𑁭. 𑀅𑀭𑀳𑀦𑁆𑀢𑀯𑀕𑁆𑀕𑁄

𑁧. 𑀚𑀻𑀯𑀓𑀧𑀜𑁆𑀳𑀯𑀢𑁆𑀣𑀼

𑀕𑀢𑀤𑁆𑀥𑀺𑀦𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑀻𑀯𑀓𑀫𑁆𑀩𑀯𑀦𑁂 𑀯𑀺𑀳𑀭𑀦𑁆𑀢𑁄 𑀚𑀻𑀯𑀓𑁂𑀦 𑀧𑀼𑀝𑁆𑀞𑀧𑀜𑁆𑀳𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀚𑀻𑀯𑀓𑀯𑀢𑁆𑀣𑀼 𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁨𑁬 𑀆𑀤𑀬𑁄) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑀏𑀓𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀤𑁂𑀯𑀤𑀢𑁆𑀢𑁄 𑀅𑀚𑀸𑀢𑀲𑀢𑁆𑀢𑀼𑀦𑀸 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀕𑀺𑀚𑁆𑀛𑀓𑀽𑀝𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 ‘‘𑀲𑀢𑁆𑀣𑀸𑀭𑀁 𑀯𑀥𑀺𑀲𑁆𑀲𑀸𑀫𑀻’’𑀢𑀺 𑀲𑀺𑀮𑀁 𑀧𑀯𑀺𑀚𑁆𑀛𑀺. 𑀢𑀁 𑀤𑁆𑀯𑁂 𑀧𑀩𑁆𑀩𑀢𑀓𑀽𑀝𑀸𑀦𑀺 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀢𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀕𑀢𑀸 𑀧𑀧𑀝𑀺𑀓𑀸 𑀪𑀕𑀯𑀢𑁄 𑀧𑀸𑀤𑀁 𑀧𑀳𑀭𑀺𑀢𑁆𑀯𑀸 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀲𑀺, 𑀪𑀼𑀲𑀸 𑀯𑁂𑀤𑀦𑀸 𑀧𑀯𑀢𑁆𑀢𑀺𑀁𑀲𑀼. 𑀪𑀺𑀓𑁆𑀔𑀽 𑀲𑀢𑁆𑀣𑀸𑀭𑀁 𑀫𑀤𑁆𑀤𑀓𑀼𑀘𑁆𑀙𑀺𑀁 𑀦𑀬𑀺𑀁𑀲𑀼. 𑀲𑀢𑁆𑀣𑀸 𑀢𑀢𑁄𑀧𑀺 𑀚𑀻𑀯𑀓𑀫𑁆𑀩𑀯𑀦𑀁 𑀕𑀦𑁆𑀢𑀼𑀓𑀸𑀫𑁄 ‘‘𑀢𑀢𑁆𑀣 𑀫𑀁 𑀦𑁂𑀣𑀸’’𑀢𑀺 𑀆𑀳. 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀆𑀤𑀸𑀬 𑀚𑀻𑀯𑀓𑀫𑁆𑀩𑀯𑀦𑀁 𑀅𑀕𑀫𑀁𑀲𑀼. 𑀚𑀻𑀯𑀓𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀡𑀧𑀝𑀺𑀓𑀫𑁆𑀫𑀢𑁆𑀣𑀸𑀬 𑀢𑀺𑀔𑀺𑀡𑀪𑁂𑀲𑀚𑁆𑀚𑀁 𑀤𑀢𑁆𑀯𑀸 𑀯𑀡𑀁 𑀩𑀦𑁆𑀥𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀪𑀦𑁆𑀢𑁂, 𑀫𑀬𑀸 𑀅𑀦𑁆𑀢𑁄𑀦𑀕𑀭𑁂 𑀏𑀓𑀲𑁆𑀲 𑀫𑀦𑀼𑀲𑁆𑀲𑀲𑁆𑀲 𑀪𑁂𑀲𑀚𑁆𑀚𑀁 𑀓𑀢𑀁, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀼𑀦 𑀆𑀕𑀫𑀺𑀲𑁆𑀲𑀸𑀫𑀺, 𑀇𑀤𑀁 𑀪𑁂𑀲𑀚𑁆𑀚𑀁 𑀬𑀸𑀯 𑀫𑀫𑀸𑀕𑀫𑀦𑀸 𑀩𑀤𑁆𑀥𑀦𑀺𑀬𑀸𑀫𑁂𑀦𑁂𑀯 𑀢𑀺𑀝𑁆𑀞𑀢𑀽’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀤𑁆𑀯𑀸𑀭𑀧𑀺𑀤𑀳𑀦𑀯𑁂𑀮𑀸𑀬 𑀆𑀕𑀘𑁆𑀙𑀦𑁆𑀢𑁄 𑀤𑁆𑀯𑀸𑀭𑀁 𑀦 𑀲𑀫𑁆𑀧𑀸𑀧𑀼𑀡𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑁄 𑀫𑀬𑀸 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀢𑀁, 𑀬𑁆𑀯𑀸𑀳𑀁 𑀅𑀜𑁆𑀜𑀢𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀧𑀸𑀤𑁂 𑀢𑀺𑀔𑀺𑀡𑀪𑁂𑀲𑀚𑁆𑀚𑀁 𑀤𑀢𑁆𑀯𑀸 𑀯𑀡𑀁 𑀩𑀦𑁆𑀥𑀺𑀁, 𑀅𑀬𑀁 𑀢𑀲𑁆𑀲 𑀫𑁄𑀘𑀦𑀯𑁂𑀮𑀸, 𑀢𑀲𑁆𑀫𑀺𑀁 𑀅𑀫𑀼𑀘𑁆𑀘𑀫𑀸𑀦𑁂 𑀲𑀩𑁆𑀩𑀭𑀢𑁆𑀢𑀺𑀁 𑀪𑀕𑀯𑀢𑁄 𑀲𑀭𑀻𑀭𑁂 𑀧𑀭𑀺𑀴𑀸𑀳𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀢𑁆𑀣𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀦𑀦𑁆𑀤, 𑀚𑀻𑀯𑀓𑁄 𑀲𑀸𑀬𑀁 𑀆𑀕𑀘𑁆𑀙𑀦𑁆𑀢𑁄 𑀤𑁆𑀯𑀸𑀭𑀁 𑀦 𑀲𑀫𑁆𑀧𑀸𑀧𑀼𑀡𑀺, ‘𑀅𑀬𑀁 𑀯𑀡𑀲𑁆𑀲 𑀫𑁄𑀘𑀦𑀯𑁂𑀮𑀸’𑀢𑀺 𑀧𑀦 𑀘𑀺𑀦𑁆𑀢𑁂𑀲𑀺, 𑀫𑁄𑀘𑁂𑀲𑀺 𑀦’’𑀦𑁆𑀢𑀺. 𑀣𑁂𑀭𑁄 𑀫𑁄𑀘𑁂𑀲𑀺, 𑀯𑀡𑁄 𑀭𑀼𑀓𑁆𑀔𑀢𑁄 𑀙𑀮𑁆𑀮𑀺 𑀯𑀺𑀬 𑀅𑀧𑀕𑀢𑁄. 𑀚𑀻𑀯𑀓𑁄 𑀅𑀦𑁆𑀢𑁄𑀅𑀭𑀼𑀡𑁂𑀬𑁂𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀯𑁂𑀕𑁂𑀦 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀲𑀭𑀻𑀭𑁂 𑀯𑁄 𑀧𑀭𑀺𑀴𑀸𑀳𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀧𑀼𑀘𑁆𑀙𑀺. 𑀲𑀢𑁆𑀣𑀸 ‘‘𑀢𑀣𑀸𑀕𑀢𑀲𑁆𑀲 𑀔𑁄, 𑀚𑀻𑀯𑀓, 𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀲𑀩𑁆𑀩𑀧𑀭𑀺𑀴𑀸𑀳𑁄 𑀯𑀽𑀧𑀲𑀦𑁆𑀢𑁄’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁦. ‘‘𑀕𑀢𑀤𑁆𑀥𑀺𑀦𑁄 𑀯𑀺𑀲𑁄𑀓𑀲𑁆𑀲, 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲 𑀲𑀩𑁆𑀩𑀥𑀺;

𑀲𑀩𑁆𑀩𑀕𑀦𑁆𑀣𑀧𑁆𑀧𑀳𑀻𑀦𑀲𑁆𑀲, 𑀧𑀭𑀺𑀴𑀸𑀳𑁄 𑀦 𑀯𑀺𑀚𑁆𑀚𑀢𑀻’’𑀢𑀺.

𑀢𑀢𑁆𑀣 𑀕𑀢𑀤𑁆𑀥𑀺𑀦𑁄𑀢𑀺 𑀕𑀢𑀫𑀕𑁆𑀕𑀲𑁆𑀲 𑀓𑀦𑁆𑀢𑀸𑀭𑀤𑁆𑀥𑀸 𑀯𑀝𑁆𑀝𑀤𑁆𑀥𑀸𑀢𑀺 𑀤𑁆𑀯𑁂 𑀅𑀤𑁆𑀥𑀸 𑀦𑀸𑀫. 𑀢𑁂𑀲𑀼 𑀓𑀦𑁆𑀢𑀸𑀭𑀧𑀝𑀺𑀧𑀦𑁆𑀦𑁄 𑀬𑀸𑀯 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀅𑀤𑁆𑀥𑀺𑀓𑁄𑀬𑁂𑀯, 𑀏𑀢𑀲𑁆𑀫𑀺𑀁 𑀧𑀦 𑀧𑀢𑁆𑀢𑁂 𑀕𑀢𑀤𑁆𑀥𑀺 𑀦𑀸𑀫 𑀳𑁄𑀢𑀺. 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀸𑀧𑀺 𑀲𑀢𑁆𑀢𑀸 𑀬𑀸𑀯 𑀯𑀝𑁆𑀝𑁂 𑀯𑀲𑀦𑁆𑀢𑀺, 𑀢𑀸𑀯 𑀅𑀤𑁆𑀥𑀺𑀓𑀸 𑀏𑀯. 𑀓𑀲𑁆𑀫𑀸? 𑀯𑀝𑁆𑀝𑀲𑁆𑀲 𑀅𑀔𑁂𑀧𑀺𑀢𑀢𑁆𑀢𑀸. 𑀲𑁄𑀢𑀸𑀧𑀦𑁆𑀦𑀸𑀤𑀬𑁄𑀧𑀺 𑀅𑀤𑁆𑀥𑀺𑀓𑀸 𑀏𑀯, 𑀯𑀝𑁆𑀝𑀁 𑀧𑀦 𑀔𑁂𑀧𑁂𑀢𑁆𑀯𑀸 𑀞𑀺𑀢𑁄 𑀔𑀻𑀡𑀸𑀲𑀯𑁄 𑀕𑀢𑀤𑁆𑀥𑀺 𑀦𑀸𑀫 𑀳𑁄𑀢𑀺. 𑀢𑀲𑁆𑀲 𑀕𑀢𑀤𑁆𑀥𑀺𑀦𑁄. 𑀯𑀺𑀲𑁄𑀓𑀲𑁆𑀲𑀸𑀢𑀺 𑀯𑀝𑁆𑀝𑀫𑀽𑀮𑀓𑀲𑁆𑀲 𑀲𑁄𑀓𑀲𑁆𑀲 𑀯𑀺𑀕𑀢𑀢𑁆𑀢𑀸 𑀯𑀺𑀲𑁄𑀓𑀲𑁆𑀲. 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲 𑀲𑀩𑁆𑀩𑀥𑀻𑀢𑀺 𑀲𑀩𑁆𑀩𑁂𑀲𑀼 𑀔𑀦𑁆𑀥𑀸𑀤𑀺𑀥𑀫𑁆𑀫𑁂𑀲𑀼 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲, 𑀲𑀩𑁆𑀩𑀕𑀦𑁆𑀣𑀧𑁆𑀧𑀳𑀻𑀦𑀲𑁆𑀲𑀸𑀢𑀺 𑀘𑀢𑀼𑀦𑁆𑀦𑀫𑁆𑀧𑀺 𑀕𑀦𑁆𑀣𑀸𑀦𑀁 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀸𑀕𑀦𑁆𑀣𑀧𑁆𑀧𑀳𑀻𑀦𑀲𑁆𑀲. 𑀧𑀭𑀺𑀴𑀸𑀳𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀤𑀼𑀯𑀺𑀥𑁄 𑀧𑀭𑀺𑀴𑀸𑀳𑁄 𑀓𑀸𑀬𑀺𑀓𑁄 𑀘𑁂𑀢𑀲𑀺𑀓𑁄 𑀘𑀸𑀢𑀺. 𑀢𑁂𑀲𑀼 𑀔𑀻𑀡𑀸𑀲𑀯𑀲𑁆𑀲 𑀲𑀻𑀢𑀼𑀡𑁆𑀳𑀸𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀓𑀸𑀬𑀺𑀓𑀧𑀭𑀺𑀴𑀸𑀳𑁄 𑀅𑀦𑀺𑀩𑁆𑀩𑀼𑀢𑁄𑀯, 𑀢𑀁 𑀲𑀦𑁆𑀥𑀸𑀬 𑀚𑀻𑀯𑀓𑁄 𑀧𑀼𑀘𑁆𑀙𑀢𑀺. 𑀲𑀢𑁆𑀣𑀸 𑀧𑀦 𑀥𑀫𑁆𑀫𑀭𑀸𑀚𑀢𑀸𑀬 𑀤𑁂𑀲𑀦𑀸𑀯𑀺𑀥𑀺𑀓𑀼𑀲𑀮𑀢𑀸𑀬 𑀘𑁂𑀢𑀲𑀺𑀓𑀧𑀭𑀺𑀴𑀸𑀳𑀯𑀲𑁂𑀦 𑀤𑁂𑀲𑀦𑀁 𑀯𑀺𑀦𑀺𑀯𑀢𑁆𑀢𑁂𑀦𑁆𑀢𑁄, ‘‘𑀚𑀻𑀯𑀓, 𑀧𑀭𑀫𑀢𑁆𑀣𑁂𑀦 𑀏𑀯𑀭𑀽𑀧𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀧𑀭𑀺𑀴𑀸𑀳𑁄 𑀦 𑀯𑀺𑀚𑁆𑀚𑀢𑀻’’𑀢𑀺 𑀆𑀳.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀚𑀻𑀯𑀓𑀧𑀜𑁆𑀳𑀯𑀢𑁆𑀣𑀼 𑀧𑀞𑀫𑀁.

𑁨. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀯𑀢𑁆𑀣𑀼

𑀉𑀬𑁆𑀬𑀼𑀜𑁆𑀚𑀦𑁆𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀲𑀢𑁆𑀣𑀸 𑀭𑀸𑀚𑀕𑀳𑁂 𑀯𑀼𑀝𑁆𑀞𑀯𑀲𑁆𑀲𑁄 ‘‘𑀅𑀤𑁆𑀥𑀫𑀸𑀲𑀘𑁆𑀘𑀬𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑀸𑀧𑁂𑀲𑀺. 𑀯𑀢𑁆𑀢𑀁 𑀓𑀺𑀭𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀘𑀸𑀭𑀺𑀓𑀁 𑀘𑀭𑀺𑀢𑀼𑀓𑀸𑀫𑀸𑀦𑀁 ‘‘𑀏𑀯𑀁 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀧𑀢𑁆𑀢𑀧𑀘𑀦𑀘𑀻𑀯𑀭𑀭𑀚𑀦𑀸𑀤𑀻𑀦𑀺 𑀓𑀢𑁆𑀯𑀸 𑀲𑀼𑀔𑀁 𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺 ‘‘𑀇𑀤𑀸𑀦𑀺 𑀅𑀤𑁆𑀥𑀫𑀸𑀲𑀘𑁆𑀘𑀬𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑀸𑀧𑀦𑀁. 𑀪𑀺𑀓𑁆𑀔𑀽𑀲𑀼 𑀧𑀦 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀸𑀤𑀻𑀦𑀺 𑀓𑀭𑁄𑀦𑁆𑀢𑁂𑀲𑀼 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄𑀧𑀺 𑀘𑀻𑀯𑀭𑀸𑀦𑀺 𑀥𑁄𑀯𑀺. 𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀺𑀁𑀲𑀼 ‘‘𑀣𑁂𑀭𑁄 𑀓𑀲𑁆𑀫𑀸 𑀘𑀻𑀯𑀭𑀸𑀦𑀺 𑀥𑁄𑀯𑀢𑀺, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀅𑀦𑁆𑀢𑁄 𑀘 𑀩𑀳𑀺 𑀘 𑀅𑀝𑁆𑀞𑀸𑀭𑀲 𑀫𑀦𑀼𑀲𑁆𑀲𑀓𑁄𑀝𑀺𑀬𑁄 𑀯𑀲𑀦𑁆𑀢𑀺. 𑀢𑀢𑁆𑀣 𑀬𑁂 𑀣𑁂𑀭𑀲𑁆𑀲 𑀦 𑀜𑀸𑀢𑀓𑀸, 𑀢𑁂 𑀉𑀧𑀝𑁆𑀞𑀸𑀓𑀸, 𑀬𑁂 𑀦 𑀉𑀧𑀝𑁆𑀞𑀸𑀓𑀸, 𑀢𑁂 𑀜𑀸𑀢𑀓𑀸. 𑀢𑁂 𑀣𑁂𑀭𑀲𑁆𑀲 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀫𑁆𑀫𑀸𑀦𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺. 𑀏𑀢𑁆𑀢𑀓𑀁 𑀉𑀧𑀓𑀸𑀭𑀁 𑀧𑀳𑀸𑀬 𑀏𑀲 𑀓𑀳𑀁 𑀕𑀫𑀺𑀲𑁆𑀲𑀢𑀺? 𑀲𑀘𑁂𑀧𑀺 𑀕𑀘𑁆𑀙𑁂𑀬𑁆𑀬, 𑀫𑀸𑀧𑀫𑀸𑀤𑀓𑀦𑁆𑀤𑀭𑀢𑁄 𑀧𑀭𑀁 𑀦 𑀕𑀫𑀺𑀲𑁆𑀲𑀢𑀻’’𑀢𑀺. 𑀲𑀢𑁆𑀣𑀸 𑀓𑀺𑀭 𑀬𑀁 𑀓𑀦𑁆𑀤𑀭𑀁 𑀧𑀢𑁆𑀯𑀸 𑀦𑀺𑀯𑀢𑁆𑀢𑁂𑀢𑀩𑁆𑀩𑀬𑀼𑀢𑁆𑀢𑀓𑁂 𑀪𑀺𑀓𑁆𑀔𑀽 ‘‘𑀢𑀼𑀫𑁆𑀳𑁂 𑀇𑀢𑁄 𑀦𑀺𑀯𑀢𑁆𑀢𑀣, 𑀫𑀸 𑀧𑀫𑀚𑁆𑀚𑀺𑀢𑁆𑀣𑀸’’𑀢𑀺 𑀯𑀤𑀢𑀺. 𑀢𑀁 ‘‘𑀫𑀸𑀧𑀫𑀸𑀤𑀓𑀦𑁆𑀤𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀲𑀢𑁆𑀣𑀸𑀧𑀺 𑀘𑀸𑀭𑀺𑀓𑀁 𑀧𑀓𑁆𑀓𑀫𑀦𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀲𑁆𑀫𑀺𑀁 𑀦𑀕𑀭𑁂 𑀅𑀦𑁆𑀢𑁄 𑀘 𑀩𑀳𑀺 𑀘 𑀅𑀝𑁆𑀞𑀸𑀭𑀲 𑀫𑀦𑀼𑀲𑁆𑀲𑀓𑁄𑀝𑀺𑀬𑁄 𑀯𑀲𑀦𑁆𑀢𑀺. 𑀫𑀦𑀼𑀲𑁆𑀲𑀸𑀦𑀁 𑀫𑀗𑁆𑀕𑀮𑀸𑀫𑀗𑁆𑀕𑀮𑀝𑁆𑀞𑀸𑀦𑁂𑀲𑀼 𑀪𑀺𑀓𑁆𑀔𑀽𑀳𑀺 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺, 𑀦 𑀲𑀓𑁆𑀓𑀸 𑀯𑀺𑀳𑀸𑀭𑀁 𑀢𑀼𑀘𑁆𑀙𑀁 𑀓𑀸𑀢𑀼𑀁, 𑀓𑀁 𑀦𑀼 𑀔𑁄 𑀦𑀺𑀯𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺? 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋‘‘𑀓𑀲𑁆𑀲𑀧𑀲𑁆𑀲 𑀳𑁂𑀢𑁂 𑀫𑀦𑀼𑀲𑁆𑀲𑀸 𑀜𑀸𑀢𑀓𑀸 𑀘 𑀉𑀧𑀝𑁆𑀞𑀸𑀓𑀸 𑀘, 𑀓𑀲𑁆𑀲𑀧𑀁 𑀦𑀺𑀯𑀢𑁆𑀢𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀣𑁂𑀭𑀁 𑀆𑀳 𑁋 ‘‘𑀓𑀲𑁆𑀲𑀧, 𑀦 𑀲𑀓𑁆𑀓𑀸 𑀯𑀺𑀳𑀸𑀭𑀁 𑀢𑀼𑀘𑁆𑀙𑀁 𑀓𑀸𑀢𑀼𑀁, 𑀫𑀦𑀼𑀲𑁆𑀲𑀸𑀦𑀁 𑀫𑀗𑁆𑀕𑀮𑀸𑀫𑀗𑁆𑀕𑀮𑀝𑁆𑀞𑀸𑀦𑁂𑀲𑀼 𑀪𑀺𑀓𑁆𑀔𑀽𑀳𑀺 𑀅𑀢𑁆𑀣𑁄 𑀳𑁄𑀢𑀺, 𑀢𑁆𑀯𑀁 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀦𑀺𑀯𑀢𑁆𑀢𑀲𑁆𑀲𑀽’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀣𑁂𑀭𑁄 𑀧𑀭𑀺𑀲𑀁 𑀆𑀤𑀸𑀬 𑀦𑀺𑀯𑀢𑁆𑀢𑀺. 𑀪𑀺𑀓𑁆𑀔𑀽 𑀉𑀧𑀚𑁆𑀛𑀸𑀬𑀺𑀁𑀲𑀼 ‘‘𑀤𑀺𑀝𑁆𑀞𑀁 𑀯𑁄, 𑀆𑀯𑀼𑀲𑁄, 𑀦𑀦𑀼 𑀇𑀤𑀸𑀦𑁂𑀯 𑀅𑀫𑁆𑀳𑁂𑀳𑀺 𑀯𑀼𑀢𑁆𑀢𑀁 ‘𑀫𑀳𑀸𑀓𑀲𑁆𑀲𑀧𑁄 𑀓𑀲𑁆𑀫𑀸 𑀘𑀻𑀯𑀭𑀸𑀦𑀺 𑀥𑁄𑀯𑀢𑀺, 𑀦 𑀏𑀲𑁄 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀕𑀫𑀺𑀲𑁆𑀲𑀢𑀻’𑀢𑀺, 𑀬𑀁 𑀅𑀫𑁆𑀳𑁂𑀳𑀺 𑀯𑀼𑀢𑁆𑀢𑀁, 𑀢𑀤𑁂𑀯 𑀚𑀸𑀢’’𑀦𑁆𑀢𑀺. 𑀲𑀢𑁆𑀣𑀸 𑀪𑀺𑀓𑁆𑀔𑀽𑀦𑀁 𑀓𑀣𑀁 𑀲𑀼𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑁄 𑀆𑀳 𑁋 ‘‘𑀪𑀺𑀓𑁆𑀔𑀯𑁂, 𑀓𑀺𑀁 𑀦𑀸𑀫𑁂𑀢𑀁 𑀓𑀣𑁂𑀣𑀸’’𑀢𑀺? ‘‘𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀫, 𑀪𑀦𑁆𑀢𑁂’’𑀢𑀺 𑀅𑀢𑁆𑀢𑀦𑀸 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀲𑀩𑁆𑀩𑀁 𑀆𑀭𑁄𑀘𑁂𑀲𑀼𑀁. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂 𑀓𑀲𑁆𑀲𑀧𑀁 ‘𑀓𑀼𑀮𑁂𑀲𑀼 𑀘 𑀧𑀘𑁆𑀘𑀬𑁂𑀲𑀼 𑀘 𑀮𑀕𑁆𑀕𑁄’𑀢𑀺 𑀯𑀤𑁂𑀣, 𑀲𑁄 ‘𑀫𑀫 𑀯𑀘𑀦𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀦𑀺𑀯𑀢𑁆𑀢𑁄. 𑀏𑀲𑁄 𑀳𑀺 𑀧𑀼𑀩𑁆𑀩𑁂 𑀧𑀢𑁆𑀣𑀦𑀁 𑀓𑀭𑁄𑀦𑁆𑀢𑁄𑀬𑁂𑀯 ‘𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀮𑀕𑁆𑀕𑁄 𑀘𑀦𑁆𑀤𑀽𑀧𑀫𑁄 𑀳𑀼𑀢𑁆𑀯𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑀼𑀁 𑀲𑀫𑀢𑁆𑀣𑁄 𑀪𑀯𑁂𑀬𑁆𑀬’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀦𑀢𑁆𑀣𑁂𑀢𑀲𑁆𑀲 𑀓𑀼𑀮𑁂 𑀯𑀸 𑀧𑀘𑁆𑀘𑀬𑁂 𑀯𑀸 𑀮𑀕𑁆𑀕𑁄, 𑀅𑀳𑀁 𑀘𑀦𑁆𑀤𑁄𑀧𑀫𑀧𑁆𑀧𑀝𑀺𑀧𑀤𑀜𑁆𑀘𑁂𑀯 (𑀲𑀁. 𑀦𑀺. 𑁨.𑁧𑁪𑁬) 𑀅𑀭𑀺𑀬𑀯𑀁𑀲𑀧𑁆𑀧𑀝𑀺𑀧𑀤𑀜𑁆𑀘 𑀓𑀣𑁂𑀦𑁆𑀢𑁄 𑀫𑀫 𑀧𑀼𑀢𑁆𑀢𑀁 𑀓𑀲𑁆𑀲𑀧𑀁 𑀆𑀤𑀺𑀁 𑀓𑀢𑁆𑀯𑀸 𑀓𑀣𑁂𑀲𑀺’’𑀦𑁆𑀢𑀺 𑀆𑀳.

𑀪𑀺𑀓𑁆𑀔𑀽 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀪𑀦𑁆𑀢𑁂, 𑀓𑀤𑀸 𑀧𑀦 𑀣𑁂𑀭𑁂𑀦 𑀧𑀢𑁆𑀣𑀦𑀸 𑀞𑀧𑀺𑀢𑀸’’𑀢𑀺? ‘‘𑀲𑁄𑀢𑀼𑀓𑀸𑀫𑀸𑀢𑁆𑀣, 𑀪𑀺𑀓𑁆𑀔𑀯𑁂’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. 𑀲𑀢𑁆𑀣𑀸 𑀢𑁂𑀲𑀁, ‘‘𑀪𑀺𑀓𑁆𑀔𑀯𑁂, 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀻’’𑀢𑀺 𑀯𑀢𑁆𑀯𑀸 𑀧𑀤𑀼𑀫𑀼𑀢𑁆𑀢𑀭𑀧𑀸𑀤𑀫𑀽𑀮𑁂 𑀢𑁂𑀦 𑀞𑀧𑀺𑀢𑀧𑀢𑁆𑀣𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀣𑁂𑀭𑀲𑁆𑀲 𑀧𑀼𑀩𑁆𑀩𑀘𑀭𑀺𑀢𑀁 𑀓𑀣𑁂𑀲𑀺. 𑀢𑀁 𑀣𑁂𑀭𑀧𑀸𑀴𑀺𑀬𑀁 (𑀣𑁂𑀭𑀕𑀸. 𑁧𑁦𑁫𑁪 𑀆𑀤𑀬𑁄) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀲𑀢𑁆𑀣𑀸 𑀧𑀦 𑀇𑀫𑀁 𑀣𑁂𑀭𑀲𑁆𑀲 𑀧𑀼𑀩𑁆𑀩𑀘𑀭𑀺𑀢𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀳𑀁 𑀘𑀦𑁆𑀤𑁄𑀧𑀫𑀧𑁆𑀧𑀝𑀺𑀧𑀤𑀜𑁆𑀘𑁂𑀯 𑀅𑀭𑀺𑀬𑀯𑀁𑀲𑀧𑁆𑀧𑀝𑀺𑀧𑀤𑀜𑁆𑀘 𑀫𑀫 𑀧𑀼𑀢𑁆𑀢𑀁 𑀓𑀲𑁆𑀲𑀧𑀁 𑀆𑀤𑀺𑀁 𑀓𑀢𑁆𑀯𑀸 𑀓𑀣𑁂𑀲𑀺𑀁, 𑀫𑀫 𑀧𑀼𑀢𑁆𑀢𑀲𑁆𑀲 𑀓𑀲𑁆𑀲𑀧𑀲𑁆𑀲 𑀧𑀘𑁆𑀘𑀬𑁂𑀲𑀼 𑀯𑀸 𑀓𑀼𑀮𑁂𑀲𑀼 𑀯𑀸 𑀯𑀺𑀳𑀸𑀭𑁂𑀲𑀼 𑀯𑀸 𑀧𑀭𑀺𑀯𑁂𑀡𑁂𑀲𑀼 𑀯𑀸 𑀮𑀕𑁆𑀕𑁄 𑀦𑀸𑀫 𑀦𑀢𑁆𑀣𑀺, 𑀧𑀮𑁆𑀮𑀮𑁂 𑀑𑀢𑀭𑀺𑀢𑁆𑀯𑀸 𑀢𑀢𑁆𑀣 𑀘𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀭𑀸𑀚𑀳𑀁𑀲𑁄 𑀯𑀺𑀬 𑀓𑀢𑁆𑀣𑀘𑀺 𑀅𑀮𑀕𑁆𑀕𑁄𑀬𑁂𑀯 𑀫𑀫 𑀧𑀼𑀢𑁆𑀢𑁄’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁧. ‘‘𑀉𑀬𑁆𑀬𑀼𑀜𑁆𑀚𑀦𑁆𑀢𑀺 𑀲𑀢𑀻𑀫𑀦𑁆𑀢𑁄, 𑀦 𑀦𑀺𑀓𑁂𑀢𑁂 𑀭𑀫𑀦𑁆𑀢𑀺 𑀢𑁂;

𑀳𑀁𑀲𑀸𑀯 𑀧𑀮𑁆𑀮𑀮𑀁 𑀳𑀺𑀢𑁆𑀯𑀸, 𑀑𑀓𑀫𑁄𑀓𑀁 𑀚𑀳𑀦𑁆𑀢𑀺 𑀢𑁂’’𑀢𑀺.

𑀢𑀢𑁆𑀣 𑀉𑀬𑁆𑀬𑀼𑀜𑁆𑀚𑀦𑁆𑀢𑀺 𑀲𑀢𑀻𑀫𑀦𑁆𑀢𑁄𑀢𑀺 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸 𑀔𑀻𑀡𑀸𑀲𑀯𑀸 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀕𑀼𑀡𑁂𑀲𑀼 𑀛𑀸𑀦𑀯𑀺𑀧𑀲𑁆𑀲𑀦𑀸𑀤𑀻𑀲𑀼 𑀆𑀯𑀚𑁆𑀚𑀦𑀲𑀫𑀸𑀧𑀚𑁆𑀚𑀦𑀯𑀼𑀝𑁆𑀞𑀸𑀦𑀸𑀥𑀺𑀝𑁆𑀞𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸𑀳𑀺 𑀬𑀼𑀜𑁆𑀚𑀦𑁆𑀢𑀺 𑀖𑀝𑁂𑀦𑁆𑀢𑀺. 𑀦 𑀦𑀺𑀓𑁂𑀢𑁂 𑀭𑀫𑀦𑁆𑀢𑀺 𑀢𑁂𑀢𑀺 𑀢𑁂𑀲𑀁 𑀆𑀮𑀬𑁂 𑀭𑀢𑀺 𑀦𑀸𑀫 𑀦𑀢𑁆𑀣𑀺. 𑀳𑀁𑀲𑀸𑀯𑀸𑀢𑀺 𑀤𑁂𑀲𑀦𑀸𑀲𑀻𑀲𑀫𑁂𑀢𑀁, 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀬𑀣𑀸 𑀕𑁄𑀘𑀭𑀲𑀫𑁆𑀧𑀦𑁆𑀦𑁂 𑀧𑀮𑁆𑀮𑀮𑁂 𑀲𑀓𑀼𑀡𑀸 𑀅𑀢𑁆𑀢𑀦𑁄 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀕𑀫𑀦𑀓𑀸𑀮𑁂 ‘‘𑀫𑀫 𑀉𑀤𑀓𑀁, 𑀫𑀫 𑀧𑀤𑀼𑀫𑀁, 𑀫𑀫 𑀉𑀧𑁆𑀧𑀮𑀁, 𑀫𑀫 𑀓𑀡𑁆𑀡𑀺𑀓𑀸’’𑀢𑀺 𑀢𑀲𑁆𑀫𑀺𑀁 𑀞𑀸𑀦𑁂 𑀓𑀜𑁆𑀘𑀺 𑀆𑀮𑀬𑀁 𑀅𑀓𑀢𑁆𑀯𑀸 𑀅𑀦𑀧𑁂𑀓𑁆𑀔𑀸𑀯 𑀢𑀁 𑀞𑀸𑀦𑀁 𑀧𑀳𑀸𑀬 𑀉𑀧𑁆𑀧𑀢𑀺𑀢𑁆𑀯𑀸 𑀆𑀓𑀸𑀲𑁂 𑀓𑀻𑀴𑀫𑀸𑀦𑀸 𑀕𑀘𑁆𑀙𑀦𑁆𑀢𑀺; 𑀏𑀯𑀫𑁂𑀯𑀁 𑀔𑀻𑀡𑀸𑀲𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀺𑀳𑀭𑀦𑁆𑀢𑀸𑀧𑀺 𑀓𑀼𑀮𑀸𑀤𑀻𑀲𑀼 𑀅𑀮𑀕𑁆𑀕𑀸 𑀏𑀯 𑀯𑀺𑀳𑀭𑀺𑀢𑁆𑀯𑀸 𑀕𑀫𑀦𑀲𑀫𑀬𑁂𑀧𑀺 𑀢𑀁 𑀞𑀸𑀦𑀁 𑀧𑀳𑀸𑀬 𑀕𑀘𑁆𑀙𑀦𑁆𑀢𑀸 ‘‘𑀫𑀫 𑀯𑀺𑀳𑀸𑀭𑁄, 𑀫𑀫 𑀧𑀭𑀺𑀯𑁂𑀡𑀁, 𑀫𑀫𑀽𑀧𑀝𑁆𑀞𑀸𑀓𑀸’’𑀢𑀺 𑀅𑀦𑀸𑀮𑀬𑀸 𑀅𑀦𑀼𑀧𑁂𑀓𑁆𑀔𑀸𑀯 𑀕𑀘𑁆𑀙𑀦𑁆𑀢𑀺. 𑀑𑀓𑀫𑁄𑀓𑀦𑁆𑀢𑀺 𑀆𑀮𑀬𑀸𑀮𑀬𑀁, 𑀲𑀩𑁆𑀩𑀸𑀮𑀬𑁂 𑀧𑀭𑀺𑀘𑁆𑀘𑀚𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀩𑁂𑀮𑀝𑁆𑀞𑀲𑀻𑀲𑀢𑁆𑀣𑁂𑀭𑀯𑀢𑁆𑀣𑀼

𑀬𑁂𑀲𑀁 𑀲𑀦𑁆𑀦𑀺𑀘𑀬𑁄 𑀦𑀢𑁆𑀣𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀩𑁂𑀮𑀝𑁆𑀞𑀲𑀻𑀲𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭𑀸𑀬𑀲𑁆𑀫𑀸 𑀅𑀦𑁆𑀢𑁄𑀕𑀸𑀫𑁂 𑀏𑀓𑀁 𑀯𑀻𑀣𑀺𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀼𑀦 𑀅𑀧𑀭𑀁 𑀯𑀻𑀣𑀺𑀁 𑀘𑀭𑀺𑀢𑁆𑀯𑀸 𑀲𑀼𑀓𑁆𑀔𑀁 𑀓𑀽𑀭𑀁 𑀆𑀤𑀸𑀬 𑀯𑀺𑀳𑀸𑀭𑀁 𑀳𑀭𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑁆𑀯𑀸 ‘‘𑀦𑀺𑀩𑀤𑁆𑀥𑀁 𑀧𑀺𑀡𑁆𑀟𑀧𑀸𑀢𑀧𑀭𑀺𑀬𑁂𑀲𑀦𑀁 𑀦𑀸𑀫 𑀤𑀼𑀓𑁆𑀔’’𑀦𑁆𑀢𑀺 𑀓𑀢𑀺𑀧𑀸𑀳𑀁 𑀛𑀸𑀦𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀆𑀳𑀸𑀭𑁂𑀦 𑀅𑀢𑁆𑀣𑁂 𑀲𑀢𑀺 𑀢𑀁 𑀧𑀭𑀺𑀪𑀼𑀜𑁆𑀚𑀢𑀺. 𑀪𑀺𑀓𑁆𑀔𑀽 𑀜𑀢𑁆𑀯𑀸 𑀉𑀚𑁆𑀛𑀸𑀬𑀺𑀢𑁆𑀯𑀸 𑀢𑀫𑀢𑁆𑀣𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀆𑀬𑀢𑀺𑀁 𑀲𑀦𑁆𑀦𑀺𑀥𑀺𑀓𑀸𑀭𑀧𑀭𑀺𑀯𑀚𑁆𑀚𑀦𑀢𑁆𑀣𑀸𑀬 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑁆𑀯𑀸𑀧𑀺 𑀣𑁂𑀭𑁂𑀦 𑀧𑀦 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂 𑀅𑀧𑁆𑀧𑀺𑀘𑁆𑀙𑀢𑀁 𑀦𑀺𑀲𑁆𑀲𑀸𑀬 𑀓𑀢𑀢𑁆𑀢𑀸 𑀢𑀲𑁆𑀲 𑀤𑁄𑀲𑀸𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁨. ‘‘𑀬𑁂𑀲𑀁 𑀲𑀦𑁆𑀦𑀺𑀘𑀬𑁄 𑀦𑀢𑁆𑀣𑀺, 𑀬𑁂 𑀧𑀭𑀺𑀜𑁆𑀜𑀸𑀢𑀪𑁄𑀚𑀦𑀸;

𑀲𑀼𑀜𑁆𑀜𑀢𑁄 𑀅𑀦𑀺𑀫𑀺𑀢𑁆𑀢𑁄 𑀘, 𑀯𑀺𑀫𑁄𑀓𑁆𑀔𑁄 𑀬𑁂𑀲𑀁 𑀕𑁄𑀘𑀭𑁄;

𑀆𑀓𑀸𑀲𑁂𑀯 𑀲𑀓𑀼𑀦𑁆𑀢𑀸𑀦𑀁, 𑀕𑀢𑀺 𑀢𑁂𑀲𑀁 𑀤𑀼𑀭𑀦𑁆𑀦𑀬𑀸’’𑀢𑀺.

𑀢𑀢𑁆𑀣 𑀲𑀦𑁆𑀦𑀺𑀘𑀬𑁄𑀢𑀺 𑀤𑁆𑀯𑁂 𑀲𑀦𑁆𑀦𑀺𑀘𑀬𑀸 𑁋 𑀓𑀫𑁆𑀫𑀲𑀦𑁆𑀦𑀺𑀘𑀬𑁄 𑀘, 𑀧𑀘𑁆𑀘𑀬𑀲𑀦𑁆𑀦𑀺𑀘𑀬𑁄 𑀘. 𑀢𑁂𑀲𑀼 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀓𑀫𑁆𑀫𑀲𑀦𑁆𑀦𑀺𑀘𑀬𑁄 𑀦𑀸𑀫, 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀧𑀘𑁆𑀘𑀬𑀲𑀦𑁆𑀦𑀺𑀘𑀬𑁄 𑀦𑀸𑀫. 𑀢𑀢𑁆𑀣 𑀯𑀺𑀳𑀸𑀭𑁂 𑀯𑀲𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀁 𑀕𑀼𑀴𑀧𑀺𑀡𑁆𑀟𑀁, 𑀘𑀢𑀼𑀪𑀸𑀕𑀫𑀢𑁆𑀢𑀁 𑀲𑀧𑁆𑀧𑀺𑀁, 𑀏𑀓𑀜𑁆𑀘 𑀢𑀡𑁆𑀟𑀼𑀮𑀦𑀸𑀴𑀺𑀁 𑀞𑀧𑁂𑀦𑁆𑀢𑀲𑁆𑀲 𑀧𑀘𑁆𑀘𑀬𑀲𑀦𑁆𑀦𑀺𑀘𑀬𑁄 𑀦𑀢𑁆𑀣𑀺, 𑀢𑀢𑁄 𑀉𑀢𑁆𑀢𑀭𑀺 𑀳𑁄𑀢𑀺. 𑀬𑁂𑀲𑀁 𑀅𑀬𑀁 𑀤𑀼𑀯𑀺𑀥𑁄𑀧𑀺 𑀲𑀦𑁆𑀦𑀺𑀘𑀬𑁄 𑀦𑀢𑁆𑀣𑀺. 𑀧𑀭𑀺𑀜𑁆𑀜𑀸𑀢𑀪𑁄𑀚𑀦𑀸𑀢𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀜𑁆𑀜𑀸𑀢𑀪𑁄𑀚𑀦𑀸. 𑀬𑀸𑀕𑀼𑀆𑀤𑀻𑀦𑀜𑁆𑀳𑀺 𑀬𑀸𑀕𑀼𑀪𑀸𑀯𑀸𑀤𑀺𑀚𑀸𑀦𑀦𑀁 𑀜𑀸𑀢𑀧𑀭𑀺𑀜𑁆𑀜𑀸, 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸𑀯𑀲𑁂𑀦 𑀧𑀦 𑀪𑁄𑀚𑀦𑀲𑁆𑀲 𑀧𑀭𑀺𑀚𑀸𑀦𑀦𑀁 𑀢𑀻𑀭𑀡𑀧𑀭𑀺𑀜𑁆𑀜𑀸, 𑀓𑀩𑀴𑀻𑀓𑀸𑀭𑀸𑀳𑀸𑀭𑁂 𑀙𑀦𑁆𑀤𑀭𑀸𑀕𑀅𑀧𑀓𑀟𑁆𑀠𑀦𑀜𑀸𑀡𑀁 𑀧𑀳𑀸𑀦𑀧𑀭𑀺𑀜𑁆𑀜𑀸. 𑀇𑀫𑀸𑀳𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀬𑁂 𑀧𑀭𑀺𑀜𑁆𑀜𑀸𑀢𑀪𑁄𑀚𑀦𑀸. 𑀲𑀼𑀜𑁆𑀜𑀢𑁄 𑀅𑀦𑀺𑀫𑀺𑀢𑁆𑀢𑁄 𑀘𑀸𑀢𑀺 𑀏𑀢𑁆𑀣 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁄𑀧𑀺 𑀕𑀳𑀺𑀢𑁄𑀬𑁂𑀯. 𑀢𑀻𑀡𑀺𑀧𑀺 𑀘𑁂𑀢𑀸𑀦𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀦𑀸𑀫𑀸𑀦𑀺. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀅𑀪𑀸𑀯𑁂𑀦 𑀲𑀼𑀜𑁆𑀜𑀢𑁄, 𑀢𑁂𑀳𑀺 𑀘 𑀯𑀺𑀫𑀼𑀢𑁆𑀢𑀦𑁆𑀢𑀺 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄, 𑀢𑀣𑀸 𑀭𑀸𑀕𑀸𑀤𑀺𑀦𑀺𑀫𑀺𑀢𑁆𑀢𑀸𑀦𑀁 𑀅𑀪𑀸𑀯𑁂𑀦 𑀅𑀦𑀺𑀫𑀺𑀢𑁆𑀢𑀁, 𑀢𑁂𑀳𑀺 𑀘 𑀯𑀺𑀫𑀼𑀢𑁆𑀢𑀦𑁆𑀢𑀺 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄, 𑀭𑀸𑀕𑀸𑀤𑀺𑀧𑀡𑀺𑀥𑀻𑀦𑀁 𑀧𑀦 𑀅𑀪𑀸𑀯𑁂𑀦 𑀅𑀧𑁆𑀧𑀡𑀺𑀳𑀺𑀢𑀁, 𑀢𑁂𑀳𑀺 𑀘 𑀯𑀺𑀫𑀼𑀢𑁆𑀢𑀦𑁆𑀢𑀺 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺. 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑀸𑀦𑀁 𑀅𑀬𑀁 𑀢𑀺𑀯𑀺𑀥𑁄 𑀯𑀺𑀫𑁄𑀓𑁆𑀔𑁄 𑀬𑁂𑀲𑀁 𑀕𑁄𑀘𑀭𑁄. 𑀕𑀢𑀺 𑀢𑁂𑀲𑀁 𑀤𑀼𑀭𑀦𑁆𑀦𑀬𑀸𑀢𑀺 𑀬𑀣𑀸 𑀦𑀸𑀫 𑀆𑀓𑀸𑀲𑁂𑀦 𑀕𑀢𑀸𑀦𑀁 𑀲𑀓𑀼𑀡𑀸𑀦𑀁 𑀧𑀤𑀦𑀺𑀓𑁆𑀔𑁂𑀧𑀲𑁆𑀲 𑀅𑀤𑀲𑁆𑀲𑀦𑁂𑀦 𑀕𑀢𑀺 𑀤𑀼𑀭𑀦𑁆𑀦𑀬𑀸 𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁, 𑀏𑀯𑀫𑁂𑀯 𑀬𑁂𑀲𑀁 𑀅𑀬𑀁 𑀤𑀼𑀯𑀺𑀥𑁄 𑀲𑀦𑁆𑀦𑀺𑀘𑀬𑁄 𑀦𑀢𑁆𑀣𑀺, 𑀇𑀫𑀸𑀳𑀺 𑀘 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀜𑁆𑀜𑀸𑀢𑀪𑁄𑀚𑀦𑀸, 𑀬𑁂𑀲𑀜𑁆𑀘 𑀅𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀯𑀺𑀫𑁄𑀓𑁆𑀔𑁄 𑀕𑁄𑀘𑀭𑁄, 𑀢𑁂𑀲𑀁 𑀢𑀬𑁄 𑀪𑀯𑀸, 𑀘𑀢𑀲𑁆𑀲𑁄 𑀬𑁄𑀦𑀺𑀬𑁄, 𑀧𑀜𑁆𑀘 𑀕𑀢𑀺𑀬𑁄, 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀦𑀯 𑀲𑀢𑁆𑀢𑀸𑀯𑀸𑀲𑀸𑀢𑀺 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀇𑀫𑀺𑀦𑀸 𑀦𑀸𑀫 𑀕𑀢𑀸𑀢𑀺 𑀕𑀫𑀦𑀲𑁆𑀲 𑀅𑀧𑀜𑁆𑀜𑀸𑀬𑀦𑀢𑁄 𑀕𑀢𑀺 𑀤𑀼𑀭𑀦𑁆𑀦𑀬𑀸 𑀦 𑀲𑀓𑁆𑀓𑀸 𑀧𑀜𑁆𑀜𑀸𑀧𑁂𑀢𑀼𑀦𑁆𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀩𑁂𑀮𑀝𑁆𑀞𑀲𑀻𑀲𑀢𑁆𑀣𑁂𑀭𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀯𑀢𑁆𑀣𑀼

𑀬𑀲𑁆𑀲𑀸𑀲𑀯𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀤𑀺𑀯𑀲𑁂 𑀣𑁂𑀭𑁄 𑀚𑀺𑀡𑁆𑀡𑀘𑀻𑀯𑀭𑁄 𑀲𑀗𑁆𑀓𑀸𑀭𑀓𑀽𑀝𑀸𑀤𑀻𑀲𑀼 𑀘𑀻𑀯𑀭𑀁 𑀧𑀭𑀺𑀬𑁂𑀲𑀢𑀺. 𑀢𑀲𑁆𑀲 𑀇𑀢𑁄 𑀢𑀢𑀺𑀬𑁂 𑀅𑀢𑁆𑀢𑀪𑀸𑀯𑁂 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀚𑀸𑀮𑀺𑀦𑀻 𑀦𑀸𑀫 𑀤𑁂𑀯𑀥𑀻𑀢𑀸 𑀅𑀳𑁄𑀲𑀺. 𑀲𑀸 𑀣𑁂𑀭𑀁 𑀘𑁄𑀴𑀓𑀸𑀦𑀺 𑀧𑀭𑀺𑀬𑁂𑀲𑀫𑀸𑀦𑀁 𑀤𑀺𑀲𑁆𑀯𑀸 𑀣𑁂𑀭𑀲𑁆𑀲 𑀅𑀢𑁆𑀣𑀸𑀬 𑀢𑁂𑀭𑀲𑀳𑀢𑁆𑀣𑀸𑀬𑀢𑀸𑀦𑀺 𑀘𑀢𑀼𑀳𑀢𑁆𑀣𑀯𑀺𑀢𑁆𑀣𑀢𑀸𑀦𑀺 𑀢𑀻𑀡𑀺 𑀤𑀺𑀩𑁆𑀩𑀤𑀼𑀲𑁆𑀲𑀸𑀦𑀺 𑀕𑀳𑁂𑀢𑁆𑀯𑀸 ‘‘𑀲𑀘𑀸𑀳𑀁 𑀇𑀫𑀸𑀦𑀺 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀤𑀲𑁆𑀲𑀸𑀫𑀺, 𑀣𑁂𑀭𑁄 𑀦 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀘𑁄𑀴𑀓𑀸𑀦𑀺 𑀧𑀭𑀺𑀬𑁂𑀲𑀫𑀸𑀦𑀲𑁆𑀲 𑀧𑀼𑀭𑀢𑁄 𑀏𑀓𑀲𑁆𑀫𑀺𑀁 𑀲𑀗𑁆𑀓𑀸𑀭𑀓𑀽𑀝𑁂 𑀬𑀣𑀸 𑀦𑁂𑀲𑀁 𑀤𑀲𑀦𑁆𑀢𑀫𑀢𑁆𑀢𑀫𑁂𑀯 𑀧𑀜𑁆𑀜𑀸𑀬𑀢𑀺, 𑀢𑀣𑀸 𑀞𑀧𑁂𑀲𑀺. 𑀣𑁂𑀭𑁄 𑀢𑁂𑀦 𑀫𑀕𑁆𑀕𑁂𑀦 𑀘𑁄𑀴𑀓𑀧𑀭𑀺𑀬𑁂𑀲𑀫𑀸𑀦𑀁 𑀘𑀭𑀦𑁆𑀢𑁄 𑀦𑁂𑀲𑀁 𑀤𑀲𑀦𑁆𑀢𑀁 𑀤𑀺𑀲𑁆𑀯𑀸 𑀢𑀢𑁆𑀣𑁂𑀯 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀫𑀸𑀦𑁄 𑀯𑀼𑀢𑁆𑀢𑀧𑁆𑀧𑀫𑀸𑀡𑀸𑀦𑀺 𑀤𑀺𑀩𑁆𑀩𑀤𑀼𑀲𑁆𑀲𑀸𑀦𑀺 𑀤𑀺𑀲𑁆𑀯𑀸 ‘‘𑀉𑀓𑁆𑀓𑀝𑁆𑀞𑀧𑀁𑀲𑀼𑀓𑀽𑀮𑀁 𑀯𑀢 𑀇𑀤’’𑀦𑁆𑀢𑀺 𑀆𑀤𑀸𑀬 𑀧𑀓𑁆𑀓𑀸𑀫𑀺. 𑀅𑀣𑀲𑁆𑀲 𑀘𑀻𑀯𑀭𑀓𑀭𑀡𑀤𑀺𑀯𑀲𑁂 𑀲𑀢𑁆𑀣𑀸 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺, 𑀅𑀲𑀻𑀢𑀺𑀫𑀳𑀸𑀣𑁂𑀭𑀸𑀧𑀺 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀁𑀲𑀼, 𑀘𑀻𑀯𑀭𑀁 𑀲𑀺𑀩𑁆𑀩𑁂𑀢𑀼𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀫𑀽𑀮𑁂 𑀦𑀺𑀲𑀻𑀤𑀺, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀫𑀚𑁆𑀛𑁂, 𑀆𑀦𑀦𑁆𑀤𑀢𑁆𑀣𑁂𑀭𑁄 𑀅𑀕𑁆𑀕𑁂, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀼𑀢𑁆𑀢𑀁 𑀯𑀝𑁆𑀝𑁂𑀲𑀺, 𑀲𑀢𑁆𑀣𑀸 𑀲𑀽𑀘𑀺𑀧𑀸𑀲𑀓𑁂 𑀆𑀯𑀼𑀡𑀺, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀬𑁂𑀦 𑀬𑁂𑀦 𑀅𑀢𑁆𑀣𑁄, 𑀢𑀁 𑀢𑀁 𑀉𑀧𑀦𑁂𑀦𑁆𑀢𑁄 𑀯𑀺𑀘𑀭𑀺.

𑀤𑁂𑀯𑀥𑀻𑀢𑀸𑀧𑀺 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀪𑁄𑀦𑁆𑀢𑀸 𑀅𑀬𑁆𑀬𑀲𑁆𑀲 𑀦𑁄 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀘𑀻𑀯𑀭𑀁 𑀓𑀭𑁄𑀦𑁆𑀢𑁄 𑀲𑀢𑁆𑀣𑀸 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀧𑀭𑀺𑀯𑀼𑀢𑁄 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀯𑀺𑀳𑀸𑀭𑁂 𑀦𑀺𑀲𑀻𑀤𑀺, 𑀬𑀸𑀕𑀼𑀆𑀤𑀻𑀦𑀺 𑀆𑀤𑀸𑀬 𑀯𑀺𑀳𑀸𑀭𑀁 𑀕𑀘𑁆𑀙𑀣𑀸’’𑀢𑀺 𑀪𑀺𑀓𑁆𑀔𑀁 𑀲𑀫𑀸𑀤𑀧𑁂𑀲𑀺. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄𑀧𑀺 𑀅𑀦𑁆𑀢𑀭𑀸𑀪𑀢𑁆𑀢𑁂 𑀫𑀳𑀸𑀚𑀫𑁆𑀩𑀼𑀧𑁂𑀲𑀺𑀁 𑀆𑀳𑀭𑀺, 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀧𑀭𑀺𑀓𑁆𑀔𑀻𑀡𑀁 𑀔𑀸𑀤𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀲𑀓𑁆𑀓𑁄 𑀘𑀻𑀯𑀭𑀓𑀭𑀡𑀝𑁆𑀞𑀸𑀦𑁂 𑀪𑀽𑀫𑀺𑀧𑀭𑀺𑀪𑀡𑁆𑀟𑀫𑀓𑀸𑀲𑀺, 𑀪𑀽𑀫𑀺 𑀅𑀮𑀢𑁆𑀢𑀓𑀭𑀲𑀭𑀜𑁆𑀚𑀺𑀢𑀸 𑀯𑀺𑀬 𑀅𑀳𑁄𑀲𑀺. 𑀪𑀺𑀓𑁆𑀔𑀽𑀳𑀺 𑀧𑀭𑀺𑀪𑀼𑀢𑁆𑀢𑀸𑀯𑀲𑁂𑀲𑀸𑀦𑀁 𑀬𑀸𑀕𑀼𑀔𑀚𑁆𑀚𑀓𑀪𑀢𑁆𑀢𑀸𑀦𑀁 𑀫𑀳𑀸𑀭𑀸𑀲𑀺 𑀅𑀳𑁄𑀲𑀺. 𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀺𑀁𑀲𑀼 ‘‘𑀏𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀺𑀁 𑀏𑀯𑀁𑀩𑀳𑀼𑀓𑁂𑀳𑀺 𑀬𑀸𑀕𑀼𑀆𑀤𑀻𑀳𑀺, 𑀦𑀦𑀼 𑀦𑀸𑀫 𑀧𑀫𑀸𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀏𑀢𑁆𑀢𑀓𑀁 𑀦𑀸𑀫 𑀆𑀳𑀭𑀣𑀸’’𑀢𑀺 𑀜𑀸𑀢𑀓𑀸 𑀘 𑀉𑀧𑀝𑁆𑀞𑀸𑀓𑀸 𑀘 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁, 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀜𑀸𑀢𑀺𑀉𑀧𑀝𑁆𑀞𑀸𑀓𑀸𑀦𑀁 𑀩𑀳𑀼𑀪𑀸𑀯𑀁 𑀜𑀸𑀧𑁂𑀢𑀼𑀓𑀸𑀫𑁄 𑀫𑀜𑁆𑀜𑁂’’𑀢𑀺, 𑀅𑀣 𑀦𑁂 𑀲𑀢𑁆𑀣𑀸 ‘‘𑀓𑀺𑀁, 𑀪𑀺𑀓𑁆𑀔𑀯𑁂, 𑀓𑀣𑁂𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀤𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀧𑀦 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, ‘𑀇𑀤𑀁 𑀅𑀦𑀼𑀭𑀼𑀤𑁆𑀥𑁂𑀦 𑀆𑀳𑀭𑀸𑀧𑀺𑀢’𑀦𑁆𑀢𑀺 𑀫𑀜𑁆𑀜𑀣𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀦, 𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑁄 𑀅𑀦𑀼𑀭𑀼𑀤𑁆𑀥𑁄 𑀏𑀯𑀭𑀽𑀧𑀁 𑀯𑀤𑁂𑀢𑀺. 𑀦 𑀳𑀺 𑀔𑀻𑀡𑀸𑀲𑀯𑀸 𑀧𑀘𑁆𑀘𑀬𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀣𑀁 𑀓𑀣𑁂𑀦𑁆𑀢𑀺, 𑀅𑀬𑀁 𑀧𑀦 𑀧𑀺𑀡𑁆𑀟𑀧𑀸𑀢𑁄 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁩. ‘‘𑀬𑀲𑁆𑀲𑀸𑀲𑀯𑀸 𑀧𑀭𑀺𑀓𑁆𑀔𑀻𑀡𑀸, 𑀆𑀳𑀸𑀭𑁂 𑀘 𑀅𑀦𑀺𑀲𑁆𑀲𑀺𑀢𑁄;

𑀲𑀼𑀜𑁆𑀜𑀢𑁄 𑀅𑀦𑀺𑀫𑀺𑀢𑁆𑀢𑁄 𑀘, 𑀯𑀺𑀫𑁄𑀓𑁆𑀔𑁄 𑀬𑀲𑁆𑀲 𑀕𑁄𑀘𑀭𑁄;

𑀆𑀓𑀸𑀲𑁂𑀯 𑀲𑀓𑀼𑀦𑁆𑀢𑀸𑀦𑀁, 𑀧𑀤𑀁 𑀢𑀲𑁆𑀲 𑀤𑀼𑀭𑀦𑁆𑀦𑀬’’𑀦𑁆𑀢𑀺.

𑀢𑀢𑁆𑀣 𑀬𑀲𑁆𑀲𑀸𑀲𑀯𑀸𑀢𑀺 𑀬𑀲𑁆𑀲 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸. 𑀆𑀳𑀸𑀭𑁂 𑀘 𑀅𑀦𑀺𑀲𑁆𑀲𑀺𑀢𑁄𑀢𑀺 𑀆𑀳𑀸𑀭𑀲𑁆𑀫𑀺𑀜𑁆𑀘 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁂𑀳𑀺 𑀅𑀦𑀺𑀲𑁆𑀲𑀺𑀢𑁄. 𑀧𑀤𑀁 𑀢𑀲𑁆𑀲 𑀤𑀼𑀭𑀦𑁆𑀦𑀬𑀦𑁆𑀢𑀺 𑀬𑀣𑀸 𑀆𑀓𑀸𑀲𑁂 𑀕𑀘𑁆𑀙𑀦𑁆𑀢𑀸𑀦𑀁 𑀲𑀓𑀼𑀡𑀸𑀦𑀁 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀸𑀤𑁂𑀳𑀺 𑀅𑀓𑁆𑀓𑀫𑀺𑀢𑁆𑀯𑀸 𑀕𑀢𑀸, 𑀇𑀤𑀁 𑀞𑀸𑀦𑀁 𑀉𑀭𑁂𑀦 𑀧𑀳𑀭𑀺𑀢𑁆𑀯𑀸 𑀕𑀢𑀸, 𑀇𑀤𑀁 𑀲𑀻𑀲𑁂𑀦, 𑀇𑀤𑀁 𑀧𑀓𑁆𑀔𑁂𑀳𑀻’’𑀢𑀺 𑀦 𑀲𑀓𑁆𑀓𑀸 𑀜𑀸𑀢𑀼𑀁, 𑀏𑀯𑀫𑁂𑀯 𑀏𑀯𑀭𑀽𑀧𑀲𑁆𑀲 𑀪𑀺𑀓𑁆𑀔𑀼𑀦𑁄 ‘‘𑀦𑀺𑀭𑀬𑀧𑀤𑁂𑀦 𑀯𑀸 𑀕𑀢𑁄, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀧𑀤𑁂𑀦 𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀤𑀁 𑀧𑀜𑁆𑀜𑀸𑀧𑁂𑀢𑀼𑀁 𑀦𑀸𑀫 𑀦 𑀲𑀓𑁆𑀓𑁄𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺 𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀯𑀢𑁆𑀣𑀼

𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀧𑀼𑀩𑁆𑀩𑀸𑀭𑀸𑀫𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀪𑀕𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 𑀧𑀸𑀲𑀸𑀤𑀲𑁆𑀲 𑀳𑁂𑀝𑁆𑀞𑀸 𑀫𑀳𑀸𑀲𑀸𑀯𑀓𑀧𑀭𑀺𑀯𑀼𑀢𑁄 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑁄 𑀅𑀯𑀦𑁆𑀢𑀻𑀲𑀼 𑀯𑀺𑀳𑀭𑀢𑀺. 𑀲𑁄 𑀧𑀦𑀸𑀬𑀲𑁆𑀫𑀸 𑀤𑀽𑀭𑀢𑁄𑀧𑀺 𑀆𑀕𑀦𑁆𑀢𑁆𑀯𑀸 𑀥𑀫𑁆𑀫𑀲𑁆𑀲𑀯𑀦𑀁 𑀧𑀕𑁆𑀕𑀡𑁆𑀳𑀸𑀢𑀺𑀬𑁂𑀯. 𑀢𑀲𑁆𑀫𑀸 𑀫𑀳𑀸𑀣𑁂𑀭𑀸 𑀦𑀺𑀲𑀻𑀤𑀦𑁆𑀢𑀸 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀲𑁆𑀲 𑀆𑀲𑀦𑀁 𑀞𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑁆𑀯𑀻𑀳𑀺 𑀤𑁂𑀯𑀮𑁄𑀓𑁂𑀳𑀺 𑀤𑁂𑀯𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑀤𑀺𑀩𑁆𑀩𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀲𑀢𑁆𑀣𑀸𑀭𑀁 𑀧𑀽𑀚𑁂𑀢𑁆𑀯𑀸 𑀞𑀺𑀢𑁄 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀁 𑀅𑀤𑀺𑀲𑁆𑀯𑀸 𑀓𑀺𑀁 𑀦𑀼 𑀔𑁄 𑀫𑀫, 𑀅𑀬𑁆𑀬𑁄, 𑀦 𑀤𑀺𑀲𑁆𑀲𑀢𑀺, 𑀲𑀸𑀥𑀼 𑀔𑁄 𑀧𑀦𑀲𑁆𑀲 𑀲𑀘𑁂 𑀆𑀕𑀘𑁆𑀙𑁂𑀬𑁆𑀬𑀸𑀢𑀺. 𑀣𑁂𑀭𑁄𑀧𑀺 𑀢𑀁 𑀔𑀡𑀜𑁆𑀜𑁂𑀯 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀆𑀲𑀦𑁂 𑀦𑀺𑀲𑀺𑀦𑁆𑀦𑀫𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀲𑀓𑁆𑀓𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀕𑁄𑀧𑁆𑀨𑀓𑁂𑀲𑀼 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 ‘‘𑀲𑀸𑀥𑀼 𑀯𑀢 𑀫𑁂, 𑀅𑀬𑁆𑀬𑁄, 𑀆𑀕𑀢𑁄, 𑀅𑀳𑀁 𑀅𑀬𑁆𑀬𑀲𑁆𑀲 𑀆𑀕𑀫𑀦𑀫𑁂𑀯 𑀧𑀘𑁆𑀘𑀸𑀲𑀻𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀸𑀤𑁂 𑀲𑀫𑁆𑀩𑀸𑀳𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀺𑀁𑀲𑀼. ‘‘𑀲𑀓𑁆𑀓𑁄 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀲𑀓𑁆𑀓𑀸𑀭𑀁 𑀓𑀭𑁄𑀢𑀺, 𑀅𑀯𑀲𑁂𑀲𑀫𑀳𑀸𑀲𑀸𑀯𑀓𑀸𑀦𑀁 𑀏𑀯𑀭𑀽𑀧𑀁 𑀲𑀓𑁆𑀓𑀸𑀭𑀁 𑀅𑀓𑀭𑀺𑀢𑁆𑀯𑀸 𑀫𑀳𑀸𑀓𑀘𑁆𑀘𑀸𑀬𑀦𑀁 𑀤𑀺𑀲𑁆𑀯𑀸 𑀯𑁂𑀕𑁂𑀦 𑀕𑁄𑀧𑁆𑀨𑀓𑁂𑀲𑀼 𑀕𑀳𑁂𑀢𑁆𑀯𑀸 ‘𑀲𑀸𑀥𑀼 𑀯𑀢 𑀫𑁂, 𑀅𑀬𑁆𑀬𑁄, 𑀆𑀕𑀢𑁄, 𑀅𑀳𑀁 𑀅𑀬𑁆𑀬𑀲𑁆𑀲 𑀆𑀕𑀫𑀦𑀫𑁂𑀯 𑀧𑀘𑁆𑀘𑀸𑀲𑀻𑀲𑀸𑀫𑀻’𑀢𑀺 𑀯𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀸𑀤𑁂 𑀲𑀫𑁆𑀩𑀸𑀳𑀺𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄’’𑀢𑀺. 𑀲𑀢𑁆𑀣𑀸 𑀢𑁂𑀲𑀁 𑀢𑀁 𑀓𑀣𑀁 𑀲𑀼𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀫𑀫 𑀧𑀼𑀢𑁆𑀢𑁂𑀦 𑀫𑀳𑀸𑀓𑀘𑁆𑀘𑀸𑀬𑀦𑁂𑀦 𑀲𑀤𑀺𑀲𑀸 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸 𑀪𑀺𑀓𑁆𑀔𑀽 𑀤𑁂𑀯𑀸𑀦𑀫𑁆𑀧𑀺 𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀧𑀺𑀬𑀸𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁪. ‘‘𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀣𑀗𑁆𑀕𑀢𑀸𑀦𑀺,

𑀅𑀲𑁆𑀲𑀸 𑀬𑀣𑀸 𑀲𑀸𑀭𑀣𑀺𑀦𑀸 𑀲𑀼𑀤𑀦𑁆𑀢𑀸;

𑀧𑀳𑀻𑀦𑀫𑀸𑀦𑀲𑁆𑀲 𑀅𑀦𑀸𑀲𑀯𑀲𑁆𑀲,

𑀤𑁂𑀯𑀸𑀧𑀺 𑀢𑀲𑁆𑀲 𑀧𑀺𑀳𑀬𑀦𑁆𑀢𑀺 𑀢𑀸𑀤𑀺𑀦𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀙𑁂𑀓𑁂𑀦 𑀲𑀸𑀭𑀣𑀺𑀦𑀸 𑀲𑀼𑀤𑀦𑁆𑀢𑀸 𑀅𑀲𑁆𑀲𑀸 𑀯𑀺𑀬 𑀙 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀣𑀁 𑀤𑀦𑁆𑀢𑀪𑀸𑀯𑀁 𑀦𑀺𑀩𑁆𑀩𑀺𑀲𑁂𑀯𑀦𑀪𑀸𑀯𑀁 𑀕𑀢𑀸𑀦𑀺, 𑀢𑀲𑁆𑀲 𑀦𑀯𑀯𑀺𑀥𑀁 𑀫𑀸𑀦𑀁 𑀧𑀳𑀸𑀬 𑀞𑀺𑀢𑀢𑁆𑀢𑀸 𑀧𑀳𑀻𑀦𑀫𑀸𑀦𑀲𑁆𑀲 𑀘𑀢𑀼𑀦𑁆𑀦𑀁 𑀆𑀲𑀯𑀸𑀦𑀁 𑀅𑀪𑀸𑀯𑁂𑀦 𑀅𑀦𑀸𑀲𑀯𑀲𑁆𑀲. 𑀢𑀸𑀤𑀺𑀦𑁄𑀢𑀺 𑀢𑀸𑀤𑀺𑀪𑀸𑀯𑀲𑀡𑁆𑀞𑀺𑀢𑀲𑁆𑀲 𑀢𑀣𑀸𑀭𑀽𑀧𑀲𑁆𑀲 𑀤𑁂𑀯𑀸𑀧𑀺 𑀧𑀺𑀳𑀬𑀦𑁆𑀢𑀺, 𑀫𑀦𑀼𑀲𑁆𑀲𑀸𑀧𑀺 𑀤𑀲𑁆𑀲𑀦𑀜𑁆𑀘 𑀆𑀕𑀫𑀦𑀜𑁆𑀘 𑀧𑀢𑁆𑀣𑁂𑀦𑁆𑀢𑀺𑀬𑁂𑀯𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼

𑀧𑀣𑀯𑀺𑀲𑀫𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀯𑀼𑀝𑁆𑀞𑀯𑀲𑁆𑀲𑁄 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀢𑀼𑀓𑀸𑀫𑁄 𑀪𑀕𑀯𑀦𑁆𑀢𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺. 𑀅𑀜𑁆𑀜𑁂𑀧𑀺 𑀩𑀳𑀽 𑀪𑀺𑀓𑁆𑀔𑀽 𑀣𑁂𑀭𑀁 𑀅𑀦𑀼𑀕𑀘𑁆𑀙𑀺𑀁𑀲𑀼. 𑀣𑁂𑀭𑁄 𑀘 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀧𑀜𑁆𑀜𑀸𑀬𑀫𑀸𑀦𑁂 𑀪𑀺𑀓𑁆𑀔𑀽 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀓𑀣𑁂𑀢𑁆𑀯𑀸 𑀦𑀺𑀯𑀢𑁆𑀢𑀸𑀧𑁂𑀲𑀺. 𑀅𑀜𑁆𑀜𑀢𑀭𑁄 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀅𑀧𑀸𑀓𑀝𑁄 𑀪𑀺𑀓𑁆𑀔𑀼 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀯𑀢 𑀫𑀫𑁆𑀧𑀺 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀧𑀕𑁆𑀕𑀡𑁆𑀳𑀦𑁆𑀢𑁄 𑀓𑀣𑁂𑀢𑁆𑀯𑀸 𑀦𑀺𑀯𑀢𑁆𑀢𑀸𑀧𑁂𑀬𑁆𑀬𑀸’’𑀢𑀺 𑀣𑁂𑀭𑁄 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀦𑁆𑀢𑀭𑁂 𑀢𑀁 𑀦 𑀲𑀮𑁆𑀮𑀓𑁆𑀔𑁂𑀲𑀺. 𑀲𑁄 ‘‘𑀅𑀜𑁆𑀜𑁂 𑀯𑀺𑀬 𑀪𑀺𑀓𑁆𑀔𑀽 𑀦 𑀫𑀁 𑀧𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀣𑁂𑀭𑁂 𑀆𑀖𑀸𑀢𑀁 𑀩𑀦𑁆𑀥𑀺. 𑀣𑁂𑀭𑀲𑁆𑀲𑀧𑀺 𑀲𑀗𑁆𑀖𑀸𑀝𑀺𑀓𑀡𑁆𑀡𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀭𑀻𑀭𑀁 𑀨𑀼𑀲𑀺, 𑀢𑁂𑀦𑀸𑀧𑀺 𑀆𑀖𑀸𑀢𑀁 𑀩𑀦𑁆𑀥𑀺𑀬𑁂𑀯. 𑀲𑁄 ‘‘𑀤𑀸𑀦𑀺 𑀣𑁂𑀭𑁄 𑀯𑀺𑀳𑀸𑀭𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀦𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀆𑀬𑀲𑁆𑀫𑀸 𑀫𑀁, 𑀪𑀦𑁆𑀢𑁂, 𑀲𑀸𑀭𑀺𑀧𑀼𑀢𑁆𑀢𑁄 𑀢𑀼𑀫𑁆𑀳𑀸𑀓𑀁 𑀅𑀕𑁆𑀕𑀲𑀸𑀯𑀓𑁄𑀫𑁆𑀳𑀻𑀢𑀺 𑀓𑀡𑁆𑀡𑀲𑀓𑁆𑀔𑀮𑀺𑀁 𑀪𑀺𑀦𑁆𑀤𑀦𑁆𑀢𑁄 𑀯𑀺𑀬 𑀧𑀳𑀭𑀺𑀢𑁆𑀯𑀸 𑀅𑀔𑀫𑀸𑀧𑁂𑀢𑁆𑀯𑀸𑀯 𑀘𑀸𑀭𑀺𑀓𑀁 𑀧𑀓𑁆𑀓𑀦𑁆𑀢𑁄’’𑀢𑀺 𑀆𑀳. 𑀲𑀢𑁆𑀣𑀸 𑀣𑁂𑀭𑀁 𑀧𑀓𑁆𑀓𑁄𑀲𑀸𑀧𑁂𑀲𑀺.

𑀢𑀲𑁆𑀫𑀺𑀁 𑀔𑀡𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀘 𑀆𑀦𑀦𑁆𑀤𑀢𑁆𑀣𑁂𑀭𑁄 𑀘 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀅𑀫𑁆𑀳𑀸𑀓𑀁 𑀅𑀕𑁆𑀕𑀚𑁂𑀝𑁆𑀞𑀪𑀸𑀢𑀭𑀸 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀳𑀝𑀪𑀸𑀯𑀁 𑀲𑀢𑁆𑀣𑀸 𑀦𑁄 𑀦 𑀚𑀸𑀦𑀸𑀢𑀺, 𑀲𑀻𑀳𑀦𑀸𑀤𑀁 𑀧𑀦 𑀦𑀤𑀸𑀧𑁂𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀻𑀢𑀺 𑀧𑀭𑀺𑀲𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀲𑁆𑀲𑀸𑀫𑀸’’𑀢𑀺. 𑀢𑁂 𑀓𑀼𑀜𑁆𑀘𑀺𑀓𑀳𑀢𑁆𑀣𑀸 𑀧𑀭𑀺𑀯𑁂𑀡𑀤𑁆𑀯𑀸𑀭𑀸𑀦𑀺 𑀯𑀺𑀯𑀭𑀺𑀢𑁆𑀯𑀸 ‘‘𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄, 𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄, 𑀇𑀤𑀸𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀢𑀻’’𑀢𑀺 (𑀅. 𑀦𑀺. 𑁯.𑁧𑁧) 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀲𑀼𑀁. 𑀣𑁂𑀭𑁄𑀧𑀺 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑀢𑁆𑀣𑀸 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀣𑁂𑀭𑁄 ‘‘𑀦𑀸𑀬𑀁 𑀪𑀺𑀓𑁆𑀔𑀼 𑀫𑀬𑀸 𑀧𑀳𑀝𑁄’’𑀢𑀺 𑀅𑀯𑀢𑁆𑀯𑀸𑀯 𑀅𑀢𑁆𑀢𑀦𑁄 𑀕𑀼𑀡𑀓𑀣𑀁 𑀓𑀣𑁂𑀦𑁆𑀢𑁄 ‘‘𑀬𑀲𑁆𑀲 𑀦𑀽𑀦, 𑀪𑀦𑁆𑀢𑁂, 𑀓𑀸𑀬𑁂 𑀓𑀸𑀬𑀕𑀢𑀸𑀲𑀢𑀺 𑀅𑀦𑀼𑀧𑀝𑁆𑀞𑀺𑀢𑀸 𑀅𑀲𑁆𑀲, 𑀲𑁄 𑀇𑀥 𑀅𑀜𑁆𑀜𑀢𑀭𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀆𑀲𑀚𑁆𑀚 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬𑀸’’𑀢𑀺 𑀯𑀢𑁆𑀯𑀸 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀧𑀣𑀯𑀺𑀬𑀁 𑀲𑀼𑀘𑀺𑀫𑁆𑀧𑀺 𑀦𑀺𑀓𑁆𑀔𑀺𑀧𑀦𑁆𑀢𑀺, 𑀅𑀲𑀼𑀘𑀺𑀫𑁆𑀧𑀺 𑀦𑀺𑀓𑁆𑀔𑀺𑀧𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑁆𑀢𑀦𑁄 𑀧𑀣𑀯𑀻𑀲𑀫𑀘𑀺𑀢𑁆𑀢𑀢𑀜𑁆𑀘 𑀆𑀧𑁄𑀢𑁂𑀚𑁄𑀯𑀸𑀬𑁄 𑀭𑀚𑁄𑀳𑀭𑀡𑀘𑀡𑁆𑀟𑀸𑀮𑀓𑀼𑀫𑀸𑀭𑀓𑀉𑀲𑀪𑀙𑀺𑀦𑁆𑀦𑀯𑀺𑀲𑀸𑀡𑀲𑀫𑀘𑀺𑀢𑁆𑀢𑀢𑀜𑁆𑀘 𑀅𑀳𑀺𑀓𑀼𑀡𑀧𑀸𑀤𑀻𑀳𑀺 𑀯𑀺𑀬 𑀅𑀢𑁆𑀢𑀦𑁄 𑀓𑀸𑀬𑁂𑀦 𑀅𑀝𑁆𑀝𑀺𑀬𑀦𑀜𑁆𑀘 𑀫𑁂𑀤𑀓𑀣𑀸𑀮𑀺𑀓𑀸 𑀯𑀺𑀬 𑀅𑀢𑁆𑀢𑀦𑁄 𑀓𑀸𑀬𑀧𑀭𑀺𑀳𑀭𑀡𑀜𑁆𑀘 𑀧𑀓𑀸𑀲𑁂𑀲𑀺. 𑀇𑀫𑀸𑀳𑀺 𑀘 𑀧𑀦 𑀦𑀯𑀳𑀺 𑀉𑀧𑀫𑀸𑀳𑀺 𑀣𑁂𑀭𑁂 𑀅𑀢𑁆𑀢𑀦𑁄 𑀕𑀼𑀡𑁂 𑀓𑀣𑁂𑀦𑁆𑀢𑁂 𑀦𑀯𑀲𑀼𑀧𑀺 𑀞𑀸𑀦𑁂𑀲𑀼 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺. 𑀭𑀚𑁄𑀳𑀭𑀡𑀘𑀡𑁆𑀟𑀸𑀮𑀓𑀼𑀫𑀸𑀭𑀓𑀫𑁂𑀤𑀓𑀣𑀸𑀮𑀺𑀓𑁄 𑀧𑀫𑀸𑀦𑀁 𑀧𑀦 𑀆𑀳𑀭𑀡𑀓𑀸𑀮𑁂 𑀧𑀼𑀣𑀼𑀚𑁆𑀚𑀦𑀸 𑀪𑀺𑀓𑁆𑀔𑀽 𑀅𑀲𑁆𑀲𑀽𑀦𑀺 𑀲𑀦𑁆𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼, 𑀔𑀻𑀡𑀸𑀲𑀯𑀸𑀦𑀁 𑀥𑀫𑁆𑀫𑀲𑀁𑀯𑁂𑀕𑁄 𑀉𑀤𑀧𑀸𑀤𑀺.

𑀣𑁂𑀭𑁂 𑀅𑀢𑁆𑀢𑀦𑁄 𑀕𑀼𑀡𑀁 𑀓𑀣𑁂𑀦𑁆𑀢𑁂𑀬𑁂𑀯 𑀅𑀩𑁆𑀪𑀸𑀘𑀺𑀓𑁆𑀔𑀦𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀓𑀮𑀲𑀭𑀻𑀭𑁂 𑀟𑀸𑀳𑁄 𑀉𑀧𑁆𑀧𑀚𑁆𑀚𑀺, 𑀲𑁄 𑀢𑀸𑀯𑀤𑁂𑀯 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀧𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀩𑁆𑀪𑀸𑀘𑀺𑀓𑁆𑀔𑀦𑀤𑁄𑀲𑀁 𑀧𑀓𑀸𑀲𑁂𑀢𑁆𑀯𑀸 𑀅𑀘𑁆𑀘𑀬𑀁 𑀤𑁂𑀲𑁂𑀲𑀺. 𑀲𑀢𑁆𑀣𑀸 𑀣𑁂𑀭𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀲𑀸𑀭𑀺𑀧𑀼𑀢𑁆𑀢, 𑀔𑀫 𑀇𑀫𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲, 𑀬𑀸𑀯𑀲𑁆𑀲 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀦 𑀨𑀮𑀢𑀻’’𑀢𑀺 𑀆𑀳. 𑀣𑁂𑀭𑁄 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 ‘‘𑀔𑀫𑀸𑀫𑀳𑀁, 𑀪𑀦𑁆𑀢𑁂, 𑀢𑀲𑁆𑀲 𑀆𑀬𑀲𑁆𑀫𑀢𑁄, 𑀔𑀫𑀢𑀼 𑀘 𑀫𑁂 𑀲𑁄 𑀆𑀬𑀲𑁆𑀫𑀸, 𑀲𑀘𑁂 𑀫𑀬𑁆𑀳𑀁 𑀤𑁄𑀲𑁄 𑀅𑀢𑁆𑀣𑀻’’𑀢𑀺 𑀆𑀳. 𑀪𑀺𑀓𑁆𑀔𑀽 𑀓𑀣𑀬𑀺𑀁𑀲𑀼 ‘‘𑀧𑀲𑁆𑀲𑀣 𑀤𑀸𑀦𑀸𑀯𑀼𑀲𑁄, 𑀣𑁂𑀭𑀲𑁆𑀲 𑀅𑀦𑁄𑀧𑀫𑀕𑀼𑀡𑀁, 𑀏𑀯𑀭𑀽𑀧𑀲𑁆𑀲 𑀦𑀸𑀫 𑀫𑀼𑀲𑀸𑀯𑀸𑀤𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑀭𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑁄𑀧𑀁 𑀯𑀸 𑀤𑁄𑀲𑀁 𑀯𑀸 𑀅𑀓𑀢𑁆𑀯𑀸 𑀲𑀬𑀫𑁂𑀯 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀔𑀫𑀸𑀧𑁂𑀢𑀻’’𑀢𑀺. ‘‘𑀲𑀢𑁆𑀣𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸, 𑀪𑀺𑀓𑁆𑀔𑀯𑁂, 𑀓𑀺𑀁 𑀓𑀣𑁂𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀤𑀁 𑀦𑀸𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂, ‘‘𑀦 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸 𑀲𑀸𑀭𑀺𑀧𑀼𑀢𑁆𑀢𑀲𑀤𑀺𑀲𑀸𑀦𑀁 𑀓𑁄𑀧𑀁 𑀯𑀸 𑀤𑁄𑀲𑀁 𑀯𑀸 𑀉𑀧𑁆𑀧𑀸𑀤𑁂𑀢𑀼𑀁, 𑀫𑀳𑀸𑀧𑀣𑀯𑀻𑀲𑀤𑀺𑀲𑀁, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑀔𑀻𑀮𑀲𑀤𑀺𑀲𑀁 𑀧𑀲𑀦𑁆𑀦𑀉𑀤𑀓𑀭𑀳𑀤𑀲𑀤𑀺𑀲𑀜𑁆𑀘 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀘𑀺𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁫. ‘‘𑀧𑀣𑀯𑀺𑀲𑀫𑁄 𑀦𑁄 𑀯𑀺𑀭𑀼𑀚𑁆𑀛𑀢𑀺,

𑀇𑀦𑁆𑀤𑀔𑀺𑀮𑀼𑀧𑀫𑁄 𑀢𑀸𑀤𑀺 𑀲𑀼𑀩𑁆𑀩𑀢𑁄;

𑀭𑀳𑀤𑁄𑀯 𑀅𑀧𑁂𑀢𑀓𑀤𑁆𑀤𑀫𑁄,

𑀲𑀁𑀲𑀸𑀭𑀸 𑀦 𑀪𑀯𑀦𑁆𑀢𑀺 𑀢𑀸𑀤𑀺𑀦𑁄’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀬𑀣𑀸 𑀦𑀸𑀫 𑀧𑀣𑀯𑀺𑀬𑀁 𑀲𑀼𑀘𑀻𑀦𑀺 𑀕𑀦𑁆𑀥𑀫𑀸𑀮𑀸𑀤𑀻𑀦𑀺𑀧𑀺 𑀦𑀺𑀓𑁆𑀔𑀺𑀧𑀦𑁆𑀢𑀺, 𑀅𑀲𑀼𑀘𑀻𑀦𑀺 𑀫𑀼𑀢𑁆𑀢𑀓𑀭𑀻𑀲𑀸𑀤𑀻𑀦𑀺𑀧𑀺 𑀦𑀺𑀓𑁆𑀔𑀺𑀧𑀦𑁆𑀢𑀺, 𑀬𑀣𑀸 𑀦𑀸𑀫 𑀦𑀕𑀭𑀤𑁆𑀯𑀸𑀭𑁂 𑀦𑀺𑀔𑀸𑀢𑀁 𑀇𑀦𑁆𑀤𑀔𑀻𑀮𑀁 𑀤𑀸𑀭𑀓𑀸𑀤𑀬𑁄 𑀑𑀫𑀼𑀢𑁆𑀢𑁂𑀦𑁆𑀢𑀺𑀧𑀺 𑀊𑀳𑀤𑀦𑁆𑀢𑀺𑀧𑀺, 𑀅𑀧𑀭𑁂 𑀧𑀦 𑀢𑀁 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀲𑀓𑁆𑀓𑀭𑁄𑀦𑁆𑀢𑀺. 𑀢𑀢𑁆𑀣 𑀧𑀣𑀯𑀺𑀬𑀸 𑀇𑀦𑁆𑀤𑀔𑀻𑀮𑀲𑁆𑀲 𑀘 𑀦𑁂𑀯 𑀅𑀦𑀼𑀭𑁄𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀦 𑀯𑀺𑀭𑁄𑀥𑁄; 𑀏𑀯𑀫𑁂𑀯 𑀬𑁆𑀯𑀸𑀬𑀁 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀅𑀝𑁆𑀞𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀅𑀓𑀫𑁆𑀧𑀺𑀬𑀪𑀸𑀯𑁂𑀦 𑀢𑀸𑀤𑀺, 𑀯𑀢𑀸𑀦𑀁 𑀲𑀼𑀦𑁆𑀤𑀭𑀢𑀸𑀬 𑀲𑀼𑀩𑁆𑀩𑀢𑁄. 𑀲𑁄 ‘‘𑀇𑀫𑁂 𑀫𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀓𑁆𑀓𑀭𑁄𑀦𑁆𑀢𑀺, 𑀇𑀫𑁂 𑀧𑀦 𑀦 𑀲𑀓𑁆𑀓𑀭𑁄𑀦𑁆𑀢𑀻’’𑀢𑀺 𑀲𑀓𑁆𑀓𑀸𑀭𑀜𑁆𑀘 𑀅𑀲𑀓𑁆𑀓𑀸𑀭𑀜𑁆𑀘 𑀓𑀭𑁄𑀦𑁆𑀢𑁂𑀲𑀼 𑀦𑁂𑀯 𑀅𑀦𑀼𑀭𑀼𑀚𑁆𑀛𑀢𑀺, 𑀦𑁄 𑀯𑀺𑀭𑀼𑀚𑁆𑀛𑀢𑀺, 𑀅𑀣 𑀔𑁄 𑀧𑀣𑀯𑀺𑀲𑀫𑁄 𑀘 𑀇𑀦𑁆𑀤𑀔𑀺𑀮𑀼𑀧𑀫𑁄 𑀏𑀯 𑀘 𑀳𑁄𑀢𑀺. 𑀬𑀣𑀸 𑀘 𑀅𑀧𑀕𑀢𑀓𑀤𑁆𑀤𑀫𑁄 𑀭𑀳𑀤𑁄 𑀧𑀲𑀦𑁆𑀦𑁄𑀤𑀓𑁄 𑀳𑁄𑀢𑀺, 𑀏𑀯𑀁 𑀅𑀧𑀕𑀢𑀓𑀺𑀮𑁂𑀲𑀢𑀸𑀬 𑀭𑀸𑀕𑀓𑀤𑁆𑀤𑀫𑀸𑀤𑀻𑀳𑀺 𑀅𑀓𑀤𑁆𑀤𑀫𑁄 𑀯𑀺𑀧𑁆𑀧𑀲𑀦𑁆𑀦𑁄𑀯 𑀳𑁄𑀢𑀺. 𑀢𑀸𑀤𑀺𑀦𑁄𑀢𑀺 𑀢𑀲𑁆𑀲 𑀧𑀦 𑀏𑀯𑀭𑀽𑀧𑀲𑁆𑀲 𑀲𑀼𑀕𑀢𑀺𑀤𑀼𑀕𑁆𑀕𑀢𑀻𑀲𑀼 𑀲𑀁𑀲𑀭𑀡𑀯𑀲𑁂𑀦 𑀲𑀁𑀲𑀸𑀭𑀸 𑀦𑀸𑀫 𑀦 𑀳𑁄𑀦𑁆𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀦𑀯 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀓𑁄𑀲𑀫𑁆𑀩𑀺𑀯𑀸𑀲𑀻𑀢𑀺𑀲𑁆𑀲𑀢𑁆𑀣𑁂𑀭𑀲𑀸𑀫𑀡𑁂𑀭𑀯𑀢𑁆𑀣𑀼

𑀲𑀦𑁆𑀢𑀁 𑀢𑀲𑁆𑀲 𑀫𑀦𑀁 𑀳𑁄𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀲𑀸𑀫𑀡𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑁄 𑀓𑀺𑀭 𑀓𑁄𑀲𑀫𑁆𑀩𑀺𑀯𑀸𑀲𑀻 𑀓𑀼𑀮𑀧𑀼𑀢𑁆𑀢𑁄 𑀲𑀢𑁆𑀣𑀼 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀮𑀤𑁆𑀥𑀼𑀧𑀲𑀫𑁆𑀧𑀤𑁄 ‘‘𑀓𑁄𑀲𑀫𑁆𑀩𑀺𑀯𑀸𑀲𑀻𑀢𑀺𑀲𑁆𑀲𑀢𑁆𑀣𑁂𑀭𑁄’’𑀢𑀺 𑀧𑀜𑁆𑀜𑀸𑀬𑀺. 𑀢𑀲𑁆𑀲 𑀓𑁄𑀲𑀫𑁆𑀩𑀺𑀬𑀁 𑀯𑀼𑀝𑁆𑀞𑀯𑀲𑁆𑀲𑀲𑁆𑀲 𑀉𑀧𑀝𑁆𑀞𑀸𑀓𑁄 𑀢𑀺𑀘𑀻𑀯𑀭𑀜𑁆𑀘𑁂𑀯 𑀲𑀧𑁆𑀧𑀺𑀨𑀸𑀡𑀺𑀢𑀜𑁆𑀘 𑀆𑀳𑀭𑀺𑀢𑁆𑀯𑀸 𑀧𑀸𑀤𑀫𑀽𑀮𑁂 𑀞𑀧𑁂𑀲𑀺. 𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀓𑀺𑀁 𑀇𑀤𑀁 𑀉𑀧𑀸𑀲𑀓𑀸’’𑀢𑀺. ‘‘𑀦𑀦𑀼 𑀫𑀬𑀸, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀯𑀲𑁆𑀲𑀁 𑀯𑀸𑀲𑀺𑀢𑀸, 𑀅𑀫𑁆𑀳𑀸𑀓𑀜𑁆𑀘 𑀯𑀺𑀳𑀸𑀭𑁂 𑀯𑀼𑀝𑁆𑀞𑀯𑀲𑁆𑀲𑀸 𑀇𑀫𑀁 𑀮𑀸𑀪𑀁 𑀮𑀪𑀦𑁆𑀢𑀺, 𑀕𑀡𑁆𑀳𑀣, 𑀪𑀦𑁆𑀢𑁂’’𑀢𑀺. ‘‘𑀳𑁄𑀢𑀼, 𑀉𑀧𑀸𑀲𑀓, 𑀦 𑀫𑀬𑁆𑀳𑀁 𑀇𑀫𑀺𑀦𑀸 𑀅𑀢𑁆𑀣𑁄’’𑀢𑀺. ‘‘𑀓𑀺𑀁 𑀓𑀸𑀭𑀡𑀸, 𑀪𑀦𑁆𑀢𑁂’’𑀢𑀺? ‘‘𑀫𑀫 𑀲𑀦𑁆𑀢𑀺𑀓𑁂 𑀓𑀧𑁆𑀧𑀺𑀬𑀓𑀸𑀭𑀓𑁄 𑀲𑀸𑀫𑀡𑁂𑀭𑁄𑀧𑀺 𑀦𑀢𑁆𑀣𑀺, 𑀆𑀯𑀼𑀲𑁄’’𑀢𑀺. ‘‘𑀲𑀘𑁂, 𑀪𑀦𑁆𑀢𑁂, 𑀓𑀧𑁆𑀧𑀺𑀬𑀓𑀸𑀭𑀓𑁄 𑀦𑀢𑁆𑀣𑀺, 𑀫𑀫 𑀧𑀼𑀢𑁆𑀢𑁄 𑀅𑀬𑁆𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀸𑀫𑀡𑁂𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀣𑁂𑀭𑁄 𑀅𑀥𑀺𑀯𑀸𑀲𑁂𑀲𑀺. 𑀉𑀧𑀸𑀲𑀓𑁄 𑀲𑀢𑁆𑀢𑀯𑀲𑁆𑀲𑀺𑀓𑀁 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 ‘‘𑀇𑀫𑀁 𑀧𑀩𑁆𑀩𑀸𑀚𑁂𑀣𑀸’’𑀢𑀺 𑀅𑀤𑀸𑀲𑀺. 𑀅𑀣𑀲𑁆𑀲 𑀣𑁂𑀭𑁄 𑀓𑁂𑀲𑁂 𑀢𑁂𑀫𑁂𑀢𑁆𑀯𑀸 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀤𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀔𑀼𑀭𑀕𑁆𑀕𑁂𑀬𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀣𑁂𑀭𑁄 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀅𑀟𑁆𑀠𑀫𑀸𑀲𑀁 𑀢𑀢𑁆𑀣 𑀯𑀲𑀺𑀢𑁆𑀯𑀸 ‘‘𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀫𑀡𑁂𑀭𑀁 𑀪𑀡𑁆𑀟𑀓𑀁 𑀕𑀸𑀳𑀸𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀁 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀲𑀸𑀫𑀡𑁂𑀭𑁄 𑀉𑀧𑀚𑁆𑀛𑀸𑀬𑀲𑁆𑀲 𑀲𑁂𑀦𑀸𑀲𑀦𑀁 𑀕𑀳𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺. 𑀢𑀲𑁆𑀲 𑀢𑀁 𑀧𑀝𑀺𑀚𑀕𑁆𑀕𑀦𑁆𑀢𑀲𑁆𑀲𑁂𑀯 𑀯𑀺𑀓𑀸𑀮𑁄 𑀚𑀸𑀢𑁄, 𑀢𑁂𑀦 𑀅𑀢𑁆𑀢𑀦𑁄 𑀲𑁂𑀦𑀸𑀲𑀦𑀁 𑀧𑀝𑀺𑀚𑀕𑁆𑀕𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀦𑀁 𑀉𑀧𑀝𑁆𑀞𑀸𑀦𑀯𑁂𑀮𑀸𑀬𑀁 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀣𑁂𑀭𑁄 𑀧𑀼𑀘𑁆𑀙𑀺 𑁋 ‘‘𑀲𑀸𑀫𑀡𑁂𑀭, 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀧𑀝𑀺𑀚𑀕𑁆𑀕𑀺𑀢’’𑀦𑁆𑀢𑀺? ‘‘𑀪𑀦𑁆𑀢𑁂, 𑀧𑀝𑀺𑀚𑀕𑁆𑀕𑀺𑀢𑀼𑀁 𑀑𑀓𑀸𑀲𑀁 𑀦𑀸𑀮𑀢𑁆𑀣’’𑀦𑁆𑀢𑀺. ‘‘𑀢𑁂𑀦 𑀳𑀺 𑀫𑀫 𑀯𑀲𑀦𑀝𑁆𑀞𑀸𑀦𑁂𑀬𑁂𑀯 𑀯𑀲, 𑀤𑀼𑀓𑁆𑀔𑀁 𑀢𑁂 𑀆𑀕𑀦𑁆𑀢𑀼𑀓𑀝𑁆𑀞𑀸𑀦𑁂 𑀩𑀳𑀺 𑀯𑀲𑀺𑀢𑀼’’𑀦𑁆𑀢𑀺 𑀢𑀁 𑀕𑀳𑁂𑀢𑁆𑀯𑀸𑀯 𑀲𑁂𑀦𑀸𑀲𑀦𑀁 𑀧𑀸𑀯𑀺𑀲𑀺. 𑀣𑁂𑀭𑁄 𑀧𑀦 𑀧𑀼𑀣𑀼𑀚𑁆𑀚𑀦𑁄 𑀦𑀺𑀧𑀦𑁆𑀦𑀫𑀢𑁆𑀢𑁄𑀯 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀲𑀸𑀫𑀡𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀚𑁆𑀚 𑀫𑁂 𑀉𑀧𑀚𑁆𑀛𑀸𑀬𑁂𑀦 𑀲𑀤𑁆𑀥𑀺𑀁 𑀢𑀢𑀺𑀬𑁄 𑀤𑀺𑀯𑀲𑁄 𑀏𑀓𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑀲𑁆𑀲, ‘𑀲𑀘𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀺𑀲𑁆𑀲𑀸𑀫𑀺, 𑀣𑁂𑀭𑁄 𑀲𑀳𑀲𑁂𑀬𑁆𑀬𑀁 𑀆𑀧𑀚𑁆𑀚𑁂𑀬𑁆𑀬𑀸’𑀢𑀺 𑀦𑀺𑀲𑀺𑀦𑁆𑀦𑀓𑁄𑀯 𑀯𑀻𑀢𑀺𑀦𑀸𑀫𑁂𑀲𑁆𑀲𑀸𑀫𑀻’’𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀫𑀜𑁆𑀘𑀓𑀲𑀫𑀻𑀧𑁂 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑁄𑀯 𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀣𑁂𑀭𑁄 𑀧𑀘𑁆𑀘𑀽𑀲𑀓𑀸𑀮𑁂 𑀧𑀘𑁆𑀘𑀼𑀝𑁆𑀞𑀸𑀬 ‘‘𑀲𑀸𑀫𑀡𑁂𑀭𑀁 𑀦𑀺𑀓𑁆𑀔𑀫𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀫𑀜𑁆𑀘𑀓𑀧𑀲𑁆𑀲𑁂 𑀞𑀧𑀺𑀢𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀩𑀻𑀚𑀦𑀺𑀧𑀢𑁆𑀢𑀲𑁆𑀲 𑀅𑀕𑁆𑀕𑁂𑀦 𑀲𑀸𑀫𑀡𑁂𑀭𑀲𑁆𑀲 𑀓𑀝𑀲𑀸𑀭𑀓𑀁 𑀧𑀳𑀭𑀺𑀢𑁆𑀯𑀸 𑀩𑀻𑀚𑀦𑀺𑀁 𑀉𑀤𑁆𑀥𑀁 𑀉𑀓𑁆𑀔𑀺𑀧𑀦𑁆𑀢𑁄 ‘‘𑀲𑀸𑀫𑀡𑁂𑀭, 𑀩𑀳𑀺 𑀦𑀺𑀓𑁆𑀔𑀫𑀸’’𑀢𑀺 𑀆𑀳, 𑀩𑀻𑀚𑀦𑀺𑀧𑀢𑁆𑀢𑀤𑀡𑁆𑀟𑀓𑁄 𑀅𑀓𑁆𑀔𑀺𑀫𑁆𑀳𑀺 𑀧𑀝𑀺𑀳𑀜𑁆𑀜𑀺, 𑀢𑀸𑀯𑀤𑁂𑀯 𑀅𑀓𑁆𑀔𑀺 𑀪𑀺𑀚𑁆𑀚𑀺. 𑀲𑁄 ‘‘𑀓𑀺𑀁, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀉𑀝𑁆𑀞𑀸𑀬 ‘‘𑀩𑀳𑀺 𑀦𑀺𑀓𑁆𑀔𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀓𑁆𑀔𑀺 𑀫𑁂, 𑀪𑀦𑁆𑀢𑁂, 𑀪𑀺𑀦𑁆𑀦’’𑀦𑁆𑀢𑀺 𑀅𑀯𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀯𑀢𑁆𑀢𑀓𑀭𑀡𑀓𑀸𑀮𑁂 𑀘 𑀧𑀦 ‘‘𑀅𑀓𑁆𑀔𑀺 𑀫𑁂 𑀪𑀺𑀦𑁆𑀦’’𑀦𑁆𑀢𑀺 𑀢𑀼𑀡𑁆𑀳𑀻 𑀅𑀦𑀺𑀲𑀻𑀤𑀺𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀅𑀓𑁆𑀔𑀺𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀫𑀼𑀝𑁆𑀞𑀺𑀲𑀫𑁆𑀫𑀼𑀜𑁆𑀚𑀦𑀺𑀁 𑀆𑀤𑀸𑀬 𑀯𑀘𑁆𑀘𑀓𑀼𑀝𑀺𑀜𑁆𑀘 𑀫𑀼𑀔𑀥𑁄𑀯𑀦𑀝𑁆𑀞𑀸𑀦𑀜𑁆𑀘 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀫𑀼𑀔𑀥𑁄𑀯𑀦𑁄𑀤𑀓𑀜𑁆𑀘 𑀞𑀧𑁂𑀢𑁆𑀯𑀸 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺. 𑀲𑁄 𑀉𑀧𑀚𑁆𑀛𑀸𑀬𑀲𑁆𑀲 𑀤𑀦𑁆𑀢𑀓𑀝𑁆𑀞𑀁 𑀤𑀤𑀫𑀸𑀦𑁄 𑀏𑀓𑁂𑀦𑁂𑀯 𑀳𑀢𑁆𑀣𑁂𑀦 𑀅𑀤𑀸𑀲𑀺.

𑀅𑀣 𑀦𑀁 𑀉𑀧𑀚𑁆𑀛𑀸𑀬𑁄 𑀆𑀳 𑁋 ‘‘𑀅𑀲𑀺𑀓𑁆𑀔𑀺𑀢𑁄 𑀯𑀢𑀸𑀬𑀁 𑀲𑀸𑀫𑀡𑁂𑀭𑁄, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀏𑀓𑁂𑀦 𑀳𑀢𑁆𑀣𑁂𑀦 𑀤𑀦𑁆𑀢𑀓𑀝𑁆𑀞𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺. 𑀚𑀸𑀦𑀸𑀫𑀳𑀁, 𑀪𑀦𑁆𑀢𑁂, ‘‘𑀦 𑀏𑀯𑀁 𑀯𑀝𑁆𑀝𑀢𑀻’’𑀢𑀺, 𑀏𑀓𑁄 𑀧𑀦 𑀫𑁂 𑀳𑀢𑁆𑀣𑁄 𑀦 𑀢𑀼𑀘𑁆𑀙𑁄𑀢𑀺. ‘‘𑀓𑀺𑀁 𑀲𑀸𑀫𑀡𑁂𑀭𑀸’’𑀢𑀺? 𑀲𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀣𑁂𑀭𑁄 𑀲𑀼𑀢𑁆𑀯𑀸𑀯 𑀲𑀁𑀯𑀺𑀕𑁆𑀕𑀫𑀸𑀦𑀲𑁄 ‘‘𑀅𑀳𑁄 𑀯𑀢 𑀫𑀬𑀸 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀯𑀢𑁆𑀯𑀸 ‘‘𑀔𑀫𑀸𑀳𑀺 𑀫𑁂, 𑀲𑀧𑁆𑀧𑀼𑀭𑀺𑀲, 𑀦𑀸𑀳𑀫𑁂𑀢𑀁 𑀚𑀸𑀦𑀸𑀫𑀺, 𑀅𑀯𑀲𑁆𑀲𑀬𑁄 𑀫𑁂 𑀳𑁄𑀳𑀻’’𑀢𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀲𑀢𑁆𑀢𑀯𑀲𑁆𑀲𑀺𑀓𑀤𑀸𑀭𑀓𑀲𑁆𑀲 𑀧𑀸𑀤𑀫𑀽𑀮𑁂 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺. 𑀅𑀣 𑀦𑀁 𑀲𑀸𑀫𑀡𑁂𑀭𑁄 𑀆𑀳 𑁋 ‘‘𑀦𑀸𑀳𑀁, 𑀪𑀦𑁆𑀢𑁂, 𑀏𑀢𑀤𑀢𑁆𑀣𑀸𑀬 𑀓𑀣𑁂𑀲𑀺𑀁, 𑀢𑀼𑀫𑁆𑀳𑀸𑀓𑀁 𑀘𑀺𑀢𑁆𑀢𑀁 𑀅𑀦𑀼𑀭𑀓𑁆𑀔𑀦𑁆𑀢𑁂𑀦 𑀫𑀬𑀸 𑀏𑀯𑀁 𑀯𑀼𑀢𑁆𑀢𑀁 𑀦𑁂𑀯𑁂𑀢𑁆𑀣 𑀢𑀼𑀫𑁆𑀳𑀸𑀓𑀁 𑀤𑁄𑀲𑁄 𑀅𑀢𑁆𑀣𑀺, 𑀦 𑀫𑀬𑁆𑀳𑀁. 𑀯𑀝𑁆𑀝𑀲𑁆𑀲𑁂𑀯𑁂𑀲𑁄 𑀤𑁄𑀲𑁄, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀫𑀬𑀸 𑀢𑀼𑀫𑁆𑀳𑀸𑀓𑀁 𑀯𑀺𑀧𑁆𑀧𑀝𑀺𑀲𑀸𑀭𑀁 𑀭𑀓𑁆𑀔𑀦𑁆𑀢𑁂𑀦𑁂𑀯 𑀦𑀸𑀭𑁄𑀘𑀺𑀢’’𑀦𑁆𑀢𑀺. 𑀣𑁂𑀭𑁄 𑀲𑀸𑀫𑀡𑁂𑀭𑁂𑀦 𑀅𑀲𑁆𑀲𑀸𑀲𑀺𑀬𑀫𑀸𑀦𑁄𑀧𑀺 𑀅𑀦𑀲𑁆𑀲𑀸𑀲𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑁄 𑀲𑀸𑀫𑀡𑁂𑀭𑀲𑁆𑀲 𑀪𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀧𑀸𑀬𑀸𑀲𑀺. 𑀲𑀢𑁆𑀣𑀸𑀧𑀺𑀲𑁆𑀲 𑀆𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑁄𑀯 𑀦𑀺𑀲𑀻𑀤𑀺. 𑀲𑁄 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀦𑀁 𑀓𑀢𑁆𑀯𑀸 ‘‘𑀔𑀫𑀦𑀻𑀬𑀁 𑀢𑁂 𑀪𑀺𑀓𑁆𑀔𑀼, 𑀓𑀺𑀜𑁆𑀘𑀺 𑀅𑀢𑀺𑀭𑁂𑀓𑀁 𑀅𑀨𑀸𑀲𑀼𑀓𑀁 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀢𑁄 𑀆𑀳 𑁋 ‘‘𑀔𑀫𑀦𑀻𑀬𑀁, 𑀪𑀦𑁆𑀢𑁂, 𑀦𑀢𑁆𑀣𑀺 𑀫𑁂 𑀓𑀺𑀜𑁆𑀘𑀺 𑀅𑀢𑀺𑀭𑁂𑀓𑀁 𑀅𑀨𑀸𑀲𑀼𑀓𑀁, 𑀅𑀧𑀺𑀘 𑀔𑁄 𑀧𑀦 𑀫𑁂 𑀅𑀬𑀁 𑀤𑀳𑀭𑀲𑀸𑀫𑀡𑁂𑀭𑁄 𑀯𑀺𑀬 𑀅𑀜𑁆𑀜𑁄 𑀅𑀢𑀺𑀭𑁂𑀓𑀕𑀼𑀡𑁄 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄’’𑀢𑀺. ‘‘𑀓𑀺𑀁 𑀧𑀦 𑀇𑀫𑀺𑀦𑀸 𑀓𑀢𑀁 𑀪𑀺𑀓𑁆𑀔𑀽’’𑀢𑀺. 𑀲𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀆𑀭𑁄𑀘𑁂𑀦𑁆𑀢𑁄 𑀆𑀳 𑁋 ‘‘𑀏𑀯𑀁, 𑀪𑀦𑁆𑀢𑁂, 𑀫𑀬𑀸 𑀔𑀫𑀸𑀧𑀺𑀬𑀫𑀸𑀦𑁄 𑀫𑀁 𑀏𑀯𑀁 𑀯𑀤𑁂𑀲𑀺 ‘𑀦𑁂𑀯𑁂𑀢𑁆𑀣 𑀢𑀼𑀫𑁆𑀳𑀸𑀓𑀁 𑀤𑁄𑀲𑁄 𑀅𑀢𑁆𑀣𑀺, 𑀦 𑀫𑀬𑁆𑀳𑀁. 𑀯𑀝𑁆𑀝𑀲𑁆𑀲𑁂𑀯𑁂𑀲𑁄 𑀤𑁄𑀲𑁄, 𑀢𑀼𑀫𑁆𑀳𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸’𑀢𑀺, 𑀇𑀢𑀺 𑀫𑀁 𑀅𑀲𑁆𑀲𑀸𑀲𑁂𑀲𑀺𑀬𑁂𑀯, 𑀫𑀬𑀺 𑀦𑁂𑀯 𑀓𑁄𑀧𑀁, 𑀦 𑀤𑁄𑀲𑀫𑀓𑀸𑀲𑀺, 𑀦 𑀫𑁂, 𑀪𑀦𑁆𑀢𑁂, 𑀏𑀯𑀭𑀽𑀧𑁄 𑀕𑀼𑀡𑀲𑀫𑁆𑀧𑀦𑁆𑀦𑁄 𑀤𑀺𑀝𑁆𑀞𑀧𑀼𑀩𑁆𑀩𑁄’’𑀢𑀺. 𑀅𑀣 𑀦𑀁 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀼 𑀔𑀻𑀡𑀸𑀲𑀯𑀸 𑀦𑀸𑀫 𑀦 𑀓𑀲𑁆𑀲𑀘𑀺 𑀓𑀼𑀧𑁆𑀧𑀦𑁆𑀢𑀺, 𑀦 𑀤𑀼𑀲𑁆𑀲𑀦𑁆𑀢𑀺, 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀸 𑀲𑀦𑁆𑀢𑀫𑀸𑀦𑀲𑀸𑀯 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁬. ‘‘𑀲𑀦𑁆𑀢𑀁 𑀢𑀲𑁆𑀲 𑀫𑀦𑀁 𑀳𑁄𑀢𑀺, 𑀲𑀦𑁆𑀢𑀸 𑀯𑀸𑀘𑀸 𑀘 𑀓𑀫𑁆𑀫 𑀘;

𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀲𑁆𑀲, 𑀉𑀧𑀲𑀦𑁆𑀢𑀲𑁆𑀲 𑀢𑀸𑀤𑀺𑀦𑁄’’𑀢𑀺.

𑀢𑀢𑁆𑀣 𑀲𑀦𑁆𑀢𑀁 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀔𑀻𑀡𑀸𑀲𑀯𑀲𑀸𑀫𑀡𑁂𑀭𑀲𑁆𑀲 𑀅𑀪𑀺𑀚𑁆𑀛𑀸𑀤𑀻𑀦𑀁 𑀅𑀪𑀸𑀯𑁂𑀦 𑀫𑀦𑀁 𑀲𑀦𑁆𑀢𑀫𑁂𑀯 𑀳𑁄𑀢𑀺 𑀉𑀧𑀲𑀦𑁆𑀢𑀁 𑀦𑀺𑀩𑁆𑀩𑀼𑀢𑀁. 𑀢𑀣𑀸 𑀫𑀼𑀲𑀸𑀯𑀸𑀤𑀸𑀤𑀻𑀦𑀁 𑀅𑀪𑀸𑀯𑁂𑀦 𑀯𑀸𑀘𑀸 𑀘 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀅𑀪𑀸𑀯𑁂𑀦 𑀓𑀸𑀬𑀓𑀫𑁆𑀫𑀜𑁆𑀘 𑀲𑀦𑁆𑀢𑀫𑁂𑀯 𑀳𑁄𑀢𑀺. 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀦𑀬𑁂𑀦 𑀳𑁂𑀢𑀼𑀦𑀸 𑀚𑀸𑀦𑀺𑀢𑁆𑀯𑀸 𑀧𑀜𑁆𑀘𑀳𑀺 𑀯𑀺𑀫𑀼𑀢𑁆𑀢𑀻𑀳𑀺 𑀯𑀺𑀫𑀼𑀢𑁆𑀢𑀲𑁆𑀲. 𑀉𑀧𑀲𑀦𑁆𑀢𑀲𑁆𑀲𑀸𑀢𑀺 𑀅𑀩𑁆𑀪𑀦𑁆𑀢𑀭𑁂 𑀭𑀸𑀕𑀸𑀤𑀻𑀦𑀁 𑀉𑀧𑀲𑀫𑁂𑀦 𑀉𑀧𑀲𑀦𑁆𑀢𑀲𑁆𑀲. 𑀢𑀸𑀤𑀺𑀦𑁄𑀢𑀺 𑀢𑀣𑀸𑀭𑀽𑀧𑀲𑁆𑀲 𑀕𑀼𑀡𑀲𑀫𑁆𑀧𑀦𑁆𑀦𑀲𑁆𑀲𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀓𑁄𑀲𑀫𑁆𑀩𑀺𑀯𑀸𑀲𑀻𑀢𑀺𑀲𑁆𑀲𑀢𑁆𑀣𑁂𑀭𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁂𑀲𑀫𑀳𑀸𑀚𑀦𑀲𑁆𑀲𑀸𑀧𑀺 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀓𑁄𑀲𑀫𑁆𑀩𑀺𑀯𑀸𑀲𑀻𑀢𑀺𑀲𑁆𑀲𑀢𑁆𑀣𑁂𑀭𑀲𑀸𑀫𑀡𑁂𑀭𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼

𑀅𑀲𑁆𑀲𑀤𑁆𑀥𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀢𑀺𑀁𑀲𑀫𑀢𑁆𑀢𑀸 𑀆𑀭𑀜𑁆𑀜𑀓𑀸 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀲𑁆𑀲𑀽𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑀤𑁆𑀤𑀳𑀲𑀺 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀅𑀫𑀢𑁄𑀕𑀥𑀁 𑀳𑁄𑀢𑀺 𑀅𑀫𑀢𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 (𑀲𑀁. 𑀦𑀺. 𑁫.𑁫𑁧𑁪) 𑀏𑀯𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀆𑀭𑀩𑁆𑀪 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀣𑁂𑀭𑁄 ‘‘𑀦 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀏𑀢𑁆𑀣 𑀪𑀕𑀯𑀢𑁄 𑀲𑀤𑁆𑀥𑀸𑀬 𑀕𑀘𑁆𑀙𑀸𑀫𑀺, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀅𑀫𑀢𑀧𑀭𑀺𑀬𑁄𑀲𑀸𑀦𑀁. 𑀬𑁂𑀲𑀜𑁆𑀳𑁂𑀢𑀁, 𑀪𑀦𑁆𑀢𑁂, 𑀅𑀜𑁆𑀜𑀸𑀢𑀁 𑀅𑀲𑁆𑀲 𑀅𑀤𑀺𑀝𑁆𑀞𑀁 𑀅𑀯𑀺𑀤𑀺𑀢𑀁 𑀅𑀲𑀘𑁆𑀙𑀺𑀓𑀢𑀁 𑀅𑀨𑀲𑁆𑀲𑀺𑀢𑀁 𑀧𑀜𑁆𑀜𑀸𑀬, 𑀢𑁂 𑀢𑀢𑁆𑀣 𑀧𑀭𑁂𑀲𑀁 𑀲𑀤𑁆𑀥𑀸𑀬 𑀕𑀘𑁆𑀙𑁂𑀬𑁆𑀬𑀼𑀁. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀅𑀫𑀢𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 (𑀲𑀁. 𑀦𑀺. 𑁫.𑁫𑁧𑁪) 𑀏𑀯𑀁 𑀢𑀁 𑀧𑀜𑁆𑀳𑀁 𑀩𑁆𑀬𑀸𑀓𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 ‘‘𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀫𑀺𑀘𑁆𑀙𑀸𑀕𑀳𑀡𑀁 𑀦𑁂𑀯 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀅𑀚𑁆𑀚𑀸𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀦 𑀲𑀤𑁆𑀤𑀳𑀢𑀺𑀬𑁂𑀯𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀓𑀺𑀁 𑀦𑀸𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀤𑁂𑀣. 𑀅𑀳𑀜𑁆𑀳𑀺 ‘𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀅𑀪𑀸𑀯𑁂𑀢𑁆𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀁 𑀅𑀯𑀟𑁆𑀠𑁂𑀢𑁆𑀯𑀸 𑀫𑀕𑁆𑀕𑀨𑀮𑀸𑀦𑀺 𑀲𑀘𑁆𑀙𑀺𑀓𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀅𑀢𑁆𑀣𑀻𑀢𑀺 𑀲𑀤𑁆𑀤𑀳𑀲𑀺 𑀢𑁆𑀯𑀁 𑀲𑀸𑀭𑀺𑀧𑀼𑀢𑁆𑀢𑁄’𑀢𑀺 𑀧𑀼𑀘𑁆𑀙𑀺𑀁. 𑀲𑁄 ‘𑀏𑀯𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀅𑀢𑁆𑀣𑀺 𑀦𑀸𑀫𑀸𑀢𑀺 𑀦 𑀲𑀤𑁆𑀤𑀳𑀸𑀫𑀺, 𑀪𑀦𑁆𑀢𑁂’𑀢𑀺 𑀓𑀣𑁂𑀲𑀺. 𑀦 𑀤𑀺𑀦𑁆𑀦𑀲𑁆𑀲 𑀯𑀸 𑀓𑀢𑀲𑁆𑀲 𑀯𑀸 𑀨𑀮𑀁 𑀯𑀺𑀧𑀸𑀓𑀁 𑀦 𑀲𑀤𑁆𑀤𑀳𑀢𑀺, 𑀦𑀸𑀧𑀺 𑀩𑀼𑀤𑁆𑀥𑀸𑀤𑀻𑀦𑀁 𑀕𑀼𑀡𑀁 𑀦 𑀲𑀤𑁆𑀤𑀳𑀢𑀺. 𑀏𑀲𑁄 𑀧𑀦 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑁂𑀲𑀼 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀥𑀫𑁆𑀫𑁂𑀲𑀼 𑀧𑀭𑁂𑀲𑀁 𑀲𑀤𑁆𑀥𑀸𑀬 𑀦 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀅𑀦𑀼𑀧𑀯𑀚𑁆𑀚𑁄’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁭. ‘‘𑀅𑀲𑁆𑀲𑀤𑁆𑀥𑁄 𑀅𑀓𑀢𑀜𑁆𑀜𑀽 𑀘, 𑀲𑀦𑁆𑀥𑀺𑀘𑁆𑀙𑁂𑀤𑁄 𑀘 𑀬𑁄 𑀦𑀭𑁄,

𑀳𑀢𑀸𑀯𑀓𑀸𑀲𑁄 𑀯𑀦𑁆𑀢𑀸𑀲𑁄, 𑀲 𑀯𑁂 𑀉𑀢𑁆𑀢𑀫𑀧𑁄𑀭𑀺𑀲𑁄’’𑀢𑀺.

𑀢𑀲𑁆𑀲𑀣𑁄 𑁋 𑀅𑀢𑁆𑀢𑀦𑁄 𑀧𑀝𑀺𑀯𑀺𑀤𑁆𑀥𑀕𑀼𑀡𑀁 𑀧𑀭𑁂𑀲𑀁 𑀓𑀣𑀸𑀬 𑀦 𑀲𑀤𑁆𑀤𑀳𑀢𑀻𑀢𑀺 𑀅𑀲𑁆𑀲𑀤𑁆𑀥𑁄. 𑀅𑀓𑀢𑀁 𑀦𑀺𑀩𑁆𑀩𑀸𑀦𑀁 𑀚𑀸𑀦𑀸𑀢𑀻𑀢𑀺 𑀅𑀓𑀢𑀜𑁆𑀜𑀽, 𑀲𑀘𑁆𑀙𑀺𑀓𑀢𑀦𑀺𑀩𑁆𑀩𑀸𑀦𑁄𑀢𑀺 𑀅𑀢𑁆𑀣𑁄. 𑀯𑀝𑁆𑀝𑀲𑀦𑁆𑀥𑀺𑀁, 𑀲𑀁𑀲𑀸𑀭𑀲𑀦𑁆𑀥𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀞𑀺𑀢𑁄𑀢𑀺 𑀲𑀦𑁆𑀥𑀺𑀘𑁆𑀙𑁂𑀤𑁄. 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀩𑀻𑀚𑀲𑁆𑀲 𑀔𑀻𑀡𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀦𑀸𑀯𑀓𑀸𑀲𑁄 𑀳𑀢𑁄 𑀅𑀲𑁆𑀲𑀸𑀢𑀺 𑀳𑀢𑀸𑀯𑀓𑀸𑀲𑁄. 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀓𑀢𑀢𑁆𑀢𑀸,𑀲𑀩𑁆𑀩𑀸 𑀆𑀲𑀸 𑀇𑀫𑀺𑀦𑀸 𑀯𑀦𑁆𑀢𑀸𑀢𑀺 𑀯𑀦𑁆𑀢𑀸𑀲𑁄. 𑀲𑁄 𑀏𑀯𑀭𑀽𑀧𑁄 𑀦𑀭𑁄. 𑀧𑀝𑀺𑀯𑀺𑀤𑁆𑀥𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀢𑀸𑀬 𑀧𑀼𑀭𑀺𑀲𑁂𑀲𑀼 𑀉𑀢𑁆𑀢𑀫𑀪𑀸𑀯𑀁 𑀧𑀢𑁆𑀢𑁄𑀢𑀺 𑀧𑀼𑀭𑀺𑀲𑀼𑀢𑁆𑀢𑀫𑁄𑀢𑀺.

𑀕𑀸𑀣𑀸𑀯𑀲𑀸𑀦𑁂 𑀢𑁂 𑀆𑀭𑀜𑁆𑀜𑀓𑀸 𑀢𑀺𑀁𑀲𑀫𑀢𑁆𑀢𑀸 𑀪𑀺𑀓𑁆𑀔𑀽 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑁂𑀲𑀚𑀦𑀲𑁆𑀲𑀸𑀧𑀺 𑀲𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀻𑀢𑀺.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼 𑀅𑀝𑁆𑀞𑀫𑀁.

𑁯. 𑀔𑀤𑀺𑀭𑀯𑀦𑀺𑀬𑀭𑁂𑀯𑀢𑀢𑁆𑀣𑁂𑀭𑀯𑀢𑁆𑀣𑀼

𑀕𑀸𑀫𑁂 𑀯𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀔𑀤𑀺𑀭𑀯𑀦𑀺𑀬𑀭𑁂𑀯𑀢𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀆𑀬𑀲𑁆𑀫𑀸 𑀳𑀺 𑀲𑀸𑀭𑀺𑀧𑀼𑀢𑁆𑀢𑁄 𑀲𑀢𑁆𑀢𑀸𑀲𑀻𑀢𑀺𑀓𑁄𑀝𑀺𑀥𑀦𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀘𑀸𑀮𑀸, 𑀉𑀧𑀘𑀸𑀮𑀸, 𑀲𑀻𑀲𑀽𑀧𑀘𑀸𑀮𑀸𑀢𑀺 𑀢𑀺𑀲𑁆𑀲𑁄 𑀪𑀕𑀺𑀦𑀺𑀬𑁄, 𑀘𑀼𑀦𑁆𑀤𑁄 𑀉𑀧𑀲𑁂𑀦𑁄𑀢𑀺 𑀇𑀫𑁂 𑀤𑁆𑀯𑁂 𑀘 𑀪𑀸𑀢𑀭𑁄 𑀧𑀩𑁆𑀩𑀸𑀚𑁂𑀲𑀺. 𑀭𑁂𑀯𑀢𑀓𑀼𑀫𑀸𑀭𑁄 𑀏𑀓𑁄𑀯 𑀕𑁂𑀳𑁂 𑀅𑀯𑀲𑀺𑀝𑁆𑀞𑁄. 𑀅𑀣𑀲𑁆𑀲 𑀫𑀸𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀫 𑀧𑀼𑀢𑁆𑀢𑁄 𑀉𑀧𑀢𑀺𑀲𑁆𑀲𑁄 𑀏𑀢𑁆𑀢𑀓𑀁 𑀥𑀦𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀢𑀺𑀲𑁆𑀲𑁄 𑀘 𑀪𑀕𑀺𑀦𑀺𑀬𑁄 𑀤𑁆𑀯𑁂 𑀘 𑀪𑀸𑀢𑀭𑁄 𑀧𑀩𑁆𑀩𑀸𑀚𑁂𑀲𑀺, 𑀭𑁂𑀯𑀢𑁄 𑀏𑀓𑁄𑀯 𑀅𑀯𑀲𑁂𑀲𑁄. 𑀲𑀘𑁂 𑀇𑀫𑀫𑁆𑀧𑀺 𑀧𑀩𑁆𑀩𑀸𑀚𑁂𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀦𑁄 𑀥𑀦𑀁 𑀦𑀲𑁆𑀲𑀺𑀲𑁆𑀲𑀢𑀺, 𑀓𑀼𑀮𑀯𑀁𑀲𑁄 𑀧𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀺, 𑀤𑀳𑀭𑀓𑀸𑀮𑁂𑀬𑁂𑀯 𑀦𑀁 𑀖𑀭𑀸𑀯𑀸𑀲𑁂𑀦 𑀩𑀦𑁆𑀥𑀺𑀲𑁆𑀲𑀸𑀫𑀻’’𑀢𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀧𑀝𑀺𑀓𑀘𑁆𑀘𑁂𑀯 𑀪𑀺𑀓𑁆𑀔𑀽 𑀆𑀡𑀸𑀧𑁂𑀲𑀺 ‘‘𑀲𑀘𑁂, 𑀆𑀯𑀼𑀲𑁄, 𑀭𑁂𑀯𑀢𑁄 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀆𑀕𑀘𑁆𑀙𑀢𑀺, 𑀆𑀕𑀢𑀫𑀢𑁆𑀢𑀫𑁂𑀯 𑀦𑀁 𑀧𑀩𑁆𑀩𑀸𑀚𑁂𑀬𑁆𑀬𑀸𑀣, 𑀫𑀫 𑀫𑀸𑀢𑀸𑀧𑀺𑀢𑀭𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸, 𑀓𑀺𑀁 𑀢𑁂𑀳𑀺 𑀆𑀧𑀼𑀘𑁆𑀙𑀺𑀢𑁂𑀳𑀺, 𑀅𑀳𑀫𑁂𑀯 𑀢𑀲𑁆𑀲 𑀫𑀸𑀢𑀸 𑀘 𑀧𑀺𑀢𑀸 𑀘𑀸’’𑀢𑀺. 𑀫𑀸𑀢𑀸𑀧𑀺𑀲𑁆𑀲 𑀭𑁂𑀯𑀢𑀓𑀼𑀫𑀸𑀭𑀁 𑀲𑀢𑁆𑀢𑀯𑀲𑁆𑀲𑀺𑀓𑀫𑁂𑀯 𑀖𑀭𑀩𑀦𑁆𑀥𑀦𑁂𑀦 𑀩𑀦𑁆𑀥𑀺𑀢𑀼𑀓𑀸𑀫𑀸 𑀲𑀫𑀸𑀦𑀚𑀸𑀢𑀺𑀓𑁂 𑀓𑀼𑀮𑁂 𑀤𑀸𑀭𑀺𑀓𑀁 𑀯𑀸𑀭𑁂𑀢𑁆𑀯𑀸 𑀤𑀺𑀯𑀲𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀓𑀼𑀫𑀸𑀭𑀁 𑀫𑀡𑁆𑀟𑁂𑀢𑁆𑀯𑀸 𑀧𑀲𑀸𑀥𑁂𑀢𑁆𑀯𑀸 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀁 𑀆𑀤𑀸𑀬 𑀓𑀼𑀫𑀸𑀭𑀺𑀓𑀸𑀬 𑀜𑀸𑀢𑀺𑀖𑀭𑀁 𑀅𑀕𑀫𑀸𑀲𑀺. 𑀅𑀣 𑀦𑁂𑀲𑀁 𑀓𑀢𑀫𑀗𑁆𑀕𑀮𑀸𑀦𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀜𑀸𑀢𑀓𑁂𑀲𑀼 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀉𑀤𑀓𑀧𑀸𑀢𑀺𑀬𑀁 𑀳𑀢𑁆𑀣𑁂 𑀑𑀢𑀸𑀭𑁂𑀢𑁆𑀯𑀸 𑀫𑀗𑁆𑀕𑀮𑀸𑀦𑀺 𑀯𑀢𑁆𑀯𑀸 𑀓𑀼𑀫𑀸𑀭𑀺𑀓𑀸𑀬 𑀯𑀼𑀟𑁆𑀠𑀺𑀁 𑀆𑀓𑀗𑁆𑀔𑀫𑀸𑀦𑀸 𑀜𑀸𑀢𑀓𑀸 ‘‘𑀢𑀯 𑀅𑀬𑁆𑀬𑀺𑀓𑀸𑀬 𑀤𑀺𑀝𑁆𑀞𑀥𑀫𑁆𑀫𑀁 𑀧𑀲𑁆𑀲, 𑀅𑀬𑁆𑀬𑀺𑀓𑀸 𑀯𑀺𑀬 𑀘𑀺𑀭𑀁 𑀚𑀻𑀯, 𑀅𑀫𑁆𑀫𑀸’’𑀢𑀺 𑀆𑀳𑀁𑀲𑀼. 𑀭𑁂𑀯𑀢𑀓𑀼𑀫𑀸𑀭𑁄 ‘‘𑀓𑁄 𑀦𑀼 𑀔𑁄 𑀇𑀫𑀺𑀲𑁆𑀲𑀸 𑀅𑀬𑁆𑀬𑀺𑀓𑀸𑀬 𑀤𑀺𑀝𑁆𑀞𑀥𑀫𑁆𑀫𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑀢𑀭𑀸 𑀇𑀫𑀺𑀲𑁆𑀲𑀸 𑀅𑀬𑁆𑀬𑀺𑀓𑀸’’𑀢𑀺 𑀧𑀼𑀘𑁆𑀙𑀺. 𑀅𑀣 𑀦𑀁 𑀆𑀳𑀁𑀲𑀼, ‘‘𑀢𑀸𑀢, 𑀓𑀺𑀁 𑀦 𑀧𑀲𑁆𑀲𑀲𑀺 𑀇𑀫𑀁 𑀯𑀻𑀲𑀯𑀲𑁆𑀲𑀲𑀢𑀺𑀓𑀁 𑀔𑀡𑁆𑀟𑀤𑀦𑁆𑀢𑀁 𑀧𑀮𑀺𑀢𑀓𑁂𑀲𑀁 𑀯𑀮𑀺𑀢𑁆𑀢𑀘𑀁 𑀢𑀺𑀮𑀓𑀸𑀳𑀢𑀕𑀢𑁆𑀢𑀁 𑀕𑁄𑀧𑀸𑀦𑀲𑀺𑀯𑀗𑁆𑀓𑀁, 𑀏𑀲𑀸 𑀏𑀢𑀺𑀲𑁆𑀲𑀸 𑀅𑀬𑁆𑀬𑀺𑀓𑀸’’𑀢𑀺. ‘‘𑀓𑀺𑀁 𑀧𑀦 𑀅𑀬𑀫𑁆𑀧𑀺 𑀏𑀯𑀭𑀽𑀧𑀸 𑀪𑀯𑀺𑀲𑁆𑀲𑀢𑀻’’𑀢𑀺? ‘‘𑀲𑀘𑁂 𑀚𑀻𑀯𑀺𑀲𑁆𑀲𑀢𑀺, 𑀪𑀯𑀺𑀲𑁆𑀲𑀢𑀺, 𑀢𑀸𑀢𑀸’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀯𑀭𑀽𑀧𑀫𑁆𑀧𑀺 𑀦𑀸𑀫 𑀲𑀭𑀻𑀭𑀁 𑀚𑀭𑀸𑀬 𑀇𑀫𑀁 𑀯𑀺𑀧𑁆𑀧𑀓𑀸𑀭𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀇𑀫𑀁 𑀫𑁂 𑀪𑀸𑀢𑀭𑀸 𑀉𑀧𑀢𑀺𑀲𑁆𑀲𑁂𑀦 𑀤𑀺𑀝𑁆𑀞𑀁 𑀪𑀯𑀺𑀲𑁆𑀲𑀢𑀺, 𑀅𑀚𑁆𑀚𑁂𑀯 𑀫𑀬𑀸 𑀧𑀮𑀸𑀬𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀅𑀣 𑀦𑀁 𑀜𑀸𑀢𑀓𑀸 𑀓𑀼𑀫𑀸𑀭𑀺𑀓𑀸𑀬 𑀲𑀤𑁆𑀥𑀺𑀁 𑀏𑀓𑀬𑀸𑀦𑀁 𑀆𑀭𑁄𑀧𑁂𑀢𑁆𑀯𑀸 𑀆𑀤𑀸𑀬 𑀧𑀓𑁆𑀓𑀫𑀺𑀁𑀲𑀼.

𑀲𑁄 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀲𑀭𑀻𑀭𑀓𑀺𑀘𑁆𑀘𑀁 𑀅𑀧𑀤𑀺𑀲𑀺𑀢𑁆𑀯𑀸 ‘‘𑀞𑀧𑁂𑀣 𑀢𑀸𑀯 𑀬𑀸𑀦𑀁, 𑀑𑀢𑀭𑀺𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀬𑀸𑀦𑀸 𑀑𑀢𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀕𑀼𑀫𑁆𑀩𑁂 𑀣𑁄𑀓𑀁 𑀧𑀧𑀜𑁆𑀘𑀁 𑀓𑀢𑁆𑀯𑀸 𑀅𑀕𑀫𑀸𑀲𑀺. 𑀧𑀼𑀦𑀧𑀺 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀢𑁂𑀦𑁂𑀯 𑀅𑀧𑀤𑁂𑀲𑁂𑀦 𑀑𑀢𑀭𑀺𑀢𑁆𑀯𑀸 𑀅𑀪𑀺𑀭𑀼𑀳𑀺, 𑀧𑀼𑀦𑀧𑀺 𑀢𑀣𑁂𑀯 𑀅𑀓𑀸𑀲𑀺. 𑀅𑀣𑀲𑁆𑀲 𑀜𑀸𑀢𑀓𑀸 ‘‘𑀅𑀤𑁆𑀥𑀸 𑀇𑀫𑀲𑁆𑀲 𑀉𑀝𑁆𑀞𑀸𑀦𑀸𑀦𑀺 𑀯𑀢𑁆𑀢𑀦𑁆𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀸𑀢𑀺𑀤𑀴𑁆𑀳𑀁 𑀆𑀭𑀓𑁆𑀔𑀁 𑀓𑀭𑀺𑀁𑀲𑀼. 𑀲𑁄 𑀧𑀼𑀦𑀧𑀺 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀢𑁂𑀦𑁂𑀯 𑀅𑀧𑀤𑁂𑀲𑁂𑀦 𑀑𑀢𑀭𑀺𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀧𑀸𑀚𑁂𑀦𑁆𑀢𑁄 𑀧𑀼𑀭𑀢𑁄 𑀕𑀘𑁆𑀙𑀣, 𑀫𑀬𑀁 𑀧𑀘𑁆𑀙𑀢𑁄 𑀲𑀡𑀺𑀓𑀁 𑀆𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀑𑀢𑀭𑀺𑀢𑁆𑀯𑀸 𑀕𑀼𑀫𑁆𑀩𑀸𑀪𑀺𑀫𑀼𑀔𑁄 𑀅𑀳𑁄𑀲𑀺. 𑀜𑀸𑀢𑀓𑀸𑀧𑀺𑀲𑁆𑀲 ‘‘𑀧𑀘𑁆𑀙𑀢𑁄 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀜𑀸𑀬 𑀬𑀸𑀦𑀁 𑀧𑀸𑀚𑁂𑀦𑁆𑀢𑀸 𑀕𑀫𑀺𑀁𑀲𑀼. 𑀲𑁄𑀧𑀺 𑀢𑀢𑁄 𑀧𑀮𑀸𑀬𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀢𑀺𑀁𑀲𑀫𑀢𑁆𑀢𑀸 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺, 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀧𑀩𑁆𑀩𑀸𑀚𑁂𑀣 𑀫𑀁, 𑀪𑀦𑁆𑀢𑁂’’𑀢𑀺. ‘‘𑀆𑀯𑀼𑀲𑁄, 𑀢𑁆𑀯𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄, 𑀫𑀬𑀁 𑀢𑁂 𑀭𑀸𑀚𑀧𑀼𑀢𑁆𑀢𑀪𑀸𑀯𑀁 𑀯𑀸 𑀅𑀫𑀘𑁆𑀘𑀧𑀼𑀢𑁆𑀢𑀪𑀸𑀯𑀁 𑀯𑀸 𑀦 𑀚𑀸𑀦𑀸𑀫, 𑀓𑀣𑀁 𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀸’’𑀢𑀺? ‘‘𑀢𑀼𑀫𑁆𑀳𑁂 𑀫𑀁, 𑀪𑀦𑁆𑀢𑁂, 𑀦 𑀚𑀸𑀦𑀸𑀣𑀸’’𑀢𑀺? ‘‘𑀦 𑀚𑀸𑀦𑀸𑀫𑀸𑀯𑀼𑀲𑁄’’𑀢𑀺. ‘‘𑀅𑀳𑀁 𑀉𑀧𑀢𑀺𑀲𑁆𑀲𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀺𑀓𑁄’’𑀢𑀺. ‘‘𑀓𑁄 𑀏𑀲 𑀉𑀧𑀢𑀺𑀲𑁆𑀲𑁄 𑀦𑀸𑀫𑀸’’𑀢𑀺? ‘‘𑀪𑀦𑁆𑀢𑁂, 𑀪𑀤𑁆𑀤𑀦𑁆𑀢𑀸 𑀫𑀫 𑀪𑀸𑀢𑀭𑀁 ‘𑀲𑀸𑀭𑀺𑀧𑀼𑀢𑁆𑀢𑁄’𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀫𑀬𑀸 ‘𑀉𑀧𑀢𑀺𑀲𑁆𑀲𑁄’𑀢𑀺 𑀯𑀼𑀢𑁆𑀢𑁂 𑀦 𑀚𑀸𑀦𑀦𑁆𑀢𑀻’’𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀺𑀓𑁄’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺 𑀏𑀳𑀺, 𑀪𑀸𑀢𑀭𑀸 𑀢𑁂 𑀅𑀦𑀼𑀜𑁆𑀜𑀸𑀢𑀫𑁂𑀯𑀸’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀽 𑀢𑀲𑁆𑀲 𑀆𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀸𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀧𑁂𑀢𑁆𑀯𑀸 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀣𑁂𑀭𑀲𑁆𑀲 𑀲𑀸𑀲𑀦𑀁 𑀧𑀳𑀺𑀡𑀺𑀁𑀲𑀼. 𑀣𑁂𑀭𑁄 𑀢𑀁 𑀲𑀼𑀢𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺 𑁋 ‘‘𑀪𑀦𑁆𑀢𑁂, ‘𑀆𑀭𑀜𑁆𑀜𑀺𑀓𑀪𑀺𑀓𑁆𑀔𑀽𑀳𑀺 𑀓𑀺𑀭 𑀭𑁂𑀯𑀢𑁄 𑀧𑀩𑁆𑀩𑀸𑀚𑀺𑀢𑁄’𑀢𑀺 𑀲𑀸𑀲𑀦𑀁 𑀧𑀳𑀺𑀡𑀺𑀁𑀲𑀼, 𑀕𑀦𑁆𑀢𑁆𑀯𑀸 𑀢𑀁 𑀧𑀲𑁆𑀲𑀺𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑀢𑁆𑀣𑀸 ‘‘𑀅𑀥𑀺𑀯𑀸𑀲𑁂𑀳𑀺 𑀢𑀸𑀯, 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺 𑀕𑀦𑁆𑀢𑀼𑀁 𑀦 𑀅𑀤𑀸𑀲𑀺. 𑀣𑁂𑀭𑁄 𑀧𑀼𑀦 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀲𑀢𑁆𑀣𑀸𑀭𑀁 𑀆𑀧𑀼𑀘𑁆𑀙𑀺. 𑀲𑀢𑁆𑀣𑀸 ‘‘𑀅𑀥𑀺𑀯𑀸𑀲𑁂𑀳𑀺 𑀢𑀸𑀯, 𑀲𑀸𑀭𑀺𑀧𑀼𑀢𑁆𑀢, 𑀫𑀬𑀫𑁆𑀧𑀺 𑀆𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀦𑁂𑀯 𑀕𑀦𑁆𑀢𑀼𑀁 𑀅𑀤𑀸𑀲𑀺.

𑀲𑀸𑀫𑀡𑁂𑀭𑁄𑀧𑀺 ‘‘𑀲𑀘𑀸𑀳𑀁 𑀇𑀥 𑀯𑀲𑀺𑀲𑁆𑀲𑀸𑀫𑀺, 𑀜𑀸𑀢𑀓𑀸 𑀫𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀧𑀓𑁆𑀓𑁄𑀲𑀺𑀲𑁆𑀲𑀦𑁆𑀢𑀻’’𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀢𑀢𑁄 𑀢𑀺𑀁𑀲𑀬𑁄𑀚𑀦𑀺𑀓𑁂 𑀞𑀸𑀦𑁂 𑀔𑀤𑀺𑀭𑀯𑀦𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀯𑀲𑁆𑀲𑁂𑀬𑁂𑀯 𑀢𑁂𑀫𑀸𑀲𑀩𑁆𑀪𑀦𑁆𑀢𑀭𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀣𑁂𑀭𑁄𑀧𑀺 𑀧𑀯𑀸𑀭𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀼𑀦 𑀢𑀢𑁆𑀣 𑀕𑀫𑀦𑀢𑁆𑀣𑀸𑀬 𑀆𑀧𑀼𑀘𑁆𑀙𑀺. 𑀲𑀢𑁆𑀣𑀸 ‘‘𑀫𑀬𑀫𑁆𑀧𑀺 𑀕𑀫𑀺𑀲𑁆𑀲𑀸𑀫, 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺. 𑀣𑁄𑀓𑀁 𑀕𑀢𑀓𑀸𑀮𑁂 𑀆𑀦𑀦𑁆𑀤𑀢𑁆𑀣𑁂𑀭𑁄 𑀤𑁆𑀯𑁂𑀥𑀸𑀧𑀣𑁂 𑀞𑀢𑁆𑀯𑀸 𑀲𑀢𑁆𑀣𑀸𑀭𑀁 𑀆𑀳 𑁋 ‘‘𑀪𑀦𑁆𑀢𑁂, 𑀭𑁂𑀯𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀦𑀫𑀕𑁆𑀕𑁂𑀲𑀼 𑀅𑀬𑀁 𑀧𑀭𑀺𑀳𑀸𑀭𑀧𑀣𑁄 𑀲𑀝𑁆𑀞𑀺𑀬𑁄𑀚𑀦𑀺𑀓𑁄 𑀫𑀦𑀼𑀲𑁆𑀲𑀸𑀯𑀸𑀲𑁄, 𑀅𑀬𑀁 𑀉𑀚𑀼𑀫𑀕𑁆𑀕𑁄 𑀢𑀺𑀁𑀲𑀬𑁄𑀚𑀦𑀺𑀓𑁄 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑁄, 𑀓𑀢𑀭𑁂𑀦 𑀕𑀘𑁆𑀙𑀸𑀫𑀸’’𑀢𑀺. ‘‘𑀲𑀻𑀯𑀮𑀺, 𑀧𑀦, 𑀆𑀦𑀦𑁆𑀤, 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀆𑀕𑀢𑁄’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀲𑀘𑁂, 𑀲𑀻𑀯𑀮𑀺, 𑀆𑀕𑀢𑁄, 𑀉𑀚𑀼𑀫𑀕𑁆𑀕𑀫𑁂𑀯 𑀕𑀡𑁆𑀳𑀸𑀳𑀻’’𑀢𑀺. 𑀲𑀢𑁆𑀣𑀸 𑀓𑀺𑀭 ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀬𑀸𑀕𑀼𑀪𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺, 𑀉𑀚𑀼𑀫𑀕𑁆𑀕𑀁 𑀕𑀡𑁆𑀳𑀸𑀳𑀻’’𑀢𑀺 𑀅𑀯𑀢𑁆𑀯𑀸 ‘‘𑀢𑁂𑀲𑀁 𑀢𑁂𑀲𑀁 𑀚𑀦𑀸𑀦𑀁 𑀧𑀼𑀜𑁆𑀜𑀲𑁆𑀲 𑀯𑀺𑀧𑀸𑀓𑀤𑀸𑀦𑀝𑁆𑀞𑀸𑀦𑀁 𑀏𑀢’’𑀦𑁆𑀢𑀺 𑀜𑀢𑁆𑀯𑀸 ‘‘𑀲𑀘𑁂, 𑀲𑀻𑀯𑀮𑀺, 𑀆𑀕𑀢𑁄, 𑀉𑀚𑀼𑀫𑀕𑁆𑀕𑀁 𑀕𑀡𑁆𑀳𑀸𑀳𑀻’’𑀢𑀺 𑀆𑀳. 𑀲𑀢𑁆𑀣𑀭𑀺 𑀧𑀦 𑀢𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁂 𑀤𑁂𑀯𑀢𑀸 ‘‘𑀅𑀫𑁆𑀳𑀸𑀓𑀁 𑀅𑀬𑁆𑀬𑀲𑁆𑀲 𑀲𑀻𑀯𑀮𑀺𑀢𑁆𑀣𑁂𑀭𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑁂𑀓𑀬𑁄𑀚𑀦𑁂 𑀯𑀺𑀳𑀸𑀭𑁂 𑀓𑀸𑀭𑁂𑀢𑁆𑀯𑀸 𑀏𑀓𑀬𑁄𑀚𑀦𑀢𑁄 𑀉𑀤𑁆𑀥𑀁 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀧𑀸𑀢𑁄 𑀯𑀼𑀝𑁆𑀞𑀸𑀬 𑀤𑀺𑀩𑁆𑀩𑀬𑀸𑀕𑀼𑀆𑀤𑀻𑀦𑀺 𑀕𑀳𑁂𑀢𑁆𑀯𑀸, ‘‘𑀅𑀬𑁆𑀬𑁄, 𑀦𑁄 𑀲𑀻𑀯𑀮𑀺𑀢𑁆𑀣𑁂𑀭𑁄 𑀓𑀳𑀁 𑀦𑀺𑀲𑀺𑀦𑁆𑀦𑁄’’𑀢𑀺 𑀯𑀺𑀘𑀭𑀦𑁆𑀢𑀺. 𑀣𑁂𑀭𑁄 𑀅𑀢𑁆𑀢𑀦𑁄 𑀅𑀪𑀺𑀳𑀝𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀧𑁂𑀲𑀺. 𑀏𑀯𑀁 𑀲𑀢𑁆𑀣𑀸 𑀲𑀧𑀭𑀺𑀯𑀸𑀭𑁄 𑀢𑀺𑀁𑀲𑀬𑁄𑀚𑀦𑀺𑀓𑀁 𑀓𑀦𑁆𑀢𑀸𑀭𑀁 𑀲𑀻𑀯𑀮𑀺𑀢𑁆𑀣𑁂𑀭𑀲𑁆𑀲 𑀧𑀼𑀜𑁆𑀜𑀁 𑀅𑀦𑀼𑀪𑀯𑀫𑀸𑀦𑁄𑀯 𑀆𑀕𑀫𑀸𑀲𑀺. 𑀭𑁂𑀯𑀢𑀢𑁆𑀣𑁂𑀭𑁄𑀧𑀺 𑀲𑀢𑁆𑀣𑀼 𑀆𑀕𑀫𑀦𑀁 𑀜𑀢𑁆𑀯𑀸 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀺𑀁 𑀫𑀸𑀧𑁂𑀢𑁆𑀯𑀸 𑀧𑀜𑁆𑀘 𑀓𑀽𑀝𑀸𑀕𑀸𑀭𑀲𑀢𑀸𑀦𑀺, 𑀧𑀜𑁆𑀘 𑀘𑀗𑁆𑀓𑀫𑀦𑀲𑀢𑀸𑀦𑀺, 𑀧𑀜𑁆𑀘𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀲𑀢𑀸𑀦𑀺 𑀘 𑀫𑀸𑀧𑁂𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀫𑀸𑀲𑀫𑀢𑁆𑀢𑀫𑁂𑀯 𑀯𑀲𑀺. 𑀢𑀲𑁆𑀫𑀺𑀁 𑀯𑀲𑀫𑀸𑀦𑁄𑀧𑀺 𑀲𑀻𑀯𑀮𑀺𑀢𑁆𑀣𑁂𑀭𑀲𑁆𑀲𑁂𑀯 𑀧𑀼𑀜𑁆𑀜𑀁 𑀅𑀦𑀼𑀪𑀯𑀺.

𑀢𑀢𑁆𑀣 𑀧𑀦 𑀤𑁆𑀯𑁂 𑀫𑀳𑀮𑁆𑀮𑀓𑀪𑀺𑀓𑁆𑀔𑀽 𑀲𑀢𑁆𑀣𑀼 𑀔𑀤𑀺𑀭𑀯𑀦𑀁 𑀧𑀯𑀺𑀲𑀦𑀓𑀸𑀮𑁂 𑀏𑀯𑀁 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀅𑀬𑀁 𑀪𑀺𑀓𑁆𑀔𑀼 𑀏𑀢𑁆𑀢𑀓𑀁 𑀦𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀓𑀺𑀁 𑀲𑀓𑁆𑀔𑀺𑀲𑁆𑀲𑀢𑀺 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁, 𑀲𑀢𑁆𑀣𑀸 ‘𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀓𑀦𑀺𑀝𑁆𑀞𑁄’𑀢𑀺 𑀫𑀼𑀔𑁄𑀮𑁄𑀓𑀦𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁄 𑀏𑀯𑀭𑀽𑀧𑀲𑁆𑀲 𑀦𑀯𑀓𑀫𑁆𑀫𑀺𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑁄’’𑀢𑀺. 𑀲𑀢𑁆𑀣𑀸𑀧𑀺 𑀢𑀁 𑀤𑀺𑀯𑀲𑀁 𑀧𑀘𑁆𑀘𑀽𑀲𑀓𑀸𑀮𑁂 𑀮𑁄𑀓𑀁 𑀯𑁄𑀮𑁄𑀓𑁂𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀢𑁂𑀲𑀁 𑀘𑀺𑀢𑁆𑀢𑀸𑀘𑀸𑀭𑀁 𑀅𑀜𑁆𑀜𑀸𑀲𑀺. 𑀢𑀲𑁆𑀫𑀸 𑀢𑀢𑁆𑀣 𑀫𑀸𑀲𑀫𑀢𑁆𑀢𑀁 𑀯𑀲𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑀤𑀺𑀯𑀲𑁂 𑀬𑀣𑀸 𑀢𑁂 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀢𑁂𑀮𑀦𑀸𑀴𑀺𑀜𑁆𑀘 𑀉𑀤𑀓𑀢𑀼𑀫𑁆𑀩𑀜𑁆𑀘 𑀉𑀧𑀸𑀳𑀦𑀸𑀦𑀺 𑀘 𑀧𑀫𑀼𑀲𑁆𑀲𑀦𑁆𑀢𑀺, 𑀢𑀣𑀸 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑁄 𑀯𑀺𑀳𑀸𑀭𑀽𑀧𑀘𑀸𑀭𑀢𑁄 𑀩𑀳𑀺 𑀦𑀺𑀓𑁆𑀔𑀦𑁆𑀢𑀓𑀸𑀮𑁂 𑀇𑀤𑁆𑀥𑀺𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀅𑀣 𑀢𑁂 𑀪𑀺𑀓𑁆𑀔𑀽 ‘‘𑀫𑀬𑀸 𑀇𑀤𑀜𑁆𑀘𑀺𑀤𑀜𑁆𑀘 𑀧𑀫𑀼𑀝𑁆𑀞𑀁, 𑀫𑀬𑀸𑀧𑀺 𑀧𑀫𑀼𑀝𑁆𑀞’’𑀦𑁆𑀢𑀺 𑀉𑀪𑁄𑀧𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀁 𑀞𑀸𑀦𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀔𑀤𑀺𑀭𑀭𑀼𑀓𑁆𑀔𑀓𑀡𑁆𑀝𑀓𑁂𑀳𑀺 𑀯𑀺𑀚𑁆𑀛𑀫𑀸𑀦𑀸 𑀯𑀺𑀘𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀔𑀤𑀺𑀭𑀭𑀼𑀓𑁆𑀔𑁂 𑀑𑀮𑀫𑁆𑀩𑀦𑁆𑀢𑀁 𑀅𑀢𑁆𑀢𑀦𑁄 𑀪𑀡𑁆𑀟𑀓𑀁 𑀤𑀺𑀲𑁆𑀯𑀸 𑀆𑀤𑀸𑀬 𑀧𑀓𑁆𑀓𑀫𑀺𑀁𑀲𑀼. 𑀲𑀢𑁆𑀣𑀸𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀤𑀸𑀬 𑀧𑀼𑀦 𑀫𑀸𑀲𑀫𑀢𑁆𑀢𑁂𑀦𑁂𑀯 𑀲𑀻𑀯𑀮𑀺𑀢𑁆𑀣𑁂𑀭𑀲𑁆𑀲 𑀧𑀼𑀜𑁆𑀜𑀁 𑀅𑀦𑀼𑀪𑀯𑀫𑀸𑀦𑁄 𑀧𑀝𑀺𑀕𑀦𑁆𑀢𑁆𑀯𑀸 𑀧𑀼𑀩𑁆𑀩𑀸𑀭𑀸𑀫𑀁 𑀧𑀸𑀯𑀺𑀲𑀺.

𑀅𑀣 𑀢𑁂 𑀫𑀳𑀮𑁆𑀮𑀓𑀪𑀺𑀓𑁆𑀔𑀽 𑀧𑀸𑀢𑁄𑀯 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 ‘‘𑀆𑀕𑀦𑁆𑀢𑀼𑀓𑀪𑀢𑁆𑀢𑀤𑀸𑀬𑀺𑀓𑀸𑀬 𑀯𑀺𑀲𑀸𑀔𑀸𑀬 𑀖𑀭𑀁 𑀬𑀸𑀕𑀼𑀁 𑀧𑀺𑀯𑀺𑀲𑁆𑀲𑀸𑀫𑀸’’𑀢𑀺 𑀕𑀦𑁆𑀢𑁆𑀯𑀸 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀔𑀚𑁆𑀚𑀓𑀁 𑀔𑀸𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀦𑁂 𑀯𑀺𑀲𑀸𑀔𑀸 𑀧𑀼𑀘𑁆𑀙𑀺 𑁋 ‘‘𑀢𑀼𑀫𑁆𑀳𑁂𑀧𑀺, 𑀪𑀦𑁆𑀢𑁂, 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀭𑁂𑀯𑀢𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀅𑀕𑀫𑀺𑀢𑁆𑀣𑀸’’𑀢𑀺. ‘‘𑀆𑀫, 𑀉𑀧𑀸𑀲𑀺𑀓𑁂𑀢𑀺, 𑀭𑀫𑀡𑀻𑀬𑀁, 𑀪𑀦𑁆𑀢𑁂, 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦’’𑀦𑁆𑀢𑀺. ‘‘𑀓𑀼𑀢𑁄 𑀢𑀲𑁆𑀲 𑀭𑀫𑀡𑀻𑀬𑀢𑀸 𑀲𑁂𑀢𑀓𑀡𑁆𑀝𑀓𑀔𑀤𑀺𑀭𑀭𑀼𑀓𑁆𑀔𑀕𑀳𑀦𑀁 𑀧𑁂𑀢𑀸𑀦𑀁 𑀦𑀺𑀯𑀸𑀲𑀦𑀝𑁆𑀞𑀸𑀦𑀲𑀤𑀺𑀲𑀁 𑀉𑀧𑀸𑀲𑀺𑀓𑁂’’𑀢𑀺. 𑀅𑀣𑀜𑁆𑀜𑁂 𑀤𑁆𑀯𑁂 𑀤𑀳𑀭𑀪𑀺𑀓𑁆𑀔𑀽 𑀆𑀕𑀫𑀺𑀁𑀲𑀼. 𑀉𑀧𑀸𑀲𑀺𑀓𑀸 𑀢𑁂𑀲𑀫𑁆𑀧𑀺 𑀬𑀸𑀕𑀼𑀔𑀚𑁆𑀚𑀓𑀁 𑀤𑀢𑁆𑀯𑀸 𑀢𑀣𑁂𑀯 𑀧𑀝𑀺𑀧𑀼𑀘𑁆𑀙𑀺. 𑀢𑁂 𑀆𑀳𑀁𑀲𑀼 𑁋 ‘‘𑀦 𑀲𑀓𑁆𑀓𑀸 𑀉𑀧𑀸𑀲𑀺𑀓𑁂 𑀯𑀡𑁆𑀡𑁂𑀢𑀼𑀁, 𑀲𑀼𑀥𑀫𑁆𑀫𑀤𑁂𑀯𑀲𑀪𑀸𑀲𑀤𑀺𑀲𑀁 𑀇𑀤𑁆𑀥𑀺𑀬𑀸 𑀅𑀪𑀺𑀲𑀗𑁆𑀔𑀢𑀁 𑀯𑀺𑀬 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦’’𑀦𑁆𑀢𑀺. 𑀉𑀧𑀸𑀲𑀺𑀓𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀞𑀫𑀁 𑀆𑀕𑀢𑀸 𑀪𑀺𑀓𑁆𑀔𑀽 𑀅𑀜𑁆𑀜𑀣𑀸 𑀯𑀤𑀺𑀁𑀲𑀼, 𑀇𑀫𑁂 𑀅𑀜𑁆𑀜𑀣𑀸 𑀯𑀤𑀦𑁆𑀢𑀺, 𑀧𑀞𑀫𑀁 𑀆𑀕𑀢𑀸 𑀪𑀺𑀓𑁆𑀔𑀽 𑀓𑀺𑀜𑁆𑀘𑀺𑀤𑁂𑀯 𑀧𑀫𑀼𑀲𑁆𑀲𑀺𑀢𑁆𑀯𑀸 𑀇𑀤𑁆𑀥𑀺𑀬𑀸 𑀯𑀺𑀲𑁆𑀲𑀝𑁆𑀞𑀓𑀸𑀮𑁂 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀇𑀫𑁂 𑀧𑀦 𑀇𑀤𑁆𑀥𑀺𑀬𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀦𑀺𑀫𑁆𑀫𑀺𑀢𑀓𑀸𑀮𑁂 𑀕𑀢𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀢𑁆𑀢𑀦𑁄 𑀧𑀡𑁆𑀟𑀺𑀢𑀪𑀸𑀯𑁂𑀦 𑀏𑀢𑀫𑀢𑁆𑀣𑀁 𑀜𑀢𑁆𑀯𑀸 ‘‘𑀲𑀢𑁆𑀣𑀸𑀭𑀁 𑀆𑀕𑀢𑀓𑀸𑀮𑁂 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀅𑀝𑁆𑀞𑀸𑀲𑀺. 𑀢𑀢𑁄 𑀫𑀼𑀳𑀼𑀢𑁆𑀢𑀁𑀬𑁂𑀯 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀯𑀺𑀲𑀸𑀔𑀸𑀬 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀲𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀓𑁆𑀓𑀘𑁆𑀘𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀕𑀢𑀪𑀺𑀓𑁆𑀔𑀽𑀲𑀼 𑀏𑀓𑀘𑁆𑀘𑁂 𑀭𑁂𑀯𑀢𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 ‘𑀔𑀤𑀺𑀭𑀕𑀳𑀦𑀁 𑀅𑀭𑀜𑁆𑀜’𑀦𑁆𑀢𑀺 𑀯𑀤𑀦𑁆𑀢𑀺, 𑀏𑀓𑀘𑁆𑀘𑁂 ‘𑀭𑀫𑀡𑀻𑀬’𑀦𑁆𑀢𑀺, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺? 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀉𑀧𑀸𑀲𑀺𑀓𑁂 𑀕𑀸𑀫𑁄 𑀯𑀸 𑀳𑁄𑀢𑀼 𑀅𑀭𑀜𑁆𑀜𑀁 𑀯𑀸, 𑀬𑀲𑁆𑀫𑀺𑀁 𑀞𑀸𑀦𑁂 𑀅𑀭𑀳𑀦𑁆𑀢𑁄 𑀯𑀺𑀳𑀭𑀦𑁆𑀢𑀺, 𑀢𑀁 𑀭𑀫𑀡𑀻𑀬𑀫𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁮. ‘‘𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀦𑀺𑀦𑁆𑀦𑁂 𑀯𑀸 𑀬𑀤𑀺 𑀯𑀸 𑀣𑀮𑁂;

𑀬𑀢𑁆𑀣 𑀅𑀭𑀳𑀦𑁆𑀢𑁄 𑀯𑀺𑀳𑀭𑀦𑁆𑀢𑀺, 𑀢𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓’’𑀦𑁆𑀢𑀺.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀭𑀳𑀦𑁆𑀢𑁄 𑀕𑀸𑀫𑀦𑁆𑀢𑁂 𑀓𑀸𑀬𑀯𑀺𑀯𑁂𑀓𑀁 𑀦 𑀮𑀪𑀦𑁆𑀢𑀺, 𑀘𑀺𑀢𑁆𑀢𑀯𑀺𑀯𑁂𑀓𑀁 𑀧𑀦 𑀮𑀪𑀦𑁆𑀢𑁂𑀯. 𑀢𑁂𑀲𑀜𑁆𑀳𑀺 𑀤𑀺𑀩𑁆𑀩𑀧𑀝𑀺𑀪𑀸𑀕𑀸𑀦𑀺𑀧𑀺 𑀆𑀭𑀫𑁆𑀫𑀡𑀸𑀦𑀺 𑀘𑀺𑀢𑁆𑀢𑀁 𑀘𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀲𑁆𑀫𑀸 𑀕𑀸𑀫𑁄 𑀯𑀸 𑀳𑁄𑀢𑀼 𑀅𑀭𑀜𑁆𑀜𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀁, 𑀬𑀢𑁆𑀣 𑀅𑀭𑀳𑀦𑁆𑀢𑁄 𑀯𑀺𑀳𑀭𑀦𑁆𑀢𑀺, 𑀢𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀦𑁆𑀢𑀺 𑀲𑁄 𑀪𑀽𑀫𑀺𑀧𑀤𑁂𑀲𑁄 𑀭𑀫𑀡𑀻𑀬𑁄 𑀏𑀯𑀸𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀅𑀧𑀭𑁂𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀆𑀯𑀼𑀲𑁄, 𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀆𑀬𑀲𑁆𑀫𑀸 𑀲𑀻𑀯𑀮𑀺𑀢𑁆𑀣𑁂𑀭𑁄 𑀲𑀢𑁆𑀢𑀤𑀺𑀯𑀲𑀲𑀢𑁆𑀢𑀫𑀸𑀲𑀸𑀥𑀺𑀓𑀸𑀦𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀫𑀸𑀢𑀼 𑀓𑀼𑀘𑁆𑀙𑀺𑀬𑀁 𑀯𑀲𑀺, 𑀓𑁂𑀦 𑀦𑀺𑀭𑀬𑁂 𑀧𑀘𑁆𑀘𑀺, 𑀓𑁂𑀦 𑀦𑀺𑀲𑁆𑀲𑀦𑁆𑀤𑁂𑀦 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀚𑀸𑀢𑁄’’𑀢𑀺? 𑀲𑀢𑁆𑀣𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀓𑀺𑀁 𑀓𑀣𑁂𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀤𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀲𑀸𑀬𑀲𑁆𑀫𑀢𑁄 𑀧𑀼𑀩𑁆𑀩𑀓𑀫𑁆𑀫𑀁 𑀓𑀣𑁂𑀦𑁆𑀢𑁄 𑀆𑀳 𑁋

𑀪𑀺𑀓𑁆𑀔𑀯𑁂, 𑀇𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀧𑀺𑀢𑀼 𑀦𑀕𑀭𑀁 𑀧𑀘𑁆𑀘𑀸𑀕𑀫𑀸𑀲𑀺. 𑀭𑀸𑀚𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀕𑀦𑁆𑀢𑀼𑀓𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀦𑀸𑀕𑀭𑀸𑀦𑀁 𑀲𑀸𑀲𑀦𑀁 𑀧𑁂𑀲𑁂𑀲𑀺 ‘‘𑀆𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀤𑀸𑀦𑁂 𑀲𑀳𑀸𑀬𑀓𑀸 𑀳𑁄𑀦𑁆𑀢𑀽’’𑀢𑀺. 𑀢𑁂 𑀢𑀣𑀸 𑀓𑀢𑁆𑀯𑀸 ‘‘𑀭𑀜𑁆𑀜𑀸 𑀤𑀺𑀦𑁆𑀦𑀤𑀸𑀦𑀢𑁄 𑀅𑀢𑀺𑀭𑁂𑀓𑀢𑀭𑀁 𑀤𑀲𑁆𑀲𑀸𑀫𑀸’’𑀢𑀺 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀤𑀸𑀦𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀭𑀜𑁆𑀜𑁄 𑀲𑀸𑀲𑀦𑀁 𑀧𑀳𑀺𑀡𑀺𑀁𑀲𑀼. 𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀢𑁂𑀲𑀁 𑀤𑀸𑀦𑀁 𑀤𑀺𑀲𑁆𑀯𑀸 ‘‘𑀇𑀢𑁄 𑀅𑀥𑀺𑀓𑀢𑀭𑀁 𑀤𑀲𑁆𑀲𑀸𑀫𑀻’’𑀢𑀺 𑀧𑀼𑀦𑀤𑀺𑀯𑀲𑀢𑁆𑀣𑀸𑀬 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀲𑀺, 𑀦𑁂𑀯 𑀭𑀸𑀚𑀸 𑀦𑀸𑀕𑀭𑁂 𑀧𑀭𑀸𑀚𑁂𑀢𑀼𑀁 𑀲𑀓𑁆𑀔𑀺, 𑀦 𑀦𑀸𑀕𑀭𑀸 𑀭𑀸𑀚𑀸𑀦𑀁. 𑀦𑀸𑀕𑀭𑀸 𑀙𑀝𑁆𑀞𑁂 𑀯𑀸𑀭𑁂 ‘‘𑀲𑁆𑀯𑁂 𑀤𑀸𑀦𑀺 𑀬𑀣𑀸 ‘𑀇𑀫𑀲𑁆𑀫𑀺𑀁 𑀤𑀸𑀦𑁂 𑀇𑀤𑀁 𑀦𑀸𑀫 𑀦𑀢𑁆𑀣𑀻’𑀢𑀺 𑀦 𑀲𑀓𑁆𑀓𑀸 𑀳𑁄𑀢𑀺 𑀯𑀢𑁆𑀢𑀼𑀁, 𑀏𑀯𑀁 𑀤𑀸𑀦𑀁 𑀤𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀤𑀸𑀦𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀏𑀢𑁆𑀣 𑀦𑀢𑁆𑀣𑀻’’𑀢𑀺 𑀑𑀮𑁄𑀓𑁂𑀦𑁆𑀢𑀸 𑀅𑀮𑁆𑀮𑀫𑀥𑀼𑀫𑁂𑀯 𑀦 𑀅𑀤𑁆𑀤𑀲𑀁𑀲𑀼. 𑀧𑀓𑁆𑀓𑀫𑀥𑀼 𑀧𑀦 𑀩𑀳𑀼𑀁 𑀅𑀢𑁆𑀣𑀺. 𑀢𑁂 𑀅𑀮𑁆𑀮𑀫𑀥𑀼𑀲𑁆𑀲𑀢𑁆𑀣𑀸𑀬 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 𑀘𑀢𑁆𑀢𑀸𑀭𑀺 𑀓𑀳𑀸𑀧𑀡𑀲𑀳𑀲𑁆𑀲𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀧𑀳𑀺𑀡𑀺𑀁𑀲𑀼. 𑀅𑀣𑁂𑀓𑁄 𑀚𑀦𑀧𑀤𑀫𑀦𑀼𑀲𑁆𑀲𑁄 𑀕𑀸𑀫𑀪𑁄𑀚𑀓𑀁 𑀧𑀲𑁆𑀲𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀥𑀼𑀧𑀝𑀮𑀁 𑀤𑀺𑀲𑁆𑀯𑀸 𑀫𑀓𑁆𑀔𑀺𑀓𑀸 𑀧𑀮𑀸𑀧𑁂𑀢𑁆𑀯𑀸 𑀲𑀸𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀸𑀔𑀸𑀤𑀡𑁆𑀟𑀓𑁂𑀦𑁂𑀯 𑀲𑀤𑁆𑀥𑀺𑀁 𑀫𑀥𑀼𑀧𑀝𑀮𑀁 𑀆𑀤𑀸𑀬 ‘‘𑀕𑀸𑀫𑀪𑁄𑀚𑀓𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀦𑀕𑀭𑀁 𑀧𑀸𑀯𑀺𑀲𑀺. 𑀫𑀥𑀼𑀅𑀢𑁆𑀣𑀸𑀬 𑀕𑀢𑁄 𑀢𑀁 𑀤𑀺𑀲𑁆𑀯𑀸, ‘‘𑀅𑀫𑁆𑀪𑁄, 𑀯𑀺𑀓𑁆𑀓𑀺𑀡𑀺𑀬𑀁 𑀫𑀥𑀼’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀦 𑀯𑀺𑀓𑁆𑀓𑀺𑀡𑀺𑀬𑀁, 𑀲𑀸𑀫𑀻’’𑀢𑀺. ‘‘𑀳𑀦𑁆𑀤, 𑀇𑀫𑀁 𑀓𑀳𑀸𑀧𑀡𑀁 𑀕𑀳𑁂𑀢𑁆𑀯𑀸 𑀤𑁂𑀳𑀻’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀁 𑀫𑀥𑀼𑀧𑀝𑀮𑀁 𑀧𑀸𑀤𑀫𑀢𑁆𑀢𑀫𑁆𑀧𑀺 𑀦 𑀅𑀕𑁆𑀖𑀢𑀺, 𑀅𑀬𑀁 𑀧𑀦 𑀓𑀳𑀸𑀧𑀡𑀁 𑀤𑁂𑀢𑀺. 𑀩𑀳𑀼𑀓𑀳𑀸𑀧𑀡𑀓𑁄 𑀫𑀜𑁆𑀜𑁂, 𑀫𑀬𑀸 𑀯𑀟𑁆𑀠𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀅𑀣 𑀦𑀁 ‘‘𑀦 𑀤𑁂𑀫𑀻’’𑀢𑀺 𑀆𑀳, ‘‘𑀢𑁂𑀦 𑀳𑀺 𑀤𑁆𑀯𑁂 𑀓𑀳𑀸𑀧𑀡𑁂 𑀕𑀡𑁆𑀳𑀸𑀳𑀻’’𑀢𑀺. ‘‘𑀤𑁆𑀯𑀻𑀳𑀺𑀧𑀺 𑀦 𑀤𑁂𑀫𑀻’’𑀢𑀺. 𑀏𑀯𑀁 𑀢𑀸𑀯 𑀯𑀟𑁆𑀠𑁂𑀲𑀺, 𑀬𑀸𑀯 𑀲𑁄 ‘‘𑀢𑁂𑀦 𑀳𑀺 𑀇𑀤𑀁 𑀲𑀳𑀲𑁆𑀲𑀁 𑀕𑀡𑁆𑀳𑀸𑀳𑀻’’𑀢𑀺 𑀪𑀡𑁆𑀟𑀺𑀓𑀁 𑀉𑀧𑀦𑁂𑀲𑀺.

𑀅𑀣 𑀦𑀁 𑀲𑁄 𑀆𑀳 𑁋 ‘‘𑀓𑀺𑀁 𑀦𑀼 𑀔𑁄 𑀢𑁆𑀯𑀁 𑀉𑀫𑁆𑀫𑀢𑁆𑀢𑀓𑁄, 𑀉𑀤𑀸𑀳𑀼 𑀓𑀳𑀸𑀧𑀡𑀸𑀦𑀁 𑀞𑀧𑀦𑁄𑀓𑀸𑀲𑀁 𑀦 𑀮𑀪𑀲𑀺, 𑀧𑀸𑀤𑀫𑁆𑀧𑀺 𑀦 𑀅𑀕𑁆𑀖𑀦𑀓𑀁 𑀫𑀥𑀼𑀁 ‘𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸 𑀤𑁂𑀳𑀻’𑀢𑀺 𑀯𑀤𑀲𑀺, ‘𑀓𑀺𑀁 𑀦𑀸𑀫𑁂𑀢’’’𑀦𑁆𑀢𑀺? ‘𑀚𑀸𑀦𑀸𑀫𑀳𑀁, 𑀪𑁄, 𑀇𑀫𑀺𑀦𑀸 𑀧𑀦 𑀫𑁂 𑀓𑀫𑁆𑀫𑀁 𑀅𑀢𑁆𑀣𑀺, 𑀢𑁂𑀦𑁂𑀯𑀁 𑀯𑀤𑀸𑀫𑀻’𑀢𑀺. ‘‘𑀓𑀺𑀁 𑀓𑀫𑁆𑀫𑀁, 𑀲𑀸𑀫𑀻’’𑀢𑀺? ‘‘𑀅𑀫𑁆𑀳𑁂𑀳𑀺 𑀯𑀺𑀧𑀲𑁆𑀲𑀻𑀩𑀼𑀤𑁆𑀥𑀲𑁆𑀲 𑀅𑀝𑁆𑀞𑀲𑀝𑁆𑀞𑀺𑀲𑀫𑀡𑀲𑀳𑀲𑁆𑀲𑀧𑀭𑀺𑀯𑀸𑀭𑀲𑁆𑀲 𑀫𑀳𑀸𑀤𑀸𑀦𑀁 𑀲𑀚𑁆𑀚𑀺𑀢𑀁, 𑀢𑀢𑁆𑀭𑁂𑀓𑀁 𑀅𑀮𑁆𑀮𑀫𑀥𑀼𑀫𑁂𑀯 𑀦𑀢𑁆𑀣𑀺, 𑀢𑀲𑁆𑀫𑀸 𑀏𑀯𑀁 𑀕𑀡𑁆𑀳𑀸𑀫𑀻’’𑀢𑀺. 𑀏𑀯𑀁, 𑀲𑀦𑁆𑀢𑁂, 𑀦𑀸𑀳𑀁 𑀫𑀽𑀮𑁂𑀦 𑀤𑀲𑁆𑀲𑀸𑀫𑀺, 𑀲𑀘𑁂 ‘‘𑀅𑀳𑀫𑁆𑀧𑀺 𑀤𑀸𑀦𑁂 𑀧𑀢𑁆𑀢𑀺𑀁 𑀮𑀪𑀺𑀲𑁆𑀲𑀸𑀫𑀺, 𑀤𑀲𑁆𑀲𑀸𑀫𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀦𑀸𑀕𑀭𑀸𑀦𑀁 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀦𑀸𑀕𑀭𑀸 𑀢𑀲𑁆𑀲 𑀲𑀤𑁆𑀥𑀸𑀬 𑀩𑀮𑀯𑀪𑀸𑀯𑀁 𑀜𑀢𑁆𑀯𑀸, ‘‘𑀲𑀸𑀥𑀼, 𑀧𑀢𑁆𑀢𑀺𑀓𑁄 𑀳𑁄𑀢𑀽’’𑀢𑀺 𑀧𑀝𑀺𑀚𑀸𑀦𑀺𑀁𑀲𑀼, 𑀢𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀁 𑀤𑀢𑁆𑀯𑀸 𑀫𑀳𑀢𑀺𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀆𑀳𑀭𑀸𑀧𑁂𑀢𑁆𑀯𑀸 𑀫𑀥𑀼𑀧𑀝𑀮𑀁 𑀧𑀻𑀴𑀸𑀧𑁂𑀲𑀼𑀁. 𑀢𑁂𑀦𑁂𑀯 𑀫𑀦𑀼𑀲𑁆𑀲𑁂𑀦 𑀧𑀡𑁆𑀡𑀸𑀓𑀸𑀭𑀢𑁆𑀣𑀸𑀬 𑀤𑀥𑀺𑀯𑀸𑀭𑀓𑁄𑀧𑀺 𑀆𑀳𑀝𑁄 𑀅𑀢𑁆𑀣𑀺, 𑀲𑁄 𑀢𑀫𑁆𑀧𑀺 𑀤𑀥𑀺𑀁 𑀧𑀸𑀢𑀺𑀬𑀁 𑀆𑀓𑀺𑀭𑀺𑀢𑁆𑀯𑀸 𑀢𑁂𑀦 𑀫𑀥𑀼𑀦𑀸 𑀲𑀁𑀲𑀦𑁆𑀤𑀺𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀤𑀸𑀲𑀺. 𑀢𑀁 𑀬𑀸𑀯𑀤𑀢𑁆𑀣𑀁 𑀕𑀡𑁆𑀳𑀦𑁆𑀢𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀺 𑀉𑀢𑁆𑀢𑀭𑀺𑀫𑁆𑀧𑀺 𑀅𑀯𑀲𑀺𑀝𑁆𑀞𑀁 𑀅𑀳𑁄𑀲𑀺𑀬𑁂𑀯. ‘‘𑀏𑀯𑀁 𑀣𑁄𑀓𑀁 𑀫𑀥𑀼 𑀓𑀣𑀁 𑀢𑀸𑀯 𑀩𑀳𑀽𑀦𑀁 𑀧𑀸𑀧𑀼𑀡𑀻’’𑀢𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀁. 𑀢𑀜𑁆𑀳𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀧𑀸𑀧𑀼𑀡𑀺. 𑀩𑀼𑀤𑁆𑀥𑀯𑀺𑀲𑀬𑁄 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄. 𑀘𑀢𑁆𑀢𑀸𑀭𑀺 𑀳𑀺 ‘‘𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀻’’𑀢𑀺 (𑀅. 𑀦𑀺. 𑁪.𑁭𑁭) 𑀯𑀼𑀢𑁆𑀢𑀸𑀦𑀺. 𑀢𑀸𑀦𑀺 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀸𑀤𑀲𑁆𑀲𑁂𑀯 𑀪𑀸𑀕𑀻 𑀳𑁄𑀢𑀻𑀢𑀺. 𑀲𑁄 𑀧𑀼𑀭𑀺𑀲𑁄 𑀏𑀢𑁆𑀢𑀓𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀲𑀁𑀲𑀭𑀦𑁆𑀢𑁄 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀧𑀸𑀧𑀼𑀡𑀺. 𑀲𑁄 ‘‘𑀏𑀓𑀁 𑀦𑀕𑀭𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀧𑀭𑀺𑀯𑀸𑀭𑁂𑀲𑀺, 𑀦𑀸𑀕𑀭𑀸𑀦𑀜𑁆𑀘 𑀲𑀸𑀲𑀦𑀁 𑀧𑀳𑀺𑀡𑀺 ‘‘𑀭𑀚𑁆𑀚𑀁 𑀯𑀸 𑀫𑁂 𑀤𑁂𑀦𑁆𑀢𑀼 𑀬𑀼𑀤𑁆𑀥𑀁 𑀯𑀸’’𑀢𑀺. 𑀢𑁂 ‘‘𑀦𑁂𑀯 𑀭𑀚𑁆𑀚𑀁 𑀤𑀲𑁆𑀲𑀸𑀫, 𑀦 𑀬𑀼𑀤𑁆𑀥’’𑀦𑁆𑀢𑀺 𑀯𑀢𑁆𑀯𑀸 𑀘𑀽𑀴𑀤𑁆𑀯𑀸𑀭𑁂𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀸𑀭𑀽𑀤𑀓𑀸𑀤𑀻𑀦𑀺 𑀆𑀳𑀭𑀦𑁆𑀢𑀺, 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑀺.

𑀇𑀢𑀭𑁄𑀧𑀺 𑀘𑀢𑁆𑀢𑀸𑀭𑀺 𑀫𑀳𑀸𑀤𑁆𑀯𑀸𑀭𑀸𑀦𑀺 𑀭𑀓𑁆𑀔𑀦𑁆𑀢𑁄 𑀲𑀢𑁆𑀢𑀫𑀸𑀲𑀸𑀥𑀺𑀓𑀸𑀦𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀦𑀕𑀭𑀁 𑀉𑀧𑀭𑀼𑀦𑁆𑀥𑀺. 𑀅𑀣𑀲𑁆𑀲 𑀫𑀸𑀢𑀸 ‘‘𑀓𑀺𑀁 𑀫𑁂 𑀧𑀼𑀢𑁆𑀢𑁄 𑀓𑀭𑁄𑀢𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀤𑀁 𑀦𑀸𑀫 𑀤𑁂𑀯𑀻’’𑀢𑀺 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 ‘‘𑀩𑀸𑀮𑁄 𑀫𑀫 𑀧𑀼𑀢𑁆𑀢𑁄, 𑀕𑀘𑁆𑀙𑀣, 𑀢𑀲𑁆𑀲 ‘𑀘𑀽𑀴𑀤𑁆𑀯𑀸𑀭𑀸𑀦𑀺𑀧𑀺 𑀧𑀺𑀥𑀸𑀬 𑀦𑀕𑀭𑀁 𑀉𑀧𑀭𑀼𑀦𑁆𑀥𑀢𑀽’𑀢𑀺 𑀯𑀤𑁂𑀣𑀸’’𑀢𑀺. 𑀲𑁄 𑀫𑀸𑀢𑀼 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀦𑀸𑀕𑀭𑀸𑀧𑀺 𑀩𑀳𑀺 𑀦𑀺𑀓𑁆𑀔𑀫𑀺𑀢𑀼𑀁 𑀅𑀮𑀪𑀦𑁆𑀢𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀢𑁆𑀢𑀦𑁄 𑀭𑀸𑀚𑀸𑀦𑀁 𑀫𑀸𑀭𑁂𑀢𑁆𑀯𑀸 𑀢𑀲𑁆𑀲 𑀭𑀚𑁆𑀚𑀁 𑀅𑀤𑀁𑀲𑀼. 𑀲𑁄 𑀇𑀫𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀬𑀸𑀯𑀸𑀬𑀁 𑀧𑀣𑀯𑀻 𑀬𑁄𑀚𑀦𑀫𑀢𑁆𑀢𑀁 𑀉𑀲𑁆𑀲𑀦𑁆𑀦𑀸, 𑀢𑀸𑀯 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀘𑀢𑀼𑀦𑁆𑀦𑀁 𑀘𑀽𑀴𑀤𑁆𑀯𑀸𑀭𑀸𑀦𑀁 𑀧𑀺𑀤𑀳𑀺𑀢𑀢𑁆𑀢𑀸 𑀢𑀢𑁄 𑀘𑀼𑀢𑁄 𑀢𑀲𑁆𑀲𑀸 𑀏𑀯 𑀫𑀸𑀢𑀼 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀲𑀢𑁆𑀢𑀫𑀸𑀲𑀸𑀥𑀺𑀓𑀸𑀦𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀅𑀦𑁆𑀢𑁄𑀓𑀼𑀘𑁆𑀙𑀺𑀲𑁆𑀫𑀺𑀁 𑀯𑀲𑀺𑀢𑁆𑀯𑀸 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀬𑁄𑀦𑀺𑀫𑀼𑀔𑁂 𑀢𑀺𑀭𑀺𑀬𑀁 𑀦𑀺𑀧𑀚𑁆𑀚𑀺. 𑀏𑀯𑀁, 𑀪𑀺𑀓𑁆𑀔𑀯𑁂, 𑀲𑀻𑀯𑀮𑀺, 𑀢𑀤𑀸 𑀦𑀕𑀭𑀁 𑀉𑀧𑀭𑀼𑀦𑁆𑀥𑀺𑀢𑁆𑀯𑀸 𑀕𑀳𑀺𑀢𑀓𑀫𑁆𑀫𑁂𑀦 𑀏𑀢𑁆𑀢𑀓𑀁 𑀓𑀸𑀮𑀁 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀘𑀢𑀼𑀦𑁆𑀦𑀁 𑀘𑀽𑀴𑀤𑁆𑀯𑀸𑀭𑀸𑀦𑀁 𑀧𑀺𑀤𑀳𑀺𑀢𑀢𑁆𑀢𑀸 𑀢𑀢𑁄 𑀘𑀼𑀢𑁄 𑀢𑀲𑁆𑀲𑀸 𑀏𑀯 𑀫𑀸𑀢𑀼 𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀼𑀘𑁆𑀙𑀺𑀬𑀁 𑀯𑀲𑀺. 𑀦𑀯𑀫𑀥𑀼𑀦𑁄 𑀤𑀺𑀦𑁆𑀦𑀢𑁆𑀢𑀸 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀚𑀸𑀢𑁄𑀢𑀺.

𑀧𑀼𑀦𑁂𑀓𑀤𑀺𑀯𑀲𑀁 𑀪𑀺𑀓𑁆𑀔𑀽 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀅𑀳𑁄 𑀲𑀸𑀫𑀡𑁂𑀭𑀲𑁆𑀲 𑀮𑀸𑀪𑁄, 𑀅𑀳𑁄 𑀧𑀼𑀜𑁆𑀜𑀁, 𑀬𑁂𑀦 𑀏𑀓𑀓𑁂𑀦 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀧𑀜𑁆𑀘𑀓𑀽𑀝𑀸𑀕𑀸𑀭𑀲𑀢𑀸𑀤𑀻𑀦𑀺 𑀓𑀢𑀸𑀦𑀻’’𑀢𑀺. 𑀲𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀺𑀓𑁆𑀔𑀯𑁂, 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀦𑁂𑀯 𑀧𑀼𑀜𑁆𑀜𑀁 𑀅𑀢𑁆𑀣𑀺, 𑀦 𑀧𑀸𑀧𑀁, 𑀉𑀪𑀬𑀫𑀲𑁆𑀲 𑀧𑀳𑀻𑀦’’𑀦𑁆𑀢𑀺 𑀯𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁂 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀬𑁄𑀥 𑀧𑀼𑀜𑁆𑀜𑀜𑁆𑀘 𑀧𑀸𑀧𑀜𑁆𑀘, 𑀉𑀪𑁄 𑀲𑀗𑁆𑀕𑀫𑀼𑀧𑀘𑁆𑀘𑀕𑀸;

𑀅𑀲𑁄𑀓𑀁 𑀯𑀺𑀭𑀚𑀁 𑀲𑀼𑀤𑁆𑀥𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺. (𑀥. 𑀧. 𑁪𑁧𑁨);

𑀔𑀤𑀺𑀭𑀯𑀦𑀺𑀬𑀭𑁂𑀯𑀢𑀢𑁆𑀣𑁂𑀭𑀯𑀢𑁆𑀣𑀼 𑀦𑀯𑀫𑀁.

𑁧𑁦. 𑀅𑀜𑁆𑀜𑀢𑀭𑀇𑀢𑁆𑀣𑀺𑀯𑀢𑁆𑀣𑀼

𑀭𑀫𑀡𑀻𑀬𑀸𑀦𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀁 𑀇𑀢𑁆𑀣𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀏𑀓𑁄 𑀓𑀺𑀭 𑀧𑀺𑀡𑁆𑀟𑀧𑀸𑀢𑀺𑀓𑁄 𑀪𑀺𑀓𑁆𑀔𑀼 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀏𑀓𑀁 𑀚𑀺𑀡𑁆𑀡𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑀺. 𑀏𑀓𑀸 𑀦𑀕𑀭𑀲𑁄𑀪𑀺𑀦𑀻 𑀇𑀢𑁆𑀣𑀻 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 ‘‘𑀅𑀳𑀁 𑀅𑀲𑀼𑀓𑀝𑁆𑀞𑀸𑀦𑀁 𑀦𑀸𑀫 𑀕𑀫𑀺𑀲𑁆𑀲𑀸𑀫𑀺, 𑀢𑁆𑀯𑀁 𑀢𑀢𑁆𑀣 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀲𑀗𑁆𑀓𑁂𑀢𑀁 𑀓𑀢𑁆𑀯𑀸 𑀅𑀕𑀫𑀸𑀲𑀺. 𑀲𑁄 𑀧𑀼𑀭𑀺𑀲𑁄 𑀦𑀸𑀕𑀘𑁆𑀙𑀺. 𑀲𑀸 𑀢𑀲𑁆𑀲 𑀆𑀕𑀫𑀦𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑀻 𑀢𑀁 𑀅𑀤𑀺𑀲𑁆𑀯𑀸 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀫𑀸𑀦𑀸 𑀢𑀁 𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀣𑁂𑀭𑀁 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑀬𑀫𑀸𑀦𑀸 𑀅𑀜𑁆𑀜𑀁 𑀓𑀜𑁆𑀘𑀺 𑀅𑀤𑀺𑀲𑁆𑀯𑀸 ‘‘𑀅𑀬𑀜𑁆𑀘 𑀧𑀼𑀭𑀺𑀲𑁄 𑀏𑀯, 𑀇𑀫𑀲𑁆𑀲 𑀘𑀺𑀢𑁆𑀢𑀁 𑀧𑀫𑁄𑀳𑁂𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀧𑀼𑀭𑀢𑁄 𑀞𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀦𑀺𑀯𑀢𑁆𑀣𑀲𑀸𑀝𑀓𑀁 𑀫𑁄𑀘𑁂𑀢𑁆𑀯𑀸 𑀦𑀺𑀯𑀸𑀲𑁂𑀢𑀺, 𑀓𑁂𑀲𑁂 𑀫𑀼𑀜𑁆𑀘𑀺𑀢𑁆𑀯𑀸 𑀩𑀦𑁆𑀥𑀢𑀺, 𑀧𑀸𑀡𑀺𑀁 𑀧𑀳𑀭𑀺𑀢𑁆𑀯𑀸 𑀳𑀲𑀢𑀺. 𑀣𑁂𑀭𑀲𑁆𑀲 𑀲𑀁𑀯𑁂𑀕𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀓𑀮𑀲𑀭𑀻𑀭𑀁 𑀨𑀭𑀺. 𑀲𑁄 ‘‘𑀓𑀺𑀁 𑀦𑀼 𑀔𑁄 𑀇𑀤’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀢𑁆𑀣𑀸𑀧𑀺 ‘‘𑀫𑀫 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 ‘𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀸 𑀦𑀼 𑀔𑁄 𑀧𑀯𑀢𑁆𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀢𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀢𑀲𑁆𑀲𑀸 𑀅𑀦𑀸𑀘𑀸𑀭𑀓𑀺𑀭𑀺𑀬𑀁, 𑀣𑁂𑀭𑀲𑁆𑀲 𑀘 𑀲𑀁𑀯𑁂𑀕𑀼𑀧𑁆𑀧𑀢𑁆𑀢𑀺𑀁 𑀜𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀲𑀺 𑁋 ‘‘𑀪𑀺𑀓𑁆𑀔𑀼, 𑀓𑀸𑀫𑀕𑀯𑁂𑀲𑀓𑀸𑀦𑀁 𑀅𑀭𑀫𑀡𑀝𑁆𑀞𑀸𑀦𑀫𑁂𑀯 𑀯𑀻𑀢𑀭𑀸𑀕𑀸𑀦𑀁 𑀭𑀫𑀡𑀝𑁆𑀞𑀸𑀦𑀁 𑀳𑁄𑀢𑀻’’𑀢𑀺. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁯𑁯. ‘‘𑀭𑀫𑀡𑀻𑀬𑀸𑀦𑀺 𑀅𑀭𑀜𑁆𑀜𑀸𑀦𑀺, 𑀬𑀢𑁆𑀣 𑀦 𑀭𑀫𑀢𑀻 𑀚𑀦𑁄;

𑀯𑀻𑀢𑀭𑀸𑀕𑀸 𑀭𑀫𑀺𑀲𑁆𑀲𑀦𑁆𑀢𑀺, 𑀦 𑀢𑁂 𑀓𑀸𑀫𑀕𑀯𑁂𑀲𑀺𑀦𑁄’’𑀢𑀺.

𑀢𑀢𑁆𑀣 𑀅𑀭𑀜𑁆𑀜𑀸𑀦𑀻𑀢𑀺 𑀲𑀼𑀧𑀼𑀧𑁆𑀨𑀺𑀢𑀢𑀭𑀼𑀯𑀦𑀲𑀡𑁆𑀟𑀧𑀝𑀺𑀫𑀡𑁆𑀟𑀺𑀢𑀸𑀦𑀺 𑀯𑀺𑀫𑀮𑀲𑀮𑀺𑀮𑀲𑀫𑁆𑀧𑀦𑁆𑀦𑀸𑀦𑀺 𑀅𑀭𑀜𑁆𑀜𑀸𑀦𑀺 𑀦𑀸𑀫 𑀭𑀫𑀡𑀻𑀬𑀸𑀦𑀺. 𑀬𑀢𑁆𑀣𑀸𑀢𑀺 𑀬𑁂𑀲𑀼 𑀅𑀭𑀜𑁆𑀜𑁂𑀲𑀼 𑀯𑀺𑀓𑀲𑀺𑀢𑁂𑀲𑀼 𑀧𑀤𑀼𑀫𑀯𑀦𑁂𑀲𑀼 𑀕𑀸𑀫𑀫𑀓𑁆𑀔𑀺𑀓𑀸 𑀯𑀺𑀬 𑀓𑀸𑀫𑀕𑀯𑁂𑀲𑀓𑁄 𑀚𑀦𑁄 𑀦 𑀭𑀫𑀢𑀺. 𑀯𑀻𑀢𑀭𑀸𑀕𑀸𑀢𑀺 𑀯𑀺𑀕𑀢𑀭𑀸𑀕𑀸 𑀧𑀦 𑀔𑀻𑀡𑀸𑀲𑀯𑀸 𑀦𑀸𑀫 𑀪𑀫𑀭𑀫𑀥𑀼𑀓𑀭𑀸 𑀯𑀺𑀬 𑀧𑀤𑀼𑀫𑀯𑀦𑁂𑀲𑀼 𑀢𑀣𑀸𑀭𑀽𑀧𑁂𑀲𑀼 𑀅𑀭𑀜𑁆𑀜𑁂𑀲𑀼 𑀭𑀫𑀺𑀲𑁆𑀲𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀸? 𑀦 𑀢𑁂 𑀓𑀸𑀫𑀧𑀯𑁂𑀲𑀺𑀦𑁄, 𑀬𑀲𑁆𑀫𑀸 𑀢𑁂 𑀓𑀸𑀫𑀕𑀯𑁂𑀲𑀺𑀦𑁄 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀣𑁂𑀭𑁄 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀢𑀣𑀸𑀕𑀢𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀅𑀕𑀫𑀸𑀲𑀻𑀢𑀺.

𑀅𑀜𑁆𑀜𑀢𑀭𑀇𑀢𑁆𑀣𑀺𑀯𑀢𑁆𑀣𑀼 𑀤𑀲𑀫𑀁.

𑀅𑀭𑀳𑀦𑁆𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀫𑁄 𑀯𑀕𑁆𑀕𑁄.