𑁧𑁫. 𑀯𑀦𑀯𑀸𑀲𑀻𑀢𑀺𑀲𑁆𑀲𑀲𑀸𑀫𑀡𑁂𑀭𑀯𑀢𑁆𑀣𑀼

𑀅𑀜𑁆𑀜𑀸 𑀳𑀺 𑀮𑀸𑀪𑀽𑀧𑀦𑀺𑀲𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀯𑀦𑀯𑀸𑀲𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀲𑀦𑀸 𑀭𑀸𑀚𑀕𑀳𑁂 𑀲𑀫𑀼𑀝𑁆𑀞𑀺𑀢𑀸.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲 𑀓𑀺𑀭 𑀧𑀺𑀢𑀼 𑀯𑀗𑁆𑀕𑀦𑁆𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀳𑀸𑀬𑀓𑁄 𑀫𑀳𑀸𑀲𑁂𑀦𑀩𑁆𑀭𑀸𑀳𑁆𑀫𑀡𑁄 𑀦𑀸𑀫 𑀭𑀸𑀚𑀕𑀳𑁂 𑀯𑀲𑀢𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀏𑀓𑀤𑀺𑀯𑀲𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀢𑀲𑁆𑀫𑀺𑀁 𑀅𑀦𑀼𑀓𑀫𑁆𑀧𑀸𑀬 𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀲𑁄 𑀧𑀦 𑀧𑀭𑀺𑀓𑁆𑀔𑀻𑀡𑀯𑀺𑀪𑀯𑁄 𑀤𑀮𑀺𑀤𑁆𑀤𑁄. 𑀲𑁄 ‘‘𑀫𑀫 𑀧𑀼𑀢𑁆𑀢𑁄 𑀫𑀬𑁆𑀳𑀁 𑀕𑁂𑀳𑀤𑁆𑀯𑀸𑀭𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁 𑀆𑀕𑀢𑁄 𑀪𑀯𑀺𑀲𑁆𑀲𑀢𑀺, 𑀅𑀳𑀜𑁆𑀘𑀫𑁆𑀳𑀺 𑀤𑀼𑀕𑁆𑀕𑀢𑁄, 𑀫𑀬𑁆𑀳𑀁 𑀤𑀼𑀕𑁆𑀕𑀢𑀪𑀸𑀯𑀁 𑀦 𑀚𑀸𑀦𑀸𑀢𑀺 𑀫𑀜𑁆𑀜𑁂, 𑀦𑀢𑁆𑀣𑀺 𑀫𑁂 𑀓𑁄𑀘𑀺 𑀤𑁂𑀬𑁆𑀬𑀥𑀫𑁆𑀫𑁄’’𑀢𑀺 𑀣𑁂𑀭𑀲𑁆𑀲 𑀲𑀫𑁆𑀫𑀼𑀔𑀸 𑀪𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀦𑀺𑀮𑀻𑀬𑀺. 𑀣𑁂𑀭𑁄 𑀅𑀧𑀭𑀫𑁆𑀧𑀺 𑀤𑀺𑀯𑀲𑀁 𑀅𑀕𑀫𑀸𑀲𑀺, 𑀩𑁆𑀭𑀸𑀳𑁆𑀫𑀡𑁄 𑀢𑀣𑁂𑀯 𑀦𑀺𑀮𑀻𑀬𑀺. ‘‘𑀓𑀺𑀜𑁆𑀘𑀺𑀤𑁂𑀯 𑀮𑀪𑀺𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄𑀧𑀺 𑀦𑀸𑀮𑀪𑀺. 𑀅𑀣𑁂𑀓𑀤𑀺𑀯𑀲𑀁 𑀏𑀓𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀯𑀸𑀘𑀓𑁂 𑀣𑀽𑀮𑀲𑀸𑀝𑀓𑁂𑀦 𑀲𑀤𑁆𑀥𑀺𑀁 𑀧𑀸𑀬𑀲𑀧𑀸𑀢𑀺𑀁 𑀮𑀪𑀺𑀢𑁆𑀯𑀸 𑀆𑀤𑀸𑀬 𑀕𑁂𑀳𑀁 𑀕𑀦𑁆𑀢𑁆𑀯𑀸𑀯 𑀣𑁂𑀭𑀁 𑀅𑀦𑀼𑀲𑁆𑀲𑀭𑀺, ‘‘𑀇𑀫𑀁 𑀧𑀺𑀡𑁆𑀟𑀧𑀸𑀢𑀁 𑀫𑀬𑀸 𑀣𑁂𑀭𑀲𑁆𑀲 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀣𑁂𑀭𑁄𑀧𑀺 𑀢𑀁 𑀔𑀡𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀲𑁆𑀯𑀸 ‘‘𑀩𑁆𑀭𑀸𑀳𑁆𑀫𑀡𑁄 𑀤𑁂𑀬𑁆𑀬𑀥𑀫𑁆𑀫𑀁 𑀮𑀪𑀺𑀢𑁆𑀯𑀸 𑀫𑀫 𑀆𑀕𑀫𑀦𑀁 𑀧𑀘𑁆𑀘𑀸𑀲𑀻𑀲𑀢𑀺, 𑀫𑀬𑀸 𑀢𑀢𑁆𑀣 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀗𑁆𑀖𑀸𑀝𑀺𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀁 𑀆𑀤𑀸𑀬 𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑁂 𑀞𑀺𑀢𑀫𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺.

𑀩𑁆𑀭𑀸𑀳𑁆𑀫𑀡𑁄 𑀣𑁂𑀭𑀁 𑀤𑀺𑀲𑁆𑀯𑀸𑀯 𑀘𑀺𑀢𑁆𑀢𑀁 𑀧𑀲𑀻𑀤𑀺. 𑀅𑀣 𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀅𑀦𑁆𑀢𑁄𑀕𑁂𑀳𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀸𑀬𑀲𑀧𑀸𑀢𑀺𑀁 𑀕𑀳𑁂𑀢𑁆𑀯𑀸 𑀣𑁂𑀭𑀲𑁆𑀲 𑀧𑀢𑁆𑀢𑁂 𑀆𑀓𑀺𑀭𑀺. 𑀣𑁂𑀭𑁄 𑀉𑀧𑀟𑁆𑀠𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀧𑀺𑀤𑀳𑀺. 𑀅𑀣 𑀦𑀁 𑀩𑁆𑀭𑀸𑀳𑁆𑀫𑀡𑁄 𑀆𑀳 𑁋 ‘‘𑀪𑀦𑁆𑀢𑁂, 𑀏𑀓𑀧𑀝𑀺𑀯𑀻𑀲𑀫𑀢𑁆𑀢𑁄𑀯 𑀅𑀬𑀁 𑀧𑀸𑀬𑀲𑁄, 𑀧𑀭𑀮𑁄𑀓𑀲𑀗𑁆𑀕𑀳𑀁 𑀫𑁂 𑀓𑀭𑁄𑀣, 𑀫𑀸 𑀇𑀥𑀮𑁄𑀓𑀲𑀗𑁆𑀕𑀳𑀁, 𑀦𑀺𑀭𑀯𑀲𑁂𑀲𑀫𑁂𑀯 𑀤𑀸𑀢𑀼𑀓𑀸𑀫𑁄𑀫𑁆𑀳𑀻’’𑀢𑀺 𑀲𑀩𑁆𑀩𑀁 𑀆𑀓𑀺𑀭𑀺. 𑀣𑁂𑀭𑁄 𑀢𑀢𑁆𑀣𑁂𑀯 𑀧𑀭𑀺𑀪𑀼𑀜𑁆𑀚𑀺. 𑀅𑀣𑀲𑁆𑀲 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀢𑀫𑁆𑀧𑀺 𑀲𑀸𑀝𑀓𑀁 𑀤𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀪𑀦𑁆𑀢𑁂, 𑀅𑀳𑀫𑁆𑀧𑀺 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀥𑀫𑁆𑀫𑀫𑁂𑀯 𑀧𑀸𑀧𑀼𑀡𑁂𑀬𑁆𑀬’’𑀦𑁆𑀢𑀺. 𑀣𑁂𑀭𑁄 ‘‘𑀏𑀯𑀁 𑀳𑁄𑀢𑀼 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀢𑀲𑁆𑀲 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺. ‘‘𑀤𑀼𑀕𑁆𑀕𑀢𑀓𑀸𑀮𑁂 𑀤𑀺𑀦𑁆𑀦𑀤𑀸𑀦𑀁 𑀧𑀦 𑀅𑀢𑀺𑀯𑀺𑀬 𑀢𑁄𑀲𑁂𑀢𑀻’’𑀢𑀺 𑀩𑁆𑀭𑀸𑀳𑁆𑀫𑀡𑁄𑀧𑀺 𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑁄𑀫𑀦𑀲𑁆𑀲𑀚𑀸𑀢𑁄 𑀣𑁂𑀭𑁂 𑀅𑀥𑀺𑀫𑀢𑁆𑀢𑀁 𑀲𑀺𑀦𑁂𑀳𑀫𑀓𑀸𑀲𑀺. 𑀲𑁄 𑀣𑁂𑀭𑁂 𑀲𑀺𑀦𑁂𑀳𑁂𑀦𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀲𑀸𑀯𑀢𑁆𑀣𑀺𑀬𑀁 𑀣𑁂𑀭𑀲𑁆𑀲𑀽𑀧𑀝𑁆𑀞𑀸𑀓𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀁𑀔𑀡𑁂𑀬𑁂𑀯 𑀧𑀦𑀲𑁆𑀲 𑀫𑀸𑀢𑀸 ‘‘𑀓𑀼𑀘𑁆𑀙𑀺𑀬𑀁 𑀫𑁂 𑀕𑀩𑁆𑀪𑁄 𑀧𑀢𑀺𑀝𑁆𑀞𑀺𑀢𑁄’’𑀢𑀺 𑀜𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀆𑀭𑁄𑀘𑁂𑀲𑀺. 𑀲𑁄 𑀢𑀲𑁆𑀲𑀸 𑀕𑀩𑁆𑀪𑀧𑀭𑀺𑀳𑀸𑀭𑀁 𑀅𑀤𑀸𑀲𑀺.

𑀢𑀲𑁆𑀲𑀸 𑀅𑀘𑁆𑀘𑀼𑀡𑁆𑀳𑀅𑀢𑀺𑀲𑀻𑀢𑀅𑀢𑀺𑀅𑀫𑁆𑀩𑀺𑀮𑀸𑀤𑀺𑀧𑀭𑀺𑀪𑁄𑀕𑀁 𑀯𑀚𑁆𑀚𑁂𑀢𑁆𑀯𑀸 𑀲𑀼𑀔𑁂𑀦 𑀕𑀩𑁆𑀪𑀁 𑀧𑀭𑀺𑀳𑀭𑀺𑀬𑀫𑀸𑀦𑀸𑀬 𑀏𑀯𑀭𑀽𑀧𑁄 𑀤𑁄𑀳𑀴𑁄 𑀉𑀧𑁆𑀧𑀚𑁆𑀚𑀺 ‘‘𑀅𑀳𑁄 𑀯𑀢𑀸𑀳𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀧𑁆𑀧𑀫𑀼𑀔𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀕𑁂𑀳𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀲𑀫𑁆𑀪𑀺𑀦𑁆𑀦𑀔𑀻𑀭𑀧𑀸𑀬𑀲𑀁 𑀤𑀢𑁆𑀯𑀸 𑀲𑀬𑀫𑁆𑀧𑀺 𑀓𑀸𑀲𑀸𑀬𑀯𑀢𑁆𑀣𑀸𑀦𑀺 𑀧𑀭𑀺𑀤𑀳𑀺𑀢𑁆𑀯𑀸 𑀲𑀼𑀯𑀡𑁆𑀡𑀲𑀭𑀓𑀁 𑀆𑀤𑀸𑀬 𑀆𑀲𑀦𑀧𑀭𑀺𑀬𑀦𑁆𑀢𑁂 𑀦𑀺𑀲𑀻𑀤𑀺𑀢𑁆𑀯𑀸 𑀏𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀘𑁆𑀙𑀺𑀝𑁆𑀞𑀧𑀸𑀬𑀲𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬’’𑀦𑁆𑀢𑀺. 𑀢𑀲𑁆𑀲𑀸 𑀓𑀺𑀭 𑀲𑁄 𑀓𑀸𑀲𑀸𑀬𑀯𑀢𑁆𑀣𑀧𑀭𑀺𑀤𑀳𑀦𑁂 𑀤𑁄𑀳𑀴𑁄 𑀓𑀼𑀘𑁆𑀙𑀺𑀬𑀁 𑀧𑀼𑀢𑁆𑀢𑀲𑁆𑀲 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑁆𑀚𑀸𑀬 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀅𑀳𑁄𑀲𑀺. 𑀅𑀣𑀲𑁆𑀲𑀸 𑀜𑀸𑀢𑀓𑀸 ‘‘𑀥𑀫𑁆𑀫𑀺𑀓𑁄 𑀦𑁄 𑀥𑀻𑀢𑀸𑀬 𑀤𑁄𑀳𑀴𑁄’’𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀲𑀗𑁆𑀖𑀢𑁆𑀣𑁂𑀭𑀁 𑀓𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀅𑀲𑀫𑁆𑀪𑀺𑀦𑁆𑀦𑀔𑀻𑀭𑀧𑀸𑀬𑀲𑀁 𑀅𑀤𑀁𑀲𑀼. 𑀲𑀸𑀧𑀺 𑀏𑀓𑀁 𑀓𑀸𑀲𑀸𑀯𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀼𑀯𑀡𑁆𑀡𑀲𑀭𑀓𑀁 𑀕𑀳𑁂𑀢𑁆𑀯𑀸 𑀆𑀲𑀦𑀧𑀭𑀺𑀬𑀦𑁆𑀢𑁂 𑀦𑀺𑀲𑀺𑀦𑁆𑀦𑀸 𑀉𑀘𑁆𑀙𑀺𑀝𑁆𑀞𑀧𑀸𑀬𑀲𑀁 𑀧𑀭𑀺𑀪𑀼𑀜𑁆𑀚𑀺, 𑀤𑁄𑀳𑀴𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺. 𑀢𑀲𑁆𑀲𑀸 𑀬𑀸𑀯 𑀕𑀩𑁆𑀪𑀯𑀼𑀝𑁆𑀞𑀸𑀦𑀸 𑀅𑀦𑁆𑀢𑀭𑀦𑁆𑀢𑀭𑀸 𑀓𑀢𑀫𑀗𑁆𑀕𑀮𑁂𑀲𑀼𑀧𑀺, 𑀤𑀲𑀫𑀸𑀲𑀘𑁆𑀘𑀬𑁂𑀦 𑀧𑀼𑀢𑁆𑀢𑀁 𑀯𑀺𑀚𑀸𑀢𑀸𑀬 𑀓𑀢𑀫𑀗𑁆𑀕𑀮𑁂𑀲𑀼𑀧𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀧𑁆𑀧𑀫𑀼𑀔𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀅𑀧𑁆𑀧𑁄𑀤𑀓𑀫𑀥𑀼𑀧𑀸𑀬𑀲𑀫𑁂𑀯 𑀅𑀤𑀁𑀲𑀼. 𑀧𑀼𑀩𑁆𑀩𑁂 𑀓𑀺𑀭𑁂𑀲 𑀤𑀸𑀭𑀓𑁂𑀦 𑀩𑁆𑀭𑀸𑀳𑁆𑀫𑀡𑀓𑀸𑀮𑁂 𑀤𑀺𑀦𑁆𑀦𑀧𑀸𑀬𑀲𑀲𑁆𑀲 𑀦𑀺𑀲𑁆𑀲𑀦𑁆𑀤𑁄.

𑀚𑀸𑀢𑀫𑀗𑁆𑀕𑀮𑀤𑀺𑀯𑀲𑁂 𑀧𑀦 𑀢𑀁 𑀤𑀸𑀭𑀓𑀁 𑀧𑀸𑀢𑁄𑀯 𑀦𑁆𑀳𑀸𑀧𑁂𑀢𑁆𑀯𑀸 𑀫𑀡𑁆𑀟𑁂𑀢𑁆𑀯𑀸 𑀲𑀺𑀭𑀺𑀲𑀬𑀦𑁂 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀲𑁆𑀲 𑀓𑀫𑁆𑀩𑀮𑀲𑁆𑀲 𑀉𑀧𑀭𑀺 𑀦𑀺𑀧𑀚𑁆𑀚𑀸𑀧𑁂𑀲𑀼𑀁. 𑀲𑁄 𑀢𑀢𑁆𑀣 𑀦𑀺𑀧𑀦𑁆𑀦𑀓𑁄𑀯 𑀣𑁂𑀭𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀫𑁂 𑀧𑀼𑀩𑁆𑀩𑀸𑀘𑀭𑀺𑀬𑁄, 𑀫𑀬𑀸 𑀣𑁂𑀭𑀁 𑀦𑀺𑀲𑁆𑀲𑀸𑀬 𑀅𑀬𑀁 𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸, 𑀫𑀬𑀸 𑀇𑀫𑀲𑁆𑀲 𑀏𑀓𑀁 𑀧𑀭𑀺𑀘𑁆𑀘𑀸𑀕𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀺𑀓𑁆𑀔𑀸𑀧𑀤𑀕𑀳𑀡𑀢𑁆𑀣𑀸𑀬 𑀆𑀦𑀻𑀬𑀫𑀸𑀦𑁄 𑀢𑀁 𑀓𑀫𑁆𑀩𑀮𑀁 𑀘𑀽𑀴𑀗𑁆𑀕𑀼𑀮𑀺𑀬𑀸 𑀯𑁂𑀞𑁂𑀢𑁆𑀯𑀸 𑀅𑀕𑁆𑀕𑀳𑁂𑀲𑀺. 𑀅𑀣𑀲𑁆𑀲 ‘‘𑀅𑀗𑁆𑀕𑀼𑀮𑀺𑀬𑀁 𑀓𑀫𑁆𑀩𑀮𑁄 𑀮𑀕𑁆𑀕𑁄’’𑀢𑀺 𑀢𑁂 𑀢𑀁 𑀳𑀭𑀺𑀢𑀼𑀁 𑀆𑀭𑀪𑀺𑀁𑀲𑀼. 𑀲𑁄 𑀧𑀭𑁄𑀤𑀺. 𑀜𑀸𑀢𑀓𑀸 ‘‘𑀅𑀧𑁂𑀣, 𑀫𑀸 𑀤𑀸𑀭𑀓𑀁 𑀭𑁄𑀤𑀸𑀧𑁂𑀣𑀸’’𑀢𑀺 𑀓𑀫𑁆𑀩𑀮𑁂𑀦𑁂𑀯 𑀲𑀤𑁆𑀥𑀺𑀁 𑀆𑀦𑀬𑀺𑀁𑀲𑀼. 𑀲𑁄 𑀣𑁂𑀭𑀁 𑀯𑀦𑁆𑀤𑀦𑀓𑀸𑀮𑁂 𑀓𑀫𑁆𑀩𑀮𑀢𑁄 𑀅𑀗𑁆𑀕𑀼𑀮𑀺𑀁 𑀅𑀧𑀓𑀟𑁆𑀠𑀺𑀢𑁆𑀯𑀸 𑀓𑀫𑁆𑀩𑀮𑀁 𑀣𑁂𑀭𑀲𑁆𑀲 𑀧𑀸𑀤𑀫𑀽𑀮𑁂 𑀧𑀸𑀢𑁂𑀲𑀺. 𑀜𑀸𑀢𑀓𑀸 ‘‘𑀤𑀳𑀭𑀓𑀼𑀫𑀸𑀭𑁂𑀦 𑀅𑀚𑀸𑀦𑀺𑀢𑁆𑀯𑀸 𑀓𑀢’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀧𑀼𑀢𑁆𑀢𑁂𑀦 𑀦𑁄 𑀤𑀺𑀦𑁆𑀦𑀁, 𑀧𑀭𑀺𑀘𑁆𑀘𑀢𑁆𑀢𑀫𑁂𑀯 𑀳𑁄𑀢𑀼, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸, ‘‘𑀪𑀦𑁆𑀢𑁂, 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑁂𑀦 𑀓𑀫𑁆𑀩𑀮𑁂𑀦 𑀧𑀽𑀚𑀸𑀓𑀸𑀭𑀓𑀲𑁆𑀲 𑀢𑀼𑀫𑁆𑀳𑀸𑀓𑀁 𑀤𑀸𑀲𑀲𑁆𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀤𑁂𑀣𑀸’’𑀢𑀺 𑀆𑀳𑀁𑀲𑀼. ‘‘𑀓𑁄 𑀦𑀸𑀫𑁄 𑀅𑀬𑀁 𑀤𑀸𑀭𑀓𑁄’’𑀢𑀺? ‘‘𑀪𑀦𑁆𑀢𑁂, 𑀅𑀬𑁆𑀬𑁂𑀦 𑀲𑀫𑀸𑀦𑀦𑀸𑀫𑀓𑁄, 𑀢𑀺𑀲𑁆𑀲𑁄 𑀦𑀸𑀫𑁂𑀲 𑀪𑀯𑀺𑀲𑁆𑀲𑀢𑀻’’𑀢𑀺. 𑀣𑁂𑀭𑁄 𑀓𑀺𑀭 𑀕𑀺𑀳𑀺𑀓𑀸𑀮𑁂 𑀉𑀧𑀢𑀺𑀲𑁆𑀲𑀫𑀸𑀡𑀯𑁄 𑀦𑀸𑀫 𑀅𑀳𑁄𑀲𑀺. 𑀫𑀸𑀢𑀸𑀧𑀺𑀲𑁆𑀲 𑀘𑀺𑀦𑁆𑀢𑁂𑀲𑀺 𑁋 ‘‘𑀦 𑀫𑀬𑀸 𑀧𑀼𑀢𑁆𑀢𑀲𑁆𑀲 𑀅𑀚𑁆𑀛𑀸𑀲𑀬𑁄 𑀪𑀺𑀦𑁆𑀤𑀺𑀢𑀩𑁆𑀩𑁄’’𑀢𑀺. 𑀏𑀯𑀁 𑀤𑀸𑀭𑀓𑀲𑁆𑀲 𑀦𑀸𑀫𑀓𑀭𑀡𑀫𑀗𑁆𑀕𑀮𑀁 𑀓𑀢𑁆𑀯𑀸 𑀧𑀼𑀦 𑀢𑀲𑁆𑀲 𑀆𑀳𑀸𑀭𑀧𑀭𑀺𑀪𑁄𑀕𑀫𑀗𑁆𑀕𑀮𑁂𑀧𑀺 𑀧𑀼𑀦 𑀢𑀲𑁆𑀲 𑀓𑀡𑁆𑀡𑀯𑀺𑀚𑁆𑀛𑀦𑀫𑀗𑁆𑀕𑀮𑁂𑀧𑀺 𑀤𑀼𑀲𑁆𑀲𑀕𑀳𑀡𑀫𑀗𑁆𑀕𑀮𑁂𑀧𑀺 𑀘𑀽𑀴𑀸𑀓𑀧𑁆𑀧𑀦𑀫𑀗𑁆𑀕𑀮𑁂𑀧𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀧𑁆𑀧𑀫𑀼𑀔𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀅𑀧𑁆𑀧𑁄𑀤𑀓𑀫𑀥𑀼𑀧𑀸𑀬𑀲𑀫𑁂𑀯 𑀅𑀤𑀁𑀲𑀼.

𑀤𑀸𑀭𑀓𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀫𑀸𑀢𑀭𑀁 𑀆𑀳 𑁋 ‘‘𑀅𑀫𑁆𑀫, 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀢𑀸𑀢, 𑀧𑀼𑀩𑁆𑀩𑁂𑀯𑀸𑀳𑀁 ‘𑀦 𑀫𑀬𑀸 𑀧𑀼𑀢𑁆𑀢𑀲𑁆𑀲 𑀅𑀚𑁆𑀛𑀸𑀲𑀬𑁄 𑀪𑀺𑀦𑁆𑀤𑀺𑀢𑀩𑁆𑀩𑁄’𑀢𑀺 𑀫𑀦𑀁 𑀅𑀓𑀸𑀲𑀺𑀁, 𑀧𑀩𑁆𑀩𑀚, 𑀧𑀼𑀢𑁆𑀢𑀸’’𑀢𑀺 𑀣𑁂𑀭𑀁 𑀦𑀺𑀫𑀦𑁆𑀢𑀸𑀧𑁂𑀢𑁆𑀯𑀸 𑀢𑀲𑁆𑀲 𑀆𑀕𑀢𑀲𑁆𑀲 𑀪𑀺𑀓𑁆𑀔𑀜𑁆𑀘 𑀤𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀤𑀸𑀲𑁄 ‘𑀧𑀩𑁆𑀩𑀚𑀺𑀲𑁆𑀲𑀸𑀫𑀻’𑀢𑀺 𑀯𑀤𑀢𑀺, 𑀇𑀫𑀁 𑀆𑀤𑀸𑀬 𑀲𑀸𑀬𑀁 𑀯𑀺𑀳𑀸𑀭𑀁 𑀆𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀣𑁂𑀭𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀫𑀳𑀦𑁆𑀢𑁂𑀦 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑁂𑀦 𑀧𑀼𑀢𑁆𑀢𑀁 𑀆𑀤𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀦𑀺𑀬𑁆𑀬𑀸𑀤𑁂𑀲𑀺. 𑀣𑁂𑀭𑁄 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀲𑀺 𑁋 ‘‘𑀢𑀺𑀲𑁆𑀲, 𑀧𑀩𑁆𑀩𑀚𑁆𑀚𑀸 𑀦𑀸𑀫 𑀤𑀼𑀓𑁆𑀓𑀭𑀸, 𑀉𑀡𑁆𑀳𑁂𑀦 𑀅𑀢𑁆𑀣𑁂 𑀲𑀢𑀺 𑀲𑀻𑀢𑀁 𑀮𑀪𑀢𑀺, 𑀲𑀻𑀢𑁂𑀦 𑀅𑀢𑁆𑀣𑁂 𑀲𑀢𑀺 𑀉𑀡𑁆𑀳𑀁 𑀮𑀪𑀢𑀺, 𑀧𑀩𑁆𑀩𑀚𑀺𑀢𑀸 𑀓𑀺𑀘𑁆𑀙𑁂𑀦 𑀚𑀻𑀯𑀦𑁆𑀢𑀺, 𑀢𑁆𑀯𑀜𑁆𑀘 𑀲𑀼𑀔𑁂𑀥𑀺𑀢𑁄’’𑀢𑀺. ‘‘𑀪𑀦𑁆𑀢𑁂, 𑀅𑀳𑀁 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀲𑀩𑁆𑀩𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺. 𑀣𑁂𑀭𑁄 ‘‘𑀲𑀸𑀥𑀽’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀯𑀲𑁂𑀦 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑀁 𑀧𑀩𑁆𑀩𑀸𑀚𑁂𑀲𑀺. 𑀲𑀓𑀮𑀫𑁆𑀧𑀺 𑀳𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀲𑀩𑁆𑀩𑀁 𑀓𑀣𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀧𑀦 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀩𑁆𑀩𑀫𑁂𑀯. 𑀇𑀤𑀜𑁆𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀅𑀯𑀺𑀚𑀳𑀺𑀢𑀫𑁂𑀯. 𑀓𑁂𑀲𑀸𑀤𑀻𑀲𑀼 𑀏𑀓𑁂𑀓𑀓𑁄𑀝𑁆𑀞𑀸𑀲𑁂𑀲𑀼 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀫𑁆𑀧𑀺 𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺 𑀉𑀧𑀸𑀲𑀓𑀸𑀦𑀫𑁆𑀧𑀺 𑀉𑀧𑀸𑀲𑀺𑀓𑀸𑀦𑀫𑁆𑀧𑀺 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀅𑀩𑁆𑀬𑀢𑁆𑀢𑀸 𑀪𑀺𑀓𑁆𑀔𑀽 𑀧𑀦 𑀧𑀩𑁆𑀩𑀚𑁂𑀦𑁆𑀢𑀸 𑀅𑀭𑀳𑀢𑁆𑀢𑀲𑁆𑀲𑀽𑀧𑀦𑀺𑀲𑁆𑀲𑀬𑀁 𑀦𑀸𑀲𑁂𑀦𑁆𑀢𑀺. 𑀢𑀲𑁆𑀫𑀸 𑀣𑁂𑀭𑁄 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀤𑀲𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀲𑁆𑀲 𑀧𑀩𑁆𑀩𑀚𑀺𑀢𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀸 𑀲𑀢𑁆𑀢𑀸𑀳𑀁 𑀯𑀺𑀳𑀸𑀭𑁂𑀬𑁂𑀯 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀧𑁆𑀧𑁄𑀤𑀓𑀫𑀥𑀼𑀧𑀸𑀬𑀲𑀫𑁂𑀯 𑀅𑀤𑀁𑀲𑀼. 𑀪𑀺𑀓𑁆𑀔𑀽𑀧𑀺 ‘‘𑀦𑀺𑀩𑀤𑁆𑀥𑀁 𑀅𑀧𑁆𑀧𑁄𑀤𑀓𑀫𑀥𑀼𑀧𑀸𑀬𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀫𑀸’’𑀢𑀺 𑀉𑀚𑁆𑀛𑀸𑀬𑀺𑀁𑀲𑀼. 𑀢𑀲𑁆𑀲𑀧𑀺 𑀫𑀸𑀢𑀸𑀧𑀺𑀢𑀭𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀸𑀬𑀁 𑀕𑁂𑀳𑀁 𑀅𑀕𑀫𑀁𑀲𑀼. 𑀲𑀸𑀫𑀡𑁂𑀭𑁄 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 ‘‘𑀲𑀸𑀫𑀡𑁂𑀭𑁄 𑀓𑀺𑀭 𑀅𑀚𑁆𑀚 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀲𑁆𑀲𑀢𑀺, 𑀲𑀓𑁆𑀓𑀸𑀭𑀫𑀲𑁆𑀲 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀧𑀜𑁆𑀘𑀳𑀺 𑀲𑀸𑀝𑀓𑀲𑀢𑁂𑀳𑀺 𑀘𑀼𑀫𑁆𑀩𑀝𑀓𑀸𑀦𑀺 𑀓𑀢𑁆𑀯𑀸 𑀧𑀜𑁆𑀘 𑀧𑀺𑀡𑁆𑀟𑀧𑀸𑀢𑀲𑀢𑀸𑀦𑀺 𑀲𑀚𑁆𑀚𑁂𑀢𑁆𑀯𑀸 𑀆𑀤𑀸𑀬 𑀧𑀝𑀺𑀧𑀣𑁂 𑀞𑀢𑁆𑀯𑀸 𑀅𑀤𑀁𑀲𑀼, 𑀧𑀼𑀦𑀤𑀺𑀯𑀲𑁂 𑀯𑀺𑀳𑀸𑀭𑀲𑁆𑀲 𑀉𑀧𑀯𑀦𑀁 𑀆𑀕𑀦𑁆𑀢𑁆𑀯𑀸 𑀅𑀤𑀁𑀲𑀼. 𑀏𑀯𑀁 𑀲𑀸𑀫𑀡𑁂𑀭𑁄 𑀤𑁆𑀯𑀻𑀳𑁂𑀯 𑀤𑀺𑀯𑀲𑁂𑀳𑀺 𑀲𑀸𑀝𑀓𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀧𑀺𑀡𑁆𑀟𑀧𑀸𑀢𑀲𑀳𑀲𑁆𑀲𑀁 𑀮𑀪𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀧𑁂𑀲𑀺. 𑀩𑁆𑀭𑀸𑀳𑁆𑀫𑀡𑀓𑀸𑀮𑁂 𑀤𑀺𑀦𑁆𑀦𑀣𑀽𑀮𑀲𑀸𑀝𑀓𑀲𑁆𑀲 𑀓𑀺𑀭𑁂𑀲 𑀦𑀺𑀲𑁆𑀲𑀦𑁆𑀤𑁄. 𑀅𑀣𑀲𑁆𑀲 𑀪𑀺𑀓𑁆𑀔𑀽 ‘‘𑀧𑀺𑀡𑁆𑀟𑀧𑀸𑀢𑀤𑀸𑀬𑀓𑀢𑀺𑀲𑁆𑀲𑁄’’𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼.

𑀧𑀼𑀦𑁂𑀓𑀤𑀺𑀯𑀲𑀁 𑀲𑀸𑀫𑀡𑁂𑀭𑁄 𑀲𑀻𑀢𑀓𑀸𑀮𑁂 𑀯𑀺𑀳𑀸𑀭𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀪𑀺𑀓𑁆𑀔𑀽 𑀢𑀢𑁆𑀣 𑀢𑀢𑁆𑀣 𑀅𑀕𑁆𑀕𑀺𑀲𑀸𑀮𑀸𑀤𑀻𑀲𑀼 𑀯𑀺𑀲𑀺𑀩𑁆𑀩𑁂𑀦𑁆𑀢𑁂 𑀤𑀺𑀲𑁆𑀯𑀸 𑀆𑀳 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀯𑀺𑀲𑀺𑀩𑁆𑀩𑁂𑀦𑁆𑀢𑀸 𑀦𑀺𑀲𑀺𑀦𑁆𑀦𑀸𑀢𑁆𑀣𑀸’’𑀢𑀺? ‘‘𑀲𑀻𑀢𑀁 𑀦𑁄 𑀧𑀻𑀴𑁂𑀢𑀺 𑀲𑀸𑀫𑀡𑁂𑀭𑁄’’𑀢𑀺. ‘‘𑀪𑀦𑁆𑀢𑁂, 𑀲𑀻𑀢𑀓𑀸𑀮𑁂 𑀦𑀸𑀫 𑀓𑀫𑁆𑀩𑀮𑀁 𑀧𑀸𑀭𑀼𑀧𑀺𑀢𑀼𑀁 𑀯𑀝𑁆𑀝𑀢𑀺. 𑀲𑁄 𑀳𑀺 𑀲𑀻𑀢𑀁 𑀧𑀝𑀺𑀩𑀸𑀳𑀺𑀢𑀼𑀁 𑀲𑀫𑀢𑁆𑀣𑁄’’𑀢𑀺. 𑀲𑀸𑀫𑀡𑁂𑀭 ‘‘𑀢𑁆𑀯𑀁 𑀫𑀳𑀸𑀧𑀼𑀜𑁆𑀜𑁄 𑀓𑀫𑁆𑀩𑀮𑀁 𑀮𑀪𑁂𑀬𑁆𑀬𑀸𑀲𑀺, 𑀅𑀫𑁆𑀳𑀸𑀓𑀁 𑀓𑀼𑀢𑁄 𑀓𑀫𑁆𑀩𑀮𑁄’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀓𑀫𑁆𑀩𑀮𑀢𑁆𑀣𑀺𑀓𑀸 𑀫𑀬𑀸 𑀲𑀤𑁆𑀥𑀺𑀁 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀲𑀓𑀮𑀯𑀺𑀳𑀸𑀭𑁂 𑀆𑀭𑁄𑀘𑀸𑀧𑁂𑀲𑀺. 𑀅𑀣 𑀪𑀺𑀓𑁆𑀔𑀽 ‘‘𑀲𑀸𑀫𑀡𑁂𑀭𑁂𑀦 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀓𑀫𑁆𑀩𑀮𑀁 𑀆𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀢𑁆𑀢𑀯𑀲𑁆𑀲𑀺𑀓𑀲𑀸𑀫𑀡𑁂𑀭𑀁 𑀦𑀺𑀲𑁆𑀲𑀸𑀬 𑀲𑀳𑀲𑁆𑀲𑀫𑀢𑁆𑀢𑀸 𑀪𑀺𑀓𑁆𑀔𑀽 𑀦𑀺𑀓𑁆𑀔𑀫𑀺𑀁𑀲𑀼. 𑀲𑁄 ‘‘𑀏𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀼𑀢𑁄 𑀓𑀫𑁆𑀩𑀮𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀫𑁆𑀧𑀺 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀢𑁂 𑀆𑀤𑀸𑀬 𑀦𑀕𑀭𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀲𑀼𑀤𑀺𑀦𑁆𑀦𑀲𑁆𑀲 𑀳𑀺 𑀤𑀸𑀦𑀲𑁆𑀲 𑀏𑀯𑀭𑀽𑀧𑁄 𑀆𑀦𑀼𑀪𑀸𑀯𑁄 𑀳𑁄𑀢𑀺. 𑀲𑁄 𑀩𑀳𑀺𑀦𑀕𑀭𑁂𑀬𑁂𑀯 𑀖𑀭𑀧𑀝𑀺𑀧𑀸𑀝𑀺𑀬𑀸 𑀘𑀭𑀦𑁆𑀢𑁄 𑀧𑀜𑁆𑀘 𑀓𑀫𑁆𑀩𑀮𑀲𑀢𑀸𑀦𑀺 𑀮𑀪𑀺𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑀁 𑀧𑀸𑀯𑀺𑀲𑀺. 𑀫𑀦𑀼𑀲𑁆𑀲𑀸 𑀇𑀢𑁄 𑀘𑀺𑀢𑁄 𑀘 𑀓𑀫𑁆𑀩𑀮𑁂 𑀆𑀳𑀭𑀦𑁆𑀢𑀺.

𑀏𑀓𑁄 𑀧𑀦 𑀧𑀼𑀭𑀺𑀲𑁄 𑀆𑀧𑀡𑀤𑁆𑀯𑀸𑀭𑁂𑀦 𑀆𑀕𑀘𑁆𑀙𑀦𑁆𑀢𑁄 𑀧𑀜𑁆𑀘 𑀓𑀫𑁆𑀩𑀮𑀲𑀢𑀸𑀦𑀺 𑀧𑀲𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀏𑀓𑀁 𑀆𑀧𑀡𑀺𑀓𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀅𑀫𑁆𑀪𑁄, 𑀏𑀓𑁄 𑀲𑀸𑀫𑀡𑁂𑀭𑁄 𑀓𑀫𑁆𑀩𑀮𑁂 𑀲𑀁𑀳𑀭𑀦𑁆𑀢𑁄 𑀆𑀕𑀘𑁆𑀙𑀢𑀺, 𑀢𑀯 𑀓𑀫𑁆𑀩𑀮𑁂 𑀧𑀝𑀺𑀘𑁆𑀙𑀸𑀤𑁂𑀳𑀻’’𑀢𑀺? ‘‘𑀓𑀺𑀁 𑀧𑀦 𑀲𑁄 𑀤𑀺𑀦𑁆𑀦𑀓𑁂 𑀕𑀡𑁆𑀳𑀸𑀢𑀺, 𑀉𑀤𑀸𑀳𑀼 𑀅𑀤𑀺𑀦𑁆𑀦𑀓𑁂’’𑀢𑀺? ‘‘𑀤𑀺𑀦𑁆𑀦𑀓𑁂 𑀕𑀡𑁆𑀳𑀸𑀢𑀻’’𑀢𑀺. ‘‘𑀏𑀯𑀁 𑀲𑀦𑁆𑀢𑁂 𑀲𑀘𑁂 𑀇𑀘𑁆𑀙𑀸𑀫𑀺, 𑀤𑀲𑁆𑀲𑀸𑀫𑀺, 𑀦𑁄 𑀘𑁂, 𑀦 𑀤𑀲𑁆𑀲𑀸𑀫𑀺, 𑀕𑀘𑁆𑀙 𑀢𑁆𑀯’’𑀦𑁆𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀫𑀘𑁆𑀙𑀭𑀺𑀦𑁄 𑀳𑀺 𑀅𑀦𑁆𑀥𑀩𑀸𑀮𑀸 𑀏𑀯𑀭𑀽𑀧𑁂𑀲𑀼 𑀤𑀸𑀦𑀁 𑀤𑀤𑀫𑀸𑀦𑁂𑀲𑀼 𑀫𑀘𑁆𑀙𑀭𑀸𑀬𑀺𑀢𑁆𑀯𑀸 𑀅𑀲𑀤𑀺𑀲𑀤𑀸𑀦𑀁 𑀤𑀺𑀲𑁆𑀯𑀸 𑀫𑀘𑁆𑀙𑀭𑀸𑀬𑀦𑁆𑀢𑁄 𑀓𑀸𑀴𑁄 (𑀥. 𑀧. 𑁧𑁭𑁭) 𑀯𑀺𑀬 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀆𑀧𑀡𑀺𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀆𑀕𑀘𑁆𑀙𑀫𑀸𑀦𑁄 ‘𑀢𑀯 𑀓𑀫𑁆𑀩𑀮𑁂 𑀧𑀝𑀺𑀘𑁆𑀙𑀸𑀤𑁂𑀳𑀻’𑀢𑀺 𑀫𑀁 𑀆𑀳. ‘𑀲𑀘𑁂𑀧𑀺 𑀲𑁄 𑀤𑀺𑀦𑁆𑀦𑀓𑀁 𑀕𑀡𑁆𑀳𑀸’𑀢𑀺, 𑀅𑀳𑀁 𑀧𑀦 ‘𑀫𑀫 𑀲𑀦𑁆𑀢𑀓𑀁 𑀲𑀘𑁂 𑀇𑀘𑁆𑀙𑀸𑀫𑀺, 𑀤𑀲𑁆𑀲𑀸𑀫𑀺, 𑀦𑁄 𑀘𑁂, 𑀦 𑀤𑀲𑁆𑀲𑀸𑀫𑀻’𑀢𑀺 𑀅𑀯𑀘𑀁, 𑀤𑀺𑀝𑁆𑀞𑀓𑀁 𑀧𑀦 𑀅𑀤𑁂𑀦𑁆𑀢𑀲𑁆𑀲 𑀮𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀲𑁆𑀲 𑀤𑁄𑀲𑁄 𑀦𑀢𑁆𑀣𑀺, 𑀇𑀫𑁂𑀲𑀼 𑀧𑀜𑁆𑀘𑀓𑀫𑁆𑀩𑀮𑀲𑀢𑁂𑀲𑀼 𑀤𑁆𑀯𑁂 𑀓𑀫𑁆𑀩𑀮𑀸𑀦𑀺 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸𑀦𑀺, 𑀇𑀫𑀸𑀦𑁂𑀯 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀤𑁆𑀯𑁂𑀧𑀺 𑀓𑀫𑁆𑀩𑀮𑁂 𑀤𑀲𑀸𑀬 𑀤𑀲𑀁 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀢𑁂𑀲𑀁 𑀅𑀦𑁆𑀢𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀲𑀺. 𑀲𑀸𑀫𑀡𑁂𑀭𑁄𑀧𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀢𑀁 𑀧𑀤𑁂𑀲𑀁 𑀧𑀸𑀧𑀼𑀡𑀺. 𑀆𑀧𑀡𑀺𑀓𑀲𑁆𑀲 𑀲𑀸𑀫𑀡𑁂𑀭𑀁 𑀤𑀺𑀲𑁆𑀯𑀸𑀯 𑀧𑀼𑀢𑁆𑀢𑀲𑀺𑀦𑁂𑀳𑁄 𑀉𑀧𑁆𑀧𑀚𑁆𑀚𑀺, 𑀲𑀓𑀮𑀲𑀭𑀻𑀭𑀁 𑀲𑀺𑀦𑁂𑀳𑁂𑀦 𑀧𑀭𑀺𑀧𑀼𑀡𑁆𑀡𑀁 𑀅𑀳𑁄𑀲𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀢𑀺𑀝𑁆𑀞𑀢𑀼 𑀓𑀫𑁆𑀩𑀮𑀸𑀦𑀺, 𑀇𑀫𑀁 𑀤𑀺𑀲𑁆𑀯𑀸 𑀳𑀤𑀬𑀫𑀁𑀲𑀫𑁆𑀧𑀺 𑀤𑀸𑀢𑀼𑀁 𑀬𑀼𑀢𑁆𑀢’’𑀦𑁆𑀢𑀺. 𑀢𑁂 𑀤𑁆𑀯𑁂𑀧𑀺 𑀓𑀫𑁆𑀩𑀮𑁂 𑀦𑀻𑀳𑀭𑀺𑀢𑁆𑀯𑀸 𑀲𑀸𑀫𑀡𑁂𑀭𑀲𑁆𑀲 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀬𑀸 𑀤𑀺𑀝𑁆𑀞𑀥𑀫𑁆𑀫𑀲𑁆𑀲 𑀪𑀸𑀕𑀻 𑀅𑀲𑁆𑀲’’𑀦𑁆𑀢𑀺 𑀅𑀯𑀘. 𑀲𑁄𑀧𑀺𑀲𑁆𑀲 ‘‘𑀏𑀯𑀁 𑀳𑁄𑀢𑀽’’𑀢𑀺 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺.

𑀲𑀸𑀫𑀡𑁂𑀭𑁄 𑀅𑀦𑁆𑀢𑁄𑀦𑀕𑀭𑁂𑀧𑀺 𑀧𑀜𑁆𑀘 𑀓𑀫𑁆𑀩𑀮𑀲𑀢𑀸𑀦𑀺 𑀮𑀪𑀺. 𑀏𑀯𑀁 𑀏𑀓𑀤𑀺𑀯𑀲𑀁𑀬𑁂𑀯 𑀓𑀫𑁆𑀩𑀮𑀲𑀳𑀲𑁆𑀲𑀁 𑀮𑀪𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀲𑁆𑀲 𑀅𑀤𑀸𑀲𑀺. 𑀅𑀣𑀲𑁆𑀲 𑀓𑀫𑁆𑀩𑀮𑀤𑀸𑀬𑀓𑀢𑀺𑀲𑁆𑀲𑀢𑁆𑀣𑁂𑀭𑁄𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀏𑀯𑀁 𑀦𑀸𑀫𑀓𑀭𑀡𑀤𑀺𑀯𑀲𑁂 𑀤𑀺𑀦𑁆𑀦𑀓𑀫𑁆𑀩𑀮𑁄 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀓𑀫𑁆𑀩𑀮𑀲𑀳𑀲𑁆𑀲𑀪𑀸𑀯𑀁 𑀧𑀸𑀧𑀼𑀡𑀺. 𑀩𑀼𑀤𑁆𑀥𑀲𑀸𑀲𑀦𑀜𑁆𑀳𑀺 𑀞𑀧𑁂𑀢𑁆𑀯𑀸 𑀦𑀢𑁆𑀣𑀜𑁆𑀜𑀁 𑀢𑀁 𑀞𑀸𑀦𑀁, 𑀬𑀢𑁆𑀣 𑀅𑀧𑁆𑀧𑀁 𑀤𑀺𑀦𑁆𑀦𑀁 𑀩𑀳𑀼𑀁 𑀳𑁄𑀢𑀺, 𑀩𑀳𑀼𑀁 𑀤𑀺𑀦𑁆𑀦𑀁 𑀩𑀳𑀼𑀢𑀭𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀢𑀣𑀸𑀭𑀽𑀧𑁄𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀬𑀣𑀸𑀭𑀽𑀧𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀅𑀧𑁆𑀧𑀁 𑀤𑀺𑀦𑁆𑀦𑀁 𑀩𑀳𑀼𑀁 𑀳𑁄𑀢𑀺, 𑀩𑀳𑀼𑀁 𑀤𑀺𑀦𑁆𑀦𑀁 𑀩𑀳𑀼𑀢𑀭’’𑀦𑁆𑀢𑀺 (𑀫. 𑀦𑀺. 𑁩.𑁧𑁪𑁬) 𑁋

𑀏𑀯𑀁 𑀲𑀸𑀫𑀡𑁂𑀭𑁄 𑀏𑀓𑀓𑀫𑁆𑀩𑀮𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀲𑀢𑁆𑀢𑀯𑀲𑁆𑀲𑀺𑀓𑁄𑀯 𑀓𑀫𑁆𑀩𑀮𑀲𑀳𑀲𑁆𑀲𑀁 𑀮𑀪𑀺. 𑀢𑀲𑁆𑀲 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑀲𑁆𑀲 𑀅𑀪𑀺𑀓𑁆𑀔𑀡𑀁 𑀜𑀸𑀢𑀺𑀤𑀸𑀬𑀓𑀸 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀓𑀣𑀸𑀲𑀮𑁆𑀮𑀸𑀧𑀁 𑀓𑀭𑁄𑀦𑁆𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀸 𑀇𑀥 𑀯𑀲𑀦𑁆𑀢𑁂𑀦 𑀜𑀸𑀢𑀺𑀤𑀸𑀬𑀓𑁂𑀲𑀼 𑀆𑀕𑀦𑁆𑀢𑁆𑀯𑀸 𑀓𑀣𑁂𑀦𑁆𑀢𑁂𑀲𑀼 𑀅𑀓𑀣𑁂𑀢𑀼𑀫𑁆𑀧𑀺 𑀦 𑀲𑀓𑁆𑀓𑀸, 𑀏𑀢𑁂𑀳𑀺 𑀲𑀤𑁆𑀥𑀺𑀁 𑀓𑀣𑀸𑀧𑀧𑀜𑁆𑀘𑁂𑀦 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀬𑀁𑀦𑀽𑀦𑀸𑀳𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑁂𑀬𑁆𑀬’’𑀦𑁆𑀢𑀺. 𑀲𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸 𑀉𑀧𑀚𑁆𑀛𑀸𑀬𑀁 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀲𑀘𑁂 𑀆𑀲𑀦𑁆𑀦𑀝𑁆𑀞𑀸𑀦𑁂 𑀯𑀲𑀺𑀲𑁆𑀲𑀸𑀫𑀺, 𑀜𑀸𑀢𑀓𑀸 𑀫𑀁 𑀧𑀓𑁆𑀓𑁄𑀲𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀻𑀲𑀢𑀺 𑀬𑁄𑀚𑀦𑀲𑀢𑀁 𑀫𑀕𑁆𑀕𑀁 𑀅𑀕𑀫𑀸𑀲𑀺. 𑀅𑀣𑁂𑀓𑁂𑀦 𑀕𑀸𑀫𑀤𑁆𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑁄 𑀏𑀓𑀁 𑀫𑀳𑀮𑁆𑀮𑀓𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀦𑀼 𑀔𑁄, 𑀫𑀳𑀸𑀉𑀧𑀸𑀲𑀓, 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀯𑀲𑀦𑁆𑀢𑀸𑀦𑀁 𑀆𑀭𑀜𑁆𑀜𑀓𑀯𑀺𑀳𑀸𑀭𑁄 𑀅𑀢𑁆𑀣𑀻’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺 𑀫𑁂 𑀫𑀕𑁆𑀕𑀁 𑀆𑀘𑀺𑀓𑁆𑀔𑀸𑀳𑀻’’𑀢𑀺. 𑀫𑀳𑀮𑁆𑀮𑀓𑀉𑀧𑀸𑀲𑀓𑀲𑁆𑀲 𑀧𑀦 𑀢𑀁 𑀤𑀺𑀲𑁆𑀯𑀸𑀯 𑀧𑀼𑀢𑁆𑀢𑀲𑀺𑀦𑁂𑀳𑁄 𑀉𑀤𑀧𑀸𑀤𑀺. 𑀅𑀣𑀲𑁆𑀲 𑀢𑀢𑁆𑀣𑁂𑀯 𑀞𑀺𑀢𑁄 𑀅𑀦𑀸𑀘𑀺𑀓𑁆𑀔𑀺𑀢𑁆𑀯𑀸 ‘‘𑀏𑀳𑀺, 𑀪𑀦𑁆𑀢𑁂, 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺 𑀢𑁂’’𑀢𑀺 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀲𑀸𑀫𑀡𑁂𑀭𑁄 𑀢𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀦𑀸𑀦𑀸𑀧𑀼𑀧𑁆𑀨𑀨𑀮𑀧𑀝𑀺𑀫𑀡𑁆𑀟𑀺𑀢𑁂 𑀭𑀼𑀓𑁆𑀔𑀧𑀩𑁆𑀩𑀢𑀧𑀤𑁂𑀲𑁂 𑀤𑀺𑀲𑁆𑀯𑀸 ‘‘𑀅𑀬𑀁, 𑀉𑀧𑀸𑀲𑀓, 𑀓𑀺𑀁 𑀧𑀤𑁂𑀲𑁄 𑀦𑀸𑀫, 𑀅𑀬𑀁 𑀉𑀧𑀸𑀲𑀓 𑀓𑀺𑀁 𑀧𑀤𑁂𑀲𑁄 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺. 𑀲𑁄𑀧𑀺𑀲𑁆𑀲 𑀢𑁂𑀲𑀁 𑀦𑀸𑀫𑀸𑀦𑀺 𑀆𑀘𑀺𑀓𑁆𑀔𑀦𑁆𑀢𑁄 𑀆𑀭𑀜𑁆𑀜𑀓𑀯𑀺𑀳𑀸𑀭𑀁 𑀧𑀢𑁆𑀯𑀸 ‘‘𑀇𑀤𑀁, 𑀪𑀦𑁆𑀢𑁂, 𑀨𑀸𑀲𑀼𑀓𑀝𑁆𑀞𑀸𑀦𑀁, 𑀇𑀥𑁂𑀯 𑀯𑀲𑀸𑀳𑀻’’𑀢𑀺 𑀯𑀢𑁆𑀯𑀸, ‘‘𑀪𑀦𑁆𑀢𑁂, 𑀓𑁄 𑀦𑀸𑀫𑁄 𑀢𑁆𑀯’’𑀦𑁆𑀢𑀺 𑀦𑀸𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀳𑀁 𑀯𑀦𑀯𑀸𑀲𑀻𑀢𑀺𑀲𑁆𑀲𑁄 𑀦𑀸𑀫 𑀉𑀧𑀸𑀲𑀓𑀸’’𑀢𑀺 𑀯𑀼𑀢𑁆𑀢𑁂, ‘‘𑀲𑁆𑀯𑁂 𑀅𑀫𑁆𑀳𑀸𑀓𑀁 𑀕𑀸𑀫𑁂 𑀪𑀺𑀓𑁆𑀔𑀸𑀬 𑀘𑀭𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀦𑁆𑀢𑁄𑀕𑀸𑀫𑀫𑁂𑀯 𑀕𑀢𑁄. ‘‘𑀯𑀦𑀯𑀸𑀲𑀻𑀢𑀺𑀲𑁆𑀲𑁄 𑀦𑀸𑀫 𑀯𑀺𑀳𑀸𑀭𑀁 𑀆𑀕𑀢𑁄, 𑀢𑀲𑁆𑀲 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀧𑀝𑀺𑀬𑀸𑀤𑁂𑀣𑀸’’𑀢𑀺 𑀫𑀦𑀼𑀲𑁆𑀲𑀸𑀦𑀁 𑀆𑀭𑁄𑀘𑁂𑀲𑀺.

𑀲𑀸𑀫𑀡𑁂𑀭𑁄 𑀧𑀞𑀫𑀫𑁂𑀯 𑀢𑀺𑀲𑁆𑀲𑁄 𑀦𑀸𑀫 𑀳𑀼𑀢𑁆𑀯𑀸 𑀢𑀢𑁄 𑀧𑀺𑀡𑁆𑀟𑀧𑀸𑀢𑀤𑀸𑀬𑀓𑀢𑀺𑀲𑁆𑀲𑁄 𑀓𑀫𑁆𑀩𑀮𑀤𑀸𑀬𑀓𑀢𑀺𑀲𑁆𑀲𑁄 𑀯𑀦𑀯𑀸𑀲𑀻𑀢𑀺𑀲𑁆𑀲𑁄𑀢𑀺 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀺𑀢𑁆𑀯𑀸 𑀲𑀢𑁆𑀢𑀯𑀲𑁆𑀲𑀩𑁆𑀪𑀦𑁆𑀢𑀭𑁂 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀺. 𑀲𑁄 𑀧𑀼𑀦𑀤𑀺𑀯𑀲𑁂 𑀧𑀸𑀢𑁄𑀯 𑀢𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀁 𑀤𑀢𑁆𑀯𑀸 𑀯𑀦𑁆𑀤𑀺𑀁𑀲𑀼. 𑀲𑀸𑀫𑀡𑁂𑀭𑁄 ‘‘𑀲𑀼𑀔𑀺𑀢𑀸 𑀳𑁄𑀣, 𑀤𑀼𑀓𑁆𑀔𑀸 𑀫𑀼𑀘𑁆𑀘𑀣𑀸’’𑀢𑀺 𑀆𑀳. 𑀏𑀓𑀫𑀦𑀼𑀲𑁆𑀲𑁄𑀧𑀺 𑀢𑀲𑁆𑀲 𑀪𑀺𑀓𑁆𑀔𑀁 𑀤𑀢𑁆𑀯𑀸 𑀧𑀼𑀦 𑀕𑁂𑀳𑀁 𑀕𑀦𑁆𑀢𑀼𑀁 𑀦𑀸𑀲𑀓𑁆𑀔𑀺, 𑀲𑀩𑁆𑀩𑁂𑀯 𑀑𑀮𑁄𑀓𑁂𑀦𑁆𑀢𑀸 𑀅𑀝𑁆𑀞𑀁𑀲𑀼. 𑀲𑁄𑀧𑀺 𑀅𑀢𑁆𑀢𑀦𑁄 𑀬𑀸𑀧𑀦𑀫𑀢𑁆𑀢𑀫𑁂𑀯 𑀕𑀡𑁆𑀳𑀺. 𑀲𑀓𑀮𑀕𑀸𑀫𑀯𑀸𑀲𑀺𑀦𑁄 𑀢𑀲𑁆𑀲 𑀧𑀸𑀤𑀫𑀽𑀮𑁂 𑀉𑀭𑁂𑀦 𑀦𑀺𑀧𑀚𑁆𑀚𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀲𑀼 𑀇𑀫𑀁 𑀢𑁂𑀫𑀸𑀲𑀁 𑀇𑀥 𑀯𑀲𑀦𑁆𑀢𑁂𑀲𑀼 𑀫𑀬𑀁 𑀢𑀻𑀡𑀺 𑀲𑀭𑀡𑀸𑀦𑀺 𑀕𑀳𑁂𑀢𑁆𑀯𑀸 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀬 𑀫𑀸𑀲𑀲𑁆𑀲 𑀅𑀝𑁆𑀞 𑀉𑀧𑁄𑀲𑀣𑀓𑀫𑁆𑀫𑀸𑀦𑀺 𑀉𑀧𑀯𑀲𑀺𑀲𑁆𑀲𑀸𑀫, 𑀇𑀥 𑀯𑀲𑀦𑀢𑁆𑀣𑀸𑀬 𑀦𑁄 𑀧𑀝𑀺𑀜𑁆𑀜𑀁 𑀤𑁂𑀣𑀸’’𑀢𑀺. 𑀲𑁄 𑀉𑀧𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑁂𑀲𑀁 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑀦𑀺𑀩𑀤𑁆𑀥𑀁 𑀢𑀢𑁆𑀣𑁂𑀯 𑀧𑀺𑀡𑁆𑀟𑀧𑀸𑀢𑀘𑀸𑀭𑀁 𑀘𑀭𑀺. 𑀯𑀦𑁆𑀤𑀺𑀢𑀯𑀦𑁆𑀤𑀺𑀢𑀓𑁆𑀔𑀡𑁂 𑀘 ‘‘𑀲𑀼𑀔𑀺𑀢𑀸 𑀳𑁄𑀣, 𑀤𑀼𑀓𑁆𑀔𑀸 𑀫𑀼𑀘𑁆𑀘𑀣𑀸’’𑀢𑀺 𑀧𑀤𑀤𑁆𑀯𑀬𑀫𑁂𑀯 𑀓𑀣𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄 𑀢𑀢𑁆𑀣𑁂𑀯𑀧𑀞𑀫𑀫𑀸𑀲𑀜𑁆𑀘 𑀤𑀼𑀢𑀺𑀬𑀫𑀸𑀲𑀜𑁆𑀘 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀢𑀢𑀺𑀬𑀫𑀸𑀲𑁂 𑀕𑀘𑁆𑀙𑀦𑁆𑀢𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀅𑀣𑀲𑁆𑀲 𑀧𑀯𑀸𑀭𑁂𑀢𑁆𑀯𑀸 𑀯𑀼𑀝𑁆𑀞𑀯𑀲𑁆𑀲𑀓𑀸𑀮𑁂 𑀉𑀧𑀚𑁆𑀛𑀸𑀬𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀻’’𑀢𑀺. ‘‘𑀕𑀘𑁆𑀙, 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺. 𑀲𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂 𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀆𑀤𑀸𑀬 𑀧𑀓𑁆𑀓𑀦𑁆𑀢𑁄, ‘‘𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀅𑀳𑀁 𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀻’’𑀢𑀺 𑀆𑀳. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 ‘‘𑀅𑀳𑀫𑁆𑀧𑀺, 𑀆𑀯𑀼𑀲𑁄, 𑀕𑀘𑁆𑀙𑀸𑀫𑀻’’𑀢𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀉𑀧𑀸𑀮𑀺𑀢𑁆𑀣𑁂𑀭𑁄 𑀧𑀼𑀡𑁆𑀡𑀢𑁆𑀣𑁂𑀭𑁄𑀢𑀺 𑀲𑀩𑁆𑀩𑁂 𑀫𑀳𑀸𑀲𑀸𑀯𑀓𑀸 𑀧𑀜𑁆𑀘𑀳𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺𑀁𑀲𑀼. 𑀲𑀩𑁆𑀩𑁂𑀧𑀺 𑀫𑀳𑀸𑀲𑀸𑀯𑀓𑀸𑀦𑀁 𑀧𑀭𑀺𑀯𑀸𑀭𑀸 𑀘𑀢𑁆𑀢𑀸𑀮𑀻𑀲 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀢𑁂 𑀯𑀻𑀲𑀢𑀺𑀬𑁄𑀚𑀦𑀲𑀢𑀁 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀕𑁄𑀘𑀭𑀕𑀸𑀫𑀁 𑀲𑀫𑁆𑀧𑀢𑁆𑀢𑀸. 𑀲𑀸𑀫𑀡𑁂𑀭𑀲𑁆𑀲 𑀦𑀺𑀩𑀤𑁆𑀥𑀽𑀧𑀝𑁆𑀞𑀸𑀓𑁄 𑀉𑀧𑀸𑀲𑀓𑁄 𑀤𑁆𑀯𑀸𑀭𑁂𑀬𑁂𑀯 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺.

𑀅𑀣 𑀦𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀧𑀼𑀘𑁆𑀙𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄, 𑀉𑀧𑀸𑀲𑀓, 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀆𑀭𑀜𑁆𑀜𑀓𑀯𑀺𑀳𑀸𑀭𑁄’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂’’𑀢𑀺. ‘‘𑀲𑀪𑀺𑀓𑁆𑀔𑀼𑀓𑁄, 𑀅𑀪𑀺𑀓𑁆𑀔𑀼𑀓𑁄’’𑀢𑀺? ‘‘𑀲𑀪𑀺𑀓𑁆𑀔𑀼𑀓𑁄, 𑀪𑀦𑁆𑀢𑁂’’𑀢𑀺. ‘‘𑀓𑁄 𑀦𑀸𑀫𑁄 𑀢𑀢𑁆𑀣 𑀯𑀲𑀢𑀻’’𑀢𑀺? ‘‘𑀯𑀦𑀯𑀸𑀲𑀻𑀢𑀺𑀲𑁆𑀲𑁄, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺 𑀫𑀕𑁆𑀕𑀁 𑀦𑁄 𑀆𑀘𑀺𑀓𑁆𑀔𑀸’’𑀢𑀺. ‘‘𑀓𑁂 𑀢𑀼𑀫𑁆𑀳𑁂, 𑀪𑀦𑁆𑀢𑁂’’𑀢𑀺? ‘‘𑀫𑀬𑀁 𑀲𑀸𑀫𑀡𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑀸’’𑀢𑀺. 𑀉𑀧𑀸𑀲𑀓𑁄 𑀑𑀮𑁄𑀓𑁂𑀢𑁆𑀯𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂𑀧𑀺 𑀫𑀳𑀸𑀲𑀸𑀯𑀓𑁂 𑀲𑀜𑁆𑀚𑀸𑀦𑀺𑀢𑁆𑀯𑀸 𑀦𑀺𑀭𑀦𑁆𑀢𑀭𑀁 𑀧𑀻𑀢𑀺𑀬𑀸 𑀨𑀼𑀝𑁆𑀞𑀲𑀭𑀻𑀭𑁄 𑀳𑀼𑀢𑁆𑀯𑀸 ‘‘𑀢𑀺𑀝𑁆𑀞𑀣 𑀢𑀸𑀯, 𑀪𑀦𑁆𑀢𑁂’’𑀢𑀺 𑀯𑁂𑀕𑁂𑀦 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀏𑀢𑁂, 𑀅𑀬𑁆𑀬𑀸, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀲𑀻𑀢𑀺 𑀫𑀳𑀸𑀲𑀸𑀯𑀓𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀳𑀺 𑀲𑀤𑁆𑀥𑀺𑀁 𑀲𑀸𑀫𑀡𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑀸, 𑀫𑀜𑁆𑀘𑀧𑀻𑀞𑀧𑀘𑁆𑀘𑀢𑁆𑀣𑀭𑀡𑀤𑀻𑀧𑀢𑁂𑀮𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑁂𑀕𑁂𑀦 𑀦𑀺𑀓𑁆𑀔𑀫𑀣𑀸’’𑀢𑀺 𑀉𑀕𑁆𑀖𑁄𑀲𑁂𑀲𑀺. 𑀫𑀦𑀼𑀲𑁆𑀲𑀸 ‘‘𑀢𑀸𑀯𑀤𑁂𑀯 𑀫𑀜𑁆𑀘𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀣𑁂𑀭𑀸𑀦𑀁 𑀧𑀤𑀸𑀦𑀼𑀧𑀤𑀺𑀓𑀸 𑀳𑀼𑀢𑁆𑀯𑀸 𑀣𑁂𑀭𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀯𑀺𑀳𑀸𑀭𑀁 𑀧𑀯𑀺𑀲𑀺𑀁𑀲𑀼. 𑀲𑀸𑀫𑀡𑁂𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 𑀓𑀢𑀺𑀧𑀬𑀸𑀦𑀁 𑀫𑀳𑀸𑀣𑁂𑀭𑀸𑀦𑀁 𑀧𑀢𑁆𑀢𑀘𑀻𑀯𑀭𑀸𑀦𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀢𑁆𑀢𑀫𑀓𑀸𑀲𑀺. 𑀢𑀲𑁆𑀲 𑀣𑁂𑀭𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀲𑀁𑀯𑀺𑀤𑀳𑀦𑁆𑀢𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀦𑁆𑀢𑀲𑁆𑀲𑁂𑀯 𑀅𑀦𑁆𑀥𑀓𑀸𑀭𑁄 𑀚𑀸𑀢𑀸’’𑀢𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀉𑀧𑀸𑀲𑀓𑁂 𑀆𑀳 𑁋 ‘‘𑀕𑀘𑁆𑀙𑀣, 𑀉𑀧𑀸𑀲𑀓𑀸, 𑀢𑀼𑀫𑁆𑀳𑀸𑀓𑀁 𑀅𑀦𑁆𑀥𑀓𑀸𑀭𑁄 𑀚𑀸𑀢𑁄’’𑀢𑀺. ‘‘𑀪𑀦𑁆𑀢𑁂, 𑀅𑀚𑁆𑀚 𑀥𑀫𑁆𑀫𑀲𑁆𑀲𑀯𑀦𑀤𑀺𑀯𑀲𑁄, 𑀦 𑀫𑀬𑀁 𑀕𑀫𑀺𑀲𑁆𑀲𑀸𑀫, 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫, 𑀇𑀢𑁄 𑀧𑀼𑀩𑁆𑀩𑁂 𑀥𑀫𑁆𑀫𑀲𑁆𑀲𑀯𑀦𑀫𑁆𑀧𑀺 𑀦𑀢𑁆𑀣𑀻’’𑀢𑀺. ‘‘𑀢𑁂𑀦 𑀳𑀺, 𑀲𑀸𑀫𑀡𑁂𑀭, 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀓𑀸𑀮𑀁 𑀖𑁄𑀲𑁂𑀳𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀢𑀺𑀲𑁆𑀲 𑀢𑀯 𑀉𑀧𑀝𑁆𑀞𑀸𑀓𑀸 ‘𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸𑀫𑁆𑀳𑀸’𑀢𑀺 𑀯𑀤𑀦𑁆𑀢𑀺, 𑀓𑀣𑁂𑀳𑀺 𑀢𑁂𑀲𑀁 𑀥𑀫𑁆𑀫’’𑀦𑁆𑀢𑀺. 𑀉𑀧𑀸𑀲𑀓𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀉𑀝𑁆𑀞𑀸𑀬, ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀅𑀬𑁆𑀬𑁄 ‘𑀲𑀼𑀔𑀺𑀢𑀸 𑀳𑁄𑀣, 𑀤𑀼𑀓𑁆𑀔𑀸 𑀫𑀼𑀘𑁆𑀘𑀣𑀸’𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀧𑀤𑀸𑀦𑀺 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀥𑀫𑁆𑀫𑀓𑀣𑀁 𑀦 𑀚𑀸𑀦𑀸𑀢𑀺, 𑀅𑀫𑁆𑀳𑀸𑀓𑀁 𑀅𑀜𑁆𑀜𑀁 𑀥𑀫𑁆𑀫𑀓𑀣𑀺𑀓𑀁 𑀤𑁂𑀣𑀸’’𑀢𑀺 𑀯𑀤𑀺𑀁𑀲𑀼. ‘‘𑀲𑀸𑀫𑀡𑁂𑀭𑁄 𑀧𑀦 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀧𑀺 𑀦𑁂𑀯 𑀢𑁂𑀲𑀁 𑀥𑀫𑁆𑀫𑀓𑀣𑀁 𑀓𑀣𑁂𑀲𑀻’’𑀢𑀺.

𑀢𑀤𑀸 𑀧𑀦 𑀦𑀁 𑀉𑀧𑀚𑁆𑀛𑀸𑀬𑁄, ‘‘𑀲𑀸𑀫𑀡𑁂𑀭, 𑀓𑀣𑀁 𑀧𑀦 𑀲𑀼𑀔𑀺𑀢𑀸 𑀳𑁄𑀦𑁆𑀢𑀺, ‘𑀓𑀣𑀁 𑀧𑀦 𑀤𑀼𑀓𑁆𑀔𑀸 𑀫𑀼𑀘𑁆𑀘𑀦𑁆𑀢𑀻’𑀢𑀺 𑀇𑀫𑁂𑀲𑀁 𑀦𑁄 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀅𑀢𑁆𑀣𑀁 𑀓𑀣𑁂𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀘𑀺𑀢𑁆𑀢𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀥𑀫𑁆𑀫𑀸𑀲𑀦𑀁 𑀆𑀭𑀼𑀬𑁆𑀳 𑀧𑀜𑁆𑀘𑀳𑀺 𑀦𑀺𑀓𑀸𑀬𑁂𑀳𑀺 𑀅𑀢𑁆𑀣𑀜𑁆𑀘 𑀓𑀸𑀭𑀡𑀜𑁆𑀘 𑀆𑀓𑀟𑁆𑀠𑀺𑀢𑁆𑀯𑀸 𑀖𑀦𑀯𑀲𑁆𑀲𑀁 𑀯𑀲𑁆𑀲𑀦𑁆𑀢𑁄 𑀘𑀸𑀢𑀼𑀤𑁆𑀤𑀻𑀧𑀓𑀫𑀳𑀸𑀫𑁂𑀖𑁄 𑀯𑀺𑀬 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀯𑀺𑀪𑀚𑀦𑁆𑀢𑁄 𑀅𑀭𑀳𑀢𑁆𑀢𑀓𑀽𑀝𑁂𑀦 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀏𑀯𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀲𑁆𑀲 𑀲𑀼𑀔𑀁 𑀳𑁄𑀢𑀺, 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀬𑁂𑀯 𑀤𑀼𑀓𑁆𑀔𑀸 𑀫𑀼𑀘𑁆𑀘𑀢𑀺, 𑀲𑁂𑀲𑀚𑀦𑀸 𑀚𑀸𑀢𑀺𑀤𑀼𑀓𑁆𑀔𑀸𑀤𑀻𑀳𑀺 𑀘𑁂𑀯 𑀦𑀺𑀭𑀬𑀤𑀼𑀓𑁆𑀔𑀸𑀤𑀻𑀳𑀺 𑀘 𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀻’’𑀢𑀺 𑀆𑀳. ‘‘𑀲𑀸𑀥𑀼, 𑀲𑀸𑀫𑀡𑁂𑀭, 𑀲𑀼𑀓𑀣𑀺𑀢𑁄 𑀢𑁂 𑀧𑀝𑀺𑀪𑀸𑀡𑁄, 𑀇𑀤𑀸𑀦𑀺 𑀲𑀭𑀪𑀜𑁆𑀜𑀁 𑀪𑀡𑀸𑀳𑀻’’𑀢𑀺. 𑀲𑁄 𑀲𑀭𑀪𑀜𑁆𑀜𑀫𑁆𑀧𑀺 𑀪𑀡𑀺. 𑀅𑀭𑀼𑀡𑁂 𑀉𑀕𑁆𑀕𑀘𑁆𑀙𑀦𑁆𑀢𑁂 𑀲𑀸𑀫𑀡𑁂𑀭𑀲𑁆𑀲 𑀉𑀧𑀝𑁆𑀞𑀸𑀓𑀫𑀦𑀼𑀲𑁆𑀲𑀸 𑀤𑁆𑀯𑁂 𑀪𑀸𑀕𑀸 𑀅𑀳𑁂𑀲𑀼𑀁. 𑀏𑀓𑀘𑁆𑀘𑁂 ‘‘𑀦 𑀯𑀢 𑀦𑁄 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑁄 𑀓𑀓𑁆𑀔𑀴𑁄 𑀤𑀺𑀝𑁆𑀞𑀧𑀼𑀩𑁆𑀩𑁄. 𑀓𑀣𑀜𑁆𑀳𑀺 𑀦𑀸𑀫 𑀏𑀯𑀭𑀽𑀧𑀁 𑀥𑀫𑁆𑀫𑀓𑀣𑀁 𑀚𑀸𑀦𑀦𑁆𑀢𑁄 𑀏𑀢𑁆𑀢𑀓𑀁 𑀓𑀸𑀮𑀁 𑀫𑀸𑀢𑀸𑀧𑀺𑀢𑀼𑀝𑁆𑀞𑀸𑀦𑁂 𑀞𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀏𑀓𑀫𑁆𑀧𑀺 𑀥𑀫𑁆𑀫𑀧𑀤𑀁 𑀦 𑀓𑀣𑁂𑀲𑀻’’𑀢𑀺 𑀓𑀼𑀚𑁆𑀛𑀺𑀁𑀲𑀼. 𑀏𑀓𑀘𑁆𑀘𑁂 ‘‘𑀮𑀸𑀪𑀸 𑀯𑀢 𑀦𑁄, 𑀬𑁂 𑀫𑀬𑀁 𑀏𑀯𑀭𑀽𑀧𑀁 𑀪𑀤𑀦𑁆𑀢𑀁 𑀕𑀼𑀡𑀁 𑀯𑀸 𑀅𑀕𑀼𑀡𑀁 𑀯𑀸 𑀅𑀚𑀸𑀦𑀦𑁆𑀢𑀸𑀧𑀺 𑀉𑀧𑀝𑁆𑀞𑀳𑀺𑀫𑁆𑀳, 𑀇𑀤𑀸𑀦𑀺 𑀘 𑀧𑀦𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑁄𑀢𑀼𑀁 𑀮𑀪𑀺𑀫𑁆𑀳𑀸’’𑀢𑀺 𑀢𑀼𑀲𑁆𑀲𑀺𑀁𑀲𑀼.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀧𑀺 𑀢𑀁 𑀤𑀺𑀯𑀲𑀁 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀯𑀦𑀯𑀸𑀲𑀻𑀢𑀺𑀲𑁆𑀲𑀲𑁆𑀲 𑀉𑀧𑀝𑁆𑀞𑀸𑀓𑁂 𑀅𑀢𑁆𑀢𑀦𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀇𑀫𑀫𑀢𑁆𑀣𑀁 𑀉𑀧𑀥𑀸𑀭𑁂𑀲𑀺 ‘‘𑀯𑀦𑀯𑀸𑀲𑀻𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲 𑀉𑀧𑀝𑁆𑀞𑀸𑀓𑀸 𑀏𑀓𑀘𑁆𑀘𑁂 𑀢𑀼𑀝𑁆𑀞𑀸, 𑀏𑀓𑀘𑁆𑀘𑁂 𑀓𑀼𑀤𑁆𑀥𑀸, 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀧𑀦 𑀲𑀸𑀫𑀡𑁂𑀭𑀲𑁆𑀲 𑀓𑀼𑀤𑁆𑀥𑀸 𑀦𑀺𑀭𑀬𑀪𑀸𑀕𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀺, 𑀕𑀦𑁆𑀢𑀩𑁆𑀩𑀫𑁂𑀯 𑀢𑀢𑁆𑀣 𑀫𑀬𑀸, 𑀫𑀬𑀺 𑀕𑀢𑁂 𑀲𑀩𑁆𑀩𑁂𑀧𑀺 𑀢𑁂 𑀲𑀸𑀫𑀡𑁂𑀭𑁂 𑀫𑁂𑀢𑁆𑀢𑀘𑀺𑀢𑁆𑀢𑀁 𑀓𑀢𑁆𑀯𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑁂𑀧𑀺 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀲𑀗𑁆𑀖𑀲𑁆𑀲 𑀆𑀕𑀫𑀦𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀪𑀺𑀓𑁆𑀔𑀽𑀧𑀺 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀸 𑀲𑀸𑀫𑀡𑁂𑀭𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀺𑀁, 𑀢𑀺𑀲𑁆𑀲, 𑀢𑁆𑀯𑀁 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀕𑀫𑀺𑀲𑁆𑀲𑀲𑀺, 𑀉𑀤𑀸𑀳𑀼 𑀧𑀘𑁆𑀙𑀸’’𑀢𑀺? ‘‘𑀫𑀫 𑀕𑀫𑀦𑀯𑁂𑀮𑀸𑀬𑀫𑁂𑀯 𑀕𑀫𑀺𑀲𑁆𑀲𑀸𑀫𑀺, 𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀪𑀦𑁆𑀢𑁂’’𑀢𑀺. 𑀪𑀺𑀓𑁆𑀔𑀽 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀧𑀯𑀺𑀲𑀺𑀁𑀲𑀼.

𑀲𑀢𑁆𑀣𑀸 𑀚𑁂𑀢𑀯𑀦𑀲𑁆𑀫𑀺𑀁𑀬𑁂𑀯 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀫𑀸𑀤𑀸𑀬 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦𑁂𑀯 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀧𑀼𑀭𑀢𑁄 𑀞𑀺𑀢𑀫𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀆𑀕𑀢𑁄’’𑀢𑀺 𑀲𑀓𑀮𑀕𑀸𑀫𑁄 𑀲𑀗𑁆𑀔𑀼𑀪𑀺𑀢𑁆𑀯𑀸 𑀏𑀓𑀓𑁄𑀮𑀸𑀳𑀮𑁄 𑀅𑀳𑁄𑀲𑀺. 𑀫𑀦𑀼𑀲𑁆𑀲𑀸 𑀉𑀤𑀕𑁆𑀕𑀘𑀺𑀢𑁆𑀢𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀁 𑀤𑀢𑁆𑀯𑀸 𑀔𑀚𑁆𑀚𑀓𑀁 𑀅𑀤𑀁𑀲𑀼. 𑀲𑀸𑀫𑀡𑁂𑀭𑁄 𑀪𑀢𑁆𑀢𑁂 𑀅𑀦𑀺𑀝𑁆𑀞𑀺𑀢𑁂𑀬𑁂𑀯 𑀅𑀦𑁆𑀢𑁄𑀕𑀸𑀫𑀁 𑀧𑀸𑀯𑀺𑀲𑀺. 𑀕𑀸𑀫𑀯𑀸𑀲𑀺𑀦𑁄 𑀦𑀻𑀳𑀭𑀺𑀢𑁆𑀯𑀸 𑀢𑀲𑁆𑀲 𑀲𑀓𑁆𑀓𑀘𑁆𑀘𑀁 𑀪𑀺𑀓𑁆𑀔𑀁 𑀅𑀤𑀁𑀲𑀼. 𑀲𑁄 𑀬𑀸𑀧𑀦𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑀺. 𑀲𑀢𑁆𑀣𑀸 ‘‘𑀆𑀳𑀭, 𑀢𑀺𑀲𑁆𑀲𑀸’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 ‘‘𑀧𑀲𑁆𑀲, 𑀲𑀸𑀭𑀺𑀧𑀼𑀢𑁆𑀢, 𑀢𑀯 𑀲𑀸𑀫𑀡𑁂𑀭𑀲𑁆𑀲 𑀧𑀢𑁆𑀢’’𑀦𑁆𑀢𑀺 𑀣𑁂𑀭𑀲𑁆𑀲 𑀤𑀲𑁆𑀲𑁂𑀲𑀺. 𑀣𑁂𑀭𑁄 𑀲𑀢𑁆𑀣𑀼 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀸𑀫𑀡𑁂𑀭𑀲𑁆𑀲 𑀤𑀢𑁆𑀯𑀸 ‘‘𑀕𑀘𑁆𑀙, 𑀅𑀢𑁆𑀢𑀦𑁄 𑀧𑀢𑁆𑀢𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑁄𑀳𑀻’’𑀢𑀺 𑀆𑀳.

𑀕𑀸𑀫𑀯𑀸𑀲𑀺𑀦𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀬𑀸𑀘𑀺𑀁𑀲𑀼. 𑀲𑀢𑁆𑀣𑀸 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀏𑀯𑀫𑀸𑀳 𑁋 ‘‘𑀮𑀸𑀪𑀸 𑀯𑀢 𑀯𑁄 𑀉𑀧𑀸𑀲𑀓𑀸, 𑀬𑁂 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀓𑀼𑀮𑀽𑀧𑀓𑀁 𑀲𑀸𑀫𑀡𑁂𑀭𑀁 𑀦𑀺𑀲𑁆𑀲𑀸𑀬 𑀲𑀸𑀭𑀺𑀧𑀼𑀢𑁆𑀢𑀁 𑀫𑁄𑀕𑁆𑀕𑀮𑁆𑀮𑀸𑀦𑀁 𑀓𑀲𑁆𑀲𑀧𑀁 𑀅𑀦𑀼𑀭𑀼𑀤𑁆𑀥𑀦𑁆𑀢𑀺 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑁂 𑀤𑀲𑁆𑀲𑀦𑀸𑀬 𑀮𑀪𑀣, 𑀅𑀳𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀓𑀼𑀮𑀽𑀧𑀓𑀫𑁂𑀯 𑀦𑀺𑀲𑁆𑀲𑀸𑀬 𑀆𑀕𑀢𑁄, 𑀩𑀼𑀤𑁆𑀥𑀤𑀲𑁆𑀲𑀦𑀫𑁆𑀧𑀺 𑀯𑁄 𑀇𑀫𑀁 𑀦𑀺𑀲𑁆𑀲𑀸𑀬𑁂𑀯 𑀮𑀤𑁆𑀥𑀁, 𑀮𑀸𑀪𑀸 𑀯𑁄, 𑀲𑀼𑀮𑀤𑁆𑀥𑀁 𑀯𑁄’’𑀢𑀺. 𑀫𑀦𑀼𑀲𑁆𑀲𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀅𑀳𑁄 𑀅𑀫𑁆𑀳𑀸𑀓𑀁 𑀮𑀸𑀪𑀸, 𑀩𑀼𑀤𑁆𑀥𑀸𑀦𑀜𑁆𑀘𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀆𑀭𑀸𑀥𑀦𑀲𑀫𑀢𑁆𑀣𑀁 𑀅𑀫𑁆𑀳𑀸𑀓𑀁 𑀅𑀬𑁆𑀬𑀁 𑀤𑀲𑁆𑀲𑀦𑀸𑀬 𑀮𑀪𑀸𑀫, 𑀤𑁂𑀬𑁆𑀬𑀥𑀫𑁆𑀫𑀜𑁆𑀘𑀲𑁆𑀲 𑀤𑀸𑀢𑀼𑀁 𑀮𑀪𑀸𑀫𑀸’’𑀢𑀺 𑀲𑀸𑀫𑀡𑁂𑀭𑀲𑁆𑀲 𑀓𑀼𑀤𑁆𑀥𑀸 𑀫𑀦𑀼𑀲𑁆𑀲𑀸 𑀢𑀼𑀲𑁆𑀲𑀺𑀁𑀲𑀼. 𑀢𑀼𑀝𑁆𑀞𑀸 𑀫𑀦𑀼𑀲𑁆𑀲𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀲𑀻𑀤𑀺𑀁𑀲𑀼. 𑀅𑀦𑀼𑀫𑁄𑀤𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼. 𑀲𑀢𑁆𑀣𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀫𑀦𑀼𑀲𑁆𑀲𑀸 𑀲𑀢𑁆𑀣𑀸𑀭𑀁 𑀅𑀦𑀼𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀁𑀲𑀼. 𑀲𑀢𑁆𑀣𑀸 𑀲𑀸𑀫𑀡𑁂𑀭𑁂𑀦 𑀲𑀤𑁆𑀥𑀺𑀁 𑀲𑀫𑀥𑀼𑀭𑁂𑀦 𑀕𑀘𑁆𑀙𑀦𑁆𑀢𑁄, ‘‘𑀲𑀸𑀫𑀡𑁂𑀭, 𑀅𑀬𑀁 𑀧𑀤𑁂𑀲𑁄 𑀓𑁄𑀦𑀸𑀫𑁄, 𑀅𑀬𑀁 𑀧𑀤𑁂𑀲𑁄 𑀓𑁄𑀦𑀸𑀫𑁄’’𑀢𑀺 𑀧𑀼𑀩𑁆𑀩𑁂 𑀢𑀲𑁆𑀲 𑀉𑀧𑀸𑀲𑀓𑁂𑀦 𑀤𑀲𑁆𑀲𑀺𑀢𑀧𑀤𑁂𑀲𑁂 𑀧𑀼𑀘𑁆𑀙𑀦𑁆𑀢𑁄 𑀅𑀕𑀫𑀸𑀲𑀺. 𑀲𑀸𑀫𑀡𑁂𑀭𑁄𑀧𑀺, ‘‘𑀪𑀦𑁆𑀢𑁂, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄, 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄’’𑀢𑀺 𑀆𑀘𑀺𑀓𑁆𑀔𑀫𑀸𑀦𑁄𑀯 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀢𑀫𑀢𑁆𑀣𑀓𑀁 𑀅𑀪𑀺𑀭𑀼𑀳𑀺. 𑀢𑀢𑁆𑀣 𑀞𑀺𑀢𑀸𑀦𑀁 𑀧𑀦 𑀫𑀳𑀸𑀲𑀫𑀼𑀤𑁆𑀤𑁄 𑀧𑀜𑁆𑀜𑀸𑀬𑀢𑀺. 𑀲𑀢𑁆𑀣𑀸 𑀲𑀸𑀫𑀡𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀢𑀺𑀲𑁆𑀲, 𑀧𑀩𑁆𑀩𑀢𑀫𑀢𑁆𑀣𑀓𑁂 𑀞𑀺𑀢𑁄 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀢𑁆𑀯𑀸 𑀓𑀺𑀁 𑀧𑀲𑁆𑀲𑀲𑀻’’𑀢𑀺? ‘‘𑀫𑀳𑀸𑀲𑀫𑀼𑀤𑁆𑀤𑀁, 𑀪𑀦𑁆𑀢𑁂’’𑀢𑀺. ‘‘𑀫𑀳𑀸𑀲𑀫𑀼𑀤𑁆𑀤𑀁 𑀤𑀺𑀲𑁆𑀯𑀸 𑀓𑀺𑀁 𑀘𑀺𑀦𑁆𑀢𑁂𑀲𑀻’’𑀢𑀺? ‘‘𑀫𑀫 𑀤𑀼𑀓𑁆𑀔𑀺𑀢𑀓𑀸𑀮𑁂 𑀭𑁄𑀤𑀦𑁆𑀢𑀲𑁆𑀲 𑀘𑀢𑀽𑀳𑀺 𑀫𑀳𑀸𑀲𑀫𑀼𑀤𑁆𑀤𑁂𑀳𑀺 𑀅𑀢𑀺𑀭𑁂𑀓𑀢𑀭𑁂𑀦 𑀅𑀲𑁆𑀲𑀼𑀦𑀸 𑀪𑀯𑀺𑀢𑀩𑁆𑀩𑀦𑁆𑀢𑀺 𑀇𑀤𑀁, 𑀪𑀦𑁆𑀢𑁂, 𑀘𑀺𑀦𑁆𑀢𑁂𑀲𑀺’’𑀦𑁆𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀢𑀺𑀲𑁆𑀲, 𑀏𑀯𑀫𑁂𑀢𑀁. 𑀏𑀓𑁂𑀓𑀲𑁆𑀲 𑀳𑀺 𑀲𑀢𑁆𑀢𑀲𑁆𑀲 𑀤𑀼𑀓𑁆𑀔𑀺𑀢𑀓𑀸𑀮𑁂 𑀧𑀕𑁆𑀖𑀭𑀺𑀢𑀅𑀲𑁆𑀲𑀽𑀦𑀺 𑀘𑀢𑀽𑀳𑀺 𑀫𑀳𑀸𑀲𑀫𑀼𑀤𑁆𑀤𑁂𑀳𑀺 𑀅𑀢𑀺𑀭𑁂𑀓𑀢𑀭𑀸𑀦𑁂𑀯𑀸’’𑀢𑀺. 𑀇𑀤𑀜𑁆𑀘 𑀧𑀦 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀘𑀢𑀽𑀲𑀼 𑀲𑀫𑀼𑀤𑁆𑀤𑁂𑀲𑀼 𑀚𑀮𑀁 𑀧𑀭𑀺𑀢𑁆𑀢𑀓𑀁,

𑀢𑀢𑁄 𑀩𑀳𑀼𑀁 𑀅𑀲𑁆𑀲𑀼𑀚𑀮𑀁 𑀅𑀦𑀧𑁆𑀧𑀓𑀁;

𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑀲𑁆𑀲 𑀦𑀭𑀲𑁆𑀲 𑀲𑁄𑀘𑀦𑀸,

𑀓𑀺𑀁𑀓𑀸𑀭𑀡𑀸 𑀲𑀫𑁆𑀫 𑀢𑀼𑀯𑀁 𑀧𑀫𑀚𑁆𑀚𑀲𑀻’’𑀢𑀺.

𑀅𑀣 𑀦𑀁 𑀧𑀼𑀦 𑀧𑀼𑀘𑁆𑀙𑀺 𑁋 ‘‘𑀢𑀺𑀲𑁆𑀲, 𑀓𑀳𑀁 𑀯𑀲𑀲𑀻’’𑀢𑀺? ‘‘𑀇𑀫𑀲𑁆𑀫𑀺𑀁 𑀧𑀩𑁆𑀪𑀸𑀭𑁂, 𑀪𑀦𑁆𑀢𑁂’’𑀢𑀺. ‘‘𑀢𑀢𑁆𑀣 𑀧𑀦 𑀯𑀲𑀦𑁆𑀢𑁄 𑀓𑀺𑀁 𑀘𑀺𑀦𑁆𑀢𑁂𑀲𑀻’’𑀢𑀺? ‘‘𑀫𑀬𑀸 𑀫𑀭𑀦𑁆𑀢𑁂𑀦 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀢𑀲𑁆𑀲 𑀲𑀭𑀻𑀭𑀦𑀺𑀓𑁆𑀔𑁂𑀧𑀲𑁆𑀲 𑀧𑀭𑀺𑀘𑁆𑀙𑁂𑀤𑁄 ‘𑀦𑀢𑁆𑀣𑀻’𑀢𑀺 𑀘𑀺𑀦𑁆𑀢𑁂𑀲𑀺𑀁, 𑀪𑀦𑁆𑀢𑁂’’𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀢𑀺𑀲𑁆𑀲, 𑀏𑀯𑀫𑁂𑀢𑀁. 𑀇𑀫𑁂𑀲𑀜𑁆𑀳𑀺 𑀲𑀢𑁆𑀢𑀸𑀦𑀁 𑀧𑀣𑀯𑀺𑀬𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀅𑀫𑀢𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑁋

‘‘𑀉𑀧𑀲𑀸𑀴𑀓𑀦𑀸𑀫𑀸𑀦𑀺, 𑀲𑀳𑀲𑁆𑀲𑀸𑀦𑀺 𑀘𑀢𑀼𑀤𑁆𑀤𑀲;

𑀅𑀲𑁆𑀫𑀺𑀁 𑀧𑀤𑁂𑀲𑁂 𑀤𑀟𑁆𑀠𑀸𑀦𑀺, 𑀦𑀢𑁆𑀣𑀺 𑀮𑁄𑀓𑁂 𑀅𑀦𑀸𑀫𑀢𑀁.

‘‘𑀬𑀫𑁆𑀳𑀺 𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘, 𑀅𑀳𑀺𑀁𑀲𑀸 𑀲𑀁𑀬𑀫𑁄 𑀤𑀫𑁄;

𑀏𑀢𑀁 𑀅𑀭𑀺𑀬𑀸 𑀲𑁂𑀯𑀦𑁆𑀢𑀺, 𑀏𑀢𑀁 𑀮𑁄𑀓𑁂 𑀅𑀦𑀸𑀫𑀢’’𑀦𑁆𑀢𑀺. (𑀚𑀸.𑁧.𑁨.𑁩𑁧-𑁩𑁨) 𑁋

𑀇𑀫𑀁 𑀤𑀼𑀓𑀦𑀺𑀧𑀸𑀢𑁂 𑀉𑀧𑀲𑀸𑀴𑀓𑀚𑀸𑀢𑀓𑀁 𑀓𑀣𑁂𑀲𑀺. 𑀇𑀢𑀺 𑀧𑀣𑀯𑀺𑀬𑀁 𑀲𑀭𑀻𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀫𑀭𑀦𑁆𑀢𑁂𑀲𑀼 𑀲𑀢𑁆𑀢𑁂𑀲𑀼 𑀅𑀫𑀢𑀧𑀼𑀩𑁆𑀩𑀧𑀤𑁂𑀲𑁂 𑀫𑀭𑀦𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀆𑀦𑀦𑁆𑀤𑀢𑁆𑀣𑁂𑀭𑀲𑀤𑀺𑀲𑀸 𑀧𑀦 𑀅𑀫𑀢𑀧𑀼𑀩𑁆𑀩𑀧𑀤𑁂𑀲𑁂 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺.

𑀆𑀦𑀦𑁆𑀤𑀢𑁆𑀣𑁂𑀭𑁄 𑀓𑀺𑀭 𑀯𑀻𑀲𑀯𑀲𑁆𑀲𑀲𑀢𑀺𑀓𑀓𑀸𑀮𑁂 𑀆𑀬𑀼𑀲𑀗𑁆𑀔𑀸𑀭𑀁 𑀑𑀮𑁄𑀓𑁂𑀦𑁆𑀢𑁄 𑀧𑀭𑀺𑀓𑁆𑀔𑀻𑀡𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀆𑀭𑁄𑀘𑁂𑀲𑀺. 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀭𑁄𑀳𑀺𑀡𑀻𑀦𑀤𑀺𑀬𑀸 𑀉𑀪𑀬𑀢𑀻𑀭𑀯𑀸𑀲𑀺𑀓𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀑𑀭𑀺𑀫𑀢𑀻𑀭𑀯𑀸𑀲𑀺𑀓𑀸 ‘‘𑀫𑀬𑀁 𑀣𑁂𑀭𑀲𑁆𑀲 𑀩𑀳𑀽𑀧𑀓𑀸𑀭𑀸, 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺 𑀯𑀤𑀺𑀁𑀲𑀼. 𑀧𑀭𑀢𑀻𑀭𑀯𑀸𑀲𑀺𑀓𑀸𑀧𑀺 ‘‘𑀫𑀬𑀁 𑀣𑁂𑀭𑀲𑁆𑀲 𑀩𑀳𑀽𑀧𑀓𑀸𑀭𑀸, 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺 𑀯𑀤𑀺𑀁𑀲𑀼. 𑀣𑁂𑀭𑁄 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀉𑀪𑀬𑀢𑀻𑀭𑀯𑀸𑀲𑀺𑀦𑁄 𑀫𑀬𑁆𑀳𑀁 𑀉𑀧𑀓𑀸𑀭𑀸, 𑀇𑀫𑁂 𑀦𑀸𑀫 𑀅𑀦𑀼𑀧𑀓𑀸𑀭𑀸𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀲𑀘𑀸𑀳𑀁 𑀑𑀭𑀺𑀫𑀢𑀻𑀭𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀧𑀭𑀢𑀻𑀭𑀯𑀸𑀲𑀺𑀦𑁄 𑀥𑀸𑀢𑀼𑀕𑀳𑀡𑀢𑁆𑀣𑀁 𑀢𑁂𑀳𑀺 𑀲𑀤𑁆𑀥𑀺𑀁 𑀓𑀮𑀳𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀲𑀘𑁂 𑀧𑀭𑀢𑀻𑀭𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀑𑀭𑀺𑀫𑀢𑀻𑀭𑀯𑀸𑀲𑀺𑀦𑁄𑀧𑀺 𑀢𑀣𑀸 𑀓𑀭𑀺𑀲𑁆𑀲𑀦𑁆𑀢𑀺, 𑀓𑀮𑀳𑁄 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀫𑀁 𑀦𑀺𑀲𑁆𑀲𑀸𑀬𑁂𑀯 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀯𑀽𑀧𑀲𑀫𑀫𑀸𑀦𑁄𑀧𑀺 𑀫𑀁 𑀦𑀺𑀲𑁆𑀲𑀸𑀬𑁂𑀯 𑀯𑀽𑀧𑀲𑀫𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀑𑀭𑀺𑀫𑀢𑀻𑀭𑀯𑀸𑀲𑀺𑀦𑁄𑀧𑀺 𑀫𑀬𑁆𑀳𑀁 𑀉𑀧𑀓𑀸𑀭𑀸, 𑀧𑀭𑀢𑀻𑀭𑀯𑀸𑀲𑀺𑀦𑁄𑀧𑀺 𑀫𑀬𑁆𑀳𑀁 𑀉𑀧𑀓𑀸𑀭𑀸, 𑀅𑀦𑀼𑀧𑀓𑀸𑀭𑀸𑀧𑀺 𑀦𑀸𑀫 𑀦𑀢𑁆𑀣𑀺, 𑀑𑀭𑀺𑀫𑀢𑀻𑀭𑀯𑀸𑀲𑀺𑀦𑁄 𑀑𑀭𑀺𑀫𑀢𑀻𑀭𑁂𑀬𑁂𑀯 𑀲𑀦𑁆𑀦𑀺𑀧𑀢𑀦𑁆𑀢𑀼, 𑀧𑀭𑀢𑀻𑀭𑀯𑀸𑀲𑀺𑀦𑁄𑀧𑀺 𑀧𑀭𑀢𑀻𑀭𑁂𑀬𑁂𑀯𑀸’’𑀢𑀺 𑀆𑀳. 𑀢𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀚𑁆𑀛𑁂𑀦𑀤𑀺𑀬𑀸 𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑁂 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 ‘‘𑀫𑀫 𑀲𑀭𑀻𑀭𑀁 𑀫𑀚𑁆𑀛𑁂 𑀪𑀺𑀚𑁆𑀚𑀺𑀢𑁆𑀯𑀸 𑀏𑀓𑁄 𑀪𑀸𑀕𑁄 𑀑𑀭𑀺𑀫𑀢𑀻𑀭𑁂 𑀧𑀢𑀢𑀼, 𑀏𑀓𑁄 𑀪𑀸𑀕𑁄 𑀧𑀭𑀢𑀻𑀭𑁂’’𑀢𑀺 𑀅𑀥𑀺𑀝𑁆𑀞𑀸𑀬 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺, 𑀚𑀸𑀮𑀸 𑀉𑀝𑁆𑀞𑀳𑀺𑀁𑀲𑀼. 𑀲𑀭𑀻𑀭𑀁 𑀫𑀚𑁆𑀛𑁂 𑀪𑀺𑀚𑁆𑀚𑀺𑀢𑁆𑀯𑀸 𑀏𑀓𑁄 𑀪𑀸𑀕𑁄 𑀑𑀭𑀺𑀫𑀢𑀻𑀭𑁂 𑀧𑀢𑀺, 𑀏𑀓𑁄 𑀪𑀸𑀕𑁄 𑀧𑀭𑀢𑀻𑀭𑁂. 𑀢𑀢𑁄 𑀫𑀳𑀸𑀚𑀦𑁄 𑀧𑀭𑀺𑀤𑁂𑀯𑀺, 𑀧𑀣𑀯𑀺𑀉𑀦𑁆𑀤𑁆𑀭𑀺𑀬𑀦𑀲𑀤𑁆𑀤𑁄 𑀯𑀺𑀬 𑀆𑀭𑁄𑀤𑀦𑀲𑀤𑁆𑀤𑁄 𑀅𑀳𑁄𑀲𑀺. 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀸𑀦𑁂 𑀆𑀭𑁄𑀤𑀦𑀲𑀤𑁆𑀤𑀢𑁄𑀧𑀺 𑀓𑀸𑀭𑀼𑀜𑁆𑀜𑀢𑀭𑁄 𑀅𑀳𑁄𑀲𑀺. 𑀫𑀦𑀼𑀲𑁆𑀲𑀸 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀭𑁄𑀤𑀦𑁆𑀢𑀸 𑀧𑀭𑀺𑀤𑁂𑀯𑀦𑁆𑀢𑀸 ‘‘𑀲𑀢𑁆𑀣𑀼 𑀧𑀢𑁆𑀢𑀘𑀻𑀯𑀭𑀕𑁆𑀕𑀸𑀳𑀓𑁂 𑀢𑀺𑀝𑁆𑀞𑀦𑁆𑀢𑁂 𑀲𑀢𑁆𑀣𑀼 𑀞𑀺𑀢𑀓𑀸𑀮𑁄 𑀯𑀺𑀬 𑀦𑁄 𑀅𑀳𑁄𑀲𑀺, 𑀇𑀤𑀸𑀦𑀺 𑀦𑁄 𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺 𑀯𑀺𑀧𑁆𑀧𑀮𑀧𑀦𑁆𑀢𑀸 𑀯𑀺𑀭𑀯𑀦𑁆𑀢𑀸 𑀯𑀺𑀘𑀭𑀺𑀁𑀲𑀽𑀢𑀺.

𑀧𑀼𑀦 𑀲𑀢𑁆𑀣𑀸 𑀲𑀸𑀫𑀡𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀢𑀺𑀲𑁆𑀲, 𑀇𑀫𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀤𑀻𑀧𑀺𑀆𑀤𑀻𑀦𑀁 𑀲𑀤𑁆𑀤𑁂𑀦 𑀪𑀸𑀬𑀲𑀺, 𑀦 𑀪𑀸𑀬𑀲𑀻’’𑀢𑀺? ‘‘𑀦 𑀪𑀸𑀬𑀸𑀫𑀺 𑀪𑀕𑀯𑀸, 𑀅𑀧𑀺𑀘 𑀔𑁄 𑀧𑀦 𑀫𑁂 𑀏𑀢𑁂𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀯𑀦𑀭𑀢𑀺 𑀦𑀸𑀫 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀯𑀸 𑀲𑀝𑁆𑀞𑀺𑀫𑀢𑁆𑀢𑀸𑀳𑀺 𑀕𑀸𑀣𑀸𑀳𑀺 𑀯𑀦𑀯𑀡𑁆𑀡𑀦𑀁 𑀦𑀸𑀫 𑀓𑀣𑁂𑀲𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀢𑀺𑀲𑁆𑀲𑀸’’𑀢𑀺 𑀆𑀫𑀦𑁆𑀢𑁂𑀲𑀺. ‘‘𑀓𑀺𑀁, 𑀪𑀦𑁆𑀢𑁂’’𑀢𑀺? ‘‘𑀫𑀬𑀁 𑀕𑀘𑁆𑀙𑀸𑀫, 𑀢𑁆𑀯𑀁 𑀕𑀫𑀺𑀲𑁆𑀲𑀲𑀺, 𑀦𑀺𑀯𑀢𑁆𑀢𑀺𑀲𑁆𑀲𑀲𑀻’’𑀢𑀺. ‘‘𑀫𑀬𑁆𑀳𑀁 𑀉𑀧𑀚𑁆𑀛𑀸𑀬𑁂 𑀫𑀁 𑀆𑀤𑀸𑀬 𑀕𑀘𑁆𑀙𑀦𑁆𑀢𑁂 𑀕𑀫𑀺𑀲𑁆𑀲𑀸𑀫𑀺, 𑀦𑀺𑀯𑀢𑁆𑀢𑁂𑀦𑁆𑀢𑁂 𑀦𑀺𑀯𑀢𑁆𑀢𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺. 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀓𑁆𑀓𑀸𑀫𑀺. 𑀲𑀸𑀫𑀡𑁂𑀭𑀲𑁆𑀲 𑀧𑀦 𑀦𑀺𑀯𑀢𑁆𑀢𑀺𑀢𑀼𑀫𑁂𑀯 𑀅𑀚𑁆𑀛𑀸𑀲𑀬𑁄, 𑀣𑁂𑀭𑁄 𑀢𑀁 𑀜𑀢𑁆𑀯𑀸 ‘‘𑀢𑀺𑀲𑁆𑀲, 𑀲𑀘𑁂 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑁄, 𑀦𑀺𑀯𑀢𑁆𑀢𑀸’’𑀢𑀺 𑀆𑀳. 𑀲𑁄 𑀲𑀢𑁆𑀣𑀸𑀭𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀲𑀢𑁆𑀣𑀸 𑀚𑁂𑀢𑀯𑀦𑀫𑁂𑀯 𑀅𑀕𑀫𑀸𑀲𑀺.

𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀲𑀪𑀸𑀬𑀁 𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀅𑀳𑁄 𑀯𑀢 𑀯𑀦𑀯𑀸𑀲𑀻𑀢𑀺𑀲𑁆𑀲𑀲𑀸𑀫𑀡𑁂𑀭𑁄 𑀤𑀼𑀓𑁆𑀓𑀭𑀁 𑀓𑀭𑁄𑀢𑀺, 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬𑀲𑁆𑀲 𑀜𑀸𑀢𑀓𑀸 𑀲𑀢𑁆𑀢𑀲𑀼 𑀫𑀗𑁆𑀕𑀮𑁂𑀲𑀼 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀅𑀧𑁆𑀧𑁄𑀤𑀓𑀫𑀥𑀼𑀧𑀸𑀬𑀲𑀫𑁂𑀯 𑀅𑀤𑀁𑀲𑀼, 𑀧𑀩𑁆𑀩𑀚𑀺𑀢𑀓𑀸𑀮𑁂 𑀅𑀦𑁆𑀢𑁄𑀯𑀺𑀳𑀸𑀭𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀅𑀧𑁆𑀧𑁄𑀤𑀓𑀫𑀥𑀼𑀧𑀸𑀬𑀲𑀫𑁂𑀯 𑀅𑀤𑀁𑀲𑀼. 𑀧𑀩𑁆𑀩𑀚𑀺𑀢𑁆𑀯𑀸 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀲𑀦𑁆𑀢𑁄 𑀤𑁆𑀯𑀻𑀳𑁂𑀯 𑀤𑀺𑀯𑀲𑁂𑀳𑀺 𑀲𑀸𑀝𑀓𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀧𑀺𑀡𑁆𑀟𑀧𑀸𑀢𑀲𑀳𑀲𑁆𑀲𑀁 𑀮𑀪𑀺, 𑀧𑀼𑀦𑁂𑀓𑀤𑀺𑀯𑀲𑀁 𑀓𑀫𑁆𑀩𑀮𑀲𑀳𑀲𑁆𑀲𑀁 𑀮𑀪𑀺. 𑀇𑀢𑀺𑀲𑁆𑀲 𑀇𑀥 𑀯𑀲𑀦𑀓𑀸𑀮𑁂 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀺, 𑀇𑀤𑀸𑀦𑀺 𑀏𑀯𑀭𑀽𑀧𑀁 𑀮𑀸𑀪𑀲𑀓𑁆𑀓𑀸𑀭𑀁 𑀙𑀟𑁆𑀟𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀫𑀺𑀲𑁆𑀲𑀓𑀸𑀳𑀸𑀭𑁂𑀦 𑀬𑀸𑀧𑁂𑀢𑀺, 𑀤𑀼𑀓𑁆𑀓𑀭𑀓𑀸𑀭𑀓𑁄 𑀯𑀢 𑀢𑀺𑀲𑁆𑀲𑀲𑀸𑀫𑀡𑁂𑀭𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸, ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀆𑀫, 𑀪𑀺𑀓𑁆𑀔𑀯𑁂, 𑀮𑀸𑀪𑀽𑀧𑀦𑀺𑀲𑀸 𑀦𑀸𑀫𑁂𑀲𑀸 𑀅𑀜𑁆𑀜𑀸, 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀜𑁆𑀜𑀸. ‘𑀏𑀯𑀁 𑀮𑀸𑀪𑀁 𑀮𑀪𑀺𑀲𑁆𑀲𑀸𑀫𑀻’𑀢𑀺 𑀳𑀺 𑀆𑀭𑀜𑁆𑀜𑀺𑀓𑀸𑀤𑀺𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀯𑀲𑁂𑀦 𑀮𑀸𑀪𑀽𑀧𑀦𑀺𑀲𑀁 𑀭𑀓𑁆𑀔𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀯𑀺𑀯𑀝𑀤𑁆𑀯𑀸𑀭𑀸 𑀏𑀯 𑀢𑀺𑀝𑁆𑀞𑀦𑁆𑀢𑀺, 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀬𑀸 𑀧𑀦 𑀧𑀝𑀺𑀧𑀤𑀸𑀬 𑀉𑀧𑁆𑀧𑀦𑁆𑀦𑀁 𑀮𑀸𑀪𑀲𑀓𑁆𑀓𑀸𑀭𑀁 𑀧𑀳𑀸𑀬 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀻’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁭𑁫. ‘‘𑀅𑀜𑁆𑀜𑀸 𑀳𑀺 𑀮𑀸𑀪𑀽𑀧𑀦𑀺𑀲𑀸, 𑀅𑀜𑁆𑀜𑀸 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻;

𑀏𑀯𑀫𑁂𑀢𑀁 𑀅𑀪𑀺𑀜𑁆𑀜𑀸𑀬, 𑀪𑀺𑀓𑁆𑀔𑀼 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄;

𑀲𑀓𑁆𑀓𑀸𑀭𑀁 𑀦𑀸𑀪𑀺𑀦𑀦𑁆𑀤𑁂𑀬𑁆𑀬, 𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀬𑁂’’𑀢𑀺.

𑀢𑀢𑁆𑀣 𑀅𑀜𑁆𑀜𑀸 𑀳𑀺 𑀮𑀸𑀪𑀽𑀧𑀦𑀺𑀲𑀸, 𑀅𑀜𑁆𑀜𑀸 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻𑀢𑀺 𑀮𑀸𑀪𑀽𑀧𑀦𑀺𑀲𑀸 𑀦𑀸𑀫𑁂𑀲𑀸 𑀅𑀜𑁆𑀜𑀸 𑀏𑀯, 𑀅𑀜𑁆𑀜𑀸 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀮𑀸𑀪𑀼𑀧𑁆𑀧𑀸𑀤𑀓𑁂𑀦 𑀳𑀺 𑀪𑀺𑀓𑁆𑀔𑀼𑀦𑀸 𑀣𑁄𑀓𑀁 𑀅𑀓𑀼𑀲𑀮𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀓𑀸𑀬𑀯𑀗𑁆𑀓𑀸𑀤𑀻𑀦𑀺 𑀓𑀸𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺. 𑀬𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀓𑀸𑀬𑀯𑀗𑁆𑀓𑀸𑀤𑀻𑀲𑀼 𑀓𑀺𑀜𑁆𑀘𑀺 𑀓𑀭𑁄𑀢𑀺, 𑀢𑀤𑀸 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺. 𑀧𑀸𑀬𑀲𑀧𑀸𑀢𑀺𑀬𑀜𑁆𑀳𑀺 𑀯𑀗𑁆𑀓𑀁 𑀅𑀓𑀢𑁆𑀯𑀸 𑀉𑀚𑀼𑀓𑀫𑁂𑀯 𑀳𑀢𑁆𑀣𑀁 𑀑𑀢𑀸𑀭𑁂𑀢𑁆𑀯𑀸 𑀉𑀓𑁆𑀔𑀺𑀧𑀦𑁆𑀢𑀲𑁆𑀲 𑀳𑀢𑁆𑀣𑁄 𑀫𑀓𑁆𑀔𑀺𑀢𑀫𑀢𑁆𑀢𑀓𑁄𑀯 𑀳𑁄𑀢𑀺, 𑀯𑀗𑁆𑀓𑀁 𑀓𑀢𑁆𑀯𑀸 𑀑𑀢𑀸𑀭𑁂𑀢𑁆𑀯𑀸 𑀉𑀓𑁆𑀔𑀺𑀧𑀦𑁆𑀢𑀲𑁆𑀲 𑀧𑀦 𑀧𑀸𑀬𑀲𑀧𑀺𑀡𑁆𑀟𑀁 𑀉𑀤𑁆𑀥𑀭𑀦𑁆𑀢𑁄𑀯 𑀦𑀺𑀓𑁆𑀔𑀫𑀢𑀺, 𑀏𑀯𑀁 𑀓𑀸𑀬𑀯𑀗𑁆𑀓𑀸𑀤𑀻𑀦𑀺 𑀓𑀭𑀡𑀓𑀸𑀮𑁂𑀬𑁂𑀯 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀅𑀥𑀫𑁆𑀫𑀺𑀓𑀸 𑀮𑀸𑀪𑀽𑀧𑀦𑀺𑀲𑁆𑀲𑀸 𑀦𑀸𑀫. 𑀉𑀧𑀥𑀺𑀲𑀫𑁆𑀧𑀤𑀸 𑀘𑀻𑀯𑀭𑀥𑀸𑀭𑀡𑀁 𑀩𑀸𑀳𑀼𑀲𑀘𑁆𑀘𑀁 𑀧𑀭𑀺𑀯𑀸𑀭𑁄 𑀅𑀭𑀜𑁆𑀜𑀯𑀸𑀲𑁄𑀢𑀺 𑀏𑀯𑀭𑀽𑀧𑁂𑀳𑀺 𑀧𑀦 𑀓𑀸𑀭𑀡𑁂𑀳𑀺 𑀉𑀧𑁆𑀧𑀦𑁆𑀦𑁄 𑀮𑀸𑀪𑁄 𑀥𑀫𑁆𑀫𑀺𑀓𑁄 𑀦𑀸𑀫 𑀳𑁄𑀢𑀺. 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀽𑀭𑁂𑀦𑁆𑀢𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀓𑀸𑀬𑀯𑀗𑁆𑀓𑀸𑀤𑀻𑀦𑀺 𑀧𑀳𑀸𑀢𑀩𑁆𑀩𑀸𑀦𑀺. 𑀅𑀦𑀦𑁆𑀥𑁂𑀦𑁂𑀯 𑀅𑀦𑁆𑀥𑁂𑀦 𑀯𑀺𑀬, 𑀅𑀫𑀽𑀕𑁂𑀦𑁂𑀯 𑀫𑀽𑀕𑁂𑀦 𑀯𑀺𑀬, 𑀅𑀩𑀥𑀺𑀭𑁂𑀦𑁂𑀯 𑀩𑀥𑀺𑀭𑁂𑀦 𑀯𑀺𑀬 𑀪𑀯𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀲𑀞𑁂𑀦 𑀅𑀫𑀸𑀬𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀫𑁂𑀢𑀦𑁆𑀢𑀺 𑀏𑀢𑀁 𑀮𑀸𑀪𑀼𑀧𑁆𑀧𑀸𑀤𑀦𑀁 𑀧𑀝𑀺𑀧𑀤𑀜𑁆𑀘 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀜𑁆𑀘 𑀏𑀯𑀁 𑀜𑀢𑁆𑀯𑀸 𑀲𑀩𑁆𑀩𑁂𑀲𑀁 𑀲𑀗𑁆𑀔𑀢𑀸𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀩𑀼𑀚𑁆𑀛𑀦𑀝𑁆𑀞𑁂𑀦 𑀩𑀼𑀤𑁆𑀥𑀲𑁆𑀲 𑀲𑀯𑀦𑀦𑁆𑀢𑁂 𑀚𑀸𑀢𑀝𑁆𑀞𑁂𑀦 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀯𑀸 𑀲𑀯𑀦𑀝𑁆𑀞𑁂𑀦 𑀲𑀸𑀯𑀓𑁄 𑀪𑀺𑀓𑁆𑀔𑀼 𑀅𑀥𑀫𑁆𑀫𑀺𑀓𑀁 𑀘𑀢𑀼𑀧𑀘𑁆𑀘𑀬𑀲𑀓𑁆𑀓𑀸𑀭𑀁 𑀦𑀸𑀪𑀺𑀦𑀦𑁆𑀤𑁂𑀬𑁆𑀬, 𑀦 𑀘𑁂𑀯 𑀥𑀫𑁆𑀫𑀺𑀓𑀁 𑀧𑀝𑀺𑀓𑁆𑀓𑁄𑀲𑁂𑀬𑁆𑀬, 𑀓𑀸𑀬𑀯𑀺𑀯𑁂𑀓𑀸𑀤𑀺𑀓𑀁 𑀯𑀺𑀯𑁂𑀓𑀁 𑀅𑀦𑀼𑀩𑁆𑀭𑀽𑀳𑀬𑁂. 𑀢𑀢𑁆𑀣 𑀓𑀸𑀬𑀯𑀺𑀯𑁂𑀓𑁄𑀢𑀺 𑀓𑀸𑀬𑀲𑁆𑀲 𑀏𑀓𑀻𑀪𑀸𑀯𑁄. 𑀘𑀺𑀢𑁆𑀢𑀯𑀺𑀯𑁂𑀓𑁄𑀢𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄. 𑀉𑀧𑀥𑀺𑀯𑀺𑀯𑁂𑀓𑁄𑀢𑀺 𑀦𑀺𑀩𑁆𑀩𑀸𑀦𑀁. 𑀢𑁂𑀲𑀼 𑀓𑀸𑀬𑀯𑀺𑀯𑁂𑀓𑁄 𑀕𑀡𑀲𑀗𑁆𑀕𑀡𑀺𑀓𑀁 𑀯𑀺𑀦𑁄𑀤𑁂𑀢𑀺, 𑀘𑀺𑀢𑁆𑀢𑀯𑀺𑀯𑁂𑀓𑁄 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀁 𑀯𑀺𑀦𑁄𑀤𑁂𑀢𑀺, 𑀉𑀧𑀥𑀺𑀯𑀺𑀯𑁂𑀓𑁄 𑀲𑀗𑁆𑀔𑀸𑀭𑀲𑀗𑁆𑀕𑀡𑀺𑀓𑀁 𑀯𑀺𑀦𑁄𑀤𑁂𑀢𑀺. 𑀓𑀸𑀬𑀯𑀺𑀯𑁂𑀓𑁄 𑀘𑀺𑀢𑁆𑀢𑀯𑀺𑀯𑁂𑀓𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀘𑀺𑀢𑁆𑀢𑀯𑀺𑀯𑁂𑀓𑁄 𑀉𑀧𑀥𑀺𑀯𑀺𑀯𑁂𑀓𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺𑀳𑁂𑀢𑀁 𑁋

‘‘𑀓𑀸𑀬𑀯𑀺𑀯𑁂𑀓𑁄 𑀘 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀁 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀁, 𑀘𑀺𑀢𑁆𑀢𑀯𑀺𑀯𑁂𑀓𑁄 𑀘 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀁, 𑀉𑀧𑀥𑀺𑀯𑀺𑀯𑁂𑀓𑁄 𑀘 𑀦𑀺𑀭𑀼𑀧𑀥𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀲𑀗𑁆𑀔𑀸𑀭𑀕𑀢𑀸𑀦’’𑀦𑁆𑀢𑀺 (𑀫𑀳𑀸𑀦𑀺. 𑁧𑁫𑁦). 𑁋

𑀇𑀫𑀁 𑀢𑀺𑀯𑀺𑀥𑀫𑁆𑀧𑀺 𑀯𑀺𑀯𑁂𑀓𑀁 𑀩𑁆𑀭𑀽𑀳𑁂𑀬𑁆𑀬 𑀯𑀟𑁆𑀠𑁂𑀬𑁆𑀬, 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀯𑀦𑀯𑀸𑀲𑀻𑀢𑀺𑀲𑁆𑀲𑀲𑀸𑀫𑀡𑁂𑀭𑀯𑀢𑁆𑀣𑀼 𑀧𑀦𑁆𑀦𑀭𑀲𑀫𑀁.

𑀩𑀸𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀫𑁄 𑀯𑀕𑁆𑀕𑁄.