𑁫. 𑀩𑀸𑀮𑀯𑀕𑁆𑀕𑁄

𑁧. 𑀅𑀜𑁆𑀜𑀢𑀭𑀧𑀼𑀭𑀺𑀲𑀯𑀢𑁆𑀣𑀼

𑀤𑀻𑀖𑀸 𑀚𑀸𑀕𑀭𑀢𑁄 𑀭𑀢𑁆𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀧𑀲𑁂𑀦𑀤𑀺𑀓𑁄𑀲𑀮𑀜𑁆𑀘𑁂𑀯 𑀅𑀜𑁆𑀜𑀢𑀭𑀜𑁆𑀘 𑀧𑀼𑀭𑀺𑀲𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀭𑀸𑀚𑀸 𑀓𑀺𑀭 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀏𑀓𑀲𑁆𑀫𑀺𑀁 𑀙𑀡𑀤𑀺𑀯𑀲𑁂 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀲𑀩𑁆𑀩𑀲𑁂𑀢𑀁 𑀏𑀓𑀁 𑀧𑀼𑀡𑁆𑀟𑀭𑀻𑀓𑀁 𑀦𑀸𑀫 𑀳𑀢𑁆𑀣𑀺𑀁 𑀅𑀪𑀺𑀭𑀼𑀬𑁆𑀳 𑀫𑀳𑀦𑁆𑀢𑁂𑀦 𑀭𑀸𑀚𑀸𑀦𑀼𑀪𑀸𑀯𑁂𑀦 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀢𑀺. 𑀉𑀲𑁆𑀲𑀸𑀭𑀡𑀸𑀬 𑀯𑀢𑁆𑀢𑀫𑀸𑀦𑀸𑀬 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑁄𑀣𑀺𑀬𑀫𑀸𑀦𑁄 𑀫𑀳𑀸𑀚𑀦𑁄 𑀧𑀮𑀸𑀬𑀦𑁆𑀢𑁄 𑀕𑀻𑀯𑀁 𑀧𑀭𑀺𑀯𑀝𑁆𑀝𑁂𑀢𑁆𑀯𑀸𑀧𑀺 𑀑𑀮𑁄𑀓𑁂𑀢𑀺𑀬𑁂𑀯. 𑀭𑀸𑀚𑀽𑀦𑀁 𑀓𑀺𑀭 𑀲𑀼𑀤𑀺𑀦𑁆𑀦𑀤𑀸𑀦𑀲𑁆𑀲𑁂𑀢𑀁 𑀨𑀮𑀁. 𑀅𑀜𑁆𑀜𑀢𑀭𑀲𑁆𑀲𑀸𑀧𑀺 𑀤𑀼𑀕𑁆𑀕𑀢𑀧𑀼𑀭𑀺𑀲𑀲𑁆𑀲 𑀪𑀭𑀺𑀬𑀸 𑀲𑀢𑁆𑀢𑀪𑀽𑀫𑀺𑀓𑀲𑁆𑀲 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺𑀢𑀮𑁂 𑀞𑀺𑀢𑀸 𑀏𑀓𑀁 𑀯𑀸𑀢𑀧𑀸𑀦𑀓𑀯𑀸𑀝𑀁 𑀯𑀺𑀯𑀭𑀺𑀢𑁆𑀯𑀸 𑀭𑀸𑀚𑀸𑀦𑀁 𑀑𑀮𑁄𑀓𑁂𑀢𑁆𑀯𑀸𑀯 𑀅𑀧𑀕𑀘𑁆𑀙𑀺. 𑀭𑀜𑁆𑀜𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀮𑀸𑀳𑀓𑀦𑁆𑀢𑀭𑀁 𑀧𑀯𑀺𑀝𑁆𑀞𑁄 𑀯𑀺𑀬 𑀉𑀧𑀝𑁆𑀞𑀸𑀲𑀺. 𑀲𑁄 𑀢𑀲𑁆𑀲𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 𑀧𑀢𑀦𑀸𑀓𑀸𑀭𑀧𑁆𑀧𑀢𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀔𑀺𑀧𑁆𑀧𑀁 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀦𑁆𑀢𑁂𑀧𑀼𑀭𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀁 𑀯𑀺𑀲𑁆𑀲𑀸𑀲𑀓𑀁 𑀅𑀫𑀘𑁆𑀘𑀁 𑀆𑀳 𑁋 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀢𑁂 𑀫𑀬𑀸 𑀑𑀮𑁄𑀓𑀺𑀢𑀧𑀸𑀲𑀸𑀤𑁄 𑀤𑀺𑀝𑁆𑀞𑁄’’𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀢𑀢𑁆𑀣𑁂𑀓𑀁 𑀇𑀢𑁆𑀣𑀺𑀁 𑀅𑀤𑁆𑀤𑀲𑀸’’𑀢𑀺? ‘‘𑀅𑀤𑁆𑀤𑀲𑀁, 𑀤𑁂𑀯𑀸’’𑀢𑀺. ‘‘𑀕𑀘𑁆𑀙, 𑀢𑀲𑁆𑀲𑀸 𑀲𑀲𑀸𑀫𑀺𑀓𑀅𑀲𑀸𑀫𑀺𑀓𑀪𑀸𑀯𑀁 𑀚𑀸𑀦𑀸𑀳𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀲𑀲𑀸𑀫𑀺𑀓𑀪𑀸𑀯𑀁 𑀜𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 ‘‘𑀲𑀲𑀸𑀫𑀺𑀓𑀸’’𑀢𑀺 𑀆𑀭𑁄𑀘𑁂𑀲𑀺. 𑀅𑀣 𑀭𑀜𑁆𑀜𑀸 ‘‘𑀢𑁂𑀦 𑀳𑀺 𑀢𑀲𑁆𑀲𑀸 𑀲𑀸𑀫𑀺𑀓𑀁 𑀧𑀓𑁆𑀓𑁄𑀲𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀲𑁄 𑀕𑀦𑁆𑀢𑁆𑀯𑀸, ‘‘𑀏𑀳𑀺, 𑀪𑁄, 𑀭𑀸𑀚𑀸 𑀢𑀁 𑀧𑀓𑁆𑀓𑁄𑀲𑀢𑀻’’𑀢𑀺 𑀆𑀳. 𑀲𑁄 ‘‘𑀪𑀭𑀺𑀬𑀁 𑀫𑁂 𑀦𑀺𑀲𑁆𑀲𑀸𑀬 𑀪𑀬𑁂𑀦 𑀉𑀧𑁆𑀧𑀦𑁆𑀦𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀜𑁆𑀜𑁄 𑀆𑀡𑀁 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀭𑀸𑀚𑀸 ‘‘𑀫𑀁 𑀇𑀢𑁄 𑀧𑀝𑁆𑀞𑀸𑀬 𑀉𑀧𑀝𑁆𑀞𑀸𑀳𑀻’’𑀢𑀺 𑀆𑀳. ‘‘𑀅𑀮𑀁, 𑀤𑁂𑀯, 𑀅𑀳𑀁 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀲𑀼𑀗𑁆𑀓𑀁 𑀤𑀤𑀸𑀫𑀺, 𑀖𑀭𑁂𑀬𑁂𑀯 𑀫𑁂 𑀚𑀻𑀯𑀺𑀓𑀸 𑀳𑁄𑀢𑀽’’𑀢𑀺. ‘‘𑀢𑀯 𑀲𑀼𑀗𑁆𑀓𑁂𑀦 𑀫𑀬𑁆𑀳𑀁 𑀅𑀢𑁆𑀣𑁄 𑀦𑀢𑁆𑀣𑀺, 𑀅𑀚𑁆𑀚𑀢𑁄 𑀧𑀝𑁆𑀞𑀸𑀬 𑀫𑀁 𑀉𑀧𑀝𑁆𑀞𑀸𑀳𑀻’’𑀢𑀺 𑀢𑀲𑁆𑀲 𑀨𑀮𑀓𑀜𑁆𑀘 𑀆𑀯𑀼𑀥𑀜𑁆𑀘 𑀤𑀸𑀧𑁂𑀲𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀓𑀜𑁆𑀘𑀺𑀤𑁂𑀯𑀲𑁆𑀲 𑀤𑁄𑀲𑀁 𑀆𑀭𑁄𑀧𑁂𑀢𑁆𑀯𑀸 𑀖𑀸𑀢𑁂𑀢𑁆𑀯𑀸 𑀪𑀭𑀺𑀬𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀲𑁄 𑀫𑀭𑀡𑀪𑀬𑀪𑀻𑀢𑁄 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀲𑀺.

𑀭𑀸𑀚𑀸 𑀢𑀲𑁆𑀲 𑀤𑁄𑀲𑀁 𑀅𑀧𑀲𑁆𑀲𑀦𑁆𑀢𑁄 𑀓𑀸𑀫𑀧𑀭𑀺𑀴𑀸𑀳𑁂 𑀯𑀟𑁆𑀠𑀦𑁆𑀢𑁂 ‘‘𑀏𑀓𑀫𑀲𑁆𑀲 𑀤𑁄𑀲𑀁 𑀆𑀭𑁄𑀧𑁂𑀢𑁆𑀯𑀸 𑀭𑀸𑀚𑀸𑀡𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀅𑀫𑁆𑀪𑁄 𑀇𑀢𑁄 𑀬𑁄𑀚𑀦𑀫𑀢𑁆𑀣𑀓𑁂 𑀦𑀤𑀺𑀬𑀸 𑀅𑀲𑀼𑀓𑀝𑁆𑀞𑀸𑀦𑀁 𑀦𑀸𑀫 𑀕𑀦𑁆𑀢𑁆𑀯𑀸 𑀲𑀸𑀬𑀁 𑀫𑀫 𑀦𑁆𑀳𑀸𑀦𑀯𑁂𑀮𑀸𑀬 𑀓𑀼𑀫𑀼𑀤𑀼𑀧𑁆𑀧𑀮𑀸𑀦𑀺 𑀘𑁂𑀯 𑀅𑀭𑀼𑀡𑀯𑀢𑀻𑀫𑀢𑁆𑀢𑀺𑀓𑀜𑁆𑀘 𑀆𑀳𑀭. 𑀲𑀘𑁂 𑀢𑀲𑁆𑀫𑀺𑀁 𑀔𑀡𑁂 𑀦𑀸𑀕𑀘𑁆𑀙𑀲𑀺, 𑀆𑀡𑀁 𑀢𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁂𑀯𑀓𑁄 𑀓𑀺𑀭 𑀘𑀢𑀽𑀳𑀺𑀧𑀺 𑀤𑀸𑀲𑁂𑀳𑀺 𑀧𑀢𑀺𑀓𑀺𑀝𑁆𑀞𑀢𑀭𑁄. 𑀥𑀦𑀓𑁆𑀓𑀻𑀢𑀸𑀤𑀬𑁄 𑀳𑀺 𑀤𑀸𑀲𑀸 ‘‘𑀲𑀻𑀲𑀁 𑀫𑁂 𑀭𑀼𑀚𑁆𑀚𑀢𑀺, 𑀧𑀺𑀝𑁆𑀞𑀺 𑀫𑁂 𑀭𑀼𑀚𑁆𑀚𑀢𑀻’’𑀢𑀺 𑀯𑀢𑁆𑀯𑀸 𑀅𑀘𑁆𑀙𑀺𑀢𑀼𑀁 𑀮𑀪𑀦𑁆𑀢𑀺𑀬𑁂𑀯. 𑀲𑁂𑀯𑀓𑀲𑁆𑀲𑁂𑀢𑀁 𑀦𑀢𑁆𑀣𑀺, 𑀆𑀡𑀢𑁆𑀢𑀓𑀫𑁆𑀫𑀁 𑀓𑀸𑀢𑀼𑀫𑁂𑀯 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀲𑁄 ‘‘𑀅𑀯𑀲𑁆𑀲𑀁 𑀫𑀬𑀸 𑀕𑀦𑁆𑀢𑀩𑁆𑀩𑀁, 𑀓𑀼𑀫𑀼𑀤𑀼𑀧𑁆𑀧𑀮𑁂𑀳𑀺 𑀲𑀤𑁆𑀥𑀺𑀁 𑀅𑀭𑀼𑀡𑀯𑀢𑀻𑀫𑀢𑁆𑀢𑀺𑀓𑀸 𑀦𑀸𑀫 𑀦𑀸𑀕𑀪𑀯𑀦𑁂 𑀉𑀧𑁆𑀧𑀚𑁆𑀚𑀢𑀺, 𑀅𑀳𑀁 𑀓𑀼𑀳𑀺𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀫𑀭𑀡𑀪𑀬𑀪𑀻𑀢𑁄 𑀯𑁂𑀕𑁂𑀦 𑀕𑁂𑀳𑀁 𑀕𑀦𑁆𑀢𑁆𑀯𑀸, ‘‘𑀪𑀤𑁆𑀤𑁂, 𑀦𑀺𑀝𑁆𑀞𑀺𑀢𑀁 𑀫𑁂 𑀪𑀢𑁆𑀢’’𑀦𑁆𑀢𑀺 𑀆𑀳. ‘‘𑀉𑀤𑁆𑀥𑀦𑀫𑀢𑁆𑀣𑀓𑁂, 𑀲𑀸𑀫𑀻’’𑀢𑀺. 𑀲𑁄 𑀬𑀸𑀯 𑀪𑀢𑁆𑀢𑀁 𑀑𑀢𑀭𑀢𑀺, 𑀢𑀸𑀯 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀴𑀼𑀗𑁆𑀓𑁂𑀦 𑀓𑀜𑁆𑀚𑀺𑀓𑀁 𑀳𑀭𑀸𑀧𑁂𑀢𑁆𑀯𑀸 𑀬𑀣𑀸𑀮𑀤𑁆𑀥𑁂𑀦 𑀩𑁆𑀬𑀜𑁆𑀚𑀦𑁂𑀦 𑀲𑀤𑁆𑀥𑀺𑀁 𑀅𑀮𑁆𑀮𑀫𑁂𑀯 𑀪𑀢𑁆𑀢𑀁 𑀧𑀘𑁆𑀙𑀺𑀬𑀁 𑀑𑀧𑀻𑀴𑁂𑀢𑁆𑀯𑀸 𑀆𑀤𑀸𑀬 𑀬𑁄𑀚𑀦𑀺𑀓𑀁 𑀫𑀕𑁆𑀕𑀁 𑀧𑀓𑁆𑀔𑀦𑁆𑀤𑁄, 𑀢𑀲𑁆𑀲 𑀕𑀘𑁆𑀙𑀦𑁆𑀢𑀲𑁆𑀲𑁂𑀯 𑀪𑀢𑁆𑀢𑀁 𑀧𑀓𑁆𑀓𑀁 𑀅𑀳𑁄𑀲𑀺. 𑀲𑁄 𑀅𑀦𑀼𑀘𑁆𑀙𑀺𑀝𑁆𑀞𑀁 𑀓𑀢𑁆𑀯𑀸𑀯 𑀣𑁄𑀓𑀁 𑀪𑀢𑁆𑀢𑀁 𑀅𑀧𑀦𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁄 𑀏𑀓𑀁 𑀅𑀤𑁆𑀥𑀺𑀓𑀁 𑀤𑀺𑀲𑁆𑀯𑀸 𑀫𑀬𑀸 𑀅𑀧𑀦𑁂𑀢𑁆𑀯𑀸 𑀞𑀧𑀺𑀢𑀁 𑀣𑁄𑀓𑀁 𑀅𑀦𑀼𑀘𑁆𑀙𑀺𑀝𑁆𑀞𑀁 𑀪𑀢𑁆𑀢𑀫𑁂𑀯 𑀅𑀢𑁆𑀣𑀺 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚 𑀲𑀸𑀫𑀻𑀢𑀺. 𑀲𑁄 𑀕𑀡𑁆𑀳𑀺𑀢𑁆𑀯𑀸 𑀪𑀼𑀜𑁆𑀚𑀺. 𑀇𑀢𑀭𑁄𑀧𑀺 𑀪𑀼𑀜𑁆𑀚𑀺𑀢𑁆𑀯𑀸 𑀏𑀓𑀁 𑀪𑀢𑁆𑀢𑀫𑀼𑀝𑁆𑀞𑀺𑀁 𑀉𑀤𑀓𑁂 𑀔𑀺𑀧𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 ‘‘𑀇𑀫𑀲𑁆𑀫𑀺𑀁 𑀦𑀤𑀻𑀧𑀤𑁂𑀲𑁂 𑀅𑀥𑀺𑀯𑀢𑁆𑀣𑀸 𑀦𑀸𑀕𑀸 𑀲𑀼𑀧𑀡𑁆𑀡𑀸 𑀤𑁂𑀯𑀢𑀸 𑀘 𑀯𑀘𑀦𑀁 𑀫𑁂 𑀲𑀼𑀡𑀦𑁆𑀢𑀼, 𑀭𑀸𑀚𑀸 𑀫𑀬𑁆𑀳𑀁 𑀆𑀡𑀁 𑀓𑀸𑀢𑀼𑀓𑀸𑀫𑁄 ‘𑀓𑀼𑀫𑀼𑀤𑀼𑀧𑁆𑀧𑀮𑁂𑀳𑀺 𑀲𑀤𑁆𑀥𑀺𑀁 𑀅𑀭𑀼𑀡𑀯𑀢𑀻𑀫𑀢𑁆𑀢𑀺𑀓𑀁 𑀆𑀳𑀭𑀸’𑀢𑀺 𑀫𑀁 𑀆𑀡𑀸𑀧𑁂𑀲𑀺, 𑀅𑀤𑁆𑀥𑀺𑀓𑀫𑀦𑀼𑀲𑁆𑀲𑀲𑁆𑀲 𑀘 𑀫𑁂 𑀪𑀢𑁆𑀢𑀁 𑀤𑀺𑀦𑁆𑀦𑀁, 𑀢𑀁 𑀲𑀳𑀲𑁆𑀲𑀸𑀦𑀺𑀲𑀁𑀲𑀁, 𑀉𑀤𑀓𑁂 𑀫𑀘𑁆𑀙𑀸𑀦𑀁 𑀤𑀺𑀦𑁆𑀦𑀁, 𑀢𑀁 𑀲𑀢𑀸𑀦𑀺𑀲𑀁𑀲𑀁. 𑀏𑀢𑁆𑀢𑀓𑀁 𑀧𑀼𑀜𑁆𑀜𑀨𑀮𑀁 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀺𑀁 𑀓𑀢𑁆𑀯𑀸 𑀤𑀫𑁆𑀫𑀺, 𑀫𑀬𑁆𑀳𑀁 𑀓𑀼𑀫𑀼𑀤𑀼𑀧𑁆𑀧𑀮𑁂𑀳𑀺 𑀲𑀤𑁆𑀥𑀺𑀁 𑀅𑀭𑀼𑀡𑀯𑀢𑀻𑀫𑀢𑁆𑀢𑀺𑀓𑀁 𑀆𑀳𑀭𑀣𑀸’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀅𑀦𑀼𑀲𑁆𑀲𑀸𑀯𑁂𑀲𑀺. 𑀢𑀢𑁆𑀣 𑀅𑀥𑀺𑀯𑀢𑁆𑀣𑁄 𑀦𑀸𑀕𑀭𑀸𑀚𑀸 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀫𑀳𑀮𑁆𑀮𑀓𑀯𑁂𑀲𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀯𑀤𑁂𑀲𑀻’’𑀢𑀺 𑀆𑀳. 𑀲𑁄 𑀧𑀼𑀦𑀧𑀺 𑀢𑀣𑁂𑀯 𑀯𑀢𑁆𑀯𑀸 ‘‘𑀫𑀬𑁆𑀳𑀁 𑀢𑀁 𑀧𑀢𑁆𑀢𑀺𑀁 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂, ‘‘𑀤𑁂𑀫𑀻’’𑀢𑀺 𑀆𑀳. 𑀧𑀼𑀦𑀧𑀺 ‘‘𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂, ‘‘𑀤𑁂𑀫𑀺, 𑀲𑀸𑀫𑀻’’𑀢𑀺 𑀆𑀳. 𑀏𑀯𑀁 𑀲𑁄 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀧𑀢𑁆𑀢𑀺𑀁 𑀆𑀳𑀭𑀸𑀧𑁂𑀢𑁆𑀯𑀸 𑀓𑀼𑀫𑀼𑀤𑀼𑀧𑁆𑀧𑀮𑁂𑀳𑀺 𑀲𑀤𑁆𑀥𑀺𑀁 𑀅𑀭𑀼𑀡𑀯𑀢𑀻𑀫𑀢𑁆𑀢𑀺𑀓𑀁 𑀅𑀤𑀸𑀲𑀺.

𑀭𑀸𑀚𑀸 𑀧𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀦𑀼𑀲𑁆𑀲𑀸 𑀦𑀸𑀫 𑀩𑀳𑀼𑀫𑀸𑀬𑀸, 𑀲𑀘𑁂 𑀲𑁄 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀮𑀪𑁂𑀬𑁆𑀬, 𑀓𑀺𑀘𑁆𑀘𑀁 𑀫𑁂 𑀦 𑀦𑀺𑀧𑁆𑀨𑀚𑁆𑀚𑁂𑀬𑁆𑀬𑀸’’𑀢𑀺. 𑀲𑁄 𑀓𑀸𑀮𑀲𑁆𑀲𑁂𑀯 𑀤𑁆𑀯𑀸𑀭𑀁 𑀧𑀺𑀤𑀳𑀸𑀧𑁂𑀢𑁆𑀯𑀸 𑀫𑀼𑀤𑁆𑀤𑀺𑀓𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀳𑀭𑀸𑀧𑁂𑀲𑀺. 𑀇𑀢𑀭𑁄𑀧𑀺 𑀧𑀼𑀭𑀺𑀲𑁄 𑀭𑀜𑁆𑀜𑁄 𑀦𑁆𑀳𑀸𑀦𑀯𑁂𑀮𑀸𑀬𑀫𑁂𑀯𑀸𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀁 𑀅𑀮𑀪𑀦𑁆𑀢𑁄 𑀤𑁆𑀯𑀸𑀭𑀧𑀸𑀮𑀁 𑀧𑀓𑁆𑀓𑁄𑀲𑁂𑀢𑁆𑀯𑀸 ‘‘𑀤𑁆𑀯𑀸𑀭𑀁 𑀯𑀺𑀯𑀭𑀸’’𑀢𑀺 𑀆𑀳. ‘‘𑀦 𑀲𑀓𑁆𑀓𑀸 𑀯𑀺𑀯𑀭𑀺𑀢𑀼𑀁, 𑀭𑀸𑀚𑀸 𑀓𑀸𑀮𑀲𑁆𑀲𑁂𑀯 𑀫𑀼𑀤𑁆𑀤𑀺𑀓𑀁 𑀤𑀢𑁆𑀯𑀸 𑀭𑀸𑀚𑀕𑁂𑀳𑀁 𑀆𑀳𑀭𑀸𑀧𑁂𑀲𑀻’’𑀢𑀺. 𑀲𑁄 ‘‘𑀭𑀸𑀚𑀤𑀽𑀢𑁄 𑀅𑀳𑀁, 𑀤𑁆𑀯𑀸𑀭𑀁 𑀯𑀺𑀯𑀭𑀸’’𑀢𑀺 𑀯𑀢𑁆𑀯𑀸𑀧𑀺 ‘‘𑀤𑁆𑀯𑀸𑀭𑀁 𑀅𑀮𑀪𑀦𑁆𑀢𑁄 𑀦𑀢𑁆𑀣𑀺 𑀫𑁂 𑀇𑀤𑀸𑀦𑀺 𑀚𑀻𑀯𑀺𑀢𑀁. 𑀓𑀺𑀁 𑀦𑀼 𑀔𑁄 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑁆𑀯𑀸𑀭𑀲𑁆𑀲 𑀉𑀧𑀭𑀺𑀉𑀫𑁆𑀫𑀸𑀭𑁂 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁 𑀔𑀺𑀧𑀺𑀢𑁆𑀯𑀸 𑀢𑀲𑁆𑀲𑀽𑀧𑀭𑀺 𑀧𑀼𑀧𑁆𑀨𑀸𑀦𑀺 𑀮𑀕𑁆𑀕𑁂𑀢𑁆𑀯𑀸 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑁄, ‘‘𑀅𑀫𑁆𑀪𑁄, 𑀦𑀕𑀭𑀯𑀸𑀲𑀺𑀦𑁄 𑀭𑀜𑁆𑀜𑁄 𑀫𑀬𑀸 𑀆𑀡𑀢𑁆𑀢𑀺𑀬𑀸 𑀕𑀢𑀪𑀸𑀯𑀁 𑀚𑀸𑀦𑀸𑀣, 𑀭𑀸𑀚𑀸 𑀫𑀁 𑀅𑀓𑀸𑀭𑀡𑁂𑀦 𑀯𑀺𑀦𑀸𑀲𑁂𑀢𑀼𑀓𑀸𑀫𑁄’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀺𑀭𑀯𑀺𑀢𑁆𑀯𑀸 ‘‘𑀓𑀢𑁆𑀣 𑀦𑀼 𑀔𑁄 𑀕𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀪𑀺𑀓𑁆𑀔𑀽 𑀦𑀸𑀫 𑀫𑀼𑀤𑀼𑀳𑀤𑀬𑀸, 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀫𑀓𑀸𑀲𑀺. 𑀇𑀫𑁂 𑀳𑀺 𑀦𑀸𑀫 𑀲𑀢𑁆𑀢𑀸 𑀲𑀼𑀔𑀺𑀢𑀓𑀸𑀮𑁂 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀺𑀪𑀸𑀯𑀫𑁆𑀧𑀺 𑀅𑀚𑀸𑀦𑀺𑀢𑁆𑀯𑀸 𑀤𑀼𑀓𑁆𑀔𑀸𑀪𑀺𑀪𑀽𑀢𑀓𑀸𑀮𑁂 𑀯𑀺𑀳𑀸𑀭𑀁 𑀕𑀦𑁆𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑁄𑀧𑀺 ‘‘𑀫𑁂 𑀅𑀜𑁆𑀜𑀁 𑀢𑀸𑀡𑀁 𑀦𑀢𑁆𑀣𑀻’’𑀢𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀨𑀸𑀲𑀼𑀓𑀝𑁆𑀞𑀸𑀦𑁂 𑀦𑀺𑀧𑀚𑁆𑀚𑀺. 𑀅𑀣 𑀭𑀜𑁆𑀜𑁄𑀧𑀺 𑀢𑀁 𑀭𑀢𑁆𑀢𑀺𑀁 𑀦𑀺𑀤𑁆𑀤𑀁 𑀅𑀮𑀪𑀦𑁆𑀢𑀲𑁆𑀲 𑀢𑀁 𑀇𑀢𑁆𑀣𑀺𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀓𑀸𑀫𑀧𑀭𑀺𑀴𑀸𑀳𑁄 𑀉𑀧𑁆𑀧𑀚𑁆𑀚𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀯𑀺𑀪𑀸𑀢𑀓𑁆𑀔𑀡𑁂𑀬𑁂𑀯 𑀢𑀁 𑀧𑀼𑀭𑀺𑀲𑀁 𑀖𑀸𑀢𑀸𑀧𑁂𑀢𑁆𑀯𑀸 𑀢𑀁 𑀇𑀢𑁆𑀣𑀺𑀁 𑀆𑀦𑁂𑀲𑁆𑀲𑀸𑀫𑀻’’𑀢𑀺.

𑀢𑀲𑁆𑀫𑀺𑀁 𑀔𑀡𑁂𑀬𑁂𑀯 𑀲𑀝𑁆𑀞𑀺𑀬𑁄𑀚𑀦𑀺𑀓𑀸𑀬 𑀮𑁄𑀳𑀓𑀼𑀫𑁆𑀪𑀺𑀬𑀸 𑀦𑀺𑀩𑁆𑀩𑀢𑁆𑀢𑀸 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀸 𑀧𑀓𑁆𑀓𑀼𑀣𑀺𑀢𑀸𑀬 𑀉𑀓𑁆𑀔𑀮𑀺𑀬𑀸 𑀢𑀡𑁆𑀟𑀼𑀮𑀸 𑀯𑀺𑀬 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀧𑀘𑁆𑀘𑀫𑀸𑀦𑀸 𑀢𑀺𑀁𑀲𑀸𑀬 𑀯𑀲𑁆𑀲𑀲𑀳𑀲𑁆𑀲𑁂𑀳𑀺 𑀳𑁂𑀝𑁆𑀞𑀺𑀫𑀢𑀮𑀁 𑀧𑀢𑁆𑀯𑀸 𑀅𑀧𑀭𑁂𑀳𑀺 𑀢𑀺𑀁𑀲𑀸𑀬 𑀯𑀲𑁆𑀲𑀲𑀳𑀲𑁆𑀲𑁂𑀳𑀺 𑀧𑀼𑀦 𑀫𑀼𑀔𑀯𑀝𑁆𑀝𑀺𑀬𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀑𑀮𑁄𑀓𑁂𑀢𑁆𑀯𑀸 𑀏𑀓𑁂𑀓𑀁 𑀕𑀸𑀣𑀁 𑀯𑀢𑁆𑀢𑀼𑀓𑀸𑀫𑀸 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀏𑀓𑁂𑀓𑀁 𑀅𑀓𑁆𑀔𑀭𑀁 𑀯𑀢𑁆𑀯𑀸 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀮𑁄𑀳𑀓𑀼𑀫𑁆𑀪𑀺𑀫𑁂𑀯 𑀧𑀯𑀺𑀝𑁆𑀞𑀸. 𑀭𑀸𑀚𑀸 𑀦𑀺𑀤𑁆𑀤𑀁 𑀅𑀮𑀪𑀦𑁆𑀢𑁄 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀪𑀻𑀢𑁄 𑀉𑀢𑁆𑀭𑀲𑁆𑀢𑀫𑀸𑀦𑀲𑁄 ‘‘𑀓𑀺𑀁 𑀦𑀼 𑀔𑁄 𑀫𑀬𑁆𑀳𑀁 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀺, 𑀉𑀤𑀸𑀳𑀼 𑀫𑁂 𑀅𑀕𑁆𑀕𑀫𑀳𑁂𑀲𑀺𑀬𑀸, 𑀉𑀤𑀸𑀳𑀼 𑀫𑁂 𑀭𑀚𑁆𑀚𑀁 𑀯𑀺𑀦𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀲𑀓𑀮𑀭𑀢𑁆𑀢𑀺𑀁 𑀅𑀓𑁆𑀔𑀻𑀦𑀺 𑀦𑀺𑀫𑀻𑀮𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸𑀬 𑀏𑀯 𑀧𑀼𑀭𑁄𑀳𑀺𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀆𑀘𑀭𑀺𑀬, 𑀫𑀬𑀸 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀫𑀳𑀦𑁆𑀢𑀸 𑀪𑁂𑀭𑀯𑀲𑀤𑁆𑀤𑀸 𑀲𑀼𑀢𑀸, ‘𑀭𑀚𑁆𑀚𑀲𑁆𑀲 𑀯𑀸 𑀅𑀕𑁆𑀕𑀫𑀳𑁂𑀲𑀺𑀬𑀸 𑀯𑀸 𑀫𑀬𑁆𑀳𑀁 𑀯𑀸 𑀓𑀲𑁆𑀲 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀦 𑀚𑀸𑀦𑀸𑀫𑀺, 𑀢𑁂𑀦 𑀫𑁂 𑀢𑁆𑀯𑀁 𑀧𑀓𑁆𑀓𑁄𑀲𑀸𑀧𑀺𑀢𑁄’’𑀢𑀺 𑀆𑀳. 𑀫𑀳𑀸𑀭𑀸𑀚, 𑀓𑀺𑀁 𑀢𑁂 𑀲𑀤𑁆𑀤𑀸 𑀲𑀼𑀢𑀸𑀢𑀺? ‘‘𑀆𑀘𑀭𑀺𑀬, 𑀤𑀼-𑀇𑀢𑀺 𑀲-𑀇𑀢𑀺 𑀦-𑀇𑀢𑀺 𑀲𑁄-𑀇𑀢𑀻𑀢𑀺 𑀇𑀫𑁂 𑀲𑀤𑁆𑀤𑁂 𑀅𑀲𑁆𑀲𑁄𑀲𑀺𑀁, 𑀇𑀫𑁂𑀲𑀁 𑀦𑀺𑀧𑁆𑀨𑀢𑁆𑀢𑀺𑀁 𑀉𑀧𑀥𑀸𑀭𑁂𑀳𑀻’’𑀢𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀳𑀸𑀅𑀦𑁆𑀥𑀓𑀸𑀭𑀁 𑀧𑀯𑀺𑀝𑁆𑀞𑀲𑁆𑀲 𑀯𑀺𑀬 𑀦 𑀓𑀺𑀜𑁆𑀘𑀺 𑀧𑀜𑁆𑀜𑀸𑀬𑀢𑀺, ‘‘𑀦 𑀚𑀸𑀦𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀧𑀦 𑀮𑀸𑀪𑀲𑀓𑁆𑀓𑀸𑀭𑁄 𑀫𑁂 𑀧𑀭𑀺𑀳𑀸𑀬𑀺𑀲𑁆𑀲𑀢𑀻’’𑀢𑀺 𑀪𑀸𑀬𑀺𑀢𑁆𑀯𑀸 ‘‘𑀪𑀸𑀭𑀺𑀬𑀁, 𑀫𑀳𑀸𑀭𑀸𑀚𑀸’’𑀢𑀺 𑀆𑀳. ‘‘𑀓𑀺𑀁, 𑀆𑀘𑀭𑀺𑀬𑀸’’𑀢𑀺? ‘‘𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀢𑁂 𑀧𑀜𑁆𑀜𑀸𑀬𑀢𑀻’’𑀢𑀺. 𑀲𑁄 𑀤𑁆𑀯𑀺𑀕𑀼𑀡𑀁 𑀪𑀻𑀢𑁄, ‘‘𑀆𑀘𑀭𑀺𑀬, 𑀅𑀢𑁆𑀣𑀺 𑀓𑀺𑀜𑁆𑀘𑀺 𑀧𑀦 𑀧𑀝𑀺𑀖𑀸𑀢𑀓𑀸𑀭𑀡’’𑀦𑁆𑀢𑀺 𑀆𑀳. ‘‘𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀫𑀸 𑀪𑀸𑀬𑀺, 𑀅𑀳𑀁 𑀢𑀬𑁄 𑀯𑁂𑀤𑁂 𑀚𑀸𑀦𑀸𑀫𑀻’’𑀢𑀺. ‘‘𑀓𑀺𑀁 𑀧𑀦 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀲𑀩𑁆𑀩𑀲𑀢𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀚𑀻𑀯𑀺𑀢𑀁 𑀮𑀪𑀺𑀲𑁆𑀲𑀲𑀺, 𑀤𑁂𑀯𑀸’’𑀢𑀺. ‘‘𑀓𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺? 𑀳𑀢𑁆𑀣𑀺𑀲𑀢𑀁 𑀅𑀲𑁆𑀲𑀲𑀢𑀁 𑀉𑀲𑀪𑀲𑀢𑀁 𑀥𑁂𑀦𑀼𑀲𑀢𑀁 𑀅𑀚𑀲𑀢𑀁 𑀉𑀭𑀩𑁆𑀪𑀲𑀢𑀁 𑀓𑀼𑀓𑁆𑀓𑀼𑀝𑀲𑀢𑀁 𑀲𑀽𑀓𑀭𑀲𑀢𑀁 𑀤𑀸𑀭𑀓𑀲𑀢𑀁 𑀤𑀸𑀭𑀺𑀓𑀸𑀲𑀢𑀦𑁆𑀢𑀺 𑀏𑀯𑀁 𑀏𑀓𑁂𑀓𑀁 𑀧𑀸𑀡𑀚𑀸𑀢𑀺𑀁 𑀲𑀢𑀁 𑀲𑀢𑀁 𑀓𑀢𑁆𑀯𑀸 𑀕𑀡𑁆𑀳𑀸𑀧𑁂𑀦𑁆𑀢𑁄 ‘‘𑀲𑀘𑁂 𑀫𑀺𑀕𑀚𑀸𑀢𑀺𑀫𑁂𑀯 𑀕𑀡𑁆𑀳𑀸𑀧𑁂𑀲𑁆𑀲𑀸𑀫𑀺, ‘𑀅𑀢𑁆𑀢𑀦𑁄 𑀔𑀸𑀤𑀦𑀻𑀬𑀫𑁂𑀯 𑀕𑀡𑁆𑀳𑀸𑀧𑁂𑀢𑀻’𑀢𑀺 𑀯𑀓𑁆𑀔𑀦𑁆𑀢𑀻’’𑀢𑀺 𑀳𑀢𑁆𑀣𑀺𑀅𑀲𑁆𑀲𑀫𑀦𑀼𑀲𑁆𑀲𑁂𑀧𑀺 𑀕𑀡𑁆𑀳𑀸𑀧𑁂𑀢𑀺. 𑀭𑀸𑀚𑀸 ‘‘𑀫𑀫 𑀚𑀻𑀯𑀺𑀢𑀫𑁂𑀯 𑀫𑀬𑁆𑀳𑀁 𑀮𑀸𑀪𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀲𑀩𑁆𑀩𑀧𑀸𑀡𑁂 𑀲𑀻𑀖𑀁 𑀕𑀡𑁆𑀳𑀣𑀸’’𑀢𑀺 𑀆𑀳. 𑀆𑀡𑀢𑁆𑀢𑀫𑀦𑀼𑀲𑁆𑀲𑀸 𑀅𑀥𑀺𑀓𑀢𑀭𑀁 𑀕𑀡𑁆𑀳𑀺𑀁𑀲𑀼. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀓𑁄𑀲𑀮𑀲𑀁𑀬𑀼𑀢𑁆𑀢𑁂 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀫𑀳𑀸𑀬𑀜𑁆𑀜𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀧𑀜𑁆𑀘 𑀘 𑀉𑀲𑀪𑀲𑀢𑀸𑀦𑀺 𑀧𑀜𑁆𑀘 𑀘 𑀯𑀘𑁆𑀙𑀢𑀭𑀲𑀢𑀸𑀦𑀺 𑀧𑀜𑁆𑀘 𑀘 𑀯𑀘𑁆𑀙𑀢𑀭𑀺𑀲𑀢𑀸𑀦𑀺 𑀧𑀜𑁆𑀘 𑀘 𑀅𑀚𑀲𑀢𑀸𑀦𑀺 𑀧𑀜𑁆𑀘 𑀘 𑀉𑀭𑀩𑁆𑀪𑀲𑀢𑀸𑀦𑀺 𑀣𑀽𑀡𑀽𑀧𑀦𑀻𑀢𑀸𑀦𑀺 𑀳𑁄𑀦𑁆𑀢𑀺 𑀬𑀜𑁆𑀜𑀢𑁆𑀣𑀸𑀬. 𑀬𑁂𑀧𑀺𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀤𑀸𑀲𑀸𑀢𑀺 𑀯𑀸 𑀧𑁂𑀲𑁆𑀲𑀸𑀢𑀺 𑀯𑀸 𑀓𑀫𑁆𑀫𑀓𑀭𑀸𑀢𑀺 𑀯𑀸, 𑀢𑁂𑀧𑀺 𑀤𑀡𑁆𑀟𑀢𑀚𑁆𑀚𑀺𑀢𑀸 𑀪𑀬𑀢𑀚𑁆𑀚𑀺𑀢𑀸 𑀅𑀲𑁆𑀲𑀼𑀫𑀼𑀔𑀸 𑀭𑀼𑀤𑀫𑀸𑀦𑀸 𑀧𑀭𑀺𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁧.𑁧𑁨𑁦).

𑀫𑀳𑀸𑀚𑀦𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀥𑀻𑀢𑀼𑀜𑀸𑀢𑀻𑀦𑀁 𑀅𑀢𑁆𑀣𑀸𑀬 𑀧𑀭𑀺𑀤𑁂𑀯𑀫𑀸𑀦𑁄 𑀫𑀳𑀸𑀲𑀤𑁆𑀤𑀫𑀓𑀸𑀲𑀺, 𑀫𑀳𑀸𑀧𑀣𑀯𑀻𑀉𑀦𑁆𑀤𑁆𑀭𑀺𑀬𑀦𑀲𑀤𑁆𑀤𑁄 𑀯𑀺𑀬 𑀅𑀳𑁄𑀲𑀺. 𑀅𑀣 𑀫𑀮𑁆𑀮𑀺𑀓𑀸 𑀤𑁂𑀯𑀻 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀢𑁂, 𑀫𑀳𑀸𑀭𑀸𑀚, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀧𑀸𑀓𑀢𑀺𑀓𑀸𑀦𑀺, 𑀓𑀺𑀮𑀦𑁆𑀢𑀭𑀽𑀧𑀸𑀦𑀺 𑀯𑀺𑀬 𑀧𑀜𑁆𑀜𑀸𑀬𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. ‘‘𑀓𑀺𑀁 𑀢𑀼𑀬𑁆𑀳𑀁, 𑀫𑀮𑁆𑀮𑀺𑀓𑁂, 𑀢𑁆𑀯𑀁 𑀫𑀫 𑀓𑀡𑁆𑀡𑀫𑀽𑀮𑁂𑀦 𑀆𑀲𑀺𑀯𑀺𑀲𑀫𑁆𑀧𑀺 𑀕𑀘𑁆𑀙𑀦𑁆𑀢𑀁 𑀦 𑀚𑀸𑀦𑀸𑀲𑀻’’𑀢𑀺? ‘‘𑀓𑀺𑀁 𑀧𑀦𑁂𑀢𑀁, 𑀤𑁂𑀯𑀸’’𑀢𑀺? ‘‘𑀭𑀢𑁆𑀢𑀺𑀪𑀸𑀕𑁂 𑀫𑁂 𑀏𑀯𑀭𑀽𑀧𑁄 𑀦𑀸𑀫 𑀲𑀤𑁆𑀤𑁄 𑀲𑀼𑀢𑁄, 𑀲𑁆𑀯𑀸𑀳𑀁 𑀧𑀼𑀭𑁄𑀳𑀺𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀢𑁂 𑀧𑀜𑁆𑀜𑀸𑀬𑀢𑀺, 𑀲𑀩𑁆𑀩𑀲𑀢𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀚𑀻𑀯𑀺𑀢𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀲𑀼𑀢𑁆𑀯𑀸 ‘‘𑀫𑀫 𑀚𑀻𑀯𑀺𑀢𑀫𑁂𑀯 𑀫𑀬𑁆𑀳𑀁 𑀮𑀸𑀪𑁄’’𑀢𑀺 𑀇𑀫𑁂 𑀧𑀸𑀡𑁂 𑀕𑀡𑁆𑀳𑀸𑀧𑁂𑀲𑀺𑀦𑁆𑀢𑀺. 𑀫𑀮𑁆𑀮𑀺𑀓𑀸 𑀤𑁂𑀯𑀻, ‘‘𑀅𑀦𑁆𑀥𑀩𑀸𑀮𑁄𑀲𑀺, 𑀫𑀳𑀸𑀭𑀸𑀚, 𑀓𑀺𑀜𑁆𑀘𑀸𑀧𑀺 𑀫𑀳𑀸𑀪𑀓𑁆𑀔𑁄𑀲𑀺, 𑀅𑀦𑁂𑀓𑀲𑀽𑀧𑀩𑁆𑀬𑀜𑁆𑀚𑀦𑀯𑀺𑀓𑀢𑀺𑀓𑀁 𑀤𑁄𑀡𑀧𑀸𑀓𑀁 𑀪𑁄𑀚𑀦𑀁 𑀪𑀼𑀜𑁆𑀚𑀲𑀺, 𑀤𑁆𑀯𑀻𑀲𑀼 𑀭𑀝𑁆𑀞𑁂𑀲𑀼 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀧𑀜𑁆𑀜𑀸 𑀧𑀦 𑀢𑁂 𑀫𑀦𑁆𑀤𑀸’’𑀢𑀺 𑀆𑀳. ‘‘𑀓𑀲𑁆𑀫𑀸 𑀏𑀯𑀁 𑀯𑀤𑁂𑀲𑀺, 𑀤𑁂𑀯𑀻’’𑀢𑀺? ‘‘𑀓𑀳𑀁 𑀢𑀬𑀸 𑀅𑀜𑁆𑀜𑀲𑁆𑀲 𑀫𑀭𑀡𑁂𑀦 𑀅𑀜𑁆𑀜𑀲𑁆𑀲 𑀚𑀻𑀯𑀺𑀢𑀮𑀸𑀪𑁄 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀅𑀦𑁆𑀥𑀩𑀸𑀮𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀣𑀁 𑀕𑀳𑁂𑀢𑁆𑀯𑀸 𑀓𑀲𑁆𑀫𑀸 𑀫𑀳𑀸𑀚𑀦𑀲𑁆𑀲 𑀉𑀧𑀭𑀺 𑀤𑀼𑀓𑁆𑀔𑀁 𑀔𑀺𑀧𑀲𑀺, 𑀥𑀼𑀭𑀯𑀺𑀳𑀸𑀭𑁂 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀕𑁆𑀕𑀧𑀼𑀕𑁆𑀕𑀮𑁄 𑀅𑀢𑀻𑀢𑀸𑀤𑀻𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑁄 𑀲𑀢𑁆𑀣𑀸 𑀯𑀲𑀢𑀺, 𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀲𑁄𑀯𑀸𑀤𑀁 𑀓𑀭𑁄𑀳𑀻’’𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸 𑀲𑀮𑁆𑀮𑀳𑀼𑀓𑁂𑀳𑀺 𑀬𑀸𑀦𑁂𑀳𑀺 𑀫𑀮𑁆𑀮𑀺𑀓𑀸𑀬 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑁄 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀅𑀣 𑀦𑀁 𑀲𑀢𑁆𑀣𑀸 ‘‘𑀳𑀦𑁆𑀤 𑀓𑀼𑀢𑁄 𑀦𑀼 𑀢𑁆𑀯𑀁, 𑀫𑀳𑀸𑀭𑀸𑀚, 𑀆𑀕𑀘𑁆𑀙𑀲𑀺 𑀤𑀺𑀯𑀸 𑀤𑀺𑀯𑀲𑁆𑀲𑀸’’𑀢𑀺 𑀧𑀞𑀫𑀢𑀭𑀁 𑀆𑀮𑀧𑀺. 𑀲𑁄 𑀢𑀼𑀡𑁆𑀳𑀻𑀬𑁂𑀯 𑀦𑀺𑀲𑀻𑀤𑀺. 𑀢𑀢𑁄 𑀫𑀮𑁆𑀮𑀺𑀓𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺 𑁋 ‘‘𑀪𑀦𑁆𑀢𑁂, 𑀭𑀜𑁆𑀜𑀸 𑀓𑀺𑀭 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀲𑀤𑁆𑀤𑁄 𑀲𑀼𑀢𑁄. 𑀅𑀣 𑀦𑀁 𑀧𑀼𑀭𑁄𑀳𑀺𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀧𑀼𑀭𑁄𑀳𑀺𑀢𑁄 ‘𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀢𑁂 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲 𑀧𑀝𑀺𑀖𑀸𑀢𑀢𑁆𑀣𑀸𑀬 𑀲𑀩𑁆𑀩𑀲𑀢𑁂 𑀧𑀸𑀡𑁂 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀕𑀮𑀮𑁄𑀳𑀺𑀢𑁂𑀦 𑀬𑀜𑁆𑀜𑁂 𑀬𑀚𑀺𑀢𑁂 𑀚𑀻𑀯𑀺𑀢𑀁 𑀮𑀪𑀺𑀲𑁆𑀲𑀲𑀻’𑀢𑀺 𑀆𑀳. 𑀭𑀸𑀚𑀸 𑀧𑀸𑀡𑁂 𑀕𑀡𑁆𑀳𑀸𑀧𑁂𑀲𑀺, 𑀢𑁂𑀦𑀸𑀬𑀁 𑀫𑀬𑀸 𑀇𑀥𑀸𑀦𑀻𑀢𑁄’’𑀢𑀺. ‘‘𑀏𑀯𑀁 𑀓𑀺𑀭, 𑀫𑀳𑀸𑀭𑀸𑀚𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. ‘‘𑀓𑀺𑀦𑁆𑀢𑀺 𑀢𑁂 𑀲𑀤𑁆𑀤𑁄 𑀲𑀼𑀢𑁄’’𑀢𑀺? 𑀲𑁄 𑀅𑀢𑁆𑀢𑀦𑀸 𑀲𑀼𑀢𑀦𑀺𑀬𑀸𑀫𑁂𑀦𑁂𑀯 𑀆𑀘𑀺𑀓𑁆𑀔𑀺. 𑀢𑀣𑀸𑀕𑀢𑀲𑁆𑀲 𑀢𑀁 𑀲𑀼𑀢𑁆𑀯𑀸𑀯 𑀏𑀓𑁄𑀪𑀸𑀲𑁄 𑀅𑀳𑁄𑀲𑀺. 𑀅𑀣 𑀦𑀁 𑀲𑀢𑁆𑀢𑀸 𑀆𑀳 𑁋 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀢𑀯 𑀅𑀦𑁆𑀢𑀭𑀸𑀬𑁄 𑀦𑀢𑁆𑀣𑀺, 𑀧𑀸𑀧𑀓𑀫𑁆𑀫𑀺𑀦𑁄 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀤𑀼𑀓𑁆𑀔𑀁 𑀆𑀯𑀻𑀓𑀭𑁄𑀦𑁆𑀢𑀸 𑀏𑀯𑀫𑀸𑀳𑀁𑀲𑀽’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀢𑁂𑀳𑀺 𑀓𑀢’’𑀦𑁆𑀢𑀺? 𑀅𑀣 𑀔𑁄 𑀪𑀕𑀯𑀸 𑀢𑁂𑀲𑀁 𑀓𑀫𑁆𑀫𑀁 𑀆𑀘𑀺𑀓𑁆𑀔𑀺𑀢𑀼𑀁 ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀲𑀼𑀡𑀸𑀳𑀻’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺 𑁋

𑀅𑀢𑀻𑀢𑁂 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀓𑀲𑁆𑀲𑀧𑁄 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀻𑀲𑀢𑀺𑀬𑀸 𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀩𑀸𑀭𑀸𑀡𑀲𑀺𑀫𑀕𑀫𑀸𑀲𑀺. 𑀩𑀸𑀭𑀸𑀡𑀲𑀺𑀯𑀸𑀲𑀺𑀦𑁄 𑀤𑁆𑀯𑁂𑀧𑀺 𑀢𑀬𑁄𑀧𑀺 𑀩𑀳𑀼𑀢𑀭𑀸𑀧𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀆𑀕𑀦𑁆𑀢𑀼𑀓𑀤𑀸𑀦𑀁 𑀧𑀯𑀢𑁆𑀢𑀬𑀺𑀁𑀲𑀼. 𑀢𑀤𑀸 𑀩𑀸𑀭𑀸𑀡𑀲𑀺𑀬𑀁 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀯𑀺𑀪𑀯𑀸 𑀘𑀢𑁆𑀢𑀸𑀭𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑀸 𑀲𑀳𑀸𑀬𑀓𑀸 𑀅𑀳𑁂𑀲𑀼𑀁. 𑀢𑁂 𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀅𑀫𑁆𑀳𑀸𑀓𑀁 𑀕𑁂𑀳𑁂 𑀩𑀳𑀼𑀥𑀦𑀁, 𑀢𑁂𑀦 𑀓𑀺𑀁 𑀓𑀭𑁄𑀫𑀸’’𑀢𑀺? ‘‘𑀏𑀯𑀭𑀽𑀧𑁂 𑀩𑀼𑀤𑁆𑀥𑁂 𑀘𑀸𑀭𑀺𑀓𑀁 𑀘𑀭𑀫𑀸𑀦𑁂 𑀤𑀸𑀦𑀁 𑀤𑀲𑁆𑀲𑀸𑀫, 𑀲𑀻𑀮𑀁 𑀭𑀓𑁆𑀔𑀺𑀲𑁆𑀲𑀸𑀫, 𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀏𑀓𑁄𑀧𑀺 𑀅𑀯𑀢𑁆𑀯𑀸 𑀢𑁂𑀲𑀼 𑀏𑀓𑁄 𑀢𑀸𑀯 𑀏𑀯𑀫𑀸𑀳 𑁋 ‘‘𑀢𑀺𑀔𑀺𑀡𑀲𑀼𑀭𑀁 𑀧𑀺𑀯𑀦𑁆𑀢𑀸 𑀫𑀥𑀼𑀭𑀫𑀁𑀲𑀁 𑀔𑀸𑀤𑀦𑁆𑀢𑀸 𑀯𑀺𑀘𑀭𑀺𑀲𑁆𑀲𑀸𑀫, 𑀇𑀤𑀁 𑀅𑀫𑁆𑀳𑀸𑀓𑀁 𑀚𑀻𑀯𑀺𑀢𑀨𑀮’’𑀦𑁆𑀢𑀺. 𑀅𑀧𑀭𑁄𑀧𑀺 𑀏𑀯𑀫𑀸𑀳 𑁋 ‘‘𑀤𑁂𑀯𑀲𑀺𑀓𑀁 𑀢𑀺𑀯𑀲𑁆𑀲𑀺𑀓𑀕𑀦𑁆𑀥𑀲𑀸𑀮𑀺𑀪𑀢𑁆𑀢𑀁 𑀦𑀸𑀦𑀕𑁆𑀕𑀭𑀲𑁂𑀳𑀺 𑀪𑀼𑀜𑁆𑀚𑀦𑁆𑀢𑀸 𑀯𑀺𑀘𑀭𑀺𑀲𑁆𑀲𑀸𑀫𑀸’’𑀢𑀺. 𑀅𑀧𑀭𑁄𑀧𑀺 𑀏𑀯𑀫𑀸𑀳 𑁋 ‘‘𑀦𑀸𑀦𑀧𑁆𑀧𑀓𑀸𑀭𑀁 𑀧𑀽𑀯𑀔𑀚𑁆𑀚𑀓𑀯𑀺𑀓𑀢𑀺𑀁 𑀧𑀘𑀸𑀧𑁂𑀢𑁆𑀯𑀸 𑀔𑀸𑀤𑀦𑁆𑀢𑀸 𑀯𑀺𑀘𑀭𑀺𑀲𑁆𑀲𑀸𑀫𑀸’’𑀢𑀺. 𑀅𑀧𑀭𑁄𑀧𑀺 𑀏𑀯𑀫𑀸𑀳 𑁋 ‘‘𑀲𑀫𑁆𑀫𑀸 𑀫𑀬𑀁 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦 𑀓𑀭𑀺𑀲𑁆𑀲𑀸𑀫, ‘𑀥𑀦𑀁 𑀤𑀲𑁆𑀲𑀸𑀫𑀸’𑀢𑀺 𑀯𑀼𑀢𑁆𑀢𑁂 𑀅𑀦𑀺𑀘𑁆𑀙𑀫𑀸𑀦𑀸 𑀇𑀢𑁆𑀣𑀻 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀥𑀦𑁂𑀦 𑀧𑀮𑁄𑀪𑁂𑀢𑁆𑀯𑀸 𑀧𑀸𑀭𑀤𑀸𑀭𑀺𑀓𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. ‘‘𑀲𑀸𑀥𑀼, 𑀲𑀸𑀥𑀽’’𑀢𑀺 𑀲𑀩𑁆𑀩𑁂𑀯 𑀢𑀲𑁆𑀲 𑀓𑀣𑀸𑀬 𑀅𑀝𑁆𑀞𑀁𑀲𑀼.

𑀢𑁂 𑀢𑀢𑁄 𑀧𑀝𑁆𑀞𑀸𑀬 𑀅𑀪𑀺𑀭𑀽𑀧𑀸𑀦𑀁 𑀇𑀢𑁆𑀣𑀻𑀦𑀁 𑀥𑀦𑀁 𑀧𑁂𑀲𑁂𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀸𑀭𑀤𑀸𑀭𑀺𑀓𑀓𑀫𑁆𑀫𑀁 𑀓𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀅𑀯𑀻𑀘𑀺𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸. 𑀢𑁂 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀢𑀢𑁆𑀣 𑀓𑀸𑀮𑀁 𑀓𑀢𑁆𑀯𑀸 𑀧𑀓𑁆𑀓𑀸𑀯𑀲𑁂𑀲𑁂𑀦 𑀲𑀝𑁆𑀞𑀺𑀬𑁄𑀚𑀦𑀺𑀓𑀸𑀬 𑀮𑁄𑀳𑀓𑀼𑀫𑁆𑀪𑀺𑀬𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀺𑀁𑀲𑀸𑀬 𑀯𑀲𑁆𑀲𑀲𑀳𑀲𑁆𑀲𑁂𑀳𑀺 𑀳𑁂𑀝𑁆𑀞𑀺𑀫𑀢𑀮𑀁 𑀧𑀢𑁆𑀯𑀸 𑀧𑀼𑀦𑀧𑀺 𑀢𑀺𑀁𑀲𑀸𑀬 𑀯𑀲𑁆𑀲𑀲𑀳𑀲𑁆𑀲𑁂𑀳𑀺 𑀮𑁄𑀳𑀓𑀼𑀫𑁆𑀪𑀺𑀫𑀼𑀔𑀁 𑀧𑀢𑁆𑀯𑀸 𑀏𑀓𑁂𑀓𑀁 𑀕𑀸𑀣𑀁 𑀯𑀢𑁆𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀏𑀓𑁂𑀓𑀁 𑀅𑀓𑁆𑀔𑀭𑀁 𑀯𑀢𑁆𑀯𑀸 𑀧𑀼𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸, 𑀮𑁄𑀳𑀓𑀼𑀫𑁆𑀪𑀺𑀫𑁂𑀯 𑀧𑀯𑀺𑀝𑁆𑀞𑀸. ‘‘𑀯𑀤𑁂𑀳𑀺, 𑀫𑀳𑀸𑀭𑀸𑀚, 𑀧𑀞𑀫𑀁 𑀢𑁂 𑀓𑀺𑀁 𑀲𑀤𑁆𑀤𑁄 𑀦𑀸𑀫 𑀲𑀼𑀢𑁄’’𑀢𑀺? ‘‘𑀤𑀼-𑀇𑀢𑀺, 𑀪𑀦𑁆𑀢𑁂’’𑀢𑀺. 𑀲𑀢𑁆𑀣𑀸 𑀢𑁂𑀦 𑀅𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀕𑀸𑀣𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳 𑁋

‘‘𑀤𑀼𑀚𑁆𑀚𑀻𑀯𑀺𑀢𑀫𑀚𑀻𑀯𑀺𑀫𑁆𑀳, 𑀬𑁂 𑀲𑀦𑁆𑀢𑁂 𑀦 𑀤𑀤𑀫𑁆𑀳𑀲𑁂;

𑀯𑀺𑀚𑁆𑀚𑀫𑀸𑀦𑁂𑀲𑀼 𑀪𑁄𑀕𑁂𑀲𑀼, 𑀤𑀻𑀧𑀁 𑀦𑀸𑀓𑀫𑁆𑀳 𑀅𑀢𑁆𑀢𑀦𑁄’’𑀢𑀺. (𑀚𑀸. 𑁧.𑁪.𑁫𑁩; 𑀧𑁂. 𑀯. 𑁮𑁦𑁪);

𑀅𑀣 𑀭𑀜𑁆𑀜𑁄 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀁 𑀧𑀓𑀸𑀲𑁂𑀢𑁆𑀯𑀸, ‘‘𑀓𑀺𑀁 𑀢𑁂, 𑀫𑀳𑀸𑀭𑀸𑀚, 𑀤𑀼𑀢𑀺𑀬𑀲𑀤𑁆𑀤𑁄 𑀢𑀢𑀺𑀬𑀲𑀤𑁆𑀤𑁄 𑀘𑀢𑀼𑀢𑁆𑀣𑀲𑀤𑁆𑀤𑁄 𑀲𑀼𑀢𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀯𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀅𑀯𑀲𑁂𑀲𑀁 𑀧𑀭𑀺𑀧𑀽𑀭𑁂𑀦𑁆𑀢𑁄 𑁋

‘‘𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑀩𑁆𑀩𑀲𑁄;

𑀦𑀺𑀭𑀬𑁂 𑀧𑀘𑁆𑀘𑀫𑀸𑀦𑀸𑀦𑀁, 𑀓𑀤𑀸 𑀅𑀦𑁆𑀢𑁄 𑀪𑀯𑀺𑀲𑁆𑀲𑀢𑀺.

‘‘𑀦𑀢𑁆𑀣𑀺 𑀅𑀦𑁆𑀢𑁄 𑀓𑀼𑀢𑁄 𑀅𑀦𑁆𑀢𑁄, 𑀦 𑀅𑀦𑁆𑀢𑁄 𑀧𑀝𑀺𑀤𑀺𑀲𑁆𑀲𑀢𑀺;

𑀢𑀤𑀸 𑀳𑀺 𑀧𑀓𑀢𑀁 𑀧𑀸𑀧𑀁, 𑀫𑀫 𑀢𑀼𑀬𑁆𑀳𑀜𑁆𑀘 𑀫𑀸𑀭𑀺𑀲𑀸.

‘‘𑀲𑁄𑀳𑀁 𑀦𑀽𑀦 𑀇𑀢𑁄 𑀕𑀦𑁆𑀢𑁆𑀯𑀸, 𑀬𑁄𑀦𑀺𑀁 𑀮𑀤𑁆𑀥𑀸𑀦 𑀫𑀸𑀦𑀼𑀲𑀺𑀁;

𑀯𑀤𑀜𑁆𑀜𑀽 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀓𑀸𑀳𑀸𑀫𑀺 𑀓𑀼𑀲𑀮𑀁 𑀩𑀳𑀼’’𑀦𑁆𑀢𑀺. (𑀚𑀸. 𑁧.𑁪.𑁫𑁪-𑁫𑁬; 𑀧𑁂. 𑀯. 𑁮𑁦𑁨, 𑁮𑁦𑁩, 𑁮𑁦𑁫) 𑁋

𑀧𑀝𑀺𑀧𑀸𑀝𑀺𑀬𑀸 𑀇𑀫𑀸 𑀕𑀸𑀣𑀸 𑀯𑀢𑁆𑀯𑀸 𑀢𑀸𑀲𑀁 𑀅𑀢𑁆𑀣𑀁 𑀧𑀓𑀸𑀲𑁂𑀢𑁆𑀯𑀸 ‘‘𑀇𑀢𑀺 𑀔𑁄, 𑀫𑀳𑀸𑀭𑀸𑀚, 𑀢𑁂 𑀘𑀢𑁆𑀢𑀸𑀭𑁄 𑀚𑀦𑀸 𑀏𑀓𑁂𑀓𑀁 𑀕𑀸𑀣𑀁 𑀯𑀢𑁆𑀢𑀼𑀓𑀸𑀫𑀸𑀧𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀏𑀓𑀓𑀫𑁂𑀯 𑀅𑀓𑁆𑀔𑀭𑀁 𑀯𑀢𑁆𑀯𑀸 𑀧𑀼𑀦 𑀮𑁄𑀳𑀓𑀼𑀫𑁆𑀪𑀺𑀫𑁂𑀯 𑀧𑀯𑀺𑀝𑁆𑀞𑀸’’𑀢𑀺 𑀆𑀳.

𑀭𑀜𑁆𑀜𑀸 𑀓𑀺𑀭 𑀧𑀲𑁂𑀦𑀤𑀺𑀓𑁄𑀲𑀮𑁂𑀦 𑀢𑀲𑁆𑀲 𑀲𑀤𑁆𑀤𑀲𑁆𑀲 𑀲𑀼𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑁂 𑀳𑁂𑀝𑁆𑀞𑀸 𑀪𑀲𑁆𑀲𑀦𑁆𑀢𑀺 𑀏𑀯, 𑀅𑀚𑁆𑀚𑀸𑀧𑀺 𑀏𑀓𑀁 𑀯𑀲𑁆𑀲𑀲𑀳𑀲𑁆𑀲𑀁 𑀦𑀸𑀢𑀺𑀓𑁆𑀓𑀫𑀦𑁆𑀢𑀺. 𑀭𑀜𑁆𑀜𑁄 𑀢𑀁 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀫𑀳𑀸𑀲𑀁𑀯𑁂𑀕𑁄 𑀉𑀧𑁆𑀧𑀚𑁆𑀚𑀺. 𑀲𑁄 ‘‘𑀪𑀸𑀭𑀺𑀬𑀁 𑀯𑀢𑀺𑀤𑀁 𑀧𑀸𑀭𑀤𑀸𑀭𑀺𑀓𑀓𑀫𑁆𑀫𑀁 𑀦𑀸𑀫, 𑀏𑀓𑀁 𑀓𑀺𑀭 𑀩𑀼𑀤𑁆𑀥𑀦𑁆𑀢𑀭𑀁 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀢𑀢𑁄 𑀘𑀼𑀢𑀸 𑀲𑀝𑁆𑀞𑀺𑀬𑁄𑀚𑀦𑀺𑀓𑀸𑀬 𑀮𑁄𑀳𑀓𑀼𑀫𑁆𑀪𑀺𑀬𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀺𑀢𑁆𑀯𑀸 𑀏𑀯𑀫𑁆𑀧𑀺 𑀦𑁂𑀲𑀁 𑀤𑀼𑀓𑁆𑀔𑀸 𑀫𑀼𑀘𑁆𑀘𑀦𑀓𑀸𑀮𑁄 𑀦 𑀧𑀜𑁆𑀜𑀸𑀬𑀢𑀺, 𑀅𑀳𑀫𑁆𑀧𑀺 𑀧𑀭𑀤𑀸𑀭𑁂 𑀲𑀺𑀦𑁂𑀳𑀁 𑀓𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀦𑀺𑀤𑁆𑀤𑀁 𑀦 𑀮𑀪𑀺𑀁, 𑀇𑀤𑀸𑀦𑀺 𑀇𑀢𑁄 𑀧𑀝𑁆𑀞𑀸𑀬 𑀧𑀭𑀤𑀸𑀭𑁂 𑀫𑀸𑀦𑀲𑀁 𑀦 𑀩𑀦𑁆𑀥𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀣𑀸𑀕𑀢𑀁 𑀆𑀳 𑁋 ‘‘𑀪𑀦𑁆𑀢𑁂, 𑀅𑀚𑁆𑀚 𑀫𑁂 𑀭𑀢𑁆𑀢𑀺𑀬𑀸 𑀤𑀻𑀖𑀪𑀸𑀯𑁄 𑀜𑀸𑀢𑁄’’𑀢𑀺. 𑀲𑁄𑀧𑀺 𑀧𑀼𑀭𑀺𑀲𑁄 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀮𑀤𑁆𑀥𑁄 𑀫𑁂 𑀩𑀮𑀯𑀧𑁆𑀧𑀘𑁆𑀘𑀬𑁄’’𑀢𑀺 𑀲𑀢𑁆𑀣𑀸𑀭𑀁 𑀆𑀳 𑁋 ‘‘𑀪𑀦𑁆𑀢𑁂, 𑀭𑀜𑁆𑀜𑀸 𑀢𑀸𑀯 𑀅𑀚𑁆𑀚 𑀭𑀢𑁆𑀢𑀺𑀬𑀸 𑀤𑀻𑀖𑀪𑀸𑀯𑁄 𑀜𑀸𑀢𑁄, 𑀅𑀳𑀁 𑀧𑀦 𑀳𑀺𑀬𑁆𑀬𑁄 𑀲𑀬𑀫𑁂𑀯 𑀬𑁄𑀚𑀦𑀲𑁆𑀲 𑀤𑀻𑀖𑀪𑀸𑀯𑀁 𑀅𑀜𑁆𑀜𑀸𑀲𑀺’’𑀦𑁆𑀢𑀺. 𑀲𑀢𑁆𑀣𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀣𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 ‘‘𑀏𑀓𑀘𑁆𑀘𑀲𑁆𑀲 𑀭𑀢𑁆𑀢𑀺 𑀤𑀻𑀖𑀸 𑀳𑁄𑀢𑀺, 𑀏𑀓𑀘𑁆𑀘𑀲𑁆𑀲 𑀬𑁄𑀚𑀦𑀁 𑀤𑀻𑀖𑀁 𑀳𑁄𑀢𑀺, 𑀩𑀸𑀮𑀲𑁆𑀲 𑀧𑀦 𑀲𑀁𑀲𑀸𑀭𑁄 𑀤𑀻𑀖𑁄 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁦. ‘‘𑀤𑀻𑀖𑀸 𑀚𑀸𑀕𑀭𑀢𑁄 𑀭𑀢𑁆𑀢𑀺, 𑀤𑀻𑀖𑀁 𑀲𑀦𑁆𑀢𑀲𑁆𑀲 𑀬𑁄𑀚𑀦𑀁;

𑀤𑀻𑀖𑁄 𑀩𑀸𑀮𑀸𑀦 𑀲𑀁𑀲𑀸𑀭𑁄, 𑀲𑀤𑁆𑀥𑀫𑁆𑀫𑀁 𑀅𑀯𑀺𑀚𑀸𑀦𑀢’’𑀦𑁆𑀢𑀺.

𑀢𑀢𑁆𑀣 𑀤𑀻𑀖𑀸𑀢𑀺 𑀭𑀢𑁆𑀢𑀺 𑀦𑀸𑀫𑁂𑀲𑀸 𑀢𑀺𑀬𑀸𑀫𑀫𑀢𑁆𑀢𑀸𑀯, 𑀚𑀸𑀕𑀭𑀦𑁆𑀢𑀲𑁆𑀲 𑀧𑀦 𑀤𑀻𑀖𑀸 𑀳𑁄𑀢𑀺, 𑀤𑁆𑀯𑀺𑀕𑀼𑀡𑀢𑀺𑀕𑀼𑀡𑀸 𑀯𑀺𑀬 𑀳𑀼𑀢𑁆𑀯𑀸 𑀔𑀸𑀬𑀢𑀺. 𑀢𑀲𑁆𑀲𑀸 𑀤𑀻𑀖𑀪𑀸𑀯𑀁 𑀅𑀢𑁆𑀢𑀸𑀦𑀁 𑀫𑀗𑁆𑀓𑀼𑀡𑀲𑀗𑁆𑀖𑀲𑁆𑀲 𑀪𑀢𑁆𑀢𑀁 𑀓𑀢𑁆𑀯𑀸 𑀬𑀸𑀯 𑀲𑀽𑀭𑀺𑀬𑀼𑀕𑁆𑀕𑀫𑀦𑀸 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀲𑁂𑀫𑀸𑀦𑁄 𑀫𑀳𑀸𑀓𑀼𑀲𑀻𑀢𑁄𑀧𑀺, 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀺𑀭𑀺𑀲𑀬𑀦𑁂 𑀲𑀬𑀫𑀸𑀦𑁄 𑀓𑀸𑀫𑀪𑁄𑀕𑀻𑀧𑀺 𑀦 𑀚𑀸𑀦𑀸𑀢𑀺, 𑀲𑀩𑁆𑀩𑀭𑀢𑁆𑀢𑀺𑀁 𑀧𑀦 𑀧𑀥𑀸𑀦𑀁 𑀧𑀤𑀳𑀦𑁆𑀢𑁄 𑀬𑁄𑀕𑀸𑀯𑀘𑀭𑁄 𑀘, 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑁄 𑀥𑀫𑁆𑀫𑀓𑀣𑀺𑀓𑁄 𑀘, 𑀆𑀲𑀦𑀲𑀫𑀻𑀧𑁂 𑀞𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀘, 𑀲𑀻𑀲𑀭𑁄𑀕𑀸𑀤𑀺𑀨𑀼𑀝𑁆𑀞𑁄 𑀯𑀸 𑀳𑀢𑁆𑀣𑀧𑀸𑀤𑀘𑁆𑀙𑁂𑀤𑀦𑀸𑀤𑀺𑀁 𑀧𑀢𑁆𑀢𑁄 𑀯𑀸 𑀯𑁂𑀤𑀦𑀸𑀪𑀺𑀪𑀽𑀢𑁄 𑀘, 𑀭𑀢𑁆𑀢𑀺𑀁 𑀫𑀕𑁆𑀕𑀧𑀝𑀺𑀧𑀦𑁆𑀦𑁄 𑀅𑀤𑁆𑀥𑀺𑀓𑁄 𑀘 𑀚𑀸𑀦𑀸𑀢𑀺. 𑀬𑁄𑀚𑀦𑀦𑁆𑀢𑀺 𑀬𑁄𑀚𑀦𑀫𑁆𑀧𑀺 𑀘𑀢𑀼𑀕𑀸𑀯𑀼𑀢𑀫𑀢𑁆𑀢𑀫𑁂𑀯, 𑀲𑀦𑁆𑀢𑀲𑁆𑀲 𑀧𑀦 𑀓𑀺𑀮𑀦𑁆𑀢𑀲𑁆𑀲 𑀤𑀻𑀖𑀁 𑀳𑁄𑀢𑀺, 𑀤𑁆𑀯𑀺𑀕𑀼𑀡𑀢𑀺𑀕𑀼𑀡𑀁 𑀯𑀺𑀬 𑀔𑀸𑀬𑀢𑀺. 𑀲𑀓𑀮𑀤𑀺𑀯𑀲𑀜𑁆𑀳𑀺 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀓𑀺𑀮𑀦𑁆𑀢𑁄 𑀧𑀝𑀺𑀧𑀣𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀧𑀼𑀭𑀢𑁄 𑀕𑀸𑀫𑁄 𑀓𑀻𑀯𑀤𑀽𑀭𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑁄𑀚𑀦’’𑀦𑁆𑀢𑀺 𑀯𑀼𑀢𑁆𑀢𑁂 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀅𑀧𑀭𑀫𑁆𑀧𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦𑀸𑀧𑀺 ‘‘𑀬𑁄𑀚𑀦’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀼𑀦 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀅𑀧𑀭𑀫𑁆𑀧𑀺 𑀧𑀼𑀘𑁆𑀙𑀢𑀺. 𑀲𑁄𑀧𑀺 ‘‘𑀬𑁄𑀚𑀦’’𑀦𑁆𑀢𑀺 𑀯𑀤𑀢𑀺. 𑀲𑁄 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀸 𑀬𑁄𑀚𑀦𑀦𑁆𑀢𑁂𑀯 𑀯𑀤𑀦𑁆𑀢𑀺, 𑀤𑀻𑀖𑀁 𑀯𑀢𑀺𑀤𑀁 𑀬𑁄𑀚𑀦𑀁, 𑀏𑀓𑀬𑁄𑀚𑀦𑀁 𑀤𑁆𑀯𑁂 𑀢𑀻𑀡𑀺 𑀬𑁄𑀚𑀦𑀸𑀦𑀺 𑀯𑀺𑀬 𑀫𑀜𑁆𑀜𑁂𑀢𑀺. 𑀩𑀸𑀮𑀸𑀦𑀦𑁆𑀢𑀺 𑀇𑀥𑀮𑁄𑀓𑀧𑀭𑀮𑁄𑀓𑀢𑁆𑀣𑀁 𑀧𑀦 𑀅𑀚𑀸𑀦𑀦𑁆𑀢𑀸𑀦𑀁 𑀩𑀸𑀮𑀸𑀦𑀁 𑀲𑀁𑀲𑀸𑀭𑀯𑀝𑁆𑀝𑀲𑁆𑀲 𑀧𑀭𑀺𑀬𑀦𑁆𑀢𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀬𑀁 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀪𑁂𑀤𑀁 𑀲𑀤𑁆𑀥𑀫𑁆𑀫𑀁 𑀜𑀢𑁆𑀯𑀸 𑀲𑀁𑀲𑀸𑀭𑀲𑁆𑀲 𑀅𑀦𑁆𑀢𑀁 𑀓𑀭𑁄𑀦𑁆𑀢𑀺, 𑀢𑀁 𑀲𑀤𑁆𑀥𑀫𑁆𑀫𑀁 𑀅𑀯𑀺𑀚𑀸𑀦𑀢𑀁 𑀲𑀁𑀲𑀸𑀭𑁄 𑀤𑀻𑀖𑁄 𑀦𑀸𑀫 𑀳𑁄𑀢𑀺. 𑀲𑁄 𑀳𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀏𑀯 𑀤𑀻𑀖𑁄 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀅𑀦𑀫𑀢𑀕𑁆𑀕𑁄𑀬𑀁, 𑀪𑀺𑀓𑁆𑀔𑀯𑁂, 𑀲𑀁𑀲𑀸𑀭𑁄, 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻’’𑀢𑀺 (𑀲𑀁. 𑀦𑀺. 𑁨.𑁧𑁨𑁪). 𑀩𑀸𑀮𑀸𑀦𑀁 𑀧𑀦 𑀧𑀭𑀺𑀬𑀦𑁆𑀢𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀅𑀢𑀺𑀤𑀻𑀖𑁄𑀬𑁂𑀯𑀸𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀲𑁄 𑀧𑀼𑀭𑀺𑀲𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑁄, 𑀅𑀜𑁆𑀜𑁂𑀧𑀺 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀢𑁆𑀢𑀸. 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀚𑀸𑀢𑀸𑀢𑀺.

𑀭𑀸𑀚𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄𑀬𑁂𑀯 𑀢𑁂 𑀲𑀢𑁆𑀢𑁂 𑀩𑀦𑁆𑀥𑀦𑀸 𑀫𑁄𑀘𑁂𑀲𑀺. 𑀢𑀢𑁆𑀣 𑀇𑀢𑁆𑀣𑀺𑀧𑀼𑀭𑀺𑀲𑀸 𑀩𑀦𑁆𑀥𑀦𑀸 𑀫𑀼𑀢𑁆𑀢𑀸 𑀲𑀻𑀲𑀁 𑀦𑁆𑀳𑀢𑁆𑀯𑀸 𑀲𑀓𑀸𑀦𑀺 𑀕𑁂𑀳𑀸𑀦𑀺 𑀕𑀘𑁆𑀙𑀦𑁆𑀢𑀸 ‘‘𑀘𑀺𑀭𑀁 𑀚𑀻𑀯𑀢𑀼 𑀦𑁄, 𑀅𑀬𑁆𑀬𑀸, 𑀫𑀮𑁆𑀮𑀺𑀓𑀸 𑀤𑁂𑀯𑀻, 𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀪𑀺𑀫𑁆𑀳𑀸’’𑀢𑀺 𑀫𑀮𑁆𑀮𑀺𑀓𑀸𑀬 𑀕𑀼𑀡𑀓𑀣𑀁 𑀓𑀣𑀬𑀺𑀁𑀲𑀼. 𑀲𑀸𑀬𑀦𑁆𑀳𑀲𑀫𑀬𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀅𑀳𑁄 𑀧𑀡𑁆𑀟𑀺𑀢𑀸 𑀯𑀢𑀸𑀬𑀁, 𑀫𑀮𑁆𑀮𑀺𑀓𑀸, 𑀅𑀢𑁆𑀢𑀦𑁄 𑀧𑀜𑁆𑀜𑀁 𑀦𑀺𑀲𑁆𑀲𑀸𑀬 𑀏𑀢𑁆𑀢𑀓𑀲𑁆𑀲 𑀚𑀦𑀲𑁆𑀲 𑀚𑀻𑀯𑀺𑀢𑀤𑀸𑀦𑀁 𑀅𑀤𑀸𑀲𑀻’’𑀢𑀺. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀓𑀣𑀁 𑀲𑀼𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀥𑀫𑁆𑀫𑀲𑀪𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀦, 𑀪𑀺𑀓𑁆𑀔𑀯𑁂, 𑀫𑀮𑁆𑀮𑀺𑀓𑀸, 𑀇𑀤𑀸𑀦𑁂𑀯 𑀅𑀢𑁆𑀢𑀦𑁄 𑀧𑀜𑁆𑀜𑀁 𑀦𑀺𑀲𑁆𑀲𑀸𑀬 𑀫𑀳𑀸𑀚𑀦𑀲𑁆𑀲 𑀚𑀻𑀯𑀺𑀢𑀤𑀸𑀦𑀁 𑀤𑁂𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀤𑀸𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀧𑀓𑀸𑀲𑀦𑁆𑀢𑁄 𑀅𑀢𑀻𑀢𑀁 𑀆𑀳𑀭𑀺 𑁋

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀏𑀓𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀸𑀬 𑀤𑁂𑀯𑀢𑀸𑀬 𑀆𑀬𑀸𑀘𑀺 𑁋 ‘‘𑀲𑀸𑀫𑀺 𑀤𑁂𑀯𑀭𑀸𑀚, 𑀇𑀫𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑁂 𑀏𑀓𑀲𑀢𑀭𑀸𑀚𑀸𑀦𑁄 𑀏𑀓𑀲𑀢𑀅𑀕𑁆𑀕𑀫𑀳𑁂𑀲𑀺𑀬𑁄, 𑀲𑀘𑀸𑀳𑀁 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀭𑀚𑁆𑀚𑀁 𑀮𑀪𑀺𑀲𑁆𑀲𑀸𑀫𑀻, 𑀏𑀢𑁂𑀲𑀁 𑀕𑀮𑀮𑁄𑀳𑀺𑀢𑁂𑀦 𑀩𑀮𑀺𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀺𑀢𑀭𑀺 𑀓𑀸𑀮𑀓𑀢𑁂 𑀭𑀚𑁆𑀚𑀁 𑀧𑀢𑁆𑀯𑀸 ‘‘𑀤𑁂𑀯𑀢𑀸𑀬 𑀫𑁂 𑀆𑀦𑀼𑀪𑀸𑀯𑁂𑀦 𑀭𑀚𑁆𑀚𑀁 𑀧𑀢𑁆𑀢𑀁, 𑀩𑀮𑀺𑀫𑀲𑁆𑀲𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀁 𑀭𑀸𑀚𑀸𑀦𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀅𑀧𑀭𑀫𑁆𑀧𑀺 𑀅𑀧𑀭𑀫𑁆𑀧𑀻𑀢𑀺 𑀲𑀩𑁆𑀩𑁂 𑀭𑀸𑀚𑀸𑀦𑁄 𑀅𑀢𑁆𑀢𑀦𑁄 𑀯𑀲𑁂 𑀓𑀢𑁆𑀯𑀸 𑀲𑀤𑁆𑀥𑀺𑀁 𑀅𑀕𑁆𑀕𑀫𑀳𑁂𑀲𑀻𑀳𑀺 𑀆𑀤𑀸𑀬 𑀕𑀘𑁆𑀙𑀦𑁆𑀢𑁄 𑀉𑀕𑁆𑀕𑀲𑁂𑀦𑀲𑁆𑀲 𑀦𑀸𑀫 𑀲𑀩𑁆𑀩𑀓𑀦𑀺𑀝𑁆𑀞𑀲𑁆𑀲 𑀭𑀜𑁆𑀜𑁄 𑀥𑀫𑁆𑀫𑀤𑀺𑀦𑁆𑀦𑀸 𑀦𑀸𑀫 𑀅𑀕𑁆𑀕𑀫𑀳𑁂𑀲𑀻 𑀕𑀭𑀼𑀕𑀩𑁆𑀪𑀸, 𑀢𑀁 𑀑𑀳𑀸𑀬 𑀆𑀕𑀦𑁆𑀢𑁆𑀯𑀸 ‘‘𑀏𑀢𑁆𑀢𑀓𑀚𑀦𑀁 𑀯𑀺𑀲𑀧𑀸𑀦𑀓𑀁 𑀧𑀸𑀬𑁂𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀭𑀼𑀓𑁆𑀔𑀫𑀽𑀮𑀁 𑀲𑁄𑀥𑀸𑀧𑁂𑀲𑀺. 𑀤𑁂𑀯𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀭𑀸𑀚𑀸 𑀏𑀢𑁆𑀢𑀓𑁂 𑀭𑀸𑀚𑀸𑀦𑁄 𑀕𑀡𑁆𑀳𑀦𑁆𑀢𑁄 ‘𑀫𑀁 𑀦𑀺𑀲𑁆𑀲𑀸𑀬 𑀕𑀳𑀺𑀢𑀸 𑀇𑀫𑁂’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀲𑀁 𑀕𑀮𑀮𑁄𑀳𑀺𑀢𑁂𑀦 𑀫𑀬𑁆𑀳𑀁 𑀩𑀮𑀺𑀁 𑀓𑀸𑀢𑀼𑀓𑀸𑀫𑁄, 𑀲𑀘𑁂 𑀧𑀦𑀸𑀬𑀁 𑀏𑀢𑁂 𑀖𑀸𑀢𑁂𑀲𑁆𑀲𑀢𑀺, 𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀯𑀁𑀲𑁄 𑀉𑀧𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀺, 𑀭𑀼𑀓𑁆𑀔𑀫𑀽𑀮𑁂𑀧𑀺, 𑀫𑁂 𑀅𑀲𑀼𑀘𑀺 𑀪𑀯𑀺𑀲𑁆𑀲𑀢𑀺, 𑀲𑀓𑁆𑀔𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀏𑀢𑀁 𑀦𑀺𑀯𑀸𑀭𑁂𑀢𑀼’’𑀦𑁆𑀢𑀺. 𑀲𑀸 𑀉𑀧𑀥𑀸𑀭𑁂𑀦𑁆𑀢𑀻 ‘‘𑀦𑀸𑀳𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀜𑀢𑁆𑀯𑀸 𑀅𑀜𑁆𑀜𑀫𑁆𑀧𑀺 𑀤𑁂𑀯𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀢𑁆𑀯𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀆𑀳. 𑀢𑀸𑀬𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀸 𑀅𑀜𑁆𑀜𑀫𑁆𑀧𑀺 𑀅𑀜𑁆𑀜𑀫𑁆𑀧𑀻𑀢𑀺 𑀏𑀯𑀁 𑀲𑀓𑀮𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀬𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀸𑀳𑀺𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀸 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀽𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀫𑀬𑀁 𑀦 𑀲𑀓𑁆𑀓𑁄𑀫, 𑀅𑀫𑁆𑀳𑀸𑀓𑀁 𑀧𑀦 𑀭𑀸𑀚𑀸 𑀅𑀫𑁆𑀳𑁂𑀳𑀺 𑀧𑀼𑀜𑁆𑀜𑁂𑀦 𑀘 𑀧𑀜𑁆𑀜𑀸𑀬 𑀘 𑀯𑀺𑀲𑀺𑀝𑁆𑀞𑁄, 𑀢𑀁 𑀧𑀼𑀘𑁆𑀙𑀸’’𑀢𑀺 𑀢𑁂𑀳𑀺𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀓𑀸𑀮𑁂 𑀲𑀓𑁆𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸, ‘‘𑀤𑁂𑀯, 𑀢𑀼𑀫𑁆𑀳𑁂𑀲𑀼 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀁 𑀆𑀧𑀦𑁆𑀦𑁂𑀲𑀼 𑀔𑀢𑁆𑀢𑀺𑀬𑀯𑀁𑀲𑁄 𑀉𑀧𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀧𑀝𑀺𑀲𑀭𑀡𑀁 𑀳𑁄𑀣𑀸’’𑀢𑀺 𑀆𑀳. 𑀲𑀓𑁆𑀓𑁄 ‘‘𑀅𑀳𑀫𑁆𑀧𑀺 𑀦𑀁 𑀧𑀝𑀺𑀩𑀸𑀳𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀉𑀧𑀸𑀬𑀁 𑀧𑀦 𑀢𑁂 𑀯𑀓𑁆𑀔𑀸𑀫𑀻’’𑀢𑀺 𑀯𑀢𑁆𑀯𑀸 𑀉𑀧𑀸𑀬𑀁 𑀆𑀘𑀺𑀓𑁆𑀔𑀺 𑁋 ‘‘𑀕𑀘𑁆𑀙, 𑀢𑁆𑀯𑀁 𑀭𑀜𑁆𑀜𑁄 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀭𑀢𑁆𑀢𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀭𑀼𑀓𑁆𑀔𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀫𑀦𑀸𑀓𑀸𑀭𑀁 𑀤𑀲𑁆𑀲𑁂𑀳𑀺. 𑀅𑀣 𑀢𑀁 𑀭𑀸𑀚𑀸 ‘𑀤𑁂𑀯𑀢𑀸 𑀕𑀘𑁆𑀙𑀢𑀺, 𑀦𑀺𑀯𑀢𑁆𑀢𑀸𑀧𑁂𑀲𑁆𑀲𑀸𑀫𑀺 𑀦’𑀦𑁆𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀬𑀸𑀘𑀺𑀲𑁆𑀲𑀢𑀺. 𑀅𑀣 𑀦𑀁 𑀯𑀤𑁂𑀬𑁆𑀬𑀸𑀲𑀺 ‘𑀢𑁆𑀯𑀁 𑀏𑀓𑀲𑀢𑀭𑀸𑀚𑀸𑀦𑁄 𑀲𑀤𑁆𑀥𑀺𑀁 𑀅𑀕𑁆𑀕𑀫𑀳𑁂𑀲𑀻𑀳𑀺 𑀆𑀦𑁂𑀢𑁆𑀯𑀸 𑀢𑁂𑀲𑀁 𑀕𑀮𑀮𑁄𑀳𑀺𑀢𑁂𑀦 𑀩𑀮𑀺𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀫𑀬𑁆𑀳𑀁 𑀆𑀬𑀸𑀘𑀺𑀢𑁆𑀯𑀸 𑀉𑀕𑁆𑀕𑀲𑁂𑀦𑀲𑁆𑀲 𑀭𑀜𑁆𑀜𑁄 𑀤𑁂𑀯𑀺𑀁 𑀑𑀳𑀸𑀬 𑀆𑀕𑀢𑁄, 𑀦𑀸𑀳𑀁 𑀢𑀸𑀤𑀺𑀲𑀲𑁆𑀲 𑀫𑀼𑀲𑀸𑀯𑀸𑀤𑀲𑁆𑀲 𑀩𑀮𑀺𑀁 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺, ‘‘𑀏𑀯𑀁 𑀓𑀺𑀭 𑀯𑀼𑀢𑁆𑀢𑁂 𑀭𑀸𑀚𑀸 𑀢𑀁 𑀆𑀡𑀸𑀧𑁂𑀲𑁆𑀲𑀢𑀺, 𑀲𑀸 𑀭𑀜𑁆𑀜𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀏𑀢𑁆𑀢𑀓𑀲𑁆𑀲 𑀚𑀦𑀲𑁆𑀲 𑀚𑀻𑀯𑀺𑀢𑀤𑀸𑀦𑀁 𑀤𑀲𑁆𑀲𑀢𑀻’’𑀢𑀺. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀲𑀓𑁆𑀓𑁄 𑀤𑁂𑀯𑀢𑀸𑀬 𑀇𑀫𑀁 𑀉𑀧𑀸𑀬𑀁 𑀆𑀘𑀺𑀓𑁆𑀔𑀺. 𑀤𑁂𑀯𑀢𑀸 𑀢𑀣𑀸 𑀅𑀓𑀸𑀲𑀺.

𑀭𑀸𑀚𑀸𑀧𑀺 𑀢𑀁 𑀆𑀡𑀸𑀧𑁂𑀲𑀺. 𑀲𑀸 𑀆𑀕𑀦𑁆𑀢𑁆𑀯𑀸 𑀢𑁂𑀲𑀁 𑀭𑀸𑀚𑀽𑀦𑀁 𑀧𑀭𑀺𑀬𑀦𑁆𑀢𑁂 𑀦𑀺𑀲𑀺𑀦𑁆𑀦𑀫𑁆𑀧𑀺 𑀅𑀢𑁆𑀢𑀦𑁄 𑀭𑀸𑀚𑀸𑀦𑀫𑁂𑀯 𑀯𑀦𑁆𑀤𑀺. 𑀭𑀸𑀚𑀸 ‘‘𑀫𑀬𑀺 𑀲𑀩𑁆𑀩𑀭𑀸𑀚𑀚𑁂𑀝𑁆𑀞𑀓𑁂 𑀞𑀺𑀢𑁂 𑀲𑀩𑁆𑀩𑀓𑀦𑀺𑀝𑁆𑀞𑀁 𑀅𑀢𑁆𑀢𑀦𑁄 𑀲𑀸𑀫𑀺𑀓𑀁 𑀯𑀦𑁆𑀤𑀢𑀻’’𑀢𑀺 𑀢𑀲𑁆𑀲𑀸 𑀓𑀼𑀚𑁆𑀛𑀺. 𑀅𑀣 𑀦𑀁 𑀲𑀸 𑀆𑀳 𑁋 ‘‘𑀓𑀺𑀁 𑀫𑀬𑁆𑀳𑀁 𑀢𑀬𑀺 𑀧𑀝𑀺𑀩𑀤𑁆𑀥𑀁, 𑀅𑀬𑀁 𑀧𑀦 𑀫𑁂 𑀲𑀸𑀫𑀺𑀓𑁄 𑀇𑀲𑁆𑀲𑀭𑀺𑀬𑀲𑁆𑀲 𑀤𑀸𑀬𑀓𑁄, 𑀇𑀫𑀁 𑀅𑀯𑀦𑁆𑀤𑀺𑀢𑁆𑀯𑀸 𑀓𑀲𑁆𑀫𑀸 𑀢𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺? 𑀭𑀼𑀓𑁆𑀔𑀤𑁂𑀯𑀢𑀸 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀫𑀳𑀸𑀚𑀦𑀲𑁆𑀲 ‘‘𑀏𑀯𑀁, 𑀪𑀤𑁆𑀤𑁂, 𑀏𑀯𑀁, 𑀪𑀤𑁆𑀤𑁂’’𑀢𑀺 𑀯𑀢𑁆𑀯𑀸 𑀢𑀁 𑀧𑀼𑀧𑁆𑀨𑀫𑀼𑀝𑁆𑀞𑀺𑀦𑀸 𑀧𑀽𑀚𑁂𑀲𑀺. 𑀧𑀼𑀦 𑀭𑀸𑀚𑀸 𑀆𑀳 𑁋 ‘‘𑀲𑀘𑁂 𑀫𑀁 𑀦 𑀯𑀦𑁆𑀤𑀲𑀺, 𑀫𑀬𑁆𑀳𑀁 𑀭𑀚𑁆𑀚𑀲𑀺𑀭𑀺𑀤𑀸𑀬𑀺𑀓𑀁 𑀏𑀯𑀁 𑀫𑀳𑀸𑀦𑀼𑀪𑀸𑀯𑀁 𑀤𑁂𑀯𑀢𑀁 𑀓𑀲𑁆𑀫𑀸 𑀦 𑀯𑀦𑁆𑀤𑀲𑀻’’𑀢𑀺? ‘‘𑀫𑀳𑀸𑀭𑀸𑀚, 𑀢𑀬𑀸 𑀅𑀢𑁆𑀢𑀦𑁄 𑀧𑀼𑀜𑁆𑀜𑁂 𑀞𑀢𑁆𑀯𑀸 𑀭𑀸𑀚𑀸𑀦𑁄 𑀕𑀳𑀺𑀢𑀸, 𑀦 𑀤𑁂𑀯𑀢𑀸𑀬 𑀕𑀳𑁂𑀢𑁆𑀯𑀸 𑀤𑀺𑀦𑁆𑀦𑀸’’𑀢𑀺. 𑀧𑀼𑀦𑀧𑀺 𑀢𑀁 𑀤𑁂𑀯𑀢𑀸 ‘‘𑀏𑀯𑀁, 𑀪𑀤𑁆𑀤𑁂, 𑀏𑀯𑀁, 𑀪𑀤𑁆𑀤𑁂’’𑀢𑀺 𑀯𑀢𑁆𑀯𑀸 𑀢𑀣𑁂𑀯 𑀧𑀽𑀚𑁂𑀲𑀺. 𑀧𑀼𑀦 𑀲𑀸 𑀭𑀸𑀚𑀸𑀦𑀁 𑀆𑀳 𑁋 ‘‘𑀢𑁆𑀯𑀁 ‘𑀤𑁂𑀯𑀢𑀸𑀬 𑀫𑁂 𑀏𑀢𑁆𑀢𑀓𑀸 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀤𑀺𑀦𑁆𑀦𑀸’𑀢𑀺 𑀯𑀤𑁂𑀲𑀺, 𑀇𑀤𑀸𑀦𑀺 𑀢𑁂 𑀤𑁂𑀯𑀢𑀸𑀬 𑀉𑀧𑀭𑀺 𑀯𑀸𑀫𑀧𑀲𑁆𑀲𑁂 𑀭𑀼𑀓𑁆𑀔𑁄 𑀅𑀕𑁆𑀕𑀺𑀦𑀸 𑀤𑀟𑁆𑀠𑁄, 𑀲𑀸 𑀢𑀁 𑀅𑀕𑁆𑀕𑀺𑀁 𑀦𑀺𑀩𑁆𑀩𑀸𑀧𑁂𑀢𑀼𑀁 𑀓𑀲𑁆𑀫𑀸 𑀦𑀸𑀲𑀓𑁆𑀔𑀺, 𑀬𑀤𑀺 𑀏𑀯𑀁 𑀫𑀳𑀸𑀦𑀼𑀪𑀸𑀯𑀸’’𑀢𑀺. 𑀧𑀼𑀦𑀧𑀺 𑀢𑀁 𑀤𑁂𑀯𑀢𑀸 ‘‘𑀏𑀯𑀁, 𑀪𑀤𑁆𑀤𑁂, 𑀏𑀯𑀁, 𑀪𑀤𑁆𑀤𑁂’’𑀢𑀺 𑀯𑀢𑁆𑀯𑀸 𑀢𑀣𑁂𑀯 𑀧𑀽𑀚𑁂𑀲𑀺.

𑀲𑀸 𑀓𑀣𑀬𑀫𑀸𑀦𑀸 𑀞𑀺𑀢𑀸 𑀭𑁄𑀤𑀺 𑀘𑁂𑀯 𑀳𑀲𑀺 𑀘. 𑀅𑀣 𑀦𑀁 𑀭𑀸𑀚𑀸 ‘‘𑀓𑀺𑀁 𑀉𑀫𑁆𑀫𑀢𑁆𑀢𑀺𑀓𑀸𑀲𑀻’’𑀢𑀺 𑀆𑀳. ‘‘𑀓𑀲𑁆𑀫𑀸 𑀤𑁂𑀯 𑀏𑀯𑀁 𑀯𑀤𑁂𑀲𑀺’’? ‘‘𑀦 𑀫𑀸𑀤𑀺𑀲𑀺𑀬𑁄 𑀉𑀫𑁆𑀫𑀢𑁆𑀢𑀺𑀓𑀸 𑀳𑁄𑀦𑁆𑀢𑀻’’𑀢𑀺. 𑀅𑀣 ‘‘𑀦𑀁 𑀓𑀺𑀁 𑀓𑀸𑀭𑀡𑀸 𑀭𑁄𑀤𑀲𑀺 𑀘𑁂𑀯 𑀳𑀲𑀲𑀺 𑀘𑀸’’𑀢𑀺? ‘‘𑀲𑀼𑀡𑀸𑀳𑀺, 𑀫𑀳𑀸𑀭𑀸𑀚, 𑀅𑀳𑀜𑁆𑀳𑀺 𑀅𑀢𑀻𑀢𑁂 𑀓𑀼𑀮𑀥𑀻𑀢𑀸 𑀳𑀼𑀢𑁆𑀯𑀸 𑀧𑀢𑀺𑀓𑀼𑀮𑁂 𑀯𑀲𑀦𑁆𑀢𑀻 𑀲𑀸𑀫𑀺𑀓𑀲𑁆𑀲 𑀲𑀳𑀸𑀬𑀓𑀁 𑀧𑀸𑀳𑀼𑀦𑀓𑀁 𑀆𑀕𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀪𑀢𑁆𑀢𑀁 𑀧𑀘𑀺𑀢𑀼𑀓𑀸𑀫𑀸 ‘𑀫𑀁𑀲𑀁 𑀆𑀳𑀭𑀸’𑀢𑀺 𑀤𑀸𑀲𑀺𑀬𑀸 𑀓𑀳𑀸𑀧𑀡𑀁 𑀤𑀢𑁆𑀯𑀸 𑀢𑀸𑀬 𑀫𑀁𑀲𑀁 𑀅𑀮𑀪𑀺𑀢𑁆𑀯𑀸 𑀆𑀕𑀢𑀸𑀬 ‘𑀦𑀢𑁆𑀣𑀺 𑀫𑀁𑀲’𑀦𑁆𑀢𑀺 𑀯𑀼𑀢𑁆𑀢𑁂 𑀕𑁂𑀳𑀲𑁆𑀲 𑀧𑀘𑁆𑀙𑀺𑀫𑀪𑀸𑀕𑁂 𑀲𑀬𑀺𑀢𑀸𑀬 𑀏𑀴𑀺𑀓𑀸𑀬 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀲𑀺𑀁. 𑀲𑀸𑀳𑀁 𑀏𑀓𑀺𑀲𑁆𑀲𑀸𑀬 𑀏𑀴𑀺𑀓𑀸𑀬 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀧𑀓𑁆𑀓𑀸𑀯𑀲𑁂𑀲𑁂𑀦 𑀢𑀲𑁆𑀲𑀸 𑀮𑁄𑀫𑀕𑀡𑀦𑀸𑀬 𑀲𑀻𑀲𑀘𑁆𑀙𑁂𑀤𑀁 𑀧𑀸𑀧𑀼𑀡𑀺𑀁, ‘𑀢𑁆𑀯𑀁 𑀏𑀢𑁆𑀢𑀓𑀁 𑀚𑀦𑀁 𑀯𑀥𑀺𑀢𑁆𑀯𑀸 𑀓𑀤𑀸 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀲𑁆𑀲𑀲𑀻’𑀢𑀺 𑀏𑀯𑀫𑀳𑀁 𑀢𑀯 𑀤𑀼𑀓𑁆𑀔𑀁 𑀅𑀦𑀼𑀲𑁆𑀲𑀭𑀦𑁆𑀢𑀻 𑀭𑁄𑀤𑀺’’𑀦𑁆𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀏𑀓𑀺𑀲𑁆𑀲𑀸 𑀓𑀡𑁆𑀞𑀁 𑀙𑁂𑀢𑁆𑀯𑀸𑀦, 𑀮𑁄𑀫𑀕𑀡𑀦𑀸𑀬 𑀧𑀘𑁆𑀘𑀺𑀲𑀁;

𑀩𑀳𑀽𑀦𑀁 𑀓𑀡𑁆𑀞𑁂 𑀙𑁂𑀢𑁆𑀯𑀸𑀦, 𑀓𑀣𑀁 𑀓𑀸𑀳𑀲𑀺 𑀔𑀢𑁆𑀢𑀺𑀬𑀸’’𑀢𑀺.

𑀅𑀣 ‘‘𑀓𑀲𑁆𑀫𑀸 𑀢𑁆𑀯𑀁 𑀳𑀲𑀲𑀻’’𑀢𑀺? ‘‘‘𑀏𑀢𑀲𑁆𑀫𑀸 𑀤𑀼𑀓𑁆𑀔𑀸 𑀫𑀼𑀢𑁆𑀢𑀸𑀫𑁆𑀳𑀻’𑀢𑀺 𑀢𑀼𑀲𑁆𑀲𑀺𑀢𑁆𑀯𑀸, 𑀫𑀳𑀸𑀭𑀸𑀚𑀸’’𑀢𑀺. 𑀧𑀼𑀦𑀧𑀺 𑀢𑀁 𑀤𑁂𑀯𑀢𑀸 ‘‘𑀏𑀯𑀁, 𑀪𑀤𑁆𑀤𑁂, 𑀏𑀯𑀁, 𑀪𑀤𑁆𑀤𑁂’’𑀢𑀺 𑀯𑀢𑁆𑀯𑀸 𑀧𑀼𑀧𑁆𑀨𑀫𑀼𑀝𑁆𑀞𑀺𑀦𑀸 𑀧𑀽𑀚𑁂𑀲𑀺. 𑀭𑀸𑀚𑀸 ‘‘𑀅𑀳𑁄 𑀫𑁂 𑀪𑀸𑀭𑀺𑀬𑀁 𑀓𑀢𑀁 𑀓𑀫𑁆𑀫𑀁, 𑀅𑀬𑀁 𑀓𑀺𑀭 𑀏𑀓𑀁 𑀏𑀴𑀺𑀓𑀁 𑀯𑀥𑀺𑀢𑁆𑀯𑀸 𑀦𑀺𑀭𑀬𑁂 𑀧𑀓𑁆𑀓𑀸𑀯𑀲𑁂𑀲𑁂𑀦 𑀢𑀲𑁆𑀲𑀸 𑀮𑁄𑀫𑀕𑀡𑀦𑀸𑀬 𑀲𑀻𑀲𑀘𑁆𑀙𑁂𑀤𑀁 𑀧𑀸𑀧𑀼𑀡𑀺, 𑀅𑀳𑀁 𑀏𑀢𑁆𑀢𑀓𑀁 𑀚𑀦𑀁 𑀯𑀥𑀺𑀢𑁆𑀯𑀸 𑀓𑀤𑀸 𑀲𑁄𑀢𑁆𑀣𑀺𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀲𑀩𑁆𑀩𑁂 𑀭𑀸𑀚𑀸𑀦𑁄 𑀫𑁄𑀘𑁂𑀢𑁆𑀯𑀸 𑀅𑀢𑁆𑀢𑀦𑁄 𑀫𑀳𑀮𑁆𑀮𑀓𑀢𑀭𑁂 𑀯𑀦𑁆𑀤𑀺𑀢𑁆𑀯𑀸 𑀤𑀳𑀭𑀤𑀳𑀭𑀸𑀦𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀲𑀩𑁆𑀩𑁂 𑀔𑀫𑀸𑀧𑁂𑀢𑁆𑀯𑀸 𑀲𑀓𑀲𑀓𑀝𑁆𑀞𑀸𑀦𑀫𑁂𑀯 𑀧𑀳𑀺𑀡𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀦 𑀇𑀤𑀸𑀦𑁂𑀯, 𑀫𑀮𑁆𑀮𑀺𑀓𑀸 𑀤𑁂𑀯𑀻, 𑀅𑀢𑁆𑀢𑀦𑁄 𑀧𑀜𑁆𑀜𑀁 𑀦𑀺𑀲𑁆𑀲𑀸𑀬 𑀫𑀳𑀸𑀚𑀦𑀲𑁆𑀲 𑀚𑀻𑀯𑀺𑀢𑀤𑀸𑀦𑀁 𑀤𑁂𑀢𑀺, 𑀧𑀼𑀩𑁆𑀩𑁂𑀧𑀺 𑀅𑀤𑀸𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀅𑀳𑁄𑀲𑀺, 𑀥𑀫𑁆𑀫𑀤𑀺𑀦𑁆𑀦𑀸, 𑀤𑁂𑀯𑀻 𑀫𑀮𑁆𑀮𑀺𑀓𑀸, 𑀭𑀼𑀓𑁆𑀔𑀤𑁂𑀯𑀢𑀸 𑀅𑀳𑀫𑁂𑀯𑀸’’𑀢𑀺. 𑀏𑀯𑀁 𑀅𑀢𑀻𑀢𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀼𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄, ‘‘𑀪𑀺𑀓𑁆𑀔𑀯𑁂, 𑀧𑀸𑀡𑀸𑀢𑀺𑀧𑀸𑀢𑁄 𑀦𑀸𑀫 𑀦 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑁄. 𑀧𑀸𑀡𑀸𑀢𑀺𑀧𑀸𑀢𑀺𑀦𑁄 𑀳𑀺 𑀤𑀻𑀖𑀭𑀢𑁆𑀢𑀁 𑀲𑁄𑀘𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀆𑀳 𑁋

‘‘𑀇𑀥 𑀲𑁄𑀘𑀢𑀺 𑀧𑁂𑀘𑁆𑀘 𑀲𑁄𑀘𑀢𑀺,

𑀧𑀸𑀧𑀓𑀸𑀭𑀻 𑀉𑀪𑀬𑀢𑁆𑀣 𑀲𑁄𑀘𑀢𑀺;

𑀲𑁄 𑀲𑁄𑀘𑀢𑀺 𑀲𑁄 𑀯𑀺𑀳𑀜𑁆𑀜𑀢𑀺,

𑀤𑀺𑀲𑁆𑀯𑀸 𑀓𑀫𑁆𑀫𑀓𑀺𑀮𑀺𑀝𑁆𑀞𑀫𑀢𑁆𑀢𑀦𑁄’’𑀢𑀺. (𑀥. 𑀧. 𑁧𑁫);

‘‘𑀏𑀯𑀁 𑀘𑁂 𑀲𑀢𑁆𑀢𑀸 𑀚𑀸𑀦𑁂𑀬𑁆𑀬𑀼𑀁, 𑀤𑀼𑀓𑁆𑀔𑀸𑀬𑀁 𑀚𑀸𑀢𑀺𑀲𑀫𑁆𑀪𑀯𑁄;

𑀦 𑀧𑀸𑀡𑁄 𑀧𑀸𑀡𑀺𑀦𑀁 𑀳𑀜𑁆𑀜𑁂, 𑀧𑀸𑀡𑀖𑀸𑀢𑀻 𑀳𑀺 𑀲𑁄𑀘𑀢𑀻’’𑀢𑀺. (𑀚𑀸. 𑁧.𑁧.𑁧𑁮);

𑀅𑀜𑁆𑀜𑀢𑀭𑀧𑀼𑀭𑀺𑀲𑀯𑀢𑁆𑀣𑀼 𑀧𑀞𑀫𑀁.

𑁨. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀣𑀼

𑀘𑀭𑀜𑁆𑀘𑁂 𑀦𑀸𑀥𑀺𑀕𑀘𑁆𑀙𑁂𑀬𑁆𑀬𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀲𑀦𑀸 𑀭𑀸𑀚𑀕𑀳𑁂 𑀲𑀫𑀼𑀝𑁆𑀞𑀺𑀢𑀸.

𑀣𑁂𑀭𑀁 𑀓𑀺𑀭 𑀭𑀸𑀚𑀕𑀳𑀁 𑀦𑀺𑀲𑁆𑀲𑀸𑀬 𑀧𑀺𑀧𑁆𑀧𑀮𑀺𑀕𑀼𑀳𑀸𑀬𑀁 𑀯𑀲𑀦𑁆𑀢𑀁 𑀤𑁆𑀯𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀉𑀧𑀝𑁆𑀞𑀳𑀺𑀁𑀲𑀼. 𑀢𑁂𑀲𑀼 𑀏𑀓𑁄 𑀲𑀓𑁆𑀓𑀘𑁆𑀘𑀁 𑀯𑀢𑁆𑀢𑀁 𑀓𑀭𑁄𑀢𑀺, 𑀏𑀓𑁄 𑀢𑁂𑀦 𑀓𑀢𑀁 𑀓𑀢𑀁 𑀅𑀢𑁆𑀢𑀦𑀸 𑀓𑀢𑀁 𑀯𑀺𑀬 𑀤𑀲𑁆𑀲𑁂𑀦𑁆𑀢𑁄 𑀫𑀼𑀔𑁄𑀤𑀓𑀤𑀦𑁆𑀢𑀓𑀝𑁆𑀞𑀸𑀦𑀁 𑀧𑀝𑀺𑀬𑀸𑀤𑀺𑀢𑀪𑀸𑀯𑀁 𑀜𑀢𑁆𑀯𑀸, ‘‘𑀪𑀦𑁆𑀢𑁂, 𑀫𑀼𑀔𑁄𑀤𑀓𑀤𑀦𑁆𑀢𑀓𑀝𑁆𑀞𑀸𑀦𑀺 𑀫𑁂 𑀧𑀝𑀺𑀬𑀸𑀤𑀺𑀢𑀸𑀦𑀺, 𑀫𑀼𑀔𑀁 𑀥𑁄𑀯𑀣𑀸’’𑀢𑀺 𑀯𑀤𑀢𑀺, 𑀧𑀸𑀤𑀥𑁄𑀯𑀦𑀦𑁆𑀳𑀸𑀦𑀸𑀤𑀺𑀓𑀸𑀮𑁂𑀧𑀺 𑀏𑀯𑀫𑁂𑀯 𑀯𑀤𑀢𑀺. 𑀇𑀢𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀦𑀺𑀘𑁆𑀘𑀓𑀸𑀮𑀁 𑀫𑀬𑀸 𑀓𑀢𑀁 𑀓𑀢𑀁 𑀅𑀢𑁆𑀢𑀦𑀸 𑀓𑀢𑀁 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺, 𑀳𑁄𑀢𑀼, 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀫𑀲𑁆𑀲 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀲 𑀪𑀼𑀜𑁆𑀚𑀺𑀢𑁆𑀯𑀸 𑀲𑀼𑀧𑀦𑁆𑀢𑀲𑁆𑀲𑁂𑀯 𑀦𑁆𑀳𑀸𑀦𑁄𑀤𑀓𑀁 𑀢𑀸𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀖𑀝𑁂 𑀓𑀢𑁆𑀯𑀸 𑀧𑀺𑀝𑁆𑀞𑀺𑀓𑁄𑀝𑁆𑀞𑀓𑁂 𑀞𑀧𑁂𑀲𑀺, 𑀉𑀤𑀓𑀢𑀸𑀧𑀦𑀪𑀸𑀚𑀦𑁂 𑀧𑀦 𑀦𑀸𑀴𑀺𑀫𑀢𑁆𑀢𑀁 𑀉𑀤𑀓𑀁 𑀲𑁂𑀲𑁂𑀢𑁆𑀯𑀸 𑀉𑀲𑀼𑀫𑀁 𑀫𑀼𑀜𑁆𑀘𑀦𑁆𑀢𑀁 𑀞𑀧𑁂𑀲𑀺. 𑀢𑀁 𑀇𑀢𑀭𑁄 𑀲𑀸𑀬𑀦𑁆𑀳𑀲𑀫𑀬𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀉𑀲𑀼𑀫𑀁 𑀦𑀺𑀓𑁆𑀔𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀉𑀤𑀓𑀁 𑀢𑀸𑀧𑁂𑀢𑁆𑀯𑀸 𑀓𑁄𑀝𑁆𑀞𑀓𑁂 𑀞𑀧𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀓𑁄𑀝𑁆𑀞𑀓𑁂 𑀉𑀤𑀓𑀁 𑀞𑀧𑀺𑀢𑀁, 𑀦𑁆𑀳𑀸𑀬𑀣𑀸’’𑀢𑀺 𑀯𑀢𑁆𑀯𑀸 𑀣𑁂𑀭𑁂𑀦 𑀲𑀤𑁆𑀥𑀺𑀁𑀬𑁂𑀯 𑀓𑁄𑀝𑁆𑀞𑀓𑀁 𑀧𑀸𑀯𑀺𑀲𑀺. 𑀣𑁂𑀭𑁄 𑀉𑀤𑀓𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀓𑀳𑀁 𑀉𑀤𑀓𑀁, 𑀆𑀯𑀼𑀲𑁄’’𑀢𑀺 𑀆𑀳. 𑀤𑀳𑀭𑁄 𑀅𑀕𑁆𑀕𑀺𑀲𑀸𑀮𑀁 𑀕𑀦𑁆𑀢𑁆𑀯𑀸 𑀪𑀸𑀚𑀦𑁂 𑀉𑀴𑀼𑀗𑁆𑀓𑀁 𑀑𑀢𑀸𑀭𑁂𑀢𑁆𑀯𑀸 𑀢𑀼𑀘𑁆𑀙𑀪𑀸𑀯𑀁 𑀜𑀢𑁆𑀯𑀸 ‘‘𑀧𑀲𑁆𑀲𑀣 𑀤𑀼𑀝𑁆𑀞𑀲𑁆𑀲 𑀓𑀫𑁆𑀫𑀁 𑀢𑀼𑀘𑁆𑀙𑀪𑀸𑀚𑀦𑀁 𑀉𑀤𑁆𑀥𑀦𑁂 𑀆𑀭𑁄𑀧𑁂𑀢𑁆𑀯𑀸 𑀓𑀼𑀳𑀺𑀁 𑀕𑀢𑁄, 𑀅𑀳𑀁 ‘𑀓𑁄𑀝𑁆𑀞𑀓𑁂 𑀉𑀤𑀓’𑀦𑁆𑀢𑀺 𑀲𑀜𑁆𑀜𑀸𑀬 𑀆𑀭𑁄𑀘𑁂𑀲𑀺’’𑀦𑁆𑀢𑀺 𑀉𑀚𑁆𑀛𑀸𑀬𑀦𑁆𑀢𑁄 𑀖𑀝𑀁 𑀆𑀤𑀸𑀬 𑀢𑀺𑀢𑁆𑀣𑀁 𑀅𑀕𑀫𑀸𑀲𑀺. 𑀇𑀢𑀭𑁄𑀧𑀺 𑀧𑀺𑀝𑁆𑀞𑀺𑀓𑁄𑀝𑁆𑀞𑀓𑀢𑁄 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀓𑁄𑀝𑁆𑀞𑀓𑁂 𑀞𑀧𑁂𑀲𑀺.

𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀤𑀳𑀭𑁄 ‘𑀉𑀤𑀓𑀁 𑀫𑁂 𑀢𑀸𑀧𑁂𑀢𑁆𑀯𑀸 𑀓𑁄𑀝𑁆𑀞𑀓𑁂 𑀞𑀧𑀺𑀢𑀁, 𑀏𑀣, 𑀪𑀦𑁆𑀢𑁂, 𑀦𑁆𑀳𑀸𑀬𑀣𑀸’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀉𑀚𑁆𑀛𑀸𑀬𑀦𑁆𑀢𑁄 𑀖𑀝𑀁 𑀆𑀤𑀸𑀬 𑀢𑀺𑀢𑁆𑀣𑀁 𑀕𑀘𑁆𑀙𑀢𑀺, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀏𑀲 𑀤𑀳𑀭𑁄 𑀇𑀫𑀺𑀦𑀸 𑀓𑀢𑀁 𑀯𑀢𑁆𑀢𑀁 𑀅𑀢𑁆𑀢𑀦𑀸𑀯 𑀓𑀢𑀁 𑀯𑀺𑀬 𑀧𑀓𑀸𑀲𑁂𑀢𑀻’’𑀢𑀺 𑀜𑀢𑁆𑀯𑀸 𑀲𑀸𑀬𑀁 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀑𑀯𑀸𑀤𑀫𑀤𑀸𑀲𑀺, ‘‘𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑀸 𑀦𑀸𑀫 ‘𑀅𑀢𑁆𑀢𑀦𑀸 𑀓𑀢𑀫𑁂𑀯 𑀓𑀢’𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀦𑁄 𑀅𑀓𑀢𑀁, 𑀢𑁆𑀯𑀁 𑀇𑀤𑀸𑀦𑁂𑀯 ‘𑀓𑁄𑀝𑁆𑀞𑀓𑁂 𑀉𑀤𑀓𑀁 𑀞𑀧𑀺𑀢𑀁, 𑀦𑁆𑀳𑀸𑀬𑀣, 𑀪𑀦𑁆𑀢𑁂’𑀢𑀺 𑀯𑀢𑁆𑀯𑀸 𑀫𑀬𑀺 𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑁂 𑀖𑀝𑀁 𑀆𑀤𑀸𑀬 𑀉𑀚𑁆𑀛𑀸𑀬𑀦𑁆𑀢𑁄 𑀕𑀘𑁆𑀙𑀲𑀺, 𑀧𑀩𑁆𑀩𑀚𑀺𑀢𑀲𑁆𑀲 𑀦𑀸𑀫 𑀏𑀯𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺. 𑀲𑁄 ‘‘𑀧𑀲𑁆𑀲𑀣 𑀣𑁂𑀭𑀲𑁆𑀲 𑀓𑀫𑁆𑀫𑀁, 𑀉𑀤𑀓𑀫𑀢𑁆𑀢𑀓𑀁 𑀦𑀸𑀫 𑀦𑀺𑀲𑁆𑀲𑀸𑀬 𑀫𑀁 𑀏𑀯𑀁 𑀯𑀤𑁂𑀲𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀧𑀺𑀡𑁆𑀟𑀸𑀬 𑀦 𑀧𑀸𑀯𑀺𑀲𑀺. 𑀣𑁂𑀭𑁄 𑀇𑀢𑀭𑁂𑀦 𑀲𑀤𑁆𑀥𑀺𑀁 𑀏𑀓𑀁 𑀧𑀤𑁂𑀲𑀁 𑀅𑀕𑀫𑀸𑀲𑀺. 𑀲𑁄 𑀢𑀲𑁆𑀫𑀺𑀁 𑀕𑀢𑁂 𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀓𑀓𑀼𑀮𑀁 𑀕𑀦𑁆𑀢𑁆𑀯𑀸 ‘‘𑀣𑁂𑀭𑁄 𑀓𑀳𑀁, 𑀪𑀦𑁆𑀢𑁂’’𑀢𑀺 𑀧𑀼𑀝𑁆𑀞𑁄 ‘‘𑀣𑁂𑀭𑀲𑁆𑀲 𑀅𑀨𑀸𑀲𑀼𑀓𑀁 𑀚𑀸𑀢𑀁, 𑀯𑀺𑀳𑀸𑀭𑁂𑀬𑁂𑀯 𑀦𑀺𑀲𑀺𑀦𑁆𑀦𑁄’’𑀢𑀺 𑀆𑀳. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺? ‘‘𑀏𑀯𑀭𑀽𑀧𑀁 𑀓𑀺𑀭 𑀦𑀸𑀫 𑀆𑀳𑀸𑀭𑀁 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 𑀢𑁂𑀦 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀤𑀁𑀲𑀼. 𑀲𑁄 𑀅𑀦𑁆𑀢𑀭𑀸𑀫𑀕𑁆𑀕𑁂𑀯 𑀢𑀁 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀢𑁄. 𑀣𑁂𑀭𑁄𑀧𑀺 𑀕𑀢𑀝𑁆𑀞𑀸𑀦𑁂 𑀫𑀳𑀦𑁆𑀢𑀁 𑀲𑀼𑀔𑀼𑀫𑀯𑀢𑁆𑀣𑀁 𑀮𑀪𑀺𑀢𑁆𑀯𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀕𑀢𑀤𑀳𑀭𑀲𑁆𑀲 𑀅𑀤𑀸𑀲𑀺. 𑀲𑁄 𑀢𑀁 𑀭𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀅𑀓𑀸𑀲𑀺.

𑀣𑁂𑀭𑁄 𑀧𑀼𑀦𑀤𑀺𑀯𑀲𑁂 𑀢𑀁 𑀉𑀧𑀝𑁆𑀞𑀸𑀓𑀓𑀼𑀮𑀁 𑀕𑀦𑁆𑀢𑁆𑀯𑀸, ‘‘𑀪𑀦𑁆𑀢𑁂, ‘𑀢𑀼𑀫𑁆𑀳𑀸𑀓𑀁 𑀓𑀺𑀭 𑀅𑀨𑀸𑀲𑀼𑀓𑀁 𑀚𑀸𑀢’𑀦𑁆𑀢𑀺 𑀅𑀫𑁆𑀳𑁂𑀳𑀺 𑀤𑀳𑀭𑁂𑀦 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀧𑀝𑀺𑀬𑀸𑀤𑁂𑀢𑁆𑀯𑀸 𑀆𑀳𑀸𑀭𑁄 𑀧𑁂𑀲𑀺𑀢𑁄, 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀯𑁄 𑀨𑀸𑀲𑀼𑀓𑀁 𑀚𑀸𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀯𑀺𑀳𑀸𑀭𑀁 𑀧𑀦 𑀕𑀦𑁆𑀢𑁆𑀯𑀸 𑀢𑀁 𑀤𑀳𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀏𑀯𑀫𑀸𑀳 𑁋 ‘‘𑀆𑀯𑀼𑀲𑁄, 𑀢𑀬𑀸 𑀓𑀺𑀭 𑀳𑀺𑀬𑁆𑀬𑁄, 𑀇𑀤𑀁 𑀦𑀸𑀫 𑀓𑀢𑀁, 𑀇𑀤𑀁 𑀧𑀩𑁆𑀩𑀚𑀺𑀢𑀸𑀦𑀁 𑀦 𑀅𑀦𑀼𑀘𑁆𑀙𑀯𑀺𑀓𑀁, 𑀯𑀺𑀜𑁆𑀜𑀢𑁆𑀢𑀺𑀁 𑀓𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺. 𑀲𑁄 𑀓𑀼𑀚𑁆𑀛𑀺𑀢𑁆𑀯𑀸 𑀣𑁂𑀭𑁂 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀧𑀼𑀭𑀺𑀫𑀤𑀺𑀯𑀲𑁂 𑀉𑀤𑀓𑀫𑀢𑁆𑀢𑀁 𑀦𑀺𑀲𑁆𑀲𑀸𑀬 𑀫𑀁 𑀫𑀼𑀲𑀸𑀯𑀸𑀤𑀺𑀁 𑀓𑀢𑁆𑀯𑀸 𑀅𑀚𑁆𑀚 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀓𑀼𑀮𑁂 𑀪𑀢𑁆𑀢𑀫𑀼𑀝𑁆𑀞𑀺𑀬𑀸 𑀪𑀼𑀢𑁆𑀢𑀓𑀸𑀭𑀡𑀸 𑀫𑀁 ‘𑀯𑀺𑀜𑁆𑀜𑀢𑁆𑀢𑀺𑀁 𑀓𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻’𑀢𑀺 𑀯𑀤𑀢𑀺, 𑀯𑀢𑁆𑀣𑀫𑁆𑀧𑀺 𑀢𑁂𑀦 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀲𑁆𑀲𑁂𑀯 𑀤𑀺𑀦𑁆𑀦𑀁, 𑀅𑀳𑁄 𑀣𑁂𑀭𑀲𑁆𑀲 𑀪𑀸𑀭𑀺𑀬𑀁 𑀓𑀫𑁆𑀫𑀁, 𑀚𑀸𑀦𑀺𑀲𑁆𑀲𑀸𑀫𑀺𑀲𑁆𑀲 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓’’𑀦𑁆𑀢𑀺 𑀧𑀼𑀦𑀤𑀺𑀯𑀲𑁂 𑀣𑁂𑀭𑁂 𑀕𑀸𑀫𑀁 𑀧𑀯𑀺𑀲𑀦𑁆𑀢𑁂 𑀲𑀬𑀁 𑀯𑀺𑀳𑀸𑀭𑁂 𑀑𑀳𑀻𑀬𑀺𑀢𑁆𑀯𑀸 𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑁄𑀕𑀪𑀸𑀚𑀦𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀣𑁂𑀭𑀲𑁆𑀲 𑀧𑀡𑁆𑀡𑀲𑀸𑀮𑀸𑀬 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀬𑀁 𑀦 𑀛𑀸𑀬𑀢𑀺, 𑀢𑀁 𑀫𑀼𑀕𑁆𑀕𑀭𑁂𑀦 𑀧𑀳𑀭𑀦𑁆𑀢𑁄 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀢𑁄. 𑀲𑁄 𑀓𑀸𑀮𑀁 𑀓𑀢𑁆𑀯𑀸 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺.

𑀫𑀳𑀸𑀚𑀦𑁄 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀺 𑁋 ‘‘𑀣𑁂𑀭𑀲𑁆𑀲 𑀓𑀺𑀭 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀑𑀯𑀸𑀤𑀫𑀢𑁆𑀢𑀁 𑀅𑀲𑀳𑀦𑁆𑀢𑁄 𑀓𑀼𑀚𑁆𑀛𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀛𑀸𑀧𑁂𑀢𑁆𑀯𑀸 𑀧𑀮𑀸𑀢𑁄’’𑀢𑀺. 𑀅𑀣𑁂𑀓𑁄 𑀪𑀺𑀓𑁆𑀔𑀼 𑀅𑀧𑀭𑀪𑀸𑀕𑁂 𑀭𑀸𑀚𑀕𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀓𑀸𑀫𑁄 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 ‘‘𑀓𑀼𑀢𑁄 𑀆𑀕𑀢𑁄𑀲𑀻’’𑀢𑀺 𑀧𑀼𑀝𑁆𑀞𑁄 ‘‘𑀭𑀸𑀚𑀕𑀳𑀢𑁄, 𑀪𑀦𑁆𑀢𑁂’’𑀢𑀺 𑀆𑀳. ‘‘𑀫𑀫 𑀧𑀼𑀢𑁆𑀢𑀲𑁆𑀲 𑀫𑀳𑀸𑀓𑀲𑁆𑀲𑀧𑀲𑁆𑀲 𑀔𑀫𑀦𑀻𑀬’’𑀦𑁆𑀢𑀺? ‘‘𑀔𑀫𑀦𑀻𑀬𑀁, 𑀪𑀦𑁆𑀢𑁂, 𑀏𑀓𑁄 𑀧𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀑𑀯𑀸𑀤𑀫𑀢𑁆𑀢𑁂𑀦 𑀓𑀼𑀚𑁆𑀛𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀛𑀸𑀧𑁂𑀢𑁆𑀯𑀸 𑀧𑀮𑀸𑀢𑁄’’𑀢𑀺. 𑀲𑀢𑁆𑀣𑀸 ‘‘𑀦 𑀲𑁄 𑀇𑀤𑀸𑀦𑁂𑀯 𑀑𑀯𑀸𑀤𑀁 𑀲𑀼𑀢𑁆𑀯𑀸 𑀓𑀼𑀚𑁆𑀛𑀢𑀺, 𑀧𑀼𑀩𑁆𑀩𑁂𑀧𑀺 𑀓𑀼𑀚𑁆𑀛𑀺𑀬𑁂𑀯. 𑀦 𑀇𑀤𑀸𑀦𑁂𑀯 𑀓𑀼𑀝𑀺𑀁 𑀤𑀽𑀲𑁂𑀢𑀺, 𑀧𑀼𑀩𑁆𑀩𑁂𑀧𑀺 𑀤𑀽𑀲𑁂𑀲𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑀻𑀢𑀁 𑀆𑀳𑀭𑀺 𑁋

𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀏𑀓𑁄 𑀲𑀺𑀗𑁆𑀕𑀺𑀮𑀲𑀓𑀼𑀡𑁄 𑀓𑀼𑀮𑀸𑀯𑀓𑀁 𑀓𑀢𑁆𑀯𑀸 𑀯𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀏𑀓𑁄 𑀫𑀓𑁆𑀓𑀝𑁄 𑀲𑀻𑀢𑁂𑀦 𑀓𑀫𑁆𑀧𑀫𑀸𑀦𑁄 𑀢𑀁 𑀧𑀤𑁂𑀲𑀁 𑀅𑀕𑀫𑀸𑀲𑀺. 𑀲𑀺𑀗𑁆𑀕𑀺𑀮𑁄 𑀢𑀁 𑀤𑀺𑀲𑁆𑀯𑀸 𑀕𑀸𑀣𑀫𑀸𑀳 𑁋

‘‘𑀫𑀦𑀼𑀲𑁆𑀲𑀲𑁆𑀲𑁂𑀯 𑀢𑁂 𑀲𑀻𑀲𑀁, 𑀳𑀢𑁆𑀣𑀧𑀸𑀤𑀸 𑀘 𑀯𑀸𑀦𑀭;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀅𑀕𑀸𑀭𑀁 𑀢𑁂 𑀦 𑀯𑀺𑀚𑁆𑀚𑀢𑀻’’𑀢𑀺. (𑀚𑀸. 𑁧.𑁪.𑁮𑁧);

𑀫𑀓𑁆𑀓𑀝𑁄 ‘‘𑀓𑀺𑀜𑁆𑀘𑀸𑀧𑀺 𑀫𑁂 𑀳𑀢𑁆𑀣𑀧𑀸𑀤𑀸 𑀅𑀢𑁆𑀣𑀺, 𑀬𑀸𑀬 𑀧𑀦 𑀧𑀜𑁆𑀜𑀸𑀬 𑀯𑀺𑀘𑀸𑀭𑁂𑀢𑁆𑀯𑀸 𑀅𑀕𑀸𑀭𑀁 𑀓𑀭𑁂𑀬𑁆𑀬𑀁, 𑀲𑀸 𑀫𑁂 𑀧𑀜𑁆𑀜𑀸 𑀦𑀢𑁆𑀣𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀫𑀢𑁆𑀣𑀁 𑀯𑀺𑀜𑁆𑀜𑀸𑀧𑁂𑀢𑀼𑀓𑀸𑀫𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀫𑀦𑀼𑀲𑁆𑀲𑀲𑁆𑀲𑁂𑀯 𑀫𑁂 𑀲𑀻𑀲𑀁, 𑀳𑀢𑁆𑀣𑀧𑀸𑀤𑀸 𑀘 𑀲𑀺𑀗𑁆𑀕𑀺𑀮;

𑀬𑀸𑀳𑀼 𑀲𑁂𑀝𑁆𑀞𑀸 𑀫𑀦𑀼𑀲𑁆𑀲𑁂𑀲𑀼, 𑀲𑀸 𑀫𑁂 𑀧𑀜𑁆𑀜𑀸 𑀦 𑀯𑀺𑀚𑁆𑀚𑀢𑀻’’𑀢𑀺. (𑀚𑀸. 𑁧.𑁪.𑁮𑁨);

𑀅𑀣 𑀦𑀁 ‘‘𑀏𑀯𑀭𑀽𑀧𑀲𑁆𑀲 𑀢𑀯 𑀓𑀣𑀁 𑀖𑀭𑀸𑀯𑀸𑀲𑁄 𑀇𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀕𑀭𑀳𑀦𑁆𑀢𑁄 𑀲𑀺𑀗𑁆𑀕𑀺𑀮𑁄 𑀇𑀫𑀁 𑀕𑀸𑀣𑀸𑀤𑁆𑀯𑀬𑀫𑀸𑀳 𑁋

‘‘𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀲𑁆𑀲, 𑀮𑀳𑀼𑀘𑀺𑀢𑁆𑀢𑀲𑁆𑀲 𑀤𑀼𑀩𑁆𑀪𑀺𑀦𑁄;

𑀦𑀺𑀘𑁆𑀘𑀁 𑀅𑀤𑁆𑀥𑀼𑀯𑀲𑀻𑀮𑀲𑁆𑀲, 𑀲𑀼𑀔𑀪𑀸𑀯𑁄 𑀦 𑀯𑀺𑀚𑁆𑀚𑀢𑀺.

‘‘𑀲𑁄 𑀓𑀭𑀲𑁆𑀲𑀼 𑀆𑀦𑀼𑀪𑀸𑀯𑀁, 𑀯𑀻𑀢𑀺𑀯𑀢𑁆𑀢𑀲𑁆𑀲𑀼 𑀲𑀻𑀮𑀺𑀬𑀁;

𑀲𑀻𑀢𑀯𑀸𑀢𑀧𑀭𑀺𑀢𑁆𑀢𑀸𑀡𑀁, 𑀓𑀭𑀲𑁆𑀲𑀼 𑀓𑀼𑀝𑀯𑀁 𑀓𑀧𑀻’’𑀢𑀺. (𑀚𑀸. 𑁧.𑁪.𑁮𑁩-𑁮𑁪);

𑀫𑀓𑁆𑀓𑀝𑁄 ‘‘𑀅𑀬𑀁 𑀫𑀁 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀁 𑀮𑀳𑀼𑀘𑀺𑀢𑁆𑀢𑀁 𑀫𑀺𑀢𑁆𑀢𑀤𑀼𑀩𑁆𑀪𑀺𑀁 𑀅𑀤𑁆𑀥𑀼𑀯𑀲𑀻𑀮𑀁 𑀓𑀭𑁄𑀢𑀺, 𑀇𑀤𑀸𑀦𑀺𑀲𑁆𑀲 𑀫𑀺𑀢𑁆𑀢𑀤𑀼𑀩𑁆𑀪𑀺𑀪𑀸𑀯𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀓𑀼𑀮𑀸𑀯𑀓𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀯𑀺𑀧𑁆𑀧𑀓𑀺𑀭𑀺. 𑀲𑀓𑀼𑀡𑁄 𑀢𑀲𑁆𑀫𑀺𑀁 𑀓𑀼𑀮𑀸𑀯𑀓𑀁 𑀕𑀡𑁆𑀳𑀦𑁆𑀢𑁂 𑀏𑀯 𑀏𑀓𑁂𑀦 𑀧𑀲𑁆𑀲𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀺.

𑀲𑀢𑁆𑀣𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀺 𑁋 ‘‘𑀢𑀤𑀸 𑀫𑀓𑁆𑀓𑀝𑁄 𑀓𑀼𑀝𑀺𑀤𑀽𑀲𑀓𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀲𑀺𑀗𑁆𑀕𑀺𑀮𑀲𑀓𑀼𑀡𑁄 𑀓𑀲𑁆𑀲𑀧𑁄 𑀅𑀳𑁄𑀲𑀻’’𑀢𑀺. 𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 ‘‘𑀏𑀯𑀁, 𑀪𑀺𑀓𑁆𑀔𑀯𑁂, 𑀦 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀲𑁄 𑀑𑀯𑀸𑀤𑀓𑁆𑀔𑀡𑁂 𑀓𑀼𑀚𑁆𑀛𑀺𑀢𑁆𑀯𑀸 𑀓𑀼𑀝𑀺𑀁 𑀤𑀽𑀲𑁂𑀲𑀺, 𑀫𑀫 𑀧𑀼𑀢𑁆𑀢𑀲𑁆𑀲 𑀓𑀲𑁆𑀲𑀧𑀲𑁆𑀲 𑀏𑀯𑀭𑀽𑀧𑁂𑀦 𑀩𑀸𑀮𑁂𑀦 𑀲𑀤𑁆𑀥𑀺𑀁 𑀯𑀲𑀦𑀢𑁄 𑀏𑀓𑀓𑀲𑁆𑀲𑁂𑀯 𑀦𑀺𑀯𑀸𑀲𑁄 𑀲𑁂𑀬𑁆𑀬𑁄’’𑀢𑀺 𑀯𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁧. ‘‘𑀘𑀭𑀜𑁆𑀘𑁂 𑀦𑀸𑀥𑀺𑀕𑀘𑁆𑀙𑁂𑀬𑁆𑀬, 𑀲𑁂𑀬𑁆𑀬𑀁 𑀲𑀤𑀺𑀲𑀫𑀢𑁆𑀢𑀦𑁄;

𑀏𑀓𑀘𑀭𑀺𑀬𑀁 𑀤𑀴𑁆𑀳𑀁 𑀓𑀬𑀺𑀭𑀸, 𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸’’𑀢𑀺.

𑀢𑀢𑁆𑀣 𑀘𑀭𑀦𑁆𑀢𑀺 𑀇𑀭𑀺𑀬𑀸𑀧𑀣𑀘𑀸𑀭𑀁 𑀅𑀕𑁆𑀕𑀳𑁂𑀢𑁆𑀯𑀸 𑀫𑀦𑀲𑀸𑀘𑀸𑀭𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀧𑀭𑀺𑀬𑁂𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀬𑁆𑀬𑀁 𑀲𑀤𑀺𑀲𑀫𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀕𑀼𑀡𑁂𑀳𑀺 𑀅𑀥𑀺𑀓𑀢𑀭𑀁 𑀯𑀸 𑀲𑀤𑀺𑀲𑀁 𑀯𑀸 𑀦 𑀮𑀪𑁂𑀬𑁆𑀬 𑀘𑁂. 𑀏𑀓𑀘𑀭𑀺𑀬𑀦𑁆𑀢𑀺 𑀏𑀢𑁂𑀲𑀼 𑀳𑀺 𑀲𑁂𑀬𑁆𑀬𑀁 𑀮𑀪𑀫𑀸𑀦𑁄 𑀲𑀻𑀮𑀸𑀤𑀻𑀳𑀺 𑀯𑀟𑁆𑀠𑀢𑀺, 𑀲𑀤𑀺𑀲𑀁 𑀮𑀪𑀫𑀸𑀦𑁄 𑀦 𑀧𑀭𑀺𑀳𑀸𑀬𑀢𑀺, 𑀳𑀻𑀦𑁂𑀦 𑀧𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀯𑀲𑀦𑁆𑀢𑁄 𑀏𑀓𑀢𑁄 𑀲𑀁𑀪𑁄𑀕𑀧𑀭𑀺𑀪𑁄𑀕𑀁 𑀓𑀭𑁄𑀦𑁆𑀢𑁄 𑀲𑀻𑀮𑀸𑀤𑀻𑀳𑀺 𑀧𑀭𑀺𑀳𑀸𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀦 𑀲𑁂𑀯𑀺𑀢𑀩𑁆𑀩𑁄 𑀦 𑀪𑀚𑀺𑀢𑀩𑁆𑀩𑁄 𑀦 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀅𑀦𑀼𑀤𑁆𑀤𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀓𑀫𑁆𑀧𑀸’’𑀢𑀺 (𑀧𑀼. 𑀧. 𑁧𑁨𑁧; 𑀅. 𑀦𑀺. 𑁩.𑁨𑁬). 𑀢𑀲𑁆𑀫𑀸 𑀲𑀘𑁂 𑀓𑀸𑀭𑀼𑀜𑁆𑀜𑀁 𑀧𑀝𑀺𑀘𑁆𑀘 ‘‘𑀅𑀬𑀁 𑀫𑀁 𑀦𑀺𑀲𑁆𑀲𑀸𑀬 𑀲𑀻𑀮𑀸𑀤𑀻𑀳𑀺 𑀯𑀟𑁆𑀠𑀺𑀲𑁆𑀲𑀢𑀻’’𑀢𑀺 𑀢𑀫𑁆𑀳𑀸 𑀧𑀼𑀕𑁆𑀕𑀮𑀸 𑀓𑀺𑀜𑁆𑀘𑀺 𑀅𑀧𑀘𑁆𑀘𑀸𑀲𑀻𑀲𑀦𑁆𑀢𑁄 𑀢𑀁 𑀲𑀗𑁆𑀕𑀡𑁆𑀳𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀲𑀓𑁆𑀓𑁄𑀢𑀺, 𑀏𑀓𑀘𑀭𑀺𑀬𑀁 𑀤𑀴𑁆𑀳𑀁 𑀓𑀬𑀺𑀭𑀸 𑀏𑀓𑀻𑀪𑀸𑀯𑀫𑁂𑀯 𑀣𑀺𑀭𑀁 𑀓𑀢𑁆𑀯𑀸 𑀲𑀩𑁆𑀩𑀇𑀭𑀺𑀬𑀸𑀧𑀣𑁂𑀲𑀼 𑀏𑀓𑀓𑁄𑀯 𑀯𑀺𑀳𑀭𑁂𑀬𑁆𑀬. 𑀓𑀺𑀁 𑀓𑀸𑀭𑀡𑀸? 𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸𑀢𑀺 𑀲𑀳𑀸𑀬𑀢𑀸 𑀦𑀸𑀫 𑀘𑀽𑀴𑀲𑀻𑀮𑀁 𑀫𑀚𑁆𑀛𑀺𑀫𑀲𑀻𑀮𑀁 𑀫𑀳𑀸𑀲𑀻𑀮𑀁 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀢𑁂𑀭𑀲 𑀥𑀼𑀢𑀗𑁆𑀕𑀕𑀼𑀡𑀸 𑀯𑀺𑀧𑀲𑁆𑀲𑀦𑀸𑀕𑀼𑀡𑀸 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀙 𑀅𑀪𑀺𑀜𑁆𑀜𑀸. 𑀅𑀬𑀁 𑀲𑀳𑀸𑀬𑀢𑀸𑀕𑀼𑀡𑁄 𑀩𑀸𑀮𑀁 𑀦𑀺𑀲𑁆𑀲𑀸𑀬 𑀦𑀢𑁆𑀣𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑁄, 𑀅𑀜𑁆𑀜𑁂𑀧𑀺 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼, 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑀢𑁆𑀣𑀼 𑀤𑀼𑀢𑀺𑀬𑀁.

𑁩. 𑀆𑀦𑀦𑁆𑀤𑀲𑁂𑀝𑁆𑀞𑀺𑀯𑀢𑁆𑀣𑀼

𑀧𑀼𑀢𑁆𑀢𑀸 𑀫𑀢𑁆𑀣𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁄 𑀆𑀦𑀦𑁆𑀤𑀲𑁂𑀝𑁆𑀞𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀆𑀦𑀦𑁆𑀤𑀲𑁂𑀝𑁆𑀞𑀺 𑀦𑀸𑀫 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀯𑀺𑀪𑀯𑁄 𑀫𑀳𑀸𑀫𑀘𑁆𑀙𑀭𑀻 𑀅𑀳𑁄𑀲𑀺. 𑀲𑁄 𑀅𑀦𑁆𑀯𑀟𑁆𑀠𑀫𑀸𑀲𑀁 𑀜𑀸𑀢𑀓𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀧𑀼𑀢𑁆𑀢𑀁 𑀫𑀽𑀮𑀲𑀺𑀭𑀺𑀁 𑀦𑀸𑀫 𑀢𑀻𑀲𑀼 𑀯𑁂𑀮𑀸𑀲𑀼 𑀏𑀯𑀁 𑀑𑀯𑀤𑀢𑀺 𑁋 ‘‘𑀇𑀤𑀁 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁 ‘𑀩𑀳𑀽’’’𑀢𑀺 𑀫𑀸 𑀲𑀜𑁆𑀜𑀁 𑀓𑀭𑀺, 𑀯𑀺𑀚𑁆𑀚𑀫𑀸𑀦𑀁 𑀥𑀦𑀁 𑀦 𑀤𑀸𑀢𑀩𑁆𑀩𑀁, 𑀦𑀯𑀁 𑀥𑀦𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀏𑀓𑁂𑀓𑀫𑁆𑀧𑀺 𑀳𑀺 𑀓𑀳𑀸𑀧𑀡𑀁 𑀯𑀬𑀁 𑀓𑀭𑁄𑀦𑁆𑀢𑀲𑁆𑀲 𑀧𑀦 𑀔𑀻𑀬𑀢𑁂𑀯. 𑀢𑀲𑁆𑀫𑀸 𑁋

‘‘𑀅𑀜𑁆𑀚𑀦𑀸𑀦𑀁 𑀔𑀬𑀁 𑀤𑀺𑀲𑁆𑀯𑀸, 𑀉𑀧𑀘𑀺𑀓𑀸𑀦𑀜𑁆𑀘 𑀆𑀘𑀬𑀁;

𑀫𑀥𑀽𑀦𑀜𑁆𑀘 𑀲𑀫𑀸𑀳𑀸𑀭𑀁, 𑀧𑀡𑁆𑀟𑀺𑀢𑁄 𑀖𑀭𑀫𑀸𑀯𑀲𑁂’’𑀢𑀺.

𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀢𑁆𑀢𑀦𑁄 𑀧𑀜𑁆𑀘 𑀫𑀳𑀸𑀦𑀺𑀥𑀺𑀬𑁄 𑀧𑀼𑀢𑁆𑀢𑀲𑁆𑀲 𑀅𑀦𑀸𑀘𑀺𑀓𑁆𑀔𑀺𑀢𑁆𑀯𑀸 𑀥𑀦𑀦𑀺𑀲𑁆𑀲𑀺𑀢𑁄 𑀫𑀘𑁆𑀙𑁂𑀭𑀫𑀮𑀫𑀮𑀺𑀦𑁄 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀲𑁂𑀯 𑀦𑀕𑀭𑀲𑁆𑀲 𑀏𑀓𑀲𑁆𑀫𑀺𑀁 𑀤𑁆𑀯𑀸𑀭𑀕𑀸𑀫𑀓𑁂 𑀘𑀡𑁆𑀟𑀸𑀮𑀸𑀦𑀁 𑀓𑀼𑀮𑀲𑀳𑀲𑁆𑀲𑀁 𑀧𑀝𑀺𑀯𑀲𑀢𑀺. 𑀢𑀢𑁆𑀣𑁂𑀓𑀺𑀲𑁆𑀲𑀸 𑀘𑀡𑁆𑀟𑀸𑀮𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀭𑀸𑀚𑀸 𑀢𑀲𑁆𑀲 𑀓𑀸𑀮𑀓𑀺𑀭𑀺𑀬𑀁 𑀲𑀼𑀢𑁆𑀯𑀸 𑀧𑀼𑀢𑁆𑀢𑀫𑀲𑁆𑀲 𑀫𑀽𑀮𑀲𑀺𑀭𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑁂𑀝𑁆𑀞𑀺𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀢𑀫𑁆𑀧𑀺 𑀘𑀡𑁆𑀟𑀸𑀮𑀓𑀼𑀮𑀲𑀳𑀲𑁆𑀲𑀁 𑀏𑀓𑀢𑁄𑀯 𑀪𑀢𑀺𑀬𑀸 𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀫𑀸𑀦𑀁 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀦𑁂𑀯 𑀪𑀢𑀺𑀁 𑀮𑀪𑀢𑀺, 𑀦 𑀬𑀸𑀧𑀦𑀫𑀢𑁆𑀢𑀢𑁄 𑀧𑀭𑀁 𑀪𑀢𑁆𑀢𑀧𑀺𑀡𑁆𑀟𑀫𑁆𑀧𑀺. 𑀢𑁂 ‘‘𑀫𑀬𑀁 𑀏𑀢𑀭𑀳𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀧𑀺 𑀧𑀺𑀡𑁆𑀟𑀪𑀢𑁆𑀢𑀫𑁆𑀧𑀺 𑀦 𑀮𑀪𑀸𑀫, 𑀅𑀫𑁆𑀳𑀸𑀓𑀁 𑀅𑀦𑁆𑀢𑀭𑁂 𑀓𑀸𑀴𑀓𑀡𑁆𑀡𑀺𑀬𑀸 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑀼𑀢𑁆𑀯𑀸 𑀬𑀸𑀯 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀯𑀺𑀲𑀼𑀁 𑀳𑁄𑀦𑁆𑀢𑀺, 𑀢𑀸𑀯 𑀯𑀺𑀪𑀚𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀓𑀼𑀮𑁂 𑀓𑀸𑀴𑀓𑀡𑁆𑀡𑀻 𑀉𑀧𑁆𑀧𑀦𑁆𑀦𑀸’’𑀢𑀺 𑀢𑀲𑁆𑀲 𑀫𑀸𑀢𑀭𑀁 𑀦𑀻𑀳𑀭𑀺𑀁𑀲𑀼.

𑀲𑀸𑀧𑀺 𑀬𑀸𑀯𑀲𑁆𑀲𑀸 𑀲𑁄 𑀓𑀼𑀘𑁆𑀙𑀺𑀕𑀢𑁄, 𑀢𑀸𑀯 𑀬𑀸𑀧𑀦𑀫𑀢𑁆𑀢𑀫𑁆𑀧𑀺 𑀓𑀺𑀘𑁆𑀙𑁂𑀦 𑀮𑀪𑀺𑀢𑁆𑀯𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀲𑁆𑀲 𑀳𑀢𑁆𑀣𑀸 𑀘 𑀧𑀸𑀤𑀸 𑀘 𑀅𑀓𑁆𑀔𑀻𑀦𑀺 𑀘 𑀓𑀡𑁆𑀡𑀸 𑀘 𑀦𑀸𑀲𑀸 𑀘 𑀫𑀼𑀔𑀜𑁆𑀘 𑀬𑀣𑀸𑀞𑀸𑀦𑁂 𑀦 𑀅𑀳𑁂𑀲𑀼𑀁. 𑀲𑁄 𑀏𑀯𑀭𑀽𑀧𑁂𑀦 𑀅𑀗𑁆𑀕𑀯𑁂𑀓𑀮𑁆𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀁𑀲𑀼𑀧𑀺𑀲𑀸𑀘𑀓𑁄 𑀯𑀺𑀬 𑀅𑀢𑀺𑀯𑀺𑀭𑀽𑀧𑁄 𑀅𑀳𑁄𑀲𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀁 𑀫𑀸𑀢𑀸 𑀦 𑀧𑀭𑀺𑀘𑁆𑀘𑀚𑀺. 𑀓𑀼𑀘𑁆𑀙𑀺𑀬𑀁 𑀯𑀲𑀺𑀢𑀧𑀼𑀢𑁆𑀢𑀲𑁆𑀫𑀺𑀜𑁆𑀳𑀺 𑀲𑀺𑀦𑁂𑀳𑁄 𑀩𑀮𑀯𑀸 𑀳𑁄𑀢𑀺. 𑀲𑀸 𑀢𑀁 𑀓𑀺𑀘𑁆𑀙𑁂𑀦 𑀧𑁄𑀲𑀬𑀫𑀸𑀦𑀸 𑀢𑀁 𑀆𑀤𑀸𑀬 𑀕𑀢𑀤𑀺𑀯𑀲𑁂 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸 𑀕𑁂𑀳𑁂 𑀓𑀢𑁆𑀯𑀸 𑀲𑀬𑀫𑁂𑀯 𑀕𑀢𑀤𑀺𑀯𑀲𑁂 𑀪𑀢𑀺𑀁 𑀮𑀪𑀢𑀺. 𑀅𑀣 𑀦𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀚𑀻𑀯𑀺𑀢𑀼𑀁 𑀲𑀫𑀢𑁆𑀣𑀓𑀸𑀮𑁂 𑀲𑀸 𑀓𑀧𑀸𑀮𑀓𑀁 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸, ‘‘𑀢𑀸𑀢, 𑀫𑀬𑀁 𑀢𑀁 𑀦𑀺𑀲𑁆𑀲𑀸𑀬 𑀫𑀳𑀸𑀤𑀼𑀓𑁆𑀔𑀁 𑀧𑀢𑁆𑀢𑀸, 𑀇𑀤𑀸𑀦𑀺 𑀦 𑀲𑀓𑁆𑀓𑁄𑀫𑀺 𑀢𑀁 𑀧𑁄𑀲𑁂𑀢𑀼𑀁, 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀁 𑀧𑀝𑀺𑀬𑀢𑁆𑀢𑀪𑀢𑁆𑀢𑀸𑀦𑀺 𑀅𑀢𑁆𑀣𑀺, 𑀢𑀢𑁆𑀣 𑀪𑀺𑀓𑁆𑀔𑀸𑀬 𑀘𑀭𑀺𑀢𑁆𑀯𑀸 𑀚𑀻𑀯𑀸𑀳𑀻’’𑀢𑀺 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄 𑀖𑀭𑀧𑀝𑀺𑀧𑀸𑀝𑀺𑀬𑀸 𑀘𑀭𑀦𑁆𑀢𑁄 𑀆𑀦𑀦𑁆𑀤𑀲𑁂𑀝𑁆𑀞𑀺𑀓𑀸𑀮𑁂 𑀦𑀺𑀯𑀼𑀢𑁆𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀚𑀸𑀢𑀺𑀲𑁆𑀲𑀭𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀁 𑀧𑀸𑀯𑀺𑀲𑀺. 𑀢𑀻𑀲𑀼 𑀧𑀦 𑀤𑁆𑀯𑀸𑀭𑀓𑁄𑀝𑁆𑀞𑀓𑁂𑀲𑀼 𑀦 𑀓𑁄𑀘𑀺 𑀲𑀮𑁆𑀮𑀓𑁆𑀔𑁂𑀲𑀺. 𑀘𑀢𑀼𑀢𑁆𑀣𑁂 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀫𑀽𑀮𑀲𑀺𑀭𑀺𑀲𑁂𑀝𑁆𑀞𑀺𑀦𑁄 𑀧𑀼𑀢𑁆𑀢𑀓𑀸 𑀤𑀺𑀲𑁆𑀯𑀸 𑀉𑀩𑁆𑀩𑀺𑀕𑁆𑀕𑀳𑀤𑀬𑀸 𑀧𑀭𑁄𑀤𑀺𑀁𑀲𑀼. 𑀅𑀣 𑀦𑀁 𑀲𑁂𑀝𑁆𑀞𑀺𑀧𑀼𑀭𑀺𑀲𑀸 ‘‘𑀦𑀺𑀓𑁆𑀔𑀫 𑀓𑀸𑀴𑀓𑀡𑁆𑀡𑀻’’𑀢𑀺 𑀧𑁄𑀣𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀔𑀺𑀧𑀺𑀁𑀲𑀼. 𑀲𑀢𑁆𑀣𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀢𑀁 𑀞𑀸𑀦𑀁 𑀧𑀢𑁆𑀢𑁄 𑀣𑁂𑀭𑀁 𑀑𑀮𑁄𑀓𑁂𑀢𑁆𑀯𑀸 𑀢𑁂𑀦 𑀧𑀼𑀝𑁆𑀞𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺. 𑀣𑁂𑀭𑁄 𑀫𑀽𑀮𑀲𑀺𑀭𑀺𑀁 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀅𑀣 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑀺. 𑀲𑀢𑁆𑀣𑀸 𑀫𑀽𑀮𑀲𑀺𑀭𑀺𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀚𑀸𑀦𑀸𑀲𑀺 𑀏𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦 𑀚𑀸𑀦𑀸𑀫𑀻’’𑀢𑀺 𑀯𑀼𑀢𑁆𑀢𑁂, ‘‘𑀧𑀺𑀢𑀸 𑀢𑁂 𑀆𑀦𑀦𑁆𑀤𑀲𑁂𑀝𑁆𑀞𑀻’’𑀢𑀺 𑀯𑀢𑁆𑀯𑀸 𑀅𑀲𑀤𑁆𑀤𑀳𑀦𑁆𑀢𑀁 ‘‘𑀆𑀦𑀦𑁆𑀤𑀲𑁂𑀝𑁆𑀞𑀺 𑀧𑀼𑀢𑁆𑀢𑀲𑁆𑀲 𑀢𑁂 𑀧𑀜𑁆𑀘 𑀫𑀳𑀸𑀦𑀺𑀥𑀺𑀬𑁄 𑀆𑀘𑀺𑀓𑁆𑀔𑀸𑀳𑀻’’𑀢𑀺 𑀆𑀘𑀺𑀓𑁆𑀔𑀸𑀧𑁂𑀢𑁆𑀯𑀸 𑀲𑀤𑁆𑀤𑀳𑀸𑀧𑁂𑀲𑀺. 𑀲𑁄 𑀲𑀢𑁆𑀣𑀸𑀭𑀁 𑀲𑀭𑀡𑀁 𑀅𑀕𑀫𑀸𑀲𑀺. 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁨. ‘‘𑀧𑀼𑀢𑁆𑀢𑀸 𑀫𑀢𑁆𑀣𑀺 𑀥𑀦𑀫𑁆𑀫𑀢𑁆𑀣𑀺, 𑀇𑀢𑀺 𑀩𑀸𑀮𑁄 𑀯𑀺𑀳𑀜𑁆𑀜𑀢𑀺;

𑀅𑀢𑁆𑀢𑀸 𑀳𑀺 𑀅𑀢𑁆𑀢𑀦𑁄 𑀦𑀢𑁆𑀣𑀺, 𑀓𑀼𑀢𑁄 𑀧𑀼𑀢𑁆𑀢𑀸 𑀓𑀼𑀢𑁄 𑀥𑀦’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀧𑀼𑀢𑁆𑀢𑀸 𑀫𑁂 𑀅𑀢𑁆𑀣𑀺, 𑀥𑀦𑀁 𑀫𑁂 𑀅𑀢𑁆𑀣𑀺, 𑀇𑀢𑀺 𑀩𑀸𑀮𑁄 𑀧𑀼𑀢𑁆𑀢𑀢𑀡𑁆𑀳𑀸𑀬 𑀘𑁂𑀯 𑀥𑀦𑀢𑀡𑁆𑀳𑀸𑀬 𑀘 𑀳𑀜𑁆𑀜𑀢𑀺 𑀯𑀺𑀳𑀜𑁆𑀜𑀢𑀺 𑀤𑀼𑀓𑁆𑀔𑀬𑀢𑀺, ‘‘𑀧𑀼𑀢𑁆𑀢𑀸 𑀫𑁂 𑀦𑀲𑁆𑀲𑀺𑀁𑀲𑀽’’𑀢𑀺 𑀯𑀺𑀳𑀜𑁆𑀜𑀢𑀺, ‘‘𑀦𑀲𑁆𑀲𑀦𑁆𑀢𑀻’’𑀢𑀺 𑀯𑀺𑀳𑀜𑁆𑀜𑀢𑀺, ‘‘𑀦𑀲𑁆𑀲𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀺𑀳𑀜𑁆𑀜𑀢𑀺. 𑀥𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀙𑀳𑀸𑀓𑀸𑀭𑁂𑀳𑀺 𑀯𑀺𑀳𑀜𑁆𑀜𑀢𑀺. ‘‘𑀧𑀼𑀢𑁆𑀢𑁂 𑀧𑁄𑀲𑁂𑀲𑁆𑀲𑀸𑀫𑀻’’𑀢𑀺 𑀭𑀢𑁆𑀢𑀺𑀜𑁆𑀘 𑀤𑀺𑀯𑀸 𑀘 𑀣𑀮𑀚𑀮𑀧𑀣𑀸𑀤𑀻𑀲𑀼 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀸𑀬𑀫𑀦𑁆𑀢𑁄𑀧𑀺 𑀯𑀺𑀳𑀜𑁆𑀜𑀢𑀺, ‘‘𑀥𑀦𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀻𑀦𑀺 𑀓𑀭𑁄𑀦𑁆𑀢𑁄𑀧𑀺 𑀯𑀺𑀳𑀜𑁆𑀜𑀢𑁂𑀯. 𑀏𑀯𑀁 𑀯𑀺𑀳𑀜𑁆𑀜𑀲𑁆𑀲 𑀘 𑀅𑀢𑁆𑀢𑀸 𑀳𑀺 𑀅𑀢𑁆𑀢𑀦𑁄 𑀦𑀢𑁆𑀣𑀺 𑀢𑁂𑀦 𑀯𑀺𑀖𑀸𑀢𑁂𑀦 𑀤𑀼𑀓𑁆𑀔𑀺𑀢𑀁 𑀅𑀢𑁆𑀢𑀸𑀦𑀁 𑀲𑀼𑀔𑀺𑀢𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀧𑀯𑀢𑁆𑀢𑀺𑀬𑀫𑁆𑀧𑀺𑀲𑁆𑀲 𑀅𑀢𑁆𑀢𑀸 𑀳𑀺 𑀅𑀢𑁆𑀢𑀦𑁄 𑀦𑀢𑁆𑀣𑀺, 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑀲𑁆𑀲 𑀫𑀸𑀭𑀡𑀦𑁆𑀢𑀺𑀓𑀸𑀳𑀺 𑀯𑁂𑀤𑀦𑀸𑀳𑀺 𑀅𑀕𑁆𑀕𑀺𑀚𑀸𑀮𑀸𑀳𑀺 𑀯𑀺𑀬 𑀧𑀭𑀺𑀟𑀬𑁆𑀳𑀫𑀸𑀦𑀲𑁆𑀲 𑀙𑀺𑀚𑁆𑀚𑀫𑀸𑀦𑁂𑀲𑀼 𑀲𑀦𑁆𑀥𑀺𑀩𑀦𑁆𑀥𑀦𑁂𑀲𑀼, 𑀪𑀺𑀚𑁆𑀚𑀫𑀸𑀦𑁂𑀲𑀼 𑀅𑀝𑁆𑀞𑀺𑀲𑀗𑁆𑀖𑀸𑀝𑁂𑀲𑀼 𑀦𑀺𑀫𑀻𑀮𑁂𑀢𑁆𑀯𑀸 𑀧𑀭𑀮𑁄𑀓𑀁 𑀉𑀫𑁆𑀫𑀻𑀮𑁂𑀢𑁆𑀯𑀸 𑀇𑀥𑀮𑁄𑀓𑀁 𑀧𑀲𑁆𑀲𑀦𑁆𑀢𑀲𑁆𑀲𑀸𑀧𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀦𑁆𑀳𑀸𑀧𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀪𑁄𑀚𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑁄𑀲𑀺𑀢𑁄𑀧𑀺 𑀲𑀳𑀸𑀬𑀪𑀸𑀯𑁂𑀦 𑀤𑀼𑀓𑁆𑀔𑀧𑀭𑀺𑀢𑁆𑀢𑀸𑀡𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀅𑀢𑁆𑀢𑀸 𑀳𑀺 𑀅𑀢𑁆𑀢𑀦𑁄 𑀦𑀢𑁆𑀣𑀺. 𑀓𑀼𑀢𑁄 𑀧𑀼𑀢𑁆𑀢𑀸 𑀓𑀼𑀢𑁄 𑀥𑀦𑀁 𑀧𑀼𑀢𑁆𑀢𑀸 𑀯𑀸 𑀥𑀦𑀁 𑀯𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀺𑀫𑁂𑀯 𑀓𑀭𑀺𑀲𑁆𑀲𑀦𑁆𑀢𑀺, 𑀆𑀦𑀦𑁆𑀤𑀲𑁂𑀝𑁆𑀞𑀺𑀦𑁄𑀧𑀺 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀅𑀤𑀢𑁆𑀯𑀸 𑀧𑀼𑀢𑁆𑀢𑀲𑁆𑀲𑀢𑁆𑀣𑀸𑀬 𑀥𑀦𑀁 𑀲𑀡𑁆𑀞𑀧𑁂𑀢𑁆𑀯𑀸 𑀧𑀼𑀩𑁆𑀩𑁂 𑀯𑀸 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑀲𑁆𑀲, 𑀇𑀤𑀸𑀦𑀺 𑀯𑀸 𑀇𑀫𑀁 𑀤𑀼𑀓𑁆𑀔𑀁 𑀧𑀢𑁆𑀢𑀲𑁆𑀲 𑀓𑀼𑀢𑁄 𑀧𑀼𑀢𑁆𑀢𑀸 𑀓𑀼𑀢𑁄 𑀥𑀦𑀁. 𑀧𑀼𑀢𑁆𑀢𑀸 𑀯𑀸 𑀥𑀦𑀁 𑀯𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀺𑀁 𑀤𑀼𑀓𑁆𑀔𑀁 𑀳𑀭𑀺𑀁𑀲𑀼, 𑀓𑀺𑀁 𑀯𑀸 𑀲𑀼𑀔𑀁 𑀉𑀧𑁆𑀧𑀸𑀤𑀬𑀺𑀁𑀲𑀽𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀤𑁂𑀲𑀦𑀸 𑀫𑀳𑀸𑀚𑀦𑀲𑁆𑀲 𑀲𑀸𑀢𑁆𑀣𑀺𑀓𑀸 𑀅𑀳𑁄𑀲𑀻𑀢𑀺.

𑀆𑀦𑀦𑁆𑀤𑀲𑁂𑀝𑁆𑀞𑀺𑀯𑀢𑁆𑀣𑀼 𑀢𑀢𑀺𑀬𑀁.

𑁪. 𑀕𑀡𑁆𑀞𑀺𑀪𑁂𑀤𑀓𑀘𑁄𑀭𑀯𑀢𑁆𑀣𑀼

𑀬𑁄 𑀩𑀸𑀮𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀕𑀡𑁆𑀞𑀺𑀪𑁂𑀤𑀓𑀘𑁄𑀭𑁂 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂 𑀓𑀺𑀭 𑀤𑁆𑀯𑁂 𑀲𑀳𑀸𑀬𑀓𑀸 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑁂𑀦 𑀫𑀳𑀸𑀚𑀦𑁂𑀦 𑀲𑀤𑁆𑀥𑀺𑀁 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀏𑀓𑁄 𑀥𑀫𑁆𑀫𑀓𑀣𑀁 𑀅𑀲𑁆𑀲𑁄𑀲𑀺, 𑀏𑀓𑁄 𑀅𑀢𑁆𑀢𑀦𑁄 𑀕𑀬𑁆𑀳𑀽𑀧𑀕𑀁 𑀑𑀮𑁄𑀓𑁂𑀲𑀺. 𑀢𑁂𑀲𑀼 𑀏𑀓𑁄 𑀥𑀫𑁆𑀫𑀁 𑀲𑀼𑀡𑀫𑀸𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺, 𑀇𑀢𑀭𑁄 𑀏𑀓𑀲𑁆𑀲 𑀤𑀼𑀲𑁆𑀲𑀦𑁆𑀢𑁂 𑀩𑀤𑁆𑀥𑀁 𑀧𑀜𑁆𑀘𑀫𑀸𑀲𑀓𑀫𑀢𑁆𑀢𑀁 𑀮𑀪𑀺. 𑀢𑀲𑁆𑀲 𑀢𑀁 𑀕𑁂𑀳𑁂 𑀧𑀸𑀓𑀪𑀢𑁆𑀢𑀁 𑀚𑀸𑀢𑀁, 𑀇𑀢𑀭𑀲𑁆𑀲 𑀕𑁂𑀳𑁂 𑀦 𑀧𑀘𑁆𑀘𑀢𑀺. 𑀅𑀣 𑀦𑀁 𑀲𑀳𑀸𑀬𑀓𑀘𑁄𑀭𑁄 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬 𑀲𑀤𑁆𑀥𑀺𑀁 𑀉𑀧𑁆𑀧𑀡𑁆𑀟𑀬𑀫𑀸𑀦𑁄 ‘‘𑀢𑁆𑀯𑀁 𑀅𑀢𑀺𑀧𑀡𑁆𑀟𑀺𑀢𑀢𑀸𑀬 𑀅𑀢𑁆𑀢𑀦𑁄 𑀕𑁂𑀳𑁂 𑀧𑀸𑀓𑀪𑀢𑁆𑀢𑀫𑀽𑀮𑀫𑁆𑀧𑀺 𑀦 𑀦𑀺𑀧𑁆𑀨𑀸𑀤𑁂𑀲𑀻’’𑀢𑀺 𑀆𑀳. 𑀇𑀢𑀭𑁄 𑀧𑀦 ‘‘𑀩𑀸𑀮𑀪𑀸𑀯𑁂𑀦𑁂𑀯 𑀯𑀢𑀸𑀬𑀁 𑀅𑀢𑁆𑀢𑀦𑁄 𑀧𑀡𑁆𑀟𑀺𑀢𑀪𑀸𑀯𑀁 𑀫𑀜𑁆𑀜𑀢𑀻’’𑀢𑀺 𑀢𑀁 𑀧𑀯𑀢𑁆𑀢𑀺𑀁 𑀲𑀢𑁆𑀣𑀼 𑀆𑀭𑁄𑀘𑁂𑀢𑀼𑀁 𑀜𑀸𑀢𑀻𑀳𑀺 𑀲𑀤𑁆𑀥𑀺𑀁 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁩. ‘‘𑀬𑁄 𑀩𑀸𑀮𑁄 𑀫𑀜𑁆𑀜𑀢𑀺 𑀩𑀸𑀮𑁆𑀬𑀁, 𑀧𑀡𑁆𑀟𑀺𑀢𑁄 𑀯𑀸𑀧𑀺 𑀢𑁂𑀦 𑀲𑁄;

𑀩𑀸𑀮𑁄 𑀘 𑀧𑀡𑁆𑀟𑀺𑀢𑀫𑀸𑀦𑀻, 𑀲 𑀯𑁂 ‘𑀩𑀸𑀮𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀬𑁄 𑀩𑀸𑀮𑁄𑀢𑀺 𑀬𑁄 𑀅𑀦𑁆𑀥𑀩𑀸𑀮𑁄 𑀅𑀧𑀡𑁆𑀟𑀺𑀢𑁄 𑀲𑀫𑀸𑀦𑁄 ‘‘𑀩𑀸𑀮𑁄 𑀅𑀳’’𑀦𑁆𑀢𑀺 𑀅𑀢𑁆𑀢𑀦𑁄 𑀩𑀸𑀮𑁆𑀬𑀁 𑀩𑀸𑀮𑀪𑀸𑀯𑀁 𑀫𑀜𑁆𑀜𑀢𑀺 𑀚𑀸𑀦𑀸𑀢𑀺. 𑀢𑁂𑀦 𑀲𑁄𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀲𑁄 𑀧𑀼𑀕𑁆𑀕𑀮𑁄 𑀧𑀡𑁆𑀟𑀺𑀢𑁄 𑀯𑀸𑀧𑀺 𑀳𑁄𑀢𑀺 𑀧𑀡𑁆𑀟𑀺𑀢𑀲𑀤𑀺𑀲𑁄 𑀯𑀸. 𑀲𑁄 𑀳𑀺 ‘‘𑀩𑀸𑀮𑁄 𑀅𑀳’’𑀦𑁆𑀢𑀺 𑀚𑀸𑀦𑀫𑀸𑀦𑁄 𑀅𑀜𑁆𑀜𑀁 𑀧𑀡𑁆𑀟𑀺𑀢𑀁 𑀉𑀧𑀲𑀗𑁆𑀓𑀫𑀦𑁆𑀢𑁄 𑀧𑀬𑀺𑀭𑀼𑀧𑀸𑀲𑀦𑁆𑀢𑁄 𑀢𑁂𑀦 𑀧𑀡𑁆𑀟𑀺𑀢𑀪𑀸𑀯𑀢𑁆𑀣𑀸𑀬 𑀑𑀯𑀤𑀺𑀬𑀫𑀸𑀦𑁄 𑀅𑀦𑀼𑀲𑀸𑀲𑀺𑀬𑀫𑀸𑀦𑁄 𑀢𑀁 𑀑𑀯𑀸𑀤𑀁 𑀕𑀡𑁆𑀳𑀺𑀢𑁆𑀯𑀸 𑀧𑀡𑁆𑀟𑀺𑀢𑁄 𑀯𑀸 𑀳𑁄𑀢𑀺 𑀧𑀡𑁆𑀟𑀺𑀢𑀢𑀭𑁄 𑀯𑀸. 𑀲 𑀯𑁂 𑀩𑀸𑀮𑁄𑀢𑀺 𑀬𑁄 𑀘 𑀩𑀸𑀮𑁄 𑀲𑀫𑀸𑀦𑁄 ‘‘𑀓𑁄 𑀅𑀜𑁆𑀜𑁄 𑀫𑀬𑀸 𑀲𑀤𑀺𑀲𑁄 𑀩𑀳𑀼𑀲𑁆𑀲𑀼𑀢𑁄 𑀯𑀸 𑀥𑀫𑁆𑀫𑀓𑀣𑀺𑀓𑁄 𑀯𑀸 𑀯𑀺𑀦𑀬𑀥𑀭𑁄 𑀯𑀸 𑀥𑀼𑀢𑀗𑁆𑀕𑀥𑀭𑁄 𑀯𑀸 𑀅𑀢𑁆𑀣𑀻’’𑀢𑀺 𑀏𑀯𑀁 𑀧𑀡𑁆𑀟𑀺𑀢𑀫𑀸𑀦𑀻 𑀳𑁄𑀢𑀺. 𑀲𑁄 𑀅𑀜𑁆𑀜𑀁 𑀧𑀡𑁆𑀟𑀺𑀢𑀁 𑀅𑀦𑀼𑀧𑀲𑀗𑁆𑀓𑀫𑀦𑁆𑀢𑁄 𑀅𑀧𑀬𑀺𑀭𑀼𑀧𑀸𑀲𑀦𑁆𑀢𑁄 𑀦𑁂𑀯 𑀧𑀭𑀺𑀬𑀢𑁆𑀢𑀺𑀁 𑀉𑀕𑁆𑀕𑀡𑁆𑀳𑀸𑀢𑀺, 𑀦 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑀺, 𑀏𑀓𑀦𑁆𑀢𑀩𑀸𑀮𑀪𑀸𑀯𑀫𑁂𑀯 𑀧𑀸𑀧𑀼𑀡𑀸𑀢𑀺. 𑀲𑁄 𑀕𑀡𑁆𑀞𑀺𑀪𑁂𑀤𑀓𑀘𑁄𑀭𑁄 𑀯𑀺𑀬. 𑀢𑁂𑀦 𑀯𑀼𑀢𑁆𑀢𑀁 ‘‘𑀲 𑀯𑁂 ‘𑀩𑀸𑀮𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀇𑀢𑀭𑀲𑁆𑀲 𑀜𑀸𑀢𑀓𑁂𑀳𑀺 𑀲𑀤𑁆𑀥𑀺𑀁 𑀫𑀳𑀸𑀚𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀻𑀢𑀺.

𑀕𑀡𑁆𑀞𑀺𑀪𑁂𑀤𑀓𑀘𑁄𑀭𑀯𑀢𑁆𑀣𑀼 𑀘𑀢𑀼𑀢𑁆𑀣𑀁.

𑁫. 𑀉𑀤𑀸𑀬𑀺𑀢𑁆𑀣𑁂𑀭𑀯𑀢𑁆𑀣𑀼

𑀬𑀸𑀯𑀚𑀻𑀯𑀫𑁆𑀧𑀺 𑀘𑁂 𑀩𑀸𑀮𑁄𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀤𑀸𑀬𑀺𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀫𑀳𑀸𑀣𑁂𑀭𑁂𑀲𑀼 𑀧𑀝𑀺𑀓𑁆𑀓𑀦𑁆𑀢𑁂𑀲𑀼 𑀥𑀫𑁆𑀫𑀲𑀪𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀅𑀬𑀁 𑀩𑀳𑀼𑀲𑁆𑀲𑀼𑀢𑁄 𑀫𑀳𑀸𑀣𑁂𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑀸 𑀔𑀦𑁆𑀥𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀚𑀸𑀦𑀫𑀸𑀦𑀁 ‘‘𑀓𑁄 𑀏𑀲𑁄, 𑀩𑀼𑀤𑁆𑀥𑁂𑀳𑀺 𑀲𑀤𑁆𑀥𑀺𑀁 𑀏𑀓𑀯𑀺𑀳𑀸𑀭𑁂 𑀯𑀲𑀫𑀸𑀦𑁄 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀫𑀢𑁆𑀢𑀫𑁆𑀧𑀺 𑀦 𑀚𑀸𑀦𑀸𑀢𑀻’’𑀢𑀺 𑀕𑀭𑀳𑀺𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑀢𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁪. ‘‘𑀬𑀸𑀯𑀚𑀻𑀯𑀫𑁆𑀧𑀺 𑀘𑁂 𑀩𑀸𑀮𑁄, 𑀧𑀡𑁆𑀟𑀺𑀢𑀁 𑀧𑀬𑀺𑀭𑀼𑀧𑀸𑀲𑀢𑀺;

𑀦 𑀲𑁄 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺, 𑀤𑀩𑁆𑀩𑀻 𑀲𑀽𑀧𑀭𑀲𑀁 𑀬𑀣𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀩𑀸𑀮𑁄 𑀦𑀸𑀫𑁂𑀲 𑀬𑀸𑀯𑀚𑀻𑀯𑀫𑁆𑀧𑀺 𑀧𑀡𑁆𑀟𑀺𑀢𑀁 𑀉𑀧𑀲𑀗𑁆𑀓𑀫𑀦𑁆𑀢𑁄 𑀧𑀬𑀺𑀭𑀼𑀧𑀸𑀲𑀦𑁆𑀢𑁄 ‘‘𑀇𑀤𑀁 𑀩𑀼𑀤𑁆𑀥𑀯𑀘𑀦𑀁, 𑀏𑀢𑁆𑀢𑀓𑀁 𑀩𑀼𑀤𑁆𑀥𑀯𑀘𑀦’’𑀦𑁆𑀢𑀺 𑀏𑀯𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀯𑀸 ‘‘𑀅𑀬𑀁 𑀘𑀸𑀭𑁄, 𑀅𑀬𑀁 𑀯𑀺𑀳𑀸𑀭𑁄, 𑀅𑀬𑀁 𑀆𑀘𑀸𑀭𑁄, 𑀅𑀬𑀁 𑀕𑁄𑀘𑀭𑁄, 𑀇𑀤𑀁 𑀲𑀸𑀯𑀚𑁆𑀚𑀁, 𑀇𑀤𑀁 𑀅𑀦𑀯𑀚𑁆𑀚𑀁, 𑀇𑀤𑀁 𑀲𑁂𑀯𑀺𑀢𑀩𑁆𑀩𑀁, 𑀇𑀤𑀁 𑀦 𑀲𑁂𑀯𑀺𑀢𑀩𑁆𑀩𑀁, 𑀇𑀤𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀁, 𑀇𑀤𑀁 𑀲𑀘𑁆𑀙𑀺𑀓𑀸𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀥𑀫𑁆𑀫𑀁 𑀯𑀸 𑀦 𑀚𑀸𑀦𑀸𑀢𑀺. 𑀬𑀣𑀸 𑀓𑀺𑀁? 𑀤𑀩𑁆𑀩𑀻 𑀲𑀽𑀧𑀭𑀲𑀁 𑀬𑀣𑀸𑀢𑀺. 𑀬𑀣𑀸 𑀳𑀺 𑀤𑀩𑁆𑀩𑀻 𑀬𑀸𑀯 𑀧𑀭𑀺𑀓𑁆𑀔𑀬𑀸 𑀦𑀸𑀦𑀧𑁆𑀧𑀓𑀸𑀭𑀸𑀬 𑀲𑀽𑀧𑀯𑀺𑀓𑀢𑀺𑀬𑀸 𑀲𑀫𑁆𑀧𑀭𑀺𑀯𑀢𑁆𑀢𑀫𑀸𑀦𑀸𑀧𑀺 ‘‘𑀇𑀤𑀁 𑀮𑁄𑀡𑀺𑀓𑀁, 𑀇𑀤𑀁 𑀅𑀮𑁄𑀡𑀺𑀓𑀁, 𑀇𑀤𑀁 𑀢𑀺𑀢𑁆𑀢𑀓𑀁, 𑀇𑀤𑀁 𑀔𑀸𑀭𑀺𑀓𑀁, 𑀇𑀤𑀁 𑀓𑀝𑀼𑀓𑀁, 𑀇𑀤𑀁 𑀅𑀫𑁆𑀩𑀺𑀮𑀁, 𑀇𑀤𑀁 𑀅𑀦𑀫𑁆𑀩𑀺𑀮𑀁, 𑀇𑀤𑀁 𑀓𑀲𑀸𑀯’’𑀦𑁆𑀢𑀺 𑀲𑀽𑀧𑀭𑀲𑀁 𑀦 𑀚𑀸𑀦𑀸𑀢𑀺, 𑀏𑀯𑀫𑁂𑀯 𑀩𑀸𑀮𑁄 𑀬𑀸𑀯𑀚𑀻𑀯𑀫𑁆𑀧𑀺 𑀧𑀡𑁆𑀟𑀺𑀢𑀁 𑀧𑀬𑀺𑀭𑀼𑀧𑀸𑀲𑀫𑀸𑀦𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀥𑀫𑁆𑀫𑀁 𑀦 𑀚𑀸𑀦𑀸𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀽𑀢𑀺.

𑀉𑀤𑀸𑀬𑀺𑀢𑁆𑀣𑁂𑀭𑀯𑀢𑁆𑀣𑀼 𑀧𑀜𑁆𑀘𑀫𑀁.

𑁬. 𑀢𑀺𑀁𑀲𑀫𑀢𑁆𑀢𑀧𑀸𑀯𑁂𑀬𑁆𑀬𑀓𑀪𑀺𑀓𑁆𑀔𑀼𑀯𑀢𑁆𑀣𑀼

𑀫𑀼𑀳𑀼𑀢𑁆𑀢𑀫𑀧𑀺 𑀘𑁂 𑀯𑀺𑀜𑁆𑀜𑀽𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀢𑀺𑀁𑀲𑀫𑀢𑁆𑀢𑁂 𑀧𑀸𑀯𑁂𑀬𑁆𑀬𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀓𑀣𑁂𑀲𑀺.

𑀢𑁂𑀲𑀜𑁆𑀳𑀺 𑀪𑀕𑀯𑀸 𑀇𑀢𑁆𑀣𑀺𑀁 𑀧𑀭𑀺𑀬𑁂𑀲𑀦𑁆𑀢𑀸𑀦𑀁 𑀓𑀧𑁆𑀧𑀸𑀲𑀺𑀓𑀯𑀦𑀲𑀡𑁆𑀟𑁂 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀤𑀸 𑀢𑁂 𑀲𑀩𑁆𑀩𑁂𑀯 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑀁 𑀧𑀢𑁆𑀯𑀸 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀳𑀼𑀢𑁆𑀯𑀸 𑀢𑁂𑀭𑀲 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀸𑀬 𑀯𑀢𑁆𑀢𑀫𑀸𑀦𑀸 𑀧𑀼𑀦𑀧𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀦𑀫𑀢𑀕𑁆𑀕𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀪𑀺𑀓𑁆𑀔𑀽 ‘‘𑀅𑀳𑁄 𑀯𑀢𑀺𑀫𑁂𑀳𑀺 𑀪𑀺𑀓𑁆𑀔𑀽𑀳𑀺 𑀔𑀺𑀧𑁆𑀧𑀫𑁂𑀯 𑀥𑀫𑁆𑀫𑁄 𑀯𑀺𑀜𑁆𑀜𑀸𑀢𑁄’’𑀢𑀺 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁. 𑀲𑀢𑁆𑀣𑀸 𑀢𑀁 𑀲𑀼𑀢𑁆𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀇𑀤𑀸𑀦𑁂𑀯, 𑀧𑀼𑀩𑁆𑀩𑁂𑀧𑀺 𑀇𑀫𑁂 𑀢𑀺𑀁𑀲𑀫𑀢𑁆𑀢𑀸 𑀲𑀳𑀸𑀬𑀓𑀸 𑀥𑀼𑀢𑁆𑀢𑀸 𑀳𑀼𑀢𑁆𑀯𑀸 𑀢𑀼𑀡𑁆𑀟𑀺𑀮𑀚𑀸𑀢𑀓𑁂 (𑀚𑀸. 𑁧.𑁬.𑁮𑁮 𑀆𑀤𑀬𑁄) 𑀫𑀳𑀸𑀢𑀼𑀡𑁆𑀟𑀺𑀮𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸𑀧𑀺 𑀔𑀺𑀧𑁆𑀧𑀫𑁂𑀯 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀧𑀜𑁆𑀘 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀺𑀁𑀲𑀼, 𑀢𑁂 𑀢𑁂𑀦𑁂𑀯 𑀉𑀧𑀦𑀺𑀲𑁆𑀲𑀬𑁂𑀦 𑀏𑀢𑀭𑀳𑀺 𑀦𑀺𑀲𑀺𑀦𑁆𑀦𑀸𑀲𑀦𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁫. ‘‘𑀫𑀼𑀳𑀼𑀢𑁆𑀢𑀫𑀧𑀺 𑀘𑁂 𑀯𑀺𑀜𑁆𑀜𑀽, 𑀧𑀡𑁆𑀟𑀺𑀢𑀁 𑀧𑀬𑀺𑀭𑀼𑀧𑀸𑀲𑀢𑀺;

𑀔𑀺𑀧𑁆𑀧𑀁 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺, 𑀚𑀺𑀯𑁆𑀳𑀸 𑀲𑀽𑀧𑀭𑀲𑀁 𑀬𑀣𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀯𑀺𑀜𑁆𑀜𑀽 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀫𑀼𑀳𑀼𑀢𑁆𑀢𑀫𑀧𑀺 𑀘𑁂 𑀅𑀜𑁆𑀜𑀁 𑀧𑀡𑁆𑀟𑀺𑀢𑀁 𑀧𑀬𑀺𑀭𑀼𑀧𑀸𑀲𑀢𑀺, 𑀲𑁄 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳𑀦𑁆𑀢𑁄 𑀧𑀭𑀺𑀧𑀼𑀘𑁆𑀙𑀦𑁆𑀢𑁄 𑀔𑀺𑀧𑁆𑀧𑀫𑁂𑀯 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺. 𑀢𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸 𑀧𑀝𑀺𑀧𑀢𑁆𑀢𑀺𑀬𑀁 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀬𑀣𑀸 𑀦𑀸𑀫 𑀅𑀦𑀼𑀧𑀳𑀢𑀚𑀺𑀯𑁆𑀳𑀸𑀧𑀲𑀸𑀤𑁄 𑀧𑀼𑀭𑀺𑀲𑁄 𑀭𑀲𑀯𑀺𑀚𑀸𑀦𑀦𑀢𑁆𑀣𑀁 𑀚𑀺𑀯𑁆𑀳𑀕𑁆𑀕𑁂 𑀞𑀧𑁂𑀢𑁆𑀯𑀸 𑀏𑀯 𑀮𑁄𑀡𑀺𑀓𑀸𑀤𑀺𑀪𑁂𑀤𑀁 𑀭𑀲𑀁 𑀯𑀺𑀚𑀸𑀦𑀸𑀢𑀺, 𑀏𑀯𑀁 𑀧𑀡𑁆𑀟𑀺𑀢𑁄 𑀔𑀺𑀧𑁆𑀧𑀫𑁂𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀫𑁆𑀧𑀺 𑀯𑀺𑀚𑀸𑀦𑀸𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀢𑀺𑀁𑀲𑀫𑀢𑁆𑀢𑀧𑀸𑀯𑁂𑀬𑁆𑀬𑀓𑀪𑀺𑀓𑁆𑀔𑀼𑀯𑀢𑁆𑀣𑀼 𑀙𑀝𑁆𑀞𑀁.

𑁭. 𑀲𑀼𑀧𑁆𑀧𑀩𑀼𑀤𑁆𑀥𑀓𑀼𑀝𑁆𑀞𑀺𑀯𑀢𑁆𑀣𑀼

𑀘𑀭𑀦𑁆𑀢𑀺 𑀩𑀸𑀮𑀸 𑀤𑀼𑀫𑁆𑀫𑁂𑀥𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀼𑀧𑁆𑀧𑀩𑀼𑀤𑁆𑀥𑀓𑀼𑀝𑁆𑀞𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀲𑀼𑀧𑁆𑀧𑀩𑀼𑀤𑁆𑀥𑀓𑀼𑀝𑁆𑀞𑀺𑀯𑀢𑁆𑀣𑀼 𑀉𑀤𑀸𑀦𑁂 (𑀉𑀤𑀸. 𑁪𑁩) 𑀆𑀕𑀢𑀫𑁂𑀯.

𑀢𑀤𑀸 𑀳𑀺 𑀲𑀼𑀧𑁆𑀧𑀩𑀼𑀤𑁆𑀥𑀓𑀼𑀝𑁆𑀞𑀺 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀲𑀺𑀦𑁆𑀦𑁄 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀕𑀼𑀡𑀁 𑀲𑀢𑁆𑀣𑀼 𑀆𑀭𑁄𑀘𑁂𑀢𑀼𑀓𑀸𑀫𑁄 𑀧𑀭𑀺𑀲𑀫𑀚𑁆𑀛𑁂 𑀑𑀕𑀸𑀳𑀺𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀫𑀳𑀸𑀚𑀦𑀲𑁆𑀲 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀦𑀓𑀸𑀮𑁂 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘‘𑀅𑀬𑀁 𑀲𑀼𑀧𑁆𑀧𑀩𑀼𑀤𑁆𑀥𑀓𑀼𑀝𑁆𑀞𑀺 𑀅𑀢𑁆𑀢𑀦𑁄 𑀲𑀢𑁆𑀣𑀼 𑀲𑀸𑀲𑀦𑁂 𑀧𑀝𑀺𑀮𑀤𑁆𑀥𑀕𑀼𑀡𑀁 𑀧𑀸𑀓𑀝𑀁 𑀓𑀸𑀢𑀼𑀓𑀸𑀫𑁄’’𑀢𑀺 𑀜𑀢𑁆𑀯𑀸 ‘‘𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑁄𑀯 𑀏𑀢𑀤𑀯𑁄𑀘 𑁋 ‘‘𑀲𑀼𑀧𑁆𑀧𑀩𑀼𑀤𑁆𑀥, 𑀢𑁆𑀯𑀁 𑀫𑀦𑀼𑀲𑁆𑀲𑀤𑀮𑀺𑀤𑁆𑀤𑁄 𑀫𑀦𑀼𑀲𑁆𑀲𑀯𑀭𑀸𑀓𑁄, 𑀅𑀳𑀁 𑀢𑁂 𑀅𑀧𑀭𑀺𑀬𑀦𑁆𑀢𑀁 𑀥𑀦𑀁 𑀤𑀲𑁆𑀲𑀸𑀫𑀺, ‘𑀩𑀼𑀤𑁆𑀥𑁄 𑀦 𑀩𑀼𑀤𑁆𑀥𑁄, 𑀥𑀫𑁆𑀫𑁄 𑀦 𑀥𑀫𑁆𑀫𑁄, 𑀲𑀗𑁆𑀖𑁄 𑀦 𑀲𑀗𑁆𑀖𑁄, 𑀅𑀮𑀁 𑀫𑁂 𑀩𑀼𑀤𑁆𑀥𑁂𑀦, 𑀅𑀮𑀁 𑀫𑁂 𑀥𑀫𑁆𑀫𑁂𑀦, 𑀅𑀮𑀁 𑀫𑁂 𑀲𑀗𑁆𑀖𑁂𑀦𑀸’𑀢𑀺 𑀯𑀤𑁂𑀳𑀻’’𑀢𑀺. 𑀅𑀣 𑀦𑀁 𑀲𑁄 𑀆𑀳 𑁋 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺? ‘‘𑀅𑀳𑀁 𑀲𑀓𑁆𑀓𑁄’’𑀢𑀺. 𑀅𑀦𑁆𑀥𑀩𑀸𑀮, 𑀅𑀳𑀺𑀭𑀺𑀓 𑀢𑁆𑀯𑀁 𑀫𑀬𑀸 𑀲𑀤𑁆𑀥𑀺𑀁 𑀓𑀣𑁂𑀢𑀼𑀁 𑀦 𑀬𑀼𑀢𑁆𑀢𑀭𑀽𑀧𑁄, 𑀢𑁆𑀯𑀁 𑀫𑀁 ‘‘𑀤𑀼𑀕𑁆𑀕𑀢𑁄 𑀤𑀮𑀺𑀤𑁆𑀤𑁄 𑀓𑀧𑀡𑁄’’𑀢𑀺 𑀯𑀤𑁂𑀲𑀺, 𑀦𑁂𑀯𑀸𑀳𑀁 𑀤𑀼𑀕𑁆𑀕𑀢𑁄, 𑀦 𑀤𑀮𑀺𑀤𑁆𑀤𑁄, 𑀲𑀼𑀔𑀧𑁆𑀧𑀢𑁆𑀢𑁄 𑀅𑀳𑀫𑀲𑁆𑀫𑀺 𑀫𑀳𑀤𑁆𑀥𑀦𑁄 𑁋

‘‘𑀲𑀤𑁆𑀥𑀸𑀥𑀦𑀁 𑀲𑀻𑀮𑀥𑀦𑀁, 𑀳𑀺𑀭𑀻 𑀑𑀢𑁆𑀢𑀧𑁆𑀧𑀺𑀬𑀁 𑀥𑀦𑀁;

𑀲𑀼𑀢𑀥𑀦𑀜𑁆𑀘 𑀘𑀸𑀕𑁄 𑀘, 𑀧𑀜𑁆𑀜𑀸 𑀯𑁂 𑀲𑀢𑁆𑀢𑀫𑀁 𑀥𑀦𑀁.

‘‘𑀬𑀲𑁆𑀲 𑀏𑀢𑁂 𑀥𑀦𑀸 𑀅𑀢𑁆𑀣𑀺, 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀲 𑀯𑀸;

‘𑀅𑀤𑀮𑀺𑀤𑁆𑀤𑁄’𑀢𑀺 𑀢𑀁 𑀆𑀳𑀼, 𑀅𑀫𑁄𑀖𑀁 𑀢𑀲𑁆𑀲 𑀚𑀻𑀯𑀺𑀢’’𑀦𑁆𑀢𑀺. (𑀅. 𑀦𑀺. 𑁭.𑁫-𑁬) 𑁋

𑀇𑀫𑀸𑀦𑀺 𑀫𑁂 𑀲𑀢𑁆𑀢𑀯𑀺𑀥𑀅𑀭𑀺𑀬𑀥𑀦𑀸𑀦𑀺 𑀲𑀦𑁆𑀢𑀺, 𑀬𑁂𑀲𑀜𑁆𑀳𑀺 𑀇𑀫𑀸𑀦𑀺 𑀲𑀢𑁆𑀢 𑀥𑀦𑀸𑀦𑀺 𑀲𑀦𑁆𑀢𑀺, 𑀦 𑀢𑁂 𑀩𑀼𑀤𑁆𑀥𑁂𑀳𑀺 𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀯𑀸 ‘‘𑀤𑀮𑀺𑀤𑁆𑀤𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺. 𑀲𑀓𑁆𑀓𑁄 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀢𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀑𑀳𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀁 𑀢𑀁 𑀯𑀘𑀦𑀧𑀝𑀺𑀯𑀘𑀦𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀪𑀕𑀯𑀸 𑀆𑀳 𑁋 ‘‘𑀦 𑀔𑁄, 𑀲𑀓𑁆𑀓, 𑀲𑀓𑁆𑀓𑀸 𑀢𑀸𑀤𑀺𑀲𑀸𑀦𑀁 𑀲𑀢𑁂𑀦𑀧𑀺 𑀲𑀳𑀲𑁆𑀲𑁂𑀦𑀧𑀺 𑀲𑀼𑀧𑁆𑀧𑀩𑀼𑀤𑁆𑀥𑀓𑀼𑀝𑁆𑀞𑀺𑀁 ‘𑀩𑀼𑀤𑁆𑀥𑁄 𑀦 𑀩𑀼𑀤𑁆𑀥𑁄’𑀢𑀺 𑀯𑀸, ‘𑀥𑀫𑁆𑀫𑁄 𑀦 𑀥𑀫𑁆𑀫𑁄’𑀢𑀺 𑀯𑀸, ‘𑀲𑀗𑁆𑀖𑁄 𑀦 𑀲𑀗𑁆𑀖𑁄’𑀢𑀺 𑀯𑀸 𑀓𑀣𑀸𑀧𑁂𑀢𑀼’’𑀦𑁆𑀢𑀺. 𑀲𑀼𑀧𑁆𑀧𑀩𑀼𑀤𑁆𑀥𑁄𑀧𑀺 𑀔𑁄 𑀓𑀼𑀝𑁆𑀞𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀲𑀫𑁆𑀫𑁄𑀤𑀫𑀸𑀦𑁄 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀕𑀼𑀡𑀁 𑀆𑀭𑁄𑀘𑁂𑀢𑁆𑀯𑀸 𑀯𑀼𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀦𑀁 𑀅𑀘𑀺𑀭𑀧𑀓𑁆𑀓𑀦𑁆𑀢𑀁 𑀕𑀸𑀯𑀻 𑀢𑀭𑀼𑀡𑀯𑀘𑁆𑀙𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺.

𑀲𑀸 𑀓𑀺𑀭 𑀏𑀓𑀸 𑀬𑀓𑁆𑀔𑀺𑀦𑀻 𑀧𑀼𑀓𑁆𑀓𑀼𑀲𑀸𑀢𑀺𑀓𑀼𑀮𑀧𑀼𑀢𑁆𑀢𑀁, 𑀩𑀸𑀳𑀺𑀬𑀁 𑀤𑀸𑀭𑀼𑀘𑀻𑀭𑀺𑀬𑀁, 𑀢𑀫𑁆𑀩𑀤𑀸𑀞𑀺𑀓𑀘𑁄𑀭𑀖𑀸𑀢𑀓𑀁, 𑀲𑀼𑀧𑁆𑀧𑀩𑀼𑀤𑁆𑀥𑀓𑀼𑀝𑁆𑀞𑀺𑀦𑁆𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀚𑀦𑀸𑀦𑀁 𑀅𑀦𑁂𑀓𑀲𑀢𑁂 𑀅𑀢𑁆𑀢𑀪𑀸𑀯𑁂 𑀕𑀸𑀯𑀻 𑀳𑀼𑀢𑁆𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺. 𑀢𑁂 𑀓𑀺𑀭 𑀅𑀢𑀻𑀢𑁂 𑀘𑀢𑁆𑀢𑀸𑀭𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑀸 𑀳𑀼𑀢𑁆𑀯𑀸 𑀏𑀓𑀁 𑀦𑀕𑀭𑀲𑁄𑀪𑀺𑀦𑀺𑀁 𑀕𑀡𑀺𑀓𑀁 𑀉𑀬𑁆𑀬𑀸𑀦𑀁 𑀦𑁂𑀢𑁆𑀯𑀸 𑀤𑀺𑀯𑀲𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀏𑀯𑀁 𑀲𑀫𑁆𑀫𑀦𑁆𑀢𑀬𑀺𑀁𑀲𑀼 𑁋 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀜𑁆𑀜𑁄 𑀦𑀢𑁆𑀣𑀺, 𑀇𑀫𑀺𑀲𑁆𑀲𑀸 𑀅𑀫𑁆𑀳𑁂𑀳𑀺 𑀤𑀺𑀦𑁆𑀦𑀁 𑀓𑀳𑀸𑀧𑀡𑀲𑀳𑀲𑁆𑀲𑀜𑁆𑀘 𑀲𑀩𑁆𑀩𑀜𑁆𑀘 𑀧𑀲𑀸𑀥𑀦𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀇𑀫𑀁 𑀫𑀸𑀭𑁂𑀢𑁆𑀯𑀸 𑀕𑀘𑁆𑀙𑀸𑀫𑀸’’𑀢𑀺. 𑀲𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀇𑀫𑁂 𑀦𑀺𑀮𑁆𑀮𑀚𑁆𑀚𑀸, 𑀫𑀬𑀸 𑀲𑀤𑁆𑀥𑀺𑀁 𑀅𑀪𑀺𑀭𑀫𑀺𑀢𑁆𑀯𑀸 𑀇𑀤𑀸𑀦𑀺 𑀫𑀁 𑀫𑀸𑀭𑁂𑀢𑀼𑀓𑀸𑀫𑀸, 𑀚𑀸𑀦𑀺𑀲𑁆𑀲𑀸𑀫𑀺 𑀦𑁂𑀲𑀁 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓’’𑀦𑁆𑀢𑀺 𑀢𑁂𑀳𑀺 𑀫𑀸𑀭𑀺𑀬𑀫𑀸𑀦𑀸 ‘‘𑀅𑀳𑀁 𑀬𑀓𑁆𑀔𑀺𑀦𑀻 𑀳𑀼𑀢𑁆𑀯𑀸 𑀬𑀣𑀸 𑀫𑀁 𑀏𑀢𑁂 𑀫𑀸𑀭𑁂𑀦𑁆𑀢𑀺, 𑀏𑀯𑀫𑁂𑀯 𑀢𑁂 𑀫𑀸𑀭𑁂𑀢𑀼𑀁 𑀲𑀫𑀢𑁆𑀣𑀸 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀇𑀫𑁂 𑀫𑀸𑀭𑁂𑀲𑀺. 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀢𑀲𑁆𑀲 𑀓𑀸𑀮𑀓𑀺𑀭𑀺𑀬𑀁 𑀪𑀕𑀯𑀢𑁄 𑀆𑀭𑁄𑀘𑁂𑀢𑁆𑀯𑀸 ‘‘𑀢𑀲𑁆𑀲 𑀓𑀸 𑀕𑀢𑀺, 𑀓𑁂𑀦 𑀘 𑀓𑀸𑀭𑀡𑁂𑀦 𑀓𑀼𑀝𑁆𑀞𑀺𑀪𑀸𑀯𑀁 𑀧𑀢𑁆𑀢𑁄’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀢𑀲𑁆𑀲 𑀢𑀸𑀯𑀢𑀺𑀁𑀲𑀪𑀯𑀦𑁂 𑀉𑀧𑁆𑀧𑀦𑁆𑀦𑀪𑀸𑀯𑀜𑁆𑀘 𑀢𑀕𑀭𑀲𑀺𑀔𑀺𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀦𑀺𑀝𑁆𑀞𑀼𑀪𑀺𑀢𑁆𑀯𑀸 𑀅𑀧𑀲𑀩𑁆𑀬𑀁 𑀓𑀢𑁆𑀯𑀸 𑀤𑀻𑀖𑀭𑀢𑁆𑀢𑀁 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀇𑀤𑀸𑀦𑀺 𑀓𑀼𑀝𑁆𑀞𑀺𑀪𑀸𑀯𑀧𑁆𑀧𑀢𑁆𑀢𑀺𑀜𑁆𑀘 𑀩𑁆𑀬𑀸𑀓𑀭𑀺𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀇𑀫𑁂 𑀲𑀢𑁆𑀢𑀸 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀓𑀝𑀼𑀓𑀯𑀺𑀧𑀸𑀓𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀯𑀺𑀘𑀭𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀉𑀢𑁆𑀢𑀭𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁬. ‘‘𑀘𑀭𑀦𑁆𑀢𑀺 𑀩𑀸𑀮𑀸 𑀤𑀼𑀫𑁆𑀫𑁂𑀥𑀸, 𑀅𑀫𑀺𑀢𑁆𑀢𑁂𑀦𑁂𑀯 𑀅𑀢𑁆𑀢𑀦𑀸;

𑀓𑀭𑁄𑀦𑁆𑀢𑀸 𑀧𑀸𑀧𑀓𑀁 𑀓𑀫𑁆𑀫𑀁, 𑀬𑀁 𑀳𑁄𑀢𑀺 𑀓𑀝𑀼𑀓𑀧𑁆𑀨𑀮’’𑀦𑁆𑀢𑀺.

𑀢𑀢𑁆𑀣 𑀘𑀭𑀦𑁆𑀢𑀻𑀢𑀺 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀅𑀓𑀼𑀲𑀮𑀫𑁂𑀯 𑀓𑀭𑁄𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀩𑀸𑀮𑀸𑀢𑀺 𑀇𑀥𑀮𑁄𑀓𑀢𑁆𑀣𑀜𑁆𑀘 𑀧𑀭𑀮𑁄𑀓𑀢𑁆𑀣𑀜𑁆𑀘 𑀅𑀚𑀸𑀦𑀦𑁆𑀢𑀸 𑀇𑀥 𑀩𑀸𑀮𑀸 𑀦𑀸𑀫. 𑀤𑀼𑀫𑁆𑀫𑁂𑀥𑀸𑀢𑀺 𑀤𑀼𑀧𑁆𑀧𑀜𑁆𑀜𑀸. 𑀅𑀫𑀺𑀢𑁆𑀢𑁂𑀦𑁂𑀯 𑀅𑀢𑁆𑀢𑀦𑀸𑀢𑀺 𑀅𑀢𑁆𑀢𑀦𑀸 𑀅𑀫𑀺𑀢𑁆𑀢𑀪𑀽𑀢𑁂𑀦 𑀯𑀺𑀬 𑀯𑁂𑀭𑀺𑀦𑀸 𑀳𑀼𑀢𑁆𑀯𑀸. 𑀓𑀝𑀼𑀓𑀧𑁆𑀨𑀮𑀦𑁆𑀢𑀺 𑀢𑀺𑀔𑀺𑀡𑀨𑀮𑀁 𑀤𑀼𑀓𑁆𑀔𑀨𑀮𑀦𑁆𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀼𑀧𑁆𑀧𑀩𑀼𑀤𑁆𑀥𑀓𑀼𑀝𑁆𑀞𑀺𑀯𑀢𑁆𑀣𑀼 𑀲𑀢𑁆𑀢𑀫𑀁.

𑁮. 𑀓𑀲𑁆𑀲𑀓𑀯𑀢𑁆𑀣𑀼

𑀦 𑀢𑀁 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀽𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀲𑁆𑀲𑀓𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀲𑀸𑀯𑀢𑁆𑀣𑀺𑀢𑁄 𑀅𑀯𑀺𑀤𑀽𑀭𑁂 𑀏𑀓𑀁 𑀔𑁂𑀢𑁆𑀢𑀁 𑀓𑀲𑀢𑀺. 𑀘𑁄𑀭𑀸 𑀉𑀤𑀓𑀦𑀺𑀤𑁆𑀥𑀫𑀦𑁂𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀅𑀟𑁆𑀠𑀓𑀼𑀮𑁂 𑀉𑀫𑀗𑁆𑀕𑀁 𑀪𑀺𑀦𑁆𑀤𑀺𑀢𑁆𑀯𑀸 𑀩𑀳𑀼𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀕𑀳𑁂𑀢𑁆𑀯𑀸 𑀉𑀤𑀓𑀦𑀺𑀤𑁆𑀥𑀫𑀦𑁂𑀦𑁂𑀯 𑀦𑀺𑀓𑁆𑀔𑀫𑀺𑀁𑀲𑀼. 𑀏𑀓𑁄 𑀘𑁄𑀭𑁄 𑀢𑁂 𑀯𑀜𑁆𑀘𑁂𑀢𑁆𑀯𑀸 𑀏𑀓𑀁 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀑𑀯𑀝𑁆𑀝𑀺𑀓𑀸𑀬 𑀓𑀢𑁆𑀯𑀸 𑀢𑀁 𑀔𑁂𑀢𑁆𑀢𑀁 𑀕𑀦𑁆𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀪𑀡𑁆𑀟𑀁 𑀪𑀸𑀚𑁂𑀢𑁆𑀯𑀸 𑀆𑀤𑀸𑀬 𑀕𑀘𑁆𑀙𑀦𑁆𑀢𑁄 𑀑𑀯𑀝𑁆𑀝𑀺𑀓𑀢𑁄 𑀧𑀢𑀫𑀸𑀦𑀁 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀦 𑀲𑀮𑁆𑀮𑀓𑁆𑀔𑁂𑀲𑀺. 𑀢𑀁 𑀤𑀺𑀯𑀲𑀁 𑀲𑀢𑁆𑀣𑀸 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑀁 𑀓𑀲𑁆𑀲𑀓𑀁 𑀅𑀢𑁆𑀢𑀦𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄𑀧𑀯𑀺𑀝𑁆𑀞𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀉𑀧𑀥𑀸𑀭𑀬𑀫𑀸𑀦𑁄 𑀇𑀤𑀁 𑀅𑀤𑁆𑀤𑀲 𑁋 ‘‘𑀅𑀬𑀁 𑀓𑀲𑁆𑀲𑀓𑁄 𑀧𑀸𑀢𑁄𑀯 𑀓𑀲𑀺𑀢𑀼𑀁 𑀕𑀫𑀺𑀲𑁆𑀲𑀢𑀺, 𑀪𑀡𑁆𑀟𑀲𑀸𑀫𑀺𑀓𑀸 𑀘𑁄𑀭𑀸𑀦𑀁 𑀅𑀦𑀼𑀧𑀤𑀁 𑀕𑀦𑁆𑀢𑁆𑀯𑀸 𑀑𑀯𑀝𑁆𑀝𑀺𑀓𑀢𑁄 𑀧𑀢𑀫𑀸𑀦𑀁 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀤𑀺𑀲𑁆𑀯𑀸 𑀏𑀢𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀺, 𑀫𑀁 𑀞𑀧𑁂𑀢𑁆𑀯𑀸 𑀢𑀲𑁆𑀲 𑀅𑀜𑁆𑀜𑁄 𑀲𑀓𑁆𑀔𑀻 𑀦𑀸𑀫 𑀦 𑀪𑀯𑀺𑀲𑁆𑀲𑀢𑀺, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑁄𑀧𑀺𑀲𑁆𑀲 𑀅𑀢𑁆𑀣𑀺, 𑀢𑀢𑁆𑀣 𑀫𑀬𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄𑀧𑀺 𑀓𑀲𑁆𑀲𑀓𑁄 𑀧𑀸𑀢𑁄𑀯 𑀓𑀲𑀺𑀢𑀼𑀁 𑀕𑀢𑁄. 𑀲𑀢𑁆𑀣𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀢𑀢𑁆𑀣 𑀅𑀕𑀫𑀸𑀲𑀺. 𑀓𑀲𑁆𑀲𑀓𑁄 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀼𑀦 𑀓𑀲𑀺𑀢𑀼𑀁 𑀆𑀭𑀪𑀺. 𑀲𑀢𑁆𑀣𑀸 𑀢𑁂𑀦 𑀲𑀤𑁆𑀥𑀺𑀁 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸𑀯 𑀲𑀳𑀲𑁆𑀲𑀢𑁆𑀣𑀯𑀺𑀓𑀸𑀬 𑀧𑀢𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀳 𑁋 ‘‘𑀧𑀲𑁆𑀲, 𑀆𑀦𑀦𑁆𑀤, 𑀆𑀲𑀻𑀯𑀺𑀲𑁄’’𑀢𑀺. ‘‘𑀧𑀲𑁆𑀲𑀸𑀫𑀺, 𑀪𑀦𑁆𑀢𑁂, 𑀖𑁄𑀭𑀯𑀺𑀲𑁄’’𑀢𑀺.

𑀓𑀲𑁆𑀲𑀓𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀫𑀫 𑀯𑁂𑀮𑀸𑀬 𑀯𑀸 𑀅𑀯𑁂𑀮𑀸𑀬 𑀯𑀸 𑀯𑀺𑀘𑀭𑀡𑀝𑁆𑀞𑀸𑀦𑀫𑁂𑀢𑀁, 𑀆𑀲𑀻𑀯𑀺𑀲𑁄 𑀓𑀺𑀭𑁂𑀢𑁆𑀣 𑀅𑀢𑁆𑀣𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀭𑀺 𑀏𑀢𑁆𑀢𑀓𑀁 𑀯𑀢𑁆𑀯𑀸 𑀧𑀓𑁆𑀓𑀦𑁆𑀢𑁂 ‘‘𑀫𑀸𑀭𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀧𑀢𑁄𑀤𑀮𑀝𑁆𑀞𑀺𑀁 𑀆𑀤𑀸𑀬 𑀕𑀢𑁄 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀤𑀺𑀲𑁆𑀯𑀸 ‘‘𑀇𑀫𑀁 𑀲𑀦𑁆𑀥𑀸𑀬 𑀲𑀢𑁆𑀣𑀸𑀭𑀸 𑀓𑀣𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀆𑀤𑀸𑀬 𑀦𑀺𑀯𑀢𑁆𑀢𑁄, 𑀅𑀩𑁆𑀬𑀢𑁆𑀢𑀢𑀸𑀬 𑀏𑀓𑀫𑀦𑁆𑀢𑁂 𑀞𑀧𑁂𑀢𑁆𑀯𑀸 𑀧𑀁𑀲𑀼𑀦𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀧𑀼𑀦 𑀓𑀲𑀺𑀢𑀼𑀁 𑀆𑀭𑀪𑀺. 𑀫𑀦𑀼𑀲𑁆𑀲𑀸 𑀘 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀕𑁂𑀳𑁂 𑀘𑁄𑀭𑁂𑀳𑀺 𑀓𑀢𑀓𑀫𑁆𑀫𑀁 𑀤𑀺𑀲𑁆𑀯𑀸 𑀧𑀤𑀸𑀦𑀼𑀧𑀤𑀁 𑀕𑀘𑁆𑀙𑀦𑁆𑀢𑀸 𑀢𑀁 𑀔𑁂𑀢𑁆𑀢𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀘𑁄𑀭𑁂𑀳𑀺 𑀪𑀡𑁆𑀟𑀲𑁆𑀲 𑀪𑀸𑀚𑀺𑀢𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 𑀓𑀲𑁆𑀲𑀓𑀲𑁆𑀲 𑀧𑀤𑀯𑀮𑀜𑁆𑀚𑀁 𑀅𑀤𑁆𑀤𑀲𑀁𑀲𑀼. 𑀢𑁂 𑀢𑀲𑁆𑀲 𑀧𑀤𑀸𑀦𑀼𑀲𑀸𑀭𑁂𑀦 𑀕𑀦𑁆𑀢𑁆𑀯𑀸 𑀣𑀯𑀺𑀓𑀸𑀬 𑀞𑀧𑀺𑀢𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 𑀧𑀁𑀲𑀼𑀁 𑀯𑀺𑀬𑀽𑀳𑀺𑀢𑁆𑀯𑀸 𑀣𑀯𑀺𑀓𑀁 𑀆𑀤𑀸𑀬 ‘‘𑀢𑁆𑀯𑀁 𑀕𑁂𑀳𑀁 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀔𑁂𑀢𑁆𑀢𑀁 𑀓𑀲𑀫𑀸𑀦𑁄 𑀯𑀺𑀬 𑀯𑀺𑀘𑀭𑀲𑀻’’𑀢𑀺 𑀢𑀚𑁆𑀚𑁂𑀢𑁆𑀯𑀸 𑀧𑁄𑀣𑁂𑀢𑁆𑀯𑀸 𑀦𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑀬𑀺𑀁𑀲𑀼. 𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀯𑀥𑀁 𑀆𑀡𑀸𑀧𑁂𑀲𑀺. 𑀭𑀸𑀚𑀧𑀼𑀭𑀺𑀲𑀸 𑀢𑀁 𑀧𑀘𑁆𑀙𑀸𑀩𑀸𑀳𑀁 𑀩𑀦𑁆𑀥𑀺𑀢𑁆𑀯𑀸 𑀓𑀲𑀸𑀳𑀺 𑀢𑀸𑀴𑁂𑀦𑁆𑀢𑀸 𑀆𑀖𑀸𑀢𑀦𑀁 𑀦𑀬𑀺𑀁𑀲𑀼. 𑀲𑁄 𑀓𑀲𑀸𑀳𑀺 𑀢𑀸𑀴𑀺𑀬𑀫𑀸𑀦𑁄 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 ‘‘𑀧𑀲𑁆𑀲𑀸𑀦𑀦𑁆𑀤, 𑀆𑀲𑀻𑀯𑀺𑀲𑁄𑀢𑀺, 𑀧𑀲𑁆𑀲𑀸𑀫𑀺 𑀪𑀕𑀯𑀸 𑀖𑁄𑀭𑀯𑀺𑀲𑁄’’𑀢𑀺 𑀯𑀤𑀦𑁆𑀢𑁄 𑀕𑀘𑁆𑀙𑀢𑀺. 𑀅𑀣 𑀦𑀁 𑀭𑀸𑀚𑀧𑀼𑀭𑀺𑀲𑀸 ‘‘𑀢𑁆𑀯𑀁 𑀲𑀢𑁆𑀣𑀼 𑀘𑁂𑀯 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀘 𑀓𑀣𑀁 𑀓𑀣𑁂𑀲𑀺, 𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑁋 ‘‘𑀭𑀸𑀚𑀸𑀦𑀁 𑀤𑀝𑁆𑀞𑀼𑀁 𑀮𑀪𑀫𑀸𑀦𑁄 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀭𑀜𑁆𑀜𑁄 𑀢𑀁 𑀧𑀯𑀢𑁆𑀢𑀺𑀁 𑀓𑀣𑀬𑀺𑀁𑀲𑀼. 𑀅𑀣 𑀦𑀁 𑀭𑀸𑀚𑀸 ‘‘𑀓𑀲𑁆𑀫𑀸 𑀏𑀯𑀁 𑀓𑀣𑁂𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 ‘‘𑀦𑀸𑀳𑀁, 𑀤𑁂𑀯, 𑀘𑁄𑀭𑁄’’𑀢𑀺 𑀯𑀢𑁆𑀯𑀸 𑀓𑀲𑀦𑀢𑁆𑀣𑀸𑀬 𑀦𑀺𑀓𑁆𑀔𑀦𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀘𑀺𑀓𑁆𑀔𑀺. 𑀭𑀸𑀚𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀪𑀡𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀁 𑀲𑀢𑁆𑀣𑀸𑀭𑀁 𑀲𑀓𑁆𑀔𑀺𑀁 𑀅𑀧𑀤𑀺𑀲𑀢𑀺, 𑀦 𑀬𑀼𑀢𑁆𑀢𑀁 𑀏𑀢𑀲𑁆𑀲 𑀤𑁄𑀲𑀁 𑀆𑀭𑁄𑀧𑁂𑀢𑀼𑀁, 𑀅𑀳𑀫𑁂𑀢𑁆𑀣 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀆𑀤𑀸𑀬 𑀲𑀸𑀬𑀦𑁆𑀳𑀲𑀫𑀬𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺 𑁋 ‘‘𑀪𑀕𑀯𑀸 𑀓𑀘𑁆𑀘𑀺 𑀢𑀼𑀫𑁆𑀳𑁂 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀏𑀢𑀲𑁆𑀲 𑀓𑀲𑁆𑀲𑀓𑀲𑁆𑀲 𑀓𑀲𑀦𑀝𑁆𑀞𑀸𑀦𑀁 𑀕𑀢𑀸’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀺𑀁 𑀯𑁄 𑀢𑀢𑁆𑀣 𑀤𑀺𑀝𑁆𑀞’’𑀦𑁆𑀢𑀺? ‘‘𑀲𑀳𑀲𑁆𑀲𑀢𑁆𑀣𑀯𑀺𑀓𑀸, 𑀫𑀳𑀸𑀭𑀸𑀚𑀸’’𑀢𑀺. ‘‘𑀤𑀺𑀲𑁆𑀯𑀸 𑀓𑀺𑀁 𑀅𑀯𑁄𑀘𑀼𑀢𑁆𑀣𑀸’’𑀢𑀺? ‘‘𑀇𑀤𑀁 𑀦𑀸𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀪𑀦𑁆𑀢𑁂, 𑀲𑀘𑀸𑀬𑀁 𑀧𑀼𑀭𑀺𑀲𑁄 𑀢𑀼𑀫𑁆𑀳𑀸𑀤𑀺𑀲𑀁 𑀅𑀧𑀤𑀺𑀲𑀁 𑀦𑀸𑀓𑀭𑀺𑀲𑁆𑀲, 𑀦 𑀚𑀻𑀯𑀺𑀢𑀁 𑀅𑀮𑀪𑀺𑀲𑁆𑀲, 𑀢𑀼𑀫𑁆𑀳𑁂𑀳𑀺 𑀧𑀦 𑀓𑀣𑀺𑀢𑀓𑀣𑀁 𑀓𑀣𑁂𑀢𑁆𑀯𑀸 𑀢𑁂𑀦 𑀚𑀻𑀯𑀺𑀢𑀁 𑀮𑀤𑁆𑀥’’𑀦𑁆𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 ‘‘𑀆𑀫, 𑀫𑀳𑀸𑀭𑀸𑀚, 𑀅𑀳𑀫𑁆𑀧𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀯𑀸 𑀕𑀢𑁄, 𑀧𑀡𑁆𑀟𑀺𑀢𑁂𑀦 𑀦𑀸𑀫 𑀬𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀧𑀘𑁆𑀙𑀸𑀦𑀼𑀢𑀧𑁆𑀧𑀁 𑀳𑁄𑀢𑀺, 𑀢𑀁 𑀦 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁭. ‘‘𑀦 𑀢𑀁 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀼, 𑀬𑀁 𑀓𑀢𑁆𑀯𑀸 𑀅𑀦𑀼𑀢𑀧𑁆𑀧𑀢𑀺;

𑀬𑀲𑁆𑀲 𑀅𑀲𑁆𑀲𑀼𑀫𑀼𑀔𑁄 𑀭𑁄𑀤𑀁, 𑀯𑀺𑀧𑀸𑀓𑀁 𑀧𑀝𑀺𑀲𑁂𑀯𑀢𑀻’’𑀢𑀺.

𑀢𑀢𑁆𑀣 𑀦 𑀢𑀁 𑀓𑀫𑁆𑀫𑀦𑁆𑀢𑀺 𑀬𑀁 𑀦𑀺𑀭𑀬𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀦𑀲𑀫𑀢𑁆𑀣𑀁 𑀤𑀼𑀓𑁆𑀔𑀼𑀤𑁆𑀭𑀬𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀅𑀦𑀼𑀲𑁆𑀲𑀭𑀦𑁆𑀢𑁄 𑀅𑀦𑀼𑀲𑁆𑀲𑀭𑀺𑀢𑀸𑀦𑀼𑀲𑁆𑀲𑀭𑀺𑀢𑀓𑁆𑀔𑀡𑁂 𑀅𑀦𑀼𑀢𑀧𑁆𑀧𑀢𑀺 𑀅𑀦𑀼𑀲𑁄𑀘𑀢𑀺, 𑀢𑀁 𑀓𑀢𑀁 𑀦 𑀲𑀸𑀥𑀼 𑀦 𑀲𑀼𑀦𑁆𑀤𑀭𑀁 𑀦𑀺𑀭𑀢𑁆𑀣𑀓𑀁. 𑀬𑀲𑁆𑀲 𑀅𑀲𑁆𑀲𑀼𑀫𑀼𑀔𑁄𑀢𑀺 𑀬𑀲𑁆𑀲 𑀅𑀲𑁆𑀲𑀽𑀳𑀺 𑀢𑀺𑀦𑁆𑀢𑀫𑀼𑀔𑁄 𑀭𑁄𑀤𑀦𑁆𑀢𑁄 𑀯𑀺𑀧𑀸𑀓𑀁 𑀅𑀦𑀼𑀪𑁄𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀓𑀲𑁆𑀲𑀓𑁄 𑀉𑀧𑀸𑀲𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑁄, 𑀲𑀫𑁆𑀧𑀢𑁆𑀢𑀪𑀺𑀓𑁆𑀔𑀽𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀓𑀲𑁆𑀲𑀓𑀯𑀢𑁆𑀣𑀼 𑀅𑀝𑁆𑀞𑀫𑀁.

𑁯. 𑀲𑀼𑀫𑀦𑀫𑀸𑀮𑀸𑀓𑀸𑀭𑀯𑀢𑁆𑀣𑀼

𑀢𑀜𑁆𑀘 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀽𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀯𑁂𑀴𑀼𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀼𑀫𑀦𑀁 𑀦𑀸𑀫 𑀫𑀸𑀮𑀸𑀓𑀸𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑁄 𑀓𑀺𑀭 𑀤𑁂𑀯𑀲𑀺𑀓𑀁 𑀩𑀺𑀫𑁆𑀩𑀺𑀲𑀸𑀭𑀭𑀸𑀚𑀸𑀦𑀁 𑀧𑀸𑀢𑁄𑀯 𑀅𑀝𑁆𑀞𑀳𑀺 𑀲𑀼𑀫𑀦𑀧𑀼𑀧𑁆𑀨𑀦𑀸𑀴𑀻𑀳𑀺 𑀉𑀧𑀝𑁆𑀞𑀳𑀦𑁆𑀢𑁄 𑀅𑀝𑁆𑀞 𑀓𑀳𑀸𑀧𑀡𑁂 𑀮𑀪𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀫𑀺𑀁 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀦𑀕𑀭𑀁 𑀧𑀯𑀺𑀝𑁆𑀞𑀫𑀢𑁆𑀢𑁂 𑀪𑀕𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀳𑀢𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀫𑀳𑀢𑀺𑀬𑀸 𑀩𑀼𑀤𑁆𑀥𑀮𑀻𑀴𑀸𑀬 𑀦𑀕𑀭𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀪𑀕𑀯𑀸 𑀳𑀺 𑀏𑀓𑀤𑀸 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀘𑀻𑀯𑀭𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀜𑁆𑀜𑀢𑀭𑁄 𑀧𑀺𑀡𑁆𑀟𑀧𑀸𑀢𑀺𑀓𑁄 𑀯𑀺𑀬 𑀘𑀭𑀢𑀺 𑀢𑀺𑀁𑀲𑀬𑁄𑀚𑀦𑀫𑀕𑁆𑀕𑀁 𑀅𑀗𑁆𑀕𑀼𑀮𑀺𑀫𑀸𑀮𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀕𑀘𑁆𑀙𑀦𑁆𑀢𑁄 𑀯𑀺𑀬, 𑀏𑀓𑀤𑀸 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀧𑁆𑀧𑀯𑁂𑀲𑀦𑀸𑀤𑀻𑀲𑀼 𑀯𑀺𑀬. 𑀢𑀲𑁆𑀫𑀺𑀫𑁆𑀧𑀺 𑀤𑀺𑀯𑀲𑁂 𑀲𑀭𑀻𑀭𑀢𑁄 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀫𑀳𑀦𑁆𑀢𑁂𑀦 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀫𑀳𑀢𑀺𑀬𑀸 𑀩𑀼𑀤𑁆𑀥𑀮𑀻𑀴𑀸𑀬 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺. 𑀫𑀸𑀮𑀸𑀓𑀸𑀭𑁄 𑀪𑀕𑀯𑀢𑁄 𑀭𑀢𑀦𑀕𑁆𑀖𑀺𑀬𑀲𑀤𑀺𑀲𑀁 𑀅𑀢𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀅𑀲𑀻𑀢𑀸𑀦𑀼𑀩𑁆𑀬𑀜𑁆𑀚𑀦𑀲𑀭𑀻𑀭𑀲𑁄𑀪𑀕𑁆𑀕𑀁 𑀑𑀮𑁄𑀓𑁂𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 ‘‘𑀓𑀺𑀁 𑀦𑀼 𑀔𑁄 𑀲𑀢𑁆𑀣𑀼 𑀅𑀥𑀺𑀓𑀸𑀭𑀁 𑀓𑀭𑁄𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀜𑁆𑀜𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀇𑀫𑁂𑀳𑀺 𑀧𑀼𑀧𑁆𑀨𑁂𑀳𑀺 𑀪𑀕𑀯𑀦𑁆𑀢𑀁 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀸𑀦𑀺 𑀭𑀜𑁆𑀜𑁄 𑀦𑀺𑀩𑀤𑁆𑀥𑀁 𑀉𑀧𑀝𑁆𑀞𑀸𑀦𑀧𑀼𑀧𑁆𑀨𑀸𑀦𑀺, 𑀭𑀸𑀚𑀸 𑀇𑀫𑀸𑀦𑀺 𑀅𑀮𑀪𑀦𑁆𑀢𑁄 𑀫𑀁 𑀩𑀦𑁆𑀥𑀸𑀧𑁂𑀬𑁆𑀬 𑀯𑀸 𑀖𑀸𑀢𑀸𑀧𑁂𑀬𑁆𑀬 𑀯𑀸 𑀭𑀝𑁆𑀞𑀢𑁄 𑀯𑀸 𑀧𑀩𑁆𑀩𑀸𑀚𑁂𑀬𑁆𑀬, 𑀓𑀺𑀁 𑀦𑀼 𑀔𑁄 𑀓𑀭𑁄𑀫𑀻’’𑀢𑀺? 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀭𑀸𑀚𑀸 𑀫𑀁 𑀖𑀸𑀢𑁂𑀢𑀼 𑀯𑀸 𑀩𑀦𑁆𑀥𑀸𑀧𑁂𑀢𑀼 𑀯𑀸 𑀭𑀝𑁆𑀞𑀢𑁄 𑀧𑀩𑁆𑀩𑀸𑀚𑁂𑀢𑀼 𑀯𑀸, 𑀲𑁄 𑀳𑀺 𑀫𑀬𑁆𑀳𑀁 𑀤𑀤𑀫𑀸𑀦𑁄𑀧𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀚𑀻𑀯𑀺𑀢𑀫𑀢𑁆𑀢𑀁 𑀥𑀦𑀁 𑀤𑀤𑁂𑀬𑁆𑀬, 𑀲𑀢𑁆𑀣𑀼𑀧𑀽𑀚𑀸 𑀧𑀦 𑀫𑁂 𑀅𑀦𑁂𑀓𑀸𑀲𑀼 𑀓𑀧𑁆𑀧𑀓𑁄𑀝𑀻𑀲𑀼 𑀅𑀮𑀁 𑀳𑀺𑀢𑀸𑀬 𑀘𑁂𑀯 𑀲𑀼𑀔𑀸𑀬 𑀘𑀸’’𑀢𑀺 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀢𑀣𑀸𑀕𑀢𑀲𑁆𑀲 𑀧𑀭𑀺𑀘𑁆𑀘𑀚𑀺.

𑀲𑁄 ‘‘𑀬𑀸𑀯 𑀫𑁂 𑀧𑀲𑀦𑁆𑀦𑀁 𑀘𑀺𑀢𑁆𑀢𑀁 𑀦 𑀧𑀢𑀺𑀓𑀼𑀝𑀢𑀺, 𑀢𑀁 𑀢𑀸𑀯𑀤𑁂𑀯 𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀳𑀝𑁆𑀞𑀢𑀼𑀝𑁆𑀞𑁄 𑀉𑀤𑀕𑁆𑀕𑀼𑀤𑀕𑁆𑀕𑁄 𑀲𑀢𑁆𑀣𑀸𑀭𑀁 𑀧𑀽𑀚𑁂𑀲𑀺. 𑀓𑀣𑀁? 𑀧𑀞𑀫𑀁 𑀢𑀸𑀯 𑀤𑁆𑀯𑁂𑀯 𑀧𑀼𑀧𑁆𑀨𑀫𑀼𑀝𑁆𑀞𑀺𑀬𑁄 𑀢𑀣𑀸𑀕𑀢𑀲𑁆𑀲 𑀉𑀧𑀭𑀺 𑀔𑀺𑀧𑀺, 𑀢𑀸 𑀉𑀧𑀭𑀺𑀫𑀢𑁆𑀣𑀓𑁂 𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀅𑀧𑀭𑀸 𑀤𑁆𑀯𑁂 𑀫𑀼𑀝𑁆𑀞𑀺𑀬𑁄 𑀔𑀺𑀧𑀺, 𑀢𑀸 𑀤𑀓𑁆𑀔𑀺𑀡𑀳𑀢𑁆𑀣𑀧𑀲𑁆𑀲𑁂𑀦 𑀫𑀸𑀮𑀸𑀧𑀝𑀘𑁆𑀙𑀦𑁆𑀦𑁂𑀦 𑀑𑀢𑀭𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀅𑀧𑀭𑀸 𑀤𑁆𑀯𑁂 𑀫𑀼𑀝𑁆𑀞𑀺𑀬𑁄 𑀔𑀺𑀧𑀺, 𑀢𑀸 𑀧𑀺𑀝𑁆𑀞𑀺𑀧𑀲𑁆𑀲𑁂𑀦 𑀑𑀢𑀭𑀺𑀢𑁆𑀯𑀸 𑀢𑀣𑁂𑀯 𑀅𑀝𑁆𑀞𑀁𑀲𑀼. 𑀅𑀧𑀭𑀸 𑀤𑁆𑀯𑁂 𑀫𑀼𑀝𑁆𑀞𑀺𑀬𑁄 𑀔𑀺𑀧𑀺, 𑀢𑀸 𑀯𑀸𑀫𑀳𑀢𑁆𑀣𑀧𑀲𑁆𑀲𑁂𑀦 𑀑𑀢𑀭𑀺𑀢𑁆𑀯𑀸 𑀢𑀣𑁂𑀯 𑀅𑀝𑁆𑀞𑀁𑀲𑀼. 𑀏𑀯𑀁 𑀅𑀝𑁆𑀞 𑀦𑀸𑀴𑀺𑀬𑁄 𑀅𑀝𑁆𑀞 𑀫𑀼𑀝𑁆𑀞𑀺𑀬𑁄 𑀳𑀼𑀢𑁆𑀯𑀸 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀢𑀣𑀸𑀕𑀢𑀁 𑀧𑀭𑀺𑀓𑁆𑀔𑀺𑀧𑀺𑀁𑀲𑀼. 𑀧𑀼𑀭𑀢𑁄 𑀕𑀫𑀦𑀤𑁆𑀯𑀸𑀭𑀫𑀢𑁆𑀢𑀫𑁂𑀯 𑀅𑀳𑁄𑀲𑀺. 𑀧𑀼𑀧𑁆𑀨𑀸𑀦𑀁 𑀯𑀡𑁆𑀝𑀸𑀦𑀺 𑀅𑀦𑁆𑀢𑁄 𑀅𑀳𑁂𑀲𑀼𑀁, 𑀧𑀢𑁆𑀢𑀸𑀦𑀺 𑀩𑀳𑀺𑀫𑀼𑀔𑀸𑀦𑀺. 𑀪𑀕𑀯𑀸 𑀭𑀚𑀢𑀧𑀢𑁆𑀢𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀧𑀸𑀬𑀸𑀲𑀺. 𑀧𑀼𑀧𑁆𑀨𑀸𑀦𑀺 𑀅𑀘𑀺𑀢𑁆𑀢𑀓𑀸𑀦𑀺𑀧𑀺 𑀲𑀘𑀺𑀢𑁆𑀢𑀓𑀁 𑀦𑀺𑀲𑁆𑀲𑀸𑀬 𑀲𑀘𑀺𑀢𑁆𑀢𑀓𑀸𑀦𑀺 𑀯𑀺𑀬 𑀅𑀪𑀺𑀚𑁆𑀚𑀺𑀢𑁆𑀯𑀸 𑀅𑀧𑀢𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁𑀬𑁂𑀯 𑀕𑀘𑁆𑀙𑀦𑁆𑀢𑀺, 𑀞𑀺𑀢𑀞𑀺𑀢𑀝𑁆𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀺. 𑀲𑀢𑁆𑀣𑀼 𑀲𑀭𑀻𑀭𑀢𑁄 𑀲𑀢𑀲𑀳𑀲𑁆𑀲𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀭𑀁𑀲𑀺𑀬𑁄 𑀦𑀺𑀓𑁆𑀔𑀫𑀺𑀁𑀲𑀼. 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀤𑀓𑁆𑀔𑀺𑀡𑀢𑁄 𑀘 𑀯𑀸𑀫𑀢𑁄 𑀘 𑀲𑀻𑀲𑀫𑀢𑁆𑀣𑀓𑀢𑁄 𑀘 𑀦𑀺𑀭𑀦𑁆𑀢𑀭𑀁 𑀦𑀺𑀓𑁆𑀔𑀦𑁆𑀢𑀭𑀁𑀲𑀻𑀲𑀼 𑀏𑀓𑀸𑀧𑀺 𑀲𑀫𑁆𑀫𑀼𑀔𑀲𑀫𑁆𑀫𑀼𑀔𑀝𑁆𑀞𑀸𑀦𑁂𑀦𑁂𑀯 𑀅𑀧𑀮𑀸𑀬𑀺𑀢𑁆𑀯𑀸 𑀲𑀩𑁆𑀩𑀸𑀧𑀺 𑀲𑀢𑁆𑀣𑀸𑀭𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀭𑀼𑀡𑀢𑀸𑀮𑀓𑁆𑀔𑀦𑁆𑀥𑀧𑁆𑀧𑀫𑀸𑀡𑀸 𑀳𑀼𑀢𑁆𑀯𑀸 𑀧𑀼𑀭𑀢𑁄 𑀏𑀯 𑀥𑀸𑀯𑀦𑁆𑀢𑀺. 𑀲𑀓𑀮𑀦𑀕𑀭𑀁 𑀲𑀗𑁆𑀔𑀼𑀪𑀺. 𑀅𑀦𑁆𑀢𑁄𑀦𑀕𑀭𑁂 𑀦𑀯 𑀓𑁄𑀝𑀺𑀬𑁄, 𑀩𑀳𑀺𑀦𑀕𑀭𑁂 𑀦𑀯 𑀓𑁄𑀝𑀺𑀬𑁄𑀢𑀺 𑀅𑀝𑁆𑀞𑀸𑀭𑀲𑀲𑀼 𑀓𑁄𑀝𑀻𑀲𑀼 𑀏𑀓𑁄𑀧𑀺 𑀧𑀼𑀭𑀺𑀲𑁄 𑀯𑀸 𑀇𑀢𑁆𑀣𑀻 𑀯𑀸 𑀪𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀅𑀦𑀺𑀓𑁆𑀔𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀫𑀳𑀸𑀚𑀦𑁄 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀘𑁂𑀮𑀼𑀓𑁆𑀔𑁂𑀧𑀲𑀳𑀲𑁆𑀲𑀸𑀦𑀺 𑀓𑀭𑁄𑀦𑁆𑀢𑁄 𑀲𑀢𑁆𑀣𑀼 𑀧𑀼𑀭𑀢𑁄𑀯 𑀕𑀘𑁆𑀙𑀢𑀺. 𑀲𑀢𑁆𑀣𑀸𑀧𑀺 𑀫𑀸𑀮𑀸𑀓𑀸𑀭𑀲𑁆𑀲 𑀕𑀼𑀡𑀁 𑀧𑀸𑀓𑀝𑀁 𑀓𑀸𑀢𑀼𑀁 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑁂 𑀦𑀕𑀭𑁂 𑀪𑁂𑀭𑀺𑀘𑀭𑀡𑀫𑀕𑁆𑀕𑁂𑀦𑁂𑀯 𑀅𑀘𑀭𑀺. 𑀫𑀸𑀮𑀸𑀓𑀸𑀭𑀲𑁆𑀲 𑀲𑀓𑀮𑀲𑀭𑀻𑀭𑀁 𑀧𑀜𑁆𑀘𑀯𑀡𑁆𑀡𑀸𑀬 𑀧𑀻𑀢𑀺𑀬𑀸 𑀧𑀭𑀺𑀧𑀽𑀭𑀺.

𑀲𑁄 𑀣𑁄𑀓𑀜𑁆𑀜𑁂𑀯 𑀢𑀣𑀸𑀕𑀢𑁂𑀦 𑀲𑀤𑁆𑀥𑀺𑀁 𑀘𑀭𑀺𑀢𑁆𑀯𑀸 𑀫𑀦𑁄𑀲𑀺𑀮𑀸𑀭𑀲𑁂 𑀦𑀺𑀫𑀼𑀕𑁆𑀕𑁄 𑀯𑀺𑀬 𑀩𑀼𑀤𑁆𑀥𑀭𑀲𑁆𑀫𑀻𑀦𑀁 𑀅𑀦𑁆𑀢𑁄 𑀧𑀯𑀺𑀝𑁆𑀞𑁄 𑀲𑀢𑁆𑀣𑀸𑀭𑀁 𑀣𑁄𑀫𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀢𑀼𑀘𑁆𑀙𑀧𑀘𑁆𑀙𑀺𑀫𑁂𑀯 𑀕𑀳𑁂𑀢𑁆𑀯𑀸 𑀕𑁂𑀳𑀁 𑀅𑀕𑀫𑀸𑀲𑀺. 𑀅𑀣 𑀦𑀁 𑀪𑀭𑀺𑀬𑀸 𑀧𑀼𑀘𑁆𑀙𑀺 ‘‘𑀓𑀳𑀁 𑀧𑀼𑀧𑁆𑀨𑀸𑀦𑀻’’𑀢𑀺? ‘‘𑀲𑀢𑁆𑀣𑀸 𑀫𑁂 𑀧𑀽𑀚𑀺𑀢𑁄’’𑀢𑀺. ‘‘𑀭𑀜𑁆𑀜𑁄 𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀭𑀸𑀚𑀸 𑀫𑀁 𑀖𑀸𑀢𑁂𑀢𑀼 𑀯𑀸 𑀭𑀝𑁆𑀞𑀢𑁄 𑀯𑀸 𑀦𑀻𑀳𑀭𑀢𑀼, 𑀅𑀳𑀁 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀲𑀺𑀁, 𑀲𑀩𑁆𑀩𑀧𑀼𑀧𑁆𑀨𑀸𑀦𑀺 𑀅𑀝𑁆𑀞 𑀫𑀼𑀝𑁆𑀞𑀺𑀬𑁄𑀯 𑀅𑀳𑁂𑀲𑀼𑀁, 𑀏𑀯𑀭𑀽𑀧𑀸 𑀦𑀸𑀫 𑀧𑀽𑀚𑀸 𑀚𑀸𑀢𑀸. 𑀫𑀳𑀸𑀚𑀦𑁄 𑀉𑀓𑁆𑀓𑀼𑀝𑁆𑀞𑀺𑀲𑀳𑀲𑁆𑀲𑀸𑀦𑀺 𑀓𑀭𑁄𑀦𑁆𑀢𑁄 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀘𑀭𑀢𑀺, 𑀬𑁄 𑀏𑀲 𑀫𑀳𑀸𑀚𑀦𑀲𑁆𑀲 𑀉𑀓𑁆𑀓𑀼𑀝𑁆𑀞𑀺𑀲𑀤𑁆𑀤𑁄, 𑀢𑀲𑁆𑀫𑀺𑀁 𑀞𑀸𑀦𑁂 𑀏𑀲𑁄’’𑀢𑀺. 𑀅𑀣𑀲𑁆𑀲 𑀪𑀭𑀺𑀬𑀸 𑀅𑀦𑁆𑀥𑀩𑀸𑀮𑀢𑀸𑀬 𑀏𑀯𑀭𑀽𑀧𑁂 𑀧𑀸𑀝𑀺𑀳𑀸𑀭𑀺𑀬𑁂 𑀧𑀲𑀸𑀤𑀁 𑀦𑀸𑀫 𑀅𑀚𑀦𑁂𑀢𑁆𑀯𑀸 𑀢𑀁 𑀅𑀓𑁆𑀓𑁄𑀲𑀺𑀢𑁆𑀯𑀸 𑀧𑀭𑀺𑀪𑀸𑀲𑀺𑀢𑁆𑀯𑀸 ‘‘𑀭𑀸𑀚𑀸𑀦𑁄 𑀦𑀸𑀫 𑀘𑀡𑁆𑀟𑀸, 𑀲𑀓𑀺𑀁 𑀓𑀼𑀤𑁆𑀥𑀸 𑀳𑀢𑁆𑀣𑀧𑀸𑀤𑀸𑀤𑀺𑀘𑁆𑀙𑁂𑀤𑀦𑁂𑀦 𑀩𑀳𑀼𑀫𑁆𑀧𑀺 𑀅𑀦𑀢𑁆𑀣𑀁 𑀓𑀭𑁄𑀦𑁆𑀢𑀺, 𑀢𑀬𑀸 𑀓𑀢𑀓𑀫𑁆𑀫𑁂𑀦 𑀫𑀬𑁆𑀳𑀫𑁆𑀧𑀺 𑀅𑀦𑀢𑁆𑀣𑁄 𑀲𑀺𑀬𑀸’’𑀢𑀺 𑀧𑀼𑀢𑁆𑀢𑁂 𑀆𑀤𑀸𑀬 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑀸 𑀧𑀓𑁆𑀓𑁄𑀲𑀺𑀢𑁆𑀯𑀸 ‘‘𑀓𑀺𑀁 𑀏𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀸 𑀆𑀳 𑁋 ‘‘𑀫𑀫 𑀲𑀸𑀫𑀺𑀓𑁄 𑀢𑀼𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀦𑀧𑀼𑀧𑁆𑀨𑁂𑀳𑀺 𑀲𑀢𑁆𑀣𑀸𑀭𑀁 𑀧𑀽𑀚𑁂𑀢𑁆𑀯𑀸 𑀢𑀼𑀘𑁆𑀙𑀳𑀢𑁆𑀣𑁄 𑀖𑀭𑀁 𑀆𑀕𑀦𑁆𑀢𑁆𑀯𑀸 ‘𑀓𑀳𑀁 𑀧𑀼𑀧𑁆𑀨𑀸𑀦𑀻’𑀢𑀺 𑀫𑀬𑀸 𑀧𑀼𑀝𑁆𑀞𑁄 𑀇𑀤𑀁 𑀦𑀸𑀫 𑀯𑀤𑁂𑀲𑀺, 𑀅𑀳𑀁 𑀢𑀁 𑀧𑀭𑀺𑀪𑀸𑀲𑀺𑀢𑁆𑀯𑀸 ‘𑀭𑀸𑀚𑀸𑀦𑁄 𑀦𑀸𑀫 𑀘𑀡𑁆𑀟𑀸, 𑀲𑀓𑀺𑀁 𑀓𑀼𑀤𑁆𑀥𑀸 𑀳𑀢𑁆𑀣𑀧𑀸𑀤𑀸𑀤𑀺𑀘𑁆𑀙𑁂𑀤𑀦𑁂𑀦 𑀩𑀳𑀼𑀫𑁆𑀧𑀺 𑀅𑀦𑀢𑁆𑀣𑀁 𑀓𑀭𑁄𑀦𑁆𑀢𑀺, 𑀢𑀬𑀸 𑀓𑀢𑀓𑀫𑁆𑀫𑁂𑀦 𑀫𑀬𑁆𑀳𑀫𑁆𑀧𑀺 𑀅𑀦𑀢𑁆𑀣𑁄 𑀲𑀺𑀬𑀸’𑀢𑀺 𑀢𑀁 𑀙𑀟𑁆𑀟𑁂𑀢𑁆𑀯𑀸 𑀇𑀥𑀸𑀕𑀢𑀸, 𑀢𑁂𑀦 𑀓𑀢𑀁 𑀓𑀫𑁆𑀫𑀁 𑀲𑀼𑀓𑀢𑀁 𑀯𑀸 𑀳𑁄𑀢𑀼, 𑀤𑀼𑀓𑁆𑀓𑀝𑀁 𑀯𑀸, 𑀢𑀲𑁆𑀲𑁂𑀯𑁂𑀢𑀁, 𑀫𑀬𑀸 𑀢𑀲𑁆𑀲 𑀙𑀟𑁆𑀟𑀺𑀢𑀪𑀸𑀯𑀁 𑀚𑀸𑀦𑀸𑀳𑀺, 𑀤𑁂𑀯𑀸’’𑀢𑀺. 𑀭𑀸𑀚𑀸 𑀧𑀞𑀫𑀤𑀲𑁆𑀲𑀦𑁂𑀦𑁂𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀅𑀭𑀺𑀬𑀲𑀸𑀯𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀅𑀬𑀁 𑀇𑀢𑁆𑀣𑀻 𑀅𑀦𑁆𑀥𑀩𑀸𑀮𑀸, 𑀏𑀯𑀭𑀽𑀧𑁂 𑀕𑀼𑀡𑁂 𑀧𑀲𑀸𑀤𑀁 𑀦 𑀉𑀧𑁆𑀧𑀸𑀤𑁂𑀲𑀻’’𑀢𑀺. 𑀲𑁄 𑀓𑀼𑀤𑁆𑀥𑁄 𑀯𑀺𑀬 𑀳𑀼𑀢𑁆𑀯𑀸, ‘‘𑀅𑀫𑁆𑀫, 𑀓𑀺𑀁 𑀯𑀤𑁂𑀲𑀺, 𑀫𑀬𑁆𑀳𑀁 𑀉𑀧𑀝𑁆𑀞𑀸𑀦𑀧𑀼𑀧𑁆𑀨𑁂𑀳𑀺 𑀢𑁂𑀦 𑀧𑀽𑀚𑀸 𑀓𑀢𑀸’’𑀢𑀺? ‘‘𑀆𑀫, 𑀤𑁂𑀯𑀸’’𑀢𑀺. ‘‘𑀪𑀤𑁆𑀤𑀓𑀁 𑀢𑁂 𑀓𑀢𑀁 𑀢𑀁 𑀙𑀟𑁆𑀟𑁂𑀦𑁆𑀢𑀺𑀬𑀸, 𑀫𑀫 𑀧𑀼𑀧𑁆𑀨𑁂𑀳𑀺 𑀧𑀽𑀚𑀸𑀓𑀸𑀭𑀲𑁆𑀲 𑀅𑀳𑀁 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀯𑁂𑀕𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁𑀬𑁂𑀯 𑀯𑀺𑀘𑀭𑀺.

𑀲𑀢𑁆𑀣𑀸 𑀭𑀜𑁆𑀜𑁄 𑀘𑀺𑀢𑁆𑀢𑀧𑁆𑀧𑀲𑀸𑀤𑀁 𑀜𑀢𑁆𑀯𑀸 𑀪𑁂𑀭𑀺𑀘𑀭𑀡𑀯𑀻𑀣𑀺𑀬𑀸 𑀦𑀕𑀭𑀁 𑀘𑀭𑀺𑀢𑁆𑀯𑀸 𑀭𑀜𑁆𑀜𑁄 𑀖𑀭𑀤𑁆𑀯𑀸𑀭𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀕𑁂𑀳𑀁 𑀧𑀯𑁂𑀲𑁂𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀲𑀢𑁆𑀣𑀸 𑀧𑀦 𑀭𑀸𑀚𑀗𑁆𑀕𑀡𑁂𑀬𑁂𑀯 𑀦𑀺𑀲𑀻𑀤𑀦𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀭𑀸𑀚𑀸 𑀢𑀁 𑀜𑀢𑁆𑀯𑀸 ‘‘𑀲𑀻𑀖𑀁 𑀫𑀡𑁆𑀟𑀧𑀁 𑀓𑀭𑁄𑀣𑀸’’𑀢𑀺 𑀢𑀗𑁆𑀔𑀡𑀜𑁆𑀜𑁂𑀯 𑀫𑀡𑁆𑀟𑀧𑀁 𑀓𑀸𑀭𑀸𑀧𑁂𑀲𑀺. 𑀦𑀺𑀲𑀻𑀤𑀺 𑀲𑀢𑁆𑀣𑀸 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀓𑀲𑁆𑀫𑀸 𑀧𑀦 𑀲𑀢𑁆𑀣𑀸 𑀭𑀸𑀚𑀕𑁂𑀳𑀁 𑀦 𑀧𑀸𑀯𑀺𑀲𑀺?

𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀲𑀘𑀸𑀳𑀁 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑁂𑀬𑁆𑀬𑀁, 𑀫𑀳𑀸𑀚𑀦𑁄 𑀫𑀁 𑀤𑀝𑁆𑀞𑀼𑀁 𑀦 𑀮𑀪𑁂𑀬𑁆𑀬, 𑀫𑀸𑀮𑀸𑀓𑀸𑀭𑀲𑁆𑀲 𑀕𑀼𑀡𑁄 𑀧𑀸𑀓𑀝𑁄 𑀦 𑀪𑀯𑁂𑀬𑁆𑀬, 𑀭𑀸𑀚𑀗𑁆𑀕𑀡𑁂 𑀧𑀦 𑀫𑀁 𑀦𑀺𑀲𑀺𑀦𑁆𑀦𑀁 𑀫𑀳𑀸𑀚𑀦𑁄 𑀤𑀝𑁆𑀞𑀼𑀁 𑀮𑀪𑀺𑀲𑁆𑀲𑀢𑀺, 𑀫𑀸𑀮𑀸𑀓𑀸𑀭𑀲𑁆𑀲 𑀕𑀼𑀡𑁄 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀕𑀼𑀡𑀯𑀦𑁆𑀢𑀸𑀦𑀜𑁆𑀳𑀺 𑀕𑀼𑀡𑀁 𑀩𑀼𑀤𑁆𑀥𑀸 𑀏𑀯 𑀧𑀸𑀓𑀝𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀅𑀯𑀲𑁂𑀲𑀚𑀦𑁄 𑀕𑀼𑀡𑀯𑀦𑁆𑀢𑀸𑀦𑀁 𑀕𑀼𑀡𑀁 𑀓𑀣𑁂𑀦𑁆𑀢𑁄 𑀫𑀘𑁆𑀙𑀭𑀸𑀬𑀢𑀺. 𑀘𑀢𑁆𑀢𑀸𑀭𑁄 𑀧𑀼𑀧𑁆𑀨𑀧𑀝𑀸 𑀘𑀢𑀼𑀤𑁆𑀤𑀺𑀲𑀁 𑀅𑀝𑁆𑀞𑀁𑀲𑀼. 𑀫𑀳𑀸𑀚𑀦𑁄 𑀲𑀢𑁆𑀣𑀸𑀭𑀁 𑀧𑀭𑀺𑀯𑀸𑀭𑁂𑀲𑀺. 𑀭𑀸𑀚𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦𑀸𑀳𑀸𑀭𑁂𑀦 𑀧𑀭𑀺𑀯𑀺𑀲𑀺. 𑀲𑀢𑁆𑀣𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀘𑀢𑀽𑀳𑀺 𑀧𑀼𑀧𑁆𑀨𑀧𑀝𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀫𑀳𑀸𑀚𑀦𑁂𑀦 𑀧𑀭𑀺𑀯𑀼𑀢𑁄 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀲𑀢𑁆𑀣𑀸𑀭𑀁 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁄 𑀫𑀸𑀮𑀸𑀓𑀸𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀫𑀫 𑀆𑀳𑀭𑀺𑀢𑀧𑀼𑀧𑁆𑀨𑁂𑀳𑀺 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀲𑀻’’𑀢𑀺 𑀧𑀼𑀘𑁆𑀙𑀺. 𑀫𑀸𑀮𑀸𑀓𑀸𑀭𑁄 ‘‘𑀭𑀸𑀚𑀸 𑀫𑀁 𑀖𑀸𑀢𑁂𑀢𑀼 𑀯𑀸 𑀭𑀝𑁆𑀞𑀢𑁄 𑀯𑀸 𑀧𑀩𑁆𑀩𑀸𑀚𑁂𑀢𑀽𑀢𑀺 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀧𑀽𑀚𑁂𑀲𑀺𑀁 𑀤𑁂𑀯𑀸’’𑀢𑀺 𑀆𑀳. 𑀭𑀸𑀚𑀸 ‘‘𑀢𑁆𑀯𑀁 𑀫𑀳𑀸𑀧𑀼𑀭𑀺𑀲𑁄 𑀦𑀸𑀫𑀸’’𑀢𑀺 𑀯𑀢𑁆𑀯𑀸 𑀅𑀝𑁆𑀞 𑀳𑀢𑁆𑀣𑀻 𑀘 𑀅𑀲𑁆𑀲𑁂 𑀘 𑀤𑀸𑀲𑁂 𑀘 𑀤𑀸𑀲𑀺𑀬𑁄 𑀘 𑀫𑀳𑀸𑀧𑀲𑀸𑀥𑀦𑀸𑀦𑀺 𑀘 𑀅𑀝𑁆𑀞 𑀓𑀳𑀸𑀧𑀡𑀲𑀳𑀲𑁆𑀲𑀸𑀦𑀺 𑀘 𑀭𑀸𑀚𑀓𑀼𑀮𑀢𑁄 𑀦𑀻𑀳𑀭𑀺𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑁆𑀧𑀝𑀺𑀫𑀡𑁆𑀟𑀺𑀢𑀸 𑀅𑀝𑁆𑀞 𑀦𑀸𑀭𑀺𑀬𑁄 𑀘 𑀅𑀝𑁆𑀞 𑀕𑀸𑀫𑀯𑀭𑁂 𑀘𑀸𑀢𑀺 𑀇𑀤𑀁 𑀲𑀩𑁆𑀩𑀝𑁆𑀞𑀓𑀁 𑀦𑀸𑀫 𑀤𑀸𑀦𑀁 𑀅𑀤𑀸𑀲𑀺.

𑀆𑀦𑀦𑁆𑀤𑀢𑁆𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀚𑁆𑀚 𑀧𑀸𑀢𑁄𑀯 𑀧𑀝𑁆𑀞𑀸𑀬 𑀲𑀻𑀳𑀦𑀸𑀤𑀲𑀳𑀲𑁆𑀲𑀸𑀦𑀺 𑀘𑁂𑀯 𑀘𑁂𑀮𑀼𑀓𑁆𑀔𑁂𑀧𑀲𑀳𑀲𑁆𑀲𑀸𑀦𑀺 𑀘 𑀧𑀯𑀢𑁆𑀢𑀦𑁆𑀢𑀺, 𑀓𑁄 𑀦𑀼 𑀔𑁄 𑀫𑀸𑀮𑀸𑀓𑀸𑀭𑀲𑁆𑀲 𑀯𑀺𑀧𑀸𑀓𑁄’’𑀢𑀺? 𑀲𑁄 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 𑁋 ‘‘𑀆𑀦𑀦𑁆𑀤, 𑀇𑀫𑀺𑀦𑀸 𑀫𑀸𑀮𑀸𑀓𑀸𑀭𑁂𑀦 𑀅𑀧𑁆𑀧𑀫𑀢𑁆𑀢𑀓𑀁 𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀫𑀸 𑀲𑀮𑁆𑀮𑀓𑁆𑀔𑁂𑀲𑀺, 𑀅𑀬𑀜𑁆𑀳𑀺 𑀫𑀬𑁆𑀳𑀁 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀧𑀽𑀚𑀁 𑀅𑀓𑀸𑀲𑀺. 𑀲𑁄 𑀏𑀯𑀁 𑀫𑀬𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑁋

‘‘𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀤𑀼𑀕𑁆𑀕𑀢𑀺𑀁 𑀦 𑀕𑀫𑀺𑀲𑁆𑀲𑀢𑀺;

𑀞𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼, 𑀨𑀮𑀁 𑀏𑀢𑀲𑁆𑀲 𑀓𑀫𑁆𑀫𑀼𑀦𑁄;

𑀧𑀘𑁆𑀙𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄, 𑀲𑀼𑀫𑀦𑁄 𑀦𑀸𑀫 𑀪𑀯𑀺𑀲𑁆𑀲𑀢𑀻’’𑀢𑀺. 𑁋

𑀆𑀳. 𑀲𑀢𑁆𑀣𑀼 𑀧𑀦 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀧𑀯𑀺𑀲𑀦𑀓𑀸𑀮𑁂 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀧𑀢𑀺𑀁𑀲𑀼. 𑀲𑀸𑀬𑀦𑁆𑀳𑀲𑀫𑀬𑁂 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀅𑀳𑁄 𑀅𑀘𑁆𑀙𑀭𑀺𑀬𑀁 𑀫𑀸𑀮𑀸𑀓𑀸𑀭𑀲𑁆𑀲 𑀓𑀫𑁆𑀫𑀁, 𑀥𑀭𑀫𑀸𑀦𑀓𑀩𑀼𑀤𑁆𑀥𑀲𑁆𑀲 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀧𑀼𑀧𑁆𑀨𑀧𑀽𑀚𑀁 𑀓𑀢𑁆𑀯𑀸 𑀢𑀗𑁆𑀔𑀡𑀜𑁆𑀜𑁂𑀯 𑀲𑀩𑁆𑀩𑀝𑁆𑀞𑀓𑀁 𑀦𑀸𑀫 𑀮𑀪𑀢𑀻’’𑀢𑀺. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀺𑀡𑁆𑀡𑀁 𑀕𑀫𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀕𑀫𑀦𑁂𑀦 𑀥𑀫𑁆𑀫𑀲𑀪𑀁 𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀸𑀬 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂, ‘‘𑀆𑀫, 𑀪𑀺𑀓𑁆𑀔𑀯𑁂, 𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀧𑀘𑁆𑀙𑀸𑀦𑀼𑀢𑀧𑁆𑀧𑀁 𑀦 𑀳𑁄𑀢𑀺, 𑀅𑀦𑀼𑀲𑁆𑀲𑀭𑀺𑀢𑀸𑀦𑀼𑀲𑁆𑀲𑀭𑀺𑀢𑀓𑁆𑀔𑀡𑁂 𑀲𑁄𑀫𑀦𑀲𑁆𑀲𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀫𑁂𑀯𑀸’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁮. ‘‘𑀢𑀜𑁆𑀘 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀼, 𑀬𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀺;

𑀬𑀲𑁆𑀲 𑀧𑀢𑀻𑀢𑁄 𑀲𑀼𑀫𑀦𑁄, 𑀯𑀺𑀧𑀸𑀓𑀁 𑀧𑀝𑀺𑀲𑁂𑀯𑀢𑀻’’𑀢𑀺.

𑀢𑀢𑁆𑀣 𑀬𑀁 𑀓𑀢𑁆𑀯𑀸𑀢𑀺 𑀬𑀁 𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀻𑀦𑀜𑁆𑀘𑁂𑀯 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀘 𑀦𑀺𑀩𑁆𑀩𑀢𑁆𑀢𑀦𑀲𑀫𑀢𑁆𑀣𑀁 𑀲𑀼𑀔𑀼𑀤𑁆𑀭𑀬𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑀢𑀺, 𑀅𑀣 𑀔𑁄 𑀤𑀺𑀝𑁆𑀞𑀥𑀫𑁆𑀫𑁂𑀬𑁂𑀯 𑀅𑀦𑀼𑀲𑁆𑀲𑀭𑀺𑀢𑀸𑀦𑀼𑀲𑁆𑀲𑀭𑀺𑀢𑀓𑁆𑀔𑀡𑁂𑀬𑁂𑀯 𑀧𑀻𑀢𑀺𑀯𑁂𑀕𑁂𑀦 𑀧𑀢𑀻𑀢𑁄 𑀲𑁄𑀫𑀦𑀲𑁆𑀲𑀯𑁂𑀕𑁂𑀦 𑀘 𑀲𑀼𑀫𑀦𑁄 𑀳𑀼𑀢𑁆𑀯𑀸 𑀆𑀬𑀢𑀺𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀳𑀼𑀢𑁆𑀯𑀸 𑀯𑀺𑀧𑀸𑀓𑀁 𑀧𑀝𑀺𑀲𑁂𑀯𑀢𑀺, 𑀢𑀁 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀼 𑀪𑀤𑁆𑀤𑀓𑀦𑁆𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺.

𑀲𑀼𑀫𑀦𑀫𑀸𑀮𑀸𑀓𑀸𑀭𑀯𑀢𑁆𑀣𑀼 𑀦𑀯𑀫𑀁.

𑁧𑁦. 𑀉𑀧𑁆𑀧𑀮𑀯𑀡𑁆𑀡𑀢𑁆𑀣𑁂𑀭𑀻𑀯𑀢𑁆𑀣𑀼

𑀫𑀥𑀼𑀯𑀸 𑀫𑀜𑁆𑀜𑀢𑀻𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀉𑀧𑁆𑀧𑀮𑀯𑀡𑁆𑀡𑀢𑁆𑀣𑁂𑀭𑀺𑀁 𑀆𑀭𑀩𑁆𑀪 𑀓𑀣𑁂𑀲𑀺.

𑀲𑀸 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀲𑁆𑀲 𑀧𑀸𑀤𑀫𑀽𑀮𑁂 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀼𑀜𑁆𑀜𑀸𑀦𑀺 𑀓𑀼𑀭𑀼𑀫𑀸𑀦𑀸 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀦𑁆𑀢𑀻 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀬𑀁 𑀲𑁂𑀝𑁆𑀞𑀺𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀦𑀻𑀮𑀼𑀧𑁆𑀧𑀮𑀕𑀩𑁆𑀪𑀲𑀫𑀸𑀦𑀯𑀡𑁆𑀡𑀢𑀸𑀬 𑀘𑀲𑁆𑀲𑀸 𑀉𑀧𑁆𑀧𑀮𑀯𑀡𑁆𑀡𑀸𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀅𑀣𑀲𑁆𑀲𑀸 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀸𑀦𑁄 𑀘 𑀲𑁂𑀝𑁆𑀞𑀺𑀦𑁄 𑀘 𑀲𑁂𑀝𑁆𑀞𑀺𑀲𑁆𑀲 𑀲𑀦𑁆𑀢𑀺𑀓𑀁 𑀲𑀸𑀲𑀦𑀁 𑀧𑀳𑀺𑀡𑀺𑀁𑀲𑀼 𑁋 ‘‘𑀥𑀻𑀢𑀭𑀁 𑀅𑀫𑁆𑀳𑀸𑀓𑀁 𑀤𑁂𑀢𑀽’’𑀢𑀺. 𑀅𑀧𑀳𑀺𑀡𑀦𑁆𑀢𑁄 𑀦𑀸𑀫 𑀦𑀸𑀳𑁄𑀲𑀺. 𑀢𑀢𑁄 𑀲𑁂𑀝𑁆𑀞𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀲𑀩𑁆𑀩𑁂𑀲𑀁 𑀫𑀦𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀉𑀧𑀸𑀬𑀁 𑀧𑀦𑁂𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀥𑀻𑀢𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀅𑀫𑁆𑀫, 𑀧𑀩𑁆𑀩𑀚𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺 𑀆𑀳. 𑀢𑀲𑁆𑀲𑀸 𑀧𑀘𑁆𑀙𑀺𑀫𑀪𑀯𑀺𑀓𑀢𑁆𑀢𑀸 𑀢𑀁 𑀯𑀘𑀦𑀁 𑀲𑀻𑀲𑁂 𑀆𑀲𑀺𑀢𑁆𑀢𑀁 𑀲𑀢𑀧𑀸𑀓𑀢𑁂𑀮𑀁 𑀯𑀺𑀬 𑀅𑀳𑁄𑀲𑀺. 𑀢𑀲𑁆𑀫𑀸 𑀧𑀺𑀢𑀭𑀁 ‘‘𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀢𑀸𑀢𑀸’’𑀢𑀺 𑀆𑀳. 𑀲𑁄 𑀢𑀲𑁆𑀲𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀉𑀧𑀲𑁆𑀲𑀬𑀁 𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀢𑀲𑁆𑀲𑀸 𑀅𑀘𑀺𑀭𑀧𑀩𑁆𑀩𑀚𑀺𑀢𑀸𑀬 𑀏𑀯 𑀉𑀧𑁄𑀲𑀣𑀸𑀕𑀸𑀭𑁂 𑀓𑀸𑀮𑀯𑀸𑀭𑁄 𑀧𑀸𑀧𑀼𑀡𑀺. 𑀲𑀸 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀉𑀧𑁄𑀲𑀣𑀸𑀕𑀸𑀭𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀤𑀻𑀧𑀲𑀺𑀔𑀸𑀬 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑁆𑀯𑀸 𑀞𑀺𑀢𑀸𑀯 𑀧𑀼𑀦𑀧𑁆𑀧𑀼𑀦𑀁 𑀑𑀮𑁄𑀓𑀬𑀫𑀸𑀦𑀸 𑀢𑁂𑀚𑁄𑀓𑀲𑀺𑀡𑀸𑀭𑀫𑁆𑀫𑀡𑀁 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀫𑁂𑀯 𑀧𑀸𑀤𑀓𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀘𑁂𑀯 𑀅𑀪𑀺𑀜𑁆𑀜𑀸𑀳𑀺 𑀘.

𑀲𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀅𑀦𑁆𑀥𑀯𑀦𑀁 𑀧𑀸𑀯𑀺𑀲𑀺. 𑀢𑀤𑀸 𑀪𑀺𑀓𑁆𑀔𑀼𑀦𑀻𑀦𑀁 𑀅𑀭𑀜𑁆𑀜𑀯𑀸𑀲𑁄 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺. 𑀅𑀣𑀲𑁆𑀲𑀸 𑀢𑀢𑁆𑀣 𑀓𑀼𑀝𑀺𑀓𑀁 𑀓𑀢𑁆𑀯𑀸 𑀫𑀜𑁆𑀘𑀓𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀺𑀁𑀲𑀼. 𑀲𑀸 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀫𑀸𑀢𑀼𑀮𑀧𑀼𑀢𑁆𑀢𑁄 𑀧𑀦𑀲𑁆𑀲𑀸 𑀦𑀦𑁆𑀤𑀫𑀸𑀡𑀯𑁄 𑀦𑀸𑀫 𑀕𑀺𑀳𑀺𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄. 𑀲𑁄 𑀢𑀲𑁆𑀲𑀸 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 𑀣𑁂𑀭𑀺𑀬𑀸 𑀆𑀕𑀫𑀦𑀢𑁄 𑀧𑀼𑀭𑁂𑀢𑀭𑀫𑁂𑀯 𑀅𑀦𑁆𑀥𑀯𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀓𑀼𑀝𑀺𑀓𑀁 𑀧𑀯𑀺𑀲𑀺𑀢𑁆𑀯𑀸 𑀳𑁂𑀝𑁆𑀞𑀸𑀫𑀜𑁆𑀘𑀓𑁂 𑀦𑀺𑀮𑀻𑀦𑁄 𑀣𑁂𑀭𑀺𑀬𑀸 𑀆𑀕𑀦𑁆𑀢𑁆𑀯𑀸 𑀓𑀼𑀝𑀺𑀓𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀫𑀜𑁆𑀘𑀓𑁂 𑀦𑀺𑀲𑀺𑀦𑁆𑀦𑀫𑀢𑁆𑀢𑀸𑀬 𑀩𑀳𑀺 𑀆𑀢𑀧𑀢𑁄 𑀆𑀕𑀢𑀢𑁆𑀢𑀸 𑀘𑀓𑁆𑀔𑀼𑀧𑀣𑁂 𑀅𑀦𑁆𑀥𑀓𑀸𑀭𑁂 𑀅𑀯𑀺𑀕𑀢𑁂𑀬𑁂𑀯 𑀳𑁂𑀝𑁆𑀞𑀸𑀫𑀜𑁆𑀘𑀓𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀜𑁆𑀘𑀓𑀁 𑀅𑀪𑀺𑀭𑀼𑀬𑁆𑀳 ‘‘𑀫𑀸 𑀦𑀲𑁆𑀲𑀺 𑀩𑀸𑀮, 𑀫𑀸 𑀦𑀲𑁆𑀲𑀺 𑀩𑀸𑀮𑀸’’𑀢𑀺 𑀣𑁂𑀭𑀺𑀬𑀸 𑀯𑀸𑀭𑀺𑀬𑀫𑀸𑀦𑁄𑀬𑁂𑀯 𑀅𑀪𑀺𑀪𑀯𑀺𑀢𑁆𑀯𑀸 𑀅𑀢𑁆𑀢𑀦𑀸 𑀧𑀢𑁆𑀣𑀺𑀢𑀓𑀫𑁆𑀫𑀁 𑀓𑀢𑁆𑀯𑀸 𑀧𑀸𑀬𑀸𑀲𑀺. 𑀅𑀣𑀲𑁆𑀲 𑀅𑀕𑀼𑀡𑀁 𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀯𑀺𑀬 𑀫𑀳𑀸𑀧𑀣𑀯𑀻 𑀤𑁆𑀯𑁂𑀥𑀸 𑀪𑀺𑀚𑁆𑀚𑀺. 𑀲𑁄 𑀧𑀣𑀯𑀺𑀁 𑀧𑀯𑀺𑀝𑁆𑀞𑁄 𑀕𑀦𑁆𑀢𑁆𑀯𑀸 𑀫𑀳𑀸𑀅𑀯𑀻𑀘𑀺𑀫𑁆𑀳𑀺 𑀏𑀯 𑀦𑀺𑀩𑁆𑀩𑀢𑁆𑀢𑀺. 𑀣𑁂𑀭𑀻𑀧𑀺 𑀢𑀫𑀢𑁆𑀣𑀁 𑀪𑀺𑀓𑁆𑀔𑀼𑀦𑀻𑀦𑀁 𑀆𑀭𑁄𑀘𑁂𑀲𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀆𑀭𑁄𑀘𑀬𑀺𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀪𑀺𑀓𑁆𑀔𑀽𑀦𑀻 𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀲𑀼 𑀬𑁄 𑀓𑁄𑀘𑀺 𑀩𑀸𑀮𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀫𑀥𑀼𑀲𑀓𑁆𑀔𑀭𑀸𑀤𑀻𑀲𑀼 𑀓𑀺𑀜𑁆𑀘𑀺 𑀤𑁂𑀯 𑀫𑀥𑀼𑀭𑀭𑀲𑀁 𑀔𑀸𑀤𑀫𑀸𑀦𑁄 𑀧𑀼𑀭𑀺𑀲𑁄 𑀯𑀺𑀬 𑀢𑀼𑀝𑁆𑀞𑀳𑀝𑁆𑀞𑁄 𑀉𑀤𑀕𑁆𑀕𑀼𑀤𑀕𑁆𑀕𑁄 𑀯𑀺𑀬 𑀓𑀭𑁄𑀢𑀻’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

𑁬𑁯. ‘‘𑀫𑀥𑀼𑀯𑀸 𑀫𑀜𑁆𑀜𑀢𑀺 𑀩𑀸𑀮𑁄, 𑀬𑀸𑀯 𑀧𑀸𑀧𑀁 𑀦 𑀧𑀘𑁆𑀘𑀢𑀺;

𑀬𑀤𑀸 𑀘 𑀧𑀘𑁆𑀘𑀢𑀺 𑀧𑀸𑀧𑀁, 𑀩𑀸𑀮𑁄 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀻’’𑀢𑀺.

𑀢𑀢𑁆𑀣 𑀫𑀥𑀼𑀯𑀸𑀢𑀺 𑀩𑀸𑀮𑀲𑁆𑀲 𑀳𑀺 𑀧𑀸𑀧𑀁 𑀅𑀓𑀼𑀲𑀮𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀢𑀁 𑀓𑀫𑁆𑀫𑀁 𑀫𑀥𑀼 𑀯𑀺𑀬 𑀫𑀥𑀼𑀭𑀭𑀲𑀁 𑀯𑀺𑀬 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧𑀁 𑀯𑀺𑀬 𑀉𑀧𑀝𑁆𑀞𑀸𑀢𑀺. 𑀇𑀢𑀺 𑀦𑀁 𑀲𑁄 𑀫𑀥𑀼𑀁𑀯 𑀫𑀜𑁆𑀜𑀢𑀺. 𑀬𑀸𑀯𑀸𑀢𑀺 𑀬𑀢𑁆𑀢𑀓𑀁 𑀓𑀸𑀮𑀁. 𑀧𑀸𑀧𑀁 𑀦 𑀧𑀘𑁆𑀘𑀢𑀻𑀢𑀺 𑀤𑀺𑀝𑁆𑀞𑀥𑀫𑁆𑀫𑁂 𑀯𑀸 𑀲𑀫𑁆𑀧𑀭𑀸𑀬𑁂 𑀯𑀸 𑀯𑀺𑀧𑀸𑀓𑀁 𑀦 𑀤𑁂𑀢𑀺, 𑀢𑀸𑀯 𑀦𑀁 𑀏𑀯𑀁 𑀫𑀜𑁆𑀜𑀢𑀺. 𑀬𑀤𑀸 𑀘𑀸𑀢𑀺 𑀬𑀤𑀸 𑀧𑀦𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑁂 𑀯𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀬𑀺𑀭𑀫𑀸𑀦𑀲𑁆𑀲, 𑀲𑀫𑁆𑀧𑀭𑀸𑀬𑁂 𑀯𑀸 𑀦𑀺𑀭𑀬𑀸𑀤𑀻𑀲𑀼 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀲𑁆𑀲 𑀢𑀁 𑀧𑀸𑀧𑀁 𑀧𑀘𑁆𑀘𑀢𑀺, 𑀅𑀣 𑀲𑁄 𑀩𑀸𑀮𑁄 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀺 𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀼.