𑁧𑁪. 𑀘𑀺𑀢𑁆𑀢𑀕𑀳𑀧𑀢𑀺𑀯𑀢𑁆𑀣𑀼

𑀅𑀲𑀦𑁆𑀢𑀁 𑀪𑀸𑀯𑀦𑀫𑀺𑀘𑁆𑀙𑁂𑀬𑁆𑀬𑀸𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀲𑀼𑀥𑀫𑁆𑀫𑀢𑁆𑀣𑁂𑀭𑀁 𑀆𑀭𑀩𑁆𑀪 𑀓𑀣𑁂𑀲𑀺. 𑀤𑁂𑀲𑀦𑀸 𑀫𑀘𑁆𑀙𑀺𑀓𑀸𑀲𑀡𑁆𑀟𑁂 𑀲𑀫𑀼𑀝𑁆𑀞𑀸𑀬 𑀲𑀸𑀯𑀢𑁆𑀣𑀺𑀬𑀁 𑀦𑀺𑀝𑁆𑀞𑀺𑀢𑀸.

𑀫𑀘𑁆𑀙𑀺𑀓𑀸𑀲𑀡𑁆𑀟𑀦𑀕𑀭𑀲𑁆𑀫𑀺𑀜𑁆𑀳𑀺 𑀘𑀺𑀢𑁆𑀢𑁄 𑀦𑀸𑀫 𑀕𑀳𑀧𑀢𑀺 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀅𑀩𑁆𑀪𑀦𑁆𑀢𑀭𑀁 𑀫𑀳𑀸𑀦𑀸𑀫𑀢𑁆𑀣𑁂𑀭𑀁 𑀦𑀸𑀫 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀇𑀭𑀺𑀬𑀸𑀧𑀣𑁂 𑀧𑀲𑀻𑀤𑀺𑀢𑁆𑀯𑀸 𑀧𑀢𑁆𑀢𑀁 𑀆𑀤𑀸𑀬 𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀅𑀘𑀮𑀲𑀤𑁆𑀥𑁄 𑀳𑀼𑀢𑁆𑀯𑀸 𑀅𑀫𑁆𑀩𑀸𑀝𑀓𑀯𑀦𑀁 𑀦𑀸𑀫 𑀅𑀢𑁆𑀢𑀦𑁄 𑀉𑀬𑁆𑀬𑀸𑀦𑀁 𑀲𑀗𑁆𑀖𑀸𑀭𑀸𑀫𑀁 𑀓𑀢𑁆𑀢𑀼𑀓𑀸𑀫𑁄 𑀣𑁂𑀭𑀲𑁆𑀲 𑀳𑀢𑁆𑀣𑁂 𑀉𑀤𑀓𑀁 𑀧𑀸𑀢𑁂𑀢𑁆𑀯𑀸 𑀦𑀺𑀬𑁆𑀬𑀸𑀤𑁂𑀲𑀺. 𑀢𑀲𑁆𑀫𑀺𑀁 𑀔𑀡𑁂 ‘‘𑀧𑀢𑀺𑀝𑁆𑀞𑀺𑀢𑀁 𑀩𑀼𑀤𑁆𑀥𑀲𑀸𑀲𑀦’’𑀦𑁆𑀢𑀺 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀫𑀳𑀸𑀧𑀣𑀯𑀻 𑀓𑀫𑁆𑀧𑀺. 𑀫𑀳𑀸𑀲𑁂𑀝𑁆𑀞𑀺 𑀉𑀬𑁆𑀬𑀸𑀦𑁂 𑀫𑀳𑀸𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀲𑀩𑁆𑀩𑀤𑀺𑀲𑀸𑀳𑀺 𑀆𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀯𑀝𑀤𑁆𑀯𑀸𑀭𑁄 𑀅𑀳𑁄𑀲𑀺. 𑀫𑀘𑁆𑀙𑀺𑀓𑀸𑀲𑀡𑁆𑀟𑁂 𑀲𑀼𑀥𑀫𑁆𑀫𑀢𑁆𑀣𑁂𑀭𑁄 𑀦𑀸𑀫 𑀦𑁂𑀯𑀸𑀲𑀺𑀓𑁄 𑀅𑀳𑁄𑀲𑀺.

𑀅𑀧𑀭𑁂𑀦 𑀲𑀫𑀬𑁂𑀦 𑀘𑀺𑀢𑁆𑀢𑀲𑁆𑀲 𑀕𑀼𑀡𑀓𑀣𑀁 𑀲𑀼𑀢𑁆𑀯𑀸 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀢𑀲𑁆𑀲 𑀲𑀗𑁆𑀕𑀳𑀁 𑀓𑀢𑁆𑀢𑀼𑀓𑀸𑀫𑀸 𑀫𑀘𑁆𑀙𑀺𑀓𑀸𑀲𑀡𑁆𑀟𑀁 𑀅𑀕𑀫𑀁𑀲𑀼. 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀢𑁂𑀲𑀁 𑀆𑀕𑀫𑀦𑀁 𑀲𑀼𑀢𑁆𑀯𑀸 𑀅𑀟𑁆𑀠𑀬𑁄𑀚𑀦𑀫𑀕𑁆𑀕𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀢𑁂 𑀆𑀤𑀸𑀬 𑀅𑀢𑁆𑀢𑀦𑁄 𑀯𑀺𑀳𑀸𑀭𑀁 𑀧𑀯𑁂𑀲𑁂𑀢𑁆𑀯𑀸 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀓𑀢𑁆𑀯𑀸, ‘‘𑀪𑀦𑁆𑀢𑁂, 𑀣𑁄𑀓𑀁 𑀥𑀫𑁆𑀫𑀓𑀣𑀁 𑀲𑁄𑀢𑀼𑀓𑀸𑀫𑁄𑀫𑁆𑀳𑀻’’𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀬𑀸𑀘𑀺. 𑀅𑀣 𑀦𑀁 𑀣𑁂𑀭𑁄, ‘‘𑀉𑀧𑀸𑀲𑀓, 𑀅𑀤𑁆𑀥𑀸𑀦𑁂𑀦 𑀆𑀕𑀢𑀸𑀫𑁆𑀳𑀸 𑀓𑀺𑀮𑀦𑁆𑀢𑀭𑀽𑀧𑀸. 𑀅𑀧𑀺𑀘 𑀣𑁄𑀓𑀁 𑀲𑀼𑀡𑀸𑀳𑀻’’𑀢𑀺 𑀢𑀲𑁆𑀲 𑀥𑀫𑁆𑀫𑀁 𑀓𑀣𑁂𑀲𑀺. 𑀲𑁄 𑀣𑁂𑀭𑀲𑁆𑀲 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄𑀯 𑀅𑀦𑀸𑀕𑀸𑀫𑀺𑀨𑀮𑀁 𑀧𑀸𑀧𑀼𑀡𑀺. 𑀲𑁄 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀲𑁆𑀯𑁂 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀫𑀫 𑀕𑁂𑀳𑁂 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀘𑁆𑀙𑀸 𑀦𑁂𑀯𑀸𑀲𑀺𑀓𑀁 𑀲𑀼𑀥𑀫𑁆𑀫𑀢𑁆𑀣𑁂𑀭𑀁 ‘‘𑀢𑀼𑀫𑁆𑀳𑁂𑀧𑀺, 𑀪𑀦𑁆𑀢𑁂, 𑀲𑁆𑀯𑁂 𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀆𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀲𑀺. 𑀲𑁄 ‘‘𑀅𑀬𑀁 𑀫𑀁 𑀧𑀘𑁆𑀙𑀸 𑀦𑀺𑀫𑀦𑁆𑀢𑁂𑀢𑀻’’𑀢𑀺 𑀓𑀼𑀤𑁆𑀥𑁄 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑀫𑀸𑀦𑁄𑀧𑀺 𑀧𑀝𑀺𑀓𑁆𑀔𑀺𑀧𑀺 𑀏𑀯. 𑀉𑀧𑀸𑀲𑀓𑁄 ‘‘𑀧𑀜𑁆𑀜𑀸𑀬𑀺𑀲𑁆𑀲𑀣, 𑀪𑀦𑁆𑀢𑁂’’𑀢𑀺 𑀧𑀓𑁆𑀓𑀫𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑁂 𑀫𑀳𑀸𑀤𑀸𑀦𑀁 𑀲𑀚𑁆𑀚𑁂𑀲𑀺. 𑀲𑀼𑀥𑀫𑁆𑀫𑀢𑁆𑀣𑁂𑀭𑁄𑀧𑀺 𑀧𑀘𑁆𑀘𑀽𑀲𑀓𑀸𑀮𑁂𑀬𑁂𑀯 ‘‘𑀓𑀻𑀤𑀺𑀲𑁄 𑀦𑀼 𑀔𑁄 𑀕𑀳𑀧𑀢𑀺𑀦𑀸 𑀅𑀕𑁆𑀕𑀲𑀸𑀯𑀓𑀸𑀦𑀁 𑀲𑀓𑁆𑀓𑀸𑀭𑁄 𑀲𑀚𑁆𑀚𑀺𑀢𑁄, 𑀲𑁆𑀯𑁂 𑀕𑀦𑁆𑀢𑁆𑀯𑀸 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀸𑀢𑁄𑀯 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀢𑀲𑁆𑀲 𑀕𑁂𑀳𑀁 𑀅𑀕𑀫𑀸𑀲𑀺.

𑀲𑁄 𑀕𑀳𑀧𑀢𑀺𑀦𑀸 ‘‘𑀦𑀺𑀲𑀻𑀤𑀣, 𑀪𑀦𑁆𑀢𑁂’’𑀢𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 ‘‘𑀦𑀸𑀳𑀁 𑀦𑀺𑀲𑀻𑀤𑀸𑀫𑀺, 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀅𑀕𑁆𑀕𑀲𑀸𑀯𑀓𑀸𑀦𑀁 𑀧𑀝𑀺𑀬𑀸𑀤𑀺𑀢𑀁 𑀲𑀓𑁆𑀓𑀸𑀭𑀁 𑀑𑀮𑁄𑀓𑁂𑀢𑁆𑀯𑀸 𑀕𑀳𑀧𑀢𑀺𑀁 𑀚𑀸𑀢𑀺𑀬𑀸 𑀖𑀝𑁆𑀝𑁂𑀢𑀼𑀓𑀸𑀫𑁄 ‘‘𑀉𑀴𑀸𑀭𑁄 𑀢𑁂, 𑀕𑀳𑀧𑀢𑀺, 𑀲𑀓𑁆𑀓𑀸𑀭𑁄, 𑀅𑀧𑀺𑀘𑁂𑀢𑁆𑀣 𑀏𑀓𑀜𑁆𑀜𑁂𑀯 𑀦𑀢𑁆𑀣𑀻’’𑀢𑀺 𑀆𑀳. ‘‘𑀓𑀺𑀁, 𑀪𑀦𑁆𑀢𑁂’’𑀢𑀺? ‘‘𑀢𑀺𑀮𑀲𑀁𑀕𑀼𑀴𑀺𑀓𑀸, 𑀕𑀳𑀧𑀢𑀻’’𑀢𑀺 𑀯𑀢𑁆𑀯𑀸 𑀕𑀳𑀧𑀢𑀺𑀦𑀸 𑀓𑀸𑀓𑁄𑀧𑀫𑀸𑀬 𑀅𑀧𑀲𑀸𑀤𑀺𑀢𑁄 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀏𑀲𑁄 𑀢𑁂, 𑀕𑀳𑀧𑀢𑀺, 𑀆𑀯𑀸𑀲𑁄, 𑀧𑀓𑁆𑀓𑀫𑀺𑀲𑁆𑀲𑀸𑀫𑀳’’𑀦𑁆𑀢𑀺 𑀯𑀢𑁆𑀯𑀸 𑀬𑀸𑀯𑀢𑀢𑀺𑀬𑀁 𑀯𑀸𑀭𑀺𑀬𑀫𑀸𑀦𑁄𑀧𑀺 𑀧𑀓𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀘𑀺𑀢𑁆𑀢𑁂𑀦 𑀘 𑀅𑀢𑁆𑀢𑀦𑀸 𑀘 𑀯𑀼𑀢𑁆𑀢𑀯𑀘𑀦𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 ‘‘𑀢𑀬𑀸 𑀉𑀧𑀸𑀲𑀓𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀳𑀻𑀦𑁂𑀦 𑀔𑀼𑀁𑀲𑀺𑀢𑁄’’𑀢𑀺 𑀢𑀲𑁆𑀲𑁂𑀯 𑀤𑁄𑀲𑀁 𑀆𑀭𑁄𑀧𑁂𑀢𑁆𑀯𑀸 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 ‘‘𑀕𑀘𑁆𑀙, 𑀘𑀺𑀢𑁆𑀢𑀕𑀳𑀧𑀢𑀺𑀁 𑀔𑀫𑀸𑀧𑁂𑀳𑀻’’𑀢𑀺 𑀧𑁂𑀲𑁂𑀲𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸, ‘‘𑀕𑀳𑀧𑀢𑀺, 𑀫𑀬𑁆𑀳𑀫𑁂𑀯 𑀲𑁄 𑀤𑁄𑀲𑁄, 𑀔𑀫𑀸𑀳𑀺 𑀫𑁂’’𑀢𑀺 𑀯𑀢𑁆𑀯𑀸𑀧𑀺 ‘‘𑀦𑀸𑀳𑀁 𑀔𑀫𑀸𑀫𑀻’’𑀢𑀺 𑀢𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑁄 𑀫𑀗𑁆𑀓𑀼𑀪𑀽𑀢𑁄 𑀢𑀁 𑀔𑀫𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀧𑀼𑀦𑀤𑁂𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀧𑀘𑁆𑀘𑀸𑀕𑀫𑀸𑀲𑀺. 𑀲𑀢𑁆𑀣𑀸 ‘‘𑀦𑀸𑀲𑁆𑀲 𑀉𑀧𑀸𑀲𑀓𑁄 𑀔𑀫𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀦𑁆𑀢𑁄𑀧𑀺 ‘‘𑀫𑀸𑀦𑀣𑀤𑁆𑀥𑁄 𑀏𑀲, 𑀢𑀺𑀁𑀲𑀬𑁄𑀚𑀦𑀁 𑀢𑀸𑀯 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑀸𑀕𑀘𑁆𑀙𑀢𑀽’’𑀢𑀺 𑀔𑀫𑀦𑀽𑀧𑀸𑀬𑀁 𑀅𑀦𑀸𑀘𑀺𑀓𑁆𑀔𑀺𑀢𑁆𑀯𑀸𑀯 𑀉𑀬𑁆𑀬𑁄𑀚𑁂𑀲𑀺. 𑀅𑀣𑀲𑁆𑀲 𑀧𑀼𑀦𑀸𑀕𑀢𑀓𑀸𑀮𑁂 𑀦𑀺𑀳𑀢𑀫𑀸𑀦𑀲𑁆𑀲 𑀅𑀦𑀼𑀤𑀽𑀢𑀁 𑀤𑀢𑁆𑀯𑀸 ‘‘𑀕𑀘𑁆𑀙, 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀉𑀧𑀸𑀲𑀓𑀁 𑀔𑀫𑀸𑀧𑁂𑀳𑀻’’𑀢𑀺 𑀯𑀢𑁆𑀯𑀸 ‘‘𑀲𑀫𑀡𑁂𑀦 𑀦𑀸𑀫 ‘𑀫𑀬𑁆𑀳𑀁 𑀯𑀺𑀳𑀸𑀭𑁄, 𑀫𑀬𑁆𑀳𑀁 𑀦𑀺𑀯𑀸𑀲𑀝𑁆𑀞𑀸𑀦𑀁, 𑀫𑀬𑁆𑀳𑀁 𑀉𑀧𑀸𑀲𑀓𑁄, 𑀫𑀬𑁆𑀳𑀁 𑀉𑀧𑀸𑀲𑀺𑀓𑀸’𑀢𑀺 𑀫𑀸𑀦𑀁 𑀯𑀸 𑀇𑀲𑁆𑀲𑀁 𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀏𑀯𑀁 𑀓𑀭𑁄𑀦𑁆𑀢𑀲𑁆𑀲 𑀳𑀺 𑀇𑀘𑁆𑀙𑀸𑀫𑀸𑀦𑀸𑀤𑀬𑁄 𑀓𑀺𑀮𑁂𑀲𑀸 𑀯𑀟𑁆𑀠𑀦𑁆𑀢𑀻’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀖𑀝𑁆𑀝𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

𑁭𑁩. ‘‘𑀅𑀲𑀦𑁆𑀢𑀁 𑀪𑀸𑀯𑀦𑀫𑀺𑀘𑁆𑀙𑁂𑀬𑁆𑀬, 𑀧𑀼𑀭𑁂𑀓𑁆𑀔𑀸𑀭𑀜𑁆𑀘 𑀪𑀺𑀓𑁆𑀔𑀼𑀲𑀼;

𑀆𑀯𑀸𑀲𑁂𑀲𑀼 𑀇𑀲𑁆𑀲𑀭𑀺𑀬𑀁, 𑀧𑀽𑀚𑀸 𑀧𑀭𑀓𑀼𑀮𑁂𑀲𑀼 𑀘.

𑁭𑁪. ‘‘𑀫𑀫𑁂𑀯 𑀓𑀢 𑀫𑀜𑁆𑀜𑀦𑁆𑀢𑀼, 𑀕𑀺𑀳𑀻 𑀧𑀩𑁆𑀩𑀚𑀺𑀢𑀸 𑀉𑀪𑁄.

𑀫𑀫𑁂𑀯𑀸𑀢𑀺𑀯𑀲𑀸 𑀅𑀲𑁆𑀲𑀼, 𑀓𑀺𑀘𑁆𑀘𑀸𑀓𑀺𑀘𑁆𑀘𑁂𑀲𑀼 𑀓𑀺𑀲𑁆𑀫𑀺𑀘𑀺;

𑀇𑀢𑀺 𑀩𑀸𑀮𑀲𑁆𑀲 𑀲𑀗𑁆𑀓𑀧𑁆𑀧𑁄, 𑀇𑀘𑁆𑀙𑀸 𑀫𑀸𑀦𑁄 𑀘 𑀯𑀟𑁆𑀠𑀢𑀻’’𑀢𑀺.

𑀢𑀢𑁆𑀣 𑀅𑀲𑀦𑁆𑀢𑀦𑁆𑀢𑀺 𑀬𑁄 𑀩𑀸𑀮𑁄 𑀪𑀺𑀓𑁆𑀔𑀼 𑀅𑀯𑀺𑀚𑁆𑀚𑀫𑀸𑀦𑀁 𑀲𑀫𑁆𑀪𑀸𑀯𑀦𑀁 𑀇𑀘𑁆𑀙𑁂𑀬𑁆𑀬, ‘‘𑀅𑀲𑁆𑀲𑀤𑁆𑀥𑁄𑀯 𑀲𑀫𑀸𑀦𑁄 ‘𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’𑀢𑀺 𑀇𑀘𑁆𑀙𑀢𑀻’’𑀢𑀺. 𑀧𑀸𑀧𑀺𑀘𑁆𑀙𑀢𑀸𑀦𑀺𑀤𑁆𑀤𑁂𑀲𑁂 (𑀯𑀺𑀪. 𑁮𑁫𑁧) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀩𑀸𑀮𑁄 ‘‘𑀅𑀲𑀤𑁆𑀥𑁄 𑀤𑀼𑀲𑁆𑀲𑀻𑀮𑁄 𑀅𑀧𑁆𑀧𑀲𑁆𑀲𑀼𑀢𑁄 𑀅𑀧𑁆𑀧𑀯𑀺𑀯𑀺𑀢𑁆𑀢𑁄 𑀓𑀼𑀲𑀻𑀢𑁄 𑀅𑀦𑀼𑀧𑀝𑁆𑀞𑀺𑀢𑀲𑁆𑀲𑀢𑀺 𑀅𑀲𑀫𑀸𑀳𑀺𑀢𑁄 𑀤𑀼𑀧𑁆𑀧𑀜𑁆𑀜𑁄 𑀅𑀔𑀻𑀡𑀸𑀲𑀯𑁄𑀯 𑀲𑀫𑀸𑀦𑁄 ‘𑀅𑀳𑁄 𑀯𑀢 𑀫𑀁 𑀚𑀦𑁄 𑀅𑀬𑀁 𑀲𑀤𑁆𑀥𑁄, 𑀲𑀻𑀮𑀯𑀸, 𑀩𑀳𑀼𑀲𑁆𑀲𑀼𑀢𑁄, 𑀧𑀯𑀺𑀯𑀺𑀢𑁆𑀢𑁄, 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀉𑀧𑀝𑁆𑀞𑀺𑀢𑀲𑁆𑀲𑀢𑀺, 𑀲𑀫𑀸𑀳𑀺𑀢𑁄, 𑀧𑀜𑁆𑀜𑀯𑀸, 𑀔𑀻𑀡𑀸𑀲𑀯𑁄’𑀢𑀺 𑀚𑀸𑀦𑁂𑀬𑁆𑀬𑀸’’𑀢𑀺 𑀇𑀤𑀁 𑀅𑀲𑀦𑁆𑀢𑀲𑀫𑁆𑀪𑀸𑀯𑀦𑀁 𑀇𑀘𑁆𑀙𑀢𑀺. 𑀧𑀼𑀭𑁂𑀓𑁆𑀔𑀸𑀭𑀦𑁆𑀢𑀺 𑀧𑀭𑀺𑀯𑀸𑀭𑀁. ‘‘𑀅𑀳𑁄 𑀯𑀢 𑀫𑀁 𑀲𑀓𑀮𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀧𑀭𑀺𑀯𑀸𑀭𑁂𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀸 𑀯𑀺𑀳𑀭𑁂𑀬𑁆𑀬𑀼’’𑀦𑁆𑀢𑀺 𑀏𑀯𑀁 𑀇𑀘𑁆𑀙𑀸𑀘𑀸𑀭𑁂 𑀞𑀢𑁆𑀯𑀸 𑀧𑀼𑀭𑁂𑀓𑁆𑀔𑀸𑀭𑀜𑁆𑀘 𑀪𑀺𑀓𑁆𑀔𑀽𑀲𑀼 𑀇𑀘𑁆𑀙𑀢𑀺. 𑀆𑀯𑀸𑀲𑁂𑀲𑀽𑀢𑀺 𑀲𑀗𑁆𑀖𑀺𑀓𑁂𑀲𑀼 𑀘 𑀆𑀯𑀸𑀲𑁂𑀲𑀼 𑀬𑀸𑀦𑀺 𑀯𑀺𑀳𑀸𑀭𑀫𑀚𑁆𑀛𑁂 𑀧𑀡𑀻𑀢𑀲𑁂𑀦𑀸𑀲𑀦𑀸𑀦𑀺, 𑀢𑀸𑀦𑀺 𑀅𑀢𑁆𑀢𑀦𑁄 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑀸𑀤𑀻𑀦𑀁 𑀪𑀺𑀓𑁆𑀔𑀽𑀦𑀁 ‘‘𑀢𑀼𑀫𑁆𑀳𑁂 𑀇𑀥 𑀯𑀲𑀣𑀸’’𑀢𑀺 𑀯𑀺𑀘𑀸𑀭𑁂𑀦𑁆𑀢𑁄 𑀲𑀬𑀫𑁆𑀧𑀺 𑀯𑀭𑀢𑀭𑀁 𑀲𑁂𑀦𑀸𑀲𑀦𑀁 𑀧𑀮𑀺𑀩𑁄𑀥𑁂𑀦𑁆𑀢𑁄, 𑀲𑁂𑀲𑀸𑀦𑀁 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀽𑀦𑀁 𑀧𑀘𑁆𑀘𑀦𑁆𑀢𑀺𑀫𑀸𑀦𑀺 𑀮𑀸𑀫𑀓𑀲𑁂𑀦𑀸𑀲𑀦𑀸𑀦𑀺 𑀘𑁂𑀯 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀘 ‘‘𑀢𑀼𑀫𑁆𑀳𑁂 𑀇𑀥 𑀯𑀲𑀣𑀸’’𑀢𑀺 𑀯𑀺𑀘𑀸𑀭𑁂𑀦𑁆𑀢𑁄 𑀆𑀯𑀸𑀲𑁂𑀲𑀼 𑀇𑀲𑁆𑀲𑀭𑀺𑀬𑀁 𑀇𑀘𑁆𑀙𑀢𑀺. 𑀧𑀽𑀚𑀸 𑀧𑀭𑀓𑀼𑀮𑁂𑀲𑀼 𑀘𑀸𑀢𑀺 𑀦𑁂𑀯 𑀫𑀸𑀢𑀸𑀧𑀺𑀢𑀽𑀦𑀁 𑀦 𑀜𑀸𑀢𑀓𑀸𑀦𑀁 𑀧𑀭𑁂𑀲𑀼𑀬𑁂𑀯 𑀓𑀼𑀮𑁂𑀲𑀼 ‘‘𑀅𑀳𑁄 𑀯𑀢𑀺𑀫𑁂 𑀫𑀬𑁆𑀳𑀫𑁂𑀯 𑀤𑀤𑁂𑀬𑁆𑀬𑀼𑀁, 𑀦 𑀅𑀜𑁆𑀜𑁂𑀲’’𑀦𑁆𑀢𑀺 𑀏𑀯𑀁 𑀘𑀢𑀼𑀧𑁆𑀧𑀘𑁆𑀘𑀬𑁂𑀳𑀺 𑀧𑀽𑀚𑀁 𑀇𑀘𑁆𑀙𑀢𑀺.

𑀫𑀫𑁂𑀯 𑀓𑀢 𑀫𑀜𑁆𑀜𑀦𑁆𑀢𑀽𑀢𑀺 𑀬𑀲𑁆𑀲 𑀘 𑀩𑀸𑀮𑀲𑁆𑀲 ‘‘𑀬𑀁𑀓𑀺𑀜𑁆𑀘𑀺 𑀯𑀺𑀳𑀸𑀭𑁂 𑀉𑀧𑁄𑀲𑀣𑀸𑀕𑀸𑀭𑀸𑀤𑀺𑀓𑀭𑀡𑀯𑀲𑁂𑀦 𑀓𑀢𑀁 𑀦𑀯𑀓𑀫𑁆𑀫𑀁, 𑀢𑀁 𑀲𑀩𑁆𑀩𑀁 𑀅𑀫𑁆𑀳𑀸𑀓𑀁 𑀣𑁂𑀭𑁂𑀦 𑀓𑀢𑀦𑁆𑀢𑀺 𑀏𑀯𑀁 𑀕𑀺𑀳𑀻 𑀘 𑀧𑀩𑁆𑀩𑀚𑀺𑀢𑀸 𑀘 𑀉𑀪𑁄𑀧𑀺 𑀫𑀫𑁂𑀯 𑀦𑀺𑀲𑁆𑀲𑀸𑀬 𑀓𑀢𑀁 𑀧𑀭𑀺𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁 𑀫𑀜𑁆𑀜𑀦𑁆𑀢𑀽’’𑀢𑀺 𑀲𑀗𑁆𑀓𑀧𑁆𑀧𑁄 𑀉𑀧𑁆𑀧𑀚𑁆𑀚𑀢𑀺. 𑀫𑀫𑁂𑀯𑀸𑀢𑀺𑀯𑀲𑀸 𑀅𑀲𑁆𑀲𑀽𑀢𑀺 ‘‘𑀕𑀺𑀳𑀻 𑀘 𑀧𑀩𑁆𑀩𑀚𑀺𑀢𑀸 𑀘 𑀲𑀩𑁆𑀩𑁂𑀧𑀺 𑀫𑀫𑁂𑀯 𑀯𑀲𑁂 𑀯𑀢𑁆𑀢𑀦𑁆𑀢𑀼, 𑀲𑀓𑀝𑀕𑁄𑀡𑀯𑀸𑀲𑀺𑀨𑀭𑀲𑀼𑀆𑀤𑀻𑀦𑀺 𑀯𑀸 𑀮𑀤𑁆𑀥𑀩𑁆𑀩𑀸𑀦𑀺 𑀳𑁄𑀦𑁆𑀢𑀼, 𑀅𑀦𑁆𑀢𑀫𑀲𑁄 𑀬𑀸𑀕𑀼𑀫𑀢𑁆𑀢𑀫𑁆𑀧𑀺 𑀢𑀸𑀧𑁂𑀢𑁆𑀯𑀸 𑀧𑀺𑀯𑀦𑀸𑀤𑀻𑀦𑀺 𑀯𑀸, 𑀏𑀯𑀭𑀽𑀧𑁂𑀲𑀼 𑀓𑀺𑀘𑁆𑀘𑀸𑀓𑀺𑀘𑁆𑀘𑁂𑀲𑀼 𑀔𑀼𑀤𑁆𑀤𑀓𑀫𑀳𑀦𑁆𑀢𑁂𑀲𑀼 𑀓𑀭𑀡𑀻𑀬𑁂𑀲𑀼 𑀓𑀺𑀲𑁆𑀫𑀺𑀜𑁆𑀘𑀺 𑀏𑀓𑀓𑀺𑀘𑁆𑀘𑁂𑀧𑀺 𑀫𑀫𑁂𑀯 𑀯𑀲𑁂 𑀯𑀢𑁆𑀢𑀦𑁆𑀢𑀼, 𑀫𑀫𑁂𑀯 𑀆𑀧𑀼𑀘𑁆𑀙𑀺𑀢𑁆𑀯𑀸 𑀓𑀭𑁄𑀦𑁆𑀢𑀽’’𑀢𑀺 𑀲𑀗𑁆𑀓𑀧𑁆𑀧𑁄 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀩𑀸𑀮𑀲𑁆𑀲𑀸𑀢𑀺 𑀬𑀲𑁆𑀲 𑀩𑀸𑀮𑀲𑁆𑀲 𑀲𑀸 𑀘 𑀇𑀘𑁆𑀙𑀸 𑀅𑀬𑀜𑁆𑀘 𑀏𑀯𑀭𑀽𑀧𑁄 𑀲𑀗𑁆𑀓𑀧𑁆𑀧𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀦𑁂𑀯 𑀯𑀺𑀧𑀲𑁆𑀲𑀦𑀸, 𑀦 𑀫𑀕𑁆𑀕𑀨𑀮𑀸𑀦𑀺 𑀯𑀟𑁆𑀠𑀦𑁆𑀢𑀺. 𑀓𑁂𑀯𑀮𑀁 𑀧𑀦𑀲𑁆𑀲 𑀘𑀦𑁆𑀤𑁄𑀤𑀬𑁂 𑀲𑀫𑀼𑀤𑁆𑀤𑀲𑁆𑀲 𑀉𑀤𑀓𑀁 𑀯𑀺𑀬 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸 𑀢𑀡𑁆𑀳𑀸 𑀘𑁂𑀯 𑀦𑀯𑀯𑀺𑀥𑀫𑀸𑀦𑁄 𑀘 𑀯𑀟𑁆𑀠𑀢𑀻𑀢𑀺.

𑀤𑁂𑀲𑀦𑀸𑀯𑀲𑀸𑀦𑁂 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀼𑀥𑀫𑁆𑀫𑀢𑁆𑀣𑁂𑀭𑁄𑀧𑀺 𑀇𑀫𑀁 𑀑𑀯𑀸𑀤𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑁂𑀦 𑀅𑀦𑀼𑀤𑀽𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀉𑀧𑀸𑀲𑀓𑀲𑁆𑀲 𑀘𑀓𑁆𑀔𑀼𑀧𑀣𑁂 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀢𑁆𑀯𑀸 𑀉𑀧𑀸𑀲𑀓𑀁 𑀔𑀫𑀸𑀧𑁂𑀲𑀺. 𑀲𑁄 𑀉𑀧𑀸𑀲𑀓𑁂𑀦 ‘‘𑀔𑀫𑀸𑀫𑀳𑀁, 𑀪𑀦𑁆𑀢𑁂, 𑀲𑀘𑁂 𑀫𑀬𑁆𑀳𑀁 𑀤𑁄𑀲𑁄 𑀅𑀢𑁆𑀣𑀺, 𑀔𑀫𑀣 𑀫𑁂’’𑀢𑀺 𑀧𑀝𑀺𑀔𑀫𑀸𑀧𑀺𑀢𑁄 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑁂 𑀑𑀯𑀸𑀤𑁂 𑀞𑀢𑁆𑀯𑀸 𑀓𑀢𑀺𑀧𑀸𑀳𑁂𑀦𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀉𑀧𑀸𑀲𑀓𑁄𑀧𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀸 𑀲𑀢𑁆𑀣𑀸𑀭𑀁 𑀅𑀤𑀺𑀲𑁆𑀯𑀸𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀁, 𑀅𑀤𑀺𑀲𑁆𑀯𑀸 𑀏𑀯 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄, 𑀲𑀢𑁆𑀣𑀸𑀭𑀁 𑀫𑁂 𑀤𑀝𑁆𑀞𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀢𑀺𑀮𑀢𑀡𑁆𑀟𑀼𑀮𑀲𑀧𑁆𑀧𑀺𑀨𑀸𑀡𑀺𑀢𑀯𑀢𑁆𑀣𑀘𑁆𑀙𑀸𑀤𑀦𑀸𑀤𑀻𑀳𑀺 𑀧𑀭𑀺𑀧𑀽𑀭𑀸𑀦𑀺 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀬𑁄𑀚𑀸𑀧𑁂𑀢𑁆𑀯𑀸 ‘‘𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀓𑀸𑀫𑀸 𑀆𑀕𑀘𑁆𑀙𑀦𑁆𑀢𑀼, 𑀧𑀺𑀡𑁆𑀟𑀧𑀸𑀢𑀸𑀤𑀻𑀳𑀺 𑀦 𑀓𑀺𑀮𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑁄𑀘𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀲𑀗𑁆𑀖𑀲𑁆𑀲𑀸𑀧𑀺 𑀉𑀧𑀸𑀲𑀓𑀸𑀦𑀫𑁆𑀧𑀺 𑀉𑀧𑀸𑀲𑀺𑀓𑀸𑀦𑀫𑁆𑀧𑀺 𑀆𑀭𑁄𑀘𑀸𑀧𑁂𑀲𑀺. 𑀢𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀲𑀢𑀸 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀉𑀧𑀸𑀲𑀓𑀸 𑀘 𑀉𑀧𑀸𑀲𑀺𑀓𑀸𑀬𑁄 𑀘 𑀦𑀺𑀓𑁆𑀔𑀫𑀺𑀁𑀲𑀼. 𑀲𑁄 𑀢𑁂𑀲𑀜𑁆𑀘𑁂𑀯 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀘𑀸𑀢𑀺 𑀢𑀺𑀡𑁆𑀡𑀁 𑀚𑀦𑀲𑀳𑀲𑁆𑀲𑀸𑀦𑀁 𑀬𑀣𑀸 𑀢𑀺𑀁𑀲𑀬𑁄𑀚𑀦𑁂 𑀫𑀕𑁆𑀕𑁂 𑀬𑀸𑀕𑀼𑀪𑀢𑁆𑀢𑀸𑀤𑀻𑀳𑀺 𑀓𑀺𑀜𑁆𑀘𑀺 𑀯𑁂𑀓𑀮𑁆𑀮𑀁 𑀦 𑀳𑁄𑀢𑀺, 𑀢𑀣𑀸 𑀲𑀁𑀯𑀺𑀤𑀳𑀺. 𑀢𑀲𑁆𑀲 𑀧𑀦 𑀦𑀺𑀓𑁆𑀔𑀦𑁆𑀢𑀪𑀸𑀯𑀁 𑀜𑀢𑁆𑀯𑀸 𑀬𑁄𑀚𑀦𑁂 𑀬𑁄𑀚𑀦𑁂 𑀤𑁂𑀯𑀢𑀸 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀤𑀺𑀩𑁆𑀩𑁂𑀳𑀺 𑀬𑀸𑀕𑀼𑀔𑀚𑁆𑀚𑀓𑀪𑀢𑁆𑀢𑀧𑀸𑀦𑀓𑀸𑀤𑀻𑀳𑀺 𑀢𑀁 𑀫𑀳𑀸𑀚𑀦𑀁 𑀉𑀧𑀝𑁆𑀞𑀳𑀺𑀁𑀲𑀼, 𑀓𑀲𑁆𑀲𑀘𑀺 𑀓𑁂𑀦𑀘𑀺 𑀯𑁂𑀓𑀮𑁆𑀮𑀁 𑀦 𑀳𑁄𑀢𑀺. 𑀏𑀯𑀁 𑀤𑁂𑀯𑀢𑀸𑀳𑀺 𑀉𑀧𑀝𑁆𑀞𑀺𑀬𑀫𑀸𑀦𑁄 𑀤𑁂𑀯𑀲𑀺𑀓𑀁 𑀬𑁄𑀚𑀦𑀁 𑀕𑀘𑁆𑀙𑀦𑁆𑀢𑁄 𑀫𑀸𑀲𑁂𑀦 𑀲𑀸𑀯𑀢𑁆𑀣𑀺𑀁 𑀧𑀸𑀧𑀼𑀡𑀺, 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀬𑀣𑀸𑀧𑀽𑀭𑀺𑀢𑀸𑀦𑁂𑀯 𑀅𑀳𑁂𑀲𑀼𑀁. 𑀤𑁂𑀯𑀢𑀸𑀳𑀺 𑀘𑁂𑀯 𑀫𑀦𑀼𑀲𑁆𑀲𑁂𑀳𑀺 𑀘 𑀅𑀪𑀺𑀳𑀝𑀁 𑀧𑀡𑁆𑀡𑀸𑀓𑀸𑀭𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄𑀯 𑀅𑀕𑀫𑀸𑀲𑀺.

𑀲𑀢𑁆𑀣𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀳 𑁋 ‘‘𑀆𑀦𑀦𑁆𑀤, 𑀅𑀚𑁆𑀚 𑀯𑀟𑁆𑀠𑀫𑀸𑀦𑀓𑀘𑁆𑀙𑀸𑀬𑀸𑀬 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀧𑀜𑁆𑀘𑀳𑀺 𑀉𑀧𑀸𑀲𑀓𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀆𑀕𑀦𑁆𑀢𑁆𑀯𑀸 𑀫𑀁 𑀯𑀦𑁆𑀤𑀺𑀲𑁆𑀲𑀢𑀻’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀢𑀲𑁆𑀲 𑀢𑀼𑀫𑁆𑀳𑀸𑀓𑀁 𑀯𑀦𑁆𑀤𑀦𑀓𑀸𑀮𑁂 𑀓𑀺𑀜𑁆𑀘𑀺 𑀧𑀸𑀝𑀺𑀳𑀸𑀭𑀺𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺? ‘‘𑀪𑀯𑀺𑀲𑁆𑀲𑀢𑀺, 𑀆𑀦𑀦𑁆𑀤𑀸’’𑀢𑀺. ‘‘𑀓𑀺𑀁, 𑀪𑀦𑁆𑀢𑁂’’𑀢𑀺? 𑀢𑀲𑁆𑀲 𑀆𑀕𑀦𑁆𑀢𑁆𑀯𑀸 ‘‘𑀫𑀁 𑀯𑀦𑁆𑀤𑀦𑀓𑀸𑀮𑁂 𑀭𑀸𑀚𑀫𑀸𑀦𑁂𑀦 𑀅𑀝𑁆𑀞𑀓𑀭𑀻𑀲𑀫𑀢𑁆𑀢𑁂 𑀧𑀤𑁂𑀲𑁂 𑀚𑀡𑁆𑀡𑀼𑀓𑀫𑀢𑁆𑀢𑁂𑀦 𑀑𑀥𑀺𑀦𑀸 𑀧𑀜𑁆𑀘𑀯𑀡𑁆𑀡𑀸𑀦𑀁 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀁 𑀖𑀦𑀯𑀲𑁆𑀲𑀁 𑀯𑀲𑁆𑀲𑀺𑀲𑁆𑀲𑀢𑀻’’𑀢𑀺. 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀦𑀕𑀭𑀯𑀸𑀲𑀺𑀦𑁄 ‘‘𑀏𑀯𑀁 𑀫𑀳𑀸𑀧𑀼𑀜𑁆𑀜𑁄 𑀓𑀺𑀭 𑀘𑀺𑀢𑁆𑀢𑁄 𑀦𑀸𑀫 𑀕𑀳𑀧𑀢𑀺 𑀆𑀕𑀦𑁆𑀢𑁆𑀯𑀸 𑀅𑀚𑁆𑀚 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀲𑁆𑀲𑀢𑀺, 𑀏𑀯𑀭𑀽𑀧𑀁 𑀓𑀺𑀭 𑀧𑀸𑀝𑀺𑀳𑀸𑀭𑀺𑀬𑀁 𑀪𑀯𑀺𑀲𑁆𑀲𑀢𑀺, 𑀫𑀬𑀫𑁆𑀧𑀺 𑀢𑀁 𑀫𑀳𑀸𑀧𑀼𑀜𑁆𑀜𑀁 𑀤𑀝𑁆𑀞𑀼𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺 𑀧𑀡𑁆𑀡𑀸𑀓𑀸𑀭𑀁 𑀆𑀤𑀸𑀬 𑀫𑀕𑁆𑀕𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀅𑀝𑁆𑀞𑀁𑀲𑀼. 𑀯𑀺𑀳𑀸𑀭𑀲𑀫𑀻𑀧𑁂 𑀆𑀕𑀢𑀓𑀸𑀮𑁂 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀧𑀞𑀫𑀁 𑀆𑀕𑀫𑀺𑀁𑀲𑀼. 𑀘𑀺𑀢𑁆𑀢𑁄 𑀕𑀳𑀧𑀢𑀺, ‘‘𑀅𑀫𑁆𑀫𑀸, 𑀢𑀼𑀫𑁆𑀳𑁂 𑀧𑀘𑁆𑀙𑀢𑁄 𑀆𑀕𑀘𑁆𑀙𑀣𑀸’’𑀢𑀺 𑀫𑀳𑀸𑀉𑀧𑀸𑀲𑀺𑀓𑀸𑀬𑁄 𑀞𑀧𑁂𑀢𑁆𑀯𑀸 𑀧𑀜𑁆𑀘𑀳𑀺 𑀉𑀧𑀸𑀲𑀓𑀲𑀢𑁂𑀳𑀺 𑀧𑀭𑀺𑀯𑀼𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀧𑀦 𑀞𑀺𑀢𑀸 𑀯𑀸 𑀦𑀺𑀲𑀺𑀦𑁆𑀦𑀸 𑀯𑀸 𑀇𑀢𑁄 𑀯𑀸 𑀏𑀢𑁆𑀢𑁄 𑀯𑀸 𑀦 𑀳𑁄𑀦𑁆𑀢𑀺, 𑀩𑀼𑀤𑁆𑀥𑀯𑀻𑀣𑀺𑀬𑀸 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀦𑀺𑀘𑁆𑀘𑀮𑀸𑀯 𑀢𑀺𑀝𑁆𑀞𑀦𑁆𑀢𑀺. 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀫𑀳𑀦𑁆𑀢𑀁 𑀩𑀼𑀤𑁆𑀥𑀯𑀻𑀣𑀺𑀁 𑀑𑀓𑁆𑀓𑀫𑀺. 𑀢𑀻𑀡𑀺 𑀨𑀮𑀸𑀦𑀺 𑀧𑀢𑁆𑀢𑁂𑀦 𑀅𑀭𑀺𑀬𑀲𑀸𑀯𑀓𑁂𑀦 𑀑𑀮𑁄𑀓𑀺𑀢𑁄𑀮𑁄𑀓𑀺𑀢𑀝𑁆𑀞𑀸𑀦𑀁 𑀓𑀫𑁆𑀧𑀺. ‘‘𑀏𑀲𑁄 𑀓𑀺𑀭 𑀘𑀺𑀢𑁆𑀢𑁄 𑀕𑀳𑀧𑀢𑀻’’𑀢𑀺 𑀫𑀳𑀸𑀚𑀦𑁄 𑀑𑀮𑁄𑀓𑁂𑀲𑀺. 𑀲𑁄 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀙𑀩𑁆𑀩𑀡𑁆𑀡𑀸𑀦𑀁 𑀩𑀼𑀤𑁆𑀥𑀭𑀲𑁆𑀫𑀻𑀦𑀁 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀻𑀲𑀼 𑀕𑁄𑀧𑁆𑀨𑀓𑁂𑀲𑀼 𑀲𑀢𑁆𑀣𑀼 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀯𑀦𑁆𑀤𑀺. 𑀢𑀁 𑀔𑀡𑀜𑁆𑀜𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀼𑀧𑁆𑀨𑀯𑀲𑁆𑀲𑀁 𑀯𑀲𑁆𑀲𑀺, 𑀲𑀸𑀥𑀼𑀓𑀸𑀭𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑀬𑀺𑀁𑀲𑀼. 𑀲𑁄 𑀏𑀓𑀫𑀸𑀲𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀯𑀲𑀺, 𑀯𑀲𑀫𑀸𑀦𑁄 𑀘 𑀲𑀓𑀮𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀺𑀳𑀸𑀭𑁂𑀬𑁂𑀯 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺, 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀆𑀕𑀢𑁂𑀧𑀺 𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀓𑀢𑁆𑀯𑀸 𑀧𑀝𑀺𑀚𑀕𑁆𑀕𑀺. 𑀏𑀓𑀤𑀺𑀯𑀲𑀫𑁆𑀧𑀺 𑀅𑀢𑁆𑀢𑀦𑁄 𑀲𑀓𑀝𑁂𑀲𑀼 𑀓𑀺𑀜𑁆𑀘𑀺 𑀕𑀳𑁂𑀢𑀩𑁆𑀩𑀁 𑀦𑀸𑀳𑁄𑀲𑀺, 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀆𑀪𑀢𑀧𑀡𑁆𑀡𑀸𑀓𑀸𑀭𑁂𑀦𑁂𑀯 𑀤𑀸𑀦𑀁 𑀅𑀤𑀸𑀲𑀺, 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀅𑀓𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀅𑀳𑀁 ‘𑀢𑀼𑀫𑁆𑀳𑀸𑀓𑀁 𑀤𑀸𑀦𑀁 𑀤𑀲𑁆𑀲𑀸𑀫𑀻’𑀢𑀺 𑀆𑀕𑀘𑁆𑀙𑀦𑁆𑀢𑁄 𑀫𑀸𑀲𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀳𑁄𑀲𑀺𑀁. 𑀇𑀥𑁂𑀯 𑀫𑁂 𑀫𑀸𑀲𑁄 𑀯𑀻𑀢𑀺𑀯𑀢𑁆𑀢𑁄, 𑀫𑀬𑀸 𑀆𑀪𑀢𑀁 𑀧𑀡𑁆𑀡𑀸𑀓𑀸𑀭𑀁 𑀓𑀺𑀜𑁆𑀘𑀺 𑀕𑀳𑁂𑀢𑀼𑀁 𑀦 𑀮𑀪𑀸𑀫𑀺, 𑀏𑀢𑁆𑀢𑀓𑀁 𑀓𑀸𑀮𑀁 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀆𑀪𑀢𑀧𑀡𑁆𑀡𑀸𑀓𑀸𑀭𑁂𑀦𑁂𑀯 𑀤𑀸𑀦𑀁 𑀅𑀤𑀸𑀲𑀺𑀁, 𑀲𑁄𑀳𑀁 𑀲𑀘𑁂𑀧𑀺 𑀇𑀥 𑀲𑀁𑀯𑀘𑁆𑀙𑀭𑀁 𑀯𑀲𑀺𑀲𑁆𑀲𑀸𑀫𑀺, 𑀦𑁂𑀯 𑀫𑀫 𑀤𑁂𑀬𑁆𑀬𑀥𑀫𑁆𑀫𑀁 𑀤𑀸𑀢𑀼𑀁 𑀮𑀪𑀺𑀲𑁆𑀲𑀸𑀫𑀺. 𑀅𑀳𑀁 𑀲𑀓𑀝𑀸𑀦𑀺 𑀑𑀢𑀸𑀭𑁂𑀢𑁆𑀯𑀸 𑀕𑀦𑁆𑀢𑀼𑀁 𑀇𑀘𑁆𑀙𑀸𑀫𑀺, 𑀧𑀝𑀺𑀲𑀸𑀫𑀦𑀝𑁆𑀞𑀸𑀦𑀁 𑀫𑁂 𑀆𑀭𑁄𑀘𑀸𑀧𑁂𑀣𑀸’’𑀢𑀺.

𑀲𑀢𑁆𑀣𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀳 𑁋 ‘‘𑀆𑀦𑀦𑁆𑀤, 𑀉𑀧𑀸𑀲𑀓𑀲𑁆𑀲 𑀏𑀓𑀁 𑀧𑀤𑁂𑀲𑀁 𑀢𑀼𑀘𑁆𑀙𑀁 𑀓𑀸𑀭𑁂𑀢𑁆𑀯𑀸 𑀤𑁂𑀳𑀻’’𑀢𑀺. 𑀣𑁂𑀭𑁄 𑀢𑀣𑀸 𑀅𑀓𑀸𑀲𑀺. 𑀓𑀧𑁆𑀧𑀺𑀬𑀪𑀽𑀫𑀺 (𑀫𑀳𑀸𑀯. 𑁨𑁯𑁫) 𑀓𑀺𑀭 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀅𑀦𑀼𑀜𑁆𑀜𑀸𑀢𑀸. 𑀉𑀧𑀸𑀲𑀓𑁄𑀧𑀺 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀆𑀕𑀢𑁂𑀳𑀺 𑀢𑀻𑀳𑀺 𑀚𑀦𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀢𑀼𑀘𑁆𑀙𑀲𑀓𑀝𑁂𑀳𑀺 𑀧𑀼𑀦 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀤𑁂𑀯𑀫𑀦𑀼𑀲𑁆𑀲𑀸 𑀉𑀝𑁆𑀞𑀸𑀬, ‘‘𑀅𑀬𑁆𑀬, 𑀢𑀬𑀸 𑀢𑀼𑀘𑁆𑀙𑀲𑀓𑀝𑁂𑀳𑀺 𑀕𑀫𑀦𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀲𑀓𑀝𑀸𑀦𑀺 𑀧𑀽𑀭𑀬𑀺𑀁𑀲𑀼. 𑀲𑁄 𑀅𑀢𑁆𑀢𑀦𑁄 𑀆𑀪𑀢𑀧𑀡𑁆𑀡𑀸𑀓𑀸𑀭𑁂𑀦𑁂𑀯 𑀫𑀳𑀸𑀚𑀦𑀁 𑀧𑀝𑀺𑀚𑀕𑁆𑀕𑀦𑁆𑀢𑁄 𑀅𑀕𑀫𑀸𑀲𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑁄𑀧𑀺 𑀫𑀸𑀲𑁂𑀦 𑀆𑀕𑀢𑁄, 𑀇𑀥𑀸𑀧𑀺 𑀫𑀸𑀲𑀫𑁂𑀯 𑀯𑀼𑀝𑁆𑀞𑁄, 𑀏𑀢𑁆𑀢𑀓𑀁 𑀓𑀸𑀮𑀁 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀅𑀪𑀺𑀳𑀝𑀧𑀡𑁆𑀡𑀸𑀓𑀸𑀭𑁂𑀦𑁂𑀯 𑀫𑀳𑀸𑀯𑀤𑀸𑀦𑀁 𑀅𑀤𑀸𑀲𑀺, 𑀇𑀤𑀸𑀦𑀺 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀢𑀼𑀘𑁆𑀙𑀸𑀦𑀺 𑀓𑀢𑁆𑀯𑀸 𑀫𑀸𑀲𑁂𑀦𑁂𑀯 𑀓𑀺𑀭 𑀕𑀫𑀺𑀲𑁆𑀲𑀢𑀺, 𑀤𑁂𑀯𑀫𑀦𑀼𑀲𑁆𑀲𑀸 𑀧𑀦𑀲𑁆𑀲 𑀉𑀝𑁆𑀞𑀸𑀬, ‘𑀅𑀬𑁆𑀬, 𑀢𑀬𑀸 𑀢𑀼𑀘𑁆𑀙𑀲𑀓𑀝𑁂𑀳𑀺 𑀕𑀫𑀦𑀓𑀫𑁆𑀫𑀁 𑀓𑀢’𑀦𑁆𑀢𑀺 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀲𑀢𑁆𑀢𑀭𑀢𑀦𑁂𑀳𑀺 𑀧𑀽𑀭𑀬𑀺𑀁𑀲𑀼. 𑀲𑁄 𑀧𑀼𑀦 𑀅𑀢𑁆𑀢𑀦𑁄 𑀆𑀪𑀢𑀧𑀡𑁆𑀡𑀸𑀓𑀸𑀭𑁂𑀦𑁂𑀯 𑀓𑀺𑀭 𑀫𑀳𑀸𑀚𑀦𑀁 𑀧𑀝𑀺𑀚𑀕𑁆𑀕𑀦𑁆𑀢𑁄 𑀕𑀫𑀺𑀲𑁆𑀲𑀢𑀻’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀏𑀢𑀲𑁆𑀲 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀲𑁆𑀲𑁂𑀯𑀸𑀬𑀁 𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺? ‘‘𑀆𑀦𑀦𑁆𑀤, 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀏𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑁂𑀯. 𑀅𑀬𑀜𑁆𑀳𑀺 𑀉𑀧𑀸𑀲𑀓𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀲𑀫𑁆𑀧𑀦𑁆𑀦𑀲𑀻𑀮𑁄, 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀬𑀁 𑀬𑀁 𑀧𑀤𑁂𑀲𑀁 𑀪𑀚𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑁄 𑀦𑀺𑀩𑁆𑀩𑀢𑁆𑀢𑀢𑀻’’𑀢𑀺 𑀯𑀢𑁆𑀯𑀸 𑀲𑀢𑁆𑀣𑀸 𑀇𑀫𑀁 𑀧𑀓𑀺𑀡𑁆𑀡𑀓𑀯𑀕𑁆𑀕𑁂 𑀕𑀸𑀣𑀫𑀸𑀳 𑁋

‘‘𑀲𑀤𑁆𑀥𑁄 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄, 𑀬𑀲𑁄 𑀪𑁄𑀕𑀲𑀫𑀧𑁆𑀧𑀺𑀢𑁄;

𑀬𑀁 𑀬𑀁 𑀧𑀤𑁂𑀲𑀁 𑀪𑀚𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀽𑀚𑀺𑀢𑁄’’𑀢𑀺. (𑀥. 𑀧. 𑁩𑁦𑁩);

𑀅𑀢𑁆𑀣𑁄 𑀧𑀦𑀲𑁆𑀲𑀸 𑀢𑀢𑁆𑀣𑁂𑀯 𑀆𑀯𑀺𑀪𑀯𑀺𑀲𑁆𑀲𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀆𑀦𑀦𑁆𑀤𑀢𑁆𑀣𑁂𑀭𑁄 𑀘𑀺𑀢𑁆𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀲𑀢𑁆𑀣𑀸 𑀆𑀘𑀺𑀓𑁆𑀔𑀦𑁆𑀢𑁄 𑀆𑀳 𑁋

𑀆𑀦𑀦𑁆𑀤, 𑀅𑀬𑀁 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀓𑀢𑀸𑀪𑀺𑀦𑀻𑀳𑀸𑀭𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀫𑀺𑀕𑀮𑀼𑀤𑁆𑀤𑀓𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀏𑀓𑀤𑀺𑀯𑀲𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀫𑀺𑀕𑀸𑀦𑀁 𑀫𑀸𑀭𑀡𑀢𑁆𑀢𑀸𑀬 𑀲𑀢𑁆𑀢𑀺𑀁 𑀆𑀤𑀸𑀬 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀫𑀺𑀕𑁂 𑀑𑀮𑁄𑀓𑁂𑀦𑁆𑀢𑁄 𑀏𑀓𑀲𑁆𑀫𑀺𑀁 𑀅𑀓𑀝𑀧𑀩𑁆𑀪𑀸𑀭𑁂 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀏𑀓𑁄, 𑀅𑀬𑁆𑀬𑁄, 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀪𑀯𑀺𑀲𑁆𑀲𑀢𑀺, 𑀪𑀢𑁆𑀢𑀫𑀲𑁆𑀲 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑁂𑀕𑁂𑀦 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀉𑀤𑁆𑀥𑀦𑁂 𑀳𑀺𑀬𑁆𑀬𑁄, 𑀆𑀪𑀢𑀫𑀁𑀲𑀁, 𑀏𑀓𑀲𑁆𑀫𑀺𑀁 𑀪𑀢𑁆𑀢𑀁 𑀧𑀘𑀸𑀧𑁂𑀢𑁆𑀯𑀸 𑀅𑀜𑁆𑀜𑁂 𑀧𑀺𑀡𑁆𑀟𑀧𑀸𑀢𑀘𑀸𑀭𑀺𑀓𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀢𑁂𑀲𑀫𑁆𑀧𑀺 𑀧𑀢𑁆𑀢𑁂 𑀆𑀤𑀸𑀬 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀁 𑀲𑀫𑁆𑀧𑀸𑀤𑁂𑀢𑁆𑀯𑀸, ‘‘𑀅𑀬𑁆𑀬𑁂, 𑀧𑀭𑀺𑀯𑀺𑀲𑀣𑀸’’𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀢𑁆𑀯𑀸 𑀢𑀁 𑀪𑀢𑁆𑀢𑀁 𑀧𑀼𑀝𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀆𑀤𑀸𑀬 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑁆𑀯𑀸 𑀧𑀢𑁆𑀢𑀧𑀼𑀝𑁂 𑀓𑀢𑁆𑀯𑀸 𑀣𑁂𑀭𑀲𑁆𑀲 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀫𑀬𑁆𑀳𑀁, 𑀪𑀦𑁆𑀢𑁂, 𑀲𑀗𑁆𑀕𑀳𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀧𑀢𑁆𑀢𑀁 𑀆𑀤𑀸𑀬 𑀧𑀽𑀭𑁂𑀢𑁆𑀯𑀸 𑀣𑁂𑀭𑀲𑁆𑀲 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀢𑁂𑀳𑀺 𑀧𑀼𑀧𑁆𑀨𑁂𑀳𑀺 𑀧𑀽𑀚𑀁 𑀓𑀢𑁆𑀯𑀸 ‘‘𑀬𑀣𑀸 𑀫𑁂 𑀅𑀬𑀁 𑀭𑀲𑀧𑀺𑀡𑁆𑀟𑀧𑀸𑀢𑁄 𑀧𑀼𑀧𑁆𑀨𑀧𑀽𑀚𑀸𑀬 𑀲𑀤𑁆𑀥𑀺𑀁 𑀘𑀺𑀢𑁆𑀢𑀁 𑀢𑁄𑀲𑁂𑀲𑀺, 𑀏𑀯𑀁 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀧𑀡𑁆𑀡𑀸𑀓𑀸𑀭𑀲𑀳𑀲𑁆𑀲𑀸𑀦𑀺 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀘𑀺𑀢𑁆𑀢𑀁 𑀢𑁄𑀲𑁂𑀦𑁆𑀢𑀼, 𑀧𑀜𑁆𑀘𑀯𑀡𑁆𑀡𑀓𑀼𑀲𑀼𑀫𑀯𑀲𑁆𑀲𑀜𑁆𑀘 𑀯𑀲𑁆𑀲𑀢𑀽’’𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺, 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀚𑀡𑁆𑀡𑀼𑀓𑀫𑀢𑁆𑀢𑁂𑀦 𑀑𑀥𑀺𑀦𑀸 𑀤𑀺𑀩𑁆𑀩𑀧𑀼𑀧𑁆𑀨𑀯𑀲𑁆𑀲𑀁 𑀯𑀲𑁆𑀲𑀺. 𑀇𑀤𑀸𑀦𑀺𑀧𑀺𑀲𑁆𑀲 𑀚𑀸𑀢𑀤𑀺𑀯𑀲𑁂 𑀘𑁂𑀯 𑀇𑀥 𑀘 𑀆𑀕𑀢𑀲𑁆𑀲 𑀧𑀼𑀧𑁆𑀨𑀯𑀲𑁆𑀲𑀯𑀲𑁆𑀲𑀦𑀜𑁆𑀘 𑀧𑀡𑁆𑀡𑀸𑀓𑀸𑀭𑀸𑀪𑀺𑀳𑀸𑀭𑁄 𑀘 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀲𑀓𑀝𑀧𑀽𑀭𑀡𑀜𑁆𑀘 𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀦𑀺𑀲𑁆𑀲𑀦𑁆𑀤𑁄𑀢𑀺.

𑀘𑀺𑀢𑁆𑀢𑀕𑀳𑀧𑀢𑀺𑀯𑀢𑁆𑀣𑀼 𑀘𑀼𑀤𑁆𑀤𑀲𑀫𑀁.