀁 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀧𑀸𑀭𑀺𑀧𑀽𑀭𑀺𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑀸𑀓𑀁 𑀚𑁂𑀝𑁆𑀞𑀪𑀸𑀢𑀺𑀓𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀑𑀮𑁄𑀓𑁂𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀆𑀳. 𑀢𑁂 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀆𑀯𑀼𑀲𑁄’’𑀢𑀺 𑀯𑀼𑀢𑁆𑀢𑁂 𑀫𑀬𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀆𑀧𑀼𑀘𑁆𑀙𑀺𑀫𑁆𑀳𑀸, 𑀅𑀣 𑀦𑁄 𑀲𑀢𑁆𑀣𑀸 𑀏𑀯𑀫𑀸𑀳 𑁋 ‘‘𑀢𑀼𑀫𑁆𑀳𑀸𑀓𑀁 𑀚𑁂𑀝𑁆𑀞𑀪𑀸𑀢𑀺𑀓𑀁 𑀑𑀮𑁄𑀓𑁂𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺? ‘‘𑀢𑁂𑀦𑀫𑁆𑀳𑀸 𑀇𑀥𑀸𑀕𑀢𑀸’’𑀢𑀺. 𑀣𑁂𑀭𑁄 ‘‘𑀲𑀢𑁆𑀣𑀸𑀭𑀸 𑀇𑀫𑁂 𑀏𑀓𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸 𑀇𑀥 𑀧𑀳𑀺𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀢𑀫𑀢𑁆𑀣𑀁 𑀜𑀢𑁆𑀯𑀸 𑀆𑀳 𑁋 ‘‘𑀅𑀢𑁆𑀣𑀺 𑀧𑀦 𑀯𑁄, 𑀆𑀯𑀼𑀲𑁄, 𑀲𑀸𑀫𑀡𑁂𑀭𑁄’’𑀢𑀺? ‘‘𑀦𑀢𑁆𑀣𑀺, 𑀆𑀯𑀼𑀲𑁄’’𑀢𑀺. ‘‘𑀲𑀘𑁂 𑀦𑀢𑁆𑀣𑀺, 𑀇𑀫𑀁 𑀲𑀁𑀓𑀺𑀘𑁆𑀘𑀲𑀸𑀫𑀡𑁂𑀭𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺. ‘‘𑀅𑀮𑀁, 𑀆𑀯𑀼𑀲𑁄, 𑀲𑀸𑀫𑀡𑁂𑀭𑀁 𑀦𑀺𑀲𑁆𑀲𑀸𑀬 𑀦𑁄 𑀧𑀮𑀺𑀩𑁄𑀥𑁄 𑀪𑀯𑀺𑀲𑁆𑀲𑀢𑀺, 𑀓𑀺𑀁 𑀅𑀭𑀜𑁆𑀜𑁂 𑀯𑀲𑀦𑁆𑀢𑀸𑀦𑀁 𑀲𑀸𑀫𑀡𑁂𑀭𑁂𑀦𑀸’’𑀢𑀺? ‘‘𑀦𑀸𑀯𑀼𑀲𑁄, 𑀇𑀫𑀁 𑀦𑀺𑀲𑁆𑀲𑀸𑀬 𑀢𑀼𑀫𑁆𑀳𑀸𑀓𑀁 𑀧𑀮𑀺𑀩𑁄𑀥𑁄, 𑀅𑀧𑀺𑀘 𑀔𑁄 𑀧𑀦 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀇𑀫𑀲𑁆𑀲 𑀧𑀮𑀺𑀩𑁄𑀥𑁄 𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸𑀧𑀺 𑀢𑀼𑀫𑁆𑀳𑁂 𑀫𑀫 𑀲𑀦𑁆𑀢𑀺𑀓𑀁 𑀧𑀳𑀺𑀡𑀦𑁆𑀢𑁄 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀲𑀸𑀫𑀡𑁂𑀭𑀲𑁆𑀲 𑀧𑀳𑀺𑀡𑀦𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑁄 𑀧𑀳𑀺𑀡𑀺, 𑀇𑀫𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀅𑀥𑀺𑀯𑀸𑀲𑁂𑀢𑁆𑀯𑀸 𑀲𑀸𑀫𑀡𑁂𑀭𑁂𑀦 𑀲𑀤𑁆𑀥𑀺𑀁 𑀏𑀓𑀢𑀺𑀁𑀲 𑀚𑀦𑀸 𑀣𑁂𑀭𑀁 𑀅𑀧𑀮𑁄𑀓𑁂𑀢𑁆𑀯𑀸 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑁆𑀫 𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀯𑀻𑀲𑀬𑁄𑀚𑀦𑀲𑀢𑀫𑀢𑁆𑀣𑀓𑁂 𑀏𑀓𑀁 𑀲𑀳𑀲𑁆𑀲𑀓𑀼𑀮𑀁 𑀕𑀸𑀫𑀁 𑀧𑀸𑀧𑀼𑀡𑀺𑀁𑀲𑀼.

𑀫𑀦𑀼𑀲𑁆𑀲𑀸 𑀢𑁂 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀓𑁆𑀓𑀘𑁆𑀘𑀁 𑀧𑀭𑀺𑀯𑀺𑀲𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀓𑀢𑁆𑀣 𑀕𑀫𑀺𑀲𑁆𑀲𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑀣𑀸𑀨𑀸𑀲𑀼𑀓𑀝𑁆𑀞𑀸𑀦𑀁, 𑀆𑀯𑀼𑀲𑁄’’𑀢𑀺 𑀯𑀼𑀢𑁆𑀢𑁂 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀫𑀬𑀁, 𑀪𑀦𑁆𑀢𑁂, 𑀅𑀬𑁆𑀬𑁂𑀲𑀼 𑀇𑀫𑀁 𑀞𑀸𑀦𑀁 𑀦𑀺𑀲𑁆𑀲𑀸𑀬 𑀅𑀦𑁆𑀢𑁄𑀯𑀲𑁆𑀲𑀁 𑀯𑀲𑀦𑁆𑀢𑁂𑀲𑀼 𑀧𑀜𑁆𑀘𑀲𑀻𑀮𑀁 𑀲𑀫𑀸𑀤𑀸𑀬 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀬𑀸𑀘𑀺𑀁𑀲𑀼. 𑀣𑁂𑀭𑀸 𑀅𑀥𑀺𑀯𑀸𑀲𑁂𑀲𑀼𑀁. 𑀅𑀣 𑀦𑁂𑀲𑀁 𑀫𑀦𑀼𑀲𑁆𑀲𑀸 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀘𑀗𑁆𑀓𑀫𑀦𑀧𑀡𑁆𑀡𑀲𑀸𑀮𑀸𑀬𑁄 𑀲𑀁𑀯𑀺𑀤𑀳𑀺𑀢𑁆𑀯𑀸 ‘‘𑀅𑀚𑁆𑀚 𑀫𑀬𑀁, 𑀲𑁆𑀯𑁂 𑀫𑀬’’𑀦𑁆𑀢𑀺 𑀉𑀲𑁆𑀲𑀸𑀳𑀧𑁆𑀧𑀢𑁆𑀢𑀸 𑀉𑀧𑀝𑁆𑀞𑀸𑀦𑀫𑀓𑀁𑀲𑀼. 𑀣𑁂𑀭𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀓𑀢𑀺𑀓𑀯𑀢𑁆𑀢𑀁 𑀓𑀭𑀺𑀁𑀲𑀼, ‘‘𑀆𑀯𑀼𑀲𑁄, 𑀅𑀫𑁆𑀳𑁂𑀳𑀺 𑀥𑀭𑀫𑀸𑀦𑀓𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑀺𑀢𑀁, 𑀦 𑀔𑁄 𑀧𑀦 𑀲𑀓𑁆𑀓𑀸 𑀅𑀜𑁆𑀜𑀢𑁆𑀭 𑀧𑀝𑀺𑀧𑀢𑁆𑀢𑀺𑀲𑀫𑁆𑀧𑀤𑀸𑀬 𑀩𑀼𑀤𑁆𑀥𑁂 𑀆𑀭𑀸𑀥𑁂𑀢𑀼𑀁, 𑀅𑀫𑁆𑀳𑀸𑀓𑀜𑁆𑀘 𑀅𑀧𑀸𑀬𑀤𑁆𑀯𑀸𑀭𑀸𑀦𑀺 𑀯𑀺𑀯𑀝𑀸𑀦𑁂𑀯, 𑀢𑀲𑁆𑀫𑀸 𑀅𑀜𑁆𑀜𑀢𑁆𑀭 𑀧𑀸𑀢𑁄 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀁, 𑀲𑀸𑀬𑀁 𑀣𑁂𑀭𑀽𑀧𑀝𑁆𑀞𑀸𑀦𑀯𑁂𑀮𑀜𑁆𑀘 𑀲𑁂𑀲𑀓𑀸𑀮𑁂 𑀤𑁆𑀯𑁂 𑀏𑀓𑀝𑁆𑀞𑀸𑀦𑁂 𑀦 𑀪𑀯𑀺𑀲𑁆𑀲𑀸𑀫, 𑀬𑀲𑁆𑀲 𑀅𑀨𑀸𑀲𑀼𑀓𑀁 𑀪𑀯𑀺𑀲𑁆𑀲𑀢𑀺, 𑀢𑁂𑀦 𑀖𑀡𑁆𑀟𑀺𑀬𑀸 𑀧𑀳𑀝𑀸𑀬 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀪𑁂𑀲𑀚𑁆𑀚𑀁 𑀓𑀭𑀺𑀲𑁆𑀲𑀸𑀫, 𑀇𑀢𑁄 𑀅𑀜𑁆𑀜𑀲𑁆𑀫𑀺𑀁 𑀭𑀢𑁆𑀢𑀺𑀪𑀸𑀕𑁂 𑀯𑀸 𑀤𑀺𑀯𑀲𑀪𑀸𑀕𑁂 𑀯𑀸 𑀅𑀧𑁆𑀧𑀫𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀫𑀦𑀼𑀬𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺.

𑀢𑁂𑀲𑀼 𑀏𑀯𑀁 𑀓𑀢𑀺𑀓𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑁂𑀲𑀼 𑀏𑀓𑁄 𑀤𑀼𑀕𑁆𑀕𑀢𑀧𑀼𑀭𑀺𑀲𑁄 𑀥𑀻𑀢𑀭𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀤𑀼𑀩𑁆𑀪𑀺𑀓𑁆𑀔𑁂 𑀉𑀧𑁆𑀧𑀦𑁆𑀦𑁂 𑀅𑀧𑀭𑀁 𑀥𑀻𑀢𑀭𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀼𑀓𑀸𑀫𑁄 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀣𑁂𑀭𑀸𑀧𑀺 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀺𑀲𑁆𑀲𑀸 𑀦𑀤𑀺𑀬𑀸 𑀦𑁆𑀳𑀢𑁆𑀯𑀸 𑀯𑀸𑀮𑀼𑀓𑀧𑀼𑀮𑀺𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀲𑁄 𑀧𑀼𑀭𑀺𑀲𑁄 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀣𑁂𑀭𑀸 ‘‘𑀓𑀳𑀁 𑀕𑀘𑁆𑀙𑀲𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀣𑁂𑀭𑀸 𑀢𑀲𑁆𑀫𑀺𑀁 𑀓𑀸𑀭𑀼𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸, ‘‘𑀉𑀧𑀸𑀲𑀓, 𑀅𑀢𑀺𑀯𑀺𑀬 𑀙𑀸𑀢𑁄𑀲𑀺, 𑀕𑀘𑁆𑀙, 𑀧𑀡𑁆𑀡𑀁 𑀆𑀳𑀭, 𑀏𑀓𑀫𑁂𑀓𑀁 𑀢𑁂 𑀪𑀢𑁆𑀢𑀧𑀺𑀡𑁆𑀟𑀁 𑀤𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀧𑀡𑁆𑀡𑁂 𑀆𑀳𑀝𑁂 𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀪𑀼𑀜𑁆𑀚𑀦𑀦𑀺𑀬𑀸𑀫𑁂𑀦𑁂𑀯 𑀲𑀽𑀧𑀩𑁆𑀬𑀜𑁆𑀚𑀦𑁂𑀳𑀺 𑀲𑀦𑁆𑀦𑀳𑀺𑀢𑁆𑀯𑀸 𑀏𑀓𑀫𑁂𑀓𑀁 𑀧𑀺𑀡𑁆𑀟𑀁 𑀅𑀤𑀁𑀲𑀼. 𑀏𑀢𑀤𑁂𑀯 𑀓𑀺𑀭 𑀯𑀢𑁆𑀢𑀁, 𑀬𑀁 𑀪𑁄𑀚𑀦𑀓𑀸𑀮𑁂 𑀆𑀕𑀢𑀲𑁆𑀲 𑀪𑀢𑁆𑀢𑀁 𑀤𑀤𑀫𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀅𑀕𑁆𑀕𑀪𑀢𑁆𑀢𑀁 𑀅𑀤𑀢𑁆𑀯𑀸 𑀅𑀢𑁆𑀢𑀦𑀸 𑀪𑀼𑀜𑁆𑀚𑀦𑀦𑀺𑀬𑀸𑀫𑁂𑀦𑁂𑀯 𑀣𑁄𑀓𑀁 𑀯𑀸 𑀩𑀳𑀼𑀁 𑀯𑀸 𑀤𑀸𑀢𑀩𑁆𑀩𑀁. 𑀢𑀲𑁆𑀫𑀸 𑀢𑁂𑀧𑀺 𑀢𑀣𑀸 𑀅𑀤𑀁𑀲𑀼. 𑀲𑁄 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀣𑁂𑀭𑁂 𑀯𑀦𑁆𑀤𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀅𑀬𑁆𑀬𑀸, 𑀓𑁂𑀦𑀘𑀺 𑀦𑀺𑀫𑀦𑁆𑀢𑀺𑀢𑀸’’𑀢𑀺? ‘‘𑀦𑀢𑁆𑀣𑀺, 𑀉𑀧𑀸𑀲𑀓, 𑀦𑀺𑀫𑀦𑁆𑀢𑀦𑀁, 𑀫𑀦𑀼𑀲𑁆𑀲𑀸 𑀤𑁂𑀯𑀲𑀺𑀓𑀁 𑀏𑀯𑀭𑀽𑀧𑀫𑁂𑀯 𑀆𑀳𑀸𑀭𑀁 𑀤𑁂𑀦𑁆𑀢𑀻’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀁 𑀦𑀺𑀘𑁆𑀘𑀓𑀸𑀮𑀁 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀧𑀺 𑀏𑀯𑀭𑀽𑀧𑀁 𑀆𑀳𑀸𑀭𑀁 𑀮𑀤𑁆𑀥𑀼𑀁 𑀦 𑀲𑀓𑁆𑀓𑁄𑀫, 𑀓𑀺𑀁 𑀫𑁂 𑀅𑀜𑁆𑀜𑀢𑁆𑀣 𑀕𑀢𑁂𑀦, 𑀇𑀫𑁂𑀲𑀁 𑀲𑀦𑁆𑀢𑀺𑀓𑁂𑀬𑁂𑀯 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑁂 𑀆𑀳 𑁋 ‘‘𑀅𑀳𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀢𑁆𑀯𑀸 𑀅𑀬𑁆𑀬𑀸𑀦𑀁 𑀲𑀦𑁆𑀢𑀺𑀓𑁂 𑀯𑀲𑀺𑀢𑀼𑀁 𑀇𑀘𑁆𑀙𑀸𑀫𑀻’’𑀢𑀺. ‘‘𑀲𑀸𑀥𑀼, 𑀉𑀧𑀸𑀲𑀓𑀸’’𑀢𑀺. 𑀲𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀢𑁂𑀲𑀁 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀸𑀥𑀼𑀓𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀭𑁄𑀦𑁆𑀢𑁄 𑀪𑀺𑀓𑁆𑀔𑀽 𑀅𑀢𑀺𑀯𑀺𑀬 𑀆𑀭𑀸𑀥𑁂𑀢𑁆𑀯𑀸 𑀤𑁆𑀯𑁂𑀫𑀸𑀲𑀘𑁆𑀘𑀬𑁂𑀦 𑀥𑀻𑀢𑀭𑀁 𑀤𑀝𑁆𑀞𑀼𑀓𑀸𑀫𑁄 𑀳𑀼𑀢𑁆𑀯𑀸 ‘‘𑀲𑀘𑁂, 𑀅𑀬𑁆𑀬𑁂, 𑀆𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀦 𑀫𑀁 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀦𑁆𑀢𑀺, 𑀅𑀦𑀸𑀧𑀼𑀘𑁆𑀙𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀢𑁂𑀲𑀁 𑀅𑀦𑀸𑀘𑀺𑀓𑁆𑀔𑀺𑀢𑁆𑀯𑀸𑀯 𑀦𑀺𑀓𑁆𑀔𑀫𑀺. 𑀏𑀢𑁆𑀢𑀓𑀫𑁂𑀯 𑀓𑀺𑀭𑀲𑁆𑀲 𑀑𑀴𑀸𑀭𑀺𑀓𑀁 𑀔𑀮𑀺𑀢𑀁 𑀅𑀳𑁄𑀲𑀺, 𑀬𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀭𑁄𑀘𑁂𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀢𑀲𑁆𑀲 𑀧𑀦 𑀕𑀫𑀦𑀫𑀕𑁆𑀕𑁂 𑀏𑀓𑀸 𑀅𑀝𑀯𑀻 𑀅𑀢𑁆𑀣𑀺. 𑀢𑀢𑁆𑀣 𑀧𑀜𑁆𑀘𑀲𑀢𑀸𑀦𑀁 𑀘𑁄𑀭𑀸𑀦𑀁 ‘‘𑀬𑁄 𑀇𑀫𑀁 𑀅𑀝𑀯𑀺𑀁 𑀧𑀯𑀺𑀲𑀢𑀺, 𑀢𑀁 𑀫𑀸𑀭𑁂𑀢𑁆𑀯𑀸 𑀢𑀲𑁆𑀲 𑀫𑀁𑀲𑀮𑁄𑀳𑀺𑀢𑁂𑀦 𑀢𑀼𑀬𑁆𑀳𑀁 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀤𑁂𑀯𑀢𑀸𑀬 𑀆𑀬𑀸𑀘𑀦𑀁 𑀓𑀢𑁆𑀯𑀸 𑀯𑀲𑀦𑁆𑀢𑀸𑀦𑀁 𑀲𑀢𑁆𑀢𑀫𑁄 𑀤𑀺𑀯𑀲𑁄 𑀳𑁄𑀢𑀺. 𑀢𑀲𑁆𑀫𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀘𑁄𑀭𑀚𑁂𑀝𑁆𑀞𑀓𑁄 𑀭𑀼𑀓𑁆𑀔𑀁 𑀆𑀭𑀼𑀬𑁆𑀳 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀘𑁄𑀭𑀸𑀦𑀁 𑀲𑀜𑁆𑀜𑀫𑀤𑀸𑀲𑀺. 𑀢𑁂 𑀢𑀲𑁆𑀲 𑀅𑀝𑀯𑀺𑀫𑀚𑁆𑀛𑀁 𑀧𑀯𑀺𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀕𑀡𑁆𑀳𑀺𑀢𑁆𑀯𑀸 𑀕𑀸𑀴𑁆𑀳𑀩𑀦𑁆𑀥𑀦𑀁 𑀓𑀢𑁆𑀯𑀸 𑀅𑀭𑀡𑀺𑀲𑀳𑀺𑀢𑁂𑀦 𑀅𑀕𑁆𑀕𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀤𑀸𑀭𑀽𑀦𑀺 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀓𑀢𑁆𑀯𑀸 𑀲𑀽𑀮𑀸𑀦𑀺 𑀢𑀘𑁆𑀙𑀺𑀁𑀲𑀼. 𑀲𑁄 𑀢𑁂𑀲𑀁 𑀢𑀁 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸, ‘‘𑀲𑀸𑀫𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦𑁂𑀯 𑀲𑀽𑀓𑀭𑀸, 𑀦 𑀫𑀺𑀕𑀸𑀤𑀬𑁄 𑀤𑀺𑀲𑁆𑀲𑀦𑁆𑀢𑀺, 𑀓𑀺𑀁 𑀓𑀸𑀭𑀡𑀸 𑀇𑀤𑀁 𑀓𑀭𑁄𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀢𑀁 𑀫𑀸𑀭𑁂𑀢𑁆𑀯𑀸 𑀢𑀯 𑀫𑀁𑀲𑀮𑁄𑀳𑀺𑀢𑁂𑀦 𑀤𑁂𑀯𑀢𑀸𑀬 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀲𑁄 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀪𑀺𑀓𑁆𑀔𑀽𑀦𑀁 𑀢𑀁 𑀉𑀧𑀓𑀸𑀭𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀚𑀻𑀯𑀺𑀢𑀫𑁂𑀯 𑀭𑀓𑁆𑀔𑀫𑀸𑀦𑁄 𑀏𑀯𑀫𑀸𑀳 𑁋 ‘‘𑀲𑀸𑀫𑀺, 𑀅𑀳𑀁 𑀯𑀺𑀖𑀸𑀲𑀸𑀤𑁄, 𑀉𑀘𑁆𑀙𑀺𑀝𑁆𑀞𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀟𑁆𑀠𑀺𑀢𑁄, 𑀯𑀺𑀖𑀸𑀲𑀸𑀤𑁄 𑀦𑀸𑀫 𑀓𑀸𑀴𑀓𑀡𑁆𑀡𑀺𑀓𑁄, 𑀅𑀬𑁆𑀬𑀸 𑀧𑀦 𑀬𑀢𑁄 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸𑀧𑀺 𑀔𑀢𑁆𑀢𑀺𑀬𑀸𑀯, 𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂 𑀏𑀓𑀢𑀺𑀁𑀲 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺, 𑀢𑁂 𑀫𑀸𑀭𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀁 𑀓𑀭𑁄𑀣, 𑀅𑀢𑀺𑀯𑀺𑀬 𑀯𑁄 𑀤𑁂𑀯𑀢𑀸 𑀢𑀼𑀲𑁆𑀲𑀺𑀲𑁆𑀲𑀢𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀘𑁄𑀭𑀸 ‘‘𑀪𑀤𑁆𑀤𑀓𑀁 𑀏𑀲 𑀯𑀤𑁂𑀢𑀺, 𑀓𑀺𑀁 𑀇𑀫𑀺𑀦𑀸 𑀓𑀸𑀴𑀓𑀡𑁆𑀡𑀺𑀦𑀸, 𑀔𑀢𑁆𑀢𑀺𑀬𑁂 𑀫𑀸𑀭𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀏𑀳𑀺, 𑀦𑁂𑀲𑀁 𑀯𑀲𑀦𑀝𑁆𑀞𑀸𑀦𑀁 𑀤𑀲𑁆𑀲𑁂𑀳𑀻’’𑀢𑀺 𑀢𑀫𑁂𑀯 𑀫𑀕𑁆𑀕𑀤𑁂𑀲𑀓𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀯𑀺𑀳𑀸𑀭𑀫𑀚𑁆𑀛𑁂 𑀪𑀺𑀓𑁆𑀔𑀽 𑀅𑀤𑀺𑀲𑁆𑀯𑀸 ‘‘𑀓𑀳𑀁 𑀪𑀺𑀓𑁆𑀔𑀽’’𑀢𑀺 𑀦𑀁 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀤𑁆𑀯𑁂 𑀫𑀸𑀲𑁂 𑀯𑀲𑀺𑀢𑀢𑁆𑀢𑀸 𑀢𑁂𑀲𑀁 𑀓𑀢𑀺𑀓𑀯𑀢𑁆𑀢𑀁 𑀚𑀸𑀦𑀦𑁆𑀢𑁄 𑀏𑀯𑀫𑀸𑀳 𑁋 ‘‘𑀅𑀢𑁆𑀢𑀦𑁄 𑀤𑀺𑀯𑀸𑀝𑁆𑀞𑀸𑀦𑀭𑀢𑁆𑀢𑀺𑀝𑁆𑀞𑀸𑀦𑁂𑀲𑀼 𑀦𑀺𑀲𑀺𑀦𑁆𑀦𑀸, 𑀏𑀢𑀁 𑀖𑀡𑁆𑀟𑀺𑀁 𑀧𑀳𑀭𑀣, 𑀖𑀡𑁆𑀟𑀺𑀲𑀤𑁆𑀤𑁂𑀦 𑀲𑀦𑁆𑀦𑀺𑀧𑀢𑀺𑀲𑁆𑀲𑀦𑁆𑀢𑀻’’𑀢𑀺. 𑀘𑁄𑀭𑀚𑁂𑀝𑁆𑀞𑀓𑁄 𑀖𑀡𑁆𑀟𑀺𑀁 𑀧𑀳𑀭𑀺.

𑀪𑀺𑀓𑁆𑀔𑀽 𑀖𑀡𑁆𑀟𑀺𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀅𑀓𑀸𑀮𑁂 𑀖𑀡𑁆𑀟𑀺 𑀧𑀳𑀝𑀸, 𑀓𑀲𑁆𑀲𑀘𑀺 𑀅𑀨𑀸𑀲𑀼𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀫𑀚𑁆𑀛𑁂 𑀧𑀝𑀺𑀧𑀸𑀝𑀺𑀬𑀸 𑀧𑀜𑁆𑀜𑀢𑁆𑀢𑁂𑀲𑀼 𑀧𑀸𑀲𑀸𑀡𑀨𑀮𑀓𑁂𑀲𑀼 𑀦𑀺𑀲𑀻𑀤𑀺𑀁𑀲𑀼. 𑀲𑀗𑁆𑀖𑀢𑁆𑀣𑁂𑀭𑁄 𑀘𑁄𑀭𑁂 𑀑𑀮𑁄𑀓𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀉𑀧𑀸𑀲𑀓𑀸 𑀓𑁂𑀦𑀸𑀬𑀁 𑀖𑀡𑁆𑀟𑀺 𑀧𑀳𑀝𑀸’’𑀢𑀺? 𑀘𑁄𑀭𑀚𑁂𑀝𑁆𑀞𑀓𑁄 𑀆𑀳 𑁋 ‘‘𑀫𑀬𑀸, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀅𑀫𑁆𑀳𑁂𑀳𑀺 𑀅𑀝𑀯𑀺𑀤𑁂𑀯𑀢𑀸𑀬 𑀆𑀬𑀸𑀘𑀺𑀢𑀁 𑀅𑀢𑁆𑀣𑀺, 𑀢𑀲𑁆𑀲𑀸 𑀩𑀮𑀺𑀓𑀫𑁆𑀫𑀓𑀭𑀡𑀢𑁆𑀣𑀸𑀬 𑀏𑀓𑀁 𑀪𑀺𑀓𑁆𑀔𑀼𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀣𑁂𑀭𑁄 𑀪𑀺𑀓𑁆𑀔𑀽 𑀆𑀳 𑁋 ‘‘𑀆𑀯𑀼𑀲𑁄, 𑀪𑀸𑀢𑀺𑀓𑀸𑀦𑀁 𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑀁 𑀦𑀸𑀫 𑀚𑁂𑀝𑁆𑀞𑀪𑀸𑀢𑀺𑀓𑁂𑀦 𑀦𑀺𑀢𑁆𑀣𑀭𑀺𑀢𑀩𑁆𑀩𑀁, 𑀅𑀳𑀁 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀢𑀼𑀫𑁆𑀳𑀸𑀓𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀇𑀫𑁂𑀳𑀺 𑀲𑀤𑁆𑀥𑀺𑀁 𑀕𑀫𑀺𑀲𑁆𑀲𑀸𑀫𑀺, 𑀫𑀸 𑀲𑀩𑁆𑀩𑁂𑀲𑀁 𑀅𑀦𑁆𑀢𑀭𑀸𑀬𑁄 𑀳𑁄𑀢𑀼, 𑀅𑀧𑁆𑀧𑀫𑀢𑁆𑀢𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀣𑀸’’𑀢𑀺. 𑀅𑀦𑀼𑀣𑁂𑀭𑁄 𑀆𑀳 𑁋 ‘‘𑀪𑀦𑁆𑀢𑁂, 𑀚𑁂𑀝𑁆𑀞𑀪𑀸𑀢𑀼 𑀓𑀺𑀘𑁆𑀘𑀁 𑀦𑀸𑀫 𑀓𑀦𑀺𑀝𑁆𑀞𑀲𑁆𑀲 𑀪𑀸𑀭𑁄, 𑀅𑀳𑀁 𑀕𑀫𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦 ‘‘𑀅𑀳𑀫𑁂𑀯 𑀅𑀳𑀫𑁂𑀯𑀸’’𑀢𑀺 𑀯𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀢𑀺𑀁𑀲𑀧𑀺 𑀚𑀦𑀸 𑀉𑀝𑁆𑀞𑀳𑀺𑀁𑀲𑀼, 𑀏𑀯𑀁 𑀢𑁂 𑀦𑁂𑀯 𑀏𑀓𑀺𑀲𑁆𑀲𑀸 𑀫𑀸𑀢𑀼𑀬𑀸 𑀧𑀼𑀢𑁆𑀢𑀸, 𑀦 𑀏𑀓𑀲𑁆𑀲 𑀧𑀺𑀢𑀼𑀦𑁄, 𑀦𑀸𑀧𑀺 𑀯𑀻𑀢𑀭𑀸𑀕𑀸, 𑀅𑀣 𑀘 𑀧𑀦 𑀅𑀯𑀲𑁂𑀲𑀸𑀦𑀁 𑀅𑀢𑁆𑀣𑀸𑀬 𑀧𑀝𑀺𑀧𑀸𑀝𑀺𑀬𑀸 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀁𑀲𑀼. 𑀢𑁂𑀲𑀼 𑀏𑀓𑁄𑀧𑀺 ‘‘𑀢𑁆𑀯𑀁 𑀬𑀸𑀳𑀻’’𑀢𑀺 𑀯𑀢𑁆𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺.

𑀲𑀁𑀓𑀺𑀘𑁆𑀘𑀲𑀸𑀫𑀡𑁂𑀭𑁄 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀢𑀺𑀝𑁆𑀞𑀣, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑁂 𑀆𑀳𑀁𑀲𑀼 𑁋 ‘‘𑀆𑀯𑀼𑀲𑁄, 𑀫𑀬𑀁 𑀲𑀩𑁆𑀩𑁂 𑀏𑀓𑀢𑁄 𑀫𑀸𑀭𑀺𑀬𑀫𑀸𑀦𑀸𑀧𑀺 𑀢𑀁 𑀏𑀓𑀓𑀁 𑀦 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀸’’𑀢𑀺. ‘‘𑀓𑀺𑀁 𑀓𑀸𑀭𑀡𑀸, 𑀪𑀦𑁆𑀢𑁂’’𑀢𑀺? ‘‘‘𑀆𑀯𑀼𑀲𑁄, 𑀢𑁆𑀯𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀸𑀫𑀡𑁂𑀭𑁄, 𑀲𑀘𑁂 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫, 𑀲𑀸𑀫𑀡𑁂𑀭𑀁 𑀫𑁂 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀘𑁄𑀭𑀸𑀦𑀁 𑀦𑀺𑀬𑁆𑀬𑀸𑀤𑀺𑀁𑀲𑀽’𑀢𑀺 𑀣𑁂𑀭𑁄 𑀦𑁄 𑀕𑀭𑀳𑀺𑀲𑁆𑀲𑀢𑀺, 𑀢𑀁 𑀦𑀺𑀦𑁆𑀤𑀁 𑀦𑀺𑀢𑁆𑀣𑀭𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫, 𑀢𑁂𑀦 𑀢𑀁 𑀦 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀸’’𑀢𑀺. ‘‘𑀪𑀦𑁆𑀢𑁂, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑀼𑀫𑁆𑀳𑁂 𑀫𑀫 𑀉𑀧𑀚𑁆𑀛𑀸𑀬𑀲𑁆𑀲 𑀲𑀦𑁆𑀢𑀺𑀓𑀁 𑀧𑀳𑀺𑀡𑀦𑁆𑀢𑁄𑀧𑀺, 𑀫𑀫 𑀉𑀧𑀚𑁆𑀛𑀸𑀬𑁄 𑀫𑀁 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀧𑀳𑀺𑀡𑀦𑁆𑀢𑁄𑀧𑀺 𑀇𑀤𑀫𑁂𑀯 𑀓𑀸𑀭𑀡𑀁 𑀤𑀺𑀲𑁆𑀯𑀸 𑀧𑀳𑀺𑀡𑀺, 𑀢𑀺𑀝𑁆𑀞𑀣 𑀢𑀼𑀫𑁆𑀳𑁂, 𑀅𑀳𑀫𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀲𑁄 𑀢𑀺𑀁𑀲 𑀪𑀺𑀓𑁆𑀔𑀽 𑀯𑀦𑁆𑀤𑀺𑀢𑁆𑀯𑀸 ‘‘𑀲𑀘𑁂, 𑀪𑀦𑁆𑀢𑁂, 𑀫𑁂 𑀤𑁄𑀲𑁄 𑀅𑀢𑁆𑀣𑀺, 𑀔𑀫𑀣𑀸’’𑀢𑀺 𑀯𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀢𑀤𑀸 𑀪𑀺𑀓𑁆𑀔𑀽𑀦𑀁 𑀫𑀳𑀸𑀲𑀁𑀯𑁂𑀕𑁄 𑀉𑀧𑁆𑀧𑀚𑁆𑀚𑀺, 𑀅𑀓𑁆𑀔𑀻𑀦𑀺 𑀅𑀲𑁆𑀲𑀼𑀧𑀼𑀡𑁆𑀡𑀸𑀦𑀺 𑀳𑀤𑀬𑀫𑀁𑀲𑀁 𑀧𑀯𑁂𑀥𑀺. 𑀫𑀳𑀸𑀣𑁂𑀭𑁄 𑀘𑁄𑀭𑁂 𑀆𑀳 𑁋 ‘‘𑀉𑀧𑀸𑀲𑀓𑀸 𑀅𑀬𑀁 𑀤𑀳𑀭𑀓𑁄 𑀢𑀼𑀫𑁆𑀳𑁂 𑀅𑀕𑁆𑀕𑀺𑀁 𑀓𑀭𑁄𑀦𑁆𑀢𑁂, 𑀲𑀽𑀮𑀸𑀦𑀺 𑀢𑀘𑁆𑀙𑀦𑁆𑀢𑁂, 𑀧𑀡𑁆𑀡𑀸𑀦𑀺 𑀅𑀢𑁆𑀣𑀭𑀦𑁆𑀢𑁂 𑀤𑀺𑀲𑁆𑀯𑀸 𑀪𑀸𑀬𑀺𑀲𑁆𑀲𑀢𑀺, 𑀇𑀫𑀁 𑀏𑀓𑀫𑀦𑁆𑀢𑁂 𑀞𑀧𑁂𑀢𑁆𑀯𑀸 𑀢𑀸𑀦𑀺 𑀓𑀺𑀘𑁆𑀘𑀸𑀦𑀺 𑀓𑀭𑁂𑀬𑁆𑀬𑀸𑀣𑀸’’𑀢𑀺. 𑀘𑁄𑀭𑀸 𑀲𑀸𑀫𑀡𑁂𑀭𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑁂 𑀞𑀧𑁂𑀢𑁆𑀯𑀸 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑀺𑀁𑀲𑀼.

𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀘𑁄𑀭𑀚𑁂𑀝𑁆𑀞𑀓𑁄 𑀅𑀲𑀺𑀁 𑀅𑀩𑁆𑀩𑀸𑀳𑀺𑀢𑁆𑀯𑀸 𑀲𑀸𑀫𑀡𑁂𑀭𑀁 𑀉𑀧𑀲𑀗𑁆𑀓𑀫𑀺. 𑀲𑀸𑀫𑀡𑁂𑀭𑁄 𑀦𑀺𑀲𑀻𑀤𑀫𑀸𑀦𑁄 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸𑀯 𑀦𑀺𑀲𑀻𑀤𑀺. 𑀘𑁄𑀭𑀚𑁂𑀝𑁆𑀞𑀓𑁄 𑀅𑀲𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀲𑀸𑀫𑀡𑁂𑀭𑀲𑁆𑀲 𑀔𑀦𑁆𑀥𑁂 𑀧𑀸𑀢𑁂𑀲𑀺, 𑀅𑀲𑀺 𑀦𑀫𑀺𑀢𑁆𑀯𑀸 𑀥𑀸𑀭𑀸𑀬 𑀥𑀸𑀭𑀁 𑀧𑀳𑀭𑀺, 𑀲𑁄 ‘‘𑀦 𑀲𑀫𑁆𑀫𑀸 𑀧𑀳𑀭𑀺’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀧𑀼𑀦 𑀢𑀁 𑀉𑀚𑀼𑀓𑀁 𑀓𑀢𑁆𑀯𑀸 𑀧𑀳𑀭𑀺. 𑀅𑀲𑀺 𑀢𑀸𑀮𑀧𑀡𑁆𑀡𑀁 𑀯𑀺𑀬 𑀯𑁂𑀞𑀬𑀫𑀸𑀦𑁄 𑀣𑀭𑀼𑀫𑀽𑀮𑀁 𑀅𑀕𑀫𑀸𑀲𑀺. 𑀲𑀸𑀫𑀡𑁂𑀭𑀜𑁆𑀳𑀺 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀺𑀦𑁂𑀭𑀼𑀦𑀸 𑀅𑀯𑀢𑁆𑀣𑀭𑀦𑁆𑀢𑁄𑀧𑀺 𑀫𑀸𑀭𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀧𑀕𑁂𑀯 𑀅𑀲𑀺𑀦𑀸. 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀘𑁄𑀭𑀚𑁂𑀝𑁆𑀞𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀼𑀩𑁆𑀩𑁂 𑀫𑁂 𑀅𑀲𑀺 𑀲𑀺𑀮𑀸𑀣𑀫𑁆𑀪𑀁 𑀯𑀸 𑀔𑀤𑀺𑀭𑀔𑀸𑀡𑀼𑀁 𑀯𑀸 𑀓𑀴𑀻𑀭𑀁 𑀯𑀺𑀬 𑀙𑀺𑀦𑁆𑀤𑀢𑀺, 𑀇𑀤𑀸𑀦𑀺 𑀏𑀓𑀯𑀸𑀭𑀁 𑀦𑀫𑀺, 𑀏𑀓𑀯𑀸𑀭𑀁 𑀢𑀸𑀮𑀧𑀢𑁆𑀢𑀯𑁂𑀞𑀓𑁄 𑀯𑀺𑀬 𑀚𑀸𑀢𑁄. 𑀅𑀬𑀁 𑀦𑀸𑀫 𑀅𑀲𑀺 𑀅𑀘𑁂𑀢𑀦𑀸 𑀳𑀼𑀢𑁆𑀯𑀸𑀧𑀺 𑀇𑀫𑀲𑁆𑀲 𑀕𑀼𑀡𑀁 𑀚𑀸𑀦𑀸𑀢𑀺, 𑀅𑀳𑀁 𑀲𑀘𑁂𑀢𑀦𑁄𑀧𑀺 𑀦 𑀚𑀸𑀦𑀸𑀫𑀻’’𑀢𑀺. 𑀲𑁄 𑀅𑀲𑀺𑀁 𑀪𑀽𑀫𑀺𑀬𑀁 𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀧𑀸𑀤𑀫𑀽𑀮𑁂 𑀉𑀭𑁂𑀦 𑀦𑀺𑀧𑀚𑁆𑀚𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀬𑀁 𑀥𑀦𑀓𑀸𑀭𑀡𑀸 𑀅𑀝𑀯𑀺𑀁 𑀧𑀯𑀺𑀝𑁆𑀞𑀸𑀫𑁆𑀳𑀸, 𑀅𑀫𑁆𑀳𑁂 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀲𑀳𑀲𑁆𑀲𑀫𑀢𑁆𑀢𑀸𑀧𑀺 𑀫𑀦𑀼𑀲𑁆𑀲𑀸 𑀧𑀯𑁂𑀥𑀦𑁆𑀢𑀺, 𑀤𑁆𑀯𑁂 𑀢𑀺𑀲𑁆𑀲𑁄 𑀓𑀣𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀯 𑀧𑀦 𑀲𑀦𑁆𑀢𑀸𑀲𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀉𑀓𑁆𑀓𑀸𑀫𑀼𑀔𑁂 𑀲𑀼𑀯𑀡𑁆𑀡𑀁 𑀯𑀺𑀬 𑀲𑀼𑀧𑀼𑀧𑁆𑀨𑀺𑀢𑀓𑀡𑀺𑀓𑀸𑀭𑀁 𑀯𑀺𑀬 𑀘 𑀢𑁂 𑀫𑀼𑀔𑀁 𑀯𑀺𑀭𑁄𑀘𑀢𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀢𑀲𑁆𑀲 𑀢𑁂 𑀦𑀢𑁆𑀣𑀺 𑀪𑀻𑀢𑀢𑁆𑀢𑀁, 𑀪𑀺𑀬𑁆𑀬𑁄 𑀯𑀡𑁆𑀡𑁄 𑀧𑀲𑀻𑀤𑀢𑀺;

𑀓𑀲𑁆𑀫𑀸 𑀦 𑀧𑀭𑀺𑀤𑁂𑀯𑁂𑀲𑀺, 𑀏𑀯𑀭𑀽𑀧𑁂 𑀫𑀳𑀩𑁆𑀪𑀬𑁂’’𑀢𑀺. (𑀣𑁂𑀭𑀕𑀸. 𑁭𑁦𑁬);

𑀲𑀸𑀫𑀡𑁂𑀭𑁄 𑀛𑀸𑀦𑀸 𑀯𑀼𑀝𑁆𑀞𑀸𑀬 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄, ‘‘𑀆𑀯𑀼𑀲𑁄 𑀕𑀸𑀫𑀡𑀺, 𑀔𑀻𑀡𑀸𑀲𑀯𑀲𑁆𑀲 𑀅𑀢𑁆𑀢𑀪𑀸𑀯𑁄 𑀦𑀸𑀫 𑀲𑀻𑀲𑁂 𑀞𑀧𑀺𑀢𑀪𑀸𑀭𑁄 𑀯𑀺𑀬 𑀳𑁄𑀢𑀺, 𑀲𑁄 𑀢𑀲𑁆𑀫𑀺𑀁 𑀪𑀺𑀚𑁆𑀚𑀦𑁆𑀢𑁂 𑀯𑀸 𑀦𑀲𑁆𑀲𑀦𑁆𑀢𑁂 𑀯𑀸 𑀢𑀼𑀲𑁆𑀲𑀢𑁂𑀯, 𑀦 𑀪𑀸𑀬𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀦𑀢𑁆𑀣𑀺 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁, 𑀅𑀦𑀧𑁂𑀓𑁆𑀔𑀲𑁆𑀲 𑀕𑀸𑀫𑀡𑀺;

𑀅𑀢𑀺𑀓𑁆𑀓𑀦𑁆𑀢𑀸 𑀪𑀬𑀸 𑀲𑀩𑁆𑀩𑁂, 𑀔𑀻𑀡𑀲𑀁𑀬𑁄𑀚𑀦𑀲𑁆𑀲 𑀯𑁂.

‘‘𑀔𑀻𑀡𑀸𑀬 𑀪𑀯𑀦𑁂𑀢𑁆𑀢𑀺𑀬𑀸, 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀬𑀣𑀸𑀢𑀣𑁂;

𑀦 𑀪𑀬𑀁 𑀫𑀭𑀡𑁂 𑀳𑁄𑀢𑀺, 𑀪𑀸𑀭𑀦𑀺𑀓𑁆𑀔𑁂𑀧𑀦𑁂 𑀬𑀣𑀸’’𑀢𑀺. (𑀣𑁂𑀭𑀕𑀸. 𑁭𑁦𑁭-𑁭𑁦𑁮);

𑀲𑁄 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀧𑀜𑁆𑀘 𑀘𑁄𑀭𑀲𑀢𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 𑀆𑀳 𑁋 ‘‘𑀢𑀼𑀫𑁆𑀳𑁂 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀢𑀼𑀫𑁆𑀳𑁂 𑀧𑀦, 𑀲𑀸𑀫𑀻’’𑀢𑀺. ‘‘𑀫𑀫 𑀢𑀸𑀯, 𑀪𑁄, ‘𑀏𑀯𑀭𑀽𑀧𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀅𑀕𑀸𑀭𑀫𑀚𑁆𑀛𑁂 𑀓𑀫𑁆𑀫𑀁 𑀦𑀢𑁆𑀣𑀺, 𑀅𑀬𑁆𑀬𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’𑀢𑀺. 𑀫𑀬𑀫𑁆𑀧𑀺 𑀢𑀣𑁂𑀯 𑀓𑀭𑀺𑀲𑁆𑀲𑀸𑀫𑀸’’𑀢𑀺. ‘‘𑀲𑀸𑀥𑀼, 𑀢𑀸𑀢𑀸’’𑀢𑀺 𑀢𑀢𑁄 𑀧𑀜𑁆𑀘𑀲𑀢𑀸𑀧𑀺 𑀘𑁄𑀭𑀸 𑀲𑀸𑀫𑀡𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀼. 𑀲𑁄 𑀢𑁂𑀲𑀁 𑀅𑀲𑀺𑀥𑀸𑀭𑀸𑀳𑀺 𑀏𑀯 𑀓𑁂𑀲𑁂 𑀘𑁂𑀯 𑀯𑀢𑁆𑀣𑀤𑀲𑀸 𑀘 𑀙𑀺𑀦𑁆𑀤𑀺𑀢𑁆𑀯𑀸 𑀢𑀫𑁆𑀩𑀫𑀢𑁆𑀢𑀺𑀓𑀸𑀬 𑀭𑀚𑀺𑀢𑁆𑀯𑀸 𑀢𑀸𑀦𑀺 𑀓𑀸𑀲𑀸𑀬𑀸𑀦𑀺 𑀅𑀘𑁆𑀙𑀸𑀤𑀸𑀧𑁂𑀢𑁆𑀯𑀸 𑀤𑀲𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑁂 𑀆𑀤𑀸𑀬 𑀕𑀘𑁆𑀙𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀣𑁂𑀭𑁂 𑀅𑀤𑀺𑀲𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀺, 𑀢𑁂 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀘𑁄𑀭𑀸𑀦𑀜𑁆𑀳𑀺 𑀫𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑁂𑀲𑀼 𑀏𑀓𑁄𑀧𑀺 𑀅𑀲𑁆𑀲𑀽𑀦𑀺 𑀲𑀦𑁆𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺, ‘𑀫𑀸𑀭𑀺𑀢𑁄 𑀦𑀼 𑀔𑁄 𑀲𑀸𑀫𑀡𑁂𑀭𑁄, 𑀦𑁄’𑀢𑀺 𑀘𑀺𑀦𑁆𑀢𑁂𑀦𑁆𑀢𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀅𑀪𑀺𑀫𑀼𑀔𑀁 𑀦 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀤𑀺𑀲𑁆𑀯𑀸𑀯 𑀦𑁂 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀤𑀲𑁆𑀲𑀦𑁂𑀦 𑀧𑀝𑀺𑀮𑀤𑁆𑀥𑀅𑀲𑁆𑀲𑀸𑀲𑁂𑀳𑀺 𑀢𑁂𑀳𑀺 ‘‘𑀓𑀺𑀁, 𑀲𑀧𑁆𑀧𑀼𑀭𑀺𑀲, 𑀲𑀁𑀓𑀺𑀘𑁆𑀘, 𑀮𑀤𑁆𑀥𑀁 𑀢𑁂 𑀚𑀻𑀯𑀺𑀢’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀆𑀫, 𑀪𑀦𑁆𑀢𑁂, 𑀇𑀫𑁂 𑀫𑀁 𑀫𑀸𑀭𑁂𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀫𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀫𑀫 𑀕𑀼𑀡𑁂 𑀧𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑀸, 𑀅𑀳𑀁 ‘𑀢𑀼𑀫𑁆𑀳𑁂 𑀤𑀺𑀲𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀻’𑀢𑀺 𑀆𑀕𑀢𑁄, 𑀅𑀧𑁆𑀧𑀫𑀢𑁆𑀢𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀣, 𑀅𑀳𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀢𑁂 𑀪𑀺𑀓𑁆𑀔𑀽 𑀯𑀦𑁆𑀤𑀺𑀢𑁆𑀯𑀸 𑀇𑀢𑀭𑁂 𑀆𑀤𑀸𑀬 𑀉𑀧𑀚𑁆𑀛𑀸𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀲𑀁𑀓𑀺𑀘𑁆𑀘, 𑀅𑀦𑁆𑀢𑁂𑀯𑀸𑀲𑀺𑀓𑀸 𑀢𑁂 𑀮𑀤𑁆𑀥𑀸’’𑀢𑀺 𑀯𑀼𑀢𑁆𑀢𑁂, ‘‘𑀆𑀫, 𑀪𑀦𑁆𑀢𑁂’’𑀢𑀺 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀣𑁂𑀭𑁂𑀦 ‘‘𑀕𑀘𑁆𑀙 𑀲𑀁𑀓𑀺𑀘𑁆𑀘, 𑀲𑀢𑁆𑀣𑀸𑀭𑀁 𑀧𑀲𑁆𑀲𑀸𑀳𑀻’’𑀢𑀺 𑀯𑀼𑀢𑁆𑀢𑁂, ‘‘𑀲𑀸𑀥𑀽’’𑀢𑀺 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀢𑁂 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀸𑀧𑀺 ‘‘𑀓𑀺𑀁 𑀲𑀁𑀓𑀺𑀘𑁆𑀘, 𑀅𑀦𑁆𑀢𑁂𑀯𑀸𑀲𑀺𑀓𑀸 𑀢𑁂 𑀮𑀤𑁆𑀥𑀸’’𑀢𑀺 𑀯𑀼𑀢𑁆𑀢𑁂, ‘‘𑀆𑀫, 𑀪𑀦𑁆𑀢𑁂’’𑀢𑀺 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀏𑀯𑀁 𑀓𑀺𑀭, 𑀪𑀺𑀓𑁆𑀔𑀯𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑀸𑀓𑀁 𑀘𑁄𑀭𑀓𑀫𑁆𑀫𑀁 𑀓𑀢𑁆𑀯𑀸 𑀤𑀼𑀲𑁆𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀯𑀲𑁆𑀲𑀲𑀢𑀁 𑀚𑀻𑀯𑀦𑀢𑁄 𑀇𑀤𑀸𑀦𑀺 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀏𑀓𑀤𑀺𑀯𑀲𑀫𑁆𑀧𑀺 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁦. ‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀤𑀼𑀲𑁆𑀲𑀻𑀮𑁄 𑀅𑀲𑀫𑀸𑀳𑀺𑀢𑁄;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀲𑀻𑀮𑀯𑀦𑁆𑀢𑀲𑁆𑀲 𑀛𑀸𑀬𑀺𑀦𑁄’’𑀢𑀺.

𑀢𑀢𑁆𑀣 𑀤𑀼𑀲𑁆𑀲𑀻𑀮𑁄𑀢𑀺 𑀦𑀺𑀲𑁆𑀲𑀻𑀮𑁄. 𑀲𑀻𑀮𑀯𑀦𑁆𑀢𑀲𑁆𑀲𑀸𑀢𑀺 𑀤𑀼𑀲𑁆𑀲𑀻𑀮𑀲𑁆𑀲 𑀯𑀲𑁆𑀲𑀲𑀢𑀁 𑀚𑀻𑀯𑀦𑀢𑁄 𑀲𑀻𑀮𑀯𑀦𑁆𑀢𑀲𑁆𑀲 𑀤𑁆𑀯𑀻𑀳𑀺 𑀛𑀸𑀦𑁂𑀳𑀺 𑀛𑀸𑀬𑀺𑀦𑁄 𑀏𑀓𑀤𑀺𑀯𑀲𑀫𑁆𑀧𑀺 𑀏𑀓𑀫𑀼𑀳𑀼𑀢𑁆𑀢𑀫𑁆𑀧𑀺 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀉𑀢𑁆𑀢𑀫𑀦𑁆𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀢𑁂 𑀧𑀜𑁆𑀘𑀲𑀢𑀸𑀧𑀺 𑀪𑀺𑀓𑁆𑀔𑀽 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀲𑀫𑁆𑀧𑀢𑁆𑀢𑀫𑀳𑀸𑀚𑀦𑀲𑁆𑀲𑀸𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀅𑀧𑀭𑁂𑀦 𑀲𑀫𑀬𑁂𑀦 𑀲𑀁𑀓𑀺𑀘𑁆𑀘𑁄 𑀉𑀧𑀲𑀫𑁆𑀧𑀤𑀁 𑀮𑀪𑀺𑀢𑁆𑀯𑀸 𑀤𑀲𑀯𑀲𑁆𑀲𑁄 𑀳𑀼𑀢𑁆𑀯𑀸 𑀲𑀸𑀫𑀡𑁂𑀭𑀁 𑀕𑀡𑁆𑀳𑀺. 𑀲𑁄 𑀧𑀦 𑀢𑀲𑁆𑀲𑁂𑀯 𑀪𑀸𑀕𑀺𑀦𑁂𑀬𑁆𑀬𑁄 𑀅𑀥𑀺𑀫𑀼𑀢𑁆𑀢𑀲𑀸𑀫𑀡𑁂𑀭𑁄 𑀦𑀸𑀫. 𑀅𑀣 𑀦𑀁 𑀣𑁂𑀭𑁄 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑀓𑀸𑀮𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀉𑀧𑀲𑀫𑁆𑀧𑀤𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺, 𑀕𑀘𑁆𑀙, 𑀜𑀸𑀢𑀓𑀸𑀦𑀁 𑀲𑀦𑁆𑀢𑀺𑀓𑁂 𑀯𑀲𑁆𑀲𑀧𑀭𑀺𑀫𑀸𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 𑀏𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀜𑁆𑀘𑀲𑀢𑁂𑀳𑀺 𑀘𑁄𑀭𑁂𑀳𑀺 𑀩𑀮𑀺𑀓𑀫𑁆𑀫𑀢𑁆𑀣𑀸𑀬 𑀫𑀸𑀭𑀺𑀬𑀫𑀸𑀦𑁄 𑀢𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁂𑀳𑀺 𑀢𑁂𑀳𑀺 ‘‘𑀦 𑀢𑁂 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀫𑁆𑀳𑀸𑀓𑀁 𑀅𑀢𑁆𑀣𑀺𑀪𑀸𑀯𑁄 𑀓𑀲𑁆𑀲𑀘𑀺 𑀆𑀭𑁄𑀘𑁂𑀢𑀩𑁆𑀩𑁄’’𑀢𑀺 𑀯𑀺𑀲𑁆𑀲𑀝𑁆𑀞𑁄 𑀧𑀝𑀺𑀧𑀣𑁂 𑀫𑀸𑀢𑀸𑀧𑀺𑀢𑀭𑁄 𑀆𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀢𑀫𑁂𑀯 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀫𑁆𑀧𑀺 𑀢𑁂𑀲𑀁 𑀲𑀘𑁆𑀘𑀫𑀦𑀼𑀭𑀓𑁆𑀔𑀦𑁆𑀢𑁄 𑀦𑀸𑀭𑁄𑀘𑁂𑀲𑀺. 𑀢𑁂𑀲𑀁 𑀘𑁄𑀭𑁂𑀳𑀺 𑀯𑀺𑀳𑁂𑀞𑀺𑀬𑀫𑀸𑀦𑀸𑀦𑀁 ‘‘𑀢𑁆𑀯𑀫𑁆𑀧𑀺 𑀘𑁄𑀭𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀫𑀜𑁆𑀜𑁂, 𑀅𑀫𑁆𑀳𑀸𑀓𑀁 𑀦𑀸𑀭𑁄𑀘𑁂𑀲𑀻’’𑀢𑀺 𑀧𑀭𑀺𑀤𑁂𑀯𑀦𑁆𑀢𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑁂 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺 𑀅𑀦𑀸𑀭𑁄𑀘𑀺𑀢𑀪𑀸𑀯𑀁 𑀜𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀼. 𑀲𑁄𑀧𑀺 𑀲𑀁𑀓𑀺𑀘𑁆𑀘𑀲𑀸𑀫𑀡𑁂𑀭𑁄 𑀯𑀺𑀬 𑀢𑁂 𑀲𑀩𑁆𑀩𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀲𑀦𑁆𑀢𑀺𑀓𑀁 𑀆𑀦𑁂𑀢𑁆𑀯𑀸 𑀢𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀧𑁂𑀲𑀺𑀢𑁄 𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀏𑀯𑀁 𑀓𑀺𑀭, 𑀪𑀺𑀓𑁆𑀔𑀯𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀫𑁂𑀯 𑀕𑀸𑀣𑀫𑀸𑀳 𑁋

‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀤𑀼𑀲𑁆𑀲𑀻𑀮𑁄 𑀅𑀲𑀫𑀸𑀳𑀺𑀢𑁄;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀲𑀻𑀮𑀯𑀦𑁆𑀢𑀲𑁆𑀲 𑀛𑀸𑀬𑀺𑀦𑁄’’𑀢𑀺.

𑀇𑀤𑀫𑁆𑀧𑀺 𑀅𑀥𑀺𑀫𑀼𑀢𑁆𑀢𑀲𑀸𑀫𑀡𑁂𑀭𑀯𑀢𑁆𑀣𑀼 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀲𑀁𑀓𑀺𑀘𑁆𑀘𑀲𑀸𑀫𑀡𑁂𑀭𑀯𑀢𑁆𑀣𑀼 𑀦𑀯𑀫𑀁.

𑁧𑁦. 𑀔𑀸𑀡𑀼𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀯𑀢𑁆𑀣𑀼

𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀔𑀸𑀡𑀼𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀣𑁂𑀭𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 ‘‘𑀲𑀢𑁆𑀣𑀼 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀢𑀢𑁄 𑀆𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀺𑀮𑀦𑁆𑀢𑁄 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀏𑀓𑀲𑁆𑀫𑀺𑀁 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀦𑀺𑀲𑀺𑀦𑁆𑀦𑁄 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀅𑀣𑁂𑀓𑀁 𑀕𑀸𑀫𑀁 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀧𑀜𑁆𑀘𑀲𑀢𑀸 𑀘𑁄𑀭𑀸 𑀅𑀢𑁆𑀢𑀦𑁄 𑀩𑀮𑀸𑀦𑀼𑀭𑀽𑀧𑁂𑀦 𑀪𑀡𑁆𑀟𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀲𑀻𑀲𑁂𑀦𑀸𑀤𑀸𑀬 𑀕𑀘𑁆𑀙𑀦𑁆𑀢𑀸 𑀤𑀽𑀭𑀁 𑀕𑀦𑁆𑀢𑁆𑀯𑀸 𑀓𑀺𑀮𑀦𑁆𑀢𑀭𑀽𑀧𑀸 ‘‘𑀤𑀽𑀭𑀁 𑀆𑀕𑀢𑀸𑀫𑁆𑀳, 𑀇𑀫𑀲𑁆𑀫𑀺𑀁 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀯𑀺𑀲𑁆𑀲𑀫𑀺𑀲𑁆𑀲𑀸𑀫𑀸’’𑀢𑀺 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀧𑀺𑀝𑁆𑀞𑀺𑀧𑀸𑀲𑀸𑀡𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀤𑀺𑀲𑁆𑀯𑀸𑀧𑀺 ‘‘𑀔𑀸𑀡𑀼𑀓𑁄 𑀅𑀬’’𑀦𑁆𑀢𑀺 𑀲𑀜𑁆𑀜𑀺𑀦𑁄 𑀅𑀳𑁂𑀲𑀼𑀁. 𑀅𑀣𑁂𑀓𑁄 𑀘𑁄𑀭𑁄 𑀣𑁂𑀭𑀲𑁆𑀲 𑀲𑀻𑀲𑁂 𑀪𑀡𑁆𑀟𑀺𑀓𑀁 𑀞𑀧𑁂𑀲𑀺, 𑀅𑀧𑀭𑁄𑀧𑀺 𑀢𑀁 𑀦𑀺𑀲𑁆𑀲𑀸𑀬 𑀪𑀡𑁆𑀟𑀺𑀓𑀁 𑀞𑀧𑁂𑀲𑀺. 𑀏𑀯𑀁 𑀧𑀜𑁆𑀘𑀲𑀢𑀸𑀧𑀺 𑀘𑁄𑀭𑀸 𑀧𑀜𑁆𑀘𑀳𑀺 𑀪𑀡𑁆𑀟𑀺𑀓𑀲𑀢𑁂𑀳𑀺 𑀣𑁂𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀬𑀫𑁆𑀧𑀺 𑀦𑀺𑀲𑀺𑀦𑁆𑀦𑀸 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑀓𑀸𑀮𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀪𑀡𑁆𑀟𑀺𑀓𑀁 𑀕𑀡𑁆𑀳𑀦𑁆𑀢𑀸 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀅𑀫𑀦𑀼𑀲𑁆𑀲𑁄’’𑀢𑀺 𑀲𑀜𑁆𑀜𑀸𑀬 𑀧𑀮𑀸𑀬𑀺𑀢𑀼𑀁 𑀆𑀭𑀪𑀺𑀁𑀲𑀼. 𑀅𑀣 𑀦𑁂 𑀣𑁂𑀭𑁄 𑀆𑀳 𑁋 ‘‘𑀫𑀸 𑀪𑀸𑀬𑀺𑀢𑁆𑀣 𑀉𑀧𑀸𑀲𑀓𑀸, 𑀧𑀩𑁆𑀩𑀚𑀺𑀢𑁄 𑀅𑀳’’𑀦𑁆𑀢𑀺. 𑀢𑁂 𑀣𑁂𑀭𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀔𑀫𑀣, 𑀪𑀦𑁆𑀢𑁂, 𑀫𑀬𑀁 𑀔𑀸𑀡𑀼𑀓𑀲𑀜𑁆𑀜𑀺𑀦𑁄 𑀅𑀳𑀼𑀫𑁆𑀳𑀸’’𑀢𑀺 𑀣𑁂𑀭𑀁 𑀔𑀫𑀸𑀧𑁂𑀢𑁆𑀯𑀸 𑀘𑁄𑀭𑀚𑁂𑀝𑁆𑀞𑀓𑁂𑀦 ‘‘𑀅𑀳𑀁 𑀅𑀬𑁆𑀬𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀲𑁂𑀲𑀸 ‘‘𑀫𑀬𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑁂𑀧𑀺 𑀏𑀓𑀘𑁆𑀙𑀦𑁆𑀤𑀸 𑀳𑀼𑀢𑁆𑀯𑀸 𑀣𑁂𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀼. 𑀣𑁂𑀭𑁄 𑀲𑀁𑀓𑀺𑀘𑁆𑀘𑀲𑀸𑀫𑀡𑁂𑀭𑁄 𑀯𑀺𑀬 𑀲𑀩𑁆𑀩𑁂𑀧𑀺 𑀢𑁂 𑀧𑀩𑁆𑀩𑀸𑀚𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀔𑀸𑀡𑀼𑀓𑁄𑀡𑁆𑀟𑀜𑁆𑀜𑁄𑀢𑀺 𑀧𑀜𑁆𑀜𑀸𑀬𑀺. 𑀲𑁄 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀸 ‘‘𑀓𑀺𑀁, 𑀓𑁄𑀡𑁆𑀟𑀜𑁆𑀜, 𑀅𑀦𑁆𑀢𑁂𑀯𑀸𑀲𑀺𑀓𑀸 𑀢𑁂 𑀮𑀤𑁆𑀥𑀸’’𑀢𑀺 𑀯𑀼𑀢𑁆𑀢𑁂 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀏𑀯𑀁 𑀓𑀺𑀭, 𑀪𑀺𑀓𑁆𑀔𑀯𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀆𑀫, 𑀪𑀦𑁆𑀢𑁂, 𑀦 𑀦𑁄 𑀅𑀜𑁆𑀜𑀲𑁆𑀲 𑀏𑀯𑀭𑀽𑀧𑁄 𑀆𑀦𑀼𑀪𑀸𑀯𑁄 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀢𑁂𑀦𑀫𑁆𑀳𑀸 𑀧𑀩𑁆𑀩𑀚𑀺𑀢𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑁂 𑀤𑀼𑀧𑁆𑀧𑀜𑁆𑀜𑀓𑀫𑁆𑀫𑁂 𑀧𑀢𑀺𑀝𑁆𑀞𑀸𑀬 𑀯𑀲𑁆𑀲𑀲𑀢𑀁 𑀚𑀻𑀯𑀦𑀢𑁄 𑀇𑀤𑀸𑀦𑀺 𑀯𑁄 𑀧𑀜𑁆𑀜𑀸𑀲𑀫𑁆𑀧𑀤𑀸𑀬 𑀯𑀢𑁆𑀢𑀫𑀸𑀦𑀸𑀦𑀁 𑀏𑀓𑀸𑀳𑀫𑁆𑀧𑀺 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁧. ‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀤𑀼𑀧𑁆𑀧𑀜𑁆𑀜𑁄 𑀅𑀲𑀫𑀸𑀳𑀺𑀢𑁄;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀧𑀜𑁆𑀜𑀯𑀦𑁆𑀢𑀲𑁆𑀲 𑀛𑀸𑀬𑀺𑀦𑁄’’𑀢𑀺.

𑀢𑀢𑁆𑀣 𑀤𑀼𑀧𑁆𑀧𑀜𑁆𑀜𑁄 𑀦𑀺𑀧𑁆𑀧𑀜𑁆𑀜𑁄. 𑀧𑀜𑁆𑀜𑀯𑀦𑁆𑀢𑀲𑁆𑀲𑀸𑀢𑀺 𑀲𑀧𑁆𑀧𑀜𑁆𑀜𑀲𑁆𑀲. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀧𑀜𑁆𑀘𑀲𑀢𑀸𑀧𑀺 𑀢𑁂 𑀪𑀺𑀓𑁆𑀔𑀽 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀫𑁆𑀧𑀢𑁆𑀢𑀫𑀳𑀸𑀚𑀦𑀲𑁆𑀲𑀸𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀔𑀸𑀡𑀼𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀯𑀢𑁆𑀣𑀼 𑀤𑀲𑀫𑀁.

𑁧𑁧. 𑀲𑀧𑁆𑀧𑀤𑀸𑀲𑀢𑁆𑀣𑁂𑀭𑀯𑀢𑁆𑀣𑀼

𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀧𑁆𑀧𑀤𑀸𑀲𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑁄 𑀓𑀼𑀮𑀧𑀼𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 ‘‘𑀫𑀸𑀤𑀺𑀲𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀕𑀺𑀳𑀺𑀪𑀸𑀯𑁄 𑀦𑀸𑀫 𑀅𑀬𑀼𑀢𑁆𑀢𑁄, 𑀧𑀩𑁆𑀩𑀚𑁆𑀚𑀸𑀬 𑀞𑀢𑁆𑀯𑀸 𑀫𑀭𑀡𑀫𑁆𑀳𑀺 𑀫𑁂 𑀲𑁂𑀬𑁆𑀬𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀫𑀭𑀡𑀽𑀧𑀸𑀬𑀁 𑀘𑀺𑀦𑁆𑀢𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀧𑀸𑀢𑁄𑀯 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀪𑀺𑀓𑁆𑀔𑀽 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀕𑁆𑀕𑀺𑀲𑀸𑀮𑀸𑀬 𑀲𑀧𑁆𑀧𑀁 𑀤𑀺𑀲𑁆𑀯𑀸 𑀢𑀁 𑀏𑀓𑀲𑁆𑀫𑀺𑀁 𑀓𑀼𑀝𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀼𑀝𑀁 𑀧𑀺𑀤𑀳𑀺𑀢𑁆𑀯𑀸 𑀆𑀤𑀸𑀬 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀉𑀓𑁆𑀓𑀡𑁆𑀞𑀺𑀢𑀪𑀺𑀓𑁆𑀔𑀼𑀧𑀺 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀓𑀺𑀁 𑀇𑀤𑀁, 𑀆𑀯𑀼𑀲𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀧𑁆𑀧𑁄, 𑀆𑀯𑀼𑀲𑁄’’𑀢𑀺 𑀯𑀼𑀢𑁆𑀢𑁂 𑀇𑀫𑀺𑀦𑀸 ‘‘𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀙𑀟𑁆𑀟𑁂𑀲𑁆𑀲𑀸𑀫 𑀦’’𑀦𑁆𑀢𑀺. 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀫𑀺𑀦𑀸 𑀅𑀢𑁆𑀢𑀸𑀦𑀁 𑀟𑀁𑀲𑀸𑀧𑁂𑀢𑁆𑀯𑀸 𑀫𑀭𑀺𑀲𑁆𑀲𑀸𑀫𑀻’’𑀢𑀺 ‘‘𑀆𑀳𑀭𑀣, 𑀅𑀳𑀁 𑀢𑀁 𑀙𑀟𑁆𑀟𑁂𑀲𑁆𑀲𑀸𑀫𑀻’’𑀢𑀺 𑀢𑁂𑀲𑀁 𑀳𑀢𑁆𑀣𑀢𑁄 𑀓𑀼𑀝𑀁 𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀢𑁂𑀦 𑀲𑀧𑁆𑀧𑁂𑀦 𑀅𑀢𑁆𑀢𑀸𑀦𑀁 𑀟𑀁𑀲𑀸𑀧𑁂𑀢𑀺, 𑀲𑀧𑁆𑀧𑁄 𑀟𑀁𑀲𑀺𑀢𑀼𑀁 𑀦 𑀇𑀘𑁆𑀙𑀢𑀺. 𑀲𑁄 𑀓𑀼𑀝𑁂 𑀳𑀢𑁆𑀣𑀁 𑀑𑀢𑀸𑀭𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀆𑀮𑁄𑀮𑁂𑀢𑀺, 𑀖𑁄𑀭𑀲𑀧𑁆𑀧𑀲𑁆𑀲 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀅𑀗𑁆𑀕𑀼𑀮𑀺𑀁 𑀧𑀓𑁆𑀔𑀺𑀧𑀢𑀺, 𑀦𑁂𑀯 𑀦𑀁 𑀲𑀧𑁆𑀧𑁄 𑀟𑀁𑀲𑀺. 𑀲𑁄 ‘‘𑀦𑀸𑀬𑀁 𑀆𑀲𑀻𑀯𑀺𑀲𑁄, 𑀖𑀭𑀲𑀧𑁆𑀧𑁄 𑀏𑀲𑁄’’𑀢𑀺 𑀢𑀁 𑀧𑀳𑀸𑀬 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀪𑀺𑀓𑁆𑀔𑀽 ‘‘𑀙𑀟𑁆𑀟𑀺𑀢𑁄 𑀢𑁂, 𑀆𑀯𑀼𑀲𑁄, 𑀲𑀧𑁆𑀧𑁄’’𑀢𑀺 𑀆𑀳𑀁𑀲𑀼. ‘‘𑀦 𑀲𑁄, 𑀆𑀯𑀼𑀲𑁄, 𑀖𑁄𑀭𑀲𑀧𑁆𑀧𑁄, 𑀖𑀭𑀲𑀧𑁆𑀧𑁄 𑀏𑀲𑁄’’𑀢𑀺. ‘‘𑀖𑁄𑀭𑀲𑀧𑁆𑀧𑁄𑀬𑁂𑀯𑀸𑀯𑀼𑀲𑁄, 𑀫𑀳𑀦𑁆𑀢𑀁 𑀨𑀡𑀁 𑀓𑀢𑁆𑀯𑀸 𑀲𑀼𑀲𑀼𑀬𑀦𑁆𑀢𑁄 𑀤𑀼𑀓𑁆𑀔𑁂𑀦 𑀅𑀫𑁆𑀳𑁂𑀳𑀺 𑀕𑀳𑀺𑀢𑁄, 𑀓𑀺𑀁 𑀓𑀸𑀭𑀡𑀸 𑀏𑀯𑀁 𑀢𑁆𑀯𑀁 𑀯𑀤𑁂𑀲𑀻’’𑀢𑀺 𑀆𑀳𑀁𑀲𑀼. ‘‘𑀅𑀳𑀁, 𑀆𑀯𑀼𑀲𑁄, 𑀢𑁂𑀦 𑀅𑀢𑁆𑀢𑀸𑀦𑀁 𑀟𑀁𑀲𑀸𑀧𑁂𑀦𑁆𑀢𑁄𑀧𑀺 𑀫𑀼𑀔𑁂 𑀅𑀗𑁆𑀕𑀼𑀮𑀺𑀁 𑀧𑀓𑁆𑀔𑀺𑀧𑁂𑀦𑁆𑀢𑁄𑀧𑀺 𑀢𑀁 𑀟𑀁𑀲𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺’’𑀦𑁆𑀢𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁.

𑀅𑀣𑁂𑀓𑀤𑀺𑀯𑀲𑀁 𑀦𑁆𑀳𑀸𑀧𑀺𑀢𑁄 𑀤𑁆𑀯𑁂 𑀢𑀬𑁄 𑀔𑀼𑀭𑁂 𑀆𑀤𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀏𑀓𑀁 𑀪𑀽𑀫𑀺𑀬𑀁 𑀞𑀧𑁂𑀢𑁆𑀯𑀸 𑀏𑀓𑁂𑀦 𑀪𑀺𑀓𑁆𑀔𑀽𑀦𑀁 𑀓𑁂𑀲𑁂 𑀑𑀳𑀸𑀭𑁂𑀢𑀺. 𑀲𑁄 𑀪𑀽𑀫𑀺𑀬𑀁 𑀞𑀧𑀺𑀢𑀁 𑀔𑀼𑀭𑀁 𑀕𑀳𑁂𑀢𑁆𑀯𑀸 ‘‘𑀇𑀫𑀺𑀦𑀸 𑀕𑀻𑀯𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑁂 𑀕𑀻𑀯𑀁 𑀉𑀧𑀦𑀺𑀥𑀸𑀬 𑀔𑀼𑀭𑀥𑀸𑀭𑀁 𑀕𑀮𑀦𑀸𑀴𑀺𑀬𑀁 𑀓𑀢𑁆𑀯𑀸 𑀞𑀺𑀢𑁄 𑀉𑀧𑀲𑀫𑁆𑀧𑀤𑀸𑀫𑀸𑀴𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀲𑀻𑀮𑀁 𑀆𑀯𑀚𑁆𑀚𑁂𑀦𑁆𑀢𑁄 𑀯𑀺𑀫𑀮𑀘𑀦𑁆𑀤𑀫𑀡𑁆𑀟𑀮𑀁 𑀯𑀺𑀬 𑀲𑀼𑀥𑁄𑀢𑀫𑀡𑀺𑀔𑀦𑁆𑀥𑀫𑀺𑀯 𑀘 𑀦𑀺𑀫𑁆𑀫𑀮𑀁 𑀲𑀻𑀮𑀁 𑀅𑀤𑁆𑀤𑀲. 𑀢𑀲𑁆𑀲 𑀢𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀲𑀓𑀮𑀲𑀭𑀻𑀭𑀁 𑀨𑀭𑀦𑁆𑀢𑀻 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺. 𑀲𑁄 𑀧𑀻𑀢𑀺𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀔𑀼𑀭𑀁 𑀆𑀤𑀸𑀬 𑀯𑀺𑀳𑀸𑀭𑀫𑀚𑁆𑀛𑀁 𑀧𑀸𑀯𑀺𑀲𑀺. 𑀅𑀣 𑀦𑀁 𑀪𑀺𑀓𑁆𑀔𑀽 ‘‘𑀓𑀳𑀁 𑀕𑀢𑁄𑀲𑀺, 𑀆𑀯𑀼𑀲𑁄’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘‘𑀇𑀫𑀺𑀦𑀸 𑀔𑀼𑀭𑁂𑀦 𑀕𑀮𑀦𑀸𑀴𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀭𑀺𑀲𑁆𑀲𑀸𑀫𑀻’𑀢𑀺 𑀕𑀢𑁄𑀫𑁆𑀳𑀺, 𑀆𑀯𑀼𑀲𑁄’’𑀢𑀺. 𑀅𑀣 ‘‘𑀓𑀲𑁆𑀫𑀸 𑀦 𑀫𑀢𑁄𑀲𑀻’’𑀢𑀺? 𑀇𑀤𑀸𑀦𑀺𑀫𑁆𑀳𑀺 𑀲𑀢𑁆𑀣𑀁 𑀆𑀳𑀭𑀺𑀢𑀼𑀁 𑀅𑀪𑀩𑁆𑀩𑁄 𑀚𑀸𑀢𑁄. 𑀅𑀳𑀜𑁆𑀳𑀺 ‘‘𑀇𑀫𑀺𑀦𑀸 𑀔𑀼𑀭𑁂𑀦 𑀕𑀮𑀦𑀸𑀴𑀺𑀁 𑀙𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀜𑀸𑀡𑀔𑀼𑀭𑁂𑀦 𑀲𑀩𑁆𑀩𑀓𑀺𑀮𑁂𑀲𑁂 𑀙𑀺𑀦𑁆𑀤𑀺𑀦𑁆𑀢𑀺. 𑀪𑀺𑀓𑁆𑀔𑀽 ‘‘𑀅𑀬𑀁 𑀅𑀪𑀽𑀢𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀢𑀻’’𑀢𑀺 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀆𑀳 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀔𑀻𑀡𑀸𑀲𑀯𑀸 𑀦𑀸𑀫 𑀲𑀳𑀢𑁆𑀣𑀸 𑀅𑀢𑁆𑀢𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀻’’𑀢𑀺. 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀇𑀫𑀁 ‘‘𑀔𑀻𑀡𑀸𑀲𑀯𑁄’’𑀢𑀺 𑀯𑀤𑀣, 𑀏𑀯𑀁 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀧𑀦𑀸𑀬𑀁 𑀓𑀲𑁆𑀫𑀸 𑀉𑀓𑁆𑀓𑀡𑁆𑀞𑀢𑀺, 𑀓𑀺𑀫𑀲𑁆𑀲 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑀓𑀸𑀭𑀡𑀁 ‘‘𑀓𑀲𑁆𑀫𑀸 𑀲𑁄 𑀲𑀧𑁆𑀧𑁄 𑀏𑀢𑀁 𑀦 𑀟𑀁𑀲𑀢𑀻’’𑀢𑀺? ‘‘𑀪𑀺𑀓𑁆𑀔𑀯𑁂, 𑀲𑁄 𑀢𑀸𑀯 𑀲𑀧𑁆𑀧𑁄 𑀇𑀫𑀲𑁆𑀲 𑀇𑀢𑁄 𑀢𑀢𑀺𑀬𑁂 𑀅𑀢𑁆𑀢𑀪𑀸𑀯𑁂 𑀤𑀸𑀲𑁄 𑀅𑀳𑁄𑀲𑀺, 𑀲𑁄 𑀅𑀢𑁆𑀢𑀦𑁄 𑀲𑀸𑀫𑀺𑀓𑀲𑁆𑀲 𑀲𑀭𑀻𑀭𑀁 𑀟𑀁𑀲𑀺𑀢𑀼𑀁 𑀦 𑀯𑀺𑀲𑀳𑀢𑀻’’𑀢𑀺. 𑀏𑀯𑀁 𑀢𑀸𑀯 𑀦𑁂𑀲𑀁 𑀲𑀢𑁆𑀣𑀸 𑀏𑀓𑀁 𑀓𑀸𑀭𑀡𑀁 𑀆𑀘𑀺𑀓𑁆𑀔𑀺. 𑀢𑀢𑁄 𑀧𑀝𑁆𑀞𑀸𑀬 𑀘 𑀲𑁄 𑀪𑀺𑀓𑁆𑀔𑀼 𑀲𑀧𑁆𑀧𑀤𑀸𑀲𑁄 𑀦𑀸𑀫 𑀚𑀸𑀢𑁄.

𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀓𑀺𑀭𑁂𑀓𑁄 𑀓𑀼𑀮𑀧𑀼𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑁄 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀽𑀧𑀲𑀫𑁆𑀧𑀤𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀦𑀪𑀺𑀭𑀢𑀺𑀬𑀸 𑀉𑀧𑁆𑀧𑀦𑁆𑀦𑀸𑀬 𑀏𑀓𑀲𑁆𑀲 𑀲𑀳𑀸𑀬𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀭𑁄𑀘𑁂𑀲𑀺. 𑀲𑁄 𑀢𑀲𑁆𑀲 𑀅𑀪𑀺𑀡𑁆𑀳𑀁 𑀕𑀺𑀳𑀺𑀪𑀸𑀯𑁂 𑀆𑀤𑀻𑀦𑀯𑀁 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀇𑀢𑀭𑁄 𑀲𑀸𑀲𑀦𑁂 𑀅𑀪𑀺𑀭𑀫𑀺𑀢𑁆𑀯𑀸 𑀧𑀼𑀩𑁆𑀩𑁂 𑀅𑀦𑀪𑀺𑀭𑀢𑀓𑀸𑀮𑁂 𑀫𑀮𑀕𑁆𑀕𑀳𑀺𑀢𑁂 𑀲𑀫𑀡𑀧𑀭𑀺𑀓𑁆𑀔𑀸𑀭𑁂 𑀏𑀓𑀲𑁆𑀫𑀺𑀁 𑀲𑁄𑀡𑁆𑀟𑀺𑀢𑀻𑀭𑁂 𑀦𑀺𑀫𑁆𑀫𑀮𑁂 𑀓𑀭𑁄𑀦𑁆𑀢𑁄 𑀦𑀺𑀲𑀻𑀤𑀺. 𑀲𑀳𑀸𑀬𑀓𑁄𑀧𑀺𑀲𑁆𑀲 𑀲𑀦𑁆𑀢𑀺𑀓𑁂𑀬𑁂𑀯 𑀦𑀺𑀲𑀺𑀦𑁆𑀦𑁄. 𑀅𑀣 𑀦𑀁 𑀲𑁄 𑀏𑀯𑀫𑀸𑀳 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀉𑀧𑁆𑀧𑀩𑁆𑀩𑀚𑀦𑁆𑀢𑁄 𑀇𑀫𑁂 𑀧𑀭𑀺𑀓𑁆𑀔𑀸𑀭𑁂 𑀢𑀼𑀬𑁆𑀳𑀁 𑀤𑀸𑀢𑀼𑀓𑀸𑀫𑁄 𑀅𑀳𑁄𑀲𑀺’’𑀦𑁆𑀢𑀺. 𑀲𑁄 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀺𑀦𑀸 𑀫𑀬𑁆𑀳𑀁 𑀧𑀩𑁆𑀩𑀚𑀺𑀢𑁂𑀦 𑀯𑀸 𑀉𑀧𑁆𑀧𑀩𑁆𑀩𑀚𑀺𑀢𑁂𑀦 𑀯𑀸 𑀓𑁄 𑀅𑀢𑁆𑀣𑁄, 𑀇𑀤𑀸𑀦𑀺 𑀧𑀭𑀺𑀓𑁆𑀔𑀸𑀭𑁂 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 ‘‘𑀓𑀺𑀁 𑀤𑀸𑀦𑀸𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀚𑀻𑀯𑀺𑀢𑁂𑀦, 𑀬𑁂 𑀫𑀬𑀁 𑀓𑀧𑀸𑀮𑀳𑀢𑁆𑀣𑀸 𑀧𑀭𑀓𑀼𑀮𑁂𑀲𑀼 𑀪𑀺𑀓𑁆𑀔𑀸𑀬 𑀘𑀭𑀸𑀫, 𑀧𑀼𑀢𑁆𑀢𑀤𑀸𑀭𑁂𑀳𑀺 𑀲𑀤𑁆𑀥𑀺𑀁 𑀆𑀮𑀸𑀧𑀲𑀮𑁆𑀮𑀸𑀧𑀁 𑀦 𑀓𑀭𑁄𑀫𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀕𑀺𑀳𑀺𑀪𑀸𑀯𑀲𑁆𑀲 𑀕𑀼𑀡𑀁 𑀓𑀣𑁂𑀲𑀺. 𑀲𑁄 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀧𑀼𑀦 𑀉𑀓𑁆𑀓𑀡𑁆𑀞𑀺𑀢𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀫𑀬𑀸 ‘𑀉𑀓𑁆𑀓𑀡𑁆𑀞𑀺𑀢𑁄𑀫𑁆𑀳𑀻’𑀢𑀺 𑀯𑀼𑀢𑁆𑀢𑁂 𑀧𑀞𑀫𑀁 𑀕𑀺𑀳𑀺𑀪𑀸𑀯𑁂 𑀆𑀤𑀻𑀦𑀯𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀅𑀪𑀺𑀡𑁆𑀳𑀁 𑀕𑀼𑀡𑀁 𑀓𑀣𑁂𑀢𑀺, ‘𑀓𑀺𑀁 𑀦𑀼 𑀔𑁄 𑀓𑀸𑀭𑀡’’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 ‘‘𑀇𑀫𑁂𑀲𑀼 𑀲𑀫𑀡𑀧𑀭𑀺𑀓𑁆𑀔𑀸𑀭𑁂𑀲𑀼 𑀮𑁄𑀪𑁂𑀦𑀸’’𑀢𑀺 𑀜𑀢𑁆𑀯𑀸 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑁂𑀲𑀺. 𑀏𑀯𑀫𑀲𑁆𑀲 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀓𑁆𑀓𑀡𑁆𑀞𑀸𑀧𑀺𑀢𑀢𑁆𑀢𑀸 𑀇𑀤𑀸𑀦𑀺 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸. 𑀬𑁄 𑀧𑀦 𑀢𑁂𑀦𑁂𑀯 𑀢𑀤𑀸 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀫𑀡𑀥𑀫𑁆𑀫𑁄 𑀓𑀢𑁄, 𑀲𑁆𑀯𑀲𑁆𑀲 𑀏𑀢𑀭𑀳𑀺 𑀅𑀭𑀳𑀢𑁆𑀢𑀽𑀧𑀦𑀺𑀲𑁆𑀲𑀬𑁄 𑀚𑀸𑀢𑁄𑀢𑀺.

𑀇𑀫𑀫𑀢𑁆𑀣𑀁 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀦𑁆𑀢𑀺𑀓𑀸 𑀲𑀼𑀢𑁆𑀯𑀸 𑀉𑀢𑁆𑀢𑀭𑀺𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀪𑀦𑁆𑀢𑁂, 𑀅𑀬𑀁 𑀓𑀺𑀭 𑀪𑀺𑀓𑁆𑀔𑀼 𑀔𑀼𑀭𑀥𑀸𑀭𑀁 𑀕𑀮𑀦𑀸𑀴𑀺𑀬𑀁 𑀓𑀢𑁆𑀯𑀸 𑀞𑀺𑀢𑁄𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦𑀼 𑀔𑁄 𑀏𑀢𑁆𑀢𑀓𑁂𑀦 𑀔𑀡𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁄’’𑀢𑀺. ‘‘𑀆𑀫, 𑀪𑀺𑀓𑁆𑀔𑀯𑁂, 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀤𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀪𑀽𑀫𑀺𑀬𑀁 𑀞𑀧𑁂𑀦𑁆𑀢𑀲𑁆𑀲 𑀧𑀸𑀤𑁂 𑀪𑀽𑀫𑀺𑀬𑀁 𑀅𑀲𑀫𑁆𑀧𑀢𑁆𑀢𑁂𑀬𑁂𑀯 𑀅𑀭𑀳𑀢𑁆𑀢𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀓𑀼𑀲𑀻𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀳𑀺 𑀯𑀲𑁆𑀲𑀲𑀢𑀁 𑀚𑀻𑀯𑀦𑀢𑁄 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀔𑀡𑀫𑀢𑁆𑀢𑀫𑁆𑀧𑀺 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁧𑁧𑁨. ‘‘𑀬𑁄 𑀘 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄;

𑀏𑀓𑀸𑀳𑀁 𑀚𑀻𑀯𑀺𑀓𑀁 𑀲𑁂𑀬𑁆𑀬𑁄, 𑀯𑀻𑀭𑀺𑀬𑀫𑀸𑀭𑀪𑀢𑁄 𑀤𑀴𑁆𑀳’’𑀦𑁆𑀢𑀺.

𑀢𑀢𑁆𑀣 𑀓𑀼𑀲𑀻𑀢𑁄𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀳𑀺 𑀢𑀻𑀳𑀺 𑀯𑀺𑀢𑀓𑁆𑀓𑁂𑀳𑀺 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀧𑀼𑀕𑁆𑀕𑀮𑁄. 𑀳𑀻𑀦𑀯𑀻𑀭𑀺𑀬𑁄𑀢𑀺 𑀦𑀺𑀩𑁆𑀩𑀻𑀭𑀺𑀬𑁄. 𑀯𑀻𑀭𑀺𑀬𑀫𑀸𑀭𑀪𑀢𑁄 𑀤𑀴𑁆𑀳𑀦𑁆𑀢𑀺 𑀤𑀼𑀯𑀺𑀥𑀚𑁆𑀛𑀸𑀦𑀦𑀺𑀩𑁆𑀩𑀢𑁆𑀢𑀦𑀲𑀫𑀢𑁆𑀣𑀁 𑀣𑀺𑀭𑀁 𑀯𑀻𑀭𑀺𑀬𑀁 𑀆𑀭𑀪𑀦𑁆𑀢𑀲𑁆𑀲. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.