𑁬. 𑀧𑀡𑁆𑀟𑀺𑀢𑀯𑀕𑁆𑀕𑁄

𑁧. 𑀭𑀸𑀥𑀢𑁆𑀣𑁂𑀭𑀯𑀢𑁆𑀣𑀼

𑀦𑀺𑀥𑀻𑀦𑀁𑀯 𑀧𑀯𑀢𑁆𑀢𑀸𑀭𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀭𑀸𑀥𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀕𑀺𑀳𑀺𑀓𑀸𑀮𑁂 𑀲𑀸𑀯𑀢𑁆𑀣𑀺𑀬𑀁 𑀤𑀼𑀕𑁆𑀕𑀢𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺. 𑀲𑁄 ‘‘𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀧𑁆𑀧𑀳𑀭𑀺𑀢𑀓𑀁 𑀓𑀭𑁄𑀦𑁆𑀢𑁄 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀦𑁆𑀢𑁄 𑀫𑀼𑀔𑀥𑁄𑀯𑀦𑀸𑀤𑀻𑀦𑀺 𑀤𑀤𑀦𑁆𑀢𑁄 𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀯𑀲𑀺. 𑀪𑀺𑀓𑁆𑀔𑀽𑀧𑀺 𑀦𑀁 𑀲𑀗𑁆𑀕𑀡𑁆𑀳𑀺𑀁𑀲𑀼, 𑀧𑀩𑁆𑀩𑀸𑀚𑁂𑀢𑀼𑀁 𑀧𑀦 𑀦 𑀇𑀘𑁆𑀙𑀦𑁆𑀢𑀺. 𑀲𑁄 𑀧𑀩𑁆𑀩𑀚𑁆𑀚𑀁 𑀅𑀮𑀪𑀫𑀸𑀦𑁄 𑀓𑀺𑀲𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀧𑀘𑁆𑀘𑀽𑀲𑀓𑀸𑀮𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀅𑀭𑀳𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀯𑀺𑀳𑀸𑀭𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀯𑀺𑀬 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀩𑁆𑀭𑀸𑀳𑁆𑀫𑀡, 𑀓𑀺𑀁 𑀓𑀭𑁄𑀦𑁆𑀢𑁄 𑀯𑀺𑀘𑀭𑀲𑀻’’𑀢𑀺 𑀆𑀳. ‘‘𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀭𑁄𑀦𑁆𑀢𑁄, 𑀪𑀦𑁆𑀢𑁂’’𑀢𑀺. ‘‘𑀮𑀪𑀲𑀺 𑀦𑁂𑀲𑀁 𑀲𑀦𑁆𑀢𑀺𑀓𑀸 𑀲𑀗𑁆𑀕𑀳’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂, 𑀆𑀳𑀸𑀭𑀫𑀢𑁆𑀢𑀁 𑀮𑀪𑀸𑀫𑀺, 𑀦 𑀧𑀦 𑀫𑀁 𑀧𑀩𑁆𑀩𑀸𑀚𑁂𑀦𑁆𑀢𑀻’’𑀢𑀺. 𑀲𑀢𑁆𑀣𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺 𑀓𑁄𑀘𑀺 𑀇𑀫𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀥𑀺𑀓𑀸𑀭𑀁 𑀲𑀭𑀢𑀻’’𑀢𑀺 𑀧𑀼𑀘𑁆𑀙𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 ‘‘𑀅𑀳𑀁, 𑀪𑀦𑁆𑀢𑁂, 𑀲𑀭𑀸𑀫𑀺, 𑀅𑀬𑀁 𑀫𑁂 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲 𑀅𑀢𑁆𑀢𑀦𑁄 𑀅𑀪𑀺𑀳𑀝𑀁 𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀸𑀧𑁂𑀲𑀺, 𑀇𑀫𑀫𑀲𑁆𑀲𑀸𑀳𑀁 𑀅𑀥𑀺𑀓𑀸𑀭𑀁 𑀲𑀭𑀸𑀫𑀻’’𑀢𑀺 𑀆𑀳. 𑀲𑁄 𑀲𑀢𑁆𑀣𑀸𑀭𑀸 ‘‘𑀓𑀺𑀁 𑀧𑀦 𑀢𑁂, 𑀲𑀸𑀭𑀺𑀧𑀼𑀢𑁆𑀢, 𑀏𑀯𑀁 𑀓𑀢𑀽𑀧𑀓𑀸𑀭𑀁 𑀤𑀼𑀓𑁆𑀔𑀢𑁄 𑀫𑁄𑀘𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑁂, ‘‘𑀲𑀸𑀥𑀼, 𑀪𑀦𑁆𑀢𑁂, 𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀧𑀩𑁆𑀩𑀸𑀚𑁂𑀲𑀺. 𑀢𑀲𑁆𑀲 𑀪𑀢𑁆𑀢𑀕𑁆𑀕𑁂 𑀆𑀲𑀦𑀧𑀭𑀺𑀬𑀦𑁆𑀢𑁂 𑀆𑀲𑀦𑀁 𑀧𑀸𑀧𑀼𑀡𑀸𑀢𑀺, 𑀬𑀸𑀕𑀼𑀪𑀢𑁆𑀢𑀸𑀤𑀻𑀳𑀺𑀧𑀺 𑀓𑀺𑀮𑀫𑀢𑀺. 𑀣𑁂𑀭𑁄 𑀢𑀁 𑀆𑀤𑀸𑀬 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺, 𑀅𑀪𑀺𑀓𑁆𑀔𑀡𑀜𑁆𑀘 𑀦𑀁 ‘‘𑀇𑀤𑀁 𑀢𑁂 𑀓𑀢𑁆𑀢𑀩𑁆𑀩𑀁, 𑀇𑀤𑀁 𑀢𑁂 𑀦 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀑𑀯𑀤𑀺 𑀅𑀦𑀼𑀲𑀸𑀲𑀺. 𑀲𑁄 𑀲𑀼𑀯𑀘𑁄 𑀅𑀳𑁄𑀲𑀺 𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻. 𑀢𑀲𑁆𑀫𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁄 𑀓𑀢𑀺𑀧𑀸𑀳𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀣𑁂𑀭𑁄 𑀢𑀁 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑀢𑁆𑀣𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀆𑀳 𑁋 ‘‘𑀲𑀼𑀯𑀘𑁄 𑀦𑀼 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀢𑁂 𑀅𑀦𑁆𑀢𑁂𑀯𑀸𑀲𑀺𑀓𑁄’’𑀢𑀺. ‘‘𑀆𑀫, 𑀪𑀦𑁆𑀢𑁂, 𑀅𑀢𑀺𑀯𑀺𑀬 𑀲𑀼𑀯𑀘𑁄, 𑀓𑀺𑀲𑁆𑀫𑀺𑀜𑁆𑀘𑀺 𑀤𑁄𑀲𑁂 𑀯𑀼𑀘𑁆𑀘𑀫𑀸𑀦𑁂 𑀦 𑀓𑀼𑀤𑁆𑀥𑀧𑀼𑀩𑁆𑀩𑁄’’𑀢𑀺. ‘‘𑀲𑀸𑀭𑀺𑀧𑀼𑀢𑁆𑀢, 𑀏𑀯𑀭𑀽𑀧𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂 𑀮𑀪𑀦𑁆𑀢𑁄 𑀓𑀺𑀢𑁆𑀢𑀓𑁂 𑀕𑀡𑁆𑀳𑁂𑀬𑁆𑀬𑀸𑀲𑀻’’𑀢𑀺? ‘‘𑀪𑀦𑁆𑀢𑁂, 𑀩𑀳𑀼𑀓𑁂𑀧𑀺 𑀕𑀡𑁆𑀳𑁂𑀬𑁆𑀬𑀫𑁂𑀯𑀸’’𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀓𑀺𑀭 𑀓𑀢𑀜𑁆𑀜𑀽 𑀓𑀢𑀯𑁂𑀤𑀻, 𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀫𑀢𑁆𑀢𑀁 𑀉𑀧𑀓𑀸𑀭𑀁 𑀲𑀭𑀺𑀢𑁆𑀯𑀸 𑀤𑀼𑀕𑁆𑀕𑀢𑀩𑁆𑀭𑀸𑀳𑁆𑀫𑀡𑀁 𑀧𑀩𑁆𑀩𑀸𑀚𑁂𑀲𑀺. 𑀣𑁂𑀭𑁄𑀧𑀺 𑀑𑀯𑀸𑀤𑀓𑁆𑀔𑀫𑁄 𑀑𑀯𑀸𑀤𑀓𑁆𑀔𑀫𑀫𑁂𑀯 𑀮𑀪𑀻’’𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀲𑀸𑀭𑀺𑀧𑀼𑀢𑁆𑀢𑁄 𑀓𑀢𑀜𑁆𑀜𑀽 𑀓𑀢𑀯𑁂𑀤𑀻𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑁋

‘‘𑀅𑀮𑀻𑀦𑀘𑀺𑀢𑁆𑀢𑀁 𑀦𑀺𑀲𑁆𑀲𑀸𑀬, 𑀧𑀳𑀝𑁆𑀞𑀸 𑀫𑀳𑀢𑀻 𑀘𑀫𑀽;

𑀓𑁄𑀲𑀮𑀁 𑀲𑁂𑀦𑀸𑀲𑀦𑁆𑀢𑀼𑀝𑁆𑀞𑀁, 𑀚𑀻𑀯𑀕𑁆𑀕𑀸𑀳𑀁 𑀅𑀕𑀸𑀳𑀬𑀺.

‘‘𑀏𑀯𑀁 𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄, 𑀪𑀺𑀓𑁆𑀔𑀼 𑀆𑀭𑀤𑁆𑀥𑀯𑀻𑀭𑀺𑀬𑁄;

𑀪𑀸𑀯𑀬𑀁 𑀓𑀼𑀲𑀮𑀁 𑀥𑀫𑁆𑀫𑀁, 𑀬𑁄𑀕𑀓𑁆𑀔𑁂𑀫𑀲𑁆𑀲 𑀧𑀢𑁆𑀢𑀺𑀬𑀸;

𑀧𑀸𑀧𑀼𑀡𑁂 𑀅𑀦𑀼𑀧𑀼𑀩𑁆𑀩𑁂𑀦, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬’’𑀦𑁆𑀢𑀺. (𑀚𑀸. 𑁧.𑁨.𑁧𑁧-𑁧𑁨) 𑁋

𑀇𑀫𑀁 𑀤𑀼𑀓𑀦𑀺𑀧𑀸𑀢𑁂 𑀅𑀮𑀻𑀦𑀘𑀺𑀢𑁆𑀢𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀲𑀺. 𑀢𑀤𑀸 𑀓𑀺𑀭 𑀯𑀟𑁆𑀠𑀓𑀻𑀳𑀺 𑀧𑀸𑀤𑀲𑁆𑀲 𑀅𑀭𑁄𑀕𑀓𑀭𑀡𑀪𑀸𑀯𑁂𑀦 𑀓𑀳𑀁 𑀅𑀢𑁆𑀢𑀦𑁄 𑀉𑀧𑀓𑀸𑀭𑀁 𑀜𑀢𑁆𑀯𑀸 𑀲𑀩𑁆𑀩𑀲𑁂𑀢𑀲𑁆𑀲 𑀳𑀢𑁆𑀣𑀺𑀧𑁄𑀢𑀓𑀲𑁆𑀲 𑀤𑀸𑀬𑀓𑁄 𑀏𑀓𑀘𑀸𑀭𑀺𑀓𑁄 𑀳𑀢𑁆𑀣𑀻 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀅𑀳𑁄𑀲𑀻𑀢𑀺 𑀏𑀯𑀁 𑀣𑁂𑀭𑀁 𑀆𑀭𑀩𑁆𑀪 𑀚𑀸𑀢𑀓𑀁 𑀓𑀣𑁂𑀢𑁆𑀯𑀸 𑀭𑀸𑀥𑀢𑁆𑀣𑁂𑀭𑀁 𑀆𑀭𑀩𑁆𑀪, ‘‘𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀭𑀸𑀥𑁂𑀦 𑀯𑀺𑀬 𑀲𑀼𑀯𑀘𑁂𑀦 𑀪𑀯𑀺𑀢𑀩𑁆𑀩𑀁, 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀑𑀯𑀤𑀺𑀬𑀫𑀸𑀦𑁂𑀦𑀧𑀺 𑀦 𑀓𑀼𑀚𑁆𑀛𑀺𑀢𑀩𑁆𑀩𑀁, 𑀑𑀯𑀸𑀤𑀤𑀸𑀬𑀓𑁄 𑀧𑀦 𑀦𑀺𑀥𑀺𑀆𑀘𑀺𑀓𑁆𑀔𑀡𑀓𑁄 𑀯𑀺𑀬 𑀤𑀝𑁆𑀞𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁭𑁬. ‘‘𑀦𑀺𑀥𑀻𑀦𑀁𑀯 𑀧𑀯𑀢𑁆𑀢𑀸𑀭𑀁, 𑀬𑀁 𑀧𑀲𑁆𑀲𑁂 𑀯𑀚𑁆𑀚𑀤𑀲𑁆𑀲𑀺𑀦𑀁;

𑀦𑀺𑀕𑁆𑀕𑀬𑁆𑀳𑀯𑀸𑀤𑀺𑀁 𑀫𑁂𑀥𑀸𑀯𑀺𑀁, 𑀢𑀸𑀤𑀺𑀲𑀁 𑀧𑀡𑁆𑀟𑀺𑀢𑀁 𑀪𑀚𑁂;

𑀢𑀸𑀤𑀺𑀲𑀁 𑀪𑀚𑀫𑀸𑀦𑀲𑁆𑀲, 𑀲𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀧𑀺𑀬𑁄’’𑀢𑀺.

𑀢𑀢𑁆𑀣 𑀦𑀺𑀥𑀻𑀦𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀸𑀦𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀧𑀽𑀭𑀸𑀦𑀁 𑀦𑀺𑀥𑀺𑀓𑀼𑀫𑁆𑀪𑀻𑀦𑀁. 𑀧𑀯𑀢𑁆𑀢𑀸𑀭𑀦𑁆𑀢𑀺 𑀓𑀺𑀘𑁆𑀙𑀚𑀻𑀯𑀺𑀓𑁂 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁂 𑀅𑀦𑀼𑀓𑀫𑁆𑀧𑀁 𑀓𑀢𑁆𑀯𑀸 ‘‘𑀏𑀳𑀺, 𑀲𑀼𑀔𑁂𑀦 𑀚𑀻𑀯𑀦𑀽𑀧𑀸𑀬𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀦𑀺𑀥𑀺𑀝𑁆𑀞𑀸𑀦𑀁 𑀦𑁂𑀢𑁆𑀯𑀸 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀇𑀫𑀁 𑀕𑀳𑁂𑀢𑁆𑀯𑀸 𑀲𑀼𑀔𑁂𑀦 𑀚𑀻𑀯𑀸’’𑀢𑀺 𑀆𑀘𑀺𑀓𑁆𑀔𑀺𑀢𑀸𑀭𑀁 𑀯𑀺𑀬. 𑀯𑀚𑁆𑀚𑀤𑀲𑁆𑀲𑀺𑀦𑀦𑁆𑀢𑀺 𑀤𑁆𑀯𑁂 𑀯𑀚𑁆𑀚𑀤𑀲𑁆𑀲𑀺𑀦𑁄 ‘‘𑀇𑀫𑀺𑀦𑀸 𑀦𑀁 𑀅𑀲𑀸𑀭𑀼𑀧𑁆𑀧𑁂𑀦 𑀯𑀸 𑀔𑀮𑀺𑀢𑁂𑀦 𑀯𑀸 𑀲𑀗𑁆𑀖𑀫𑀚𑁆𑀛𑁂 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀭𑀦𑁆𑀥𑀕𑀯𑁂𑀲𑀓𑁄 𑀘, 𑀅𑀜𑁆𑀜𑀸𑀢𑀁 𑀜𑀸𑀧𑀦𑀢𑁆𑀣𑀸𑀬 𑀜𑀸𑀢𑀁 𑀅𑀦𑀼𑀕𑁆𑀕𑀳𑀡𑀢𑁆𑀣𑀸𑀬 𑀲𑀻𑀮𑀸𑀤𑀻𑀦𑀫𑀲𑁆𑀲 𑀯𑀼𑀤𑁆𑀥𑀺𑀓𑀸𑀫𑀢𑀸𑀬 𑀢𑀁 𑀢𑀁 𑀯𑀚𑁆𑀚𑀁 𑀑𑀮𑁄𑀓𑀦𑁂𑀦 𑀉𑀮𑁆𑀮𑀼𑀫𑁆𑀧𑀦𑀲𑀪𑀸𑀯𑀲𑀡𑁆𑀞𑀺𑀢𑁄 𑀘. 𑀅𑀬𑀁 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀬𑀣𑀸 𑀳𑀺 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁄 ‘‘𑀇𑀫𑀁 𑀕𑀡𑁆𑀳𑀸𑀳𑀻’’𑀢𑀺 𑀢𑀚𑁆𑀚𑁂𑀢𑁆𑀯𑀸𑀧𑀺 𑀧𑁄𑀣𑁂𑀢𑁆𑀯𑀸𑀧𑀺 𑀦𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁂 𑀓𑁄𑀧𑀁 𑀦 𑀓𑀭𑁄𑀢𑀺, 𑀧𑀫𑀼𑀤𑀺𑀢𑁄 𑀏𑀯 𑀳𑁄𑀢𑀺, 𑀏𑀯𑀫𑁂𑀯 𑀏𑀯𑀭𑀽𑀧𑁂 𑀧𑀼𑀕𑁆𑀕𑀮𑁂 𑀅𑀲𑀸𑀭𑀼𑀧𑁆𑀧𑀁 𑀯𑀸 𑀔𑀮𑀺𑀢𑀁 𑀯𑀸 𑀤𑀺𑀲𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑁂 𑀓𑁄𑀧𑁄 𑀦 𑀓𑀸𑀢𑀩𑁆𑀩𑁄, 𑀢𑀼𑀝𑁆𑀞𑁂𑀦𑁂𑀯 𑀪𑀯𑀺𑀢𑀩𑁆𑀩𑀁, ‘‘𑀪𑀦𑁆𑀢𑁂, 𑀫𑀳𑀦𑁆𑀢𑀁 𑀯𑁄 𑀓𑀫𑁆𑀫𑀁 𑀓𑀢𑀁, 𑀫𑀬𑁆𑀳𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀑𑀯𑀤𑀦𑁆𑀢𑁂𑀳𑀺 𑀧𑀼𑀦𑀧𑀺 𑀫𑀁 𑀯𑀤𑁂𑀬𑁆𑀬𑀸𑀣𑀸’’𑀢𑀺 𑀧𑀯𑀸𑀭𑁂𑀢𑀩𑁆𑀩𑀫𑁂𑀯. 𑀦𑀺𑀕𑁆𑀕𑀬𑁆𑀳𑀯𑀸𑀤𑀺𑀦𑁆𑀢𑀺 𑀏𑀓𑀘𑁆𑀘𑁄 𑀳𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀁 𑀅𑀲𑀸𑀭𑀼𑀧𑁆𑀧𑀁 𑀯𑀸 𑀔𑀮𑀺𑀢𑀁 𑀯𑀸 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑁂 𑀫𑀼𑀔𑁄𑀤𑀓𑀤𑀸𑀦𑀸𑀤𑀻𑀳𑀺 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀢𑀺, 𑀲𑀘𑁂 𑀦𑀁 𑀯𑀓𑁆𑀔𑀸𑀫𑀺, 𑀦 𑀫𑀁 𑀉𑀧𑀝𑁆𑀞𑀳𑀺𑀲𑁆𑀲𑀢𑀺, 𑀏𑀯𑀁 𑀫𑁂 𑀧𑀭𑀺𑀳𑀸𑀦𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀣𑀼𑀁 𑀅𑀯𑀺𑀲𑀳𑀦𑁆𑀢𑁄 𑀦 𑀦𑀺𑀕𑁆𑀕𑀬𑁆𑀳𑀯𑀸𑀤𑀻 𑀦𑀸𑀫 𑀳𑁄𑀢𑀺. 𑀲𑁄 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀓𑀘𑀯𑀭𑀁 𑀆𑀓𑀺𑀭𑀢𑀺. 𑀬𑁄 𑀧𑀦 𑀢𑀣𑀸𑀭𑀽𑀧𑀁 𑀯𑀚𑁆𑀚𑀁 𑀤𑀺𑀲𑁆𑀯𑀸 𑀯𑀚𑁆𑀚𑀸𑀦𑀼𑀭𑀽𑀧𑀁 𑀢𑀚𑁆𑀚𑁂𑀦𑁆𑀢𑁄 𑀧𑀡𑀸𑀫𑁂𑀦𑁆𑀢𑁄 𑀤𑀡𑁆𑀟𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀺𑀳𑀸𑀭𑀸 𑀢𑀁 𑀦𑀻𑀳𑀭𑀦𑁆𑀢𑁄 𑀲𑀺𑀓𑁆𑀔𑀸𑀧𑁂𑀢𑀺, 𑀅𑀬𑀁 𑀦𑀺𑀕𑁆𑀕𑀬𑁆𑀳𑀯𑀸𑀤𑀻 𑀦𑀸𑀫 𑀲𑁂𑀬𑁆𑀬𑀣𑀸𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀦𑀺𑀕𑁆𑀕𑀬𑁆𑀳 𑀦𑀺𑀕𑁆𑀕𑀬𑁆𑀳𑀸𑀳𑀁, 𑀆𑀦𑀦𑁆𑀤, 𑀯𑀓𑁆𑀔𑀸𑀫𑀺, 𑀧𑀯𑀬𑁆𑀳 𑀧𑀯𑀬𑁆𑀳, 𑀆𑀦𑀦𑁆𑀤, 𑀯𑀓𑁆𑀔𑀸𑀫𑀺, 𑀬𑁄 𑀲𑀸𑀭𑁄 𑀲𑁄 𑀞𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁩.𑁧𑁯𑁬). 𑀫𑁂𑀥𑀸𑀯𑀺𑀦𑁆𑀢𑀺 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀁. 𑀢𑀸𑀤𑀺𑀲𑀦𑁆𑀢𑀺 𑀏𑀯𑀭𑀽𑀧𑀁 𑀧𑀡𑁆𑀟𑀺𑀢𑀁 𑀪𑀚𑁂𑀬𑁆𑀬 𑀧𑀬𑀺𑀭𑀼𑀧𑀸𑀲𑁂𑀬𑁆𑀬. 𑀢𑀸𑀤𑀺𑀲𑀜𑁆𑀳𑀺 𑀆𑀘𑀭𑀺𑀬𑀁 𑀪𑀚𑀫𑀸𑀦𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀲𑁂𑀬𑁆𑀬𑁄 𑀳𑁄𑀢𑀺, 𑀦 𑀧𑀸𑀧𑀺𑀬𑁄 𑀯𑀟𑁆𑀠𑀺𑀬𑁂𑀯 𑀳𑁄𑀢𑀺, 𑀦𑁄 𑀧𑀭𑀺𑀳𑀸𑀦𑀻𑀢𑀺.

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀭𑀸𑀥𑀢𑁆𑀣𑁂𑀭𑀯𑀢𑁆𑀣𑀼 𑀧𑀞𑀫𑀁.

𑁨. 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀯𑀢𑁆𑀣𑀼

𑀑𑀯𑀤𑁂𑀬𑁆𑀬𑀸𑀦𑀼𑀲𑀸𑀲𑁂𑀬𑁆𑀬𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀲𑀦𑀸 𑀧𑀦 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀲𑀫𑀼𑀝𑁆𑀞𑀺𑀢𑀸.

𑀢𑁂 𑀓𑀺𑀭 𑀤𑁆𑀯𑁂 𑀪𑀺𑀓𑁆𑀔𑀽 𑀓𑀺𑀜𑁆𑀘𑀸𑀧𑀺 𑀅𑀕𑁆𑀕𑀲𑀸𑀯𑀓𑀸𑀦𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸, 𑀅𑀮𑀚𑁆𑀚𑀺𑀦𑁄 𑀧𑀦 𑀅𑀳𑁂𑀲𑀼𑀁 𑀧𑀸𑀧𑀪𑀺𑀓𑁆𑀔𑀽. 𑀢𑁂 𑀧𑀸𑀧𑀓𑁂𑀳𑀺 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀳𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀺𑀳𑀭𑀦𑁆𑀢𑀸 ‘‘𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀦𑁆𑀢𑀺𑀧𑀺 𑀭𑁄𑀧𑀸𑀧𑁂𑀦𑁆𑀢𑀺𑀧𑀻’’𑀢𑀺𑀆𑀤𑀺𑀓𑀁 (𑀧𑀸𑀭𑀸. 𑁪𑁩𑁧; 𑀘𑀽𑀴𑀯. 𑁨𑁧) 𑀦𑀸𑀦𑀧𑁆𑀧𑀓𑀸𑀭𑀁 𑀅𑀦𑀸𑀘𑀸𑀭𑀁 𑀓𑀭𑁄𑀦𑁆𑀢𑀸 𑀓𑀼𑀮𑀤𑀽𑀲𑀓𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑁄 𑀉𑀧𑁆𑀧𑀦𑁆𑀦𑁂𑀳𑀺 𑀧𑀘𑁆𑀘𑀬𑁂𑀳𑀺 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀸 𑀢𑀁 𑀆𑀯𑀸𑀲𑀁 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀯𑀸𑀲𑀁 𑀅𑀓𑀁𑀲𑀼. 𑀲𑀢𑁆𑀣𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀢𑁂𑀲𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀭𑀡𑀢𑁆𑀣𑀸𑀬 𑀲𑀧𑀭𑀺𑀯𑀸𑀭𑁂 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀕𑀘𑁆𑀙𑀣, 𑀲𑀸𑀭𑀺𑀧𑀼𑀢𑁆𑀢𑀸, 𑀢𑁂𑀲𑀼 𑀬𑁂 𑀢𑀼𑀫𑁆𑀳𑀸𑀓𑀁 𑀯𑀘𑀦𑀁 𑀦 𑀓𑀭𑁄𑀦𑁆𑀢𑀺, 𑀢𑁂𑀲𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀣, 𑀬𑁂 𑀧𑀦 𑀓𑀭𑁄𑀦𑁆𑀢𑀺, 𑀢𑁂 𑀑𑀯𑀤𑀣 𑀅𑀦𑀼𑀲𑀸𑀲𑀣. 𑀑𑀯𑀤𑀦𑁆𑀢𑁄 𑀳𑀺 𑀅𑀦𑀼𑀲𑀸𑀲𑀦𑁆𑀢𑁄 𑀅𑀧𑀡𑁆𑀟𑀺𑀢𑀸𑀦𑀁𑀬𑁂𑀯 𑀅𑀧𑁆𑀧𑀺𑀬𑁄 𑀳𑁄𑀢𑀺 𑀅𑀫𑀦𑀸𑀧𑁄, 𑀧𑀡𑁆𑀟𑀺𑀢𑀸𑀦𑀁 𑀧𑀦 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁭𑁭. ‘‘𑀑𑀯𑀤𑁂𑀬𑁆𑀬𑀸𑀦𑀼𑀲𑀸𑀲𑁂𑀬𑁆𑀬, 𑀅𑀲𑀩𑁆𑀪𑀸 𑀘 𑀦𑀺𑀯𑀸𑀭𑀬𑁂;

𑀲𑀢𑀜𑁆𑀳𑀺 𑀲𑁄 𑀧𑀺𑀬𑁄 𑀳𑁄𑀢𑀺, 𑀅𑀲𑀢𑀁 𑀳𑁄𑀢𑀺 𑀅𑀧𑁆𑀧𑀺𑀬𑁄’’𑀢𑀺.

𑀢𑀢𑁆𑀣 𑀑𑀯𑀤𑁂𑀬𑁆𑀬𑀸𑀢𑀺 𑀉𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀲𑁆𑀫𑀺𑀁 𑀯𑀤𑀦𑁆𑀢𑁄 𑀑𑀯𑀤𑀢𑀺 𑀦𑀸𑀫, 𑀅𑀦𑀼𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀬𑀲𑁄𑀧𑀺 𑀢𑁂 𑀲𑀺𑀬𑀸’’𑀢𑀺𑀆𑀤𑀺𑀯𑀲𑁂𑀦 𑀅𑀦𑀸𑀕𑀢𑀁 𑀤𑀲𑁆𑀲𑁂𑀦𑁆𑀢𑁄 𑀅𑀦𑀼𑀲𑀸𑀲𑀢𑀺 𑀦𑀸𑀫. 𑀲𑀫𑁆𑀫𑀼𑀔𑀸 𑀯𑀤𑀦𑁆𑀢𑁄 𑀑𑀯𑀤𑀢𑀺 𑀦𑀸𑀫, 𑀧𑀭𑀫𑁆𑀫𑀼𑀔𑀸 𑀤𑀽𑀢𑀁 𑀯𑀸 𑀲𑀸𑀲𑀦𑀁 𑀯𑀸 𑀧𑁂𑀲𑁂𑀦𑁆𑀢𑁄 𑀅𑀦𑀼𑀲𑀸𑀲𑀢𑀺 𑀦𑀸𑀫. 𑀲𑀓𑀺𑀁 𑀯𑀤𑀦𑁆𑀢𑁄 𑀑𑀯𑀤𑀢𑀺 𑀦𑀸𑀫, 𑀧𑀼𑀦𑀧𑁆𑀧𑀼𑀦𑀁 𑀯𑀤𑀦𑁆𑀢𑁄 𑀅𑀦𑀼𑀲𑀸𑀲𑀢𑀺 𑀦𑀸𑀫. 𑀑𑀯𑀤𑀦𑁆𑀢𑁄 𑀏𑀯 𑀯𑀸 𑀅𑀦𑀼𑀲𑀸𑀲𑀢𑀺 𑀦𑀸𑀫𑀸𑀢𑀺 𑀏𑀯𑀁 𑀑𑀯𑀤𑁂𑀬𑁆𑀬 𑀅𑀦𑀼𑀲𑀸𑀲𑁂𑀬𑁆𑀬. 𑀅𑀲𑀩𑁆𑀪𑀸 𑀘𑀸𑀢𑀺 𑀅𑀓𑀼𑀲𑀮𑀥𑀫𑁆𑀫𑀸 𑀘 𑀦𑀺𑀯𑀸𑀭𑁂𑀬𑁆𑀬, 𑀓𑀼𑀲𑀮𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀢𑀜𑁆𑀳𑀺 𑀲𑁄 𑀧𑀺𑀬𑁄 𑀳𑁄𑀢𑀻𑀢𑀺 𑀲𑁄 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀩𑀼𑀤𑁆𑀥𑀸𑀤𑀻𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺. 𑀬𑁂 𑀧𑀦 𑀅𑀤𑀺𑀝𑁆𑀞𑀥𑀫𑁆𑀫𑀸 𑀅𑀯𑀺𑀢𑀺𑀡𑁆𑀡𑀧𑀭𑀮𑁄𑀓𑀸 𑀆𑀫𑀺𑀲𑀘𑀓𑁆𑀔𑀼𑀓𑀸 𑀚𑀻𑀯𑀺𑀓𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑀸, 𑀢𑁂𑀲𑀁 𑀅𑀲𑀢𑀁 𑀲𑁄 𑀑𑀯𑀸𑀤𑀓𑁄 𑀅𑀦𑀼𑀲𑀸𑀲𑀓𑁄, ‘‘‘𑀦 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁄, 𑀦 𑀆𑀘𑀭𑀺𑀬𑁄, 𑀓𑀲𑁆𑀫𑀸 𑀅𑀫𑁆𑀳𑁂 𑀑𑀯𑀤𑀲𑀻’𑀢𑀺 𑀏𑀯𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀚𑁆𑀛𑀦𑁆𑀢𑀸𑀦𑀁 𑀅𑀧𑁆𑀧𑀺𑀬𑁄 𑀳𑁄𑀢𑀻’’𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺. 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀧𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀑𑀯𑀤𑀺𑀁𑀲𑀼 𑀅𑀦𑀼𑀲𑀸𑀲𑀺𑀁𑀲𑀼. 𑀢𑁂𑀲𑀼 𑀏𑀓𑀘𑁆𑀘𑁂 𑀑𑀯𑀸𑀤𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀫𑁆𑀫𑀸 𑀯𑀢𑁆𑀢𑀺𑀁𑀲𑀼, 𑀏𑀓𑀘𑁆𑀘𑁂 𑀯𑀺𑀩𑁆𑀪𑀫𑀺𑀁𑀲𑀼, 𑀏𑀓𑀘𑁆𑀘𑁂 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀙𑀦𑁆𑀦𑀢𑁆𑀣𑁂𑀭𑀯𑀢𑁆𑀣𑀼

𑀦 𑀪𑀚𑁂 𑀧𑀸𑀧𑀓𑁂 𑀫𑀺𑀢𑁆𑀢𑁂𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀙𑀦𑁆𑀦𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀆𑀬𑀲𑁆𑀫𑀸 ‘‘𑀅𑀳𑀁 𑀅𑀫𑁆𑀳𑀸𑀓𑀁 𑀅𑀬𑁆𑀬𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑁄 𑀢𑀤𑀸 𑀅𑀜𑁆𑀜𑀁 𑀏𑀓𑀫𑁆𑀧𑀺 𑀦 𑀧𑀲𑁆𑀲𑀸𑀫𑀺, 𑀇𑀤𑀸𑀦𑀺 𑀧𑀦 ‘𑀅𑀳𑀁 𑀲𑀸𑀭𑀺𑀧𑀼𑀢𑁆𑀢𑁄 𑀦𑀸𑀫, 𑀅𑀳𑀁 𑀫𑁄𑀕𑁆𑀕𑀮𑁆𑀮𑀸𑀦𑁄 𑀦𑀸𑀫, 𑀫𑀬𑀁 𑀅𑀕𑁆𑀕𑀲𑀸𑀯𑀓𑀫𑁆𑀳𑀸’𑀢𑀺 𑀯𑀢𑁆𑀯𑀸 𑀇𑀫𑁂 𑀯𑀺𑀘𑀭𑀦𑁆𑀢𑀻’’𑀢𑀺 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀅𑀓𑁆𑀓𑁄𑀲𑀢𑀺. 𑀲𑀢𑁆𑀣𑀸 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀙𑀦𑁆𑀦𑀢𑁆𑀣𑁂𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀑𑀯𑀤𑀢𑀺. 𑀲𑁄 𑀢𑀗𑁆𑀔𑀡𑁂𑀬𑁂𑀯 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸 𑀧𑀼𑀦 𑀕𑀦𑁆𑀢𑁆𑀯𑀸 𑀣𑁂𑀭𑁂 𑀅𑀓𑁆𑀓𑁄𑀲𑀢𑀺𑀬𑁂𑀯. 𑀏𑀯𑀁 𑀬𑀸𑀯𑀢𑀢𑀺𑀬𑀁 𑀅𑀓𑁆𑀓𑁄𑀲𑀦𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀢𑁆𑀣𑀸 𑀑𑀯𑀤𑀺𑀢𑁆𑀯𑀸 ‘‘𑀙𑀦𑁆𑀦, 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀦𑀸𑀫 𑀢𑀼𑀬𑁆𑀳𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀸 𑀉𑀢𑁆𑀢𑀫𑀧𑀼𑀭𑀺𑀲𑀸, 𑀏𑀯𑀭𑀽𑀧𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀲𑁆𑀲𑀼 𑀪𑀚𑀲𑁆𑀲𑀽’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁭𑁮. ‘‘𑀦 𑀪𑀚𑁂 𑀧𑀸𑀧𑀓𑁂 𑀫𑀺𑀢𑁆𑀢𑁂, 𑀦 𑀪𑀚𑁂 𑀧𑀼𑀭𑀺𑀲𑀸𑀥𑀫𑁂;

𑀪𑀚𑁂𑀣 𑀫𑀺𑀢𑁆𑀢𑁂 𑀓𑀮𑁆𑀬𑀸𑀡𑁂, 𑀪𑀚𑁂𑀣 𑀧𑀼𑀭𑀺𑀲𑀼𑀢𑁆𑀢𑀫𑁂’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀅𑀓𑀼𑀲𑀮𑀓𑀫𑁆𑀫𑀸𑀪𑀺𑀭𑀢𑀸 𑀧𑀸𑀧𑀫𑀺𑀢𑁆𑀢𑀸 𑀦𑀸𑀫. 𑀲𑀦𑁆𑀥𑀺𑀘𑁆𑀙𑁂𑀤𑀦𑀸𑀤𑀺𑀓𑁂 𑀯𑀸 𑀏𑀓𑀯𑀻𑀲𑀢𑀺𑀅𑀦𑁂𑀲𑀦𑀸𑀤𑀺𑀪𑁂𑀤𑁂 𑀯𑀸 𑀅𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑀸 𑀧𑀼𑀭𑀺𑀲𑀸𑀥𑀫𑀸 𑀦𑀸𑀫. 𑀉𑀪𑁄𑀧𑀺 𑀯𑀸 𑀏𑀢𑁂 𑀧𑀸𑀧𑀫𑀺𑀢𑁆𑀢𑀸 𑀘𑁂𑀯 𑀧𑀼𑀭𑀺𑀲𑀸𑀥𑀫𑀸 𑀘, 𑀢𑁂 𑀦 𑀪𑀚𑁂𑀬𑁆𑀬 𑀦 𑀧𑀬𑀺𑀭𑀼𑀧𑀸𑀲𑁂𑀬𑁆𑀬, 𑀯𑀺𑀧𑀭𑀻𑀢𑀸 𑀧𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑀸 𑀘𑁂𑀯 𑀲𑀧𑁆𑀧𑀼𑀭𑀺𑀲𑀸 𑀘, 𑀢𑁂 𑀪𑀚𑁂𑀣 𑀧𑀬𑀺𑀭𑀼𑀧𑀸𑀲𑁂𑀣𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀙𑀦𑁆𑀦𑀢𑁆𑀣𑁂𑀭𑁄 𑀧𑀦 𑀢𑀁 𑀑𑀯𑀸𑀤𑀁 𑀲𑀼𑀢𑁆𑀯𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺. 𑀧𑀼𑀦𑀧𑀺 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸, ‘‘𑀪𑀺𑀓𑁆𑀔𑀯𑁂, 𑀫𑀬𑀺 𑀥𑀭𑀦𑁆𑀢𑁂 𑀙𑀦𑁆𑀦𑀁 𑀲𑀺𑀓𑁆𑀔𑀸𑀧𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀣, 𑀫𑀬𑀺 𑀧𑀦 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀓𑁆𑀔𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦, ‘‘𑀪𑀦𑁆𑀢𑁂, 𑀓𑀣𑀁 𑀙𑀦𑁆𑀦𑀢𑁆𑀣𑁂𑀭𑁂 𑀅𑀫𑁆𑀳𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑁂, ‘‘𑀆𑀦𑀦𑁆𑀤, 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀭𑀳𑁆𑀫𑀤𑀡𑁆𑀟𑁄 𑀤𑀸𑀢𑀩𑁆𑀩𑁄’’𑀢𑀺 𑀆𑀡𑀸𑀧𑁂𑀲𑀺. 𑀲𑁄 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀆𑀭𑁄𑀘𑀺𑀢𑀁 𑀩𑁆𑀭𑀳𑁆𑀫𑀤𑀡𑁆𑀟𑀁 𑀲𑀼𑀢𑁆𑀯𑀸 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀢𑀺𑀓𑁆𑀔𑀢𑁆𑀢𑀼𑀁 𑀫𑀼𑀘𑁆𑀙𑀺𑀢𑁄 𑀧𑀢𑀺𑀢𑁆𑀯𑀸 ‘‘𑀫𑀸 𑀫𑀁, 𑀪𑀦𑁆𑀢𑁂, 𑀦𑀸𑀲𑀬𑀺𑀢𑁆𑀣𑀸’’𑀢𑀺 𑀬𑀸𑀘𑀺𑀢𑁆𑀯𑀸 𑀲𑀫𑁆𑀫𑀸 𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺.

𑀙𑀦𑁆𑀦𑀢𑁆𑀣𑁂𑀭𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀯𑀢𑁆𑀣𑀼

𑀥𑀫𑁆𑀫𑀧𑀻𑀢𑀺 𑀲𑀼𑀔𑀁 𑀲𑁂𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀻 𑀓𑀣𑀸 𑁋 𑀅𑀢𑀻𑀢𑁂 𑀓𑀺𑀭 𑀆𑀬𑀲𑁆𑀫𑀸 𑀫𑀳𑀸𑀓𑀧𑁆𑀧𑀺𑀦𑁄 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲 𑀧𑀸𑀤𑀫𑀽𑀮𑁂 𑀓𑀢𑀸𑀪𑀺𑀦𑀻𑀳𑀸𑀭𑁄 𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑁄 𑀩𑀸𑀭𑀸𑀡𑀲𑀺𑀢𑁄 𑀅𑀯𑀺𑀤𑀽𑀭𑁂 𑀏𑀓𑀲𑁆𑀫𑀺𑀁 𑀧𑁂𑀲𑀓𑀸𑀭𑀕𑀸𑀫𑁂 𑀚𑁂𑀝𑁆𑀞𑀓𑀧𑁂𑀲𑀓𑀸𑀭𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀤𑀸 𑀲𑀳𑀲𑁆𑀲𑀫𑀢𑁆𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀝𑁆𑀞 𑀫𑀸𑀲𑁂 𑀳𑀺𑀫𑀯𑀦𑁆𑀢𑁂 𑀯𑀲𑀺𑀢𑁆𑀯𑀸 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀚𑀦𑀧𑀤𑁂 𑀯𑀲𑀦𑁆𑀢𑀺. 𑀢𑁂 𑀏𑀓𑀯𑀸𑀭𑀁 𑀩𑀸𑀭𑀸𑀡𑀲𑀺𑀬𑀸 𑀅𑀯𑀺𑀤𑀽𑀭𑁂 𑀑𑀢𑀭𑀺𑀢𑁆𑀯𑀸 ‘‘𑀲𑁂𑀦𑀸𑀲𑀦𑀓𑀭𑀡𑀢𑁆𑀣𑀸𑀬 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀣𑀸’’𑀢𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀅𑀝𑁆𑀞 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀧𑀳𑀺𑀡𑀺𑀁𑀲𑀼. 𑀢𑀤𑀸 𑀧𑀦 𑀭𑀜𑁆𑀜𑁄 𑀯𑀧𑁆𑀧𑀫𑀗𑁆𑀕𑀮𑀓𑀸𑀮𑁄 𑀳𑁄𑀢𑀺. 𑀲𑁄 ‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀓𑀺𑀭 𑀆𑀕𑀢𑀸’’𑀢𑀺 𑀲𑀼𑀢𑁆𑀯𑀸 𑀢𑀲𑁆𑀫𑀺𑀁 𑀔𑀡𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀕𑀢𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀚𑁆𑀚, 𑀪𑀦𑁆𑀢𑁂, 𑀑𑀓𑀸𑀲𑁄 𑀦𑀢𑁆𑀣𑀺, 𑀲𑁆𑀯𑁂 𑀅𑀫𑁆𑀳𑀸𑀓𑀁 𑀯𑀧𑁆𑀧𑀫𑀗𑁆𑀕𑀮𑀁, 𑀢𑀢𑀺𑀬𑀤𑀺𑀯𑀲𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀅𑀦𑀺𑀫𑀦𑁆𑀢𑁂𑀢𑁆𑀯𑀸𑀯 𑀧𑀸𑀯𑀺𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 ‘‘𑀅𑀜𑁆𑀜𑀢𑁆𑀣 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀧𑀓𑁆𑀓𑀫𑀺𑀁𑀲𑀼. 𑀢𑀲𑁆𑀫𑀺𑀁 𑀔𑀡𑁂 𑀚𑁂𑀝𑁆𑀞𑀧𑁂𑀲𑀓𑀸𑀭𑀲𑁆𑀲 𑀪𑀭𑀺𑀬𑀸 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀩𑀸𑀭𑀸𑀡𑀲𑀺𑀁 𑀕𑀘𑁆𑀙𑀦𑁆𑀢𑀻 𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀅𑀯𑁂𑀮𑀸𑀬, 𑀅𑀬𑁆𑀬𑀸, 𑀆𑀕𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀓𑀣𑁂𑀲𑀼𑀁. 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸 𑀜𑀸𑀡𑀲𑀫𑁆𑀧𑀦𑁆𑀦𑀸 𑀇𑀢𑁆𑀣𑀻 ‘‘𑀲𑁆𑀯𑁂, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀲𑀺. ‘‘𑀩𑀳𑀼𑀓𑀸 𑀫𑀬𑀁 𑀪𑀕𑀺𑀦𑀻’’𑀢𑀺. ‘‘𑀓𑀺𑀢𑁆𑀢𑀓𑀸, 𑀪𑀦𑁆𑀢𑁂’’𑀢𑀺? ‘‘𑀲𑀳𑀲𑁆𑀲𑀫𑀢𑁆𑀢𑀸’’𑀢𑀺. ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀕𑀸𑀫𑁂 𑀲𑀳𑀲𑁆𑀲𑀧𑁂𑀲𑀓𑀸𑀭𑀸 𑀯𑀲𑀺𑀫𑁆𑀳. 𑀏𑀓𑁂𑀓𑁄 𑀏𑀓𑁂𑀓𑀲𑁆𑀲 𑀪𑀺𑀓𑁆𑀔𑀁 𑀤𑀲𑁆𑀲𑀢𑀺, 𑀪𑀺𑀓𑁆𑀔𑀁 𑀅𑀥𑀺𑀯𑀸𑀲𑁂𑀣, 𑀅𑀳𑀫𑁂𑀯 𑀯𑁄 𑀯𑀲𑀦𑀝𑁆𑀞𑀸𑀦𑀫𑁆𑀧𑀺 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀥𑀺𑀯𑀸𑀲𑀬𑀺𑀁𑀲𑀼.

𑀲𑀸 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀉𑀕𑁆𑀖𑁄𑀲𑁂𑀲𑀺 𑁋 ‘‘𑀅𑀳𑀁 𑀲𑀳𑀲𑁆𑀲𑀫𑀢𑁆𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀤𑀺𑀲𑁆𑀯𑀸 𑀦𑀺𑀫𑀦𑁆𑀢𑀬𑀺𑀁, 𑀅𑀬𑁆𑀬𑀸𑀦𑀁 𑀦𑀺𑀲𑀻𑀤𑀦𑀝𑁆𑀞𑀸𑀦𑀁 𑀲𑀁𑀯𑀺𑀤𑀳𑀣, 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀣𑀸’’𑀢𑀺. 𑀕𑀸𑀫𑀫𑀚𑁆𑀛𑁂 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀢𑀲𑁆𑀫𑀺𑀁 𑀕𑀸𑀫𑁂 𑀲𑀩𑁆𑀩𑀸 𑀇𑀢𑁆𑀣𑀺𑀬𑁄 𑀆𑀤𑀸𑀬 𑀢𑀸𑀳𑀺 𑀲𑀤𑁆𑀥𑀺𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑁂𑀫𑀸𑀲𑀁 𑀯𑀲𑀦𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀤𑁂𑀣𑀸’’𑀢𑀺 𑀢𑁂𑀲𑀁 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀧𑀼𑀦 𑀕𑀸𑀫𑁂 𑀉𑀕𑁆𑀖𑁄𑀲𑁂𑀲𑀺 𑁋 ‘‘𑀅𑀫𑁆𑀫𑀢𑀸𑀢𑀸, 𑀏𑀓𑁂𑀓𑀓𑀼𑀮𑀢𑁄 𑀏𑀓𑁂𑀓𑁄 𑀧𑀼𑀭𑀺𑀲𑁄 𑀨𑀭𑀲𑀼𑀯𑀸𑀲𑀺𑀆𑀤𑀻𑀦𑀺 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀤𑀩𑁆𑀩𑀲𑀫𑁆𑀪𑀸𑀭𑁂 𑀆𑀳𑀭𑀺𑀢𑁆𑀯𑀸 𑀅𑀬𑁆𑀬𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀓𑀭𑁄𑀢𑀽’’𑀢𑀺. 𑀕𑀸𑀫𑀯𑀸𑀲𑀺𑀦𑁄 𑀢𑀲𑁆𑀲𑀸𑀬𑁂𑀯 𑀯𑀘𑀦𑀁 𑀲𑀼𑀢𑁆𑀯𑀸 𑀏𑀓𑁂𑀓𑁄 𑀏𑀓𑁂𑀓𑀁 𑀓𑀢𑁆𑀯𑀸 𑀲𑀤𑁆𑀥𑀺𑀁 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂𑀳𑀺 𑀧𑀡𑁆𑀡𑀲𑀸𑀮𑀲𑀳𑀲𑁆𑀲𑀁 𑀓𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀸𑀬𑀁 𑀯𑀲𑁆𑀲𑀽𑀧𑀕𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 ‘‘𑀅𑀳𑀁 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺, 𑀅𑀳𑀁 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀝𑁆𑀞𑀳𑀺𑀁𑀲𑀼. 𑀯𑀲𑁆𑀲𑀁𑀯𑀼𑀝𑁆𑀞𑀓𑀸𑀮𑁂 ‘‘𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀸𑀬 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀘𑀻𑀯𑀭𑀲𑀸𑀝𑀓𑁂 𑀲𑀚𑁆𑀚𑁂𑀣𑀸’’𑀢𑀺 𑀲𑀫𑀸𑀤𑀧𑁂𑀢𑁆𑀯𑀸 𑀏𑀓𑁂𑀓𑀲𑁆𑀲 𑀲𑀳𑀲𑁆𑀲𑀲𑀳𑀲𑁆𑀲𑀫𑀽𑀮𑀁 𑀘𑀻𑀯𑀭𑀁 𑀤𑀸𑀧𑁂𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀯𑀼𑀝𑁆𑀞𑀯𑀲𑁆𑀲𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀕𑀸𑀫𑀯𑀸𑀲𑀺𑀦𑁄𑀧𑀺 𑀇𑀤𑀁 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑁆𑀯𑀸 𑀇𑀢𑁄 𑀘𑀼𑀢𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀕𑀡𑀤𑁂𑀯𑀧𑀼𑀢𑁆𑀢𑀸 𑀦𑀸𑀫 𑀅𑀳𑁂𑀲𑀼𑀁. 𑀢𑁂 𑀢𑀢𑁆𑀣 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀓𑀼𑀝𑀼𑀫𑁆𑀩𑀺𑀓𑀕𑁂𑀳𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀚𑁂𑀝𑁆𑀞𑀓𑀧𑁂𑀲𑀓𑀸𑀭𑁄 𑀚𑁂𑀝𑁆𑀞𑀓𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀪𑀭𑀺𑀬𑀸𑀧𑀺𑀲𑁆𑀲 𑀚𑁂𑀝𑁆𑀞𑀓𑀓𑀼𑀝𑀼𑀫𑁆𑀩𑀺𑀓𑀲𑁆𑀲𑁂𑀯 𑀥𑀻𑀢𑀸 𑀅𑀳𑁄𑀲𑀺. 𑀢𑀸 𑀲𑀩𑁆𑀩𑀸𑀧𑀺 𑀯𑀬𑀧𑁆𑀧𑀢𑁆𑀢𑀸 𑀧𑀭𑀓𑀼𑀮𑀁 𑀕𑀘𑁆𑀙𑀦𑁆𑀢𑀺𑀬𑁄 𑀢𑁂𑀲𑀁 𑀢𑁂𑀲𑀁𑀬𑁂𑀯 𑀕𑁂𑀳𑀸𑀦𑀺 𑀅𑀕𑀫𑀺𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 𑀯𑀺𑀳𑀸𑀭𑁂 𑀥𑀫𑁆𑀫𑀲𑁆𑀲𑀯𑀦𑀁 𑀲𑀗𑁆𑀖𑀼𑀝𑁆𑀞𑀁. ‘‘𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀻’’𑀢𑀺 𑀲𑀼𑀢𑁆𑀯𑀸 𑀲𑀩𑁆𑀩𑁂𑀧𑀺 𑀢𑁂 𑀓𑀼𑀝𑀼𑀫𑁆𑀩𑀺𑀓𑀸 ‘‘𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀸’’𑀢𑀺 𑀪𑀭𑀺𑀬𑀸𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀅𑀕𑀫𑀺𑀁𑀲𑀼. 𑀢𑁂𑀲𑀁 𑀯𑀺𑀳𑀸𑀭𑀫𑀚𑁆𑀛𑀁 𑀧𑀯𑀺𑀝𑁆𑀞𑀓𑁆𑀔𑀡𑁂 𑀯𑀲𑁆𑀲𑀁 𑀉𑀝𑁆𑀞𑀳𑀺. 𑀬𑁂𑀲𑀁 𑀓𑀼𑀮𑀽𑀧𑀓𑀸 𑀯𑀸 𑀜𑀸𑀢𑀺𑀲𑀸𑀫𑀡𑁂𑀭𑀸𑀤𑀬𑁄 𑀯𑀸 𑀅𑀢𑁆𑀣𑀺, 𑀢𑁂 𑀢𑁂𑀲𑀁 𑀧𑀭𑀺𑀯𑁂𑀡𑀸𑀦𑀺 𑀧𑀯𑀺𑀲𑀺𑀁𑀲𑀼. 𑀢𑁂 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀦𑀢𑁆𑀣𑀺𑀢𑀸𑀬 𑀓𑀢𑁆𑀣𑀘𑀺, 𑀧𑀯𑀺𑀲𑀺𑀢𑀼𑀁 𑀅𑀯𑀺𑀲𑀳𑀦𑁆𑀢𑀸 𑀯𑀺𑀳𑀸𑀭𑀫𑀚𑁆𑀛𑁂𑀬𑁂𑀯 𑀅𑀝𑁆𑀞𑀁𑀲𑀼. 𑀅𑀣 𑀦𑁂 𑀚𑁂𑀝𑁆𑀞𑀓𑀓𑀼𑀝𑀼𑀫𑁆𑀩𑀺𑀓𑁄 𑀆𑀳 𑁋 ‘‘𑀧𑀲𑁆𑀲𑀣 𑀅𑀫𑁆𑀳𑀸𑀓𑀁 𑀯𑀺𑀧𑁆𑀧𑀓𑀸𑀭𑀁, 𑀓𑀼𑀮𑀧𑀼𑀢𑁆𑀢𑁂𑀳𑀺 𑀦𑀸𑀫 𑀏𑀢𑁆𑀢𑀓𑁂𑀦 𑀮𑀚𑁆𑀚𑀺𑀢𑀼𑀁 𑀬𑀼𑀢𑁆𑀢’’𑀦𑁆𑀢𑀺. ‘‘𑀅𑀬𑁆𑀬, 𑀓𑀺𑀁 𑀧𑀦 𑀓𑀭𑁄𑀫𑀸’’𑀢𑀺? ‘‘𑀫𑀬𑀁 𑀯𑀺𑀲𑁆𑀲𑀸𑀲𑀺𑀓𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑁂𑀦 𑀇𑀫𑀁 𑀯𑀺𑀧𑁆𑀧𑀓𑀸𑀭𑀁 𑀧𑀢𑁆𑀢𑀸, 𑀲𑀩𑁆𑀩𑁂 𑀥𑀦𑀁 𑀲𑀁𑀳𑀭𑀺𑀢𑁆𑀯𑀸 𑀧𑀭𑀺𑀯𑁂𑀡𑀁 𑀓𑀭𑁄𑀫𑀸’’𑀢𑀺. ‘‘𑀲𑀸𑀥𑀼, 𑀅𑀬𑁆𑀬𑀸’’𑀢𑀺 𑀚𑁂𑀝𑁆𑀞𑀓𑁄 𑀲𑀳𑀲𑁆𑀲𑀁 𑀅𑀤𑀸𑀲𑀺, 𑀲𑁂𑀲𑀸 𑀧𑀜𑁆𑀘 𑀧𑀜𑁆𑀘 𑀲𑀢𑀸𑀦𑀺. 𑀇𑀢𑁆𑀣𑀺𑀬𑁄 𑀅𑀟𑁆𑀠𑀢𑁂𑀬𑁆𑀬𑀸𑀦𑀺 𑀅𑀟𑁆𑀠𑀢𑁂𑀬𑁆𑀬𑀸𑀦𑀺 𑀲𑀢𑀸𑀦𑀺. 𑀢𑁂 𑀢𑀁 𑀥𑀦𑀁 𑀲𑀁𑀳𑀭𑀺𑀢𑁆𑀯𑀸 𑀲𑀳𑀲𑁆𑀲𑀓𑀽𑀝𑀸𑀕𑀸𑀭𑀧𑀭𑀺𑀯𑀸𑀭𑀁 𑀲𑀢𑁆𑀣𑀼 𑀯𑀲𑀦𑀢𑁆𑀣𑀸𑀬 𑀫𑀳𑀸𑀧𑀭𑀺𑀯𑁂𑀡𑀁 𑀦𑀸𑀫 𑀆𑀭𑀪𑀺𑀁𑀲𑀼. 𑀦𑀯𑀓𑀫𑁆𑀫𑀲𑁆𑀲 𑀫𑀳𑀦𑁆𑀢𑀢𑀸𑀬 𑀥𑀦𑁂 𑀅𑀧𑁆𑀧𑀳𑁄𑀦𑁆𑀢𑁂 𑀧𑀼𑀩𑁆𑀩𑁂 𑀤𑀺𑀦𑁆𑀦𑀥𑀦𑀢𑁄 𑀧𑀼𑀦 𑀉𑀧𑀟𑁆𑀠𑀽𑀧𑀟𑁆𑀠𑀁 𑀅𑀤𑀁𑀲𑀼. 𑀦𑀺𑀝𑁆𑀞𑀺𑀢𑁂 𑀧𑀭𑀺𑀯𑁂𑀡𑁂 𑀯𑀺𑀳𑀸𑀭𑀫𑀳𑀁 𑀓𑀭𑁄𑀦𑁆𑀢𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀘𑀻𑀯𑀭𑀸𑀦𑀺 𑀲𑀚𑁆𑀚𑀺𑀁𑀲𑀼.

𑀚𑁂𑀝𑁆𑀞𑀓𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀧𑀦 𑀪𑀭𑀺𑀬𑀸 𑀲𑀩𑁆𑀩𑁂𑀳𑀺 𑀲𑀫𑀸𑀦𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄 𑀧𑀜𑁆𑀜𑀸𑀬 𑀞𑀺𑀢𑀸 ‘‘𑀅𑀢𑀺𑀭𑁂𑀓𑀢𑀭𑀁 𑀓𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀅𑀦𑁄𑀚𑀧𑀼𑀧𑁆𑀨𑀯𑀡𑁆𑀡𑁂𑀦 𑀲𑀳𑀲𑁆𑀲𑀫𑀽𑀮𑁂𑀦 𑀲𑀸𑀝𑀓𑁂𑀦 𑀲𑀤𑁆𑀥𑀺𑀁 𑀅𑀦𑁄𑀚𑀧𑀼𑀧𑁆𑀨𑀘𑀗𑁆𑀓𑁄𑀝𑀓𑀁 𑀕𑀳𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀓𑀸𑀮𑁂 𑀲𑀢𑁆𑀣𑀸𑀭𑀁 𑀅𑀦𑁄𑀚𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀢𑀁 𑀲𑀸𑀝𑀓𑀁 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀅𑀦𑁄𑀚𑀧𑀼𑀧𑁆𑀨𑀯𑀡𑁆𑀡𑀁𑀬𑁂𑀯 𑀫𑁂 𑀲𑀭𑀻𑀭𑀁 𑀳𑁄𑀢𑀼, 𑀅𑀦𑁄𑀚𑀸 𑀏𑀯 𑀘 𑀫𑁂 𑀦𑀸𑀫𑀁 𑀳𑁄𑀢𑀽’’𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺. 𑀲𑀢𑁆𑀣𑀸 ‘‘𑀏𑀯𑀁 𑀳𑁄𑀢𑀽’’𑀢𑀺 𑀅𑀦𑀼𑀫𑁄𑀤𑀦𑀁 𑀅𑀓𑀸𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀚𑁂𑀝𑁆𑀞𑀓𑀓𑀼𑀝𑀼𑀫𑁆𑀩𑀺𑀓𑁄 𑀓𑀼𑀓𑁆𑀓𑀼𑀝𑀯𑀢𑀻𑀦𑀕𑀭𑁂 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀫𑀳𑀸𑀓𑀧𑁆𑀧𑀺𑀦𑀭𑀸𑀚𑀸 𑀦𑀸𑀫 𑀅𑀳𑁄𑀲𑀺, 𑀲𑁂𑀲𑀸 𑀅𑀫𑀘𑁆𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀚𑁂𑀝𑁆𑀞𑀓𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀪𑀭𑀺𑀬𑀸 𑀫𑀤𑁆𑀤𑀭𑀝𑁆𑀞𑁂 𑀲𑀸𑀕𑀮𑀦𑀕𑀭𑁂 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀅𑀦𑁄𑀚𑀧𑀼𑀧𑁆𑀨𑀯𑀡𑁆𑀡𑀫𑁂𑀯𑀲𑁆𑀲𑀸 𑀲𑀭𑀻𑀭𑀁 𑀅𑀳𑁄𑀲𑀺, 𑀅𑀦𑁄𑀚𑀸𑀢𑁆𑀯𑁂𑀯𑀲𑁆𑀲𑀸 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑀸 𑀯𑀬𑀧𑁆𑀧𑀢𑁆𑀢𑀸 𑀫𑀳𑀸𑀓𑀧𑁆𑀧𑀺𑀦𑀭𑀜𑁆𑀜𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀅𑀦𑁄𑀚𑀸𑀤𑁂𑀯𑀻 𑀦𑀸𑀫 𑀅𑀳𑁄𑀲𑀺. 𑀲𑁂𑀲𑀺𑀢𑁆𑀣𑀺𑀬𑁄𑀧𑀺 𑀅𑀫𑀘𑁆𑀘𑀓𑀼𑀮𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑀸 𑀢𑁂𑀲𑀁𑀬𑁂𑀯 𑀅𑀫𑀘𑁆𑀘𑀧𑀼𑀢𑁆𑀢𑀸𑀦𑀁 𑀕𑁂𑀳𑀸𑀦𑀺 𑀅𑀕𑀫𑀁𑀲𑀼. 𑀢𑁂 𑀲𑀩𑁆𑀩𑁂 𑀭𑀜𑁆𑀜𑁄 𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀁𑀲𑀼. 𑀬𑀤𑀸 𑀭𑀸𑀚𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀳𑀢𑁆𑀣𑀺𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀯𑀺𑀘𑀭𑀺, 𑀢𑀤𑀸 𑀢𑁂𑀧𑀺 𑀢𑀣𑁂𑀯 𑀯𑀺𑀘𑀭𑀦𑁆𑀢𑀺. 𑀢𑀲𑁆𑀫𑀺𑀁 𑀅𑀲𑁆𑀲𑁂𑀦 𑀯𑀸 𑀭𑀣𑁂𑀦 𑀯𑀸 𑀯𑀺𑀘𑀭𑀦𑁆𑀢𑁂 𑀢𑁂𑀧𑀺 𑀢𑀣𑁂𑀯 𑀯𑀺𑀘𑀭𑀦𑁆𑀢𑀺? 𑀏𑀯𑀁 𑀢𑁂 𑀏𑀓𑀢𑁄 𑀳𑀼𑀢𑁆𑀯𑀸 𑀓𑀢𑀸𑀦𑀁 𑀧𑀼𑀜𑁆𑀜𑀸𑀦𑀁 𑀆𑀦𑀼𑀪𑀸𑀯𑁂𑀦 𑀏𑀓𑀢𑁄𑀯 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀁𑀲𑀼. 𑀭𑀜𑁆𑀜𑁄 𑀧𑀦 𑀩𑀮𑁄, 𑀩𑀮𑀯𑀸𑀳𑀦𑁄, 𑀧𑀼𑀧𑁆𑀨𑁄, 𑀧𑀼𑀧𑁆𑀨𑀯𑀸𑀳𑀦𑁄, 𑀲𑀼𑀧𑀢𑁆𑀢𑁄𑀢𑀺 𑀧𑀜𑁆𑀘 𑀅𑀲𑁆𑀲𑀸 𑀳𑁄𑀦𑁆𑀢𑀺. 𑀭𑀸𑀚𑀸 𑀢𑁂𑀲𑀼 𑀲𑀼𑀧𑀢𑁆𑀢𑀁 𑀅𑀲𑁆𑀲𑀁 𑀲𑀬𑀁 𑀆𑀭𑁄𑀳𑀢𑀺, 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀅𑀲𑁆𑀲𑀸𑀭𑁄𑀳𑀸𑀦𑀁 𑀲𑀸𑀲𑀦𑀸𑀳𑀭𑀡𑀢𑁆𑀣𑀸𑀬 𑀅𑀤𑀸𑀲𑀺. 𑀭𑀸𑀚𑀸 𑀢𑁂 𑀧𑀸𑀢𑁄𑀯 𑀪𑁄𑀚𑁂𑀢𑁆𑀯𑀸 ‘‘𑀕𑀘𑁆𑀙𑀣 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀬𑁄𑀚𑀦𑀸𑀦𑀺 𑀆𑀳𑀺𑀡𑁆𑀟𑀺𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀉𑀧𑁆𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀫𑀬𑁆𑀳𑀁 𑀲𑀼𑀔𑀲𑀸𑀲𑀦𑀁 𑀆𑀳𑀭𑀣𑀸’’𑀢𑀺 𑀧𑁂𑀲𑁂𑀲𑀺. 𑀢𑁂 𑀘𑀢𑀽𑀳𑀺 𑀤𑁆𑀯𑀸𑀭𑁂𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀻𑀡𑀺 𑀬𑁄𑀚𑀦𑀸𑀦𑀺 𑀆𑀳𑀺𑀡𑁆𑀟𑀺𑀢𑁆𑀯𑀸 𑀲𑀸𑀲𑀦𑀁 𑀅𑀮𑀪𑀺𑀢𑁆𑀯𑀸 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀲𑀼𑀧𑀢𑁆𑀢𑀁 𑀅𑀲𑁆𑀲𑀁 𑀆𑀭𑀼𑀬𑁆𑀳 𑀅𑀫𑀘𑁆𑀘𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀓𑀺𑀮𑀦𑁆𑀢𑀭𑀽𑀧𑁂 𑀧𑀜𑁆𑀘𑀲𑀢𑀯𑀸𑀡𑀺𑀚𑀓𑁂 𑀦𑀕𑀭𑀁 𑀧𑀯𑀺𑀲𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀇𑀫𑁂 𑀅𑀤𑁆𑀥𑀸𑀦𑀓𑀺𑀮𑀦𑁆𑀢𑀸, 𑀅𑀤𑁆𑀥𑀸 𑀇𑀫𑁂𑀲𑀁 𑀲𑀦𑁆𑀢𑀺𑀓𑀸 𑀏𑀓𑀁 𑀪𑀤𑁆𑀤𑀓𑀁 𑀲𑀸𑀲𑀦𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀼𑀢𑁄 𑀆𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀅𑀢𑁆𑀣𑀺, 𑀤𑁂𑀯, 𑀇𑀢𑁄 𑀯𑀻𑀲𑀢𑀺𑀬𑁄𑀚𑀦𑀲𑀢𑀫𑀢𑁆𑀣𑀓𑁂 𑀲𑀸𑀯𑀢𑁆𑀣𑀺 𑀦𑀸𑀫 𑀦𑀕𑀭𑀁, 𑀢𑀢𑁄 𑀆𑀕𑀘𑁆𑀙𑀸𑀫𑀸’’𑀢𑀺. ‘‘𑀅𑀢𑁆𑀣𑀺 𑀧𑀦 𑀯𑁄 𑀧𑀤𑁂𑀲𑁂 𑀓𑀺𑀜𑁆𑀘𑀺 𑀲𑀸𑀲𑀦𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺. ‘‘𑀤𑁂𑀯, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦𑀢𑁆𑀣𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀉𑀧𑁆𑀧𑀦𑁆𑀦𑁄’’𑀢𑀺. 𑀭𑀸𑀚𑀸 𑀢𑀸𑀯𑀤𑁂𑀯 𑀧𑀜𑁆𑀘𑀯𑀡𑁆𑀡𑀸𑀬 𑀧𑀻𑀢𑀺𑀬𑀸 𑀨𑀼𑀝𑁆𑀞𑀲𑀭𑀻𑀭𑁄 𑀓𑀺𑀜𑁆𑀘𑀺 𑀲𑀮𑁆𑀮𑀓𑁆𑀔𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀫𑀼𑀳𑀼𑀢𑁆𑀢𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸, ‘‘𑀢𑀸𑀢𑀸, 𑀓𑀺𑀁 𑀯𑀤𑁂𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀩𑀼𑀤𑁆𑀥𑁄, 𑀤𑁂𑀯, 𑀉𑀧𑁆𑀧𑀦𑁆𑀦𑁄’’𑀢𑀺. 𑀭𑀸𑀚𑀸 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀢𑀣𑁂𑀯 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀘𑀢𑀼𑀢𑁆𑀣𑁂 𑀯𑀸𑀭𑁂 ‘‘𑀓𑀺𑀁 𑀯𑀤𑁂𑀣, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀩𑀼𑀤𑁆𑀥𑁄, 𑀤𑁂𑀯, 𑀉𑀧𑁆𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂, ‘‘𑀢𑀸𑀢𑀸, 𑀯𑁄 𑀲𑀢𑀲𑀳𑀲𑁆𑀲𑀁 𑀤𑀤𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀅𑀜𑁆𑀜𑀫𑁆𑀧𑀺 𑀓𑀺𑀜𑁆𑀘𑀺 𑀲𑀸𑀲𑀦𑀁 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀢𑁆𑀣𑀺, 𑀤𑁂𑀯, 𑀥𑀫𑁆𑀫𑁄 𑀉𑀧𑁆𑀧𑀦𑁆𑀦𑁄’’𑀢𑀺. 𑀭𑀸𑀚𑀸 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑀬𑁄 𑀯𑀸𑀭𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀘𑀢𑀼𑀢𑁆𑀣𑁂 𑀯𑀸𑀭𑁂 ‘‘𑀥𑀫𑁆𑀫𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂 ‘‘𑀇𑀥𑀸𑀧𑀺 𑀯𑁄 𑀲𑀢𑀲𑀳𑀲𑁆𑀲𑀁 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 ‘‘𑀅𑀧𑀭𑀫𑁆𑀧𑀺 𑀲𑀸𑀲𑀦𑀁 𑀅𑀢𑁆𑀣𑀺, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺. ‘‘𑀅𑀢𑁆𑀣𑀺, 𑀤𑁂𑀯, 𑀲𑀗𑁆𑀖𑀭𑀢𑀦𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺. 𑀭𑀸𑀚𑀸 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀢𑀬𑁄 𑀯𑀸𑀭𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀘𑀢𑀼𑀢𑁆𑀣𑁂 𑀯𑀸𑀭𑁂 ‘‘𑀲𑀗𑁆𑀖𑁄’’𑀢𑀺 𑀧𑀤𑁂 𑀯𑀼𑀢𑁆𑀢𑁂 ‘‘𑀇𑀥𑀸𑀧𑀺 𑀯𑁄 𑀲𑀢𑀲𑀳𑀲𑁆𑀲𑀁 𑀤𑀫𑁆𑀫𑀻’’𑀢𑀺 𑀯𑀢𑁆𑀯𑀸 𑀅𑀫𑀘𑁆𑀘𑀲𑀳𑀲𑁆𑀲𑀁 𑀑𑀮𑁄𑀓𑁂𑀢𑁆𑀯𑀸, ‘‘𑀢𑀸𑀢𑀸, 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀤𑁂𑀯, 𑀢𑀼𑀫𑁆𑀳𑁂 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀅𑀳𑀁, 𑀢𑀸𑀢𑀸, ‘𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄, 𑀥𑀫𑁆𑀫𑁄 𑀉𑀧𑁆𑀧𑀦𑁆𑀦𑁄, 𑀲𑀗𑁆𑀖𑁄 𑀉𑀧𑁆𑀧𑀦𑁆𑀦𑁄’𑀢𑀺 𑀲𑀼𑀢𑁆𑀯𑀸 𑀦 𑀧𑀼𑀦 𑀦𑀺𑀯𑀢𑁆𑀢𑀺𑀲𑁆𑀲𑀸𑀫𑀺, 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀫𑀬𑀫𑁆𑀧𑀺, 𑀤𑁂𑀯, 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺. 𑀭𑀸𑀚𑀸 𑀲𑀼𑀯𑀡𑁆𑀡𑀧𑀝𑁆𑀝𑁂 𑀅𑀓𑁆𑀔𑀭𑀸𑀦𑀺 𑀮𑀺𑀔𑀸𑀧𑁂𑀢𑁆𑀯𑀸 𑀯𑀸𑀡𑀺𑀚𑀓𑁂 𑀆𑀳 𑁋 ‘‘𑀅𑀦𑁄𑀚𑀸 𑀦𑀸𑀫 𑀤𑁂𑀯𑀻 𑀢𑀼𑀫𑁆𑀳𑀸𑀓𑀁 𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺 𑀤𑀲𑁆𑀲𑀢𑀺, 𑀏𑀯𑀜𑁆𑀘 𑀧𑀦 𑀦𑀁 𑀯𑀤𑁂𑀬𑁆𑀬𑀸𑀣 ‘𑀭𑀜𑁆𑀜𑁄 𑀓𑀺𑀭 𑀢𑁂 𑀇𑀲𑁆𑀲𑀭𑀺𑀬𑀁 𑀯𑀺𑀲𑁆𑀲𑀝𑁆𑀞𑀁, 𑀬𑀣𑀸𑀲𑀼𑀔𑀁 𑀲𑀫𑁆𑀧𑀢𑁆𑀢𑀺𑀁 𑀧𑀭𑀺𑀪𑀼𑀜𑁆𑀚𑀸𑀳𑀻’𑀢𑀺, 𑀲𑀘𑁂 𑀧𑀦 𑀯𑁄 ‘𑀭𑀸𑀚𑀸 𑀓𑀳’𑀦𑁆𑀢𑀺 𑀧𑀼𑀘𑁆𑀙𑀢𑀺, ‘𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺 𑀯𑀢𑁆𑀯𑀸 𑀕𑀢𑁄’𑀢𑀺 𑀆𑀭𑁄𑀘𑁂𑀬𑁆𑀬𑀸𑀣𑀸’’𑀢𑀺. 𑀅𑀫𑀘𑁆𑀘𑀸𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀪𑀭𑀺𑀬𑀸𑀦𑀁 𑀢𑀣𑁂𑀯 𑀲𑀸𑀲𑀦𑀁 𑀧𑀳𑀺𑀡𑀺𑀁𑀲𑀼. 𑀭𑀸𑀚𑀸 𑀯𑀸𑀡𑀺𑀚𑀓𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀅𑀲𑁆𑀲𑀁 𑀅𑀪𑀺𑀭𑀼𑀬𑁆𑀳 𑀅𑀫𑀘𑁆𑀘𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀢𑀁 𑀔𑀡𑀁𑀬𑁂𑀯 𑀦𑀺𑀓𑁆𑀔𑀫𑀺.

𑀲𑀢𑁆𑀣𑀸𑀧𑀺 𑀢𑀁 𑀤𑀺𑀯𑀲𑀁 𑀧𑀘𑁆𑀘𑀽𑀲𑀓𑀸𑀮𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀫𑀳𑀸𑀓𑀧𑁆𑀧𑀺𑀦𑀭𑀸𑀚𑀸𑀦𑀁 𑀲𑀧𑀭𑀺𑀯𑀸𑀭𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀳𑀸𑀓𑀧𑁆𑀧𑀺𑀦𑁄 𑀯𑀸𑀡𑀺𑀚𑀓𑀸𑀦𑀁 𑀲𑀦𑁆𑀢𑀺𑀓𑀸 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀉𑀧𑁆𑀧𑀦𑁆𑀦𑀪𑀸𑀯𑀁 𑀲𑀼𑀢𑁆𑀯𑀸 𑀢𑁂𑀲𑀁 𑀯𑀘𑀦𑀁 𑀢𑀻𑀳𑀺 𑀲𑀢𑀲𑀳𑀲𑁆𑀲𑁂𑀳𑀺 𑀧𑀽𑀚𑁂𑀢𑁆𑀯𑀸 𑀭𑀚𑁆𑀚𑀁 𑀧𑀳𑀸𑀬 𑀅𑀫𑀘𑁆𑀘𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀫𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀲𑁆𑀯𑁂 𑀦𑀺𑀓𑁆𑀔𑀫𑀺𑀲𑁆𑀲𑀢𑀺. 𑀲𑁄 𑀲𑀧𑀭𑀺𑀯𑀸𑀭𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀧𑀘𑁆𑀘𑀼𑀕𑁆𑀕𑀫𑀦𑀫𑀲𑁆𑀲 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀦𑀤𑀺𑀯𑀲𑁂 𑀘𑀓𑁆𑀓𑀯𑀢𑁆𑀢𑀻 𑀯𑀺𑀬 𑀔𑀼𑀤𑁆𑀤𑀓𑀕𑀸𑀫𑀪𑁄𑀚𑀓𑀁 𑀧𑀘𑁆𑀘𑀼𑀕𑁆𑀕𑀘𑁆𑀙𑀦𑁆𑀢𑁄 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀻𑀲𑀬𑁄𑀚𑀦𑀲𑀢𑀁 𑀫𑀕𑁆𑀕𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀘𑀦𑁆𑀤𑀪𑀸𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀦𑀺𑀲𑀻𑀤𑀺. ‘‘𑀭𑀸𑀚𑀸𑀧𑀺 𑀆𑀕𑀘𑁆𑀙𑀦𑁆𑀢𑁄 𑀏𑀓𑀁 𑀦𑀤𑀺𑀁 𑀧𑀢𑁆𑀯𑀸 ‘‘𑀓𑀸 𑀦𑀸𑀫𑁂𑀲𑀸’’𑀢𑀺 𑀧𑀼𑀘𑁆𑀙𑀺. ‘‘𑀅𑀧𑀭𑀘𑁆𑀙𑀸 𑀦𑀸𑀫, 𑀤𑁂𑀯𑀸’’𑀢𑀺. ‘‘𑀓𑀺𑀫𑀲𑁆𑀲𑀸 𑀧𑀭𑀺𑀫𑀸𑀡𑀁, 𑀢𑀸𑀢𑀸’’𑀢𑀺? ‘‘𑀕𑀫𑁆𑀪𑀻𑀭𑀢𑁄 𑀕𑀸𑀯𑀼𑀢𑀁, 𑀧𑀼𑀣𑀼𑀮𑀢𑁄 𑀤𑁆𑀯𑁂 𑀕𑀸𑀯𑀼𑀢𑀸𑀦𑀺, 𑀤𑁂𑀯𑀸’’𑀢𑀺. ‘‘𑀅𑀢𑁆𑀣𑀺 𑀧𑀦𑁂𑀢𑁆𑀣 𑀦𑀸𑀯𑀸 𑀯𑀸 𑀉𑀴𑀼𑀫𑁆𑀧𑁄 𑀯𑀸’’𑀢𑀺? ‘‘𑀦𑀢𑁆𑀣𑀺, 𑀤𑁂𑀯𑀸’’𑀢𑀺. ‘‘𑀦𑀸𑀯𑀸𑀤𑀻𑀦𑀺 𑀑𑀮𑁄𑀓𑁂𑀦𑁆𑀢𑁂 𑀅𑀫𑁆𑀳𑁂 𑀚𑀸𑀢𑀺 𑀚𑀭𑀁 𑀉𑀧𑀦𑁂𑀢𑀺, 𑀚𑀭𑀸 𑀫𑀭𑀡𑀁. 𑀅𑀳𑀁 𑀦𑀺𑀩𑁆𑀩𑁂𑀫𑀢𑀺𑀓𑁄 𑀳𑀼𑀢𑁆𑀯𑀸 𑀢𑀻𑀡𑀺 𑀭𑀢𑀦𑀸𑀦𑀺 𑀉𑀤𑁆𑀤𑀺𑀲𑁆𑀲 𑀦𑀺𑀓𑁆𑀔𑀦𑁆𑀢𑁄, 𑀢𑁂𑀲𑀁 𑀫𑁂 𑀆𑀦𑀼𑀪𑀸𑀯𑁂𑀦 𑀇𑀫𑀁 𑀉𑀤𑀓𑀁 𑀉𑀤𑀓𑀁 𑀯𑀺𑀬 𑀫𑀸 𑀅𑀳𑁄𑀲𑀻’’𑀢𑀺 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀁 𑀆𑀯𑀚𑁆𑀚𑁂𑀢𑁆𑀯𑀸 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀲𑀧𑀭𑀺𑀯𑀸𑀭𑁄 𑀅𑀲𑁆𑀲𑀲𑀳𑀲𑁆𑀲𑁂𑀦 𑀉𑀤𑀓𑀧𑀺𑀝𑁆𑀞𑀺𑀁 𑀧𑀓𑁆𑀔𑀦𑁆𑀤𑀺. 𑀲𑀺𑀦𑁆𑀥𑀯𑀸 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀯𑀺𑀬 𑀧𑀓𑁆𑀔𑀦𑁆𑀤𑀺𑀁𑀲𑀼. 𑀔𑀼𑀭𑀸𑀦𑀁 𑀅𑀕𑁆𑀕𑀸 𑀦𑁂𑀯 𑀢𑁂𑀫𑀺𑀁𑀲𑀼.

𑀲𑁄 𑀢𑀁 𑀉𑀢𑁆𑀢𑀭𑀺𑀢𑁆𑀯𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀅𑀧𑀭𑀫𑁆𑀧𑀺 𑀦𑀤𑀺𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀓𑀸 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺. ‘‘𑀦𑀻𑀮𑀯𑀸𑀳𑀺𑀦𑀻 𑀦𑀸𑀫, 𑀤𑁂𑀯𑀸’’𑀢𑀺. ‘‘𑀓𑀺𑀫𑀲𑁆𑀲𑀸 𑀧𑀭𑀺𑀫𑀸𑀡’’𑀦𑁆𑀢𑀺? ‘‘𑀕𑀫𑁆𑀪𑀻𑀭𑀢𑁄𑀧𑀺 𑀧𑀼𑀣𑀼𑀮𑀢𑁄𑀧𑀺 𑀅𑀟𑁆𑀠𑀬𑁄𑀚𑀦𑀁, 𑀤𑁂𑀯𑀸’’𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀢𑀁 𑀧𑀦 𑀦𑀤𑀺𑀁 𑀤𑀺𑀲𑁆𑀯𑀸 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄’’𑀢𑀺 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀧𑀓𑁆𑀔𑀦𑁆𑀤𑀺. 𑀢𑀫𑁆𑀧𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀅𑀧𑀭𑀫𑁆𑀧𑀺 𑀦𑀤𑀺𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀓𑀸 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺. ‘‘𑀘𑀦𑁆𑀤𑀪𑀸𑀕𑀸 𑀦𑀸𑀫, 𑀤𑁂𑀯𑀸’’𑀢𑀺. ‘‘𑀓𑀺𑀫𑀲𑁆𑀲𑀸 𑀧𑀭𑀺𑀫𑀸𑀡’’𑀦𑁆𑀢𑀺? ‘‘𑀕𑀫𑁆𑀪𑀻𑀭𑀢𑁄𑀧𑀺 𑀧𑀼𑀣𑀼𑀮𑀢𑁄𑀧𑀺 𑀬𑁄𑀚𑀦𑀁, 𑀤𑁂𑀯𑀸’’𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀇𑀫𑀁 𑀧𑀦 𑀦𑀤𑀺𑀁 𑀤𑀺𑀲𑁆𑀯𑀸 ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄’’𑀢𑀺 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀧𑀓𑁆𑀔𑀦𑁆𑀤𑀺. 𑀢𑀁 𑀧𑀦 𑀦𑀤𑀺𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀲𑀢𑁆𑀣𑀼 𑀲𑀭𑀻𑀭𑀢𑁄 𑀦𑀺𑀓𑁆𑀔𑀦𑁆𑀢𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀅𑀤𑁆𑀤𑀲. 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀲𑁆𑀲 𑀲𑀸𑀔𑀸𑀯𑀺𑀝𑀧𑀧𑀮𑀸𑀲𑀸𑀦𑀺 𑀲𑁄𑀯𑀡𑁆𑀡𑀫𑀬𑀸𑀦𑀺 𑀯𑀺𑀬 𑀅𑀳𑁂𑀲𑀼𑀁. 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀧𑀦 𑀑𑀪𑀸𑀲𑁄 𑀦𑁂𑀯 𑀘𑀦𑁆𑀤𑀲𑁆𑀲, 𑀦 𑀲𑀽𑀭𑀺𑀬𑀲𑁆𑀲, 𑀦 𑀤𑁂𑀯𑀫𑀸𑀭𑀩𑁆𑀭𑀳𑁆𑀫𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑁆𑀲, 𑀅𑀤𑁆𑀥𑀸 𑀅𑀳𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀆𑀕𑀘𑁆𑀙𑀦𑁆𑀢𑁄 𑀫𑀳𑀸𑀕𑁄𑀢𑀫𑀩𑀼𑀤𑁆𑀥𑁂𑀦 𑀤𑀺𑀝𑁆𑀞𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀸𑀯𑀤𑁂𑀯 𑀅𑀲𑁆𑀲𑀧𑀺𑀝𑁆𑀞𑀺𑀢𑁄 𑀑𑀢𑀭𑀺𑀢𑁆𑀯𑀸 𑀑𑀦𑀢𑀲𑀭𑀻𑀭𑁄 𑀭𑀲𑁆𑀫𑀺𑀅𑀦𑀼𑀲𑀸𑀭𑁂𑀦 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀦𑁄𑀲𑀺𑀮𑀸𑀭𑀲𑁂 𑀦𑀺𑀫𑀼𑀚𑁆𑀚𑀦𑁆𑀢𑁄 𑀯𑀺𑀬 𑀩𑀼𑀤𑁆𑀥𑀭𑀲𑁆𑀫𑀻𑀦𑀁 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀅𑀫𑀘𑁆𑀘𑀲𑀳𑀲𑁆𑀲𑁂𑀦, 𑀲𑀢𑁆𑀣𑀸 𑀢𑀲𑁆𑀲 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀭𑀸𑀚𑀸 𑀲𑀧𑀭𑀺𑀯𑀸𑀭𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀅𑀣 𑀲𑀩𑁆𑀩𑁂𑀯 𑀉𑀝𑁆𑀞𑀳𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀼. 𑀲𑀢𑁆𑀣𑀸 ‘‘𑀆𑀕𑀫𑀺𑀲𑁆𑀲𑀢𑀺 𑀦𑀼 𑀔𑁄 𑀇𑀫𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀇𑀫𑁂 𑀓𑀼𑀮𑀧𑀼𑀢𑁆𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀳𑀲𑁆𑀲𑀲𑁆𑀲 𑀘𑀻𑀯𑀭𑀲𑀳𑀲𑁆𑀲𑀁 𑀅𑀤𑀁𑀲𑀼, 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀫𑁆𑀧𑀺 𑀯𑀻𑀲𑀢𑀺𑀘𑀻𑀯𑀭𑀲𑀳𑀲𑁆𑀲𑀸𑀦𑀺𑀧𑀺 𑀅𑀤𑀁𑀲𑀼. 𑀅𑀦𑀘𑁆𑀙𑀭𑀺𑀬𑀁 𑀇𑀫𑁂𑀲𑀁 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀸𑀕𑀫𑀦’’𑀦𑁆𑀢𑀺 𑀜𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀏𑀣, 𑀪𑀺𑀓𑁆𑀔𑀯𑁄, 𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺 𑀆𑀳. 𑀢𑁂 𑀢𑀸𑀯𑀤𑁂𑀯 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀥𑀭𑀸 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑀸 𑀯𑀺𑀬 𑀳𑀼𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼.

𑀢𑁂𑀧𑀺 𑀯𑀸𑀡𑀺𑀚𑀓𑀸 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑀸 𑀧𑀳𑀺𑀢𑀪𑀸𑀯𑀁 𑀆𑀭𑁄𑀘𑀸𑀧𑁂𑀢𑁆𑀯𑀸 𑀤𑁂𑀯𑀺𑀬𑀸 ‘‘𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀯𑀼𑀢𑁆𑀢𑁂 𑀧𑀯𑀺𑀲𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀅𑀣 𑀦𑁂 𑀤𑁂𑀯𑀻 𑀧𑀼𑀘𑁆𑀙𑀺 𑁋 ‘‘𑀢𑀸𑀢𑀸, 𑀓𑀺𑀁 𑀓𑀸𑀭𑀡𑀸 𑀆𑀕𑀢𑀸𑀢𑁆𑀣𑀸’’𑀢𑀺? ‘‘𑀫𑀬𑀁 𑀭𑀜𑁆𑀜𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀧𑀳𑀺𑀢𑀸, 𑀢𑀻𑀡𑀺 𑀓𑀺𑀭 𑀦𑁄 𑀲𑀢𑀲𑀳𑀲𑁆𑀲𑀸𑀦𑀺 𑀤𑁂𑀣𑀸’’𑀢𑀺. ‘‘𑀢𑀸𑀢𑀸, 𑀅𑀢𑀺𑀩𑀳𑀼𑀁 𑀪𑀡𑀣, 𑀓𑀺𑀁 𑀢𑀼𑀫𑁆𑀳𑁂𑀳𑀺 𑀭𑀜𑁆𑀜𑁄 𑀓𑀢𑀁, 𑀓𑀺𑀲𑁆𑀫𑀺𑀁 𑀯𑁄 𑀭𑀸𑀚𑀸 𑀧𑀲𑀦𑁆𑀦𑁄 𑀏𑀢𑁆𑀢𑀓𑀁 𑀥𑀦𑀁 𑀤𑀸𑀧𑁂𑀲𑀻’’𑀢𑀺? ‘‘𑀤𑁂𑀯𑀺, 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀢𑀁, 𑀭𑀜𑁆𑀜𑁄 𑀧𑀦 𑀏𑀓𑀁 𑀲𑀸𑀲𑀦𑀁 𑀆𑀭𑁄𑀘𑀬𑀺𑀫𑁆𑀳𑀸’’𑀢𑀺? ‘‘𑀲𑀓𑁆𑀓𑀸 𑀧𑀦, 𑀢𑀸𑀢𑀸, 𑀫𑀬𑁆𑀳𑀁 𑀆𑀭𑁄𑀘𑁂𑀢𑀼’’𑀦𑁆𑀢𑀺. ‘‘𑀲𑀓𑁆𑀓𑀸, 𑀤𑁂𑀯𑀻’’𑀢𑀺. ‘‘𑀢𑁂𑀦 𑀳𑀺, 𑀢𑀸𑀢𑀸, 𑀯𑀤𑁂𑀣𑀸’’𑀢𑀺. ‘‘𑀤𑁂𑀯𑀺 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄’’𑀢𑀺. 𑀲𑀸𑀧𑀺 ‘‘𑀢𑀁 𑀲𑀼𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀻𑀢𑀺𑀬𑀸 𑀨𑀼𑀝𑁆𑀞𑀲𑀭𑀻𑀭𑀸 𑀢𑀺𑀓𑁆𑀔𑀢𑁆𑀢𑀼𑀁 𑀓𑀺𑀜𑁆𑀘𑀺 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀘𑀢𑀼𑀢𑁆𑀣𑁂 𑀯𑀸𑀭𑁂 ‘𑀩𑀼𑀤𑁆𑀥𑁄’𑀢𑀺 𑀧𑀤𑀁 𑀲𑀼𑀢𑁆𑀯𑀸, 𑀢𑀸𑀢𑀸, 𑀇𑀫𑀲𑁆𑀫𑀺𑀁 𑀧𑀤𑁂 𑀭𑀜𑁆𑀜𑀸 𑀓𑀺𑀁 𑀤𑀺𑀦𑁆𑀦’’𑀦𑁆𑀢𑀺? ‘‘𑀲𑀢𑀲𑀳𑀲𑁆𑀲𑀁, 𑀤𑁂𑀯𑀻’’𑀢𑀺. ‘‘𑀢𑀸𑀢𑀸, 𑀅𑀦𑀦𑀼𑀘𑁆𑀙𑀯𑀺𑀓𑀁 𑀭𑀜𑁆𑀜𑀸 𑀓𑀢𑀁 𑀏𑀯𑀭𑀽𑀧𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀲𑀢𑀲𑀳𑀲𑁆𑀲𑀁 𑀤𑀤𑀫𑀸𑀦𑁂𑀦. 𑀅𑀳𑀜𑁆𑀳𑀺 𑀯𑁄 𑀫𑀫 𑀤𑀼𑀕𑁆𑀕𑀢𑀧𑀡𑁆𑀡𑀸𑀓𑀸𑀭𑁂 𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺 𑀤𑀫𑁆𑀫𑀺, 𑀅𑀧𑀭𑀫𑁆𑀧𑀺 𑀢𑀼𑀫𑁆𑀳𑁂𑀳𑀺 𑀭𑀜𑁆𑀜𑁄 𑀓𑀺𑀁 𑀆𑀭𑁄𑀘𑀺𑀢’’𑀦𑁆𑀢𑀺? 𑀢𑁂 𑀇𑀤𑀜𑁆𑀘𑀺𑀤𑀜𑁆𑀘𑀸𑀢𑀺 𑀇𑀢𑀭𑀸𑀦𑀺𑀧𑀺 𑀤𑁆𑀯𑁂 𑀲𑀸𑀲𑀦𑀸𑀦𑀺 𑀆𑀭𑁄𑀘𑀬𑀺𑀁𑀲𑀼. 𑀤𑁂𑀯𑀻 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀻𑀢𑀺𑀬𑀸 𑀨𑀼𑀝𑁆𑀞𑀲𑀭𑀻𑀭𑀸 𑀢𑀺𑀓𑁆𑀔𑀢𑁆𑀢𑀼𑀁 𑀓𑀺𑀜𑁆𑀘𑀺 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀘𑀢𑀼𑀢𑁆𑀣𑁂 𑀯𑀸𑀭𑁂 𑀢𑀣𑁂𑀯 𑀲𑀼𑀢𑁆𑀯𑀸 𑀢𑀻𑀡𑀺 𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺 𑀤𑀸𑀧𑁂𑀲𑀺, 𑀏𑀯𑀁 𑀢𑁂 𑀲𑀩𑁆𑀩𑀸𑀦𑀺𑀧𑀺 𑀤𑁆𑀯𑀸𑀤𑀲 𑀲𑀢𑀲𑀳𑀲𑁆𑀲𑀸𑀦𑀺 𑀮𑀪𑀺𑀁𑀲𑀼.

𑀅𑀣 𑀦𑁂 𑀤𑁂𑀯𑀻 𑀧𑀼𑀘𑁆𑀙𑀺 𑁋 ‘‘𑀭𑀸𑀚𑀸 𑀓𑀳𑀁, 𑀢𑀸𑀢𑀸’’𑀢𑀺? 𑀤𑁂𑀯𑀺, ‘‘𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 ‘𑀧𑀩𑁆𑀩𑀚𑀺𑀲𑁆𑀲𑀸𑀫𑀻’𑀢𑀺 𑀕𑀢𑁄’’𑀢𑀺. ‘‘𑀫𑀬𑁆𑀳𑀁 𑀢𑁂𑀦 𑀓𑀺𑀁 𑀲𑀸𑀲𑀦𑀁 𑀤𑀺𑀦𑁆𑀦’’𑀦𑁆𑀢𑀺? ‘‘𑀲𑀩𑁆𑀩𑀁 𑀓𑀺𑀭 𑀢𑁂𑀦 𑀢𑀼𑀫𑁆𑀳𑀸𑀓𑀁 𑀇𑀲𑁆𑀲𑀭𑀺𑀬𑀁 𑀯𑀺𑀲𑁆𑀲𑀝𑁆𑀞𑀁, 𑀢𑀼𑀫𑁆𑀳𑁂 𑀓𑀺𑀭 𑀬𑀣𑀸𑀭𑀼𑀘𑀺𑀬𑀸 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀣𑀸’’𑀢𑀺. ‘‘𑀅𑀫𑀘𑁆𑀘𑀸 𑀧𑀦 𑀓𑀳𑀁, 𑀢𑀸𑀢𑀸’’𑀢𑀺? 𑀢𑁂𑀧𑀺 ‘‘‘𑀭𑀜𑁆𑀜𑀸 𑀲𑀤𑁆𑀥𑀺𑀁𑀬𑁂𑀯 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’𑀢𑀺 𑀕𑀢𑀸, 𑀤𑁂𑀯𑀻’’𑀢𑀺. 𑀲𑀸 𑀢𑁂𑀲𑀁 𑀪𑀭𑀺𑀬𑀸𑀬𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, 𑀅𑀫𑁆𑀫𑀸, 𑀢𑀼𑀫𑁆𑀳𑀸𑀓𑀁 𑀲𑀸𑀫𑀺𑀓𑀸 ‘‘𑀭𑀜𑁆𑀜𑀸 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀕𑀢𑀸, ‘‘𑀢𑀼𑀫𑁆𑀳𑁂 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀓𑀺𑀁 𑀧𑀦 𑀢𑁂𑀳𑀺 𑀅𑀫𑁆𑀳𑀸𑀓𑀁 𑀲𑀸𑀲𑀦𑀁 𑀧𑀳𑀺𑀢𑀁, 𑀤𑁂𑀯𑀻’’𑀢𑀺? ‘‘𑀢𑁂𑀳𑀺 𑀓𑀺𑀭 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺 𑀢𑀼𑀫𑁆𑀳𑀸𑀓𑀁 𑀯𑀺𑀲𑁆𑀲𑀝𑁆𑀞𑀸, 𑀢𑀼𑀫𑁆𑀳𑁂 𑀓𑀺𑀭 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀬𑀣𑀸𑀭𑀼𑀘𑀺 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺. ‘‘𑀢𑀼𑀫𑁆𑀳𑁂 𑀧𑀦, 𑀤𑁂𑀯𑀺, 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀅𑀫𑁆𑀫𑀸, 𑀲𑁄 𑀢𑀸𑀯 𑀭𑀸𑀚𑀸 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀫𑀕𑁆𑀕𑁂 𑀞𑀺𑀢𑀓𑁄𑀯 𑀢𑀻𑀳𑀺 𑀲𑀢𑀲𑀳𑀲𑁆𑀲𑁂𑀳𑀺 𑀢𑀻𑀡𑀺 𑀭𑀢𑀦𑀸𑀦𑀺 𑀧𑀽𑀚𑁂𑀢𑁆𑀯𑀸 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 ‘𑀧𑀩𑁆𑀩𑀚𑀺𑀲𑁆𑀲𑀸𑀫𑀻’𑀢𑀺 𑀦𑀺𑀓𑁆𑀔𑀦𑁆𑀢𑁄, 𑀫𑀬𑀸 𑀧𑀦 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀢𑀻𑀡𑀺 𑀭𑀢𑀦𑀸𑀦𑀺 𑀦𑀯𑀳𑀺 𑀲𑀢𑀲𑀳𑀲𑁆𑀲𑁂𑀳𑀺 𑀧𑀽𑀚𑀺𑀢𑀸𑀦𑀺, 𑀦 𑀔𑁄 𑀧𑀦𑁂𑀲𑀸 𑀲𑀫𑁆𑀧𑀢𑁆𑀢𑀺 𑀦𑀸𑀫 𑀭𑀜𑁆𑀜𑁄𑀬𑁂𑀯 𑀤𑀼𑀓𑁆𑀔𑀸, 𑀫𑀬𑁆𑀳𑀫𑁆𑀧𑀺 𑀤𑀼𑀓𑁆𑀔𑀸𑀬𑁂𑀯. 𑀓𑁄 𑀭𑀜𑁆𑀜𑀸 𑀙𑀟𑁆𑀟𑀺𑀢𑀔𑁂𑀴𑀧𑀺𑀡𑁆𑀟𑀁 𑀚𑀸𑀡𑀼𑀓𑁂𑀳𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀫𑀼𑀔𑁂𑀦 𑀕𑀡𑁆𑀳𑀺𑀲𑁆𑀲𑀢𑀺, 𑀦 𑀫𑀬𑁆𑀳𑀁 𑀲𑀫𑁆𑀧𑀢𑁆𑀢𑀺𑀬𑀸 𑀅𑀢𑁆𑀣𑁄, 𑀅𑀳𑀫𑁆𑀧𑀺 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀤𑁂𑀯𑀺, 𑀫𑀬𑀫𑁆𑀧𑀺 𑀢𑀼𑀫𑁆𑀳𑁂𑀳𑁂𑀯 𑀲𑀤𑁆𑀥𑀺𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺. ‘‘𑀲𑀘𑁂 𑀲𑀓𑁆𑀓𑁄𑀣, 𑀲𑀸𑀥𑀼, 𑀅𑀫𑁆𑀫𑀸’’𑀢𑀺? ‘‘𑀲𑀓𑁆𑀓𑁄𑀫, 𑀤𑁂𑀯𑀻’’𑀢𑀺. ‘‘𑀲𑀸𑀥𑀼, 𑀅𑀫𑁆𑀫𑀸, 𑀢𑁂𑀦 𑀳𑀺 𑀏𑀣𑀸’’𑀢𑀺 𑀭𑀣𑀲𑀳𑀲𑁆𑀲𑀁 𑀬𑁄𑀚𑀸𑀧𑁂𑀢𑁆𑀯𑀸 𑀭𑀣𑀁 𑀆𑀭𑀼𑀬𑁆𑀳 𑀢𑀸𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀞𑀫𑀁 𑀦𑀤𑀺𑀁 𑀤𑀺𑀲𑁆𑀯𑀸 𑀬𑀣𑀸 𑀭𑀜𑁆𑀜𑀸 𑀧𑀼𑀝𑁆𑀞𑀁, 𑀢𑀣𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀭𑀜𑁆𑀜𑁄 𑀕𑀢𑀫𑀕𑁆𑀕𑀁 𑀑𑀮𑁄𑀓𑁂𑀣𑀸’’𑀢𑀺 𑀯𑀢𑁆𑀯𑀸 ‘‘𑀲𑀺𑀦𑁆𑀥𑀯𑀸𑀦𑀁 𑀧𑀤𑀯𑀮𑀜𑁆𑀚𑀁 𑀦 𑀧𑀲𑁆𑀲𑀸𑀫, 𑀤𑁂𑀯𑀻’’𑀢𑀺 𑀯𑀼𑀢𑁆𑀢𑁂 ‘‘𑀭𑀸𑀚𑀸 𑀢𑀻𑀡𑀺 𑀭𑀢𑀦𑀸𑀦𑀺 𑀉𑀤𑁆𑀤𑀺𑀲𑁆𑀲 𑀦𑀺𑀓𑁆𑀔𑀦𑁆𑀢𑁄 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀕𑀢𑁄 𑀪𑀯𑀺𑀲𑁆𑀲𑀢𑀺. 𑀅𑀳𑀫𑁆𑀧𑀺 𑀢𑀻𑀡𑀺 𑀭𑀢𑀦𑀸𑀦𑀺 𑀉𑀤𑁆𑀤𑀺𑀲𑁆𑀲 𑀦𑀺𑀓𑁆𑀔𑀦𑁆𑀢𑀸, 𑀢𑁂𑀲𑀫𑁂𑀯 𑀅𑀦𑀼𑀪𑀸𑀯𑁂𑀦 𑀇𑀤𑀁 𑀉𑀤𑀓𑀁 𑀯𑀺𑀬 𑀫𑀸 𑀅𑀳𑁄𑀲𑀻’’𑀢𑀺 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀭𑀣𑀲𑀳𑀲𑁆𑀲𑀁 𑀧𑁂𑀲𑁂𑀲𑀺. 𑀉𑀤𑀓𑀁 𑀧𑀺𑀝𑁆𑀞𑀺𑀧𑀸𑀲𑀸𑀡𑀲𑀤𑀺𑀲𑀁 𑀅𑀳𑁄𑀲𑀺. 𑀘𑀓𑁆𑀓𑀸𑀦𑀁 𑀅𑀕𑁆𑀕𑀕𑁆𑀕𑀦𑁂𑀫𑀺𑀯𑀝𑁆𑀝𑀺𑀬𑁄 𑀦𑁂𑀯 𑀢𑁂𑀫𑀺𑀁𑀲𑀼. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀇𑀢𑀭𑀸 𑀤𑁆𑀯𑁂 𑀦𑀤𑀺𑀬𑁄 𑀉𑀢𑁆𑀢𑀭𑀺.

𑀅𑀣 𑀲𑀢𑁆𑀣𑀸 𑀢𑀲𑁆𑀲𑀸𑀕𑀫𑀦𑀪𑀸𑀯𑀁 𑀜𑀢𑁆𑀯𑀸 𑀬𑀣𑀸 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑀸 𑀪𑀺𑀓𑁆𑀔𑀽 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀏𑀯𑀫𑀓𑀸𑀲𑀺. 𑀲𑀸𑀧𑀺 𑀕𑀘𑁆𑀙𑀦𑁆𑀢𑀻 𑀕𑀘𑁆𑀙𑀦𑁆𑀢𑀻 𑀲𑀢𑁆𑀣𑀼 𑀲𑀭𑀻𑀭𑀢𑁄 𑀦𑀺𑀓𑁆𑀔𑀦𑁆𑀢𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀤𑀺𑀲𑁆𑀯𑀸 𑀢𑀣𑁂𑀯 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀫𑀳𑀸𑀓𑀧𑁆𑀧𑀺𑀦𑁄 𑀢𑀼𑀫𑁆𑀳𑀸𑀓𑀁 𑀉𑀤𑁆𑀤𑀺𑀲𑁆𑀲 𑀦𑀺𑀓𑁆𑀔𑀦𑁆𑀢𑁄 𑀆𑀕𑀢𑁂𑀢𑁆𑀣 𑀫𑀜𑁆𑀜𑁂, 𑀓𑀳𑀁 𑀲𑁄, 𑀅𑀫𑁆𑀳𑀸𑀓𑀫𑁆𑀧𑀺 𑀦𑀁 𑀤𑀲𑁆𑀲𑁂𑀣𑀸’’𑀢𑀺? ‘‘𑀦𑀺𑀲𑀻𑀤𑀣 𑀢𑀸𑀯, 𑀇𑀥𑁂𑀯 𑀦𑀁 𑀧𑀲𑁆𑀲𑀺𑀲𑁆𑀲𑀣𑀸’’𑀢𑀺. 𑀢𑀸 𑀲𑀩𑁆𑀩𑀸𑀧𑀺 𑀢𑀼𑀝𑁆𑀞𑀘𑀺𑀢𑁆𑀢𑀸 ‘‘𑀇𑀥𑁂𑀯 𑀓𑀺𑀭 𑀦𑀺𑀲𑀺𑀦𑁆𑀦𑀸 𑀲𑀸𑀫𑀺𑀓𑁂 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑀸𑀲𑀁 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀅𑀦𑁄𑀚𑀸𑀤𑁂𑀯𑀻 𑀤𑁂𑀲𑀦𑀸𑀯𑀲𑀸𑀦𑁂 𑀲𑀧𑀭𑀺𑀯𑀸𑀭𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺. 𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑁄 𑀢𑀸𑀲𑀁 𑀯𑀟𑁆𑀠𑀺𑀢𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑁄 𑀲𑀧𑀭𑀺𑀯𑀸𑀭𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀢𑁆𑀣𑀸 𑀢𑀸𑀲𑀁 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁂 𑀤𑀲𑁆𑀲𑁂𑀲𑀺. 𑀢𑀸𑀲𑀁 𑀓𑀺𑀭 𑀆𑀕𑀢𑀓𑁆𑀔𑀡𑁂𑀬𑁂𑀯 𑀅𑀢𑁆𑀢𑀦𑁄 𑀲𑀸𑀫𑀺𑀓𑁂 𑀓𑀸𑀲𑀸𑀯𑀥𑀭𑁂 𑀫𑀼𑀡𑁆𑀟𑀓𑀲𑀻𑀲𑁂 𑀤𑀺𑀲𑁆𑀯𑀸 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀦 𑀪𑀯𑁂𑀬𑁆𑀬, 𑀢𑁂𑀦 𑀫𑀕𑁆𑀕𑀨𑀮𑀸𑀦𑀺 𑀧𑀢𑁆𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬𑀼𑀁. 𑀢𑀲𑁆𑀫𑀸 𑀅𑀘𑀮𑀲𑀤𑁆𑀥𑀸𑀬 𑀧𑀢𑀺𑀝𑁆𑀞𑀺𑀢𑀓𑀸𑀮𑁂 𑀢𑀸𑀲𑀁 𑀢𑁂 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁂𑀬𑁂𑀯 𑀤𑀲𑁆𑀲𑁂𑀲𑀺.

𑀢𑀸𑀧𑀺 𑀢𑁂 𑀤𑀺𑀲𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀢𑀸𑀯 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀼. 𑀏𑀯𑀁 𑀓𑀺𑀭 𑀯𑀼𑀢𑁆𑀢𑁂 ‘‘𑀲𑀢𑁆𑀣𑀸 𑀉𑀧𑁆𑀧𑀮𑀯𑀡𑁆𑀡𑀸𑀬 𑀆𑀕𑀫𑀦𑀁 𑀘𑀺𑀦𑁆𑀢𑁂𑀲𑀻’’𑀢𑀺 𑀏𑀓𑀘𑁆𑀘𑁂 𑀯𑀤𑀦𑁆𑀢𑀺. 𑀲𑀢𑁆𑀣𑀸 𑀧𑀦 𑀢𑀸 𑀉𑀧𑀸𑀲𑀺𑀓𑀸𑀬𑁄 𑀆𑀳 𑁋 ‘‘𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀉𑀧𑀲𑁆𑀲𑀬𑁂 𑀧𑀩𑁆𑀩𑀚𑁂𑀣𑀸’’𑀢𑀺. 𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀫𑀸𑀦𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀳𑀸𑀚𑀦𑁂𑀦 𑀅𑀪𑀺𑀳𑀝𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀸 𑀧𑀤𑀲𑀸𑀯 𑀯𑀻𑀲𑀬𑁄𑀚𑀦𑀲𑀢𑀺𑀓𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀉𑀧𑀲𑁆𑀲𑀬𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀢𑁆𑀣𑀸𑀧𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀆𑀤𑀸𑀬 𑀆𑀓𑀸𑀲𑁂𑀦𑁂𑀯 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺. 𑀢𑀢𑁆𑀭 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀳𑀸𑀓𑀧𑁆𑀧𑀺𑀦𑁄 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀤𑀻𑀲𑀼 ‘‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’𑀦𑁆𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁 𑁋 ‘‘𑀪𑀦𑁆𑀢𑁂, 𑀫𑀳𑀸𑀓𑀧𑁆𑀧𑀺𑀦𑁄 ‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’𑀦𑁆𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀯𑀺𑀘𑀭𑀢𑀺, 𑀅𑀢𑁆𑀢𑀦𑁄 𑀓𑀸𑀫𑀲𑀼𑀔𑀁 𑀭𑀚𑁆𑀚𑀲𑀼𑀔𑀁 𑀆𑀭𑀩𑁆𑀪 𑀓𑀣𑁂𑀲𑀺 𑀫𑀜𑁆𑀜𑁂’’𑀢𑀺. 𑀲𑀢𑁆𑀣𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀓𑀧𑁆𑀧𑀺𑀦, 𑀓𑀸𑀫𑀲𑀼𑀔𑀁 𑀭𑀚𑁆𑀚𑀲𑀼𑀔𑀁 𑀆𑀭𑀩𑁆𑀪 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻’’𑀢𑀺. ‘‘𑀪𑀕𑀯𑀸 𑀫𑁂, 𑀪𑀦𑁆𑀢𑁂, 𑀢𑀁 𑀆𑀭𑀩𑁆𑀪 𑀉𑀤𑀸𑀦𑀪𑀸𑀯𑀁 𑀯𑀸 𑀅𑀦𑀼𑀤𑀸𑀦𑀪𑀸𑀯𑀁 𑀯𑀸 𑀚𑀸𑀦𑀸𑀢𑀻’’𑀢𑀺? 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑁄 𑀓𑀸𑀫𑀲𑀼𑀔𑀁 𑀭𑀚𑁆𑀚𑀲𑀼𑀔𑀁 𑀆𑀭𑀩𑁆𑀪 𑀉𑀤𑀸𑀦𑀁 𑀉𑀤𑀸𑀦𑁂𑀢𑀺, 𑀧𑀼𑀢𑁆𑀢𑀲𑁆𑀲 𑀧𑀦 𑀫𑁂 𑀥𑀫𑁆𑀫𑀧𑀻𑀢𑀺 𑀦𑀸𑀫 𑀥𑀫𑁆𑀫𑀭𑀢𑀺 𑀦𑀸𑀫 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀏𑀯 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁭𑁯. ‘‘𑀥𑀫𑁆𑀫𑀧𑀻𑀢𑀺 𑀲𑀼𑀔𑀁 𑀲𑁂𑀢𑀺, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀅𑀭𑀺𑀬𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑁂, 𑀲𑀤𑀸 𑀭𑀫𑀢𑀺 𑀧𑀡𑁆𑀟𑀺𑀢𑁄’’𑀢𑀺.

𑀢𑀢𑁆𑀣 𑀥𑀫𑁆𑀫𑀧𑀻𑀢𑀻𑀢𑀺 𑀥𑀫𑁆𑀫𑀧𑀸𑀬𑀓𑁄, 𑀥𑀫𑁆𑀫𑀁 𑀧𑀺𑀯𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁄 𑀘 𑀦𑀸𑀫𑁂𑀲 𑀦 𑀲𑀓𑁆𑀓𑀸 𑀪𑀸𑀚𑀦𑁂𑀦 𑀬𑀸𑀕𑀼𑀆𑀤𑀻𑀦𑀺 𑀯𑀺𑀬 𑀧𑀸𑀢𑀼𑀁? 𑀦𑀯𑀯𑀺𑀥𑀁 𑀧𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀸𑀫𑀓𑀸𑀬𑁂𑀦 𑀨𑀼𑀲𑀦𑁆𑀢𑁄 𑀆𑀭𑀫𑁆𑀫𑀡𑀢𑁄 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀻𑀳𑀺 𑀤𑀼𑀓𑁆𑀔𑀸𑀤𑀻𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀥𑀫𑁆𑀫𑀁 𑀧𑀺𑀯𑀢𑀺 𑀦𑀸𑀫. 𑀲𑀼𑀔𑀁 𑀲𑁂𑀢𑀻𑀢𑀺 𑀤𑁂𑀲𑀦𑀸𑀫𑀢𑁆𑀢𑀫𑁂𑀯𑁂𑀢𑀁, 𑀘𑀢𑀽𑀳𑀺𑀧𑀺 𑀇𑀭𑀺𑀬𑀸𑀧𑀣𑁂𑀳𑀺 𑀲𑀼𑀔𑀁 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀧𑁆𑀧𑀲𑀦𑁆𑀦𑁂𑀦𑀸𑀢𑀺 𑀅𑀦𑀸𑀯𑀺𑀮𑁂𑀦 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑁂𑀦. 𑀅𑀭𑀺𑀬𑀧𑁆𑀧𑀯𑁂𑀤𑀺𑀢𑁂𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀅𑀭𑀺𑀬𑁂𑀳𑀺 𑀧𑀯𑁂𑀤𑀺𑀢𑁂 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑁂 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂. 𑀲𑀤𑀸 𑀭𑀫𑀢𑀻𑀢𑀺 𑀏𑀯𑀭𑀽𑀧𑁄 𑀥𑀫𑁆𑀫𑀧𑀻𑀢𑀺 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸 𑀯𑀺𑀳𑀭𑀦𑁆𑀢𑁄 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀤𑀸 𑀭𑀫𑀢𑀺 𑀅𑀪𑀺𑀭𑀫𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀳𑁂𑀲𑀼𑀦𑁆𑀢𑀺.

𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀧𑀡𑁆𑀟𑀺𑀢𑀲𑀸𑀫𑀡𑁂𑀭𑀯𑀢𑁆𑀣𑀼

𑀉𑀤𑀓𑀜𑁆𑀳𑀺 𑀦𑀬𑀦𑁆𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀡𑁆𑀟𑀺𑀢𑀲𑀸𑀫𑀡𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀅𑀢𑀻𑀢𑁂 𑀓𑀺𑀭 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀻𑀲𑀢𑀺𑀔𑀻𑀡𑀸𑀲𑀯𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀩𑀸𑀭𑀸𑀡𑀲𑀺𑀁 𑀅𑀕𑀫𑀸𑀲𑀺. 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀩𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀝𑁆𑀞𑀧𑀺 𑀤𑀲𑀧𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀅𑀕𑀦𑁆𑀢𑀼𑀓𑀤𑀸𑀦𑀸𑀤𑀻𑀦𑀺 𑀅𑀤𑀁𑀲𑀼. 𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀏𑀯𑀁 𑀅𑀦𑀼𑀫𑁄𑀤𑀦𑀫𑀓𑀸𑀲𑀺 𑁋

‘‘𑀉𑀧𑀸𑀲𑀓𑀸 𑀇𑀥 𑀏𑀓𑀘𑁆𑀘𑁄 ‘𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁂𑀯 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀓𑀺𑀁 𑀧𑀭𑁂𑀦 𑀲𑀫𑀸𑀤𑀧𑀺𑀢𑁂𑀦𑀸’𑀢𑀺 𑀅𑀢𑁆𑀢𑀦𑀸𑀯 𑀤𑀸𑀦𑀁 𑀤𑁂𑀢𑀺, 𑀧𑀭𑀁 𑀦 𑀲𑀫𑀸𑀤𑀧𑁂𑀢𑀺. 𑀲𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀪𑁄𑀕𑀲𑀫𑁆𑀧𑀤𑀁 𑀮𑀪𑀢𑀺, 𑀦𑁄 𑀧𑀭𑀺𑀯𑀸𑀭𑀲𑀫𑁆𑀧𑀤𑀁. 𑀏𑀓𑀘𑁆𑀘𑁄 𑀧𑀭𑀁 𑀲𑀫𑀸𑀤𑀧𑁂𑀢𑀺, 𑀅𑀢𑁆𑀢𑀦𑀸 𑀦 𑀤𑁂𑀢𑀺. 𑀲𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀧𑀭𑀺𑀯𑀸𑀭𑀲𑀫𑁆𑀧𑀤𑀁 𑀮𑀪𑀢𑀺, 𑀦𑁄 𑀪𑁄𑀕𑀲𑀫𑁆𑀧𑀤𑀁 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸𑀧𑀺 𑀦 𑀤𑁂𑀢𑀺, 𑀧𑀭𑀫𑁆𑀧𑀺 𑀦 𑀲𑀫𑀸𑀤𑀧𑁂𑀢𑀺. 𑀲𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀦𑁂𑀯 𑀪𑁄𑀕𑀲𑀫𑁆𑀧𑀤𑀁 𑀮𑀪𑀢𑀺, 𑀦 𑀧𑀭𑀺𑀯𑀸𑀭𑀲𑀫𑁆𑀧𑀤𑀁, 𑀯𑀺𑀖𑀸𑀲𑀸𑀤𑁄𑀯 𑀳𑀼𑀢𑁆𑀯𑀸 𑀚𑀻𑀯𑀢𑀺. 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀘 𑀤𑁂𑀢𑀺, 𑀧𑀭𑀜𑁆𑀘 𑀲𑀫𑀸𑀤𑀧𑁂𑀢𑀺. 𑀲𑁄 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀪𑁄𑀕𑀲𑀫𑁆𑀧𑀤𑀫𑁆𑀧𑀺 𑀮𑀪𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀤𑀫𑁆𑀧𑀻’’𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀫𑀻𑀧𑁂 𑀞𑀺𑀢𑁄 𑀏𑀓𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀤𑀸𑀦𑀺 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺, 𑀬𑀣𑀸 𑀫𑁂 𑀤𑁆𑀯𑁂𑀧𑀺 𑀲𑀫𑁆𑀧𑀢𑁆𑀢𑀺𑀬𑁄 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀲𑁆𑀯𑀸𑀢𑀦𑀸𑀬 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺. ‘‘𑀓𑀺𑀢𑁆𑀢𑀓𑁂𑀳𑀺 𑀢𑁂 𑀪𑀺𑀓𑁆𑀔𑀽𑀳𑀺 𑀅𑀢𑁆𑀣𑁄’’𑀢𑀺? ‘‘𑀓𑀺𑀢𑁆𑀢𑀓𑁄 𑀧𑀦 𑀯𑁄, 𑀪𑀦𑁆𑀢𑁂, 𑀧𑀭𑀺𑀯𑀸𑀭𑁄’’𑀢𑀺? ‘‘𑀯𑀻𑀲𑀢𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀻’’𑀢𑀺. ‘‘𑀪𑀦𑁆𑀢𑁂, 𑀲𑀩𑁆𑀩𑁂𑀳𑀺 𑀲𑀤𑁆𑀥𑀺𑀁 𑀲𑁆𑀯𑀸𑀢𑀦𑀸𑀬 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺. 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺. 𑀲𑁄 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸, ‘‘𑀅𑀫𑁆𑀫𑀢𑀸𑀢𑀸, 𑀲𑁆𑀯𑀸𑀢𑀦𑀸𑀬 𑀫𑀬𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄, 𑀢𑀼𑀫𑁆𑀳𑁂 𑀬𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀣, 𑀢𑀢𑁆𑀢𑀓𑀸𑀦𑀁 𑀤𑀸𑀦𑀁 𑀤𑁂𑀣𑀸’’𑀢𑀺 𑀆𑀭𑁄𑀘𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀩𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀫𑀬𑀁 𑀤𑀲𑀦𑁆𑀦𑀁 𑀤𑀲𑁆𑀲𑀸𑀫, 𑀫𑀬𑀁 𑀯𑀻𑀲𑀢𑀺𑀬𑀸, 𑀫𑀬𑀁 𑀲𑀢𑀲𑁆𑀲, 𑀫𑀬𑀁 𑀧𑀜𑁆𑀘𑀲𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑁂𑀲𑀁 𑀯𑀘𑀦𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀡𑁆𑀡𑁂 𑀆𑀭𑁄𑀧𑁂𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀢𑀲𑁆𑀫𑀺𑀁 𑀦𑀕𑀭𑁂 𑀅𑀢𑀺𑀤𑀼𑀕𑁆𑀕𑀢𑀪𑀸𑀯𑁂𑀦𑁂𑀯 ‘‘𑀫𑀳𑀸𑀤𑀼𑀕𑁆𑀕𑀢𑁄’’𑀢𑀺 𑀧𑀜𑁆𑀜𑀸𑀢𑁄 𑀏𑀓𑁄 𑀧𑀼𑀭𑀺𑀲𑁄 𑀅𑀢𑁆𑀣𑀺. 𑀲𑁄 𑀢𑀫𑁆𑀧𑀺 𑀲𑀫𑁆𑀫𑀼𑀔𑀸𑀕𑀢𑀁 𑀤𑀺𑀲𑁆𑀯𑀸, 𑀲𑀫𑁆𑀫 𑀫𑀳𑀸𑀤𑀼𑀕𑁆𑀕𑀢, 𑀫𑀬𑀸 𑀲𑁆𑀯𑀸𑀢𑀦𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄, 𑀲𑁆𑀯𑁂 𑀦𑀕𑀭𑀯𑀸𑀲𑀺𑀦𑁄 𑀤𑀸𑀦𑀁 𑀤𑀲𑁆𑀲𑀦𑁆𑀢𑀺, ‘‘𑀢𑁆𑀯𑀁 𑀓𑀢𑀺 𑀪𑀺𑀓𑁆𑀔𑀽 𑀪𑁄𑀚𑁂𑀲𑁆𑀲𑀲𑀻’’𑀢𑀺? ‘‘𑀲𑀸𑀫𑀺, 𑀫𑀬𑁆𑀳𑀁 𑀓𑀺𑀁 𑀪𑀺𑀓𑁆𑀔𑀽𑀳𑀺, 𑀪𑀺𑀓𑁆𑀔𑀽𑀳𑀺 𑀦𑀸𑀫 𑀲𑀥𑀦𑀸𑀦𑀁 𑀅𑀢𑁆𑀣𑁄, 𑀫𑀬𑁆𑀳𑀁 𑀧𑀦 𑀲𑁆𑀯𑁂 𑀬𑀸𑀕𑀼𑀅𑀢𑁆𑀣𑀸𑀬 𑀢𑀡𑁆𑀟𑀼𑀮𑀦𑀸𑀴𑀺𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀅𑀳𑀁 𑀪𑀢𑀺𑀁 𑀓𑀢𑁆𑀯𑀸 𑀚𑀻𑀯𑀸𑀫𑀺, 𑀓𑀺𑀁 𑀫𑁂 𑀪𑀺𑀓𑁆𑀔𑀽𑀳𑀻’’𑀢𑀺? 𑀲𑀫𑀸𑀤𑀧𑀓𑁂𑀦 𑀦𑀸𑀫 𑀩𑁆𑀬𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀲𑁄 𑀢𑁂𑀦 ‘‘𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀢𑀼𑀡𑁆𑀳𑀻𑀪𑀽𑀢𑁄 𑀅𑀳𑀼𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀲𑀫𑁆𑀫 𑀫𑀳𑀸𑀤𑀼𑀕𑁆𑀕𑀢, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀼𑀔𑀼𑀫𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀦𑀸𑀦𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑀸 𑀲𑀺𑀭𑀺𑀲𑀬𑀦𑁂 𑀲𑀬𑀫𑀸𑀦𑀸 𑀩𑀳𑀽 𑀚𑀦𑀸 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀺, 𑀢𑁆𑀯𑀁 𑀧𑀦 𑀤𑀺𑀯𑀲𑀁 𑀪𑀢𑀺𑀁 𑀓𑀢𑁆𑀯𑀸 𑀓𑀼𑀘𑁆𑀙𑀺𑀧𑀽𑀭𑀡𑀫𑀢𑁆𑀢𑀫𑁆𑀧𑀺 𑀦 𑀮𑀪𑀲𑀺, 𑀏𑀯𑀁 𑀲𑀦𑁆𑀢𑁂𑀧𑀺 ‘𑀅𑀳𑀁 𑀧𑀼𑀩𑁆𑀩𑁂 𑀧𑀼𑀜𑁆𑀜𑀁 𑀅𑀓𑀢𑀢𑁆𑀢𑀸 𑀓𑀺𑀜𑁆𑀘𑀺 𑀦 𑀮𑀪𑀸𑀫𑀻’𑀢𑀺 𑀦 𑀚𑀸𑀦𑀸𑀲𑀻’’𑀢𑀺? ‘‘𑀚𑀸𑀦𑀸𑀫𑀺, 𑀲𑀸𑀫𑀻’’𑀢𑀺. ‘‘𑀅𑀣 𑀓𑀲𑁆𑀫𑀸 𑀇𑀤𑀸𑀦𑀺 𑀧𑀼𑀜𑁆𑀜𑀁 𑀦 𑀓𑀭𑁄𑀲𑀺, 𑀢𑁆𑀯𑀁 𑀬𑀼𑀯𑀸 𑀩𑀮𑀲𑀫𑁆𑀧𑀦𑁆𑀦𑁄, 𑀓𑀺𑀁 𑀢𑀬𑀸 𑀪𑀢𑀺𑀁 𑀓𑀢𑁆𑀯𑀸𑀧𑀺 𑀬𑀣𑀸𑀩𑀮𑀁 𑀤𑀸𑀦𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺? 𑀲𑁄 𑀢𑀲𑁆𑀫𑀺𑀁 𑀓𑀣𑁂𑀦𑁆𑀢𑁂𑀬𑁂𑀯 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 ‘‘𑀫𑀬𑁆𑀳𑀫𑁆𑀧𑀺 𑀏𑀓𑀁 𑀪𑀺𑀓𑁆𑀔𑀼𑀁 𑀧𑀡𑁆𑀡𑁂 𑀆𑀭𑁄𑀧𑁂𑀳𑀺, 𑀓𑀺𑀜𑁆𑀘𑀺𑀤𑁂𑀯 𑀪𑀢𑀺𑀁 𑀓𑀢𑁆𑀯𑀸 𑀏𑀓𑀲𑁆𑀲 𑀪𑀺𑀓𑁆𑀔𑀁 𑀤𑀲𑁆𑀲𑀸𑀫𑀻’’𑀢𑀺 𑀆𑀳. 𑀇𑀢𑀭𑁄 ‘‘𑀓𑀺𑀁 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀡𑁆𑀡𑁂 𑀆𑀭𑁄𑀧𑀺𑀢𑁂𑀦𑀸’’𑀢𑀺 𑀦 𑀆𑀭𑁄𑀧𑁂𑀲𑀺? 𑀫𑀳𑀸𑀤𑀼𑀕𑁆𑀕𑀢𑁄𑀧𑀺 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀭𑀺𑀬𑀁 𑀆𑀳 𑁋 ‘‘𑀪𑀤𑁆𑀤𑁂, 𑀦𑀕𑀭𑀯𑀸𑀲𑀺𑀦𑁄 𑀲𑁆𑀯𑁂 𑀲𑀗𑁆𑀖𑀪𑀢𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀅𑀳𑀫𑁆𑀧𑀺 𑀲𑀫𑀸𑀤𑀧𑀓𑁂𑀦 ‘𑀏𑀓𑀲𑁆𑀲 𑀪𑀺𑀓𑁆𑀔𑀁 𑀤𑁂𑀳𑀻’𑀢𑀺 𑀯𑀼𑀢𑁆𑀢𑁄, 𑀫𑀬𑀫𑁆𑀧𑀺 𑀲𑁆𑀯𑁂 𑀏𑀓𑀲𑁆𑀲 𑀪𑀺𑀓𑁆𑀔𑀁 𑀤𑀲𑁆𑀲𑀸𑀫𑀸’’𑀢𑀺. 𑀅𑀣𑀲𑁆𑀲 𑀪𑀭𑀺𑀬𑀸 ‘‘𑀫𑀬𑀁 𑀤𑀮𑀺𑀤𑁆𑀤𑀸, 𑀓𑀲𑁆𑀫𑀸 𑀢𑀬𑀸 𑀲𑀫𑁆𑀧𑀝𑀺𑀘𑁆𑀙𑀺𑀢’’𑀦𑁆𑀢𑀺 𑀅𑀯𑀢𑁆𑀯𑀸𑀯, ‘‘𑀲𑀸𑀫𑀺, 𑀪𑀤𑁆𑀤𑀓𑀁 𑀢𑁂 𑀓𑀢𑀁, 𑀫𑀬𑀁 𑀧𑀼𑀩𑁆𑀩𑁂𑀧𑀺 𑀓𑀺𑀜𑁆𑀘𑀺 𑀅𑀤𑀢𑁆𑀯𑀸 𑀇𑀤𑀸𑀦𑀺 𑀤𑀼𑀕𑁆𑀕𑀢𑀸 𑀚𑀸𑀢𑀸, 𑀫𑀬𑀁 𑀉𑀪𑁄𑀧𑀺 𑀪𑀢𑀺𑀁 𑀓𑀢𑁆𑀯𑀸 𑀏𑀓𑀲𑁆𑀲 𑀪𑀺𑀓𑁆𑀔𑀁 𑀤𑀲𑁆𑀲𑀸𑀫, 𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀉𑀪𑁄𑀧𑀺 𑀕𑁂𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀢𑀺𑀝𑁆𑀞𑀸𑀦𑀁 𑀅𑀕𑀫𑀁𑀲𑀼.

𑀫𑀳𑀸𑀲𑁂𑀝𑁆𑀞𑀺 𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁, 𑀲𑀫𑁆𑀫 𑀫𑀳𑀸𑀤𑀼𑀕𑁆𑀕𑀢, 𑀪𑀢𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀆𑀫, 𑀅𑀬𑁆𑀬𑀸’’𑀢𑀺. ‘‘𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀬𑀁 𑀢𑀼𑀫𑁆𑀳𑁂 𑀓𑀸𑀭𑁂𑀲𑁆𑀲𑀣, 𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀢𑁂𑀦 𑀳𑀺 𑀫𑀬𑀁 𑀲𑁆𑀯𑁂 𑀤𑁆𑀯𑁂 𑀢𑀻𑀡𑀺 𑀪𑀺𑀓𑁆𑀔𑀼𑀲𑀢𑀸𑀦𑀺 𑀪𑁄𑀚𑁂𑀲𑁆𑀲𑀸𑀫, 𑀏𑀳𑀺, 𑀤𑀸𑀭𑀽𑀦𑀺 𑀨𑀸𑀮𑁂𑀳𑀻’’𑀢𑀺 𑀯𑀸𑀲𑀺𑀨𑀭𑀲𑀼𑀁 𑀦𑀻𑀳𑀭𑀺𑀢𑁆𑀯𑀸 𑀤𑀸𑀧𑁂𑀲𑀺. 𑀫𑀳𑀸𑀤𑀼𑀕𑁆𑀕𑀢𑁄 𑀤𑀴𑁆𑀳𑀁 𑀓𑀘𑁆𑀙𑀁 𑀩𑀦𑁆𑀥𑀺𑀢𑁆𑀯𑀸 𑀫𑀳𑀼𑀲𑁆𑀲𑀸𑀳𑀧𑁆𑀧𑀢𑁆𑀢𑁄 𑀯𑀸𑀲𑀺𑀁 𑀧𑀳𑀸𑀬 𑀨𑀭𑀲𑀼𑀁 𑀕𑀡𑁆𑀳𑀦𑁆𑀢𑁄, 𑀨𑀭𑀲𑀼𑀁 𑀧𑀳𑀸𑀬 𑀯𑀸𑀲𑀺𑀁 𑀕𑀡𑁆𑀳𑀦𑁆𑀢𑁄 𑀤𑀸𑀭𑀽𑀦𑀺 𑀨𑀸𑀮𑁂𑀢𑀺. 𑀅𑀣 𑀦𑀁 𑀲𑁂𑀝𑁆𑀞𑀺 𑀆𑀳 𑁋 ‘‘𑀲𑀫𑁆𑀫, 𑀢𑁆𑀯𑀁 𑀅𑀚𑁆𑀚 𑀅𑀢𑀺𑀯𑀺𑀬 𑀉𑀲𑁆𑀲𑀸𑀳𑀧𑁆𑀧𑀢𑁆𑀢𑁄 𑀓𑀫𑁆𑀫𑀁 𑀓𑀭𑁄𑀲𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺? ‘‘𑀲𑀸𑀫𑀺, 𑀅𑀳𑀁 𑀲𑁆𑀯𑁂 𑀏𑀓𑀁 𑀪𑀺𑀓𑁆𑀔𑀼𑀁 𑀪𑁄𑀚𑁂𑀲𑁆𑀲𑀸𑀫𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺 𑀧𑀲𑀦𑁆𑀦𑀫𑀸𑀦𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀇𑀫𑀺𑀦𑀸 𑀤𑀼𑀓𑁆𑀓𑀭𑀁 𑀓𑀢𑀁, ‘𑀅𑀳𑀁 𑀤𑀼𑀕𑁆𑀕𑀢𑁄’𑀢𑀺 𑀢𑀼𑀡𑁆𑀳𑀻𑀪𑀸𑀯𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 ‘𑀪𑀢𑀺𑀁 𑀓𑀢𑁆𑀯𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀪𑁄𑀚𑁂𑀲𑁆𑀲𑀸𑀫𑀻’𑀢𑀺 𑀯𑀤𑀢𑀻’’𑀢𑀺. 𑀲𑁂𑀝𑁆𑀞𑀺𑀪𑀭𑀺𑀬𑀸𑀧𑀺 𑀢𑀲𑁆𑀲 𑀪𑀭𑀺𑀬𑀁 𑀤𑀺𑀲𑁆𑀯𑀸, ‘‘𑀅𑀫𑁆𑀫, 𑀓𑀺𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑀁 𑀢𑀼𑀫𑁆𑀳𑁂 𑀓𑀸𑀭𑁂𑀲𑁆𑀲𑀣, 𑀢𑀁 𑀓𑀭𑁄𑀫𑀻’’𑀢𑀺 𑀯𑀼𑀢𑁆𑀢𑁂 𑀉𑀤𑀼𑀓𑁆𑀔𑀮𑀲𑀸𑀮𑀁 𑀧𑀯𑁂𑀲𑁂𑀢𑁆𑀯𑀸 𑀲𑀼𑀧𑁆𑀧𑀫𑀼𑀲𑀮𑀸𑀤𑀻𑀦𑀺 𑀤𑀸𑀧𑁂𑀲𑀺. 𑀲𑀸 𑀦𑀘𑁆𑀘𑀦𑁆𑀢𑀻 𑀯𑀺𑀬 𑀢𑀼𑀝𑁆𑀞𑀧𑀳𑀝𑁆𑀞𑀸 𑀯𑀻𑀳𑀺𑀁 𑀓𑁄𑀝𑁆𑀝𑁂𑀢𑀺 𑀘𑁂𑀯 𑀑𑀨𑀼𑀡𑀸𑀢𑀺 𑀘. 𑀅𑀣 𑀦𑀁 𑀲𑁂𑀝𑁆𑀞𑀺𑀪𑀭𑀺𑀬𑀸 𑀧𑀼𑀘𑁆𑀙𑀺 𑁋 ‘‘𑀅𑀫𑁆𑀫, 𑀢𑁆𑀯𑀁 𑀅𑀢𑀺𑀯𑀺𑀬 𑀢𑀼𑀝𑁆𑀞𑀧𑀳𑀝𑁆𑀞𑀸 𑀓𑀫𑁆𑀫𑀁 𑀓𑀭𑁄𑀲𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺? ‘‘𑀅𑀬𑁆𑀬𑁂, 𑀇𑀫𑀁 𑀪𑀢𑀺𑀁 𑀓𑀢𑁆𑀯𑀸 𑀫𑀬𑀫𑁆𑀧𑀺 𑀏𑀓𑀁 𑀪𑀺𑀓𑁆𑀔𑀼𑀁 𑀪𑁄𑀚𑁂𑀲𑁆𑀲𑀸𑀫𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺𑀪𑀭𑀺𑀬𑀸𑀧𑀺 𑀢𑀲𑁆𑀲𑀁 ‘‘𑀅𑀳𑁄 𑀯𑀢𑀸𑀬𑀁 𑀤𑀼𑀓𑁆𑀓𑀭𑀓𑀸𑀭𑀺𑀓𑀸’’𑀢𑀺 𑀧𑀲𑀻𑀤𑀺. 𑀲𑁂𑀝𑁆𑀞𑀺 𑀫𑀳𑀸𑀤𑀼𑀕𑁆𑀕𑀢𑀲𑁆𑀲 𑀤𑀸𑀭𑀽𑀦𑀁 𑀨𑀸𑀮𑀺𑀢𑀓𑀸𑀮𑁂 ‘‘𑀅𑀬𑀁 𑀢𑁂 𑀪𑀢𑀻’’𑀢𑀺 𑀲𑀸𑀮𑀻𑀦𑀁 𑀘𑀢𑀲𑁆𑀲𑁄 𑀦𑀸𑀴𑀺𑀬𑁄 𑀤𑀸𑀧𑁂𑀢𑁆𑀯𑀸 ‘‘𑀅𑀬𑀁 𑀢𑁂 𑀢𑀼𑀝𑁆𑀞𑀺𑀤𑀸𑀬𑁄’’𑀢𑀺 𑀅𑀧𑀭𑀸𑀧𑀺 𑀘𑀢𑀲𑁆𑀲𑁄 𑀦𑀸𑀴𑀺𑀬𑁄 𑀤𑀸𑀧𑁂𑀲𑀺.

𑀲𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀭𑀺𑀬𑀁 𑀆𑀳 𑁋 ‘‘𑀫𑀬𑀸 𑀪𑀢𑀺𑀁 𑀓𑀢𑁆𑀯𑀸 𑀲𑀸𑀮𑀺 𑀮𑀤𑁆𑀥𑁄, 𑀅𑀬𑀁 𑀦𑀺𑀯𑀸𑀧𑁄 𑀪𑀯𑀺𑀲𑁆𑀲𑀢𑀺, 𑀢𑀬𑀸 𑀮𑀤𑁆𑀥𑀸𑀬 𑀪𑀢𑀺𑀬𑀸 𑀤𑀥𑀺𑀢𑁂𑀮𑀓𑀝𑀼𑀓𑀪𑀡𑁆𑀟𑀸𑀦𑀺 𑀕𑀡𑁆𑀳𑀸𑀳𑀻’’𑀢𑀺. 𑀲𑁂𑀝𑁆𑀞𑀺𑀪𑀭𑀺𑀬𑀸𑀧𑀺 𑀧𑀼𑀦 𑀢𑀲𑁆𑀲𑀸 𑀏𑀓𑀁 𑀲𑀧𑁆𑀧𑀺𑀓𑀭𑁄𑀝𑀺𑀓𑀜𑁆𑀘𑁂𑀯 𑀤𑀥𑀺𑀪𑀸𑀚𑀦𑀜𑁆𑀘 𑀓𑀝𑀼𑀓𑀪𑀡𑁆𑀟𑀜𑁆𑀘 𑀲𑀼𑀤𑁆𑀥𑀢𑀡𑁆𑀟𑀼𑀴𑀺𑀦𑀸𑀴𑀺𑀜𑁆𑀘 𑀤𑀸𑀧𑁂𑀲𑀺. 𑀇𑀢𑀺 𑀘 𑀉𑀪𑀺𑀦𑁆𑀦𑀫𑁆𑀧𑀺 𑀦𑀯 𑀢𑀡𑁆𑀟𑀼𑀮𑀦𑀸𑀴𑀺𑀬𑁄 𑀅𑀳𑁂𑀲𑀼𑀁. 𑀢𑁂 ‘‘𑀤𑁂𑀬𑁆𑀬𑀥𑀫𑁆𑀫𑁄 𑀦𑁄 𑀮𑀤𑁆𑀥𑁄’’𑀢𑀺 𑀢𑀼𑀝𑁆𑀞𑀳𑀝𑁆𑀞𑀸 𑀧𑀸𑀢𑁄𑀯 𑀉𑀝𑁆𑀞𑀳𑀺𑀁𑀲𑀼. 𑀪𑀭𑀺𑀬𑀸 𑀫𑀳𑀸𑀤𑀼𑀕𑁆𑀕𑀢𑀁 𑀆𑀳 𑁋 ‘‘𑀕𑀘𑁆𑀙, 𑀲𑀸𑀫𑀺, 𑀧𑀡𑁆𑀡𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀳𑀭𑀸’’𑀢𑀺. 𑀲𑁄 𑀅𑀦𑁆𑀢𑀭𑀸𑀧𑀡𑁂 𑀧𑀡𑁆𑀡𑀁 𑀅𑀤𑀺𑀲𑁆𑀯𑀸 𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 ‘‘𑀅𑀚𑁆𑀚 𑀅𑀬𑁆𑀬𑀸𑀦𑀁 𑀪𑁄𑀚𑀦𑀁 𑀤𑀸𑀢𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀧𑀳𑀝𑁆𑀞𑀫𑀸𑀦𑀲𑁄 𑀕𑀸𑀬𑀦𑁆𑀢𑁄 𑀧𑀡𑁆𑀡𑀁 𑀉𑀘𑁆𑀘𑀺𑀦𑀢𑀺. 𑀫𑀳𑀸𑀚𑀸𑀮𑀁 𑀔𑀺𑀧𑀺𑀢𑁆𑀯𑀸 𑀞𑀺𑀢𑁄 𑀓𑁂𑀯𑀝𑁆𑀝𑁄 ‘‘𑀫𑀳𑀸𑀤𑀼𑀕𑁆𑀕𑀢𑀲𑁆𑀲 𑀲𑀤𑁆𑀤𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀢𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀅𑀢𑀺𑀯𑀺𑀬 𑀢𑀼𑀝𑁆𑀞𑀘𑀺𑀢𑁆𑀢𑁄 𑀕𑀸𑀬𑀲𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺? ‘‘𑀧𑀡𑁆𑀡𑀁 𑀉𑀘𑁆𑀘𑀺𑀦𑀸𑀫𑀺, 𑀲𑀫𑁆𑀫𑀸’’𑀢𑀺. ‘‘𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀏𑀓𑀁 𑀪𑀺𑀓𑁆𑀔𑀼𑀁 𑀪𑁄𑀚𑁂𑀲𑁆𑀲𑀸𑀫𑀻’’𑀢𑀺. ‘‘𑀅𑀳𑁄 𑀲𑀼𑀔𑀺𑀢𑁄, 𑀪𑀺𑀓𑁆𑀔𑀼, 𑀲𑁄 𑀢𑀯 𑀓𑀺𑀁 𑀧𑀡𑁆𑀡𑀁 𑀔𑀸𑀤𑀺𑀲𑁆𑀲𑀢𑀻’’𑀢𑀺? ‘‘𑀓𑀺𑀁 𑀓𑀭𑁄𑀫𑀺, 𑀲𑀫𑁆𑀫, 𑀅𑀢𑁆𑀢𑀦𑀸 𑀮𑀤𑁆𑀥𑀧𑀡𑁆𑀡𑁂𑀦 𑀪𑁄𑀚𑁂𑀲𑁆𑀲𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀏𑀳𑀻’’𑀢𑀺. ‘‘𑀓𑀺𑀁 𑀓𑀭𑁄𑀫𑀺, 𑀲𑀫𑁆𑀫𑀸’’𑀢𑀺? ‘‘𑀇𑀫𑁂 𑀫𑀘𑁆𑀙𑁂 𑀕𑀳𑁂𑀢𑁆𑀯𑀸 𑀧𑀸𑀤𑀕𑁆𑀖𑀦𑀓𑀸𑀦𑀺 𑀅𑀟𑁆𑀠𑀕𑁆𑀖𑀦𑀓𑀸𑀦𑀺 𑀓𑀳𑀸𑀧𑀡𑀕𑁆𑀖𑀦𑀓𑀸𑀦𑀺 𑀘 𑀉𑀤𑁆𑀤𑀸𑀦𑀸𑀦𑀺 𑀓𑀭𑁄𑀳𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀩𑀤𑁆𑀥𑀩𑀤𑁆𑀥𑁂 𑀫𑀘𑁆𑀙𑁂 𑀦𑀕𑀭𑀯𑀸𑀲𑀺𑀦𑁄 𑀦𑀺𑀫𑀦𑁆𑀢𑀺𑀢𑀦𑀺𑀫𑀦𑁆𑀢𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀳𑀭𑀺𑀁𑀲𑀼. 𑀢𑀲𑁆𑀲 𑀫𑀘𑁆𑀙𑀼𑀤𑁆𑀤𑀸𑀦𑀸𑀦𑀺 𑀓𑀭𑁄𑀦𑁆𑀢𑀲𑁆𑀲𑁂𑀯 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸 𑀧𑀸𑀧𑀼𑀡𑀺. 𑀲𑁄 𑀯𑁂𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀕𑀫𑀺𑀲𑁆𑀲𑀸𑀫𑀳𑀁, 𑀲𑀫𑁆𑀫, 𑀅𑀬𑀁 𑀪𑀺𑀓𑁆𑀔𑀽𑀦𑀁 𑀆𑀕𑀫𑀦𑀯𑁂𑀮𑀸’’𑀢𑀺 𑀆𑀳. ‘‘𑀅𑀢𑁆𑀣𑀺 𑀧𑀦 𑀓𑀺𑀜𑁆𑀘𑀺 𑀫𑀘𑁆𑀙𑀼𑀤𑁆𑀤𑀸𑀦’’𑀦𑁆𑀢𑀺? ‘‘𑀦𑀢𑁆𑀣𑀺, 𑀲𑀫𑁆𑀫, 𑀲𑀩𑁆𑀩𑀸𑀦𑀺 𑀔𑀻𑀡𑀸𑀦𑀻’’𑀢𑀺. ‘‘𑀢𑁂𑀦 𑀳𑀺 𑀫𑀬𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀸𑀮𑀼𑀓𑀸𑀬 𑀦𑀺𑀔𑀡𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀭𑁄𑀳𑀺𑀢𑀫𑀘𑁆𑀙𑀸 𑀞𑀧𑀺𑀢𑀸, 𑀲𑀘𑁂 𑀪𑀺𑀓𑁆𑀔𑀼𑀁 𑀪𑁄𑀚𑁂𑀢𑀼𑀓𑀸𑀫𑁄𑀲𑀺, 𑀇𑀫𑁂 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸’’𑀢𑀺 𑀢𑁂 𑀫𑀘𑁆𑀙𑁂 𑀢𑀲𑁆𑀲 𑀅𑀤𑀸𑀲𑀺.

𑀢𑀁 𑀤𑀺𑀯𑀲𑀁 𑀧𑀦 𑀲𑀢𑁆𑀣𑀸 𑀧𑀘𑁆𑀘𑀽𑀲𑀓𑀸𑀮𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀫𑀳𑀸𑀤𑀼𑀕𑁆𑀕𑀢𑀁 𑀅𑀢𑁆𑀢𑀦𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀫𑀳𑀸𑀤𑀼𑀕𑁆𑀕𑀢𑁄 ‘𑀏𑀓𑀁 𑀪𑀺𑀓𑁆𑀔𑀼𑀁 𑀪𑁄𑀚𑁂𑀲𑁆𑀲𑀸𑀫𑀻’𑀢𑀺 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀳𑀺𑀬𑁆𑀬𑁄 𑀪𑀢𑀺𑀁 𑀅𑀓𑀸𑀲𑀺, 𑀓𑀢𑀭𑀁 𑀦𑀼 𑀔𑁄 𑀪𑀺𑀓𑁆𑀔𑀼𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀦𑀼𑀲𑁆𑀲𑀸 𑀧𑀡𑁆𑀡𑁂 𑀆𑀭𑁄𑀧𑀺𑀢𑀲𑀜𑁆𑀜𑀸𑀬 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑁂𑀳𑁂𑀲𑀼 𑀦𑀺𑀲𑀻𑀤𑀸𑀧𑁂𑀲𑁆𑀲𑀦𑁆𑀢𑀺, 𑀫𑀳𑀸𑀤𑀼𑀕𑁆𑀕𑀢𑁄 𑀫𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀦 𑀮𑀪𑀺𑀲𑁆𑀲𑀢𑀻’’𑀢𑀺 𑀉𑀧𑀥𑀸𑀭𑁂𑀲𑀺. 𑀩𑀼𑀤𑁆𑀥𑀸 𑀓𑀺𑀭 𑀤𑀼𑀕𑁆𑀕𑀢𑁂𑀲𑀼 𑀅𑀦𑀼𑀓𑀫𑁆𑀧𑀁 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀢𑁆𑀣𑀸 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 ‘‘𑀫𑀳𑀸𑀤𑀼𑀕𑁆𑀕𑀢𑀁 𑀲𑀗𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀫𑀳𑀸𑀤𑀼𑀕𑁆𑀕𑀢𑁂𑀧𑀺 𑀫𑀘𑁆𑀙𑁂 𑀕𑀳𑁂𑀢𑁆𑀯𑀸 𑀕𑁂𑀳𑀁 𑀧𑀯𑀺𑀲𑀦𑁆𑀢𑁂 𑀲𑀓𑁆𑀓𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀳𑀺𑀬𑁆𑀬𑁄, 𑀫𑀳𑀸𑀤𑀼𑀕𑁆𑀕𑀢𑁄 ‘𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀺𑀓𑁆𑀔𑀁 𑀤𑀲𑁆𑀲𑀸𑀫𑀻’𑀢𑀺 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀪𑀢𑀺𑀁 𑀅𑀓𑀸𑀲𑀺, 𑀓𑀢𑀭𑀁 𑀦𑀼 𑀔𑁄 𑀪𑀺𑀓𑁆𑀔𑀼𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀦𑀢𑁆𑀣𑁂𑀢𑀲𑁆𑀲 𑀅𑀜𑁆𑀜𑁄 𑀪𑀺𑀓𑁆𑀔𑀼, 𑀲𑀢𑁆𑀣𑀸 𑀧𑀦 𑀫𑀳𑀸𑀤𑀼𑀕𑁆𑀕𑀢𑀲𑁆𑀲 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄. 𑀫𑀳𑀸𑀤𑀼𑀕𑁆𑀕𑀢𑁄 𑀅𑀢𑁆𑀢𑀦𑁄 𑀉𑀧𑀓𑀧𑁆𑀧𑀦𑀓𑀁 𑀬𑀸𑀕𑀼𑀪𑀢𑁆𑀢𑀁 𑀧𑀡𑁆𑀡𑀲𑀽𑀧𑁂𑀬𑁆𑀬𑀫𑁆𑀧𑀺 𑀢𑀣𑀸𑀕𑀢𑀲𑁆𑀲 𑀤𑀤𑁂𑀬𑁆𑀬, ‘‘𑀬𑀁𑀦𑀽𑀦𑀸𑀳𑀁 𑀫𑀳𑀸𑀤𑀼𑀕𑁆𑀕𑀢𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀪𑀢𑁆𑀢𑀓𑀸𑀭𑀓𑀓𑀫𑁆𑀫𑀁 𑀓𑀭𑁂𑀬𑁆𑀬’’𑀦𑁆𑀢𑀺 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀢𑀲𑁆𑀲 𑀕𑁂𑀳𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀪𑀢𑀺𑀬𑀸 𑀓𑀸𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺. 𑀫𑀳𑀸𑀤𑀼𑀕𑁆𑀕𑀢𑁄 𑀢𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀲𑀫𑁆𑀫, 𑀓𑀺𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀅𑀳𑀁, 𑀲𑀸𑀫𑀺, 𑀲𑀩𑁆𑀩𑀲𑀺𑀧𑁆𑀧𑀺𑀓𑁄, 𑀫𑀬𑁆𑀳𑀁 𑀅𑀚𑀸𑀦𑀦𑀲𑀺𑀧𑁆𑀧𑀁 𑀦𑀸𑀫 𑀦𑀢𑁆𑀣𑀺, 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺𑀧𑀺 𑀲𑀫𑁆𑀧𑀸𑀤𑁂𑀢𑀼𑀁 𑀚𑀸𑀦𑀸𑀫𑀻’’𑀢𑀺. ‘‘𑀲𑀫𑁆𑀫, 𑀫𑀬𑀁 𑀢𑀯 𑀓𑀫𑁆𑀫𑁂𑀦 𑀅𑀢𑁆𑀣𑀺𑀓𑀸, 𑀢𑀼𑀬𑁆𑀳𑀁 𑀧𑀦 𑀓𑀺𑀜𑁆𑀘𑀺 𑀤𑀸𑀢𑀩𑁆𑀩𑀁 𑀪𑀢𑀺𑀁 𑀦 𑀧𑀲𑁆𑀲𑀸𑀫𑀸’’𑀢𑀺. ‘‘𑀓𑀺𑀁 𑀧𑀦 𑀢𑁂 𑀓𑀢𑁆𑀢𑀩𑁆𑀩’’𑀦𑁆𑀢𑀺? ‘‘𑀏𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀁 𑀤𑀸𑀢𑀼𑀓𑀸𑀫𑁄𑀫𑁆𑀳𑀺, 𑀢𑀲𑁆𑀲 𑀬𑀸𑀕𑀼𑀪𑀢𑁆𑀢𑀲𑀁𑀯𑀺𑀥𑀸𑀦𑀁 𑀇𑀘𑁆𑀙𑀸𑀫𑀻’’𑀢𑀺. ‘‘𑀲𑀘𑁂 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀁 𑀤𑀲𑁆𑀲𑀲𑀺, 𑀦 𑀫𑁂 𑀪𑀢𑀺𑀬𑀸 𑀅𑀢𑁆𑀣𑁄, 𑀓𑀺𑀁 𑀫𑀫 𑀧𑀼𑀜𑁆𑀜𑀁 𑀦 𑀯𑀝𑁆𑀝𑀢𑀻’’𑀢𑀺? ‘‘𑀏𑀯𑀁 𑀲𑀦𑁆𑀢𑁂 𑀲𑀸𑀥𑀼, 𑀲𑀫𑁆𑀫, 𑀧𑀯𑀺𑀲𑀸’’𑀢𑀺. 𑀲𑁄 𑀢𑀲𑁆𑀲 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀢𑁂𑀮𑀢𑀡𑁆𑀟𑀼𑀮𑀸𑀤𑀻𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 ‘‘𑀕𑀘𑁆𑀙, 𑀅𑀢𑁆𑀢𑀦𑁄 𑀧𑀢𑁆𑀢𑀪𑀺𑀓𑁆𑀔𑀼𑀁 𑀆𑀦𑁂𑀳𑀻’’𑀢𑀺 𑀢𑀁 𑀉𑀬𑁆𑀬𑁄𑀚𑁂𑀲𑀺. 𑀤𑀸𑀦𑀯𑁂𑀬𑁆𑀬𑀸𑀯𑀝𑀺𑀓𑁄𑀧𑀺 𑀧𑀡𑁆𑀡𑁂 𑀆𑀭𑁄𑀧𑀺𑀢𑀦𑀺𑀬𑀸𑀫𑁂𑀦𑁂𑀯 𑀢𑁂𑀲𑀁 𑀢𑁂𑀲𑀁 𑀕𑁂𑀳𑀸𑀦𑀺 𑀪𑀺𑀓𑁆𑀔𑀽 𑀧𑀳𑀺𑀡𑀺.

𑀫𑀳𑀸𑀤𑀼𑀕𑁆𑀕𑀢𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀫𑀬𑁆𑀳𑀁 𑀧𑀢𑁆𑀢𑀪𑀺𑀓𑁆𑀔𑀼𑀁 𑀤𑁂𑀳𑀻’’𑀢𑀺 𑀆𑀳. 𑀲𑁄 𑀢𑀲𑁆𑀫𑀺𑀁 𑀔𑀡𑁂 𑀲𑀢𑀺𑀁 𑀮𑀪𑀺𑀢𑁆𑀯𑀸 ‘‘𑀅𑀳𑀁 𑀢𑀯 𑀪𑀺𑀓𑁆𑀔𑀼𑀁 𑀧𑀫𑀼𑀝𑁆𑀞𑁄’’𑀢𑀺 𑀆𑀳. 𑀫𑀳𑀸𑀤𑀼𑀕𑁆𑀕𑀢𑁄 𑀢𑀺𑀔𑀺𑀡𑀸𑀬 𑀲𑀢𑁆𑀢𑀺𑀬𑀸 𑀓𑀼𑀘𑁆𑀙𑀺𑀬𑀁 𑀧𑀳𑀝𑁄 𑀯𑀺𑀬, ‘‘𑀲𑀸𑀫𑀺, 𑀓𑀲𑁆𑀫𑀸 𑀫𑀁 𑀦𑀸𑀲𑁂𑀲𑀺, 𑀅𑀳𑀁 𑀢𑀬𑀸 𑀳𑀺𑀬𑁆𑀬𑁄 𑀲𑀫𑀸𑀤𑀧𑀺𑀢𑁄 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀤𑀺𑀯𑀲𑀁 𑀪𑀢𑀺𑀁 𑀓𑀢𑁆𑀯𑀸 𑀅𑀚𑁆𑀚 𑀧𑀸𑀢𑁄𑀯 𑀧𑀡𑁆𑀡𑀢𑁆𑀣𑀸𑀬 𑀦𑀤𑀻𑀢𑀻𑀭𑁂 𑀆𑀳𑀺𑀡𑁆𑀟𑀺𑀢𑁆𑀯𑀸 𑀆𑀕𑀢𑁄, 𑀤𑁂𑀳𑀺 𑀫𑁂 𑀏𑀓𑀁 𑀪𑀺𑀓𑁆𑀔𑀼’’𑀦𑁆𑀢𑀺 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀧𑀭𑀺𑀤𑁂𑀯𑀺. 𑀫𑀦𑀼𑀲𑁆𑀲𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀓𑀺𑀫𑁂𑀢𑀁, 𑀫𑀳𑀸𑀤𑀼𑀕𑁆𑀕𑀢𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑁂 𑀯𑁂𑀬𑁆𑀬𑀸𑀯𑀝𑀺𑀓𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀲𑀘𑁆𑀘𑀁 𑀓𑀺𑀭, 𑀲𑀫𑁆𑀫, 𑀢𑀬𑀸 𑀏𑀲 ‘𑀪𑀢𑀺𑀁 𑀓𑀢𑁆𑀯𑀸 𑀏𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀁 𑀤𑁂𑀳𑀻’𑀢𑀺 𑀲𑀫𑀸𑀤𑀧𑀺𑀢𑁄’’𑀢𑀺? ‘‘𑀆𑀫, 𑀅𑀬𑁆𑀬𑀸’’𑀢𑀺. ‘‘𑀪𑀸𑀭𑀺𑀬𑀁 𑀢𑁂 𑀓𑀫𑁆𑀫𑀁 𑀓𑀢𑀁, 𑀬𑁄 𑀢𑁆𑀯𑀁 𑀏𑀢𑁆𑀢𑀓𑁂 𑀪𑀺𑀓𑁆𑀔𑀽 𑀲𑀁𑀯𑀺𑀤𑀳𑀦𑁆𑀢𑁄 𑀏𑀢𑀲𑁆𑀲 𑀏𑀓𑀁 𑀪𑀺𑀓𑁆𑀔𑀼𑀁 𑀦𑀸𑀤𑀸𑀲𑀻’’𑀢𑀺. 𑀲𑁄 𑀢𑁂𑀲𑀁 𑀯𑀘𑀦𑁂𑀦 𑀫𑀗𑁆𑀓𑀼𑀪𑀽𑀢𑁄 𑀢𑀁 𑀆𑀳 𑁋 ‘‘𑀲𑀫𑁆𑀫 𑀫𑀳𑀸𑀤𑀼𑀕𑁆𑀕𑀢, 𑀫𑀸 𑀫𑀁 𑀦𑀸𑀲𑀬𑀺, 𑀅𑀳𑀁 𑀢𑀯 𑀓𑀸𑀭𑀡𑀸 𑀫𑀳𑀸𑀯𑀺𑀳𑁂𑀲𑀁 𑀧𑀢𑁆𑀢𑁄, 𑀫𑀦𑀼𑀲𑁆𑀲𑀸 𑀧𑀡𑁆𑀡𑁂 𑀆𑀭𑁄𑀧𑀺𑀢𑀦𑀺𑀬𑀸𑀫𑁂𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀪𑀺𑀓𑁆𑀔𑀽 𑀦𑀬𑀺𑀁𑀲𑀼, 𑀅𑀢𑁆𑀢𑀦𑁄 𑀕𑁂𑀳𑁂 𑀦𑀺𑀲𑀺𑀦𑁆𑀦𑀪𑀺𑀓𑁆𑀔𑀼𑀁 𑀦𑀻𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀲𑀢𑁆𑀣𑀸 𑀧𑀦 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀬𑀫𑁂𑀯 𑀦𑀺𑀲𑀺𑀦𑁆𑀦𑁄, 𑀭𑀸𑀚𑀬𑀼𑀯𑀭𑀸𑀚𑀲𑁂𑀦𑀸𑀧𑀢𑀺𑀆𑀤𑀬𑁄 𑀲𑀢𑁆𑀣𑀼 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀦𑀁 𑀑𑀮𑁄𑀓𑁂𑀦𑁆𑀢𑀸 𑀦𑀺𑀲𑀺𑀦𑁆𑀦𑀸 𑀲𑀢𑁆𑀣𑀼 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 ‘𑀕𑀫𑀺𑀲𑁆𑀲𑀸𑀫𑀸’𑀢𑀺. 𑀩𑀼𑀤𑁆𑀥𑀸 𑀦𑀸𑀫 𑀤𑀼𑀕𑁆𑀕𑀢𑁂 𑀅𑀦𑀼𑀓𑀫𑁆𑀧𑀁 𑀓𑀭𑁄𑀦𑁆𑀢𑀺, 𑀢𑁆𑀯𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘𑀤𑀼𑀕𑁆𑀕𑀢𑁄𑀫𑁆𑀳𑀺, 𑀪𑀦𑁆𑀢𑁂, 𑀫𑀫 𑀲𑀗𑁆𑀕𑀳𑀁 𑀓𑀭𑁄𑀣𑀸’𑀢𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤, 𑀲𑀘𑁂 𑀢𑁂 𑀧𑀼𑀜𑁆𑀜𑀁 𑀅𑀢𑁆𑀣𑀺, 𑀅𑀤𑁆𑀥𑀸 𑀮𑀘𑁆𑀙𑀲𑀻’’𑀢𑀺.

𑀲𑁄 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀯𑀺𑀳𑀸𑀭𑁂 𑀯𑀺𑀖𑀸𑀲𑀸𑀤𑀪𑀸𑀯𑁂𑀦 𑀤𑀺𑀝𑁆𑀞𑀢𑁆𑀢𑀸 𑀭𑀸𑀚𑀬𑀼𑀯𑀭𑀸𑀚𑀸𑀤𑀬𑁄, ‘‘𑀫𑀳𑀸𑀤𑀼𑀕𑁆𑀕𑀢, 𑀦 𑀢𑀸𑀯 𑀪𑀢𑁆𑀢𑀓𑀸𑀮𑁄, 𑀓𑀲𑁆𑀫𑀸 𑀢𑁆𑀯𑀁 𑀆𑀕𑀘𑁆𑀙𑀲𑀻’’𑀢𑀺 𑀆𑀳𑀁𑀲𑀼. 𑀲𑁄 ‘‘𑀚𑀸𑀦𑀸𑀫𑀺, 𑀲𑀸𑀫𑀺, ‘𑀦 𑀢𑀸𑀯 𑀪𑀢𑁆𑀢𑀓𑀸𑀮𑁄’𑀢𑀺. 𑀲𑀢𑁆𑀣𑀸𑀭𑀁 𑀧𑀦 𑀯𑀦𑁆𑀤𑀺𑀢𑀼𑀁 𑀆𑀕𑀘𑁆𑀙𑀸𑀫𑀻’’𑀢𑀺 𑀯𑀤𑀦𑁆𑀢𑁄 𑀕𑀦𑁆𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀬𑀸 𑀉𑀫𑁆𑀫𑀸𑀭𑁂 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀫𑀬𑀸 𑀤𑀼𑀕𑁆𑀕𑀢𑀢𑀭𑁄 𑀦𑀢𑁆𑀣𑀺, 𑀅𑀯𑀲𑁆𑀲𑀬𑁄 𑀫𑁂 𑀳𑁄𑀣, 𑀓𑀭𑁄𑀣 𑀫𑁂 𑀲𑀗𑁆𑀕𑀳’’𑀦𑁆𑀢𑀺 𑀆𑀳. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀧𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑁂 𑀞𑀧𑁂𑀲𑀺. 𑀲𑁄 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁 𑀧𑀢𑁆𑀢𑁄 𑀯𑀺𑀬 𑀅𑀳𑁄𑀲𑀺, 𑀭𑀸𑀚𑀬𑀼𑀯𑀭𑀸𑀚𑀸𑀤𑀬𑁄 𑀅𑀜𑁆𑀜𑀫𑀜𑁆𑀜𑀲𑁆𑀲 𑀫𑀼𑀔𑀸𑀦𑀺 𑀑𑀮𑁄𑀓𑀬𑀺𑀁𑀲𑀼. 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀧𑀢𑁆𑀢𑀜𑁆𑀳𑀺 𑀓𑁄𑀘𑀺 𑀇𑀲𑁆𑀲𑀭𑀺𑀬𑀯𑀲𑁂𑀦 𑀕𑀳𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀏𑀯𑀁 𑀧𑀦 𑀯𑀤𑀺𑀁𑀲𑀼, ‘‘𑀲𑀫𑁆𑀫 𑀫𑀳𑀸𑀤𑀼𑀕𑁆𑀕𑀢, 𑀲𑀢𑁆𑀣𑀼 𑀧𑀢𑁆𑀢𑀁 𑀅𑀫𑁆𑀳𑀸𑀓𑀁 𑀤𑁂𑀳𑀺 𑀏𑀢𑁆𑀢𑀓𑀁 𑀦𑀸𑀫 𑀢𑁂 𑀥𑀦𑀁 𑀤𑀲𑁆𑀲𑀸𑀫, 𑀢𑁆𑀯𑀁 𑀤𑀼𑀕𑁆𑀕𑀢𑁄 𑀥𑀦𑀁 𑀕𑀡𑁆𑀳𑀸𑀳𑀺, 𑀓𑀺𑀁 𑀢𑁂 𑀧𑀢𑁆𑀢𑁂𑀦𑀸’’𑀢𑀺? 𑀫𑀳𑀸𑀤𑀼𑀕𑁆𑀕𑀢𑁄 ‘‘𑀦 𑀓𑀲𑁆𑀲𑀘𑀺 𑀤𑀲𑁆𑀲𑀸𑀫𑀺, 𑀦 𑀫𑁂 𑀥𑀦𑁂𑀦 𑀅𑀢𑁆𑀣𑁄, 𑀲𑀢𑁆𑀣𑀸𑀭𑀁𑀬𑁂𑀯 𑀪𑁄𑀚𑁂𑀲𑁆𑀲𑀸𑀫𑀻’’𑀢𑀺 𑀆𑀳. 𑀅𑀯𑀲𑁂𑀲𑀸 𑀢𑀁 𑀬𑀸𑀘𑀺𑀢𑁆𑀯𑀸 𑀧𑀢𑁆𑀢𑀁 𑀅𑀮𑀪𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀁𑀲𑀼. 𑀭𑀸𑀚𑀸 𑀧𑀦 ‘‘𑀫𑀳𑀸𑀤𑀼𑀕𑁆𑀕𑀢𑁄 𑀥𑀦𑁂𑀦 𑀧𑀮𑁄𑀪𑀺𑀬𑀫𑀸𑀦𑁄𑀧𑀺 𑀲𑀢𑁆𑀣𑀼 𑀧𑀢𑁆𑀢𑀁 𑀦 𑀤𑁂𑀢𑀺, 𑀲𑀢𑁆𑀣𑀸𑀭𑀸 𑀘 𑀲𑀬𑀁 𑀤𑀺𑀦𑁆𑀦𑀧𑀢𑁆𑀢𑀁 𑀓𑁄𑀘𑀺 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀇𑀫𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑁄 𑀦𑀸𑀫 𑀓𑀺𑀢𑁆𑀢𑀓𑁄 𑀪𑀯𑀺𑀲𑁆𑀲𑀢𑀺, 𑀇𑀫𑀺𑀦𑀸 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀤𑀺𑀦𑁆𑀦𑀓𑀸𑀮𑁂 𑀲𑀢𑁆𑀣𑀸𑀭𑀁 𑀆𑀤𑀸𑀬 𑀕𑁂𑀳𑀁 𑀦𑁂𑀢𑁆𑀯𑀸 𑀫𑀬𑁆𑀳𑀁 𑀲𑀫𑁆𑀧𑀸𑀤𑀺𑀢𑀁 𑀆𑀳𑀸𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁𑀬𑁂𑀯 𑀅𑀕𑀫𑀸𑀲𑀺. 𑀲𑀓𑁆𑀓𑁄𑀧𑀺 𑀤𑁂𑀯𑀭𑀸𑀚𑀸 𑀬𑀸𑀕𑀼𑀔𑀚𑁆𑀚𑀓𑀪𑀢𑁆𑀢𑀲𑀽𑀧𑁂𑀬𑁆𑀬𑀧𑀡𑁆𑀡𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀲𑀢𑁆𑀣𑀼 𑀦𑀺𑀲𑀻𑀤𑀦𑀸𑀭𑀳𑀁 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀻𑀤𑀺.

𑀫𑀳𑀸𑀤𑀼𑀕𑁆𑀕𑀢𑁄 𑀲𑀢𑁆𑀣𑀸𑀭𑀁 𑀦𑁂𑀢𑁆𑀯𑀸 ‘‘𑀧𑀯𑀺𑀲𑀣, 𑀪𑀦𑁆𑀢𑁂’’𑀢𑀺 𑀆𑀳. 𑀯𑀲𑀦𑀕𑁂𑀳𑀜𑁆𑀘𑀲𑁆𑀲 𑀦𑀻𑀘𑀁 𑀳𑁄𑀢𑀺, 𑀅𑀦𑁄𑀦𑀢𑁂𑀦 𑀧𑀯𑀺𑀲𑀺𑀢𑀼𑀁 𑀦 𑀲𑀓𑁆𑀓𑀸. 𑀩𑀼𑀤𑁆𑀥𑀸 𑀘 𑀦𑀸𑀫 𑀕𑁂𑀳𑀁 𑀧𑀯𑀺𑀲𑀦𑁆𑀢𑀸 𑀦 𑀑𑀦𑀫𑀺𑀢𑁆𑀯𑀸 𑀧𑀯𑀺𑀲𑀦𑁆𑀢𑀺. 𑀕𑁂𑀳𑀜𑁆𑀳𑀺 𑀧𑀯𑀺𑀲𑀦𑀓𑀸𑀮𑁂 𑀫𑀳𑀸𑀧𑀣𑀯𑀻 𑀯𑀸 𑀳𑁂𑀝𑁆𑀞𑀸 𑀑𑀕𑀘𑁆𑀙𑀢𑀺, 𑀕𑁂𑀳𑀁 𑀯𑀸 𑀉𑀤𑁆𑀥𑀁 𑀕𑀘𑁆𑀙𑀢𑀺. 𑀇𑀤𑀁 𑀢𑁂𑀲𑀁 𑀲𑀼𑀤𑀺𑀦𑁆𑀦𑀤𑀸𑀦𑀲𑁆𑀲 𑀨𑀮𑀁. 𑀧𑀼𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀢𑀓𑀸𑀮𑁂 𑀲𑀩𑁆𑀩𑀁 𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀲𑀢𑁆𑀣𑀸 𑀞𑀺𑀢𑀓𑁄𑀯 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀲𑀓𑁆𑀓𑁂𑀦 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀲𑀢𑁆𑀣𑀭𑀺 𑀦𑀺𑀲𑀺𑀦𑁆𑀦𑁂 𑀭𑀸𑀚𑀸 𑀆𑀳 𑁋 ‘‘𑀲𑀫𑁆𑀫 𑀫𑀳𑀸𑀤𑀼𑀕𑁆𑀕𑀢, 𑀢𑀬𑀸 𑀅𑀫𑁆𑀳𑀸𑀓𑀁 𑀬𑀸𑀘𑀦𑁆𑀢𑀸𑀦𑀫𑁆𑀧𑀺 𑀲𑀢𑁆𑀣𑀼 𑀧𑀢𑁆𑀢𑁄 𑀦 𑀤𑀺𑀦𑁆𑀦𑁄, 𑀧𑀲𑁆𑀲𑀸𑀫 𑀢𑀸𑀯, 𑀓𑀻𑀤𑀺𑀲𑁄 𑀢𑁂 𑀲𑀢𑁆𑀣𑀼 𑀲𑀓𑁆𑀓𑀸𑀭𑁄 𑀓𑀢𑁄’’𑀢𑀺? 𑀅𑀣𑀲𑁆𑀲 𑀲𑀓𑁆𑀓𑁄 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀯𑀺𑀯𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀢𑁂𑀲𑀁 𑀯𑀸𑀲𑀕𑀦𑁆𑀥𑁄 𑀲𑀓𑀮𑀦𑀕𑀭𑀁 𑀙𑀸𑀤𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀬𑀸𑀕𑀼𑀆𑀤𑀻𑀦𑀺 𑀑𑀮𑁄𑀓𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀆𑀳 𑁋 ‘‘𑀪𑀦𑁆𑀢𑁂, ‘𑀅𑀳𑀁 𑀫𑀳𑀸𑀤𑀼𑀕𑁆𑀕𑀢𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑁄 𑀓𑀺𑀢𑁆𑀢𑀓𑁄 𑀪𑀯𑀺𑀲𑁆𑀲𑀢𑀺, 𑀇𑀫𑀺𑀦𑀸 𑀤𑁂𑀬𑁆𑀬𑀥𑀫𑁆𑀫𑁂 𑀤𑀺𑀦𑁆𑀦𑁂 𑀲𑀢𑁆𑀣𑀸𑀭𑀁 𑀕𑁂𑀳𑀁 𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀫𑁆𑀧𑀸𑀤𑀺𑀢𑀁 𑀆𑀳𑀸𑀭𑀁 𑀤𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀕𑀢𑁄, 𑀫𑀬𑀸 𑀏𑀯𑀭𑀽𑀧𑁄 𑀆𑀳𑀸𑀭𑁄 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀫𑀬𑀺 𑀇𑀥 𑀞𑀺𑀢𑁂 𑀫𑀳𑀸𑀤𑀼𑀕𑁆𑀕𑀢𑁄 𑀓𑀺𑀮𑀫𑁂𑀬𑁆𑀬, 𑀕𑀘𑁆𑀙𑀸𑀫𑀳’’𑀦𑁆𑀢𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀓𑁆𑀓𑁄𑀧𑀺 𑀲𑀢𑁆𑀣𑀸𑀭𑀁 𑀬𑀸𑀕𑀼𑀆𑀤𑀻𑀦𑀺 𑀤𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀧𑀭𑀺𑀯𑀺𑀲𑀺. 𑀲𑀢𑁆𑀣𑀸𑀧𑀺 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀲𑀓𑁆𑀓𑁄 𑀫𑀳𑀸𑀤𑀼𑀕𑁆𑀕𑀢𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺. 𑀲𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀅𑀦𑀼𑀕𑀘𑁆𑀙𑀺. 𑀲𑀓𑁆𑀓𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀫𑀳𑀸𑀤𑀼𑀕𑁆𑀕𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑁂 𑀞𑀺𑀢𑁄 𑀆𑀓𑀸𑀲𑀁 𑀑𑀮𑁄𑀓𑁂𑀲𑀺. 𑀢𑀸𑀯𑀤𑁂𑀯 𑀆𑀓𑀸𑀲𑀢𑁄 𑀲𑀢𑁆𑀢𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀺𑀢𑁆𑀯𑀸 𑀢𑀲𑁆𑀲 𑀕𑁂𑀳𑁂 𑀲𑀩𑁆𑀩𑀪𑀸𑀚𑀦𑀸𑀦𑀺 𑀧𑀽𑀭𑁂𑀢𑁆𑀯𑀸 𑀲𑀓𑀮𑀁 𑀕𑁂𑀳𑀁 𑀧𑀽𑀭𑁂𑀲𑀺. 𑀢𑀲𑁆𑀲 𑀕𑁂𑀳𑁂 𑀑𑀓𑀸𑀲𑁄 𑀦𑀸𑀳𑁄𑀲𑀺. 𑀢𑀲𑁆𑀲 𑀪𑀭𑀺𑀬𑀸 𑀤𑀸𑀭𑀓𑁂 𑀳𑀢𑁆𑀣𑁂𑀲𑀼 𑀕𑀳𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀩𑀳𑀺 𑀅𑀝𑁆𑀞𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀁 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁄 𑀤𑀸𑀭𑀓𑁂 𑀩𑀳𑀺 𑀤𑀺𑀲𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀲𑀸𑀫𑀺, 𑀲𑀓𑀮𑀁 𑀦𑁄 𑀕𑁂𑀳𑀁 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀧𑀼𑀡𑁆𑀡𑀁, 𑀧𑀯𑀺𑀲𑀺𑀢𑀼𑀁 𑀑𑀓𑀸𑀲𑁄 𑀦𑀢𑁆𑀣𑀻’’𑀢𑀺. 𑀲𑁄 ‘‘𑀅𑀚𑁆𑀚𑁂𑀯 𑀫𑁂 𑀤𑀸𑀦𑁂𑀦 𑀯𑀺𑀧𑀸𑀓𑁄 𑀤𑀺𑀦𑁆𑀦𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, ‘‘𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺 𑀯𑀼𑀢𑁆𑀢𑁂 𑀆𑀳 𑁋‘‘𑀤𑁂𑀯, 𑀕𑁂𑀳𑀁 𑀫𑁂 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀧𑀼𑀡𑁆𑀡𑀁, 𑀢𑀁 𑀥𑀦𑀁 𑀕𑀡𑁆𑀳𑀣𑀸’’𑀢𑀺. 𑀭𑀸𑀚𑀸 ‘‘𑀅𑀳𑁄 𑀩𑀼𑀤𑁆𑀥𑀸𑀦𑀁 𑀤𑀺𑀦𑁆𑀦𑀤𑀸𑀦𑀁, 𑀅𑀚𑁆𑀚𑁂𑀯 𑀫𑀢𑁆𑀣𑀓𑀁 𑀧𑀢𑁆𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀆𑀳 𑁋 ‘‘𑀓𑀺𑀁 𑀢𑁂 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀥𑀦𑀳𑀭𑀡𑀢𑁆𑀣𑀸𑀬 𑀲𑀓𑀝𑀲𑀳𑀲𑁆𑀲𑀁, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀲𑀓𑀝𑀲𑀳𑀲𑁆𑀲𑀁 𑀧𑁂𑀲𑁂𑀢𑁆𑀯𑀸 𑀥𑀦𑀁 𑀆𑀳𑀭𑀸𑀧𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀑𑀓𑀺𑀭𑀸𑀧𑁂𑀲𑀺. 𑀢𑀸𑀮𑀧𑁆𑀧𑀫𑀸𑀡𑁄 𑀭𑀸𑀲𑀺 𑀅𑀳𑁄𑀲𑀺. 𑀭𑀸𑀚𑀸 𑀦𑀕𑀭𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀦𑀕𑀭𑁂 𑀅𑀢𑁆𑀣𑀺 𑀓𑀲𑁆𑀲𑀘𑀺 𑀏𑀢𑁆𑀢𑀓𑀁 𑀥𑀦’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀦𑀢𑁆𑀣𑀺, 𑀤𑁂𑀯𑀸’’𑀢𑀺. ‘‘𑀏𑀯𑀁 𑀫𑀳𑀸𑀥𑀦𑀲𑁆𑀲 𑀓𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀢𑀲𑁆𑀲 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀤𑀸𑀧𑁂𑀲𑀺.

𑀅𑀣𑀲𑁆𑀲 𑀧𑀼𑀩𑁆𑀩𑁂 𑀏𑀓𑀲𑁆𑀲 𑀲𑁂𑀝𑁆𑀞𑀺𑀦𑁄 𑀕𑁂𑀳𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀏𑀢𑁆𑀣 𑀚𑀸𑀢𑁂 𑀕𑀘𑁆𑀙𑁂 𑀳𑀭𑀸𑀧𑁂𑀢𑁆𑀯𑀸 𑀕𑁂𑀳𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀯𑀲𑀸𑀳𑀻’’𑀢𑀺 𑀆𑀳. 𑀢𑀲𑁆𑀲 𑀢𑀁 𑀞𑀸𑀦𑀁 𑀲𑁄𑀥𑁂𑀢𑁆𑀯𑀸 𑀲𑀫𑀁 𑀓𑀢𑁆𑀯𑀸 𑀪𑀽𑀫𑀺𑀬𑀸 𑀔𑀜𑁆𑀜𑀫𑀸𑀦𑀸𑀬 𑀅𑀜𑁆𑀜𑀫𑀜𑁆𑀜𑀁 𑀆𑀳𑀘𑁆𑀘 𑀦𑀺𑀥𑀺𑀓𑀼𑀫𑁆𑀪𑀺𑀬𑁄 𑀉𑀝𑁆𑀞𑀳𑀺𑀁𑀲𑀼. 𑀢𑁂𑀦 𑀭𑀜𑁆𑀜𑁄 𑀆𑀭𑁄𑀘𑀺𑀢𑁂 ‘‘𑀢𑀯 𑀧𑀼𑀜𑁆𑀜𑁂𑀦 𑀦𑀺𑀩𑁆𑀩𑀢𑁆𑀢𑀸, 𑀢𑁆𑀯𑀫𑁂𑀯 𑀕𑀡𑁆𑀳𑀸𑀳𑀻’’𑀢𑀺 𑀆𑀳. 𑀲𑁄 𑀕𑁂𑀳𑀁 𑀓𑀸𑀭𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀢𑀢𑁄 𑀧𑀭𑀫𑁆𑀧𑀺 𑀬𑀸𑀯𑀢𑀸𑀬𑀼𑀓𑀁 𑀢𑀺𑀝𑁆𑀞𑀦𑁆𑀢𑁄 𑀧𑀼𑀜𑁆𑀜𑀸𑀦𑀺 𑀓𑀭𑀺𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄.

𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀢𑀢𑁄 𑀘𑀼𑀢𑁄 𑀲𑀸𑀯𑀢𑁆𑀣𑀺𑀬𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲𑀽𑀧𑀝𑁆𑀞𑀸𑀓𑀓𑀼𑀮𑁂 𑀲𑁂𑀝𑁆𑀞𑀺𑀥𑀻𑀢𑀼 𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀅𑀣𑀲𑁆𑀲𑀸 𑀫𑀸𑀢𑀸𑀧𑀺𑀢𑀭𑁄 𑀕𑀩𑁆𑀪𑀲𑁆𑀲 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 𑀕𑀩𑁆𑀪𑀧𑀭𑀺𑀳𑀸𑀭𑀁 𑀅𑀤𑀁𑀲𑀼. 𑀢𑀲𑁆𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀯𑀭𑀽𑀧𑁄 𑀤𑁄𑀳𑀴𑁄 𑀉𑀧𑁆𑀧𑀚𑁆𑀚𑀺 𑁋 ‘‘𑀅𑀳𑁄 𑀯𑀢𑀸𑀳𑀁 𑀥𑀫𑁆𑀫𑀤𑁂𑀲𑀦𑀸𑀧𑀢𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀭𑁄𑀳𑀺𑀢𑀫𑀘𑁆𑀙𑀭𑀲𑁂𑀦 𑀤𑀸𑀦𑀁 𑀤𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀆𑀲𑀦𑀧𑀭𑀺𑀬𑀦𑁆𑀢𑁂 𑀦𑀺𑀲𑀺𑀦𑁆𑀦𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀉𑀘𑁆𑀙𑀺𑀝𑁆𑀞𑀪𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬’’𑀦𑁆𑀢𑀺. 𑀲𑀸 𑀫𑀸𑀢𑀸𑀧𑀺𑀢𑀽𑀦𑀁 𑀆𑀭𑁄𑀘𑁂𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺, 𑀤𑁄𑀳𑀴𑁄 𑀧𑀝𑀺𑀧𑀲𑁆𑀲𑀫𑁆𑀪𑀺. 𑀅𑀣𑀲𑁆𑀲𑀸 𑀢𑀢𑁄 𑀅𑀧𑀭𑁂𑀲𑀼𑀧𑀺 𑀲𑀢𑁆𑀢𑀲𑀼 𑀫𑀗𑁆𑀕𑀮𑁂𑀲𑀼 𑀭𑁄𑀳𑀺𑀢𑀫𑀘𑁆𑀙𑀭𑀲𑁂𑀦𑁂𑀯 𑀥𑀫𑁆𑀫𑀲𑁂𑀦𑀸𑀧𑀢𑀺𑀢𑁆𑀣𑁂𑀭𑀧𑁆𑀧𑀫𑀼𑀔𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀪𑁄𑀚𑁂𑀲𑀼𑀁. 𑀲𑀩𑁆𑀩𑀁 𑀢𑀺𑀲𑁆𑀲𑀓𑀼𑀫𑀸𑀭𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑀲𑁆𑀲 𑀧𑀦 𑀫𑀳𑀸𑀤𑀼𑀕𑁆𑀕𑀢𑀓𑀸𑀮𑁂 𑀤𑀺𑀦𑁆𑀦𑀲𑁆𑀲 𑀭𑁄𑀳𑀺𑀢𑀫𑀘𑁆𑀙𑀭𑀲𑀤𑀸𑀦𑀲𑁆𑀲𑁂𑀯 𑀦𑀺𑀲𑁆𑀲𑀦𑁆𑀤𑁄. 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀧𑀦𑀲𑁆𑀲, ‘‘𑀪𑀦𑁆𑀢𑁂, 𑀤𑀸𑀲𑀲𑁆𑀲 𑀯𑁄 𑀲𑀺𑀓𑁆𑀔𑀸𑀧𑀤𑀸𑀦𑀺 𑀤𑁂𑀣𑀸’’𑀢𑀺 𑀫𑀸𑀢𑀭𑀸 𑀯𑀼𑀢𑁆𑀢𑁂 𑀣𑁂𑀭𑁄 𑀆𑀳 𑁋 ‘‘𑀓𑁄𑀦𑀸𑀫𑁄 𑀅𑀬𑀁 𑀤𑀸𑀭𑀓𑁄’’𑀢𑀺? ‘‘𑀪𑀦𑁆𑀢𑁂, 𑀇𑀫𑀲𑁆𑀲 𑀤𑀸𑀭𑀓𑀲𑁆𑀲 𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀚𑀴𑀸 𑀏𑀴𑀫𑀽𑀕𑀸𑀧𑀺 𑀧𑀡𑁆𑀟𑀺𑀢𑀸 𑀚𑀸𑀢𑀸, 𑀢𑀲𑁆𑀫𑀸 𑀫𑁂 𑀧𑀼𑀢𑁆𑀢𑀲𑁆𑀲 𑀧𑀡𑁆𑀟𑀺𑀢𑁄𑀢𑁆𑀯𑁂𑀯 𑀦𑀸𑀫𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀣𑁂𑀭𑁄 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀤𑀸𑀲𑀺. 𑀚𑀸𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀧𑀦𑀲𑁆𑀲 ‘‘𑀦𑀸𑀳𑀁 𑀫𑀫 𑀧𑀼𑀢𑁆𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀫𑀸𑀢𑀼 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺. 𑀲𑁄 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀫𑀸𑀢𑀭𑀁 𑀆𑀳 𑁋 ‘‘𑀅𑀫𑁆𑀫, 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑀸𑀥𑀼, 𑀢𑀸𑀢, ‘𑀅𑀳𑀁 𑀢𑀯 𑀅𑀚𑁆𑀛𑀸𑀲𑀬𑀁 𑀦 𑀪𑀺𑀦𑁆𑀤𑀺𑀲𑁆𑀲𑀸𑀫𑀺𑀘𑁆𑀘𑁂𑀯 𑀫𑀦𑀁 𑀉𑀧𑁆𑀧𑀸𑀤𑁂𑀲𑀺’’’𑀦𑁆𑀢𑀺 𑀯𑀢𑁆𑀯𑀸 𑀣𑁂𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀤𑀸𑀲𑁄 𑀯𑁄 𑀧𑀩𑁆𑀩𑀚𑀺𑀢𑀼𑀓𑀸𑀫𑁄, 𑀅𑀳𑀁 𑀇𑀫𑀁 𑀲𑀸𑀬𑀦𑁆𑀳𑀲𑀫𑀬𑁂 𑀯𑀺𑀳𑀸𑀭𑀁 𑀆𑀦𑁂𑀲𑁆𑀲𑀸𑀫𑀻’’𑀢𑀺 𑀣𑁂𑀭𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀜𑀸𑀢𑀓𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 ‘‘𑀫𑀫 𑀧𑀼𑀢𑁆𑀢𑀲𑁆𑀲 𑀕𑀺𑀳𑀺𑀓𑀸𑀮𑁂 𑀓𑀢𑁆𑀢𑀩𑁆𑀩𑀲𑀓𑁆𑀓𑀸𑀭𑀁 𑀅𑀚𑁆𑀚𑁂𑀯 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀸𑀭𑁂𑀢𑁆𑀯𑀸 𑀢𑀁 𑀆𑀤𑀸𑀬 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀇𑀫𑀁, 𑀪𑀦𑁆𑀢𑁂, 𑀧𑀩𑁆𑀩𑀸𑀚𑁂𑀣𑀸’’𑀢𑀺 𑀣𑁂𑀭𑀲𑁆𑀲 𑀅𑀤𑀸𑀲𑀺.

𑀣𑁂𑀭𑁄 𑀧𑀩𑁆𑀩𑀚𑁆𑀚𑀸𑀬 𑀤𑀼𑀓𑁆𑀓𑀭𑀪𑀸𑀯𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀓𑀭𑀺𑀲𑁆𑀲𑀸𑀫𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀑𑀯𑀸𑀤’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀏𑀳𑀻’’𑀢𑀺 𑀓𑁂𑀲𑁂 𑀢𑁂𑀫𑁂𑀢𑁆𑀯𑀸 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀫𑀸𑀢𑀸𑀧𑀺𑀢𑀭𑁄𑀧𑀺𑀲𑁆𑀲 𑀲𑀢𑁆𑀢𑀸𑀳𑀁 𑀯𑀺𑀳𑀸𑀭𑁂𑀬𑁂𑀯 𑀯𑀲𑀦𑁆𑀢𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀭𑁄𑀳𑀺𑀢𑀫𑀘𑁆𑀙𑀭𑀲𑁂𑀦𑁂𑀯 𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀸𑀬𑀁 𑀕𑁂𑀳𑀁 𑀅𑀕𑀫𑀁𑀲𑀼. 𑀣𑁂𑀭𑁄 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀅𑀦𑁆𑀢𑁄𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀢𑀁 𑀆𑀤𑀸𑀬 𑀕𑀘𑁆𑀙𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀦𑀸𑀕𑀫𑀸𑀲𑀺. 𑀓𑀺𑀁 𑀓𑀸𑀭𑀡𑀸? 𑀦 𑀢𑀸𑀯𑀲𑁆𑀲 𑀧𑀢𑁆𑀢𑀘𑀻𑀯𑀭𑀕𑁆𑀕𑀳𑀡𑀸𑀦𑀺 𑀯𑀸 𑀇𑀭𑀺𑀬𑀸𑀧𑀣𑁄 𑀯𑀸 𑀧𑀸𑀲𑀸𑀤𑀺𑀓𑁄 𑀳𑁄𑀢𑀺, 𑀅𑀧𑀺𑀘 𑀯𑀺𑀳𑀸𑀭𑁂 𑀣𑁂𑀭𑀲𑁆𑀲 𑀓𑀢𑁆𑀢𑀩𑁆𑀩𑀯𑀢𑁆𑀢𑀁 𑀅𑀢𑁆𑀣𑀺. 𑀣𑁂𑀭𑁄 𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀝𑁆𑀞𑁂 𑀲𑀓𑀮𑀯𑀺𑀳𑀸𑀭𑀁 𑀯𑀺𑀘𑀭𑀦𑁆𑀢𑁄 𑀅𑀲𑀫𑁆𑀫𑀚𑁆𑀚𑀦𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀢𑀼𑀘𑁆𑀙𑀪𑀸𑀚𑀦𑁂𑀲𑀼 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀸𑀦𑀺 𑀉𑀧𑀝𑁆𑀞𑀧𑁂𑀢𑁆𑀯𑀸 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀸𑀦𑀺 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀧𑀝𑀺𑀲𑀸𑀫𑁂𑀢𑁆𑀯𑀸 𑀧𑀘𑁆𑀙𑀸 𑀕𑀸𑀫𑀁 𑀧𑀯𑀺𑀲𑀢𑀺. 𑀅𑀧𑀺𑀘 ‘‘𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀢𑀼𑀘𑁆𑀙𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘𑀧𑀲𑁆𑀲𑀣 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸𑀦𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀸𑀦𑀻’𑀢𑀺 𑀯𑀢𑁆𑀢𑀼𑀁 𑀫𑀸 𑀮𑀪𑀺𑀁𑀲𑀽’’𑀢𑀺 𑀲𑀓𑀮𑀯𑀺𑀳𑀸𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀧𑀘𑁆𑀙𑀸 𑀕𑀸𑀫𑀁 𑀧𑀯𑀺𑀲𑀢𑀺. 𑀢𑀲𑁆𑀫𑀸 𑀢𑀁 𑀤𑀺𑀯𑀲𑀫𑁆𑀧𑀺 𑀲𑀸𑀫𑀡𑁂𑀭𑁂𑀦 𑀧𑀢𑁆𑀢𑀘𑀻𑀯𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 𑀤𑀺𑀯𑀸𑀢𑀭𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺.

𑀲𑀸𑀫𑀡𑁂𑀭𑁄 𑀉𑀧𑀚𑁆𑀛𑀸𑀬𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀸𑀢𑀺𑀓𑀁 𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂, 𑀇𑀤𑀁 𑀓𑀺𑀁 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺. ‘‘𑀫𑀸𑀢𑀺𑀓𑀸 𑀦𑀸𑀫, 𑀲𑀸𑀫𑀡𑁂𑀭𑀸’’𑀢𑀺. ‘‘𑀇𑀫𑀸𑀬 𑀓𑀺𑀁 𑀓𑀭𑁄𑀦𑁆𑀢𑀻’’𑀢𑀺? ‘‘𑀇𑀢𑁄 𑀘𑀺𑀢𑁄 𑀘 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀲𑁆𑀲𑀓𑀫𑁆𑀫𑀁 𑀲𑀫𑁆𑀧𑀸𑀤𑁂𑀦𑁆𑀢𑀻’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀉𑀤𑀓𑀲𑁆𑀲 𑀘𑀺𑀢𑁆𑀢𑀁 𑀅𑀢𑁆𑀣𑀻’’𑀢𑀺? ‘‘𑀦𑀢𑁆𑀣𑀸𑀯𑀼𑀲𑁄’’𑀢𑀺. ‘‘𑀏𑀯𑀭𑀽𑀧𑀁 𑀅𑀘𑀺𑀢𑁆𑀢𑀓𑀁 𑀅𑀢𑁆𑀢𑀦𑁄 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀳𑀭𑀦𑁆𑀢𑀺, 𑀪𑀦𑁆𑀢𑁂’’𑀢𑀺? ‘‘𑀆𑀫𑀸𑀯𑀼𑀲𑁄’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀏𑀯𑀭𑀽𑀧𑀫𑁆𑀧𑀺 𑀅𑀘𑀺𑀢𑁆𑀢𑀓𑀁 𑀅𑀢𑁆𑀢𑀦𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀳𑀭𑀺𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀓𑀲𑁆𑀫𑀸 𑀲𑀘𑀺𑀢𑁆𑀢𑀓𑀸𑀧𑀺 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀣𑁂𑀲𑁄 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀉𑀲𑀼𑀓𑀸𑀭𑁂 𑀲𑀭𑀤𑀡𑁆𑀟𑀓𑀁 𑀅𑀕𑁆𑀕𑀺𑀫𑁆𑀳𑀺 𑀢𑀸𑀧𑁂𑀢𑁆𑀯𑀸 𑀅𑀓𑁆𑀔𑀺𑀓𑁄𑀝𑀺𑀬𑀸 𑀑𑀮𑁄𑀓𑁂𑀢𑁆𑀯𑀸 𑀉𑀚𑀼𑀓𑀁 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸, ‘‘𑀇𑀫𑁂, 𑀪𑀦𑁆𑀢𑁂, 𑀓𑁂 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺. ‘‘𑀉𑀲𑀼𑀓𑀸𑀭𑀸 𑀦𑀸𑀫𑀸𑀯𑀼𑀲𑁄’’𑀢𑀺. ‘‘𑀓𑀺𑀁 𑀧𑀦𑁂𑀢𑁂 𑀓𑀭𑁄𑀦𑁆𑀢𑀻’’𑀢𑀺? ‘‘𑀅𑀕𑁆𑀕𑀺𑀫𑁆𑀳𑀺 𑀢𑀸𑀧𑁂𑀢𑁆𑀯𑀸 𑀲𑀭𑀤𑀡𑁆𑀟𑀓𑀁 𑀉𑀚𑀼𑀁 𑀓𑀭𑁄𑀦𑁆𑀢𑀻’’𑀢𑀺. ‘‘𑀲𑀘𑀺𑀢𑁆𑀢𑀓𑁄, 𑀪𑀦𑁆𑀢𑁂, 𑀏𑀲𑁄’’𑀢𑀺? ‘‘𑀅𑀘𑀺𑀢𑁆𑀢𑀓𑁄, 𑀆𑀯𑀼𑀲𑁄’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀅𑀘𑀺𑀢𑁆𑀢𑀓𑀁 𑀕𑀳𑁂𑀢𑁆𑀯𑀸 𑀅𑀕𑁆𑀕𑀺𑀫𑁆𑀳𑀺 𑀢𑀸𑀧𑁂𑀢𑁆𑀯𑀸 𑀉𑀚𑀼𑀁 𑀓𑀭𑁄𑀦𑁆𑀢𑀺, 𑀓𑀲𑁆𑀫𑀸 𑀲𑀘𑀺𑀢𑁆𑀢𑀓𑀸𑀧𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀣𑁂𑀲𑁄 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀤𑀸𑀭𑀽𑀦𑀺 𑀅𑀭𑀦𑁂𑀫𑀺𑀦𑀸𑀪𑀺𑀆𑀤𑀻𑀦𑀺 𑀢𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂, 𑀇𑀫𑁂 𑀓𑁂 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺. ‘‘𑀢𑀘𑁆𑀙𑀓𑀸 𑀦𑀸𑀫𑀸𑀯𑀼𑀲𑁄’’𑀢𑀺. ‘‘𑀓𑀺𑀁 𑀧𑀦𑁂𑀢𑁂 𑀓𑀭𑁄𑀦𑁆𑀢𑀻’’𑀢𑀺? ‘‘𑀤𑀸𑀭𑀽𑀦𑀺 𑀕𑀳𑁂𑀢𑁆𑀯𑀸 𑀬𑀸𑀦𑀓𑀸𑀤𑀻𑀦𑀁 𑀘𑀓𑁆𑀓𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀆𑀯𑀼𑀲𑁄’’𑀢𑀺. ‘‘𑀏𑀢𑀸𑀦𑀺 𑀧𑀦 𑀲𑀘𑀺𑀢𑁆𑀢𑀓𑀸𑀦𑀺, 𑀪𑀦𑁆𑀢𑁂’’𑀢𑀺? ‘‘𑀅𑀘𑀺𑀢𑁆𑀢𑀓𑀸𑀦𑀺, 𑀆𑀯𑀼𑀲𑁄’’𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀅𑀘𑀺𑀢𑁆𑀢𑀓𑀸𑀦𑀺 𑀓𑀝𑁆𑀞𑀓𑀮𑀺𑀗𑁆𑀕𑀭𑀸𑀦𑀺 𑀕𑀳𑁂𑀢𑁆𑀯𑀸 𑀘𑀓𑁆𑀓𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀓𑀲𑁆𑀫𑀸 𑀲𑀘𑀺𑀢𑁆𑀢𑀓𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑁄 𑀇𑀫𑀸𑀦𑀺 𑀓𑀸𑀭𑀡𑀸𑀦𑀺 𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂, 𑀲𑀘𑁂 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀘𑀻𑀯𑀭𑁂 𑀢𑀼𑀫𑁆𑀳𑁂 𑀕𑀡𑁆𑀳𑁂𑀬𑁆𑀬𑀸𑀣, 𑀅𑀳𑀁 𑀦𑀺𑀯𑀢𑁆𑀢𑁂𑀬𑁆𑀬’’𑀦𑁆𑀢𑀺. 𑀣𑁂𑀭𑁄 ‘‘𑀅𑀬𑀁 𑀅𑀥𑀼𑀦𑀸 𑀧𑀩𑁆𑀩𑀚𑀺𑀢𑁄 𑀤𑀳𑀭𑀲𑀸𑀫𑀡𑁂𑀭𑁄 𑀫𑀁 𑀅𑀦𑀼𑀩𑀦𑁆𑀥𑀫𑀸𑀦𑁄 𑀏𑀯𑀁 𑀯𑀤𑁂𑀢𑀻’’𑀢𑀺 𑀘𑀺𑀢𑁆𑀢𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸𑀯 ‘‘𑀆𑀳𑀭, 𑀲𑀸𑀫𑀡𑁂𑀭𑀸’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀅𑀕𑁆𑀕𑀳𑁂𑀲𑀺.

𑀲𑀸𑀫𑀡𑁂𑀭𑁄𑀧𑀺 𑀉𑀧𑀚𑁆𑀛𑀸𑀬𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀦𑁆𑀢𑁄, ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀆𑀳𑀸𑀭𑀁 𑀆𑀳𑀭𑀦𑁆𑀢𑁄 𑀭𑁄𑀳𑀺𑀢𑀫𑀘𑁆𑀙𑀭𑀲𑁂𑀦𑁂𑀯 𑀆𑀳𑀭𑁂𑀬𑁆𑀬𑀸𑀣𑀸’’𑀢𑀺 𑀆𑀳. ‘‘𑀓𑀣𑀁 𑀮𑀪𑀺𑀲𑁆𑀲𑀸𑀫𑀸𑀯𑀼𑀲𑁄’’𑀢𑀺? ‘‘𑀪𑀦𑁆𑀢𑁂, 𑀅𑀢𑁆𑀢𑀦𑁄 𑀧𑀼𑀜𑁆𑀜𑁂𑀦 𑀅𑀮𑀪𑀦𑁆𑀢𑀸 𑀫𑀫 𑀧𑀼𑀜𑁆𑀜𑁂𑀦 𑀮𑀪𑀺𑀲𑁆𑀲𑀣𑀸’’𑀢𑀺 𑀆𑀳. 𑀣𑁂𑀭𑁄 ‘‘𑀤𑀳𑀭𑀲𑀸𑀫𑀡𑁂𑀭𑀲𑁆𑀲 𑀩𑀳𑀺 𑀦𑀺𑀲𑀺𑀦𑁆𑀦𑀓𑀲𑁆𑀲 𑀧𑀭𑀺𑀧𑀦𑁆𑀣𑁄𑀧𑀺 𑀪𑀯𑁂𑀬𑁆𑀬𑀸’’𑀢𑀺 𑀓𑀼𑀜𑁆𑀚𑀺𑀓𑀁 𑀤𑀢𑁆𑀯𑀸 ‘‘𑀫𑀬𑁆𑀳𑀁 𑀯𑀲𑀦𑀕𑀩𑁆𑀪𑀲𑁆𑀲 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀲𑁄 𑀢𑀣𑀸 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀓𑀭𑀚𑀓𑀸𑀬𑁂 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀅𑀢𑁆𑀢𑀪𑀸𑀯𑀁 𑀲𑀫𑁆𑀫𑀲𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀕𑀼𑀡𑀢𑁂𑀚𑁂𑀦 𑀲𑀓𑁆𑀓𑀲𑁆𑀲 𑀆𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀲𑁄 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀧𑀡𑁆𑀟𑀺𑀢𑀲𑀸𑀫𑀡𑁂𑀭𑁄 𑀉𑀧𑀚𑁆𑀛𑀸𑀬𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 ‘𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀦𑀺𑀯𑀢𑁆𑀢𑁄, 𑀫𑀬𑀸𑀧𑀺 𑀢𑀢𑁆𑀣 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀯𑀺𑀳𑀸𑀭𑀲𑁆𑀲 𑀉𑀧𑀯𑀦𑁂 𑀯𑀲𑀦𑁆𑀢𑁂 𑀲𑀓𑀼𑀡𑁂 𑀧𑀮𑀸𑀧𑁂𑀢𑁆𑀯𑀸 𑀲𑀫𑀦𑁆𑀢𑀢𑁄 𑀆𑀭𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀯𑀸 𑀘𑀦𑁆𑀤𑀤𑁂𑀯𑀧𑀼𑀢𑁆𑀢𑀁 ‘‘𑀘𑀦𑁆𑀤𑀫𑀡𑁆𑀟𑀮𑀁 𑀆𑀓𑀟𑁆𑀠𑀺𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺, 𑀲𑀽𑀭𑀺𑀬𑀤𑁂𑀯𑀧𑀼𑀢𑁆𑀢𑀁 ‘‘𑀲𑀽𑀭𑀺𑀬𑀫𑀡𑁆𑀟𑀮𑀁 𑀆𑀓𑀟𑁆𑀠𑀺𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺 𑀯𑀢𑁆𑀯𑀸 𑀲𑀬𑀁 𑀕𑀦𑁆𑀢𑁆𑀯𑀸 𑀆𑀯𑀺𑀜𑁆𑀙𑀦𑀭𑀚𑁆𑀚𑀼𑀝𑁆𑀞𑀸𑀦𑁂 𑀆𑀭𑀓𑁆𑀔𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀯𑀺𑀳𑀸𑀭𑁂 𑀧𑀼𑀭𑀸𑀡𑀧𑀡𑁆𑀡𑀲𑁆𑀲 𑀧𑀢𑀦𑁆𑀢𑀲𑁆𑀲𑀧𑀺 𑀲𑀤𑁆𑀤𑁄 𑀦𑀸𑀳𑁄𑀲𑀺, 𑀲𑀸𑀫𑀡𑁂𑀭𑀲𑁆𑀲 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀅𑀳𑁄𑀲𑀺. 𑀲𑁄 𑀅𑀦𑁆𑀢𑀭𑀸𑀪𑀢𑁆𑀢𑁂𑀬𑁂𑀯 𑀅𑀢𑁆𑀢𑀪𑀸𑀯𑀁 𑀲𑀫𑁆𑀫𑀲𑀺𑀢𑁆𑀯𑀸 𑀢𑀻𑀡𑀺 𑀨𑀮𑀸𑀦𑀺 𑀧𑀸𑀧𑀼𑀡𑀺.

𑀣𑁂𑀭𑁄𑀧𑀺 ‘‘𑀲𑀸𑀫𑀡𑁂𑀭𑁄 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄, 𑀢𑀲𑁆𑀲 𑀉𑀧𑀓𑀧𑁆𑀧𑀦𑀓𑀁 𑀪𑁄𑀚𑀦𑀁 𑀅𑀲𑀼𑀓𑀓𑀼𑀮𑁂 𑀦𑀸𑀫 𑀲𑀓𑁆𑀓𑀸 𑀮𑀤𑁆𑀥𑀼’’𑀦𑁆𑀢𑀺 𑀏𑀓𑀁 𑀧𑁂𑀫𑀕𑀸𑀭𑀯𑀬𑀼𑀢𑁆𑀢𑀁 𑀉𑀧𑀝𑁆𑀞𑀸𑀓𑀓𑀼𑀮𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀘 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀯𑀲𑀁 𑀭𑁄𑀳𑀺𑀢𑀫𑀘𑁆𑀙𑁂 𑀮𑀪𑀺𑀢𑁆𑀯𑀸 𑀣𑁂𑀭𑀲𑁆𑀲𑁂𑀯 𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀲𑀻𑀤𑀺𑀁𑀲𑀼. 𑀢𑁂 𑀣𑁂𑀭𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸, ‘‘𑀪𑀦𑁆𑀢𑁂, 𑀪𑀤𑁆𑀤𑀓𑀁 𑀯𑁄 𑀓𑀢𑀁 𑀇𑀥𑀸𑀕𑀘𑁆𑀙𑀦𑁆𑀢𑁂𑀳𑀻’’𑀢𑀺 𑀅𑀦𑁆𑀢𑁄𑀕𑁂𑀳𑁂 𑀧𑀯𑁂𑀲𑁂𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀤𑀢𑁆𑀯𑀸 𑀭𑁄𑀳𑀺𑀢𑀫𑀘𑁆𑀙𑀭𑀲𑁂𑀦𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀅𑀤𑀁𑀲𑀼. 𑀣𑁂𑀭𑁄 𑀳𑀭𑀡𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀫𑀦𑀼𑀲𑁆𑀲𑀸 ‘‘𑀧𑀭𑀺𑀪𑀼𑀜𑁆𑀚𑀣, 𑀪𑀦𑁆𑀢𑁂, 𑀳𑀭𑀡𑀓𑀪𑀢𑁆𑀢𑀫𑁆𑀧𑀺 𑀮𑀪𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑀣𑁂𑀭𑀲𑁆𑀲 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀧𑀢𑁆𑀢𑀁 𑀭𑁄𑀳𑀺𑀢𑀫𑀘𑁆𑀙𑀭𑀲𑀪𑁄𑀚𑀦𑀲𑁆𑀲 𑀧𑀽𑀭𑁂𑀢𑁆𑀯𑀸 𑀅𑀤𑀁𑀲𑀼. 𑀣𑁂𑀭𑁄 ‘‘𑀲𑀸𑀫𑀡𑁂𑀭𑁄 𑀫𑁂 𑀙𑀸𑀢𑁄’’𑀢𑀺 𑀲𑀻𑀖𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸𑀧𑀺 𑀢𑀁 𑀤𑀺𑀯𑀲𑀁 𑀓𑀸𑀮𑀲𑁆𑀲𑁂𑀯 𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀏𑀯𑀁 𑀆𑀯𑀚𑁆𑀚𑁂𑀲𑀺 𑁋 ‘‘𑀧𑀡𑁆𑀟𑀺𑀢𑀲𑀸𑀫𑀡𑁂𑀭𑁄 𑀉𑀧𑀚𑁆𑀛𑀸𑀬𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 ‘𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀦𑀺𑀯𑀢𑁆𑀢𑁄, 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀺 𑀦𑀼 𑀔𑁄 𑀅𑀲𑁆𑀲 𑀧𑀩𑁆𑀩𑀚𑀺𑀢𑀓𑀺𑀘𑁆𑀘’’𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀢𑀺𑀡𑁆𑀡𑀁 𑀨𑀮𑀸𑀦𑀁 𑀧𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀅𑀢𑁆𑀣𑀺, 𑀦𑀢𑁆𑀣𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀅𑀢𑁆𑀣𑀻’’𑀢𑀺 𑀤𑀺𑀲𑁆𑀯𑀸 ‘‘𑀧𑀼𑀭𑁂𑀪𑀢𑁆𑀢𑀫𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀦 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀅𑀜𑁆𑀜𑀸𑀲𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀫𑀡𑁂𑀭𑀲𑁆𑀲 𑀪𑀢𑁆𑀢𑀁 𑀆𑀤𑀸𑀬 𑀲𑀻𑀖𑀁 𑀆𑀕𑀘𑁆𑀙𑀢𑀺, 𑀅𑀦𑁆𑀢𑀭𑀸𑀬𑀫𑁆𑀧𑀺𑀲𑁆𑀲 𑀓𑀭𑁂𑀬𑁆𑀬 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀆𑀭𑀓𑁆𑀔𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺𑀲𑁆𑀲𑀸𑀫𑀺, 𑀅𑀣 𑀦𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀢𑀲𑁆𑀫𑀺𑀁 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑀺𑀬𑀫𑀸𑀦𑁂 𑀲𑀸𑀫𑀡𑁂𑀭𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀢𑁆𑀯𑀸 𑀲𑀫𑁆𑀧𑀢𑁆𑀢𑀁 𑀣𑁂𑀭𑀁 𑀘𑀢𑁆𑀢𑀸𑀭𑁄 𑀧𑀜𑁆𑀳𑁂 𑀧𑀼𑀘𑁆𑀙𑀺, 𑀧𑀼𑀝𑁆𑀞𑀁 𑀧𑀼𑀝𑁆𑀞𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀺.

𑀢𑀢𑁆𑀭𑀺𑀤𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑁋 𑀲𑀢𑁆𑀣𑀸 𑀓𑀺𑀭 𑀦𑀁 𑀆𑀳 𑁋 ‘‘𑀲𑀸𑀭𑀺𑀧𑀼𑀢𑁆𑀢, 𑀓𑀺𑀁 𑀢𑁂 𑀮𑀤𑁆𑀥’’𑀦𑁆𑀢𑀺? ‘‘𑀆𑀳𑀸𑀭𑁄, 𑀪𑀦𑁆𑀢𑁂’’𑀢𑀺. ‘‘𑀆𑀳𑀸𑀭𑁄 𑀦𑀸𑀫 𑀓𑀺𑀁 𑀆𑀳𑀭𑀢𑀺, 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺? ‘‘𑀯𑁂𑀤𑀦𑀁, 𑀪𑀦𑁆𑀢𑁂’’𑀢𑀺. ‘‘𑀯𑁂𑀤𑀦𑀁 𑀓𑀺𑀁 𑀆𑀳𑀭𑀢𑀺, 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺? ‘‘𑀭𑀽𑀧𑀁, 𑀪𑀦𑁆𑀢𑁂’’𑀢𑀺. ‘‘𑀭𑀽𑀧𑀁 𑀧𑀦 𑀓𑀺𑀁 𑀆𑀳𑀭𑀢𑀺, 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺? ‘‘𑀨𑀲𑁆𑀲𑀁, 𑀪𑀦𑁆𑀢𑁂’’𑀢𑀺. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 ‘‘𑀚𑀺𑀖𑀘𑁆𑀙𑀺𑀢𑁂𑀦 𑀳𑀺 𑀧𑀭𑀺𑀪𑀼𑀢𑁆𑀢𑁄 𑀆𑀳𑀸𑀭𑁄 𑀢𑀲𑁆𑀲 𑀔𑀼𑀤𑁆𑀤𑀁 𑀧𑀭𑀺𑀳𑀭𑀺𑀢𑁆𑀯𑀸 𑀲𑀼𑀔𑀁 𑀯𑁂𑀤𑀦𑀁 𑀆𑀳𑀭𑀢𑀺. 𑀆𑀳𑀸𑀭𑀧𑀭𑀺𑀪𑁄𑀕𑁂𑀦 𑀲𑀼𑀔𑀺𑀢𑀲𑁆𑀲 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀲𑀭𑀻𑀭𑁂 𑀯𑀡𑁆𑀡𑀲𑀫𑁆𑀧𑀢𑁆𑀢𑀺 𑀳𑁄𑀢𑀺. 𑀏𑀯𑀁 𑀯𑁂𑀤𑀦𑀸 𑀭𑀽𑀧𑀁 𑀆𑀳𑀭𑀢𑀺. 𑀲𑀼𑀔𑀺𑀢𑁄 𑀧𑀦 𑀆𑀳𑀸𑀭𑀚𑀭𑀽𑀧𑀯𑀲𑁂𑀦 𑀉𑀧𑁆𑀧𑀦𑁆𑀦𑀲𑀼𑀔𑀲𑁄𑀫𑀦𑀲𑁆𑀲𑁄 ‘𑀇𑀤𑀸𑀦𑀺 𑀫𑁂 𑀅𑀲𑁆𑀲𑀸𑀤𑁄 𑀚𑀸𑀢𑁄’𑀢𑀺 𑀦𑀺𑀧𑁆𑀧𑀚𑁆𑀚𑀦𑁆𑀢𑁄 𑀯𑀸 𑀦𑀺𑀲𑀻𑀤𑀦𑁆𑀢𑁄 𑀯𑀸 𑀲𑀼𑀔𑀲𑀫𑁆𑀨𑀲𑁆𑀲𑀁 𑀧𑀝𑀺𑀮𑀪𑀢𑀻’’𑀢𑀺.

𑀏𑀯𑀁 𑀇𑀫𑁂𑀲𑀼 𑀘𑀢𑀽𑀲𑀼 𑀧𑀜𑁆𑀳𑁂𑀲𑀼 𑀯𑀺𑀲𑁆𑀲𑀚𑁆𑀚𑀺𑀓𑁂𑀲𑀼 𑀲𑀸𑀫𑀡𑁂𑀭𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀲𑀢𑁆𑀣𑀸𑀧𑀺 𑀣𑁂𑀭𑀁 𑀆𑀳 𑁋 ‘‘𑀕𑀘𑁆𑀙, 𑀲𑀸𑀭𑀺𑀧𑀼𑀢𑁆𑀢, 𑀢𑀯 𑀲𑀸𑀫𑀡𑁂𑀭𑀲𑁆𑀲 𑀪𑀢𑁆𑀢𑀁 𑀤𑁂𑀳𑀻’’𑀢𑀺. 𑀣𑁂𑀭𑁄 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀁 𑀆𑀓𑁄𑀝𑁂𑀲𑀺. 𑀲𑀸𑀫𑀡𑁂𑀭𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑁂𑀭𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀧𑁂𑀢𑁆𑀯𑀸 𑀢𑀸𑀮𑀯𑀡𑁆𑀝𑁂𑀦 𑀣𑁂𑀭𑀁 𑀩𑀻𑀚𑀺. 𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀲𑀸𑀫𑀡𑁂𑀭, 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑁄𑀳𑀻’’𑀢𑀺. ‘‘𑀢𑀼𑀫𑁆𑀳𑁂 𑀧𑀦, 𑀪𑀦𑁆𑀢𑁂’’𑀢𑀺. ‘‘𑀓𑀢𑀁 𑀫𑀬𑀸 𑀪𑀢𑁆𑀢𑀓𑀺𑀘𑁆𑀘𑀁, 𑀢𑁆𑀯𑀁 𑀓𑀭𑁄𑀳𑀻’’𑀢𑀺. 𑀲𑀢𑁆𑀢𑀯𑀲𑁆𑀲𑀺𑀓𑀤𑀸𑀭𑀓𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀢𑀁 𑀔𑀡𑀁 𑀯𑀺𑀓𑀲𑀺𑀢𑀧𑀤𑀼𑀫𑀼𑀧𑁆𑀧𑀮𑀲𑀤𑀺𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀧𑀘𑁆𑀘𑀯𑁂𑀓𑁆𑀔𑀺𑀢𑀝𑁆𑀞𑀸𑀦𑀁 𑀧𑀦 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀫𑀓𑀸𑀲𑀺. 𑀢𑁂𑀦 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑀺𑀢𑀓𑀸𑀮𑁂 𑀘𑀦𑁆𑀤𑀤𑁂𑀯𑀧𑀼𑀢𑁆𑀢𑁄 𑀘𑀦𑁆𑀤𑀫𑀡𑁆𑀟𑀮𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀲𑀽𑀭𑀺𑀬𑀤𑁂𑀯𑀧𑀼𑀢𑁆𑀢𑁄 𑀲𑀽𑀭𑀺𑀬𑀫𑀡𑁆𑀟𑀮𑀁. 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀘𑀢𑀼𑀤𑁆𑀤𑀺𑀲𑀁 𑀆𑀭𑀓𑁆𑀔𑀁 𑀯𑀺𑀲𑁆𑀲𑀚𑁆𑀚𑁂𑀲𑀼𑀁, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀆𑀯𑀺𑀜𑁆𑀙𑀦𑀓𑁂 𑀆𑀭𑀓𑁆𑀔𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀽𑀭𑀺𑀬𑁄 𑀫𑀚𑁆𑀛𑀝𑁆𑀞𑀸𑀦𑀢𑁄 𑀕𑀮𑀺𑀢𑁆𑀯𑀸 𑀕𑀢𑁄.

𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀺𑀁𑀲𑀼, ‘‘𑀙𑀸𑀬𑀸 𑀅𑀥𑀺𑀓𑀧𑁆𑀧𑀫𑀸𑀡𑀸 𑀚𑀸𑀢𑀸, 𑀲𑀽𑀭𑀺𑀬𑁄 𑀫𑀚𑁆𑀛𑀝𑁆𑀞𑀸𑀦𑀢𑁄 𑀕𑀮𑀺𑀢𑁆𑀯𑀸 𑀕𑀢𑁄, 𑀲𑀸𑀫𑀡𑁂𑀭𑁂𑀦 𑀘 𑀇𑀤𑀸𑀦𑁂𑀯 𑀪𑀼𑀢𑁆𑀢𑀁, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺. 𑀲𑀢𑁆𑀣𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀪𑀺𑀓𑁆𑀔𑀯𑁂, 𑀓𑀺𑀁 𑀓𑀣𑁂𑀣𑀸’’𑀢𑀺? ‘‘𑀇𑀤𑀁 𑀦𑀸𑀫, 𑀪𑀦𑁆𑀢𑁂’’𑀢𑀺? ‘‘𑀆𑀫, 𑀪𑀺𑀓𑁆𑀔𑀯𑁂, 𑀧𑀼𑀜𑁆𑀜𑀯𑀢𑁄 𑀲𑀫𑀡𑀥𑀫𑁆𑀫𑀁 𑀓𑀭𑀡𑀓𑀸𑀮𑁂 𑀘𑀦𑁆𑀤𑀤𑁂𑀯𑀧𑀼𑀢𑁆𑀢𑁄 𑀘𑀦𑁆𑀤𑀫𑀡𑁆𑀟𑀮𑀁, 𑀲𑀽𑀭𑀺𑀬𑀤𑁂𑀯𑀧𑀼𑀢𑁆𑀢𑁄 𑀲𑀽𑀭𑀺𑀬𑀫𑀡𑁆𑀟𑀮𑀁 𑀆𑀓𑀟𑁆𑀠𑀺𑀢𑁆𑀯𑀸 𑀕𑀡𑁆𑀳𑀺, 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀯𑀺𑀳𑀸𑀭𑁄𑀧𑀯𑀦𑁂 𑀘𑀢𑀼𑀤𑁆𑀤𑀺𑀲𑀁 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀆𑀯𑀺𑀜𑁆𑀙𑀦𑀓𑁂 𑀆𑀭𑀓𑁆𑀔𑀁 𑀕𑀡𑁆𑀳𑀺, 𑀅𑀳𑀫𑁆𑀧𑀺 ‘𑀩𑀼𑀤𑁆𑀥𑁄𑀫𑁆𑀳𑀻’𑀢𑀺 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀦𑀺𑀲𑀻𑀤𑀺𑀢𑀼𑀁 𑀦𑀸𑀮𑀢𑁆𑀣𑀁, 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀫𑀫 𑀧𑀼𑀢𑁆𑀢𑀲𑁆𑀲 𑀆𑀭𑀓𑁆𑀔𑀁 𑀅𑀕𑁆𑀕𑀳𑁂𑀲𑀺𑀁, 𑀦𑁂𑀢𑁆𑀢𑀺𑀓𑁂 𑀘 𑀫𑀸𑀢𑀺𑀓𑀸𑀬 𑀉𑀤𑀓𑀁 𑀳𑀭𑀦𑁆𑀢𑁂, 𑀉𑀲𑀼𑀓𑀸𑀭𑁂 𑀘 𑀉𑀲𑀼𑀁 𑀉𑀚𑀼𑀁 𑀓𑀭𑁄𑀦𑁆𑀢𑁂, 𑀢𑀘𑁆𑀙𑀓𑁂 𑀘 𑀤𑀸𑀭𑀽𑀦𑀺 𑀢𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀏𑀢𑁆𑀢𑀓𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀧𑀡𑁆𑀟𑀺𑀢𑀸 𑀅𑀢𑁆𑀢𑀸𑀦𑀁 𑀤𑀫𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀦𑁆𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁮𑁦. ‘‘𑀉𑀤𑀓𑀜𑁆𑀳𑀺 𑀦𑀬𑀦𑁆𑀢𑀺 𑀦𑁂𑀢𑁆𑀢𑀺𑀓𑀸, 𑀉𑀲𑀼𑀓𑀸𑀭𑀸 𑀦𑀫𑀬𑀦𑁆𑀢𑀺 𑀢𑁂𑀚𑀦𑀁;

𑀤𑀸𑀭𑀼𑀁 𑀦𑀫𑀬𑀦𑁆𑀢𑀺 𑀢𑀘𑁆𑀙𑀓𑀸, 𑀅𑀢𑁆𑀢𑀸𑀦𑀁 𑀤𑀫𑀬𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺.

𑀢𑀢𑁆𑀣 𑀉𑀤𑀓𑀦𑁆𑀢𑀺 𑀧𑀣𑀯𑀺𑀬𑀸 𑀣𑀮𑀝𑁆𑀞𑀸𑀦𑀁 𑀔𑀡𑀺𑀢𑁆𑀯𑀸 𑀆𑀯𑀸𑀝𑀝𑁆𑀞𑀸𑀦𑀁 𑀧𑀽𑀭𑁂𑀢𑁆𑀯𑀸 𑀫𑀸𑀢𑀺𑀓𑀁 𑀯𑀸 𑀓𑀢𑁆𑀯𑀸 𑀭𑀼𑀓𑁆𑀔𑀤𑁄𑀡𑀺𑀁 𑀯𑀸 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀉𑀤𑀓𑀁. 𑀦𑁂𑀦𑁆𑀢𑀻𑀢𑀺 𑀦𑁂𑀢𑁆𑀢𑀺𑀓𑀸. 𑀢𑁂𑀚𑀦𑀦𑁆𑀢𑀺 𑀓𑀡𑁆𑀟𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀦𑁂𑀢𑁆𑀢𑀺𑀓𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀉𑀤𑀓𑀁 𑀦𑀬𑀦𑁆𑀢𑀺, 𑀉𑀲𑀼𑀓𑀸𑀭𑀸𑀧𑀺 𑀢𑀸𑀧𑁂𑀢𑁆𑀯𑀸 𑀢𑁂𑀚𑀦𑀁 𑀦𑀫𑀬𑀦𑁆𑀢𑀺 𑀉𑀲𑀼𑀁 𑀉𑀚𑀼𑀁 𑀓𑀭𑁄𑀦𑁆𑀢𑀺. 𑀢𑀘𑁆𑀙𑀓𑀸𑀧𑀺 𑀦𑁂𑀫𑀺𑀆𑀤𑀻𑀦𑀁 𑀅𑀢𑁆𑀣𑀸𑀬 𑀢𑀘𑁆𑀙𑀦𑁆𑀢𑀸 𑀤𑀸𑀭𑀼𑀁 𑀦𑀫𑀬𑀦𑁆𑀢𑀺 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀉𑀚𑀼𑀁 𑀯𑀸 𑀯𑀗𑁆𑀓𑀁 𑀯𑀸 𑀓𑀭𑁄𑀦𑁆𑀢𑀺. 𑀏𑀯𑀁 𑀏𑀢𑁆𑀢𑀓𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀡𑁆𑀟𑀺𑀢𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀻𑀦𑀺 𑀉𑀧𑁆𑀧𑀸𑀤𑁂𑀦𑁆𑀢𑀸 𑀅𑀢𑁆𑀢𑀸𑀦𑀁 𑀤𑀫𑀬𑀦𑁆𑀢𑀺, 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀸 𑀧𑀦 𑀏𑀓𑀦𑁆𑀢𑀤𑀦𑁆𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀧𑀡𑁆𑀟𑀺𑀢𑀲𑀸𑀫𑀡𑁂𑀭𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀯𑀢𑁆𑀣𑀼

𑀲𑁂𑀮𑁄 𑀬𑀣𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀧𑀼𑀣𑀼𑀚𑁆𑀚𑀦𑀸 𑀓𑀺𑀭 𑀲𑀸𑀫𑀡𑁂𑀭𑀸𑀤𑀬𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀲𑀻𑀲𑁂𑀧𑀺 𑀓𑀡𑁆𑀡𑁂𑀲𑀼𑀧𑀺 𑀦𑀸𑀲𑀸𑀬𑀧𑀺 𑀕𑀳𑁂𑀢𑁆𑀯𑀸 ‘‘𑀓𑀺𑀁, 𑀘𑀽𑀴𑀧𑀺𑀢, 𑀲𑀸𑀲𑀦𑀲𑁆𑀫𑀺𑀁 𑀦 𑀉𑀓𑁆𑀓𑀡𑁆𑀞𑀲𑀺, 𑀅𑀪𑀺𑀭𑀫𑀲𑀻’’𑀢𑀺 𑀯𑀤𑀦𑁆𑀢𑀺. 𑀣𑁂𑀭𑁄 𑀢𑁂𑀲𑀼 𑀦𑁂𑀯 𑀓𑀼𑀚𑁆𑀛𑀢𑀺, 𑀦 𑀤𑀼𑀲𑁆𑀲𑀢𑀺. 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀧𑀲𑁆𑀲𑀣𑀸𑀯𑀼𑀲𑁄, 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀁 𑀤𑀺𑀲𑁆𑀯𑀸 𑀲𑀸𑀫𑀡𑁂𑀭𑀸𑀤𑀬𑁄 𑀏𑀯𑀜𑁆𑀘𑁂𑀯𑀜𑁆𑀘 𑀯𑀺𑀳𑁂𑀞𑁂𑀦𑁆𑀢𑀺, 𑀲𑁄 𑀢𑁂𑀲𑀼 𑀦𑁂𑀯 𑀓𑀼𑀚𑁆𑀛𑀢𑀺, 𑀦 𑀤𑀼𑀲𑁆𑀲𑀢𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀓𑀣𑁂𑀣, 𑀪𑀺𑀓𑁆𑀔𑀯𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀁 𑀦𑀸𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀆𑀫, 𑀪𑀺𑀓𑁆𑀔𑀯𑁂, 𑀔𑀻𑀡𑀸𑀲𑀯𑀸 𑀦𑀸𑀫 𑀦𑁂𑀯 𑀓𑀼𑀚𑁆𑀛𑀦𑁆𑀢𑀺, 𑀦 𑀤𑀼𑀲𑁆𑀲𑀦𑁆𑀢𑀺. 𑀖𑀦𑀲𑁂𑀮𑀲𑀤𑀺𑀲𑀸 𑀳𑁂𑀢𑁂 𑀅𑀘𑀮𑀸 𑀅𑀓𑀫𑁆𑀧𑀺𑀬𑀸’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁮𑁧. ‘‘𑀲𑁂𑀮𑁄 𑀬𑀣𑀸 𑀏𑀓𑀖𑀦𑁄, 𑀯𑀸𑀢𑁂𑀦 𑀦 𑀲𑀫𑀻𑀭𑀢𑀺;

𑀏𑀯𑀁 𑀦𑀺𑀦𑁆𑀤𑀸𑀧𑀲𑀁𑀲𑀸𑀲𑀼, 𑀦 𑀲𑀫𑀺𑀜𑁆𑀚𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺.

𑀢𑀢𑁆𑀣 𑀦𑀺𑀦𑁆𑀤𑀸𑀧𑀲𑀁𑀲𑀸𑀲𑀽𑀢𑀺 𑀓𑀺𑀜𑁆𑀘𑀸𑀧𑀺 𑀇𑀥 𑀤𑁆𑀯𑁂 𑀮𑁄𑀓𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀅𑀢𑁆𑀣𑁄 𑀧𑀦 𑀅𑀝𑁆𑀞𑀦𑁆𑀦𑀫𑁆𑀧𑀺 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀳𑀺 𑀏𑀓𑀖𑀦𑁄 𑀅𑀲𑀼𑀲𑀺𑀭𑁄 𑀲𑁂𑀮𑁄 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑁂𑀦 𑀯𑀸𑀢𑁂𑀦 𑀦 𑀲𑀫𑀻𑀭𑀢𑀺 𑀦 𑀇𑀜𑁆𑀚𑀢𑀺 𑀦 𑀘𑀮𑀢𑀺, 𑀏𑀯𑀁 𑀅𑀝𑁆𑀞𑀲𑀼𑀧𑀺 𑀮𑁄𑀓𑀥𑀫𑁆𑀫𑁂𑀲𑀼 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁂𑀲𑀼 𑀧𑀡𑁆𑀟𑀺𑀢𑀸 𑀦 𑀲𑀫𑀺𑀜𑁆𑀚𑀦𑁆𑀢𑀺, 𑀧𑀝𑀺𑀖𑀯𑀲𑁂𑀦 𑀯𑀸 𑀅𑀦𑀼𑀦𑀬𑀯𑀲𑁂𑀦 𑀯𑀸 𑀦 𑀘𑀮𑀦𑁆𑀢𑀺 𑀦 𑀓𑀫𑁆𑀧𑀦𑁆𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀓𑀸𑀡𑀫𑀸𑀢𑀼𑀯𑀢𑁆𑀣𑀼

𑀬𑀣𑀸𑀧𑀺 𑀭𑀳𑀤𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀓𑀸𑀡𑀫𑀸𑀢𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀯𑀢𑁆𑀣𑀼 𑀯𑀺𑀦𑀬𑁂 (𑀧𑀸𑀘𑀺. 𑁨𑁩𑁦) 𑀆𑀕𑀢𑀫𑁂𑀯.

𑀢𑀤𑀸 𑀧𑀦 𑀓𑀸𑀡𑀫𑀸𑀢𑀭𑀸 𑀅𑀢𑀼𑀘𑁆𑀙𑀳𑀢𑁆𑀣𑀁 𑀥𑀻𑀢𑀭𑀁 𑀧𑀢𑀺𑀓𑀼𑀮𑀁 𑀧𑁂𑀲𑁂𑀢𑀼𑀁 𑀧𑀓𑁆𑀓𑁂𑀲𑀼 𑀧𑀽𑀯𑁂𑀲𑀼 𑀘𑀢𑀼𑀓𑁆𑀔𑀢𑁆𑀢𑀼𑀁 𑀘𑀢𑀼𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀤𑀺𑀦𑁆𑀦𑀓𑀸𑀮𑁂 𑀲𑀢𑁆𑀣𑀸𑀭𑀸 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀧𑀜𑁆𑀜𑀢𑁆𑀢𑁂 𑀓𑀸𑀡𑀸𑀬 𑀲𑀸𑀫𑀺𑀓𑁂𑀦 𑀅𑀜𑁆𑀜𑀸𑀬 𑀧𑀚𑀸𑀧𑀢𑀺𑀬𑀸 𑀆𑀦𑀻𑀢𑀸𑀬 𑀓𑀸𑀡𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀇𑀫𑁂𑀳𑀺 𑀫𑁂 𑀖𑀭𑀸𑀯𑀸𑀲𑁄 𑀦𑀸𑀲𑀺𑀢𑁄’’𑀢𑀺 𑀤𑀺𑀝𑁆𑀞𑀤𑀺𑀝𑁆𑀞𑁂 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺. 𑀪𑀺𑀓𑁆𑀔𑀽 𑀢𑀁 𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀺𑀢𑀼𑀁 𑀦 𑀯𑀺𑀲𑀳𑀺𑀁𑀲𑀼. 𑀲𑀢𑁆𑀣𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀢𑀢𑁆𑀣 𑀅𑀕𑀫𑀸𑀲𑀺. 𑀓𑀸𑀡𑀫𑀸𑀢𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀁 𑀅𑀤𑀸𑀲𑀺. 𑀲𑀢𑁆𑀣𑀸 𑀓𑀢𑀧𑀸𑀢𑀭𑀸𑀲𑁄 ‘‘𑀓𑀳𑀁 𑀓𑀸𑀡𑀸’’𑀢𑀺 𑀧𑀼𑀘𑁆𑀙𑀺. ‘‘𑀏𑀲𑀸, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀤𑀺𑀲𑁆𑀯𑀸 𑀫𑀗𑁆𑀓𑀼𑀪𑀽𑀢𑀸 𑀭𑁄𑀤𑀦𑁆𑀢𑀻 𑀞𑀺𑀢𑀸’’𑀢𑀺. ‘‘𑀓𑀺𑀁 𑀓𑀸𑀭𑀡𑀸’’𑀢𑀺? ‘‘𑀏𑀲𑀸, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀢𑀲𑁆𑀫𑀸 𑀢𑀼𑀫𑁆𑀳𑁂 𑀤𑀺𑀲𑁆𑀯𑀸 𑀫𑀗𑁆𑀓𑀼𑀪𑀽𑀢𑀸 𑀭𑁄𑀤𑀫𑀸𑀦𑀸 𑀞𑀺𑀢𑀸’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑁋 ‘‘𑀓𑀸𑀡𑁂, 𑀓𑀲𑁆𑀫𑀸 𑀫𑀁 𑀤𑀺𑀲𑁆𑀯𑀸 𑀫𑀗𑁆𑀓𑀼𑀪𑀽𑀢𑀸 𑀦𑀺𑀮𑀻𑀬𑀺𑀢𑁆𑀯𑀸 𑀭𑁄𑀤𑀲𑀻’’𑀢𑀺. 𑀅𑀣𑀲𑁆𑀲𑀸 𑀫𑀸𑀢𑀸 𑀢𑀸𑀬 𑀓𑀢𑀓𑀺𑀭𑀺𑀬𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 𑁋 ‘‘𑀓𑀺𑀁 𑀧𑀦 𑀓𑀸𑀡𑀫𑀸𑀢𑁂 𑀫𑀫 𑀲𑀸𑀯𑀓𑀸 𑀢𑀬𑀸 𑀤𑀺𑀦𑁆𑀦𑀓𑀁 𑀕𑀡𑁆𑀳𑀺𑀁𑀲𑀼, 𑀅𑀤𑀺𑀦𑁆𑀦𑀓’’𑀦𑁆𑀢𑀺? ‘‘𑀤𑀺𑀦𑁆𑀦𑀓𑀁, 𑀪𑀦𑁆𑀢𑁂’’𑀢𑀺. ‘‘𑀲𑀘𑁂 𑀫𑀫 𑀲𑀸𑀯𑀓𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀸 𑀢𑀯 𑀕𑁂𑀳𑀤𑁆𑀯𑀸𑀭𑀁 𑀧𑀢𑁆𑀢𑀸 𑀢𑀬𑀸 𑀤𑀺𑀦𑁆𑀦𑀓𑀁 𑀕𑀡𑁆𑀳𑀺𑀁𑀲𑀼, 𑀓𑁄 𑀢𑁂𑀲𑀁 𑀤𑁄𑀲𑁄’’𑀢𑀺? ‘‘𑀦𑀢𑁆𑀣𑀺, 𑀪𑀦𑁆𑀢𑁂, 𑀅𑀬𑁆𑀬𑀸𑀦𑀁 𑀤𑁄𑀲𑁄’’. ‘‘𑀏𑀢𑀺𑀲𑁆𑀲𑀸𑀬𑁂𑀯 𑀤𑁄𑀲𑁄’’𑀢𑀺. 𑀲𑀢𑁆𑀣𑀸 𑀓𑀸𑀡𑀁 𑀆𑀳 𑁋 ‘‘𑀓𑀸𑀡𑁂, 𑀫𑀬𑁆𑀳𑀁 𑀓𑀺𑀭 𑀲𑀸𑀯𑀓𑀸 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑀸 𑀕𑁂𑀳𑀤𑁆𑀯𑀸𑀭𑀁 𑀆𑀕𑀢𑀸, 𑀅𑀣 𑀦𑁂𑀲𑀁 𑀢𑀯 𑀫𑀸𑀢𑀭𑀸 𑀧𑀽𑀯𑀸 𑀤𑀺𑀦𑁆𑀦𑀸, 𑀓𑁄 𑀦𑀸𑀫𑁂𑀢𑁆𑀣 𑀫𑀫 𑀲𑀸𑀯𑀓𑀸𑀦𑀁 𑀤𑁄𑀲𑁄’’𑀢𑀺? ‘‘𑀦𑀢𑁆𑀣𑀺, 𑀪𑀦𑁆𑀢𑁂, 𑀅𑀬𑁆𑀬𑀸𑀦𑀁 𑀤𑁄𑀲𑁄, 𑀫𑀬𑁆𑀳𑀫𑁂𑀯 𑀤𑁄𑀲𑁄’’𑀢𑀺 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀔𑀫𑀸𑀧𑁂𑀲𑀺.

𑀅𑀣𑀲𑁆𑀲𑀸 𑀲𑀢𑁆𑀣𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺. 𑀲𑀢𑁆𑀣𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑁄 𑀭𑀸𑀚𑀗𑁆𑀕𑀡𑁂𑀦 𑀧𑀸𑀬𑀸𑀲𑀺. 𑀭𑀸𑀚𑀸 𑀤𑀺𑀲𑁆𑀯𑀸 ‘‘𑀲𑀢𑁆𑀣𑀸 𑀯𑀺𑀬 𑀪𑀡𑁂’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫, 𑀤𑁂𑀯𑀸’’𑀢𑀺 𑀯𑀼𑀢𑁆𑀢𑁂 ‘‘𑀕𑀘𑁆𑀙𑀣, 𑀫𑀫 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀦𑀪𑀸𑀯𑀁 𑀆𑀭𑁄𑀘𑁂𑀣𑀸’’𑀢𑀺 𑀧𑁂𑀲𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀞𑀺𑀢𑀁 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀓𑀳𑀁, 𑀪𑀦𑁆𑀢𑁂, 𑀕𑀢𑀸𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀓𑀸𑀡𑀫𑀸𑀢𑀸𑀬 𑀕𑁂𑀳𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀺𑀁 𑀓𑀸𑀭𑀡𑀸, 𑀪𑀦𑁆𑀢𑁂’’𑀢𑀺? ‘‘𑀓𑀸𑀡𑀸 𑀓𑀺𑀭 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀢𑀁𑀓𑀸𑀭𑀡𑀸 𑀕𑀢𑁄𑀫𑁆𑀳𑀻’’𑀢𑀺. ‘‘𑀓𑀺𑀁 𑀧𑀦 𑀯𑁄, 𑀪𑀦𑁆𑀢𑁂, 𑀢𑀲𑁆𑀲𑀸 𑀅𑀦𑀓𑁆𑀓𑁄𑀲𑀦𑀪𑀸𑀯𑁄 𑀓𑀢𑁄’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀽𑀦𑀜𑁆𑀘 𑀅𑀦𑀓𑁆𑀓𑁄𑀲𑀺𑀓𑀸 𑀓𑀢𑀸, 𑀮𑁄𑀓𑀼𑀢𑁆𑀢𑀭𑀓𑀼𑀝𑀼𑀫𑁆𑀩𑀲𑀸𑀫𑀺𑀦𑀻 𑀘𑀸’’𑀢𑀺. ‘‘𑀳𑁄𑀢𑀼, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀲𑀸 𑀮𑁄𑀓𑀼𑀢𑁆𑀢𑀭𑀓𑀼𑀝𑀼𑀫𑁆𑀩𑀲𑀸𑀫𑀺𑀦𑀻 𑀓𑀢𑀸, 𑀅𑀳𑀁 𑀧𑀦 𑀦𑀁 𑀮𑁄𑀓𑀺𑀬𑀓𑀼𑀝𑀼𑀫𑁆𑀩𑀲𑀸𑀫𑀺𑀦𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀭𑀸𑀚𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑁄 𑀧𑀝𑀺𑀘𑁆𑀙𑀦𑁆𑀦𑀫𑀳𑀸𑀬𑁄𑀕𑁆𑀕𑀁 𑀧𑀳𑀺𑀡𑀺𑀢𑁆𑀯𑀸 𑀓𑀸𑀡𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀩𑁆𑀩𑀸𑀪𑀭𑀡𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀚𑁂𑀝𑁆𑀞𑀥𑀻𑀢𑀼𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 ‘‘𑀫𑀫 𑀥𑀻𑀢𑀭𑀁 𑀧𑁄𑀲𑁂𑀢𑀼𑀁 𑀲𑀫𑀢𑁆𑀣𑀸 𑀕𑀡𑁆𑀳𑀦𑁆𑀢𑀽’’𑀢𑀺 𑀆𑀳. 𑀅𑀣𑁂𑀓𑁄 𑀲𑀩𑁆𑀩𑀢𑁆𑀣𑀓𑀫𑀳𑀸𑀫𑀢𑁆𑀢𑁄 ‘‘𑀅𑀳𑀁 𑀤𑁂𑀯𑀲𑁆𑀲 𑀥𑀻𑀢𑀭𑀁 𑀧𑁄𑀲𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀅𑀢𑁆𑀢𑀦𑁄 𑀕𑁂𑀳𑀁 𑀦𑁂𑀢𑁆𑀯𑀸 𑀲𑀩𑁆𑀩𑀁 𑀇𑀲𑁆𑀲𑀭𑀺𑀬𑀁 𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 ‘‘𑀬𑀣𑀸𑀭𑀼𑀘𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀳𑀻’’𑀢𑀺 𑀆𑀳. 𑀢𑀢𑁄 𑀧𑀝𑁆𑀞𑀸𑀬 𑀓𑀸𑀡𑀸 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀧𑀼𑀭𑀺𑀲𑁂 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀉𑀧𑀝𑁆𑀞𑀸𑀢𑀩𑁆𑀩𑁂 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀧𑀭𑀺𑀬𑁂𑀲𑀫𑀸𑀦𑀸𑀧𑀺 𑀦 𑀮𑀪𑀢𑀺. 𑀓𑀸𑀡𑀸𑀬 𑀕𑁂𑀳𑀤𑁆𑀯𑀸𑀭𑁂 𑀧𑀝𑀺𑀬𑀸𑀤𑁂𑀢𑁆𑀯𑀸 𑀞𑀧𑀺𑀢𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀫𑀳𑁄𑀖𑁄 𑀯𑀺𑀬 𑀧𑀯𑀢𑁆𑀢𑀢𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀧𑀼𑀩𑁆𑀩𑁂, 𑀆𑀯𑀼𑀲𑁄, 𑀘𑀢𑁆𑀢𑀸𑀭𑁄 𑀫𑀳𑀮𑁆𑀮𑀓𑀢𑁆𑀣𑁂𑀭𑀸 𑀓𑀸𑀡𑀸𑀬 𑀯𑀺𑀧𑁆𑀧𑀝𑀺𑀲𑀸𑀭𑀁 𑀓𑀭𑀺𑀁𑀲𑀼, 𑀲𑀸 𑀏𑀯𑀁 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑀻 𑀳𑀼𑀢𑁆𑀯𑀸𑀧𑀺 𑀲𑀢𑁆𑀣𑀸𑀭𑀁 𑀆𑀕𑀫𑁆𑀫 𑀲𑀤𑁆𑀥𑀸𑀲𑀫𑁆𑀧𑀤𑀁 𑀮𑀪𑀺. 𑀲𑀢𑁆𑀣𑀸𑀭𑀸 𑀧𑀼𑀦 𑀢𑀲𑁆𑀲𑀸 𑀕𑁂𑀳𑀤𑁆𑀯𑀸𑀭𑀁 𑀪𑀺𑀓𑁆𑀔𑀽𑀦𑀁 𑀉𑀧𑀲𑀗𑁆𑀓𑀫𑀦𑀸𑀭𑀳𑀁 𑀓𑀢𑀁. 𑀇𑀤𑀸𑀦𑀺 𑀉𑀧𑀝𑁆𑀞𑀸𑀢𑀩𑁆𑀩𑁂 𑀪𑀺𑀓𑁆𑀔𑀽 𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀯𑀸 𑀧𑀭𑀺𑀬𑁂𑀲𑀫𑀸𑀦𑀸𑀧𑀺 𑀦 𑀮𑀪𑀢𑀺, 𑀅𑀳𑁄 𑀩𑀼𑀤𑁆𑀥𑀸 𑀦𑀸𑀫 𑀅𑀘𑁆𑀙𑀭𑀺𑀬𑀕𑀼𑀡𑀸’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯 𑀢𑁂𑀳𑀺 𑀫𑀳𑀮𑁆𑀮𑀓𑀪𑀺𑀓𑁆𑀔𑀽𑀳𑀺 𑀓𑀸𑀡𑀸𑀬 𑀯𑀺𑀧𑁆𑀧𑀝𑀺𑀲𑀸𑀭𑁄 𑀓𑀢𑁄, 𑀧𑀼𑀩𑁆𑀩𑁂𑀧𑀺 𑀓𑀭𑀺𑀁𑀲𑀼𑀬𑁂𑀯. 𑀦 𑀘 𑀇𑀤𑀸𑀦𑁂𑀯 𑀫𑀬𑀸 𑀓𑀸𑀡𑀸 𑀫𑀫 𑀯𑀘𑀦𑀓𑀸𑀭𑀺𑀓𑀸 𑀓𑀢𑀸, 𑀧𑀼𑀩𑁆𑀩𑁂𑀧𑀺 𑀓𑀢𑀸𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀲𑁄𑀢𑀼𑀓𑀸𑀫𑁂𑀳𑀺 𑀪𑀺𑀓𑁆𑀔𑀽𑀳𑀺 𑀬𑀸𑀘𑀺𑀢𑁄 𑁋

‘‘𑀬𑀢𑁆𑀣𑁂𑀓𑁄 𑀮𑀪𑀢𑁂 𑀩𑀩𑁆𑀩𑀼, 𑀤𑀼𑀢𑀺𑀬𑁄 𑀢𑀢𑁆𑀣 𑀚𑀸𑀬𑀢𑀺;

𑀢𑀢𑀺𑀬𑁄 𑀘 𑀘𑀢𑀼𑀢𑁆𑀣𑁄 𑀘, 𑀇𑀤𑀁 𑀢𑁂 𑀩𑀩𑁆𑀩𑀼𑀓𑀸 𑀩𑀺𑀮’’𑀦𑁆𑀢𑀺. (𑀚𑀸. 𑁧.𑁧.𑁧𑁩𑁭) 𑁋

𑀇𑀤𑀁 𑀩𑀩𑁆𑀩𑀼𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀢𑁆𑀯𑀸 ‘‘𑀢𑀤𑀸 𑀘𑀢𑁆𑀢𑀸𑀭𑁄 𑀫𑀳𑀮𑁆𑀮𑀓𑀪𑀺𑀓𑁆𑀔𑀽 𑀘𑀢𑁆𑀢𑀸𑀭𑁄 𑀩𑀺𑀴𑀸𑀭𑀸 𑀅𑀳𑁂𑀲𑀼𑀁, 𑀫𑀽𑀲𑀺𑀓𑀸 𑀓𑀸𑀡𑀸, 𑀫𑀡𑀺𑀓𑀸𑀭𑁄 𑀅𑀳𑀫𑁂𑀯𑀸’’𑀢𑀺 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑁂𑀧𑀺 𑀓𑀸𑀡𑀸 𑀤𑀼𑀫𑁆𑀫𑀦𑀸 𑀆𑀯𑀺𑀮𑀘𑀺𑀢𑁆𑀢𑀸 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀧𑀲𑀦𑁆𑀦𑀉𑀤𑀓𑀭𑀳𑀤𑁄 𑀯𑀺𑀬 𑀯𑀺𑀧𑁆𑀧𑀲𑀦𑁆𑀦𑀘𑀺𑀢𑁆𑀢𑀸 𑀅𑀳𑁄𑀲𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁮𑁨. ‘‘𑀬𑀣𑀸𑀧𑀺 𑀭𑀳𑀤𑁄 𑀕𑀫𑁆𑀪𑀻𑀭𑁄, 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄;

𑀏𑀯𑀁 𑀥𑀫𑁆𑀫𑀸𑀦𑀺 𑀲𑀼𑀢𑁆𑀯𑀸𑀦, 𑀯𑀺𑀧𑁆𑀧𑀲𑀻𑀤𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺.

𑀢𑀢𑁆𑀣 𑀭𑀳𑀤𑁄𑀢𑀺 𑀬𑁄 𑀘𑀢𑀼𑀭𑀗𑁆𑀕𑀺𑀦𑀺𑀬𑀸𑀧𑀺 𑀲𑁂𑀦𑀸𑀬 𑀑𑀕𑀸𑀳𑀦𑁆𑀢𑀺𑀬𑀸 𑀦𑀔𑀼𑀪𑀢𑀺 𑀏𑀯𑀭𑀽𑀧𑁄 𑀉𑀤𑀓𑀡𑁆𑀡𑀯𑁄, 𑀲𑀩𑁆𑀩𑀸𑀓𑀸𑀭𑁂𑀦 𑀧𑀦 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀕𑀫𑁆𑀪𑀻𑀭𑁄 𑀦𑀻𑀮𑀫𑀳𑀸𑀲𑀫𑀼𑀤𑁆𑀤𑁄 𑀭𑀳𑀤𑁄 𑀦𑀸𑀫. 𑀢𑀲𑁆𑀲 𑀳𑀺 𑀳𑁂𑀝𑁆𑀞𑀸 𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀲𑀳𑀲𑁆𑀲𑀫𑀢𑁆𑀢𑁂 𑀞𑀸𑀦𑁂 𑀉𑀤𑀓𑀁 𑀫𑀘𑁆𑀙𑁂𑀳𑀺 𑀘𑀮𑀢𑀺, 𑀉𑀧𑀭𑀺 𑀢𑀸𑀯𑀢𑁆𑀢𑀓𑁂𑀬𑁂𑀯 𑀞𑀸𑀦𑁂 𑀉𑀤𑀓𑀁 𑀯𑀸𑀢𑁂𑀦 𑀘𑀮𑀢𑀺, 𑀫𑀚𑁆𑀛𑁂 𑀘𑀢𑀼𑀬𑁄𑀚𑀦𑀲𑀳𑀲𑁆𑀲𑀫𑀢𑁆𑀢𑁂 𑀞𑀸𑀦𑁂 𑀉𑀤𑀓𑀁 𑀦𑀺𑀘𑁆𑀘𑀮𑀁 𑀢𑀺𑀝𑁆𑀞𑀢𑀺. 𑀅𑀬𑀁 𑀕𑀫𑁆𑀪𑀻𑀭𑁄 𑀭𑀳𑀤𑁄 𑀦𑀸𑀫. 𑀏𑀯𑀁 𑀥𑀫𑁆𑀫𑀸𑀦𑀻𑀢𑀺 𑀤𑁂𑀲𑀦𑀸𑀥𑀫𑁆𑀫𑀸𑀦𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀦𑀸𑀫 𑀭𑀳𑀤𑁄 𑀅𑀦𑀸𑀓𑀼𑀮𑀢𑀸𑀬 𑀯𑀺𑀧𑁆𑀧𑀲𑀦𑁆𑀦𑁄, 𑀅𑀘𑀮𑀢𑀸𑀬 𑀅𑀦𑀸𑀯𑀺𑀮𑁄, 𑀏𑀯𑀁 𑀫𑀫 𑀤𑁂𑀲𑀦𑀸𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀺𑀯𑀲𑁂𑀦 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀘𑀺𑀢𑁆𑀢𑀢𑀁 𑀆𑀧𑀚𑁆𑀚𑀦𑁆𑀢𑀸 𑀯𑀺𑀧𑁆𑀧𑀲𑀻𑀤𑀦𑁆𑀢𑀺 𑀧𑀡𑁆𑀟𑀺𑀢𑀸, 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀸 𑀧𑀦 𑀏𑀓𑀦𑁆𑀢𑀯𑀺𑀧𑁆𑀧𑀲𑀦𑁆𑀦𑀸𑀯 𑀳𑁄𑀦𑁆𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀓𑀸𑀡𑀫𑀸𑀢𑀼𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀯𑀢𑁆𑀣𑀼

𑀲𑀩𑁆𑀩𑀢𑁆𑀣 𑀯𑁂 𑀲𑀧𑁆𑀧𑀼𑀭𑀺𑀲𑀸 𑀘𑀚𑀦𑁆𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀲𑀦𑀸 𑀯𑁂𑀭𑀜𑁆𑀚𑀸𑀬𑀁 𑀲𑀫𑀼𑀝𑁆𑀞𑀺𑀢𑀸.

𑀧𑀞𑀫𑀩𑁄𑀥𑀺𑀬𑀜𑁆𑀳𑀺 𑀪𑀕𑀯𑀸 𑀯𑁂𑀭𑀜𑁆𑀚𑀁 𑀕𑀦𑁆𑀢𑁆𑀯𑀸 𑀯𑁂𑀭𑀜𑁆𑀚𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀦𑀺𑀫𑀦𑁆𑀢𑀺𑀢𑁄 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀯𑀲𑁆𑀲𑀁 𑀉𑀧𑀕𑀜𑁆𑀙𑀺. 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀫𑀸𑀭𑀸𑀯𑀝𑁆𑀝𑀦𑁂𑀦 𑀆𑀯𑀝𑁆𑀝𑁄 𑀏𑀓𑀤𑀺𑀯𑀲𑀫𑁆𑀧𑀺 𑀲𑀢𑁆𑀣𑀸𑀭𑀁 𑀆𑀭𑀩𑁆𑀪 𑀲𑀢𑀺𑀁 𑀦 𑀉𑀧𑁆𑀧𑀸𑀤𑁂𑀲𑀺. 𑀯𑁂𑀭𑀜𑁆𑀚𑀸𑀧𑀺 𑀤𑀼𑀩𑁆𑀪𑀺𑀓𑁆𑀔𑀸 𑀅𑀳𑁄𑀲𑀺, 𑀪𑀺𑀓𑁆𑀔𑀽 𑀲𑀦𑁆𑀢𑀭𑀩𑀸𑀳𑀺𑀭𑀁 𑀯𑁂𑀭𑀜𑁆𑀚𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀅𑀮𑀪𑀦𑁆𑀢𑀸 𑀓𑀺𑀮𑀫𑀺𑀁𑀲𑀼. 𑀢𑁂𑀲𑀁 𑀅𑀲𑁆𑀲𑀯𑀸𑀡𑀺𑀚𑀓𑀸 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀪𑀺𑀓𑁆𑀔𑀁 𑀧𑀜𑁆𑀜𑀸𑀧𑁂𑀲𑀼𑀁. 𑀢𑁂 𑀓𑀺𑀮𑀫𑀦𑁆𑀢𑁂 𑀤𑀺𑀲𑁆𑀯𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀧𑀣𑀯𑁄𑀚𑀁 𑀪𑁄𑀚𑁂𑀢𑀼𑀓𑀸𑀫𑁄, 𑀉𑀢𑁆𑀢𑀭𑀓𑀼𑀭𑀼𑀜𑁆𑀘 𑀧𑀺𑀡𑁆𑀟𑀸𑀬 𑀧𑀯𑁂𑀲𑁂𑀢𑀼𑀓𑀸𑀫𑁄 𑀅𑀳𑁄𑀲𑀺, 𑀲𑀢𑁆𑀣𑀸 𑀢𑀁 𑀧𑀝𑀺𑀓𑁆𑀔𑀺𑀧𑀺. 𑀪𑀺𑀓𑁆𑀔𑀽𑀦𑀁 𑀏𑀓𑀤𑀺𑀯𑀲𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀁 𑀆𑀭𑀩𑁆𑀪 𑀧𑀭𑀺𑀢𑁆𑀢𑀸𑀲𑁄 𑀦𑀸𑀳𑁄𑀲𑀺, 𑀇𑀘𑁆𑀙𑀸𑀘𑀸𑀭𑀁 𑀯𑀚𑁆𑀚𑁂𑀢𑁆𑀯𑀸 𑀏𑀯 𑀯𑀺𑀳𑀭𑀺𑀁𑀲𑀼. 𑀲𑀢𑁆𑀣𑀸 𑀢𑀢𑁆𑀣 𑀢𑁂𑀫𑀸𑀲𑀁 𑀯𑀲𑀺𑀢𑁆𑀯𑀸 𑀯𑁂𑀭𑀜𑁆𑀚𑀁 𑀩𑁆𑀭𑀸𑀳𑁆𑀫𑀡𑀁 𑀅𑀧𑀮𑁄𑀓𑁂𑀢𑁆𑀯𑀸 𑀢𑁂𑀦 𑀓𑀢𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑁄 𑀢𑀁 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀚𑁂𑀢𑀯𑀦𑁂 𑀯𑀺𑀳𑀸𑀲𑀺, 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀲𑀢𑁆𑀣𑀼 𑀆𑀕𑀦𑁆𑀢𑀼𑀓𑀪𑀢𑁆𑀢𑀸𑀦𑀺 𑀓𑀭𑀺𑀁𑀲𑀼. 𑀢𑀤𑀸 𑀧𑀦 𑀧𑀜𑁆𑀘𑀲𑀢𑀫𑀢𑁆𑀢𑀸 𑀯𑀺𑀖𑀸𑀲𑀸𑀤𑀸 𑀪𑀺𑀓𑁆𑀔𑀽 𑀦𑀺𑀲𑁆𑀲𑀸𑀬 𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀯𑀲𑀦𑁆𑀢𑀺. 𑀢𑁂 𑀪𑀺𑀓𑁆𑀔𑀽𑀦𑀁 𑀪𑀼𑀢𑁆𑀢𑀸𑀯𑀲𑁂𑀲𑀸𑀦𑀺 𑀧𑀡𑀻𑀢𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀉𑀝𑁆𑀞𑀸𑀬 𑀦𑀤𑀻𑀢𑀻𑀭𑀁 𑀕𑀦𑁆𑀢𑁆𑀯𑀸 𑀦𑀤𑀦𑁆𑀢𑀸 𑀯𑀕𑁆𑀕𑀦𑁆𑀢𑀸 𑀫𑀮𑁆𑀮𑀫𑀼𑀝𑁆𑀞𑀺𑀬𑀼𑀤𑁆𑀥𑀁 𑀬𑀼𑀚𑁆𑀛𑀦𑁆𑀢𑀸 𑀓𑀻𑀴𑀦𑁆𑀢𑀸 𑀅𑀦𑁆𑀢𑁄𑀯𑀺𑀳𑀸𑀭𑁂𑀧𑀺 𑀩𑀳𑀺𑀯𑀺𑀳𑀸𑀭𑁂𑀧𑀺 𑀅𑀦𑀸𑀘𑀸𑀭𑀫𑁂𑀯 𑀘𑀭𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀧𑀲𑁆𑀲𑀣𑀸𑀯𑀼𑀲𑁄, 𑀇𑀫𑁂 𑀯𑀺𑀖𑀸𑀲𑀸𑀤𑀸 𑀤𑀼𑀩𑁆𑀪𑀺𑀓𑁆𑀔𑀓𑀸𑀮𑁂 𑀯𑁂𑀭𑀜𑁆𑀚𑀸𑀬𑀁 𑀓𑀜𑁆𑀘𑀺 𑀯𑀺𑀓𑀸𑀭𑀁 𑀦 𑀤𑀲𑁆𑀲𑁂𑀲𑀼𑀁, 𑀇𑀤𑀸𑀦𑀺 𑀧𑀦 𑀏𑀯𑀭𑀽𑀧𑀸𑀦𑀺 𑀧𑀡𑀻𑀢𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑁂𑀓𑀧𑁆𑀧𑀓𑀸𑀭𑀁 𑀯𑀺𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀪𑀺𑀓𑁆𑀔𑀽 𑀧𑀦 𑀯𑁂𑀭𑀜𑁆𑀚𑀸𑀬𑀫𑁆𑀧𑀺 𑀉𑀧𑀲𑀦𑁆𑀢𑀭𑀽𑀧𑀸 𑀯𑀺𑀳𑀭𑀺𑀢𑁆𑀯𑀸 𑀇𑀤𑀸𑀦𑀺𑀧𑀺 𑀉𑀧𑀲𑀦𑁆𑀢𑀼𑀧𑀲𑀦𑁆𑀢𑀸𑀯 𑀯𑀺𑀳𑀭𑀦𑁆𑀢𑀻’’𑀢𑀺. 𑀲𑀢𑁆𑀣𑀸 𑀥𑀫𑁆𑀫𑀲𑀪𑀁 𑀕𑀦𑁆𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀓𑀺𑀁 𑀓𑀣𑁂𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀤𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀧𑀼𑀩𑁆𑀩𑁂𑀧𑁂𑀢𑁂 𑀕𑀤𑁆𑀭𑀪𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸 𑀧𑀜𑁆𑀘𑀲𑀢𑀸 𑀕𑀤𑁆𑀭𑀪𑀸 𑀳𑀼𑀢𑁆𑀯𑀸 𑀧𑀜𑁆𑀘𑀲𑀢𑀸𑀦𑀁 𑀆𑀚𑀸𑀦𑀻𑀬𑀲𑀺𑀦𑁆𑀥𑀯𑀸𑀦𑀁 𑀅𑀮𑁆𑀮𑀭𑀲𑀫𑀼𑀤𑁆𑀤𑀺𑀓𑀧𑀸𑀦𑀓𑀧𑀻𑀢𑀸𑀯𑀲𑁂𑀲𑀁 𑀉𑀘𑁆𑀙𑀺𑀝𑁆𑀞𑀓𑀲𑀝𑀁 𑀉𑀤𑀓𑁂𑀦 𑀫𑀤𑁆𑀤𑀺𑀢𑁆𑀯𑀸 𑀫𑀓𑀘𑀺𑀧𑀺𑀮𑁄𑀢𑀺𑀓𑀸𑀳𑀺 𑀧𑀭𑀺𑀲𑁆𑀲𑀸𑀯𑀺𑀢𑀢𑁆𑀢𑀸 ‘𑀯𑁄𑀮𑁄𑀤𑀓’𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑀁 𑀅𑀧𑁆𑀧𑀭𑀲𑀁 𑀦𑀺𑀳𑀻𑀦𑀁 𑀧𑀺𑀯𑀺𑀢𑁆𑀯𑀸 𑀫𑀥𑀼𑀫𑀢𑁆𑀢𑀸 𑀯𑀺𑀬 𑀦𑀤𑀦𑁆𑀢𑀸 𑀯𑀺𑀘𑀭𑀺𑀁𑀲𑀽𑀢𑀺 𑀯𑀢𑁆𑀯𑀸 𑁋

‘‘𑀯𑀸𑀮𑁄𑀤𑀓𑀁 𑀅𑀧𑁆𑀧𑀭𑀲𑀁 𑀦𑀺𑀳𑀻𑀦𑀁,

𑀧𑀺𑀢𑁆𑀯𑀸 𑀫𑀤𑁄 𑀚𑀸𑀬𑀢𑀺 𑀕𑀤𑁆𑀭𑀪𑀸𑀦𑀁;

𑀇𑀫𑀜𑁆𑀘 𑀧𑀺𑀢𑁆𑀯𑀸𑀦 𑀭𑀲𑀁 𑀧𑀡𑀻𑀢𑀁,

𑀫𑀤𑁄 𑀦 𑀲𑀜𑁆𑀚𑀸𑀬𑀢𑀺 𑀲𑀺𑀦𑁆𑀥𑀯𑀸𑀦𑀁.

‘‘𑀅𑀧𑁆𑀧𑀁 𑀧𑀺𑀯𑀺𑀢𑁆𑀯𑀸𑀦 𑀦𑀺𑀳𑀻𑀦𑀚𑀘𑁆𑀘𑁄,

𑀲𑁄 𑀫𑀚𑁆𑀚𑀢𑀻 𑀢𑁂𑀦 𑀚𑀦𑀺𑀦𑁆𑀤 𑀧𑀼𑀝𑁆𑀞𑁄;

𑀥𑁄𑀭𑀬𑁆𑀳𑀲𑀻𑀮𑀻 𑀘 𑀓𑀼𑀮𑀫𑁆𑀳𑀺 𑀚𑀸𑀢𑁄,

𑀦 𑀫𑀚𑁆𑀚𑀢𑀻 𑀅𑀕𑁆𑀕𑀭𑀲𑀁 𑀧𑀺𑀯𑀺𑀢𑁆𑀯𑀸’’𑀢𑀺. (𑀚𑀸. 𑁧.𑁨.𑁬𑁫);

𑀇𑀤𑀁 𑀯𑀸𑀮𑁄𑀤𑀓𑀚𑀸𑀢𑀓𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀢𑁆𑀯𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑀥𑀫𑁆𑀫𑀁 𑀯𑀺𑀯𑀚𑁆𑀚𑁂𑀢𑁆𑀯𑀸 𑀲𑀼𑀔𑀺𑀢𑀓𑀸𑀮𑁂𑀧𑀺 𑀤𑀼𑀓𑁆𑀔𑀺𑀢𑀓𑀸𑀮𑁂𑀧𑀺 𑀦𑀺𑀩𑁆𑀩𑀺𑀓𑀸𑀭𑀸𑀯 𑀳𑁄𑀦𑁆𑀢𑀻’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁮𑁩. ‘‘𑀲𑀩𑁆𑀩𑀢𑁆𑀣 𑀯𑁂 𑀲𑀧𑁆𑀧𑀼𑀭𑀺𑀲𑀸 𑀘𑀚𑀦𑁆𑀢𑀺,

𑀦 𑀓𑀸𑀫𑀓𑀸𑀫𑀸 𑀮𑀧𑀬𑀦𑁆𑀢𑀺 𑀲𑀦𑁆𑀢𑁄;

𑀲𑀼𑀔𑁂𑀦 𑀨𑀼𑀝𑁆𑀞𑀸 𑀅𑀣 𑀯𑀸 𑀤𑀼𑀔𑁂𑀦,

𑀦 𑀉𑀘𑁆𑀘𑀸𑀯𑀘𑀁 𑀧𑀡𑁆𑀟𑀺𑀢𑀸 𑀤𑀲𑁆𑀲𑀬𑀦𑁆𑀢𑀻’’𑀢𑀺.

𑀢𑀢𑁆𑀣 𑀲𑀩𑁆𑀩𑀢𑁆𑀣𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸𑀤𑀺𑀪𑁂𑀤𑁂𑀲𑀼 𑀲𑀩𑁆𑀩𑀥𑀫𑁆𑀫𑁂𑀲𑀼. 𑀲𑀧𑁆𑀧𑀼𑀭𑀺𑀲𑀸𑀢𑀺 𑀲𑀼𑀧𑀼𑀭𑀺𑀲𑀸. 𑀘𑀚𑀦𑁆𑀢𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀅𑀧𑀓𑀟𑁆𑀠𑀦𑁆𑀢𑀸 𑀙𑀦𑁆𑀤𑀭𑀸𑀕𑀁 𑀯𑀺𑀚𑀳𑀦𑁆𑀢𑀺. 𑀓𑀸𑀫𑀓𑀸𑀫𑀸𑀢𑀺 𑀓𑀸𑀫𑁂 𑀓𑀸𑀫𑀬𑀦𑁆𑀢𑀸 𑀓𑀸𑀫𑀳𑁂𑀢𑀼 𑀓𑀸𑀫𑀓𑀸𑀭𑀡𑀸. 𑀦 𑀮𑀧𑀬𑀦𑁆𑀢𑀺 𑀲𑀦𑁆𑀢𑁄𑀢𑀺 𑀩𑀼𑀤𑁆𑀥𑀸𑀤𑀬𑁄 𑀲𑀦𑁆𑀢𑁄 𑀓𑀸𑀫𑀳𑁂𑀢𑀼 𑀦𑁂𑀯 𑀅𑀢𑁆𑀢𑀦𑀸 𑀮𑀧𑀬𑀦𑁆𑀢𑀺, 𑀦 𑀧𑀭𑀁 𑀮𑀧𑀸𑀧𑁂𑀦𑁆𑀢𑀺. 𑀬𑁂 𑀳𑀺 𑀪𑀺𑀓𑁆𑀔𑀸𑀬 𑀧𑀯𑀺𑀝𑁆𑀞𑀸 𑀇𑀘𑁆𑀙𑀸𑀘𑀸𑀭𑁂 𑀞𑀺𑀢𑀸 ‘‘𑀓𑀺𑀁, 𑀉𑀧𑀸𑀲𑀓, 𑀲𑀼𑀔𑀁 𑀢𑁂 𑀧𑀼𑀢𑁆𑀢𑀤𑀸𑀭𑀲𑁆𑀲, 𑀭𑀸𑀚𑀘𑁄𑀭𑀸𑀤𑀻𑀦𑀁 𑀯𑀲𑁂𑀦 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑁂𑀲𑀼 𑀦𑀢𑁆𑀣𑀺 𑀓𑁄𑀘𑀺 𑀉𑀧𑀤𑁆𑀤𑀯𑁄’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀺, 𑀢𑀸𑀯 𑀢𑁂 𑀮𑀧𑀬𑀦𑁆𑀢𑀺 𑀦𑀸𑀫. 𑀢𑀣𑀸 𑀧𑀦 𑀯𑀢𑁆𑀯𑀸 ‘‘𑀆𑀫, 𑀪𑀦𑁆𑀢𑁂, 𑀲𑀩𑁆𑀩𑁂𑀲𑀁 𑀦𑁄 𑀲𑀼𑀔𑀁, 𑀦𑀢𑁆𑀣𑀺 𑀓𑁄𑀘𑀺 𑀉𑀧𑀤𑁆𑀤𑀯𑁄, 𑀇𑀤𑀸𑀦𑀺 𑀦𑁄 𑀕𑁂𑀳𑀁 𑀧𑀳𑀽𑀢𑀅𑀦𑁆𑀦𑀧𑀸𑀦𑀁, 𑀇𑀥𑁂𑀯 𑀯𑀲𑀣𑀸’’𑀢𑀺 𑀅𑀢𑁆𑀢𑀸𑀦𑀁 𑀦𑀺𑀫𑀦𑁆𑀢𑀸𑀧𑁂𑀦𑁆𑀢𑀸 𑀮𑀧𑀸𑀧𑁂𑀦𑁆𑀢𑀺 𑀦𑀸𑀫. 𑀲𑀦𑁆𑀢𑁄 𑀧𑀦 𑀇𑀤𑀁 𑀉𑀪𑀬𑀫𑁆𑀧𑀺 𑀦 𑀓𑀭𑁄𑀦𑁆𑀢𑀺. 𑀲𑀼𑀔𑁂𑀦 𑀨𑀼𑀝𑁆𑀞𑀸 𑀅𑀣 𑀯𑀸 𑀤𑀼𑀔𑁂𑀦𑀸𑀢𑀺 𑀤𑁂𑀲𑀦𑀸𑀫𑀢𑁆𑀢𑀫𑁂𑀢𑀁, 𑀅𑀝𑁆𑀞𑀳𑀺 𑀧𑀦 𑀮𑁄𑀓𑀥𑀫𑁆𑀫𑁂𑀳𑀺 𑀨𑀼𑀝𑁆𑀞𑀸 𑀢𑀼𑀝𑁆𑀞𑀺𑀪𑀸𑀯𑀫𑀗𑁆𑀓𑀼𑀪𑀸𑀯𑀯𑀲𑁂𑀦 𑀯𑀸 𑀯𑀡𑁆𑀡𑀪𑀡𑀦𑀅𑀯𑀡𑁆𑀡𑀪𑀡𑀦𑀯𑀲𑁂𑀦 𑀯𑀸 𑀉𑀘𑁆𑀘𑀸𑀯𑀘𑀁 𑀆𑀓𑀸𑀭𑀁 𑀧𑀡𑁆𑀟𑀺𑀢𑀸 𑀦 𑀤𑀲𑁆𑀲𑀬𑀦𑁆𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀯𑀢𑁆𑀣𑀼 𑀅𑀝𑁆𑀞𑀫𑀁.

𑁯. 𑀥𑀫𑁆𑀫𑀺𑀓𑀢𑁆𑀣𑁂𑀭𑀯𑀢𑁆𑀣𑀼

𑀦 𑀅𑀢𑁆𑀢𑀳𑁂𑀢𑀽𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀥𑀫𑁆𑀫𑀺𑀓𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑁄 𑀉𑀧𑀸𑀲𑀓𑁄 𑀥𑀫𑁆𑀫𑁂𑀦 𑀲𑀫𑁂𑀦 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺. 𑀲𑁄 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀔𑀓𑀣𑀁 𑀓𑀣𑁂𑀦𑁆𑀢𑁄 𑀆𑀳 𑁋 ‘‘𑀪𑀤𑁆𑀤𑁂, 𑀇𑀘𑁆𑀙𑀸𑀫𑀳𑀁 𑀧𑀩𑁆𑀩𑀚𑀺𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀲𑀸𑀫𑀺, 𑀆𑀕𑀫𑁂𑀳𑀺 𑀢𑀸𑀯, 𑀬𑀸𑀯𑀸𑀳𑀁 𑀓𑀼𑀘𑁆𑀙𑀺𑀕𑀢𑀁 𑀤𑀸𑀭𑀓𑀁 𑀯𑀺𑀚𑀸𑀬𑀸𑀫𑀻’’𑀢𑀺. 𑀲𑁄 𑀆𑀕𑀫𑁂𑀢𑁆𑀯𑀸 𑀤𑀸𑀭𑀓𑀲𑁆𑀲 𑀧𑀤𑀲𑀸 𑀕𑀫𑀦𑀓𑀸𑀮𑁂 𑀧𑀼𑀦 𑀢𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀕𑀫𑁂𑀳𑀺 𑀢𑀸𑀯, 𑀲𑀸𑀫𑀺, 𑀬𑀸𑀯𑀸𑀬𑀁 𑀯𑀬𑀧𑁆𑀧𑀢𑁆𑀢𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀫𑁂 𑀇𑀫𑀸𑀬 𑀅𑀧𑀮𑁄𑀓𑀺𑀢𑀸𑀬 𑀯𑀸 𑀅𑀦𑀧𑀮𑁄𑀓𑀺𑀢𑀸𑀬 𑀯𑀸, 𑀅𑀢𑁆𑀢𑀦𑁄 𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀲𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀅𑀢𑁆𑀢𑀦𑁄 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀢𑁂𑀲𑀁 𑀤𑀲𑁆𑀲𑀦𑀢𑁆𑀣𑀸𑀬 𑀧𑀼𑀦 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀲𑁄𑀧𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺, 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀧𑀦 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀧𑀺𑀲𑁆𑀲 ‘‘𑀬𑁂𑀲𑀁 𑀅𑀢𑁆𑀣𑀸𑀬 𑀅𑀳𑀁 𑀖𑀭𑀸𑀯𑀸𑀲𑁂 𑀯𑀲𑁂𑀬𑁆𑀬𑀁, 𑀢𑁂 𑀉𑀪𑁄𑀧𑀺 𑀧𑀩𑁆𑀩𑀚𑀺𑀢𑀸, 𑀇𑀤𑀸𑀦𑀺 𑀫𑁂 𑀓𑀺𑀁 𑀖𑀭𑀸𑀯𑀸𑀲𑁂𑀦, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺, 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀧𑀦 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀥𑀫𑁆𑀫𑀺𑀓𑀉𑀧𑀸𑀲𑀓𑁄 𑀅𑀢𑁆𑀢𑀦𑁄 𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀧𑀼𑀢𑁆𑀢𑀤𑀸𑀭𑀲𑁆𑀲𑀸𑀧𑀺 𑀧𑀢𑀺𑀝𑁆𑀞𑀸 𑀚𑀸𑀢𑁄’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘𑀇𑀫𑀸𑀬 𑀦𑀸𑀫𑀸’’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁂𑀦 𑀦𑀸𑀫 𑀦𑁂𑀯 𑀅𑀢𑁆𑀢𑀳𑁂𑀢𑀼, 𑀦 𑀧𑀭𑀳𑁂𑀢𑀼 𑀲𑀫𑀺𑀤𑁆𑀥𑀺 𑀇𑀘𑁆𑀙𑀺𑀢𑀩𑁆𑀩𑀸, 𑀥𑀫𑁆𑀫𑀺𑀓𑁂𑀦𑁂𑀯 𑀧𑀦 𑀥𑀫𑁆𑀫𑀧𑀝𑀺𑀲𑀭𑀡𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁮𑁪. ‘‘𑀦 𑀅𑀢𑁆𑀢𑀳𑁂𑀢𑀼 𑀦 𑀧𑀭𑀲𑁆𑀲 𑀳𑁂𑀢𑀼,

𑀦 𑀧𑀼𑀢𑁆𑀢𑀫𑀺𑀘𑁆𑀙𑁂 𑀦 𑀥𑀦𑀁 𑀦 𑀭𑀝𑁆𑀞𑀁;

𑀦 𑀇𑀘𑁆𑀙𑁂𑀬𑁆𑀬 𑀅𑀥𑀫𑁆𑀫𑁂𑀦 𑀲𑀫𑀺𑀤𑁆𑀥𑀺𑀫𑀢𑁆𑀢𑀦𑁄,

𑀲 𑀲𑀻𑀮𑀯𑀸 𑀧𑀜𑁆𑀜𑀯𑀸 𑀥𑀫𑁆𑀫𑀺𑀓𑁄 𑀲𑀺𑀬𑀸’’𑀢𑀺.

𑀢𑀢𑁆𑀣 𑀦 𑀅𑀢𑁆𑀢𑀳𑁂𑀢𑀽𑀢𑀺 𑀧𑀡𑁆𑀟𑀺𑀢𑁄 𑀦𑀸𑀫 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸 𑀧𑀸𑀧𑀁 𑀦 𑀓𑀭𑁄𑀢𑀺. 𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀢𑀺 𑀧𑀼𑀢𑁆𑀢𑀁 𑀯𑀸 𑀥𑀦𑀁 𑀯𑀸 𑀭𑀝𑁆𑀞𑀁 𑀯𑀸 𑀧𑀸𑀧𑀓𑀫𑁆𑀫𑁂𑀦 𑀦 𑀇𑀘𑁆𑀙𑁂𑀬𑁆𑀬, 𑀏𑀢𑀸𑀦𑀺𑀧𑀺 𑀇𑀘𑁆𑀙𑀢𑁄 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀲𑀫𑀺𑀤𑁆𑀥𑀺𑀫𑀢𑁆𑀢𑀦𑁄𑀢𑀺 𑀬𑀸 𑀅𑀢𑁆𑀢𑀦𑁄 𑀲𑀫𑀺𑀤𑁆𑀥𑀺, 𑀢𑀫𑁆𑀧𑀺 𑀅𑀥𑀫𑁆𑀫𑁂𑀦 𑀦 𑀇𑀘𑁆𑀙𑁂𑀬𑁆𑀬,𑀲𑀫𑀺𑀤𑁆𑀥𑀺𑀓𑀸𑀭𑀡𑀸𑀧𑀺 𑀧𑀸𑀧𑀁 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀲 𑀲𑀻𑀮𑀯𑀸𑀢𑀺 𑀬𑁄 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄, 𑀲𑁄 𑀏𑀯 𑀲𑀻𑀮𑀯𑀸 𑀘 𑀧𑀜𑁆𑀜𑀯𑀸 𑀘 𑀥𑀫𑁆𑀫𑀺𑀓𑁄𑀘 𑀲𑀺𑀬𑀸, 𑀦 𑀅𑀜𑁆𑀜𑁄𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀥𑀫𑁆𑀫𑀺𑀓𑀢𑁆𑀣𑁂𑀭𑀯𑀢𑁆𑀣𑀼 𑀦𑀯𑀫𑀁.

𑁧𑁦. 𑀥𑀫𑁆𑀫𑀲𑁆𑀲𑀯𑀦𑀯𑀢𑁆𑀣𑀼

𑀅𑀧𑁆𑀧𑀓𑀸 𑀢𑁂 𑀫𑀦𑀼𑀲𑁆𑀲𑁂𑀲𑀽𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀥𑀫𑁆𑀫𑀲𑁆𑀲𑀯𑀦𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀏𑀓𑀯𑀻𑀣𑀺𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀲𑀫𑀕𑁆𑀕𑀸 𑀳𑀼𑀢𑁆𑀯𑀸 𑀕𑀡𑀩𑀦𑁆𑀥𑁂𑀦 𑀤𑀸𑀦𑀁 𑀤𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀲𑁆𑀲𑀯𑀦𑀁 𑀓𑀸𑀭𑁂𑀲𑀼𑀁, 𑀲𑀩𑁆𑀩𑀭𑀢𑁆𑀢𑀺𑀁 𑀧𑀦 𑀥𑀫𑁆𑀫𑀁 𑀲𑁄𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀏𑀓𑀘𑁆𑀘𑁂 𑀓𑀸𑀫𑀭𑀢𑀺𑀦𑀺𑀲𑁆𑀲𑀺𑀢𑀸 𑀳𑀼𑀢𑁆𑀯𑀸, 𑀧𑀼𑀦 𑀕𑁂𑀳𑀫𑁂𑀯 𑀕𑀢𑀸, 𑀏𑀓𑀘𑁆𑀘𑁂 𑀤𑁄𑀲𑀦𑀺𑀲𑁆𑀲𑀺𑀢𑀸 𑀳𑀼𑀢𑁆𑀯𑀸, 𑀏𑀓𑀘𑁆𑀘𑁂 𑀫𑀸𑀦𑀦𑀺𑀲𑁆𑀲𑀺𑀢𑀸 𑀳𑀼𑀢𑁆𑀯𑀸, 𑀏𑀓𑀘𑁆𑀘𑁂 𑀣𑀺𑀦𑀫𑀺𑀤𑁆𑀥𑀲𑀫𑀗𑁆𑀕𑀺𑀦𑁄 𑀳𑀼𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀧𑀘𑀮𑀸𑀬𑀦𑁆𑀢𑀸 𑀲𑁄𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀽 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀇𑀫𑀸 𑀲𑀢𑁆𑀢𑀸 𑀦𑀸𑀫 𑀬𑁂𑀪𑀼𑀬𑁆𑀬𑁂𑀦 𑀪𑀯𑀦𑀺𑀲𑁆𑀲𑀺𑀢𑀸, 𑀪𑀯𑁂𑀲𑀼 𑀏𑀯 𑀮𑀕𑁆𑀕𑀸 𑀯𑀺𑀳𑀭𑀦𑁆𑀢𑀺, 𑀧𑀸𑀭𑀕𑀸𑀫𑀺𑀦𑁄 𑀦𑀸𑀫 𑀅𑀧𑁆𑀧𑀓𑀸’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀆𑀳 𑁋

𑁮𑁫. ‘‘𑀅𑀧𑁆𑀧𑀓𑀸 𑀢𑁂 𑀫𑀦𑀼𑀲𑁆𑀲𑁂𑀲𑀼, 𑀬𑁂 𑀚𑀦𑀸 𑀧𑀸𑀭𑀕𑀸𑀫𑀺𑀦𑁄;

𑀅𑀣𑀸𑀬𑀁 𑀇𑀢𑀭𑀸 𑀧𑀚𑀸, 𑀢𑀻𑀭𑀫𑁂𑀯𑀸𑀦𑀼𑀥𑀸𑀯𑀢𑀺.

𑁮𑁬. ‘‘𑀬𑁂 𑀘 𑀔𑁄 𑀲𑀫𑁆𑀫𑀤𑀓𑁆𑀔𑀸𑀢𑁂, 𑀥𑀫𑁆𑀫𑁂 𑀥𑀫𑁆𑀫𑀸𑀦𑀼𑀯𑀢𑁆𑀢𑀺𑀦𑁄;

𑀢𑁂 𑀚𑀦𑀸 𑀧𑀸𑀭𑀫𑁂𑀲𑁆𑀲𑀦𑁆𑀢𑀺, 𑀫𑀘𑁆𑀘𑀼𑀥𑁂𑀬𑁆𑀬𑀁 𑀲𑀼𑀤𑀼𑀢𑁆𑀢𑀭’’𑀦𑁆𑀢𑀺.

𑀢𑀢𑁆𑀣 𑀅𑀧𑁆𑀧𑀓𑀸𑀢𑀺 𑀣𑁄𑀓𑀸 𑀦 𑀩𑀳𑀽. 𑀧𑀸𑀭𑀕𑀸𑀫𑀺𑀦𑁄𑀢𑀺 𑀦𑀺𑀩𑁆𑀩𑀸𑀦𑀧𑀸𑀭𑀕𑀸𑀫𑀺𑀦𑁄. 𑀅𑀣𑀸𑀬𑀁 𑀇𑀢𑀭𑀸 𑀧𑀚𑀸𑀢𑀺 𑀬𑀸 𑀧𑀦𑀸𑀬𑀁 𑀅𑀯𑀲𑁂𑀲𑀸 𑀧𑀚𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀢𑀻𑀭𑀫𑁂𑀯 𑀅𑀦𑀼𑀥𑀸𑀯𑀢𑀺, 𑀅𑀬𑀫𑁂𑀯 𑀩𑀳𑀼𑀢𑀭𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀤𑀓𑁆𑀔𑀸𑀢𑁂𑀢𑀺 𑀲𑀫𑁆𑀫𑀸 𑀅𑀓𑁆𑀔𑀸𑀢𑁂 𑀲𑀼𑀓𑀣𑀺𑀢𑁂. 𑀥𑀫𑁆𑀫𑁂𑀢𑀺 𑀤𑁂𑀲𑀦𑀸𑀥𑀫𑁆𑀫𑁂. 𑀥𑀫𑁆𑀫𑀸𑀦𑀼𑀯𑀢𑁆𑀢𑀺𑀦𑁄𑀢𑀺 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀤𑀦𑀼𑀘𑁆𑀙𑀯𑀺𑀓𑀁 𑀧𑀝𑀺𑀧𑀤𑀁 𑀧𑀽𑀭𑁂𑀢𑁆𑀯𑀸 𑀫𑀕𑁆𑀕𑀨𑀮𑀲𑀘𑁆𑀙𑀺𑀓𑀭𑀡𑁂𑀦 𑀥𑀫𑁆𑀫𑀸𑀦𑀼𑀯𑀢𑁆𑀢𑀺𑀦𑁄. 𑀧𑀸𑀭𑀫𑁂𑀲𑁆𑀲𑀦𑁆𑀢𑀻𑀢𑀺 𑀢𑁂 𑀏𑀯𑀭𑀽𑀧𑀸 𑀚𑀦𑀸 𑀦𑀺𑀩𑁆𑀩𑀸𑀦𑀧𑀸𑀭𑀁 𑀕𑀫𑀺𑀲𑁆𑀲𑀦𑁆𑀢𑀺. 𑀫𑀘𑁆𑀘𑀼𑀥𑁂𑀬𑁆𑀬𑀦𑁆𑀢𑀺 𑀓𑀺𑀮𑁂𑀲𑀫𑀸𑀭𑀲𑀗𑁆𑀔𑀸𑀢𑀲𑁆𑀲 𑀫𑀘𑁆𑀘𑀼𑀲𑁆𑀲 𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑀁 𑀢𑁂𑀪𑀽𑀫𑀺𑀓𑀯𑀝𑁆𑀝𑀁. 𑀲𑀼𑀤𑀼𑀢𑁆𑀢𑀭𑀦𑁆𑀢𑀺 𑀬𑁂 𑀚𑀦𑀸 𑀥𑀫𑁆𑀫𑀸𑀦𑀼𑀯𑀢𑁆𑀢𑀺𑀦𑁄, 𑀢𑁂 𑀏𑀢𑀁 𑀲𑀼𑀤𑀼𑀢𑁆𑀢𑀭𑀁 𑀤𑀼𑀭𑀢𑀺𑀓𑁆𑀓𑀫𑀁 𑀫𑀸𑀭𑀥𑁂𑀬𑁆𑀬𑀁 𑀢𑀭𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀧𑀸𑀭𑀁 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀥𑀫𑁆𑀫𑀲𑁆𑀲𑀯𑀦𑀯𑀢𑁆𑀣𑀼 𑀤𑀲𑀫𑀁.

𑁧𑁧. 𑀧𑀜𑁆𑀘𑀲𑀢𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀼𑀯𑀢𑁆𑀣𑀼

𑀓𑀡𑁆𑀳𑀁 𑀥𑀫𑁆𑀫𑀁 𑀯𑀺𑀧𑁆𑀧𑀳𑀸𑀬𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀜𑁆𑀘𑀲𑀢𑁂 𑀆𑀕𑀦𑁆𑀢𑀼𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀓𑁄𑀲𑀮𑀭𑀝𑁆𑀞𑁂 𑀓𑀺𑀭 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀯𑀼𑀝𑁆𑀞𑀯𑀲𑁆𑀲𑀸 ‘‘𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀘𑀭𑀺𑀬𑀧𑀝𑀺𑀧𑀓𑁆𑀔𑀁 𑀦𑀺𑀲𑀸𑀫𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁮𑁭. ‘‘𑀓𑀡𑁆𑀳𑀁 𑀥𑀫𑁆𑀫𑀁 𑀯𑀺𑀧𑁆𑀧𑀳𑀸𑀬, 𑀲𑀼𑀓𑁆𑀓𑀁 𑀪𑀸𑀯𑁂𑀣 𑀧𑀡𑁆𑀟𑀺𑀢𑁄;

𑀑𑀓𑀸 𑀅𑀦𑁄𑀓𑀫𑀸𑀕𑀫𑁆𑀫, 𑀯𑀺𑀯𑁂𑀓𑁂 𑀬𑀢𑁆𑀣 𑀤𑀽𑀭𑀫𑀁.

𑁮𑁮. ‘‘𑀢𑀢𑁆𑀭𑀸𑀪𑀺𑀭𑀢𑀺𑀫𑀺𑀘𑁆𑀙𑁂𑀬𑁆𑀬, 𑀳𑀺𑀢𑁆𑀯𑀸 𑀓𑀸𑀫𑁂 𑀅𑀓𑀺𑀜𑁆𑀘𑀦𑁄;

𑀧𑀭𑀺𑀬𑁄𑀤𑀧𑁂𑀬𑁆𑀬 𑀅𑀢𑁆𑀢𑀸𑀦𑀁, 𑀘𑀺𑀢𑁆𑀢𑀓𑁆𑀮𑁂𑀲𑁂𑀳𑀺 𑀧𑀡𑁆𑀟𑀺𑀢𑁄.

𑁮𑁯. ‘‘𑀬𑁂𑀲𑀁 𑀲𑀫𑁆𑀩𑁄𑀥𑀺𑀬𑀗𑁆𑀕𑁂𑀲𑀼, 𑀲𑀫𑁆𑀫𑀸 𑀘𑀺𑀢𑁆𑀢𑀁 𑀲𑀼𑀪𑀸𑀯𑀺𑀢𑀁;

𑀆𑀤𑀸𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑁂, 𑀅𑀦𑀼𑀧𑀸𑀤𑀸𑀬 𑀬𑁂 𑀭𑀢𑀸;

𑀔𑀻𑀡𑀸𑀲𑀯𑀸 𑀚𑀼𑀢𑀺𑀫𑀦𑁆𑀢𑁄, 𑀢𑁂 𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀼𑀢𑀸’’𑀢𑀺.

𑀢𑀢𑁆𑀣 𑀓𑀡𑁆𑀳𑀁 𑀥𑀫𑁆𑀫𑀦𑁆𑀢𑀺 𑀓𑀸𑀬𑀤𑀼𑀘𑀭𑀺𑀢𑀸𑀤𑀺𑀪𑁂𑀤𑀁 𑀅𑀓𑀼𑀲𑀮𑀁 𑀥𑀫𑁆𑀫𑀁 𑀯𑀺𑀧𑁆𑀧𑀳𑀸𑀬 𑀚𑀳𑀺𑀢𑁆𑀯𑀸. 𑀲𑀼𑀓𑁆𑀓𑀁 𑀪𑀸𑀯𑁂𑀣𑀸𑀢𑀺 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼 𑀅𑀪𑀺𑀦𑀺𑀓𑁆𑀔𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀪𑁂𑀤𑀁 𑀲𑀼𑀓𑁆𑀓𑀁 𑀥𑀫𑁆𑀫𑀁 𑀪𑀸𑀯𑁂𑀬𑁆𑀬. 𑀓𑀣𑀁? 𑀑𑀓𑀸 𑀅𑀦𑁄𑀓𑀫𑀸𑀕𑀫𑁆𑀫𑀸𑀢𑀺 𑀑𑀓𑀁 𑀯𑀼𑀘𑁆𑀘𑀢𑀺 𑀆𑀮𑀬𑁄, 𑀅𑀦𑁄𑀓𑀁 𑀯𑀼𑀘𑁆𑀘𑀢𑀺 𑀅𑀦𑀸𑀮𑀬𑁄, 𑀆𑀮𑀬𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀸𑀮𑀬𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀧𑀝𑀺𑀘𑁆𑀘 𑀆𑀭𑀩𑁆𑀪 𑀢𑀁 𑀧𑀢𑁆𑀣𑀬𑀫𑀸𑀦𑁄 𑀪𑀸𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀸𑀪𑀺𑀭𑀢𑀺𑀫𑀺𑀘𑁆𑀙𑁂𑀬𑁆𑀬𑀸𑀢𑀺 𑀬𑀲𑁆𑀫𑀺𑀁 𑀅𑀦𑀸𑀮𑀬𑀲𑀗𑁆𑀔𑀸𑀢𑁂 𑀯𑀺𑀯𑁂𑀓𑁂 𑀦𑀺𑀩𑁆𑀩𑀸𑀦𑁂 𑀇𑀫𑁂𑀳𑀺 𑀲𑀢𑁆𑀢𑁂𑀳𑀺 𑀤𑀼𑀭𑀪𑀺𑀭𑀫𑀁, 𑀢𑀢𑁆𑀭 𑀅𑀪𑀺𑀭𑀢𑀺𑀁 𑀇𑀘𑁆𑀙𑁂𑀬𑁆𑀬. 𑀳𑀺𑀢𑁆𑀯𑀸 𑀓𑀸𑀫𑁂𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂 𑀳𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑁄 𑀳𑀼𑀢𑁆𑀯𑀸 𑀯𑀺𑀯𑁂𑀓𑁂 𑀅𑀪𑀺𑀭𑀢𑀺𑀁 𑀇𑀘𑁆𑀙𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀓𑁆𑀮𑁂𑀲𑁂𑀳𑀻𑀢𑀺 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺, 𑀅𑀢𑁆𑀢𑀸𑀦𑀁 𑀧𑀭𑀺𑀬𑁄𑀤𑀧𑁂𑀬𑁆𑀬 𑀯𑁄𑀤𑀸𑀧𑁂𑀬𑁆𑀬, 𑀧𑀭𑀺𑀲𑁄𑀥𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀩𑁄𑀥𑀺𑀬𑀗𑁆𑀕𑁂𑀲𑀽𑀢𑀺 𑀲𑀫𑁆𑀩𑁄𑀚𑁆𑀛𑀗𑁆𑀕𑁂𑀲𑀼. 𑀲𑀫𑁆𑀫𑀸 𑀘𑀺𑀢𑁆𑀢𑀁 𑀲𑀼𑀪𑀸𑀯𑀺𑀢𑀦𑁆𑀢𑀺 𑀳𑁂𑀢𑀼𑀦𑀸 𑀦𑀬𑁂𑀦 𑀘𑀺𑀢𑁆𑀢𑀁 𑀲𑀼𑀝𑁆𑀞𑀼 𑀪𑀸𑀯𑀺𑀢𑀁 𑀯𑀟𑁆𑀠𑀺𑀢𑀁. 𑀆𑀤𑀸𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑁂𑀢𑀺 𑀆𑀤𑀸𑀦𑀁 𑀯𑀼𑀘𑁆𑀘𑀢𑀺 𑀕𑀳𑀡𑀁, 𑀢𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀲𑀗𑁆𑀔𑀸𑀢𑁂 𑀅𑀕𑁆𑀕𑀳𑀡𑁂 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀓𑀺𑀜𑁆𑀘𑀺 𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸 𑀬𑁂 𑀭𑀢𑀸𑀢𑀺 𑀅𑀢𑁆𑀣𑁄. 𑀚𑀼𑀢𑀺𑀫𑀦𑁆𑀢𑁄𑀢𑀺 𑀆𑀦𑀼𑀪𑀸𑀯𑀯𑀦𑁆𑀢𑁄, 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀚𑀼𑀢𑀺𑀬𑀸 𑀔𑀦𑁆𑀥𑀸𑀤𑀺𑀪𑁂𑀤𑁂 𑀥𑀫𑁆𑀫𑁂 𑀚𑁄𑀢𑁂𑀢𑁆𑀯𑀸 𑀞𑀺𑀢𑀸𑀢𑀺 𑀅𑀢𑁆𑀣𑁄. 𑀢𑁂 𑀮𑁄𑀓𑁂𑀢𑀺 𑀇𑀫𑀲𑁆𑀫𑀺𑀁 𑀔𑀦𑁆𑀥𑀸𑀤𑀺𑀮𑁄𑀓𑁂 𑀧𑀭𑀺𑀦𑀺𑀩𑁆𑀩𑀼𑀢𑀸 𑀦𑀸𑀫 𑀅𑀭𑀳𑀢𑁆𑀢𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀓𑀺𑀮𑁂𑀲𑀯𑀝𑁆𑀝𑀲𑁆𑀲 𑀔𑁂𑀧𑀺𑀢𑀢𑁆𑀢𑀸 𑀲𑀉𑀧𑀸𑀤𑀺𑀲𑁂𑀲𑁂𑀦, 𑀘𑀭𑀺𑀫𑀘𑀺𑀢𑁆𑀢𑀦𑀺𑀭𑁄𑀥𑁂𑀦 𑀔𑀦𑁆𑀥𑀯𑀝𑁆𑀝𑀲𑁆𑀲 𑀔𑁂𑀧𑀺𑀢𑀢𑁆𑀢𑀸 𑀅𑀦𑀼𑀧𑀸𑀤𑀺𑀲𑁂𑀲𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀧𑀭𑀺𑀦𑀺𑀩𑁆𑀩𑀸𑀦𑁂𑀳𑀺 𑀧𑀭𑀺𑀦𑀺𑀩𑁆𑀩𑀼𑀢𑀸, 𑀅𑀦𑀼𑀧𑀸𑀤𑀸𑀦𑁄 𑀯𑀺𑀬 𑀧𑀤𑀻𑀧𑁄 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀕𑀢𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.